དཀྱིལ་འཁོར་འཇུག་ཅིང་དབང་བསྐུར་བའི་ཆོ་ག
དེ་ནས་རྡོ་རྗེ་སློབ་དཔོན་གྱིས་རྡོ་རྗེ་དང་དྲིལ་བུ་འཛིན་ཅིང༌། འབར་བའི་ལྟ་བ་དང་བཅས་པས་དཀྱིལ་འཁོར་ལ་བསྐོར་བ་བྱ་ཞིང༌། ནོར་བ་རྣམས་བཅོས་པར་བྱའོ། །སྲུང་བའི་འཁོར་ལོས་བྱིན་གྱིས་བརླབ་པར་རིག་པར་བྱའོ། །དེ་ནས་ལྷོའི་སྒོར་སྟན་ལ་འདུག་ནས། སེམས་མཉམ་པར་བཞག་པས། ཆོ་ག་ཇི་ལྟ་བ་བཞིན་དུ་དམ་ཚིག་སེམས་དཔའི་འཁོར་ལོར་སྤྲུལ་ལ། བར་སྣང་ལ་གནས་པ་དེ་ཡང་འབར་བའི་ལྟ་བ་དང༌། ཡི་གེ་ཇའི་སྦྱོར་བས། ཤྲཱི་བཛྲ་བྷཻ་ར་བ་མ་ཧཱ་མཎྜལ་ཨཱ་བེ་ཤ་ཡ་ཨ་ཨ་ཞེས་པས་གཉིས་སུ་མེད་པར་གྱུར་པར་མཐོང་ནས། སྐྱེ་མཆེད་དྲུག་དང༌། སྐུ་གསུང་ཐུགས་རྡོ་རྗེའི་རང་བཞིན་དུ་སྒྲུབ་སྟེ། དེ་ནས་ཡེ་ཤེས་ཀྱི་འཁོར་ལོ་སྤྱན་དྲང་ཞིང༌། དབྱེར་མེད་པར་གྱུར་བའི་ཚེ་ན། སངས་རྒྱས་ཐམས་ཅད་ཀྱིས་དབང་བསྐུར་བར་རིག་པར་བྱའོ། །དེ་ནས་བློ་ལྡན་སློབ་མ་གང༌། །དཀྱིལ་འཁོར་མངོན་དུ་གྱུར་འདོད་པས། །མཆོད་པ་ཀུན་གྱི་མཆོག་གྱུར་པའི། །བླ་མ་མཆོད་ལ་བརྩོན་བྱ་སྟེ། །དད་པས་རང་དང་ལོངས་སྤྱོད་བཅས། །ཇི་ལྟར་འབྱོར་ཞིང་ཡིད་འཐད་ཀུན། །རྗེ་བཙུན་ཞབས་ལ་བཏུད་དེ་འབུལ། །དེ་ནས་སྙིང་པོ་བྱང་ཆུབ་པར། །ཞབས་ཀྱི་པདྨ་ལ་བཏུད་ཅིང༌། །ཐེག་མཆོག་བསྲུང་བར་བསྐུལ་འདེབས་ཤིང༌། །འགྲོ་བའི་མུན་སེལ་སྒྲོན་མེ་སྤྲོ། །དེ་ནས་རྡོ་རྗེ་སློབ་དཔོན་དེས། །རང་རིག་པའི་རྒྱལ་པོར་ངེས་པར་མཐོང་ནས། སྐྱེ་མཆེད་དྲུག་དང་ལུས་ངག་ཡིད་རྡོ་རྗེར་བྱིན་གྱིས་རློབ་ཅིང༌། ཡེ་ཤེས་ཀྱི་འཁོར་ལོར་བྱིན་གྱིས་བརླབས་ཏེ། དབང་བསྐུར་བར་འདོད་པས། བསང་གཏོར་སྔོན་དུ་འགྲོ་བས། མཆོད་ཡོན་དང་སྐུ་ཁྲུས་གསོལ་ཏེ། བདུག་སྤོས་ལ་སོགས་པའི་མཆོད་པའི་བྱེ་བྲག་དུ་མ་དང༌། འདོད་པའི་ཡོན་ཏན་ལྔ་དང༌། སྤྱང་བ་དང༌། སྦར་ཞིང་རྟོགས་པར་བྱ་བའི་བདུད་རྩིའི་རོས་ནི་སངས་རྒྱས་ཐམས་ཅད་ལ་ཡང་དག་པར་མཆོད་ནས། དེ་བཞིན་དུ་འཇིག་རྟེན་པ་དག་ལ་ཡང་རྒྱ་ཆེ་བར་མཆོད་
པར་བྱས་ནས། དེ་དག་སྒྱུ་མའི་རྣམ་པར་ཤེས་པར་འགྱུར་བ་དང༌། རང་གི་རྟོག་པ་ལས་ཇི་སྐད་དུ་གསུངས་པ་ལྟར་དུ་ཞི་བ་དང་རྒྱས་པའི་སྤྱིན་སྲེག་གིས་ཀྱང་དོན་ཐམས་ཅད་སྒྲུབ་པར་གསུངས་སོ། །དེ་ནས་སློབ་མ་དབང་བསྐུར་ཕྱིར། །འཁོར་ལོས་སྒྱུར་རྒྱལ་སྦྱར་བས་འཇུག །བདག་ཉིད་གནང་བ་ཐོབ་གྱུར་ནས། །གཞན་དོན་མཆོག་འགྱུར་ཐེ་ཚོམ་མེད། །དེ་ནས་ཡང་སློབ་མས་དབང་བསྐུར་བའི་དོན་དུ། སློབ་དཔོན་ལ་གསོལ་བ་གདབ་སྟེ། ཀུན་མཁྱེན་ཡེ་ཤེས་ཕུང་པོ་ཅན། །སྲིད་པའི་འཁོར་ལོ་རྣམ་སྦྱོང་བའི། །ཇི་ལྟར་བཤད་པའི་རིན་ཆེན་ལྟར། །གཙོ་བོས་བདག་ལ་བཀའ་དྲིན་སྩོལ། །ཁྱོད་ཞབས་པདྨ་སྤངས་ནས་ནི། །མགོན་པོ་གཞན་ལ་སྐྱབས་མ་མཆིས། །འགྲོ་བའི་མགོན་པོ་ཐུབ་ཆེན་གྱིས། །བློ་མཆོག་བདག་ལ་གནང་བར་མཛོད། །དེ་ནས་ཡང་ཕྱོགས་བཞི་ནས་གསོལ་བ་གདབ་པ་ནི། དེ་བཞིན་གཤེགས་པ་ཀུན་ཞི་བ། །དེ་བཞིན་གཤེགས་པ་ཀུན་གྱི་གནས། །ཆོས་ཀུན་བདག་མེད་པ་ཡི་མཆོག །དཀྱིལ་འཁོར་དམ་པ་བཤད་དུ་གསོལ། །མཚན་རྣམས་ཐམས་ཅད་ཡང་དག་རྫོགས། །མཚན་མིན་ཐམས་ཅད་ཡང་དག་སྤངས། །ཀུན་དུ་བཟང་པོ་སྐུ་ཡི་མཆོག །དཀྱིལ་འཁོར་དམ་པ་ཞི་བ་ཆོས་མཆོག་ཡང་དག་འབྱུང༌། །ཡེ་ཤེས་སྤྱོད་པ་རྣམ་སྦྱོང་བ། །ཀུན་དུ་བཟང་པོ་གསུང་གི་མཆོག །དཀྱིལ་འཁོར་སེམས་ཅན་ཀུན་གྱི་སེམས་ཆེན་པོ། །རང་བཞིན་དག་པ་དྲི་མ་མེད། །ཀུན་བཟང་ཐུགས་མཆོག་ཁ་ལོས་སྒྱུར། །དཀྱིལ་འཁོར་དེ་ནས་རིགས་ལྔའི་སྡོམ་པ་དང༌། དམ་ཚིག་རྣམས་དབོག་ཅིང༌། དེ་དག་གི་སྔོན་དུ་རྒྱུན་བཤགས་ལ་སོགས་པས་ལེགས་པར་སྦྱངས་ན། སློབ་དཔོན་ཡོལ་བའི་ནང་དུ་གནས་ལ། ལས་ཀྱི་རྡོ་རྗེས་ཕྱི་རོལ་དུ་ལས་ཐམས་ཅད་པའི་བུམ་པ་དེས་ཅི་རིགས་སུ་བསྐུ་ཞིང༌། གོས་དམར་པོས་གདོང་པ་གཡོགས་ཏེ། རྣམ་པར་སྣང་མཛད་དུ་བསྐྱེད་དེ། ཨ་ཁཾ་བཱི་ར་ཧཱུཾ། ཞེས་མེ་ཏོག་གི་ཕྲེང་བ་སྙིམ་པར་གཏད་ལ། རྡོ་རྗེ་ནས་འཛིན་དུ་བཅུག་སྟེ། བསླབ་བྱ་དང་བཅས་པ་ཡོལ་བའི་རྩར་ཕྱིན་པ་དང༌། ཞལ་བཞི་པ་དང༌། ཏ་ཀྲྀ་ཏ་བཞིའི་སྔགས་དང་བཅས་པས། བགེགས་ཀྱི་ཚོགས་ཀུན་བསྐྲད་དེ། ཁྱོད་ནི་གང་ཞིག་ཅིལ་དགའ། །ཞེས་བསྒོ་བ་དང་དད་པས་ལེགས་པར་བསྒྲུབས་པ་སྟེ། སྐལ་པ་བཟང་ལ་བདག་དགའོ། །ཞེས་སྨྲ་བར་གྱུར་པ་
དང། དེ་ལ་བྱང་ཆུབ་མཆོག་ཏུ་སེམས་བསྐྱེད་པར་བྱ་སྟེ། ཡོལ་བའི་ནང་དུ་འོང་བ་ན། བོ་དྷི་ཙིཏྟ་ཨུཏྤཱ་ད་ཡཱ་མི། ཞེས་བརྗོད་དོ། །དེའི་སྙིང་གར་རྡོ་རྗེ་དང་བདུད་རྩིར་བཅས་པས་རྒྱས་བཏབ་སྟེ། དེ་རིང་ཁྱོད་ལ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབ་པར་འགྱུར་ཏེ། དེ་བཞིན་གཤེགས་པ་ཐམས་ཅད་ཀྱི་གསང་བ་དམ་པ་དེ་ཁོ་ན་ཉིད་ཀྱི་གནས་ཆེན་པོ་འདི་ནི། ཕྱིན་ཅི་མ་ལོག་པར་བསྟན་པར་བྱ་སྟེ། གང་དག་ཁྱོད་ཀྱི་དཀྱིལ་འཁོར་དུ་མ་ཞུགས་པ་རྣམས་ལ་སྨྲ་བར་མི་བྱ་སྟེ། དད་པ་ཆུང་བ་དག་དང༌། ཡོངས་སུ་མ་སྨིན་པ་རྣམས་ལ་སྨྲ་བར་མི་རིགས་སོ། །གལ་ཏེ་བག་མེད་པར་སྨྲས་ན་མགོ་འགས་པར་འགྱུར་རོ། །དེ་ནས་ཡི་གེ་གསུམ་གྱིས་གནས་གསུམ་དུ་བྱིན་གྱིས་བརླབ་ཅིང༌། རྡོ་རྗེ་དང་བཅས་པའི་བདུད་རྩིའི་ཐིག་ལེ་བྱ་ཞིང༌། ཉི་ཟླ་ཁ་སྦྱར་རེ་རེ་བཀོད་པར་བསྒོམས་ནས། དེ་ནས་ཡང་འདི་སྐད་དུ་བསྒོ་སྟེ། དེང་ནས་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཆུད་པ་ཡིན་པར་ཤེས་པར་བྱོས་ཤིག །དེ་ལྟ་བས་ན། ངས་ཁྱོད་ལ་ཡེ་ཤེས་ཆེན་པོའི་རྡོ་རྗེ་ངེས་པར་བསྐྱེད་པར་བྱའོ། །ཡེ་ཤེས་གང་གིས་ཁྱོད་ལ་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱང་འགྲུབ་པར་འགྱུར་ཏེ་དངོས་གྲུབ་གཞན་ལྟ་ཅི་སྨོས། འདི་དག་ནི་དཀྱིལ་འཁོར་ཆེན་པོ་མ་མཐོང་བ་དག་གི་དྲུང་དུ་བརྗོད་པར་མི་བྱ་སྟེ། དམ་ཚིག་ཉམས་པར་གྱུར་ཏ་རེའོ། །རྡོ་རྗེ་སེམས་དཔའ་འང་དེང་ཁྱོད་ཀྱིས། །སྙིང་ལ་ཡང་དག་གནས་པར་བྱས། །གལ་ཏེ་ཚུལ་འདི་སྨྲས་གྱུར་ན། །དེ་མ་ཐག་ཏུ་དྲལ་ཏེ་གཤེགས། །ཨོཾ་བཛྲ་ས་ཏྭ་ཧཱུཾ། དེ་ནས་པདྨའི་སྣོད་དུ་བསྒྲུབ་པའི་འཆི་མེད་དེ་ལས་རྡོ་རྗེ་བླངས་ཏེ། དེའི་ལྕེ་ལ་བཞག་སྟེ། འདི་ནི་རྡོ་རྗེའི་བདུད་རྩིའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ཀུན། །རྡོ་རྗེ་བདུད་རྩིའི་ཆུ་འདིས་འགྲུབ། །ཨོཾ་བཛྲ་ཨ་མྲྀ་ཏ་ཨུ་ད་ཀ་ཋཿ་དེ་རིང་ཕན་ཆད་ཁྱོད་ཀྱི་ཕྱག་ན་རྡོ་རྗེ་ང་ཡིན་པས་ངས་ཇི་ལྟར་བསྒོ་བའི་དགེ་བའི་ལས་རྣམས་ཁྱོད་ཀྱིས་བྱ་དགོས་པས། ང་ལ་བརྙས་པར་འགྱུར་བའི་ལས་དག་མ་བྱེད་ཅིག །ཇི་ལྟར་དུ་མི་བདེ་བ་དག་མ་སྤངས་པར་ཚེའི་དུས་བྱས་ནས། སེམས་ཅན་དམྱལ་བར་གྱུར་ཏ་རེའོ། །དེ་ནས་ཡང་སློབ་མས་འདི་སྐད་དུ་གསོལ་བ་གདབ་པར་བྱ་སྟེ། བདག་ནི་དེ་ནས་བཟུང་ནས་དེ་བཞིན་གཤེགས་ཐམས་ཅད་ཀྱིས་བྱིན་གྱིས་བརླབས་ནས། རྡོ་རྗེ་སེམས་དཔའ་
བདག་ལ་འབབ་པར་གྱུར་ཅིག །ཅེས་བརྗོད་ལ། བྱིན་རླབས་རྒྱུད་ལྡན་བླ་མས་ནི། །རྡོ་རྗེ་སློབ་མ་བྱིན་བརླབ་ཕྱིར། །སློབ་མའི་ལུས་དང་རྟེན་འབྲེལ་རྫས། །ཐུགས་ཀྱི་བྱིན་རླབས་དཀྱིལ་འཁོར་གྱིས། །གསུང་གི་རྡོ་རྗེའི་རྣལ་འབྱོར་དེས། །སེམས་ནི་བྱིན་གྱིས་བརླབས་ཅམ་གྱིས།།གཡོ་ཞིང་རྟོགས་ཐོབ་གང་ཡིན་པ། །སྟོབས་སུ་གྱུར་ཕྱིར་ཀུན་གྱིས་ཀྱང༌། །རོལ་མོའི་སྒྲར་བཅས་རྟོགས་པ་བསྐྱེད། །བརྟན་པའི་ཆོ་ག་ཅི་རིགས་སྤྱད། །དེ་ལས་ཤེས་པ་བརྟན་གྱུར་ནས། །ཁ་དོག་ལ་སོགས་སྣང་བ་བྲིའོ། །དེ་ནས་ལས་ཀྱི་རྡོ་རྗེ་དང་བཅས་པས་བསྟོད་པའི་ཚིགས་སུ་བཅད་པ་དང༌། དཀྱིལ་འཁོར་ཆེན་པོ་ལ་བསྐོར་བ་བྱས་ནས། ནུབ་ཀྱི་སྒོ་ནས་ཤར་དུ་བལྟ་བས། མེ་ཏོག་གི་ཕྲེང་བ་དེ་དཀྱིལ་འཁོར་ཆེན་པོར་དོར་བར་བྱ་སྟེ། མ་ཧཱ་པཱུ་ཛྱ་པྲ་ཏཱིཙྪ་བཛྲ་ཧོ་ཞེས་བརྗོད་དེ། སླར་ཡང་བླངས་ཏེ། གཙུག་ཕུད་དུ་བཅིངས་ལ། པྲ་ཏི་གྲྀཧྞ་བཛྲ་ཧོཿ་གང་ལ་བབ་པའི་ལྷ་དེ་ཉིད་ཡི་དམ་ལྷ་རུ་བསྐྱེད་ཅིང་དབོག་གོ །དེ་ནས་མིག་གཉིས་ཨོཾ་དུ་བསམ། །འོད་འཕྲོག་ཁམས་གསུམ་དག་པར་མཐོང༌། །རྡོ་རྗེ་སེམས་དཔའ་དེང་ཁྱོད་ཀྱི། །མིག་འབྱེད་པ་ལ་བརྩོན་པར་བྱ། །རྡོ་རྗེའི་མིག་ནི་བླ་ན་མེད། །ཡེ་ཤེས་མཆོག་ཏུ་གལ་བར་བྱེད། །ཧེ་བཛྲ་པཱ་ཤ །གདོང་གཡོགས་བཀྲོལ་ཏེ། ཨོཾ་བཛྲ་ཙྐྵུ་མ་ཧཱ་མཎྜལ་པྲ་བེ་ཤ་ཡ་ཕཊ། ཆོས་རྣམས་གཟུགས་བརྙན་ལྟ་བུའི་དངོས། །དག་ཅིང་གསལ་ལ་མ་རྙོགས་པར། །གང་རྟོག་ཞིང་ཁམས་རྣམ་དག་མཆོག་བླ་ན་མེད་པའི་གནས་མཆོག་ཡིན། །རྡོ་རྗེ་ཐུགས་རྗེའི་རྒྱུན་གནས་པས། །སྤྲུལ་པའི་དཀྱིལ་འཁོར་རྒྱུན་མི་འཆད། །བདེན་པའི་བྱིན་གྱི་རླབས་ཀྱིས་མཐོང༌། །ཕུན་སུམ་ཚིགས་ཀུན་འདིས་གྲུབ་འགྱུར། །དངོས་གྲུབ་སྒྲུབ་ཕྱིར་དམ་ཚིག་སྐྱོང༌། །གསང་སྔགས་དོན་ལ་བརྩོན་པར་གྱིས། །ཤར་སོགས་སྒོ་བཞི་ནས་བརྩམས་ཏེ། །ཇི་སྲིད་གཙོ་ཚོགས་རིམ་པར་བསྟན། །དེར་རྗེས་རྣལ་འབྱོར་ཐམས་ཅད་ཀྱིས། །མགྲིན་གཅིག་ཏུ་ནི་སྔགས་པ་ཡིས། །བཀྲ་ཤིས་གླུ་དབྱངས་དུ་མར་བཅས། །བུམ་པ་བླངས་ཏེ་དབང་བསྐུར་བྱའོ། །ཇི་ལྟར་བལྟམས་པའི་དུས་ཀྱི་ཚེ། །ལྷ་རྣམས་ཀུན་གྱིས་དབང་བསྐུར་ལྟར། །དེ་ལྟར་དེ་བཞིན་གཤེགས་ཀུན་གྱིས། །རིགས་ཀྱི་བུ་ཁྱོད་དབང་བསྐུར་བྱའོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ཤྲཱི་ས་མ་ཡེ་ཧཱུཾ། ཨ་ཁཾ་བཱི་ར་ཧཱུཾ་
ཞེས་པ་ཆོ་ག་གསུམ་ལས་རིགས་ལྔའི་སྐུར་གསལ་བས། སྔ་མ་བཞིན་དུ་དབང་བསྐུར་བྱ་སྟེ། སངས་རྒྱས་ཀུན་དངོས་ཅོད་པན་དབང༌། །རྫོགས་སངས་རྒྱས་ཉིད་རབ་བསྒྲུབ་ཕྱིར། །ཅོད་པན་མཆོག་གི་དབང་བསྐུར་བས། །འཁོར་ལོས་སྒྱུར་རྒྱལ་མགོན་དབང་བསྐུར། །ཨོཾ་ལཱཾ་མཱཾ་པཱཾ་ཏཱཾ་ཧཱུཾ། རཏྣ་མུ་ཀུ་ཊ་ཨ་བྷི་ཥིཉྩ་ཧཱུཾ། རྡོ་རྗེ་འདི་ནི་རྡོ་རྗེ་ཆེ། །སངས་རྒྱས་ཀུན་གྱི་བྱིན་གྱིས་བརླབས། །སངས་རྒྱས་ཀུན་དུ་རབ་བསྒྲུབ་ཕྱིར། །རྡོ་རྗེ་མཆོག་གིས་དབང་བསྐུར་བྱའོ། །ཨོཾ་སརྦ་ཏ་ཐཱ་ག་ཏ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་ཨ་བྷི་ཥིཉྩ་མི། ཆོས་ཀྱི་དྲིལ་བུ་བླ་མེད་དོན། །སྟོང་ཉིད་ཡེ་ཤེས་སྒྲ་སྒྲོགས་པའི། །ཐམས་ཅད་སྟོང་ཉིད་དོན་སྟོན་པའི། །དྲིལ་བུའི་དབང་བསྐུར་བླ་ན་མེད། །ཨོཾ་སརྦ་ཏ་ཐཱ་ག་ཏ་ཤབྷ་པ་ཏ་ལེ་དྷརྨ་དྷཱ་ཏུ་ཨ་བྷི་ཥེ་ཀ་ཏ་ཤྲཱི་ས་མ་ཡེ་ཧཱུཾ། དེ་ནས་རྟག་པ་ཆེན་པོའི་དོན། །མཉམ་ཉིད་བདེ་བ་ཆེན་པོའི་སྐུར། །རྡོ་རྗེའི་རྒྱལ་པོ་བྱིན་གྱིས་བརླབས། །ངེས་པར་མ་ཡེངས་རྒྱུན་དུ་བསྒོམས། །ཨོཾ་བཛྲ་ཨ་དྷི་པ་ཏི་སྟྭཾ། ཨོཾ་བཛྲ་ཨ་བྷི་ཥིཉྩ་མཾ། ཏིཥྛ་བཛྲ་ས་མ་ཡ་ཧཱུཾ། ཨོཾ་བཛྲ་སཏྭ་སྟྭཾ། བཛྲ་ཨ་བྷི་ཥེ་ཀ་ཏ་ཤྲཱིས་མ་ཡ་ཧཱུཾ། ལྷག་པའི་ལྷ་ནི་གང་གང་གི །དེ་དང་དེ་ཡི་མཚོན་བྱེད་བརྡ། །ཤྲཱི་ཡི་སྒྲ་ཡིས་མཛེས་བྱས་མིང༌། །མ་འོང་ས་ཞིང་དུ་ལུང་སྟོན་འགྱུར། །བརྟུལ་ཞུགས་དབུགས་ཕྱུང་ལུང་བསྟན་པས།། ཆོ་གའི་རྗེས་འགྲོར་གསུངས་པ་སྟེ། །བརྟུལ་ཞུགས་སྐུ་གསུང་ཐུགས་ཡིན་ཏེ། །ཕྱག་རྒྱ་གསུམ་གྱི་ཐུགས་རྒྱས་གདབ། །ཕྱག་རྒྱ་ཆེན་པོར་གང་གྱུར་པ། །རྡོ་རྗེ་དྲིལ་བུ་བྱིན་རླབས་གཏད། །ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ཏིཥྛ་ཨེ་ཥ་སྟྭཾ་དྷ་ར་ཡ་མི་ཧི་ཧི་ཧི་ཧི་ཧོ་ཧཱུཾ་ཨོཾ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་བདག་སྙེམས་བདག་མཛོད་ཅིག །ཧོཿ་ཆོས་ཀྱི་དྲིལ་བུ་གཟུང་བར་བྱའོ། །འདི་དེ་སངས་རྒྱས་ཐམས་ཅད་ཀྱི། །ཤེས་རབ་དབྱངས་ཀྱི་རྗེས་འགྲོ་བའི། །རྟག་ཏུ་ཁྱོད་ཀྱིས་གཟུང་བྱ་སྟེ། །བྱང་ཆུབ་མཆོག་ཏུ་རྒྱལ་བས་གསུངས། །ཆོས་ཀྱི་དྲིལ་བུ་དཀྲོལ་བར་བྱའོ། །སྲིད་པ་རང་བཞིན་གྱིས་དག་ཕྱིར། །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་པའི་སེམས་དཔའ་མཆོག །སྲིད་པ་མཆོག་ཏུ་སྒྲུབ་པར་བྱེད། །འཁོར་བའི་བདེ་བ་ཤིན་ཏུ་ཆུང༌། །དུཿ་ཁ་ཆེན་པོ་དག་བྱའི་ཕྱིར། །མཆོག་ཏུ་བདེ་
བ་དམ་པའི་ཐབས། །དམ་ཚིག་འདི་དག་རྟག་ཏུ་སྐྱོངས། །འདོད་པའི་ལོངས་སྤྱོད་ཐམས་ཅད་ལ། །ཇི་ལྟར་བདེ་བ་བརྟེན་བཞིན་དུ། །རང་གི་ལྷ་ཡི་སྦྱོར་བ་ཡིས། །བདག་དང་གཞན་ལ་མཆོད་པར་བྱའོ། །ཇི་སྲིད་འཁོར་བའི་གནས་མཆོག་ཏུ། །ཐབས་མཁས་མཆོག་ཆེན་བཞུགས་པའི་ཚེ། །དེ་སྲིད་མཚུངས་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །ཤེས་རབ་ཕ་རོལ་ཕྱིན་མཆོག་ཐབས། །བསོད་ནམས་བྱིན་རླབས་ཀྱིས་བསྒྲུབས་པའི། །དམ་ཚིག་འདི་དག་རྟག་ཏུ་བསྲུངས། །དངོས་གྲུབ་ཐམས་ཅད་ཕུན་སུམ་ཚོགས། །ཕྱག་རྒྱ་ཆེན་པོའི་བརྟུལ་ཞུགས་མཆོག །སངས་རྒྱས་ཀུན་གྱི་གནང་བ་སྦྱིན། །དེ་ནས་བདུད་དཔུང་འཇོམས་བྱེད་མཆོག །འབར་བ་ཆེན་པོའི་སྐུ་དབང་བསྐུར། །གྲི་གུག་ལ་སོགས་ཕྱག་མཚན་བསྣམས། །ཡི་གེ་བཅུ་པའི་གསང་སྔགས་མཆོག །མངོན་པར་བཟླས་ཤིང་རིམ་གྱིས་གཏད། །སྟོད་གཡོགས་སྨད་གཡོགས་དག་ལ་ཡང༌། །ཉེ་བའི་སྙིང་པོས་བྱིན་བརླབས་ལ། །ཐེག་ཆེན་དོན་ལྡན་དབང་བསྐུར་ཏེ། །སྦྲུལ་སོགས་ཐོད་པའི་ཕྲེང་བ་ལ། །ཕྲེང་བའི་སྔགས་ཀྱིས་བྱིན་བརླབས་ལ། །ལོངས་སྤྱོད་རྫོགས་སྐུར་དབང་བསྐུར་རོ། །གསུང་གི་བརྟུལ་ཞུགས་བརྟན་པ་ནི། །གསང་སྔགས་སྒྲུབ་དང་ཉན་པ་དང༌། དམ་ཚིག་རྗེས་གནང་མཆོད་པ་གནང། །ལས་བཞི་གྲུབ་ཆེན་བརྒྱད་སྒྲུབ་གནང༌། །ཆོ་ག་ཇི་བཞིན་རྒྱས་པར་གཏད། །དེ་ནས་རྡོ་རྗེ་སློབ་དཔོན་མཆོག །འཁོར་ལོས་སྒྱུར་བར་དབང་བསྐུར་ཏེ། །པདྨའམ་སེང་གེའི་ཁྲི་སྟིང་དུ། །རྒྱལ་པོར་དབང་བསྐུར་དོན་ཕྱིར་གཞག །སྟེང་ནས་རིན་ཆེན་གདུགས་དཀར་དབུབ། །དེས་ཀྱང་ཇི་བཞིན་གསོལ་བ་གདབ། །བྱང་ཆུབ་རྡོ་རྗེ་སངས་རྒྱས་ལ། །ཇི་ལྟར་མཆོད་ཆེན་གསོལ་བཏབ་ལྟར། །བདག་ཀྱང་ངེས་པར་གྲོལ་བའི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །དེ་ཡི་རྗེས་ལ་རྣལ་འབྱོར་བའི། །ཚོགས་ཀྱི་སྔགས་བཅས་བཀྲ་ཤིས་དང༌། །བུམ་པ་ལ་སོགས་ཀྱིས་དབང་བསྐུར། །ཁྱད་པར་དུ་ཡང་རྡོ་རྗེའི་མིང༌། །ཀུན་གྱི་བཀྲ་ཤིས་བརྗོད་ནས་ནི། །དབང་རྣམས་ཇི་ལྟ་བར་ཡང་བསྐུར། །ཀུན་གྱིས་ཚིག་ཏུ་རྗོད་བྱེད་པ། །ཨོཾ་ནམ་མཁའ་ལས་བྱུང་མཚན་ལྡན་ཕྱིར། །ཐོག་མ་ཐ་མ་མེད་པའི་མཆོག །རྡོ་རྗེ་སེམས་དཔའ་ཆེ་རང་བཞིན། །སེམས་དཔའི་མཆོག་ཏུ་དེང་གྲུབ་མཛོད། །ཀུན་མཆོག་
དངོས་གྲུབ་ཆེན་པོ་སྟེ། །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་པ་ཀུན་གྱི་རྒྱལ། །མི་འགྱུར་མཆོག་ཏུ་གྲུབ་པར་མཛོད། །ཉེས་པ་མི་མངའ་རྟག་པ་ཁྱོད། །འདོད་ཆགས་ཀུན་གྱི་རྗེས་ཆགས་པ། །འདོད་ཆགས་ཆེན་པོ་དགའ་བ་ཆེ། །བཅོམ་ལྡན་དེ་ཉིད་གྲུབ་པར་མཛོད།། ཤིན་ཏུ་དག་པ་ཀུན་གྱི་མཆོག །གདོང་ནས་གྲོལ་བ་དེ་བཞིན་གཤེགས། །ཀུན་དུ་བཟང་པོ་ཀུན་བདག་ཉིད། །བྱང་ཆུབ་མཆོག་ཏུ་བདག་གྲུབ་མཛོད། །དངོས་གྲུབ་ཆེན་པོ་ཀུན་གྱི་མཆོག །རྒྱལ་བ་བདག་ཉིད་ཆེ་རང་བཞིན། །གྲུབ་པའི་རྡོ་རྗེ་ཆེར་བསྟོད་པ། །རྡོ་རྗེ་སྙེམས་ཚུལ་བདག་མཛོད་ཅིག། དེ་ནས་གཞལ་ཡས་ཁང་པ་དང༌། །ལྷ་ཡི་མཚན་ཉིད་རྣམ་དག་ལམ། །མྱ་ངན་འདས་དང་འཁོར་བའི་དངོས། །མ་བཅོས་དོན་དམ་རང་བཞིན་མཆོག །སྐལ་བཟང་དེ་ལ་གསལ་བར་བསྟན། །དམ་ཚིག་མཆོག་ཏུ་གྲུབ་པར་བྱེད། །དེ་ནས་དབེན་ཞིང་བདེར་གནས་པས། །ཚོགས་ཀྱི་མཆོད་པ་ལ་སོགས་ཀུན། །ཉེ་བར་སྟ་གོན་གནས་བྱས་ཏེ། །རང་བཞིན་དག་ཅིང་སྦྱངས་པས་མཛེས། །ཆོས་ཀུན་མཚན་ཉིད་བཤད་པ་དེས། །ནམ་གྱི་གུང་ལ་མཉམ་སྦྱར་ནས། །སངས་རྒྱས་ཀུན་གྱིས་བྱིན་བརླབས་པའི། །དྲི་མེད་བདུད་རྩིར་བྱིན་བརླབས་པའི། །ལྕེ་ཡི་པད་སྟེང་རྡོ་རྗེའི་རྩེར། །བདེ་བ་ཆེན་པོའི་སྙིང་པོར་སྦྱིན། །ངག་གི་སྒྲར་བཅས་དམ་ཚིག་བསྒྲགས། །དེ་ནས་རིགས་དང་རྒྱུད་སྦྱངས་ལ། །བརྡ་དང་གར་ལ་སོགས་པ་ཡིས། །ནམ་ཕྱེད་དུས་སུ་བུམ་དབང་བསྐུར། །ཕྱི་རོལ་སྦྱོར་བ་དག་པ་དང༌། །རྩ་གནས་རླུང་གི་སྦྱོར་བ་མཁས། །བདེ་བ་ཆེ་ལ་ལྷག་པར་དང༌། །དེ་ལ་སྒྱུ་མའི་དཀྱིལ་འཁོར་དུ། །ཡེ་ཤེས་རྟོགས་ཕྱིར་དབང་བསྐུར་མཆོག །བག་ཡངས་ཉམ་ང་བློས་ཐོངས་ཚེ། །སྐད་ཅིག་སྐད་ཅིག་དབྱེར་མེད་པར། །བདེ་བ་ཆེན་པོའི་བདག་ཉིད་སད། །མ་ནིང་མཁན་པོ་སྒྲ་མཁན་དང༌། །ཚད་མ་རྟོག་གེའི་སྤྱོད་ཡུལ་མིན། །དགག་ཅིང་སྒྲུབ་ལས་འདས་པས་ན། །བརྗོད་བྲལ་ལྷན་ཅིག་སྐྱེས་དགར་གསུངས། །འདི་དག་བདེ་བར་སྐྱོང་བྱེད་རྣམས། །བསླབ་བཞི་འདུལ་སྒོམ་དམ་ཚིག་ཀུན། །ངེས་པར་བསྲུང་ཕྱིར་སེམས་བདག་ཉིད། །བྱང་ཆུབ་མཆོག་ཏུ་རྒྱལ་བ་བཞེད། །དཀོན་མཆོག་གསུམ་གྱི་དགྲ་བསད་ཅིང༌། །འདོད་ལ་ངེས་པར་ཆགས་ཕྱིར་སྤྱད། །
གཞན་གྱི་ལོངས་སྤྱོད་བག་མེད་བླངས། །དངོས་གྲུབ་བརྫུན་སོགས་སྒྱུ་མར་སྨྲ། །ཚོགས་དྲུག་བདེ་ཆེན་ལོངས་སྤྱོད་སྤྱད། །གྲུབ་པ་ལྔ་དང་ལྕགས་ཀྱུ་ལྔ། །ལོངས་སྤྱོད་ལྔ་སོགས་རྒྱུན་དུ་སྤྱད། །རྟག་ཏུ་སེམས་ལས་དངོས་གྲུབ་བསྒྲུབས། །དུས་གསུམ་རྟག་པའི་སྐུ་རུ་གནས། །དེ་ལྟར་དེ་བཞིན་གཤེགས་གྱུར་ནས། །སངས་རྒྱས་སྲས་སུ་ལུང་བསྟན་ཏེ། །བུ་ལ་སྟོན་པའི་ཕྱག་མཚན་བསྐོན། །གཡས་པ་སྐྱབས་སྦྱིན་གཡོན་མཉམ་གཞག །སེམས་ཅན་དོན་སྒྲུབ་ཚུལ་དུ་ལངས། །དེ་ལ་མགྲིན་ཅིག་ཚིག་འདི་བརྗོད། །ཨོཾ་ངས་ཁྱོད་འདི་ལྟར་ལུང་བསྟན་ཏེ། །སྲིད་པའི་དན་འགྲོ་རྣམས་ལས་བཏོན། །སྲིད་པ་མཆོག་ཏུ་བསྒྲུབ་པའི་ཕྱིར། །རྡོ་རྗེ་སེམས་དཔའ་དེ་བཞིན་གཤེགས། །ཨོཾ་ཡ་མཱནྟ་ཀྲྀཏ་ཧཱུཾ་མཾ་བྷུར་བྷུ་ཝ་སྭཿ། དེ་ནས་དབུགས་དབྱུང་སྦྱིན་བྱ་སྟེ། །དེ་རིང་ཁྱོད་བདག་ལེགས་པར་རྙེད། །མི་ཡི་སྲིད་པ་དོན་དང་བཅས། །སངས་རྒྱས་ཀུན་གྱི་རིགས་སུ་སྐྱེས། །སེམས་ཉིད་རང་བྱུང་བ་ཡི་གཏེར། །ཕུན་སུམ་ཚོགས་པའི་ཉེ་བ་གནས། །གསང་སྔགས་མཉམ་མེད་སེམས་ལས་གྲུབ། །ཟག་པ་མེད་པའི་དཀྱིལ་འཁོར་ཆེ། །མཐོང་བའམ་ནི་ཞུགས་གྱུར་པས། །སྡིག་པ་ཀུན་ལས་རྣམ་པར་གྲོལ། །བྱང་ཆུབ་སེམས་མཆོག་རྨད་བྱུང་རྙེད། །འགྲོ་བ་ཀུན་གྱི་སྐྱབས་གནས་མཆོག །བདུད་བཞི་འཇོམས་ཤིང་དུཿ་ཁ་ཡི། །སྐྱེ་རྒ་ན་འཆི་འཇིག་པར་བྱེད། །སྲིད་པའི་ངོ་བོ་ཉིད་དག་པའི། །ཕྱག་ན་རྡོ་རྗེ་དེང་གྱུར་ཏོ། །དེ་ནས་དེའི་སེམས་ཀྱི་མཚན་ཉིད་བསྟན་པར་བྱ་སྟེ། བྱང་ཆུབ་ཆེན་པའི་རྒྱུར་གནས་པའི། །མདོར་ན་ཕུང་པོ་ལྔ་རྣམས་ནི། །སངས་རྒྱས་ལྔར་ནི་རབ་ཏུ་གྲགས། །སྐྱེ་མཆེད་ཁམས་རྣམས་མང་པོ་ཀུན། །ལྷ་དང་ལྷ་མོའི་དཀྱིལ་འཁོར་མཆོག །ཡེ་ནས་རང་བྱུང་ཡེ་ཤེས་ཆེའོ། །བདག་ཉིད་ཆེན་པོ་རྟག་པའི་ལྷ། །མ་བསྒྲུབས་རྡོ་རྗེ་སེམས་དཔར་གནས། །དེ་ནས་བློ་ལྡན་སློབ་མ་ཡིས། །བདག་ཉིད་མཆོག་ཏུ་གྱུར་ཤེས་ནས། །བླ་མ་ལ་ནི་འབྱོར་པའི་མཆོག །ཅི་ནུས་དད་པས་དབུལ་བར་བྱའོ། །དེ་ནས་ཚོགས་ཀྱིས་མཆོད་པ་དང༌། །ཞི་བའི་སྦྱིན་སྲེག་བརྒྱའམ་སྟོང༌། །འབྱུང་པོ་ཀུན་ལ་གཏོར་མས་མཆོད་།སྐྱེ་བོ་གཞན་ཡང་མགུ་བྱ་ཡི། །ལོངས་སྤྱོད་ཅི་རིགས་མཁས་པས་སྦྱིན། །དེ་ནས་བཟོད་གསོལ་
བཤགས་པ་དང༌། །ཡེ་ཤེས་དཀྱིལ་འཁོར་གཤེགས་སུ་གསོལ། །རྡུལ་ཚོན་མཚན་མ་ཀུན་བསྡུས་ཏེ། །བསྔོ་བདག་བྱས་ཆུ་བོར་དོར། །བླ་མ་མཉེས་བྱས་ཅི་རིགས་གཤེགས། །མཐར་ནི་དམ་ཚིག་མཆོག་གིས་བསྟན། །བདག་གཞན་དོན་རྣམས་རབ་བསྒྲུབ་ཕྱིར། །རྟག་ཏུ་བདེ་བའི་མཆོག་གནས་པས། །རང་གི་དམ་ཚིག་བསྲུང་བར་གྱིས། །དཔལ་རྡོ་རྗེ་འཇིགས་བྱེད་ཀྱི་དམ་ཚིག་སྒྲུབ་པར་བྱེད་པའི་ཆོ་ག །དངོས་གྲུབ་མཉེས་པའི་སློབ་དཔོན་ཆེན་པོ་དཔལ་ལ་ལི་ཏ་བཛྲའི་ཞལ་སྔ་ནས་མཛད་པ་རྫོགས་སོ།། །།གྲུབ་པ་བརྙེས་པའི་པཎྜི་ཏ་ཆེན་པོ་ཨ་མོ་གྷ་བཛྲ་དང༌། །ལོ་ཙཱ་བ་མར་པ་དགེ་བསྙེན་ཆོས་འབར་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།