Nitartha Digital Library
Tibetan
སྡེ་དགེའི་བསྟན་འགྱུར་པོད་ང་བདུན་པ།


   
དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པ་ཐེག་པ་ཆེན་པོ་མངོན་པར་རྟོགས་པ་ཞེས་བྱ་བའི་རྒྱུད་ཀྱི་བཤད་པ་དེ་ཁོ་ན་ཉིད་སྣང་བར་བྱེད་པ་ཞེས་བྱ་བ།  ཀུན་དགའ་སྙིང་པོ།


 
no previousདེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པ་ཐེག་པ་ཆེན་པོ་མངོན་པར་རྟོགས་པ་ཞེས་བྱ་བའི་རྒྱུད་ཀྱི་བཤད་པ་དེ་ཁོ་ན་ཉིད་སྣང་བར་བྱེད་པ་ཞེས་བྱ་བ། ཀུན་དགའ་སྙིང་པོ།no next

དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པ་ཐེག་པ་ཆེན་པོ་མངོན་པར་རྟོགས་པ་ཞེས་བྱ་བའི་རྒྱུད་ཀྱི་བཤད་པ་དེ་ཁོ་ན་ཉིད་སྣང་བར་བྱེད་པ་ཞེས་བྱ་བ།
ཀུན་དགའ་སྙིང་པོ།


DTG057_Page_0002
[མ་དཔེ་གཟིགས་ན་འདིར་གནོན།]

རྒྱ་གར་སྐད་དུ། སརྦ་ཏ་ཐཱ་ག་ཏ་ཏཏྟྭ་སཾ་གྲ་ཧ་མ་ཧཱ་ཡཱ་ན་ཨ་བྷི་ས་མ་ཡ་ནཱ་མ་ཏནྟྲ་ཏ་ཏཏྟྭ་ཨཱ་ལོ་ཀ་ཀཱ་རི་ནཱ་མ་བྱཱ་ཁྱཱ། བོད་སྐད་དུ། དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པ་ཐེག་པ་ཆེན་པོ་མངོན་པར་རྟོགས་པ་ཞེས་བྱ་བའི་རྒྱུད་ཀྱི་བཤེད་པ་དེ་ཁོ་ན་ཉིད་སྣང་བར་བྱེད་པ་ཞེས་བྱ་བ། བཅོམ་ལྡན་འདས་དཔལ་རྣམ་པར་སྣང་མཛད་ལ་ཕྱག་འཚལ་ལོ། །བཅོམ་ལྡན་འདས་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །བཅོམ་ལྡན་འདས་རྡོ་རྗེ་སེམས་དཔའ་ལ་ཕྱག་འཚལ་ལོ། །དེ་བཞིན་གཤེགས་ལ་ཕྱག་འཚལ་ནས། །སངས་རྒྱས་ཀུན་གྱི་དེ་ཉིད་ཆེ། །བསྡུས་པ་རྟོགས་པ་དགེ་བ་ནི། །ཅི་ནུས་པར་ནི་རྣམ་པར་དབྱེ། །འདི་སྐད་བདག་གིས་ཐོས་པ་ཞེས་བྱ་བ་ལ་སོགས་པ་འདིའི་བརྗོད་པར་བྱ་བ་དང༌། འབྲེལ་པ་ནི་གང་ཞིག་ཡིན། དེ་བཞིན་དུ་དགོས་པ་དང༌། དགོས་པའི་དགོས་པ་ནི་ཅི་ཞིག་ཡིན་ཞེ་ན། དེ་བརྗོད་པར་བྱ་སྟེ། དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པ་ཐེག་པ་ཆེན་པོ་མངོན་པར་རྟོགས་པ་ཞེས་བྱ་བ་འདི་ནི་རྒྱུད་ཡིན་ལ། འདིའི་འདི་སྐད་བདག་གིས་ཞེས་བྱ་བ་ལ་


DTG057_Page_0003
[མ་དཔེ་གཟིགས་ན་འདིར་གནོན།]

སོགས་པ་ནི་རྣམ་པར་སྣང་མཛད་དང༌། རྣམ་པར་སྣང་མཛད་ཆེན་པོའི་བདག་ཉིད་བདག་དང་གཞན་གྱི་དོན་ཕུན་སུམ་ཚོགས་པ་སྟོན་པར་བྱེད་པའི་གླིང་གཞིའི་མདོ་ནི་རྣམ་པར་སྣང་མཛད་དང་རྣམ་པར་སྣང་མཛད་ཆེན་པོའི་མཚན་ཉིད་དུ་བདག་དང་གཞན་གྱི་དོན་ཕུན་སུམ་ཚོགས་པའི་རང་བཞིན་ལ་གདུལ་བྱ་རྣམས་མངོན་པར་འདོད་པ་བསྐྱེད་པར་བྱ་བའི་ཕྱིར་གསུངས་པ་ཡིན་ནོ། །གདུལ་བྱ་རྣམས་མངོན་པར་འདོད་པ་རྣམས་ལ་རྣམ་པར་སྣང་མཛད་དང༌། རྣམ་པར་སྣང་མཛད་ཆེན་པོའི་རང་བཞིན་མངོན་སུམ་དུ་བྱ་བའི་ཕྱིར། དེ་ནས་དེ་བཞིན་གཤེགས་པ་ཐམས་ཅད་ཀྱི་སངས་རྒྱས་ཀྱི་ཞིང་འདི་ཞེས་བྱ་བ་ནས་བརྩམས་ཏེ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཞེས་བྱ་བའི་བར་གྱིས་ཐབས་དང་དེའི་རང་བཞིན་མངོན་སུམ་དུ་བྱེད་པ་བསྟན་པ་ཡིན་ནོ། །དེ་ལ་ཐབས་ཀྱི་དབྱེ་བ་བཤད་པར་བྱ་སྟེ། དེ་ལ་ཡང་ཏིང་ངེ་འཛིན་ཉིད་ནི་དངོས་སུ་ཐབས་ཡིན་པས་ན། དེ་ནས་དེ་བཞིན་གཤེགས་པ་ཐམས་ཅད་ཀྱི་སངས་རྒྱས་ཀྱི་ཞིང་འདི་ཞེས་བྱ་བ་ནས་བརྩམས་ཏེ། སངས་རྒྱས་རྣམས་ནི་གཅིག་ཏུ་གྱུར། །ཞེས་བྱ་བའི་བར་གྱི་བཤད་པས་ནི་དང་པོ་སྦྱོར་བ་དང༌། དཀྱིལ་འཁོར་གྱི་རྒྱལ་པོ་མཆོག་དང༌། ལས་


DTG057_Page_0004
[མ་དཔེ་གཟིགས་ན་འདིར་གནོན།]

ཀྱི་རྒྱལ་པོ་མཆོག་སྟེ། ཏིང་ངེ་འཛིན་གསུམ་བསྟན་པ་ཡིན་ནོ། །དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་ཐབས་དེ་ལ་འཇུག་པར་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་ཞེས་བྱ་བ་ནས། གང་གི་མིང་བརྗོད་པ་དེར་ཀྱེ་ཞེས་བརྗོད་པ་ཡིན་ནོ་ཞེས་བྱ་བའི་བར་གྱི་གཞུང་གིས་ནི་སློབ་དཔོན་གྱི་ལས་རྣམས་དང༌། དཀྱིལ་འཁོར་ཐམས་ཅད་དུ་འཇུག་པའི་ཆོག་རྒྱས་པར་བསྟན་པར་མཛད་པ་ཡིན་ནོ། །དམ་ཚིག་དང་དབང་བསྐུར་བ་ཐོབ་པ་དེ་རྣམས་ཉིད་ལ་སློབ་དཔོན་གྱིས་ཇི་ལྟར་མངོན་པར་འདོད་པའི་དངོས་གྲུབ་ཀྱི་ཡེ་ཤེས་བཤད་པར་བྱའོ་ཞེས་བསྟན་པར་བྱ་བའི་ཕྱིར། དེ་ནས་ཅི་ཁྱོད་དོན་འབྱུང་བའི་དངོས་གྲུབ་ཀྱི་ཡེ་ཤེས་དང་རྫུ་འཕྲུལ་གྱི་དངོས་གྲུབ་ཀྱི་ཡེ་ཤེས་དང་ཞེས་བྱ་བ་ནས་བརྩམས་ཏེ། བཛྲ་ཨཱ་ཧ་ར་ཞེས་བྱ་བའི་བར་གྱིས་དངོས་གྲུབ་ཀྱི་ཡེ་ཤེས་ཀྱི་རྒྱུད་གསུངས་པ་ཡིན་ནོ། །དོན་གྲུབ་པ་ལ་སོགས་པ་ཡང་སྒྲུབ་པ་པོས་བདག་ལ་བྱིན་གྱིས་བརླབས་པ་ལ་སོགས་པས་རང་གི་ལྷའི་རྣལ་འབྱོར་བསྐྱེད་ལ་བསྒྲུབ་པར་བྱའོ་ཞེས་བྱ་བ་དང༌། སྒྲུབ་པ་པོ་སྤྲོ་བ་བསྐྱེད་པར་བྱ་བའི་ཕྱིར་ཕན་ཡོན་བརྗོད་པར་བྱའོ་ཞེས་བྱ་བའི་དོན་འདི་གཉིས་བསྟན་པར་བྱ་བའི་ཕྱིར། དེ་ནས་རང་གི་རིགས་ཀྱི་ལྷའི་སྙིང་པོ་བྱིན་ལ་ཕྱག་རྒྱ་བཞིའི་ཡེ་ཤེས་བསླབ་པར་བྱའོ་ཞེས་བྱ་བ་ནས་བརྩམས་ཏེ། རྡོ་རྗེ་དྲིལ་བུ་བསྐྱོད་པའོ་ཞེས་བྱ་བའི་བར་གྱི་གཞུང་གིས་བསྟན་ཏོ། །དམ་ཚིག་དང་ཆོས་དང་ལས་དང་ཕྱག་རྒྱ་ཆེན་པོས་བཅིངས་པའི་ཆོ་ག་སྔོན་དུ་འགྲོ་བས་བྱའོ་ཞེས་བྱ་བའི་དོན་འདི་བཤད་པར་བྱ་བའི་ཕྱིར། དེ་ནས་ཕྱག་རྒྱ་ཐམས་ཅད་ཀྱི་སྤྱིའི་ཕྱག་རྒྱ་བཅིང་བའི་ཆོ་ག་རྒྱས་པར་བཤད་དེ་ཞེས་བྱ་བ་ནས་བརྩམས་ཏེ། དེ་ནས་བསྒྲུབ་པར་བྱའོ། །དེ་བསྒྲུབ་པར་བྱ་བའི་ཆོ་ག་རྒྱས་པའོ་ཞེས་བྱ་བའི་བར་གྱི་གཞུང་གིས་བསྟན་ཏོ། །ཆོ་ག་ཇི་ལྟ་བས་རང་གི་ལྷའི་ཕྱག་རྒྱ་ཆེན་པོ་བཅིངས་ལ་མདུན་རྡོ་རྗེ་དབབ་པ་ཡང་དག་པར་བསྐྱེད་དེ། རང་གི་ལྷའི་ཕྱག་རྒྱ་ཆེན་པོའི་ང་རྒྱལ་རྣམ་པར་བསྒོམས་ནས་ཕྱག་རྒྱ་དེ་ཡང་རང་གི་ལྷའི་སྐུར་བསམས་ལ། དེ་ལས་རང་གི་ལྷའི་ང་རྒྱལ་བསྐྱེད་ལ་ཡེ་ཤེས་སེམས་དཔའ་རང་གི་ལུས་ལ་ཇི་ལྟ་བ་བཞིན་དུ་བཅུག་སྟེ། ཕྱག་རྒྱ་ཆེན་པོ་རབ་ཏུ་སྒྲུབ་པ་དང༌། བདག་ལ་བྱིན་


DTG057_Page_0005
[མ་དཔེ་གཟིགས་ན་འདིར་གནོན།]

གྱིས་བརླབ་པ་ལ་སོགས་པ་བྱས་ནས་རབ་ཏུ་ཤིས་པའི་སྒྲ་བརྗོད་པ་སྔོན་དུ་འགྲོ་བས་དོན་སྒྲུབ་པ་ལ་སོགས་པ་བསྒྲུབ་པར་བྱ་བའི་ཕྱིར། བཛྲ་ནི་དྷི་ཞེས་བྱ་བ་ལ་སོགས་པ་བཟླས་པར་བྱའོ་ཞེས་བྱ་བའི་དོན་བསྟན་པའི་ཕྱིར། དེ་ནས་དངོས་གྲུབ་ཀྱི་ཆོ་ག་རྒྱས་པར་བཤད་དེ་ཞེས་བྱ་བ་ནས་བརྩམས་ཏེ། དངོས་གྲུབ་ཀྱི་ཆོ་ག་རྒྱས་པའོ་ཞེས་བྱ་བའི་བར་གྱིས་བསྟན་ཏོ། །བཟླས་བརྗོད་དང་སྒོམ་པ་དང་རབ་ཏུ་ལྡན་ཞིང་སྒྲིབ་པ་ཐམས་ཅད་རབ་ཏུ་སྤངས་པས་རྡོ་རྗེ་སེམས་དཔའ་བརྟན་པར་གྱུར་ནས། སེམས་བརྟན་པར་བྱ་བའི་ཕྱིར། དེ་ནས་ཕྱག་རྒྱ་ཐམས་ཅད་ཀྱི་སྤྱིའི་ལུས་དང་ངག་དང་སེམས་རྡོ་རྗེར་བྱ་བ་ཞེས་བྱ་བ་ནས་བརྩམས་ཏེ། དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་སེམས་དཔས་གསུངས་སོ་ཞེས་བྱ་བའི་བར་གྱི་གཞུང་གིས་ཆོ་ག་བསྟན་པ་ཡིན་ནོ། །བཟླས་བྲོད་དང་བསྒོམ་པས་སེམས་དུབ་ན་ཐུན་མཚམས་རེ་རེ་ཕྱག་རྒྱ་དགྲོལ་བའི་ཆོ་ག་རྗེས་སུ་སྤྱད་ལ་ལྷ་གཤེགས་སུ་གསོལ་བར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཕྱག་རྒྱ་ཐམས་ཅད་ཀྱི་དགྲོལ་བ་སྤྱིའི་ཆོ་ག་བཤད་དོ་ཞེས་བྱ་བ་ནས་བརྩམས་ཏེ། བཅོམ་ལྡན་འདས་ཀུན་དུ་བཟང་པོས་གསུངས་སོ་ཞེས་བྱ་བའི་བར་གྱིས་ཆོ་ག་བསྟན་ཏོ། །རྒྱུད་འདི་ནི་བསྒོམ་པ་གཙོ་བོར་གྱུར་པ་ཡིན་པས་འདིར་བསྒོམ་པ་ཉིད་ལ་འབད་པར་བྱའི་གྲངས་ཀྱི་བཟླས་པ་ནི་མ་ཡིན་ནོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། རྡོ་རྗེ་སེམས་སོགས་སེམས་དཔའ་རྣམས། །ཞེས་བྱ་བ་ནས་བརྩམས་ཏེ། དངོས་གྲུབ་འཐོབ་ཅེས་བྱ་བའི་བར་གྱི་གཞུང་གིས་ནི་འདིའི་ཅི་འདོད་པའི་བཟླས་པའི་ཆོ་ག་སྟོན་ཏོ། །བྱ་བ་དང་སྤྱོད་པ་དང་གཉིས་ཀའི་རྒྱུད་ལ་སོགས་པའི་ཆོ་ག་ལ་མངོན་པར་ཞེན་པ་རྣམས་ཀྱིས་ཀྱང་ཆོ་ག་དེས་འདི་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་བསྒྲུབ་པར་བྱའོ་ཞེས་བྱ་བའི་དོན་འདི་བཤད་པར་བྱ་བའི་ཕྱིར། སྙིང་པོ་ཕྱག་རྒྱ་སྔགས་རིག་རྣམས། །ཇི་ལྟར་འདོད་པའི་ཚུལ་གྱིས་ནི། །ཞེས་བྱ་བ་ལ་སོགས་པའི་གཞུང་གིས་སྟོན་ཏོ། །སྔོན་དུ་བསྙེན་པ་ལ་སོགས་པའི་དུས་དང་དཀྱིལ་འཁོར་གྱི་དུས་སུ་བཟླས་བརྗོད་དང་བསྒོམ་པས་དུབ་པར་གྱུར་ནས་ལྷ་གཤེགས་སུ་གསོལ་བར་འདོད་ན། ཡང་གསང་བའི་མཆོད་པ་


DTG057_Page_0006
[མ་དཔེ་གཟིགས་ན་འདིར་གནོན།]

ལ་སོགས་པའི་མཆོད་པ་ཐམས་ཅད་ཀྱིས་ལྷ་རྣམས་མཆོད་པར་བྱའོ་ཞེས་བསྟན་པར་བྱ་བའི་ཕྱིར། དེ་ནས་གསང་བའི་མཆོད་པ་བརྗོད་ཅིང་ཞེས་བྱ་བ་ནས་བརྩམས་ཏེ། མཆོད་པ་བྱེད་དུ་བཅུག་ལ་ཞེས་བྱ་བའི་བར་གྱི་གཞུང་གིས་སྟོན་ཏོ། །བརྟུལ་ཞུགས་ཡོངས་སུ་བསྲུང་བས་མངོན་པར་འདོད་པའི་དངོས་གྲུབ་ཐོབ་པར་འདོད་པས་དངོས་པོ་འདི་ཉམས་སུ་བླང་བ་ནི། ཇི་ལྟར་ཞུགས་པ་རྣམས་ཅི་འབྱོར་པའི་རོ་དང་ཞེས་བྱ་བ་ནས་བརྩམས་ཏེ། མནའི་སྙིང་པོ་ཡང་བསྟན་ཏོ་ཞེས་བྱ་བའི་བར་གྱི་གཞུང་གིས་སྟོན་ཏོ། །དཀྱིལ་འཁོར་དང་སྔོན་དུ་བསྙེན་པ་ལ་སོགས་པའི་དུས་སུ་ལྷ་རྣམས་མཆོད་པ་ཐམས་ཅད་ཀྱིས་ཡང་དག་པར་མཆོད་ལ་ཕྱག་རྒྱ་དགྲོལ་བའི་ཆོ་ག་རྗེས་སུ་སྤྱད་ལ་གཤེགས་སུ་གསོལ་བར་བྱའོ་ཞེས་བྱ་བའི་དོན་དེ་གསལ་བར་བྱ་བའི་ཕྱིར། དེ་ནས་ཇི་ལྟར་ཞུགས་པ་རྣམས་སླར་བཀྱེ་སྟེ་ཞེས་བྱ་བ་ནས་བརྩམས་ཏེ། དེ་ལྟར་དཀྱིལ་འཁོར་ཐམས་ཅད་ལ་བྱའོ་ཞེས་བྱ་བའི་གཞུང་འདིས་བསྟན་ཏོ། །བཅོམ་ལྡན་འདས་རྣམ་པར་སྣང་མཛད་ནས་རྡོ་རྗེ་འབེབས་པའི་བར་གྱིས་རང་གི་ཕྱག་རྒྱ་བཞི་པོ་དགྲོལ་བ་ནི་རང་གི་དམ་ཚིག་གི་ཕྱག་རྒྱས་གནས་ཇི་ལྟ་བ་བཞིན་དུ་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། ཕྱག་རྒྱ་རྣམས་དགྲོལ་བར་བྱའོ་ཞེས་བཅོམ་ལྡན་འདས་ཀྱིས་གསུངས་པ་ཡིན་ནོ། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་བསྡུས་པའི་དོན་བསྟན་པའོ། །དམ་ཚིག་གི་ཕྱག་རྒྱ་གཙོ་བོར་གྱུར་པ་གཟུངས་ཀྱི་དཀྱིལ་འཁོར་གྱི་བསྡུས་པའི་དོན་བསྟན་པར་བྱའོ། །དེ་ལ་དང་པོ་སྦྱོར་བའི་ཏིང་ངེ་འཛིན་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་བཤད་པ་ཡིན་ནོ། །འདིར་ནི་རྡོ་རྗེ་སེམས་དཔའ་དང་བཅས་པ་ཡིན་ནོ། །དེ་ནས་ཡང་བཅོམ་ལྡན་འདས་ཞེས་བྱ་བ་ནས་བརྩམས་ཏེ། དཀྱིལ་འཁོར་གྱི་གྲྭ་རྣམས་སུ་དགོད་དོ། །ཞེས་བྱ་བའི་བར་གྱི་གཞུང་གིས་ནི་དཀྱིལ་འཁོར་གྱི་རྒྱལ་པོ་མཆོག་གི་ཏིང་ངེ་འཛིན་ཏོ། །དེ་ནས་བྱིན་གྱིས་བརླབས་པ་ནས་བརྩམས་ཏེ། ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པ་ནི་འདིར་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་དང་འདྲ་བར་ཤེས་པར་བྱའོ། །གཟུངས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་བསྒྲུབ་


DTG057_Page_0007
[མ་དཔེ་གཟིགས་ན་འདིར་གནོན།]

པར་བྱ་བའི་ཕྱིར་གཟུངས་ཀྱི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར་དེ་ནས་ཡང་ཕྱག་ན་རྡོ་རྗེ་གསང་བ་ཞེས་བྱ་བ་ནས་བརྩམས་ཏེ། རྡོ་རྗེ་གསང་བའི་ཕྱག་རྒྱའི་ཡེ་ཤེས་བསླབ་པོ་ཞེས་བྱ་བའི་བར་གྱི་གཞུང་གིས་ནི་སློབ་དཔོན་གྱི་ལས་རྣམས་དང༌། གཟུངས་ཀྱི་དཀྱིལ་འཁོར་དུ་འཇུག་པའི་ཆོག་རྒྱས་པ་བསྟན་པར་མཛད་པ་ཡིན་ནོ། །དམ་ཚིག་དང་དབང་བསྐུར་བ་ཐོབ་པ་དེ་རྣམས་ལ་སློབ་དཔོན་གྱིས་ཇི་ལྟར་མངོན་པར་འདོད་པའི་གཟུངས་ཀྱི་དཀྱིལ་འཁོར་གྱི་དངོས་གྲུབ་བསྟན་པར་བྱའོ་ཞེས་བསྟན་པར་བྱ་བའི་ཕྱིར། དེ་ལ་དང་པོར་རྡོ་རྗེ་གསང་བའི་ལུས་ཀྱི་ཕྱག་རྒྱའི་ཡེ་ཤེས་བསླབ་པར་བྱའོ་ཞེས་བྱ་བ་ནས་བརྩམས་ཏེ། བཛྲ་གུཧྱ་ས་མ་ཡ་ཧཾ་ཞེས་བྱ་བའི་བར་གྱི་གཞུང་གིས་སྟོན་ཏོ། །གཟུངས་ཀྱི་དཀྱིལ་འཁོར་ལས་བཤད་པའི་དངོས་གྲུབ་རྣམས་ཀྱང་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པའི་ཕྱག་རྒྱ་བཞིས་རང་གི་ལྷའི་རྣལ་འབྱོར་ཇི་ལྟ་བ་བཞིན་དུ་བྱས་ཏེ་འདི་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་ཆོ་ག་ཇི་ལྟ་བ་བཞིན་དུ་བཅིངས་ལ་སྒྲུབ་པ་པོས་བསྒྲུབ་པར་བྱའོ་ཞེས་བསྟན་པར་བྱ་བའི་ཕྱིར། དེ་ནས་རྡོ་རྗེ་གསང་བའི་ཕྱག་རྒྱ་ཆེན་པོ་བཅིངས་པ་བསླབ་བོ་ཞེས་བྱ་བ་ནས་བརྩམས་ཏེ། དམ་ཚིག་མཆོག་ནི་ཇི་སྙེད་པ། །གཉིས་སུ་ཕྲལ་ནས་དེ་བཞིན་ནོ། །ཞེས་བྱ་བའི་བར་གྱི་གཞུང་གིས་སྟོན་ཏོ། །གསང་བའི་དམ་ཚིག་ལས་བྱུང་བའི་ལས་ཀྱི་ཕྱག་རྒྱ་རྣམས་ས་མ་ཡ་སཏྭཾ་ཞེས་བརྗོད་ཅིང་སྒྲུབ་པ་པོས་བསྒྲུབ་པའི་དཀྱིལ་འཁོར་དུ་བཅིང་བར་བྱའི། དུས་གཞན་དུ་ནི་མ་ཡིན་ནོ་ཞེས་བྱ་བའི་དོན་འདིས་བསྟན་པར་བྱ་བའི་ཕྱིར། དེ་ནས་འདི་རྣམས་བསྒྲུབ་པ་བཤད། །ཅེས་བྱ་བ་ནས་བརྩམས་ཏེ། རྟག་པའི་བདག་པོས་གཏང་ང་རེ། །ཞེས་བྱ་བའི་བར་གྱི་གཞུང་གིས་སྟོན་ཏོ། །གཟུངས་ཀྱི་དཀྱིལ་འཁོར་ལས་གསུངས་པའི་དམ་ཚིག་དང་ཆོས་དང་ལས་དང་ཕྱག་རྒྱ་ཆེན་པོ་ཐམས་ཅད་བཛྲ་ཧཱུཾ་བནྡྷ་ཞེས་བྱ་བས་བཅིང་བར་བྱ་ཞིང་རང་གི་ལྷའི་དམ་ཚིག་གི་ཕྱག་རྒྱས་རང་གི་གནས་སུ་ངེས་པར་གྲོལ་བ་ནི། བཛྲ་མུཿ་ཞེས་པས་བྱའོ། །ཕྱག་རྒྱ་དེ་ཐམས་ཅད་རྡོ་རྗེ་རིན་ཆེན་གྱིས་སྔ་མ་བཞིན་དུ་དབང་བསྐུར་བར་


DTG057_Page_0008
[མ་དཔེ་གཟིགས་ན་འདིར་གནོན།]

བྱ་བ་ནི། ཨོཾ་དྲྀ་ཌྷ་བཛྲ་ཀ་བ་ཙདྷྲི་ཀ་ཅེས་བྱ་བས་སོ། །དེ་བཞིན་དུ་དེ་རྣམས་ཀྱི་གོ་ཆ་བཅིང་བར་བྱས་ལ་ཨོཾ་བཛྲ་གུཧྱ་ས་མ་ཡ་ཏ་ལ་ས་ཞེས་བྱ་བས་དེ་རྣམས་མཉམ་པའི་ཐལ་མོ་གསུམ་གྱིས་མཉེས་པར་བྱའོ་ཞེས་བྱ་བའི་དོན་བསྟན་པར་བྱ་བའི་ཕྱིར། དེ་ནས་ཕྱག་རྒྱ་འདི་རྣམས་བཅིང་པ་ལ་སྒས་པའི་ལས་རྣམས་ཡིན་ནོ་ཞེས་བྱ་བ་ནས། ཨོཾ་གུཧྱ་ས་མ་ཡ་ཏ་ལ་ས་ཞེས་བྱ་བའི་བར་གྱི་གཞུང་གིས་སྟོན་ཏོ། །གང་ཞིག་ཕྱག་རྒྱ་ཆེན་པོ་ལ་སོགས་པས་འཇིགས་ཤིང་སྐྲག་པར་གྱུར་པས་དེ་ནི་བཅིང་བ་ལ་སོགས་པའི་ལས་རྣམས་བཛྲ་ས་ཏྭ་ཞེས་བྱ་བའི་དོན་བསྟན་པར་བྱ་བའི་ཕྱིར། རྡོ་རྗེ་སེམས་དཔའ་ཅི་དགར་བཟླས། །ཞེས་བྱ་བ་ལ་སོགས་པས་སྟོན་ཏོ། །གཟུངས་ཀྱི་དཀྱིལ་འཁོར་གྱི་བསྡུས་པའི་དོན་ཏོ། །ཆོས་ཀྱི་ཕྱག་རྒྱ་གཙོ་བོར་གྱུར་པ་ཆོས་ཀྱི་དཀྱིལ་འཁོར་གྱི་བསྡུས་པའི་དོན་བརྗོད་པར་བྱ་སྟེ། འདིར་དང་པོ་སྦྱོར་བའི་ཏིང་ངེ་འཛིན་ནི་རྡོ་རྗེ་དབྱིངས་ཀྱི་དཀྱིལ་འཁོར་དུ་གསུངས་པ་ཉིད་ཡིན་ནོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་རྡོ་རྗེ་ཕྲ་མོའི་ཡེ་ཤེས་ཀྱི་དང་ཞེས་བྱ་བ་ནས་བརྩམས་ཏེ། རང་གི་སྙིང་པོའི་ཏིང་ངེ་འཛིན་ལ་མཉམ་པར་གཞག་སྟེ་བཞུགས་སོ་ཞེས་བྱ་བའི་བར་གྱི་གཞུང་གིས་ཆོས་ཀྱི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་བསྟན་པ་ཡིན་ནོ། །དེ་ནས་བསྡུ་བ་དང་བྱིན་གྱིས་བརླབས་པ་ནས་བརྩམས་པ་དེ་ནི་དེ་བཞིན་དུ་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །ཆོས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོ་ལ་སོགས་པ་བསྒྲུབ་པ་ནི། ཆོས་ཀྱི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པར་བྱའོ་ཞེས་བསྟན་པར་བྱ་བའི་ཕྱིར། དེ་ནས་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་དང༌། ཡེ་ཤེས་དང་མངོན་པར་ཤེས་པ་བསྒྲུབ་པར་བྱ་བའི་ཕྱིར་ཞེས་བྱ་བ་ནས་བརྩམས་ཏེ། ཡེ་ཤེས་ཀྱི་མཚན་མ་ལག་ཏུ་བྱིན་ནས་ཞེས་བྱ་བའི་བར་གྱིས་གཞུང་གི་བཤད་པས་ནི། སློབ་དཔོན་གྱི་ལས་ཀྱི་ཆོ་ག་དང་ཆོས་ཀྱི་དཀྱིལ་འཁོར་དུ་འཇུག་པའི་ཆོ་ག་བསྟན་པར་མཛད་པ་ཡིན་ནོ། །དམ་ཚིག་དང་དབང་བསྐུར་བ་ཐོབ་པ་དེ་རྣམས་ལ་སློབ་དཔོན་གྱིས་


DTG057_Page_0009
[མ་དཔེ་གཟིགས་ན་འདིར་གནོན།]

ཇི་ལྟར་མངོན་པར་འདོད་པའི་ཆོས་ཀྱི་དཀྱིལ་འཁོར་ལས་བཤད་པའི་དངོས་གྲུབ་བསྟན་པར་བྱའོ་ཞེས་ཁོང་དུ་ཆུད་པར་བྱ་བའི་ཕྱིར། རང་གི་སེམས་ལས་སུ་རུང་བར་བྱ་བའི་ཕྱིར་ཕྱག་རྒྱ་ཆེན་པོའི་ཡེ་ཤེས་བསླབ་པོ་ཞེས་བྱ་བ་ནས་བརྩམས་ཏེ། ལས་རྣམས་ཐམས་ཅད་དེས་གྲུབ་བོ་ཞེས་བྱ་བའི་བར་གྱི་གཞུང་གིས་སྟོན་ཏོ། །ཆོས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་རྣམས་ཀྱང་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པའི་ཕྱག་རྒྱ་བཞིས་རང་གི་ལྷའི་རྣལ་འབྱོར་ཇི་ལྟ་བ་བཞིན་དུ་བསྐྱེད་ནས། དེའི་རྗེས་ལ་ཆོས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ་བསྒྲུབ་པར་བྱའོ་ཞེས་བསྟན་པར་བྱ་བའི་ཕྱིར། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་རྡོ་རྗེར་བྱིན་གྱིས་བརླབས་ཞེས་བྱ་བའི་ཏིང་ངེ་འཛིན་གྱི་ཕྱག་རྒྱའི་ཡེ་ཤེས་བསླབ་པོ་ཞེས་བྱ་བ་ནས་བརྩམས་ཏེ། གཉིས་སུ་བྱས་ནས་སྦྱར་བར་བྱ། །ཞེས་བྱ་བའི་བར་གྱི་གཞུང་གིས་སྟོན་ཏོ། །ཆོས་ཀྱི་དཀྱིལ་འཁོར་གྱི་བསྡུས་པའི་དོན་ཡིན་ནོ། །ལས་ཀྱི་ཕྱག་རྒྱ་གཙོ་བོར་གྱུར་པ་ལས་ཀྱི་དཀྱིལ་འཁོར་གྱི་བསྡུས་པའི་དོན་བརྗོད་པར་བྱ་སྟེ་འདིར་དང་པོར་སྦྱོར་བའི་ཏིང་ངེ་འཛིན་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པ་ཉིད་ཡིན་ནོ། །དེ་ནས་བཅོམ་ལྡན་འདས་ཀྱིས་དེ་བཞིན་གཤེགས་པ་ཐམས་ཅད་ཀྱི་མཆོད་པ་བླ་ན་མེད་པའི་ཆོ་ག་རྒྱས་པ་ཞེས་བྱ་བ་ནས་བརྩམས་ཏེ། དེ་བཞིན་གཤེགས་པ་ཐམས་ཅད་ཀྱི་ལས་ཀྱི་ལས་ཀྱི་མཆོད་པའོ་ཞེས་བྱ་བའི་བར་གྱིས་གཞུང་གི་བཤད་པས་ནི་ལས་ཀྱི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་ཏོ། །དེ་ནས་བསྡུ་བ་དང་བྱིན་གྱིས་བརླབས་པ་ནས་བརྩམས་ཏེ་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་གསུངས་པ་བཞིན་དུ་བལྟ་བར་བྱའོ། །ལས་ཀྱི་དཀྱིལ་འཁོར་ལས་གསུངས་པའི་བསྒྲུབ་པ་ནི་ལས་ཀི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པར་བྱའོ་ཞེས་བྱ་བའི་ཆོ་ག་བསྟན་པར་བྱ་བའི་ཕྱིར། དེ་ནས་འདིར་དེ་བཞིན་གཤེགས་པ་ཐམས་ཅད་མ་ལུས་ཤིང་པ་མེད་པ་ཐམས་ཅད་ལ་མཆོད་པ་བྱེད་པའི་ལས་ཀྱི་དཀྱིལ་འཁོར་རྡོ་རྗེ་


DTG057_Page_0010
[མ་དཔེ་གཟིགས་ན་འདིར་གནོན།]

ཞེས་བྱ་བ་ནས་བརྩམས་ཏེ། གཞན་གྱིས་ལྟ་སྨོས་ཀྱང་ཅི་དགོས་ཞེས་བྱ་བའི་བར་གྱི་གཞུང་གིས་སློབ་དཔོན་གྱི་ལས་ཀྱི་ཆོ་ག་དང༌། ལས་ཀྱི་དཀྱིལ་འཁོར་དུ་འཇུག་པའི་ཆོ་ག་བསྟན་པར་མཛད་པ་ཡིན་ནོ། །དམ་ཚིག་དང་དབང་བསྐུར་བ་ཐོབ་པ་དེ་རྣམས་ལ་སློབ་དཔོན་གྱིས་ལས་ཀྱི་དཀྱིལ་འཁོར་ལས་བཤད་པའི་དངོས་གྲུབ་ཇི་ལྟར་མངོན་པར་འདོད་པ་དག་བཤད་པར་བྱའོ་ཞེས་བྱ་བ་འདི་བསྟན་པར་བྱ་བའི་ཕྱིར། དེ་ནས་བྱང་ཆུབ་ཆེན་པོའི་སེམས་བསྒྲུབ་པའི་མཆོད་པའི་ཕྱག་རྒྱའི་ཡེ་ཤེས་བསླབ་བོ་ཞེས་བྱ་བ་ནས་བརྩམས་ཏེ། ཀརྨ་བཛྲ་ཞེས་བྱ་བའི་བར་གྱི་གཞུང་གིས་སྟོན་ཏོ། །ལས་ཀྱི་དཀྱིལ་འཁོར་ལས་བཤད་པའི་དངོས་གྲུབ་ཀྱང་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པའི་ཕྱག་རྒྱ་བཞིས་རང་གི་ལྷའི་རྣལ་འབྱོར་དེ་ལས་བཤད་པ་ལྟར་ཇི་ལྟ་བ་བཞིན་དུ་བསྐྱེད་ནས། དེའི་རྗེས་ལ་ལས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོ་ལ་སོགས་པ་བཅིངས་ལ་བསྒྲུབ་པར་བྱའོ་ཞེས་བྱ་བ་འདི་བསྟན་པར་བྱ་བའི་ཕྱིར། དེ་ནས་དེ་བཞིན་གཤེགས་པ་ཐམས་ཅད་ཀྱི་མཆོད་པའི་ཕྲིན་ལས་ཀྱི་ཡེ་ཤེས་ཀྱི་ཕྱག་རྒྱ་ཞེས་བྱ་བ་ནས་བརྩམས་ཏེ། ལས་ཀྱི་ཕྱག་རྒྱ་མདོར་བསྡུས་ནས། །ལས་ཀྱི་ཕྱག་རྒྱ་གཉིས་སུ་བྱ། །ཞེས་བྱ་བའི་བར་གྱི་གཞུང་གིས་བསྟན་ཏོ། །ལས་ཀྱི་དཀྱིལ་འཁོར་མདོར་བསྡུས་པའི་དོན་ཏོ། །རྡོ་རྗེ་དབྱིངས་ཀྱི་དུམ་བུ་ལས་གསུངས་པ་རྡོ་རྗེ་སེམས་དཔའ་ལ་སོགས་པའི་དཀྱིལ་འཁོར་ཐམས་ཅད་དུ་བཤད་པའི་དོན་བསྡུས་པར་གྱུར་པའི་སེམས་ཅན་བར་མ་ལ་མངོན་པར་སྲེད་པ་རྗེས་སུ་འཛིན་པར་བྱེད་པའི་ཕྱག་རྒྱ་བཞི་པའི་དཀྱིལ་འཁོར་གྱི་དོན་བརྗོད་པར་བྱ་སྟེ། འདིར་ཡང་དང་པོ་སྦྱོར་བའི་ཏིང་ངེ་འཛིན་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པ་ཡིན་ནོ། །དེ་ནས་བཅོམ་ལྡན་འདས་རྣམ་པར་སྣང་མཛད་དེ་བཞིན་གཤེགས་པས་ཞེས་བྱ་བ་ནས་བརྩམས་ཏེ། ཨོཾ་བཛྲ་ཀརྨ་མུཥྟི་ཧཾ་ཤེས་བྱ་བའི་བར་གྱི་བཤད་པས་ནི་དཀྱིལ་འཁོར་གྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་ལྔ་པོ་གསུངས་པ་ཡིན་ནོ། །སྔ་མ་བཞིན་དུ་བསྡུ་བ་དང་བྱིན་གྱིས་བརླབས་པ་ནས་བརྩམས་ཏེ། ལས་ཀྱི་མཆོག་གི་ཏིང་ངེ་འཛིན་ལྔ་པོ་གསུངས་པ་ཡིན་ནོ། །རྡོ་རྗེ་དབྱིངས་


DTG057_Page_0011
[མ་དཔེ་གཟིགས་ན་འདིར་གནོན།]

ཀྱི་དཀྱིལ་འཁོར་ལས་གསུངས་པའི་དངོས་གྲུབ་ཐམས་ཅད་ཀྱང་ཕྱག་རྒྱ་བཞི་པའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་བས་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེ་ཞེས་བྱ་བ་ནས་བརྩམས་ཏེ། དཀྱིལ་འཁོར་སྟོན་ཏོ་ཞེས་བྱ་བའི་བར་གྱི་གཞུང་གིས་ནི་སློབ་དཔོན་གྱི་ལས་ཀྱི་ཆོ་ག་དང༌། ཕྱག་རྒྱ་བཞི་པའི་དཀྱིལ་འཁོར་དུ་འཇུག་པའི་ཆོ་ག་རྒྱས་པར་བསྟན་པར་མཛད་པ་ཡིན་ནོ། །ཕྱག་རྒྱ་བཞི་པའི་དཀྱིལ་འཁོར་དུ་དམ་ཚིག་དང་དབང་བསྐུར་པ་དེ་ལ། སློབ་དཔོན་གྱིས་རྡོ་རྗེ་དབྱིངས་ཀྱི་དུམ་བུ་ལས་གསུངས་པའི་དངོས་གྲུབ་གང་ཡང་རུང་བ་བཤད་པར་བྱའོ་ཞེས་ཁོང་དུ་ཆུད་པར་བྱ་བའི་ཕྱིར། དེ་ནས་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱའི་དམ་ཚིག་སྨྲོས་ཤིག་ཅེས་བྱ་བ་ནས་བརྩམས་ཏེ། རྡོ་རྗེ་དགོས་མཆོག་དཀྱིལ་འཁོར་རོ། །ཞེས་བྱ་བའི་བར་གྱི་ཆོ་གས་བསྟན་པ་ཡིན་ནོ། །རྡོ་རྗེ་དབྱིངས་ལས་གསུངས་པའི་དངོས་གྲུབ་ཐམས་ཅད་ཀྱང་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པའི་ཕྱག་རྒྱ་བཞིས་རང་གི་ལྷའི་རྣལ་འབྱོར་ཇི་སྐད་བཤད་པ་བཞིན་དུ་བསྐྱེད་ལ་བསྒྲུབ་པར་བྱའོ་ཞེས་བྱ་བ་འདི་བསྟན་པར་བྱ་བའི་ཕྱིར། དེ་ནས་རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་བཞི་བསླབས་ནས་ཞེས་བྱ་བ་ལ་སོགས་པ་བསྟན་པར་མཛད་པ་ཡིན་ནོ། །ཇི་ལྟར་རྣམ་པར་སྣང་མཛད་ཀྱི་ཕྱག་རྒྱ་བཞི་པའི་དཀྱིལ་འཁོར་དུ་དངོས་གྲུབ་ཐམས་ཅད་བསྡུས་པར་གྱུར་པ། དེ་བཞིན་དུ་དེ་བཞིན་གཤེག་པ་མི་བསྐྱོད་པ་ལ་སོགས་པ་དེ་བཞིན་གཤེགས་པ་བཞིའི་དཀྱིལ་འཁོར་ཡང་དེ་དང་འདྲའོ་ཞེས་བྱ་བ་འདི་བསྟན་པར་བྱ་བའི་ཕྱིར། རྡོ་རྗེ་དངོས་གྲུབ་ཅེས་བྱ་བ་ནས་བརྩམས་ཏེ། དངོས་གྲུབ་ཐམས་ཅད་ཀྱང་འགྲུབ་བོ་ཞེས་བྱ་བའི་བར་གྱི་གཞུང་གིས་བསྟན་པ་ཡིན་ནོ། །དཀྱིལ་འཁོར་འདི་དག་ལ་ཕྱིའི་ཡོ་བྱད་མེད་ཀྱང་སེམས་ཀྱིས་བརྟག་པར་བྱའོ་ཞེས་རྣལ་འབྱོར་གཙོ་བོ་ཡིན་པར་བསྟན་པར་བྱ་བའི་ཕྱིར། དེ་ལྟར་རས་དང་རྩིག་པ་དང་ནམ་མཁའ་དང་གནས་ཐམས་ཅད་དུ་བྲིས་ན་དངོས་གྲུབ་ཐམས་ཅད་གྲུབ་བོ་ཞེས་བསྟན་པ་ཡིན་ནོ། །རྒྱུད་འདི་སྒྲུབ་པར་བྱེད་པ་


DTG057_Page_0012
[མ་དཔེ་གཟིགས་ན་འདིར་གནོན།]

དག་ལ་སྤྲོ་བ་བསྐྱེད་པར་བྱ་པའི་ཕྱིར་ཕན་ཡོན་སྟོན་པར་མཛད་པ་ནི་དཀྱིལ་འཁོར་དུ་ཞུགས་པ་ནས་བརྩམས་ཏེ་ཞེས་བྱ་བ་ནས། ལོ་གཅིག་གིས་མཆོག་འགྲུབ་བོ་ཞེས་བྱ་བའི་བར་གྱི་གཞུང་གིས་སྟོན་ཏོ། །ཕྱག་རྒྱ་བཞི་པའི་དཀྱིལ་འཁོར་གྱི་བསྡུས་པའི་དོན་ཏོ། །མདོར་བསྡུས་པ་ལ་དགའ་བའི་སེམས་ཅན་རྣམས་རྗེས་སུ་འཛིན་པར་བྱེད་པ་རྡོ་རྗེ་དབྱིངས་ཀྱི་དཀྱིལ་འཁོར་ལས་གསུངས་པའི་དཀྱིལ་འཁོར་ཐམས་ཅད་ཀྱི་དངོས་གྲུབ་བསྡུས་པར་གྱུར་པ། ཕྱག་རྒྱ་གཅིག་པའི་དཀྱིལ་འཁོར་གྱི་བསྡུས་པའི་དོན་བརྗོད་པར་བྱ་སྟེ། འདིར་དང་པོ་སྦྱོར་བའི་ཏིང་ངེ་འཛིན་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་གསུངས་པ་ཡིན་ནོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཅེས་བྱ་བ་ནས་བརྩམས་ཏེ། བཛྲ་ས་ཏྭ་ཞེས་བྱ་བའི་བར་གྱི་གཞུང་གིས་ནི། ཕྱག་རྒྱ་གཅིག་པའི་དཀྱིལ་འཁོར་གྱི་རྒྱལ་པོ་མཆོག་གི་ཏིང་ངེ་འཛིན་བསྟན་པ་ཡིན་ནོ།། སྔ་མ་བཞིན་དུ་བསྡུ་བ་དང་བྱིན་གྱིས་བརླབས་པ་ནས་བརྩམས་ཏེ། ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་ཡིན་པར་ཤེས་པར་བྱའོ། །རྡོ་རྗེ་དབྱིངས་ཀྱི་དུམ་བུར་གསུངས་པའི་དངོས་གྲུབ་ཐམས་ཅད་ཀྱང་ཕྱག་རྒྱ་གཅིག་པའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་བས་བསྒྲུབ་པར་བྱའོ་ཞེས་བྱ་བའི་དོན་བསྟན་པར་བྱ་བའི་ཕྱིར་དེ་ནས་བཅོམ་ལྡན་དས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེ་ཞེས་བྱ་བ་ནས་དུས་མ་ཡིན་པར་འཆི་བར་གྱུར་ཏ་རེ་ཞེས་བསྒོ་བར་བྱའོ་ཞེས་བྱ་བའི་གཞུང་གིས་ནི་སློབ་དཔོན་གྱི་ལས་ཀྱི་ཆོ་ག་དང༌། ཕྱག་རྒྱ་གཅིག་པའི་དཀྱིལ་འཁོར་དུ་འཇུག་པའི་ཆོ་ག་སྟོན་ཏོ། །ཕྱག་རྒྱ་གཅིག་པའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པ་དེ་རྣམས་ལ་བསྒྲུབ་པའི་ཡེ་ཤེས་བསླབ་པར་བྱའོ་ཞེས་བྱ་བ་འདི་བསྟན་པར་བྱ་བའི་ཕྱིར། དེ་ནས་དཀྱིལ་འཁོར་ཐམས་ཅད་ཀྱི་རྡོ་རྗེ་སེམས་དཔའི་དངོས་གྲུབ་དམ་པ་བསྒྲུབ་པའི་ཡེ་ཤེས་བསླབ་པོ་ཞེས་བྱ་བ་ལ་སོགས་བས་སྟོན་ཏོ། །རྒྱུད་ཐམས་ཅད་ལས་གསུངས་པའི་དངོས་གྲུབ་ནི་དམ་ཚིག་ཡོངས་སུ་སྲུང་བར་བྱེད་པ་ལ་འགྲུབ་པར་འགྱུར་རོ་ཞེས་བསྟན་པར་བྱ་བའི་ཕྱིར། དེ་ནས་དཀྱིལ་འཁོར་ཐམས་ཅད་ཀྱི་གསང་


DTG057_Page_0013
[མ་དཔེ་གཟིགས་ན་འདིར་གནོན།]

བའི་དམ་ཚིག་ཅེས་བྱ་བ་ནས་དམ་ཚིག་གི་སྡོམས་པ་སྦྱིན་པར་བྱའོ་ཞེས་བྱ་བའི་གཞུང་གིས་སྟོན་ཏོ། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་ཇི་སྐད་གསུངས་པའི་དངོས་གྲུབ་རྣམས་ཀྱང་རང་གི་ལྷའི་ཕྱག་རྒྱ་བཞི་དང་ལྡན་པའི་ལྷའི་རྣལ་འབྱོར་བྱས་ནས་བསྒྲུབ་པར་བྱའོ་ཞེས་བསྟན་པར་བྱ་བའི་ཕྱིར། དེ་ནས་རྡོ་རྗེ་སེམས་དཔའི་ཕྱག་རྒྱ་ཆེན་པོ་ལ་སོགས་པ་བཞི་བཅིང་བ་བསླབ་པར་བྱའོ་ཞེས་བྱ་བའི་གཞུང་གིས་སྟོན་ཏོ། །དངོས་གྲུབ་ཀྱང་དེ་བཞིན་ནོ་ཞེས་བྱ་བ་ལ་སོགས་པའི་གཞུང་གི་དོན་ནི་སྔ་མ་ཁོ་ན་བཞིན་དུ་ཤེས་པར་བྱའོ། ཕྱག་རྒྱ་གཅིག་པའི་དཀྱིལ་འཁོར་བསྡུས་པའི་དོན་ཏོ། །རྡོ་རྗེ་དབྱིངས་ཀྱི་དུམ་བུ་འདི་ཐམས་ཅད་ཀྱང་དེ་བཞིན་གཤེགས་པའི་རིགས་ཡིན་ཞིང་དེ་བཞིན་གཤེགས་པ་རྣམས་ལས་སྐྱེས་པའི་ཕྱིར་དང༌། བྱང་ཆུབ་ཀྱི་སེམས་ལས་བྱུང་བ་ཡིན་པའི་ཕྱིར་ཕྱག་རྒྱ་ཆེན་པོ་ཞེས་བྱ་བར་བཤད་ཅིང། འདོད་ཆགས་ཀྱིས་འདོད་ཆགས་སྤང་པར་བྱ་བའི་སྤྱོད་པ་བསྟན་པའི་ཕྱིར་གསུངས་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་བཀའ་བསྒོ་བའི་རྗེས་སུ་འཇུག་པའི་མཚན་ཉིད་དམ་ཚིག་གི་ཕྱག་རྒྱའི་རང་བཞིན་རྡོ་རྗེ་རིགས་ཀྱི་བསྡུས་པའི་དོན་བརྗོད་པར་བྱ་སྟེ། དེ་ལ་འདིར་དང་པོ་སྦྱོར་བའི་ཏིང་ངེ་འཛིན་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་གསུངས་པའི་རྡོ་རྗེ་སེམས་དཔའ་སྤྲུལ་པ་ལ་སོགས་པ་ཉིད་ཡིན་པར་ཤེས་པར་བྱའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཡང་གཅིག་ཏུ་འདུས་པར་གྱུར་ཏེ། དེ་བཞིན་གཤེགས་པ་ཐམས་ཅད་ཀྱི་འཁོར་ལོ་ཆེན་པོ་བསྐོར་བ་ལ་མཚན་བརྒྱ་རྩ་བརྒྱད་པ་འདིས་གསོལ་བ་བཏབ་པོ་ཞེས་བྱ་བ་ནས་བརྩམས་ཏེ། རང་གི་རིགས་ནི་སྐྱེད་པར་མཛོད། །ཅེས་བྱ་བའི་བར་གྱི་གཞུང་གིས་ནི། དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པ་སྟོན་ཏོ། །འདིའི་རབ་ཏུ་དབྱེ་བ་དེའི་རྗེས་སུ་འཇུག་པའི་མཚན་ཉིད་དམ་ཚིག་གི་ཕྱག་རྒྱའི་དབྱེ་བ་བཞི་བརྗོད་པར་བྱ་སྟེ། དེ་ནས་བཞིན་གཤེགས་པ་ཐམས་ཅད་ཀྱི་གཙོ་བོ་ཕྱག་ན་རྡོ་རྗེ་ཞེས་བྱ་བ་ནས་བརྩམས་ཏེ། དྲི་མ་མེད་པའི་ཁྲོ་བོར་གྱུར། །ཞེས་བྱ་བའི་བར་གྱི་གཞུང་གིས་ནི་རྡོ་རྗེའི་རིགས་སྤྲུལ་


DTG057_Page_0014
[མ་དཔེ་གཟིགས་ན་འདིར་གནོན།]

པའི་ཕྱིར་དང༌། བཀའ་བསྒོ་བའི་རྗེས་སུ་འཇུག་པ་སྟོན་ཏོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཅེས་བྱ་བ་ནས། ཡང་བཀའ་ནོད་ཅིང་བཞུགས་སོ་ཞེས་བྱ་བའི་བར་གྱི་གཞུང་གིས་ནི་རྡོ་རྗེ་རིགས་ཀྱི་བདག་པོ་སྤྲུལ་པ་དང༌། དབང་བསྐུར་པ་དང༌། དེ་བཞིན་གཤེགས་པ་བཀའ་བསྒོ་བའི་རྗེས་སུ་འཇུག་པ་སྟོན་ཏོ། །དེ་ནས་བཅོམ་ལྡན་འདས་ཞེས་བྱ་བ་ནས། དམ་ཚིག་ཀྱང་ལོང་ཤིག་ཅེས་བྱ་བའི་བར་གྱི་གཞུང་གིས་ནི། ཁམས་གསུམ་པ་དགུག་པ་དང༌། བཀའ་བསྒོ་བ་དང༌། དེའི་རྗེས་སུ་འཇུག་པ་སྟོན་ཏོ། །དེ་ནས་ཕྱག་ན་རྡོ་རྗེ་ཁྲོ་བོ་ཆེན་པོའི་རྒྱལ་པོ་ཞེས་བྱ་བ་ནས་ལྟ་ཞིང་ལངས་སོ་ཞེས་བྱ་བའི་བར་གྱི་གཞུང་གིས་ནི་ཁམས་གསུམ་གྱི་འཁོར་ལོ་བཏུལ་བ་དང༌། བཀའ་བསྒོ་བ་དང༌། ཁམས་གསུམ་པ་བཏུལ་བ་སྟོན་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེ་ལ་བཀའ་སྩལ་པ་ཞེས་བྱ་བ་ནས། ཞབས་ཀྱི་དྲུང་དུ་གཞག་གོ་ཞེས་བྱ་བའི་བར་གྱིས་དབང་ཕྱུག་ཆེན་པོ་ལ་སྲོག་བྱིན་པ་དང༌། བཀའ་བསྒོ་བ་དང༌། དེའི་རྗེས་སུ་འཇུག་པ་དང༌། ཡང་དག་པར་སྦྱངས་པའི་མཚན་མ་དང༌། དགུག་པ་རྣམས་སྟོན་པ་ཡིན་ནོ། །དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེས་ཞེས་བྱ་བ་ནས་བདག་ཉིད་ཆེན་པོ་དེ་བཏུལ་ལོ་ཞེས་སྒྲ་ཆེན་པོ་ཕྱུང་ངོ་ཞེས་བྱ་བའི་བར་གྱིས་ནི་དབང་ཕྱུག་ཆེན་པོ་ལ་ཡང་དག་པར་སྦྱང་བའི་དོན་དུ་ཚར་གཅད་པ་དང༌། བཀའ་བསྒོ་བས་དེའི་རྗེས་སུ་འཇུག་པ་སྟོན་ཏོ། །དེ་ནས་བཅོམ་ལྡན་འདས་ཀྱིས་ལྷ་ཆེན་པོ་ཞེས་བྱ་བ་ནས། མྱ་ངན་ལས་ནི་འདས་པར་གཞག །ཅེས་བྱ་བའི་བར་གྱི་གཞུང་གིས་ནི། དབང་ཕྱུག་ཆེན་པོ་ལ་བབས་པ་དང༌། སྡུག་བསྔལ་ཉེ་བར་ཞི་བ་དང༌། བླ་ན་མེད་པའི་བྱང་ཆུབ་ཐོབ་པར་གསུངས་པ་ཡིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ཞེས་བྱ་བ་ནས་བུད་མེད་ཐམས་ཅད་ཀྱིའོ་ཞེས་བྱ་བའི་བར་གྱི་གཞུང་གིས་ནི་ཁམས་གསུམ་གྱི་འཁོར་ལོ་མ་ལུས་པ་དཀྱིལ་འཁོར་དུ་བཅུག་སྟེ། དབང་བསྐུར་བ་དང༌། རང་གི་བཀའ་བསྒོ་བ་ལ་ངེས་པར་སྦྱར་བ་གསུངས་པ་ཡིན་ནོ། །དེ་ནས་བཅོམ་


DTG057_Page_0015
[མ་དཔེ་གཟིགས་ན་འདིར་གནོན།]

ལྡན་འདས་ཕྱག་ན་རྡོ་རྗེ་ཞེས་བྱ་བ་ནས། རྒྱ་མཚོ་ཆེན་པོར་ལྟུང་ངོ་ཞེས་བྱ་བའི་བར་གྱི་གཞུང་གིས་ནི། འབྱུང་པོ་དང་གདོན་ཐམས་ཅད་དགུག་པ་དང༌། བཀའ་བསྒོ་བ་དང་དེ་རྣམས་ཀྱི་དགུག་པ་དང༌། འཆིང་བ་རྣམ་པར་སྦྱོང་བ་གསུངས་པ་ཡིན་ནོ། །དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེ་ཞེས་བྱ་བ་ནས། ངན་སོང་དེ་རྣམས་རང་གི་གནས་སུ་དོང་ངོ་ཞེས་བྱ་བའི་བར་གྱི་གཞུང་གིས་ནི། མཁའ་འགྲོ་མ་ལ་སོགས་པའི་གདོན་ཐམས་ཅད་དགུག་གནས་བཀའ་བསྒོ་བ་དང་དེ་དགུག་པ་དང༌། རང་གི་བསྒོ་བ་ལ་དེས་པར་སྦྱར་བར་གསུངས་པ་ཡིན་ནོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་ཞེས་བྱ་བ་ནས་སླར་དོང་ངོ་ཞེས་བྱ་བའི་བར་གྱི་གཞུང་གིས་ནི་རིམས་ལ་སོགས་པའི་ནད་ཐམས་ཅད་བཀུག་སྟེ། བཀའ་བསྒོ་བ་དང༌། དགུག་ཅིང་དེ་རྣམས་བསལ་བ་སྟོན་ཏོ། །ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་ཞེས་བྱ་བ་ནས། ངན་སོང་དེ་རྣམས་རྒྱ་མཚོ་ཆེན་པོར་བོར་རོ་ཞེས་བྱ་བའི་བར་གྱི་གཞུང་གིས་ནི་ངན་སོང་གསུམ་པོ་དགུག་ཅིང་བཀའ་བསྒོ་བ་དང༌། བཀུག་ནས་དེ་རྣམ་པར་སྦྱང་བ་གསུངས་པ་ཡིན་ནོ། །གཞུང་འདི་དག་གིས་རྡོ་རྗེ་ཁྲོ་བོའི་དཀྱིལ་འཁོར་ཆེན་པོའི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་བསྟན་ཏེ། །དེ་ནས་བསྡུས་བ་དང་བྱིན་གྱིས་བརླབས་པ་སྔོན་དུ་འགྲོ་བས་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་སྔ་མ་བཞིན་དུ་ཤེས་པར་བྱའོ། །ཁམས་གསུམ་རྣམ་པར་རྒྱལ་བའི་དཀྱིལ་འཁོར་ཆེན་པོར་དམ་ཚིག་དང་དབང་བསྐུར་བ་ཐོབ་པས་ཀྱང༌། དེ་ལས་གསུངས་པའི་དངོས་གྲུབ་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཡང་བཅོམ་ལྡན་འདས་ཕྱག་ན་རྡོ་རྗེས་འདི་སྐད་ཅེས་གསོལ་ཏེ་ཞེས་བྱ་བ་ནས་དེ་ལ་ཀྱེ་ཞེས་བྱ་བའི་སྒྲ་དང་སྦྱར་བར་བྱའོ་ཞེས་བྱ་བའི་བར་གྱིས་ནི། སློབ་དཔོན་གྱི་ལས་ཀྱི་ཆོ་ག་དང༌། ཁམས་གསུམ་རྣམ་པར་རྒྱལ་བའི་དཀྱིལ་འཁོར་ཆེན་པོར་འཇུག་པའི་ཆོ་ག་སྟོན་ཏོ། །ཁམས་གསུམ་རྣམ་པར་རྒྱལ་བའི་དཀྱིལ་འཁོར་ཆེན་པོར་དམ་ཚིག་དང་དབང་བསྐུར་བ་ཐོབ་པ་ལ་སློབ་དཔོན་གྱིས་ཇི་ལྟར་མངོན་པར་འདོད་པའི་དངོས་གྲུབ་ཀྱི་ཡེ་ཤེས་བསླབ་པར་བྱའོ་ཞེས་བྱ་བའི་དོན་འདི་བསྟན་


DTG057_Page_0016
[མ་དཔེ་གཟིགས་ན་འདིར་གནོན།]

པར་བྱ་བའི་ཕྱིར། དེ་ནས་ཡེ་ཤེས་རྣམས་བསྐྱེད་དེ། །ཞེས་བྱ་བ་ནས་བརྩམས་ཏེ། ཧཱུཾ་ཧཾ་ཞེས་བྱ་བའི་བར་གྱི་གཞུང་གིས་བསྟན་ཏོ། །ཁམས་གསུམ་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་གསུངས་པའི་དངོས་གྲུབ་རྣམས་ནི་ཁམས་གསུམ་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་གསུངས་པའི་དངོས་གྲུབ་རང་གི་ལྷའི་ཕྱག་རྒྱ་བཞིས་རང་གི་ལྷའི་རྣལ་འབྱོར་ཇི་ལྟ་བ་བཞིན་དུ་བསྐྱེད་ལ་བསྒྲུབ་པར་བྱའོ་ཞེས་བྱ་བ་དང༌། སྒྲུབ་པ་པོ་རྣམས་སྤྲོ་བ་བསྐྱེད་པར་བྱ་བའི་ཕྱིར་ཕྱག་རྒྱ་རྣམས་ཀྱི་འབྲས་བུ་བཤད་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོའི་འདི་ཚིག་གི་དེ་ཁོ་ན་ཉིད་ཀྱི་ཕྱག་རྒྱའི་ཡེ་ཤེས་བསླབ་པའོ་ཞེས་བྱ་བ་ནས་བརྩམས་ཏེ། ཕྱག་རྒྱ་ཐམས་ཅད་ཀྱི་ཆོ་གའོ་ཞེས་བྱ་བའི་བར་གྱི་གཞུང་གིས་སྟོན་ཏོ། །རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེབས་པའི་བར་གྱིས་ཁྲོ་བོའི་ཟློས་པ་པོ་རྣམས་ཀྱིས་རྡོ་རྗེ་ཧཱུཾ་མཛད་དུ་བྱས་ནས་ལས་ཀྱི་ཚོགས་རྣམས་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་འདིར་འཇིག་རྟེན་གསུམ་ལས་རྣམ་པར་རྒྱ་ལ་བའི་དཀྱིལ་འཁོར་ཆེན་པོའི་སྤྱིའི་ཕྱག་རྒྱ་བཅིང་བ་བཤད་དོ་ཞེས་བྱ་བ་ནས་བརྩམས་ཏེ། སྐད་ཅིག་གིས་ནི་སྡིག་དྲལ་ལོ། །ཞེས་བྱ་བའི་བར་གྱི་གཞུང་གིས་སྟོན་ཏོ། །རིགས་ཐམས་ཅད་ཀྱི་དཀྱིལ་འཁོར་བརྟག་པར་བྱ་བའི་ཕྱིར་སྤྱིའི་ཆོ་ག་ནི་དེ་ནས་ཞེས་བྱ་བ་ནས། སྒོ་དབྱེ་བའི་མཆོག་ཡིན་ནོ་ཞེས་བྱ་བའི་བར་གྱི་གཞུང་གིས་སྟོན་ཏོ། །ཁམས་གསུམ་རྣམ་པར་རྒྱལ་པའི་དཀྱིལ་འཁོར་ཆེན་པོར་གསུངས་པའི་མཚན་མ་ཐོབ་ནས་ནི། བརྐྱང་བསྐུམ་གྱི་ཚུལ་དུ་བྱ་སྟེ། ཁྲོ་བོ་ཡི་ནི་སྐད་འབྱིན་ཅིང༌། །ཁྲོ་ཞིང་ཁྲོ་བའི་ལྟ་བས་ནི། །ལས་རྣམས་ཐམས་ཅད་བསྒྲུབ་པར་བྱ། །ཁམས་གསུམ་རྣམ་པར་རྒྱལ་བའི་དཀྱིལ་འཁོར་ཆེན་པོའི་བསྡུས་པའི་དོན་ཏོ། །ཁམས་གསུམ་རྣམ་པར་རྒྱལ་བའི་དུམ་བུ་ལས། ཕྱག་རྒྱ་ཆེན་པོ་གཙོ་བོར་གྱུར་པ་ཁམས་གསུམ་རྣམ་པར་རྒྱལ་བའི་དཀྱིལ་འཁོར་ཆེན་པོའི་བསྡུས་པའི་དོན་བཤད་ནས། ད་ནི་དམ་ཚིག་གི་ཕྱག་རྒྱ་གཙོ་བོར་གྱུར་པ་གཟུངས་ཀྱི་དཀྱིལ་འཁོར་གྱི་བསྡུས་པའི་དོན་བཤད་པར་བྱའོ། །འདིར་


DTG057_Page_0017
[མ་དཔེ་གཟིགས་ན་འདིར་གནོན།]

དང་པོ་སྦྱོར་བའི་ཏིང་ངེ་འཛིན་ནི་ཁམས་གསུམ་རྣམ་པར་རྒྱལ་བའི་དཀྱིལ་འཁོར་ཆེན་པོར་གསུངས་པ་ཉིད་ཡིན་ནོ། །དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ། ཧྲཱིཿ་ཞེས་བྱ་བའི་བར་གྱི་གཞུང་གིས་ནི་ཁམས་གསུམ་རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་བསྟན་པ་ཡིན་ནོ། །དེ་ནས་བསྡུས་བ་དང་བྱིན་གྱིས་བརླབས་པ་ནས་བརྩམས་ཏེ། འདིར་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པ་ཡང་དེ་བཞིན་དུ་ཤེས་པར་བྱའོ། །གཟུངས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་བསྒྲུབ་པས་ནི་གཟུངས་ཀྱི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཡང་ཕྱག་ན་རྡོ་རྗེ་ཞེས་བྱ་བའི་བར་གྱི་གཞུང་གིས་ནི། སློབ་དཔོན་གྱི་ལས་ཀྱི་ཆོ་ག་དང༌། ཁམས་གསུམ་རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་དུ་འཇུག་པའི་ཆོ་ག་སྟོན་ཏོ། །དམ་ཚིག་དང་དབང་བསྐུར་བ་ཐོབ་པ་དེ་རྣམས་ལ་སློབ་དཔོན་གྱིས་གཟུངས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་ཇི་ལྟར་འདོད་པ་དེ་བཞིན་དུ་བསྟན་པར་བྱའོ་ཞེས་པའི་དོན་འདི་བསྟན་པར་བྱ་བའི་ཕྱིར། དེ་ནས་ཁྲོ་བོའི་གསང་བའི་རྡོ་རྗེའི་ཕྱག་རྒྱའི་ཡེ་ཤེས་བསླབ་བོ་ཞེས་བྱ་བ་ནས། ཧཱུཾ་མ་ནུ་བཛྲ་ཐཱ་ཞེས་བྱ་བའི་བར་གྱི་གཞུང་གིས་སྟོན་ཏོ། །ཁམས་གསུམ་རྣམ་པར་རྒྱལ་པའི་གཟུངས་ཀྱི་དཀྱིལ་འཁོར་ལས་དངོས་གྲུབ་ཇི་ལྟར་འདོད་པ་གསུངས་པའི་དངོས་གྲུབ་ཀྱང་སྒྲུབ་པ་པོས་ཁམས་གསུམ་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་གསུངས་པའི་ལྷའི་སྦྱོར་བ་བྱས་ནས་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་རྡོ་རྗེ་འཆང་ཆེན་པོ་རིགས་ཀྱི་གསང་བའི་ཕྱག་རྒྱའི་ཡེ་ཤེས་བསླབ་པོ་ཞེས་བྱ་བ་ནས། ཁྲོ་བོའི་ལྟ་བས་ཁྲོ་བོ་དང་ལྡན་ཞེས་བྱ་བའི་བར་གྱི་གཞུང་གིས་སྟོན་ཏོ། །ཁམས་གསུམ་རྣམ་པར་རྒྱལ་བའི་གཟུངས་ཀྱི་དཀྱིལ་འཁོར་གྱི་བསྡུས་པའི་དོན་ཏོ། །ཆོས་ཀྱི་ཕྱག་རྒྱ་གཙོ་བོར་གྱུར་པའི་ཁམས་གསུམ་རྣམ་པར་རྒྱལ་བའི་ཆོས་ཀྱི་དཀྱིལ་འཁོར་གྱི་བསྡུས་


DTG057_Page_0018
[མ་དཔེ་གཟིགས་ན་འདིར་གནོན།]

པའི་དོན་བསྟན་པར་བྱ་སྟེ། འདིར་དང་པོ་སྦྱོར་བའི་ཏིང་ངེ་འཛིན་ནི་ཁམས་གསུམ་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་གསུངས་པའི་དང་པོ་སྦྱོར་བ་བསྐྱེད་ནས། རྡོ་རྗེ་ཧཱུཾ་མཛད་དུ་སྤྲུལ་བའི་མཐར་ཐུག་པ་ཡིན་པར་ཤེས་པར་བྱའོ། །དེ་ནས་བཅོམ་ལྡན་འདས་ཞེས་བྱ་བ་ནས། ཨོཾ་སུ་སྨ་བཛྲ་མུཥྚི་ཀྵ་ཏ་བནྡྷ་ཧཱུཾ་ཕཊ་ཅེས་བྱ་བའི་བར་གྱི་གཞུང་གིས་ནི་ཁམས་གསུམ་རྣམ་པར་རྒྱལ་བའི་ཆོས་ཀྱི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་བསྟན་པ་ཡིན་ནོ། །དེ་ནས་བསྡུ་བ་དང་བྱིན་གྱིས་བརླབས་པ་ནས་བརྩམས་ཏེ། ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པ་ཡང་དེ་བཞིན་དུ་ཤེས་པར་བྱའོ། །ཁམས་གསུམ་རྣམ་པར་རྒྱལ་པའི་ཆོས་ཀྱི་དཀྱིལ་འཁོར་ལས་གསུངས་པའི་སྒྲུབ་པ་ནི་ཁམས་གསུམ་རྣམ་པར་རྒྱལ་བའི་ཆོས་ཀྱི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པས་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཡང་ཕྱག་ན་རྡོ་རྗེ་ཞེས་བྱ་བ་ནས། རྡོ་རྗེ་ཇི་ལྟ་བཞིན་དུ་ལག་པ་གཉིས་སུ་བྱིན་ནོ་ཞེས་བྱ་བའི་བར་གྱི་གཞུང་གིས་ནི་འདིར་སློབ་དཔོན་གྱི་ལས་ཀྱི་ཆོ་ག་དང༌། ཆོས་ཀྱི་དཀྱིལ་འཁོར་དུ་འཇུག་པའི་ཆོ་ག་སྟོན་ཏོ། །འདིར་དབང་བསྐུར་བ་དང་དམ་ཚིག་ཐོབ་པ་དེ་རྣམས་ལ་སློབ་བ་དབོན་གྱིས་ཁམས་གསུམ་རྣམ་པར་རྒྱལ་བའི་ཆོས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་བསྟན་པར་བྱའོ་ཞེས་བྱ་བའི་དོན་འདི་རྟོགས་པར་བྱ་བའི་ཕྱིར། དེ་ནས་རྡོ་རྗེ་ཁྲོ་བོའི་ཡེ་ཤེས་ཕྲ་མོ་རྣམས་སློབས་ཤིག་ཅེས་བྱ་བ་ནས། ཧཱུཾ་ཧྲྀ་ད་ཡ་ཨཱ་ཀཱ་ཪྵ་ཀྲོ་དྷ་པྲ་བེ་ཤ་ཀཱ་ཡཾ་ཧྲྀ་ད་ཡ་ཙྪིནྡ་བིནྡྷ་ཀདྡྷ་ཀནྡྷ་ཧཱུཾ་ཕཊ་ཅེས་བྱ་བའི་བར་གྱི་གཞུང་གིས་སྟོན་ཏོ། །ཁམས་གསུམ་རྣམ་པར་རྒྱལ་པའི་ཆོས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་ནི་ཁམས་གསུམ་རྣམ་པར་རྒྱལ་པའི་དཀྱིལ་འཁོར་ཆེན་པོ་ལས་བཤད་པའི་ཕྱག་རྒྱ་བཞིས་རང་གི་ལྷའི་རྣལ་འབྱོར་ཇི་ལྟ་བ་བཞིན་དུ་བསྐྱེད་ནས། དེའི་འོག་ཏུ་ཁམས་གསུམ་རྣམ་པར་རྒྱལ་བའི་ཆོས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་བཞི་ལ་སོགས་པ་བཅིངས་ཏེ་བསྒྲུབ་པར་བྱའོ་ཞེས་བྱའོ། །དོན་འདི་བསྟན་པར་བྱ་བའི་ཕྱིར། དེ་


DTG057_Page_0019
[མ་དཔེ་གཟིགས་ན་འདིར་གནོན།]

ནས་རྡོ་རྗེ་རིགས་ཀྱི་ཆོས་ཀྱི་ཕྱག་རྒྱའི་ཡེ་ཤེས་བསླབ་པོ་ཞེས་བྱ་བ་ནས། ཆོ་ག་ཇི་ལྟ་བ་བཞིན་དུ་འགྲུབ་པར་འགྱུར་རོ་ཞེས་བྱ་བའི་བར་གྱི་གཞུང་གིས་སྟོན་ཏོ། །ཁམས་གསུམ་རྣམ་པར་རྒྱལ་པའི་ཆོས་ཀྱི་དཀྱིལ་འཁོར་གྱི་བསྡུས་པའི་དོན་ཏོ། །ལས་ཀྱི་ཕྱག་རྒྱ་གཙོ་བོར་གྱུར་པའི་ཁམས་གསུམ་རྣམ་པར་རྒྱལ་པའི་ལས་ཀྱི་དཀྱིལ་འཁོར་གྱི་བསྡུས་པའི་དོན་བརྗོད་པར་བྱ་སྟེ། འདིར་དང་པོ་སྦྱོར་བའི་ཏིང་ངེ་འཛིན་ནི་ཁམས་གསུམ་རྣམ་པར་རྒྱལ་བའི་ཆོས་ཀྱི་དཀྱིལ་འཁོར་དུ་བཤད་པ་ཡིན་ནོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ལས་ཀྱི་ཞེས་བྱ་བ་ནས་ཟླ་བའི་དཀྱིལ་འཁོར་ལ་གནས་ཏེ་འཁོད་དོ་ཞེས་བྱ་བའི་བར་གྱི་གཞུང་གིས་ནི་ཁམས་གསུམ་རྣམ་པར་རྒྱལ་པའི་ལས་ཀྱི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་བསྟན་པ་ཡིན་ནོ། །དེ་ནས་བསྡུ་བ་དང་བྱིན་གྱིས་བརླབས་པ་ནས་བརྩམས་ཏེ་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པ་ཡང་དེ་བཞིན་དུ་ཤེས་པར་བྱའོ། །ཁམས་གསུམ་རྣམ་པར་རྒྱལ་བའི་ལས་ཀྱི་དཀྱིལ་འཁོར་ལས་གསུངས་པའི་སྒྲུབ་པ་ནི་ཁམས་གསུམ་རྣམ་པར་རྒྱལ་བའི་ལས་ཀྱི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པས་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཕྱག་ན་རྡོ་རྗེས་ཞེས་བྱ་བ་ནས་བརྩམས་ཏེ། ལས་ཀྱི་དཀྱིལ་འཁོར་འདིར་ཆོ་ག་རྒྱས་པ་ཇི་ལྟ་བ་བཞིན་དུ་བྱས་ཏེ་ཞེས་བྱ་བའི་གཞུང་གིས་ནི་སློབ་དཔོན་གྱི་ལས་ཀྱི་ཆོ་ག་དང༌། ཁམས་གསུམ་རྣམ་པར་རྒྱལ་བའི་ལས་ཀྱི་དཀྱིལ་འཁོར་དུ་འཇུག་པའི་ཆོ་ག་སྟོན་ཏོ། །དམ་ཚིག་དང་དབང་བསྐུར་བ་ཐོབ་པ་དེ་རྣམས་ལ། སློབ་དཔོན་གྱིས་ཁམས་གསུམ་རྣམ་པར་རྒྱལ་བའི་ལས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་ཇི་ལྟར་མངོན་པར་འདོད་པ་བཞིན་དུ་བསྟན་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། རྡོ་རྗེ་རིགས་ཀྱི་ལས་ཀྱི་ཡེ་ཤེས་རྣམས་བསྐྱེད་དོ་ཞེས་བྱ་བ་ནས། ཨོཾ་བཛྲ་དྷཱ་ར་གུ་ཧྱ་སིདྡྷ་ཧཱུཾ་ཞེས་བྱ་བའི་བར་གྱི་གཞུང་གིས་སྟོན་ཏོ། །ཁམས་གསུམ་རྣམ་པར་


DTG057_Page_0020
[མ་དཔེ་གཟིགས་ན་འདིར་གནོན།]

རྒྱ་པའི་ལས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་ནི་ཁམས་གསུམ་རྣམ་པར་རྒྱལ་བའི་ལས་ཀྱི་དཀྱིལ་འཁོར་ཆེན་པོ་ལས་གསུངས་པའི་ཕྱག་རྒྱ་བཞིས་རང་གི་ལྷའི་རྣལ་འབྱོར་ཇི་ལྟ་བ་བཞིན་དུ་བསྐྱེད་ནས། དེའི་འོག་ཏུ་ཁམས་གསུམ་རྣམ་པར་རྒྱལ་བའི་ལས་ཀྱི་དཀྱིལ་འཁོར་ལས་བཤད་པའི་ཕྱག་རྒྱ་ཆེན་པོ་ལ་སོགས་པས་བཅིངས་ལ་བསྒྲུབ་པར་བྱའོ་ཞེས་བྱ་བ་འདི་བསྟན་པར་བྱ་བའི་ཕྱིར། དེ་ནས་རྡོ་རྗེ་རིགས་ཀྱི་ལས་ཀྱི་ཕྱག་རྒྱ་ཆེན་པོའི་ཡེ་ཤེས་བསླབ་པོ་ཞེས་བྱ་བ་ནས། རྡོ་རྗེ་ལས་ཀྱིས་སོ་ཞེས་བྱ་བའི་བར་གྱི་གཞུང་གིས་སྟོན་ཏོ། །ཁམས་གསུམ་རྣམ་པར་རྒྱལ་བའི་ལས་ཀྱི་དཀྱིལ་འཁོར་གྱི་ལས་ཀྱི་བསྡུས་པའི་དོན་ཏོ། །ཁམས་གསུམ་རྣམ་པར་རྒྱལ་བའི་དུམ་བུ་ལས་ཁམས་གསུམ་རྣམ་པར་རྒྱལ་བའི་དཀྱིལ་འཁོར་ཆེན་པོ་ལ་སོགས་པའི་དོན་བསྡུས་པར་གྱུར་བ་སེམས་ཅན་བར་མ་ལ་སྲེད་པ་རྣམས་རྗེས་སུ་འཛིན་པར་བྱེད་ལ་ཁམས་གསུམ་རྣམ་པར་རྒྱལ་བའི་ཕྱག་རྒྱ་བཞི་པའི་དཀྱིལ་འཁོར་གྱི་བསྡུས་པའི་དོན་བརྗོད་པར་བྱའོ། །འདིར་ཡང་དང་པོ་སྦྱོར་བའི་ཏིང་ངེ་འཛིན་ཁམས་གསུམ་རྣམ་པར་རྒྱལ་བའི་ལས་ཀྱི་དཀྱིལ་འཁོར་དུ་བཤད་པ་ཉིད་ཡིན་ནོ། །དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ནས། ཧཱུཾ་བཛྲ་ཀརྨ་གྲཱྀ་ཀི་ཏ་ཅེས་བྱ་བའི་བར་གྱི་གཞུང་གིས་ནི། ཁམས་གསུམ་རྣམ་པར་རྒྱལ་བའི་ཕྱག་རྒྱ་བཞི་པའི་དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་ལྔ་པོ་གསུངས་པ་ཡིན་ནོ། །སྔ་མ་བཞིན་དུ་བསྡུ་བ་དང་བྱིན་གྱིས་བརླབས་པ་ནས་བརྩམས་ཏེ་ཁམས་གསུམ་རྣམ་པར་རྒྱལ་བའི་ཕྱག་རྒྱ་པ་བའི་དཀྱིལ་འཁོར་གྱི་ལས་ཀྱི་མཆོག་གི་ཏིང་ངེ་འཛིན་ཀྱང་གསུངས་པ་ཡིན་ནོ། ཁམས་གསུམ་རྣམ་པར་རྒྱལ་བའི་དུམ་བུ་ལས་གསུངས་པའི་དངོས་གྲུབ་ནི་ཁམས་གསུམ་རྣམ་པར་རྒྱལ་བའི་ཕྱག་རྒྱ་བཞི་བའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པས་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེས་ཞེས་བྱ་བ་ནས། ཆོ་ག་རྒྱས་པར་བྱ་སྟེ་ཞེས་


DTG057_Page_0021
[མ་དཔེ་གཟིགས་ན་འདིར་གནོན།]

བྱ་བའི་བར་གྱི་གཞུང་གིས་ཁམས་གསུམ་རྣམ་པར་རྒྱལ་བའི་ཕྱག་རྒྱ་བཞི་པའི་དཀྱིལ་འཁོར་དུ་སློབ་དཔོན་གྱི་ལས་ཀྱི་ཆོ་ག་དང་འཇུག་པའི་ཆོ་ག་རྒྱས་པར་སྟོན་ཏོ། །ཁམས་གསུམ་རྣམ་པར་རྒྱལ་བའི་ཕྱག་རྒྱ་བཞི་པའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པ་ལ་སློབ་དཔོན་གྱིས་ཁམས་གསུམ་རྣམ་པར་རྒྱལ་བའི་དུམ་བུ་ལས་བཤད་པའི་དངོས་གྲུབ་རྣམས་བསླབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། བཅུག་ནས་ཕྱག་རྒྱ་བཞི་པའི་དཀྱིལ་འཁོར་གྱི་གསང་བའི་ཕྱག་རྒྱའི་ཡེ་ཤེས་བསླབ་བོ་ཞེས་བྱ་བ་ནས། ཧོ་བཛྲ་ཀརྨ་ཞེས་བྱ་བའི་བར་གྱི་གཞུང་གིས་སྟོན་ཏོ། །ཁམས་གསུམ་རྣམ་པར་རྒྱལ་བའི་དུམ་བུ་ལས་གསུངས་པའི་དངོས་གྲུབ་ནི་ཁམས་གསུམ་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་གསུངས་པའི་ཕྱག་རྒྱ་བཞིས་རང་གི་ལྷའི་རྣལ་འབྱོར་དེ་ལས་གསུངས་པས་བྱས་ལ་བསྒྲུབ་པར་བྱའོ་ཞེས་བྱ་བ་བསྟན་པའི་ཕྱིར་དེ་ནས་ཇི་ལྟ་བ་བཞིན་དུ་རྡོ་རྗེ་མནན་པའི་རྩེ་གསུམ་པའི་ཕྱག་རྒྱ་ལ་སོགས་པ་ཞེས་བྱ་བ་ནས། མཛུབ་མོའི་རྩེ་མོ་གཞག་པའོ་ཞེས་བྱ་བའི་བར་གྱི་གཞུང་གིས་སྟོན་ཏོ། །ཁམས་གསུམ་རྣམ་པར་རྒྱལ་བའི་ཕྱག་རྒྱ་བཞིའི་བསྡུས་པའི་དོན་བསྟན་པའོ། །མདོར་བསྡུས་པ་ལ་དགའ་བའི་སེམས་ཅན་རྗེས་སུ་འཛིན་པར་བྱེད་པ། ཁམས་གསུམ་རྣམ་པར་རྒྱལ་བའི་དུམ་བུ་ལས་གསུངས་པའི་དཀྱིལ་འཁོར་ཐམས་ཅད་བསྡུས་པར་གྱུར་པ། རྡོ་རྗེ་ཧཱུཾ་མཛད་ཀྱི་ཕྱག་རྒྱ་གཅིག་བའི་དཀྱིལ་འཁོར་གྱི་བསྡུས་པའི་དོན་བརྗོད་པར་བྱའོ། །འདིར་དང་པོ་སྦྱོར་བའི་ཏིང་ངེ་འཛིན་ནི་རྡོ་རྗེ་ཧཱུཾ་མཛད་ཀྱི་རྣལ་འབྱོར་ཆེན་པོའོ། །དེ་ནས་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་རང་གི་རྡོ་རྗེའི་དམ་ཚིག་གི་ཁྲོ་བོའི་དམ་ཚིག་འདི་གསུངས་པ་ཧཱུཾ་ཞེས་བྱ་བ་འདིས་ནི་ཁམས་གསུམ་རྣམ་པར་རྒྱལ་བའི་རྡོ་རྗེ་ཧཱུཾ་མཛད་ཀྱི་ཕྱག་རྒྱ་གཅིག་པའི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུངས་པ་ཡིན་ནོ། །དེ་ནས་བསྡུ་བ་དང་བྱིན་གྱིས་བརླབས་པ་ནས་བརྩམས་ཏེ། ཁམས་གསུམ་རྣམ་པར་རྒྱལ་བའི་རྡོ་རྗེ་ཧཱུཾ་


DTG057_Page_0022
[མ་དཔེ་གཟིགས་ན་འདིར་གནོན།]

མཛད་ཀྱི་ཕྱག་རྒྱ་གཅིག་པའི་དཀྱིལ་འཁོར་གྱི་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པ་བསྟན་པ་ཡིན་པར་ཤེས་པར་བྱའོ། །ཁམས་གསུམ་རྣམ་པར་རྒྱལ་བའི་དུམ་བུ་ཐམས་ཅད་ལས་གསུངས་པའི་དངོས་གྲུབ་ནི་རྡོ་རྗེ་ཧཱུཾ་མཛད་ཀྱི་ཕྱག་རྒྱ་གཅིག་པའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པས་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་འདིའི་དཀྱིལ་འཁོར་བཤད་པ་ཞེས་བྱ་བ་ནས། ཆོ་ག་རྒྱས་པ་ཐམས་ཅད་བྱས་ཏེ་ཞེས་བྱ་བའི་བར་གྱི་གཞུང་གྲུབ་ནི་རྡོ་རྗེ་ཧཱུཾ་མཛད་ཀྱི་ཕྱག་རྒྱ་གཅིག་པའི་དཀྱིལ་འཁོར་གྱི་སློབ་དཔོན་གྱི་ལས་ཀྱི་ཆོ་ག་དང༌། དཀྱིལ་འཁོར་དེར་འཇུག་པའི་ཆོ་ག་རྒྱས་པར་སྟོན་ཏོ། །རྡོ་རྗེ་ཧཱུཾ་མཛད་ཀྱི་ཕྱག་རྒྱ་གཅིག་པའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པ་རྣམས་ལ་སྒྲུབ་པའི་ཡེ་ཤེས་བསྟན་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། རྡོ་རྗེ་ཧཱུཾ་མཛད་ཅེས་བྱ་བའི་གསང་བའི་ཕྱག་རྒྱའི་ཡེ་ཤེས་བསླབ་བོ་ཞེས་བྱ་བ་ནས། ཧཱུཾ་བཛྲ་ས་མ་ཡ་ཧཱུཾ་ཞེས་བྱ་བའི་བར་གྱི་གཞུང་གིས་བསྟན་ཏོ། །ཁམས་གསུམ་རྣམ་པར་རྒྱལ་བའི་དུམ་བུ་ཐམས་ཅད་ལས་གསུངས་པའི་དངོས་གྲུབ་ནི། ཁམས་གསུམ་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་གསུངས་པའི་རང་གི་ལྷའི་ཕྱག་རྒྱ་བཞིས་རྣལ་འབྱོར་ཇི་ལྟ་བ་བཞིན་དུ་བསྐྱེད་ལ་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཕྱག་རྒྱ་བཞི་བཅིངས་པ་ཇི་ལྟ་བ་བཞིན་དུ་བསླབ་སྟེ། དེ་བཞིན་དུ་དངོས་གྲུབ་ཏུ་འགྱུར་རོ་ཞེས་བྱ་བས་སྟོན་ཏོ། །དཀྱིལ་འཁོར་དུ་ཇི་ལྟ་བ་བཞིན་དུ་རས་ལ་སོགས་པ་བྲིས་པ་དང་ལུགས་མ་ལ་སོགས་པའི་གཟུགས་ཐམས་ཅད་ལ་ཡང་དངོས་གྲུབ་ནི་ཐུན་མོང་ངོ་ཞེས་བྱ་བའི་བར་གྱི་གཞུང་གིས་དོན་འདི་སྔ་མ་བཞིན་དུ་ཤེས་པར་བྱའོ། །རྡོ་རྗེ་ཧཱུཾ་མཛད་ཀྱི་ཕྱག་རྒྱ་གཅིག་པའི་དཀྱིལ་འཁོར་གྱི་བསྡུས་པའི་དོན་བསྟན་པའོ། །རིགས་འདི་དག་ཐམས་ཅད་ནི་ཁྲོ་བས་ཁྲོ་བ་སྤང་བར་བྱ་བའི་ཕྱིར་གསུངས་པ་ཡིན་ནོ། །འཇིག་རྟེན་པའི་ལྷ་ལ་ལྷག་པར་མོས་པའི་སེམས་ཅན་རྣམས་རྡོ་རྗེའི་རིགས་འཇིག་རྟེན་གསུམ་གྱི་འཁོར་ལོ་ཕྱིར་མི་ལྡོག་པ་ཉིད་


DTG057_Page_0023
[མ་དཔེ་གཟིགས་ན་འདིར་གནོན།]

དུ་འཇོག་པར་བྱེད་པའི་འཇིག་རྟེན་གསུམ་གྱི་འཁོར་ལོའི་དཀྱིལ་འཁོར་ཆེན་པོའི་བསྡུས་པའི་དོན་བརྗོད་པར་བྱའོ། །དེ་ལ་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོར་གསུངས་པའི་དང་པོ་སྦྱོར་བའི་ཏིང་ངེ་འཛིན་རྣམ་པར་བསྒོམས་ལ། རྡོ་རྗེ་ཧཱུཾ་མཛད་དང་རིན་པོ་ཆེ་དང༌། ཆོས་དང་ལས་ཀྱི་ཧཱུཾ་མཛད་སྤྲུལ་ནས་འཇིག་རྟེན་གསུམ་གྱི་འཁོར་ལོ་མ་ལུས་པ་འདོད་པའི་རྒྱལ་པོས་བཀུག་ལ་རང་གི་བསྒོ་བ་ལ་སྦྱར་བ་འདི་ནི་འདིར་དང་པོ་སྦྱོར་བའི་ཏིང་ངེ་འཛིན་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་གཅིག་ཏུ་འདུས་ཏེ་ཞེས་བྱ་བ་ནས། ཨོཾ་བཛྲ་ཀརྨྨ་སཱ་དྷ་ཡ་ཀྲྀཏ་ཅེས་བྱ་བའི་བར་གྱི་གཞུང་གིས་ནི་འཇིག་རྟེན་གསུམ་གྱི་འཁོར་ལོའི་དཀྱིལ་འཁོར་ཆེན་པོའི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་སྟོན་པ་ཡིན་ནོ། །དེ་ནས་བསྡུ་བ་དང་བྱིན་གྱིས་བརླབས་པ་ནས་བརྩམས་ཏེ། ལས་ཀྱི་མཆོག་ཅེས་བྱ་བའི་ཏིང་ངེ་འཛིན་ནི་སྔ་མ་བཞིན་དུ་ཤེས་པར་བྱའོ། །འཇིག་རྟེན་གསུམ་གྱི་འཁོར་ལོའི་དཀྱིལ་འཁོར་ཆེན་པོ་དམ་ཚིག་དང་དབང་བསྐུར་བ་ཐོབ་པས་དེ་ལས་གསུངས་པའི་དངོས་གྲུབ་བསྒྲུབ་པར་བྱའོ་ཞེས་བསྟན་པར་བྱ་བའི་ཕྱིར། དེ་ནས་བཅོམ་ལྡན་འདས་ཕྱག་ན་རྡོ་རྗེ་ཞེས་བྱ་བ་ནས་ཇི་ལྟར་རྡོ་རྗེ་དམ་ཚིག་གི་དཀྱིལ་འཁོར་ཆེན་པོ་བཞིན་དུ་བྱའོ་ཞེས་བྱ་བའི་བར་གྱི་གཞུང་གིས་ནི་འཇིག་རྟེན་གསུམ་གྱི་འཁོར་ལོའི་དཀྱིལ་འཁོར་ཆེན་པོའི་སློབ་དཔོན་གྱི་ལས་ཀྱི་ཆོ་ག་དང༌། དེར་འཇུག་པའི་ཆོ་ག་རྒྱས་པར་སྟོན་པ་ཡིན་ནོ། །དམ་ཚིག་དབང་བསྐུར་བ་ཐོབ་པ་དེ་རྣམས་ལ་ཇི་ལྟར་འདོད་པའི་དངོས་གྲུབ་བསྒྲུབ་པར་བྱ་བའི་ཕྱིར། ཕྱག་རྒྱ་བཅིང་བ་བསྟན་པར་བྱ་བ་དང༌། སྒྲུབ་པ་པོ་སྤྲོ་བ་བསྐྱེད་པར་བྱ་བའི་ཕྱིར། ཕྱག་རྒྱའི་ཕན་ཡོན་བཤད་པར་བྱའོ་ཞེས་བྱ་བའི་དོན་གཉིས་པོ་འདི་བསྟན་པར་བྱ་བའི་ཕྱིར། དེ་ནས་ཕྱག་རྒྱ་ཆེན་པོ་བཅིང་བ་བསླབ་པར་བྱའོ་ཞེས་བྱ་བ་ནས་བྲན་གྱི་ཕྱག་རྒྱ་ཕྱག་རྒྱ་རྣམས་སོ་ཞེས་བྱ་བའི་བར་གྱི་གཞུང་གིས་སྟོན་ཏོ། །འཇིག་རྟེན་གསུམ་གྱི་འཁོར་ལོའི་དཀྱིལ་འཁོར་ཆེན་པོའི་བསྡུས་པའི་


DTG057_Page_0024
[མ་དཔེ་གཟིགས་ན་འདིར་གནོན།]

དོན་བསྟན་པའོ། །དམ་ཚིག་གི་ཕྱག་རྒྱ་གཙོ་བོར་གྱུར་པའི་འཇིག་རྟེན་གསུམ་གྱི་འཁོར་ལོའི་གཟུངས་ཀྱི་དཀྱིལ་འཁོར་གྱི་བདུས་པའི་དོན་བརྗོད་པར་བྱ་སྟེ་དེ་ལ་དང་པོ་སྦྱོར་བའི་ཏིང་ངེ་འཛིན་གསུམ་གྱི་འཁོར་ལོ་དཀྱིལ་འཁོར་ཆེན་པོ་གསུངས་པ་ཉིད་འདིར་གཟུང་བར་བྱའོ། །དེ་ནས་ཡང་བཅོམ་ལྡན་འདས་ཞེས་བྱ་བ་ནས། ཨོཾ་བཛྲ་ཧ་རི་ནི་ཧཾ་ཞེས་བྱ་བའི་བར་གྱི་གཞུང་གིས་འཇིག་རྟེན་གསུམ་གྱི་འཁོར་ལོའི་གཟུངས་ཀྱི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ནོ།།དེ་ནས་བསྡུ་བ་དང་བྱིན་གྱིས་བརླབས་བ་ནས་བརྩམས་ཏེ། ལས་ཀྱི་མཆོག་ཅེས་བྱ་བའི་ཏིང་ངེ་འཛིན་གསུམ་པ་ཡིན་པར་སྔ་མ་བཞིན་དུ་ཤེས་པར་བྱའོ། །འཇིག་རྟེན་གསུམ་གྱི་འཁོར་ལོ་ལས་གསུངས་པའི་དཀྱིལ་འཁོར་སྒྲུབ་པ་རྣམས་ཀྱང་འཇིག་རྟེན་གསུམ་གྱི་འཁོར་ལོའི་གཟུངས་ཀྱི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པས་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཡང་ཕྱག་ན་རྡོ་རྗེ་ཞེས་བྱ་བ་ནས། དཀྱིལ་འཁོར་རིམ་པ་བཞིན་དུ་བསྟན་ཏེ་ཞེས་བྱ་བའི་བར་གྱི་གཞུང་གིས་ནི་སློབ་དཔོན་གྱི་ལས་ཀྱི་ཆོ་ག་དང། དཀྱིལ་འཁོར་དུ་འཇུག་པའི་ཆོ་ག་སྟོན་ཏོ། །འཇིག་རྟེན་གསུམ་གྱི་འཁོར་ལོའི་གཟུངས་ཀྱི་དཀྱིལ་འཁོར་ལས་གསུངས་པའི་གསང་བའི་ཡེ་ཤེས་ནི་འཇིག་རྟེན་གསུམ་གྱི་འཁོར་ལོའི་གཟུངས་ཀྱི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པ་ལ་བསྟན་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དམ་ཚིག་གི་ཕྱག་རྒྱ་གསང་བ་སྨྲོས་ཤིག་ཅེས་བྱ་བ་ནས། རྡོ་རྗེ་འཆང་བས་གསུངས་སོ་ཞེས་བྱ་བའི་བར་གྱི་གཞུང་གིས་སྟོན་ཏོ། །འཇིག་རྟེན་གསུམ་གྱི་འཁོར་ལོའི་གཟུངས་ཀྱི་དཀྱིལ་འཁོར་གྱི་སྒྲུབ་པ་པོས་ཀྱང་འཇིག་རྟེན་གསུམ་གྱི་འཁོར་ལོའི་དཀྱིལ་འཁོར་ཆེན་པོ་ལས་གསུངས་པའི་རང་གི་ལྷའི་རྣལ་འབྱོར་བྱས་ལ་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་དམ་ཚིག་གི་ཕྱག་རྒྱ་བསླབ་པར་བྱའོ་ཞེས་བྱ་བ་ནས། མྱུར་དུ་སྤྲོས་པ་ཡང་དེ་བཞིན་ནོ་ཞེས་བྱ་བའི་བར་གྱི་གཞུང་གིས་


DTG057_Page_0025
[མ་དཔེ་གཟིགས་ན་འདིར་གནོན།]

སྟོན་ཏོ། །འཇིག་རྟེན་གསུམ་གྱི་གཟུངས་ཀྱི་དཀྱིལ་འཁོར་གྱི་བསྡུས་པའི་དོན་བསྟན་པའོ། །ཆོས་ཀྱི་ཕྱག་རྒྱ་གཙོ་བོར་གྱུར་པའི་འཇིག་རྟེན་གསུམ་གྱི་འཁོར་ལོའི་ཆོས་ཀྱི་དཀྱིལ་འཁོར་གྱི་བསྡུས་པའི་དོན་བརྗོད་པར་བྱ་སྟེ། འདིར་དང་པོ་སྦྱོར་བའི་ཏིང་ངེ་འཛིན་ནི་འཇིག་རྟེན་གསུམ་གྱི་འཁོར་ལོའི་དཀྱིལ་འཁོར་ཆེན་པོ་གསུངས་པ་ཉིད་ཡིན་ནོ། །དེ་ནས་བཅོམ་ལྡན་འདས་ཞེས་བྱ་བ་ནས། ཨོཾ་པི་པ་པི་པ་ཧཱུཾ་ཕཊ་ཅེས་བྱ་བའི་གཞུང་གིས་ནི་འཇིག་རྟེན་གསུམ་གྱི་འཁོར་ལོའི་དཀྱིལ་འཁོར་གྱི་ཆོས་ཀྱི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་བསྟན་པ་ཡིན་ནོ། །དེ་ནས་བསྡུ་བ་དང་བྱིན་གྱིས་བརླབས་པ་སྔོན་དུ་འགྲོ་བ་ནི་ལས་ཀྱི་མཆོག་ཅེས་བྱ་བའི་ཏིང་ངེ་འཛིན་གསུམ་པ་ཡིན་པར་སྔ་མ་བཞིན་དུ་ཤེས་པར་བྱའོ། །འཇིག་རྟེན་གསུམ་གྱི་འཁོར་ལོའི་ཆོས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་ནི་འཇིག་རྟེན་གསུམ་གྱི་འཁོར་ལོའི་ཆོས་ཀྱི་དཀྱིལ་འཁོར་དུ་དམ་ཚིག་དང་དབང་བསྐུར་པ་ཐོབ་པས་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཡང་ཕྱག་ན་རྡོ་རྗེས་རྡོ་རྗེའི་རིགས་ཐམས་ཅད་ཀྱི་ཞེས་བྱ་བ་ནས། གདོང་གཡོགས་བཀྲོལ་ལ་དཀྱིལ་འཁོར་བསྟན་པར་བྱའོ་ཞེས་བྱ་བའི་བར་གྱི་གཞུང་གིས་འཇིག་རྟེན་གསུམ་གྱི་འཁོར་ལོའི་ཆོས་ཀྱི་དཀྱིལ་འཁོར་གྱི་སློབ་དཔོན་གྱི་ལས་ཀྱི་ཆོ་ག་དང༌། དེར་འཇུག་པའི་ཆོ་ག་སྟོན་ཏོ། །འཇིག་རྟེན་གསུམ་གྱི་འཁོར་ལོའི་ཆོས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་ནི་འཇིག་རྟེན་གསུམ་གྱི་འཁོར་ལོའི་དཀྱིལ་འཁོར་ཆེན་པོ་ལས་གསུངས་པའི་ལྷའི་རྣལ་འབྱོར་བྱས་ལ་དེའི་རྗེས་ལ་འཇིག་རྟེན་གསུམ་གྱི་འཁོར་ལོའི་ཆོས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་བཅིངས་ཏེ་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། ཆོས་ཀྱི་དམ་ཚིག་གི་ཕྱག་རྒྱའི་ཡེ་ཤེས་སློབས་ཤིག་ཅེས་བྱ་བ་ནས། ཆུ་ལས་ལྷག་པའི་རོ་གཞན་མེད། །ཅེས་བྱ་བའི་བར་གྱི་གཞུང་གི་སྟོན་ཏོ། །འཇིག་རྟེན་གསུམ་གྱི་འཁོར་ལོའི་ཆོས་ཀྱི་དཀྱིལ་འཁོར་གྱི་


DTG057_Page_0026
[མ་དཔེ་གཟིགས་ན་འདིར་གནོན།]

དཀྱིལ་འཁོར་བསྡུས་པའི་དོན་བསྟན་པའོ། །ལས་ཀྱི་ཕྱག་རྒྱ་གཙོ་བོར་གྱུར་པའི་འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་གྱི་བསྡུས་པའི་དོན་བརྗོད་པར་བྱའོ། །འདི་ཡང་དང་པོ་སྦྱོར་བའི་ཏིང་ངེ་འཛིན་ནི་འཇིག་རྟེན་གསུམ་གྱི་འཁོར་ལོའི་ཆོས་ཀྱི་དཀྱིལ་འཁོར་ཆེན་པོར་གསུངས་པ་ཉིད་ཡིན་ནོ། །དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་དམ་ཚིག་ལས་འབྱུང་བ་ཞེས་བྱ་བ་ནས། རྡོ་རྗེ་བྲན་མོ་རྣམས་ཀྱིའོ་ཞེས་བྱ་བའི་བར་གྱི་གཞུང་གི་འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་བསྡུས་བ་དང་བྱིན་གྱིས་བརླབས་པ་ནས་བརྩམས་ཏེ། ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པ་ཡིན་པར་སྔ་མ་བཞིན་དུ་ཤེས་པར་བྱའོ། །འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་ལས་གསུངས་པའི་བསྒྲུབ་པ་ནི་འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པས་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཕྱག་ན་རྡོ་རྗེས་ཡང་ཞེས་བྱ་བ་ནས་གདོང་གཡོགས་བཀྲོལ་ཏེ་ཞེས་བྱ་བའི་བར་གྱི་གཞུང་གིས་སློབ་དཔོན་གྱི་ལས་ཀྱི་ཆོ་ག་དང༌། འཇུག་པའི་ཆོ་ག་རྒྱས་པར་སྟོན་ཏོ། །འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་ལས་བཤད་པའི་དངོས་གྲུབ་ནི་འཇིག་རྟེན་གསུམ་གྱི་འཁོར་ལོའི་དཀྱིལ་འཁོར་ཆེན་པོ་ལ་གསུངས་པའི་ལྷའི་རྣལ་འབྱོར་བྱས་ནས་དེའི་རྗེས་ལ་ལས་ཀྱི་དཀྱིལ་འཁོར་ལས་བཤད་པའི་ལས་ཀྱི་ཕྱག་རྒྱ་རྣམས་ཀྱིས་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། །གར་གྱི་མཆོད་པའི་ཕྱག་རྒྱའི་ཡེ་ཤེས་སློབས་ཤིག་ཅེས་བྱ་བ་ནས་བརྩམས་ཏེ། ལས་བསྒྲུབ་པར་ཡང་ངེས་པར་འགྱུར་ཞེས་བྱ་བའི་བར་གྱི་གཞུང་གིས་སྟོན་ཏོ། །འཇིག་རྟེན་གསུམ་གྱི་འཁོར་ལོའི་ལས་ཀྱི་དཀྱིལ་འཁོར་གྱི་བསྡུས་པའི་དོན་བསྟན་པའོ། །གཏི་མུག་གི་གཉེན་པོར་གྱུར་པ་པདྨའི་རིགས་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པའི་


DTG057_Page_0027
[མ་དཔེ་གཟིགས་ན་འདིར་གནོན།]

ཆོས་ཀྱི་ཕྱག་རྒྱའི་ངོ་བོ་ཉིད་ཀྱི་བསྡུས་པའི་དོན་བརྗོད་པར་བྱའོ། །དེ་ལ་རེ་ཞིག་ཕྱག་རྒྱ་ཆེན་པོ་གཙོ་བོར་གྱུར་པའི་འགྲོ་བ་འདུལ་བའི་དཀྱིལ་འཁོར་ཆེན་པོའི་བསྡུས་པའི་དོན་བཤད་པར་བྱ་སྟེ། འདིར་དང་པོ་སྦྱོར་བའི་ཏིང་ངེ་འཛིན་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པའི་དང་པོ་སྦྱོར་བ་བྱས་ལ། རྡོ་རྗེ་སེམས་དཔའ་དང༌། རྡོ་རྗེ་རིན་ཆེན་དང༌། རྡོ་རྗེ་ཆོས་དང༌། རྡོ་རྗེ་ལས་ལས་སྤྲུལ་པའི་བར་ཡིན་པར་ཤེས་པར་བྱའོ། །དེ་ནས་ཡང་དེ་བཞིན་གཤེགས་པ་ཐམས་ཅད་གཅིག་ཏུ་འདུས་ཏེ་ཞེས་བྱ་བ་ནས། ལྷ་རྣམས་སུ་ཡང་གྱུར་པ་ཡིན་ཞེས་བྱ་བའི་བར་གྱི་གཞུང་གིས་ནི་འགྲོ་བ་འདུལ་བའི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་སྟོན་པ་ཡིན་ནོ། །དེ་ནས་བསྡུ་བ་དང་བྱིན་གྱི་བརླབས་པ་ནས་བརྩམས་ཏེ་སྔ་མ་བཞིན་དུ་ལས་ཀྱི་མཆོག་གི་ཏིང་ངེ་འཛིན་ཡིན་པར་ཤེས་པར་བྱའོ། །འགྲོ་བ་འདུལ་བའི་དཀྱིལ་འཁོར་ཆེན་པོར་དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་དེ་ལས་གསུངས་པའི་ཕྱག་རྒྱ་ཆེན་པོ་ལ་སོགས་པའི་བསྒྲུབ་པ་ལ་འཇུག་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཡང་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་ཀྱི་དབང་པོས་ཞེས་བྱ་བ་ནས། དེ་ལ་ཆོས་ཉིད་ནི་དེ་ཡིན་ནོ་ཞེས་བྱ་བའི་བར་གྱི་གཞུང་གིས་ནི་འགྲོ་བ་འདུལ་བའི་དཀྱིལ་འཁོར་ཆེན་པོའི་སློབ་དཔོན་གྱི་ལས་ཀྱི་ཆོ་ག་དང་འཇུག་པའི་ཆོ་ག་སྟོན་ཏོ། །འགྲོ་བ་འདུལ་བའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པ་རྣམས་ལ་སློབ་དཔོན་གྱིས་ཇི་ལྟར་འདོད་པའི་དངོས་གྲུབ་ཀྱི་ཡེ་ཤེས་བསླབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་པདྨའི་རིགས་ཀྱི་ཕྱག་རྒྱའི་ཡེ་ཤེས་བསླབ་པར་བྱ་སྟེ་ཞེས་བྱ་བ་ནས། ལོ་ཀ་ཤྭ་ར་ཞེས་བྱ་བའི་བར་གྱི་གཞུང་གིས་སྟོན་ཏོ། །འགྲོ་བ་འདུལ་བའི་དཀྱིལ་འཁོར་ལས་གསུངས་པའི་དངོས་གྲུབ་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་གསུངས་པའི་རང་གི་ལྷའི་ཕྱག་རྒྱ་བ་ཞིས་


DTG057_Page_0028
[མ་དཔེ་གཟིགས་ན་འདིར་གནོན།]

རང་གི་ལྷའི་རྣལ་འབྱོར་བྱས་ལ་བསྒྲུབ་པར་བྱའོ་ཞེས་བྱ་བ་དང༌། གདུལ་བྱ་རྣམས་སྤྲོ་བ་བསྐྱེད་པར་བྱ་བའི་ཕྱིར་ཕྱག་རྒྱའི་ཕན་ཡོན་བཤད་པར་བྱ་བའི་དོན་འདི་གཉིས་བསྟན་པར་བྱ་བའི་ཕྱིར། དེ་ནས་དཀྱིལ་འཁོར་ཆེན་པོ་ཐམས་ཅད་ཀྱི་ཕྱག་རྒྱའི་ཡེ་ཤེས་བསླབ་བོ་ཞེས་བྱ་བ་ནས། ལས་ཀྱི་ཕྱག་རྒྱ་བསྒྲུབ་པར་བྱ། །ཞེས་བྱ་བའི་བར་གྱི་གཞུང་གིས་སྟོན་ཏོ། །འགྲོ་བ་འདུལ་བའི་དཀྱིལ་འཁོར་ཆེན་པོའི་བསྡུས་པའི་དོན་བསྟན་པའོ། །དམ་ཚིག་གི་ཕྱག་རྒྱ་གཙོ་བོར་གྱུར་པའི་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་གྱི་བསྡུས་པའི་དོན་བརྗོད་པར་བྱ་སྟེ། འདིར་དང་པོ་སྦྱོར་བའི་ཏིང་ངེ་འཛིན་ནི་འགྲོ་བ་འདུལ་བའི་དཀྱིལ་འཁོར་ཆེན་པོར་བཤད་པ་ཉིད་ཡིན་པར་ཤེས་པར་བྱའོ། །དེ་ནས་ཡང་བཅོམ་ལྡན་འདས་ཞེས་བྱ་བ་ནས། ཨོཾ་ཀརྨ་ས་མ་ཡེ་ཧཱུཾ་ཞེས་བྱ་བའི་བར་གྱི་གཞུང་གིས་ནི་དཀྱིལ་འཁོར་གྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་སྟོན་པ་ཡིན་ནོ། །དེ་ནས་བསྡུ་བ་དང་བྱིན་གྱི་བརླབས་པ་ནས་བརྩམས་ཏེ། སྔ་མ་བཞིན་དུ་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་ཡིན་པར་ཤེས་པར་བྱའོ། །འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་ནི་དེའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པས་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་ཀྱི་དབང་པོས་ཞེས་བྱ་བ་ནས། གདོང་གཡོགས་བཀྲོལ་ཏེ་ཞེས་བྱ་བའི་བར་གྱི་གཞུང་གིས་ནི་སློབ་དཔོན་གྱི་ལས་ཀྱི་ཆོ་ག་དང༌། དཀྱིལ་འཁོར་དུ་འཇུག་པའི་ཆོ་ག་སྟོན་ཏོ། །དེ་ནས་དམ་ཚིག་དང་དབང་བསྐུར་བ་ཐོབ་པ་རྣམས་ལ་འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་གསུངས་པའི་ཇི་ལྟར་འདོད་པའི་དངོས་གྲུབ་བསླབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། སྣོད་ཇི་ལྟ་བ་བཞིན་དུ་ཡེ་ཤེས་བསྐྱེད་དེ་ཞེས་བྱ་བ་ནས། ཨོཾ་བི་ཤྭ་པདྨ་སན་ཡོ་ག་སའྡྷ་ཡ་སཏཱི་ཞེས་བྱ་བའི་བར་གྱི་གཞུང་གིས་སྟོན་ཏོ། །འགྲོ་བ་འདུལ་བའི་གཟུངས་ཀྱི་དཀྱིལ་འཁོར་ལས་


DTG057_Page_0029
[མ་དཔེ་གཟིགས་ན་འདིར་གནོན།]

གསུངས་པའི་དངོས་གྲུབ་ཀྱང་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་གསུངས་པའི་རང་རང་གི་ལྷའི་རྣལ་འབྱོར་ཇི་ལྟ་བ་བཞིན་བྱས་ལ་བསྒྲུབ་པར་བྱའོ་ཞེས་བྱ་བའི་དོན་འདི་ཁོང་དུ་ཆུད་པར་བྱ་བའི་ཕྱིར། དེ་ནས་པདྨའི་དཀྱིལ་འཁོར་རིགས་ཀྱི་གསང་བ་ཞེས་བྱ་བ་ནས། གསང་བའི་ཁུ་ཚུར་གཉིས་བྱས་པའོ་ཞེས་བྱ་བའི་བར་གྱི་གཞུང་གིས་སྟོན་ཏོ། །འགྲོ་བ་འདུལ་བའི་གཟུངས་ཀྱི་དཀྱིལ་འཁོར་གྱི་བསྡུས་པའི་དོན་བསྟན་པའོ། །ཆོས་ཀྱི་ཕྱག་རྒྱ་བཙོ་བོར་གྱུར་པའི་འགྲོ་བ་འདུལ་བའི་ཆོས་ཀྱི་དཀྱིལ་འཁོར་གྱི་བསྡུས་པའི་དོན་བརྗོད་པར་བྱ་སྟེ། དེ་ལ་འདིར་དང་པོ་སྦྱོར་བའི་ཏིང་ངེ་འཛིན་ནི་འགྲོ་བ་འདུལ་བའི་ཆོས་ཀྱི་དཀྱིལ་འཁོར་ཆེན་པོར་བཤད་པ་ཉིད་ཡིན་ནོ། །དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་ཡེ་ཤེས་ཞེས་བྱ་བ་ནས། ཨོཾ་ཀརྨ་དྷཾ་ཧཱུཾ་ཞེས་བྱ་བའི་བར་གྱི་གཞུང་གིས་ནི་འགྲོ་བ་འདུལ་བའི་ཆོས་ཀྱི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་སྟོན་ཏོ། །དེ་ནས་བསྡུ་བ་དང་བྱིན་གྱིས་བརླབས་པ་སྔོན་དུ་འགྲོ་བས་དེ་བཞིན་དུ་ལས་ཀྱི་རྒྱལ་པོ་མཆོག་གི་ཏིང་ངེ་འཛིན་ཡིན་པར་ཤེས་པར་བྱའོ། །འགྲོ་བ་འདུལ་བའི་ཆོས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་ནི་འགྲོ་བ་འདུལ་བ་ཆོས་ཀྱི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པས་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་སྤྱན་རས་གཟིགས་ཀྱི་དབང་པོ་ཞེས་བྱ་བ་ནས། སྡུག་བསྔལ་བར་གྱུར་ཏ་རེ་ཞེས་བྱ་བའི་བར་གྱི་གཞུང་གིས་ནི་སློབ་དཔོན་གྱི་ལས་ཀྱི་ཆོ་ག་དང༌། འཇུག་པའི་ཆོ་ག་སྟོན་ཏོ། །འགྲོ་བ་འདུལ་བའི་ཆོས་ཀྱི་དཀྱིལ་འཁོར་དུ་དབང་བསྐུར་བ་དང་དམ་ཚིག་ཐོབ་པ་རྣམས་ལ་ཆོས་ཀྱི་དཀྱིལ་འཁོར་ལས་གསུངས་པའི་ཇི་ལྟར་འདོད་པའི་དངོས་གྲུབ་སློབ་དཔོན་གྱིས་བསྟན་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཡེ་ཤེས་བསྐྱེད་པར་བྱའོ་ཞེས་བྱ་བ་ནས། ཨོཾ་ཀརྨ་པདྨ་ཧོ་ཞེས་བྱ་བའི་བར་གྱི་གཞུང་གིས་སྟོན་ཏོ། །འགྲོ་བ་འདུལ་


DTG057_Page_0030
[མ་དཔེ་གཟིགས་ན་འདིར་གནོན།]

བའི་ཆོས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་གསུངས་པའི་ཕྱག་རྒྱ་བཞིས་རང་གི་ལྷའི་རྣལ་འབྱོར་ཇི་ལྟ་བ་བཞིན་དུ་བྱས་ནས་དེའི་རྗེས་ལ་འགྲོ་བ་འདུལ་བའི་ཆོས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ། བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཡེ་ཤེས་ཀྱི་དཀྱིལ་འཁོར་གྱི་ཕྱག་རྒྱ་ཆེན་པོའི་ཡེ་ཤེས་བསླབ་བོ་ཞེས་བྱ་བ་ནས། ལས་ཀྱི་ཕྱག་རྒྱ་གཉིས་སུ་བྱས། །ཞེས་བྱ་བའི་བར་གྱི་གཞུང་གིས་སྟོན་ཏོ། །འགྲོ་བ་འདུལ་བའི་ཆོས་ཀྱི་དཀྱིལ་འཁོར་གྱི་བསྡུས་པའི་དོན་བསྟན་པའོ། །ལས་ཀྱི་ཕྱག་རྒྱ་གཙོ་བོར་གྱུར་པ་འགྲོ་བ་འདུལ་བའི་ལས་ཀྱི་དཀྱིལ་འཁོར་གྱི་བསྡུས་པའི་དོན་བརྗོད་པར་བྱ་སྟེ། དེ་ལ་དང་པོ་སྦྱོར་བའི་ཏིང་ངེ་འཛིན་ནི་འགྲོ་བ་འདུལ་བའི་དཀྱིལ་འཁོར་ཆེན་པོར་བཤད་པ་ཉིད་ཡིན་པར་གཟུང་བར་བྱའོ། །དེ་ནས་བཅོམ་ལྡན་འདས་ཞེས་བྱ་བ་ནས། ཨོཾ་བི་ཤྭ་ཀརྨེ་ཧཱུཾ་ཞེས་བྱ་བའི་བར་གྱི་གཞུང་གིས་ནི་འགྲོ་བ་འདུལ་བའི་ལས་ཀྱི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་སྟོན་ཏེ། དེ་ནས་བསྡུ་བ་དང་བྱིན་གྱིས་བརླབས་པ་ལ་སོགས་པ་ནི་དེ་བཞིན་དུ་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །འགྲོ་བ་འདུལ་བའི་དཀྱིལ་འཁོར་ལས་བཤད་པའི་དངོས་གྲུབ་ནི་འགྲོ་བ་འདུལ་བའི་ལས་ཀྱི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པས་བྱའོ་ཞེས་བྱ་བའི་འདི་བསྟན་པར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་ཀྱི་དབང་པོས་ཞེས་བྱ་བ་ནས། སེམས་ཅན་དམྱལ་པར་ལྷུང་བར་གྱུར་ཏ་རེ་ཞེས་བྱ་བའི་བར་གྱི་གཞུང་གིས་ནི་སློབ་དཔོན་གྱི་ལས་ཀྱི་ཆོ་ག་དང༌། དཀྱིལ་འཁོར་དུ་འཇུག་པའི་ཆོ་ག་སྟོན་ཏོ། །དམ་ཚིག་དང་དབང་བསྐུར་བ་ཐོབ་པ་དེ་རྣམས་སློབ་དཔོན་གྱིས་འགྲོ་བ་འདུལ་བའི་ལས་ཀྱི་དཀྱིལ་འཁོར་ལས་བཤད་པའི་དངོས་གྲུབ་རྣམས་ཇི་ལྟར་འདོད་པ་བཞིན་དུ་བསླབ་


DTG057_Page_0031
[མ་དཔེ་གཟིགས་ན་འདིར་གནོན།]

པར་བྱའོ་ཞེས་བྱ་བའི་དོན་བསྟན་པར་བྱ་བའི་ཕྱིར། དེ་ནས་ཡེ་ཤེས་བསྐྱེད་པར་བྱ་སྟེ་ཞེས་བྱ་བ་ནས། ཨོཾ་མ་ཧཱ་སུ་ཁ་པདྨ་ཀྲྀ་ཏ་ཧཾ་ཞེས་བྱ་བའི་བར་གྱི་གཞུང་གིས་སྟོན་ཏོ། །འགྲོ་བ་འདུལ་བའི་ལས་ཀྱི་དཀྱིལ་འཁོར་ལས་བཤད་པའི་དངོས་གྲུབ་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་གསུངས་བའི་ཕྱག་རྒྱ་བཞིས་རང་གི་ལྷའི་རྣལ་འབྱོར་ཇི་ལྟ་བ་བཞིན་དུ་བྱས་ལ་དེའི་རྗེས་ལ་འགྲོ་བ་འདུལ་བའི་ལས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ལས་ཀྱི་ཕྱག་རྒྱ་ཆེན་པོ་ཇི་ལྟ་བ་བཞིན་དུ་བསླབ་པར་བྱ་སྟེ་ཞེས་བྱ་བ་ནས། ལས་ཀྱི་ཕྱག་རྒྱ་ཡང་དག་སྦྱར། །ཞེས་བྱ་བའི་བར་གྱི་གཞུང་གིས་སྟོན་ཏོ། །འགྲོ་བ་འདུལ་བའི་ལས་ཀྱི་དཀྱིལ་འཁོར་གྱི་བསྡུས་པའི་དོན་བསྟན་པའོ། །འགྲོ་བ་འདུལ་བའི་དཀྱིལ་འཁོར་ཆེན་པོ་ལ་སོགས་པ་བསྡུས་པར་གྱུར་པ་བར་མ་ལ་དགའ་བའི་སེམས་ཅན་རྗེས་སུ་འཛིན་པར་བྱེད་པའི་འགྲོ་བ་འདུལ་བའི་ཕྱག་རྒྱ་བཞི་པའི་དཀྱིལ་འཁོར་གྱི་བསྡུས་པའི་དོན་བརྗོད་པར་བྱ་སྟེ། འདིར་དང་པོ་སྦྱོར་བའི་ཏིང་ངེ་འཛིན་ནི་འགྲོ་བ་འདུལ་བའི་དཀྱིལ་འཁོར་ཆེན་པོར་བཤད་པ་ཉིད་དོ། །དེ་ནས་ཡང་བཅོམ་ལྡན་འདས་ཀྱིས་རྡོ་རྗེ་ཆོས་ཀྱི་དམ་ཚིག་གི་ཕྱག་རྒྱ་ཞེས་བྱ་བ་ནས། ཨོཾ་སརྦྦ་མུ་ཁཾ་ཧཱུཾ་ཞེས་བྱ་བའི་བར་གྱིས་ནི་འགྲོ་བ་འདུལ་བའི་ཕྱག་རྒྱ་བཞི་པའི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་ལྔ་པོ་གསུངས་པ་ཡིན་ནོ། །དེ་ནས་བསྡུ་བ་དང་བྱིན་གྱིས་བརླབས་པ་ལ་སོགས་པ་སྔ་མ་བཞིན་དུ་འགྲོ་བ་འདུལ་བའི་ཕྱག་རྒྱ་བཞི་པའི་དཀྱིལ་འཁོར་གྱི་ལས་ཀྱི་མཆོག་གི་ཏིང་ངེ་འཛིན་ལྔ་པོ་ཡིན་པར་ཤེས་པར་བྱའོ། །འགྲོ་བ་འདུལ་བའི་དུམ་བུ་ལས་གསུངས་པའི་དངོས་གྲུབ་རྣམས་ནི་འགྲོ་བ་འདུལ་བའི་ཕྱག་རྒྱ་བཞི་པའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པས་བསྒྲུབ་པར་བྱའོ་ཞེས་བྱ་བའི་དོན་འདི་གསལ་བར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་ཀྱི་དབང་


DTG057_Page_0032
[མ་དཔེ་གཟིགས་ན་འདིར་གནོན།]

པོས་ཞེས་བྱ་བ་ནས། མི་བདེ་བ་མ་སྤངས་པར་དུས་བྱས་ནས་སེམས་ཅན་དམྱལ་བར་ལྟུང་ང་རེ་ཞེས་བསྒོ་ཞིག་ཅེས་བྱ་བའི་བར་གྱི་གཞུང་གིས་ནི་འགྲོ་བ་འདུལ་བའི་ཕྱག་རྒྱ་བཞི་པའི་དཀྱིལ་འཁོར་གྱི་སློབ་དཔོན་གྱི་ལས་ཀྱི་ཆོ་ག་དང༌། འཇུག་པའི་ཆོ་ག་རྒྱས་པར་སྟོན་ཏོ། །འགྲོ་བ་འདུལ་བའི་ཕྱག་རྒྱ་བཞི་པའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པ་རྣམས་ལ་སློབ་དཔོན་གྱིས་འགྲོ་བ་འདུལ་བའི་ཕྱག་རྒྱ་བཞིའི་དཀྱིལ་འཁོར་དུ་གསུངས་པའི་དངོས་གྲུབ་རྣམས་བསླབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་དེའི་ཡེ་ཤེས་བསྐྱེད་པར་བྱ་ཞེས་བྱ་བ་ནས། ཨོཾ་སཱ་དྷ་ཡ་པདྨ་རཱ་ཀ་ས་མ་ཡ་ཨཱཿ་ཞེས་བྱ་བའི་བར་གྱི་གཞུང་གིས་སྟོན་ཏོ། །འགྲོ་བ་འདུལ་བའི་དུམ་བུ་ལས་གསུངས་པའི་དངོས་གྲུབ་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་གསུངས་པའི་ཕྱག་རྒྱ་བཞིས་རང་གི་ལྷའི་རྣལ་འབྱོར་ཇི་ལྟ་བ་བཞིན་དུ་བྱས་ལ་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་ཐམས་ཅད་བཅིང་བ་བསླབ་པར་བྱའོ་ཞེས་བྱ་བའི་བར་གྱི་གཞུང་གིས་སྟོན་ཏོ། །འགྲོ་བ་འདུལ་བའི་ཕྱག་རྒྱ་བཞིའི་དཀྱིལ་འཁོར་གྱི་བསྡུས་པའི་དོན་བསྟན་པའོ། །འགྲོ་བ་འདུལ་བའི་དུམ་བུ་ལས་གསུངས་པའི་དངོས་གྲུབ་ཐམས་ཅད་བསྡུས་པར་གྱུར་པ་མདོར་བསྡུས་པ་ལ་དགའ་བའི་སེམས་ཅན་རྣམས་རྗེས་སུ་འཛིན་པར་བྱེད་པའི་འགྲོ་བ་འདུལ་བའི་ཕྱག་རྒྱ་གཅིག་པའི་དཀྱིལ་འཁོར་གྱི་བསྡུས་པའི་དོན་བརྗོད་པར་བྱའོ། །འདིར་དང་པོ་སྦྱོར་བའི་ཏིང་ངེ་འཛིན་ནི་འགྲོ་བ་འདུལ་བའི་དཀྱིལ་འཁོར་ཆེན་པོར་བཤད་པའི་ཚུལ་གྱིས་འགྲོ་བ་འདུལ་བའི་རྣལ་འབྱོར་ཆེན་པོར་བྱས་པ་ཡིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་ཀྱི་དབང་པོས་ཞེས་བྱ་བ་ནས་ཧྲཱིཿ་ཞེས་བྱ་བའི་བར་གྱི་གཞུང་གིས་ནི་འགྲོ་བ་འདུལ་བའི་ཕྱག་རྒྱ་གཅིག་པའི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་བསྟན་པ་ཡིན་ནོ། །དེ་ནས་བསྡུ་བ་དང་བྱིན་གྱིས་


DTG057_Page_0033
[མ་དཔེ་གཟིགས་ན་འདིར་གནོན།]

བརླབས་པ་ལ་སོགས་པ་ནི་སྔ་མ་བཞིན་དུ་འགྲོ་བ་འདུལ་བའི་ཕྱག་རྒྱ་གཅིག་པའི་དཀྱིལ་འཁོར་གྱི་ལས་ཀྱི་མཆོག་ཅེས་བྱ་བའི་ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །འགྲོ་བ་འདུལ་བའི་དུམ་བུ་ལས་གསུངས་པའི་དངོས་གྲུབ་ཐམས་ཅད་ནི་འགྲོ་བ་འདུལ་བའི་ཕྱག་རྒྱ་གཅིག་པའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པས་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་ཀྱི་དབང་པོས་ཞེས་བྱ་བ་ནས། དེ་བཞིན་དུ་བསྒོ་སྟེ་ཞེས་བྱ་བའི་བར་གྱི་གཞུང་གིས་འགྲོ་བ་འདུལ་བའི་ཕྱག་རྒྱ་གཅིག་པའི་དཀྱིལ་འཁོར་གྱི་སློབ་དཔོན་གྱི་ལས་ཀྱི་ཆོ་ག་དང༌། དཀྱིལ་འཁོར་དུ་འཇུག་པའི་ཆོ་ག་སྟོན་ཏོ། །འགྲོ་བ་འདུལ་བའི་ཕྱག་རྒྱ་གཅིག་པའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པ་རྣམས་ལ་སློབ་དཔོན་གྱིས་བསྒྲུབ་པའི་ཡེ་ཤེས་བསྟན་པར་བྱའོ། །ཞེས་བྱ་བའི་དོན་འདི་བསྟན་པར་བྱ་བའི་ཕྱིར། འགྲོ་བ་ཐམས་ཅད་འདུལ་བའི་ཡེ་ཤེས་བསླབ་པོ་ཞེས་བྱ་བ་ནས། དཀྱིལ་འཁོར་དུ་ཡང་དེ་འགྲུབ་པོ་ཞེས་བྱ་བའི་བར་གྱི་གཞུང་གིས་སྟོན་ཏོ།། འགྲོ་བ་འདུལ་བའི་དུམ་བུ་ཐམས་ཅད་ལས་གསུངས་པའི་དངོས་གྲུབ་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་གསུངས་པའི་ཕྱག་རྒྱ་བཞིས་རང་གི་ལྷའི་རྣལ་འབྱོར་ཇི་ལྟ་བ་བཞིན་བྱས་ནས་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་བཅིང་བ་རྣམས་བསླབ་པར་བྱའོ། །དངོས་གྲུབ་རྣམས་ཀྱང་དེ་བཞིན་ནོ་ཞེས་བྱ་བའི་བར་གྱི་གཞུང་གིས་བསྟན་ཏོ། །དེ་བཞིན་དུ་རས་ལ་སོགས་པ་ལ་ཡང་བྱའོ་ཞེས་བྱ་བ་ནི་ཐམས་ཅད་ལྔ་མ་བཞིན་དུ་ཤེས་པར་བྱའོ། །འགྲོ་བ་འདུལ་བའི་ཕྱག་རྒྱ་གཅིག་པའི་དཀྱིལ་འཁོར་གྱི་བསྡུས་པའི་དོན་བསྟན་པའོ། །རིགས་འདི་དག་ཐམས་ཅད་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་གྱི་ཆོས་ཀྱི་ཕྱག་རྒྱའི་ངོ་བོ་ཡིན་ཏེ་དེ་བས་ན་ཆོས་ཀྱི་ཕྱག་རྒྱ་ཞེས་བྱའོ། །སེར་སྣའི་གཉེན་པོར་གྱུར་པའི་སེམས་ཅན་


DTG057_Page_0034
[མ་དཔེ་གཟིགས་ན་འདིར་གནོན།]

ཐམས་ཅད་ཀྱི་བསམ་པ་ཐམས་ཅད་ཡོངས་སུ་རྫོགས་པར་བྱེད་པར་བྱེད་པ་ལས་ཀྱི་ཕྱག་རྒྱ་སྐྱེད་པར་བྱེད་པའི་ནོར་བུའི་རིགས་ཀྱི་བསྡུས་པའི་དོན་བརྗོད་པར་བྱ་སྟེ། འདིར་དང་པོ་སྦྱོར་བའི་ཏིང་ངེ་འཛིན་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་གསུངས་བའི་དང་པོ་སྦྱོར་བ་བྱས་ལ། རྡོ་རྗེ་སེམས་དཔའ་དང༌། རྡོ་རྗེ་རིན་ཆེན་དང༌། རྡོ་རྗེ་ཆོས་དང༌། རྡོ་རྗེ་ལས་སྦྲུལ་པའི་མཐར་ཐུག་པ་ཡིན་པར་ཤེས་པར་བྱའོ། །དེ་ནས་ཡང་དེ་བཞིན་གཤེགས་པ་ཐམས་ཅད་ཅེས་བྱ་བ་ནས། འགྲོ་བའི་དོན་དུ་འདིར་འགྱུར་རོ་ཞེས་བྱ་བའི་བར་གྱི་གཞུང་གིས་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོའི་དཀྱིལ་འཁོར་གྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་སྟོན་ཏོ། །དེ་ནས་བསྡུ་བ་དང་བྱིན་གྱིས་བརླབས་པ་ལ་སོགས་པ་ནི་སྔ་མ་བཞིན་དུ་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོའི་ལས་ཀྱི་མཆོག་ཅེས་བྱ་བའི་ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །དོན་ཐམས་ཅད་གྲུབ་པའི་དཀྱིལ་འཁོར་ཆེན་པོར་དབང་བསྐུར་བ་དང་དམ་ཚིག་ཐོབ་པས་དེ་ལས་གསུངས་པའི་ཕྱག་རྒྱ་ཆེན་པོ་ལ་སོགས་པ་བསྒྲུབ་པ་ལ་འཇུག་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ཞེས་བྱ་བ་ནས། དཀྱིལ་འཁོར་ཆེན་པོ་བསྟན་པར་བྱའོ་ཞེས་བྱ་བའི་བར་གྱི་གཞུང་གིས་སློབ་དཔོན་གྱི་ལས་ཀྱི་ཆོ་ག་དང༌། དོན་ཐམས་ཅད་གྲུབ་པའི་དཀྱིལ་འཁོར་ཆེན་པོར་འཇུག་པའི་ཆོ་ག་སྟོན་ཏོ། །དོན་ཐམས་ཅད་གྲུབ་པའི་དཀྱིལ་འཁོར་ཆེན་པོར་དམ་ཚིག་དང༌། དབང་བསྐུར་བ་ཐོབ་པ་རྣམས་ལ་སློབ་དཔོན་གྱིས་ཇི་ལྟར་འདོད་པའི་དངོས་གྲུབ་ཀྱི་ཡེ་ཤེས་བསླབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཅི་འབྱོར་པས་མཆོད་པ་བྱས་ནས་ཞེས་བྱ་བ་ནས་བརྩམས་ཏེ། ཨོཾ་སརྦྦ་སྥོ་ཊ་ས་ན་ཡོ་ག་ཅེས་བྱ་བའི་བར་གྱི་གཞུང་གིས་སྟོན་ཏོ། །དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་གསུངས་པའི་དངོས་གྲུབ་རྣམས་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་གསུངས་པའི་ཕྱག་རྒྱ་བཞིས་རང་གི་ལྷའི་རྣལ་འབྱོར་ཇི་


DTG057_Page_0035
[མ་དཔེ་གཟིགས་ན་འདིར་གནོན།]

ལྟ་བ་བཞིན་བྱས་ལ་བསྒྲུབ་པར་བྱའོ་ཞེས་བྱ་བ་དང༌། སྒྲུབ་པ་པོ་སྤྲོ་བ་བསྐྱེད་པར་བྱ་བའི་ཕྱིར་ཕྱག་རྒྱའི་འབྲས་བུ་བརྗོད་པར་བྱའོ་ཞེས་བྱ་བའི་དོན་གཉིས་པ་འདི་དག་བསྟན་པར་བྱ་བའི་ཕྱིར། དེ་ནས་ནོར་བུ་ཆེན་པོའི་ཕྱག་རྒྱའི་ཡེ་ཤེས་བསླབ་པོ་ཞེས་བྱ་བ་ནས། རིན་ཆེན་ཁུ་ཚུར་གཉིས་བྱས་ལ། །ལས་ཀྱི་ཕྱག་རྒྱ་བྲི་བར་བྱ། །ཞེས་བྱ་བའི་བར་གྱི་གཞུང་གིས་སྟོན་ཏོ། །དོན་ཐམས་ཅད་གྲུབ་པའི་དཀྱིལ་འཁོར་ཆེན་པོའི་བསྡུས་པའི་དོན་བསྟན་པའོ། །དམ་ཚིག་གི་ཕྱག་རྒྱ་གཙོ་བོར་གྱུར་པ་དོན་ཐམས་ཅད་གྲུབ་པའི་གཟུངས་ཀྱི་དཀྱིལ་འཁོར་གྱི་བསྡུས་པའི་དོན་བརྗོད་པར་བྱ་སྟེ། འདིར་དང་པོ་སྦྱོར་བའི་ཏིང་ངེ་འཛིན་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོར་བཤད་པ་ཉིད་ཡིན་ནོ། །དེ་ནས་ཡང་བཅོམ་ལྡན་འདས་ཞེས་བྱ་བ་ནས་བརྩམས་ཏེ། ཨོཾ་སརྦྦ་ཨ་བྷི་ཥེ་ཀ་པཱུ་ཛ་ས་མ་ཡེ་ཧཱུཾ་ཞེས་བྱ་བའི་བར་གྱི་གཞུང་གིས་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་སྟོན་ཏོ། །དེ་ནས་བསྡུ་པ་དང་བྱིན་གྱིས་བརླབས་པ་སྔོན་དུ་འགྲོ་བ་འདིས་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་ཡིན་པར་ཤེས་པར་བྱའོ། །དོན་ཐམས་ཅད་གྲུབ་པའི་གཟུངས་ཀྱི་དཀྱིལ་འཁོར་ལས་གསུངས་པའི་བསྒྲུབ་པ་ནི་དེའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པས་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་བཅོམ་ལྡན་འདས་ཞེས་བྱ་བ་ནས། ཁྱོད་རབ་ཏུ་དབུལ་བ་དང༌། དུས་བྱས་ནས་སེམས་ཅན་དམྱལ་བར་ལྟུང་ང་རེ་ཞེས་བསྒོ་ལ་ཞེས་བྱ་བའི་བར་གྱི་གཞུང་གིས་ནི་སློབ་དཔོན་གྱི་ལས་དང་དོན་ཐམས་ཅད་གྲུབ་པའི་གཟུངས་ཀྱི་དཀྱིལ་འཁོར་དུ་འཇུག་པའི་ཆོ་ག་སྟོན་ཏོ། །དམ་ཚིག་དང་དབང་བསྐུར་བ་ཐོབ་པ་དེ་རྣམས་ལ་སློབ་དཔོན་གྱིས་དོན་ཐམས་ཅད་གྲུབ་པའི་གཟུངས་ཀྱི་དཀྱིལ་འཁོར་ལས་གསུངས་པའི་ཇི་ལྟར་འདོད་པའི་དངོས་གྲུབ་རྣམས་བསླབ་པར་བྱའོ་ཞེས་བྱ་བའི་དོན་འདི་བསྟན་བར་བྱ་བའི་ཕྱིར་རང་གི་ནོར་བུའི་རིགས་ཀྱི་དམ་ཚིག་གི་ཡེ་ཤེས་བསྐྱེད་པར་བྱའོ་ཞེས་བྱ་བ་ནས། ཨོཾ་ཀརྨ་སིདྡྷི་ཞེས་བྱ་བའི་བར་གྱི་གཞུང་གིས་སྟོན་ཏོ། །དོན་ཐམས་ཅད་གྲུབ་པའི་གཟུངས་ཀྱི་དཀྱིལ་


DTG057_Page_0036
[མ་དཔེ་གཟིགས་ན་འདིར་གནོན།]

འཁོར་ལས་གསུངས་པའི་དངོས་གྲུབ་ནི་དོན་ཐམས་ཅད་གྲུབ་པའི་དཀྱིལ་འཁོར་ལས་གསུངས་པའི་ཕྱག་རྒྱ་བཞིས་རང་གི་ལྷའི་རྣལ་འབྱོར་ཇི་ལྟ་བ་བཞིན་བྱས་ལ་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་དཀྱིལ་འཁོར་ཆེན་པོ་འདིའི་ཕྱག་རྒྱ་ཆེན་པོ་བཅིང་བ་བཤད་དེ་ཞེས་བྱ་བ་ནས། གསང་བ་གསང་བའི་ཁུ་ཚུར་མཆོག །གཉིས་སུ་བྱས་ན་ལས་ཀུན་བྱེད། །ཅེས་བྱ་བའི་བར་གྱི་གཞུང་གིས་གསུངས་སོ། །ནོར་བུའི་རིགས་ཀྱི་གཟུངས་ཀྱི་དཀྱིལ་འཁོར་གྱི་བསྡུས་པའི་དོན་བསྟན་པའོ། །ཆོས་ཀྱི་ཕྱག་རྒྱ་གཙོ་བོར་གྱུར་པ་ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་གྱི་བསྡུས་པའི་དོན་བརྗོད་པར་བྱ་སྟེ། འདིར་དང་པོ་སྦྱོར་བའི་ཏིང་ངེ་འཛིན་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོར་བཤད་པ་ཉིད་གཟུང་བར་བྱའོ། །དེ་ནས་ཡང་བཅོམ་ལྡན་འདས་ཞེས་བྱ་བ་ནས་བརྩམས་ཏེ། ཨོཾ་སརྦ་ཨ་བྷི་ཥེ་ཀ་ཛྙཱ་ན་ཧཱུཾ་ཞེས་བྱ་བའི་བར་གྱི་གཞུང་གིས་ནི་ནོར་བུའི་རིགས་ཀྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་སྟོན་ཏོ། །དེ་ནས་བསྡུ་བ་དང་བྱིན་གྱིས་བརླབས་པ་སྔོན་དུ་འགྲོ་བ་ནི་ལས་ཀྱི་རྒྱལ་པོ་མཆོག་གི་ཏིང་ངེ་འཛིན་ཡིན་པར་སྔ་མ་བཞིན་དུ་ཤེས་པར་བྱའོ། །དོན་ཐམས་ཅད་གྲུབ་པའི་ཆོས་ཀྱི་དཀྱིལ་འཁོར་ལས་གསུངས་པའི་གྲུབ་པ་ནི་ཆོས་ཀྱི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པས་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོས་ཞེས་བྱ་བ་ནས། ཁྱོད་ཀྱིས་ཆོས་ཀྱི་དཀྱིལ་འཁོར་མ་མཐོང་བ་ལ་མ་བརྗོད་ཅིག །ཁྱོད་དངོས་གྲུབ་མ་ཐོབ་པར་མྱུར་དུ་ཤི་བར་གྱུར་ཏ་རེ་ཞེས་བསྒོ་ལ་ཞེས་བྱ་བའི་བར་གྱི་གཞུང་གིས་ནི་སློབ་དཔོན་གྱི་ལས་ཀྱི་ཆོ་ག་དང༌། དོན་ཐམས་ཅད་གྲུབ་པའི་ཆོས་ཀྱི་དཀྱིལ་འཁོར་དུ་འཇུག་པའི་ཆོ་ག་སྟོན་ཏོ། །དོན་ཐམས་ཅད་གྲུབ་པའི་ཆོས་ཀྱི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པ་ལ་སློབ་དཔོན་གྱིས་དེ་ལས་གསུངས་པའི་དངོས་གྲུབ་ཇི་ལྟར་འདོད་པ་བཞིན་དུ་བསླབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། ནོར་བུའི་


DTG057_Page_0037
[མ་དཔེ་གཟིགས་ན་འདིར་གནོན།]

རིགས་ཀྱི་ཆོས་ཀྱི་ཡེ་ཤེས་བསྐྱེད་པར་བྱའོ་ཞེས་བྱ་བ་ནས། སརྦྦ་གུཧྱ་ཛྙཱ་ན་སརྦྦ་སིདྡྷིཾ་མེ་པྲ་ཡཙྪ་ཧཱུཾ་ཞེས་བྱ་བའི་བར་གྱི་གཞུང་གིས་སྟོན་ཏོ། །དོན་ཐམས་ཅད་གྲུབ་པའི་ཆོས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་རྣམས་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་གསུངས་པའི་ཕྱག་རྒྱ་བཞི་རང་གི་ལྷའི་རྣལ་འབྱོར་བྱས་ནས་དེའི་རྗེས་ལ་དོན་ཐམས་ཅད་གྲུབ་པའི་ཆོས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོ་ལ་སོགས་པ་བཅིངས་ཏེ་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཕྱག་རྒྱ་ཆེན་པོ་ཇི་ལྟ་བ་བཞིན་དུ་བཅིང་བར་བྱའོ་ཞེས་བྱ་བ་ནས། གནས་ཇི་ལྟ་བ་བཞིན་གཞག་པར་བྱའོ་ཞེས་བྱ་བའི་བར་གྱི་གཞུང་གིས་སྟོན་ཏོ། །ནོར་བུའི་རིགས་ཀྱི་ཆོས་ཀྱི་དཀྱིལ་འཁོར་གྱི་བསྡུས་པའི་དོན་བསྟན་པའོ། །ལས་ཀྱི་ཕྱག་རྒྱ་གཙོ་བོར་གྱུར་པ་ནོར་བུའི་རིགས་ཀྱི་ལས་ཀྱི་དཀྱིལ་འཁོར་གྱི་བསྡུས་པའི་དོན་བརྗོད་པར་བྱ་སྟེ། འདིར་དང་པོ་སྦྱོར་བའི་ཏིང་ངེ་འཛིན་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོར་བཤད་པ་ཉིད་ཡིན་ནོ། །དེ་ནས་ཡང་བཅོམ་ལྡན་འདས་ཀྱིས་ཞེས་བྱ་བ་ནས་བརྩམས་ཏེ། ཨོཾ་བཛྲ་བི་ཤྭ་ཨ་བྷི་ཥེ་ཀེ་ཧཱུཾ་ཞེས་བྱ་བའི་བར་གྱི་གཞུང་གིས་ནི་ནོར་བུའི་རིགས་ཀྱི་ལས་ཀྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་སྟོན་ཏོ། །དེ་ནས་བསྡུ་པ་དང་བྱིན་གྱིས་བརླབས་པ་ནས་བརྩམས་ཏེ། ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པ་ཡིན་པར་ཤེས་པར་བྱའོ། །ནོར་བུའི་རིགས་ཀྱི་ལས་ཀྱི་དཀྱིལ་འཁོར་ལས་གསུངས་པའི་བསྒྲུབ་པ་ནི་ནོར་བུའི་རིགས་ཀྱི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པས་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོས་ཞེས་བྱ་བ་ནས། ཤི་བར་གྱུར་ཏ་རེ་ཞེས་བསྒོ་ལ་ཞེས་བྱ་བའི་བར་གྱི་གཞུང་གིས་ནི་སློབ་དཔོན་གྱི་ལས་ཀྱི་ཆོ་ག་དང༌། དོན་ཐམས་ཅད་གྲུབ་པའི་ལས་ཀྱི་དཀྱིལ་འཁོར་དུ་འཇུག་པའི་ཆོ་ག་སྟོན་ཏོ། །དོན་ཐམས་ཅད་གྲུབ་པའི་ལས་ཀྱི་དཀྱིལ་འཁོར་ལས་


DTG057_Page_0038
[མ་དཔེ་གཟིགས་ན་འདིར་གནོན།]

གསུངས་པའི་དངོས་གྲུབ་ཀྱི་ཡེ་ཤེས་ནི། དཀྱིལ་འཁོར་དེར་དམ་ཚིག་དང་དབང་བསྐུར་བ་ཐོབ་པ་རྣམས་ལ་བཤད་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། ནོར་བུའི་རིགས་ཀྱི་ལས་ཀྱི་ཡེ་ཤེས་བསླབ་པར་བྱའོ་ཞེས་བྱ་བ་ནས། འཇིག་རྟེན་ཐམས་ཅད་དེས་མགུར་འགྱུར། །ཞེས་བྱ་བའི་བར་གྱི་གཞུང་གིས་སྟོན་ཏོ། །དོན་ཐམས་ཅད་གྲུབ་པའི་ལས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་རྣམས་ནི་དོན་ཐམས་ཅད་གྲུབ་པའི་ཕྱག་རྒྱ་བཞིས་རང་གི་ལྷའི་རྣལ་འབྱོར་ཇི་ལྟ་བ་བཞིན་བྱས་བའི་རྗེས་ལ། ལས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོ་ལ་སོགས་པ་བཅིངས་ལ་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཕྱག་རྒྱ་ཆེན་པོ་ཡེ་ཤེས་ཀྱི་དངོས་གྲུབ་དམ་པར་འགྱུར་རོ་ཞེས་བྱ་བ་ནས་ལས་ཀྱི་ཕྱག་རྒྱ་དེ་བསྒྲུབ་བོ་ཞེས་བྱ་བའི་བར་གྱི་གཞུང་གིས་སྟོན་ཏོ།། ནོར་བུའི་རིགས་ཀྱི་ལས་ཀྱི་དཀྱིལ་འཁོར་གྱི་བསྡུས་པའི་དོན་བསྟན་པའོ། །ནོར་བུའི་རིགས་ཀྱི་དོན་ཐམས་ཅད་གྲུབ་པའི་དཀྱིལ་འཁོར་གྱི་དངོས་གྲུབ་བསྡུས་པར་གྱུར་པ་བར་མ་ལ་དགའ་བའི་སེམས་ཅན་རྣམས་རྗེས་སུ་འཛིན་པར་བྱེད་པས་ཕྱག་རྒྱ་བཞི་པའི་དཀྱིལ་འཁོར་གྱི་བསྡུས་པའི་དོན་བརྗོད་པར་བྱ་སྟེ། དེ་ལ་དང་པོའི་སྦྱོར་བ་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོར་བཤད་པ་ཉིད་ཡིན་ནོ། །དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ། ཨོཾ་བི་ཤྭ་དཥྚི་ཞེས་བྱ་བའི་བར་གྱི་གཞུང་གིས་ནི་དོན་ཐམས་ཅད་གྲུབ་པའི་ཕྱག་རྒྱ་བཞི་པའི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་ལྔ་པོ་གསུངས་པ་ཡིན་ནོ། །བསྡུ་བ་དང་བྱིན་གྱིས་བརླབས་པ་ནས་བརྩམས་ཏེ། སྔ་མ་བཞིན་དུ་ལས་ཀྱི་མཆོག་གི་ཏིང་ངེ་འཛིན་ལྔ་པོ་ཡིན་པར་ཤེས་པར་བྱའོ། །དོན་ཐམས་ཅད་གྲུབ་པའི་དུམ་བུ་ལས་གསུངས་པའི་དངོས་གྲུབ་རྣམས་ནི་དོན་ཐམས་ཅད་གྲུབ་པའི་ཕྱག་རྒྱ་བཞི་པའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པས་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་ནམ་མཁའི་སྙིང་པོས་ཞེས་བྱ་བ་ནས་ཁྱོད་


DTG057_Page_0039
[མ་དཔེ་གཟིགས་ན་འདིར་གནོན།]

ཀྱིས་སུལ་ཡང་མ་སྨྲ་ཞིག་ཅེས་བསྒོ་བར་བྱའོ་ཞེས་བྱ་བའི་བར་གྱི་གཞུང་གིས་ནི་སློབ་དཔོན་གྱི་ལས་ཀྱི་ཆོ་ག་དང༌། ནོར་བུའི་རིགས་ཀྱི་ཕྱག་རྒྱ་བཞི་པའི་དཀྱིལ་འཁོར་དུ་འཇུག་པའི་ཆོ་ག་སྟོན་ཏོ། །དོན་ཐམས་ཅད་གྲུབ་པའི་ཕྱག་རྒྱ་བཞི་པའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པ་རྣམས་ལ། སློབ་དཔོན་གྱིས་དོན་ཐམས་ཅད་གྲུབ་པའི་དུམ་བུ་ལས་གསུངས་པའི་དངོས་གྲུབ་བསླབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཡེ་ཤེས་བསྐྱེད་པར་བྱ་སྟེ་ཞེས་བྱ་བ་ནས། ཧི་ཧི་ཧ་ཧ་ཧ་ཊ་ཞེས་བྱ་བའི་སྔགས་ཀྱི་བར་གྱི་གཞུང་གིས་སྟོན་ཏོ། །དོན་ཐམས་ཅད་གྲུབ་པའི་དུམ་བུ་ལས་གསུངས་པའི་དངོས་གྲུབ་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་གསུངས་པའི་ཕྱག་རྒྱ་བཞིས་རང་གི་ལྷའི་རྣལ་འབྱོར་ཇི་ལྟ་བ་བཞིན་བྱས་ལ་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཕྱག་རྒྱ་བཞི་ཇི་ལྟ་བ་བཞིན་བཅིང་བ་དང༌། རྣམ་པ་བཞི་དེ་བཞིན་དུ་བསླབ་པར་བྱའོ། །དངོས་གྲུབ་ཐམས་ཅད་ཀྱང་དེ་བཞིན་ནོ་ཞེས་བྱ་བའི་གཞུང་གིས་སྟོན་ཏོ། །ནོར་བུའི་རིགས་ཀྱི་ཕྱག་རྒྱ་བཞི་པའི་དཀྱིལ་འཁོར་གྱི་བསྡུས་པའི་དོན་བསྟན་པའོ། །དོན་ཐམས་ཅད་གྲུབ་པའི་དུམ་བུ་ལས་གསུངས་པའི་དངོས་གྲུབ་ཐམས་ཅད་བསྡུས་པར་གྱུར་པ་མདོར་བསྡུས་པ་ལ་དགའ་པའི་སེམས་ཅན་རྣམས་རྗེས་སུ་འཛིན་པར་བྱེད་པ་དོན་ཐམས་ཅད་གྲུབ་བའི་ཕྱག་རྒྱ་གཅིག་པའི་དཀྱིལ་འཁོར་གྱི་བསྡུས་པའི་དོན་བརྗོད་པར་བྱ་སྟེ། དེ་ལ་འདིར་དང་པོ་སྦྱོར་བ་ནི་འཕགས་པ་ནམ་མཁའི་སྙིང་པོའི་དཀྱིལ་འཁོར་ཆེན་པོར་བཤད་པའི་རྣལ་འབྱོར་ཆེན་པོ་ཡིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོས་ཞེས་བྱ་བ་ནས་བརྩམས་ཏེ། བཛྲ་རཏྣ་ཧཱུཾ་ཞེས་བྱ་བའི་བར་གྱི་གཞུང་གིས་ནི། འཕགས་པ་ནམ་མཁའི་སྙིང་པོའི་ཕྱག་རྒྱ་གཅིག་པའི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་བསྟན་ཏོ། །ལས་ཀྱི་མཆོག་གི་ཏིང་ངེ་འཛིན་ནི་སྔ་མ་བཞིན་དུ་བསྡུ་བ་དང་བྱིན་གྱིས་བརླབས་པ་སྔོན་དུ་འགྲོ་བ་ཉིད་ཡིན་


DTG057_Page_0040
[མ་དཔེ་གཟིགས་ན་འདིར་གནོན།]

ནོ། །དོན་ཐམས་ཅད་གྲུབ་པའི་དུམ་བུ་ལས་གསུངས་པའི་དངོས་གྲུབ་རྣམས་ནི་འཕགས་པ་ནམ་མཁའི་སྙིང་པོའི་ཕྱག་རྒྱ་གཅིག་པའི་དཀྱིལ་འཁོར་དུ་དམ་ཚིག་དང་དབང་བསྐུར་བ་ཐོབ་པས་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་དཀྱིལ་འཁོར་ནི་འདི་ཡིན་ཏེ་ཞེས་བྱ་བ་ནས། དངོས་གྲུབ་ཀྱི་དཀྱིལ་འཁོར་ནི་ཇི་བཞིན་པར་ནི་བྲི་བར་བྱའོ་ཞེས་བྱ་པའི་བར་གྱི་གཞུང་གི་གཞུང་གིས་ནི་འཕགས་པ་ནམ་མཁའི་སྙིང་པོའི་ཕྱག་རྒྱ་གཅིག་པའི་དཀྱིལ་འཁོར་གྱི་སློབ་དཔོན་གྱི་ལས་དང་དཀྱིལ་འཁོར་དུ་འཇུག་པའི་ཆོ་ག་སྟོན་ཏོ། །འཕགས་པ་ནམ་མཁའི་སྙིང་པོའི་ཕྱག་རྒྱ་གཅིག་པའི་དཀྱིལ་འཁོར་དུ་དམ་ཚིག་དང་དབར་བསྐུར་བ་ཐོབ་པ་རྣམས་ལ་སློབ་དཔོན་གྱིས་བསྒྲུབ་པའི་ཡེ་ཤེས་བསླབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་འདིར་ཡེ་ཤེས་གསང་བའི་ཞེས་བྱ་བ་ནས། ལས་ཀྱི་དངོས་གྲུབ་ཐོབ་པར་འགྱུར། །ཞེས་བྱ་བའི་བར་གྱི་གཞུང་གིས་སྟོན་ཏོ། །དེ་ནས་དོན་ཐམས་ཅད་གྲུབ་པའི་དུམ་བུ་ལས་གསུངས་པའི་དངོས་གྲུབ་རྣམས་ནི་དོན་ཐམས་ཅད་གྲུབ་པའི་དཀྱིལ་འཁོར་ཆེན་པོ་ལས་གསུངས་པའི་ཕྱག་རྒྱ་བཞིས་རང་གི་ལྷའི་རྣལ་འབྱོར་ཇི་ལྟ་བ་བཞིན་བྱས་ལ་བསྒྲུབ་པར་བྱའོ་ཞེས་བྱ་བའི་དོན་འདི་གསལ་བར་བྱ་བའི་ཕྱིར། དེ་ནས་ཕྱག་རྒྱ་བཞིའི་ཡེ་ཤེས་བསླབ་པར་བྱའོ། །རས་ལ་སོགས་པ་ལ་ཡང་སེམས་དཔའ་དང་ཕྱག་རྒྱའི་དཀྱིལ་འཁོར་བྲིས་ཏེ་བསྒྲུབ་པར་བྱའོ་ཞེས་བྱ་བའི་གཞུང་གིས་སྟོན་ཏོ། །དོན་ཐམས་ཅད་གྲུབ་པའི་ཕྱག་རྒྱ་གཅིག་པའི་དཀྱིལ་འཁོར་གྱི་བསྡུས་པའི་དོན་བསྟན་པའོ། །ནོར་བུའི་རིགས་ཀྱི་དམ་ཚིག་ཐམས་ཅད་སེམས་ཅན་ཐམས་ཅད་ཀྱི་བསམ་པ་ཐམས་ཅད་རྫོགས་པར་བྱེད་པའི་ལས་ཅན་ཡིན་ཏེ་དེ་བས་ན་ལས་ཀྱི་རིགས་ལ་ལས་ཀྱི་དམ་ཚིག་ཅེས་བཤད་པ་ཡིན་ནོ། །དེ་ལྟར་འཇིག་རྟེན་དང་འཇིག་རྟེན་ལས་འདས་པའི་ཆོས་ཀྱི་དེ་ཁོ་ན་ཉིད་ཀྱི་ངོ་བོ་སེམས་ཅན་ཐམས་ཅད་ཀྱི་ཐུན་མོང་དུ་འགྱུར་བའི་རྩ་བའི་རྒྱུད་ཀྱི་བསྡུས་པའི་དོན་བཤད་པ་ཡིན་ནོ། །ད་ནི་འཇིག་རྟེན་དང་འཇིག་རྟེན་ལས་


DTG057_Page_0041
[མ་དཔེ་གཟིགས་ན་འདིར་གནོན།]

འདས་པའི་དངོས་གྲུབ་སྒྲུབ་པར་བྱེད་པའི་སེམས་ཅན་གོང་མའི་ཡང་གོང་མ་རྗེས་སུ་འཛིན་པར་བྱེད་པ་ཐོག་མ་དང་ཐ་མ་མེད་པའི་དམ་ཚིག་ཆེན་པོའི་དེ་ཁོ་ན་ཉིད་སངས་རྒྱས་དང་བྱང་ཆུབ་སེམས་དཔའ་ཐོབ་པའི་རྒྱུར་གྱུར་པ། རྒྱུད་ཕྱི་མའི་བསྡུས་པའི་དོན་བརྗོད་པར་བྱའོ། །དེ་ལ་དང་པོར་རེ་ཞིག་སངས་རྒྱས་དང་བྱང་ཆུབ་སེམས་དཔའ་དེ་ཉིད་གྲུབ་པའི་ཕྱིར་དེ་བཞིན་གཤེགས་པ་དང༌། རྡོ་རྗེ་དང༌། པདྨ་དང༌། ནོར་བུའི་རིགས་རྣམས་ཀྱི་དཀྱིལ་འཁོར་ཆེན་པོ་ལས་གསུངས་བའི་ཕྱག་རྒྱ་ཆེན་པོ་དང་དམ་ཚིག་དང༌། ཆོས་དང་ལས་ཀྱི་ཕྱག་རྒྱ་རྣམས་ཀྱི་བསྒོམ་པ་བསྟན་པར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ཞེས་བྱ་བ་ནས་བརྩམས་ཏེ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་དངོས་གྲུབ་དམ་པ་ཐོབ་པའི་ཆོ་ག་རྒྱས་པའི་རྒྱུད་དོ་ཞེས་བྱ་བའི་བར་གྱི་གཞུང་གིས་སྟོན་ཏོ། །ཕྱག་རྒྱ་ཆེན་པོ་ལ་སོགས་པ་བསྒོམ་པ་ནི་དམ་ཚིག་ལ་གནས་པས་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་བྱུང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་ཞེས་བྱ་བ་ནས། དམ་ཚིག་གི་དངོས་གྲུབ་ཀྱི་ཆོག་རྒྱས་པའི་རྒྱུད་དོ་ཞེས་བྱ་བའི་བར་གྱི་གཞུང་གིས་སྟོན་ཏོ། །དངོས་པོ་ལ་མངོན་པར་ཞེན་པ་སྤང་བར་བྱ་བའི་ཕྱིར། གཟུགས་བརྙན་དང་འདྲ་བ་ཉིད་དུ་ཕྱག་རྒྱ་ཆེན་པོ་ལ་སོགས་པ་བསྒོམ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་ཞེས་བྱ་བ་ནས། རིགས་ཐམས་ཅད་ཀྱི་ཆོས་ཀྱི་དཀྱིལ་འཁོར་དངོས་གྲུབ་ཀྱི་ཆོ་ག་རྒྱས་པའི་རྒྱུད་དོ་ཞེས་བྱ་བའི་བར་གྱི་གཞུང་གིས་བསྟན་ཏོ། །ཕྱག་རྒྱ་ཆེན་པོ་ལ་སོགས་པ་སྒྲུབ་པར་བྱེད་པ་པོས་ལས་ཀྱི་དཀྱིལ་འཁོར་ལས་གསུངས་པའི་མཆོད་པ་རྣམ་པ་བཅུ་དྲུག་རབ་ཏུ་བྱེད་ཅིང་སེམས་ཅན་ཐམས་ཅད་ཀྱི་དོན་བྱ་བའི་མཚན་ཉིད་ཅན་དང༌། དེ་བཞིན་གཤེགས་པ་ཐམས་ཅད་མཆོད་པའི་མཚན་ཉིད་ཅན་གྱི་ལས་ནམ་མཁའི་ཁམས་ཅད་དུ་སྤྲོས་པ་བསྒོམ་པར་བྱའོ་ཞེས་བྱ་བའི་དོན་འདི་


DTG057_Page_0042
[མ་དཔེ་གཟིགས་ན་འདིར་གནོན།]

བསྟན་པར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་ཞེས་བྱ་བ་ནས། རིགས་ཐམས་ཅད་ཀྱི་ལས་ཀྱི་དངོས་གྲུབ་ཀྱི་ཆོ་ག་རྒྱས་པའི་རྒྱུད་དོ་ཞེས་བྱ་བའི་བར་གྱི་གཞུང་གིས་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ལས་ཀྱི་དངོས་གྲུབ་ཀྱི་རྒྱུད་སྟོན་ཏོ། །དེ་བཞིན་གཤེགས་པ་ལ་སོགས་པ་རིགས་ཐམས་ཅད་ཀྱི་ཕྱག་རྒྱ་ཆེན་པོ་དང༌། དམ་ཚིག་དང་ཆོས་དང༌། ལས་ཀྱི་ཕྱག་རྒྱ་རྣམས་ཀྱི་སྤྱིའི་སྒྲུབ་པ་ཁྱད་པར་གྱིས་འགྲུབ་པར་འགྱུར་རོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྗེས་ཞེས་བྱ་བ་ནས། རིགས་ཐམས་ཅད་ཀྱི་ཆོས་ཉིད་མཁྱེན་པའི་ཆོ་ག་རྒྱས་པའི་རྒྱུད་དོ་ཞེས་བྱ་བའི་བར་གྱིས་ཆོས་ཉིད་ཀྱི་རྒྱུད་སྟོན་ཏོ། །ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་ཐམས་ཅད་བསྒྲུབ་པར་བྱ་བའི་ཕྱིར། ངེས་པ་བསྐྱེད་ནས་འཇུག་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་ཞེས་བྱ་བ་ནས། རིགས་ཐམས་ཅད་ཀྱི་མཁྱེན་པའི་དངོས་གྲུབ་ཀྱི་ཆོ་ག་རྒྱས་པའི་རྒྱུད་དོ་ཞེས་བྱ་བར་གྱི་གཞུང་གིས་ནི་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཕྱག་རྒྱའི་ཡེ་ཤེས་ཀྱི་དངོས་གྲུབ་ཀྱི་རྒྱུད་སྟོན་ཏོ། །ཕྱག་རྒྱ་ཆེན་པོ་ལ་སོགས་པ་བསྒོམ་པ་ནི། གང་གི་ཚེ་མཚན་མ་ཐོབ་པར་གྱུར་པ་དེའི་ཚེ་འགྲུབ་པར་འགྱུར་རོ་ཞེས་བྱ་བའི་དོན་འདི་ཤེས་པར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ཞེས་བྱ་བ་ནས། མདུན་མཐོང་ནའོ་ཞེས་བྱ་བའི་བར་གྱི་གཞུང་གིས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དངོས་གྲུབ་ཀྱི་ཡེ་ཤེས་ཀྱི་ཕྱག་རྒྱའི་རྒྱུད་སྟོན་ཏོ། །ཕྱག་རྒྱ་ཆེན་པོ་ལ་སོགས་པ་བསྒོམས་ནས་ཀྱང་མཚན་མ་ཐོབ་པར་གྱུར་པས་མངོན་པར་ཤེས་པ་བསྒྲུབ་པར་བྱའོ་ཞེས་བྱ་བའི་དོན་འདི་ཁོང་དུ་ཆུད་པར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་ཞེས་བྱ་བ་ནས། མངོན་པར་ཤེས་པ་ལྔ་ནི་དེས་ཐོབ་བོ་ཞེས་བཅོམ་ལྡན་


DTG057_Page_0043
[མ་དཔེ་གཟིགས་ན་འདིར་གནོན།]

འདས་ནམ་མཁའི་སྙིང་པོས་གསུངས་སོ་ཞེས་བྱ་བའི་བར་གྱི་གཞུང་གིས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་མངོན་པར་ཤེས་པའི་སྒྲུབ་པའི་ཡེ་ཤེས་ཀྱི་རྒྱུད་སྟོན་ཏོ། །མན་འདོར་བའི་བརྟུལ་ཞུགས་ལ་རྗེས་སུ་འཇུག་པས་ཕྱག་རྒྱ་ཆེན་པོ་ལ་སོགས་པ་གྲུབ་པར་འགྱུར་རོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ནས་བཅོམ་ལྡན་འདས་སངས་རྒྱས་མཆོད་པས་གསུངས་སོ་ཞེས་བྱ་བའི་བར་གྱི་གཞུང་གིས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་བདེན་པའི་དངོས་གྲུབ་ཀྱི་རྒྱུད་སྟོན་ཏོ། །ས་མ་ཡ་སྟྭཾ་ཞེས་བྱ་བ་ལ་སོགས་པ་བརྗོད་དེ། ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་བཅིང་བར་བྱའོ་ཞེས་བྱ་བའི་ཆོ་ག་འདི་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ནས། རང་བྱུང་ཉིད་ལ་མཆོད་པར་འགྱུར། །ཞེས་བྱ་བའི་བར་གྱི་གཞུང་གིས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དམ་ཚིག་གི་དེ་ཁོ་ན་ཉིད་ཀྱི་དངོས་གྲུབ་ཀྱི་རྒྱུད་སྟོན་ཏོ། །རང་གི་ལྷའི་རྣལ་འབྱོར་བྱས་ལ་རས་རིས་ལ་སོགས་པ་ལ་ཡང་རང་གི་ལྷ་སྤྱན་དྲངས་ཏེ་སྒོམ་པར་བྱེད་ཅིང་རང་གི་ལྷ་རྗེས་སུ་དྲན་པས་ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་བཞི་འགྲུབ་པར་འགྱུར་རོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཕྱག་ན་རྡོ་རྗེས་ཞེས་བྱ་བ་ནས། ཉི་རིམ་དུ་ནི་ཡང་དག་འགྱུར། །ཞེས་བྱ་བའི་བར་གྱི་གཞུང་གིས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ཕྱག་རྒྱའི་དངོས་གྲུབ་ཀྱི་རྒྱུད་སྟོན་ཏོ། །ཕྱག་རྒྱ་ཆེན་པོ་ལ་སོགས་པ་ལ་རང་གི་ལྷའི་ཕྱག་རྒྱ་བཞི་པོ་ནི་རང་གི་ལྷའི་རྒྱལ་གྱིས་སྙིང་པོ་བརྗོད་ཅིང་བསྒྲུབ་པར་བྱའོ་ཞེས་བྱ་བའི་ངེས་པ་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ནས། བཅོམ་ལྡན་འདས་ནམ་མཁའི་སྙིང་པོས་གསུངས་སོ་ཞེས་བྱ་བའི་བར་གྱི་གཞུང་གིས་ནི་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དངོས་གྲུབ་ཐམས་ཅད་སྟོན་པའི་རྒྱུད་སྟོན་ཏོ། །སྒྲུབ་པ་པོས་ཕྱག་རྒྱ་ཆེན་པོ་ལ་སོགས་པ་རང་རང་གི་ལྷའི་ཕྱག་རྒྱ་བཞི་ལ་དང་པོ་ཁོ་ནར་བྱིན་གྱིས་བརླབས་པ་དང༌། དབང་བསྐུར་བ་དང༌། མཆོད་པ་བྱས་ལ་ཏིང་ངེ་


DTG057_Page_0044
[མ་དཔེ་གཟིགས་ན་འདིར་གནོན།]

འཛིན་གྱིས་བཟླས་བརྗོད་དང་བསྒོམ་པ་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ནས། དངོས་གྲུབ་ཐམས་ཅད་འགྲུབ་པར་འགྱུར། །ཞེས་བྱ་བའི་བར་གྱི་གཞུང་གིས་རིགས་ཐམས་ཅད་བྱིན་གྱིས་བརླབས་པ་དང༌། དབང་བསྐུར་བ་དང༌།ཏིང་ངེ་འཛིན་དང་མཆོད་པའི་རྒྱུད་སྟོན་ཏོ། །གང་གི་ཚེ་སྔར་བཤད་པའི་ཚུལ་གྱིས་མངོན་པར་ཤེས་པ་ལ་སོགས་པ་སྐྱེས་པར་མ་གྱུར་ན། དེའི་ཚེ་དཀྱིལ་འཁོར་ལ་སོགས་པ་རང་གི་ལྷའི་ཕྱག་རྒྱ་བཞིར་མཚན་ཐོག་ཐག་བསྒོམས་པས་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ནས། བཅོམ་ལྡན་འདས་རྡོ་རྗེ་འཛིན་པས་གསུངས་སོ་ཞེས་བྱ་བའི་བར་གྱི་གཞུང་གིས་ནི་རིགས་ཐམས་ཅད་ཀྱི་མངོན་པར་ཤེས་པའི་ཡེ་ཤེས་ཀྱི་དངོས་གྲུབ་ཀྱི་ཆོ་ག་རྒྱས་པའི་རྒྱུད་སྟོན་ཏོ། །སྔོན་དུ་བསྙེན་པ་ལ་སོགས་པའི་དུས་སུ་ཡང་བྱང་ཆུབ་ཆེན་པོའི་ཡེ་ཤེས་ཀྱི་ཕྱག་རྒྱ་ཆེན་པོ་ལ་སོགས་པ་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ནས། བསྒོམས་ན་དངོས་གྲུབ་ཐོབ་པར་འགྱུར། །ཞེས་བྱ་བའི་བར་གྱི་གཞུང་གིས་རིགས་ཐམས་ཅད་ཀྱི་བྱང་ཆུབ་ཆེན་པོའི་ཡེ་ཤེས་ཀྱི་ཆོ་ག་རྒྱས་པའི་རྒྱུད་སྟོན་ཏོ། །མཚན་མ་ཐོབ་པས་སྔར་བཤད་པའི་ཚུལ་གྱིས་མངོན་པར་ཤེས་པ་སྐྱེས་པར་མ་གྱུར་ན། ཁམས་གསུམ་རྣམ་པར་རྒྱལ་བའི་རྒྱུད་ལས་གསུངས་པའི་ཆོ་གས་སངས་རྒྱས་ལ་སོགས་པའི་ཆ་ལུགས་ཀྱི་བརྟུལ་ཞུགས་ཀྱིས་དེ་བཞིན་གཤེགས་པ་ཐམས་ཅད་ལ་སོགས་པའི་རིགས་ཐམས་ཅད་མཉེས་པར་བྱ་བ་དང་དབང་དུ་བྱ་བ་བྱས་ལ་དེ་བཞིན་གཤེགས་པ་ལ་སོགས་པ་བསྒྲུབ་པར་བྱའོ་ཞེས་བྱ་བའི་དོན་གཉིས་པོ་འདི་བསྟན་པར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་ཞེས་བྱ་བ་ནས། སངས་རྒྱས་ཐམས་ཅད་དབང་དུ་འགྱུར། །ཞེས་བྱ་བའི་བར་གྱི་གཞུང་གིས་རིགས་ཐམས་ཅད་མཉེས་པར་བྱ་བ་དང་དབང་དུ་བྱ་བའི་དངོས་གྲུབ་ཀྱི་རྒྱུད་སྟོན་ཏོ། །གང་གི་ཚེ་ཇི་སྐད་བཤད་པའི་ཆོ་གས་ལན་བདུན་བསྒྲུབས་ན་ཡང་


DTG057_Page_0045
[མ་དཔེ་གཟིགས་ན་འདིར་གནོན།]

དངོས་གྲུབ་ཐོབ་པར་མ་གྱུར་ན། དེའི་ཚེ་རིགས་པ་ལ་མངོན་སྤྱོད་བྱ་བའི་ཆོ་གས་རང་གི་ལྷའི་མངོན་སྤྱོད་བྱས་ན་དེ་ནས་འགྲུབ་པར་འགྱུར་རོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ནས། ཀུན་དུ་བཟང་པོས་གསུངས་སོ་ཞེས་བྱ་བའི་བར་གྱི་གཞུང་གིས་རིགས་ཐམས་ཅད་ཀྱི་གསང་བའི་དངོས་གྲུབ་ཀྱི་ཆོ་ག་རྒྱས་པའི་རྒྱུད་སྟོན་ཏོ། །དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་རྣལ་འབྱོར་པས་བདག་ཉིད་ལ་སོགས་པ་བསྲུང་བར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ཞེས་བྱ་བ་ནས། བཅོམ་ལྡན་འདས་རྡོ་རྗེ་སྲུང་བས་གསུངས་སོ་ཞེས་བྱ་བའི་བར་གྱི་གཞུང་གིས་རིགས་ཐམས་ཅད་ཀྱི་བསྲུང་བའི་དངོས་གྲུབ་ཀྱི་ཆོ་ག་རྒྱས་བའི་རྒྱུད་སྟོན་པ་ཡིན་ནོ། །རྒྱུད་ཕྱི་མ་ལས་རིགས་ཐམས་ཅད་ཀྱི་དཀྱིལ་འཁོར་ཆེན་པོ་དང་འབྲེལ་བའི་དངོས་གྲུབ་བསྒྲུབ་པའི་བསྡུས་པའི་དོན་བསྟན་པའོ། །དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་གཟུངས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་བཞི་བསྒོམ་པ་ནི་རང་གི་རིགས་ཀྱི་དཀྱིལ་འཁོར་ཆེན་པོ་ལས་གསུངས་པའི་ཕྱག་རྒྱ་བཞིས་རང་གི་ལྷའི་རྣལ་འབྱོར་ཇི་ལྟ་བ་བཞིན་བྱས་པའི་རྗེས་ལ་གཟུངས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོ་ལ་སོགས་པའི་བཅིང་བ་རྒྱུད་ཕྱི་མ་ལ་ཡང་བྱའོ་ཞེས་བྱ་བའི་ཆོ་ག་འདི་བསྟན་པར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་ཞེས་བྱ་བ་ནས་བརྩམས་ཏེ། སྐད་ཅིག་གིས་ཕབ་གང་བྱེད་འགྱུར། །ཞེས་བྱ་བའི་བར་གྱི་གཞུང་གིས་སྟོན་ཏོ། །དེ་ནས་དཀྱིལ་འཁོར་ཆེན་པོའི་དབང་དུ་བྱས་ནས་གསུངས་པའི་རྒྱུད་ཕྱི་མའི་ཚོགས་མཚན་མ་ཐོབ་པ་དང་མངོན་པར་ཤེས་པ་ཐོབ་པས་སྒྲུབ་པའི་དཀྱིལ་འཁོར་བྲིས་ལ་གཟུངས་བསྒྲུབ་པར་བྱའོ་ཞེས་བྱ་བའི་དོན་འདི་ཁོང་དུ་ཆུད་པར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་ཞེས་བྱ་བ་ནས། རྡོ་རྗེ་སེམས་དཔས་གསུངས་སོ་ཞེས་བྱ་བའི་


DTG057_Page_0046
[མ་དཔེ་གཟིགས་ན་འདིར་གནོན།]

བར་གྱི་གཞུང་གིས་རིགས་ཐམས་ཅད་ཀྱི་དཀྱིལ་འཁོར་དག་པའི་དངོས་གྲུབ་གསང་བའི་རྒྱུད་སྟོན་ཏོ། །སྒྲུབ་པ་དང་པོས་མ་གྲུབ་ན་སྒྲུབ་པ་གཉིས་པ་ལ་ཡང་དེ་ཁོ་ན་ཉིད་ཀྱིས་བསྐུལ་བས་ཡང་དག་པར་བསྐུལ་ལ། གཟུངས་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ནས་བརྩམས་ཏེ། བཅོམ་ལྡན་འདས་ནམ་མཁའི་སྙིང་པོས་གསུངས་སོ་ཞེས་བྱ་བའི་བར་གྱི་གཞུང་གིས་ནི་རིགས་ཐམས་ཅད་ཀྱི་ཕྱག་རྒྱ་ཐམས་ཅད་ཀྱི་གསང་བའི་དངོས་གྲུབ་ཀྱི་ཆོ་ག་རྒྱས་པའི་རྒྱུད་སྟོན་ཏོ། །སྔོན་དུ་བསྙེན་པ་ལ་སོགས་པའི་དུས་སུ་ཡང༌། མུ་སྟེགས་རྣམས་ལ་ཕན་གདགས་ཕྱིར། །རི་མོའི་ཕྱག་རྒྱའི་ཚུལ་དུ་ནི། །སངས་རྒྱས་བཙུན་མོ་རབ་སྦྱངས་པར། །ཤེས་ན་རབ་ཏུ་འགྲུབ་པར་འགྱུར། །ཞེས་བྱ་བ་ལ་སོགས་པ་གསང་བའི་ཡེ་ཤེས་ཀྱི་གཟུངས་ཀྱི་ཕྱག་རྒྱར་བསྐྱེད་དེ་བསྒོམ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་ཞེས་བྱ་བ་ནས། བཅོམ་ལྡན་འདས་ཀྱི་བཀའ་བཞིན་དུ་མཛད་པར་གསུངས་སོ་ཞེས་བྱ་བའི་བར་གྱི་གཞུང་གིས་ནི་རིགས་ཐམས་ཅད་ཀྱི་དམ་ཚིག་གསང་བའི་དངོས་གྲུབ་ཀྱི་ཆོ་ག་རྒྱས་པའི་རྒྱུད་སྟོན་ཏོ། །གཟུགས་དང་ཡང་དག་པར་སྦྱོར་བར་བསྒོམས་པ་ལས་བྱུང་བའི་བདེ་བ་དབུལ་བའི་ཡང་དག་པར་སྦྱོར་པ་བསྒོམ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ནས། བཅོམ་ལྡན་འདས་རྡོ་རྗེ་རིན་ཆེན་གྱིས་གསུངས་སོ་ཞེས་བྱ་བའི་བར་གྱི་གཞུང་གིས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་གསང་བའི་མཆོད་པའི་དངོས་གྲུབ་ཀྱི་རྒྱུད་སྟོན་ཏོ། །བདག་ཉིད་རྣལ་འབྱོར་གྲུབ་པ་ཙམ་དུ་གསུངས་སྒྲུབ་པར་བྱེད་པས་གསུངས་ཀྱི་དཀྱིལ་འཁོར་ལས་གསུངས་པའི་སྒེག་མོ་ལ་སོགས་པའི་གསང་བའི་མཆོད་པ་བཞིས་མཆོད་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ནས། བཅོམ་ལྡན་འདས་རྡོ་རྗེ་སྙིང་པོས་གསུངས་སོ་ཞེས་བྱ་བའི་བར་གྱི་གཞུང་གིས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་གསང་བའི་མཆོད་པའི་དངོས་གྲུབ་ཀྱི་རྒྱུད་སྟོན་ཏོ།།


DTG057_Page_0047
[མ་དཔེ་གཟིགས་ན་འདིར་གནོན།]

དེ་ཁོ་ན་ཉིད་བརྗོད་པ་དང་མཚན་མ་མངོན་པར་བརྗོད་པ་དང་ཕྱག་རྒྱ་བཅིང་བ་སྐྱེ་བའི་ཡེ་ཤེས་ཀྱི་རྒྱུད་ནི་རང་གི་སེམས་ཡོངས་སུ་སྤྱང་བའི་ལས་བསྟན་པའི་ཕྱིར། རིགས་ཐམས་ཅད་ཀྱི་དཀྱིལ་འཁོར་ཆེན་པོའི་ལྷའི་རྣལ་འབྱོར་གསུངས་པ་ཡིན་ནོ། །རིགས་ཐམས་ཅད་ཀྱི་གཟུངས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་རྣམས་ཀྱི་རྒྱུད་ཕྱི་མ་བསྒྲུབ་པའི་ཆོ་ག་བསྡུས་པའི་དོན་བསྟན་ཏོ། །དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་བཞི་པོ་བསྒོམ་པ་ན། རང་གི་རིགས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་བཞིས་རང་གི་ལྷའི་རྣལ་འབྱོར་ཇི་ལྟ་བ་བཞིན་དུ་བྱས་ལ། དེའི་རྗེས་ལ་ཆོས་ཀྱི་དཀྱིལ་འཁོར་ལས་གསུངས་བའི་ཕྱག་རྒྱ་ཆེན་པོ་ལ་སོགས་པ་བཅིང་བ་རྒྱུད་ཕྱི་མ་ལ་ཡང་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་ཞེས་བྱ་བ་ནས་བརྩམས་ཏེ། བཅོམ་ལྡན་འདས་རིན་པོ་ཆེའི་རྒྱལ་མཚན་གྱིས་གསུངས་སོ་ཞེས་བྱ་བའི་བར་གྱི་གཞུང་གིས་རིགས་ཐམས་ཅད་ཀྱི་ཏིང་ངེ་འཛིན་ལས་ཀྱི་དངོས་གྲུབ་ཀྱི་ཆོག་རྒྱས་པ་ཞེས་བྱ་བའི་བར་གྱི་རྒྱུད་ཀྱིས་སྟོན་ཏོ། །ཆོས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོ་ལ་སོགས་པ་བསྒོམས་པས་གང་གི་ཚེ་མཚན་མ་ཐོབ་པར་གྱུར་པ་དེའི་ཚེ་རྡོ་རྗེ་ཕར་མོ་བསྒོམས་པས་མངོན་པར་ཤེས་པ་ལྔ་བསྐྱེད་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ནས། བཅོམ་ལྡན་འདས་རྡོ་རྗེ་ནོར་བུས་གསུངས་སོ་ཞེས་བྱ་བའི་བར་གྱི་གཞུང་གིས་ནི་རིགས་ཐམས་ཅད་ཀྱི་ཕར་མོའི་ཡེ་ཤེས་ཀྱི་དངོས་གྲུབ་ཀྱི་ཆོག་རྒྱས་པའི་རྒྱུད་སྟོན་ཏོ། །ཆོས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོ་ལ་སོགས་པ་བསྒོམས་ན་མཚན་མ་འདི་དག་འབྱུང་བར་འགྱུར་ན་མངོན་པར་ཤེས་པ་བསྒྲུབ་པར་བྱའོ་ཞེས་བྱ་བའི་དོན་འདི་གསལ་བར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་ཞེས་བྱ་བ་ནས། བཅོམ་ལྡན་འདས་རྡོ་རྗེ་སྙིང་པོས་གསུངས་སོ་ཞེས་བྱ་


DTG057_Page_0048
[མ་དཔེ་གཟིགས་ན་འདིར་གནོན།]

བའི་བར་གྱི་གཞུང་གིས་རིགས་ཐམས་ཅད་ཀྱི་སྤྱིའི་ཡེ་ཤེས་ཀྱི་དངོས་གྲུབ་ཀྱི་ཆོ་ག་རྒྱས་པའི་རྒྱུད་སྟོན་པ་ཡིན་ནོ། །རིགས་ཐམས་ཅད་ཀྱི་ཆོས་ཀྱི་དཀྱིལ་འཁོར་ལས་གསུངས་པའི་རྒྱུད་ཕྱི་མ་སྒྲུབ་པའི་བསྡུས་པའི་དོན་བསྟན་པའོ། །དེ་བཞིན་གཤེགས་པ་ལ་སོགས་བའི་རིགས་ཐམས་ཅད་ཀྱི་ལས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོ་ལ་སོགས་པ་ནི་རང་གི་རིགས་ཀྱི་ཆོས་ཀྱི་སྐྱིལ་འཁོར་ཆེན་པོ་ལས་གསུངས་པའི་ཕྱག་རྒྱ་བཞིས་རང་གི་ལྷའི་རྣལ་འབྱོར་ཇི་ལྟ་བ་བཞིན་དུ་བྱས་པའི་རྗེས་ལ་ལས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོ་ལ་སོགས་པ་བཅིང་བ་རྒྱུད་ཕྱི་མ་ལས་ཀྱང་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་ཞེས་བྱ་བ་ནས་བརྩམས་ཏེ། བཅོམ་ལྡན་འདས་རྡོ་རྗེས་སྙིང་པོས་གསུངས་སོ་ཞེས་བྱ་བའི་བར་གྱི་གཞུང་གིས་རིགས་ཐམས་ཅད་ཀྱི་ལས་ཀྱི་དམ་ཚིག་དང༌། རིགས་ཐམས་ཅད་ཀྱི་ལས་ཀྱི་དམ་ཚིག་གསང་བའི་དངོས་གྲུབ་དང་རིགས་ཐམས་ཅད་ཀྱི་ལས་ཀྱི་ཆོས་ཉིད་དང་རིགས་ཐམས་ཅད་ཀྱི་ལས་ཀྱི་དགོས་པའི་དངོས་གྲུབ་ཀྱི་ཆོག་རྒྱས་པ་རྣམས་སྟོན་ཏོ། །དེ་བཞིན་གཤེགས་པ་ལ་སོགས་པའི་རིགས་ཀྱི་དཀྱིལ་འཁོར་ཆེན་པོ་ལས་གསུངས་བའི་ལྷའི་རྣལ་འབྱོར་བྱས་པ་ལ་ཡང༌། དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་བྱིན་གྱིས་བརླབས་པའི་རྣལ་འབྱོར་གྱི་རྒྱུད་ཀྱིས་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་བཅོམ་ལྡན་འདས་ཕྱག་ན་རྡོ་རྗེས་ཞེས་བྱ་བ་ནས། བཅོམ་ལྡན་འདས་རྡོ་རྗེ་ལས་ཀྱིས་གསུངས་སོ་ཞེས་བྱ་བའི་བར་གྱི་གཞུང་གིས་རིགས་ཐམས་ཅད་ཀྱི་ཕྱག་རྒྱ་བསྒོམ་པའི་དངོས་གྲུབ་ཀྱི་རྒྱུད་སྟོན་པ་ཡིན་ནོ། །རིགས་ཐམས་ཅད་ཀྱི་ལས་ཀྱི་དཀྱིལ་འཁོར་དང་འབྲེལ་བའི་རྒྱུད་ཕྱི་མའི་ཆོ་ག་རྒྱས་པའི་བསྡུས་པའི་དོན་བསྟན་པའོ། །དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པ་ལས་རྟོགས་པ་ཐམས་ཅད་ཀྱི་གསང་བའི་རྒྱུད་ཕྱི་མའི་བསྡུས་པའི་དོན་རྫོགས་སོ།། །།བསྒོམས་


DTG057_Page_0049
[མ་དཔེ་གཟིགས་ན་འདིར་གནོན།]

པས་འཇིགས་སྐྲག་ཅིང་བྱ་བ་ལ་མངོན་པར་ཞེན་པའི་སེམས་ཅན་རྗེས་སུ་འཛིན་པར་བྱེད་པ་རྟོག་པ་ཐམས་ཅད་ཀྱི་རྒྱུད་ཀྱི་ཕྱི་མའི་ཕྱི་མ་བསྡུས་པའི་དོན་བརྗོད་པར་བྱ་སྟེ། འདིར་ཡང་རྟོག་པ་ཐམས་ཅད་ཀྱི་ཕྱི་མའི་ཕྱིད་མའི་རྒྱུད་དུ་རང་གི་རིགས་ཀྱི་དཀྱིལ་འཁོར་ཆེན་པོ་མཐོང་བ་ཙམ་གྱིས་ཀྱང་རང་གི་རིགས་ལས་གསུངས་པའི་སྙིང་པོ་དང་ཕྱག་རྒྱ་དང༌། གསང་སྔགས་དང༌། རིག་པ་བསྒྲུབ་པ་ནི་རྒྱ་ཆེན་པོས་འཇིགས་ཤིང་སྐྲག་ལ་བསོད་ནམས་ཆུང་བའི་སེམས་ཅན་རྗེས་སུ་གཟུང་བའི་ཕྱིར་བཅོམ་ལྡན་འདས་ཀྱིས་རྗེས་སུ་གནང་བ་མཛད་པ་ཡིན་ནོ། །རང་གི་རིགས་ཀྱི་དཀྱིལ་འཁོར་ཆེན་པོ་ལས་གསུངས་པའི་བསྒྲུབ་པར་བྱ་བའི་དངོས་པོ་ཐམས་ཅད་དང་སྒྲ་ནི་སྙིང་པོ་ཞེས་བྱའོ། །རང་གི་རིགས་ཀྱི་གཟུངས་ཀྱི་དཀྱིལ་འཁོར་ལས་གསུངས་པ་ཐམས་ཅད་དང་སྒྲ་ནི་ཕྱག་རྒྱའོ། །རང་གི་རིགས་ཀྱི་ལས་ཀྱི་དཀྱིལ་འཁོར་ལས་གསུངས་པ་ཐམས་ཅད་དང་སྒྲ་ནི་གསང་སྔགས་སོ། །རང་གི་རིགས་ཀྱི་ལས་ཀྱི་དཀྱིལ་འཁོར་ལས་གསུངས་པའི་བསྒྲུབ་པར་བྱ་བ་ཐམས་ཅད་དང༌། རིག་པའི་སྒྲའི་བདག་ཉིད་ཅན་ནི་བཅོམ་ལྡན་འདས་ཀྱིས་རིག་པ་ཞེས་བྱ་བར་བསྟན་ཏོ། །དེ་ལ་དཀྱིལ་འཁོར་ཆེན་པོ་མཐོང་བའི་དུས་ཀྱི་ངེས་པ་དང་སྔགས་བཟླས་པའི་གྲངས་དང༌། རས་རིས་དང་ཕྱིའི་མཆོད་པ་ལྔ་ལ་སོགས་པའི་མཆོད་པ་དང་ཕྱག་རྒྱའི་མཆོད་པ་དང༌། སྐྱིལ་མོ་ཀྲུང་ལ་སོགས་པའི་ངེས་པ་ནི་ཡོ་བྱད་དེ་དེ་ལ་མངོན་པར་ཞེན་པ་རྣམས་ཀྱིས་དབུལ་བར་བྱའོ་ཞེས་བྱ་བའི་དོན་འདི་རྟོགས་པར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་ཞེས་བྱ་བ་ནས་བརྩམས་ཏེ། རྡོ་རྗེ་འཛིན་པས་གསུངས་སོ་ཞེས་བྱ་བའི་བར་གྱི་གཞུང་གིས་སྟོན་ཏོ། །རིགས་ཐམས་ཅད་ཀྱི་ཟློས་པ་པོས་སྙིང་པོ་ཡིད་ལ་འདོད་པ་ཞེས་བྱ་བ་ལ་སོགས་པ་རབ་ཏུ་ཤིས་པའི་སྒྲ་བརྗོད་ལ། སྙིང་པོ་དང་ཕྱག་རྒྱ་དང༌། སྔགས་དང༌། རིག་པ་བཟླས་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ནས། རྡོ་རྗེ་འཛིན་པས་གསུངས་སོ་ཞེས་བྱ་བའི་བར་གྱི་གཞུང་གིས་རིགས་ཐམས་


DTG057_Page_0050
[མ་དཔེ་གཟིགས་ན་འདིར་གནོན།]

ཅད་ཀྱི་ཐུན་མོང་དུ་སྒྲུབ་པའི་ཡོ་བྱད་ཀྱི་ཆོག་སྟོན་ཏོ། །བཛྲ་སཏྭ་ཞེས་བྱ་བ་ལ་སོགས་པའི་སྒྲ་བརྗོད་དེའི་དོན་གྱི་བདག་ཉིད་རང་གི་ལྷའི་སྐུར་བསྒོམ་པའམ། མདུན་དུ་བསྒོམས་ལ་སྙིང་པོ་དང༌། སྔགས་དང༌། ཕྱག་རྒྱ་དང༌། རིག་པ་བཟླས་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ནས། བཅོམ་ལྡན་འདས་རྡོ་རྗེ་སེམས་དཔས་གསུངས་སོ་ཞེས་བྱ་བའི་བར་གྱི་གཞུང་གིས་རིགས་ཐམས་ཅད་ཀྱི་བཟླས་པའི་ཆོ་ག་སྟོན་ཏོ། །ཟློས་པ་པོ་རྣམས་ལ་སྤྲོ་བ་བསྐྱེད་པར་བྱ་བའི་ཕྱིར་བཟླས་བརྗོད་ཀྱི་འབྲས་བུ་བརྗོད་པར་བྱའོ་ཞེས་བྱ་བའི་དོན་འདི་བསྟན་པའི་ཕྱིར། དེ་ནས་ཞེས་བྱ་བ་ནས་དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་རིན་པོ་ཆེས་གསུངས་སོ་ཞེས་བྱ་བའི་བར་གྱི་གཟུང་གིས་རིགས་ཐམས་ཅད་ཐུན་མོང་གི་དངོས་གྲུབ་ཀྱི་ཆོ་ག་སྟོན་ཏོ། །ཐམས་མེད་པར་སྙིང་པོ་དང༌། ཕྱག་རྒྱ་དང༌། སྔགས་དང༌། རིག་པ་རྣམས་འགྲུབ་པར་མི་འགྱུར་རོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་རྟོག་པ་ཐམས་ཅད་ཀྱི་ཐབས་ཀྱི་རྒྱུད་ཅེས་བྱ་བ་ནས། དངོས་གྲུབ་ཀུན་གྱི་མཆོག་ཐོབ་བོ། །ཞེས་བྱ་བའི་བར་གྱི་གཞུང་གིས་རྟོག་པ་ཐམས་ཅད་ཀྱི་ཐབས་ཀྱི་དངོས་གྲུབ་ཀྱི་རྒྱུད་སྟོན་ཏོ། །དེ་རྣམས་ཉིད་ནི་བསོད་ནམས་མེད་པ་མ་ཡིན་ནོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ནས། མྱུར་དུ་སངས་རྒྱས་ཉིད་དུ་འགྲུབ། །ཅེས་བྱ་བའི་བར་གྱི་གཞུང་གིས་རྟོག་པ་ཐམས་ཅད་ཀྱི་བསོད་ནམས་ཀྱི་དངོས་གྲུབ་ཀྱི་རྒྱུད་སྟོན་ཏོ། །དེ་རྣམས་ཉིད་ནི་ཤེས་རབ་མེད་པ་མ་ཡིན་ནོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ནས། དེ་བཞིན་གཤེགས་པ་ཐམས་ཅད་ཀྱི་ཤེས་རབ་དང༌། ཡེ་ཤེས་ཀྱིས་གསུངས་སོ་ཞེས་བྱ་བའི་བར་གྱི་གཞུང་གིས་རྟོག་པ་ཐམས་ཅད་ཀྱི་ཤེས་རབ་དང་ཡེ་ཤེས་ཀྱི་དངོས་གྲུབ་ཀྱི་རྒྱུད་སྟོན་ཏོ། །དེ་རྣམས་ཉིད་ནི་ཚོགས་མེད་པར་མ་ཡིན་ནོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ནས། མྱུར་དུ་དངོས་གྲུབ་ཐོབ་པར་འགྱུར། །ཞེས་བྱ་བའི་བར་གྱི་གཞུང་གིས་


DTG057_Page_0051
[མ་དཔེ་གཟིགས་ན་འདིར་གནོན།]

རྟོག་པ་ཐམས་ཅད་ཀྱི་ཚོགས་ཀྱི་དངོས་གྲུབ་ཀྱི་རྒྱུད་སྟོན་ཏོ། །དེ་རྣམས་ཉིད་ནི་མཚན་མ་འབྱུང་བའི་ཡེ་ཤེས་མེད་ན་མ་ཡིན་ནོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་ཞེས་བྱ་བ་ནས། རྡོ་རྗེ་སེམས་དཔས་གསུངས་སོ་ཞེས་བྱ་བའི་བར་གྱི་གཞུང་གིས་དེ་བཞིན་གཤེགས་པ་ཐམས་ཅད་ཀྱི་མཚན་མ་བྱུང་བའི་ཡེ་ཤེས་ཀྱི་ཆོ་ག་རྒྱས་པའི་རྒྱུད་སྟོན་ཏོ། །དེ་རྣམས་ཉིད་ནི་རྟོག་པ་འབྱུང་བའི་ཡེ་ཤེས་མེད་པ་མ་ཡིན་ནོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ནས། རྡོ་རྗེ་རིན་ཆེན་གྱིས་གསུངས་སོ་ཞེས་བྱ་བའི་བར་གྱི་གཞུང་གིས་རིགས་ཐམས་ཅད་ཀྱི་རྟོག་པ་འབྱུང་བའི་ཡེ་ཤེས་ཀྱི་རྒྱུད་སྟོན་ཏོ། །སྙིང་པོ་དང༌། ཕྱག་རྒྱ་དང༌། སྔགས་དང་ཡེ་ཤེས་མེད་པར། སྙིང་པོ་དང༌། ཕྱག་རྒྱ་དང༌། སྔགས་དང༌། རིག་པའི་དངོས་གྲུབ་ཏུ་མི་འགྱུར་རོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ནས་བརྩམས་ཏེ། རྡོ་རྗེ་འཛིན་པས་གསུངས་སོ་ཞེས་བྱ་བའི་བར་གྱི་གཞུང་གིས་རིགས་ཐམས་ཅད་ཀྱི་རྟོག་པའི་སྙིང་པོ་ལ་སོགས་པ་འབྱུང་བའི་ཡེ་ཤེས་ཀྱི་རྒྱུད་སྟོན་ཏོ། །རིགས་ཐམས་ཅད་ཀྱི་ཟློས་པ་པོས་རང་གི་ཚིག་ལས་སྐལ་བ་དང་ལྡན་པ་དང༌། སྐལ་བ་དང་མི་ལྡན་པ་བརྟག་པར་བྱས་ནས་འཇུག་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ནས། ཡིད་ཀྱིས་དེ་ནི་ཤེས་པར་འགྱུར། །ཞེས་བྱ་བའི་བར་གྱི་གཞུང་གིས་རྟོག་པ་ཐམས་ཅད་ཀྱི་ཡེ་ཤེས་སྐྱེད་པའི་ཆོ་ག་རྒྱས་པའི་རྒྱུད་སྟོན་ཏོ། །དེ་ཉིད་ཀྱིས་ན་གདུལ་བྱ་དེ་རྣམས་རྟོག་པ་སྣ་ཚོགས་ཀྱིས་ཉེ་བར་བཅོམ་པའི་ཕྱིར། ལྟ་བ་ངན་པ་དང་ཞེན་པ་དང་མ་བྲལ་བ་ཡིན་ནོ་ཞེས་གསུངས་པས། དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་ཟློས་པ་པོས་ཐུན་མོང་དང་ཁྱད་པར་གྱི་སྐུ་དང་གསུང་དང་ཐུགས་རྡོ་རྗེའི་ཕྱག་རྒྱ་བསྒྲུབ་པ་ཉམས་སུ་བླང་བར་བྱའོ་ཞེས་བྱ་བའི་དོན་འདི་རྟོགས་པར་བྱ་བའི་ཕྱིར། དེ་ནས་རིགས་ཐམས་ཅད་ཀྱི་ཐུན་མོང་བའི་ཞེས་བྱ་བ་ནས།


DTG057_Page_0052
[མ་དཔེ་གཟིགས་ན་འདིར་གནོན།]

རྡོ་རྗེ་སེམས་དཔས་གསུངས་སོ་ཞེས་བྱ་བའི་བར་གྱིས་རིགས་ཐམས་ཅད་ཀྱི་གསང་བའི་སྐུ་དང༌། གསུང་དང༌། ཐུགས་རྡོ་རྗེའི་ཕྱག་རྒྱའི་རྒྱུད་སྟོན་པ་ཡིན་ནོ། །རྟོག་པ་ཐམས་ཅད་ཀྱི་རྒྱུད་ཕྱི་མའི་ཕྱི་མའི་བསྡུས་པའི་དོན་བསྟན་པའོ། །ཇི་སྐད་དུ་གསུངས་པའི་དཀྱིལ་འཁོར་དུ་སློབ་མ་བཅུག་ནས་དབང་བསྐུར་བ་ཐམས་ཅད་ཀྱིས་དབང་བསྐུར་ནས། ལྷ་རྣམས་ཇི་ལྟ་བ་བཞིན་དུ་གཤེགས་སུ་གསོལ་བ་བྱས་ལ། སྤྲུལ་པ་རྣམས་རང་གི་ལུས་སུ་བཅུག་སྟེ་མངོན་པར་རྫོགས་པར་འཚང་རྒྱ་བའི་རང་གི་ཐུགས་ཀ་ན་གནས་པའི་རྡོ་རྗེ་སེམས་དཔའ་ལ་མཚན་བརྒྱ་རྩ་བརྒྱད་པས་ཡང་དག་པར་བསྟོད་ནས་ཅི་ལྟར་བདེ་བའི་སྤྱོད་ལམ་གྱིས་གནས་པར་བྱའོ་ཞེས་བྱ་བའི་དོན་འདི་བསྟན་པར་བྱའི་བའི་ཕྱིར། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་སྟན་ལས་ལངས་ནས་ཞེས་བྱ་བ་ནས་བརྩམས་ཏེ། དེ་བཞིན་གཤེགས་པ་ཐམས་ཅད་ཀྱི་གསང་བའི་ཐེག་པ་ཆེན་པོ་མངོན་པར་བསྡུས་པ་ཞེས་བྱ་བའི་བར་གྱི་གཞུང་གིས་སྟོན་ཏོ། །ཇི་སྐད་དུ་བཤད་པའི་བསྡུས་པའི་དོན་ཐམས་ཅད་བསྟན་པས་བཅོམ་ལྡན་འདས་ཤཱཀྱ་ཐུབ་པ་རྣམ་པར་སྣང་མཛད་དང་རྣམ་པར་སྣང་མཛད་ཆེན་པོར་གྱུར་པའི་རང་བཞིན་ནི་བརྗོད་པར་བྱ་བ་བཤད་པ་ཡིན་ལ། དེ་སྟོན་པར་བྱེད་པའི་སྒྲའི་ཚོགས་ནི་རྒྱུད་ཡིན་ནོ། །རྒྱུད་དང་བརྗོད་པར་བྱ་བ་གཉིས་ཀྱི་བརྗོད་པར་བྱ་བ་དང་རྗོད་པར་བྱེད་པའི་མཚན་ཉིད་དུ་འབྲེལ་པ་ནི་འབྲེལ་བའོ། །ཐབས་དང་ཤེས་རབ་ཀྱི་རྣམ་པར་སྣང་མཛད་དང༌། རྣམ་པར་སྣང་མཛད་ཆེན་པོ་བརྗོད་པར་བྱ་བ་བསྟན་པས་གདུལ་བྱ་རྣམས་ཀྱི་མངོན་པར་འདོད་པ་སྐྱེད་པ་ནི་དགོས་པའོ། །མངོན་པར་འདོད་པ་སྐྱེད་པ་དེ་རྣམས་དཀྱིལ་འཁོར་དུ་འཇུག་པ་ལ་སོགས་པས་དེའི་རང་བཞིན་མངོན་སུམ་དུ་བྱེད་པ་ནི་དགོས་པའི་ཡང་དགོས་པ་ཡིན་ནོ། །རྒྱུད་འདི་ནི་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པའི་ཐེག་པ་ཆེན་པོ་མངོན་པར་རྟོགས་པ་ཞེས་བྱའོ་ཞེས་གསུངས་སོ། །དེ་ལ་འདས་པ་དང་མ་འོངས་པ་དང༌། ད་ལྟར་བྱུང་བའི་སངས་རྒྱས་བཅོམ་ལྡན་འདས་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་


DTG057_Page_0053
[མ་དཔེ་གཟིགས་ན་འདིར་གནོན།]

རབ་དང་མཉམ་པ་རྣམས་ཀྱི་གཉིས་སུ་མེད་པའི་སེམས་དང་སེམས་ལས་བྱུང་བ་རྣམས་གཉིས་སུ་མེད་དེ་དེ་བཞིན་གཤེགས་པ་ཐམས་ཅད་དོ། །དེ་རྣམས་ཀྱི་དེ་ཁོ་ན་ཉིད་ནི་རྣམ་པ་བཅུ་སྟེ། བཅུ་གང་ཞེ་ན། འདི་ལྟ་སྟེ། དཀྱིལ་འཁོར་དང་སྔགས་དང་ཕྱག་རྒྱ་དང་བདག་དང་གནས་ལ་སོགས་པ་བསྲུང་པ་དང༌། ལྷ་རྣམས་སྤྱན་དྲང་བའི་ཆོ་ག་དང༌། བཟླས་བརྗོད་དང་སྒོམ་པ་དང༌། ཕྱི་དང་ནང་གི་བདག་ཉིད་ཅན་གྱི་སྦྱིན་སྲེག་དང་ཉེ་བར་བསྡུ་བ་དང༌། མཆོད་ནས་གཤེགས་སུ་གསོལ་བའོ། །དེ་ལ་དཀྱིལ་འཁོར་གྱི་གྲངས་བརྗོད་པར་བྱ་སྟེ། རྡོ་རྗེ་དབྱིངས་ཀྱི་དུམ་བུ་ལ་དེ་བཞིན་གཤེགས་པའི་རིགས་ཀྱི་དཀྱིལ་འཁོར་ནི་བཅུའོ། །ཁམས་གསུམ་རྣམ་པར་རྒྱལ་བའི་དུམ་བུ་ལ་རྡོ་རྗེའི་རིགས་ཀྱི་དཀྱིལ་འཁོར་ནི་བཅུ་བཞིའོ། །པདྨའི་རིགས་དང་ནོར་བུའི་རིགས་གཉིས་ལ་ཡང་གྲངས་དེ་བཞིན་གཤེགས་པའི་རིགས་དང་འདྲའོ། །ཡང་དེ་བཞིན་གཤེགས་པའི་རིགས་ཀྱི་རྒྱུད་ཕྱི་མ་ལ་སྒྲུབ་པའི་དཀྱིལ་འཁོར་སུམ་ཅུ་རྩ་བདུན་ནོ། །རྡོ་རྗེའི་རིགས་ལ་ལྔ་རྩ་བརྒྱད་དོ། །པདྨའི་རིགས་དང་ནོར་བུའི་རིགས་གཉིས་ལ་ཡང་གྲངས་དེ་བཞིན་གཤེགས་པའི་རིགས་དང་འདྲའོ། །སྔགས་ལ་སོགས་པའི་དེ་ཁོ་ན་ཉིད་ནི་འདིའི་རྒྱུད་ཕྱི་མའི་བཤད་པ་ལས་ཁོང་དུ་ཆུད་པར་བྱའོ། །ཡང་ན་རྒྱུ་དང་འབྲས་བུ་དང་དོན་དམ་པའི་དེ་ཁོ་ན་ཉིད་ལས་བཅུ་པོར་གྱུར་པ། དེ་ཁོ་ན་ཉིད་བཅུ་པོ་དེ་དག་ཉིད་ཐོས་པ་དང་བསམ་པའི་ཤེས་རབ་ཀྱི་ཕ་རོལ་ཏུ་ཕྱིན་པ་དང། ཐབས་ཀྱི་ཕ་རོལ་ཏུ་ཕྱིན་པའི་དབྱེ་བས་དེ་ཁོ་ན་ཉིད་བཅུ་པོ་དེ་དག་ཉིད་རྣམ་པ་གཉིས་སུ་འཇོག་པ་ཡང་ཡིན་ནོ། །ཇི་སྐད་དུ་བཤད་པའི་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བཅུ་པོ་དེ་དག་ཉིད་ཐོས་པ་དང་བསམ་པའི་ཤེས་རབ་གཉིས་ཀྱིས་ཡང་དག་པར་བཟུང་པས་ན་བསྡུས་པའོ། །དེ་ཉིད་ནི་ཐེག་པ་ཆེན་པོའོ། །དེ་ཁོང་དུ་ཆུད་པ་ནི་མངོན་པར་རྟོགས་པ་སྟེ། མངོན་སུམ་དུ་བྱེད་པའོ། །དེ་སྟོན་པར་བྱེད་པའི་སྒྲའི་ཚོགས་ཉི་རྒྱུད་ཅེས་བྱ་བར་བཤད་དོ། །ཡང་རྣམ་པར་སྣང་མཛད་དང༌། རྣམ་པར་སྣང་མཛད་ཆེན་པོ་བསྟན་པ་ནི་གླེང་


DTG057_Page_0054
[མ་དཔེ་གཟིགས་ན་འདིར་གནོན།]

གཞིའོ། །འདི་ཉིད་ཀྱི་མངོན་པར་བྱང་ཆུབ་པ་ལྔ་ནས་བརྩམས་ཏེ་དུམ་བུ་བཞིར་བསྟན་པ་ནི་རྩ་བའི་རྒྱུད་དོ། །ཡང་འདིའི་མཆོག་གི་དངོས་གྲུབ་ཀྱི་ཁྱད་པར་བརྗོད་པ་ནི་རྒྱུད་ཕྱི་མའོ། །གཞན་ཡང་མཆོག་གི་དངོས་བསྒྲུབ་པའི་ཁྱད་པར་ལ་འཇུག་མི་ནུས་པ་ལ་དམིགས་པ་དང་བཅས་པར་རྟོག་པ་དང་བཅས་པའི་རྒྱུད་ཕྱི་མའི་ཕྱི་མ་བསྟན་པར་མཛད་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པ་ཐེག་པ་ཆེན་པོ་མངོན་པར་རྟོགས་པའི་མདོའི་བསྡུས་པའི་དོན་བསྟན་པ་རྫོགས་སོ།། །།དེ་ལྟ་བུའི་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་བསྡུས་པ་ཐེག་པ་ཆེན་པོ་མངོན་པར་རྟོགས་པའི་མདོ་བློ་ལ་གནས་པར་བྱས་ནས། སྡུད་པར་བྱེད་པས་ས་བཅུའི་དབང་ཕྱུག་ལྕང་ལོ་ཅན་གྱི་ཕོ་བྲང་ན་བཞུགས་པའི་རྡོ་རྗེ་འཛིན་པས་འདི་སྐད་ཅེས་བྱ་བ་ལ་སོགས་པ་སྨྲས་པ་ཡིན་ཏེ། དེ་ལ་འདི་སྐད་ཅེས་བྱ་བ་ནི་བཤད་མ་ཐག་པའི་ཡང་དག་པར་བསྡུས་པའི་གཞུང་གི་ཚུལ་ཞེས་བྱ་བའི་དོན་ཏོ། །བདག་གིས་ཞེས་བྱ་བ་ནི་བདག་ཉིད་ཡིན་པར་སྟོན་ཏོ། །བདག་ཉིད་ཀྱིས་ཐོས་ཀྱི་གཞན་དག་ལས་བརྒྱུད་པ་ནི་མ་ཡིན་ནོ་ཞེས་བྱ་བའི་དོན་ཏོ། །ཐོས་པ་ཞེས་བྱ་བ་ནི་འདིར་ཐོས་པའི་རང་བཞིན་གྱི་ཤེས་པས་ཐོས་པ་ཡིན་གྱི་རྟོགས་པ་ནི་མ་ཡིན་ནོ་ཞེས་བྱ་བའི་དོན་ཏོ། །འདིས་ནི་བདག་ཉིད་ཀྱིས་མངོན་སུམ་དུ་ཐོས་པ་དང་མ་ཡེངས་པ་ཉིད་དུ་སྟོན་པ་ཡིན་ནོ། །ཁྱེད་ཀྱིས་དེ་གང་གི་ཚེ་ཐོས་ཤེ་ན། དུས་གཅིག་ནི་ཞེས་བྱ་བ་སྨོས་ཏེ། དུས་གཅིག་ནི་དུས་གཅིག་གི་ཚེ་སྟེ། གཞན་དག་གི་ཚེ་དང་གཞན་དག་ཀྱང་བདག་གིས་ཐོས་སོ་ཞེས་བྱ་བ་སྟེ། འདིས་ཀྱང་བདག་ཉིད་ཐོས་པ་མང་བར་སྟོན་པ་ཡིན་ནོ། །ཡང་ན་དུས་གཅིག་ན་ནི་སྐད་ཅིག་མ་གཅིག་ཉིད་ལ་སྟེ། འདིས་ཀྱང་རྣམ་པར་ཐར་པ་བསམ་གྱིས་མི་ཁྱབ་པ་ཐོབ་པ་ཉིད་ཀྱིས་སྐད་ཅིག་མ་གཅིག་ཉིད་ལ་དུས་གསུམ་གྱི་བསྐལ་པ་སོ་སོར་སྣང་བས་བདག་ཉིད་ཚད་མའི་སྐྱེས་བུ་ཉིད་ཡིན་པར་སྟོན་ཏོ། །ཁྱེད་ཀྱིས་གང་ལས་གང་དུ་ཐོས་ཞེས་རྟོགས་པ་འདི་བསལ་བའི་ཕྱིར། བཅོམ་ལྡན་འདས་ཞེས་བྱ་བ་


DTG057_Page_0055
[མ་དཔེ་གཟིགས་ན་འདིར་གནོན།]

ལ་སོགས་པ་སྨོས་པ་ཡིན་ཏེ། འདིར་བཅོམ་ལྡན་འདས་ལྷའི་རྒྱལ་པོའི་གནས་ན་བཞུགས་ཏེ་ཞེས་བྱ་བ་འདི་དང་སྦྱར་བར་བྱའོ། །དེ་བས་ན་དོན་འདི་སྐད་སྟོན་ཏེ། བཅོམ་ལྡན་འདས་འོག་མིན་གྱི་ལྷའི་རྒྱལ་པོའི་གནས་ན་བཞུགས་ཏེ། དེ་ལས་དེར་བདག་གིས་ཐོས་སོ་ཞེས་བྱ་བ་སྟེ། ཉོན་མོངས་པ་དང༌། ལྷའི་བུ་དང༌། ཕུང་པོ་དང༌། འཆི་བདག་གི་མཚན་ཉིད་ཅན་གྱི་བདུད་བཞི་བཅོམ་པས་ན། བཅོམ་ལྡན་འདས་སོ། །ཁྱད་པར་ཇི་ལྟ་བུའི་བཅོམ་ལྡན་འདས་འདི་ལས་ཁྱེད་ཀྱིས་ཐོས་ཤེ་ན། དེ་བཞིན་གཤེགས་པ་ཞེས་བྱ་བ་ལ་སོགས་པ་སྨོས་ཏེ། དེ་བཞིན་གཤེགས་པ་ཡང་ཡིན་ལ་ཐམས་ཅད་ཀྱང་ཡིན་པས་དེ་བཞིན་གཤེགས་པ་ཐམས་ཅད་དེ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་སངས་རྒྱས་རྣམས་ཀྱིས་བྱང་ཆུབ་ཀྱི་སེམས་དང་གཉིས་སུ་མེད་པའི་རང་བཞིན་གྱི་སེམས་དང་སེམས་ལས་བྱུང་བ་རྣམས་སོ། །དེ་ཉིད་ནི་གཟུང་བ་དང་འཛིན་པའི་རྣམ་པར་རྟོག་པས་བསྐྱོད་པར་མི་ནུས་པས་ན་རྡོ་རྗེའོ། །དེ་རྣམས་བྱིན་གྱིས་བརླབས་པ་ནི་སྔོན་གྱི་འཕེན་པའི་ཤུགས་སོ། །དེའི་དམ་ཚིག་ནི་དེ་བཞིན་གཤེགས་པའི་རིགས་དེ་ལས་སྐྱེས་པའོ། །འདི་གང་ལས་ཤེ་ན། རྟག་ཏུ་དྲི་མེད་ཐུགས་རྗེའི་ཤུགས་ལས་བྱུང༌། །སྨོན་ལམ་གྲུབ་པ་མི་འགག་ཆོས་ཉིད་ཅན། །འགྲོ་བའི་དོན་སྒྲུབ་མཐའ་ཡས་ལྷུར་མཛད་པ། །ཐུགས་རྗེའི་བདག་ཉིད་རྟག་ཏུ་རྣམ་པར་སྣང༌། །ཞེས་གསུངས་པའི་ཕྱིར་རོ། །དམ་ཚིག་དེ་དག་གི་ཡེ་ཤེས་ནི་དེར་ངེས་པའོ། །དེའི་རྣམ་པ་སྣ་ཚོགས་ཀྱི་ཁྱད་པར་ནི་ཕྱག་རྒྱ་ཆེན་པོ་ལ་སོགས་པར་ངེས་པའི་རང་བཞིན་ནོ། །དེ་རྣམས་དང་ཡང་དག་པར་ལྡན་པ་ནི་བཅས་པའོ། །འདིས་ནི་བཅོམ་ལྡན་འདས་དེ་བཞིན་གཤེགས་པའི་རིགས་ཐུགས་སུ་ཆུད་པ་དང་དམ་ཚིག་མཁྱེན་པ་ཉིད་དུ་སྟོན་ཏོ། །གསང་སྔགས་ཀྱི་སྒོའི་སྤྱད་པ་སྤྱོད་པར་འདོད་པ་རྣམས་ཀྱིས་ཀྱང་དམ་ཚིག་ཤེས་པར་བྱའོ་ཞེས་བྱ་བར་སྟོན་ཏོ། །དེ་བཞིན་གཤེགས་པ་ཐམས་ཅད་ནི་སྦྱིན་པའི་ཕ་རོལ་ཏུ་ཕྱིན་པ་ནི་ངོ་བོ་ཉིད་དུ་གཉིས་སུ་མེད་པའི་སེམས་ལས་བྱུང་བ་སྟེ། དེ་ལས་བྱུང་བའི་རིན་པོ་ཆེའི་དབུ་རྒྱན་དེས། འདོད་པ་དང་


DTG057_Page_0056
[མ་དཔེ་གཟིགས་ན་འདིར་གནོན།]

གཟུགས་དང༌། གཟུགས་མེད་པའི་མཚན་ཉིད་ཅན་གྱི་ཁམས་གསུམ་པར་ཆོས་ཀྱི་རྒྱལ་པོའི་རྒྱུར་དབང་བསྐུར་བ་སྟེ། དེས་བརྙེས་པ་ནི་ཁམས་གསུམ་ན་སྤྱོད་པའི་སེམས་ཅན་རྣམས་འཇིག་རྟེན་ལས་འདས་པའི་ལམ་ལ་ངེས་པར་སྦྱོར་བའི་ཆོས་ཀྱི་རྒྱལ་སྲིད་དོ། །འདིས་ནི་བཅོམ་ལྡན་འདས་རིན་པོ་ཆེའི་རིགས་ཐུགས་སུ་ཆུད་པ་དང་དབང་བསྐུར་བར་བརྙེས་པར་ཡང་སྟོན་ཏེ། གསང་སྔགས་ཀྱི་སྒོའི་སྤྱད་པར་འདོད་པ་རྣམས་ཀྱིས་ཀྱང་དབང་བསྐུར་བ་ཐོབ་པར་བྱའོ་ཞེས་བྱ་བར་སྟོན་ཏོ། །དེ་བཞིན་གཤེགས་པ་ཐམས་ཅད་ནི་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། གཉིས་སུ་མེད་པའི་སེམས་དང་སེམས་ལས་བྱུང་བ་རྣམས་སོ། །དེ་ཉིད་ནི་ཐམས་ཅད་མཁྱེན་པའི་ཡེ་ཤེས་སོ། །དེ་ཉིད་ནི་རྣལ་འབྱོར་ཆེན་པོ་སྟེ་དེ་གང་ལ་མངའ་བ་དེ་ནི་ཐམས་ཅད་མཁྱེན་པའི་ཡེ་ཤེས་ཀྱི་རྣལ་འབྱོར་ཆེན་པོའོ། །དེ་དག་ཀྱང་ཡིན་ལ་དབང་ཕྱུག་ཀྱང་ཡིན་པས་ན། དེ་བཞིན་གཤེགས་པ་ཐམས་ཅད་མཁྱེན་པའི་ཡེ་ཤེས་རྣལ་འབྱོར་ཆེན་པོའི་དབང་ཕྱུག་གོ །འདིར་ཀྱང་བཅོམ་ལྡན་འདས་པདྨའི་རིགས་ཐུགས་སུ་ཆུད་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་བསྙེན་བས་རྣལ་འབྱོར་ཆེན་པོའི་དབང་ཕྱུག་ཡིན་པར་སྟོན་ལ། གསང་སྔགས་ཀྱི་སྒོའི་སྤྱད་པ་སྤྱོད་པར་འདོད་པས་ཀྱང་རྣལ་འབྱོར་ལ་དབང་དུ་གྱུར་པར་བྱའོ་ཞེས་སྟོན་ཏོ། །འདིས་ཇི་ལྟར་ཐམས་ཅད་མཁྱེན་པའི་ཡེ་ཤེས་རྣལ་འབྱོར་ཆེན་པོའི་དབང་ཕྱུག་བརྙེས་པས་དེ་ཉིད་ཀྱི་དོན་སུམ་ཚོགས་པ་དེ་བཞིན་དུ་གཞན་གྱི་དོན་ཀྱང་མཛད་པ་ཡིན་ནོ་ཞེས་བསྟན་པའི་ཕྱིར། དེ་བཞིན་གཤེགས་པ་ཞེས་བྱ་བ་ལ་སོགས་པ་སྨོས་ཏེ། དེ་བཞིན་གཤེགས་པ་ཐམས་ཅད་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་རང་བཞིན་ནོ། །དེ་ཉིད་ནི་ཕྱག་རྒྱ་ཐམས་ཅད་དེ་སེམས་ཅན་གྱི་ཁམས་ཐམས་ཅད་བྱང་ཆུབ་པར་བརྩོན་འགྲུས་ཀྱི་གཟུགས་བསྐྱེད་པར་རྒྱས་འདེབས་པའི་ཕྱིར་རོ། །དེ་ཉིད་ནི་མཉམ་པ་ཉིད་དོ། དེ་ཐུགས་སུ་ཆུད་པ་ནི་བརྙེས་པའོ། །ཐམས་ཅད་ནི་སེམས་ཅན་གྱི་ཁམས་སྣ་ཚོགས་པའོ། །དེའི་དགོས་པ་མཛད་པ་ནི་མངོན་པར་འདོད་པའི་དོན་མཛད་པའོ། །དགོས་པ་མཛད་པ་ཉིད་ཡིན་པས་ན། དགོས་པ་མཛད་པ་ཉིད་དེ་སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་ཐམས་


DTG057_Page_0057
[མ་དཔེ་གཟིགས་ན་འདིར་གནོན།]

ཅད་ཀྱི་རེ་བ་ཐམས་ཅད་དེ་རྣམ་པར་ཐམས་ཅད་དུ་ཕྱག་རྒྱ་ཆེན་པོ་ལ་སོགས་པ་ཐོབ་པར་སྲེད་པ་དེ་ཡོངས་སུ་སྐོང་བ་ནི་མངོན་པར་འདོད་པའི་དོན་ཐོབ་པར་མཛད་པའོ། །དེ་ཉིད་ནི་ཕྲིན་ལས་ཏེ་དེ་མཛད་པས་ན་རེ་བ་ཐམས་ཅད་སྐོང་བའི་ཕྲིན་ལས་མཛད་པའོ། མ་ལུས་པའི་སྒྲ་ཟད་བར་གྱི་མིང་ལ་ཡང་འཇུག་སྲིད་དེ། དེས་ན་ལུས་པ་མེད་པ་ཞེས་བྱ་བའི་སྒྲས་ཟད་པར་གྱི་དོན་སྟོན་པར་བྱེད་པ་ཡིན་ནོ། །འདིས་ཀྱང་བཅོམ་ལྡན་འདས་ལས་ཀྱི་རིགས་ཐུགས་སུ་ཆུད་པ་དང་གཞན་གྱི་དོན་ཕུན་སུམ་ཚོགས་པར་སྟོན་པ། གསང་སྔགས་ཀྱི་སྒོའི་སྤྱད་པ་སྤྱོད་པར་འདོད་པས་ཀྱང་སེམས་ཅན་རྣམས་རྗེས་སུ་བཟུང་ཞིང༌། རིག་པ་གྲུབ་པས་དཀྱིལ་འཁོར་བྲི་བ་ལ་སོགས་པའི་ལས་རྣམས་ལ་འཇུག་པར་བྱའོ་ཞེས་བྱ་བར་སྟོན་ཏོ། །དེ་ལྟ་བུ་སུ་ཞིག་ཡིན་ཞེ་ན། ཐུགས་རྗེ་ཆེ་བ་རྣམ་པར་སྣང་མཛད་ཅེས་བྱ་བ་ལ་སོགས་པ་སྨོས་ཏེ། དམིགས་སུ་མེད་པའི་ཐུགས་རྗེ་ཆེན་པོའི་རང་གི་ངག་གིས་འཇུག་པ་འདི་ལ་མངའ་བས་ན་ཐུགས་རྗེ་ཆེ་བའོ། །དེ་བཞིན་གཤེགས་པའི་རིགས་པ་ལ་སོགས་པའི་རིགས་ཀྱི་ཚུལ་གྱིས་རྣམ་པར་སྣང་ཞིང་འབར་བར་གྱུར་པས་ན་རྣམ་པར་སྣང་མཛད་དོ། །དེ་ཉིད་ནི་ཆོས་ཆོས་དང་ལོངས་སྤྱོད་རྫོགས་པ་དང༌། རྣམ་པར་སྨིན་པའི་སྐུས་རྟག་པ་ཡིན་ཞིང་འདས་པ་དང༌། མ་འོངས་པ་དང༌། ད་ལྟར་བྱུང་བའི་དུས་གསུམ་པོ་ནི་དུས་གསུམ་སྟེ་དུས་གསུམ་པོ་དེ་དག་ཏུ་ཀུན་རྫོབ་ཏུ་སྤྲུལ་པའི་སྐུས་བཞུགས་པའོ། །ཡང་ན་དུས་གསུམ་པོ་རྣམས་སུ་ན་ཀུན་རྫོབ་ཀྱི་ཚུལ་གྱིས་བཞུགས་ལ། །དོན་དམ་པར་ནི་དུས་ཡོད་པ་མ་ཡིན་པས་དུས་གསུམ་དུ་བཞུགས་པའོ། །སྐུ་ཐམས་ཅད་ནི་ངོ་བོ་ཉིད་དང༌། རྣམ་པར་སྨིན་པ་དང༌། ལོངས་སྤྱོད་རྫོགས་པ་དང༌། སྤྲུལ་པའི་སྐུའི་དབྱེ་བས་རྣམ་པ་བཞིའོ། །དེ་ལ་གང་དག་དུ་མ་རྒྱ་ཆེན་པོ། །ཁ་དོག་དང་ནི་དབྱིབས་དང་གདན། །ཕྱག་མཚན་ལ་སོགས་དབྱེ་བ་འདི། །སྐུ་ཡི་གསང་བར་རིག་པར་བྱ། །གསུང་ཐམས་ཅད་ནི་རྡོ་རྗེ་དང༌། ཁྲོ་བོ་དང༌། ཆོས་དང༌། གསལ་བའི་དབྱེ་བས་ཕྱེ་བའོ། །ཐུགས་ཐམས་ཅད་ནི་ཐུགས་ཀའི་ཟླ་བར། དང་པོའི་རྡོ་རྗེ་དང༌། ཁྲོ་བོའི་རྡོ་རྗེ་དང༌། རྡོ་རྗེ་པདྨ་དང༌། རྡོ་རྗེ་རིན་ཆེན་དང༌། སྣ་ཚོགས་རྡོ་རྗེ་སྟེ། འདི་དག་གང་


DTG057_Page_0058
[མ་དཔེ་གཟིགས་ན་འདིར་གནོན།]

ལ་མངའ་བ་དེ་ནི་སྐུ་དང་གསུང་དང༌། ཐུགས་རྡོ་རྗེའོ། །དེ་ཉིད་ནི་དེ་བཞིན་གཤེགས་པ་ཡིན་པས་སྐུ་དང་གསུང་དང་ཐུགས་རྡོ་རྗེའི་དེ་བཞིན་གཤེགས་པ་སྟེ། དངོས་པོ་ཐམས་ཅད་ཇི་ལྟར་གནས་པ་དེ་བཞིན་ཐུགས་སུ་ཆུད་པ་དང༌། དེ་བཞིན་དུ་གཞན་དག་ལ་ཡང་སྟོན་པར་མཛད་པས་ཀྱང་སངས་རྒྱས་ནི། དེ་བཞིན་གཤེགས་པ་ཞེས་བྱའོ། །འདིས་ཀྱང་གང་ལ་ཐོབ་པའི་སྟོན་པ་པོ་འདི་ནི་སངས་རྒྱས་ཐམས་ཅད་གཅིག་ཏུ་བསྡུས་པ་རྣམ་པར་སྣང་མཛད་ཡིན་ནོ་ཞེས་བཤད་དེ། དང་པོ་སྦྱོར་བའི་ཏིང་ངེ་འཛིན་གྱི་མདོ་ལས་དེ་བཞིན་གཤེགས་པ་ལྔའི་ངོ་བོ་ཡིན་པར་སྟོན་པའི་ཕྱིར་རོ། །དེ་ལྟར་བཅོམ་ལྡན་འདས་ཀྱི་ཡོན་ཏན་བཤད་པ་སྔོན་དུ་འགྲོ་བས་བསྟན་པར་བྱས་ན། ཡོན་ཏན་དེ་ལྟ་བུ་དང་ལྡན་པའི་བཅོམ་ལྡན་འདས་གང་ན་བཞུགས་རྟོག་པ་ལ། དེ་བཞིན་གཤེགས་པ་ཐམས་ཅད་བཞུགས་ཤིང་ཞེས་བྱ་བ་ལ་སོགས་པ་སྨོས་ཏེ། དེ་བཞིན་གཤེགས་པ་ཐམས་ཅད་བཞུགས་པ་ནི་བཞུགས་པར་མཛད་པའོ། །དེ་བས་ན་བསྔགས་པ་ཡིན་ལ་བསྔགས་པ་ཉིད་ཀྱིས་ནི་བསྟོད་པའོ། །དེར་ནོར་བུ་ཆེན་པོ་ནི་ཡིད་བཞིན་གྱི་ནོར་བུ་རྣམས་སོ། །རིན་པོ་ཆེ་ནི་རྡོ་རྗེ་ལ་སོགས་པའོ། །དེ་རྣམས་ཀྱིས་སྤྲས་པ་ནི་གང་དུ་མཛེས་པར་བྱ་བའི་ཕྱིར་སྤེལ་ཞིང་བཀོད་པའོ། །དེར་ཁ་དོག་སྣ་ཚོགས་ཤིང་དྲིལ་བུ་བཏགས་པ་དང༌། དར་དང༌། འཕན་དང༌། མེ་ཏོག་གི་ཕྲེང་བ་དང༌། རྔ་མ་དང༌། དྲ་བ་དང༌། དྲ་བ་ཕྱེད་པ་དང༌། ཟླ་བ་རླུང་གིས་བསྐྱོད་པ་རྣམས་ཀྱིས་མཛེས་པར་བྱས་ཤིང་བརྒྱན་པོའོ། །འོག་མིན་གྱི་ལྷའི་རྒྱལ་པོའི་གནས་ན་བཞུགས་པ་ནི་གནས་པར་མཛད་པའོ། །འོག་མིན་ཀྱང་ཡིན་ལ་ལྷའི་རྒྱལ་པོ་ཡང་ཡིན་པས་ན་འོག་མིན་ལྷའི་རྒྱལ་པོ་དང༌། བཅོམ་ལྡན་འདས་རྣམ་པར་སྣང་འཛད་དང་པོའི་ཐུ་བོར་གྱུར་པའི་ཕྱིར་རོ། །གནས་དེ་ནི་དེ་ཉིད་ཀྱི་ཡིན་གྱི་གཞན་གྱི་མ་ཡིན་ཏེ། དེ་བས་ན་རང་གི་གནས་ན་བཞུགས་པ་ཡིན་ནོ་ཞེས་སྟོན་པ་ཡིན་ནོ། །དེ་ཡང་དཀྱིལ་འཁོར་གྱི་དེ་ཁོ་ན་ཉིད་དུ་དེ་བཞིན་གཤེགས་པའི་ཡོན་ཏན་གྱི་རང་བཞིན། མི་མཉམ་པ་མེད་པས་ཟུར་བཞི་པ་ཞེས་བྱ་བ་ལ་སོགས་པས་གཞལ་ཡས་ཁང་སྟོན་པ་ཡིན་ཏེ། འདི་


DTG057_Page_0059
[མ་དཔེ་གཟིགས་ན་འདིར་གནོན།]

དག་ཀྱང་འདིའི་འོག་ནས་བཤད་པར་བྱའོ། །དེ་ཡང་གཞན་དག་ལ་མི་སྲིད་དོ། །འདིས་ནི་གང་དུ་ཐོས་པ་དེས་སྟོན་པ་ཡིན་ནོ། །དེ་ལྟར་བཅོམ་ལྡན་འདས་ཀྱི་བཞུགས་གནས་ཀྱི་ཕུན་སུམ་ཚོགས་པ་བསྟན་ནས། འཁོར་ཕུན་སུམ་ཚོགས་པ་བསྟན་པའི་ཕྱིར། བྱང་ཆུབ་སེམས་དཔའ་ཞེས་བྱ་བ་ལ་སོགས་པ་སྨོས་པ་ཡིན་ཏེ། འདིའི་ཕྱག་ན་རྡོ་རྗེ་མངའ་བས་ན་ཕྱག་ན་རྡོ་རྗེའོ། །གཟིགས་པས་ན་ཀུན་དུ་སྤྱན་རས་གཟིགས་ཏེ། ཆོས་ཐམས་ཅད་རང་བཞིན་གྱིས་རྣམ་པར་དག་པོའོ་ཞེས་སོ་སོར་རྟོགས་པར་མཛད་པ་དང༌། སེམས་ཅན་རྣམས་བསྐྱབ་པའི་ཕྱིར་གཟིགས་པར་མཛད་པའོ། །དེའི་དབང་པོ་ནི་གཙོ་བོའོ། །ནམ་མཁའི་ནི་མཉམ་པ་ཉིད་ཀྱི་ཡེ་སོ། སྙིང་པོ་ནི་སྐྱེ་བ་མེད་པའི་གནས་ཏེ། དེ་གང་ལ་ཡོད་པ་དེ་ནི་ནམ་ནམ་མཁའི་སྙིང་པོའོ། །ཆོས་རྣམ་པ་ནི་རང་བཞིན་གྱིས་འོད་གསལ་བའོ་ཞེས་བྱ་བ་འདིས་ཆོས་ཆོས་ཐམས་ཅད་གཅིག་ཏུ་བྱེད་པའི་མི་ཕྱེད་པའི་ཁུ་ཚུར་གང་ལ་མངའ་བ་དེ་ནི་རྡོ་རྗེ་ཁུ་ཚུར་ཏེ། གང་ཞིག་མི་སླུ་བདེན་དེ་ཉིད། །རྡོ་རྗེའི་ཁུ་ཚུར་དེ་བཤད་དོ། །ཞེས་ལུང་ལས་གསུངས་པ་ཡིན་ནོ། །འཇམ་ཞིང་མཉེན་པའི་དཔལ་གང་ལ་མངའ་བ་དེ་ནི་འཇམ་དཔལ་ཏེ། གཉིས་སུ་མེད་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པའི་རྒྱུ་ལས་ངེས་པར་འབྱུང་བའི་དེ་ཁོ་ན་ཉིད་ཀྱིས་ཉོན་མོངས་པ་སྲ་ཞིང་རྩུབ་པ་དང་བྲལ་ལ། ན་ཚོད་ལོ་བརྒྱད་པའི་གཞོན་ནུའི་གཟུགས་མངའ་བའི་ཕྱིར་རོ། །སེམས་བསྐྱེད་པའི་རྗེས་ཐོགས་ཉིད་ལ་ཆོས་ཀྱི་འཁོར་ལོ་དཀྱིལ་འཁོར་དུ་འཇུག་པའི་ངག་ཚུལ་གང་ལ་མངའ་བ་དེ་ནི་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའོ། །ནམ་མཁའ་ནི་གོ་འབྱེད་པ་སྟེ་མཉམ་པ་ཉིད་ཀྱི་ཡེ་ཤེས་སོ། །དེ་ཉིད་ཀྱི་མཛོད་འདི་ལ་མངའ་བས་ན་ནམ་མཁའི་མཛོད་དོ། །ཕུང་པོ་དང༌། ཉོན་མོངས་པ་དང༌། འཆི་བདག་དང༌། ལྷའི་བུ་ནི་བདུད་ཐམས་ཅད་དེ། དེའི་སྟོབས་ནི་ནུས་པའོ། །དེ་རབ་ཏུ་འཇོམས་ཤིང་བཟློག་པར་མཛད་པའི་ངག་ཚུལ་གང་ལ་མངའ་བ་དེ་ནི་བདུད་ཀྱི་སྟོབས་ཐམས་ཅད་རབ་ཏུ་འཇོམས་པའོ། །བྱང་ཆུབ་སེམས་དཔའ་འདི་རྣམས་


DTG057_Page_0060
[མ་དཔེ་གཟིགས་ན་འདིར་གནོན།]

ནི་སྒྲུབ་པའི་ཡན་ལག་ཏུ་གྱུར་པ་ཡིན་ཏེ། ལུང་ལས་དམ་པའི་ཆོས་ཀྱི་གྲོང་ཁྱེར་སྐྱོང་བར་བྱེད་པའི་བྱང་ཆུབ་སེམས་དཔའ་རྣམས་ཞེས་གསུངས་པ་ཡིན་ནོ། །གང་གའི་ཀླུང་གི་བྱེ་མ་ཉེད་ཀྱི་དེ་བཞིན་གཤེགས་པ་རྣམས་དང་ཞེས་བྱ་བ་འདིས་ཀྱང་སྒྲུབ་པའི་ཡན་ལག་ཏུ་གྱུར་པའི་དེ་བཞིན་གཤེགས་པ་རྣམས་བསྟན་པ་ཡིན་ཏེ། ཛཿཧཱུཾ་བཾ་ཧོཿ་ཞེས་བརྗོད་དེ། ལུས་ལ་སངས་རྒྱས་ཀུན་གཞུག་གོ །ཞེས་བྱ་བ་ལ་སོགས་པ་གསུངས་པའི་ཕྱིར་རོ། །བཅོམ་ལྡན་འདས་དུས་དེའི་ཚེ་འོག་མིན་གྱི་གནས་ཇི་ལྟར་དེ་བཞིན་གཤེགས་པ་རྣམས་ཀྱིས་ཡོངས་སུ་གང་བ་དང། ལྷན་ཅིག་པ་ཞུགས་ཤེ་ན། དེ་ཡང་འདི་ལྟར་ཞེས་བྱ་བ་ལ་སོགས་པས་དཔེ་གསུངས་པ་ཡིན་ཏེ། ལྕང་ལོ་ཅན་ན་བཞུགས་པའི་ས་བཅུའི་དབང་ཕྱུག་གི་ཚུལ་འཛིན་པའི་རྡོ་རྗེ་འཆང་བས་ཀུན་དུ་བཟང་པོ་ལ་སོགས་པའི་བྱང་ཆུབ་སེམས་དཔའ་ཆེན་པོ་རྣམས་ལ་ཇི་ལྟར་བདག་ན་རྒྱལ་པོའི་ཕོ་བྲང་ལྕང་ལོ་ཅན་ན་ཡང་དག་པར་སྡུད་པའི་དུས་སུ་འཛམ་བུའི་གླིང་ཏིལ་གྱི་གང་བུ་ཏིལ་གྱི་ས་བོན་གྱིས་ཡོངས་སུ་གང་བ་བཞིན་དུ་འཛམ་བུའི་གླིང་ན་དེ་བཞིན་གཤེགས་པ་ཐམས་ཅད་ཀྱིས་ཀུན་དུ་གང་བར་བདག་ཅག་ལ་སྣང་ལ། འོག་མིན་གྱི་གནས་སུ་སྟོན་པར་མཛད་པའི་དུས་སུ་ཡང་བདག་ཅག་གིས་དེ་བཞིན་དུ་མཐོང་ངོ་ཞེས་གསུངས་པ་ཡིན་ནོ། །ཅི་དེ་བཞིན་གཤེགས་པའི་སྐུ་གཅིག་ཏུ་བཞུགས་སམ་ཞེ་ན་མ་ཡིན་ཏེ། དེ་བཞིན་གཤེགས་པའི་སྐུ་ཚད་མེད་པ་ཞེས་བྱ་བ་སྨོས་ཏེ། ཇི་ལྟ་བུ་ཞེ་ན་དེ་རྣམས་དང་ཞེས་བྱ་བ་སྨོས་སོ། །ཀྱང་ཞེས་བྱ་བའི་སྒྲས་ནི་གཞན་དག་ཀྱང་ཞེས་སྟོན་ཏེ། འདི་ཉིད་བཤད་པ་ན་དེ་བཞིན་གཤེགས་པ་རེ་རེའི་སྐུ་ལས་ཀྱང་ཞེས་བྱ་བ་སྨོས་པ་ཡིན་ནོ། །ཡང་ན་ཇི་བཞིན་ཐུན་མོང་དུ་གྱུར་པས་ན་ཐབས་ཅིག་པ་ཡིན་ཞེ་ན། སངས་རྒྱས་ཀྱི་ཞིང་ཞེས་བྱ་བ་ལ་སོགས་པ་སྨོས་ཏེ། དེ་དག་ནི་ཞེས་བྱ་བ་བྱེད་པར་གྱུར་པ་རྣམས་ཀྱི་དབང་ལས་ཞེས་བྱ་བའི་བར་དུའོ། །ཇི་ལྟར་ན་དེ་དག་གི་དབང་ལས་རག་ལས་པ་ཡིན་ཞེ་ན། དེ་བཞིན་གཤེགས་པ་རེ་རེའི་སྐུ་ལས་ཀྱང་ཞེས་པ་ལ་སོགས་པ་དང༌། ཆོས་ཀྱི་ཚུལ་འདི་ཉིད་འཆད་དོ་ཞེས་བྱ་


DTG057_Page_0061
[མ་དཔེ་གཟིགས་ན་འདིར་གནོན།]

ལ་སོགས་པས་དེ་བཞིན་གཤེགས་པ་ཐམས་ཅད་ཅེས་སྨོས་པ་ནི་རྒྱུད་དེ་དེ་བཞིན་གཤེགས་པ་རྣམས་དགོངས་པ་གཅིག་གིས་སྟོན་པར་མཛད་པ་ཡིན་ནོ། །གསང་སྔགས་ཀྱི་སྒོའི་སྤྱད་པ་སྤྱོད་པར་འདོད་པ་རྣམས་ཀྱིས་ཀྱང་མན་ངག་ཕན་ཚུན་ལས་ངེས་པ་སྐྱེད་དེ་བསམ་པ་གཅིག་གིས་དཀྱིལ་འཁོར་འདྲི་བ་ལ་སོགས་པ་ལ་འཇུག་པར་བྱའོ་ཞེས་སྟོན་ཏོ། །རང་ཉིད་དང་གཞན་གྱི་དོན་ཕུན་སུམ་ཚོགས་པ་དང་ལྡན་པའི་རྣམ་པར་སྣང་མཛད་བསྟན་ནས། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོ་དེ་བཞིན་གཤེགས་པ་ཐམས་ཅད་ཀྱི་ཐུགས་ལ་གནས་སོ་ཞེས་བྱ་བ་ནི་རྣམ་པར་སྣང་མཛད་དང་རྣམ་པར་སྣང་མཛད་ཆེན་པོ་སྨོས་པ་ཡིན་ནོ། །འདི་གཉིས་ཀྱི་ཁྱད་པར་ཅི་ཞིག་ཡིན་ཞེ་ན། འོག་མིན་གྱི་གནས་སུ་མངོན་པར་རྫོགས་པར་སངས་རྒྱས་པ་དེ་བཞིན་གཤེགས་པ་ལྔའི་སྐུའི་ངོ་བོ་ཉིད་ནི་རྣམས་པར་སྣང་མཛད་ཡིན་ལ། དེ་ཉིད་ཀྱིས་གཉིས་སུ་མེད་པའི་སེམས་དང་སེམས་ལས་བྱུང་བ་རྣམ་པར་སྣང་མཛད་དང༌། རྡོ་རྗེ་སེམས་དཔའ་ལ་སོགས་པའི་ཚུལ་བསྐྱེད་པའི་རྒྱུར་གྱུར་པ། ཆོས་ཀྱི་དབྱིངས་ཐོག་མ་དང་ཐ་མ་མེད་པའི་མཚན་ཉིད་ཅན་ནི་རྣམ་པར་སྣང་མཛད་ཆེན་པོ་ཡིན་ནོ། །དེ་ནི་དམིགས་སུ་མེད་པའི་ཐུགས་རྗེ་ཆེན་པོའི་རང་བཞིན་ཆོས་བདག་མེད་པའི་ཡེ་ཤེས་ཀྱི་མཐུས་སྐལ་བ་ཇི་ལྟ་བ་བ་བཞིན་དུ་སེམས་ཅན་ཡོངས་སུ་སྨིན་པར་བྱ་བའི་ཕྱིར། ཕྱི་མའི་མཐར་ཐུག་པ་མེད་པའི་བར་གྱི་དུས་ཐམས་ཅད་དུ་རྣམ་པར་སྣང་མཛད་ལ་སོགས་པའི་སྐུས་བཞུགས་པར་མཛད་པས་དེའི་ཕྱིར་ནམ་མཁའི་དབྱིངས་བཞིན་དུ་རྟག་པར་བཞུགས་ཤིང་ཞེས་བྱ་བ་ལ་སོགས་པ་སྨོས་པ་ཡིན་ཏེ། རྟག་ཏུ་དྲི་མད་ཐུགས་རྗེའི་ཤུགས་ལས་འབྱུང༌། །ཞེས་བྱ་བ་ལ་སོགས་པས་གསུངས་སོ། །ནམ་མཁའི་དབྱིངས་ཀྱང་ཡིན་ལ་ཐམས་ཅད་ཀྱང་ཡིན་པས་ན། ནམ་མཁའི་དབྱིངས་ཐམས་ཅད་དེ། དེར་རྟག་པར་བཞུགས་ཤིང་སྐུ་དང་གསུངས་དང་ཐུགས་རྡོ་རྗེ་ལྟ་བུར་གྱུར་པ་གང་ཡིན་པ་དེ་ནི་ནམ་མཁའི་དབྱིངས་ཐམས་ཅད་བཞིན་དུ་རྟག་པར་བཞུགས་ཤིང་སྐུ་དང་གསུང་དང་


DTG057_Page_0062
[མ་དཔེ་གཟིགས་ན་འདིར་གནོན།]

ཐུགས་རྡོ་རྗེ་ལྟ་བུར་གྱུར་པ་ཞེས་བྱའོ། །ཇི་ལྟར་ན་འདི་ནམ་མཁའི་དབྱིངས་བཞིན་དུ་རྟག་ཏུ་བཞུགས་ཤིང་སྐུ་དང་གསུངས་དང་ཐུགས་རྡོ་རྗེ་ལྟ་བུ་ཡིན་ཞེ་ན། དེ་བཞིན་གཤེགས་པ་ཞེས་བྱ་བ་ལ་སོགས་པ་སྨོས་ཏེ། རྣམ་པར་སྣང་མཛད་ལ་སོགས་པ་དང་གདུལ་བྱ་རྣམས་ནི་དེ་བཞིན་གཤེགས་པ་ཐམས་ཅད་དེ། དེ་རྣམས་ཕྱོགས་བཅུའི་དེ་བཞིན་གཤེགས་པའི་རིགས་ཀྱི་ཚུལ་གྱིས་བཞུགས་པར་གྱུར་པས། དེ་བཞིན་གཤེགས་པ་ཐམས་ཅད་དང་མཉམ་པ་ཉིད་དུ་འཇུག་པའོ། །དེ་བཞིན་གཤེགས་པ་ཐམས་ཅད་དང་མཉམ་པ་ཉིད་དུ་འཇུག་པར་གྱུར་པ་ནི་དེ་བཞིན་གཤེགས་པ་ཐམས་ཅད་དང་མཉམ་པ་ཉིད་དུ་འཇུག་པ་ཉིད་དེ་ད་རྒྱུར་གྱུར་པས་སོ། །དེ་བཞིན་གཤེགས་པ་རྣམས་དང་རྡོ་རྗེ་སེམས་དཔའ་ལ་སོགས་པའི་སྐུ་དང་གསུངས་དང་ཐུགས་ཀྱི་གསང་བ་ནི་རྡོ་རྗེའི་དབྱིངས་སོ། །རྡོ་རྗེའི་དབྱིངས་ཀྱང་ཡིན་ལ་ཐམས་ཅད་ཀྱང་ཡིན་པས་ན། རྡོ་རྗེའི་དབྱིངས་ཐམས་ཅད་དེ། དེ་རྣམས་ཀྱི་ཐུགས་སུ་ཆུད་པ་ནི་གདུལ་བྱ་རྣམས་ཀྱི་རྒྱུད་རྟོགས་པའོ། །ཡེ་ཤེས་སེམས་དཔའ་ནི་གང་གི་ཕྱིར་རྡོ་རྗེ་སེམས་དཔའ་ཡིན་ལ། དེ་བས་ན་བཅོམ་ལྡན་འདས་འདི་ནི་ནམ་མཁའི་དབྱིངས་ཐམས་ཅད་བཞིན་དུ་རྟག་པར་བཞུགས་ཤིང༌། སྐུ་དང་གསུངས་དང་ཐུགས་རྡོ་རྗེ་ཡིན་ནོ། །ཇི་སྐད་དུ་བཤད་པའི་བཅོམ་ལྡན་འདས་འདི་ནི་རྡོ་རྗེ་སེམས་དཔའི་ཚུལ་འབའ་ཞིག་ཏུ་མ་ཟད་ཀྱི། རྡོ་རྗེ་རིན་ཆེན་གྱི་ཚུལ་གྱིས་ཀྱང་བཞུགས་པས་ནམ་མཁའི་དབྱིངས་ཞེས་བྱ་བ་ལ་སོགས་པ་སྨོས་པ་ཡིན་ཏེ། ནམ་མཁའི་དབྱིངས་ཐམས་ཅད་ནི་ནམ་མཁའ་སྡོ་བ་དང༌། དམར་བ་དང༌། སེར་བ་དང༌། ཤེལ་གྱི་མདོག་ཅན་གྱི་འོད་ཟེར་རྣམས་ཏེ། དེ་རྣམས་ཀྱི་ཤིན་ཏུ་ཕྲ་མོ་ནི་ཕྲ་རབ་རྣམས་སོ། །དེ་ཉིད་ནི་རྡུལ་ཏེ་གཅིག་ཏུ་བྱས་ནས་རྡོ་རྗེ་རིན་ཆེན་གྱི་གཟུགས་སུ་བསྐྱེད་པ་ནི་རྡོ་རྗེའི་བྱིན་གྱི་རླབས་སོ། །དེ་འབྱུང་བའི་ཡེ་ཤེས་དེ་ནི་ནམ་མཁའི་དབྱིངས་ཐམས་ཅད་ཀྱི་རྡུལ་ཤིན་ཏུ་ཕྲ་མོའི་རྡོ་རྗེའི་བྱིན་གྱི་རླབས་ལས་བྱུང་བའི་ཡེ་ཤེས་སོ། །དེ་ཉིད་ནི་སྙིང་པོ་སྟེ། བསྐྱེད་པའི་གནས་སུ་གྱུར་པ་གང་ཡིན་པ་དེ་ནི་ནམ་མཁའི་


DTG057_Page_0063
[མ་དཔེ་གཟིགས་ན་འདིར་གནོན།]

དབྱིངས་ཐམས་ཅད་ཀྱི་རྡུལ་ཕྲ་མོ་རྡོ་རྗེའི་བྱིན་གྱི་རླབས་ལས་བྱུང་བའི་ཡེ་ཤེས་ཀྱི་སྙིང་པོ་སྟེ། རྡོ་རྗེ་རྩེ་ལྔ་པས་མཚན་པའི་ཡིད་བཞིན་གྱི་ནོར་བུའི་གཟུགས་རྡོ་རྗེ་རིན་ཆེན་གྱི་ཕྱག་རྒྱའི་རང་བཞིན་ནོ། །རྡོ་རྗེ་རིན་ཆེན་དེ་ལས་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་དེ་བཞིན་གཤེགས་པ་རྣམས་འབྱུང་བར་འགྱུར་ལ། དེས་ཀྱང་སེམས་ཅན་གྱི་དོན་མཛད་ནས་གཅིག་ཏུ་གྱུར་པ་སྟེ་ནམ་མཁའི་སྙིང་པོའི་སྐུས་རིན་པོ་ཆེའི་རིགས་ཀྱི་འཁོར་ལོས་སྒྱུར་བར་མཛད་དོ་ཞེས་བསྟན་པའི་ཕྱིར། དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པ་སྨོས་ཏེ། དེ་བཞིན་གཤེགས་པ་ཐམས་ཅད་ནི་ཇི་སྐད་དུ་བཞད་པ་རྣམས་སོ། །དེ་རྣམས་ཀྱི་མཐའ་ཡས་པ་ཉིད་ནི་དེ་བཞིན་གཤེགས་པ་ཐམས་ཅད་མཐའ་ཡས་པ་ཉིད་དེ། དེ་རྒྱུར་པ་ཉིད་ཀྱིས་ན། རྡོ་རྗེ་ཆེན་པོའི་ཡེ་ཤེས་དབང་བསྐུར་བའི་རིན་པོ་ཆེ་ཡིན་ཏེ། རིན་པོ་ཆེའི་རིགས་ནི་རྡོ་རྗེ་རིན་པོ་ཆེའི་ཡེ་ཤེས་ཀྱི་དབང་བསྐུར་བའོ། །དེའི་རྒྱུའི་རིན་པོ་ཆེན་ནི་འཕགས་པ་ནམ་མཁའི་སྙིང་པོའི་རིགས་ཀྱི་བདག་པོའི་ཚུལ་ཏེ་འདི་དག་ཐམས་ཅད་ཡིན་པར་ཤེས་པར་བྱའོ། །ཇི་སྐད་དུ་བཤད་བའི་བཅོམ་ལྡན་འདས་འདི་ནི་པདྨའི་རིགས་ཀྱི་བདག་པོའི་རང་བཞིན་ཡིན་ནོ་ཞེས་བྱ་བ་བསྟན་པར་བྱ་བའི་ཕྱིར། ནམ་མཁའི་དབྱིངས་ཐམས་ཅད་ཅེས་བྱ་བ་ལ་སོགས་པ་སྨོས་པ་ཡིན་ཏེ། ནམ་མཁའི་དབྱིངས་ཐམས་ཅད་དུ་སྤྲོས་ཤིང་ཁྱབ་པ་ཡང་ཡིན་ལ། དེ་བཞིན་ཉིད་ཀྱང་ཡིན་པས་ནམ་མཁའི་དབྱིངས་ཐམས་ཅད་དུ་སྤྲོས་པའི་དེ་བཞིན་ཉིད་དོ། །དེའི་ཡེ་ཤེས་ནི་ནམ་མཁའི་དབྱིངས་ཐམས་ཅད་དུ་སྤྲོས་པའི་དེ་བཞིན་ཉིད་ཀྱི་ཡེ་ཤེས་ཏེ། པདྨ་ལྟ་བུའི་འོད་ཟེར་གྱི་ཚུལ་གྱིས་ནམ་མཁའི་དབྱིངས་ཐམས་ཅད་དུ་ཁྱབ་ཅིང་དངོས་པོ་ཐམས་ཅད་ངེས་པར་བསྐྱེད་པའོ། །དེའི་མངོན་པར་རྫོགས་པར་བྱང་ཆུབ་པར་གྱུར་པ་ནི་མངོན་སུམ་དུ་མཛད་པའོ། །དེས་མངོན་པར་རྫོགས་པར་བྱང་ཆུབ་པར་གྱུར་པ་ནི་མངོན་པར་བྱང་ཆུབ་པའི་རང་བཞིན་རྡོ་རྗེ་པདྨའི་ཕྱག་རྒྱའི་གཟུགས་ཞེས་བྱ་བའི་དོན་ཏོ། །ཕྱག་རྒྱའི་གཟུགས་དེ་ལས་


DTG057_Page_0064
[མ་དཔེ་གཟིགས་ན་འདིར་གནོན།]

དེ་བཞིན་གཤེགས་པ་མཐའ་ཡས་པ་བྱུང་ནས་འགྲོ་བའི་དོན་རྣམས་མཛད་དེ། གཅིག་ཏུ་གྱུར་པ་ལས་འཇིག་རྟེན་དབང་ཕྱུག་ཏུ་གྱུར་ཏོ་ཞེས་བསྟན་པའི་ཕྱིར། དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ལ་སོགས་པ་སྨོས་ཏེ། དེ་བཞིན་གཤེགས་པ་ཐམས་ཅད་ཀྱི་ངོ་བོ་ཉིད་ནི་འཇིག་རྟེན་དབང་ཕྱུག་གི་ཕྱག་རྒྱ་ཆེན་པོའོ། །དེའི་དག་པ་ནི་བག་ཆགས་དང་བཅས་པའི་ཉོན་མོངས་པ་མེད་པའོ། །དེའི་ངོ་བོ་ཉིད་ཡིན་པས་ན་དེ་བཞིན་གཤེགས་པ་ཐམས་ཀྱི་ངོ་བོ་ཉིད་དག་པའོ། །ངོ་བོ་ཉིད་དག་པ་དེས་འགྲོ་བའི་དོན་གྱི་བྱ་བ་དང༌། སངས་རྒྱས་ལ་མཆོད་པའི་མཚན་ཉིད་ཅན་གྱི་ཆོས་ཐམས་ཅད་གང་ཡིན་པ་དེ་ལ་དེ་སྐད་ཅེས་བྱ་སྟེ། འདིས་ནི་ཆོས་ཀྱི་སྐུར་དབང་བསྐུར་བ་དང༌། པདྨའི་རིགས་ཀྱི་བདག་པོའི་རང་བཞིན་ཡིན་པར་སྟོན་ཏོ། །དེ་ནི་པདྨའི་རིགས་ཀྱི་སྤྲུལ་པའི་ཡེ་ཤེས་ཀྱི་དེ་ཁོ་ན་ཉིད་ཀྱི་གདུལ་བྱའི་སྤྱོད་པའི་གཞུང་གིས་སེམས་ཅན་གྱི་དོན་མཛད་པར་སྟོན་པ་ནི་ནམ་མཁའི་དབྱིངས་ཐམས་ཅད་དུ་ཁྱབ་པ་ཞེས་བྱ་བ་ལ་སོགས་པ་སྨོས་པ་ཡིན་ཏེ། དེ་ནི་ནམ་མཁའི་ཁམས་ཐམས་ཅད་དུ་ཁྱབ་པ་ཡང་ཡིན་ལ། གཟུགས་ཐམས་ཅད་དུ་ཡང་དག་པར་བསྟན་པ་ཡང་ཡིན་པས་དེ་སྐད་ཅེས་བྱ་སྦ་དང༌། དེ་མཁྱེན་པ་ནི་ངེར་ངེས་པའོ། །དེས་སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་རྣམས་འདུལ་བ་ནི་ཕན་པ་མ་ཡིན་པ་ལས་བཟློག་ནས་ཕན་པ་ལ་ངེས་པར་སྦྱོར་བའོ། །དེ་ཉིད་ནི་སྤྱོད་པའོ། །དེའི་མཆོག་ཏུ་གྱུར་པ་ནི་ཟླ་མེད་པའོ། །འདིས་ནི་བཅོམ་ལྡན་འདས་པདྨའི་རིགས་ཀྱི་རང་བཞིན་ཡིན་པར་སྟོན་ཏོ། །ལས་ཀྱི་རིགས་ཀྱི་འཁོར་ལོས་སྒྱུར་བ་ཉིད་དུ་གྱུར་པས་ཀྱང༌། དེ་ནམ་མཁའ་ཐམས་ཅད་ཁྱབ་པར་བསྟན་པ་ནི། དེ་བཞིན་གཤེགས་པ་ཞེས་བྱ་བ་ལ་སོགས་པ་སྨོས་པ་ཡིན་ཏེ། དེ་བཞིན་གཤེགས་པ་ཐམས་ཅད་ཀྱི་བཀའ་དོན་ཡོད་པ་ནི་འབྲས་བུ་ཡོད་པའི་བཀའ་སྟེ། སེམས་ཅན་ཐམས་ཅད་ཀྱི་དོན་གྱིས་ཤིག །མཆོད་པ་ཐམས་ཅད་ཀྱིས་ཀྱང་དེ་བཞིན་གཤེགས་པ་ཐམས་ཅད་ལ་མཆོད་ཅིག་ཅེས་བྱ་བའོ། །དེ་མཛད་པའི་དང་ཚུལ་གང་ལ་ཡོད་


DTG057_Page_0065
[མ་དཔེ་གཟིགས་ན་འདིར་གནོན།]

པ་ནི། དེ་བཞིན་གཤེགས་པ་ཐམས་ཅད་ཀྱི་བཀའི་དོན་ཡོད་པར་མཛད་པ་སྟེ། དེའི་ངོ་བོ་ཉིད་ནི་དེ་བཞིན་གཤེགས་པ་ཐམས་ཅད་ཀྱི་བཀའ་དོན་ཡོད་པར་མཛད་པ་ཉིད་དོ། །དེས་ཐམས་ཅད་མཉམ་པ་མེད་པ་ཡི་ལ་མཉམ་པ་མེད་པ་ཉིད་ཀྱིས་ན་བླ་ན་མེད་པ་ཡང་ཡིན་ཏེ། རྣམ་པར་ཐམས་ཅད་པའི་ཕྲིན་ལས་འདི་མངའ་བས་ན་ཐམས་ཅད་དང་མཉམ་པ་མེད་ཅིང་བླ་ན་མེད་པའི་ཕྲིན་ལས་སྣ་ཚོགས་མཛད་པའོ། །འདིས་ནི་འདི་ན་སྣ་ཚོགས་རྡོ་རྗེ་བསྣམས་ཤིང་ལས་ཀྱི་རིགས་སུ་ལས་ཀྱི་དཀྱིལ་འཁོར་ལོ་ས་རྒྱུར་བ་ཡིན་པར་སྟོན་ཏོ། །དེ་བཞིན་དུ་སྣ་ཚོགས་རྡོ་རྗེ་བསྣམས་ཏེ་དེར་སེམས་ཅན་སྣ་ཚོགས་ཀྱི་བྱ་བ་མཛད་དོ་ཞེས་བྱ་བ་དང༌། དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ལ་སོགས་པས་རྡོ་རྗེ་སེམས་དཔའ་ལ་སོགས་པ་སྙིང་པོའི་དོན་བསྟན་པའི་སྒོ་ནས་དེའི་སྙིང་པོ་རྣམས་བསྟན་པ་དང། ཚུལ་དེས་རྣམ་པར་སྣང་མཛད་ཆེན་པོ་ཡིན་པར་གསུངས་པ་ཡིན་ཏེ། དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ནི་རྣམ་པར་སྣང་མཛད་ལ་སོགས་པའོ། །བྱང་ཆུབ་ཆེན་པོ་ནི་མི་བསྐྱོད་པའི་རང་བཞིན་དུ་གཉིས་སུ་མེད་པའི་སེམས་དང་སེམས་ལས་བྱུང་བ་རྣམས་ཏེ། དེའི་ངོ་བོ་ཉིད་དུ་སེམས་དཔའ་བརྟན་པའི་སེམས་གང་ཡིན་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཆེན་པོར་སེམས་དཔའ་བརྟན་པ་སྟེ། རྡོ་རྗེ་སེམས་དཔའ་ཞེས་བྱ་བྱ་བའི་ཐ་ཚིག་གོ །ཡང་ན་དེ་ཉིད་ནི་བརྟན་ཞིང་མི་གྱོ་བ་སྟེ། དེ་ལས་སྤྲུལ་པའི་སེམས་དཔའ་ནི་བརྟན་པའི་སེམས་དཔའ་སྟེ། བཛྲ་སཏྭ་ཞེས་བྱ་བའོ། །དེ་བཞིན་གཤེགས་པ་ཐམས་ཅད་སྤྱན་དྲང་བ་ནི་སྤྱན་འདྲེན་པའོ། །དེའི་དམ་ཚིག་ནི་འདའ་བར་མི་བྱ་སྟེ། བཛྲ་རཱ་ཛ་ཞེས་བྱའོ། །དེ་བཞིན་གཤེགས་པ་ཐམས་ཅད་ཀྱི་སྒོམ་པ་ནི་དེའི་རྗེས་སུ་མཉེས་པར་བྱ་བ་སྟེ། དེའི་ཡེ་ཤེས་ནི་ངེས་པའོ། །དེའི་དབང་ཕྱུག་ནི་གཙོ་བོ་སྟེ། བཛྲ་རཱ་ག་ཞེས་བྱ་བའོ། །དེ་བཞིན་གཤེགས་པ་ཐམས་ཅད་ཀྱིས་ལེགས་སོ་ཞེས་བྱ་བ་ནི་ཕྱིན་ཅི་མ་ལོག་ཅིང་ཡང་དག་པའི་བྱང་ཆུབ་ཀྱི་སྤྱོད་པའི་ཚུལ་གྱིས་ཏེ། བཛྲ་སཱ་དྷུ་ཞེས་བྱ་བའོ། །དེ་བཞིན་གཤེགས་པ་


DTG057_Page_0066
[མ་དཔེ་གཟིགས་ན་འདིར་གནོན།]

ཐམས་ཅད་ཀྱི་སྦྱིན་པའི་ཕ་རོལ་ཏུ་ཕྱིན་པའི་འཁོར་གསུམ་ཡོངས་སུ་དག་པའི་ངོ་བོ་ཉིད་རིན་ཆེན་འབྱུང་ལྡན་གྱི་ཚུལ་གྱིས་སེར་སྣའི་དྲི་མ་སྤངས་པ་ནི་དབང་བསྐུར་བ་ཆེན་པོ་དེའི་དོན་གྱིས་རིན་པོ་ནི་བཅོམ་ལྡན་འདས་བཛྲ་རཏྣ་ཞེས་བྱ་བའོ། །དེ་བཞིན་གཤེགས་པ་ཐམས་ཅད་ནི་བཤད་མ་ཐག་པའི་དེ་ཉིད་ཡིན་ནོ། །དེའི་ཡེ་ཤེས་ནི་མུན་པ་ཐམས་ཅད་སེལ་བའི་ཚུལ་གྱིས་ཉི་མའི་འོད་ཀྱི་དཀྱིལ་འཁོར་དུ་གྱུར་པ་གང་ཡིན་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་ཉི་མའི་དཀྱིལ་འཁོར་འོད་ཀྱི་དཀྱིལ་འཁོར་ཏེ། དེ་ནི་བཛྲ་ཏེ་ཛ་ཞེས་བྱ་བའོ། །སྒྲིབ་པ་མེད་པའི་ཡེ་ཤེས་དེ་ཉིད་ནི་དེ་བཞིན་གཤེགས་པ་ཐམས་ཅད་དོ། །དེ་རྣམས་ཀྱི་བསམ་པ་ནི་ཆོས་རྟོགས་པ་བྱེད་པར་བཞེད་པའོ། །བསམ་པ་དེའི་སྟོབས་དང༌། མི་འཇིགས་པ་ལ་སོགས་པའི་ཆོས་རྣམས་བརྙེས་པ་ནི་འབར་ཞིང་མཛེས་པས་ན་བསམ་བའི་རྒྱལ་པོའོ། །དེ་ལས་བྱུང་བའི་ནོར་བུ་རིན་པོ་ཆེ་དེས་ཉེ་བར་མཚན་པའི་དཔལ་ཏེ། རྒྱལ་མཚན་གང་ལ་ཡོད་པ་དེ་ལ་དེ་སྐད་ཅེས་བྱ་སྟེ། བཛྲ་ཀེ་ཏུ་ཞེས་བྱ་བའོ། །ཆོས་ཐམས་ཅད་བརྙེས་པའི་དགྱེས་པའི་ཚུལ་སྐྱེས་པས་ན་དེ་བཞིན་གཤེགས་པ་ཞེས་བྱ་བ་ལ་སོགས་པ་སྨོས་པ་ཡིན་ཏེ། བཞད་པ་ཆེན་པོ་ནི་དགྱེས་པ་ལས་བྱུང་བའི་འཛུམ་པ་གང་ཡིན་པ་དེ་ནི་བཞད་པ་ཆེན་པོའོ། །དེ་བཞིན་གཤེགས་པ་ཐམས་ཅད་ཀྱང་ཡིན་ལ་བཞད་པ་ཆེན་པོ་ཡང་ཡིན་པས་ན། དེ་བཞིན་གཤེགས་པ་ཐམས་ཅད་ཀྱི་བཞད་པ་ཆེན་པོ་སྟེ། བཛྲ་ཧཱ་ས་ཞེས་བྱ་བའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་གྱི་སེམས་དང་སེམས་ལས་བྱུང་བའི་འོད་དཔག་ཏུ་མེད་པའི་ཚུལ་ནི་དེ་བཞིན་གཤེགས་པ་ཐམས་ཅད་དོ། །དེ་བཞིན་གཤེགས་པ་ཐམས་ཅད་ཀྱི་དག་པའི་ཆོས་ཆེན་པོ་གང་ཡིན་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་དག་པའི་ཆོས་ཆེན་པོ་སྟེ། བཛྲ་དྷརྨ་ཞེས་བྱ་བའོ། །གང་གི་ཡེ་ཤེས་དེ་དེ་བཞིན་བཤེགས་པ་ཐམས་ཅད་ཀྱི་ཤེས་རབ་ཆེན་པོ་ཉིད་གང་ཡིན་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་ཤེས་རབ་ཆེན་པོའི་ཡེ་ཤེས་ཏེ། བཛྲ་ཏཱིཀྵྞ་ཞེས་བྱ་བའོ། །དེ་བཞིན་གཤེགས་པ་ཐམས་ཅད་ཀྱི་འཁོར་ལོ་ཞེས་བྱ་བའི་


DTG057_Page_0067
[མ་དཔེ་གཟིགས་ན་འདིར་གནོན།]

དཀྱིལ་འཁོར་ཆེན་པོ་གང་ལ་ཡོད་པ་དེ་ནི་ད་བཞིན་གཤེགས་པ་ཐམས་ཅད་ཀྱི་འཁོར་ལོ་སྟེ་བཛྲ་ཧེ་ཏུ་ཞེས་བྱ་བའོ། །དེ་བཞིན་གཤེགས་པ་ཐམས་ཅད་ཀྱི་དགོངས་པས་དྲང་བའི་དོན་གྱི་གསུང་སྟོན་པ་གང་ཡིན་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་དགོངས་པ་འཆད་པ་སྟེ། བཛྲ་བྷཱ་ཥ་ཞེས་བྱ་བའོ། །དོན་ཡོད་པར་གྲུབ་པའི་རང་བཞིན་འཁོར་གསུམ་ཡོངས་སུ་དག་པ་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ཚུལ་གྱིས་སེམས་ལ་སོགས་པ་དེ་ནི་དེ་བཞིན་གཤེགས་པ་ཐམས་ཅད་དེ། དེ་རྣམས་ཀྱི་གདོན་མེ་ཟ་ཞིང་ཐམས་ཅད་དེ། རྣམ་པ་སྣ་ཚོགས་པའི་སེམས་ཅན་གྱི་དོན་བྱ་བ་དང༌། སངས་རྒྱས་ལ་མཆོད་པའི་མཚན་ཉིད་ཅན་གྱི་དགོངས་པ་མཛད་པ་གང་ཡིན་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་གདོན་མི་ཟ་བར་ཐམས་ཅད་ཀྱི་དགོངས་པ་མཛད་པ་སྟེ། བཛྲ་ཀརྨ་ཞེས་བྱ་བའོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཇུག་པའི་སེམས་བསྲུང་བར་སྤྲོ་བ་ནི། དེ་བཞིན་གཤེགས་པ་ཐམས་ཅད་ཀྱི་བརྩོན་འགྲུས་ཆེན་པོའོ། །དེ་ཉིད་ཀྱི་གོ་ཆ་ཤིན་ཏུ་བརྟན་བོ་གང་ལ་ཡོད་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་བརྩོན་འགྲུས་ཆེན་པོའི་གོ་ཆ་ཤིན་ཏུ་བརྟན་པོ་སྟེ། བཛྲ་རཀྵ་ཞེས་བྱ་བའོ། །དེ་བཞིན་གཤེགས་པ་ཐམས་ཅད་ནི་བཤད་མ་ཐག་པའོ། །དེ་རྣམས་ཀྱི་བསྲུང་བ་ནི་གང་ཆོས་ཐམས་ཅད་རང་བཞིན་གྱིས་འོད་གསལ་བར་སོ་སོར་རྟོགས་པས་ཡོངས་སུ་སྐྱོང་བ་རྡོ་རྗེ་ལྟར་མི་ཕྱེད་པ་གང་ཡིན་པ་དེ་ནི་དེ་གནོད་སྦྱིན་ཏེ། བཛྲ་ཡཀྵ་ཞེས་བྱ་བའོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ནི་ཇི་སྐད་དུ་བཤད་པ་སྟེ། དེ་ཉིད་མི་ཕྱེད་པས་ན་རྡོ་རྗེའོ། །དེ་བཅིང་བ་ནི་མ་སྐྱེས་པའི་སྦྱོར་བས་གཅིག་ཏུ་བྱེད་པའོ། །དེ་ཉིད་ནི་ཕྱག་རྒྱ་སྟེ། དེའི་ཡེ་ཤེས་གང་ལ་ཡོད་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་བཅིང་བའི་ཡེ་ཤེས་རྣམས་ཏེ། བཛྲ་མུཥྚཱི་ཞེས་བྱ་བའོ། །འདིས་ནི་བཛྲས་ཏྭ་ཞེས་བྱ་བ་ལ་སོགས་པའི་སྙིང་པོའི་དོན་གྱི་སྒོ་ནས་རྡོ་རྗེ་སེམས་དཔའ་ལ་སོགས་པའི་སྙིང་པོའི་ཚུལ་གང་ཡིན་པ་དེ་བསྟན་ནས། གཞན་ཡང་དེ་ཉིད་རྡོ་རྗེ་སེམས་དཔའ་ལ་སོགས་པའི་ཚུལ་གྱིས་སྐུའི་དབྱེ་བ་བསྟན་པ་ནི་ཀུན་དུ་བ་ཟང་ཞེས་བྱ་བ་ལ་སོགས་པ་སྨོས་པ་ཡིན་ཏེ། འདི་ལས་ཀུན་ནས་བཟང་ཞིང་དགེ་བར་གྱུར་པས་ན་ཀུན་དུ་


DTG057_Page_0068
[མ་དཔེ་གཟིགས་ན་འདིར་གནོན།]

བཟང་པོ་ཡིན་པ་འམ། རྣམ་པ་ཐམས་ཅད་དུ་བཟང་བས་ན་ཀུན་དུ་བཟང་པོ་སྟེ། སྙིང་སྟོབས་རྡུལ་དང་མུན་པས་ཀྱང༌། །གང་ཕྱིར་སེམས་ཅན་དོན་གྱུར་པས། དེས་ན་འདི་ནི་ཀུན་དུ་བཟང༌། །བྱང་ཆུབ་སྤྱོད་པའི་རྗེས་འཇུག་པའོ། །ཞེས་གསུངས་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀུན་ནས་རབ་ཏུ་སྤྱན་འདྲེན་པ་ལ་གདོན་མི་ཟ་ཞིང་དོན་ཡོད་པས་རབ་ཏུ་གདོན་མི་ཟ་བའོ། །གདུལ་བྱ་རྣམས་ཉན་ཐོས་དང་རང་སངས་རྒྱས་སུ་བློས་བསམ་པ་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བ་སྒོམས་པས་དར་དུ་གཅོད་ཅིང་གསོད་པས་ན་བདུད་དོ། །རབ་ཏུ་དགྱེས་པ་ནི་ཡིད་བ་སྟེ་དེ་བརྙེས་པའོ། །ནམ་མཁའ་ནི་མཉན་པ་ཉིད་ཀྱི་ཡེ་ཤེས་སོ། །དེ་ལས་བྱུང་བའི་དེ་བཞིན་གཤེགས་པ་རྣམས་ནི་ནམ་མཁའ་སྟེ་ནམ་མཁའ་ཞེས་བྱ་བ་དེ་ཉིད་སྙིང་པོ་སྟེ་གང་གི་སྐྱེས་པའི་གནས་ཡིན་པ་དེ་ནི་ནམ་མཁའ་སྟེ། དེ་ལས་སྐྱེས་པའི་ཕྱིར་རོ། །ཤིན་ཏུ་གཟི་བརྗིད་ཆེན་པོ་དང་ལྡན་པས་ན་ཤིན་ཏུ་གཟི་ཆེན་ཏེ། ནམ་མཁའ་ཐམས་ཅད་དུ་ཁྱབ་པའི་རྡོ་རྗེ་ཉི་མའི་འོད་ཀྱིས་ནམ་མཁའི་ཁམས་ཐམས་ཅད་དུ་སྤྲོས་པའི་ཕྱིར་རོ། །ཡིད་བཞིན་གྱི་ནོར་བུ་རིན་པོ་ཆེན་ཉེ་བར་མཚོན་པའི་ཏོག་གི་མཚན་མ་གང་ལ་ཡོད་པ་དེ་ནི་རིན་ཆེན་དཔལ་ལོ། །འཛུམ་པ་ཆེན་པོ་མངའ་བས་ན་འཛུམ་པ་ཆེ་སྟེ། འཛུམ་ཞིང་བཞད་པས་ན་ནས་ནམ་མཁའ་ཐམས་ཅད་ཁྱབ་པའོ། །གཏི་མུག་སྤངས་པའི་ཕྱིར་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་དེ་བཞིན་གཤེགས་པ་ཐམས་ཅད་ཀྱིས་གཟིགས་པའམ། སེམས་ཅན་རྣམས་སྤྱན་རས་ཀྱིས་འཚོ་བས་ན་ཀུན་དུ་གཟིགས་པའོ། །དེ་ཉིད་ནི་ཉེས་པ་ཐམས་ཅད་དང་བྲལ་བ་ཉིད་ཀྱིས་རང་དབང་མངའ་བས་ན་དབང་ཆེན་ནོ། །ཀུན་དུ་གཟིགས་པ་ཡང་ཡིན་ལ་དབང་ཆེན་ཡང་ཡིན་པས་ཀུན་དུ་གཟིགས་པའི་དབང་ཆེན་ནོ། །འཇམ་དཔལ་ནི་བཤད་ཟིན་ཏོ། །རྡོ་རྗེ་དབྱིངས་ལ་སོགས་པའི་དཀྱིལ་འཁོར་གྱི་ཚུལ་གྱིས་བཞུགས་བས་ན། དཀྱིལ་འཁོར་ཐམས་ཅད་དོ། །ཚིག་རྣམ་པར་རྟོག་པ་མི་མངའ་བས་ན་མི་གསུང་བ་སྟེ། དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་གསུང་གིས་སྤྲོས་པ་མེད་པའི་ཆོས་ཉིད་ལ་ངེས་པར་སྦྱོར་བའོ་ཞེས་བསྟན་པར་བྱ་བའི་ཕྱིར་རོ། །མ་ལུས་ཤིང་ལུས་པ་མེད་པའི་


DTG057_Page_0069
[མ་དཔེ་གཟིགས་ན་འདིར་གནོན།]

དེ་བཞིན་གཤེགས་པའི་མཆོད་པའི་ལས་མཛད་པས་ན་ཐམས་ཅད་ལས་སོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་པར་སྤྲོ་བའི་བརྩོན་འགྲུས་ཆེན་པོ་འདི་ལ་མངའ་བས་ན་བརྩོན་འགྲུས་སོ། །གཏུམ་པས་ན་མ་རུངས་པའོ། །མི་ཕྱེད་པས་ན་དམ་པའོ། །དེ་ཉིད་ནི་སྐུ་དང་གསུང་དང་ཐུགས་གཅིག་ཏུ་བྱས་བའི་ཁུ་ཚུར་གྱི་ཚུལ་ཅན་ཡིན་པས་ན་དམ་དུ་གཟུང་བ་སྟེ། རྡོ་རྗེ་ཁུ་ཚུར་ཞེས་བྱ་བའི་ཐ་ཚིག་གོ །ཚིག་འདི་དག་གིས་ནི་གོ་རེམས་བཞིན་དུ་རྡོ་རྗེ་སེམས་དཔའ་ལ་སོགས་པ་སེམས་དཔའ་བཅུ་དྲུག་པོ་དེ་དག་གི་སྐུའི་གསང་བ་གསུངས་པ་ཡིན་ནོ། །འདི་དག་ནི་རྡོ་རྗེ་ལ་སོགས་པའི་མཚན་མ་ཡང་དེ་དག་ཉིད་ཡིན་ནོ་ཞེས་བསྟན་པར་བྱ་བའི་ཕྱིར། རྡོ་རྗེ་ཞེས་བྱ་བ་ལ་སོགས་པ་སྨོས་ཏེ། རྡོ་རྗེ་སྔ་པ་ནི་བཅོམ་ལྡན་འདས་རྡོ་རྗེ་སེམས་དཔའི་ཕྱག་མཚན་ཉིད་ཡིན་ཏེ་གཞན་དག་ཀྱང་དེ་བཞིན་དུ་ཤེས་པར་བྱའོ། །རྒྱུད་པས་འདི་དག་གི་ཕྱག་མཚན་སྨོས་པ་ནི་འོག་ནས་ཀྱང་སྟོན་ཏོ། །སེམས་དཔའ་ཆེན་པོ་བཅུ་དྲུག་པོ་འདི་དག་ནི་རྣམ་པར་སྣང་མཛད་ཆེན་པོའི་སྐུ་དང་གསུང་དང་ཐུགས་ཀྱི་གསང་བའི་ངོ་བོ་ཉིད་ཡིན་པར་ནི་སྟོན་ཏོ། །ཐོག་མ་ཐ་མ་མེད་ཅིང་ཞི། ཞེས་བྱ་བ་ལ་སོགས་པས་ཏེ། དེ་ཉིད་ཆོས་ཀྱི་དབྱིངས་ལ་སོགས་པའི་རང་བཞིན་དུ་གསུངས་སོ། །དེ་ལ་ཐོག་མ་ནི་དང་པོར་སྐྱེས་པའོ། །ཐ་མ་ནི་ཉིང་མཚམས་སྦྱོར་བ་མེད་པའི་ཉན་ཐོས་དང་རང་སངས་རྒྱས་ཀྱི་མྱ་ངན་ལས་འདས་པའོ། །གང་ལ་འདི་དག་མི་མངའ་བ་དེ་ནི་ཐོག་མ་དང་ཐ་མ་མེད་པ་སྟེ། དེ་བཞིན་ཉིད་དུ་རོ་གཅིག་པའི་སེམས་ལས་བྱུང་བ་གཉིས་སུ་མེད་པའི་རང་ཞིན་ཆོས་ཀྱི་དབྱིངས་ཞེས་བྱ་བའི་ཐ་ཚིག་གོ །རྒྱུ་འདི་ཉིད་ཀྱིས་ནི་ཞིང་ཞེས་བྱ་བ་དང༌། ཞི་བའི་ཚུལ་གྱིས་འདུལ་བའི་སེམས་ཅན་རྣམས་གདུལ་བར་བྱ་བའི་ཕྱིར། ཞི་བའི་སྐུ་སྟོན་པར་མཛད་པས་ན་ཞི་བའོ། །གདུག་ཅིང་གཏུམ་པའི་སེམས་ཅན་གདུལ་བར་བྱ་བའི་ཕྱིར་དྲག་པོའི་སྐུར་སྟོན་པར་མཛད་པས་ན་མ་རུངས་པ་སྟེ། འདི་དག་ཀྱང་ཁམས་གསུམ་པའི་མཆོག་ལས་རྣམ་པར་རྒྱལ་བ་ལས་སྟོན་ཏོ། །སེམས་ཅན་དང་སེམས་ཅན་མ་ཡིན་པ་དག་འཇོམས་ཤིང་ཁྲོ་བས་འདུལ་


DTG057_Page_0070
[མ་དཔེ་གཟིགས་ན་འདིར་གནོན།]

བ་རྣམས་ཀྱི་ཕྱིར་དེའི་རྗེས་སུ་འཇུག་པའི་ཚུལ་སྟོན་པར་མཛད་པས་ན་ཁྲོ་བའོ། །བཟོད་པར་སྨྲ་བ་ལ་སོགས་པར་སྤྲུལ་པས་སེམས་ཅན་འདུལ་བས་ན་བཟོད་པ་ཆེ་བའོ། །གནོད་སྦྱིན་གྱིས་འདུལ་བ་རྣམས་ལ་ནི་གནོད་སྦྱིན་ནོ། །སྲིན་པོས་འདི་ལ་བ་རྣམས་ལ་ནི་སྲིན་པོ་དམ་པའོ། །བརྟན་བོས་འདུལ་བ་རྣམས་ལ་ནི་བརྟན་པའོ། །གཟི་ཆེན་རྣམས་ལས་ཀྱང་གཟི་བརྗིད་ཆེ་བ་ནི་གཟི་ཆེན་ནོ། །དཔའ་བས་མངོན་པར་རློམ་པ་རྣམས་ལ་ནི་དཔའ་བའོ། །ཁྱབ་པ་པོ་ཐམས་ཅད་པས་ཀྱང་ཐམས་ཅད་ཤིན་ཏུ་ཁྱབ་པས་ན་ཁྱབ་བདག་ཆེན་པོའོ། །ཨུ་མའི་བདག་པོའི་ཚུལ་གྱིས་སེམས་ཅན་འདུལ་བར་མཛད་པས་ན་ཨུ་མའི་བདག་པོའོ། །སེམས་ཅན་གྱི་ཁམས་རྣམས་ནི་སྐྱེ་དགུ་སྟེ། དེའི་མགོན་པོ་ནི་བསྲུང་བའོ། །ཁྱབ་འཇུག་གིས་འདུལ་བའི་སེམས་ཅན་རྣམས་ལ་ཁྱབ་འཇུག་གི་གཟུགས་སྟོན་པར་མཛད་པས་ན་གཏོགས་འདོད་དོ། །རྒྱལ་བའི་དང་ཚུལ་ཅན་ནི་རྒྱལ་འདོད་དེ་ཉི་མའོ། །ཐུབ་པ་རྣམས་ཀྱི་ནང་ན་ཤཱཀྱ་ཐུབ་པའི་ཚུལ་སྟོན་པས་ན་ཐུབ་པ་ཆེན་པོའོ། །འཇིག་རྟེན་སྐྱོང་བ་བཞིའི་གཟུགས་ཀྱིས་སེམས་ཅན་གྱི་དོན་མཛད་པས་ན་འཇིག་རྟེན་སྐྱོང་ངོ༌། །ནམ་མཁའ་ལྟར་སྒྲིབ་པ་མེད་པའི་ངོ་བོ་ཉིད་ཀྱིས་ན་ནམ་མཁའོ། །རྒྱ་མཚོ་ཆེན་པོ་ལ་སོགས་པར་ལྟུང་བ་རྣམས་ས་གཞིའི་ཚུལ་གྱིས་འཛིན་པར་མཛད་པས་ན་སའོ། །མིང་པོ་གསུམ་གྱི་གཟུགས་ཀྱིས་འགྲོ་བའི་དོན་མཛད་པས་ན་འཇིག་རྟེན་གསུམ་མོ། །ཁམས་གསུམ་པོ་རྡོ་རྗེ་སེམས་དཔའ་ཡིན་པའི་ཚུལ་གྱིས་ན་ཁམས་གསུམ་པའོ། །ས་དང་ཆུ་དང་མེ་དང་རླུང་སྟེ་འབྱུང་བ་ཆེན་པོའི་གཟུགས་འཛིན་པར་མཛད་པས་ན་འབྱུང་ཆེན་ནོ། །ནོར་འགྲུབ་པ་ལ་སོགས་པའི་ཚུལ་ཉིད་ཀྱིས་ན། སེམས་ཅན་དོན་རབ་མཛད་དོ། །དངོས་པོ་ཐམས་ཅད་ཀྱི་ཆོས་ཉིད་དུ་གྱུར་པས་ན་ཐམས་ཅད་དོ། །གུ་ལང་སྟེ་ལྷ་ཆེན་པོའི་གཟུགས་འཛིན་པར་མཛད་པས་ན་གུ་ལང་ངོ༌། ཚངས་པའི་གཟུགས་སུ་བཞུགས་པས་ན་ཚངས་པའོ། །ཆགས་པ་དང་འཇིག་པའི་བསྐལ་པའི་ཚུལ་གྱིས་སེམས་ཅན་འདུལ་བར་མཛད་པ་དང༌། སྐྱེ་བ་མེད་པའི་སྦྱོར་བས་འཁོར་བའི་ཆོས་ཉིད་ཡིན་པས་ན་འཁོ་


DTG057_Page_0071
[མ་དཔེ་གཟིགས་ན་འདིར་གནོན།]

བའོ། །མི་གནས་པའི་མྱ་ངན་ལས་འདས་པ་ཡིན་པས་ན་མྱ་ངན་ལས་འདས་པའོ། །མྱ་ངན་ལས་འདས་པའི་ངོ་བོ་ཉིད་ཀྱིས་བརྟག་པའམ་རྟག་པས་ན་རྟག་པའོ། །ཕ་རོལ་ཏུ་ཕྱིན་པ་བཅུའི་སྤྱོད་པ་མངའ་བས་ན་ཡང་དག་འཚོ་བའོ། །ལས་ཀྱི་དཀྱིལ་འཁོར་གྱི་རང་བཞིན་གྱིས་མཆོད་པ་ཆེན་པོ་ཡིན་པས་ན་མཆོད་པ་ཆེན་པོའོ། །སངས་རྒྱས་བསྒོམ་པའི་ངོ་བོ་ཉིད་ཡིན་པས་ན་སངས་རྒྱས་ཏེ། རང་ཉིད་སངས་རྒྱས་རབ་བསྒོམས་པས། །སངས་རྒྱས་ཞེས་ནི་བྱ་བ་ཡིན། །ཞེས་བསྟན་པས་སོ། །པདྨའི་རིགས་ཀྱི་ངོ་བོ་ཉིད་ཡིན་པའི་ཕྱིར་སོ་སོར་རྟོག་པའི་ཡེ་ཤེས་ཀྱི་ངོ་བོ་ཡིན་པས་ན་དགའ་བའོ། །བྱང་ཆུབ་སེམས་དཔའི་ལམ་འབྲས་བུ་དང་བཅས་པའི་ངོ་བོ་ཉིད་ཡིན་པས་ན་ཐེག་པ་ཆེན་པོའོ། །འདོད་པ་དང་གཟུགས་དང་གཟུགས་མེད་པའི་ཁམས་སུ་ཡང་དག་པར་སྟོན་པ་དང༌། དེའི་ཆོས་ཉིད་ཀྱིས་ན་སྲིད་གསུམ་མོ། །རྟག་པ་ནི་ལྷ་ཆེན་པོའི་གཟུགས་ཏེ་དེར་སྟོན་པས་ན་རྟག་པའོ། །དཔལ་ཁམས་གསུམ་རྣམ་པར་རྒྱལ་བའི་དུམ་བུའི་སྒོ་ནས་འཇིག་རྟེན་གསུམ་རྒྱལ་ལོ། །ཤམ་ནི་བདེ་བ་སྟེ་དེ་ལ་སྤྱོད་པས་ན་བདེ་སྤྱོད་དོ། །བདེ་སྤྱོད་ནི་ལྷ་ཆེན་པོ་སྟེ་དེ་བྱང་ཆུབ་ལ་བཀོད་པས་མགོན་པོ་མཛད་པའི་ཕྱིར། བདེ་སྤྱོད་མགོན་པོའོ། །ཡི་གེ་ཧཱུཾ་གཅིག་པུ་ཙམ་གྱིས་འཇིག་རྟེན་གསུམ་འདུལ་བར་མཛད་པས་ན་རབ་ཏུ་འདུལ་མཛད་དོ། །བཅོམ་ལྡན་འདས་རྡོ་རྗེ་ཧཱུཾ་མཛད་ནི་རྡོ་རྗེའི་རིགས་ཀྱི་བདག་པོ་ཡིན་པས་ན་རྡོ་རྗེ་གཙོ་བོའོ། །ས་རབ་ནི་མོས་པ་སྤྱོད་པའི་ས་ལ་སོགས་པ་སྟེ་དེ་རྣམས་ཀྱི་མཆོག་ནི་རྡོ་རྗེ་འཆང་གི་ས་ཡིན་ལ། དེའི་རང་བཞིན་ཡིན་པས་ན་ས་རབ་ཆོག་གོ །ཆོས་ཀྱི་དཀྱིལ་འཁོར་གྱི་ཚུལ་གྱིས་ནི་ཡེ་ཤེས་སོ། །ཡེ་ཤེས་ཡིན་པ་ཉིད་ཀྱིས་ན་ཕ་རོལ་ཏུ་ཕྱིན་པ་བཅུ་དྲུག་ཐོབ་པའི་ཐབས་སུ་གྱུར་པས་ན། ཕ་རོལ་ཏུ་ཕྱིན་པའི་ཚུལ་ལོ། །ཇི་ལྟར་ན་ཡེ་ཤེས་ཉིད་ཡིན་པས་ཕ་རོལ་ཏུ་ཕྱིན་པའི་ཚུལ་ཡིན་ཞེས་ན། དེ་ནས་བཙམས་ཏེ་གང་ཡང་རུང༌། །མཉམ་པར་གཞག་པས་བསྒོམས་ནས་ནི། །དེ་དག་ཐམས་ཅད་བརྟན་འགྱུར་ཏེ། ཏིང་འཛིན་ཡེ་ཤེས་ཀྱིས་བརྟགས་པའོ། །ཞེས་གསུངས་པའི་ཕྱི་རོ། །བྱང་ཆུབ་ཀྱི་


DTG057_Page_0072
[མ་དཔེ་གཟིགས་ན་འདིར་གནོན།]

རང་བཞིན་ཡིན་པས་ན་བྱང་ཆུབ་སེམས་དཔའོ། །རྡོ་རྗེ་སེམས་དཔའ་ལ་སོགས་པ་བསྒོམས་པས་སེམས་ཅན་ཐམས་ཅད་རྣམ་པར་གྲོལ་བར་མཛད་པས་ན་རྣམ་པར་ཐར་པའོ། །གསངས་སྔགས་ཀྱི་སྤྱོད་པའི་ངོ་བོ་ཉིད་ཡིན་པས་ན་སྤྱོད་པའོ། །རྣམ་པར་སྣང་མཛད་དང༌། མི་བསྐྱོད་པ་དང༌། རིན་ཆེན་འབྱུང་ལྡན་དང༌། འཇིག་རྟེན་དབང་ཕྱུག་དང༌། དོན་ཡོད་གྲུབ་པའི་མཚན་ཉིད་ཅན་ཡིན་པས་ན་དེ་བཞིན་གཤེགས་པ་ཀུན་ནོ། །ནོར་བུའི་རིགས་ཀྱི་རང་བཞིན་ཡིན་པས་ན་སངས་རྒྱས་དོན་ནོ། །ཏིང་ངེ་འཛིན་སྒྲུབ་པར་བྱེད་པས་ནི་རང་སངས་རྒྱས་ཐུགས་ཏེ་ཏིང་ངེ་འཛིན་སྒྲུབ་པ་སྙིང་ལ་གནས་ཏེ་དེས་ན་སྙིང་པོ་ཞེས་བཤད་དོ་ཞེས་གསུངས་པའི་ཕྱིར་རོ། །ཉན་ཐོས་དང་རང་བྱང་ཆུབ་དང༌། ཡང་དག་པར་རྫོགས་པའི་བྱང་ཆུབ་ཀྱི་ཆོས་ཉིད་ཡིན་པས་ན་བྱང་ཆུབ་ཀུན་ནོ། །འདིའི་གོང་ན་ཡོད་པ་མ་ཡིན་པས་ན་བླ་ན་མེད་པའོ། རྣམ་པར་སྣང་མཛད་ནི་ཇི་ལྟར་གྲགས་པ་ཉིད་དོ། །བདུད་ལས་རྒྱལ་བས་ན་རྒྱལ་བའོ། །སེམས་ཅན་གྱི་ཚོགས་ཆེན་པོའི་དོན་མཛད་པས་ན་སེམས་དཔའ་ཆེན་པོའོ། །ཕྱག་རྒྱ་ཆེན་པོ་མངའ་ན་ཕྱག་རྒྱ་ཆེན་པོ་སྟེ། གང་ཕྱིར་སེམས་ནི་བཅོམ་ལྡན་འདས། །འདོད་ཆགས་ན་གཟུགས་སོ། །དམིགས་པ་བསྙེལ་བ་མེད་པའི་རང་བཞིན་ཡིན་པས་ན་རྒྱལ་བའོ། །རིགས་བཞིའི་བདག་པོར་གྱུར་པས་ན་མགོན་ནོ། །རང་ཉིད་མངོན་པར་རྫོགས་པར་བྱང་ཆུབ་པས་ནན་རང་བྱུང་ངོ༌། །རིགས་བཞིའི་འཛིན་པར་མཛད་པའི་རང་ཞིན་ཡིན་པས་ཆེན་པོ་འདི་ཡི་ལྷ། །ཞེས་གསུངས་པའི་ཕྱི་རོ། །སེམས་དཔའ་དང་ཕྱག་རྒྱ་ཆེན་པོ་དེ་དང་འབྲེལ་བའི་བདག་མེད་པ་བསྒོམས་པས་སེམས་རྩེ་གཅིག་པའི་ཏིང་ངེ་འཛིན་ཏེ། མཉམ་པར་གཞག་པས་རིང་ངེ་འཛིན་ཡིན་ཞེས་གསུངས་པའི་ཕྱིར་རོ། །སངས་རྒྱས་རྣམས་ཀྱི་ཕྲིན་ལས་ནི་སངས་རྒྱས་ཀྱི་ཕྲིན་ལས་ཏེ། བྱང་ཆུབ་ཀྱི་སེམས་ལ་སོགས་པའི་མཆོད་པའི་མཚན་ཉིད་དོ། །དེས་མཛད་པས་ན་སངས་རྒྱས་ཕྲིན་ལས་མཛད་དོ། འདི་དག་མཛད་པར་ཇི་ལྟར་སྤྱོད་པ་ཡིན་ཞེ་ན། དིའི་ཕྱིར། ཡང་དག་སངས་རྒྱས་ཀུན་བདག་ཉིད།


DTG057_Page_0073
[མ་དཔེ་གཟིགས་ན་འདིར་གནོན།]

ཅེས་བྱ་བ་སྨོས་ཏེ། དེ་ཁོ་ན་ཉིད་ཀྱི་རང་བཞིན་ཡིན་པས་ན་ཡང་དག་པ་ཉིད་དོ། །སེམས་ཅན་རྣམས་ཀྱི་དོན་ལ་ཆགས་པས་ན་སེམས་ཅན་ཏེ། སེམས་ཅན་གྱི་དོན་ལ་ཆགས་པ་ན་སེམས་ཅན་ནོ་ཞེས་གསུངས་པའི་ཕྱིར་རོ། །ཐོག་མ་དང་ཐ་མ་མེད་པའི་ཆོས་ཀྱི་དབྱིངས་སྟོན་པར་མཛད་པས་ན། རྟག་ཏུ་དོན་རྟོགས་མཛད་པའོ། །སྔོན་པོ་ནི་ལྷ་ཆེན་པོའི་གཟུགས་སུ་སེམས་ཅན་གྱི་དོན་དུ་བྱིན་གྱིས་བརླབས་པའོ། །དེའི་གཉེན་པོར་གྱུར་པའི་སྐུ་ཆེན་པོ་ནི་སྡོང་པོ་ཆེན་པོའོ། །ནག་པོ་ཆེན་པོའི་གཟུགས་ཀྱིས་སེམས་ཅན་འདུལ་བར་མཛད་པས་ན་ནག་པོ་ཆེན་པོའོ། དཔལ་མཆོག་དང་པོ་ལས་བཤད་པའི་ལྷ་མོ་བཞི་ཡང་དག་པར་འདུས་པ་ལ་སོགས་པའི་སྦྱོར་བའི་ཚུལ་དང་ལྡན་པའི་རྡོ་རྗེ་སེམས་དཔའ་ནི་འདོད་ཆགས་ཆེན་པའོ། །དེ་ཉིད་ནི་གཉིས་སུ་མེད་པའི་ཡེ་ཤེས་ཀྱི་རང་བཞིན་ཡིན་པས་ན་བདེ་བ་ཆེ་སྟེ། མི་འགྱུར་བདེ་བ་ཀུན་གྲུབ་པ། །བདེ་བ་ཆེན་པོ་ཞེས་བཤད་དོ། །ཞེས་ལུང་ལས་བཤད་པའི་ཕྱིར་རོ། །ཕྱག་རྒྱ་བཞིའི་དཀྱིལ་འཁོར་གྱི་ཚུལ་གྱིས་དངོས་གྲུབ་ཐམས་ཅད་བསྡུས་པ་ཡིན་པས་ན་ཐབས་ཆེན་ནོ། །རྒྱུ་འདི་ཉིད་ཀྱིས་ན་མཆོག་ཆེན་ཆོག་གོ །ཕྱག་རྒྱ་གཅིག་པའི་དཀྱིལ་འཁོར་གྱི་རང་བཞིན་གྱིས་ན་ཀུན་གྱི་ཆོག་གོ །དེ་ཉིད་ཀྱི་ཕྱིར་གནས་ཀྱི་དབང་པོའོ། །དེ་ལྟ་བུ་དེ་སུ་ཞིག་ཡིན་ཞེ་ན། བཅོམ་ལྡན་འདས་ཞེས་བྱ་བ་ལ་སོགས་པ་སྨོས་ཏེ། ཉན་ཐོས་དང༌། རང་སངས་རྒྱས་རྒྱས་ཀྱི་བྱང་ཆུབ་ལ་ལྟོས་ན་འདི་ནི་བྱང་ཆུབ་ཀྱང་ཡིན་ལ་ཆེན་པོ་ཡང་ཡིན་པས་ན་བྱང་ཆུབ་ཆེན་པོ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །དེ་ནི་སེམས་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་པའི་མཚན་ཉིད་དོ། །དེ་ལྟ་བུའི་རང་བཞིན་ཅན་གྱི་ཐུགས་འདི་ལ་མངའ་བས་ན་བཅོམ་ལྡན་འདས་བྱང་ཆུབ་སེམས་དཔའ་ཆེན་པོའི་ཐུགས་ཞེས་བཤད་དོ། །ཀུན་དུ་བཟང་པོ་ནི་བཤད་ཟིན་ཏོ། །དེ་ཉིད་ནི་བྱང་ཆུབ་ཆེན་པོའི་རང་བཞིན་ཡིན་པས་ན་བྱང་ཆུབ་སེམས་དཔའ་ཆེན་པོའོ། །རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་


DTG057_Page_0074
[མ་དཔེ་གཟིགས་ན་འདིར་གནོན།]

ཐུགས་ཀར་ཟླ་བའི་དཀྱིལ་འཁོར་གྱི་གཟུགས་ལ། དང་པོའི་རྡོ་རྗེ་རྩེ་ལྔ་པའི་གཟུགས་ཀྱིས་གནས་སོ་ཞེས་བྱ་བ་ནི་བཞུགས་པའོ། །དང་པོའི་རྡོ་རྗེ་རྩེ་ལྔ་པའི་གཟུགས་ཀྱིས་ནི་སྐུ་དང་ལྡན་པ་མ་ཡིན་ཏེ། འདི་གང་ལས་ཤེས་ཤེ་ན། གང་གི་ཕྱིར། བཅོམ་ལྡན་དེ་ཉིད་སེམས་དཔའ་ཡི། །རྡོ་རྗེའི་ངོ་བོའི་ཐུགས་དག །དེ་ཉིད་རྒྱལ་བར་གྱུར་པ་ཡིན། །རྡོ་རྗེའི་སེམས་དཔའ་ཞེས་བཤད་པ། །རྡོ་རྗེ་དེར་ནི་རབ་ཏུ་གནས། །དེ་ཉིད་ཡེ་ཤེས་སྦྱོར་བ་ཡིས། །སངས་རྒྱས་ཞེས་ནི་བཤད་པ་སྟེ། །ཐུགས་ལས་ན་ཚོགས་བྱུང་ནས་ནི། །སྣ་རྟོགས་གཟུགས་སུ་འང་གྱུར་པ་ཡིན། །ཁམས་ཀུན་རྡུལ་གྱི་གྲངས་སྙེད་དག །དེ་ཉིད་རྒྱལ་བར་གྱུར་པ་ཡིན། །རྡོ་རྗེའི་སྐུ་ནི་དེ་རྣམས་ལས། །རྡོ་རྗེ་སེམས་དཔའ་འང་འབྱུང་བ་ཡིན། །ཞེས་བཅོམ་ལྡན་འདས་རྡོ་རྗེ་འཆང་གིས་གསུངས་པ་ཡིན་ནོ། །འདིས་ནི་སྐྱིལ་འཁོར་གྱི་རྒྱལ་པོ་མཆོག་དང༌། ལས་ཀྱི་རྒྱལ་པོ་མཆོག་གི་ཏིང་ངེ་འཛིན་གཉིས་ཀྱི་མདོ་འདིས་རིགས་བཞིའི་མདོ་བཤད་པ་ཡིན་ནོ། །གླེང་གཞིའི་རྣམ་པར་འགྲེལ་པ་རྫོགས་སོ།། །།དེ་ལྟར་རྣམ་པར་སྣང་མཛད་དང༌། རྣམ་པར་སྣང་མཛད་ཆེན་པོ་བསྟན་པ་བདག་དང་གཞན་གྱི་དོན་ཕུན་སུམ་ཚོགས་པའི་འབྲས་བུའི་མཚན་ཉིད་ཅན་གྱི་དེ་བཞིན་གཤེགས་པས་འདུལ་བའི་སྐྱེས་བོའི་མངོན་པར་འདོད་པ་སྐྱེས་པ་ཡིན་ལ། མངོན་པར་འདོད་པ་སྐྱེས་བར་གྱུར་བ་རྣམས་བདག་དང་གཞན་གྱི་དོན་ཕུན་སུམ་ཚོགས་པའི་འབྲས་བུའི་མཚན་ཉིད་ཅན་བཅོམ་ལྡན་འདས་དེ་ཇི་ལྟར་འཐོབ་པར་འགྱུར་ཞེས་རྣམ་པར་རྟོག་པར་འགྱུར་བ་ལ། ངོ་བོ་ཉིད་དེ་མངོན་སུམ་དུ་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པས། དེ་ཐོབ་པར་བྱེད་པའི་ཐབས་སུ་རྒྱུད་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་འདས་མ་ཐག་པ་སྟེ། གདུལ་བྱ་རྣམས་ཀྱི་རྣམ་པར་རྟོག་པའི་རྗེས་ཐོགས་པའོ། །དེ་བཞིན་གཤེགས་པ་ཐམས་ཅད་ནི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་རྣམ་པར་སྣང་མཛད་དང༌། མི་བསྐྱོད་པ་ལ་སོགས་པ་སྟེ། དེ་བཞིན་གཤེགས་པ་ཐམས་ཅད་ཀྱིས་སོ། །སངས་རྒྱས་ཀྱི་ཞིང་འདི་ཞེས་བྱ་བ་


DTG057_Page_0075
[མ་དཔེ་གཟིགས་ན་འདིར་གནོན།]

ནི་མི་མཛོད་ཀྱི་འཇིག་རྟེན་གྱི་ཁམས་གླིང་བཞི་པ་ཕྲག་བརྒྱལ་སོགས་པའི་རྣམ་གྲགས་ཡོད་པའོ། །དཔེར་ན་ཞེས་བྱ་བའི་སྒྲ་ནི་དཔེ་བསྟན་པའི་དོན་ཏོ། །ཏིལ་གྱི་གང་བུ་བཞིན་དུ་ཡོངས་སུ་གང་བར་གྱུར་ཏོ་ཞེས་བྱ་བ་ནི་སྔ་མ་བཞིན་དུ་སངས་རྒྱས་རྗེས་སུ་དྲན་པ་སྟེ། དེས་མངོན་སུམ་དུ་བྱས་ནས་ཞེས་སྟོན་པར་བྱེད་པ་ཡིན་ནོ། །སྔགས་ཀྱི་སྒོའི་སྤྱོད་པ་རྣམས་ཀྱིས་ཀྱང་སངས་རྒྱས་རྗེས་སུ་དྲན་པ་བསྒོམ་པར་བྱ་སྟེ། དེ་བཞིན་གཤེགས་པ་ཐམས་ཅད་ཀྱི་གཟུགས་ཀྱི་སྐུ་དང་ཆོས་ཉིད་རྗེས་སུ་དྲན་པར་བྱའོ་ཞེས་རྟོགས་པར་བྱ་བའི་ཕྱིར་རོ། །སངས་རྒྱས་ཀྱི་ཞིང་ཐམས་ཅད་ཁྱབ་ནས་ཅི་ཞིག་མཛད་ཅེ་ན། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲ་ནི་སྔ་མ་བཞིན་ནོ། །འདུས་ཏེ་ཞེས་བྱ་བ་ནི་བསྡུ་བའི་ཚུལ་གྱིས་རྫོགས་པར་མཛད་པ་སྟེ། དེ་ལྟ་བུ་མཛད་ནས་སོ། །བྱང་ཆུབ་ལ་དགོངས་ཤིང་སེམས་དཔའི་ཐུགས་འདི་ལ་མངའ་བས་ནས་བྱང་ཆུབ་སེམས་དཔའོ། །སེམས་ཅན་གྱི་ཚོགས་ཆེན་པོའི་དོན་ཆེན་པོ་མཛད་པ་ལ་རབ་ཏུ་འཇུག་པས་ན་སེམས་དཔའ་ཆེན་པོའོ། །དོན་ཐམས་ཅད་གྲུབ་པ་ཞེས་བྱ་བ་ནི་བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པས་དོན་ཐམས་ཅད་གྲུབ་པར་བྱ་བཞེད་པ་ཙམ་ལ་རག་ལས་པ་འདི་ལས་པ་འདི་ལ་མངའ་བས་ན་དོན་ཐམས་ཅད་གྲུབ་པའོ། །བྱང་ཆུབ་ཀྱི་རྒྱུའི་སྙིང་པོ་ནི་བྱང་ཆུབ་ཀྱི་སྙིང་པོ་སྟེ། མར་གྱི་སྙིང་པོ་དང་འདྲ་བར་གནས་ཀྱི་སྙིང་པོར་གྱུར་པའོ། །དེར་བཞུགས་པ་ནི་ཉེ་བར་གནས་པར་མཛད་པའོ། །གང་ན་བར་ཞེས་བྱ་བར་ཞེས་བྱ་བའི་རྒྱུ་གསུམ་པའོ། །དེའི་དོན་ནི་འདི་ཡིན་ཏེ་གང་གིས་བསྐལ་པ་གྲངས་མེད་པ་གསུམ་དུ་སྐྱེ་བ་སྣ་ཚོགས་པ་བ་ཞེས་ཏེ། བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པར་མཛད་ནས། བསམ་གཏན་དང་གཟུགས་མེད་པའི་སྙོམས་པར་འཇུག་པ་བསྐྱེད་དེ། བསམ་གཏན་བཞི་བའི་ཆེན་པོའི་ཡང་ཆེན་པོ་བསྐྱེད་ནས་ཏིང་ངེ་འཛིན་གྱི་སྟོབས་ཀྱིས་ཡིད་ཀྱི་རང་བཞིན་གྱི་ལུས་ཅན་གྱི་སྲིད་པ་ཐ་མ་པར་མཛད་ནས། དེ་བཞིན་གཤེགས་པ་ཐམས་ཅད་ལས་ཅོད་པན་དང༌། དར་དཔྱངས་ཀྱི་དབང་བསྐུར་བ་ཐོབ་


DTG057_Page_0076
[མ་དཔེ་གཟིགས་ན་འདིར་གནོན།]

ནས་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་འཚང་རྒྱ་བར་བྱའོ་ཞེས་དགོངས་ནས་དབུགས་རྔུབ་པ་དང༌། དབུགས་དབྱུང་བ་བཀག་སྟེ་བཅོམ་ལྡན་དས་དོན་ཐམས་ཅད་གྲུབ་པ་འོག་མིན་གྱི་གནས་བྱང་ཆུབ་ཀྱི་སྙིང་པོ་ན་བཞུགས་པ་གང་ན་བ་དེར་གཤེགས་ཤིང་བཞུད་ནས་འདི་སྐད་ཅས་གསུངས་པ་ཡིན་ནོ། །བཅོམ་ལྡན་འདས་བསྐལ་པ་བསམ་གྱིས་མི་ཁྱབ་པར་མངོན་པར་རྫོགས་པར་སངས་རྒྱས་ནས་ཤཱཀྱའི་རིགས་སུ་སྐྱེ་བ་སྟོན་པར་མཛད་དོ་ཞེས་གསུངས་པས་ན། ཤཱཀྱའི་རིགས་སུ་སྐྱེ་བ་བཞེས་བྱ་བ་འདི་ལ་མི་རིགས་སོ། གཤེགས་ནས་ཀྱང་དེ་རྣམས་ཀྱིས་དེ་ལ་ཅི་ཞིག་མཛད་ཅེ་ན། ཆེད་དུ་ཞེས་བྱ་བ་ལ་སོགས་པ་གསུངས་ཏེ། དེ་ལ་རྫོགས་ལོངས་སྤྱོད་པའི་སྐུ་ནི་ཉོན་མོངས་པ་དང་ཤེས་བྱའི་སྒྲིབ་པ་དང་བྲལ་བ་ས་ཆེན་པོ་ལ་བཞུགས་པའི་བྱང་ཆུབ་སེམས་དཔའ་ཀུན་དུ་བཟང་པོ་ལ་སོགས་པ་རྣམས་ཀྱི་ཆོས་ཀྱི་རྫོགས་ལོངས་སྤྱོད་པ་ཉམས་སུ་མྱོང་བའི་ཕྱིར། ཆོས་ཀྱི་འཁོར་ལོ་ཆེན་པོ་བསྐོར་བའི་ཚུལ་གྱིས་བཞུགས་པ་གང་ཡིན་པ་འདི་ནི་ཆོས་ཀྱི་རྫོགས་ལོངས་སྤྱོད་པའི་སྐུ་དགོངས་པ་ཡིན་པས་རྫོགས་ལོངས་སྤྱོད་པ་ཞེས་བྱའོ། །དེ་རྣམས་ཀྱིས་རྫོགས་ལོངས་སྤྱོད་པའི་སྐུ་བསྟན་ནས་ཇི་སྐད་དུ་གསུངས་ཤེ་ན། རིགས་ཀྱི་བུ་ཁྱོད་ཀྱི་ཞེས་བྱ་བ་ལ་སོགས་པ་སྨོས་ཏེ། རིགས་ཀྱི་བུ་ཞེས་བྱ་བ་ནི་བོད་པའོ། །ཅི་ལྟར་ཞེས་བྱ་བ་ནི་སྤོང་བའོ། །དེའི་གོང་ན་ཁྱད་པར་དུ་གྱུར་བ་གཞན་མེད་པས་ན་བླ་ན་མེད་པ་སྟེ་ཡང་དག་པར་རྫོགས་པའི་བྱང་ཆུབ་མངོན་པར་བྱང་ཆུབ་པ་རྣམ་པ་ལྔའོ། །གང་གི་ཕྱིར་ཞེས་བྱ་བ་ལ་སོགས་པ་ལ། ཇི་སྲིད་དེ་ཁོ་ན་ཉིད་བསྒོམ་པ་མེད་པར་མི་གྱོ་བའི་ཏིང་ངེ་འཛིན་འདིས་ནི་ཁྱོད་མངོན་པར་རྫོགས་པར་བྱང་ཆུབ་པར་མི་འགྱུར་རོ་ཞེས་བྱ་བར་དགོངས་སོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་མ་རྟོགས་པར་ཞེས་བྱ་བ་ལ་སོགས་པ་གསུངས་ཏེ། གང་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་རྟོགས་པ་དེ་ནི་མངོན་པར་རྫོགས་པར་འཚང་རྒྱ་བར་འགྱུར་ན་ཡང་ཁྱོད་ནི་མི་གྱོ་བའི་ཏིང་ངེ་འཛིན་ལ་སྦྱོར་བས་བདག་ཉིད་གཟིར་ཅིང་དཀའ་བ་སྤྱོད་པ་ལ་ཞུགས་པ་ཡིན་ལ་། དེ་བས་ན་


DTG057_Page_0077
[མ་དཔེ་གཟིགས་ན་འདིར་གནོན།]

དེ་ཁོ་ན་ཉིད་མེ་དཔས་མངོན་པར་རྫོགས་པར་བྱང་ཆུབ་པར་མི་འགྱུར་རོ་ཞེས། དེ་བཞིན་གཤེགས་པ་ཐམས་ཅད་ཀྱིས་བསྐུལ་བས་ཞེས་བྱ་བས། ཇི་སྐད་གསུངས་པའི་ཚིག་གིས་བསྐུལ་བར་གྱུར་བ་ཡིན་ནོ། །དེ་ནས་མི་གྱོ་བའི་ཏིང་ངེ་འཛིན་ལས་བཞེངས་ཏེ་ཞེས་བྱ་བ་ནི་ཏིང་ངེ་འཛིན་དེ་ལས་ལྡང་བར་མཛད་པ་སྟེ་འདིས་ནི་དབུགས་བཀག་པས་གནས་པ་ཡིན་ནོ་ཞེས་དོན་ཤུགས་ལས་ཤེས་ཏེ། དེ་ཡང་བཅོམ་ལྡན་འདས་ཀྱིས་དེ་ལྟ་བུའི་ཏིང་ངེ་འཛིན་ལ་དྲེགས་པ་འཆང་བར་གྱུར་ནས་ནི། དབུགས་རྔུབ་པ་དང་འབྱུང་བ་བཀག།། ཅེས་བྱ་བ་ནས། ཨོཾ་བཛྲོ་ཏིཏྵྵ་ཞེས་བསྐུལ་བར་བྱས་སོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །དེ་བཞིན་གཤེགས་པ་ཐམས་ཅད་ལ་ཕྱག་བྱས་ནས་ཞེས་བྱ་བ་ནི། ཨོཾ་ས་རྦབ་ཏ་ཐཱ་ག་ཏ་བཱ་ད་བ་ནྡྷ་ནི་ཀ་རོ་མི་ཞེས་བྱ་བས་སོ། །འདི་སྐད་ཅེས་གསོལ་ཏོ་ཞེས་བྱ་བ་ནི་ཇི་སྐད་དུ་ཞུས་ནས་ཅི་ཞིག་སྨྲས་པ་དག་གི་རང་གི་ངོ་བོ་བསྟན་པའི་ཕྱིར། བཅོམ་ལྡན་འདས་དེ་བཞིན་གཤེགས་པ་རྣམས་ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་ཁོ་ན་ཉིད་ཇི་ལྟ་བུ་ལགས་ཞེས་བྱ་བ་ནི་གང་གིས་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་མངོན་པར་མ་རྟོགས་པར་ཞེས་ཁྱེད་རྣམས་ཀྱིས་གསུངས་པའིའོ། །ཇི་ལྟར་བསྒྲུབ་པར་བགྱི་ཞེས་བྱ་བ་ནི་ཇི་ལྟ་བུའི་དེ་ཁོ་ན་ཉིད་བསྒོམས་པས་སོ། །གསུང་གཅིག་ཏུ་འདི་སྐད་ཅེས་བཀའ་སྩལ་ཏོ་ཞེས་བྱ་བ་ནི་དགོངས་པ་གཅིག་གིས་དེ་ཁོ་ན་ཉིད་སྟོན་པར་མཛད་པ་ཡིན་ནོ། །སྒྲུབ་པར་གྱིས་ཤིག་ཅེས་བྱ་བ་ནི་ཉམས་སུ་བླང་བར་གྱིས་ཤིག་པའོ། །ཇི་ལྟར་ཞེ་ན། རང་གི་སེམས་ལ་སོ་སོར་རྟོག་ཅིང་ཞེས་བྱ་བ་ལ་སོགས་པ་གསུངས་ཏེ། རང་ཉིད་ཀྱི་སེམས་ནི་རང་གི་སེམས་ཏེ་དེ་ལ་སོ་སོར་རྟོག་པ་ནི་རྒྱུད་དང་བྲལ་བའི་ཕྱིར་ཆོས་ཐམས་ཅད་ནི་ངོ་བོ་ཉིད་ཀྱིས་དག་པའོ་ཞེས་སོ་སོར་རྟག་པའོ། །དེའི་དོན་དུ་མཉམ་པར་འཇོག་པ་ནི་རང་གི་སེམས་ལ་སོ་སོར་རྟོག་ཅིང་མཉམ་པར་ཞོག་ལ་ཞེས་བྱ་བ་སྟེ། སེམས་རྩེ་གཅིག་པ་ཉིད་དུའོ། །མཉམ་པར་གཞག་པས་སྒྲུབ་པར་གྱིས་ཤིག་ཅེས་བྱ་བ་འབའ་ཞིག་ཏུ་མ་ཟད་ཀྱི་


DTG057_Page_0078
[མ་དཔེ་གཟིགས་ན་འདིར་གནོན།]

གཞན་ཡང་རང་བཞིན་གྱིས་ཞེས་བྱ་བའི་ངོ་བོ་ཉིད་ཀྱིས་གྲུབ་པ་ནི་རང་བཞིན་གྱིས་གྲུབ་པ་སྟེ། རང་བཞིན་གྱིས་གྲུབ་པའི་སྔགས་ཅི་དགར་ཟློས་ཤིག་ཅེས་བྱ་བའི་གྲངས་ཀྱི་ངེས་པ་མེད་པ་སྟེ། གང་གི་ཕྱིར་འཚང་རྒྱ་བ་ཐོབ་པར་བྱ་བ་ལ་ནི་བསྒོམ་པར་བྱ་བ་ཉིད་གཙོ་བོར་གྱུར་བ་ཡིན་པའི་ཕྱིར་རོ། །ཅི་དགར་བ་ཟླས་པའི་སྔས་འདི་ཡང་གང་ཞིག་ཡིན་ཞེ་ན། ཨོཾ་ཙིཏྟ་པྲ་ཏི་བེ་དྷཾ་ཀ་རོ་མི་ཞེས་གསུངས་པ་ཡིན་ཏེ། སེམས་ཞེས་བྱ་བ་ཡིད་ཀྱི་རྣམ་པར་ཤེས་པ་ལ་སོགས་པའི་རང་བཞིན་སོ་སོར་གཟུང་བ་དང་འཛིན་པ་པོ་མེད་པ་ཉིད་དུ་ངེས་པར་བྱ་བ་ནི། ཙི་ཏྟ་པྲ་ཏི་བེ་དྷཾ་ཟེས་པ་སོ་སོར་རྟོག་པའོ། །ཡང་ན་བག་ཆགས་དང་བཅས་པའི་ཉོན་མོངས་པ་རབ་ཏུ་སྤངས་པས་ཤེས་པའོ། །དེ་ལྟར་ཇི་སྐད་དུ་བཤད་པའི་བཟླས་པ་དང་བསྒོམས་པས་ཆོས་ཀྱི་དབྱིངས་ཐོག་མ་དང་ཐ་མ་མེད་པ་མངོན་སུམ་དུ་བྱས་པས་ན། བདག་གི་སྙིང་གར་ཟླ་བའི་སྐྱིལ་འཁོར་ལྟ་བུར་བདག་གིས་མཐོང་ངོ་ཞེས་བྱ་བར་རང་གི་སྙིང་ག་ན་ངེས་པའི་ཡེ་ཤེས་སོ། །གཟུང་བར་བྱ་བའི་རང་གི་ངོ་བོ་ཟླ་བའི་དབྱིངས་ཀྱི་ཡི་གེ་བཅུ་དྲུག་ལས་བྱུང་བ་ནང་ལ་སོགས་པ་སྟོང་བ་ཉིད་བཅུ་དྲུག་སྟོན་པར་བྱེད་པ་འཇིག་རྟེན་ལས་འདས་པའི་རྗེས་ལས་སྐྱེས་པའི་ཡེ་ཤེས་ཀྱི་ཟླ་བའི་དཀྱིལ་འཁོར་གྱི་རྣམ་པར་མཐོང་ངོ་ཞེས་པ་སྟེ། ཟླ་བའི་དཀྱིལ་འཁོར་ཉིད་མིག་ཡོར་ཙམ་དུ་སོ་སོར་སྣང་བས་ནས་ཟླ་བའི་དཀྱིལ་འཁོར་ལྟ་བུ་སྒོམ་པར་བཤད་པའི་རྒྱུད་ལས་བསྟན་པས་ནས་སོམ་ཉི་མི་བྱའོ། །ཁ་ཅིག་ནི་ཚེས་གཅིག་པའི་ཟླ་བའི་རི་མོ་འདྲ་བའི་ཟླ་བ་འདི་དཀྱིལ་འཁོར་ལྟ་བུ་ཞེས་ཟེར་རོ། །གཞན་དག་ན་རེ་དེ་ནི་མི་རིགས་ཏེ། དེ་ཡང༌། གང་འདི་ཟླ་བ་རྫོགས་པ་འདི། །དག་ཅིང་གསལ་ལ་རྙོག་པ་མེད། དེ་བཞིན་ཚོགས་ནི་རྫོགས་པའི་ཕྱིར། །སེམས་ནི་ཟླ་བརྒྱས་པ་འདྲ། །ཞེས་གསུངས་པའི་ཕྱིར་རོ། །འདིས་ནི་བྱང་ཆུབ་ཀྱི་སེམས་ཀྱི་ངོ་བོ་མི་བསྐྱེད་པའི་རང་བཞིན་དུ་གསུངས་པ་ཡིན་ནོ། །རང་བཞིན་གྱིས་ཞེས་བྱ་བ་ནི་ངོ་བོ་ཉིད་ཀྱིས་སོ། །འོད་གསལ་བ་ཞེས་བྱ་བ་ནི་དྲ་མ་མེད་པའི་དོན་ཏེ་གཟུང་བ་དང་འཛིན་པ་པོའི་བག་ཆགས་ཀྱི་ནག་ནོག་དང་


DTG057_Page_0079
[མ་དཔེ་གཟིགས་ན་འདིར་གནོན།]

བྲལ་བ་ལ་གློ་བུར་བའི་དྲི་མས་དྲི་མས་ཅན་དུ་གྱུར་པ་མ་ཡིན་པའི་ཕྱིར་རོ། །འདི་ནི་ཇི་ལྟར་སྦྱངས་པ་ཞེས་བྱ་བ་ནི། དེ་བཞིན་གཤེགས་པ་ལ་སོགས་པའི་སྐུར་བསྒོམས་པས་གང་དང་གང་དག་གིས་སོ། །དེ་ལྟར་འགྱུར་ཏེ་ཞེས་བྱ་བ་ནི་དེ་དང་དེས་ཤིན་ཏུ་གསལ་བར་འགྱུར་བའོ། །ཇི་ལྟ་བུར་ཞེ་ན། དཔེར་ན་ཞེས་བྱ་བ་ལ་སོགས་པ་གསུངས་ཏེ། ཇི་ལྟར་རས་དཀར་པོ་དྲི་མ་ཐམས་ཅད་དང་བྲལ་བ་ཚོན་གྱིས་ཁ་བསྒྱུར་བ་ནི། པདྨ་རཱ་ག་ལ་སོགས་པའི་མདོག་ཏུ་མདོག་ཤིན་ཏུ་གསལ་བར་དེའི་མདོག་ཅན་དུ་འགྱུར་ཏེ། དེ་དང་འདྲའོ་ཞེས་བྱ་བའི་ཐ་ཚིག་གོ །དེ་བས་ན་ཞེས་བྱ་བ་ལ་སོགས་པ་ལ། རང་བཞིན་གྱིས་འོད་གསལ་བ་ནི་ངོ་བོ་ཉིད་ཀྱིས་གཟུང་བ་དང་འཛིན་པའི་རྣམ་པར་རྟོག་པ་དང༌། བྲལ་བའོ། །དེ་གང་ཞིག་ཅེ་ན་སེམས་སོ། །དེའི་ཤེས་བ་ནི་མངོན་པར་རྟོགས་པའོ། །དེ་རྒྱས་པར་བྱ་བ་ནི་ཐབས་ཀྱི་ཕ་རོལ་ཏུ་ཕྱིན་པའི་རང་བཞིན་ཟླ་བའི་དཀྱིལ་འཁོར་གྱི་སྟེང་ན་ཟླ་བའི་དཀྱིལ་འཁོར་གཉིས་པ་བསྐྱེད་པར་བྱ་བ་ནི་རྒྱས་པར་བྱ་བ་སྟེ། རྒྱུ་དེའི་ཕྱིར་བྱང་ཆུབ་ཀྱི་སེམས་བསྐྱེད་པ་ལ་འཇུག་པར་བྱའོ། ཞེས་པ་སྟེ། རྣམ་པར་སྣང་མཛད་ལ་སོགས་པའི་རང་བཞིན་སྟོན་པར་བྱེད་པའི་ཡི་གེ་ཀ་ལ་སོགས་པ་ལས་ཟླ་བའི་དཀྱིལ་འཁོར་གཉིས་པ་བསྐྱེད་པ་ནི། བྱང་ཆུབ་སེམས་བསྐྱེད་པ་ཡིན་ཏེ། ཡི་གེ་ཀ་ལ་སོགས་པ་སྐར་མ་ལྟ་བུའི་གཟུགས་ཅན་ལས་ཟླ་བའི་དཀྱིལ་འཁོར་གཉིས་པ་བསྐྱེད་པར་བསམ་མོ་ཞེས་བཤད་པའི་རྒྱུད་ལས་གསུངས་པ་ཡིན་ནོ། །ཟླ་བའི་དཀྱིལ་འཁོར་ལྟ་བུར་མཐོང་བ་གང་ལགས་པ་དེ་ནི་ཟླ་བའི་དཀྱིལ་འཁོར་ཉིད་དུ་མཐོང་ངོ་ཞེས་བྱ་བ་ནི། འདི་སྐད་སྟོན་པ་ཡིན་ཏེ། སེམས་སོ་སོར་རྟོག་པའི་ཡེ་ཤེས་གང་ཡིན་པ་དེ་ཟླ་བའི་དཀྱིལ་འཁོར་ལྟ་བུར་སོ་སོར་སྣང་བ་གང་ཡིན་པ་དེ་ལ་བྱང་ཆུབ་ཀྱི་སེམས་བསྐྱེད་པ་བསྒོམས་པས་ཟླ་བའི་དཀྱིལ་འཁོར་ཆེན་པོའི་གཟུགས་ཅན་གཉིས་པ་ཉིད་དུ་མཐོང་ངོ་ཞེས་པའོ། །དེ་ཡང་ཟླ་བའི་དབུས་སུ་འང་ཟླ་བའི་དཀྱིལ་འཁོར་གཉིས་པ་མཐོང་བ་ཡིན་ཞེས་གསུངས་པ་ཡིན་ནོ། །འདིས་ནི་སྦྱིན་པའི་ཕ་རོལ་ཏུ་ཕྱིན་


DTG057_Page_0080
[མ་དཔེ་གཟིགས་ན་འདིར་གནོན།]

པའི་བདག་ཉིད་ཅན་རིན་ཆེན་འབྱུང་ལྡན་གྱི་ངོ་བོ་ཉིད་དུ་གསུངས་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་སྙིང་པོ་ནི་དེར་ངེས་པའོ། །ཀུན་དུ་བཟང་པོ་ནི་འདོད་ཆགས་ལ་སོགས་པ་དང་བྲལ་ཞིང་སེམས་ཅན་ཐམས་ཅད་ཀྱི་བསམ་པ་ཐམས་ཅད་ཡོངས་སུ་རྫོགས་པའི་རྒྱུར་གྱུར་པའོ། །དེ་གང་ཞིག་ཡིན་ཞེ་ན། སེམས་བསྐྱེད་པ་ཞེས་བྱ་བའོ། །ཇི་ལྟར་ཞེ་ན་ཁྱོད་ཀྱིས་མངོན་སུམ་དུ་གྱུར་གྱིས་ཞེས་བྱ་བ་གསུངས་ཏེ། གང་གི་ཕྱིར་དེ་བཞིན་གཤེགས་པ་ཐམས་ཅད་ཀྱི་ཐུགས་དང་མཉམ་པ་ཉིད་ཐོབ་པ་དེས་ན། འདི་ནི་དེ་བཞིན་གཤེགས་པ་ཐམས་ཅད་ཀྱི་སྙིང་པོའི་གཟུགས་སུ་གྱུར་བའོ། །བརྟན་པར་བྱ་བའི་ཕྱིར་ཞེས་བྱ་བ་ནི་རང་བཞིན་གྱིས་རྣམ་པར་དག་པ་སོ་སོར་བརྟགས་པས་དངོས་པོར་གཟུང་བར་བྱ་བ་ཉེ་བར་མི་དམིགས་པ་ནི་བརྟན་པར་བྱ་སྟེ་དེའི་ཕྱི་རོ། །རང་གི་སྙིང་གའི་ཟླ་བའི་དཀྱིལ་འཁོར་ལ་ཞེས་བྱ་བ་ནི། དང་པོའི་ཟླ་བའི་དཀྱིལ་འཁོར་དང༌། གཞིའི་ཟླ་བའི་དཀྱིལ་འཁོར་ལ་རྡོ་རྗེ་རྩེ་ལྔ་པའི་དབྱི་བས་སུ་སོམས་ཤིག་ཅེས་པ་ནི་སྒོམས་ཤིག་པའོ། །བསྒོམས་པ་འབའ་ཞིག་ཏུ་ཟད་དམ་ཞེ་ན་མ་ཡིན་ཏེ། སྔགས་འདིས་ཞེས་བྱ་བ་གསུངས་སོ།། ཟླ་བའི་དཀྱིལ་འཁོར་གཉིས་པར་རྡོ་རྗེ་ར་བ་བསྒོམས་པས་ཀྱང་རྣམ་པར་སྣང་མཛད་ལ་སོགས་པའི་རང་བཞིན་དུ་དམིགས་པར་གསུངས་པ་ཡིན་ཏེ། སྟོང་པ་ཉིད་ནི་རྡོ་རྗེར་བཤད། །ཅེས་འབྱུང་བས་ན་རྡོ་རྗེའི་ཕྱག་རྒྱ་ནི་སྟོང་པ་ཉིད་ཀྱི་རྡོ་རྗེ་ནི་རང་བཞིན་དུ་སྟོན་བར་བྱེད་པ་ཡིན་ནོ། འདིས་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད་འོད་དཔག་ཏུ་མེད་པའི་རང་བཞིན་གསུངས་པ་ཡིན་ནོ། །ཟླ་བའི་དཀྱིལ་འཁོར་གཉིས་པར་རྡོ་རྗེ་རྣམ་པར་བསྒོམ་པར་བྱའོ་ཞེས་བྱ་བ་འདི་གང་ལས་ཤེས་ཤེ་ན། གང་གི་ཕྱིར། དཀྱིལ་འཁོར་གཉིས་པའི་དབུས་སུ་ནི། །རྡོ་རྗེ་ཆེན་པོ་རྣམ་བསམས་ལ། །ཡིད་ཙམ་སོ་སོར་བརྟགས་པ་ནི། །ཐེག་པ་ཆེན་པོ་བརྟན་པ་ཡིན། །ཞེས་གསུངས་སོ། །འདི་བརྟན་པར་བྱ་སྟེ། རང་བཞིན་གྱིས་འོད་གསལ་བར་བསྒོམས་པས་སྟོང་པ་ཉིད་རྡོ་རྗེའི་བདག་ཉིད་ཅན་དུ་སྦྱོར་བས་འཛིན་པོ་མི་དམིགས་པ་ནི་


DTG057_Page_0081
[མ་དཔེ་གཟིགས་ན་འདིར་གནོན།]

བརྟན་པར་བྱའོ། །དེ་གསུངས་པ་ནི། ཨོཾ་བཛྲ་ཨཏྨ་ཀོ྅ཧཾ་ཞེས་བྱ་བའོ། །ནམ་མཁའི་དབྱིངས་ཐམས་ཅད་དུ་ཞེས་བྱ་བ་ལ་སོགས་པ་ལ། ནམ་མཁའི་དབྱིངས་ཐམས་ཅད་དུ་ཡང་དག་པར་མཉམ་པར་འཇུག་ཅིང་ཁྱབ་པ་གང་ཡིན་པ་དེ་ནི་ནམ་མཁའི་དབྱིངས་ཐམས་ཅད་དུ་མཉམ་པར་འཇུག་པའོ། །དེ་གང་ཞིག་ཡིན་ཞེ་ན། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་དབྱིངས་ཞེས་བྱ་བ་སྟེ། དེ་བཞིན་གཤེགས་པ་རྟག་པ་དང༌། མི་བསྐྱོད་པ་དང༌། རིན་ཆེན་འབྱུང་ལྡན་དང༌། འོད་དཔག་ཏུ་མེད་པ་དང༌། དོན་ཡོད་པར་གྲུབ་པའི་རང་བཞིན་ཅན་གྱི་རྡུལ་ཕྲ་རབ་རྣམས་རྣམ་པར་སྣང་མཛད་ཀྱི་སྐུ་ལ་སོགས་པའི་རྒྱུར་གྱུར་པས་ན་དབྱིངས་རྣམས་ཏེ། འདིར་ཁམས་ཀྱི་དོན་ནི་རྒྱུའི་དོན་ཡིན་པར་འདོད་དོ། །དེ་ལ་སྐུའི་གསང་བ་ནི་སྐུའི་དབྱིངས་སོ། །གསུང་གི་གསང་བ་ནི་གསུང་གི་དབྱིངས་སོ། །དེ་རྣམས་ཀྱི་ཐུགས་ཀར་གནས་པའི་སེམས་དཔའ་རྡོ་རྗེ་གང་ཡིན་པ་དེ་ནི་ཐུགས་རྡོ་རྗེའི་དབྱིངས་སོ། །དེ་བཞིན་གཤེགས་པ་ཐམས་ཅད་ནི་བཅོམ་ལྡན་འདས་རྣམ་པར་སྣང་མཛད་དང༌། མི་བསྐྱོད་པ་ལ་སོགས་པ་སྟེ། དེ་རྣམས་ཀྱི་སེམས་དང་སེམས་ལས་བྱུང་བ་ཡང༌། དེ་བཞིན་གཤེགས་པ་ཐམས་ཅད་དོ། །དེ་རྣམས་ཀྱི་བྱིན་གྱི་རླབས་ནི་ཁབ་ལོང་གིས་ལྕགས་འདྲེན་པ་དང་འདྲ་བར་ནུས་པ་སྐྱེད་པའོ། །སེམས་དཔའི་རྡོ་རྗེ་ཞེས་བྱ་བ་ནི་ཟླ་བའི་དཀྱིལ་འཁོར་ལ་གནས་པའི་རྡོ་རྗེའོ། །དེར་ཞུགས་སོ་ཞེས་བྱ་བ་ནི་བྱེ་མ་ལ་བུམ་པའི་ཆུ་བླུགས་པ་ལྟར་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་དབྱིངས་ཇི་སྐད་བཤད་པ་ཉིད་རྣམ་པར་སྣང་མཛད་ཀྱི་སྐུ་མངོན་པར་གྲུབ་པའི་རྒྱུ་ཡིན་པས་ན་རྡོ་རྗེ་དབྱིངས་ཏེ། འདིས་ཀྱང་རྣམ་པར་ཐར་པའི་སྒོའི་རང་བཞིན་གྱིས་འོད་གསལ་བ་ཉིད་ཡིན་པས་ན། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་རང་བཞིན་ཉིད་ཀྱིས་དོན་ཡོད་པར་གྲུབ་པའི་ངོ་བོ་ཉིད་སྟོན་ཏོ། །ཁ་ཅིག་ནི་གནས་ས་བས་འདིར་རྡོ་རྗེ་སེམས་དཔའི་ཕྱག་རྒྱ་ཆེན་པོ་ཡིན་ནོ་ཞེས་ཟེར་མོད་ཀྱི་གཞན་དག་ན་རེ་དེ་ནི་མ་ཡིན་ཏེ། ཁྱད་པར་གྱི་


DTG057_Page_0082
[མ་དཔེ་གཟིགས་ན་འདིར་གནོན།]

ཚིག་མེད་པའི་ཕྱིར་དང༌། འོག་ནས་བྱང་ཆུབ་སེམས་དཔའ་ཆེན་པོ་དེ་ལྟ་བས་ན། སེམས་དཔའི་རྡོ་རྗེ་དེ་རྣམ་པ་ཐམས་ཅད་ཀྱི་མཆོག་དང་ལྡན་པའི་སངས་རྒྱས་ཀྱི་སྐུར་བདག་ཉིད་སྒོམས་ཤིག་ཅེས་གསུངས་པའི་ཕྱིར་རོ། །སེམས་དཔའི་རྡོ་རྗེའི་སྒྲས་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོ་ཡིན་པར་བཤད་དོ་ཞེས་བཤད་པར་ནུས་པ་ཡང་མ་ཡིན་ཏེ། ཡོངས་སུ་འ་ཆད་པར་བཤད་པ་མེད་པའི་ཕྱིར་རོ། །རྡོ་རྗེ་སེམས་དཔའི་ཏིང་ངེ་འཛིན་ནི། སངས་རྒྱས་རྣམས་ཀྱི་ཆོས་ཉིད་དགོངས། །ཞེས་བྱ་བ་གཏན་ཚིགས་ཡིན་ནོ་ཞེ་ན། སྔར་བཤད་པའི་ཚུལ་གྱིས། བཅོམ་ལྡན་སེམས་དཔའ་དེ་ཉིད་ནི། །སྙིང་གར་རྡོ་རྗེ་བསྒོམས་པ་ཡིས། །རྡོ་རྗེ་སེམས་དཔའ་ཞེས་བཤད་ལ། །རྡོ་རྗེ་སེམས་དཔའ་དེར་ཞུགས་སོ། །ཞེས་བྱ་བ་ལ་སོགས་པའི་ངེས་པས་དེ་བཞིན་གཤེགས་པ་ཐམས་ཅད་ཀྱི་རྡུལ་ཕྲ་རབ་འདུས་པ་ལས་རྡོ་རྗེ་རྩེ་ལྔ་པའི་གཟུགས་ནི། དེ་བཞིན་གཤེགས་པ་ཐམས་ཅད་ཀྱི་སྐུ་སྟེ། དེའི་ངོ་བོ་ཉིད་ཀྱི་བདག་ཉིད་དེ། དེ་ལྟ་བས་ན་ཞེས་བྱ་བ་ནི་གང་གི་ཕྱིར་རྡོ་རྗེའི་གཟུགས་དེ་ཉིད་དེ་བཞིན་གཤེགས་པ་ཐམས་ཅད་ཀྱི་རྡུལ་ཕྲ་རབ་ལས་བསྒྲུབས་པའི་བདག་ཉིད་དུ་མཐོང་གི་མཚན་དང་དཔེ་བྱད་ཡོངས་སུ་རྫོགས་པའི་སངས་རྒྱས་ཀྱི་སྐུ་གཅིག་པུར་ནི་མ་ཡིན་ཏེ། དེ་བས་ན་སེམས་དཔའི་རྡོ་རྗེ་དེ་ནི་རྣམ་པ་ཐམས་ཅད་ཀྱི་མཆོག་དང་ལྡན་པའི་སངས་རྒྱས་ཀྱི་སྐུ་དེ་བཞིན་གཤེགས་པ་རྣམས་ཀྱི་སྐུའི་གསང་བའི་བདག་ཉིད་ཅན་ཡིན་ནོ། །དེ་བས་ན་འདི་ནི་སངས་རྒྱས་ཐམས་ཅད་གཅིག་ཏུ་བསྡུས་པར་གྱུར་པ་རྣམ་པར་གྱུར་པ་རྣམ་པར་སྣང་མཛད་དུ་གྱུར་པ་ཡིན་ནོ། །མངོན་པར་བྱང་ཆུབ་པ་ལྔའི་རིམ་པ་འདི་ལ་འང༌། མི་བསྐྱོད་པའི་ཕྱག་རྒྱ་ཆེན་པོ་བཅིངས་ལ་སེམས་སོ་སོར་རྟོགས་པར་བྱའོ། །དེ་བཞིན་དུ་བྱང་ཆུབ་ཏུ་སེམས་བསྐྱེད་པ་དང། རྡོ་རྗེ་དང་རྡོ་རྗེའི་བདག་ཉིད་ཅན་དང༌། དེ་བཞིན་གཤེགས་པ་ཐམས་ཅད་བསྒོམ་པའི་དུས་སུ། མི་བསྐྱོད་པ་དང༌། རིན་ཆེན་འབྱུང་ལྡན་དང༌། འོད་དཔག་ཏུ་མེད་པ་དང༌། དོན་ཡོད་གྲུབ་པ་དང༌། རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་བཅིང་བར་བྱའོ་ཞེས་བཤད་


DTG057_Page_0083
[མ་དཔེ་གཟིགས་ན་འདིར་གནོན།]

པའི་རྒྱུད་ལས་བསྟན་པ་ཡིན་ནོ། །བྱིན་གྱིས་བརླབས་ལ་ཞེས་བྱ་བ་ནི། སེམས་ཅན་གྱི་དོན་དུ་བྱ་བར་ནུས་བ་བརྟན་ཕར་མཛོད་ཅིག་ཅེས་བྱ་བའི་ཐ་ཚིག་གོ །བརྟན་པར་མཛོད་ཅེས་བྱ་བ་ནི། མི་ཕྱེད་པར་བྱ་བ་སྟེ། རྡོ་རྗེ་དབྱིངས་ཀྱི་དབང་ཕྱུག་མས་བྱིན་གྱིས་བརླབས་པ་དང༌། ཡི་གེ་བརྒྱ་པས་བརྟན་པར་བྱ་བ་ནི་འོ་ནས་འཆད་དོ། །དེ་བཞིན་གཤེགས་པ་ཐམས་ཅད་རྡོ་རྗེ་དབྱིངས་ཀྱི་སེམས་དཔའི་རྡོ་རྗེ་དེར་ཞུགས་སོ་ཞེས་བྱ་བ་ནི། ཡ་ཐཱ་སརྦ་ཏ་ཐཱ་ག་ཏ་སྟ་ཐཱ་ཨ་ཧཾ་ཞེས་བྱ་བའི་བསྒོམས་པའི་སྟོབས་ལས་བྱུང་བའི་བཅོམ་ལྡན་འདས་རང་གི་སྙིང་གར་གནས་པའི་སེམས་དཔའི་རྡོ་རྗེ་དེར་ཞུགས་སོ་ཞེས་བྱ་བའི་དོན་ཏོ། །གང་གི་ཕྱིར་སྐུ་གསུང་ཐུགས་རྡོ་རྗེས་བྱིན་གྱིས་བརླབས་པའི་དུས་དེའི་ཚེ་ཉིད་དེ་བཞིན་གཤེགས་པར་གྱུར་བ་ཡིན་ནོ། །དེ་ནས་ཞུགས་པ་དང་རྒྱུད་ཕྱི་མ་ལས་གསུངས་པའི་ཚུལ་གྱིས་རྡོ་རྗེ་དབྱིངས་ཀྱི་དབང་ཕྱུག་མས། སྙིང་ག་དང༌། དཔྲལ་བ་དང༌། ལྐོག་མ་དང༌། སྤྱི་བོར། རྡོ་རྗེ་དང༌། རིན་པོ་ཆེ་དང༌། པདྨ་དང༌། སྣ་ཚོགས་རྡོ་རྗེས་དེ་ལ་བསྐྱེད་པར་བྱའོ། །དེ་ནས་ཡི་གེ་བརྒྱ་ཕས་བརྟན་པར་བྱ་བ་འདིས་ནི་རང་གི་རྒྱུད་ལས་གསུངས་པའི་ཆོ་ག་ཡིན་ལ། ཨོཾ་སྦྲ་ཏ་ཐཱ་ག་ཏ་ཨ་བྷི་སཾ་བོ་དྷི་དྲྀ་ཌྷ་བཛྲ་ཏི་ཥཋ་ཞེས་བྱ་བ་བཤད་པའི་རྒྱུད་ལས་གསུངས་པས་ཀྱང་བྱིན་གྱིས་བརླབས་པ་བརྟན་པར་ཤེས་པར་བྱའོ། །སེམས་སོ་སོར་རྟོག་པ་ལ་སོགས་པའི་རིམ་གྱིས་མངོན་པར་བྱང་ཆུབ་པ་དང་བྱིན་གྱིས་བརླབས་པ་དང༌། བརྟན་པར་བྱ་བ་ནི། བཅོམ་ལྡན་འདས་ཀྱིས་མ་འོངས་པའི་གསང་སྔགས་ཀྱི་སྒོ་ལ་སྤྱོད་པ་སྤྱད་པ་རྣམས་ཀྱི་སྒོམ་པའི་ལུང་འབོགས་པ་སྦྱིན་པའི་ཕྱིར་སྟོན་པར་མཛད་པ་ཡིན་ཏེ། མ་འོངས་པ་རྣམས་ཀྱིས་རིམ་པ་འདིས་སྒོམ་པ་ལ་འཇུག་པར་བྱའོ་ཞེས་སྟོན་པ་ཡིན་ནོ། །ཡང་བཅོམ་ལྡན་འདས་སྐད་ཅིག་མ་གཅིག་ཉིད་ལ་ལྡོག་པའི་དབྱེ་བས་མི་བསྐྱོད་པ་ལ་སོགས་པའི་སྐུས་ཐ་དད་པར་སྣང་བས་སམ་ཆོས་ཐམས་ཅད་བདག་མེད་པའི་ཡེ་ཤེས་སོ་སོར་མངོན་དུ་མཛད་པ་ཡིན་ནོ། །དེ་ཡང་གང་གི་ཕྱིར་སྐད་ཅིག་མ་དེ་ཉིད་ཀྱི་


DTG057_Page_0084
[མ་དཔེ་གཟིགས་ན་འདིར་གནོན།]

ཆོ་ན་ཞེས་བྱ་བ་གསུངས་ཏེ། ཨོཾ་ཙིཏྟ་པྲ་ཏི་བེ་དྷཾ་ཀ་རོམ་མི་ཞེས་བྱ་བ་ནི་སྐད་ཅིག་མ་དེ་ཉིད་ཀྱི་ཚེ་ནའོ། །འདི་གང་ལས་ཤེས་ཤེ་ན་གང་གི་ཕྱིར་ཡང་རྣམ་པར་རྟོག་པ་འབྱུང་བ་ན་ནི་བྱང་ཆུབ་ལས་ཉམས་པར་འགྱུར་ན། དེ་ལྟར་ནི་མི་འདོད་དོ། །དེ་བཞིན་གཤེགས་པ་ཐམས་ཅད་ནི་རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པའི་རིགས་ཀྱི་རང་བཞིན་ཅན་རྣམས་ཏེ། དེ་རྣམས་ཀྱི་མཉམ་པ་ཉིད་ནི་དོན་དམ་པར་དེ་བཞིན་ཉིད་དུ་ཚུལ་གཅིག་པ་ཉིད་དོ། །འདི་ཉིད་ཀྱི་དཀྱིལ་འཁོར་ལ་སོགས་པའི་ཚུལ་ཡང་དབྱེ་བ་མེད་པས་ཕྱེ་བ་ཉིད་ནི་ཀུན་རྫོབ་ཀྱི་མཉམ་པ་ཉིད་དོ། །འདིའི་ངེས་པ་ནི་ཡེ་ཤེས་ཏེ། དེ་མངོན་པར་རྫོགས་པར་སངས་རྒྱས་པ་དེ་ཐུགས་སུ་ཆུད་པའོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་མཉམ་པ་ཉིད་ནི་རིན་པོ་ཆེའི་རིགས་ཀྱི་ངོ་བོ་ཉིད་ཀྱི་ཉམ་པ་ཉིད་ཀྱང་སྔ་མ་དང་འདྲ་སྟེ། དེའི་ཡེ་ཤེས་སོ། །དེ་ཉིད་ནི་ཕྱག་རྒྱའོ། །གསང་བ་ཡང་དེ་ཉིད་དོ། །དེའི་དམ་ཚིག་ནི་དབང་བསྐུར་བ་ལ་སོགས་པའི་སྦྱིན་པས་སེམས་ཅན་ཐམས་ཅད་དགའ་བར་བྱེད་པའོ། །དེར་ཞུགས་པ་ནི་ཐུགས་སུ་ཆུད་པས་དེའི་ངོ་བོ་ཉིད་དུ་སྐྱེད་པར་རྫོགས་པའོ། །དེ་བཞིན་གཤེགས་པ་ཐམས་ཅད་ཀྱི་ཆོས་ནི་པདྨའི་རིགས་ཀྱི་རང་བཞིན་ནོ། །དེ་རྣམས་ཀྱི་མཉམ་པ་ཉིད་ཀྱང་དེ་བཞིན་ནོ། །དེའི་ཡེ་ཤེས་ནི་ངེས་པའོ། །དེའི་རྟོགས་པ་ནི་མངོན་སུམ་དུ་མཛད་པའོ། །རྫོགས་པས་དེར་རང་བཞིན་གྱིས་དག་པ་ནི་པདྨའི་རིགས་ཀྱི་ངོ་བོར་གྱུར་པའོ། །དེ་བཞིན་གཤེགས་པ་ཐམས་ཅད་ནི་ལས་ཀྱི་རིགས་ཀྱི་ངོ་བོ་ཉིད་དོ། །དེ་རྣམས་ཀྱི་ཐམས་ཅད་མཉམ་པ་ཉིད་ནི། འཁོར་གསུམ་ཡོངས་སུ་དག་པའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །དེས་རང་བཞིན་གྱིས་འོད་གསལ་བའི་ཡེ་ཤེས་ནི་རང་གི་རྒྱུད་དང་གདུལ་བྱའི་རྒྱུད་ལ་གོང་ནས་གོང་དུ་ཁྱད་པར་དུ་གྱུར་པའོ། །དེའི་འབྱུང་གནས་སུ་གྱུར་པ་ནི་རིགས་སུ་གྱུར་པའི་ལས་ཀྱི་རིགས་ཀྱི་ངོ་བོ་ཉིད་དོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་གྱུར་ཏོ་ཞེས་བྱ་བ་ནི། ཡེ་ཤེས་བཞི་ཐུགས་སུ་ཆུད་པའི་རྗེས་ཐོགས་ཉིད་ཀྱི་སྐད་ཅིག་


DTG057_Page_0085
[མ་དཔེ་གཟིགས་ན་འདིར་གནོན།]

མ་གཅིག་ལ། ཨོཾ་ཡ་ཐཱ་སརྦྦ་ཏ་ཐཱ་ག་ཏཱ་ཏསྟ་ཐཱ་ཨ་ཧཾ་ཞེས་བྱ་བའི་སྒོམ་པ་འདིས་སྔོན་གྱི་སངས་རྒྱས་རྣམས་ངི་ལྟར་བཞུད་པ་དེ་ལྟར་གཤེགས་ཤིང་སངས་རྒྱས་པས་ན་དེའི་ཕྱིར་དེ་བཞིན་གཤེགས་པའོ། །བདུད་བཞིའི་དགྲ་བཅོམ་པས་ན་དགྲ་བཅོམ་པའོ། །དེ་ཉིད་ཀྱི་ཕྱིར་ཡང་དག་ཅིང་ཕྱིན་ཅི་མ་ལོག་པར་ཀུན་ནས་ཐུགས་སུ་ཆུད་ཅིང་སངས་རྒྱས་པ་རྒྱུད་པས་ན་ཡང་དག་པར་རྫོགས་པའི་སངས་རྒྱས་སུ་གྱུར་ཏོ་ཞེས་བྱ་བ་ནི་རྫོགས་པའོ། །འདི་ནི་སངས་རྒྱས་ཐམས་ཅད་གཅིག་ཏུ་བསྡུས་པར་གྱུར་པ་རྣམ་པར་སྣང་མཛད་ཀྱི་ངོ་བོ་ཉིད་ཡིན་པར་སྟོན་ཏོ། །གདུལ་བྱའི་ངོར་མཛད་ནས་བྱིན་གྱིས་བརླབས་པ་ཇི་ལྟར་མཛད་པ་ལྟར་དབང་བསྐུར་བ་ལ་སོགས་པ་ཡང་དེ་བཞིན་དུ་བྱའོ་ཞེས་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་བཞིན་གཤེགས་པ་ཐམས་ཅད་ཀྱི་སེམས་དཔའ་རྡོ་རྗེ་དེ་ལས་ཞེས་བྱ་བ་ནི་རྣམ་པར་སྣང་མཛད་ཀྱི་ཐུགས་ཀར་གནས་པ་དེ་ལས་སོ། །ནམ་མཁའི་སྙིང་པོའི་ནོར་བུ་རིན་པོ་ཆེའི་དབང་བསྐུར་བ་ནི། བཛྲ་རཏྣ་ཞེས་བྱ་བའི་སྙིང་པོ་འདིས་རྡོ་རྗེ་རི་ན་ཆེན་གྱི་ཅོད་པན་གྱི་དབང་བསྐུར་བའོ། །ཀུན་དུ་སྤྱན་རས་གཟིགས་ཀྱི་དབང་པོ་ཆོས་ཀྱི་ཡེ་ཤེས་ནི་བསྐྱེད་ཅེས་བྱ་བ་ལ་སྤྱན་རས་གཟིགས་དབང་ཕྱུག་ནི་བཤད་ཟིན་ཏོ། །དེའི་ཆོས་ནི་ཇི་སྐད་དུ་བཤད་པའི་རྣམ་པར་སྣང་མཛད་དང༌། རྣམ་པར་སྣང་མཛད་ཆེན་པོ་བསྟན་པ་དང་རྡོ་རྗེ་སེམས་དཔའ་ལ་སོགས་པ་དཀྱིལ་འཁོར་སྤྲུལ་པའི་ཡུལ་ལོ། །དེའི་ཡེ་ཤེས་ནི་ངེས་པ་སྟེ་དེ་བསྐྱེད་པའོ། །འདི་སྐད་དུ་སྟོན་ཏེ་དབང་བསྐུར་ནས་མདོར་ན་འཇིག་རྟེན་ཐམས་ཅད་དུ་ཞེས་བྱ་བ་ལ་སོགས་པའི་རྗེས་སུ་གནང་བ་ལྔ་པོ་དཀྱིལ་འཁོར་ལ་འཇུག་པ་དང༌། ཆོས་ཀྱི་འཁོར་ལོ་ལ་འཇུག་པའི་ཕྱིར་བྱིན་པའོ། །དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་ཐམས་ཅད་ལ་རབ་ཏུ་བཞག་ནས་ཞེས་བྱ་བ་ནི། དཀྱིལ་འཁོར་བྲི་བའི་ཆོ་གས་འགྲོ་བའི་དོན་བྱ་བ་ནི། དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་ཐམས་ཅད་དེ། དབང་བསྐུར་བ་དང་རྗེས་སུ་གནང་བ་བྱིན་ནས་དཀྱིལ་འཁོར་བྲི་བའི་ལས་ལ་འཇུག་པར་


DTG057_Page_0086
[མ་དཔེ་གཟིགས་ན་འདིར་གནོན།]

བྱའོ་ཞེས་སྟོན་པ་ཡིན་ནོ། །དེ་ལྟར་མཛད་ནས་དེ་རྣམས་ཀྱི་ཅི་ཞིག་མཛད་ཅེ་ན། རི་རབ་ཀྱི་རྩེ་མོ་ཞེས་བྱ་བ་ལ་སོགས་པ་གསུངས་ཏེ། ཁང་པ་བརྩེགས་པ་ནི་གཙོ་བོའི་བཞུགས་གནས་ཀྱི་གཞལ་ཡས་ཁང་ངོ༌། །རྩེ་མོ་ནི་སྟེང་གི་ཆའོ། །རྡོ་རྗེ་ནི་རྡོ་རྗེ་རྩེ་ལྔ་པའོ། ནོར་བུ་ནི་ཡིད་བཞིན་གྱི་ནོར་བུ་སྟེ། དེ་དག་ནི་རྩེ་མོ་རྡོ་རྗེ་དང་ནོར་བུ་རིན་པོ་ཆེ་ལས་བྱས་པ་སྟེ། དེས་ཁང་པ་བརྩེགས་པའི་རྩེ་མོ་བརྒྱན་པ་གང་ཡིན་པ་དེ་ནི་ཁང་པ་བརྩེགས་པ་རྩེ་མོ་རྡོ་རྗེ་དང་ནོར་བུ་རིན་པོ་ཆེ་ལས་བྱས་པ་ཞེས་བྱ་བ་སྟེ། དེ་གང་ན་བ་དེར་གཤེགས་ཏེ་བྱོན་ནས་ཞེས་བྱ་བར་སྦྱོར་རོ། །དེ་བཞིན་གཤེགས་པ་ཐམས་ཅད་དུ་བྱིན་གྱིས་བརླབས་ཏེ་ཞེས་བྱ་བ་ནི་བསྐྱོད་པ་ལ་སོགས་པ་དེ་བཞིན་གཤེགས་པ་བཞི་པོའི་སྐུར་བྱིན་གྱིས་བརླབས་པས་ཞལ་བཞི་བསྐྱེད་པའོ། །དེ་བཞིན་གཤེགས་པ་ཐམས་ཅད་ཀྱི་སེང་གེའི་གདན་ལ་ཞེས་བྱ་པ་ནི་དེ་བཞིན་གཤེགས་པ་ཐམས་ཅད་ཀྱི་སྔོན་གྱི་སྨོན་ལམ་གྱི་སྟོབས་ཀྱིས་བྱང་ཆུབ་སེམས་དཔའི་ལུས་སེང་གེར་གྱུར་པའི་གདན་དེ་ལའོ། །ཞལ་ཀུན་དུ་བསྟན་ནས་ཞེས་བྱ་བ་ནི་ཞལ་བཞི་པའོ། །བཞག་པར་གྱུར་ཏོ་ཞེས་བྱ་བ་ནི་སོ་སོར་གནས་པར་མཛད་པའོ། །ཞལ་ཀུན་དུ་བསྟན་པ་ཞེས་བྱ་བ་ཞལ་མཐའ་ཡས་པ་ཡིན་ནོ་ཞེ་ན་མ་ཡིན་ཏེ། རྩ་བའི་རྒྱུད་ལས་རྣམ་པར་སྣང་མཛད་ཞལ་བཞི་པར་བྲིའོ་ཞེས་གསུངས་པས། ཞལ་བཞི་པོ་འདི་དག་ནི། བྱང་ཆུབ་ཀྱི་སེམས་དང༌། སྦྱིན་པ་དང༌། ཤེས་རབ་དང༌། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ངོ་བོ་མི་བསྐྱོད་པ་ལ་སོགས་པར་སྟོན་པར་བྱེད་པ་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ། དེ་བཞིན་གཤེགས་པ་ཐམས་ཅད་དུ་བདག་ཉིད་ཀྱིས་བྱིན་གྱིས་བརླབས་ཏེ། བཅོམ་ལྡན་འདས་ཀྱི་ཕྱོགས་བཞིར་བཞུགས་སོ་ཞེས་བྱ་བར་སྦྱོར་རོ། །དེ་ནས་ཞེས་བྱ་བའི་སྒྲ་ནི་དེ་བཞིན་གཤེགས་པ་ཐམས་ཅད་ཀྱིས་བཞག་པར་གྱུར་བའི་རྗེས་ཐོགས་ལའོ། །སྔར་གྲུབ་པ་རྣམས་ཀྱི་ས་བཅོམ་ལྡན་འདས་བྱིན་གྱིས་བརླབས་ནས་སེང་གེའི་གདན་གང་ཡིན་པ་ལ་བཞག་པར་གྱུར་པ་དེས་ན་ཐུན་མོང་དུ་སེམས་ཅན་ཐམས་ཅད་ཀྱི་


DTG057_Page_0087
[མ་དཔེ་གཟིགས་ན་འདིར་གནོན།]

དོན་མཛད་པ་ཡིན་ལ། མི་བསྐྱོད་པ་ལ་སོགས་པ་ཡང་དེའི་བྱང་ཆུབ་ཀྱི་སེམས་ལ་སོགས་པའི་ངོ་བོ་ཉིད་ཡིན་པས་དེའི་ཡན་ལག་ཏུ་གྱུར་པ་ཉིད་ཡིན་ཏེ། དེ་མེད་པར་མི་འབྱུང་བས་དེ་རྣམས་ཀྱང་རང་ལ་བྱིན་གྱིས་བརླབ་པ་མཛད་ནས་བཞུགས་སོ། །གལ་ཏེ་དེ་རྣམས་དེའི་ངོ་བོ་ཉིད་ཡིན་ན་དེ་རྣམས་ཀྱི་བྱིན་གྱིས་བརླབ་པ་ཡང་རྣམ་པར་སྣང་མཛད་ཉིད་ཀྱིས་མཛད་པ་ཡིན་ནོ་ཞེ་ན་མ་ཡིན་ཏེ། བྱིན་གྱིས་བརླབ་པ་ཉིད་ཀྱང་དེ་རྣམས་ཀྱིས་བྱས་པ་ཡིན་པའི་ཕྱིར་རོ། །དེ་ལྟ་བས་ན་དེ་རྣམས་རང་ཉིད་ཀྱིས་མཛད་པ་ཡིན་ནོ་ཞེ་ན་སློབ་དཔོན་གྱིས་བྱིན་གྱིས་བརླབས་སུ་ཟིན་ཀྱང་ཉིན་རེ་ཞིང་རང་ལ་བྱིན་གྱིས་བརླབས་པ་ལ་སོགས་པ་བྱས་ནས་བཟླས་པ་དང་བསྒོམ་པར་བྱའོ་ཞེས་བསྟན་པའི་དོན་ཉིད་ཡིན་ནོ། །མི་བསྐྱོད་པ་ཞེས་བྱ་བ་ནི་གཟུང་བ་དང་འཛིན་པའི་རྣམ་པར་རྟོག་པས་མི་བསྐྱོད་པས་ན་མི་བསྐྱོད་པ་སྟེ། བྱང་ཆུབ་ཀྱི་སེམས་ཀྱི་མཚན་ཉིད་ཀྱི་རང་བཞིན་ནོ། །འདི་ཡོད་ན་བྱང་ཆུབ་ཀྱི་ཡན་ལག་བདུན་དང༌། སྟོབས་དང་མི་འཇིགས་པ་ལ་སོགས་པའི་རིན་པོ་ཆེ་རྣམས་དང༌། རིན་པོ་ཆེའི་རིགས་འབྱུང་བས་ན་རིན་ཆེན་འབྱུང་བ་སྟེ། སྦྱིན་པའི་ཕ་རོལ་ཏུ་ཕྱིན་པའི་མཚན་ཉིད་ཅན་ནོ། །འཇིག་རྟེན་ནི་འཁོར་བའོ། །དབང་ཕྱུག་ནི་དབང་མཛད་པས་ན་འཇིག་རྟེན་དབང་ཕྱུག་སྟེ། གཟུགས་ཐམས་ཅད་ཡང་དག་པར་སྟོན་པས་སེམས་ཅན་ཐམས་ཅད་ཀྱི་དོན་མཛད་པའི་ཕྱིར་རོ། །དེ་ཉིད་ཀྱི་རྒྱལ་པོར་གྱུར་ཅིང༌། གཟི་བརྗིད་འབར་བས་ན་འཇིག་རྟེན་དབང་ཕྱུག་གི་རྒྱལ་པོའོ། །ཡང་ན་འཇིག་རྟེན་དབང་པོའི་རྒྱལ་པོ་སྟེ། འཕགས་པ་སྤྱན་རས་གཟིགས་དབང་ཕྱུག་གི་རྒྱལ་པོའོ། །དེའི་དབུ་ལ་བཞུགས་པས་འཇིག་རྟེན་དབང་པོའི་རྒྱལ་པོ་ནི་བཅོམ་ལྡན་འདས་འོད་དཔག་ཏུ་མེད་པ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད་དོ། །གདོན་མི་ཟ་བ་ནི་དོན་ཡོད་པ་སྟེ། དོན་ཡོད་པ་ཉིད་གྲུབ་པས་ན་གདོན་མི་ཟ་བ་གྲུབ་པ་སྟེ། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད་དོ། །མ་འོངས་པའི་དུས་ན་ཤཱཀྱའི་རིགས་སུ་སྐྱེ་བ་ཡོངས་སུ་བཟུང་ནས་འདི་ལྟར་བྱའོ་


DTG057_Page_0088
[མ་དཔེ་གཟིགས་ན་འདིར་གནོན།]

ཞེས་ཐུགས་དམ་བཅས་པས་ན་ཤཱཀྱ་ཐུབ་པ་ཞེས་སྨོས་སོ། །ཐམས་ཅད་མཉམ་པ་ཉིད་དུ་རྟོགས་པར་བྱ་བའི་ཕྱིར་ཞེས་བྱ་བ་ནི། བྱང་ཆུབ་ཀྱི་སེམས་ལ་སོགས་པ་ཐམས་ཅད་མཉམ་པ་ཉིད་དེ་གཉིས་སུ་མེད་པའི་རང་བཞིན་ནོ། །དེ་རབ་ཏུ་རྟོགས་པ་ནི་ཁོང་དུ་ཆུད་པ་སྟེ་དེ་ཁོ་ན་ཉིད་དེ་ལྟ་བུ་ཤིན་ཏུ་རྟོགས་པ་ཉིད་ཀྱིས་ན་རབ་ཏུ་རྟོགས་པའི་ཕྱིར་རོ། །ཕྱོགས་ཐམས་ཅད་མཉམ་པ་ཉིད་དུ་དམིགས་ནས་ཞེས་བྱ་བ་ནི་ཕྱོགས་ཀྱི་དབྱེ་བ་ནི་ཡང་དག་པ་མ་ཡིན་པའི་ཀུན་དུ་རྟོག་པ་ཙམ་ཉིད་དུ་ཟད་པའི་ཕྱིར་ཕྱོགས་ཐམས་ཅད་ནི་མཉམ་པ་ཉིད་ཡིན་ནོ། །དེ་བས་ན་སེམས་དཔའ་འབྱུང་བ་ཐམས་ཅད་དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་དེ་བདག་མེད་པའི་ཡེ་ཤེས་ནི་ཀུན་དུ་འགྲོ་བ་ཡིན་པ་དང་དེའི་འབྲས་བུ་ཡང་ཀུན་དུ་འགྲོ་བར་འགྱུར་བ་ཡིན་ནོ། །དེ་ལ་ཤར་ཕྱོགས་ཀྱི་ཆར་ནི་མི་བསྐྱོད་པ། ལྷོ་ཕྱོགས་སུ་ནི་རིན་ཆེན་འབྱུང་ལྡན། ནུབ་ཕྱོགས་སུ་ནི་འོད་དཔག་ཏུ་མེད་པ། བྱང་ཕྱོགས་སུ་ནི་དོན་ཡོད་གྲུབ་པ་བཞུགས་སོ། །དེ་ཡང༌། གདུག་པ་ཀུན་གྱི་དབང་ཕྱུག་རྒྱལ། །ཐུབ་པའི་སྐྱེས་བུ་མི་བསྐྱོད་པ། །སངས་རྒྱས་ཐམས་ཅད་སྲ་མཛད་པ། །ཤར་ཕྱོགས་སུ་ནི་ཡང་དག་བཞུགས། །དབང་བསྐུར་བ་ཡི་རྒྱལ་པོ་ཆེ། །ཐུབ་པའི་སྐྱེས་བུ་ནམ་མཁའ་འདི། །སངས་རྒྱས་ཐམས་ཅད་སྲ་མཛད་པ། །ལྷོ་ཕྱོགས་སུ་ནི་ཡང་དག་བཞུགས། །དགེ་བའི་ཆོས་ནི་འཛིན་པའི་རྒྱལ། །ཁྱབ་བདག་པདྨ་ཆེ་བསྣམས་པ། །སངས་རྒྱས་ཐམས་ཅད་སྲ་མཛད་པ། །ནུབ་ཕྱོགས་སུ་ནི་ཡང་དག་བཞུགས། །སངས་རྒྱས་མཛད་པ་འཛིན་པའི་རྒྱལ། །དོན་ཡོད་གྲུབ་པ་རྣམ་པར་རྒྱལ། །སངས་རྒྱས་ཐམས་ཅད་སྲ་མཛད་པ། །བྱང་ཕྱོགས་སུ་ནི་ཡང་དག་བཞུགས། །ཆོས་དབྱིངས་མཁྲེགས་པ་གང་ཡིན་པ། །གང་ཡང་གསང་བ་ཤིན་ཏུ་མཁྲེགས། །དེ་ཉིད་མགོན་པོ་རྣམ་སྣང་མཛད། སངས་རྒྱས་ཀུན་བདག་ཡིན་པར་བཤད། །ཅེས་གསུངས་པ་ཡིན་ནོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་སངས་རྒྱས་ཀྱི་ཞིང་འདི་ཞེས་བྱ་བ་ནས་བརྩམས་ཏེ་ཕྱོགས་བཞིར་


DTG057_Page_0089
[མ་དཔེ་གཟིགས་ན་འདིར་གནོན།]

བཞུགས་སོ་ཞེས་བྱ་བའི་བར་གྱི་གཞུང་གིས་ནི། དང་པོ་སྦྱོར་བའི་ཏིང་ངེ་འཛིན་སྟོན་ཅིང་རྣམ་པར་སྣང་མཛད་སྟོན་པར་བྱེད་པའི་གླེང་གཞིའི་མདོའི་འགྲེལ་པ་བཤད་པ་ཡིན་ནོ། །ད་ནི་དེ་ནས་བཅོམ་ལྡན་འདས་རྣམ་པར་སྣང་མཛད་ཅེས་བྱ་བ་ནས། དེ་བཞིན་གཤེགས་པ་ཐམས་ཅད་ཀྱི་ཐུགས་ལ་གནས་སོ་ཞེས་བྱ་བའི་བར་དུ་གང་གསུངས་པ་དེ་སྟོན་པར་བཞེད་པས། དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་སྨོས་པ་ཡིན་ཏེ། དེ་བཞིན་གཤེགས་པ་ཐམས་ཅད་ཀྱི་ཐུགས་ཀུན་དུ་བཟང་པོ་ཞེས་བྱ་བ་ལ་དེ་བཞིན་གཤེགས་པ་ཐམས་ཅད་ཀྱང་ཡིན་ལ། ཀུན་དུ་བཟང་པོ་ཡང་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་ཀུན་དུ་བཟང་པོ་སྟེ། བཅོམ་ལྡན་འདས་ཀྱི་བྱང་ཆུབ་ཀྱི་སེམས་ཀྱི་རང་བཞིན་རྡོ་རྗེ་སེམས་དཔའོ། །དེ་ཉིད་ནི་གང་གི་ཐུགས་ཡིན་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་ཀུན་དུ་བཟང་པོའི་ཐུགས་ཏེ། འདིས་ནི་སེམས་སོ་སོར་རྟོག་པའི་ཡེ་ཤེས་གསུངས་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་ནམ་མཁའ་དང་མཉམ་པའི་ཡེ་ཤེས་ལས་བྱུང་བའི་ནོར་བུ་རིན་པོ་ཆེ་ཆེན་པོ་ནི་རིན་པོ་ཆེའི་ཅོད་པན་ཏེ། དེའི་དབང་གིས་དབང་བསྐུར་བའོ། །དེ་བཞིན་གཤེགས་པ་ཐམས་ཅད་ཀྱི་ཀུན་དུ་སྤྱན་རས་གཟིགས་ཀྱི་དབང་པོ་ཞེས་བྱ་བ་ནི་འོད་དཔག་ཏུ་མེད་པའི་ཆོས་རྣམས་དང༌། རྣམ་པར་སྣང་མཛད་ལ་སོགས་པ་སྟོན་པའི་དཀྱིལ་ཁོར་དུ་འཇུག་པ་ལ་སོགས་པ་ལ་དེས་པ་ནི་ཡེ་ཤེས་སོ། །དེའི་མཐར་ཐུག་པ་བརྙེས་པ་ནི་ཕ་རོལ་ཏུ་ཕྱིན་པ་བརྙེས་པའོ། །དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་སྣ་ཚོགས་པའི་ངོ་བོ་ཉིད་ནི་ཕྲིན་ལས་ཐམས་ཅད་ཉིད་དེ། འདོད་པའི་ཁམས་སུ་དཀྱིལ་འཁོར་ལ་སོགས་པ་སྦྲུལ་ཞིང་བྲིས་པས་སེམས་ཅན་གྱི་དོན་བྱེད་ཅིང་དགའ་ལྡན་ལ་སོགས་པར་རྣམ་པར་འཕྲུལ་པ་སྟོན་པ་ནི་སྤྲུལ་བའི་སྐུ་ཡིན་ནོ་ཞེས་བྱ་བ་བསྟན་པས་དེས་གདོན་མི་ཟ་བའི་དོན་ཡོད་པ་ཉིད་དང༌། ཐོགས་པ་མེད་པར་སྟོན་པ་ཡིན་པར་ཤེས་པ་གང་ཡིན་པ་དེ་ལ་དེ་སྐད་ཅེས་བྱའོ། །གང་གི་ཕྱིར་དེ་ལྟར་སྔར་བཤད་པའི་ཚུལ་གྱིས་བཅོམ་ལྡན་དས་རྣམ་


DTG057_Page_0090
[མ་དཔེ་གཟིགས་ན་འདིར་གནོན།]

པར་སྣང་མཛད་འདི་ཡེ་ཤེས་བཞིའི་བདག་ཉིད་ཅན་ཡིན་པ་དེས་ན། དགོངས་པ་ཡོངས་སུ་རྫོགས་པ་ཡིན་ལ་དུས་ཡུན་རིང་པོར་མངོན་པར་བཞེད་པའི་སེམས་ཅན་གྱི་དོན་ཡོངས་སུ་རྫོགས་པར་མཛད་པར་སྤྱོད་པའི་ཕྱིར་རོ། །ཡིད་ལ་རེ་བ་ཡོངས་སུ་རྫོགས་ནས་ཅི་ཞིག་མཛད་པར་འགྱུར་ཞེ་ན། དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་སྙིང་པོ་འདིར་རང་གི་ཐུགས་ཀ་ནས་ཕྱུང་ངོ་ཞེས་བྱ་བར་སྦྱོར་རོ། །ཅི་ཞིག་མཛད་ཅེ་ན། དེ་བཞིན་གཤེགས་པ་ཐམས་ཅད་དུ་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཡང་ཡིན་ལ་ཐམས་ཅད་ཀྱང་ཡིན་པས་ན། དེ་བཞིན་གཤེགས་པ་ཐམས་ཅད་དོ། །དེ་བཞིན་གཤེགས་པ་ཐམས་ཅད་ཀྱི་ངོ་བོ་ཉིད་ཡིན་པས་དེ་བཞིན་གཤེགས་པ་ཐམས་ཅད་ཉིད་དུའོ། །རང་ཉིད་ཅེས་བྱ་བ་ནི་བདག་ཉིད་དོ། །བདག་ཉིད་ཀྱིས་ཞེས་བྱ་བདག་ཉིད་དོ། །བདག་ཉིད་ཀྱིས་ཞེས་བྱ་བ་རང་ཉིད་ཀྱི་རྒྱུད་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་རྣམ་པར་སྣང་མཛད་དང༌། མི་བསྐྱོད་པ་ལ་སོགས་པའི་དེ་བཞིན་གཤེགས་པ་རྣམས་དང༌། ཐ་མི་དང་པར་བདག་ཉིད་ཀྱིས་མཛད་དོ་ཞེས་བྱ་བའི་ཐ་ཚིག་གོ །དེ་བཞིན་གཤེགས་པ་ཞེས་བྱ་བ་ལ་སོགས་པ་ལ། དེ་བཞིན་གཤེགས་པ་ཐམས་ཅད་ཀྱི་ཀུན་དུ་བཟང་པོ་ཡིན་པས། དེ་བཞིན་གཤེགས་པ་ཐམས་ཅད་ཀྱི་ཀུན་དུ་བཟང་པོ་ཞེས་བྱ་བ་འམ། དེ་བཞིན་གཤེགས་པ་ཐམས་ཅད་ཀྱང་ཡིན་ལ། ཀུན་དུ་བཟང་པོ་ཡང་ཡིན་པས་དེ་སྐད་ཅེས་བྱའོ། །དེ་ཉིད་ནི་བྱང་ཆུབ་ཆེན་པོའི་རང་བཞིན་ཡིན་པས། བྱང་ཆུབ་སེམས་དཔའ་ཆེན་པོ་སྟེ། དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ན་སེམས་དཔའི་རྡོ་རྗེའི་ཚུལ་གྱིས་བཞུགས་སོ་ཞེས་བྱ་བའི་ཐ་ཚིག་གོ །དེའི་དམ་ཚིག་ནི་ཀུན་རྫོབ་ཏུ་ཟླ་བའི་དཀྱིལ་འཁོར་ལ་སོགས་པའི་ཚུལ་ལོ། །དེ་ལས་བྱུང་བ་ནི་སེམས་དཔའ་རྡོ་རྗེ་སྟེ་ཐུགས་ལས་བྱུང་ནས་སེམས་དཔའི་རྡོ་རྗེའི་རྣམ་པར་གྱུར་པའོ། །དེའི་བྱིན་གྱི་རླབས་ནི་བརྟན་པར་བྱ་བའི་ཕྱིར་ཟླ་བའི་དཀྱིལ་འཁོར་ལ་སོགས་པ་སྤྲུལ་པའི་དོན་དུ་བརྟན་པར་བྱ་བའི་


DTG057_Page_0091
[མ་དཔེ་གཟིགས་ན་འདིར་གནོན།]

ཕྱིར་རྡོ་རྗེ་ལྟར་མི་ཕྱེད་པའི་ཏིང་ངེ་འཛིན་གང་ཡིན་པ་དེ་ལ་སྙོམས་པར་ཞུགས་ནས་ཟླ་བའི་དཀྱིལ་འཁོར་ལ་སོགས་པའི་གཟུགས་ཀྱི་རྡོ་རྗེ་སེམས་དཔའ་རྣམ་པར་འཕྲུལ་པ་ལྟ་བུ་ཐུགས་རྩེ་གཅིག་ཏུ་མཛད་དོ་ཞེས་བྱ་བའི་ཐ་ཚིག་གོ །དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ནས་དེ་ཅི་ཞིག་མཛད་ཅེ་ན། དེ་བཞིན་གཤེགས་པ་ཞེས་བྱ་བ་ལ་སོགས་པ་སྨོས་ཏེ། དེ་བཞིན་གཤེགས་པ་ཐམས་ཅད་ཀྱི་ཐེག་པ་ཆེན་པོ་ཡིན་པས་དེ་བཞིན་གཤེགས་པ་ཐམས་ཅད་ཀྱི་ཐེག་པ་ཆེན་པོའོ། །དེའི་མངོན་པར་རྟོགས་པ་ནི་ཐུགས་སུ་ཆུད་པ་ཡིན་ལ། དེའི་རྒྱུར་གྱུར་པ་བཛྲ་སཏྭ་ཞེས་བྱ་བའི་སྒྲའི་ཚུལ་ལ་ཡང་ཉེ་བར་གདགས་པས་ཐེག་པ་ཆེན་པོ་མངོན་པར་རྟོགས་པ་ཞེས་བྱ་བའི་སྒྲར་བཤད་དོ། །དེ་ཉིད་ནི་དེའི་དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ལ་སོགས་པས་སྟོན་ཏེ། དེ་བཞིན་གཤེགས་པ་ཐམས་ཅད་ཀྱི་མངོན་པར་རྟོགས་པ་ཞེས་བྱ་བའི་དེ་བཞིན་གཤེགས་པ་ཐམས་ཅད་ཀྱི་སྙིང་པོ་དེ་ཉིད་ཀྱི་ཐུགས་ཀ་ནས་ཕྱུང་སྟེ་ཞེས་བྱ་བ་སྟེ་སྟོན་པར་གྱུར་པའོ། །བཛྲ་སཏྭ་ཞེས་བྱ་བ་འདི་ཉིད་རྒྱུ་ལ་འབྲས་བུ་བཏགས་པའི་ཚུལ་གྱིས་སྒྲ་ལ་ཡང་སྙིང་པོ་ཞེས་བཤད་དོ། །བཅོམ་ལྡན་འདས་ཀུན་དུ་བཟང་པོ་དེ་ཉིད་ཅེས་བྱ་བ་ནི་གང་སྔར་བསྟན་པའི་རྡོ་རྗེ་སེམས་དཔའི་གཟུགས་སོ། །སེམས་ཅན་ཐམས་ཅད་ཀྱི་ཞེས་བྱ་བ་ལ་སོགས་པ་ལ་གང་ཕྱོགས་བཅུའི་སེམས་ཅན་ཐམས་ཅད་རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་རིགས་སུ་གྱུར་པ་ལ་མངོན་པར་དགའ་བ་དེ་རྣམས་ལ། རྡོ་རྗེ་སེམས་དཔའི་ཡེ་ཤེས་བསྐྱེད་པ་ནི་བྱང་ཆུབ་ཀྱི་སེམས་ཆེན་པོ་ཡང་དག་པར་སྦྱངས་པ་ཡིན་ཏེ། བྱང་ཆུབ་ཆེན་པོ་ལས་ཕྱིར་མི་ལྡོག་པར་དེ་རྣམས་ཀྱི་སེམས་མཛད་ནས། དེ་བཞིན་གཤེགས་པ་ཐམས་ཅད་ཀྱི་ཕྱོགས་ཕྱོགས་སུ་འཁོད་དོ་ཞེས་བྱ་བ་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་རྣམས་ན་ལྷའི་གནས་རྣམས་ཡོད་པ་ལ་གནས་པའོ། །དེ་བཞིན་གཤེགས་པ་


DTG057_Page_0092
[མ་དཔེ་གཟིགས་ན་འདིར་གནོན།]

ཐམས་ཅད་ཀྱི་ཡེ་ཤེས་ཀྱི་རྡོ་རྗེ་ཞེས་བྱ་བ་ནི། བྱང་ཆུབ་ཀྱི་སེམས་སྟོན་པར་བྱེད་པའི་རྡོ་རྗེ་རྩེ་ལྔ་པ་ནི་ཡེ་ཤེས་ཀྱི་རྡོ་རྗེའོ། །དེ་རྣམས་ཀྱང་བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་ཀར་ཞུགས་ཏེ། རྡོ་རྗེ་རྩེ་ལྔ་པའི་གཟུགས་སུ་གྱུར་ཏོ། །ཅིའི་ཕྱིར་ཞེ་ན། རྡོ་རྗེ་སེམས་དཔའ་ཞེས་བྱ་བ་ལ་སོགས་པ་སྨོས་ཏེ། རྡོ་རྗེ་སེམས་དཔའི་ཏིང་ངེ་འཛིན་ནི་རྡོ་རྗེ་སེམས་དཔའི་ཏིང་ངེ་འཛིན་ཏོ། །བཅོམ་ལྡན་སེམས་དཔའ་དེ་ཉིད་ནི། །ཐུགས་ཀར་རྡོ་རྗེ་བསྒོམ་པ་ཡིས། །རྡོ་རྗེ་སེམས་དཔའ་ཞེས་བཤད་དོ། །རྡོ་རྗེ་དེར་ནི་རབ་ཏུ་གནས། །ཞེས་ལུང་ལས་གསུངས་པ་ཡིན་ནོ། །དེ་ཉིད་ཤིན་ཏུ་བརྟན་པ་ཉིད་ནི་མང་པོའི་གཟུགས་སུ་གཅིག་ཏུ་གྱུར་པར་ཤིན་ཏུ་ཡང་ཡོངས་སུ་བསྒོམས་པ་ཉིད་ཀྱིས་རྡོ་རྗེ་གཅིག་གི་གཟུགས་སུ་གྱུར་པའོ། །དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་ཀྱིས་ཀྱང་གཅིག་ཏུ་འདྲེས་པར་གྱུར་པ་སྟེ། མི་ཕྱེད་པའོ། ཚད་ཇི་ཙམ་ཞེ་ན། ནམ་མཁའ་ཞེས་བྱ་བ་ལ་སོགས་པ་གསུངས་ཏེ། ནམ་མཁའི་དབྱིངས་ཐམས་ཅད་དུ་ཀུན་ནས་མཉམ་པར་འཇུག་པར་འགྲོ་བའི་རྡོ་རྗེའི་གཟུགས་ཀྱིས་ཁྱབ་པར་གྱུར་ཏོ་ཞེས་བྱ་བའི་བར་དུའོ། །གང་ལ་ནམ་མཁའི་དབྱིངས་ཐམས་ཅད་དང་མཉམ་པར་འཇུག་པའི་ཚད་ཡོད་པ་དེ་ནི། ནམ་མཁའི་དབྱིངས་ཐམས་ཅད་ཀྱི་ཚད་དང་མཉམ་པར་འཇུག་པའོ། །འོད་ཟེར་གྱི་ཕྲེང་བ་ཅན་ཞེས་བྱ་བ་ལ། འོད་ཟེར་རྣམས་ཀྱི་ཕྲེང་བ་ནི་འོད་ཟེར་གྱི་ཕྲེང་བ་སྟེ། དེ་འདི་ལ་ཡོད་པས་ན་འོད་ཟེར་གྱི་ཕྲེང་བ་ཅན་ནོ། །རྩེ་མོ་ལྔ་པ་ཞེས་བྱ་བ་ནི་རྩེ་མོ་ལྔ་པའོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་རང་བཞིན་ཞེས་བྱ་བ་ནི། དེའི་རྒྱུ་ཅན་ནམ་དེའི་རང་བཞིན་ནོ། །བྱུང་སྟེ་ཕྱག་གཉིས་སུ་གནས་སོ་ཞེས་བྱ་བ་ནི། བསྡུས་པའི་ཚུལ་གྱིས་ཚད་གཞལ་དུ་རུང་བར་གྱུར་ཏེ། རྣམ་པར་སྣང་མཛད་ཀྱི་ཐུགས་ཀ་ནས་ཕྱུང་ནས་རྣམ་པར་མཛད་ཀྱི་ཕྱག་གཉིས་སུ་གནས་སོ། །རྡོ་རྗེ་ལྟ་བུ་ཞེས་བྱ་བ་ལ་སོགས་པ་ལ། རྡོ་རྗེ་དེ་ལས་རྡོ་རྗེ་རྩེ་ལྔ་པ་ལྟ་བུ་ནི་རྡོ་རྗེ་རྩེ་ལྔ་པའི་གཟུགས་ཅན་གྱི་འོད་ཟེར་རྣམས་བྱུང་བར་གྱུར་པའོ། །དབྱིབས་ཇི་ལྟ་བུ་ཁ་དོག་ཇི་ལྟ་བུ་ཞེ་ན། གཟུགས་དང་ཞེས་བྱ་བ་


DTG057_Page_0093
[མ་དཔེ་གཟིགས་ན་འདིར་གནོན།]

ལ་སོགས་པ་གསུངས་ཏེ། གཟུགས་ནི་དབྱིབས་སོ། །སྣ་ཚོགས་ནི་དབྱིབས་མཛེས་པའོ། །ཁ་དོག་སྣ་ཚོགས་པ་ནི་སྔོན་པོ་ལ་སོགས་པ་སྟེ། དེ་ལར་གཟུགས་སྣ་ཚོགས་པ་དང་ཁ་དོག་སྣ་ཚོགས་པ་གང་ཡིན་པ་དེ་ལ་དེ་སྐད་ཅེས་བྱའོ། །འཇིག་རྟེན་གྱི་ཁམས་ཐམས་ཅད་དུ་སྣང་བས་ཁྱབ་པར་བྱེད་ཅེས་བྱ་བ་ནི་འཇིག་རྟེན་གྱི་ཁམས་ཐམས་ཅད་དུ་རང་གི་ངོ་བོ་ཡང་དག་པར་སྟོན་པའི་སྣང་བས་འཇིག་རྟེན་གྱི་ཁམས་ཐམས་ཅད་ཁྱབ་པར་སྤྲོས་པའི་སྣང་བ་གང་ལ་ཡོད་པ་དེ་ནི། འཇིག་རྟེན་གྱི་ཁམས་ཐམས་ཅད་སྣང་བས་ཁྱབ་པར་བྱེད་པའོ། །རྡོ་རྗེ་ལྟ་བུའི་འོད་ཟེར་དེ་དག་གི་རྩེ་མོ་ལས་ཞེས་བྱ་བ་ལ། འོད་ཟེར་རྣམས་ཀྱི་སྒོ་ནི་འོད་ཟེར་གྱི་རྩེ་མོ་སྟེ། དེ་རྣམས་ཀྱི་མཐའ་མའི་ཙེ་མོའི་ཆའོ། །དེ་རྣམས་ལས་འཇིག་རྟེན་གྱི་ཁམས་ཐམས་ཅད་རྡུལ་ཤིན་ཏུ་ཕྲ་མོ་སྙེད་ཀྱི་དེ་བཞིན་གཤེགས་པ་རྣམས་ཀྱི་སྐུ་བྱུང་སྟེ་ཞེས་བྱ་བ་ལ་དེ་བཞིན་གཤེགས་པའི་སྐུ་ནི་རྣམ་པར་སྣང་མཛད་ལ་སོགས་པའི་ཕྱག་རྒྱ་ཆེན་པོ་བྱུང་ཞིང་མཐོང་ནས། འཇིག་རྟེན་གྱི་ཁམས་རབ་འབྱམ་རྒྱ་མཚོའི་སྤྲིན་ཐམས་ཅད་དུ། བྱང་ཆུབ་ཏུ་སེམས་བསྐྱེད་པ་ལ་སོགས་པ་བསྟན་ནས་གཅིག་ཏུ་འདྲེས་པར་གྱུར་པ་ལས། བྱང་ཆུབ་སེམས་དཔའ་ཆེན་པོ་ཀུན་དུ་བཟང་པོའི་སྐུར་གྱུར་ཏེ། བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་ལ་གནས་ནས་ཆེད་དུ་བརྗོད་པ་འདིས་ཆེད་དུ་བརྗོད་དོ་ཞེས་བྱ་བ་དང་སྦྱར་རོ། །འཇིག་རྟེན་གྱི་ཁམས་ཇི་ལྟ་བུ་དག་ཏུ་ཞེ་ན། ཆོས་ཀྱི་དབྱིངས་ཞེས་བྱ་བ་ལ་སོགས་པ་གསུངས་ཏེ། ཕྱོགས་བཅུའི་ཆོས་ཐམས་ཅད་དོན་དམ་པར་དངོས་པོ་མེད་པའི་ཚུལ་གྱིས་མ་ལུས་བར་ཆོས་ཀྱི་དབྱིངས་ཡིན་པས་ཆོས་ཀྱི་དབྱིངས་ཐམས་ཅད་དེ། དེས་ཀུན་དུ་ཁྱབ་པ་ནི་དེ་ལྟར་འཇུག་པ་གང་ཡིན་པ་དེ་ལ་དེ་སྐད་ཅེས་བྱ་སྟེ། འཇིག་རྟེན་གྱི་ཁམས་རྒྱ་མཚོ་ཐམས་ཅད་དེ་དེ་རྣམས་དང༌། ནམ་མཁའི་ཁམས་ཀྱང་ཡིན་ལ། ཐམས་ཅད་ཀྱང་ཡིན་པས་ན། ནམ་མཁའི་ཁམས་ཐམས་ཅད་དེ། དེ་ཉིད་ནི་མཐས་གཏུགས་པ་སྟེ། ཡོངས་སུ་མཐར་ཐུག་པ་གང་ཡིན་པ་དེ་ནི་ནམ་མཁའི་ཁམས་ཐམས་ཅད་ཀྱི་མཐས་གཏུགས་


DTG057_Page_0094
[མ་དཔེ་གཟིགས་ན་འདིར་གནོན།]

པ་ཐམས་ཅད་དོ། །འཇིག་རྟེན་གྱི་ཁམས་རབ་འབྱམ་རྒྱ་མཚོའི་སྤྲིན་ཐམས་ཅད་དུ་ཞེས་བྱ་བ་ནི། དེ་ལ་འཇིག་རྟེན་གྱི་ཁམས་ཐམས་ཅད་ཀྱི་རབ་འབྱམ་ནི་རྒྱུན་རྣམས་སོ། །དེ་རྣམས་ཀྱིས་བསྡུས་པ་ཉིད་ནི་སྤྲིན་ནོ། །དེ་རྣམས་ཀྱིས་ཡང་དག་པར་བསྡུས་པ་ནི་རྒྱ་མཚོའོ།། འདིས་ནི་འཇིག་རྟེན་གྱི་ཁམས་རྣམས་མཐའ་ཡས་པ་ཉིད་དུ་སྟོན་ཏོ། །ཇི་ལྟར་ན་བྱང་ཆུབ་ཀྱི་སེམས་བསྐྱེད་པ་ལ་སོགས་པ་སེམས་ཅན་རྣམས་ལ་སྟོན་པར་མཛད་ཅེ་ན། དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་མ་ཉམ་པ་ཉིད་ཀྱི་ཡེ་ཤེས་ནི། །ཐབས་དང་ཤེས་རབ་གཉིས་སུ་མེད་པའི་ཚུལ་ཆོས་ཀྱི་དབྱིངས་སུ་རོ་གཅིག་བའི་ཡེ་ཤེས་སོ། །དེ་བཞིན་གཤེགས་པ་ཐམས་ཅད་ཀྱི་མངོན་པར་ཤེས་པ་ནི་དྲུག་སྟེ། ལྷའི་སྤྱན་དང༌། ལྷའི་སྙན་དང༌། གཞན་གྱི་སེམས་མཁྱེན་པ་དང༌། སྔོན་གྱི་གནས་རྗེས་སུ་དགོངས་པ་དང༌། རྫུ་འཕྲུལ་དང༌། ཟག་པ་ཟད་པའི་ཡེ་ཤེས་སོ། །དེ་བཞིན་གཤེགས་པ་ཐམས་ཅད་ཀྱི་མཉམ་པ་ཉིད་ཀྱི་ཡེ་ཤེས་དང་མངོན་པར་ཤེས་པ་འདི་དག་ཉིད་ནི། མངོན་པར་བྱང་ཆུབ་པ་སྟེ། འདི་དག་ཐུགས་སུ་ཆུད་པས་དེ་བཞིན་གཤེགས་པ་ཐམས་ཅད་ཀྱི། བྱང་ཆུབ་ཀྱི་སེམས་ཆེན་པོའི་རང་བཞིན་གྱི་ཐུགས་ནི་དཔལ་རྡོ་རྗེ་སེམས་དཔའོ། །དེ་བསྐྱེད་པ་ནི་སྒོམ་པ་ལ་མངོན་པར་དགའ་བའི་སེམས་ཅན་རྣམས་ལ། རྡོ་རྗེ་སེམས་དཔའི་ཕྱག་རྒྱ་ཆེན་པོ་མངོན་སུམ་དུ་བྱས་པའོ།། དེ་ཡང་རྡོ་རྗེ་སེམས་དཔའི་ཕྱག་རྒྱ་ཆེན་པོའི་དབང་དུ་མཛད་ནས་བྱང་ཆུབ་ཀྱི་སེམས་ཆེན་པོ་ཞེས་བཤད་པ་ཡིན་ནོ། །ཀུན་དུ་བཟང་པོའི་སྤྱོད་པ་སྣ་ཚོགས་པ་ནི་འཇིག་རྟེན་གསུམ་གྱི་ཚུལ་གྱིས་སེམས་ཅན་གྱི་དོན་མཛད་པ་སྟེ་གྲུབ་པའོ། །དེ་ཡང་ཇི་ལྟར་ན་བཅོམ་ལྡན་འདས་ཀུན་དུ་བཟང་པོའི་སྤྱོད་པ་ཡིན་ཞེ་ན། སྙིང་སྟོབས་རྡུལ་དང་མུན་པས་ཀྱང༌། །གང་ཕྱིར་སེམས་ཅན་དོན་འགྱུར་བས། དེས་ན་འདི་ནི་ཀུན་དུ་བཟང༌། །བྱང་ཆུབ་སྤྱོད་པའི་རྗེས་འདུག་པའོ། །ཞེས་གསུངས་པ་ཡིན་ནོ། །དེ་བཞིན་གཤེགས་


DTG057_Page_0095
[མ་དཔེ་གཟིགས་ན་འདིར་གནོན།]

།པ་ཐམས་ཅད་ཀྱི་རིགས་མཉེས་བར་མཛད་པ་དང་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱང་ཡིན་ལ། རིགས་ཀྱང་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་རིགས་སོ། །དེ་རྣམས་མཉེས་པར་མཛད་པ་ནི་དབང་དུ་མཛད་པའོ། བྱང་ཆུབ་ཀྱི་སྙིང་པོར་གཤེགས་པ་དང་བདུད་ཐམས་ཅད་བཏུལ་བ་ནི་འོག་མིན་གྱི་གནས་དང་མིའི་ཡུལ་དུའོ། །དེ་བཞིན་གཤེགས་པ་ཐམས་ཅད་ཀྱི་མཉམས་པ་ཉིད་ནི། སེམས་དང་སེམས་ལས་བྱུང་བ་རྣམས་ཀྱི་གཟུང་བ་དང་འཛིན་པ་པོ་དང་བྲལ་བ་ཉིད་དོ། །དེ་ཉིད་ནི་བྱང་ཆུབ་ཆེན་པོའོ། །དེའི་མངོན་པར་བྱང་ཆུབ་པ་ནི་མངོན་པར་བྱང་ཆུབ་པ་རྣམ་པ་ལྔའི་རིམ་གྱིས་འོག་མིན་དང་མིའི་ཡུལ་དུ་བརྙེས་པའོ། །དམ་པའི་ཆོས་ཀྱི་འཁོར་ལོ་བསྐོར་བ་ཞེས་བྱ་བ་ནི། དམ་པ་རྣམས་ཀྱི་ཆོས་ཡིན་པས་དམ་པ་རྣམས་ཀྱི་ཆོས་ཏེ། ལུང་དང་རྟོགས་པའི་བདག་ཉིད་ཅན་ནོ། །དེ་ཉིད་གདུལ་བྱའི་རྒྱུད་ལ་འཕོ་བའི་ཚུལ་གྱིས་ན་འཁོར་ལོའོ། །དེ་བསྐོར་བ་ནི་དཀྱིལ་འཁོར་ལ་སོགས་པའི་ཚུལ་གྱིས་སོ། །ཇི་སྲིད་ཀྱི་སྒྲས་ནི་ས་དང་ཕ་རོལ་ཏུ་ཕྱིན་པ་ལ་སོགས་པ་གཞན་དག་ཀྱང་བསྡུའོ། །སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་རྣམས་ཡོངས་སུ་སྐྱོབ་ཅིང་ཞེས་བྱ་བ་ནི། སེམས་ཅན་གྱི་ཁམས་ཐམས་ཅད་དང་ན་སོང་ལ་སོགས་པའི་སྡུག་བསྔལ་ལས་བཟློག་པ་ནི་ཀུན་ནས་ཡོངས་སུ་སྐྱོབ་པའོ། །ཐམས་ཅད་ལ་ཕན་པ་ནི་མ་འོངས་པའི་བདེ་བར་སྨིན་བའི་ལས་ལ་སྦྱར་བའོ། ཐམས་ཅད་བདེ་བ་ནི་ཚེ་འདི་ཉིད་ལ་མྱོང་བའི་ལུས་ཀྱི་བདེ་བའོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ནི་དཔལ་རྡོ་རྗེ་སེམས་དཔས་ངེས་པར་སྦྱར་བའོ། །དེ་བཞིན་གཤེགས་པ་ཐམས་ཅད་ཀྱི་མངོན་པར་ཤེས་པ་ནི་གནས་སྐབས་འདིར་དཔལ་རྡོ་རྗེ་སེམས་དཔའི་མངོན་པར་ཤེས་པ་ཉིད་ཡིན་ནོ། །དེ་ཉིད་ནི་དམ་པའི་དངོས་གྲུབ་བོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་དང༌། མངོན་པར་ཤེས་པ་དང༌། དམ་པའི་དངོས་གྲུབ་དེ་རྣམས་གྲུབ་པ་ལ་སོགས་པ་གང་ཡིན་པ་དང༌། དེ་བཞིན་གཤེགས་པ་ཐམས་ཅད་ཀྱི་རྫུ་


DTG057_Page_0096
[མ་དཔེ་གཟིགས་ན་འདིར་གནོན།]

འཕྲུལ་དང་ཆོ་འཕྲུལ་མཐའ་ཡས་པ་རྣམས་རབ་ཏུ་བསྟན་པས་ན་དེ་སྐད་ཅེས་བྱའོ། །སོགས་པའི་སྒྲས་ནི་རྡོ་རྗེ་རྒྱལ་པོ་ལ་སོགས་པའི་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་དང་མངོན་པར་ཤེས་པ་རྣམས་བསྡུའོ། །རྫུ་འཕྲུལ་ནི་ནམ་མཁའ་ལ་འགྲོ་བ་ལ་སོགས་པའོ། །ཆོ་འཕྲུལ་ནི་མཐུ་ཡང་དག་པར་སྟོན་པ་སྟེ། ལོང་པ་རྣམས་ཀྱིས་མིག་འཐོབ་བོ་ཞེས་བྱ་བ་ལ་སོགས་པའོ། །རྡོ་རྗེ་སེམས་དཔའི་ཏིང་ངེ་འཛིན་ནི་ཀུན་དུ་བཟང་པོ་ཡིན་པ་དང་ཞེས་བྱ་བ་ནི། འདི་ལས་ཀུན་ནས་བཟང་ཞིང་དགེ་བ་འདི་ལས་འཚེ་བ་མེད་པས་ནི་ཀུན་དུ་བཟང་པོའི་སྐུར་གྱུར་པ་སྟེ། དེ་བས་ན་ཀུན་དུ་བཟང་པོའོ། །དེ་ཉིད་ཀྱི་ངོ་བོ་ནི་ཀུན་དུ་བཟང་པོ་ཉིད་ཡིན་པའོ། །སུའི་ཞེ་ན་རྡོ་རྗེ་སེམས་དཔའི་ཏིང་ངེ་འཛིན་ནི་ཞེས་བྱ་བ་སྟེ། ཇི་སྐད་དུ་བཤད་པའི་བཞིན་གཤེགས་པ་ཐམས་ཅད་གཅིག་ཏུ་མཛད་པའི་བྱང་ཆུབ་སེམས་དཔའ་ཆེན་པོ་དུན་དུ་བཟང་པོའི་སྐུ་ནི་རྡོ་རྗེ་སེམས་དཔའི་སྐུ་སྟེ། དེ་ལྟ་བུའི་ཀུན་དུ་བཟང་པོ་གྲུབ་པ་དང་ཡིན་པ་དེ་ནི་རྡོ་རྗེ་སེམས་དཔའི་ཏིང་ངེ་འཛིན་ཏེ། དེ་གྲུབ་པར་བྱེད་པ་ལ་ཐུགས་རྩེ་གཅིག་པའོ། །ཤིན་ཏུ་བརྟན་པའི་ཕྱིར་ཞེས་བྱ་བ་ནི། སྒྱུ་མ་དང་འདྲ་ཞིང་མིག་ཡོར་ལྟ་བུར་སྣང་བའི་ཚུལ་གྱིས་སྟོང་པ་ཉིད་ཀྱིས་ཡོངས་སུ་བསྡུས་པའི་ཕྱིར་དང༌། དངོས་པོར་འཛིན་པས་བསྐྱོད་པར་མི་ནུས་པ་ནི་ཤིན་ཏུ་བརྟན་པ་སྟེ། དེའི་ངོ་བོ་ཉིད་ནི་ཤིན་ཏུ་བརྟན་པ་ཉིད་དོ། །དེ་ལྟར་ཤིན་ཏུ་བརྟན་ཞིང་དངོས་པོར་འཛིན་པ་དང་བྲལ་བ་དེའི་ཕྱིར། དེ་ལྟ་བུའི་ཏིང་ངེ་འཛིན་གང་ཡིན་པ་དེ་ནི་སངས་རྒྱས་ཀྱི་སྐུ་གཅིག་ཏུ་གྱུར་པ་ཀུན་དུ་བཟང་པོའི་སྐུ་གཅིག་པུའོ། །ཤིན་ཏུ་བརྟན་པ་དང་གཅིག་ཏུ་གྱུར་པ་ཉིད་ཀྱིས་གཅིག་ཏུ་གྱུར་པའོ། །བཅོམ་ལྡན་འདས་རྣམ་པར་སྣང་མཛད་ལས་གཞན་པ་དགའ་བ་ཉིད་དུ་བསྟན་པའི་ཕྱིར། བཅོམ་ལྡན་འདས་རྣམ་པར་སྣང་མཛད་ཀྱི་ཞེས་བྱ་བ་ལ་སོགས་པ་གསུངས་ཏེ། བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་ཀྱི་དབང་ཉིད་ཀྱིས་སོ། །དུ་མའི་ཚུལ་གྱིས་བཞུད་པ་དང་བྱོན་པར་སྟོན་པ་


DTG057_Page_0097
[མ་དཔེ་གཟིགས་ན་འདིར་གནོན།]

ནི་ཐུགས་ལ་ཞུགས་པ་ཡིན་ནོ། །གཞན་དག་གིས་ཀྱང་སེམས་དབང་དུ་བྱ་བར་འདོད་ན་འདི་ལྟ་བུར་བསྒོམ་པར་བྱའོ་ཞེས་སྟོན་ཏོ། །ཆད་དུ་བརྗོད་པ་ཞེས་བྱ་བ་ནི། ཆེད་ཀར་ཉེ་བར་བརྗོད་པས་ན་ཆེད་དུ་བརྗོད་པ་སྟེ། གཞན་གྱིས་མི་བསྐུལ་བས་རང་ས་བའི་ཡིད་ཀྱིས་བརྗོད་ཅིང་སྨྲས་པའོ། །ཨེ་མའོ་ཞེས་བྱ་བ་ནི་ངོ་མཚར་བའོ། །བདག་ཅེས་བྱ་བ་ནི་བདག་ཉིད་དོ། །རང་ཉི་བྱུང་བས་བ་རང་འབྱུང་སྟེ་སངས་རྒྱས་བཅོམ་ལྡན་འདས་སོ། །སེམས་དཔའ་བརྟན་ཞེས་བྱ་བ་ནི་མི་བྱེད་པའི་སེམས་དཔའོ། །གལ་ཏེ་ཁྱོད་སངས་རྒྱས་རྣམས་ཀྱི་ཀུན་དུ་བཟང་པོ་ཡིན་པ་ལ་ངོ་མཚར་ཅི་ཞིག་ཡོད་ཅེ་ན། དེ་ནི་བརྟན་ཕྱིར་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་ནི་རྒྱུ་གང་གིས་སོ། །བརྟན་པས་ལུས་མིན་ཀྱང་ཞེས་བྱ་བ་ནི། གཉིས་སུ་མེད་བའི་སེམས་ཀྱི་ངོ་བོ་ཉིད་ཡིན་དུ་ཟུན་ཀྱང༌། སེམས་དཔའི་ལུས་སུ་ཞེས་བྱ་བ་ནི། སེམས་དཔའི་སྐུའི་ངོ་བོ་ནི་སེམས་དཔའི་ལུས་ཉིད་དོ། །གྱུར་པ་ཡིན་ཞེས་བྱ་བ་ནི། ཐོབ་ཅིང་གྲུབ་པ་འདི་ནི་ངོ་མཚར་ཆེའོ། །འདི་སྐད་སྟོན་པ་ཡིན་ཏེ། བདག་ནི་གཉིས་སུ་མེད་པའི་ཡེ་ཤེས་ཀྱི་རང་བཞིན་གཟུགས་མེད་པ་ཡིན་ན། སྔོན་གྱི་འཕེན་པའི་ཤུགས་ཀྱི་མཐུས་གདུལ་བྱས་བདག་གཟུགས་ཀྱི་སྐུར་མཐོང་བ་ཡིན་ནོ། །དེ་ནས་བྱང་ཆུབ་སེམས་དཔའ་ཆེན་པོ་ཀུན་དུ་བཟང་པོའི་སྐུ་ཞེས་བྱ་བ་ནི་བཤད་མ་ཐག་པའོ། །བཅོམ་ལྡན་འདས་ཀྱི་ཐུགས་ཀ་ནས་ཞས་བྱ་བ་ནི། རྣམ་པར་སྣང་མཛད་ཀྱི་ཐུགས་ཀ་ནས་སོ། །དེ་བཞིན་གཤེགས་པ་ཐམས་ཅད་ཀྱི་སྤྱན་སྔ་ན་ཞེས་བྱ་བ་ནི། བཅོམ་ལྡན་འདས་མི་བསྐྱོད་པའི་མདུན་ནའོ། །བཀའ་ནོད་ཅིང་བཞུགས་པར་གྱུར་ཏོ་ཞེས་བྱ་བ་ནི། བདག་གིས་ཅི་ཞིག་བགྱི་ཞེས་བཀའ་ནོད་པར་གྱུར་པའོ། །བཅོམ་ལྡན་འདས་རྣམ་པར་སྣང་མཛད་ཀྱི་སྤྱན་ལྡན་རྣམ་པར་སྣང་མཛད་ལ་མངོན་པར་ཕྱོགས་ན་ནི། འདི་ཞལ་གཅིག་པ་དང་ཕྱག་གཉིས་པ་ཡིན་ཏེ། ཞལ་དུ་མའི་ཚིག་མེད་དོ། །གན་གྱང་ཞལ་དུ་མ་མངའ་བ་དེར་ནི་ཁྱད་པར་ཉིད་དུ་གསུང་བར་འགྱུར་རོ། །དེ་ནས་ཞེས་བྱ་བ་


DTG057_Page_0098
[མ་དཔེ་གཟིགས་ན་འདིར་གནོན།]

ལ་སོགས་པ་ལ། བཅོམ་ལྡན་འདས་ཏིང་ངེ་འཛིན་ལ་སྙོམས་པར་ཞུགས་པ་སྟེ། རྡོ་རྗེ་དེ་དེའི་ལག་ཏུ་བྱིན་ནོ་ཞེས་བྱ་བར་འགྱུར་རོ། །དེ་ནས་ཞེས་བྱ་བའི་སྒྲ་ནི། དེ་མ་ཐག་པ་སྟོན་པའི་ཚིག་སྟེ་གསོལ་བ་བཏབ་པའི་རྗེས་ཐོགས་ཉིད་ལའོ། །བཅོམ་ལྡན་འདས་ཞེས་བྱ་བ་ནི་རྣམ་པར་སྣང་མཛད་དོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ནི་བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་ན་གནས་པའི་རྡོ་རྗེ་རྩེ་ལྔ་པའི་རྣམ་པ་དེ་ཉིད། ཀུན་རྫོབ་ཀྱི་རང་བཞིན་ཡིན་པས་ན་དམ་ཚིག་རྡོ་རྗེའོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་རྒྱུ་མཐུན་པ་ལས་བྱུང་བ་ཉིད་ཀྱིས་ན་ཀུན་རྫོབ་ཀྱི་ཚུལ་གྱིས་རྡོ་རྗེ་དེ་ལ་དེ་སྐད་ཅེས་བྱ་སྟེ། དེ་ལ་དམིགས་པའི་ཏིང་ངེ་འཛིན་ལ་ཡང་མིང་དེ་སྐད་ཅེས་བཤད་དོ་ཞེས་བསྟན་པའི་ཕྱིར་རོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་དམ་ཚིག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཞེས་བྱ་བ་གསུངས་ཏེ། རྡོ་རྗེ་རྩེ་ལྔ་པ་སྦྱིན་པའི་རྣམ་པར་ཐུགས་རྩེ་གཅིག་ཏུ་མཛད་ཅིས་བྱ་བའི་ཐ་ཚིག་གོ །རྡོ་རྗེ་དེ་ཇི་ལྟ་བུ་ཞེ་ན། དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་ཚུལ་ཁྲིམས་ནི། ཇི་ལྟ་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པ། །ཞེས་བྱ་བ་ལ་སོགས་པ་ཕས་ཕམ་པ་བཅུ་བཞི་ལས་ལྡོག་པའི་མཚན་ཉིད་ཅན་ནོ། །དེ་བཞིན་གཤེགས་པ་དང༌། རྡོ་རྗེ་སེམས་དཔའ་ལ་སོགས་པའི་རྣམ་པར་སེམས་རྩེ་གཅིག་པ་ཉིད་ནི་དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་ཏོ། །སོ་སོར་རྟོག་པའི་ཡེ་ཤེས་ནི་ཤེས་རབ་བོ། །དེས་ལམ་གྱི་ཚུལ་གྱིས་ཉོན་མོངས་པ་ཐམས་ཅད་སྤངས་ཤིང༌། དེ་བཞིན་གཤེགས་པ་ཐམས་ཅད་ཀྱི་མཉམ་པ་ཉིད་མངོན་པར་བྱང་ཆུབ་པ་ནི་རྣམ་པར་གྲོལ་བའོ། །རྡོ་རྗེ་སེམས་དཔའ་ལ་སོགས་པའི་རིགས་ཐམས་ཅད་ཀྱི་དཀྱིལ་འཁོར་གྱི་ཡེ་ཤེས་ནི། རྣམ་པར་གྲོལ་བའི་ཡེ་ཤེས་མཐོང་བའོ། །དེ་ནས་དཀྱིལ་འཁོར་སྤྲུལ་པ་ནི་དམ་པའི་ཆོས་ཀྱི་འཁོར་ལོ་བསྐོར་བའོ། །རྫུ་འཕྲུལ་


DTG057_Page_0099
[མ་དཔེ་གཟིགས་ན་འདིར་གནོན།]

།དང་ཆོ་འཕྲལ་སྣ་ཚོགས་ཀྱིས་སེམས་ཅན་ཐམས་ཅད་རྣམ་པར་སྦྱོང་བ་ནི་སེམས་ཅན་གྱི་དོན་ནོ། །བཅོས་མའི་ཁྲོ་བོ་ཡང་དག་པར་སྟོན་པ་ནི་ཐབས་ཆེན་པོ་སྟེ། ཐབས་ཆེན་པོའི་ཡེ་ཤེས་ཀྱི་དམ་ཚིག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་བར་ཞུགས་སོ་ཞེས་བསྟན་པའི་ཕྱིར་རོ། །དེ་ཉིད་གདུག་པ་ཐམས་ཅད་ཚར་གཅོད་པར་སྦྱོར་པས་སྟོབས་སོ། །རྟ་མཆོག་ལ་སོགས་པའི་གཟུགས་ཅན་དུ་གྱུར་པས་བརྩོན་འགྲུས་སོ། །ཚིག་རེ་རེར་ཐམས་ཅད་བདག་ཡིན་པར་བྱ་བའི་ཡེ་ཤེས་ཆེན་པོའོ། །དེ་ལྟར་ན་དེ་བཞིན་གཤེགས་པ་ཐམས་ཅད་ཀྱི་ཚུལ་ཁྲིམས་དང༌། ཏིང་ངེ་འཛིན་དང༌། ཤེས་རབ་དང༌། རྣམ་པར་གྲོལ་བ་དང༌། རྣམ་པར་གྲོལ་བའི་ཡེ་ཤེས་མཐོང་བ་དང༌། ཆོས་ཀྱི་འཁོར་ལོ་བསྐོར་བ་དང༌། སེམས་ཅན་གྱི་དོན་བྱ་བ་དང༌། ཐབས་ཆེན་པོ་དང༌། སྟོབས་ཆེན་པོ་དང༌། བརྩོན་འགྲུས་དང༌། ཡེ་ཤེས་ཆེན་པོ་སྟེ། དེ་རྣམས་བསྐྱེད་པའི་རྒྱུར་གྱུར་པས་ན། རྡོ་རྗེ་ནི་དམ་ཚིག་གོ །དེ་ཅིའི་ཕྱིར་ཞེས་ན། སེམས་ཅད་ཀྱི་ཁམས་ཞེས་བྱ་བ་ལ་སོགས་པ་གསུངས་ཏེ། སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་རྣམས་ཡོངས་སུ་བསྐྱབ་པ་དང༌། ཐམས་ཅད་ཀྱི་དབང་པོར་བྱ་བ་ནི་འཇིག་རྟེན་དང་འཇིག་རྟེན་ལས་འདས་པའོ། །དེ་ཡང་བདེ་བ་ཐམས་ཅད་ནི་འཇིག་རྟེན་དང་འཇིག་རྟེན་ལས་འདས་པ་རྣམས་སོ། །ཡིད་བདེ་བ་ཐམས་ཅད་ནི་དགའ་བ་སྟེ་དེ་དག་ཀྱང་དེ་བཞིན་ནོ། །དེ་རྗེས་སུ་མྱོང་བར་བྱ་བ་ནི་མངོན་སུམ་དུ་བྱ་བ་སྟེ། དེའི་དོན་དུ་རྗེས་སུ་སྦྱིན་ནོ། །ཇི་སྲིད་ཅེས་བྱ་བའི་སྒྲས་ནི་ས་དང་ཕ་རོལ་ཏུ་ཕྱིན་པ་ལ་སོགས་པ་གཞན་རྣམས་ཀྱང་བསྡུའོ། །དེ་བཞིན་གཤེགས་པ་ཐམས་ཅད་ཀྱི་མཉམ་པ་ཉིད་ནི་མི་བསྐྱོད་པ་ལ་སོགས་པའི་ཐུགས་ཏེ། དེའི་ཡེ་ཤེས་ནི་མངོན་པར་རྟོགས་པའོ། །མངོན་པར་ཤེས་པ་ནི་ཇི་སྐད་དུ་བཤད་པའི་མངོན་པར་ཤེས་པ་དྲུག་ཉིད་དོ། །ཡ་ཤེས་དང་མངོན་པར་ཤེས་པ་དྲུག་ཉིད་ནི་བླ་ན་མེད་པའི་ཐེག་པ་ཆེན་པོའོ། །དེ་མངོན་པར་རྟོགས་པ་ནི་ཐུགས་སུ་ཆུད་པའོ། །དེ་ཉིད་ནི་གྲུབ་པའི་མཆོག་སྟེ། དངོས་གྲུབ་ཀྱི་


DTG057_Page_0100
[མ་དཔེ་གཟིགས་ན་འདིར་གནོན།]

མཆོག་གེ། །དེ་ཐོབ་པ་ནི་བསྙེས་པའོ། །དེ་ཉིད་ནི་འབྲས་བུ་སྟེ་དེ་དག་གི་རྒྱུའི་ཕྱིར་དེ་བཞིན་གཤེགས་པ་ཐམས་ཅད་ཀྱི་གྲུབ་པའི་རྡོ་རྗེ་བྱིན་པ་ནི་སྩལ་བའོ། །འདི་སྐད་སྟོན་ཏེ། ཇི་སྲིད་རྡོ་རྗེ་སེམས་དཔའི་ཡེ་ཤེས་དང་མངོན་པར་ཤེས་པ་ཐོག་པར་བྱ་བའི་ཕྱིར་དེའི་ལག་པར་བྱིན་ནོ། །བྱང་ཆུབ་སེམས་དཔའ་ཆེན་པོ་ཞེས་བྱ་བ་ལ་སོགས་པ་ལ། དེ་བཞིན་གཤེགས་པ་ཐམས་ཅད་ཀྱི་འཁོར་ལོ་ནི་རྡོ་རྗེ་དབྱིངས་ཀྱི་དུམ་བུར་གསུངས་པའི་དཀྱིལ་འཁོར་རྣམས་ཏེ། འཁོར་ལོ་ནི་དཀྱིལ་འཁོར་ཞས་གསུངས་པའི་ཕྱིར་རོ། །དེ་སྒྱུར་ངའི་དང་ཚུལ་འདི་ལ་མངའ་བ་སྟེ། སེམས་ཅན་ཐམས་ཅད་ཀྱི་རྒྱུད་ལ་སྤྲུལ་པ་དང་བྲི་བའི་ཆོགས་ཐུན་མོང་དུ་བྱ་བའི་ཕྱིར་དེའི་ངོ་བོ་ཉིད་ཡིན་པས་ན། དེ་བཞིན་གཤེགས་པ་ཐམས་ཅད་ཀྱི་འཁོར་ལོས་སྒྱུར་བ་ཉིད་དུའོ། །དེ་བཞིན་གཤགས་པ་ཐམས་ཅད་ཀྱི་འཁོར་ལོས་སྒྱུར་བ་ཉིད་དུ་བྱ་བ་དེས་ཀྱང་ཅི་ཞིག་མཛད་ཅེ་ན། སངས་རྒྱས་ཐམས་ཅད་ཀྱི་ཞེས་བྱ་བ་ལ་སོགས་པ་གསུངས་ཏེ། རྣམ་པར་སྣང་མཛད་དང༌། མི་བསྐྱོད་པ་དང༌། རིན་ཆེན་འབྱུང་ལྡན་དང༌། འོད་དཔག་ཏུ་མེད་པ་དང༌། དོན་ཡོད་གྲུབ་པའི་སྐུ་ནི་སངས་རྒྱས་ཐམས་ཅད་ཀྱི་སྐུའོ། །དེ་ཉིད་ནི་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པའི་རྒྱུར་གྱུར་པས་ན་རིན་པོ་ཆེའོ། །དེ་དང་ལྡན་པའི་དབུ་རྒྱན་ནི་སངས་རྒྱས་ཐམས་ཅད་ཀྱི་སྐུ་རིན་པོ་ཆེའི་དབུ་རྒྱན་ནོ། །དེས་དབང་བསྐུར་བ་ནི་དེ་ལྟ་བུའི་དབུ་རྒྱན། དེའི་དབུ་ལ་བཞག་ནས། དར་དཀར་པོ་ཞང་དུ་ཁྲུ་གང་ལ། དཀྱུས་ཁྲུ་ཉི་ཤུ་བ་བཅིངས་པའི་དབང་གིས་དབང་བསྐུར་ནས་རྡོ་རྗེ་དེ་དེའི་ལག་ཏུ་བྱིན་ནོ་ཞེས་བྱ་བ་ལ་གཡོན་པའི་རྡོ་རྗེ་ཁུ་ཚུར་དྲིལ་བུ་དང་བཅས་པ་ནི་གཡོན་པའི་རྡོ་རྗེ་སྟེ། དེ་ཁ་ནང་དུ་བསྟན་པར་གཡོན་པའི་རྐེད་པའི་ཕྱོགས་སུ་བ་དན་ཏེ་བཞག་པ་ནི་གཡོན་པའི་རྡོ་རྗེ་བསྒྱིངས་པའོ། །དེས་བཞུགས་ནས་ཕྱག་གཡས་པ་འདེགས་ཤིང་འཛིན་པར་མཛད་པས་ན་གསོར་བ་ཉིད་ཀྱིས་ཏེ་ངེས་རྡོ་རྗེ་དེ་ཞེས་བྱ་བ་གང་བཅོམ་ལྡན་འདས་རྣམ་པར་སྣང་མཛད་ཀྱིས་སྩལ་


DTG057_Page_0101
[མ་དཔེ་གཟིགས་ན་འདིར་གནོན།]

བ་གང་ཡིན་པ་དེ་ཐུགས་ཀར་བསྟོད་པའི་ཚུལ་གྱིས་ཞེས་བྱ་བ་རང་གི་ཐུགས་ཀའི་གནས་སུ་སོར་མོ་གསུམ་བསྒྲེང་བའི་གུང་མོ་ལ་རྡོ་རྗེ་དེ་ཁ་གྱེན་དུ་བལྟ་བར་འཇོག་བའི་ཚུལ་གྱིས་འཛིན་ཅིང་འཆང་ངོ༌། །འདི་ཞེས་བྱ་བ་ཐུགས་ལ་གཞག་པར་མཛད་ནས་འདི་སྐད་གསུངས་སོ། །སངས་རྒྱས་ཀུན་གྱི་ཞེས་བྱ་བ་ནི་རྣམ་པར་སྣང་མཛད་ལ་སོགས་པའོ། །གྲུབ་པའི་རྡོ་རྗེ་ཞེས་བྱ་བ་ནི་གྲུབ་པའི་ཕྱིར་དང་དངོས་གྲུབ་ཀྱི་རང་བཞིན་ཡིན་པས་སོ། །བླ་ན་མེད་པ་ཞེས་བྱ་བ་ནི། སྟོང་བ་ཉིད་ནི་རྡོ་རྗེར་བཤད། །ཅེས་གསུངས་པའི་ཕྱིར་རོ། །རིགས་ལྔའི་སྟོང་བ་ཉིད་ཀྱི་ཡེ་ཤེས་ཀྱི་ངོ་བོ་ཉིད་ཀྱིས་ནི་ཕུལ་དུ་བྱུང་བ་ཡིན་པས་སོ། །འདི་ཞེས་བྱ་བ་ནི་རྣམ་པར་སྣང་མཛད་ཀྱིས་སྩལ་བ་གང་ཡིན་པའོ། །བདག་སྟེ་ཞེས་བྱ་བ་ནི་རྡོ་རྗེ་གང་ཡིན་པ་དེ་ནི་བདག་ཡིན་པའོ། །བདག་གི་ལག་ཏུ་བྱིན་ཞེས་བྱ་བ་ནི། བདག་གི་རང་བཞིན་ཅན་གྱི་རྡོ་རྗེའི་གཟུགས་གང་ཡིན་པ་དེ་བདག་གི་ལག་ཏུ་བྱིན་པའོ། །དེ་ལྟ་ཡིན་པ་དེས་ན་བདག་རྡོ་རྗེ་ལ་ནི་རྡོ་རྗེ་གནས་ཞེས་བྱ་བའོ། །དེ་ལྟར་བཅོམ་ལྡན་འདས་ཀྱིས་དཔལ་རྡོ་རྗེ་སེམས་དཔའི་གདུལ་བྱ་རྣམས་བྱང་ཆུབ་ཀྱི་སེམས་རབ་ཏུ་གཞག་པའི་དོན་དུ། རྡོ་རྗེ་སེམས་དཔའ་བསྐུལ་བའི་ཕྱིར་ཏིང་ངེ་འཛིན་མངོན་དུ་མཛད་པ་དང༌། དེའི་ཆེད་དུ་བརྗོད་པའི་ཕྱིར་ཟླ་བའི་དཀྱིལ་འཁོར་དང༌། ཡེ་ཤེས་ཀྱི་རྡོ་རྗེ་དང༌། རྡོ་རྗེ་ཆེན་པོའི་འོད་ཟེར་གྱིས་དེ་བཞིན་གཤེགས་པ་རྣམས་དང༌། སེམས་ཅན་གྱི་དོན་དང༌། ཀུན་དུ་བཟང་པོ་དང༌། དེའི་ཆེད་དུ། བརྗོད་པ་དང༌། བཀའ་ནོད་པ་དང༌། དབང་བསྐུར་བ་དང༌། རྫོགས་པའི་ཆེད་དུ་བརྗོད་པས་བསྐྱེད་པ་དང༌། སྤྲོ་བ་དང༌། བསྡུ་བ་དང༌། གནས་པ་དང༌། བརྟན་པར་བསྒོམ་པ་གསུངས་པ་ཡིན་ནོ། །དེ་ལྟར་ཚུལ་འདིས་དཔལ་རྡོ་རྗེ་སེམས་དཔས་འདུལ་བའི་རང་བཞིན་ལ་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཀྱི་སེམས་སུ་གཞག་པ་ཡིན་ནོ། །རྡོ་རྗེ་རྒྱལ་པོས་འགུགས་པ་ཡིན་པས་ན། དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་ནས་བཅོམ་ལྡན་འདས་ཞེས་བྱ་བ་ནི་རྣམ་པར་སྣང་མཛད་དོ། །ཡང་ཞེས་བྱ་བའི་སྒྲ་ནི་གཞན་ཡང་ཞེས་བྱ་


DTG057_Page_0102
[མ་དཔེ་གཟིགས་ན་འདིར་གནོན།]

བའི་དོན་ཏོ། །བྱང་ཆུབ་སེམས་དཔའ་ཆེན་པོ་གདོན་མི་ཟ་བའི་རྒྱལ་པོ་ཞེས་བྱ་བ་ལ། གདོན་མི་ཟ་བ་ཡང་ཡིན་ལ་རྒྱལ་པོ་ཡང་ཡིན་པས་ན་གདོན་མི་ཟ་བའི་རྒྱལ་པོའོ། །དེ་ཉིད་ནི་བྱང་ཆུབ་སེམས་དཔའ་ཆེན་པོ་སྟེ་བྱང་ཆུབ་ཆེན་པོའི་མཚན་ཉིད་ཅན་གྱི་ཟླ་བའི་དཀྱིལ་འཁོར་གྱི་སྟེང་ན་རྡོ་རྗེ་རྩེ་ལྔ་པའི་གཟུགས་སུ་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ན་གནས་པར་གང་སྡར་བཤད་པའོ། །གདོན་མི་ཟ་བ་ནི་དོན་ཡོད་བའོ། །དེ་བཞིན་གཤེགས་པ་ཐམས་ཅད་སྤྱན་འདྲེན་པ་རྡོ་རྗེ་རྒྱལ་པོའི་གཟུགས་ཀྱིས་དེ་ཉིད་མཛེས་ཤིང་འབར་བའི་གདོན་མི་ཟ་བའི་རྒྱལ་པོའི། །དེའི་དམ་ཚིག་ནི་རྡོ་རྗེ་ལྕགས་ཀྱུ་ལ་སོགས་པའི་གཟུགས་ཐམས་ཅད་ཡང་དག་པར་སྟོན་པའོ། །གང་གི་ཕྱིར་དེ་ལས་བྱུང་བས་ན་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །འདི་སྐད་སྟོན་པ་ཡིན་ཏེ། རྡོ་རྗེ་ལྕགས་ཀྱུ་ལ་སོགས་པའི་གཟུགས་ཀྱི་རྣམ་པར་སྤྲུལ་བ་བསྐྱེད་པའི་རྣམ་པར་ཐུགས་རྩེ་གཅིག་ཏུ་མཛད་པའོ། །དེ་བཞིན་གཤེགས་པ་ཐམས་ཅད་སྤྱན་དྲང་བའི་དམ་ཚིག་ཅེས་བྱ་བ་ལ། རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་ཐམས་ཅད་སྤྱན་དྲང་བ་ནི་སྤྱན་འདྲེན་པའོ། །དེ་ཉིད་ནི་དམ་ཚིག་སྟེ་རྒྱུའོ། །མིང་དེ་སྐད་ཅེས་བྱ་བའི་དེ་བཞིན་གཤེགས་པ་ཐམས་ཅད་ཀྱི་སྙིང་པོར་གྱུར་པ་དེ་རང་གི་ཐུགས་ཀ་ནས་རང་ཉིད་ཀྱིས་ཕྱུང་བར་གྱུར་པ་ནི་བཛྲ་རཱ་ཛེ་ཞེས་བྱ་བའོ། །དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་ཞེས་བྱ་བ་ནི། དེ་བཞིན་གཤེགས་པ་ལྔའི་ཐུགས་ཀ་ནས་སོ། །ཕྱུང་མ་ཐག་པ་ཞེས་བྱ་བ་ནི་སྒྲའི་གཟུགས་སོ། །བཅོམ་ལྡན་འདས་ཕྱག་ན་རྡོ་རྗེ་དེ་ཉིད་ཅེས་བྱ་བ་ནི། གང་སྔར་ཟླ་བའི་དཀྱིལ་འཁོར་ལ་སོགས་པའི་གཟུགས་ཀྱིས་བྱུང་བ་དེ་ཉིད། དེ་ནི་རྡོ་རྗེ་ལྕགས་ཀྱུ་ལྟ་བུར་བྱུང་བར་གྱུར་ནས་ཕྱག།། གཉིས་སུ་གནས་སོ་ཞེས་བྱ་བར་སྦྱོར་རོ། །དེ་བཞིན་གཤེགས་པ་ཐམས་ཅད་ཀྱི་ལྕགས་ཀྱུ་ཆེན་པོ་སྟེ། ལྕགས་ཀྱུ་ཚད་མེད་པའི་གཟུགས་སུ་གྱུར་ཅིང་གྲུབ་པ་སྟེ། དེ་བཞིན་གཤེགས་པ་ལྔའི་ཐུགས་ཀ་ནས་བྱུང་ནས།


DTG057_Page_0103
[མ་དཔེ་གཟིགས་ན་འདིར་གནོན།]

བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་སུ་བཞུགས་ཏེ་སྔར་བཤད་པའི་ཉིད་ཀྱིས་གཅིག་ཏུ་འདྲེས་ནས། རྡོ་རྗེའི་རང་བཞིན་ཅན་གྱི་རྡོ་རྗེ་ལྕགས་ཀྱུ་ཆེན་པོའི་དབྱིབས་སུ་གྱུར་ཅིང་བྱུང་ནས། བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་ཀ་ནས་ཕྱུང་སྟེ། དེ་ཉིད་ཀྱི་ཕྱག་གཉིས་སུ་གནས་སོ། །དེ་ནས་ཞེས་བྱ་བ་ལ་སོགས་པ་ལ། དེ་བཞིན་གཤེགས་པ་ཐམས་ཅད་སྤྱན་དྲང་བ་ལ་སོགས་པ་བྱས་ནས་ཐུགས་ཀར་གནས་ཏེ། ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་ནས་ལྕགས་ཀྱུའི་དབྱིབས་ཆེན་པོ་དེ་ལས་ཞེས་བྱ་བ་ནི་རྣམ་པར་སྣང་མཛད་ཀྱི་ཕྱག་ན་གནས་པ་ནས་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་མོ་དང་མཉམ་པའི་དེ་བཞིན་གཤེགས་པའི་སྐུ་རྣམས་ཞེས་བྱ་བ་ནི་རྣམ་པར་སྣང་མཛད་དང༌། མི་བསྐྱོད་པ་དང༌། རིན་ཆེན་འབྱུང་ལྡན་དང༌། འོད་དཔག་ཏུ་མེད་པ་དང༌། དོན་ཡོད་གྲུབ་པའི་སྐུ་རྣམས་བྱུང་ཞིང་འཐོན་པར་གྱུར་པའོ། །དེས་ཅི་ཞིག་མཛད་ཅེ་ན། དེ་བཞིན་གཤེགས་པ་ཐམས་ཅད་སྤྱན་དྲང་བ་ལ་སོགས་པ་ཞེས་བྱ་བ་གསུངས་ཏེ། དེ་བཞིན་གཤེགས་པ་ཐམས་ཅད་སྤྱན་འདྲེན་པ་ནི་འདིའི་ལས་ཀྱི་གཙོ་བོ་ཡིན་པར་སྟོན་ལ་དེ་ལ་སོགས་པའི་སངས་རྒྱས་ཐམས་ཅད་ཀྱི་རྫུ་འཕྲུལ་དང་ཆོ་འཕྲུལ་གང་ཡིན་པ་དེ་ནི་དེ་བཞིན་གཤེགས་པ་ཐམས་ཅད་སྤྱན་དྲང་བ་ལ་སོགས་པ་སངས་རྒྱས་ཐམས་ཅད་ཀྱི་རྫུ་འཕྲུལ་དང་ཆོ་འཕྲུལ་རྣམས་སོ། །སོགས་པའི་སྒྲས་ནི་བྱང་ཆུབ་ཏུ་སེམས་བསྐྱེད་པ་ལ་སོགས་པ་བསྡུས་ཏེ། དེ་རྣམས་བྱས་ནས་སོ། །རྡོ་རྗེ་སེམས་དཔའི་ཏིང་ངེ་འཛིན་ནི་ཤིན་ཏུ་གདོན་མི་ཟ་བའི་རྒྱལ་པོ་ཞེས་བྱ་བ་ལ་ཤིན་ཏུ་གདོན་མི་ཟ་ཞིང་དོན་ཡོད་པའི་དེ་བཞིན་གཤེགས་པ་ཐམས་ཅད་སྤྱན་འདྲེན་པའི་རང་བཞིན། རྡོ་རྗེ་རྒྱལ་པོའི་གཟུགས་སུ་འདི་ལས་འགྱུར་བས་ན་ཤིན་ཏུ་གདོན་མི་ཟ་བའོ། །དེ་ཉིད་ཀྱིས་ནི་རྒྱལ་པོ་སྟེ། དེའི་ངོ་བོ་ཉིད་ཡིན་པས་ན་རྒྱལ་པོ་དེ་ཉིད་དོ། །དེ་ལྟར་ཤིན་ཏུ་གདོན་མི་ཟ་བའི་རྒྱལ་པོ་ཉིད་དོ། །གང་གི་ཡིན་ཞེ་ན། རྡོ་རྗེ་སེམས་དཔའི་ཏིང་ངེ་འཛིན་ནི་ཞེས་བྱ་བ་སྟེ། ལྔར་ནི་རྡོ་རྗེ་སེམས་དཔའི་ཏིང་ངེ་


DTG057_Page_0104
[མ་དཔེ་གཟིགས་ན་འདིར་གནོན།]

འཛིན་ཏོ། །རྒྱུ་དེ་ལས་དེ་བཞིན་གཤེགས་པའི་སྐུ་དེ་དག་ཐམས་ཅད་གཅིག་ཏུ་གྱུར་པ་ལས་རྡོ་རྗེ་རྒྱལ་པོའི་ལུས་གཅིག་ཏུ་གྱུར་རོ། །ཤིན་ཏུ་བརྟན་པའི་ཕྱིར་ཡང་རྡོ་རྗེ་སེམས་དཔའི་ཏིང་ངེ་འཛིན་ཡིན་ཏེ། གང་གི་རྡོ་རྗེའི་རང་བཞིན་ཁོང་སྟོང་མ་ཡིན་པའོ། །བྱང་ཆུབ་སེམས་དཔའ་ཆེན་པོ་གདོན་མི་ཟ་བའི་ལུས་སུ་གྱུར་ནས། བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་སུ་ཞུགས་ནས་དེ་ཉིད་དུ་གནས་ཏེ། ཆེད་དུ་བརྗོད་པ་འདི་ཆེད་དུ་བརྗོད་པར་གྱུར་ཏོ། །ཨེ་མའོ་རྡོ་རྗེ་ལས་བྱུང་བ། །ཞེས་བྱ་བ་ལ། ཨེ་མའོ་ཞེས་བྱ་བའི་སྒྲ་ནི་སྔ་མ་བཞིན་ནོ། །རྡོ་རྗེ་ལས་བྱུང་བའི་ལྕགས་ཀྱུ་ཞེས་བྱ་བ་ནི། དེ་བཞིན་གཤེགས་པ་ཐམས་ཅད་ཀྱི་སྐུ་ལས་བྱུང་བས་ན་དེའི་ཕྱིར་རྡོ་རྗེ་ལས་བྱུང་བའོ། །ཡན་ལག་གང་ལས་གཟུང་བ་སྟེ་འདྲེན་པའི་དོན་གྱིས་ནི་ལྕགས་ཀྱུ་སྟེ། འདི་ཡང་དེ་བཞིན་གཤེགས་པ་ཐམས་ཅད་སྤྱན་འདྲེན་པའི་ཚུལ་གྱིས་ན་ལྕགས་ཀྱུ་དང་འདྲ་བས་ལྕགས་ཀྱུ་ཞེས་སྨོས་པ་ཡིན་ནོ། །ངེས་པའི་རྒྱལ་པོ་བདག་ཅེས་བྱ་བ་སྨོས་པ་ནི། གདོན་མི་བ་བའི་རྒྱལ་པོ་ནི་བདག་ཡིན་པའོ། །འདིར་ཅི་ཞིག་ངོ་མཚར་ཆེ་ཞེ་ན། གང་གི་ཕྱིར་ཀུན་དུ་སངས་རྒྱས་ཁྱབ་ཅེས་བྱ་བ་ལ་སོགས་པ་གསུངས་ཏེ། གང་གི་ཕྱིར་ཏེ་གཏན་ཚིགས་གང་གིས་ན་སྐུ་དང་གསུང་དང་ཐུགས་རྡོ་རྗེ་བདག་མེད་པའི་ཡེ་ཤེས་ཀྱི་མཐུས་ནམ་མཁའི་དབྱིངས་ཐམས་ཅད་དུ་རྟག་ཏུ་བཞུགས་པའི་སངས་རྒྱས་བཅོམ་ལྡན་འདས་གང་ཡིན་པ་དེ་དངོས་གྲུབ་གྲུབ་པའི་ཕྱིར། ཀུན་ནས་སྤྱན་འདྲེན་ཅིང་ཐམས་ཅད་དུ་ཁྱབ་པ་ལས་འགུགས་པ་འདི་ནི་ངོ་མཚར་ཆེའོ། །འདི་སྐད་སྟོན་ཏེ། བདག་དང་དེ་རྣམས་ཐ་མི་དད་པས་ཐམས་ཅད་དུ་ཁྱབ་པ་ལྟ་བུ་ལས། དེ་བཞིན་གཤེགས་པ་ཐམས་ཅད་སྤྱན་འདྲེན་པ་ཡིན་ནོ་ཞེས་གདུལ་བྱ་རྣམས་ཀྱིས་དེ་ལྟར་མཐོང་གི །དེའི་རང་བཞིན་བདག་དང་ཐ་དད་པ་ནི་མ་ཡིན་ནོ། །དེ་ནས་བྱང་ཆུབ་སེམས་དཔའ་ཆེན་པོ་ཤིན་ཏུ་གདོན་མི་ཟ་བའི་རྒྱལ་པོའི་སྐུ་ཞེས་བྱ་བ་ནི་གང་གིས་བཤད་མ་ཐག་བའི་ཆེད་དུ་བརྗོད་པ་གསུངས་སོ། །བཅོམ་ལྡན་འདས་ཀྱི་ཐུགས་ཀ་ནས་ཕྱུང་སྟེ་ཞེས་བྱ་བ་ནི་རྣམ་པར་སྣད་མཛད་ཀྱི་ཐུགས་ཀ་ནས་སོ། །དེ་བཞིན་གཤེགས་པ་


DTG057_Page_0105
[མ་དཔེ་གཟིགས་ན་འདིར་གནོན།]

ཐམས་ཅད་ཀྱི་གཡས་ཕྱོགས་ཀྱི་ཟླ་བའི་དཀྱིལ་འཁོར་ལ་གནས་ནས་ཞེས་བྱ་བ་ནི། བཅོམ་ལྡན་འདས་མི་བསྐྱོད་པའི་གཡས་ལོགས་སུའོ། །ཡང་བཀའ་ནོད་ཅིང་བཞུགས་པར་གྱུར་ཏེ་ཞེས་བྱ་བ་ནི། ཀུན་དུ་བཟང་པོའི་ཚུལ་གྱིས་བཀའ་ནོད་པ་ནི་བྱང་ཆུབ་ཀྱི་སེམས་ཡོངས་སུ་རྫོགས་པར་བྱ་བའི་ཕྱིར་ཡིན་ལ། དེ་ནས་དེ་བཞིན་གཤེགས་པ་ཐམས་ཅད་སྤྱན་འདྲེན་པའི་ཕྱིར་ཡིན་པས་ཞེས་བྱ་བའི་སྒྲས་སྟོན་ཏོ། །དེ་ནས་ཞེས་བྱ་བ་ལ་སོགས་པ་ལ་དེ་བཞིན་གཤེགས་པ་ཐམས་ཅད་ཅེས་བྱ་བ་རྣམ་པར་སྣང་མཛད་ལ་སོགས་པ་སྤྱན་འདྲེན་པའི་ཕྱིར་དམ་ཚིག་སྟེ། རྡོ་རྗེ་ལྕགས་ཀྱུའི་སྐུ་ལ་དམིགས་པ་རྡོ་རྗེ་ལྟར་མི་ཕྱེད་པའི་ཏིང་ངེ་འཛིན་གང་ལ་མིང་དེ་སྐད་ཅེས་བྱ་བ་དེ་ལ་སྙོམས་པར་ཞུགས་ཏེ། རྡོ་རྗེ་ལྕགས་ཀྱུ་སྦྱིན་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་ཐ་ཚིག་གོ །དེས་ཅི་ཞིག་མཛད་ཅེ་ན། དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་སྤྱན་འདྲེན་པའི་དམ་ཚིག་རྡོ་རྗེ་ལྕགས་ཀྱུ་དེ་དེའི་ལག་པར་དེ་བཞིན་དུ་བྱིན་ནོ་ཞེས་བྱ་བར་སྦྱར་ཏེ། དེ་བཞིན་གཤེགས་པ་ཐམས་ཅད་སྤྱན་འདྲེན་པའི་དམ་ཚིག་ནི་རྒྱུའོ། །དེ་ཅིའི་ཕྱིར་ཞེ་ན། སེམས་ཅན་ཐམས་ཅད་ཀྱི་ཁམས་ཞེས་བྱ་བ་ལ་སོགས་པ་གསུངས་ཏེ། སེམས་ཅན་གྱི་ཁམས་མ་ལུས་ཤིང་ལུས་པ་མེད་པའི་སེམས་ཅན་གྱི་ཁམས་ཐམས་ཅད་དོ། །ཐམས་ཅད་འགུགས་པ་དང་ཞེས་བྱ་བ་ནི། །དེ་བཞིན་གཤེགས་པ་ཐམས་ཅད་སྤྱན་དྲངས་པས་བདེ་བ་དང་ཡིད་བདེ་བ་ཐམས་ཅད་མྱོང་བར་བྱ་བའི་ཕྱིར་རོ། །དེ་བཞིན་གཤེགས་པ་ཐམས་ཅད་འདུ་བའི་བྱིན་གྱི་རླབས་ནི་གཅིག་ཏུ་འདུས་པར་མཛད་པའོ། །དེ་ཉིད་ནི་དམ་པའི་དངོས་གྲུབ་སྟེ་དེའི་ཕྱིར་རོ། །བར་གྱི་ཞེས་བྱ་བའི་སྒྲས་ནི་ས་དང་ཕ་རོལ་ཏུ་ཕྱིན་པ་ལ་སོགས་པ་བསྡུའོ། །རྡོ་རྗེ་ལྕགས་ཀྱུ་དེ་རྣམས་བྱང་ཆུབ་སེམས་དཔའ་ཆེན་པོ་གདོན་མི་ཟ་བའི་རྒྱལ་པོ་དེའི་ཞེས་བྱ་བ་ནི་སྔར་གྲུབ་པའོ། །ལག་པར་དེ་བཞིན་དུ་བྱིན་ནོ་ཞེས་བྱ་བ་ནི། དེ་བཞིན་གཤེགས་པ་ལྔའི་རིན་པོ་ཆེའི་ཅོད་པན་དང༌། དར་དབྱངས་ཀྱི་དབང་གིས་དབང་བསྐུར་


DTG057_Page_0106
[མ་དཔེ་གཟིགས་ན་འདིར་གནོན།]

ནས། རྡོ་རྗེ་འགུགས་པ་ཞེས་བྱ་བ། རྡོ་རྗེ་ལྟར་མི་ཕྱེད་པའི་འགུགས་པས་སྤྱན་འདྲེན་པ་འདི་ལ་མངའ་བས་ན་རྡོ་རྗེ་འགུགས་པའོ། །སངས་རྒྱས་ཀུན་གྱི་ཞེས་བྱ་བ་ནི། དེ་བཞིན་གཤེགས་པ་ཐམས་ཅད་ཀྱིའོ། །རྡོ་རྗེའི་ཡེ་ཤེས་བྱ་བ་ནི་སྟོང་བ་ཉིད་ཀྱི་ཡེ་ཤེས་སོ།། དེ་ཉིད་ཀྱིས་ན་བླ་ན་མེད་པ་སྟེ་མཆོག་ཏུ་གྱུར་བའོ། །འདི་ཞེས་བྱ་བ་ནི་བཅོམ་ལྡན་འདས་ལས་རྙེད་པ་གང་ཡིན་པའོ། །ཅིའི་ཕྱིར་བླ་ན་མེད་པ་ཡིན་ཞེ་ན། སངས་རྒྱས་ཀུན་གྱི་དོན་གྲུབ་ཕྱིར། །ཀུན་ནས་སྤྱན་དྲངས་དམ་པའོ། །ཞེས་བྱ་བ་གསུངས་ཏ། གང་གི་ཕྱིར་སངས་རྒྱས་ཐམས་ཅད་ཀྱི་དོན་ནི་དེ་བཞིན་གཤེགས་པ་ཐམས་ཅད་སྤྱན་འདྲེན་པས་སེམས་ཅན་གྱི་དོན་གང་ཡིན་པ་དེ་གྲུབ་ཅིང་རྫོགས་པར་གྱུར་ཏེ། དེའི་ཕྱིར་ཀུན་ནས་ཏེ། ཕྱོགས་བཅུ་ནས་སྤྱན་འདྲེན་པ་ཡིན་ལ། དེ་ལྟར་ཀུན་ནས་སྤྱན་དྲངས་པ་ཉིད་ཀྱིས་ན་དམ་པའོ། བསྐྱེད་པ་དང༌། སྤྲོ་བ་དང༌། བསྡུ་བ་དང༌། གནས་པ་དང༌། བརྟན་པར་བསྒོམས་པ་ལ་སོགས་པ་ནི་ཐམས་ཅད་སྔ་མ་བཞིན་དུ་ཤེས་པར་བྱའོ། །དེ་ལྟར་རྡོ་རྗེ་རྒྱལ་པོས་དེ་བཞིན་གཤེགས་པ་ཐམས་ཅད་སྤྱན་དྲངས་ནས། དེ་རྣམས་རྡོ་རྗེ་ཆགས་པས་ཇི་ལྟར་རྗེས་སུ་མཉེས་པར་བྱ་བ་དེ་བསྟན་པ་ནི། དེ་ནས་ཞེས་བྱ་བ་ལ་སོགས་པ་ཡིན་ཏེ།དེ་ནས་ཞེས་བྱ་བ་ནི་དེ་མ་ཐག་པར་སྟོན་པའི་ཚིག་གོ །ཡང་ཞེས་བྱ་བ་ནི་རྡོ་རྗེ་རྒྱལ་པོ་ལ་ལྟོས་ནས་ཡང་གི་སྒྲ་སྨོས་པ་ཡིན་ནོ།།བྱང་ཆུབ་སེམས་དཔའ་ཆེན་པོ་བདུད། །ཅེས་བྱ་བ་ནི། །བྱང་ཆུབ་སེམས་དཔའ་ཆེན་པོ་ལ་རྒྱབ་ཀྱིས་ཕྱོགས་པའི་སེམས་ནི་ཆོས་བདག་མེད་པའི་ཆགས་པས་གསོད་པས་ན་བདུད་དོ། །བྱང་ཆུབ་སེམས་དཔའ་ཆེན་པོ་ཡང་ཡིན་ལ། བདུད་ཀྱང་ཡིན་པས་ན་བྱང་ཆུབ་སེམས་དཔའ་ཆེན་པོ་བདུད་དོ། །དེ་ཉིད་ནི་རྡོ་རྗེ་སེམས་དཔའ་ལྟ་བུའོ། །དེའི་དམ་ཚིག་ནི་མེ་ཏོག་གི་མཚོན་ཆ་ལ་སོགས་པའི་གཟུགས་སོ། །དེ་གང་ལས་བྱུང་བ་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །དེ་ལ་སྙོམས་པར་ཞུགས་པ་ནི་མེ་ཏོག་གི་མཚོན་ཆ་ལ་སོགས་པའི་གཟུགས་ཀྱི་རྣམ་པར་འཕྲུལ་བ་བསྐྱེད་པའི་རྣམ་པར་ཐུགས་རྩེ་གཅིག་ཏུ་


DTG057_Page_0107
[མ་དཔེ་གཟིགས་ན་འདིར་གནོན།]

མཛད་དོ་ཞེས་བྱ་བའི་ཐ་ཚིག་གོ །ཅི་ཞིག་མཛད་ཅེ་ན། དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། སྙིང་པོ་འདི་ཕྱུང་ངོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་མཉེས་པར་བྱེད་པ་ཞེས་པ་ནི་ཡང་དང་ཡང་དུ་མངོན་དུ་བྱེད་བའོ། །དེའི་དོན་གྱི་དམ་ཚིག་ནི་དེ་བཞིན་གཤེགས་པ་ཐམས་ཅད་མཉེས་པར་བྱེད་པའི་དམ་ཚིག་སྟེ་རྒྱུའོ། །གང་ལ་མིང་དེ་སྐད་ཅེས་བྱ་བའི་དེ་བཞིན་གཤེགས་པ་ཐམས་ཅད་ཀྱི་སྙིང་པོ་གང་ཡིན་པ་དེ་ལ་དེ་སྐད་ཅེས་བྱ་སྟེ། དེ་བཞིན་གཤེགས་པ་ཐམས་ཅད་ཀྱི་སྙིང་པོ་དེ་རང་གི་ཐུགས་ཀའི་ངེས་པའི་ཡེ་ཤེས་ལས་བྱུང་ངོ་ཞེས་པ། ཕྱུང་བར་གྱུར་པ་ནི་བཛྲ་རཱ་ག་ཞེས་བྱ་བ་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ་ཕྱག་གཉིས་སུ་གནས་སོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་ཐུགས་ལས་ཞེས་བྱ་བ་ནི། །དེ་བཞིན་གཤེགས་པ་ལྔའི་ཐུགས་ལས་སོ། བཅོམ་ལྡན་འདས་རྡོ་རྗེ་འཛིན་པ་ཉིད་དེ་ཞེས་བྱ་བ་ནི་སེམས་དཔའི་རྡོ་རྗེ་གཟུགས་གང་ཡིན་པ་སྔར་བཤད་པའི་རྡོ་རྗེ་ལྕགས་ཀྱུ་ལ་སོགས་པའི་གཟུགས་སུ་བྱུང་བ་གང་ཡིན་པ་དེ་ཉིད་དོ། །དེ་བཞིན་གཤེགས་པ་ཐམས་ཅད་ཀྱི་མེ་ཏོག་གི་མངར་གྱུར་ནས་ཞེས་བྱ་བ་ནི་མེ་ཏོག་གི་མདའ་དང་བཅས་པའི་གཞུའི་གཟུགས་སུ་གྱུར་ནས། ཕྱག་གཉིས་སུ་གནས་སོ་ཞེས་བྱ་བའི་བར་དུ་སང་མ་བཞིན་ནོ། དེ་ནས་ཞེས་བྱ་བ་ལ་སོགས་པ་ལ་བཅོམ་ལྡན་འདས་ཀྱི་ཐུགས་ལ་གནས་ནས་ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་རྗེས་སུ་མཉེས་པར་བྱ་བ་ལ་སོགས་པ་དང༌། སངས་རྒྱས་ཐམས་ཅད་ཀྱི་རྫུ་འཕྲུལ་དང་ཆོ་འཕྲུལ་རྣམས་བྱས་ནས་ཞེས་བྱ་བ་ནི། དེ་བཞིན་གཤེགས་པ་ཐམས་ཅད་རྗེས་སུ་མཉེས་པ་ནི་སྒོམ་པ་སྟེ། འདོད་ཆགས་དམ་ཚིག་ཅེས་བཤད་པ། །ཆོས་ཀྱི་འདོད་པ་ཡིན་དུ་འོང༌། །དེ་ཡི་ལ་མ་གྲུབ་རྣམ་འབྱོར་ནི། །རྗེས་སུ་ཆགས་པ་ཞེས་བཤད་དོ། །ཞེས་གསུངས་པ་ཡིན་ནོ། །དེ་ལ་སོགས་པ་གང་ཡིན་པ་དེ་ནི་དེ་བཞིན་གཤེགས་པ་ཐམས་ཅད་རྗེས་སུ་མཉེས་པར་བྱ་བ་ལ་སོགས་


DTG057_Page_0108
[མ་དཔེ་གཟིགས་ན་འདིར་གནོན།]

པ་སྟེ། སོགས་པའི་སྒྲས་ནི་རྡོ་རྗེ་སེམས་དཔའ་ལ་སོགས་པ་བསྡུའོ། །རྡོ་རྗེ་སེམས་དཔའི་ཏིང་ངེ་འཛིན་ནི་ཤིན་ཏུ་བདུད་བྱེད་པ་ཉིད་དང་ཞེས་བྱ་བ་ནི། རབ་ཏུ་བདུད་བྱེད་བས་ན་ཤིན་ཏུ་བདུད་བྱེད་པ་སྟེ། དའི་ངོ་བོ་ཉིད་ནི་ཤིན་ཏུ་བདུད་བྱེད་པ་ཉིད་དོ། །དེའི་ཕྱིར་ཤིན་ཏུ་བདུད་བྱེད་པ་ཉིད་ཀྱིས་ནི། །འདི་ནི་རྡོ་རྗེ་སེམས་དཔའི་ཏིང་ངེ་འཛིན་ཡིན་ཏེ། རྡོ་རྗེ་ཆགས་པ་ནི་བྱང་ཆུབ་སེམས་དཔའ་རྣམས་ཀྱི་ཉན་ཐོས་དང་རང་སངས་རྒྱས་ཀྱི་བློ་ཅན་སངས་རྒྱས་ཀྱི་བྱང་ཆུབ་སེམས་ཀྱི་ངོ་བོ་ཆོས་བདག་མེད་པའི་འདོད་ཆགས་ཀྱིས་ཤིན་ཏུ་གསོད་ཅིང་བར་དུ་གཅོད་བར་བྱེད་པས་ཤིན་ཏུ་བདུད་བྱེད་པ་ཉིད་དེ་དེ་རྫོགས་པར་བྱེད་པའི་སེམས་རྩེ་གཅིག་པ་ནི་ཤིན་ཏུ་བདུད་བྱེད་པའི་རྡོ་རྗེའི་ཏིང་ངེ་འཛིན་ཏོ། །དེ་བས་ན་རྡོ་རྗེ་སེམས་དཔའི་ཏིང་ངེ་འཛིན་གྱིས་ཤིན་ཏུ་བདུད་བྱེད་པ་ལས་ནི་དེ་དེ་བཞིན་གཤེགས་པའི་སྐུ་གཅིག་ཏུ་གྱུར་ནས། ཤེས་བ་བྱང་ཆུབ་སེམས་དཔའ་ཆེན་པོ་བདུད་ཀྱི་སྐུར་གྱུར་ནས་སོ། །ཤིན་ཏུ་བརྟན་པའི་ཕྱིར་ཞེས་བྱ་བ་ནི་སྔ་མ་བཞིན་ནོ། །གཅིག་ཏུ་འདྲེས་པར་གྱུར་བ་ནི་རྡོ་རྗེའི་རང་བཞིན་ཁོང་སྟོང་མ་ཡིན་པའོ། །བདུད་ཅེས་བྱ་བ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བསྒོམ་པའི་ལམ་གྱི་ཚུལ་གྱིས་གཟུང་བ་དང་འཛིན་པ་པོའི་རྣམ་པར་རྟོག་པ་གསོད་པས་ན་བདུད་ཅེས་བྱ་སྟེ། སངས་རྒྱས་ཐམས་ཅད་མཉེས་བྱེད་པ། །རྗེས་སུ་ཆགས་པ་ཞེས་བཤད་དོ། །རྡོ་རྗེ་འདོད་པ་འདོད་ཆགས་ཆེ། །རྡོ་རྗེ་ཆགས་པ་ཞེས་བཤད་དོ། །ཞེས་གསུངས་པའི་ཕྱིར་རོ། །ཨེ་མའོ་ཞེས་བྱ་བ་ལ་སོགས་པ་ལ། ཨེ་མའོ་ཞེས་བྱ་བ་ནི་ངོ་མཚར་ཏོ། །བདག་གི་རང་བཞིན་དག་ཅེས་བྱ་བ་ནི། རང་བཞིན་གྱིས་ཡང་དག་པའི་ལམ་བསྒོམ་པའི་ཚུལ་གྱིས་ཉོན་མོངས་པའི་དྲི་མ་ཐམས་ཅད་དང་བྲལ་བའི་ཕྱིར་དག་པ་སྟེ་རྗེས་སུ་ཆགས་པའི་སྒོམ་པའོ། །གང་གིས་སྒོམ་པ་ཡིན་ཞེ་ན། རང་བྱུང་བདག་ཅེས་བྱ་བ་གསུངས་ཏེ། སངས་རྒྱས་བཅོམ་ལྡན་འདས་ཀྱི་སྐུ་བསྒོམས་པས་ཞེས་བྱ་བའི་དོན་ཏོ། །འདིར་ཅི་ཞིག་ངོ་མཚར་ཆེ་ཞེ་ན། གང་གི་ཕྱིར། འདོད་ཆགས་བྲལ་རྣམས་དག་བྱའི་ཕྱིར། །ཞེས་གསུངས་ཏེ། འདོད་ཆགས་དང་བྲལ་བ་ནི་ཉོན་མོངས་པ་བག་ཆགས་


DTG057_Page_0109
[མ་དཔེ་གཟིགས་ན་འདིར་གནོན།]

དང་བཅས་པ་སྤངས་པས་ཁམས་གསུམ་ལ་རྒྱབ་ཀྱིས་ཕྱོགས་ཤིང་དེར་འདོད་ཆགས་དང་བྲལ་བའོ། །སངས་རྒྱས་བཅོམ་ལྡན་འདས་ནི་རྣམ་པར་རྟོག་པ་མི་མདའ་བས་དེ་རྣམས་ལ་འདོད་ཆགས་ཀྱིས་ཞེས་བྱ་བ། ཆས་ལ་བདག་མེད་བའི་འདོད་ཆགས་རྒྱུར་གྱུར་བས་སོ། །འདུལ་བར་བྱེད་ཅེས་བྱ་བ་སེམས་ཅན་གྱི་ཁམས་རྣམས་སངས་རྒྱས་ཀྱི་བྱང་ཆུབ་ལ་རབ་ཏུ་འཇོག་པར་བྱེད་པ་འདི་ནི་ངོ་མཚར་ཆེའོ། །གང་འདོད་ཆགས་དང་བྲལ་བ་ཇི་ལྟར་འདོད་ཆགས་ཅན་ཡིན། ཇི་ལྟར་འདོད་ཆགས་ཅན་འདོད་ཆགས་དང་བྲལ་བར་འགྱུར་ཞེས་བྱ་བ་ནི་མི་མཐུན་པའི་རྒྱན་ནོ། །བཅོམ་ལྡན་འདས་ཀྱི་ཐུགས་ཀ་ནས་ཕྱུང་སྟེ་ཞེས་བྱ་བ་ནི་རྣམ་པར་སྣང་མཛད་ཀྱིའོ། །དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ནི། མི་བསྐྱོད་པའི་གཡོན་ཕྱོགས་སུའོ། །ཡང་བཀའ་ནོད་ཅིང་བཞུགས་སོ་ཞེས་བྱ་བ་ནི། གདོན་མི་ཟ་བའི་རྒྱལ་བོའི་གཟུགས་ཀྱིས་ནི། དེ་བཞིན་གཤེགས་པ་རྣམས་སྤྱན་འདྲེན་པའི་ཕྱིར་བཀའ་ནོད་པ་ཡིན་ལ། དེ་ལྟ་ནི་དེའི་རྗེས་སུ་མཉེས་པར་བྱ་བའི་ཕྱིར་རོ་ཞེས་བྱ་བ་ནི། ཡང་གི་སྒྲའི་དོན་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ་བཅོམ་ལྡན་འདས་ཀྱིས་རྡོ་རྗེའི་མདའ་དེ་དེའི་ལག་ཏུ་བྱིན་ནོ་ཞེས་བྱ་བར་སྦྱར་རོ། །དེ་དེ་བཞིན་གཤེགས་པ་ཐམས་ཅད་མཉེས་པར་བྱ་བ་ནི་སྔ་མ་བཞིན་ནོ། དེའི་དོན་དུ་བྱིན་གྱིས་བརླབས་པ་ནི། དེའི་རྒྱུ་མདའི་གཟུགས་སུ་དེ་ལ་དམིགས་པ་རྡོ་རྗེ་ལྟར་མི་ཕྱེད་པའི་ཏིང་ངེ་འཛིན་གང་ལ་མིང་དེ་སྐད་ཅེས་བྱ་བ་དེ་ལ་སྙོམས་པར་ཞུགས་པ་ནི་མངོན་སུམ་དུ་མཛད་པ་སྟེ། རྡོ་རྗེ་མདའི་སྦྱིན་པའི་རྣམ་པར་ཐུགས་རྩེ་གཅིག་ཏུ་མཛད་དོ་ཞེས་བྱ་བའི་ཐ་ཚིག་གོ །དེ་བཞིན་གཤེགས་པ་ཐམས་ཅད་ཀྱི་བདུད་རྡོ་རྗེའི་དམ་ཚིག་ཅེས་བྱ་བ་ནི། དེ་བཞིན་གཤེགས་པ་ཐམས་ཅད་ཀྱི་གདུལ་བྱ་དམིགས་པ་ལ་སྤྱོད་པ་དེ་རྣམས་ཀྱི་ཉེ་བར་དམིགས་པ་ལས་ངེས་པར་ཟློག་པར་བྱེད་པ་ནི་གསོད་པ་ཡིན་ལ། དེའི་དོན་ནི་མི་ཕྱེད་པའི་དམ་ཚིག་གི་རྒྱུ་མདའི་གཟུགས་ནི་དེ་བཞིན་གཤེགས་པ་ཐམས་ཅད་ཀྱི་བདུད་ཀྱི་རྡོ་རྗེའི་དམ་ཚིག་གོ །དེ་


DTG057_Page_0110
[མ་དཔེ་གཟིགས་ན་འདིར་གནོན།]

ཅིའི་ཕྱིར་བརྩལ་ཞེ་ན། སེམས་ཅན་གྱི་ཁམས་ཞེས་བྱ་བ་ལ་སོགས་པ་གསུངས་ཏེ། སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་རྣམས་སངས་རྒྱས་ཀྱི་བྱང་ཆུབ་སྒོམ་པ་ནི་མགུ་བར་བྱ་བའོ། །དེས་བདེ་བ་དང་ཡིན་བདེ་བ་མྱོང་བར་བྱ་བའི་དོན་དུའོ། །དེ་བཞིན་གཤེགས་པ་ཐམས་ཅད་ཀྱི་བདུད་ཀྱི་ལས་ཡིན་བས་ནས་བདུད་ཀྱི་ལས་ཏེ། སངས་རྒྱས་ཀྱི་བྱང་ཆུབ་ལ་རྗེས་སུ་ཆགས་པའོ། །དེ་ཉིད་ནི་དངོས་གྲུབ་ཀྱི་མཆོག་སྟེ། དེ་ཐོབ་ཅིང་རེག་པར་བྱ་བ་དེ་དག་གི་རྒྱུའི་ཕྱིར་ཏེ། སེམས་ཅན་གྱི་ཁམས་རྣམས་ཀྱི་རྡོ་རྗེ་ཆགས་པའི་ཏིང་ངེ་འཛིན་ཐོབ་པའི་དོན་དུ་ཞེས་བྱ་བའི་ཐ་ཚིག་གོ །བར་དུ་ཞེས་བྱ་བའི་སྒྲས་ནི་རྡོ་རྗེ་སེམས་དཔའ་ལ་སོགས་པའི་ཡང་ཞེས་སྟོན་ཏོ། །རྡོ་རྗེའི་མདའ་དེས་དེ་བཞིན་གཤེགས་པ་ཐམས་ཅད་ལ་བདུད་བྱེད་ཅིང་ཞེས་བྱ་བ་ནི་བདག་ཉིད་དང་མཉམ་པར་བྱེད་ཅེས་བྱ་བའི་དོན་ཏོ། །འདི་ཞེས་བྱ་བ་ནི་གང་བཅོམ་ལྡན་འདས་ཀྱིས་སྩལ་པ་གང་ཡིན་པའོ། །འདི་ཅི་ཞིག་ཡིན་ཞེ་ན། སངས་རྒྱས་ཀུན་གྱི་འདོད་ཆགས་ཀྱི་ཡེ་ཤེས་ཞེས་བྱ་བ་སྟེ། བྱང་ཆུབ་ཀྱི་སེམས་སུ་ངེས་པ་ནི་འདོད་ཆགས་ཀྱི་ཡེ་ཤེས་སོ། །དྲི་མ་མེད་ཅེས་བྱ་བ་ནི་ངེས་པའི་ཚུལ་ཡིན་པ་ཉིད་ཀྱིས་ན་འདོད་ཆགས་ལ་སོགས་པའི་དྲི་མ་དང་བྲལ་བས་དྲི་མ་མེད་པའོ། །འདིས་ཅི་ཞིག་བྱེད་ཅེ་ན། འདོད་ཆགས་ཀྱིས་ནི་ཆགས་བྲལ་བཅོམ། །ཞེས་བྱ་བ་གསུངས་ཏེ། འདོད་ཆགས་འདིས་སངས་རྒྱས་ཀྱི་བྱང་ཆུབ་ལ་རྒྱབ་ཀྱིས་ཕྱོགས་པའི་སེམས་ཅན་བཅོམ་ནས། བདེ་བ་ཐམས་ཅད་སྦྱིན་པར་བྱེད། །ཅེས་བྱ་བ། སེམས་ཅན་རྣམས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རང་བཞིན་ཅན་གྱིས་བདེ་བ་ཐམས་ཅད་ངེས་པར་སྦྱིན་པར་བྱེད་ཅིང་སྩོལ་བར་མཛད་པའོ། །དེ་ལྟར་རྡོ་རྗེ་ཆགས་པས་དེ་བཞིན་གཤེགས་པ་ཐམས་ཅད་རྔེས་སུ་མཉེས་པར་བྱ་བ་གསུངས་ནས། དེ་ནས་ཞེས་བྱ་བ་ལ་སོགས་པས་རྡོ་རྗེ་ལེགས་པས་དེ་བཞིན་གཤེགས་པ་ཐམས་ཅད་དགྱེས་པར་བྱ་བར་གསུངས་པ་ཡིན་ཏེ། བཅོམ་ལྡན་འདས་ཀྱི་སྙིང་པོ་འདི་རང་གི་ཐུགས་ཀ་ནས་ཕྱུང་ངོ་ཞེས་བྱ་བར་སྦྱར་རོ། །ཡང་ཞེས་བྱ་བ་ནི་


DTG057_Page_0111
[མ་དཔེ་གཟིགས་ན་འདིར་གནོན།]

རྡོ་རྗེ་ཆགས་པ་ལ་ལྟོས་པའོ། །རབ་ཏུ་དགའ་ཞེས་བྱ་བ་ནི་ཡིད་བདེ་བ་སྟེ། ཟག་པ་མེད་པའི་དགའ་བའོ། །དེས་ནི་མཛེས་ཤིང་འབར་བས་ན་རྒྱལ་པོའོ། །བྱང་ཆུབ་སེམས་དཔའ་ཆེན་པོ་རབ་ཏུ་དགའ་བའི་རྒྱལ་པོ་དེ་ཉིད་ནི་རྡོ་རྗེ་སེམས་དཔའི་ཚུལ་ལོ། །དེའི་དམ་ཚིག་ནི་ལེགས་སོ་ཞེས་བྱ་བ་ལ་སོགས་པའི་ཚུལ་ལོ། །དེ་བྱུང་བ་ནི་སེམས་དཔའ་སྟེ་རྣམ་པར་སྣང་མཛད་ལ་སོགས་པའི་ཐུགས་ཀར་གནས་པའི་སེམས་དཔའ་གང་ལས་སེམས་དཔའི་རྡོ་རྗེར་གྱུར་པ་དེ་བྱིན་གྱིས་བརླབས་པའི་ཕྱིར། རྡོ་རྗེ་ལྟར་མི་ཕྱེད་པའི་ཏིང་ངེ་འཛིན་གང་ཡིན་པ་དེ་ལ་མིང་དེ་སྐད་ཅེས་བྱ་བ་དེ་ལ་སྙོམས་པར་ཞུགས་ཏེ། དགའ་བའི་ཕྱག་རྒྱལ་སོགས་པའི་རྣམ་པར་འཕྲུལ་པ་རྫོགས་པར་མཛད་པར་ཐུགས་རྩེ་གཅིག་ཏུ་མཛད་དོ་ཞེས་བྱ་བའི་དོན་ཏོ། །དེ་བཞིན་གཤེགས་པ་ཐམས་ཅད་ཀྱི་རབ་ཏུ་དགའ་བའི་དམ་ཚིག་ཅེས་བྱ་བ་ནི། དེ་བཞིན་གཤེགས་པ་ཐམས་ཅད་ཀྱི་རབ་ཏུ་དགའ་བ་ནི་མགུ་བའོ། །དེའི་དམ་ཚིག་ནི་རྒྱུའོ། །གང་ལ་མིང་དེ་སྐད་ཅེས་བྱ་བའི་དེ་བཞིན་གཤེགས་པའི་སྙིང་པོ་དེ་རང་གི་ཐུགས་ཀ་ནས་ཕྱུང་བར་གྱུར་པ་ནི་བཛྲ་སཱ་དྷུ་ཞེས་བྱ་བ་སྟེ། ལེགས་སོ་ཞེས་བྱ་བ་ལ་སོགས་པའི་ཚུལ་གང་བཤད་མ་ཐག་པ་དང་ཕྱིས་སྟོན་པ་སྟེ། བཛྲ་སཱ་དྷུ་ཞེས་བྱ་བའི་སྒྲའི་ཚུལ་དུ་ཕྱུང་བར་གྱུར་ཏོ་ཞེས་བྱ་བའི་ཐ་ཚིག་གོ །དེ་ནས་ཞེས་བྱ་བ་ལ་སོགས་པ་ལ། བཅོམ་ལྡན་འདས་དེ་ཉིད་རྡོ་རྗེ་དགྱེས་པའི་དབྱིབས་སུ་གྱུར་ཏེ། ཕྱག་གཉིས་སུ་གནས་སོ་ཞེས་བྱ་བར་སྦྱོར་རོ། །བཛྲ་སཱ་དྷུ་ཞེས་བྱ་བའི་སྒྲ་ནི་དེ་བཞིན་གཤེགས་པ་ཐམས་ཅད་ཀྱི་ཐུགས་ལས་ཕྱུང་མ་ཐག་པ་ཞེས་བྱ་བ་ནི། དེ་བཞིན་གཤེགས་པ་ལྔའི་ཐུགས་ལས་སོ། །བཅོམ་ལྡན་འདས་རྡོ་རྗེ་འཛིན་པ་ནི་ཟླ་བ་དང་རྡོ་རྗེའི་རྣམ་པའོ། །ལེགས་སོ་ཞེས་བྱ་བར་གྱུར་ནས་ཞེས་བྱ་བ་ནི་མགུ་བའི་ཕྱག་རྒྱའི་གཟུགས་སུ་གྱུར་ནས། བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་གཉིས་སུ་གནས་སོ། །དེ་ནས་རྣམ་པར་སྣང་མཛད་ཀྱི་ཕྱག་གཉིས་ན་གནས་པའི་རྡོ་རྗེ་དགྱེས་པའི་དབྱིབས་ཕྱག་རྒྱའི་གཟུགས་ལས་ད་བཞིན་གཤེགས་པའི་སྐུ་རྣམས་


DTG057_Page_0112
[མ་དཔེ་གཟིགས་ན་འདིར་གནོན།]

བྱུང་ནས་ལེགས་སོ་ཞེས་བྱ་བ་ལ་སོགས་པ་བྱས་ནས། དེ་བཞིན་གཤེགས་པའི་ཐུགས་ལ་གནས་ནས་ཆེད་དུ་བརྗོད་པ་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱིས་ལེགས་སོ་ཞེས་བྱ་བ་ནི་རྡོ་རྗེ་ལེགས་པའོ། །སོགས་པ་ཞེས་བྱ་བའི་སྒྲས་ནི་རྡོ་རྗེ་སེམས་དཔའ་ལ་སོགས་པ་གཞན་རྣམས་ཀྱི་ཡང་བསྡུས་ཏེ། དེ་ལ་སོགས་པ་བྱས་ནས་སངས་རྒྱས་ཀྱི་སྐུ་དེ་རྣམས་ལས་རྡོ་རྗེ་ལེགས་པའི་སྐུ་གཅིག་པུར་གྱུར་ཏོ། །ཅིའི་ཕྱིར་ཞེ་ན། རྡོ་རྗེ་སེམས་དཔའི་ཏིང་ངེ་འཛིན་ནི་ཤིན་ཏུ་དགའ་བར་བྱེད་པ་ཉིད་དང་ཞེས་བྱ་བ་གསུངས་ཏེ། ཤིན་ཏུ་རབ་ཏུ་དགའ་ཞིང་ཡིད་བདེ་བ་གང་ཡིན་པ་དེ་ནི་ཤིན་ཏུ་དགའ་བར་བྱ་སྟེ། བྱང་ཆུབ་སེམས་དཔའ་ཆེན་པོར་བ་ཏུ་དགའ་བའི་རྒྱལ་པོ་སྐྱེད་པར་བྱེད་པའི་རྣམ་པར་མི་རྟོག་པའི་ཡིད་བདེ་བའི་རང་བཞིན་ཉིད་ནི་ཤིན་ཏུ་དགའ་བར་བྱེད་པའོ། །དེའི་ངོ་བོ་ཉིད་ནི་ཤིན་ཏུ་དགའ་བར་བྱེད་པ་ཉིད་དེ་གང་གི་ངོ་བོ་ཡིན་ཞེ་ན། རྡོ་རྗེ་སེམས་དཔའི་ཏིང་ངེ་འཛིན་ཏེ། རྡོ་རྗེ་སེམས་དཔའ་ནི་འདིར་སྔ་མ་བཞིན་དུ་སེམས་དཔའི་རྡོ་རྗེའོ། །དེ་ཉིད་ནི་ཐམས་ཅད་འབྱིན་པ་ཡིན་པར་ཤེས་པར་བྱའོ། །རབ་ཏུ་དགའ་བའི་རྒྱལ་པོའི་སྐུར་གྱུར་པ་གཅིག་པུ་ནི་སྟོང་པ་ཉིད་ཀྱིས་ན་རབ་ཏུ་བརྟན་པའི་ཕྱིར་རོ། །དེ་བས་ན་འདྲེས་ཤིང་སྲ་བར་གྱུར་པ་སྟེ། རབ་ཏུ་དགའ་བའི་རྒྱལ་པོ་ནི་རྡོ་རྗེའི་རང་བཞིན་ནོ། །ཨེ་མའོ་ཐམས་ཅད་མཁྱེན་ཀུན་གྱི། །ཞེས་བྱ་བ་ནི་ཐམས་ཅད་མཁྱེན་པ་སྟེ་སངས་རྒྱས་རྣམས་ཀྱིའོ། །ལེགས་སྦྱིན་ནང་ན་བདག་མཆོག་པས། །ཞེས་བྱ་བ་ནི་མ་ཚང་བ་མེད་པ་ཀུན་གྱིས་ལེགས་པར་སྦྱིན་པ་ཉིད་ནི་བདག་ཉིད་ཡིན་ཏེ། རྣམ་པར་རྟོག་པ་མེད་དུ་ཟིན་ཀྱང་སྔོན་གྱི་འཕེན་པའི་ཤུགས་ཀྱིས་ཕྱོགས་བཅུའི་སེམས་ཅན་ཐམས་ཅད་མགུ་བར་བྱེད་པ་ཡིན་པའི་ཕྱིར་རོ། །ཅི་ཞིག་ངོ་མཚར་ཆེ་ཞེན། རྣམ་རྟོག་བྲལ་བ་དེ་དག་གིས། །ངེས་པར་དགྱེས་པ་བསྐྱེད་པ་ཡིན། །ཞེས་གསུངས་ཏེ། གང་གི་ཕྱིར་རྣམ་རྟོག་དང་བྲལ་ཞིང་རྣམ་པར་མི་རྟོག་པའི་ཡེ་ཤེས་ཀྱི་རང་བཞིན་གྱི་སངས་རྒྱས་རྣམས་ཀྱང་ངེས་པར་དགྱེས་པ་སྟེ། དགའ་བ་བསྐྱེད་པར་ནུས་པ་འདི་ནི་ངོ་མཚར་ཏོ། །


DTG057_Page_0113
[མ་དཔེ་གཟིགས་ན་འདིར་གནོན།]

འདི་སྐད་སྟོན་ཏེ། སངས་རྒྱས་རྣམས་ཀྱི་སྔོན་གྱི་འཕེན་པའི་ཤུགས་ཀྱིས་ཅད་པ་མེད་པའི་མགུ་བའི་ངོ་བོ་ནི་བདག་ཡིན་ཏེ། བདག་གིས་དེ་རྣམས་རྣམ་པར་མི་རྟོག་པའི་རང་བཞིན་གྱིས་དགྱེས་པ་བསྐྱེད་དོ་ཞེས་བྱ་བ་འདི་གདུལ་བྱ་རྣམས་ཀྱིས་དེ་ལྟར་མཐོང་བ་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ་བཀའ་ནོད་ཅིང་བཞུགས་པར་གྱུར་ཏོ་ཞེས་བྱ་བར་སྦྱར་རོ། །དེ་ནས་བྱང་ཆུབ་སེམས་དཔའ་ཆེན་པོ་རབ་ཏུ་དགའ་བའི་རྒྱལ་པོའི་སྐུ་དེ་ཞེས་བྱ་བ་ནི་གང་གིས་འདས་མ་ཐག་པའི་ཆེད་དུ་བརྗོད་པ་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་རྒྱབ་ན་ཟླ་བའི་དཀྱིལ་འཁོར་ལ་གནས་པར་གྱུར་ནས་ཞེས་བྱ་བ་ནི་བཅོམ་ལྡན་འདས་མི་བསྐྱོད་པའི་རྒྱབ་ནའོ། །ཡང་བཀའ་ནོད་ཅིང་བཞུགས་པར་གྱུར་ཏོ་ཞེས་བྱ་བ་ནི་སྔར་ནི་རྡོ་རྗེ་ཆགས་པའི་གཟུགས་ཀྱིས་རྗེས་སུ་མཉེས་པར་བྱ་བའི་ཕྱིར་བཀའ་ནོད་པ་ཡིན་ལ་ད་ལྟར་ནི་དེ་བཞིན་གཤེགས་པ་ཐམས་ཅད་ཀྱི་དགྱེས་པ་བསྐྱེད་པར་བྱ་བའི་ཕྱིར་ཡིན་ནོ་ཞེས་བྱ་བ་ནི་ཡང་གི་སྒྲའི་དོ་ཉིན་ནོ། །དེ་ནས་ཞེས་བྱ་བ་ལ་སོགས་པ་ལ་རྡོ་རྗེ་དགྱེས་པ་དེའི་ལག་པ་གཉིས་སུ་དེ་བཞིན་དུ་སྦྱིན་ནོ་ཞེས་བྱ་བར་སྦྱོར་རོ། །དེ་བཞིན་གཤེགས་པ་ཐམས་ཅད་མཉེས་པར་བྱེད་པའི་ཞེས་བྱ་བ་ལ་སོགས་པ་ལ། དེ་བཞིན་གཤེགས་པ་ཐམས་ཅད་ཀྱི་མཉེས་པར་བྱེད་པ་ནི་དགྱེས་པ་བསྐྱེད་པ་སྟེ་དོན་དེས་ནི་རྡོ་རྗེ་དགྱེས་པའི་ཕྱག་རྒྱལ་དེ་སྐད་ཅེས་བྱའོ། །དེ་ལ་དམིགས་པའི་ཏིང་ངེ་འཛིན་ནི་རྡོ་རྗེ་ལྟར་མི་ཕྱེད་པས་མིང་དེ་སྐད་ཅེས་བྱ་སྟེ། དེ་ལ་སྙོམས་པར་འཇུག་པ་ནི་རྡོ་རྗེ་མགུ་བ་སྦྱིན་པའི་རྣམ་པར་ཐུགས་གཅིག་ཏུ་མཛད་ཅེས་བྱ་བའི་དོན་ཏོ། །དེ་བཞིན་གཤེགས་པ་ཐམས་ཅད་ཀྱི་རབ་ཏུ་དགྱེས་པ་བླ་ན་མེད་པ་ནི་ཟག་པ་མེད་པའི་དགའ་བའོ། །དེའི་ཡེ་ཤེས་ནི་མངོན་སུམ་དུ་བྱས་པ་ཡིན་པས་དེ་བཞེན་གཤེགས་པ་ཐམས་ཅད་ཀྱི་རབ་ཏུ་དགྱེས་པ་བླ་ན་མེད་པའི་ཡེ་ཤེས་སོ། །དེའི་དམ་ཚིག་ནི་བསྐྱེད་པའི་རྒྱུ་དགྱེས་པའི་རྡོ་རྗེའི་ཕྱག་རྒྱའོ། །སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་ཐམས་ཅད་མགུ་བར་བྱས་པས་བདེ་བ་དང་ཡིད་བདེ་བ་ཐམས་ཅད་མྱོང་བར་བྱ་བ་ནི་མངོན་སུམ་དུ་བྱ་


DTG057_Page_0114
[མ་དཔེ་གཟིགས་ན་འདིར་གནོན།]

བ་སྟེ་དེའི་དོན་དུ་དགྱེས་པའི་ཕྱག་རྒྱ་བྱིན་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་དགྱེས་པའི་རོ་བླ་ན་མེད་པ་ཞེས་བྱ་བ་ལ་སོགས་པ་ལ། དེ་བཞིན་གཤེགས་པ་ཐམས་ཅད་ཀྱི་ཟག་པ་མེད་པའི་ཡེ་ཤེས་དགྱེས་པ་ནི། དེ་བཞིན་གཤེགས་པ་ཐམས་ཅད་ཀྱི་དགྱེས་པ་བླ་ན་མེད་པ་སྟེ་ཡིད་བདེ་བ་ཡིན་ལ། དེའི་རོ་ནི་དགྱེས་པའི་ཉམས་སོ། །དེ་ཉིད་ནི་དངོས་གྲུབ་ཀྱི་དམ་པ་སྟེ་ཐོབ་པ་ཉིད་འབྲས་བུ་ཡིན་ཏེ་དེའི་ཕྱིར། རྡོ་རྗེ་ལེགས་པ་ཉིད་ཐོབ་པའི་ཕྱིར་རོ། །བར་དུ་ཞེས་བྱ་བའི་སྒྲས་ནི་ས་དང་ཕ་རོལ་ཏུ་ཕྱིན་པ་ལ་སོགས་པ་མ་གསུངས་པ་རྣམས་ཀྱང་བསྡུའོ། །རབ་ཏུ་དགའ་བའི་རྒྱལ་པོ་དེའི་ཞེས་བྱ་བ་ནི་རབ་ཏུ་དགའ་བས་འབར་བར་བྱ་བའི་ཕྱིར་རོ། །དེ་བཞིན་དུ་སངས་རྒྱས་ལྔའི་དབུ་རྒྱན་དང་དར་དཔྱངས་ཀྱི་དབང་གིས་དང་བསྐུར་ནས་རྡོ་རྗེ་དགྱེས་པ་ཞེས་བྱ་བ་མི་ཕྱེད་པའི་དགའ་བ་མངའ་བས་ན་རྡོ་རྗེ་དགྱེས་པའོ། །དེ་བཞིན་གཤེགས་པ་ཐམས་ཅད་རབ་ཏུ་དགྱེས་པར་བྱེད་པའི་རང་བཞིན་དུ་བྱེད་ཅིང་ཆེད་དུ་བརྗོད་པ་འདི་གསུངས་པ་ཡིན་ཏེ། སངས་རྒྱས་ཀུན་གྱི་ཞེས་བྱ་བ་ནི། བཅོམ་ལྡན་འདས་ཀྱི་ཐད་ནས་བདག་གིས་རྙེད་པ་གང་ཡིན་པ་འདིའོ། །ཅི་ཞིག་ལས་ཅན་ཞེ་ན། ལེགས་པ་སྦྱིན་པ་རབ་ཏུ་འཇུག་བྱེད་པས།། ཞེས་བྱ་བ་སྨོས་ཏེ། དགའ་བ་བསྐྱེད་པའོ། །དེ་བས་ན་རྡོ་རྗེ་ཐམས་ཅད་དགྱེས་པར་བྱེད་ཅེས་བྱ་བ་སྟེ་མི་ཕྱེད་པའོ། །ལྷ་རྫས་ཞེས་བྱ་བ་ནི་ལྷ་རྣམས་ཀྱི་ཡིན་པས་ན་ལྷ་རྫས་ཏེ། དེ་བཞིན་གཤེགས་པ་ཐམས་ཅད་ཀྱི་རང་བཞིན་ཅན་གྱི་ལྷ་རྣམས་ཀྱི་ཡིན་གྱི་གཞན་གྱིས་ནི་མ་ཡིན་ནོ། །དགྱེས་པ་སྤེལ་བའོ་ཞེས་བྱ་བ་ནི་ཟག་པ་མེད་པའི་ཡིད་བདེ་བའི་རྒྱུད་མངོན་པར་འཕེལ་བར་བྱེད་པའོ། །དེ་ལྟར་ན་རྡོ་རྗེ་ལེགས་པས་དེ་བཞིན་གཤེགས་པ་ཐམས་ཅད་ལེགས་སོ་ཞེས་བྱ་བས་མཉེས་པར་བྱེད་པ་ཡིན་ནོ། །བྱང་ཆུབ་ཀྱི་སེམས་ཆེན་པོ་དང་ཞེས་བྱ་བ་ནི་མི་བསྐྱོད་པའི་ཐུགས་ཏེ། དེ་ལས་བྱུང་བའི་རྡོ་རྗེ་སེམས་དཔའ་ཡང་དབྱེར་མེད་པའི་ཉེ་བར་གདགས་པས་བྱང་ཆུབ་ཀྱི་སེམས་ཆེན་པོ་ཞེས་བཤད་དོ། །དེ་བཞིན་གཤེགས་པ་ཐམས་ཅད་སྤྱན་འདྲེན་པའི་དམ་ཚིག་དང་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་སྤྱན་འདྲེན་པ་ནི་སྤྱན་དྲངས་པའོ། །དེའི་དམ་ཚིག་


DTG057_Page_0115
[མ་དཔེ་གཟིགས་ན་འདིར་གནོན།]

ནི་རྒྱུ་སྟེ་བཅོམ་ལྡན་འདས་རྡོ་རྗེ་རྒྱལ་པོའོ། །དེ་བཞིན་གཤེགས་པ་ཐམས་ཅད་མཉེས་པར་བྱེད་པའི་ཡེ་ཤེས་ནི་དེ་བཞིན་གཤེགས་པ་ཐམས་ཅད་མཉེས་པར་བྱེད་པའི་དོན་གྱི་ཡེ་ཤེས་ཏེ་རྡོ་རྗེ་ཆགས་པའོ། །དགྱེས་པ་ཆེན་པོ་ནི་དགྱེས་པ་ཆེ་བ་སྟེ། རྡོ་རྗེ་ལེགས་པའོ། །འདི་ནི་སྡོམ་པ་གསུངས་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་དམ་ཚིག་ཆེན་པོའི་སེམས་དཔའོ་ཞེས་བྱ་བ་ནི་མི་བསྐྱོད་པ་ལ་སོགས་པའི་ཚུལ་ཅན་གྱི་དེ་བཞིན་གཤེགས་པ་ཐམས་ཅད་ཀྱི་དམ་ཚིག་ཆེན་པའི་སེམས་དཔའ་ཡིན་པས་ན་དམ་ཚིག་ཆེན་པོའི་སེམས་དཔའ་སྟེ། དེ་རྣམས་ལས་སྐྱེས་པ་ཡིན་པའི་ཕྱིར་རོ། །དེ་ཡང་ཐོག་མ་དང་ཐ་མ་མེད་པའི་དམ་ཚིག་ཆེན་པོའི་ཆོས་ཀྱི་དབྱིངས་ཀྱི་རང་བཞིན་གྱི་སེམས་དཔའ་ནི་དམ་ཚིག་ཆེན་པོའི་སེམས་དཔའ་སྟེ། གཟུགས་སྟོང་པའོ། །སྟོང་བ་ཉིད་གཟུགས་སོ་ཞེས་གསུངས་པའི་ཕྱིར་རོ། །གཞན་དུ་ཡང་བཤད་པར་བྱ་སྟེ། བྱང་ཆུབ་ཀྱི་མཚན་ཉིད་ཅན་གྱི་སེམས་བསྐྱེད་པ་ནི། མི་བསྐྱོད་པའི་རང་བཞིན་ཡིན་ནོ། །དེ་ཡང་བརྟགས་པ་ལས་ལྡོག་པའི་དབྱེ་བས་རྣམ་པ་བཞིའོ། །དེ་ལ་དབྱེ་བ་ནི་འདི་ཡིན་ཏེ། རྣམ་པར་རྟོག་པ་ཐམས་ཅད་ཀྱིས་མི་གྱོ་བའི་མི་བསྐྱོད་པའི་ཐུགས་ཏེ་དེ་ཉིད་རྣམ་པར་རྟོག་པའི་ཆུ་བོ་ལས་གྲོལ་བར་བྱེད་པས་གྲོལ་བའི་སེམས་སོ། །གྲོལ་བར་བྱེད་པ་ཉིད་ཀྱིས་གྲོལ་བར་བྱེད་པས་ན་དེའི་ཕྱིར་གྲོལ་བའི་སེམས་སོ། །རྣམ་པར་རྟོག་པ་མེད་པས་ནི་དབུགས་འབྱིན་པའི་དོ་བོ་སྟེ། དབུགས་འབྱིན་པའི་ཚུལ་དེ་ཉིད་ཀྱིས་མཆོག་ཏུ་ཡིད་བདེ་བ་ཐོབ་པ་མྱ་ངན་ལས་འདས་པའི་ཚུལ་ཐམས་ཅད་ནི་རྡོ་རྗེ་སེམས་དཔའ་དང༌། རྡོ་རྗེ་རྒྱལ་པོ་དང༌། རྡོ་རྗེ་ཆགས་པ་དང༌། རྡོ་རྗེ་ལེགས་པའི་ཚུལ་ཡིན་པར་བཤད་དོ། །དེ་བས་ན་འདི་དག་ཉིད་ལ་དམ་ཚིག་ཆེན་པོའི་སེམས་དཔའ་ཞེས་བཤད་དེ། བྱང་ཆུབ་ཆེན་པོར་སེམས་བསྐྱེད་པ་ལས་བྱུང་བའི་ཕྱིར་རོ། །དེ་ཡང་དམ་ཚིག་ཀྱང་ཡིན་ལ་ཆེན་པོ་ཡང་ཡིན་པས་ན་དམ་ཚིག་ཆེན་པོ་ཞེས་བཤད་དོ། །དམ་ཚིག་ཆེན་པོ་ཞེས་སུ་ཞིག་ལ་བཤད་ཅེ་ན། ཐོག་མཐའ་མེད་པའི་སེམས་དཔའ་ནི་རྡོ་རྗེ་སེམས་དཔའ་


DTG057_Page_0116
[མ་དཔེ་གཟིགས་ན་འདིར་གནོན།]

ཞེས་གསུངས་པས་ཆོས་བདག་མེད་པའི་ཚུལ་གྱིས་ཐམས་ཅད་དུ་ཁྱབ་པས། དེའི་ཕྱིར་དམ་ཚིག་ཆེན་པོའོ། །གཞན་ཡང༌། བྱང་ཆུབ་སེམས་བཟང་གང་ཡིན་ཏེ། །རྡོ་རྗེ་སེམས་དཔའ་ཡང་དག་འབྱུང༌། །བསྡུ་བའི་དངོས་པོ་བཞི་རྣམས་ན། །རྡོ་རྗེ་རྒྱལ་པོར་དེ་བྱུང་ངོ༌། །སེམས་ཅན་སྨིན་བྱེད་འདི་ཆགས་པ། །ཡང་དག་བྱང་ཆུབ་སྤྱོད་ལེགས་པ། །དམ་ཚིག་ཆེ་སེམས་ཞེས་བྱ་བ། །བྱང་ཆུབ་སེམས་ལས་ཡང་དག་བྱུང༌། །ཞེས་བཤད་པ་ཡིན་ནོ། །དེ་ལྟར་རྡོ་རྗེ་ལེགས་པའི་ཚུལ་གྱིས་སེམས་ཅན་ཡང་དག་པའི་བྱང་ཆུབ་ཀྱི་སྤྱོད་པས་དྲི་མ་ཐམས་ཅད་དང་བྲལ་བར་གྱུར་ནས། དབང་བསྐུར་བར་བྱའོ་ཞེས་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ཏེ། ཡང་བཅོམ་ལྡན་འདས་ཀྱིས་དེ་བཞིན་གཤེགས་པ་ཐམས་ཅད་ཀྱི་སྙིང་པོ་རང་གི་ཐུགས་ནས་བྱུང་ངོ་ཞེས་བྱ་བར་སྦྱར་རོ། །ལེགས་སོ་ཞེས་བྱ་བའི་ཚུལ་ལ་ལྟོས་ན་ཡང་ཞེས་བྱ་བའི་སྒྲ་སྨོས་སོ། །ནམ་མཁའ་ནི་མཉམ་པ་ཉིད་ཀྱི་ཡེ་ཤེས་སོ། །སྙིང་པོ་ནི་བསྐྱེད་པའི་གནས་ཏེ་དེ་ལྟ་བུའི་སེམས་དཔའི་རྡོ་རྗེ་གང་ལ་མངའ་བ་དེ་ནི་ནམ་མཁའི་སྙིང་པོའོ། །དེའི་དམ་ཚིག་ནི་ནམ་མཁའ་ཐམས་ཅད་ཀྱི་ཟེར་ལ་སོགས་པའི་ཚུལ་ལོ། །དེ་བྱུང་བ་ནི་སེམས་དཔའི་རྡོ་རྗེ་གང་ལས་རིན་པོ་ཆེ་ལྟ་བུར་གྱུར་པའོ། །དེ་བྱིན་གྱིས་བརླབས་པ་ནི་བརྟན་པར་བྱ་བའི་ཕྱིར་སྤྲུལ་པའི་དོན་རྡོ་རྗེ་ལྟར་མི་ཕྱེད་པའི་ཏིང་ངེ་འཛིན་ལ་མིང་དེ་སྐད་ཅེས་བྱ་བའི་ཚུལ་ཉིད་ཀྱི་ཏིང་ངེ་འཛིན་ལ་སྙོམས་པར་ཞུགས་པ་སྟེ། བྱང་ཆུབ་སེམས་དཔའ་ཆེན་པོ་ནམ་མཁའི་སྙིང་པོའི་འོད་ཟེར་ལ་སོགས་པས་སྤྲུལ་པ་རྣམས་བསྐྱེད་པའི་རྣམ་པར་ཐུགས་རྩེ་གཅིག་པར་མཛད་ཅེས་བྱ་བའི་ཐ་ཚིག་གོ །དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བའི་དམ་ཚིག་ཅེས་བྱ་བ་ལ། དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བ་ནི་ནམ་མཁའི་སྙིང་པོའོ། །དེ་ཉིད་ནི་འདའ་བར་མི་བྱ་བ་ཡིན་པས་ན་དམ་ཚིག་སྟེ། དེ་ལས་བྱུང་པ་ཉིད་ཀྱིས་ན་མིང་དེ་སྐད་ཅེས་བྱ་བའི་ཐ་ཚིག་གོ །དེ་བཞིན་གཤེགས་པ་ཐམས་ཅད་ཀྱི་ཐུགས་ལས་ཞེས་བྱ་བ་ན་དེའི་རང་གི་ཐུགས་ཀ་ནས་བྱུང་བར་གྱུར་པ་ནི།


DTG057_Page_0117
[མ་དཔེ་གཟིགས་ན་འདིར་གནོན།]

བཛྲ་རཏྣ་ཞེས་བྱ་བ་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ། དེ་ཉིད་བཅོམ་ལྡན་འདས་ནམ་མཁའ་ཐམས་ཅད་ཀྱི་འོད་ཟེར་དུ་གྱུར་ནས་བྱུང་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་ཐུགས་ལས་ཞེས་བྱ་བ་ནི་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་ལྔའི་ཐུགས་ལས་སོ། །བྱུང་མ་ཐག་པ་ཞེས་བྱ་བ་ནི། །བཛྲ་རཏྣ་ཞེས་བྱ་བའི་སྒྲའི་ཚུ་བྱུང་མ་ཐག་ཏུའོ། །ཐམས་ཅད་ནམ་མཁའ་དང་མཉམ་པ་ཞེས་བྱ་བ་ནི་ཐམས་ཅད་ཀྱང་ཡིན་ལ་ནམ་མཁའ་ཡང་ཡིན་པས་ན་ཐམས་ཅད་ནམ་མཁའོ། །དེའི་མཉམ་པ་ཉིད་ནི་ཕྱོགས་བཅུ་ཐམས་ཅད་མེད་པར་བསྒོམ་པ་དང༌། དོན་དམ་པར་ནི་རིན་པོ་ཆེའི་རིགས་སྒོམ་པའོ། །དེའི་ཡེ་ཤེས་ནི་ནམ་མཁའ་ཐམས་ཅད་དང་མཉམ་པ་ཉིད་ཀྱི་ཡེ་ཤེས་སོ། །དེ་གང་གིས་ཤིན་ཏུ་རྟོགས་པ་དེ་ལ་དེ་སྐད་ཅེས་བྱ་སྟེ། དེའི་ངོ་བོ་ཉིད་ཡིན་པའི་ཕྱིར་ཤིན་ཏུ་རྟོགས་པ་ཡིན་པའི་ཕྱིར་ཞེས་བྱའོ། །དེ་སུ་ཞིག་ཡི་ཞེན་ན། རྡོ་རྗེ་སེམས་དཔའི་ཏིང་ངེ་འཛིན་ཞེས་གང་གསུངས་པ་ཡིན་ཏེ། ནམ་མཁའི་འོད་ཟེར་སྐྱེད་པར་བྱེད་པར་སེམས་པར་རྩེ་གཅིག་པ་ཉིད་ནི་རྡོ་རྗེ་སེམས་དཔའི་ཏིང་ངེ་འཛིན་ཏོ། །བཅོམ་ལྡན་འདས་རྡོ་རྗེ་འཛིན་པ་དེ་ཉིད་དེ་ཞེས་བྱ་བ་ནི་སེམས་དཔའི་རྡོ་རྗེའི་རང་བཞིན་ནོ། །ནམ་མཁའ་ཐམས་ཅད་ཀྱི་འོད་ཟེར་དུ་གྱུར་ནས་བྱུང་ངོ་ཞེས་བྱ་བ་ལ། ནམ་མཁའ་ཐམས་ཅད་ཀྱི་འོད་ཟེར་ནི། སྔོན་པོ་དང༌། དམར་པོ་དང༌། སེར་པོ་དང༌། ཤེལ་གྱི་མདོག་ཅན་ནི་ནམ་མཁའ་ཐམས་ཅད་ཀྱི་འོད་ཟེར་ཏེ། རིའི་རྒྱལ་པོ་རི་རབ་ཀྱི་གྲགས་པ་ཉིད་བཤད་པ་ཡིན་ནོ། །རིན་པོ་ཆེ་སྣ་བཞིའི་རང་བཞིན་དེའི་འོད་ཟེར་གྱིས་ཁྱབ་པ་ཡིན་ཏེ། འདི་ལྟ་སྟེ། འཛམ་བུའི་གླིང་འདི་ནི་ནམ་མཁའ་གཅིག་ཏུ་སྔོ་བར་སྣང་ངོ༌། །དེ་བཞིན་དུ་ཤར་གྱི་ལུས་འཕགས་པོ་ནི་ཤེལ་གྱི་མདོག་ཅན་ནོ་ཞེས་བྱ་བའི་བར་དུའོ། །ནམ་མཁའ་ཐམས་ཅད་ཀྱི་འོད་ཟེར་དེ་དག་གིས་འཇིག་རྟེན་གྱི་ཁམས་ཐམས་ཅད་སྣང་བར་བྱས་པ་ནི་གསལ་བར་བྱས་པའོ། །ཐམས་ཅད་ནམ་མཁའི་དབྱིངས་ལྟ་བུ་ནི་ནམ་མཁའི་འོད་ཟེར་གྱི་རང་བཞིན་ནོ། །གྱུར་པ་ནི་གྲུབ་པའོ། །དེ་ནས་ཞེས་བྱ་བ་ལ་སོགས་པ་


DTG057_Page_0118
[མ་དཔེ་གཟིགས་ན་འདིར་གནོན།]

ལ། ནམ་མཁའི་ཁམས་ཐམས་ཅད་ཀྱི་འོད་ཟེར་གྱི་ཚོགས་བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་སུ་ཞུགས་ནས་རྡོ་རྗེ་རིན་པོ་ཆེའི་དབྱིབས་སུ་གྱུར་ནས་བཅོམ་ལྡན་འདས་ཀྱི་ཕྱག་གཉིས་སུ་གནས་སེ་ཞེས་བྱ་བར་སྦྱར་རོ། །རྒྱུ་གང་གིས་ཤེ་ན། རྡོ་རྗེ་སེམས་དཔའི་ཏིང་ངེ་འཛིན་ཤིན་ཏུ་བསྒོམས་པའི་ཕྱིར་ཞེས་བྱ་བ་གསུངས་ཏེ། ཤིན་ཏུ་ཡོངས་སུ་བསྒོམས་པས་ན་ཤིན་ཏུ་བསྒོམས་པ་སྟེ། དེ་བས་ན་ཤིན་ཏུ་བསྒོམས་པར་གྱུར་པ་ཉིད་ཀྱི་ཕྱིར་རོ། །སུ་ཞིག་གི་ཞེ་ན། རྡོ་རྗེ་སེམས་དཔའི་ཏིང་ངེ་འཛིན་ཞེས་བྱ་བ་སྟེ་ནམ་མཁའི་ཁམས་ཐམས་ཅད་ཀྱི་འོད་ཟེར་བསྡུས་པའི་ཚུལ་གྱིས་རྡོ་རྗེ་རིན་པོ་ཆེ་གཅིག་ཏུ་གྲུབ་བར་བྱེད་པས་སེམས་རྩེ་གཅིག་པ་ནི། འདིར་རྡོ་རྗེ་སེམས་དཔའི་ཏིང་ངེ་འཛིན་ཏེ། དེ་ཤིན་ཏུ་བསྒོམས་པར་གྱུར་པའི་ཕྱིར་རོ། །ནམ་མཁའི་ཁམས་ཐམས་ཅད་ཀྱི་སྙིང་པོའི་རང་བཞིན་ཞེས་བྱ་བ་ལ་ནམ་མཁའི་ཁམས་ཀྱང་ཡིན་ལ་ཐམས་ཅད་ཀྱང་ཡིན་པས་ན། ནམ་མཁའི་ཁམས་ཐམས་ཅད་དེ། རྡོ་རྗེ་རིན་པོ་ཆེ་བསྐྱེད་པའི་རྒྱུའི་འོད་ཟེར་བསྡུས་པའི་ཚུལ་གྱིས་རྡོ་རྗེ་རིན་པོ་ཆེ་བསྐྱེད་པའི་རྒྱུའི་འོད་ཟེར་སྤྲོས་པ་ཐམས་ཅད་དོ། །དེ་ཉིད་ནི་སྙིང་པོ་སྟེ་བསྐྱེད་པའི་གནས་གང་ལ་ཡོད་པའི་རྡོ་རྗེ་རིན་པོ་ཆེའི་དབྱིབས་དེ་ནི། ནམ་མཁའི་ཐམས་ཅད་ཀྱི་སྙིང་པོའི་རང་བཞིན་ཏེ། དེའི་ངོ་བོ་ཉིད་ཅེས་བྱ་བའི་ཐ་ཚིག་གོ །ཚད་ཇི་ཙམ་ཞེ་ན། འཇིག་རྟེན་གྱི་ཁམས་ཐམས་ཅད་ཀུན་དུ་ཁྱབ་པར་སོད་བ་ནི་འཇིག་རྟེན་གྱི་ཁམས་ཐམས་ཅད་དུ་མཉམ་པར་འཇུག་པའོ། །དེ་ཉིད་ཀྱི་ཚད་གང་ལ་ཡོད་པ་དེ་ནི་འཇིག་རྟེན་གྱི་ཁམས་ཐམས་ཅད་དུ་མཉམ་པར་འཇུག་པའི་ཚད་ཙམ་མོ། །དེ་གང་ཞིག་ཡིན་ཞེ་ན། རྡོ་རྗེ་རིན་པོ་ཆེའི་དབྱིབས་ཞེས་བྱ་བ་གསུངས་ཏེ། རྡོ་རྗེ་རིན་པོ་ཆེའི་དབྱིབས་ཀྱང་ཡིན་ལ་རིན་པོ་ཆེ་ཡང་ཡིན་པས་རྡོ་རྗེ་རིན་པོ་ཆེ་ཆེན་པོའི་དབྱིབས་ཏེ་རྡོ་རྗེ་རྩེ་ལྡ་པའི་རྩེ་མོ་ཅན་གྱི་ཡིད་བཞིན་གྱི་ནོར་བུ་རིན་པོ་ཆེ་འདི་ནི། རྡོ་རྗེ་ཉེ་བར་མཚན་པས་ན་རྡོ་རྗེ་རིན་པོ་ཆེའི་དབྱིབས་ཞེས་བྱ་བ་ལ། ནམ་མཁའ་ཐམས་ཅད་ཁྱབ་པས་ན་ཆེན་པོའོ། །བཅོམ་ལྡན་འདས་ཀྱི་ཕྱག་གཉིས་སུ་གནས་སོ་ཞེས་བྱ་བ་ནི་བསྡུ་བ་མཛད་ནས་བཅོམ་ལྡན་འདས་རྣམ་


DTG057_Page_0119
[མ་དཔེ་གཟིགས་ན་འདིར་གནོན།]

པར་སྣང་མཛད་ཀྱི་ཐུགས་ཀ་ནས་བྱུང་སྟེ་དེ་ཉིད་ཀྱི་ཕྱག་གཉིས་སུ་གནས་པའོ། །དེ་ནས་རྡོ་རྗེ་རིན་པོ་ཆེ་ཞེས་བྱ་བ་ལ་སོགས་པ་ལ། རྡོ་རྗེ་རིན་པོ་ཆེའི་དབྱིབས་དེ་ལས་དེ་བཞིན་གཤེགས་པ་རྣམས་ཀྱི་སྐུ་དང༌། བྱང་ཆུབ་སེམས་དཔའི་སྐུར་གྱུར་ནས་ཐུགས་ལ་གནས་ནས་ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་ནས་རིན་པོ་ཆེའི་དབྱིབས་དེ་ལས་ཞེས་བྱ་བ་ནི། རྣམ་པར་སྣང་མཛད་ཀྱི་ཕྱག་ནས་གནས་པ་ལས་སོ། །དེ་བཞིན་གཤེགས་ཅད་ཀྱི་དབང་བསྐུར་བ་ལ་སོགས་པ་ཞེས་བྱ་བ་ནི་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་རྣམས་དང༌། གདུལ་བྱ་རྣམས་ལ་ནམ་མཁའི་སྙིང་པོའི་གཟུགས་སུ་གྱུར་པ་ནི་དབང་བསྐུར་བའོ། །དེ་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་རྫུ་འཕྲུལ་དང་ཆོ་འཕྲུལ་རྣམས་གང་ཡིན་པ་དེ་ལ་དེ་སྐད་ཅེས་བྱ་སྟེ་དེ་དག་འཇིག་རྟེན་གྱི་ཁམས་ཐམས་ཅད་དུ་བྱས་ནས་སོ། །སོགས་པའི་སྒྲས་ནི་བྱང་ཆུབ་ཏུ་སེམས་བསྐྱེད་པ་ལ་སོགས་པ་བསྡུའོ། །དེ་བཞིན་གཤེགས་པ་དེ་རྣམས་ཀྱིས་ཀྱང་འཇིག་རྟེན་གྱི་ཁམས་ཐམས་ཅད་དུ་ཆོ་འཕྲུལ་རྣམས་མཛད་ནས་གཅིག་ཏུ་གྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོའི་སྐུར་གྱུར་ཏོ། །རྒྱུ་ཅི་ཞིག་གི་ཕྱིར་ཞེ་ན། རྡོ་རྗེ་སེམས་དཔའི་ཏིང་ངེ་འཛིན་ནི་ནམ་མཁའི་ཁམས་ཐམས་ཅད་ཀྱི་སྙིང་པོ་ལས་ཤིན་ཏུ་བྱུང་བ་དང་ཞེས་བྱ་བ་གསུངས་ཏེ། ནམ་མཁའི་ཁམས་ཀྱང་ཡིན་ལ་ཐམས་ཅད་ཀྱང་ཡིན་པས་ན་ནམ་མཁའི་ཁམས་ཐམས་ཅད་དོ། །འཇིག་རྟེན་གྱི་ཁམས་ཐམས་ཅད་ཀྱི་རྔུལ་ཕྲ་རབ་དང་མཉམ་པའི་ཇི་སྐད་དུ་བཤད་པའི་དེ་བཞིན་གཤེགས་པ་རྣམས་སོ། །དེ་ཉིད་ནི་གང་གིས་བསྐྱེད་པའི་རྒྱུ་ཡིན་པ་དེ་ལ་ནམ་མཁའ་ཐམས་ཅད་ཀྱི་སྙིང་པོ་ཞེས་བྱ་སྟེ། འཕགས་པ་ནམ་མཁའི་སྙིང་པོའོ། །དེ་ཏིང་ངེ་འཛིན་གང་ལས་ཤིན་ཏུ་བྱུང་བར་གྱུར་པ་དེ་ནི་ཤིན་ཏུ་བྱུང་བའོ། །དེའི་ངོ་བོ་ཉིད་ཡིན་པས་ན་བྱུང་བ་ཉིད་དོ། །དེ་ལྟར་ནམ་མཁའི་ཁམས་ཐམས་ཅད་ཀྱི་སྙིང་པོ་ལས་ཤིན་ཏུ་བྱུང་བ་ཡིན་པའི་ཕྱིར་སེམས་དཔའི་ཏིང་ངེ་འཛིན་ཏེ། དེ་བཞིན་


DTG057_Page_0120
[མ་དཔེ་གཟིགས་ན་འདིར་གནོན།]

གཤེགས་པ་ཐམས་ཅད་གཅིག་ཏུ་མཛད་པའི་ཚུལ་གྱིས་འཕགས་པ་ནམ་མཁའི་སྙིང་པོ་སྐྱེད་པར་བྱེད་པར་ཐུགས་རྩེ་གཅིག་ཏུ་མཛད་པའི་ཐ་ཚིག་གོ །གཅིག་པའི་རྒྱུད་བཤད་ནས་ཅིའི་ཕྱིར་འདྲེས་པར་གྱུར་ཞེ་ན་ཤིན་ཏུ་བརྟན་པའི་ཕྱིར་ཞེས་བྱ་བ་གསུངས་ཏེ། རྣམ་པར་རྟོག་པ་ཐམས་ཅད་དང་བྲལ་བའི་ཕྱིར་ཞེས་བྱ་བའི་དོན་ཏོ། །ཨེ་མའོ་དབང་བསྐུར་མཆོག་ནི་བདག་ཡིན་ནོ། །ཞེས་བྱ་བ་ནམ་མཁའ་དང་མཉམ་པའི་ཡེ་ཤེས་ཀྱི་བདུད་རྩི་ལ་ལོངས་སྤྱོད་པས་དེ་བཞིན་གཤེགས་པ་ཐམས་ཅད་ཀྱི་བག་ཆགས་དང་བཅས་པའི་ཉོན་མོངས་པའི་དྲི་མ་ཁྲུད་པས་ན་དབང་བསྐུར་མཆོག་སྟེ། དབང་བསྐུར་བཟང་པོ་ནི་དབང་བསྐུར་བའི་ཆོག་གོ །བདག་ཉིད་ཡིན་ནོ་ཞེས་བྱ་བ་ནི་བདག་ཉིད་ཡིན་པར་སྟོན་ཏོ། །ཁྱེད་ཇི་ལྟ་བུ་ཡིན་ཞེ་ན། རྡོ་རྗེ་རིན་ཆེན་བླ་ན་མེད་པའི་ཞེས་བྱ་བ་གསུངས་ཏེ་རྡོ་རྗེ་ནི་སྟོང་པ་ཉིད་ཀྱི་ཡེ་ཤེས་སོ། །དེ་ཉིད་ནི་སེམས་ཅན་ཐམས་ཅད་ཀྱི་བསམ་པ་ཐམས་ཅད་ཡོངས་སུ་རྫོགས་པའི་རྒྱུར་གྱུར་པས་ན་རིན་པོ་ཆེ་དང་འདྲ་བའི་ཕྱིར་ན་རིན་ཆེན་ནོ། །དེ་ཉིད་བླ་ན་མེད་པ་སྟེ། འདིའི་གོང་ན་དམ་པ་གཞན་མེད་པའི་ཕྱིར་རོ། །ཅི་ཞིག་ངོ་མཚར་ཆེ་ཞེ་ན། ཆགས་མེད་རྒྱལ་བ་ཡང༌། ཁམས་གསུམ་དབང་པོར་དགོངས་པས་ན་ཞེས་བྱ་བ་གསུངས་ཏེ། འདི་ནི་ངོ་མཚར་ཆེའོ། །ཇི་སྐད་དུ་བཤད་པའི་ཉོན་མོངས་པ་བག་ཆགས་དང་བཅས་པ་སྤངས་པ་གང་ཁམས་གསུམ་པར་ཞེན་པ་མི་མངའ་ཞིང་ཆགས་པ་མེད་པའི་རྒྱལ་བ་སྟེ། དེ་བཞིན་གཤེགས་པ་སེམས་ཅན་ཐམས་ཅད་ཀྱི་བསམ་པ་ཐམས་ཅད་ཡོངས་སུ་རྫོགས་པའི་རྒྱུ་རིན་པོ་ཆེའི་རིགས་སུ་བསྐྱེད་པ་འདི་ནི་ཁམས་གསུམ་གྱི་དབང་པོའོ། །འདི་སྐད་སྟོན་ཏེ་དེ་བཞིན་གཤེགས་པ་ཐམས་ཅད་གང་ཡིན་པ་དེ་ནི་བདག་ཡིན་ལ། བདག་གང་ཡིན་པ་དེ་ནི་དེ་བཞིན་གཤེགས་པ་ཐམས་ཅད་དོ། །དེས་ན་དེ་རྣམས་དང་བདག་ཐ་མི་དད་པའི་ཚུལ་གྱིས་དབང་བསྐུར་བར་གྱུར་པས་ན་ཁམས་གསུམ་གྱི་བདག་པོར་གྱུར་པ་ཡིན་མོད་ཀྱི། ཀུན་རྫོབ་ཏུ་དེ་རྣམས་ལས་ཐ་དད་གདུལ་བྱ་རྣམས་ཀྱིས་མཐོང་བ་འདི་ནི་ངོ་མཚར་ཆེའོ། །དེ་རྣམས་ཀྱང་སྔོན་གྱི་འཕེན་པའི་ཤུགས་ཀྱིས་རྣམ་པར་མི་རྟོག་


DTG057_Page_0121
[མ་དཔེ་གཟིགས་ན་འདིར་གནོན།]

།པའི་སྦྱོར་བས་བདག་པོ་མཛད་པས་གདུལ་བྱ་རྣམ་པར་རྟོག་པ་དང་བཅས་པས་དེ་ལྟར་མཐོང་བ་འདི་ཡང་ངོ་མཚར་ཆེའོ། །དེ་བཞིན་གཤེགས་པ་ཐམས་ཅད་ཀྱི་སྤྱན་སྔ་ན་ཞེས་བྱ་བ་ནི། བཅོམ་ལྡན་འདས་རིན་ཆེན་འབྱུང་ལྡན་གྱི་མདུན་ནའོ། །ཡང་བཀའ་ནོད་ཅིང་བཞུགས་པར་གྱུར་ཏོ་ཞེས་བྱ་བ་ནི་རྡོ་རྗེ་ལེགས་པའི་གཟུགས་ཀྱིས་ནི་དགྱེས་པ་བསྐྱེད་པའི་ཕྱིར་བཀའ་ནོད་པ་ཡིན་ལ། ད་ལྟར་ནི་རིན་པོ་ཆེའི་རིགས་ཀྱི་འཁོར་ལོས་སྒྱུར་བ་ཉིད་དུ་ཡིན་པས་ན་ཡང་གི་སྒྲས་སྨོས་སོ། །དེ་ནས་ཞེས་བྱ་བ་ལ་སོགས་པ་ལ། བཅོམ་ལྡན་འདས་ཀྱིས་ལག་ཏུ་རྡོ་རྗེ་ནོར་བུ་བྱིན་ནོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་ནོར་བུ་རིན་པོ་ཆེ་རྡོ་རྗེ་ཞེས་བྱ་བ་ནི། བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་ན་གནས་པའི་རྡོ་རྗེ་རིན་པོ་ཆེ་ཆེན་པོ་སྟེ། དེ་ལ་དམིགས་པའི་ཏིང་ངེ་འཛིན་དེ་ལ་དེ་སྐད་ཅེས་བྱའོ། །དེ་ལ་སྙོམས་པར་ཞུགས་པ་ནི་རྡོ་རྗེ་རིན་པོ་ཆེ་སྦྱིན་པའི་རྣམ་པར་ཐུགས་རྩེ་གཅིག་ཏུ་མཛད་པ་ཡིན་ནོ་ཞེས་སྟོན་ཏོ། །དེ་ཇི་ལྟ་བུ་ཡིན་ཞེ་ན། དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་དགོངས་པ་ནི་རིན་པོ་ཆེའི་རིགས་ཀྱི་ཚུལ་གྱིས་སེམས། ཅན་གྱི་དོན་མཛད་བར་བཞེད་པའོ། །དེ་ཡོངས་སུ་རྫོགས་པར་བྱ་བ་ནི་སེམས་ཅན་གྱི་དོན་མངོན་པར་འདོད་པའི་དོན་རྫོགས་པར་བྱ་བའོ། །དེའི་དམ་ཚིག་ནི་རྒྱུ་སྟེ། དེ་ནི་དེ་བཞིན་གཤེགས་པ་ཐམས་ཅད་ཀྱི་དགོངས་པ་ཡོངས་སུ་རྫོགས་པའི་དམ་ཚིག་ཅེས་བྱའོ། །ཅེའི་ཕྱིར་རྗེས་སུ་བརྩལ་ཞེ་ན། སེམས་ཅན་གྱི་ཁམས་ཞེས་བྱ་བ་ལ་སོགས་པ་གསུངས་ཏེ། སེམས་ཅན་གྱི་ཁམས་མ་ལུས་ཤིང་ལུས་པ་མེད་པའི་དོན་ཐམས་ཅད་ཡོངས་སུ་གྲུབ་པར་བྱ་བ་ནི། འཇིག་རྟེན་དང་འཇིག་རྟེན་ལས་འདས་པའི་དོན་རྣམས་ཐོབ་པའོ། །དེས་ན་འདིའི་བདེ་བ་ཐམས་ཅད་མྱོང་བར་བྱ་བའི་དོན་དུ་བྱིན་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་དོན་ཕུན་སུམ་ཚོགས་པ་ནི་འཕགས་པ་ནམ་མཁའི་སྙིང་པོའོ། །དོན་ཕུན་སུམ་ཚོགས་པ་ཉིད་ནི་དངོས་གྲུབ་དམ་པའོ། །དེའི་མངོན་དུ་བྱས་པ་ནི་ཐོབ་པའོ། །ཐོབ་པར་བྱ་བའི་ཕྱིར་དེ་ཐོབ་པར་བྱ་


DTG057_Page_0122
[མ་དཔེ་གཟིགས་ན་འདིར་གནོན།]

བའི་དོན་དུའོ། །རྡོ་རྗེ་རིན་པོ་ཆེའི་འཁོར་ལོས་སྒྱུར་བ་ཉིད་དུ་ཞེས་བྱ་བ་ལ། རྡོ་རྗེ་རིན་པོ་ཆེ་ནི་རིན་པོ་ཆེའི་རིགས་སོ། །དེ་རྣམས་ཀྱི་འཁོར་ལོ་ནི་དཀྱིལ་འཁོར་སྤྲུལ་པ་དང་བྲེ་བ་དག་གོ །དེ་བསྐོར་བའི་དང་ཚུལ་གང་ལ་ཡོད་པ་དེ་ནི་འཁོར་ལོ་བསྐོར་བའོ། །དེའི་ངོ་བོ་ཉིད་ཡིན་པས་ན་རིན་པོ་ཆེའི་འཁོར་ལོ་བསྐོར་བ་ཉིད་དོ། །དེ་ལ་རྡོ་རྗེ་རིན་པོ་ཆེའི་འཁོར་ལོ་བསྐོར་བ་ཉིད་དུ་ཅི་ཞིག་གིས་བྱ་ཞེ་ན། རྡོ་རྗེ་རིན་པོ་ཆེའི་མྱུ་གུའི་དབང་གིས་དབང་བསྐུར་ནས་ཞེས་བྱ་བ་ཡིན་ཏེ། རྡོ་རྗེ་རིན་པོ་ཆེའི་མྱུ་གུ་ནི་དུམ་བུ་བཞི་ལས་འོག་ནས་བཞད་པའི་ཨོཾ་བཛྲ་རཏྣ་ཀུ་རུ་ཧཱུཾ་ཞེས་བྱ་བ། རྡོ་རྗེ་རིན་པོ་ཆེའི་མྱུ་གུས་དབང་བསྐུར་བ་ནི་རྡོ་རྗེ་རིན་པོ་ཆེའི་མྱུ་གུའི་དབང་བསྐུར་ཏེ། དེས་དབང་བསྐུར་བའོ། །འདིས་ནི་འདི་སྐད་སྟོན་ཏེ། དུམ་བུ་བཞི་པ་ལས་འཁོར་ལོས་སྒྱུར་བར་སྤྲུལ་པ་ཡང༌། འོག་མིན་དུ་མངོན་པར་བྱང་ཆུབ་ནས་མི་བསྐྱོད་པ་ལ་སོགས་པའི་དེ་བཞིན་གཤེགས་པ་བཞིས་ཡོངས་སུ་བསྐོར་ཏེ་བབས་ནས། དེ་བཞིན་གཤེགས་པའི་རིགས་སུ་ནམ་མཁའི་སྙིང་པོ་ལ་ཡང་དེ་ཉིད་ཀྱིས་མི་བྱའོ། །ཁྱད་པར་ནི་འདི་ཡོད་དེ། འདི་ལྟར་འདིར་ནི་སངས་རྒྱས་ལྔའི་རིན་པོ་ཆེའི་དབུ་རྒྱན་དང༌། དར་དཔྱངས་ཀྱིས་དབང་བསྐུར་ལ། ནོར་བུའི་རིགས་ཀྱི་འཁོར་ལོས་སྒྱུར་བར་ནི་རྡོ་རྗེ་རིན་པོ་ཆེའི་མྱུ་གུས་རིན་པོ་ཆེའི་དབུ་རྒྱན་དང་དར་དཔྱངས་ཀྱིས་དབང་བསྐུར་བའོ། །གང་གི་ཕྱིར་འདིའི་རྒྱུད་ཕྱི་མ་ལས། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དབང་བསྐུར་བ་ལ། རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པ་དེ་བཞིན་གཤེགས་པ་ལྔའི་ཕྱག་རྒྱས་དེ་བཞིན་གཤེགས་པ་ལྔའི་དབུ་རྒྱན་གྱི་ཚུལ་གྱིས་བྱ་བར་བསྟན་ལ། ནོར་བུའི་རིགས་ཀྱི་དབང་བསྐུར་བར་ནི་རྡོ་རྗེ་རིན་པོ་ཆེའི་མྱུ་གུས་སོ། །གང་རྡོ་རྗེ་དབྱིངས་ཀྱི་དུམ་བུར་མི་བསྐྱོད་པའི་རིགས་གང་ཡིན་པ་དེ་ནི། དེ་བཞིན་གཤེགས་པའི་རིགས་ཡིན་ལ། རིན་ཆེན་འབྱུང་ལྡན་གྱི་རིགས་གང་ཡིན་པ་དེ་ནི་རིན་པོ་ཆེའི་རིགས་སོ། །དེ་བཞིན་དུ་དོན་ཡོད་པར་གྲུབ་པའི་རིགས་གང་ཡིན་པ་དེ་ནི་ལས་ཀྱི་རིགས་ཡིན་ནོ་ཞེས་བྱ་བའི་བར་དུ་དེ་ལྟར་ནི་སྨྲ་བར་ནུས་པ་ཡང་མ་ཡིན་ཏེ་ཅིའི་ཕྱིར་ཞེ་ན། རྡོ་རྗེ་དབྱིངས་ཀྱི་དུམ་བུ་ཐམས་ཅད་ནི་དེ་བཞིན་གཤེགས་པའི་རིགས་


DTG057_Page_0123
[མ་དཔེ་གཟིགས་ན་འདིར་གནོན།]

།སོ་ཞེས་བྱ་བ་ནས། དོན་ཐམས་ཅད་གྲུབ་པའི་དུམ་བུ་ཐམས་ཅད་ནི་ནོར་བུའི་རིགས་སོ་ཞེས་རྒྱུད་ཕྱི་མ་ལས་བཤད་པ་དང༌། བཤད་པའི་རྒྱུད་ལས་ཀྱང་དེ་བཞིན་གཤེགས་པའི་རིགས་དབང་དུ་མཛད་ནས། རྡོ་རྗེ་སེམས་དཔའ་དང༌། རྡོ་རྗེ་རིན་ཆེན་དང༌། རྡོ་རྗེ་ཆོས་དང། རྡོ་རྗེ་ལས་རྣམས་སངས་རྒྱས་ལྔའི་དབུ་རྒྱན་དང་དར་དབྱངས་ཀྱིས་དབང་བསྐུར་བར་བྱའོ། །ཞེས་གསུངས་པ། ཡིན་ནོ། །རྡོ་རྗེ་ནོར་བུ་དེ་ཞེས་བྱ་བ་ནི་བཅོམ་ལྡན་འདས་ཀྱི་ཕྱག་ན་གནས་པའོ། །ལག་པ་གཉིས་སུ་བྱིན་ནོ་ཞེས་བྱ་བ་ནི་ལག་པ་གཉིས་ཀར་ཡང་ངོ༌། །འདིས་ནི་རིན་པོ་ཆེའི་རིགས་ཀྱི་དཀྱིལ་འཁོར་སྤྲུལ་པའི་དང་པོ་སྦྱོར་བའི་ཏིང་ངེ་འཛིན་བསྟན་པ་ཡིན་ནོ། །གཞུང་བསྡུས་པས་གཞུང་རྒྱས་པ་ཁོང་དུ་ཆུད་པར་བྱ་བའི་ཕྱིར་ཏེ། གཞན་དུ་ནི་གླེང་གཞི་དང་བཅས་པར་བརྗོད་དགོས་པར་འགྱུར་རོ། །རྡོ་རྗེ་དབྱིངས་ཀྱི་དཀྱིལ་འཁོར་གྱི་རྒྱལ་པོ་མཆོག་སྒོམ་པ་པོས་ནི་སངས་རྒྱས་ལྔའི་དབུ་རྒྱན་དང་དར་དཔྱངས་ཀྱི་དབང་གིས་དབང་བསྐུར་བར་བྱའོ། །རྡོ་རྗེ་རིན་པོ་ཆེའི་མྱུ་གུས་ནི་མ་ཡིན་ཏེ། དེ་ནི་དོན་གཞན་ཡིན་པའི་ཕྱིར་རོ། །དེ་ནས་ཞེས་བྱ་བ་ལ་སོས་པ་ལ། གཡོན་པ་བསྣེམས་པས་བཞུགས་ནས་གཡས་པའི་ཁུ་ཚུར་གྱིས་རྡོ་རྗེ་ནོར་བུ་འཛིན་པ་དང༌། དཔྲལ་བའི་གནས་སུ་འཇོག་ཅིག་ཆེད་དུ་བརྗོད་ཅིག་ཆེད་དུབ་རྗོད་པ་འདི་ཆེད་དུ་བརྗོད་པ་ཡིན་ཏེ། རྡོ་རྗེ་སེམས་དཔའ་དང༌། རིན་པོ་ཆེ་དང༌། ཆོས་དང༌། ལས་ནི་བསྙེམས་པའི་ཚུལ་གྱིས་བཞུགས་པ་ཡིན་ནོ་ཞེས་བཤད་པ་ཡིན་ནོ། །སངས་རྒྱས་ཀུན་གྱི་འདི་ཞེས་བྱ་བ་ནི་བཅོམ་ལྡན་འདས་རྣམ་པར་སྣང་མཛད་ལས་ཐོབ་པ་གང་ཡིན་པ་དེའོ། །འདི་ཅི་ཞིག་ཡིན་ཞེ་ན། སེམས་ཅན་ཁམས་ལ་དབང་བསྐུར་བ། །ཞེས་བྱ་བ་གསུངས་ཏེ། དེ་བཞིན་གཤེགས་པ་ལ་སོགས་པའི་རིན་པོ་ཆེས་སེམས་ཅན་གྱི་ཁམས་རྣམས་ནམ་མཁའི་སྙིང་པོར་བྱེད་པ། ནི་དབང་བསྐུར་བའོ། །བདག་ཡིན་ཏེ་བདག་གི་ལག་ཏུ་བྱིན་པས་ན་ཞེས་བྱ་བ་ནི་རིན་པོ་ཆེའི་ཕྱག་རྒྱ་གང་ཡིན་པ་ནི་བདག་ཡིན་ལ། བདག་དེ་རིན་པོ་ཆེའི་ཕྱག་རྒྱ་ཡིན་ནོ། །དེ་ལྟར་ཡིན་པ་དེའི་ཕྱིར། རིན་ཆེན་ལ་ནི་རིན་ཆེན་བཞག །ཅེས་བྱའོ། །དེ་ལྟར་རྡོ་རྗེ་རིན་ཆེན་གྱིས་དེ་


DTG057_Page_0124
[མ་དཔེ་གཟིགས་ན་འདིར་གནོན།]

བཞིན་གཤེགས་པ་ཐམས་ཅད་དབང་བསྐུར་ལ་དབང་བསྐུར་བར་གྱུར་པས་ནི་ཉོན་མོངས་པའི་མུན་པའི་གནས་མེད་པས་ཉི་མར་གྱུར་པའི་ཡེ་ཤེས་སུ་འགྱུར་བ་ཡིན་པས། དེ་ནས་ཞེས་བྱ་བ་ལ་སོགས་པས་རྡོ་རྗེ་ཉི་མའི་འོད་ཀྱིས་སྣང་བར་བྱས་སོ་ཞེས་སྟོན་པ་ཡིན་ནོ། །དེ་ནས་བཅོམ་ལྡན་འདས་ཀྱིས་དེ་བཞིན་གཤེགས་པ་ཐམས་ཅད་ཀྱི་སྙིང་པོ་འདི་རང་གི་ཐུགས་ཀ་ནས་བྱུང་ངོ་ཞེས་བྱ་བར་སྦྱར་རོ། །དེ་ནས་ཞེས་བྱ་བའི་སྒྲས་ནི་འདས་མ་ཐག་པའོ། །ཡང་ཞེས་བྱ་བའི་སྒྲས་ནི་འཕགས་པ་ནམ་མཁའི་སྙིང་པོ་ལ་ལྟོས་པས་སོ། །བྱུང་ཆུབ་སེམས་དཔའ་ཆེན་པོ་ཡང་ཡིན་ལ། གཟི་བརྗིད་ཆེན་པོ་ཡང་ཡིན་པས་བྱང་ཆུབ་སེམས་དཔའ་ཆེན་པོ་གཟི་བརྗིད་ཆེན་པོའོ། །དེ་ཉིད་ནི་སེམས་དཔའི་སྟེ། རྡོ་རྗེ་ལྟ་བུའི་རྡོ་རྗེ་འཛིན་པ་ཆེན་པོའོ། །དེའི་དམ་ཚིག་ནི་ཉི་མའི་དཀྱིལ་འཁོར་ལ་སོགས་པའི་གཟུགས་སོ། །དེ་འབྱུང་བ་ནི་རིན་པོ་ཆེ་ལྟ་བུའི་སེམས་དཔའི་རྡོ་རྗེ་གང་ལས་དེ་འབྱུང་བའོ། །དེ་བྱིན་གྱིས་བརླབས་པ་ནི་བརྟན་པར་བྱ་བའི་ཕྱིར། ཏིང་ངེ་འཛིན་གང་ཡིན་པ་དེ་ལ་སྙོམས་པར་ཞུགས་ནས་ཉི་མའི་དཀྱིལ་འཁོར་ལ་སོགས་པ་སྤྲུལ་ཅིང་བསྐྱེད་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་དོན་ཏོ།། དེ་བཞིན་གཤེགས་པ་ཐམས་ཅད་ཀྱི་འོད་ཟེར་རྣམས་ནི་དེ་བཞིན་གཤེགས་པ་ཐམས་ཅད་ཀྱི་འོད་ཟེར་ཏེ། ཉི་མའི་དཀྱིལ་འཁོར་ལ་སོགས་པའི་རང་བཞིན་ནོ། །དེའི་དམ་ཚིག་ནི་རྒྱུའོ། །གང་ལ་མིང་དེ་སྐད་ཅེས་བྱ་བའི་དེ་བཞིན་གཤེགས་པ་ཐམས་ཅད་ཀྱི་སྙིང་པོ་གང་ཡིན་པ་དེ་རང་གི་ཐུགས་ཀ་ནས་བྱུང་བ་ནི་རང་ཉིད་ཀྱིས་སྟོན་པར་གྱུར་པ་སྟེ། བཛྲ་ཏེ་ཛ་ཞེས་བྱ་བའོ། །དེ་ནས་ཕྱག་གཉིས་སུ་གནས་སོ་ཞེས་བྱ་བར་སྦྱར་རོ། །བཅོམ་ལྡན་འདས་ཕྱག་ན་རྡོ་རྗེ་ཞེས་བྱ་བ་ནི་སེམས་དཔའི་རྡོ་རྗེའི་གཟུགས་སོ། །ཉི་མའི་དཀྱིལ་འཁོར་ཆེན་པོ་ཞེས་བྱ་བ་ནི་ནམ་མཁའ་ཐམས་ཅད་ཀྱི་ཚད་དང་མཉམ་པ་ཡིན་པས་དེའི་ཕྱིར་ཉི་མའི་དཀྱིལ་འཁོར་ཆེན་པོ་ཞེས་བྱའོ། །དེ་ནས་བསྡུ་བ་བྱས་ན་དེ་བཞིན་དུ་དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་ཀྱིས་བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་སུ་ཞུགས་ཏེ།


DTG057_Page_0125
[མ་དཔེ་གཟིགས་ན་འདིར་གནོན།]

།ནམ་མཁའ་ཐམས་ཅད་ཁྱབ་པ་རྣམས་རྡོ་རྗེ་ཉི་མའི་དབྱིབས་གཅིག་ཏུ་གྱུར་ལ། དེ་ལྟར་གྱུར་ནས་བྱུང་སྟེ། དེ་ཉིད་ཀྱི་ཕྱག་གཉིས་སུ་གནས་སོ། །དེ་ནས་ཞེས་བྱ་བ་ལ་སོགས་པ་ལ་ཐུགས་ལ་གནས་ཏེ་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་འོད་ཟེར་འགྱུར་པ་ལ་སོས་པ་ཞེས་བྱ་བ་ནི་སེམས་ཅན་གྱི་ཁམས་མ་ལུས་པར་རྡོ་རྗེ་ཉི་མའི་ཏིང་ངེ་འཛིན་བསྐྱེད་པ་ནི། དེ་བཞིན་གཤེགས་པ་ཐམས་ཅད་ཀྱི་འོད་ཟེར་འགྱེད་པའོ། །དེ་ལྟར་དེ་ལ་སོགས་པའི་དེ་བཞིན་གཤེགས་པ་ཐམས་ཅད་ཀྱི་རྫུ་འཕྲུལ་དང་ཆོ་འཕྲུལ་གང་ཡིན་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་འོད་ཟེར་འགྱེད་པ་ལ་སོགས་པ་དང༌། དེ་བཞིན་གཤེགས་པ་ཐམས་ཅད་ཀྱི་རྫུ་འཕྲུལ་དང་ཆོ་འཕྲུལ་རྣམས་ཏེ། དེ་རྣམས་བྱས་ནས་སོ། །སོགས་པའི་སྒྲས་ནི་རྡོ་རྗེ་སེམས་དཔའ་ལ་སོགས་པའི་རྣམ་བར་འཕྲུལ་པ་རྣམས་གཟུང་ངོ༌། །རྡོ་རྗེ་སེམས་དཔའི་ཏིང་ངེ་འཛིན་ནི་ཤིན་ཏུ་གཟི་བརྗིད་ཆེ་བ་ཉིད་དང་ཞེས་བྱ་བ་འདི་ལ་རབ་ཏུ་ཆེ་བའི་གཟི་བརྗིད་མངའ་བས་ན་ཤིང་ཏུ་གཟི་བརྗིད་ཆེ་བ་སྟེ། དེའི་ངོ་བོ་ཉིད་ཤིན་ཏུ་གཟི་བརྗིད་ཆེ་བ་ཉིད་དོ། །ཤིན་ཏུ་གཟི་བརྗིད་ཆེ་བ་ཉིད་གང་ཡིན་ཞེ་ན། སེམས་དཔའི་ཏིང་ངེ་འཛིན་ནི་ཞེས་བྱ་བ་སྨོས་ཏེ། དེ་བཞིན་གཤེགས་པ་ཐམས་ཅད་གཅིག་ཏུ་མཛད་ནས་བྱང་ཆུབ་སེམས་དཔའ་རྡོ་རྗེ་ཉི་མའི་གཟུགས་ཀྱི་རང་བཞིན་དུ་གྱུར་ཏོ་ཞེས་བྱ་བའི་དོན་ཏོ། །རབ་ཏུ་བརྟན་བའི་ཕྱིར་ཞེས་བྱ་བ་ནི་རྣམ་པར་རྟོག་པ་ཐམས་ཅད་ཀྱིས་གཡོ་བར་མི་ནུས་པའི་ཕྱིར་རོ་གཅིག་ཏུ་འདྲེས་པ་ནི་འདུས་པར་གྱུར་པ་སྟེ་རྡོ་རྗེའི་རང་བཞིན་ནོ། །ཨེ་མའོ་དཔེ་མེད་གཟི་བརྗིད་ནི། །ཞེས་བྱ་བ་ནི་འདི་ལ་མཚུངས་པ་ཡོད་པ་ཡིན་པས་ན་དཔེ་མེད་གཟེ་བརྗིད་དོ། །སེམས་ཅན་ཁམས་ཀུན་སྣང་བྱེད་བདག །ཅེས་བྱ་བ་ནི། ཉོན་མོངས་པའི་མུན་ནག་ཐམས་ཅད་སེལ་བར་བྱེད་པའི་ཡེ་ཤེས་ཀྱི་ཉི་མ་སེམས་དང་སེམས་ལས་བྱུང་བའི་མཚན་ཉིད་ཅན་གྱི་སེམས་ཅན་གྱི་ཁམས་ཅན་གྱི་ཁམས་རྣམས་ཀྱི་སྣང་བ་མཛད་པས་ན་ཀུན་དུ་སྣང་བྱེད་དོ། །འདིའི་ཕྲིན་ལས་བསྟན་པ་ཡིན་ནོ། །འདིར་ཅི་ཞིག་ངོ་མཚར་ཆེ་ཞེ་ན། གང་གི་ཕྱིར་ཞེས་བྱ་བ་ལ་སོགས་པ་གསུངས་ཏེ།


DTG057_Page_0126
[མ་དཔེ་གཟིགས་ན་འདིར་གནོན།]

གང་གི་ཕྱིར་སྤྱོད་བར་བྱེད་པའི་གཟི་བརྗིད་ཡིན་ཞེས་བྱ་བར་སྦྱར་རོ། །གང་གི་ཞེ་ན། སངས་རྒྱས་དག་པའི་ཞེས་བྱ་བ་ལ་སོགས་པ་གསུངས་ཏེ། བག་ཆགས་དང་བཅས་པའི་ཉོན་མོངས་པ་སྤངས་པས་དག་པར་གྱུར་བའི་སངས་རྒྱས་བཅོམ་ལྡན་འདས་དེ་རྣམས་ཀྱི་གཟི་བརྗིད་ཀྱང་སྤྱོད་བར་བྱེད་པའི་ཡེ་ཤེས་ཀྱི་ཉི་མ་འབར་བ་ཡིན་པ་ཡིན་བ་འདི་ནི་ངོ་མཚར་ཆེའོ། །འདི་སྐད་སྟོན་པ་ཡིན་ཏེ། མ་དག་པ་དང་ཐ་དད་པའི་ཚུལ་གྱིས་དེ་བཞིན་གཤེགས་པ་སྦྱོང་པ་ཡིན་ནོ། །དེ་རྣམས་ཤིན་ཏུ་དག་པ་ཡིན་པའི་ཕྱིར་བདག་དང་རང་བཞིན་ཐ་མི་དད་པ་ཡིན་བས་བདག་ཉིད་ལ་བྱེད་པ་པོར་འགྱུར་བ་ནི་འགལ་བ་ཡིན་བའི་ཕྱིར། བདག་དེ་རྣམས་སྦྱོང་བར་བྱེད་པ་མ་ཡིན་མོད་ཀྱི་འོན་ཀྱང་གདུལ་བྱ་རྣམས་ཀྱིས་དེ་ལྟར་མཐོང་བ་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ། བྱང་ཆུབ་སེམས་དཔའ་ཆེན་པོ་དྲི་མ་མེད་པའི་གཟི་བརྗིད་དེ། བཀའ་ནོད་ཅིང་བཞུགས་པར་གྱུར་ཏོ་ཞེས་བར་སྦྱར་རོ། །བྱང་ཆུབ་སེམས་དཔའ་ཆེན་པོ་ཡང་ཡིན་ལ་དྲི་མ་མེད་བའི་གཟི་བརྗིད་ཀྱང་ཡིན་པས། བྱང་ཆུབ་སེམས་དཔའ་ཆེན་པོ་དྲི་མ་མེད་པའི་གཟི་བརྗིད་དོ། །དེ་བཞིན་གཤེགས་པ་ཐམས་ཅད་ཀྱི་གཡས་ཕྱོགས་སུ་གནས་སོ་ཞེས་བྱ་བ་ནི་བཅོམ་ལྡན་འདས་རིན་ཆེན་འབྱུང་ལྡན་གྱི་གཡས་ཕྱོགས་སུའོ། །ཡང་ཞེས་བྱ་བ་ནི་ནམ་མཁའི་སྙིང་པོ་ལ་ལྟོས་ནས་ཡང་གི་སྒྲས་གསུངས་པ་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ། བཅོམ་ལྡན་འདས་ཀྱིས་རྡོ་རྗེ་ཉི་མའི་ལག་ཏུ་བྱིན་ནོ་ཞེས་བྱ་བར་སྦྱར་རོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་འོད་ཀྱི་དཀྱིལ་འཁོར་ནི་རྡོ་རྗེ་ཉི་མའི་ཕྱག་རྒྱའོ། །དེ་ལ་དམིགས་བའི་ཏིང་ངེ་འཛིན་གང་ཡིན་པ་དེ་བཞིན་གཤེགས་པ་ཐམས་ཅད་ཀྱི་འོད་ཀྱི་དཀྱིལ་འཁོར་བྱིན་གྱིས་བརླབ་པ་རྡོ་རྗེ་ཞེས་བྱ་བ་སྟེ། དེ་ལ་སྙོམས་པར་ཞུགས་པ་ནི་རྡོ་རྗེ་ཉི་མ་སྦྱིན་པའི་རྣམ་པར་ཏིང་ངེ་འཛིན་ལ་སྙོམས་པར་ཞུགས་སོ་ཞེས་བྱ་བའི་ཐ་ཚིག་གོ །དེ་ཇི་ལྟ་བུ་ཡིན་ཞེ་ན། དེ་བཞིན་གཤེགས་པ་ཐམས་ཅད་ཀྱི་འོད་ཀྱི་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་འོད་ཟེར་རྣམས་ནི་དེ་བཞིན་གཤེགས་པ་ཐམས་ཅད་ཀྱི་འོད་ཟེར་ཏེ། ཉི་མའི་


DTG057_Page_0127
[མ་དཔེ་གཟིགས་ན་འདིར་གནོན།]

འོད་ཟེར་རྣམས་སོ། །དེ་རྣམས་ཀྱི་དམ་ཚིག་ནི་རྒྱུ་སྟེ། རྡོ་རྗེ་ཉི་མའི་དཀྱིལ་འཁོར་རོ། །ཅིའི་ཕྱིར་ཞེས་ན། སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་རྣམས་ཀྱི་གཟི་བརྗིད་མཚུངས་པ་མེད་པ་སྟེ། ཉི་མའི་དཀྱིལ་འཁོར་གྱི་ཕྱག་རྒྱའི་གཟུགས་ཀྱིས་བདེ་བ་དང་ཡིད་བདེ་བ་དང་ཡིད་བདེ་ཐམས་ཅད་མྱོང་བར་བྱ་བའི་ཕྱིར། འདི་ལ་དཔེ་ཡོད་པ་མ་ཡིན་པས་ན་མཚུངས་པ་མེད་སྟེ། རྒྱུར་གྱུར་པ་དེ་ཞེས་བྱ་བའི་ཐ་ཚིག་གོ །དེ་བཞིན་གཤེགས་པ་ཐམས་ཅད་ཀྱི་རང་གི་འོད་འབར་བའོ། །དེ་ཐོབ་པ་ནི་ཐོབ་པར་གྱུར་པའོ། དེ་ཉིད་ནི་དངོས་གྲུབ་དམ་པ་སྟེ། དེའི་ཕྱིར་ནི་དེའི་ཕྱིར་ནི་དེའི་དོན་དུ་སྟེ་བྱང་ཆུབ་སེམས་དཔའ་ཆེན་པོ་རྡོ་རྗེ་ཉི་མ་གྲུབ་བའི་ཕྱིར་ཞེས་བྱ་བའི་ཐ་ཚིག་གོ །བར་གྱི་ཞེས་བྱ་བའི་སྒྲས་ནི་བྱང་ཆུབ་ཏུ་སེམས་བསྐྱེད་པ་ལ་སོགས་པ་བསྡུའོ། །དེ་བཞིན་དུ་ཞེས་བྱ་བ་ནི་སངས་རྒྱས་ལྔའི་དབུ་རྒྱན་དང་དར་དཔྱངས་ཀྱི་དབང་གིས་དབང་བསྐུར་ནས་སོ། །རྡོ་རྗེའི་འོད་ཅེས་བྱ་བ་ནི་འདི་ལ་མི་ཕྱེད་པའི་འོད་མངའ་བས་ན་རྡོ་རྗེའི་འོད་དེ། གང་གི་ཕྱིར་ཉི་མའི་ཕྱག་རྒྱ་དེ་ནི་རི་བོ་ཡང་བརྟོལ་ཏེ་སྣང་བར་བྱེད་པ་ཡིན་པས་དེས་འབད་པར་བྱེད་པའི་ཕྱིར་རྡོ་རྗེའི་འོད་དོ། །རྡོ་རྗེ་ཉི་མ་དེས་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་སྣང་བར་བྱེད་ཅིང་སེམས་ཅན་རྣམས། དེ་བཞིན་གཤེགས་པ་ལ་སོགས་པའི་རང་བཞིན་དུ་བྱེད་པའོ། །སངས་རྒྱས་ཀུན་གྱི་སྣང་བ་འདི། །ཞེས་བྱ་བ་ནི། བཅོམ་ལྡན་འདས་ཀྱི་གསལ་བ་གང་ཡིན་པ་དེའོ། །འདི་ཇི་ལྟ་བུ་ཡིན་ཞེ་ན། མི་ཤེས་མུན་ནག་འཇོམས་བྱེད་པ། །ཞེས་བྱ་བ་གསུངས་ཏེ། མི་ཤེས་པ་ནི་མ་རིག་པའོ། །མི་ཤེས་པ་དེ་ཉིད་ནི་མུན་པ་མུན་པ་མུན་ནག་གོ །དེ་འཇོམས་པར་བྱེད་པ་ནི་འཇིག་པར་བྱེད་པའོ། །ཤིན་ཏུ་རྡུལ་ཕྲན་ཇི་སྙེད་པ། །།ཞེས་བྱ་བ་ནི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་གྲངས་དང་མཉམ་བའོ། །ཉི་མའི་འོད་པས་ཤིང་ཏུ་ལྷག །ཅེས་བྱ་བ་ནི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་ཀྱི་གྲངས་སྙེད་ཀྱི་ཉི་མ་བས་ལྷག་པ་ཡོད་པའི་རྡོ་རྗེ་ཉི་མའོ། །འདི་སྐད་སྟོན་པ་ཡིན་ཏེ། རྡོ་རྗེ་ཆོས་ཀྱི་དབྱིངས་སྟོང་པ་ཉིད་ཀྱི་རང་བཞིན་གྱི་


DTG057_Page_0128
[མ་དཔེ་གཟིགས་ན་འདིར་གནོན།]

དེ་བཞིན་གཤེགས་པ་ཐམས་ཅད་ཀྱི་སྐུ་དེ་ལས་བྱུང་བའི་རྡོ་རྗེ་ཉི་མ་མཐའ་ཡས་པ་ཡིན་པས་ན། ཤིན་ཏུ་རྡུལ་ཕྲན་ཇི་སྙེད་པའི། །ཉི་མའི་འོད་བས་ཤིན་ཏུ་ལྷག །ཅེས་བྱའོ། །དེ་ལྟར་རྡོ་རྗེ་ཉི་མའི་འོད་ཀྱིས་དེ་བཞིན་གཤེགས་པ་ཐམས་ཅད་སྣང་བར་བྱས་ནས། སྒྲིབ་པ་ཐམས་ཅད་དང་བྲལ་བའི་བྱམས་པའི་བདག་ཉིད་ཅན་དུ་གྱུར་པ་ཡིན་པས། དེ་ནས་ཞེས་བྱ་བ་ལ་སོགས་པས་བྱམས་པའི་སྦྱིན་པའི་ཚུལ་གསུངས་པ་ཡིན་ནོ། །བཅོམ་ལྡན་འདས་ཀྱིས་དེ་བཞིན་གཤེགས་པ་ཐམས་ཅད་ཀྱི་སྙིང་པོ་འདི་རང་གི་ཐུགས་ཀ་ནས་ཕྱུང་ངོ་ཞེས་བྱ་བར་སྦྱར་རོ། །ཡང་ཞེས་བྱ་བ་ནི་རྡོ་རྗེ་ཉི་མ་ལ་ལྟོས་པའོ། །བྱང་ཆུབ་སེམས་དཔའ་ཆེན་པོ་རིན་པོ་ཆེའི་དཔལ་ཞེས་བྱ་བ་ནི་རིན་པོ་ཆེའི་ཏོག་ཅན་གྱི་རིན་པོ་ཆེ་ཡང་དག་པར་བསྒྲེང་ཞིང་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱེད་པ་ཉིད་ཀྱིས་ན་ཐམས་ཅད་ལས་མཆོག་ཏུ་གྱུར་པའི་རིན་པོ་ཆེ་བསྒྲེང་བའི་བཅོམ་ལྡན་འདས་ནི། བྱང་ཆུབ་སེམས་དཔའ་རིན་ཆེན་དཔལ་ཏེ་དེ་ཉིད་ནི་སེམས་དཔའི་རྡོ་ཇེའོ། །དེའི་དམ་ཚིག་ནི་རྒྱལ་མཚན་ལ་སོགས་པའི་གཟུགས་སོ། །དེ་འབྱུང་བ་ནི་སེམས་དཔའི་རྡོ་རྗེའི་གཟུགས་ཀྱི་རིན་པོ་ཆེ་གང་ལས་སོ། །དེ་བྱིན་གྱིས་བརླབ་བའི་ཕྱིར་རྡོ་རྗེ་ལྟར་མི་ཕྱེ་པའི་ཏིང་ངེ་འཛིན་གང་ལ་མིད་དེ་སྐད་ཅེས་བྱ་བ་དེ་ལ་སྙོམས་བར་ཞུགས་བ་ནི་རྒྱལ་མཚན་ལ་སོགས་པ་སྤྲུལ་ཅིང་བསྐྱེད་པའི་རྣམ་པར་ཐུགས་རྩེ་གཅིག་ཏུ་མཛད་དོ་ཞེས་བྱ་བའི་དོན་ཏོ། །དེ་བཞིན་གཤེགས་པ་ཐམས་ཅད་ཀྱི་དགོངས་པ་ནི་བྱམས་བའི་སྦྱིན་བས་སེམས་ཅན་གྱི་ཁམས་མགུ་བར་བྱ་བར་མངོན་བར་བཞེད་བའོ། །དེ་ཡོངས་སུ་རྫོགས་པར་བྱེད་པ་ནི་ཕྱོགས་བཅུར་མི་དམིགས་པའི་བྱམས་པའི་མཐུས་སེམས་ཅན་རྣམས་ཀྱི་ཕན་པ་དང་བདེ་བས་བསྡུས་པ་གྲུབ་བར་ཡོངས་སུ་དགའ་བའི་བྱང་ཆུབ་སེམས་དཔའི་རྡོ་རྗེ་དབལ་གྱི་རང་བཞིན་ནོ། །དེའི་དམ་ཚིག་ནི་རྒྱུ་སྟེ་མིང་དེ་སྐད་ཅེས་བྱ་བའི་དེ་བཞིན་གཤེགས་པ་ཐམས་ཅད་ཀྱི་སྙིང་པོ་གང་ཡིན་པའི་སྙིང་པོ་འདི་རང་གི་ཐུགས་ཀ་ནས་ཕྱུང་བར་གྱུར་པ་ནི། བཛྲ་ཀེ་ཏུ་ཞེས་བྱ་བའོ། །བཅོམ་ལྡན་འདས་ཞེས་བྱ་བ་ལ་སོགས་པ་ལ་བཅོམ་


DTG057_Page_0129
[མ་དཔེ་གཟིགས་ན་འདིར་གནོན།]

ལྡན་འདས་རྡོ་རྗེ་འཛིན་པ་སེམས་དཔའི་རྡོ་རྗེའི་གཟུགས་ཀྱིས་ཕྱག་གཉིས་སུ་གནས་སོ་ཞེས་བྱ་བར་སྦྱར་རོ། །རྒྱལ་མཚན་ཞེས་བྱ་བ་ལ་སོགས་པ་ལ་ཁ་དོག་སྣ་ཚོགས་པ་ནི་དཀར་པོ་ལ་སོགས་པའོ། །དེ་ཉིད་ནི་གཟུགས་ཏེ་རང་བཞིན་ནོ། །རྒྱན་ནི་དར་དང་མུ་ཏིག་ཆུན་འཕྱང་ལ་སོགས་པའི་རྒྱན་ནོ། །དབྱིབས་སྣ་ཚོགས་པ་ནི་རིང་པོ་ལ་སོགས་པ་རྣམ་པ་བརྒྱད་དོ། །དེ་ཐམས་ཅད་གང་ལ་ཡོད་པ་དེ་ནི་ཁ་དོག་གཟུགས་དང་རྒྱན་དང་དབྱིབས་སྣ་ཚོགས་པ་སྟེ། དེ་ལྟ་བུ་རྒྱལ་མཚན་དུ་གྱུར་ཏེ་བྱུང་ཞིང་འཐོན་ནས་རྣམ་པར་སྣང་མཛད་ཀྱི་ཐུགས་སུ་ཞུགས་ཏེ་གཅིག་ཏུ་འདྲེས་པར་གྱུར་ནས་རྡོ་རྗེ་རྒྱལ་མཚན་གྱི་དབྱིབས་སུ་གྱུར་ཏེ། བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་གཉིས་སུ་གནས་སོ། །དེ་ནས་ཞེས་བྱ་བ་ལ་སོགས་པ་ལ་བྱང་ཆུབ་སེམས་དཔའ་ཆེན་པོ་རིན་པོ་ཆེ་དབལ་གྱི་སྐུར་གྱུར་ནས། ཐུགས་ལ་གནས་ནས་ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་རིན་པོ་ཆེའི་རྒྱལ་མཚན་ཞེས་བྱ་བ་ལ་སོགས་པ་ལ། དེ་བཞིན་གཤེགས་པ་ཐམས་ཅད་ཀྱི་ཡིན་པོ་ཆེའི་རྒྱལ་མཚན་མངོན་པར་བསྒྲེང་བ་ན་བྱང་ཆུབ་སེམས་དཔའ་ཆེན་པོ་རྡོ་རྗེ་དཔལ་གྱི་རང་བཞིན་རྫོགས་པར་བྱེད་པ་ལ་དེ་བཞིན་གཤེགས་པ་ཐམས་ཅད་ཀྱི་རིན་པོ་ཆེའི་དབལ་བསྒྲེང་བ་ཞེས་བྱའོ། །དེ་ལ་སོགས་བ་སང་རྒྱས་ཐམས་ཅད་ཀྱི་རྫུ་འཕྲུལ་དང་ཆོ་འཕྲུལ་གང་དག་ཡིན་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་རིན་པོ་ཆེའི་རྒྱལ་མཚན་བསྒྲེང་བ་ལ་སོགས་པ་སང་རྒྱས་ཐམས་ཅད་ཀྱི་རྫུ་འཕྲུལ་དང་ཆོ་འཕྲུལ་རྣམས་ཏེ་དེ་བྱས་ནས་སོ། །སོགས་པའི་སྒྲས་ནི་ད་དང་ཕ་རོལ་ཏུ་ཕྱིན་པ་ལ་སོགས་པ་ག་ཞན་རྣམས་ཀྱང་བསྟན་སྟེ། དེ་བཞིན་དུ་ཐམས་ཅད་ལ་ཡང་ཤེས་པར་བྱའོ། །རྡོ་རྗེ་སེམས་དཔའི་ཏིང་ངེ་འཛིན་རིན་པོ་ཆེའི་དཔལ་ཉིད་དང་ཞེས་བྱ་བ་ནི་བྱང་ཆུབ་སེམས་དཔའ་རིན་པོ་ཆེའི་དབལ་གྱི་ཏིང་ངེ་འཛིན་དེ་ལ་དམིགས་པ་ཉིད་ཀྱིས་ན་རིན་པོ་ཆེ་ཆེན་པོའི་དབལ་གྱི་ཏིང་ངེ་འཛིན་ཏོ། །དེའི་ངོ་བོ་ཉིད་ཡིན་བས་ན་ཡིན་པོ་ཆེ་ཆེན་པོའི་དབལ་བྱི་དོ། །དེ་ཉིད་ཀྱིས་ན་རྡོ་རྗེ་སེམས་དཔའི་ཏིང་ངེ་འཛིན་ནི།


DTG057_Page_0130
[མ་དཔེ་གཟིགས་ན་འདིར་གནོན།]

ཞེས་བྱ་བ་སྟེ། འཇིག་རྟེན་གྱི་ཁམས་ཀྱི་རྡུལ་ཕྲ་རབ་དང་མཉམ་པའི་དེ་བཞིན་གཤེགས་པ་རྣམས་གཅིག་ཏུ་མཛད་ནས། བྱང་ཆུབ་སེམས་དཔའ་ཆེན་པོ་རྡོ་རྗེ་དབལ་གྱི་སྐུར་བསྐྱེད་པ་གང་ཡིན་པ་འདི་ནི། འདིར་རྡོ་རྗེ་སེམས་དཔའི་ཏིང་དེ་འཛིན་ནི་རིན་པོ་ཆེ་ཆེན་པོའི་དབལ་ཏེ། འདིས་ནི་མང་པོ་གཅིག་ཏུ་བྱས་པ་གསུངས་པ་ཡིན་ནོ། །ཤིན་ཏུ་བརྟན་པའི་ཕྱིར་ཞེས་བྱ་བ་འདིས་ཀྱང་རྣམ་པར་རྟོག་བ་མེད་པས་མི་ཕྱེད་པོ་ཉེད་དང༌། འདྲེས་ཤིང་གཅིག་ཏུ་གྱུར་པའི་རྒྱུད་གསུངས་པ་ཡིན་ནོ། །ཨི་མའོ་འདྲ་མེད་དབལ་གྱི་བདག་ཡིན་ནོ། །ཞེས་བྱ་བ་ལ། འདྲ་བ་མེད་པ་ནི་གཉིས་པ་མེད་པའོ། །སངས་རྒྱས་ཐམས་ཅད་ཀྱི་ངོ་བོར་གྱུར་བའི་ཡིད་བཞིན་གྱི་ནོར་བུའི་རྒྱལ་མཚན་གྱིས་ཉེ་བར་མཚན་པའི་ཕྱིར་དབལ་ལོ། །བདག་ཡིན་ནོ་ཞེས་བྱ་བ་ནི་བདག་ཉིད་ཡིན་བར་སྟོན་ཏོ། །ཁྱོད་སུ་ཞིག་གི་ཡིན་ཞེ་ན། དོན་ཀུན་གྲུབ་པ་སྟེ་ཟེས་བྱ་བ་གསུངས་ཏེ། དོན་ཐམས་ཅད་གྲུབ་པ་གང་ཡིན་པ་དེ་ནི་དོན་ཀུན་གྲུབ་པ་སྟེ། དེ་རྣམས་ཀྱི་འདྲ་བ་མེད་པའི་དབལ་བདག་ཡིན་ནོ། །འདི་ལ་ངོ་མཚར་ཅི་ཞིག་ཡོད་ཅེ་ན། གང་གི་ཕྱིར་དགོངས་པ་ཐམས་ཅད་ཡོངས་སུ་རྫོགས་ཤིང༌། དོན་རྣམས་ཐམས་ཅད་རྫོགས་བར་བྱེད་བ་ཞེས་བྱ་བ་སྨོས་ཏེ། འདི་ནི་ངོ་མཚར་ཆེའོ། །འདི་སྐད་སྟོན་པ་ཡིན་ཏེ། བདག་གི་རང་བཞིན་དུ་གྲུབ་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་དགོངས་པ་ཐམས་ཅད་ཡོངས་སུ་རྫོགས་པར་བྱེད་པ་ཡིན་ཏེ། དེ་རྣམས་བདག་དང་ཐ་མི་དད་ཀྱང་བྱང་ཆུབ་སེམས་དཔའ་ཆེན་པོ་རིན་ཆེན་དབལ་གྱི་ཏིང་ངེ་འཛིན་གྲུབ་བའི་རང་བཞིན་ནི་དོན་ཐམས་ཅད་ཡོངས་སུ་རྫོགས་བར་བྱེད་བ་ཡིན་ནོ་ཞེས་གདུལ་བྱ་རྣམས་ཀྱིས་མཐོང་བ་འདི་ནི་ངོ་མཚར་ཆེའོ། །དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ནི་བཅོམ་ལྡན་འདས་རིན་ཆེན་འབྱུང་ལྡན་གྱིའོ། །གཡོན་ཕྱོགས་སུ་ཟླ་བའི་དཀྱིལ་འཁོར་ལ་གནས་པ་ནི་གཡོན་ལོགས་ཀྱི་ཟླ་བའི་དཀྱིལ་འཁོར་ལ་ཞུགས་པའོ། །ཡང་བདའ་ནོ་ད་ཅིང་བཞུགས་པར་གྱུར་ཏོ་ཞེས་བྱ་བ་ནི་རྡོ་རྗེ་གཟི་བརྗིད་ཀྱི་གཟུགས་ཀྱིས་དེ་བཞིན་གཤེགས་པ་ཐམས་ཅད་ལས་རྡོ་རྗེ་ཉི་


DTG057_Page_0131
[མ་དཔེ་གཟིགས་ན་འདིར་གནོན།]

མའི་འོད་ཀྱིས་སྣང་བར་བྱ་བའི་ཕྱིར། རྗེས་སུ་གསང་བ་ནོད་པ་ཡིན་ལ། དེ་ལྟར་ནི་བྱམས་པའི་བདག་ཉིད་ཅན་གྱི་སྦྱིན་པའི་ཕ་རོལ་ཏུ་ཕྱིན་པ་ལ་དེས་པར་སྦྱོར་བ་ཡིན་ནོ་ཞེས་བྱ་བ་ན་ཡང་གི་སྒྲའི་དོན་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ། བཅོམ་ལྡན་འདས་ཀྱིས་རྡོ་རྗེ་རྒྱལ་མཚན་དེ། དེའི་ལག་པ་གཉིས་སུ་བྱིན་ནོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་རྒྱལ་མཚན་བསྒྲེང་བ་ནི་ཡིད་བཞིན་གྱི་ནོར་བུའི་རྒྱལ་མཚན་ནོ། །དེ་བྱིན་གྱིས་བརླབས་པ་ལ་དམིགས་པ་གང་ཡིན་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་རིན་པོ་ཆེའི་བྱིན་གྱི་རླབས་རྡོ་རྗེ་ཞེས་བྱ་སྟེ། དེ་ལ་སྙོམས་པར་ཞུགས་པ་ན་ཡིད་བཞིན་གྱི་ནོར་བུའི་རྒྱལ་མཚན་སྦྱིན་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་ཐ་ཚིག་གོ །དེ་བཞིན་གཤེགས་པ་ཞེས་བྱ་བ་ལ་སོགས་པ་ལ། དེ་བཞིན་གཤེགས་པ་ཐམས་ཅད་ཀྱི་ནོར་བུ་ཡིད་བཞིན་གྱི་རྒྱལ་པོ་ཞེས་བྱ་བ་ལ། ནོར་བུ་ནི་ཡིད་བཞིན་གྱི་ནོར་བུའོ། །དེས་ཉེ་བར་མཚོན་པའི་བྱང་ཆུབ་གང་ཡིན་པ་དེ་ལ་ཡང་དེ་སྐད་ཅེས་བྱ་སྟེ། དེས་བསྒྲེང་བ་ནི་བྱང་ཆུབ་སེམས་དཔའི་ནོར་བུ་ཡིད་བཞིན་གྱི་ནོར་བུའི་རྒྱལ་པོའི་རྒྱལ་མཚན་བསྐྱེད་པའོ། །དེའི་དམ་ཚིག་ནི་རྒྱུའོ། །ཅིའི་ཕྱིར་ཞེ་ན། སེམས་ཅན་གྱི་ཁམས་ཞེས་བྱ་བ་ལ་སོགས་པ་གསུངས་ཏེ། སེམས་ཅན་གྱི་ཁམས་ཀྱི་རེ་བ་ཐམས་ཅད་ཡོངས་སུ་བསྐང་བ་ནི་འཇིག་རྟེན་དང་འཇིག་རྟེན་ལས་འདས་པའི་དོན་རྣམས་ཐོབ་པའོ། །དེས་བདེ་བ་དང་ཡིད་བདེ་བ་ཐམས་ཅད་མྱོང་བར་བྱ་བ་ནས་ཞེས་བྱ་བ་ནི་སྔ་མ་བཞིན་ནོ། །དེ་བཞིན་གཤེགས་པ་ཐམས་ཅད་ཀྱི་དོན་ཆེན་པོ་དང་དངོས་གྲུབ་དམ་པ་ཐོབ་པ་ནི། བྱང་ཆུབ་སེམས་དཔའ་ཆེན་པོ་རིན་ཆེན་དབལ་དུ་གྲུབ་པའོ། །དེ་བཞིན་དུ་ཞེས་བྱ་བ་ནི་སངས་རྒྱས་ཐམས་ཅད་ཀྱི་དབུ་རྒྱན་དང་དར་དཔྱངས་ཀྱི་དབང་གིས་དབང་བསྐུར་ནས་སོ། །རྡོ་རྗེ་རྒྱལ་མཚན་ཞེས་བྱ་བ་ནི་རྡོ་རྗེ་དཔལ་དང་བཅས་པའི་རྒྱལ་མཚན་འཛིན་པས་ཉེ་བར་མཚན་པའི་ཕྱིར་རྡོ་རྗེ་རྒྱལ་མཚན་ཞེས་གསུངས་སོ། །


DTG057_Page_0132
[མ་དཔེ་གཟིགས་ན་འདིར་གནོན།]

སྦྱིན་པའི་ཕ་རོལ་ཏུ་ཕྱིན་པ་ལ་སྦྱོར་དུ་བཅུག་ནས་ཞེས་བྱ་བའི་བར་གྱི་ཏིང་ངེ་འཛིན་གྱིས་རང་གི་རྣམ་པར་ཐར་པ་ལ་ངེས་པར་སྦྱར་བས། དེ་བཞིན་གཤེགས་པ་ལ་སོགས་པ་དང༌། དེ་བཞིན་གཤེགས་པ་དང་སེམས་ཅན་གྱི་ཁམས་རྣམས་རང་གི་རང་བཞིན་ལ་སྦྱོར་བར་བྱེད་ཅེས་བྱ་བའི་དོན་ཏོ། །མགུ་བར་གྱུར་ནས་ཆེད་དུ་བརྗོད་པ་འདི་གསུངས་པ་ཡིན་ཏེ། སངས་རྒྱས་ཀུན་གྱི་འདི་ཞེས་བྱ་བ་ནི་ལག་ན་གནས་པའི་ཡིད་བཞིན་གྱི་ནོར་བུའི་རྒྱལ་མཚན་གསུངས་པ་ཡིན་ནོ། །ལས་ཅི་ཞིག་བྱེད་པ་ཡིན་ཞེ་ན་དགོངས་པ་ཀུན་ཡོངས་སུ་རྫོགས་པར་བྱེད་པ་ཡིན་ཞེས་བྱ་བ་གསུངས་ཏེ། རིན་ཆེན་དཔལ་སྐྱེད་པར་བྱེད་པའོ། །ཡིད་བཞིན་གྱི་ནོར་བུའི་རྒྱལ་མཚན་ཞེས་བྱ་བ་ནི་བྱམས་པའི་སྦྱིན་པའི་རང་བཞིན་གྱི་སྦྱིན་པའི་ཕ་རོལ་ཏུ་ཕྱིན་པ་ཐོས་པ་དང༌། བསམ་པ་དང་བསྒོམ་པའི་རང་བཞིན་ཐོབ་པར་བྱེད་པ་ནི་ཡིད་བཞིན་གྱི་ནོར་བུའི་རྒྱལ་མཚན་ནོ། །དེ་ཉིད་ཀྱིས་ན་སྤྱིན་པའི་ཕ་རོལ་ཏུ་ཕྱིན་པའི་ཚུལ་ཞེས་གསུངས་པ་ཡིན་ནོ། །དེ་ལྟར་རྡོ་རྗེ་དཔལ་གྱིས་དེ་བཞིན་གཤེགས་པ་ཐམས་ཅད་སྦྱིན་པའི་ཕ་རོལ་ཏུ་ཕྱིན་པ་ལ་སྦྱར་ནས། རྡོ་རྗེ་བཞད་པ་ཆོས་སྨྲ་བའི་ཚུལ་གྱིས་ཇི་ལྟར་དེ་རྣམས་འཛུམས་པར་འགྱུར་བ་ལ་རབ་ཏུ་གཞག་པ་དེ་ལྟར་བསྟན་པ་ནི། དེ་ནས་ཞེས་བྱ་བ་ལ་སོགས་པ་ཡིན་ཏེ། དེ་ནས་བཅོམ་ལྡན་འདས་ཀྱིས་སྙིང་པོ་འདི་རང་གི་ཐུགས་ཀ་ནས་ཕྱུང་ངོ་ཞེས་བྱ་བར་སྦྱར་རོ། །ཡང་ཞེས་བྱ་བ་ནི་རྡོ་རྗེ་དཔལ་ལ་ལྟོས་པས་སོ། །རྟག་པར་དགའ་ཞིང་མགུ་བའི་དབང་པོ་ཞེས་བྱ་བ་ནི་དད་པ་ལ་སོགས་པའི་དབང་པོ་རྣམས་ཀྱིས་རྟག་པར་དགའ་ཞིང་མགུ་བ་གང་ཡིན་པ་སྟེ། དེ་ནི་བྱང་ཆུབ་སེམས་དཔའ་ཆེན་པོ་ཡང་ཡིན་ལ་རྟག་པར་དགའ་ཞིང་མགུ་བའི་དབང་པོ་ཡང་ཡིན་པས་བྱང་ཆུབ་སེམས་དཔའ་ཆེན་པོ་རྟག་པར་དགའ་ཞིང་མགུ་བའི་དབང་པོའོ། དེ་ཉིད་ནི་རྡོ་རྗེ་སེམས་དཔའི་རང་བཞིན་གྱི་རྡོ་རྗེ་འཛིན་པ་ཆེན་པོའོ། །དེ་ཉིད་ནི་དམ་ཚིག་སྟེ་འཛུམ་པར་གྱུར་པ་ཞེས་བྱ་བའོ། །དེ་ལས་བྱུང་བ་ནི་རིན་པོ་ཆེ་ལྟ་བུའི་སེམས་དཔའ་རྡོ་རྗེ་གང་ལས་གྱུར་པའོ། །དེ་བྱིན་གྱིས་བརླབས་བ་ནི་བརྟན་པར་བྱ་བའི་ཕྱིར་ཏིང་ངེ་འཛིན་


DTG057_Page_0133
[མ་དཔེ་གཟིགས་ན་འདིར་གནོན།]

གང་ལ་མིང་དེ་སྐད་ཅེས་བྱ་བ་དེ་ལ་སྙོམས་པར་ཞུགས་ནས་འཛུམ་པར་གྱུར་པ་ལ་སོགས་པ་སྤྲུལ་པ་སྐྱེད་པར་བྱེད་པའི་རྣམས་པར་ཐུགས་རྩེ་གཅིག་ཏུ་མཛད་པའོ། །འདི་ཞེས་བྱ་བ་ནི་སྙིང་པོ་ཐུགས་ལ་གནས་པ་གསུངས་པའོ། །དེ་བཞིན་གཤེགས་པ་ཐམས་ཅད་ཀྱི་དགྱེས་པ་ནི་རྡོ་རྗེ་ཞད་པའོ། །དེ་སྐྱེད་པར་བྱེད་པའི་རྒྱུ་ནི་དགྱེས་པའི་དམ་ཚིག་གོ །མིང་དེ་སྐད་ཅེས་བྱ་བའི་བཞིན་གཤེགས་པ་ཐམས་ཅད་ཀྱི་སྙིང་པོ་གང་ཡིན་པ་དེ་རང་གི་ཐུགས་ཀ་ནས་ཕྱུང་བར་གྱུར་པ་ནི། བཛྲ་ཧཱས་ཞེས་བྱ་བའོ། །དེ་ནས་ཞེས་བྱ་བ་ལ་སོགས་པ་ལ། བཅོམ་ལྡན་འདས་རྡོ་རྗེ་འཛིན་པ་དེ་ཉིད་རྡོ་རྗེ་འཛུམ་པའི་དབྱིབས་སུ་གྱུར་ཏེ་ཕྱག་གཉིས་སུ་གནས་སོ་ཞེས་བྱ་བར་སྦྱར་རོ། །བཅོམ་ལྡན་འདས་རྡོ་རྗེ་འཛིན་པ་དེ་ཉིད་ཅེས་བྱ་བ་ནི་སེམས་དཔའ་རྡོ་རྗེའི་ཚུལ་ལོ། །དེ་བཞིན་གཤེགས་པ་ཐམས་ཅད་ཀྱི་འཛུམ་པར་གྱུར་ཏེ་ཞེས་བྱ་བ་ནི་རྡོ་རྗེ་གཉིས་ཀྱི་བར་དུ་ཆུད་པའི་སོའི་ཕྲེང་བ་ནི་འཛུམ་པའི་ཕྱག་རྒྱའི་མཚན་ཉིད་དོ། །དེ་ལྟ་བུའི་གཟུགས་སུ་གྱུར་ཏེ་བྱུང་ནས་བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་སུ་ཞུགས་ཏེ་གཅིག་ཏུ་འདྲེས་པར་གྱུར་ནས། རྡོ་རྗེ་འཛུམ་པའི་དབྱིབས་ནམ་མཁའ་ཐམས་ཅད་ཁྱབ་པར་ཡང་དག་པར་གྱུར་ནས་བསྡུ་བ་མཛད་དེ་ཐུགས་ལས་བྱུང་ནས་དེ་ཉིད་ཀྱི་ཕྱག་གཉིས་སུ་གནས་སོ། །དེ་ནས་ཞེས་བྱ་བ་ལ་སོགས་པ་ལ། དེ་བཞིན་གཤེགས་པའི་སྐུ་ནི་བྱང་ཆུབ་སེམས་དཔའ་ཆེན་པོའི་ལུས་སུ་གྱུར་པ་སྟེ། བཅོམ་ལྡན་འདས་ཀྱི་ཐུགས་ལ་གནས་ཏེ་ཆེད་དུ་བརྗོད་པ་ནི་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་རྨད་དུ་བྱུང་བ་ཞེས་བྱ་བ་ལ་སོགས་པ་ལ། དེ་བཞིན་གཤེགས་པ་ཐམས་ཅད་ཀྱི་རྨད་དུ་བྱུང་བ་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་རྨད་དུ་བྱུང་བ་སྟེ། འཛུགས་པ་ཞེས་བྱ་བ་ནི་ཅུང་ཟད་བཞད་པའི་ཚུལ་ལོ། །འཛུམ་པ་ནི་རྣམ་པར་རྟོག་པ་ལས་བྱུང་བ་ཡིན་ལ། རྣམ་པར་རྟོག་པ་དེ་ཡང་སངས་རྒྱས་ལ་མི་མངའ་བ་ལས། དེ་མེད་པར་དེ་མི་འབྱུང་བ་འདི་ནི་རྨད་དུ་བྱུང་བ་ཡིན་ཏེ། གདུལ་བྱ་རྣམས་ལ་རྡོ་རྗེ་བཞད་པའི་ཏིང་


DTG057_Page_0134
[མ་དཔེ་གཟིགས་ན་འདིར་གནོན།]

ངེ་འཛིན་བསྐྱེད་པ་ལ་སོགས་པ་སངས་རྒྱས་ཐམས་ཅད་ཀྱི་རྣམ་པར་འཕྲུལ་པ་མཛད་དོ་ཞེས་བྱ་བའི་དོན་ཏོ། །སོགས་པའི་སྒྲས་ནི་གཞན་དག་ཀྱང་བསྡུའོ། །རྡོ་རྗེ་སེམས་དཔའི་ཏིང་ངེ་འཛིན་ནི་རྟག་ཏུ་དགའ་ཞིང་རབ་ཏུ་མགུ་བའི་དབང་པོ་ཡིན་པ་ཉིད་དང་ཞེས་བྱ་བ་ནི་འཇིག་རྟེན་གྱི་ཁམས་ཐམས་ཅད་རྡུལ་ཕྲ་རབ་དང་མཉམ་པའི་དེ་བཞིན་གཤེགས་པ་རྣམས་གཅིག་ཏུ་མཛད་ནས་རྡོ་རྗེ་བཞད་པའི་སྐུ་གཅིག་པུར་བསྐྱེད་པ་གང་ཡིན་པ་དེ་ནི་རྟག་ཏུ་དགའ་ཞིང་རབ་ཏུ་མགུ་བའི་དབང་པོའོ། །དེའི་ངོ་བོ་ཉིད་ཡིན་པས་ན་དེར་དེ་ལ་རྟག་ཏུ་དགའ་ཞིང་རབ་ཏུ་མགུ་བའི་དབང་པོ་ཉིད་དང་ཞེས་བྱའོ། །སུ་ཡིན་ཞེ་ན། རྡོ་རྗེ་སེམས་དཔའི་ཏིང་ངེ་འཛིན་ཞེས་བྱ་བ་གསུངས་ཏེ། དེ་ནི་བྱང་ཆུབ་སེམས་དཔའ་ཆེན་པོ་རྟག་ཏུ་དགའ་ཞིང་རབ་ཏུ་མགུ་བའི་དབང་པོ་བསྐྱེད་པའི་རྣམ་པར་ཐུགས་རྩེ་གཅིག་ཏུ་མཛད་པ་ཡིན་པས་ན་ཞེས་བྱ་བའི་ཐ་ཚིག་གོ །བདག་ནི་ཞེས་བྱ་བ་ནི་བདག་ཉིད་ཡིན་པར་སྟོན་ཏོ། །ཁྱེད་སུའི་ཡིན་ཞེ་ན། ཀུན་མཆོག་གི་ཞེས་བྱ་བ་གསུངས་ཏེ། སངས་རྒྱས་རྣམས་ཀྱིའོ། །བཞད་པ་ཡང་ཡིན་ལ་ཆེན་པོ་ཡང་ཡིན་པས་ན་བཞད་ཆེན་ཏེ། ནམ་མཁའ་ཐམས་ཅད་ཁྱབ་པའོ། །རྨད་དུ་བྱུང་བ་ཆེན་པོ་ཡིན། །ཞེས་བྱ་བ་ནི་གཞན་རྣམས་ལ་སྔོན་མ་བྱུང་བ་ཡིན་པས་ན་རྨད་དུ་བྱུང་བ་ཆེན་པོའོ། །འདིར་ཅི་ཞིག་ངོ་མཚར་ཆེ་ཞེ་ན། གང་ཕྱིར་རྟག་ཏུ་མཉམ་གཞག་རྣམས། །སངས་རྒྱས་དོན་ལ་རབ་ཏུ་སྦྱོར། །ཞེས་བྱ་བ་གསུངས་ཏེ། གང་གི་ཕྱིར་མའི་མཐའི་བར་དུ་རྣམ་པར་མི་རྟོག་པའི་ཏིང་ངེ་འཛིན་ལ་ཞུགས་པ་དེ་རྣམས་ཀྱང༌། སངས་རྒྱས་ཀྱིས་སེམས་ཅན་དོན་བྱ་བའི་བཞད་པ་མཛད་པར་སྟོན་པ་ལ་རབ་ཏུ་སྦྱོར་ཞིང་འཛུམ་པ་ཉེ་བར་སྟོན་པར་མཛད་པ་འདི་ནི་ངོ་མཚར་ཆེའོ། །འདི་སྐད་སྟོན་ཏེ། སྔ་ནི་གྱི་འཕེན་པའི་ཤུགས་ཀྱིས་གདུལ་བྱ་རྣམས་ཀྱི་རྣམ་པར་རྟོག་པའི་དབང་གིས་སངས་རྒྱས་རྣམས་འཛུམ་པ་མཛད་དོ་ཞེས་དེ་ལྟར་མཐོང་བ་འདི་ནི་ངོ་མཚར་ཆེའོ། །དེ་བཞིན་གཤེགས་པ་ཐམས་ཅད་ཀྱི་རྒྱབ་ཀྱི་ཟླ་བའི་དཀྱིལ་འཁོར་ལ་གནས་ཞེས་བྱ་བ་ནི། བཅོམ་ལྡན་འདས་རིན་ཆེན་འབྱུང་ལྡན་གྱི་


DTG057_Page_0135
[མ་དཔེ་གཟིགས་ན་འདིར་གནོན།]

རྒྱབ་ཏུའོ། །དེ་ནས་ཞེས་བྱ་བ་ལ་སོགས་པ་ལ། བཅོམ་ལྡན་འདས་ཀྱིས་དེའི་ལག་པ་གཉིས་སུ་རྡོ་རྗེ་འཛུམ་པ་དེ་བྱིན་ནོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་རྨད་དུ་བྱུང་བ་ནི་འཛུམ་པའི་ཕྱག་རྒྱའོ། །དེ་བྱིན་གྱིས་བརླབ་པ་ལ་དམིགས་པའི་ཏིང་ངེ་འཛིན་རྡོ་རྗེ་ལྟར་མི་ཕྱེད་པ་གང་ཡིན་པ་དེ་ནི། དེ་བཞིན་གཤེགས་པ་ཐམས་ཅད་ཀྱི་རྨད་དུ་བྱུང་བའི་བྱིན་གྱི་རླབས་ཀྱིས་རྡོ་རྗེ་ཞེས་བྱ་བའི་ཏིང་ངེ་འཛིན་ཏེ། དེ་ལ་སྙོམས་པར་ཞུགས་པ་ནི་འཛུམ་པའི་ཕྱག་རྒྱ་སྦྱིན་པའི་རྣམ་པར་ཐུགས་རྩེ་གཅིག་ཏུ་མཛད་པའོ། །ཇི་ལྟ་བུ་ཞིག་དེའི་ལག་པ་གཉིས་སུ་བྱིན་ཞེ་ན། དེ་བཞིན་གཤེགས་པ་ཐམས་ཅད་ཀྱི་རྨད་དུ་བྱུང་བའི་བསྐྱེད་པའི་དམ་ཚིག་དང་ཞེས་བྱ་བ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་བཞད་པ་བསྐྱེད་པའི་རྒྱུར་པའོ། །ཅིའི་ཕྱིར་བརྩལ་ཞེ་ན། སེམས་ཅན་གྱི་ཁམས་ཞེས་བྱ་བ་ལ་སེམས་པ་གསུངས་ཏེ། སེམས་ཅན་གྱི་ཁམས་ཅད་དད་པ་ལ་སོགས་པ་དང༌། མིག་ལ་སོགས་པའི་དབང་པོ་ཐམས་ཅད་ཀྱི་བདེ་བ་དང་ཡིད་བདེ་བླ་བླན་མེད་པ་ཐམས་ཅད་མྱང་བར་བྱ་བའི་ཕྱིར་རོ། །དེ་བཞིན་གཤེགས་པ་ཐམས་ཅད་ཀྱི་དབང་པོ་ཡོངས་སུ་སྦྱོང་བའི་ཡེ་ཤེས་ནི་རྡོ་རྗེ་བཞད་པའི་ཡེ་ཤེས་སོ། །མངོན་པར་ཤེས་པ་ཡང་དེ་ཉིད་ཀྱི་སྟེ། དེ་དག་ཐོབ་པ་ཉིད་ནི་འབྲས་བུའོ། །དེ་དག་གི་ཕྱིར་ཞེས་བྱ་བ་ནི་རྡོ་རྗེ་བཞད་པ་གྲུབ་པའི་རྒྱུར་ཞེས་བྱ་བའི་དོན་ཏོ། །བར་དུ་ཞེས་བྱ་བའི་སྒྲ་ནི་སྔ་མ་དང་འདྲའོ། །དེ་བཞིན་དུ་ཞེས་བྱ་བ་ནི་སངས་རྒྱས་ལྔའི་རིན་པོ་ཆེའི་དབུ་རྒྱན་དང་དར་དཔྱངས་ཀྱི་དབང་གིས་དབང་བསྐུར་ནས། རྡོ་རྗེ་དགའ་བཞེས་བྱ་བ་སྔོན་གྱི་འཕེན་ཤུགས་ཀྱི་མཐུས་རྣམ་པར་རྟོག་བ་མི་མངའ་བ་ཉིད་ཀྱིས་རྡོ་རྗེ་ལྟར་མི་ཕྱེད་བའི་དཀའ་བ་མངའ་བས་ན་རྡོ་རྗེ་དགའ་བའོ། །དེ་བཞིན་གཤེགས་པ་ཐམས་ཅད་དགྱེས་པར་བྱེད་ཅིང་ཞེས་བྱ་བ་ནི། དེ་བཞིན་གཤེགས་པ་ལ་སོགས་པ་དང་སེམས་ཅན་རྣམས་རང་གི་རང་བཞིན་ཐུགས་སུ་ཆུད་ཅིང་རྟོགས་པས་དགྱེས་པར་གྱུར་པའོ། །འདི་ཞེས་བྱ་བ་ནི་ཐུགས་ལ་གནས་པ་གསུངས་ཤིང་ཆེད་


DTG057_Page_0136
[མ་དཔེ་གཟིགས་ན་འདིར་གནོན།]

དུ་བརྗོད་པའོ། །རྨད་དུ་བྱུང་སྐྱེད་སྟོན་པ་པོ། །ཞེས་བྱ་བ་ནི་རྡོ་རྗེ་བཞད་པ་སྐྱེད་པར་བྱེད་པའོ། །རྒྱུ་འདི་ཉིད་ཀྱིས་ན་དགྱེས་ཆེན་བྱེད་པའི་ཡེ་ཤེས་སོ། །བཅོམ་ལྡན་འདས་ཀྱི་ཡེ་ཤེས་འདི་ཉིད་ཐུན་མོང་མ་ཡིན་པར་བསྟན་པར་བྱ་བའི་ཕྱིར། གཙུག་ལག་གཞན་གྱིས་ཤེས་མི་ནུས། །ཞེས་བྱ་བ་གསུངས་ཏེ། མུ་སྟེགས་པ་གཞན་གྱིས་བསྟན་ཅིང་རང་གི་སྒོམ་པ་ལ་སྦྱོར་བ་ནི་གཞན་གྱི་གཙུག་ལག་སྟེ། དབང་ཕྱུག་ལ་སོགས་པ་གཞན་གྱི་གཙུག་ལག་དེ་དག་གིས་ཤེས་པར་མི་ནུས་སོ། །དེ་ལྟར་རྡོ་རྗེ་བཞད་པས་དེ་བཞིན་གཤེགས་པ་ཐམས་ཅད་འཛུམ་པ་རྨད་དུ་བྱུང་བ་ལ་གཞག་པ་ཡིན་ནོ། །དབང་བསྐུར་བ་ཆེན་པོ་དང་ཞེས་བྱ་བ་ལ་སོགས་པས་ནི་སྡོམ་གསུངས་པ་ཡིན་ཏེ། དབང་བསྐུར་བ་ཡང་ཡིན་ལ་ཆེན་པོ་ཡང་ཡིན་པས་ན་དབང་བསྐུར་བ་ཆེན་པོ་སྟེ། འཕགས་པ་ནམ་མཁའི་སྙིང་པོའོ། །འོད་ཀྱི་དཀྱིལ་འཁོར་འདོམ་གང་བ་ནི་རྡོ་རྗེ་ཉི་མའིའོ། །བྱང་ཆུབ་སེམས་དཔའ་ཆེན་པོའི་དོན་ནི་རིན་ཆེན་དཔལ་ལོ། །བཞད་པ་ཆེན་པོ་ནི་རྡོ་རྗེ་བཞད་པའོ། །འདི་བཞིན་དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བའི་སེམས་དཔའ་ཆེན་པོའོ་ཞེས་བྱ་བ་ནི་གཟུང་བ་དང་འཛིན་པ་པོའི་དོན་ལ་འཛིན་པ་དང་སེམས་ཅན་རྣམས་འཇིགས་པ་སྐྱེད་པར་བྱེད་པ་དང༌། སེམས་ཅན་ལ་རྣམས་སྡང་བ་དང༌། ཆོས་ཡོངས་སུ་སྤོང་བའི་འཛིན་པ་པོའི་མངོན་དང་མི་འཇིགས་པ་དང་བྱམས་པ་དང༌། ཆོས་ཀྱི་སྤྱིན་པའི་རང་བཞིན་གྱིས་འཁྲུད་པར་བྱེད་པས་ན་འདི་དག་ནི། དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བ་ཆེན་པོའི་སེམས་དཔའོ། །དེ་ཡང༌། སྔོན་ཆད་སྤྱིན་པའི་སྤྱོད་གྲུབ་གང༌། །རྡོ་རྗེ་རིན་ཆེན་དུ་བཤད་དེ། །སེམས་ཅན་ཀུན་ལ་མི་འཇིགས་སྤྱིན། །རྡོ་རྗེ་གཟི་བརྗིད་དུ་དེ་བཤད། །འབྱུང་པོ་ཀུན་ལ་བྱམས་པ་ཡི། །རྡོ་རྗེ་དབལ་ཏེ་རྒྱལ་མཚན་ཆེ། །ཆོས་ཀྱི་སྦྱིན་པ་བཞད་པ་ཆེ། །བཞི་པོ་དབང་བསྐུར་ཡིན་པར་བཤད། །ཅེས་གསུངས་པ་ཡིན་ནོ། །འདིར་སྦྱིན་པའི་ཕ་རོལ་ཏུ་ཕྱིན་པ་ནི་རིན་ཆེན་འབྱུང་ལྡན་གྱི་ཐུགས་སོ། །དེ་ཡང་ལྡོག་པའི་དབྱེ་བས་རྣམ་པ་


DTG057_Page_0137
[མ་དཔེ་གཟིགས་ན་འདིར་གནོན།]

བཞིར་གཞག་སྟེ། སྦྱིན་པར་བྱ་བ་དང༌། སྦྱིན་པ་པོ་དང༌། ལེན་པ་པོ་མི་དམིགས་པོའི་སྤྱི་ཉིད་ནི་རིན་ཆེན་འབྱུང་ལྡན་གྱི་ཐུགས་སོ། །དེ་ལྟར་ན་གང་གི་ཕྱིར་གཟུང་བར་བྱ་བ་དང༌། འཛིན་པ་པོའི་དོན་ལ་མངོན་པར་ཞེན་པ་སྤངས་པ་འདིས་བྱེད་པས། དེའི་ཕྱིར་ནོར་བུ་སྦྱིན་པའི་རང་བཞིན་ནི་རྡོ་རྗེ་རིན་ཆེན་གྱི་ཐུགས་སོ། །དེས་ཀྱང་གཟུང་བ་དང༌། འཛིན་པ་པོའི་རྣམ་པར་རྟོག་པའི་འཇིགས་པ་མེད་པ་ནི་མི་འཇིགས་པའི་སྤྱིན་པ་སྟེ། སེམས་དང་སེམས་ལས་བྱུང་བ་དུལ་བ་ཞེས་བྱ་བའི་མི་འཇིགས་པ་སྦྱིན་པ་ནི་རྡོ་རྗེ་གཟི་བརྗིད་ཀྱི་རང་བཞིན་ནོ། །དེས་ཀྱང་སྒྲིབ་པའི་མུན་པ་ཐམས་ཅད་དང་བྲལ་བས་མི་དམིགས་པའི་བྱམས་པ་གྲུབ་པ་ཡིན་ལ། དེའི་ཕྱིར་བྱམས་པ་སྦྱིན་པའི་རང་བཞིན་ནི་རྡོ་རྗེ་དཔལ་གྱི་ཐུགས་སོ། །མི་དམིགས་པའི་བྱམས་པའི་མཐུ་དང་སྔོན་གྱི་འཕེན་པའི་ཤུགས་ཀྱི་སྟོབས་ཀྱིས་ཇི་ལྟར་མངོན་པར་རྟོགས་པའི་ཆོས་ཀྱི་སྦྱིན་པས་སེམས་ཅན་རྣམས་མགུ་བར་བྱེད་པའི་ཆོས་ཀྱི་སྦྱིན་པའི་རང་བཞིན་ནི་རྡོ་རྗེ་བཞད་པའི་ཐུགས་སོ། །དེ་ཡང༌། སྒྲོལ་དང་གྲོལ་དང་དབུགས་འབྱིན་པ། །མྱ་ངན་འདས་ལ་འཇོག་པ་ནི། །རྡོ་རྗེ་རིན་ཆེན་ལ་སོགས་སེམས། །ཞེས་གསུངས་པ་ཡིན་ཏེ། སྒྲོལ་བ་ནི་ཇི་སྐད་དུ་བཤད་པའི་དོན་འཛིན་པ་སྟེ་རྡོ་རྗེ་རིན་ཆེན་གྱིས་སོ། །གྲོལ་བ་ནི་ཇི་སྐད་དུ་བཤད་པའི་མི་འཇིགས་པས་ཏེ་རྡོ་རྗེ་ཉི་མས་སོ། །དབུགས་འབྱིན་པ་ནི་ཞེ་སྡང་མེད་པ་སྟེ། རྡོ་རྗེ་དབལ་གྱིས་སོ། །མི་གནས་པའི་མྱ་ངན་ལས་འདས་པའི་དོན་ནི་རྡོ་རྗེ་བཞད་པའི་རང་བཞིན་གྱིས་ཆོས་ཀྱི་སྦྱིན་པའི་ཐུགས་ཀྱིས་སོ། །དེ་ལྟར་རྡོ་རྗེ་བཞད་པའི་ཚུལ་གྱིས་སེམས་རབ་ཏུ་དགའ་བ་ཐོབ་པས་ཆོས་ཐམས་ཅད་རང་བཞིན་གྱིས་རྣམ་པར་དག་པའི་ཏིང་ངེ་འཛིན་ཐོབ་པར་བྱ་བ་ཡིན་པས། དེ་ནས་ཞེས་བྱ་བ་ལ་སོགས་པས་རྡོ་རྗེ་ཆོས་ཀྱིས་དེ་བཞིན་གཤེགས་པ་ཐམས་ཅད་ཏིང་ངེ་འཛིན་ལ་ངེས་པར་སྦྱོར་རོ་ཞེས་སྟོན་པ་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ། བཅོམ་ལྡན་འདས་ཀྱི་སྙིང་པོ་འདི་རང་གི་ཐུགས་ཀ་ནས་ཕྱུང་ངོ་ཞེས་བྱ་བར་སྦྱར་རོ། །ཡང་ཞེས་བྱ་བའི་


DTG057_Page_0138
[མ་དཔེ་གཟིགས་ན་འདིར་གནོན།]

སྒྲ་ནི་རྡོ་རྗེ་བཞད་པ་ལ་ལྟོས་པའོ། །ཀུན་དུ་ལྟ་བ་ནི་ཀུན་དུ་སྤྱན་རས་ཀྱིས་གཟིགས་པ་སྟེ། ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་སོ་སོར་རྟོག་པ་དང༌། སེམས་ཅན་བསྐྱབ་པ་ལ་གཟིགས་པའོ། །དེའི་དབང་ཕྱུག་སྟེ་གཙོ་བོ་ཡིན་པས་ན་ཀུན་དུ་སྤྱན་རས་གཟིགས་ཀྱི་དབང་པོའོ། །བྱང་ཆུབ་སེམས་དཔའ་ཆེན་པོ་ཡང་ཡིན་ལ་ཀུན་དུ་སྤྱན་རས་གཟིགས་ཀྱི་དབང་པོ་ཡང་ཡིན་པས་ན། བྱང་ཆུབ་སེམས་དཔའ་ཆེན་པོ་ཀུན་དུ་སྤྱན་རས་གཟིགས་ཀྱི་དབང་པོ་སྟེ། ཇི་སྐད་དུ་བཤད་པའི་སེམས་དཔའི་རྡོ་རྗེའོ། །དེའི་དམ་ཚིག་ནི་དམ་པའི་ཆོས་ཀྱི་འོད་ཟེར་ལ་སོགས་པའོ། །དེ་འབྱུང་བ་ནི་སེམས་དཔའི་རྡོ་རྗེའི་ཚུལ་གྱིས་ཆོས་ལས་བྱུང་བ་སྟེ། དེ་བྱིན་གྱིས་བརླབས་པའི་ཕྱིར་ཏིང་ངེ་འཛིན་གང་ཡིན་པ་དེ་ལ་སྙོམས་པར་ཞུགས་ཏེ། དམ་པའི་ཆོས་ཀྱི་འོད་ཟེར་བསྐྱེད་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་ཐ་ཚིག་གོ །དེ་བཞིན་གཤེགས་པ་ཐམས་ཅད་ཀྱི་ཆོས་ནི་འཕགས་པ་སྤྱན་རས་གཟིགས་དབང་ཕྱུག་ཏུ་རྣམ་པར་འཕྲུལ་པའོ། །དེའི་དམ་ཚིག་ནི་བསྐྱེད་པའི་རྒྱུའོ། །མིང་དེ་སྐད་ཅེས་བྱ་བའི་དེ་བཞིན་གཤེགས་པ་ཐམས་ཅད་ཀྱི་སྙིང་པོ་རང་གི་ཐུགས་ཀ་ནས་ཕྱུང་བ་ནི་བཛྲ་དྷརྨྨ་ཞེས་བྱ་བའོ། །དེ་ནས་ཞེས་བྱ་བ་ལ་སོགས་པ་ལ་བཅོམ་ལྡན་འདས་དེ་ཉིད་པདྨ་ཆེན་པོའི་དབྱིབས་སུ་གྱུར་ཏེ་ཕྱག་གཉིས་སུ་གནས་སོ་ཞེས་བྱ་བར་སྦྱར་རོ། །བཅོམ་ལྡན་འདས་རྡོ་རྗེ་འཛིན་པ་དེ་ཉིད་དོ་ཞེས་བྱ་བ་ནི། སེམས་དཔའི་རྡོ་རྗེ་རང་བཞིན་གྱིས་དག་པའི་ཆོས་མཉམ་པ་ཉིད་ཀྱི་ཡེ་ཤེས་རབ་ཏུ་རྟོགས་པའི་ཕྱིར་སེམས་དཔའ་རྡོ་རྗེའི་ཏིང་ངེ་འཛིན་ཞེས་བྱ་སྟེ། དེ་ནི་རང་བཞིན་གྱིས་དག་པ་ཡིན་ལ་ཆོས་ཀྱང་ཡིན་པས་ན་རང་བཞིན་གྱིས་དག་པའི་ཆོས་དེ་དམ་པའི་ཆོས་ཀྱི་འོད་ཟེར་ལྟ་བུའི་འཇིག་རྟེན་དབང་ཕྱུག་གི་རྣམ་པར་འཕྲུལ་པའི་ཚུལ་ལོ། །དེ་རྣམས་ཀྱི་མཉམ་པ་ཉིད་ནི་དོན་དམ་པར་དངོས་པོ་མེད་པའི་ངོ་བོ་ཉིད་ཀྱིས་སྟོང་པ་ཉིད་ཅེས་བྱ་བའི་ཐ་ཚིག་གོ །དེའི་ཡེ་ཤེས་ནི་ངེས་པའོ། །དེ་གང་གིས་རབ་ཏུ་རྟོགས་པར་གྱུར་པ་དེ་ནི་རབ་ཏུ་རྟོགས་པར་གྱུར་པ་ཉིད་ཀྱི་


DTG057_Page_0139
[མ་དཔེ་གཟིགས་ན་འདིར་གནོན།]

ཕྱིར་ཏེ། རབ་ཏུ་རྟོགས་པ་དེ་ཉིད་ཀྱི་ཕྱིར་རྡོ་རྗེ་སེམས་དཔའི་ཏིང་ངེ་འཛིན་ལས་དམ་པའི་ཆོས་ཀྱི་འོད་ཟེར་བྱུང་ལ། དེ་དག་གིས་འཇིག་རྟེན་གྱི་ཁམས་ཐམས་ཅད་ཀུན་དུ་སྣང་བར་བྱས་ཤིང་གང་ལས་དེའི་རང་བཞིན་དུ་གྱུར་པ་དེ་ལ་དེ་སྐད་ཅེས་བྱའོ། །ནམ་མཁའ་ཐམས་ཅད་ཁྱབ་པའི་པདྨ་ལྟ་བུའི་དམ་པའི་ཆོས་ཀྱི་འོད་ཟེར་བསྡུས་ནས་པདྨའི་གཟུགས་ཇི་ལྟ་བུར་གང་གིས་མཛད་པ་དེ་ལྟ་བུར་ནི་འདིར་རྡོ་རྗེ་སེམས་དཔའི་ཏིང་ངེ་འཛིན་ཞེས་བཤད་ལ། པདྨ་ལྟ་བུའི་འོད་ཟེར་རྣམས་ནི་འདིར་དམ་པའི་ཆོས་ཀྱི་འོད་ཟེར་གྱི་སྒྲར་བཤད་དེ། པདྨའི་དབང་དུ་བྱས་ནས། ཆོས་ལ་ཆོས་ནི་གནས་པར་འགྱུར། །ཞེས་པ་ཡང༌། འདིར་ཆོས་ཀྱི་སྒྲས་ནི་པདྨའི་ཕྱག་རྒྱལ་བྱ་བར་བཤད་པའི་ཕྱིར་རོ། །ཆོས་ཀྱི་དབྱིངས་ཀྱི་རང་བཞིན་དུ་གྱུར་ཏོ་ཞེས་བྱ་བ་ནི་ཆོས་ནི་པདྨའི་དབྱིངས་ཞེས་བྱ་བ་རྒྱུ་ཡིན་པས་ན་ཆོས་ཀྱི་དབྱིངས་ཏེ་པདྨ་ལྟ་བུའི་འོད་ཟེར་རོ། །དེའི་རང་བཞིན་ནི་ངོ་པོ་ཉིད་གྱུར་པ་ནི་གྲུབ་པའོ། །ཆོས་ཀྱི་དབྱིངས་དེ་ཐམས་ཅད་ཀྱང་ཞེས་བྱ་བ་ནི་པདྨ་ལྟ་བུའི་འོད་ཟེར་གྱི་ཚོགས་སོ། །དེ་ནས་རྡོ་རྗེ་པདྨོ་ཞེས་བྱ་བ་ལ་སོགས་པ་ལ། བྱང་ཆུབ་སེམས་དཔའ་ཆེན་པོའི་སྐུས་ཐུགས་ལ་གནས་ནས་ཆེད་དུ་བརྗོད་པ་འདིས་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་དང་མངོན་པར་ཤེས་པ་ལ་སོགས་པ་དང༌། སངས་རྒྱས་ཐམས་ཅད་ཀྱི་རྫུ་འཕྲུལ་དང༌། ཆོ་འཕྲུལ་རྣམས་བྱས་ནས་ཞེས་བྱ་བ་ནི། གདུལ་བྱ་རྣམས་ལ་འཇིག་རྟེན་དབང་ཕྱུག་གི་ཡེ་ཤེས་ལ་སོགས་པ་བསྐྱེད་ནས། དེ་ཐམས་ཅད་སངས་རྒྱས་ཀྱི་སྐུ་གཅིག་ཏུ་བསྡུས་པར་གྱུར་ནས་འཕགས་པ་སྤྱན་རས་གཟིགས་དབང་ཕྱུག་གི་སྐུ་གཅིག་ཏུ་གྱུར་ཏོ། །ཅིའི་ཕྱིར་ཞེ་ན། རྡོ་རྗེ་སེམས་དཔའི་ཏིང་ངེ་འཛིན་ནི་ཀུན་དུ་སྤྱན་རས་གཟིགས་ཀྱི་དབང་པོ་ཡིན་པ་ཉིད་དང་ཞེས་བྱ་བ་གསུངས་ཏེ། ཤིན་ཏུ་གཟིགས་པ་གང་ཡིན་པ་དེ་ལ་དེ་སྐད་ཅེས་བྱའོ། །བྱང་ཆུབ་སེམས་དཔའ་ཆེན་པོ་ཡང་ཡིན་ལ། ཀུན་དུ་སྤྱན་རས་གཟིགས་ཀྱི་དབང་པོ་ཡང་ཡིན་པས་དེ་བསྐྱེད་པ་ཉིད་ཀྱིས་ན་དེའི་


DTG057_Page_0140
[མ་དཔེ་གཟིགས་ན་འདིར་གནོན།]

དབང་ཕྱུག་ཡིན་པའི་ཕྱིར། ཤིན་ཏུ་སྤྱན་རས་གཟིགས་ཀྱི་དབང་པོ་ཡིན་པའོ། །དེའི་ངོ་བོ་ཉིད་ནི་ཤིན་ཏུ་སྤྱན་རས་གཟིགས་ཀྱི་དབང་པོ་ཡིན་པ་ཉིད་དོ། །དེ་བས་ན་རྡོ་རྗེ་སེམས་པའི་ཏིང་ངེ་འཛིན་ནི་ཤིན་ཏུ་ཀུན་དུ་སྤྱན་རས་གཟིགས་ཀྱི་དབང་པོ་དེ་ཉིད་དང་ཞེས་བྱའོ། །ཨེ་མའོ་ཞེས་བྱ་བ་ལ་སོགས་པ་ལ། དམ་པ་ཡང་ཡིན་ལ་དོན་ཡང་ཡིན་པས་ན་དམ་པའི་དོན་ཏེ། ཟག་པ་མེད་པའི་ཆོས་བདག་མེད་པའི་ཏིང་ངེ་འཛིན་ཏོ། །དེ་ཉིད་རྣམ་པ་ཐམས་ཅད་དུ་གཟུང་བ་དང་འཛིན་པའི་རྣམ་པར་རྟོག་པ་དང་བྲལ་བའི་ཕྱིར་གདོད་ནས་དག་པའོ། །སུའི་ཡིན་ཞེ་ན་རང་བྱུང་སྟེ་སངས་རྒྱས་རྣམས་ཀྱིའོ། །ཅི་ཞིག་ངོ་མཚར་ཆེ་ཞེ་ན། །གང་ཕྱིར་གཟིངས་འདྲའི་ཆོས་རྣམས་ལས། །རྣམ་པར་དག་པ་དམིགས་པར་གྱུར། །ཞེས་བྱ་བ་གསུངས་ཏེ། གཟིངས་ནི་ཆུ་པོ་ལས་རྒལ་བར་བྱ་བའི་ཕྱིར་སྒྲོལ་བའི་ཐབས་སུ་བྱེད་དེ། དེ་ལས་བརྒལ་ནས་ནི་དེ་དོར་བར་བྱེད་དོ། །དེ་བཞིན་དུ་ཆོས་ཐམས་ཅད་རང་བཞིན་གྱིས་རྣམ་པར་དག་པ་སྟོན་པར་བྱེད་པའི་ཐོས་པ་དང༌། བསམ་པ་དང༌། བསྒོམ་པའི་མཚན་ཉིད་ཅན་གྱི་ཆོས་རྣམས་ནི་གཟུང་བ་དང༌། འཛིན་པའི་རྣམ་པར་རྟོག་པ་ལས་རྒལ་བའི་ཕྱིར་གཟིངས་དང་འདྲ་བ་ཡིན་ཏེ། ལོག་པ་དེ་རྣམ་པར་དག་ནས། ཐོས་པ་དང༌། བསམ་པ་དང༌། །བསྒོམ་པ་དང་བྲལ་བའི་ཚུལ་གྱིས་དེ་དམིགས་པར་བྱེད་པ་གང་ཡིན་བ་དེ་ནི་གཟིངས་དང་འདྲ་བ་ཡིན་པས་ན་གཟིངས་དང་འདྲ་བ་ཡང་ཡིན་ལ་ཆོས་ཀྱང་ཡིན་པས་ན་གཟིངས་འདྲའི་ཆོས་རྣམས་སོ། །དེའི་རྣམ་པར་དག་པ་ནི་ཇི་སྐད་དུ་བཤད་པའི་ཐོས་པ་དང༌། བསམ་པ་དང༌། །བསྒོམ་པའི་མཚན་ཉིད་ཅན་གྱི་ཆོས་དེ་རྣམས་ཀྱང་ཡང་དག་པ་མ་ཡིན་པའི་ཡོངས་སུ་རྟོགས་པའི་ངོ་བོ་ཉིད་ཡིན་པའི་ཕྱིར་དོན་དམ་པར་སྐྱེ་བ་མེད་པ་ཉིད་ཡིན་ན། དེ་རྣམས་ལས་རྣམ་པར་དག་པར་དམིགས་པར་ཇི་ལྟར་འགྱུར་ཞེ་ན། འདི་སྐད་སྟོན་པ་ཡིན་ཏེ། ཕྱག་དད་ཞབས་ལ་སོགས་པ་དང་ལྡན་པའི་འཇིག་རྟེན་དབང་ཕྱུག་ནི་བདག་ཡིན་ནོ་ཞེས། ཐོས་པ་དང༌། བསམ་པ་དང༌། བསྒོམ་པའི་རང་བཞིན་ནི་ཟག་པ་མེད་


DTG057_Page_0141
[མ་དཔེ་གཟིགས་ན་འདིར་གནོན།]

པའི་ཏིང་ངེ་འཛིན་ཐོབ་པར་བྱེད་པའི་ཕྱིར་སྒྲོལ་བར་བྱེད་པའི་ཐབས་ལྟ་བུ་ཡིན་ལ། རྟག་པའི་ངོ་བོ་གང་ཡིན་པ་བདག་ཡིན་ནོ་ཞེས་བྱ་བ་དེ་ནི། དོན་དམ་པར་སྐྱེ་བ་མེད་པ་ལ་བདག་གིས་ཐོས་པ་ལ་སོགས་པ་དེ་ཇི་ལྟར་ཡོད་པར་འགྱུར་ཏེ། ཆོས་མེད་ན་ཆོས་ཅན་མེད་བའི་ཕྱིར་རོ། །དེ་བས་ན་བདག་གིས་ཐོས་པ་ལ་སོགས་པ་ནི་ཡོད་པ་མ་ཡིན་པ་དང༌། གདུལ་བྱ་རྣམས་ཀྱིས་རྣམས་པར་དག་པ་མཐོང་བ་འདི་ནི་ངོ་མཚར་ཆེའོ། །དེ་བཞིན་གཤེགས་པ་ཐམས་ཅད་ཀྱི་སྤྱན་སྔ་ན་ཞེས་བྱ་བ་ནི། བཅོམ་ལྡན་འདས་འོད་དཔག་ཏུ་མེད་པའི་མདུན་ནའོ། །ཡང་བཀའ་ནོད་ཅིང་ཞེས་བྱ་བ་ནི་རྡོ་རྗེ་བཞད་པ་ལ་ལྟོས་ན་ཡང་གི་སྒྲ་སྨོས་སོ། །དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་ལ། བཅོམ་ལྡན་འདས་ཀྱིས་དེའི་ལག་ཏུ་རྡོ་རྗེ་པདྨོ་དེ་བྱིན་ནོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་ནི་ཡེ་ཤེས་ཏེ། དིའི་དམ་ཚིག་ནི་རྒྱུའོ། །དེ་ལ་དམིགས་པ་ནི་རྡོ་རྗེ་ལྟར་མི་ཕྱེད་བའི་རྣལ་འབྱོར་མིང་འདི་ཉིད་ཅེས་བྱ་བའི་ཏིང་ངེ་འཛིན་དེ་ལ་སྙོམས་པར་ཞུགས་པ་སྟེ། པདྨའི་ཕྱག་རྒྱ་སྦྱིན་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་ཐ་ཚིག་གོ །ཚུལ་ཇི་ལྟ་བུ་ཡིན་ཞེ་ན། དེ་བཞིན་གཤེགས་པ་ཐམས་ཅད་རྣམ་པར་བྱང་བའི་དམ་ཚིག་ཅེས་བྱ་བ་གསུངས་ཏེ། དེ་བཞིན་གཤེགས་པ་ཐམས་ཅད་རྣམ་པར་བྱང་བ་ནི་འཇིག་རྟེན་དབང་ཕྱུག་གི་ཏིང་ངེ་འཛིན་བསྐྱེད་པ་སྟེ། དེའི་དོན་གྱི་དམ་ཚིག་ནི་སྐྱེད་པར་བྱེད་པའི་སྒྱུའོ་།ཅིའི་ཕྱིར་ཞེ་ན། སེམས་ཅན་གྱི་ཁམས་ཞས་བྱ་བ་ལ་སོགས་ཕ་གསུངས་པས་སྟོན་ཏོ། །སེམས་ཅན་གྱི་ཁམས་ཐམས་ཅད་ཀྱི་བདག་ཉིད་ཡོངས་སུ་དག་བ་ནི་གཟུང་བ་དན་འཛིན་པའི་དོན་དང་འབྲལ་བ་གཉིས་སུ་མེད་པའི་ཡེ་ཤེས་རྟོགས་པ་སྟེ། དེས་བདེ་པ་དང་ཡིད་བདེ་བ་ཐམས་མྱང་བར་བྱ་བའི་ཕྱིར་རོ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་ཆོས་ཀྱི་ཡེ་ཤེས་དང༌། མངོན་པར་ཤེས་པ་དྲུག་ཐོབ་པ་ནི་འཇིག་རྟེན་དབང་ཕྱུག་ཉིད་ཐོབ་པའོ། །བར་དུ་ཞེས་བྱ་བའི་སྒྲས་ནི་རྡོ་རྗེ་སེམས་


DTG057_Page_0142
[མ་དཔེ་གཟིགས་ན་འདིར་གནོན།]

དཔའ་ལ་སོགས་པ་བསྡུའོ། །དམ་པའི་ཆོས་ཀྱི་འཁོར་ལོ་བསྐོར་བ་ཉིད་དང་ཞེས་བྱ་བལ། དམ་པ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཆོས་ཡིན་པས་དམ་པའི་ཆོས་ཏེ། འགྲོ་བ་འདུལ་བའི་དུམ་བུ་ལས་བཤད་པའི་པདྨའི་རིགས་སོ། །དེའི་འཁོར་ལོ་ནི་དཀྱིལ་འཁོར་ཏེ་སྤྲུལ་པ་དང་བྲི་བ་དག་གིས་བསྐོར་བའི་དང་ཚུལ་གང་ཡིན་པ་དེ་ནི་དམ་པའི་ཆོས་ཀྱི་འཁོར་ལོ་བསྐོར་བའོ། །དེའི་ངོ་བོ་ཉིད་ནི་དམ་པའི་ཆོས་ཀྱི་འཁོར་ལོ་བསྐོར་བ་ཉིད་དོ། །ཅི་ཞིག་མཛད་ནས་ཤེ་ན། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྐུའི་དབང་བསྐུར་ནས་ཞེས་བྱ་བ་སྟེ། དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྐུ་ནི་བཅོམ་ལྡན་འདས་འོད་དཔག་ཏུ་མེད་པ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་ཆོས་ལས་བྱུང་བའི་ཕྱིར་ཆོས་ཀྱི་སྐུའོ། །དེས་ཉེ་བར་མཚོན་བའི་དབུ་རྒྱན་གྱི་དབང་སྟེ། དེས་དབང་བསྐུར་བ་ནི་དབུ་རྒྱན་ཏེ་དེའི་དབུལ་བཞག་སྟེ། ཆོས་ཀྱི་རྡོ་རྗེ་བཅིངས་ནས་ཀྱང༌། །མགོ་བར་བཞག་སྟེ་དེ་དབང་བསྐུར། །སངས་རྒྱས་ཀུན་གྱིས་འཇིག་རྟེན་གྱི། །དབང་ཕྱུག་གིས་ནི་དབང་བསྐུར་རོ། །ཞེས་འགྲོ་བ་འདྲ་བ་འདུལ་བའི་དུམ་བུ་ལས་བསྟན་པ་འདིས་དབང་བསྐུར་བའོ། །དེ་ནི་འདི་སྐད་སྟོན་པ་ཡིན་ཏེ། དམ་པའི་ཆོས་ཀྱི་འཁོར་ལོ་བསྐོར་བ་ཉིད་དང༌། ཆོས་ཀྱི་སྐུའི་དབང་གིས་དབང་བསྐུར་བ་དག་གིས་འདི་ནི་པདྨའི་རིགས་ཀྱི་བདག་པོའི་ངོ་བོ་ཉིད་དུ་སྟོན་ཏོ། །དེ་བས་ན་རྡོ་རྗེ་ནོར་བུ་དང༌། རིན་པོ་ཆེའི་རྩེ་མོའི་ཁང་པ་བརྩེགས་མར་འགྲོ་བ་འདུལ་བའི་དཀྱིལ་འཁོར་ཇི་ལྟ་བ་བཞིན་དུ་སྤྲུལ་ནས་མི་བསྐྱོད་པ་ལ་སོགས་པའི་དེ་བཞིན་གཤེགས་པས་ཡོངས་སུ་བསྐོར་བ་ཡིན་གྱི་རྣམ་པར་སྣང་མཛད་ཀྱིས་ནི་མ་ཡིན་ནོ། །རྡོ་རྗེ་སེམས་དཔའ་དང༌། རྡོ་རྗེ་སྤྱན་དང༌། རྡོ་རྗེ་ལས་རྣམས་དང༌། བཛྲ་དྷརྨྨ་ཞེས་བྱ་བ་དང༌། ཡང་རྡོ་རྗེ་སྤྱན་སྤྲུལ་ལ་པདྨའི་རིགས་ཀྱི་བདག་པོར་འཕགས་པ་སྤྱན་རས་གཟིགས་དབང་ཕྱུག་འོད་དཔག་མེད་ཀྱི་དབང་བསྐུར་པས་དབང་བསྐུར་ནས། འགོ་བ་འདུལ་བའི་དཀྱིལ་འཁོར་སྤྲུལ་པར་བྱ་བའི་ཕྱིར། འཕགས་པ་སྤྱན་


DTG057_Page_0143
[མ་དཔེ་གཟིགས་ན་འདིར་གནོན།]

རས་གཟིགས་དབང་ཕྱུག་ལ་མཚན་བརྒྱ་རྩ་བརྒྱད་པས་གསོལ་བ་བཏབ་བོ་ཞེས་བྱ་བས། པདྨའི་རིགས་ཀྱི་དང་པོ་སྦྱོར་བའི་ཏིང་ངེ་འཛིན་བསྟན་པ་ནི། མདོར་བསྡུས་པས་རྒྱ་ཆེན་པོའི་དོན་རྟོགས་པར་བྱ་བའི་ཕྱིར་ཡིན་ནོ། །གཞན་དུ་ན་དེ་བཞིན་གཤེགས་པ་ཐམས་ཅད་ཀྱི་སངས་རྒྱས་ཀྱི་ཞིང་འདི་ཞེས་བྱ་བ་ལ་སོགས་པ་ཡང་བརྗོད་དགོས་པར་འགྱུར་རོ། །དེ་བཞིན་གཤེགས་པའི་རིགས་ཀྱི་རང་བཞིན་དུ་ཡང་བཛྲ་ནཻ་ཏྲ་ཞེས་བྱ་བ་སྙིང་པོ་འདིས་བསྐྱེད་ལ་སངས་རྒྱས་ལྔའི་རིན་པོ་ཆེའི་དབུ་རྒྱན་དད་དར་དཔྱངས་ཀྱི་དབང་གིས་དབང་བསྐུར་བས་དབང་བསྐུར་བར་བྱའི་ཆོས་ཀྱི་སྐུ་ཙམ་གྱིས་ནི་མ་ཡིན་ནོ། །དེའི་དོན་གཞན་ཡིན་པ་ཉིད་དུ་གསུངས་ཏེ། དེ་ནས་རྡོ་རྗེ་དབྱིངས་ཀྱི་དཀྱིལ་འཁོར་སྒོམ་པ་པོས་དེ་སྤྲུལ་པར་འདོད་ན། རྡོ་རྗེ་སྤྱན་དེ་བཞིན་གཤེགས་པའི་རིགས་ཀྱི་རང་བཞིན་དུ་བསྐྱེད་པར་བྱའི། པདྨའི་རིགས་ཀྱི་བདག་པོ་ནི་མ་ཡིན་ནོ། །རྡོ་རྗེ་སྤྱན་གྱི་དེ་བཞིན་གཤེགས་པའི་རིགས་མ་ཡིན་ནོ་ཞེས་ཀྱང་བརྗོད་པར་མི་བྱ་སྟེ། གང་གི་ཕྱིར་འདི་ཉིད་ལས་རྡོ་རྗེ་དབྱིངས་ཀྱི་དུམ་བུ་ཐམས་ཅད་ནི་དེ་བཞིན་གཤེགས་པའི་རིགས་ཡིན་ལ་འགྲོ་བ་འདུལ་བའི་དུམ་བུ་ཐམས་ཅད་ནི་པདྨའི་རིགས་ཡིན་ནོ་ཞེས་བཤད་ལ། པདྨའི་རིགས་ཡིན་ནོ་ཞེས་བཤད་ལ། པདྨའི་རིགས་ཐམས་ཅད་ནི་འོད་དཔག་ཏུ་མེད་པས་དབང་བསྐུར་ལ། དེ་བཞིན་གཤེགས་པའི་རིགས་རྣམས་ནི་སངས་རྒྱས་ལྔའི་དབུ་རྒྱན་དང་དར་དཔྱངས་ཀྱིས་དབང་བསྐུར་རོ་ཞེས་འདི་ཉིད་ལས་འབྱུང་སྟེ། དེ་བས་ན་ཡིད་གཉིས་མི་བྱའོ། །དེའི་ལག་པ་གཉིས་སུ་བྱིན་ནོ་ཞེས་བྱ་བ་ནི། དེ་བཞིན་གཤེགས་པའི་རིགས་ཀྱི་ཚུལ་ཅན་དང༌། པདྨའི་རིགས་ཀྱི་བདག་པོར་རྡོ་རྗེ་སྤྱན་ཞེས་བྱ་བའི་རྡོ་རྗེའི་མིང་གི་དབང་གིས་དབང་བསྐུར་ཏེ། རྡོ་རྗེའི་ལྟ་བས་པདྨའི་ཕྱག་རྒྱ་ལ་གཟིགས་པས་དེ་གཉིས་ཀྱིས་ཉེ་བར་མཚོན་ཏེ་རྡོ་རྗེ་སྤྱན་ཞེས་གསུངས་པ་ཡིན་ནོ། །རྡོ་རྗེ་པདྨའི་འདབ་མ་ཞེས་བྱ་བ་ལ་སོགས་པ་ལ། གཡོན་པ་བསྙེམས་བའི་ཚུལ་གྱིས་པདྨ་གཟུང་སྟེ། ཕྱག་གཡས་པས་ཐུགས་ཀར་གནས་པའི་པདྨའི་འདབ་མ་ཁ་འབྱེད་ཅིང་རྡོ་རྗེའི་ལྟ་བས་གཟིགས་


DTG057_Page_0144
[མ་དཔེ་གཟིགས་ན་འདིར་གནོན།]

ཤིང་སོ་སོར་རྟོགས་པའོ། །ཇི་ལྟར་གཟིགས་ཤེ་ན། འདོད་ཆགས་རྣམ་པར་དག་ཅིང་མ་ཆགས་པའི་ངོ་བོ་ཉིད་དུ་གཟིགས་ཞེས་བྱ་བ་སྟེ། ཆོས་བདག་མེད་པའི་ཡེ་ཤེས་ནི་གཟུང་བ་དང་འཛིན་པའི་དྲི་མ་དང་བྲལ་བར་སོ་སོར་རྟོག་ཅིང་བསྒོམས་ལ་སྒོམ་པ་དེས། ཇི་ལྟར་པདྨ་དམར་པོ་འདི། །ཚོན་གྱི་ཉེས་པས་མི་གོས་བཞིན། །ཐམས་ཅད་དག་པར་བསྒོམས་ན་ནི། །དེ་བཞིན་སྡིག་པས་གོས་མི་འགྱུར། །ཞེས་ཇི་སྐད་གསུངས་པ་ལྟ་བུའོ། །འདི་དེས་སངས་རྒྱས་ཐམས་ཅད་ཀྱི། །ཞེས་པ་ལ། བཅོམ་ལྡན་འདས་ཀྱིས་བཀའ་སྩལ་པ་གང་ཡིན་པ་འདི་དག་གི་ལག་ཏུ་གནས་པ་འདི་དེའོ། །འདི་སུ་ཞིག་གི་ཡིན་ཞེ་ན་སངས་རྒྱས་ཐམས་ཅད་ཀྱིའོ། །ལས་ཅི་ཞིག་བྱེད་ཅེ་ན། འདོད་ཆགས་དེ་ཉིང་རྟོགས་བྱེད་པ། །ཞེས་བྱ་བ་སྟེ་འདོད་ཆགས་ཀྱི་དེ་ཁོ་ན་ཉིད་དུ་བཤད་པའོ། །དེ་གདུལ་བྱ་རྣམས་ལ་ཇི་སྐད་བཤད་པའི་ཚུལ་གྱིས་ཁོང་དུ་ཆུད་པར་བྱེད་པས་འདི་ནི་འདོད་ཆགས་ཀྱི་དེ་ཁོ་ན་ཉིད་ཁོང་དུ་ཆུད་པར་བྱེད་པ་ཡིན་ནོ། །ཅི་འདི་བདག་དང་ཐ་དད་དམ་འོན་ཏེ་མ་ཡིན་ཞེན་། བདག་སྟེ་ཞེས་བྱ་བ་གསུངས་ཏེ། བདག་གི་ལག་ཏུ་བྱིན་པས་ན། །ཞེས་བྱ་བ་ནི། བདག་གི་རང་བཞིན་ཅན་གྱི་པདྨ་བདག་གི་ལག་ཏུ་བྱིན་ནོ། །དེ་བས་ན། བདག་གི་ཆོས་ནི་གནས་པར་འགྱུར། །ཞེས་བྱའོ། །དེ་ལྟར་དེ་བཞེན་གཤེགས་པ་ཐམས་ཅད་ཀྱི་རྡོ་རྗེ་ཆོས་ཀྱི་ཏིང་ངེ་འཛིན་ལ་མཉམ་པར་གཞག་པ་ཡིན་ལ། མཉམ་པར་གཞག་པའི་སེམས་ཀྱིས་ནི་ཡང་དག་པ་ཇི་ལྟ་བ་བཞིན་དུ་ཤེས་པར་འགྱུར་པར་ཡིན་ལ། དེས་ཀྱང་ཉོན་མོངས་པ་དང༌། ཉེ་བའི་ཉོན་མོངས་པ་རྣམས་གཅོད་པར་འགྱུར་བ་ཡིན་པས། དེའི་ཕྱིར་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ངོ་བོ་བཅོམ་ལྡན་འདས་རྡོ་རྗེ་རྣོན་པོས་སེམས་དང་སེམས་ལས་བྱུང་བའི་ཉོན་མོངས་པ་སྣག་ཉེ་བའི་ཉོན་མོངས་པ་རྣམས་གཅོད་པར་འགྱུར་རོ་ཞེས་བྱ་བ་ནི། དེ་ནས་ཞེས་བྱ་བ་ལ་སོགས་པས་སྟོན་པ་ཡིན་ཏེ་དེ་ནས་བཅོམ་ལྡན་འདས་ཀྱི་སྙིང་པོ་འདི་རང་གི་ཐུགས་ཀ་ནས་ཕྱུང་ཞེས་བྱ་བར་སྦྱར་རོ། །བྱང་ཆུབ་སེམས་དཔའ་


DTG057_Page_0145
[མ་དཔེ་གཟིགས་ན་འདིར་གནོན།]

ཆེན་པོ་འཇམ་དཔལ་ཞེས་བྱ་བ་ནི་ཉོན་མོངས་པ་སྲ་བ་མི་མང་བས་འཇམ་ཞིང་མཉེན་པའི་དཔལ་ཏེ། མ་དངས་གང་ལ་མངའ་བ་དེ་ནི་བྱང་ཆུབ་སེམས་དཔའ་ཆེན་པོ་ཡང་ཡིན་ལ་འཇམ་དཔལ་ཡང་ཡིན་པས་བྱང་ཆུབ་སེམས་དཔའ་ཆེན་པོ་འཇམ་དཔལ་ལོ། །དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ན་གནས་པའི་སྲོ་རྗེ་རྩེ་ལྔ་པའི་གཟུགས་དེ་ནི་རྡོ་རྗེ་འཛིན་པ་ཆེན་པོའོ། །དེའི་དམ་ཚིག་ནི་ཤེས་རབ་ཀྱི་མཚོན་ཆ་ལ་སོགས་པའི་ཚུལ་ལོ། །དེ་འབྱུང་བ་ནི་དེ་བཞིན་གཤེགས་བའི་ཐུགས་ཀ་ན་གནས་པའི་སེམས་དཔའི་རྡོ་རྗེའི་གཟུགས་ཀྱི་ཆོས་ལས་བྱུང་བའོ། །དེ་བྱིན་གྱིས་བརླབ་ཅིང་བརྟན་པར་བྱ་པའི་ཕྱིར། སྤྲུལ་པའི་དོན་རྡོ་རྗེ་ལྟར་མི་ཕྱེད་པའི་ཏིང་ངེ་འཛིན་གང་ལ་མིང་དེ་སྐད་ཅེས་བྱ་བ་དེ་ལ་སྙོམས་པར་འཇུག་པ་སྟེ། བཅོམ་ལྡན་འདས་རྡོ་རྗེ་རྣོན་པོའི་ཤེས་རབ་ཀྱི་མཚོན་ཆ་ལ་སོགས་པ་སྤྲུལ་ཅིང་བསྐྱེད་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་ཐ་ཚིག་གོ །དེ་བཞིན་གཤེགས་པ་ཐམས་ཅད་ཀྱི་ཤེས་རབ་དང་ཡེ་ཤེས་ཆེན་པོའི་དམ་ཚིག་ཅེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་ཤེས་རབ་ཆེན་པོའི་མཚོན་ཆ་ལ་སོགས་པའི་ངོ་བོ་ནི་བཅོམ་ལྡན་འདས་འཇམ་དཔལ་ལོ། །དེ་ཉིད་ནི་ཡེ་ཤེས་ཏེ། དེའི་དམ་ཚིག་ནི་རྒྱུའོ། །མིང་དེ་སྐད་ཅེས་བྱ་བའི་དེ་བཞིན་གཤེགས་པ་ཐམས་ཅད་ཀྱི་སྙིང་པོ་རང་གི་ཐུགས་ཀ་ནས་ཕྱུང་བ་ནི་བཛྲ་ཏཱི་ཀྵྞ་ཞེས་བྱ་བའོ། །དེ་ནས་ཞེས་བྱ་བ་ལ་སོགས་པ་ལ། དེ་ཉིད་བཅོམ་ལྡན་འདས་ཀྱི་ཕྱག་གཉིས་སུ་གནས་སོ་ཞེས་བྱ་བར་སྦྱར་རོ། །རྡོ་རྗེ་འཛིན་པ་དེ་ཉིད་དོ་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ལ་གནས་པའི་སེམས་དཔའི་རྡོ་རྗེའོ། །ཤེས་རབ་དང་ཡེ་ཤེས་ཀྱི་རལ་གྲིར་གྱུར་ཏེ་ཞེས་བྱ་བ་ནི་རལ་གྲི་ཕྱག་ན་བསྣམས་པར་གྱུར་པའོ། །རྡོ་རྗེ་ནམ་མཁའི་དབྱིབས་སུ་གྱུར་ཏེ་ཞེས་བྱ་བ་ནི་ཤེས་རབ་ཀྱི་མཚོན་ཆ་དེ་ཐམས་ཅད་རྡོ་རྗེ་ནམ་མཁའ་གཅིག་གི་དབྱིབས་ཏེ། རལ་གྲི་གཅིག་ཏུ་གྱུར་པའོ། །འདིར་ཡང་རྟེན་གྱིས་བརྟེན་པ་པོ་སྟོན་པ་ཡིན་ཏེ། ཤུགས་ནི་ཉོན་མོངས་གཅོད་བྱེད་ཡིན། །ཞེས་གསུངས་པ་


DTG057_Page_0146
[མ་དཔེ་གཟིགས་ན་འདིར་གནོན།]

ལྟ་བུའོ། །དེ་ནས་རྡོ་རྗེ་རལ་གྲིའི་དབྱིབས་དེ་ལས་ཞེས་བྱ་བ་ལ་སོགས་པ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུའི་སྐུར་གྱུར་ཏེ། ཆེད་དུ་བརྗོད་པ་འདིས་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་ཤེས་རབ་དང་ཡེ་ཤེས་ནི་འཕགས་པ་འཇམ་དཔལ་ལོ། །དེ་བཞིན་གཤེགས་པ་ཐམས་ཅད་ཀྱི་ཤེས་རབ་དང་ཡེ་ཤེས་ལ་སོགས་པ་གང་ཡིན་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་ཤེས་རབ་དང་ཡེ་ཤེས་ལ་སོགས་པ། སངས་རྒྱས་ཐམས་ཅད་ཀྱི་རྫུ་འཕྲུལ་དང་ཆོ་འཕྲུལ་རྣམས་ལ་དེ་སྐད་ཅེས་བྱ་སྟེ། དེ་རྣམས་བྱས་ནས་དེ་བཞིན་གཤེགས་པའི་སྐུ་ཐམས་ཅད་གཅིག་ཏུ་གྱུར་ནས་འཕགས་པ་འཇམ་དཔལ་གྱི་སྐུར་གྱུར་ཏོ། །རྒྱུ་གང་གིས་ཤེ་ན། རྡོ་རྗེ་སེམས་དཔའི་ཏིང་ངེ་འཛིན་ནི་ཤིན་ཏུ་འཇམ་པའི་དཔལ་ཡིན་པ་ཉིད་ཅེས་བྱ་བ་གསུངས་ཏེ། མཛེས་པའི་འཇམ་དཔལ་གྱི་ཡུལ་གང་ཡིན་པ་དེ་ནི་ཤིང་ཏུ་འཇམ་བའི་དཔལ་ཡིན་ཏེ། དེའི་ངོ་བོ་ཉེད་ནི་ཤིན་ཏུ་འཇམ་དཔལ་ཡིན་པ་ཉིད་ཀྱིས་སོ། །དོན་གང་ཡིན་ཞེ་ན། རྡོ་རྗེ་སེམས་དཔའི་ཏིང་ངེ་འཛིན་ཏེ། དེ་བཞིན་གཤེགས་པ་ཐམས་ཅད་གཅིག་ཏུ་མཛད་ནས་འཕགས་པ་འཇམ་དཔལ་གྱི་སྐུར་བསྐྱེད་པ་གང་ཡིན་པ་དེ་ནི། རྡོ་རྗེ་སེམས་དཔའི་ཏིང་ངེ་འཛིན་ནི་ཤིན་ཏུ་འཇམ་པའི་དཔལ་ཉིད་ཅེས་བྱའོ། །ཨེ་མ་ཧོ་སངས་རྒྱས་ཐམས་ཅད་ཀྱི། །འཇམ་དབྱངས་བདག་ནི་ཡིན་པར་དགོངས། །ཞེས་བྱ་བ་ལ། ཨེ་མ་འོ་ཞེས་བྱ་བ་ནི་ངོ་མཚར་རོ། །བདག་ནི་སངས་རྒྱས་ཐམས་ཅད་ཉིད་ཀྱི་ཡིན་གྱི། དེ་ལས་གཞན་པ་བྱིས་པ་རྣམས་ཀྱི་དབྱངས་ཀྱི་རྗེས་སུ་འཇུག་པ་ནི་མ་ཡིན་ནོ། །འཇམ་དབྱངས་ཡིན་པར་དགོངས། ཞེས་བྱ་བ་ནི་འཇམ་ཞིང་སྙན་པའི་དབྱངས་ཡིན་པར་དགོངས་ཤིང་གྲགས་པ་ནི་སངས་རྒྱས་ཀྱི་གྲུབ་པའི་མཐའ་ལས་བཤད་པའོ། །ཅི་ཞིག་ངོ་མཚར་ཞེ་ཞེ་ན། གང་ཕྱིར་ཤེས་ཏབ་གཟུགས་མེད་ཀྱང༌། །དབྱངས་ཉིད་དུ་ནི་དམིགས་པ་ཡིན། །ཞེས་བྱ་བ་གསུངས་ཏེ། བདག་ནི་གཉིས་སུ་མེད་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་


DTG057_Page_0147
[མ་དཔེ་གཟིགས་ན་འདིར་གནོན།]

བོ་ཡིན་པ་ལས། གདུལ་བྱ་རྣམས་ཀྱིས་ནི། བདག་བྱང་ཆུབ་སེམས་དཔའ་འཇམ་དཔལ་གྱི་གཟུགས་སུ་མཐོང་བ་འདི་ནི་ངོ་མཚར་ཆེའོ། །དེ་བཞིན་གཤེགས་པ་ཐམས་ཅད་ཀྱི་གཡས་ཕྱོགས་ཀྱི་ཟླ་བའི་དཀྱིལ་འཁོར་ལ་གནས་ནས་ཞེས་བྱ་བ་ནི་བཅོམ་ལྡན་འདས་འོད་དཔག་ཏུ་མེད་པའི་གཡས་ལོགས་སུའོ། །ཡང་བཀའ་ནོད་ཅིང་ཞེས་བྱ་བ་ནི། རྡོ་རྗེ་ཆོས་ལ་ལྟོས་པ་སྟེ། །རང་གི་རྣམ་པར་ཐར་པ་གདུལ་བྱ་ལ་བསྐྱེད་པར་བྱ་བའི་ཕྱིར། བཀའ་ནོད་པར་གྱུར་པའོ། །དེ་ནས་ཞེས་བྱ་བ་ལ་སོགས་པ་ལ། བཅོམ་ལྡན་འདས་ཀྱིས་རྡོ་རྗེ་རལ་གྲི་དེ་དེའི་ལག་པ་གཉིས་སུ་བྱིན་ནོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་ཤེས་རབ་དང་ཡེ་ཤེས་རྣམས་ཀྱི་རལ་གྲི་ནི་ཕྱག་རྒྱའོ། །དེ་ལ་དམིགས་པའི་རྡོ་རྗེ་ལྟར་མི་ཕྱེད་པའི་ཤེས་རབ་དང༌། ཡེ་ཤེས་རྡོ་རྗེ་བྱ་སྟེ། །དེ་ལ་སྙོམས་པར་ཞུགས་པ་ནི་རལ་གྲི་སྦྱིན་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་ཐ་ཚིག་གོ །རང་བཞིན་ཇི་ལྟ་བུ་ཞེ་ན། དེ་བཞིན་གཤེགས་པ་ཐམས་ཅད་ཀྱི་ཉོན་མོངས་པ་གཅོད་པའི་དམ་ཚིག་ཅེས་བྱ་བ་གསུངས་ཏེ། དེ་བཞིན་གཤེགས་པ་ཐམས་ཅད་ཉོན་མོངས་པ་གཅོད་པ་ནི་བཅོམ་ལྡན་འདས་འཕགས་པ་འཇམ་དཔལ་ལོ། །དམ་ཚིག་ནི་དེ་བསྐྱེད་བའི་སྒྱུའོ། །ཅིའི་ཕྱིར་ཞེ་ན། སེམས་ཅན་གྱི་ཁམས་ཞེས་བྱ་བ་ལ་སོགས་པ་གསུངས་ཏེ། སེམས་ཅན་གྱི་ཁམས་ཐམས་ཅད་ཀྱི་སྡུག་བསྔལ་ཐམས་ཅད་གཅོད་པ་ནི་སྡུག་བསྔལ་ཐམས་ཅད་སྤང་བར་མཛད་པ་སྟེ། སྡུག་བསྔལ་གཅིག་པ་དེས་བདེ་བ་དང་ཡིད་བདེ་བ་ཐམས་ཅད་མྱོང་བར་བྱ་བའི་དོན་དུའོ། །དེ་བཞིན་གཤེགས་པ་ཐམས་ཅད་ཀྱི་གསུང་ནི་བཅོམ་ལྡན་འདས་འཕགས་པ་འཇམ་དཔལ་ལོ། །དེའི་རྗེས་སུ་འབྲང་ཞིང་འགྲོ་བས་ན་གསུང་གི་རྗེས་སུ་འབྲང་བའི་ཤེས་རབ་སྟེ། འཇམ་པའི་དབྱངས་རྟོགས་པའི་ངོ་བོ་ཞེས་བྱ་བའི་དོན་ཏོ། །དེས་ཡོངས་སུ་རྫོགས་པ་ནི་ཡོངས་སུ་གྲུབ་པ་སྟེ་དེ་ཉིད་ནི་དངོས་གྲུབ་ཀྱི་མཆོག་གོ །བར་དུ་ཞེས་བྱ་བའི་སྒྲས་ནི་ཡོན་ཏན་གཞན་དག་ཀྱང་རྫོགས་པར་བྱ་བའི་ཕྱིར་


DTG057_Page_0148
[མ་དཔེ་གཟིགས་ན་འདིར་གནོན།]

རོ། །དེ་དག་གི་ཕྱིར་ཞེས་བྱ་བ་ནི་འཇམ་པའི་དབྱངས་ཐོབ་པའི་ཕྱིར་རོ། །དེ་བཞིན་དུ་ཞེས་བྱ་བ་ནི་སངས་རྒྱས་ལྔའི་རིན་པོ་ཆེའི་དབུ་རྒྱན་དང་དར་དཔྱངས་ཀྱི་དབང་གིས་དབང་བསྐུར་བའོ། །རྡོ་རྗེ་བློ་ཞེས་བྱ་བ་ནི་འདི་ལ་གཉིས་སུ་མེད་པའི་བློ་མངའ་བས་ན་རྡོ་རྗེའི་བློའོ། །དེ་ཉིད་ཀྱིས་ན་འདི་ནི་ངེས་པར་འབྱེད་པའི་ཤེས་རབ་ཀྱི་ངོ་བོ་ཡིན་བས་ན་གསུང་གི་རྗེས་སུ་འབྲང་བའི་ཤེས་རབ་དམ་པའོ། །གསུང་གི་རྗེས་སུ་འབྲང་བའི་ཤེས་རབ་ཀྱི་ངོ་བོ་ནི་རྡོ་རྗེ་གསུང་ཡིན་པར་ཤེས་པར་བྱ་སྟེ། གཉིས་སུ་མེད་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པའི་ཚུལ་གྱིས་ཕྱག་ན་གནས་པའོ། །རལ་གྲི་དེས་དེ་བཞིན་གཤེགས་པ་ཐམས་ཅད་ལ་འདེབས་པ་ནི་སྣང་བར་མཛད་པའི་ཏིང་ངེ་འཛན་ལ་ངེས་བར་སྦྱོར་བ་ཡིན་ནོ་ཞེས་བསྟན་པ་ཡིན་ནོ། །འདི་དེ་སངས་རྒྱས་ཐམས་ཅད་ཀྱི། །ཞེས་བྱ་བ་ནི། རང་གི་ཕྱག་ན་གནས་པ་གསུངས་པའོ། །འདི་ཅི་ཞིག་ཡིན་ཞེ་ན། ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ཞེས་བྱ་བ་གསུངས་ཏེ། རལ་གྲིའི་ངོ་བོས་ཐོས་པ་དང༌། བསམ་པ་དང༌། བསྒོམ་པའི་རིམ་གྱིས་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པ་ཐོབ་པར་བྱེད་པ་ཡིན་ལ། རྒྱུ་དེ་ཉིད་ཀྱིས་ན་རལ་གྲི་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བཤད་དོ། །རྒྱུ་གང་ཁོ་ནས་འདི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གྱི་རལ་གྲིའི་གཟུགས་ཡིན་པ་དེས་ན་གཅོད་པར་བྱེད་པ་ཡིན་ནོ། །སུ་ཞིག་གཅོད་ཅེ་ན། དགྲ་རྣམས་ཐམས་ཅད་ཅེས་བྱ་བ་འདོད་ཆགས་ལ་སོགས་པ་དང༌། ཕྱི་རོལ་གྱི་དངོས་པོ་རྣམས་སོ། །འདོད་ཆགས་ལ་སོགས་པའི་སྡིག་པ་རྣམས་ངེས་པར་སེལ་བའི་ངོ་བོ་ཉིད་ཀྱིས་ན། ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ཡིན་ལ། དེ་བས་ན་འདི་ནི་སྡིག་པ་ཐམས་ཅད་འཇོམས་པའི་མཆོག་ཅེས་བྱའོ། །དེ་ལྟར་རྡོ་རྗེ་རྣོན་པོས་དེ་བཞིན་གཤེགས་པ་ཐམས་ཅད་ཀྱི་སྙོན་མོངས་པ་དང་ཉེ་བའི་ཉོན་མོངས་པ་བཅད་ལ་ཉོན་མོངས་པ་དང་ཉེ་བའི་ཉོན་མོངས་པ་དང༌། སྒྲིབ་པ་མེད་པའི་སེམས་ནི་སྔོན་གྱི་འཕེན་པའི་ཤུགས་ཀྱི་དབང་གིས་མངོན་པར་ཤེས་པ་ལ་སོགས་པའི་མཐུས་དཀྱིལ་འཁོར་ལོའི་ཚུལ་རྡོ་རྗེ་རྒྱུས་དཀྱིལ་འཁོར་དུ་འཇུག་པར་བྱེད་དོ་ཞེས་


DTG057_Page_0149
[མ་དཔེ་གཟིགས་ན་འདིར་གནོན།]

བསྟན་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་བཅོམ་ལྡན་འདས་ཀྱིས་སྙིང་པོ་འདི་རང་གི་ཐུགས་ཀ་ནས་ཕྱང་ངོ་ཞེས་བྱ་བར་སྦྱར་རོ། །སེམས་བསྐྱེད་པའི་རྗེས་ཐོགས་ཉིད་ལ། ཆོས་ཀྱི་འཁོར་ལོ་སྟེ་དཀྱིལ་འཁོར་རབ་རུ་བོ་སྐོར་ཞིང་སྤྲུལ་པའི་དང་ཚུལ་འདི་ལ་མངའ་བས་ན་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའོ། །བྱང་ཆུབ་སེམས་དཔའ་ཆེན་པོ་ཡང་ཡིན་ལ། སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་ཡང་ཡིན་བས་ན། བྱང་ཆུབ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའོ། །ཇི་སྐད་དུ་བཤད་པའི་སེམས་དཔའི་རྡོ་རྗེའི་གཟུགས་ཅན་ནི་ཀུན་དུ་བཟང་པོའོ། །འདིའི་དམ་ཚིག་ནི་དཀྱིལ་འཁོར་ཆེན་པོ་ལ་སོགས་པའི་ཚུལ་ལོ། །ལྷག་མ་ནི་སྔ་མ་བཞིན་ཏེ། དཀྱིལ་འཁོར་ལ་སོགས་པ་སྤྲུལ་པ་བསྐྱེད་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་ཚིག་གོ །དེ་བཞིན་གཤེགས་པ་ཐམས་ཅད་ཀྱི་འཁོར་ལོའི་དམ་ཚིག་ཅེས་བྱ་བ་ལ། དེ་བཞིན་གཤེགས་པ་ཐམས་ཅད་ཀྱི་འཁོར་ལོ་ནི་དཀྱིལ་འཁོར་དང་རྡོ་རྗེ་རྒྱུའི་ཚུལ་ལོ། །དེའི་དམ་ཚིག་ནི་བསྐྱེད་པའི་རྒྱུའོ། །བཅོམ་ལྡན་འདས་རྡོ་རྗེ་འཛིན་པ་དེ་ཉིད་དེ་ཞེས་བྱ་བ་ནི་སེམས་དཔའི་རྡོ་རྗེ་རྣམ་པ་རྡོ་རྗེ་དབྱིངས་ལ་སོགས་པ་རྡོ་རྗེ་དབྱིངས་ཀྱི་དུམ་བུ་ལས་གསུངས་པའི་དཀྱིལ་འཁོར་ཐམས་ཅད་དུ་གྱུར་ཏེ་བྱུང་ངོ༌། །རྡོ་རྗེ་འཁོར་ལོའི་དབྱིབས་ཞེས་བྱ་བ་ནི་རྡོ་རྗེ་རྩེ་གཅིག་པའི་རྩིབས་བརྒྱད་པ་ཅན་གྱི་འཁོར་ལོའི་གཟུགས་སོ། །དེ་ནས་ཞེས་བྱ་བ་ལ། བཅོམ་ལྡན་འདས་ཀྱི་ཐུགས་ལ་གནས་ནས་ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་འཁོར་ལོ་ནི་བཅོམ་ལྡན་འདས་རྡོ་རྗེ་རྒྱུའོ། །དེ་བསྐོར་བ་ནི་སེམས་ཅན་གྱི་རྒྱུད་ལ་བསྐྱེད་བའོ། །དེ་ཉིད་ལ་སོགས་པ་གང་ཡིན་པ་དེ་ནི། དེ་བཞིན་གཤེགས་པ་ཐམས་ཅད་ཀྱིས་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་ལ་སོགས་པ་སངས་རྒྱས་ཐམས་ཅད་ཀྱི་རྫུ་འཕྲུལ་དང་ཆོ་འཕྲུལ་རྣམས་བྱས་ནས། དེ་བཞིན་གཤེགས་


DTG057_Page_0150
[མ་དཔེ་གཟིགས་ན་འདིར་གནོན།]

པ་ཐམས་ཅད་གཅིག་ཏུ་གྱུར་ནས། བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཆེས་ཀྱི་འཁོར་ལོ་བསྐོར་པའི་སྐུར་གྱུར་ཏོ། །རྒྱུ་གང་ཡིན་ཞེ་ན། སེམས་བསྐྱད་མ་ཐག་ཏུ་ཆོས་ཀྱི་འཁོར་ལོ་རབ་ཏུ་བསྐོར་བ་ཉིད་དང་ཞེས་བྱ་བ་གསུངས་ཏེ། སེམས་བསྐྱེད་པ་ཙམ་གྱིས་ཆོས་ཀྱི་འཁོར་ལོ་རབ་ཏུ་བསྐོར་བའི་རྒྱུས་ནི་རབ་ཏུ་བསྐོར་བའོ། །གང་གིས་དེའི་ངོ་བོ་ཉིད་ཡིན་པ་དེས་ན་རབ་ཏུ་བསྐོར་བ་ཡིན་པ་ཉིད་དོ། །གང་གི་ཞེ་ན། རྡོ་རྗེ་དམ་པ་ཆོས་ཅན་གྱི། །ཞེས་བྱ་བ་སྟེ། དེ་བཞིན་གཤེགས་པ་ཐམས་ཅད་གཅིག་ཏུ་མཛད་པའི་ཚུལ་གྱིས་རྡོ་རྗེ་རྒྱུ་བསྐྱེད་པར་ཐུགས་རྩེ་གཅིག་ཏུ་མཛད་པ་ན་རྡོ་རྗེ་སེམས་དཔའི་ཏིང་ངེ་འཛིན་ཏོ། །ཨེ་མའོ་རྡོ་རྗེ་འཁོར་ལོ་བདག །ཅེས་བྱ་བ་ནི་སྟོང་པ་ཉིད་ཀྱི་རང་བཞིན་བདག་ཡིན་པའོ། །སུ་ཞིག་གི་ཡིན་ཞེ་ན། རྡོ་རྗེ་དམ་པ་ཆོས་ཅན་གྱི། །ཞེས་བྱ་བ་སྟེ། རྡོ་རྗེ་ཉིད་གང་གི་ཆོས་ཀྱི་མཆོག་ཡིན་པ་དེ་ནི། རྡོ་རྗེ་དམ་པ་ཆོས་ཅན་གྱི་སྟེ། དེ་བཞིན་གཤེགས་པ་སྟེ། དེ་རྣམས་ཀྱི་དེ་ཁོ་ན་ཉིད་ཀྱི་ཆོས་ཉིད་ཅེས་བྱ་བའི་ཐ་ཚིག་གོ །ཅི་ཞིག་ངོ་མཚར་ཆེ་ཞེ་ན། གང་ཕྱིར་སེམས་བསྐྱེད་ཙམ་གྱིས་ཀྱང༌། །ཞེས་སེམས་བསྐྱེད་པའི་རྗེས་ཐོགས་ཉིད་ལ་ཆོས་ཀྱི་འཁོར་ལོ་སྟེ། དཀྱིལ་འཁོར་རབ་གྱུར། །ཞེས་བྱའོ། །འདི་སྐད་སྟོན་པ་ཡིན་ཏེ། བདག་ནི་གཉིས་སུ་མེད་བའི་ཡེ་ཤེས་ཀྱི་ངོ་བོ་ཡིན་པ་ལས། གདུལ་བྱ་རྣམས་ཀྱིས་དཀྱིལ་འཁོར་སྤྲུལ་པས་སེམས་ཅན་གྱི་དོན་བྱེད་པར་བདག་མཐོང་ཞིང་རྟོགས་པ་འདི་ངོ་མཚར་ཆེའོ། །དེ་བཞིན་གཤེགས་པ་ཐམས་ཅད་ཀྱི་གཡོན་ཕྱོགས་ཀྱི་ཟླ་བའི་དཀྱིལ་འཁོར་ལ་གནས་ནས་ཞེས་བྱ་བ་ནི། བཅོམ་ལྡན་འདས་སྣང་བ་མཐའ་ཡས་ཀྱི་གཡོན་ལོགས་སུའོ། །ཡང་ཞེས་བྱ་བའི་སྒྲས་ནི། སྔར་ནི་འཕགས་པ་འཇམ་དཔལ་གྱི་ཚུལ་གྱིས་ཤེས་རབ་དང་ཡེ་ཤེས་བསྐྱེད་པའི་ཕྱིར་བཀའ་ནོད་པ་ཡིན་ལ། ད་ལྟར་དཀྱིལ་འཁོར་བསྐོར་བའི་ཕྱིར་ཡིན་པས་ཡང་ཞེས་བྱ་བའི་སྒྲ་སྨོས་སོ། །དེ་ནས་ཞེས་བྱ་བ་ལ་སོགས་པ་ལ། བཅོམ་ལྡན་འདས་ཀྱིས་འཁོར་ལོ་དེ་དེའི་ལག་པ་གཉིས་སུ་བྱིན་ནོ་ཞེས་བྱ་བར་སྦྱར་རོ། །


DTG057_Page_0151
[མ་དཔེ་གཟིགས་ན་འདིར་གནོན།]

དེ་བཞིན་གཤེགས་པ་ཐམས་ཅད་ཀྱི་འཁོར་ལོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་ཞེས་བྱ་བ་ལ། དེ་བཞིན་གཤེགས་པ་ཐམས་ཅད་ཀྱི་འཁོར་ལོ་ནི་རྣམ་པར་སྣང་མཛད་ཀྱི་ཕྱག་ན་གནས་པའི་རྩིབས་བརྒྱད་པ་སྟེ། དེ་ལ་དམིགས་པའི་ཏིང་ངེ་འཛིན་ནི། དེ་བཞིན་གཤེགས་པ་ཐམས་ཅད་ཀྱི་འཁོར་ལོ་རྡོ་རྗེ་ཞེས་བྱ་བའོ། །ཏིང་ངེ་འཛིན་དེ་ལ་སྙོམས་པར་ཞུགས་པ་ལ་ནི་འཁོར་ལོ་སྦྱིན་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་བར་དུའོ། །དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་ཆེན་པོ་ནི་རྡོ་རྗེ་དབྱིངས་ལ་སོགས་པ་དང་རྡོ་རྗེ་རྒྱུ་ནི་དཀྱིལ་འཁོར་ཆེན་པོའོ། །དེའི་དམ་ཚིག་ནི་རྒྱུའོ། །འཁོར་ལོ་དེ་ཅིའི་ཕྱིར་བྱིན་ཞེ་ན། སེམས་ཅན་གྱི་ཞེས་བྱ་བ་ལ་སོགས་པ་གསུངས་ཏེ། སེམས་ཅན་གྱི་ཁམས་མ་ལུས་ཤིང་ལུས་པ་མེད་པར་འཇུག་པ་དེས་ཕྱིར་མི་ལྡོག་པ་ཐོབ་བའི་དོན་དེས། འཁོར་ལོ་གང་ཡིན་པ་དེ་ལ་དེ་སྐད་ཅེས་བྱའོ། །དེས་བདེ་བ་དང་ཡིད་བདེ་བ་ཐམས་ཅད་མྱོང་བར་བྱ་བ་ནི། དེ་ལ་གནས་པས་བྱང་ཆུབ་སེམས་དཔའ་ཆེན་པོའི་ལམ་ལས་ཕྱིར་མི་ལྡོག་པར་གྱུར་པས་ན་ཕྱིར་མི་ལྡོག་པ་སྟེ། ལྡོག་པ་མེད་པ་ནི་མི་ལྡོག་པའོ། །དེ་བཞིན་གཤེགས་པ་ཐམས་ཅད་ཀྱི་དམ་པའི་ཆོས་ཀྱི་འཁོར་ལོ་ནི་དཀྱིལ་འཁོར་རོ། །དེ་བསྐོར་བ་ནི་གདུལ་བྱའི་རྒྱུད་ལ་བསྐོར་བའོ། །དེ་ཉིད་ནི་དམ་པ་གྲུབ་པ་སྟེ། དེ་དག་གི་ཕྱིར་ཞེས་བྱ་བ་བྱང་ཆུབ་བ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་གདུལ་བྱའི་རྒྱུད་ལ་བསྐྱེད་པའི་རྒྱུར་རོ། །བར་དུ་ཞེས་བྱ་བའི་སྒྲས་ནི་གཞན་དག་ཀྱང་བསྡུའོ། །དེ་བཞིན་དུ་ཞེས་བྱ་བ་ནི་སངས་རྒྱས་ལྔའི་རིན་པོ་ཆེའི་དབུ་རྒྱན་དང༌། དར་དཔྱངས་ཀྱི་དབང་གིས་དང་བསྐུར་ནས་སོ། །རྡོ་རྗེ་སྙིང་པོ་ཞེས་བྱ་བལ་རྡོ་རྗེ་ནི་སྟོང་པ་ཉིད་ཀྱི་ཡེ་ཤེས་སོ། །སྙིང་པོ་ནི་གཅེས་པར་བྱ་བར་བཤད་དོ། །དེ་གྲུབ་པའི་རྒྱུ་ཡིན་པས་ན། འཁོར་ལོ་ནི་རྡོ་རྗེ་སྙིང་པོ་དེས་ཉེ་བར་མཚོན་པའི་སེམས་དཔའ་ནི་རྡོ་རྗེ་སྙིང་པོའོ། །ཕྱིར་མི་ལྡོག་པ་ཉིད་དུ་འཇོག་ཅིང་ཞེས་པ་ནི། ཕྱིར་མི་ལྡོག་པའི་ངོ་བོ་ཉིད་


DTG057_Page_0152
[མ་དཔེ་གཟིགས་ན་འདིར་གནོན།]

ནི་ཕྱིར་མི་ལྡོག་པ་ཉིད་དི། ཕྱིར་མི་ལྡོག་པ་དེ་ཉིད་དུ་འཇོག་པ་ནི་རང་གི་རང་བཞིན་དེ་བཞིན་གཤེགས་པ་ཐམས་ཅད་དུ་བྱེད་པའོ། །འདི་དེ་སངས་རྒྱས་ཐམས་ཅད་ཀྱི། །ཞེས་བྱ་བ་ནི་བདག་གི་ལག་པར་བྱིན་པ་གང་ཡིན་པ་འདི་ནི་སངས་རྒྱས་ཐམས་ཅད་ཀྱི་ཡིན་ནོ། །ལས་ཅི་ཞིག་བྱེད་ཅེ་ན། ཆོས་རྣམས་ཐམས་ཅད་རྣམ་པར་སྦྱོང༌། །ཞེས་བྱ་བ་ཡིན་ཏེ། ཆོས་རྣམས་ཐམས་ཅད་ནི་བྱང་ཆུབ་ཏུ་སེམས་བསྐྱེད་པ་ལ་སོགས་པའོ། །དེ་རྣམས་ཀྱི་དཀྱིལ་འཁོར་དུ་འཇུག་པས་རྣམ་བར་དག་པར་འགྱུར་ལ། དེ་བས་ན་འཁོར་ལོ་ནི་ཆོས་ཐམས་ཅད་རྣམ་པར་སྦྱོང་བར་བྱེད་པ་ཡིན་ནོ། །ཕྱིར་མི་ལྡོག་པ་རྣམས་ཀྱི་འཁོར་ལོ་ནི་ཕྱིར་མི་ལྡོག་པའི་འཁོར་ལོའོ། །ནི་ཞེས་བྱ་བའི་སྒྲས་ནི་ངེས་པར་གཟུང་བ་སྟེ། འདིས་ནི་ཕྱིར་མི་ལྡོག་པ་རྣམས་ཀྱི་ཡིན་གྱི་གཞན་གྱི་ནི་མ་ཡིན་ནོ། །དེ་བས་ན། བྱང་ཆུབ་སྙིང་པོ་ཡིན་པར་བཤད། །ཅེས་བྱ་བ་སྟེ། ཉན་ཐོས་དང་རང་སངས་རྒྱས་ཀྱི་བྱང་ཆུབ་ལ་ལྟོས་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི། མཆོག་ཡིན་པས་སྙིང་པོར་གྱུར་པ་ཡིན་ལ། དེའི་ངོ་བོ་ཉིད་ནི་འཁོར་ལོ་འདི་ཡིན་པས་བྱང་ཆུབ་སྙིང་པོ་ཡིན་ཞེས་བྱའོ། །བཤད་ཅེས་བྱ་བ་ནི་རྒྱུད་འདིར་གསུངས་པའོ། །དེ་ལྟར་རྡོ་རྗེ་རྒྱུས་དེ་བཞི་ན་གཤེགས་པ་རྣམས་དཀྱིལ་འཁོར་དུ་བཅུག་ནས། དེ་དཀྱིལ་འཁོར་ལ་སོགས་པ་བཤད་པའི་ཚུལ་གྱིས་རྡོ་རྗེ་སྨྲ་བ་སྤྲོས་པ་མེད་པའི་ཆོས་ཉིད་ལ་ཇི་ལྟར་ངེས་པར་སྦྱོར་བ་དེ་ནི། དེ་ནས་ཞེས་བྱ་བ་ལ་སོགས་པས་སྟོན་ཏེ། དེ་ནས་བཅོམ་ལྡན་འདས་ཀྱིས་སྙིང་པོ་འདི་རང་གི་ཐུགས་ཀ་ནས་ཕྱུང་ངོ་ཞེས་བྱ་བར་སྦྱར་རོ། །ཆོས་ཐམས་ཅད་ནི་དག་གི་ལམ་དང་བྲལ་ཞིང༌། སྒྲ་རྣམས་བྲག་ཅ་དང་འདྲའོ་ཞེས་ཐུགས་སུ་ཆུད་པས་འདི་ལ་ཚིག་ཏུ་བརྗོད་པ་མི་མངའ་བས་ན་མི་གསུང་བའོ། །བྱང་ཆུབ་སེམས་དཔའ་ཆེན་པོ་ཡང་ཡིན་ལ་མི་གསུང་བ་ཡང་ཡིན་པས་ན་བྱང་ཆུབ་སེམས་དཔའ་ཆེན་པོ་མི་གསུང་བ་སྟེ། སེམས་དཔའི་རྡོ་རྗེའི་ཚུལ་ཅན་གྱི་ཀུན་དུ་བཟང་པོའོ། །དེའི་དམ་ཚིག་ནི་ཆོས་ཀྱི་ཡི་གེའི་གཟུགས་སོ། །དེ་ལས་བྱུང་བ་ནི་སེམས་དཔའི་རྡོ་རྗེའི་ཚུལ་གྱིས་ཆོས་གང་


DTG057_Page_0153
[མ་དཔེ་གཟིགས་ན་འདིར་གནོན།]

ལས་བྱུང་བའོ། །དེའི་བྱིན་གྱི་རླབས་ནི་བརྟན་པར་བྱེད་པའི་ཏིང་ངེ་འཛིན་གང་ཡིན་པའི་ཏིང་ངེ་འཛིན་དེ་ལ་སྙོམས་པར་འཇུག་པའི་ཆོས་ཀྱི་ཡི་གེ་ལ་སོགས་པ་སྤྲུལ་ཞིང་བསྐྱེད་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་ཐ་ཚིག་གོ །དེ་བཞིན་གཤེགས་པ་ཐམས་ཅད་བཟླས་པའི་དམ་ཚིག་ཅེས་བྱ་བ་ནི། རྡོ་རྗེ་སྨྲ་བ་ནི་བཟླས་པའོ། །དེའི་དམ་ཚིག་ནི་བསྐྱེད་པའི་རྒྱུ་སྟེ། བཛྲ་བྷཱ་ཥ་ཞེས་བྱ་བའི་སྙིང་པོའོ། །དེ་ནས་ཞེས་བྱས་བ་ལ་སོགས་པ་ལ། བཅོམ་ལྡན་འདས་དེ་ཉིད་རྡོ་རྗེ་བཟླས་པའི་དབྱིངས་སུ་གྱུར་ཏེ་ཕྱག་གཉིས་སུ་གནས་སོ་ཞེས་བྱ་བར་སྦྱར་རོ། །བཅོམ་ལྡན་འདས་ཕྱག་ན་རྡོ་རྗེ་དེ་ཉིད་ཅེས་བྱ་བ་ནི་སེམས་དཔའི་རྡོ་རྗེའི་ཚུལ་ལོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཉིད་ཀྱི་ཡི་གེ་ནི། སྒྲ་འབྱུང་བ་ཡིན་པའི་ཕྱིར་ཆོས་ཀྱི་ཡི་གེ་ཞེས་བྱ་སྟེ། ལྗགས་ཀྱི་ཕྱག་རྒྱལ་བྱ་བར་བཤད་དོ། །འདི་ཡང་ཅིའི་ཕྱིར་ཞེ་ན། རང་གི་ཕྱག་རྒྱ་ལས་གཟུགས་སུ་སྤྲུལ་པ་དེ་ནི་དེ་ལས་རང་གི་རྣམ་པར་སྤྲུལ་བ་ཐམས་ཅད་འདིར་འདོད་དེ། གང་གི་ཕྱིར་རྡོ་རྗེ་བཟླས་པའི་དབྱིབས་ཞེས་བྱ་བ་ལྕེའི་ཕྱག་རྒྱ་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ།བྱང་ཆུབ་སེམས་དཔའི་སྐུར་གྱུར་ནས་ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཉིད་ནི་ཆོས་ཐམས་ཅད་སྤྲོས་པ་མེད་པའོ་ཞེས་བྱ་བའོ། །དེ་ལ་སོགས་པ་གང་ཡིན་པ་དེ་དག་བྱས་པ་སྟེ། གདུལ་བྱ་རྣམས་ལ་རྡོ་རྗེ་སྨྲ་བའི་ཏིང་ངེ་འཛིན་བསྐྱེད་པ་ལ་སོགས་པ་ལ་ཞེས་བྱ་བའི་བར་དུའོ། །རྡོ་རྗེ་སེམས་དཔའི་ཏིང་ངེ་འཛིན་ཤིན་ཏུ་ཚིག་མ་ཡིན་པ་ཉིད་དང་ཞེས་བྱ་བ་ནི་གང་ལ་ཚིག་མེད་པ་དེ་ནི་ཚིག་མ་ཡིན་པའོ། །མཛེས་པ་ཡང་ཡིན་ལ་ཚིག་མ་ཡིན་པ་ཡང་ཡིན་པས་ན་ཤིན་ཏུ་ཚིག་མ་ཡིན་པ་སྟེ། དེའི་ངོ་བོ་ཉིད་ཡིན་པས་ན་ཚིག་མ་ཡིན་པ་ཉིད་དོ། །དེ་ཡང་སངས་རྒྱས་ཐམས་ཅད་གཅིག་ཏུ་བྱས་ནས་བྱང་ཆུབ་སེམས་དཔའ་ཆེན་པོ་རྡོ་རྗེ་སྨྲ་བའི་གཟུགས་སུ་ཤིན་ཏུ་ཡོངས་སུ་བསྒོམ་པའི་ཕྱིར་རོ་ཞེས་བྱ་བའི་ཐ་ཚིག་གོ །ཨེ་མའོ་རང་འབྱུང་རྣམས་ཀྱི་ཞེས་བྱ་བ་ནི་


DTG057_Page_0154
[མ་དཔེ་གཟིགས་ན་འདིར་གནོན།]

སངས་རྒྱས་རྣམས་ཀྱིའོ། །གསང་བ་ནི་དེའི་སྣོད་མ་ཡིན་པའི་འགྲོ་བ་ལ་བརྩེ་བར་བྱ་བ་ཡིན་པས་སོ། །དེ་ཉིད་ཀྱིས་ན་ལྡེམ་པོ་ངག་ཏུ་བདག་དགོངས་ཏེ་ཞེས་བྱ་བ་གསུངས་ཏེ། དགོངས་པ་ཅན་གྱི་ཚིག་དྲང་བའི་དོན་དུ་གསུངས་པ་ནི་ལྡེམ་པོའི་ངག་གོ །བདག་ཅེས་བྱ་བ་ནི་བདག་ཉིད་ཡིན་པར་སྨྲ་བའོ། །དགོངས་ཞེས་བྱ་བ་ནི་བཤད་ཅེས་པའོ། །ཅི་ཞིག་ངོ་མཚར་ཆེ་ཞེ་ན། གང་གི་ཕྱིར་ཞེས་བྱ་བ་ལ་སོགས་གསུངས་ཏེ། གང་གི་ཕྱིར་རོ། །དཀྱིལ་འཁོར་ལ་སོགས་པའི་ཚུལ་གྱིས་དམ་པའི་ཆོས་ཚིག་གིས་བརྗོད་དུ་མེད་པར་འཆད་ཅིང་སྟོན་པས་ན། ཚིག་གི་སྤྲོས་དང་རྣམ་པར་བྲལ། །ཞེས་བྱའོ། །འདི་སྐད་སྟོན་པ་ཡིན་ཏེ། དོན་དམ་པར་ནི་ཆོས་སྟོན་པར་འབྱུང་བ་ཡང་མེད་ན། ཀུན་རྫོབ་ཏུ་སྟོན་པར་མཛད་པས་གདུལ་བྱ་རྣམས་ཀྱིས་དོན་དམ་པར་སྟོན་པར་མཛད་དོ་སྙམ་པ་འདི་ནི་ངོ་མཚར་ཆེའོ། །དེ་བཞིན་གཤེགས་པ་ཐམས་ཅད་ཀྱི་རྒྱབ་ན་ཞེས་བྱ་བ་ནི། བཅོམ་ལྡན་འདས་འོད་དཔག་ཏུ་མེད་པའིའོ། །དེ་ནས་ཞེས་བྱ་བ་ལ་སོགས་པ་ལ། བཅོམ་ལྡན་འདས་ཀྱིས་རྡོ་རྗེ་བཟླས་པ་དེ་དེའི་ལག་ཏུ་བྱིན་ནོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་གསུང་ནི་ལྕེའི་ཕྱག་རྒྱ་སྟེ། དེ་ལ་དམིགས་པ་ནི་གསུང་རྡོ་རྗེ་ཞེས་བྱ་བའི་ཏིང་ངེ་འཛིན་ཏེ། དེ་ལ་སྙོམས་པར་ཞུགས་པ་ནི་ལྕེ་སྦྱིན་པའི་རྣམ་པར་ཐུགས་རྩེ་གཅིག་ཏུ་མཛད་དོ་ཞེས་བྱ་བའི་ཐ་ཚིག་གོ །དེ་བཞིན་གཤེགས་པ་ཐམས་ཅད་ཀྱི་གསུང་གི་ཡེ་ཤེས་ནི། ཆོས་ཐམས་ཅད་སྤྲོས་པ་མེད་པ་ཞེས་བྱ་བ་རྡོ་རྗེ་སྨྲ་བའི་ཚུལ་དུ་ངེས་པའོ། །དེའི་དམ་ཚིག་ནི་རྒྱུའོ། །སེམས་ཅན་གྱི་ཁམས་མ་ལུས་ཤིང་ལུས་བ་མེད་པ་རྣམས་ཀྱི་ཚིག་གྲུབ་པ་ནི་སོ་སོ་ཡང་དག་པར་རིག་པ་བཞི་ཐོབ་པའོ། །དེ་བཞིན་གཤེགས་པ་ཐམས་ཅད་ཀྱི་གསུང་གི་གསང་བའི་ངོ་བོ་ཉིད་ནི། དེ་བཞིན་གཤེགས་པ་ཐམས་ཅད་ཀྱི་གསུང་གི་གསང་བ་སྟེ། རྡོ་རྗེ་སྨྲ་བའི་ངོ་བོ་ཉིད་དོ། །དེ་བཞིན་དུ་ཞེས་བྱ་བ་ནི། སངས་རྒྱས་ལྔའི་རིན་པོ་ཆེའི་དབུ་རྒྱན་དང་དར་དཔྱངས་ཀྱི་དབང་གིས་དབང་བསྐུར་བའོ། །རྡོ་རྗེའི་ཚིག་ཅེས་བྱ་བ་ནི། ཆོས་ཐམས་


DTG057_Page_0155
[མ་དཔེ་གཟིགས་ན་འདིར་གནོན།]

ཅད་སྤྲོས་པ་དང་བྲལ་བ་འདིས་སམ། རྡོ་རྗེའི་ཚིག་ནི་སྒྲ་སྤངས་པའི་ཞེས་བྱ་བ་འདིས་ཉེ་བར་མཚོན་པ་ཉིད་ཀྱིས་ནི་རྡོ་རྗེའི་ཚིག་ཅེས་བྱའོ། །རྡོ་རྗེ་བཟླས་པ་དེས་ཞེས་བྱ་བ་ནི་རང་གི་ཕྱག་ན་གནས་པའི་ལྗགས་ཀྱི་ཕྱག་རྒྱའི་ཚུལ་གྱིས་སོ། །དེ་བཞིན་གཤེགས་པ་ཐམས་ཅད་ལ་ཡང་དག་པར་སྨྲ་ཞིང་ཞེས་བྱ་བ་ནི། རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་ཕྱོགས་བཅུ་ན་བཞུགས་པ་ཐམས་ཅད་དང༌། ཡང་དག་པར་སྨྲ་བའི་རང་བཞིན་ཅན་རྡོ་རྗེའི་ཚིག་བརྗོད་པ་ལ་བརྩོན་པར་བྱེད་ཅིང་ཆེད་དུ་བརྗོད་པ་འདི་ཆེད་དུ་བརྗོད་པ་སྟེ། འདི་ཞེས་བྱ་བ་ནི་བློ་ལ་གནས་པའོ། །འདི་དེ་སངས་རྒྱས་ཐམས་ཅད་ཀྱི། །ཞེས་བྱ་བ་ནི། རང་གི་ལག་ན་གནས་པ་གསུངས་པའོ། །དེ་ཅི་ཞིག་ཡིན་ཞེ་ན། རྡོ་རྗེ་བཟླས་པར་བརྗོད་པ་ཡིན། །ཞེས་བྱ་བ་གསུངས་ཏེ། སྤྲོས་པ་མེད་པར་བརྗོད་པ་ནི་རྡོ་རྗེ་བཟླས་པ་ཞེས་བརྗོད་ཅིང་བཤད་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི། །སྔགས་འདི་མྱུར་དུ་སྒྲུབ་བྱེད་ཡིན། །ཞེས་བྱ་བ་ནི་སྒྲ་སྤངས་པའི་ཚིག་གི་སྤྲོས་པ་མེད་པའི་ཆོས་སྨྲ་བ་ཉིད། དེ་བཞིན་གཤེགས་པ་ཐམས་ཅད་དེ། །རྡོ་རྗེ་དབྱིངས་ཀྱི་དུམ་བུ་ལས་གསུངས་པའི་སྔགས་རྣམས་མྱུར་དུ་སྒྲུབ་པར་བྱེད་པ་ཡིན་ནོ། །རྡོ་རྗེ་ཆོས་ཉིད་ཀྱི་ཡེ་ཤེས་དང་ཞེས་བྱ་བ་ལ་སོགས་པས་ནི་སྡོམ་གསུངས་པ་ཡིན་ཏེ། རྡོ་རྗེ་ཆོས་ཉིད་ནི་གཉིས་སུ་མེད་པའི་ཏིང་ངེ་འཛིན་ཏོ། །དེའི་ཡེ་ཤེས་ནི་རྡོ་རྗེ་ཆོས་སུ་དེས་པའོ། །དེ་བཞིན་གཤེགས་པ་ཐམས་ཅད་ཀྱི་ཤེས་རབ་ཉིད་ནི་ཡེ་ཤེས་ཏེ་རྡོ་རྗེ་རྣོན་པོའོ། །ཆོས་ཀྱི་འཁོར་ལོ་ཆེན་པོ་ནི་དཀྱིལ་འཁོར་ཏེ། དེ་བསྐོར་བའི་ཡེ་ཤེས་ནི་རྡོ་རྗེ་རྒྱུའོ། །དེ་བཞིན་གཤེགས་པ་ཐམས་ཅད་ཀྱི་གསུང་གི་སྤྲོས་པ་ནི་ངག་གི་རྣམ་པར་རྟོག་པའོ། །དེ་རྣམ་པར་རྟོག་པའི་ཡེ་ཤེས་ནི་རྡོ་རྗེ་སྨྲ་བའོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཆེན་པོ་ལས་བྱུང་བའི་སེམས་དཔའ་ནི། ཡེ་ཤེས་སེམས་དཔའ་ཆེན་པོ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་ལས་བྱུང་བའོ་ཐ་ཚིག་གོ །དེ་ཡང་ཤེས་


DTG057_Page_0156
[མ་དཔེ་གཟིགས་ན་འདིར་གནོན།]

རབ་ཀྱི་ཕ་རོལ་ཏུ་ཕྱིན་པ་རྒྱལ་པོ། ཐུབ་པའི་དབང་པོ་འོད་དཔག་མེད། །ཅེས་གསུངས་པ་ཡིན་ནོ། །དེ་དག་ཀྱང་ལྡོག་པའི་དབྱིབས་རྣམ་པ་བཞིར་གཞག་པར་བྱ་སྟེ། བསྒྲལ་བ་དང༌། གྲོལ་བ་དང༌། དབུགས་དབྱུང་བ་དང༌། མྱ་ངན་ལས་འདས་པ་ལ་གཞག་པའི་ཕྱིར་ཡང་ལོག་པའི་ཏིང་ངེ་འཛིན་གྱི་རྒྱ་མཚོ་ལས། རྡོ་རྗེ་ཆོས་ཀྱི་ཡང་དག་པའི་ཏིང་ངེ་འཛིན་གྱི་ཚུལ་གྱིས་བསྒྲལ་བ་ནི། མཉམ་པར་གཞག་པའི་སེམས་ཀྱིས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ་ཞེས་བྱ་བའི་དོན་ཏོ། །རྡོ་རྗེ་རྣོན་པོས་ནི་ཉོན་མོངས་པ་དང་ཉེ་བའི་ཉོན་མོངས་པ་རྣམས་ལས་གྲོལ་བར་མཛད་དོ། །རྡོ་རྗེ་རྒྱུས་ནི་རྫུ་འཕྲུལ་དང་རྣམ་པར་འཕྲུལ་པ་སྣ་ཚོགས་པའི་ཚུལ་གྱིས་འགྲོ་བ་རྣམས་དབུགས་འབྱིན་ཏོ། །རྡོ་རྗེ་སྨྲ་བས་ནི་རྣམ་པར་རྟོག་པའི་ཚིག་ལས་སྤྲོས་པ་མེད་པའི་ཆོས་ཁོང་དུ་ཆུད་པས་མྱ་ངན་ལས་འདས་པ་ལ་འཇོག་པར་མཛད་དོ། །དེ་ལྟར་རྡོ་རྗེ་སྨྲ་བས་དེ་བཞིན་གཤེགས་པ་ཐམས་ཅད་སྤྲོས་པ་མེད་པའི་ཆོས་ལ་སྦྱར་བ་རྣམས་མཆོད་པ་མེད་པར་འགྲུབ་པར་མི་འགྱུར་བས། དེའི་ཕྱིར་རྡོ་རྗེ་ལས་ཀྱི་དེ་བཞིན་གཤེགས་པ་ཐམས་ཅད་མ་ལུས་པ་མེད་པའི་མཆོད་པས་མཆོད་པ་ཡིན་པ་ནི། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་བཅོམ་ལྡན་འདས་ཀྱིས་སྙིང་པོ་འདི་རང་གི་ཐུགས་ཀ་ནས་ཕྱུང་ངོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་སངས་རྒྱས་ཀྱི་སྤྲུལ་པ་དང༌། མ་ལུས་ཤིང་ལུས་པ་མེད་པའི་སེམས་ཅན་གྱི་དོན་གྱི་ཚུལ་གྱིས་ཕྲིན་ལས་སྣ་ཚོགས་པ་རྣམ་པ་ཐ་དད་པ་མངའ་བ། གང་ཡིན་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་ཐམས་ཅད་པའོ་ཞེས་བྱའོ། །ཕྲིན་ལས་ཐམས་ཅད་པའང་ཡིན་ལ་བྱང་ཆུབ་སེམས་དཔའ་ཆེན་པོའང་ཡིན་པས། བྱང་ཆུབ་སེམས་དཔའ་ཆེན་པོའི་ཕྲིན་ལས་ཐམས་ཅད་པའོ། །ཇི་སྐད་དུ་གསུངས་པའི་སེམས་དཔའི་རྡོ་རྗེ་ནི་དེའི་དམ་ཚིག་གོ །དེ་ལས་བྱུང་བ་ནི་ཕྲིན་ལས་ཐམས་ཅད་ཀྱི་འོད་ཟེར་ལ་སོགས་པའོ། །སེམས་དཔའི་རྡོ་རྗེའི་ཚུལ་གང་ལས་ཕྲིན་ལས་བྱིན་གྱིས་བརླབ་པའི་ཕྱིར། རྡོ་རྗེ་ལྟར་


DTG057_Page_0157
[མ་དཔེ་གཟིགས་ན་འདིར་གནོན།]

མི་ཕྱད་པའི་ཏིང་ངེ་འཛིན་གང་ལ་མིང་དེ་སྐད་ཅེས་བྱ་བ་དེ་ལ་སྙོམས་བར་འཇུག་པ་ནི། ཕྲིན་ལས་ཀྱི་འོད་ཟེར་ལ་སོགས་པ་བསྐྱེད་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་བར་དུའོ། །དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་ཀྱི་དམ་ཚིག་ནི་རྒྱུ་སྟེ། རྡོ་རྗེ་ལས་བསྐྱེད་པའི་རྒྱུར་གྱུར་བའོ། །འདི་ཞེས་བྱ་བ་ནི་ཐུགས་ལ་གནས་སོ། །དེ་ནས་ཞེས་བྱ་བ་ལ་སོགས་པ་ལ། བཅོམ་ལྡན་འདས་དེ་ཉིད་ལས་ཀྱི་རྡོ་རྗེའི་དབྱི་བས་སུ་གྱུར་ནས་ཕྱག་གཉིས་སུ་གནས་སོ་ཞེས་བྱ་བར་སྦྱར་རོ། །ལས་ཐམས་ཅད་ནི་སྣ་ཚོགས་རྡོ་རྗེའོ། །དེའི་ལས་ཀྱི་མཉམ་པ་ཉིད་ནི། དོན་དམ་པར་དངོས་པོ་མེད་པའི་ངོ་བོ་ཉིད་རྣམ་པར་མི་རྟོག་བ་ཙམ་ལས་བྱུང་བའོ། །དེའི་ཡེ་ཤེས་ནི་ཐུགས་སུ་ཆུད་པའོ། །ཤིན་ཏུ་རྟོགས་པ་ནི་རྣམ་པར་རྟོག་པ་མ་ལུས་པར་སྤངས་པས་ཐུགས་སུ་ཆུད་པ་གང་ཡིན་པ་དེ་ནི་དེ་བཞིན་དུ་དེའི་ངོ་བོ་ཉིད་ཡིན་བས་ཤིན་ཏུ་རྟོགས་པ་ཉིད་ཀྱི་ཕྱིར་རོ། །ཤིན་ཏུ་རྟོགས་པ་ཉིད་གང་ཡིན་ཞེ་ན། རྡོ་རྗེ་སེམས་དཔའི་ཏིང་ངེ་འཛིན་ནི་ཞེས་བྱ་བའོ། །ཕྲིན་ལས་ཀྱི་འོད་ཟེར་ལ་སོགས་པའི་ཚུལ་གྱིས་འབྱུང་བ་ལ་སོགས་པས་སྣ་ཚོགས་རྡོ་རྗེ་བསྐྱེད་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་ཐ་ཚིག་གོ །བཅོམ་ལྡན་འདས་རྡོ་རྗེ་སེམས་དཔའ་དེ་ཉིད་དེ་ཞེས་བྱ་བ་ནི་སེམས་དཔའི་རྡོ་རྗེའོ། །དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་ཀྱི་འོད་ཟེར་དུ་གྱུར་ཏེ། བྱུང་ནས་ཞེས་བྱ་བ་ནི། སྣ་ཚོགས་རྡོ་རྗེ་ལྟ་བུའི་འོད་ཟེར་ནི་ཕྲིན་ལས་ཀྱི་འོད་ཟེར་ཏེ་དེར་གྱུར་པའོ། །དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་ནི་སྣ་ཚོགས་རྡོ་རྗེའོ། །དེའི་ལས་ཀྱི་དབྱིངས་ནི་སྣ་ཚོགས་རྡོ་རྗེའི་རྒྱུ་སྟེ། སྣ་ཚོགས་རྡོ་རྗེ་ལྟ་བུའི་འོད་ཟེར་གྱིས་ཁྱབ་པ་ནི་དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་ཀྱི་དབྱིངས་སོ། །དེའི་རང་བཞིན་ནི་དེའི་ངོ་བོ་ཉིད་དོ། །གྱུར་ཏོ་ཞེས་བྱ་བ་ནི་འཇིག་རྟེན་གྱི་ཁམས་རྣམས་སུའོ། །དེ་ནས་ཞེས་བྱ་བ་ལ་སོགས་པ་ལ་བྱང་ཆུབ་སེམས་དཔའི་སྐུར་གྱུར་ཏེ། བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་ཀ་ན་གནས་ནས་ཆེད་དུ་བརྗོད་པ་འདིས་ཆེད་དུ་བརྗོད་དོ་


DTG057_Page_0158
[མ་དཔེ་གཟིགས་ན་འདིར་གནོན།]

ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་ལ་སོགས་པའི་སངས་རྒྱས་ཐམས་ཅད་ཀྱི་རྫུ་འཕྲུལ་དང་ཆོ་འཕྲུལ་རྣམས་བྱས་ནས་ཞེས་བྱ་བ་ལ། དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་ནི་རྡོ་རྗེ་ལས་ཀྱི་ཏིང་ངེ་བསྐྱེད་པའི་སེམས་ཅན་གྱི་དོན་ཏོ། །དེ་ལ་སོགས་པ་གང་ཡིན་པ་དེ་རྣམས་བྱས་ནས། དེ་བཞིན་གཤེགས་པ་དེ་དག་ཐམས་ཅད་གཅིག་ཏུ་གྱུར་ཏོ། །བྱང་ཆུབ་སེམས་དཔའ་ཆེན་པོ་རྡོ་རྗེ་ལས་ཀྱི་སྐུར་གྱུར་ཏོ། །རྒྱུ་གང་གི་ཕྱིར་ཞེ་བ། རྡོ་རྗེ་སེམས་དཔའི་ཏིང་ངེ་འཛིན་ནི་དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་མཐའ་ཡས་པ་ཉིད་དང་ཞེས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་མཐའ་ཡས་པ་ནི། སངས་རྒྱས་ཀྱི་སྤྲུལ་པ་དང༌། སེམས་ཅན་སྨིན་པ་དང་གྲོལ་བའི་མཚན་ཉིད་ཅན་གང་ཡིན་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་མཐའ་ཡས་པ་སྟེ། དེའི་ངོ་བོ་ཉིད་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་མཐའ་ཡས་པ་ཉིད་དོ། །གང་གི་ཡིན་ཞེ་ན། རྡོ་རྗེ་སེམས་དཔའི་ཏིང་ངེ་འཛིན་ཞེས་བྱ་བ་སྨོས་ཏེ། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་དེ་བཞིན་གཤེགས་པ་རྣམས་གཅིག་ཏུ་བྱས་ནས་བྱང་ཆུབ་སེམས་དཔའ་ཆེན་པོ་རྡོ་རྗེ་ལས་ཀྱི་སྐུར་གང་གིས་བསྐྱེད་པ་དེ་ནི་འདིར་རྡོ་རྗེ་སེམས་དཔའི་ཏིང་ངེ་འཛིན་ཏོ། །ཨེ་མའོ་སངས་རྒྱས་རྣམས་ཀྱི་ངེས། །ཞེས་བྱ་བ་ལ། ངེས་བ་ནི་གདོན་མི་ཟ་བ་སྟེ་དོན་ཡོད་བའོ། །གང་གི་ཞེ་ན། སངས་རྒྱས་རྣམས་ཀྱིའོ། །ཕྲིན་ལས་ཀུན་ནི་སེམས་ཅན་གྱི་དོན་གྱི་ལས་དང༌། སངས་རྒྱས་ཀྱི་སྤྲུལ་བའི་ལས་སོ། །ནམ་མཁའི་ཁམས་མ་ལུས་པར་ཁྱབ་བས་ན་མང་བའོ། །ཅི་ཞིག་ངོ་མཚར་ཆེ་ཞེ་ན། སངས་རྒྱས་དོན་ནི་ཞེས་བྱ་བ་ལ་སོགས་པ་གསུངས་ཏེ། སངས་རྒྱས་ཀྱི་དོན་ནི་འགྲོ་བའི་དོན་གྱི་རྒྱུར་རོ། །ལྷུན་གྲུབ་ཕྱིར་ནི་རྣམ་པར་མི་རྟོག་པའི་ཚུལ་གྱིས་རྡོ་རྗེའི་ལས་ལ་འཇུག་བ་ནི་ངོ་མཚར་ཆེའོ། །ཕྱིར་མི་ལྡོག་པའི་ལས་ནི་རྡོ་རྗེ་ལས་ཏེ། སྔོན་གྱི་འཕེན་པའི་ཤུགས་ཀྱིས་སྟོབས་ཀྱིས་འཇུག་ཅིང་མི་ཕྱེད་བའི་རང་བཞིན་ཅན་ཡིན་པའི་ཕྱིར་རོ། །


DTG057_Page_0159
[མ་དཔེ་གཟིགས་ན་འདིར་གནོན།]

གལ་ཏེ་ལྷུན་གྱིས་གྲུབ་པ་ལ་འཇུག་པ་དེ་ལྟ་ན་ཡང་ངོ་མཚར་ཅི་ཞིག་ཆེ་ཞེ་ན། གང་གི་ཕྱིར་ལྷུན་གྱིས་གྲུབ་པའི་སྟོབས་ཀྱིས་ལས་ལ་འཇུག་པར་སྣང་བ་དེའི་ཕྱིར་ངོ་མཚར་ཆེའོ། །དེ་བཞིན་གཤེགས་པ་ཐམས་ཅད་ཀྱི་སྤྱན་སྔར་ཞེས་བྱ་བ་ནི་བཅོམ་འདས་དོན་ཡོད་གྲུབ་པའི་མདུན་དུའོ། །དེ་ནས་ཞེས་བྱ་བ་ལ་སོགས་པ་ལ། བཅོམ་ལྡན་འདས་ཀྱིས་ལས་ཀྱིས་རྡོ་རྗེ་དེ་བཞིན་དུ་བྱིན་ནོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་གདོན་མི་ཟ་བ་ཡང་ཡིན་ལ་རྡོ་རྗེ་ཡང་ཡིན་པས། དེ་བཞིན་གཤེགས་པ་ཐམས་ཅད་ཀྱི་དོན་ཡོད་པའི་རྡོ་རྗེ་སྟེ། སྣ་ཚོགས་རྡོ་རྗེའོ། །དེ་ལ་དམིགས་པའི་ཏིང་ངེ་འཛིན་ནི་གདོན་མི་ཟ་བའི་རྡོ་རྗེ་ཞེས་བྱ་སྟེ། དེ་ལ་སྙོམས་པར་ཞུགས་པ་ནི་སྣ་ཚོགས་རྡོ་རྗེ་སྦྱིན་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་བར་དུའོ། །དེ་བཞིན་གཤེགས་པ་ཐམས་ཅད་ཀྱི་མཆོད་བ་ནི་སེམས་ཅན་གྱི་དོན་བྱ་བ་དང༌། སངས་རྒྱས་ལ་མཆོད་པའོ། །དེ་ལ་འཇུག་པ་ནི་དེ་བཞིན་གཤེགས་པ་ཐམས་ཅད་ཀྱི་མཆོད་པ་ལ་འཇུག་པའོ། །སོགས་པའི་སྒྲས་ནི་བྱང་ཆུབ་ཏུ་སེམས་བསྐྱེད་པ་ལ་སོགས་པ་བསྡུའོ། །དེ་ཉིད་ལ་སོགས་པའི་གདོན་མི་ཟ་བ་དང༌། ཚད་མེད་བའི་ལས་ཀྱི་ཆོ་ག་རྒྱས་པ་ཐམས་ཅད་གང་ཡིན་བ་དེ་ནི་དེ་བཞིན་གཤེགས་པ་ཐམས་ཅད་ཀྱི་མཆོད་པ་ལ་འཇུག་པ་ལ་སོགས་པ་གདོན་མི་ཟ་བ་དང་ཚད་མེད་པའི་ལས་ཀྱི་ཆོག་རྒྱས་པ་ཐམས་ཅད་དེ་གདོན་མི་ཟ་བ་ཡིན་ལ་ཚད་མེད་པ་ཡང་ཡིན་པས་གདོན་མི་ཟ་བ་དང་ཚད་མེད་པའོ། །ལས་ཀྱི་ཆོ་ག་རྒྱས་པ་ཐམས་ཅད་ནི་བྱང་ཆུབ་ཏུ་སེམས་བསྐྱེད་པ་ལ་སོགས་པའི་ཆོ་ག་རྒྱས་པར་ནི་རེ་རེ་ཞིང་ཡང་མཐའ་ཡས་པའོ། །དེའི་དམ་ཚིག་ནི་རྒྱུའོ། །སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་རྣམས་ཀྱི་ལས་ཐམས་ཅད་ནི་སྔར་བཤད་པ་རྣམས་སོ། །དེ་གྲུབ་པ་ནི་རྫོགས་པའོ། །དེས་ཀྱང་བདེ་བ་དང་ཡིད་བདེ་བ་ཐམས་ཅད་མྱོང་བར་བྱ་བའི་ཕྱིར་རོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་ཕྲིན་ལས་ནི་བྱང་ཆུབ་སེམས་དཔའ་ཆེན་པོའི་ཚུལ་ཉིད་དོ། །རྡོ་རྗེ་ལས་ཀྱི་ངོ་བོ་ཉིད་ཡིན་པས་ན།


DTG057_Page_0160
[མ་དཔེ་གཟིགས་ན་འདིར་གནོན།]

རྡོ་རྗེའི་ཕྲིན་ལས་ཉིད་དེ། དེའི་ཡེ་ཤེས་དང་མངོན་པར་ཤེས་པ་དྲུག་ནི་དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་ཉིད་དང༌། ཡེ་ཤེས་དང་མངོན་པར་ཤེས་པ་རྣམས་ཏེ། དེ་ཉིད་ནི་དངོས་གྲུབ་དམ་པའི་ཡེ་ཤེས་ཡིན་པས་དེའི་རྒྱུར་རོ། །བར་དུ་ཞེས་བྱ་བའི་སྒྲས་ནི་ས་དང་ཕ་རོལ་ཏུ་ཕྱིན་པ་ལ་སོགས་པ་བསྡུའོ། །ཕྲིན་ལས་ཐམས་ཅད་ཀྱི་འཁོར་ལོ་བསྐོར་བ་ཞེས་བྱ་བ་ལ། ཕྲིན་ལས་ཐམས་ཅད་ཀྱི་འཁོར་ལོ་ནི་ལས་ཀྱི་དཀྱིལ་འཁོར་ཐམས་ཅད་དང༌། དེའི་རིགས་རྣམས་སོ། །ཕྲིན་ལས་ཐམས་ཅད་ཀྱི་འཁོར་ལོ་བསྐོར་བ་ཉིད་དུ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་དབང་གིས་དབང་བསྐུར་ནས་ཞེས་བྱ་བ་ནི་ཡི་གེ་ཨོཾ་དང་ནམ་མཁའ་མཛོད་ཀྱི་ཕྱག་རྒྱས་སྣ་ཚོགས་རྡོ་རྗེའི་ཕྲེང་བའི་དབང་བསྐུར་བ་བྱིན་ལ་ལས་ཀྱི་དཀྱིལ་འཁོར་སྦྲུལ་བར་བྱ་བའི་ཕྱིར་དང་པོ་སྦྱོར་བའི་ཏིང་ངེ་འཛིན་གྱི་བར་བསྟན་པ་ཡིན་ནོ། །རྡོ་རྗེ་དབྱིངས་ཀྱི་དཀྱིལ་འཁོར་དུ་ནི་སངས་རྒྱས་ལྔའི་དབུ་རྒྱུན་དང་དར་དབྱངས་ཀྱི་བང་གིས་དབང་བསྐུར་པར་བྱའོ་ཞེས་སྔར་བཤད་པའི་ཚུལ་བཞིན་དུ་ཤེས་པར་བྱའོ། །དེ་ཡང་སློབ་དཔོན་སྣ་ཚོགས་རྡོ་རྗེ་ཐོགས་པས་ལས་ཀྱི་དཀྱིལ་འཁོར་གྱི་ཆོ་ག་བྱ་ལ། སློབ་མ་ལ་ཡང་སྣ་ཚོགས་རྡོ་རྗེའི་མཚན་མ་སྦྱིན་པར་བྱའོ། །སྣ་ཚོགས་རྡོ་རྗེ་སྣ་ཚོགས་རྡོ་རྗེ་ཞེས་བྱ་བ་ནི་ཁ་དོག་སྣ་ཚོགས་པའི་ཕྱིར། སྣ་ཚོགས་རྡོ་རྗེ་ཉེ་བར་མཚན་པ་ཉིད་ཡིན་པའི་ཕྱིར་དང་ལས་སྣ་ཚོགས་བྱེད་བའི་ཕྱིར་སྣ་ཚོགས་རྡོ་རྗེ་ཞེས་བཤད་དོ། །རང་གི་སྙིང་གར་ཞུགས་ཏེ་ཞེས་བྱ་བ་ནི་གཡོན་བསྙེམས་བས་སྣ་ཚོགས་དྲིལ་བུ་བསྣམས་ཏེ། ཕྱག་གཡས་པས་རང་གི་ཐུགས་ཀར་བསྟོད་པའི་ཚུལ་གྱིས་རྡོ་རྗེ་བསྣམས་ཤིང་ཕྱོགས་བཅུའི་དེ་བཞིན་གཤེགས་པ་ཐམས་ཅད་རང་གི་རྣམ་པར་ཐར་བའི་ཕྲིན་ལས་ལ་སྦྱོར་ཞིང་ངོ༌། །འདི་དེ་སངས་རྒྱས་ཐམས་ཅད་ཀྱི། །ཞེས་བྱ་བ་ནི་རང་གི་ཕྱག་ན་གནས་པའི་སྣ་ཚོགས་རྡོ་རྗེ་གསུངས་པའོ། །ལས་རྣམས་ཐམས་ཅད་བྱེད་པའི་མཆོག །ཅེས་བྱ་བ་ནི་ཇི་སྐད་དུ་གསུངས་པའི་ལས་སྣ་ཚོགས་རྫོགས་པར་བྱེད་པའོ། །བདག་སྟེ་ཞེས་བྱ་བ་ནི་བདག་ཉིད་ཡིན་པར་སྟོན་ཏོ། །དེ་ལྟར་ན་གང་གི་ཕྱི་


DTG057_Page_0161
[མ་དཔེ་གཟིགས་ན་འདིར་གནོན།]

བདག་སྣ་ཚོགས་ལ་སྣ་ཚོགས་རྡོ་རྗེ་སྦྱར་བ་ཡིན་ནོ། །དེ་ལྟར་རྡོ་རྗེ་ལས་ཀྱི་དེ་བཞིན་གཤེགས་པ་ཐམས་ཅད་མ་ལུས་ཤིང་ལུས་པ་མེད་པའི་མཆོད་པས་མཆོད་ནས་ཇི་ལྟར་དེ་རྡོ་རྗེ་བསྲུང་བས་སྔོན་ཆད་ཐེག་པ་གཞན་འདོད་པའི་སེམས་སུ་ལྷུང་བ་ལས་བསྲུང་བས་བསྲུངས་པ་དེ་བསྟན་པ་ནི། དེ་ནས་ཞེས་བྱ་བ་ལ་སོགས་པ་ཡིན་ཏེ། བཅོམ་ལྡན་འདས་ཀྱིས་སྙིང་པོ་འདི་རང་གི་ཐུགས་ཀ་ནས་ཕྱུང་ངོ་ཞེས་བྱ་བར་སྦྱར་རོ། །བྱང་ཆུབ་སེམས་དཔའ་ཆེན་པོ་ཡང་ཡིན་ལ། བརྩོན་འགྲུས་ཐུབ་པར་དཀའ་བ་ཡང་ཡིན་པས་ན། བྱང་ཆུབ་སེམས་དཔའ་བརྩོན་འགྲུས་ཐུབ་པར་དཀའ་བ་སྟེ། གང་གིས་བརྩོན་འགྲུས་ཐུབ་པར་དཀའ་བ་དེ་ནི་བརྩོན་འགྲུས་ཐུབ་པར་དཀའ་སྟེ། ཕྱིར་མི་ལྡོག་པའི་བརྩོན་འགྲུས་བྱང་ཆུབ་ཆེན་པོར་སྤྲོ་བའི་བརྩོན་འགྲུས་སོ། །དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ན་གནས་པའི་རྡོ་རྗེ་རྩེ་ལྔ་པའི་གཟུགས་ནི་ཀུན་དུ་བཟང་པོ་ཡིན་ལ། དེའི་དམ་ཚིག་ནི་གོ་ཆ་བརྟན་པ་ལ་སོགས་པའི་ཚུལ་ལོ། །དེ་ལས་བྱུང་བ་དེ་ནི་སེམས་དཔའི་རྡོ་རྗེའི་ཚུལ་གང་ལས། ལས་སུ་གྱུར་པ་དེས་བྱིན་གྱིས་བརླབས་པ་ནི་བརྟན་པར་བྱེད་པའི་ཕྱིར། རྡོ་རྗེ་ལྟར་མི་ཕྱེད་པའི་ཏིང་ངེ་འཛིན་གང་ཡིན་པ་དེ་ལ་སྙོམས་པར་ཞུགས་པ་ནི་གོ་ཆ་བརྟན་པ་སྤྲུལ་ཅིང་བསྐྱེད་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་བར་དུའོ། །ཇི་ལྟ་བུ་ཞེ་ན། དེ་བཞིན་གཤེགས་པ་ཐམས་ཅད་ཀྱི་བསྲུང་བ་ཞེས་བྱ་བ་སྟེ། གོ་ཆ་བརྟན་པའོ། །དེའི་དམ་ཚིག་ནི་རྒྱུའོ། །དེའི་ངོ་བོ་རང་གི་ཐུགས་ཀྱིས་པའི་ཡེ་ཤེས་ནི་སྙིང་པོ་སྟེ། བཛྲ་རཀྵ་ཞེས་བྱའོ། །འདི་ཞེས་བྱ་བ་ནི་ཐུགས་ལ་གནས་པ་གསུངས་པའོ། །བཅོམ་ལྡན་འདས་ཕྱག་ན་རྡོ་རྗེ་དེ་ཉིད་དེ་ཞེས་བྱ་བ་ནི་སེམས་དཔའི་རྡོ་རྗེའི་གཟུགས་ཏེ་ཕྱག་ན་རྡོ་རྗེ་བསྐྱེད་པའི་རྒྱུར་གྱུར་པས་ཕྱག་ན་རྡོ་རྗེ་ཞེས་བཤད་དོ། །གོ་ཆ་བརྟན་པོར་གྱུར་ཏེ་ཞེས་བྱ་བ་ནི། རྡོ་རྗེའི་རང་བཞིན་གྱི་གོ་ཆ་བརྟན་པ་སྟེ། དེར་གྱུར་ནས་བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་སུ་ཞུགས་ཏེ། ནམ་མཁའི་ཁམས་ཀྱི་ཚད་ཙམ་གྱི་གོ་ཆའི་དབྱིབས་སུ་གྱུར་ནས། བསྡུ་བ་བྱས་པ་ལས་ཐུགས་


DTG057_Page_0162
[མ་དཔེ་གཟིགས་ན་འདིར་གནོན།]

ཀ་ནས་ཕྱུང་སྟེ་དེ་ཉིད་ཀྱི་ཕྱག་གཉིས་སུ་གནས་སོ། །དེ་ནས་ཞེས་བྱ་བ་ལ་སོགས་པ་ལ། བྱང་ཆུབ་སེམས་དཔའི་ལུས་སུ་གྱུར་ནས་ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ལ། སྲུང་བའི་ཆོ་ག་རྒྱས་པའི་ལས་ལ་སོགས་པ་དང༌། སངས་རྒྱས་ཐམས་ཅད་ཀྱི་རྫུ་འཕྲུལ་དང་ཆོ་འཕྲུལ་རྣམས་བྱས་ནས་ཞེས་བྱ་བ་ནི་གདུལ་བྱ་རྣམས་ལ་རྡོ་རྗེ་བསྲུང་བའི་ཏིང་ངེ་འཛིན་བསྐྱེད་པ་ནི་དེ་བཞིན་གཤེགས་པ་ཐམས་ཅད་ལ་བསྲུང་བ་སྟེ། དེའི་ཆོ་ག་རྒྱས་པའོ། །དེ་ཉིད་ནི་ལས་སོ། །དེ་ལ་སོགས་པ་གང་ཡིན་བ་དེ་ལ་དེ་སྐད་ཅེས་བྱ་སྟེ། དེ་དང་སངས་རྒྱས་ཐམས་ཅད་ཀྱི་རྫུ་འཕྲུལ་དང་ཆོ་འཕྲུལ་རྣམས་བྱས་ནས། དེ་བཞིན་གཤེགས་པའི་སྐུ་དེ་དག་ཐམས་ཅད་གཅིག་ཏུ་གྱུར་ནས། བརྩོན་འགྲུས་ཐུབ་པར་དཀའ་བའི་ལུས་གཅིག་ཏུ་གྱུར་ཏོ། །རྒྱུ་གང་གིས་ཤེ་ན། རྡོ་རྗེ་སེམས་དཔའི་ཏིང་ངེ་འཛིན་ནི། བརྩོན་འགྲུས་དམ་པ་ཐུབ་པར་དཀའ་བ་ཉིད་དང་ཞེས་བྱ་བ་གསུངས་ཏེ། བརྩོན་འགྲུས་བརྟན་པོ་ཤིན་ཏུ་ཐུབ་པར་དཀའ་བ་གང་ཡིན་པ་དེ་ནི། བརྩོན་འགྲུས་དམ་པ་ཐུབ་པར་དཀའ་བ་སྟེ། དེ་ཁོ་ན་ཉིད་ཡིན་པས་ན་ཐུབ་པར་དཀའ་བ་ཉིད་དོ། །བརྩོན་འགྲུས་དམ་པ་ཐུབ་པར་དཀའ་བ་ཉིད་དེ་གང་ཡིན་ཞེ་ན། རྡོ་རྗེ་སེམས་དཔའི་ཏིང་ངེ་འཛིན་ནོ་ཞེས་བྱ་བ་སྟེ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་སངས་རྒྱས་རྣམས་གཅིག་ཏུ་བྱས་ནས། བྱང་ཆུབ་སེམས་དཔའ་ཆེན་པོ་རྡོ་རྗེ་བསྲུང་བའི་སྐུར་བསྐྱེད་པ་གང་ཡིན་པ་དེ་ནི་འདིར་རྡོ་རྗེ་སེམས་དཔའི་ཏིང་ངེ་འཛིན་ནི་བརྩོན་འགྲུས་ཆེན་པོ་ཐུབ་པར་དཀའ་བ་ཉིད་ཅེས་བྱའོ། །ཨེ་མའོ་བརྩོན་འགྲུས་གོ་ཆ་ནི། །ཞེས་བྱ་བ་ནི་བརྩོན་འགྲུས་ཀྱི་རང་བཞིན་ཅན་གྱི་གོ་ཆའོ། །བརྟན་པའི་བདག་ཉིད་ཅན་ཞེས་བྱ་བའི་བརྟན་པའི་རང་བཞིན་ཅན་གང་ཡིན་པ་དེ་ནི་བརྟན་པའི་བདག་ཉིད་དོ། །དེ་བཞིན་གཤེགས་པ་ཆོས་ཀྱི་སྐུ། །ཞེས་བྱ་བའི་བདག་ཉིད་དོ། །རབ་བརྟན་བདག་ཅེས་བྱ་བ་ནི་མི་ཕྱེད་པའོ། །ཅི་ཞིག་ངོ་མཚར་ཆེ་ཞེ་ན། གང་གི་ཕྱིར། དེ་ནི་བརྟན་ཕྱིར་ལུས་མིན་ཡང༌། །རྡོ་རྗེའི་ལུས་སུ་བྱེད་པའི་མཆོག །ཅེས་བྱ་བ་གསུངས་ཏེ། དེ་བཞིན་


DTG057_Page_0163
[མ་དཔེ་གཟིགས་ན་འདིར་གནོན།]

གཤེགས་པ་རྣམས་ནི་གཟུགས་ཀྱི་སྐུ་མ་ཡིན་ཏེ། ཆོས་ཀྱི་སྐུ་མི་སྣང་བའི་རང་བཞིན་ཡིན་ན། དེ་རྣམས་གཟུགས་ཀྱི་རང་བཞིན་དུ་སྣང་ཞིང་རྡོ་རྗེའི་སྐུར་བདག་བྱེད་པ་ནི་ངོ་མཚར་ཆེའོ། །འདི་སྐད་སྟོན་པ་ཡིན་ཏེ། དེ་བཞིན་གཤེགས་པ་རྣམས་ནི་དོན་དམ་པར་ཆོས་ཀྱི་སྐུའི་ངོ་བོ་ཉིད་ཡིན་པས། དེ་རྣམས་ལ་གཟུགས་ཀྱི་སྐུ་མི་མངའ་བ་ཉིད་ཡིན་ན། གདུལ་བྱ་རྣམས་ལ་འདི་ལྟར་རྡོ་རྗེ་བ་སྲུང་བས་དེ་བཞིན་གཤེགས་པ་རྣམས་ཀྱི་གཟུགས་ཀྱི་སྐུ་རྡོ་རྗེ་དང་མཉམ་པར་བྱེད་དོ་སྙམ་དུ་སེམས་པ་འདི་ནི་ངོ་མཚར་ཆེའོ། །དེ་བཞིན་གཤེགས་པ་ཐམས་ཅད་ཀྱི། །ཞེས་བྱ་བ་ནི་བཅོམ་ལྡན་འདས་དོན་ཡོད་པར་གྲུབ་པའི་གཡས་ཕྱོགས་སུའོ། །བཀའ་ནོད་ཅིང་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་བསྲུང་བའི་དོན་དུའོ། །དེ་ནས་ཞེས་བྱ་བ་ལ་སོགས་པ་ལ། བཅོམ་ལྡན་འདས་ཀྱིས་ཆོ་ག་དེ་དེའི་ལག་ཏུ་བྱིན་ནོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་གོ་ཆའི་ཕྱག་རྒྱ་ནི་རྡོ་རྗེ་བརྟན་པ་སྟེ། དེ་ལ་དམིགས་པའི་ཏིང་ངེ་འཛིན་ནི་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་བརྟན་པ་ཞེས་བྱ་སྟེ། དེ་ལ་སྙོམས་པར་ཞུགས་པ་ནི་གོ་ཆ་སྦྱིན་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་ཐ་ཚིག་གོ །དེ་བཞིན་གཤེགས་པ་ཐམས་ཅད་ཀྱི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ནི་བཅོམ་ལྡན་འདས་རྡོ་རྗེ་བསྲུང་བའོ། །དེའི་དམ་ཚིག་ནི་བསྐྱེད་པའི་རྒྱུའོ། །དེ་ཅིའི་ཕྱིར་བྱིན་ཞེ་ན། སེམས་ཅན་གྱི་ཁམས་ཞེས་བྱ་བ་ལ་སོགས་པ་གསུངས་ཏེ། སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་རྣམས་ཡོངས་སུ་བསྐྱང་བ་དང་ཞེས་བྱ་བ་ནི་རྡོ་རྗེ་བསྲུང་བའི་ཕྱག་རྒྱས་ཐེག་པ་གཞན་འདོད་པ་ལས་བཟློག་པ་དང༌། ཕྱི་རོལ་གྱི་འཚེ་བ་རྣམས་བཟློག་པའོ། །དེས་ཀྱང་འཇིག་རྟེན་དང་འཇིག་རྟེན་ལས་འདས་པའི་བདེ་བ་དང་ཡིད་བདེ་བ་ཐམས་ཅད་མྱོང་བའི་དོན་དུའོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་སྐུ་ཐོབ་པའི་མཆོག་གྲུབ་པར་བྱ་བ་ཞེས་བྱ་བ་ལ། དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་སྐུ་ནི་རྡོ་རྗེ་བསྲུང་བའི་སྐུའོ། །བར་དུ་ཞེས་བྱ་བའི་སྒྲས་ནི་མ་སྨོས་པ་རྣམས་ཀྱང་བསྡུའོ། །རྡོ་རྗེ་གྲོགས་པོ་ཞེས་བྱ་


DTG057_Page_0164
[མ་དཔེ་གཟིགས་ན་འདིར་གནོན།]

བ་ནི། ཇི་སྐད་དུ་བཤད་པའི་ཉེས་པ་བཟློག་པས་མཛའ་བོའི་དོན་རྫོགས་པར་བྱེད་པ་དང༌། མི་ཕྱེད་པ་ཉིད་ཀྱིས་ན་རྡོ་རྗེ་གྲོགས་པོ་ཞེས་བཤད་དོ། །དེ་བཞིན་གཤེགས་པ་ཐམས་ཅད་ལ་གོ་ཆ་བསྐོན་ཞིང་ཞེས་བྱ་བ་ནི་སེམས་ཅན་གྱི་ཁམས་རྣམས་རྣམ་པར་སྣང་མཛད་ལ་སོགས་པའི་ངོ་བོར་བྱེད་ཅིང་ངོ༌། །འདི་དེ་སངས་རྒྱས་ཐམས་ཅད་ཀྱི། །ཞེས་བྱ་བ་ནི་རང་གི་ཕྱག་ན་གནས་པའི་གོ་ཆ་གསུངས་པའོ། །བྱམས་པའི་གོ་ཆ་དམ་པ་སྟེ། །ཞེས་བྱ་བ་ནི། བྱམས་པའི་དོན་རྫོགས་པར་བྱེད་པས་ན། བྱམས་པའི་གོ་ཆ་ཞེས་གསུངས་སོ། །དེ་ཡང་གང་གི་ཕྱིར་བརྩོན་འགྲུས་བརྟན་པས་བསྲུང་བ་ཞེས་བྱ་བ་གསུངས་ཏེ། འཁོར་གསུམ་ཡོངས་སུ་དག་པ་རྣམ་པར་སྦྱངས་པའི་བརྩོན་འགྲུས་ཀྱི་ངོ་བོ་ཞེས་བྱ་བའི་ཐ་ཚིག་གོ །གང་གི་ཕྱིར་དེ་ལྟ་ཡིན་པ་དེས་ན་གྲོགས་པོ་ཆེན་པོར་བརྗོད་པ་ཡིན་ཞེས་བྱའོ། །དེ་ལྟར་རྡོ་རྗེ་བསྲུང་བས་དེ་བཞིན་གཤེགས་པ་ཐམས་ཅད་བསྲུངས་ནས། རྡོ་རྗེ་གནོད་སྦྱིན་གྱིས་བསྲུང་བའི་ཡོངས་སུ་བསྐྱངས་པས་ཡོངས་སུ་བསྲུང་བར་བྱའོ་ཞེས་བྱ་བའི་དོན་ནི། དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་པ་ཡིན་ཏེ། བཅོམ་ལྡན་འདས་ཀྱིས་སྙིང་པོ་འདི་རང་གི་ཐུགས་ཀ་ནས་ཕྱུང་ངོ་ཞེས་བྱ་བར་སྦྱར་རོ། །བྱང་ཆུབ་སེམས་དཔའ་ཆེན་པོ་ཡང་ཡིན་ལ། བདུད་ཐམས་ཅད་རབ་ཏུ་འཇོམས་པ་ཡང་ཡིན་པས། བྱང་ཆུབ་སེམས་དཔའ་ཆེན་པོ་བདུད་ཐམས་ཅད་རབ་ཏུ་འཇོམས་པའོ། །བདུད་ཀྱང་ཡིན་ལ་ཐམས་ཅད་ཀྱང་ཡིན་པས་ན་བདུད་ཐམས་ཅད་དེ། དེ་རྣམས་རབ་ཏུ་འཇོམས་པ་ནི་ཤིན་ཏུ་མི་སྣང་བར་མཛད་པའོ། །དེ་གང་ལ་མངའ་བ་དེ་ནི་བདུད་ཐམས་ཅད་རབ་ཏུ་འཇོམས་པའོ། །ཇི་སྐད་དུ་བཤད་པའི་རྡོ་རྗེ་སེམས་དཔའི་ཚུལ་ནི། བྱང་ཆུབ་སེམས་དཔའ་ཆེན་པོའོ། །དེའི་དམ་ཚིག་ནི་མཆེ་བ་ཆེན་པོ་ལ་སོགས་པའི་གཟུགས་སོ། །དེ་ལས་བྱུང་བ་ནི་སེམས་དཔའ་རྡོ་རྗེའི་ཚུལ་གང་ལས་བྱུང་བར་གྱུར་པའོ། །དེ་བྱིན་གྱིས་བརླབ་པའི་ཕྱིར་རྡོ་རྗེ་ལྟར་མི་ཕྱེད་པའི་ཏིང་ངེ་འཛིན་གང་ལ་མིང་དེ་སྐད་ཅེས་བྱ་བ་གང་ཡིན་པ་དེ་ལ་སྙོམས་པར་ཞུགས་པ་ནི་མཆེ་བ་མཚོན་ཆའི་རྣམ་པར་སྤྲུལ་ཅིང་བསྐྱེད་པའི་རྣམ་པར་ཐུགས་རྩེ་གཅིག་ཏུ་


DTG057_Page_0165
[མ་དཔེ་གཟིགས་ན་འདིར་གནོན།]

མཛད་ཅེས་བྱ་བའི་ཐ་ཚིག་གོ །དེ་བཞིན་གཤེགས་པ་ཐམས་ཅད་ཀྱི་ཐབས་ཡིན་པས་ན། དེ་བཞིན་གཤེགས་པ་ཐམས་ཅད་ཀྱི་ཐབས་ཏེ། འདོད་ཆགས་ལ་སོགས་པ་ཟ་བར་མཛད་པ་བཅོམ་ལྡན་འདས་རྡོ་རྗེ་གནོད་སྦྱིན་ནོ། །དེ་ནས་ཞེས་བྱ་བ་ལ་སོགས་པ་ལ། བཅོམ་ལྡན་འདས་དེ་ཉིད་རྡོ་རྗེ་མཆེ་བའི་དབྱིབས་སུ་གྱུར་ཏེ་བྱུང་ནས་ཕྱག་གཉིས་སུ་གནས་སོ་ཞེས་བྱ་བར་སྦྱར་རོ། །བཅོམ་ལྡན་འདས་རྡོ་རྗེ་འཛིན་པ་དེ་ཉིད་ཅེས་བྱ་བ་ནི་སེམས་དཔའ་རྡོ་རྗེའི་གཟུགས་སོ། །རྡོ་རྗེ་མཆེ་བའི་མཚོན་ཆ་ཆེན་པོར་གྱུར་ཏེ་ཞེས་བྱ་བ་ནི་མཆེ་བས་མཚོན་ཆའི་དོན་རྫོགས་པར་བྱེད་པས་མཚོན་ཆ་ཞེས་གསུངས་སོ། །དེ་ནས་ཞེས་བྱ་བ་ལ་སོགས་པ་ལ། བྱང་ཆུབ་སེམས་དཔའ་ཆེན་པོའི་ལུས་སུ་གྱུར་ནས། ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་བཞིན་གཤགས་པ་ཐམས་ཅད་ཀྱི་གདུག་པ་འདུལ་བ་ལ་སོགས་པས་སངས་རྒྱས་ཐམས་ཅད་ཀྱི་རྫུ་འཕྲུལ་དང་ཆོ་འཕྲུལ་རྣམས་བྱས་ནས་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་གདུག་པ་ཡང་ཡིན་ལ། གདུལ་བྱ་ཡང་ཡིན་པས་དེ་བཞིན་གཤེགས་པ་ཐམས་ཅད་ཀྱི་གདུག་པ་འདུལ་བ་སྟེ། བཅོམ་ལྡན་འདས་རྡོ་རྗེ་གནོད་སྦྱིན་ནོ། །འདིས་གདུག་པ་ཐམས་ཅད་འདུལ་བས་ན་འདུལ་བའོ། །སོགས་པའི་སྒྲས་ནི་བྱང་ཆུབ་ཏུ་སེམས་བསྐྱེད་པ་ལ་སོགས་པ་བསྡུའོ། །དེ་ལྟར་གདུག་པ་འདུལ་བ་ལ་སོགས་པ་སངས་རྒྱས་ཐམས་ཅད་ཀྱི་རྫུ་འཕྲུལ་དང་ཆོ་འཕྲུལ་རྣམས་དེས་བྱས་ནས། དེ་བཞིན་གཤེགས་པ་ཐམས་ཅད་ཀྱི་སྐུ་རྡོ་རྗེ་གནོད་སྦྱིན་གྱི་ལུས་གཅིག་ཏུ་གྱུར་ཏོ། །རྒྱུ་གང་གི་ཞེ་ན། རྡོ་རྗེ་སེམས་དཔའི་ཏིང་ངེ་འཛིན་ནི་བདུད་ཐམས་ཅད་རབ་ཏུ་འཇོམས་པ་ཉིད་ཅེས་བྱ་བ་གསུངས་ཏེ། བདུད་ཐམས་ཅད་ཤིན་ཏུ་རབ་ཏུ་འཇོམས་པའི་ངང་ཚུལ་ཅན་གང་ཡིན་པ་དེ་ནི་བདུད་ཐམས་ཅད་རབ་ཏུ་འཇོམས་པའོ། །བདུད་ཐམས་ཅད་རབ་ཏུ་འཇོམས་པའི་ངོ་བོ་ཡིན་པས་ན། བདུད་ཐམས་ཅད་རབ་ཏུ་འཇོམས་པ་ཉིད་དོ། །གང་གིས་ཤེ་ན། རྡོ་རྗེ་སེམས་དཔའི་ཏིང་ངེ་འཛིན་གྱིས་ཏེ། དེ་བཞིན་གཤེགས་པ་ཐམས་ཅད་གཅིག་ཏུ་མཛད་ནས་རྡོ་རྗེ་གནོད་སྦྱིན་གྱི་གཟུགས་སུ་སྐྱེད་པར་བྱེད་པ་གང་ཡིན་པ་འདི་ནི།


DTG057_Page_0166
[མ་དཔེ་གཟིགས་ན་འདིར་གནོན།]

རྡོ་རྗེ་སེམས་དཔའི་ཏིང་ངེ་འཛིན་ནི་བདུད་ཐམས་ཅད་རབ་ཏུ་འཇོམས་པ་ཞེས་བྱའོ། །ཨེ་མའོ་བདག་ནི་སངས་རྒྱས་རྣམས། །ཐུགས་རྗེ་ཅན་གྱི་ཐབས་ཡིན་ཏེ། །ཞེས་བྱ་བ་ལ། བདག་ནི་ཞེས་བྱ་བ་ནི་བདག་ཉིད་ཡིན་པར་སྟོན་ཏོ། །སངས་རྒྱས་རྣམས་ཐུགས་རྗེ་ཅན་གྱི་ཞེས་བྱ་བ་ནི་མི་དམིགས་པའི་ཐུགས་རྗེའི་རང་བཞིན་ཅན་གྱི་སངས་རྒྱས་རྣམས་ཀྱིའོ། །ཐབས་ཀྱང་ཡིན་ལ་ཆེན་པོ་ཡང་ཡིན་པས་ན་ཐབས་ཆེན་ནོ། །ཅི་ཞིག་ངོ་མཚར་ཆེ་ཞེ་ན། ཞི་ཡང་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་ཞི་བ་སྟེ་བག་ཆགས་དང་བཅས་པའི་ཉོན་མོངས་པ་དང་བྲལ་བ་ཡང༌། སེམས་ཅན་གྱི་དོན་བྱ་བ་ཉིད་ཡིན་པའི་ཕྱིར། མ་རུངས་པ་ཡང་སྟོན་པར་གྱུར། །ཞེས་བྱ་བས་གདུག་པ་འདུལ་བ་རྣམས་ལ་དྲག་ཅིང་གཏུམ་པར་ཡང་སྟོན་པར་བྱེད་དེ། གང་ཞིག་སྲེད་དང་གང་ཞིག་རྣོ། །གང་ཞིག་གདུག་གང་ཉེར་གདུག་ལྡན། །ཤ་དང་ཁྲག་དང་རྐང་ཟབ། །གང་ཡིན་མ་རུངས་པར་དེ་བཤད། །ཅེས་བྱ་སྟེ། དྲག་པོའི་རྣམ་པར་འགྱུར་བ་ནི་མ་རུངས་པ་ཉིད་དེ། དེ་ནི་སྨད་པ་ཡིན་དུ་ཟིན་ཀྱང་སེམས་ཅན་གྱི་དོན་མ་རུངས་པར་སྟོན་པ་ནི་ངོ་མཚར་ཆེའོ། །འདི་སྐད་སྟོན་པ་ཡིན་ཏེ། འདི་དག་ཡོང་པ་མ་ཡིན་དུ་ཟིན་ཀྱང་སྔོན་གྱི་འཕེན་པའི་སྟོབས་ཀྱིས། སེམས་ཅན་རྣམས་ཀྱིས་དེ་བཞིན་གཤེགས་པ་མ་རུངས་ཤིང་གདུག་པ་ཉིད་དུ་མཐོང་བར་ཟད་དོ། །དེ་བཞིན་གཤེགས་པ་ཐམས་ཅད་ཅིས་བྱ་བ་ནི་དོན་ཡོད་པར་གྲུབ་པ་སྟེ། དེའི་གཡོན་ཕྱོགས་སུའོ། །དེ་ནས་ཞེས་བྱ་བ་ལ་སོགས་པ་ལ། བཅོམ་ལྡན་འདས་ཀྱིས་མཆེ་བའི་མཚོན་ཆ་དེ་དེའི་ལག་ཏུ་བྱིན་ནོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་རབ་ཏུ་གཏུམ་པའི་རྡོ་རྗེ་ནི་མཆེ་བའི་ཕྱག་རྒྱའི་གཟུགས་སོ། །དེ་ལ་དམིགས་པའི་ཏིང་ངེ་འཛིན་ནི་དེ་བཞིན་གཤེགས་པ་ཐམས་ཅད་ཀྱི་རབ་ཏུ་གཏུམ་པའི་རྡོ་རྗེ་ཞེས་བྱ་སྟེ། དེ་ལ་སྙོམས་པར་ཞུགས་པ་ནི་རྡོ་རྗེ་མཆེ་བ་སྦྱིན་པའི་རྣམ་པར་ཐུགས་རྩ་གཅིག་ཏུ་མཛད་ཅེས་བྱ་བའི་ཐ་ཚིག་གོ །དེ་བཞིན་གཤེགས་པ་ཐམས་ཅད་ཀྱི་མ་རུངས་པ་འདུལ་བའི་དམ་ཚིག་ཅེས་བྱ་བ་ལ། དེ་བཞིན་གཤེགས་པ་ཐམས་ཅད་ཀྱི་མ་རུངས་པ་འདུལ་བ་ནི་


DTG057_Page_0167
[མ་དཔེ་གཟིགས་ན་འདིར་གནོན།]

རྡོ་རྗེ་གནོད་སྦྱིན་ནོ། །དེའི་དམ་ཚིག་ནི་རྒྱུའོ། །སེམས་ཅན་གྱི་ཁམས་ཞེས་བྱ་བ་ལ་སོགས་པ་ལ། སེམས་ཅན་གྱི་ཁམས་ཐམས་ཅད་འཇིགས་པ་མེད་པར་བྱ་བ་ནི་འཇིགས་པ་དང་བྲལ་བའོ། །དེ་ཉིད་ཀྱིས་ཀྱང་བདེ་བ་དང་ཡིད་བདེ་བ་མྱོང་བར་བྱ་བའི་དོན་དུའོ། །དེ་བཞིན་གཤེགས་པ་ཐམས་ཅད་ཀྱི་ཐམས་ཆེན་པོ་ནི། རྡོ་རྗེ་གནོད་སྦྱིན་དང་ཡེ་ཤེས་དང་མངོན་པར་ཤེས་པ་རྣམས་ཐོབ་ཅིང་དངོས་གྲུབ་དམ་པའི་འབྲས་བུ་དེ་དག་ཐོབ་པའི་ཕྱིར་རོ། །བར་དུ་ཞེས་བྱ་བའི་སྒྲས་ནི་ས་དང་ཕ་རོལ་ཏུ་ཕྱིན་པ་ལ་སོགས་པ་བསྡུའོ། །དེ་བཞིན་དུ་ཞེས་བྱ་བ་ནི། སངས་རྒྱས་ལྔའི་རིན་པོ་ཆེའི་དབུ་རྒྱན་དང་དར་དཔྱངས་ཀྱི་དབང་བསྐུར་བའོ། །རྡོ་རྗེ་ཁྲོ་བོ་ཞེས་བྱ་བ་ནི། མི་ཕྱེད་པའི་ཡེ་ཤེས་ལས་བྱུང་བས་ནི། རྡོ་རྗེ་ཡང་ཡིན་ལ་ཁྲོ་ཞིང་ཏུམ་པ་ཡང་ཡིན་པས་ན་རྡོ་རྗེ་ཁྲོ་བོ་སྟེ། དེ་བཞིན་གཤེགས་པ་ཐམས་ཅད་ལ་བསྡིགས་ཤིང་ཞེས་བྱ་བ་ནི་སེམས་ཅན་གྱི་ཁམས་རྣམས་རྣམ་པར་སྣང་མཛད་ལ་སོགས་པའི་རང་བཞིན་དུ་བྱེད་ཅིང༌། འདི་དེ་སངས་རྒྱས་ཐམས་ཅད་ཀྱི། །ཞེས་བྱ་བ་ནི། རང་གི་ཕྱག་ན་གནས་པའི་མཆེ་བའི་ཕྱག་རྒྱ་གསུངས་བའོ། །མ་རུངས་ཐམས་ཅད་འདུལ་བའི་མཆོག །ཅེས་བྱ་བ་ནི། མ་རུངས་པ་ཡང་ཡིན་ལ་ཐམས་ཅད་ཀྱང་ཡིན་པས་ན་མ་རུངས་པ་ཐམས་ཅད་དེ། ལྷའི་བུའི་བདུད་ལ་སོགས་པ་ཡིན་ལ། དེ་རྣམས་འདུལ་བའི་མཆོག་ཡིན་པས་ན་དེ་སྐད་ཅེས་བྱའོ། །དེ་གང་ཞིག་ཡིན་ཞེ་ན། རྡོ་རྗེ་མཆེ་བའི་མཚོན་རྣོ་སྟེ། །ཞེས་བྱ་བ་གསུངས་ཏེ། མཚོན་ཆ་ནི་དོན་རྫོགས་པར་བྱེད་པས་ན་མཚོན་ཆའོ། །རྣོ་ཞེས་བྱ་བ་ནི་གཞིག་པར་དཀའ་བ་འཇིག་པ་ཉིད་ཀྱིས་སོ། །གདུག་པ་འདུལ་པའི་ཐབས་སུ་གྱུར་པ་ཉིད་ཀྱིས་ན་ཐབས་སོ། །དེ་ལྟར་རྡོ་རྗེ་གནོད་སྦྱིན་གྱིས་དེ་བཞིན་གཤེགས་པ་རྣམས་ཀྱི་བསྲུང་བ་ཡོངས་སུ་བསྐྱང་བར་བྱས་པ་ཡིན་ལ། དེ་ནས་དེ་ཁོ་ན་ཉིད་རྟོགས་པའི་ཚུལ་གྱིས་རྡོ་རྗེ་ཁུ་ཚུར་གྱིས་བསྒྲུབས་པས་ན། དེ་ནས་ཞེས་བྱ་བ་ལ་སོགས་པ་གསུངས་སོ། །དེ་ནས་བཅོམ་ལྡན་འདས་ཀྱིས་སྙིང་པོ་འདི་རང་གི་ཐུགས་ཀ་ནས་ཕྱུང་ངོ་ཞེས་བྱ་བར་སྦྱར་རོ། །དེ་བཞིན་གཤེགས་ས་


DTG057_Page_0168
[མ་དཔེ་གཟིགས་ན་འདིར་གནོན།]

པ་ཐམས་ཅད་ཀྱི་སྐུ་དང་གསུང་དང༌། ཐུགས་རྡོ་རྗེ་སྐྱེ་བ་མེད་པའི་དེ་བཞིན་ཉིད་དུ་ཐུགས་སུ་ཆུད་པས་གཅིག་ཏུ་མཛད་པ་ནི་ཁུ་ཚུར་རོ། །དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་ཡང་ཡིན་ལ་བྱང་ཆུབ་སེམས་དཔའ་ཆེན་པོ་ཡང་ཡིན་པས་ན། དེ་བཞིན་གཤེགས་བ་ཐམས་ཅད་ཀྱི་བྱང་ཆུབ་སེམས་དཔའ་ཆེན་པོའི་ཁུ་ཚུར་རོ། །དེ་ཉིད་ནི་སེམས་དཔའ་རྡོ་རྗེའི་གཟུགས་ཅན་གྱི་རྡོ་རྗེ་སེམས་དཔའོ། །དེའི་དམ་ཚིག་ནི་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ཐམས་ཅད་བཅིང་བ་ལ་སོགས་པའི་ཚུལ་ལོ། །དེ་ལས་བྱུང་བ་ནི་སེམས་དཔའི་རྡོ་རྗེའི་ཚུལ་གང་ལས་ལས་སུ་གྱུར་པ་སྟེ། དེ་བྱིན་གྱིས་བརླབ་ཅིང་བརྟན་པར་བྱ་བའི་ཕྱིར། རྡོ་རྗེ་ལྟར་མི་ཕྱེད་པའི་ཏིང་ངེ་འཛིན་གང་ལ་མིང་དེ་སྐད་ཅེས་བྱ་བའི་ཏིང་ངེ་འཛིན་དེ་ལ་སྙོམས་པར་ཞུགས་ནས། ཕྱག་རྒྱ་ཐམས་ཅད་བཅིང་བ་ལ་སོགས་པའི་སྤྲུལ་པ་སྐྱེ་བའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་བར་དུའོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་བཅིང་བ་ནི། བཅོམ་ལྡན་འདས་རྡོ་རྗེའི་ཁུ་ཚུར་རོ། །དེའི་དམ་ཚིག་ནི་བསྐྱེད་པའི་རྒྱུའོ། །དེ་ནས་ཞེས་བྱ་བ་ལ་སོགས་པ་ལ། བཅོམ་ལྡན་འདས་དེ་ཉིད་རྡོ་རྗེ་བཅིངས་པའི་དབྱིབས་སུ་གྱུར་ཏེ་ཕྱག་གཉིས་སུ་གནས་སོ་ཞེས་བྱ་བར་སྦྱར་རོ། །བཅོམ་ལྡན་འདས་རྡོ་རྗེ་འཛིན་པ་དེ་ཉིད་དེ་ཞེས་བྱ་བ་ནི་སེམས་དཔའ་རྡོ་རྗེའི་གཟུགས་སོ། །དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་བཅིངས་པར་གྱུར་ཏོ་ཞེས་བྱ་བ་ལ། དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་བཅིངས་པ་ནི་དམ་ཚིག་རྡོ་རྗེ་ཁུ་ཚུར་གྱིས་རྡོ་རྗེ་རྩེ་ལྔ་པ་བཙིར་བ་ལྟ་བུའོ། །དེ་དག་ཐམས་ཅད་ཀྱང་གཅིག་ཏུ་གྱུར་ནས་རྡོ་རྗེ་བཅིངས་པའི་དབྱིབས་གཅིག་ཏུ་གྱུར་ཏོ། །ཕྱག་གཉིས་སུ་གནས་པ་ནི། དམ་ཚིག་གི་ཁུ་ཚུར་གྱིས་གཟུང་བའི་རྡོ་རྗེ་རྩེ་ལྔ་པའི་ཕྱག་རྒྱ་ཉིད་འདིར་བཅིངས་པའི་དབྱིབས་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ། བྱང་ཆུབ་སེམས་དཔའི་སྐུར་གྱུར་ནས་ཐུགས་ལ་གནས་ནས་ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་དང་ཡེ་ཤེས་ལ་སོགས་པ་དང༌།


DTG057_Page_0169
[མ་དཔེ་གཟིགས་ན་འདིར་གནོན།]

སངས་རྒྱས་ཐམས་ཅད་ཀྱི་རྫུ་འཕྲུལ་དང་ཆོ་འཕྲུལ་རྣམས་བྱས་ནས་ཞེས་བྱ་བ་ལ་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ནི་བཅོམ་ལྡན་འདས་རྡོ་རྗེ་ཁུ་ཚུར་ཏེ་དེ་ནི་ཡེ་ཤེས་སོ། །དེ་ལ་སོགས་པ་གང་ཡིན་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་དང་ཡེ་ཤེས་ལ་སོགས་པ། སངས་རྒྱས་ཐམས་ཅད་ཀྱི་རྫུ་འཕྲུལ་དང་ཆོ་འཕྲུལ་རྣམས་བྱས་ནས། དེ་ཐམས་ཅད་གཅིག་ཏུ་གྱུར་ནས་བྱང་ཆུབ་སེམས་དཔའ་རྡོ་རྗེ་ཁུ་ཚུར་གྱི་སྐུར་གྱུར་ཏོ། །ཅིའི་ཕྱིར་ཞེ་ན། རྡོ་རྗེ་སེམས་དཔའ་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་ནི་བཅོམ་ལྡན་འདས་རྡོ་རྗེ་ཁུ་ཚུར་རོ། །དེ་ཉིད་ཤིན་ཏུ་བཅིངས་པ་གང་ཡིན་པ་འདི་ནི། དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་བཅིངས་པ་སྟེ་དེའི་ངོ་བོ་ཉིད་ཡིན་པས་ན་བཅིངས་པ་ཉིད་དོ། །གང་གི་ཞེ་ན། རྡོ་རྗེ་སེམས་དཔའི་ཏིང་ངེ་འཛིན་ནི་ཞེས་བྱ་བ་སྟེ། དེ་བཞིན་གཤེགས་པ་ཐམས་ཅད་གཅིག་ཏུ་མཛད་ནས་བྱང་ཆུབ་སེམས་དཔའ་ཆེན་པོ་རྡོ་རྗེ་ཁུ་ཚུར་གྱི་སྐུར་སྐྱེད་པར་བྱེད་པ་གང་ཡིན་པ་དེ་ནི་འདིར་རྡོ་རྗེ་སེམས་དཔའི་ཏིང་ངེ་འཛིན་ཏོ། །ཨེ་མའོ་རབ་ཏུ་བརྟན་བཅིངས་པས། །ཞེས་བྱ་བ་ལ། རབ་ཏུ་བརྟན་པ་ནི་མི་ཕྱེད་པའོ། །འདི་ནི་ཅི་ཞིག་ཡིན་ཞེ་ན་བཅིངས་པའོ། །ཇི་ལྟ་བུ་ཞེ་ན་དམ་ཚིག་ཅེས་བྱ་བ་སྟེ། འདའ་བར་མི་བྱ་བའི་དོན་ཏོ། །ཅི་ཞིག་ངོ་མཚར་ཆེ་ཞེ་ན། བསམ་པ་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། གང་གི་ཕྱིར། བསམ་པ་ཐམས་ཅད་རབ་གྲུབ་ཕྱིར། །ཞེས་བྱ་བ། སྲེད་པའི་རྣམ་པ་ཐམས་ཅད་ནི་བསམ་པ་ཐམས་ཅད་དེ། བདག་གིས་དེ་བཞིན་གཤེགས་པ་ཉིད་རྟོགས་པར་བྱས་ནས་ཐམས་ཅད་ཀྱིས་སེམས་ཅན་ཐམས་ཅད་རྫོགས་པར་བྱའོ་ཞེས་བྱ་བའི་སྨོན་ལམ་རྫོགས་པར་གྱུར་པ་ནི་རབ་ཏུ་གྲུབ་པ་སྟེ། དོན་དེའི་ཕྱིར་གྲོལ་བ་རྣམས་ཞེས་བྱ་བ། ཉོན་མོངས་པ་དང་ཤེས་བྱའི་སྒྲིབ་པ་འཆིང་བ་ལས་ཐར་པ་རྣམས་ཀྱང༌། མི་གནས་པའི་མྱང་ངན་ལས་འདས་པའི་ཚུལ་གྱིས་འཁོར་བར་ཞུགས་པར་བྱེད་པ་ནི་འཆིང་བར་བྱེད་པའོ། །དེ་བཞིན་གཤེགས་པ་ཐམས་ཅད་ཀྱི་རྒྱབ་ན་ཞེས་བྱ་བ་ནི་བཅོམ་ལྡན་འདས་དོན་ཡོད་པར་གྲུབ་པའིའོ། །


DTG057_Page_0170
[མ་དཔེ་གཟིགས་ན་འདིར་གནོན།]

དེ་ནས་ཞེས་བྱ་བ་ལ་སོགས་པ་ལ། བཅོམ་ལྡན་འདས་ཀྱིས་རྡོ་རྗེ་བཅིངས་པ་དེ་དེའི་ལག་པ་གཉིས་སུ་བྱིན་ནོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་ཀུན་རྫོབ་ཀྱི་རྡོ་རྗེ་ཁུ་ཚུར་གྱི་བདག་ཉིད་ཅན་ནི་རྡོ་རྗེ་འཆིང་བའོ། །དེ་ཉིད་ནི་དམ་ཚིག་གོ །དེ་ཉིད་ནི་མི་ཕྱེད་པས་ན་རྡོ་རྗེ་སྟེ། དེ་ལ་དམིགས་པའི་ཏིང་ངེ་འཛིན་ནི་དེ་བཞིན་གཤེགས་པ་ཐམས་ཅད་ཀྱི་འཆིང་བའི་དམ་ཚིག་རྡོ་རྗེ་ཞེས་བྱ་བ། དེ་ལ་སྙོམས་པར་ཞུགས་པ་ནི། རྡོ་རྗེ་བཅིངས་པའི་ཕྱག་རྒྱ་སྦྱིན་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་ཐ་ཚིག་གོ །དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་བཅིངས་པའི་དམ་ཚིག་ཅེས་བྱ་བ་ལ། དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ནི་རིགས་ཐམས་ཅད་ལས་བྱུང་བའི་སྐུ་གསུང་ཐུགས་ཀྱི་ཕྱག་རྒྱའོ། །དེ་བཅིངས་པ་ནི་བདག་མེད་པའི་ཚུལ་གྱིས་གཅིག་ཏུ་བྱ་བ་སྟེ། རྡོ་རྗེ་ཁུ་ཚུར་ཉིད་ལ་བྱ་བར་བཤད་དོ། །དེའི་དམ་ཚིག་ནི་རྒྱུ་སྟེ། རྡོ་རྗེ་བཅིངས་པའི་ཕྱག་རྒྱའོ། །དེ་བཞིན་གཤེགས་པ་ཐམས་ཅད་དང༌། ལྷ་རྣམས་ཀྱིས་དགོངས་པར་བརྟག་པ་ཞེས་བྱ་བ་ལ། དེ་བཞིན་གཤེགས་པ་ཐམས་ཅད་ནི་སེམས་དང་སེམས་ལས་བྱུང་བ་གཉིས་སུ་མེད་པའོ། །དེ་རྣམས་ཀྱི་ལྷ་རྣམས་ནི་དེ་བཞིན་གཤེགས་པ་དང་དེ་བཞིན་གཤེགས་པའི་རིགས་ཀྱི་སྐུ་གསུངས་ཐུགས་ཀྱི་གསང་བའི་ཕྱག་རྒྱའོ། །དེའི་དགོངས་པ་བརྟག་པ་ནི་ཆོ་འཕྲུལ་གྱི་རྣམ་པ་བརྒྱ་རྩ་བརྒྱད་པའི་ཏིང་ངེ་འཛིན་གྱིས་དགོངས་པར་བརྟགས་པས་བརྟགས་པས་སེམས་ཅན་གྱི་ཁམས་ཐམས་ཅད་བདེ་བ་དང་ཡིད་བདེ་བ་ཐམས་ཅད་མྱོང་བར་བྱས་ནས། དེ་བཞིན་གཤེགས་གཤེགས་པ་ཐམས་ཅད་ཀྱི་ཐམས་ཅད་མཁྱེན་པའི་ཡེ་ཤེས་དང༌། ཕྱག་རྒྱའི་དབང་དམ་པ་གྲུབ་བའི་བར་དུ་སྟེ་འབྲས་བུ་དེ་དག་གི་ཕྱིར་རོ། །དེ་བཞིན་གཤེགས་པ་ཐམས་ཅད་ཀྱི་ཐམས་ཅད་མཁྱེན་པའི་ཡེ་ཤེས་ནི་ཆོས་བདག་མེད་པའི་ཡེ་ཤེས་སོ། །དེ་ཉིད་ཕྱག་རྒྱ་ཡིན་ལ་དེ་ལ་དབང་བ་ནི་བདག་པོར་གྱུར་པའོ། །དེ་ཉིད་ནི་དམ་པ་གྲུབ་པ་སྟེ་དེ་ཁོ་ན་ཉིད་ནི་འབྲས་བུ་ཡིན་ཏེ། དེ་དག་གི་ཕྱིར་ནི་རྒྱུར་ཏེ། བྱང་ཆུབ་སེམས་དཔའ་ཆེན་པོ་གྲུབ་པའི་དོན་དུ་ཞེས་བྱ་བའི་ཐ་ཚིག་གོ །བར་དུ་ཞེས་བྱ་བའི་


DTG057_Page_0171
[མ་དཔེ་གཟིགས་ན་འདིར་གནོན།]

སྒྲས་ནི་བྱང་ཆུབ་ཏུ་སེམས་བསྐྱེད་པ་ལ་སོགས་པ་བསྡུའོ། །དེའི་ལག་ཏུ་བྱིན་ནོ་ཞེས་བྱ་བ་ནི་སངས་རྒྱས་ལྔའི་དབུ་རྒྱན་དང་དར་དབྱངས་ཀྱི་དབང་གིས་དབང་བསྐུར་ནས་སོ། །རྡོ་རྗེ་ཁུ་ཚུར་རྡོ་རྗེ་ཁུ་ཚུར་ཞེས་བྱ་བ་ནི། དེ་བཞིན་ཉིད་ཀྱི་ཁུ་ཚུར་གྱིས་ཉེ་བར་མཚོན་པའི་ཕྱིར་དེ་བས་ན་རྡོ་རྗེ་ཁུ་ཚུར་ཞེས་བྱའོ། །རྡོ་རྗེ་བཅིངས་པ་དེས་ཞེས་བྱ་བ་ནི། རང་གི་ལག་ན་གནས་པའི་ཆོས་བདག་མེད་པའི་རྡོ་རྗེ་བཅིངས་པ་སྟེ། དེས་རྣམ་པར་སྣང་མཛད་ལ་སོགས་པ་འདི་དེ་བཞིན་གཤེགས་པ་ཐམས་ཅད་འཆིང་ཞིང་ཞེས་བྱ་བ། མི་གནས་པའི་མྱ་ངན་ལས་འདས་པ་ལ་འཇོག་ཅིང་སེམས་ཅན་གྱི་དོན་དུ་འཁོར་བ་ཇི་སྲིད་པར་བཞུགས་པར་བྱེད་པའོ། །འདི་དེ་ཞེས་བྱ་བ་ནི་གང་བཅོམ་ལྡན་འདས་རྣམ་པར་སྣང་མཛད་ཀྱིས་བདག་ལ་སྩལ་བ་གང་ཡིན་པ་དེ་ནི་སངས་རྒྱས་ཐམས་ཅད་ཀྱི་ཕྱག་རྒྱ་བཅིངས་བ་ཡིན་ནོ། །ཇི་ལྟ་བུ་ཞིག་ཅེ་ན། ཆེ་ཞིང་བརྟན་ཞེས་བྱ་བ་ནི། ཆོས་ཀྱི་དབྱིངས་གཉིས་སུ་མེད་པའི་ཚུལ་ཉིད་ཀྱིས་ན་མི་ཕྱེད་པ་ཡིན་པའི་ཕྱིར་རོ། །ཅིའི་ཕྱིར་ཕྱག་རྒྱ་བཅིངས་པ་ཆེ་ཞིང་བརྟན་པ་ཡིན་ཞེ་ན། སངས་རྒྱས་ཀུན་ནི་མྱུར་གྲུབ་ཕྱིར། །ཞེས་བྱ་བ་སྟེ། དེ་བཞིན་གཤེགས་པ་ལ་སོགས་པའི་ཟློས་པ་པོས། རྡོ་རྗེ་འབེབས་པའི་ཕྱག་རྒྱ་བཅིངས་ནས་བཛྲ་མུཥྚི་ཞེས་བྱ་བས་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་བཅིངས་ལ། བཛྲ་སནྡྷི་ཞེས་བརྗོད་དོ། །དེ་ནས་དེ་རྣམས་ཕྱག་རྒྱ་བཅིངས་ན། དེས་མྱུར་དུ་འགྲུབ་པར་འགྱུར་རོ། །དེ་ནས་བཛྲ་ཨཱ་བེ་ཤ་ཞེས་བྱ་བས། རྡོ་རྗེ་འབེབས་པའི་དམ་ཚིག་གི་ཕྱག་རྒྱ་བཅིངས་ལ། ཨཿ་ཞེས་བྱ་བས་བདག་ཉིད་ལ་དབབ་པར་བྱའོ། །དེ་ནས་བཛྲ་མུཥྚི་ཞེས་བྱ་བས་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་བཅིང་བར་བྱའོ། །དེ་ནས་ཕྱག་རྒྱ་ཐམས་ཅད་བཅིང་བ་འགྲུབ་པར་འགྱུར་རོ། །གལ་ཏེ་དེ་ལྟར་མི་བྱེད་ནས་མ་ཡ་སྟྭཾ་ཞེས་བྱ་བས་ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་ཐམས་ཅད་བཅིང་བར་བྱའོ་ཞེས་བཤད་པ་ཡིན་ནོ། །དམ་ཚིག་ཤིན་ཏུའང་འདའ་བར་དཀའ། །ཞེས་བྱ་བ་ནི་འདའ་བར་བྱ་བ་མ་ཡིན་པས་ན་དམ་ཚིག་སྟེ། འདི་ཉིད་ཀྱིས་ན་འདའ་བར་དཀའ་བའོ། །དེས་ནི་འདི་སྐད་སྟོན་པ་


DTG057_Page_0172
[མ་དཔེ་གཟིགས་ན་འདིར་གནོན།]

ཡིན་ཏེ། གང་གིས་ན་སངས་རྒྱས་ཐམས་ཅད་མྱུར་དུ་གྲུབ་པའི་ཕྱིར། འདི་ནི་འདའ་བར་མི་བྱ་བའི་དམ་ཚིག་ཡིན་ལ། དེ་བས་ན་བདག་གི་རྡོ་རྗེ་ཁུ་ཚུར་བཅིངས་པའི་ཚུལ་འདི་ནི་ཆེ་ཞིང་བརྟན་པ་ཡིན་ནོ། །དེ་ནས་ཞེས་བྱ་བ་ལ་སོགས་པས་ནི་སྡོམ་པ་གསུངས་པ་ཡིན་ཏེ། དེ་བཞིན་གཤེགས་པ་ཐམས་ཅད་ཀྱི་མཆོད་པའི་ཆོ་ག་རྒྱས་པའི་ལས་ཀྱི་རང་བཞིན་ནི་རྡོ་རྗེའི་ལས་སོ། །བརྩོན་འགྲུས་ཆེན་པོ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་པར་སྤྲོ་བའོ། །དེ་ཉིད་ནི་གོ་ཆ་བརྟན་པ་སྟེ། གོ་ཆ་ནི་རྡོ་རྗེ་བསྲུང་བའོ། །དེ་བཞིན་གཤེགས་པ་ཐམས་ཅད་ཀྱི་ཐབས་ཆེན་པོ་ནི་རྡོ་རྗེ་གནོད་སྦྱིན་ནོ། །དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ཐམས་ཅད་བཅིངས་པའི་ཡེ་ཤེས་ནི་རྡོ་རྗེ་ཁུ་ཚུར་རོ། །དེ་བཞིན་གཤེགས་པ་ཐམས་ཅད་ཀྱི་ཕྲིན་ལས་ཆེན་པོའི་སེམས་དཔའ་ཞེས་བྱ་བ་ནི། དེ་བཞིན་གཤེགས་པ་ཐམས་ཅད་ཀྱི་བརྩོན་འགྲུས་ཆེན་པོའི་རང་བཞིན་གྱི་ཕྲིན་ལས་ལས་བྱུང་བའི་སེམས་དཔའ་རྣམས་སོ། །དེ་ཡང་བཅོམ་ལྡན་འདས་ཀྱིས་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ཕྲིན་ལས་ནི་དོན་ཡོང་པར་གྲུབ་པའོ། །བརྩོན་འགྲུས་ཀྱི་རང་བཞིན་གྱི་ལས་དེ་ཡང་རྣམ་པ་བཞིར་འགྱུར་ཏེ། བརྩམ་པ་དང༌། ཡོངས་སུ་སྦྱོང་བ་དང༌། སོ་སོར་རྟོག་པ་དང༌། བསྒྲུབ་པ་ལྷུར་ལེན་པའོ། །དེ་ལ་རྩོམ་པའི་བརྩོན་འགྲུས་ནི་དང་པོ་འཇུག་པ་སྟེ། སངས་རྒྱས་ཀྱི་སྤྲུལ་པས་འགྲོ་བའི་དོན་བྱེད་པར་སྤྲོ་བའི་རྩོམ་པའི་བརྩོན་འགྲུས་ནི་རྡོ་རྗེ་ལས་སོ། །དེ་ཉིད་གོང་ནས་གོང་དུ་མངོན་པར་འཕེལ་བར་བྱ་བའི་ཕྱིར་མ་ཞུམ་པའི་སྦྱོར་བས་ཡོངས་སུ་སྦྱོངས་བའི་བརྩོན་འགྲུས་ནི་རྡོ་རྗེ་བསྲུང་བའོ། །འཁོར་གསུམ་ཡོངས་སུ་དག་པའི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་གོམས་པ་ཐམས་ཅད་ཉེ་བར་མ་དམིགས་པ་སོ་སོར་རྟོག་པའི་བརྩོན་འགྲུས་ནི་རྡོ་རྗེ་གནོད་སྦྱིན་ནོ། །རང་བཞིན་མེད་པ་དེ་མངོན་སུམ་དུ་བྱེད་པ་སྒྲུབ་པ་ལྷུར་ལེན་པའི་བརྩོན་འགྲུས་ནི་རྡོ་རྗེ་ཁུ་ཚུར་རོ། །དེ་ལྟར་རྡོ་རྗེ་ཁུ་ཚུར་གྱིས་དེ་བཞིན་གཤེགས་པ་ཐམས་ཅད་ཀྱི་དེ་བཞིན་ཉིད་རྟོགས་པས་གྲུབ་པར་གྱུར་པ་ནི། བྱང་ཆུབ་ཀྱི་སེམས་


DTG057_Page_0173
[མ་དཔེ་གཟིགས་ན་འདིར་གནོན།]

དང། སྦྱིན་པའི་ཕ་རོལ་ཏུ་ཕྱིན་པ་དང་ཤེས་རབ་དང་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ངོ་བོ་རྣམས་ནི། རྡོ་རྗེ་སེམས་དཔའ་ལ་སོགས་པ་སྡུད་པར་བྱེད་པ་ཡིན་ནོ། །རྣམ་པར་སྣང་མཛད་ལ་སོགས་པ་ནས་རྡོ་རྗེ་འབེབས་པའི་མཐར་ཐུག་པའི་བར་གྱི་རེ་རེ་ཞིང་ཡང་གྱུར་ཏོ་ཞེས་བྱ་བ་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་སྨོས་པ་ཡིན་ཏེ། དེ་ནས་ཞེས་བྱ་བ་ལ་སོགས་པ་ལ། དེ་བཞིན་གཤེགས་པ་མི་བསྐྱོད་པས་རྡོ་རྗེ་དམ་ཚིག་ཕྱུང་ངོ་ཞེས་བྱ་བར་སྦྱར་རོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་ཏུའོ། །བཅོམ་ལྡན་འདས་རྣམ་པར་སྣང་མཛད་ཀྱི་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་བསྒྲུབས་ཏེ་ཞེས་བྱ་བ་ནི། སངས་རྒྱས་ཐམས་ཅད་གཅིག་ཏུ་བསྡུས་པ་ལ་སོགས་པ་ནས་རྡོ་རྗེ་འབེབས་པའི་བར་གྱི་ཡེ་ཤེས་ནི་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་སོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་པ་ཐམས་ཅད་ཀྱི་ཡེ་ཤེས་ལ་ཕྱག་རྒྱས་གདབ་པའི་ཕྱིར་ཞེས་བྱ་བ་ནི། རྣམ་པར་སྣང་མཛད་ལ་སོགས་པའི་ཐུགས་ཀར་རྡོ་རྗེ་རྩེ་ལྔ་པ་བཞག་པ་ནི་ཕྱག་རྒྱས་གདབ་པ་སྟེ་དེའི་ཕྱིར་རོ། །རྡོ་རྗེའི་ཕ་རོལ་ཏུ་ཕྱིན་པ་ཞེས་བྱ་བ་ལ། རྡོ་རྗེ་ནི་བྱང་ཆུབ་ཀྱི་མཚན་ཉིད་ཅན་གྱི་སེམས་ཏེ། དེའི་ཕ་རོལ་ཏུ་ཕྱིན་ཅིང་འགྲོ་བས་ན། རྡོ་རྗེའི་ཕ་རོལ་ཏུ་ཕྱིན་པ་སྟེ། དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཆེན་པོའི་ཡེ་ཤེས་ཀྱི་མཚན་ཉིད་རྡོ་རྗེ་སེམས་མའོ། །དེ་ཡང༌། བྱང་ཆུབ་སེམས་ཀྱི་མཐུ་ཡིས་ནི། །ཕ་རོལ་སངས་རྒྱས་ཉིད་དུ་འགྱུར། །དེ་བས་ཕ་རོལ་ཕྱིན་ལྡན་པ། །རྡོ་རྗེ་སེམས་མར་ཤེས་པར་བྱ། །ཞེས་གསུངས་པ་ཡིན་ནོ། །དེའི་དམ་ཚིག་ནི་རྒྱུ་སྟེ། རྡོ་རྗེའི་འོད་ཟེར་ལ་སོགས་པའི་ཚུལ་ལོ། །དེ་འབྱུང་བ་ནི་རྣམ་པར་སྣང་མཛད་ལ་སོགས་པའི་ཐུགས་ཀར་གནས་པའི་སེམས་དཔའ་རྡོ་རྗེ་ལས་བྱུང་བའོ། །དེ་བྱིན་གྱིས་བརླབས་པའི་ཏིང་ངེ་འཛིན་གང་ལ་མིང་འདི་ཉིད་ཅེས་བྱ་བའི་ཏིང་ངེ་འཛིན་དེ་ལ་སྙོམས་པར་ཞུགས་པ་ནི། རྡོ་རྗེའི་འོད་ཟེར་ལ་སོགས་པ་སྤྲུལ་ཞིང་བསྐྱེད་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་ཐ་ཚིག་གོ །དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ཞེས་བྱ་བ་ནི་སེམས་དཔའི་རྡོ་རྗེའོ། །དེའི་དམ་ཚིག་ནི་


DTG057_Page_0174
[མ་དཔེ་གཟིགས་ན་འདིར་གནོན།]

རྒྱུར་གྱུར་པའོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་དམ་ཚིག་ནི་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་སྟེ་རྡོ་རྗེ་སེམས་མའོ། །འདི་ཞེས་བྱ་བ་ནི་ཐུགས་ལ་གནས་པའི་སྒྲའི་ཚུལ་ལོ། །རང་གི་ཐུགས་ཀ་ནས་བྱུང་བ་ནི་ཕྱུང་བར་གྱུར་པའོ། །དེ་ནས་ཞེས་བྱ་བ་ལ་སོགས་པ་ལ། རྡོ་རྗེ་ཆེན་པོའི་དབྱིབས་སུ་གྱུར་ཏེ་ཆེད་དུ་བརྗོད་པ་འདི་ཡང་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་ཐུགས་ལས་ཞེས་བྱ་བ་ནི། དེ་བཞིན་གཤེགས་པ་ལྔའི་ཐུགས་ལས་སོ། །རྡོ་རྗེའི་འོད་ཟེར་ནི་རྡོ་རྗེ་རྩེ་ལྔ་པ་ལྟ་བུའོ། །བཅོམ་ལྡན་འདས་རྡོ་རྗེ་འཛིན་པ་དེ་ཉིད་དོ་ཞེས་བྱ་བ་ནི། སེམས་དཔའ་རྡོ་རྗེའི་ཚུལ་ལོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་ཕ་རོལ་ཏུ་ཕྱིན་པའི་ཡེ་ཤེས་རྣམས་ལ་ཕྱག་རྒྱས་བཏབ་ནས་ཞེས་བྱ་བ་ལ། རྡོ་རྗེའི་ཕ་རོལ་ཏུ་ཕྱིན་པ་ནི་བཤད་མ་ཐག་པའི་མཚན་ཉིད་དོ། །དེ་ལས་བྱུང་བའི་རྣམ་པར་སྣང་མཛད་ལ་སོགས་པའི་སྐུའི་གསང་བའི་ཚུལ་ནི་ཡེ་ཤེས་སོ། །སྐུའི་གསང་བའི་ཐུགས་ཀའི་ཟླ་བ་དེ་རྣམས་སུ་རྡོ་རྗེ་རྩེ་ལྔ་པའི་གཟུགས་སུ་བསྐྱེད་པ་འདི་ནི་ཕྱག་རྒྱས་བཏབ་པའོ། །ཨེ་མའོ་ཞེས་བྱ་བ་ལ་སོགས་པ་ལ། སེམས་དཔའ་རྡོ་རྗེ་ཞེས་པ་ལ་ཟླ་བའི་དཀྱིལ་འཁོར་ནི་སེམས་དཔའོ། །དེའི་སྟེང་གི་རྡོ་རྗེ་རྩེ་ལྔ་པ་ནི་སེམས་དཔའི་རྡོ་རྗེའོ། །བརྟན་པའི་བདག་ཅེས་བྱ་བ་ནི་བྱང་ཆུབ་ཀྱི་མཚན་ཉིད་ཅན་གྱི་ཐུགས་ཀྱི་ཚུལ་ཡིན་པ་ཉིད་ཀྱིས་ན་བརྟན་པའོ། །ཅི་ཞིག་ངོ་མཚར་ཆེ་ཞེ་ན། གང་ཕྱིར་ཞེས་བྱ་བ་ལ་སོགས་པ་གསུངས་ཏེ། གང་ཕྱིར་བརྟན་པས་ཞེས་བྱ་བ། གཉིས་སུ་མེད་པའི་ཚུལ་གྱིས་མི་ཕྱེད་པ་ཉིད་ཡིན་པས་ལུས་མེད་ཀྱང་ཞེས་བྱ་བ་གཟུགས་མེད་པ་སྟེ། ཆོས་ཀྱི་དབྱིངས་ཀྱི་རང་བཞིན་ཅན་ཡིན་པས་ལུས་མེད་དུ་ཟིན་ཀྱང་རྡོ་རྗེའི་ལུས་སུ་སྟེ། རྡོ་རྗེ་རྩེ་ལྔ་པའི་གཟུགས་ཉིད་དུ་གྱུར་བ་ཡིན་ཞིང་ཐོབ་པ་སྟེ། བདག་ནི་གཉིས་སུ་མེད་པའི་ཡེ་ཤེས་ཀྱི་རང་བཞིན་ཡིན་པ་ལས། གདུལ་བྱ་རྣམས་ཀྱིས་རྡོ་རྗེ་རྩེ་ལྔ་པའི་གཟུགས་སུ་མཐོང་བ་འདི་ནི་ངོ་མཚར་ཆེའོ། །དེ་ནས་ཞེས་བྱ་བ་ལ་སོགས་པ་ལ་བཅོམ་ལྡན་འདས་དེ་བཞིན་གཤེགས་པ་རིན་ཆེན་


DTG057_Page_0175
[མ་དཔེ་གཟིགས་ན་འདིར་གནོན།]

འབྱུང་ལྡན་གྱིས། རིན་པོ་ཆེའི་དམ་ཚིག་ཅེས་བྱ་བའི་རང་གི་ཕྱག་རྒྱ་འདི་རང་གི་ཐུགས་ཀ་ནས་ཕྱུང་ངོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ལ་ཕྱག་རྒྱས་བཏབ་པའི་ཕྱིར་ཞེས་བྱ་བ་ལ། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ནི་སྔ་མ་དང་འདྲའོ། །རྣམ་པར་སྣང་མཛད་ལ་སོགས་པའི་དཔྲལ་བར་ཟླ་བའི་དཀྱིལ་འཁོར་གྱི་སྟེང་དུ་རྡོ་རྗེ་རིན་པོ་ཆེ་བསྐྱེད་པ་ནི། དེ་རྣམས་ལ་ཕྱག་རྒྱས་བཏབ་པའོ། །རིན་པོ་ཆེའི་ཕ་རོལ་ཏུ་ཕྱིན་པའི་དམ་ཚིག་ཅེས་བྱ་བ་ལ། རིན་པོ་ཆེའི་ཕ་རོལ་ཏུ་ཕྱིན་པ་ནི་སྦྱིན་པའི་ཕ་རོལ་ཏུ་ཕྱིན་པའི་ཚུལ་ཅན་གྱི་རྡོ་རྗེ་རིན་ཆན་མའོ། །དེ་ཡང༌། སྦྱིན་པ་ལ་སྤྱོད་མཐུ་ཡིས་ནི། །ཕ་རོལ་སངས་རྒྱས་ཉིད་དུ་འགྱུར། །དེ་བས་ཕ་རོལ་ཕྱིན་ལྡན་པ། །རྡོ་རྗེ་རིན་ཆེན་མར་ཤེས་བྱ། །ཞེས་བཤད་པ་ཡིན་ནོ། །རིན་པོ་ཆེའི་ཕ་རོལ་ཏུ་ཕྱིན་པ་དེའི་དམ་ཚིག་ནི་རྒྱུ་སྟེ། རིན་པོ་ཆེ་ལྟ་བུའི་འོད་ཟེར་དང་དེ་བཞིན་གཤེགས་པ་སྤྲུལ་པ་ལ་སོགས་པའོ། །དེ་ལས་བྱུང་བ་ནི་རིན་པོ་ཆེ་ལྟ་བུའི་སེམས་དཔའི་རྡོ་རྗེ་གང་ལས་བྱུང་བ་སྟེ། དེ་བྱིན་གྱིས་བརླབ་པར་བྱ་བའི་ཕྱིར། ཏིང་ངེ་འཛིན་གང་ཡིན་པ་དེ་ལ་སྙོམས་པར་ཞུགས་ནས་སོ། །རྡོ་རྗེ་རིན་པོ་ཆེའི་དམ་ཚིག་ཅེས་བྱ་བ་ལ། རྡོ་རྗེ་རིན་པོ་ཆེ་ནི་རྡོ་རྗེ་རིན་ཆེན་མའོ། །དེའི་དམ་ཚིག་ནི་རྒྱུར་གྱུར་པའོ། །དེ་ནས་ཞེས་བྱ་བ་ལ་སོགས་པ་ལ། རིན་པོ་ཆེའི་དབྱིབས་སུ་གྱུར་ཏེ་ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །རིན་པོ་ཆེའི་འོད་ཟེར་ཞེས་བྱ་བ་ནི་རིན་པོ་ཆེ་ལྟ་བུའི་འོད་ཟེར་ནི་རིན་པོ་ཆེའི་འོད་ཟེར་རོ། །བཅོམ་ལྡན་འདས་རྡོ་རྗེ་འཛིན་པ་དེ་ཉིད་ཅེས་བྱ་བ་ནི་སེམས་དཔའི་རྡོ་རྗེའི་རྣམ་པའོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ལ་ཕྱག་རྒྱས་བཏབ་ནས་ཞེས་བྱ་བ་ནི། རྣམ་པར་སྣང་མཛད་ལ་སོགས་པའི་དཔྲལ་བར་ཟླ་བའི་དཀྱིལ་འཁོར་གྱི་སྟེང་དུ་རྡོ་རྗེ་རིན་པོ་ཆེ་བསྐྱེད་པ་ནི་ཕྱག་རྒྱས་བཏབ་པའོ། །ཨེ་མའོ་སངས་རྒྱས་ཐམས་ཅད་ཀྱི། །རྡོ་རྗེ་རིན་ཆེན་བདག་ཉིད་གྲགས། །ཞེས་བྱ་བ་ནི། ཨེ་མའོ་ནི་ངོ་མཚན་ཆེ་བ་སྟེ། རྡོ་རྗེ་རྩེ་ལྔ་པས་རྩེ་མོ་མཚན་པའི་ཡིད་བཞིན་གྱི་ནོར་བུ་ནི་རྡོ་རྗེ་རིན་ཆེན་ནོ། །ཅི་ཞིག་ངོ་


DTG057_Page_0176
[མ་དཔེ་གཟིགས་ན་འདིར་གནོན།]

མཚར་ཆེ་ཞེ་ན། གང་ཕྱིར་ཕྱག་རྒྱ་ཐམས་ཅད་ནི། །དབང་གི་ཚུལ་ནི་བརྟན་པའོ། །ཞེས་སྨོས་ཏེ། གང་གི་ཕྱིར་རྣམ་པར་སྣང་མཛད་ལ་སོགས་པའི་ཕྱག་རྒྱ་ཆེན་པོ་ཐམས་ཅད་ཀྱིས་དབང་བསྐུར་བའི་ཚུལ་བསྟན་པ་ཡིན་ཏེ། མཉམ་པ་ཉིད་ཀྱི་མཚན་ཉིད་ཅན་གྱི་རིན་པོ་ཆེས་སེམས་དྲི་མ་མེད་པར་བྱེད་པ་ཡིན་ལ། དེ་ཡང་གཉིས་སུ་མེད་པ་ཡིན་པས་བརྟན་པ་སྟེ། དེ་ཐོབ་པའི་ཐབས་ཀྱི་རྡོ་རྗེ་རིན་པོ་ཆེའི་ཚུལ་ལོ། །འདི་སྐད་སྟོན་པ་ཡིན་ཏེ། བདག་ནི་ནམ་མཁའ་དང་མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་ཡིན་ན་གདུལ་བྱ་རྣམས་ཀྱིས་རྡོ་རྗེ་རིན་ཆེན་གྱི་གཟུགས་སུ་མཐོང་བ་འདི་ནི་ངོ་མཚར་ཆེའོ། །དེ་ནས་ཞེས་བྱ་བ་ལ་སོགས་པ་ལ། བཅོམ་ལྡན་འདས་ཀྱིས་རང་གི་ཕྱག་རྒྱ་ཕྱུང་ངོ་ཞེས་བྱ་བར་སྦྱར་རོ། །འཇིག་རྟེན་དབང་ཕྱུག་ནི་རྡོ་རྗེ་ཆོས་སོ། །དེ་མཛེས་པར་གྱུར་པས་ན་འཇིག་རྟེན་དབང་ཕྱུག་གི་རྒྱལ་པོ་སྟེ། བཅོམ་ལྡན་འདས་འོད་དཔག་ཏུ་མེད་པ་དེའི་དབུ་ལ་བཞུགས་པའི་ཕྱིར་རོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ནི་རྣམ་པར་སྣང་མཛད་ལ་སོགས་པའིའོ། །ཕྱག་རྒྱས་གདབ་པར་བྱ་བའི་ཕྱིར། །ཞེས་བྱ་བ་ནི་དེ་རྣམས་ཀྱི་ལྐོག་མར་ཟླ་བའི་དཀྱིལ་འཁོར་གྱི་སྟེང་དུ་རྡོ་རྗེ་པདྨ་བསྐྱེད་པའོ། །ཆོས་ཀྱི་ཕ་རོལ་ཏུ་ཕྱིན་པའི་ཚུལ་ནི་རྡོ་རྗེ་ཆོས་མ་སྟེ། དེ་ཡང༌། ཤེས་རབ་སྤྱོད་པའི་མཐུ་ཡིས་ནི། །ཕ་རོལ་སངས་རྒྱས་ཉིད་དུ་འགྱུར། །དེ་བས་ཕ་རོལ་ཕྱིན་ལྡན་མ། །རྡོ་རྗེ་ཆོས་མར་ཤེས་པར་བྱ། །ཞེས་གསུངས་པའི་ཕྱིར་རོ། །ཆོས་ཀྱི་ཕ་རོལ་ཏུ་ཕྱིན་པའི་དམ་ཚིག་ནི་རྒྱུ་སྟ། པདྨའི་འོད་ཟེར་ལ་སོགས་པའོ། །དེ་ལས་བྱུང་བ་ནི་སེམས་དཔའི་རྡོ་རྗེ་གང་ལས་ཆོས་སུ་གྱུར་པ་སྟེ། དེ་བྱིན་གྱིས་བརླབ་པའི་ཕྱིར་རྡོ་རྗེ་ལྟར་མི་ཕྱེད་པའི་ཏིང་ངེ་འཛིན་གང་ལ་མིང་འདི་ཉིད་ཅེས་བྱ་བ་ལ་སྙོམས་པར་ཞུགས་ནས་ཆོས་ཀྱི་དམ་ཚིག་ཅེས་བྱ་བ་པདྨའི་འོད་ཟེར་ལ་སོགས་པ་ནི་ཆོས་སོ། །དེའི་དམ་ཚིག་ནི་དྷརྨྨཱ་བཛྲཱི་ཞེས་བྱ་བའི་སྒྲའི་ཚུལ་ལོ། །དེ་ནས་ཞེས་བྱ་བ་ལ་སོགས་པ་ལ་པདྨ་ཆེན་པོའི་དབྱིབས་སུ་གྱུར་ནས་ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །པདྨའི་འོད་ཟེར་ཞེས་བྱ་བ་ནི་པདྨ་ལྟ་བུའི་འོད་ཟེར་རྣམས་སོ། །བཅོམ་


DTG057_Page_0177
[མ་དཔེ་གཟིགས་ན་འདིར་གནོན།]

ལྡན་འདས་རྡོ་རྗེ་འཛིན་པ་དེ་ཉིད་ཅེས་བྱ་བ་ནི་སེམས་དཔའི་རྡོ་རྗེའོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ལ་ཕྱག་རྒྱས་བཏབ་བོ་ཞེས་བྱ་བ་ནི་རྣམ་པར་སྣང་མཛད་ལ་སོགས་པའི་ལྐོག་མའི་ཕྱོགས་སུ་ཟླ་བའི་དཀྱིལ་འཁོར་གྱི་སྟེང་དུ་རྡོ་རྗེ་པདྨ་བསྐྱེད་པ་ནི་ཕྱག་རྒྱས་བཏབ་པའོ། །ཆོས་ཀྱི་རྡོ་རྗེ་གཙང་མ་བདག །ཅེས་བྱ་བ་ནི། ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ནི་ཆོས་ཀྱི་རྡོ་རྗེ་བདག་ཡིན་ནོ། །དེ་ཉིད་ཀྱིས་ནི་རང་བཞིན་གྱིས་དག་པ་ཉིད་ཡིན་པའི་ཕྱིར་གཙང་བའོ། །ཅི་ཞིག་ངོ་མཚར་ཞེ་ན། གང་ཕྱིར་རང་བཞིན་རྣམ་དག་པས། །འདོད་ཆགས་ཡིན་ཡང་དྲི་མ་མེད། །ཅེས་བྱ་བ་སྟེ་གང་གི་ཕྱིར་འདོད་ཆགས་ཏེ་ཞེན་པའི་མཚན་ཉིད་ཡིན་ཡང་དྲི་མ་ཐམས་ཅད་དང་བྲལ་བས་ཤིན་ཏུ་དྲི་མ་མེད་པ་ཡིན་པ་འདི་ནི་ངོ་མཚར་ཆེའོ། །ཇི་ལྟར་དེ་དྲི་མ་མེད་པ་ཡིན་ཞེ་ན། རང་བཞིན་རྣམ་པར་དག་པས་ཞེས་བྱ་བ་སྨྲོས་ཏེ། དེ་བཞིན་ཉིད་ཀྱི་ངོ་བོ་ཉིད་ཡིན་ནོ་ཞེས་བྱ་བའི་ཐ་ཚིག་གོ །དེ་ནས་ཞེས་བྱ་བ་ལ་སོགས་པ་ལ། བཅོམ་ལྡན་འདས་དེ་བཞིན་གཤེགས་པ་གདོན་མི་ཟ་བར་གྲུབ་པས་རང་གི་ཕྱག་རྒྱ་འདི་རང་གི་ཐུགས་ཀ་ནས་ཕྱུང་ངོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ནི་རྣམ་པར་སྣང་མཛད་ལ་སོགས་པའོ། །དེ་རྣམས་ཀྱི་སྤྱི་བོར་སྣ་ཚོགས་རྡོ་རྗེ་བཞག་པ་ནི་ཕྱག་རྒྱས་བཏབ་པ་སྟེ་དེའི་ཕྱིར་རོ། །ཕ་རོལ་ཏུ་ཕྱིན་པ་ཐམས་ཅད་ཀྱི་དམ་ཚིག་ཅེས་བྱ་བ་ལ། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ངོ་བོ་རྡོ་རྗེ་ལས་མ་ནི་ཕ་རོལ་ཏུ་ཕྱིན་པ་ཐམས་ཅད་དོ། །དེ་ཡང༌། བརྩོན་འགྲུས་སྤྱོད་པའི་མཐུ་ཡིས་ནི། །ཕ་རོལ་སངས་རྒྱས་ཉིད་དུ་འགྱུར། །དེ་བས་ཕ་རོལ་ཕྱིན་ལྡན་པ། །རྡོ་རྗེ་ལས་མར་ཤེས་པར་བྱ། །ཞེས་གསུངས་པ་ཡིན་ནོ། །ཕ་རོལ་ཏུ་ཕྱིན་པ་ཐམས་ཅད་ཀྱི་དམ་ཚིག་ནི་རྒྱུ་སྟེ། ལས་ཀྱི་འོད་ཟེར་ལ་སོགས་པའོ། །དེ་ལས་བྱུང་བ་ནི་སེམས་དཔའི་རྡོ་རྗེ་གང་ལས་བྱུང་བ་དེ་བྱིན་གྱིས་བརླབ་པའི་ཕྱིར། མི་ཕྱེད་པའི་ཏིང་ངེ་འཛིན་གང་ལ་མིང་འདི་ཉིད་ཅེས་བྱ་བ་དེ་ལ་སྙོམས་པར་ཞུགས་པ་ནི་ལས་ཀྱི་རྡོ་རྗེ་སྦྲུལ་ཅིང་བསྐྱེད་པའི་རྣམ་པར་ཐུགས་རྩེ་གཅིག་ཏུ་མཛད་པའོ། །དེ་བཞིན་གཤེགས་པ་ཐམས་ཅད་ཀྱི་


DTG057_Page_0178
[མ་དཔེ་གཟིགས་ན་འདིར་གནོན།]

ལས་ཀྱི་དམ་ཚིག་ཅེས་བྱ་བ་ནི། །དེ་བཞིན་གཤེགས་པ་ཐམས་ཅད་ཀྱི་ལས་ནི་སྣ་ཚོགས་རྡོ་རྗེས་ཉེ་བར་མཚོན་པའི་བརྩོན་འགྲུས་ཀྱི་ཕྱི་རོལ་ཏུ་ཕྱིན་པའོ། །དེ་བཞིན་གཤེགས་པ་ཐམས་ཅད་ཀྱི་ལས་ཀྱི་དམ་ཚིག་ནི་རྒྱུར་གྱུར་པ་སྟེ། ཀརྨྨ་བཛྲཱི་ཞེས་བྱ་བའི་སྒྲའི་ཚུལ་ལོ། །ལས་ཐམས་ཅད་ཀྱི་འོད་ཟེར་ཞེས་བྱ་བ་ནི་སྣ་ཚོགས་རྡོ་རྗེ་ལྟ་བུའོ། །བཅོམ་ལྡན་འདས་རྡོ་རྗེ་འཛིན་པ་དེ་ཉིད་དོ་ཞེས་བྱ་བ་ནི། གང་དུ་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་སེམས་དཔའི་རྡོ་རྗེའི་ཚུལ་གྱིས་གནས་པའོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ལ་ཕྱག་རྒྱས་བཏབ་སྟེ་ཞེས་བྱ་བ་ནི་རྣམ་པར་སྣང་མཛད་ལ་སོགས་པའི་སྤྱི་བོར་ཟླ་བའི་དཀྱིལ་འཁོར་གྱི་སྟེང་དུ་རྡོ་རྗེ་རྩེ་མོ་བཅུ་གཉིས་པའི་ལས་ཀྱི་རྡོ་རྗེ་བསྐྱེད་པ་ནི་རྒྱས་བཏབ་པའོ། །ཐམས་ཅད་དུ་རྩེ་མོ་བལྟས་པ་ཞེས་བྱ་བ་ནི། རྡོ་རྗེ་རྩེ་གསུམ་པའི་རྩེ་མོ་རེ་རེ་ཞིང་ཕྱོགས་བཞི་ཆར་དུ་ཁ་བལྟས་པར་གནས་པའི་ཕྱིར་རོ། །ལས་ཀྱི་རྡོ་རྗེ་མང་པོ་བདག །ཅེས་བྱ་བ་ནི་ནམ་མཁའ་ཐམས་ཅད་ཁྱབ་པའི་རྣམ་པར་སྣང་མཛད་ལ་སོགས་པའི་དབུ་ལ་ཐམས་ཅད་གནས་པས་ནི་མང་བའོ། །ཅི་ཞིག་ངོ་མཚར་ཆེ་ཞེ་ན། གང་ཕྱིར་ཞེས་བྱ་བ་ལ་སོགས་པ་སྨོས་ཏེ། གང་གི་ཕྱིར་བདག་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་བསྡུས་པའི་ཚུལ་གྱིས་ན་གཅིག་ཡིན་ཡང་བདག་གསལ་བའི་དབྱེ་བས་སེམས་ཅན་གྱི་ཁམས་མ་ལུས་པར་གདུལ་བྱ་རྣམས་ཀྱིས་དུ་མར་མཐོང་བ་འདི་ནི་ངོ་མཚར་ཆེའོ། །དེ་ཉིད་ཀྱི་སྡོམ་གསུངས་པ་ནི། དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཀྱི་མཚན་ཉིད་ཀྱི་ཡེ་ཤེས་ཀྱི་རང་བཞིན་གྱི་དམ་ཚིག་ནི་ཀུན་རྫོབ་ཀྱི་ཚུལ་དུ་སེམས་དཔའི་རྡོ་རྗེའི་ཚུལ་གྱིས་ན་རྡོ་རྗེ་སེམས་མའོ། །དབང་བསྐུར་ཆེན་པོ་ནི་རྡོ་རྗེ་རིན་ཆེན་མའོ། །རྡོ་རྗེ་ཆོས་ཉིད་ནི་རྡོ་རྗེ་ཆོས་མའོ། །མཆོད་པ་ཐམས་ཅད་ནི་རྡོ་རྗེ་ལས་མའོ། །འདི་དག་ནི་དེ་བཞིན་གཤེགས་པའི་རིགས་བསྡུས་པར་གྱུར་པ་ཡིན་པས་ཕ་རོལ་ཏུ་ཕྱིན་པ་ཆེན་པོ་རྣམས་སོ་ཞེས་བྱའོ། །བྱང་ཆུབ་ཀྱི་སེམས་ལ་དགའ་བར་འགྱུར་རོ་ཞེས་བྱ་བ་ལ་སོགས་


DTG057_Page_0179
[མ་དཔེ་གཟིགས་ན་འདིར་གནོན།]

པ་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་བཅོམ་ལྡན་འདས་ཀྱིས་ལྷ་མོ་ཆེན་མོ་འདི་ཕྱུང་ངོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་དགྱེས་པ་ནི་དགའ་བའོ། །དེ་ཉིད་ནི་མཆོད་པ་སྟེ་སྒྲུབ་པའི་མཆོད་པའི་ངོ་བོའོ། །དེའི་དམ་ཚིག་ནི་རྡོ་རྗེའི་ཕྱག་རྒྱ་ལ་སོགས་པའི་ཚུལ་ལོ། །དེ་ལས་བྱུང་བ་ནི་སེམས་དཔའི་རྡོ་རྗེ་གང་ལས་གྱུར་པ་སྟེ། དེ་ལ་དམིགས་པ་ནི་རྡོ་རྗེ་ལྟར་མི་ཕྱེད་པའི་ཏིང་ངེ་འཛིན་གང་ལ་མིང་དེ་ཉིད་ཅེས་བྱ་བ་དེ་ལ་སྙོམས་པར་ཞུགས་པའོ། །དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ལྷ་མོ་ཞེས་བྱ་བ་ནི། དེ་བཞིན་གཤེགས་པ་ཐམས་ཅད་ཀྱང་ཡིན། རིགས་ཐམས་ཅད་ཀྱང་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་རིགས་ཡིན་ཏེ། རྡོ་རྗེ་སེམས་དཔའ་ལ་སོགས་པའོ། །དེའི་ལྷ་མོ་ཡང་ཡིན་ལ་ཆེན་པོ་ཡང་ཡིན་པས་ན་ལྷ་མོ་ཆེན་མོ་སྟེ། དེའི་བཙུན་མོ་ཞེས་བྱ་བའི་དོན་ཏོ། །དེ་ཡང་དེས་གསོ་བར་བྱ་ཞིང་མངོན་པར་བསྐྱེད་པར་བྱ་བ་ཉིད་ཡས་པར་འགྱུར། །ཞེས་བྱ་བ་གསུངས་ཏེ། འདོད་པ་ནི་རྡོ་རྗེ་མོ་ཆེན་མོ་རྡོ་རྗེ་སྒེག་མོས་ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །རྡོ་རྗེའི་ཕྱག་རྒྱར་གྱུར་ནས་བྱུང་སྟེ་ཞེས་བྱ་བ་ནི་རྡོ་རྗེ་རྩེ་ལྔ་པར་རོ། །བཅོམ་ལྡན་འདས་རྡོ་རྗེ་འཛིན་པ་དེ་ཉིད་དོ་ཞེས་བྱ་བ་ནི་སྔ་མ་དང་འདྲའོ། །རང་གི་དངོས་པོ་ཐམས་ཅད་རྡོ་རྗེ་སེམས་དཔའ་དང་འདྲ་ཞིང་ཞེས་བྱ་བ་ནི་བདག་ཉིད་ཀྱི་དངོས་པོ་ཐམས་ཅད་ཕལ་ཆེར་རྡོ་རྗེ་སེམས་དཔའ་དང་འདྲ་ཞིང་རྗེས་སུ་མཐུན་པ་གང་ཡིན་པ་དེ་ལ་དེ་སྐད་ཅེས་བྱའོ། །བདག་ཉིད་ཀྱི་ལུས་ཐམས་ཅད་ཁྱབ་པར་འདྲ་བ་ནི་མ་ཡིན་པའི་ཕྱིར། ཐམས་ཅད་ཅེས་བྱ་བའི་སྒྲས་འདིའི་དོན་ཕལ་ཆེར་ཞེས་བྱ་བའི་ཐ་ཚིག་གོ །འདི་དག་ཉིད་བསྟན་པར་བྱ་བའི་ཕྱིར། ཁ་དོག་དང་གཟུགས་དང་ཞེས་བྱ་བ་ལ་སོགས་པ་གསུངས་ཏེ། དེ་ལ་ཁ་དོག་སྣ་ཚོགས་པ་ནི་ཁ་དོག་དཀར་ཞིང་མཛེས་པའོ། །གཟུངས་སྣ་ཚོགས་པ་ནི་ཡན་ལག་གི་དབྱིབས་རྣམས་སོ། །མཚན་མ་སྣ་ཚོགས་པ་ནི་ནུ་མ་དང་སྐྲ་ལ་སོགས་པའོ། །སྤྱོད་པ་སྣ་ཚོགས་པ་ནི་གནས་པ་དང་འགྲོ་བ་ལ་སོགས་པ་འགྲེང་བ་དང་བཅས་པའི། །ཁ་དོག་སྣ་ཚོགས་པ་འབའ་ཞིག་ཏུ་མ་ཟད་ཀྱི།


DTG057_Page_0180
[མ་དཔེ་གཟིགས་ན་འདིར་གནོན།]

དེ་ནི་རྒྱན་ཐམས་ཅད་ཀྱིས་ཀླུབས་པ་ཡིན་ཏེ། སངས་རྒྱས་ཐམས་ཅད་ཀྱི་རིན་པོ་ཆེའི་དབུ་རྒྱན་དང་དར་དཔྱངས་ཀྱི་དབང་གིས་དབང་བསྐུར་བ་ལ་སོགས་པས་བརྒྱན་པའོ། །འདིར་རྡོ་རྗེ་སེམས་དཔའ་དང་འདྲ་བ་ལས་ཁྱད་པར་དུ་སྦྱར་བ་ནི། བྱང་ཆུབ་སེམས་དཔའི་བྱང་ཆུབ་སེམས་ལ་ཇི་ལྟ་བ་བཞིན་དགའ་བས། དེ་བཞིན་གཤེགས་པའི་རིགས་ཐམས་ཅད་སྡུད་པར་གྱུར་པ་སྟེ། དེ་བས་ན་བསྡུས་པར་གྱུར་པར་འདོད་དོ། །རྡོ་རྗེ་སེམས་དཔའི་ལྷ་མོ་ཞེས་བྱ་བ་ནི་བསྡུས་པའོ། །མཆོད་པ་བདག་འདྲ་གཞན་མེད་དེ། །ཞེས་བྱ་བ་ནི་བྱང་ཆུབ་ཀྱི་སེམས་ཀྱི་དགའ་བའི་རང་བཞིན་ཅན་གཞན་དག་ཡོད་པ་མ་ཡིན་པའོ། །ཅི་ཞིག་ངོ་མཚན་ཆེ་ཞེ་ན། གང་ཕྱིར་འདོད་པས་དགའ་མཆོད་པས། །མཆོད་པ་ཐམས་ཅད་བྱས་པར་འགྱུར། །ཞེས་བྱ་བ་གསུངས་ཏེ། འདོད་པ་ནི་རྡོ་རྗེ་སེམས་དཔའོ། །དེ་ལ་དགའ་བས་ན་འདོད་པ་ལ་དགའ་བའོ། །དེ་ཉིད་ནི་མཆོད་པ་སྟེ་བསྒྲུབ་པའི་མཆོད་པའི་ཚུལ་དེས་བྱང་ཆུབ་ཀྱི་སེམས་ལ་སོགས་པའི་མཆོད་པ་ལ་གདུལ་བྱའི་སེམས་ཅན་རྣམས་འཇུག་པར་བྱས་པར་འགྱུར་བའོ། །འདི་སྐད་སྟོན་པ་ཡིན་ཏེ། འདིར་འདོད་པ་ནི་རྡོ་རྗེ་སེམས་དཔའ་ལ་སོགས་པ་ཡིན་ལ། བདག་ནི་ཡུལ་དེ་ལ་དགའ་བའི་བདག་ཉིད་ཅན་ཡིན་གྱི་འཇིག་རྟེན་ན་གྲགས་པའི་གཟུགས་ལ་སོགས་པའི་ཡུལ་རྣམས་ལ་དགའ་བ་ནི་མ་ཡིན་ནོ། །དེ་བས་ན་བྱང་ཆུབ་ཀྱི་སེམས་ལ་སོགས་པའི་སྒྲུབ་པའི་མཆོད་པ་ལ་འཇུག་པར་བྱེད་ན་གདུལ་བྱ་རྣམས་ཀྱིས་བྱིས་པ་ལྟར་གཟུགས་ལ་དགའོ་སྙམ་དུ་སེམས་པ་འདི་ནི་ངོ་མཚར་ཆེའོ། །ཆོས་དང་གང་ཟག་ཏུ་འཛིན་པའི་ལྟ་བ་དང་བྲལ་བ་སྦྱིན་པའི་ཕ་རོལ་ཏུ་ཕྱིན་པའི་མཚན་ཉིད་ནི་རིན་པོ་ཆེའི་རིགས་སུ་འགྱུར་གྱི་གཞན་ནི་མ་ཡིན་ནོ་ཞེས་ཡང་དག་པའི་ལྟ་བའི་ཚུལ་རིན་པོ་ཆེའི་རིགས་ཐོབ་པར་བྱེད་པའི་ཐབས་སུ་གྱུར་པ་རིན་པོ་ཆེའི་ཕྲེང་བ་ནི། དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་ནས་བཅོམ་ལྡན་འདས་ཀྱིས་ལྷ་མོ་ཆེན་མོ་རང་གི་ཐུགས་ཀ་ནས་ཕྱུང་ངོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་རིན་པོ་ཆེའི་ཕྲེང་བ་ནི་ཡང་དག་པའི་བའོ། །དེས་དེ་བརྒྱན་པའི་ཕྱིར་དེས་དབང་བསྐུར་བ་ནི་གང་ཆོས་དང་གང་ཟག་ཏུ་ལྟ་བའི་དྲི་མ་འཁྲུད་པར་བྱེད་


DTG057_Page_0181
[མ་དཔེ་གཟིགས་ན་འདིར་གནོན།]

པའོ། །དེའི་དམ་ཚིག་ནི་རིན་པོ་ཆེའི་ཕྱག་རྒྱ་ལ་སོགས་པའོ། །དེ་ལས་བྱུང་བ་ནི་སེམས་དཔའི་རྡོ་རྗེ་གང་ལས་ཞེས་བྱ་བ་ལ་སོགས་པ་སྔར་བཤད་ཟིན་ཏོ། །དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ལྷ་མོ་ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པ་ཐམས་ཅད་ནི་དེ་བཞིན་གཤེགས་པའི་རིགས་སོ། །དེའི་ལྷ་མོ་ཆེན་མོ་ནི་ཡང་དག་པའི་ལྟ་བའི་ངོ་བོ་རིན་པོ་ཆེའི་ཕྲེང་བ་ནི་སྔར་བཤད་པའི་ཚུལ་གྱིས་བཙུན་མོའོ། །རིན་པོ་ཆེའི་ཕྱག་རྒྱ་ཞེས་བྱ་བ་ནི་རྡོ་རྗེ་རིན་པོ་ཆེའི་ཕྲེང་བའི་ཕྱག་རྒྱའོ། །བཅོམ་ལྡན་འདས་རྡོ་རྗེ་འཛིན་པ་དེ་ཉིད་དོ་ཞེས་བྱ་བ་ནི་སྔ་མ་དང་འདྲའོ། །རིན་ཆེན་མཆོད་པ་ཞེས་གྲགས་ཞེས་བྱ་བ་ནི་ཇི་སྐད་དུ་བཤད་པའི་ཚུལ་ཁྲིམས་འཆལ་པ་དང་བྲལ་བའི་རིན་པོ་ཆེའི་མཆོད་པ་སྟེ་སྒྲུབ་པའི་མཆོད་པ་ཡིན་ཏེ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ནི་ཆོས་དང་གང་ཟག་ཏུ་མངོན་པར་ཞེན་པའི་ཚུལ་ཁྲིམས་འཆལ་བའི་ནོར་བུ་མཆིང་བུ་རྣམ་པར་སྦོང་བས་ཡང་དག་པའི་ལྟ་བ་དེའི་ཚུལ་ཁྲིམས་ནི་ཡིད་བཞིན་གྱི་ནོར་བུ་རིན་པོ་ཆེའི་ཕྲེང་བ་ཡིན་པར་བསྟན་ཏེ། ཚུལ་ཁྲིམས་ཕ་རོལ་ཕྱིན་པ་ཡིས། །བརྒྱན་པའི་ཡན་ལག་ཡིད་དུ་འོང༌། །ཞེས་གསུངས་པའི་ཕྱིར་རོ། །ཅི་ཞིག་ངོ་མཚར་ཆེ་ཞེ་ན། གང་ཞིག་ཁམས་གསུམ་རྒྱལ་མཆོག་ཀྱང༌། །རབ་ཏུ་མཆོད་པ་བྱེད་པར་འགྱུར། །ཞེས་བྱ་བ་སྟེ་འདོད་པ་དང་གཟུགས་དང༌། གཟུགས་མེད་པའི་མཚན་ཉིད་གསུམ་པོ་བསྡུས་པ་ཁམས་གསུམ་པ་སྟེ། ཁམས་གསུམ་པོ་དེར་ཆོས་ཀྱི་རྒྱལ་པོ་ནི་ཉོན་མོངས་པ་དང་ཤེས་བྱའི་སྒྲིབ་པ་བག་ཆགས་དང་བཅས་པ་སྤངས་པས་སངས་རྒྱས་བཅོམ་ལྡན་འདས་སོ། །དེ་ཉིད་ཀྱིས་ན་མཆོག་ཡིན་པ་ཉིད་ཀྱིས་མཆོག་སྟེ། ཁམས་གསུམ་པའི་རྒྱལ་མཆོག་དེ་ནི་སངས་རྒྱས་བཅོམ་ལྡན་འདས་སོ། །འདུལ་མཛད་པ་ནི་གདུལ་བྱ་རྣམས་འདུལ་བར་མཛད་ཅིང་རང་གི་སེམས་དབང་དུ་མཛད་པར་གྱུར་པ་མངོན་སུམ་དུ་མཛད་ཅེས་བྱ་བའི་དོན་ཏོ། །འདི་སྐད་སྟོན་པ་ཡིན་ཏེ། གང་བདག་གིས་མཆོད་པ་དེ་བཞིན་གཤེགས་པ་ཉིད་དུ་གྱུར་པ་གང་ཡིན་པ་དེ་དང་བདག་ནི་ཐ་མི་དད་ན། གདུལ་བྱ་རྣམས་ནི་བདག་ལས་ཐ་དད་པར་རྟོགས་པ་འདི་ནི་ངོ་མཚར་ཆེའོ། །ཤེས་རབ་ཀྱི་ཕ་རོལ་ཏུ་


DTG057_Page_0182
[མ་དཔེ་གཟིགས་ན་འདིར་གནོན།]

ཕྱིན་པའི་ཐབས་སུ་གྱུར་པའི་བཟོད་པའི་ཕ་རོལ་ཏུ་ཕྱིན་པ་ནི། དེ་ནས་ཞེས་བྱ་བ་ལ་སོགས་པ་གསུངས་ཏེ། བཅོམ་ལྡན་འདས་ཀྱིས་ལྷ་མོ་ཆེན་མེ་རང་གི་ཐུགས་ཀ་ནས་ཕྱུང་ངོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་གཉིས་སུ་མེད་པའི་སེམས་དང་སེམས་ལས་བྱུང་བའི་མཚན་ཉིད་ཅན་གྱི་སྟོབས་དང་མི་འཇིགས་པ་ལ་སོགས་པའི་ཆོས་རྣམས་ནི། ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་ཆོས་ལ་དམིགས་པའི་བཟོད་པ་ཀུན་དུ་གཟིགས་པས། དེ་བཞིན་གཤེགས་པ་ཐམས་ཅད་ཀྱིས་ཡང་དག་པར་གླུར་བླངས་པ་ནི་གླུའི་མཆོག་གོ །དེའི་དམ་ཚིག་ནི་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ལ་སོགས་པའོ། །དེ་ལས་བྱུང་བ་ནི་སྔ་མ་དང་འདྲའོ། །དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ལྷ་མོ་ཆོས་ལ་དམིགས་པའི་བཟོད་པ་བསྒོམས་པའོ། །དེའི་ལྷ་མོ་ཆེན་མོ་ནི་བཙུན་མོའི་དོན་ཏེ། སྔ་མ་བཞིན་དུ་བལྟ་བར་བྱས་ཏེ་ལྷ་མོ་ཆེན་མོ་དེ་བྱུང་བའོ། །དེ་ནས་ཞེས་བྱ་བ་ལ་སོགས་པ་ལ། ལྷ་མོ་ཆེན་མོས་ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་ཕྱག་རྒྱ་ཞེས་བྱ་བ་ནི་རྡོ་རྗེ་པི་ཝང་ནི་དེ་བཞིན་གཤེགས་པ་ཐམས་ཅད་ཀྱི་ཆོས་སྟོན་པ་ལ་བརྩོན་པས་ཆོས་ཀྱི་ཕྱག་རྒྱའོ། །བཅོམ་ལྡན་འདས་རྡོ་རྗེ་འཛིན་པ་དེ་ཉིད་དོ་ཞེས་བྱ་བ་ནི་སྔ་མ་དང་འདྲའོ། །གླུ་མཆོག་རང་ཞིན་ཞེས་བྱ་བ་ནི་གླུར་བླངས་པའི་ངོ་བོ་ཉིད་དོ། །ཅི་ཞིག་ངོ་མཚར་ཆེ་ཞེ་ན། གང་ཕྱིར་ཞེས་བྱ་བ་ལ་སོགས་པ་གསུངས་ཏེ། གང་ཕྱིར་སྒྲ་བརྙན་འདྲ་བ་ཡི། །ཞེས་བྱ་བ་ནི། སྒྲ་ཐམས་ཅད་ནི་དོན་དམ་པར་མ་སྐྱེས་པ་བྲག་ཅ་དང་འདྲ་བ་ཡིན་ལ། མཆོད་པ་རྣམས་ཀྱིས་ཞེས་བྱ་བ་ནི་ཐེག་པ་གསུམ་གྱིས་བསྟན་པའི་ཆོས་ཀྱི་མཆོད་པ་རྣམས་ཀྱིས་སོ། །མཉེས་པར་བྱེད་པ་ནི་དེ་བཞིན་གཤེགས་པ་དང༌། སེམས་ཅན་གྱི་ཁམས་རྣམས་སོ། །དེ་ཡང་སྒྲ་རྣམས་བྲག་ཅ་དང་འདྲ་བ་ཡིན་དུ་ཟིན་ཀྱང་དམ་པའི་ཆོས་སྟོན་པ་བདག་གི་པི་ཝང་གི་སྒྲ་ལ་གནས་པས་དེ་བཞིན་གཤེགས་པ་རྣམས་དང༌། སེམས་ཅན་གྱི་ཁམས་རྣམས་མཉེས་ཤིང་མགུ་བར་བྱེད་པ་འདི་ནི་ངོ་མཚར་ཆེའོ། །དོན་ཡོད་པར་གྲུབ་པ་ཐོབ་པའི་


DTG057_Page_0183
[མ་དཔེ་གཟིགས་ན་འདིར་གནོན།]

ཐབས་སུ་གྱུར་པ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ནི། དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ཏེ། དོན་ཡོད་པར་གྲུབ་པ་སྔ་མ་དང་འདྲ་བར་ཡང་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་རང་བཞིན་ཡིན་ན། དེ་དང་འདི་ལ་ཁྱད་པར་ཅི་ཞིག་ཡོད་ཅེ་ན། རྒྱུ་དང་འབྲས་བུའི་ངོ་བོ་ལས་འདིར་ནི་རྒྱུའི་རང་བཞིན་ཡིན་པས་ཁྱད་པར་ནི་འདི་ཡོད་དོ། །བཅོམ་ལྡན་འདས་ཀྱིས་དེ་བཞིན་གཤེགས་པའི་རིགས་ཀྱི་ལྷ་མོ་ཕྱུང་ངོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་གར་གྱི་མཆོད་པ་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་གསང་བ་ཐམས་ཅད་ཀྱི་བྱང་ཆུབ་ཆེན་པོར་སྤྲོ་བ་ནི་འདིར་གར་ཞེས་བྱ་བ་ཡིན་པར་འདོད་དེ། བརྩོན་འགྲུས་ཀྱི་ཕ་རོལ་ཏུ་ཕྱིན་པ་གང་ཞེས་གསུངས་པའི་ཕྱིར་རོ། །དེ་ཉིད་ནི་མཆོད་པ་སྟེ། སྒྲུབ་པའི་མཆོད་པའི་ངོ་བོ་ཡིན་པའི་ཕྱིར་རོ། །དེའི་དམ་ཚིག་ནི་གར་གྱི་མཆོད་པའི་ཚུལ་ལོ། །དེ་ལས་བྱུང་བ་ནི་སེམས་དཔའི་རྡོ་རྗེ་གང་ལས་ཞེས་བྱ་བ་ལ་སོགས་པ་སྔ་མ་དང་འདྲའོ། །དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་ལྷ་མོ་ཆེན་མོ་ཞེས་བྱ་བ་ནི་བརྩོན་འགྲུས་ཀྱི་ཕ་རོལ་དུ་ཕྱིན་པ་ནི་ཐམས་ཅད་བསྐྱེད་པ་ཉིད་ཡིན་པས་ན་སྔར་བཤད་པའི་ཚུལ་གྱིས་ལྷ་མོ་ཆེན་མོ་ཞེས་བཤད་དོ།། དེ་བཞིན་གཤེགས་པ་ཐམས་ཅད་ཀྱི་གར་གྱི་མཆོད་པས་ཞེས་བྱ་བ་ནི་སྔར་བཤད་ཟིན་ཏོ། །དེའི་ཆོ་ག་རྒྱས་པ་ནི་རྡོ་རྗེ་རྩེ་གསུམ་པ་དང་བཅས་པའི་གར་བྱེད་པའི་ཕྱག་རྒྱ་གཉིས་ཀྱིས་ནམ་མཁའ་ཁྱབ་པའོ། །བཅོམ་ལྡན་འདས་རྡོ་རྗེ་འཛིན་བ་དེ་ཉིད་ཅེས་བྱ་བ་ལ་སོགས་པ་ནི་སྔར་བཤད་ཟིན་ཏོ། །མཆོད་ཀུན་དོན་མཛད་པ་ཞེས་བྱ་བ་ནི་ཐམས་ཅད་དུ་ཁྱབ་པ་འདི་ཉིད་ནི་མཆོད་པ་ཀུན་ཏེ། དེས་སངས་རྒྱས་ལ་སོགས་པའི་སྤྲུལ་པས་སེམས་ཅན་ཐམས་ཅད་ཀྱི་དོན་མཛད་པས་ན། མཆོད་ཀུན་དོན་མཛད་པ་སྟེ་དེ་བཞིན་གཤེགས་པ་རྣམས་སོ། །དེ་རྣམས་ཀྱི། མཆོད་པ་རྒྱ་ཆེན་བདག་ཡིན་ཏེ། །ཞེས་པ་སྟེ། འཁོར་གསུམ་ཡོངས་སུ་དག་པའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ཚུལ་གྱིས་སེམས་ཅན་མ་ལུས་པའི་དོན་བྱེད་པའི་ཕྱིར་རོ། །ཅི་ཞིག་ངོ་མཚར་ཆེ་ཞེ་ན། གང་ཕྱིར་རྡོ་རྗེ་གར་ཆོ་གས། །སངས་རྒྱས་མཆོད་པར་རབ་རྟོགས་བྱེད། །


DTG057_Page_0184
[མ་དཔེ་གཟིགས་ན་འདིར་གནོན།]

ཅེས་བྱ་བ་གསུངས་ཏེ། གང་གི་ཕྱིར་རྡོ་རྗེ་གར་གྱི་ཚུལ་གྱིས་སངས་རྒྱས་ཀྱི་སྤྲུལ་པས་གདུལ་བྱ་རྣམས་ཀྱི་དོན་བྱེད་ཅིང༌། སངས་རྒྱས་ཀྱི་མཆོད་པར་རབ་ཏུ་རྟོགས་པར་བྱེད་དོ། །འདི་སྐད་སྟོན་པ་ཡིན་ཏེ། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་རང་བཞིན་གྱིས་སངས་རྒྱས་རྣམས་དང་བདག་ཐ་མི་དད་པ་ཡིན་ན། དེ་རྣམས་བདག་དང་ཐ་དད་པར་གྱུར་ནས་མཆོད་པ་བྱེད་དོ་སྙམ་པ་འདི་ནི་ངོ་མཚར་ཆེའོ། །དེ་བཞིན་གཤེགས་པ་ཐམས་ཅད་ཀྱི། །ཞེས་བྱ་བ་ལ་སོགས་པས། འདི་རྣམས་ཀྱི་སྡོམ་གསུངས་པ་ཡིན་ཏེ། དེ་བཞིན་གཤེགས་པ་ཐམས་ཅད་ཀྱི་བདེ་བ་དང་ཡིད་བདེ་བ་བླ་ན་མེད་པའི་རྒྱུན་གང་ཡིན་པ་དེའི་དམ་ཚིག་ནི་དེའི་རང་བཞིན་ཏེ་སྒེག་མོའོ། །དེ་བཞིན་གཤེགས་བ་ཐམས་ཅད་ཀྱི་དབང་བསྐུར་བ་བག་ཆགས་དང་བཅས་པའི་ཉོན་མོངས་པ་མེད་པ་དེའི་དོན་གྱི་ཕྲེང་བ་ནི་རྡོ་རྗེ་ཕྲེང་བ་མའོ། །དེ་བཞིན་གཤེགས་པ་ཐམས་ཅད་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གྱིས་ཚིགས་སུ་བཅད་པ་ཇི་སྐད་དུ་གསུངས་པ་བཞིན་ཡང་དག་པར་གླུར་ལེན་པའི་གླུ་ནི་ལྷ་མོ་རྡོ་རྗེ་གླུ་མའོ། །དེ་བཞིན་གཤེགས་པ་ཐམས་ཅད་ཀྱི་མཆོད་པའི་ལས་བླ་ན་མེད་པ་ནི་གར་གྱི་མཆོད་པ་སྟེ། དེ་ཉིད་ནི་ལས་སུ་བྱེད་པའི་ངང་ཚུལ་ཡིན་པས་ན་མཆོད་པའི་ལས་བླ་ན་མེད་པ་སྟེ། རྡོ་རྗེ་གར་མའོ། །འདི་དག་ནི་སེམས་དང་ལྡན་པའི་ངོ་བོ་ཡིན་པས་དེའི་ཕྱིར་གསང་བའི་མཆོད་བ་ཞེས་བྱའོ། །དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམས་པས་བྱང་ཆུབ་ཀྱི་སེམས་ལ་དགའ་བའི་རང་བཞིན་སྐྱེ་བ་ཡིན་པས། དེ་ནས་ཞེས་བྱ་བ་ལ་སོགས་པས་དེ་སྟོན་ཏོ། །རྡོ་རྗེ་ཆོས་ལ་སོགས་པ་ཡང་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ཡིན་ན། དེ་རྣམས་ལས་ཁྱད་པར་ཅི་ཞིག་ཡོད་ཅེ་ན། དེ་རྣམས་ནི་འབྲས་བུའི་ངོ་བོ་ཡིན་ལ། འདི་ནི་རྒྱུའི་ངོ་བོ་ཡིན་པས་འདི་ནི་ཁྱད་པར་རོ། །དེ་ནས་བཅོམ་ལྡན་འདས་ཀྱིས་གཡོག་མོའི་གཙོ་མོ་ཕྱུང་ངོ་ཞེས་བྱ་བར་སྦྱར་རོ། །མཆོད་པའི་ལན་དུ་སླར་མཆོད་པའི་ཕྱིར་ཞེས་བྱ་བ་ནི། དགའ་བའི་རང་བཞིན་ལྷ་མོ་སྒེག་མོ་ནི་མཆོད་པའོ། །དེའི་མཆོད་པ་ནི་སྒྱུ་མའི་མཆོད་པ་སྟེ། མཆོད་པ་དེ་ནི་ལན་གྱི་མཆོད་པའོ། །བྱང་ཆུབ་ཀྱི་སེམས་ལ་དགའ་བའི་རང་བཞིན་སྒེག་མོ་གང་


DTG057_Page_0185
[མ་དཔེ་གཟིགས་ན་འདིར་གནོན།]

ཡིན་པའི་ཤེས་རབ་ལས་བྱུང་བའི་ཕྱིར། དེ་བཞིན་གཤེགས་པ་ཐམས་ཅད་རབ་ཏུ་ཚིམ་པ་ཞེས་བྱ་བ་སྟེ། དེ་བཞིན་གཤེགས་པ་ཐམས་ཅད་མཆོག་ཏུ་བདེ་བས་ན་དེ་བཞིན་གཤེགས་པ་ཐམས་ཅད་རབ་ཏུ་ཚིམ་པ་སྟེ་ཤེས་རབ་ཀྱི་ཕ་རོལ་ཏུ་ཕྱིན་པའོ། །དེ་ཡང་བདུག་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་གསུངས་པའི་ཕྱིར་རོ། །ཚིམ་པར་བྱེད་པའི་དམ་ཚིག་ནི་ཚིམ་པའི་དམ་ཚིག་སྟེ། བདུག་པའི་མཆོད་པའི་ཚུལ་ལོ། །དེ་ལས་བྱུང་བ་ནི་སེམས་དཔའི་རྡོ་རྗེ་གང་ལས་གྱུར་པ་སྟེ། དེ་ལ་དམིགས་པའི་ཏིང་ངེ་འཛིན་ལ་ཡང་དེ་བཞིན་གཤེགས་པ་ཐམས་ཅད་རབ་ཏུ་ཚིམ་པའི་དམ་ཚིག་ལས་བྱུང་བ་རྡོ་རྗེ་ཞེས་བྱ་བའི་ཏིང་ངེ་འཛིན་ཞེས་བྱ་བ་སྟེ། དེ་ལ་སྙོམས་པར་ཞུགས་པའོ། །དེ་བཞིན་གཤེགས་པ་ཐམས་ཅད་ཀྱི་གཡོག་མོའི་གཙོ་བོ་ཞེས་བྱ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོའོ། །ཇི་ལྟར་འཇིག་རྟེན་ན་གྲགས་པའི་གཡོག་མོས་གང་ལ་བརྟེན་པའི་དཔོན་པོ་དེའི་འཇིག་རྟེན་པའི་བདེ་བ་དང་ཡིད་བདེ་བ་བསྐྱེད་པ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པས་ཀྱང༌། འཇིག་རྟེན་ལས་འདས་པའི་བདེ་བ་དང་ཡིད་བདེ་བ་བསྐྱེད་པས་དའི་ཕྱིར་གཡོག་མོའི་གཙོ་མོ་ཞེས་བཤད་དོ། །དེ་ནས་ཞེས་བྱ་བ་ལ་སོགས་པ་ལ། ལྷ་མོ་རྡོ་རྗེ་བདུག་པ་མའི་ལུས་སུ་གྱུར་ཏེ་ཆེད་དུ་བརྗོད་པ་འདི་ཆེད་དུ་བརྗོད་ཅེས་བྱ་བར་སྦྱར་རོ། །དེ་ཉིད་ད་ཞེས་བྱ་བ་ནི་སེམས་དཔའ་རྡོ་རྗེའོ། །བདུག་པའི་མཆོད་པའི་སྤྲིན་གྱི་བཀོད་པ་ཞེས་བྱ་བ་ནི། ལྷ་དང་མིའི་ལྷན་ཅིག་སྐྱེས་པ་དང༌། སྦྱར་བ་ལས་བྱུང་བ་དང༌། ཡོངས་སུ་གྱུར་པའི་བདུག་པའི་ཚོགས་རྣམས་ནི་སྤྲིན་ནོ། །དེ་རྣམས་ཀྱི་ཡང་ཕུང་པོ་ནི་བཀོད་པ་སྟེ། གཞལ་ཡས་ཁང་ལ་སོགས་པ་ལྟ་བུའོ། །རྣམ་པ་དུ་མ་ནི་རྣམ་པ་སྣ་ཚོགས་པའོ། །རྡོ་རྗེ་དབྱིངས་ཐམས་ཅད་ཁྱབ་པར་ཞེས་བྱ་བ་ལ། རྡོ་རྗེ་དབྱིངས་ཐམས་ཅད་ནི་ཆོས་ཀྱི་དབྱིངས་སོ། །དེར་ཁྱབ་པ་ནི་ཁྱབ་པར་སྤྲོས་པའོ། །དེ་ལྟ་བུའི་བདུག་པའི་མཆོད་པའི་སྤྲིན་གྱི་བཀོད་པ་དུམ་རྡོ་རྗེ་དབྱིངས་ཐམས་ཅད་དུ་ཁྱབ་པར་གྱུར་ནས་ཕྱུང་ངོ༌། རབ་ཏུ་སིམ་ལྡན་དགེ་བ་ཡིན། །ཞེས་བྱ་བ་ནི། །གང་ལ་ཚིམ་པ་ཡོད་པ་དེ་ནི་སིམ་ལྡན་ཏེ་གང་ལ་


DTG057_Page_0186
[མ་དཔེ་གཟིགས་ན་འདིར་གནོན།]

ཟག་པ་མེད་པའི་བདེ་བ་མངའ་བ་ཞེས་བྱ་བའི་ཐ་ཚིག་གོ །ཟག་པ་མེད་པའི་བདེ་བ་མངའ་བ་ཉིད་ཀྱིས་ན་དགེ་བའོ། །ཅི་ཞིག་ངོ་མཚར་ཆེ་ཞེ་ན། གང་ཕྱིར་སེམས་ཅན་དབང་ལྡན་པ། །མྱུར་དུ་བྱུང་ཆུབ་ཐོབ་པར་འགྱུར། །ཞེས་བྱ་བ་གསུངས་ཏེ། བདུག་སྤོས་ཀྱིས་སྐྱེས་བུ་ལ་སོགས་པའི་ལུས་ཀྱི་རྒྱུད་ཀྱི་ནང་དུ་ལྷ་ལ་སོགས་པ་ཞུགས་པ་ནི་སེམས་ཅན་དབབ་པའོ། །དེས་ཀྱང་རང་དབང་མེད་པར་འགྱུར་ཏེ། དེ་རྣམས་ལས་ཆེན་པོ་སྐྱེ་བར་འགྱུར་རོ། །བདག་ཀྱང་སེམས་དཔའ་སྟེ་སེམས་དཔའི་རྡོ་རྗེ་བབས་པས་མྱུར་དུ་བྱང་ཆུབ་ཐོབ་པར་འགྱུར་བ་ནི་ངོ་མཚར་ཆེའོ། །འདི་སྐད་སྟོན་པ་ཡིན་ཏེ། བདག་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ཡིན་ལ། སེམས་ཅན་ལས་བབས་ཏེ་ཟག་པ་མེད་པའི་བདེ་བ་སྐེད་པར་བྱེད་ན། གདུལ་བའི་གཟུགས་སུ་རྟོག་པར་བྱེད་དོ། །བྱང་ཆུབ་ཀྱི་ཡན་ལག་གི་བསམ་གཏན་ཡང་དག་པའི་ལྟ་བ་སྐྱེ་བར་འགྱུར་བས་ན། ད་ནས་ཞེས་བྱ་བ་ལ་སོགས་པ་བསམ་གཏན་གྱི་ཕ་རོལ་ཏུ་ཕྱིན་པའི་མེ་ཏོག་གསུངས་པ་ཡིན་ཏེ། དེ་ནས་བཅོམ་ལྡན་འདས་ཀྱིས་གསོལ་ཀ་མ་འདི་རང་གི་ཐུགས་ཀ་ནས་ཕྱུང་ངོ་ཞེས་བྱ་བར་སྦྱར་རོ། །མཆོད་པའི་ལན་དུ་སླར་མཆོད་པ་ཞེས་བྱ་བ་ནི་བཅོམ་ལྡན་འདས་ལྷ་མོ་རྡོ་རྗེ་ཕྲེང་བ་མ་ནི་ཡང་དག་པའི་ལྟ་བའི་རང་བཞིན་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་ཇི་སྐད་དུ་བཤད་པའི་མཆོད་པའི་ཡིན་ལ། མཆོད་པ་འདིས་གང་ལ་སླར་མཆོད་པ་ནི། འདིར་བྱང་ཆུབ་ཀྱི་ཡན་ལག་གིས་བསམ་གཏན་གྱི་ཕ་རོལ་ཏུ་ཕྱིན་པ་གང་ལས་ཡང་དག་པའི་ལྟ་བ་བསྐྱེད་པ་ཡིན་ལ། དེ་བས་ན་དེ་ལས་བྱུང་བ་ཡིན་ནོ། །རིན་པོ་ཆེའི་རྒྱན་གྱི་མཆོད་པ་ཞེས་བྱ་བ་ནི་དྲན་པ་ལ་སོགས་པ་བྱང་ཆུབ་ཀྱི་ཡན་ལག་བདུན་གྱི་བསམ་གཏན་རྣམས་ནི་རིན་པོ་ཆེ་དང་ཆོས་མཐུན་པས་རིན་པོ་ཆེའོ། །དེ་ཉིད་ནི་རྒྱན་ཏེ་དེ་ལྟ་བུའི་རང་བཞིན་ཅན་གྱི་མཆོད་པ་ནི་རིན་པོ་ཆེའི་རྒྱན་གྱི་མཆོད་པ་སྟེ། སྒྲུབ་པའི་མཆོད་པ་ཡང་དག་པའི་ལྟ་བ་རྡོ་རྗེ་ཕྲེང་བ་མ་བསྐྱེད་པའི་རྒྱུ་གང་ཡིན་པའོ། །དེའི་དམ་ཚིག་ནི་རིན་པོ་ཆེ་རྒྱན་གྱི་མཆོད་པའི་དམ་ཚིག་སྟེ། དེ་བཞིན་གཤེགས་པ་ཐམས་ཅད་ཀྱི་


DTG057_Page_0187
[མ་དཔེ་གཟིགས་ན་འདིར་གནོན།]

མེ་ཏོག་ལ་སོགས་པའོ། །དེ་ལས་བྱུང་བ་ནི་སེམས་དཔའི་རྡོ་རྗེ་གང་ལས་བྱུང་བའི་རིན་པོ་ཆེན་རྒྱན་གྱི་མཆོད་པའི་དམ་ཚིག་ལས་བྱུང་བ་རྡོ་རྗེ་ལ་དམིགས་པའི་ཏིང་ངེ་འཛིན་ལ་ཡང༌། རིན་པོ་ཆེའི་རྒྱན་གྱི་མཆོད་པའི་དམ་ཚིག་ལས་བྱུང་བའི་རྡོ་རྗེ་ཞེས་བྱ་སྟེ། ཏིང་དེ་འཛིན་དེ་ལ་སྙོམས་བར་ཞུགས་པ་ནི་མ་ཏོག་ལ་སོགས་པ་སྤྲུལ་ཅིང་བསྐྱེད་པའི་རྣམ་པར་ཐུགས་རྩེ་གཅིག་ཏུ་མཛད་པའོ། །དེ་བཞིན་གཤེགས་པ་ཐམས་ཅད་ཀྱི་གསོལ་ཀ་མ་ཞེས་བྱ་བ་ནི། དཔེར་ན་རྒྱལ་པོའི་མདུན་ན་གནས་ཏེ་རལ་གྲི་ཐོགས་པ་གང་ཡིན་པ་དེ་ནི་འཇིག་རྟེན་ན་གསོལ་ཀ་མ་ཞེས་གྲགས་ལ། བཅོམ་ལྡན་འདས་མ་འདི་ཡང་བཅོམ་ལྡན་འདས་རྣམ་པར་སྣང་མཛད་སྒེག་མོ་ལ་སོགས་པའི་བཙུན་མོའི་དབུས་ན་བཞུགས་པའི་ཡང་དག་པའི་ལྟ་བའི་རལ་གྲི་ཐོགས་པ་ཡིན་ཏེ། དེ་བས་ན་གསོལ་ཀ་མ་ཞེས་བྱའོ། །དེ་ནས་ཞེས་བྱ་བ་ལ་སོགས་པ་ལ། རྡོ་རྗེ་མེ་ཏོག་གི་ལྷ་མོར་གྱུར་ནས་ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །བཅོམ་ལྡན་འདས་རྡོ་རྗེ་འཛིན་པ་དེ་ཉིད་དོ་ཞེས་བྱ་བ་ནི་སྔར་བཤད་པའི་སེམས་དཔའི་རྡོ་རྗེའི་རྣམ་པ་གང་ཡིན་པའོ། །མེ་ཏོག་ཐམས་ཅད་ཀྱི་མཆོད་པའི་སྤྲིན་གྱི་བཀོད་པ་ཞེས་བྱ་བ་མེ་ཏོག་ཐམས་ཅད་ནི་ལྷ་དང་མི་དང་ཡིད་ཀྱི་རང་བཞིན་རྣམས་ཏེ་དེ་ཉིད་ནི་མཆོད་པའོ། །དེ་རྣམས་ཀྱི་ཚོགས་ནི་སྤྲིན་ནོ། །དེ་རྣམས་ཀྱི་ཚོགས་ནི་བཀོད་པ་སྟེ། མེ་ཏོག་གི་ཁང་པ་བརྩེགས་པ་ལ་སོགས་པའི་ཚུལ་ལོ། །ཚད་ཇི་ཙམ་ཞེ་ན། ནམ་མཁའི་ཁམས་ཐམས་ཅད་ཁྱབ་པར་བྱེད་པའི་ཞེས་བྱ་བ་སྨོས་ཏེ། ནམ་མཁའི་དབྱིངས་ཐམས་ཅད་དུ་སྤྲོས་པའོ། །རྡོ་རྗེ་མེ་ཏོག་གི་ལྷ་མོའི་སྐུར་གྱུར་ནས་ཞེས་བྱ་བ་ནི་རྡོ་རྗེ་མེ་ཏོག་གི་ཆར་འབེབས་པས་ཉེ་བར་མཚོན་པའི་ལྷ་མོའི་སྐུའོ། །ཐམས་ཅད་ཀྱི་ནི་རྒྱན་བྱེད་དེ། །ཞེས་བྱ་བ་ནི་བྱང་ཆུབ་ཀྱི་ཡན་ལག་གི་མེ་ཏོག་གིས་བྱང་ཆུབ་ཀྱི་སེམས་ལ་སོགས་པ་བརྒྱན་ཅིང་སྤུད་པར་བྱེད་དེ། དེ་བས་ན་ཐམས་ཅད་མཛེས་པར་བྱེད་པ་སྟེ། ཐམས་ཅད་མཛེས་པར་བྱེད་དོ་ཞེས་བྱ་བའི་ཐ་ཚིག་གོ །ཅི་ཞིག་ངོ་མཚར་ཆེ་ཞེ་ན། གང་ཕྱིར་མཆོད་ནས་དེ་བཞིན་གཤེགས། །


DTG057_Page_0188
[མ་དཔེ་གཟིགས་ན་འདིར་གནོན།]

རིན་ཆེན་ཉིད་དུ་མྱུར་དུ་འགྲུབ། །ཅེས་བྱ་བ་གསུངས་ཏེ། དེའི་དོན་ནི་འདི་ཡིན་ཏེ་ཐ་མི་དད་པར་གྱུར་པ་དག་གིས། དེ་བཞིན་གཤེགས་པ་རྣམས་མེ་ཏོག་གི་མཆོད་པའི་ཚུལ་གྱིས་མཆོད་པ་ནི་དེ་བཞིན་གཤེགས་པ་ཉིད་དུ་མྱུར་དུ་གྲུབ་པ་ཐོབ་པའི་དི་ངོ་མཚར་ཆེའོ། །བདག་བྱང་ཆུབ་ཀྱི་ཡན་ལག་གི་ངོ་བོ་ཉིད་ཡིན་ལས་ན། དེ་བཞིན་གཤེགས་པ་ཐམས་ཅད་ཀྱི་ངོ་བོ་དང་ཐ་མི་དད་ཀྱང༌། གདུལ་བྱ་རྣམས་ནི་བདག་དང་ཐ་དད་པར་རྟོག་པར་བྱེད་དོ་ཞེས་བའོ། །ཆོས་ཀྱི་སྤྱན་གྱིས་ཆོས་རྣམས་མཐོང་བའི་ཆོས་ལ་དམིགས་པའི་བཟོད་པའི་མཚན་ཉིད་ལས་ལྷ་མོ་མར་མེ་འབྱུང་བར་འགྱུར་རོ་ཞེས་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་ནས་བཅོམ་ལྡན་འདས་ཀྱིས་ཕོ་ཉ་མོ་འདི་རང་གི་ཐུགས་ཀ་ནས་ཕྱུང་ངོ་ཞེས་བྱ་བར་སྦྱར་རོ། །མཆོད་པའི་ལན་དུ་མཆོད་པའི་ཕྱིར་། །ཞེས་བྱ་བ་ནི་ཇི་སྐད་དུ་བཤད་པའི་བཟོད་པའི་ཕ་རོལ་ཏུ་ཕྱིན་པ་ནི་མཆོད་པའོ། །དེའི་མཆོད་པ་གང་ཡིན་པ་དེའི་ལན་དུ་མཆོད་པ་སྟེ། ཇི་ལྟ་ཞེ་ན། དེས་དེ་ལ་སྒྲུབ་པའི་མཆོད་པའོ། །དེ་བསྐྱེད་པའི་རྒྱུ་ཉིད་ཀྱིས་ན་སྒྲུབ་པའི་མཆོད་པའི་རང་བཞིན་ཉིད་ཡིན་པའི་ཕྱིར་རོ། །དེ་བཞིན་གཤེགས་པ་ཐམས་ཅད་ཀྱི་སྣང་བའི་མཆོད་པའི་ཞེས་བྱ་བ་ལ་དེ་བཞིན་གཤེགས་པ་ཐམས་ཅད་ནི་ཆོས་ཀྱི་སྤྱན་གྱི་སྣང་བའོ། །དེ་ཉིད་ནི་མཆོད་པ་ཡིན་པས་དེ་བཞིན་གཤེགས་པ་ཐམས་ཅད་ཀྱི་སྣང་བའི་མཆོད་པའོ། །དེ་ལ་བསྟན་པའི་ཆོས་ཀྱི་ཡུལ་ལ་ཐོགས་པ་མེད་པའི་ཡེ་ཤེས་ནི་ཆོས་ཀྱི་སྤྱན་ཏེ་དེའི་སྣང་བའི་མཆོད་པའོ། །དེའི་དམ་ཚིག་ནི་སྣང་བའི་མཆོད་པ་ལ་སོགས་པ་ཐམས་ཅད་དོ། །དེ་ལས་བྱུང་བ་ནི་སེམས་དཔའི་རྡོ་རྗེ་གང་ལས་གྱུར་པ་དེ་ནི་དམ་ཚིག་ལས་བྱུང་བའི་རྡོ་རྗེ་སྟེ་དེ་ལ་དམིགས་པའི་ཏིང་ངེ་འཛིན་ནི་དམ་ཚིག་ལས་བྱུང་བའི་རྡོ་རྗེ་ཞེས་བྱ་བའི་ཏིང་ངེ་འཛིན་ཏེ། དེ་ལ་སྙོམས་པར་ཞུགས་པ་ནི་སྣང་བའི་མཆོད་པ་ཐམས་ཅད་ལ་སོགས་པ་སྤྲུལ་ཅིང་བསྐྱེད་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་ཐ་ཚིག་གོ །དེ་བཞིན་གཤེགས་པ་ཐམས་ཅད་ཀྱི་ཕོ་ཉ་མོ་ཞེས་བྱ་བ་ནི་ཇི་སྐད་དུ་བཤད་པའི་ཆོས་ཀྱི་སྤྱན་རྡོ་རྗེ་སྣང་བ་མོ་ནི་དེ་བཞིན་གཤེགས་པ་ཐམས་ཅད་ཀྱི་ཕོ་ཉ་


DTG057_Page_0189
[མ་དཔེ་གཟིགས་ན་འདིར་གནོན།]

མོ་སྟེ། ཇི་ལྟར་རྒྱལ་པོ་ནི་ཤིན་ཏུ་ཡུན་རིང་དུ་གནས་པ་ལ་བརྟགས་པ་ཕོ་ཉའི་བྱ་བ་ཡིན་ལ། དེ་བཞིན་དུ་དེ་བཞིན་གཤེགས་པ་རྣམས་ཀྱང་ཆོས་ཀྱི་སྤྱན་གྱིས་ཡུལ་དང་དུས་ལ་སོགས་པའི་དབྱེ་བས་ཐག་རིང་དུ་གྱུར་པའི་ཆོས་དུ་མ་གཟིགས་པར་བྱེད་པའི་ཚུལ་དུ་གནས་པས་ཕོ་ཉ་ཞེས་བརྗོད་དོ། །དེ་ནས་ཞེས་བྱ་བ་ལ་སོགས་པ་ལ། ལྷ་མོ་རྡོ་རྗེ་སྣང་བ་ཞེས་བྱ་བའི་སྐུར་གྱུར་ནས་ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །རྡོ་རྗེ་འཛིན་པ་དེ་ཉིད་དོ་ཞེས་བྱ་བ་ནི་སྔ་མ་བཞིན་དུ་ཤེས་པར་བྱའོ། །སྣང་བ་ཐམས་ཅད་ཅེས་བྱ་བ་ནི་སྣང་བ་ཡང་ཡིན་ལ་ཐམས་ཅད་ཀྱང་ཡིན་པས་ན་སྣང་བ་ཐམས་ཅད་དེ། ལྷ་དང་མི་དང་ཡིན་གྱི་རང་བཞིན་ཅན་གྱི་རྡོ་རྗེ་ཉི་མ་ལ་སོགས་པའི་ཚུལ་ལོ། །ཚད་ཇི་ཙམ་ཞེ་ན། ཆོས་ཀྱི་དབྱིངས་ཐམས་ཅད་ཁྱབ་པར་བྱེད་པ་ཞེས་བྱ་བ་གསུངས་ཏེ། ཆོས་ཀྱི་དབྱིངས་ཏེ། ཆོས་ཀྱི་དབྱིངས་རྣམས་ཁྱབ་པར་སྤྲོས་པའོ། །ལྷ་མོ་རྡོ་རྗེ་སྣང་བ་ཞེས་བྱ་བའི་སྐུར་གྱུར་ནས་ཞེས་བྱ་བ་ནི་རྡོ་རྗེ་སྣང་བས་ཉེ་བར་མཚོན་པའི་ལྷ་མོའི་སྐུར་གྱུར་པའོ། །རྒྱ་ཆེན་ཞེས་བྱ་བ་ནི་ཆོས་ཀྱི་དབྱིངས་ཁྱབ་པའོ། །མར་མེའི་རང་བཞིན་ཞེས་བྱ་བ་ནི་ཆོས་ཀྱི་སྤྱན་ནི་མར་མེ་སྟེ་དེའི་རང་བཞིན་ནོ། །དེ་ཉིད་ཀྱིས་ན་དགེ་བའོ། །ཅི་ཞིག་ངོ་མཚར་ཆེ་ཞེ་ན། གང་ཕྱིར་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་སྣང་བ་དང་བཅས་ཤིང་ཆོས་ཀྱི་སྤྱན་གྱི་རང་བཞིན་གྱི་རྒྱུ་ཉིད་ཡོད་པ་གང་ཡིན་པ་དེ་ལ་དེ་སྐད་ཅེས་བྱ་སྟེ། བཟོད་པའི་ཕ་རོལ་ཏུ་ཕྱིན་པ་དེ་མྱུར་ཞིང་རིངས་པར་ཐོབ་པར་འགྱུར་བ་ནི། གང་གི་ཕྱིར་སངས་རྒྱས་ཐམས་ཅད་ཀྱི་སྤྱན་ཐོབ་པས་ན། ཆོས་ཀྱི་སྤྱན་གྱི་ངོ་བོ་ཉིད་དེ་ལས་ཐོབ་ཅིང་རྙེད་པར་འགྱུར་བའོ། །འདི་སྐད་སྟོན་པ་ཡིན་ཏེ། བདག་དང་ཐ་མི་དད་པའི་སྣང་བའི་ཚུལ་གྱིས་དེ་བཞིན་གཤེགས་པ་རྣམས་མཆོད་ན་བཟོད་པར་འགྱུར་བ་འདི་ནི་ངོ་མཚར་ཆེའོ། །གང་གི་ཕྱིར་བདག་ཆོས་སོ་སོ་ཡང་དག་པར་རིག་པའི་རང་བཞིན་གྱིས་དེའི་ངོ་བོ་ཉིད་ཡིན། གདུལ་བྱ་རྣམས་ཀྱིས་བདག་ལས་ཐ་དད་པར་མཐོང་གི །ཡང་དག་པར་ན་བདག་ནི་དེ་ལྟ་བུ་མ་ཡིན་ནོ། །དེ་ལྟར་སྨོན་ལམ་གྱི་ཕ་རོལ་ཏུ་ཕྱིན་པ་མར་མེ་


DTG057_Page_0190
[མ་དཔེ་གཟིགས་ན་འདིར་གནོན།]

བསྟན་ནས། བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཐོབ་པའི་རྡོ་རྗེ་དྲི་ནི། དེ་ནས་ཞེས་བྱ་བ་ལ་སོགས་པ་གསུངས་པས། དེ་ནས་བཅོམ་ལྡན་འདས་གདོན་མི་ཟ་བར་གྲུབ་པས་བྲན་མོ་འདི་རང་གི་ཐུགས་ཀ་ནས་ཕྱུང་ངོ་ཞེས་བྱ་བར་སྦྱར་རོ། །མཆོད་པའི་ལན་དུ་སླར་མཆོད་པའི་ཕྱིར་ཞེས་བྱ་བ་ནི་ཇི་སྐད་དུ་བཤད་པའི་གར་གྱི་མཆོད་པའོ། །མཆོད་བ་དེ་ལ་ལན་དུ་མཆོད་པ་གནག་ཡིན་པ་དེ་ནི་མཆོད་པའི་ལན་ཏེ། ཚུལ་ཁྲིམས་དང༌། ཏིང་ངེ་འཛིན་དང༌། ཤེས་རབ་དང༌། རྣམ་པར་གྲོལ་བ་དང༌། རྣམ་པར་གྲོལ་བའི་ཡེ་ཤེས་མཐོང་བས་བརྩོན་འགྲུས་བསྐྱེད་ལ། ཚུལ་ཁྲིམས་འཆད་བ་ལ་སོགས་པས་ཀྱང་ལེ་ལོ་ལ་སོགས་པ་བསྐྱེད་པས་དེའི་ཕྱེར་སྒྲུབ་པའི་མཆོད་པ་ནི་བརྩོན་འགྲུས་བསྐྱེད་པའི་རྒྱུ་དྲི་ནི་ཐབས་ཀྱི་ཕ་རོལ་ཏུ་ཕྱིན་པའོ། །དེ་བཞིན་གཤེགས་པ་ཐམས་ཅད་ཀྱི་དྲིའི་མཆོད་པ་ནི། ཇི་སྐད་བཤད་པའི་དྲིའི་སྒྲུབ་པའི་མཆོད་པའོ། །དེའི་དམ་ཚིག་ནི་དེ་བཞིན་གཤེགས་པ་ཐམས་ཅད་ཀྱི་དྲིའི་བཀོད་པ་ལ་སོགས་པའོ། །དེ་འབྱུང་བ་ནི་སེམས་དཔའི་རྡོ་རྗེ་གང་ཡིན་པ་ལས་གྱུར་པ་སྟེ། དེ་ནི་དྲིའི་མཆོད་པའི་དམ་ཚིག་ལས་བྱུང་བའི་རྡོ་རྗེའོ། །དེ་ལ་དམིགས་པའི་ཏིང་ངེ་འཛིན་ཀྱང་དེ་བཞིན་གཤེགས་པ་ཐམས་ཅད་ཀྱི་དྲིས་མཆོད་པའི་དམ་ཚིག་ལས་བྱུང་བ་རྡོ་རྗེ་ཞེས་བྱ་སྟེ། དེ་ལ་སྙོམས་པར་ཞུགས་པ་ནི་དྲིའི་བཀོད་པ་ལ་སོགས་པ་སྤྲུལ་ཞིང་བསྐྱེད་པའི་རྣམ་པར་ཐུགས་རྩེ་གཅིག་ཏུ་མཛད་པའོ། །དེ་བཞིན་གཤེགས་པ་ཐམས་ཅད་ཀྱི་བྲན་མོ་ཞེས་བྱ་བ་ནི། ཚུལ་ཁྲིམས་དང༌། ཏིང་ངེ་འཛིན་དང༌། ཤེས་རབ་དག །རྣམ་པར་གྲོལ་བ་དང༌། རྣམ་པར་གྲོལ་བའི་ཡེ་ཤེས་མཐོང་བའི་དྲིས། དེ་བཞིན་གཤེགས་པ་རྣམས་བདེ་བར་བྱེད་པ་ལས་བྱེད་པའི་རང་བཞིན་ཉིད་ཀྱིས་ན་བྲན་མོའོ། །དེ་ནས་ཞེས་བྱ་བ་ལ་སོགས་པ་ལ། ལྷ་མོ་རྡོ་རྗེ་དྲི་ཞེས་བྱ་བའི་སྐུར་གྱུར་ནས་ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །བཅོམ་ལྡན་འདས་རྡོ་རྗེ་འཛིན་པ་དེ་ཉིད་དོ་ཞེས་བྱ་བ་ནི་སེམས་དཔའི་རྡོ་རྗེའི་རང་བཞིན་ནོ། །དྲི་ཐམས་ཅད་ཀྱི་མཆོད་པའི་བཀོད་པ་ཞེས་བྱ་བ་ནི། ལྷ་དང༌། མིའི་དང༌། ལྷན་ཅིག་སྐྱེས་པ་དང༌། སྦྱར་བ་དང༌། ཡིད་ཀྱི་རང་བཞིན་ཅན་དྲི་


DTG057_Page_0191
[མ་དཔེ་གཟིགས་ན་འདིར་གནོན།]

ཐམས་ཅད་ཀྱི་མཆོད་པ་ནི་དྲི་ཐམས་ཅད་ཀྱི་མཆོད་པའོ། །ཚད་ཇི་ཙམ་ཞེ་ན། འཇིག་རྟེན་གྱི་ཁམས་ཐམས་ཅད་ཁྱབ་ཅེས་བྱ་བ་གསུངས་ཏེ། འཇིག་རྟེན་གྱི་ཁམས་ཅད་དུ་སྤྲོས་ཤིང་ཁྱབ་པ་སྟེ། དེ་གང་ལ་ཡོད་པ་དེ་ནི་འཇིག་རྟེན་གྱི་ཁམས་ཐམས་ཅད་ཁྱབ་པའོ། །ལྷ་མོ་རྡོ་རྗེ་དྲི་ཞིམ་ཞེས་བྱ་བའི་སྐུར་གྱུར་ནས་ཞེས་བྱ་བ་ནི་དྲིས་ཉེ་བར་མཚོན་པའོ། །དྲིའི་རང་བཞིན་ཞེས་བྱ་བ་ནི་ཇི་སྐད་དུ་བཤད་པའི་དྲིའི་ངོ་བོ་ཉིད་དོ། །ཇི་སྐད་དུ་བཤད་པའི་དྲིའི་ཚུལ་ཡིན་པ་ཉིད་ཀྱིས་ན་ལྷ་རྫས་ཡིན་ནོ། །ལྷ་རྫས་ཡིན་པ་ཉིད་ཀྱིས་ན་ཡིད་དུ་འོང་བ་སྟེ། ཡིད་དང་རྗེས་སུ་མཐུན་པའོ། །ཅི་ཞིག་ངོ་མཚར་ཆེ་ཞེ་ན། གང་ཕྱིར་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་དེ་བཞིན་གཤེགས་པ་རྣམས་ཀྱི་དྲི་ནི་ཇི་སྐད་བཤད་པའི་ཚུལ་ཁྲིམས་ལ་སོགས་པའོ། །ལུས་རྣམས་ཀུན་ལ་ཞེས་བྱ་བ་ནི་ཕུང་པོ་ལྔའི་མཚན་ཉིད་ཅན་ལའོ། །འབྱིན་པར་འགྱུར་ཞེས་བྱ་བ་ནི་སྡོམ་པའི་ཚུལ་ཁྲིམས་ཀྱི་དྲི་འདི་ནི་ངོ་མཚར་ཆེའོ། །འདི་སྐད་སྟོན་པ་ཡིན་ཏེ། བདག་ནི་ཚུལ་ཁྲིམས་དང༌། ཏིང་ངེ་འཛིན་དང༌། ཤེས་རབ་དང༌། རྣམ་པར་གྲོལ་བ་དང༌། རྣམ་པར་གྲོལ་བའི་ཡེ་ཤེས་མཐོང་བ་སྟེ། ཟག་པ་མེད་པའི་ཕུང་པོའི་རང་བཞིན་ཡིན་པས། དེ་བཞིན་གཤེགས་པའི་ངོ་བོ་ཉིད་ཡིན་ན། གདུལ་བྱ་རྣམས་ཀྱི་ས་བདག་ཐ་དད་པར་གྱུར་པའི་དྲིས་དེ་བཞིན་གཤེགས་པ་ལ་མཆོད་པར་མཐོང་གི །ཁོ་མོ་ནི་འདི་ལྟ་བུ་མ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་དབབ་པ་ཞེས་བྱ་བ་ལ། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་དབབ་པ་ནི་བདུག་པ་མའོ། །བྱང་ཆུབ་ཆེན་པོའི་ཡན་ལག་ནི་བྱང་ཆུབ་ཀྱི་ཡན་ལག་བདུན་ནོ། །དེ་རྣམས་ཀྱི་བསགས་པ་ནི་མེ་ཏོག་མའོ། །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྤྱན་ནི་ཀུན་དུ་སྣང་བ་སྟེ། དེའི་རང་བཞིན་ནི་མར་མེའོ། །ཚུལ་ཁྲིམས་ལ་སོགས་པ་དྲིའི་རང་བཞིན་ནི་རྡོ་རྗེ་བྱུག་པ་མའོ། །འདི་དག་ནི་ཇི་སྐད་དུ་གསུངས་པའི་གཡོག་མོ་ལ་སོགས་པའི་ཚུལ་དུ་གྱུར་པས། དེ་བཞིན་གཤེགས་པ་ཐམས་ཅད་ཀྱི་བཀའ་བཞིན་བྱེད་བའོ། །བྱང་ཆུབ་ཀྱི་


DTG057_Page_0192
[མ་དཔེ་གཟིགས་ན་འདིར་གནོན།]

སེམས་ཀྱི་ལྕགས་ཀྱུས་ཐར་པའི་གྲོང་ཁྱེར་འདིར་དེ་བཞིན་གཤེགས་པ་ལ་སོགས་པ་འགུགས་པར་བྱེད་པ་ནི། དེ་ནས་ཞེས་བྱ་བ་ལ་སོགས་པས་སྟོན་ཏེ། བཅོམ་ལྡན་འདས་ཀྱིས་ཕྱག་རྒྱའི་ཚོགས་ཐམས་ཅད་ཀྱི་བདག་པོ་འདི་རང་གི་ཐུགས་ཀ་ནས་ཕྱུང་ངོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་དམ་ཚིག་གི་ལྕག་ཀྱུ་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱང་ཡིན་ལ་དམ་ཚིག་གི་ལྕག་ཀྱུ་ཡང་ཡིན་པས་དེ་བཞིན་གཤེགས་པ་ཐམས་ཅད་ཀྱི་དམ་ཚིག་གི་ལྕགས་ཀྱུ་སྟེ། སེམས་དཔའི་རྡོ་རྗེ་ལྟ་བུའི་རྡོ་རྗེ་འཛིན་པ་ཆེན་པོའོ།། དེའི་དམ་ཚིག་ནི་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱའི་ཚུལ་ལོ། །དེའི་འབྱུང་བ་ནི་སེམས་དཔའི་རྡོ་རྗེའི་ཚུལ་གང་ལས་འདི་བྱུང་བའོ། །དམ་ཚིག་ལས་བྱུང་བ་ཡང་ཡིན་ལ་སེམས་དཔའི་རྡོ་རྗེ་ཡང་ཡིན་པས་ཞེས་བྱ་བར་སྦྱར་རོ། །དེ་ལ་དམིགས་པའི་ཏིང་ངེ་འཛིན་ཀྱང་དམ་ཚིག་ལས་བྱུང་བ་སེམས་དཔའི་རྡོ་རྗེ་ཞེས་བྱ་བ་སྟེ་ཏིང་ངེ་འཛིན་གང་ལ་མིང་དེ་ཉིད་ཅེས་བྱ་བ་དེ་ལ་སྙོམས་པར་ཞུགས་པ་ནི་རྡོ་རྗེ་ལྕགས་ཀྱུ་ལ་སོགས་པ་སྦྲུལ་ཅིང་བསྐྱེད་པའི་རྣམ་པར་ཐུགས་རྩེ་གཅིག་ཏུ་མཛད་པའོ། །དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ཐམས་ཅད་ནི་ཕྱག་རྒྱ་ཆེན་པོ་ལ་སོགས་པའོ། །དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱའི་ཚོགས་ནི་མངའ་བ་སྟེ། དེ་བཞིན་གཤེགས་པའི་རིགས་རྒྱས་བཏབ་པར་གྱུར་ཏོ་ཞེས་བྱ་བའི་དོན་ཏོ། །དེའི་བདག་པོ་ནི་དེའི་དབང་གིས་དེ་བཞིན་གཤེགས་པ་ཐམས་ཅད་ལ་སོགས་པའི་ཕྱག་རྒྱ་རྣམས་བྱིན་པས་དེ་བས་ན་དེ་རྣམས་ཀྱི་བདག་པོ་སྟེ་བདག་པོ་དེ་ཕྱུང་བར་གྱུར་ཏོ། །དེ་ནས་ཞེས་བྱ་བ་ལ་སོགས་པ་ལ། བྱང་ཆུབ་སེམས་དཔའ་ཆེན་པོ་རྡོ་རྗེ་ལྕགས་ཀྱུ་ཞེས་བྱ་བའི་སྐུར་གྱུར་ནས་ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱའི་ཚོགས་ཐམས་ཅད་དུ་གྱུར་ནས་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ཐམས་ཅད་ནི་ཕྱག་རྒྱ་ཆེན་པོ་ལ་སོགས་པའོ། །དེ་རྣམས་ཀྱི་ཚོགས་ནི་འགུགས་པའི་ཚོགས་ཏེ། དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ཐམས་ཅད་སྤྱན་འདྲེན་པའི་ཕྱིར་ཚད་མེད་པའི་


DTG057_Page_0193
[མ་དཔེ་གཟིགས་ན་འདིར་གནོན།]

རྡོ་རྗེ་ལྕགས་ཀྱུའི་ཚོགས་སུ་གྱུར་ནས་སོ། །བཅོམ་ལྡན་འདས་རྡོ་རྗེ་སེམས་དཔའ་དེ་ཉིད་དེ་ཞེས་བྱ་བ་ནི་ཇི་སྐད་དུ་བཤད་པའི་སེམས་དཔའི་རྡོ་རྗེའོ། །དེ་བཞིན་གཤེགས་པ་ཐམས་ཅད་དམ་ཚིག་གིས་སྤྱན་འདྲེན་ཅིང་ཞེས་བྱ་བ་ནི་རྣམ་པར་སྣང་མཛད་ལ་སོགས་པ་ནི་ཤར་ལ་སོགས་པ་སྒོར་ཉེ་བར་མཛད་ཅིང༌། ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བ་ནི་བློ་ལ་གནས་པ་གསུངས་པའོ། །ཡང་དག་སྤྱན་འདྲེན་བརྟན་བྱེད་བདག །ཅེས་བྱ་བ་ནི་ཕྱོགས་བཅུ་ཀུན་ནས་སྤྱན་འདྲེན་པས་ན་ཡང་དག་སྤྱན་འདྲེན་པའོ། །བརྟན་པ་ནི་མི་ཕྱེད་པ་སྟེ་དེ་ནི་བདག་ཡིན་ནོ། །ཅི་ཞིག་ངོ་མཚར་ཆེ་ཞེ་ན། གང་ཕྱིར་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་བདག་གིས་སྤྱན་དྲངས་ཤིང་བཀུག་པ་ནི་སངས་རྒྱས་བཅོམ་ལྡན་འདས་རྣམས་ཀྱང་བྱོན་ཏེ། དཀྱིལ་འཁོར་ཀུན་ལ་སྟོན་པར་གྱུར་པ་ཡིན་ནོ། འདི་སྐད་སྟོན་ཏེ། དེ་བཞིན་གཤེགས་པ་ཐམས་ཅད་དང་བདག་ནི་ཚུལ་གཅིག་ཅིང་ཐམས་ཅད་དུ་ཁྱབ་པ་ལྟ་བུ་ཡིན་ན། གང་གིས་དེ་རྣམས་དང་ཐ་དད་པའི་ཚུལ་དུ་སྤྱན་དྲངས་པ་འདི་ནི་ངོ་མཚར་ཆེའོ། །དེ་ལྟར་བྱང་ཆུབ་ཀྱི་སེམས་ཀྱི་ལྕགས་ཀྱུས་དེ་བཞིན་གཤེགས་པ་ཐམས་ཅད་སྤྱན་དྲངས་ནས། བྱང་ཆུབ་ཀྱི་སྤྱོད་པའི་ཞགས་པས་དཀྱིལ་འཁོར་དུ་ཞུགས་པར་མཛད་དོ་ཞེས་བྱ་བ་ནི། དེ་ནས་ཞེས་བྱ་བ་ལ་སོགས་པས་སྟོན་ཏོ། །བཅོམ་ལྡན་འདས་ཀྱིས་གསོལ་ཀ་བ་འདི་རང་གི་ཐུགས་ཀ་ནས་ཕྱུང་ངོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་དམ་ཚིག་ནི་ཕ་རོལ་ཏུ་ཕྱིན་པ་བཅུའི་སྤྱོད་པའི་ཚུལ་ལོ། །དེ་ཉིད་ནི་འཇུག་པ་ཡིན་པས་ན་འཇུག་པ་ཞེས་བྱའོ། །དེ་བཞིན་གཤེགས་པ་ཐམས་ཅད་ཀྱི་དམ་ཚིག་ལ་འཇུག་པ་ཡང་ཡིན་ལ། སེམས་དཔའ་ཆེན་པོ་ཡང་ཡིན་པས་ན། དེ་བཞིན་གཤེགས་པ་ཐམས་ཅད་ཀྱི་དམ་ཚིག་ལ་འཇུག་པའི་སེམས་དཔའ་ཆེན་པོ་སྟེ། ཇི་སྐད་དུ་གསུངས་པའི་སེམས་དཔའ་རྡོ་རྗེའོ། །དེའི་དམ་ཚིག་ནི་དམ་ཚིག་ལ་འཇུག་པའི་ཕྱག་རྒྱའི་ཚོགས་ཀྱི་ཚུལ་ལོ། །དེ་འབྱུང་བ་ནི་སེམས་དཔའི་རྡོ་རྗེ་གང་ལས་གྱུར་པ་དེ་ནི་དམ་ཚིག་ལས་བྱུང་བའི་རྡོ་རྗེའོ། །དེ་ལ་དམིགས་པའི་ཏིང་ངེ་འཛིན་ལ་ཡང་མིང་དེ་སྐད་ཅེས་


DTG057_Page_0194
[མ་དཔེ་གཟིགས་ན་འདིར་གནོན།]

བྱའོ། །དེ་ལ་སྙོམས་པར་ཞུགས་པ་ནི་དམ་ཚིག་ལ་འཇུག་པའི་ཕྱག་རྒྱའི་ཚོགས་ལ་སོགས་པ་སྤྲུལ་ཅིང་བསྐྱེད་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་དོན་ཏོ། །དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ལ་འཇུག་པའི་གསོལ་ཀ་བ་ཞེས་བྱ་བ་ལ། དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ནི་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ཆེན་པོ་ལ་སོགས་པའོ། །དེ་ལ་འཇུག་པའི་གསོལ་ཀ་བ་ཡིན་པས་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱར་འཇུག་པའི་གསོལ་ཀ་བ་སྟེ། དེ་ཕྱུང་བར་གྱུར་པའོ། །དེ་ནས་ཞེས་བྱ་བ་ལ་སོགས་པ་ལ། བྱང་ཆུབ་སེམས་དཔའི་རྡོ་རྗེ་ཞགས་པ་ཞེས་བྱ་བའི་སྐུར་གྱུར་ནས་ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་དམ་ཚིག་ལ་འཇུག་པའི་ཕྱག་རྒྱའི་ཚོགས་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་དམ་ཚིག་ལ་འཇུག་པའི་དོན་གྱི་ཕྱག་རྒྱ་སྟེ། ཞགས་པའི་ཕྱག་རྒྱའོ། །དེའི་ཚོགས་ནི་མང་པོ་སྟེ་དེར་གྱུར་ནས་བྱུང་བའོ། །བཅོམ་ལྡན་འདས་རྡོ་རྗེ་འཛིན་པ་དེ་ཉིད་དེ་ཞེས་བྱ་བ་ནི་སེམས་དཔའི་རྡོ་རྗེའི་ཚུལ་ལོ། །དེ་བཞིན་གཤེགས་པ་ཐམས་ཅད་འཇུག །ཅེས་བྱ་བ་ནི་རྣམ་པར་སྣང་མཛད་ལ་སོགས་པ་རང་གི་སྒོ་ནས་འཇུག་པར་མཛད་ཅིང་ཆེད་དུ་བརྗོད་པར་འགྱུར་རོ། །རྡོ་རྗེ་ཞགས་པ་དམ་པོ་བདག །ཅེས་བྱ་བ་ནི་རྡོ་རྗེ་ཞགས་པའི་ཕྱག་རྒྱས་ཉེ་བར་མཚོན་པ་ཉིད་ཀྱིས་ན་རྡོ་རྗེ་ཞགས་པའོ། །དམ་པོ་ནི་བརྟན་པ་སྟེ། སྟོང་པ་ཉིད་ཀྱི་ཏིང་ངེ་འཛིན་གྱི་ངོ་བོ་ཉིད་ཡིན་པའི་ཕྱིར་མི་ཕྱེད་པའོ། །ཅི་ཞིག་ངོ་མཚར་ཆེ་ཞེ་ན། རྡུལ་ཕྲན་བཞུགས་པ་ཐམས་ཅད་ཀྱང༌། །བདག་གིས་སླར་ཡང་དྲང་བར་བྱ། །ཞེས་བྱ་བ་གསུངས་ཏེ། འདི་སྐད་སྟོན་པ་ཡིན་ཏེ། ནམ་མཁའ་དང་མཉམ་པའི་ཡེ་ཤེས་ཀྱི་ཚུལ་གྱིས་དེ་བཞིན་གཤེགས་པ་རྣམས་ནི་ཐམས་ཅད་དུ་ཁྱབ་པ་ཡིན་ལ། དེ་ལས་བྱུང་བ་རྣམས་ཀྱང་དེའི་ངོ་བོ་ཡིན་པས་ཐམས་ཅད་དུ་ཁྱབ་པའོ། །དེ་བས་ན་དེ་དག་ཐམས་ཅད་ཀྱང་རྡུལ་ཕྲན་དུ་ཞུགས་པ་ཡིན་ལ། དེ་རྣམས་དང་བདག་ཐ་མི་དད་ན། གདུལ་བྱ་རྣམས་ཀྱིས་དེ་དང་བདག་ཐ་དད་པར་གྱུར་ནས། ཐམས་ཅད་ལ་ཁྱབ་པ་ལྟ་བུར་འཇུག་པར་


DTG057_Page_0195
[མ་དཔེ་གཟིགས་ན་འདིར་གནོན།]

བྱེད་པ་དེ་ལྟར་མཐོང་བ་འདི་ནི་ངོ་མཚར་ཆེའོ། །དེ་ལྟར་རྡོ་རྗེ་ཞགས་པས་དེ་བཞིན་གཤེགས་པ་ཐམས་ཅད་བཅུག་ནས་རྡོ་རྗེ་ལྕགས་སོགས་ཀྱིས་ཐེག་པ་གཞན་ལ་འདོད་པའི་སེམས་དྲལ་བར་བྱེད་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་བསམ་གཏན་གྱིས་འཆིང་བར་བྱེད་དོ་ཞེས་བྱ་བ་ནི། དེ་ནས་ཞེས་བྱ་བ་ལ་སོགས་པས་སྟོན་ཏོ། །བཅོམ་ལྡན་འདས་ཀྱིས་དེ་བཞིན་གཤེགས་པ་ཐམས་ཅད་ཀྱི་ཕོ་ཉ་འདི་ཕྱུང་ངོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་དམ་ཚིག་གི་ལྕགས་སྒྲོག་ཅེས་བྱ་བ་ལ་དེ་བཞིན་གཤེགས་པ་ཐམས་ཅད་ཀྱི་དམ་ཚིག་ནི་འདའ་བར་མི་བྱའོ། །དེ་ཉིད་ནི་ཐེག་པ་གཞན་འདོད་པའི་སེམས་དྲལ་བས་ལྕགས་སྒྲོག་གོ །སེམས་དཔའ་ཆེན་པོ་ཞེས་བྱ་བ་ནི། ཤེས་རབ་ཀྱི་ཕ་རོལ་ཏུ་ཕྱིན་པའི་བསམ་གཏན་གྱིས་ཐམས་ཅད་དུ་ཁྱབ་པས་ན་སེམས་དཔའ་ཆེན་པོ་སྟེ། སེམས་དཔའི་རྡོ་རྗེའི་རང་བཞིན་ཅན་གྱི་རྡོ་རྗེ་འཛིན་པའོ། །དེའི་དམ་ཚིག་ནི་དེ་བཞིན་གཤེགས་པ་ཐམས་ཅད་ཀྱི་དམ་ཚིག་བསྡམས་པའི་ཕྱག་རྒྱ་ལ་སོགས་པའོ། །དེའི་དམ་ཚིག་ནི་སེམས་དཔའི་རྡོ་རྗེ་གང་ལས་གྱུར་པ་སྟེ། དེ་ནི་དེ་བཞིན་གཤེགས་པ་ཐམས་ཅད་ཀྱི་དམ་ཚིག་གི་ལྕགས་སྒྲོག་སེམས་དཔའ་ཆེན་པོའི་དམ་ཚིག་ལས་བྱུང་པ་རྡོ་རྗེ་སྟེ། མིང་འདི་ཉིད་ཅེས་བྱ་བའི་ཏིང་ངེ་འཛིན་གང་ཡིན་པ་དེ་ལ་སྙོམས་པར་ཞུགས་ཤིང་མངོན་སུམ་དུ་མཛད་ནས། དེ་བཞིན་གཤེགས་པ་ཐམས་ཅད་ཀྱི་ཕོ་ཉ་ཕྱུང་གནོ། །དེ་བཞིན་གཤེགས་པ་ཐམས་ཅད་ཀྱི་དམ་ཚིག་བསྡམས་པ་ཞེས་བྱ་བ་ལ། དེ་བཞིན་གཤེགས་པ་ཐམས་ཅད་ཀྱི་དམ་ཚིག་བསྡམས་པ་ནི། ཇི་སྐད་དུ་བཤད་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་བསམ་གཏན་གྱིས་ཐེག་པ་ཆེན་པོར་བཅིངས་པའོ། །དེ་བཞིན་གཤེགས་པ་ཐམས་ཅད་ཀྱི་ཕོ་ཉ་ཞེས་བྱ་བ་ལ། དེ་བཞིན་གཤེགས་པ་ཐམས་ཅད་ཀྱི་རང་གི་རྣལ་འབྱོར་གྱི་གནས་ན་བཞུགས་པ་རྣམས་ཏེ། ཤེས་རབ་ཀྱི་ཕ་རོལ་ཏུ་ཕྱིན་པའི་བསམ་གཏན་གྱི་ཕོ་ཉ་འདིས་ཐག་རིང་ན་གནས་པའི་དངོས་པོ་ཐམས་ཅད་གཟིགས་པས། ཕོ་ཉ་དང་ཆོས་མཐུན་པའི་ཕྱིར་ཕོ་ཉའོ། །དེ་ནས་ཞེས་བྱ་བ་ལ་སོགས་པ་ལ། བྱང་ཆུབ་སེམས་དཔའ་ཆེན་


DTG057_Page_0196
[མ་དཔེ་གཟིགས་ན་འདིར་གནོན།]

པོ་རྡོ་རྗེ་ལྕགས་སྒྲོག་གི་སྐུར་གྱུར་ཏེ་ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་དམ་ཚིག་བསྡམས་པའི་ཕྱག་རྒྱའི་ཚོགས་མང་པོར་གྱུར་ནས་ཞེས་བྱ་བ་ལ། དེ་བཞིན་གཤེགས་པ་ཐམས་ཅད་ཀྱི་དམ་ཚིག་ནི་འདའ་བར་མི་བྱ་བའི་བསྡམས་པའི་ཕྱག་རྒྱ་ནི་ལྕགས་སྒྲོག་གི་ཕྱག་རྒྱའོ། །དེའི་ཚོགས་ནི་མང་པོར་གྱུར་པའོ། །བཅོམ་ལྡན་འདས་རྡོ་རྗེ་འཛིན་པ་དེ་ཉིད་དེ་ཞེས་བྱ་བ་ནི་སྔ་མ་དང་འདྲའོ། །རྡོ་རྗེ་ལྕགས་སྒྲོག་དམ་པོ་བདག །ཅེས་བྱ་བ་ནི་རྡོ་རྗེ་ལྕགས་སྒྲོག་གི་ཕྱག་རྒྱས་ཉེ་བར་མཚོན་པའི་ཕྱིར། བྱང་ཆུབ་སེམས་དཔའ་ཆེན་པོ་རྡོ་རྗེ་ལྕགས་སྒྲོག་གི་སྐུ་ནི་བདག་གོ །དམ་པོ་ནི་མི་ཕྱེད་པའོ། །གལ་ཏེ་ཁྱེད་དེ་ལྟར་གྱུར་པ་ལ་ངོ་མཚར་ཅི་ཞིག་ཡོད་ཅེ་ན། འཆིང་བ་ཀུན་ལས་གྲོལ་བས་ན། །སེམས་ཅན་དོན་དུ་འཆིང་བར་འདོད། །ཅེས་བྱ་བ་གསུངས་སོ། །དེའི་དོན་ནི་འདི་ཡིན་ཏེ། ཉོན་མོངས་པ་བག་ཆགས་དང་བཅས་པ་སྤངས་པས་འཆིང་བ་ལས་གྲོལ་བ་ནི་དེ་བཞིན་གཤེགས་པ་རྣམས་དང༌། བདག་ཐ་མི་དད་པ་ཡིན་ཡང༌། དེ་རྣམས་དང་ཐ་དད་པ་ལྟ་བུ་དེ་རྣམས་བདག་གིས་བཅིངས་པར་ཤེས་པ་འདི་ནི་ངོ་མཚར་ཆེའོ། །འདི་སྐད་སྟོན་ཏེ། གདུལ་བྱས་དེ་ལྟར་མཐོང་གི་བདག་ནི་དེ་ལྟ་མ་ཡིན་ནོ་ཞེས་པའོ། །འཆིང་བ་འདིས་བཅིངས་པའི་དེ་བཞིན་གཤེགས་པ་རྣམས་རང་བཞིན་གྱིས་འོད་གསལ་བའི་ཡེ་ཤེས་དབབ་པས་རྡོ་རྗེ་འབེབས་པས་དབང་དུ་བྱས་པ་ཡིན་ནོ་ཞེས་བྱ་བ་ནི། དེ་ནས་ཞེས་བྱ་བ་ལ་སོགས་པས་སྟོན་ཏོ། །བཅོམ་ལྡན་འདས་ཀྱིས་ཕྱག་རྒྱ་ཐམས་ཅད་ཀྱི་བྲན་འདི་ཕྱུང་ངོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་དབབ་པ་ཞེས་བྱ་བའི་སེམས་དཔའ་ཆེན་པོ་ཞེས་བྱ་བ་ལ། དེ་བཞིན་གཤེགས་པ་ཐམས་ཅད་ཀྱི་ཆོས་རྣམས་རང་བཞིན་གྱིས་འོད་གསལ་བའོ་ཞེས་བྱ་བའི་ངེས་པ་ནི་དེ་བཞིན་གཤེགས་པ་ཐམས་ཅད་དབབ་པའོ། །དེ་བཞིན་གཤེགས་པ་ཐམས་ཅད་དབབ་པ་ཡང་ཡིན་ལ། སེམས་དཔའ་ཆེན་པོ་ཡང་ཡིན་པས་ན། དེ་བཞིན་གཤེགས་པ་ཐམས་ཅད་དབབ་བ་ཞེས་བྱ་བའི་སེམས་དཔའ་ཆེན་པོ་སྟེ། ཐམས་ཅད་དུ་ཁྱབ་པས་དེ་བཞིན་གཤེགས་པ་ཐམས་ཅད་ཀྱི་ཐུགས་ལ་


DTG057_Page_0197
[མ་དཔེ་གཟིགས་ན་འདིར་གནོན།]

ཞུགས་པའི་སེམས་དཔའ་ཆེན་པོ་རྡོ་རྗེའི་རང་བཞིན་རྡོ་རྗེ་འཛིན་པ་ཆེན་པོའོ། །དེའི་དམ་ཚིག་ནི་དེ་བཞིན་གཤེགས་པ་ཐམས་ཅད་ཀྱི་དམ་ཚིག་འབེབས་པའི་ཕྱག་རྒྱའི་ཚོགས་ལ་སོགས་པའོ། །དེའི་འབྱུང་བ་ནི་སེམས་དཔའི་རྡོ་རྗེ་གང་ལས་གྱུར་པ་སྟེ། དེ་ལ་དམིགས་པའི་ཏིང་ངེ་འཛིན་ལ་ཡང་མིང་འདི་ཉིད་ཅེས་བྱ་སྟེ། དེ་ལ་སྙོམས་པར་ཞུགས་པའོ། །དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ཐམས་ཅད་ཀྱི་བྲན་ཞེས་བྱ་བ་ནི་ཕྱག་རྒྱ་ཆེན་པོ་ལ་སོགས་པའི་ངོ་བོའོ། །དེ་རྣམས་མཉེས་པར་བྱེད་པའི་ལས་བྱེད་པས་བྲན་དང་ཆོས་མཐུན་པའི་ཕྱིར་བྲན་ཞེས་བྱའོ། །དེ་ནས་ཞེས་བྱ་བ་ལ་སོགས་པ་ལ་རྡོ་རྗེ་དབབ་པའི་སྐུར་གྱུར་ཏེ་ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་དམ་ཚིག་གི་ཕྱག་རྒྱའི་ཚོགས་སུ་གྱུར་ནས་ཞེས་བྱ་བ་ལ། དེ་བཞིན་གཤེགས་པ་ཐམས་ཅད་ཀྱི་དམ་ཚིག་དབབ་ཅིང་དབང་དུ་བྱ་བའི་དོན་གྱིས་ཕྱིར་ཕྱག་རྒྱ་ནི་དྲིལ་བུའི་ཕྱག་རྒྱ་སྟེ། དེ་རྣམས་ཀྱིས་ཕྱག་རྒྱའི་ཚོགས་དེར་གྱུར་པའོ། །བཅོམ་ལྡན་འདས་རྡོ་རྗེ་འཛིན་པ་དེ་ཉིད་དོ་ཞེས་བྱ་བ་དེ་ནི་དེ་བཞིན་གཤེགས་པ་ཐམས་ཅད་ཀྱི་ཐུགས་ལ་གནས་པའི་སེམས་དཔའི་རྡོ་རྗེའི་ངོ་བོར་སྔར་བསྟན་པ་གང་ཡིན་པའོ། །དེ་བཞིན་གཤེགས་པ་ཐམས་ཅད་འབེབས་ཤིང་ཞེས་བྱ་བ་ནི། རང་བཞིན་གྱིས་འོད་གསལ་བའི་ཡེ་ཤེས་བསྐྱེད་པས་དབང་དུ་བྱེད་ཅིང་ཆེད་དུ་བརྗོད་པ་འདི་ཆེད་དུ་བརྗོད་པར་གྱུར་བའོ། །རྡོ་རྗེ་དབབ་པ་བརྟན་པའི་བདག །ཅེས་བྱ་བ་ལ། རྡོ་རྗེ་འབེབས་པ་ནི་རྡོ་རྗེ་དྲིལ་བུ་ལ་བྱ་ལ། དེས་ཉེ་བར་མཚོན་པའི་བྱང་ཆུབ་སེམས་དཔའ་ནི་རྡོ་རྗེ་འབེབས་པའོ། །བརྟན་པ་ནི་མི་ཕྱེད་པའོ། །གལ་ཏེ་ཁྱེད་དེ་ལྟ་བུ་ཡིན་པ་ལ་འདིར་ངོ་མཚར་ཅི་ཞིག་ཡོད་ཅེ་ན། གང་ཕྱིར་ཀུན་གྱིས་བདག་གྱུར་ནས། །བྲན་དུ་ཡང་ནི་གྱུར་པ་ཡིན། །ཞེས་བྱ་བ་གསུངས་སོ། །འདིས་ནི་འདི་སྐད་སྟོན་ཏེ། རང་བཞིན་གྱིས་འོད་གསལ་བའི་ཡེ་ཤེས་ཐོབ་ཅིང་སྤྲུལ་པས་འགྲོ་བའི་དོན་བྱ་བ་ལ་དབང་བ་ཉིད་ཐོབ་པས། དེ་བཞིན་གཤེགས་པ་ཐམས་ཅད་ཀྱི་བདག་པོ་ཡིན་ཞིང་དེ་རྣམས་བདག་དང་ཐ་མི་དད་པའི་རང་བཞིན་ཡིན་པ་ལས་གདུལ་བྱ་རྣམས་ཀྱིས་བདག་དེ་


DTG057_Page_0198
[མ་དཔེ་གཟིགས་ན་འདིར་གནོན།]

རྣམས་ཀྱི་ལས་བྱེད་པར་མཐོང་བ་འདི་ནི་ངོ་མཚར་ཆེའོ། །དེ་བཞིན་གཤེགས་པ་ཞེས་བྱ་བ་ལ་སོགས་པས་ནི་སྡོམ་གསུངས་པ་ཡིན་ཏེ། དེ་བཞིན་གཤེགས་པ་ཐམས་ཅད་སྤྱན་དྲངས་ན་སྤྱན་འདྲེན་པ་སྟེ། རྡོ་རྗེ་ལྕགས་ཀྱུའོ། །དེ་རྣམས་ཉིད་བཞུགས་པ་ནི་རྡོ་རྗེ་ཞགས་པའོ། །ཞུགས་པ་རྣམས་འཆིང་བ་ནི་རྡོ་རྗེ་ལྕགས་སྒྲོག་གོ །བཅིངས་པ་རྣམས་དབང་དུ་བྱ་བ་ནི་རྡོ་རྗེ་འབེབས་པའོ། །དེ་བཞིན་གཤེགས་པ་ཐམས་ཅད་ཀྱི་བཀའ་བཞིན་བྱེད་པ་ཞེས་བྱ་བ་ནི་འདི་དག་ཐམས་ཅད་ནི། ཇི་སྐད་དུ་བཤད་པའི་སྤྱན་འདྲེན་པ་ལ་སོགས་པའི་ཚུལ་གྱིས་བཀའ་བཞིན་བྱེད་པའོ། །དེ་ལྟར་དཀྱིལ་འཁོར་དུ་དེ་བཞིན་གཤེགས་པ་རྣམས་རྡོ་རྗེ་སེམས་དཔས་བྱང་ཆུབ་ཀྱི་སེམས་ལ་རབ་ཏུ་གཞག །རྒྱལ་པོས་སྤྱན་དྲངས། ཆགས་པས་རྗེས་སུ་མཉེས། ལེགས་པས་ལེགས་སོ་ཞེས་བྱ་བས་དགྱེས་པར་བྱས། རྡོ་རྗེ་རིན་ཆེན་གྱིས་དབང་བསྐུར། གཟི་བརྗིད་ཀྱིས་འོད་ཀྱིས་སྣང་བར་བྱས། དཔལ་གྱིས་སྦྱིན་པའི་ཕ་རོལ་ཏུ་ཕྱིན་པ་ལ་སྦྱར། བཞད་པས་འཛུམ་བ་རྨད་དུ་བྱུང་བ་ལ་རབ་ཏུ་གཞག །ཆོས་ཀྱིས་ཏིང་ངེ་འཛིན་ལ་སྦྱོར། རྣོན་པོས་དེ་རྣམས་ཀྱི་ཉོན་མོངས་པ་དང་ཉེ་བའི་ཉོན་མོངས་པ་བཅད། རྡོ་རྗེ་རྒྱུས་དཀྱིལ་འཁོར་དུ་བཅུག །སྨྲ་བས་སྤྲོས་པ་མེད་པའི་ཆོས་ཉིད་ལ་ངེས་པར་སྦྱར། རྡོ་རྗེ་ལས་ཀྱིས་མ་ལུས་ཤིང་ལུས་པ་མེད་པའི་མཆོད་པས་མཆོད། རྡོ་རྗེ་བསྲུང་བས་བསྲུངས། རྡོ་རྗེ་གནོད་སྦྱིན་གྱིས་བསྲུང་བ་ཡོངས་སུ་བསྐྱབ་པས་བསྲུངས། རྡོ་རྗེ་ཁུ་ཚུར་གྱིས་གྲུབ་བོ། །དེ་ནས་མི་བསྐྱོད་པ་དང༌། རིན་ཆེན་འབྱུང་ལྡན་དང་འོད་དཔག་ཏུ་མེད་པ་དང༌། དོན་ཡོད་གྲུབ་པ་དང༌། རྣམ་པར་སྣང་མཛད་ཀྱི་རང་བཞིན་དུ་གྱུར་ཏེ། རྡོ་རྗེ་སེམས་མ་ནི་བྱང་ཆུབ་ཀྱི་སེམས་ཀྱི་ཚུལ་གྱིས་སོ། །རྡོ་རྗེ་རིན་ཆེན་མ་ནི་སྦྱིན་པའི་ཕ་རོལ་ཏུ་ཕྱིན་བའི་ཚུལ་གྱིས་སོ། །རྡོ་རྗེ་ཆོས་མ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གྱིས་སོ། །རྡོ་རྗེ་ལས་མ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ཚུལ་གྱིས་རིགས་ཐམས་ཅད་བསྡུས་པ་ཡིན་པར་ཤེས་པར་བྱའོ། །སྒེག་མོ་ལ་སོགས་པ་ནི་དེ་བཞིན་གཤེགས་པ་རྣམས་ཀྱི་སྦྱིན་པ་དང༌། ཚུལ་ཁྲིམས་དང༌། བཟོད་པ་དང༌། བརྩོན་འགྲུས་དང༌། བསམ་གཏན་


DTG057_Page_0199
[མ་དཔེ་གཟིགས་ན་འདིར་གནོན།]

དང། ཤེས་རབ་དང༌། སྨོན་ལམ་དང༌། ཐབས་ཀྱི་ཕ་རོལ་ཏུ་ཕྱིན་པའི་རང་བཞིན་ཡིན་ནོ། །དེ་རྣམས་ཀྱང་བྱང་ཆུབ་ཀྱི་སེམས་ཀྱི་ལྕགས་ཀྱུས་ཐར་པ་ཆེན་པོའི་གྲོང་ཁྱེར་དུ་དགུག་པ་དང༌། བྱང་ཆུབ་ཀྱི་སྤྱོད་པའི་ཞགས་པས་བཅུག་པ་དང༌། བསམ་གཏན་གྱིས་བཅིངས་པ་དང༌། བྱང་ཆུབ་ཀྱི་དབབ་པས་དབང་དུ་མཛད་པ་ཡིན་ནོ། །རེ་རེ་ཞིང་ཡང་བསྐྱེད་པ་དང༌། སྤྲོ་བ་དང༌། བསྡུ་བ་དང༌། དེ་ནས་རང་གི་གནས་སུ་ཞུགས་ཏེ་ཆེད་དུ་བརྗོད་པ་དང༌། བརྟན་པར་བསྒོམ་པར་ཤེས་པར་བྱའོ། །རྡོ་རྗེ་སེམས་དཔའ་བསྐྱེད་པ་ནས་བརྩམས་ཏེ། རྡོ་རྗེ་འབེབས་པའི་བར་གྱི་གཞུང་གིས་ནི། དཀྱིལ་འཁོར་རྒྱལ་མཆོག་ཅེས་བྱ་བའི་ཏིང་ངེ་འཛིན་གཉིས་པ་བསྟན་པ་ཡིན་ནོ། །འདི་དག་ཀྱང་རི་རབ་ཀྱི་སྟེང་དུ་དེ་བཞིན་གཤེགས་པ་ཐམས་ཅད་རྣམ་པར་འཕྲུལ་པར་མཛད་པ་ཡིན་ལ། བཅོམ་ལྡན་འདས་འོག་མིན་གྱི་གནས་སུ་མངོན་པར་རྫོགས་པར་སངས་རྒྱས་པ་གང་ཡིན་པ་དེ་ནི། ཀུན་དུ་བཟང་པ་ལ་སོགས་པ་ལས་གཞན་པའི་སེམས་ཅན་རྣམས་རྗེས་སུ་གཟུང་བའི་ཕྱིར་དེར་ཞུགས་པ་ཉིད་ཀྱིས་དགའ་ལྡན་ལ་སོགས་པར་རྣམ་པར་འཕྲུལ་པའི་སྤྲུལ་པ་སྟོན་པར་མཛད་པ་ནི་སྤྲུལ་པའི་སྐུ་ཡིན་ནོ་ཞེས་བཤད་པའི་རྒྱུད་ཀྱི་དོན་བསྟན་པའི་ཕྱིར་དང་གཞུང་གཞན་དག་ལས་འོག་མིན་གྱི་གནས་ལས་བསྐྱོད་པར་མི་མཛད་དོ་ཞེས་གསུངས་པ་ཡིན་ནོ། །དེ་ལྟར་བསྐྱེད་པ་དང༌། སྤྲོ་བ་དང༌། བསྡུ་བ་དང༌། གནས་པ་དང༌། བརྟན་པར་བསྒོམ་པས་དཀྱིལ་འཁོར་རྒྱལ་པོ་མཆོག་གི་དོན་བསྟན་ནས། སྤྲུལ་པ་བྱིན་གྱིས་བརླབ་པའི་ཕྱིར། དེ་ནས་ཞེས་བྱ་བ་ལ་སོགས་པའི་གཞུང་གསུངས་པ་ཡིན་ཏེ། དེ་བཞིན་གཤེགས་པ་ཐམས་ཅད་ཀྱིས་བསྡུ་བ་ནི། འདུས་པར་མཛད་པའོ། །དེ་སྔོན་དུ་འགྲོ་བའི་བྱིན་གྱིས་བརླབ་པའི་ཕྱིར་ཞེས་པ་ནི་ཡེ་ཤེས་སེམས་དཔའ་བཞུགས་པས་སོ། །དེའི་དོན་དུ་རྡོ་རྗེ་སེ་གོལ་གྱི་མཚན་མ་མཛད་ནས་ཞེས་བྱ་བ་ནི་རྡོ་རྗེ་ཁུ་ཚུར་གཉིས་བཅིངས་ལ་མཛུབ་མོ་གཉིས་ལྕགས་ཀྱུ་གཉིས་སུ་བྱས་ལ། ལག་པ་གཉིས་རྡོ་རྗེ་བཅིང་བར་བསྣོལ་ཏེ། རྡོ་རྗེ་སེ་གོལ་བརྡབས་པས། སངས་རྒྱས་ཐམས་ཅད་ཀྱང་གཤེགས་པར་གྱུར་ན་གཞན་ལྟ་སྨོས་ཀྱང་ཅི་དགོས་ཞེས་བྱ་བ་འདི་རྡོ་རྗེ་སེ་གོལ་


DTG057_Page_0200
[མ་དཔེ་གཟིགས་ན་འདིར་གནོན།]

ཏེ། མིང་དེ་སྐད་ཅེས་བྱ་བའི་སྒྲ་མཛད་པའོ། །དེ་ནས་སྐད་ཅིག་མ་དེ་ཉིད་ལ་སྟེ་བསྐུལ་བའི་རྗེས་ཐོགས་ཉིད་ལ་ཞེས་བྱ་བའི་ཐ་ཚིག་གོ །ཐང་ཅིག་ཡུད་ཙམ་ཞེས་བྱ་བའི་ཚིག་ནི་འཇིག་རྟེན་པའི་ཚིག་གི་ཚུལ་དུ་ཅུང་ཟད་ཅིག་ཏུ་ཉེ་བར་མཚོན་པ་ཡིན་ནོ། །སྐད་ཅིག་ཙམ་དེའི་ཚེ་ཞེས་བྱ་བ་ནི་འདི་ཉིད་ལ་འཇུག་སྟེ། གང་གི་ཕྱིར་སྐད་ཅིག་མ་གཅིག་ལ་བྱོན་པའོ། །དེ་ཡང༌། དེའི་ཚེ་སངས་རྒྱས་ཐམས་ཅད་ནི། །རྡོ་རྗེ་སེམས་དཔའ་ལ་སོགས་བཅས། དཀྱིལ་འཁོར་ཐམས་ཅད་གང་བ་རྣམས། །དཀྱིལ་འཁོར་རྣམས་སུ་འདུས་པར་གྱུར། །ཞེས་གསུངས་པ་ཡིན་ནོ། །སེ་གོལ་གྱི་སྒྲའི་མཚན་མས་བསྐུལ་བ་ནི་འཇིག་རྟེན་གྱི་ཁམས་ཐམས་ཅད་ན་བཞུགས་པའོ། །འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་མོ་དང་མཉམ་པའི་དེ་བཞིན་གཤེགས་པ་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་མང་པོ་དང་བཅས་ཏེ། སྐད་ཅིག་མ་དེ་ཉིད་ལ་འདུས་པར་མཛད་ནས། ཁང་བུ་བརྩེགས་པ་གང་ན་བ་དང༌། བཅོམ་ལྡན་འདས་གང་ན་བ་དེར་གཤེགས་ཤིང་བྱོན་ལ། གཤེགས་ནས་ཀྱང་ཆེད་དུ་བརྗོད་པ་འདི་ཆེད་དུ་བརྗོད་དེ། ཨོཾ་སརྦྦ་ཏ་ཐཱ་ག་ཏ་པཱ་ད་བནད་ནཾ་ཀ་རོ་མི་ཞེས་བྱ་བ་འདིས། ཞབས་ལ་ཕྱག་འཚལ་ནས་ཀྱང་ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཁྱི་ཞབས་ལ་ཕྱག་འཚལ་བས་ནི་དོན་འདི་སྟོན་པ་ཡིན་ཏེ། ཇི་ལྟར་བདག་ཅག་གི་རྣམ་པར་སྣང་མཛད་ལ་སོགས་པའི་ཡེ་ཤེས་སེམས་དཔའ་འོག་མིན་གྱི་གནས་ན་བཞུགས་པ་ཉིད་ལས་སེམས་ཅན་གྱིས་དོན་ལ་གཟིགས་ཏེ་རི་རབ་ཀྱི་སྟེང་དུ་རྡོ་རྗེ་དབྱིངས་ཀྱི་དཀྱིལ་འཁོར་ལ་སོགས་པའི་སྤྲུལ་པ་རྫོགས་པར་མཛད་པ་དེ་བཞིན་དུ། བསྡུ་བས་བྱོན་པ་རྣམས་ཀྱང་ཐུགས་གཅིག་པའོ། །ཀུན་དུ་བང་པོ་ཞེས་བྱ་བ་ནི་སྐུ་དང་གསུངས་དང་ཐུགས་གཅིག་པ་ཉིད་ལ་དགོངས་ནས། འདིར་རྣམས་པར་སྣང་མཛད་ཉིད་ལ་ཀུན་དུ་བཟང་པོ་ཞེས་བྱ་བར་འདོད་དོ། །ཡང་ན་རྣམ་པར་སྣང་མཛད་ཆེན་པོ་ཉིད་ནི་ཀུན་དུ་བཟང་པོ་སྟེ། དེའི་སྤྱོད་པའི་མཆོག་ནི་མཛེས་པའི་སྤྱོད་པ་ཡིན་པས་སྤྱོད་པའི་མཆོག་སྟེ། ལྷ་སུམ་ཅུ་རྩ་བདུན་དུ་ལྷག་པར་མོས་པའི་རྣམ་པར་ཐར་


DTG057_Page_0201
[མ་དཔེ་གཟིགས་ན་འདིར་གནོན།]

པའི་སྒོ་ནས་སེམས་ཅན་གྱི་དོན་མཛད་པའོ། །འདིར་ཅི་ཞིག་ངོ་མཚར་ཆེ་ཞེ་ན། དེ་བཞིན་གཤེགས་པའི་འཁོར་ལོ་ཡི། །དབུས་ན་དེ་བཞིན་གཤེགས་པ་མཛེས། །ཞེས་བྱ་བ་གསུངས་ཏེ། དེ་བཞིན་གཤེགས་པ་རྣམས་ཀྱི་འཁོར་ལོ་ནི་དེ་བཞིན་གཤེགས་པའི་འཁོར་ལོ་སྟེ། བསྡུས་ནས་བྱོན་པའི་དཀྱིལ་འཁོར་གྱི་འཁོར་ལོའོ། །དེ་བཞིན་གཤེགས་པ་དེའི་འཁོར་ལོ་དེའི་དབུས་ན་བཅོམ་ལྡན་འདས་རྣམ་པར་སྣང་མཛད་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་ཚུལ་གྱིས་མཛེས་ཤིང་འབར་བར་གྱུར་པ་འདི་ནི་ངོ་མཚར་ཆེའོ། །འདིས་ནི་འདི་སྐད་སྟོན་པ་ཡིན་ཏེ། དངོས་པོ་ཐམས་ཅད་ཀྱི་དོན་ཇི་ལྟ་བ་བཞིན་ཐུགས་སུ་ཆུད་པས། འདི་ནི་དེ་བཞིན་གཤེགས་པ་ཡིན་ལ། བདག་ཅག་གིས་ཀྱང་དངོས་པོ་ཐམས་ཅད་ཀྱི་དོན་ཇི་ལྟ་བ་བཞིན་དུ་རྟོགས་པས་དེ་བཞིན་གཤེགས་པ་རྣམས་ཡིན་ཏེ། དེ་རྣམ་པར་སྣང་མཛད་ལ་སོགས་པ་གཅིག་པུའི་ཚུལ་གང་ཡིན་པ་དེ་ནི་ཐམས་ཅད་ཀྱི་ཡིན་ལ། ཐམས་ཅད་ཀྱི་གང་ཡིན་པ་ནི་གཅིག་ཡི་ཡང་དེ་ཡིན་ཏེ། ཐམས་ཅད་ཀྱང་ཚོགས་དང༌། ཆོས་ཀྱི་སྐུ་དང༌། འགྲོ་བའི་དོན་གྱི་བྱ་པས་མཚུངས་པ་ཉིད་ཡིན་པའི་ཕྱིར་རོ། །དེ་བས་ན་ཁོ་བོ་ཅག་ཐམས་ཅད་ཚུལ་འདིས་གནས་མོད་ཀྱི། གདུལ་བྱ་རྣམས་ཀྱིས་ཀུན་དུ་བཟང་པོ་ཉིད་གཅིག་པུར་མཐོང་བ་འདི་ནི་ངོ་མཚར་ཆེའོ། །ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ནས་འདུས་པ་ཞེས་བྱ་བ་ནི། འཇིག་རྟེན་གྱི་ཁམས་ཐམས་ཅད་ནས་འདུས་ཏེ་བྱོན་བ་རྣམས་སོ། །དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་ཀྱིས་ཞེས་བྱ་བ་ནི་མི་བསྐྱོད་པ་ལ་སོགས་པའི་མཐུས་ཏེ། མི་བསྐྱོད་པ་ལ་སོགས་པའི་ཚུལ་གྱིས་སེམས་དང་སེམས་ལས་བྱུང་བ་རྣམས་སྔོན་གྱི་འཕེན་པའི་ཤུགས་ཀྱི་སྟོབས་ཀྱིས་ཡེ་ཤེས་རྟོགས་པ་ཡིན་ནོ། །རྣམ་པར་སྣང་མཛད་ཀྱི་ཐུགས་སུ་ཞུགས་ནས་ཞེས་བྱ་བ་ནི་དབུས་ན་བཞུགས་པའི་རྣམ་པར་སྣང་མཛད་ཀྱིའོ། །བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དང་བཅས་པ་ཞེས་བྱ་བ་ནི་རང་རང་གི་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་རང་རང་གི་ཐུགས་ཀར་ཞུགས་ཤིང་ཆུད་པར་གྱུར་ཏེ་ཞས་བྱ་བའི་ཐ་ཚིག་གོ །ཅིའི་ཕྱིར་ཞེ་ན། དེ་དག་ཐམས་


DTG057_Page_0202
[མ་དཔེ་གཟིགས་ན་འདིར་གནོན།]

ཅད་ཀྱི་ཐུགས་ལས་ཞེས་འོག་ནས་བཤད་པའི་ཕྱིར་རོ། །དེ་བཞིན་གཤེགས་པ་ཐམས་ཅད་ཀྱི་ཐུགས་ལས་ཞེས་བྱ་བ་ནི་རྣམ་པར་སྣང་མཛད་ཀྱི་ཐུགས་ཀར་ཞུགས་ནས། རྣམ་པར་སྣང་མཛད་དང༌། མི་བསྐྱོད་པ་ལ་སོགས་པའི་ཐུགས་ལས། རང་རང་གི་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དང་བཅས་ཏེ་བྱུང་ནས་ཞེས་བྱ་བ་ནི་རྣམ་པར་སྣང་མཛད་ཀྱི་ཐུགས་ལས་སེམས་མ་རྡོ་རྗེ་མ་དང༌། རིན་ཆེན་མ་དང༌། ཆོས་མ་དང༌། ལས་མ་རྣམས་བྱུང་ཞིང་སྦྲུལ་ཏེ། སེམས་མ་རྡོ་རྗེ་མ་ལ་སོགས་པའི་ཚུལ་གྱིས་བཞུགས་པས་བདག་ཉིད་ཀྱི་ཏིང་ངེ་འཛིན་གྱི་ཚུལ་གྱིས་བཞུགས་སོ།། མི་བསྐྱོད་པའི་ཐུགས་ལས་མི་བསྐྱོད་པ་དང༌། རྡོ་རྗེ་སེམས་དཔའ་དང༌། རྒྱལ་པོ་དང༌། ཆགས་པ་དང༌། ལེགས་པ་དང༌། སྒེག་མོ་དང༌། བདུག་པ་མ་དང༌། ལྕགས་ཀྱུ་མ་དང༌། བྱམས་པ་ལ་སོགས་པ་ཤར་ཕྱོགས་ཀྱི་ཆ་ལ་བཞུགས་པ་རྣམས་བྱུང་སྟེ། སྤྲུལ་པའི་མི་བསྐྱོད་པ་ལ་སོགས་པའི་ཚུལ་གྱིས་བཞུགས་པས་རང་རང་གི་ཏིང་ངེ་འཛིན་གྱིས་བཞུགས་སོ། །བྱམས་པ་ལ་སོགས་པ་ཡང་རང་རང་གི་གནས་ཉིད་ནའོ། །གཞན་དག་ཀྱང་དེ་བཞིན་དུ་ཤེས་པར་བྱའོ། །ཅིའི་ཕྱིར་རྣམ་པར་སྣང་མཛད་ཀྱི་ཐུགས་ཀར་ཐམས་ཅད་ཞུགས་ཤེ་ན། རྣམ་པར་སྣང་མཛད་ནི་སངས་རྒྱས་ཐམས་ཅད་བསྡུས་པ་ཡིན་ནོ་ཞེས་ཤེས་པར་བྱ་བའི་ཕྱིར་རོ། །དེའི་ཐུགས་ཀར་ཆུད་ནས་དེ་བཞིན་གཤེགས་པ་རྣམས་ཀྱི་ཐུགས་ཀ་ནས་ཕྱུང་སྟེ་ལྷག་མ་གཞན་དག་ཀྱང་བྱིན་གྱིས་བརླབ་པ་ནི། དེའི་ཡན་ལག་གི་ཁྱད་པར་དུ་རྟོགས་པར་བྱ་བའི་ཕྱིར་ཡིན་ནོ། །གསང་སྔགས་ཀྱི་སྒོའི་སྤྱད་པ་སྤྱོད་པ་རྣམས་ཀྱིས་ཀྱང་མངོན་པར་འདོད་པའི་དོན་འགྲུབ་པར་བྱའི་ཕྱིར། དཀྱིལ་འཁོར་སྤྲུལ་པ་བྱས་ནས་བཅོམ་ལྡན་འདས་ཀྱིས་ཇི་ལྟར་མཛད་པ་དེ་ལྟར་རྗེས་སུ་སྤྱད་པར་བྱའོ་ཞེས་སྟོན་པ་ཡིན་ནོ། །རྒྱ་ཆེན་ཆེན་པོ་ཐོག་མེད་སྐྱེས། །ཞེས་བྱ་བ་ནི་རྒྱ་ཆེ་བ་ཡང་ཡིན་ལ་ཆེན་པོ་ཡང་ཡིན་པས་ན་རྒྱ་ཆེན་པོ་སྟེ། རྣམ་པར་སྣང་མཛད་ཀྱི་ཐུགས་ཀ་ན་གནས་པ་འཇིག་རྟེན་གསུམ་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་མོ་དང་མཉམ་པའི་དེ་བཞིན་གཤེགས་པ་རྣམས་བཞུགས་པ་ཡིན་ནོ། །ཐོག་མེད་སྐྱེས་ཞེས་བྱ་བ་ནི། འདི་ལ་ཐོག་མ་ཡོད་པ་མ་ཡིན་པས་ན་ཐོག་མ་མེད་པ་སྟེ། བཅོམ་ལྡན་


DTG057_Page_0203
[མ་དཔེ་གཟིགས་ན་འདིར་གནོན།]

འདས་རྣམ་པར་སྣང་མཛད་ཆེན་པོའོ། །དེ་ཉིད་ལས་སྐྱེས་པ་ནི་འདི་ལྟར་དེ་བཞིན་གཤེགས་པ་གཅིག་གི་ཐུགས་ཀ་ན་སངས་རྒྱས་ཐམས་ཅད་བཞུགས་པའི་ཕྱིར་རོ། །འདིར་ངོ་མཚར་ཅི་ཞིག་ཆེ་ཞེ་ན། རྡུལ་ཕྲར་བ་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། རྣམ་པར་སྣང་མཛད་ཀྱི་ཐུགས་ཀར་ཞུགས་ནས་གཅིག་ཏུ་གྱུར་པ་ཉིད་ཐོབ་པ་ནི་ངོ་མཚར་ཆེའོ། །འདི་སྐད་སྟོན་ཏེ། གདུལ་བྱ་རྣམས་ཀྱིས་དེ་ལྟར་མ་ཐོག་གི་ཆོས་ཀྱི་དབྱིངས་ཀྱི་རང་བཞིན་ཅན་གྱི་དེ་བཞིན་གཤེགས་པ་རྣམས་ལ་ནི་དོན་དམ་པར་གཅིག་པ་ཉིད་དང་དུ་མ་ཉིད་དུ་མ་ཉིད་མངའ་བ་མ་ཡིན་ནོ།། བསྡུ་བ་དང་བྱིན་གྱིས་བརླབ་པ་ལ་སོགས་པ་ནས། ཆེད་དུ་བརྗོད་པའི་བར་གྱི་གཞུང་འདིས་ནི་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པ་སྟོན་པ་ཡིན་ནོ། །ཏིང་ངེ་འཛིན་གསུམ་པ་འདི་དག་ཀྱང། གསང་བ་སྲ་ཞིང་མཐོ་བ་ལས་རྣམ་པར་ཕྱེ་སྟེ། བསྟན་པ་ཡིན་པས་སོམ་ཉི་མི་བྱའོ། །དེ་ལྟར་ཏིང་ངེ་འཛིན་གསུམ་པ་བསྟན་པས། རྣམ་པར་སྣང་མཛད་ཆེན་པོ་ཐོབ་པའི་ཐབས་བསྟན་ནས། འདིར་དཀྱིལ་འཁོར་དུ་འཇུག་ཅིང་དབང་བསྐུར་བའི་ཐབས་ལ་འཇུག་པར་བྱའོ་ཞེས་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་རྡོ་རྗེ་འཛིན་པ་ཆེན་པོ་ལ་མིང་བརྒྱ་རྩ་བརྒྱད་པ་འདིས་གསོལ་བ་བཏབ་བོ་ཞེས་བྱ་བ་འདིར་སྦྱར་རོ། །ཅིའི་ཕྱིར་གསོལ་བ་བཏབ་ཅེ་ན། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་འདི་ཞེས་བྱ་བ་གསུངས་ཏེ། ཇི་སྐད་དུ་བསྟན་པ་འདིའོ། །བྱིན་གྱིས་བརླབ་བར་ཞེས་བྱ་བ་ནི་སློབ་དཔོན་གཅིག་ནས་གཅིག་ཏུ་བརྒྱུད་པའི་བྲི་བའི་ཚོགས་ཡུན་རིང་དུ་གནས་པ་དེས། སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་རྣམས་ཇི་སྐད་དུ་བཤད་པའི་ཡོངས་སུ་བསྐྱབ་པ་ལ་སོགས་པ་འབྲས་བུ་ཐོབ་པའི་ཕྱིར། དེ་བཞིན་གཤེགས་པ་ཐམས་ཅད་ཀྱི་ཞེས་པ་རྣམ་པར་སྣང་མཛད་ལ་སོགས་པའི་མཉམ་པ་ཉིད་ཀྱི་ཡེ་ཤེས་ཏེ། ཆོས་ཀྱི་དབྱིངས་ལ་དམིགས་པའི་སེམས་དང༌། མངོན་པ་ཤེས་པ་དྲུག་སྟེ། དེ་རྣམས་ཉིད་ཀྱི་མངོན་པར་ཤེས་པ་ཇི་སྐད་དུ་བཤད་པ་དྲུག་སྟེ། དེ་ལྟར་ན་དེ་བཞིན་གཤེགས་པ་


DTG057_Page_0204
[མ་དཔེ་གཟིགས་ན་འདིར་གནོན།]

ཐམས་ཅད་ཀྱི་མཉམ་པ་ཉིད་ཀྱི་ཡེ་ཤེས་དང༌། མངོན་པར་ཤེས་པ་དང༌། ཡང་དག་པར་རྫོགས་པའི་བྱང་ཆུབ་རྟོགས་པ་སྟེ། དེ་ཉིད་དངོས་གྲུབ་དམ་པ་ཞེས་བྱ་བ་སྟེ། དེ་དག་གི་ཕྱིར་གསོལ་བ་འདེབས་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་བདག་པོ་ཡིན་ལ་ཞེས་བྱ་བ་ནི་མི་དམིགས་པའི་ཐུགས་རྗེ་ཆེན་པོའི་བདག་ཉིད་ཀུན་དུ་བཟང་པོ་ནི་དེ་བཞིན་གཤེགས་པ་ཐམས་ཅད་ཀྱི་བདག་པོ་སྟེ། གང་གི་ཕྱིར་འདི་ལས་སྔོན་གྱི་འཕེན་པའི་ཤུགས་ཀྱིས་ཉེ་བར་སྐྱེ་ཞིང་དེ་དག་ཀྱང་དེའི་དབང་གིས་འཇུག་པ་ཡིན་ནོ། །དེ་བས་ན་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་ཞེས་བྱའོ། །དེ་ཡང་དེ་རྣམས་ཀྱི་བདག་ཉིད་ནི་རྡོ་རྗེ་སེམས་དཔའ་ཡིན་པས་དེའི་ཕྱིར། རང་གི་རྡོ་རྗེ་སེམས་དཔའ་ཞེས་བྱ་བ་གསུངས་ཏེ། དེ་ཡང་རང་བཞིན་གྱིས་འོད་གསལ་བ་ཉིད་ཀྱིས། རྟག་ཏུ་གཉིས་མེད་པ་ཉིད་ལ། དེ་ནས་ཐོག་མ་དང་ཐ་མ་མེད་པ་ཞེས་གསུངས་སོ། །དེ་ཉིད་ཀྱིས་ན་དེ་བཞིན་གཤེགས་པའི་རྡོ་རྗེ་ཆེན་པོ་འཛིན་པར་མཛད་དེ། དེའི་ཕྱིར་རྡོ་རྗེ་ཆེན་པོ་འཛིན་པ་ལ་ཞེས་སྨོས་སོ། །འདིས་ཞེས་བྱ་བ་ནི་འོག་ནས་བཤད་པ་ཐུགས་ལ་བཞག་སྟེ་གསུངས་པའོ། །གསོལ་བ་བཏབ་བོ་ཞེས་བྱ་བ་ནི་གསོལ་བ་བཏབ་པར་གྱུར་པའོ།། དེ་བསྟེན་པ་ནི་རྡོ་རྗེ་སེམས་དཔའ་ཞེས་བྱ་བ་ལ་སོགས་པ་སྟེ། རྡོ་རྗེ་སེམས་དཔའ་ཞེས་བྱ་བ་ནི་འདིར་བཛྲ་སཏྭ་ཞེས་བྱ་བའི་ཚུལ་ནི་སྙིང་པོར་གསུངས་པ་ཡིན་ཏེ། ཁྱེད་ནི་རྡོ་རྗེ་སེམས་དཔའ་ཞེས་བྱ་བའི་སྒྲའི་རང་བཞིན་ཡིན་ནོ་ཞེས་བྱ་བའི་ཐ་ཚིག་གོ །སེམས་དཔའ་ཆེ་ཞེས་བྱ་བ་ནི་ཆོས་ཀྱི་དབྱིངས་ཀྱི་ཟླ་བའི་དཀྱིལ་འཁོར་ལ་སོགས་པར་སྤྲོ་བ་ནི་སེམས་དཔའ་ཆེན་པོའོ། །རྡོ་རྗེ་ནི་འདིར་རྡོ་རྗེ་རྩེ་ལྔ་བའོ། །དེ་བཞིན་གཤེགས་པ་ཀུན་ཞེས་བྱ་བ་ནི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་མོ་དང་མཉམ་པའི་སངས་རྒྱས་རྣམས་ཀྱི་ཚུལ་གྱིས་ན་དེ་བཞིན་གཤེགས་པ་ཀུན་ནོ། །རྡོ་རྗེ་རྒྱལ་པོ་ལ་སོགས་པ་རྣམས་ལ་ཐོག་མ་ཁོ་ནར་འཁྲུངས་པས་ན་རྡོ་རྗེ་དང་པོའོ། །དེ་བཞིན་གཤེགས་པ་ཐམས་ཅད་ཀྱང་གཅིག་ཏུ་གྱུར་པ་ལས་བསྐྱེད་པ་ནི་རྡོ་རྗེ་སེམས་དཔའི་སྐུ་ཡིན་པས་ན་ཀུན་དུ་བཟང་པོའོ། །རྡོ་རྗེས་ཉེ་བར་མཚོན་པའི་ཕྱག་མངའ་


DTG057_Page_0205
[མ་དཔེ་གཟིགས་ན་འདིར་གནོན།]

བས་ན་ཕྱག་ན་རྡོ་རྗེའོ། །དེ་ལྟར་ན་མཚན་བདུན་ནོ། །བཛྲ་རཱ་ཛ་ཞེས་བྱ་བ་ནི་རྡོ་རྗེ་རྒྱལ་པོའི་སྙིང་པོའོ། །སངས་རྒྱས་མཆོག་ཅེས་བྱ་བ་ནི་དེ་ཉིད་དེ་བཞིན་གཤེགས་པ་ཐམས་ཅད་སྤྱན་འདྲེན་པའི་ལས་ཀྱི་ཤིན་ཏུ་སངས་རྒྱས་རྣམས་ཀྱི་མཆོག་གོ །རྡོ་རྗེ་ལྕགས་ཀྱུ་ཞེ། བྱ་བ་ནི་དེ་ཉིད་ཀྱི་མཚན་མའི་ཕྱག་རྒྱ་གང་ཡིན་པ་དེ་ནི་ལྕགས་ཀྱུ་ཡིན་ནོ། །དེ་བཞིན་གཤེགས་པ་ཞེས་བྱ་བ་ནི་ཇི་སྐད་དུ་བཤད་པའི་དེ་བཞིན་གཤེགས་པ་ཐམས་ཅད་ཀྱི་ངོ་བོ་ཉིད་ཡིན་པས་དེ་བཞིན་གཤེགས་པའོ། །དོན་ཡོད་རྒྱལ་པོ་ཞེས་བྱ་བ་ནི་རྡོ་རྗེ་རྒྱལ་པོའི་སྐུའི་ཚུལ་གྱིས་སོ། །རྡོ་རྗེ་མཆོག་ཅེས་བྱ་བ་ལ། རྡོ་རྗེ་ནི་དེ་བཞིན་གཤེགས་པ་རྣམས་ཏེ། བསྡུ་བའི་དངོས་པོ་བཞིའི་ཚུལ་གྱིས་དེ་རྣམས་ཀྱི་མཆོག་ཏུ་གྱུར་བའོ། །དེ་ཉིད་གང་གི་ཚེ་དེ་བཞིན་གཤེགས་པ་རྣམས་ཀྱིས་རྡོ་རྗེ་ལྕགས་ཀྱུ་སྩལ་ནས་མིང་གི་དབང་བསྐུར་བས་དབང་བསྐུར་བ་དེའི་ཚེ། རྡོ་རྗེ་འགུགས་པ་ཞེས་བྱའོ། །དེ་ལྟར་མཚན་བདུན་ནོ། །བཛྲ་རཱ་ག་ཞེས་བྱ་བ་ནི་རྡོ་རྗེ་ཆགས་པའི་སྙིང་པོའོ། །བདེ་བ་ཆེན་པོ་ཞེས་བྱ་བ་ནི་བདེ་བ་ཡང་ཡིན་ལ་ཆེན་པོ་ཡང་ཡིན་པས་བདེ་བ་ཆེན་པོ་སྟེ། བདེ་བ་ཆེན་པོ་ཉིད་ལ་བདེ་བ་ཆེན་པོ་ཞེས་བྱའོ། །དེ་ཡང༌། ཀུན་གྲུབ་མི་འགྱུར་བདེ་བ་ནི། བདེ་བ་ཆེན་པོ་ཞེས་བཤད་དོ། །ཞེས་གསུངས་པས་ཆོས་བདག་མེད་པའི་ཡེ་ཤེས་ནི་བདེ་བ་ཆེན་པོའོ། །རྡོ་རྗེ་མདའ་ནི་ཞེས་བྱ་བ་ནི་དེའི་མཚན་མའི་ཕྱག་རྒྱའོ། །དབང་བྱེད་པ་ཞེས་བྱ་བ་ནི་ཐམས་ཅད་མཁྱེན་པའི་ཡེ་ཤེས་ཀྱིས་སྐལ་བ་ཇི་ལྟ་བ་བཞིན་དུ་སེམས་ཅན་རྣམས་དབང་དུ་མཛད་པས་ན་དབང་དུ་མཛད་པའོ། །བདུད་ཀྱི་འདོད་པ་ཞེས་བྱ་བ་ནི། བདུད་ཀྱང་ཡིན་ལ་འདོད་པ་ཡང་ཡིན་པས་ན་བདུད་ཀྱི་འདོད་པ་སྟེ། ཉན་ཐོས་དང༌། རང་སངས་རྒྱས་ཀྱི་སེམས་གསོད་པས་ན་བདུད་དོ། །དེ་ཉིད་ནི་བྱང་ཆུབ་ཀྱི་སེམས་ཀྱི་ངོ་བོ་ཉིད་ཡིན་པས་ན་འདོད་པ་སྟེ། འདི་ནི་མཚན་གཅིག་ཡིན་ནོ།། འདིས་ནི་རྡོ་རྗེ་ཆགས་པའི་སྐུའི་ཚུལ་བཤད་པ་ཡིན་ནོ། །རྡོ་རྗེ་ཆེ་ཞེས་བྱ་བ་ནི་སྤྲོ་བའི་ཚུལ་གྱིས་སོ། །རྡོ་རྗེ་གཟུ་ཞེས་བྱ་བ་ནི་མཚན་མའི་སྒོ་ནས་ཏེ། དེ་ལྟར་ན་བདུན་ནོ། །བཛྲ་སཱ་དྷུ་ཞེས་བྱ་བའི་མཚན་འདི་ནི་རྡོ་རྗེ་ལེགས་པའི་སྙིང་པོའི་སྒོ་ནས་སོ། །སེམས་དཔའ་མཆོག་ཅེས་བྱ་བ་


DTG057_Page_0206
[མ་དཔེ་གཟིགས་ན་འདིར་གནོན།]

ནི་དེ་བཞིན་གཤེགས་པ་ཐམས་ཅད་ཀྱི་དགྱེས་པ་ཡང་དག་པར་བསྐྱེད་པས་བླ་ན་མེད་པ་ཡིན་པས་སེམས་དཔའ་མཆོག་གོ །རྡོ་རྗེ་མགུ་བ་ཞེས་བྱ་བ་ནི་དེ་ཉིད་ཀྱི་མཚན་མའི་ཕྱག་རྒྱ་ནི་རྡོ་རྗེ་མགུ་པའོ། །དགའ་བ་ཆེ་ཞེས་བྱ་བ་ནི་མགུ་བའི་ཚུལ་གྱིས་ནམ་མཁའ་ཐམས་ཅད་ཁྱབ་པར་མཛད་བས་སོ། །རབ་དགྱེས་རྒྱལ་པོ་རྡོ་རྗེ་མཆོག །ཅེས་བྱ་བ་ནི། རབ་དགྱེས་རྒྱལ་པོ་ཡང་ཡིན་ལ། རྡོ་རྗེ་མཆོག་ཀྱང་ཡིན་པས། རབ་དགྱེས་རྒྱལ་པོ་རྡོ་རྗེ་མཆོག་སྟེ། རྡོ་རྗེ་ལེགས་པའི་སྐུའོ། །དེ་ལ་རབ་དགྱེས་ནི་ཡིད་བདེ་བའོ། །དེས་མཛེས་ཤིང་འབར་བས་ན་རབ་དགྱེས་རྒྱལ་པོའོ། །དེ་ཉིད་ནི་རྡོ་རྗེ་སྟེ། སངས་རྒྱས་དང་བྱང་ཆུབ་སེམས་དཔའ་རྣམས་ལ་མཆོག་ཏུ་གྱུར་པས། རབ་དགྱེས་རྒྱལ་པོ་རྡོ་རྗེ་མཆོག །ཅེས་བྱའོ། །རྡོ་རྗེ་དགྱེས་ཁྱོད་ཅེས་བྱ་བའི་མཚན་འདི་ནི་ཞེས་བྱ་བ་ནི་རྡོ་རྗེ་རིན་ཆེན་གྱི་སྙིང་པོའི་སྒོ་ནས་སོ། །རྡོ་རྗེའི་དོན་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བ་ཉིད་ཀྱིས་ན་མཆོག་ཏུ་གྱུར་པའི་ཕྱིར་རྡོ་རྗེ་བཟང་པོའི་དོན་ཏེ། རྡོ་རྗེ་རྣམས་ཀྱི་དོན་མཛེས་པའོ། །རྡོ་རྗེ་ནམ་མཁའ་ཞེས་བྱ་བ་ནི་རྡོ་རྗེ་རིན་ཆེན་གྱི་འབྱུང་གནས་ཡིན་པས་དང༌། ནམ་མཁའ་དང་མཉམ་པའི་འོད་མངའ་བས་ན་རྡོ་རྗེ་ནམ་མཁའོ། །ནོར་བུ་ཆེ་ཞེས་བྱ་བ་ནི་རྡོ་རྗེ་རིན་ཆེན་གྱི་ཕྱག་རྒྱས་ནམ་མཁའ་ཁྱབ་པར་སྤྲོས་པས་ན་ནོར་བུ་ཆེའོ། །ནམ་མཁའི་སྙིང་པོ་རྡོ་རྗེ་ཕྱུག །ཅེས་བྱ་བ་ནི། ནམ་མཁའི་སྙིང་པོ་ཡང་ཡིན་ལ། རྡོ་རྗེས་ཕྱུག་པ་ཡང་ཡིན་པས་ན། ནམ་མཁའི་སྙིང་པོ་རྡོ་རྗེ་ཕྱུག །ཅེས་བྱ་བ་སྟེ། ནམ་མཁའི་སྙིང་པོའི་སྐུ་ནི་ནམ་མཁའི་སྙིང་པོ་ཉིད་ཡིན་པར་ཡང་དག་པར་བརྙེས་པའོ། །རྡོ་རྗེ་སྙིང་པོ་ཞེས་བྱ་བ་ནི་མིང་གི་དབང་བསྐུར་བའི་སྒོ་ནས་རྡོ་རྗེ་སྙིང་པོ་ཞེས་བྱ་སྟེ། དེ་ལྟར་ན་མཚན་དྲུག་ཡིན་ནོ། །བཛྲ་ཏེ་ཛ་ཞེས་བྱ་བ་ནི་སྙིང་པོའི་སྒོ་ནས་སོ། །ཆེར་འང་རབ་ཞེས་བྱ་བ་ནི་ནམ་མཁའ་ཁྱབ་པའི་འོད་མངའ་བའོ། །རྡོ་རྗེ་ཉི་མ་ཞེས་བྱ་བ་ནི་རྡོ་རྗེ་ཉི་མའི་ཕྱག་རྒྱའི་ཚུལ་གྱི་སྒོ་ནས་སོ། །རྒྱལ་བའི་འོད་ཅེས་བྱ་བ་ནི་རྒྱལ་བ་རྣམས་ཀྱི་འོད་ཀྱི་མདངས་འདི་ལ་མངའ་བས་ན་རྒྱལ་བའི་འོད་དེ། ནམ་མཁའ་དང་མཉམ་པ་ཉིད་ཀྱི་ཡེ་ཤེས་ལས་བྱུང་


DTG057_Page_0207
[མ་དཔེ་གཟིགས་ན་འདིར་གནོན།]

བའི་དེ་བཞིན་གཤེགས་པ་ཕྲ་རབ་བསྡུས་པ་ཉིད་ཀྱིས་ནི། ངེའི་མདངས་བརྙེས་པས་རྒྱལ་བའི་འོད་ཅེས་བྱའོ། །རྡོ་རྗེའི་འོད་ཟེར་ཞེས་བྱ་བ་ནི་མི་ཕྱེད་པའི་འོད་འདི་ལ་མངའ་བས་ན་རྡོ་རྗེའི་འོད་ཟེར་རོ། །གཟི་བརྗིད་ཆེ་ཞེས་བྱ་བ་ནི་འགེག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་མོ་དང་མཉམ་པའི་ཉི་མ་རྣམ་པར་ལྷག་པའི་འོད་མངའ་བས་ན་གཟི་བརྗིད་ཆེའོ། །རྡོ་རྗེའི་འོད་ཅེས་བྱ་བ་ནི་མིང་གི་དབང་བསྐུར་བའི་མཚན་ཏེ། དེ་ལྟར་ན་མཚན་བདུན་ནོ། །བཛྲ་ཀེ་ཏུ་ཞེས་བྱ་བ་ནི་སྙིང་པོའི་སྒོ་ནས་སོ། །སེམས་ཅན་དོན་རབ་ཅེས་བྱ་བ་ནི་སེམས་ཅད་རྣམས་ཚིམ་པར་མཛད་པས་ན། སེམས་ཅན་རྣམས་ཀྱི་དོན་མཛད་པ་འདི་ལ་མངའ་བས་ན་སེམས་ཅན་དོན་རབ་བོ། །རྡོ་རྗེ་རྒྱལ་མཚན་ཞེས་བྱ་བ་ནི་མཚན་མའི་ཕྱག་རྒྱའི་ཚུལ་གྱིས་ན་རྡོ་རྗེ་རྒྱལ་མཚན་ཞེས་བྱ་བའོ། །རབ་དགའ་བྱེད་ཅེས་བྱ་བ་ནི་རྡོ་རྗེ་རྒྱལ་མཚན་དེ་ཉིད་ཀྱིས་དེ་བཞིན་གཤེགས་པ་ཐམས་ཅད་ཀྱི་སྦྱིན་པའི་ཕ་རོལ་ཏུ་ཕྱིན་པ་ལ་ངེས་པར་སྦྱོར་བས་ན་རབ་དགའ་བྱེད་དོ། །རྡོ་རྗེ་ཆེན་པོ་ཞེས་བྱ་བ་ནི་རྡོ་རྗེ་རྒྱལ་མཚན་གྱི་ཕྱག་རྒྱས་ནམ་མཁའ་ཐམས་ཅད་ཁྱབ་པར་མཛད་པས་ན་རྡོ་རྗེ་ཆེན་པོའོ། །རིན་ཆེན་དཔལ་ཞེས་བྱ་བ་ནི་བྱང་ཆུབ་སེམས་དཔའི་རིན་ཆེན་དཔལ་གྱི་སྐུ་ལ་བྱ་བར་བཤད་དོ། །རྡོ་རྗེ་དབལ་ཞེས་བྱ་བ་ནི་མིང་གི་དབང་བསྐུར་བའི་སྒོ་ནས། དེ་ལྟར་ན་མཚན་བདུན་ནོ། །བཛྲ་ཧཱ་ས་ཞེས་བྱ་བ་ནི་སྙིང་པོའི་སྒོ་ནས་སོ། །བཞད་པ་ཆེན་པོ་ཞེས་བྱ་བ་ནི། བཞད་པའི་ཕྱག་རྒྱས་ནམ་མཁའ་ཐམས་ཅད་ཁྱབ་པར་མཛད་པས་ན་བཞད་པ་ཆེའོ། །རྡོ་རྗེ་འཛུམ་པ་ཞེས་བྱ་བ་ནི་རྡོ་རྗེ་བཞད་པའི་མཚན་མའི་ཕྱག་རྒྱལ་དེ་སྐད་ཅེས་བྱ་བར་བཤད་དོ། །ཕྱག་རྒྱ་དེ་ཉིད་ཀྱིས་དེ་བཞིན་གཤེགས་པ་ཐམས་ཅད་འཛུམ་པ་ལ་དེས་པར་སྦྱོར་བར་མཛད་པས་ན་ངོ་མཚན་ཆེ་ཞེས་བྱ་སྟེ། རྣམ་པར་རྟོག་པ་མི་མངའ་བ་རྣམས་ལ་ནི་བཞད་པ་མི་མངའ་བར་ཕྱིར་རོ། །དགའ་ཞིང་རབ་དགའ་ཞེས་བྱ་བ་ནི་སེམས་ཅན་གྱི་ཁམས་དགའ་བ་དང་མགུ་བ་གང་ལ་མངའ་བ་དེ་ནི་དགའ་ཞིང་རབ་དགའ་སྟེ། རྡོ་རྗེ་བཞད་པའི་སྐུའོ། །རྡོ་རྗེ་སྟོན་ཞེས་བྱ་བ་ནི་རྡོ་རྗེ་སྟོན་པ་འདི་ལ་མངའ་བས་ན་རྡོ་རྗེ་སྟོན་ཏེ་འཛུམ་བའི་ཁོངས་སུ་གཏོགས་པ་མི་དམིགས་


DTG057_Page_0208
[མ་དཔེ་གཟིགས་ན་འདིར་གནོན།]

པའི་ཆོས་ཀྱི་སྦྱིན་པའི་རྡོ་རྗེ་ཉེ་བར་སྟོན་བའོ། །རྡོ་རྗེ་དགའ་བ་ཞེས་བྱ་བའི་མིང་གི་དབང་བསྐུར་བས་ན་དེའི་སྒོ་ནས་འདི་སྐད་ཅེས་བྱ་སྟེ། དེ་ལྟར་མཚན་བདུན་ནོ། །རྡོ་རྗེ་ཆོས་ནི་བཛྲ་དྷརྨྨ་ཞེས་བྱ་བའི་སྙིང་པོའི་སྒོ་ནས་སོ། །རབ་དགའ་དེ་ཉིད་དོན་ནི་མཛེས་བའི་དེ་ཁོ་ན་ཉིད་ནི་དེ་ཉིང་དོན་ཏེ། རང་བཞིན་གྱིས་དག་པའི་དོན་ལ་འདི་སྐད་ཅེས་བྱའོ། །རྡོ་རྗེ་པདྨོ་ཞེས་བྱ་བ་ནི་བཅོམ་ལྡན་འདས་ཀྱི་པདྨོའི་ཕྱག་རྒྱ་ལ་བྱའོ། །རབ་དགའ་བྱེད་ཅེས་བྱ་བ་ནི་རང་བཞིན་གྱིས་རྣམ་པར་དག་པའི་ཆོས་ཉིད་ཀྱི་ཡེ་ཤེས་ཀྱིས་སེམས་ཅན་རྣམས་ཤིན་ཏུ་སྦྱོང་བར་མཛད་པས་ན་རབ་དགའ་བྱེད་དོ། །འཇིག་རྟེན་དབང་ཕྱུག་ཅེས་བྱ་བ་ལ་འཇིག་རྟེན་ནི་སེམས་ཅན་གྱི་ཁམས་རྣམས་སོ། །དབང་ཕྱུག་ནི་དེའི་གཙོ་བོ་ཡིན་བས་ན་རྡོ་རྗེ་ཆོས་ཀྱི་སྐུའོ། །རྡོ་རྗེ་སྤྱན་ཞེས་བྱ་བ་ནི་རྡོ་རྗེ་སྤྱན་གྱི་ཕྱག་རྒྱ་མཛེས་པ་མངའ་བས་རྡོ་རྗེ་སྤྱན་ནོ། །རྡོ་རྗེ་སྤྱན་ཁྱོད་ཅེས་བྱ་བ་ནི་མིང་གི་དབང་བསྐུར་བའི་སྒོ་ནས་ཏེ། དེ་ལྟར་ན་མཚན་བདུན་ནོ། །རྡོ་རྗེ་རྣོན་པོ་ནི་བཛྲ་ཏཱི་ཀྵྞ་ཞེས་བྱ་བ་སྟེ། སྙིང་པོའི་སྒོ་ནས་སོ། །ཐེག་པ་ཆེན་པོ་ཞེས་བྱ་བ་ནི་ཤེས་རབ་དང་ཡེ་ཤེས་ཆེན་པོའི་ངོ་བོ་ཉིང་ཡིན་པས་ན་ཐེག་པ་ཆེན་པོ་ཉིད་དོ། །བཅོམ་ལྡན་འདས་འཕགས་པ་འཇམ་དཔལ་ལོ། །རྡོ་རྗེ་རལ་གྲི་ཞེས་བྱ་བ་ནི་རལ་གྲིའི་ཕྱག་མཚན་གྱི་སྒོ་ནས་སོ། །མཚན་ཆེན་པོ་ཞེས་བྱ་བ་ནི་རལ་གྲིས་ནམ་མཁའ་ཁྱབ་པར་མཛད་པའོ། །འཇམ་དཔལ་ཞེས་བྱ་བ་ནི་འཇམ་དཔལ་གཞོན་ནུའི་སྐུ་མངའ་བས་སོ། །རྡོ་རྗེ་རབ་ཏུ་ཟབ་ཅེས་བྱ་བ་ནི་རྡོ་རྗེ་དང་འདྲ་བའི་ཤེས་རབ་ཟབ་མོ་འདི་ལ་མངའ་བས་ན་དེ་སྐད་ཅེས་བྱའོ། །རྡོ་རྗེ་བློ་ཞེས་བྱ་བ་ནི་མིང་གི་དབང་བསྐུར་བའི་སྒོ་ནས་ཏེ། དེ་ལྟར་ན་མཚན་བདུན་ནོ། །རྡོ་རྗེ་རྒྱུ་ནི་བཛྲ་ཧེ་ཏུ་ཞེས་བྱ་བ་སྟེ། སྙིང་པོའི་སྒོ་ནས་སོ། །སྙིང་པོ་ཆེ་ཞེས་བྱ་བ་ནི་འཁོར་ལོའི་ཕྱག་རྒྱས་ནམ་མཁའ་ཁྱབ་པར་མཛད་པའོ། །རྡོ་རྗེ་འཁོར་ལོ་ཞེས་བྱ་བ་ནི་འཁོར་ལོའི་ཕྱག་རྒྱའི་སྒོ་ནས་སོ། །ཚུལ་ཆེན་པོ་ཞེས་བྱ་བ་ནི་རྡོ་རྗེ་དབྱིངས་ལ་སོགས་པའི་དཀྱིལ་འཁོར་ཆེན་པོའི་ཚུལ་གྱིས་ནམ་མཁའ་ཁྱབ་པར་སྤྲོས་པས་སོ། །རབ་བསྐོར་ཞེས་བྱ་བ་ནི། དེ་ཉིད་སེམས་བསྐྱེད་པ་ཙམ་གྱིས་རབ་ཏུ་བསྐོར་བར་མཛད་པས་ན་རབ་


DTG057_Page_0209
[མ་དཔེ་གཟིགས་ན་འདིར་གནོན།]

བསྐོར་རོ། །རྡོ་རྗེ་ལས་བྱུང་བ་ཞེས་བྱ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རྡོ་རྗེ་ལས་བྱུང་བའི་ཕྱིར་རོ། །རྡོ་རྗེ་སྙིང་པོ་ཞེས་བྱ་བ་ནི་མིང་གི་དབང་བསྐུར་བའི་སྒྲོ་ནས་ཏེ། དེ་ལྟར་ན་མཚན་བདུན་ནོ། །རྡོ་རྗེ་གསུངས་བ་ཞེས་བྱ་བ་ནི་བཛྲ་བྷཱ་ཥ་སྟེ་སྙིང་པོའི་སྒོ་ནས་སོ། །རང་རིག་མཆོག་ཅེས་བྱ་བ་ནི་མཛེས་པའི་རིག་པ་ཡིན་པས་ན་རང་རིག་སྟེ། སོ་སོ་ཡང་དག་པར་རིག་པ་བཞིའི་རང་བཞིན་གྱི་སྒྲའི་རྗེས་སུ་འགྲོ་བའི་ཤེས་རབ་པོ། །ཚུལ་དེ་ཉིད་ཀྱིས་ན་མཆོག་ཡིན་པས་ན་རང་རིག་མཆོག་གོ །རྡོ་རྗེ་ཟློས་བ་ཞེས་བྱ་བ་ནི་ལྗགས་ཀྱི་ཕྱག་རྒྱའི་སྒོ་ནས་སོ། །རབ་སྒྲུབ་སྦྱིན་ཞེས་བྱ་བ་ནི་ལྷགས་ཀྱི་ཕྱག་རྒྱ་དེས་དངོས་གྲུབ་བཟང་པོ་སྩོལ་བར་མཛད་པས་ན་རབ་སྒྲུབ་སྦྱིན་ནོ། །མི་གསུངས་རྡོ་རྗེ་ཞེས་བྱ་བ་ནི་རྡོ་རྗེ་གསུང་གི་སྐུ་ལའོ། །མཆོག་གྲུབ་པ་ཞེས་བ་ནི་རྡོ་རྗེ་ལྗགས་ཀྱིས་དེ་བཞིན་གཤེགས་པ་ཐམས་ཅད་ལས་རང་གིས་དངོས་གྲུབ་བརྙེས་པས་ན་མཆོག་གྲུབ་པའོ། །རྡོ་རྗེ་གསུངས་ཞེས་བྱ་བ་ནི་མིང་གི་དབང་བསྐུར་བའི་སྒོ་ནས་ཏེ། དེ་ལྟར་ན་མཚན་བདུན་ནོ། །རྡོ་རྗེ་ལས་ནི་བཛྲ་ཀརྨྨ་ཞེས་བྱ་བ་སྟེ་སྙིང་པོའི་སྒོ་ནས་སོ། །རབ་རྡོ་རྗེའི་བཀའ་ཞེས་བྱ་བ་ནི་ཤིན་ཏུ་བཟང་པོའི་རྡོ་རྗེ་ནི་རབ་རྡོ་རྗེ་སྟེ། དེ་བཞིན་གཤེགས་པ་རྣམས་སོ། །དེ་རྣམས་ཀྱི་བཀའ་ནི་བསྒོ་བ་སྟེ། སངས་རྒྱས་ཀྱི་སྤྲུལ་པ་དང༌། སེམས་ཅན་རྣམས་ཀྱི་དོན་བྱ་བའོ། །དེ་འདི་ལ་མངའ་བས་ན་རབ་རྡོ་རྗེའི་བཀའོ། །ལས་ཀྱི་རྡོ་རྗེ་ཞེས་བྱ་བ་ནི། རྩེ་མོ་བཅུ་གཉིས་པའི་སྣ་ཚོགས་རྡོ་རྗེའི་ཕྱག་རྒྱའི་སྒོ་ནས་སོ། །ཀུན་རབ་འགྲོ་ཞེས་བྱ་བ་ནི་སྣ་ཚོགས་རྡོ་རྗེས་ནམ་མཁའ་ཁྱབ་པའོ། །རྡོ་རྗེ་ངེས་པ་ཞེས་བྱ་བ་ནི་བྱང་ཆུབ་སེམས་དཔའ་སྣ་ཚོགས་རྡོ་རྗེའི་སྐུའི་སྒོ་ནས་སོ། །རྒྱ་ཆེ་བ་ཞེས་བྱ་བ་ནི་མཆོད་པ་མ་ལུས་ཤིང་ལུས་པ་མེད་པས་དེ་བཞིན་གཤེགས་པ་ཐམས་ཅད་མཆོད་པས་ན་རྒྱ་ཆེ་བའོ། །རྡོ་རྗེ་ཀུན་ཞེས་བྱ་བ་ནི་མིང་གི་དབང་བསྐུར་བའི་སྒོ་ནས་ཏེ། དེ་ལྟར་ན་མཚན་བདུན་ནོ། །རྡོ་རྗེ་བསྲུང་བ་ནི་བཛྲ་རཀྵ་སྟེ་སྙིང་པོའི་སྒོ་ནས་སོ། །བརྟན་པ་ཆེ་ཞེས་བྱ་བ་ནི་འཁོ