དཀྱིལ་འཁོར་བརྒྱན་པར་བྱས་པའི་རིམ་པ།
དེ་ནས་བུམ་པ་དགོད་དེ། གཙོ་བོའི་བུམ་པ་དབུས་སུ་དགོད་དོ། །གཞན་དགུ་དང་ལས་བུམ་དང་བཅས་པ་བྱང་ཤར་དུ་བཞག་ལ་བིགྷྣཱན་ཏ་ཀྲྀ་ཏ་ལ་བསྲུང་བའི་ལས་བཅོལ་ལོ། །དེ་ནས་མཆོད་པའི་ཡོ་བྱད་དགོད་པ་ནི། སྤྱིར་ཤ་དང་ཁྲག་ཐམས་ཅད་གཙོ་བོར་གསུངས་སོ། །མཆོད་པ་རྣམས་ནི་བཤམ་པ་དང༌། གྲངས་དང༌། གོ་རིམས་ནི་ཇི་ལྟར་གསུངས་པ་བཞིན་ནོ། །མར་མེ་ཆེན་པོ་བརྒྱད་ནི། ཕྱོགས་མཚམས་བརྒྱད་དུ་དགོད་པ་ལ་སོགས་པ་དང༌། སྒོ་བཞི་དང་གྲྭ་བཞིར་ནི་ཤ་ཁྲག་སྣ་ཚོགས་པས་བཀང་བའི་ཐོད་པ་ཆེན་པོའི་གཏོར་མ་བརྒྱད་དང༌། གཞན་ཅི་རིགས་པར་བཤམས་པའི་ཚོགས་ཀྱི་ཡོ་བྱད་རྣམས་དང༌། འདོད་པའི་ཡོན་ཏན་ལྔའི་ཡོ་བྱད་དེ། གོས་ཟུང་དུ་སྦྱར་བ་ལ་སོགས་པ་དང༌། རྒྱན་གྱི་ཡོ་བྱད་ནི།
བླ་རེ་དང༌། འཕན་དང༌། གདུགས་དང༌། ཡོལ་བ་ལ་སོགས་པ་དང༌། བསྲུང་བའི་ཡོ་བྱད་ནི་གྲི་ཕུར་དང༌། མདའ་བོ་ཆེ་དང༌། སྒོ་མཚམས་མ་ལ་སོགས་པ་དང༌། སྒྲུབ་པའི་ཡོ་བྱད་ནི་རྣལ་འབྱོར་དུ་འདུས་པ་རྣམས་ནི། ཏིང་ངེ་འཛིན་གཅིག་ཏུ་གྱུར་པའམ། མ་གྱུར་བའང་རུང་སྟེ། མཉམ་པར་འཇོག་ནུས་པ་རྣམས་ཏེ། དེ་དག་གིས་ནི་དཀྱིལ་འཁོར་བརྒྱན་པར་བྱས་པའི་རིམ་པའོ། །