རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་ལྷ་རྣམས་ཀྱི་རྣམ་པར་གཞག་པ།
མུ་ཏི་ཏ་ཀོ་ཥ།
རྒྱ་གར་སྐད་དུ། བཛྲ་དྷཱ་ཏུ་མ་ཧཱ་མཎྜལ་དེ་བ་སརྦ་བྱ་བསྠཱ་ན་ནཱ་མ། བོད་སྐད་དུ། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་ལྷ་རྣམས་ཀྱི་རྣམ་པར་གཞག་པ་ཞེས་བྱ་བ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །འདོད་ཆགས་ཞ་སྡང་ལ་སོགས་པ། །རྣམ་པར་རྟོག་པ་རྣམ་སྤངས་པའི། །སྐུ་ནི་བདེ་བས་ཀུན་ནས་གང༌། །རྡོ་རྗེ་འཆད་ཆེན་ཕྱག་འཚལ་ལོ། །འདི་ཡི་རིགས་ཀྱི་འདོད་པ་པོས། །ཕྱག་རྒྱ་ཆེན་པོ་རྟོགས་པའི་ཕྱིར། །རྡོར་དབྱིངས་དཀྱིལ་འཁོར་ཆེན་པོ་ཡི། །རྣམ་པར་གཞག་པ་བདག་གིས་བྲི། །དེ་ལ་འདོད་ཆགས་ལ་སོགས་པའི་དྲི་མ་མ་ལུས་པ་དང་བྲལ་བ་ཉིད་དེ། དེ་ལས་གཞན་པའི་ཁྱད་པར་ཅན་གྱི་རྒྱུར་གྱུར་པ་ཉིད་ཀྱིས་ན་མེ་ལོང་ལྟ་བུའི་ཡེ་ཤེས་ཀྱི་ངོ་བོ་ཉིད་དང༌། དབྱེ་བ་
མ་ལུས་པའི་རང་བཞིན་དང་བྲལ་བ་ཉིད་ཀྱིས་ན་མཉམ་པ་ཉིད་ཀྱི་ཡེ་ཤེས་ཀྱི་ངོ་བོ་ཉིད་དང༌། ཕྱིན་ཅི་ལོག་མ་ལུས་པ་དང་བྲལ་བའི་རང་བཞིན་ཉིད་ཀྱིས་ན་སོ་སོར་རྟོག་པའི་ཡེ་ཤེས་ཀྱི་ངོ་བོ་ཉིད་དང༌། འགྲོ་བ་མ་ལུས་པ་ལ་ཕན་པ་སྐྱེད་པའི་རྒྱུར་གྱུར་པས་བྱ་བ་གྲུབ་པའི་ཡེ་ཤེས་ཀྱི་ངོ་བོ་ཉིད་དང༌། གཟུང་བ་དང་འཛིན་པ་རྣམ་པ་གཉིས་དང་བྲལ་བས་ཆོས་ཀྱི་དབྱིངས་ཤིན་ཏུ་རྣམ་པར་དག་པའི་ངོ་བོ་ཉིད་ཡིན་ནོ། །དེ་བས་ན་མེ་ལོང་ལྟ་བུའི་ཡེ་ཤེས་ལ་སོགས་པའི་བདག་ཉིད་ཅན་ཡང་དེ་ཉིད་ཡིན་པས་སངས་རྒྱས་ཐམས་ཅད་ཀྱི་ང་བོ་ཉིད་ཡིན་ནོ། །དེ་ཉིད་ནི་ཉེ་བར་དམིགས་པ་རྣམས་ལས་ལྡོག་པའི་སྟོང་པ་ཉིད་ཀྱི་བདག་ཉིད་ཅན་ཡིན་པའི་ཕྱིར་རྡོ་རྗེ་སེམས་མའོ། །མཚན་མ་ལུས་པ་ལས་ལྡོག་ཅིང་མཚན་མ་མེད་པའི་བདག་ཉིད་ཅན་ནི་རིན་ཆེན་སེམས་མའོ། །ལོག་པའི་རྨི་ལམ་ལས་ལྡོག་ཅིང་སྨོན་པ་མེད་པའི་བདག་ཉིད་ཅན་ཡིན་པས་ན་ཆོས་ཀྱི་སེམས་མའོ། །ཕྱིན་ཅི་ལོག་གི་སྨོན་པར་བྱེད་པ་ལས་བཟློག་ཅིང་མངོན་པར་འདུས་པའི་བདག་ཉིད་ཅན་ཡིན་པས་ན་ལས་ཀྱི་སེམས་མའོ། །རྡོ་རྗེ་སེམས་མ་ལ་སོགས་པ་རིགས་ཀྱི་ཡུམ་བཞི་ནི་གོ་རིམས་བཞིན་དུ་སྟོང་པ་ཉིད་ལ་སོགས་པ་རྣམ་པར་ཐར་པའི་སྒོ་བཞིའི་ངོ་བོ་ཉིད་ཡིན་པའི་ཕྱིར་རོ། །དེ་བཞིན་དུ་དེ་ཉིད་ནི་སྣོད་ཀྱི་འཇིག་རྟེན་གྱི་མཐར་རྟོག་པ་ལས་ལྡོག་ཅིང༌། ཆེན་པོ་སྟོང་པ་ཉིད་ཀྱི་ངོ་བོ་ཉིད་དུ་གྱུར་པ་བྱང་ཆུབ་ཀྱི་སེམས་སྐྱེད་པའི་རྒྱུར་གྱུར་པས་ན་རྡོ་རྗེ་སེམས་དཔའོ། །མིག་ལ་སོགས་པ་ཉེ་པར་དམིགས་པ་ལས་ལྡོག་ཅིང་ནང་སྟོང་བ་ཉིད་ཀྱི་ངོ་བོ་ཉིད་དུ་གྱུར་པ་དང༌། བྱང་ཆུབ་ཏུ་སེམས་བསྐྱེད་པ་རྣམས་འགུགས་པའི་རྒྱུར་གྱུར་པས་རྡོ་རྗེ་རྒྱལ་པོའོ། །གཟུགས་ལ་སོགས་པ་ཉེ་བར་དམིགས་པ་ལས་ལྡོག་པས་ཕྱི་སྟོང་པ་ཉིད་ཀྱི་བདག་ཉིད་ཅན་དུ་གྱུར་པ་དང༌། དགུག་པ་རྣམས་ཀྱི་རྗེས་སུ་ཆགས་པའི་རྒྱུར་གྱུར་བས་རྡོ་རྗེ་ཆགས་པའོ། །ཕྱི་ནང་གི་སྐྱེ་མཆེད་དང་ལུས་དང་གནས་སུ་ཉེ་བར་དམིགས་པ་ལས་བཟློག་པས་ཕྱི་ནང་སྟོང་པ་ཉིད་ཀྱི་བདག་ཉིད་ཅན་དུ་གྱུར་པ་དང༌། ཆགས་པར་གྱུར་པའི་སེམས་ཀྱི་ཡིད་བདེ་བ་སྐྱེད་པར་འགྱུར་པས་རྡོ་རྗེ་ལེགས་པའོ། །མིག་དང་གཟུགས་ལ་སོགས་པའི་བག་ཆགས་ཀྱི་གནས་ཡོངས་སུ་གྱུར་པ་དག་གིས་མེ་ལོང་ལྟ་
བུའི་ཡེ་ཤེས་དེའི་རྒྱུར་གྱུར་པ་ཆེན་པོ་སྟོང་པ་ཉིད་ལ་སོགས་པ་བཞིའི་ངོ་བོ་ཉིད་ནི་རྡོ་རྗེ་སེམས་དཔའ་ལ་སོགས་པ་ཡིན་ནོ། །སྟོང་པ་ཉིད་དུ་ཉེ་བར་དམིགས་པ་ལས་ལྡོག་པས་སྟོང་བ་ཉིད་སྟོང་པ་ཉིད་ཀྱི་བདག་ཉིད་ཅན་དུ་གྱུར་པ་དང༌། བྱང་ཆུབ་ཀྱི་སེམས་མངོན་པར་འཕེལ་བ་རྣམས་ཀྱི་རྒྱལ་མཚན་དུ་དབང་བསྐུར་བའི་རྒྱུར་གྱུར་བས་རྡོ་རྗེ་རིན་ཆེན་ནོ། །དོན་དམ་པར་ཉེ་བར་དམིགས་པ་ལས་ལྡོག་ཅིང་དོན་དམ་པ་སྟོང་པ་ཉིད་ཀྱི་བདག་ཉིད་དུ་གྱུར་པ་དང་དབང་བསྐུར་བ་རྙེད་པ་རྣམས་ལ་མི་འཇིགས་པ་རབ་ཏུ་སྦྱིན་པའི་མཚན་ཉིད་ཅན་དུ་གཟི་བརྗིད་ཀྱི་རྒྱུར་གྱུར་པས་རྡོ་རྗེ་གཟི་བརྗིད་དོ། །འདུས་བྱས་པའི་བསོད་ནམས་ཀྱི་ཚོགས་སུ་ཉེ་བར་དམིགས་པ་ལས་ལྡོག་པས་འདུས་བྱས་སྟོང་པ་ཉིད་ཀྱི་བདག་ཉིད་ཅན་དུ་གྱུར་པ་དང༌། གཟི་བྱིན་ཐོབ་པ་རྣམས་ལ་བྱམས་པའི་མཚན་ཉིད་ཀྱི་རྒྱུར་གྱུར་པས་རྡོ་རྗེ་དཔལ་ལོ། །འདུས་མ་བྱས་པའི་བྱང་ཆུབ་ཀྱི་ཚོགས་ཀྱི་ཉེ་བར་དམིགས་པ་ལས་ལྡོག་པས་འདུས་མ་བྱས་སྟོང་བ་ཉིད་ཀྱི་བདག་ཉིད་ཅན་དུ་གྱུར་པ་དང༌། བྱམས་པའི་རྒྱལ་མཚན་བསྒྲེང་བའི་མཚན་ཉིད་རྣམས་ལ་ཆོས་ཀྱི་སྦྱིན་པ་བླ་ན་མེད་པའི་ཡིད་བདེ་བའི་རྒྱུར་གྱུར་པས་ན་རྡོ་རྗེ་བཞད་པའོ། །ཉོན་མོངས་བ་ཅན་གྱི་ཡིད་གནས་གྱུར་བ་ཉིད་ཀྱིས་མཉམ་པ་ཉིད་ཀྱི་ཡེ་ཤེས་དེའི་ཕྱིན་ཅི་ལོག་སྤོང་བའི་མཉམ་པ་ཉིད་ཀྱི་རྐྱེན་དུ་གྱུར་བས་སྟོང་བ་ཉིད་ལ་སོགས་པ་བཞིའི་ངོ་བོ་ཉིད་ནི་རྡོ་རྗེ་རིན་ཆེན་ལ་སོགས་པ་བཞི་ཡིན་ནོ། །སྒྲོ་བཏགས་པ་དང་སྐུར་བ་བཏབ་བའི་མཐར་ཉེ་བར་དམིགས་པ་ལས་ལྡོག་པས་ཤིན་ཏུ་སྟོང་པ་ཉིད་དུ་གྱུར་པ་དང། ཆོས་ཀྱི་སྦྱིན་པ་ལ་ཡིད་བདེ་བ་ལ་ཞུགས་པ་རྣམས་ཀྱི་ཏིང་ངེ་འཛིན་སྐྱེད་པའི་རྒྱུར་གྱུར་པས་ན་རྡོ་རྗེ་ཆོས་སོ། །འཁོར་བ་དམིགས་པ་ལས་ལྡོག་པས་ཐོག་མ་དང་ཐ་མ་མེད་པ་སྟོང་བ་ཉིད་ཅན་དུ་གྱུར་པ་དང༌། ཏིང་ངེ་འཛིན་རྫོགས་པ་རྣམས་ཀྱི་དེ་ཁོ་ན་ཉིད་ཀྱི་ཡེ་ཤེས་སྐྱེད་པའི་རྒྱུར་གྱུར་པས་རྡོ་རྗེ་རྣོན་པོའོ། །དགེ་བའི་ཕྱོགས་ཡོངས་སུ་མི་གཏོང་བའི་ཉེ་བར་དམིགས་པ་ལས་ལྡོག་པས་དོར་བ་མེད་པ་སྟོང་བ་ཉིད་ཀྱི་བདག་ཉིད་ཅན་དུ་གྱུར་པ་དང༌། ཆོས་ཀྱི་འཁོར་ལོར་ཞུགས་པ་དེ་རྣམས་གདུལ་བྱའི་སྐྱེ་བོ་རྣམས་ཀྱི་ངོར་ཆོས་སྟོན་དུ་འཇུག་པའི་རྒྱུར་གྱུར་པས་རྡོ་རྗེ་སྨྲ་བའོ། །ཡིད་ཀྱི་རྣམ་པར་ཤེས་པ་
གནས་གྱུར་པའི་ངོ་བོ་ཉིད་ཀྱིས་སོ་སོར་རྟོག་པའི་ཡེ་ཤེས་ཇི་སྐད་དུ་བཤད་པའི་ཕྱིན་ཅི་ལོག་ལས་རྣམ་པར་དབེན་པའི་ངོ་བོ་ཉིད་ཀྱི་དེའི་འཁོར་དུ་གྱུར་པས་ཤིན་ཏུ་སྟོང་པ་ཉིད་ལ་སོགས་པ་བཞིའི་ངོ་བོ་ཉིད་དུ་གྱུར་པ་ནི་རྡོ་རྗེ་ཆོས་ལ་སོགས་པ་ཉིད་དོ། །སྟོབས་དང་མི་འཇིགས་པ་ལ་སོགས་པ་ཆོས་ཀྱི་སྐུར་ཉེ་བར་དམིགས་པ་ལས་ལྡོག་པའི་ཆོས་ཐམས་ཅད་སྟོང་པ་ཉིད་ཀྱི་བདག་ཉིད་ཅན་དུ་གྱུར་བ་དང༌། དོན་དམ་པའི་སྟོང་པ་ཉིད་སྐལ་བ་ཅན་རྣམས་ཀྱི་རྒྱུར་གྱུར་པས་ན་རྡོ་རྗེ་ལས་སོ། །རང་དང་སྤྱིའི་མཚན་ཉིད་ཉེ་བར་དམིགས་པའི་མཚན་ཉིད་ལས་ལྡོག་པའི་རང་གི་མཚན་ཉིད་སྟོང་པ་ཉིད་ཀྱི་བདག་ཉིད་ཅན་དུ་གྱུར་པ་དང༌། ལས་ལ་རབ་ཏུ་ཞུགས་པ་རྣམས་ཀྱི་བསྡུ་བའི་རྒྱུར་གྱུར་པས་རྡོ་རྗེ་སྲུང་བའོ། །ཉེ་བར་དམིགས་པ་མེད་པ་དང་ཉེ་བར་དམིགས་པ་ལས་ལྡོག་པས་མི་དམིགས་པ་སྟོང་པ་ཉིད་ཀྱི་བདག་ཉིད་ཅན་དུ་གྱུར་པ་དང་སྲུང་པ་ལ་སོགས་པ་རྣམས་ཀྱི་བགེགས་ཞི་བར་བྱེད་པས་རྡོ་རྗེ་གནོད་སྦྱིན་ནོ། །དངོས་བོ་མེད་པ་ལས་བཟློག་པས་དངོས་པོ་མེད་པའི་ངོ་བོ་ཉིད་སྟོང་པ་ཉིད་ཀྱི་བདག་ཉིད་ཅན་དུ་གྱུར་པ་དང༌། དེ་ལྟར་བྱ་བསྒྲུབ་པ་འཇུག་བ་རྣམས་སྐུ་གསུང་ཐུགས་རྡོ་རྗེ་བྱེད་པས་དངོས་གྲུབ་ཐམས་ཅད་རྫོགས་པའི་རྒྱུར་གྱུར་པས་ན་རྡོ་རྗེ་ཁུ་ཚུར་རོ། །མིག་ལ་སོགས་པའི་རྣམ་པར་ཤེས་པ་གནས་གྱུར་པའི་ངོ་བོ་ཉིད་ཀྱི་བྱ་བ་གྲུབ་པའི་ཡེ་ཤེས་ཇི་སྐད་དུ་བཤད་པའི་ཕྱིན་ཅི་ལོག་རྣམས་ལས་དབེན་པའི་ངོ་བོ་ཉིད་དེའི་འཁོར་དུ་གྱུར་པས་ཆོས་ཐམས་ཅད་སྟོང་པ་ཉིད་ལ་སོགས་པའི་ངོ་བོ་ཉིད་དེ་རྡོ་རྗེ་ལ་སོགས་པའོ། །དེ་བཞིན་དུ་སེར་སྣ་དང༌། འཆལ་པའི་ཚུལ་ཁྲིམས་དང༌། །ཁྲོ་བ་དང༌། །ལེ་ལོ་ལ་སོགས་པའི་ཉེ་བར་དམིགས་པ་ལས་ལྡོག་ཅིང༌། དེའི་གཉེན་པོ་ཉིད་ཀྱི་སྦྱིན་པ་དང་ཚུལ་ཁྲིམས་དང་བཟོད་པ་དང༌། བཙོན་འགྲུས་ཀྱི་ཕ་རོལ་ཏུ་ཕྱིན་པའི་བདག་ཉིད་ཅན་དུ་གྱུར་པས་ཕྱག་རྒྱ་ཆེན་པོ་གཉིས་སུ་མེད་པའི་ཡེ་ཤེས་ཀྱི་ངོ་བོ་ཉིད་ཀྱི་རྣལ་འབྱོར་གྱི་དབང་ཕྱུག་དེ་ནི་གསང་བའི་མཆོད་པ་བཞིའི་ངོ་བོ་ཉིད་དེ་རྡོ་རྗེ་སྒེག་མོ་དང༌། ཕྲེང་བ་དང་གླུ་མ་དང་གར་མའི་བདག་ཉིད་ཅན་ནོ། །རྡོ་རྗེ་སྒེག་མོ་ལ་སོགས་པ་ནི་སྦྱིན་པའི་ཕ་རོལ་ཏུ་ཕྱིན་པའི་ངོ་བོ་ཉིད་ཡིན་པས་ན་དེ་བཞིན་དུ་ཤེས་རབ་འཆལ་པ་དང༌། རྣམ་པར་གཡེང་བ་དང་
ལོག་པའི་ང་རྒྱལ་དང་ཐབས་མེད་པ་ལས་ལོག་པས་ཤེས་རབ་དང་བསམ་གཏན་དང་སྨོན་ལམ་དང་ཐབས་ཀྱི་ཕ་རོལ་ཏུ་ཕྱིན་པའི་བདག་ཉིད་ཅན་དུ་གྱུར་པའི་ཕྱག་རྒྱ་ཆེན་པོ་གཉིས་སུ་མེད་པའི་ཡེ་ཤེས་ཀྱི་ངོ་བོ་ཉིད་ཀྱི་དབང་ཕྱུག་དེ་ཉིད་ནི་ཕྱིའི་མཆོད་པའི་རང་བཞིན་རྡོ་རྗེ་བདུག་པ་དང་མེ་ཏོག་དང་མར་མེ་དང་དྲིའི་ངོ་བོ་ཉིད་ཡིན་ཏེ། རྡོ་རྗེ་བདུག་པ་མ་ལ་སོགས་པ་རིམ་པ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པ་བཞིའི་ངོ་བོ་ཉིད་ཡིན་ནོ། །དེ་ཉིད་ཐེག་པ་ཆེན་པོ་ལ་སོགས་པ་ལ་ཡིད་ཆེས་པས་མ་དད་པ་ལས་ལྡོག་པས་དད་པའི་བདག་ཉིད་ཅན་དེ་ཐབ་ཆེན་པོའི་ངོ་བོ་ཉིད་ཡིན་པས་རྡོ་རྗེ་ལྕགས་ཀྱུའོ། །ཐེག་པ་ཆེན་པོ་ལ་འཇུག་པ་ལས་ལྡོག་པའི་བརྩོན་འགྲུས་ཀྱི་བདག་ཉིད་ཅན་གྱི་སྤྱོད་པའི་ངོ་ངོ་ཉིད་དུ་གྱུར་པས་ན་རྡོ་རྗེ་ཞགས་པའོ། །བརྗེད་ངས་པ་ལས་ལྡོག་ཅིང་དྲན་པའི་བདག་ཅན་དུ་གཅོད་པའི་དགོས་པ་ལས་ལྡོག་པའི་བདག་ཉིད་ཅན་ཡིན་པས་ན་རྡོ་རྗེ་ལྕགས་སྒྲོག་གོ །ཆོས་རྣམས་མི་ཤེས་པ་ལས་ལྡོག་པའི་ཏིང་ངེ་འཛིན་གྱི་བདག་ཉིད་ཅན་ཡིན་ཞིང་ཆོས་ཐམས་ཅད་མ་སྐྱེས་པར་སྟོན་པའི་ངོ་བོ་ཉིད་དུ་གྱུར་པས་ན་རྡོ་རྗེ་འབེབས་པའོ། །དེས་ན་ཐབས་དང་ཤེས་རབ་ཀྱི་བདག་ཉིད་ཅན་གྱི་རྣལ་འབྱོར་ཆེན་པོ་དེ་ཉིད་ནི་དད་པ་དང་བརྩོན་འགྲུས་དང་དྲན་པ་དང་ཏིང་ངེ་འཛིན་གྱི་ངོ་བོར་གྱུར་པས་ན་རྡོ་རྗེ་ལྕགས་ཀྱུ་ལ་སོགས་པའོ། །སའི་གོ་རིམས་ངེས་པ་གང་ཞེ་ན་ཚོགས་ཀྱི་ལམ་དུ་བྱང་ཆུབ་ཏུ་སེམས་སྐྱེད་པ་དང་གདམས་དགའ་འབོགས་པའོ། །སྦྱོར་བའི་ལམ་དུ་དེ་ཁོ་ན་ཉིད་ལ་རྗེས་སུ་ཆགས་པ་སྐྱེད་པ་དང་རྗེས་སུ་ཆགས་པའི་ཡིད་བདེ་བ་སྐྱེས་པའོ། །མཐོང་བའི་ལམ་དུ་ཆོས་ཀྱི་མཐོང་བ་རྒྱུན་མི་འཆད་བར་བྱ་བའི་ཕྱིར་དབང་བསྐུར་བའོ། །ས་གཉིས་པ་ལ་དབང་མི་འཕྲོགས་པར་བྱ་བའི་ཕྱིར་མི་འཇིགས་པ་སྐྱེད་པའོ། །ས་གསུམ་པ་ལ་བྱང་ཆུབ་སེམས་དཔའ་དེ་ལ་བདེ་བར་གཤེགས་པའི་ཐུགས་རྗེའི་དབང་གིས། བྱམས་པའི་རྒྱལ་མཚན་བསྒྲེང་བའོ། །ས་བཞི་པ་ལ་བྱང་ཆུབ་སེམས་དཔའི་དེ་ལ་བདེ་བར་གཤེགས་པས་ཆོས་ཀྱི་འཁོར་ལོ་བསྐོར་རོ། །ལྔ་པ་ལ་ཆོས་ཀྱི་འཁོར་ལོ་དེ་ཉིད་ཏིང་ངེ་གྱི་སྟོབས་སོ། །དྲུག་པ་ལ་ནི་ཏིང་ངེ་འཛིན་དེ་ཉིད་རྫོགས་པར་བྱེད་པའི་ཡེ་ཤེས་སྐྱེད་དོ།།
བདུན་པ་ལ་བྱང་ཆུབ་སེམས་དཔའ་དེ་ཉིད་སེམས་ཅན་ལ་སྙིང་རྗེ་སྐྱེད་དོ། །བརྒྱད་པ་ལ་དེ་ཉིད་ཀྱིས་ཆོས་ཀྱི་འཁོར་ལོ་བསྐོར་རོ། །དགུ་པ་ལ་ཟག་པ་མེད་པའི་མཆོད་པས་མཆོད་དོ། །བཅུ་པ་ལ་ཆོས་ཀྱི་རྒྱལ་མཚན་དུ་དབང་བསྐུར་རོ། །བཅུ་པའི་ཆོས་ཀྱི་ཡེ་ཤེས་ཆེན་པོས་བཅུ་གཅིག་པ་ལ་བགེགས་ཉེ་བར་ཞི་བར་བྱེད་དོ། །རྨོངས་པ་དང་གནས་ངན་ལེན་པ་ལ་སོགས་པའི་བག་ལ་ཉལ་རྣམས་སྤོང་ངོ༌། །བཅུ་གཉིས་པ་ལ་སྐུ་གསུང་ཐུགས་རྡོ་རྗེ་ལྟར་མི་ཤིགས་པ་སྟེ་རྫོགས་པའི་སངས་རྒྱས་སུ་མཐར་ཕྱིན་ཏོ། །དེ་ནས་ཆོས་ཀྱི་དབྱིངས་ཀྱི་ཡེ་ཤེས་དང༌། མེ་ལོང་ལྟ་བུའི་ཡེ་ཤེས་དང༌། མཉམ་པ་ཉིད་ཀྱི་ཡེ་ཤེས་དང༌། སོ་སོར་རྟོག་པའི་ཡེ་ཤེས་དང༌། བྱ་བ་གྲུབ་པའི་ཡེ་ཤེས་ཀྱིས་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པ་དང་འདུས་མ་བྱས་པ་དང་དེ་རྣམས་ནི་གཟུང་འཛིན་དུ་མ་ཞེན་པར་བདེ་བ་ཉམས་སུ་མྱོང་ངོ༌། །རྗེས་ལས་ཐོབ་པའི་སྐབས་སུ་ནི་སྦྱིན་པ་དང༌། ཚུལ་ཁྲིམས་དང༌། བཟོད་པ་དང༌། བརྩོན་འགྲུས་དང༌། བསམ་གཏན་དང༌། ཤེས་རབ་དང༌། སྨོན་ལམ་དང༌། ཐབས་དང༌། དད་པའི་དབང་པོ་དང༌། བརྩོན་འགྲུས་ཀྱི་དབང་པོ་དང༌། དྲན་པའི་དབང་པོ་དང༌། ཏིང་ངེ་འཛིན་གྱི་དབང་པོ་ལ་སྤྱོད་དོ། །གྲངས་ངེས་པ་ནི་འོག་ནས་ཤེས་པར་བྱའོ། །དེ་བས་ན་རྡོ་རྗེ་དབྱིངས་ཀྱི་ལྷ་རྣམས་ནི་ཀུན་རྫོབ་ཏུ་གོ་རིམས་ངེས་བའོ། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་ལྷ་རྣམས་ཀྱི་རྣམ་པར་གཞག་པ་ལས་དོན་དམ་པའི་རྣལ་འབྱོར་བསྟན་པ་སྟེ་ལེའུ་དང་པོའོ།། །།དེ་ནས་ཡང༌། གཞན་ཡང་བརྗོད་པར་བྱ་བ་ནི། །རྩ་བའི་བཞིར་གྱུར་ལྷ་རྣམས་ཀྱི། །ཀུན་རྫོབ་ངག་གི་ངེས་པ་ནི། །ཅུང་ཟད་བསྡུས་ཏེ་བདག་གིས་བྲི། །དེ་ལ་རེ་ཞིག་རྣམ་པར་སྣང་མཛད་ནི་ཞལ་བཞི་བར་ངེས་ཏེ། རྡོ་རྗེ་སེམས་མ་ལ་སོགས་པ་ནི་དམ་ཚིག་གི་ཕྱག་རྒྱར་ངེས་སོ། །མི་བསྐྱོད་པ་ལ་སོགས་པ་ནི་རྟག་བ་ལ་ཞལ་གཅིག་པའོ། །རྡོ་རྗེ་སེམས་དཔའ་ནི་ཞལ་གཉིས་པ་དང་ལྡན་པའོ། །རྡོ་རྗེ་ལེགས་པ་ནི་ཞལ་རེ་རེ་དང་ལྡན་པའོ། །སྒེག་མོ་ལ་སོགས་པ་ནི་བུད་མེད་ཀྱི་ཆག་ལུགས་འཛིན་པའོ། །ལྕགས་ཀྱུ་ལ་སོགས་པ་ནི་ཁྲོ་བོའི་ཆ་ལུགས་འཛིན་པའོ། །དྲིས་པ་རྣམ་པར་སྣང་མཛད་
ནི་ཅིའི་ཕྱིར་ཞལ་བཞིར་ངེས་ཤེ་ན། དེ་ནི་རྡོ་རྗེ་སློབ་དཔོན་ལ་བསྙེན་བ་ཀུར་བ་སྟེ་དེ་ཡང་བུམ་པ་ལས། བདེ་གཤེགས་སློབ་དཔོན་དགྱེས་པའི་ཕྱིར། །རྣམ་པར་སྣང་མཛད་ཕྱོགས་བཞིར་གཟིགས། །ཞེས་གསུངས་པའི་ཕྱིར་རོ། །རྡོ་རྗེ་སེམས་མ་ལ་སོགས་པ་ནི་དམ་ཚིག་གི་ཕྱག་རྒྱར་རིག་པ་མ་ཡིན་ནོ་ཞེ་ན། དེ་ནི་གདུལ་བྱའི་ངོར་བསྟན་པ་སྟེ། དེ་ཡང་དེ་ཁོ་ན་ཉིད་བསྡུས་པའི་རྒྱུད་ལས། མུ་སྟེགས་པ་ལ་ཕན་དོན་དུ། །སངས་རྒྱས་བཙུན་པོ་ཕྱག་རྒྱར་བཅས། ཞས་གསུངས་པའི་ཕྱིར་རོ། །དེ་ལྟ་ན་ནི་མི་བསྐྱོད་པ་ལ་སོགས་པ་རྣམ་པར་སྣང་མཛད་ལ་ཞལ་གཟིགས་པར་མི་རིགས་སོ་ཞེ་ན་དེ་ནི་ཆོས་ཀྱི་དབྱིངས་ཀྱི་ཡེ་ཤེས་ཀྱི་དབང་དུ་བྱས་པ་སྟེ། དེ་ཁྲོ་བོའི་རྒྱུད་ལས། དཔེར་ནས་གཞི་ཆེན་པོ་ལས། །རྩི་ཤིང་ལ་སོགས་འབྱུང་བ་བཞིན། །ཆོས་ཀྱི་དབྱིངས་ཀྱི་ཡེ་ཤེས་ལས། །ཡེ་ཤེས་གཞན་ཡང་འབྱུང་ཕྱིར་རོ། །ཞེས་གསུངས་སོ། །རྡོ་རྗེ་སེམས་དཔའ་ལ་སོགས་པ་ནི་ཞལ་གཉིས་དང་ལྡན་པ་དང༌། རྡོ་རྗེ་རྒྱལ་པོ་ལ་སོགས་པ་ནི་ཞལ་གཅིག་ཏུ་ངེས་པ་བརྗོད་དེ་དེ་ནི་གཙོ་བོའི་དབང་དུ་མཛད་པ་སྟེ་དེ་ཡང་འབྲུག་སྒྲ་རྒྱས་པའི་རྟག་པ་ལས། ཐུན་མོང་པ་ནི་མ་ཡིན་པའི། །སོ་སོ་དག་ལ་ཞལ་གཉིས་གཟིགས། །ཐུན་མོང་གཙོ་བོ་ཉིད་གཅིག་སྟེ། །རྡོ་རྗེ་རྒྱལ་པོ་ལ་སོགས་པ། །ཞལ་གཅིག་ངེས་ཞེས་བསྟན་པའི་ཕྱིར་རོ། །སྒེག་མོ་ལ་སོགས་བུད་མེད་ཀྱི་ཆ་ལུགས་འཛིན་པ་ནི་མོས་པའི་དབང་དུ་བསྟན་པ་སྟེ་དེ་ཡང་རྣམ་པར་སྣང་མཛད་ཀྱི་རྒྱུད་ཆེན་པོ་ལས། སེམས་ཅན་མོས་པ་ཐ་དད་པས། །སངས་རྒྱས་སྐུ་ནི་ཅིར་ཡང་བསྟན། །ཞེས་གསུངས་སོ། །དྲིས་པ་རྡོ་རྗེ་ལྕགས་ཀྱུ་ལ་སོགས་པ་ནི་ཁྲོ་བོའི་ཆ་ལུགས་སུ་འཛིན་པ་ཇི་ལྟ་བུ་ཞེ་ན་དེ་ནི་ཉོན་མོངས་པ་ལ་སོགས་པའི་བདུད་ཚར་གཅོད་པ་དང༌། དངོས་གྲུབ་ལ་སོགས་པའི་མཚན་ཉིད་དང་ལྡན་པ་སྟེ་དེ་ལྡེམ་པོར་བསྟན་པ་སྟེ་དེ་ཡང་འཇམ་དཔལ་གྱི་རྒྱུད་ལས། ཉོན་མོངས་བདུད་རྣམས་ཚར་གཅོད་པས། །མཆོག་གི་དངོས་གྲུབ་སྩོལ་བྱའི་ཕྱིར། །རྡོ་རྗེ་ལྕགས་ཀྱུ་ལ་སོགས་ནི། །ཁྲོ་བོའི་ཆ་ལུགས་ཁོ་ནར་ངེས། །ཞེས་གསུངས་ཏེ་དེ་བས་ན་རྒྱལ་བ་དེ་དག་ནི་བདེ་བར་གཤེགས་པའི་བཀའ་དག་ལས་སྨོས་པས་དེ་ལྟ་བུར་རྟོགས་ན་ཤིན་ཏུ་འང་
དམ་ཚིག་ཉམས་པའི་ཕྱིར་དམུས་ལོང་ལ་འོ་མའི་ཡོན་ཏན་བརྗོད་པ་ལྟ་བུ་སྟེ་ལན་བརྗོད་པར་འོས་པ་མ་ཡིན་གྱི། འོན་ཀྱང་སྙིང་རྗེའི་དབང་གིས་ཅུང་ཞིག་བརྗོད་པའོ། །དྲིས་པ་གོ་རིམས་ངེས་པ་གང་ཡིན་དེ་བརྗོད་དེ་གཟུང་བ་དང་འཛིན་པ་གཉིས་དང་བྲལ་བའི་ཡེ་ཤེས་ལས་དེ་ཉིད་གསལ་བའི་ངོ་བོར་གནས་པ་དང༌། བདག་དང་གཞན་གྱི་རྣམ་པར་མི་འབྱེད་པ་དང༌། བདེན་པ་ཉམས་སུ་མྱོང་བ་དང༌། འགྲོ་བའི་དོན་བྱེད་པའི་རྒྱུར་གྱུར་བ་དང༌། དེ་ཉིད་ནི་ཀུན་རྫོབ་མཚན་མ་རྣམས་ལས་ལྡོག་པ་ནི་རིམ་གྱིས་ལྡོག་པའི་ཕྱིར་གཙོ་བོའི་ངེས་པ་འཁོར་རྣམས་དང༌། རང་རང་གི་ངེས་པ་དེ་དང་དེས་ནི་ཅི་རིགས་སུ་སྦྱར་རོ། །སྦྱིན་པ་ལ་སོགས་པ་དང་ཅི་རིགས་སུ་སྦྱར་ཏེ་གཞན་དག་ཏུ་རྒྱ་ཆེར་བསྟན་པས་འདིར་མངས་ཀྱིས་དོགས་ནས་མ་བྱས་སོ། །གྲངས་མེད་པ་ནི་ཕྱོགས་སྔ་མ་ལྟར་ན་མ་ཚང་བ་དང་མི་དགོས་པའི་ཕྱིར་དང༌། ཕྱི་མ་ལྟ་ན་ནི་ཆོས་ཀྱི་དབྱིངས་ཀྱི་ཡེ་ཤེས་བཞི་འབྱུང་བས་དེ་ཉིད་རེ་རེ་ཞིང་ཡང་ཡོན་ཏན་གྱི་ཆ་བཞི་བཞི་དང་ལྡན་པའི་ཕྱིར་དང༌། སྒེག་མོ་ལ་སོགས་པ་ལ་ནི་ཕྱི་ནང་གི་མཆོད་པ་དང་དགུག་པ་དང་གཞུག་པ་ལ་སོགས་པ་དེས་ཆོག་པའི་ཕྱིར་ཏེ་དེ་བས་ན་རྡོ་རྗེ་དབྱིངས་ཀྱི་ལྷ་རྣམས་ནི་དོན་དམ་པར་གྲངས་དང་གོ་རིམས་ངེས་བའོ། །རྡོ་རྗེ་དབྱིངས་ཀྱི་དཀྱིལ་འཁོར་གྱི་ལྷ་རྣམས་ཀྱི་རྣམ་པར་གཞག་པ་ལས་ཀུན་རྫོབ་དང་དོན་དམ་གྱི་རྣལ་འབྱོར་བསྟན་པའི་ལེའུ་སྟེ་གཉིས་པའོ།། །།རྡོ་རྗེ་དབྱིངས་ཀྱི་དཀྱིལ་འཁོར་གྱི་རྣམ་པར་གཞག་པ་ཞེས་བྱ་བ་སློབ་དཔོན་མུ་ཏི་ཏ་ཀོ་ཥས་མཛད་པ་རྫོགས་སོ།། །། རྒྱ་གར་གྱི་མཁན་པོ་པདྨ་ཀ་ར་བརྨ་དང༌། བོད་ཀྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།