རྡོ་རྗེའི་མགུར་བཞེངས་བ་ཉམས་ཀྱི་མན་ངག་ཐིག་ལེ་གསེར་གྱི་ཕྲེང་བ།
བླ་མ་རྣམས་ལ་ཕྱག་འཚལ་ལོ། །སློབ་དཔོན་ཀླུ་སྒྲུབ་ཀྱི་ཞལ་ནས། གང་གིས་མ་རྟོགས་པ་ཡིས་རྟོགས་པའི་སྤྱོད་པ་མི་བྱ་སྟེ། །བྱས་ན་རྒྱལ་པོའི་ཁྲིམས་ལ་དམངས་ཀྱི་གནོད་པ་བྱས་པ་བཞིན། །རྟོགས་པ་རྣམས་ཀྱིས་མ་རྟོགས་པ་ཡི་སྤྱོད་པ་མི་བྱ་སྟེ། །བྱས་ན་གླང་ཆེན་དག་ནི་འདམ་དུ་བྱིང་བ་འདྲ། །གསུང་ངོ༌།། །།སློབ་དཔོན་ས་ར་ཧའི་ཞལ་ནས། ཀྱེ་ཧོ་གྲོགས་དག་ལྷན་ཅིག་སྐྱེས་བ་སྟེ། །གཞན་ནས་རྙེད་མིན་ཞལ་ལ་དྲིས། །དོན་དམ་གཞན་གྱི་ངོ་བོ་དེ་རྟོགས་ན། །ཡིད་ནི་གར་འཆིང་རླུང་ཡང་ཆད་པ་མེད། །གསུང་ངོ༌།། །།སློབ་དཔོན་ཏོག་ཙེ་པའི་ཞལ་ནས། ཐ་མལ་ཤེས་པ་སྙིང་གི་དབུས་སུ་སད། །ཚོགས་དྲུག་དག་ན་བདེ་ཆེན་རྒྱུན་མི་འཆད། །བརྟགས་པ་ཐམས་ཅད་དོན་མེད་གཡེང་བའི་རྒྱུ། །སྒོམ་དུ་མེད་པས་གཉུག་མའི་ངང་ལ་ཞོག །གསུང་ངོ༌།། །།སློབ་དཔོན་ས་མནྟ་བཛྲའི་ཞལ་ནས། ཕྱག་རྒྱ་ཆེན་པོ་རང་ལ་ལྷུན་གྱིས་གྲུབ་པ་སྟེ། །མི་བསམ་མི་རིག་འབད་པ་མེད་པར་ངང་གིས་ཞོག །ཆད་པ་མེད་དེ་སྔོན་དུ་ཉམས་མྱོང་རང་གིས་རིག །རྟག་པར་མི་འགྱུར་མངོན་ཞེན་མེད་པར་ཟུང་དུ་འཇུག །གསུང་ངོ༌།། །།སློབ་དཔོན་ཀ་ན་པའི་ཞལ་ནས། ཤིང་རྟའི་འཁོར་ལོ་གཅིག་དང་མི་ལྡན་འགྲོ་བར་མི་ནུས་བཞིན། །སྦྱིན་སོགས་འབད་པ་བྱས་ཀྱང་བླ་མའི་མན་ངག་མེད་ན་དངོས་གྲུབ་དམ་པ་མེད། །བྱ་རྒོད་རྩལ་རྫོགས་འདབ་མར་བཅས་པ་དག་ནི་མཁའ་ལ་སྤྱོད་ཅིང་རྒྱུག །སྐལ་བཟང་རྣལ་འབྱོར་དམ་པ་རྣམས་ནི་དབང་དང་བྱིན་བརླབས་དམ་པའི་འོག་ཏུ་ཆུད་ཅིང་བདེ། །གསུང་ངོ༌།། །།ཀམ་པ་ལའི་ཞལ་ནས། ཟབ་ཅིང་རྒྱ་ཆེ་རྒྱ་མཚོ་ནོར་བུས་གང་བ་ལ། །ཀླུ་ཡི་རྒྱལ་པོ་རྣམས་ཀྱིས་མངའ་མཛད་ངོ་མཚར་ཆེ། །སྣང་གྲགས་ཐམས་ཅད་ཡེ་ནས་ཆོས་སྐུ་ཡིན་པ་ལ། །རྟོགས་དང་ཉམས་མྱོང་ལྡན་པས་མངའ་མཛོད་ངོ་མཚར་ཆེ། །གསུང་ངོ༌།། །།སློབ་དཔོན་ལཱུ་ཡི་པའི་ཞལ་ནས། ཁྱི་རྒོད་རབ་ཏུ་མི་སྲུན་སྣ་ལ་སྤྲང་རྩི་བྱུགས་ན་ཕྱོགས་
རྣམས་ཀུན་ཏུ་ཟ་བར་བྱེད། །བློ་དམན་སྐལ་བ་དམ་པའི་གང་ཟག་རྣམས་ལ་དབང་དང་གདམས་ངག་བྱིན་པས་རང་རྒྱུད་བསྲེག །གླང་ཆེན་དཔའ་ལ་བརྟན་བའི་སྣ་ལ་རལ་གྲི་བསྐུར་བས་དགྲ་དཔུང་འཇོམས། །སྐལ་བཟང་བློ་ལྡན་སྐྱེ་མེད་རྟོགས་པ་རྣམས་ཀྱིས་ཐུགས་ཕྲད་དག་གི་རྣམ་རྟོག་འཇོམས། །གསུང་ངོ༌།། །།སློབ་དཔོན་ཏི་ལོ་པའི་ཞལ་ནས། རི་རབ་གསེར་གྱི་ངོས་ལ་བྱ་གནས་པ། །བྱ་ཡི་རང་བཞིན་བོར་ནས་གསེར་དུ་སྣང༌། །མཁས་པ་གང་གིས་སྐྱེ་བ་མེད་རྟོགས་ན། །དངོས་པོའི་རང་བཞིན་བོར་ནས་བདེ་བ་ཆེ། །གསུང་ངོ༌།། །།ཏི་ལོ་པའི་ཞལ་ནས། བདག་ཉིད་གདོད་མ་ཉིད་ནས་སངས་རྒྱས་ཡིན་པ་ལ། །མ་རྟོགས་དབང་གིས་སངས་རྒྱས་ཉིད་དུ་མ་མཐོང་ངོ༌། །གཉིས་མེད་གང་གིས་རྟོགས་པ་དེ་ནི་ཕྱག་རྒྱ་ཆེ། །རྟོགས་པའི་ཡུལ་ན་མཐོང་པ་མེད་ཅིང་རྟོགས་པ་མེད། །གསུང་ངོ༌།། །།སློབ་དཔོན་ཤེས་རབ་བཟང་པོའི་ཞལ་ནས། བྱིས་བ་ཆུང་དུ་གསོས་ནས་གྱད་ཀྱི་སྟོབས་དང་ལྡན་པ་བཞིན། །བློ་ཆུང་རྣམས་ཀྱང་བླ་མའི་གདམས་ངག་དག་གིས་བྲིད་པས་ཐེག་པ་ཆེ། །རླུང་མཁྲིས་བད་ཀན་འདུས་པའི་ནད་རྣམས་སྨན་གྱིས་སེལ་བ་ལྟར། །ང་དང་བདག་ཏུ་འཛིན་པའི་ནད་རྣམས་བླ་མའི་གདམས་ངག་དག་གིས་སྐད་ཅིག་ཉིད་ལ་བསྲེག །གསུང་ངོ༌།། །།སློབ་དཔོན་ནཱ་རོ་པའི་ཞལ་ནས། འཁོར་ལོས་སྒྱུར་རྒྱལ་དཔུང་གི་ཚོགས་རྣམས་ཀྱིས། །གླིང་རྣམས་ཀུན་ལ་དབང་བསྒྱུར་བ་ཞིན། །ལྷན་ཅིག་སྐྱེས་པའི་རོ་རྙེད་པས། །འཁོར་བ་དག་ལ་དབང་བསྒྱུར་ངོ་མཚར་ཆེ། །གསུང་ངོ༌།། །།སློབ་དཔོན་ཌོམྦི་པ་ཆུང་བའི་ཞལ་ནས། གསེར་འགྱུར་རྩི་ཡི་ནུས་པ་ཡིས། །ལྕགས་རྣམས་གསེར་དུ་འགྱུར་པ་བཞིན། །རིན་ཆེན་དབང་གི་ནུས་པ་ཡིས། །ཉོན་མོངས་ཡེ་ཤེས་གཉིས་མེད་འགྱུར། །ཞེས་གསུང་ངོ༌།། །།སློབ་དཔོན་ཛ་བ་རི་བའི་ཞལ་ནས། སྐྱེ་མེད་རྟོགས་ཀྱང་ཉམས་མྱོང་བྲལ། །དེ་ཡང་སྲིན་མོའི་ལག་ཏུ་བུ་ཁྱེར་འདྲ། །ཉམས་སུ་མྱོང་ཡང་གནས་ལུགས་མ་རྟོགས་ན། །དེ་ཡང་གླང་ཆེན་ལྕགས་ཀྱུས་ཕྲོགས་པ་འདྲ། །ཞེས་གསུངས་ངོ༌།། །།སློབ་དཔོན་བ་སུ་དྷ་རའི་ཞལ་ནས། གང་གིས་མ་རྟོགས་བར་དུ་རོ་འདི་འབྲས་ཆན་དག་དང་ཁྱད་པར་ཆེ། །དེ་
བཞིན་མ་རྟོགས་བར་དུ་སངས་རྒྱས་སེམས་ཅན་ཁྱད་པར་བརྟགས། །རྟོགས་པའི་དུས་ན་འཁོར་བ་དག་ཀྱང་སངས་རྒྱས་ཆེ། །དེ་ཕྱིར་རྟོགས་དང་མ་རྟོགས་དག་ཀྱང་དབྱེ་བར་དཀའ་བས་ཁྱད་པར་མེད། །གསུང་ངོ༌།། །།སློབ་དཔོན་ཕྱོགས་ཀྱི་གླང་པོའི་ཞལ་ནས། བྱ་བ་གཏོང་བ་མན་ངག་ཡིན། །ཞེ་འདོད་མེད་ན་རྟོགས་པ་ཡིན། །བསྒྲུབ་བྱ་མེད་ན་སྤྱོད་པ་ཡིན། །སྨྲ་བརྗོད་མེད་ན་ཉམས་མྱོང་ཡིན། །བླང་དོར་མེད་ན་འབྲས་བུ་ཡིན། །གསུང་ངོ༌།། །།སློབ་དཔོན་ཌོམྦི་ཧེ་རུ་ཀའི་ཞལ་ནས། རྟོགས་པ་ཡིད་བཞིན་ནོར་བུ་ལ། །ཉམས་སུ་མྱོང་བས་མདོག་ཕྱུང་ལ། །སྤྱོད་པའི་ནུས་པས་དགོས་འདོད་འབྱུང༌། །རོ་སྙོམས་ལྡན་པ་རྣམས་ཀྱིས་འགྲུབ། །གསུང་ངོ༌།། །།སློབ་དཔོན་ཨ་བ་དྷཱུ་ཏཱིའི་ཞལ་ནས། །ཐབས་དང་ཤེས་རབ་ཨན་ཛ་ལ། །བླ་མའི་ཆུ་བོའི་རྒྱུན་གྱིས་རབ་ཏུ་རྒྱལ། །ལྷན་ཅིག་སྐྱེས་པའི་དཔག་བསམ་ཤིང་དག་ལ། །འབྲས་བུ་ལྷུན་གྲུབ་རང་ལ་རྫོགས་པར་འབྱུང༌། །གསུང་ངོ༌།། །།སློབ་དཔོན་དཱ་རི་ཀ་པའི་ཞལ་ནས། །རང་ལ་བདེ་ཆེན་ཡོད་ཀྱང་མ་རྟོགས་འཁྲུལ་པས་བསྒྲིབས། །བདེ་ཆེན་གསལ་བར་འདོད་ན་ཚོགས་གཉིས་བསག་པར་བྱ། །ཚོགས་གཉིས་མ་བསགས་བསྐལ་བ་བརྒྱ་རུ་འབད་བྱས་ཀྱང༌། །དོན་མེད་དོན་དང་མི་ལྡན་བདེ་ཆེན་རྟོགས་མི་འགྱུར། །གསུང་ངོ༌།། །།སློབ་དཔོན་ནག་པོ་ཞབས་ཀྱི་ཞལ་ནས། དུས་གསུམ་སངས་རྒྱས་ངོ་བོ་གཅིག །དེ་ཡི་རང་བཞིན་བྱང་ཆུབ་སེམས། །རྟོགས་པར་འདོད་ན་ཇི་བཞིན་ཞོག །གོམས་པར་བྱས་ན་མངོན་དུ་འགྱུར།། གསུང་ངོ༌།། །།སློབ་དཔོན་གཅེར་བུ་ལྷུང་བཟོད་ཀྱི་ཞལ་ནས། བླ་མ་དག་ལས་དང་པོ་རང་གི་སེམས་རྟོགས་བྱ། །དེ་ནས་ཆོས་རྣམས་ཀུན་དང་ཐ་དད་མེད་བྱས་ལ། །གཉིས་མེད་གོམས་ཕྱིར་དུར་ཁྲོད་གནས་སུ་འདུག་ནས་ནི། །མཉམ་པར་བཞག་ནས་སྨྱོན་པའི་བརྟུལ་ཞུགས་དག་གིས་སྤྱད། །གསུང་ངོ༌།། །།སློབ་དཔོན་རོ་ལངས་བདེ་བའི་ཞལ་ནས། །རྟ་དང་གླང་པོ་རྒྱ་མཚོ་འདྲ་ན་རབ་ཏུ་བདེ། །སྤྲེའུ་ཆུ་ཡི་རི་མོ་འདྲ་ན་སྤྲོ་བར་འགྱུར། །ཆུ་བོ་ཉི་མ་སྨན་དང་འདྲ་ན་དབྱེར་མི་ཕྱེད། །གཙུག་ཕུད་མིག་དང་འཁོར་ལོ་ལྟ་བུར་འབྲས་བུ་ཐོབ། །གསུང་ངོ༌།། །།སློབ་
དཔོན་རཱ་མ་ཕ་ལའི་ཞལ་ནས། སངས་རྒྱས་ཀུན་གྱི་སྡོམ་པའི་མཆོག །རང་གི་རྟོགས་པར་གནས་པས་ན། །གཉུག་མའི་སེམས་ཀྱིས་རྟོགས་པ་གང༌། །སངས་རྒྱས་ཐམས་ཅད་དེས་མཐོང་ཡིན། །གསུང་ངོ༌།། །།སློབ་དཔོན་ཀུ་ཀུ་རི་བའི་ཞལ་ནས། དབྱེར་མེད་ས་ལ་གནས་ན་ཀུན་ཀྱང་སྐལ་བ་བཟང༌། །རྒྱ་མཚོའི་གཏིང་དུ་ཕྱིན་ན་དབུལ་དང་བྲལ། །རལ་གྲི་ལག་ན་ཐོགས་ན་ལོངས་སྤྱོད་ཆེ། །ཕྱོགས་མེད་ས་ལ་ཕྱི་ན་གཉེན་དང་ཕྲད། །གསུང་ངོ༌།། །།སློབ་དཔོན་སྤྱོད་པ་མཐུ་སྟོབས་ཅན་གྱི་ཞལ་ནས། །རྣལ་འབྱོར་རྣམས་ལ་གང་སྣང་ཐམས་ཅད་གདམས་པ་སྟེ། །མཐོང་བས་དེ་ཡི་སྐྱེ་མེད་རྟོགས་པས་སློབ་དཔོན་མཆོག །བྱས་པ་ཀུན་གྱི་སྐྱེ་མེད་རྟོགས་ཕྱིར་ཐབས་ཡིན་ཏེ། །དགའ་དང་མི་དགའ་བྲལ་ན་སྐྱེས་བུ་དེ་ལ་གཉིས་མེད་འབྱུང༌། །ཞེས་གསུང་ངོ༌།། །།སློབ་དཔོན་ཀུན་མཱ་ར་ཏྲི་ཏའི་ཞལ་ནས། གང་གིས་བླ་མའི་གདམས་པ་ལ། །དབང་བླངས་ལྷན་ཅིག་སྐྱེས་པ་ཡི། །རོ་ཡིས་ཀུན་ལ་ཁྱབ་བྱས་ཏེ། །སྐྱེ་མེད་རྒྱས་འདེབས་རྡོ་རྗེ་འཛིན། །བྱིན་བརླབས་ཤར་བས་དབྱེར་མེད་རྫོགས་སངས་རྒྱས། །གསུང་ངོ༌།། །།སློབ་དཔོན་བྷ་ཏི་བའི་ཞལ་ནས། ཆོས་རྣམས་ཀུན་ཀྱང་རང་གི་སེམས་དང་གཉིས་མེད་སྦྱོར། །རྟོགས་པའི་ཉམས་མྱོང་ངེས་དོན་གདམས་པའི་དོན་བྲལ་ན། །ནོར་བུ་མཆིང་བུ་དག་ལ་བདེ་ཆེན་མིན། །ཆོས་དེ་རྣམས་དང་ལྡན་ན་རེ་དོག་ས་མེད་པར་རང་སར་ཞོག །གསུང་ངོ༌།། །།སློབ་དཔོན་ལུས་མེད་རྡོ་རྗེའི་ཞལ་ནས། སེམས་མ་གདུངས་ན་བདེ་བ་ཆེ། །ཞེ་འདོད་མེད་ན་རོ་སྙོམས་ཡིན། །འབད་དང་བྲལ་ན་བསྒོམ་པའི་མཆོག །གཉིས་སྣང་བྲལ་ན་རྫོགས་སངས་རྒྱས། །གསུང་ངོ༌།། །།རྒྱལ་པོ་ཨིནྡྲ་བོ་དྷིའི་ཞལ་ནས། །དུས་ཀྱི་སྣ་རྩེ་བདག་བྱིན་བརླབ་དང་མ་ལྡན་ན། །ཕྱི་དང་ནང་དུ་སྤྱོད་པ་བྱས་ཀྱང་སངས་མི་རྒྱ། །བདེ་བ་རང་ཆས་སྣང་བ་དག་ཁྱད་པར་མེད། །ཞེན་པ་བཏང་བས་ཉམས་སུ་མྱོང་བ་མཆོག་ཐོབ་འགྱུར། །གསུང་ངོ༌།། །།སློབ་དཔོན་པདྨ་བཛྲའི་ཞལ་ནས། གར་ཡང་མ་བལྟས་དབུས་སུ་ལྟོས། །མཆོག་དང་བྲལ་ན་དགའ་བ་ཆེ། །སྔགས་རིག་གསང་བ་ལྟོས་སྤྱོད་ན། །རྣལ་འབྱོར་རྟགས་ཀྱིས་བསྒྱུར་བར་བྱས། །གསུང་ངོ༌།།
ལྷ་ལྕམ་ལ་ཀྵྨཱིཀ་རའི་ཞལ་ནས། དང་པོ་བློ་ལྡན་རྟོགས་པ་བསྐྱེད། །གཉིས་པ་ནགས་སུ་སྣ་རྩེ་བསྒོམ། །ཉམས་སུ་མྱོང་བ་སྐྱེས་པ་ན། སྤྱོད་པའི་ཁྱད་པར་རྟོགས་པར་བྱ། །གསུང་ངོ༌།། །།སློབ་དཔོན་པདྨོ་ཞབས་ཀྱི་ཞལ་ནས། གང་གང་ལྷན་ཅིག་སྐྱེས་བདེ། །གླང་པོ་ཆེ་ཡི་མིག་བཞིན་དུ། །གཟེ་རེག་སྐྱེས་ན་ཟུག་རྡུར་འགྱུར། །གློད་ན་ཞན་མེད་བསམ་གཏན་མཆོག །གསུང་ངོ༌།། །།སློབ་དཔོན་སྙིང་པོ་ཞབས་ཀྱི་ཞལ་ནས། ཆུ་རྒྱུན་གནས་པའི་ཉམས་བསྟན་ནས། །སྤྱོད་པའི་གནས་ཀྱིས་འགྲོ་བར་བྱ། །བླ་མ་དམ་པའི་གདམས་ངག་གི ། ཆགས་སྡང་རྟོག་པ་ཞི་བར་བྱ། །གསུང་ངོ༌།། །།སློབ་དཔོན་རྡོ་རྗེ་ཞབས་ཀྱི་ཞལ་ནས། བདེའོ་བདེའོ་གནས་མེད་བདེ། །འདོད་པ་མེད་པའི་རང་བཞིན་བདེ། །བརྟགས་པ་ཐམས་ཅད་དེར་ཤེས་བདེ། བསྒྲུབས་པ་མེད་པའི་སངས་རྒྱས་བདེ། །གསུང་ངོ༌།། །།སློབ་དཔོན་དྲིལ་བུ་ཞབས་ཀྱི་ཞལ་ནས། ལ་ལ་ར་ས་དྷཱུ་ཏཱི་གསུམ། །བདག་བྱིན་བརླབ་ཕྱིར་བཅིང་བར་བྱ། །བླ་མ་སེམས་དང་སྣང་བ་གསུམ། །རྟོག་པ་བསྐྱེད་ཕྱིར་མཁས་པས་བསྟེན། །གསུང་ངོ༌།། །།སློབ་དཔོན་མདུང་ཅན་ལྐུགས་པའི་ཞལ་ནས། དགག་བསྒྲུབ་བྲལ་བའི་སྐུ་བཞི་དབྱེར་མི་ཕྱེད། །གཟའ་གཏད་མེད་པའི་ཆོས་རྣམས་རྩ་བ་གཅིག །མ་ཡེངས་པ་ཡི་སངས་རྒྱས་ཀུན་གྱི་ལམ། །ཕྱོགས་ཆ་མེད་ན་རྣལ་འབྱོར་ཀུན་གྱི་མཆོག །གསུང་ངོ༌།། །།སློབ་དཔོན་ཀུ་ཏི་བྷི་ར་པའི་ཞལ་ནས། སངས་རྒྱས་མཆོད་སོགས་རྣམས་ལ་དོན་མི་འབྱུང༌། །འདོད་དང་རྩོལ་བ་ཡོད་ན་སངས་མི་རྒྱ། །བྱིན་རླབས་བླ་མའི་ངག་གིས་ཉམས་མྱོང་འཕེལ། །བླ་མའི་མན་ངག་ཆ་ལས་གཞན་གྱིས་མིན། །གསུང་ངོ༌།། །།སློབ་དཔོན་མི་ཕམ་རལ་པ་ཅན་གྱི་ཞལ་ནས། །རྗེ་བཙུན་དམ་པ་བསྟེན་ན་དེ་ཉིད་འཐོབ། །རངས་ཚལ་མཐོངས་སུ་བསྐམས་ན་དབེན་པ་ཐོབ། ཆོས་རྣམས་སེམས་སུ་རྟོག་སྣ་མི་མཐུན་མེད། །ནམ་མཁའི་འོ་མ་འཐུངས་ན་ཚིམ་པར་འགྱུར། །གསུང་ངོ༌།། །།སློབ་དཔོན་ཞི་བའི་དབང་ཕྱུག་གི་ཞལ་ནས། བདེ་བ་སྟོང་པ་མཐའ་དང་བྲལ་རྟོགས་ན། །དཔག་བསམ་ཤིང་ལ་བརྟེན་པས་ཉེས་བྲལ་ཏེ། མཚོ་ལས་
སྐྱེས་བུ་རྒྱལ་བས་འགྲོ་ཤེས་ན། །བྲམ་ཟེ་ཕ་དང་མ་ལ་བུ་སྐྱེ་འགྱུར། །གསུང་ངོ༌།། །།རྣལ་འབྱོར་མ་བྷརྨའི་ཞལ་ནས། གོ་ཆ་ཆེན་པོ་གོན་ནས་ཀྱང༌། །ནོར་བུ་ལྟ་བུའི་སྙིང་སྟོབས་ཀྱས། །རང་གི་སེམས་ལ་ཆུ་བཏང་སྟེ། །མི་རོའི་ཁོག་པར་ངེས་ཞུགས་ནས། སྐྱེ་བ་བདུན་པའི་ཤ་ཟོས་ན། །ནམ་མཁའ་ལ་ནི་བྱ་བཞིན་ནོ། །གསུང་ངོ༌།། །།སློབ་དཔོན་མཻ་ཏྲི་པའི་ཞལ་ནས། བདེ་དང་སྟོང་པ་དབྱེར་མེད་སྙིང་ག་པདྨ་དག་ལ་རྫོགས། །སྐྱེ་མེད་ཡིད་ལ་བྱེད་པ་བསམ་གྱིས་མི་ཁྱབ་བདེ་བ་ཆེན་པོའི་སེམས། །སྣང་གྲགས་ཐམས་ཅད་རོ་མཉམ་གསུམ་དུ་རྣལ་འབྱོར་པ་ཡིས་སྤྱད། །རྗེས་སུ་བདག་གིས་བྱིན་བརླབས་ཤར་བས་དབྱེར་མེད་རྫོགས་སངས་རྒྱས། །གསུང་ངོ༌།། །།རྣལ་འབྱོར་མ་གྷ་གྷའི་ཞལ་ནས། ཡུལ་ལ་མ་ལྟ་སེམས་ལ་འང་མ་ལྟ་ཞིག །ཞེ་འདོད་མ་བྱེད་བྱ་བ་མ་བྱེད་ཅིག །དོགས་པ་མ་འཆའ་ཉམས་པ་མ་བྱེད་པར། །གཉུག་མའི་ཤེས་པ་གང་དགར་ཉིད་དུ་ཐོང༌། །གསུང་ངོ༌།། །།བྷུ་སུ་ཀུའི་ཞལ་ནས། བྱ་བ་འཁོར་བའི་སྡུག་བསྔལ་ཉིད་དུ་ཟད། །བྱ་བ་བཏང་བའི་རྣལ་འབྱོར་སེམས་རྟོགས་བྱེད། །གང་དུའང་མི་གནས་རྟག་ཆད་མཐའ་ལས་འདས། །བསྒོམ་དུ་མེད་བས་བསམ་གྱིས་མི་ཁྱབ་ཉིད། །གསུང་ངོ༌།། །།རྣལ་འབྱོར་མ་ཀང་ཀ་རའི་ཞལ་ནས། གཉིས་མེད་ཤེས་པ་ཆུ་ལ་ཆུ་བཞག་འདྲ། །རང་བཞིན་མ་བསླད་གླང་པོ་ལྟ་བུར་ཞོག །ཉམས་མྱོང་སྤྲེའུ་གང་ལྟར་བྱུང་ཡང་རུང༌། །རྟོགས་པའི་ནམ་མཁའ་ཇི་ལྟར་ཁྱབ་པར་བྱ། །ཞེས་གསུང་ངོ༌། །དཔལ་ཨུ་རྒྱན་དུ་ཚོགས་འཁོར་བྱས་པའི་དུས་སུ་རྣལ་འབྱོར་པ་གྲུབ་པ་ཐོབ་པ་བཞི་བཅུས་རྡོ་རྗེའི་མགུར་བཞེངས་པ་ཉམས་ཀྱི་མན་ངག་ཐིག་ལེ་གསེར་གྱི་ཕྲེང་བ་ཞེས་བྱ་བ་རྫོགས་སོ།།