བསྡུས་པའི་དོན།
རྒྱ་གར་སྐད་དུ། ཨཱཪྻ་མཉྫུ་ཤྲཱི་ན་མ་སངྒཱི་ཏི་ནཱ་མ་མ་ཧཱ་ཊཱི་ཀཱ །བོད་སྐད་དུ། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་རྒྱ་ཆེར་འགྲེལ་པ། བཅོམ་ལྡན་འདས་འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །སྒྲོ་དང་སྐུར་པས་སྟོང་པ་ཡི། །ངོ་བོ་ཉིད་ཀྱིས་བདེ་བ་ཆེ། །ཨུཏྤལ་དང་ནི་རལ་གྲི་འཛིན། །གཞོན་ནུར་གྱུར་ལ་ཕྱག་འཚལ་ནས། །ཚིག་རྒྱས་པ་ཡི་རྒྱུད་དག་ལས། །ཟབ་མོ་གླུ་ཡི་ལེའུ་དག །འདིར་ནི་བདག་གིས་དབྱེ་བར་བྱ། །དེ་ལ་འདིར་བདག་གིས་མགོན་པོ་འཇིག་རྟེན་དབང་ཕྱུག་ལས་ཇི་ལྟར་ཐོས་པ་བཞིན་བྲི་བར་བྱའོ། །དེ་ལ་རྟོགས་པ་དང་ལྡན་པའི་གང་ཟག་དག་ནི། དགོས་པ་དག་མེད་ན་འཇུག་པར་མི་འགྱུར་བས་ན། དེའི་ཕྱིར་རྒྱུད་འདི་བརྗོད་པར་བྱ་བ་ནི་གང༌། དགོས་པ་ནི་གང༌། དགོས་པའི་དགོས་པ་ནི་གང༌། འབྲེལ་པ་ནི་གང་ཞེ་ན། བརྗོད་པར་བྱ་བ་ནི་འཇམ་དཔལ་ཡེ་ཤེས་སེམས་དཔའ་ཁོ་ན་ཡིན་ལ། དགོས་པ་ནི་ཐེག་པ་སྣ་ཚོགས་ཀྱི་དོན་རྟོགས་པའོ། །དགོས་པའི་དགོས་པ་ནི་སྐུ་གསུམ་དང་ཡེ་ཤེས་ལྔ་ཐོབ་པར་བྱེད་པའོ། །འབྲེལ་པ་ནི་ཐབས་དང་ཐབས་ལས་བྱུང་བའི་མཚན་ཉིད་ཀྱིས་འབྲེལ་པར་གནས་སོ། །དེ་ལ་རྒྱུད་འདི་ནི་ནམ་མཁའ་དང་མཉམ་པའི་རྒྱུད་ཡིན་ཏེ། བྱ་བ་དང༌། སྤྱོད་པ་དང༌། གཉི་ག་དང༌། རྣལ་འབྱོར་དང༌། རྣལ་འབྱོར་བླ་ན་མེད་པའི་རྒྱུད་དང༌། རྒྱུད་ཐམས་ཅད་ཀྱི་བཤད་རྒྱུད་ཡིན་ཏེ། རྒྱུད་ཀུན་གྱི་ནི་བདག་པོ་མཆོག །ཅེས་པས་གསལ་ལོ། །ཐེག་པ་ཐམས་ཅད་ཀྱི་གལ་འགེགས་ཡིན་ཏེ། ཐེག་པ་སྣ་ཚོགས་ཐབས་ཚུལ་གྱིས། །ཞེས་པས་གསལ་ལོ། །གཞུང་མི་མཐུན་པ་མང་པོ་དག་རང་གི་འདོད་པའི་ངོས་ནས་སྨྲ་སྟེ་དེ་དག་གིས་ནི་རྒྱུད་འདིའི་ཆ་ཤས་ཙམ་ལས་མ་རྟོགས་ཏེ། རང་རང་གི་རྟོག་པ་ལ་བདེན་པར་འཛིན་པའི་ཕྱིར་རོ། །དེ་ལ་རེ་ཞིག་བསྡུས་པའི་དོན་བཤད་པར་བྱ་སྟེ། གླེང་གཞི་ཕུན་སུམ་ཚོགས་པ་དང༌། རྒྱུད་དངོས་དང༌། རྗེས་སུ་ཡི་རང་བའོ། །གླེང་གཞི་ལ་གསུམ་སྟེ། འཁོར་དང་སྟོན་
པ་དང་བསྟན་པ་ལན་སུམ་ཚོགས་པའོ། །རྒྱུད་དངོས་ནི། ཡི་གེ་གཅིག་པའི་རྒྱུད་དེ་ཨ་ཡིག་གཙོ་བོར་གྱུར་པའི་ཕྱིར་རོ། །མུ་སྟེགས་རི་དྭགས་ཞེས་པ་དང༌། །ཀུན་དོན་ཡོན་ཏན་གསུམ་གྱི་བདག །ཅེས་པས་མུ་སྟེགས་ཀྱི་ལྟ་བ་བསྟན་ཏེ། བདེན་པ་གཉིས་ནི་རྟོགས་པ་པོ། །ཕྱིར་མི་ལྡོག་པ་ཕྱིར་མི་འོང༌། །ཞེས་པས་ཉན་ཐོས་ཀྱི་ལྟ་བ་བསྟན་ཏོ། །འདྲེན་པ་རང་རྒྱལ་བསེ་རུའི་ཚུལ། །དེས་འབྱུང་སྣ་ཚོགས་ལས་བྱུང་བ། །ཞེས་པས་རང་རྒྱལ་བའི་ལམ་འབྲས་བུ་དང་བཅས་པ་བསྟན་ཏོ། །རྣམ་རིག་སྣ་ཚོགས་གཟུགས་དོན་ཅན། །རྣམ་ཤེས་སྣ་ཚོགས་རྒྱུད་དང་ལྡན། །སྣ་ཚོགས་གཟུགས་ཅན་ཡིད་ལས་སྐྱེས། །ཞེས་པས་རྣལ་འབྱོར་སྤྱོད་པའི་ལྟ་བ་བསྟན་ཏོ། །གཉིས་མེད་གཉིས་སུ་མེད་པར་སྟོན། །ཞེས་པས་ཟུང་འཇུག་གི་ངོ་བོ་སྟེ་སྒྱུ་མ་ལྟ་བུ་བསྟན་ཏོ། །བདེན་པ་གཉིས་ཀྱི་ཚུལ་ལ་གནས། །ཡང་དག་མཐའ་ལ་རྣམ་པར་གནས། །ཞེས་པས་རབ་ཏུ་གནས་པའི་དོན་བསྟན་ཏོ། །ཡང་དག་མཐའ་སྟེ་ཡི་གེ་མེད། །ཅེས་པས་གསང་སྔགས་བླ་ན་མེད་པའི་མཐར་ཐུག་པའི་དོན་བསྟན་ཏོ། །ཚོགས་གཉིས་ཚོགས་ནི་བསགས་པ་པོ། །ཞེས་པས་བསོད་ནམས་དང་ཡེ་ཤེས་ཀྱི་ཚོགས་བསགས་པ་བསྟན་ཏོ།། སྐད་ཅིག་གཅིག་གིས་རྫོགས་སངས་རྒྱས། །ཞེས་པས་ལྷ་སྐད་ཅིག་དྲན་རྫོགས་ཀྱིས་བསྐྱེད་པར་བསྟན་ཏོ། །རྡོ་རྗེ་ཧཱུཾ་སྟེ་ཧཱུཾ་ཞེས་སྒྲོགས། །མཚོན་དུ་རྡོ་རྗེའི་མདའ་ཐོགས་པ། །རྡོ་རྗེ་རལ་གྲིས་མ་ལུས་གཅོད། །རྡོ་རྗེ་སྐུ་འཆང་རྡོ་རྗེ་ཅན། །ཞེས་པས་ཆོ་ག་གསུམ་གྱིས་བསྐྱེད་པ་བསྟན་ཏེ། རྡོ་རྗེ་གདན་ནི་མ་ལུས་ལྡན། །ཞེས་པས་གདན་སྐྱེད་པ་བསྟན་ཏོ། །ཡེ་ཤེས་དབང་བསྐུར་ཅོད་པན་ཅན། །ཞེས་པས་དབང་བསྐུར་བའི་ཆོ་ག་ཡན་ལག་དང་བཅས་པ་བསྟན་ཏོ། །ངན་སོང་ཐམས་ཅད་རྣམ་སྦྱོང་བ། །ཞེས་པས་རོ་སྲེག་པའི་ཆོ་ག་བསྟན་ཏོ། །ཡེ་ཤེས་མེ་ལྕེ་འོད་འབར་གསལ། །ཞེས་པས་སྤྱིན་སྲེག་གི་ཆོ་ག་བསྟན་ཏོ། །བསམ་གཏན་ཡན་ལག་ཀུན་ཤེས་ཤིང༌། །ཞེས་པས་གྲུབ་མཐའ་དེ་དག་སོ་སོའི་སྒོམ་པ་བསྟན་ཏོ། །ཡན་ལག་མེད་པའི་རྩིས་ལས་འདས། །ཞེས་པ་དང༌། བསམ་གཏན་བཞི་པོའི་རྩེ་མོ་ཅན། །ཞེས་པས་མཚན་མ་མེད་པའི་རྫོགས་པའི་རིམ་པ་
བསྟན་ཏོ། །བཅུ་དྲུག་ཕྱེད་ཕྱེད་ཐིག་ལེ་ཅན། །རྣམ་པ་ཀུན་ལྡན་རྣམ་པ་མེད། །ཅེས་པས་མཚན་བཅས་ཀྱི་རྫོགས་རིམ་བསྟན་ཏོ། །ད་ནི་དཀྱིལ་འཁོར་བསྟན་པར་བྱ་སྟེ། དེ་ལ། དཀྱིལ་འཁོར་ཆེན་པོ་ཡངས་པ་ཡིན། །ཞེས་པས་དཀྱིལ་འཁོར་ཐམས་ཅད་ཀྱི་དོན་འདིར་རྟོགས་པར་བྱའོ། །ཁྱད་པར་གྱི་དཀྱིལ་འཁོར་བསྟན་པ་ནི། སངས་རྒྱས་རྣམ་པར་སྣང་མཛད་ཆེ། །ཞེས་པས་རིགས་ཀྱི་གཙོ་བོ་ཡིན་པས་རིགས་ལྔའི་དཀྱིལ་འཁོར་བསྟན་ཏོ། །གཙང་གནས་དམ་པ་གཽ་ཏམ། །ཞེས་པས་ཤཱཀྱ་ཐུབ་པའི་དཀྱིལ་འཁོར་བསྟན་ཏོ། །རྡོ་རྗེ་འཇིགས་བྱེད་འཇིགས་པར་བྱེད། །ཅེས་པས་རྡོ་རྗེ་འཇིགས་བྱེད་ཀྱི་དཀྱིལ་འཁོར་བསྟན་ཏོ། །ཁྲོ་བོའི་རྒྱལ་པོ་གདོང་དྲུག་འཇིགས། །ཞེས་པས་གཞོན་ནུ་གདོང་དྲུག་གི་དཀྱིལ་འཁོར་བསྟན་ཏོ། །ཧ་ལ་ཧ་ལ་གདོང་བརྒྱ་པ། །ཞེས་པས་འཇམ་དཔལ་གདོང་བརྒྱ་པའི་དཀྱིལ་འཁོར་བསྟན་ཏོ། །གཤིན་རྗེ་གཤེད་པོ་བགེགས་ཀྱི་རྒྱལ། །ཞེས་པས་གཤིན་རྗེ་གཤེད་ཀྱི་དཀྱིལ་འཁོར་བསྟན་ཏོ། །གདོང་ལྔ་གཙུག་ཕུད་ལྔ་དང་ལྡན། །ཞེས་པས་འཇམ་དཔལ་ཀུན་དུ་ཞལ་གྱི་དཀྱིལ་འཁོར་བསྟན་ཏོ། །དཔལ་ལྡན་རྒྱུ་སྐར་དཀྱིལ་འཁོར་ཅན། །ཞེས་པས་དཔལ་ལྡན་རྒྱུ་སྐར་གྱི་དཀྱིལ་འཁོར་བསྟན་ཏོ། །ལྷའི་དབང་པོ་ཞེས་པས་ཁྱབ་འཇུག་གི་དཀྱིལ་འཁོར་བསྟན་ཏོ། །ལྷ་ཡི་བླ་ཞེས་པས་ཚངས་པའི་དཀྱིལ་འཁོར་བསྟན་ཏོ། །ལྷ་ཡི་བདག་པོ་ཞེས་པས་བརྒྱ་བྱིན་གྱི་དཀྱིལ་འཁོར་བསྟན་ཏོ། །ལྷ་མིན་བདག་ཅེས་པས་རཱ་ཧཱུ་ལའི་དཀྱིལ་འཁོར་བསྟན་ཏོ། །ལྷ་ཡི་བླ་ཞེས་པས་གཟའ་ཕུར་བུའི་དཀྱིལ་འཁོར་བསྟན་ཏོ། །འཇོམས་བྱེད་ཅེས་པས་གཟའ་ཐགས་ཟངས་རིས་ཀྱི་དཀྱིལ་འཁོར་བསྟན་ཏོ། །འཇོམས་བྱེད་ཕྱི་མས་ནི་སྲིན་པོའི་རྒྱལ་པོ་ལང་ཀ་མགྲིན་བཅུའི་དཀྱིལ་འཁོར་བསྟན་ཏོ། །དབང་ཕྱུག་པོ་ཞེས་པས་མ་ཧཱ་དེ་བའི་དཀྱིལ་འཁོར་བསྟན་ཏོ། །ཤེས་རབ་རལ་གྲི་མདའ་གཞུ་ཐོགས། །ཞེས་པས་འཇམ་དཔལ་ཡེ་ཤེས་སེམས་དཔའ་ཉིད་ཀྱི་དཀྱིལ་འཁོར་བསྟན་ཏོ། །དེ་ལས་ཚོགས་བསགས་པ་དག་གིས་ནི་ས་དང༌། ལམ་དང༌། རྣམ་པར་ཐར་པའི་སྒོ་ནས་འཇམ་དཔལ་ཡེ་ཤེས་སེམས་དཔའ་ལ་བསྟོད་པ་བསྟན་ཏོ། །
ཏིང་འཛིན་ལུས་ཅན་ལུས་ཀྱི་མཆོག །ལོངས་སྤྱོད་རྫོགས་སྐུ་ཀུན་གྱི་རྒྱལ། །སྤྲུལ་པའི་སྐུ་སྟེ་སྐུ་ཡི་མཆོག །ཅེས་པས་འབྲས་བུ་བསྟན་ཏོ། །དེ་དག་དང་ཡེ་ཤེས་རྣམ་པ་ལྔ་དང༌། འདིས་བསྡུས་རྒྱས་ཀྱི་བསྟོད་པ་ཤེས་པར་བྱའོ། །