རྣལ་འབྱོར་བཞིའི་དེ་ཁོ་ན་ཉིད་ཅེས་བྱ་བ་རང་བྱིན་གྱིས་བརླབ་པའི་མན་ངག།
དཔལ་འཛིན།
རྣལ་འབྱོར།
རྒྱ་གར་སྐད་དུ། སྭ་ཨ་དྷིཥྛ་ན་ཙ་ཏུ་ཡོ་ག་ཏད་ཏྭ་ཨུ་པ་དེ་ཤ་ནཱ་མ། བོད་སྐད་དུ། རྣལ་འབྱོར་བཞིའི་དེ་ཁོ་ན་ཉིད་ཅེས་བྱ་བ་རང་བྱིན་གྱིས་བརླབ་པའི་མན་ངག །བཅོམ་ལྡན་འདས་གཤིན་རྗེ་གཤེད་དམར་པོ་ལ་ཕྱག་འཚལ་ལོ། །ཤིན་ཏུ་སྤྲོས་མེད་ཐུགས་རྗེས་བརླན། །དཔལ་ལྡན་བདེ་ཆེན་ཕྱག་འཚལ་ཏེ། །རང་བྱིན་བརླབས་པའི་རིམ་པ་ནི། །བླ་མའི་དྲིན་གྱིས་གསལ་བར་བཤད། །བླ་མ་ལ་གུས་དམ་ཚིག་ཅན། །སྙིང་རྗེ་སེམས་ཅན་དོན་སེམས་པའི། །སྒྲུབ་པོས་དབེན་པའི་གནས་སུ་ནི། །དངོས་གྲུབ་དམ་པ་བསྒྲུབ་པར་བྱ། །
རྣལ་འབྱོར་དམ་པ་བཞིར་བཤད་དོ། །དབྱིབས་དང་སྔགས་དང་བྱིན་རླབས་དང༌། །རྣམ་དག་ཡེ་ཤེས་ཞེས་བྱ་བས། །སྲིད་པའི་འཆིང་བ་ལས་གྲོལ་འགྱུར། །རིམ་པའམ་ཡང་ན་ཅིག་ཅར་དང༌། །སངས་རྒྱས་རྗེས་དྲན་བསྒོམ་བྱ་སྟེ། །གོང་བུར་གནས་པའི་བདག་ཉིད་ཀྱིས། །ལུས་འདི་གཤིན་རྗེ་གཤེད་དམར་པོ། །འདི་ནི་བེམས་པོ་མ་ཡིན་ལ། །ཤ་དང་ཁྲག་ཀྱང་དེ་མ་ཡིན། །བདེན་མིན་བརྫུན་པ་མ་ཡིན་ནོ། །ཐ་མལ་མ་ཡིན་ཡེ་ཤེས་སྐུ། །དང་ཞིང་གསལ་ལ་རྙོག་པ་མེད། །ཕུན་ཚོགས་ཡོན་ཏན་ཀུན་གྱི་རྟེན། །འདི་ནི་བདག་ལས་ཐ་དད་མེད། །སྤང་ཞིང་བསྣན་དུ་ཅུང་ཟད་མེད། །མ་འཁྲུལ་བླ་མའི་བཀའ་དྲིན་གྱིས། །གདོད་ནས་གྲུབ་པར་ཤེས་བྱ་སྟེ། །ལུས་ཅན་ཀུན་གྱིས་འདི་མཐོང་དང༌། །གང་གིས་ཐོས་དང་དྲན་ཙམ་གྱིས། །བསམ་པ་རྫོགས་མཛད་ཟུང་འཇུག་སྐུ། །དེ་ལྟར་བདག་ཉིད་གསལ་བར་བལྟ། །བདག་གི་ཐུགས་ཀའི་ས་བོན་ལས།། ས་གསུམ་འོད་ཟེར་རབ་འཕྲོས་ནས། །མཐོང་ཐོས་དྲན་པའི་སྤྱོད་ཡུལ་དུ། །མ་ལུས་ལུས་པ་མེད་པ་ཡིན། །བརྟན་གཡོའི་དངོས་པོ་ཇི་སྙེད་པ། །དཔལ་ལྡན་གཤིན་རྗེ་གཤེགས་དམར་པོ། །ཁམས་གསུམ་མིན་འདི་གཞལ་མེད་ཁང༌། །སྲོག་ཆགས་མིན་འདི་རྒྱལ་བ་རྣམས། །ཕུང་པོ་ཁམས་དང་སྐྱེ་མཆེད་མིན། །ཁམས་གསུམ་མིན་འདི་དཀྱིལ་འཁོར་པ། །རང་བཞིན་འོད་གསལ་ངོ་བོ་ཉིད། །མེ་ལོང་ནང་གི་གཟུགས་བརྙན་ལྟར། །སྒྱུ་མ་ལྟ་བུའི་ཏིང་ངེ་འཛིན། །རྨི་ལམ་ཇི་བཞིན་གོམས་བྱས་ཏེ། །བར་མའི་སྲིད་པ་རབ་སྦྱོར་བས། །དེ་བཞིན་གཤེགས་པའི་དངོས་གྲུབ་ཐོབ། །དབྱིབས་ཀྱི་རིམ་པ་སྟེ་རྣལ་འབྱོར་རོ། །
རྗེས་སུ་རྣལ་འབྱོར།
ལུས་ཅན་རྣམས་ཀྱི་སྲོག་གྱུར་པ། །རླུང་ཞེས་བྱ་བ་ལས་ཀུན་བྱེད། །འདི་ནི་རྣམ་ཤེས་བཞོན་པ་སྟེ། །སྲིད་དང་རྣམ་གྲོལ་ཐོབ་བྱེད་པའོ། །བྱ་དྲ་དང་ནི་བྷ་ར་ཏ། །མུ་ས་ལ་དང་ཨ་ཏྲ་ཏས། ཐོག་མར་ལུས་ནི་སྤྱང་བར་བྱ། །ལུས་སྦྱངས་པས་ནི་རྩ་དང་རླུང། །ལེགས་པར་དག་པ་ཉིད་དུ་འགྱུར། །སྤྲོས་པ་ཐམས་ཅད་སྤངས་ནས་སོ། །མཉམ་པར་གཞག་པས་དངོས་གྲུབ་ཐོབ། །དགང་བའི་སྦྱོར་བས་དགང་བྱ་སྟེ། །དགུག་པའི་སྦྱོར་བས་དགུག་པར་བྱ། །ཞི་བ་ཡིས་ནི་ཞི་བ་ཉིད། །རེངས་པའི་སྦྱོར་བས་མི་གཡོའོ། །སྦྱོར་བ་བཞི་ཡིས་
བདག་ཉིད་ཀྱིས། །དངོས་གྲུབ་ཆེན་པོ་སྐྱེ་བར་འགྱུར། །རྩ་གསུམ་ཟུར་གསུམ་སྦྱངས་ནས་ནི། །ཅུང་ཟད་སྤྱོད་ལམ་དལ་བར་བྱ། །དབང་པོ་ངལ་ཞིང་དུབ་པའི་ཚེ། །སེམས་ནི་རྩེ་གཅིག་ཉིད་དུ་གཞག །དུ་བ་ལ་སོགས་ལྔ་པོ་ནི། །སྐད་ཅིག་ཉིད་ལ་འཆར་བར་འགྱུར། །མངོན་ཤེས་རྫུ་འཕྲུལ་ལ་སོགས་པ། །གྲོལ་བའི་དངོས་གྲུབ་གོ་འཕང་འཐོབ། །རླུང་གི་གཡོ་བས་འཁོར་བ་སྟེ། །མི་གཡོ་བས་ནི་མྱ་ངན་འདས། །སྙིང་གི་ཆུ་སྐྱེས་དབུས་སོགས་པས། །མི་གནས་མྱ་ངན་འདས་པ་ཐོབ། །རྣལ་འབྱོར་པས་ནི་མཉམ་གཞག་པས། །ནང་པར་བྱ་རོག་མི་གྲག་པར། །འཇུག་པའི་རླུང་ནི་གང་ཡིན་ལ། །སྟོང་ཕྲག་གཅིག་ནི་བགྲང་བར་བྱ། །སྒྲུབ་པོས་སྒྲ་དང་བྲལ་བ་ནི། །འབུམ་ཕྲག་གཅིག་ནི་རྫོགས་པ་ན། །ཚེ་ཟད་པ་ཡང་ལོ་ལྔ་རུ། །འཚོ་འགྱུར་འདི་ལ་ཐེ་ཚོམ་མེད། །སྙིང་གའི་ཧཱུཾ་ཡིག་དཀར་པོ་ལ། །ཡུལ་སོགས་དམིགས་པར་མི་བྱེད་པས། །རླུང་གི་སྦྱོར་བས་གོམས་བྱེད་ན། །མངོན་པར་ཤེས་པ་འཐོབ་པར་འགྱུར། །རྣམ་ཤེས་གོང་དུ་འཕོ་བ་ནི། །འཆི་བའི་དུས་ལ་བབ་པའི་ཚེ། །བུ་ག་རྣམས་སུ་སོན་པའི་རྩ། །ཡི་གེ་རྣམས་ཀྱིས་དགབ་པར་བྱ། །ཨཱ་ལི་ཀཱ་ལིའི་རླུང་གིས་ནི། །བུ་གའི་རླུང་ནི་སྤྱང་བར་བྱ། །སྙིང་གའི་ཧཱུཾ་ཡིག་ཤེས་དང་སྦྱར། །ཕྱེད་དང་གཉིས་ཀྱི་ཡི་གེ་ནི། འོག་དང་སྟེང་དུ་བཞག་པ་ལ། །དེ་ཡི་འོག་གི་ཆ་རླུང་གིས། །ས་བོན་སྟེང་འོག་བལྟས་པ་ཡིས། །རླུང་གི་ས་བོན་གཉིས་གཞག་པས། །རྣལ་འབྱོར་ལྡན་པས་ཁ་སྦྱོར་བཅིང༌། །ཡི་གེ་ཕྱེད་དང་གཉིས་ཀྱི་སྔགས། །ཉི་ཤུ་རྩ་གཅིག་རིམ་པར་བརྗོད། །རླུང་ནི་རྣམ་ཤེས་བཞོན་པ་སྟེ། །གང་དང་གང་དུ་བགྲོད་པ་ཡི། །རླུང་ནི་སྒོ་རུ་བརྩམས་པས་ཏེ། །དགུག་པ་ལྡོག་པའི་སྦྱོར་བ་ཡིས། །དེ་ལྟར་སྦྱངས་པའི་གོམས་པ་ལས། །གྲོལ་བའི་དངོས་གྲུབ་ཐོབ་པའོ། །སྒོ་ཡི་བྱེ་བྲག་བཤད་པར་བྱ། །འདོད་ཁམས་བདེ་འགྲོ་ལྟ་བ་གནས།། གཟུགས་ཁམས་སྨིན་མཚམས་ཐིག་ལེ་ལས། །ཚངས་པའི་སྒོ་ནས་གཟུགས་མེད་དོ། །དེ་ནི་མཐོ་རིས་བྱེད་པའོ། །སྣ་ནས་གནོད་སྤྱིན་གནས་སུ་སྐྱེ། །རྣ་བ་ལས་ནི་མི་འམ་ཅི། །མིག་ལས་མི་ཡི་དབང་པོར་འགྱུར། །གཅིན་གྱི་སྒོ་ལས་དུད་འགྲོར་འགྱུར། །བཤང་བ་ལས་ནི་དམྱལ་བར་འགྱུར།།
བདེ་འགྲོ་ལས་ནི་གཞན་དུ་འགྲོ། །དེ་ལྟར་མ་ནུས་སྟོབས་ཆུང་བ། །རྣམ་ཤེས་བླ་མར་འཕོ་བ་ནི། །སྤྲོས་པ་ཐམས་ཅད་བཅད་ནས་ནི། །རྒྱལ་སྲས་ལམ་ལ་གཏང་བར་བྱ། །ལུས་ནི་ལེགས་པར་བསྲུང་བར་བྱ། །ཡང་ན་སེང་གེའི་ཉལ་ཐབས་བྱ། །རྣམ་སྨིན་ལས་གྲུབ་ཕུང་པོ་འདི། །བླ་མ་ལྷ་དང་འབྱུང་པོ་ལ། །སྟོས་པ་མེད་པར་གཏང་བར་བྱ། །མཆོག་གི་སྒོ་ནི་གསལ་པོར་དབྱེ། །སྙིང་གི་ཆུ་སྐྱེས་པདྨོ་ཡི། །ཧཱུཾ་ལས་རྣམས་ཤེས་བསྟིམ་པར་བྱ། །སྤྱི་བོར་བླ་མ་ལྷག་པའི་ལྷ། །དུས་གསུམ་བདེ་གཤེགས་རོ་གཅིག་པ། །མཆོད་སོགས་བྱས་ལ་གསོལ་བ་གདབ། །དེ་ནས་རླུང་གི་སྦྱོར་བ་ཡིས། །རྣམ་ཤེས་ཐུགས་ཀར་འཕང་བར་བྱ། །སངས་རྒྱས་ཀུན་གྱི་ཡེ་ཤེས་དང༌། །རང་གི་རྣམ་ཤེས་དབྱེར་མེད་དུ། །སྟོང་ཉིད་སྙིང་རྗེ་རོ་གཅིག་པར། །མི་འགྱུར་བདེ་བ་བསྒོམ་པར་བྱ། །དེ་ནི་ཆོས་སྐུ་ཕྲིན་ལས་དང༌། །བཅས་པའི་དངོས་གྲུབ་ཐོབ་པར་འགྱུར། །མཚམས་མེད་ལྔ་ནི་བྱེད་པ་དང༌། །ཉིན་བཞིན་བྲམ་ཟེ་གསོད་པ་ཡང༌། །འདི་ཡི་ལམ་གྱིས་གྲོལ་འགྱུར་ཏེ། །སྡིག་གིས་གོས་པར་མི་འགྱུར་རོ། །དུས་ལ་བབས་ན་འཕོ་བར་བྱ། །དུས་མིན་ལྷ་ནི་གསོད་པར་འགྱུར། །ལྷ་ནི་བསད་པ་ཙམ་གྱིས་ནི། །མནར་མེད་གནས་སུ་སྲེག་པར་བྱེད། །འདི་ནི་བདེ་བར་གནས་དུས་སུ། །ཅུང་ཟད་གོམས་པར་བྱ་བ་སྟེ། །འབྱིན་དང་འཇུག་པའི་རླུང་ལ་ནི། །སྦྱར་ཏེ་སྤྲོ་དང་བསྡུ་བའི་ཚུལ། །ནམ་མཁར་རྗེ་བཙུན་བལྟས་ནས་ནི། །ཡུད་ཙམ་མཉམ་གཞག་རྣལ་འབྱོར་བྱ། །སྔགས་ཀྱི་རིམ་པ་སྟེ་རྗེས་སུ་རྣལ་འབྱོར་རོ། །
ཤིན་ཏུ་རྣལ་འབྱོར།
ཤེས་རབ་ཐབས་ཀྱི་ཕྱག་རྒྱ་ལས། །བླ་མའི་མན་ངག་རིམ་པ་ཡིས། །སྲིད་པའི་སྡུག་བསྔལ་གཞོམ་འདོད་པས། །མི་འགྱུར་བདེ་བ་བསྒོམ་པར་བྱ། །རྣལ་འབྱོར་མ་ཡི་མཚན་ཉིད་ནི། །རིགས་ནི་རྣམ་པ་བཞི་རུ་བཤད། །ཙ་རྩི་ཀ་ནི་པདྨ་ཅན། །ཕག་མོ་གླང་པོ་ཅན་དུ་བཤད། །རྡོ་རྗེ་དབྱིངས་ཅན་དུང་ཅན་མ། །དཀར་མོ་རི་མོ་ཅན་ཡིན་ཏེ། །རིགས་ནི་བཞི་ཡི་མཚན་ཉིད་རྣམས། །དེ་ལྟར་མཁས་པས་ཤེས་པར་བྱ། །པདྨ་ཅན་གྱི་མཚན་ཉིད་ནི། །བཞིན་ནི་ཀུན་ནས་ཟླུམ་པོ་སྟེ། །སྣ་ནི་ཟར་མའི་མེ་ཏོག་མཚུངས། །རུས་
སྦལ་རྒྱབ་འདྲའི་སེན་མོ་དམར། །ནུ་མ་མཁྲེགས་ཤིང་འཇམ་པ་དང༌། །རྐང་མཐིལ་མཉམ་ནས་བྲང་ཡང་མཛེས། །བ་སྤུ་འཁྱིལ་ཞིང་ངང་པའི་སྐད། །རི་མོ་གསུམ་ཅན་ཆུ་སྐྱེས་མཆོག །པདྨའི་དྲི་ལྡན་གླང་ཆེན་འགྲོས། །པདྨའི་འདབ་ལྟར་རེག་ན་འཇམ། །པདྨའི་བྱེད་པས་བསྟེན་ཕྱིར་སྟེ། པདྨ་ཅན་གྱི་དངོས་གྲུབ་འགྱུར། །གླང་པོ་ཅན་ཞེས་བྱ་བ་ནི། །སྣ་གཡོན་པ་སྤུ་འཁྱིལ་བ་དང༌། །འདོད་པས་མྱོས་ཤིང་འདོད་ལ་སྲེད། །ཆང་གི་དྲི་ལྡན་བྱིན་པ་སྦོམ། །ལུས་ནི་སྦོམ་ལ་མི་སྲུན་པ། །བཞིན་གྱི་མདངས་ཆེ་ང་རོ་ཆེ། །གླུ་དང་རོལ་མོ་ལ་དགའ་བ། །བྱེད་པ་བཅིངས་བའི་སྦྱོར་བ་ཡིས། །གླང་པོ་ཆེ་ཡི་མཆོག་སྒྲུབ་བྱེད། །དུང་ཅན་མ་ཞེས་གྲགས་པ་ནི། །ཧ་ཅང་སྐེམ་ཞིང་སྦོམ་པ་མིན། །སྐྲ་རིང་སྣ་ཡང་ཅུང་ཟད་རིང༌། །ནུ་མ་ན་ར་ཀ་འབྲས་ལྟར། །ཞོ་དང་འོ་མའི་ཚོགས་ལ་དགའ། །བྱ་རོག་སྐད་ཅན་བུང་བའི་སྒྲ། །བ་ལང་ལྕེ་ལྟར་རྩུབ་པ་སྟེ། །གི་ཝང་ར་ཏའི་བཅིངས་པས་བསྟེན། །རི་མོ་ཅན་ཡང་བཤད་པར་བྱ། །ཤིན་ཏུ་ཁྲོ་ཞིང་ངོ་ཚ་སྤངས། །རྟག་ཏུ་རྩོད་པ་ལ་དགའ་ཞིང༌། །ལུས་ཐུང་དེ་ཡི་བྲང་རྣམས་མཛེས། །པ་ལའི་འབྲས་ལྟར་ནུ་མ་ཟབ། །བྱིན་པ་ཕྲ་ཞིང་ཕྱིས་གན་ཉལ། །གསུས་པ་སྦོམ་ཞིང་མཆུ་ཡང་འཕྱང༌། །ཤ་བའི་དྲི་ལྡན་ཕུག་རོན་སྐད། །དེ་ནི་རི་མོ་ཅན་ཞེས་བྱ། །པི་ལས་ཡི་བཅིངས་པས་བསྟེན། །རི་མོ་ཅན་གྱི་དངོས་གྲུབ་འགྱུར། །བཅུ་དྲུག་ལོན་པའི་སྐད་བཟང་མ། །གཟུགས་དང་ལང་ཚོ་ཕུན་སུམ་ཆོགས། །དང་པོར་ལེགས་པར་སྤྱང་བ་དང༌། །དབང་བསྐུར་ནས་ནི་སྒྲུབ་པ་བརྩམ། །སྐུ་གསུང་ཐུགས་དང་རྡོ་རྗེ་ནི། །དཔྲལ་བ་ལ་སོགས་རྣམས་སུ་དགོད། །སྭཱ་ཧཱ་གསང་བ་གཙུག་ཏོར་དུའོ། །དེ་ནས་པདྨ་རྡོ་རྗེ་སྤྱང༌། །ཨ་ཡིས་པདྨའི་འདབ་བརྒྱད་ལ། །ཨ་ཡིས་ཟེ་འབྲུ་རབ་ཏུ་བརྟག །ཧཱུཾ་གིས་རྡོ་རྗེ་རྩེ་ལྔ་པ། །ཕཊ་ཀྱིས་སྒོ་ལ་རབ་ཏུ་བརྟག །དེ་ལྟར་རྡོ་རྗེ་པདྨ་བཅས། །བྷ་གར་ལིངྒ་བཞག་ནས་ནི། །བྱང་ཆུབ་སེམས་ནི་སྤྲོ་མི་བྱ། །རྣལ་འབྱོར་པས་ནི་གྲཱུཾ་ཕཊ་བསམ། །བྷ་གར་རྡོ་རྗེ་འཛིན་པར་བྱེད། །ཁམས་གསུམ་པོ་ནི་མ་ལུས་པ། །སངས་རྒྱས་ངོ་བོར་བསྒོམ་པར་བྱ། །རྒྱུ་མཐུན་ལ་སོགས་རབ་དབྱེ་བས། །ཤིན་ཏུ་རྣལ་འབྱོར་བསྒོམ་པར་བྱ། །རྡོ་རྗེ་དབྱིངས་ཀྱི་དབང་ཕྱུག་མའི། །རྩ་ནི་ཉེ་བར་བཙལ་བྱ་སྟེ། །
བྱེད་པ་བཅིངས་པའི་སྦྱོར་བ་ཡིས། །རྣལ་འབྱོར་པ་ཡིས་ཇི་སྲིད་དུད། །བྱང་ཆུབ་སེམས་ནི་འབྱིན་མི་བྱ། །གང་ཚེ་ཆུ་ཡི་རི་མོ་ལྟར། །དེ་ཚེ་ཐོབ་འགྱུར་རྒྱུན་མི་འཆད། །དགའ་བ་ལས་སྐྱེས་དེ་བཞིན་ཅི། །དངོས་གྲུབ་ཀུན་གྱི་གཏེར་གྱུར་པ། །བྱང་ཆུབ་སེམས་ནི་ཉམས་གྱུར་ན། །ཕུང་པོ་རྣམ་ཤེས་བརྒྱལ་འགྱུར་བས། །མ་སྨད་དངོས་གྲུབ་ག་ལ་ཐོབ། །མཁའ་ཁམས་རྡོ་རྗེ་ཀུན་སྦྱོར་དང༌། །རེག་བྱས་ཀྱིས་ནི་རྨད་བྱུང་ཆེ། །བདེ་བ་སྐྱེད་པར་བྱེད་པ་ནི། །མཆོག་ཏུ་དགའ་བ་བྱེད་པའོ། །དགའ་བྲལ་དག་གི་དབུས་སུ་ནི། །མཚོན་པར་དེ་ནི་བསྟན་པར་བྱ། །པདྨའི་དབུས་སུ་རྡོ་རྗེ་ནི། །ལྟེ་བས་མནན་པའི་གནས་དག་ཏུ། །རྡོ་རྗེའི་སྐྱིལ་ཀྲུང་ལས་སེམས་ནི། །ནོར་བུའི་ནང་དུ་སོན་པ་ལྟར། །ཡེ་ཤེས་སྐྱེ་བ་གང་ཡིན་པ། །ཡེ་ཤེས་ངོ་བོ་ཞེས་བྱ་བ། །ཆགས་པ་མ་ཡིན་ཆགས་བྲལ་མིན། །དབུ་མར་དམིགས་པར་མི་འགྱུར་རོ། །གང་ཚེ་རྣལ་འབྱོར་ཡེ་ཤེས་མཐོང༌། །བདེ་བ་གནས་སུ་འགྱུར་མི་བྱ། །ཐུན་མོང་ཡང་ན་ཉིན་གཅིག་དང༌། །ཟླ་ཕྱེད་ཟླ་བ་ལོ་དང་ནི། །བསྐལ་པ་འམ་བསྐལ་པ་སྟོང་དུ་ཡང༌། །ཡེ་ཤེས་སྦྱོར་བས་གནས་པར་བྱ། །བྱིན་གྱིས་བརླབས་པའི་སྦྱོར་བ་སྟེ་ཤིན་ཏུ་རྣལ་འབྱོར་རོ། །
རྣལ་འབྱོར་ཆེན་པོ།
མཁའ་འགྲོའི་ཕོ་བྲང་ཆུ་སྐྱེས་དབུས། །ཐབས་དང་ཤེས་རབ་སྦྱོར་བ་ཡིས། །ཁམས་གསུམ་རྒྱུ་དང་མི་རྒྱུ་དངོས། །རྣལ་འབྱོར་ཆེན་པོས་ངལ་བསོ་བྱ། །ལྟེ་བའི་དབུས་སོན་དཔའ་བོ་ལ། །སྤྲོ་དང་བསྡུ་བའི་སྦྱོར་བ་ཡིས། །ཇི་ལྟར་དབུགས་རླུང་མེ་ལོང་ལ། །ཇི་ལྟར་ཐིམ་པ་བལྟ་བར་བྱ། །ལྟེ་བའི་ཆུ་སྐྱེས་པདྨོ་ལ། །ཡུངས་ཀར་ཙམ་དུ་བརྟག་བྱ་གང༌། །བདེ་གསལ་ཡེ་ཤེས་ཉིད་དུ་འགྱུར། །རྟག་པ་མ་ཡིན་ཆད་པ་མིན། །བདག་མིན་གཞན་ཡང་མ་ཡིན་ལ། །སྲིད་མིན་མྱ་ངན་འདས་པ་མིན། །ཐོག་མ་དབུས་མཐའ་རྣམ་པར་སྤངས། །འོད་གསལ་བ་ལས་དེ་གསལ་ན། །དེ་ལས་རྡོ་རྗེ་འཛིན་པར་འགྱུར།། རྣལ་འབྱོར་བཞི་ཡི་རིམ་པ་ལས། །གང་སྐྱེས་ཡེ་ཤེས་ཕྱག་རྒྱ་ཆེ། །ཐབས་དང་ཤེས་རབ་རང་གི་དངོས། །མེ་ལོང་ནང་གི་གཟུགས་བརྙན་བཞིན། །འཇིག་རྟེན་ཁྱབ་བྱེད་གསལ་བར་སྣང༌། །མི་འགྱུར་མཆོག་གི་བདེ་བ་ཆེ། །སྟོང་ཉིད་སྙིང་རྗེ་དབྱེར་མེད་ལ། །ཕུན་སུམ་ཚོགས་པའི་འབྱུང་གནས་ཀྱི། །
ཡེ་ཤེས་ཆེན་པོ་འགྲུབ་འགྱུར་རོ། །ཡེ་ཤེས་ཀྱི་སྦྱོར་བ་ཞེས་བྱ་སྟེ་རྣལ་འབྱོར་ཆེན་པོའོ། །དེ་ལྟར་བླ་མའི་མན་ངག་རྗེས་འབྲངས་ཏེ། །དེ་ཉིད་གསལ་བྱས་བརྩེ་ཆེན་བཟོད་པར་གསོལ། །འདིར་འབད་བསོད་ནམས་དྲི་མེད་གང་སྐྱེས་དེས། །སྲིད་གསུམ་དཔལ་ལྡན་རྡོ་རྗེ་འཛིན་གྱུར་ཅིག །རྣལ་འབྱོར་བཞིའི་དེ་ཁོ་ན་ཉིད་ཅེས་བྱ་བ་རང་བྱིན་གྱིས་བརླབ་པའི་མན་ངག་གྲུབ་ཐོབ་ཀྱིས་འཁོར་ལོས་སྒྱུར་བ་མཐུ་སྟོབས་ལས་མངའ་བརྙེས་པ། དཔལ་ལྡན་རྣལ་འབྱོར་གྱི་དབང་ཕྱུག་བྲམ་ཟེ་དཔལ་འཛིན་གྱིས་མཛད་པ་རྫོགས་སོ།། །།ད་ར་པཎ་ཨཱ་ཙཱཪྻ་དང༌། གློ་བོ་ལོ་ཙཱ་བས་བསྒྱུར་བའོ།། །།