ཀླུ་རིགས་བཞིའི་སྒྲུབ་ཐབས་ཞེས་བྱ་བ།
རྒྱ་གར་སྐད་དུ། ནཱ་ག་ཀུ་ལ་ཙ་ཏྭ་རི་སཱ་དྷ་ནཱཾ་ནཱ་མ། བོད་སྐད་དུ། ཀླུ་རིགས་བཞིའི་སྒྲུབ་ཐབས་ཞེས་བྱ་བ། ཕྱག་ན་རྡོ་རྗེ་ལ་ཕྱག་འཚལ་ལོ། །ཐུགས་རྗེ་བྱམས་པས་འགྲོ་བ་རྣམས་ལམ་བཞིན་བརྩེ་བར་མཛད། །གདུག་པ་འདུལ་ཕྱིར་ཁྲོ་རྒྱལ་འབར་བའི་སྐུར་སྟོན་པ། །བྱོལ་སོང་རྒྱན་ལྡན་བསྐལ་པའི་མེ་ལྟར་འབར། །བཟོད་དཀའ་གདུག་པའི་ནད་ལས་ཐར་མཛད་དེ་ལ་དངོས་པོ་ཀུན་གྱིས་འདུད། །བྱམས་པས་ཞེ་སྡང་ཞི་བ་དང༌། དྲག་པོས་ཉེ་རིངས་གསང་བའི་ཕྱིར། །དེ་ཡི་སྒྲུབ་ཐབས་གཟུང་བའི་ཕྱིར། །བླ་མའི་དྲིན་གྱིས་ཐོབ་ནས་བརྩམ། །གང་ཞིག་བསྙེན་པ་རྫོགས་པ་ཡིས། །གང་ཞིག་དབང་དུ་བསྡུ་འདོད་ན། །ཀླུ་ཡི་སྒྲུབ་དང་འཁྲུལ་འཁོར་དང༌། །སྦྱོར་བ་བརྩམ་པར་བྱ་བ་ཡིན། །དང་པོ་གནས་ཆེན་ཡིད་འོང་དུ། །བསྙེན་པ་སྔོན་དུ་རྫོགས་བྱས་ཏེ། །ཀླུ་བརྒྱད་གཟུགས་
ནི་འཁར་གཞོང་གཞག །རང་ཉིད་ལྷ་ཡི་སྐུར་བསྒོམས་ན། །དུས་གསུམ་ཀླུ་ལ་མཆོད་པ་བྱ། །རྟགས་དང་རྨི་ལམ་བརྟགས་ནས་ནི། །དེ་ལས་བཟློག་པའི་ལས་བརྩམ་སྟེ། །མཚམས་བཅད་ས་ཡི་ཆོ་ག་བྱ། །སྟེགས་བུ་བྱི་དོར་ལེགས་བྱས་ཏེ། །སྟ་གོན་ཆོ་ག་རྒྱས་བྱས་ལ། །དེ་ནས་རྫས་རྣམས་བསག་པར་བྱ། །འབྲས་ཀྱི་རྒྱུ་ལས་བྱས་པ་ཡི། །ཀླུ་ཆེན་བརྒྱད་ནི་སྦྲུལ་མགོ་ཅན། །དངུལ་གཞོང་ནང་དུ་བསག་པར་བྱ། ཁ་དོག་ཚོན་གྱིས་བསྒྱུར་ལ་གཞག །སོ་སོ་ལྟོ་འཕྱེའི་མགོ་བོ་ནི། །དགུ་དང་བདུན་དང་ལྔ་དང་གསུམ། །སྐྱེས་པ་བུད་མེད་མཛེས་པ་དང༌། །སྦྲུལ་དང་སྦལ་པ་ལྕོང་མོ་དང༌། །ཉ་དང་རུས་སྦལ་རྐང་མངས་དང༌། །སྡིག་པ་ཕག་དང་མདོ་རྟོལ་དྲེ། །གཞན་ཡང་གང་བྱུང་གཟུགས་བྱའོ། །དེ་ནས་ཐིག་དང་ཆོན་དགྱེ་ཞིང༌། །དབུས་ཀྱི་ལྟེ་བ་ཟླུམ་པོ་ལ། །གཙོ་བོ་དབུས་སུ་བྲིས་ནས་ནི། །འདབ་མ་བརྒྱད་ལ་ཀླུ་བརྒྱད་བྲི། །ཕྱི་རོལ་གྱི་ནི་འདབ་མ་ལ། །འཁོར་དུ་གཏོགས་པ་སོ་སོར་བྲི། །ཤར་ལ་སོགས་པའི་ཕྱོགས་རྣམས་སུ། །སྐྱེས་པ་བུད་མེད་ལ་སོགས་བྲི། །མཚམས་སུ་ལྕོང་མོ་ཉ་སོགས་དགོད།། སྟེང་དུ་སྡིག་པ་ཕག་སོགས་བྲིའོ། །སྟེང་དུ་འཁར་གཞོང་ཀླུ་ཆེན་བརྒྱད། །བར་ཁྱམས་ལྷ་ཡི་སྣམ་བུ་ལ། །ཀླུ་དང་གཉན་དང་ས་བདག་གསུམ། །རིམ་གྱིས་མཉམ་པར་དགོད་པར་བྱ། །བླ་རྒྱན་འོག་རྒྱན་འབྱོར་ཚད་དགྲམ། །འབྲུ་ལྔ་སྨན་ལྔའི་གཏོར་མ་དང༌། །ནཱ་ག་གེ་སར་ཀཎྜ་ཀ་རི་དང༌། །ནཱ་ག་པུཥྤ་རྒྱ་མཚོ་དབུ་བ་དང༌། །ཆུ་སྲིན་སྡེར་མོ་དབང་པོ་ལག་པ་དང༌། །བལ་པོའི་སེའུ་སྨྱག་ཤད་ལྕུག་མ་དང༌། །ནཱི་ལོཏྤ་ལ་འདམ་བུའི་རྩ་བ་དང༌། །དར་ཚོན་སྣ་ལྔ་རས་སྐུད་དམར་པོ་དང༌། །ལི་ཁྲི་དམར་པོ་དང་ནི་ག་བུར་ཤེལ། །པུ་ཤེལ་ཙེ་དང་ལྗོན་ཤིང་འདམ་བུ་ཚལ། །དཀར་གསུམ་མངར་གསུམ་འབྲས་ཆན་ཁུར་བའོ། །དེ་ནས། འདོད་ཡོན་ལྔ་ཡི་འཁོར་ལོ་ནི། །གྲུ་བཞི་སྒོ་བཞི་བྷྲཱུཾ་ལས་ནི།། འདབ་བཞི་འདབ་བརྒྱད་བསྐྱེད་པར་བྱ། །ཕུཿ་ལས་གླུ་བརྒྱད་ཀླུ་ཆེན་ཏེ། །འཁོར་ཡང་དེ་བཞིན་བསྐྱེད་བྱས་ནས། །གཙོ་བོ་སྒྲུབ་ཐབས་ལས་གསུངས་བཞིན། །སྤྱན་དྲངས་བསྟིམ་པ་ལ་སོགས་ཀྱིས། །ཀླུ་ལ་སོགས་པ་དེ་བཞིན་དགུག །ཨོཾ་རྒྱ་མཚོ་ཆེན་པོའི་ཀློང་དཀྱིལ་ནས། །གཙུག་ན་རིན་ཆེན་ཀླུ་ཡི་རྗེ། །ནོར་རྒྱས་བུ་དང་དུང་སྐྱོང་དང༌། །དགའ་བོ་དང་ནི་འཇོག་པོ་དང༌། །པདྨ་དང་ནི་ཆུ་ལྷ་དང༌། །སྟོབས་ཀྱི་རྒྱུ་དང་མ་དྲོས་དང༌། །ཀླུ་ཆེན་བརྒྱད་པོ་འཁོར་དང་བཅས། །གནས་འདིར་མཆོད་ཀྱིས་གཤེགས་སུ་གསོལ། །རྒྱལ་རིགས་དང་ནི་བྲམ་ཟེའི་རིགས། །རྗེ་རིགས་དང་ནི་གདོལ་བའི་རིགས། །གནས་འདིར་མཆོད་ཀྱིས་གཤེགས་སུ་གསོལ།།
ཀླུ་བན་གཉན་དང་ས་བདག་ཚོགས། །སྤྲུལ་བ་འབུམ་སྡེ་འཁོར་དང་བཅས། །གནས་འདིར་མཆོད་ཀྱིས་གཤེགས་སུ་གསོལ། །མེ་ཏོག་ལ་སོགས་མཆོད་པ་ལྔ། །འདོད་པའི་ལྷ་དབུལ་བར་བྱ། །གཏོར་མ་རྣམས་ཀྱང་སོ་སོར་དབུལ། །ནཱ་ག་གེ་སར་སྨན་གྱི་མཆོག །སྔགས་དང་ཕྱག་རྒྱས་བྱིན་བརླབས་ནས། །ཏིང་འཛིན་འཕྲོ་འདུའི་བརྡས་བཀྲོལ་ཏེ། །ཀླུ་ཆེན་བརྒྱད་ལ་མཆོད་པ་དབུལ། །སྔོན་གྱི་དམ་ཚིག་སླར་དུལ་ལ། །ཞེ་རིངས་དུག་ལས་སླར་དུ་ལ་ཞིག །ཀཎྜ་ཀ་རི་ནཱ་ག་པུཥྤ་དང༌། །རྒྱ་མཚོ་དབུ་བ་ཆུ་སྲིན་སྡེར་མོ་དང༌། །དབང་བོ་ལག་བ་ནཱ་ག་གེ་སར་དང༌། །བལ་པོ་སེའུ་སྨྱག་ཤད་ལྷུག་མ་དང༌། །ནཱི་ལ་ཨུཏྤལ་འདམ་བུའི་ནགས་ཚལ་དང༌། །དར་ཚོན་སྣ་ལྔའི་རས་སྐུད་དམར་པོ་དང༌། །ལི་ཁྲི་དམར་པོ་ག་བུར་ཤལ་དང་ནི། །པུ་ཤེལ་རྩེ་དང་དུང་གཡས་འཁྱིལ་བ་དང༌། །ཤུ་དག་དཀར་པོ་སྙིང་ནི་ཞོ་ཤ་དང༌། །མཁལ་མ་ཞོ་ཤ་སྟག་པའི་ཤུན་པ་དང༌། །སེང་ལྡེང་དཀར་དམར་ཀླུ་སྨན་སྣ་ཚོགས་ཀྱིས། །ཀླུ་རྣམས་ཀུན་ལ་རབ་ཏུ་མཆོད་པར་བྱ། །མཆོད་པ་ཕུལ་ནས་བཟླས་པ་བྱ། །ཨོཾ་ནཱ་ག་ཧ་ར་ཧ་ར་ནཱ་ག་ཕུ། །པྲ་ཧ་ར་པྲ་ཧ་ར་ནཱ་ག་ཕུ། །ཚིནད་ཚིནད་ནཱ་ག་ཕུ་ཧྲྀ་ད་ཡ་ནི་ཕུ། བྷིནྡ་བྷིནྡ་ནཱ་ག་དྷ་མ་ནི་ཕུ། བི་སི་མ་ཏ་ནཱ་ག་ཤ་རཱི་ར་ཎི་ཕུ། པི་སྥོ་ཊ་ཡ་ནཱ་ག་ན་ཡ་ནི་ཕུ། ནཱ་ག་བི་དཱ་ར་ཎ་ཡ་ཕུ། ནཱ་ག་ཀྲོ་དྷ་ན་ཡ་ཕུ་སྭཱ་ཧཱ། ཨོཾ་ཨ་ནནད་ཡ་ཧཱུཾ་ནཱཾ་ཧཱུཾ་སྭཱ་ཧ། ཨོཾ་བཱ་སུ་ཀི་ཧཱུཾ་ནཱཾ་ཧཱུཾ་སྭཱ་ཧཱ། ཨོཾ་ཏ་ཀཥ་ཀ་ཧཱུཾ་ནཱཾ་ཧཱུཾ་སྭཱ་ཧཱ། ཨོཾ་པདྨ་ཧཱུཾ་ནཱཾ་ཧཱུཾ་སྭཱ་ཧཱ། ཨོཾ་མ་ཧཱ་པདྨ་ཧཱུཾ་ནཱཾ་ཧཱུཾ་སྭཱ་ཧཱ། ཨོཾ་ཤ་ཁ་པཱ་ལ་ཧཱུཾ་ནཱཾ་ཧཱུཾ་སྭཱ་ཧཱ། ཨོཾ་ཀརྐོ་ཊ་ཧཱུཾ་ནཱུཾ་ཧཱུཾ་སྭཱ་ཧཱ། ཨོཾ་ཨ་ཎ་ཝ་ཏ་ཏཱུཾ་ནཱཾ་ཧཱུཾ་སྭཱ་ཧཱ། ཨོཾ་ནཱ་ཀ་ཀུ་ལ་ཙ་ཏྭ་རི་ཤཱ་ནྟི་སྭཱ་ཧཱ། ཨོཾ་ནཱ་ག་པྲ་ཏི་སྥོ་ཊ་ཡ་སྭཱ་ཧཱ། ཨོ་ནཱ་ག་པྲ་པཉྩ་བུ་ཉེ་བ་སྭཱ་ཧཱ། ཨོཾ་ཏ་ཐཱ་ག་ཏ་ཧྲྀ་ད་ཡ་ཧཱུཾ་སྭཱ་ཧཱ། ཨོཾ་ཏ་ཐཱ་ག་ཏ་ཧྲྀ་ད་ཡ་ཙ་ལེ་ཙ་ལེ་ཧཱུཾ་ཕཊ། ཀུན་ལ་བརྒྱ་བརྒྱ་བཟླས་པར་བྱ། །གཙུག་ན་ཡིད་བཞིན་ནོར་བུ་ཅན། །མིག་ནེ་གདེངས་པ་ལྟོ་འཕྱེའི་རིགས། །ཀླུ་ཆེན་བརྒྱད་རོ་མཐོང་བའི་དུག །བཟོད་དཀའི་དུག་རྣམས་ཕྱིར་ཕྱུང་ཤིག །ལུས་ཆེན་མགོ་བོ་ཐ་དད་པའི། །ཞེ་སྡང་དྲག་པོ་རྒྱས་པ་ཡི། །རིགས་བཞི་ཀླུ་རྒྱལ་ཡིད་ཀྱི་དུང༌། །བཟོད་དཀའི་དུག་རྣམས་ཕྱིར་ཕྱུང་ཤིག །གཤེར་ལ་གནས་པ་མཛངས་པའི་རིགས། །གཙང་མ་ཕལ་ལ་གནོད་མི་བྱེད། །ཀླུ་བྲན་འབུམ་སྡེ་རེག་བའི་དུག །བཟོད་དཀའི་དུག་རྣམས་ཕྱིར་ཕྱུང་ཤིག །ཞེ་རིངས་ནག་པོ་བྱ་ལོ་སོང་རིགས། །རྨིག་བཞི་ལྕགས་ལས་ན་བུན་འཐིབས། །གཉེན་ཆེན་འབུམ་སྡེ་ཁ་བླངས་དུག །བཟོད་དཀའི་དུག་རྣམས་ཕྱིར་ཕྱུང་ཤིག །དམན་པའི་ཆ་འཛིན་ཞེ་སྡང་ཅན། །བདེན་བ་མི་ཉན་
ཀུན་ལ་གནོད། །ས་བདག་འབུམ་སྡེ་མཆེ་བའི་དུག །བཟོད་དཀའི་དུག་རྣམས་ཕྱིར་ཕྱུང་ཤིག །དྲེགས་པ་ཞེ་སྡང་འབར་བ་ཡི། །གླེན་པ་བརྒྱལ་མཐུ་བོ་ཆེ། །འགྲོ་བའི་ལ་གང་གནོད་པ། །བཟོད་དཀའི་དུག་རྣམས་ཕྱིར་ཕྱུང་ཤིག །སྦྱོར་གཞན་རབ་ཏུ་ཁྲོས་པའི་པོ་ཉ་ནི། །སྤྲུལ་པ་འབུམ་སྡེ་འགྲོ་བའི་གནོད་པ་སྐྱེལ། །སྨན་དང་སྔགས་དང་ཕྱག་རྒྱ་ཏིང་འཛིན་གྱིས། །བཟོད་དཀའི་དུག་རྣམས་ཕྱིར་ཕྱུང་ཞིག །དེ་ལྟར་བསྙེན་པ་སྔོན་སོང་བས། །མཆོག་ཏུ་སྒྲུབ་པོས་དུག་ཕྱུང་ནས། །རྨི་ལྟས་རིམ་པ་སོ་སོར་གསལ། །ཐུབ་རྟགས་བྱུང་ན་རྫས་རྣམས་ནི། །རྟེན་ཡོད་གནས་སུ་སྤ་བར་བྱའོ། །གལ་ཏེ་མི་ཐུབ་རྟགས་བྱུང་ནས།། ཆོ་འཕྲུལ་དྲག་པོ་སྟོན་བྱེད་ན། །འཁྲུལ་འཁོར་ལས་ཀྱི་སྦྱོར་བ་བརྩམ། །བསད་པའི་ལས་ཀྱི་སྦྱོར་བ་ནི། །འཁོར་ལོ་ཆེན་པོ་ལ་བརྟེན་ནས། །ཀླུ་གྲུབ་དཀྱིལ་འཁོར་ཤར་ཕྱོགས་སུ། །ཐབས་བཟློག་པ་ཡི་ལས་བྱ་སྟེ། །བྱང་དུ་གསད་པའི་ལས་བྱའོ། །སྲོག་ནན་ནན་ཕཊ་ཕཊ། པྲ་རཾ་ཛྭ་ལ་ཛྭ་ལ་ཕཊ་ཕཊ། ཤད་ཤད་ཤིག་ཤིག་ཕཊ་ཕཊ། མཱ་ར་ཡ་ཧཱུཾ་ཕཊ། རིགས་བཞི་ཀླུ་ལ་མནན་པ་བྱ། །རཱ་ཛ་ཀུ་ལེའི་ཐེམ་པའམ། །ཡང་ན་སྒྲུབ་ཁང་ཐེམ་འོག་ཏུ། །དབྱར་གྱི་ཁྱིམ་གསུམ་ཐ་མ་ལ། །དྲུག་གཉིས་བཞི་ཡི་ཉིན་ཕྱེད་ན། །ཤིན་ཏུ་དམ་པར་སྦ་བར་བྱ། །རྒྱ་གྲམ་འབར་བས་སྟེང་ནས་མནན། །ཇི་ལྟར་བསྟན་པའི་ཏིང་འཛིན་གྱིས། །རི་རབ་གླང་ལ་བསྐོར་ནས་ནི། །བསྐལ་པའི་མཐའ་རུ་མནན་པར་བསམ། །མཐུ་སྟོབས་ཆེན་པོའི་ང་རོ་ཡིས། །ཕྲེང་བའི་སྔགས་ནི་རབ་བཟླས་ཤིང༌། །རྒྱ་གྲམ་འབར་བས་སྟང་སྟབས་བྱ། །མོས་པ་རང་འདོད་ལྷ་མཉེས་ཏེ། །སྒྲུབ་པས་མངོན་སུམ་སྣང་བར་མཛད། །རྩོལ་བ་དྲག་པོས་རྟོག་པའི་ནང་ལས་ཐར།། ཡུན་དུ་མ་བཏང་ངང་ལྡན་ངང་བསྲིངས་ན། །ཏཀྵ་ཀ་ཡིས་བཟུང་བར་གྱུར་པ་ཡང༌། །ཟླ་བ་དྲུག་གིས་བཟློག་འགྱུར་ཐེ་ཚོམ་མེད། །གང་ཞིག་རང་སེམས་དཔང་དུ་བཙུགས་ནས་ནི། །ཐེ་ཚོམ་མེད་པར་རྟག་ཏུ་མ་བརྗེད་ན། །རྟོག་པའི་ནད་ལས་ཐར་ཅིང་དངོས་གྲུབ་འབྱུང་བར་ངེས། །འགྲོ་ལ་བརྩེ་བས་ཀླུ་སྒྲུབ་འཁྲུལ་འཁོར་བརྩམས། །འདི་ལས་བསོད་ནམས་དག་རྩ་ཅ་ཡད་པ། །གང་མོས་རྟོག་པའི་ནད་ལས་ཐར་གྱུར་ནས། །དེ་བཞིན་གཤེགས་པ་རྣམས་ཀྱི་ཞལ་མཐོང་ཤོག །རིན་ཆེན་དཀོན་མཆོག་གསུམ་ལ་ཕྱག་འཚལ་ནས། །དངོས་གྲུབ་སྡུག་
བསྔལ་ཐམས་ཅད་ཞི་བར་ཤོག །སློབ་དཔོན་ཛཱ་བ་རི་པས་མཛད་པའི་ཀླུ་སྒྲུབ་ཐབས་རྫོགས་སོ།། །།བལ་པོའི་པཎྜི་ཏ་དེ་བ་པཱུ་རྞམ་ཏི་དང༌། ལོ་ཙཱ་བ་དགེ་སློང་ཆོས་ཀྱི་བཟང་པོས་བསྒྱུར་བའོ།།