འཕགས་པ་དཔལ་གཤིན་རྗེ་ཚེ་བདག་ནག་པོ་སྒྲུབ་པའི་ཐབས་ཞེས་བྱ་བ།
ནག་པོ།
རྒྱ་གར་སྐད་དུ། ཨཱཪྻ་ཤྲཱི་ཡ་མ་ཨཱ་ཡུཿཀཱ་ལ་སཱ་དྷ་ན་ནཱ་མ། བོད་སྐད་དུ། འཕགས་པ་དཔལ་གཤིན་རྗེ་ཚེ་བདག་ནག་པོ་སྒྲུབ་པའི་ཐབས་ཞེས་བྱ་བ། འཕགས་པ་འཇམ་དཔལ་ལ་ཕྱག་འཚལ་ལོ། །ཐུགས་རྗེས་སྤྲུལ་སྐུའི་ཐབས་ཀྱིས་འགྲོ་དོན་མཛད། །ཕྲིན་ལས་རྣམ་བཞི་ལམ་ལ་བརྗོད་པ་བསྐྱེད། །བསྐྱེད་རྫོགས་ལམ་གྱི་ཕྲ་རགས་རྟོག་པ་བཟློག །བཅོམ་ལྡན་གཤིན་རྗེ་གཤེད་ལ་ཕྱག་འཚལ་ནས། །སྒྲུབ་ཐབས་གསལ་བ་ཉིད་དུ་བརྗོད་པར་བྱ། །དད་དང་སྙིང་རྗེས་འགྲོ་བའི་དོན་མོས་ཤིང༌། །དཀྱིལ་འཁོར་འདི་ཉིད་དུ་ནི་དབང་ཐོབ་པས། །ཤིང་གཅིག་དུར་ཁྲོད་ལ་སོགས་གནས་སུ་ནི། །སོ་ཕག་རོ་རས་ལ་སོགས་སྟན་ལ་འདུག །དྲག་པོའི་མཆོད་གཏོར་ལ་སོགས་གཞུང་བཞིན་བཤམ། །སྙིང་རྗེ་ལ་སོགས་ཚད་མེད་བཞི་བསྒོམས་ལ། །ཀུན་ལ་སྒྱུ་མའི་སེམས་ཀྱིས་གནས་པར་བྱ། །སྟོང་པའི་ངང་ལས་སྣོད་གྱུར་གཞལ་ཡས་ཁང༌། །ཐོད་
མཁར་དུར་ཁྲོད་བཅས་པ་བསྒོམ་པར་བྱ། །བཅུད་གྱུར་ཡ་ལས་འོད་འཕྲོས་གཤིན་རྗེ་ནི། །དབུས་སུ་ཆོ་བདག་ཡུམ་དང་བཅས། །རྩ་བའི་ལྷ་ལྔ་གཤེད་བཞི་དང༌། །གཡས་སུ་འཆི་བདག་གཡོན་དུ་ནི། །སྲོག་བདག་དམར་པོ་བསྒོམ་པར་བྱ། །སྔགས་བརྗོད་པ་ལས་ལྷ་རྣམས་བསྐྱེད། །དེ་ནས་མཆོད་ཡོན་བྱིན་གྱིས་བརླབ། །བདུད་རྩི་ལྔ་ཡི་ཨརྒྷ་དང༌། །ཚིལ་ཆེན་སྤོས་ལ་དུག་མེ་ཏོག །ཏིལ་ཆེན་མི་མར་ཁྲག་ཆེན་དྲི། །ཤ་ཆེན་བཤོས་ལ་ཐོད་པའི་རྡ། །གཏོར་མ་དཔའ་བོའི་སྟོན་མོ་ཡང༌། །ཅི་འབྱོར་ཆོགས་བྱིན་བརླབ་བྱ། །དེ་ནས་ཡེ་ཤེས་སྤྱན་དྲང་བ། །མ་ལུས་སེམས་ཅན་མགོན་གྱུར་པ། །ཚུར་གཤེགས་ཁྲོ་བདག་གཙོ། །འཁོར་བཅས་མ་ལུས་གཤེགས་སུ་གསོལ། །ཐུགས་དམ་དབང་གིས་བརྟན་པར་བཞུགས། །ཨོཾ་ཡ་མ་བཛྲ་གྲོ་དྷ་ཨི་ཨ་ར་ལི་ཧྲིཾ་ཧྲིཾ། ཞེས་པས་མདུན་དུ་སྤྱན་དྲངས་ལ། ཡིད་ཀྱིས་ཕྱག་བྱ་བསྟོད་པ་བརྩམ། །གདུག་པ་འདུལ་མཛད་གཤིན་རྗེའི་གཤེད་ཀྱི་ལྷ། །སྤྲུལ་དང་ཐོད་རློན་སྣ་ཚོགས་འཛིན། །འཇིག་བྱེད་དཔའ་བོ་འི་སྐུ་ལ་ཕྱག་འཚལ་བསྟོད། །ཛཿཧཱུཾ་བཾ་ཧོཿས་མ་ཡ་ཏིཥྛ་ལྷན། །ཞེས་པས་ལྷ་རྣམས་རང་ལ་བསྟིམ། །འདོད་ཡོན་ཕྱི་ནང་གསང་པའི་མཆོད་པས་མཆོད། །ཕུད་དང་དཔའ་བོའི་སྟོན་མོས་མཉེས་པར་བྱ། །མཆོད་པའི་ལྷ་མོ་དཔག་མེད་ནམ་མཁའ་ལ། །མཆོད་དང་བསྟོད་པ་བྱེད་པར་བསམ་པར་བྱ། །སྡིག་བཤགས་སྨོན་ལམ་ལ་སོགས་རྒྱས་པར་བྱ། །དེ་ནས་བསྐྱེད་པའི་རིམ་པ་གསལ་བཏབ་སྟེ། །བརྟན་པ་ཉིད་དུ་བསྒོམ་པར་བྱ། །སྐྱོན་ངག་གི་བཟླས་པ་བརྩམ་།བཅུ་གསུམ་བརྒྱ་དང་བཞི་ལ་སོགས། །ལས་མཐུན་པ་ཡི་བཟླས་པ་བྱ། །ཕྲ་མོའི་རྣལ་འབྱོར་བསྒོམ་འདོད་ན། །བྱང་ཆུབ་སེམས་གནས་དབུ་མའི་མགོར། །གདོད་ནས་དག་པའི་ཐིག་ལེ་ལ། །ཨ་ཤད་ནཱ་ད་བཅས་པ་བསྒོམ། །རི་བོད་ཅན་ལ་བཅུ་གསུམ་སྔགས་།རབ་ཏུ་བསྐོར་བར་བསྒོམ་པར་བྱ། །ཁམས་གསུམ་གཟུགས་ལ་རབ་ཏུ་རྡུལ། །འགྲོ་འོད་སྔགས་ཀྱིས་བརྗོད་པས་འགོག །ཐུན་བཞི་ལ་སོགས་རིམ་པ་ཡིས། །ཇི་ལྟར་བརྟན་གྱི་བར་དུ་བསྒོམ། །དུད་པ་ལ་སོགས་རྟགས་ཟད་ནས། །སྤྲིན་མེད་
ནམ་མཁའ་དངས་པ་ན། །མཐར་ཐུག་འོད་གསལ་ཞེས་བརྗོད་དོ། །བདག་དང་གཞན་དོན་མོས་པ་ཡིས། །ལམ་ལ་བརྗོད་པ་བསྐྱེད་པའི་ཕྱིར། །ཕྲིན་ལས་རྣམ་བཞི་བརྩམ་པར་བྱ། །བསྐྱེད་པའི་འཁོར་ལོ་བསྒོམ་པར་བྱ། །རང་སྙིང་འཁོར་ལོ་རྩིབས་བརྒྱད་ལ། །དབུས་སུ་ཨོཾ་ཡིག་དཀར་པོ་བསྒོམ། །རྩིབས་བརྒྱད་འབྲུ་བརྒྱད་བསམ་པར་བྱ། །ཨོཾ་ལས་འོད་ཟེར་དཀར་བྱུང་བས། །འབྲུ་བརྒྱད་དག་ལ་ཕོག་པར་འབར། །འབྲུ་བརྒྱད་དག་ལས་འོད་འཕྲོས་པས། །དབུས་ཀྱི་ཧཱུཾ་ཡིག་གསོ་བསྐྱེད་བྱ། །བཟླས་པ་ཚང་ནས་རྟགས་བྱུང་ན། །དྲག་པོའི་ལས་ལ་སྦྱར་བར་བྱ། །ཨོཾ་གྱུར་འོད་ཟེར་དམར་ནག་འཕྲོས། །འབྲུ་བརྒྱད་སྔགས་རྒྱལ་རབ་ཏུ་ཕོག །འོད་ཟེར་འཕྲོས་དང་འཁོར་ལོ་ནི། །དམིགས་པས་དྲངས་ནས་བསྒྲལ་བར་བསམ། །འཚིག་དང་ཁྲོ་སྙིང་འདོད་པ་དང༌། །མངོན་སུམ་ཉིད་དུ་ཁུགས་པ་ན། །མནན་དང་སྲེག་པའི་ལས་བྱའོ། །སྦྱོར་བ་བྱང་ཆུབ་སེམས་ཀྱིས་ཟིན། །དངོས་གཞིའི་ཏིང་འཛིན་པར་ཆོད་མེད། །རྗེས་ལ་བདག་མེད་རྣལ་འབྱོར་བྱ། །ནམ་མཁའི་ངང་དུ་གསད་བྱའོ། །དེ་རྣམས་ཀུན་ནས་བཏུས་པ་ཡིས། །རྒྱུད་དང་འདྲ་བའི་སྒྲུབ་ཐབས་འདི། །བླ་མའི་ཞབས་པད་བརྟེན་པས་བླང༌། །གཞན་དུ་འཁྲུལ་འཁོར་རྩོམ་པ་ན་།འབྲས་བུ་མེད་ཅིང་བརླག་པར་འགྱུར། །སྒྲུབ་ཐབས་སྦྱོར་བ་འདི་བརྩམས་པས། །འགྲོ་ཀུན་འཇམ་རྒྱལ་ཉིད་གྱུར་ཅིག །བཅོམ་ལྡན་འདས་གཤིན་རྗེའི་གཤེད་ཚེ་བདག་ནག་པོའི་སྒྲུབ་ཐབས་རྫོགས་སོ། །