ལྔ་པ། བྲིས་སྐུའི་ཆོ་གའི་རྟོག་པའི་དཀའ་འགྲེལ།
― DTG047_Page_0268 ―
[མ་དཔེ་གཟིགས་ན་འདིར་གནོན།]
དེ་ནས་ཞེས་བྱ་བ་ལ་སོགས་པ་ལ། གང་གང་ནས་གཡུལ་དོར་དངོས་སུ་ཤི་བའོ། །དེའི་དཔའ་བོའི་གོས་སོ། །མེ་ཏོག་ནི་ཟླ་མཚན་ནོ། །དེས་གོས་པ་ནི་མེ་ཏོག་གིས་གོས་སུ་བརྗོད་དོ། །གང་གིས་བུ་བཙས་པའི་དུས་སུ་བུད་མེད་ཀྱིས་གྱོན་པའི་བུ་སྐྱེས་པའི་རས་སོ། །རི་མོ་མཁན་བཟང་པོ་ནི་དབང་ཐོབ་པའོ། །རྟོག་པ་ཞེས་བྱ་བ་ནི་བཟའ་བར་བྱ་བ་དང༌། བཟའ་བར་བྱ་བ་མ་ཡིན་པའི་རྣམ་པར་རྟོག་པ་དང་བྲལ་བའོ། །ཁྲོ་བ་མེད་པ་ནི་བྱམས་པའི་སེམས་དང་ལྡན་པའོ། །ཆ་ཕྲ་བར་བྲི་བ་ནི་མཛེས་ཤིང་ཉེས་པའི་སྐྱོན་མེད་པའོ། །བརྩོན་པ་ནི་འབད་པའོ། །དད་པ་ནི་དཀོན་མཆོག་གསུམ་ལ་ཡིད་ཆེས་པའོ། །བརྩེ་བ་ནི་སྒྲུབ་པ་པོ་སྒྲུབ་པར་འདོད་པའོ། །རྙེད་པ་ལ་མི་བལྟ་བ་ནི་འདོད་པ་ཆུང་བའོ། །ཡོན་བྱིན་པ་ནི་རི་མོ་མཁན་གྱིས་ཇི་ཙམ་བརྗོད་པའོ། །རྟོག་པ་ལྔ་པ་ཞེས་བྱ་བའི་དཀའ་འགྲེལ་ལོ།། །།