འཇིག་རྟེན་ལས་འདས་པའི་མེ་ལྷ་བསྐྱེད་པའི་ཆོ་ག
དེ་ནས་མེ་ལྷ་དེའི་སྙིང་གར་ཡང་རུང་སྟེ། བཅོམ་ལྡན་འདས་རྡོ་རྗེ་འཇིགས་བྱེད་ཇི་སྐད་དུ་བཤད་པའི་སྐུ་མདོག་དང་ཕྱག་མཚན་དུ་ལྡན་པ་བསྒོམ་པ་ནི་ཉི་མའི་དཀྱིལ་འཁོར་ལ་གནས་པའི་ཡི་གེ་ཧཱུཾ་ཡོངས་སུ་གྱུར་པ་ལས་ཞལ་དགུ་པ། ཞབས་བཅུ་དྲུག་པ། ཕྱག་སུམ་ཅུ་རྩ་བཞི་དང་ལྡན་པའོ། །རྩ་བའི་ཞལ་མ་ཧེའི་གདོང་ཅན་ནོ། །རྭ་གཡས་པའི་ཕྱོགས་ཀྱི་ཞལ་གསུམ་ནི་སྔོན་པོ་དང༌། དམར་པོ་དང་སེར་པོ་ཤིན་ཏུ་ཁྲོས་པར་བྱའོ། །རྭ་གཡོན་པའི་ཕྱོགས་ཀྱི་ཞལ་གསུམ་ནི་དཀར་པོ་དང༌། ནག་པོ་དང༌། དུད་ཀའོ། །རྭ་གཉིས་ཀྱི་བར་གྱི་ཞལ་ནི་དམར་པོ། དེའི་སྟེང་གི་ཞལ་ནི་སེར་བ་ཅུང་ཟད་ཙམ་ཁྲོ་བ་དང་བཅས་པར་བསམ་པར་བྱའོ། །ཕྱག་གཡས་པ་རྣམས་ལ་གྲི་གུག་དང༌། ཐག་མདུང་དང༌། གཏུན་ཤིང་དང༌། གཏུབ་མཚོན་དང༌། རྡོ་རྗེ་རྩེ་གཅིག་པ་དང༌། སྟ་རེ་དང༌། མདའ་དང༌། ལྕགས་ཀྱུ་དང༌། དབྱུག་ཏོ་དང༌། ཁ་ཊྭཱཾ་ག་དང༌། འཁོར་ལོ་དང༌། རྡོ་རྗེ་ཐོ་བ་དང༌།
རལ་གྲི་དང༌། ཅང་ཏེའུ་བསྣམས་པའོ། །ཕྱག་གཡོན་པ་རྣམས་ལ་ནི་ཐོད་པ་དང༌། ཨ་ཀོ་ཙེ་དང༌། ཕུབ་དང༌། རྐང་པ་དང༌། ཞགས་པ་དང༌། གཞུ་དང༌། རྒྱུ་མ་དང༌། དྲིལ་བུ་དང༌། ལག་པ་དང༌། དུར་ཁྲོད་ཀྱི་རས་དང༌། གསལ་ཤིང་དང༌། མེ་ཐབ་དང༌། ཚོད་ཚལ་དང༌། སྡིགས་མཛུབ་དང། འཕན་རྩེ་གསུམ་དང༌། རླུང་གི་རས་རྣམས་སོ། །ཕྱག་དང་པོ་གཉིས་ཀྱིས་ནི་གླང་པོ་ཆེའི་པགས་པ་འཛིན་པ་བསམ་པར་བྱའོ། །ཞབས་གཡས་པ་རྣམས་ཀྱིས་ནི་མི་དང༌། མ་ཧེ་དང༌། བོང་བུ་དང༌། རྔ་མོ་དང༌། གླང་དང༌། ཁྱི་དང༌། ལུག་དང༌། ཝ་རྣམས་མནན་པའོ། །ཞབས་གཡོན་པ་རྣམས་ཀྱིས་ནི་བྱ་རྒོད་དང༌། འུག་པ་དང༌། བྱ་རོག་དང༌། སེང་གེ་དང༌། ཁྲ་དང༌། བྱེ་ཆེན་དང༌། སྲིན་བྱ་དང༌། ཁྲུང་ཁྲུང་རྣམས་མནན་པར་བསྒོམ་པར་བྱའོ། །དེ་ནས་སྔགས་འདིས་ཡེ་ཤེས་སེམས་དཔའ་སྤྱན་དྲངས་པར་བྱ་སྟེ། ཨོཾ་ཧྲཱིཿ་བྷོ་བྷོ་མ་ཧཱ་ཀྲོ་དྷ་ཨཱ་གྩྪ་ཡ་ཨཱ་གྩྪ་ཡཱ་སྨ་ད་པཱུ་ཛ་པྲ་ཏི་གྲྀཧྞ་པྲ་སཱ་དྷ་མེ་དྷི་མན་ཀུ་རུ་ཤ་ཏྲཱུཾ་མཱ་ར་ཡ་ཧཱུཾ་ཕཊ། དེ་ནས་གསང་གཏོར་བྱས་ལ་དགུག་པ་དང༌། གཞུག་པ་དང༌། བཅིང་བ་དང༌། གཉིས་སུ་མེད་པར་བྱ་སྟེ། འཇིག་རྟེན་ལས་འདས་པའི་མེ་ལྷ་བསྐྱེད་པའི་ཆོ་གའོ། །