མན་ངག་གི་ཚིགས་སུ་བཅད་པ་བཅུ་གཉིས་པ།
རྒྱ་གར་སྐད་དུ། །དྭ་ད་ཤ་ཨུ་པ་དེ་ཤ་གཱ་ཐཱ། བོད་སྐད་དུ། མན་ངག་གི་ཚིགས་སུ་བཅད་པ་བཅུ་གཉིས་པ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །བྱང་ཆུབ་སེམས་ནི་
ཞི་བ་སྟེ། །དེ་ལ་གནས་པ་གང་ཡིན་པ། །ནམ་མཁའ་བཞིན་དུ་ཞི་བར་འགྱུར། །ལུས་ངག་ཡིད་ལས་བྱུང་བ་ཡི། །དེ་ལ་ཅུང་ཟད་འགྱུར་བ་མེད། །ཡང་དག་ཡེ་ཤེས་ལས་འདས་པ། །རྣམ་པར་མི་རྟོག་ཞི་བར་འགྱུར། །རྟོག་པ་ཞི་བ་སངས་རྒྱས་ཉིད། །དེ་ཉིད་རྣམ་པ་མཁྱེན་ཉིད་དོ། །དངོས་པོ་དངོས་པོ་མཐོང་ནས་ནི། །དེ་ལྟར་རྣམ་རྟོག་གང་བྱུང་བ། །དེ་ནི་རྟོག་མེད་ཡེ་ཤེས་ཡིན། །འགྲོ་བ་ཐ་དད་འཛིན་ཕྱིར་རོ། །དངོས་པོ་ཀུན་གྱི་རང་བཞིན་ནོ། །ཐམས་ཅད་དུ་ནི་སོ་སོར་གནས། །དེ་དགལ་ནི་ཁྱད་པར་དུ། །ང་རྒྱལ་མེད་ཅིང་རྨོངས་པ་མེད། །དེ་ཕྱོགས་ཕྱོགས་གཅིག་དངོས་པོ་ལ། །བདག་ཏུ་འཛིན་པ་ཇི་ལྟར་ཡིན། །དུད་འགྲོ་ལ་སོགས་རང་བཞིན་ནོ། །ཕྱོགས་གཅིག་ཙམ་ལས་གང་བྱུང་བ། །དེ་ཡི་ངོ་བོར་བཤད་པར་བྱ། །ཡང་དག་སེམས་ཀྱིས་གཟུང་བར་བྱོས། །སྟག་ནི་ཕུག་ན་གནས་པ་དང༌། །སྦལ་པ་སྟོང་པ་ཆེན་པོ་དང༌། །བྱི་ལ་བ་སྤུ་ལྡང་བ་དང༌། །བ་ལང་ལ་སོགས་ལུས་པོ་སྤྲུག །སྦྲུལ་ལ་བཟའ་བ་མེད་པ་དང༌། །བྱ་རྣམས་མཁའ་ལ་འགྲོ་བ་དང༌། །སྲིན་བུ་མེ་ཁྱེར་འོད་འཕྲོ་དང༌། །རྔ་མོས་སྦྲུལ་རྣམས་འགུགས་པ་དང༌། །རྨ་བྱ་སྐོམ་ལས་རྒྱལ་བ་དང༌། །བུང་བས་དུག་རྣམས་ཟོས་པ་དང༌། །ཆུ་བྱས་དབང་པོ་བསྡམས་བ་དང༌། །སེང་གེ་འཇིགས་པ་མེད་པ་དང༌། །འུག་པས་མཚན་མོ་མཐོང་བ་དང༌། །བྱ་རྒོད་རིན་ཆེན་རྟོགས་པ་དང༌། །སྦྲུལ་གྱི་དུག་ནི་བྱེད་པ་དང༌། །རྨ་བྱས་དུག་རྣམས་ཟ་བ་དང། །དུར་པས་མ་འོངས་ཤེས་པ་དང༌། །ནི་ཚོ་ཚིག་ལ་མཁས་པ་དང༌། །སྦྲང་བུས་རྗེས་རྣམས་སྡུད་པ་དང༌། །དུད་འགྲོ་ལ་སོགས་རང་རིག་འགྲོ། །ངང་པས་ཆུ་དང་འོ་མ་འབྱེད། །བུང་བའི་སྐད་ནི་ཤིན་དུ་སྙན། །ཆུ་སྐྱར་མཆིལ་མས་སེམས་ཅན་འཛིན། །སྦྲུལ་གྱི་མིག་གིས་ཐོས་པ་དང༌། །རི་དགས་ལས་ནི་གླ་རྩི་འབྱུང༌། །གུ་ན་ས་ནི་མིག་གིས་སྣོམ། །ཆུ་ཡི་ནང་ན་གནས་པའི་ཉ། །སྲོག་དང་རྩོལ་བས་འགོག་པར་བྱེད། །ཚུལ་ངན་བཟླས་པ་བྲམ་ཟེ་ཡིས། །ཡེ་ཤེས་མཆོག་ཏུ་ཐལ་བར་འགྱུར། །སྟག་ལ་སོགས་པའི་
སྲོག་ཆགས་ཀུན། །སྔ་མའི་བག་ཆགས་ལས་བྱུང་བའི། །རང་བཞིན་ཡོན་ཏན་འབྱུང་བར་འགྱུར། །དེ་དག་འཇིག་རྟེན་ཡེ་ཤེས་ཅན། །དཀའ་ཐུབ་མ་ཡིན་གྲོལ་བ་མིན། །སྔ་མའི་བག་ཆགས་ལས་བྱུང་བའི། །དེ་དག་སོ་སོར་གནས་པ་ཡིན། །དེ་ཙམ་ཡེ་ཤེས་ཡིན་ན་ནི། །དུད་འགྲོ་རྣམས་ཀྱང་གྲོལ་བར་འགྱུར། །དེ་ལྟར་ཤེས་ཏེ་ཞེན་སྤངས་ནས། །ཡང་དག་ཡེ་ཤེས་སྤྱད་པར་བྱ། །གང་གིས་བྱང་ཆུབ་དམ་པ་དག །དངོས་གྲུབ་དམ་པ་འབྱུང་བར་འགྱུར། །མན་ངག་གི་ཚིགས་སུ་བཅད་པ་བཅུ་གཉིས་པ་བྲམ་ཟེ་ཆེན་པོས་ར་ཧའི་ཞལ་ནས་གསུངས་པ་རྫོགས་སོ།།