གཤིན་རྗེ་གཤེད་དམར་པོའི་འཁོར་ལོའི་གསལ་བྱེད་བསྡུས་པ།
བྱང་ཆུབ་སྙིང་པོ།
རྒྱ་གར་སྐད་དུ། རཀྟ་ཡ་མཱནྟ་ཀ་ཡནྟྲ་ཨུཏྟ་ཀ། བོད་སྐད་དུ། །གཤིན་རྗེ་གཤེད་དམར་པོའི་འཁོར་ལོའི་གསལ་བྱེད། །བཅོམ་ལྡན་འདས་གཤིན་རྗེ་གཤེད་ལ་ཕྱག་འཚལ་ལོ། །འདི་རྣམས་བྲི་གཞི་ནི། །ཉ་གྲོ་དྷའི་ལོ་མ་ལ་སོགས་པ་ལ། དང་པོ་འཁོར་ལོ་རྩིབས་བརྒྱད་པ་ཟླུམ་པོ། །གཉིས་པ་ལ་རྩིབས་བཅུ་གཉིས་པ། གསུམ་པ་
ལ་རྩིབས་བཅུ་དྲུག་པ། རྩིབས་བརྒྱད་པའི་ཕྱོགས་སུ་ཡ་མ་ལ་སོགས་པའི་ཡི་གེ་དགོང༌། མཚམས་ཀྱི་འདབ་མ་ལ་བསྒྲུལ་བྱའི་མིང་གི་ཡི་གེ་དགོད། །རྩིབས་བཅུ་དྲུག་པའི་རྩིབས་ཀྱི་བར་གྱི་རྩིབས་བརྒྱད་ལ། དེ་ལྟར་བསྒྲུབ་བྱ་ཟུར་རྣམས་སུའོ། །འཁོར་ལོ་དང་པོའི་དབུས་ཀྱི་ལྟེ་བར། ཡ་ནི་རབ་ཏུ་འབྱུང་བར་འགྱུར། ཤར་དུ་མ། རྩིབས་བཅུ་གཉིས་པའི་ཤར་དུ་རཱ། གཉིས་པར་ཛ། གསུམ་པར་ས། བཞི་པར་དོ། །རྩིབས་བརྒྱད་པའི་ལྷོའི་རྩིབས་ལ་མེ། སླར་ཡང་རྩིབས་བཅུ་གཉིས་པའི་འདབ་མ་ལྔ་པ་ལ་རུ། །དྲུག་པ་ལ་ཎ། བདུན་པ་ལ་ཡོ། །སླར་ཡང་རྩིབས་བརྒྱད་ཀྱི་ནུབ་ཀྱི་འདབ་མ་ལ་ད། ཡང་རྩིབས་བཅུ་གཉིས་པའི་རྩིབས་བརྒྱད་པ་ལ་ནི། དགུ་པ་ལ་རཱ། བཅུ་པ་ལ་ཡ། སླར་ཡང་རྩིབས་བརྒྱད་པའི་བྱང་གི་རྩིབས་ལ་ཀྵེ། ཡང་རྩིབས་བཅུ་གཉིས་པའི་བཅུ་གཅིག་པ་ལ་ཙྪ། བཅུག་གཉིས་པ་ལ་ནི། དེ་བཞིན་དུ་གསུངས་པ། ཡམ་རཱ་ཛས་དོ་མེ་ཡ། ཡ་མེད་རུ་ཎ་ཡོ་ད་ཡ། ཡ་ད་ཡོ་ནི་ར་ཡ་ཀྵེ་ཡ། ཡ་ཀྵེ་ཡ་ཙྪ་ནི་རཱ་མ་ཡ། ཞེས་པ་རྩ་བའི་སྔགས་སོ། །ཡི་གེ་བཅུ་དྲུག་ནི་རྩིབས་བཅུ་དྲུག་ལའོ། །གཅིག་ནི་གཙོ་བོའི་སྟེ་འདི་ལྟར་དབུས་སུ་རབ་ཏུ་འབྱུང་བར་འགྱུར་རོ། །ཡ་མ་རཱ་ད་ས་དོམ་རུ་ཎ་ཡོ། །དེ་ནས་དབུས་ཀྱི་སྙིང་པོའི་རྩིབས་ནས་འབྱུང་བར་འགྱུར་རོ། །ད་ནི་རཀྵ་ཡ་ཙྪ། དེ་ནས་ནའི་མཐའ་ཅན་ནོ། །འཁོར་ལོ་རྩིབས་བརྒྱད་པ་དང༌། རྩིབས་བཅུ་གཉིས་པའི་དེས་པའོ། །དེ་ནས་རྩིབས་བཅུ་དྲུག་པའི་དངས་བསྒྲུབ་བྱའི་མིད་གི་བར་བར་གྱི་འདབ་མ་ལ་སྔགས་འདི་རྣམས་བྲི་བར་བྱ་སྟེ། ཨོཾ་ཧྲཱིཿ་ཥྣྲྀཿ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། སྡད་པ་རྣམ་པར་དབྱེ་བ་ལད་བུས་སུ་གཙོ་བོ་ཡའོ། །གསད་པ་ལམ། དབང་དུ་སྡུད་པ་ལ་རཱ་འབྱུང་བར་འགྱུར་རོ། །རྒྱས་པ་ལ་རཱ། མནན་པ་ལ་ཀྵེ། དགུག་པ་ལ་ད། རྨོངས་པ་ལ་མེ། སྟོབས་དང་ལྡན་པར་བྱ་བ་ལ་དོ། །ཞི་བ་ལས། བསྐྲད་པ་ལ་ཙྪ། ཆད་པ་བཏབ་པ་ལ་ཎ། སེམས་མནན་པ་ལ་རུ། རྒྱལ་བ་ལ་ཛ། རབ་ཏུ་གདུང་བ་ལ་ཡོ། །དགྲ་བརླག་པར་བྱ་བ་ལ་ནི། འདིར་ལས་ཀྱི་རང་བཞིན་གྱིས་ཡི་གེ་དབུས་སུ་གཙོ་བོར་གྱུར་པ་དེའི་གནས་སུ་ཡ་བྲི་བར། གཤིན་རྗེ་གཤེད་ཀྱི་འཁོར་ལོ་ལ་དེས་པ་འདི་དང་པོའི་སངས་རྒྱས་
ནས་བཏུས་པའོ།། །།འདི་རྣམས་ཀྱི་ཞི་བ་ལ་སོགས་པའི་ལས་འཆད་པར་འགྱུར་བའི་འཁོར་ལོ་བྲི་བའི་ཆོ་ག་བརྗོད་དེ། དེ་ལ་ཞི་བ་དང་རྒྱས་པའི་འཁོར་ལོ་ནི་ནྱ་གྲོ་དྷའི་ལོ་མ་རླན་དད་མ་བྲལ་བའི་བྲི་གཞི་ལ། འབྲས་སཱ་ལུ་བཏགས་པའི་ཆུ་ཡིས། དཱུར་བའི་སྨྱུ་གུས་སོ། །རྒྱས་པ་ལ་འཇག་རྒོད་དཀར་པོ་ལ་སོགས་པས་བྲིའོ། །དེ་བཞིན་དུ་གསད་པ་དང་བསྐྲད་པ་ལ་དུར་ཁྲོད་ཀྱི་རས་ལ་དུག་དང་ཁྲག་དང་སོལ་བས་མི་རུས་ཀྱི་སྨྱུ་གུས་སོ། །སྐྲོད་པ་ལ་བྱ་རོག་གི་སྒྲོ་རྐང་གིས་བྲིའོ། །དབང་དུ་བྱ་བ་དང་དགུག་པ་ལ་གྲོ་ག་ལ་གུར་གུམ་དང་གི་ཝང་གསེར་གྱི་ཐུར་མས་སོ། །དགུག་པ་ལ་ཙནྡན་དམར་པོ་སེང་ལྡེང་གི་སྨྱུ་གུས་སོ། །རེངས་པ་དང་རྨོངས་པ་ནི་མཆོད་སྤྱིན་གྱི་ལོ་མ་ཡོངས་སུ་སྨིན་པ་ཁ་དོག་སེར་པོ་ལ་འབྲས་བུ་གསུམ་གྱི་ཁུ་བ་དང་བསྲེས་པའི་བ་བླ་འམ་ཡུང་བས་སོ། །ཀ་པེད་ཀྱི་སྨྱུ་གུ་དང་མཆོད་སྤྱིན་གྱི་སྨྱུ་གུས་རྨོངས་པར་བྱེད་པ་ལའོ།། འདི་ནི་དེས་པའོ།། །།འཁོར་ལོ་དེ་རྣམས་ཀྱི་རབ་ཏུ་གནས་པའི་ཆོ་ག་བཤད་དེ། ཞི་བ་དང་རྒྱས་པའི་འཁོར་ལོ་བྲིས་ལ། འཁོར་ལོ་ལ་སོགས་པ་སྐུད་པ་དཀར་པོས་བཅིང་བར་བྱ། ཇི་ལྟར་འཁོར་ལོ་མི་མཐོང་བའི་ཚུལ་ལོ། །དེ་བཞིན་ལས་ཀྱི་བྱེ་བྲག་གིས་སྐུད་པ་དཀར་པོ་དང༌། སེར་པོས་བཅིང་བར་བྱའོ། །དེ་ནས་ཞི་དང་རྒྱས་པ་ནི་མར་དང་འོ་མ་དང་སྦྲང་གིས་བཀང་བའི་རྫ་ཕོར་ཁ་སྦྱར་དུ་གཞག་པའོ། །གསང་པ་དང་བསྐྲད་པ་ལ་ཐོད་པ་ཁྲག་གིས་བཀང་བར་གཞག་པར་བྱ། དབང་དང་དགུག་པ་ལ་སྤྲ་ཚིལ་གྱིས་གཡོགས་ལ་གྱོ་མོ་ཁ་སྦྱར་དུ་མེས་གདུང་བར་བྱའོ། །མནན་པ་དང་རྨོངས་པ་ལ་བ་བླའི་ཆུས་བཀང་བའི་སོ་ཕག་དབུས་སུ་གཞག་པར་བྱའོ། །གནས་གཙང་ཞིང་རླན་དང་བཅས་པའི་མཎྜལ་གྱི་སྟེང་དུ་ཞི་བ་དང་རྒྱས་པ་ལ་གཞག་པར་བྱའོ། །གསད་པ་དང་བསྐྲང་པ་ལ་དོང་གི་ནང་དུ་ཞོ་དང་མར་བླུགས་ལ་སྦ་བར་བྱའོ། །དགུག་པ་དང་དབང་ལ་ཐབ་ཀྱི་འོག་ཏུའོ། །མནན་པ་དང་རྨོངས་པ་ནི་ས་སྐམ་པོར་སྦ་བར་བྱའོ། །དགེ་བ་དང་མི་དགེ་བའི་ལས་ཀྱི་འབྲས་བུ་འདི་ནི་སྔགས་པས་ངེས་པར་རིག་པར་བྱའོ། །འཁོར་ལོ་བྲིས་བ་དེ་རྣམས་ཀྱི་ཕྱི་རོལ་གྱི་འཁོར་ལོའི་ངེས་པ་གསུངས་ཏེ། དེ་ལ་ཞི་བའི་འཁོར་ལོའི་ཕྱི་རོལ་ཏུ་ཟླ་བའི་
དཀྱིལ་འཁོར་གྱིས་བསྐོར་ཞིང་རེ་ཁཱ་ས་བསྐོར་བར་བྱའོ། །རྒྱས་པ་ལ་གླང་པོ་ཆེས་བསྐོར་བར་བྱ་སྟེ། ཇི་ལྟར་གླང་པོ་ཆེའི་ལྟོ་བར་འཁོར་ལོ་ཆུད་པའོ། །གསད་པ་ལ་ཡི་དྭགས་ཀྱི་ལུས་སུའོ། །བསྐྲད་པ་ལ་རྔ་མོའི་ལྟོ་བར་རོ། །དབང་དུ་བསྡུ་བ་ལ་རི་དགས་ཀྱི་ལྟོ་བར་རོ། །དགུག་པ་ལ་རྟའི་ལྟོ་བར་རོ། །རྨོངས་པ་ལ་རའི་ལྟོ་བའམ་ལུག་གི་ལྟོ་བར་རོ། །མནན་པ་རུས་སྤེལ་གྱི་ལྟོ་བར་རོ། །ཇི་ལྟར་འཁོར་ལོ་ལྟོ་བར་འགྱུར། །ཕྱི་རོལ་གཟུགས་ཀྱང་དེ་བཞིན་ནོ། །དེ་ནས་གོང་དུ་གསུངས་པའི་སྐུད་པས་དཀྲི་བར་བྱའོ། །རིག་པ་དེ་རྣམས་ཀྱི་དུས་སུ་ཐུན་གྱི་ངེས་པས་གསུངས་ཏེ། ཐུན་དང་པོ་ཕྱེད་གཡོན་པ་ཆུའི་དཀྱིལ་འཁོར་ལ་ཁ་བྱང་དུ་བལྟས་ཏེ་ཞི་བའི་ལས་སྒྲུབ། ཐུན་བྱེད་ཀྱི་གཉིས་པ་ལ་དེ་བཞིན་དུ་རྒྱས་པའི་ལས་ལ་དབང་ལྡན་དུ་ཁ་བལྟས་ལའོ། །ཐུན་ཚོད་གཉིས་པའི་ཐུན་ཕྱེད་ལ་གཡས་པ་རླུང་གི་དཀྱིལ་འཁོར་རྒྱུ་བའི་ཚེ་ཁ་ཤར་དུ་བལྟས་ལ་གསད་པའི་ལས་སྒྲུབ། ཐུན་ཚོད་གཉིས་པའི་ཕྱེད་ཀྱི་ཕྱི་མ་ལ་མེ་རུ་བལྟས་ཏེ་བསྐྲད་པའི་ལས་སྒྲུབ། ཐུན་ཚོད་གསུམ་པའི་ཕྱེད་ལ་གཡས་པ་མེའི་དཀྱིལ་འཁོར་གྱི་དུས་སུ་ཁ་ལྷོ་རུ་བལྟས་ཏེ་དབང་གི་ལས་སྒྲུབ། ཐུན་ཚོད་གསུམ་པའི་ཕྱེད་ཀྱི་ཕྱི་མ་ལ་བདེན་བྲལ་དུ་བལྟས་ཏེ་དགུག་པའི་ལས་སྒྲུབ། ཐུན་ཚོད་བཞི་པ་ལ་གཡས་པ་སའི་དཀྱིལ་འཁོར་འབྱུང་བའི་དུས་སུ་ཁ་ནུབ་ཏུ་བལྟས་ཏེ་མནན་པའི་ལས་སྒྲུབ། ཐུན་ཚོད་བཞི་པའི་ཕྱེད་ལ་རླུང་དུ་བལྟས་ཏེ་རྨོངས་པའི་ལས་སྒྲུབ། དབང་དུ་བྱ་བ་དང་དགུག་པ་ནི་གྲོ་ག་ལ་གུར་གུམ་དང་གི་ཝང་ལ་གསེར་གྱི་སྨྱུ་གུས་བྲི། ཞི་བ་དང་རྒྱས་པ་ལ་ནྱ་གྲོ་དྷའི་ལོ་མ་ལ་དཱུར་བས་འབྲས་ཀྱི་ཁུ་བས་བྲི། གསད་པ་དང་བསྐྲད་པ་ནི་དུར་ཁྲོད་ཀྱི་རས་ལ་སོགས་པ་དག་ལ་མིའི་རུས་པས་སོ། །མནན་པ་དང་རྨོངས་པ་དག་ལ་སོ་ཕག་གི་ཕྱི་མ་འམ་ཡུང་བས་སོ། །འཁོར་ལོའི་ཆོ་ག་ཉེ་བར་བསྡུས་པ་རྫོགས་སོ།། །།པཎྚི་ཏ་རྡོ་རྗེ་གདན་པ་ནི་སྐ་ལཾ་ཀའི་ཞལ་སྔ་ནས། དཔྱལ་ལོ་ཙཱ་བ་དཔལ་ཆོས་ཀྱི་བཟང་པོས་བསྒྱུར་བའོ།།