ཚོགས་ཀྱི་འཁོར་ལོའི་ཆོ་ག།
བཟང་པོ་སྦྱིན།
རྒྱ་གར་སྐད་དུ། ག་ཎ་ཙཀྲ་བི་དྷིཿ། བོད་སྐད་དུ། ཚོགས་ཀྱི་འཁོར་ལོའི་ཆོ་ག །དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཤིན་ཏུ་དད་པ་ཆེན་པོ་ཡིས། །རྡོ་རྗེ་འཛིན་ལ་ཕྱག་འཚལ་ནས། །མདོར་བསྡུས་ཚོགས་ཀྱི་འཁོར་ལོ་ནི། །ཡང་དད་པར་ནི་བརྩམ་པར་
བྱ། །དངོས་གྲུབ་ཐམས་ཅད་འགྲུབ་བྱེད་པའོ། །རྟག་ཏུ་བྱའམ་ཟླ་བར་ནི། །ཡང་ན་ལོ་རེ་ན་ནི་བྱ། །ལོངས་སྤྱོད་མཆོག་དང་ལྡན་པས་ནི། །ཚོགས་ཀྱི་འཁོར་ལོ་མཆོད་པར་བྱ། །རང་གི་སློབ་མ་དག་དང་ལྡན། །དེ་ཡང་དམ་ཚིག་སྔོམ་ལ་གནས། །ཡོན་ཏན་རྣམས་ཀྱིས་བརྒྱན་པ་དང༌། །སྣ་ཚོགས་པདྨའི་སྟེང་དུ་ནི། །བདེ་བ་ཆེན་པོ་དང་ལྡན་ནས། །དེ་ལྟར་དམ་ཚིག་དབུས་གནས་ལ། །རང་གི་ཏིང་འཛིན་རྫོགས་བྱས་ནས། །དང་པོ་འབྱུང་པོའི་གཏོར་མ་བཏང༌། །དེ་ནས་རིམ་བཞིན་བཞུགས་སུ་གསོལ། །དེ་ཡང་ཤེས་རབ་དང་ལྡན་པར། །མེད་ན་ཏིང་ངེ་འཛིན་གྱིས་བསམ། །མེ་ཏོག་སྤོས་དང་མར་མེ་དང༌། །དྲི་ཆབ་ཕྲེང་དང་ན་བཟའ་དང༌། །ཇི་ལྟར་འདོད་པ་བཞིན་དུ་ནི། །བཟའ་བ་བཏུང་བ་ལྷ་བཤོས་རྣམས། །དེ་དག་གིས་ནི་མཆོད་པར་བྱ། །དེ་ལྟར་ཕྱི་ཡི་མཆོད་བྱས་ནས། །ནང་གི་མཆོད་པ་དག་ནི་བྱ། །པདྨ་ལྟ་བུར་རང་གི་ཁ། །ཧོ་མ་ཁུང་ཉིད་དུ་བསམ་བྱས་ལ། །དགང་གཟར་བཀང་བ་བླུགས་པར་བྱ། །ལག་པ་བླུགས་གཟར་དག་གིས་ཀྱང༌། །མཆོད་རྫས་ཡང་དག་དབུལ་བར་བྱ། །དེ་ལྟར་ཧོམ་གྱིས་མཆོད་བྱས་ནས། །རང་གི་དགའ་བའི་རྩེད་མོ་ཡིས། །ཡི་དམ་ལྷ་ནི་མཉེས་པར་བྱ། །ཚོགས་ཀྱིས་མཆོད་ལ་དམ་ཚིག་སྤྱད། །སེམས་ནི་བརྟན་པར་ཤེས་རབ་སྤྱོད། །བཏུང་བའི་སྣོད་ནི་མང་གྱུར་ན། །ཀུན་ལ་རེ་རེ་སྦྱིན་པར་བྱ། །བླ་མ་ལ་ནི་ངེས་པར་གཉིས། །ཡང་དག་པར་ནི་དབུལ་བར་བྱ། །བཟའ་བ་གང་ཞིམ་བླ་མ་ལའོ། །བླ་མ་ལ་དད་བརྩོན་འགྲུས་ལྡན། །སེམས་བཟང་བཟོད་དང་ལྡན་པ་ཡིས། །ལས་རྣམས་ཀུན་ནི་བྱ་བ་ཡིན། །སྔགས་པ་རང་གིས་བྱིན་བརླབས་ནས། །གཞན་དག་ལ་ནི་སྦྱིན་པར་བྱ། །དེ་ཡིས་པདྨའི་ཕྱག་རྒྱ་ཡིས། །གུས་པར་བྱས་ཏེ་བླང་བར་བྱ། །མ་དད་པས་ནི་བླ་མི་བྱ། །སྐོམ་ཡང་ཀུན་ནི་བཏུང་མི་བྱ། །བཀྲེས་སྐོམ་ཡོད་ཀྱང་རང་གིས་ནི། །བླང་བ་རུ་ནི་མི་བྱའོ། །བདུད་རྩི་བཞིན་དུ་བཏུང་བར་བྱ། །ས་ལ་བོར་བར་མི་བྱ་ཞིང༌། །སླར་ནི་སྐྱོགས་ནི་སྦྱིན་པར་བྱ། །གནང་བ་བྱིན་ནས་ས་ལ་གཞག །གཏོར་གཞན་ལ་སྦྱིན་མི་བྱ། །ས་ལ་འཇོག་པ་ཆད་པས་བཅད། །རྩོད་བྱེད་སློབ་དཔོན་ལ་
སྨོད་དང༌། །ང་རྒྱལ་དང་ནི་ལྡན་པ་ནི། །ཚོགས་ཀྱི་ནད་དུ་གཞག་མི་བྱ། །བླ་མ་དག་གིས་བཟའ་བཏུང་ལ། །གནང་མེད་ལེན་པར་བྱེད་གྱུར་པ། །ཆད་པས་བཅད་དམ་ཡང་ན་དབྱུང༌། །དེ་ཉིད་མི་ཉན་པར་འགྱུར་ན། །རང་གི་གནས་ནས་གཞན་དུ་འགྲོ། །ཡང་ན་ཉལ་ལ་འདུག་པར་བྱ། །གང་ཞིག་དངོས་གྲུབ་འདོད་པ་ཡིས། །འཐབ་མོ་ལ་སོགས་སེམས་ཀྱིས་ཀྱང༌། །ངེས་པ་རུ་ནི་བསམ་མི་བྱ། །བྱས་གྱུར་ཕྱིས་ནི་མི་བྱ་བའི། །སྡོམ་པ་ཡང་དག་པར་ནི་བླང༌། །ང་ནི་རོ་བར་གྱུར་ན་ནི། །ནན་ཏན་གྱིས་ནི་ལུས་ངག་བསྡམ། །ལས་ཀྱི་རྡོ་རྗེ་དག་གིས་ནི། །རང་གིས་བླངས་ཏེ་བཟའ་བར་བྱ། །དེ་ནི་སྐྱོན་ནི་མེད་པར་བསྟན། །གར་ལ་སོགས་པའི་རོལ་མོ་རྣམས། །གནང་བ་མེད་པར་མི་བྱའོ། །གང་ལ་གནང་བ་བྱིན་པ་ཡིས། །ཚོགས་ཀྱི་དཀྱིལ་འཁོར་དབུས་སུ་ནི། །དེ་ཡི་སྐད་ཅིག་ཉིད་ལ་བྱ། །དེ་ལྟར་གང་གིས་མ་བྱས་པ། །དེ་བཞིན་གཤེགས་པའི་བཀའ་བཅག་གོ །ཕྱི་རོལ་དུ་ནི་འབྱུང་བའི་ཚེ། །ལུས་ངག་ཡིད་གསུམ་བསྡམ་བྱས་ཏེ། །བླ་མ་ལ་ནི་ཕྱག་བྱས་ལ། །ཕྱི་རོལ་དུ་ནི་འབྱུང་བར་བྱ། །སྤྱོད་ཡུལ་དུ་ནི་བབ་གྱུར་ན། །སྡུག་བསྔལ་གྱིས་ནི་གཟུང་མི་བྱ། །བྱ་བ་ཐམས་ཅད་བསྔལ་ལ་ནི། །དགའ་བ་དང་ནི་བཅས་པར་བྱ། །སེམས་ཀྱི་དྲན་པ་མེད་གྱུར་ན། །ལྷ་ཡི་ཏིང་འཛིན་དང་མི་ལྡན། །ཏིང་ངེ་འཛིན་དང་མི་ལྡན་ན། །ལྷ་ཡི་དངོས་གྲུབ་ཐོབ་མི་འགྱུར། །ཏིང་ངེ་འཛིན་ལ་གཡེངས་གྱུར་ན། །སྐྱོན་དེ་གོང་མ་ཉིད་དང་མཚུངས། །རྩེ་གཅིག་སེམས་ཀྱིས་དངོས་གྲུབ་འཐོབ། །དེ་རུ་འདུག་པར་མི་ནུས་ན། །ཕྱག་བྱས་ལ་ནི་འགྲོ་བར་བྱ། །ལྷག་མ་ཐམས་ཅད་བསྡུས་ནས་ནི། །ཕྱི་རོལ་དུ་ནི་གཏོར་མ་གཏད། །རྫོགས་ནས་མགུ་བ་ལ་སོགས་སྦྱིན། །ཕྱག་བྱས་ནས་ནི་བཟོད་པར་གསོལ། །ཚོགས་ཀྱི་འཁོར་ལོའི་ཆོ་ག་བྱས་པ་ཡི། །དགེ་བའི་རྩ་བ་བདག་གིས་གང་ཐོབ་པ། །ཁམས་གསུམ་སེམས་ཅན་རྣམས་ནི་ཡང་དག་པར། །དངོས་གྲུབ་ཆེན་པོ་ཡང་དག་ཐོབ་གྱུར་ཅིག །པཎྜི་ཏ་བཟང་པོ་སྦྱིན་པས་ཚོགས་ཀྱི་འཁོར་ལོ་མཛད་པ་རྫོགས་སོ།། །།རྒྱ་གར་གྱི་མཁན་པོ་ཤཱཀྱ་ཤྲཱི་བྷ་དྲ་དང༌། བོད་ཀྱི་ལོ་ཙཱ་བ་དགེ་སློང་ཀུན་དགའ་རྒྱལ་མཚན་དཔལ་བཟང་པོས་བསྒྱུར་བའོ།།