དཔལ་རྡོ་རྗེ་འཇིགས་བྱེད་ཀྱི་སྒྲུབ་པའི་ཐབས་མདོར་བསྡུས་པ།
ཤྲཱི་བྷ་དྲ།
རྒྱ་གར་སྐད་དུ། ཤྲཱི་བཛྲ་བྷཻ་ར་བ་སཱ་དྷ་ན་ནོ་པི་ཀ་སཾ་ཀྵིཔྟ། བོད་སྐད་དུ། དཔལ་རྡོ་རྗེ་འཇིགས་བྱེད་ཀྱི་སྒྲུབ་པའི་ཐབས་མདོར་བསྡུས་པ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དཔལ་ལྡན་གང་ཞིག་སྔོན་བསྒོམས་པས། །དངོས་གྲུབ་མྱུར་དུ་ཐོབ་འགྱུར་བའི། །རྡོ་རྗེ་ཅན་ལ་གུས་བཏུད་ནས། །དེ་ཡི་སྒྲུབ་ཐབས་ཆོ་ག་བཤད། །དེ་ལ་རེ་ཞིག་དཔལ་རྡོ་རྗེ་འཇིགས་བྱེད་ཀྱི་རྒྱུད་ལས་ཇི་སྐད་གསུངས་པའི་དབང་བསྐུར་བ་ཕུན་སུམ་ཚོགས་པ་ལ་སོགས་པའི་མཚན་ཉིད་དང་ལྡན་པའི་སྔགས་པས། དུར་ཁྲོད་ལ་སོགས་པའི་གནས་ཡིད་དུ་འོང་བ་རྣམས་སུ་གནས་ལ། སྟན་བདེ་བ་ལ་འདུག་སྟེ། ཐེ་ཚོམ་ལ་སོགས་པའི་དོགས་པ་བསལ་ནས་འབད་པས་བསྒྲུབ་པར་བྱའོ། །དེའི་ཆོ་ག་ནི་འདི་ཡིན་ཏེ། དང་པོ་ཁོ་ནར་བདག་མེད་པ་བསྒོམས་པས་ནང་གི་བདག་ཉིད་ཅན་གྱི་ཁྲུས་བྱས་ལ། རང་གི་སྙིང་གར་ཡི་གེ་རཾ་ཡོངས་སུ་གྱུར་པ་ལས་ཉི་མའི་དཀྱིལ་འཁོར་དེའི་སྟེང་དུ། ཧཱུཾ་ཡོངས་སུ་གྱུར་བ་ལས་བྱུང་བའི་ཁྲོ་བོའི་རྡོ་རྗེ། དེའི་དབུས་སུ་ཡང་ཧཱུཾ་ཁ་དོག་ནག་པོ་འོད་ཟེར་སྣ་ཚོགས་འཕྲོ་བ་བསམས་ལ། དེའི་སྣང་བས་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་རྣམས་སྤྱན་དྲངས་ཏེ། མཆོད་པ་སྣ་ཚོགས་ཀྱིས་མཆོད་པར་བྱའོ། །དེ་ནས་སྡིག་པ་བཤགས་པ་དང༌། བསོད་ནམས་ལ་རྗེས་སུ་ཡི་རང་བ་དང༌། དཀོན་མཆོག་གསུམ་ལ་སྐྱབས་སུ་འགྲོ་བ་དང༌། བྱང་ཆུབ་ཏུ་སེམས་བསྐྱེད་པ་དང༌། ལམ་ལ་གནས་པ་དང༌། བདག་ཉིད་དབུལ་བ་དང༌། ཡོངས་སུ་བསྔོ་
པ་རྣམས་བྱས་ལ། །ཚངས་པའི་གནས་བཞི་བསྒོམ་པར་བྱའོ། །དེ་ནས་ཆོས་ཐམས་ཅད་རང་བཞིན་གྱིས་རྣམ་པར་དག་པའི་སྟོང་པ་ཉིད་དུ་བསྒོམ་ཞིང་དེ་བརྟན་པའི་སྔགས་འདི་བརྗོད་པར་བྱའོ། །ཨོཾ་སྭ་བྷཱ་ཝ་ཤུདྡྷཿ་སརྦ་དྷརྨཱཿ་སྭ་བྷཱ་ཝ་ཤུདྡྷོ྅ཧཾ། དེ་ལྟར་སྟོང་པ་ཉིད་བསྒོམས་ནས་ཡི་གེ་ཡཾ་ཡོངས་སུ་གྱུར་པ་ལས་རླུང་གི་དཀྱིལ་འཁོར་གཞུ་ལྟ་བུ་ཁ་དོག་ནག་པོ་བ་དན་གྱིས་མཚན་པ་བསམས་ལ། དེའི་སྟེང་དུ་རཾ་ལས་བྱུང་བའི་ཉི་མའི་དཀྱིལ་འཁོར། དེའི་དབུས་སུ་ཧཱུཾ་ཡོངས་སུ་གྱུར་པ་ལས་ཁྲོ་བོའི་རྡོ་རྗེ། དེ་ལས་རྡོ་རྗེའི་ས་གཞི་དང༌། ར་བ་དང་བླ་རེ་དང། གུར་ལ་སོགས་པ་བསྒོམས་ཏེ། ཐམས་ཅད་རྡོ་རྗེའི་རང་བཞིན་གྱི་དབུས་སུ་ཨ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར། དེའི་དབུས་སུ་ཡི་གེ་དྷཱིཿ་ཡོངས་སུ་གྱུར་པ་ལས་རལ་གྲི། རལ་གྲིའི་དབུས་སུ་ཡི་གེ་དྷཱིཿ་དེ་དག་ཐམས་ཅད་ཡོངས་སུ་གྱུར་པ་ལས་བཅོམ་ལྡན་འདས་འཇམ་དཔལ་གཞོན་ནུར་གྱུར་པ་སྐུ་མདོག་གསེར་བཙོ་མ་ལྟ་བུ་ཞལ་གཅིག་ཕྱག་གཉིས་དང་ལྡན་པ། ཕྱག་གཡས་པས་ཤེས་རབ་ཀྱི་རལ་གྲི་དཔུང་པའི་ཐད་ཀར་འཛིན་པ། གཡོན་པས་གླེགས་བམ་ཐུགས་ཀར་བསྣམས་པ། གཞོན་ནུ་རྒྱན་ཐམས་ཅད་ཀྱིས་བརྒྱན་པ། མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་བརྒྱན་པ། རལ་པ་དང་ཐོར་ཚུགས་ཅན་ནོ། །དེའི་སྙིང་གར་ཡི་གེ་མཾ་ཡོངས་སུ་གྱུར་པ་ལས་ཉི་མའི་དཀྱིལ་འཁོར། དེ་ལས་བྱུང་བའི་འོད་ཟེར་གྱིས་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་དང༌། བྱང་ཆུབ་སེམས་དཔའ་དང༌། རིག་པའི་ལྷ་མོ་དང༌། ཁྲོ་བོ་ལ་སོགས་པ་ཐམས་ཅད་བཀུག་ལ། གཞུག་པར་བྱའོ། །དེ་ནས་དེ་བཞིན་གཤེགས་པ་ལ་སོགས་པ་དང༌། རང་འཇམ་དཔལ་གྱི་གཟུགས་སུ་སྣང་བ་དང་བཅས་པ་ཐམས་ཅད་ཉི་མའི་དཀྱིལ་འཁོར་ལ་ཐིམ་པར་གྱུར་ཏེ། སླར་འོད་ཟེར་ཆེར་འཕྲོས་པ་ལས་དཔག་ཚད་བྱེ་བ་བརྒྱ་སྟོང་དུ་ཁྱབ་པས་འགྲོ་བའི་དོན་བྱས་ནས། དེ་བཞིན་གཤེགས་པ་ལ་སོགས་པ་བཀུག་སྟེ། གཅིག་ཏུ་བསྡུས་པ་ལས། ཡི་གེ་ཧཱུཾ་ཁ་དོག་ནག་པོ་འོད་
ཟེར་སྣ་ཚོགས་དང་ལྡན་པ་བསམས་ཏེ། དེ་ལས་ཀྱང་འོད་ཟེར་བྱུང་བས་སྔ་མ་བཞིན་དུ་བྱས་ཏེ། སླར་ཞུགས་པས་ཁྲོ་བོའི་རྡོ་རྗེ། དེ་ལས་རྡོ་རྗེ་ཕྲ་མོའི་གཟུགས་སྤྲོས་པས་སངས་རྒྱས་དང་བྱང་ཆུབ་སེམས་དཔའ་དང༌། རིག་པའི་ལྷ་མོ་དང་ཁྲོ་བོ་ལ་སོགས་པ་སྤྲོས་ཏེ། ནམ་མཁའི་ཁམས་གང་བར་བྱས་ནས་སེམས་ཅན་གྱི་དོན་བྱས་ཏེ། སེམས་ཅན་ཐམས་ཅད་ཀྱིས་དཔལ་རྡོ་རྗེ་འཇིགས་བྱེད་ཉིད་ཐོབ་པར་བྱས་ནས་སླར་བསྡུས་ཏེ། དེ་དག་ཐམས་ཅད་ཡོངས་སུ་གྱུར་པ་ལས་བཅོམ་ལྡན་འདས་དཔལ་རྡོ་རྗེ་འཇིགས་བྱེད་ཀྱི་དཀྱིལ་འཁོར་འཁོར་ལོ་དང་བཅས་པ། དུར་ཁྲོད་བརྒྱད་ཀྱིས་བརྒྱན་པ་བསམས་པ་ནི། །གྲུ་བཞི་པ་ལ་སྒོ་བཞི་པ། །རྟ་བབས་བཞི་དང་ཡང་དག་ལྡན། །དྲིལ་བུ་དར་གྱི་འཕན་ལ་སོགས། །མེ་ཏོག་ཕྲེང་དང་ཡང་དག་ལྡན། །སྒོ་རྣམས་ཀྱི་ནི་ཐམས་ཅད་ཀྱི། །སྒོ་ཁྱུད་ཀྱི་ནི་གནས་སུ་ཡང༌། །ཟླ་ཕྱེད་རྡོ་རྗེ་རིན་ཆེན་ནོ། །དེའི་དབུས་ཀྱི་དཀྱིལ་འཁོར་ནི། །རེའུ་མིག་བརྒྱད་པ་འདྲ་བ་ལ། །ཞེས་གསུངས་པའི་རིམ་པས་གཞལ་ཡས་ཁང་དེ་ལྟ་བུའི་རྣམ་པ་ཅན་བསམས་ཏེ། དེའི་དབུས་ཀྱི་ལྟེ་བ་ལ་དཔལ་རྡོ་རྗེ་འཇིགས་བྱེད་ཞལ་དགུ་པ། ཕྱག་སུམ་ཅུ་རྩ་བཞི་པ། ཞབས་བཅུ་དྲུག་དང་ལྡན་པ། འཇིགས་པ་རྣམས་ཀྱང་འཇིགས་པར་བྱེད་པ། ཧ་ཧ་ཞེས་བཞད་ཅིང་ལྕེ་འདྲིལ་བ། སྤྱན་བགྲད་པ། འཇིགས་པའི་མེ་ལྟར་འོད་འཕྲོ་བ། མིའི་ཤ་དང་ཞག་དང་ཁྲག་ལ་དགྱེས་པ། ཐོད་པའི་ཕྲེང་བས་བརྒྱན་པ། མིའི་རུས་པའི་ཕྲེང་བ་ཅན། ཕཊ་ཅེས་བྱ་བའི་སྒྲས་སེམས་ཅན་ཐམས་ཅད་སྐྲག་པར་བྱེད་པ། ཕྱག་དང་པོ་གཉིས་ཀྱིས་གླང་པོ་ཆེའི་པགས་པ་གོས་སུ་བསྣམས་པ། ལྷག་མ་རྣམས་ལ་གོ་རིམས་བཞིན་དུ་གྲི་གུག་དང༌། མཚོན་རྩེ་གཅིག་པ་དང༌། ཐག་མདུང་དང༌། གཏུན་ཤིང་དང༌། ཆུ་གྲི་དང༌། ཤག་གླང་དང༌། སྟ་རེ་དང༌། མདའ་དང༌། ལྕགས་ཀྱུ་དང༌། དབྱུག་ཏོ་དང༌། ཁ་ཊྭཱཾ་ག་དང༌། འཁོར་ལོ་དང༌། རྡོ་རྗེ་དང༌། རྡོ་རྗེ་ཐོ་བ་དང༌། རལ་གྲི་དང༌། ཅང་ཏེའུའོ། །གཡོན་པ་རྣམས་ནི་ཀ་པཱ་ལ་དང༌། མགོ་བོ་དང༌།
ཕུབ་ཆུང་དང༌། རྐང་པ་དང༌། ཞགས་པ་དང༌། གཞུ་དང༌། རྒྱུ་མ་དང༌། དྲིལ་བུ་དང༌། ལག་པ་དང༌། དུར་ཁྲོད་ཀྱི་རས་དང༌། གསལ་ཤིང་དང༌། མེ་ཐབ་དང༌། ཐོད་ཚལ་དང༌། སྡིགས་མཛུབ་དང༌། འཕན་དང༌། རླུང་གི་རས་རྣམས་སོ། །ཞབས་གཡས་པ་རྣམས་ཀྱིས་ནི། མི་དང༌། མ་ཧེ་དང༌། གླང་དང༌། བོང་བུ་དང༌། རྔ་མོ་དང༌། ཁྱི་དང༌། ལུག་དང༌། ཝ་རྣམས་སོ། །གཡོན་པའི་ཞབས་རྣམས་ཀྱིས་ནི། །བྱ་རྒོད་དང༌། བྱ་རོག་དང༌། ནེ་ཙོ་དང༌། སེང་གེ་དང༌། ཁྲ་དང༌། བྱ་ཆེན་པོ་དང༌། སྲིན་བྱ་དང༌། ཁྲུང་ཁྲུང་རྣམས་མནན་པར་བསམ་པར་བྱའོ། །ཞལ་དང་པོ་མ་ཧེའི་གདོང་ཅན་ནག་པོ། རྭ་གཡས་ཕྱོགས་ཀྱི་ཞལ་གསུམ་ལ། དང་པོ་སྔོན་པོ་གཉིས་པ་དམར་པོ། གསུམ་པ་སེར་པོའོ། །རྭ་གཡོན་ཕྱོགས་ཀྱི་ཞལ་གསུམ་ལ་དང་པོ་དཀར་པོ། གཉིས་པ་དུད་ཀ །གསུམ་པ་ནག་པོའོ། །རྭ་གཉིས་ཀྱི་དབུས་ཀྱི་ཞལ་དམར་པོ་ཁྲོ་བ་དང་བཅས་པའོ། །སྟེང་གི་ཞལ་ཁ་དོག་སེར་པོ་ཅུང་ཟད་ཁྲོ་བ། གཞོན་པའི་ཆ་ལུགས་ཅན། ཟུར་ཕུད་ལྔ་དང་ལྡན་པ་སྟེ། ཞལ་རེ་རེ་ཞིང་ཡང་སྤྱན་གསུམ་གསུམ་དང་ལྡན་པའོ། །ཕྱི་རོལ་དུ་ནི་དུར་ཁྲོད་བརྒྱད་དང་ལྡན་པ་ལ། ཤར་ཕྱོགས་སུ་ནི་གཏུམ་དྲག་ཅེས་བྱ་བའི་དུར་ཁྲོད་ལ་ནཱ་ག་གེ་སར་གྱི་ཤིང་ལ་གནས་པའི་ལྷའི་ཚོགས་ལ་སོགས་པ་དགོད་པར་བྱའོ། །ལྷོ་ཕྱོགས་སུ་ནི་ཤིན་ཏུ་དགོད་པ་ཞེས་བྱ་བའི་དུར་ཁྲོད་ལ་པླཀྵའི་ཤིང་ལ་གནས་པའི་གཤིན་རྗེའི་སྡེ་དཔོན་ཆེན་པོ་དགོད་དོ། །ནུབ་ཕྱོགས་སུ་ནི་གོ་ར་ཨནྟ་ཀ་ར་ཞེས་བྱ་བའི་དུར་ཁྲོད་ལ་ཨ་ཤྭདྠ་ལ་གནས་པའི་སྤྲིན་གྱི་རྒྱལ་པོ་རྣམས་ཡོངས་སུ་དགོད་དོ། །བྱང་ཕྱོགས་སུ་ནི་ཀི་ལི་ཀི་ལ་ཞེས་བྱ་བའི་དུར་ཁྲོད་ལ་ཤིང་པ་ཏ་ལ་ལ་གནས་པའི་གནོད་སྦྱིན་གྱི་གཟུགས་ཅན་བསམ་པར་བྱའོ། །མེའི་ཕྱོགས་སུ་ནི་བི་བི་ཤ་ན་ཞེས་བྱ་བའི་དུར་ཁྲོད་ལ་ཤིང་ཨ་ཁརྫུན་ལ་གནས་པའི་དྲང་སྲོང་གི་ཚོགས་བསྒོམ་པར་བྱའོ། །བདེན་བྲལ་གྱི་མཚམས་སུ་ནི་འབར་བའི་རིགས་ཞེས་བྱ་བའི་དུར་ཁྲོད་ལ་ཤིང་པ་ཏ་ལ་ལ་གནས་པའི་སྲིན་པོ་ལ་སོགས་པ་དགོད་པར་བྱའོ། །རླུང་གི་མཚམས་
སུ་ནི་དམྱལ་བ་ལ་སོགས་པ་ཞེས་བྱ་བའི་དུར་ཁྲོད་ལ་ཤིང་ཨུ་དུམྺཱ་ར་ལ་གནས་པའི་རླུང་གི་བདག་པོ་དང་བཅས་པ་རྣམས་དགོད་པར་བྱའོ། །དབང་ལྡན་གྱི་མཚམས་སུ་ནི་དབྱིབས་ཅན་ཞེས་བྱ་བའི་དུར་ཁྲོད་ལ་ཤིང་ཨ་མྲ་ལ་གནས་པའི་ཡི་དགས་ཀྱི་ཚོགས་བསྒོམ་པར་བྱའོ། །གཞན་ཡང་དུར་ཁྲོད་བརྒྱད་ན་བྱ་ཤ་ཟ་བ་སྣ་ཚོགས་དང༌། གཅན་གཟན་སྣ་ཚོགས་པ་དང༌། མིའི་རོ་སྣ་ཚོགས་པ་དང༌། རོ་ལངས་དང་སྲིན་པོ་དང་འདྲེ་ལ་སོགས་པ་སྣ་ཚོགས་བསྒོམ་པར་བྱའོ། །དེ་ལྟར་དུར་ཁྲོད་ཀྱི་དབུས་སུ་ཆུད་པའི་གཞལ་ཡས་ཁང་རྡོ་རྗེ་འཇིགས་བྱེད་དང་བཅས་པ་སྐད་ཅིག་གིས་བསྒོམས་ལ། རང་གི་སྙིང་གར་རྡོ་རྗེའི་ལྟེ་བ་ལ་གནས་པའི་ཡི་གེ་ཧཱུཾ་གི་འོད་ཟེར་གྱིས་རང་བཞིན་གྱི་དཀྱིལ་འཁོར་ན་གནས་པའི་རྡོ་རྗེ་འཇིགས་བྱེད་ཀྱི་སྐུ་བསྐུལ་ཏེ། རིན་པོ་ཆེ་ལ་སོགས་པའི་བུམ་པ་ཕྱག་གིས་བསྣམས་པས་དབང་བསྐུར་བས། མི་བསྐྱོད་པ་ཅོད་པན་དུ་བསམས་ཏེ། དེ་ཉིད་སླར་རང་གི་ལུས་ལ་ཞུགས་པས་སྙིང་གར་ཡེ་ཤེས་སེམས་དཔའ་བསམས་ལ། དེའི་སྙིང་གར་ཏིང་ངེ་འཛིན་སེམས་དཔའ་བསྒོམ་པར་བྱའོ། །དེ་ལྟར་རང་ཉིད་རྡོ་རྗེ་འཇིགས་བྱེད་དུ་བསྒོམས་ལ། སྔགས་ཀྱི་བཟླས་པ་བྱ་སྟེ། ཨོཾ་ཡ་མ་རཱ་ཛ། ས་དོ་མེ་ཡ། ཡ་མེ་དོ་རུ། ཎ་ཡོ་ད་ཡ། ཡ་དེ་ཡོ་ནི་ར་ཡ་ཀྵེ་ཡ། ཡཀྵེ་ཡཙྪ་ནི་རཱ་མ་ཡ་ཧཱུཾ་ཕཊ་ཕཊ། རྩ་བའི་སྔགས་སོ། །ཨོཾ་ཧྲཱིཿ་ཥྚྲྀཿ་ཝི་ཀྲྀ་ཏཱ་ན་ན་ཧཱུཾ་ཕཊ། ལས་ཀྱི་སྔས་སོ། །ཨོཾ་ཡ་མཱནྟ་ཀ་ཧཱུཾ་ཕཊ། སྙིང་པོའོ། །སྙིང་གར་ཉི་མའི་དཀྱིལ་འཁོར་ལ་སྔགས་ཀྱི་ཡི་གེ་དེ་རྣམས་ལས་གང་ཡང་རུང་བ་བསམས་ཏེ། སྤྲོ་བ་དང་བསྡུ་བ་བྱའོ། །སྔགས་ཀྱི་ཡི་གེའི་འོད་ཟེར་ལས་ཁྲོ་བོ་སྣ་ཚོགས་པ་དང༌། བྱ་སྣ་ཚོགས་པ་དང༌། འདྲེ་དང་སྲིན་པོ་ལ་སོགས་པ་དང༌། ཤིན་ཏུ་འཇིགས་སུ་རུང་བ་རྣམས་སྤྲོས་ཏེ། བསྒྲུབ་པར་བྱ་བའི་ཤ་དང༌། རུས་པ་དང༌། ཁྲག་དང་ཆུ་སེར་རྣམས་ཟ་ཞིང་འཐུང་བ་དང༌། འཇིབ་པར་བསམ་པར་བྱའོ། །དེ་ལྟར་བསྒོམ་པ་དང་བཟླས་པ་ལས་ལྡང་བར་འདོད་ན་གཏོར་མ་གཏང་བར་བྱ་སྟེ། དྲུག་ཅུ་
པའི་འབྲས་ཆན་དང༌། ཤ་དང་ཉ་དང་ཁྲག་དང་སྒོག་པ་དང༌། ཆང་དང་བཅས་པའི་གཏོར་མ་བདུད་རྩི་ལྔ་དང་བཅས་པའམ། །ཡང་རྒྱུད་ལས་གསུངས་པའི་ཤ་ས་ཚོགས་པས་བདུད་རྩིར་བྱིན་གྱིས་བརླབས་ཏེ། སྔགས་འདིས་དབུལ་བར་བྱའོ། །ཨོཾ་ཀཱ་ལ་རཱུ་པ་སརྦ་དུཥྚ་ས་ཏྭ་ད་མ་ཀ་མ་ཧཱ་བྷཱུ་ཏ་ཨ་དྷི་པ་ཏི་ཨི་དཾ་པ་ལིཾ་གྲྀཧྞ་གྲྀཧྞཱ་པ་ཡ་མ་མ་ཤ་ཏྲཱུཾ་མཱ་ར་ཡ་ཧཱུཾ་ཕཊ། ཅེས་པ་ནི་གཏོར་མའི་སྔགས་སོ། །དེ་ནས་ལངས་པའི་དུས་སུ་ཡང་རྡོ་རྗེ་འཇིགས་བྱེད་ཀྱི་ང་རྒྱལ་གྱིས་གནས་པར་བྱའོ། །དེ་ལྟར་རྣམ་པར་བསྡུས་པ་ལས་བྱུང་བའི། །དགེ་བ་དེས་ནི་སེམས་ཅན་མ་ལུས་ཀུན། །འཕགས་པ་འཇམ་དཔལ་ཁྲོས་པ་ལས་བྱུང་བའི། །རྡོ་རྗེ་འཇིགས་བྱེད་དེ་དང་འདྲ་བར་ཤོག །དཔལ་རྡོ་རྗེ་འཇིགས་བྱེད་ཀྱི་སྒྲུབ་པའི་ཐབས་མདོར་བསྡུས་པ། སློབ་དཔོན་ཆེན་པོ་ཤྲཱི་བྷ་དྲས་མཛད་པ་རྫོགས་སོ།། །།