ཚེ་དང་ཡེ་ཤེས་དཔག་ཏུ་མེད་པ་ཞེས་བྱ་བའི་སྒྲུབ་ཐབས།
མཁའ་འགྲོ་མ་གྲུབ་པའི་རྒྱལ་མོ།
རྒྱ་གར་སྐད་དུ། །ཨ་བ་རི་མི་ཏ་ཨཱ་ཡུ་རྫྙཱ་ན་སཱ་དྷ་ན་ནཱ་མ། བོད་སྐད་དུ། ཚེ་དང་ཡེ་ཤེས་དཔག་ཏུ་མེད་པ་ཞེས་བྱ་བའི་སྒྲུབ་ཐབས། བཅོམ་ལྡན་འདས་ཚེ་དང་ཡེ་ཤེས་དཔག་ཏུ་མེད་པ་ལ་ཕྱག་འཚལ་ལོ། །རིགས་དྲུག་སེམས་ཅན་ཐམས་ཅད་ཀྱི། །ཚེ་ཉམས་པ་ལ་གསོ་བའི་ཕྱིར། །བཅོམ་ལྡན་ཡེ་ཤེས་ཚེ་དཔག་མེད། །སྒྲུབ་ཐབས་ཡང་དག་བཤད་པར་བྱ། །དང་བརྩོན་དབང་ཐོབ་དམ་ཚིག་ལྡན། །ཚེ་ཉམས་པ་རྣམས་གསོ་འདོད་པས། །དབེན་ཞིང་ཉམས་དགའི་གནས་འདུག་ནས། །བསོད་ནམས་ཚོགས་ཀྱི་སྔོན་འགྲོ་ནི། །བླ་མ་དཀྱིལ་འཁོར་ལྷ་ཚོགས་རྣམས། །ནམ་མཁར་སྤྱན་དྲངས་ཕྱག་འཚལ་ནས། །མཆོད་ཅིང་སྡིག་པ་བཤགས་པ་དང༌། །ཆངས་པའི་གནས་བཞི་བསྒོམ་པར་
བྱ། །རང་གི་སྙིང་གར་ཧྲཱིཿ་དམར་ལས། །ཡེ་ཤེས་མེ་འབར་རྣམ་སྨིན་བསྲེགས། །སྔགས་ཀྱི་དོན་ལ་སྟོང་ཉིད་བསྒོམ། །ཨོཾ་སྭ་བྷཱ་ཝ་ཤུདྡྷཿ་སརྦ་དྷརྨཱཿ་སྭ་བྷཱ་ཝ་ཤུདྡྷོ྅ཧཾ། སྟོང་པའི་ངང་ལས་སེམས་ཉིད་ནི། །ཧྲཱིཿ་དམར་ཚེག་དྲག་ཐིག་ལེ་ལས། །དབང་ཆེན་ཞལ་གཅིག་ཕྱག་གཉིས་པ། །སྤྱན་གསུམ་ཁྲོ་གཉེར་ལྗགས་འདྲིལ་བ། །སྟེང་ཞལ་རྟ་མགོ་ལྗང་གུལ། །དྲག་པོས་རྟ་སྐད་རབ་ཏུ་མཚེར། །དབྱུག་པའི་སྡིགས་མཛུབ་མེ་ལྟར་འབར། །ཐུགས་ཀར་པདྨ་རྒྱས་པ་ཡིས། །སྟེང་དུ་ཟླ་བ་ཉི་མ་ལ། །ཧྲཱིཿ་ལས་འོད་ཟེར་འཕྲོས་པ་ཡིས། །ཨེ་ལས་ཆོས་འབྱུང་ཡངས་པ་རུ། །ཡཾ་ལས་རླུང་དང་རཾ་ལས་མེ། །བཾ་ལས་ཆུ་དང་ལཾ་ལས་ས། །སུཾ་ལས་རི་རབ་ལྷུན་པོ་དང༌། །དེ་སྟེང་བྷྲཱུཾ་ལས་གཞལ་ཡས་ཁང༌། །གྲུ་བཞི་སྒོ་བཞི་རྟ་བབས་བརྒྱན། །འདོད་ཡོན་ཕ་གུ་དྲ་ཕྱེད་མཛེས། །ཁོར་ཡུག་ཆུ་སྐྱེས་སྣ་ཚོགས་དང༌། །རྡོ་རྗེ་མེ་རི་ཐོགས་པ་མེད། །ཕོ་བྲང་ཆུ་སྐྱེས་འཕང་རིམ་གཉིས། །འདབ་མ་བཞི་དང་བརྒྱད་པ་ལ། །མུ་ཁྱུད་པད་མས་མཛེས་པ་དང༌། །ལྷ་སྣམ་པན་རེག་ལྔ་དང་ལྡན། །འོད་ཟེར་སྣ་ཚོགས་འཕྲོ་བ་ལས། །ཨ་ལས་ཆུ་ཤེལ་དཀྱིལ་འཁོར་དང༌། །རཾ་ལས་རྟ་བདུན་དག་ཏུ་གྱུར། །སྟེང་དུ་པདྨ་ཧྲཱིཿ་ཡིས་མཚན། །དེ་ལས་འོད་འཕྲོས་དོན་གཉིས་བྱས། །ཚུར་འདུས་ཧྲཱིཿ་ལ་ཐིམ་པ་ཡི། །ལི་ཁྲི་ལྟ་བུའི་ཐིག་ལེ་ལས། །བཅོམ་ལྡན་ཚེ་དཔག་མེད་པ་ནི། །འགྱིང་བཅས་འོད་འཁྲུག་སྐྱིལ་ཀྲུང་བཞུགས། །ཕྱག་གཉིས་པདྨ་རཱ་ག་ཡི། །བུམ་པ་འཆི་མེད་བདུད་རྩིས་གང༌། །འགྲོ་རྣམས་རེ་སྐོང་དཔག་བསམ་ཤིང༌། །བུམ་པའི་ཁ་རྒྱན་ཐུགས་ཀར་འཛིན། །ཡུམ་ལ་འཁྱུད་ཅིང་གཉིས་སུ་མེད། །པཾ་ལས་ཡུམ་མཆོག་གོས་དཀར་མོ། །ལི་ཁྲི་ལྟ་བུར་འཛུམ་ཞིང་སྒེག །གཡས་པ་པདྨ་གཡོན་པ་ནི། །བུམ་པ་ཡོངས་སུ་འཛིན་པ་ལ། །ཡབ་ལ་གཉིས་མེད་ལེགས་པར་འཁྲིལ། །དར་དང་ནོར་བུ་དུ་མས་བརྒྱན། །ཆུ་སྐྱེས་བརྒྱད་དང་ལྷ་སྣམ་ལ། །པདྨ་ཟླ་བ་ཉི་མའི་གདན། །མཚམས་བཞིའི་སྒོ་བཞི་ཟླ་བའི་གདན། །ཤར་དུ་རྡོ་རྗེ་ཧཱུཾ་གིས་མཚན། །དེ་ལས་མི་བསྐྱོད་ཚེ་དཔག་མེད། །ལྷོ་རུ་རིན་ཆེན་ཏཱཾ་གིས་མཚན། །རིན་ཆེན་རིགས་ཀྱི་ཚེ་དཔག་མེད། །ནུབ་ཏུ་འཁོར་ལོ་ཨོཾ་གྱིས་མཚན། །རྣམ་པར་སྣང་མཛད་ཚེ་དཔག་མེད། །བྱང་དུ་རལ་གྲི་ཨ་ཡིས་མཚན། །དོན་ཡོད་གྲུབ་པ་ཚེ་
དཔག་མེད། །ཤར་ལྷོར་མཾ་ལས་མཱ་མ་ཀཱི། །ལྷོ་ནུབ་ཏཱཾ་ལས་ལྷ་མོ་སྒྲོལ། །ནུབ་བྱང་ལཾ་ལས་སངས་རྒྱས་སྤྱན། །བྱང་ཤར་ཏཱཾ་ལས་དམ་ཚིག་སྒྲོལ། །རིགས་བཞི་མཉམ་གཞག་ཕྱག་རྒྱ་ལས། །ཤེལ་དང་བཻ་ཌཱུཪྻ་གསེར་དང་ནི། །ཨིནྡྲ་ནཱི་ལའི་བུམ་པ་འཛིན། །ཡུམ་ལ་གཡས་པ་རང་རྟགས་དང༌། །གཡོན་པ་བུམ་པ་འཛིན་པའོ། །ཤར་དུ་རྡོ་རྗེ་སེམས་དཔའ་བཞི། །ལྷོ་རུ་རིན་ཆེན་སེམས་དཔའ་བཞི། །ནུབ་ཏུ་རྣམ་སྣང་སེམས་དཔའ་བཞི། །བྱང་དུ་ལས་ཀྱི་སེམས་དཔའ་བཞི། །གཡས་པ་རང་རྟགས་འཛིན་པ་ལ། །གཡོན་པས་ཚེ་ཡི་བུམ་པ་འཛིན། །ཐམས་ཅད་དར་དང་ནོར་བུས་བརྒྱན། །རྡོ་རྗེ་སྐྱིལ་ཀྲུང་བཞུགས་པའོ། །མཚམས་བཞི་ལ་ནི་མཆོད་པ་ཡི། །བདུག་སྤོས་མར་མེ་མེ་ཏོག་མ། །དྲི་ཆབ་མ་དང་ལྷ་མོ་བཞི། །སྣ་ཚོགས་འོད་ཀྱིས་བསྐོར་བའོ། །ཤར་སྒོར་ཛཿ་ལས་ལྕགས་ཀྱུ་དཀར། །ལྷོ་སྒོར་ཧཱུཾ་ལས་ཞགས་པ་སེར། །ནུབ་སྒོར་བཾ་ལས་ལྕགས་སྒྲོག་དམར། །བྱད་སྒོར་ཧོཿ་ལས་དྲིལ་བུ་ལྗང༌། །སྒོ་བ་བཞི་པོ་དེ་དག་ནི། །འཁྲིལ་ལྡེམ་བཞེངས་ནས་བཞུགས་པའོ། །དེ་ནས་ཐུགས་ཀའི་འོད་ཟེར་གྱིས། །རང་བཞིན་གནས་ནས་ཡེ་ཤེས་པ། །ཚིག་འདིས་སྤྱན་ནི་དྲང་བར་བྱ། །གདོད་ནས་རང་བཞིན་ནམ་མཁའ་ལྟར། །ཐུགས་རྗེ་འཇའ་ཚོན་སྐུར་སྟོན་པའི། །བཅོམ་ལྡན་གསུང་མཆོག་ཚེ་དཔག་མེད། །རང་བཞིན་ལྷུན་གྲུབ་གཞལ་ཡས་ནས། །ཏིང་འཛིན་གཟུགས་བརྙན་དམ་པ་འདིར། །འགྲོ་བའི་དོན་ཕྱིར་སྤྱན་འདྲེན་ན། །ཚེ་ཟད་ཚེ་ཉམས་གསོ་བའི་ཕྱིར། །འདི་ཉིད་དུ་ནི་གཤེགས་སུ་གསོལ། །རྡོ་རྗེ་རིན་ཆེན་རྣམ་སྣང་དང༌། །ལས་ཀྱི་རིགས་མཆོག་ཚེ་དཔག་མེད། །ཡུམ་བཞི་མཆོད་པའི་ལྷ་མོ་དང༌། །སེམས་དཔའ་བཅུ་དྲུག་སྒོ་མར་བཅས། །རང་བཞིན་བདེ་ཆེན་དཀྱིལ་འཁོར་ནས། །ཏིང་འཛིན་གཟུགས་བརྙན་དམ་པ་འདིར། །ཚེ་དང་ཡེ་ཤེས་རྒྱས་པ་དང༌། །ཐུགས་མཆོག་ཡེ་ཤེས་ཐོབ་བྱའི་ཕྱིར། །འདི་ཉིད་དུ་ནི་སྤྱན་འདྲེན་ན། །བྱིན་གྱིས་རློབ་ཅིད་གཤེགས་སུ་གསོལ། །ཛཿ་ཧཱུཾ་བཾ་ཧོཿ་ས་དགུག་གཞུག་བྱ། །སྐུ་གསུང་ཐུགས་ནི་བྱིན་གྱིས་བརླབ། །སངས་རྒྱས་ཀུན་གྱིས་དབང་བསྐུར་ནས། །རིགས་བདག་རྣམས་ཀྱིས་དབུ་བརྒྱན་ཏེ། །མཉེས་པར་གྱུར་ལ་མཆོད་པ་དང༌།།
བསྟོད་པ་རྒྱས་དང་བསྡུས་པ་བྱ། །དེ་ནས་བྱིང་རྒོད་རབ་སྤངས་ནས། །མ་ཡེངས་ལྷ་རྣམས་གསལ་སྟོང་བསྒོམ། །དེ་རྗེས་བཟླས་པ་བྱ་བ་ནི། །ལྷ་རྣམས་ཐུགས་ཀའི་བུམ་པ་རུ། །ཧྲཱིཿ་ཧཱུཾ་ཏྲཱཾ་བྷྲཱུཾ་ཨ་ལས་ནི། །རང་རང་སྔགས་ཀྱིས་བསྐོར་བར་བསྒོམ། །ཨོཾ་ཧྲཱིཿ་བྷྲཱུཾ་བཛྲ་ཛྙཱ་ན་ཨཱ་ཡུ་ཥེ་སྭཱ་ཧཱ།། ཨོཾ་ཧཱུཾ་བྷྲཱུཾ་བཛྲ་ཛྙཱ་ན་ཨཱ་ཡུ་ཥེ་སྭཱ་ཧཱ། ཨོཾ་སྭཱ་བྷྲཱུཾ་བཛྲ་ཛྙཱ་ན་ཨཱ་ཡུ་ཥེ་སྭཱ་ཧཱ། ཨོཾ་ཨོཾ་བྷྲཱུཾ་བཛྲ་ཛྙཱ་ན་ཨཱ་ཡུ་ཥེ་སྭཱ་ཧཱ། ཨོཾ་ཨཱཿ་བྷྲཱུཾ་བཛྲ་ཛྙཱ་ན་ཨཱ་ཡུ་ཥེ་སྭཱ་ཧཱ། དེ་རྣམས་ཡབ་ཀྱི་སྙིང་པོའི་སྔགས་སོ། །ཡུམ་གྱི་བུམ་པར་པཾ་མཾ་ཏྲཾ་ལཾ་ཏཾ་རྣམས་ལས་སྔགས་ཀྱིས་བསྐོར། ཨོཾ་བྷྲཱུཾ་ཨ་པ་རི་མི་ཏི་ཨཱ་ཡུརྫྙཱ་ན་སུ་བི་ནི་ཤྩི་ཏ་ཏེ་ཛོ་རཱ་ཛཱ་ཡ། ཡུམ་མཆོག་ལྔ་ཡི་སྙིང་པོའོ། །ཕྱོགས་བཞི་སེམས་དཔའ་བཅུ་དྲུག་ལ། །རང་གིས་བོན་རྣམས་ལ་ནི། །གཅོ་བོའི་སྔགས་ཀྱིས་བསྐོར་བར་བསམས། །ཛཿ་ཧཱུཾ་བཾ་ཧོཿ་ཨ་པ་རི་མི་ཏ་ཨཱ་ཡུརྫྙཱ་ན་སུ་བི་ནི་སྭཱ་ཧཱ། སྒོམ་བཞིའི་སྙིང་པོའི་སྔགས་སོ། །དེ་ལྟར་བུམ་པའི་སྔགས་རྣམས་ལ། །དམིགས་ཏེ་གསང་སྔགས་བཟླས་པ་ཡིས། །ཡིག་འབྲུ་རྣམས་ལ་བདུད་རྩིའི་ཆུ། །བབས་པས་བུམ་པ་གང་པར་བསམ། །བུམ་ནང་ཡེ་ཤེས་བདུད་རྩིའི་རྒྱུན། །རང་གི་གནས་གསུམ་ཐིམ་པ་ཡིས། །ལུས་ངག་ཡིད་གསུམ་ནང་གདོན་དང༌། །སྡིག་སྒྲིབ་དག་ནས་དབང་བཞི་ཐོབ། །འཆི་མེད་དངོས་གྲུབ་ཐོབ་པར་བསམ། །དེ་ནས་རང་གིས་སྔགས་བཟླས་པས། །དཀྱིལ་འཁོར་ལྷ་ཚོགས་ཐམས་ཅད་ཀྱི། །རང་རང་གསང་སྔགས་བཟླས་པར་བསྒོམ། །སྙིང་གའི་ས་བོན་འོད་ཟེར་ལས། །ལྷ་མོ་དཀར་མོ་ལྕགས་ཀྱུ་ཐོགས། །བསམ་གྱིས་མི་ཁྱབ་ཤར་དུ་འཕྲོས། །ནད་གདོན་ཞི་བའི་ལས་བྱས་ཏེ། །དྲི་ཟའི་ལག་ནས་ཚེ་བཀུག་ནས། །བདག་བསྐྱོད་ལྷ་དང་བུམ་པར་བསྟིམ། །དེ་བཞིན་ལྷོ་ཡི་ཞགས་པ་མོས། །ཚེ་དང་ལོངས་སྤྱོད་རྒྱས་བྱས་ནས། །གཤིན་རྗེའི་ལག་ནས་ཚེ་བཀུག་སྟེ། །གོང་བཞིན་དུ་ནི་བསྟིམ་པར་བྱ། །ནུབ་ཀྱི་ལྕགས་སྒྲོག་དམར་མོ་ཡིས། །སྲིད་གསུམ་མ་ལུས་དབང་བསྡུས་ཏེ། །ཆུ་ལྷའི་ལག་ནས་ཚེ་བཀུག་ནས། །བསྟིམ་ཞིང་ཀླུ་གདོན་དག་པར་བསམ། །བྱང་གི་དྲིལ་བུ་དགྱེས་མཛེས་མས། །ནད་གདོན་ལོག་འདྲེན་ཚར་བཅད་ནས། །གནོད་
སྦྱིན་ལག་ནས་ཚེ་བཀུག་ནས། །གོང་བཞིན་དམིགས་པ་གསལ་བས་བསྟིམ། །བུམ་པ་དག་ལ་བརྟེན་ནས་ནི། །འཆི་མེད་ཚོ་སྒྲུབ་བཤད་པ་ནི། །རྣམ་རྒྱལ་ལས་བུམ་གཉིས་པོ་ལ། །རྫས་དང་ཁ་རྒྱན་མགུལ་འཆིངས་བཅས། །ཕྱག་མཚན་བྲིས་ལ་གདགས་པར་བྱ། །མཎྜལ་སྟེང་དུ་ལེགས་པར་གཞག །ཕྱི་ནི་བུམ་པའི་རྣམ་པ་ལ། །ནང་དུ་གཞལ་ཡས་ཁང་དུ་བསྒོམ། །གསང་སྔགས་རྒྱལ་པོའི་བཟླས་པ་བྱ། །གོང་བཞིན་བདུད་རྩིས་བུམ་པ་གང༌། །དེ་ཡིས་རང་གཞན་ཐམས་ཅད་ཀྱི། །ནད་གདོན་སྡིག་སྒྲིབ་མ་ལུས་དག །འཆི་མེད་དངོས་གྲུབ་ཐོབ་པར་བསམ། །ལས་བུམ་རྟ་མགྲིན་གོང་བཞིན་བསྐྱེད། །ཐུགས་ཀའི་ས་བོན་སྔགས་ཀྱིས་བསྐོར། །ཨོཾ་བཛྲ་ཀྲོ་དྷ་ཧ་ཡ་གྲཱི་བ་ཧུ་ལུ་ཧུ་ལུ་ཧཱུཾ་ཕཊ། དེ་ཡིས་རང་གཞན་བར་ཆད་བསྲུང༌། །འཆི་མེད་བདུད་རྩིའི་ཁྲུས་བྱའོ། །དེ་ལྟར་རང་དོན་གཞན་དོན་ལ། །མ་ཡེངས་བསྐྱེད་རིམ་གསལ་བ་ཡིས། །ཏིང་འཛིན་གཅིག་ཏུ་སྔགས་བཟླས་ན། །རྟགས་རྫོགས་ཟླ་དྲུག་ཞལ་མཐོང་འགྱུར། །དེ་ནས་རྒྱུན་དུ་ཉམས་སུ་ལེན། །ཁྭ་ཏའི་སྐད་ཀྱིས་མ་ནོན་པར། །བདག་ཉིད་གཞན་དང་ངག་མ་འདྲེས། །མདུན་དུ་ཆུ་སྐྱེས་སྟོང་དང་ལྡན། །གཙོ་བོ་ཡབ་ཡུམ་གསལ་བར་བསྒོམ། །ཨོཾ་ཨཱ་ཡུ་ཥེ་ས་ར་ཧ་ཀ་ར་རི་ཤ་ར་རི་ཧཱུཾ། །གསོལ་བ་བཏབ་ལ་མཆོད་བསྟོད་བྱ། །བུམ་པ་དག་ལ་དམིགས་ནས་ནི། །སྒྲུབ་བྱེད་སྔགས་ཀྱི་རྒྱལ་པོ་འདི། །ཨོཾ་ཨ་མ་ར་ཎི་ཛཱི་ཝནྟཱི་ཡེ་སྭཱ་ཧཱ། །གསང་སྔགས་ཉི་ཤུ་རྩ་གཅིག་བཟླས། །དེ་ཡི་སི་བདུད་རྩིའི་རྒྱུན་བྱུང་ནས། །རང་གི་སྤྱི་གཙུག་ཐིམ་པ་ཡིས། །ནད་གདོན་སྡིག་སྒྲིབ་ཐམས་ཅད་དག །བདུད་རྩིས་རང་ལུས་གང་བ་ཡིན། །འཆི་མེད་ཚེ་ཡི་དངོས་གྲུབ་ཐོབ། །ཚེ་དཔག་མེད་པར་གྱུར་པར་བསམ། །བརྟན་པའི་ཡན་ལག་ལྔ་བཟླས་སོ། །མདུ་ན་བསྐྱེད་བདག་ལ་བསྟིམ་པ་དང༌། །དེ་ཡི་ཚེ་ཚད་ཉི་ཟླར་འགྱུར། །ཚེ་ཉམས་ལ་སོགས་སྨོས་ཅི་དགོས། །གསང་ནས་སྒྲུབ་པ་རབ་ཏུ་བསྔགས། །དེ་ནས་གསང་སྒྲུབ་བཤད་པར་བྱ། །དཀྱིལ་འཁོར་གོང་དང་འདྲ་བ་ལ། །ལྷ་ཚོགས་ཐམས་
ཅད་ལི་ཁྲི་ལྟར། །སྣ་ཚོགས་རིན་ཆེན་རྒྱན་གྱིས་མཛེས། །བུམ་པ་ཐོད་པར་བཅས་པ་འཛིན། །རྡོ་རྗེ་སྐྱིལ་ཀྲུང་བཞུགས་པའོ། །བཅུ་དྲུག་ལོན་པ་སྐུ་ཤ་རྒྱས། །འཇམ་ཞིང་ནུ་མ་འབུར་བ་ལ། །པདྨ་རྡོ་རྗེ་རིན་ཆེན་དང༌། །འཁོར་ལོ་སྣ་ཚོགས་རྡོ་རྗེ་སྟེ། །གཡས་པ་རང་གི་ཕྱག་མཚན་འཛིན། །གཡོན་པ་ཐོད་པ་བདུད་རྩིས་གང༌། །ཡབ་ལ་སྟོབས་ཤིང་གཉིས་སུ་འཁྲིལ། །ཐབས་དང་ཤེས་རབ་གཉིས་སུ་མེད། །ཡབ་ཡུམ་འོད་ཟེར་ཚོགས་འཁྲུགས་ཤིང༌། །སྙོམས་འཇུག་ཟག་མེད་བདེ་བ་རྒྱས། །མཚམས་བཞིར་བདུད་རྩིའི་བུམ་པ་བཞི། །ཕྱོགས་ཀྱི་ལྷ་ཡི་སྣམ་བུ་ལ། །ཤར་དུ་རྡོ་རྗེ་ཁྲོ་བོ་དང༌། །ལྷོ་རུ་རིན་ཆེན་ཁྲོ་བོ་དང༌། །ནུབ་ཏུ་པདྨའི་ཁྲོ་བོ་དང༌། །བྱར་དུ་ཕྲིན་ལས་ཁྲོ་བོ་དང༌། །སྟེང་འོག་རྣམ་སྣང་ཁྲོ་བོ་གཉིས། །ཕྱོགས་བཞིར་ཁྲོ་བོ་གཉིས་གཉིས་ནི། །རིགས་ཀྱི་ཡུམ་དང་བཅས་པ་ལ། །གཡས་བསྐྱམ་གཡོན་བརྐྱང་བཞེངས་པའོ། །ཐམས་ཅད་གཡས་པ་རང་རྟགས་འཛིན། །གཡོན་པ་ཚེ་ཡི་བུམ་པ་དང༌། །སྤྲུལ་དང་རིན་ཆེན་སྣ་ཚོགས་བརྒྱན། །མེ་རེ་འབར་བའི་ཀློང་ན་བཞུགས། །ལྷ་མོ་བཞི་དང་སྒོ་བ་བཞི། །བཞེངས་པ་ཁྲོ་བོའི་ཚུལ་དུ་གནས། །འབྲུ་གསུམ་སྔགས་ཀྱིས་བྱིན་གྱིས་བརླབས། །ཡེ་ཤེས་སྤྱན་དྲང་གཉིས་མེད་བསྟིམ། །དབང་བསྐུར་རིགས་ཀྱིས་དབུ་བརྒྱན་པ། །གཙོ་བོ་ལྔ་དང་ཁྲོ་བོ་བཅུའི། །བུམ་པ་དག་ལ་དམིགས་ནས་ནི། །གསང་སྔགས་འདི་ནི་བཟླས་པར་བྱ། །ཨོཾ་ཧྲཱིཿ་ཧཱུཾ། སྭཱ་བྷྲཱུཾ་ཨཱཿ་ཛཿ་ཧཱུཾ་བཾ་ཧོཿ་ཨ་པ་རི་མི་ཏ་ཨཱ་ཡུརྫྙཱ་ན་མ་ཧཱ་སིདྡྷི་ཧ་ས་ནི་རི་ཏི་སྭཱ་ཧཱ། དེ་ནས་རང་ཉིད་བཟླས་པ་བྱ། །བུམ་པ་ལེགས་པར་བཅས་པ་ལ། །ལྷ་རྣམས་གོང་བཞིན་བསྐྱེད་པ་དང༌། །རང་དང་ལྷ་རྣམས་སྔགས་བཟླས་པས། །འཆི་མེད་བདུད་རྩིའི་བུམ་པ་གང༌། །རྗེས་སུ་ལྷ་རྣམས་ཞུ་བའི་ཆུས། །རང་གཞན་ཐམས་ཅད་ཁྲུས་བྱའོ། །དེ་ཡིས་མཆོག་དང་ཐུན་མོང་གི །དངོས་གྲུབ་ཐམས་ཅད་ཐོབ་པར་འགྱུར། །བདུད་རྩི་ལྔ་ཡི་གཏོར་མ་འདི། །སྙིང་པོ་སྔགས་ཀྱིས་འབུལ་བར་བྱ། །ལས་བཞིའི་སྦྱིན་སྲེག་བྱ་བ་དང༌། །ལོངས་སྤྱོད་
སྤེལ་ལ་ཐོད་པ་མཆོད། །དེ་ནས་དེ་ཁོ་ན་ཉིད་སྒྲུབ། །རང་ཉིད་མགོན་པོར་གསལ་བ་ཡི། །གསང་གནས་ཆོས་འབྱུང་གྲུ་གསུམ་དུ། །ཧྲཱིཿ་དང་པཾ་ལས་མེ་འབར་བས། །ལུས་ཀྱི་ནང་རྣམས་ཐམས་ཅད་ཁེངས། །སྤྱི་བོའི་ཧཾ་བརྒྱད་ཞུ་བ་ལས། །བདེ་ཆེན་བདུད་རྩིའི་ཆུ་རྒྱུན་འབབ། །རྩ་གསུམ་གང་བས་བདེ་བ་རྒྱས། །དྲོ་དང་བདེ་པའི་ཁྱད་པར་རྣམས། །སྟེང་འོག་རླུང་གིས་མནན་ཞེས་བྱ། །རྟ་བདུན་རི་བོ་རྒྱས་འདྲ་ནས། །མཐར་ཐུག་ལྷུན་གྲུབ་རྣམ་གསུམ་ཐོབ། །བཅུ་གསུམ་ས་རྣམས་རྫོགས་པར་འགྱུར། །ཚེ་དཔག་མེད་པའི་སྒྲུབ་པའི་ཐབས། །རྩ་རྒྱུད་ལེའུ་འབུམ་པ་དང༌། །བཤད་རྒྱུད་འོད་ཟེར་དྲ་བ་ལ། །བརྟེན་ནས་གྲུབ་པའི་རྒྱལ་མོས་མཛད། །འཆི་མེད་ཚེ་སྒྲུབ་འདི་བརྩམས་པས། །བདག་དང་རིགས་དྲུག་སེམས་ཅན་རྣམས། །འཆི་མེད་དངོས་གྲུབ་ཐོབ་གྱུར་ནས། །ཚེ་དཔག་མེད་པ་ཐོབ་པར་ཤོག །།རྒྱ་གར་གྱི་པཎྜི་ཏ་ཟླ་བ་བཟང་པོ་དང༌། བོད་ཀྱི་ལོ་ཙཱ་བ་གླན་དང་མ་ཚུལ་ཁྲིམས་ཀྱིས་བསྒྱུར་བའོ།། །།