གྲུབ་པ་དམ་པའི་ལམ་ངེས་པ།
རྒྱ་གར་སྐད་དུ། སིདྡྷ་སདྨཱ་རྒ་ནི་རྣ་ལཾ་ཏ། བོད་སྐད་དུ། གྲུབ་པ་དམ་པའི་ལམ་ངེས་པ། བཅོམ་ལྡན་འདས་འཇིག་རྟེན་དབང་ཕྱུག་ལ་ཕྱག་འཚལ་ལོ། །ཁ་རས་པཱ་ཎི་འཇིག་རྟེན་དཔལ། །ཐུགས་རྗེ་ཆེན་པོ་སྟོན་པའི་མཐུས། །གདུལ་དཀའི་རང་སེམས་གདུལ་བ་
ལ། །སྙིང་པོ་བླ་མེད་རྣམ་གསུམ་ཐོབ། །ཀྱེ་མ་ཧོ་འཛམ་གླིང་སྐྱེ་བོ་ཉོན། །འགྲོ་བའི་བཤེས་གཉེན་འདི་སྐད་སྨྲ། །གང་ཞིག་འཆིང་བར་བྱེད་པའི་རྒྱུ། །དེ་ཉིད་གྲོལ་བར་བྱེད་པའི་ལམ། །སྡུག་བསྔལ་རྒྱ་མཚོ་སྒྲོལ་བའི་གྲུ། །ཐུབ་པའི་བསྟན་པ་རིན་པོ་ཆེ། །དེ་ཡི་ངོ་བོ་ལམ་དང་ཐབས། །བཤེས་གཉེན་ཀུན་དགའི་གདམས་པ་ཡིན། །ཨེ་མའོ། །མི་ལུས་རིན་ཆེན་རྙེད་པར་དཀའ། །རྙེད་དཀའི་དལ་འབྱོར་སྤྲིན་ལྟར་གཡོ། །འཁོར་བ་ཐམས་ཅད་སྡུག་བསྔལ་ཏེ། །རང་སེམས་མྱ་ངན་འདས་པ་ཡིན། །རྒྱ་མཚོར་བྱིང་བས་རྙེད་པའི་གྲུ། །ཆུ་རྒྱུན་དྲག་པོའི་དཔའ་དང་ནི། །དུག་ཅན་སྦྲུལ་གྱི་ཚང་བཞིན་དང༌། །སྟོན་གྱི་ནམ་མཁའི་གུང་བཞིན་ནོ། །ལོངས་སྤྱོད་ཅི་འདྲ་ཁྱིམ་གྱི་སྦྲ། །བཤེས་པ་ཅི་འདྲ་ཚོང་ཁང་མི། །རང་ལུས་ཅི་འདྲ་སྤྲུལ་གྱི་ལྤགས། །ཚེ་སྲོག་ཅི་འདྲ་རི་གཟར་ཆུ། །ཀྱེ་མ་ཧོ་མི་རྟག་སྲིན་པོ་ཡི། །ཁར་ཆུད་མ་གྱུར་དེ་སྲིད་བར། །གྲོགས་དག་སྲིད་པ་རུ་བཟློག་ལ། །སྒྲིམ་པར་གྱིས་ཤིག་བཞིན་བཟང་དག །སྒྱུ་མའི་གྲོང་ཁྱེར་ཡངས་པ་ན། །རྨི་ལམ་སྐྱེས་བུ་ལོངས་སྤྱོད་པ། །སེམས་ཉིད་རྟེན་ཅིང་འབྲེལ་བར་འབྱུང༌། །སྣང་སེམས་དེ་ལྟར་ཤེས་པར་བྱ། །ལྟོས་ཤིག་ལུས་ནི་ཆུ་ཤིང་འདྲ། །དག་ནི་བྲག་ཅ་མཁའ་འདྲ་ཡིད། །རྡུལ་ཙམ་དམིགས་པ་ཡོད་མིན་ན། །བུ་དག་གང་ལ་སུ་ཞིག་འཆིང༌། །ཡུ་བུ་ཐམས་ཅད་ད་སྙམ་དང༌། །ངའོ་སྙམ་དང་གཞན་སྙམ་དང༌། །གཞན་གྱིའོ་ཞེས་ལོག་རྟོག་པ། །འདི་དག་ཇི་ལྟར་གང་དུ་དོགས། །ཇི་ལྟར་རྨི་ལམ་བུ་ཤི་བ། །བུ་ཉིད་མེད་ན་དེ་ཤི་ཡང༌། །བདེན་པར་ཡོད་པ་མ་ཡིན་པ། །དེ་བཞིན་ཡུ་བུའི་འཛིན་པ་ཡང༌། །ཆོས་ཀུན་རྨི་ལམ་འདྲ་བའི་ཕྱིར། །ཟས་གོས་ནོར་དང་གྲོགས་བཤེས་དགྲ། །སྣ་ཚོགས་སྣང་བ་འདི་དག་ཀུན། །སྒྱུ་མ་ཡི་ནི་རྟ་གླང་བཞིན། །གང་ཤར་སོར་བཞག་དྲན་པ་ཡིན། །དྲན་པ་རང་གྲོལ་བྲལ་བ་སྟེ། །བྲལ་བ་རོ་མཉམ་ལྷུན་གྱིས་གྲུབ། །སྙིང་པོའི་གསེབ་ལམ་རྣམ་པ་གསུམ། ཨྀཐི།