རྣལ་འབྱོར་བཞིའི་ཉམས་ལེན་གྱི་ཐབས།
ཏན་ཏི་པ།
རྒྱ་གར་སྐད་དུ། ཙ་ཏུར་ཡོ་ག་བྷཱ་བ་ན་ནཱ་མ། བོད་སྐད་དུ། རྣལ་འབྱོར་བཞིའི་ཉམས་ལེན་གྱི་ཐབས་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །སེམས་དང་སེམས་ཉིད་རྒྱུ་མེད་དེ། །བསྒྲུབ་བྱ་སྒྲུབ་བྱེད་ཐིག་ལའི་ངོ༌། །འབྲས་བུ་མ་གྲུབ་མྱ་ངན་འདས། །དཔལ་ལྡན་དཔའ་བོ་ཡི་གེ་མེད། །ལྟེ་བར་གསང་བའི་གེ་སར་ལ། །ཨཱ་ལི་ཀཱ་ལི་ལ་བརྟེན་ནས། །རྣལ་འབྱོར་བཞི་ཡི་ཉམས་ལེན་བཤད། །ལྟེ་བ་ཡི་ཤེས་འཁོར་ལོ་རུ། །རྩ་ནི་བརྒྱད་ཀྱི་ཐིག་བཏབ་ནས། །ཨཱ་ཕྲེང་ཀཱ་ཕྲེང་མཉམ་བསམས་ནས། །མཁའ་འགྲོ་བརྒྱད་ཀྱི་མེ་ལྕེ་སྦར། །བྱང་ཆུབ་སེམས་ཀྱི་རང་བཞིན་ནི། །ནམ་མཁའི་དབྱིབས་ཀྱི་འོད་ལས་ནི། །གཉིས་མེད་ཟུང་འཇུག་འཛག་བྱས་པས། །དཔའ་བོ་རྣམས་ཀྱི་ལམ་ནས་རྒྱུ། །དེ་འགག་རྣལ་འབྱོར་མཚན་མ་མེད། །བརྟན་པའི་རྣལ་འབྱོར་གྲུབ་འགྱུར་བ། །སངས་རྒྱས་རྣམས་ཀྱི་ས་ལམ་ཐོབ། །ཨཱ་ལི་ཀཱ་ལིའི་རྣལ་འབྱོར་རོ། །ཨ་ཧོ་བཟླས་པའི་རྣལ་འབྱོར་པ། །དངོས་དང་དངོས་མེད་བྲལ་འགྱུར་བས། །ཕྱི་ནང་དུག་གི་རྣམ་
པ་སེལ། །རྣལ་འབྱོར་འདི་ནི་བརྟན་གྲུབ་ན། །ཟླ་བ་དྲུག་ནས་འགྲུབ་འགྱུར་བའི། །རྡོ་རྗེ་སེམས་དཔའ་དང་མཉམ་མོ། །དེ་ནི་རིག་བའི་རྣལ་འབྱོར་རོ། །སེམས་ཉིད་གནས་སུ་པདྨ་ནི། །མཉམ་པ་ཉིད་ནི་དམར་པོར་བསམ། །པད་འདབ་བཞི་ལ་ཐིག་ལེ་ནི། །དབུས་སུ་རྒྱུ་མེད་ཐིག་ལེ་ཡིན། །དེ་དག་རྣམས་ཀྱི་ཁ་དོག་ནི། །ཤར་དུ་དམར་དང་བྱང་དུ་སེར། །ནུབ་ཏུ་དཀར་དང་ལྷོ་རུ་གནག །སྣ་ཚོགས་འོད་གསལ་དབུས་སུ་འཕྲོ། །སྔར་བཤད་སྔགས་དང་བཅས་པ་ནི། །སྒོམ་ན་རྣལ་འབྱོར་དབང་ཕྱུག་དེ། །སྐད་ཅིག་གཅིག་ལ་རྫོགས་སངས་རྒྱས། །དེ་ནི་མཉམ་ཉིད་རྣལ་འབྱོར་རོ། །མི་བསྐྱོད་ཆུ་དང་རྣམ་སྣང་དང༌། །ཕྱི་ནང་བདུད་རྩི་ལྔ་ཡིས་ནི། །སྔགས་པའི་ཐབས་ཀྱི་རྣལ་འབྱོར་གྱི། །ཏན་ཏི་བདག་གིས་གྲུབ་པ་ཐོབ། །རྣལ་འབྱོར་བཞིའི་ཉམས་ལེན་ཅེས་བྱ་བ་སློབ་དཔོན་ཏན་ཏི་པས་མཛད་པ་རྫོགས་སོ།། །།