ཁྲུས་ཀྱི་ཆོ་ག་སྒྲུབ་པ་སྦྱོང་ཞིང་བར་ཆོད་བསལ་བ།
ནག་པོ།
བཅོམ་ལྡན་འདས་གཤིན་རྗེ་གཤེད་ལ་ཕྱག་འཚལ་ལོ། །དངོས་གྲུབ་བསྒྲུབ་དང་བར་ཆད་བསལ་བའི་ཕྱིར། །གཏོར་མའི་ལས་ལ་རྣལ་འབྱོར་འབད་པར་བྱ། །ཧཱུཾ་ལས་སྣ་ཚོགས་རྡོ་རྗེ་ནི། །བར་སྣང་ལ་གནས་བསམ་པར་བྱ། །ཨ་ལས་བྱུང་བའི་ཐོད་པ་ནི། །དེ་ཡི་འོག་ཏུ་བསམ་པར་བྱ། །བདུད་རྩི་ཨོཾ་གྱིས་མཚན་པ་ནི། །དེ་ཡི་ནང་དུ་བསམ་པར་བྱ། །གོ་ཀུ་ད་ཧ་ན། བི་ཤུ་ར་མ་མུ། ཧཱུཾ་ཁཾ་ཛྲཱྀཾ་ཨཱཾ་བྷཱུཾ། རཾ་ལས་མེ་ཡི་དཀྱིལ་འཁོར་ནི། །ཐོད་པའི་འོག་ཏུ་བསམ་པར་བྱ། །ཡཾ་ལས་རླུང་གི་དཀྱིལ་འཁོར་ནི། །མེ་ཡི་འོག་ཏུ་བསམ་པར་བྱ། །གོ་ལས་ཤར་དུ་བ་གླང་ཤ་།ཀུ་ལས་ལྷོ་རུ་ཁྱི་ཡི་ཤ་།ད་ལས་ནུབ་ཏུ་རྟ་ཡི་ཤ་།ཧ་ལས་བྱང་དུ་བླང་ཆེན་ཤ་།ན་ལས་དབུས་སུ་ཤ་ཆེན་བསམ། །བི་ལས་ཤར་དུ་དྲི་ཆེན་
བསམ། །ཤུ་ལས་ལྷོ་རུ་བྱང་ཆུབ་སེམས། །ར་ལས་ནུབ་ཏུ་རང་བྱུང་མཚལ། །མ་ལས་བྱང་དུ་དྲི་ཆུ་བསམ། །མུ་ལས་དབུས་སུ་སྨན་ཆེན་བསམ། །ཤར་དུ་བྷཱཾ་ལ་ལྷོ་རུ་ཨཱཾ། །ནུབ་ཏུ་ཛྲཱྀཾ་ལ་བྱང་དུ་ཁཾ། །དབུས་སུ་ཧཱུཾ་ཡིག་རྣམ་པར་བསམ། །སྟེང་དུ་རྡོ་རྗེ་རྒྱ་གྲམ་བསྒོམ། །ཡཾ་ལས་རླུང་བྱུང་མེ་སྦར་ལ། །ཐོད་པ་དྲོས་པས་བདུད་རྩི་ཁོལ། །རླངས་ལས་འོད་བྱུང་རིགས་ལྔ་བསྐུལ། །ཡེ་ཤེས་བདུད་རྩི་ཕབ་ལ་བསྟིམ། །རྡོ་རྗེ་ཡིག་འབྲུ་བཅས་པ་ཞུ། །འབྲུ་གསུམ་སྔགས་ཀྱིས་བྱིན་གྱིས་བརླབ། །གཉིས་སུ་མེད་པའི་མཆོད་པ་དབུལ། །མཆོད་བསྟོད་སྨོན་ལམ་རྒྱས་པར་བྱ། །ཨོཾ་ཡ་མ་ཀཱ་ལ་སརྦ་ཏུ་པ་སཏ་མ་ཧཱ་བ་ལིཾ་ཨི་དམ་གྲྀཧྞ་གྲྀཧྞ་ཁ་ཁ་ཁཱ་ཧི་ཁཱ་ཧི། །གཏོར་མ་དབུལ་ལོ། །བཅོམ་ལྡན་འདས་གཤིན་རྗེ་གཤེད་ལ་ཕྱག་འཚལ་ལོ། །སྒྲིབ་དང་བར་ཆད་ཉེ་བར་བསལ་བའི་ཕྱིར། །ཁྲུས་ཀྱི་སྣོད་དག་མདུན་དུ་བརྟན་པར་བྱ། །ལྟོ་ལྡིར་མགྲིན་པ་ཕྲ་བའི་བུམ་པ་ལ། །ཁ་ཚར་མ་ཉམས་རས་ཀྱིས་མགུལ་ཆིངས་བྱ། །འབྲས་བུ་ལོ་འདབ་མ་ཉམས་ཁ་རྒྱན་ཅན། །ལུས་ངག་ཡིད་གསུམ་དག་པར་བྱ་བའི་ཕྱིར། །དཀར་གསུམ་མངར་གསུམ་ལྡན་པའི་ཆུ་ཡིས་དགང༌། །ཕུང་པོ་ལྔ་པོ་དག་པར་བྱ་བའི་ཕྱིར། །འབྲུ་སྣ་ལྔ་ཡི་སྙིང་པོ་ལྡན་བར་བྱ། །ཡན་ལག་ལྔ་པོ་དག་པར་བྱ་བའི་ཕྱིར། །སྨན་སྣ་ལྔ་ཡི་དྲི་དང་ལྡན་པར་བྱ། །ཡེ་ཤེས་ལྔ་པོ་རྫོགས་པར་བྱ་བའི་ཕྱིར། །རིན་ཆེན་ལྔ་ཡི་སྙིང་པོ་ལྡན་པར་བྱ། །བདག་ལུས་ལྷ་ཡི་རྣལ་འབྱོར་ལྡན་པ་ཡིས། །བྷྲཱུཾ་ལས་བུམ་པ་གཞལ་ཡས་ཁང་ཆེན་བསམ། །དབུས་སུ་ཡ་ལས་བཅོམ་ལྡན་གཤིན་རྗེའི་གཤེད། །གཤེད་བཞི་འཁོར་དང་ཕྱི་རོལ་བཅས་པ་བསྐྱེད། །གཟུངས་ཐག་རང་གི་སྙིང་གར་བཟུང་ནས་ནི། །ཏིང་ངེ་འཛིན་གྱིས་སྔགས་ཀྱི་བཟླས་པ་བྱ། །རང་གི་སྙིང་གའི་ཧཱུཾ་ལས་འོད་འཕྲོས་པས། །སྐུད་པའི་ལམ་ནས་ཡང་ཀྱི་ཐུགས་ཀར་ཞུགས། །ཚུར་ལ་འཕྲོས་པས་རང་གི་ཧཱུམ་ལ་ཐིམ། །བཅུ་གསུམ་སྔགས་ལ་རྟེན་འབྲེལ་བཏགས་པ་བཟླས། །འོད་དང་དུ་པ་བྱུང་བྱུང་བསྙེན་པ་བྱ། །བསྙེན་པ་ཐོན་ནས་གཙང་བའི་དབུས་འདུས་ནས། །ཡབ་ཡུམ་གཉིས་མེད་སྙོམས་པར་ཞུགས་པ་ཡིས། །བྱང་ཆུབ་སེམས་ཀྱི་ཆུ་ཡིས་ཁྲུས་བྱའོ། །ཁྲུས་ཀྱི་ཆོ་ག་སྒྲིབ་པ་སྦྱོང་ཞིང་བར་ཆོད་བསལ་བ་རྫོགས་སོ།། །།