ཕྱག་ན་རྡོ་རྗེ་གོས་སྔོན་པོ་ཅན་གནོད་སྦྱིན་དྲག་པོ་ཆེན་པོ་རྡོ་རྗེ་མེ་ལྕེའི་རྒྱུད་ཀྱི་འགྲེལ་པ་ཞེས་བྱ་བ།
ཕྱག་ན་རྡོ་རྗེ།

དང་པོ། གླེང་གཞིའི་ལེའུའི་བཤད་པ།

---

^{[མ་དཔེ་གཟིགས་ན་འདིར་གནོན།]}

རྒྱ་གར་སྐད་དུ། ནཱི་ལཱཾ་བ་ར་དྷ་ར་བཛྲ་པཱ་ཎི་ཡཀྵ་མ་ཧཱ་རུ་དྲ་བཛྲ་ཨ་གནེ་ཛི་ཧྭ་ཏནྟྲྀ་བྲ་ཏྟི་ནཱ་མ། བོད་སྐད་དུ། ཕྱག་ན་རྡོ་རྗེ་གོས་སྔོན་པོ་ཅན་གནོད་སྦྱིན་དྲག་པོ་ཆེན་པོ་རྡོ་རྗེ་མེ་ལྕེའི་རྒྱུད་ཀྱི་འགྲེལ་བ་ཞེས་བྱ་བ། འཕགས་པ་ཕྱག་ན་རྡོ་རྗེ་ལ་ཕྱག་འཚལ་ལོ། །གང་ཞིག་ཉོན་མོངས་སྐྱོན་གྱིས་མ་གོས་རིན་ཆེན་བཻ་ཌཱུ་ཪྻ་ལྟར་དང་ཞིང་རབ་འབར་རི་རབ་ལྟར་བརྗིད་དང༌། །འགྲོ་ལ་རིག་པས་མྱུར་བར་སྟོན་དང་ཧཱུཾ་ལས་རབ་བྱུང་སྟོང་གསུམ་སྐྲག་པར་མཛད་པ་ཉིད། །གདོང་ནས་མི་རྟོག་ཞི་བའི་དང་ལས་སྙིང་རྗེའི་སྟོབས་ཀྱིས་མཐའ་དག་སྡུད་མཛད་ཞེ་སྡང་ཆེན་པོར་གསལ། །དུས་གསུམ་སངས་རྒྱས་ཀུན་གྱི་གསང་བའི་མཛོད་དུ་རབ་གྱུར་རྡོ་རྗེ་འཛིན་པའི་བདག་ཉིད་དེ་ལ་ཕྱག་འཚལ་ནས། །རྒྱུད་ཀྱི་རྒྱལ་པོ་འགྲོ་དོན་མཛད་པ་ཉིད་ལ་ཕྱི་ནང་སྡུག་བསྔལ་ཞི་མཛད་གསང་བ་ཟབ་མོའི་དོན། བླ་མ་བརྒྱུད་པའི་སྟོབས་ལས་རང་བྱུང་བདག་ཉིད་རབ་སྦྱོར་དྲག་པོ་དེ་ཡི་བདུད་རྩིའི་འོད་ཟེར་ངེས་པར་རབ་བརྙེས་ནས། །དང་པོའི་མིང་ལ་ལག་ན་རྡོ་རྗེས་སྣང་བ་ཞེས་བྱར་འཇིག་རྟེན་ཀུན་ལས་གྲགས་པ་རབ་ཐོབ་སྟེ། །བདག་གིས་འགྲེལ་འདི་རྙེད་དང་བཀུར་སྟི་གྲགས་པ་རློམ་སེམས་ཕྱིར། །མིན་འདི་དྲན་དང་འགྲོ་ལ་ཕན་ཕྱིར་རྒྱས་བ་བྲི་བར་བྱ། །དེ་ལ་དེ་ཁོ་ན་ཉིད་སྣང་བ་ཞེས་བྱ་བ་འདིས་རིམ་པ་ཇི་ལྟ་བ་བཞིན་དུ་བླ་མའི་མན་ངག་ལ་རག་ལས་པ་རྣམས་བཤད་པར་བྱ་སྟེ། འདི་སྐད་བདག་གིས་ཐོས་པའི་དུས་གཅིག་ན་ཞེས་བྱ་བ་ལ། ཨེ་ཝཾ་མ་ཡཱའི་བཤད་པ་ནི་འོག་ནས་རིག་པར་བྱའོ། །བདག་ནི་སྡུད་པ་པོ་ཉིད་དུ་རིག་པར་བྱ་སྟེ། དེ་ཡིས་དེའི་སྐད་ཅིག་དེ་ཉིད་ལ་ཐོས་པས་ན་ཐོས་པའི་དུས་གཅིག་ནའོ། །བཅོམ་ལྡན་འདས་ཐམས་ཅད་འབྱུང་བའི་

---

^{[མ་དཔེ་གཟིགས་ན་འདིར་གནོན།]}

ཡུམ་བཙུན་མོའི་བྷ་ག་ལ་བཞུགས་ཏེ་ཞེས་བྱ་བ་ལ། བཅོམ་ལྡན་འདས་རྡོ་རྗེ་གར་མཁན་ཉིད་སྔ་མའི་ཆ་བྱད་རྣམས་ཡང་བདག་པར་སྤངས་ཏེ་བྷ་ག་ལ་བཞུགས་པའོ། །བཅོམ་ལྡན་འདས་མའི་སྒྲས་ནི་ཟ་བ་དང་འཇོམས་པ་ཉིད་དང་ལྡན་པར་སྟོན་ཏོ། །ཐམས་ཅད་འབྱུང་བའི་སྒྲས་ནི་འབྱུང་བ་བཞིའི་ས་བོན་རྣམས་ནམ་མཁའ་ལ་ཡང་དག་པར་བརྟེན་ཏེ་གནས་པ་དེའི་ས་བོན་གྱི་གཟུགས་དྲག་པོའི་དཀྱིལ་འཁོར་ལ་བཞུགས་ཏེ། དེ་ཉིད་བུད་མེད་ཀྱི་བྷ་ག་དང་དབྱིབས་མཐུན་པས་བྷ་ག་ལ་བཞུགས་སོ། །དེ་ལས་འགྲོ་བ་རྣམས་བྱུང་བས་ན་ཐམས་ཅད་བྱུང་བ་ཉིད་དོ། །ཡང་ན་སྟོང་པ་ཉིད་ལས་དངོས་པོ་ཐམས་ཅད་འབྱུང་ཞིང་དེའི་ངག་ལ་གནས་པས་བཞུགས་སོ། །ཡུམ་ནི་དངོས་པོ་རྣམས་བསྐྱེད་པའོ། །བཙུན་མོ་ནི་བདེ་བ་བསྐྱེད་པའི་རྒྱུ་ཡིན་ཏེ། དེ་དང་མཐུན་པར་སྟོང་པ་ཉིད་ལ་སྦྱོར་བས་བདེ་བའི་འབྲས་བུ་སྐྱེའོ། །བྷ་གའི་སྒྲས་ངེས་པའི་རྟགས་སྟོན་པའམ། ཡང་ན་གོང་མའི་སྒྲ་དང་མཐུན་པར་གདུག་པ་རྣམས་འཇོམས་པས་ན་བྷ་གའོ། །འབྱུང་བ་དང་ཡུམ་དང་བཙུན་མོའི་སྒྲ་ནི་དུས་རྣམ་པ་གསུམ་ལའང་འཇུག་སྟེ། དུས་གསུམ་དུ་ངེས་པའི་དོན་བསྟན་པ་ལའང་སྦྱར་རོ། །དེ་ན་གནོད་སྦྱིན་ལ་སོགས་པ་གདུག་པའི་རིགས་ཐམས་ཅད་དང་ཐབས་གཅིག་ཅེས་པ་ནི་ཅིའི་ཕྱིར་འདུས་ཤེ་ན། དེ་དག་འདུལ་པའི་ཕྱིར་ཉིད་ཀྱིས་བྱིན་གྱི་རླབས་ཀྱིས་བཀུག་པའོ། །དེ་ནའི་སྒྲས་ནི་ཉིད་ཀྱི་དྲུང་ན་གནས་པས་ཐབས་ཅིག་པའོ། །དེ་ནས་བཅོམ་ལྡན་འདས་དྲག་པོའི་སྐྱིལ་མོ་ཀྲུང་བཅས་ནས་ཞེས་པ་ནི། དྲག་པོ་རྣམས་བསྒྲལ་བར་བྱ་བའི་ཕྱིར་ཞབས་ཀྱི་མཐིལ་གཉིས་སྦྱར་ནས་ཚིགས་གཉིས་བཅག་པས་བཞུགས་སོ། །ཕྱག་གཡས་པ་སྟེང་དུ་བསྒྲེང༌། གཡོན་པ་ས་ལ་བསྒྲེང་ནས་སྤྱན་བཟློག་པས་ཕྱོགས་བཅུར་གཟིགས་པ་ནི་གདུག་པ་རྣམས་འདུལ་པའི་ཕྱིར་དྲག་པོའི་ཕྱག་རྒྱར་ཤེས་པའོ། །ཧཱུཾ་དང་ཧ་ནི་སྔགས་སུ་རིག་པར་བྱ་སྟེ་སྡུག་པ་དང་འཇོམས་པའོ། །ཡང་ན་ཐམས་དང་ཤེས་རབ་ཀྱི་བདག་ཉིད་ཀྱིས་འདུལ་བར་ཤེས་པར་བྱའོ། །སྒྲ་ཆེན་ཕྱུང་བ་ནི་ལྟེ་བས་ཡོངས་སུ་བསྐྱོད་པའོ། །དེ་ནས་འཁོར་ཐམས་ཅད་གཙོ་བོ་མི་སྣང་བས་ཡུན་

---

^{[མ་དཔེ་གཟིགས་ན་འདིར་གནོན།]}

རིང་ཞིག་ཏུ་བརྒྱལ་བར་གྱུར་ཏོ་ཞེས་བྱ་བ་ལ་གོང་མའི་སྔགས་ཀྱིས་བརྒྱལ་བ་ལས་ཕྱོགས་རྨོངས་པར་གྱུར་ཏེ་དེ་ཉིད་ཀྱང་མི་སྣང་བའོ། །དེའི་སྐད་ཅིག་དེ་ཉིད་བཅོམ་ལྡན་འདས་ཀྱིས་སྤྱི་པོ་ནས་སངས་རྒྱས་ཐམས་ཅད་ཀྱི་གནང་བ་ཞེས་བྱ་བ་ནི་དབུའི་གཙུག་ཏོར་ནས་ཕྱུང་བ་ལ་བྱ་སྟེ། གནང་བ་ནི་དུས་གསུམ་གྱི་སངས་རྒྱས་རྣམས་ཀྱིས་དཔང་བསྐུར་བར་བྱས་ནས་གསང་བའི་བདག་པོར་གནང་བ་བྱིན་ཏེ་བསྒོ་བའོ། །སྔགས་རྣམ་པ་གསུམ་གྱི་བདག་པོ་ཞེས་བྱ་བ་ནས། རྒྱ་མཚོར་བཞུགས་སོ་ཞེས་བྱ་བའི་བར་ལ་སྔགས་རྣམ་པ་གསུམ་ནི་སྐུ་གསུང་ཐུགས་ཀྱི་ཡི་གེ་གསུམ་ལས་སྔགས་ཐམས་ཅད་འབྱུང་བས་དེའི་བདག་པོ་ཡིན་པར་བསྟན་པ་དང༌། རིག་སྔགས་དང༌། གསང་སྔགས་དང༌། གཟུགས་སྔགས་གསུམ་གྱི་བདག་པོ་ཡིན་པར་བསྟན་པའོ། །ཕྱག་བརྙན་ཞེས་པ་ནི་དང་པོའི་ཚིག་ལ་འཇུག་པ་དང་ཕོ་ཉ་ཡིན་པར་བསྟན་པའོ། །ཁ་དོག་སྔོན་པོའི་སྒྲས་ནི་རྣམ་པར་རྟོག་པ་ཐམས་ཅད་སྤངས་པ་ཉིད་དང༌། ཉེས་པའི་སྐྱོན་གྱིས་མ་གོས་པར་བསྟན་པའོ། །ལྷག་མ་ནི་གོ་སླའོ། །ནམ་མཁའི་ལྡིང་གཤོག་པ་བསྐྱོད་ནས་ཞེས་བྱ་བ་ནས། རང་གི་བདག་པོའི་ལག་པར་སླར་སོང་ངོ་ཞེས་བྱ་བའི་འབར་ལ་ནམ་མཁའ་ལྡིང་གི་བདག་པོའི་རྒྱན་བླང་པའི་ཕྱིར་རྒྱ་མཚོར་ཞུགས་ཏེ། ཀླུ་རྣམས་ཀྱི་གཟུགས་བརྙན་བསྒྱུར་ནས་སྦྲུལ་གྱིས་སྐུ་ལ་རྒྱན་ཆ་བདུན་དུ་བརྒྱན་པའོ། །ནམ་མཁའ་ལྡིང་ཡང་དེ་ཉིད་ཀྱི་བྱིན་གྱིར་རླབས་ཀྱིས་བསྐྱེད་པ་སྟེ། སླར་བདག་པོའི་ཕྱག་མཚན་དུ་གནས་པའོ། །དེ་ནས་གནོད་སྦྱིན་བྱེ་བ་ཕྲག་བཅུ་དང་ཞེས་པ་ནས། མདུན་དུ་སྙིང་པོ་དང་ལྡན་པའི་སྐྱིལ་མོ་ཀྲུང་བཅས་ཏེ་འདུག་གོ་ཞེས་བྱ་བའི་བར་དུ་གོ་སླ་བས་འདིར་མ་བཤད་དོ། །དེ་ཉིད་ནི་བདེ་བར་གཤེགས་པའི་བཀའ་ལ་རག་ལས་པར་མ་གྱུར་བའི་གང་ཟག་ཁ་ཅིག་ན་རེ་གནོད་སྦྱིན་དངོས་ཡིན་པར་འདོད་ན་དེ་ནི་བཀའ་ལ་རྨོངས་པར་གྱུར་པས་དེ་ལྟར་མི་བལྟའོ། །དེ་ནི་ལག་ན་རྡོ་རྗེ་དབང་བསྐུར་བའི་རྒྱུད་ལས་འབྱུང་བ་དང་མཐུན་པར་རིག་པར་བྱ་སྟེ། བཅོམ་ལྡན་འདས་ཕྱག་ན་རྡོ་རྗེ་དངོས་སོ། །དེ་ནས་བཅོམ་ལྡན་འདས་ཀྱིས་ནམ་མཁའ་དང་

---

^{[མ་དཔེ་གཟིགས་ན་འདིར་གནོན།]}

ས་ལ་གཟིགས་ནས་བར་སྣང་དུ་ཡང་སྤྱན་གྱིས་འཁོར་བར་གཟིགས་སོ་ཞེས་བྱ་བ་ནི་ནམ་མཁའ་དང་ས་ལ་གཟིགས་པ་དང་བར་སྣང་དུ་ཡང་གཟིགས་པ་ནི་ཕྱོགས་བཅུ་ན་གནས་པའི་གདུག་པ་མ་ལུས་པ་འདུལ་པར་བསྟན་པའོ། །དེ་ནས་ཁཾ་བྲུཾ་སཾ་ཞེས་པའི་སྔགས་བརྗོད་པ་ནི། ཁཾ་གི་སྙིང་པོས་སྟེང་གི་ཕྱོགས་སུ་འདུལ་པའོ། །བྲུཾ་གྱི་སྙིང་པོས་འོག་གི་ཕྱོགས་སུ་འདུལ་བར་བསྟན་པའོ། །སཾ་གི་སྙིང་པོས་ཕྱོགས་མཚམས་བརྒྱད་པོ་འདུལ་བར་བསྟན་པའོ། །དེ་ནས་ཕྱག་ན་རྡོ་རྗེ་སྟན་ལ་ས་ལངས་ཏེ། རྡོ་རྗེ་ཐལ་མོ་རང་གི་སྙིང་གར་སྦྱར་བ་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ་ཞེས་བྱ་བ་ལ། རྡོ་རྗེ་ཐལ་མོ་ནི་རྡོ་རྗེ་རྩེ་ལྔ་པའི་ཕྱག་རྒྱའོ། །དེ་ཉིད་ཐུགས་ཀར་སྦྱར་ནས་བཅོམ་ལྡན་འདས་ལ་འོག་ནས་འབྱུང་བའི་ཚིག་གསོལ་བའོ། །ཀྱེ་མ་བཅོམ་ལྡན་འདས་ལ་གསང་བ་དྲག་པོའི་དོན་བདག་དང་སེམས་ཐམས་ཅད་ལ་སྨན་པའི་ཕྱིར་ཞུ་ན་ཅི་བཅོམ་ལྡན་འདས་ཀྱིས་སྐབས་དབྱེ་བར་གནད་ཞེས་བྱ་བ་ལ། དང་པོའི་ཆིག་ལ་ཀྱེའི་སྒྲ་དང་ལྡན་པ་ནི་ཤིན་ཏུ་ངོ་མཚར་དུ་གྱུར་པའོ། །གསང་བ་ནི་ཉན་ཐོས་དང་རང་སངས་རྒྱས་ལ་སོགས་པ་རྣམས་ལ་ཤིན་ཏུ་གསང་བར་གྱུར་པའི་ཕྱིར་གསང་བའོ། །དྲག་པོ་ནི་གདུག་པའི་ཆོགས་འདུལ་བ་དང༌། གཞན་ཡང་ཤིན་ཏུ་དྲག་པོའི་ཆོས་ཉེ་བར་སྟོན་པས་ན་དེའི་དོན་ཉིད་དང༌། སེམས་ཅན་ཐམས་ཅད་ལ་ཕན་པར་བྱ་བའི་ཕྱིར་རྒྱས་པར་གསོལ་བའོ། །ཅང་མི་གསུང་ཞེས་བྱ་བ་ལ་སོགས་པ་ལ། ཅང་མི་གསུང་པ་ནི་སྒྲའི་དོན་ལས་ཟབ་མོའི་དོན་རྒྱས་པར་གསུང་བར་རིག་པར་བྱའོ། །གདུག་པའི་ཚོགས་འདུལ་བ་ཞེས་བྱ་བ་ནི་བླ་མའི་ངག་ལས་ཤེས་པར་བྱའོ། །ལྷག་མ་ནི་གོ་སླའོ། །དེ་ནས་བཅོམ་ལྡན་འདས་ཏིང་ངེ་འཛིན་དེ་ལས་བཞེངས་ནས་ལག་ན་རྡོ་རྗེ་ལ་གཟིགས་ཏེ། བྱེད་པ་གཡོན་པ་ཆུའི་སྙིང་པོ་ནས་དངས་ཏེ་ཞེས་བྱ་བ་ནི། གཟིགས་པ་ནི་ཞུ་བ་པོའི་རེ་བསྐོང་བའི་རྟགས་སོ། །བྱེད་པ་ཞེས་བྱ་བ་ནི། ལས་ཀྱི་སྒྲ་དོན་ལ་ཉེ་བར་སྦྱོར་བ་ཞེས་བྱ་སྟེ་ལུས་ཀྱི་ཡན་ལག་རྣམས་ལས། ལག་པས་བྱ་བ་བྱེད་ཅེས་འབྲུ་མང་པོ་པ་ཀུན་དུ་རྒྱུའི་སྒྲ་ཡིན་ཏེ།

---

^{[མ་དཔེ་གཟིགས་ན་འདིར་གནོན།]}

ལག་བ་ལ་རིག་བར་བྱའོ། །ཆུའི་སྙིང་པོ་ནས་དྲང་བ་ནི་རྔའི་སྒྲ་ལ་ཉེ་བར་སྦྱོར་བ་སྟེ། ཀ་ཏ་ལའི་སྒྲ་གང་འོག་དང་སྡེ་བར་ལྡན་པ་དང༌། སྟོབས་ཆེ་བའི་ཕྱིར་དང༌། གཅིག་ལ་གྲོགས་ཀྱིས་སྒྲོགས་པས་ཆུ་ཤིང་ནི་མཛུབ་མོའོ། །སྙིང་པོ་ནས་དྲངས་པ་ནི་ཀུན་རྫོབ་ཏུ་དྲག་པོའི་སྙིང་པོ་ཉིད་དེ། དེའི་ཐད་ཀ་ནས་དྲངས་ནས་ལྕགས་ཀྱུའི་ཕྱག་རྒྱ་བཅས་ནས་གནས་པའོ། །བྱེད་པ་སྐྱེད་པ་ཆུ་ཤིང་སྒྲ་དང་བཅས་པས་བརྐྱང་སྟེ་གནས་སོ་ཞེས་བྱ་བ་ནི་དེ་ལ་ཡང་གོང་མའི་སྒྲ་སྦྱོར་གྱིས་མཇུག་སྟེ། སྐྱེས་པ་ནི་དྲག་པོའི་སྒྲ་དང་ལྡན་པ་དང་སྟོབས་ཆེ་བའི་ཕྱིར་ཏེ། གཡས་པ་ལ་རིག་པར་བྱའོ། །སྒྲ་དང་བཅས་པ་ནི་རང་གི་རིགས་ལ་དང་པོ་དང་གཉིས་པའི་སྦྱོར་བའི་སྒྲ་དང་བཅས་པའོ། །བརྐྱང་བ་ནི་དངོས་སུ་སྟེ། དེ་ཡང་གནས་ནི་སྒོའི་ཐད་དཀར་གནས་པའོ། །དེ་ནས་ཕྱག་ན་རྡོ་རྗེས་ཕྱག་རྒྱ་དེ་ཉིད་ཡང་དག་པར་རིག་སྟེ་ཞེས་པ་ནི། དེའི་དོན་བརྡའི་སྒོ་ནས་རིག་ནས་ཚིག་བརྗོད་པའོ། །ཁྱེད་ལ་སོགས་པའི་འཁོར་དག་ཅེས་པ་ནས་སྔ་མ་བཞིན་དུ་འཁོད་དོ་ཞེས་པའི་བར་ལ། དྲག་པོའི་ཆོས་སྟོན་པས་དེ་དང་མི་མཐུན་པ་རྣམས་དེའི་སྐད་ཅིག་དེ་ལ་མི་ཐོས་པར་བྱ་བའི་ཕྱིར་བརྗོད་པའོ། །སྒྲ་གནས་ཀྱི་ཁུང་བུར་སྒྲིབ་བྱེད་ཀྱི་ཚིག་སོང་སྟེ་ཞེས་བ་ནི། སྒྲ་གནས་པ་ནི་རྟེན་བྱེད་པའི་ཕྱིར་རྣ་བ་ལའོ། །ཁུང་བུར་ནི་དངོས་སོ། །སྒྲིབ་བྱེད་ཀྱི་ཚིག་ནི་ཚིག་དེ་དངོས་ལ་བྱ་སྟེ། །ཅིའི་ཕྱིར་སྒྲིབ་པར་བྱེད་ཅེ་ན། གཉིས་ཀྱིས་བྱིན་གྱི་རླབས་ཀྱིས་བཅིངས་པ་གཉིས་ཀྱིས་ཡང་དག་པར་གནས་བཅིངས་ནས་ཏེ། བསྒྲིབས་ནས་འཁོད་པའོ། །འཁོང་བ་ནི་དེ་དང་འདྲའོ། །སྔ་མ་ནི་དང་པོ་ལ་འདུས་བཞིན་དུའོ། །རྡོ་རྗེ་མེ་ལྕེའི་རྒྱུད་ཀྱི་འགྲེལ་བ་དེ་ཁོ་ན་ཉིད་སྣང་བ་ནས་བྱ་བ་ལས་ལེའུ་དང་བོའི་བཤད་པའོ།། །།

གཉིས་པ། ངེས་ཚིག་གི་ལེའུའི་བཤད་པ།

---

^{[མ་དཔེ་གཟིགས་ན་འདིར་གནོན།]}

དེ་ནས་ཕྱག་ན་རྡོ་རྗེ་ཡིས། །ཞེས་བྱ་བ་ནས། མཚན་མ་ངེས་པར་བཤད་པར་བྱ། །ཞེས་པའི་བར་དུ་ནི་སྤྱི་དོན་རྒྱས་པར་ཞུ་བ་གསོལ་བ་དང༌། ནན་ཏན་དུ་བྱ་བ་གནང་བ་ལ་ལེགས་པར་བྱིན་པ་དང༌། ལག་ན་རྡོ་རྗེ་ཉིད་ཀྱི་རྒྱུད་བཤད་པར་མཚོན་པ་དང༌། སེམས་ཅན་ཐམས་ཅད་ལ་ཕན་པའི་དོན་དུ་བཤད་པར་དམ་བཅའ་བར་

---

^{[མ་དཔེ་གཟིགས་ན་འདིར་གནོན།]}

ཤེས་པར་བྱའོ། །བ་ནི་རྣམ་པར་སྣང་མཛད་དེ། ཛ་ནི་མི་བསྐྱོད་ཐུབ་པའོ། །ར་ནི་རིན་ཆེན་ཀུན་འབྱུང་སྟེ། །ཞེས་བྱ་བ་ལ་སྐུ་གསུང་ཐུགས་རྣམ་པ་གསུམ་ལ། རྡོ་རྗེའི་ཚིག་ཉེ་བར་སྦྱར་བ་སྟེ། སྐུ་གསུམ་ལ་སྒྲའི་སྦྱོར་བའི་སྒོ་ནས་གང་གཞིའི་ཡི་གེ་ལ་གྲོགས་ཉེ་བར་བརྟགས་པར་སྐུ་གསུམ་ལ་འཇུག་པའོ། །མེ་ལྕེའི་ཡིག་འབྲུ་གསུམ་པ་ལ། །དང་པོའི་གཙོ་བོ་བཤད་བྱ་བ། །ཞེས་བྱ་བ་ནི་འོག་ཏུ་བཏགས་པའི་འཁོར་མ་གཏོགས་པར་དང་པོ་ཡང་ཡིན་ལ་གཙོ་བོ་ཡང་ཡིན་པས་དང་པོའི་གཙོ་བོའོ། །དེ་དག་ཡོངས་སུ་འཆད་པས་བཤད་པར་བྱ་བར་སྦྱར་རོ། །པ་ནི་རྡོ་རྗེ་འཇོམས་བྱེད་མ། །ན་ནི་པདྨ་འཇོམས་བྱེད་མ། །ཨི་ནི་ཀུན་འགྲོ་འཇོམས་བྱེད་མ། །ཞེས་བྱ་བ་ལ། དེ་ཡང་དང་པོ་མཐུན་པར་གཞིའི་ཡི་གེ་ལ་གྲོགས་ཉེ་བར་སྦྱར་བས་ཤེས་པར་བྱ་སྟེ། འཇོམས་པར་བྱེད་པའི་སྒྲ་ནི་གྲོགས་དང་བསྡོངས་པས་འོག་བཏགས་གསུམ་པོ་ཡོད་པས་ན། འོག་བཏགས་གསུམ་པོའི་མིད་མཐར་སྦྱོར་ཞེས་པའོ། །ཨེ་ནི་ཀུན་དུ་གོ་བྱེད་དེ། །མ་ནི་སྨིན་པར་བྱེད་པ་སྟེ། །ཝཾ་ནི་ཀུན་ནས་སྡུད་པ་ཡིན། །ལ་ནི་ཡོངས་སུ་བརྟེན་པའི་ལས། །ཡ་ནི་ཡང་དག་བསྐྱོད་པར་བཤད། །གོ་འབྱེད་གཉིས་དང་སྟེང་གནས་པའི། །སྣ་ལྡན་དག་ཏུ་ཤེས་པར་བྱ། ཞེས་བྱ་བ་ལ། རང་བཞིན་གྱིས་གྲུབ་པའི་ས་བོན་ས་བོ་ན་སྔར་ཡོངས་སུ་གསུངས་ཏེ། མེ་དང༌། ཆུ་དང༌། ས་དང༌། རླུང་དང༌། ནམ་མཁའི་འབྱུང་བར་རྒྱུད་གཞན་དང་མཐུན་པར་ཤེས་པར་བྱ་སྟེ། ངེས་ཚིག་ཀྱང་བཤད་པའི་ཕྱིར་རོ། །དེ་ལ་རྒྱུད་འདིར་མ་གསུངས་མོད་ཀྱང་སྒྲོལ་མ་ལ་སོགས་པ་ལྷ་མོ་ལྔ་དང༌། དགའ་བ་བཞི་དང༌། །སྡེ་པ་ལ་སོགས་པ་མཐའ་དག་རྒྱས་པར་ཤེས་པར་བྱའོ། །དེ་ལ་ངེས་པར་འབྱུང་བས་ན། ཀུན་སྣང་གང་ཡིན་དངོས་དང་སྦྱར། །བསམ་པའི་དངོས་ལ་འཇུག་རྣམས་ཀྱི། །ཡན་ལག་རྣམས་ལ་ཐམས་ཅད་དུ། །གོང་དུ་སྨོས་པ་བརྗོད་པ་ཡིན། །ཞེས་བྱ་བ་ལ། དེ་ཞེས་པ་ནི་གོང་དུ་སྨོས་པའི་ས་བོན་རྣམས་སོ། །དེ་ལ་དངོས་པོ་ཐམས་ཅད་ཡང་དག་པར་འབྱུང་བས་ན། དེ་ལས་པེས་པར་འབྱུང་བར་སྦྱར་རོ། །ཀུན་དུ་སྣང་བ་ནི། ཀུན་དུའི་སྒྲས་བདག་དང་

---

^{[མ་དཔེ་གཟིགས་ན་འདིར་གནོན།]}

གཞན་གྱི་རྒྱུད་ལ་ཡང་དག་པར་འཇུག་སྟེ། འདི་ལྟར་སྣང་བ་ནི་གཡོ་བ་དང་མི་གཡོ་བའོ། །དེའི་དངོས་ལ་སྦྱར་བ་དང་བསམ་པའི་དངོས་པོ་ནི་རྣལ་འབྱོར་པ་གང་ཞིག་ཆོས་ཉིད་བསྒོམ་པའོ། །དེ་ཡང་སྐྱེས་བུའི་སྤྱིའི་སྒྲ་འབྲུ་མང་པོ་པར་སྦྱར་བར་བྱའོ། །ཡན་ལག་དེའི་ལས་ལ་འཇུག་པའི་ཡན་ལག་གམ། ཐབས་སུ་གསུངས་པས་ན་ཡན་ལག་ཐབས་རྣམས་སུ་སྦྱར་རོ། །གོང་དུ་སྨོས་པས་ནི་གོང་མའི་ས་བོན་ལ་སྦྱར་བར་བྱའོ། །དོན་དུ་གསལ་བར་ཟློས་པ་ཡི། །ཚིག་ནི་རྒྱས་པར་བརྗོད་མི་དགོས། །ཞེས་བྱ་བ་ནི་འདི་སྐད་བདག་གིས་ཐོས་པའི་དུས་ཏེ། དེའི་ཚིག་ལ་གསལ་བར་བརྗོད་མི་དགོས་པའོ། །ལས་ལས་སྐྱེས་པའི་གཟུགས་རྣམས་ལ། །དྲག་པོ་ཡོངས་སུ་སྟོན་པ་དང༌། །གནོད་སྦྱིན་ཅི་ཆོན་ཐོགས་རྣམས་ལ། །གཙོ་བོའི་དོན་དུ་བཤད་པས་ན། །ཚིག་ཏུ་ངེས་པར་ཡང་དག་བརྗོད། །ཅེས་བྱ་བ་ནི་ལས་ལས་གྲུབ་པ་ནི་གནོད་སྦྱིན་ཏེ། དེ་རྣམས་ཀྱི་གཟུགས་སོ། །དྲག་པོ་ཡོངས་སུ་སྟོན་པ་ནི་སྔགས་དང་ཕྱག་རྒྱ་དང་ཐབས་རྣམས་དྲག་པོའི་སྟོན་པའོ། །སུ་ལ་སྟོན་ཞེ་ན། ལས་ལས་གྲུབ་པའི་གཟུགས་དྲག་པོའི་རིགས་ཐམས་ཅད་ལའོ། །གནོད་སྦྱིན་བེ་ཅོན་ཐོགས་པ་ལ་སོགས་པ་གནོད་སྦྱིན་གྱི་རིགས་ཐམས་ཅད་ལ་གཙོ་བོ་ལག་ན་རྡོ་རྗེ་ཉིད་གཙོ་བོར་བཤད་ཅིང་སྦྱོར་བས་ན་གཙོ་བོའི་དོན་དུ་ཡོངས་སུ་ཤེས་པར་བྱའོ། །ཚིག་ཏུ་ངེས་པར་བརྗོད་པ་ནི་ངེས་པའི་ཚིག་རྒྱུད་ལ་ཡང་དག་པར་གོང་འོག་དང་སྦྱར་ཏེ་གསུངས་པ་དང་གསུང་བར་སྦྱར་རོ། །ཁྱོད་ཀྱི་ཚུལ་འཆང་རབ་དགའ་བས། །དེ་ཉིད་རིགས་སུ་འབྱུང་བ་སྟེ། །ཀུན་ཀྱང་ནག་པོའི་ལས་ལ་དགའ། །གནང་བ་དག་པར་མི་མཐོང་ཞིང༌། །དེ་ཉིད་ལ་ནི་ངེས་པར་བརྗོད། །ཅེས་བྱ་བ་ནི་ཁྱོད་ཀྱི་ཚུལ་འཆང་ཞེས་པ་ནི་ལག་ན་རྡོ་རྗེ་ཉིད་ཀྱི་ཚུལ་འཆང་བའོ། །རབ་དགའ་ནི་གདུག་པ་གཞན་རྣམས་སོ། །དེ་ལ་རབ་ཏུ་དགའ་བས་གདུག་པ་གཞན་རྣམས་དེ་ཉིད་གནོད་སྦྱིན་གྱི་རིགས་སུ་འབྱུང་བར་སྦྱར་རོ། །དེ་དག་ཐམས་ཅད་ནག་པོའི་ལས་སྡིག་པ་ལ་དགའ་བས་སྣང་བ་ནི་ཡེ་ཤེས་ལ་སྦྱར་ཏེ། དེ་དག་ཐམས་ཅད་

---

^{[མ་དཔེ་གཟིགས་ན་འདིར་གནོན།]}

ཀྱིས་མི་མཐོང་བཞིན་དུ། དེ་ཉིད་ནི་སྡིག་པ་ལ་གྲོལ་བ་དང༌། ཐར་པར་ལྟ་བ་དེ་ཉིད་ལ་ངེས་པར་བརྗོད་པའམ་འདོད་པའོ། །གོང་དུ་བསྟན་པ་གང་ཡིན་པ། །སོ་སོར་དག་ལ་གདོན་མི་ཟ། །སྦྱོར་བ་སྣ་ཚོགས་ངེས་བསྒྲུབས་ནས། །རྣལ་འབྱོར་པ་ནི་སྣ་ཚོགས་པ། །མངོན་དུ་རྒྱས་ཤིང་ངེས་པར་གསལ། ཞེས་བྱ་བ་ལ། གོང་དུ་བསྟན་པ་ནི་འདི་ཉིད་དུའོ། །གང་ཡིན་པ་ནི་སྦྱོར་བ་དང་ཐབས་རྣམས་སུ་སྦྱར་རོ། །སོ་སོ་དག་ལ་ནི་གདུག་པའི་རིགས་རང་རང་ལའོ། །གདོན་མི་ཟ་བ་ནི་ཐེ་ཚོམ་མེད་པར་འགྲུབ་པར་སྦྱར་རོ། །སྦྱོར་བ་སྣ་ཚོགས་པ་ནི་འདིར་བསྟན་པ་རྣམས་ཏེ། དེ་དག་ངེས་པར་བསྒྲུབས་པས་སྣང་བ་ཡེ་ཤེས་དང༌། འབྱོར་བ་སྣ་ཚོགས་པ་རྣམས་མངོན་པར་འགྲུབ་ཅིང་ངེས་པར་གསལ་བའོ། །སྣང་བ་ཆེན་པོ་བདག་མེད་པར། །བརྒྱུད་པས་ཡོངས་སུ་འགྲུབ་པ་ཡིན། །ཞེས་བྱ་བ་ལ། རྣམ་པར་མི་རྟོག་པའི་ཡེ་ཤེས་དང་ཆོས་ཉིད་སྟོང་པ་ཉིད་བདག་དང་གཞན་དུ་མི་དམིགས་པའི་ཕྱག་རྒྱ་ཉིད་གནང་བ་དང༌། གནང་བ་ཉེ་བར་ཐོབ་པས། བརྒྱུད་པས་འགྲུབ་པའོ། །ཀུན་རྫོབ་གོང་མའི་དངོས་པོ་ལྟར། །བརྟན་པ་ལྟ་བུར་རབ་ཏུ་མཐོང༌། །དོན་དམ་འོག་མའི་སྒྲ་ལྟ་བུར། །ཉོན་མོངས་ཀུན་སྲེག་རང་བཞིན་གྱིས། །འོད་གསལ་བ་རུ་གནས་པ་ཡིན། །ཞེས་བྱ་བ་ལ། ངེས་པའི་ཚིག་སྒྲ་སྦྱོར་གྱི་སྒོ་ལས་དོན་དམ་པ་དང༌། ཀུན་རྫོབ་གཉིས་ལ་ཡང་དག་པར་སྦྱར་ཏེ་གསུངས་པ་ལས། གོང་མའི་དངོས་པོ་ནི་སྣ་ཚོགས་དང༌། བརྟན་པ་མི་འཇིག་པར་མཐོང་བས་ན། ཀུན་རྫོབ་གོང་མའི་ཚིག་ཏུ་སྦྱར་རོ། །དོན་དམ་པ་ནི་ཉོན་མོངས་པའི་བུད་ཤིང་རྣམས་བསྲེགས་པའི་ཚུལ་དུ་སྦྱངས་པ་དང༌། རྣམ་པར་རྟོག་པ་མེད་པས་རང་བཞིན་གྱིས་འོད་གསལ་པར་གནས་པས་ན་འོག་མའི་དགྲ་ལྟ་བུར་ཤེས་པར་བྱའོ། །སྙིང་པོ་དོན་དམ་ལ་འཇུག་པ། །ཕྱི་རིམ་ཀུན་རྫོབ་ལ་བརྟེན་པ། །དང་པོར་སངས་རྒྱས་མི་གནས་ཤིང༌། །སྔ་མ་བྱ་བའི་སྦྱོར་བས་བརྩོན། །ཞེས་བྱ་བ་ལ། སྙིང་པོ་དོན་དམ་པའི་ནི་བསྒྲུབ་པའི་བྱ་བའི་དངོས་པོ་བརྟན་པ་མི་འཇིགས་པ་ལ་བྱ་སྟེ། དེ་ལ་འཇུག་པར་འདོད་པས་ཕྱི་རིམ་ཞེས་བྱ་བ་ནི་གསོག་དང་

---

^{[མ་དཔེ་གཟིགས་ན་འདིར་གནོན།]}

གསོབ་ཏུ་གྱུར་པ་དངོས་པོ་ཇི་ལྟ་བ་བཞིན་དུ་ལས་དང་པོ་པ་རྣམས་ཀྱིས་ཐབས་ལ་མཁས་པས་ཡོངས་སུ་བསྒྲུབ་པར་བྱའོ། །དང་པོར་སངས་རྒྱས་མི་གནས་པ་ནི་ཐེག་པ་ཆེན་པོའི་སྔགས་ལ་ཞུགས་པ་ཙམ་གྱིས་རྨོངས་པ་ཁ་ཅིག་སངས་རྒྱས་པར་འདོད་དེ། དེ་ལྟ་བུའི་ང་རྒྱལ་ལ་བརྟེན་ནས་ཐབས་ཀྱི་ཡན་ལག་མ་ཤེས་པས་ངན་འགྲོར་ལྟུང་བར་འགྱུར་རོ། །དེ་ནས་སྔ་མའི་བྱ་བ་ལས་དང་པོ་པ་རྣམས་ཀྱི་ཐབས་ཀྱི་སྦྱོར་བ་རིམ་པ་ཇི་ལྟ་བ་བཞིན་དུ་བརྩོན་པར་བསྒྲུབ་པར་སྦྱར་རོ། །དབང་ཐོབ་པ་ལ་རློམ་སེམས་བྱེད། །བླ་མའི་མན་ངག་ངེས་པ་ལས། །བླ་མ་ཉིད་ལ་ཅི་ནུས་ཀྱིས། །ཡང་དག་པར་ནི་མཆོད་པར་བྱ། །ཞེས་བྱ་བ་ལ། དབང་ཐོབ་པ་ཙམ་དག་ལ་བདག་རྡོ་རྗེ་སེམས་དཔར་ཁ་ཅིག་རློམ་སེམས་པར་བྱེད་དེ། དེ་ལྟར་རློམ་སེམས་པར་ནི་མི་བྱ་བར་བླ་མ་དམ་པའི་མན་ངག་ངེས་པར་རྙེད་པ་རྟོག་པ་དང་བྲལ་བའི་རིམ་པ་ཇི་ལྟ་བ་བཞིན་དུ་ཐབས་ཀྱི་ཡན་ལག་ཡང་དག་པར་ཤེས་པར་བྱས་ནས། བླ་མ་དམ་པ་ལ་བུ་དང་ཆུང་མ་དང་རིན་པོ་ཆེ་སྣ་ཚོགས་པས་ཡོངས་སུ་མཆོད་པར་བྱའོ། །ཅིའི་ཕྱིར་མཆོད་ཅེ་ན། བླ་མ་ལས་དངོས་གྲུབ་ཐོབ་པར་གསུངས་པས་དངོས་གྲུབ་ཉེ་བར་བྱ་བའི་ཕྱིར་མཆོད་པའོ། །རྡོ་རྗེ་ངོ་བོ་ཀུན་འབྱུང་དང༌། །གདུག་པ་ཐམས་ཅད་སྲེག་ཕྱིར་དང༌། །དངོས་ལ་འཇུག་བ་ངེས་པའི་སྒྲས། །གོང་མའི་ཚིག་ཏུ་བརྗོད་པ་ཡིན། །ཞེས་བྱ་བ་ལ། རྡོ་རྗེ་ངོ་བོ་ཀུན་འབྱུང་བ་ནི་སྔགས་རྣམ་པ་གསུམ་དང༌། ཕྱག་རྒྱའི་སྙིང་པོ་ཡེ་ཤེས་ཀྱི་ཐབས་དང༌། དེ་ཁོ་ན་ཉིད་ཐམས་ཅད་འབྱུང་བས་ན་ངོ་བོ་ཀུན་འབྱུང་ངོ༌། །གདུག་པ་ཐམས་ཅད་མ་ལུས་པར་སྐྲག་ཅིང་རླག་པར་བྱེད་དེ། སྲེག་པས་ནི་སྲེག་པ་སྟེ་དངོས་པོ་འདི་ཉིད་དོ། །དངོས་པོ་ཉིད་ལ་མཐུན་པའི་ངེས་པའི་སྒྲ་སྦྱར་ན་གོང་མའི་རྡོ་རྗེ་མེ་ལྕེར་གསུངས་བར་སྦྱར་རོ། །རྡོ་རྗེ་མེ་ལྕེའི་རྒྱུད་ཀྱི་འགྲེལ་བ་དེ་ཁོ་ན་ཉིད་སྣང་བ་ཞེས་བྱ་བ་ལས་ལེའུ་གཉིས་པའི་བཤད་པའོ།། །།

གསུམ་པ། དཀྱིལ་འཁོར་དང་ལྷ་ཡི་ལེའུའི་བཤད་པ།

---

^{[མ་དཔེ་གཟིགས་ན་འདིར་གནོན།]}

གོས་སྡོན་ལག་ན་རྡོ་རྗེ་ཡིས། །ཞེས་པ་ནས། ལྷ་ཡི་སྦྱོར་བ་བཤད་པར་བྱ། །ཞེས་བྱ་བའི་བར་དུ་ནི། ལག་ན་རྡོ་རྗེ་གང་དག་སྒྲུབ་པའི་

---

^{[མ་དཔེ་གཟིགས་ན་འདིར་གནོན།]}

ཐབས་སུ་དཀྱིལ་འཁོར་ཞུས་པ་དང༌། བཅོམ་ལྡན་འདས་ཀྱིས་ཡང་དག་པའི་དོན་དངོས་པོར་གྱུར་ན་ཁ་དོག་དང་དབྱིབས་དང་ལྷ་དང་སྔགས་ལ་སོགས་པ་མེད་དེ། འོ་ན་ཡང་འགྲོ་བའི་རྟོག་པ་བསལ་བ་དང༌། ལས་དང་པོ་པས་སྒྲུབ་པའི་ཐབས་སུ་བཤད་པར་དམ་བཅས་པར་ཤེས་པར་བྱའོ། །གང་ཞིག་མོས་པར་བྱེད་པ་ཡིས། །ཁྲུ་གསུམ་དཀྱིལ་འཁོར་ཕྱོགས་བཞི་པ། །ནགས་སམ་དུར་ཁྲོད་ཁང་སྟོང་དམ། །གཙུག་ལྷག་ཁང་དང་མཆོད་རྟེན་ནང༌། །དེ་དག་རྣམས་སུ་ངེས་པར་བརྩམ། །ཞེས་བྱ་བ་ལ། མོས་པར་རམ་གྲུབ་པར་བྱེད་པའི་གང་ཟག་གིས་ཕྱོགས་བཞི་རུ་ཁྲུ་གསུམ་གསུམ་པའི་དཀྱིལ་འཁོར་གནས་གོ་སླ་བ་རྣམས་སུ་ངེས་པའམ། གདོན་མི་ཟ་བར་བརྩམ་པར་བྱ་བར་སྦྱར་བར་བྱའོ། །དང་པོ་བསྙེན་པ་རབ་གནས་པས། །བུ་མོ་བཅུ་དྲུག་སྟོན་མོ་བྱས། །བདག་གིས་ཞག་གསུམ་ཁྲུས་བྱ་ཞིང༌། །སྤྱི་བོ་ལྐོག་མ་སྙིང་ག་རུ། །གསང་བ་གསུམ་གྱི་ཡི་གེ་བརྟག །ཅེས་བྱ་བ་ལ་དང་པོ་བསྙེན་པ་ལ་བུ་མོ་ལོ་བཅུ་དྲུག་ལོན་བརྒྱལ་རིགས་སམ་བྲམ་ཟེའི་རིགས་སམ། །རྗེའུ་རིགས་ལ་གཟུགས་དང་ཁ་དོག་ཕུན་སུམ་ཚོགས་པར་ལྡན་པ། ཞི་བ་བྱང་ཆུབ་ཀྱི་སེམས་ལ་ལྷག་པར་ཆགས་པ་ལ། བདག་གི་སྔགས་ཆུ་དང་ལྡན་པའི་བུམ་པས་ཁྲུས་ཉི་མ་གསུམ་དུ་བྱས་ལ། ཙནྡན་དམར་པོའི་ལྡེ་གུས་གནས་རྣམ་པ་གསུམ་པོ་རུ་གསང་བ་གསུམ་གྱི་ཡི་གེའི་གདན་ཐིག་ལེ་ལེགས་པར་བསྐུ་བར་བྱའོ། །དེ་ཡང་བ་བ་སི་ཏ་བཛྲ་ཧཱུཾ་ཞེས་པའི་སྔགས་ཀྱིས་ཡོངས་སུ་བསྐུས་ལ། སྐུ་གསུང་ཐུགས་ཀྱི་ཡི་གེ་བརྟན་པར་བྱ་བར་འབྲེལ་ཏོ། །རྣམས་སུ་བཅོས་པའི་གོས་ཉིད་ལ། །གུར་གུམ་ཐིག་ལེས་ངེས་བཏབ་སྟེ། །དེ་ཉིད་ལ་ནི་བསྐོན་པར་བྱ། །ཞེས་བྱ་བ་ལ། གོས་སྔོན་པོ་ལ་གུར་གུམ་གྱི་ཐིག་ལེས་གནས་བཅུ་བདུན་དུ་བསྐུ་བར་བྱའོ། །སྐྱེས་པ་དང་ནི་སྤྲད་མི་བྱ། །ཞེས་པ་ནས། གནས་གང་ཡིན་པར་བདག་ལ་གཏད། །ཅེས་པའི་བར་ལ་སྐྱེས་པ་དང་ནི་སྤྲད་མི་བྱ་ནི་དེའི་བར་དུའོ། །དཀར་གསུམ་ནི་འོ་མ་དང་ཞོ་དང་འབྲས་གསུམ་མོ། །དེ་ཡོངས་

---

^{[མ་དཔེ་གཟིགས་ན་འདིར་གནོན།]}

སུ་གསལ་ལ་སྙིང་པོ་ནི་འདི་ཡིན་ཏེ། དེ་ཡིས་འབུམ་དུ་བཟླས་པའོ། །ཨོཾ་ཨ་མྲྀ་ཏེ་སིདྡྷ་བཛྲ་ཧཱུཾ་ཞེས་བསྔགས་ལ། རང་གི་སྔགས་བུ་མོའི་ཁར་བཏབ་པ་དང༌། དེ་ཉིད་ལ་ཡང་བསླབ་པའོ། །དེ་ནས་བསྙེན་པ་རྫོགས་པ་དང༌། །བུ་མོ་ལ་ཉོས་ཤིག་དང་ལོངས་ཤིག་པའི་ཚིག་བརྗོད་ནས། ཀུན་འདུས་པ་ནི་ཚོང་འདུས་སོ། །དེར་མི་སྒེག་པར་དངོས་པོ་གང་ཡིན་པ་ཉོས་ལ། རིགས་མཐུན་པ་ནི་གོས་སྔོན་པོ་དེར་གཏུམས་ལ། གནས་ནི་གང་ན་གནས་པའི་ས་རུ། བདག་ནི་སྒྲུབ་པ་པོ་ལ་ག་ཏད་པར་འབྲེལ་ཏོ། །དེ་ཡིས་ཞག་གསུམ་སྦྱོར་བ་ཡིས། །ཕྱག་རྒྱ་ངེས་པ་ཉིད་དང་ཡང༌། །སྙིང་པོ་གང་གི་སྦྱོར་བ་ཡིས། །དྲི་ཆུ་བཏབ་ལ་གྲངས་ཚད་དུ། །ཕྱིན་པར་ཡང་དག་བཟླས་པར་བྱ། །ཞེས་བྱ་བ་ལ། དེ་ཡིས་ཞེས་པ་ནི་རྣལ་འབྱོར་བའོ། །རྣལ་འབྱོར་པས་ནི་བའི་རྣམ་པ་ལྔ་ལ་སོགས་པ་ལ་ཞག་གསུམ་གྱི་བར་དུ་བདག་གི་ཕྱག་རྒྱ་ནི་རྡོ་རྗེ་རྩེ་གཅིག་པའོ། །ལྷའི་སྙིང་པོ་ཀུན་ལ་གྲངས་ཉི་ཤུ་རྩ་གཅིག་ཏུ་ཡང་དག་པར་བཟླས་ལ། དྲི་ཆུས་ཀུན་ལ་ཕོག་པར་གཏོར་བར་བྱ་བར་འབྲེལ་ཏོ། །ལྷག་མ་ནི་གོ་སླ་བས་འདིར་མ་བཤད་དོ། །དང་པོར་བྱང་ཤར་མཚམས་ཉིད་ནས། །ཀུན་བརྟེན་ཁ་དོག་རིགས་མཐུན་བླང༌། །ཡོངས་སུ་བསྡུས་བྱས་ཉིད་དུ་ངེས། །གཉིས་པ་གཉིས་པར་ཡང་དག་ལྡན། །གསུམ་པ་གཅིག་གིས་ཚད་བྱས་ལ། །ཞེས་བྱ་བ་ལ། བྱང་ཤར་མཚམས་ནས་ཀུན་བརྟེན་པའི་སྟོབས་དང་ལྡན་པའི་སྒྲ་རྟགས་ཀྱིས་དབྱེ་བས་འཇུག་སྟེ་ས་ལ་ངེས་པའོ། །ས་ཁ་དོག་རིགས་མཐུན་པ་ནི་སྔོན་པོར་ཤེས་པར་བྱའོ། །ས་དེ་ཡོངས་སུ་བསྡུས་པ་ལ་དཀྱིལ་འཁོར་ངེས་པར་བྱ་བར་འབྲེལ་ཏོ། །གཉིས་པ་གཉིས་པར་ཡང་དག་ལྡན་པ་ནི། །རབ་འབྲིང་ཐ་མའི་ཚད་ལ་བྱ་སྟེ། རབ་ནི་གོང་དུ་བསྟན་པར་ཟད་དོ། །འབྲིང་ནི་གཉིས་པ་སྟེ་ཁྲུ་གཉིས་པ་ལས་བྱས་པའོ། །གསུམ་པ་གཅིག་པ་ནི་ཁྲུ་གཅིག་པ་ལ་ངེས་པར་བྱའོ། །དེ་ལྟར་ཚད་དུ་བྱས་པ་ལས། །ཤིན་ཏུ་མཉམ་པར་འཐས་པར་བྱ། །དེ་ཉིད་རྗེས་སུ་འཇུག་པ་ཡིས། །དང་པོར་སྲད་

---

^{[མ་དཔེ་གཟིགས་ན་འདིར་གནོན།]}

བུ་གང་ཡིན་པས། །ཁ་དོག་སེར་པོས་ཐིག་གདབ་བྱ། །ཞེས་བྱ་བ་ལ། རབ་འབྲིང་ཐ་མའི་ཚད་དུ་བྱས་པ་ལས་མཉམ་པ་དང་འཐས་པ་དང་ལེགས་པར་བྱས་ལ་དེ་ཉིད་རྗེས་སུ་འཇུག་པ་ནི་གང་ཟག་རྣལ་འབྱོར་བའོ། །དེ་ཡི་དང་པོ་སྲད་བུ་ནི། །བུ་མོས་བཀལ་བའི་དགུ་སྒྲིལ་ལོ།། ཁ་དོག་སེར་པོ་ནི་ཡུང་བ་ལ་སོགས་ཕ་གང་ཡང་རུང་བའི་ཐིག་གདབ་པར་སྦྱར་རོ། །དཀྱིལ་འཁོར་དགུ་རུ་ངེས་པ་ལས། །འབྲུ་དང་ས་དང་རིན་ཆེན་གང༌། །ཕྱེ་མ་ཉིད་དུ་བཏགས་པ་ཡིས། །དཀྱིལ་དུ་པདྨ་བཅུ་དྲུག་པ། །འདབ་མར་ལྡན་པར་བྲི་བར་བྱ། །ཞེས་བྱ་བ་ལ། ཐིག་བཏབ་པའི་ལེ་ཚེ་དགུ་ལ་དཀྱིལ་དུ་རྒྱལ་པོ་དང༌། བློན་པོ་དང༌། བྲམ་ཟེ་དང༌། དམངས་རིགས་ལ་རིམ་པར་སྦྱར་ལ། རིན་པོ་ཆེ་མུ་ཏིག་ལ་སོགས་པས་ཟི་བ་དང༌། འབྲས་བཏགས་པ་ལ་རྣམས་ལ་སོགས་པས་ཁ་དོག་བསྒྱུར་བ་དང༌། ས་ཁ་དོག་ལྔ་པ་ལ་ཞིབ་པར་བཏགས་པས་པདྨ་བཅུ་དྲུག་དང་ལྡན་པ་བྲི་བར་སྦྱར་བར་བྱའོ། །ཤར་དང་ལྷོ་དང་ཞེས་བྱ་བ་ནས། ཀུན་ཀྱང་སྟག་གི་པགས་པ་ཡིས། །སྨད་ནི་ཡོངས་སུ་དཀྲིས་པ་ཡིན། །ཞེས་བྱ་བའི་བར་ནི་གོ་སླ་བས་འདིར་མ་བཤད་དོ། །དེ་སྟེང་གདན་ནི་རབ་གནས་པས། །གཙོ་བོ་ཉིད་ལ་ཉི་ཟླ་ཡིས། །ཕྲག་པ་ལ་ནི་འཁོར་བར་རྒྱུ། །ཚངས་པ་དབང་པོ་ལྷ་ཆེན་གཉིས། །ཞབས་ཀྱིས་ཡོངས་སུ་མནན་པ་ཡིན། །ཞེས་བྱ་བ་ལ། ལྷའི་བུ་ཉི་མ་དང་ཟླ་བ་གཉིས་ཕྲག་པ་ལ་རྒྱུ་བར་བྱེད་དོ། །དེ་ཅིའི་ཕྱིར་ཞེ་ན། བདེ་བར་གཤེགས་པས་ལུང་གཉིས་སུ་གསུངས་ཏེ། གཅིག་ནི་ལག་ན་རྡོ་རྗེའི་སྐུས་རི་རབ་ཀྱི་རྐེད་པར་སླེབ་པས་ཉི་མ་དང་ཟླ་བ་ཡང་རི་རབ་ཀྱི་རྐེད་པ་ནས་རྒྱུ་བས་ལག་ན་རྡོ་རྗེའི་ཕྲག་པ་ལ་ཕོག་པའོ། །གཅིག་ནི་འཇིག་རྟེན་པ་རྣམས་ལ་ཕྲིན་ལས་རྣམ་པ་གཉིས་ཀྱིས་འདུལ་བ་དང༌། ཐབས་དང་ཤེས་རབ་ཏུ་ལྡན་པས་ཨཱ་ལི་ཀཱ་ལི་སྙོམས་པར་འཇུག་པའི་དོན་གསུམ་དུ་རིག་པར་བྱའོ། །དེ་ཡང་ལུང་གང་ལས་གྲུབ་ཅེ་ན་རིམ་པ་ཇི་ལྟ་བ་བཞིན་དུ་ལག་ན་རྡོ་རྗེ་དབང་བསྐུར་བའི་རྒྱུད་དང་ལག་ན་རྡོ་རྗེ་བདེ་བར་རོལ་བའི་རྒྱུད་དང་ལག་ན་རྡོ་རྗེ་ཡུམ་ལྕང་ལོ་མའི་རྒྱུད་ལས་རིག་པར་བྱའོ། །ཚངས་པ་དང་

---

^{[མ་དཔེ་གཟིགས་ན་འདིར་གནོན།]}

དབང་པོ་གཉིས་སྲིད་པ་དང༌། མྱ་ངན་ལས་འདས་པའི་རྟགས་སུ་བརྟེན་ནས་དེ་གཉིས་ཀ་ལ་མི་གནས་པ་དང༌། ཡང་ན་རྟོག་པ་དང་མི་རྟོག་པ་གཉིས་ཀ་ལ་མི་གནས་པའི་རྟགས་དང༌། ཡང་ན་བདུད་ཀྱི་སྙིང་ག་ཉམས་དགའ་བར་བཅོམ་ལྡན་འདས་རོལ་བས་བཞུགས་པའོ། །ཤར་གྱི་ལྷ་ཆེན་རྣམ་རྒྱལ་ཉིད། །ཀེང་རུས་སྟེང་ན་གནས་པ་བཞིན། །གཞན་ཡང་དེ་ལྟར་གནས་པ་ཡིན། །ས་བོན་གནས་པ་གང་ཡིན་པ། །སྒྲ་དང་བཅས་པས་ཤེས་པར་བྱ། །ཞེས་བྱ་བ་ལ། ཤར་ན་བཞུགས་པའི་ཁྲོ་བོ་ཁམས་གསུམ་རྣམ་པར་རྒྱལ་བ་ཀེང་རུས་སྐམ་པོའི་སྟེང་ན་བཞུགས་པ་བཞིན་དུ་ནག་པོ་ཆེན་པོ་ལ་སོགས་པའང་ཀེང་རུས་སྐམ་པོའི་སྟེང་ན་བཞུགས་པར་འབྲེལ་ཏོ། །དེ་ཡང་ཅིའི་ཕྱིར་ཀེང་རུས་སྐམ་པོའི་སྟེང་ན་བཞུགས་ཤེ་ན། ཐམས་ཅད་ཀྱང་རྣམ་པར་རྟོག་པ་དང་བྲལ་བའི་ཕྱིར་དང༌། སྒྲའི་སྦྱོར་བས་ཀ་རང་ཀ་ལ་གདུག་པ་རྣམས་སྐྲག་པར་བྱ་བའི་ཕྱིར་དང༌། དྲག་པོའི་ལས་སུ་སྦྱོར་བས་ན་ཀེང་རུས་ལ་བཞུགས་པའོ། །ས་བོན་གནས་པ་དེ་ནི་དེ་དག་ཐམས་ཅད་སྐྱེད་པའི་ས་བོན་ལ་བྱ་སྟེ་ཡིག་འབྲུ་རྣམས་སོ། །སྒྲ་དང་བཅས་པ་ནི་བཅོམ་ལྡན་འདས་རྡོ་རྗེ་གར་མཁན་གྱི་ཞལ་ནས་སྒྲ་དང་བཅས་པར་ཕྱུང་བའོ། །དེ་ཡང་ཇི་ལྟ་བུ་ཞེ་ན། ས་བོན་གྱི་ཡི་གེ་རེ་རེ་ལ་འོད་ཟེར་རིགས་མི་འདྲ་བ་རེ་རེ་དང༌། སྒྲ་མི་འདྲ་བ་རེ་རེ་ཡང་དག་པར་ཕྱུང་སྟེ་བསྒྲགས་པར་སྦྱར་རོ། །དང་པོ་གཙོ་བོ་སྐྱེད་བྱེད་གང༌། །ཧཱུཾ་ལས་ངེས་པར་རྫོགས་བྱ་ཞིང༌། །གཞན་རྣམས་འདི་ལས་འབྱུང་བར་བསམ། །ཞེས་བྱ་བ་ལ། དང་པོར་གཙོ་བོ་ཕྱག་ན་རྡོ་རྗེ་ཉིད་ཀྱི་བསྐྱེད་པར་བྱ་བའི་ས་བོན་དུ་ཧཱུཾ་ནག་པོ་ལས་ཡང་དག་པར་ཤེས་པར་བྱའོ། །གཞན་རྣམས་འདི་ལས་ཞེས་པ་ནི་འོག་ནས་འབྱུང་བའི་ས་བོན་བཅུ་དྲུག་པོ་རིམ་པ་ཇི་ལྟ་བ་བཞིན་དུ་ཁམས་གསུམ་རྣམ་པར་རྒྱལ་བ་ནས། ཤ་ཟ་མའི་བར་དུ་ཁ་དོག་མི་འདྲ་བ་ནི་བླ་མའི་ངག་ལས་ཡོངས་སུ་རིག་པར་བྱ་ཞིང་དེ་རྣམས་ལས་འབྱུང་བའམ་བསྐྱེད་པར་འབྲེལ་ཏོ། །ལྷག་མ་ནི་གོ་སླའོ། །དེ་ལས་རགས་པ་གང་ཞིག་གིས། །བར་འཕྲ་ངེས་པར་བསྐྱེད་པར་བྱ། །དང་པོར་ཀུན་ཀྱང་

---

^{[མ་དཔེ་གཟིགས་ན་འདིར་གནོན།]}

བརྩིགས་པ་ཡིས། །བཾ་ལས་གྱུར་པ་སྣ་ཚོགས་པ། །ཡང་དག་པར་ནི་བསྐྱེད་པར་བྱ། །དེ་འོག་ཀཾ་ལས་རབ་སྐྱེས་པ། །སྐམ་པོར་ཡོངས་སུ་བརྟགས་པ་ཡིན། །ཞེས་བྱ་བ་ལ། རགས་པ་ནི་སྐུ་ཉིད་དོ། །བར་འཕྲ་ནི་དང་པོར་གཅིག་པའི་བཾ་དམར་པོ་ལས་བྱུང་བའི་པདྨ་འདབ་མ་བཅུ་དྲུག་པ་སྣ་ཚོགས་པ་བསྐྱེད་པར་བྱའོ། །དེ་འོག་ཅེས་པ་ནི། དེའི་རྟིང་ལ་བྱུང་བས་དེའི་འོག་སྟེ། དེའི་སྟིང་དུ་ཀཾ་དཀར་པོ་ལས་ཡང་དག་པར་བྱུང་བའི་ཀེང་རུས་སྐམ་པོ་རབ་ཏུ་གནས་པའོ། །ལྷག་མ་ནི་བླ་མའི་མན་ངག་ལས་ཤེས་པར་བྱའོ། །དེ་དག་རྣམས་ནི་རབ་བ་རྫོགས་པའི། །སྐུ་རུ་ཡོངས་སུ་རྫོགས་བྱས་ལ། །བདག་གིས་རྣལ་འབྱོར་ཡང་དག་བསྒྲུབ། །ཅེས་བྱ་བ་ལ། དེ་དག་གི་ནི་གོང་དུ་སྨོས་པའི་གདན་དང་ཡིག་འབྲུ་དང་བླ་མའི་ང་ལ་སོགས་པའི་ལས་རྫོགས་པའོ། །སྐུ་རུ་ནི་རང་རང་གི་ཆོ་ག་གསུམ་ལས་རང་རང་གི་སྐུར་རྫོགས་པར་བྱས་ལ་ཞེས་པར་འབྲེལ་ཏོ། །དེ་ནས་བདག་རྣལ་འབྱོར་བས་མཆོད་པ་ལ་སོགས་པའི་རྣལ་འབྱོར་ཡང་དག་པར་སྒྲུབ་པར་འབྲེལ་ཏོ། །དེ་ནས་སྔགས་པ་བློ་ལྡན་པས། །རིགས་སུ་ངེས་པ་གང་ཡིན་པ། །ཐབས་འདི་ལ་ནི་འཇུག་བར་བྱ། ཞེས་བྱ་བ་ནི་རིགས་རྣམ་པ་ལྔ་ལས་མི་འདའ་བས་རིགས་ཀྱི་རྗེས་སུ་འབྲང་བས་རྣལ་འབྱོར་ཡང་དག་པར་བསྒྲུབ་པར་གསུངས་ཏེ། སུ་ཡིས་ཤེ་ན། སྔགས་པ་ཤེས་རབ་ཅན་གྱིས་སོ། །དེ་ཡང་སྤྱིར་རིགས་ལ་བརྟེན་ཏེ་བསྒྲུབ་པར་གསུངས་སོ། །ཐབས་ནི་འོག་ནས་སྟོན་པ་རྣམས་ལ་འཇུག་པར་འབྲེལ་ཏོ། །ཀུན་ལ་འཇུག་པར་འགྱུར་བ་ཡི། །ཁྱབ་པའི་བདག་པོ་ཆེན་པོ་ནི། །རིགས་ཀྱི་གཙོ་བོས་སྤྱི་ལ་ཁྱབ། །ཅེས་བྱ་བ་ནི་སྤྱིར་ཁྱབ་པ་རྣམ་པ་གསུམ་གྱིས་ཡོངས་སུ་སྟོན་ཏེ་སྐུ་གསུང་ཐུགས་ཀྱིས་ཁྱབ་པའོ། །ཀུན་ལ་འཇུག་པ་ནི་ལས་ཀྱི་བྱ་བ་ཐམས་ཅད་ལའོ། །ཁྱབ་པའི་བདག་པོ་ནི་རིགས་ཀུན་ལ་འཇུག་པ་དང༌། གཙོ་བོ་དང་བདག་པོར་འབྲེལ་བས་ན་བདག་པོར་འབྲེལ་ཏོ། །རིགས་ཀྱི་གཙོ་བོ་ནི་རིགས་ཐམས་ཅད་དེ་ལས་འབྱུང་བས་ན་གཙོ་བོ་ཡིན་ཏེ་དེ་ཡིས་ཀུན་ལ་ཁྱབ་པར་འཇུག་པར་

---

^{[མ་དཔེ་གཟིགས་ན་འདིར་གནོན།]}

བསྟན་པའོ། །མདུན་ནི་རྡོ་རྗེའི་རིགས་ཡིན་ཏེ། །ལྷ་མིན་ལ་སོགས་ངེས་པར་འཇིགས། །གཡས་ནི་རིན་ཆེན་རིགས་ཡིན་ཏེ། །ཤ་ཟ་ལ་སོགས་ཡང་དག་འཇིགས། །རྒྱབ་ན་གནས་པ་གང་ཡིན་བ། །པདྨའི་རིགས་སུ་ཡང་དག་ལྡན། །ནོར་ལ་སོགས་པ་གང་དགོས་པ། །རེ་བ་བཞིན་དུ་སྐོང་བར་བྱེད། །གཡོན་ན་གནས་པ་གང་ཡིན་པ། །ལས་ཀྱི་རིགས་ཀྱི་ངེས་པ་ལས། །ཀླུ་དང་གནོད་སྦྱིན་ལ་སོགས་པ། །མ་རུངས་པ་རྣམས་ཡོངས་སུ་འཇིགས། །ཞེས་བྱ་བ་ལ། མདུན་ནི་ཤར་དུ་རིག་པར་བྱ་སྟེ། ཁམས་གསུམ་རྣམ་པར་རྒྱལ་པོ་ནི་རྡོ་རྗེའི་རིགས་སུ་ངེས་བས་ཚངས་པ་དང་ལྷག་མ་ཡིན་རྣམས་འཇིགས་པའོ། །གཡས་པ་ནི་ལྷོར་རིག་པ་སྟེ། ནག་པོ་ཆེན་པོ་རིན་པོ་ཆེའི་རིགས་སུ་ངེས་པས་གཤིན་རྗེ་དང་ཤ་ཟ་རྣམས་འཇིགས་པའོ། །རྒྱ་བ་ནི་ནུབ་ཡིན་ཏེ་རྣམ་ཐོས་སྲས་པདྨའི་རིགས་སུ་ངེས་ཏེ། ནོར་དང་བཞོན་པ་ལ་སོགས་པ་རྣམས་ངེས་པར་སྟེར་བ་དང་གནོད་སྦྱིན་རྣམས་འདུལ་བར་གསུངས་སོ། །གཡོན་ནི་བྱང་དུ་རིག་པར་བྱ་སྟེ། བདུད་རྩི་ཐབ་སྦྱོར་གྱིས་ཀླུ་དང་ཡང་མ་རུངས་པ་རྣམས་ཡོངས་སུ་འཇིགས་པར་གསུངས་སོ། །གཞན་ཡང་ལྷག་མ་ཐམས་ཅད་ཀུན། །ཕོ་ཉའི་ཚུལ་དུ་ངེས་པར་གནས། །ཞེས་པ་ནི་རྡོ་རྗེ་གནོད་སྦྱིན་ལ་སོགས་པ་ཐམས་ཅད་ཕོ་ཉའི་ཚུལ་དུ་ཡང་དག་པར་གནས་པར་འབྲེལ་ཏོ། །དང་པོ་ཉི་མ་ཤར་བ་ནས། །ལས་ཀྱི་སྦྱོར་བ་སྣ་ཚོགས་པ། །སོ་སོ་དག་པ་སྙིང་པོ་ནི། །གང་དུ་འབུམ་པས་རབ་རྫོགས་པ། །བརྒྱ་རྩ་བརྒྱད་དུ་ངེས་པར་བཟླས། །ཞེས་པ་ལ་དཀྱིལ་འཁོར་བྲི་བའི་སྔ་དྲོ་ཚོན་རྩི་ལྔ་ལ་ལས་ཀྱི་སྦྱོར་བ་སྣ་ཚོགས་པ་ཞེས་བྱ་བ་བརྗོད་དེ། དེ་ལ་སྙིང་པོ་བརྒྱ་རྩ་བརྒྱད་ཡང་དག་པར་བཟླས་ཞེས་པ་ནི། གོང་གི་བསྙེན་པའི་དུས་སུ་སྙིང་པོ་འབུམ་ལ་སོགས་པ་བཟླས་པའོ། །དེ་ནས་སྔ་དྲོའོ་དུས་སུ་བརྒྱ་རྩ་བརྒྱད་བཟླས་པས་སྦྱོར་བ་བྲི་བར་བྱའོ། །ཧཱུཾ་གི་སྒྲ་དང་རབ་ལྡན་པས། །བདག་ཉིད་ཁ་ནས་མེ་འབར་གསལ། །ཕྱག་རྒྱ་གནང་བར་རབ་བཅས་ཏེ། །དེ་ཉིད་སྟང་སྟབས་བསྐྱོད་པ་ཡིས། །གདུག་པ་ཐམས་ཅད་སྐྲག་བྱེད་པ། །བདེ་གཤེགས་མངོན་པར་དགྱེས་པར་བྱ།།

---

^{[མ་དཔེ་གཟིགས་ན་འདིར་གནོན།]}

ཞེས་བྱ་བ་ལ། སྔ་དྲོའི་དུས་སུ་རྒྱན་ཆ་ལྔ་ལ་སོགས་པ་ཡོངས་སུ་བགོས་ལ། རྡོ་རྗེ་དྲིལ་བུ་ངེས་པར་བཟུང་སྟེ་ཧཱུཾ་ཧཱུཾ་ཧཱུཾ་ཞེས་པའི་སྔགས་ཀྱིས་ཁ་ནས་མེ་འབར་བར་བསམས་ལ། ཕྱག་རྒྱ་ནི་གར་གྱིས་ཡང་དག་པར་བྱས་ལ། དེ་ཉིད་ཅེས་པ་ནི། དོན་དམ་པ་གཉིས་ལ་སྒྲ་རྣམ་པ་གཉིས་འཇུག་སྟེ། རྣལ་འབྱོར་པ་དེ་ཉིད་ཀྱིས་ལག་ན་རྡོ་རྗེ་དེ་ཉིད་ཀྱི་སྟང་སྟབས་བྱ་བར་གསུངས་པ་སྟེ། གཡས་པ་བརྐྱང་ལ་གཡོན་པ་ངེས་པར་བཀུག་ནས། རྡོ་རྗེ་རྒྱ་གྲམ་འགྲོས་ཀྱིས་ཕྱོགས་བཞིར་བསྐྱོད་པས་གདུག་པ་ཅན་ཐམས་ཅད་སྒྲག་པར་འགྱུར་བ་དང༌། བདེ་བར་གཤེགས་པ་རྣམས་གར་གྱིས་མངོན་པར་དགྱེས་པའོ། །རྡོ་རྗེ་དྲིལ་བུ་བཟུང་བྱས་ནས། །ཁྲོ་བོའི་ཆ་ལུགས་གང་ཡིན་པས། །ཕྱོགས་རྣམས་རྨོངས་པར་བྱེད་པ་ཡིན། །ལྷ་མོའི་གཟུགས་འཆང་གང་ཡིན་པས། །གཞན་གྱི་སེམས་ཀྱང་འཕྲོག་པར་བྱེད། །ཅེས་པ་ལ། དུས་རྣམ་པ་གཉིས་ཀྱི་སྦྱོར་བས་གསུངས་པ་ཡིན་ཏེ། བགེགས་བསྐྲད་པ་དང་མཆོད་པ་ཉིད་ལ་སྦྱོར་བ་གསུངས་སོ། །དེ་ལ་ཁྲོ་བོའི་སྟང་སྟབས་ཀྱིས་རྡོ་རྗེ་དང་དྲིལ་བུ་བཟུང་པས་ཁ་ནས་ཧཱུཾ་འབར་བས་ཡང་དག་པར་བསྐྱོད་པས་གདུག་པ་རྣམས་བསྒྱེལ་ཏེ། ཅིའི་ཕྱིར་འཁྲུགས་ཤེ་ན་བརྒྱལ་བས་སོ། །བརྒྱལ་བས་ཤར་ཕྱོགས་ལ་སོགས་པ་མི་ཤེས་སོ། །ལྷ་མོའི་གཟུགས་སུ་བདག་ཉིད་ཡང་དག་པར་བསྒྲུབས་ལ་གནས་པར་བྱ་སྟེ། ཇི་ལྟ་བུ་ཞེ་ན། ལས་ཀྱི་ལྷ་མོ་སྣ་ཚོགས་པ། །དབུ་རྒྱན་དང་གདུ་བུ་དང༌། སྟོད་གཡོགས་ལ་སོགས་པ་རྒྱན་ཆ་བཅུ་གཅིག་གིས་ཡང་དག་པར་བརྒྱན་ལ། ནུ་མ་ཅུང་ཟད་འབུར་བར་བྱ་སྟེ། མཆོད་པའི་རྫས་ཐམས་ཅད་རྡོ་རྗེའི་གླུ་དང༌། གར་དང༌། ཕྱག་རྒྱ་ལ་སོགས་པས་ཡང་དག་པར་མཆོད་པ་དང༌། འདོད་པ་ཡོན་ཏན་ལྔས་སྐུ་ལ་ཡོངས་སུ་མཆོད་པར་བྱའོ། །དེའི་གཟུགས་ཀྱིས་ལྷ་རྣམས་མཉེས་པ་དང༌། འཇིག་རྟེན་པ་རྣམས་དབང་དུ་སྡུད་པར་འབྲེལ་ཏོ། །རེ་མིག་རྣམས་ཀྱི་བར་གང་ཡིན། །མེ་ལྕེའི་ཕྲེང་བས་ཡོངས་སུ་བྲི། །འཁོར་ལོའི་འོག་ཏུ་གནས་བྱ་བ། །ཆོས་འབྱུང་ཕྱག་རྒྱ་ངེས་པར་བྲི། །

---

^{[མ་དཔེ་གཟིགས་ན་འདིར་གནོན།]}

ཞེས་བྱ་བ་ལ། དང་པོར་དཀྱིལ་འཁོར་བྲི་བའི་སྐབས་སུ་ཤེས་པར་བྱ་སྟེ། རེ་མིག་ནི་དཀྱིལ་འཁོར་ལྔ་ལ་བྱ་སྟེ། དེའི་བར་དག་མེའི་འོད་ཀྱིས་བྲི་བར་འབྲེལ་ཏོ། །འཁོར་ལོ་ནི་དཀྱིལ་འཁོར་ལ་ཤེས་པར་བྱ་སྟེ། དེའི་འོག་ཏུ་ཆོས་འབྱུང་གི་ཕྱག་རྒྱ་གྲུ་གསུམ་པ་མཚན་མ་ཀུན་ལ་ཁྱབ་པར་བྲི་བར་བྱ་བར་འབྲེལ་ཏོ། །དེ་ཡང་ཅིའི་ཕྱིར་ཆོས་འབྱུང་གི་ཕྱག་རྒྱ་བྲི་ཞེ་ན། བཅོམ་ལྡན་འདས་ཀྱིས་འདི་སྐད་གསུངས་པའོ། །ཐབས་དང་ཤེས་རབ་ལྡན་པ་དང༌། །ཀུན་འབྱུང་ཡུམ་དུ་ངེས་པར་གསལ། །རྟེན་འབྲེལ་ཡང་དག་འབྱུང་བ་ཡིན། །ཀུན་རྫོབ་ལ་ནི་དོན་དམ་བརྟེན། །དོན་དམ་ཉིད་ལ་ཀུན་རྫོབ་ཡང༌། །བརྟེན་པ་ཉིད་དུ་འགྱུར་བ་ཡིས། །དེ་བས་གནང་བ་མི་གསལ་བར། །ཆོས་འབྱུང་ཕྱག་རྒྱ་ངེས་པར་བྲི། །རྒྱས་པ་ལ་སོགས་མ་ཡིན་གྱི། །དྲག་པོའི་དཀྱིལ་འཁོར་ཡིན་པ་དང༌། །དེ་བཞིན་དབྱིབས་སུ་རབ་གསལ་བས། །དྲན་དང་བཅས་པས་བྲི་བར་བྱ། །ཞེས་བྱ་བ་ལ། ཆོས་ཐམས་ཅད་ཐབས་དང་ཤེས་རབ་ཏུ་འབྲེལ་བར་གནས་པ་དང༌། ཆོས་ཐམས་ཅད་དེ་ལས་འབྱུང་བས་ན། དེ་ཡང་དག་པར་བྲི་བར་འབྲེལ་ཏེ། ཡང་རྟེན་ཅིང་འབྲེལ་བར་འབྱུང་བའི་ཆོས་སུ་དངོས་པོ་ཀུན་གྲུབ་པས་བྲི་བར་བྱའོ། །ཇི་ལྟར་རྟེན་ཅིང་འབྲེལ་ཞེ་ན། །ཀུན་རྫོབ་ལ་ཞེས་པ་གསུངས་ཏེ། ཀུན་རྫོབ་ལ་དོན་དམ་པ་བརྟེན་པ་དང༌། དོན་དམ་པ་ལ་ཀུན་རྫོབ་བརྟེན་པའི་ཕྱིར་ཏེ། ཆོས་འབྱུང་ནི་དོན་དམ་པའི་ཕྱག་རྒྱ་ཡིན་པ་དང༌། དཀྱིལ་འཁོར་ནི་ཀུན་རྫོབ་ཀྱི་ཕྱག་རྒྱ་ཡིན་པར་འབྲེལ་ཏོ། །ཡང་ན་དྲག་པོའི་དཀྱིལ་འཁོར་ཡིན་པར་གསུངས་པས། སྐབས་འདིར་ཡང་དྲག་པོའི་སྐབས་ལ་བབ་པས་ན། དེ་ལ་ཡང་དབྱིབས་མཐུན་པའི་ཕྱིར་སྣང་བ་མི་གསལ་བར་བྲི་བར་བྱའོ། །སྣང་བ་མི་གསལ་བ་ནི་གོང་དུ་བསྟན་པར་ཟད་དོ། །དེ་བས་ན་རྣམ་པ་ཐམས་ཅད་དུ་ཡང་རྣལ་འབྱོར་པས་ཆོས་འབྱུང་བའི་ཕྱག་རྒྱ་མཉམ་པར་གཞག་ཅིང་དྲན་པ་དང་བཅས་པས་བྲི་བར་གསུངས་སོ། །མཐུ་དང་ལྡན་པའི་གང་ཟག་ལ། །སྟོབས་ནི་ཤིན་ཏུ་ངེས་པར་སྐྱེད། །དཀྱིལ་འཁོར་ལྷ་ཉིད་མངོན་བསྒྲུབས་པས། །ལུས་ལ་གཟི་བརྗིད་འཇུག་

---

^{[མ་དཔེ་གཟིགས་ན་འདིར་གནོན།]}

པའོ། །ཞེས་བྱ་བ་ལ། མཐུ་ཞེས་པ་ནི། ཨ་ནུ་བྷ་བའི་སྦྱོར་བས་སྐབས་མང་པོ་ལ་འཇུག་སྟེ། སྐབས་འདིར་ནི་སྔོན་གྱི་ལས་འཕྲོ་དང་ལྡན་པ་ལ་བྱའོ། །དེ་དང་ལྡན་པའི་གང་ཟག་ལ་ནི་ཕྱག་ན་རྡོ་རྗེའི་སྟོབས་སུ་སྐྱེ་བར་འགྱུར་རོ། །དེ་ནས་དཀྱིལ་འཁོར་གྱི་ལྷ་རྣམས་མངོན་པར་བསྒྲུབས་པས་ནི། ལུས་ནི་བདག་གི་ཕུང་པོའི་རྒྱུད་ལ་གཟི་བརྗིད་ཡེ་ཤེས་འཇུག་པར་གསུངས་སོ། །རྡོ་རྗེ་མེ་ལྕེའི་རྒྱུད་ཀྱི་འགྲེལ་པ་དེ་ཁོ་ན་ཉིད་སྣང་བཞེས་བྱ་བ་ལས་ལེའུ་གསུམ་པའི་བཤད་པའོ།། །།

བཞི་པ། མཆོད་པའི་ལེའུའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ལག་ན་རྡོ་རྗེ་ཞེས་བྱ་བ་ནས། ཐབས་དེ་གང་ལགས་གསུང་དུ་གསོལ་ཞེས་པའི་བར་དུ་ནི་གོ་སླའོ། །ནང་གི་བདག་ཉིད་ཅན་དང་ཡང༌། །ཕྱི་ཡི་ཁྲུས་སོགས་རབ་བྱས་ལ། །རབ་གསལ་ལ་སོགས་རྒྱུན་ཆད་ནས། །གང་ཡང་རུང་བའི་ལོ་ཉིད་ལ། །སྟོན་ཟླ་བ་ནས་བརྩམས་ལ། །ལྷ་མིན་ལྷ་དང་མེ་ཏོག་མཛེས། །དྲག་པོའི་དང་པོ་འདི་ཉིད་ལ། །བདག་གིས་ངེས་པར་སྦྱོར་བ་བརྩམ། །ཞེས་བྱ་བ་ལ། དང་པོར་ནང་གི་བདག་ཉིད་ནི་ནང་སྟེ། ཕྱི་རོལ་གྱི་དངོས་པོར་མི་འཛིན་པ་དང༌། བདག་དང་གཞན་དུ་མི་རྟོག་པ་དང༌། སྟོང་པ་དང་མི་སྟོང་པའི་མཐའ་གཉིས་དང་བྲལ་བའོ། །ཕྱིའི་ཆོས་དང་ནང་གི་ཆོས་ཐམས་ཅད་རང་བཞིན་གྱིས་རྣམ་པར་དག་པར་བྱེད་པས་ཁྲུས་མཆོག་ཏུ་གསུངས་སོ། །ཕྱིའི་ཁྲུས་ནི་གོ་སླའོ། །ཁྲུས་རྣམ་པ་གཉིས་བྱས་ནས་རབ་གསལ་ལ་སོགས་ཞེས་སྨོས་ཏེ། ཤེས་རབ་གསལ་བས་ན་རབ་གསལ་ལོ། །དེ་ཡང་ཤེས་པ་ལྔ་དང་རྒྱུན་ཆད་མེད་པ་ནི། རྣམ་པར་བཟའ་བར་མི་བྱ་བ་དང༌། སོགས་པ་ནི་མྱོས་འགྱུར་ཡང་ལོངས་སྤྱད་པར་མི་བྱའོ། །གང་ཡང་རུང་བ་ནི་བྱི་བ་ལ་སོགས་པའི་ལོ་གང་ཡང་རུང་བའོ། །སྟོན་ཟླ་རབ་པ་སྨོས་པ་ནི་སྟོན་ཟླ་ར་བ་ལ་མེ་ཏོག་དང་ལོ་ཏོག་ཀུན་དུ་རྒྱས་པས་དེའི་ཕྱིར། དེ་ནས་བརྩིས་པའི་ལྷ་མ་ཡིན་གྱི་བླ་མ་དོན་ཐམས་ཅད་ཀུན་དུ་འགྲུབ་པ་དང༌། མེ་ཏོག་མཛེས་བཀྲ་ཤིས་བར་གསུངས་པ་དེ་དང༌། དྲག་པོ་བྱ་བ་ནི་འོད་ཟེར་དྲག་པོ་ཕོ་གང་ལ་ཡོད་པ་ལ་དྲག་པོ་ཞེས་སྨོས་པའོ། །དང་པོའི་ཞེས་བྱ་བ་ནི་ཆ་བཞིར་བགོས་པའི་དང་པོའོ། །དེ་གསུམ་ཡོངས་སུ་འཇོམས་པས་ན་བདག་རྣལ་འབྱོར་པས་སྦྱོར་བ་ཡང་དག་པར་བརྩམ་པར་

---

^{[མ་དཔེ་གཟིགས་ན་འདིར་གནོན།]}

བྱ་བར་གསུངས་སོ། །དེ་ནས་བདག་ཉིད་ལུས་ཉིད་ལ། །རྒྱན་ཆ་ལྔ་ཡིས་རབ་བརྒྱན་ཏེ། །ལུས་ལ་གོས་དག་སྔོན་པོ་ཉིད། །བླ་གོས་སྨད་གཡོགས་ཡང་དག་བཅིངས། །སྤྱི་བོ་ལ་སོགས་གནས་ལྔ་རུ། །སྤྲུལ་གྱིས་ཡོངས་སུ་བཅིང་བར་བྱ། །རང་ཉིད་དཀྱིལ་འཁོར་ཤར་སྒོ་རུ། །འདུག་པས་སྦྱོར་བ་བརྩམ་པར་བྱ། །ཞེས་བྱ་བ་ལ། རྣལ་འབྱོར་པའི་ལུས་ལ་དབུ་རྒྱན་ལ་སོགས་པ་ལྔས་བརྒྱན་པར་བྱའོ། །སྟོད་གཡོགས་སྔོན་པོས་ལུས་ལ་བགོ་བར་བྱ་བ་དང༌། སྲོག་སྲོང་བའི་སྤྲུལ་ལམ། ཡང་ན་ཤིང་ཤུན་ལས་གཟུགས་བྱས་པ་སྔ་མའི་རྒྱན་ཆའི་རྩར་བཅིང་བར་སྦྱར་རོ། །བདག་ཉིད་ཤར་གྱི་ཕྱོགས་སུ་འདུག་པས་ལས་བྱ་བར་འབྲེལ་ཏོ། །དེ་ནས་དང་པོར་བླ་རེ་གང༌། །ཞེས་བྱ་བ་ནས། གོས་སར་ཡང་དག་གཙང་བར་བྱ། །ཞེས་བྱ་བའི་བར་དུ་ནི་གོ་སླ་བས་འདིར་མ་བཤད་དོ། །དེ་ནས་སྔགས་པ་བློ་ལྡན་པས། །བདག་ཉིད་བསྲུང་བའི་འཁོར་ལོ་བརྩམ། །རང་གི་ཕྱི་རོལ་མཚམས་རྣམས་སུ། །མི་འགྱུར་བས་ནི་བསིལ་ལྡན་བསྒོམ། །དེ་སྟེང་སྡུད་པའི་དངོས་པོ་གང༌། །ཁ་དོག་ནག་པོ་ཡང་དག་བསམ། །དེ་ལས་ཁྱབ་བྱེད་རིགས་ལྔ་བ། །ཡང་དག་པར་ནི་བསམ་པར་བྱ། །དེ་དག་ཡོངས་སུ་རྫོགས་བྱས་པས། །བདུད་རྩི་འཁྱིལ་བར་བདག་བསམས་ཏེ། །རྡོ་རྗེ་སྡིགས་མཛུབ་ཕྱག་རྒྱ་ཡིས། །སྔགས་བཟླས་པ་ཡིས་བགེགས་བསྐྲད་བྱ། །རིགས་གཙོའི་རྩེ་མོ་དེ་ཉིད་ལ། ཀཾ་ལས་ལུས་སྐྱོབ་བསམ་བྱས་ཏེ། །སྤྱི་བོར་གནས་པར་ཁྱབ་པར་བསམ། །ཞེས་བྱ་བ་ལ། སྐབས་འདིར་དང་པོར་འཇུག་པའི་ལས་ལ། བདག་ཉིད་ལ་བསྲུང་བའི་འཁོར་ལོ་བྱ་བར་གསུངས་ཏེ། དེའི་དང་པོར་བླ་མའི་མནན་ངག་ལས་ཡང་དག་པར་ཤེས་པར་བྱ་བ་ནི། །རྒྱུད་ལས་འབྱུང་བས་བདག་གིས་དོན་གསལ་བར་བརྗོད་པ་ནི་འགལ་བ་ཡོད་པའི་ཕྱིར་ཏེ། མི་གོ་བ་ཡིན་བའོ། །དེ་ནས་ཞེས་པ་ནི་ཚིག་གི་ལྷག་མ་ལུས་པ་དང༌། གཞན་ཉེ་བར་སྟོན་པའི་ཚིག་སྟེ། སྔགས་པ་ཤེས་རབ་ཅན་གྱིས་བསྲུང་བའི་འཁོར་ལོ་བྱ་བར་སྟོན་པའོ། །རང་གི་ཕྱི་རོལ་ནི་རང་གི་རྒྱུད་ལས་མ་གཏོགས་པའི་ཕྱི་རོལ་ལོ། །མཚམས་ནི་རྒྱུད་ལས་མ་གཏོགས་པ་དང༌། ཕྱི་

---

^{[མ་དཔེ་གཟིགས་ན་འདིར་གནོན།]}

རོལ་གྱི་དངོས་པོའི་མཚམས་སུ་མི་འགྱུར་བ་ནི་ཡི་གེ་དང་པོའོ། །བསིལ་ལྡན་ནི་འོད་ཟེར་ཁ་དོག་དཀར་པོ་དང་ལྡན་པའོ། །དེའི་སྟེང་ནི་བསིལ་ལྡན་གྱི་སྟེང་དུ། སྡུད་པའི་དངོས་པོ་ནི། ཐུགས་ཀྱི་ཡི་ག་ལ་ཁ་དོག་ནག་པོར་བསམ་པར་བྱ་བར་འབྲེལ་ཏོ། །དེ་ལས་ནི་སྡུད་པའི་དངོས་པོ་ལ་སྟེ། ཁྱབ་བྱེད་ནི་ཀུན་དུ་ཁྱབ་པར་བྱེད་པ་དང༌། མི་འཇིགས་པའི་གནས་པ་ལ་བྱ་སྟེ། དངོས་པོ་དེ་རིགས་ལྔས་པའི་འཁོར་ལོའི་རིགས་ལ་སོགས་པ་དང་ལྡན་པའོ། །དེ་ཡང་དག་པར་བསྒོམ་པར་འབྲེལ་ཏོ། །དེ་དག་ཡོངས་སུ་རྫོགས་པ་ནི། །གོང་དུ་སྨོས་པའི་ཆོ་ག་རྣམ་པ་གསུམ་པའོ། །དེ་གསུམ་རྫོགས་པ་ལས་བདག་ཉིད་ཁྲོ་བོ་བདུད་རྩི་ཐབས་སྦྱོར་དུ་ཡང་དག་པར་བསམ་པར་བྱ་སྟེ། སྐུ་མདོག་ལྗང་གུ་ཕྱག་གཉིས་པ་ལ་ཐལ་མོ་ཕན་ཚུན་དུ་བསྣོལ་བ་ནི། དམ་ཚིག་གི་ཕྱག་རྒྱ་བཅས་ལ། དེ་ནས་ལས་ཀྱི་ཕྱག་རྒྱ་ནི། །གཡོན་པ་དཀུར་བརྟེན་ཏེ་གཡས་པ་ནི། རྡོ་རྗེ་བཅིང་བའི་ཕྱག་གིས་སྡིགས་མཛུབ་ཏུ་བྱས་ལ། སྔགས་འདིས་བགེགས་བསྐྲད་པར་བྱའོ། །ཨོཾ་བིགྷྣཱཾ་ཀྲོ་དྷ་ཡ་ཧཱུཾ་ཕཊ། རིགས་གཙོའི་རྩེ་མོ་ནི་གོང་མའི་རིགས་ལྔ་ལས་མ་གཏོགས་པའི་ནང་གི་རྒྱུད་ཀྱི་རིགས་ལྔ་པ་དང་པོའི་རྩེ་མོ་ལ་ཡི་གེ་ཀཾ་དཀར་པོ་ལས་ལུས་སྐྱོབ་པར་བྱེད་པ་ཡོངས་སུ་བསམ་པར་བྱས་ལ། སྤྱི་བོ་ནས་རྩེ་མོ་ཡང་དག་པར་བཙུགས་ཏེ། ཨོཾ་བཛྲ་ཀ་པ་ཙ་ཧཱུཾ་ཕཊ་སྭཱཧཱ། ཞེས་པའི་སྔགས་ཀྱིས་ལུས་ཐམས་ཅད་ལ་ཁྱབ་པར་བསམ་མོ། །དེ་ཡང་འོད་ཟེར་གདུག་པ་དང་བཅས་པ་འབར་བར་བསམ་པར་འབྲེལ་ཏོ། །འདིས་ནི་སའི་ཆོ་ག་དང་ཐིག་གི་ཆོ་ག་གཉིས་ཡོངས་སུ་རྒྱས་པར་སྟོན་པའི་སྐབས་ཏེ། དེ་ནས་གཏོར་མ་ཞེས་བྱ་བ་ནས། ཕྱོགས་བཞི་མཚམས་སུ་ངེས་པར་གདབ། །ཅེས་པའི་བར་དུ་གོ་སླ་བས་འདིར་མ་བཤད་དོ། །ཁ་ནས་ཧཱུཾ་གི་སྒྲ་འབར་ཞིང༌། སྣ་ཚོགས་རྡོ་རྗེའི་གར་ཐབས་ཀྱིས། །ལན་གསུམ་བར་དུ་བསྐོར་བ་བྱ། །དེ་ནས་གདུག་པ་གང་ཡིན་པས། །ཕྱོགས་བཞི་དག་ཏུ་སོང་བ་ལ། །ས་ཕྱོགས་ངེས་པར་གཙང་བར་འགྱུར། །ཞེས་བྱ་བ་ལས། ཁ་ནས་ཧཱུཾ་ཧཱུཾ་ཧཱུཾ་ཞེས་པའི་སྒྲ་དྲག་པོ་དག་ཕྱུང་བས་གདུག་པ་རྣམས་ཀྱི་ཁ་

---

^{[མ་དཔེ་གཟིགས་ན་འདིར་གནོན།]}

ནས་མེ་འབར་བ་མཐོང་བའོ། །སྣ་ཚོགས་རྡོ་རྗེ་གར་ཐབས་ནི། །ལག་པ་གཡས་པར་བེ་ཅོན་སྔོན་པོ་བཟུང་ནས། གཡོན་པ་རྡོ་རྗེ་ཐོགས་པས་སྙིང་གར་བཟུང་ལ། རྐང་པ་གཡོན་པ་ལྟེ་བར་གནས་ཏེ། གཡས་པ་ཕྱོགས་བཞི་རུ་རྡོ་རྗེ་རྩེ་གསུམ་པའི་གོམ་པ་འདོར་བ་དང༌། དེ་དང་མཐུན་པར་བེ་ཅོན་གྱིས་ཐབས་དང༌། ཤེས་རབ་ལ་བསྐོར་བས་ས་ལ་གདབ་པར་བྱའོ། །དེ་ནས་གོམ་པ་གཅིག་གིས་བར་དུ་གསལ་བར་འབྲེལ་ཏོ། །དེ་ལྟར་ཡན་ལག་གསུམ་གྱི་བར་དུ་བསྐོར་བས། གདུག་པ་རྣམས་ཕྱོགས་གཞན་དུ་བྱེར་ཏེ། །ས་ཕྱོགས་དེ་གདུག་པས་གཙང་བར་གྱུར་པར་འབྲེལ་ཏོ། །དེ་ནས་ཐིག་སོགས་བཏབ་པ་ཡིས། །ཞེས་པ་ནས། ཤེས་རབ་ཐབས་ཀྱིས་གསལ་བར་བརྟགས། །ཞེས་པའི་བར་དུ་ནི། །སྟ་གོན་གྱི་ཆོ་ག་རྒྱས་པར་བསྟན་པར་རིགས་པ་ནི་རྒྱུད་གཞན་དང་མཐུན་པར་འབྲེལ་ཏོ། སངས་རྒྱས་དཀྱིལ་འཁོར་བཞེངས་བྱའི་ཕྱིར། །བདག་གིས་དྲག་པོ་དང་པོ་ལ། །ཕྱེ་མ་ལྔ་དང་སྔགས་དག་དང༌། །ཕྱག་རྒྱ་བཅས་པས་བྱིན་གྱིས་བརླབ། །ཅེས་བྱ་བ་ལ། བདག་རྣལ་འབྱོར་པས་འོད་ཟེར་དྲག་པོ་དང་བཅས་པའི་དང་པོའི་ཉི་མ་ཤར་པའོ། །ཕྱེ་མ་ནི་རབ་འབྲིང་ཐ་མ་གསུམ་གྱིས་ཕྱེ་མའོ། །དེ་ལ་སྔགས་ནི་འདི་དག་གོ །དཀར་པོ་ལ་སོགས་པ་ཐམས་ཅད་ལ། རིམ་པ་བཞིན་དུ་རིན་པོ་ཆེ་འབར་བའི་ཕྱག་རྒྱ་བཅས་ལ། ཨོཾ་སྭ་སྟི་མུཀྟི་བྷ་བ་ཏི་ཧཱུཾ། ཨོཾ་པི་ཏ་ཨུ་དྷ་ར་བྷ་ར་ན་བྷ་བ་ཏི་ཧཱུཾ། ཨོཾ་རཀྟོ་བོ་བ་ལ་བྷ་བ་ཏི་ཧཱུཾ། ཨོཾ་ཧ་རི་ཏ་མ་ར་ཀ་ཏ་བྷ་བ་ཏི་ཧཱུཾ། ཨོཾ་ཀྲྀཥྞ་ཀཾ་ཀ་ནི་བྷ་བ་ཏི་ཧཱུཾ། ཞེས་བྱིན་གྱིས་བརླབ་པ་ནི་རིམ་པ་ཇི་ལྟ་བ་བཞིན་དུ། མུ་ཏིག་དང༌། གསེར་དང༌། བྱི་རུ་དང༌། སློག་བཙོང་དང༌། མུ་མེན་དུ་བརླབ་པར་སྦྱར་རོ། །དེ་ནས་སྣོད་དག་ཐོད་པ་ལ། །བྱས་པས་རྡོ་རྗེའི་ཕྱག་རྒྱ་རབ། །དེས་པས་ལས་ཀྱི་སྦྱོར་བ་བརྩམ། །ཕྱོགས་སུ་ལེགས་པར་བསྐོར་བ་ཡིས། །དབུགས་རྒྱུ་བ་ཡི་དངོས་པོ་གང༌། །ཡི་གེ་མངོན་པར་གསལ་བ་ཡིས། །རྒྱུན་མི་འཆད་པར་བྲི་བར་བྱ། །ཞེས་བྱ་བ་ལ། སྣོད་ནི་ཐོད་པའི་དུམ་བུ་ལས་བྱས་པས་ཕྱེ་མ་དེར་བླུགས་པར་བྱ་བར་འབྲེལ་ཏོ།།

---

^{[མ་དཔེ་གཟིགས་ན་འདིར་གནོན།]}

རྡོ་རྗེ་ཕྱག་རྒྱ་ནི་རྡོ་རྗེ་རྩེ་གཅིག་པའི་ཕྱག་རྒྱ་དང༌། གུང་མོ་མཐེ་བོང་སྦྱར་བའི་བར་ནས་ཚོན་རྩི་དགྱེ་བར་བྱ་སྟེ། མཛུབ་མོ་བརྐྱང་པའོ། །དེ་ཡིས་རབ་ཏུ་གསུངས་པས་སྦྱོར་བ་ནི་བྲི་བར་བྱའོ། །ཕྱོགས་སུ་ལེགས་པར་བསྐོར་བ་ཡིས། །ཞེས་པ་ནི། ཕྱོགས་སུ་གཡས་ཕྱོགས་སུ་མ་འཁྲུལ་བར་བྲི་བར་འབྲེལ་ཏོ། །དབུགས་རྒྱུ་བའི་དངོས་པོ་ནི་བླ་མའི་མན་ངག་གིས་ཤེས་པར་བྱ་སྟེ། སྡུད་པའི་དངོས་པོའོ། །དེའི་ཡི་གེ་མངོན་པར་གསལ་བ་ནི་མངོན་པ་ནི་ས་ལ་ཕྲེང་བར་འབྱུང་བའོ། །གསལ་བ་ནི་སྒྲ་དག་པར་བརྗོད་པ་ཉིད་དོ། །དབུགས་རྒྱུན་མི་འཆད་པར་བྲི་བར་འབྲེལ་ཏོ། །སྐབས་ཀྱི་སྐད་ཅིག་ཤེས་པ་ལས། །བར་དུ་ཁྲོ་གཉེར་བསྟན་པར་བྱ། །དང་པོ་ནག་པོ་བྲི་བྱ་ཞིང༌། །གཉིས་པ་དཀར་པོ་ངེས་པར་དགྱེ། །གསུམ་པ་ཉིད་ལ་སེར་པོ་སྟེ། །བཞི་པ་དམར་པོ་ཡང་དག་ལྡན། །ལྔ་པ་ལྗང་གུ་བྲི་བྱ་ཞིང༌། །དྲུག་པ་ཁ་དོག་སྣ་ཚོགས་རྒྱས། །ཞེས་བྱ་བ་ལ། སྐབས་ནི་ཕྱོགས་དང་མཚམས་སུ་བབ་པ་ལའོ། །ཕྱོགས་གང་ཡང་རུང་བ་དང་མཚམས་སུ་བབ་ན་ཧཱུཾ་ཕཊ་ཅེས་པའི་སྔགས་བཏོན་ལ། ཁྲོ་གཉེར་སྟོན་པར་འབྲེལ་ཏོ། །ལྷག་མ་ནི་གོ་སླའོ། །དྲུག་པ་ཁ་དོག་སྣ་ཚོགས་རྒྱས། །ཞེས་བྱ་བ་ནི། ཁ་དོག་སྣ་ཚོགས་ཕན་ཚུན་དུ་བསྲེས་ནས་དམར་སྐྱ་ལ་སོགས་པར་སྦྱར་བ་ལ་བྱའོ། །དཀྱིལ་འཁོར་ལས་ཉིད་རྫོགས་པ་དང༌། །རྫས་སུ་ཡང་དག་ལྡན་བྱས་ཏེ། །གྲུ་བཞི་དག་ཏུ་བྱང་ཤར་གྱི། །མཚམས་ནི་ས་གང་བུ་མོ་ཡིས། །བླངས་པ་ལས་བྱས་མཆོད་རྟེན་ནི།། སྔོན་པོ་བཞི་དག་ཡོངས་སུ་གཞག །དེ་ཡི་འཁོར་ལོའི་རྩེ་མོ་ལ། །གོང་གི་སྲད་དུ་གདགས་བྱ་སྟེ། །མེ་ཏོག་སྔོན་པོའི་ཕྲེང་བ་ཡིས། །འཁོར་བར་ཡོངས་སུ་བརྒྱན་པར་བྱ། །བུམ་པ་སྔོན་པོ་བཅུ་བདུན་ཉིད། །མཐའ་ཡི་ཕྱོགས་སུ་ངེས་པར་གཞག །ཅེས་བྱ་བ་ལ། དཀྱིལ་འཁོར་བྲི་བ་རྫོགས་པ་དང༌། །འདི་ནས་མར་མཆོད་པའི་རྫས་བཤམ་པ་གསུངས་ཏེ། དཀྱིལ་འཁོར་གྱི་ཟུར་བཞི་དག་ཏུ། བྱང་ཤར་མཚམས་ནས་བུ་མོས་ས་སྔོན་པོ་བླངས་པ་ལ། སྐུ་གདུང་རྒྱར་སོར་བཅུ་གཉིས་པ་ལས། དཔང་དུ་སོར་ཉི་ཤུ་རྩ་བཞི་པ་བྱས་ལ།

---

^{[མ་དཔེ་གཟིགས་ན་འདིར་གནོན།]}

དེའི་འཁོར་ལོའི་རྩེ་མོ་ལ་ཚོན་སྐུད་སྣ་ལྔས་བརྒྱན་པ་སྟེ། མེ་ཏོག་གིས་ཡོངས་སུ་བྲེ་བར་འབྲེལ་ཏོ། །བུམ་པ་སྔོན་པོས་བསྐུས་པའི་ལྷའི་གྲངས་སུ་སྦྱར་བས། དཀྱིལ་དུ་གཅིག་དང་ཕྱོགས་མཉམ་པར་བཀོད་པའོ། །སྨན་དང་སྤོས་དང་ཞེས་པ་ནས། །ལུས་ལ་མངོན་པར་ཕྱོགས་པས་གཞག །ཅེས་པའི་བར་དུ་གོ་སླའོ། །དེ་ནས་སྔགས་པ་བློ་ལྡན་པས། ཞེས་པ་ནས། ཕྱི་མ་རྣམས་ཀྱིས་སྣང་མི་བྱ། །ཞེས་པའི་བར་དུ་ནི། བཅུ་བདུན་བཅུ་བདུན་དུ་རྫས་ཀུན་ལ་ཤེས་པར་བྱའོ། །དེ་ལ་གདུགས་དང་རྒྱལ་མཚན་དང༌། བ་དན་ནི་བུམ་པ་ལ་གཟུགས་པར་བྱའོ། །ཕྲེང་བ་ནི་བེ་ཅོན་ལ་གདགས་པར་བྱ་བ་དང༌། ཚངས་པའི་སྐུད་པ་ནི་རལ་གྲིའི་རྩེ་མོ་ལ་གདགས་པར་བྱའོ། །བདག་པོ་ནི་ལག་ན་རྡོ་རྗེ་དངོས་ཏེ། དེའི་ན་བཟའ་དར་རམ་རས་ས་མ་སྣམ་བུ་ལ་གུར་གུམ་གྱི་ཐིག་ལེ་ཡོངས་སུ་བྲིས་ལ་དབུལ་བར་བྱའོ། །ཡོལ་བ་སྔོན་པོས་དཀྱིལ་འཁོར་བསྐོར་བར་བྱ་བ་དང༌། བླ་རེས་སྟེང་ནས་ཕུབ་ནས་གཞན་ལ་སྣང་བར་མི་བྱ་བར་འབྲེལ་ཏོ། །གལ་ཏེ་སྣང་བར་གྱུར་པ་ན། རང་གི་ལུས་ནི་མ་གཏོགས་པའི། །གཞན་རྣམས་བརླག་པར་འགྱུར་བ་ཡིན། །དེ་བས་ལེགས་པར་བསྒྲིབས་པ་ཡིས། །ཕྱི་རོལ་གཞན་ལ་བསྟན་མི་བྱ། །ཞེས་བྱ་བ་ལ། གལ་ཏེ་གཞན་རྣམས་ཀྱིས་མཐོང་བར་འགྱུར་བ་ན། རང་གི་ལུས་ནི་ལག་ན་རྡོ་རྗེ་གོས་སྔོན་པོ་ཅན་གྱི་རིམ་པ་དང་དབང་ལེགས་པར་ཐོབ་པ་ལ་བྱ་སྟེ། དེ་མ་ཡིན་པ་རྣམས་བརླག་པར་འགྱུར་བ་ནི། དམ་ཚིག་ལས་འདས་པས་ནད་དང་གདུག་པས་འཚེ་བར་བྱེད་དོ། །དེ་བས་ན་བདག་རྣལ་འབྱོར་པས་ལེགས་པར་བསྒྲིབས་པས་ཅི་ནས་ཀྱང་ཕྱི་རོལ་གཞན་ལ་བསྟན་པར་མི་བྱ་བར་སྦྱར་རོ། །གང་ཟག་གཅིག་པུ་གནས་པ་ཡིས། །ལས་ཀྱི་སྦྱོར་བ་འདི་བརྩམ་བྱ། །ཞེས་པ་ལ། མི་མང་པོ་རྣམས་ཡོངས་སུ་མི་བསྙེན་པར་བདག་ཉིད་གཅིག་པུས་འོག་ནས་འབྱུང་བའི་ལས་རྣམས་སྤྱད་པར་གསུངས་སོ། །ཕྱག་དག་སྔོན་དུ་འགྲོ་བ་ཡིས། །མཆོད་པའི་ལས་ལ་མཉམ་པར་གཞག །བདག་ཉིད་ལས་ཀྱི་ཕྱག་རྒྱས་གནས། །བསམ་པ་སྔོན་དུ་གྱུར་པ་ཡིས། །ཀུན་གྱི་འབྲས་བུ་གང་

---

^{[མ་དཔེ་གཟིགས་ན་འདིར་གནོན།]}

ཡིན་པ། །བདག་གིས་གསལ་བ་རབ་ཏུ་བརྟག །སྔགས་དང་ཕྱག་རྒྱ་རབ་ལྡན་པའོ། །མཆོད་པ་འདི་དག་ངེས་པ་ལས། །བགེགས་བསལ་ཡེ་ཤེས་རབ་དབབ་པའི། །རྣལ་འབྱོར་རྫོགས་པས་ཡང་དག་གནས། །རང་རང་རིགས་ཀྱི་ཕྱག་རྒྱ་ཡིས། །སྔགས་བཟླས་པ་ཡིས་དབུལ་བར་བྱ། །ཞེས་བྱ་བ་ལ། འདི་ནས་མར་མཆོད་པའི་རིམ་པར་གསུངས་ཏེ། དང་པོར་བླ་མའི་མན་ངག་གིས་སྤྱན་དྲང་བར་བྱ་བ་དང༌། ཚིག་གིས་ཀྱང་འདི་ལྟར་སྤྱན་དྲང་བར་བྱའོ། །ཨོཾ་བདེ་གཤེགས་གཙོ་བོ་ཀུན་ཁྱབ་དང༌། །ལྷ་རྣམས་ཕྱོགས་སུ་འཁོར་བ་རྣམས། །བདག་དང་སེམས་ཅན་རྒྱུད་སྦྱངས་ཕྱིར། །སྐད་ཅིག་ཙམ་གྱིས་གཤེགས་སུ་གསོལ། །ཞེས་བརྗོད་ལ་སྤྱན་དྲང་པར་བྱའོ། །དེ་ནས་བཞུགས་སུ་གསོལ་བ་ལ་སོགས་པ་ཡོངས་སུ་རྫོགས་པར་བྱས་ལ། དེ་ནས་ཕྱག་འཚལ་བ་དང༌། མཆོད་པའི་ལས་ལ་མཉམ་པར་གཞག་པ་ནི་ཡང་དག་པར་སྤྱད་པར་བྱ་སྟེ། བདག་ཉིད་ལས་ཀྱི་ཕྱག་རྒྱ་ནི། །དངོས་པོ་མ་བསྒྱུར་པར་དམ་ཚིག་སེམས་དཔའི་ངོ་པོས་གནས་པ་ལ་བྱའོ། །བསམ་པ་སྔོན་དུ་གྱུར་པའི་གང་ཟག་རྣལ་འབྱོར་པས་དམིགས་པར་བྱ་སྟེ། ཀུན་གྱི་འབྲས་བུ་ནི་སྟོང་པ་ཉིད་ལ་བདག་གིས་གསལ་བར་སྐད་ཅིག་ཡུན་རིང་བར་རབ་ཏུ་བརྟག་པར་འབྲེལ་ཏོ། །སྔགས་དང་ཕྱག་རྒྱ་ནི་འདི་ལྟར་སྦྱར་ཏེ། སྔགས་ནི་འོག་ནས་སྟོན་ཏོ། །ཕྱག་རྒྱ་ནི་དང་པོར་གར་གྱིས་སྐུ་གསུང་ཐུགས་སུ་ངེས་པར་སྦྱར་ནས། བསམ་པས་ཀྱང་མཆོད་པའི་སྤྲིན་རྒྱས་པར་སྤྲོས་ལ། པདྨ་ཁ་འབུས་ལྟར་བྱས་ལ། སྤྱི་བོའི་སྟེང་དུ་གནས་པ་དང༌། གཡས་གཡོན་གྱི་མཐེབ་སྲིན་ངེས་པར་སྦྱར་ལ་འདུད་དེ། གཞན་རྣམས་བཀུག་པས་གཡོན་པའི་མཛུབ་མོ་བསྒྲེང་ནས་སྣའི་ཐད་ཀར་གནས་པ་དང༌། གཡས་གཡོན་གུང་མཐེབ་སྦྱར་ནས་སྣ་སྤྲད་དེ། མཛུབ་མོ་གཉིས་ཀྱིས་ཀྱང་བསྒྲེང་བས་སྣ་སྤྲད་པར་བྱས་ནས། གཞན་རྣམས་ཡོངས་སུ་བརྐྱང་ནས་མིག་གི་ཐད་ཀར་གནས་པ་དང༌། མཐེབ་སྲིན་གཉིས་སྦྱར་བས་སྟེང་དུ་བསྟན་ཏེ། སྙིང་གར་གནས་པ་དང༌། ལག་པ་གཉིས་ཀྱིས་ཐི་པ་ལྟར་སྦྱར་ནས། སྣ་སྒོའི་ཐད་ཀར་གནས་པ་དང༌། ལག་

---

^{[མ་དཔེ་གཟིགས་ན་འདིར་གནོན།]}

བ་གཉིས་བསྐོར་ཏེ། མཐེ་བོང་གཉིས་ཅུང་ཟད་བསྣོལ་ཏེ། གུང་མོ་གཉིས་ཅུང་ཟད་བརྐྱང་བས་ཁ་སྦྱོར་དུ་གནས་ཏེ། རྣ་བ་གཡས་པའི་ཐད་ཀར་གནས་ཏེ། གཟུང་བ་དང༌། གར་གྱི་ཕྱག་རྒྱ་དངོས་དང༌། ཕྲེང་བ་འཛིན་པའི་ཚུལ་དང༌། འཁྱུད་པའི་ཕྱག་རྒྱ་དང༌། སྣ་ཚོགས་པའི་ཕྱག་རྒྱ་ཡང་དག་པར་བཅས་ལ་དབུལ་བར་སྦྱར་རོ། །དེའི་དད་པོར་བགེགས་ནི་དྲི་ཚུལ་སྔགས་ཀྱིས་བཏབ་ལ་བསྐྲད་བ་དང༌། ཡེ་ཤེས་དབབ་པས་ཡོངས་སུ་གཟུང་བའོ། །དེ་ཡི་སྔགས་དང་མཆོད་པ་དང༌། སྡིག་པ་བཤགས་པའི་ཕྱག་རྒྱ་ཡིས། །ཡང་དག་པར་ནི་བཤགས་པ་ནི། །ཕྱག་རྒྱ་གསུམ་ལས་ཤེས་པར་བྱའོ། །སྔགས་ནི་པ་པ་དྷེ་ས་ན་ལ་སོགས་པའི་སྔགས་ཀྱིས་ཡང་དག་པར་ཤེས་པའོ། །སྡིག་བཤགས་པ་ནི་སྨྲེ་སྔགས་ཞེས་བྱ་ནས། །གནས་བཞིའི་བར་དུ་ནི་གོ་སླ་བས་མ་བཤད་དོ། །གོང་དུ་བསྟན་པའི་ཕྱག་རྒྱ་ནི། སྐབས་འདི་དག་ཏུ་བསམ་པར་བྱ། །དང་པོ་རྒྱུད་ལས་སྐྱེས་པ་ལས། །ཕྱི་ནས་རིང་པོ་མི་གནས་ཤིང༌། །རང་བཞིན་དུ་ནི་འོད་གསལ་བསྒོམ། །ཞེས་བྱ་བ་ལ། ཡན་ལག་བདུན་རྣམ་པར་དག་པར་བསྒོམ་པ་དང༌། སྤྱད་པ་ལས་དང་གོང་དུ་བསྟན་པ་ནི། སྟོང་པ་ཉིད་སྐབས་འདིར་བསྒོམ་པར་གསུངས་སོ། །དང་པོ་རྒྱུ་ལས་སྐྱེས་ཞེས་བྱ་བའི་ཚིག་འདི་ནི་སྐབས་གཉིས་སུ་ཤེས་པར་བྱ་སྟེ། གཅིག་ནི་བདུན་རྣམ་པར་དག་པ་དང༌། སེམས་ཙམ་དུ་དམིགས་པའི་རྒྱུ་ལས་སྐྱེས་པ་ལས། ཕྱི་ནས་སྟོང་པ་ཉིད་སྔ་མའི་དངོས་པོར་མི་གནས་པར་རང་བཞིན་དུ་འོད་གསལ་བར་བསྒོམ་པའོ། །གཅིག་ནི་དཀྱིལ་འཁོར་གྱི་རྒྱུ་ཡི་རྒྱུ། །དེ་ལས་སྐྱེས་པ་ནི་སྒྲའི་སྦྱོར་བས་བསྡུས་པ་ལ་འཇུག་པས། རྒྱུའི་འབྲས་བུ་སྟོང་པ་ཉིད་ཀྱིས་གཤེགས་སུ་གསོལ་བར་འབྲེལ་ཏོ། །རྡོ་རྗེ་མེ་ལྕེའི་རྒྱུད་ཀྱི་འགྲེལ་པ་དེ་ཁོ་ན་ཉིད་སྣང་བ་ལས་ལེའུ་བཞི་པའི་བཤད་པའོ།། །།

ལྔ་པ། ནང་དང་སྔགས་ཀྱི་ལེའུའི་བཤད་པ།

---

^{[མ་དཔེ་གཟིགས་ན་འདིར་གནོན།]}

དེ་ནས་ཕྱག་ན་རྡོ་རྗེ་ཡིས། །གསང་བའི་མགོན་ལ་འདི་སྐད་གསོལ། །བསམ་པ་རབ་ཏུ་རྫོགས་པ་ཡིས། །ནང་གི་རྣལ་འབྱོར་གསུང་དུ་གསོལ། །ཞེས་བྱ་བ་ལ། ལག་ན་རྡོ་རྗེ་གསང་བའི་མགོན་ནི་གསང་བ་རྣམ་པ་གསུམ་གྱི་བདག་པོར་གྱུར་པ་སྟེ། དེ་མགོན་དུ་ཇི་ལྟར་འོང་ཞེ་ན། གསང་བ་དང་ལྡན་པ་

---

^{[མ་དཔེ་གཟིགས་ན་འདིར་གནོན།]}

ལ་གསང་བའི་མགོན་ནོ། །དཔེར་ན་རལ་གྲིའི་འཁོར་ལོ་མཁས་པའི་མི་ལ། རལ་གྲིའི་མགོན་པོ་ཞེས་ཟེར་བ་དང་འདྲ་བར། སྐབས་འདིར་ཡང་གསང་བའི་དོན་རྒྱས་པར་སྟོན་པའི་སྐབས་སུ་བབ་པ་དང༌། དེ་དང་ལྡན་པས་གསང་བའི་མགོན་ནོ། །དེ་ལ་བསམ་པ་རབ་ཏུ་རྫོགས་པ་ནི། དཔེར་ན་ཡིད་བཞིན་གྱི་ནོར་བུ་རིན་པོ་ཆེ་དང་འདྲ་བར། འདིས་ཀྱང་འཇིག་རྟེན་དང་འཇིག་རྟེན་ལས་འདས་པའི་དགོས་པ་ཐམས་ཅད་འགྲུབ་པའི་ཐབས་ནང་གི་རྣལ་འབྱོར་གསུང་བར་ཞུ་བར་འབྲེལ་ཏོ། །བདེ་གཤེགས་གསང་བས་བཀའ་སྩལ་པ། །གང་གིས་བསྒྲུབ་པར་བྱ་བ་ལ། །ཐབས་ཀྱིས་དངོས་གྲུབ་ཐོབ་པར་འགྱུར། །ཞེས་བྱ་བ་ལ། བདེ་བར་གཤེགས་པ་ཡང་དག་པའི་དོན་གསང་བ་དང་ལྡན་པས། བདེ་བར་གཤེགས་པ་གསང་བའོ། །དེ་ཡིས་ཡོངས་སུ་གསུང་བ་ནི་འོག་མ་རྣམས་སོ། །གང་གིས་ཞེས་པ་ནི་གང་གིས་བསྒྲུབ་པར་བྱ་བ་ལ། ཐབས་ཁྱད་པར་ཅན་གྱིས་དངོས་གྲུབ་བསྒྲུབ་པའོ། །ཐོབ་བ་ནི་མྱུར་བའི་སྒྲ་དང་ལྡན་པའོ། །དང་པོར་ཤེས་རབ་ཅན་དག་གིས། །བདག་གིས་དངོས་པོར་སྣང་པ་ལས། །དེ་ཉིད་སྣང་ལ་མཆོག་ཉིད་ལས། །འོད་ཟེར་བསིལ་ལྡན་ཡང་དག་བསམ། །ཞེས་བྱ་བ་ལ། དང་པོར་ཤེས་རབ་ཅན་རིགས་དང་ལྡན་པ་ལས། བདག་གིས་དངོས་པོར་སྣང་བ་ནི་བདག་ཏུ་སྣང་བའོ། །དེ་ཉིད་ནི་སྒྲའི་སྦྱོར་བས་བདུན་པ་ལ་སོགས་པའི་སྒྲ་ལ་མངོན་པར་ཞེན་པ་ཡིན་ཏེ། རྫིང་བུ་ལ་འཇུག་པའོ། །རྫིང་བུའི་ནང་ན་འོད་ཟེར་བསིལ་ལྡན་ནི་ཆུ་ཤེལ་བསམ་པའོ། །འདི་ནས་མར་ནི་ཕྲན་ཚེགས་སུ་བྱ་སྟེ། དེ་ལས་གོང་ནི་ཆུ་ཤེལ་ལས་གོང་དུ་སྟེ། དབུགས་རྒྱུ་བ་ནི་ཁ་སྦྱོར་སྤུ་གུ་ཅན་ནོ། །དེ་བསམས་ལ་དེ་ལས་གསལ་ལྡན་ནི་མེ་ལོང་སྟོང་སྟེ། མེ་ལོང་ལ་རྡོ་རྗེ་ལ་སོགས་པའི་ཕྲེང་བ་ལྔ་དང་ལྡན་པའོ། །དེ་སྟོང་པ་དཔེ་ནི་རྣམ་པར་རྟོག་པ་དང་བྲལ་བའི་རིལ་སོང་བས་གཟུགས་བང་མ་དང༌། སྟོང་འཇོམས་མ་ལ་སོགས་པའི་རིག་མ་ལྡས་ཏེ་ལ་ལེན་པའོ། །མི་འཆི་བ་ནི་དབུགས་ཏེ། དུས་འགྱུར་ནི་དུས་ཀྱི་སྐད་ཅིག་འགྱུར་བའོ། །དེ་ཡིས་འཛིན་པ་ཅན་ལ་བྱིན་པར་བསམས་པ་སྟེ། འཛིན་པ་ཅན་ནི་བརྐམ་པའོ། །དེ་ནས་སྔགས་འོག་མ་འདིས་རབ་ཏུ་གནས་པར་བྱས་ནས། བདག་ཉིད་

---

^{[མ་དཔེ་གཟིགས་ན་འདིར་གནོན།]}

རིགས་སུ་ལྡན་པ་ནི་ལྕགས་ཏེ། ཐོ་བས་བདག་པོ་ཡིན་པའི་ཕྱིར་རོ། །ཕྱག་རྒྱ་ནི་རྗེས་སམ་རྟགས་གསལ་བར་སྦྱར་རོ། །སྔགས་ནི་ཨོཾ་ཨ་བྷི་ཥིཉྩ་ཞེས་པ་ནས་སྟུ་སྟི་མ་ཧཱུཾ་ཞེས་པའི་བར་དུའོ། །བདག་ཉིད་དངོས་པོ་ལ་བརྟེན་ནས། །མཚན་མར་མི་གསལ་མ་སྐྱེས་པའི། །གདོད་ནས་གྲུབ་པར་བསམ་བྱ་སྟེ། །སངས་རྒྱས་དངོས་ལ་རབ་སྦྱོར་བས། །དང་པོར་དངོས་དག་བསམ་བྱ་སྟེ། །བདག་ཉིད་གོང་གི་གཟུགས་གནས་ལ། །སྟེང་དུ་མི་འདྲ་དངོས་པོར་བསྒོམ། །ཞེས་བྱ་བ་ལས། བདག་ཉིད་དངོས་པོ་ནི་རྫིང་བུའོ། །རྫིང་བུ་ལ་ཡོངས་སུ་བརྟེན་ཏེ། མཚན་མར་མི་གནས་པ་དང༌། གདོད་ནས་གྲུབ་པ་དང༌། མ་སྐྱེས་པ་གསུམ་རྫིང་བུ་རུ་བསམ་པར་བྱའོ། །དེ་ཡང་ཇི་ལྟ་བུ་ཞེ་ན། སངས་རྒྱས་དངོས་ལ་རབ་སྦྱོར་བས། །ཞེས་གསུངས་པ་སྟེ། གང་ཟག་སངས་རྒྱས་ཉིད་ལ་རབ་ཏུ་དང་བས། །དངོས་པོར་རྫིང་བུ་ཉིད་བསམ་པར་བྱས་ལ། བདག་ཉིད་གོང་གི་གཟུགས་གནས་ལ་ཞེས་པ་ནི། སྔ་མའི་མི་དངོས་སུ་ཡང་དག་པར་གནས་ཏེ། སྟེང་དུ་མིག་འདྲ་བའི་དངོས་པོ་ནི་མེ་ཤེལ་དུ་ཤེས་པར་བྱ་སྟེ་སྟེ་རྫིང་བུའི་སྟེང་དུའོ། །དེ་ལས་གོང་དུ་གྱུར་པ་ཡིས། །འཇིགས་བྱེད་རིགས་དགུ་ངེས་པར་བསྒོམ། །མིག་འདྲའི་སྦུ་གུར་རབ་འབྱར་བས། །སྙིང་པོའི་སྟེང་དུ་གསལ་བར་སྣང༌། །ཞེས་བྱ་བ་ལ། དེ་ལས་ནི་མེ་ཤེལ་ལས་གོང་དུ་གྱུར་པའོ། །འཇིགས་བྱེད་ནི་སྟ་རི་ལ་བྱ་སྟེ། རིགས་དགུ་ནི་སྟ་རིའི་ལོགས་ཐིག་ལེ་དགུ་བྲིས་པ་བསམ་པར་བྱའོ། །དེ་ཡང་གད་དུ་གནས་ཤེ་ན། །མིག་འདྲའི་བུ་གུར་རབ་འབྱར་བས། །ཞེས་གསུངས་ཏེ། མེ་ཤེལ་གྱི་མིག་ལ་འབྱོར་བར་བསྒོམ་པའོ། །སྙིང་པོ་སྟེང་ནི་མེ་ཤེལ་གྱི་སྙིང་པོའི་སྟེང་ངོ༌། །གསལ་བར་སྣང་བ་ནི་ཆུད་པར་སྣང་བར་འབྲེལ་ཏོ། །སྙིང་པོའི་སྟེང་དུ་ཆུ་བསྒྲུབ་པས། །ཡན་ལག་སྟོང་དང་ལྡན་པ་ཉིད། །སྤུ་ན་ལ་ཕྱོགས་པར་ཁ་བལྟས་ནས། །བདག་ལས་གོང་དུ་གྱུར་པ་ཡི། །ཞེས་བྱ་བ་ལ། སྙིང་པོ་ནི་མེ་ཤེལ་ཏེ། དེའི་སྟེང་དུ་ཆུ་བསྒྲུབས་པ་ནི་ཉ་ལ་བྱ་སྟེ། ཉའི་ཁ་ནས་ཡན་ལག་བརྒྱད་དང་ལྡན་པའི་ཆུ་འབབ་པ་ལ་བྱའོ། །སྤུན་ལ་ཕྱོགས་པ་ནི་མི་མཐུན་པས་ཟླ་བ་ཉ་ལ་བྱ་སྟེ། དེ་ལ་ཕྱོགས་པར་ཁ་བལྟས་པའོ། །དེ་ལ་ཁ་བལྟས་ནས། བདག་ལས་

---

^{[མ་དཔེ་གཟིགས་ན་འདིར་གནོན།]}

གོང་དུ་གྱུར་ན་ནི་ཐོད་པ་ལ་བྱ་སྟེ། དེ་ཡང་ཇི་ལྟ་བུ་ཞེ་ན། ཧཱུཾ་གཉིས་ལས་བསྒྲུབས་ཏེ་མེའི་ངེས་པར་གསལ་བྱེད་སྦར་བ་ལས། དངོས་པོར་སྙིང་པོར་རབ་སོང་བས། །དེ་ལས་མི་འཆི་འོད་ལྡན་པས། །འཇོམས་བྱེད་སྟེང་ན་རབ་གནས་པའི། །མིག་འདྲའི་ཡན་ལག་བརྒྱད་དང་ལྡན།། འཇོམས་བྱེད་མིག་འདྲར་གར་མ་འབྱོར། །ཞེས་གསུངས་ཏེ། ཐོད་པ་ནི་ཧཱུཾ་གཉིས་ལས་གྲུབ་པ་ཡིན་པས་ན། ཧཱུཾ་གཉིས་ལས་བསྒྲུབས་པས་སོ། །དེས་པར་གསལ་བྱེད་སྦར་བ་ལས། ཐོད་པ་ལས་མེ་སྦར་བ་ལས། དངོས་པོ་ནི་དངོས་པོ་ཐམས་ཅད་ལ་བྱ་སྟེ། དེ་རྣམས་ཀྱི་སྙིང་པོ་ནི་ནམ་མཁའོ། །དེ་པས་ནི་ནམ་མཁའ་ལ་མེ་ལྕེ་སོད་བས། ནམ་མཁའ་ལས་མི་འཆི་བར་བྱེད་པའི་སྨན་རེག་འོད་དང་ལྡན་པ་མཐོང་བར་བྱེད་དེ། དེ་ཡི་འཇོམས་བྱེད་ནི་སྟ་རི་སྟེ། སྟ་རི་ལ་གནས་པའི་མིག་འདྲ་བ་ནི་མེ་ཤེལ་ཏེ། དེ་ལ་ཡན་ལག་བརྒྱད་དང་ལྡན་པའི་སྨན་གནས་པས་ན། ཡན་ལག་བརྒྱད་དང་ལྡན་པར་འབྲེལ་ཏོ། །འཇོམས་བྱེད་སྟ་རི་དང་མིག་འདྲར་མེ་ཤེལ་དུ་གར་མའམ་དམ་པོར་སྦྱོར་ཏེ། སྤྱིར་གནས་པ་ནི་ཐམས་ཅད་དུ་ཡང་དག་པར་འབྱོར་པའོ། །ཐབས་དང་ཤེས་རབ་གསུམ་དུ་ངེས། །དངོས་པོ་གསུམ་དུ་རབ་ངེས་ཏེ། །སྙིང་པོའི་སྟེང་ན་གནས་པ་ཡིན། །མིག་འདྲའི་སྟེང་ན་ངེས་པར་སོང༌། །ཞེས་བྱ་བ་ལས། ཐབས་སྟ་རི་དང་ཤེས་རབ་མེ་ཤེལ་གསུམ་དུངས་པར་གནས་པར་སྦྱར་རོ། །དངོས་པོ་གསུམ་ནི་སྟ་རི་དང༌། མེ་ཤེལ་གཉིས་ལ་དངོས་པོ་གསུམ་སྟེ། དེ་གསུམ་ལ་བརྒྱུད་ནས་སྙིང་པོ་ནི་རྫིང་བུ་ལ་བྱ་སྟེ། རྫིང་བུའི་སྟེང་ན་གནས་པའི་མེ་ཤེལ་ལ་ངེས་པར་སོང་བར་འབྲེལ་ཏོ། །རང་གི་གར་མའི་ཁྱོན་ཙམ་ལ། །སྐད་ཅིག་བྱེ་བྲག་བཅུ་དྲུག་པའི། །ཐབས་སུ་ཡོངས་སུ་རྫོགས་པ་ཡིས། །དང་པོའི་དངོས་པོ་བརྟག་མི་བྱ། །ཞེས་བྱ་བ་ལ། རང་གི་གར་མ་ནི་སྐབས་འདིར་སོ་གཉིས་སྦྱར་བ་ལ་བྱ་སྟེ། སོ་གཉིས་བསྣམས་པའི་ནང་གི་ཁྱོན་ཙམ་ལ། སྐད་ཅིག་བྱེ་བྲག་བཅུ་དྲུག་ནི། །དབྱུ་གུའི་ཆ་ཡིས་ཡོངས་སུ་བརྩིས་ལ། དེའི་ཐབས་ཀྱིས་ཡོངས་སུ་རྫོགས་པའོ། །གང་ལ་རྫོགས་ཤེ་ན་སྨན་ལ་རྫོགས་པའོ། །དང་པོའི་དངོས་པོ་ནི་མེ་ཤེལ་ལ་སོགས་པ་སྟེ། དེའི་ཡོངས་སུ་མི་རྟག་

---

^{[མ་དཔེ་གཟིགས་ན་འདིར་གནོན།]}

པའོ། །རྫོགས་པ་གཉིས་ལ་མེ་འབར་བས། །རིམ་པ་དེ་གཉིས་མི་གནས་ཤིང༌། །དངོས་པོར་སྣང་བ་གང་ཡིན་པ། །མར་མེའི་རྩེ་མོ་ལྟ་བུ་སྟ། །ཕྱི་ནས་དེ་ནི་འོད་གསལ་བའོ། །ཞེས་བྱ་བ་ལ། རྫོགས་པ་ཉིད་ནི་གོང་མའི་སྨན་རྫོགས་པའོ། །དེ་ལས་མེ་འབར་བས་རིམ་གྱིས་དེ་རྣམས་དངོས་པོར་མི་གནས་པའོ། །དངོས་པོ་སྣང་བའི་སྨན་ལ་བྱ་སྟེ། དེ་ཡང་མར་མེའི་རྩེ་མོ་ལྟར་རིམ་པས་ཕྲ་བར་བསམས་ཏེ། ཕྱི་ནས་རང་བཞིན་གྱིས་འོད་གསལ་བའོ། །དངོས་པོ་རབ་ཏུ་བ་རྟག་བྱ་བ། །རིམ་པ་གསུམ་ལས་རབ་རྫོགས་ཡིན། །སྟེང་དུ་བཾ་ཉིད་རབ་འབར་དང༌། །ཧཱུཾ་ལས་སྐྱེས་པ་ཐུག་པའི་སྐུ། །ཡང་དག་པ་རུ་བརྟག་པར་བྱ། །འོན་ཀྱང་གོང་མའི་ས་བོན་ལས། །བསྐྱེད་པར་བྱ་བ་ཁོ་ན་ཡིན། །ཞེས་བྱ་བ་ལ། དང་པོར་དེ་དག་རྣམ་པར་རབ་ཏུ་བརྟས་པ་ནི། སྟེང་ཞེས་པ་སྟེ། རྫིང་བུའི་སྟེང་དང༌། སྟ་རིའི་སྟེང་སྟེ། དེ་གཉིས་ནི་པཾ་ལས་བསྐྱེད་པར་བྱའོ། །ཧཱུཾ་ལས་སྐྱེས་པ་ནི་སྟ་རི་སྟེ། ཐུབ་པའི་སྐུའོ། །འོག་ཅེས་བྱ་བ་ནི་རྫིང་བུའི་འོག་ན་གནས་པའི་མེ་ཤེལ་ནི་གོང་མའི་ས་བོན་ལས་བསྐྱེད་པར་གསུངས་སོ། །སེམས་དཔའ་གཉིས་སུ་ངེས་པ་ལས། །འཁོར་ལོ་སྤྲོས་པས་ཆར་ལྟ་བུའོ། །ལོ་ཏོག་ཤིན་ཏུ་སྨིན་བྱེད་པ། །སྐྱོན་རྣམས་བསལ་ནས་དེ་བཞིན་དུ། །སླར་ཡང་ངོ་བོ་ཡང་དག་གནས། །ཞེས་བྱ་བ་ལ། སེམས་དཔའ་གཉིས་ནི་གོ་སླ་སྟེ། ཡེ་ཤེས་དང་དམ་ཚིག་སེམས་དཔའོ། །འཁོར་ལོ་སྤྲོས་པ་ནི་ཕྱོགས་བཅུ་རྣམས་སུ་སྟེ། དེ་ཡང་དང་པོ་ནམ་མཁའ་ལས། །ཡེ་ཤེས་སེམས་དཔའ་སྤྱན་དྲངས་པ་ལ་སོགས་པ་མ་ལུས་པར་བྱས་ནས། དེ་ནས་དམ་ཚིག་གི་འཁོར་ལོ་མྱུར་དུ་གཞུག་པའོ། །ལོ་ཏོག་ལྟ་བུའི་སེམས་ཅན་ལ། །ཆར་ལྟ་བུའི་འཁོར་ལོ་སྤྲོས་པས། སྐྱོན་རྣམས་དང་བྲལ་ཏེ། སླར་དེའི་ངོ་བོར་གནས་པའོ། །དེ་ལྟར་གསལ་བར་མ་འཁྲུལ་བར། །སྐྱོན་གྱིས་མ་གོས་དྲི་མེད་དོ། །ཞེས་བྱ་བ་ནི། གོང་མ་ལྟར་གསལ་ཞིང་མི་སྣང་བར་བསྒོམས་ན། འཁོར་བའི་བག་ཆགས་ཀྱི་སྐྱོན་གྱིས་མི་གོས་ཏེ། ནམ་མཁའ་དངས་པ་ང་ལྟར་དྲི་མ་མེད་པར་གསུངས་སོ། །དེ་ཡང་ལས་ཀྱི་སྦྱོར་བ་ལས་ཡང་དག་པར་གསུངས་སོ། །མཁའ་

---

^{[མ་དཔེ་གཟིགས་ན་འདིར་གནོན།]}

ཀུན་ཞེན་པའི་སེམས་ཀྱིས་སུ། །རྡོ་རྗེ་ལམ་དུ་རབ་ཞུགས་ནས། །ནོར་བུ་དྲི་མེད་ཟླ་བ་ཡི། །ལས་ཀྱི་སྦྱོར་བ་སྣ་ཚོགས་པར། །མཉམ་པར་སྦྱོར་བས་བདེ་བའི་མཆོག །མི་འཛག་གནས་དང་ལྡན་པར་འགྱུར། །ཞེས་བྱ་བ་ལ། ནམ་མཁའ་ལ་ཡང་དག་པར་ཞེན་པ་སྟེ། ནམ་མཁའ་དང་དབྱིབས་མཐུན་པའི་ཆོས་འབྱུང་ངོ༌། །དེ་ལ་ཞེན་པས་ནོར་བུ་འབར་བ་དང༌། ཟླ་བ་ལྟ་བུའི་བྱང་ཆུབ་ཀྱི་སེམས་རྡོ་རྗེའི་ལམ་དུ་ཡོངས་སུ་ཞུགས་པས། ལས་ལ་སྦྱོར་བ་དང་མཉམ་པར་སྦྱར་བས་བདེ་བའི་མཆོག་ཅིར་ཡང་མི་རྟོག་པ་སྐྱེས་ནས་ཕྱིས་མི་འཛག་པར་འབྲེལ་ཏོ། །མཁས་པ་སངས་རྒྱས་བདེ་བས་བདེ། །ལུས་ལ་ཆགས་པར་མི་ལྟ་ཞིང༌། །སེམས་ལ་ཆགས་པ་ཆེན་པོར་སྐྱེད། །ཅེས་བྱ་བ་ལ། ལུས་དངོས་པོར་སྣང་བའི་དབྱིབས་དང༌། །བ་དོག་ལ་ཆགས་པར་མི་ལྟ་བར་སེམས་ནི་ཡེ་ཤེས་ཏེ། ཡེ་ཤེས་ཀུན་ནས་ཞེན་པའམ། ཡང་དག་པར་ཆགས་པར་ལོངས་སྤྱོད་པའོ། །དེ་ལྟར་སྤྱད་པས་མཁས་པ་དེ་ཉིད་སངས་རྒྱས་ཀྱི་བདེ་བ་དངོས་ཡོན་པས་ན། བདེ་བས་བདེ་བར་འབྲེལ་ཏོ། །དེ་འདྲའི་སྤྱོད་པས་ཡོངས་བསྡུས་ནས། །གང་ཞིག་མྱ་ངན་འདས་པ་ལས། །མཆོད་གྱུར་མི་གནས་མྱ་ངན་འདས། །ཞེས་པ་ནི། །གང་ཟག་རྣལ་འབྱོར་པ་གང་ཞིག་གིས་གོང་དུ་བསྟན་པའི་སྦྱོར་པ་དེ་ལྟར་བུས་བདག་གི་རྒྱུད་ཡོངས་སུ་བསྡུས་ན། མི་དེ་མྱ་ངན་འདས་པ་ལ་མཆོག་ཏུ་གྱུར་པའི་མི་གནས་པའི་མྱ་ངན་ལས་འདས་པ་ཐོབ་པར་འགྱུར་རོ། །ལ་ལ་མངོན་པར་མི་གནས་ཤིང༌། །ཀུན་དུ་མངོན་པར་བསྒྲོད་པས་ནི། ཡེ་ཤེས་རྡོ་རྗེ་གོ་འཕང་ཉིད། །བརྒྱུད་པས་མངོན་དུ་བྱེད་པ་ལ། །ཞེས་བྱ་བ་ལ། ས་ནི་བཅུ་གཅིག་ལ་སོགས་པ་སྟེ། དེ་ལའང་མི་གནས་པ་དང༌། གཞན་ཐམས་ཅད་ལ་མངོན་པར་མི་དགའ་བས། ཡེ་ཤེས་རྡོ་རྗེ་ནི་ཕྱག་རྒྱ་ཆེན་པོ་ཉིད་དོ། །དེའི་གོ་འཕང་ཡང་ཀུན་དུ་བརྒྱུད་པས་མངོན་དུ་བྱེད་ན། ཞེས་པ་ནི་གང་བསྒྲུབ་པར་བྱ་བ་གཞན་དཀའ་སླ་མེད་པར་གསུངས་པའོ། །འདི་ནི་རྫས་ལ་སོགས་པ་ཡི། །འདི་ཡི་དངོས་གྲུབ་གང་ཡིན་པ། །ངེས་པར་འགྲུབ་པ་སྨོས་ཅི་དགོས། །ཤེས་རབ་ཅན་གྱིས་ལས་འདི་ལ། །ཆགས་པ་ཆེན་པོ་ཡང་དག་འགྲུབ། །ཅེས་བྱ་བ་ལ། འདི་ཞེས་བྱ་བ་ནི་

---

^{[མ་དཔེ་གཟིགས་ན་འདིར་གནོན།]}

ཚེ་འདི་ལ་སྟེ། ཚེ་འདིའི་རྫས་ནི་དངུལ་ཆུ་དང་རལ་གྲི་གྲུབ་པར་འཇིག་རྟེན་འདིའི་དངོས་ཐུབ་གང་ཡིན་པ་རྣམས་ངེས་པར་རམ་གདོན་མི་ཟ་བར་སྨོས་ཅི་དགོས་པར་འབྲེལ་ཏོ། །ཤེས་རབ་ཅན་བློ་དང་ལྡན་པས་འདི་ལྟ་བུ་ལ་ཆགས་སམ་ཞེན་པ་ཆེན་པོས་ཡང་དག་པར་བསྒྲུབ་པར་བྱའོ། །ལུས་ལ་མེ་འབར་ཆེན་པོ་ཡིས། །སྙིང་པོ་འདི་ཉིད་བཟླས་པ་ལས། །རང་ཉིད་པདྨ་གསང་བ་ཡིས། །དྲག་པོའི་རྟགས་སུ་ངེས་སོང་སྟེ། །དེ་བཞིན་རྟག་ཏུ་བསྒྲུབ་པར་བྱ། །ཞེས་བྱ་བ་ལ། ལུས་ལ་མེ་འབར་བ་ནི་ལག་ན་རྡོ་རྗེའི་རིགས་ཏེ་གཟི་བརྗིད་ཆེན་པོ་དང་ལྡན་པའི་ཕྱིར་རོ། །དེའི་སྙིང་པོ་འོག་ནས་འབྱུང་བ་འདི་ཉིད་བཟླས་པའི་ཐབས་ནི་རང་ཉིད་པདྨ་དང་གསང་བའི་ཁ་སྦྱོར་བར་བྱས་ལ། དྲག་པོའི་རྟགས་ནི་ཐ་མ་མེའི་དཀྱིལ་འཁོར་ལ་བྱ་སྟེ། དེ་ལྟར་བརྒྱུད་པས་རྟག་ཏུ་བཟླས་པ་བྱ་བར་འབྲེལ་ཏོ། །དེ་ལ་ཨོཾ་བྷྱོ་བྷྱོ་ཞེས་པ་ནས་རཱ་ཛྙཱ་པ་ཡ་ཏིའི་བར་དུ་ནི་རྩ་བའི་སྔགས་སུ་ཤེས་པར་བྱའོ། །ཨོཾ་དཾཥྟྲ་ཀ་ར་ལོ་ཞེས་པ་ནས། བྷ་ཀྵ་ཡ་ཞེས་པའི་བར་དུ་ནི། རྐང་པ་བརྒྱད་པའི་སྔགས་སོ། །ལྷག་མ་ནི་རིམ་པ་ཇི་ལྟ་བ་བཞིན་རྣམ་པར་རྒྱལ་བ་ལ་སོགས་པའི་སྙིང་པོའོ། །དེའི་ལྷག་མ་བདུན་དོན་བསྒྲུབ་པ་དང༌། བསྲུང་བའི་ལས་དང༌། ས་ཚོན་བྱིན་གྱིས་བརླབ་པ་དང༌། དྲི་ཆུ་སྔགས་པ་དང༌། སྲད་བུ་སྔགས་པ་དང༌། བུ་མོ་སྔགས་པ་དང༌། བདེ་བྱེད་སྔགས་པའི་སྔགས་ཏེ། དེ་ཡང་སྐབས་ཀྱི་དུས་སུ་བླ་མའི་མན་ངག་ལས་ཤེས་པར་བྱའོ། །དེ་ནས་ཕྱོགས་བཅུར་འཁྲུགས་པ་ལས། ཡི་གེ་ངེས་པར་གང་ཡིན་པ། །བླ་མའི་མན་ངག་རབ་གསལ་བས། །གཅིག་ཏུ་བསྡུས་ནས་བཟླས་པར་བྱ། །ཞེས་བྱ་བ་ལ། རྩ་བའི་སྔགས་བསྟོད་པ་ལ་སོགས་པ་དང༌། བཟླས་པ་ཉིད་སྙིང་པོའི་སྔགས་ཕྱོགས་ཀུན་དུ་འཁྲུགས་པ་དེ་རྣམས་ཡི་གེའི་ཕྱོགས་གཅིག་ཏུ་བསྡུས་ནས་བཟླས་པ་ངེས་པར་བྱ་བ་ནི། བླ་མའི་མན་ངག་ལས་ཤེས་པར་བྱའོ། །རང་འབྱུང་སྔགས་པ་བདག་ཉིད་ལ། །གྲངས་ཚད་གཟུང་བ་གང་ཡིན་པ། །རིགས་ཀྱི་དབང་གིས་ངེས་པར་བཤད། །ཅེས་བྱ་བ་ལ་རྣལ་འབྱོར་པའི་འཁོར་བ་ལས་རབ་ཏུ་བྱུང་བའི་སྔགས་པས། བདག་ཉིད་

---

^{[མ་དཔེ་གཟིགས་ན་འདིར་གནོན།]}

བཟླས་པའི་གྲངས་ཚད་ནི་ཕྲེང་བ་སྟེ། དེ་ནི་རིགས་ཀྱི་དབང་གིས་ཡང་དག་པར་བ་ཤད་པ་ལས་ཤེས་པར་བྱ་བ་ནི་དྲག་པོ་ལ་སོགས་པའི་ལས་ལ་རང་རང་གི་ཕྲེང་བས་འོག་ནས་འབྱུང་བས་བཟླས་པར་གསུངས་སོ། །ཀུན་དུ་སྣང་བ་གང་ཡིན་པས། །རིགས་སུ་བསྡུས་ནས་ངག་གི་ཡང༌། །སྤྱོད་ཡུལ་མ་ཡིན་ཐ་མ་ཉིད། །ཅེས་པ་ནི། ཀུན་དུ་སྣང་བའི་ལུས་ལ་འཇུག་པ་དང༌། རིགས་སུ་བསྡུས་པའི་ངག་གི་བཟླས་པ་དང༌། ཐ་མལ་པ་ནི་ཡིད་ཀྱི་བཟླས་པར་གསུངས་པ་སྟ། དེ་ཡང་སྐྱེས་བུ་དགུག་པའི་དོན་ལ་ལོག་པར་བསྐོར་བའི་སྒྲས་ཡང་མ་ནི་བྱེད་པ་ལ་འཇུག་པའོ། །དྲག་པོའི་སྙིང་པོ་ཉིད་དང་ཡང༌། །རང་བཞིན་རྡོ་རྗེ་བཟླས་པ་ཡིས། །རིགས་གསུམ་ཡང་དག་བཟླས་པ་ནི། །ཞེས་བྱ་བ་ནི། སྤྱིར་བཟླས་པ་རྣམ་པ་གསུམ་དུ་གསུངས་ཏེ། དྲག་པོའི་བཟླས་པ་དང༌། རང་བཞིན་གྱི་བཟླས་པ་དང༌། རྡོ་རྗེའི་བཟླས་པ་དང་གསུམ་དུ་གསུངས་ཏེ། དེའི་རིགས་གསུམ་ནི་སྐུ་གསུང་ཐུགས་དང༌། རྡོ་རྗེ་དང༌། རིན་པོ་ཆེ་དང༌། པདྨ་དང་གསུམ་དུ་གསུངས་སོ། །གོང་མའི་སྔགས་ལ་རབ་བསྔགས་པས། །མཐའ་རུ་ཀུན་ལ་ཧཱུཾ་གིས་བརྒྱན། །དེ་མཐར་སྐྲོད་པའི་ཚིག་དག་གིས། །ཡོངས་སུ་བརྒྱན་པ་ངེས་པར་བཟླས། །གང་དང་གང་ལ་ལས་སྦྱོར་བ། །དེ་དང་དེ་ལ་མན་ངག་གིས། །མངོན་པར་ཤེས་པར་ཡང་དག་བཤད། །ཅེས་བྱ་བ་ལ། གོང་མ་རྣམས་ཀྱི་སྔགས་ལ། སྡུད་པ་ལ་ནི་ཧཱུཾ་གདགས་སོ། །སྐྲོད་པ་ལ་ཕཊ་ཀྱི་སྒྲ་ཡོངས་སུ་གདགས་སོ། །དེ་ལ་སོགས་པ་གསོད་པ་དང༌། བཅིང་བ་དང༌། སྨྱོ་བ་རྣམས་ལ་རང་རང་གི་སྔགས་ཀྱིས་སྦྱར་བ་ནི་བླ་མ་ལས་ཤེས་པར་བྱ་བར་འབྲེལ་ཏོ། །བཟླས་པ་ཕུན་སུམ་ཚོགས་ལྡན་པས། །རབ་འབྲིང་ཐ་མར་ལྡན་པ་ཡི། །དང་པོར་སྦྱོར་བ་ངེས་པ་དང༌། །ཐ་མ་ལས་ལ་འཇུག་པ་ལ། །གྲངས་དང་ཆ་རུ་རྣམ་པར་ལྡན། །སྤྱོད་ཡུལ་བསྡུས་པར་ངེས་བསལ་བར། །བདག་གིས་ངག་ལ་བརྟན་པར་བྱ། །ཞེས་བྱ་བ་ལ། ཕུན་སུམ་ཚོགས་པ་ནི་དམིགས་པ་དང༌། ཚད་དང༌། ཕྲེང་བ་དང༌། གང་ལས་དྲང་པ་རྣམས་དང་ལྡན་པའོ། །རབ་ནི་འབུམ་མོ། །འབྲིང་ནི་ཁྲིའོ། །ཐ་མ་ནི་སྟོང་དུ་ཤེས་པར་བྱའོ། །དང་པོར་སྦྱོར་བ་ནི་བསྙེན་པའི་ཚད་དང༌། ཐ་མར་

---

^{[མ་དཔེ་གཟིགས་ན་འདིར་གནོན།]}

ལས་ལ་འཇུག་པ་ནི་དེའི་དུས་ལ་སྦྱོར་བའོ། །སྤྱོད་ཡུལ་བསྡུས་པ་ནི་ལུས་དང་དག་དང༌། ཡིད་ཀྱི་སྤྱོད་ཡུལ་མཐུན་པར་ངེས་པར་སྦྱར་བའོ། །ངག་ལ་བརྟག་པ་ནི་ཀུན་ལ་འཇུག་པའི་སྒྲས་འཇུག་པའོ། །དང་པོར་སྲིད་པ་ཆགས་པ་དང༌། བར་དུ་གང་ཞིག་གནས་པ་ཉིད། །ཐ་མར་འཇིག་པ་གང་ཡིན་པས། །སྔགས་རྣམས་ཐམས་ཅད་རྒྱས་པར་གསུངས། །ཞེས་བྱ་བ་ལ། སྲིད་པ་ཆགས་པ་དང༌། བར་དུ་གནས་པ་དང༌། ཐ་མར་འཇིག་པ་ལ་སྦྱར་ཏེ། སྔགས་ཐམས་ཅད་ལས་དང་པོ་དང༌། བར་དང་ཐ་མའི་རིམ་པས་འབྱུང་བར་གསུངས་སོ། །དེ་ཡང་ཇི་ལྟ་བུ་ཞེ་ན། འབྱུང་བ་ལྔ་དང་རབ་ལྡན་ནས། །དེ་ལ་ཆོས་རྣམས་ཐམས་ཅད་པ། །ཡོངས་སུ་བསྡུས་པས་ཡང་དགག་གནས། །དེ་དང་སྦྱོར་དང་དང་པོའི་དོན། །འདི་ལས་སྒྲུབ་པར་འགྱུར་བ་གང༌། །ལས་རྣམས་སྣ་ཚོགས་གང་ཡིན་པ། །གདོན་མི་ཟ་བར་འགྲུབ་པ་ཡིན། །ཞེས་བྱ་བ་ལ། ཡི་གེ་གང་ལས་འབྱུང་བ་ལྔའི་ས་བོན་ཡང་དག་པར་གནས་པས། འབྱུང་བ་ལྔ་དང་ལྡན་པའོ། །འབྱུང་བ་ལྔ་ལས་ཆོས་ཐམས་ཅད་བསྐྱེད་པར་གསུངས་ཏེ། དེ་བས་ན་འདིར་ཡང་དང་པོའི་ཡི་གེ་ལྔ་པོ་སྨོས་པ་ནི། དེ་ལས་ཡོངས་སུ་འབྱུང་བར་བྱའོ། །དེའི་དོན་དངོས་པོ་ཐམས་ཅད་ལ་རྒྱས་པར་བྱ་བ་དང༌། དེའི་དོན་ཤེས་པ་དེ་སྒྲུབ་པ་ནི་ལས་སྣ་ཚོགས་པ་ཐམས་ཅད་གདོན་མི་ཟར་སྦྱོར་བའོ། །དེ་དག་ལ་སོགས་པ་ནང་དང་སྔགས་ཀྱི་ལེའུ་ཐམས་ཅད་དུ་ཡང་དག་པར་ནི་བླ་མའི་མན་ངག་ལས་ཤེས་པར་བྱའོ། །སྒྲ་ཇི་བཞིན་པ་དང་ཇི་བཞིན་པ་མ་ཡིན་པ་ལས། ཇི་བཞིན་མ་ཡིན་ཕའི་སྒྲ་ལོག་པར་གོ་བར་བྱའོ། །རྡོ་རྗེ་མེ་ལྕེའི་རྒྱུད་ཀྱི་འགྲེལ་བ་དེ་ཁོ་ན་ཉིད་སྣང་བ་ཞེས་བྱ་བ་ལས་ལེའུ་ལྔ་པའི་བཤད་པའོ།། །།

དྲུག་པ། དབང་གི་ལེའུའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ལག་ན་རྡོ་རྗེ་གོས་སྔོན་གྱིས། །བཅོམ་ལྡན་མགོན་ལ་འདི་སྐད་གསོལ། །སེམས་ཅན་སྨིན་པར་བྱ་བ་ཡི། །འཇུག་པའི་ཐབས་ཉིད་གསུང་དུ་གསོལ། །ཞེས་བྱ་བ་ལས། སེམས་ཅན་སྨིན་པར་བྱ་བའི་འཇུག་པའི་ཐབས་ཡོངས་སུ་ཞུས་པའོ། །ཀུན་མཁྱེན་མགོན་པོས་བཀའ་སྩལ་པ། །དང་པོར་ས་བརྟག་ལ་སོགས་པ། །ངེས་པར་གོང་དུ་བསྟན་པ་ལྟར། །ལས་རྣམས་ངེས་པར་

---

^{[མ་དཔེ་གཟིགས་ན་འདིར་གནོན།]}

རྫོགས་པར་བྱ། །ཞེས་བྱ་བ་ལ། ཀུན་དངོས་པོ་མ་ལུས་པར་ཐམས་ཅད་མཁྱེན་པ་ཡང་ཡིན་ལ། ལྷ་ལ་སོགས་པའི་མགོན་པོ་ཡང་ཡིན་པས་ཀུན་མཁྱེན་མགོན་པོའོ། །དེའི་ཡོངས་སུ་བཤད་པར་གསུངས་ཏེ། ས་བརྟག་པ་དང༌། བསླང་བ་ལ་སོགས་པ་དཀྱིལ་འཁོར་དང༌། མཆོད་པའི་སྐབས་སུ་བཤད་པ་ལྟར་མ་ལུས་པར་རྫོགས་པར་བྱ་བར་གསུངས་སོ། །ས་ཕྱོགས་དབེན་པའི་ཁྱིམ་རྣམས་སུ། །བ་ཡི་རྣམ་ལྔ་ལ་སོགས་དང༌། །རྣམས་སོགས་མདུན་དུ་ངེས་པར་སྦྱར། །ཐ་མའི་ཚུལ་དུ་རབ་བྱས་ལ། །གུར་གུམ་ཆུ་ཡིས་ཡོངས་སུ་གདབ། །ཅེས་པ་ནི། བའི་རྣམ་ལྔ་ལ་སོགས་པ་རྣམས་ཀྱིས་ལེགས་པར་བྱུགས་ལ། ཐ་མའི་ཚད་ནི་ཁྲུ་གང་གིས་ཡང་དག་པར་བྱས་པའོ། །དེ་གང་དུ་བྱ་ཞེ་ན། ས་ཕྱོགས་དབེན་པའི་ཁྱིམ་དུའོ། །ཞལ་ཟས་སྣ་ཚོགས་ཞེས་པ་ནས་སེམས་བསྐྱེད་པ་དང་ཞེས་བྱ་བའི་བར་དུ་ནི་གོ་སླ་བས་མ་བཤད་དོ། །གསང་བ་གསུམ་གྱི་གནས་རྣམས་སུ། །དྲི་ཡི་ཐིག་ལེ་རྡོ་རྗེ་དང༌། །བཅས་པའི་གུང་མོས་ངེས་པར་བསྐུ། །མི་འགྱུར་གསུམ་ལས་སྐུ་གསུམ་དུ། །སྔགས་འདི་དག་གིས་བྱིན་གྱིས་བརླབ། །ཅེས་པ་ལ། གསང་བ་གསུམ་ནི་དཔྲལ་བ་དང༌། ལྐོག་མ་དང༌། སྙིང་ག་གསུམ་དུ་དྲིའི་ཐིག་ལེ་རྡོ་རྗེ་དང་བཅས་པའི་གུང་མོས་བསྐུས་ལ། དེའི་སྟེང་དུ་དང་པོའི་ཡི་གེ་གསུམ་ལས་མི་བསྐྱོད་པ་དང༌། རིན་ཆེན་འབྱུང་ལྡན་དང༌། སྣང་བ་མཐའ་ཡས་གསུམ་དུ་ཡང་དག་པར་བརྟགས་ལ་སྔགས་འདིས་བྱིན་གྱིས་བརླབ་པོ། །ཨོཾ་ཏྲི་མ་ཏ་བི་ཤོ་དྷ་ཡ་ཧཱུཾ། དེ་ནས་སོ་ཤིང་དག་ལ་ནི།། ཞེས་པ་ནས། ཡང་དག་པར་ནི་སྦྱོར་བ་བརྩམ། །ཞེས་པའི་བར་དུ་ནི་གོ་སླ་བས་འདིར་མ་བཤད་དོ། །སྔགས་གཉིས་པོ་ནི་གོང་མར་ཤེས་པར་བྱའོ། །རང་བཞིན་མི་གནས་དགོས་པ་ཡིས། །ཀུན་རྫོབ་དྲི་མ་སྤང་པར་བྱ། །ཞེས་བྱ་བ་ནི། དབང་ནོད་པའི་དུས་སུ་སློབ་མ་ཁྲུས་ཡང་དག་པར་བྱེད་དུ་གཞུག་པའོ། །དེ་ནས་སྣ་ཚོགས་ཞེས་བྱ་བ་ནས་མཆོད་པར་བྱ་ཞེས་པའི་བར་དུ་ནི་གོ་སླའོ། །དེ་ཉིད་གཟུགས་ལ་རབ་ཏུ་ཡང༌། །གནས་པའི་བདག་ཉིད་དེ་ཉིད་དུ། །ཡང་དག་པར་ནི་བསྐྱེད་པར་བྱ། །ཞེས་པ་ནི། དེ་ཉིད་ནི་ཕྱག་ན་རྡོ་རྗེ་ཉིད་དེ། དབང་གི་དུས་སུ་ལག་ན་རྡོ་རྗེའི་

---

^{[མ་དཔེ་གཟིགས་ན་འདིར་གནོན།]}

གཟུགས་བྲིས་སྐུའམ། འཇིམ་པའམ། ལུགས་སུ་བླུགས་པའི་གཟུགས་ལ་མཆོད་པས་ཡང་དག་པར་མཆོད་ལ། རིམ་པ་ཇི་ལྟ་བ་བཞིན་དུ་ཡང་རབ་ཏུ་གནས་པར་བྱས་ལ། ཕྱི་ནས་ཆོ་ག་གསུམ་ལས་བདག་ཉིད་དེའི་སྐུར་ཡང་དག་པར་བསྐྱེད་པར་བྱའོ། །པདྨ་ཉིད་ལས་གོས་ལ་སོགས། །ཞེས་པ་ནས། རགས་པ་རྣམ་པར་དག་པར་འདོད། །ཅེས་པའི་བར་དུ། མིག་བཀབ་པས་བདུད་རྩི་འཁྱིལ་པའི་སྔགས་ཀྱིས་ཡང་ད་པར་ནང་དུ་བཅུག་ལ། ཡོལ་པའི་ཕྱི་རོལ་གནས་བས་རང་གི་འབྱོར་བས་ཡོན་ཁས་ལེན་དུ་གཞུག་པ་དང༌། དེ་ནས་སྣང་བ་ཇི་ལྟ་བུ་ལ་དངོས་གྲུབ་བརྗོད་པ་དང༌། སྔགས་ཀྱིས་མེ་ཏོག་དོར་དུ་བཅུག་ལ། ལྷ་རྣམས་རིམ་པ་ཇི་ལྟ་བ་བཞིན་དུ་བསྟན་པ་དང༌། དེ་ནས་སེམས་བསྐྱེད་པ་ལ་སོགས་པ་བྱས་ནས། རྣམ་པར་རྒྱལ་པའི་བུམ་པའི་ཆུས་དབང་བསྐུར་བར་བྱའོ། །དེ་ཡང་དང་པོར་རིམ་པ་ཇི་ལྟ་བ་བཞིན་དུ་ཅོད་པན་ལ་སོགས་པའི་དབང་རིམ་པར་བསྐུར་བ་དང༌། སློབ་དཔོན་ཡང་བུམ་པར་ཤེས་པར་བྱས་ལ། དེ་ཡིས་བསྐུར་བ་ནི་ལུས་ཏེ། ལུས་རྣམ་པར་དག་པར་གསུངས་སོ། །དེ་ནས་ཕྱག་རྒྱ་བཅས་པ་ལས། །བྱང་ཆུབ་སེམས་ལྡན་མ་ཉམས་པས། །བདག་དང་གཞན་རྣམས་གང་རུང་བཅས། །བདེ་བ་མངོན་དུ་རབ་སྤྱད་དེ། །བསམ་པས་ཡང་དག་སྦྱང་བྱས་ནས། །ཐབས་དང་ཤེས་རབ་ཕྱག་རྒྱ་ཡིས། །དེ་ཡི་ཁ་རུ་སྦྱིན་པར་བྱ། །ཞེས་བྱ་བ་ལ། ཕྱག་རྒྱ་ནི་ལས་རྣམ་པ་གཉིས་ཀྱིས་ཡང་དག་པར་སྤྱད་པར་བྱའོ། །དེ་ཡང་ཇི་ལྟ་བུ་ཞེ་ན། ཕོ་ཉ་དང་དངོས་པོ་ལ་ཞེན་པ་ནི། ཤེས་རབ་མ་གཟུགས་དང་ཁ་དོག་ཕུན་སུམ་ཚོགས་པ་ལ་ཕྱག་རྒྱ་བཅས་ཏེ། དེ་ཡང་བདག་རང་གིའམ། གཞན་གྱི་ཡང་རུང་སྟེ། བདག་བྱང་ཆུབ་ཀྱི་སེམས་མ་ཉམས་པས། བདེ་བ་མངོན་དུ་སྤྱད་ལ། དེ་བསམས་པ་དང་ལག་པ་གཉིས་ཀས་སྦྱངས་ཏེ། ཐབས་བདག་དང་ཤེས་རབ་ཀྱི་ཕྱག་རྒྱ་གཉིས་ཀས་དེའི་པདྨར་སྦྱིན་པར་གསུངས་ཏེ། དེ་ནི་གསང་བའི་དབང་ཡིན་པས། །དེའི་འོག་ཅེས་པ་ནི་ངག་སྟེ། དེ་རྣམ་པར་དག་པར་གསུངས་སོ། །རྣལ་འབྱོར་དང་མི་དམིགས་པ་ལ་འཇུག་པ་ནི་

---

^{[མ་དཔེ་གཟིགས་ན་འདིར་གནོན།]}

འདི་ལྟར་ཤེས་པར་བྱའོ། །ནང་དུ་ཤེས་པའི་སྒོ་དག་ལ། །དེ་ལ་མི་བརྟེན་བདག་ཉིད་གནས། །ཞེས་གསུངས་པ། རྟགས་དང་མིང་འདྲ་བ་དེ་ལ་བརྟེན་ནས། བདག་ཉམས་པར་འགྱུར་བའི་ཕྱིར། བླ་མའི་ངག་ལས་ཡང་དག་པར་ཤེས་པར་བྱའོ། །དེ་ནས་བདག་གི་དངོས་པོ་གང༌། །བུ་མོ་མདོག་བཟངས་སྔོན་མོ་ལ། །གང་དང་ལྡན་བའི་ཡང་བས་བསྐྱོད། །ཆོ་གས་ཡང་དག་གཟུང་བྱས་ལ། །ཐབས་གཉིས་རབ་སུ་བསྐྱོད་པ་ཡིས། །སྣ་ཚོགས་དངོས་པོ་གནས་པ་ཡིས། །དེ་འོག་སོར་བཞི་གཞལ་བྱས་ནས། །ཤེས་རབ་གཉིས་ལ་མནན་པ་ཡིས། །བདེ་བ་དཔག་ཏུ་མེད་པ་མྱོང༌། །དེ་མྱོང་སྐད་ཅིག་རྫོགས་པ་ཡིས། །དེ་ལ་བལྟ་པ་ཡིན་པར་བསྟན། །དེ་ཡིས་ཤེས་རབ་ཡེ་ཤེས་ཀྱི། །དབང་ཉིད་མངོན་པར་རྫོགས་པར་འགྱུར། །ཞེས་བྱ་བ་ལ། དེ་ཡང་གོང་མའི་ལམ་གྱིས་ཤེས་པར་བྱ་སྟེ། བདག་གང་ཟག་རྣལ་འབྱོར་པས། །དངོས་པོ་བུ་མོ་མདོག་དང་ལྡན་པ་སྔོན་མོ་ཉིད་ལ། གར་དང་ལྡན་པ་ནི་སྒེག་པ་ལ་སོགས་པ་དང་ལྡན་པའོ། །གཞན་ཡང་རོལ་པའི་སྐབས་སུ་སྒྱུར་རྩལ་བཅུ་དང་ལྡན་ཞིང༌། དེ་ལ་ཡང་བག་དང་ལྡན་པའོ། །དེ་ལ་ཆོ་ག་ནི་སྔགས་བཟླ་བ་དང་བསམ་པས་ཡོངས་སུ་བཟུང་བ་ལ་བྱའོ། །ཐབས་ནི་གོ་སླའོ། །དེའི་སྣ་ཚོགས་དངོས་པོ་གནས་པ་ནི། བུ་ག་འཕྲེད་ལ་ཡོད་པའི་སའོ། །དེ་ནས་སོར་བཞི་གཞལ་བ་དང༌། ཤེས་རབ་མ་གཉིས་ལ་མནན་ཅིང་མཉམ་པར་སྦྱར་བས། དེའི་མོད་ལ་བདེ་བ་དཔག་ཏུ་མེད་པ་མྱོང་བར་འགྱུར་རོ། །དེ་མྱོང་བའི་སྐད་ཅིག་ཐ་མ་ལ་དཔེའི་ཡེ་ཤེས་ཡིན་པར་བསྟན་པ་སྟེ། དེ་ཡེ་ཤེས་དངོས་མཚོན་པའི་ཕྱིར་དེ་གསུངས་པའོ། །དེ་ཡིས་ཤེས་རབ་ཡེ་ཤེས་ཀྱི་དབང་ཐོབ་པ་སྟེ། སེམས་རྣམ་པར་དག་པར་འགྱུར་བའོ། །བཞི་པ་ཆོས་ཉིད་མངོན་རྟོགས་དབང༌། །མེད་པ་མངོན་པར་སྣང་བར་འགྱུར། །དེ་ཡི་སྤྱི་ལ་ཁྱབ་གནས་ཏེ།། རང་ལ་ཡོད་བཞིན་ངེས་པར་རྨོངས། །ཞེས་བྱ་བ་ལ། བཞི་བའི་དབང་ཆོས་ཉིད་མངོན་པར་རྟོགས་པ་ཞེས་བྱ་སྟེ། དེ་ཡང་ཇི་ལྟ་བུ་ཞེ་ན། ཤེས་རབ་ཡེ་ཤེས་ལ་སོགས་པའི་དབང་རྣམས་རྟོགས་པའམ། གསལ་བར་བྱེད་པ་ཡིན་ནོ། །མེད་པ་མངོན་པར་སྣང་བ་ནི། །ཡོད་པའི་

---

^{[མ་དཔེ་གཟིགས་ན་འདིར་གནོན།]}

མེད་པ་དང༌། མེད་པའི་ཡོད་པ་དང༌། མེད་པ་ལ་སྣང་བ་དང༌། ཡོད་པ་མི་སྣང་བར་སྦྱར་རོ། །དེ་ཡང་ཇི་ལྟ་བུ་སྙམ་པ་ལ། རང་ལ་དེས་པར་ཡོད་བཞིན་དུ། །བདག་རྨོངས་པ་སྟེ། གདོད་ནས་ཡེ་ཤེས་ཡོད་པ་ལ་མ་རིག་པས་ཡང་དག་པར་བསྒྲིབས་པའོ། །དེ་མངོན་པར་རྟོགས་པས་ནི་མངོན་པར་རྟོགས་པའི་དབང་ངོ༌། །ཅི་དེ་ལོགས་ཤིག་པའམ། སྤྱི་ལ་ཁྱབ་སྙམ་པ་ལ། དེ་ཡིས་སྤྱིལ་ཁྱབ་གནས་ཏེ། །ཞེས་གསུངས་ཏེ། དེ་ནི་དབང་ཐམས་ཅད་ལ་སྤྱི་ལ་ཁྱབ་པར་གནས་པའོ། །སྔགས་རྣམ་པ་གཉིས་པོ་ནི། གཞུག་པ་དང་མེ་ཏོག་དོར་བའི་སྔགས་སུ་རིག་པར་བྱའོ། །སངས་རྒྱས་ཀུན་གྱི་ཕྱག་བརྙན་པར། །དེ་ཉིད་དུ་ནི་སློབ་མ་བསྒྲུབ། །དར་ལ་སོགས་པ་སྔོན་པོ་ཡིས། །སློབ་མ་ཉིད་ལ་དབང་བསྐུར་བྱ། །ཞེས་བྱ་བ་དང༌། ལག་ན་རྡོ་རྗེ་དངོས་སུ་སློབ་མ་བསྒྲུབ་པ་ལ་ཐུན་མོང་གི་དབང་མ་གཏོགས་པ་དབང་ལྔས་སློབ་མ་བསྒྲུབ་བར་གསུངས་ཏ། དར་རམ་རས་སོགས་སྔོན་པོ་ཚད་མེད་པ་ལ་སྔགས་འོག་མ་ཉིད་དང༌། ཕྱག་རྒྱ་དང་པོ་དང༌། གཉིས་པས་བཟུང་ལ་བསྐོན་པར་བྱ་བར་འབྲེལ་ཏོ། །མཁའ་ལྡིང་སྔོན་པོ་འདབ་རྒྱས་ལ། མགུལ་དུ་དང་དཔྱངས་བཅིངས་པ་ཡིས། །བུ་ཉིད་ལ་ནི་ངེས་པར་སྦྱིན། །ཞེས་བྱ་བ་ནི་ཤོག་བུ་ལ་ནམ་མཁའ་ལྡིང་གི་གཟུགས་བྱས་ལ་སློབ་མ་ལ་སྔགས་དང་བཅས་པས་སྦྱིན་པར་འབྲེལ་ཏོ། །དངོས་གྲུབ་སྣ་ཚོགས་གྲུབ་པ་དང༌། །ཞེས་པ་ནས། ཕྱར་ཏེ་བྱེད་པ་པོ་ལ་གཞག །ཅེས་བྱ་བའི་བར་ལ། གདོན་ཐམས་ཅད་ཞི་བར་བྱ་བའི་ཕྱིར་ཤིང་ལ་བེ་ཅོན་ཁྲུ་དོ་པ་བྱས་ལ། རྩེ་མོ་སྦོམ་པ་དང། རྩ་བ་ཕྲ་བ་རྣམས་ཀྱིས་ཡོངས་སུ་བྱུགས་ཏེ། དེའི་རྩེ་མོའི་ཕྱོགས་སུ་མེ་ཏོག་སྔོན་པོའི་ཕྲེང་བས་བཅིངས་ཏེ། ལག་པ་གཡས་པའི་མཐེ་བོང་དང༌། གུང་མོ་ལ་སོགས་གསུམ་དུ་སྦྱར་བས་བེ་ཅོན་བཟུང་སྟེ། གཡོན་པས་དཀུ་ལ་ཡོངས་སུ་བརྟེན་པས། བེ་ཅོན་སྤྱི་བོའི་སྟེང་དུ་བཟུང་བས་སྔགས་བཟླས་ཏེ། སློབ་མའི་ལག་པ་གཡས་པར་སྦྱིན་པའོ། །དེ་ནས་རས་བལ་གསར་བ་ལས་སྐུད་པ་བཞིན་དུ་ཡང་དག་པར་བཀལ་ཏེ། རྩ་བའི་སྔགས་དང་དྲི་ཆུས་ཡང་དག་པར་བསངས་ཏེ། ལྷས་མར་བྱས་ཏེ། གཡས་པས་སྟེང་དུ་དྲངས་གཡོན་པ་ས་ལ་བཙུགས་

---

^{[མ་དཔེ་གཟིགས་ན་འདིར་གནོན།]}

པས། འོག་མའི་སྔགས་བཟླས་པས་གང་ཤར་བཅིང་བར་བྱའོ། །དེ་ཅིའི་ཕྱིར་བཅིང་ཞེ། ཚངས་པ་ཆེན་པོ་ལག་ན་རྡོ་རྗེ་མཐོང་བར་བྱ་བ་དང༌། མཆོད་པ་རྣམས་བསྡུ་བའི་ཕྱིར་བཅིང་བར་བྱའོ། །དེ་ཡང་ཁྲོ་གཉེར་གཡོན་དུ་ཕྱོགས་པས་སྦྱིན་པར་འབྲེལ་ཏོ། །སྔགས་ནི་རྒྱུད་ནས་འབྱུང་བར་ཤེས་པར་བྱའོ། །དེའི་ལག་པ་བསྒོམ་བྱས་ལ། །དེ་ཡི་ལག་པའང་བསྒོམ་བྱ་སྟེ། །ཞེས་བྱ་བ་ལ། བདག་དང་དེའི་ལག་པ་གཉིས་ཀ་ཁུ་ཚུར་བརྩེགས་མ་ལ་སྦུ་གུར་བྱ་སྟེ། དྲག་པོའི་ཕྲེང་བ་ནང་ནས་བཏོན་པ་འོག་ནས་འབྱུང་བའི་སྙིང་པོ་འདི་ཉིད་ལན་གྲངས་བརྒྱ་རྩ་བརྒྱད་དུ་བཟླས་ལ་སྙིང་པོ་སྦྱིན་པར་བྱའོ། །སྙིང་པོ་ནི་རྒྱུད་ལས་འབྱུང་བའོ། །དེ་ནས་ལེགས་པའི་མཚན་མ་ལ། །ཆོས་ལ་དབང་སོགས་མི་གནས་ན། །འཇུག་པར་འགྱུར་བ་ག་ལ་སྲིད། །ཅེས་བྱ་བ་ལ། ལེགས་པའི་མཚན་མ་ནི་གང་ཟག་འཇུག་པ་པོ་སྟེ། དེ་ལ་དབང་དང་དམ་ཚིག་ཏུ་མི་ལྡན་ན་ཆོས་འདི་ལ་འཇུག་པ་མི་སྲིད་དོ། །མི་སྲིད་པ་ནི་སྟོབས་ལ་འཇུག་པའི་སྒྲས་གཞུག་པར་མི་བྱ་བར་འབྲེལ་ཏོ། །རྒྱུད་གཞན་ལ་ནི་སྤྱིར་དབང་གནས། །དེས་ནི་ཀུན་ལ་འཇུག་པར་འགྱུར། །སྤྱི་ཉིད་དབང་ལ་མི་ལྟོས་པར། །འདི་ཉིད་ལ་ནི་རྟོགས་པའི་མཆོག་དེ་ཡིས་འཇུག་པ་ཁོ་ན་ཡིན། །ཞེས་བྱ་བ་ལ། བདེ་བར་གཤེགས་པས་གསུངས་པའི་རྒྱུད་གཞན་ཐམས་ཅད་ལ་སྤྱིའི་དབང་གིས་འཇུག་པར་གསུངས་ཏེ། འདི་ལ་ནི་སྤྱིའི་དབང་ལ་མི་ལྟོས་པར་འདི་ཉིད་ལ་རྟོག་པའི་མཆོག་འདི་ཁོ་ན་ལ་བྱ་བར་གསུངས་སོ། །རྡོ་རྗེ་མེ་ལྕེའི་རྒྱུད་ཀྱི་འགྲེལ་པ་དེ་ཁོ་ན་ཉིད་སྣད་བ་ཞེས་བྱ་བ་ལས་ལེའུ་དྲུག་པའི་བཤད་པའོ།། །།

བདུན་པ། ཀླུ་གདུག་མདངས་འཕྲོག་གི་གདོན་འདུལ་བའི་ལེའུའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ལག་ན་རྡོ་རྗེ་གོས་སྔོན་གྱིས། །བཅོམ་ལྡན་མགོན་ལ་འདི་སྐད་གསོལ། །གང་དག་ཀླུ་ཡིས་ཟིན་པ་ལ། །ཐབས་དེ་གང་ལགས་གསུང་དུ་གསོལ། །ཞེས་པ་ནི། སེམས་ཅན་ལ་ཕན་གདགས་པའི་ཕྱིར་ལས་རྣམ་པ་བཞི་རུ་གསུངས་ཏེ། གང་དུ་བསྡུས་པའི་ཐབས་ངེས་པར་བསྟན་པར་གསུངས་སོ། །ཀུན་མཁྱེན་གཙོ་བོ་ཞེས་པ་ནས། །བུ་མོ་ལ་ནི་ཡོངས་སུ་བསྔགས། །ཞེས་བྱ་བའི་བར་དུ་ནི་གོ་སླ་བས་འདིར་མ་བཤད་དོ། །རྒྱན་ཆ་ལྔ་ཡིས་རྒྱན་བཏགས་ལ། །རྐང་པའི་རྒྱུད་

---

^{[མ་དཔེ་གཟིགས་ན་འདིར་གནོན།]}

མར་ལོར་བཏགས་ཏེ། །ལག་པའི་རྒྱུད་པར་དབང་སྒྱུར་དུ། །ཡན་ལག་གནས་པས་ཕྱག་རྒྱ་བཅས། །ཞེས་བྱ་བ་ལ། བུ་མོ་ལ་དབུ་རྒྱན་ལ་སོགས་པ་ལྔས་ཡང་དག་པར་བཏགས་ལ། རྐང་པའི་རྒྱུད་མར་ནི་གོམ་པའི་འགྲོས་སོ། །ལག་པའི་རྒྱུད་མར་ནི་ཕྱག་རྒྱ་བཅས་པ་སྟེ། དེ་ཡང་ཇི་ལྟ་བུ་ཞེ་ན། ལག་པ་གཉིས་ཕུན་ཚུན་དུ་ནང་ནས་ནང་དུ་བསྐོར་ཞིང་ཡང་དག་པར་གནས་པའོ། །ཀླུ་ཡི་མཚན་མ་གང་ཡིན་པའི། །དངོས་པོ་གང་ལ་རབ་སྦྱར་ནས། །གཙོ་བོ་ཀུན་འབྱུང་མཆོག་ཉིད་ལ། །འཁོར་རྣམས་བརྒྱད་ཀྱིས་ངེས་བསྐོར་ཏེ། ཞེས་བྱ་བ་ནི། ཀླུའི་མཚན་མ་ནི་ཀླུའི་མིང་ལ་བྱ་སྟེ། དངོས་པོ་གང་ནི་ཀུན་འབྱུང་བའི་ཡི་གེའོ། །གཙོ་བོའི་ཐུགས་ཀའི་ཧཱུཾ་ལས་ས་བོན་བརྒྱད། །དེ་ལ་རབ་ཏུ་སྦྱར་ནས་འཁོར་བརྒྱད་ནི། །ནཱ་ག་བ་ཤི་ཀ་ར་ཡཾ་ཧཱུཾ་ཞེས་བྱ་བར་ཡང་དག་པར་བསྐོར་བ་སྤྱད་པའོ། །ནུབ་ཏུ་དངོས་པོ་སྟོན་བྱེད་པ། །གྲུ་བཞི་པ་དག་རབ་ཏུ་གདགས། །དེ་ཉིད་ས་རུ་རབ་ཏུ་ཐོབ། །དེ་སྟེང་ཅི་ནུས་སྦྱོར་བ་བསྒྲུབ། །ཅེས་བྱ་བ་ལ། ནུབ་ནི་སྐྱེས་བུ་ལ་འཇུག་པའི་སྒྲ་རྒྱབ་ལ་འཇུག་སྟེ། རྒྱབ་ཏུ་དངོས་པོ་འདིས་ལས་བྱ་སྟེ། ས་དེ་རྟེན་པར་བྱེད་པའི་སྣོད་ཕ་ཚེ་ཡོངས་སུ་གདགས་པར་བྱ་བའོ། །དེ་ཉིད་ས་ནི་ནའི་སྟེང་དུ་ཕྱིན་པས་ཐོབ་པའོ། །དེ་སྟེང་ཞེས་པ་ནི། ནའི་སྟེང་ནས་ས་ཅི་འབྱོར་པའམ། ནུས་བས་བླང་བར་བྱ་བར་འབྲེལ་ཏོ། །དེ་ཐོབ་རབ་ཏུ་བྲལ་བ་ལས། །དེ་ཡི་ཕྱོགས་སུ་མི་བལྟ་ཞིང༌། །དྲག་པོ་ཆེན་པོའི་སྔགས་བཟླས་བྱ། །ཞེས་པ་ནི། ས་དེ་ཐོབ་པ་ལས་བདག་དེ་དང་བྲལ་བར་བྱས་ལ། སའི་ཕྱོགས་སུ་མི་ལྟ་བར་བདུད་རྩི་འཁྱིལ་བའི་སྔགས་བཟླས་པར་བྱའོ། །དེ་ཉིད་བདག་གིས་མཐོང་བ་ལས། །ལེགས་སོ་སྙམ་པའི་ཚིག་ཀྱང་བརྗོད། །དེ་ནས་ས་ཕྱོགས་རབ་དབེན་པར། །བདག་གིས་སྦྱོར་བ་ལེགས་བརྩམ་བྱ། །ཞེས་པ་ལ། དེ་ཞེས་པའི་བུ་མོ་དེ་བུ་མོ་བདག་གིས་ས་བླངས་ནས་འོང་པ་མཐོང་བ་དང་ལེགས་སོ་ཞེས་བྱ་བའམ། ཡང་ན་རྗེས་སུ་ཡི་རང་བའི་ཚིག་གིས་བརྗོད་པར་བྱའོ། །དེ་ཀུན་ནས་དབེན་པའི་ས་རུ་བདག་རྣལ་འབྱོར་པས་དཀྱིལ་འཁོར་ལ་སོགས་པའི་སྦྱོར་བས་བརྩམ་པར་གསུངས་སོ། །རྒྱར་ནི་ཁྲུ་དོ་ངེས་པ་ལས། །ཞེས་པ་ནས།

---

^{[མ་དཔེ་གཟིགས་ན་འདིར་གནོན།]}

ཡང་དག་པར་ནི་བསྐོར་བར་བྱ། །ཞེས་པའི་བར་ནི་གོ་སླ་བས་འདིར་མ་བཤད་དོ། །སྔུན་དུ་སོར་བརྒྱད་བསྐོར་བ་ནི། །མདོག་དམར་ཀུན་ནས་ཟླུམ་པར་བྱ། །དེ་སྟེང་ཀླུ་རིགས་དྲུག་པོ་དག །ཉ་དང་སྦལ་པ་ལྕོང་མོ་དང༌། །སྦྲུལ་དང་རྩངས་པ་ཆུ་སྲིན་དང༌། །མི་དང་རུས་སྦལ་བ་ལང་དང༌། བྱི་ལ་ནོར་བུ་རྒྱལ་འབུད་རྣམས། །གཙོ་བོའི་ཆ་ཡིས་གཟུང་བྱས་ནས། །ཤུལ་དུ་དྲག་པར་དྲངས་བྱས་ལ། །ཞེས་བྱ་བ་ལ། སྔོན་དུ་ནི་དཀྱིལ་འཁོར་ཆེན་པོའི་ཡང་སྔུན་དང༌། བདག་གི་ཡང་སྔུན་དུ་སོར་མོ་བརྐྱང་བ་ནི་མཐོ་སྟེ། མཐོ་གང་ཟླུམ་པོར་བསྐོར་བར་བྱས་ལ། །ཁ་དོག་མཚལ་ལ་སོགས་པས་ཡོངས་སུ་བྱུག་པར་བྱ་བའོ། །དེའི་སྟེང་དུ་ཀླུ་བ་སུ་ཏ་རིགས་དྲུག་པོ་རྣམས་བག་ཟན་ལས་གཟུགས་བྱ་སྟེ། ཤུལ་དུག་གི་ཤུལ་ནས་དྲག་པར་དྲངས་ནས་བཀུག་པའོ། །དེ་ཡང་ཅི་ཀུན་ནམ་འོན་ཏེ་འགའ་མཉམ་པ་ལས། །གཙོ་བོའི་ཆ་ཡིས་གཟུང་བྱས་ནས། །ཞེས་གསུངས་ཏེ། གཙོ་བོ་ནི་ཟུང་དུ་བསྡེབས་པའི་དང་པོ་རྣམས་སོ། །མ་ཏུ་ལུང་ཀའི་ཕྱེ་མ་ཡིས། །གཞི་བཀང་རིགས་མཐུན་དངོས་པོ་ནི། །རབ་ཏུ་གསལ་བར་བྱ་བ་ཡིན། །ཞེས་པ་ལ། མ་ཏུ་ལུང་ཀའི་ཤིང་གི་ལོ་མའི་ཕྱེ་མས་དེའི་སྟེང་ཡོངས་སུ་བཀང་ལ། རིགས་མཐུན་པ་ནི་ལི་ཁྲིའི་ཕྱེ་མས་གསལ་བར་བྱས་པ་ནི་མཚམས་ཡོངས་སུ་གཅད་པར་བྱ་བར་གསུངས་སོ། །མཚན་མོ་དྲག་པོའི་གཏོར་མ་ལ། །སྣང་བ་ཞི་བ་དེས་པར་བྱ། །བཟླས་པའི་སྔགས་ནི་རབ་འབར་བས། །དྲག་པོའི་ཕྲེང་བ་གཟུང་བྱས་ནས། །གྲུ་དག་སྔོན་པོས་ཕུབ་བྱས་ཏེ། །ཞེས་བྱ་བ་ལ། མཚན་མོ་ལ་དྲག་པོའི་གཏོར་མ་གཏང་བར་བྱ་བ་དང༌། ཉིན་མོ་ལ་ཞི་བའི་གཏོར་མ་གཏང་བར་གསུངས་པ་དང༌། དྲག་པོའི་ཕྲེང་བས་དྲག་པོའི་རིགས་ལ་ཉེ་བར་བཟུང་སྟེ། བཟླས་པའི་སྔགས་བཟླས་པར་འབྲེལ་ཏོ། །གུར་སྔོན་པོས་ནི་དཀྱིལ་འཁོར་ཕུབ་པར་གསུངས་སོ། །ཇི་སྲིད་དེ་ཉིད་མ་རྫོགས་པར། །བདག་གིས་བལྟ་བར་མི་བྱ་ཞིང༌། །དྲག་པོ་ཉིད་ལ་མངོན་པར་བཟླས། །ཞེས་བྱ་བ་ལ། བཟླས་པའི་སྔགས་འབུམ་དུ་མ་རྫོགས་པར་བདག་གིས་དཀྱིལ་འཁོར་བལྟ་བར་མི་བྱ་བ་དང༌། དྲག་པོ་ཉིད་ནི་དྲག་པོ་ཉིད་ལ་ངེས་པར་བཟླས་པར་འབྲེལ་ཏོ། །དེ་ཡི་

---

^{[མ་དཔེ་གཟིགས་ན་འདིར་གནོན།]}

ཕྱི་རིམ་དག་ལ་ནི། །ཞེས་པ་ནས། རབ་འབྲིང་ཐ་མར་ཡང་དག་ལྡན། །ཞེས་པའི་བར་དུ་གོ་སླའོ། །བདག་གིས་གཙོ་བོའི་ཆ་ལུགས་ལ། །སྔགས་དང་ཕྱག་རྒྱ་ཡང་དག་བགོ །བཟླས་པའི་གྲངས་སུ་རྫོགས་བྱས་ལ། །ནད་པ་དེར་ནི་བཀུག་བྱས་ཏེ། །ཞེས་བྱ་བ་ལ། བློ་གོས་ལ་སོགས་པ་ལ་སྔགས་ཀྱིས་བསྔགས་ལ། གོན་པའི་དུས་སུ་བཛྲ་པཱ་ཎི་ཧཱུཾ་ཞེས་པས་རྡོ་རྗེ་རྩེ་ལྔ་པའི་ཕྱག་རྒྱས་རྒྱན་ཆ་བདུན་དུ་བགོ་བར་གསུངས་སོ། །བཟླས་པའི་གྲངས་འབུམ་དུ་ཐིམ་པར་བྱ་ལ་ནང་པ་དེར་ཞེས་པ་ནི་དཀྱིལ་འཁོར་གྱི་རྩར་བཀུག་པར་འབྲེལ་ཏོ། །དེ་ཡང་དཀྱིལ་འཁོར་གྱི་བྱང་ཕྱོགས་སུ་ཡང་དག་པར་གནས་པར་བྱའོ། །དངུལ་གྱི་རྫིང་བུ་ཉིད་དུ་ཡང༌། །བྲང་གི་ས་བོན་དཀར་པོ་ཡིས། །ཡོངས་སུ་གང་བར་བྱ་བར་ཡིན། །ཞེས་བྱ་བ་ལ། དངུལ་གྱི་རྫིང་བུ་ནི་གཞོང་པ་ལ་བྱ་སྟེ། དེ་དང་བྲང་གི་ས་བོན་ནི་ནུ་ཞོས་ཡོངས་སུ་གང་བར་འབྲེལ་ཏོ། །རྫོགས་པའི་སྒྲ་ལྡན་བཅུ་དྲུག་གིས། །ལྕགས་ཀྱི་སྐམ་པས་ཀ་བི་ཙའི། །ཤིང་དག་སོར་ནི་བཅུ་གཉིས་པར། །ཡོངས་སུ་གཅད་པར་བྱས་པ་ལས། །སྔགས་ཀྱིས་མངོན་པར་བཟླས་བྱ་སྟེ། །དེ་ཉིད་དག་ཏུ་སྤང་བར་བྱ། །ཞེས་བྱ་བ་ལ། རྫོགས་པའི་སྒྲ་དང་ལྡན་པ་ནི་པུ་རུ་ཥའི་སྒྲས་བྱེད་པ་ལ་འཇུག་པ་དང༌། བསྲུང་བྱ་ལ་ངེས་པའི་སྒྲ་སྦྱར་བས་ནི་སྐྱེས་བུ་ལ་འཇུག་སྟེ། སྐྱེས་པ་ལོ་བཅུ་དྲུག་ལོན་པས། ལྕགས་ཀྱི་སྐམ་པ་ངེས་པར་བཟུང་ནས། །དེ་ཡིས་ཤིང་ཀ་བི་ཙའམ། །བལ་པོ་སེའུའི་ལྕུག་མ་ལས་སོར་བཅུ་གཉིས་པ་བཅད་ནས་དེ་ཉིད་དྲག་པའི་སྔགས་ཀྱིས་བཏབ་ལ། འཁོར་གཞོང་དེ་ཉིད་དུ་སྦང་བར་འབྲེལ་ཏོ། །རྨ་བྱའི་མདོངས་ལ་ཞེས་པ་ནས། །རིགས་དྲུག་པོ་ལ་ངེས་པར་གདབ། །ཅེས་པའི་བར་དུ་ནི་གོ་སླ་བས་འདིར་མ་བཤད་དོ། །དེ་ནས་དེ་ཉིད་སྙིང་གར་ནི། །ཐིག་ལེ་དྲུག་ཏུ་ངེས་པར་བྲི། །དེ་སྟེང་རིགས་དྲུག་བསམ་བྱས་ནས། །གཡོན་ན་གནས་པའི་ང་རྒྱལ་མཆོག །སྔགས་ཀྱིས་མངོན་པར་བསྐུལ་བྱས་པས། །དྲག་པོའི་ཤུགས་ཀྱིས་རབ་སོང་སྟེ། །རྔམ་པའི་ཞལ་དུ་ངེས་པར་བསྟབས། །ཞེས་བྱ་བ་ལ། དེ་ནས་དེའི་སྙིང་ག་ནི་ནད་པའི་སྙིང་ག་ལ་སོར་བཞིས་པར་ཆོད་པར་བྱས་ལ།

---

^{[མ་དཔེ་གཟིགས་ན་འདིར་གནོན།]}

སྟེང་འོག་ཏུ་ཙནྡན་གི་ཐིག་ལེ་དྲུག་བསྐུ་བར་བྱས་ཏེ། དེའི་སྟེང་དུ་དང་པོའི་གཙོ་བོ་རྣམས་གསལ་བར་བསམ་པའོ། །དེ་ནས་གཡོན་ན་གནས་པ་ནི་ནམ་མཁའ་ལྡིང་སྟེ། དེ་ནི་ང་རྒྱལ་གྱི་རང་བཞིན་ཡིན་པས། དེ་སྔགས་ཀྱིས་ཡང་དག་པར་བསྐུལ་བས་ཤུགས་དྲག་པོ་དང་ལྡན་པར་དེར་སོང་སྟེ། དེ་དག་ངེས་པར་བླངས་ནས་རྔམ་པ་ལག་ན་རྡོ་རྗེའི་ཞལ་དུ་ངེས་པར་བསྟབས་པས་གསོལ་བར་བསམ་པར་འབྲེལ་ཏོ། །དེ་ལྟར་བསམ་པ་རབ་བརྟན་པས། །ཡོངས་སུ་བསྒོམ་པར་བྱ་བ་ཡིན། །དེ་ཡིས་དེ་ལ་གནོད་བྱེད་པ། །སྐད་ཅིག་ཙམ་ཡང་མི་གནས་ཤིང༌། །མྱུར་བར་སྐྲག་པར་ཕྱོགས་བཅུར་འབྲོས། །ཞེས་བྱ་བ་ལ། གོང་དུ་བསྟན་པ་དེ་ལྟར་བསམ་པ་རབ་ཏུ་བརྟན་པར་བསྒོམས་པས། བསམ་པ་དེའི་སྟོབས་ཀྱིས་ནད་པ་དེ་ལ་གནོད་པའི་བགེགས་དེ་ཤིན་ཏུ་སྐྲག་པས་མྱུར་པར་ཕྱོགས་བཅུར་འབྲོས་པར་སྦྱར་རོ། །དེ་ལ་གོང་དུ་སྔགས་རྣམ་པ་མང་པོར་གསུངས་པ་ཐམས་ཅད་ནི་རིམ་པ་ཇི་ལྟ་བ་བཞིན་དུ་འདི་ལས་ཤེས་པར་བྱའོ། །ཨོཾ་བཛྲ་ཀྲོ་དྷ་ཞེས་པ་ནས། བི་དྷྭ་ནྶ་ན་ཧཱུཾ་ཕཊ། ཅེས་པའི་བར་ལ་བླ་མའི་མན་ངག་ལས་ཡང་དག་པར་ཤེས་བྱའོ། །བཞིན་ནི་རབ་ཏུ་འབར་བ་དང༌། །ཞེ་སྡང་རྡོ་རྗེའི་ཏིང་འཛིན་གྱིས། །འབྲུག་སྒྲར་ལྡན་པས་ཡོངས་སུ་གཏུབ། །ཅེས་པ་ནི། དེའི་ཕྱི་ནས་བདག་རྣལ་འབྱོར་པས་ཞེ་སྡང་དྲག་པོ་བསྐྱེད་ལ་བཞིན་ཁྲོ་གཉེར་བཟློག་པས་ཁ་ནས་སྔགས་གོང་མས་འབྲུག་སྒྲ་དྲག་པོ་བརྗོད་དེ། སེང་ལྡེང་གི་ཕུར་པས་རིགས་དྲུག་པོ་ཡང་དག་པར་གཏུབ་པར་འབྲེལ་ཏོ། །དེ་ནས་དྲག་པོའི་སྲས་ཀྱིས་སུ། །ཞེས་པ་ནས། །དེ་ཡང་རྟག་ཏུ་ངེས་པ་ཡིན། །ཞེས་པའི་བར་དུ་ནི་གོ་སླ་བས་འདིར་མ་བཤད་དོ། །དང་པོར་རབ་ཏུ་འབྱོར་པ་ལས། །ནང་གི་བགེགས་ཉིད་བསལ་བ་ཡིས། །ཕྱི་ནས་ཕྱི་ཡི་ནད་བསལ་བ། །སྨན་ལ་སོགས་པའི་སྦྱོར་བ་ཡིས། །མཁས་པས་ཕྱི་ཡི་ནད་བསལ་ཏེ། །ཞེས་བྱ་བ་ལ། དང་པོ་ནི་བསྒྲུབ་པ་དང༌། བསྙེན་པ་རྣམས་ཡོངས་སུ་འབྱོར་བ་ལས་ནང་གི་བགེགས་བསལ་བར་བྱ་སྟེ། ཕྱི་ནས་ཕྱིའི་ནད་བསལ་བར་བྱ་བའི་ཕྱིར་སྨན་སྣ་ཚོགས་པའི་སྦྱོར་བས་རྟེན་ཅིང་འབྲེལ་པར་འབྱུང་བའི་སྟོབས་ལ་བརྟེན་ནས་མཁས་པས་ནད་བསལ་བར་གསུངས་

---

^{[མ་དཔེ་གཟིགས་ན་འདིར་གནོན།]}

སོ། །དེ་ལ་སྨན་ནི་འདི་དག་གོ །བརྒྱལ་ཀ་ལ་སོགས་སྨན་རྣམས་ཀྱིས། །མར་ནག་ཉིད་ལ་ངེས་བཏབ་ལ། །ཞག་གྲངས་བདུན་ནི་མནན་པ་ཡིས། །སྦུ་ཆུང་ལེགས་པར་ཁྱབ་པར་སྣང༌། །ཞེས་བྱ་བ་ལ། བརྒྱལ་ཀ་ཞེས་པ་ནི་སྒྲའི་སྟོབས་ལས་རྣམ་པར་གཅོད་པ་ལ་བྱ་སྟེ། རྣམ་པར་གཅོད་པ་ལྔ་ཏིལ་མར་གྱི་ནང་དུ་བླུགས་ཏེ། ཞག་གྲངས་བདུན་དུ་ཡོངས་སུ་མནན་པ་ལས་དེའི་ཁ་རུ་སྦུ་ཆུང་མུ་ཏིག་ལྟ་བུས་ཀུན་ལ་ཁྱབ་པར་མཐོང་བ་དང༌། ཁ་བསངས་ལ་ཁྱིམ་གཙང་མར་གཞག་གོ །དེ་ནས་སྦྱོར་བ་འདིས་ཡང་དག་པར་བྱ་སྟེ། འདི་སྐད་གསུངས་སོ། །སུག་པ་ལ་སོགས་གཙང་སྦྱར་བས། །གོང་དུ་སྔགས་ཀྱིས་བསྙེན་པར་གནས། །འོད་ཟེར་དཀར་པོ་ཡོངས་གནས་པའི། །ཉི་མ་ཉིད་ལ་ཁྲུས་བྱས་ཏེ། །དྲི་མ་དག་པར་བསལ་བ་ལ། །དྲུག་སྦྱར་ངེས་པར་བསྐུ་བར་བྱ། །ཞེས་པ་ལ། སུག་པ་དང༌། སྤུ་དང༌། ཙནྡན་དང༌། སྦྲང་རྩི་ལ་སོགས་པ་དྲུག་གིས་ཡང་དག་པར་སྦྱར་བར་བྱ་ལ། གོང་དུ་གོང་གི་སྔགས་ཀྱི་བསྙེན་པས་སྔགས་ཀྱི་ཆུ་ལ་འབུམ་དུ་ཡོངས་སུ་བཏབ་པས་དེ་ནས་འོད་དཀར་པོ་གང་ལ་ཡོད་པ་དེ་ལ་འོད་ཟེར་དཀར་པོ་ཅན་ཏེ། དེ་ཡོངས་སུ་རྫོགས་པའི་ཉི་མ་དང་པོ་ལ་ཁ་ཤར་དུ་བལྟས་ཏེ། སྔགས་ཀྱི་སྦྱོར་བས་ཁྲུས་བྱ་བར་འབྲེལ་ཏོ། །དེ་ནས་དྲི་མ་དག་པ་ལ། དྲུག་སྦྱོར་ནི་རྣམ་གཅོད་ལྔ་དང་ཏིལ་མར་དང་དྲུག་ཏུ་སྦྱར་བར་བྱ་སྟེ། དེ་ཡི་ལུས་ལ་བསྐུ་བར་བྱའོ། །དེ་འོག་མཆོག་གི་སྨན་ཉིད་གང༌། །གྲགས་ལྡན་ཆེན་པོ་སྲང་གཅིག་ནི། །ལེགས་པར་བསྐོལ་བས་ཁ་ཉིད་དུ། །ཞག་དག་ངེས་པར་འཆགས་པར་འགྱུར། །དེ་ཡིས་ལུས་ལ་བསྐུ་བྱ་ཞིང༌། །ཚིགས་མ་ཞོ་གསུམ་བཟའ་བར་བྱ། །ཞེས་བྱ་བ་ལ། དེའི་འོག་ཏུ་མཆོག་གི་སྨན་ཉིད་ཀྱིས་སྦྱར་བར་གསུངས་ཏེ། དེ་ཡང་གང་ཞེ་ན་གྲགས་ལྡན་ཆེན་པོ་ནི་འཇིག་རྟེན་པ་ཀུན་ལ་གྲགས་པའི་རིགས་སྡུད་དོ། །དེ་སྲང་ནི་བདེ་སྤྱོད་གཅིག་གོ །དེ་ངེས་པར་བཞུ་བ་ལས་མར་ཁ་རུ་འཆགས་ཏེ། མར་ངེས་ལུས་ལ་བསྐུ་བ་དང༌། དེའི་ཚིགས་མ་ཞོ་གསུམ་ཟ་རུ་གཞུག་པར་བྱའོ། །སྙིང་པོ་གསུམ་ལ་ཤ་བཙོས་ཏེ། །ཁུ་བ་ངེས་པར་གཏང་བར་བྱ། །ཞེས་པ་ལ། སྙིང་པོ་གསུམ་ནི་པདྨ་དང༌། །ཨུཏྤ་ལ་དང༌།

---

^{[མ་དཔེ་གཟིགས་ན་འདིར་གནོན།]}

ནཱ་ག་གེ་སར་གསུམ་གྱི་སྙིང་པོ་ལ་བྱ་སྟ། དེ་རྣམས་ཉྭ་ཤའི་ནང་དུ་བཙོས་ལ། དེ་ཡི་ཁུ་བ་ངེས་པར་བླུད་པར་བྱའོ། །གནམ་སྒྲོ་ནག་པོ་ཟུར་གསུམ་པ། །རྩེ་མོ་ཤིན་ཏུ་རྣོ་བ་ལ། །རི་མོ་སྣ་ཚོགས་ཡོད་གྱུར་པ། །བརྒྱ་དག་ཤིན་ཏུ་གདུས་བྱས་ལ། །བཅུ་དྲུག་ཆ་རུ་ངེས་པར་བསྐོལ། །དེ་ཡིས་ལུས་ལ་བསྐུ་བ་དང༌། །ཁ་རུ་ངེས་པར་བླུད་པར་བྱ། །ཞེས་བྱ་བ་ནི། གནམ་སྒྲོ་ནི་གོང་ཀའི་ས་ལ་བྱ་སྟེ་དེ་ཁ་དོག་ནག་པོ་ཟུར་གསུམ་པ་དང་ལྡན་པའི་རི་མོ་སྣ་ཚོགས་པ་དང་ལྡན་པ། སྐམ་པོར་གྱུར་པ། བརྒྱ་ནི་ཤིན་ཏུ་གདུས་པར་བྱ་སྟེ། དེ་ཡང་ཚད་ཇི་ཙམ་དུ་བསྙམས་པ་ལ། བཅུ་དྲུག་ཆ་རུ་ཞེས་གསུངས་པ་སྟེ། བྲེ་བཅུ་དྲུག་ལ་བྲེ་གང་དུ་བསྐོལ་ཏེ། དེ་ཡིས་ལུས་ལ་བསྐུ་བ་དང༌། ཁ་རུ་ཡང་བླུད་པར་སྦྱར་རོ། །དེ་ཡིས་ཀུན་ཀྱང་སྐྱུག་འགྱུར་ཏེ། །ནད་ནི་ངེས་པར་འབྱུང་བར་འགྱུར། །ཞེས་པ་ནི། དེ་བླུད་པས་ནང་ན་གནས་པའི་ནད་སྐྱུག་པར་འགྱུར་བ་དང༌། འབྱང་བར་འགྱུར་བས་ན་འཚོ་བར་འགྱུར་པར་སྦྱར་རོ། །དྲི་ཞིམ་སྣ་ཚོགས་སྦྱར་བ་ཡིས། །ཆང་དུ་ཞག་བཅུ་ངེས་པར་སྦང༌། །དེ་ནས་སྔོན་པོར་གྱུར་པ་དང༌། །ལན་ཚྭ་ཕུལ་གང་ངེས་པར་གདབ། །དེ་བཏབ་ཞག་བཞི་སྤང་བྱས་ནས། །བཅུ་བཞི་པ་ལ་ལོ་མར་ཉིད།། ཕུལ་དོ་དང་ནི་བསྲེས་བྱས་ལ། །སྦུ་བ་དངས་པར་ཡང་དག་བསྐུལ། །དེ་ཡིས་ལུས་ལ་བསྐུ་བ་དང༌། །སུམ་གཉིས་ནང་དུ་ངེས་པར་བླུད། །ཅེས་བྱ་བ་ལ། དྲི་ཞིམ་པོ་སྣ་ཚོགས་པ་ནི་ག་པུར་ལ་སོགས་པ་བཅུ་བདུན་ནོ། །དེ་རྣམས་སྲང་གསུམ་གསུམ་དུ་སྦྱར་ཏེ། ཆང་གི་ནང་དུ་ཞག་བཅུའི་བར་དུ་སྦངས་ལ། དེ་ནས་ལན་ཚྭ་ཕུལ་གང་བླུགས་ན་ཞག་བཞིའི་བར་དུ་གཞག་པར་བྱའོ། །དེ་ནས་ལོ་མར་ཕུལ་དོ་དང་བསྲེས་ལ། །བསྐོལ་བའི་སྦུ་བ་དངས་པར་སྦྱར་རོ། །དེ་ཡང་དང་པོར་ཆང་ནི་དོར་ཤེས་པར་བྱའོ། །མར་ནི་དེའི་ལུས་སུམ་ཆ་བསྐུ་བར་བྱ་བ་དང༌། ཁར་སུམ་གཉིས་བླུང་པར་བྱའོ། །སྦྱོར་བ་དེ་ལ་རབ་བརྟེན་ན། །གདོན་མི་ཟ་བར་འཚོ་བར་འགྱུར། །ཞེས་གསུངས་ཏེ། དེ་ལྟ་བུའི་སྦྱོར་བ་དེ་ལ་བརྟེན་ནས་ངེས་པར་བྱས་ན་ཤ་བརྩེགས་ཞེས་བྱ་བའི་ནད་གདོན་མི་ཟ་བར་འཚོ་བར་གསུངས་ཏེ། བདག་གིས་ཀྱང་

---

^{[མ་དཔེ་གཟིགས་ན་འདིར་གནོན།]}

ཡང་དག་པར་འཚོ་བར་མཐོང་བའི་ཕྱིར་ངེས་པར་འགྲུབ་པའོ། །རྡོ་རྗེ་མེ་ལྕེའི་རྒྱུད་ཀྱི་འགྲེལ་པ་དེ་ཁོ་ན་ཉིད་སྣང་བ་ཞེས་བྱ་བ་ལས་ལེའུ་བདུན་པའི་བཤད་པའོ།། །།

བརྒྱད་པ། ཚངས་པ་སྲིན་པོའི་གདོན་འདུལ་བའི་ལེའུའི་བཤད་པ།

---

^{[མ་དཔེ་གཟིགས་ན་འདིར་གནོན།]}

དེ་ནས་ལག་ནས་རྡོ་རྗེ་ཡིས། །ཞེས་པ་ནས། ཐ་མལ་བ་ཡི་འགྲོ་བ་མིན། །ཞེས་པའི་བར་དུ་ནི་གོ་སླ་བས་འདིར་མ་བཤད་དོ། །བྲམ་ཟེའི་སྔགས་དང་མི་བཟད་པ། །ཡང་ན་དྲག་པོའི་སྒྲ་ལྡན་པ། །སྟོན་མོ་བཅུ་བཞི་བྱས་པ་ལས། །ཞག་གསུམ་པར་དུ་དཀར་གསུམ་ཟས། །རྒྱུན་མི་འཆད་པར་སྦྱིན་པར་བྱ། །ཞེས་བྱ་བ་ལ། བྲམ་ཟེ་སྔགས་པ་མི་བཟད་པ་ནི་བུ་མོ་རྒྱལ་རིགས་ཅན་ལ་བྱ་སྟེ། ཅིའི་ཕྱིར་སྔགས་པ་མི་བཟད་ཅེ་ན། བྲམ་ཟེའི་རྒྱུད་དང་སྲོང་མངོན་པར་རྟོགས་པ་ལས་འདི་སྐད་འབྱུང་ངོ༌། །རྒྱལ་རིགས་བུ་མོ་བཅུ་བཞི་མ། །དམར་སེར་མདོག་ཏུ་འདུག་པ་ལ། །འཇིག་རྟེན་འདི་དང་འདས་པ་ཡི། །དངོས་གྲུབ་བདེ་བ་ཐམས་ཅད་གནས། །ཞེས་འབྱུང་བས་ན། རྒྱལ་པོའི་བུ་མོ་ལོ་བཅུ་བཞི་ལོན་པའམ། ཡང་ན་དྲག་པོའི་སྒྲ་དང་ལྡན་པའི་སྐྱེས་པ་ལ་བྱ་སྟེ། དེ་ཡང་ལོ་ནི་བཅུ་བཞི་ལོན་པ་ལ་བྱ་སྟེ། ཞག་གསུམ་གྱི་བར་དུ་ཟས་དཀར་གསུམ་བྱིན་ལ། བདག་གི་འོག་ནས་འབྱུང་བ་རྣམས་སྒྲུབ་པར་འབྲེལ་ཏོ། །རིག་བྱེད་སྔགས་སུ་ལྡན་པ་ཉིད། །དེ་ལ་བསླབ་པར་བྱ་བ་ཡིན། །ཚངས་པའི་སྐུད་པས་སྟོད་དཀྲིས་ལ། །གོས་དག་དཀར་པོ་ཡོངས་སུ་བསྐོན། །ཞེས་པ་ནི། རིག་བྱེད་ཀྱི་སྔགས་འོག་ནས་འབྱུང་བ་དེ་ཁྱེའུ་ལ་བསླབས་ཏེ། ཚངས་པའི་སྐུད་པ་དཀར་པོ་ལ་སྦོས་ཆུས་བཏབ་སྟེ། སེ་རལ་ཁར་བཅིངས་ནས་གོས་དཀར་པོ་བསྐོན་པར་བྱའོ། །སྤྱི་བོར་ཐོར་ཅོག་བཅིང་བྱ་སྟེ། །ལག་པ་གཡས་བཞི་པ་ཉིད་ལ། །དཀྲི་ཞིང་དངོས་པོ་ཡོངས་སུ་བསྡམ། །ཞེས་བྱ་བ་ནི། སྤྱི་བོར་སྐྲའམ་ཡང་ན་རས་ལས་ཐོར་ཅོག་བཅིངས་ཏེ། ལག་པ་གཡས་པའི་སོར་མོ་བཞི་པ་ལ་ཀུ་ཤས་ཡོངས་སུ་བསྡམས་ནས། ཤར་ཕྱོགས་སུ་གཏང་བར་བྱའོ། །ཤར་ཕྱོགས་དག་ཏུ་སོང་བ་ལས། །ཤིང་ཆེན་རྩ་ནས་ཁྲུ་གང་ཉིད། །འོག་ནས་བརྐོས་པའི་ས་བླང་བྱ། །དེ་སྟེང་རས་ཡུག་དཀར་པོ་ཡིས། །ཐོབ་པའི་ཕྱོགས་སུ་མི་ལྟ་ཞིང༌། །ཤར་

---

^{[མ་དཔེ་གཟིགས་ན་འདིར་གནོན།]}

ཕྱོགས་ཁྲོ་བོའི་སྔགས་བཟླས་བྱ། །ཞེས་བྱ་བ་ལ། ཁྱེའུ་དེ་ཤར་ཕྱོགས་སུ་སོང་བ་ལས། ཤིང་ཆེན་པོའི་རྩ་བ་ནས་ཁྲུ་གང་འོག་ཏུ་བརྐོས་པའི་ས་བླངས་ནས། རས་དཀར་པོའི་ཕ་ཚེའི་ནང་དུ་བླུགས་ཏེ། ཕྱིར་འོངས་པ་ལས་ཕྱི་མིག་མི་ལྟ་བར་ཁམས་གསུམ་རྣམ་པར་རྒྱལ་པའི་སྔགས་འོག་ནས་འབྱུང་བ་བཞིན་བཟླས་པར་བྱའོ། །དེ་ནས་དེ་ཉིད་མཐོང་བ་དང༌། །ཧ་ལ་ཧ་ལའི་སྒྲ་ཡང་བརྗོད། །ཅེས་པ་ནི། དེ་ཉིད་ནི་ཁྱེའུ་སྟེ། ཁྱེའུ་དེ་མཐོང་བ་དང༌། རྣལ་འབྱོར་པས་ཧ་ལ་ཧ་ལ་ཧཱུཾ་ཞེས་བྱ་བའི་སྔགས་བཟླ་བར་བྱའོ། །བ་ཡི་རྣམ་ལྔ་ཉིད་དང་ཡང༌། །ཞེས་པ་ནས། མཐའ་མ་ཡོངས་སུ་འཁོར་བར་བྱ། །ཞེས་པའི་བར་དུ་ནི་གོ་སླ་བས་འདིར་མ་བཤད་དོ། །སྟེང་ཡང་ཕུབ་པས་ཡུངས་ཀར་ལ། །སྔགས་བཟླས་པ་ཡིས་ཡོངས་སུ་བསྣུན། །གཏོར་མ་སྟོབས་རྣམས་སྐྱེད་བྱེད་དང༌། །མཆོད་པ་ལྔ་ཡིས་དུས་གཉིས་སུ། །ཡང་དག་པར་ནི་མཆོད་པར་བྱ། །ཞེས་བྱ་བ་ལ། སྟེང་དུ་ཕུབ་པ་ནི་སྐྱེར་པའི་ཕུར་པས་ཕུབ་ལ། འོག་ནས་འབྱུང་བའི་སྔགས་ཀྱིས་ཡུངས་ཀར་ལ་བསྔགས་ལ། ཚངས་པའི་གཟུགས་ལ་བརྡེག་པར་གསུངས་སོ། །གཏོར་མ་ལས་སྣ་ཚོགས་འགྲུབ་པར་བྱེད་པ་དང༌། སྟོབས་སྐྱེད་པར་བྱེད་པ་ཡིན་པས་དེ་དང་མཆོད་པ་རྣམ་པ་ལྔ་ནི་ལྷ་རྣམས་ལ་ཉིན་མཚན་གཉིས་ལ་ཉིན་ལན་ཅིག་མཚན་ལན་ཅིག་དབུལ་པར་བྱ་སྟེ། གཏོར་མ་ནི་སེམས་ཅན་ཐམས་ཅད་ལའོ། །རང་ཉིད་སྔ་མའི་ཚུལ་གནས་ལ། །ཡིད་ཆེས་ཕྲེད་བ་རྣམས་བཟུང་བས། །དྲག་པོའི་རིགས་ལ་རྩ་བའི་སྔགས། །ཚད་དུ་ཕྱིན་པར་ཡོངས་སུ་བཟླས། །ཞེས་བྱ་བ་ལ། རང་ཉིད་སྔ་མའི་ཚུལ་ནི་ལག་ན་རྡོ་རྗེ་ཉིད་ཀྱི་ཚུལ་དུ་གནས་པར་བྱས་ལ། ཡིད་ཆེས་ནི་མི་ལ་བྱ་སྟེ། མི་རུས་ཀྱི་ཕྲེང་བ་དྲག་པོའི་རིགས་སོར་མོ་ལྔ་པ་ལས་ཡོངས་སུ་བཟུང་ནས་རྩ་བའི་སྔགས་རྣམས་ཚད་འབུམ་དུ་ཕྱིན་པར་བཟླས་པར་འབྲེལ་ཏོ། །དེ་མཐར་སྙིང་པོ་མ་ལུས་པར། །བརྒྱ་རྩ་བརྒྱད་དག་བཟླས་པར་བྱ། །དེ་ཡི་མཐའ་རུ་བཟླས་བྱ་བ། །དེ་ཡི་སྲོག་སྙིང་ངེས་པར་བཟླས། །ཞེས་པ་ལ། རྩ་བའི་སྔགས་ཐིམ་ནས་ལྷ་ཐམས་ཅད་ཀྱི་སྙིང་པོ་རེ་རེ་ལ་བརྒྱ་རྩ་བརྒྱད་དུ་བཟླས་པར་འབྲེལ་ཏོ། །

---

^{[མ་དཔེ་གཟིགས་ན་འདིར་གནོན།]}

དེའི་མཐར་ཚངས་པ་སྲིན་པོའི་སྲོག་སྙིང་བཟླས་པར་བྱའོ། །སྐྱེར་པའི་ཚེར་མར་རབ་སྦངས་ལ། །དཀྱིལ་འཁོར་མཐའ་རུ་གནས་པར་བྱ། །དེ་ནས་འགུགས་པའི་སྔགས་བཟླས་པ། །ཚད་དུ་ངེས་པར་ཐེམ་བྱས་ལ། །ཞེས་བྱ་བ་ལ། སྐྱེར་པའི་ཚེར་མ་བམ་པོར་སྦངས་ལ་མིའི་སྐྲས་ཡོངས་སུ་བཅིངས་ལ་དཀྱིལ་འཁོར་གྱི་རྩར་གཞག་པའོ། །དེ་ནས་ཚངས་པ་འགུགས་པའི་སྔགས་བརྒྱ་རྩ་བརྒྱད་ཡོངས་སུ་བཟླས་པའོ། །དེ་ཉིད་འོངས་པར་མ་གྱུར་ན། །ཞེས་པ་ནས། བདག་ཉིད་སྙིང་ལས་ཆུང་དུ་ཡིན། །ཞས་བྱ་བའི་བར་དུ་ནི་གོ་སླ་བས་འདིར་མ་བཤད་དོ། །འོན་ཏེ་འགྲོ་བར་མི་འགྱུར་ན། །བདག་གི་སྦྱོར་བ་འདི་བརྩམ་བྱ། །ཞེས་བྱ་བ་ནི་འདི་ལྟར་ཤེས་པར་བྱའོ། །འོངས་པར་གྱུར་ན་གོང་མའི་སྔགས་དང་ཕྱག་རྒྱས་དགུག་པ་དང༌། བཀུག་ནས་རིམ་པའི་སྦྱོར་བས་མདུན་དུ་གནས་པར་བྱ་བ་དང༌། འོངས་པའི་རྟགས་བརྟན་པ་དང༌། དང་ལ་ཞི་པའི་ཚིག་གིས་གདགས་པར་བྱས་ལ། གལ་ཏེ་སོང་ན་རྣལ་འབྱོར་པས་སྙིང་ལས་ཆུང་དུས་གནས་པར་བྱའོ། །གལ་ཏེ་འགྲོ་བར་མི་འགྱུར་ན། འོག་ནས་འབྱུང་བའི་སྦྱོར་བར་བརྩམ་པར་གསུངས་པ་ནི་འདི་ལྟར་རོ། །སྐུད་པ་སྣ་ལྔར་ལྡན་པ་ལ། །ཁྲོ་བོའི་སྔགས་ཀྱིས་རབ་བསྔགས་ཏེ། །ཞགས་མིག་དམ་པོས་ནད་པ་བཅིངས། །ལྕགས་ཀྱུས་སྙིང་ནས་དྲངས་བྱས་ནས། །གཡོན་དུ་རྡོ་རྗེ་གཟུང་བྱས་ནས། །གཡས་པས་ཡིད་ཆེན་ཕྲེང་བ་ལ། །ལུས་ངག་ཡིད་གསུམ་རབ་དྲག་པ། །སྔགས་སོགས་ཡོངས་སུ་བཟླས་པར་བྱ། །ཞེས་བྱ་བ་ལ། ཚོན་སྐུད་སྣ་ལྔ་ལ་རྣམ་པར་རྒྱལ་བའི་སྔགས་ཀྱིས་བསྔགས་ལ། སྲད་བུ་དེ་ཡིས་ནད་པ་དེའི་སྐེ་ལ་ཞགས་མིག་གིས་བསྡམས་ཏེ། ལྕགས་ཀྱུ་དང༌། རྡོ་རྗེ་དང༌། ཞགས་པ་གསུམ་ལག་པ་གཡོན་པས་བཟུང་ལ། གཡས་པས་མི་རུས་ཀྱི་ཕྲེང་བས་དྲག་པོའི་རིགས་ལ་བཟུང་བས་སྔགས་འོག་མ་རྣམས་བཟླས་པར་བྱའོ། །ཕྱག་རྒྱ་ལྔ་ཡིས་བསྡམས་བྱས་ལ། །དེ་ཉིད་ལ་ནི་ཡོངས་སུ་དབབ། །ཅེས་པ་ནི། ཞགས་པ་ལ་སོགས་པ་ལྔས་ཡང་དག་བར་བཅིངས་ལ། དེ་ཉིད་གཟུགས་ལ་ཡང་དག་པར་དབབ་པའོ། །

---

^{[མ་དཔེ་གཟིགས་ན་འདིར་གནོན།]}

དེ་ནས་སྐྱེར་པའི་བམ་པོ་ལ། །ཞེས་པ་ནས། གསང་བའི་དོན་དུ་ཁ་དགབ་བྱ། །ཞེས་པའི་བར་དུ་ནི་གོ་སླའོ། །དང་པོ་ནས་སྔགས་རྣམས་ནི་རིམ་པ་ཇི་ལྟ་བ་བཞིན་དུ་འདི་ལས་ཞེས་པར་བྱའོ། །ཨོཾ་བྷུ་ར་ཊ་ཞེས་པ་ནས་ཕཊ་གསུམ་པོའི་བར་དུ་ནི་སྔགས་སུ་རིག་པར་བྱའོ། །དེ་བསྲེགས་བདག་གི་ལུས་ངག་ནི། །ཚིག་པས་དེ་ལ་འགྱོད་པའི་ངག །བདག་གིས་ངེས་པར་བརྗོད་པར་བྱ། །དེ་ཡིས་དེ་ལ་ལུས་ལ་སོགས། །གདོན་དང་བྲལ་བས་ཞི་བར་འགྱུར། །ཞེས་པ་ལ། ཚངས་པ་དེ་བསྲེག་པས་ལུས་ངག་རྣམས་ཚིག་པས། །དེ་ལ་ནི་ཚངས་པ་ལ་སྟེ། འགྱོད་པའི་ཚིག་གིས་རང་ལ་གནོད་པ་རྣམས། །བྱས་པས་རང་ཉིད་སྡུག་བསྔལ་མྱོང༌། །དེ་མྱོང་དགའ་བར་ཚོར་རམ་འདི། །ཞེས་བྱ་བ་ལ་སོགས་པའི་ཚིག་བརྗོད་པར་བྱའོ། །གོང་མའི་སྦྱོར་བས་ནད་པ་དེའི་སྡུག་བསྔལ་དང་བྲལ་ནས་ཞི་བར་སྦྱར་རོ། །དེ་ནས་ཐལ་བས་ནད་པ་ལ། །ལུས་ལ་བསྐུས་ནས་སྲུང་པ་ཡི། །འཁོར་ལོ་འདི་ལྟར་གདགས་པར་བྱ། །ཞེས་བྱ་བ་ལ། ཚངས་པའི་གཟུགས་བསྲེགས་པའི་ཐལ་བས་ལུས་ལ་བསྐུས་ན་གདོན་རྣམས་འཇིགས་པས་ཕྱིས་མི་འཇུག་པར་འགྱུར་རོ། །དཔེར་ན་བྱ་རོག་བསད་པའི་རོ་ཤིང་བ་ཀ་ཏི་བསྲུང་བའི་ཁར་བ་ཞག་པས། བྱ་རོག་གཞན་མ་རྣམས་བས་དེ་འོད་བའི་བསམ་པས་སྐྲག་སྟེ། ཤིང་དེ་ལེགས་པར་བསྲུང་པའོ། །དེ་བཞིན་དུ་བགེགས་རྣམས་ཐལ་བ་ལ་སྔགས་དང་བླ་མའི་མན་ངག་གིས་བཏབ་པས་སྐྲོད་པ་སྟེ། ཕྱིས་མི་འཇུག་པར་འབྲེལ་ཏོ། །སྲུང་བའི་འཁོར་ལོ་ནི་འོག་ནས་འབྱུང་བ་སྟེ་གོ་སླའོ། །ཁམས་གསུམ་རྣམ་པར་རྒྱལ་འབར་བའི། །ཞེས་པ་ནས། ཕྱག་རྒྱ་བཅས་པས་སྔགས་པ་ཡིན། །ཞེས་པའི་བར་དུ་ནི་ཕྱི་ནས་སྔགས་པ་ལ་ལུས་ལ་གཟི་བྱིན་བསྐྱེད་པར་བྱ་བའི་དོན་ཏོ། །སངས་རྒྱས་བྱང་ཆུབ་སེམས་དཔའ་དང༌། །བླ་མ་རྡོ་རྗེ་འཛིན་པ་ལ། །གུས་པ་ཡིས་ནི་སངས་རྒྱས་བདེ། །ཞེས་བྱ་བ་ལ། སངས་རྒྱས་དང་བྱང་ཆུབ་སེམས་དཔའ་དང༌། བླ་མ་རྣམ་པ་གསུམ་ལ་མཆོད་པ་དང༌། ཕྱག་བཙལ་བ་ལ་སོགས་པ་གུས་པར་བྱས་པས་འབྲས་བུ་སངས་རྒྱས་པས་བདེ་བའི་འབྲས་བུ་ཐོབ་པར་གྱུར་པ་ཁོ་

---

^{[མ་དཔེ་གཟིགས་ན་འདིར་གནོན།]}

ནའོ། །མཆོད་པ་རབ་ཏུ་རྒྱས་པ་ཡིས། །སྔོན་དུ་བསྙེན་པ་ཡོངས་སུ་བསྒྲུབ། །ཅེས་བྱ་བ་ནི། སྤྱིར་ཁྱབ་པར་གནས་པ་དང་རྣམ་པར་རྒྱལ་བའི་བསྒྲུབ་པ་དང༌། གོང་དུ་བསྙེན་པ་ཡོངས་སུ་སྒྲུབ་པར་འབྲེལ་ཏོ། །ཁམས་གསུམ་རྣམ་པར་རྒྱལ་ཞེས་བྱ། །ཞེས་པ་ནས། སྟག་གི་པགས་པས་སྨད་དཀྲིས་བྱ། །ཞེས་པའི་བར་དུ་ནི་གོ་སླའོ། །དོན་དང་ལྡན་པའི་སྙིང་པོ་བསམ། །ཁྲག་གིས་དོན་ཡང་བསྐུས་བྱས་ལ། །ནག་པོར་གཏོགས་པའི་འཕྲོ་བ་བརྒྱད། །ཡོལ་བའི་མིང་ལ་ཞུགས་བྱས་ལ། །སྐར་མ་དག་ལ་ངེས་པར་བསྒོམ། །ཞེས་བྱ་བ་ལ། དོན་དང་ལྡན་པའི་སྙིང་པོ་ནི། །བླ་མའི་མན་ངག་ལས་སྤྲོས་པ་ཐམས་ཅད་དང་བྲལ་བའི་ས་བོན་གྱི་གཞི་ངེས་པར་བསྐྱེད་པར་བྱའོ། །ཁྲག་ནི་མིའི་ཁྲག་གིས་ལུས་བསྐུས་ནས་ནག་པོར་གཏོགས་ནག་པོར་གཏོགས་པ་སྟ། དེའི་ཚེས་བརྒྱད་ལ་མིག་དམར་གྱི་སྐར་མ་ལ་རྣལ་འབྱོར་པས་ཞུགས་ལ་སྐུར་མ་ལ་ཡོངས་སུ་བསྒོམ་པར་བྱའོ། །ཆང་འདུ་བ་ལ་གནས་བྱས་ལ། །ཤེས་རབ་ཟུང་དུ་འབྲེལ་བ་ཡིས། །སྐར་མ་ཉིད་ལ་མཉམ་སྦྱར་ལ། །བརྒྱད་པ་ཡི་ནི་སྔགས་བཟླས་བྱ། །ཞེས་བྱ་བ་ལ། ཆང་འཚོང་མའི་ཁང་པར་གནས་བྱས་ལ། བུ་མོ་གཞོན་ནུ་མ་ལོ་སུམ་ཅུ་ལས་མི་རྒན་པ་གཉིས་ལ་ཆོགས་ཡོངས་སུ་བཟུང་ལ། གཡས་དང་གཡོན་དུ་བསྙེན་པས་སྐར་མ་མཉམ་པར་སྦྱར་ཏེ། ཐབས་དང་ཤེས་རབ་ཀྱི་འཁོར་ལོ་བརྒྱུད་པས་སྔགས་བཟླས་པར་གསུངས་སོ། །ཞག་གྲངས་བརྒྱ་རྩ་བརྒྱད་པ་ཡིས། །ཞེས་པ་ནས། སྙིང་དུ་སྡུག་པར་ངེས་པ་ཡིན། །ཞེས་བྱ་བའི་བར་དུ་གོ་སླའོ། །མཁའ་འགྲོ་མ་སོགས་ཕྲ་མེན་མས། །བདག་ལ་ལུས་ནི་ངེས་པར་སྟོན། །ཞེས་བྱ་བ་ནི། མཁའ་འགྲོ་མ་དང་ཕྲ་མེན་མ་ལ་སོགས་པས་སྣ་ཚོགས་པའི་གཟུགས་སྟོན་པ་ན་རྣལ་འབྱོར་གྲུབ་པ་ཡིན་པས་ན་བདག་གིས་འཇིགས་པ་བསྐྱེད་པར་མི་བྱའོ། །དེའི་དགོངས་པ་ཇི་ལྟ་བུར་འགྲུབ་ཅེ་ན། སྡུག་བསྔལ་རྟག་ཏུ་མི་འབྱུང་ཞིང༌། །ལྷ་མིན་ལ་སོགས་གདུག་པ་ཡིས། །མེ་ཡི་ཕུང་པོར་མཐོང་བ་ཡིན། །ཞེས་པ་ནི། ཚེ་འདི་དང་པ་རོལ་དུ་སྡུག་བསྔལ་མི་འབྱུང་བ་དང༌། ལྷ་མ་ཡིན་

---

^{[མ་དཔེ་གཟིགས་ན་འདིར་གནོན།]}

ལ་སོགས་པ་གདུག་པ་ཐམས་ཅད་ཀྱིས་མེའི་ཕུང་པོར་མཐོང་བའོ། །བདག་ལ་སྡིག་པ་དམར་པོས་འཇུས། །དེ་ལས་འཇིགས་པ་བསྐྱེད་མི་བྱ། །བདག་ལ་གདུག་པ་སྣ་ཚོགས་པས། །གནོད་པ་སྣ་ཚོགས་བྱེད་པ་ན། །དེ་ལ་འཇིགས་པ་མི་བསྐྱེད་ཅིང༌། །སེམས་དགའ་བ་ཡིས་ཡོངས་སུ་མཆོད། །ཅེས་བྱ་བ་ལ། སྡིག་པ་དམར་པོ་འཇིགས་པའི་གཟུགས་བདག་ལ་སྙིང་གར་འཇུས་པ་ན་སྐྲག་པར་མི་བྱེད་པ་དང༌། བདག་ལ་གདུག་པ་སྣ་ཚོགས་པ་གནོད་པའི་ལས་བྱེད་ན། དེ་ལ་བག་ཚའི་སེམས་མི་བསྐྱེད་མཆོད་པས་དགའ་བར་བྱ་བར་སྦྱར་རོ། །དེ་ནི་དངོས་གྲུབ་ཡིན་པས་ན་དགའ་བའི་སེམས་བསྐྱེད་པའོ། །དེ་ལ་སྤྱོད་པའི་སྔགས་ནི་འདི་ལ་རིག་པར་བྱའོ། །ཨོཾ་ཀ་པ་ལ་ཞེས་པ་ནས། ས་མ་ཡ་ཞེས་པའི་བར་དུ་ནི་རིམ་པ་ཇི་ལྟ་བ་བཞིན་དུ་དངོས་གྲུབ་བསྒྲུབ་པའི་སྔགས་སུ་ཤེས་པར་བྱའོ། །རྡོ་རྗེ་མེ་ལྕེའི་རྒྱུད་ཀྱི་འགྲེལ་པ་དེ་ཁོ་ན་ཉིད་སྣང་བ་ཞེས་བྱ་བ་ལས་ལེའུ་བརྒྱད་པའི་བཤད་པའོ།། །།

དགུ་པ། གཤིན་རྗེ་བྲང་དམར་གྱི་གདོན་འདུལ་བའི་ལེའུའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ལག་ན་རྡོ་རྗེ་གོས་སྔོན་གྱིས། །ཞེས་པ་ནས། ཐབས་འདི་ཡང་དག་སྦྱར་བར་བྱ། །ཞེས་བྱ་བའི་བར་དུ་ནི་གོ་སླའོ། །རང་གི་སྦྱོར་བས་གཟུང་བྱས་ནས། །དྲག་པོའི་སྒྲ་ལྡན་ཉི་ཤུ་པ། །ཤིན་ཏུ་དཔའ་ཞིང་དད་ལྡན་པ། །སྟོབས་ལྡན་གཏུམ་པའི་བདག་ཉིད་ཅན། །ཞག་དྲུག་བར་དུ་བསྙེན་བྱ་བ། །ཞེས་པ་ནི་རང་གི་སྦྱོར་བས་གཟུང་བ་ནི་འོག་ནས་འབྱུང་བ་སྟེ། དེ་ཡིས་ཡོངས་སུ་གཟུང་བར་འབྲེལ་ཏོ། །དྲག་པོའི་སྒྲ་དང་ལྡན་པ་ནི་སྐྱེས་པ་ལ་བྱ་སྟེ། སྐྱེས་པ་ལོ་ཉི་ཤུ་ལོན་པ་ཤིན་ཏུ་དཔའ་བ་དང་ལྡན་པ་སྟོབས་ཆེ་བ། གཏུམ་བག་ཅན་ལ་བདག་རྣལ་འབྱོར་པས་ཞག་དྲུག་གི་བར་དུ་བསྙེན་པར་སྦྱར་རོ། །ཤ་ལྔ་ལ་སོགས་ཆང་བྱིན་ལ། །དེ་ལའང་སྔགས་ཀྱིས་ངེས་བཏབ་ནས། །ཤ་གོས་ཁྲ་པོས་ཡོངས་སུ་བསྐོན། །ཞེས་བྱ་བ་ལ། མི་ལ་སོགས་པའི་ཤ་ལྔ་དང༌། །ཆང་ལ་སྔགས་འོག་མ་བཏབ་ལ་སྦྱིན་པའོ། །ཤ་གོས་ནི་སྨད་གཡོགས་ལ་བྱ་སྟེ། དེ་ཁྲ་བོར་བསྐོན་པར་འབྲེལ་ཏོ། །མེ་ཏོག་ཕྲེང་བས་བརྒྱན་བྱས་ལ། །སྔགས་འདི་དག་གིས་འབུམ་དུ་བཟླས། །དེ་ནས་དེ་ཡི་གཡས་ཉིད་དུ། །ཞགས་པ་ངེས་པར་བསྐུར་བྱས་ལ། །ག་ས་ག་སའི་སྙིང་པོ་བརྗོད། །གཡོན་དུ་

---

^{[མ་དཔེ་གཟིགས་ན་འདིར་གནོན།]}

དངོས་པོ་ལྡུགས་བྱེད་པ། །ཡིད་ཆེན་ལས་ནི་རབ་ཏུ་བརྩམས། །ཞེས་པ་ནི་གོ་སླའོ། །ནག་པོར་གཏོགས་པའི་གསུམ་པ་ལ། །སྐར་མ་ཉིད་ལ་རབ་བསྐུལ་ཏེ། །མཉམ་པ་ཡིས་ནི་བླང་བར་བྱ། །ཞེས་བྱ་བ་ལ། །ནག་པོར་གཏོགས་པའི་ཚེས་གསུམ་གྱི་མཚན་མོ་གཏང་བར་བྱ་བའོ། །དེ་ནས་དེ་ཡིས་མཉམ་པ་ཡིས་ནི་དུར་ཁྲོད་ཀྱིས་ལས་བྱ་སྟེ་དེ་ཡིས་བླང་བར་བྱའོ། །ཅིའི་ཕྱིར་མཉམ་ལ་ཞེས་བྱ་ཞེ་ན། རྣམ་པར་རྟོག་པ་ཐམས་ཅད་དང་བྲལ་བས་ཡིན་པས་ན་མཉམ་པའོ། །དེ་ཐོབ་སྔགས་པ་བློ་ལྡན་པས། །ཞེས་པ་ནས། འབུམ་དུ་ཚང་བར་བཟླས་པར་བྱ། །ཞེས་པའི་བར་དུ་གོ་སླ་བས་འདིར་མ་བཤད་དོ། །བདག་ཉིད་སྔ་མའི་དབྱིབས་གནས་ཏེ། འབོར་གཉིས་རུས་པའི་ཕྲེང་བ་ལ། །དྲག་པོའི་རིགས་ལ་གཟུང་བྱ་སྟེ། །རྩ་བའི་སྔགས་དང་མགོན་པོ་སོགས། །ཐིམ་པར་བཟླས་ཞེས་བྱ་བ་ལ། བདག་ཉིད་ལག་ན་རྡོ་རྗེ་སྔ་མའི་གཟུགས་སུ་གནས་པར་བྱས་ལ། འབོར་གཉིས་ཞེས་བྱ་བ་ནི་རྔ་མོ་ལ་བྱ་སྟེ། །འབོར་གཉིས་དང་ལྡན་པའི་ཕྱིར་རོ། །དེའི་རུས་པ་ལས་བྱས་པའི་ཕྲེང་བ་བཟུང་སྟེ། དྲག་པོའི་རིགས་ལ་རྩ་བའི་སྔགས་དང༌། །མགོན་པོ་ནག་པོའི་སྔགས་རྣམས་གྲངས་སུ་ཐིམ་པར་བཟླས་པར་སྦྱར་རོ། །མཆོད་པ་རྣམ་པ་ལྔ་དག་དང༌། །ཞེས་པ་ནས། དེ་སྟེང་དར་གྱིས་ངེས་པར་གདིང༌། །ཞེས་པའི་བར་དུ་ནི་གོ་སླའོ། །དེ་ལྟར་ཞག་གྲངས་སུམ་ཅུའི་བར། །ཡོངས་སུ་བསྙེན་པར་བྱ་པ་ལས། །ནད་པའི་གོས་ལ་སོགས་བ་དང༌། །ཁ་འཕྲོ་ལ་སོགས་བདག་གི་རྣམས། །སྣོད་དུ་ཐམས་ཅད་བ་སོགས་བྱ་སྟེ། །སྔགས་ཆེན་གྱིས་ནི་ཡང་དག་བསྔགས། །ཞེས་བྱ་བ་ནི། ཟླ་བ་ནི་ཟླ་བ་གཅིག་ཏུ་གོང་དུ་བསྟན་པ་ལྟར་བསྙེན་པས་ནད་པའི་ཁ་འཕྲོ་དང༌། གོས་ཀྱི་སྣལ་མ་དང་དྲི་མ་ལ་སོགས་པ་རྣམས་ཟངས་ཀྱི་སྣོད་དུ་བ་སོགས་ལ། སྔགས་ཆེན་པོ་ནི་གཙོ་བོའི་སྔགས་ཀྱིས་ཡང་དག་པར་བསྔགས་ལ། གཏོར་མ་གཏང་བར་འབྲེལ་ཏོ། །དེ་ལྟར་བསྙེན་པ་རྫོགས་པ་དང༌། །ནད་པ་ཡོངས་སུ་བཀུག་བྱས་ལ། །ཐལ་མོ་ཡོངས་སུ་སྦྱར་བྱས་ཏེ། །སེམས་བསྐྱེད་པ་དང་སྐྱབས་འགྲོ་བྱ། །ཞེས་བྱ་བ་ལ། །བསྙེན་པ་

---

^{[མ་དཔེ་གཟིགས་ན་འདིར་གནོན།]}

རྫོགས་ནས་ནད་པ་བཀུག་ལ་བྱང་ཆུབ་ཏུ་སེམས་བསྐྱེད་པ་དང༌། །གསུམ་ལ་སྐྱབས་སུ་འགྲོ་བ་དང༌། སྔོམ་པ་ནོད་པ་ལ་སོགས་པ་བྱས་ལ་གསོ་བར་བྱ་བར་འབྲེལ་ཏོ། །རྡོ་རྗེ་འབར་བའི་ལྕགས་ཀྱུ་ཡིས། །དེ་ཡི་སྙིང་ལས་དྲངས་བྱས་ལ། །ཧཱུཾ་ཛ་ཕཊ་ཀྱི་སྒྲ་ཡང་བསྒྲགས། །ཞེ་སྡང་རྡོ་རྗེའི་ཏིང་ངེ་འཛིན་དང༌། །ཁྲོ་བོའི་གཟུགས་དང་དྲག་པོའི་སྒྲས། །གཡས་པར་ཕྲེང་བ་ཐོགས་བྱས་ལ། །གཡོན་པས་རལ་གྲི་འབར་བ་གཟུང༌། །ནག་པོ་ཆེན་པོ་རབ་རྦད་ལ། །དེ་ཡི་ཕུང་པོ་འཇོམས་པར་བསམ། །ཞེས་བྱ་བ་ལ། ལག་པ་གཡོན་པས་ལྕགས་ཀྱུ་དང༌། །རལ་གྲི་བཟུང་ནས་གཡས་པ་ཕྲེང་བ་བཟུང་སྟེ། ཞེ་སྡང་ཆེན་པོར་བསྐྱེད་ལ་བཞིན་བཟློག་ནས། དང་པོར་ཛ་ཞེས་པའི་ངག་དྲག་པོར་བཏོན་ཏེ། །ནག་པོ་ཆེན་པོ་རྡབ་ལ་གཤིན་རྗེ་འཇོམས་པར་བསམ་པའོ། །དེ་ནས་སྔགས་པ་ཟློ་ལྡན་པས། །ཞེས་པ་ནས། །ཕྱི་ནས་བགེགས་མི་འཇུག་པ་ཡིན། །ཞེས་པའི་བར་ནི་གོ་སླའོ། །དེ་ལ་གོང་དུ་སྔགས་སྨོས་པ་ཐམས་ཅད་ནི་རིམ་པ་ཇི་ལྟ་བས་འདི་ལས་ཤེས་པར་བྱའོ། །ཨོཾ་ཕཊ་ཕཊ་ཅེས་པ་ནས། རཀྵ་རཀྵ་སྭཱ་ཧཱ་ཞེས་པའི་བར་ལ་སྔགས་རྣམས་རིག་པར་བྱའོ། །དེ་ལྟར་གནོད་པ་ངེས་བསལ་ནས། །རྣལ་འབྱོར་པ་ལ་གནོད་བྱེད་པའི། །དངོས་པོ་གང་དག་གསད་བྱའི་ཕྱིར། །ནག་པོ་ཆེན་པོ་དེ་བསྒྲུབ་བྱ། །ཞེས་བྱ་བ་ལ། ཕན་པ་དང་གནོད་པ་རྣམ་པ་གཉིས་ཀྱིས་གནོད་པར་བྱེད་པ་རྣམ་པ་གཉིས་བསལ་ཏེ། གོང་དུ་བསྟན་པ་དེ་ལྟར་བྱས་པས་སེམས་ཅན་ནད་པ་ལ་གནོད་པའི་བགེགས་བསལ་བར་སྦྱར་རོ། །འདི་ནས་མར་ལ་རྣལ་འབྱོར་པ་ལ་གནོད་པར་བྱེད་པའི་གང་ཟག་བསྟན་ཏེ། འདི་ལྟར་གོ་བར་བྱའོ། །རྣལ་འབྱོར་པ་ལ་གནོད་པར་བྱེད་པའི་དགྲ་གསད་པར་བྱ་བའི་ཕྱིར་ནག་པོ་ཆེན་པོ་བསྒྲུབ་པར་བྱ་བར་འབྲེལ་ཏོ། །སྙིང་རྗེ་ཆེན་པོས་སྦྱོར་བ་བརྩམ། །ཤིན་ཏུ་བརྟགས་ལ་མངོན་པར་བསྒྲུབ། །ཕྲ་མོ་ཙམ་ལ་བྱ་བ་མིན། །བསྟན་པ་ཡོངས་སུ་འཇིག་ལ་སོགས། །ཞེས་བྱ་བ་ལ། སྙིང་རྗེ་ཆེན་པོ་ནི་མི་དེས་གཞན་བསྟེན་ནས་སྡིག་པའི་ལས་མང་པོར་བསྔགས་པས་དེ་ཡུན་རིང་དུ་གནས་ན་དེ་ཉིད་ལ་གནོད་པས། །བདག་

---

^{[མ་དཔེ་གཟིགས་ན་འདིར་གནོན།]}

གིས་སྙིང་རྗེ་རབ་བལྟས་པས། །དེ་གསད་པའི་སྦྱོར་བ་བརྩམ་པར་བྱའོ། །ཤིན་ཏུ་བརྟགས་པ་ནི་དེ་ལྟ་བུའི་མི་བརྟག་པར་བྱའོ། །ཕྲ་མོ་ཙམ་ལ་བྱ་བ་མིན་པ་ནི་རང་གི་ཆེད་དམ་རྫས་ཕྲ་མོ་ཙམ་ལ་བྱ་བ་མིན་པའོ། །ཇི་ལྟ་བུ་ལ་བྱ་ཞེ་ན། བསྟན་པ་དངོས་སུ་འཇིག་པ་ལ་བྱ་བར་གསུངས་སོ། །དེ་ཡང་གནས་ཇི་ལྟ་ཇི་ལྟ་བུར་བྱ་སྙམ་པ་ལས། དངོས་པོར་གཙུག་ལག་ཁང་ཆེན་ནམ། །མཆོད་རྟེན་ཁང་སྟོང་ཆེན་པོའམ། །རབ་ཏུ་སྔགས་པས་དུར་ཁྲོད་མཆོག །བདག་གིས་ནག་པོ་ཆེན་པོ་ཡི། །གཟུགས་བརྙན་ལེགས་པར་བྲིས་པ་ལས། །ཞེས་བྱ་བ་ལ། གཙུག་ལག་ཁང་ཆེན་པོ་དང༌། མཆོད་རྟེན་དང༌། ཁང་པ་སྟོད་པ་དང༌། དུར་ཁྲོད་རྣམས་སུ་མཆོག་ཡིན་པར་གསུངས་པས་དེ་རུ་བདག་གིས་ནག་པོ་ཆེན་པོའི་གཟུགས་བརྙན་གོང་ནས་འབྱུང་བ་བཞིན་དུ་བྲིས་ལ་བྱ་བར་འབྲེལ་ཏོ། །མཆོད་པ་སྣ་ཚོགས་འབྱོར་བ་དང༌། །རབ་གསལ་ལྔ་ཡི་དུད་པ་དང༌། །མི་འཆི་ལྔ་ཡི་དུད་པ་ཡིས། །ཞག་བདུན་བར་དུ་བདུན་པར་བྱ། །ཞེས་བྱ་བ་ལ། །མཆོག་པ་སྣ་ཚོགས་པ་ནི་ཅི་འབྱོར་པའི་མེ་ཏོག་ལ་སོགས་པ་སྟེ། དེས་མཆོད་པར་གསུངས་སོ། །རབ་གསལ་ལྔ་ནི་མི་ལ་སོགས་པའི་ཤ་ལྔའོ། །མི་འཆི་ལྔ་ནི་སྟོབས་མཆོག་པ་ལ་སོགས་པ་སྟེ། །དེ་རྣམས་ཀྱི་དུད་པས་ཞག་བདུན་གྱི་བར་དུ་དེའི་གཟུགས་བརྙན་བདུག་པར་བྱའོ། །དང་པོར་གཞི་མའི་དངོས་པོ་དང༌། ཡིད་ཆེན་པགས་པ་ངེས་པ་ལས། །དེ་ལས་བྱུང་བ་གང་ཡིན་པ། །ཡང་དག་པར་ནི་བྲི་པར་བྱ། །ཞེས་བྱ་བ་ལ། །གཟུགས་བརྙན་བྲི་པའི་གཞི་ནི་ཡིད་ཤས་ཆེ་པའི་ཕགས་པ་བྱ་བ་དང༌། དེ་བྲི་པའི་ཚོན་རྩི་ནི། །དེ་རང་ལས་བྱུང་པའི་ཁུ་བ་དང་སྣག་ཚ་བསྲེག་ལ་བྲི་པར་བྱའོ། །དེ་ནས་གནས་གང་ཡིན་པ་རུ། །སྐར་མ་དག་ལ་ཡོངས་མཆོད་པ། །རབ་གསལ་ལྔ་དང་མི་འཆི་ལྔ། །གཞན་ཡང་རབ་གསལ་སྣ་ཚོགས་པ། ཡང་དག་པ་རུ་མཆོད་པར་བྱ། །ཞེས་པ་ནི། གནས་གཙུག་ལག་ཁང་ལ་སོགས་པ་རུ་མི་ལ་སོགས་པའི་རབ་གསལ་ལྔ་དང༌། སྟོབས་མཆོག་ལྔ་ལ་སོགས་པའི་མི་

---

^{[མ་དཔེ་གཟིགས་ན་འདིར་གནོན།]}

འཆི་ལྔ་དང༌། གཞན་ཡང་རབ་གསལ་སྣ་ཚོགས་པས་སྐར་མ་ལ་མཆོད་པར་འབྲེལ་ཏོ། །དཔའ་བོ་སྣ་ཚོགས་འབྱོར་པ་དང༌། །མཆོད་པ་སྣ་ཚོགས་ཅི་འབྱོར་པས། །ཟླ་གསུམ་བར་དུ་མཆོད་བྱ་ཞིང༌། །རང་ཉིད་ཆ་ལུགས་བསྒྱུར་བ་ཡི། །ལུས་ལ་ཁྲག་གིས་རྣམ་པར་བསྐུ། །ཞེས་བྱ་བ་ལ། དཔའ་བོ་ནི་དཔའ་བར་བྱེད་པའི་རྒྱུ་ལ་དཔའ་བོ་ཞེས་ཟེར་ཏེ། དེ་བས་ན་སྣ་ཚོགས་པས་མཆོད་པ་དང༌། གཞན་ཡང་མཆོད་པ་སྣ་ཚོགས་པས་ཟླ་བ་གསུམ་གྱི་བར་དུ་བདག་ཆ་ལུགས་ནག་པོར་བསྒྱུར་ལ། ལུས་ལ་ཁྲག་གིས་བསྐུས་ནས་མཆོད་པར་སྦྱར་རོ། །རླག་བྱེད་དངོས་པོ་གང་ཡིན་པ། །འབར་བའི་དཀྱིལ་འཁོར་ཕྱོགས་ཀུན་དུ། །སྟོད་ཀྱི་ཚོགས་གཉིས་བཀུག་པ་ཡིན། །ཡོངས་སུ་བྲི་བར་བྱ་བ་ཡིན། །དེ་ཡི་ནང་དུ་དངོས་པོ་གང༌། །ཡང་དག་པར་ནི་བླུགས་བྱས་ལ། །ཞེས་བྱ་བ་ལ། སྟོད་ཀྱི་ཚིགས་གཉིས་ནི་གྲུ་མོ་གཉིས་བཀུག་པར་འབར་བའི་དཀྱིལ་འཁོར་ཟུར་གསུམ་པ་བྲི་བར་བྱས་ལ། དེའི་ནང་དུ་ཕྱོགས་ཀུན་ཁྱབ་པར་རླག་པར་བྱེད་པ་དང༌། འདར་ཤ་དང༌། མགོ་ཆོ་བ་དང་གསུམ་བསྲེག་པས་བླུགས་པར་བྱ་བར་འབྲེལ་ཏོ། །གང་ལ་དམིགས་པར་བྱ་བ་ཡིས། །དངོས་པོ་ཡང་དག་དེར་བསམ་བྱ། །སྔགས་དང་ཕྱག་རྒྱ་སྦྱོར་ཤེས་པས། །གསལ་བར་དམིགས་ཏེ་དབུལ་བྱར་བྱ། །ཞེས་བྱ་བ་ལ། །གང་ལ་དམིགས་པར་བྱ་བ་ནི་གནོད་པར་བྱ་པ་སྟེ། དེའི་དངོས་པོ་དེ་རུ་བསམས་ལ། སྔགས་འོག་མ་དང་ཕྱག་རྒྱ་བཅས་ལ་ནག་པོ་ཆེན་པོ་ལ་དབུལ་བར་བྱ་བར་འབྲེལ་ཏོ། །གཏོར་མ་ཉིད་ལ་སྣ་ཚོགས་པའོ། །དངོས་པོ་ཡོངས་སུ་བླུགས་བྱས་ལ། །མཚན་མོ་ཕྱེད་བས་ཡོངས་སུ་གཏང༌། །ཞེས་བྱ་བ་ནི་གོ་སླའོ། །དེ་ཡི་ཐུགས་ཀ་ཉིད་ནས་ནི། །ཐུགས་ཡིག་བསྡུ་བ་ཡོངས་སུ་བསམ། །འདི་ཡི་སྟོད་ཀྱི་ཆ་གང་ལ། །མི་འགྱུར་གནས་པ་རབ་ཏུ་བསྒོམ། །ཞེས་བྱ་བ་ལ། དེ་ཞེས་པ་ནི་ནག་པོ་ཆེན་པོ་སྟེ། །དེའི་ཐུགས་ཀ་ནས་ཐུགས་ཀྱི་ཡི་གེ་སྡུད་པའི་དངོས་པོ་བསམ་པ་དང༌། འདི་ཞེས་བྱ་བའི་རྣལ་འབྱོར་པའི་རོ་སྟོད་སྙིང་ག་ལ་མི་འགྱུར་པ་གནས་པའི་ཡི་གེ་བསྒོམ་པར་བྱའོ། །འདི་

---

^{[མ་དཔེ་གཟིགས་ན་འདིར་གནོན།]}

གཉིས་ཀྱི་དགོས་པ་ནི་ཁ་དོག་ཇི་ལྟ་བུ་སྙམ་པ་ལ། དེ་གཉིས་དཀར་དང་ནག་པ་སྟེ། །འདི་ལས་འབྲེལ་པར་གྱུར་པ་ཡིས། །དང་པོ་ནག་པོ་དེ་ཉིད་ལས། །དངོས་པོ་དཀར་པོ་གང་ཡིན་པ། །སྟོབས་སྐྱེད་གསལ་བར་གནས་པར་བྱ། །ཞེས་གསུངས་ཏེ། དེ་ཡང་ཇི་ལྟ་བུ་སྙམ་པ་ལ་འདི་ལྟར་ཤེས་པར་བྱའོ། །སྡུད་པ་དང་གནས་པའི་ཡི་གེ་གཉིས། །སྡུད་པ་ནི་གནག་ལ་གནས་པ་ནི་དཀར་པོའོ། །འདི་ལས་ཞེས་པ་ནི་རྣལ་འབྱོར་པས་འདི་ལ་འགྲེལ་པར་འགྱུར་པས། །སྡུད་པ་པོ་ཡི་དངོས་པོ་ནས། །གནས་པའི་དངོས་པོ་ལ་སྟོབས་སྐྱེད་པར་བྱེད་པའི་དངོས་པོ་ནི་ནག་པོས་གནས་པར་བྱ་བར་འབྲེལ་ཏོ། །དེ་ལྟར་སྐད་ཅིག་དུ་མ་ཡིས། །ཞེས་པ་ནས། ངེས་པ་ཉིད་དུ་འགྲུབ་པ་ཉིད། །ཅེས་པའི་བར་དུ་ནི་གོ་སླ་བས་འདིར་མ་བཤད་དོ། །དེ་འགྲུབ་བསྒྲུབ་བྱ་གང་ཡིན་པ། །དེ་ཉིད་རྣམ་གསུམ་བསྲེས་པ་ཡིས། །ཆག་གང་བ་ཡི་དབྱིབས་བྱས་ལ། །ཞེས་བྱ་བ་ལ། དེ་འགྲུབ་ཅེས་པ་ནི་ནག་པོ་ཆེན་པོ་དེའོ། །དེ་བསྒྲུབ་པ་དང༌། དེ་ཉིད་རྣམ་གསུམ་བསྲེས་པ་ལ་བྱའོ། །དེ་ཉིད་རྣམ་གསུམ་ནི་རང་བྱུང་རྣམ་པར་གསུམ་ལ། ཆགས་གང་བའི་གཟུགས་བྱ་བར་འབྲེལ་ཏོ། །དེ་ཡི་དཀྱིལ་དུ་སྲོག་སྙིང་གཞུག །དེ་ནས་ནག་པོ་ཆེན་པོ་ལ། །མ་ཉེས་པ་ཡི་ཚིག་འདི་བརྗོད། །ནག་པོ་ཆེན་པོ་ཉིད་ལ་བསྟབས། །ཞེས་བྱ་བ་ལ། དེ་ནི་ཆག་གང་བའི་གཟུགས་བྱས་ལ། དེའི་དཀྱིལ་འཁོར་དུ་དེའི་སྲོག་སྙིང་བཅུག་ལ། རང་གིས་མ་ཉེས་པའི་ཚིག་སྐད་དྲག་པོ་བཏོན་ཏེ། །ནག་པོ་ཆེན་པོ་ལ་བསྟབས་པར་འབྲེལ་ཏོ། །ཇི་ལྟར་བསྟབས་ཤེ་ན། འདི་ལྟར་བསྟབས་པར་གསུངས་སོ། །དེ་ཡི་སྔགས་དག་བཟླས་པ་ཡིས། །རབ་གསལ་ལྔ་དང་མི་འཆི་ལྔ། །དཔའ་བོ་ལ་སོགས་ཐམས་ཅད་ཀྱིས། །ཡོངས་སུ་སྦྱར་བ་དེ་ཉིད་གསུམ། །དངོས་པོ་གང་ཉིད་ལ་སོགས་པ། །མཚོན་གྱིས་ཡོངས་སུ་གཏུབ་པར་བྱ། །ཞེས་བྱ་བ་ལ། དེའི་སྔགས་ནི་དྲག་པོ་ཆེན་པོའི་སྔགས་བཟླས་པས། །རབ་གསལ་ལྔ་དང༌། །དཔའ་བོ་ལ་སོགས་པ་ཐམས་ཅད་དད། །དེ་ཉིད་གསུམ་ནི་དུག་ལ་

---

^{[མ་དཔེ་གཟིགས་ན་འདིར་གནོན།]}

སོགས་པ་གསུམ་དུ་སྐྱར་ལ། དངོས་པོ་གང་ནི་དགྲ་བོའི་གཟུགས་རལ་གྲིས་ཡོངས་སུ་གཏུ་བས་ལ་བསྲེག་པར་བྱའོ། །དེ་ནས་མེ་ནི་རབ་སྦར་བས། །སྔགས་དང་ཕྱག་རྒྱ་རབ་ལྡན་པས། །ལུས་ངག་ཡིད་གསུམ་དྲག་པོ་ཡིས། །ལས་ཀྱི་སྦྱོར་བ་ངེས་པར་སྤྱད། །ཅེས་བྱ་བ་ལ། དྲག་པོའི་ཤིན་ལ་མེ་ལེགས་པར་སྦར་ལ། སྔགས་འོག་མ་དང་ཕྱག་རྒྱ་བཅས་པས། །ལུས་ཁྲོ་བོའི་ཆ་ལུགས་སུ་བསྒྱུར་ལ། །ངག་སྔགས་དྲག་པོ་ལྡན་པས་སེམས་ཞེ་སྡང་ཆེན་པོར་བསྐྱེད་ལ། དེ་རྣམས་སྲེག་བླུགས་སྟོང་དུ་ཚང་བར་བྱའོ། །སྔགས་རྣམས་ནི་འོག་མ་འདི་ལས་རིག་པར་བྱའོ། །ཨོཾ་མ་ཧཱ་ཀཱ་ལ་ཡཱ་ཞེས་པའི་ནས་སྭཱ་ཧཱ་ཞེས་པའི་བར་དུ་གོ་བར་བྱའོ། །དེ་ནས་སྔགས་པ་ཡོངས་རྟོགས་པས། །ཞེས་པ་ནས། གོང་མའི་སེམས་ཀྱིས་ཡང་དག་སྦྱར། །ཞེས་པའི་བར་དུ་གོ་སླ་བསམ་མ་བཤད་དོ། །དེ་ལ་བླ་མའི་མན་ངག་གིས། །ཡང་དག་པར་ནི་དབྱེ་བར་བྱ། །བླ་མ་ཉིད་ལ་ཅི་ནུས་པས། །ཡོངས་སུ་མཆོད་པས་མན་ངག་བྲལ། །ཞེས་བྱ་བ་ལ། དེ་ལ་ཞེས་པ་ནི་གོང་དུ་སྨྲས་པའི་སྦྱོར་བ་རྣམས་ལ་སྟེ། །སྦྱོར་བ་དེ་རྣམས་ལ་བླ་བའི་མན་ངག་གིས་རིམ་པ་ཇི་ལྟ་བཞིན་དུ་ཐབས་དང་མན་ངག་རྣམས་ཀྱིས་ཡང་དག་པར་དབྱེ་བའོ། །བླ་མ་ལ་ཇི་ལྟར་བྱས་པས་དབྲལ་སྙམ་པ་ལ་ཅི་ནུས་པས་ཡོངས་སུ་མཆོད་པས་དབྲལ་བར་སྦྱར་རོ། །འདིས་ནི་ངེས་པར་འགྲུབ་པས་ན། །ཡིད་ཆེས་པ་ཡིས་ཡོངས་སུ་འགྲུབ། །ཅེས་པ་ནི། །སྦྱོར་བ་གོང་མ་དེས་ངེས་པར་འགྲུབ་པས་ན་བདག་གིས་ཡིད་ཆེས་པས་ཡོངས་སུ་འགྲུབ་པར་འབྲེལ་ཏོ། །ཡིད་ཆེས་པ་ཞེས་བྱ་བ་ཅིའི་ཕྱིར་སྨོས་ཤེ་ན། ཡིད་མ་ཆེས་པར་སོམ་ཉི་ཟ་བས་མི་འགྲུབ་པར་གསུངས་སོ། །རྡོ་རྗེ་མེ་ལྕེའི་རྒྱུད་ཀྱི་འགྲེལ་པ་དེ་ཁོ་ན་ཉིད་སྣང་བ་ཞེས་བྱ་བ་ལས་ལེའུ་དགུ་བའི་བཤད་པའོ།། །།

བཅུ་པ། གནོད་སྦྱིན་གདོང་སེར་གྱི་གདོན་འདུལ་བའི་ལེའུའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ལག་ན་རྡོ་རྗེ་ཞེས་པ་ནས། །ཐབས་འདི་ཡང་དག་བརྩམས་པར་བྱ། །ཞེས་པའི་བར་ནི་གོ་སླ་བསམ་བཤད་དོ། །དྲག་པོའི་སྒྲ་དང་རབ་ལྡན་པའི། །ཁ་དོག་སེར་བ་སུམ་ཅུའི་གཟུགས། །སྟོབས་དང་ལྡན་ཞིང་རབ་ཏུ་གུས། །

---

^{[མ་དཔེ་གཟིགས་ན་འདིར་གནོན།]}

ཟས་སུ་སྦྲང་རྩི་ཟར་བཅུག་ལ། །ཞག་བདུན་བར་དུ་ངེས་པར་བསྙེན། །ཞེས་བྱ་བ་ལ། དྲག་པོའི་སྒྲ་དང་ལྡན་བ་ནི་སྐྱེས་པའོ། །ཅིའི་ཕྱིར་དྲག་པོའི་སྒྲ་དང་ལྡན་ཞེ་ན། །ཡི་གེ་ངེས་པར་སྦྱོར་བ་ཡི། །ཕོ་ཡི་རྟགས་ནི་འཛིན་པས་ན། །དྲག་པོའི་སྒྲ་དང་ལྡན་པའོ། །སྐྱེས་པ་ལ་སུམ་ཅུ་ལོན་པ་ལ་ཁ་དོག་སེར་པོ་སྟོབས་དང་ཉམས་རྩལ་ཆེ་བ། །རབ་ཏུ་གུས་པར་ལྡན་པ་ལས། །ཟས་རྣམས་ལ་སྦྲང་རྩི་བསྲེས་ཏེ། ཟས་བྱིན་ཞིང་ཞག་བདུན་གྱི་བར་དུ་རྣམ་ཐོས་སྲས་ཀྱི་སྔགས་ཀྱིས་བསྔགས་ལ། །སྤྱི་བོར་མེ་ཏོག་བོར་བར་བྱས་ལ་བསྙེན་པར་བྱའོ། །གོས་དག་ལྗང་གུ་བསྐོན་བྱས་ལ། །ཞེས་པ་ནས། སྙིང་པོ་ཉིད་ཀྱང་གདོན་བྱ་ཞིང༌། །ཞེས་པའི་བར་དུ་ནི་གོ་སླའོ། །དེ་ཐོབ་བྱང་ཕྱོགས་ཁྲོ་བོ་ཡི། །སྔགས་བཟླས་པ་ཡིས་ཕྱིར་མི་བལྟ། །ཞེས་བྱ་བ་ནི། དེ་ཞེས་པ་ནི་ས་ལ་བྱ་སྟེ། །ས་དེ་ཐོབ་པ་དང། བྱང་ཕྱོགས་ན་གནས་པའི་ཁྲོ་བོ་བདུད་རྩི་ཐབ་སྦྱོར་གྱི་སྔགས་བཟླས་ཤིན་ཕྱི་མིག་མི་ལྟར་འོང་བའོ། །སྔགས་མ་བཟླས་ནས་སྐྱོན་ཅི་ཡོད་ཅེ་ན། གནོད་སྦྱིན་གྱིས་གནོད་པར་བྱེད་པའི་ཕྱིར་རོ། །དེ་ནས་སྔགས་པ་ཟློ་ལྡན་པས། །ཞེས་པ་ནས། ཡོངས་སུ་གཏང་བར་བྱ་བ་ཡིན། །ཞེས་པའི་བར་དུ་ནི་གོ་སླ་བའོ། །སྒྲ་སྐད་ཆེན་པོའི་རུས་པ་ལས། །ཕྲེང་བ་བྱས་པས་དྲག་པོའི་རིགས། །དེ་ཉིད་ལ་ནི་བཟུང་བ་ཡིས། །རྩ་བའི་སྔགས་སོགས་འབར་བ་བཟླ། །ཞེས་བྱ་བ་ལ། སྒྲ་སྐད་ཆེན་པོ་ནི་བོང་དུ་སྟེ། དེའི་རུས་བ་ལས་ཕྲེང་བ་བྱས་ལ། སོར་མི་དྲག་པོའི་རིགས་ལ་བཟུང་བས་ལག་ན་དྲོ་རྗེའི་རྩ་བའི་སྔགས་དང༌། རྣམ་པར་རྒྱལ་བ་ལ་སོགས་པའི་སྔགས་རྣམས་ཚད་དུ་ཕྱིན་པར་བཟླས་པར་འབྲེལ་ཏོ། །དེ་དག་གོང་དུ་ཐིམ་འགྱུར་བས། །ལུས་ངན་སྲས་པོའི་སྔགས་བཟླས་པས། །དེ་ཡང་གོང་མའི་ཚད་ཉིད་དུ། །ཕྱིར་པས་ཡོངས་སུ་བཟླས་པར་བྱ། །ཞེས་བྱ་བ་ལ། དེ་དག་ཅེས་པ་ནི་རྩ་བའི་སྔགས་ལ་སོགས་པ་ལ་བྱ་སྟེ། དེ་དག་གོང་དུ་ཐིམ་པ་ལས། །ཕྱི་ནས་རྣམ་ཐོས་སྲས་ཀྱི་སྔགས་གོང་མའི་ཚད་དུ་ཕྱིན་པར་བཟླས་པར་སྦྱར་རོ། །ཡིད་ཆེན་ཕུར་བུ་སོར་

---

^{[མ་དཔེ་གཟིགས་ན་འདིར་གནོན།]}

བཅུ་པ། །ཞེས་པ་ནས། སྔགས་ཆུ་ཡིས་ནི་ཁྲུས་བྱས་ཏེ། ཞེས་བྱ་བའི་བར་དུ་ནི་བཤད་དུ་མེད་པའི་ཕྱིར་མ་བཤད་དོ། །ལུས་ངག་ཡིད་གསུམ་དྲག་པོ་ཡིས། །དངོས་པོ་ཡོངས་སུ་བཅིང་བྱས་ལ། །ཁྲུ་གང་བརྐོས་པའི་ནང་དུ་གཞག །ཕུར་བུས་སྟེང་དུ་གཟིར་བྱས་ལ། །ཕཊ་ཀྱི་སྔགས་ཀྱིས་ཡང་དག་མནན། །ཞེས་བྱ་བ་ལ། ལུས་ཁྲོ་བོའི་གཟུགས་སུ་བསྒྱུར་ལ། །ངག་དྲག་ཅིང་གཏུམ་པ་དང༌། ཡིད་ཞེ་སྡང་ཆེན་པོར་ཡང་དག་པར་བསྐྱེད་ལ། །དངོས་པོ་ནི་བྲིས་སྐུ་དེའི་གཟུགས་བྱས་ཏེ། དེ་ཡང་དག་པར་སྐུད་པས་བཅིངས་ལ། དང་པོའི་ཁུང་གུ་ཁྲུ་གང་བ་རུ་བཅུག་ལ། མི་ནུས་ཀྱི་ཕུར་བུས་སྟེང་དུ་བཙུགས་ལ། ཕཊ་ཉི་ཤུ་རྩ་བཞི་བཟླས་པས་མནན་པར་འབྲེལ་ཏོ། །དེས་ནི་ཞེས་པ་ནས། ཕྱི་ནས་མི་འཇིག་པ་ཡང་ཡིན། །ཞེས་པའི་བར་དུ་ནི་གོ་སླའོ། །གོང་དུ་སྨོས་པའི་སྔགས་རྣམས་ནི་རིམ་པ་ཇི་ལྟ་བུ་བཞིན་དུ། ཨོཾ་བཻ་ཤྲ་བ་ཎ་ཡེ་ཞེས་པ་ནས་ཧཱུཾ་ཞེས་པའི་བར་གྱིས་ཤེས་པར་བྱའོ། །སངས་རྒྱས་བྱང་ཆུབ་སེམས་དཔའ་དང༌། །བདག་ལ་སོགས་པ་ཕཊ་གནོད་གཉིས། །ཡོངས་སུ་སྦྱར་བ་ཡང་དག་བཤད། །དེ་ཉིད་ལུས་ངན་སྲས་པོ་ལ། །གང་བསྟབས་ངེས་པར་དེ་ཉིད་འཇིག །ཅེས་བྱ་བ་ལ། སངས་རྒྱས་དང་བྱང་ཆུབ་སེམས་དཔའ་དང་བདག་ལ་སོགས་པ་རྣམས་ལག་གནོད་པ་དང༌། ཕན་པར་གྱུར་པའི་སྒྲུབ་པ་ཡང་དག་པར་བཤད་པར་བྱ་བར་གསུངས་ཏེ། དེ་ཡང་ལུས་ངན་སྲས་པོ་ལ་ཡོངས་སུ་བསྟབས་ངེས་པར་འཇིག་སྟེ། སྒྲའི་སྦྱོར་བས་བསྟབས་པ་དང༌། །འཇིག་པ་དང་ནི་དོན་གཉིས་ལ་འཇུག་གོ །དེ་ཡང་ཇི་ལྟ་བུ་ཞེ་ན། ལུས་ངན་སྲས་པོ་ལ་གནོད་པར་བྱེད་པ་བསྟབས་པས་དེའི་ལུས་འཇིག་པར་འགྱུར་བའོ། །ལུས་ངན་སྲས་པོ་ལ་བདག་གིས་བསྟབས་པས་འཇིག་པར་སྦྱར་རོ། །དེ་ཡི་སྦྱོར་བ་བྱ་བའི་ཕྱིར། །ལུས་ངན་སྲས་པོའི་སྒྲུབ་པ་བཤད། །དང་པོ་དེ་ཡི་གཟུགས་བྱ་བ། །རམས་དང་ཡུང་བ་རབ་སྦྱར་བས། །བ་དན་ནེའུ་ལེའུ་རྐྱལ་པ་དང༌། །སྐུ་གདུང་གཡས་ཕྱོགས་གཞག་བྱས་ལ། །གོང་མ་ལྟ་བུའི་གཟུགས་

---

^{[མ་དཔེ་གཟིགས་ན་འདིར་གནོན།]}

སུ་བྲི། །ཞེས་པ་ནི་གོ་སླའོ། །གཡས་གཡོན་གཉིས་སུ་དེ་ཉིད་ཀྱི། །ཡི་གེ་གཉིས་པོ་བྲིས་བྱས་ལ། དེ་མཐར་དྲག་པོའི་སྙིང་ངོ་ཁྲི། །ཞེས་བྱ་བ་ནི། གཟུགས་ཀྱི་གཡས་གཡོན་དུའོ། །དང་པོར་འབྱུང་བ་དང་བསྡུས་པའི་གཙོ་བོས་བྱས་ནས་དེའི་མཐར་དྲག་པོའི་སྙིང་པོ་བྲི་བར་བྱའོ། །གསུམ་སྦྱར་དངོས་པོ་འགུགས་བྱེད་པ། །ཚིག་གིས་གསུམ་དུ་ངེས་པ་ལས། །དར་དག་དམར་པོ་ཁ་ཚོན་གང༌། །མེ་ཏོག་ཕྲེང་བས་ཡོངས་སུ་བརྒྱན། །ཞེས་བྱ་བ་ལ། གསུམ་སྦྱར་བ་ལས་དངོས་པོ་མི་ལ་སོགས་པ་འགུགས་པར་བྱེད་པའི་ཚིག་གསུམ་པ་ལ་དར་དམར་པོ་ཁ་ཚོགས་གང་བཏགས་ལ། །མེ་ཏོག་གི་ཕྲེང་བས་བརྒྱན་པར་བྱས་ལ་ཕྱི་ནས་འདི་སྐད་ཡོངས་སུ་གསུངས་པའོ། །དྲི་ཡི་ཕྱེ་མ་སྣ་ཚོགས་དང༌། །རིན་ཆེན་སྣ་ལྔའི་ཕྱེ་མ་ཡིས། །ཕུར་མ་བྱས་པ་གདགས་པར་བྱ། །ཞེས་པ་ནི་གོ་སླའོ། །སྲོག་གི་སྙིང་པོ་བྲིས་བྱས་ལ། །དེ་ཡི་མིང་རུས་ཁྲག་གིས་བྲི། །འབྲུ་དག་དཀར་པོའི་སྟེང་བཙུགས་ལ། །དེ་ཉིད་ལ་ནི་ཆགས་པར་འགྱུར། །ཞེས་བྱ་བ་ལ། ལུས་ངན་དྲས་པོའི་སྲོག་སྙིང་ཟླ་མའི་མན་གང་གིས་འོ་མས་བྲིས་ལ། དེའི་འོག་ཏུ་དགྲ་བོའི་མིང་རུས་རའི་ཁྲག་གིས་བྲིས་ལ། འབྲས་དཀར་པོའི་སྟེང་དུ་བཙུགས་པས་དེ་ལ་ལུས་ངན་སྲས་པོ་འཆགས་པར་འགྱུར་རོ། །དཀྱིལ་འཁོར་ཁྲུ་གང་ཞེས་པ་ནས། །ཡོངས་སུ་ཤེས་པར་བྱ་བ་ཡིན། །ཞེས་པའི་བར་དུ་ནི་གོ་སླ་བས་འདིར་མ་བཤད་དོ། །སྔགས་ནི་བླ་མའི་ངག་ལས་ཤེས་པར་བྱའོ། །ལྷག་མ་ནི་གོ་སླའོ། །རྡོ་རྗེ་མེ་ལྕེའི་རྒྱུད་ཀྱི་འགྲེལ་པ་དེ་ཁོ་ན་ཉིད་སྣང་བ་ཞེས་བྱ་བ་ལས་ལེའུ་བཅུ་པའི་བཤད་པའོ།། །།

བཅུ་གཅིག་པ། བྲིས་སྐུ་དང་གླེགས་བམ་གྱི་ལེའུའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ལག་ན་རྡོ་རྗེ་གོས་སྔོན་གྱིས། །ཞེས་པ་ནས། ཡང་དག་པར་ནི་བསྒྲུབ་པར་བྱ། །ཞེས་པའི་བར་དུ་གོ་སླའོ། །དུར་ཁྲོད་ལ་སོགས་གང་ཡིན་པར། །རི་མོ་མཁན་ནི་རིམ་པར་བཞིན། །ཡང་དག་པར་ནི་དབང་བསྐུར་བྱ། །ཐག་མ་ཡང་བསྙེན་བྱས་ལ། །དྲི་ཞིམ་པ་ཡིས་ཡོངས་སུ་བྱུང༌། །ཅེས་བྱ་བ་ལ། །དུར་ཁྲོད་དང་ཤིན་གཅིག་ལ་སོགས་པའི་གནས་སུ། །རི་མོ་མཁན་དང་ཐག་མ་གཉིས་ཀ་དབང་བསྐུར་ལ། །ཐ་ག་མའི་སྣལ་མ་ལ་དྲི་ཞིམ་པོ་གུར་གུམ་ལ་སོགས་པས་ཡོངས་སུ་བྱུག་པར་བྱའོ། །སྟེང་འོག་གཉིས་

---

^{[མ་དཔེ་གཟིགས་ན་འདིར་གནོན།]}

དང་མཐའ་གཉིས་གསུམ། །མཉམ་པར་བཞག་པས་ཡང་དག་བརྟབ། །ཅེས་པ་ནི་གོ་སླ་སྟེ། ཐ་ག་པས་ཡང་དག་པར་བྱ་བའི་ལས་སོ། །དམར་པོ་ལྔ་ཡིས་རབ་བྱུགས་ལ། །ས་བོན་ཡང་དག་ལྡན་པ་དང༌། །དྲི་ཞིམ་པ་ནི་སྣ་ཚོགས་པས། །ཡང་དག་བར་ནི་བྱུག་བར་བྱ། །ཞེས་བྱ་བ་ལ་དམར་པོ་ལྔ་ནི་རབ་གསལ་ལྔའི་ཁུ་བ་ལ་བྱ་སྟེ། དེ་དང་ས་བོན་ནི་ཡོད་ཆེས་སྐྱེས་པའི་ས་བོན་ལ་བྱ་སྟེ། ས་བོན་དང་ག་པུར་ལ་སོགས་པའི་དྲི་ཞིམ་པ་སྣ་ཚོགས་པས་རས་ལ་བྱུང་བར་སྦྱར་རོ། །ཚོན་རྩི་རྣམ་པར་སྣ་ཚོགས་ལ། །ཡིད་ཆེ་རྣམས་ཀྱི་ཚོན་རྩི་རྣམས། །མཉམ་པར་སྦྱར་བས་བྲི་བར་བྱ། །ཞེས་པ་ནི། རམས་ལ་སོགས་པའི་ཚོན་ཐམ་ཅད་མི་འཆི་བ་རྣམ་ལྔ་ཡིས་སྦྱར་ལ་བྲི་བར་བྱའོ། །སྣོད་དག་ཐོད་པ་ཉིད་ལ་ནི། །པིར་ནི་ཞིང་གི་སྐྲ་ཡིས་བྱ། །དུར་ཁྲོད་ལ་སོག་ཁང་སྟོང་ངམ། །གནས་དབེན་པར་ནི་ཡོངས་སུ་བྲི། །ཞེས་པ་ནི། ཚོན་རྣམས་ཀྱིས་སྣོད་ནི་ཐོད་པའི་དུམ་བུ་ལས་བྱས་ལ། པིར་ནི་ཞིང་ཆེན་གྱི་སྐྲ་ལས་བྱ་སྟེ། །ཁང་སྟོང་ལ་སོགས་པ་གནས་བདེན་པར་བྱའོ། །ལས་མཁན་སྔོན་པོའི་གོས་བགོས་ཏེ། །ཁྲག་གིས་གདོང་ཡང་བྱུང་བྱས་ལ། །སྔགས་འདི་དག་ནི་རྟག་ཏུ་བཟླས། །ཞེས་བྱ་བ་ལ། ལས་མཁན་ནི་རི་མོ་མཁན་ཏེ། དེའི་གོས་སྔོན་པོ་བགོས་ཏེ། མི་ཁྲག་གིས་གདོང་བྱུགས་ཏེ། སྔགས་འགོམ་བཟླ་ཞིང་བྲི་བར་གསུངས་སོ། །སྔགས་ནི་ཨོཾ་ཙནྡྲ་ཞེས་པ་ལ་སོགས་པའོ། །གཏོར་མ་དྲག་པོ་གང་ཡིན་པ། །བྲི་བའི་དུས་སུ་གཞག་བྱས་ལ། །ཟིན་ནས་གཏོར་མ་གཏང་བར་བྱ། །ཞེས་བྱ་བ་ལ། དྲག་པོའི་གཏོར་མི་ནི་རམས་དང་ཤ་སྣ་ཚོགས་པ་དང༌། ཁྲག་སྣ་ཚོགས་པའི་གཏོར་མ་དང་པོ་བྲི་དུས་སུ་བཞག་ལ་བྲིས་པའི་འཕྲོ་བཅད་པ་དང་དེ་གཏང་བར་འབྲེལ་ཏོ། །དང་པོ་ཚོན་རྩི་ཐམས་ཅད་ལ། །རིན་ཆེན་སྣ་ལྔར་བྱིན་གྱིས་བརླབས། །རྡོ་རྗེ་རྩེ་གཅིག་ཕྱག་རྒྱ་ཡིས། །ཡང་དག་པ་དུ་བྲི་བྱ་སྟེ། །སྐྱེས་བྱེད་དང་ནི་ཡོན་བདག་གིས། །བསམས་ཀ་ཡོངས་སུ་བྲི་བར་བྱ། །དང་པོ་ཚོན་རྩི་དཀར་པོ་ལ་སོགས་པ་ཐམས་ཅད་ལ་མུ་ཏིག་ལ་སོགས་པ་ལྔར་སྔགས་དང་ཕྱག་རྒྱ་བྱིན་གྱིས་བརླབ་བ་དང༌། རྡོ་རྗེ་རྩེ་གཅིག་པ་ནི་མཐེ་བོང་དང་གུང་མོའི་བར་དུ་བཅུག་ལ་མཛུབ་མོ་ངེས་པར་བརྐྱང་བས་བྲིས་བར་བྱའོ། །སྐྱེད་བྱེད་ཅེས་པ་ནི་

---

^{[མ་དཔེ་གཟིགས་ན་འདིར་གནོན།]}

མེ་ལ་བྱ་སྟེ། དེ་ཡད་སྐུ་ཉིད་འདྲི་ཙམ་ན། །ཕྱག་རྒྱ་ཆེན་མོའི་ཡུམ་དུ་བྱིན་གྱིས་བརླབས་ལ་དེ་ལས་སྐྱེད་པར་བསམ་སྟེ་བྲིའོ། །དེ་ནས་རྒྱན་འདོགས་པའི་དུས་སུ་ནི་བདག་ཡོན་གྱི་བདག་པོས་རྒྱན་འབུལ་བར་བསམས་ལ་བྲི་བ་ཉིད་དོ། །དཀྱིལ་དུ་པདྨ་བཅུ་དྲུག་པ། །ཞེས་པ་ནས། སྦྱོར་བ་ལེགས་པར་བརྩམ་པར་བྱའོ། །ཞེས་བྱ་བའི་བར་དུ་གོ་སླ་བས་འདིར་མ་བཤད་དོ། །གླེགས་བམ་ངེས་པར་བྲི་བར་བྱ། །ཞེས་པ་ནས། མཉེན་པར་བྱས་པ་ཡོངས་སུ་བསྡམས། །ཞེས་པའི་བར་ནི་གོ་སླའོ། །དེ་ནས་ལག་གཡོན་སྟོད་ཀྱི་བར། །དེ་ཉིད་དག་ཏུ་ཡོངས་སུ་སྦ། །ཞེས་བྱ་བ་ནི། ལག་པ་གཡོན་བའི་སྟོད་ཀྱི་བར་གང་ཡིན་པར་གླེགས་བམ་སྦ་བར་གསུངས་སོ། །སངས་རྒྱས་ལྔ་ཡི་བདག་བོ་མཆོད། །ངེས་པར་རྡོ་རྗེ་རྣོན་པོ་ཉིད། །སྡང་བ་ཐམས་ཅད་འདུལ་བྱེད་ཅིང༌། །དངོས་སུ་དཔའ་བོ་རབ་འབར་བ། །ཞེས་པ་ནི། དཔལ་རྡོ་རྗེ་འཛིན་པ་ཉིད་ཡིན་པའི་ཕྱིར། །སངས་རྒྱས་ལྔ་ཡང་དེའི་ངོ་བོ་ལས་མི་འདའོ། །གསུང་གིས་འདུལ་བའི་བར་དུ་ངེས་པར་བརླག་ཅིང་འཆད་པས་ན་རྡོ་རྗེ་རྣོན་པོ་ཉིད་དོ། །དེ་སྐུ་གསུང་ཐུགས་ཀྱི་བྱིན་གྱི་རླབས་ཀྱིས་གདུག་པ་ཐམས་ཅད་འདུལ་བར་བྱེད་པའོ། །ད་དོས་སུ་ན་མིག་གི་སྣང་བར་མེའི་ཕུང་པོར་མཐོང་བའི་ཕྱིར་རབ་ཏུ་འབར་བའོ། །ཆེན་པོ་ཡི་ནི་ཆེན་པོ་ཉིད། །ཀུན་ལ་མཁའ་འགྲོ་ཆེན་པོ་སྟེ། །སྐུ་ཆེན་རབ་དྲག་འཇིགས་གཟུགས་ཅན། །མཁའ་ལྟར་མཉམ་ལ་ཕྱག་འཚལ་བསྟོད། །ཅེས་བྱ་བ་ལ། འཇིག་རྟེན་པ་རྣམས་ཀྱི་ཆེན་པོ་ནི་དབང་ཕྱུག་ཆེན་པོ་ལ་སོགས་པ་སྟེ། དེའི་ཡང་ཆེན་པོ་ཡིན་པའི་ཕྱིར་ཆེན་པོའི་ཆེན་པོའོ། །ཀུན་ནི་སེམས་ཅན་ཐམས་ཅད་ལ་ཐུགས་ཀྱིས་ནམ་མཁའ་ལས་འགྲོ་བའི་དོན་མཛད་ཅིང་གཤེགས་པས་ན་ཀུན་ལ་མཁའ་འགྲོའོ། །སྐུ་ཆེན་རབ་དྲག་ནི་སྐུ་ཤིན་ཏུ་ཆེ་བ་ལ་རབ་ཏུ་དྲག་པའི་གཟུགས་འཇིགས་པ་དང་བཅས་པས་ན། རབ་དྲག་འཇིགས་གཟུགས་ཅན་ནོ། །མཁའ་ལྟར་མཉམ་པ་ནི་ཐུགས་ཀྱི་ཡེ་ཤེས་ལ་བྱ་སྟེ། སྐུའི་སྤྲུལ་པ་ནི་སྣ་ཚོགས་པར་འགྱེད། གསུང་གི་སྒྲ་ནི་སྣ་ཚོགས་པར་སྒྲོགས་ཀྱང་ཐུགས་ཀྱི་ཡེ་ཤེས་མཁའ་དང་འདྲ་བ་ཀུན་ལ་མཉམ་པར་བཞུགས་པའོ། །དེ་ལ་བདག་རི་མོ་མཁན་

---

^{[མ་དཔེ་གཟིགས་ན་འདིར་གནོན།]}

ལ་སོགས་པས་ཕྱག་འཚལ་ཞིང་བསྟོད་པར་བྱའོ། །ལས་ལ་འཇུག་པ་སྣང་བ་ཉིད། །ཀུན་བཏུད་པས་ནི་དེ་བརྗོད་བྱ། །ཞེས་པས་ནི། རི་མོ་མཁན་དང་འདྲི་མཁན་གྱིས་ལས་ལ་འཇུག་པས་ན། །སྐུ་གཟུགས་སམ་དུ་སྟི་སྣང་བ་མཐོང་བ་ནི། །ཀུན་ནི་ཡང་དག་ཀུན་བཏུས་བས། །གོང་མའི་བསྟོད་པ་བརྗོད་པར་བྱ་ཞིང་ཕྱག་འཚལ་བར་འབྲེལ་ཏོ། །རྡོ་རྗེ་མེ་ལྕེའི་རྒྱུད་ཀྱི་འགྲེལ་པ་དེ་ཁོ་ན་ཉིད་སྣང་བ་ཞེས་བྱ་བ་ལས་ལེའུ་བཅུ་གཅིག་པའི་བཤད་པའོ།། །།

བཅུ་གཉིས་པ། ལས་སྣ་ཚོགས་ཀྱི་ལེའུའི་བཤད་པ།

---

^{[མ་དཔེ་གཟིགས་ན་འདིར་གནོན།]}

ལག་ན་རྡོ་རྗེ་གོས་སྔོན་གྱིས། །བཅོམ་ལྡན་མགོན་ལ་འདི་སྐད་གསོལ། །གང་ཞིག་རྒྱུད་འདི་ལ་སྦྱོར་བས། །ཐམས་ཀྱི་ཡན་ལག་སྣ་ཚོགས་པ། །ཡང་དག་རྒྱས་པར་བཤད་དུ་གསོལ། །ཞེས་བྱ་བ་ལ། ལག་ན་རྡོ་རྗེ་གོས་སྔོན་པོ་དང་ལྡན་པ་དེས་བདག་དང་སེམས་ཅན་ཐམས་ཅད་ཀྱི་མགོན་པོ་བཅོམ་ལྡན་འདས་ལ་གང་ཞིག་རྒྱུད་འདི་ལ་སྦྱོར་བ་ན། ཀུན་རྫོབ་ཏུ་འཇུག་པའི་ཐམས་སྣ་ཚོགས་པ་རྣམས་ཡང་དག་པར་མ་ནོར་བ་བདེན་པ་ཉིད་རྒྱས་པའམ་གསལ་བར་བཤད་དུ་གསོལ་ཞེས་ཞུས་པར་སྦྱར་རོ། །བདེ་གཤེགས་མཆོག་གིས་བཀའ་སྩལ་པ། །དད་པའི་རང་བཞིན་ཅན་གྱི་མིས། །འདི་ཉིད་ལ་ནི་མངོན་པར་བསྒྲུབ། །ཅེས་བྱ་བ་ལ། བདེ་བར་གཤེགས་པ་ཐམས་ཅད་ཀྱི་མཆོག་གིས་རྒྱས་པར་བཤད་པར་གནང་བ་བྱིན་པ་དང་དད་པ་དང་ལྡན་པའི་རང་བཞིན་ཅན་དེས་པར་ཡིད་ཆེས་པས་འོག་ནས་གསུངས་པའི་ཐམས་འདི་ལ་མངོན་བར་བསྒྲུབ་བར་གསུངས་སོ། །ཀླུ་གདུག་འབར་བས་ཟིན་པས་ནི། །ཞེས་བྱ་བ་ནས། གནོད་སྦྱིན་གདོན་དུ་ཡིན་པར་བཤད། །ཅེས་པའི་ཚིག་ཐ་མའི་བར་དུ་ནི་ན་བའི་རྟགས་བསྟན་པ་དང༌། མཚན་མོའི་རྨི་ལས་བསྟན་པ་དང༌། སྔགས་ཀྱི་སྦྱོར་བས་གནོད་པའི་རྟགས་བསྟན་པར་ཤེས་པར་བྱའོ། །དེ་ཡང་གོ་སླ་བའི་ཕྱིར་མ་བཤད་དོ། །ཆོམ་པོ་དང་ནི་ཕྲད་པ་དང༌། །སྦྱོར་བ་འདི་ཡིས་ཡང་དག་སྦྱར། །དུར་ཁྲོད་མི་མང་བསྲེགས་པ་ཡི། །སྣ་ཚོགས་ཐལ་བ་བླང་བྱས་ལ། །ཞེས་བྱ་བ་ལ། དུར་ཁྲོད་ཀྱི་ས་གང་དུ་མི་མང་པོ་

---

^{[མ་དཔེ་གཟིགས་ན་འདིར་གནོན།]}

བསྲེགས་པའི་ཐལ་བ་ནི་སྣ་ཚོགས་པའི་ཐལ་བའོ། །ཅིའི་ཕྱིར་སྣ་ཚོགས་པ་ཞེ་ན། སྣ་ཚོགས་པ་ནི་དུ་མ་ལ་བྱ་སྟེ། རིགས་རྣམ་པ་བཞི་དང༌། གླང་པོ་ཆེན་པོ་ལ་སོགས་པའི་ཐལ་བ་ཡིན་པའི་ཕྱིར་སྣ་ཚོགས་ཐལ་བའོ། །དེ་བདག་གིས་ལག་ན་རྡོ་རྗེའི་སྔགས་བཟླས་ཤིང་གཟའ་ཕུར་བུའི་ཉི་མ་ལ་བླངས་ལ་སྦྱོར་བར་འབྲེལ་ཏོ། །ཆང་དང་ངེས་པར་སྦྲུས་བྱས་ཏེ། །སྦྲུལ་གྱི་པགས་པར་གཏུམས་བྱས་ནས། །ཏིལ་གྱི་གང་བུའི་འབྲས་བུ་ལ། །འབུམ་དུ་ཡང་དག་བཟླས་བྱས་ཏེ། བདག་ཉིད་གོས་ལ་ཡོངས་སུ་གཏུམས། །ཞེས་པ་ལ། ས་དེ་དང་ཆང་གཉིས་སྦྲུས་ལ། སྦྲུལ་གྱི་པགས་པར་གཏུམས་ཏེ། ལག་ན་རྡོ་རྗེ་རྩ་བའི་སྔགས་འབུམ་དུ་ཐེམ་པར་བྱ་སྟེ། དེ་ཡང་ཏིལ་གྱི་འབྲས་བུ་བརྒྱ་ལ་སྔགས་རེ་རེ་དང་སྦྱར་ལ། དེའི་མཐར་སྦྱོར་བའི་ལས་ཀྱི་སྔགས་བཏགས་ཏེ། ལུས་ངག་ཡིད་གསུམ་དྲག་པོ་དང། རྨུགས་པ་དངས་པར་བསམས་པས་བསྣུན་པར་འབྲེལ་ཏོ། །དེ་ནས་ཐེམ་པ་དང༌། བདག་ཉིད་ཀྱི་གོས་འོག་མ་ལ་ཡང་དག་པར་གཏུམས་ལ་གར་འགྲོ་བའི་ཕྱོགས་སུ་བཀྱེར་བར་འབྲེལ་ཏོ། །དེ་ནས་དེ་དར་ཕྲད་པ་ན། །དྲག་པོའི་ལས་ནི་སྦྱོར་བ་ཡིས། །དེ་ཉིད་ལ་ནི་ཕོག་པར་གཏོར། །དེ་ཡིས་དེ་ལ་གཏོར་བ་ཡིས། །དེ་ནི་རེངས་དང་རྨོངས་པར་འགྱུར། །ཞེས་བྱ་བ་ལ། དེ་ནས་དེ་དང་ནི་ཆོམ་པོ་ལ་བྱ་སྟེ། དེ་དང་ཆོམ་པོ་དང་ཕྲད་པ་ན། བདག་གིས་ཞེས་སྡང་དྲག་པོ་བསྐྱེད་ལ། ལུས་རྩ་རྒྱུས་བསྒྲིམས་པས་མིག་བཟློག་སྟེ། སྔགས་དྲག་པོ་བཟླས་པས་ལན་བདུན་གྱི་བར་དུ་ལུས་ལ་ཕོག་པར་གཏོར་བར་འབྲེལ་ཏོ། །དེ་གཏོར་བས་ཆོམ་པོ་དེ་རེངས་པར་འགྱུར་བ་དང༌། རྨོངས་པར་འགྱུར་བ་ནི་ངེས་པའོ། །སྦྱོར་བ་ལས་ཀྱི་སྔགས་ཀྱིས་ནི། །ཨོཾ་མ་ནུ་ཞེས་བྱ་བ་ལ་སོགས་པས་དྲག་པོ་ལ་སྐད་ཆེན་གྱི་ཕྲེང་བས་སོ། །སྒྱུ་མ་དབང་དུ་བསྡུ་བྱས་ནས། །སྦྱོར་བ་འདི་ནི་བརྩམ་པར་བྱ། །ཞེས་པ་ནི། བྲམ་ཟེ་མོ་ལ་སོགས་པ་ཆོ་གའི་ཕྱིར་འགུགས་པར་བྱེད་ན་འོག་ནས་འབྱུང་བའི་སྦྱོར་བ་རྣམས་སྤྱད་པར་བྱའོ། །ངོ་འཇམ་རྡུལ་དང་ཟླ་བ་དང༌། །བགེགས་ཀྱི་གཉེན་པོའི་ཁུ་བ་དང༌། །

---

^{[མ་དཔེ་གཟིགས་ན་འདིར་གནོན།]}

སྒོ་ཆེན་ལས་ཀྱི་ཁུ་བས་སུ། །བྱེད་པ་གཉིས་ཀའི་བར་སྦྲུས་ལ། །དེ་དང་མཐུན་པ་ཉིད་ལ་ནི། །ཡོངས་སུ་བསྐུས་ནས་སྦྱིན་བར་བྱ། །ཞེས་བྱ་བ་ལ། ངོ་འཇམ་ནི་ཤའི་མེ་ལོང་ལ་བྱ་སྟེ། ཤའི་མེ་ལོང་ནི་རྡུལ་དྲིའི་བཞུན་པ་དང༌། ཟླ་བ་ནི་བ་དག་གི་ཟླ་བ་དང༌། བགེགས་ཀྱི་གཉེན་པོ་ནི་ཉུངས་ཀར་ལ་བྱ་སྟེ། དེ་དང་སྒོ་ཆེན་ལས་ཀྱི་ཁུ་བ་ནི་གང་དུ་རྒྱུན་ལུགས་ཀྱི་སྦྱོར་བ་མང་པོ་ལ་སྒོ་ཆེན་ཞེས་ཟེར་ཏེ། དབྱིབས་ཆེ་བ་ནི་མི་ཡིན་ཏེ། དཔེར་ན་ཡོན་ཏན་དུ་མ་དང་ལྡན་པའི་མི་ལ་མི་ཆེན་པོ་ཞེས་ཟེར་བ་དང་འདྲ་བ་སྟེ། དེ་བས་ན་དེའི་ཁུ་བ་དང་ངོ༌། །བྱེད་པ་གཉིས་ཀ་ནི་ལག་པ་གཉིས་ལ་བྱ་སྟེ། ལག་པ་གཉིས་ཀྱི་བར་དུ་སྦྲུས་ལ། དེ་ལ་མཐུན་པའི་དངོས་པོ་གང་ལ་བསྐུས་བས་བུ་མོ་ལ་སྦྱིན་པར་བྱའོ། །དེ་ཡང་དང་པོར་རང་གི་རྟགས་ལ་ཞག་གསུམ་པར་དུ་བཅིངས་པས་སོ། །དེ་ནས་ངེས་པའི་དུས་བཏབ་ལ། །ཁ་སྦྱོར་བ་ནི་ཡང་དག་བསྔགས། །ཞེས་པ་ནི། །བདག་གིས་ཡིད་ལ་བྱའོ། །ངེས་པའི་དུས་ས་ཕྱོགས་དབེན་པར་བཏབ་ལ། དེར་བྱུང་བ་ན་བདག་གིས་ཆོ་གའི་མཆོག་ཁ་སྦྱར་བས་སྔགས་པའོ། །སྔགས་ནི་ཨོཾ་ན་མོ་ཀ་ཞེས་པ་ནས་སྭཱ་ཧཱ། ཞེས་པའི་བར་དུ་གོ་བར་བྱའོ། །ལྷག་མ་ནི་གོ་སླའོ། །ནོར་དག་སྒྲུབ་པར་འདོད་པ་ན། །ནོར་འཛིན་ལྷ་མོ་ཡོངས་སུ་བྲི། །ཞེས་པ་ནི། རྣལ་འབྱོར་པས་སྦྱིན་པ་ལ་སོགས་པ་གཏང་བའི་ཕྱིར། ནོར་སྒྲུབ་པར་འདོད་ན། ནོར་འཛིན་གྱི་ལྷ་མོའི་གཟུགས་བྲི་བར་བྱའོ། །དེ་ཡང་ཇི་ལྟ་བུར་བྲི་བར་བྱ་ཞེ་ན། འདི་སྐད་གསུངས་ཏེ། ཁ་དོག་སེར་བ་ཉིད་ལ་ནི། །ཕྱག་བཞི་པར་ནི་ཡང་དག་བྲི། །ཞལ་གཅིག་ནུ་མ་འབུར་བ་ལ། །གཡས་ཀྱི་དང་པོས་པུ་སྟི་འཛིན། །གཉིས་པས་འབྲས་ཀྱི་སྙེ་མ་འཛིན། །གཡོན་གྱི་དང་པོ་ཉིད་ན་ནི། །རིན་ཆེན་འབར་བ་ཡང་དག་བསྣམས། །གཉིས་པས་ནེའུ་ལེའི་རྒྱལ་པ་བསྣམས། །ཞེས་བྱ་བ་ལ། དེ་ཇི་ལྟ་བ་བཞིན་དུའོ། །དེ་ལ་རྒྱན་ཆ་ལྔ་དང་སྨད་གཡོགས་ལ་སོགས་པས་ཡང་དག་པར་བརྒྱན་ཏེ། པདྨ་དམར་པོའི་སྟེང་ན་བཞུགས་པ་བྲི་བར་བྱའོ། །དེ་ལྟ་བུ་ཡི་གཟུགས་བྱས་ལ། །སྣ་ཚོགས་དྲི་ཡིས་ཡང་དག་མཆོད། །

---

^{[མ་དཔེ་གཟིགས་ན་འདིར་གནོན།]}

མཆོད་པ་རྣམ་པ་ལྔ་དག་དང༌། །ན་བཟའ་དང་ལ་སོགས་པ་ནི། །ཡང་དག་པ་རུ་མཆོད་པར་བྱ། །ཞེས་པ་ནི། གོང་མ་ལྟ་བུའི་གཟུགས་བྱས་ལ་དྲི་སྣ་ཚོགས་པའི་ཐིག་ལེ་བསྐུ་བ་དང༌། མཆོད་པ་རྣམ་པ་ལྔ་ཉིན་མཚན་དུས་དྲུག་ཏུ་དབུལ་བ་དང༌། དཀྱིལ་འཁོར་ཡང་ལེགས་པར་ཕུབ་པས་བསྒྲུབ་པའོ། །ཞག་གྲངས་བརྒྱ་རྩ་བརྒྱད་བར་དུ། །ཡོངས་སུ་བསྙེན་པས་སྔགས་བཟླས་བྱ། །ཞེས་པ་ནི། ཆོ་ག་དེ་ལྟ་བུས་ཞག་བརྒྱ་རྩ་བརྒྱད་དུ་སྔགས་འདི་བཟླས་པར་གསུངས་སོ། །ཨོཾ་བ་སུ་དྷ་ར་ཡེ་ཧཱུཾ། དེ་ནས་འགྲུབ་པར་འགྱུར་བའི་རྟགས། །དེ་ཉིད་གཡོ་བར་འགྱུར་བ་ཡིན། །དེ་འགྲུབ་གཏེར་ནི་རྙེད་པ་རུ། །དེ་ཡིས་ལུང་ནི་སྟོན་པར་བྱེད། །དེ་ནས་དབྱིག་ནི་མི་ཟད་པའི། །བདག་པོར་མི་དེ་ངེས་པར་འགྱུར། །ཞེས་བྱ་བ་ལ། དེ་གྲུབ་པའི་རྟགས་ནི་སྐུ་གཡོ་བའོ། །ལྷ་མོ་གྲུབ་པ་ནི་བདག་ལས་ཕྱོགས་ཆེ་གེ་མོ་འདི་ན་གཏེར་འདི་ལྟ་བུ་ཡོད་པས་ལོང་ཤིག་ཅེས་པའི་ལུང་སྟོན་པར་བྱེད་པ་ནི། །མཚན་མོའི་རྨི་ལམ་ནའོ། །དེ་ནས་བླངས་པ་ལས་དབྱིག་མི་ཟད་པའི་བདག་པོར་སྒྲུབ་པ་པོ་དེ་འགྱུར་བར་ངེས་པར་སྦྱར་རོ། །དེ་ཡང་བླ་མའི་མན་ངག་ལས་ཡིད་ཆེས་པས་སྤྱད་པར་བྱའོ། །མ་རུངས་པ་དག་སྦྱོར་གཞུག་ན། །སྦྱོར་བ་འདི་དག་ངེས་པར་བརྩམ། །ཞེས་བྱ་བ་ནི། མི་གང་དག་རྣལ་འབྱོར་བ་རྣམས་ལ་གནོད་བ་དང༌། འཚེ་བར་བྱེད་པའི་མ་རུངས་པ་རྣམས་བཟོད་པ་ལ་ཉེ་བར་སྦྱོར་བའི་ཕྱིར་འོག་ནས་འབྱུང་བའི་སྤྱོར་བ་རྣམས་བརྩམ་པར་གསུངས་སོ། །དེ་ཡི་ཀུན་གྲགས་ཉིད་དང་ནི། །ཁུ་ཆེན་བ་ལ་སོགས་པ་ལ། །སྔགས་འདི་ཡིས་ནི་འབུམ་དུ་བཟླས། །དེ་ནས་བསྙེན་པ་རྫོགས་པ་ལ། །ཡིད་ཆེན་དུང་ལ་སྦུ་གུ་ཅན། །སོར་བདུན་ཉིད་ལ་དུག་བླུགས་ཏེ། །ཞེས་པ་ལ། དེའི་ཞེས་པ་ནི་མ་རུངས་པའི་དེའི་འོ། །དེའི་ཀུན་གྲགས་ནི་འཇིག་རྟེན་བ་ཀུན་ལ་གྲགས་པ་ཆེན་པོ་ཐོབ་པ་དེ་ལ་བྱ་སྟེ། དེ་དང་ཁུ་ཆེན་འཛག་པ་དང་དེའི་རྗེས་ཀྱིས་བླངས་ལ་དེ་གསུམ་དང་དུག་བསྲེས་ནས་ཡིད་ཆེན་གྱི་དུང་སྤུ་གུ་ཅན་སོར་བདུན་བཅང་ལ། དེའི་ནང་དུ་དངོས་པོ་རྣམས་བླུགས་ཏེ། འོག་ནས་འབྱུང་བའི་སྔགས་

---

^{[མ་དཔེ་གཟིགས་ན་འདིར་གནོན།]}

འབུམ་བཟླས་པར་འབྲེལ་ཏོ། །སྐུད་པ་སྔོན་པོས་རབ་བཅིངས་ལ། །ནུབ་ཕྱོགས་དག་ཏུ་ངེས་པར་གདགས། །དེ་ཡིས་འབྱུང་བས་བསྐྱོད་པས་ན། །མི་དེ་ངེས་པར་སྨྱོ་བར་འགྱུར། །ཞེས་བྱ་བ་ལ། སྐུད་པ་སྔོན་པོ་མེ་ཏོག་བ་ལི་ཀའི་ནང་དུ་བཙོས་པས་ཡོངས་སུ་བཅིངས་ལ། ནུབ་ཕྱོགས་ངོས་སུ་ཀ་ར་བཱི་རའི་ལྕུག་མ་ལ་བཏགས་ཏེ་བཞག་པས། དངོས་པོ་དེ་འབྱུང་བ་རླུང་གིས་བསྐྱོད་པས་མི་དེ་ངེས་པར་སྨྱོ་བར་གསུངས་སོ། །སྔགས་ནི་ཨོཾ་མོ་ཧ་ཡ་ཞེས་པ་ལ་སོགས་པའོ། །མིང་རྣམས་ངེས་པར་མི་གསལ་བས། །རྡོ་རྗེ་མོ་ནི་ཡོངས་སུ་བསྒྲུབ། །ཅེས་བྱ་བ་ལ། མངོན་པར་ཤེས་པ་དང་མི་ལྡན་པས་བསྒྲུབ་པར་བྱ་བ་གཞན་ལ་མིང་མི་གསལ་བའི་ཕྱིར་རྡོ་རྗེ་མོ་སྒྲུབ་པར་འབྲེལ་ཏོ། །དེ་ཡང་ཇི་ལྟ་བུར་བསྒྲུབ་སྙམ་པ་ལ་འདི་སྐད་གསུངས་སོ། །ས་ལ་ཕྱོགས་བཞི་མཚམས་བརྒྱད་དུ། །རེའུ་མིག་བཅུ་གཉིས་བྲི་བྱས་ལ། །མ་རིག་ལ་སོགས་རྟགས་ཀྱིས་ནི། །དངོས་པོ་ཡང་དག་བྲི་བར་བྱ། །ཞེས་བྱ་བ་ལ། ས་ལ་རི་མོ་བཞི་བསྣོལ་ཏེ། ཟུར་བཞི་རུ་ཡང་རི་མོ་བཞི་བྲིས་པས་ལེའུ་ཚེ་བཅུ་གཉིས་སུ་འགྱུར་རོ། །དེ་ནས་ལེའུ་ཚེ་བཅུ་གཉིས་ལ་མ་རིག་པ་ལ་སོགས་པའི་རྟགས་རིམ་པ་ཇི་ལྟ་བ་བཞིན་དུ་ཨ་ལ་སོགས་པ་བྲིས་ལ་བརྟག་པར་གསུངས་སོ། །དེ་ནས་སྔགས་པས་རབ་བསྔགས་ལ། །བསམ་པ་རབ་ཏུ་རྫོགས་བྱས་ཏེ། །དེ་ཉིད་དངོས་པོ་གང་ཡིན་པས། །བསམ་པ་སྦྱོར་བས་མེ་ཏོག་པོར། །ཞེས་པ་ལ། བདག་སྔགས་པས་རྣམ་པར་རྒྱལ་བའི་སྔགས་ཀྱིས་མེ་ཏོག་ལ་བསྔགས་ཏེ། བཟང་ངན་གང་ཡིན་པ་སྟོན་ཅིག་པའི་བསམ་པས་རང་གི་མེ་ཏོག་བོར་བར་འབྲེལ་ཏོ། །གང་དུ་བབ་པ་དེར་གནས་ལ། །ཤེས་རབ་ཅན་གྱིས་རྣམ་དཔྱད་ནས། །བཟང་ངན་ལྟས་རྣམས་ཡོངས་སུ་བཤད། །ཅེས་བྱ་བ་ལ། རྟེན་འབྲེལ་བཅུ་གཉིས་པོ་གང་ལ་བབ་པ་དེ་ལ་བཟང་བ་དང་ངན་པའི་ལྟས་རྣམས་ཤེས་རབ་དང་ལྡན་པས་དཔྱད་ལ་བཤད་པར་བྱའོ། །རིག་པ་ལེགས་པར་སྦས་པ་ཡིས། །བ་ཡི་ལྕི་བར་རབ་གཏུམས་

---

^{[མ་དཔེ་གཟིགས་ན་འདིར་གནོན།]}

ལ། །དང་པོ་གཉིས་སུ་ཤེས་པར་བྱ། །རི་ལུ་བྱེ་བྲག་མེད་བ་ཡིས། །བཅོམ་ལྡན་སྔོན་དུ་གཞག་བྱས་ལ། །ཞེས་བྱ་བ་ལ། རིག་པ་ཞེས་བྱ་བ་ནི་བཟང་བ་དང་ངན་པའི་རིམ་པ་ལ་བྱ་སྟེ། དེའི་མིང་སུ་དང་ཧ་གཉིས་བྲིས་ལ་རམས་ཀྱིས་བཙོས་ལ་བའི་ལྕི་བའི་ནང་དུ་གཏུམས་ཏེ། གཉིས་སུ་བྱས་ནས་རི་ལུ་འདྲ་བ་མཉམ་པར་བྱས་ལ། བདེ་བར་གཤེགས་པའི་མདུན་དུ་གཞག་པར་བྱའོ། །དང་པོར་མཆོད་པ་ཡང་དག་སྦྱོར། །དམོད་དག་ཡོངས་སུ་བཙུགས་པ་ཡིས། །ཞེས་པ་ནི། དང་པོར་བདེ་བར་གཤེགས་པ་མཆོད་པ་རྣམ་པར་ལྔས་ཡང་དག་པར་མཆོད་ནས་ཕྱག་འཚལ་ཏེ། ལྟས་འདི་ངེས་པར་བསྟན་དུ་གསོལ། །ཞེས་པའི་དམོད་གཟུགས་པར་འབྲེལ་ཏོ། །ཤེས་རབ་བཅུ་གསུམ་བདག་ཉིད་ཅན། །དམར་པོ་གོས་ཀྱིས་རབ་བརྒྱན་ཏེ། །ཁྲུས་དག་བེས་པར་བྱས་པ་དང༌། །དྲི་ཡིས་ལུས་ལ་བྱུགས་བྱས་ལ། །ཞེས་པ་ནི། བུད་མེད་ཤེས་རབ་ཀྱི་བདག་ཉིད་ཡིན་པས། བུ་མོ་ལོ་བཅུ་གསུམ་ལོན་བ་ལ་གོས་དམར་ཕོས་ཡང་དག་པར་བསྐོན་པ་དང༌། དང་པོར་ཁྲུས་ལེགས་བར་བྱས་ཏེ་ཙནྡན་གྱིས་ལུས་ལ་བསྐུས་ལ་སྦྱོར་བ་བརྩམ་པར་འབྲེལ་ཏོ། །དཔྲལ་བར་ཐིག་ལེ་དམར་པོ་བསྐུ། །མེ་ཏོག་དྲི་ཞིམ་ཕྲེང་བ་ཉིད། །དེ་ཡི་ལག་ཏུ་སྦྱིན་པར་བྱ། །དེ་ཡིས་དེ་ལས་བླངས་པ་ལས། །དེ་ཉིད་དངོས་པོ་བསམ་བྱ་སྟེ། །བཟང་ངན་ལྟས་སུ་ངེས་པར་སྟོན། །ཞེས་བྱ་བ་ལ། བུ་མོའི་དཔྲལ་བ་ལ་ཐིག་ལེ་དམར་པོ་ལི་ཁྲིས་བསྐུས་ལ། མེ་ཏོག་དྲི་ཞིམ་པོ་བུ་མོའི་ལག་པར་སྦྱིན་ཏེ། བུ་མོས་ཀྱང་དེ་བདེ་བར་གཤེགས་པ་ལ་དབུལ་བར་བྱའོ། །དེ་ནས་བུ་མོ་ལ་བདག་རྣལ་འབྱོར་པས་ཚིག་ཁྱོད་ཀྱིས་གང་ཡང་རུང་བ་ཅིག་ལོང་ཤིག་པར་བརྗོད་པར་བྱའོ། །དེ་ནས་གཅིག་ཕྱེ་བས་ལས་བཟང་ངན་གང་ཡང་རུང་བ་སྟོན་པར་འགྱུར་རོ། །གཞན་ཡང་སྣ་ཚོགས་པའི་ལས་རྣམས་ཡང་དག་པར་སྤྱད་པར་གསུངས་སོ། །དེ་ཡང་ཇི་ལྟ་བུ་ཞེ་ན། ལག་ན་རྡོ་རྗེ་བཀོད་པའི་རྒྱུད་

---

^{[མ་དཔེ་གཟིགས་ན་འདིར་གནོན།]}

ལས་ཤེས་པར་བྱའོ། །འདི་ནས་མར་ནི་སྦྱིའི་བགེགས་འདུལ་བའི་ཐབས་སྟོན་བར་ཤེས་པར་བྱའོ། །སྦྱིར་ན་སྣ་ཚོགས་གདོན་ལ་ནི། །འབར་བ་ཆེན་པོའི་སྔགས་བཟླས་ལ། །གུ་གུལ་ནག་པོའི་དུད་པ་དག །དེ་ཡི་སྣ་རུ་གཏུལ་བྱས་ལ། །ཞེས་བྱ་བ་ནི། གདོན་ཆེན་པོ་བཞི་ལས་མ་གཏོགས་པ་གདོན་བྱིན་པོ་ཐམས་ཅད་ལ་སྦྱོར་བ་འདི་ཡང་དག་པར་སྦྱར་བར་བྱའོ། །འབར་བ་ཆེན་པོ་ནི་ལག་ན་རྡོ་རྗེ་དངོས་ལ་བྱ་སྟེ། དེའི་རྩ་བའི་སྔགས་སྟོང་དུ་ཐེམ་པར་བཟླས་ལ་གུ་གུལ་ནག་པོའི་དུད་པས་ནད་པའི་སྣ་རུ་གཏུལ་བར་བྱའོ།། ཡུངས་ཀར་གུ་གུལ་མེ་ཏོག་དང༌། དེ་ཡི་སྙིང་པོ་བསྲེག་པར་བྱའོ། །དེ་ཡིས་ནད་པ་གང་ཡིན་པ། །བགེགས་དང་ངེས་པར་དབྲལ་བར་བྱ། །ཞེས་བྱ་བ་ལ། གུ་གུལ་དང་མེ་ཏོག་དང༌། ཡུངས་ཀར་གསུམ་ལ། དེ་རེ་རེ་བཞིན་དུ་བགེགས་ཐམས་ཅད་ཀྱི་སྙིང་པོ། སརྦ་བི་གྷྣཱཾ་ཧ་ན་ཧ་ན་ཧཱུཾ་ཀཿ་ཞེས་པས་སྲེག་བླུགས་སྟོང་དུ་ཚང་བར་བྱའོ། །དེས་ནད་པ་དེ་བགེགས་དང་བྲལ་བར་འགྱུར་རོ། །སྲིན་ལག་གཉིས་ལ་སྐུད་བ་ནི། །སྔོན་པོས་ཡང་དག་བསྡམས་བྱས་ལ། །སྤྱི་བོའི་སྐྲ་ལ་སྲད་བུ་གང༌། །བཅིངས་པས་སྔགས་ནི་ངེས་པར་བཟླས། །ཞེས་བྱ་བ་ལ། ནད་པའི་སྲིན་ལག་ལ་སྐུད་པ་སྔོན་པོས་ཡང་དག་པར་བཅིངས་ལ། སྲུང་བའི་འཁོར་ལོ་ཡང་གདགས་པར་བྱའོ། །དེ་ཡང་སྔགས་གོང་མས་ཡང་དག་བར་བྱ་བར་འབྱུང་ངོ༌། །ཅིའི་ཕྱིར་བྱ་ཞེས་པ་ལ་སོགས་པ་ནི་རྒྱུད་གཞན་ལས་གོ་བར་བྱའོ། །འཁྲུག་པའི་སྡེ་དག་རྒྱལ་འདོད་ན། །ཁམས་གསུམ་རྣམ་རྒྱལ་སྙིང་པོ་ཡིས། །འབུམ་དུ་བཟླས་པས་བསྙེན་པ་བྱ། །ཞེས་པ་ནི་གཡུལ་ངོ་བཟློག་པའི་ཕྱིར། ཁམས་གསུམ་རྣམ་པར་རྒྱལ་བའི་སྙིང་པོས། གི་ཝང་ལ་ཡང་དག་བར་འབུམ་དུ་བཟླས་པར་འབྲེལ་ཏོ། །དེ་ནས་ཨ་མྲ་ཏ་ཡི་ལོ་མ་ལ། །ཡུང་བས་ཡོངས་སུ་བྲི་བྱས་ལ། །གི་ཝང་གིས་ནི་རབ་ཏུ་བསྐུ། །ཞེས་པ་ནི། ཨ་མྲའི་ལོ་མ་ལ་གི་ཝང་གིས་ཡང་དག་པར་བསྐུས་ལ།

---

^{[མ་དཔེ་གཟིགས་ན་འདིར་གནོན།]}

ཡུང་བས་ཁམས་གསུམ་རྣམ་པར་རྒྱལ་བའི་སྙིང་པོ་སྟེང་དུ་བྲི་ལ། སྦྱོར་བ་བརྩམ་པར་གསུངས་སོ། །ཅོད་པན་སྤྱི་བོར་གཏུམས་བྱས་ལ། །རང་ཉིད་སྐུ་ར་བསྒོམ་བྱས་ལ། །ལག་པ་གཡས་པ་ཡུངས་ཀར་དང༌། །སྐེ་ཚེ་ཉིད་དུ་སྦྱོར་བ་ཡིས། །སྔགས་བཟླས་སྡིགས་མཛུབ་ཕྱག་རྒྱ་ཡིས། །ཡོངས་སུ་བྲིས་པས་སྡེ་རྒྱལ་འགྱུར། །ཞེས་བྱ་བ་ལ། རྣམ་པར་རྒྱལ་བའི་སྙིང་པོ་ཉིད་དམིགས་ཀྱི་སྤྱི་བོར་གཏུམས་ཏེ། རང་ཉིད་རྣམ་པར་རྒྱལ་བའི་སྐུ་རུ་བསམས་ན་སྐེ་ཆོས་དང། ཡུངས་ཀར་གཉིས་བསྲེས་ཏེ། སྔགས་བཟླས་ཞིང་སྡིགས་མཛུབ་ཀྱི་ཕྱག་རྒྱ་བཅས་པས་གཡུལ་གྱི་ཕྱོགས་སུ་རྒྱ་གྲམ་བྲི་བར་བྱ་བར་གསུངས་སོ། །དེ་ཡང་སྐེ་ཚེ་དང་ཡུངས་ཀར་གཉིས་ལ་ཡང་གང་དུ་སྔགས་བཟླས་པར་ཤེས་པར་བྱའོ། རྣལ་འབྱོར་པ་ཡི་བདག་ཉིད་ལ། །འཆི་བ་བསླུ་བར་ཡང་དག་བྱ། །ཞེས་བྱ་བ་ལ། བདག་རྣལ་འབྱོར་ལ་ཡུན་རིང་དུ་རྣལ་འབྱོར་བསྒྲུབ་པའི་ཕྱིར། དུས་མ་ཡིན་པར་འཆི་བ་བདག་གིས་བསླུ་བར་བྱའོ། །དེ་ལ་ཇི་ལྟ་བུས་འཆི་བར་འགྱུར་ཞེ་ན། བདག་གི་རྒྱུད་ལ་འཆི་ལྟས་ནི། །ཕྱི་ནང་བཅུ་གཉིས་ཡང་དག་ལྡན། །བདག་གི་བྲང་ལ་ཤ་མཚན་དག །དམར་པོ་བྱུང་བར་གྱུར་པ་ནི། །ཟླ་བ་གསུམ་ན་འཆི་བར་འགྱུར། །རིག་པའི་རྒྱལ་མོའི་སྔགས་ཀྱིས་སུ། །ཏིལ་ལ་སྲེག་བླུགས་སྟོང་དུ་ནི། །ཚང་བར་བྱས་པས་དེ་བཟློག་འགྱུར། །ཞེས་བྱ་བ་ལ། བདག་རྣལ་འབྱོར་པའི་རྒྱུད་ལ་ཕྱིའི་འཆི་ལྟས་དྲུག་དང༌། ནང་གི་འཆི་ལྟས་དྲུག་སྟེ་བཅུ་གཉིས་དང་ཡང་དག་པར་ལྡན་པར་འགྱུར་རོ། །དེ་དག་གང་ཞེ་ན་སྙམ་པ་ལ། བདག་གི་བྲང་ལ་ཤ་མཚན་དག །ཅེས་གསུངས་ཏེ། བདག་ལ་ཤ་མཚན་དམར་པོ་བྲང་གི་གཡོན་ཕྱོགས་སུ་བྱུང་བ་ན། བདག་ཟླ་བ་གསུམ་ན་འཆི་བའི་ལྟས་ཡིན་པས། །དེ་ལ་བདག་གིས་རིག་པའི་རྒྱལ་པོ་ཁྲོ་པོ་རྣམ་པར་རྒྱལ་བའི་སྔགས་

---

^{[མ་དཔེ་གཟིགས་ན་འདིར་གནོན།]}

དད་སྦྱར་བས། དཀྱིལ་འཁོར་ལྷ་དང་བཅས་བ་བྲིས་ལ། མེ་ཏོག་དང་ཏིལ་བསྲེགས་པའི་སྲེག་བླུག་སླན་གྲངས་སྟོད་དུ་ཚང་བར་བྱ་བར་འབྲེལ་ཏོ། །དེ་ལ་ཡང་བདག་ཉིད་འཆི་བ་སླུ་བའི་སྔགས་མཐར་གདགས་ཏེ་བསམ་པ་དང་ལྡན་པས་བྱས་ལ་དེ་ངེས་པར་བཟློག་པར་འགྱུར་རོ། །དེ་དང་ཆ་མཐུན་གང་ཡིན་པས། །རྐན་ལ་འབྲུམ་བུ་གསུམ་པ་དང༌། །ལྕེ་ཡེ་རྩེ་མོར་སྨེ་བ་དང༌། རྡོ་རྗེའི་ལམ་ནས་ཁྲག་འཛག་དང༌། །འཛམ་གཉིས་དབུགས་དག་གསུམ་པ་དང༌། །རི་ཡི་རྩེ་མོར་ཤུ་བ་བྱུང། །ནང་གི་འཆི་ལྟས་ངེས་པ་སྟེ། །ཞེས་བྱ་བ་ལ། དེ་དང་ཞེས་པ་ནི་གོང་མ་དང་གཉིས་ཆ་མཐུན་པའི་འཆི་ལྟས་གསུངས་སོ། །དེ་ཡང་ཇི་ལྟ་བུ་སྙམ་པ་ལ། རྐན་ལ་འབྲུམ་བུ་གསུམ་པ་ཞེས་གསུངས་ཏེ། རྐན་གྱི་དཀྱིལ་དུ་འབྲུམ་བུ་ཡུངས་ཀར་གྱི་ཁོ་བུ་ཙམ་པ་གསུམ་ཚུལ་དུ་གནས་པའམ། ཡང་ན་གསུམ་ཚོམས་སུ་བྱུང་ན་དེ་ཡང་ནང་གི་འཆི་ལྟས་ཡིན་པ་སྟེ། འཆི་བའི་དུས་འོག་ནས་རིག་པར་བྱའོ། །དེ་བཞིན་དུ་འཆི་བ་བཟློག་པའི་ཐབས་ཀྱང་འོག་ནས་འབྱུང་བས་རིག་པར་བྱའོ། །གཞན་ཡང་ལྕེའི་རྩེ་མོ་ལ་སྨེ་བ་ནག་པོ་མེ་ཏོག་དུ་རུ་ཀའི་སྙིང་པོ་ཙམ་བྱུང་ན། དེ་ཡང་ནང་གི་འཆི་ལྟས་སུ་རིག་པར་བྱ་སྟེ། དུས་དང་བཟློག་པ་ནི་གོང་མ་བཞིན་ནོ། །ཡང་བདག་གི་གསང་པའི་རྡོ་རྗེའི་ལམ་ནས་མར་ཁྲག་འཛག་པའམ། ཆུ་སེར་པོ་གུར་གུམ་གྱི་ཁུ་བ་ལྟ་བུ་བྱུང་ན། དེ་ཡང་ནང་གི་འཆི་ལྟས་སུ་རིག་པར་བྱའོ། །དུས་དང་བཟློག་པ་ནི་གོང་མ་བཞིན་ནོ། །ཡང་བདག་གི་ལུས་ལ་དུས་མཉམ་པར་འཛག་པ་གཉིས་དང་དབུགས་གཅིག་སྟེ། གསུམ་དུ་བྱུང་བ་དེ་ཡང་ནང་གི་འཆི་ལྟས་སུ་རིག་པར་བྱའོ། །ཡང་བདག་གི་རིའི་རྩེ་མོ་རུ་ཤུ་བ་མདོག་སྔོ་བ་ཟར་མའི་མེ་ཏོག་ལྟ་བུ་བྱུང་བ་ནི། །དེ་ཡང་ནང་གི་འཆི་ལྟས་སུ་རིག་པར་བྱའོ། །དེ་ཡོད་པ་དང་བསྒྲུབ་ཅེས་པ་གསུངས་ཏེ། དེ་ཡང་བཟློག་པའི་ཐབས་སུ་གསུངས་སོ།།

---

^{[མ་དཔེ་གཟིགས་ན་འདིར་གནོན།]}

སྟག་དང་འབྲུག་དང་བྱི་ལ་དང༌། །རྩངས་པ་བྱ་གག་ནག་པོ་རུ། །ཡོངས་སུ་སྦྱོར་བས་རིག་པ་བཟླས། །གི་ཝང་འུག་པ་རུས་སྦལ་དང༌། ཙམ་པ་ག་དང་ཨུཏྤལ་དང༌། །སེང་ལྡེང་འབྲས་བུ་གང་ཡིན་པ། །འུག་པའི་སྒྲོ་ལ་སྦྱོར་བར་བྱ། །ཞེས་བྱ་བ་ནི། སྨན་དང་སྔགས་ཀྱི་སྦྱོར་བས་འཆི་བའི་ལྟས་བཟློག་པར་གསུངས་སོ། །ད་ནི་ཕྱིའི་འཆི་ལྟས་ཡང་དག་པར་སྟོན་ཏེ། བྱ་རོག་མཁའ་ལ་འཕུར་བ་ཡི། །དཀར་པོས་བདག་ལ་ཕོག་པ་ན། །ཕྱི་ཡི་འཆི་ལྟས་ཡིན་པ་སྟེ། །གང་དུ་གྲགས་པའི་སར་སོང་སྟེ། །རིག་པ་ལ་སོགས་སྦྱོར་བ་ཡི། །ཡོངས་སུ་བཟློག་པར་བྱ་བ་ཡིན། །ཞེས་བྱ་བ་ལ། བྱ་རོག་ནམ་མཁའ་ལ་འཕུར་བའི་བྱ་ཐལ་དཀར་པོས་བདག་གི་ལུས་གང་ཡང་རུང་བ་ལ་ཕོག་པར་གྱུར་ན་ཕྱིའི་འཆི་བའི་རྟགས་ཡིན་པས། གོང་དུ་ཕོག་པའི་མི་ལ་གྲགས་པའི་སར་སོང་ལ་སྔགས་དང་སྨན་དང་དགེ་བ་ལ་སྦྱོར་བས་ཡོངས་སུ་བཟློག་པར་བྱའོ། །དེའི་འཆི་ལྟས་སུ་བབས་ནས་དུས་ངེས་པ་ནི་འོག་ནས་རིག་པར་བྱའོ། །གཞན་ཡང་ཕྱིའི་འཆི་ལྟས་རྣམས་འདི་ལྟར་གོ་བར་བྱའོ། །ནམ་མཁའ་ལ་སྣ་ལྔ་མཐང་བ་དང༌། ཆུ་ལ་མི་གཟུགས་མཐོང་གྱུར་པ། །ཤིན་ཏུ་སྡིག་པའི་ལྟས་སུ་བསྟན། །རྨི་ལམ་ན་ནི་སྟག་ལ་ཞོན། །མཆོད་སྡོང་ཉིད་ལ་འཛེག་པ་དང༌། །སེང་གེའི་ཁར་ནི་ཞུགས་རྨི་དང༌། །ཡོངས་སུ་སྡིག་པའི་ལྟས་ཡིན་པས། །ཞེས་བྱ་བ་ལ། མཁའ་ལ་སྣ་ལྔ་ནི། ནམ་མཁའ་ལ་འཇའ་ཚོན་ཁ་དོག་སྣ་ལྔའི་ཉི་མ་ཕྱེད་ན་མཐོང་བ་དང༌། ཆུའི་ནང་ན་མིའི་གཟུགས་མཐོང་བ་དང༌། རྨི་ལམ་དུ་རང་སྟག་ལ་ཞོན་པ་རྨི་བ་དང༌། པདྨ་ལ་སོགས་པའི་མཆོད་སྡོང་ལ་འཛེག་པ་རྨི་བ་དང༌། རང་གི་ལུས་པོ་སེང་གེའི་ཁར་ཞུགས་པར་རྨི་བ་རྣམས་ཡོངས་སུ་སྡིག་པའི་འཆི་ལྟས་སུ་ངེས་པར་ཡིན་པར་རིག་པར་བྱའོ། །དེ་ལ་འཆི་བའི་དུས་ངེས་པ་ནི་རིམ་པ་ཇི་ལྟ་བ་བཞིན་དུ་འདི་ལྟར་ཤེས་པར་བྱའོ། །ལོགས་ཤིང་སོར་མོ་རྩེ་གསུམ་དང༌། །བསེ་རུ་ཕྱོགས་དང་ཀུནདའི་འདབ། །ཡོན་ཏན་རྒྱ་མཚོ་མཚན་བཟངས་དང༌། །སྐྱེ་མཆེད་འཕགས་ལམ་ཆུ་སྲིན་སོ། །ལོ་གསུམ་ཞག་བཞི་ཟླ་བ་ལྔ། །མི་དེ་ངེས་པར་འཆི་བ་ཡིན། །ཞེས་བྱ་བ་ལ། ལོགས་ཤིང་དང༌། བསེ་རུ་དང༌། ཆུ་སྲིན་གྱི་སོ་རྣམ་པ་གསུམ་ནི་ལོ་རུ་ཤེས་པར་བྱའོ། །མཚན་བཟངས་དང༌། སྐྱེ་མཆེད་དང༌། སོར་མོ་དང༌། ཕྱོགས་རྣམ་པ་བཞི་ནི་ཞག་ཏུ་རིག་པར་བྱའོ། །རྩེ་གསུམ་དང་ཀུནདའི་འདབ་མ་དང༌། འཕགས་པའི་ལམ་དང༌། ཡོན་ཏན་དང༌། རྒྱ་མཚོ་རྣམ་པ་ལྔ་ནི་ཟླ་

---

^{[མ་དཔེ་གཟིགས་ན་འདིར་གནོན།]}

བར་ཤེས་པར་བྱའོ། །དེ་ལྟར་སྔགས་པ་བློ་དང་ལྡན་པས། བླ་མའི་ངག་ལས་ཡང་དག་པར་ཤེས་པར་བྱས་ལ། མཉམ་པར་གཞག་པས་དུས་ཐམས་ཅད་དུ་བརྟག་པར་བྱའོ། །དེ་ནས་རྟོག་པ་དང༌། བདག་གིས་སྲུང་བའི་འཁོར་ལོ་བསམ་པ་དང༌། འཆི་བ་བཟློག་པའི་ཐབས་གང་ལ་གང་གིས་བཟློག་པ་ནི་འདི་ལས་ཤེས་པར་བྱའོ། །རིག་པའི་རྒྱལ་པོ་བདུད་རྩི་འཁྱིལ། །རྟེན་འབྲེལ་ཡི་གེ་བརྒྱ་པ་ཡི། །སྔགས་ཀྱིས་སྨན་ལ་བསྲུང་བར་བྱ། །ཁམས་གསུམ་རྣམ་རྒྱལ་འཇིག་རྟེན་མགོན། །དེ་དག་གི་ནི་སྙིང་པོ་ཡིས། །སྟག་སོགས་གསོབ་ལ་ངེས་པར་བཟླས། །རྨ་བྱ་ཆེན་མོའི་སྔགས་དག་གིས། །འུག་པའི་སྒྲོ་སྕོགྶ་ངེས་པར་བསྔགས། །ཕྱག་ན་རྡོ་རྗེ་འཇམ་དབྱངས་དང༌། །སྟོབས་ཆེན་ཁྲོ་བོ་གང་དག་གི །སྔགས་ཆེན་སེང་ལྡེང་འུག་སྒྲོ་དང༌། །ཀུ་ཤ་བྱི་ལ་ལ་སོགས་པའི། །གསོ་བ་ལ་སོགས་པས་ཡོངས་སུ་བཟློག །གཏོར་མ་སྦྱིན་སྲེག་ལས་ཀྱིས་ནི། །ཡོངས་སུ་བཟློག་པར་བྱ་བ་ཡིན། །ཞེས་བྱ་བ་ལ། རིག་པའི་རྒྱལ་མོ་སོ་སོར་འབྲང་མའི་སྔགས་ནི། །ཨོཾ་མུ་ནི་མུ་ནི། བི་མུ་ནི་བི་མུ་ནི། དྷ་རི་ཙ་ལ་ཙ་ལ་ནི་བྷ་ག་བ་ཏི་བྷ་ཡ་བི་ག་ཏེ། བྷ་ཡ་ཧ་རི་ཎི། བོ་དྷི་བོ་དྷི། བོ་དྷ་ཡ་བོ་དྷ་ཡ། བུདྡྷི་ལི་བུདྡྷི་ལི། །ཙུཾ་བུ་ལི་ཙུཾ་བུ་ལི་སྭཱ་ཧཱ། སརྦ་ཏ་ཐཱ་ག་ཏ་ཧྲྀ་ད་ཡ་དུཥྚེ་ཤེ་སྭཱ་ཧཱ། ཨོཾ་མུ་ནི་མུ་ནི་མུ་ནི། བ་རེ་སརྦ་ཏ་ཐཱ་ག་ཏ་ཧྲྀ་ད་ཡ་ཨདྷིཥྛཱ་ན་ཡ་ཨདྷིཥྛི་ཏེ་བཛྲ་སྭཱ་ཧཱ། ཞེས་བྱ་བའི་སྔགས་ཀྱིས་སྨན་ག་པུར་དང༌། ཛཱ་ཏི་ཕ་ལ་དང༌། གུར་ཀུམ་གསུམ་སྲང་ལྔ་ལྔ་ཆ་བསྙམས་ལ། ཞག་གི་དང་པོ་ལ་སྔགས་འབུམ་དུའམ། ཡང་ན་སྟོང་ངམ། ཡང་ན་ཁྲི་བཟླས་པས་བདག་ཉིད་བཏུང་བར་བྱས་པས་ལོ་དང་པོའི་འཆི་བ་བཟློག་པར་གསུངས་སོ། །དེ་ནས་བདུད་རྩི་འཁྱིལ་པའི་སྔགས་གོང་མས་ཙམ་པ་ཀ་དང་ཨུཏྤ་ལ་ལ་ལན་གྲངས་སྟོང་དུ་བཟླས་ནས་ས་གཙང་སར་བོར་ན། ཟླ་བ་དང་པོའི་འཆི་བ་བཟློག་པར་འགྱུར་རོ། །རྟེན་འབྲེལ་གྱི་སྙིང་པོ་ཡེ་དྷརྨཱ་ཞེས་བྱ་བས། གི་ཝང་ལ་ལན་སྟོང་དུ་བསྔགས་ནས་དཔྲལ་བར་ཐིག་ལེ་བྱས་ན། ལོ་བར་མའི་འཆི་བ་བཟློག་པར་བྱའོ། །ཡི་གེ་བརྒྱ་པའི་སྔགས་ཀྱིས་སེང་ལྡེང་གི་ལྕུག་མ་ལ་ལན་སྟོང་དུ་བཟླས་པས། ས་ལ་ལན་གསུམ་དུ་བརྡབས་པས་ལོ་ཐ་མའི་འཆི་བ་བཟློག་པར་འགྱུར་རོ། །འཇིག་རྟེན་མགོན་གྱི་སྙིང་པོ་ནི། །ན་མོ་རཏྣ་ཏྲ་ཡཱ་ཡ་ཞེས་བྱ་བ་ལ་སོགས་པས། སྟག་གི་གསོབ་ལ་ལན་སྟོང་དུ་བཟླས་པས། ཆུའི་ནང་

---

^{[མ་དཔེ་གཟིགས་ན་འདིར་གནོན།]}

དུ་བསྐྱུར་བས་ཟླ་བ་གཉིས་པའི་འཆི་བ་བཟློག་པར་འགྱུར་རོ། །ཕྱག་ན་རྡོ་རྗེའི་སྙིང་པོ་གོང་ནས་འབྱུང་བའི་ཨོཾ་ཙཎྜ་མ་ཧཱ་ཞེས་པའི་སྔགས་ཀྱིས་འབྲུག་གི་གསོབ་ལ་ལན་སྟོང་དུ་བཟླས་ཏེ། མེའི་ནང་དུ་བསྲེགས་པས་ཟླ་བ་གསུམ་པའི་འཆི་བ་བཟློག་པར་འགྱུར་རོ། །འཇམ་དབྱངས་ཀྱི་སྔགས་ཡི་གེ་འབྲུག་གཅིག་པས་བྱི་ལའི་གསོལ་ལ་ལན་སྟོང་དུ་བཟླས་ནས་སའི་འོག་ཏུ་བཅུག་པས་ཟླ་བ་བཞི་པའི་འཆི་བ་བཟློག་པར་འགྱུར་རོ། །ཁྲོ་བོ་སྟོབས་པོ་ཆེའི་སྙིང་པོ་ཨོཾ་མ་ཧཱ་བ་ལ་རུ་རུ་པ་ར་ཧ་ར་ཡ་བ་ཏི་ཕཊ་ཅེས་བྱ་བའི་སྔགས་སྟོང་དུ་བཟླས་ལ་བྱ་གག་ནག་པོའི་གསོབ་ལ་སྔགས་བཏབ་སྟེ་མེའི་ནང་དུ་བོར་བས་ཟླ་བ་ལྔ་པའི་འཆི་བ་བཟློག་པར་འགྱུར་རོ། །ཞག་དང་པོ་ནི་ཁམས་གསུམ་རྣམ་པར་རྒྱལ་བའི་སྦྱོར་བས་འཆི་བ་བཟློག་པར་བྱའོ། །ཞག་གཉིས་པའི་འཆི་བ་བཟློག་པ་ནི་རུས་སྦལ་དང་འུག་པའི་སྒྲོ་ལ་རྨ་བྱ་ཆེན་མོའི་སྔགས། ཨོཾ་མ་ཧཱ་མ་ཡཱུ་རི་རཀྵ་པ་ཡ་ནི་མེ་གྷུ་པུ་ཏི་བ་བི་ཤཱནྟི་ཡ་ཧཱུཾ། ཞེས་པས་བསྔགས་ལ་ལུས་ལ་བྱབས་ཏེ། ཆུ་མིག་ཏུ་བོར་བས་བཟློག་པར་འགྱུར་རོ། །ཞག་གསུམ་པའི་འཆི་བ་ནི་གཏོར་མ་འབྱུང་པོ་ཐམས་ཅད་ལ་ལན་བརྒྱ་རྩ་བརྒྱད་བཏང་བས་བཟློག་པར་བྱའོ། །ཞག་བཞི་པའི་འཆི་བ་ནི་ཞི་བའི་སྦྱིན་སྲེག་ཉི་ཤུ་རྩ་གཅིག་བྱས་པས་འཆི་བ་བཟློག་པར་བྱའོ། །དེ་ཡང་རྣལ་འབྱོར་པས་ལུས་ངག་ཡིད་གསུམ་རང་གི་རྒྱུད་ལ་ནད་དང་སྡུག་བསྔལ་ལ་སོགས་པ་མི་འོང་བ་དང༌། དུས་མ་ཡིན་པར་འཆི་བ་རྣམས་བཟློག་པའི་ཕྱིར་གོང་མའི་སྦྱོར་བ་རྣམས་ཡང་དག་པར་བསྙེན་པ་དང༌། ལས་སྣ་ཚོགས་སུ་གང་གིས་གང་ལ་བསྲུང་བ་དང༌། སྦྱོར་བ་ཐམས་ཅད་ལ་མཆོད་པ་རྣམ་པ་ལྔའི་དངོས་པོས་མཆོད་པར་བྱའོ། །སྐྱབས་སུ་གསོལ་བ་ལ་སོགས་པ་ནི་རིམ་པ་ཇི་ལྟ་བ་བཞིན་དུ་ངེས་པར་སྤྱད་པར་བྱའོ། །ཤིན་ཏུ་དཔའ་དང་དད་པར་ལྡན། །ཤེས་རབ་ཆེ་དང་ཐོས་པ་བསགས། །བླ་མ་ལ་གུས་གཏོང་བ་ཕོད། །ལྟུང་བས་མ་གོས་གཅང་མ་ལ། །ཞེས་བྱ་བ་ལ། འདི་ནས་མར་ལ་སློབ་མའི་རྒྱུད་བརྟག་པར་གསུངས་ཏེ། དེ་ཡང་འདིས་ཡང་དག་པར་ཤེས་པར་བྱའོ། །ཤིན་ཏུ་སྤྱོད་པ་ལ་སོགས་པ་ཐམས་ཅད་ལ་ཞུམ་པ་མེད་པར་དཔའ་བ་དང༌། ཆོས་ལ་དད་པ་དྲག་པོ་ཡུན་རིང་བར་གནས་པ་དང༌། ཤེས་རབ་ཆེ་བ་ལ་བསྟན་བཅོས་ལ་སོགས་པ་ཐོས་པ་སྣ་ཚོགས་པ་

---

^{[མ་དཔེ་གཟིགས་ན་འདིར་གནོན།]}

བསགས་པ་དང༌། བླ་མ་ལ་ལྷག་པར་གུས་པ་ལ་སྦྱིན་པ་གཏོང་ཕོད་པ་དང༌། གསང་སྔགས་ཀྱིའམ། བྱང་ཆུབ་སེམས་དཔའ་འམ། ཉན་ཐོས་ཀྱི་ལྟུང་བ་རྣམ་པ་གསུམ་གྱིས་མ་གོས་པ་ནི་སློབ་མ་སྣོད་དང་ལྡན་པ་ཡིན་པས་ན་དེ་ལ་བདག་གིས་སྦྱོར་བ་འདི་ལྟ་བུས་ཡོངས་སུ་སྦྱང་བར་བྱའོ། །དེ་ཡང་གང་ཞེ་ན་སྙམ་པ་ལ་འདི་སྐད་གསུངས་ཏེ། རིམ་པ་བཞིན་དུ་དབང་བསྐུར་ནས། །ཚོགས་ཀྱི་འཁོར་ལོ་ལྔ་བསྐོར་ནས། །ཤེས་རབ་ལྡན་ལ་བསྟན་བྱ་ཡི། །གསང་བ་དྲག་པོའི་རྒྱུད་རྒྱལ་འདི། །གཞན་ལ་བཤད་པར་བྱ་བ་མིན། །ཞེས་བྱ་བ་ལ། བུམ་པ་ལ་སོགས་པའི་དབང་རིམ་པ་བཞིན་དུ་བསྐུར་ནས་བསོད་ནམས་ཀྱི་ཚོགས་བསག་པ་དང༌། སྡིག་པ་སྦྱང་བའི་ཕྱིར་ཚོགས་ཀྱི་འཁོར་ལོ་རིམ་པ་ལྔ་རུ་ཡང་དག་པར་བྱས་ལ། ཤེས་རབ་དང་ལྡན་པ་ལ་གསང་བ་དྲག་པོའི་རྒྱུད་ཀྱི་རྒྱལ་པོ་འདི་བསྟན་པར་བྱའི་དེ་རྣམས་དང་མི་ལྡན་པ་ལ་ནི་བཤད་པར་མི་བྱའོ། །གསང་བའི་བདག་པོ་ཁྱོད་ཀྱིས་ནི།། ཕན་དང་གནོད་བྱ་གང་ཡིན་ལ། །རིམ་པ་བཞིན་དུ་ཤེས་པ་ཡིས། །ལེགས་པར་སྤ་དང་བཤད་པ་ཡིན། །ཞེས་བྱ་བ་ལ། བཅོམ་ལྡན་འདས་ཀྱིས་ལག་ན་རྡོ་རྗེ་གསང་བ་རྣམ་པ་གསུམ་གྱི་བདག་པོ་ནན་ཏན་དུ་ཡང་དག་པར་གསུངས་ཏེ་གཏད་པའོ། །དེ་ལ་ཁྱོད་ཀྱིས་ཕན་པ་སེམས་ཅན་ཐམས་ཅད་ལ་རྒྱུད་སྦྱང་བའི་ཕྱིར་ལེགས་པར་བཤད་པར་སྦྱར་རོ། །གང་ཟག་སྣོད་དང་མི་ལྡན་པ་ལ་ནི་སྤ་བར་བྱའོ། །དེ་ཡང་རིམ་པར་བརྟག་པར་བྱ་བར་འབྲེལ་ཏོ། །གནས་སྐབས་དུ་མར་རབ་ལྡན་ཞིང༌། །ཀུན་ལ་ངེས་པར་ཞུགས་པ་ཡིས། །རྒྱུད་འདི་ལ་ནི་ངེས་པར་བརྟག །ཅེས་པ་ནི་གནས་སྐབས་དུ་མར་ནི་ཕན་པར་བྱ་བ་དང༌། གནོད་པར་བྱ་བའི་ལས་ལ་སོགས་པ་ལ་དབང་བསྐུར་བ་ལ། ངེས་པར་ཞུགས་པས་རྒྱུད་འདི་ལ་གཞུག་པར་གསུངས་སོ། །རྒྱུད་འདི་གང་ན་གནས་པ་ན། །ཕྱོགས་དེ་ན་ནི་གདུག་པ་རྣམས། །རིང་དུ་བསྲིངས་པས་གནས་མི་བྱེད། །གལ་ཏེ་གནས་པར་བྱེད་པ་ན། །དེ་རྣམས་ཀུན་གྱི་རྒྱུད་ཚིག་འགྱུར། །ཞེས་པ་ལ། རྒྱུད་འདི་གང་ན་གནས་པ་ན་གདུག་པ་ཐམས་ཅད་གནས་པར་མི་བྱེད་པའོ། །དེ་ཅིའི་ཕྱིར་ཞེ་ན། དྲག་པོའི་སྦྱོར་བ་གསུངས་པས་གདུག་པ་རྣམས་གལ་ཏེ་གནས་ན་གདུག་པ་རྣམས་ཀྱི་རྒྱུད་ཚིག་པར་འགྱུར་བའོ། །དྲག་པོའི་རྒྱུད་ཀྱི་རྒྱལ་པོ་

---

^{[མ་དཔེ་གཟིགས་ན་འདིར་གནོན།]}

ལ། །གང་ཞིག་གུས་པར་གྱུར་པ་དེས། །དུག་གསུམ་སྐུ་ལ་རབ་རྒྱས་ཏེ། །བཙུན་མོའི་བྷ་ག་ལ་གནས་ནས། །ཉོན་མོངས་འཁོར་གྱིས་རབ་བསྐོར་ཏེ། །བདེ་བ་ཆེན་པོའི་རོལ་པས་གནས། །ཞེས་བྱ་བ་དང༌། དྲག་པོའི་ཆོས་སྟོན་པས་དྲག་པོའོ། །དེ་རྒྱུད་རྣམས་ཀྱི་རྒྱལ་པོ་ཡིན་པས་ན་རྒྱུད་ཀྱི་རྒྱལ་པོ་སྟེ། དེ་ལ་གང་ཞིག་གུས་པའམ་སྒྲུབ་པ་དེས་འདོད་ཆགས་ལ་སོགས་པ་དུག་གསུམ་ནི་མེ་ལོང་ལྟ་བུའི་ཡེ་ཤེས་ལ་སོགས་པ་གསུམ་དུ་རྒྱས་ནས་བཙུན་མོའི་བྷ་ག་ནི་སྟོང་པ་ཉིད་དེ། དེ་ལ་གནས་ཏེ་ཉོན་མོངས་པ་གཞན་རྣམས་རང་གི་རྒྱུད་ལ་ཡེ་ཤེས་ཕྲ་མོ་རུ་གྱུར་ནས་གནས་པ་ནི་བསྐོར་བར་འབྲེལ་ཏོ། །དེ་བས་ན་བདེ་བ་ཆེན་པོའི་རོལ་པས་སྟོང་པ་ཉིད་ལ་གནས་པའོ། །ལག་ན་རྡོ་རྗེ་དེ་ཉིད་དུ། །སྐད་ཅིག་ཙམ་གྱིས་བསྐོར་བ་ནི། །འབུམ་ཕྲག་དུ་མས་རབ་བསྐོར་ནས། །བདེ་བར་གཤེགས་ལ་འདི་སྐད་གསོལ། །བདག་གིས་རྒྱུད་ཀྱི་རྒྱལ་པོ་འདི། །ངེས་པའི་དོན་དང་རབ་སྦྱོར་ནས། །གསང་བ་ཉིད་དུ་སྦ་བར་བགྱི། །ཞེས་བྱ་བ་ལ། ལག་ན་རྡོ་རྗེས་ཞབས་གཅིག་པའི་གོམ་པས་སྐད་ཅིག་ཙམ་གྱིས་བདེ་བར་གཤེགས་པ་ལ་བསྐོར་བ་ལན་འབུམ་བྱས་ནས་བདེ་བར་གཤེགས་པས་བཀའ་སྩལ་པ་བཞིན་དུ་རྒྱུད་ཀྱི་རྒྱལ་པོ་འདི་ངེས་པའི་དོན་བཀའ་སྩལ་པ་བཞིན་དུ་གསང་བར་སྤ་བར་བགྱི་ཞེས་གནང་བ་བླངས་པར་སྦྱར་རོ། །བདག་གི་རྒྱུད་ཀྱི་རྒྱལ་པོ་གང༌། །དྲག་པོའི་འགྲེལ་པ་འདི་བྱས་པའི། །བསོད་ནམས་རྒྱ་ཆེན་གང་ཐོབ་དེས། །སྐྱེ་བ་བཞིས་བསྡུས་སེམས་ཅན་རྣམས། །ཀུན་རྫོབ་དོན་དམ་རིམ་ཞུགས་ལ། །ཐབས་དང་ཤེས་རབ་མཉམ་སྦྱར་བས། །ཕྱི་ནང་བགེགས་གཉིས་རྣམ་བསལ་ཏེ། །མྱུར་དུ་རྡོ་རྗེ་འཛིན་པར་ཤོག །སློབ་དཔོན་ཆེན་པོ་འཕགས་པ་ཕྱག་ན་རྡོ་རྗེའི་དངོས་གྲུབ་བརྙེས་པ་དེའི་སྐུར་སྤྲུལ་ནུས་པ་ཕྱག་ན་རྡོ་རྗེས་མཛད་པ་རྡོ་རྗེ་མེ་ལྕེའི་རྒྱུད་ཀྱི་འགྲེལ་པ་དེ་ཁོ་ན་ཉིད་སྣང་བ་ཞེས་བྱ་བ་རྫོགས་སོ།། །།རྒྱ་གར་གྱི་མཁན་པོ་མཉྫུ་ཤྲཱི་དང༌། བོད་ཀྱི་ལོ་ཙཱ་བ་དགེ་སློང་གཞོན་ནུ་ཚུལ་ཁྲིམས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །