པདྨ་གཤིན་རྗེ་གཤེད་ཤེས་རབ་བདེ་བ་ཅན་གྱི་སྒྲུབ་ཐབས་ཞེས་བྱ་བ།
དཱི་པཾ་ཀ་ར།
རྒྱ་གར་སྐད་དུ། པྲ་ཛྙཱ་སུ་ཁ་ཡ་པདྨ་ཡ་མཱ་རི་སཱ་དྷ་ནཾ་ནཱ་མ། བོད་སྐད་དུ། པདྨ་གཤིན་རྗེ་གཤེད་ཤེས་རབ་བདེ་བ་ཅན་གྱི་སྒྲུབ་ཐབས་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །སེམས་ཅན་རྗེས་སུ་དྲན་ལྡན་ཞིང༌། །དེ་འདྲེན་ཐུགས་རྗེའི་རྟགས་མངའ་བ། །མཚོ་སྐྱེས་ཞལ་ལ་ཕྱག་འཚལ་ཏེ། །དེ་ཡི་སྒྲུབ་ཐབས་བཤད་པར་བྱ། །དང་པོར་སྔགས་པས་
ཁྲུས་བྱས་ནས། །ཀུ་ཤའི་སྟན་ལ་ལེགས་འདུག་སྟེ། །ལུས་ངག་ཡིད་གསུམ་བག་ལྡན་པས། །ཅུང་ཟད་འགྲོ་འོང་ལྡན་པས་བྱ། །རང་གི་ལྷག་པའི་ལྷར་ལྡན་པས། །ཅོད་པན་རྗེ་བཙུན་གཟུང་བར་བྱ། །དེ་ནས་རྗེ་བཙུན་སྤྱན་དྲངས་ཏེ། །སྐྱབས་འགྲོ་བྱང་ཆུབ་སེམས་བསྐྱེད་དེ། །དེ་ནས་མཎྜལ་བསྟར་བ་སྟེ། །མེ་ཏོག་དགྲམ་ཞིང་མཆོད་ཚོགས་བཤམ། །དེ་ནས་སེམས་ཅན་ཀུན་གྱི་ཕྱིར། །བསོད་ནམས་ཚོགས་བསགས་གཤེགས་སུ་གསོལ། །བུ་གཅིག་ལྟར་དྲན་བྱམས་པ་དང༌། །སྡུག་བསྔལ་བྲལ་འདོད་སྙིང་རྗེ་དང༌། །བདེ་བ་ཐོབ་པའི་དགའ་བ་དང༌། །ཕུན་སུམ་ཚོགས་པའི་བཏང་སྙོམས་སོ། །སྙིང་རྗེ་ཐབས་ཀྱི་རང་བཞིན་དང༌། །ལྡན་པའི་སྟོང་པ་བསྒོམ་པར་བྱ། །སྲུང་འཁོར་པདྨ་ཉི་མའི་སྟེང༌། །ནི་ལས་ཆུ་སྐྱེས་གྱུར་པའི་སྐུ། །པདྨ་རཱ་གའི་མདོག་འདྲ་ལ། །གཡས་དང་གཡོན་ནི་སྔོ་དང་དཀར། །གྲི་གུག་ཆུ་སྐྱེས་རལ་གྲི་དང༌། ཐོད་པ་འཁོར་ལོ་རིན་ཆེན་འཛིན། །ཐོད་པ་ལྔ་ཡིས་དབུ་བསྐོར་ཅིང༌། །ཕྲེང་བ་ཀླུ་དང་དུར་ཁྲོད་བརྒྱན། །མེ་དཔུང་སྐྱིལ་ཀྲུང་སྟག་ལྤགས་མནབས། །བསྐྱེད་པ་ཅུང་ཟད་འཇམ་པའི་མདངས། །སྐུ་གསུང་ཐུགས་དང་སྐྱེ་མཆེད་དྲུག །རང་ལུས་ངོ་བོ་བྱིན་གྱིས་བརླབ། །དབང་བསྐུར་རྟགས་དང་ལྡན་པ་ལ། །མཆོད་ལ་བསྟོད་པ་འདིས་མཉེས་བྱ། །ཧཱུཾ་རྡོ་རྗེ་དམ་ཚིག་རྡོ་རྗེ་གསུང༌། །རྡོ་རྗེ་དབྱངས་ནི་ཟབ་མོ་ཆེ། །འདོད་ཆགས་རྡོ་རྗེ་ཉིད་མཚུངས་པ། །སྐྱོན་བྲལ་རྗེ་ལ་ཕྱག་འཚལ་བསྟོད། །བདུད་རྩི་མྱང་ཞིང་སྤྲོ་བསྡུ་བཟླས། །བྱས་ནས་ཕྱག་རྒྱ་བཀྲོལ་པར་བྱ། །ཨོཾ་བཛྲ་པདྨ་དྷྲྀཀ་ཧཱུཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། རིག་པའི་ཤེས་རབ་མདའ་དག་གིས། །ལྟོང་ལྡན་འབེན་ལ་ཐུག་པ་ན། །གཅིག་ཀྱང་མི་གནས་བདེ་བ་ཆེ། །བསྒོམ་བྱ་སྒོམ་བྱེད་མེད་པ་ཡི། །རྗེ་བཙུན་གསུང་གི་དྲིན་དག་དང༌། །རྒྱུད་ལས་མཐོང་བ་བྲིས་པ་འདིས། །འགྲོ་ཀུན་དྲི་མ་མེད་པ་ཡི། །སངས་རྒྱས་ལ་གནས་པར་ཤོག །པདྨ་གཤིན་རྗེ་གཤེད་ཤེས་རབ་བདེ་བ་ཅན་གྱི་སྒྲུབ་ཐབས་ཞེས་བྱ་བ། རྒྱ་གར་གྱི་མཁན་པོ་དཱི་པཾ་ཀ་ར་ཞེས་བྱ་བས་མཛད་པ་རྫོགས་སོ།། །།རྣལ་འབྱོར་པ་པྲ་ཛྙཱ་ཤྲཱི་ཛྙཱ་ན་ཀཱི་རྟིས་རང་འགྱུར་དུ་མཛད་པའོ།།