དོ་ཧ་སྤྱོད་པའི་གླུའི་ལྟ་བ།
ཀི་ར་པ།
རྒྱ་གར་སྐད་དུ། ཙྲྱ་དྲྀཥྚི་དོ་ཧ་གཱི་ཏི་ཀ་ནཱ་མ། བོད་སྐད་དུ། དོ་ཧ་སྤྱོད་པའི་གླུའི་ལྟ་བ་ཞེས་བྱ་བ། རྡོ་རྗེ་རྣལ་འབྱོར་མ་ལ་ཕྱག་འཚལ་ལོ། །རྨ་བྱའི་གདུགས་བསྒྲེང་འཛིན་བྱེད་ཅིང༌། །ཆ་བྱད་སྣ་ཚོགས་འཛིན་བྱེད་པའི། །རྣལ་འབྱོར་པ་ནི་སྨྱོན་པ་འདྲ། །ང་རྒྱལ་ཅན་ལ་རྒྱལ་བའི་ལམ། །མེད་ཅེས་ལཱུ་ཡི་སྨྲ་བར་བྱེད། །ལུས་ཀྱི་ཚིམ་བུ་བསྲུངས་པས་
གྲུབ། །དབང་བསྐུར་མང་པོ་བླང་བྱ་སྟེ། །དོན་མེད་པར་ནི་སླུ་བར་བྱེད། །དབང་བསྐུར་རྟོགས་པར་མ་གྱུར་ན། །དུས་ཀྱི་དབང་དུ་འགྲོ་བ་ཡིན། །ང་རྒྱལ་ཅན་ལ་རྒྱལ་བའི་ལམ། །མེད་ཅེས་ལཱུ་ཡི་སྨྲ་བར་བྱེད། །ལུས་ཀྱི་ཚིམ་བུ་བསྲུངས་པས་གྲུབ། །གཉིད་དང་ཆང་དང་རྩོད་པ་དང༌། །སྦྱོར་བས་རྣལ་འབྱོར་ཇི་ལྟར་གྲུབ། །བཟློག་ན་སྲིད་པའི་ཞགས་པས་བཅིངས། །ང་རྒྱལ་ཅན་ལ་རྒྱལ་བའི་ལམ། །མེད་ཅེས་ལཱུ་ཡི་སྨྲ་བར་བྱེད། །ལུས་ཀྱི་ཚིམ་བུ་བསྲུངས་པས་གྲུབ། །ཚང་དུས་ཁམ་ཕོར་གསེར་སྐྱོགས་ལྟར། །གལ་ཏེ་དེ་ལྟར་བྱས་པ་ན། །སངས་རྒྱས་རྣམས་དང་ཕྲད་པར་འགྱུར། །ང་རྒྱལ་ཅན་ལ་རྒྱལ་བའི་ལམ། །མེད་ཅེས་ལཱུ་ཡི་སྨྲ་བར་བྱེད། །ལུས་ཀྱི་ཚིམ་བུ་བསྲུངས་པས་གྲུབ། །དོ་ཧ་སྤྱོད་པའི་གླུའི་ལྟ་བ་ཞེས་བྱ་བ། སློབ་དཔོན་ལཱུ་ཡི་པ་ནས་བརྒྱུད་སློབ་དཔོན་ཀི་ར་པས་མཛད་པ་རྫོགས་སོ།།