གཤིན་རྗེའི་དགྲ་དམར་པོའི་སྒྲུབ་ཐབས་ཞེས་བྱ་བ།
བློ་བཟང་སྙིང་པོ།
རྒྱ་གར་སྐད་དུ། རཀྟ་ཡ་མཱ་རི་སཱ་དྷ་ནཾ་ནཱ་མ། བོད་སྐད་དུ། གཤིན་རྗེའི་དགྲ་དམར་པོའི་སྒྲུབ་ཐབས་ཞེས་བྱ་བ། གཤིན་རྗེའི་གཤེད་དམར་པོ་ལ་ཕྱག་འཚལ་ལོ། །ཧཱུཾ་ཡིག་དམར་པོ་འབར་བ་ལས་མེ་འབར་བར་བལྟ་སྟེ། དེའི་སྟེང་དུ་ཨཱཿཡིག་གིས་གསེར་གྱི་བུམ་པའི་སྣོད་ཆེན་པོའོ། །དེའི་ནང་དུ་གོ་ཀུ་ད་ཧ་ན་བི་ར་ཤུ་མ་མུ། དེ་རྣམས་ཐམས་ཅད་འོ་མའི་རང་བཞིན་ལྟར་རྣམ་པར་བསམ་པར་བྱའོ། །དེའི་རྗེས་སུ་སྣོད་ཀྱི་ཤར་དུ་གླང་པོ་ཆེ་ལ་ཞོན་པའི་དབང་པོ་རྡོ་རྗེ་འཆང་བའོ། །ལྷོར་མ་ཧེ་ལ་ཞོན་པའི་གཤིན་རྗེ་དབྱུག་པ་འཆང་བའོ། །ནུབ་ཏུ་ཆུ་སྲིན་ལ་ཞོན་པའི་ཆུ་ལྷ་ཞགས་པ་འཛིན་པའོ། །བྱང་དུ་གཏེར་ལ་ཞོན་པའི་ལུས་ངན་པོ་ཕྱག་ན་ན་ཀུ་ལི་དང་བི་ཛ་པཱུ་ར་ཅན་ནོ། །མེར་ར་ལ་ཞོན་པའི་མེ་ལྷ་ཕྱག་ན་ཕྲེང་བ་ཅན་ནོ། །བདེན་བྲལ་དུ་སྲིན་པོ་རོ་ལ་ཞོན་པ་རལ་གྲི་འདེབས་པའི་ཕྱག་ཅན་ནོ། །རླུང་དུ་རི་དགས་ལ་ཞོན་པའི་རླུང་ལྷ་རླུང་དར་འཛིན་པའོ། །དབང་ལྡན་དུ་གླང་ལ་ཞོན་པའི་དབང་ཕྱུག་རྩེ་གསུམ་དང་ཐོད་པ་འཛིན་པ་ཅན་ནོ། །དབུས་སུ་ཚངས་པའོ། །དེའི་མདུན་དུ་ཟླ་བའི་ལྷ་ཕྱག་ན་ཀུ་མུ་ད་ཅན་ནོ། །རྒྱབ་ཏུ་ཉི་མ་
ཕྱག་ན་པདྨ་ཅན་ནོ། །གཡས་སུ་སའི་ལྷ་མོ་དམ་བཅའ་ལ་མངོན་པར་ཕྱོགས་པས་བཞུགས་པའོ། །གཡོན་དུ་ཐགས་བཟངས་རིས་གཞོན་ནུའོ། །དེ་ལྟར་ཡོངས་སུ་བསྐོར་ནས་བཞུགས་པའི་འབྱུང་པོའི་ཚོགས་མ་ལུས་པ་སྐད་ཅིག་གིས་སྟོང་པ་ཉིད་ལས་སེམས་ཅན་རྣམས་ཡོངས་སུ་གྱུར་པ་ལས། གཤིན་རྗེའི་དགྲའི་སྐུར་དམིགས་ཏེ་དེ་རྣམས་ཀྱི་ལྗགས་ལ་རྡོ་རྗེ་ནས་འབྲུ་ཙམ་བསྒོམས་ཏེ་དེ་རྣམས་ལ་གཏོང་མཉེ་བར་དབུལ་བར་བྱའོ། །དེ་ནས་བཅོམ་ལྡན་འདས་ཀྱི་ཐུགས་ཀར་སྔོན་གྱི་ས་བོན་ལས་བསྐྱེད་པའི་ཉི་མའི་སྟེང་དུ། ཧཱུཾ་ཡིག་དམར་པོ་ལས་སྐྱེས་པའི་མི་མགོ་རློན་པས་མཚན་པའི་དབྱུག་ཐོ་ངེས་པར་བསྒོམ་པར་བྱའོ། །དེའི་དབུས་སུ་ཉི་མའི་དཀྱིལ་འཁོར་ལ་གནས་པའི་ཧཱུཾ་ཡིག་དམར་པོ་བསམ་པར་བྱའོ། །དེ་ནས་གསང་བའི་རྡོ་རྗེ་ཧཱུཾ་ཡིག་ཡོངས་སུ་གྱུར་པར་བསམ་པར་བྱའོ། །བཅོམ་ལྡན་འདས་མའི་གསང་བར་འདབ་མ་བརྒྱད་པའི་པདྨ་ལ་ཨཾ་ཡིག་དམར་པོ་ཡོངས་སུ་གྱུར་པའོ། །དེའི་རྗེས་སུ་སྔགས་བརྗོད་པར་བྱ་སྟེ། ཨོཾ་སརྦྦ་ཏ་ཐཱ་ག་ཏ་རཱ་ག་ཎ་བཛྲ་སྭ་བྷཱ་བ་ཨཱཏྨ་ཀོ྅ཧམ། དེའི་རྗེས་སུ་ལྟེ་བའི་འོག་དེར་པདྨ་དམར་པོ་འདབ་མ་བརྒྱད་པའི་སྟེང་དུ་ཧྲཱིཿཡིག་དམར་པོ་འབར་བ་བསམ་པར་བྱའོ། །བཅོམ་ལྡན་འདས་ཞལ་གཅིག་ཕྱག་གཉིས། ཕྱག་གཡོན་གྱིས་ཐོད་པ་ཁྲག་གིས་གང་བ་དང༌། གཡས་ཀྱིས་མི་མགོས་མཚན་པའི་དབྱུག་ཏོ་དཀར་པོ་འཆང་བ། མཧིཪྵའི་སྟེང་དུ་སྣ་ཚོགས་པདྨ་ལ་བཞུགས་པ་བསྒོམ་པར་བྱའོ། །ཤེས་རབ་མ་དགའ་བས་མྱོས་པ་ཐོད་པ་སྐམ་པོས་མགུལ་པ་བརྒྱན་པ། ཞལ་གཅིག་ཕྱག་གཉིས་མ། བཅོམ་ལྡན་འདས་དང་ལྷན་ཅིག་སྦྱོར་བས་བཞུགས་པ། དེ་ལྟ་བུར་གྱུར་པའི་གཤིན་རྗེའི་དགྲ་ཐུན་གསུམ་མམ་བཞིར་བསྒོམ། གཏོར་མ་སྤྱིན་ནོ། །བྲུཾ་མཱཾ་ཧྲཱཾ་ཁཾ་ཧཱུཾ་ཞེས་པས་དམ་ཚིག་བྱིན་གྱིས་བརླབ་པའི་སྔགས་སོ། །ཨོཾ་ཨིནྡྲཱ་ཡ་ཧྲཱིཿ་ཡ་མ་ཡ་ཥྚྲྀཿ་བ་རུ་ཎཱ་ཡ་བི། ཀུ་བེ་རཱ་ཡ་ཀྲྀ། ཨཱི་ཤ་ནཱ་ཡ་ཏ། ཨཀྣ་ཡེ་ཨ། ནཻ་རྀ་ཏྱེ་ན། བཱ་ཡ་བེ་ན། ཙནྡྲཱ་ཡ་ཧཱུཾ། ཨ་ཀཱ་ཡ་ཧཱུཾ། བྲཧྨ་ཎཱ་ཡ་ཕཊ། བ་སུ་ཪྻ་རཱ་ཡ་ཕཊ། བེ་མ་ཙི་ཏྲ་ཎེ་སྭཱ། སརྦ་བྷཱུ་ཏེ་བྷྱོ་ཧཱ། ཧྲཱཾ་ཧྲཱཾ་ཧྲཱིཿ། ཧཱུཾ་ཧཱུཾ་ཧཱུཾ། ཕེཾ་ཕེཾ་ཕེཾ། སྭཱ་ཧཱ། གཏོར་མའི་སྔགས་སོ། །གང་ཅུང་ཟད་ཟ་བ་དེ་ཐམས་ཅད་
གཤིན་རྗེའི་དགྲ་ལ་དབུལ་བར་བྱའོ། །སློབ་དཔོན་ཆེན་པོ་བློ་བཟང་སྙིང་པོ་ཞབས་ཀྱིས་མཛད་པའི་གཤིན་རྗེའི་དགྲ་དམར་པོའི་སྒྲུབ་ཐབས་རྫོགས་སོ།། །།ལྷའི་སྐད་ལ་ལེགས་པར་ཞུགས་པའི་ཤཱཀྱའི་དགེ་སློང་ཉི་མ་རྒྱལ་མཚན་དཔལ་བཟང་པོས་སྐད་གཉིས་སྨྲ་བ་རྣམས་ཀྱི་གང་ནས་དཔལ་ཐར་པ་གླིང་གི་གཙུག་ལག་ཁང་དུ་བསྒྲུབས་པའོ། །གཤིན་རྗེ་གཤེད་དམར་པོ་ཡོན་ཏན་འབྱུང་གནས་སྒྲུབ་ཐབས་ཆོས། །རྒྱ་གར་དཔེ་འདི་བོད་ཀྱིས་མི་རྟོགས་པས། །དམ་པ་སེ་ཙའི་རིག་འཛིན་སྐང་གཉིས་པ། །ཆོས་ཀྱི་བཟང་པོའི་དཔེ་ལས་གུས་པར་བསྒྱུར། །སའི་སྟེང་ན་ཉི་ཟླ་ལྟར་གྱུར་ཅིག །