གཞི་ལམ་འབྲས་བུ་བསྒོམ་པའི་ཕྱག་རྒྱ་ཆེན་པོའི་ཉམས་ལེན།
པཾ་ཀ་ལ།
རྒྱ་གར་སྐད་དུ། སྠཱ་ན་མཱ་རྒ་ཕ་ལ་མ་ཧཱ་མུ་དྲ་བྷཱ་བ་ན་ནཱ་མ། བོད་སྐད་དུ། གཞི་ལམ་འབྲས་བུ་བསྒོམ་པའི་ཕྱག་རྒྱ་ཆེན་པོའི་ཉམས་ལེན་ཞེས་བྱ་བ། དཔལ་ཧེ་རུ་ཀ་ལ་ཕྱག་འཚལ་ལོ། །གཞི་ལམ་འབྲས་བུ་གསུམ་གྱི་ནི། །རྩ་གསུམ་བརྒྱུད་པའི་བླ་མ་དང༌། །ཡིག་འབྲུ་གསུམ་གྱི་ཉམས་ལེན་ནི། །ཉམ་ཆུང་ཉོན་ཅིག་བཤད་པར་བྱ། །ལྟེ་བ་སྦྲུལ་པའི་འཁོར་ལོ་ནས། །སྣ་བུ་ཀ་གཉིས་དང་ཚངས་པའི་བར། །རྩ་གསུམ་ལ་ནི་སེམས་གཏད་བྱ། །གཡོན་གྱི་དཀར་དང་གཡས་རྩ་དམར། །དབུས་ཀྱི་མི་བསྐྱོད་མཐིང་ག་ལ། །གཡས་པར་ཧཱུཾ་དང་གཡོན་པར་ཨོཾ། །ཚངས་པའི་བུ་གར་ཨ་ཡིག་བསམ། །འོད་གསལ་མཐིང་ག་དཀར་དང་དམར། །ཁམས་གསུམ་སྦྲུལ་བའི་འོད་ཀྱིས་ཁྱབ། །གདུལ་བྱ་བཏུལ་ནས་སླར་ཡང་ཐིམ། །ཡི་གེ་གསུམ་གྱི་ཟླ་ཚེས་ལ། །སྟོང་པའི་ཐིག་ལེ་སྟེང་དུ་ནི། །བརྒྱུད་པའི་བླ་མ་འོད་གསལ་ནི། །དེ་སྟེང་འདི་ལྟར་བསྒོམ་པར་བྱ། །གཡོན་གྱི་སྣ་བུག་ཡི་གེ་ལ། །ཡིད་ཆེས་ཉམས་མྱོང་བླ་མ་ནི། །སྐར་མ་ལྟ་
བུའི་འོད་གསལ་བསྒོམ། །འབྲས་བུ་མངོན་སུམ་བླ་མ་སྟེ། །ཧཱུཾ་ཡིག་ཟླ་ཚེས་སྟེང་དུ་སྟེ། །བརྟན་པར་བསམ་གཏན་བསྒོམ་པར་བྱ། །རླུང་གསུམ་འགགས་ཏེ་གདོན་གསུམ་སེལ། །དུག་གསུམ་རྣམ་རྟོག་བྲལ་འགྱུར་བ། །རྒྱུ་འབྲས་ཆོས་ཀྱི་རྟོག་པ་སྤངས།། ལུས་ཀྱི་དགོན་པ་བརྟན་འགྱུར་བས། །བདག་གཞན་གཉིས་མེད་དོན་རྟོགས་ཏེ། །དུར་ཁྲོད་ཀྱི་ནི་འཇིགས་པ་སྤངས། །ཧ་རི་ཙནྡྲ་ནམ་མཁའི་དབྱིངས། །དྲི་ཟའི་གྲོང་ཁྱེར་ལོངས་སྤྱོད་བྱེད། །གཞི་ལམ་འབྲས་བུ་བླ་མ་བསྒོམ་པའི་ཕྱག་རྒྱ་ཆེན་པོའི་ཉམས་ལན་ཞེས་བྱ་བ་སློབ་དཔོན་པཾ་ཀ་ལས་མཛད་པ་རྫོགས་སོ།།