མན་ངག་སྐུའི་སྒྲོན་མ་ཞེས་བྱ་བ།
རྒྱ་གར་སྐད་དུ། །ཨུ་པ་དེ་ཤ་ཀཱ་ཡ་པྲ་དཱི་པ་ནཱ་མ། བོད་སྐད་དུ། །མན་ངག་སྐུའི་སྒྲོན་མ་ཞེས་བྱས་བ། །འཇམ་དཔལ་སྨྲ་བའི་སེང་གེ་ལ་ཕྱག་འཚལ་ལོ། །རྒྱལ་བའི་སྐུ་ནི་གཅིག་ཉིད་ལ། །གདུལ་བྱའི་མོས་པའི་དབང་གིས་ནི། །ཕྱི་ནང་གསང་བ་གསུམ་དུ་སྣང༌། །བདེ་གཤེགས་སྤྲུལ་པ་སྣ་ཚོགས་སྟོན། །ཡབ་ནི་ཐབས་ཀྱི་རང་བཞིན་ལ། །ཡུམ་ནི་ཤེས་རབ་རང་བཞིན་ཏེ། །ཐབས་དང་ཤེས་རབ་གཉིས་མེད་པ། །ཐར་པའི་ལམ་གྱི་གཙོ་བོ་ཡིན། །ལས་དང་ཐུགས་རྗེའི་དབང་གིས་ནི། །ལ་ལ་ཞི་ཞིང་ལ་ཁྲོ། །ཞི་བས་ཕན་པར་མ་གྱུར་ན། །ཁྲོ་བོ་དེ་བཞིན་གཤེགས་པས་བསྟན། །གདོད་ནས་དག་པའི་སྙིང་པོ་ལ། །གཟུགས་སྐུ་མཚན་དང་དཔེ་བྱད་ལྡན། །རང་རྒྱུད་དངོས་པོ་མ་ཡིན་པར། །རང་དབང་ཅན་གྱི་སྐུ་ཉིད་དོ། །སྐྱེ་དང་
འཆི་བའི་ཆོ་འཕྲུལ་རྣམས། །སེམས་ཅན་ལྟ་བུ་མ་ཡིན་ཏེ། སྐྱེ་རྒ་ན་འཆི་རང་གིས་ཤེས། །ཞེན་པ་རྣམས་ལས་འདའ་ཚུལ་སྟོན། །སྐྱེ་དང་འཆི་བ་མི་དམིགས་པས། །བག་ཆགས་ལུས་ལས་གྲོལ་གྱུར་ནས། །རྡོ་རྗེ་ལྟ་བུའི་སྐུ་ཡིན་པས། །བལྟས་པ་ཙན་གྱིས་དྲི་མ་འདག །མཚན་གཞི་དྲི་མེད་མེ་ལོང་ལ། །མཚན་བཅས་འཛིན་མེད་གཟུགས་བརྙན་འཆར། །ཟུང་འཇུག་བློ་གྲོས་ངོ་བོར་རྟོགས། །གཉུག་མ་དར་ལྡན་མེ་ལོང་ལ། །བཅུད་དང་རྩལ་སྦྱོང་གཟུགས་བརྙན་འཆར། །ལྷན་ཅིག་སྐྱེས་པའི་ངོ་བོར་རྟོགས། །འཁོར་འདས་གཞི་མེད་མེ་ལོང་ལ། །འགྲོ་བ་དྲུག་གི་གཟུགས་བརྙན་འཆར། །བསྒོམ་དུ་མེད་པའི་ངོ་བོར་རྟོགས། །ཤེས་རབ་གསུམ་གྱི་མེ་ལོང་ལ། །ཡོན་ཏན་མཐའ་དག་གཟུགས་བརྙན་འཆར། །ཡེངས་སུ་མེད་པའི་ངོ་བོར་རྟོགས། །བཅུ་གཅིག་ལྡན་པའི་དམ་པ་ལ། །བརྒྱད་དང་ལྡན་པའི་སློབ་མ་ཡིས། །ཞབས་ཀྱི་པདྨར་རབ་བཏུད་ནས། །མ་ཉམས་གསུམ་གྱིས་མཆོད་པ་དབུལ། །ངེས་པའི་ཤེས་པ་སྐྱེས་གྱུར་ནས། །སྤྱི་དང་རང་གི་མཚན་ཉིད་ནི། །མ་འདྲེས་གཅིག་ཏུ་རྟོགས་པ་ཡིས། །དུས་འདི་ཉིད་ལ་རྫོགས་སངས་རྒྱས། །མན་ངག་སྐུའི་སྒྲོན་མ་རྫོགས་སོ།།