ཐུན་མོང་གི་དངོས་གྲུབ་སྒྲུབ་པའི་ཐབས་ཀྱི་མན་ངག།
སྡོམ་པ་བཟང་པོ།
༈། །འཇམ་དཔའ་ཡེ་ཤེས་སེམས་དཔའ་ལ་ཕྱག་འཚལ་ལོ། །ཐུན་མོང་གྲུབ་རིན་པོ་ཆེ་གཏེར་སྒྲུབ་པ། འཇམ་དཔལ་གྱི་བསྙེན་པ་གཞུང་བཞིན་
དུ་བྱས་ལ། དེ་ནས་གྲོང་ཁྱེར་ཆེན་པོའི་དབུས་སམ། རྒྱལ་པོའི་ཕོ་བྲང་དུ་མཎྜལ་མདའ་གང་གྲུ་བཞི་བ་བྱས་པ། བའི་རྣམ་ལྔ་དང་དྲི་ཞིམ་པོ་སྣ་ཚོགས་ཀྱིས་བྱུགས་ལ། གླེགས་བམ་གྲུ་བཞི་པ་ཅིག་ལ་པདྨ་འདབ་མ་བརྒྱད་པ་བྲིས་ལ། པདྨའི་ལྟེ་བ་ལ། ཛཾ་བྷ་ལའི་གཟུགས་སེར་པོ། གསུས་པ་ཆེ་བ་བྱིན་ཤ་རྒྱས་པ་རྒྱན་མ་ལུས་པས་བརྒྱན་པ། གཡས་པ་ན་བཱི་ཛ་པཱུར་ར་བསྣམས་པ། གཡོན་པ་ན་ནེའི་ལེའི་རྒྱལ་པ་བསྣམས་པ་བུམ་པའི་གདན་ལ་བཞུགས་པའོ། །དེའི་མདུན་དུ་གནོད་སྦྱིན་སྐུ་མདོག་སེར་པོ་རིན་པོ་ཆེ་བསྣམས་པ། གཡས་སུ་གནོད་སྦྱིན་སྐུ་མདོག་དམར་སེར་བུ་མ་པ་བསྣམས་པ། རྒྱབ་ཏུ་གནོད་སྦྱིན་སྐུ་མདོག་དཀར་པོ་རིན་པོ་ཆེ་ཐོགས་པ། གཡོན་དུ་གནོད་སྦྱིན་སྐུ་མདོག་ནག་པོ་རལ་གྲི་ཐོགས་པ། ཤར་ལྷོར་སྐུ་མདོག་སེར་སྐྱ་རལ་གྲི་བསྣམས་པ། ལྷོ་ནུབ་ཏུ་སྐུ་མདོག་སྨུག་ནག་མདུང་ཐོགས་པ། ནུབ་བྱང་ན་སྐུ་མདོག་སེར་སྐྱ་རིན་པོ་ཆེའི་ཁང་པ་ཐོགས་པ། བྱང་ཤར་ན་སྐུ་མདོག་སེར་པོ་གྲི་ཕུ་བ་ཐོགས་པ། གཡོན་ཐམས་ཅད་རིན་པོ་ཆེའི་རྒྱལ་མཚན་ཐོགས་པ། དར་སྣ་ཚོགས་ཀྱིས་ཐོད་བཅིངས་པའོ། །ཡང་གླེགས་བམ་གྲུ་བཞི་པ་ཅིག་ལ་པདྨ་འདབ་མ་བརྒྱད་པ་ལྟེ་བ་ལ་ལྷ་མོ་ནོར་རྒྱུན་མ་སེར་མོ་རིན་པོ་ཆེའི་རྒྱན་གྱིས་བརྒྱན་པ། གཡས་མཆོག་སྦྱིན་གཡོན་འབྲས་ཀྱི་སྙེ་མ་བསྣམས་པའོ། །ལྷ་མོ་བརྒྱད་ཀྱང་གཙོ་མོའི་ཆ་ལུགས་ཅན་ནོ། །དེ་ནས་མཎྜལ་གྱི་ཁར་བུམ་པ་ནས་དང་འབྲས་ཀྱིས་བཀང་ལ་གཞག་གོ །དེའི་ཁར་ལྷ་མོའི་གླེགས་བམ་བཞག་ལ། དེའི་ཁར་ཛཾ་བྷ་ལའི་གླེགས་བམ་གཞག །གླེགས་བམ་གཉིས་ཀྱི་བར་དུ་རིན་པོ་ཆེའི་ཀ་བ་གཟུགས། དེ་ལ་དགུག་གཞུག་ལེགས་པར་བྱས་ལ་བདག་འཇམ་དཔལ་དུ་གསལ་བའི་ཐུགས་ཀ་ནས་ཛཿ་ཧཱུཾ་བཾ་ཧོཿ་འཕྲོས་པ་མེ་ཏོག་ལུག་རུ་དང༌། དཀར་གསུམ་མངར་གསུམ་གྱིས་མཆོད་ལ་གཏོར་མ་སུམ་ཡར་དུ་གཏར། མཆོད་པ་རྣམ་ལྔ་དབུལ། དེའི་མཇུག་ལ་འཁོར་དང་ལོངས་སྤྱོད་དངོས་གྲུབ་སྩོལ་ཅིག་ཅེས་བྱའོ། །ཉིན་མོ་ལྷ་མོ་རྣམས་ཀྱི་སྙིང་པོ་བཟླས་ཏེ། ཨོཾ་བ་སུནྡྷཱ་རི་ཎྱཻ་སྭཱ་ཧཱ། ཨོཾ་ཙནྡྲ་ཀནྟྱཻ་སྭཱ་ཧཱ། ཨོཾ་དཏྟྱཻ་སྭཱ་ཧཱ། ཨོཾ་སུ་ད་ཏྟྱཻ་སྭཱ་ཧཱ། ཨོཾ་ཨཱ་ཪྻ་ཡཻ་སྭཱ་ཧཱ། ཨོཾ་སུ་བྷ་དྱཻ་སྭཱ་ཧཱ། ཨོཾ་གུཔྟྱཻ་སྭཱ་ཧཱ། ཨོཾ་དེ་བྱཻ་སྭཱ་ཧཱ། ཨོཾ་ས་ར་སྭ་ཏྱཻ་སྭཱ་ཧཱ། ཟས་སྣ་ཚོགས་ཀྱི་གཏོར་མས་མཆོད། མཆོད་པ་རྣམ་ལྔ་དབུལ། དངོས་གྲུབ་བླང་ངོ༌། །ནུབ་མོ་ཕོ་སྔགས་
ཏེ། ཨོཾ་ཛམྦྷ་ལ་ཛ་ལནྡྲཱ་ཡ་སྭཱ་ཧཱ། ཨོཾ་མ་ཎི་བྷ་དྲཱ་ཡ་སྭཱ་ཧཱ། ཨོཾ་པུ་རྞ་བྷ་དྲཱ་ཡ་སྭཱ་ཧཱ། ཨོཾ་དྷ་ན་དཱ་ཡ་སྭཱ་ཧཱ། ཨོཾ་བཻ་ཤྲ་བཎཱ་ཡ་སྭཱ་ཧཱ། ཨོཾ་ཀི་ལི་མཱ་ལ་ཡེ་སྭཱ་ཧཱ། ཨོཾ་བི་ཙི་ཀུཎྜ་ལི་ནི་སྭཱ་ཧཱ། ཨོཾ་མུ་ཁེནྡྲཱ་ཡ་སྭཱ་ཧཱ། ཨོཾ་ཙ་རེནྡྲཱ་ཡ་སྭཱ་ཧཱ། གཏོར་མ་དབུ་ལ། མཆོད་པ་ལྔ་དབུལ། དངོས་གྲུབ་བླང༌། འཇམ་དཔལ་གྱི་བསྙེན་པ་རྫོགས་པའི་གཏོར་མ་ལ། གནོད་སྦྱིན་ཕོ་མོ་ལ་ཟླ་བ་གསུམ་དུ་མཆོད་པ་ན་འདོད་པ་ཕུན་སུམ་ཚོགས་སོ། །མེ་ཏོག་ལུག་རུ་དང༌། གུ་གུལ་དཀར་པོ་དང༌། དཀར་གསུམ་མངར་གསུམ་དང་ནས་དང་འབྲུ་སྣ་ལྔའི་སྦྱིན་སྲེག་ལན་བརྒྱ་རྩ་བརྒྱད་བྱས་ན་ལྷའི་ལོངས་སྤྱོད་དང་མཉམ་པར་འགྱུར་རོ། །ཐོ་རངས་བྱ་ཟེ་ཙན་ཕོ་སྔགས་མོ་སྔགས་ཟློས་པ་ཡིན། །ཆུ་སྦྱིན་ཡང་ནས་ཡང་དུ་བཏང་ན་ལོངས་སྤྱོད་ཕུན་སུམ་ཚོགས་པ་དང་ལྡན་ནོ། །དེ་ཡང་འདོད་པའི་དོན་གྲུབ་དམ་པ་སྟེ། །གསུང་ངོ༌། །འདི་ནི་རིན་པོ་ཆེ་གཏེར་གྱི་སྒྲུབ་པའོ། །རྒྱུད་ལས། ཡིད་བཞིན་ནོར་བུ་ཆེན་པོ་འཆང༌། གསུང་ངོ༌། །ཐུན་མོང་གི་དངོས་གྲུབ་སྒྲུབ་པའི་ཐབས་ཀྱི་མན་ངག །སློབ་དཔོན་སྡོམ་པ་བཟང་པོས་མཛད་པ་རྫོགས་སོ།།