དངོས་པོ་གསལ་བའི་རྗེས་སུ་འགྲོ་བའི་དེ་ཁོ་ན་ཉིད་གྲུབ་པ།
རྒྱ་གར་སྐད་དུ། བྱཀྟ་བྷཱ་བ་ཨ་ནུ་ག་ཊནྟྲཱ་སིདྡྷི། བོད་སྐད་དུ། དངོས་པོ་གསལ་བའི་རྗེས་སུ་འགྲོ་བའི་དེ་ཁོ་ན་ཉིད་གྲུབ་པ། དཀོན་མཆོག་གསུམ་ལ་ཕྱག་འཚལ་ལོ། །དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །བཅོམ་ལྡན་འདས་འཇིག་རྟེན་དབང་ཕྱུག་ལ་ཕྱག་འཚལ་ལོ། །འགྲོ་བ་རྣམས་ཀྱི་བདེ་ཆེན་རྒྱལ་པོ་གཅིག་པུ་ཉིད། །རྒྱུ་རྣམས་དང་བྲལ་རྟག་ཏུ་འབྱུང་བར་གྱུར་པ་སྟེ། །གང་ཞིག་གིས་ནི་ཉེ་བར་བརྗོད་པའི་དུས་དག་ཏུ། །ཐམས་ཅད་མཁྱེན་པ་ཚིག་གིས་དབུལ་གྱུར་རྒྱལ་གྱུར་ཅིག །བླ་མ་དམ་པའི་ཞབས་ལ་ཡུན་རིང་དུ། །རྟག་ཏུ་གུས་པས་བཀས་གནང་ཁྱད་པར་ནི། །བདག་ཉིད་དྲན་ཕྱིར་བདག་ཉིད་བྲིས་འདི་ལ། །སྐྱེ་བོ་མཁས་པ་སུ་ཞིག་སྡང་བར་བྱེད། །འདིར་གཉིས་སུ་
མེད་ཅིང་རང་བཞིན་གྱིས་རྣམ་པར་དག་པའི་ལྷན་ཅིག་སྐྱེས་པའི་གནས་སྐབས་སུ། བདག་ཉིད་ཀྱིས་དོན་ཏེ་རྟོགས་པར་བྱ་བའི་ཕྱིར། བདག་ཉིད་སྐྱེས་པ་དང་བུད་མེད་ཀྱི་གཟུགས་སུ་མངོན་པར་སྤྲུལ་ཏེ། རང་གི་ངོ་བོ་ཉིད་འབྱིན་པ་པོའི་རང་བཞིན་དུ་དངོས་པོ་གསལ་བའི་རྗེས་སུ་སྟོན་པར་མཛད་དེ། ལྷན་ཅིག་སྐྱེས་པའི་རྣམ་པར་སྤྲུལ་པའི་ཉམས་དགའ་བའི་བུ་མོ་ལ་ཀུན་དུ་བལྟས་ནས་དགའ་བ་དང་བདེ་བའི་འདོད་པའི་ཡིད་དུ་གྱུར་ནས། བཅོམ་ལྡན་འདས་ཤིན་ཏུ་ཆགས་པ་དང་བཅས་པའི་རོལ་པ་དང་བཅས་ནས་ཀུན་དུ་གཟིགས་པར་མཛད་དོ། །དེ་ནས་ཤིན་ཏུ་འཇམ་ཞིང་དེས་པའི་གསུང་གིས་ཐུགས་འཛིན་པར་མཛད་ཅིང༌། དེའི་འོག་ཏུ་དེ་ལ་དྲི་ཞིམ་པོས་མཐུག་པོར་བྱུག་པའི་དྲི་བསུང་ཆགས་པ་བསྣམས་པས་ཐུགས་ཚིམ་པར་མཛད་དོ། །དེ་ནས་ཐུགས་ཉམས་སུ་ལོན་པའི་བདུད་རྩིའི་བུམ་པ་བརྒྱས་བཀུས་པ་བཞིན་དུ་དགའ་བ་དང་བདེ་བ་ཆེན་པོ་ཐོབ་ནས། ཚམ་ཚོམ་མེད་པར་བདེ་བའི་བྱེ་བྲག་དག་གིས་འཁྱུད་དོ། །དེ་ནས་བདག་ཉིད་དོན་བྱས་པ་བཞིན་དུ་ཡིད་ལ་སེམས་ཤིང་དཔེ་མེད་པའི་རོ་མྱང་བའི་ཕྱིར་འོ་བྱ་བའི་རྣམ་པ་དག་མཛད་དོ། །དེ་ལས་ཀྱང་སོས་འདེབས་པས་གཅོད་པ་དང༌། འབིགས་པ་ལ་སོགས་པའི་བྱེ་བྲག་དག་ཁྱད་པར་དུ་མཛད་དོ། །དེའི་རྗེས་ལ་ཡང་ཤིན་ཏུ་བདེ་བ་སྐྱེས་པས་རྨོངས་པ་བསལ་བའི་ཕྱིར། །སྐབས་སྐབས་སུ་ཤིན་ཏུ་འཇམ་པའི་སེན་མོས་འདེབས་པས་སད་པར་བྱེད་དོ། །དེ་ནས་ཀྱང་མགྲིན་པ་ནས་གྱ་གྱུའི་སྒྲ་ཟབ་མོ་སྒྲོགས་པ་ལ་སོགས་པ་རོལ་པའི་རང་བཞིན་གྱི་རྣམ་པ་ལྔ་རྨི་ལམ་ལྟ་བུ་ལ་བདག་ཉིད་གར་མཁན་ལྟ་བུས་ཀུན་དུ་རྩེ་བར་མཛད་དོ། །དེ་དག་གིས་ནི་དེའི་སེམས་ཀྱི་ཁྱད་པར་ཐོབ་པར་བྱ་བའི་ཕྱིར་རབ་ཏུ་སྤྱོད་པའི་སྒྲུབ་པས་རྗེས་སུ་སྤྱོད་པར་མཛད་པར་གྱུར་པ་ཡིན་ནོ། །མཛའ་བོས་ཆགས་པས་ཀུན་དུ་བལྟ་ཞིང་དེ་ཡི་རྗེས་སུ་སྦྲང་རྩི་འཛག་འདྲའི་ཚིག་འཇམ་དང༌། །དེ་ནས་དགའ་བའི་ཆར་འབེབས་ལགས་པའི་མཚོ་སྐྱེས་བསྐྱོད་པས་དེ་ལ་ཀུན་འཁྱུད་པའི། །རིམ་གྱིས་ཆགས་པའི་རོ་ཡིས་དེ་ནི་སུ་ཡིན་བདག་ཀྱང་ཅིར་འགྱུར་མ་ཤེས་ཏེ། །གྲོགས་རྣམས་སྔར་མི་བདེ་བ་ཚིག་
གིས་བརྗོད་དུ་མ་བཏུབ་པ་ཞིག་སྐྱེས་པར་འགྱུར། །འཛིན་པ་དང་བཅས་པའི་སྤྱོད་པ་ལ་འཇུག་པའོ། །ཡིད་ལས་བྱུང་བ་ལས་སྐྱེས་པའི་སྤྲོས་པའི་རྒྱུན་གྱིས་འཆིང་བ་འདིས་གཉིས་ཀ་བཅིང་སྟེ་གང་གི་གཉི་གའི་སེམས་ཀྱི་འཇུག་པ་ཇི་སྲིད་དུ་གཞན་མི་དྲན་ཞིང་དགའ་བའི་དྲན་པ་ལ་ཕྱོགས་པ་སྟེ། འཇུག་པའི་དགའ་བའི་གདུང་བས་ཆགས་ཏེ་ཞུ་བར་གྱུར་ནས་ཆུ་དང་འོ་མ་འདྲེས་པ་བཞིན་དུ་ལྟོས་པ་མེད་པར་རྒྱུན་མི་འཆད་པར་འགྱུར་རོ། །དེའི་འོག་ཏུ་ནང་དུ་རྒྱུ་བའི་སེམས་ཀྱི་འཇུག་པའི་སྟོབས་ཀྱིས་བརྩོན་འགྲུས་ལ་འཇུག་པར་འགྱུར་རོ། །མ་བསམས་པར་ཀ་ར་ནའི་བྱེ་བྲག་དག་ལས་གསལ་བར་བྱེད་ཅིང༌། གཉི་ག་ཡང་སིད་ཅེས་ཟེར་ཞིང་ཐམས་ཅད་ལ་ཆེར་ལྟོས་པ་མེད་ཅིང་ཚམ་ཚོམ་མེད་པ་དང་བཅས་པས་ཤིན་ཏུ་རྒྱ་ཆེ་བའི་དགའ་བའི་སྒྲུབ་པ་སྤེལ་བར་གྱུར་ཏོ། །དེ་ལས་ཀྱང་བདེ་བའི་བྱ་བ་ཤིན་ཏུ་གོམས་པའི་ལོངས་སྤྱོད་ཀྱིས་ཐིབས་པོ་ཀུན་སད་པར་བྱས་ཏེ། དགའ་བ་དང་བདེ་བས་ཡང་དག་པར་སྤེལ་བ་འཇུག་པས་བསྐྱེད་པ་ནི། དབང་པོ་ལས་འདས་ཤིང་རང་གི་རྟག་པའི་སྤྱོད་ཡུལ་འཁོར་བའི་སྙིང་པོར་གྱུར་པ་བདེ་བའི་ཕུང་པོ་སྐྱེས་པར་གྱུར་ཏོ། །འགྲོ་བ་རྣམས་ཀྱི་བདེ་བ་མཚན་མར་བཅས་པ་ནི། གང་ཡིན་དེ་ཉིད་མཚན་མ་སྤངས་པར་གྱུར་པ་ནི། །རང་བྱུང་ཡེ་ཤེས་ཉིད་ཀྱི་ངོ་བོར་གྱུར་པ་སྟེ། རྟོག་པ་རྣམས་ཀྱི་སྟོང་པའི་བདེ་བ་ཆེན་པོ་ཡིན། བག་ཆགས་དང་བཅས་པའི་སེམས་ཀྱིས་དེ་ཁོ་ན་ཉིད་འབྱུང་བའོ། །དེ་ལྟ་བུ་འདི་ལས་སྒྱུ་མ་ལྟ་བུ་ཐོག་མ་མེད་པ་ནས་རང་གིས་བྱས་པའི་འཁོར་བ་ན་བག་ཆགས་ཀྱི་རྒྱུན་ཤིན་ཏུ་ཕྲ་བས་ཤིན་ཏུ་གཡོ་ཞིང་གཟུང་དུ་མེད་པའི་སེམས་ཀྱི་རྒྱུན་གྱིས་འཇུག་པས་ཉམས་པའི་གནས་སྐབས་ཀྱི་དུས་བླང་བར་གྱུར་པས། ཕྱི་རོལ་དུ་གཞག་པའི་རྟོག་པ་མཐའ་དག་གི་སྒྲིབ་པས་གཡོགས་ཏེ། མི་མངོན་པར་གྱུར་པའི་བདེ་བའི་བདག་ཉིད་དག་པའི་རང་བཞིན་སྐྱེ་འགྲོའི་གཙོ་བོ་གང་ཡིན་པ་དེ་རླུང་དང་བཅས་པའི་ཁུ་བའི་ཐིགས་པ་རྣམས་དང་ལྷན་ཅིག་ཏུ་བཙུན་མོའི་ཚིགས་ལ་བབ་པ་རྙེད་པ་ན། ལྟེ་བའི་འོག་ཏུ་ཁ་ཐུར་ལ་བལྟས་པའི་པདྨ་དམར་པོ་འདབ་མ་
བརྒྱད་པའི་ནང་དུ་ཁྲག་འཛག་པའི་ལྷག་མ་ཀུན་དུ་གཟུང་བ་སྟེ། དེའི་རྗེས་ལ་ཡང་དག་པར་པདྨ་ཟུམ་པར་གྱུར་ཏོ། །དེ་ཡང་ཁྲག་དང་ཁུ་བ་གཉིས་ཀ་ཡང་ཆུ་དང་འོ་མ་འདྲེས་པ་བཞིན་དུ་གྱུར་ནས་གོང་བུ་གཅིག་ཏུ་གྱུར་ཏེ་རང་གི་རང་བཞིན་རྩོམ་པར་བྱེད་དོ། །དེ་ནས་རྫས་སུ་འགྲོ་བའི་རིམ་གྱིས་ནུར་ནུར་པོ་ལ་སོགས་པ་ཡོངས་སུ་གྱུར་པས་རིམ་གྱིས་སྐྱེ་སྟེ། འབྱུང་བ་མཐའ་དག་ཚོགས་ཉེ་བར་བསགས་པ་རྙེད་ནས་གང་དུས་ལ་སོགས་པ་ལྔ་པོ་འདུས་པ་དེར་ཚོར་བ་དེས་དངོས་པོ་གསལ་བའི་དེ་ཁོ་ན་ཉིད་འདི་སྟོན་པར་བྱེད་ཅིང༌། ཕུང་པོ་ལྔ་དང་ལྡན་པའི་ཚོར་བའི་བདག་ཉིད་ཀྱི་ལུས་སུ་འགྱུར་རོ། །ནང་གི་ཚོར་བ་དེ་སོ་སོར་ཉེ་བར་འགྲོ་བ་འབྲེལ་པ་ཤིན་ཏུ་ངེས་པར་ཐམས་ཅད་ལ་ཁྱབ་ཅིང་ཐམས་ཅད་དུ་འགྲོ་བ་ཡང་ཤིན་ཏུ་གཡོ་བའི་ཡིད་དང༌། འབྱུང་བ་ཡང་དག་པར་ལྡན་པས་དེ་ཕྱོགས་གཅིག་པར་གྱུར་ནས་ཕྱི་རོལ་དབང་པོ་ལྔའི་གྲོང་གི་རྗེས་སུ་འགྲོ་ཞིང་ཡིད་ཀྱིས་བརྟགས་པའི་ཕྱི་རོལ་དུ་གྱུར་པའི་གཟུགས་ལ་སོགས་པ་གཟུང་བ་དང་འཛིན་པར་གྱུར་པས་མངོན་པར་ཟིལ་གྱིས་མནན་ཏེ། ང་རྒྱལ་དང་གཏི་མུག་དང་སེར་སྣ་དང་འཇིགས་པ་དང་མྱ་ངན་དང་ཕྲག་དོག་དང་བརྩེ་བ་དང་སྲེད་པ་དང་སྡུག་པ་དང་མི་སྡུག་པ་ལ་སོགས་པ་ཤིན་ཏུ་ཡིད་དུ་མི་འོང་བའི་འཁོར་ལོར་འཁྱམས་པར་འགྱུར་བ་ཡིན་ནོ། །སྐྱེ་བ་སྔ་མར་བྱས་པའི་ལས་ཀྱི་རྒྱུ་ལས་ནི། །སེམས་དེ་འདི་རུ་སྐྱེ་བ་ཡོངས་སུ་ལེན་ཅིང་འགྲོ། །དེ་ཡི་རྒྱུ་ཡིས་མ་ལུས་འདི་དག་ཐམས་ཅད་ནི། །བག་ཆགས་བཅས་པའི་སེམས་ཀྱི་བྱེད་པར་འགྱུར་བ་ཉིད། །དེ་ལྟར་འཁོར་བའི་གནས་སྐབས་སོ། །དེ་ལྟར་འཁོར་བའི་རྒྱ་མཚོ་འཇིགས་སུ་རུང་ཞིང་རྒལ་དཀའ་བ། ང་རྒྱལ་ཆུ་བོ་གཏིང་ཟབ་པ། ཡུལ་གྱི་རླུང་ཤིན་ཏུ་དག་པས་གཅིག་ནས་གཅིག་ཏུ་ཕན་ཚུན་བརླབས་པས་རྦ་རླབས་ཤིན་ཏུ་འཁོར་ཞིང་འཁྲིགས་པས་སྟེང་དུ་འགྲོ་བ་དང་འོག་ཏུ་འགྲོ་བ་གཅིག་ནས་གཅིག་ཏུ་བརྒྱུད་པས་རྒྱུན་ཆགས་པའི་འཁོར་བ་ལས་ཤིན་ཏུ་སྒྲོལ་བར་བྱེད་པའི་གྲུ་ཐུགས་བརྩེ་བའི་བདག་ཉིད་ཅན། མཆོག་ཏུ་མཉེས་གཤིན་བའི་བདག་ཉིད་རང་བཞིན་ཐུགས་རྗེ་ཆེན་པོ་དང་ལྡན་པ། སྨོན་ལམ་རྒྱ་ཆེན་པོར་བཏབ་པའི་
བླ་མ་དམ་པའི་ཞབས་ཀྱི་པདྨ་དག་ལ་འཁོར་བ་གང་ཞིག་མཆོག་ཏུ་གུས་པས་ཕྱག་འཚལ་བར་མི་བྱེད། སྟོད་པར་མི་བྱེད་སྟེན་པར་མི་བྱེད། མཉེས་པར་མི་བྱེད་པ་དེ་དག་ནི་རྒལ་དཀའ་བའི་འཁོར་བའི་རྒྱ་མཚོ་ཕུན་སུམ་ཚོགས་པ་མ་ཡིན་པ་ལས་རྒལ་བར་མི་འགྱུར་བས་ཡོངས་སུ་བརྟག་པར་བྱའོ། །དེ་བས་ན་རྣམ་པ་ཐམས་ཅད་ཀྱི་ཐམས་ཅད་དུ་བླ་མ་དམ་པའི་ཞབས་ཀྱི་པདྨ་དག་ལ་ངེས་པར་ལེགས་པ་དོན་དུ་གཉེར་བས་བསྟེན་པར་བྱ་བ་ཁོ་ན་ཡིན་ནོ། །ཤིན་ཏུ་འཇིགས་སུ་རུང་བ་འཁོར་བའི་རྒྱ་མཚོ་མཐའ་མེད་ཡུལ་དང་གདུལ་དཀའི་དུས་ཀྱིས་གང༌། །རང་གི་རྣམ་རྟོག་ཆོས་ཀྱིས་སྤྲུལ་སོགས་མང་པོས་ཀུན་དུ་འཁྲུགས་ལས་སྐྱེ་བ་འདི་དག་ནི། །ཇི་སྟེ་གྲུ་དང་འདྲ་བའི་བླ་མ་དམ་པ་སྐྱོབ་པ་བྱེད་པ་དེ་ནི་མེད་གྱུར་ན། །མཆོག་ཏུ་བདེ་བ་གཅིག་པུའི་གནས་གྱུར་སངས་རྒྱས་ཉིད་ནི་འདི་རུ་ཇི་ལྟར་ཐོབ་པར་གྱུར། །བླ་མ་དམ་པ་བསྙེན་བཀུར་རོ།། །།འདི་ལྟར་རྣམ་པར་ཤེས་པའི་བདག་ཉིད་རླུང་ཤིན་ཏུ་གཡོ་ཞིང་བཅིང་མི་ནུས་པ་དབང་པོའི་གྲོང་ཁྱེར་མཐའ་དག་ཟིལ་གྱིས་མནན་པ། དཔེ་མེད་པའི་ཡུལ་གྱི་བདེ་བས་བྲི་ལ་ཞིང་ཟིན་པ། དཔེར་ན་རི་མོ་མཁན་གྱིས་རང་གིས་བྲིས་པའི་རི་མོ་ཤིན་ཏུ་འཇིགས་སུ་རུང་བ་མཐོང་ནས། བདག་ཉིད་འཇིགས་ཤིང་དངས་ཏེ་ས་ལ་བརྡབས་ནས་བརྒྱལ་བར་གྱུར་པ་དེ་བཞིན་དུ། འདིར་ཡང་རང་ཉིད་ཀྱིས་བདེ་བ་མ་ཡིན་པའི་ཚོགས་ཀྱིས་ཡོངས་སུ་བརྟགས་པའི་འདོད་པ་དང༌། མི་འདོད་པ་ལ་སོགས་པའི་རྒྱུར་གྱུར་པ་ལས་བྱས་པའི་ཆགས་པས་ཟིལ་གྱིས་ནོན་པའི་དབང་གིས་རང་གི་རང་བཞིན་མཐོང་སྟེ། འཁོར་ལོ་ལྟ་བུའི་འཁོར་བའི་འཁོར་ལོར་འཁྱམ་ཞིང་འབྱུང་བའི་དབང་པོ་གང་ཡིན་པའི་རྣམ་པར་ཤེས་པ་འབྱུང་བ་འདི་ལ་གནས་ཤིང་སྣ་ཚོགས་གཟུང་སྟེ་གནས་སོ། །དེ་ཡོངས་སུ་མཉེས་པ་ལས་དེའི་བཀའ་ལུང་གིས་དེ་ལྟ་བུའི་རླུང་དབང་པོ་རྣམས་ལས་བཀུག་སྟེ། རྒྱུན་དུ་འཇུག་པ་དང་འབྱུང་བའི་བྱ་བ་བྱེད་པའི་ལམ་ལ་རྣལ་མ་ཉིད་དུ་གནས་པར་བྱེད་དོ། །དེས་ནི་ཡང་དག་པ་མ་ཡིན་པའི་རྟོག་པའི་ཚོགས་མཐའ་དག་གི་འོབས་ཀྱིས་བསྐོར་བའི་ནང་དུ་དྲི་མ་དང་བཅས་པའི་སྲིད་པའི་ཆུའི་ཚོགས་
ཀྱིས་བཀང་སྟེ། །སྲིད་པའི་ཤིང་སྤངས་ཤིང་ཆུས་གཏོར་བས་བསྐྱེད་དེ། ཤིན་ཏུ་རིང་བར་སྐྱེས་པས་འདོད་པའི་འབྲས་བུ་མི་དགའ་བར་སྐྱེད་པ་དང༌། དྲི་ཞིམ་པ་དང༌། རོ་ཞིམ་པ་དང༌། མཁྲང་ཞིང་སྦོམ་ལ་སྣ་ཚོགས་རྣམ་པ་མང་པོ་ཉམས་སུ་མྱོང་བར་བྱེད་པའི་རྒྱུ་གསར་དུ་སྐྱེ་བའི་སྲིད་པ་ལྡོག་པར་འགྱུར་རོ། །དེ་ཡང་ལྷན་ཅིག་སྐྱེས་པའི་རྗེས་སུ་ཚོལ་ཏེ། དེར་གནས་ནས་ཕྱི་རོལ་ཐམས་ཅད་སྤོང་མོད་ཀྱི། དེ་ལྷན་ཅིག་སྐྱེས་པའི་བྱ་བ་ཡོད་དེ། དེ་ཉིད་ཀྱིས་འབྲེལ་ཞིང་ཉམས་སུ་མྱོང་བ་གཡོ་བའི་བདག་ཉིད་དུ་རྣམ་པར་གནས་སོ། །དེར་ཡང་ཁྱད་པར་མི་དམིགས་པ་ཉམས་སུ་མྱོང་བའི་དངོས་པོ་སླར་ཡང་ཉམས་སུ་མྱོང་བར་བྱ་བའི་རྗེས་སུ་ཆགས་པའི་འཇུག་པ་གཏོད་པར་བྱེད་དོ། །མང་པོས་ཅི་ཞིག་བྱ་སྟེ། གང་གི་ཚེ་ན་ཕྱི་རོལ་དུ་གྱུར་པའི་བརྟག་པའི་རང་བཞིན་རྣམ་པར་བཅད་པ་དེའི་ཚེ་འདི་རང་གི་ངོ་བོ་ལ་གནས་པར་འགྱུར་རོ། །དེ་ཡང་གཉུག་མའི་ཡུལ་ཕྲ་མོ་འཇུག་པ་ལ་རྗེས་སུ་ཆགས་པ་ཟད་པས་འབད་པ་བཅོམ་ནས་བདག་ཉིད་ཀྱི་གནས་ལ་མངོན་པར་ཕྱོགས་པར་འགྱུར་རོ། །དེ་ནས་ཡོན་ཏན་མཐའ་དག་དང་ལྡན་པར་གྱུར་པས་བརྟན་པའི་ཡོན་ཏན་དང་ལྡན་པར་འགྱུར་ཏེ། བརྟན་པས་ན་གཞན་གྱི་དོན་གྱི་ཡོན་ཏན་དུ་འགྱུར་རོ། །དཔེར་ན་ནམ་མཁའི་ངོས་སུ་ཁྱབ་པའི་ཆུ་འཛིན་གྱི་ཚོགས་སྟུག་པོ་དེངས་པར་གྱུར་པ་ན། གང་དུ་སོང་བ་མི་ཤེས་པ་དེ་བཞིན་དུ་རླུང་འདི་ཡང་སྔར་རྒྱུན་མ་ཆད་པར་འབྱུང་བ་ལས་དེ་ལྟར་ཐིམ་པར་གྱུར་ན། མཆོག་ཏུ་ལྡོག་ཅིང་ཚིམ་པ་ཐེབ་པས་གང་དུ་ཡང་འགྲོ་བར་མི་འགྱུར་རོ། །ལྷན་ཅིག་སྐྱེས་པའི་རླུང་རང་གི་གནས་སུ་གནས་པས་རྟོག་པའི་ཚོགས་ལས་གྲོལ་ཞིང་སྟོང་པ་ཉིད་ཀྱི་རང་བཞིན་གྱིས་ཐུགས་ཚིམ་པར་བྱེད་པ་ཅི་ཞིག་ལྟར་སྐྱེ་སྟེ། འདི་ལས་འཁོར་བ་འདིར་ཐབས་ཐུགས་རྗེ་ཆེན་པོ་མང་དུ་རྒྱུན་མི་ཆད་པར་གོམས་པར་བྱས་པས། མཐའ་ཡས་པའི་སེམས་ཅན་རྣམས་ཀྱི་དོན་མཛད་པའི་རྒྱུ་ཐོབ་པ་ཡིན་པས་སེམས་བརྟན་པར་བྱའོ། །འདི་ལྟར་ཉོན་ཅིག་གཡོ་བ་དང་ལྡན་པས་དབང་པོར་མངོན་པར་འགྲོ་ལ། དབང་པོར་མངོན་པར་འགྲོ་བས་དབང་པོ་དང་དོན་
ཕྲད་པར་གྱུར་ལ། དབང་པོ་དང་དོན་ཕྲད་པས་དངོས་པོར་དམིགས་པར་འདོད་པ་དང་མི་འདོད་པ་ལ་སོགས་པ་མངོན་པར་ཞེན་པ་ཤིན་ཏུ་མང་པོའི་གདོན་གྱིས་ཟིན་པས་ཤིན་ཏུ་རྒལ་དཀའ་བའི་འཁོར་བར་འཁོར་རོ། །བརྟན་པ་ལས་སྤྲོས་པའི་ཁྱད་པར་སྐྱེས་པ་རྣམས་སྤངས་ཏེ། གཉུག་མའི་རང་བཞིན་བྱང་ཆུབ་ཀྱི་ངོ་བོ་ཤིན་ཏུ་གཟི་བརྗིད་དང་ལྡན་པའི་བློ་རྗེས་སུ་ཚོལ་ཏེ། གང་གི་ཚེ་དེས་ཀུན་དུ་འཁྱུད་པར་གྱུར་ན། དེའི་ཚེ་ནམ་མཁའ་བཞིན་དུ་འདྲེས་པར་གྱུར་ཏེ། སྔར་ཡུལ་རྣམས་ལ་དགའ་བ་དང་ཆགས་པ་དང་ལྡན་པའི་རྣམ་པར་གཡེང་བའི་ཁྱད་པར་སྐྱེ་བ་རྣམས་མེད་ཅིང༌། ནམ་མཁའ་དང་མཚུངས་པར་རྟོག་པ་དང་བྲལ་བས་ཕྱག་རྒྱ་ཐམས་ཅད་ཀྱིས་བྱིན་གྱིས་བརླབས་ཤིང༌། དབང་པོ་ལས་འདས་པ་སྐྱེ་བ་མེད་པ་དང་ལྡན་པ་རང་གི་རིག་པའི་སྤྱོད་ཡུལ་ཅན། ཐ་སྙད་ལས་འདས་པ་སྔར་མངོན་དུ་མ་བྱས་པའི་ཐབས་དང་ཤེས་རབ་ཀྱི་རང་བཞིན་བདེ་བའི་བདག་ཉིད་གཙོ་བོར་གྱུར་པ་སྐྱེ་བར་འགྱུར་རོ། །རླུང་གི་བློ་ནི་རྗེས་སུ་བཙལ་བས་ནི། །བདེ་བ་དམ་པའི་ངོ་པོ་རང་སེམས་ནི། །ཚིམ་བྱེད་དེ་དག་ལས་གཞན་མི་གཡོ་བ། །ཤེས་རབ་ཐབས་ཀྱི་རང་བཞིན་འགའ་ཞིག་ཡིན། ཐབས་དང་ཤེས་རབ་ཀྱི་རང་གཞན་གསལ་བ་དེ་ཁོ་ན་ཉིད་དུ་སེམས་གནས་སོ། །དེས་སྔོན་ཡོངས་སུ་བཏང་བའི་དབང་པོ་དེ་ཡང་ཡིད་དང་བྲལ་བས་བྱེད་པ་མེད་པར་འགྱུར་ཏེ། ཨ་མས་བོར་བས་བེའུ་མ་ཉིད་རྗེས་སུ་ཚོལ་བ་དེ་བཞིན་དུ་དེ་ཡང་དབང་པོ་རྣམས་ནི་ཡིད་ཀྱི་རྗེས་སུ་འབྲང་བར་འགྱུར་རོ། །གང་དུ་ཡིད་འཇུག་པ་དེར་རབ་ཏུ་འཇུག་སྟེ། གང་གི་ཕྱིར་དེ་མ་གཏོགས་པར་དེ་དག་རབ་ཏུ་སྦྱོར་བ་མེད་པ་ཡིན་ནོ། །འདིར་བྱེ་བྲག་ནི་འདི་ཡིན་ཏེ། འདི་ནི་ཐབས་དང་ཤེས་རབ་ལས་སྐྱེས་པའི་བདེ་བ་ཆེན་པོའི་སྣང་བ་གནས་པ་ཡིན་ཏེ་རྣམ་པར་རྟོག་པའི་ཚོགས་མཐའ་དག་སྤངས་ནས། བླ་ན་མེད་པའི་ལོངས་སྤྱོད་དུ་ཉེ་བར་འགྲོ་ཞིང་བྱེད་པའི་གྲོང་ཁྱེར་རྣམས་རྗེས་སུ་ཞུགས་པ་དང་ལྡན་པས་འགྲོ་བ་འདི་དག་ཉིད་བདེ་བ་ཆེན་པོའི་རྣམ་པར་རོ་གཅིག་པར་འགྲོ་བར་འགྱུར་ཏེ། དཔེར་ན་ཉི་མའི་འོད་ཟེར་གྱི་ཚོགས་ཀྱིས་ཕོག་པའི་ཟླ་བའི་དཀྱིལ་འཁོར་གྱི་གཟུགས་
བཞིན་དུ་འགྲོ་བ་རྣམས་སྙིང་པོ་མེད་པར་སྣང་ངོ༌། །དེ་ལྟར་བྱེད་པའི་གྲོང་ཁྱེར་རྣམས་འཛིན་པས་སྟོང་ཞིང་སེམས་དང་ལྷན་ཅིག་འདྲེས་པས། གཡོ་བ་དང་མི་གཡོ་བ་སྣ་ཚོགས་མཐའ་དག་འདི་སྙམ་པ་མེད་པའི་མཉམ་པའི་རོ་བདེ་བ་ཕུན་སུམ་ཚོགས་པ་སྐྱེ་བ་མེད་པའི་དཔལ་བདེ་བ་ཆེན་པོའི་རང་བཞིན་རྣམ་པར་འགྱུར་རོ། །དེ་དག་གིས་འདི་སྐད་དུ་བསྟན་པར་འགྱུར་ཏེ། དབང་པོའི་གྲོང་ཁྱེར་མི་སྣང་བར་གྱུར་ནས་རོ་དང་འདྲ་བ་རྗེས་སུ་མཐུན་པར་ལྷན་ཅིག་ཏུ་འཇུག་པས་འགྲོ་བ་རྣམས་ཀྱི་གཙོ་བོ་ཉིད་འཐོབ་སྟེ། བློའི་དབང་ཕྱུག་གི་གཙོ་བོ་རང་དབང་ཅན་གང་དུ་འཇུག་པ་དེར་འཛིན་པས་སྟོང་པའི་དབང་པོ་རྣམས་དང༌། སྐྱེ་བའི་དབང་པོ་དང་འདྲ་བར་འཇུག་སྟེ། དེའི་རྗེས་སུ་འབྲང་བའི་སྤྱོད་པ་རྣམས་མཛེས་ཤིང་རྗེས་སུ་མཐུན་པར་ཉེ་བར་སྤྱོད་ལ། གསལ་བ་ཉིད་དུ་སྟོན་ཅིང་ཉེ་བར་བརྟེན་པས་རྣམ་པར་རྟོག་པ་ཐམས་ཅད་སྤངས་པའི་གཙོ་བོ་རང་བཞིན་གྱིས་རྣམ་པར་དག་པའི་ཡེ་ཤེས་ཀྱི་རྣམ་བ་གང་ཡིན་པ་དེར་བྱེད་པའི་གྲོང་ཁྱེར་འདི་དག་ཁྱད་པར་ཅན་དུ་གྱུར་ནས་རྗེས་སུ་འགྲོ་ཞིང་ཞུགས་པས་འབྲང་བར་འགྱུར་ཏེ། རྣམ་པ་དེ་ལྟར་བྱེད་པའི་གྲོང་ཁྱེར་རྣམས་སེམས་ཀྱིས་མེད་པར་འགྱུར་རོ། །གལ་ཏེ་སེམས་མེད་པར་གྱུར་ན་དེའི་ཚེ་སྣ་ཚོགས་འདི་དག་ཉེ་བར་ཞིག་པས་ན་གང་དུ་གནས་པར་འགྱུར། དེ་བས་ན་སེམས་ལས་གཞན་པའི་མཆོག་ཏུ་གྱུར་པ་ཡོད་པ་མ་ཡིན་ནོ། །དབང་པོའི་ཚོགས་རྣམས་ཐིམ་ཞིང་རྣམ་རྟོག་ནི། །ཟད་པ་སྲིད་པའི་ས་བོན་མི་མཐུན་བྲལ།། དཀའ་དང་གསལ་བའི་རང་བཞིན་བསིལ་གྱུར་པའི། །འདི་ནི་ནམ་མཁའ་ལྟ་བུར་ཤིན་ཏུ་མཚར། །དབང་པོའི་གྲོང་ཁྱེར་རྣམ་པར་ཞུགས་པས་ཤེས་རབ་ཐབས་ཀྱི་རྗེས་སུ་འགྲོ་བ་བདེ་བ་ཆེན་པོའི་སེམས་སོ། །ཡང་ཐོག་མ་མེད་པའི་བག་ཆགས་ཀྱི་ཚོགས་ཀྱི་ཟིལ་གྱིས་མནན་པའི་བྱིས་པ་རྣམས་འབྱེད་པར་བྱེད་པས་ཅི་ཞིག་བྱ་སྟེ། གལ་ཏེ་སེམས་ཉིད་དངོས་པོའི་རང་བཞིན་དུ་མ་གྱུར་ན། དེ་ལྟར་ན་ནི་གང་ལས་ཕྱི་རོལ་གྱི་དོན་ཤེས། ཇི་སྟེ་སེམས་ཉིད་དངོས་པོའི་བདག་ཉིད་དུ་གྱུར་ན། དེ་ལྟར་ཡང་འདི་དག་སེམས་ཉིད་ཡིན་པས་རྣམ་པ་ཐམས་ཅད་དུ་
ཕྱི་རོལ་གྱི་དོན་སྐྱེ་བ་ཡོད་པ་མ་ཡིན་ཏེ། འདི་ལྟར་མ་ལུས་པ་འདི་དག་བརྟགས་པས་སྟོང་པའི་སེམས་ཉིད་དེ་སྐྱེ་བ་དང༌། འགག་པ་དང་བྲལ་ཞིང་རང་བཞིན་དག་པའི་གཉིས་སུ་མེད་པའི་ཡེ་ཤེས་ཀྱི་རྣམ་པ་ཡོངས་སུ་གསལ་བ་ཡིན་ནོ། །དེ་དག་གིས་འདི་སྐད་དུ་བསྟན་པར་འགྱུར་ཏེ། རང་བཞིན་དག་པའི་བྱང་ཆུབ་ཀྱིས་གང་ཡང་ལྷན་ཅིག་སྐྱེས་ཤིང་རྣམ་པར་སྤྲུལ་པའི་ཡན་ལག་བསྐྱོད་པ་ཇི་སྙེད་པ་དེ་དག་ཕྱག་རྒྱ་རབ་ཏུ་དབྱེ་བར་འགྱུར་ལ། གང་ཡང་ངག་གིས་བརྗོད་པའི་ཇི་སྙེད་པ་དེ་སྙེད་སྔགས་ཀྱི་རྣམ་པའོ། །གང་ཡང་ལྷན་ཅིག་སྐྱེས་པ་ལས་བྱུང་བའི་རྒྱུན་མི་འཆད་པར་རྣམ་པར་གཡོ་བ་མངོན་པར་འདུས་མ་བྱས་ལ་རིས་སུ་ཚད་མེད་ཅིང་དཔག་ཏུ་མེད་པ་རྣམས་སྣ་ཚོགས་པའི་རོ་དང་ལྡན་པས་དགོངས་པ་དང༌། བྱ་བ་རྣམས་འདི་ལྟར་སྒེག་པ་དང༌། དཔའ་བ་དང༌། འཇིགས་སུ་རུང་བ་བྱེད་པ་དང༌། སྙིང་རྗེ་དང༌། རྔམ་པ་དང༌། ཞི་བ་ལ་སོགས་པའི་འདོད་ཆགས་དང༌། ཞེ་སྡང་དང༌། དྲེགས་པ་དང༌། སེར་སྣ་དང༌། ཕྲག་དོག་ལ་སོགས་པ་ཅུང་ཟད་སྐྱེས་པ་དེ་དག་མ་ལུས་པར་རང་བཞིན་དག་པའི་ཡེ་ཤེས་ཀྱི་རྣམ་པ་ཡོངས་སུ་རྫོགས་པ་ཡིན་ནོ། །ཁམས་གསུམ་སྣ་ཚོགས་འདི་དག་ཐམས་ཅད་སེམས་ཀྱི་རང་བཞིན་དུ་གནས་པའོ། །སྤྱོད་པ་ཡང་ངེས་བརྗོད་དུ་བསྟན་ཏོ། །དེ་ལྟར་ལ་ལར་སྙིང་རྗེའི་བདག་ཉིད་དོ། །ལ་ལར་ཁ་ཅིག་ཏུ་ནི་སྲིན་པོ་དང་མཚུངས་པར་རོ། །ལ་ལར་ནི་སྨྲ་བར་མཛད་དོ། །ལ་ལར་ནི་མུ་ཅོར་སྨྲ་བར་རོ། །ལ་ལར་ནི་སྲིད་པར་རོ། །ལ་ལར་ནི་ཡིད་བཞིན་ནོར་བུ་དང་མཚུངས་པར་རོ། །ལ་ལར་ནི་གཉིད་ལོག་པར་རོ། །ལ་ལར་ནི་གཉིད་སད་ཅིང་བསྡམས་པར་རོ། །ལ་ལར་ནི་ཞིམ་པས་ཚིམ་པར་རོ། །ལ་ལར་ནི་རུལ་པ་ལ་སོགས་པ་སྲིད་པར་རོ། །ལ་ལར་ནི་ཆགས་ཤིང་ཞེན་པར་རོ། །ལ་ལར་ནི་གཅིག་པུ་འདོད་ཆགས་དང་བྲལ་བར་གནས་པར་རོ། །ལ་ལར་ནི་ཚུལ་ཁྲིམས་ཀྱིས་གནས་པར་རོ། །ལ་ལར་ནི་ཚུལ་དང་སྤྱོད་ལམ་ངན་པར་རོ། །ལ་ལར་ནི་བརྟན་པར་གནས་པར་རོ། །ལ་ལར་ནི་རབ་
ཏུ་གཡོ་བར་རོ། །ལ་ལར་ནི་རོལ་པ་ཆགས་པར་རོ། །ལ་ལར་ནི་རྒོད་པ་གཅིག་པུ་ལའོ། །ལ་ལར་ནི་རབ་ཏུ་ངུ་བར་རོ། །ལ་ལར་ནི་རང་དགའི་བདག་ཉིད་དོ། །ལ་ལར་ནི་གཞན་གྱི་དབང་དུ་གྱུར་པའོ། །ལ་ལར་ནི་མི་གཙང་བར་གནས་པར་རོ། །ལ་ལར་ནི་ཤིན་ཏུ་གཙང་སྤྲའི་སྤྱོད་པའི་ལུས་སུའོ། །ལ་ལར་ནི་འཆད་པ་ལ་འཁོར་བར་རོ། །ལ་ལར་ནི་རྨོངས་ཤིང་གླེན་པར་རོ། །ལ་ལར་ནི་ཅུང་ཟད་ཀྱིས་ཚིམ་པར་རོ། །ལ་ལར་ནི་ཚིམ་པ་མེད་པར་རོ། །ལ་ལར་ནི་གར་བྱ་བའི་ཕྱིར་ལུས་གློད་པ་ཡིད་ཀྱིས་འཇུག་པར་རོ། །ལ་ལར་ནི་གླུ་ལེན་པའི་གསང་བ་མཐོན་པོ་ལས་སོ། །ལ་ལར་ནི་བདེ་བའི་གནས་སུའོ། །ལ་ལར་ནི་གཅིག་པུ་སྡུག་བསྔལ་གྱི་གནས་སུ་གྱུར་པར་རོ། །ལ་ལར་ནི་རྒྱན་པོ་རྩེ་བ་ལ་གོམས་ཤིང་དགའ་བར་རོ། །ལ་ལར་ནི་རྡུལ་གྱིས་གོས་པར་རོ། །ལ་ལར་ནི་ཁྲུས་ཀྱིས་གནས་པ་དང་བསྐལ་པ་བཟང་པོར་རོ། །ལ་ལར་ནི་གཅེར་བུར་རོ། །ལ་ལར་ནི་རི་མོ་ཅན་གྱི་གོས་བགོས་པར་རོ། །ལ་ལར་ནི་སྦྱིན་པ་པོ་དང་ལོངས་སྤྱོད་པར་རོ། །ལ་ལར་ནི་ཤིན་ཏུ་ཕོངས་པར་རོ། །ལ་ལར་ནི་ཤིན་ཏུ་ངེས་པར་རོ། །ལ་ལར་ནི་བརྫུན་སྨྲ་བར་རོ། །ལ་ལར་ནི་བདེན་བ་གཅིག་པུ་སྨྲ་བར་རོ། །ལ་ལར་ནི་ཆོས་ཀྱི་རྒོད་པ་དང་ལྡན་པར་རོ། །ལ་ལར་ནི་སྡིག་པ་ཆེན་པོ་བྱེད་པར་རོ། །ལ་ལར་ནི་སྦྱིན་པ་པོར་རོ། །ལ་ལར་ནི་དུལ་ཞིང་དེས་པར་རོ། །ལ་ལར་ནི་རྒྱུའི་གནས་པར་རོ། །ལ་ལར་ནི་བློ་བཟང་ཞིང་དག་པར་རོ། །ལ་ལར་ནི་སྣང་བར་རོ། །ལ་ལར་ནི་མི་མཐོང་ཞིང་མི་སྣང་བར་རོ། །ལ་ལར་ནི་བདག་ཉིད་ཆེན་པོར་རོ། །ལ་ལར་ནི་མངོན་པར་ཤེས་པར་རོ། །ལ་ལར་ནི་དེ་ཉིད་ཐིམ་པར་རོ། །ལ་ལར་ནི་འབྱུང་བ་ལ་གནས་པར་རོ། །ལ་ལར་ནི་འབྱུང་བ་དང་བྲལ་བར་རོ། །ལ་ལར་ནི་རྣམ་པ་དང་ལྡན་པར་རོ། །ལ་ལར་ནི་ངག་གི་ཡུལ་ལས་འདས་བར་རོ། །དེ་ལྟར་གང་ཞིག་ལྷན་ཅིག་སྐྱེས་པའི་རྣམ་རྟོག་དང་བྲལ་དམིགས་མེད་པར། །སྣ་ཚོགས་འདི་དག་རང་བཞིན་དག་པས་སྤྱོད་པའི་དགོངས་ལྡན་མཁས་པ་ནི། །དེ་ཡི་ལག་ན་བདེ་གཤེགས་གོ་འཕང་བདག་ཆེན་རྩོམ་
པ་ཆེར་ལྡན་པ། །རབ་དགའ་གཞན་དོན་ལ་དགའ་མཆོག་གིས་བདེ་བ་དམ་པ་ལེགས་པར་གནས། །སྐྱེ་བ་མེད་ཅིང་དགའ་བ་གཅིག་པུའི་རོ་དང་ལྡན་པའི་སེམས། །དངོས་པོ་ཀུན་གྱི་རང་བཞིན་མཆོག །ཆོས་ཀུན་མཉམ་དང་མི་མཉམ་པ། །ཀུན་མཁྱེན་ཀུན་འགྲོ་ཐམས་ཅད་ལ། །ཆོས་རྣམས་ཀུན་གྱི་རང་བཞིན་འཛིན། །མི་གནས་མྱ་ངན་འདས་པའོ། །མཉམ་ཉིད་འགྲོ་བའི་དོན་མཛད་པ། །གཅིག་དང་དུ་མའི་རང་བཞིན་གནས། །ཚོར་མིན་གཡོ་བ་རང་བཞིན་མེད། །བཅོམ་ལྡན་སོ་སོ་རང་རིག་པ། །གཙོ་བོ་དཔེ་དང་བྲལ་བ་སྟེ། །བདག་པོ་ཀུན་འགྲོ་ཀུན་ཁྱབ་པ། །བྱེད་པ་པོ་དང་འཕྲོག་པ་ཡིན། །འདི་ནི་དཔལ་ལྡན་རྡོ་རྗེ་སེམས། །དངོས་པོ་གསལ་བ་གསལ་མཛད་ཡིན། །དཔལ་ཨུ་རྒྱན་གྱི་རྡོ་རྗེ་ཆེན་པོ་མཆོག་གི་གནས་སུ་རང་བྱུང་གི་ཡེ་ཤེས་ཕུན་སུམ་ཚོགས་པའི་དཔལ་རྣལ་འབྱོར་མ་རྣམས་འདུས་ནས་ཡང་དག་པའི་དོན་ལ་གཟིགས་མོ་ལས་བྱུང་བའི་མ་ནོར་བའི་ཆོས་ཀྱི་དེ་ཁོ་ན་ཉིད་ཀྱི་མོད་ལ་བྱིན་གྱིས་རློབ་པར་བྱེད་པ། ས་གསུམ་རྡོ་རྗེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་པའི་དུས་སུ། །ནེམ་ནུར་མི་མངའ་པའི་ཞལ་གྱི་པདྨ་རབ་ཏུ་རྒྱས་པ་ལས་བདེ་བ་ཕུན་སུམ་ཆོགས་པའི་སྦྲང་རྩིའི་རྒྱུན་འབབ་པར་གྱུར་པ་དངོས་པོ་གསལ་བའི་རྗེས་སུ་འགྲོ་བ་དེ་ཁོ་ན་ཉིད་གྲུབ་པ་རྫོགས་སོ།། །།དེ་ལྟར་འདི་ནི་བཅོམ་ལྡན་འདས་དེའི་བཀའ་བསྒོ་བའི་རྗེས་སུ་འགྲོ་བས་དོན་ཆེན་པོ་འདི་རྣམས་ཀྱིས་ཡང་དག་པར་བསྡུས་ནས། སྐྱེ་བོ་ཉན་འདོད་པ་རྣམས་ལ་ཇི་ལྟར་དེ་རྣམས་ཀྱི་མིག་གི་ཡུལ་དུ་གྱུར་པའི་གཟུགས་སྣང་ཞིང་གསལ་བར་མཛད་ནས། །སྔར་ཇི་ལྟར་ཉམས་སུ་མྱོང་བ་བཞིན་དུ་གསལ་བར་མཛད་དེ་མངོན་པར་བསྟན་པ་ཡིན་ནོ། །གང་ཞིག་འབྱུང་བའི་ཚོགས་སུ་དགྲད་བར་མ་ཆུད་པ། །དེས་ཀྱང་བདག་ཉིད་འབའ་ཞིག་དག་པར་བྱེད་པའི་བློས། །དགའ་བ་འདི་ནི་གྲགས་པར་གྱུར་པ་རྣམ་དག་པའོ། །བདེ་བ་དམ་པ་ཐོབ་གྱུར་འདི་ནི་ངོ་མཚར་ཆེ། །རྣལ་འབྱོར་མ་ཚུལ་མཚོ་ཆེན་གྱི་ནི་བྲུར་གྱུར་པ། །བདེ་བ་དམ་པའི་
གནས་སུ་སྒྲོལ་བྱེད་གང་ཡིན་པ། །དེ་ཉིད་གྲུབ་པ་བྲིས་པ་འདི་ཡིས་ནི། །སྐྱེ་འགྲོ་གསུམ་པོ་རྣམས་ཀྱིས་དངོས་གྲུབ་འགྲུབ་པར་ཤོག །དངོས་པོ་གསལ་བའི་རྗེས་སུ་གྲུབ་པ་དེ་ཁོ་ན་ཉིད་གྲུབ་པ་ཞེས་བྱ་བ། ལྷན་ཅིག་སྐྱེས་པའི་རྣལ་འབྱོར་མ་ཙི་ཏོས་མཛད་པ་རྫོགས་སོ།། །། པཎྜི་ཏ་ཆེན་པོ་ཞི་བ་བཟང་པོ་དང༌། ཞུ་ཆེན་གྱི་ལོ་ཙཱ་བ་འགོས་ལྷས་བཙས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།རང་རིག་ཙམ་གྱི་ཡེ་ཤེས་ནི། །ནམ་མཁའ་འདྲ་བར་མཚན་ཉིད་མེད། །འོན་ཀྱང་དེ་ལ་དབྱེ་ཡོད་དེ། །རབ་མཚམས་ཉིད་དང་མཚམས་མོའི་བར། །སྣང་བ་དང་ནི་སྣང་བ་མཆེད། །དེ་བཞིན་སྣང་བ་ཐོབ་པ་ཅན། །སེམས་ནི་རྣམ་པ་གསུམ་དུ་བཤད། །དེ་ཡི་གཞི་ནི་བཤད་པར་བྱ། །ཕྲ་བའི་གཟུགས་ཅན་རླུང་དང་ནི། །ཡེ་ཤེས་དག་ནི་འདྲེས་གྱུར་པ། །དབང་པོ་ལམ་ནས་བྱུང་ནས་ནི། །ཡུལ་རྣམས་ལ་ནི་སྨིན་པར་འགྱུར། །གང་ཚོ་སྣང་བ་ལྡན་འགྱུར་བ། །རླུང་ནི་བཞོན་པར་གྱུར་པ་ཡིན། །དེ་ཚེ་རང་བཞིན་དེ་ཐམས་ཅད། །མ་ལུས་ལུས་པ་མེད་པར་འབྱུང༌། །རླུང་ནི་གང་དང་གར་གནས་པ། །རང་བཞིན་དེ་དང་དེ་རྗེས་སྤྱོད། །ཅེས་དགོངས་པ་ལུང་སྟོན་པས་སོ།།