དཔལ་རྡོ་རྗེ་འཇིགས་བྱེད་ཀྱི་རྟོག་པ་ལས་འཁོར་ལོ་བསྐོར་བའི་ལས་དྲག་པོ་ཕྱོགས་གཅིག་པ།
ཞི་བ་ཡེ་ཤེས།
དཔལ་འཇམ་པའི་རྡོ་རྗེ་ལ་ཕྱག་འཚལ་ལོ། །གང་ཞིག་ལས་ལ་སྦྱོར་བར་འདོད་པས། སྒྲུབ་ཆེན་དངོས་གྲུབ་ཐོབ་པའམ། ཏིང་ངེ་འཛིན་ལས་སུ་ཡང་རུང་བའམ། །སྔགས་གྲུབ་པས་སྦྱར་རོ་ཞེས་གསུངས་སོ། །དེ་ལ་གནས་ནི་དུར་ཁྲོད་དང༌། ཤིང་གཅིག་གི་དྲུང་དང༌། ལམ་བཞི་མདོ་ལ་སོགས་པ་སྟེ། འབྱུང་པོ་གནས་པའི་སར་བྱའོ། །དུས་ནི་ཉི་ཤུ་གཉིས་ནས་གནམ་སྟོང་ལ་བྱའོ། །དེ་ལ་དང་པོ་གཏོར་མ་དང༌། །གཙང་བའི་མཆོད་པ་དག་གིས་འཕགས་པ་དང་མཁའ་འགྲོ་མ་དག་ཚིམ་པར་བྱས་ལ། ས་ཕྱོགས་དེའི་གདོན་དེ་མཆོད་སྦྱིན་གྱིས་མགུ་བར་བྱས་ལ། བདེན་པ་བདར་ཞིང་སྟོང་གྲོགས་ཀྱིས་ཤིག་པར་བསྒོ། ཞི་བའི་སྦྱིན་སྲེག་བྱའོ། །དེ་ནས་འཁོར་ལོ་བྲི་བར་བྱ་སྟེ། རང་གི་ལྷའི་ཏིང་ངེ་འཛིན་དང་ལྡན་པས་གཅེར་བུ་ཁ་ལྷོ་ཕྱོགས་སུ་བལྟས་ཏེ་བྲི་བར་བྱའོ། །འདི་ལྟར་དུར་ཁྲོད་ཀྱི་རས་ལ་དུག་དང༌། ཁྲག་དང༌། སྐེ་ཚེ་དང༌། ནིམ་པ་དང༌། ད་དུ་རའི་ཁུ་བ་དང༌། བྱ་རོག་གིས་ཟོས་པའི་ལྷག་མ་དང༌། དྲི་ཆེན་དང༌། ཐལ་ཆེན་གྱིས་བྱུགས་ཏེ་རས་ལེགས་པར་སྦྱངས་ལ། གོང་གི་རྫས་དང་རོའི་སོལ་བས་སྣག་ཚ་བྱས་ཏེ། བྱ་རོག་གི་སྒྲོ་རྩས་འཁོར་ལོ་བྲི་བར་བྱའོ། །དེ་ལ་འཁོར་ལོའི་རིམ་པ་གསུམ་ལ་དབུས་སུ་ཡ་བརྒྱད་བྲིས་ལ། དེ་ལ་རིམ་པ་གཉིས་པ་ཡན་ཆད་ཡི་གེ་གསུམ་ཅུ་རྩ་གཉིས་པས་བསྐོར་ལ། དབུས་སུ་ཡ་དང་ཡའི་བར་དུ་བསྒྲུབ་བྱའི་མིང་བྲིའོ། །རིམ་པ་ཐ་མ་ལ་ཡི་གེ་བཅུ་པ་དང་བསྒྲུབ་བྱའི་མིང་སྤེལ་ཏེ་བྲིའོ། །དེའི་ཕྱི་རོལ་དུ་ཡི་གེ་ཕྲེང་བ་བྲིའོ། །ཕྱོགས་མཚམས་སུ་ཧཱུཾ་བརྒྱད་བྲིའོ། །གྲྭ་བཞིར་ཕཊ་བྲིའོ། །དེའི་དུས་སུ་དམ་ཚིག་གི་སྔགས་དང་ཕྱག་རྒྱས་བྲིས་ཏེ། ཟིན་པ་དང་ལྷ་ལ་ཕྱག་བྱས་ནས་བཀའ་བདེན་པར་གྱུར་ཅིག་བྱའོ། །དེ་ནས་གྲོག་མཁར་གྱི་ས་དང༌། ཆུ་འགྲམ་གཉིས་ཀྱི་ས་དང༌། རྒྱལ་པོའི་དྲི་ཆེན་དང༌། དུར་ཁྲོད་ཀྱི་སོལ་བ་ཉིན་མཚན་གྱི་གུང་ལ་དྲི་ཆུས་སྤྲུས་ཏེ། བསྒྲུབ་བྱའི་གཟུགས་སོར་བརྒྱད་པ་ཅིག་བྱས་ལ། དེའི་སྙིང་གར་གོང་གི་འཁོར་ལོ་དྲིལ་ཏེ་གཞུག་གོ །དེ་ནས་བསྒྲུབ་བྱ་
དགུག་པའི་སྦྱོར་བས་བཀུག་སྟེ། བསྒྲུབ་བྱའི་གཟུགས་ལ་ཕབ་ལ། གནས་ལྔར་མི་རུས་ཀྱི་ཕུར་པ་བརྡེག་ཅིང་ཚིགས་ཐམས་ཅད་ཚེར་མ་རྣོན་པོས་དགང་ངོ༌། །དེ་ལ་དགུག་པ་ནི། ལྷའི་ཏིང་ངེ་འཛིན་ལ་གནས་པས་མདུན་དུ་ཡཾ་ལས་རླུང་གི་དཀྱིལ་འཁོར་དུ་གྱུར་པའི་སྟེང་ན་ཟླ་བའི་གདན་སྟེང་ན་གནས་པའི་གཤིན་རྗེ་ལག་ན་ལྕགས་ཀྱུ་དང༌། ཞགས་པ་ཐོགས་པ་ཞིག་བསམས་ཏེ། དེ་ལ་ཆེ་གེ་མོ་ཁུག་ལ་ཤོག་ཅེས་བསྐུལ་ཏེ། སྔགས་ཀྱི་མཇུག་ལ་ཆེ་གེ་མོ་ཨཱ་ཀཪྵ་ཡ་ཧཱུཾ་ཕཊ་ཅེས་བཟླས་ཏེ་གཟུགས་ལ་བསྟིམས་ཏེ། དེ་ནས་ཕུར་བུ་འདེབས་པའི་དུས་སུ། གཤིན་རྗེ་ལག་ན་མཚོན་ཆ་སྣ་ཚོགས་ཐོགས་པ། བརྡེག་ཅིང་ཟ་བ་དང༌། གཅན་གཟན་གྱི་ཚོགས་ཀྱིས་ཟ་ཞིང་འཐོབ་པར་བསམས་ཏེ། སྔགས་ཀྱི་མཇུག་ལ་ཆེ་གེ་མོ་མཱ་ར་ཡ་ཕཊ་ཅེས་བཟླས་སོ། །དེ་ནས་ལིངྒ་དེ་ཐོད་པ་ཁ་སྦྱར་གྱི་ནང་དུ་གཞུག་པར་བྱ་སྟེ། འདི་ལྟར་ཐོད་པ་འོག་མའི་རྒྱབ་ཏུ་རླུང་གི་མཎྜལ་བྲིའོ། །ནང་དུ་པདྨ་འདབ་བརྒྱད་ལ་དབབ་པའི་སྙིང་པོ་བྲིའོ། །ཐོད་པ་གོང་མའི་ནང་དུ་མེའི་མཎྜལ་བྲིའོ། །རྒྱབ་ཏུ་དབང་ཆེན་རི་རབ་དང་བཅས་པ་བྲིའོ། །དེའི་ནང་དུ་ལིངྒ་བཅུག་ལ་སྐུད་པ་ནག་པོས་དཀྲིས་ནས་མཎྜལ་གྲུ་གསུམ་ནག་པོའི་སྟེང་དུ། དུག་ཤིང་གི་འདབ་མ་ལ་དྲོ་བར་གྱུར་པ་ཙམ་དུ་བསྲོ་ཞིང་སྔགས་ལ་སྦྱར་བར་བྱའོ། །དེ་ལ་ཉི་མ་དང་པོ། ཨོཾ་ཡ་མ་རཱ་ཛ་ས་དོ་མེ་ཡ་ཆེ་གེ་མོ་བྷ་མ་ཡ་ཀུ་རུ་ཧཱུཾ་ཕཊ་ཅེས་ཁྲི་ཕྲག་གཅིག་བཟླས་ཏེ། དེ་བཞིན་དུ་ཉི་མ་བཞིའི་བར་དུ་སྔགས་དང་བསྐུལ་བར་བྱས་ཏེ། ཇི་ལྟ་བ་བཞིན་དུ་བཟླས་པ་བྱའོ། །དམིགས་པ་ནི་ཕོ་ཉའི་ཚོགས་ཀྱིས་བསྒྲུབ་བྱ་བཀུག་སྟེ། གའུའི་ནང་དུ་ཆུད་པར་བྱས་ནས། དེར་སྔགས་ཀྱི་དཔལ་གྱིས་བསྲེགས་ཏེ། ཤ་ཁྲག་བསྐམས། རྣམ་ཤེས་བྲལ་ཏེ། རུས་པ་ཐལ་བ་བརྡུང་བར་འདུག་པར་བསམ་མོ། །དེའི་དུས་སུ་ལས་མཁན་དག་གིས་དུས་གསུམ་དུ་གཏོར་མ་དང་ཚོགས་དང་མཆོད་པ་བྱས་ཏེ། དམ་ལ་གནས་པའི་གཤིན་རྗེ་དང༌། མ་མོ་མཁའ་འགྲོ་མ་ཡང་བསྐུལ་ཞིང་ཕྲིན་ལས་བཅོལ་ལོ། །གནས་བདུན་གྲོག་མཁར་གྱིས་བླངས་ལ། གཤིན་རྗེའི་མི་ཁྲུ་གང་པའི་ཚད་ལ་
མཆེ་བ་གཙིགས་པ། མདོག་སྔོན་ནག་ལག་ན་རལ་གྲི་དང་གཡོན་པ་ཞགས་པ་དང་སྡིགས་མཛུབ་བྱེད་པ། གཅེར་བུ་སྐྲ་ལྷུག་པར་འདུག་པ་བྱས་ལ། དེའི་སྙིང་གར་གའུ་བཅུག་ལ། གནམ་སྟོང་གི་ནམ་ཕྱེད་ན་དུར་ཁྲོད་ཀྱི་ཐབ་ཏུ་གཏིང་རིང་བྲུས་ཏེ། དེར་བཞག་ལ་གཤིན་རྗེ་སྤྱན་དྲངས་ཏེ་གཟུགས་ལ་བསྟིམས་ནས། གཏོར་མ་དང་མཆོད་པས་དག་པར་བྱས་ལ། དེ་ནས་མགོ་ལྷོར་བསྟན་ལ། ཁྲ་སྦུབ་ཏུ་བཞག་ལ་བདེན་པ་བདར་དཔང་དུ་བཙུགས་ལ་གཤིན་རྗེ་ལ་གཏད་ལ་གཞག་གོ །དེ་ནས་རང་གི་ཁྱིམ་དུ་འོངས་ནས་ཀྱང་གསང་སྔགས་ཀྱི་རྗེས་སུ་བསྐུལ་བར་བྱའོ། །དཔལ་རྡོ་རྗེ་འཇིགས་བྱེད་ཀྱི་རྟོག་པ་ལས་འཁོར་ལོ་བསྐོར་བའི་ལས་དྲག་པོ་ཕྱོགས་གཅིག་པ། སློབ་དཔོན་ཞི་བའི་ཡེ་ཤེས་ཀྱིས་མཛད་པ་རྫོགས་སོ།།