རོའི་རབ་གནས་ཆོ་ག།
སྡོམ་པ་བཟང་པོ།
༈། །བླ་མ་དམ་པ་རྣམས་ལ་ཕྱག་འཚལ་ལོ། །སྔགས་པ་མཚན་ཉིད་དང་ལྡན་པས་ཞག་བདུན་རོའི་རབ་གནས་བྱ་སྟེ། དེ་ཡང༌། ངན་སོང་ཐམས་ཅད་རྣམ་སྦྱོང་བ། །མགོན་པོ་སེམས་ཅན་ཀུན་གྱི་མཆོག །གསུང་ངོ༌། །ཤི་བ་སྦྱང་བ་བསྟན་ཏེ། དཀྱིལ་འཁོར་ཆོ་ག་རྫོགས་བྱ་སྟེ། །ཞི་བའི་དཀྱིལ་འཁོར་སྟེང་དུ་བྱ། །ཁྲོ་བོ་དེ་ལ་འོག་ཏུ་བྱའོ། །ཐིག་གདབ་ཚོན་གྱི་ཆོ་ག་བྱ། །དཀྱིལ་འཁོར་དབུས་སུ་བུམ་པ་གཙང་མ་ལ་རས་ཁ་ཚར་མ་ཉམས་པས་མགུལ་ཆིངས་བྱ། དེར་སྙིང་པོ་ལྔ་དང༌། འབྲུ་ལྔ་དང༌། སྨན་ལྔ་དང༌། ཚུ་གཙང་མས་དགང༌། དཀྱིལ་འཁོར་གྱི་ཟུར་བཞིར་མདའ་བཞི་ལ་དར་སྣ་ལྔ་བཏགས་ལ་གཞག །གཤིན་བུམ་མགུལ་ཆིངས་སྔོན་པོར་བྱས་ལ་གཞག་གོ །དེ་ནས་དྲི་མ་བཅའ་སྟེ། དྲི་མ་ལ་མཚན་བྱང་བཏགས་ལ། གདུགས་དང་དར་སྣ་དང་མེ་ལོང་བཏགས་ལ་གཞག་གོ །དེ་ནས་བགེགས་བསྐྲད་པ་ནི་ལས་ཐམས་ཅད་པའི་སྔགས་བཟླས་ཤིང་ཉུངས་ཀར་ཕྱོགས་བཞིར་གཏོར་རོ། །དེ་ནས་བགེགས་མཐོང་བ་རྣམས་ལ་ཕྱིའི་གཏོར་མ་བཏང་ལ་བདེན་པ་བདར་ཏེ་འདི་སྐད་དོ། །ཚེ་འདས་པའི་བློ་འདི་རྒྱལ་པོའམ། མ་མོའམ། བཙན་ནམ། བདུད་དམ། ད་མུའམ། ཀླུའམ། སས་བདག་གམ། ཐེའུ་རང་ལ་སོགས་ཏེ། གང་གི་ལག་ན་ཡོད་ཀྱང་རུང་སྟེ། ཁྱེད་ལ་གླུད་གཏོར་རིན་པོ་ཆེས་བརྒྱན་པ་འབུལ་གྱིས། འདི་བ་ཞེས་ལ་གསོན་གྱི་ཚེ་ལ་མ་གནོད། གཤིན་གྱི་བླ་མ་བཅད་པར་རྣལ་འབྱོར་པའི་བཀའ་ལ་ཉོན་ཅིག །དེ་སྐད་བྱས་ལ་ལས་རྒྱུ་འབྲས་ཀྱི་ཆོས་བཤད་ལ། གཏོར་མ་སྔགས་དྲུག་ཕྱག་རྒྱ་དྲུག་གིས་བྱིན་གྱིས་བརླབ་པོ། །བགེགས་དམའ་བ་རྣམས་ལ་ཕོ་ཉ་དགྱེ། རྡོ་རྗེའི་ལེའུ་གདོན། ཉུངས་ཀར་གཏོར་ཏོ། །དེ་ལྟར་བྱས་ལ་དྲི་མ་ལ་བླ་ཡང་ཡང་དགུག་གོ །དེ་ནས་ཏིལ་ལ་སྡིག་པའི་གཟུགས་བྱས་ལ་ཆེ་འདས་ཀྱི་སྡིག་པ་འདི་ལ་བསྟིམས། དེ་ནས་ཞི་བའི་སྦྱིན་སྲེག་བྱ། དུས་གསུམ་དུ་མཆོད་པ་དང་གཏོར་མ་ཆ་གསུམ་
གཏོང་ངོ༌། །དུག་སྦྱང་བ་ནི་དེ་ཡང་དག་པར་བྱེད་ཅིང་སྡིག་སེལ་བ་ཞེས་སོ། །ཁྲུས་ཆོག་བཤད་དེ། བུམ་པའི་ནང་དུ་ཆུ་དང་སྨན་དང༌། སྤོས་ལྔ་ལ་སོགས་པ་བླུགས་ལ། བུམ་པའི་ཁར་པདྨ་འདབ་མ་བརྒྱད་པ་དཀར་པོ་ཅིག་བསམས་ལ། རྒྱུད་ལས། དཔལ་ལྡན་སངས་རྒྱས་པདྨ་སྐྱེས། །ཞེས་སོ། །དེའི་སྟེང་དུ་ཨ་ལས་འཇམ་དཔལ་ཡེ་ཤེས་སེམས་དཔའ་བསྒོམ་མོ། །རྒྱུད་ལས། རྫོགས་པའི་སངས་རྒྱས་ཨ་ལས་བྱུང༌། །གསུང་ངོ༌། །དེ་ལ་ཛཿཧཱུཾ་བཾ་ཧོཿས་ཡེ་ཤེས་པ་དགུག་གཞུག་བྱ། ལས་ཐམས་ཅད་པའི་སྔགས་བཟླས། འཇམ་དཔལ་གྱི་གསང་གནས་ནས་བདུད་རྩིའི་ཆུ་རྒྱུན་བྱུང་ནས་བུམ་པ་དཀར་མེར་གྱིས་ཁེངས་པར་བསམ་མོ། །དེ་ནས་ཁྲུས་བྱས་ཏེ། མེ་ལོང་ནང་དུ་མཚན་བྱང་གསལ་བར་བྱས་ལ། ཨ་འདོད་ཆགས་ཞེ་སྡང་གཏི་མུག་གསུམ། །འདི་དག་འཇིག་རྟེན་དུག་གསུམ་སྟེ། །སངས་རྒྱས་བདེན་པས་དུག་མི་མངའ། །སངས་རྒྱས་བདེན་པས་དུག་བཅོམ་མོ། །ཆོས་དང་དགེ་འདུན་ཡང་དེ་བཞིན་དུ་སྦྱར་རོ། །ས་ནི་དུག་གི་ཕ་ཡིན་ཏེ། །ས་ནི་དུག་གི་མ་ཡང་ཡིན། བདེན་པའི་བདེན་ཚིག་འདི་བརྗོད་པས། །ཚེ་འདས་དུག་ནི་དུག་མེད་ཤོག །ལས་ཐམས་ཅད་པའི་སྔགས་ཀྱིས་ཁྲུས་དུས་གསུམ་དུ་བྱའོ། །ཞག་བདུན་པའི་ཐ་མ་ལ་ཕྱིར་མི་དག་པར་བྱ་བའི་ཕྱིར། བུམ་པས་དབང་བསྐུར་ལ། ཕྱོགས་བཞིར་ཕྱིན་ལ་འདི་སྐད་དོ། །ཚེ་འདས་ཉོན་མོངས་སྙིང་རྗེ་རྗེ། །གལ་ཏེ་ལས་ཀྱི་དབང་བཙན་ནས། །ཤར་གྱི་ཕྱོགས་སུ་སྐྱེ་སྲིད་དོ། །ཤར་གྱི་ཕྱོགས་སུ་སྐྱེས་པ་ནི། །དེ་ན་སྐྱོབ་པའི་མགོན་པོ་བཞུགས། །མགོན་པོའི་མིང་ནི་རྣམ་སྣང་མཛད། །མགོན་པོའི་མིང་ནི་ཡུལ་འཁོར་སྲུང་སངས་རྒྱས་དེ་ལ་ཕྱག་འཚལ་ལོ། །མགོན་པོ་དེ་ལ་སྐྱབས་སོང་ཅིག །དེས་ཕྱོགས་འོག་མ་གསུམ་འགྲེའོ། ལྷོར་རིན་འབྱུང་མགོན་པོའི་མིང་ནི་འཕགས་སྐྱེས་པོ། །ནུབ་སྣང་བ་མཐའ་ཡས། མགོན་པོའི་མིང་ནི་སྤྱན་མི་བཟང༌། བྱང་སངས་རྒྱས་དོན་ཡོད་གྲུབ་པ། །མགོན་པོའི་མིང་ནི་རྣམ་ཐོས་སྲས། །དེ་ནས་ཚེ་ལས་འདས་པའི་རིག་པ་ཨ་དཀར་པོ་བསམ། ཨ་དེ་འཇམ་དཔལ་གྱི་ཐུགས་ཀར་འཕང་ངོ༌། །དེ་ནས་བྱང་བུ་མར་མེ་ལ་བསྲེག །ཐ་མ་ལ་སཱཙྪ་གདབ། ཚེ་འདས་པའི་དོན་དུ་སྨོན་ལམ་རྒྱ་ཆེན་པོ་གདབ་པོ། །སྡོམ་པ་བཟང་པོས་མཛད་པ་འབྲོ་ལོ་ཙཱ་བ་དྷརྨཱ་བྷིས་བསྒྱུར་བ་རོའི་རབ་གནས་ཆོ་ག་རྫོགས་སོ།།