གཉིས་པ། ཚོགས་ཀྱི་ལས་ཀྱི་སྦྱོར་ཀ
ཚོགས་ཀྱི་ལས་ཀྱི་སྦྱོར་ཀ་བསྟན་པ་ནི། །ཚོགས་ཀྱི་བྱ་བའི་རིམ་པ་རྣམས། །ཚོགས་ཀྱི་འཁོར་ལོར་ཤེས་པར་བྱ། །ཆོ་གའི་ལས་རྣམས་འདི་རུ་བསྟན། །འཁོར་ལོ་ཕྱི་ནང་གསལ་བ་ལ། །ཆོ་གའི་རིམ་པ་སྐབས་དང་སྦྱར། །ཕྱི་མཆོད་དང་མཆོད་གསང་བའི་མཆོད། །ཕྱི་མཆོད་རིམ་པ་བསྟན་པ་ནི། །ཕྱི་ལ་ཡང་ནི་གཉིས་སུ་བསྟན། །མི་ཟད་དབྱིབས་ཀྱི་མཆོད་པ་ནི། །རྣལ་འབྱོར་རྒྱུད་དུ་ཤེས་པར་བྱ། །མཚན་ལྡན་དྲི་མེད་སྣོད་མཆོག་ཏུ། །བྱང་ཆུབ་སེམས་ཀྱི་དྲི་མེད་ཆུ། །དཀྱིལ་འཁོར་བཞུགས་པའི་ལྷ་ལ་དབུལ། །ཐུགས་རྗེས་དགོངས་ལ་བཞེས་སུ་གསོལ། །ཞེས་བྱ་བ་ལ་སོགས་པས་བཏང་ངོ༌། །ཨོཾ་ན་མོ་ནཱི་ལམྦ་ར་དྷ་ར་བཛྲ་པཱ་ཎི་མནྡལ་དེ་བ་ཏ་ནན་ཏཱ་ནཱ་ན། ཨ་ཧ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཉེ་ཧཱུཾ། དྷཱུ་པ་ནི་ཪྻ་མི་ཧཱུཾ། ཨཱ་རོ་ལྀ་ཀ་ནི་ཪྻཱ་མི་ཧཱུཾ། པུཥྤེ། དྷཱུ་པེ། ཨཱ་ལོ་ཀེ། གནྡྷེ། ནཻ་བི་དྱེ། ཤ་པྡེ། ནྲྀ་ཏ། ན་མ་པ་ས། སྤ་ཪྵ། ནན་ནན་རད་ན། སརྦ་བསྟུ། གནྡྷ་རྦ། བཛྲ་ལཱ་སྱེ་ཧཱུཾ། བཛྲ་མཱ་ལེ་ཧཱུཾ། བཛྲ་གཱི་ཏི་ཧཱུཾ། བཛྲ་ནྲྀ་ཏྱ་ཧཱུཾ། བཛྲ་དྷཱུ་པེ་ཧཱུཾ། བཛྲ་པུཥྤེ་ཧཱུཾ། བཛྲ་ཨཱ་ལོ་ཀེ་ཧཱུཾ་ཧཱུཾ། བཛྲ་གནྡྷེ་ཧཱུཾ། རེ་རེ་ལ་ཡང་རྡོ་རྗེའི་གླུ་གསུམ་གསུམ་བརྗོད་ལ། །ལྷ་མོ་དཔག་མེད་སྤྲུལ་ནས་ཀྱང༌། །དཀྱིལ་འཁོར་ལྷ་ལ་མཆོད་པ་དབུལ། །དེ་ནས་མཆོད་པ་ཉི་ཤུ་ནི། །རྡོ་རྗེ་གླུ་ནི་ཕྲ་མོ་ཡིས། །ཧཱུཾ་གི་གླུ་དང་སྦྱར་བར་བྱ། །དེ་ནས་པད་ཀོར་སྔོན་འགྲོ་བའི། །སྒེག་པའི་ཚུལ་གྱིས་སྒེག་པ་དང༌། །པི་ཝང་ཚུལ་གྱིས་འབུད་པ་དང༌། །གླིང་བུའི་ཚུལ་གྱིས་འབུད་པ་དང༌། །སིལ་སྙན་ཚུལ་གྱིས་བཀྲོལ་བ་དང༌། །བརྡབ་པའི་ཚུལ་གྱིས་རྡེབས་པ་དང༌། །གར་གྱི་ཚུལ་གྱིས་ཡན་ལག་བསྐྱོད། །རླུང་གི་ཚུལ་གྱིས་གཡོབ་པ་དང༌། །རྒྱལ་མཚན་ཚུལ་གྱིས་བསྒྲེང་བ་དང༌། །བླ་རེའི་ཚུལ་གྱིས་བྲེ་བ་དང༌། །བ་དན་ཚུལ་གྱིས་སྒེག་པ་དང༌། །ཅང་ཏེའུའི་ཚུལ་གྱིས་རྡེབས་པ་དང༌། །གདུགས་ཀྱི་ཚུལ་གྱིས་དབུབ་པ་དང༌། །རྔ་ཡི་ཚུལ་གྱིས་འཛུམ་པ་དང༌། །གར་གྱི་ཚུལ་གྱིས་
གར་བྱེད་དང༌། །ཁྲོ་བོའི་ཚུལ་གྱིས་ཁྲོ་བ་དང༌། །སྒེག་པའི་ཚུལ་གྱིས་སྒེག་པ་དང༌། །འགྱིང་བའི་ཚུལ་གྱིས་འགྱིང་བ་དང༌། །མདའ་འདྲེན་བུམ་པ་འཁྱུད་པ་དང༌། །རྡོ་རྗེ་གསོར་ཞིང་ཕྱག་འཚལ་བའི། །ཚུལ་གྱིས་འདུད་པར་བྱེད་པ་སྟེ། །ཕྱག་རྒྱའི་མཆོད་པ་ཉི་ཤུ་ཉིད། །རྡོ་རྗེ་དྲིལ་བུ་རོལ་བཅས་པའི། །གླུ་ཡི་སྒྲ་ཡིས་དགའ་བར་བྱ། །ལྷ་མོ་དཔག་མེད་སྤྲུལ་ནས་ནི། །ཇི་ལྟར་མཉེས་པའི་མཆོད་པ་དབུལ། །དེ་ནས་བདུད་རྩི་ལྔ་པོ་ཉིད། །ལྷ་གསུམ་གྱིས་ནི་བསྒྲུབས་ནས་ཀྱང༌། །མཚན་ལྡན་སྣོད་མཆོག་བཀྲམ་ནས་ཀྱང༌། །ཉི་མ་པདྨར་གཞག་པར་བྱ། །རྡོ་རྗེ་སྲིན་མཐེབ་སྦྱར་ནས་ཀྱང༌། །ཐིགས་པའི་གཏོར་མ་ཀུན་ལ་དབུལ། །རྣལ་འབྱོར་ཤེས་རབ་གར་རྣམས་བསྐོར། །ཡང་ན་བཟློག་པས་ཐབས་ཀྱང་དེ། །ལན་གསུམ་མཆོད་པས་གནས་གསུམ་གྱི། །སྐུ་གསུང་ཐུགས་ཀྱི་ལྷ་གསུམ་མཉེས། །རྡོ་རྗེ་གླུ་དང་ལྡན་པ་ཡིས། །སྔགས་ནི་ལན་གསུམ་བརྗོད་པར་བྱ། །སོ་སོའི་རྩ་བའི་སྔགས་མཐའ་ལ། །བདུད་རྩིའི་སྔགས་ནི་གདབ་པར་བྱ། །དེ་ནས་ལྕགས་ཀྱུ་ལྔ་པོ་ནི། །གོང་མ་བཞིན་དུ་དབུལ་བར་བྱ། །ལྷ་མོ་དྲུག་གི་མཆོད་པ་ནི། །གཟུགས་ཀྱི་རྡོ་རྗེའི་ལྷ་མོ་ནི། །གཟུགས་བརྙན་བཞིན་དུ་རྒྱས་མཛད་མ། །ཁ་དོག་དབྱིབས་ལྡན་མཆོད་པ་དབུལ། །བདེ་གཤེགས་སྤྱན་མཆོག་རྒྱས་གྱུར་ཅིག །སྒྲ་ཡི་རྡོ་རྗེ་ལྷ་མོ་ནི། །གསུང་དབྱངས་ཡན་ལག་བརྒྱད་ལྡན་པའི། །སྒྲ་སྙན་ཡིད་འོང་མཆོད་པ་དབུལ། །བདེ་གཤེགས་སྙན་མཆོག་རྒྱས་གྱུར་ཅིག །རྡོ་རྗེ་ལྷ་མོ་དྲི་ལྡན་མ། །དྲི་ཞིམ་བདུག་སྤོས་དང་བསུང་ལྡན། །དྲི་ཞིམ་ཡིད་འོང་མཆོད་དབུལ་བས། །ཤངས་ཀྱི་མཆོག་རྣམས་རྒྱས་གྱུར་ཅིག །རྡོ་རྗེ་ལྷ་མོ་རོ་ལྡན་མ། །རོ་མཆོག་རྒྱས་ལྡན་མཛེས་པ་འདི། །ཡིད་འོང་དཔག་མེད་མཆོད་པ་འབུལ། །བདེ་གཤེགས་ལྗགས་ནི་རྒྱས་གྱུར་ཅིག །རྡོ་རྗེ་ལྷ་མོ་རེག་ལྡན་མ། །ན་བཟའ་ལི་ཀ་མཛེས་པ་བསྣམས། །ཡིད་འོང་དཔག་མེད་མཆོད་པ་འབུལ། །བདེ་གཤེགས་སྐུ་རྣམས་རྒྱས་གྱུར་ཅིག །རྡོ་རྗེ་ལྷ་མོ་ཆོས་ལྡན་མ། །རིན་ཆེན་འབར་བའི་ཆོས་སྒྲོགས་མ། །ཡིད་འོང་དཔག་མད་མཆོད་པ་འབུལ། །བདེ་གཤེགས་ཐུགས་མཆོག་རྒྱས་གྱུར་ཅིག །སེམས་དཔའ་ཆེན་པོ་དང་པོ་མཆོག །དགྱེས་ཆེན་རྣམས་ཀྱི་
དགའ་བ་ཆེ། །ཀུན་དུ་བཟང་པོ་ཀུན་གྱི་བདག །རྡོ་རྗེ་སྙེམས་པ་བདག་པོའི་བདག །ཐུགས་ཀྱི་སེམས་དཔའ་ཏིང་འཛིན་མཆོག །རྡོ་རྗེའི་རྡོ་རྗེ་སྟོབས་པོ་ཆེ། །ཀུན་དུ་བཟང་པོ་སྤྱོད་པའི་མཆོག །བདུད་ཀྱི་བདུད་སྡེ་འཇོམས་པ་པོ། །སེམས་དཔའ་ཀུན་གྱི་སེམས་བྱང་ཆུབ། །སངས་རྒྱས་བྱང་ཆུབ་མཆོག་སྐྱེས་མཆོག །རྡོ་རྗེ་ཧཱུཾ་སྟེ་ཧཱུཾ་མཛད་པ། །འཇིག་རྟེན་དབང་ཕྱུག་ནོར་སྦྱིན་པ། །འདོད་ཆགས་ཆེན་པོ་བདེ་བ་ཆེ། །འདོད་དང་ཐར་པ་ནོར་ཆེ་བ། །དུས་གསུམ་སྲིད་གསུམ་མཆོག་གསུམ་སྟེ། །འཇིག་རྟེན་གསུམ་མཆོག་ཁམས་གསུམ་པ། །མི་རྒྱུ་བ་ནི་མཆོག་ཏུ་གསོལ། །ཤིན་ཏུ་ཕྲ་དང་སྦོམ་པོའི་ཚོགས། །རྒྱུ་བ་རྣམས་ཀྱི་རབ་མཆོག་བརྙེས། །སྲིད་པའི་འཁོར་ལོ་སྦྱོང་མཛད་པ། །ཐོག་མཐའ་མེད་ཅིང་གསལ་བ་མིན། །ཤེས་རབ་སྡུད་ལ་རྣམ་པར་གནས། །ཐུགས་ཀྱི་ཕྱག་རྒྱ་སྙོམས་ཞུགས་པ། །དེ་ཉིད་རྡོ་རྗེ་སེམས་དཔའ་ཡི། །རྡོ་རྗེ་ཁྲོ་བོ་ཁྲོ་ཆེན་པོ། །འཇིགས་པའི་མེ་ནི་འདུལ་མཛད་པ། །གདུག་པའི་མཆོག་ནི་འདུལ་བ་ཆེ། །དྲག་པོའི་དྲག་མཆོག་འཇིགས་བྱེད་པ། །དེ་བཞིན་གཤེགས་པའི་དངོས་གྲུབ་ཆེ། །ཆོས་ཀྱི་ལས་ཆེན་འཛིན་པ་པོ། །དམ་ཆོས་ལས་ནི་བཟང་པའི་ལམ། །བྱང་ཆུབ་སེམས་ནི་སྤྱོད་པར་མཛད། །ཐམས་ཅད་དག་ཏུ་པདྨ་ཆེ། །ཤེས་རབ་ཐབས་ཀྱི་ནོར་ཆེ་བ། །འདོད་ཆགས་དག་པའི་ཏིང་འཛིན་མཆོག །སྣ་ཚོགས་ཆགས་པའི་དང་དབང་ཕྱུག་ཆེ། །ནམ་མཁའ་མཐའ་ལས་བརྟགས་པའི་དོན། །སེམས་ཅན་ཀུན་གྱི་གནས་ཆེན་པོ། །དཔལ་གྱི་འབྱོར་པ་འབྱོར་པའི་རྒྱལ།། བསམ་པ་ཐམས་ཅད་རྫོགས་མཛད་པ། །ཕྱག་འཚལ་ཕྱག་འཚལ་ཕྱག་འཚལ་འདུད། །ཕྱག་འཚལ་འདུད་ཅིང་ཕྱག་འཚལ་འདུད། །དད་པས་ཁྱེད་ལ་འདུད་བགྱིས་པས། །བདག་སེམས་རྡོ་རྗེ་སེམས་གྲུབ་མཛོད། །རྡོ་རྗེ་ལྷ་མོའི་མཆོད་པ་དང༌། །ཏེ་ན་ཏེ་ཏེ་ཧཱུཾ་ཞེས་བྱ་བ་ལ་སོགས་བ་ཡང་གཏང་ངོ༌། །དང་པོ་འདྲེན་པའི་ཚིགས་བཅད་ནི། །འཁོར་ལོ་ཉིད་དང་མཐུན་པར་བྱ། །བསྟོད་པ་ལ་སོགས་རྒྱས་པར་བྱའོ། །ཐ་མ་འདྲེན་པའི་ཚིགས་བཅད་ནི། །དམ་ཚིག་སྤྱོད་པ་ཐམས་ཅད་ལ། །ཚིགས་བཅད་འདིས་ནི་སྦྱིན་པར་བྱ། །ལྟོས་ཤིག་མཛེས་པ་དམ་པའི་ཆོས། །
འདི་ལ་ཐེ་ཚོམ་བྱར་མི་རུང༌། །ཁྱི་དང་བྲམ་ཟེ་གདོལ་པ་གསུམ། །རང་བཞིན་པས་གཅིག་པས་ལྷན་ཅིག་བཟའ། །པདྨའི་གར་སྐོར་སྔོན་འགྲོ་བས། །གཞན་གྱིས་དེ་བཞིན་བཟུང་ནས་ཀྱང༌། །སྦོམ་པོས་ཆུང་དུ་མནན་ནས་ཀྱང༌། །ལྷག་མ་རྩེ་གསུམ་ལྟ་བུར་བྱ། །ཉི་མར་ཟླ་བ་བཞག་ནས་ནི། །ཚིགས་བཅད་འདི་ནི་རྗེས་སུ་བཟླ། རིན་ཐང་མེད་པའི་དམ་པའི་ཆོས། །འདོད་ཆགས་དྲི་བྲལ་ལེགས་འོང་ཅིང༌། །གཟུང་དང་མཚན་མ་རྣམ་སྤངས་པ། །དེ་ཉིད་གནས་ལ་ཕྱག་འཚལ་ལོ། །དེ་ནས་རྣལ་འབྱོར་སོ་སོ་ཡིས།། ནང་གི་འཁོར་ལོ་གསལ་བསྒོམས་ནས། །ཁྲུས་ནི་རྣམ་གསུམ་བྱ་བར་གསུངས། །དེ་ནས་རྣལ་འབྱོར་ཅི་དགར་རོལ། །རྡོ་རྗེ་སྨེ་གདུང་བཤགས་པ་ནི། །བདག་ཅག་རྣལ་འབྱོར་སྒྲུབ་པ་པོས། །བླ་མ་ཡི་དམ་ལྷ་དང་ནི། །དཀྱིལ་འཁོར་བཞུགས་པའི་སྤྱན་ལམ་དུ། །སྡོམ་པ་གསུམ་ལ་གནས་པ་དང༌། །ཁྱད་པར་ནང་གི་སྔོམ་པ་ནི། །བསྔོ་ཞིང་བགྲང་བར་ཁས་བླངས་ནས། །ཚུལ་བཞིན་མ་གྱུར་བཤགས་པར་བགྱི། །བླ་མ་རྡོ་རྗེ་སློབ་དཔོན་ལ། །གཤེ་ཞིང་སྨད་པ་ལ་སོགས་བཤགས། །བདེ་གཤེགས་བཀའ་ཡི་ཆོས་རྣམས་ལ། །གཞུང་བཞིན་མ་གྱུར་འཁྲུལ་པ་བཤགས། །རྣལ་འབྱོར་ལམ་གཅིག་སྤུན་རྣམས་ལ། །རྩོད་པ་ལ་སོགས་བགྱིས་པ་བཤགས། །སྙིང་རྗེའི་ཡུལ་གྱུར་སེམས་ཅན་ལ། །སྙིང་རྗེ་ལ་སོགས་སྤངས་པ་བཤགས། །ཆོས་རྣམས་ཀུན་གྱི་རྩ་བ་སྟེ། །བྱང་སེམས་ཕྱི་ནང་སྤངས་པ་བཤགས། །རང་དང་གཞན་གྱི་གྲུབ་མཐའ་ལ། །སྨད་ཅིང་སྤངས་པར་གྱུར་པ་བཤགས། །མ་སྨིན་པ་ཡི་སེམས་ཅན་ལ། །མན་ངག་གསང་བ་བསྒྲགས་པ་བཤགས། །ཕུང་པོ་ལྷ་ཡི་དཀྱིལ་འཁོར་ལ། །སྨད་ཅིང་སྤངས་པ་ལ་སོགས་བཤགས། །རང་བཞིན་དག་པའི་ཆོས་རྣམས་ལ། །ཐེ་ཚོམ་ལ་སོགས་བགྱིས་པ་བཤགས། །བསྟན་པ་ལ་གནོད་སེམས་ཅན་ལ། །མ་བསྒྲལ་བྱམས་པ་བགྱིས་པ་བཤགས། །ཆོས་ཉིད་སྤྲོས་དང་བྲལ་བ་ལ། །ཡོད་མེད་མཚན་མར་བརྟགས་པ་བཤགས། །སེམས་ཅན་དད་དང་ལྡན་པ་ལ། །སེམས་སུན་ཕྱུང་བར་བྱས་པ་བཤགས།།
དམ་ཚིག་རྣམས་ལས་ཐམས་ཅད་འབྱུང༌། །མ་བརྟེན་བགྲང་བསྔོ་མ་བགྱིས་བཤགས། །བུད་མེད་ཤེས་རབ་རང་བཞིན་ལ། །མ་སྨིན་སྤངས་པ་ལ་སོགས་བཤགས། །རྩ་བའི་དམ་ཚིག་ཇི་སྙེད་ཀུན། །ཚུལ་བཞིན་མ་བསྲུངས་རྔོ་མ་ཐོག །བདེ་གཤེགས་བཀའ་དང་མ་མཐུན་པ། །ཇི་སྙེད་བགྱིས་པ་དེ་དག་ཀུན། །རྡོ་རྗེ་སློབ་དཔོན་ཡི་དམ་ལྷ། །གསང་བའི་དཀྱིལ་འཁོར་ལྷ་རྣམས་དང༌། །མ་མོ་མཁའ་འགྲོའི་ཚོགས་བཅས་ལ། །འགྱོད་པའི་སེམས་ཀྱིས་མཐོལ་ལོ་བཤགས། །རྣལ་འབྱོར་བྱིན་རླབས་མ་བགྱིས་པར། །ནན་རྟགས་འཇུག་པ་བགྱིས་པ་བཤགས། །བླ་མའི་མན་ངག་མ་ཐོབ་པར། །ནན་རྟགས་ཆོས་རྣམས་བགྱིས་པ་བཤགས། །མི་ཟབ་ལམ་གཅིག་སྤུན་རྣམས་ལ། །རྩོད་པ་ལ་སོགས་བགྱིས་པ་བཤགས། །གསང་བའི་མན་ངག་ཤེས་གྱུར་ཀྱང༌། །སྣོད་ལྡན་རྣམས་ལ་མ་བསྟན་བཤགས། །དད་དང་ལྡན་པའི་སེམས་ཅན་ལ། །ཆོས་རྣམས་ལོག་པར་བསྟན་པ་བཤགས། །རྣལ་འབྱོར་ལ་སོགས་མི་ཤེས་པར། །སྔགས་པར་ང་རྒྱལ་བགྱིས་པ་བཤགས། །ལྟ་བ་སྤྱོད་པ་མི་གཅིག་པའི། །ཉན་ཐོས་ལམ་དུ་ཞག་འདས་བཤགས། །ཕྱི་ཡི་ཆོས་བཤད་ཡིན་པ་ལ། །གསང་བའི་ཆོས་རྣམས་བཤད་པ་བཤགས། །མདོར་ན་ཡན་ལག་དམ་ཚིག་རྣམས། །ཉིན་མཚན་བགྲང་བསྔོ་མ་བགྱིས་པ་དང༌། །བླ་མ་མཆོད་པ་ལ་སོགས་དང༌། །བཤགས་པ་ལ་སོགས་མ་བགྱིས་རྣམས། །རྡོ་རྗེ་སློབ་དཔོན་ཡི་དམ་ལྷ། །དཀྱིལ་འཁོར་གསང་བའི་ལྷ་རྣམས་དང༌། །མ་མོ་མཁའ་འགྲོའི་ཚེགས་ལ་བཤགས། །མཚམས་མེད་མི་དགེ་བཤགས་པ་དང༌། །མཁའ་འགྲོ་མ་ཡི་བཤགས་པ་ནི། །མཁའ་འགྲོའི་གསང་རྒྱུད་དེ་བཞིན་བྱ། །དེ་ལ་སོགས་པའི་ཆོ་ག་རྣམས། །མན་ངག་བསྡེབས་སུ་ཤེས་པར་བྱ། །ཚོགས་ཀྱི་ལས་ཀྱི་སྦྱོར་ཀ་སྟེ་གཉིས་པའོ།། །།