སྙིང་པོ་ཀུན་ལས་བཏུས་པའི་རབ་ཏུ་བྱེད་པ།
རྒྱ་གར་སྐད་དུ། སརྦ་སཱ་ར་ས་མུཙྪ་ཡ་པྲ་ཀ་ར་ཎ། བོད་སྐད་དུ། སྙིང་པོ་ཀུན་ལས་བཏུས་པའི་རབ་ཏུ་བྱེད་པ། བླ་མ་དང་སངས་རྒྱས་ལ་ཕྱག་འཚལ་ལོ། །གང་དེ་དགའ་བའི་རང་བཞིན་གྱིས། །སྙིང་ལ་བདེ་བྱེད་ཉམས་མྱོང་བ། །དེ་ཡང་ཀུན་དུ་རྟོག་པ་ཙམ། །འདོད་ཆགས་བྲལ་བའི་དངོས་པོ་གང༌། །དེ་ནི་གཅིག་ཏུ་སྲིད་རྒྱུའི་མཆོག །གང་ཞིག་ཡིད་ཀྱིས་སྐྱེས་པ་ཡི། །རྣམ་པར་རྟོག་པ་གང་དག་ཀྱང༌། །དེ་ཉིད་རང་བཞིན་ཡིན་ཕྱིར་ཏེ། །སྣང་ཞིང་རྒྱུ་བ་འདི་དག་ལས། །མྱ་ངན་འདས་པ་གཞན་དུ་ནི། །ཡོད་མིན་ཡུལ་ནི་ཙལ་ཡང༌། །རྣམ་པར་མི་རྟོག་བདག་ཉིད་སེམས། །རྣམ་རྟོག་སྤངས་པ་དེ་བཞིན་ཏེ། །མྱ་ངན་འདས་པ་ཞེས་བརྟག་གོ །གཉིས་མེད་མྱ་ངན་འདས་པ་མིན། །འཁོར་
བའང་མ་ཡིན་པ་ཁོ་ན། །སོ་སོར་འགེགས་ཆོ་ག་གང་ཡིན་དང༌། །སོ་སོར་འགག་བྱར་འགེགས་པ་ཡི། །གསུམ་གྱི་དངོས་པོའང་མེད་པས་ན། །གང་གིས་གང་ཞིག་ཇི་ལྟར་འགྲུབ། །ཡུལ་ནི་དངོས་མེད་གཉིས་ཡིན་ནོ། །སོ་སོར་འགེགས་པའི་བྱེ་བྲག་ཅི། །ནམ་མཁའི་མེ་ཏོག་ལ་སོགས་པས། །ཅིར་ཡང་མཐོང་ཞིང་རྒྱས་པ་བཞིན། །སྐྱེ་བ་མེད་པའི་རང་བཞིན་གྱིས། །བདེན་པའི་དངོས་པོ་སྦྱིན་སྣང་བ། །རྣམ་རྟོག་སྟོབས་ལས་བསལ་བ་ལ། །བུས་པའི་འབྲས་བུ་ངོ་མཚར་ཆེ། །ཇི་ལྟར་བུས་པ་བཀྲེས་པ་དག །སོར་མོ་རང་གི་ཁར་བཅུག་ནས། །ནུ་ཞོ་འབབ་པ་ལྟ་བུ་ནི། །མཆིལ་མ་འཐུངས་པས་དུ་བ་མེད། །དེ་ལྟ་བས་ན་འབྲས་རྨོངས་པས། །མྱ་ངན་འདས་ལ་སོགས་པར་བྱེད། །བདེ་བ་ཐོབ་པར་འདོད་པ་ཡི། །སོ་སོའི་སྐྱེ་བོ་དེ་ཉིད་དམན། །འགྲོ་རྣམས་དེ་ལྟར་སྡུག་བསྔལ་བས། །ཐོབ་པར་གྱུར་པ་མི་མཉམ་སྟེ། །དྲུད་པ་ལས་བྱུང་མེ་ཡིས་ནི། །འོད་མ་ཚིག་གྱུར་ཇི་བཞིན་ནོ། །ཆགས་དང་ཆགས་བྲལ་ཞེས་བྱ་བ། །རྣམ་པར་སྤངས་ནས་མཉམ་གཞག་ན། །སྡུག་བསྔལ་མེད་ཅིང་བདེ་བ་མེད། །དེ་ཉིད་མཐོང་བར་སོམ་ཉི་མེད། །སྙིང་པོ་ཀུན་ལས་བཏུས་པའི་རབ་ཏུ་བྱེད་པ། སློབ་དཔོན་ཆེན་པོ་ཤྲཱི་ཨཱ་ནནད་བཛྲའི་ཞལ་སྔ་ནས་མཛད་པ་རྫོགས་སོ།། །།རྒྱ་གར་གྱི་མཁན་པོ་བཛྲ་པཱ་ཎི་དང༌། བོད་ཀྱི་ལོ་ཙཱ་བ་རྨ་བན་ཆོས་འབར་གྱིས་བསྒྱུར་བའོ།།