ཨ་ཕྲེང་ཀ་ཕྲེང་བདེ་མཆོག་འཁོར་ལོའི་རྣལ་འབྱོར་ཆེན་པོ་བསྒོམ་པ།
སཱ་ག་ར།
རྒྱ་གར་སྐད་དུ། སམྤ་ར་ཙཀྲ་ཨཱ་ལི་ཀཱ་ལི་མཧཱ་ཡོ་ག་བྷ་བ་ན་ནཱ་མ། བོད་སྐད་དུ། ཨ་ཕྲེང་ཀ་ཕྲེང་བདེ་མཆོག་འཁོར་ལོའི་རྣལ་འབྱོར་ཆེན་པོ་བསྒོམ་པ་ཞེས་བྱ་བ། དཔལ་ཧེ་རུ་ཀ་ལ་ཕྱག་འཚལ་ལོ། །འཁོར་བའི་ཐོག་མཐའི་ཚད་ནད་ནི། །བདེ་བ་ཆེན་པོའི་བདག་ཉིད་ཀྱི། །རྒྱ་མཚོ་ལྟ་བུའི་བདུད་རྩིས་སེལ། །དགའ་ཆེན་དེ་ལ་ཕྱག་འཚལ་ལོ། །དཔལ་ལྡན་ཕག་མོའི་སྙིང་པོ་ཡིས། །བདེ་ཆེན་དཀྱིལ་འཁོར་ཤིན་ཏུ་མཛེས། །དཔའ་བོ་དཔའ་མོ་ཉི་ཤུ་བཞིས། །ས་མུ་དྲ་ཡི་ལུས་ཉིད་ལ། །གོ་ཆ་དྲུག་གི་རྒྱས་བཏབ་ལ། །ཡི་གེ་བདུན་པའི་རྣ་རྒྱན་ཅན། །དཔལ་ལྡན་ཕྲེང་བའི་སྔགས་ཀྱིས་ནི། །མགོ་ཕྲེང་བཞི་བཅུ་རྩ་དགུས་བརྒྱན། །གླང་པོ་ཆེ་ཡི་ག་ཡང་གཞི་ནི། །སངས་རྒྱས་ཀུན་གྱི་མཁའ་འགྲོ་འཛིན། །རྣལ་འབྱོར་མ་ཡི་རིག་པ་ནི། །རྣལ་འབྱོར་རྒྱ་མཚོས་རྐེད་རྒྱན་བྱས། །ཐོད་ཕྲེང་ཡེ་ཤེས་ལྔ་ཡིན་ཏེ། །བདེ་གཤེགས་ལྔ་ཡིས་སྤྱི་བོར་བརྒྱན། །སཱ་ག་ར་བདག་གར་བྱེད་དོ། །ཚངས་སྤྱོད་རྟག་ཏུ་བསྲུང་བྱས་ནས། །རྣལ་འབྱོར་ཆེན་པོ་གཉིས་མེད་བསམ། །རྐང་པ་བརྒྱད་པའི་སྔགས་མཆོད་བྱ། །བདག་ཉིད་རྣལ་འབྱོར་སཱ་ག་ར། །དུར་ཁྱོད་བརྒྱད་དུ་གནས་བྱེད་ཀྱང༌། །འཇིགས་པ་རྣམས་དང་བྲལ་བ་ཡིན། །དེ་ཕྱིར་རྣལ་འབྱོར་དབང་ཕྱུག་རྣམས། །བདེ་མཆོག་འཁོར་ལོར་རྟག་ཏུ་མཆོད། །ཀྱེ་ཧོ་རིགས་ལྔའི་སྤྱོད་པ་འདི། །རྣལ་འབྱོར་པ་ཡིས་ཏག་ཏུ་རྟོགས། །རྟོག་པ་མེད་པའི་སེམས་ཀྱིས་ནི། །འདོད་ཡོན་ལྔ་ནི་སྤྱོད་པར་
གྱིས། །རྒྱན་དྲུག་གིས་ནི་བརྒྱན་པའི་སྐུ། །སེང་གེ་བཞིན་དུ་རྟག་ཏུ་སྤྱོད། །ཨ་ཕྲེང་ཀ་ཕྲེང་རྣལ་འབྱོར་ཆེ། །མདུན་དུ་བསམ་ཞིང་གཉིས་མེད་སྐྱེ། །རྣལ་འབྱོར་ཆེན་པོ་བསྲེ་བྱས་ནས། །བདག་གི་ལྟེ་བའི་ཁུང་བུ་ལ། །ཟླ་བའི་ཐིག་ལེ་རྒྱས་པར་བསམ། །ཡང་དག་པ་ཡི་ཡི་གེ་ནི། །བདུད་རྩིའི་རྒྱ་མཚོའི་དབུས་བསམས་ནས། །དབང་པོ་ཞི་ཞིང་གཉིས་མེད་འགྲུབ། །བསམ་གཏན་བསམ་མེད་འགྲུབ་རྒྱུ་མེད། །བསམ་མེད་བསམས་ན་གྲུབ་པ་ཐོབ། །སཱ་ག་ར་བདག་སྨྲ་བར་བྱེད། །གྲུབ་པའི་རྟགས་ནི་གླང་ཆེན་ཐུལ། །རྣལ་འབྱོར་ཆེན་པོ་གཉིས་མེད་དོ། །ཨ་ཕྲེང་ཀ་ཕྲེང་བདེ་མཆོག་འཁོར་ལོའི་རྣལ་འབྱོར་ཆེན་པོ་བསྒོམ་པ་ཞེས་བྱ་བ་སློབ་དཔོན་སཱ་ག་རས་མཛད་པ་རྫོགས་སོ།།