དང་པོ། གཏོར་མའི་ལས་སྣ་ཚོགས་པའི་ཆོ་ག
རྒྱ་གར་སྐད་དུ། བཛྲ་ཀརྨ་སཾ་བྷ་ཀྲ་མོངྒྷ་ཊ་པི་དྷིཿ། བོད་སྐད་དུ། རྡོ་རྗེ་ལས་ཀྱི་ཚོགས་རིམ་པར་ཕྱེ་བའི་ཆོ་ག །བཅོམ་ལྡན་འདས་རྡོ་རྗེ་བསྣམས་པ་ལ་དད་ཅིང་གུས་པས་ཕྱག་འཚལ་ལོ། །སེམས་ཅན་ལ་ནི་ཕན་པའི་ཕྱིར། །ལས་ཀྱི་ཚོགས་ནི་བདུད་རྩི་མཚུངས།། རྒྱུད་རྣམས་ཀུན་ལས་བཏུས་ནས་ནི། །བདག་གིས་སྒྲུབ་པའི་དོན་དུ་བཤད། །ལས་རྣམས་ཐམས་ཅད་ཅི་བྱེད་ཀྱང༌། །གཏོར་མའི་ལས་འདི་གྲོགས་སུ་འགྱུར། །དེ་བས་གཏོར་མ་སྔོན་ལ་བཤད། །གཏོར་མའི་ལས་རྣམས་ཀུན་ལ་ཡང༌། །ཏིང་འཛིན་སྔགས་དང་ཕྱག་རྒྱ་དང༌། །ཚིགས་བཅད་རྫས་ཀྱི་ནུས་པའི་མཐུས། །དེ་ལྔ་ཚོགས་ན་ལས་རྣམས་འགྲུབ། །ད་ཡང་ཏིང་འཛིན་རྒྱལ་པོའི་རྒྱལ། །བྲམ་ཟེ་སྔགས་ཀྱི་ནུས་མཐུ་ཅན། །རྗེའུ་རིགས་ཕྱག་རྒྱ་ཉིད་དང་མཐུན། །ཚིགས་བཅད་ཐ་མལ་སྤྱོད་པ་འདྲ། །རྫས་ནི་ཀུན་གྱི་གཞི་རྟེན་འགྱུར། །དེ་ཡང་སྤྱི་དང་ཁྱད་པར་རོ། །སྤྱི་ནི་ཀུན་གྱི་ནུས་མཐུ་ཅན། །ནུས་པ་དྲག་པོ་འབྱིན་པ་ཡིན། །ཁྱད་བར་སོ་སོ་ཀུན་ལ་ཡང༌། །ནུས་པ་ཆེ་ཆུང་རིམ་པ་འབྱུང༌། །དེ་ཡི་རྣལ་འབྱོར་རིམ་པ་ཡང༌། །ལས་དང་བོ་ནི་མོས་པ་འཇོག །དངོས་གྲུབ་ཕྲ་མོ་ཕྲིན་ལས་དབང༌། །ཡེ་ཤེས་ཕྲ་མོས་ཕྲིན་ལས་རྫོགས། །ཡེ་ཤེས་ཅན་ནི་དེ་ཉིད་འཐོབ། །ཡང་དག་པས་ནི་བྱ་བ་རྫོགས། །རྣལ་འབྱོར་དེ་ལྔའི་རིམ་པས་ཀྱང༌། །གཏོར་མ་ལ་སོགས་ལས་རྣམས་ལ། །ཏིང་འཛིན་ལ་སོགས་འཇུག་ཐབས་ལྔ། །མན་ངག་ཅན་གྱིས་ཤེས་པར་བྱ། །དེ་བཞིན་ལས་རྣམས་ཀུན་ལ་ཡང༌། །མན་ངག་ཅན་གྱིས་སྦྱར་བར་བྱའོ། །གཏོར་མ་དབུལ་བའི་རིམ་པ་ཡང༌། །མགྲོན་གྱི་ལྷ་ནི་གཉིས་སུ་བྱ། །འཇིག་རྟེན་འདས་དང་འཇིག་རྟེན་པ། །འཇིག་རྟེན་འདས་ལ་གཉིས་ཡོད་དེ། །བདེ་གཤེགས་སྤྲུལ་དང་ས་ལ་གནས། །དེ་དག་གཉིས་ལའང་སྤྱི་དང་ནི། །སོ་སོའི་ཁྱད་པར་ཤེས་པར་བྱ། །འཇིག་རྟེན་པ་ལ་གཉིས་ཡོད་དེ། །སྤྱི་དང་སོ་སོའི་ཁྱད་པར་རོ། །སྤྱི་ནི་ཁམས་གསུམ་སེམས་ཅན་ཀུན། །ཁྱད་པར་ཆོས་སྐྱོང་སྲུང་མ་རྣམས། །དེ་ལ་ཁྱད་པར་སོ་སོ་ལ། །དཔག་ཏུ་མེད་པ་ཡོད་མེད་ཀྱང༌། །དགོས་པ་བསྡུས་པ་བསྟན་པར་བྱ། །གཏོར་མའི་རྫས་རྣམས་བསྟན་པ་ནི། །ཐུན་
མོང་རྫས་དང་ཁྱད་པར་རྫས། །ཐུན་མོང་དྲུག་ཅུར་སྦྱར་ཞེས་བྱ། །ཁྱད་བར་བདུད་རྩི་རྣམ་ལྔ་དང༌། །དཀར་གསུམ་མངར་གསུམ་ལ་སོགས་དང༌། །ཤ་སྣ་ཁྲག་ལ་སོགས་པ་དང༌། །མགྲིན་གྱི་སྐབས་དང་སྦྱར་བར་བྱ། །ཏིང་འཛིན་བསྟན་པའི་རིམ་པ་ཡང༌། །བདག་ཉིད་ལྷག་པའི་ལྷར་བསྐྱེད་ལ། །མཚན་དང་ལྡན་པའི་སྣོད་མཆོག་ཏུ། །ཉི་ཟླའི་གདན་བསམ་བདུད་རྩི་བསམ། །ས་བོན་ལས་བསྐྱེད་དེས་སུ་མཚན། །དེ་འོག་མེ་དང་རླུང་ནི་བསམ། །དེ་ཡི་སྟེང་དུ་རྡོ་རྗེ་བསམ། །དེ་ཡི་སྟེང་དུ་རི་བོང་ཅན། །ཡི་གེ་ཨོཾ་གྱིས་མཚན་བ་ཡིན། །ཧཱུཾ་བསྐྱེད་པས་ནི་རླུང་བྱུང་བས། །མེ་འབར་བདུད་རྩི་དྲོས་པར་འགྱུར། །ཨོཾ་གྱིས་ཡེ་ཤེས་བདུད་རྩི་ཕབ། །རྡོ་རྗེས་དཀྲུག་ཅིང་འབྲུ་གསུམ་བཟླས། །དྲི་མེད་དག་པའི་བདུད་རྩིར་གྱུར། །དེ་ནི་ཐུན་མོང་ཏིང་འཛིན་ཡིན། །ཁྱད་པར་སོ་སོའི་སྐབས་སུ་བསྟན། །ཐུན་མོང་གི་ནི་སྔགས་བསྟན་པ། །ཨོཾ་བུདྡྷ་ཌཱ་ཀི་ནཱི་སརྦ་བི་ལཾ་ཏ་ཁ་ཁ་ཁཱ་ཧི། ཨོཾ་བཛྲ་ཌཱ་ཀི་ནཱི་སརྦ་བ་ལིཾ་ཏ་ཁ་ཁ་ཁཱ་ཧི། ཨོཾ་རཏྣ་ཌཱ་ཀི་ནཱི་སརྦ་བ་ལིཾ་ཏ་ཁ་ཁ་ཁཱ་ཧི། ཨོཾ་པདྨ་ཌཱ་ཀི་ནཱི་སརྦ་བ་ལིཾ་ཏ་ཁ་ཁ་ཁཱ་ཧི། ཨོཾ་བི་ཤྭ་ཌཱ་ཀི་ནཱི་སརྦ་བ་ལིཾ་ཏ་ཁ་ཁ་ཁཱ་ཧི། ཨོཾ་སརྦ་ཌཱ་ཀི་ནཱི་སརྦ་བ་ལིཾ་ཏ་ཁ་ཁ་ཁཱ་ཧི། ཁྱད་པར་གྱི་སྔགས་བསྟན་པ་ནི། ཨོཾ་བཛྲ་ཌཱ་ཀི་བྱ་བ་ཁྱེར་ཙི། རཱུ་པ་ཀཱ་ཀཱ་སྱ་ཙི་ལ་ཀཱ་ལ་རཱུ་པ། ཨི་མཾ་བ་ལིཾ་གྲྀཧྣཾ་ཏུ་ས་མ་ཡཾ་ར་ཀྵ་ནྟུ་ཡ་ཐེ་ཥྚ་སརྦ་སིདྡྷི་མྨེ་པྲ་ཡཙྪནྟུ། ཧཱུཾ་ཧཱུཾ་ཕཊ་སྭཱ་ཧཱ། ཚིགས་བཅད་ཀྱི་ནི་རིམ་པ་ཡང༌། །སྤྱི་དང་ཁྱད་པར་གཉིས་སུ་བསྟན། །སྤྱི་ཡི་ཚིགས་བཅད་བསྟན་པ་ནི། །མཁའ་དབྱིངས་རྣམ་དག་ཀློང་དཀྱིལ་ནས། །སྨོན་ལམ་ཐུགས་རྗེའི་དབང་གིས་ན། །མཁའ་འགྲོ་མི་བཟད་སྐུ་སྤྲུལ་ནས། །འཇིགས་བྱེད་འཇིགས་པའི་སྐུ་འཆང་མ། །སྐུ་ལ་བསྒྲིབས་པ་མི་མངའ་ཡང༌། །འགྲོ་བ་སེམས་ཅན་དོན་སླད་དུ། །བདུད་རྩི་ལ་སོགས་གསོལ་མཛད་མ། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །བུདྡྷ་མཁའ་འགྲོ་དཔལ་འབར་བ། །སྨུག་ནག་འབར་བའི་རལ་པ་ཅན། །སྟོབས་ལྡན་དྲག་ཤུལ་སྐུ་འཆང་མ། །སྐུ་ཡི་སྟོབས་ལྡན་མཐུ་ཆེན་ལས། །སྐུ་ཡི་ལྷ་མོའི་སྤྲུལ་པ་འགྱེད། །བུདྡྷ་མཁའ་འགྲོ་འཁོར་བཅས་རྣམས། །ཡང་སྤྲུལ་སྨུག་མོ་འབུམ་གྱིས་བསྐོར། །དགྱེས་པའི་ཚུལ་གྱིས་འདིར་གཤེགས་
མཆོད་པ་བཞེས། །རྡོ་རྗེ་མཁའ་འགྲོ་དཔལ་འབར་མ། །མཐིང་ནག་འབར་བའི་རལ་བ་ཅན། །ཐུགས་མཆོག་འབར་བའི་རིགས་ལྡན་མ། །མི་འགྱུར་ཐུགས་ཀྱི་དཔལ་བེའུ་ནས། །ཐུགས་ཀྱི་ལྷ་མོ་སྦྲུལ་པ་འགྱེད། །རྡོ་རྗེ་མཁའ་འགྲོ་འཁོར་བཅས་རྣམས། །འཁོར་དུ་ནག་མོ་འབུམ་གྱིས་བསྐོར། །དགྱེས་པའི་ཆུལ་གྱིས་འདིར་གཤེགས་མཆོད་པ་བཞེས། །རིན་ཆེན་མཁའ་འགྲོ་དཔལ་འབར་མ། །སེར་ནག་འབར་བའི་རལ་པ་ཅན། །ཡོན་ཏན་རྒྱས་པའི་རིགས་ལྡན་མ། །རིན་ཆེན་འབར་བའི་མཛོད་སྤུ་ནས། །རིན་ཆེན་རིགས་ཀྱི་སྤྲུལ་པ་འགྱེད། །རིན་ཆེན་མཁའ་འགྲོ་འཁོར་བཅས་རྣམས། །འཁོར་དུ་སེར་མོ་འབུམ་གྱིས་བསྐོར། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །པདྨ་མཁའ་འགྲོ་དཔལ་འབར་མ། །དམར་ནག་འབར་བའི་རལ་པ་ཅན། །གསུང་མཆོག་འབར་བའི་རིགས་ལྡན་མ། །དྲི་མེད་གསུང་གི་བུམ་པ་ནས། །གསུང་གི་ལྷ་མོའི་སྤྲུལ་པ་འགྱེད། །སྒྲ་རྣམས་སྒྲོགས་པའི་མཁའ་འགྲོ་མ། །འཁོར་དུ་དམར་མོ་འབུམ་གྱིས་བསྐོར། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །ལས་ཀྱི་མཁའ་འགྲོ་དཔལ་འབར་མ། །ལྗང་ནག་འབར་བའི་རལ་པ་ཅན། །ལས་རྣམས་མཛད་པའི་རིགས་ལྡན་མ། །ཕྱག་ཞབས་པདྨའི་འཁོར་ལོ་ལས། །ལས་ཀྱི་ལྷ་མོའི་སྤྲུལ་པ་འགྱེད། །དྲག་ཤུལ་ལས་ཀྱི་མཁའ་འགྲོ་མ། །འཁོར་དུ་ལྗང་ནག་འབུམ་གྱིས་བསྐོར། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །མཁའ་ལ་འགྲོ་བའི་མཁའ་འགྲོ་མ། །རྡོ་རྗེ་ནམ་མཁར་འགྲོ་མ་རྣམས། །ས་ལ་འགྲོ་བའི་མཁའ་འགྲོ་མ། །རྡོ་རྗེ་ས་འོག་འགྲོ་མ་དང༌། །བར་སྣང་འགྲོ་བའི་མཁའ་འགྲོ་མ། །མཁའ་འགྲོ་མ་དང་ཤུགས་འགྲོ་མ། །མ་མོའི་ཚོགས་དང་སྲིད་མོའི་ཚོགས། །ནག་མོ་དབང་ཕྱུག་ཚོགས་རྣམས་ཀུན། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །གནོད་སྦྱིན་ཚོགས་རྣམས་མ་ལུས་དང༌། །ཞེས་བྱ་བ་ལ་སོགས་པ་ཀློག་ཕྲེང་ནས་འབྱུང་བའི་རྒྱུད་བཞིན་དུ་གཏོང་ངོ༌། །ཁྱད་པར་སོ་སོའི་ཚིགས་བཅད་ནི། །མཁའ་ལ་སྤྱོད་པའི་མཁའ་འགྲོ་མ། །བྱ་རོག་གཟུགས་ཅན་འཇིགས་པའི་གཟུགས། །པདྨ་ལ་
གནས་ཁྭ་གདོང་མ། །ཐོད་པ་ཁ་ཊྭཱཾ་ག་ཡིས་བརྒྱན། །གྲི་གུག་གཅོད་མཛད་ཐོད་ཁྲག་འཐུང༌། །ཕྱག་བཞི་དེ་བཞིན་རོལ་པ་མཛད། །ཞལ་གྱི་ང་རོས་བདུད་རྣམས་བརྒྱལ། །སྤྱན་གསུམ་སྨིན་མའི་དཀྱུས་ལྡན་མ། །སྤྱན་གསུམ་འོད་ཀྱིས་ཁམས་གསུམ་གསལ། །རོལ་པའི་འདུག་སྟངས་གར་དང་ལྡན། །སྒེག་པ་ལ་སོགས་རོ་ལྡན་པ། །གར་གྱི་སྤྱོད་ལྡན་མཁའ་འགྲོ་མ། །ཁྲོ་བོའི་རྒྱལ་པོ་སྟོང་ས་ཆེན་རྣམས། །སྦྱོར་ལྡན་ཚུལ་གྱི་འཁོར་གྱིས་བསྐོར། །འཁོར་བཅས་མ་ལུས་ཐམས་ཅད་ཀྱང༌། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །མཁའ་འགྲོ་ཆེན་མོ་ས་སྤྱོད་མ། །ཁྱི་ཡི་གདོང་ཅན་འཇིགས་པའི་གཟུགས། །སྤྱན་མིག་གློག་འགྱུ་སྟོང་མཛད་མ། །ཞལ་གདངས་བས་ནི་ཁམས་གསུམ་རྔུབ། །ཕྱག་གི་གར་གྱིས་དགྱེས་པར་མཛད། །སྐུ་ཡི་སྒེག་པས་རོལ་པར་ལྡན། །ཞབས་ཀྱིས་འབྱུང་པོ་ཟིལ་གྱིས་གནོན། །དྲག་པོ་འཁོར་དང་བཅས་པ་རྣམས། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །ས་འོག་གནས་པའི་མཁའ་འགྲོ་མ། །གཽ་རཱི་ནག་མོ་ཆེན་མོ་ནི། །ཉ་ཡི་གདོང་ཅན་འཇིགས་པའི་གཟུགས། །སྤྱན་གསུམ་འོད་ཟེར་འབར་བ་ཡིས། །ཁམས་གསུམ་མ་ལུས་སྐྲག་པར་བྱེད། །ཞལ་གྱིས་ས་འོག་སེམས་ཅན་གསོལ། །ཕྱག་གི་གྲི་ཡིས་ཉམས་རྣམས་གཏུབས། །ཞབས་རྣམས་རོལ་པས་ས་འོག་གནོན། །གར་གྱི་འགྱིང་ཚུལ་ལ་བརྩོན་པ། །ཧ་ཧ་ཧི་ཧི་སྒྲ་སྒྲོགས་མ། །དྲག་པོའི་འཁོར་དང་བཅས་པ་རྣམས། །དགྱེས་པའི་ཚུལ་གྱེས་འདིར་གཤེགས་མཆོད་པ་བཞེས། །ཕྱོགས་སྐྱོང་གནས་པའི་མཁའ་འགྲོ་མ། །ཐོད་པ་འབར་བའི་གཞལ་ཡས་ནས། །རྡོ་རྗེ་ཧཱུཾ་བདག་གཙོ་བདག་མཛད། །སྡིགས་མཛུབ་རྡོ་རྗེ་འགྱིང་བག་ཅན། །ཤིན་ཏུ་མི་བཟད་འཇིགས་མཛད་མ། །སྤྱན་ནི་སྔོན་པོའི་མདོག་དང་ལྡན། །འབར་བ་སྔོན་པོར་རབ་ཏུ་ཁྱབ། །ཞབས་བསྐུམ་ཚུལ་གནས་མ་མོ་གནོན། །དེ་འཁོར་ཕྱོགས་སྐྱོང་མཁའ་འགྲོ་མ། །ཤར་གྱི་ཕྱོགས་ཀྱི་ཚངས་པ་མོ། །ཞལ་གཅིག་སྤྱན་གསུམ་གར་ལ་བརྩོན། །རྡུབ་དང་སྐྲག་དང་འཛིན་པའི་ལས། །ཕྲེང་བའི་སྦི་བླུགས་བསྣམས་པའི་མཁའ་འགྲོ་མ།།
དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །ལྷོ་ན་གནས་པའི་ཁྱབ་འཇུག་མ། །ཞལ་གཅིག་སྤྱན་གསུམ་གར་ལ་བརྩོན། །རྡུབ་དང་སྐྲག་དང་འཛིན་པའི་ལས། །འཁོར་ལོ་པདྨ་བསྣམས་པའི་མཁའ་འགྲོ་མ། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །ནུབ་ན་གནས་པའི་གཞོན་ནུ་མ། །ཞལ་གཅིག་སྤྱན་གསུམ་གར་ལ་བརྩོན། །རྡུབ་དང་སྐྲག་དང་འཛིན་པའི་ལས། །རྩེ་གསུམ་ཕྲེང་བ་བསྣམས་པའི་མཁའ་འགྲོ་མ། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །བྱང་ན་གནས་པའི་གཤིན་རྗེ་མ། །ཞལ་གཅིག་སྤྱན་གསུམ་གར་ལ་བརྩོན། །རྡུབ་དང་སྐྲག་དང་འཛིན་པའི་ལས། །དབྱུག་པ་མི་མགོ་བསྣམས་པའི་མཁའ་འགྲོ་མ། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །མེ་ཡི་ཕྱོགས་ན་གནས་པའི་ཙ་མུ་ཎྜཱི། །ཞལ་གཅིག་སྤྱན་གསུམ་གར་ལ་བརྩོན། །རྡུབ་དང་སྐྲག་དང་འཛིན་པའི་ལས། །འཁོར་ལོ་སེང་གེ་བསྣམས་པའི་མཁའ་འགྲོ་མ། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །སྲིན་པོའི་ཕྱོགས་ན་གནས་པའི་ཙ་མུཎྜཱི། །ཞལ་གཅིག་སྤྱན་གསུམ་གར་ལ་བརྩོན། །རྡུབ་དང་སྐྲག་དང་འཛིན་པའི་ལས། །རལ་གྲི་རྒྱལ་མཚན་བསྣམས་པའི་མཁའ་འགྲོ་མ། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །དབང་ལྡན་མཚམས་ན་གནས་པའི་དབང་ལྡན་མ། །ཞལ་གཅིག་སྤྱན་གསུམ་གར་ལ་བརྩོན། །རྡུབ་དང་སྐྲག་དང་འཛིན་པའི་ལས། །མདུང་ཐུང་ཐོད་པ་བསྣམས་པའི་མཁའ་འགྲོ་མ། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །རླུང་གི་ཕྱོགས་ན་གནས་པའི་རླུང་ལྷ་མོ། །ཞལ་གཅིག་སྤྱན་གསུམ་གར་ལ་བརྩོན། །རྡུབ་དང་སྐྲག་དང་འཛིན་པའི་ལས། །གོས་དང་ཐོད་པ་བསྣམས་པའི་མཁའ་འགྲོ་མ། །མ་མོ་མཁའ་འགྲོ་འཁོར་བཅས་རྣམས། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །མཁའ་འགྲོ་ཆེན་མོ་ཐང་སྤྱོད་མ། །ཁྱུ་མཆོག་རྡོ་རྗེ་འཇིགས་པའི་གཟུགས། །དེ་ཡིས་ཐུགས་ལས་སྤྲུལ་པ་མོ། །མཁའ་འགྲོ་དྲག་མོ་མཐུ་མོ་ཆེ། །རོ་ལངས་མ་ནི་ཟ་ལ་དགའ། །
གཏུམ་མོ་འཇིགས་པའི་ཆ་ལུགས་ཅན། །སེང་གེ་ཆེན་མོ་མཆོད་བྱེད་མ། །སྟག་མོ་ཆེན་མོ་འཁྱུག་བྱེད་མ། །འུག་གདོང་ཆེན་མོ་མུན་པ་འཇོམས། །ཅེ་སྦྱང་མ་ནི་ཁྲག་ཏུ་ཟ། །མཁའ་འགྲོ་ཆེན་མོ་འཁོར་བཅས་ཀྱང༌། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས།། མཁའ་འགྲོ་ཆེན་མོ་གཞོན་ནུ་མ། །སྐུ་མདོག་སེར་མོ་འོད་ཟེར་འབར། །འོད་ཟེར་ཕྲེང་བ་སྟོང་ཕྲག་འཕྲོ། །མཛེས་པའི་རྒྱན་རྣམས་ཀུན་གྱིས་བརྒྱན། །རྣམ་སྣང་མཛད་ཀྱི་དབུ་རྒྱན་ཅན། །མྱ་ངན་མེད་པའི་མེ་ཏོག་ཕྲེང༌། །དབུ་ལ་མཛེས་པའི་རྒྱན་དུ་བྱས། །ཞལ་གསུམ་ཕྱག་དྲུག་མཐུ་མོ་ཆེ། །སྒེག་ཅིང་རོལ་དང་བཅས་པ་མོ། །གཞོན་ནུ་ཆེན་མོ་འཁོར་བཅས་ཀྱང༌། །དགྱེས་པའི་ཚུལ་གྱིས་འདིར་གཤེགས་མཆོད་པ་བཞེས། །མཁའ་འགྲོ་ཆེན་མོ་ལྷག་སྡུད་མ། །དུར་ཁྲོད་བརྒྱད་ཀྱི་དབུས་གནས་པ། །བཅོམ་ལྡན་འཁོར་བ་སྒྲོལ་བའི་མཆོག །དར་བབ་ལོ་ཡིན་ཚོད་གནས། །ལྗང་བུའི་མདོག་ཅན་འགྱིང་བག་ཅན། །གྲུ་གསུམ་ནང་གི་ཕྱོགས་དག་ན། །ཡེ་ཤེས་ཅན་དང་མཁའ་འགྲོ་མ། །སྐྱོན་མ་གོས་པའི་གོས་དཀར་མོ། །ཉོན་མོངས་འཁྲུ་བྱེད་མཱ་མ་ཀཱི། །འབར་བའི་ཕྲེང་བས་ཁྱབ་ཅིང་དྲག །མཁའ་འགྲོ་ཆེན་མོ་ཁྱེད་བཞི་ཡང༌། །ལྷག་སྡུད་རྣམས་ཀྱི་གཙོ་མོར་གྲགས། །མཁའ་འགྲོ་ཆེན་མོ་ལྷག་སྡུད་རྣམས། །དུར་ཁྲོད་བརྒྱད་ཀྱི་ཕྱོགས་དག་ནི། །ཁ་ཊྭཱཾ་ག་དང་མགོ་ལ་སོགས། །ཐོད་པ་རྣམས་ཀྱིས་ཡོངས་སུ་བརྒྱན། །ཤིང་གཅིག་དང་ནི་ལྡན་པ་ཉིད། །ཁྲ་དང་ཁྱི་དང་སྤྱང་ཀི་དང༌། །སེང་གེ་སྟག་དང་བྱི་ལ་དང། །བྱ་རྒོད་ལ་སོགས་འཁོར་གྱིས་བསྐོང༌། །དཔའ་བོ་རྣལ་འབྱོར་མ་ཚོགས་ཀྱིས། །མཉེས་པར་སྦྲས་པའི་གཟུགས་འཛིན་མ། །མཁའ་འགྲོ་ཆེན་མོ་ཀེང་རུས་མ། །དྲག་པོ་གྲི་གུག་སྣོད་ཐོགས་པ། །གྲི་གུག་གཅོད་པའི་ལས་མཛོད་ཅིག །ཐོད་པའི་ཁྲག་ནི་འཐུང་བར་བྱེད། །སྐྲ་བཤིག་པ་ལ་སྤྱན་གསུམ་པ། །ཡི་དགས་ཞལ་དུ་རྡུབ་པར་བྱེད། །དྲག་པོ་མི་བཟད་གསུས་པ་འཕྱང༌། །ཐོད་པ་འབར་བའི་རྒྱན་དང་ལྡན། །རྒྱུ་མའི་ཕྲེང་བས་ངེས་པར་བརྒྱན། །སྟག་གི་པགས་པའི་ཤམ་ཐབས་ཅན། །མི་ཡི་རུས་པའི་ཕྲེང་ལྡན་པའི། །སྐ་རགས་ཁྲག་གི་
ཐིག་ལེ་ཅན། །ཡི་དགས་ཀླད་པ་ཚིལ་དང་ཞག །ལུས་ལ་བྱུག་པ་ལ་དགྱེས་པ། །ལག་འགྲོ་ཆེན་མོའི་རྣ་ཆ་ཅན། །བྲང་འགྲོའི་རྐང་གདུབ་འཇིགས་རུང་བ། །ཁ་དོག་དཀར་པོ་འབར་བའི་ཚོགས། །གཟི་བརྗིད་ཐུབ་པ་དག་པ་ཡིས། །ཤིན་ཏུ་མི་བཟད་ཁྲོས་བས་ནི། །གནོད་སྦྱིན་ལ་སོགས་སྡིགས་པར་བྱེད། །ཧ་ཧ་ཆེན་པོའི་སྒྲ་སྒྲོགས་པ། །མཁའ་འགྲོ་ཆེན་མོ་དུད་སོལ་གདོང༌། །དེ་འདྲའི་མཁའ་འགྲོ་དཔག་མེད་དང༌། །ཤ་ཟ་ལ་སོགས་འཁོར་གྱིས་བསྐོར། །འཁོར་བཅས་མ་ལུས་ཐམས་ཅད་ཀྱིས། །འདིར་གཤེགས་ལྷག་མའི་གཏོར་མ་བཞེས། །ལྷག་མའི་གཏོར་མ་འདི་བཞེས་ལ། །ལས་རྣམས་མ་ལུས་མྱུར་དུ་མཛོད། །ཁྱེད་ཀྱིས་ལས་རྣམས་མཛད་ཚུལ་ནི། །རྒྱལ་བ་ཤཱ་ཀ་ཐུབ་བསྟན་པ་ལ། །གནས་པའི་རྣལ་འབྱོར་བསྲུང་བ་དང༌། །བསྟན་པ་གཉེན་པོ་བསྲུང་བ་དང༌། །ནད་རྣམས་མ་ལུས་བཟློག་པ་དང། །དེ་ལ་སོགས་པའི་ལས་རྣམས་ཀུན། །མྱུར་དུ་མཛད་ཅིང་སྲུང་དུ་གསོལ། །གཞན་ཡང་བཅོལ་པའི་ལས་རྣམས་ནི། །རྡོ་རྗེ་སློབ་དཔོན་སྨོད་པ་དང༌། །སངས་རྒྱས་བསྟན་པ་བཤིག་པ་དང༌། །རྒྱལ་ཁམས་ཡོངས་སུ་སྨོད་པ་དང༌། །དགེ་འདུན་འདུ་བའི་སྒོ་འཕྲོག་དང༌།། གསང་སྔགས་ཐེག་ཆེན་སྨོད་པ་དང༌། །རྣལ་འབྱོར་སྤྱི་ཡི་དགར་གྱུར་རྣམས། །མཁའ་འགྲོ་ཁྱེད་ཀྱིས་མྱུར་དུ་སྒྲོལ། །ཤ་ཟ་མོ་ནི་འཇིགས་པའི་གཟུགས། །དུར་ཁྲོད་གནས་པའི་ཤིང་གཅིག་ལ། །རྩེ་མོར་གནས་བཅས་ཀུན་དུ་བལྟ། །གཅེར་བུ་སྐྲ་བཤིག་ཤ་ཟ་མ། །རྟག་ཏུ་ཤ་ནི་ཟ་བར་བྱེད། །ཤ་ཟ་འཁོར་དང་བཅས་པ་རྣམས། །འདིར་གཤེགས་མཆོད་པ་དམ་པ་བཞེས། །མཁའ་ལྡིང་རྒྱལ་པོ་གསེར་མིག་ཅན། །གདོང་གཅིག་པ་ལ་ལག་བཞི་པ། །ཁ་དོག་དཀར་པོའི་འོད་ཆེན་ལྡན། །གསེར་གྱི་གཤོག་པའི་དབུ་རྒྱན་ཅན། །ནོར་བུ་བཻ་ཌཱུཪྻ་ཡི་མཆུ། །རྐང་གཟེར་བྱི་རུ་ལས་བྱུང་བ། །ཤེལ་ལྟར་དཀར་བའི་མདོག་དང་ལྡན། །སྐྱེ་བའི་གནས་སུ་བདུད་རྩིས་བཀང༌། །ཕྱག་གིས་བུམ་འཛིན་ཕྱག་འཚལ་བསྟོད། །འོད་ཟེར་དམར་པོའི་ཚོགས་ཀྱིས་ནི། །མཁའ་ལྡིང་དབང་ཕྱུག་འཁོར་བཅས་སྤྲོས། །གཤོག་ཟུར་བརྒྱབ་པས་རྒྱ་
མཚོ་སྐེམས། །ཀླུ་རྣམས་མ་ལུས་ཟས་སུ་ཟ། །མཁའ་ལྡིང་རྒྱ་པོ་འཁོར་བཅས་རྣམས། །འདིར་གཤེགས་མཆོད་པ་དམ་པ་བཞེས། །ཀླུ་ཡི་རྒྱལ་པོ་གཟི་བརྗིད་ཅན། །ཀླུ་ཆེན་བརྒྱད་དུ་སྐུས་སྦྲུལ་པ། །ཀླུ་ཆེན་རྒྱལ་པོ་ནོར་རྒྱས་བུ། །སྐུ་མདོག་དཀར་པོ་སྐྱོན་མགོས། །ཤར་ཕྱོགས་ཀླུ་རྣམས་འདུལ་མཛད་པ། །སྦྲུལ་མགོ་ཅན་ལ་ཕྱག་འཚལ་བསྟོད། །ཀླུ་ཡི་རྒྱལ་པོ་འཇོག་པོ་ནི། །ཀླུ་མདོག་སེར་པོ་སྦྲུལ་མགོ་ཅན། །བྱང་ཕྱོགས་ཀླུ་རྣམས་འདུལ་མཛད་པ། །སྦྲུལ་ཞགས་བསྣམས་ལ་ཕྱག་འཚལ་བསྟོད། །ཀླུ་ཆེན་རྒྱལ་པོ་སྟོབས་ཀྱི་རྒྱུ། །སྐུ་མདོག་དམར་པོ་སྦྲུལ་མགོ་ཅན། །ནུབ་ཕྱོགས་ཀླུ་རྣམས་འདུལ་མཛད་པ། །ཐུ་ཆེན་ཁྱོད་ལ་ཕྱག་འཚལ་བསྟོད། །ཀླུ་ཆེན་རྒྱལ་པོ་པདྨའི་རྒྱལ། །སྐུ་མདོག་སྔོན་པོ་སྦྲུལ་མགོ་ཅན། །ལྷོ་ཕྱོགས་ཀླུ་རྣམས་འདུལ་མཛད་པ། །ཡོན་ཏན་རྒྱལ་ལ་ཕྱག་འཚལ་བསྟོད། །ཀླུ་ཆེན་རྒྱལ་པོ་པདྨ་ཆེ། །སྐུ་མདོག་དཀར་སེར་སྦྲུལ་མགོ་ཅན། །དབང་ལྡན་ཀླུ་རྣམས་འདུལ་མཛད་པ། །སྐྱོན་མགོས་ལ་ཕྱག་འཚལ་བསྟོད། །ཀླུ་ཆེན་རྒྱལ་པོ་དུད་སྐྱོང་ནི། །སྐུ་མདོག་དཀར་སྔོ་སྦྲུལ་མགོ་ཅན། །ཤར་ལྷོའི་ཀླུ་རྣམས་འདུལ་མཛད་པ། །དུག་རྣམས་འཇོམས་ལ་ཕྱག་འཚལ་བསྟོད།། ཀླུ་ཆེན་རྒྱལ་པོ་རིགས་ལྡན་ནི། །སྐུ་མདོག་སྔོན་དམར་སྦྲུལ་མགོ་ཅན། །ལྷོ་ནུབ་ཀླུ་རྣམས་འདུལ་མཛད་པ། །སྟོབས་པོ་ཆེ་ལ་ཕྱག་འཚལ་བསྟོད། །ཀླུ་ཆེན་རྒྱལ་པོ་པདྨ་འཁྱིལ། །སྐུ་མདོག་དམར་སེར་སྦྲུལ་མགོ་ཅན། །ནུབ་བྱང་ཀླུ་རྣམས་འདུལ་མཛད་པ། །ནད་རྣམས་སེལ་ལ་ཕྱག་འཚལ་བསྟོད། །ཨོཾ་མཐའ་ཡས་དང་ནི་ནོར་རྒྱས་བུ། །འཇོག་པོ་དང་ནི་སྟོབས་ཀྱི་རྒྱུ། །པདྨ་པདྨ་ཆེན་པོ་དང༌། །དུང་སྐྱོང་དང་ནི་རིགས་ལྡན་དང༌། །ལྷ་མོ་ལྷ་མོ་ཆེན་མོ་དང༌། །ཟླ་བ་སྤྱི་གཙུག་སྤྱི་གཙུག་ཆེ། །བེ་ཅོན་འཛིན་དང་བེ་ཅོན་ཆེ། །སྙིང་བོ་མེད་དང་གུལ་ཏི། །དགའ་པོ་དང་ནི་ཉེར་དགའ་དང༌། །རྒྱ་མཚོ་དང་ནི་རྒྱ་མཚོ་ཆེ། །གདུང་བ་དང་ནི་གདུང་ཆེན་མོ། །དཔལ་གྱི་འོད་དང་འོད་པོ་ཆེ། །རིན་ཆེན་འོད་དང་གཟུགས་བཟང་དང༌། །གཟུགས་ཆེན་སྤྲུལ་བཟངས་ལྟོ་འཕྱེ་ཆེ། །སྨིག་རྒྱུ་དང་ནི་སྨིག་རྒྱུ་ཆེ། །ཀླུ་ཆེན་བརྒྱད་པོ་འཁོར་བཅས་རྣམས། །འདིར་གཤེགས་མཆོད་
སྦྱིན་གཏོར་མ་བཞེས། །དཔལ་ལྡན་མགོན་པོ་ནག་པོ་ཆེ། །སྐུ་མདོག་མཐིང་ནག་ཞལ་གཅིག་པ། །གཡོན་བརྐྱང་གཡས་བསྐུམ་འབྱུང་པོ་འདུལ། །མཐུ་སྟོབས་ཅན་ལ་ཕྱག་འཚལ་ལོ། །ནམ་མཁའི་གོས་ཅན་མཐུ་བོ་ཆེ། །སྟག་གི་པགས་པའི་ཤམ་ཐབས་ཅན། །སྦྲུལ་དང་ཐོད་པའི་ཕྲེང་བར་ལྡན། །མཐུ་ཆེན་ཐོབ་ལ་ལ་ཕྱག་འཚལ་བསྟོད། །མཆེ་བ་གཙིགས་པ་མི་བཟད་པ། །ཐོད་པའི་ཕྲེང་བ་བཀོད་པ་ཡིས། །མགྲིན་པ་རྐང་པ་རྣམ་བརྒྱན་པ། །མི་བཟང་ཐོད་ཕྲེང་ཅན་ལ་བསྟོད། །སྨིན་མ་ཁམ་པའི་སྨིན་འཁྱུག་ཅན། །སྤྱན་གསུམ་གྱིས་ནི་རྣམ་པར་སྤྲས། །ཁམས་གསུམ་ལ་ནི་གཟིགས་པའི་རྟགས། །སྐུ་གསུང་ཐུགས་ལྡན་ཁྱོད་ལ་བསྟོད། །དང་པོ་སྤྱན་ནི་ནག་པོ་མཚུངས། །གཡས་པ་སྔོན་པོར་སྣང་བ་སྟེ། །གཡོན་པ་དམར་པོར་ཤིན་ཏུ་མཛེས། །གསལ་བར་མཁྱེན་ལ་ཕྱག་འཚལ་བསྟོད། །ཡེ་ཤེས་སྤྱན་ནི་གསུམ་པོ་ཡང༌། །མི་འགྱུར་ཕྲིན་ལས་ཆགས་པའི་རྟགས། །ཉི་མ་ཁྲི་དང་མཚུངས་པའི་འོད། །འོད་ལྡན་ཁྱོད་ལ་ཕྱག་འཚལ་བསྟོད། །ཕ་རོལ་ཕྱིན་བཅུའི་མཐུ་ལྡན་པའི། །ཕྱོགས་བཅུའི་འགྲོ་བའི་དོན་མཛད་པའི། །ཤེས་རབ་རལ་གྲི་རྣོན་པོ་ཡིས། །ཉོན་མོངས་གཅོད་མཛད་ཁྱོད་ཕྱག་འཚལ། །ཐུགས་རྗེས་འབར་བའི་ཐོ་བ་ཡིས། །དགྲ་བགེགས་ཐལ་བར་རློག་མཛད་པ། །རྩེ་གསུམ་འབར་བའི་འོད་ཟེར་གྱིས། །དུག་གསུམ་རྩད་གཅོད་ཁྱོད་ཕྱག་འཚལ། །རྒྱུད་སྦྲེང་ལ་ནི་བརྩོན་གྱུར་པ། །མཁའ་འགྲོ་རྣམས་ནི་བསྐུལ་བའི་རྟགས། །གཡས་ཀྱི་ཐབས་ཀྱི་ཕྱག་རྣམས་ནི། །ལས་རྣམས་མཛད་པ་ཁྱོད་ཕྱག་འཚལ། །གཡོན་གྱི་ཐོད་པས་ཁྲག་བཀང་པ། །དགྲ་བགེགས་ཞལ་དུ་རྔུབ་མཛད་པ། །ཁ་ཊྭཱཾ་རྩེ་གསུམ་བསྣམས་པ་ནི། །ཉོན་མོངས་གདུང་བ་སེལ་མཛད་པ། །གར་གྱི་ཐབས་ཀྱི་ཕྱག་རྒྱ་ནི། །ལས་ལ་སྐུལ་མཛད་ཁྱོད་ཕྱག་འཚལ། །མི་ཡི་པགས་པ་ཁྲག་འཛག་པ། །སྟེང་གི་ཕྱག་ནི་གཉིས་ན་བསྣམས། །དྲག་པོའི་ལས་ལ་རོལ་པའི་རྟགས། །དྲག་པོའི་ལས་མཛད་ཁྱོད་ཕྱག་འཚལ། །དེ་ཡི་བཀའ་སྟོད་ཕོ་ཉ་མོ། །མཁའ་འགྲོ་ཆེན་མོ་མི་སྡུག་གདོང༌། །ཁྱོད་གྱིས་དྲག་པོའི་ལས་མཛད་ཅིག །དྲག་པོའི་ལས་མཛད་
ཁྱོད་ཕྱག་འཚལ། །སེང་གདོང་ཆེན་མོ་རྩལ་མོ་ཆེ། །འབྱུང་པོ་ཐམས་ཅད་འཇིགས་མཛད་མ། །འབྱུང་པོ་བསྒྲལ་བའི་ལས་མཛོད་ཅིག །སྒྲོལ་མཛད་ཁྱོད་ལ་ཕྱག་འཚལ་བསྟོད། །མཁའ་འགྲོ་ཆེན་མོ་གླང་པོའི་གདོང༌། །ཁྱོད་ཀྱི་སྟོབས་ཀྱིས་བདུད་རྣམས་འདུལ། །བདུད་རྣམས་མ་ལུས་ཁྱོད་ཀྱིས་འདུལ། །བདུད་འདུལ་ཆེན་མོ་ཁྱོད་ཕྱག་འཚལ། །མཁའ་འགྲོ་ཆེན་མོ་དྲེད་མོའི་གདོང༌། །རྡོ་རྗེའི་བྲག་ཀྱང་འགས་པར་བྱེད། །བྲག་འགས་ཆེན་མོ་མཐུ་རྩལ་ཅན། །མཐུ་རྩལ་ཅན་ལ་ཕྱག་འཚལ་བསྟོད། །མཁའ་འགྲོ་ཆེན་མོ་སྦྲུལ་གྱི་གདོང༌། །གསོད་བྱེད་གསོད་བྱེད་མཐུ་མོ་ཆེ། །སྨན་དང་དུག་གི་སྦྱོར་མཁན་མ། །སྦྱོར་མཁན་མ་ལ་ཕྱག་འཚལ་བསྟོད། །མཁའ་འགྲོ་ཆེན་མོ་བྱི་ལའི་གདོང༌། །མགྱོགས་བྱེད་རྩལ་དང་ལྡན་པ་མོ། །གང་ལ་བྱ་བའི་དོན་གྲུབ་མ། །དོན་གྲུབ་མ་ལ་ཕྱག་འཚལ་བསྟོད། །མཁའ་འགྲོ་ཆེན་མོ་ཁྱི་ཡི་གདོང༌། །གཙང་སྨེ་མེད་པར་ཟ་བའི་མཆོག །ཤ་ཁྲག་དུས་གསུམ་གསོལ་མཛད་མ། །གསོལ་མཛད་མ་ལ་ཕྱག་འཚལ་བསྟོད། །མཁའ་འགྲོ་ཆེན་མོ་སྟག་གི་གདོང༌། །དཔལ་བརྟུལ་ཆེན་མོ་མཐུ་མོ་ཆེ། །གསོད་ལ་དགའ་བའི་མཁའ་འགྲོ་མ། །གསོད་བདག་ཆེན་མོ་ཁྱོད་ཕྱག་འཚལ། །མཁའ་འགྲོ་ཆེན་མོ་ཁྱོད་རྣམས་ཀྱང༌། །འཁོར་དུ་ཡང་སྤྲུལ་འབུམ་གྱིས་བསྐོར། །ཧ་ཧ་ཞེས་པའི་སྒྲ་སྒྲོགས་ཤིང༌། །རྨོངས་པ་རྣམས་ནི་སྐྲག་བྱེད་ཅིང༌། །ཐོད་པའི་ནང་དུ་བླུགས་པའི་ཁྲག །འཐུང་པར་བྱེད་པའི་མཁའ་འགྲོ་མ། །སྐད་ཅིག་ཡུད་ལ་སྒྲོལ་བར་བྱེད། །འཁོར་བཅས་ཁྱེད་ལ་ཕྱག་འཚལ་བསྟོད། །དཔལ་ལྡན་མགོན་པོ་ནག་པོ་ལ། །མཆོད་པ་དམ་པ་འབུལ་བ་ནི། །མེ་ཏོག་སྤོས་དང་མར་མེ་དང༌། །དྲི་ལ་སོགས་པ་འབུལ་གྱིས་བཞེས། །མཐུན་པའི་གཏོར་མ་འབུལ་བ་ནི། །ཐུག་པ་ནག་པོའི་འོ་ཐུག་དང༌། །སྦྱར་བ་ལ་སོགས་མི་བཟད་དབུལ། །བསྟན་པ་བསྲུང་བའི་ལས་མཛོད་ཅིག །རློན་པ་དང་ནི་བཙོས་པ་དང༌། །བསྲེགས་པའི་ཤ་ཡི་བྱེ་བྲག་རྣམས། །མི་བཟད་དབུལ་གྱིས་བཞེས་སུ་གསོལ། །བསྟན་པ་བསྲུང་བའི་ལས་མཛོད་ཅིག །ཞག་དང་ཀླད་པའི་ཚིལ་རྣམས་དང༌། །ཁྲག་དང་གློ་བ་ལ་སོགས་པ། །ཉལ་
སོགས་པ་མི་བཟད་དབུལ། །བསྟན་པ་བསྲུང་བའི་ལས་མཛོད་ཅིག །རྒུན་ཆང་དང་ནི་སྦྱར་བའི་ཆང༌། །འབྲུ་ཡི་ཆང་ལ་སོགས་པ་དང༌། །འབྲེང་བུའི་ཆུན་པོ་མི་བཟད་དབུལ། །སྒོག་པའི་བྱེ་བྲག་བདུན་རྣམས་དང༌། །སྣམ་ཁུར་འབྲུལ་སོགས་པ་དང༌། །ཟངས་ལྕགས་ལ་སོགས་མི་བཟད་དབུལ། །བསྟན་པ་བསྲུང་བའི་ལས་མཛོད་ཅིག །གཞན་ཡང་མཁའ་འགྲོ་ཆེན་མོ་རྣམས། །སྦྱང་གདོང་མ་དང་སེང་གདོང་མ། །གླང་པོའི་གདོང་དང་བྱི་ལའི་གདོང༌། །ཁྱི་གདོང་མ་དང་སྟག་གདོང་མ། །མཁའ་འགྲོ་ཆེན་མོ་འཁོར་བཅས་ལ། །ཤ་ཁྲག་གཏོར་མ་མི་བཟད་དབུལ། །མཆོད་པ་དམ་པ་འདི་བཞེས་ལ། །ཁྱེད་ལ་བཅོལ་པའི་ཕྲིན་ལས་ནི། །རྡོ་རྗེ་སློབ་དཔོན་སྨོད་པ་དང༌། །སངས་རྒྱས་བསྟན་པ་བཤིག་པ་དང༌། །རྒྱལ་ཁམས་ཡོངས་ལ་གནོད་པ་དང༌། །དགེ་འདུན་འདུ་བའི་སྒོ་འཕྲོག་དང༌། །ཐེག་ཆེན་ཆོས་ལ་སྨོད་པ་དང༌། །རྣལ་འབྱོར་སྤྱི་ཡི་དགྲར་གྱུར་རྣམས། །མ་ཐོགས་མྱུར་དུ་བསྒྲལ་དུ་གསོལ། །ཕྱི་ནང་ཚུལ་དུ་སྐུ་སྤྲུལ་པའི། །རྒྱལ་པོ་ཆེན་པོ་བཞི་རྣམས་ནི། །སོ་སོའི་ཕྱོགས་ཀྱི་འཁོར་སྐྱོང་བ། །དྲག་པོའི་ལས་མཛད་རྒྱལ་པོ་བཞི། །ཡུལ་འཁོར་སྐྱོང་གི་རིགས་རྣམས་ཀུན། །ཆང་སྤངས་པ་ཡི་གཏོར་མ་ལོང༌། །རྒྱལ་པོ་ཆེན་པོ་རྣམ་ཐོས་སྲས། །གནོད་སྦྱིན་སྟོང་ལ་མངའ་མཛད་པ། །ཁྱེད་ཀྱི་མཐུན་པའི་དམ་རྫས་ནི། །ཤ་ཆང་ལ་སོགས་གཏོར་མ་ལོང༌། །རྒྱལ་པོ་ཆེན་པོ་འཕགས་སྐྱེས་པོ། །གྲུལ་བུམ་སྟོང་ལ་མངའ་མཛད་པའི། །ཤིན་ཏུ་ཁྲག་ལ་དགྱེས་པའོ། །ཁྲག་གིས་བཀང་བའི་གཏོར་མ་ལོང། །རྒྱལ་པོ་ཆེན་པོ་སྤྱན་མི་བཟང༌། །ཀླུ་རྣམས་སྟོང་ལ་མངའ་མཛད་པ། །འོ་མ་དག་ལ་ཤིན་ཏུ་དགྱེས། །འོ་མས་བཀང་བའི་གཏོར་མ་ལོང༌། །རྒྱལ་པོ་ཆེན་པོ་འཁོར་བཅས་ཀྱང༌། །འདིར་གཤེགས་མཆོད་སྦྱིན་གཏོར་མ་བཞེས། །དྲི་ཟའི་རྒྱལ་པོ་ཟུར་ཕུད་ཅན། །སྤོས་ངད་ལྡན་པའི་རྩེ་ལ་གནས། །དྲི་རྣམས་ཞིམ་པས་ལུས་ལ་བྱུགས། །མེ་ཏོག་ཕྲེང་བས་ལུས་ནི་བརྒྱན། །དྲི་ཟའི་བུ་མོ་ལུས་ལ་འཁྲིལ། །ས་འཛིན་ལ་སོགས་གླུ་ཡི་ནི། །བྱེ་བྲག་བདུན་གྱི་སྒྲ་རྣམས་སྒྲོགས། །ཟས་སུ་དྲི་རྣམས་ཟ་བར་བྱེད། །དྲི་ཟ་འཁོར་དང་བཅས་པ་རྣམས། །འདིར་
གཤེགས་ཚུལ་བཞིན་གཏོར་མ་བཞེས། །ཤ་ཟའི་རྒྱལ་པོ་མཐུ་བོ་ཆེ། །ཤིན་ཏུ་འཇིགས་པའི་ང་རོ་སྒྲོགས། །ཞལ་གདངས་པས་ནི་ཤ་རྣམས་གསོལ། །ཤ་ཟ་འཁོར་དང་བཅས་པ་རྣམས། །འདིར་གཤེགས་ཚུལ་བཞིན་གཏོར་མ་བཞེས། །རྣལ་འབྱོར་ཆེན་མ་འཕྲོག་མའི་གདོང༌། །མཆེ་བ་གཙིགས་པ་འཇིགས་སུ་རུང༌། །ཁ་ནས་ལྕེ་འདྲིལ་མཐུ་མོ་ཆེ། །གར་གྱི་ཚུལ་དུ་མཆོད་མཛད་མ། །གནོད་སྦྱིན་འཕྲོག་མ་འཁོར་བཅས་རྣམས། །འདིར་གཤེགས་མཆོད་པ་དམ་པ་བཞེས། །ལྷ་དང་ལྷ་མིན་རྒྱལ་པོ་ནི། །རྒྱུ་བ་དང་ནི་ཆེར་རྒྱུ་བ། །ཡི་དགས་རྒྱུ་བ་ཉི་མ་ཟླ། །དངོས་གྲུབ་གདོང་དང་རྒྱལ་པོ་དང༌། །རྟ་ཡི་རྒྱལ་པོ་ཟླ་བའི་རྒྱལ། །ལྷ་མོ་ཀླུ་མོ་འགའ་འགའ་དང༌། །གཟུགས་མཛེས་སྐར་མ་འདུས་པ་དང༌། །གཟའ་རྣམས་ཀུན་དུ་ཚོགས་ཀྱི་གཙོ། །ཀརྟི་ཀ་དང་དཔལ་ལྡན་མ། །ལྷ་མོ་རི་བོང་འཛིན་པ་ཉིད། །ལྷག་མ་དང་ནི་ལྷག་མཆེ། །ལྷ་ཡི་རྒྱལ་པོ་ལྷ་མིན་རྒྱལ། །པུཀྐ་སཱི་དང་སྦོམ་ཆེན་མོ། །ལྷ་དང་ལྷ་མིན་རྒྱལ་པོ་ཆེ། །འཁོར་བཅས་མ་ལུས་ཐམས་ཅད་ཀྱང༌། །འདིར་གཤེགས་མཆོད་པ་དམ་པ་བཞེས། །གནོད་སྦྱིན་རྒྱལ་པོ་ཆེན་པོ་ནི། །ནོར་བུ་བཟང་དང་གང་བ་བཟང༌། །རྒྱལ་བ་བཟང་པོ་དགའ་བྱེད་ཕུར། །ཕུར་བུ་ཆེ་དང་པདྨའི་གཙུག །ཐུང་གི་གཙུག་ཕུད་གར་དང་ནི། །གར་ཆེན་འབིགས་པར་བྱེད་པ་དང༌། །གཅོད་པར་བྱེད་དང་གང་བར་བྱེད། །ནོར་དང་ནོར་མིན་ཤིན་ཏུ་ནོར། །གཟུགས་བཟང་རོལ་པ་རོལ་ཆེན་པོ། །དགོང་དང་རྩེ་ལྡན་རྣམ་པར་སྤྱོད། །དཔལ་བཟངས་དང་ནི་གཟུག་མཛེས་རྣམས། །བདེ་བ་ཆེན་པོའི་བཀའ་འདི་ཡིས། །གནོད་སྦྱིན་གནོད་སྦྱིན་མ་འདིར་ཤོག །གནོད་སྦྱིན་འཁོར་བཅས་མ་ལུས་ཀྱང༌། །འདིར་གཤེགས་མཆོད་སྦྱིན་གཏོར་མ་ལོང༌། །མཁའ་འགྲོ་ནག་མོ་ཆེན་མོ་ནི། །ཨོཾ་ཤིང་གཅིག་དང་ནི་དུར་ཁྲོད་དང༌། །རི་བོ་དང་རི་རི་སུལ་ཕུག །གྲོང་དང་བཞི་མདོ་ཞིང་དང་ནི། །ཁྱད་པར་དུ་ནི་ཁང་སྟོང་དང༌། །སེམས་ཅན་གནོད་དང་ཐང་དང་ནི། །ཁྱད་པར་དུ་ནི་ཆུ་ལ་གནས། །ནག་པོ་ཆེན་པོ་དྲག་ཆེན་པོ། །ལྷ་སྦྱིན་མཉམ་དུ་སྟོན་པ་དང༌། །ནག་པོ་གཙིགས་དང་འཇིགས་བྱེད་དང༌། །དགའ་ལས་འདས་དང་ལོག་འདྲེན་རྣམས། །རྒན་བྱེད་མོ་དང་
དྲག་མོ་དང༌། །འཇིགས་བྱེད་མོ་དང་ཨུ་མ་དང༌། །རྒྱལ་དང་རྣམ་པར་རྒྱལ་བ་དང༌། །མི་ཐུབ་གཞན་གྱིས་མི་ཐུབ་མ། །ནག་མོ་བཟང་མོ་ནག་མོ་ཆེ། །ནག་མོ་སྦོམ་དང་རྣལ་འབྱོར་མ། །དབང་མོ་དང་ནི་ཟླ་བ་ཆེ། །དྲག་ཏུ་སྡང་དང་འཆང་བ་མོ། །འཕྲོག་བྱེད་མ་དང་མར་མེ་མ། །འཇིགས་བྱེད་གྲོང་གནས་རྣལ་འབྱོར་མ། །དྲག་མོའི་གཟུགས་དང་གཟུགས་ཆེན་མོ། །མཆེ་བ་གཙིགས་དང་ཐོད་ཆེན་མ། །ཕོད་ཕྲེང་ཕྲེང་ཅན་ཁ་ཊྭཱཾ་ག །སྦྲུལ་ཆེན་རལ་གྲི་དགྲ་སྟ་ཅན། །རྡོ་རྗེ་དེ་བཞིན་གཞུ་ཅན་མ། །དེ་ཉིད་ཆེན་མོ་མཁའ་འགྲོ་མ། །ལུས་ཀུན་རྗེས་སུ་གྲུབ་བྱེད་མ། །སྦྱོར་བའི་དཀྱིལ་འཁོར་རྒྱ་ཆེན་མོ། །དེ་བཞིན་རྡོ་རྗེ་དབང་ཕྱུག་གཙོ། །དེ་བཞིན་གཤེགས་པའི་སྐུ་ཆེན་ཏེ། །རྡུལ་མེད་རྣལ་འབྱོར་འབྱིན་པ་མོ། །རྡོ་རྗེ་དབང་པོའི་བཀའ་འདི་ཡིས། །ཐམས་ཅད་ཀུན་ནས་འདིར་སྦྱོན་ཅིག །མཁའ་འགྲོ་ནག་མོ་འཇིགས་པའི་གདོང༌། །ནག་མོ་ཆེན་མོའི་ཚོགས་ཀྱིས་བསྐོར། །དུར་ཁྲོད་ཀུན་དུ་རྒྱུག་མཛད་མ། །དཔག་ཚད་བརྒྱད་ཁྲི་བཞི་སྟོང་ནས། །སྐད་ཅིག་ཡུད་ལ་ཕྱིན་མཛད་མ། །ཁྲག་གི་དྲི་སྣོམ་མཐུ་མོ་ཆེ། །འཁོར་བཅས་འདིར་གཤེགས་གཏོར་མ་ལོང༌། །ཁྱེད་ལ་བཅོལ་པའི་ཕྲིན་ལས་ནི།། རྡོ་རྗེ་སློབ་དཔོན་སྨོད་པ་དང༌། །སངས་རྒྱས་བསྟན་པ་འཇིག་པ་དང༌། །རྒྱལ་ཁམས་ཡོངས་སུ་གནོད་པ་དང༌། །དགེ་འདུན་འདུ་བའི་སྒོ་འཕྲོག་དང༌། །གསང་སྔགས་ཐེག་ཆེན་སྨོད་པ་དང༌། །རྣལ་འབྱོར་སྤྱི་ཡི་དགྲར་གྱུར་རྣམས། །མ་ཐོགས་མྱུར་དུ་བསྒྲལ་དུ་གསོལ། །རྣལ་འབྱོར་ལྕམ་དྲལ་བསྲུང་བ་དང༌། །རིམས་ནད་ཡམས་ནད་བཅད་པ་དང༌། །མི་མཐུན་རྐྱེན་དབང་བཟློག་ཏུ་གསོལ། །དེ་ནས་གསང་སྔགས་བསྟན་བྱ་སྟེ། །སྔགས་རྣམས་ནུས་པའི་མཐུ་ཡིས་ནི། །དུག་རྣམས་འཇོམས་ཤིང་ཐམས་ཅད་སྦྱང༌། །སྔགས་རྣམས་སོ་སོའི་ཚིགས་བཅད་དང༌། །སྦྱར་བ་རུ་ནི་ཤེས་པར་བྱ། །ཡང་ན་སྔགས་རྣམས་ཕྱོགས་གཅིག་གཏང༌། །ཚིགས་བཅད་ཀྱང་ནི་ཕྱོགས་གཅིག་གཏང༌། །དེ་ནི་མན་ངག་སྐབས་ཤེས་བྱའོ། །སྐབས་རྣམས་དེ་ནི་མ་ཤེས་ན། །ནུས་པའི་མཐུ་ནི་ཉམས་པར་འགྱུར། །ཡང་ན་ཚིགས་བཅད་གཅིག་པུས་ཀྱང༌། །
གང་ཡིན་དོན་རྣམས་འགྲུབ་པར་འགྱུར། །རྡོ་རྗེའི་ཚིགས་བཅད་དོན་ལྡན་ནི། །སྔགས་དང་འདྲ་བ་ཉིད་དུ་གསུངས། །རྡོ་རྗེ་ཚིག་གི་ཁྱད་པར་གྱི། །སྔགས་ཀྱི་ལྷ་ཡི་ཡོན་ཏན་གྱི། །དོན་རྣམས་ཀུན་ནི་བརྗོད་པས་སུ། །དོན་དམ་ཀུན་རྫོབ་ལས་མི་འདའ། །དོན་དམ་ཀུན་རྫོབ་བརྗོད་ཚིག་ཏུ། །སྔགས་མཚོན་བྱེད་པའི་རྡོ་རྗེའི་ཚིག །དེ་ལ་སྔགས་ཞེས་བྱ་བ་ཡིན། །ཨོཾ་ན་མཿ་ཤྲཱི་བཛྲ་ཌཱ་ཀི་ཡ། །ཨོཾ་ཀ་ཀཱ་སྱེ་ཧཱུཾ་ཧཱུཾ་ཕཊ། ཨོཾ་ཨ་ཡན་ཏྭ་ཡནྡུ་ཌཱ་ཀི་བྱ་ཤན་རྦག་ཏུ་མ་ཧོ། །བྲ་བྷི་མ་ཝ། །ཨི་ཤ་ཨི་མཾ་བ་ལིཾ། བྷུཉྫ་ཛིགྷྲ་པི་པ་གྲྀ་ཧྣ་ཏ། ཨཱཏྨ་ཀཾ་པུཥྚིཾ་ཀུ་རུ། །ས་མ་ཡ་མ་ནུ་སྨ་ར་ཨ་ཧཱུཾ་ཕཊ་སྭཱ་ཧཱ། ཨོཾ་ཤྭ་ན་སེ་བྷཱུ་ཙ་རི་ཡེ་ཨི་མཾ་བ་ལིཾ། གྲྀཧྣ་གྲྀ་ཧྣ། ཧཱུཾ་ཧཱུཾ་ཕཊ། ཨོཾ་ཨེ་ཧྱེ་ཧི་མ་ཧཱ་པཱ་ལ་བིཪྻ་བར་གྲ་མ་ཡོ་ཛ་ན་ས་ཧཱ་སྲ་པྲ་ལཾ་བརྦ་པུ་ཤཾ། ཏི་ལི་ཏི་མི་གི་ལི་མ་ཧཱ་ཏི་མིདྷི་ལ་བྲི་བྷི་ཏ་ཡོ་མ་ཧཱ་མི་ན་ཨ་དྷཱི་པ་ཏི་ཡ་ཨ་སནྣི་ཧི་ཏོ་བྷ་བནྟུ། མ་མ་ཨ་བ་མ་བེ་ཏ་ཝ་སིདྡྷི་མ་བི་ཏ་ར་ན་ཏུ་སྭཱ་ཧཱ། ཨོཾ་ཨ་ཨཱ་ཨི་ཨཱི་ཨུ་ཨཱུ་རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨོ་ཨཽ་ཨཾ་ཨཿ་སྭཱ་ཧཱ། ཨོཾ་ན་མོ་བྷ་ག་བ་ཏེ་བཛྲ་ཧཱུཾ་ཀ་ར། ཧྲིཾ་ཥྚཾ་སརྦ་བྷཱུ་ཏ་ནི་སྟམྦྷ་སྭཱ་ཧཱ། ཨོཾ་བྲ་ཧྨཻ་ཧྲཾ་ཧཱུཾ་ཧཱུཾ་ཕཊ། ཨོཾ་བ་ཤ་བི་ཧཱུཾ་ཕཊ། ཨོཾ་ཀཽ་མཱ་རཱི་ཡ་ཧྲི་ཧཱུཾ་ཕཊ། ཨོཾ་ཡ་མེ་ཧྲི་ཧཱུཾ་ཕཊ། ཨོཾ་ཀོ་བཱི་རཱི་ཡེ་ཧཱུཾ་ཕཊ། ཨོཾ་ཙ་མུ་ཎྜཱི་ཡེ་ཧྲི་ཡེ་ཧཱུཾ་ཕཊ། ཨོཾ་ཨཻ་ཤཱ་ནྱཻ་ཧྲི་ཧཱུཾ་ཕཊ། ཨོཾ་མ་བྷཻ་ཧྲིཾ་ཧཱུཾ་ཕཊ། ཨོཾ་ཨ་ཨཱ་ཨཾ་ཨ་ཨ་ཀཱ་རོ་མུ་ཁཾ་སརྦ་དྷ་རྨཱ་ཎཱཾ་ཨཱདྱ་ནུཏྤནྣ་ཏྭ་ཏ་ཨོཾ་ཨཱཿ་ཧཱུཾ་ཕཊ་སྭཱ་ཧཱ། ཨོཾ་ཏཱ་རེ་ཏུཏྟཱ་རེ་ཨཱཿ་ཧཱུཾ་ཕཊ་སྭཱ་ཧཱ། ཨོཾ་མཱ་རཱི་ཙྱཻ་བ་ར་ལི་བ་དཱ་ལི་བཱ་ར་ཧཱ་མ་ཁི་སརྦ་དུཥྚ་ནཾ་མུ་ཁཾ། བནྡྷ་བནྡྷ་ཧཱུཾ་ཧཱུཾ་ཕཊ། ཨི་མཾ་བ་ལིཾ་པྲ་ཏཱི་ཙྪ་ས་མ་ཡ་མ་ནུ་སྨ་ར་ཧཱུཾ་ཕཊ་སྭཱ་ཧཱ། ཨོཾ་མ་ཧཱ་ཀཱ་ལ་ཨ་ཡ་ཧི་ཨ་ཨཱ་ཧི། མ་ཧཱ་བི་ཧ་ར་པ་ལ་ན་བརྦ་ཌཱ་ཀི་ནཱི་ཡ་ཀྵ་རཱ་ཀྵ་ས་པ་རི་བ་རོ། །ཨད་ཏྲ་སནྣི་ཧི་ཏོ་བྷ་བ་སྭཱ་ཧཱ། ཨོཾ་ཨ་ད་ཤ་དི་ཀ་ཏྲི་ཨཱ་ཪྻ་སཾ་བྱ་བྱ་བ་ཏི་ཥྛ་ཏ། སརྦ་ད་ཤ་དི་ཀ་ལོ་ཀ་དྷཱ་ཏུ་བ་ར་མ་ནྱ་པ་རན་ཏད་པ་ར་ཏིང༌། སརྦ་ཏིག་ལོ་ཀ་པ་ཡ། མ་ཧཱ་ཀཱ་ལ་བཛྲ་ཨཱ་ཡུ་དྷ་མཱ་ཡ་བཛྲ། བཛྲ་ན་མ། བཛྲ་ག་ལ། བཛྲ་མུ་ས་ལ། ནཱ་ག་བཛྲ། བཛྲ་ཨ་ནི་ལ། བཛྲ་ཤོ་ན་ཌཱ། བཛྲ་ཀྲོ་དྷ། བཛྲ་བྲ་ལ། བཛྲ་ཀནྡྷ་ལི། མོན་བཛྲ། མེ་མ་ཙི་ཏྲ། པྲྀ་ཐི་བི་བདྷྱཻ་བ་ཧཱ། སརྦ་ཨི་ཏྱུ་བ་ས་ར་ག་ཨུ་པ་ཤནྟེ་ཡེ། སརྦ་གནྡྷ་པུ་ཥྤ་དྷཱུ་པ། དཱི་བ། ནཻ་བི་དྱེ།
སརྦ་པ་ཏ་ཨ་ལཾ་ཀཱ་ར་དྷ་ནི་ཤྣ་པྲ་ཏཱི་ཙྪ་ཨུ་པ་དུ་ཛ། སརྦ་དུ་ཥྚ་ནཱཾ། ཀཱ་ཡ་བཱ་ཀ་ཙིཏྟཾ། སྟཾ་བྷ་ཡ་སྟཾ་བྷ་ཡ། མ་མ་སརྦ་ཨ་ཤཾ་པ་རི་པུ་ར། ཡ་ཐཱ་ཡ་བཱ། ཧཱ་སཱཾ་ས་རཾ་མ་མ་སརྦ་ས་ས་ཏཾ་ནཾ་ཙ། སཏྶུ་ཁ་སིདྡྷི་ཡེ་སྭཱ་ཧཱ། ཨཱ་ཀཱ་བྷཱ་བནྡུ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་བཛྲ་ཌཱ་ཀི་ས་མ་ཡ་མ་ནུ་པཱ་ལ་ཡ། བཛྲ་ཌཱ་ཀི་ཏྭེ་ནོ་པ་ཏི་ཥྛ་དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། ཨ་ནུ་ར་ཀྟོ་མེ་བྷ་བ། སུབོཥྱོ་མེ་བྷ་བ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཿ་ཀུ་རུ་ཧཱུཾ། ཧ་ཧ་ཧ་ཧ་ཧོཿ། བྷ་ག་ཝཱ་ན། སརྦ་ཏ་ཐཱ་ག་ཏ་ཌཱ་ཀི་མ་མེ་མུཉྩ། ཌཱ་ཀི་བྷ་བ་མ་ཧཱ་ས་མ་ཡ་ས་ཏྭ་ཨཿ་མུཿ་ཨོཾ་དྲི་ཏ་རཥྚ་ཡ་ག་ག་ན་དྷ་ཝ་སེ་ནཱ་དྷི་པ་ཏ་ཡེ་མི་མཾ་བ་ལིཾ་པྲ་ཏཱི་ཙྪ་ས་མ་ཡ་མ་ནུ་སྨ་ར་ཡ་ཧཱུཾ་ཧཱུཾ་ཕཊ་སྭཱ་ཧཱ་ཨོཾ་བཻ་ཤ་ར་མ་ཎ་ཡ་ཡཀྵ་སེ་ནཱ་དྷི་པ་ཏ་ཡེ་ཨི་མཾ་བ་ལིཾ་པྲ་ཏཱི་ཙྪ་ས་མ་ཡེ་མ་ནུ་སྨ་ར་ཨཿ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་བཱི་རུ་ཌཱ་ཀ་ཡ་མ་ཧཱ་ཀུམྦྷ་དྷཱ་དྷི་པ་ཏ་ཡེ། ཨི་མཾ་བ་ལིཾ་པྲ་ཏཱི་ཙྪ་ས་མ་ཡ་མ་ནུ་སྨ་ར་ཨཱཿ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་བི་རུ་པ་ཀྵ་མ་ཧཱ་ནཱ་གཱ་དྷི་པ་ཏ་ཡེ་ཨི་མཾ་བ་ལིཾ་བྲ་ཏཱི་ཙྪ། ས་མ་ཡ་མ་ནུ་སྨ་ར་ཨཿ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་གན་དྷ་རྦ་ཨ་དྷི་པ་ཏ་ཡེ་བི་ཙ་ཏྲ། ཨ་གནྡྷ་ཡོ། མ་མ་ཀ་ཪྻ་ས་ཏ་ཡེ། ཨི་ཧ་ཡནྟུ། བྷ་ག་བཱཾ་བཛྲ་དྷ་ར་ཤ་ས་ནེ་ཏིཥྛ་ནྟུ། ཨ་ཏྲ་སནྣི་ཧི་ཏོ་བྷ་བཎ་སྭཱ་ཧཱ། ཨོཾ་སྭ་བྷཱ་ཝ་ཤུདྡྷ་རྨཱཿ་སྭ་བྷཱ་ཝ་ཤུདྡྷོ྅ཧཾ། ཨོཾ་ཨ་ཀཱ་རོ་མུ་ཁཾ་སརྦ་དྷ་རྨཱ་ཎཱཾ་ཨཾ་དྱ་ནུ་ཏྤནྣ་ཏྭཱ་ཏ་ཨོཾ་ཨཱཿ་ཧཱུཾ་ཕཊ་སྭཱ་ཧཱ། ཨོཾ་ཨ་རལླི་ཧོ་ཛཿ་ཧཱུཾ་བཾ་ཧོཿ། བཛྲ་ཌཱ་ཀི་ནྱ་ས་མ་ཡ་སྟྭཾ་དྲྀ་ཤྱ་ཧོ། །ཨོཾ་བི་ཙི་པི་ཙི་སྨ་ཤན་རྦ་སི་བྷྱོ། །མ་ཧཱ་པི་ཤཱ་ཙ་བྷྱ། ཨི་མཾ་བ་ལིཾ་གྲྀ་ཧྣ་ཏ་བྷུ་ཉྫ་ཐ་པི་པ་ཐ། མ་མེ་ཥྚ་སིདྡྷི་མྨེ་པྲ་ཡཙྪ་ནྟུ་སྭཱ་ཧཱ། ཨོཾ་དྷི་པ་ཀྵི་རཱ་ཛ་ཡ། ཨཱ་གཙྪ་ཨཱ་གཙྪ་སརྦ་དུཥྚཱཾ་ནཾ་མུ་ཁཾ་བྷནྡྷ་ཀུ་རུ་མ་ཧཱ་ཀཱ་ལ་ཀུ་ཏ་བི་ཤ་པ་ཧི་རི་ཤྲཱི་གྲ་ས་མ་ཡེ་ཏིཥྛ། སྟུཾ་སྟུཾ་སྟུཾ་ས་ས་ས་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱ་ཧཱ། ཨོཾ་སརྦ་ཏ་ཐཱ་ག་ཏ་ནཻ་བི་ཏྱེ་ས་མ་ཡ་ས་མུ་དྲ། སྥ་ར་ཎ་ཤྲི་ཡེ་ཧཱུཾ་ཨོཾ་ན་མོ་བྷ་ག་བ་ཏེ་ཨཱ་ཪྻ་བ་ར་མ་ཨ་ཤྲཱ་ཡ་ཏ་ཐཱ་ག་ཏཱ་ཡ། ཨརྷ་ཏེ་སམྱ་ཀྶཾ་བུདྡྷཱ་ཡ་ཨོཾ་ཏཱ་ཏྟཱ་རེ་རུ་རེ་སྭཱ་ཧཱ། ཨོཾ་གྲྀ་ཧྞ་གྲྀ་ཧྞ་པུཥྤ་དྷཱུ་པ་པ་ལིཾ་ཨི་མཾ་སརྦ་ཨུ་པ་ཙ་ར་སམྦ་ནྣ་མ། ཁ་གཱ་དྷི་བ་ཏེ་ཁ་ཁ་ཁཱ་ཧི་ས་མ་ཡ་མ་ནུ་སྨ་ར་ཨཿ་ཧཱུཾ་ཕཊ་སྭཱ་ཧཱ། ཨོཾ་ཨེ་ཛ་ཧྱ་ཛ་ཧི་ཤྨ་ཤཱ་ན་ཝ་སེ་ནི་མ་མ་ས་པ་རི་བཱ་ར་རཀྵ་ཀུ་རུ་ཨི་ཧ་སནྣི་ཧི་ཏོ་བྷ་བ་སྭ་བ་སྭཱ་ཧཱ། ཨོཾ་ཀུ་རུ་ཝ་ད་ཏྲ་ལི། སིདྡྷི་མུ་ཁི་ཤྨ་ཤ་ན་ཁ་སི་ནི། །པྲེ་ཏ་ཝ་ཏ་ནི་ཙཎྜི་ཀ་ར་ལི། །རུ་དྷི་ར་པྲི་ཡེ།
སམ་ཡ་རཀྵ་ཏི། གོ་གད་ཙི། །ཀི་ལི་ཀི་ལི། །ར་བེ་བཛྲ་པྲི་ཏི་ཝ་ན་མི་དྷ་བྷུ་ཉྫ་ཏི། བྷ་ག་ནི་གུ་ཧྱ་ན་དུ་ཏེ། དྷུ་མཾ་ག་རི། ཅཎྜ་ཀཱ་ར་ལི། ཏིཥྛ་ཏི་ཥྛ། ཨི་མཾ་ཨུ་ཙྪ་ཥྛ། བ་ལིཾ་གྲི་ཧྣ་སརྦ་དུ་ཥྚ་བྷ་ཀྵ་ཡ། ཧཱུཾ་ཕྲུཾ་ཕཊ་སྭཱ་ཧཱ། ཨོཾ་བ་ལེ་པ་ཏ་ལེ་མ་ཧཱ་པ་ཏ་ལེ་ཧཱུཾ་ཧཱུཾ་ཛྷ་སྭཱ་ཧཱ། ཧཱུཾ་ཧཱུཾ་ཧོ་ཧོ་ཨཱ་ཀ་ཪྵ་ཡ། ཨཱ་ཀ་ཪྵ་ཡ། ས་མ་ཡ་ཨདྷི་བ་ཏེ་ཧཱུཾ་ཕཊ་སྭཱ་ཧཱ། ཨོཾ་ཨཱ་ག་ཙྪ་ཨཱ་གཙྪ་མ་ཧཱ་ནཱ་ག་ཨདྷི་པ་ཏེ་སརྦ་བྷུ་རྦྷུ་བ་ཧཱུཾ་ཕཊ་སྭཱ་ཧཱ། ཧཱུཾ་ཨ་བརྡ་ར་ཨ་བརྡ་ར། ཨོཾ་པ་ཏ་ལེ་བ་ཏ་ལེ་བྷ་ཀྵ་པྲི་ཡ། ཨོཾ་ཀི་ནི་མ་དྷེ་ཧཱུཾ་ཧཱུཾ་སྭ་ཧཱ། ཨོཾ་དྷ་ན་ཨ་དྷི་པ་ཏ་ཡེ་པ་ཏ་ལ་བྲུཾ་སྭཱ་ཧཱ། ཨོཾ་ཀ་ཀ་ཀནྡྷ་བ་བ་བནྡྷ་ན། ཁ་ཁ་ཁནྡྷ་ན། སརྦ་དུ་ཥྚཱཾ་ནཾ། ཧ་ན་ཧ་ན། ག་ག་ག་ཏ་ཡ། ཨ་མུ་ཀ་སྱ། ཤཱནྟིཾ་ཀུ་རུ་ཧཱུཾ་ཧཱུཾ་ཕཊ་ཛ་སྭཱ་ཧཱ། ཨོཾ་ཏི་ཥྛ་ཧཱུཾ་བཀྵ་བཀྵ་ཛྫ་ཛྫ་སྭཱ་ཧཱ།། །།དེ་ལྟར་སྔགས་རྣམས་བསྟན་ནས་ནི། །ཁྱད་པར་བྱིན་རླབས་བསྟན་པ་ནི། །དེ་ནས་བློ་དང་ལྡན་པ་ཡིས། །གལ་ཏེ་སྦྱོར་བ་གཞན་དང་བཅས། །ཚོན་ཆེན་གྱིས་ནི་གོས་དག་གམ། །དར་ལ་སོགས་པ་གོན་ནས་ནི། །རྡོ་རྗེ་དྲིལ་བུ་དེ་བཞིན་དུ། །རྒྱན་རྣམས་ཀུན་གྱིས་མཛེས་པར་བརྒྱན། །ཤར་ལ་སོགས་པའི་ཕྱོགས་རྣམས་སུ། །ལས་ཀྱི་སྐབས་དང་བསྟུན་ཏེ་བལྟ། །འདུག་སྟངས་ལ་སོགས་དེ་བཞིན་སྦྱར། །བསྐྱེད་པའི་རིམ་པ་ཚུལ་བཞིན་བསྒོམ། །མྱུར་པར་འདོད་ན་རྫུས་སྐྱེས་ཚུལ། །མཆོད་བྱ་སྤྲུལ་དང་སྤྱན་དྲང་བ། །གང་འདོད་པ་ནི་བྱ་བ་ཡིན། །གཉིས་ཀས་བྱ་བར་འདོད་པའང་ཡོད། །ཐུན་མོང་བྱིན་རླབས་གོང་བཞིན་ནོ། །ཁྱད་པར་བྱིན་རླབས་བསྟན་པ་ནི། །ཟླ་བ་ཨོཾ་ནི་བསམས་ནས་སུ། །འོད་ཟེར་སྟོབས་ཀྱིས་རྣམ་རྟོག་སྦྱོང༌། །ཉི་མར་ཨ་ནི་བསམས་ནས་ཀྱང༌། །དྲི་མ་མེད་པར་བསམ་པར་བལྟ། །གཉིས་ཀའི་ཧཱུཾ་གིས་འོད་དུ་འབར། །ཧས་སུ་བདུད་རྩི་ཞུ་བར་བསམ། །ཡི་གེ་རཾ་གྱིས་མཚན་མ་བསྲེགས། །ཡཾ་གིས་བདུད་རྩི་དྲི་མེད་འགྱུར། །ཨོཾ་གྱིས་གང་འདོད་དོན་རྣམས་འགྲུབ། །ཧཱུཾ་གྱིས་སྦྱངས་ནས་ཨཱཿ་ས་སུ་འབར། །ཨོཾ་གྱིས་རྟོགས་པར་བྱ་བ་ཡིན། །རྒས་སུ་གཟུགས་བཅོམ་ཧྲཱིཿ་ཡིག་ནི། །རོལ་སོགས་པ་བཅོམ་པ་ཡིན། །ཧོས་སུ་བདུད་རྩི་འབར་བར་བསམ། །ཡང་ན། ཧྲཱིཿ་ས་སུ་རོ་དང་ཧོས་སུ་དྲི། །བདུད་རྩིའི་རང་བཞིན་ཉིད་དུ་བལྟ། །རི་རབ་རྡོ་རྗེས་དཀྲུགས་ནས་ཀྱང༌། །ཡེ་ཤེས་བདུད་རྩི་བསྟིམ་
པའམ། །ཧཱུཾ་ནི་གཅིག་པུས་སྦྱང་ཞིང་བསྲེག །ཡེ་ཤེས་ཀྱང་ནི་ངེས་སུ་དབབ། །སོ་སོ་རྩ་བའི་སྔགས་ཀྱིས་ནི། །ལན་གསུམ་ལན་བུན་བརྗོད་པས་སུ། །སྦྱང་ཞིང་བྱིན་གྱིས་བརླབ་པ་དང༌། །སྔགས་རྣམས་སོ་སོའི་ནུས་མཐུ་ནི། །རྒྱུད་རྣམས་སོ་སོར་དག་ནས་ནི། །འབྱུང་བ་དག་གིས་བརླབ་པའམ། །སྔགས་ནི་གོང་མ་ལེན་ཞེས་བྱ། །སོ་སོ་ལྷ་ཡི་ཡིག་འབྲུས་ཀྱང༌། །ལན་གསུམ་ལན་བདུན་སྦྱང་བ་ཡིན། །དེ་ལྟར་བྱིན་རླབས་མན་ངག་རྣམས། །འཇིག་རྟེན་འདས་དང་འཇིག་རྟེན་པའི། །བྱིན་རླབས་མན་ངག་སྐབས་དང་སྦྱར། །བྱིན་གྱིས་བརླབས་པའི་ལས་རྣམས་སོ། །ཕྱག་རྒྱ་བཅིངས་པའི་སྦྱོར་བ་ནི། །ཐུན་མོང་ཕྱག་རྒྱ་ཐམས་ཅད་ནི། །རྡོ་རྗེ་ཐལ་མོའི་ཚུལ་དུ་ནི། །བཅངས་ནས་ཁ་ནི་དབྱེ་བ་དང༌། །རྡོ་རྗེ་སེ་གོལ་གཏོགས་ལའོ། །ལག་པ་གཡོན་པའི་གུང་མོ་བསྒྲེང༌། །མཐེ་ཆུང་མཐེ་བོས་སོ་སོར་བཀུག །མཛུབ་མོ་སྲིན་ལག་ཅུང་ཟད་དགུག །མཁའ་ལྡིང་དགུག་པའི་ཕྱག་རྒྱའོ། །རྩེ་གསུམ་ཕྱག་རྒྱས་བྱིན་གྱིས་བརླབ། །རྡོ་རྗེ་ཁུ་ཚུར་གཉིས་བཅིངས་ནས། །རྒྱབ་དང་རྒྱབ་ཏུ་སྦྱར་བར་བྱ། །པདྨ་ས་གདུགས་སྤྲེལ་ནས་སུ། །དཀར་པོ་དང་ནི་གི་ཝང་བསྒྲེང༌། །དཀར་པོ་ཅུང་ཟད་བཀུག་པ་ཡིས། །ལྷ་མིན་དགུག་པའི་ཕྱག་རྒྱ་ཡིན། །ཟླ་བ་སྣོད་ལ་རེག་ནས་ནི། །ཉི་མ་རྡོ་རྗེ་ཁུ་ཚུར་བཅིང༌། །དཀར་པོ་བསྒྲེངས་ཏེ་བྱིན་གྱིས་བརླབ། །ཟླ་བ་ཁུ་ཚུར་བསྟན་བཅིངས་ལ། །རྣམ་ཤེས་ཀྱང་ནི་ས་གདུགས་བརྐྱང༌། །ཉི་མ་ལག་པ་ལེགས་བརྐྱང་སྟེ། གདེངས་པའི་ཚུལ་དུ་སྟེང་དུ་སྦྱར། །ཕྱག་རྒྱས་སྣོད་ལ་རེག་པར་བྱ། །ཁུ་ཚུར་གཉིས་ནི་སྦྱར་ནས་སུ། །སྙིང་གའི་ཕྱོགས་སུ་སྦྱར་བར་བྱ། །རྡོ་རྗེ་ཁུ་ཚུར་གཉིས་སྦྱངས་ནས། །རྒྱབ་དང་རྒྱབ་ཏུ་སྦྱར་བར་བྱ། །པདྨ་དག་ནི་ས་གདུགས་སྦྲེལ། །དཀར་པོའི་གི་ཝང་སྒྲོག་ཏུ་བྱ། །དེ་བཞིན་ཕྱག་རྒྱས་བྱིན་བརླབ་ཅིང༌། །དགུག་པ་ཡང་ནི་ཤེས་པར་བྱ། །ཕྱག་རྒྱའི་མན་ངག་གཞན་སོགས་ཀྱང༌། །སྐབས་དང་སྦྱར་ཏེ་ཤེས་པར་བྱ། །གཏོར་མའི་རྫས་རྣམས་སོ་སོ་དང༌། །མཎྜལ་ལ་སོགས་ཆོ་ག་དང༌། །དེ་ལ་སོགས་པའི་མན་ངག་རྣམས། །ཐབས་
རྣམས་ཐོབ་པའི་སློབ་དཔོན་གྱིས། །སྣ་ཚོགས་གཏོར་མས་རྒྱས་པར་བསྟན། །དེ་དང་མཐུན་པར་ཤེས་པར་གཏོར་མའི་ལས་སྣ་ཚོགས་པའི་ཆོ་ག་སྟེ་དང་པོའོ།། །།