རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བའི་དཀའ་འགྲེལ།
རབ་ཏུ་ཞི་བའི་བཤེས་གཉེན།
རྒྱ་གར་སྐད་དུ། མཱ་ཡ་ཛཱ་ལ་ཏནྟྲ་རཱ་ཛ་པཉྫི་ཀ །བོད་སྐད་དུ། རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བའི་དཀའ་འགྲེལ། བཅོམ་ལྡན་འདས་ངག་གི་དབང་ཕྱུག་ལ་ཕྱག་འཚལ་ལོ། །སྒྱུ་འཕྲུལ་དྲ་བ་དྲི་མ་སེལ་མཛད་པ། །ཐབས་དང་ཤེས་རབ་ལས་བྱུང་ཕྱག་འཚལ་ཏེ། །དེ་ཡི་རྟོགས་པར་དཀའ་བའི་ཚིག་བཤད་པ། །དྲན་པར་བྱ་བའི་ཕྱིར་ནི་བྲི་བར་བྱ། །འདིར་དེ་ཁོ་ན་ཉིད་རྣམ་པ་བཅུ་ནི་གཙོ་བོ་ཡིན་པས་ཡང་དག་པར་བརྗོད་པར་བྱ་བ་ཡིན་ལ། ཇི་སྲིད་བཅོམ་ལྡན་འདས་རྣམ་པར་སྣང་མཛད་ཆེན་པོ་འདི་གདུལ་བྱའི་སྐྱེ་བོ་རྣམས་ཇི་ལྟ་བ་བཞིན་དུ་རྗེས་སུ་གཟུང་བར་བྱ་བའི་ཕྱིར་བྱུང་བར་གྱུར་པས་འགྲེལ་པ་ལ་སོགས་པ་གསུམ་ནི་དོན་གྱི་དབང་གིས་སྟོན་པར་འགྱུར་རོ། །འདིར་སྡུད་པར་བྱེད་པ་ཕྱག་ན་རྡོ་རྗེ་ཚད་མ་ཉིད་ཡིན་པར་བསྟན་པར་བྱ་བའི་ཕྱིར་གླེང་གཞི་བཤད་པ་སྨྲས་པ་ནི་འདི་སྐད་ཅེས་བྱ་བ་ལ་སོགས་པ་ལ། འདི་སྐད་ཅེས་བྱ་བ་ནི་རྒྱུད་ཀྱི་དོན་ཐམས་ཅད་སྟོན་པའི་ཚིག་གི་ཕྲད་དོ། །བདག་གིས་ཞེས་བྱ་བ་ནི་མངོན་སུམ་དུ་ཐོས་ཀྱིས་རྟོགས་པ་མ་ཡིན་པའོ། །དུས་གཅིག་ན་ཞེས་བྱ་བ་ནི་གཞན་དུ་གཞན་དག་ཐོས་པ་སྟེ་བདག་ཉིད་ཐོས་བ་མང་པོར་སྟོན་ཏོ། །བཅོམ་ལྡན་འདས་ཞེས་བྱ་བ་འདིས་ནི་མི་ཤེས་པ་སྤང་བ་ཕུན་སུམ་ཚོགས་པའོ། །ཁང་པ་བརྩེགས་པའི་ཞེས་བྱ་བ་ལ་སོགས་པས་ནི་མེ་ལོང་ལྟ་བུ་དང་མཉམ་པ་ཉིད་དང་སོ་སོར་ཀུན་དུ་རྟོག་པ་དང་བྱ་བ་སྒྲུབ་པའི་ཡེ་ཤེས་ཀྱི་སྒོ་ནས་གནས་ཕུན་སུམ་ཚོགས་བ་སྟེ། འདི་དག་གིས་བདག་གི་ཕུན་སུམ་ཚོགས་པ་བསྟན་ནས་གཞན་གྱི་ཕུན་སུམ་ཚོགས་པ་ཉེ་བར་བསྟན་པར་བྱ་བའི་ཕྱིར། རྡོ་རྗེ་འཁོར་ལོ་ཞེས་བྱ་བ་ལ་སོགས་པ་གསུངས་ཏེ་རྡོ་རྗེ་འཁོར་ལོས་རབ་ཏུ་སྤྲས་པའི་ཆ་བྱད་སྣ་ཚོགས་འཆང་པའི་དེ་བཞིན་གཤེགས་པ་ལ་སོགས་པའི་རིགས་དང་ལྡན་པ་རྣམས་ཀྱི་ཆ་ལུགས་བསྒྱུར་བ་རྣམ་པ་སྣ་ཚོགས་ཀྱིས་སྤྲས་པའི་རྣམ་པར་སྣང་མཛད་ཀྱི་སྤྲུལ་པས་ཞེས་བྱ་བའི་བར་དུའོ། །རྣམ་པར་སྣང་མཛད་ཀྱི་ཞེས་བྱ་བ་ལ་སོགས་པས་ནི་གཞན་གྱི་དོན་མཛད་པའི་ཐབས་ཕུན་སུམ་ཚོགས་པ་སྟེ་རྣམ་པར་སྣང་མཛད་ཉིད་སྙིང་པོ་ཡིན་ལ་
དེ་ལས་བྱུང་བས་ན་རྣམ་པར་སྣང་མཛད་ཀྱི་སྙིང་པོ་ལས་བྱུང་པའོ། །སྣ་ཚོགས་ནི་དོན་ཡོད་གྲུབ་པའི་དབང་ཕྱུག་གོ །རྡོ་རྗེ་ནི་མི་བསྐྱོད་པའོ། །རིན་པོ་ཆེ་ནི་རིན་ཆེན་འབྱུང་ལྡན་ནོ། །ཐབས་དང་ཤེས་རབ་དག་གིས་རྣམ་པར་རོལ་པ་བསྟན་པར་བྱ་བའི་ཕྱིར་སྤྱོད་པ་ཞེས་བྱ་བ་ལ་སོགས་པ་གསུངས་ཏེ། སྤྱོད་པ་ནི་ལ་ལ་དག་གིས་ཐབས་ཀྱི་ཕ་རོལ་ཏུ་ཕྱིན་པའོ་ཞེས་འདོད་དོ། །སྤྱད་པ་སྤྱོད་པས་རྣམ་པར་སྣང་མཛད་ལ་སོགས་པའི་ལྷ་མོ་བཞིའི་པདྨའི་གོ་སྐབས་ནས་སམ། སྟོང་བ་ཉིད་ལ་སོགས་པའི་རྣམ་པར་ཐར་པའི་སྒོ་བཞིའི་ངོ་བོའི་རྡོ་རྗེའི་གོ་སྐབས་ནས་བྱུང་བའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཚོགས་ལ་སོགས་པའི་འཁོར་དཔག་ཏུ་མེད་པ་རྣམས་ཀྱིས་ཡོངས་སུ་བསྐོར་བའོ། །མདུན་གྱིས་བལྟས་པ་ཞེས་བྱ་བ་ནི་གཙོ་བོར་བྱས་པའོ། །ཐུགས་རྗེ་ཆེན་པོ་སྔོན་དུ་འགྲོ་བའི་སེམས་ཅན་ཐམས་ཅད་བསྒྲལ་བལ་མངོན་པར་བརྩོན་པར་མཛད་པ་ནི་བཤད་མ་ཐག་པ་ཉིད་ཀྱི་རྒྱུད་བསྟན་པ་ཡིན་ནོ། །དེ་ནས་ཞེས་བྱ་བ་ལ་སོགས་པ་ནི་རྒྱུད་ཀྱི་དོན་ཉེ་བར་སྟོན་ཏེ་སྒྱུ་འཕྲུལ་གྱི་དྲ་བ་ནི་དམ་ཚིག་གི་དཀྱིལ་འཁོར་ལ་སོགས་པ་སྟེ་ཀུན་རྫོབ་ཡིན་པའི་ཕྱིར་རོ། །ཡེ་ཤེས་ཆེན་པོས་རྣམ་པར་བསྒྱིངས་པ་ནི་བྱང་ཆུབ་ཀྱི་སེམས་ལས་བྱུང་བའི་ཕྱིར་རོ། །སྒྲུབ་པ་ཞེས་བྱ་བ་ནི་རྒྱུའོ། །རོལ་པས་ཞེས་བྱ་བ་ནི་ཐབས་དང་ཤེས་རབ་དག་གི་རྣམ་པར་འཕྲུལ་པས་རོལ་ཅིང་རྩེ་བའོ། །སྟང་སྟབས་ཀྱིས་ཞེས་བྱ་བ་ནི་གཡས་བརྐྱང་བ་ལ་སོགས་པའི་སྟང་སྟབས་རྣམས་ཀྱིས་མི་མཐུན་པའི་ཕྱོགས་ཐམས་ཅད་རྣམ་པར་འཇིག་པ་ཡིན་པས་ན་སྟང་སྟབས་ཀྱིས་རྣམ་པར་རྒྱལ་བའོ། །ཐབས་དང་ཤེས་རབ་ལས་བྱུང་བ་ནི་བྱང་ཆུབ་སེམས་ཀྱི་བདག་ཉིད་ཅན་བདེ་བ་ཆེན་པོའོ། །དེ་ལས་རྡོ་རྗེ་ནི་དམ་ཚིག་ལ་སོགས་པ་སྟེ། དེ་ནི་གདུལ་བྱའི་སྐྱེ་བོ་རྣམས་སྒྲོལ་བར་བྱེད་པས་ནི་སྒྲོལ་བའོ། །དེ་ལྟ་བུའི་རོལ་བས་བཞད་པ་སྟོན་བའི་རྣམ་པར་འཕྲུལ་པ་ཏིང་ངེ་འཛིན་གང་དུ་སྟོན་པ་དེ་ལ་དེ་སྐད་ཅེས་བྱའོ། །ཡེ་ཤེས་རྒྱ་མཚོ་ཆེ་ནི་འོད་དཔག་ཏུ་མེད་པའོ། །ཡིད་བཞིན་ནོར་བུ་རིན་ཆེན་སྦྱིན་ནི་དོན་ཡོང་པར་གྲུབ་པ་སྟེ་དེ་ནི་ཡིད་བཞིན་གྱི་ནོར་བུ་རིན་པོ་ཆེ་དང་འདྲ་བར་བླ་ན་མེད་པའི་མཆོད་པའི་དོན་རྫོགས་པར་བྱེད་བས་སོ། །
རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བའི་ལེའུ་དང་པོའི་བཤད་པའོ།། །།རྣམ་པར་སྣང་མཛད་འབྱུང་བ་ཞེས་བྱ་བའི་དཀྱིལ་འཁོར་གྱི་རྒྱལ་པོ་ཆེན་པོ་བསྟན་པར་བྱ་བའི་ཕྱིར། དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་ཏེ། སྒྱུ་འཕྲུལ་ཆེན་པོའི་ཡེ་ཤེས་ནི་སྤྱན་ལ་སོགས་པའི་ལྷ་མོ་བསྐྱད་པའི་བྱང་ཆུབ་ཀྱི་སེམས་ཏེ་དེ་རྣམ་པར་བསྒྱིངས་པའོ། །གསང་བ་ནི་དཀྱིལ་འཁོར་ཆེན་པོའོ། །དེ་ཉིད་ཕུན་སུམ་ཚོགས་པ་ཐམས་ཅད་ཀྱི་གནས་སུ་གྱུར་པས་ན་བྱིན་གྱི་རླབས་ཀྱི་མཆོག་གོ །མི་ཕྱེད་པས་ན་རྡོ་རྗེའོ། །དེ་སྟོན་པའི་ཏིང་ངེ་འཛིན་གང་ཡིན་པ་དེ་ལའང་དེ་སྐད་ཅེས་བྱ་སྟེ་དེ་ལ་སྙོམས་པར་ཞུགས་པའོ། །ཡེ་ཤེས་ཆེན་པོ་ནི་བྱང་ཆུབ་ཀྱི་སེམས་ཏེ་དེ་ཉིད་འབར་བའོ། །འདི་ཉིད་ཀྱི་སྙིང་པོ་ཅན་གང་ཡིན་པ་ནི་རྡོ་རྗེའི་སྟེ་དཀྱིལ་འཁོར་བ་རྣམས་ཀྱིའོ། །དེ་ཉིད་ནི་སྙིང་པོ་སྟེ་དེ་རྣམས་ཀྱི་འབྱུང་གནས་སོ། །གྲངས་སུ་འགྲོ་བར་འགྱུར་བ་ཞེས་བྱ་བ་ནི་སངས་རྒྱས་ཀྱི་ཞིང་ཆེ་གེ་མོ་ཞེས་བྱ་བར་དེ་བཞིན་གཤེགས་པ་འདི་ཞེས་བྱ་བར་འགྱུར་རོ་ཞེས་གྲངས་སུ་འགྲོ་བར་མཁྱེན་པར་འགྱུར་རོ་ཞེས་བྱ་བའི་བར་དུའོ། །དང་པོ་ཁོ་ནར་ས་ཡོངས་སུ་གཟུང་བར་བྱའོ་ཞེས་བྱ་བ་ནི་འདི་སྐད་སྟོན་པར་འགྱུར་ཏེ། དང་པོར་ཇི་སྐད་བསྟན་པའི་མཚན་ཉིད་དང་ལྡན་པའི་སློབ་དཔོན་གྱིས་མངོན་པར་འདུས་བྱས་པའི་ས་གཞིར། རྣམ་པར་སྣང་མཛད་ཇི་ལྟ་བ་བཞིན་དུ་གྱུར་ནས་གདན་བཞིར་རང་གི་ལྷའི་གཟུགས་སྤྲོ་བ་ལ་སོགས་པས་བསྒོམས་ལ་སྤྲུལ་པའི་སྤྲིན་ཕྱུང་སྟེ། དེ་དག་ཉིད་ཀྱིས་ཕྱོགས་བཅུ་ན་བཞུགས་པའི་དེ་བཞིན་གཤེགས་པ་འཁོར་དང་བཅས་པ་རྣམས་ལ་ཁྱེད་རྣམས་ཀྱིས་འདིར་བྱིན་གྱིས་བརླབ་པ་ལ་བརྩོན་པར་མཛོད་ཅིག་ཅེས་གསོལ་བར་བསམ་ཞིང་སློབ་དཔོན་དང་སློབ་མ་དེ་སྲུང་བར་མཛོད་ཅིག་ཅེས་བསྐུལ་ལ། དེ་ནས་དེ་དག་ཡང་དག་པར་བསྡུས་ཏེ། ནང་དུ་བསྒོམས་ནས་རང་གི་སྙིང་གའི་ཟླ་བའི་རྡོ་རྗེའི་ལྟེ་བའི་ཡི་གེ་ཧཱུཾ་གི་ནང་དུ་གནས་པར་བྱས་ལ། དེ་ལས་བྱུང་བའི་རྡོ་རྗེ་འཛིན་པའི་སྐུ་རང་གི་རིག་པ་དང་ལྡན་པ་དང༌། བཅོམ་ལྡན་འདས་རྣམ་པར་སྣང་མཛད་གཅིག་ཏུ་གྱུར་བར་བྱས་ནས། ཡི་གེ་གསུམ་ལ་སོགས་པས་བྱིན་གྱིས་བརླབ་པ་སྔོན་དུ་འགྲོ་བས་ལག་པ་གཡས་པས་རྡོ་རྗེ་གསོར་ལ་གཡོན་དཀུར་བརྟེན་པས་རྡོ་རྗེ་དྲིལ་བུ་གསིལ་
ཞིང༌། རྐང་པའི་འོག་ཏུ་ཧཱུཾ་བཀོད་པ་ལས་རྡོ་རྗེ་འབར་བ་ཕྱུང་སྟེ། རྒྱན་གྱིས་བརྒྱན་པ་དང་བཅས་པའི་ཁྲོ་བོའི་ང་རྒྱལ་དང་ལྡན་པས་ཡི་གེ་ཧཱུཾ་བརྗོད་པ་སྔོན་དུ་འགྲོ་བ་དང༌། སློབ་དཔོན་མིང་འདི་ཞེས་བྱ་བ་ལ་སོགས་བརྗོད་ནས། རང་གི་རྡོ་རྗེ་ལས་ཁྲོ་བོའི་ལུས་ཕྱུང་སྟེ། མྱུར་བ་ཉིད་དུ་རྡོ་རྗེའི་འགྲོས་ཀྱིས་དཀྱིལ་འཁོར་གྱིས་ཀུན་དུ་བསྐོར་ནས་གདུག་པ་ཅན་ཐམས་ཅད་བསྐྲད་པར་བྱ་སྟེ། དེ་ལྟ་བུས་ནི་ས་གཞི་ཡོངས་སུ་གཟུང་བ་བྱས་པར་གྱུར་པ་ཡིན་ནོ། །ཉི་མ་གཉིས་པ་ལ་དཀྱིལ་འཁོར་བྲི་བ་འབྱུང་བར་འགྱུར་བས་གཡས་བརྐྱང་བ་ལ་སོགས་པའི་སྟང་སྟབས་ལ་རྣམ་པར་གནས་པས། ཇི་ལྟ་བཞིན་དུ་མངོན་པར་འདུས་བྱས་པའི་དཀྱིལ་འཁོར་གྱི་ས་གཞི་རྡོ་རྗེའི་རང་བཞིན་དུ་བྱིན་གྱིས་བརླབ་པོ། །གཡས་བརྐྱང་བ་ནི་གཡོན་པའི་བྱིན་པ་བསྐུམ་ལ་གཡས་པ་རྒྱར་མཐོ་ལྔར་བརྐྱང་པ་ནི་གཡས་བརྐྱང་བའོ། །གཡོན་བརྐྱང་བ་ནི་གཡོན་དེ་བཞིན་དུ་བརྐྱང་བ་སྟེ། འདི་གཉིས་ལ་ནི་རང་གི་མིང་སྨོས་པ་སྔོན་དུ་འགྲོ་བས་ཧཱུཾ་ཞེས་བྱ་བའི་སྒྲ་འོད་ཟེར་འབར་བའི་ཕྲེང་བས་ཀུན་ནས་འཁྲིགས་བ་རྣམས་ཀྱིས་དཀྱིལ་འཁོར་གྱི་ས་གཞིའི་གཏན་པ་ལ་ཐུག་གི་བར་དུ་ཁྱབ་པར་བསམས་ལ། རྡོ་རྗེ་གསོར་ཞིང་ཁྲོ་བོའི་ལྟ་བ་དང་ལྡན་པས་ཀུན་དུ་བསྐོར་བར་བྱའོ། །ལྷག་མ་རྣམས་ལ་ནི་ཅི་རིགས་པར་སྦྱར་བར་བྱའོ། །ས་གའི་འདུག་སྟངས་ནི་རྐང་པའི་ཕྱི་རོལ་གྱི་སོར་མོའི་བར་རྒྱར་སོར་ཉི་ཤུ་རྩ་དྲུག་གིས་ཆོད་པར་བྱས་ལ། པུས་མོ་གཉིས་བརྐྱང་བའོ། །ཟླུམ་པོའི་འདུག་སྟངས་ཀྱང་དེ་ཉིད་ལས་ལག་བ་གཉིས་རྒྱར་དང་པའི་གཤོག་པ་ལྟར་བྱས་པའོ། །མཐུན་པའི་རྐང་སྟབས་ནི་རྐང་པ་གཉིས་ཕན་ཚུན་དུ་མཐེ་བོ་དང་ལོང་མོ་བཅེར་བའོ། །རུས་སྦལ་གྱི་རྐང་སྟབས་ནི་རྐང་པ་གཡས་པས་རྐང་པ་གཡོན་པ་མནན་པའོ། །རྡོ་རྗེ་འདེགས་པ་ནི་རྡོ་རྗེ་སྙིང་གར་འདེགས་པའོ། །རྡོ་རྗེ་འཇོ་ཚུལ་ནི་རྡོ་རྗེ་ཉིད་སྒེག་པ་དང་བཅས་པས་ཡོངས་སུ་བསྐོར་བའོ། །རྐང་པ་ཡ་གཅིག་གི་སྟང་སྟབས་ནི་རྐང་པ་གཅིག་བཏེག་ལ་རྐང་པ་ཡ་གཅིག་གིས་འགྲོ་བའོ། །བུང་བའི་འཕུར་སྟངས་ནི་ལུས་ཀུན་དུ་བསྐོར་བའོ། །སེང་གེའི་ལྟ་ཐབས་ནི་གཡས་བརྐྱང་བས་རང་གི་ཁ་གདངས་ལ། ལག་པ་གཡོན་
པའི་མཁྲིག་མའི་སྟེང་དུ་ལག་པ་གཡས་པ་བརྐྱང་བའི་མཁྲིག་མ་སྦྱར་བའོ། །སེང་གེའི་གླལ་བ་ནི་འདི་ཉིད་ལས་རྒྱབ་ཏུ་ལྟ་བར་བྱེད་པའོ། །རྡོ་རྗེ་དྲལ་བ་ནི་སྙིང་གར་རྡོ་རྗེ་བཅིང་བ་བྱེད་པའོ། །རྡོ་རྗེ་གསོར་བ་ནི་ལག་པ་གཉིས་ཀྱིས་རྡོ་རྗེ་བསྐོར་ནས་འོག་ཏུ་རྡོ་རྗེ་ཡོངས་སུ་བསྐོར་བ་ལས་བརྗིད་བབ། དང་བཅས་པས་བསྐྱོད་པའོ། །རྡོ་རྗེའི་སྟང་སྟབས་ནི་རྡོ་རྗེ་བསྣུན་པའི་ཚུལ་ལོ། །རྡོ་རྗེ་གར་ནི་རྡོ་རྗེ་དང་གར་བྱས་པས་ལག་པ་གཡོན་པ་བརྐྱང་ལ། དེའི་རྩ་བར་གཡས་པ་བ་དན་གསུམ་པར་བྱས་པས་འདི་འཛིན་པའོ། །རྡོ་རྗེ་འཇིགས་སུ་རུང་བ་ནི་ཁའི་སྟེང་ནས་འོག་ཏུ་ལག་པ་བརྐྱང་ནས་དེ་ཉིད་འཇིགས་བྱེད་ཀྱི་ཚུལ་དུ་བྱས་པའོ། །རྡོ་རྗེ་རོ་ལངས་མ་ནི་ལག་པ་གཉིས་ཀྱིས་རོ་བླངས་ལ་ཟབ་ལྟར་བྱེད་ཅིང་འགྲོ་བའོ། །རྡོ་རྗེ་ཐོ་བ་ནི་རྡོ་རྗེ་ཁུ་ཚུར་གྱིས་ཐོབ་བརྡེག་པའི་ཚུལ་དུ་བྱེད་པའོ། །སྒོ་བཞི་བྱིན་གྱིས་བརླབ་པ་ནི་ཤར་ལ་སོགས་པའི་ཕྱོགས་སུ་ས་གནོན་པའི་ཕྱག་རྒྱ་དང་ལྡན་པས་སྟོང་པ་ཉིད་ལ་སོགས་པ་རྣམ་པར་ཐར་པའི་སྒོ་བཞི་བསྒོམ་པའོ། །རྡོ་རྗེའི་གདུ་བུ་ནི་སྐོར་ཕྱོགས་སུ་སོང་སྟེ་རིམ་གྱིས་ས་གཞིར་རྐང་པ་གཉིས་འཇོག་པའོ། །བུད་མེད་ཀྱི་སྒྱུ་འཕྲུལ་གྱི་སྟང་སྟབས་ནི། རྡོ་རྗེ་གར་སྔོན་དུ་འགྲོ་བས་ལག་པ་གཉིས་ཀ་དཀུར་བརྟེན་ལ་མགོ་གཡོན་དུ་འདུད་པར་བྱས་པའོ། །རྡོ་རྗེ་སྟོབས་པོ་ཆེའི་འདེགས་པ་ནི། སྙིང་གར་ལག་པ་གཡོན་པས་རྡོ་རྗེ་རྩེ་གསུམ་པར་བྱས་ལ་གཡས་པའི་རྡོ་རྗེ་ཁུ་ཚུར་དབྱུག་པ་ལྟར་འདེབས་པས་འཇོག་པའོ། །རྡོ་རྗེ་མཆེ་བ་ནི་རྡོ་རྗེ་ཁུ་ཚུར་གྱི་མཐེའུ་དག་བཟློག་ལ་ཁའི་གྲྭ་མཆེ་བལྟར་བྱས་ནས་ལྕེ་བསྐྱོད་ཅིང་ཁྲོ་བའི་ལྟ་བས་བལྟ་བའོ། །རྡོ་རྗེའི་གད་མོ་ནི་ཧ་ཧ་ཞེས་བྱ་བའི་སྒྲ་ཡང་དང་ཡང་དུ་བྱེད་པའོ། །རྡོ་རྗེའི་སྒྲ་ནི་རྡོ་རྗེའི་དྲིལ་བུ་འཁྲོལ་བའོ། །རལ་གྲིའི་སྟབས་ནི་གཡོན་པའི་ཁུ་ཚུར་གྱི་ཤུགས་ལས་དྲངས་ནས་གཡས་པའི་ཁུ་ཚུར་རལ་གྲིའི་ཚུལ་དུ་གཞག་པའོ། །རྡོ་རྗེའི་སྟབས་ནི་གཡས་པས་རྡོ་རྗེ་རྩེ་གསུམ་པ་འདེགས་པའོ། །འཁོར་ལོའི་སྟབས་ནི་སྙིང་གར་རྡོ་རྗེ་ཁུ་ཚུར་གཉིས་ཀྱི་མཐེའུ་ཆུང་དང་མཛུབ་མོ་རྡོ་རྗེ་འདུད་པ་བྱས་ལ་འཁོར་ལོ་ལྟར་གཏོང་བའོ། །གཏུན་ཤིང་གི་སྟབས་ནི་རྡོ་རྗེ་བཅིངས་པས་གཏུན་ཤིང་འཛིན་པའི་ཚུལ་ལོ། །བ་དན་གྱི་སྟབས་ནི་ལག་
པ་གཡས་པའི་མཐེ་བོས་སྲིན་ལག་གི་སེན་མོ་མནན་ལ། སོར་མོ་ལྷག་མ་རྣམས་བརྐྱང་ནས་གཡས་པའི་དཔུང་པའི་ཐད་ཀར་གཞག་པའོ། །ཞགས་པའི་སྟབས་ནི་འདོད་པའི་རྒྱལ་པོའི་ཕྱག་རྒྱ་ཉིད་དོ། །པདྨའི་ཚུལ་ནི་ཐལ་མོ་སྦྱར་བ་པདྨ་ལྟར་ཕྱེ་བའོ། །བེ་ཅོན་གྱི་ཚུལ་ནི་གཡས་པའི་ཁུ་ཚུར་གྱི་མཐེ་བོ་ནང་ནས་བཏོན་ཏེ་བསྒྲེང་བའོ། །མི་འཇིགས་པའི་ཚུལ་ནི་ལག་པ་གཡས་པ་མི་འཇིགས་པའི་ཚུལ་དུ་བྱེད་པའོ། །ལྕགས་ཀྱུའི་སྟབས་ནི་ལག་པ་གཡས་པའི་མཛུབ་མོ་འགུགས་པའི་ཚུལ་དུ་བྱེད་པའོ། །གཤོལ་གྱི་ཚུལ་ནི་ལག་པ་གཡས་པའི་སོར་མོ་བརྐྱང་ནས་ཅུང་ཟད་བསྐུམ་པའོ། །མདུང་ཐུང་གི་སྟབས་ནི་རྡོ་རྗེ་ཁུ་ཚུར་གཉིས་ཀྱིས་བསྣུན་པ་ལྟར་བྱེད་པའོ། །གཞུའི་སྟབས་ནི་ལག་པ་གཡོན་པས་གཞུ་འཛིན་པའི་ཚུལ་ལོ། །མདའ་གཟུང་བའི་སྟབས་ནི་ལག་པ་གཡས་པའི་མཛུབ་མོ་དང་གུང་མོ་གཉིས་ཀྱིས་མདའ་བླངས་ལ་གསོར་བ་ལྟར་བྱེད་པའོ། །མདའ་གསོར་བའི་སྟབས་ནི་དེ་དག་ཉིད་ཀྱིས་མདའ་འཕེན་པའི་ཚུལ་དུ་བྱེད་པའོ། །ཐག་མདུང་བསྐོར་བའི་སྟབས་ནི་ལག་པ་གཡས་པའི་ཁུ་ཚུར་གྱིས་ཐག་མདུང་ཡོངས་སུ་བསྐོར་བའི་ཚུལ་དུ་བྱེད་པའོ། །མཆོག་སྦྱིན་བའི་སྟབས་ནི་ལག་པ་གཡས་པ་མཆོག་སྦྱིན་པའི་ཚུལ་དུ་བཞག་པའོ། །མདུང་ཐུང་གི་སྟབས་ནི་ལག་པ་གཡས་པས་གསོར་བ་སྔོན་དུ་འགྲོ་བས་མདུང་ཐུང་འཕེན་པའི་ཚུལ་དུ་བྱེད་པའོ། །མཚོན་རྩེ་གཅིག་པའི་སྟབས་ནི་མདུང་རྩེ་གཅིག་པ་འཕེན་པའི་ཚུལ་ལོ། །ཕྱག་འཚལ་བའི་ཚུལ་ནི་ཐལ་མོ་སྦྱར་ནས་བསྟོད་པ་བྱེད་པའི་ཚུལ་དུ་སྙིང་གར་འཇོག་པའོ། །བསམ་གཏན་གྱི་ཚུལ་ནི་ཏིང་ངེ་འཛིན་གྱི་ཕྱག་རྒྱ་དེ་ཉིད་དེ། སྟང་སྟངས་དེ་རྣམས་ཀྱིས་ཁྲོ་བོ་འབྱིན་པ་སྔོན་དུ་འགྲོ་བས་བགེགས་ཐམས་ཅད་རྣམ་པར་གཞོམ་པར་བྱའོ། །དེ་ནས་རྡོ་རྗེ་སྐྱིལ་མོ་ཀྲུང་ལ་སོགས་པ་རྣམས་ཀྱིས་དབུས་སུ་འདུག་ལ་ཧཱུཾ་ཞེས་བརྗོད་ཅིང་སའི་ཆ་རྡོ་རྗེའི་རང་བཞིན་འབར་བ་རྣམ་པར་གྱུར་པར་བསམ་མོ། །པདྨའི་འདུག་སྟངས་ནི་གཡས་པའི་བྱིན་པས་གཡོན་པ་མནན་ལ་ཕུས་མོ་གཉིས་ཕབ་པའོ། །བཟང་པོའི་འདུག་སྟངས་ནི། སྟན་ལ་རྐང་པ་གཉིས་དྲང་པོར་འཇོག་པའོ། །
རྩེ་བའི་འདུག་སྟངས་ནི་སེམས་དཔའི་སྐྱིལ་མོ་ཀྲུང་ལས་གཡོན་པ་བརྗིད་བག་ཏུ་བརྐྱང་པའོ། །མདུན་དུ་བསྣུར་བ་ནི་དེ་ཉིད་ལ་དེ་བཞིན་དུ་རྒྱབ་ཏུ་བལྟ་བའོ། །གསང་བའི་དཀྱིལ་འཁོར་དྲངས་ནས་ལྟེ་བ་དང་བྱང་ཤར་ལ་སོགས་པ་མཚམས་བཞིར་སྔགས་དང་ཕྱག་རྒྱས་བྱིན་གྱིས་བརླབས་པའི་སེང་ལྡེང་གི་ཕུར་བུ་སོར་བརྒྱད་པ་དང་རྡོ་རྗེའི་ཐོ་བས་ཀྱང་དེའི་སྔགས་བརྗོད་ཅིང་རིམ་བཞིན་གདབ་པར་བྱ་སྟེ། དེ་ནི་མཐའ་ཡས་དང་རྣམ་ང་རྒྱལ་བ་ལ་སོགས་པ་ཞེས་གྲགས་པའི་ཕུར་བུས་གནས་ལྡར་བཏབ་ནས་ཕྱོགས་བཅིང་ཞིང་རབ་བྱ་བ་ལ་སོགས་པ་ཇི་ལྟ་བ་བཞིན་དུ་བྱའོ། །སྟང་སྟབས་ལ་སོགས་པ་ལ་དང་པོར་རང་གི་མིང་ནས་སྨོས་བ་སྔོན་དུ་འགྲོ་བས་ཡི་གེ་ཧཱུཾ་ཞེས་བྱ་བའི་སྒྲ་བརྗོད་པར་བྱའོ། །འདི་ཉིད་འཁོར་ལོ་ཐམས་ཅད་ལ་སྦྱར་བར་བྱའོ་ཞེས་བསྟན་པར་བྱ་བའི་ཕྱིར་སྔགས་ཀྱི་ཆོ་ག་འདི་ནི་ཞེས་བྱ་བ་ལ་སོགས་པ་གསུངས་སོ། །དེ་ནས་ཞེས་བྱ་བ་ལ་སོགས་པ་ལ་སའི་ལྷ་མོ་ཇི་ལྟ་བ་བཞིན་དུ་བྱུང་བར་བསམས་ལ་ཡིད་ཀྱིས་སྤྱན་དྲངས་ནས་མཆོད་དེ་དབུས་སུ་གནས་པ་ལ། སྐྱོབ་པ་སངས་རྒྱས་ཐམས་ཅད་ཀྱིས། །ཞེས་བྱ་བ་ལ་སོགས་པས་ལན་གསུམ་དུ་བསྐུལ་ལ་གཤེགས་སུ་གསོལ་ལོ། །དེ་ནས་བདུག་སྤོས་དབུལ་བ་སྔོན་དུ་འགྲོ་བ་དང༌། ཐུགས་བརྩེ་ཕན་པའི་དགོངས་པ་ཅན། །ཞེས་བྱ་བ་ལ་སོགས་པས་སངས་རྒྱས་དང་བྱང་ཆུབ་སེམས་དཔའ་རྣམས་ལྷག་པར་གནས་པར་བྱ་སྟེ། དྲི་ལ་སོགས་པ་རྣམས་ཀྱིས་བྱུགས་ལ་ལྷ་ཐམས་ཅད་ཀྱི་གནས་སུ་ཡི་གེ་ཧཱུཾ་དང་བཅས་པའི་མཚན་ནས་སྨོས་པ་སྔོན་དུ་འགྲོ་བས་སྤོས་ཀྱི་དཀྱིལ་འཁོར་བྱའོ། །དེ་ནས་སྤྱོད་པས་བསྐྱོད་ནས་སྒོ་བཞིའི་གོ་སྐབས་ནས་བྱུང་བའི་ཡི་གེ་ཧཱུཾ་དང་ཨ་ལས་དཀྱིལ་འཁོར་པའི་ལྷའི་འཁོར་ལོ་ཕྱུང་ལ་གནས་ཇི་ལྟ་བ་བཞིན་དུ་གཞག་སྟེ། སྤྱན་དྲང་བ་ལ་སོགས་པ་བཤད་པའི་རིམ་གྱིས་སྐུ་བྱིན་གྱིས་བརླབ་པ་ལ་སོགས་པ་སྔོན་དུ་འགྲོ་བས་རང་གི་ཕྱག་རྒྱ་སྔགས་དང་བཅས་པས་ཉེ་བར་བསྟན་ཏེ། དབང་བསྐུར་ལ་མཆོད་ཅིང་ཡང་དག་པར་བསྟོད་ནས་ཕྱག་བྱས་ལ་ཚིམ་པར་བྱ་བའི་ཕྱིར་སྦྱིན་སྲེག་བྱས་ནས་ཕྱོགས་ཀྱི་གཏོར་མ་སྦྱིན་ནོ། །དེ་ནས་རྩ་པའི་བུམ་པ་ལྷག་པར་གནས་པ་ཇི་ལྟ་བ་བཞིན་དུ་བྱས་ནས་སློབ་མ་ལྷག་
པར་གནས་པར་བྱ་སྟེ་ཡི་གེ་ཧཱུཾ་བཟླས་པའི་སྤོས་ཆུས་སྙིང་ག་ལ་སོགས་པར་གཏོར་ཏེ། ད་ཉིད་ཀྱིས་རྡོ་རྗེ་དང་བཅས་པའི་ལག་པ་གཡས་པས་རེག་པར་བྱས་ལ་སྙིང་གར་རྡོ་རྗེ་རྩེ་ལྔ་པ་དང་སྤྱི་བོར་སྣ་ཚོགས་རྡོ་རྗེ་བསམས་ཏེ་གསུམ་ལ་སྐྱབས་སུ་བཏང་བ་ལ་སོགས་པ་བྱེད་དུ་བཅུ་གནས་ཡི་གེ་ཧཱུཾ་གིས་ཡོངས་སུ་བཟླས་པའི་སྲུང་སྐུད་དཔུང་པ་ལ་བཅིངས་ལ་སོ་ཤིང་ལ་སོགས་པ་བྱིན་ཏེ་དེ་རྣམས་ལ་ཆོས་བཤད་པར་བྱའོ། །དེ་ནས་དཀྱིལ་འཁོར་གྱི་གནས་སུ་ཞུགས་པ་གཤེགས་སུ་གསོལ་བའི་ཕྱིར་སྔར་བཤད་པ་བཞིན་དུ་མཆོད་པ་ལ་སོགས་པ་བྱས་ལ་དཀྱིལ་འཁོར་གྱི་ལྷ་རྣམས་ཇི་ལྟ་བ་བཞིན་དུ་རྡོ་རྗེའི་ལམ་ནས་སྙིང་གའི་རྡོ་རྗེའི་ལྟེ་བའི་ནང་དུ་གནས་པར་བྱའོ། །དེ་ནས་ཕྱི་དེ་ཉིན་རྣམ་པར་སྣང་མཛད་ཀྱི་སྦྱོར་བ་དང་ལྡན་པས་མི་བསྐྱོད་པ་ལ་སོགས་པའི་སྙིང་པོས་ཕྱུང་ལ་སྔོན་པོ་ལ་སོགས་པའི་ཚོན་སྐུད་ལྔ་དེའི་རང་བཞིན་དུ་བྱས་ཏེ་ཡི་གེ་ཧཱུཾ་འདོན་བཞིན་པས་བསྒྲིལ་ལ་དེ་བརྒྱ་རྩ་བརྒྱད་བཟླས་པར་བྱའོ། །དེ་བཞིན་དུ་ཚོན་རྣམས་ལ་ཡང་ཅི་རིགས་པར་བྱའོ། །དེ་ཉིད་བསྟན་པར་བྱ་བའི་ཕྱིར། ཚོན་དང་ཐིག་ལ་སངས་རྒྱས་ལྔའི། །ཞེས་བྱ་བ་ལ་སོགས་པ་གསུངས་ཏེ། དཀྱིལ་འཁོར་ཇི་ལྟ་བ་བཞིན་དུ་ཐིག་གདབ་ལ་དང་པོར་སློབ་དཔོན་གྱིས་ཚོན་རྩི་དགྱེ་བར་བྱ་སྟེ་ཕྱི་ནས་སློབ་མས་བྱའོ། །དེ་ཡང་ཕྱིའི་དཀྱིལ་འཁོར་དུ་སྔོན་པོ་དང་དམར་པོ་དང་དཀར་པོ་དང་ལྗང་གུ་དང་སེར་པོའི་ཚོན་རྣམས་ཀྱིས་རབ་ལྔ་བྱའོ། །གཉིས་པར་ནི་སྔོན་པོ་དང༌། དམར་པོ་དང༌། དཀར་པོ་རྣམས་ཀྱིས་སོ། །འཁོར་ལོ་གསུམ་པ་ལ་ནི་ཚོན་རྩི་དཀར་པོས་སོ། །འཁོར་ལོའི་ལྟེ་བ་ལ་ནི་སེང་གེའི་གདན་ལ་གནས་པའི་པདྨ་དང་ཟླ་བའི་གདན་ལ་བཞུགས་པའི་རྣམ་པར་སྣང་མཛད་དགོད་པར་བྱའོ། །ཤར་ལ་སོགས་པའི་རེའུའི་ཆ་རྣམས་ལ་ནི་མི་བསྐྱོད་པ་ལ་སོགས་པའོ། །འཁོར་ལོའི་བྱང་ཤར་ལ་སོགས་པར་ནི་སྤྱན་ལ་སོགས་པའོ། །རིམ་པ་གཉིས་པའི་ཤར་ཕྱོགས་ལ་སོགས་པར་ནི་རྡོ་རྗེ་སེམས་མ་ལ་སོགས་པའོ། །མཚམས་རྣམས་སུ་ནི་སྐུ་ལ་བྱེད་མ་ལ་སོགས་པའོ། །རིམ་པ་གསུམ་པའི་ཤར་ལ་སོགས་པའི་སྣ་མ་བུ་ལ་ནི་བྱམས་པ་ལ་སོགས་བའོ། །ཤར་ལ་སོགས་པའི་སྒོ་རྣམས་
སུ་གཤིན་རྗེ་གཤེད་ལ་སོགས་པའོ། །མཚམས་རྣམས་སུ་མི་གཡོ་བ་ལ་སོགས་པའོ། །དབང་བསྐུར་བའི་དཀྱིལ་འཁོར་ནི་གོ་སླའོ། །དེ་ལྟར་དཀྱིལ་འཁོར་མངོན་པར་བྲིས་ནས་ཇི་ལྟ་བ་བཞིན་དུ་མངོན་པར་འདུས་བྱས་པའི་བུམ་པ་ལ་བཟླས་བརྗོད་བརྒྱ་རྩ་བརྒྱད་བྱས་ཏེ། རྩ་བའི་བུམ་པ་ལ་རྣམ་པར་སྣང་མཛད་ཀྱི་སྔགས་སྟོང་རྩ་བརྒྱད་བཟླས་ཤིང་ཡི་གེ་ཧཱུཾ་བརྒྱ་རྩ་བརྒྱད་བཟླ་བ་དང་ལྷག་མ་རྣམས་ཀྱི་བུམ་པ་བཞི་ལ་ནི་སྤྱན་ལ་སོགས་པ་བཞིའི་སྔགས་བཟླ་བ་དང༌། ལྷ་ཐམས་ཅད་ཀྱི་ལ་ནི་རིགས་ཀྱི་དབྱེ་བས་སོ། །ལས་ཐམས་ཅད་པ་བཟླས་པ་སྒོར་གཞག་པ་ནི་བསང་གཏོར་གྱི་བུམ་པ་བྱའོ། །དེ་ནས་ལུས་ཁྲུས་བྱས་ཤིང་གོས་ལ་སོགས་བའི་རྒྱན་གྱིས་བརྒྱན་ལ་བདག་པོའི་སྦྱོར་བ་དང་ལྡན་པའི་རྣལ་འབྱོར་དམ་པས་ལྷའི་འཁོར་ལོ་ཐམས་ཅད་དང་བདག་ཉིད་ནང་དུ་བསྒོམས་ལ། དེའི་ང་རྒྱལ་དང་ལྡན་པས་མཆོད་ཡོན་དང་མཆོད་པ་ལ་ཡོངས་སུ་བཟླས་ཏེ། སྒོ་ཕྱེ་ནས་གནས་ཇི་ལྟ་བ་བཞིན་དུ་བུམ་པ་ལགས་པར་བཞག་ལ། དཀྱིལ་འཁོར་གྱི་ལྷ་རྣམས་སྔ་མ་བཞིན་དུ་ཕྱུང་སྟེ་རང་གནས་སུ་གནས་པར་བྱས་ལ། འཁོར་ལོའི་ལྷ་རྣམས་རྡོ་རྗེ་ཁྲོ་བོའི་ལྕགས་ཀྱུའི་ཕྱག་རྒྱ་དང༌། ཨོཾ་བཛྲ་ཨཾ་ཀུ་ཤ་ཨཱ་ཀཪྵ་ཡ་ཧཱུཾ་ཛཿ་ཞེས་བརྗོད་ལ་སྤྱན་དྲང་ངོ༌། །རྡོ་རྗེ་སེམས་མ་ལ་སོགས་པ་བཞི་དང་སྤྱན་ལ་སོགས་པའི་རིགས་ཀྱི་ཡུམ་རྣམས་དང༌། སྐུ་ལ་བྱེད་མ་ལ་སོགས་པ་ཕོ་ཉ་རྣམས་ནི་ལྕགས་ཀྱུའི་ཕྱག་རྒྱས་སོ། །འཕགས་པ་མི་གཡོ་བ་ལ་སོགས་པ་བྲན་རྣམས་ནི་ཞགས་པའི་ཕྱག་རྒྱས་སོ། །གཤིན་རྗེ་གཤེད་ལ་སོགས་པ་ཁྲོ་བོ་རྣམས་ནི་ཞལ་གྱི་ཕྱག་རྒྱས་སོ། །ཧཱུཾ་བཾ་ཨཱཿ་ཞེས་བརྗོད་པ་སྔོན་དུ་འགྲོ་བས་ནི་ཐམས་ཅད་གཞུག་པ་དང་བཅིང་བ་དང༌། དབང་དུ་བྱའོ། །དེ་ནས་ལངས་ནས་ཕུར་བུ་དང་ར་བ་ལ་སོགས་པས་གནས་སྲུང་བ་བྱས་ལ་པདྨའི་གདན་དང༌། མཆོད་ཡོན་དང་ཞབས་བསིལ་དག་ཕུལ་ལ་སྐུ་ལ་སོགས་པ་བྱིན་གྱིས་བརླབ་པའི་ཕྱག་རྒྱ་རྣམས་ཀྱིས་བྱིན་གྱིས་བརླབས་ཏེ་རང་གི་ཕྱག་རྒྱ་བསྟན་ནས། རང་གི་དབང་བསྐུར་བས་དབང་བསྐུར་ལ་ཏིང་ངེ་འཛིན་ལ་གནས་པར་བསམས་ནས་སྒེག་མོ་ལ་སོགས་པ་མཆོད་པ་ཐམས་ཅད་དང་སིལ་སྙན་དང༌། གླིང་བུ་
ལ་སོགས་པ་ཡིད་དགའ་བར་བྱེད་པའི་རང་བཞིན་གྱི་མཆོད་པའི་ཁྱད་པར་ཐམས་ཅད་ཀྱིས་ཡང་དག་པར་མཆོད་ནས་ཐལ་མོ་སྦྱར་ཏེ་རོལ་མོའི་ཁྱད་པར་གཞན་རྣམས་ཀྱིས་ཀྱང་མཆོད་པ་དང༌། ལན་གསུམ་གྱི་བར་དུ་རྡོ་རྗེའི་གླུ་བླངས་པས་ཡང་དག་པར་བསྟོད་ནས་ཕྱག་བྱས་ཏེ། ལྷ་རྣམས་ཚིམ་པར་བྱ་བའི་ཕྱིར་བཤད་པའི་སྦྱིན་སྲེག་ཕུལ་ལ་བཟོད་པར་གསོལ་ཏེ། དེའི་འོག་ཏུ་དངོས་གྲུབ་ཀྱི་ཕྱིར་གསོལ་བ་བཏབ་ནས་བདག་ཉིད་འཇུག་པ་ལ་སོགས་པ་རྫོགས་པར་བྱའོ། །དེའི་འོག་ཏུ་སློབ་མ་ཁྲུས་བྱས་ཤིང་རྒྱན་གྱིས་བརྒྱན་ལ་ཛིན་ཛི་ཀ་ཅེས་བྱ་བ་ལ་སོགས་པའི་སྙིང་པོ་དང༌། སྐུ་ལ་སོགས་པ་བྱིན་གྱིས་བརླབ་པའི་ཕྱག་རྒྱ་རྣམས་ཀྱིས་བྱིན་གྱིས་བརླབས་ཏེ་མཛུབ་མོ་དཀྲི་བའི་ཐལ་མོ་སྦྱར་བ་དང༌། བཛྲ་ཀ་ཝ་ཙ་ཧཱུཾ་ཞེས་བྱ་བ་བརྗོད་ཅིང་གནས་ལྔར་གོ་ཆ་དང་བཅས་པར་བྱས་ནས་གདོང་གོས་ཀྱིས་གཡོགས་ཏེ་རྡོ་རྗེ་སེམས་མའི་ཕྱག་རྒྱས་མེ་ཏོག་འཛིན་བས་ཧཱུཾ་ཞེས་བྱ་བ་ཉིད་ཀྱིས་གཞུག་ཅིང་ཐུན་མོང་གི་ཆོ་ག་ཐམས་ཅད་བྱས་ནས། སློབ་མ་དེའི་ཐུགས་ཀར་རྡོ་རྗེ་སེམས་དཔས་བྱིན་གྱིས་བརླབས་པའི་རྣམ་པར་སྣང་མཛད་དུ་བྱིན་གྱིས་བརླབས་ལ། དྲི་དང་མེ་ཏོག་ལ་སོགས་པས་བརྒྱན་ནས་ལྷ་ཐམས་ཅད་ཀྱི་བུམ་པ་ལ་སོགས་པ་ཇི་ལྟ་བ་བཞིན་དུ་དབང་བསྐུར་ལ་རྣམ་པར་རྒྱལ་བའི་བུམ་པས་དབང་བསྐུར་རོ། །འདི་དག་ཀྱང་ག་ལས་ཤེ་ན། དང་པོར་གྱི་སྒྲ་ནི་གཙོ་བོར་བསྟན་པ་ཡིན་པའི་ཕྱིར་ཏེ་དེ་བཞིན་གཤེགས་པ་རྣམས་ལྷའི་བདུད་རྩིས་གང་བའི་བུམ་པ་ཕྱག་ན་བསྣམས་པ་ཕྱུང་ནས་དེ་རྣམས་ཀྱིས་དབང་བསྐུར་བར་གྱུར་པར་བསམ་མོ། །དེ་ནས་ཡང་གོས་ལ་སོགས་པས་བརྒྱན་ནས་རྡོ་རྗེ་སེམས་མ་ལ་སོགས་པའི་དབང་བསྐུར་ཏེ། སངས་རྒྱས་རྣམས་རིན་པོ་ཆེའི་དབུ་རྒྱན་གྱི་གཟུགས་སུ་གྱུར་པར་བསམས་ནས། དར་དབྱངས་དང༌། ཕྲེང་བ་དང༌། རྡོ་རྗེ་དང༌། བདག་པོ་དང༌། རྡོ་རྗེ་མིང་གི་དབང་བསྐུར་བས་དབང་བསྐུར་ལ་གསེར་ལ་སོགས་པའི་ཐུར་མ་དང༌། ཇི་ལྟར་མིག་མཁན་རྒྱལ་པོ་ཡིས། །ཞེས་བྱ་བ་ལ་སོགས་པའི་ཚིགས་སུ་བཅད་པས་མི་ཤེས་པའི་རབ་རིབ་བསལ་ལ་མེ་ལོང་བླངས་ཏེ། རྡོ་རྗེ་སེམས་དཔའི་རང་
བཞིན་ཏེ། །ཞེས་བྱ་བ་ལ་སོགས་པའི་ཚིགས་སུ་བཅད་པ་རྣམས་ཀྱིས་ཆོས་ཀྱི་མཚན་ཉིད་བསྟན་པར་བྱའོ། །ཡི་གེ་ཨ་དང་གླེགས་བམ་སྦྱིན་ཞིང་ཨ་དང་དྲིལ་བུ་སྦྱིན་ལ་རྗེས་སུ་གནང་བ་སྦྱིན་པར་བྱ་བའི་ཕྱིར་འཁོར་ལོ་རྐང་པ་གཉིས་ཀྱི་བར་དུ་བཞག་ནས་ལག་པ་གཡས་པར་དུང་བྱིན་ཏེ། དི་རིང་ཕན་ཆད་འཇིག་རྟེན་དུ། །ཆོས་ཀྱི་འཁོར་ལོ་བསྐོར་བར་གྱིས། །ཞེས་བྱ་བ་ལ་སོགས་པ་བརྗོད་དོ། །དེ་ནས། དེ་རིང་ཕན་ཆད་བུ་ཁྱོད་ཀྱིས། །ཞེས་བྱ་བ་ལ་སོགས་པས་དམ་ཚིག་བསྟན་ནས། བླ་མས་ཡོན་བླངས་ཏེ་ཞི་བའི་སྦྱིན་སྲེག་བྱས་ནས་མཆོད་པ་དང་བསྟོད་པ་ལ་སོགས་པ་བྱས་ལ་ཧཱུཾ་མུཿ། ཞེས་བྱ་བ་བརྗོད་དེ་སེམས་མའི་ཕྱག་རྒྱ་སྤྱི་བོར་དཀྲོལ་ཏེ་ལྷའི་འཁོར་ལོ་གཤེགས་སུ་གསོལ་ལོ། །དེ་ནས་ཕུར་བུ་ཕྱུང་ལ་གསང་བའི་དཀྱིལ་འཁོར་དེ་བཞིན་དུ་གཤེགས་སུ་གསོལ་ནས་བྱ་བ་སྔ་མས་ཛཿ་ཧཱུཾ་བཾ་ཧོཿ་ཞེས་བརྗོད་ལ། ལྷག་མ་རྣམས་རང་གི་གནས་སུ་ནང་དུ་བསྒོམ་མོ། །ཡི་གེ་ཧཱུཾ་གིས་ཚོན་རྩི་བསྡུ་བར་བྱ་སྟེ་བསྡུས་ནས་ཆུ་བོ་རྣམས་སུ་དོར་བར་བྱའོ་ལེའུ་གཉིས་པའི་བཤད་པའོ།། །།གསང་སྔགས་ཀྱི་རིམ་པར་ཕྱེ་བ་བསྟན་པར་བྱ་བའི་ཕྱིར་དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་ཏེ། ཇི་ལྟ་བ་བཞིན་དུ་ཕྱུང་ལ་སོ་སོའི་གསང་སྔགས་ཀྱི་ཡི་གེས་གནས་ཇི་ལྟ་བ་བཞིན་དུ་དཀྱིལ་འཁོར་གྱི་ལྷ་རྣམས་དགོད་པར་བྱའོ་ཞེས་གསུངས་པ་སྟེ་གསང་སྔགས་ཀྱི་ཡི་གེ་འདི་དག་གིས་དཀྱིལ་འཁོར་དགོད་པའོ། །དེ་དག་ལ་བརྟེན་ནས་ཞེས་བྱ་བ་ལ་སོགས་པས་ནི་གསང་སྔགས་ཀྱི་ཆེ་བའི་བདག་ཉིད་སྟོན་པ་ཡིན་ནོ། །ལེའུ་གསུམ་པའི་བཤད་པའོ།། །།དེ་ནས་བཅོམ་ལྡན་འདས་ཞེས་བྱ་བ་ལ་སོགས་པས་ནི་ཏིང་ངེ་འཛིན་གྱི་དཀྱིལ་འཁོར་བསྟན་པ་ཡིན་ཏེ། ཡེ་ཤེས་ཆེན་པོ་ཉིད་སྟོབས་ཡིན་ལ། དེའི་རྣམ་པར་འཕྲུལ་པ་ནི་རྣམ་པར་སྣང་མཛད་ལ་སོགས་པའི་ཏིང་ངེ་འཛིན་གྱི་མཚན་ཉིད་དོ། །དེ་ཉིད་མི་ཕྱེད་པས་ན་རྡོ་རྗེ་སྟེ་ཏིང་ངེ་འཛིན་གང་ལ་དེ་སྐད་ཅེས་བྱ་བ་དེ་ལ་སྙོམས་པར་ཞུགས་པའོ། །ཡི་གེ་ཨོཾ་ཉིད་ཡེ་ཤེས་ཏེ་ཐུགས་ཡིན་ལ་དེ་ལས་ཇི་ལྟ་བ་བཞིན་དུ་སྤྲུལ་ཏོ་ཞེས་བྱ་བའི་དོན་ཏོ། །ཤེས་རབ་ཡེ་ཤེས་རབ་རྒྱས་པ། །ཞེས་བྱ་བ་ནི་
ཤེས་རབ་དང་ཡེ་ཤེས་ཀྱིས་རབ་ཏུ་རྒྱས་པས་སེམས་ཅན་རྣམས་སངས་རྒྱས་ཉིད་དུ་བསྐྱེད་པའི་སངས་རྒྱས་ཀུན་མཆོག་ནི་རིན་པོ་ཆེའི་དབུ་རྒྱན་ཏེ་ངེས་མཆོད་པ་ནི་བརྒྱན་པའོ། །ཞལ་གསུམ་ཞེས་བྱ་བ་ལ་དབུས་མ་ནི་གསེར་གྱི་མདོག་ཅན་ནོ། །གཡས་པ་ནི་སྔོན་བོའོ། །གཡོན་ནི་དཀར་པོ་སྟེ་དེ་རྣམས་ཀྱིས་རྣམ་པར་མཛེས་པའོ། །བསམ་གཏན་ཕྱག་རྒྱ་ཅན་ཞེས་བྱ་བ་ནི་རྡོ་རྗེ་སྐྱིལ་མོ་ཀྲུང་གིས་བཞུགས་པའི་པང་བར་ཕྱག་གཡོན་པ་བརྐྱང་ལ་དེའི་སྟེང་དུ་ཕྱག་གཡས་པ་བརྐྱང་ནས་འཇོག་བའོ། །བགྲང་ཕྲེང་ལྡན་ཞིང་ཞེས་བྱ་བ་ནི་གཡས་པའི་ཕྱག་གཉིས་ན་བགྲང་ཕྲེང་དང་བཅས་པའོ། །མདའ་ཡིས་བརྒྱན་ཅེས་བྱ་བ་ནི་གཡས་ཀྱི་གསུམ་པ་མདའ་དང་བཅས་པའོ། །ནུ་མ་འཛིན་ཅེས་བྱ་བ་ནི་ཕྱག་གཡོན་པའི་གཉིས་པ་ལྷ་མོའི་ནུ་མ་འཛིན་པའོ། །རྡོ་རྗེ་གཞུ་ཐོགས་ཤིང་ཞེས་བྱ་བ་ནི་གསུམ་པ་རྡོ་རྗེ་གཞུ་བསྣམས་ཤིང༌། འོག་ཏུ་ནི་ཀུན་དུ་དྲག་པོ་དང་ཁྱབ་འཇུག་ལ་སོགས་པའི་ལྷ་རྣམས་བྲེད་ཅིང་སྐྲག་པར་བྲིའོ། །དེ་ཉིད་སྤྱོད་ཡུལ་བསྒོམ་པར་གྱིས། །ཞེས་བྱ་བ་ནི་འདི་སྐད་སྟོན་པ་ཡིན་ཏེ་རྣམ་པར་སྣང་མཛད་ཀྱི་སྒྲུབ་པ་པོས་ཡིད་ལ་རང་གི་སྔགས་བཟླས་ཤིང་སྙོམས་པར་འཇུག་པ་ལས་བྱུང་བའི་སངས་རྒྱས་ཐམས་ཅད་ཀྱི་སྤྲིན་རང་གི་རིགས་པ་དང་སྦྱོར་བ་སྤྲོ་བ་དང་བསྡུ་བ་ལ་སོགས་པས་བསྒོམ་པར་བྱའོ། །ཨཱ་ཞེས་བྱ་བའི་ཚིག་གི་ལམ། །ཞེས་བྱ་བ་ནི་ཨ་ལས་བྱུང་བ་འོད་དཔག་ཏུ་མེད་པའོ། །འཇིག་རྟེན་དབང་ཕྱུག་འོད་ཆེན་བསམ། །ཞེས་བྱ་བ་ནི་འཇིག་རྟེན་དབང་ཕྱུག་གི་སྐུར་ཡོངས་སུ་བྱུང་བའོ། །དབུ་རྒྱན་ཐམས་ཅད་མཁྱེན་པས་བརྒྱན། །ཞེས་བྱ་བ་ནི་འོད་དཔག་ཏུ་མེད་པ་དབུ་ལ་འཇོག་པའོ། །ཞལ་གསུམ་འབར་བ་ལ་ཞེས་བྱ་བ་ནི་དང་པོ་ནི་དཀར་པོ། གཡོན་པ་ནི་གསེར་མདོག་གོ །གཡས་པ་ནི་ཨུཏྤལའི་མདོག་ཅན་ནོ། །དེ་རྣམས་ཀྱིས་འབར་བ་ཞེས་བྱ་བའི་བར་དུའོ། །ལྷ་མོ་བཞི་དང་གདན་གཅིག་པས་ན་འདུག་སྟངས་བཞི་པ་ཅན་ནོ། །པདྨའི་འཇོ་ཚུལ་ལྡན་ཞེས་བྱ་བ་ནི་གཡོན་པ་དཀུར་བརྟེན་པས་སྡོང་བུ་འཛིན་ཅིང་གཡས་པ་ཐུགས་ཀར་འབྱེད་པའོ། །བགྲང་ཕྲེང་རྡོ་རྗེ་འཆང་ཞེས་བྱ་བ་གཡས་
ཀྱི་གཉིས་ཀྱིས་བགྲང་ཕྲེང་དང་རྡོ་རྗེ་བསྣམས་པའོ། །ནུ་མ་འཛིན་ཞེས་བྱ་བ་ནི་སྔ་མ་བཞིན་ནོ། །གསུམ་པས་ནི་སྤྱི་བླུགས་བསྣམས་པའོ། །གཟུགས་རྣམས་ཐམས་ཅད་ཅེས་བྱ་བ་ནི་ལྟ་བ་ལ་སྤྱོད་པའི་སེམས་ཅན་རྣམས་གདུལ་བར་བྱ་བའི་ཕྱིར་ལྷ་ཐམས་ཅད་ཀྱི་གཟུགས་ཀྱིས་འདུལ་བའོ།། ཟླ་བའི་གཟུགས་ཞེས་བྱ་བ་ནི་པདྨའི་གདན་ལ་བཞུགས་པའོ། །སེམས་ཀྱི་རྡོ་རྗེ་ཞེས་བྱ་བ་ནི་རྡོ་རྗེ་འཛིན་པའོ། །མཐིང་ཤུན་བཟང་པོ་ལྟ་བུའི་མདོག །ཅེས་བྱ་བ་ནི་མཐིང་ཤུན་གྱི་མདོག་ཅན་ནོ། །མི་འཁྲུགས་བཞུགས་ཞེས་བྱ་བ་ནི་མི་བསྐྱོད་པས་བརྒྱན་པའོ། །ཞལ་གསུམ་ཞེས་བྱ་བ་ལ་ཞལ་དབུས་མ་ནི་སྔོན་པོའོ། །གཡས་ནི་དཀར་པོའོ། །གཡོན་ནི་སེར་པོའོ། །རིན་ཆེན་འབྱུང་ལྡན་ནི་དབུས་མ་དང་གཡས་གཡོན་དག་དམར་པོ་དང་སྔོན་པོ་དང་དཀར་པོའི་ཞལ་མངའ་བས་ན་ཞལ་གསུམ་པའོ། །ཏིང་ངེ་འཛིན་གྱི་ཕྱག་རྒྱ་ནི་སྔ་མ་བཞིན་ནོ། །གཡས་ན་ནི་རྡོ་རྗེ་བསྣམས་པ་གཡོན་པས་ནི་རིན་པོ་ཆེ་བསྣམས་པ་སྟེ་ཕྱག་བཞི་པར་བསྒོམ་པར་བྱའོ་ཞེས་བྱ་བ་ནི་ལྷག་མའོ། །དོན་ཡོད་གྲུབ་པའི་རྡོ་རྗེ་ནི་ཕྱག་བཞི་པ་སྟེ། ཏིང་ངེ་འཛིན་གྱི་ཕྱག་རྒྱ་དང་ལྡན་ཞིང༌། རལ་གྲི་དང་ལྕགས་ཀྱུ་བསྣམས་པ། ཡི་གེ་ཁཾ་ལས་བྱུང་བ་སྔོ་བསངས་ཀྱི་མདོག་ཅན་ནོ། །སྤྱན་ནི་རྣམ་པར་སྣང་མཛད་དང་འདྲ་བའི་ཞལ་གསུམ་མངའ་བ་དང༌། གཡོན་པ་སྡིགས་མཛུབ་ཞགས་པ་ཅན། །ཞེས་བྱ་བ་སྟེ་ཕྱག་གཡོན་པས་ཞགས་པ་ཐོགས་པ་དང་སྡིགས་མཛུབ་མཛད་པའོ། །བྱང་ཆུབ་ཡན་ལག་སྟོབས་བརྒྱན་པའི། །ཞེས་བྱ་བ་ནི་ཆོས་རབ་ཏུ་རྣམ་པར་འབྱེད་པ་ལ་སོགས་པ་བྱང་ཆུབ་ཀྱི་ཡན་ལག་བདུན་དང༌། གནས་དང་གནས་མ་ཡིན་པ་མཁྱེན་པ་ལ་སོགས་པ་སྟོབས་བཅུས་བརྒྱན་པའོ། །མཱ་མ་ཀཱིའི་ཞལ་གསུམ་ནི་མི་བསྐྱོད་པ་དང་འདྲའོ། །དངོས་དང་དངོས་མེད་མཚན་ཉེད་ཅན། །ཞེས་བྱ་བ་ནི་དངོས་པོ་དང་དངོས་པོ་མེད་པ་དང་བྲལ་བའོ། །འདི་འདྲ་སྒོམ་པས་བསྒོམ་པར་བྱ། །ཞེས་བྱ་བ་ནི་འདི་ལྟ་བུའི་བསམ་པས་བསྒོམ་པར་བྱའོ། །གོས་དཀར་ཅན་གྱི་ཞལ་རས་གསུམ། །ཞེས་བྱ་བ་ནི་འོད་དཔག་ཏུ་མེད་པ་དང་འདྲ་བའོ། །སྒྲོལ་མའི་ཞལ་གསུམ་ནི་དོན་ཡོད་རྡོ་རྗེ་དང་འདྲ་བའོ། །མདའ་
ཡང་གསོར་ཞེས་བྱ་བ་ནི་མདས་གར་བྱེད་པའི་ཚུལ་ལོ། །རྡོ་རྗེ་སེམས་ལ་སོགས་པ་བཞི་ནི་རིམ་བཞིན་དུ་རྡོ་རྗེ་སེམས་དཔའ་དང༌། རིན་ཆེན་དང༌། ཆོས་དང༌། ལས་ཀྱི་སེམས་དཔའ་དང་འདྲ་བར་ཉེ་བར་བསྟན་པར་བྱ་བའི་ཕྱིར་སྐྱེས་མཆོག་ཅེས་བྱ་བ་ལ་སོགས་པ་གསུངས་ཏེ་དེ་རྣམས་ནི་ཞལ་གསུམ་པའོ། །སྐུལ་བྱེད་མའི་ནི། ཡི་གེ་དགུ་ཡི་ཐབས་དགུ་ཅན། །ལྷ་དགུ་རྣམས་ཀྱི་གནས་ཀྱང་ཡིན། །ཞེས་བྱ་བ་ནི་སྔགས་ཀྱི་སྒོ་ནས་ཡི་གེ་དགུ་ལ་སོགས་པ་གར་ཐབས་དགུ་དང༌། དེ་བཞིན་གཤེགས་པ་ལ་སོགས་པ་ལྷ་དགུའི་གནས་སུ་གྱུར་པ་ཡིན་པའི་ཕྱིར་རོ། །འབར་བའི་ཕྱག་ནི་ཉི་ཤུ་དྲུག །ཅེས་བྱ་བ་ནི་ཕྱག་འབར་བ་ཉི་ཤུ་རྩ་དྲུག་དང་ལྡན་པའོ། །རྩ་བའི་ཕྱག་རྒྱ་ནི་འོག་ནས་བཤད་པའི་མཚན་ཉིད་ཅན་ནོ། །བཅུ་གཉིས་པ་ནི་ཕུལ་དུ་བྱུང་བ་སྟེ། ངོ་མཚར་དུ་གྱུར་པའོ། །དེ་ཡང་མཛུབ་མོ་དང་མཐེ་བོས་སྟོན་པ་ཡིན་ནོ། །ལྟུང་བ་ཞེས་བྱ་བ་དྲག་པོ་དང་ཁྱབ་འཇུག་ལ་སོགས་པའོ། །རིན་ཆེན་སྒྲོན་མའི་ཞལ་རས་གསུམ་ནི་རྣམ་པར་སྣང་མཛད་དང་འདྲ་བའོ། །ཕྱག་གཉིས་རིན་ཆེན་ཐལ་མོ་སྟེ། །ཞེས་བྱ་བ་ནི་ཐལ་མོ་སྦྱར་བ་ལ་ཡིད་བཞིན་གྱི་ནོར་བུ་ལྟ་བུའོ། །ཁྲོ་གཉེར་ཅན་གྱི་ཞལ་རས་གསུམ་ནི་འཇིག་རྟེན་དབང་ཕྱུག་དང་འདྲ་བའོ། །རྡོ་རྗེ་ལུ་གུ་རྒྱུད་ཀྱི་ཞལ་རས་གསུམ་ནི་དོན་ཡོད་གྲུབ་པའི་རྡོ་རྗེ་དང་འདྲ་པའོ། །ཞལ་ནི་ཅུང་ཟད་བཞད་མཛད་པ། །ཞེས་བྱ་བ་ནི་ཞལ་དབུས་མ་ཅུང་ཟད་བཞད་པ་གང་ཡིན་པའོ། །བྱམས་པའི་ཞལ་གསུམ་ནི་རྣམ་པར་སྣང་མཛད་དང་འདྲའོ། །འཇམ་དཔལ་གཞོན་ནུར་གྱུར་པའི་ཞལ་གསུམ་ཡང་རྣམ་པར་སྣང་མཛད་དང་འདྲ་བའོ། །བསྐལ་པ་བཟང་པོ་པ་ལྷག་མ་རྣམས་ཀྱང་འདི་དག་གི་རྗེས་སུ་འབྲངས་ནས་བསྒོམ་པར་བྱའོ་ཞེས་བསྟན་པར་བྱ་བའི་ཕྱིར་སྤོས་ཀྱི་གླང་པོ་ཞེས་བྱ་བ་ལ་སོགས་པ་གསུངས་སོ། །ཁྲོ་བོ་གཤིན་རྗེའི་གཤེད་ཀྱི་གདན་ནི་འོག་ཏུ་པདྨའི་ཞེས་བྱ་བ་སྟེ། མ་ཧེའི་འོག་ཏུ་པདྨའི་གདན་བྱས་པ་གང་ཡིན་པ་དེ་ལ་དེ་སྐད་ཅེས་བྱ་བའོ། །སྐུ་གསུམ་ལ་ནི་རྣམ་པར་བཞུགས། །ཞེས་བྱ་བ་ནི་སྐུ་ལ་སོགས་པ་གསུམ་དང་ལྡན་པའོ། །འཇམ་པའི་དཔལ་
གྱིས་ལེགས་པར་བརྒྱན། །ཞེས་བྱ་བ་ནི་འཇམ་དཔལ་གྱི་སྐུས་མཚན་པའི་ཐོད་པའི་ཕྲེང་བ་ཡོད་པའི་ཕྱིར་རོ། །ལྷ་མོ་ཡིས་ན་ཞེས་བྱ་བ་ལ་སོགས་པ་ལ་གཅིག་གིས་ནི་དེ་གཡས་ནས་འཁྱུད་པའོ། །གཉིས་པ་ནི་རྒྱབ་ཏུ་གནས་ནས་ཨུཏྤལ་ཐོགས་པའོ། །གསུམ་པ་ནི་གཡས་ཕྱོགས་ན་འདུག་པ་སྟེ་པདྨ་ཐོགས་པའོ། །བཞི་པ་ནི་མདུན་དུ་གནས་པར་ཤེས་པར་བྱའོ། །ཁྲོ་བོ་གཞན་གྱིས་མི་ཐུབ་པའི་ཞལ་རས་གསུམ་ནི་རྣམ་པར་སྣང་མཛད་དང་འདྲའོ། །རྟ་མཆོག་གི་ཞལ་གསུམ་ནི་རིན་ཆེན་འབྱུང་ལྡན་དང་འདྲའོ། །ཁྲོ་བོ་བགེགས་ཀྱི་གཤེད་ནི་ཞལ་གསུམ་དོན་ཡོད་རྡོ་རྗེ་ལྟ་བུ་སྟེ་ཞབས་གཡས་པས་བགེགས་གནོན་ཅིང་གཡོན་པས་པདྨ་ལ་བརྟེན་པའོ། །ཁྲོ་བོ་མི་གཡོ་བ་ནི་ཞལ་གསུམ་དཔལ་རྡོ་རྗེ་སེམས་དཔའ་དང་འདྲའོ། །རིན་ཆེན་རི་སྟེང་པདྨ་ལ། །ཞེས་བྱ་བ་ནི་པདྨའི་འོག་ཏུ་རིན་པོ་ཆེའི་རི་བོ་ཡོད་པའོ། །ཁྲོ་བོ་འདོད་པའི་རྒྱལ་པོ་ནི་ཞལ་གསུམ་མི་གཡོ་བ་དང་འདྲ་བའོ། །འདོད་པའི་རྒྱལ་པོའི་ཕྱག་རྒྱ་ནི་འོག་ནས་བཤད་པའོ། །ཁྲོ་བོ་བེ་ཅོན་སྔོན་པོ་ཅན་ནི་ཞལ་གསུམ་འདོད་པའི་རྒྱལ་པོ་དང་འདྲའོ། །སྐུ་ནི་རི་སྔོན་འདྲ་བའོ་ཞེས་བྱ་བ་ནི་ཞལ་དབུས་མ་རི་བོ་སྔོན་པོ་དང་འདྲ་བ་མངའ་བའོ། །དབུ་རྒྱན་ལ་ནི་སངས་རྒྱས་བཞུགས། །ཞེས་བྱ་བ་ནི་སྤྱི་བོར་སངས་རྒྱས་ཀྱི་དབུ་རྒྱན་དང་ལྡན་པའོ། །སྦྱོར་བའི་ཡེ་ཤེས་ཀྱིས་བསྐུལ་བའི། །ཞེས་བྱ་བ་ནི་སྙོམས་པར་ཞུགས་པ་ལས་བྱུང་བའི་བྱང་ཆུབ་ཀྱི་སེམས་ལས་སྐྱེས་ཞེས་བྱ་བའི་དོན་ཏོ། །ཁྲོ་བོ་སྟོབས་པོ་ཆེ་ནི་ཞལ་རས་གསུམ་བདུད་རྩི་ཐབ་སྦྱོར་དང་འདྲའོ། །དྲག་པོ་ཚམ་དམ་སྟང་སྟབས་ཅན། །ཞེས་བྱ་བ་ནི་ཞབས་ཚམ་དམ་གྱི་སྟང་སྟབས་དན་བཅས་པའོ། །ཉི་མའི་དཀྱིལ་འཁོར་ནང་ན་བཞུགས། །ཞེས་བྱ་བ་ནི་ཉི་མའི་འོད་ཀྱི་དཀྱིལ་འཁོར་ལ་བཞུགས་པའོ། །བཅོམ་ལྡན་འདས་ནི་རྡོ་རྗེ་སྐྱིལ་མོ་ཀྲུང་དང་ལྡན་པའོ། །སློབ་དཔོན་ལ་ལ་དག་ནི་རོལ་པའི་སྟང་སྟབས་ཀྱིས་བཞུགས་པར་འདོད་དོ། །བསྐལ་པ་བཟང་པོ་པ་རྣམས་དང་ལྷ་མོ་སྒྲོལ་མ་ལ་ཡང་དེ་བཞིན་ནོ། །ལྷག་མ་ནི་རོལ་པའི་སྟང་སྟབས་ཀྱིས་བཞུགས་སོ། །གཙུག་ཏོར་འཁོར་ལོས་སྒྱུར་
བའི་སྐུ་གསུམ་ཞེས་བྱ་བ་ནི་སྐུ་དང་གསུང་དང་ཐུགས་ཀྱི་དབྱེ་བས་སོ། །ཞལ་གསུམ་ནི་རྣམ་པར་སྣང་མཛད་དང་འདྲའོ། །རིན་ཆེན་རི་སྟེང་པདྨ་ལ། །ཞེས་བྱ་བ་ནི་པདྨའི་འོག་ཏུ་རིན་པོ་ཆེའི་རི་ཡོད་པའོ། །རིགས་ཀྱི་ཡུམ་ནི་སྤྱན་ལ་སོགས་པ་སྟེ་རིམ་བཞིན་དུ་རིན་པོ་ཆེའི་སྙེ་མ་དང༌། རྡོ་རྗེ་དང༌། པདྨ་དང་ཨུཏྤལ་བསྣམས་པའོ། །ཆགས་ཕྱིར་སྤྲོ་ཞིང་རྩོལ་བ་ཅན། །ཞེས་བྱ་བ་ནི་ཆགས་པས་ནི་ཤིན་ཏུ་རྩོལ་བ་དང་བཅས་པའོ། །གནོད་གནས་ཀྱི་སྐུ་གསུམ་ཅན་ཞེས་བྱ་བ་ནི་སྔ་མ་བཞིན་ནོ། །ཞལ་རས་གསུམ་ནི་ཐུགས་རྡོ་རྗེ་དང་འདྲ་བའོ།། པདྨའི་གདན་ལ་བཞུགས་པ་ཞེས་བྱ་བ་ནི་ཞབས་གཡས་པ་པདྨའི་གདན་ལ་བརྟེན་པས་བཞུགས་སོ། །བཟང་པོའི་འདུག་སྟངས་ཞེས་བྱ་བ་ནི་གཡོན་པས་བཟང་པོའི་འདུག་སྟངས་སུ་གནས་པ་སྟེ་བུམ་པ་བཟང་པོ་ལ་བརྟེན་པའོ། །ལ་ལ་ནི་རོལ་པའི་སྟང་སྟབས་སུ་གནས་སོ་ཞེས་ཟེར་རོ། །ཕྱག་ན་རྡོར་ཇེ་བདུད་རྩི་ཡིས། །ཞེས་བྱ་བ་ནི་འདི་སྐད་སྟོན་པར་འགྱུར་ཏེ། རང་གི་ལྷ་སྤྱན་དྲངས་པ་ལ་སོགས་པ་སྔོན་དུ་འགྲོ་བས་ལག་པ་གཡས་པར་དང་པོའི་ཡི་གེ་ཨ་ལས་བྱུང་བའི་ཟླ་བའི་དཀྱིལ་འཁོར་ལ་གནས་པའི་ཡི་གེ་ལཾ་གྱིས་ཁྱབ་པའི་ལག་པས་དྲི་བཟང་པོའི་ཆུ་ཇི་ལྟ་བ་བཞིན་དུ་བླུགས་པར་བྱའོ། །ལྷ་མོ་འོད་ཟེར་ཅན་གྱི་ཞལ་གསུམ་ནི་རྣམ་པར་མཛད་དང་འདྲ་བའོ། །ཧཱུཾ་མཛད་ཅེས་བྱ་བ་ནི་ཁྲོ་བོའི་སྟང་སྟབས་དང་ལྡན་པའོ། །རོ་ཁྲོད་ཤིང་ལོ་ཅན་གྱི་ཞལ་རས་གསུམ་ནི་རྣམ་པར་སྣང་མཛད་དང་དྲ་བའོ། །དེ་ཡང་ཁྲོ་བོའི་མེ་འབར་བས་སྐྱེ་དགུ་རྣམས་ལ་འཚེ་བའི་གདོན་ཐམས་ཅད་ཐལ་བར་བྱས་ནས་སངས་རྒྱས་རྣམས་སྤྲོས་ཏེ་དེ་རྣམས་ཀྱིས་འགྲོ་བ་རྣམས་ལ་བདུད་རྩིའི་ཆར་འབེབས་པའོ། །དུག་སེལ་མའི་ཞལ་རས་གསུམ་ནི་རྣམ་པར་སྣང་མཛད་དང་འདྲ་བའོ། །བླུགས་ཞེས་བྱ་བ་ནི་སངས་རྒྱས་ཀྱི་གཟུགས་རྣམས་སྤྲོས་ལ་དེ་དག་ཉིད་ཀྱིས་ཡི་གེ་ཛཿ་ས་ཁ་རྣམ་པར་བརྒྱན་པའི་ཟླ་བའི་བུམ་པ་རྣམས་ཀྱིས་དུག་གིས་ཕོག་པ་རྣམས་ལ་ལྡུགས་སོ་ཞེས་པའི་བར་དུའོ། །ཧ་ལ་ཧ་ལའི་ཞལ་རས་གསུམ་ནི་འོད་དཔག་ཏུ་མེད་པ་དང་འདྲ་བའོ།།
ལྷ་རྣམས་ཀྱི་ཏིང་ངེ་འཛིན་ཉིད་ཀྱིས་ཇི་ལྟར་རང་གི་བསམ་གཏན་གྱི་ཚུལ་སྟོན་པ་བཞིན་དུ་ཤེས་པར་བྱའོ། །སྐྲ་ཚུགས་ཕྱེད་དུ་གཟར་ཞེས་བྱ་བ་ནི་དཔྲལ་བའི་བར་དུ་སྐྲ་འཁྱིལ་བའོ། །སྐྲ་རབ་ཅེས་བྱ་བ་ནི་སྐྲ་སྟེ་དེའི་མགོ་ལའོ། །འཇམ་པའི་རྡོ་རྗེ་ཁྲོ་བོ་ཡིས། །ཞེས་བྱ་བ་ནི་གཤིན་རྗེའི་གཤེད་ཅེས་བྱ་བའི་ཁྲོ་བོ་དེའི་མགོ་ལ་གནས་པའོ། །དེ་ནི་འདི་སྐད་སྟོན་པར་འགྱུར་ཏེ། འཇམ་པའི་རྡོ་རྗེའི་རྣལ་འབྱོར་པས་མདུན་དུ་ཀྵཾ་ལས་བྱུང་བའི་གནོད་སྦྱིན་མ་བསྐྱེད་ལ་དེ་དང་སྙོམས་པར་འཇུག་པ་ལས་ཡང་དང་ཡང་དུ་དེ་ཉིད་སྤྲོས་ནས་ནམ་མཁའ་གང་བར་བསྒོམས་ལ། མཾ་ཨོཾ་ཨཱ་ཞེས་བྱ་བའི་ཡི་གེ་གསུམ་ལས་ཁྱབ་འཇུག་དང༌། ལྷ་ཆེན་པོ་དང༌། ཚངས་པ་སྟེ་དེ་དག་ཇི་སྐད་དུ་བསྟན་པའི་རང་གི་ཡི་གེ་ལས་བྱུང་བ་ལ་རྡོ་རྗེ་ཧཱུཾ་མཛད་ཀྱི་སྦྱོར་བ་དང་ལྡན་པའོ། །དགུག་པ་ལ་སོགས་པ་སྔོན་དུ་འགྲོ་བས་མནན་ལ་ཡི་གེ་ཧཱུཾ་བརྗོད་ཅིང་བསྒོམ་པར་བྱའོ། །བརྒྱ་བྱིན་ལ་སོགས་པ་ཡང་རང་གི་ས་བོན་ལས་བྱུང་བའི་རིམ་པ་འདི་ཉིད་ཀྱིས་བསྒྲུབ་པར་བྱའོ་ཞེས་བསྟན་པར་བྱ་བའི་ཕྱིར་གཞན་ཡང་ཞེས་བྱ་བ་ལ་སོགས་པ་གསུངས་སོ། །འབྲོག་བྱེད་ལས་སྐྱེས་པ་ཞེས་བྱ་བ་ནི། །ཡི་གེ་ཧ་ལས་བྱུང་བ་སྟེ། དེར་ཡང་རང་གི་འཁོར་གྱིས་ཡོངས་སུ་བསྐོར་བ་ཇི་བཞིན་དུ་སྦྱོར་བ་དང་སྤྲོ་བ་ལ་སོགས་པས་བསྒྲུབ་པར་བྱའོ། །ལེའུ་བཞི་པའི་བཤད་པའོ།། །།དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་ནི་གསང་སྔགས་ཀྱི་ཡེ་ཤེས་རྣམ་པར་བསྒྱིངས་པ་རིམ་པར་ཕྱེ་བ་སྟོན་ཏེ། ཞི་བ་ཉིད་ནི་ཉེས་པ་ཐམས་ཅད་དང་བྲལ་བས་ན་རྡུལ་དང་བྲལ་བའོ། །དེ་ཉིད་མཆོག་སྟེ་ཏིང་ངེ་འཛིན་གང་ལ་དེ་སྐད་ཅེས་བྱ་བ་དེ་ལ་སྙོམས་པར་ཞུགས་པའོ། །སངས་རྒྱས་རྡོ་རྗེ་ཞེས་བྱ་བ་ནི་བཅོམ་ལྡན་།དས་རྣམ་པར་སྣང་མཛད་ཀྱི་གཟུགས་སུ་བྱུང་བ་སྟེ། དེ་བཞིན་དུ་འོག་མ་རྣམས་ལ་ཡང་ཅི་རིགས་པར་རྗེས་སུ་སྦྱར་བར་བྱ་སྟེ། རྣམ་པར་སྣང་མཛད་ཀྱི་སྦྱོར་བ་དང་ལྡན་པས་ཡུམ་སངས་རྒྱས་སྤྱན་གསང་སྔགས་ཀྱི་ཡི་གེ་ལས་བདུད་རྩིས་གང་བའི་གང་བའི་ཟླ་བའི་བུམ་པ་ཐོགས་པ་ཕྱུང་ལ་ནད་པ་ལ་ལྡུགས་པར་བསྒོམས་ན་ཞི་བ་བསྐྱེད་པར་འགྱུར་ཏེ། །ཞི་བ་རྣམས་ལ་ཡང་
སྲོག་སྦྱིན་པར་བྱེད་ཅིང་མ་གྲུབ་པ་རྣམས་ལ་གྲུབ་པ་སྩོལ་བར་འགྱུར་རོ། །ཅིའི་ཕྱིར་འདི་ལྟར་འགྱུར་ཞེ་ན། རྡོ་རྗེ་ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་བཅིངས་པ་ལ་སོགས་པའི་དམ་ཚིག་གི་སྔགས་ཀྱིས་དབང་བསྐུང་བའི་བདག་ཉིད་ཅན་གྱི་སྐུ་བསྐུལ་ཞིང་མངོན་སུམ་དུ་བྱས་པ་ནི་རྡོ་རྗེ་དམ་ཚིག་གིས་བསྐུལ་བའོ། །སྐུ་གསུམ་འབར་བ་ཡིས་ནི་ཐུགས་རྗེ་སྟེ་མཆོག་གི་དམ་ཚིག་ནི་མཱ་མ་ཀཱིའི་མཚན་ཉིད་ཅན་ཏེ། ཏིང་ངེ་འཛིན་གང་ལ་དེ་སྐད་ཅེས་བྱ་བ་དེ་ལ་སྙོམས་པར་ཞུགས་པའོ། །རྡོ་རྗེའི་དཀྱིལ་འཁོར་ཞེས་བྱ་བ་ནི་རྡོ་རྗེའི་རིགས་ཀྱི་སྟེ་དེ་ཡང་སྔགས་ཀྱི་ཡི་གེ་དཀར་པོ་ཕྱུང་ནས་དེ་བསྒྲུབ་པར་བྱ་བའི་ལུས་ཀུན་དུ་གང་བར་བསྒོམས་ན་སྡིག་པ་འཇོམས་པར་འགྱུར་རོ། །ནད་པ་ལ་ཞི་བ་ནི་སྤྱན་དང་འདྲ་བར་བྱའོ། །རྒྱས་པ་ལ་རིན་པོ་ཆེའི་བུམ་པས་རིན་པོ་ཆེའི་ཆར་འབེབས་པར་བསམ་པར་བྱའོ། །འདོད་ཆགས་ཆེན་པོ་ནི་འོད་དཔག་ཏུ་མེད་པའོ། །དེ་སོ་སོར་རྟོག་པའི་མཚན་ཉིད་ཅན་གྱི་པདྨས་ཆགས་ཤིང་མཉེས་པར་བྱས་པས་ག་ར་དེས་རྣམ་པར་འཕྲུལ་པའོ། །དེ་ཉིད་འཐོབ་པ་སྟེ་གོས་དཀར་མོ་ཞེས་བྱ་བས་སྒྲིབ་པ་རྣམས་འཐོར་བར་བྱེད་པའི་ཕྱིར་རོ། །དེ་ལ་དམིགས་པའི་ཏིང་ངེ་འཛིན་རྡོ་རྗེ་དེ་ལ་དེ་སྐད་ཅེས་བྱའོ། །རྡོ་རྗེ་ཆོས་ནི་འོད་དཔག་ཏུ་མེད་པ་སྟེ་གསང་སྔགས་ཀྱི་ཡི་གེ་གསེར་གྱི་མདོག་ཅན་དུ་ཕྱུང་ལ་བསྒྲུབ་པར་བྱ་བ་དབང་བསྐུར་ན་རྒྱས་པ་ཆེན་པོ་སྐྱེད་པར་འགྱུར་རོ། །དེ་ཉིད་སྤྲོ་བ་དང་བསྡུ་བ་དག་ཏུ་བསྒོམ་པས་ཆོས་ཀྱི་མཛོད་རྣམ་པར་འཕེལ་བར་བྱེད་དོ། །རང་གི་སྙིང་གའི་པདྨའི་ལྟེ་བ་ལ་བསྒྲུབ་པར་བྱ་བ་གཞག་སྟེ། གསང་སྔགས་ཀྱི་ཡི་གེའི་ཕྲེང་བས་བསྐོར་ལ། །སྣ་ཚོགས་རྡོ་རྗེ་སྤྱི་བོར་གནས་པར་བྱས་ནས་བཟླས་པ་ལ་སོགས་པ་ཇི་ལྟ་བ་བཞིན་དུ་བྱས་ན་སྲུང་བ་ཆེན་པོ་མཛད་པར་འགྱུར་རོ། །ཐམས་ཅད་དབང་དུ་བྱ་བ་ནི་ཚེ་ལ་དབང་བ་ལ་སོགས་པ་བཅུའོ། །དེ་རྣམས་ཁོང་དུ་ཆུད་པར་བྱས་པ་ལས་བསྐྱེད་པ་ནི་དོན་ཡོད་རྡོ་རྗེ་ཅན་ནོ། །དེ་ཉིད་ནི་རྡོ་རྗེ་གསུམ་མཉམ་པ་ཉིད་དེ་དེའི་དགའ་བར་བྱེད་པ་ནི་རྡོ་རྗེ་དང་འདྲ་བར་མ་ཕྱེད་པའི་ཏིང་ངེ་འཛིན་གང་ཡིན་པ་དེ་ལ་སྙོམས་པར་ཞུགས་ནས་ཡི་གེ་
དམར་བོའི་གསང་སྔགས་ཕྱུང་ལ་དེས་བསྒྲུབ་པར་བྱ་བ་ཀུན་དུ་བཀང་ལ་བཟླས་ན་མངག་གཞུག་པར་འགྱུར་རོ། །ཡེ་ཤེས་ལ་འཇུག་པས་སྒྲོལ་བར་བྱེད་པ་ཞེས་བྱ་བ་ནི། །ཡེ་ཤེས་ལ་འཇུག་པས་སྒྲོལ་བར་བྱེད་པས་ན་དེ་ལས་དམིགས་པའི་ཏིང་ངེ་འཛིན་དེ་ལ་ཡང་དེ་སྐད་ཅེས་བྱའོ། །རྡོ་རྗེ་ནི་གཤིན་རྗེ་གཤེད་ལ་སོགས་པའི་ཁྲོ་བོ་རྣམས་ཏེ། དེ་དག་ཉིད་གདུག་པ་རྣམས་སྒྲིབ་པའི་ཕྱིར་དེ་རྣམས་ཀྱིས་དྲ་བར་བྱས་པའོ། །ཡེ་ཤེས་སྣ་ཚོགས་ཅན་ནི་འཇིག་རྟེན་ལས་འདས་པའི་ཡེ་ཤེས་སྣ་ཚོགས་དང་ལྡན་པའོ། །སྲུབས་གཅིག་པ་ནི་དུམ་བུ་གཅིག་པའོ། །སྲུབས་གཉིས་པ་ནི་དུམ་བུ་གཉིས་པ་སྟེ་འདི་གཉིས་ཁོ་ན་བསྔགས་པ་ཡིན་པའི་ཕྱིར་རོ། །བཟང་པོ་ནི་ཡན་ལག་མ་ཉམས་པའོ། །རྐང་རྗེས་ས་ཡི་ཆོ་ག་ཡིས། །ཞེས་བྱ་བ་ལ་དེས་ནི་འདི་སྐད་སྟོན་པར་འགྱུར་ཏེ། །གཤིན་རྗེ་གཤེད་ཀྱི་རྣལ་འབྱོར་པས་ལྷ་མོ་བཞིའི་སྦྱོར་བ་དང་ལྡན་པས་དེ་བཞིན་གཤེགས་པ་ལྔས་བྱིན་གྱིས་བརླབས་ལ་བསྒྲུབ་བྱའི་རྐང་རྗེས་ཀྱིས་ལས་དེའི་གཟུགས་བརྙན་བྱས་ཏེ། ཐོད་པར་བཞག་ལ་དེ་དགུག་པ་དང༌། གཞུག་བ་དང་བཅིང་བ་བྱས་ལ་རྐང་པ་གཡོན་པས་མནན་ཏེ། བསྐུལ་བ་དང་བཅས་པར་ཇི་སྲིད་དུ་ཁུགས་པར་གྱུར་པ་དེ་སྲིད་ཀྱི་བར་དུ་བཟླས་བརྗོད་བྱའོ། །སྐུ་གསུམ་དབྱེར་མེད་བསྒོམས་ནས་སུ། །ཞེས་བྱ་བ་ནི་རང་གི་ལྷའི་ང་རྒྱལ་བརྟན་པོ་དང་ལྡན་པའོ། །སྤྲིན་མཆོག་ནི་དོན་ཡོད་རྡོ་རྗེ་སྟེ་དེའི་ཡེ་ཤེས་རྡོ་རྗེ་ནི་མཆོག་གོ །དེའི་ཡེ་ཤེས་དེ་ལས་རྡོ་རྗེ་བདུད་རྩིའི་ཁྲོ་བོའི་ཏིང་ངེ་འཛིན་གང་ཡིན་པ་དེ་ལ་དེ་སྐད་ཅེས་བྱའོ། །ཚོགས་བདག་རྐང་པའི་དྲུང་དུ་གཞག །ཅེས་བྱ་བ་ནི་བདུད་རྩི་ཐབ་སྦྱོར་གྱི་སྦྱོར་བ་དང་ལྡན་པས་བསྒྲུབ་པར་བྱ་བའི་རྐང་རྗེས་ཀྱིས་ལས་དེའི་གཟུགས་བརྙན་བོང་བུའི་གཅིན་དང་སྦྲུས་ཏེ་བྱས་ལ་རླུང་གིས་ཁྱེར་བའི་འདབ་མ་ལ་ཁྲག་དང་བཏགས་པའི་དུར་ཁྲོད་ཀྱི་སོལ་བས། ཁྲོ་བོ་དང་སྤེལ་བའི་བསྒྲུབ་པར་བྱ་བའི་མིང་བྲིས་ནས་གཟུགས་བརྙན་གྱི་གནས་ལྔའི་ནང་དུ་བཅུག་ལ། རྡོ་རྗེ་ཚོགས་ཀྱི་བདག་པོ་བཀུག་ནས་ལེགས་པར་མཆོད་དེ། དེའི་རྐང་པའི་འོག་ཏུ་དེ་གཞག་པ་བྱས་ལ་སྔགས་ཀྱི་མཐར་ཧཱུཾ་ཆེ་གེ་མོ་སྐྲོད་
ཅིག་ཕཊ་ཅེས་བྱ་བའི་བར་དུ་ཁྲོས་པས་བཟླས་བརྗོད་བྱའོ། །རིན་པོ་ཆེའི་སྒྲོལ་མ་ནི་རིན་ཆེན་འབྱུང་ལྡན་ནོ། །དེའི་ཁྲོ་བོའི་ཡེ་ཤེས་ནི་སྔ་མ་བཞིན་ནོ། །དེ་ལས་བྱུང་བའི་རྡོ་རྗེ་ནི་ཁྲོ་བོའི་བདག་ཉིད་ཅན་གྱི་ཏིང་ངེ་འཛིན་གང་ཡིན་པ་དེ་ལ་དེ་སྐད་ཅེས་བྱའོ། །རྡོ་རྗེས་གཟིར་བའི་སྦྱོར་བ་ཡིས། །ཧཱུཾ་ཙམ་གྱིས་ཀྱང་ལས་བྱེད་དོ། །ཞེས་བྱ་བ་ནི་ཁྲོ་བོ་གཞན་གྱིས་མི་ཐུབ་པའི་སྦྱོར་བ་དང་ལྡན་པས་དེ་ཉིད་འབར་བའི་ཕྲེང་བས་འཁྲིགས་པ་ཕྱུང་ལ་སྔགས་ཀྱི་མཐར་ཧཱུཾ་ཞེས་བྱ་བ་བརྗོད་ནས་གནོད་སྦྱིན་ལ་སོགས་པ་གཟིར་བར་བྱའོ། །དཔག་ཏུ་མེད་པ་ནི་འོད་དཔག་ཏུ་མེད་པའོ། །དེའི་ཡེ་ཤེས་ནི་རིན་པོ་ཆེ་དང་འདྲ་བས་ན་རིན་པོ་ཆེའོ། །དེ་ཉིད་ནི་ཡོན་ཏན་བསགས་པའོ། །དེ་ལས་བྱུང་བའི་རྡོ་རྗེ་ནི་ཁྲོ་བོའི་རང་བཞིན་ཏེ། ཏིང་ངེ་འཛིན་གང་ལ་དེ་སྐད་ཅེས་བྱ་བ་དེ་ལ་སྙོམས་པར་ཞུགས་པའོ། །བསམ་ཞེས་བྱ་བ་ནི་འདི་སྐད་སྟོན་པར་འགྱུར་ཏེ། རྟ་མགྲིན་གྱི་རྣལ་འབྱོར་པས་ལག་པ་གཡས་པ་ལས་བྱུང་བའི་པདྨ་དཀར་པོ་འདབ་མ་བརྒྱད་པ་གནས་པར་བསམས་ལ། དེའི་ལྟེ་བ་ལ་གནས་པའི་ཡི་གེ་ཧ་འོད་ཟེར་འབར་བ་ལས་བསྒྲུབ་པར་བྱ་བའི་སྟེང་དུ། བདུད་རྩི་འབར་བར་བསམས་ལ། དེ་དང་གསང་སྔགས་འདོན་པ་སྔོན་དུ་འགྲོ་བས་དུག་ཐམས་ཅད་དྲང་བར་བྱའོ། །དོན་ཡང་དག་པར་འབྱུང་བ་ནི་དོན་ཡོད་རྡོ་རྗེའོ། །དེའི་མཆོག་གི་ནོར་བུ་སྟེ་རྡོ་རྗེ་རིན་པོ་ཆེའོ། །དེ་ལས་བྱུང་བའི་རྡོ་རྗེ་ནི་ཁྲོ་བོའི་མཚན་ཉིད་ཅན་གྱི་ཏིང་ངེ་འཛིན་གང་ཡིན་པ་དེ་ལ་སྙོམས་པར་ཞུགས་ཤིང་དམིགས་པ་ལ་སེམས་རྩེ་གཅིག་ཏུ་གྱུར་ལ་མངོན་རུ་མཛད་ཅེས་བྱ་བའི་བར་དུའོ། །གསོད་པར་བྱེད་དོ་ཞེས་བྱ་བ་ནི་ཁྲོ་བོ་བེ་ཅོན་སྔོན་པོ་ཅན་གྱི་རྣལ་འབྱོར་པས་བསྒྲུབ་པར་བྱ་བ་མདུན་དུ་གནས་པར་བསམས་ནས་ཁྲོ་བོ་མཚོན་ཆ་འབར་བ་ལག་ན་ཐོགས་པ་ཕྱུང་ལ་དེ་དག་ཉིད་ཀྱིས་དེ་གསོད་པར་བསམས་ལ་ཁྲོ་བོའི་ཚིག་གིས་གསང་སྔགས་བརྒྱ་རྩ་བརྒྱད་བརྗོད་ན། ངེས་པར་གསོད་པར་བྱེད་དོ། །ཀུན་དུ་རྣམ་པར་འཕྲོ་བ་ནི་བྱང་ཆུབ་ཀྱི་སེམས་ཏེ་དེ་ཉིད་བཀོད་པའོ། །དེ་ལས་བྱུང་བའི་རྡོ་རྗེ་ནི་ཁྲོ་བོའི་བདག་ཉིད་ཅན་གང་ཡིན་
པ་སྟེ་ཏིང་ངེ་འཛིན་དེ་ལ་ཡང་དེ་སྐད་ཅེས་བྱའོ། །ཆར་པ་ཆེན་གཅོད་པར་འགྱུར། །ཞེས་པ་ནི་སྟོབས་པོ་ཆེའི་སྦྱོར་བ་དང་ལྡན་པས་ཁྲོ་བོ་མཚོན་ཆ་འབར་བ་ཐོགས་པ་ཕྱུང་ནས་སྤྲིན་རྣམས་བསྲེགས་པར་གྱུར་ཅིང༌། ཆུ་རྣམས་སྐམས་པར་བསམས་ལ་ཁྲོ་བས་བཟླས་ན་ཆར་ཆེན་པོ་གཅོད་པར་འགྱུར་རོ། །གདངས་ཀ་ཅན་གྱི་ཀླུའི་གཟུགས་གྲོག་མཁར་གྱིས་ལས་བྱས་ནས་དགུག་པ་ལ་སོགས་པ་སྔོན་དུ་འགྲོ་བས་མནན་ལ་ཆར་ཕོབ་ཅིག་ཅེས་བསྐུལ་ཏེ་དེ་བཞིན་དུ་བཟླས་བརྗོད་བྱས་ན་ཆར་འབབས་པར་འགྱུར་རོ། །ཀུན་དུ་འབར་བ་ཞེས་བྱ་བ་ནི་སྔ་མ་བཞིན་ནོ། །དེ་ཉིད་སྙིང་པོ་ཅན་གྱི་ཁྲོ་བོ་གང་ཡིན་པ་སྟེ་དེ་ལ་དམིགས་པའི་ཏིང་ངེ་འཛིན་དེ་ལ་ཡང་དེ་སྐད་ཅེས་བྱའོ། །བཀུག་ནས་ནི་ཞེས་པ་ནི་འདོད་པའི་རྒྱལ་པོའི་ཏིང་ངེ་འཛིན་དང་ལྡན་པས་རྐང་པ་གཡས་པར་སྣ་ཚོགས་རྡོ་རྗེ་འབར་བ་དགོད་པས་བཀུག་ནས་བསྒྲུབ་པར་བྱ་བའི་མཚན་མ་མནན་ཏེ་ཁྲོ་གཉེར་རིམ་པར་བསྙེར་ཞིང་ཁྲོས་པས་བསྐུལ་བའི་ཚིག་དང་བཅས་པར་གསང་སྔགས་བཟླས་པ་བྱས་ན་ངེས་པར་ཁུགས་པར་འགྱུར་རོ། །ཡེ་ཤེས་འབར་བ་དང་འདྲ་བས་ན་ཡེ་ཤེས་རབ་ཏུ་འབར་བའོ། །དེ་ལས་རབ་ཏུ་འབར་བ་ནི་ཁྲོ་བོ་གཏུམ་བ་སྟེ་དེ་ལ་དམིགས་པའི་ཏིང་ངེ་འཛིན་དེ་ལ་ཡང་དེ་སྐད་ཅེས་བྱའོ། །ཁྲོ་བོའི་རྒྱལ་པོ་ཞེས་བྱ་བ་ལ་སོགས་པ་གསུངས་པ་ལ་མི་གཡོ་བའི་སྦྱོར་བ་དང་ལྡན་པས་དེ་ཉིད་མནན་ལ་ཞགས་པས་བཅིངས་ལ་དྲང་བར་བྱའོ། །ཡང་ན་ལས་འདི་དག་ཐམས་ཅད་ལ་ནི་རང་གི་བདག་པོའི་སྦྱོར་བ་ཇི་ལྟ་བས་བྱའོ། །སྐུ་གསུམ་རྡོ་རྗེ་ནི་བཅོམ་ལྡན་འདས་རྣམ་པར་སྣང་མཛད་དོ། །དེའི་ཡེ་ཤེས་འབར་བའི་འོད་ཟེར་ལྟ་བུ་དེ་ལས་གནོད་མཛེས་ཀྱི་བདག་ཉིད་ཅན་ནི་རྡོ་རྗེ་སྟེ་དེ་ལ་དམིགས་པའི་ཏིང་ངེ་འཛིན་ལ་སྙོམས་པར་ཞུགས་པའོ། །སྐུ་གསུམ་རྡོ་རྗེ་མཆོག་མངའ་བས། །ཞེས་བྱ་བ་ནི་རྣམ་པར་སྣང་མཛད་ངོ༌། །དགུག་བྱ་བ་ཞེས་བྱ་བ་ནི་གནོད་མཛེས་ཀྱི་སྦྱོར་བ་དང་ལྡན་པས་བསྒྲུབ་པར་བྱ་བའི་སྙིང་གའི་པདྨའི་ལྟེ་བ་ལྕགས་ཀྱུས་ཕུག་ལ་དགྲ་བདུད་ཞགས་པས་བཅིངས་ནས་གསང་སྔགས་བརྗོད་དེ་དགུག་པར་བྱའོ། །ཡེ་ཤེས་ཆེན་པོ་ནི་སྔ་མ་བཞིན་ཏེ། རྡོ་རྗེའི་
སྔགས་ཀྱི་གཟུགས་ཀྱིས་དེ་རྣམ་པར་བསྒྱིངས་པ་ཉིད་ནི་དགའ་སྟོན་ཏེ། དེ་ལ་དམིགས་པའི་ཏིང་ངེ་འཛིན་ལ་ཡང་དེ་སྐད་ཅེས་བྱའོ། །སངས་རྒྱས་བྱང་ཆུབ་རྗེས་དྲན་པས། །ཞེས་བྱ་བ་ནི་སངས་རྒྱས་ཀྱི་བྱང་ཆུབ་ལ་སེམས་ཅན་ཐམས་ཅད་དགོད་པར་བྱའོ་ཞེས་མངོན་དུ་བྱེད་པའོ། །འཁོར་ལོ་ཆེ་ལ་རྣམ་གནས་ནས། །ཞེས་བྱ་བ་ནི་འདི་སྐད་སྟོན་པར་འགྱུར་ཏེ། རྡོ་རྗེ་སེམས་དཔའི་རྣལ་འབྱོར་པས་འཁོར་ལོ་ཆེན་བོའི་དབུས་སུ་འདུག་སྟེ། ལྕགས་ཀྱུ་དང་ཞགས་པ་ཐོགས་པའི་སངས་རྒྱས་ཀྱི་སྤྲིན་ཕྱུང་སྟེ། དས་ནི་སངས་རྒྱས་རྣམས་ཀྱང་འགུགས་པར་བྱེད་དོ། །རང་སྔགས་སྐྱེས་བུར་རྣམ་བསྒོམས་ནས། །ཞེས་བྱ་བ་ནི་རང་གི་ལྷའི་སྦྱོར་བ་དང་ལྡན་པའོ། །འགུགས་འགྱུར་ཏེ་ཞེས་བྱ་བ་ནི་མིའམ་ལྷ་མ་ཡིན་གྱི་བུ་མོ་རླུང་གི་དཀྱིལ་འཁོར་ལ་གནས་པར་བསམས་ལ་ལྕགས་ཀྱུས་སྙིང་ག་ཕུག་སྟེ་སྔགས་བརྗོད་ནས་བཀུག་ན་ངེས་པར་ཁུགས་པར་འགྱུར་རོ། །ཟླ་བའི་དཀྱིལ་འཁོར་ལ་གནས་པ། །ཞེས་བྱ་བ་ནི་བཅོམ་ལྡན་འདས་རྣམ་པར་སྣང་མཛད་ཟླ་བའི་མདོག་ཅན་སྐུ་ཆེན་པོ་དང་ལྡན་པ་བསམས་ལ་བསྒྲུབ་བར་བྱ་བ་ཟླ་བའི་དཀྱིལ་འཁོར་དེ་ལ་གནས་པར་བྱའོ། །རྡོ་རྗེ་བདུད་རྩི་ཞེས་བྱ་བ་ནི་འདི་སྐད་སྟོན་ཏེ། རྡོ་རྗེ་བདུད་རྩི་ཞེས་བྱ་བའི་ཁྲོ་བོའི་སྦྱོར་བས་དེ་འོངས་པར་རྣམ་པར་བསམས་ལ་དེའི་གསང་སྔགས་ལན་བཅུ་བརྗོད་ན། ངེས་པར་ཁུགས་པར་འགྱུར་རོ། །གཞོན་ནུ་མ་དག་ངེས་པར་ཁུགས། །ཞེས་བྱ་བ་ནི་རྡོ་རྗེ་བདུད་རྩིའི་ཁྲོ་བོའི་སྦྱོར་བ་ཉིད་ཀྱིས་རྡོ་རྗེ་ལྕགས་ཀྱུ་གཟུགས་ཆེན་པོ་དང་ལྡན་ཞིང་འབར་བ་དང༌། རྡོ་རྗེ་རླུང་གི་དཀྱིལ་འཁོར་ད་ལ་བསྒྲུབ་པར་བྱ་བ་གནས་བར་བསམས་ལ་ལྕགས་ཀྱུས་སྙིང་ག་ཕུག་སྟེ་གཞོན་ནུ་མ་དགུག་པར་བྱའོ། །ལྷ་མ་ཡིན་གྱི་བུ་མོ་དགུག་པའི་ཆོ་ག་ནི་སྔ་མ་བཞིན་ནོ། །ཁུགས་ཞེས་བྱ་བ་ནི་འདི་སྐད་སྟོན་པར་འགྱུར་ཏེ། རྡོ་རྗེས་འོག་གི་རྣལ་འབྱོར་པས་དབུ་གསུམ་པ་ལ་ཞགས་པ་དང༌། དགྲ་སྟ་དང༌། རྩེ་གསུམ་པ་དང༌། ལྕགས་ཀྱུ་ཐོགས་པས་མདུན་དུ་རང་གི་རིགས་པས་བྱིན་གྱིས་བརླབས་པའི་ནུ་མ་པདྨའི་ལྟེ་བའི་ནང་ན་གནས་པར་བྱས་ལ། རྡོ་རྗེ་ལྕགས་
ཀྱུའི་ཏིང་ངེ་འཛིན་ལས་བྱུང་བའི་བཙག་ལ་སོགས་པ་ལས་འོད་ཟེར་འབར་བ་དང་ལྡན་པའི་རྡོ་རྗེ་ལྕགས་ཀྱུ་ལ་སོགས་པ་ཡང་ནས་ཡང་དུ་བྱུང་སྟེ། ཧཱུཾ་ཞེས་བྱ་བའི་སྔགས་བརྗོད་ནས་སྤྲོས་པ་སྔོན་དུ་འགྲོ་བས་གཟས་ཟིན་པའི་ཚེ་མཆན་མ་བྱུང་གི་བར་དུ་དེ་བཟླས་པར་བྱའོ། །དེ་ནས་དེ་དང་མིང་བྲིས་ན་གནོད་སྦྱིན་མོ་ལ་སོགས་པ་ངེས་པར་ཁུགས་པར་འགྱུར་རོ། །བཀུག་ནས་ཞེས་བྱ་བ་ནི་འཇམ་པའི་རྡོ་རྗེའི་ཏིང་ངེ་འཛིན་དང་ལྡན་པས་སངས་རྒྱས་ཀྱི་འཁོར་ལོའི་ནང་ན་གནས་ལ་གཤིན་རྗེ་གཤེད་སྐྲ་འབར་བས་འབར་བར་གྱུར་ཅིང་ལག་ན་རྡོ་རྗེ་ལྕགས་ཀྱུ་ཐོགས་པ་ཕྱུང་ལ་དེ་ཉིད་ལྕགས་ཀྱུར་བྱས་ཏེ་གནོད་སྦྱིན་མོ་དགུག་པར་བྱའོ་ཞེས་བྱ་བའི་བར་དུའོ། །ཕྱག་རྒྱ་གསང་སྔགས་སྦྱོར་བ་དང༌། །བསམ་གཏན་འཁོར་ལོའི་སྦྱོར་བ་ཡིས། །ཞེས་བྱ་བ་ནི་འགོག་པའི་རྡོ་རྗེ་བསྒོམ་པའི་སྦྱོར་བས་སོ། །བསྐུལ་བར་བྱ་ཞེས་བྱ་བ་ནི་ཡང་རྡོ་རྗེ་སེམས་དཔའི་ང་རྒྱལ་དང་ལྡན་པའམ། །དེ་ཉིད་དབུ་རྒྱན་ལ་བསྒོམ་པར་བྱ་སྟེ་གནོད་མཛེས་བཞིན་དུ་སྦྱར་བར་བྱའོ། །ཡེ་ཤེས་ནི་བྱང་ཆུབ་ཀྱི་སེམས་སོ། །དེ་ལས་བྱུང་བའི་རྣམ་པར་རྒྱལ་བའི་རྡོ་རྗེ་ནི་དྲག་པོའི་རྡོ་རྗེ་སྟེ་དེ་ལ་དམིགས་པའི་ཏིང་ངེ་འཛིན་གང་ཡིན་པ་དེ་ལའང་དེ་སྐད་ཅེས་བྱའོ། །ཉེ་བར་སྤྱོད་པར་བྱེད་ཅེས་བྱ་བ་ནི་རྣམ་པར་སྣང་མཛད་ཀྱི་སྦྱོར་བ་དང་ལྡན་པས་ཞལ་གསུམ་པ་ཐོད་པ་དང༌། རྩེ་གསུམ་དང༌། ཞགས་པ་དང༌། ལྕགས་ཀྱུ་བསྣམས་པ་ཕྱག་གཉིས་ཀྱིས་གླང་པོའི་པགས་པ་འཛིན་ལ་རལ་པ་གཅིག་མ་དེའི་སྔགས་བརྗོད་པས་ཕྱུང་ལ་དེས་ཀླུའི་བུ་མོ་བཀུག་ནས་ཉེ་བར་སྤྱད་པར་བྱའོ་ཞེས་བྱ་བའི་དོན་ཏོ། །ནམ་མཁའ་ཆེན་པོ་དང་འདྲ་བའི་ཤུགས་རྒྱ་མཚོ་ནི་མཐའི་རྒྱ་མཚོ་སྟེ་དེ་འཕྲོ་བའོ། །དམ་ཚིག་ནི་རྒྱུ་སྟེ་སྐུལ་བྱེད་མ་གང་ཡིན་པ་དེ་ལ་དམིགས་པའི་ཏིང་ངེ་འཛིན་དེ་ལ་ཡང་དེ་སྐད་ཅེས་བྱ་སྟེ། སྔ་མ་བཞིན་དུ་འདི་ཉིད་ཀྱིས་སམ་རང་གི་སྦྱོར་བས་གསང་བ་ལ་སོགས་པའི་བུ་མོ་རྣམས་ལེགས་པར་བཀུག་ནས་བསྟེན་པར་བྱའོ། །ནམ་མཁའ་མཛོད་ནི་འོད་དཔག་ཏུ་མེད་པ་སྟེ་ཆོས་ཀྱི་མཛོད་ཀྱི་མཐུ་ཡིས་སོ། །དེའི་རྣམ་པར་རྒྱལ་བ་ནི་ཁྲོ་གཉེར་ཅན་གྱི་བདག་ཉིད་ཅན་ནོ། །དེ་ཉིད་མཆོག་སྟེ་ཏིང་ངེ་འཛིན་དེ་ལ་དམིགས་པའི་ཏིང་
ངེ་འཛིན་དེ་ལ་དེ་སྐད་ཅེས་བྱའོ། །འདི་ལ་ཡང་དེ་བཞིན་དུ་བཀུག་ནས་སྤྱད་པར་བྱའོ། །འགོག་པའི་རྡོ་རྗེ་བསྒོམ་པ་རྫོགས་པ་མ་ཐོས་པས་ནི་གསང་སྔགས་ཐམས་ཅད་ཀྱི་བཟླས་བརྗོད་བྱེ་བ་བྱའོ་ཞེས་བསྟན་པར་བྱ་བའི་ཕྱིར། ཡང་ན་ཞེས་བྱ་བ་ལ་སོགས་པ་གསུངས་སོ། །སངས་རྒྱས་ཀྱང་ནི་ངེས་པར་འཇིག །ཅེས་བྱ་བ་ནི་ཁྲོ་བོའི་རྒྱལ་པོའི་རྣལ་འབྱོར་པས་ཁྲག་གིས་བརླན་པའི་གོས་ཀྱིས་ལུས་གཡོགས་པའམ་གཅེར་བུ་དང༌། རྐང་པ་གཡོན་པས་མཚན་མ་མནན་ལ་ཡི་གེ་ཧཱུཾ་གིས་ཕྱོགས་བཅུའི་སེམས་ཅན་ཐམས་ཅད་ཁྲོ་བོར་བྱིན་གྱིས་བརླབས་པར་བསམས་ནས། དེ་རྣམས་ཀྱིས་བསྒྲུབ་པར་བྱ་བ་གསོད་པར་བསྒོམས་ལ་ཁྲོ་བོའི་ཚིག་ཏུ་འདོན་པས་གསང་སྔགས་བརྒྱ་རྩ་བརྒྱད་བཟླས་ལ་གསད་པར་བྱའོ། །དེ་ལ་ཕྱོགས་བཅུའི་སེམས་ཅན་ཐམས་ཅད་ཡི་གེ་གསུམ་ལས་བྱུང་བའི་རྣམ་པར་སྣང་མཛད་ལ་སོགས་པའི་ངོ་བོ་ཉིད་ཀྱིས་དང་པོར་དགྲ་བོ་བསད་པར་བསམས་ལ་དེའི་འོག་ཏུ་མངོན་སྤྱོད་ཀྱི་ལས་བྱ་སྟེ་དེས་ནི་ངེས་པར་སངས་རྒྱས་ཀྱང་འཇིག་པར་འགྱུར་རོ། །མངོན་སྤྱོད་ཀྱི་གནས་བསྟན་པར་བྱ་བའི་ཕྱིར་མ་མོའི་གནས་དང་ཞེས་བྱ་བ་ལ་སོགས་པ་གསུངས་སོ། །མི་རུས་ལས་བྱས་ཞེས་བྱ་བ་ལ་སོགས་པ་ནི་འདི་སྐད་སྟོན་པར་འགྱུར་ཏེ། ཁྲོ་བོའི་སྦྱོར་བ་དང་ལྡན་པས་མི་རུས་ཀྱི་ཕུར་བུ་སོར་བརྒྱད་པ་དེའི་གསང་སྔགས་བརྒྱ་རྩ་བརྒྱད་བཟླས་པ་དང་བཅས་པས་བསྒྲུབ་པར་བྱ་བའི་རྐང་རྗེས་ཀྱིས་ལས་དེའི་གཟུགས་བརྙན་བྱས་ཏེ། དགུག་པ་སྟོན་དུ་འགྲོ་བས་སྔགས་བརྗོད་ལ་སྙིང་གར་ཕུར་བུ་གདབ་པའམ་དེའི་ཁང་པའི་སྒོར་ས་བརྐོས་པར་སྦ་བར་བྱའོ། །ངེས་པར་སྐྲོད་ཅེས་བྱ་བ་ནི་ཡན་ལག་མ་ཉམས་པའི་ཐོད་པ་བླངས་ལ་ཁྲོ་བོའི་སྔགས་དང་སྤེལ་བ་བྱས་ནས་འདིར་བསྒྲུབ་པར་བྱ་བའི་མིང་བྲིས་ལ་རྡོ་རྗེའི་ཚིག་དག་བཟླས་ནས་དགྲའི་སྒོ་ཁའམ་ཡུལ་གྱི་དབུས་སུ་སྦས་ན་ངེས་པར་སྐྲོད་པར་བྱེད་དོ། །དེ་བཞིན་དུ་ཏ་ལའི་ལོ་མའམ་དུར་ཁྲོད་ཀྱི་རས་ལ་བྲིས་ནས་དགྲའི་ཁྱིམ་སྒོ་ལ་སོགས་པར་སྦས་ན་འཆི་བའམ་སྐམས་པར་འགྱུར་རོ། །རྡོ་རྗེ་སེམས་དཔའ་རྣམ་པར་འཇིག །ཅེས་
བྱ་བ་ནི་སྐུ་ལ་སོགས་བའི་རྡོ་རྗེ་ཕུར་བུ་འདེབས་པའི་ཕྱིར་རོ། །འོད་བཟང་མེ་སྟག་འཁྲུགས་པ་ཅན། །ཞེས་བྱ་བ་ནི་འོད་ཀྱི་ཕྲེང་བས་འཁྲིགས་པ་ཧཱུཾ་ལས་བྱུང་བའི་ཕྱིར་རོ། །མཐས་གཏུགས་པ་ཞེས་བྱ་བ་ནི། སྤྱི་བོ་ནས་བརྩམས་ཏེ་རྐང་པའི་བར་དུའོ། །སྦྱོར་བ་གང་གིས་བྱ་བ་དེ་བསྟན་པར་བྱ་བའི་ཕྱིར་རྣམ་སྣང་ཞེས་བྱ་བ་ལ་སོགས་པ་གསུངས་སོ། །སྐུ་རྡོ་རྗེ་ལ་སོགས་པ་བསྟན་པར་བྱ་བའི་ཕྱིར་དང་དེའི་ཕུར་བུ་ཉེ་བར་བརྟན་པར་བྱ་བའི་ཕྱིར། དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་ཏེ་སྐུའི་ཡེ་ཤེས་ནི་རྣམ་པར་སྣང་མཛད་དེ། དེའི་རྣམ་བར་བསྒྱིངས་པ་ཏིང་ངེ་འཛིན་གང་དུ་སྟོན་པ་དེ་ལ་དེ་སྐད་ཅེས་བྱའོ། །ཕན་ཚུན་དཀྲི་བའི་ཚུལ་གྱིས་ཞེས་བྱ་བ་ལ་སོགས་པ་གསུངས་ཏེ་སོར་མོ་རྣམས་རྒྱབ་ཏུ་ཕན་ཆུན་དཀྲིས་ལ། མཐེ་བོ་གཉིས་ལག་པ་གཡས་པའི་མཐིལ་དུ་ཁ་སྦྱར་བ་ནི་འཁོར་ལོའི་ཕུར་བུའི་ཕྱག་རྒྱའོ། །སྣང་མཛད་ཞབས་ཀྱིས་མནན་ནས་སུ། །ཞེས་བྱ་བ་ནི་འདི་སྐད་སྟོན་པར་འགྱུར་ཏེ་ཕུར་བུའི་དབྱིབས་ཀྱི་ཕྱག་རྒྱ་རྣམ་པར་སྣང་མཛད་དུ་གྱུར་པར་བསམས་ལ་ཡིད་ཉིད་ཀྱིས་བཀུག་ནས་གསང་སྔགས་འདོན་པ་སྔོན་དུ་འགྲོ་བས་ཕུར་བུས་གདབ་པར་བྱའོ། །དམ་ཚིག་མཆོག་གིས་བཞེངས་པར་མཛོད། །ཅེས་བྱ་བ་ནི་བཅོམ་ལྡན་འདས་རྣམ་པར་སྣང་མཛད་ཉིད་ཕུར་བུའི་དབྱིབས་སུ་དེར་འབྱུང་བར་འགྱུར་རོ་ཞེས་བྱ་བའི་བར་དུའོ། །སྦྱོར་བའི་ཆེ་བའི་བདག་ཉིད་བསྟན་པར་བྱ་བའི་ཕྱིར། གཞན་དུ་བྱས་ན་བརླག་པར་འགྱུར། །ཞེས་བྱ་བ་གསུངས་ཏེ། རྡོ་རྗེ་ཐུགས་ཀྱི་ཡེ་ཤེས་ཆེན་པོ་ཞེས་བྱ་བ་ནི་རྣམ་པར་སྣང་མཛད་དེ། དེའི་རྣམ་པར་བསྒྱིངས་པ་སྟོན་པའི་ཏིང་ངེ་འཛིན་གང་ཡིན་པ་དེ་ལ་ཡང་དེ་སྐད་ཅེས་བྱའོ། །རྩེ་མོ་ལྔ་པ་ཞེས་བྱ་བ་ལ་སོགས་པ་ལ། ཐལ་མོ་སྦྱོར་བ་བཅིངས་ལ་སྲིན་ལག་སྦྱར་བ་ནང་དུ་གཞུག་སྟེ། གུང་མོ་གཉིས་སྦྱར་བའི་ཚིགས་གསུམ་པར་མཛུབ་མོ་གཉིས་རྡོ་རྗེ་དང་འདྲ་བར་བཞག་ན་རྩེ་མོ་ལྔ་པར་འགྱུར་ཏེ། འདི་ལས་མེ་སྟག་འཕྲོ་བས་འཁྲིགས་པའི་རྡོ་རྗེ་ཕུར་བུར་བལྟས་ལ་སྟང་སྟབས་ཀྱིས་སྦྱར་བར་བྱའོ། །འཇིག་རྟེན་དབང་ཕྱུག་ཉིད་གསུང་གི་དམ་ཚིག་ཉིད་ཡིན་ཏེ་
དེའི་རྣམ་པར་འཕྲུལ་པ་སྟོན་པའི་ཏིང་ངེ་འཛིན་གང་ཡིན་པ་དེ་ལ་ཡང་དེ་སྐད་ཅེས་བྱའོ། །རྡོ་རྗེ་སོར་མོ་ཞེས་བྱ་བ་ལ་སོགས་པ་ལ། ཐལ་མོ་ཁོང་སྟོང་དུ་སྦྱར་བ་པདྨ་དང་འདྲ་བར་ཕྱེ་ན་པདྨ་ཁ་ཕྱེ་བར་འགྱུར་ཏེ། དེ་དག་ནི་རང་གི་བདག་པོའི་སྦྱོར་བ་གཙོ་བོར་བྱས་པས་སྦྱར་བར་བྱའོ། །གསང་བའི་ཚིག་ནི་རྣམ་པར་སྣང་མཛད་ཀྱི་ངོ་བོ་ཉིད་ཡིན་པའི་ཕྱིར་རོ། །གསང་བ་ཀུན་བཏུས་པ་ནི་མི་བསྐྱོད་པའི་ངོ་བོ་ཉིད་ཡིན་པའི་ཕྱིར་རོ། །ཞི་བ་ཆོས་ཀྱི་ཚིག་ནི་འོད་དཔག་ཏུ་མེད་པའི་ངོ་བོ་ཉིད་ཡིན་པའི་ཕྱིར་རོ། །དེ་བས་ན་རྡོ་རྗེ་ཡེ་ཤེས་ངེས་པར་འཆི་བས་རྡོ་རྗེ་ཡེ་ཤེས་སོ། །མངོན་སྤྱོད་ལ་ཡང་བསམ་པའི་ཁྱད་པར་གྱིས་རྡོ་རྗེ་ཕུར་བུས་གདབ་པ་ཇི་ལྟ་བ་བཞིན་དུ་སྦྱར་བར་བྱའོ། །རྐུན་མ་མདོངས་པར་བྱེད་པའི་རྡོ་རྗེ་ཞེས་བྱ་བ་ལ། རྐུན་མ་མདོངས་པར་བྱེད་པ་ནི་ལྷ་མོ་འོད་ཟེར་ཅན་ཏེ། དེ་ཉིད་མི་ཕྱེད་པས་ན་རྡོ་རྗེ་སྟེ་དེ་ལ་དམིགས་པས་ན་ཏིང་ངེ་འཛིན་དེ་ལ་ཡང་དེ་སྐད་ཅེས་བྱའོ། །དེ་ལ་འདིར་འོད་ཟེར་ཅན་གྱི་སྦྱོར་བ་དང་སྔགས་དང་ཕྱག་རྒྱར་བཅས་པས་རྣམ་བར་འཚེ་བར་བྱེད་པ་རྣམས་ཀྱི་ཁ་དང་མིག་བཙེམས་ལ་དེ་རྣམས་ལྐུགས་པ་དང་ལོང་བར་གྱུར་པར་བསམས་ན་ཆོམ་རྐུན་དང་སྣང་བ་རྣམས་བཅིངས་པར་འགྱུར་རོ། །ནད་ཆེན་པོ་ཐམས་ཅད་དགུག་པ་ལས་རྣམ་པར་རྒྱལ་མ་དེ་ཉིད་ཡེ་ཤེས་ཡིན་པ་དེ་ལ་དམིགས་པའི་ཏིང་ངེ་འཛིན་དེ་ལ་ཡང་དེ་སྐད་ཅེས་བྱའོ། །ཞི་བར་འགྱུར་ཞེས་བྱ་བ་ནི་དོན་ཡོད་རྡོ་རྗེའི་སྦྱོར་བ་དང་ལྡན་པས་རི་ཁྲོད་ཀྱི་ལོ་མ་ཅན་སྤྱན་དྲངས་ལ་དེའི་ཞལ་དུ་པདྨ་དཀར་པོ་དང་མར་སྲང་བསྲེས་པའི་ཏིལ་དང་འོ་མ་ལ་སོགས་པ་ཇི་ལྟ་བ་བཞིན་དུ་སྦྱིན་སྲེག་བྱས་ལ། སེམས་ཅན་རྣམས་ཀྱི་ཡམས་དང་འཚེ་བ་ལ་སོགས་པ་དང་བྲལ་བར་བསམས་ན་ཞི་བར་འགྱུར་རོ། །ཡང་ན་འདི་ཉིད་ཕྱུང་ལ་ཀུན་དུ་སྤྲོས་ཏེ་བདུད་རྩིའི་ཆར་རབ་ཏུ་འབེབས་པར་བསམ་མོ་ཞེས་བསྟན་པར་བྱ་བའི་ཕྱིར་ནམ་མཁའ་ཀུན་ནས་ཞེས་བྱ་བ་ལ་སོགས་པ་གསུངས་སོ། །ལེའུ་ལྔ་པའི་བཤད་པའོ།། །།ལག་པའི་ཕྱག་རྒྱ་ལ་སོགས་པའི་གླེང་བསླང་བར་བྱ་བའི་ཕྱིར། དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་ཏེ། ལག་
པ་གཉིས་ཀྱི་ནང་གི་ཁུ་ཚུར་བཅིངས་ཏེ་མཐེ་བོ་གཉིས་གཤིབས་ནས་བསྒྲེང་བར་བྱས་པ་འདི་དང༌། མགོར་རང་གི་བསང་སྔགས་ཀྱིས་སྐུ་བྱིན་གྱིས་བརླབ་པར་བྱའོ། །འདི་ཉིད་ལས་གཡོན་པའི་མཐེ་བོ་ནང་དུ་བཅུག་པ་ནི་དེ་བཞིན་དུ་གསུངས་སོ། །འདི་ཉིད་ལས་གཡས་པའི་མཐེ་བོ་ནང་དུ་བཅུག་ལ་གཡོན་པ་བཏེག་པ་ནི་དེ་བཞིན་དུ་ཐུགས་ཀྱི་སྟེ་རང་གི་སྟན་ལ་གནས་ནས་སྤྱི་བོ་ལ་སོགས་པར་ཡི་གེ་ཨོཾ་ལ་སོགས་པ་གསུམ་བསྒོམ་པ་ནས་བྱིན་གྱིས་བརླབ་པ་ལ་སོགས་པ་བྱའོ། །གཡོན་བའི་རྡོ་རྗེ་ཁུ་ཚུར་གྱི་མཛུབ་མོ་བསྒྲེང་ལ་གཡས་པའི་རྡོ་རྗེ་ཁུ་ཚུར་གྱིས་རྩེ་མོ་བཟུང་བ་ནི་རྣམ་པར་སྣང་མཛད་ཀྱི་ཕྱག་རྒྱའོ། །སེམས་དཔའི་སྐྱིལ་མོ་ཀྲུང་དུ་འདུག་ནས་ལག་པ་གཡོན་པའི་ཁུ་ཚུར་པང་པར་གཞག་སྟེ་གཡས་པས་ས་གནོན་པ་ནི་མི་འཁྲུགས་པའིའོ། །གཡོན་པ་དེ་བཞིན་བཞག་ལ་གཡས་པ་མཆོག་སྦྱིན་ལྟར་བྱས་པ་ནི་རིན་ཆེན་འབྱུང་གནས་ཀྱིའོ། །ལག་པ་གཉིས་པང་པར་བཞག་སྟེ་བསམ་གཏན་གྱི་ཚུལ་དུ་སྦྱར་བ་ནི་འོད་དཔག་མེད་ཀྱིའོ། །གཡོན་པ་སྔ་མ་བཞིན་དུ་བཞག་ལ་གཡས་པ་མི་འཇིགས་པའི་ཚུལ་དུ་གཞག་པ་ནི་གདོན་མི་ཟ་བར་གྲུབ་པའོ། །ལག་པ་གཉིས་རྡོ་རྗེ་བཅིང་པར་བྱས་ལ་གུང་མོ་གཉིས་གཤིབས་ཏེ་བསྒྲེང་བ་ནི་རྡོ་རྗེ་སེམས་མའིའོ། །དེ་ཉིད་ལས་གུང་མོའི་ཚིགས་དང་པོ་དགུག་སྟེ། རིན་པོ་ཆེའི་ཚུལ་དུ་བྱས་པ་ནི། རྡོ་རྗེ་རིན་ཆེན་སེམས་མའིའོ། །གུང་མོ་སྦྱར་བ་པདྨའི་འདབ་མ་ལྟར་བྱས་པ་ནི་རྡོ་རྗེ་ཆོས་མའིའོ། །དེ་ཉིད་ལས་གུང་མོ་སྦྱར་ཏེ་ཚིགས་པར་མ་རྩེ་བསྐུམ་ནས་རལ་གྲི་ལྟར་བྱས་པ་ནི་རྡོ་རྗེ་ལས་མའིའོ། །ཐལ་མོ་ཁོང་སྟོང་དུ་སྦྱར་བ་ལས་མཛུབ་མོ་གཉིས་གདུ་བུ་འདྲ་བར་ཟླུམ་པོར་བྱས་ཏེ་མཐེ་བོའི་སྟེང་དུ་མིག་དང་འདྲ་བར་གཞག་པ་ནི་སངས་རྒྱས་སྤྱན་གྱིའོ། །རྡོ་རྗེ་བཅིངས་པ་ལས་གུང་མོ་གཉིས་གཤིབས་ཏེ་སྦྱར་བའི་ཚིགས་གསུམ་པར་མཛུབ་མོ་གཉིས་རྡོ་རྗེའི་ཚུལ་དུ་གཞག་པ་ནི་མཱ་མ་ཀཱིའིའོ། །ལག་པ་གཉིས་ཀྱི་ཐལ་མོ་གཉིས་ཁོང་སྟོང་དུ་སྦྱར་ཏེ་པདྨ་ཁ་བྱེ་བ་དང་འདྲ་བར་བྱས་པ་ནི་གོས་དཀར་ཅན་གྱིའོ། །ཐལ་མོ་ཁོང་སྟོང་དུ་སྦྱར་བ་ལས་མཛུབ་མོ་གཉིས་ཀྱིས་གུང་མོའི་
སེན་མོ་མནན་ཏེ་དབུས་སུ་གཞག་པ་ནི་སྒྲོལ་མའིའོ། །ཐལ་མོ་སྦྱར་ཏེ་མཛུབ་མོ་གཉིས་གུང་མོའི་ཚིགས་དབུ་མར་སྦྱར་ལ་མཐེ་བོ་གཉིས་གློར་གཞག་པ་ནི་སྐུལ་བྱེད་མའིའོ། །རྡོ་རྗེ་བཅིང་བ་བྱས་པ་ལས་མཐེ་བོ་གཉིས་བསྡམས་ཏེ་མཛུབ་མོ་གཉིས་ཀྱི་རྩེ་མོ་བཀུག་ནས་སྦྱར་བ་ནི་རིན་ཆེན་སྒྲོལ་མའིའོ། །ཐལ་མོ་ཁོང་སྟོང་དུ་སྦྱར་བ་ལས་མཐེ་བོས་སོ་སོའི་རང་གི་མཐེའུ་ཆུང་གི་སེན་མོ་མནན་ལ་ལྷག་མ་རྡོ་རྗེའི་མཚན་ཉིད་དུ་བྱས་པ་ཁྲོ་གཉེར་ཅན་གྱིའོ། །རྡོ་རྗེ་ཁུ་ཚུར་གཉིས་བཅིངས་པ་ལས་མཛུབ་མོ་དང་མཐེའུ་ཆུང་གཉིས་ལུ་གུ་རྒྱུད་ལྟར་བཅིངས་པ་ནི་རྡོ་རྗེ་ལུ་གུ་རྒྱུད་ཀྱིའོ། །ལག་པ་གཉིས་ཁུ་ཆུར་ནང་དུ་བཅངས་པ་ལས་གུང་མོ་གཉིས་གཤིབས་ཏེ་སྦྱར་ལ་སྲིན་ལག་གཉིས་བཀྲོལ་ཏེ་བསྣོལ་བ་མཛུབ་མོ་གཉིས་ཀྱིས་དཀྲིས་ཏེ་མཐེ་བོ་གཉིས་བརྐྱང་ལ་རྩེ་སྦྱར་ཏེ་བཀུག་ལ་ཁ་དང་འདྲ་བར་བྱས་པ་ནི་གཤིན་རྗེ་གཤེད་ཀྱིའོ། །གཡོན་པའི་རྡོ་རྗེ་ཁུ་ཚུར་བཅངས་པ་ལས་མཛུབ་མོ་བརྐྱང་ནས་སྙིང་གར་གཞག་གཡས་པ་བཏེག་པ་ཐལ་ལྕག་གི་ཚུལ་དུ་བྱས་པ་ནི་གཞན་གྱིས་མི་ཐུབ་པ་ཞེས་བྱ་བའིའོ། །རྡོ་རྗེ་ཁུ་ཚུར་གཉིས་མཐེའུ་ཆུང་ལུ་གུ་རྒྱུད་དུ་བྱས་ལ་མཛུབ་མོ་གཉིས་གཤིབས་ཏེ་རྩེ་མོ་སྦྱར་ལ་བཟློག་སྟེ་དཔྲལ་བར་གཞག་པ་ནི་རྟ་མགྲིན་གྱིའོ། །ལག་པ་གཉིས་བརྐྱང་ལ་མཐེ་བོ་གཉིས་ཀྱིས་རང་རང་གི་མཐེའུ་ཆུང་གི་སེན་མོ་མནན་ནས་དཔུང་མགོའི་དྲུང་དུ་རྡོ་རྗེ་བཅིང་བའི་ཚུལ་དུ་བྱས་ནས་ཁྲོས་པས་སྦྱར་བ་ནི་བདུད་རྩི་ཐབ་སྦྱོར་གྱིའོ། །ལག་པ་གཉིས་བརྐྱང་ལ་མཐེ་བོས་རང་གི་སྲིན་ལག་དང་མཐེའུ་ཆུང་གི་སེན་མོ་མནན་ཏེ་ཤུབས་ལས་ཕྱུང་ནས། གཡས་པས་རལ་གྲིའི་ཚུལ་དུ་གཞག་པ་ནི་མི་གཡོ་བའིའོ། །ལག་པ་གཡོན་པའི་རྡོ་རྗེ་ཁུ་ཚུར་གྱི་རྒྱབ་ཏུ་ལག་པ་གཡས་པ་རྡོ་རྗེ་ཁུ་ཆུར་དུ་བྱས་ལ། མཐེའུ་ཆུང་གཉིས་ལུ་གུ་རྒྱུད་ལྟར་བཅིངས་ནས་མཛུབ་མོ་གཉིས་བཏེག་སྟེ་ཞགས་པར་བྱས་པ་ནི་འདོད་པའི་རྒྱལ་པོའིའོ། །གཡོན་པའི་རྡོ་རྗེ་ཁུ་ཚུར་ལས་བྱུང་བའི་མཛུབ་མོ་བསྒྲེང་ལ་སྙིང་གར་བཞག་ལ་གཡས་པའི་རྡོ་རྗེ་ཁུ་ཚུར་གྱི་མཛུབ་མོ་བེ་ཅོན་ལྟར་བརྡེགས་པ་ནི་བེ་ཅོན་སྔོན་པོ་ཅན་གྱིའོ། །ལག་པ་གཡོན་པའི་རྡོ་རྗེ་ཁུ་ཚུར་གྱི་རྩེ་གསུམ་པ་བྱས་ལ་གཡས་པའི་རྡོ་རྗེ་
བརྡེག་པའི་ཚུལ་དུ་གཏེག་པ་ནི་སྟོབས་པོ་ཆེའིའོ། །ཁུ་ཚུར་གཉིས་བཅིངས་ལ་མཐེ་བོ་དང་མཛུབ་མོ་དང་གུང་མོ་རྣམས་བསྒྲེང་སྟེ་སོ་སོ་ཞིང་ཕན་ཚུན་རྩེ་སྤྲང་པ་ནི་བྱམས་པའིའོ། །ཐལ་མོ་ཁོང་སྟོང་དུ་སྦྱར་ལ་མཛུབ་མོ་གཉིས་ཀྱིས་རང་གི་སྲིན་ལག་གི་སེན་མོ་མནན་ནས། ཨུཏྤ་ལའི་ཚུལ་དུ་གཞག་པ་ནི་འཇམ་པའི་དབྱངས་ཀྱིའོ། །ལག་པ་གཡོན་པ་པང་པར་གནས་པར་བྱས་ལ་གཡས་པ་གླང་པོའི་སྣ་ལྟར་བྱས་པ་ནི་སྤོས་ཀྱི་གླང་པོ་ཆེའིའོ། །ལག་བ་གཡོན་པའི་རྡོ་རྗེ་ཁུ་ཚུར་བཏེག་པ་ལག་པ་གཡས་པ་བ་དན་གྱི་ཚུལ་དུ་གཞག་པ་ནི་ཡེ་ཤེས་ཏོག་གི་ཕྱག་རྒྱའོ། །བཟང་པོའི་འདུག་སྟངས་སུ་འདུག་ལ་ཐལ་མོ་ཁོང་སྟོང་སྙིང་གར་སྦྱར་བ་ནི་བཟང་སྐྱོང་གིའོ། །ལག་པ་གཡོན་པ་བརྐྱང་བའི་རྒྱབ་ཏུ་ལག་པ་གཡས་པ་རུས་སྦལ་གྱི་ཚུལ་དུ་བྱས་ལ་སོར་མོ་རྣམས་ཆུ་རླབས་འདྲེན་པའི་ཚུལ་དུ་བྱེད་པ་ནི་བློ་གྲོས་རྒྱ་མཚོའིའོ། །གཡོན་པའི་རྡོ་རྗེ་ཁུ་ཚུར་སྙིང་གར་བཅིངས་ལ་གཡས་པ་མཆོག་སྦྱིན་པའི་ཚུལ་དུ་གཞག་པ་ནི་བློ་གྲོས་མི་ཟད་པའིའོ། །གཡོན་པའི་རྡོ་རྗེ་ཁུ་ཚུར་པང་པར་བཞག་ལ་གཡས་པས་སེ་གོལ་གཏོགས་པའི་ཚུལ་དུ་བྱེད་པ་ནི་སྤོབས་པ་བརྩེགས་པའིའོ། །ཐལ་མོ་གཉིས་ཁོང་སྟོང་དུ་སྦྱར་ལ་པདྨ་ཅུང་ཟད་ཁ་བྱེ་བ་ལྟར་བྱས་པ་ནི་མཐུ་ཆེན་ཐོབ་པའིའོ། །ལག་པ་གཉིས་ཀྱིས་འཐོར་བ་ནི་ངན་སོང་ཐམས་ཅད་སྤོང་བའིའོ། །ལག་བ་གཉིས་ཐལ་མོ་སྦྱར་ལ་བསྣུན་པའི་ཚུལ་དུ་བྱེད་པ་ནི་མྱ་ངན་ཐམས་ཅད་ཀྱི་མུན་བ་ངེས་པར་འཇོམས་པའི་བློ་གྲོས་ཀྱིའོ། །ལག་པ་གཉིས་བརྐྱང་ལ་འབར་བའི་ཚུལ་དུ་བྱེད་པ་ནི་དྲ་བ་ཅན་གྱི་འོད་ཀྱིའོ། །གཡས་པ་མཆོག་སྦྱིན་པར་བྱས་ལ་གཡོན་པའི་མཐེ་བོ་དང་མཛུབ་མོ་ཟླ་བ་ལྟར་བརྐྱང་པ་ནི་ཟླ་འོད་ཀྱི་ཕྱག་རྒྱའོ། །ལག་པ་གཉིས་བུམ་པའི་ཚུལ་དུ་གཞག་པ་ནི་འོད་དཔག་མེད་པའིའོ། །རྡོ་རྗེ་ཁུ་ཚུར་གཉིས་ནམ་མཁར་ཀུན་དུ་བསྐོར་བ་ནི་ནམ་མཁའ་མཛོད་ཀྱིའོ། །ལག་པ་གཡོན་པས་ལ་བརྐྱང་ནས་གཡས་པའི་མཐེ་བོ་དང་མཛུབ་མོ་སྤྲད་ལ། ཞུ་བའི་ཚུལ་དུ་བྱེད་པ་ནི་སྒྲིབ་པ་ཐམས་ཅད་རྣམ་པར་སེལ་བའི་ཕྱག་རྒྱ་སྟེ། དེ་དག་ནི་དཀྱིལ་འཁོར་བའི་ལྷ་རྣམས་ཀྱི་ཕྱག་རྒྱ་རྣམས་སོ། །གཡོན་པ་རྡོ་རྗེ་ཁུ་ཚུར་ལས་ཁྲོ་བོའི་མཛུབ་མོ་སྙིང་གར་རབ་ཏུ་བཞག་ལ།
ཧཱུཾ་ཞེས་སྨྲ་ཞིང་ལག་པ་གཡས་པའི་རྡོ་རྗེ་ཁུ་ཚུར་བརྡེག་པའི་ཚུལ་གྱིས་འདེགས་པར་བྱེད་པ་ནི་རི་ཁྲོད་ལོ་མ་ཅན་གྱིའོ། །གཡོན་པའི་མཛུབ་མོ་དང་མཐེ་བོས་སྐུད་པ་བཟུང་ལ་གཡས་པས་ཁབ་ཀྱིས་ཁ་དང་མིག་འཚེམས་པའི་ཚུལ་དུ་བྱེད་པ་ནི་འོད་ཟེར་ཅན་གྱིའོ། །ལག་པ་གཉིས་སྤྱི་བོར་སྦྲུལ་མགོའི་གདེངས་ཀའི་ཚུལ་དུ་བྱས་ལ་ཕུཊ་ཅེས་བརྗོད་པ་ནི་དུག་སེལ་མའི་སྟེ་དུག་སེལ་མ་འདི་ཉིད་ཀྱི་སྦྱོར་བས་དུག་བསལ་བར་བྱའོ། །འདོད་པའི་རྒྱལ་པོའི་ཕྱག་རྒྱ་ལས་མཛུབ་མོ་གཉིས་བསྒྲེང་ནས་གཞག་པ་ནི་རྡོ་རྗེ་ཧཱུཾ་མཛད་ཀྱིའོ། །དེ་ཉིད་ལག་པ་གཡས་པའི་མཛུབ་མོ་ལྕགས་ཀྱུའི་ཚུལ་དུ་བྱས་བ་ནི་རྡོ་རྗེའི་ཁྲོ་བོའི་ལྕགས་ཀྱུའི་ཕྱག་རྒྱ་སྟེ། དེ་བཞིན་གཤེགས་པ་ཐམས་ཅད་སྤྱན་འདྲེན་པ་ལ་ནི་ཛཿ་ཞེས་བྱ་བ་དང་སྦྱར་བར་བྱའོ། །རྡོ་རྗེ་ཁུ་ཚུར་གཉིས་ཀྱི་མཐེའུ་ཆུང་གཉིས་ཁའི་གྲྭ་གཉིས་སུ་བཟློག་སྟེ་མཆེ་བར་བྱས་ལ་ལྕེ་བསྐུལ་ཞིང་ཁྲོ་བོའི་ལྟ་བས་ལྟ་བར་བྱེད་བ་ནི་རྡོ་རྗེ་མཆེ་བའི་ཕྱག་རྒྱའོ། །རྡོ་རྗེ་ཁུ་ཚུར་གཉིས་ཀྱི་མཐེའུ་ཆུང་དང་མཛུབ་མོ་གཉིས་རྡོ་རྗེས་མནན་པའི་ལྕགས་ཀྱུ་བྱས་ལ་ཧཱུཾ་ཞེས་བརྗོད་ཅིང་ཁྲོ་བོའི་ལྟ་བ་དང་ལྡན་པས་ལུས་གཅུ་བ་ནི་རྡོ་རྗེ་མཁའ་འགྲོ་མའི་ཕྱག་རྒྱ་སྟེ། ཁྲག་ལ་སོགས་པ་དྲང་བ་ལ་སྦྱར་བར་བྱའོ། །རྡོ་རྗེ་ཁུ་ཚུར་གཉིས་བཅིངས་ལ་མཛུབ་མོ་གཉིས་བརྐྱང་ནས་བསྣོལ་ཏེ་གྱེན་དུ་འདེགས་པ་ནི་དཀྱིལ་འཁོར་གྱི་ཕྱག་རྒྱ་སྟེ། བཟླས་བརྗོད་འབུམ་བྱས་ནས་མཚན་མོ་ཐོག་ཐག་བསྒྲུབས་ལ་ཕྱག་རྒྱ་འདི་དང་བཛྲོད་ཏིཥྛ་ཞེས་བྱ་བ་དང་དཀྱིལ་འཁོར་བཏེག་ལ་བསྟན་པར་བྱའོ། །དེ་ཉིད་ལས་མཁྲིག་མ་གཡོན་པ་ལ་མཁྲིག་མ་གཡས་པ་གཞག་སྟེ། །ཡང་སྒོ་ལོགས་སུ་བཏེག་པ་ནི་སྒོ་དབྱེ་བའི་ཕྱག་རྒྱའོ། །རྡོ་རྗེ་ཁུ་ཚུར་གཉིས་བཟློག་ནས་བསྣོལ་ལ་མཚན་ཁུང་དུ་བསམས་ཏེ་ཁྲོ་བོའི་ལྟ་བ་དང་ལྡན་པ་ནི་གདོན་ཐམས་ཅད་སྐྲག་པར་བྱེད་པའི་ཕྱག་རྒྱའོ། །ལག་པ་གཡོན་པ་བརྐྱང་སྟེ་ཁ་སྦུབས་ལ་དེའི་སྟེང་དུ་གཡས་པ་བཞག་ལ་གཉིས་གའི་མཐེ་བོ་བསྐྱོད་པ་ནི་ལྷ་མ་ཡིན་གྱི་སྒྱུ་དང་འཁྲུལ་འཁོར་དབྱེ་བ་དང༌། ལྷ་མ་ཡིན་གྱི་བུ་མོ་སྨྲར་གཞུག་པའི་ཕྱག་རྒྱའོ། །ལག་པ་གཉིས་ཀྱི་མཐེ་བོ་དང་མཐེའུ་ཆུང་ལུ་གུ་རྒྱུད་དུ་བྱས་ལ་
ལྷག་མ་བརྐྱང་སྟེ་སྟང་སྟབས་དང་བཅས་པས་ཧཱུཾ་ཞེས་བྱ་བ་དང་སྦྱོར་བ་ནི་ཁྲོ་བོ་རྡོ་རྗེ་ས་འོག་གི་ཕྱག་རྒྱ་སྟེ་འདིས་འཁྲུལ་འཁོར་བཤིག་ལ་ལྷ་མ་ཡིན་གྱི་གྲོང་ཁྱེར་དུ་འཇུག་པར་བྱའོ། །གཡོན་པའི་རྡོ་རྗེ་ཁུ་ཚུར་གྱིས་སྡིགས་མཛུབ་བྱས་པ་ནི། རྡོ་རྗེ་ནག་མོའི་ཕྱག་རྒྱའོ། །རྡོ་རྗེ་བཅིངས་པ་ལས་མཛུབ་མོ་གཉིས་བརྐྱང་སྟེ་ཕུར་བུའི་ཚུལ་དུ་བྱས་པ་ནི་རྡོ་རྗེ་ཕུར་བུའི་ཕྱག་རྒྱའོ། །གཡས་པའི་རྡོ་རྗེ་ཁུ་ཚུར་བརྡུང་བའི་ཚུལ་དུ་བྱེད་པ་ནི་རྡོ་རྗེ་ཐོ་བའི་ཕྱག་རྒྱའོ། །ལག་པ་གཉིས་རྡོ་རྗེ་ཁུ་ཚུར་བྱས་ལ་མཛུབ་མོ་གཉིས་བརྒྱང་སྟེ་མདུད་པ་དོར་བའི་ཚུལ་དུ་བྱས་པ་ནི་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་བཅིང་བའི་ཕྱག་རྒྱ་སྟེ་འདི་དང་བཾ་ཞེས་བྱ་བ་འདིས་དཀྱིལ་འཁོར་གྱི་ལྷ་རྣམས་བཅིང་བར་བྱའོ། །རྡོ་རྗེ་ཁུ་ཚུར་གཉིས་སོག་ལེས་བགེགས་འདྲ་བ་ལྟར་བྱེད་པ་ནི་རྡོ་རྗེ་སོག་ལེའི་ཕྱག་རྒྱ་སྟེ་བགེགས་འདྲ་བ་ལ་ནི་ཧཱུཾ་ཞེས་བརྗོད་ནས་སྦྱར་བར་བྱའོ། །ལག་བ་གཉིས་ཟླ་བ་འདྲ་བར་བྱས་པས་གདོང་གཡོགས་ལ་ཨ་ལ་ལ་ཞེས་བརྗོད་ཅིང་མིག་སྟེང་དུ་བགྲད་པར་གྱུར་པ་ནི་རྡོ་རྗེ་སྲིན་མོའི་ཕྱག་རྒྱ་སྟེ་འདི་ནི་གདུག་པ་གནོན་པའོ། །ལག་པ་གཉིས་ལུ་གུ་རྒྱུད་དུ་བྱས་ལ། གུང་མོ་དང་མཛུབ་མོ་བརྐྱང་ནས་གྲི་གུག་ལྟར་བྱས་པ་ནི་ཆད་པའི་ཕྱག་རྒྱ་སྟེ་འདི་དང་སྟོབས་པོ་ཆེའི་ཕྱག་རྒྱས་སྤྲིན་ཐམས་ཅད་གཏུབས་པར་འགྱུར་རོ། །ལག་པ་གཉིས་ཁུ་ཚུར་བཅངས་ལ་མཛུབ་མོ་གཉིས་སྐམ་པར་བྱས་ནས་དཔུང་པ་བརྐྱང་ལ་ཕུར་བུ་འབྱིན་པའི་ཚུལ་དུ་བྱེད་པ་ནི་སྐམ་པའི་ཕྱག་རྒྱ་སྟེ། ལག་པ་གཉིས་ཀྱི་མཐེ་བོ་རང་གི་ལག་མཐིལ་དུ་བཞག་ལ་རྐང་པ་གཅིག་ས་ལ་བཙུགས་ནས་རྐང་པ་གཉིས་པ་རྒྱབ་ཏུ་བསྐུམ་ལ་ཁྲོ་བོའི་བལྟ་བས་ལྕེ་བསྐྱོད་ཅིང་ཧཱུཾ་ཕཊ་ཅེས་བརྗོད་ཅང་གོམ་པ་འདོར་ཞིང་བསྐྱོད་པ་སྟེ། རང་གི་ལག་མཐིལ་དུ་མཐེ་བོ་གཞག་པའི་ལག་པ་གཉིས་ཀྱིས་གཤོག་པ་བསྐྱོད་པ་ལྟར་བྱེད་པ་ནི་རྡོ་རྗེ་ནམ་མཁའ་ལྡིང་གི་ཕྱག་རྒྱ་སྟེ་རྡོ་རྗེ་ནམ་མཁའ་ལྡིང་དུ་བདག་ཉིད་བསམས་ལ་འདིས་ནད་ཐམས་ཅད་བསལ་བར་བྱའོ། །རྡོ་རྗེ་ཁུ་ཚུར་གྱིས་མདའ་གཟུང་ལ། གཡས་དང་གཡོན་དུ་བརྐྱང་བའི་ཚུལ་དུ་བྱས་ལ། སྟེང་དང་འོག་དང་ངོས་གཉིས་སུ་མདའ་འཕེན་པར་བྱེད་པ་ནི་རྡོ་རྗེ་མདའི་ཕྱག་རྒྱ་སྟེ་འདི་དང་ཧཱུཾ་ཕཊ་
ཅེས་བྱ་བས་གཞན་གྱི་དབུང་གཞིག་པ་དང༌། དེ་བཞིན་གཤེགས་པ་ཐམས་ཅད་མཉེས་པར་བྱས་ལ་ཧོཿ་ཞེས་བྱ་བས་མཉེས་པར་བྱའོ། །རྡོ་རྗེ་ཁུ་ཚུར་གཉིས་བཅིངས་ལ་གུང་མོ་གཉིས་གཤིབས་ཏེ་བསྒྲེང་ལ་ཚིགས་གསུམ་པ་བཅག་སྟེ་རིན་པོ་ཆེ་དང་འདྲ་བར་བྱ། མཐེ་བོ་གཉིས་བསྙམས་པའི་སྟེང་དུ་མཛུབ་མོ་གཉིས་གདུ་བུའི་ཚུལ་དུ་བྱས་པ་ནི་བཅོམ་ལྡན་འདས་འཁོར་ལོ་ཅན་གྱི་ཕྱག་རྒྱ་སྟེ་འདི་དང་དེའི་གཟུགས་སུ་བསྒོམས་ནས་འཁོར་ལོ་འབར་བ་ལྟ་བུ་འཛིན་པ་ནི་གཡུལ་ལས་སྒྲོལ་བར་བྱེད་པའོ། །ལག་པ་གཡོན་པའི་སོར་མོ་ཀུན་རང་གི་མཐེ་བོས་མནན་ཏེ་གུང་མོ་བསྒྲེང་གཡས་པ་པདྨར་བྱ་བ་ནི་ཧལ་ཧ་ལའི་ཕྱག་རྒྱའོ། །རྡོ་རྗེ་ཁུ་ཚུར་གཉིས་ཀྱི་མཐེའུ་ཆུང་གཉིས་ལུ་གུ་རྒྱུད་དུ་བྱས་ལ། མཛུབ་མོ་གཉིས་གཤིབས་ཏེ་བཟློག་ལ་དཔྲལ་བར་གཞག་པ་ནི་རྡོ་རྗེ་ཁྲག་འཐུང་གི་ཕྱག་རྒྱ་སྟེ་འདིས་དུར་ཁྲོད་དུ་ཞུགས་ལ་མཁའ་འགྲོ་མ་རྣམས་བསྐྲད་པར་བྱའོ། །གཡོན་པས་ཐོད་པ་གཟུང་བའི་ཚུལ་དུ་བྱས་ལ། གཡས་པས་མདུང་རྩེ་གསུམ་པར་བྱས་ནས་རལ་བ་ལ་ཟླ་བས་བརྒྱན་ཏེ་བཅིངས་ནས་མཚན་མ་བསྒྲེངས་པ་མིག་གསུམ་པ་ལ་གར་སྟབས་ཀྱིས་གར་བྱེད་པར་བདག་ཉིད་བསྒོམས་པ་ནི་བདེ་བྱེད་ཀྱི་ཕྱག་རྒྱའོ། །གཡོན་པའི་གུང་མོ་དང་མཐེ་བོ་འཇིགས་པའི་ཚུལ་དུ་བརྐྱང་ལ་གཡས་པའི་ཁུ་ཚུར་དབྱུག་ཏོ་འཛིན་པ་ལྟར་བྱས་པ་ནི་ཁྱབ་འཇུག་གི་ཕྱག་རྒྱའོ། །ལག་པ་གཉིས་ཐལ་མོ་སྦྱར་ནས་པདྨའི་ཚུལ་དུ་བརྐྱང་བར་བྱེད་པ་ནི་ཚངས་པའི་ཕྱག་རྒྱའོ། །ལག་པ་གཉིས་མེ་ཏོག་ཐོགས་པའི་ཕྱག་རྒྱར་བྱས་པ་ནི་མ་མོ་ཐམས་ཅད་ཀྱིའོ། །རྡོ་རྗེ་སེམས་མ་ལ་སོགས་པ་དེ་དག་ཉིད་ནི་རིན་པོ་ཆེ་སྟེ་མེ་ལོང་ལྟ་བུ་ལ་སོགས་པའི་ཡེ་ཤེས་ཀྱི་ངོ་བོ་ཉིད་དེས་དཀྱིལ་འཁོར་གྱི་ལྷ་རང་གི་ཏིང་ངེ་འཛིན་ལ་གནས་པར་བསྒོམས་ལ་དབང་བསྐུར་བར་བྱ་སྟེ། དེ་ལ་བཅོམ་ལྡན་འདས་རྣམ་པར་སྣང་མཛད་ཀྱི་ནི་རིན་པོ་ཆེའི་དབུ་རྒྱན་ཉིད་ཀྱིས་སོ། །གཞན་རྣམས་ཀྱི་ནི་མི་བསྐྱོད་པ་དང༌། འོད་དཔག་ཏུ་མེད་པ་དང༌། སངས་རྒྱས་ལྔའི་དབུ་རྒྱན་ཉིད་ཀྱིས་ཅི་རིགས་པར་བསྐྱེད་པར་བྱའོ། །དར་དབྱངས་དང་ཕྲེང་བས་ཀྱང་དབང་བསྐུར་བར་བྱ་སྟེ་རྡོ་རྗེ་ཁུ་ཚུར་གཉིས་ལྟག་པར་མདུང་ལ་
མཐེའུ་ཆུང་ལ་སོགས་པ་སོར་མོ་ཐམས་ཅད་བཀྲོལ་ནས་འགྱིད་བག་དང་བཅས་པས་དར་དབྱངས་ཀྱི་ཚུལ་དུ་བྱའོ། །གསང་བའི་མཆོད་པ་ཉིད་བསྟན་པར་བྱ་བའི་ཕྱིར་འགྱུར་ཞིང་ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་ཁུ་ཚུར་གཉིས་དཀུར་བརྟེན་ནས་ཅུང་ཟད་འཇོ་སྒེག་གི་ཚུལ་གྱིས་འགྱུར་ཞིང་གཡོན་ཕྱོགས་སུ་འདུད་པ་ནི་སྒེག་མོའིའོ། །དེ་ཉིད་ལས་ཕྲེང་བའི་ཚུལ་དུ་མགོ་ལ་འཆིང་བ་ནི་ཕྲེང་བ་མའིའོ། །གླུ་ལེན་ཅིང་རྡོ་རྗེའི་པི་ཝང་བརྡུང་བའི་ཚུལ་དུ་བྱེད་པ་ནི་རྡོ་རྗེ་གླུ་མའིའོ། །རྡོ་རྗེ་ཁུ་ཚུར་གཉིས་གར་བྱེད་པའི་ཚུལ་དུ་བསྐོར་བ་ནི་རྡོ་རྗེ་གར་མཁན་མའིའོ། །གསང་བ་དང་ཕྱིའི་མཆོད་པ་གར་སྔོན་དུ་འགྲོ་བས་བྱའོ་ཞེས་བསྟན་པར་བྱ་བའི་ཕྱིར། འཇོ་སྒེག་ཐབས་ལ་སྤྲོ་བ་ཡིས། ཞེས་བྱ་བ་ལ་སོགས་པ་གསུངས་སོ། །མེ་ཏོག་ནི་ཐལ་མོ་དང་གར་གྱིས་མེ་ཏོག་དབུལ་བའི་ཚུལ་དུ་བྱེད་པ་ནི་མེ་ཏོག་མའིའོ། །ཕན་ཚུན་རྒྱབ་སྦྱར་ལ་གུང་མོ་བསྒྲེང་ནས་སྤོས་ཀྱི་ཚུལ་དུ་བསྐོར་བ་ནི་བདུག་སྤོས་མའིའོ། །མཐེ་བོ་གཉིས་མར་མེའི་ཚུལ་དུ་གཞག་པ་ནི་མར་མེ་མའིའོ། །གར་སྔོན་དུ་འགྲོ་བས་བྱུག་པའི་ཚུལ་དུ་བྱེད་པ་ནི་བྱུག་པ་མའིའོ། །ལག་པ་གཉིས་དུང་གི་ཚུལ་དུ་སྦྱར་ལ་མཆོད་ཡོན་དབུལ་བར་བྱའོ། །ལག་པ་གཉིས་ཀྱིས་བརྡེབས་པས་རྫ་རྡ་བརྡུང་བའི་ཚུལ་དུ་བྱ་བ་དང༌། རང་གི་བུད་པའི་ཚུལ་གྱིས་གླིང་བུ་འབུད་པ་དང༌། རྡོ་རྗེ་བསྡམས་པ་ནང་དུ་བཅིངས་ལ་མཐེ་བོ་གཉིས་གཤིབས་ལ་བརྐྱང༌། མཐེ་བོ་གཉིས་གདུ་བུར་བྱས་པའི་དུང་འབུད་པ་དང་ལག་པ་གཡས་པ་བཏེག་སྟེ། དེ་ཉིད་ཀྱིས་རྔ་ཡབ་གཡོབ་བ་ལྟར་བྱ་བ་དང་ལག་པ་གཡོན་པ་བཏེག་ལ་ལག་པ་གཡས་པ་རྒྱལ་མཚན་གྱི་ཚུལ་དུ་དབྱངས་པ་དང༌། དེ་བཞིན་དུ་གཉི་ག་བ་དན་དུ་བྱ་བའི་དོན་དུ་གཡོ་ཞིང་བསྐོར་བས་འོག་ཏུ་བྱ་བ་དང་ཚོན་འགྱེད་པའི་ཚུལ་གྱིས་ཕྲེང་བ་བྱ་བ་དང་ལག་པ་གཡོན་པ་པང་བར་གཞག་སྟེ་སྣོད་དུ་བྱས་ལ། གཡས་པ་བཟུང་ནས་ལྷ་བཤོས་རྣམ་པ་སྣ་ཚོགས་པ་དབུལ་བ་དང༌། ཟུར་བཞིའི་ཚུལ་གྱིས་ཁང་པ་བརྩེགས་མ་བྱ་བ་དང༌། གོས་ཀྱི་ཚུལ་ཏེ་ན་བཟའ་འདྲ་བའི་ཚུལ་དང༌། གདུ་བུ་དང་དོ་ཤལ་དང༌། དཔུང་རྒྱན་དང༌། རྐང་རྒྱན་དང༌། རྣ་ཆ་རྣམས་ནི་
གནས་ཇི་ལྟ་བར་བརྒྱན་པར་བྱ་བ་དང༌། ལག་པ་གཡོན་པའི་མཐེ་བོའི་རྩེ་མོའི་སྟེང་དུ་གཡས་པ་བརྐྱང་ལ་གདུགས་སུ་བྱ་བ་དང༌། ལག་པ་གཡོན་པ་ཐད་ཀར་བརྐྱང་ལ་གཡས་པ་དེ་བཞིན་དུ་གཡོན་པའི་སྟེང་དུ་གཞག་སྟེ་ནམ་མཁའ་ལ་བསྐོར་ན་བླ་རེར་འགྱུར་རོ། །མཚམས་རྣམས་སུ་དྲང་བ་ལ་སོགས་པ་བྱ་སྟེ་འདི་དག་ལ་ཡི་གེ་ཧཱུཾ་གིས་ཅི་རིགས་པར་བྱའོ། །དེ་ཁོ་ན་ཉིད་ཀྱི་མཆོད་པའི་དོན་དུ་ཤེས་རབ་ཀྱི་སྒོ་འཕར་དབྱེ་བར་བྱ་བའི་ཕྱིར་དབྱེ་བར་བྱའོ། །གང་རྣམ་པར་རྟོག་པ་དང་བྲལ་བ་དེ་རྣམས་ཀྱི་བྱང་ཆུབ་ཀྱི་སེམས་རྣམ་པར་བསྒོམས་པས་ཐམས་ཅད་རྡོ་རྗེའི་འཛིན་པའི་བདག་ཉིད་དུ་ཤིན་ཏུ་དད་པ་ནི་ལྷ་ཐམས་ཅད་ཀྱི་སྐུ་དང་གསུང་དང་ཐུགས་རྣམས་ལ་མཆོད་པ་བླ་ན་མེད་པ་བྱས་པར་འགྱུར་རོ། །དབུ་མའི་ཐེག་པ་བསྒོམས་པས་རྣམ་པར་མ་བསྒོམས་པ་ཡང་ཀུན་རྫོབ་ཀྱི་མཆོད་པ་ཡིན་པར་བལྟ་བར་བྱའོ། །དཀྱིལ་འཁོར་བའི་ལྷ་རྣམས་ཀྱི་སྐུ་དང་གསུང་དང་ཐུགས་དང་དེ་བསྒྲུབས་པའི་འབྲས་བུ་མཉམ་པ་མེད་པས་ལེགས་སོ་ཞེས་གསུངས་སོ། །དེ་བཞིན་གཤེགས་པ་ལ་སོགས་པ་རིགས་ལྡན་ནི་སྐྱེ་བ་དང་འགག་པ་དང་བྲལ་བས་བཅོམ་ལྡན་འདས་ལ་བསྟོད་པ་བསྟན་པར་བྱ་བའི་ཕྱིར། མཐའ་མ་མེད་ཅིང་ཞེས་བྱ་བ་ལ་སོགས་པ་གསུངས་སོ། །སྐུ་གསུམ་གྱི་བདེ་བའི་སྒོ་ནས་ལྷ་ཐམས་ཅད་ལ་བསྟོད་པ་བསྟན་པར་བྱ་བའི་ཕྱིར། བདེ་བ་ལས་འཁྲུངས་རྡོ་རྗེ་འཆང་བ་ཡི། །ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་ཡེ་ཤེས་ནི་བྱང་ཆུབ་ཀྱི་སེམས་ཀྱི་བདག་ཉིད་ཅན་ཏེ་དེ་ལས་ཟླ་བ་དང་རྡོ་རྗེ་ལ་སོགས་པའི་རིམ་གྱིས་བདེ་བའི་ངོ་བོར་འཁྲུངས་པའོ། །ཇི་ལྟ་བུ་ཞེ་ན་དངོས་པོ་ཞེས་བྱ་བ་ལ་སོགས་པ་གསུངས་ཏེ། དངོས་པོ་རྣམ་པར་བསྒོམ་པ་ནི་རྣམ་པར་སྣང་མཛད་ལ་སོགས་པ་བདག་པོ་བསྐྱེད་པའི་སྒོ་ཡོད་པ་དེ་ཉིད་བསྟན་པར་བྱ་བའི་ཕྱིར། གང་ཕྱིར་ཞེས་བྱ་བ་ལ་སོགས་པ་གསུངས་ཏེ་གང་གི་ཕྱིར་དང་པོར་ཏེ། ཐོག་མར་རྣམ་པར་སྣང་མཛད་ནི། །ཨོཾ་ལས་བྱུང་བར་སྤྲུལ་པའོ། །གང་གིས་ཤེ་ན་དག་ཅིང་ཞེས་བྱ་བ་ལ་སོགས་པ་གསུངས་ཏེ། དག་ཅིང་རྣམ་དག་ཅེས་བྱ་བ་ནི་ཉོན་མོངས་པ་དང་ཤེས་བྱའི་སྒྲིབ་པ་ལས་
དབེན་ཞིང༌། སྒྲིབ་པ་ཐམས་ཅད་སྤངས་པ་ཡིན་པས་ན་དེ་སྐད་ཅེས་བྱའོ། །གཟུངས་མང་ཚུལ་གྱིས་ཞེས་བྱ་བ་ནི་ཡང་དག་པའི་རིག་པ་བཅུ་མཚན་ཉིད་ཅན་གྱི་ཕྲེང་བས་བཅིངས་པ་ནི་བསྐྱེད་པ་སྟེ། ཀུན་ནས་ཉོན་མོངས་པ་ཟིལ་གྱིས་གནོན་པའི་བདག་ཉིད་ཅན་གྱི་བསྟོད་པའི་རྣམ་པའོ། །དེ་པས་ན་སྒྱུ་འཕྲུལ་དྲ་བའི་རྒྱུད་ཀྱི་ངོ་བོ་བཅོམ་ལྡན་འདས་དེ་ཉིད་ལ་ཕྱག་འཚལ་བའོ། །གསུང་སྙན་ཞེས་བྱ་བ་ལ་སོགས་པ་ལ་ཡི་གེ་ཀུན་ནི་པདྨའི་རེགས་ཀྱི་ལྷ་མོ་རྣམས་ཀྱིས་ཏེ་དེ་ཀུན་དུ་བསྟེན་ཅིང་ཁྱབ་པའི་བར་གྱིས་གསུངས་སྙན་ཅེས་གསུངས་སོ། །གསུང་ནི་ཡི་གེ་ཨཱཿ་སྟེ། དེ་ཉིད་སྐྱེ་བ་མེད་པ་སྟོན་པས་སྤྲོས་པ་མེད་པར་སྟོན་པའོ། །དེ་ལ་འཇིག་རྟེན་དབང་ཕྱུག་བཞུགས་པ་ནི་དེ་ལས་བྱུང་པའི་ཕྱིར་ཏེ། སྔ་མ་བཞིན་དུ་དེ་ལ་ཡང་བདག་ཕྱག་འཚལ་ལོ་ཞེས་བྱ་བར་སྦྱར་རོ། །དེས་བྱས་པའི་མིག་གསུམ་པ་ལྷ་མོ་དང་བཅས་པ་ཁྲོ་བོའི་རྒྱལ་པོའི་སྐུས་བཏུལ་བར་མཛད་པ་དང༌། རྫུ་འཕྲུལ་གྱི་རྐང་ཚུལ་མང་བ་དང་ལྡན་པ་གང་ཡིན་པ་དེ་ལྟ་བུ་གཞན་འགའ་ཡང་མཉམ་པ་མེད་པ་དང་བདེ་བ་ཆེན་པོའི་རང་བཞིན་གྱི་རྗེས་སུ་ཆགས་པས་བཞུགས་པ་སྟེ། ན་ཆུང་དག་དང་ལྷན་ཅིག་བཞད་ཅིང་རོལ་བ་ནི་བདེན་པ་མ་ཡིན་པས་ཀུན་རྫོབ་ཏུ་བཞུགས་པར་སྟོན་པའི་བར་དུའོ། །ད་ནི་འདི་སྐད་སྟོན་པར་འགྱུར་ཏེ་ཡི་གེ་གསུམ་གྱི་རྣམ་པ་ལས་རིམ་གྱིས་འབྲས་བུའི་སྒོ་ནས་བདག་ཉིད་ཆེན་པོའི་འབྱུང་བ་སྔོན་དུ་འགྲོ་བས་ཕྱག་འཚལ་བ་སྟོན་པ་ཡིན་ཏེ་དེ་ལ་ཡང་སྔ་མ་བཞིན་ནོ། །འདིའི་ཡང་ཕྱག་གཡས་པས་ཐུགས་ཀར་རྡོ་རྗེ་བསྟོད་དེ་འཇོག་ལ། གཡོན་པ་དཀུར་བརྟེན་ནས་དྲིལ་བུ་འཁྲོལ་བར་མཛད་ཅིང༌། ཡང་གཡས་དང་གཡོན་གྱིས་མདའ་དང་གཞུ་གསོར་ཞིང་བསྣམས་པ། ཟླ་བའི་མདོག་ཅན་ལ་ཅུང་ཟད་དམར་བས་མཛེས་པའི་མདངས་ཅན་ལྷ་མོ་བཞིའི་བཙུན་མོས་བསྐོར་བ་སྟེ། དེ་ཡང་གཅིག་ནི་ལྷ་མོ་ཀཱི་ལི་ཀཱི་ལ་སྟེ་མཆོག་ཏུ་དབུས་ཀྱི་རང་གི་ལྷའི་དམ་ཚིག་པ་ལ་འཁྱུད་པའོ། །གཉིས་པ་ནི་ཆུ་སྲིན་གྱི་རྒྱལ་མཚན་ཅན་ཏེ་རྒྱབ་ཏུ་གནས་ཤིང་རྗེས་སུ་ཆགས་པ་བདེ་བ་ཆེན་པོའི་མཐུ་དང་ལྡན་པའོ། །གསུམ་བ་ནི་བསྙེམས་མ་ཞེས་བྱ་བ་སྟེ་མེ་ཏོག་གི་ཕྲེང་བས་བདག་པོ་ལ་ཀུན་ནས་འཕེན་པའོ་ཞེས་བྱ་བ་ནི་
ལྷག་མའོ། །བཞི་པ་ནི་མེ་ཏོག་གི་མིག་ཅན་ཏེ། གཡས་ནས་བདེ་བའི་མདའ་འཕེན་པ་སྟེ་འདོད་པའི་མདའ་ཞེས་བྱ་བའི་དོན་ཏོ། །གང་ཞིག་གླུ་འདི་ལེན་ཅིང་སྟོད་པར་བྱེད་པ་དང༌། སྒོམ་པར་བྱེད་པ་དེས་ནི་བདེ་བའི་རྡོ་རྗེ་ཅན་དང་མཉམ་པ་ཐོབ་པར་འགྱུར་རོ། །དེ་རྣམས་ཀྱིས་ཕྱིའི་མཆོད་པ་རྣམ་པ་སྣ་ཚོགས་དང་ཡིད་ཀྱི་མཆོད་པ་རྣམས་ཨོཾ་ཨ་ནུཏྟ་ར་ཞེས་བྱ་བ་ལ་སོགས་པས་བྱིན་གྱིས་བརླབ་པར་བྱའོ་ཞེས་གསུངས་པ་ཡིན་ནོ། །ལེའུ་དྲུག་པའི་བཤད་པའོ།། །།ད་ནི་བྱང་ཆུབ་ཀྱི་སེམས་བསྟན་པར་བྱ་བའི་དོན་དུ། རྒྱུད་ཕྱི་མ་བཤད་པར་བྱ་བའི་ཕྱིར། དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་ཏེ། སེམས་ནི་ལུས་ཀྱི་རྣམ་པ་ཡིན་ལ་ཞེས་བྱ་བ་ནི་དེ་ལྟ་བུའི་རྣམ་པར་སྣང་བ་ཡིན་ཏེ། དེ་སྐད་དུ་ཁམས་གསུམ་པོ་འདི་དག་ནི་སེམས་ཙམ་མོ་ཞེས་གང་གསུངས་པས་སོ། །ཆོས་རྣམས་ཞེས་བྱ་བ་ནི་དེ་བཞིན་གཤེགས་པའི་རིགས་རྣམས་ལའོ། །སྐྱེ་བ་མེད་པས་བརྗོད་དུ་མེད་པ་ནི་ཡི་གེ་མེད་པའོ། །ཡི་གེ་མེད་པས་ན་གནས་པ་མེད་པའོ། །དེ་བས་ན་དེ་ཁོ་ན་ཉིད་དུ་མེད་པའོ། །རྟོག་པ་དང་བརྗོད་པ་ཐམས་ཅད་ཀྱི་གནས་མ་ཡིན་པས་ན་རྟོག་པ་དང་བརྗོད་པའི་ཚུལ་སྤངས་པའོ། །གསུང་གི་སྤྲོས་བ་ཙམ་ཉིད་རྡོ་རྗེ་ཡིན་པས་ན་དེ་ལ་དམིགས་པའི་ཏིང་ངེ་འཛིན་དེ་ལ་ཡང་དེ་སྐད་ཅེས་བྱའོ། །དངོས་པོ་ཞེས་བྱ་བ་ནི་རྡོ་རྗེའི་རིགས་རྣམས་སོ། །དེ་མ་བསྐྱེད་པ་ཡིན་ཏེ། དེ་བས་ན་ཆོས་ཅན་དང་ཆོས་ཉིད་དང་བྲལ་བས་ཆོས་ཐམས་ཅད་མེད་པ་སྟེ། ཡང་དག་པར་རིག་པ་བཅུའི་མཚན་ཉིད་ཅན་དང་ཆོས་ཉིད་མེད་པ་སྟེ་ཡིད་དུ་འོང་བའི་དོན་ཐོབ་པའི་བདག་ཉིད་ཅན་མེད་པའོ། །དེ་བཞིན་གཤེགས་པ་ཐམས་ཅད་ཀྱི་དམིགས་སུ་མེད་པའི་ཏིང་ངེ་འཛིན་གང་ཡིན་པ་དེ་ལ་དེ་སྐད་ཅེས་བྱའོ། །དངོས་པོ་འདི་དག་ཅེས་བྱ་བ་ནི་རིན་པོ་ཆེའི་རིགས་དང་ལྡན་པ་རྣམས་སོ། །ཆོས་ཀྱི་མཚན་ཉིད་སྤངས་པ་ཡིན། །ཞེས་བྱ་བ་ནི་དཀྱིལ་འཁོར་ལ་སོགས་པའི་ཆོས་རྣམས་ནི་རང་གི་མཚན་ཉིད་དང་བྲལ་བའི་ཕྱིར་རོ། །ཇི་ལྟར་ན་འདི་ལྟར་འགྱུར་ཞེ་ན། བདག་མེད་ཆོས་ལས་ལེགས་བྱུང་བའི། །ཞེས་བྱ་བ་གསུངས་ཏེ་མཉམ་པ་ཉིད་ཀྱི་ཡེ་ཤེས་ཀྱི་
བདག་པོ་ལས་སྐྱེས་ཞེས་བྱ་བའི་དོན་ཏོ། །མེ་ལྕེ་འབར་བ་ནི་ཆོས་ཐམས་ཅད་རང་བཞིན་གྱིས་དག་པའོ། །དེ་ཉིད་རྡོ་རྗེ་འབར་བ་སྟེ་དེ་ལ་དམིགས་པའི་ཏིང་ངེ་འཛིན་དེ་ལ་ཡང་དེ་སྐད་ཅེས་བྱའོ། །དངོས་པོ་ཞེས་བྱ་བ་ནི་པདྨའི་རིགས་དང་ལྡན་པ་རྣམས་སོ། །དེ་ནི་སྐྱེ་བ་མེད་པ་ཡིན་ལ་དེ་བས་ན་དངོས་པོ་མེད་པ་སྟེ། ལྷ་རྣམས་དང་སྒོམ་དུ་མེད་པ་སྟེ་བསྒོམ་པར་བྱ་བའང་མེད་པའི་ཕྱིར་རོ། །དངོས་པོ་ཞེས་རབ་ཏུ་བརྗོད་པ་ནི་ཀུན་རྫོབ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་བླ་ན་མེད་པའི་རང་བཞིན་གྱིས་འོད་གསལ་བའོ། །དེ་ཉིད་རྡོ་རྗེ་སྟེ་དེ་ལ་དམིགས་པའི་ཏིང་ངེ་འཛིན་གང་ཡིན་པ་དེ་ལ་ཡང་དེ་སྐད་ཅེས་བྱའོ། །ཆོས་རྣམས་ཞེས་བྱ་བ་ནི་ལས་ཀྱི་རིགས་དང་ལྡན་པ་རྣམས་སོ། །གཟོད་ནས་དག་པ་ནི་ཐོག་མ་ནས་སྐྱེ་བ་མེད་པའི་ཕྱིར་རོ། །རྙོག་པ་མེད་པ་ནི་ཉེས་པ་ཐམས་ཅད་ལས་དཔེན་པའི་ཕྱིར་རོ། །དེ་བས་ན་སེམས་ཅན་མེད་པ་སྟེ་བླ་བའི་དཀྱིལ་འཁོར་གྱི་ངོ་བོ་དང་སྲོག་ཀྱང་མེ་དང་སྟེ་ཕྱག་མཚན་གྱི་གཟུགས་མེད་པ་དང་སངས་རྒྱས་ཉིད་མེད་པ་སྟེ་རིགས་ཀྱི་བདག་པོའི་མཚན་ཉིད་ཅན་དང༌། བྱང་ཆུབ་མེད་པ་སྟེ་བྱ་བ་སྒྲུབ་པའི་ཡེ་ཤེས་ཀྱི་བདག་ཉིད་ཅན་དངོས་པོ་མེད་པའོ། །སངས་རྒྱས་དང་དག་པ་དང༌། ཆོས་བསྟན་པ་རྣམས་ནི་སྐུ་དང་ཐུགས་དང་གསུང་གི་སྒོ་ནས་སོ། །ཆོས་ཐམས་ཅད་བདག་མེད་པ་བསྒོམ་པའི་བདག་ཉིད་ཅན་ཡིན་པས་ན། བདག་མེད་ཆོས་ལས་ལེགས་བྱུང་སྟེ། །འདི་དག་ནི་སངས་རྒྱས་ལ་སོགས་པའི་རྒྱུད་དང་འབྲས་བུར་གྱུར་པ་ཡིན་ནོ། །བྱང་ཆུབ་ཅེས་བྱ་བ་ལ་སོགས་བ་ནི་ཕྱག་འཚལ་བ་སྟོན་པ་ཡིན་ཏེ། ཇི་ལྟར་འབྱུང་ཞེ་ན་བྱང་ཆུབ་ཚོགས་ཀྱིས་བསྒོམས་པ་ཡིས། །ཞེས་བྱ་བ་སྟེ་བྱང་ཆུབ་ཀྱི་སེམས་བསྒོམས་པའི་བསོད་ནམས་དང་ཡེ་ཤེས་ཀྱི་ཚོགས་བླ་ན་མེད་པའི་བསོད་རྣམས་དང་ཡེ་ཤེས་ཀྱི་ཚོགས་དེས་རྒྱུད་བསྒོས་པའི་ཕྱིར་རོ། །མི་གཡོ་ཡི་གེ་ལས་འབྱུང་ཞིང༌། །ཞེས་བྱ་བ་ནི་ཟླ་བ་ལ་གནས་པའི་ཡི་གེ་ཧཱུཾ་ལས་འབྱུང་བའི་ཕྱིར་རོ། །དེ་ནི་འདི་སྐད་སྟོན་པར་འགྱུར་ཏེ། བྱང་ཆུབ་ཀྱི་སེམས་བསྒོམ་པ་སྔོན་དུ་འགྲོ་བས་ཟླ་བའི་དཀྱིལ་འཁོར་ལ་སོགས་པ་བསྒོམ་པར་བྱའོ། །ཐུགས་རྡོ་རྗེའི་སྦྱོར་བས་དང་པོར་བཟླས་
པ་ལ་སོགས་པ་ལ་རང་གི་ལྷ་སྤྱན་དྲང་བ་ལ་སོགས་པ་བྱའོ་ཞེས་བསྟན་པར་བྱ་བའི་ཕྱིར། གནས་དང་ཞེས་བྱ་བ་ལ་སོགས་པ་གསུངས་ཏེ་འདི་དག་ག་ལས་ཤེས་ཤེ་ན། འཁོར་ལོས་སྒྱུར་བ་ཆེན་པོར་གྱུར་པས་ཆོས་ཀྱི་མཐར་ཡང་དམ་ཚིག་རྡོ་རྗེ་ཅན་དུ་གྱུར་ནས་རང་གི་ལྷ་སྤྱན་དྲང་བར་བྱའོ་ཞེས་བསྟན་པར་བྱ་བའི་ཕྱིར་རོ། །རྣལ་འབྱོར་བདག་ཉིད་ཅན་གྱིས་བརྟག །ཅེས་བྱ་བ་ནི་འདི་སྐད་སྟོན་པར་འགྱུར་ཏེ། སེམས་དཔའི་སྐྱིལ་མོ་ཀྲུང་དང་ལྡན་པར་འདུག་ལ་རང་བཞིན་གྱིས་དག་པའི་ཆོས་ཉིད་མངོན་དུ་བྱས་ཏེ། རང་གི་ཕྱག་རྒྱ་བྱིན་གྱིས་བརླབ་པ་སྔོན་དུ་འགྲོ་བ་དང༌། རྡོ་རྗེ་སེམས་མས་བྱིན་གྱིས་བརླབས་ལ་ཧཱུཾ་ཞེས་བྱ་བ་བརྗོད་དེ། རང་གི་ལུས་ཀྱི་རིན་པོ་ཆེ་ལ་བདག་ཉིད་རྡོ་རྗེ་ཅན་ཡིན་ནོ་ཞེས་ང་རྒྱལ་བསྐྱེད་ལ་ཇི་སྐད་དུ་བཤད་པའི་གནས་དང་སྟན་ལ་སོགས་པ་རྫོགས་ནས། རྡོ་རྗེའི་ལྕགས་ཀྱུས་རང་གི་ལྷ་སྤྱན་དྲངས་ལ་གདན་ཇི་ལྟ་བ་བཞིན་དུ་བསྟབས་ཏེ། རིགས་ཀྱི་ཡུམ་གྱི་དམ་ཚིག་ཉེ་བར་བསྟན་ནས་ཕྱག་རྒྱ་བསྐོར་བས་ཕྱོགས་བཅིངས་ལ་མཆོད་ཡོན་དང་ཞབས་བསིལ་ལ་སོགས་པ་ཕུལ་ནས་གོ་ཆ་བསྐོན་ཏེ། ཕྱོགས་སུ་མདའ་འཕེན་པའི་ཚུལ་དང༌། ཕུར་བུ་དང་རབས་སྲུང་བ་བྱས་ལ། རང་གི་ཕྱག་རྒྱས་བྱིན་གྱིས་བརླབ་ཅིང་དབང་བསྐུར་ཏེ་གསང་བའི་མཆོད་པ་དང་རོལ་མོ་ལ་སོགས་པ་བསམ་ཞིང་བསྟོད་པ་དང༌། ཕྱག་བྱ་ལ་སོགས་པའི་རིམ་གྱིས་རང་གི་ལྷའི་གཟུགས་སུ་བསྒོམ་པར་བྱའོ། །བྱིན་གྱིས་བརླབས་པའི་རྣལ་འབྱོར་ལ་ནི་རང་གི་སྔགས་དང་ཕྱག་རྒྱས་བདག་ཉིད་བྱིན་གྱིས་བརླབས་ལ་རང་གི་ལྷའི་ང་རྒྱལ་དུ་བྱའོ། །ཡོངས་སུ་རྟོག་པའི་རྣལ་འབྱོར་ནི་བྱང་ཆུབ་ཀྱི་སེམས་བསྒོམ་པ་ལ་སོགས་པའི་རིམ་གྱིས་རང་གི་ལྷར་བསྐྱེད་པའོ། །ཡོངས་སུ་རྫོགས་པའི་རྣལ་འབྱོར་ནི། སྐད་ཅིག་གིས་རྣམ་པ་ཐམས་ཅད་ཀྱི་མཆོག་དང་ལྡན་པའི་རང་གི་ལྷའི་གཟུགས་སུ་སྤྲོ་བ་དང༌། སྡུད་པར་བྱད་བས་བསྒོམ་པའོ། །དམ་ཚིག་བྱིན་གྱིས་བརླབ་པ་ནི་ལྟར་བྱིན་གྱིས་བརླབ་པ་ཡིན་ཏེ་སྔར་བཤད་པའོ། །རྣལ་འབྱོར་སྤྱོད་པ་ཞེས་བྱ་བ་ནི་བཅོམ་ལྡན་འདས་ལྷ་ཐམས་ཅད་ཀྱི་རྣལ་འབྱོར་གྱིས་བྱུང་བ་ཡིན་པའི་ཕྱིར་རོ། །དེ་ཉིད་བརྟགས་པ་སྟེ་
སེམས་སོ་སོར་རྟོགས་པ་ལ་སོགས་པའི་རིམ་གྱིས་བྱུང་བའི་ཕྱིར་རོ། །བར་དུ་ཞེས་བྱ་བ་ནི་དབུས་སུ་བྱུང་བ་སྟེ་རྣམ་པར་སྣང་མཛད་ཀྱི་ཐུགས་ཀའི་ཟླ་བའི་དབུས་ན་གནས་པའི་གསང་སྔགས་ཀྱི་ཡི་གེ་ལས་ངེས་པར་བྱུང་བ་ཞེས་བྱ་བའི་བར་དུའོ། །ཡོངས་སུ་བརྟག་པ་ལ་སོགས་པ་རྣལ་འབྱོར་གཉིས་བསྟན་པར་བྱ་བའི་ཕྱིར། བྱང་ཆུབ་སེམས་ནི་ཞེས་བྱ་བ་ལ་སོགས་པ་གསུངས་སོ། །དེ་ནི་འདི་ལྟར་སྟོན་པར་འགྱུར་ཏེ། དེ་ལ་དང་པོར་ཡི་གེ་ཧཱུཾ་གིས་ཐལ་མོ་གསུམ་བརྡབས་ལ་རང་གི་བྱང་ཆུབ་ཀྱི་སེམས་བསྒོམས་ནས་རང་བཞིན་གྱིས་དག་པར་མངོན་སུམ་དུ་བྱས་ལ་རང་གི་སེམས་བྱང་ཆུབ་ཀྱི་ཚོགས་ཀྱིས་བསྒོས་པ་ཟླ་བའི་དཀྱིལ་འཁོར་ལྟ་བུར་སོ་སོར་བརྟགས་ལ། དེ་ཉིད་ཡོངས་སུ་རྫོགས་པ་དེ་ལ་ཡི་གེ་ཨོཾ་མྱུ་གུར་བྱས་ནས། དེ་ལས་དེ་བཞིན་གཤེགས་པ་ཐམས་ཅད་ཕྱུང་སྟེ། དེ་རྣམས་ཀྱིས་སེམས་ཅན་ཐམས་ཅད་བཏུལ་ནས་ནང་དུ་ཆུད་པ་སྔོན་དུ་འགྲོ་བས་དེ་ལས་བྱུང་བའི་སྐུ་རྡོ་རྗེ་ལ་རང་གི་གདན་པཾ་ལས་བྱུང་བའི་པདྨ་ལ་གནས་པའི་མཚན་མ་ཐམས་ཅད་ཡོངས་སུ་རྫོགས་པར་བསྒོམས་ལ། གནས་ཇི་ལྟ་བར་ཡི་གེ་གསུམ་གྱིས་སྐུ་གཉིས་བྱིན་གྱིས་བརླབས་ལ། རང་དང་སྤྱན་གཉིས་བྱུང་བའི་རྒྱལ་མཚན་ལ་གནས་པའི་ཡི་གེ་ཐམས་ཅད་ར་སའི་སེམས་ཞུ་བར་བྱས་ལ་བྱང་ཆུབ་ཀྱི་སེམས་ཕྱུང་སྟེ་ཧཱུཾ་ལས་བྱུང་བའི་རང་གི་གསང་བའི་རྡོ་རྗེ་བྱས་ལ་དེ་ནས་སྔགས་ཀྱི་ཡི་གེ་གཉིས་ཡི་གེ་ཧོ་དམར་པོ་དང་སྤེལ་བ་རང་གི་ཁར་བཅུག་སྟེ། འདོད་ཆགས་ཆེན་པོའི་མེས་དེ་ཞུ་བར་གྱུར་ཅིང༌། གཉི་ག་ཡང་ཞུ་བར་གྱུར་པར་བལྟས་ལ་སྤྱན་ལ་སོགས་པས་བསླང་བའི་གླུ་དང་ཡང་དག་པར་བསྐུལ་བ་སྔོན་དུ་འགྲོ་བར་བྱས་པ་དང༌། དེ་ནས་རྣམ་པར་སྣང་མཛད་དུ་གྱུར་ནས་ཐུགས་ཀའི་ཟླ་བའི་དཀྱིལ་འཁོར་ལ་རང་གི་གསང་སྔགས་དང་ལྡན་པས་རྡོ་རྗེའི་བདག་ཉིད་ནི་བདག་ཡིན་ནོ་ཞེས་བྱ་བའི་ང་རྒྱལ་བསྐྱེད་ནས། མཚན་ཐམས་ཅད་ལ་སོགས་པ་ཡོངས་སུ་རྫོགས་ཤིང་འོད་ཀྱི་དཀྱིལ་འཁོར་དམ་པས་བརྒྱན་པ་དང་ཕྱག་རྒྱ་དང་ཉེ་བར་ལྡན་པའི་ཡེ་ཤེས་སེམས་དཔར་བདག་ཉིད་བསྒོམ་པར་བྱའོ། །ཆ་ཤེས་ཀྱི་ནི་དྲ་བ་ཅན། །ཞེས་བྱ་བ་ནི་ས་ལ་སོགས་པ་སྤྱན་ལ་སོགས་པར་
རང་གི་ས་བོན་ལས་བྱུང་བ་དགོད་པར་བྱའོ། །ཕུང་པོ་དང་ཁམས་དང་སྐྱེ་མཆེད་ལ་སོགས་པ་རྣམས་ལ་ནི་དེ་བཞིན་གཤེགས་པ་རྣམས་དང་སའི་སྙིང་པོ་ལ་སོགས་པ་བཀོད་ལ། ཡང་ཡི་གེ་གསུམ་གྱིས་བྱིན་གྱིས་བརླབས་ཏེ་རྡོ་རྗེ་སེམས་དཔའ་ལ་སོགས་པའི་རང་གི་སྔགས་དང་ཕྱག་རྒྱས་བྱིན་གྱིས་བརླབ་པོ། །དེ་ནས་གོ་ཆ་དང་མཚོན་ཆ་ལ་སོགས་པ་བརྟག་པར་བྱ་ཞིང་རྫོགས་པའི་སངས་རྒྱས་ལྔ་པོ་རིན་པོ་ཆེའི་དབུ་རྒྱན་དུ་གྱུར་པའི་ཅོད་པན་དང༌། ཕྲེང་བ་རྣམས་ཀྱིས་དབང་བསྐུར་ལ། གསང་བའི་མཆོད་བ་རྣམས་ཀྱིས་མཆོད་དེ། དེའི་འོག་ཏུ་སྒྱུ་མ་སྟེ་རང་གི་ལྷའི་གཟུགས་ཀྱི་མཚན་ཉིད་ཅན་སངས་རྒྱས་ཀྱིས་སྤྲུལ་པ་མཛད་པ་དེ་རྣམས་ཀྱིས་སེམས་ཅན་ཐམས་ཅད་འདུལ་ཞིང༌། པདྨ་ལ་གནས་པ་རྡོ་རྗེ་འབར་བའི་འཕྲོ་བའི་བདག་ཉིད་ཅན་གྱི་ལུས་དང་ལྡན་པ་སྤྲོས་ནས། ཡང་དག་པར་བསྡུས་ཏེ་རང་གི་གདན་ལ་གནས་པར་བྱ་སྟེ་རང་གི་ལྷའི་ང་རྒྱལ་བྱའོ། །འདིར་ཡང་རྡོ་རྗེ་སེམས་དཔའ་ལ་སོགས་པའི་སྦྱོར་བས་རྣལ་འབྱོར་གསུམ་ཆར་ཡང་སྟོན་པ་ནི་སྒྲུབ་པའི་ཐབས་གཞན་དག་ཉེ་བར་མཚོན་པའི་དོན་དུ་འདི་དག་བསྟན་པ་ཡིན་ཏེ་གཞན་དུ་ན་དེ་རྣམས་ཀྱི་མོས་པའི་དབང་གིས་ཉེ་བར་དགོད་པ་དོན་མེད་པར་ཐལ་བར་འགྱུར་རོ། །དབན་བསྐུར་བ་བྱས་པས་ནི་སྒེག་མོ་ལ་སོགས་པ་ཡང་དག་པར་མཆོད་ལ་སྟོང་པ་ཉིད་དུ་བྱས་ཏེ། རྡོ་རྗེ་གླུ་ལ་སོགས་པ་རྣམས་ཀྱིས་བདག་ཉིད་ཀྱི་ལུས་བསྐྱེད་དོ། །ལ་ལ་ནི་ཡོངས་སུ་བརྟགས་པ་དང་གཞན་གྱི་དབང་ལ་སོགས་པའི་དེ་ཁོ་ན་ཉིད་ཀྱི་དབྱེ་བ་དང་རང་གི་ལྷ་ཉིད་ཀྱི་སྦྱོར་བ་ཉིད་ཀྱིས་སེམས་ཅན་གྱི་བསམ་པའི་ང་རྒྱལ་གྱི་དབྱེ་བས་བྱང་ཆུབ་གསུམ་འདིར་གསུངས་པ་ཡིན་ལ། དེ་ནི་དང་པོ་ཕྱེ་སྟེ་སྤྲོས་པ་ཡིན་ལ་གཞན་དག་ནི་མ་བཤད་དོ། །བསྒོམ་པས་སྐྱོ་བར་གྱུར་ན་མྱུར་ཆེས་པ་དང་དབུལ་བ་ལ་སོགས་པ་དང་བྲལ་བའི་གསང་སྔགས་བཟླས་བརྗོད་བྱའོ། །བཟླས་པས་སྐྱོ་ན་གཡས་པས་རྡོ་རྗེ་གསོར་ལ་གཡོན་པ་དཀུར་བརྟེན་པའི་དྲིལ་བུ་གསིལ་ཞིང་རྡོ་རྗེའི་གླུ་བླངས་ལ་མཆོད་པ་བྱས་ཏེ། སྔ་མ་བཞིན་དུ་གཤེགས་སུ་གསོལ་ལ་བདག་ཉིད་བསྲུངས་ཏེ།
སྐུ་དང་གསུང་དང་ཐུགས་བསྒོམ་བ་ཅི་བདེ་བ་ལ་གནས་པར་བྱའོ། །བསྒོམ་པ་དང་བཟླས་པ་བར་ཆད་དུ་གྱུར་པས་ཀྱང་ཡི་གེ་བརྒྱ་བ་བརྗོད་པ་ཉེ་བར་བསྡུ་བར་བྱའོ། །ལེའུ་བདུན་བའི་བཤད་པའོ།། །།ལས་ཀྱི་ཚོགས་བསྟན་པར་བྱ་བའི་ཕྱིར། དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་ཏེ། ལྷ་ནི་གང་ཡང་རུང་བ་ཞེས་བྱ་བ་ལ་སོགས་པ་གསུངས་ཏེ། འདི་སྐད་སྟོན་པར་འགྱུར་ཏེ། དཀྱིལ་འཁོར་གྱི་དབུས་སུ་གང་གཞག་པར་གྱུར་པའི་དཀྱིལ་འཁོར་ཏེ་དེའི་མིང་འབྱུང་བ་ཞེས་བྱ་བར་འགྱུར་རོ། །བདག་པོ་ཉིད་ཀྱིས་ཞེས་བྱ་བ་ནི་རྣམ་པར་སྣང་མཛད་ལ་སོགས་པའི་རྣལ་འབྱོར་གྱིས་ཞི་བ་ལ་སོགས་པའི་ལས་རྣམས་བྱ་བའོ། །འཁོར་ལོའི་རྒྱལ་མོ་རྣམས་བསྒོམས་ནས། །ཞེས་བྱ་བ་ནི་སྤྱན་ལ་སོགས་པའི་རྒྱལ་མོ་བསྒོམས་པས་ཏེ་ཞི་བའི་ལས་ནི་སྐུལ་བྱེད་མ་དང་སྤྱན་གཉིས་ཀྱིས་སོ། །རྒྱས་པ་ལ་ནི་རིན་ཆེན་སྒྲོལ་མ་དང་གོས་དཀར་མོ་གཉིས་ཀྱིས་སོ། །དབང་ལ་ནི་སྒྲོལ་མ་དང༌། རྡོ་རྗེ་ལུ་གུ་རྒྱུད་གཉིས་ཀྱིས་སོ། །ཡམས་ལ་སོགས་པ་རྣམ་པར་གཞིག་པ་ལ་ནི་འོད་ཟེར་ཅན་དང་རི་ཁྲོད་ཀྱི་ལོ་མ་ཅན་གྱིས་སོ། །མངོན་སྤྱོད་ལ་ནི་མཱ་མ་ཀཱི་དང་ཁྲོ་གཉེར་ཅན་གྱིས་སོ། །རོལ་པ་སྟེ་ཞེས་བྱ་བ་ནི་དོན་དམ་པ་ལ་རོལ་པའི་དང་ཚུལ་དང་ལྡན་པས་སོ། །ཆགས་པའི་རྡོ་རྗེ་རྗེས་ཆགས་པ། །ཞེས་བྱ་བ་ནི་སྙོམས་པར་འཇུག་པ་ལ་རྗེས་སུ་ཆགས་པའོ། །གསང་སྔགས་དེ་ཉིད་ཀྱིས་བསྐུལ་ན། །ཞེས་བྱ་བ་ནི་སྦྱོར་བས་སོ། །དང་པོ་ནི་ཏིང་འཛིན་གྱིས་སྤྲུལ་ནས། ཞེས་བྱ་བ་ནི་སྔ་མ་བཞིན་དུ་སྤྲུལ་པར་བསམས་ཏེ་རྣམ་པར་སྣང་མཛད་ཀྱི་སྦྱོར་བས་བསྐུལ་བ་དང་བཅས་པ་དེའི་སྔགས་བརྗོད་ལས་སྤྱན་ནམ་སྐུལ་བྱེད་མ་ཕྱུང་སྟེ། བྱང་ཆུབ་ཀྱི་སེམས་ཀྱི་བདུད་རྩིས་གང་བའི་ཟླ་བ་ལྟར་དཀར་བའི་བུམ་པ་ལག་པ་གཉིས་ཀྱིས་འཛིན་ཅིང་བགྲང་ཕྲེང་དང་རིལ་བ་སྤྱི་བླུགས་བསྣམས་ལ། དབང་པོ་ཞི་ཞིང་ཟླ་བ་ལྟར་དཀར་བ་སྤྲོས་ལ་ནད་ལ་སོགས་པས་གདུངས་པའི་འཇིག་རྟེན་ལ་ལྡུགས་པར་བསམ་མོ་ཞེས་བྱ་བའི་བར་དུའོ། །དང་པོ་ཏིང་ངེ་འཛིན་གྱིས་སྦྲུལ་ནས། །ཞེས་བྱ་བ་ནི་སྔ་མ་དང་འདྲའོ། །ལུས་ལ་སོགས་པ་རྒྱས་པར་བྱ་བ་ལ་ནི་
རིན་ཆེན་ཏོག་གི་ཏིང་ངེ་འཛིན་དང་ལྡན་པས་རིན་ཆེན་སྒྲོལ་མ་དང་གོས་དཀར་མོ་གསེར་གྱི་མདོག་ཅན་ལ་བདུད་རྩི་ལ་སོགས་པས་ཡོངས་སུ་གང་བའི་གསེར་གྱི་བུམ་པ་ཕྱག་གཉིས་ཀྱིས་འཛིན་ཅིང་པདྨ་དང་རིན་པོ་ཆེ་བསྣམས་པ་བདུད་རྩིའམ་རིན་པོ་ཆེའི་ཆར་འབེབས་པས་བསྒྲུབ་པར་བྱ་བའམ། དེའི་ཁྱིམ་འགེངས་པར་དེ་བཞིན་དུ་བསྒོམ་མོ། །བཀུག་སྟེ་མདའ་ཡིས་བསྣུན་ན་ནི། །ཞེས་བྱ་བ་འདི་སྐད་སྟོན་པར་འགྱུར་ཏེ། འོད་དཔག་མེད་ཀྱི་རྣལ་འབྱོར་པས་སྒྲོལ་མའམ་ལུ་གུ་རྒྱུད་མདོག་དམར་ཞིང་འོད་ཟེར་དམར་པོ་དང་ལྡན་པ་ཞགས་པ་དང་ལྕགས་ཀྱུ་འཛིན་ལ། གཡོན་གྱིས་གཞུ་བཟུང་ནས་གཡས་ཀྱིས་རྩེ་དམར་བའི་མདའ་འདྲེན་པས་བསྒྲུབ་པར་བྱ་བའི་སྙིང་གའི་ལྟེ་བ་ལ་བསྣུན་པར་སྔ་མ་བཞིན་དུ་བསམས་ན་ངེས་པར་མདག་གཞུག་ཉིད་དུ་འགྱུར་རོ། །དོན་ཡོད་རྡོ་རྗེའི་རྣལ་འབྱོར་པས་ནི་འོད་ཟེར་ཅན་ནམ། རི་ཁྲོད་ཀྱི་ལོ་མ་ཅན་མདོག་ལྗང་གུ་བྱང་ཆུབ་ཀྱི་སེམས་ཀྱི་ཆུས་གང་བའི་བུམ་པ་ཕྱག་ན་ཐོགས་ནས་ཡུལ་འཁོར་དུ་སྔ་མ་བཞིན་དུ་ལྡུགས་པར་བསམས་ན་བདུད་ལ་སོགས་པའི་ཉེ་བར་འཚེ་བ་སེལ་བར་འགྱུར་བས་ན་ཡམས་དང་གནོད་པ་ཞི་བར་འགྱུར་རོ་ཞེས་གསུངས་སོ། །མརྒད་ལྟ་བུའི་མདོག་ཅན་ལ། །ཞེས་བྱ་བ་ནི་བ་རྒད་ཀི་འོད་ཀྱི་མདོག་ཅན་ནོ། །ཧཱུཾ་ཞེས་བྱ་བའི་སྒྲ་སྒྲོགས་པ། །ཞེས་བྱ་བ་ནི་ཁྲོ་ག་ཉེར་ཅན་ནམ་མཱ་མ་ཀཱིས་ཧཱུཾ་གི་ང་རོའི་སྒྲ་སྒྲོགས་པའོ། །རྡོ་རྗེ་བསྡིགས་པར་བརྩོན་པ་ཡིས། །ཞེས་བྱ་བ་ནི་སྙིང་གར་ཁྲོ་བོའི་སྡིགས་མཛུབ་ཀྱིས་བསྒྲུབ་བྱ་ལ་བསྡིགས་པར་བརྩོན་པའོ། །ཁྲོས་ནས་ནི་ཞེས་བྱ་བ་ནི་ཁྲོ་བོའི་ལྟ་བས་རྡོ་རྗེ་མེའི་ཆར་འབེབས་པར་མི་བསྐྱོད་པའི་རྣལ་འབྱོར་དང་ལྡན་པས་སྔ་མ་བཞིན་དུ་བསམ་པར་བྱ་ཞིང་བསྒྲུབ་པར་བྱ་བ་འཇིགས་པར་འགྱུར་བ་ལ་སྦྱར་བར་བྱའོ། །སྦྱོར་བཞེས་བྱ་བ་ནི་ཕྱག་རྒྱ་ལ་སོགས་པའི་སྦྱོར་བས་སོ། །རྡོ་རྗེ་སེམས་མ་ལ་སོགས་པ་བཞིས་རང་གི་རིགས་དང་ལྡན་པ་རྣམས་བྱིན་གྱིས་བརླབ་ཅིང་སྤྱན་དྲངས་ལ་དམ་ཚིག་ལ་བཞག་ནས། དབང་བསྐུར་བར་བྱའོ། །སྐལ་བ་བཟང་པོ་པ་རྣམས་ཀྱང་ཞི་བ་དང་རྒྱས་པ་ལ་སོགས་
པའི་ལས་ལ་སྦྱར་ན་དེས་རང་གི་ལས་ཞི་བ་དང་རྒྱས་པ་ལ་སོགས་པའི་འབྲས་བུ་དོན་ཡོད་པར་སྦྱིན་པར་བྱེད་པར་འགྱུར་རོ། །ཁྲོ་བོའི་རྒྱལ་པོར་སྦྱར་བར་བྱ། །ཞེས་བྱ་བ་ནི་གཤིན་རྗེ་གཤེད་ལ་སོགས་པའི་རྣལ་འབྱོར་པས་ལས་དེ་ཉིད་ལ་སྦྱར་བར་བྱའོ། །ཇི་ལྟར་ཞེ་ན། །དམ་ཚིག་ཅེས་བྱ་བ་ལ་སོགས་པ་གསུངས་ཏེ་རང་གི་ལྷའི་ང་རྒྱལ་གྱིས་བསྐུལ་བ་སྔོན་དུ་འགྲོ་བ་དང༌། གསང་སྔགས་བརྗོད་ལ་དམ་ཚིག་སྤྱན་དྲང་བ་དང་བསྐྲད་པ་དང༌། བསྲུང་བ་དང་མངོན་སྤྱོད་ལ་སོགས་པ་བྱའོ། །མངོན་སྤྱོད་ཉིད་བསྟན་བར་བྱ་བའི་ཕྱིར། རྐང་རྗེས་སའི་ཞེས་བྱ་བ་ལ་སོགས་བ་གསུངས་ཏེ། དགྲ་བོའི་ཚ་བ་བ་སྐྱེད་པར་བྱ་བའི་ཕྱིར་ཇི་སྐད་དུ་བསྟན་པ་བཞིན་དེའི་གཟུགས་བརྙན་བྱས་ལ། རྣམ་པར་ཤེས་པ་དགུག་པ་ལ་སོགས་པ་སྔོན་དུ་འགྲོ་བས་དུག་དང་སྐེ་ཚེ་ལ་སོགས་པས་བཀང་ནས་ཤིན་ཏུ་སྡུག་བསྔལ་བར་གྱུར་པ་ལ། བོ་སོན་ཆའི་ཚེར་མས་ཁྲོ་བོའི་སྔགས་བཟླས་པས་དབུག་གོ །གསད་པ་ལ་ནི་མི་རུས་ཀྱི་ཕུར་བུས་དཔྲལ་བ་ལ་སོགས་པ་གནས་ལྔར་གདབ་བོ། །དེ་ཡང་འདི་ལྟར་ཕུར་བུས་བཏབ་ནས་བསྐམ་པར་བྱ་སྟེ། དེ་བཞིན་དུ་དེས་ཀྱང་མ་ནུས་ན་དུམ་བུར་གཏུབས་ནས་སྦྱིན་སྲེག་བྱའོ། །རུས་སྦལ་གྱི་རྐང་པས་ནི་སྔར་བཤད་པའོ། །ཆོ་ག་བཞིན་དུ་དགུག་པར་བྱ། །ཞེས་བྱ་བ་ནི་ཡི་གེ་ཧཱུཾ་གིས་སྲུང་བ་དྲངས་ལ་དཔལ་དང་བྲལ་བར་བྱའོ། །བསྒྲུབ་བྱ་བསམས་ནས་ཞེས་བྱ་བ་ནི་རྡོ་རྗེ་ཁྲོ་བོ་ལ་ལས་ཞགས་པས་བཅིངས་ནས་ལྷོ་ཕྱོགས་སུ་ཁྲིད་པར་གྱུར་པ་དང༌། ལ་ལས་རྡོ་རྗེས་བརྡེགས་བཞིན་པ་དང༌། ལ་ལས་རལ་གྲིས་གཏུབས་བར་གྱུར་པ་དང༌། ཧཱུཾ་བཛྲ་རཱཀྵ། ཞེས་བྱ་བ་ལ་སོགས་པའི་བསྐུལ་ཚིག་སྔོན་དུ་འགྲོ་བས་རྡོ་རྗེ་སྲིན་པོས་བསྒྲུབ་པར་བྱ་བ་ཟོས་པར་བསྒོམས་ཤིང༌། བྱ་རོག་དང་ཁྱི་ལ་སོགས་པས་ཀུན་ནས་བསྐོར་ནས་ཟ་ཞིང་འཐོག་པར་བསམས་སོ། །མིང་ནས་བསྐུལ་བར་བྱ་ཞེས་བྱ་བ་ནི་དེའི་མིང་ནས་བསྐུལ་བས་སོ། །བསྐྲད་པའི་ཡང་ནང་གི་སྦྱོར་བ་བསྟན་པར་བྱ་བའི་ཕྱིར། །རླུང་གི་དཀྱིལ་འཁོར་ཞེས་བྱ་བ་ལ་སོགས་པ་གསུངས་ཏེ་རླུང་གི་དཀྱིལ་འཁོར་ལ་ཞོན་པ་ཧཱུཾ་དང་སྤེལ་བའི་ཨུ་ལས་བྱུང་བའི་རྡོ་རྗེ་རྔ་མོ་བསམས་ཏེ། དེའི་
རྒྱབ་ཏུ་བསྒྲུབ་པར་བྱ་བ་ཞོན་པར་ཡོངས་སུ་བརྟགས་ལ་རྡོ་རྗེ་ཁྲོ་བོས་གཟིར་བར་གྱུར་བཞིན་དུ་ལྷོ་ཕྱོགས་སུ་ཁྲིད་པར་གྱུར་པར་བསམ་མོ། །དེ་ཉིད་ལ་ཕྱིའི་ཆོ་ག་བསྟན་པར་བྱ་བའི་ཕྱིར་དེའི་རྐང་རྗེས་ཞེས་བྱ་བ་ལ་སོགས་པ་གསུངས་སོ། །དེ་ནི་འདི་སྐད་སྟོན་པ་ཡིན་ཏེ་རླུང་གིས་བཙུགས་པའི་ཤིང་ལོ་ལ་ཁྲོ་བོའི་སྔགས་དང་སྤེལ་བའི་མིང་བྲིས་ལ་དེ་དང༌། དེའི་རྐང་རྗེས་ཀྱིས་དང་བསྲེས་ལ་མིང་ནས་སྨོས་པ་སྔོན་དུ་འགྲོ་བས་བཀུག་ལ་རྡོ་རྗེ་སྣ་ཡོན་གྱི་རྐང་པའི་དྲུང་དུ་སྦའོ། །དེའི་མིང་གསང་སྔགས་དང་སྤེལ་ཏེ་ཞེས་བྱ་བ་ནི་འུག་པའི་སྒྲོ་ལ་བསྒྲུབ་པར་བྱ་བའི་མིང་ཁྲོ་བོའི་སྔགས་དང་སྤེལ་ཏེ་བྲིས་ལ་དགེ་སྦྱོང་དང་བྲམ་ཟེའི་སྐྲ་ཡིས་དེ་དཀྲིས་ལ་སའི་འོག་ཏུ་བརྐོས་ནས་གཞུག་སྟེ་དེ་གཉིས་ཁྲོ་བོ་གཉིས་ཀྱིས་འཐབ་མོ་འགྱེད་པར་བསམ་པར་བྱ་སྟེ། དེས་ནི་ཕན་ཚུན་འབྱེ་བར་འགྱུར་རོ། །བསྒྲུབ་པར་བྱ་བའི་ལུས་བསྐམ་པར་བྱ་བའི་ཕྱིར་ཧཱུཾ་ཞེས་བྱ་བ་ལ་སོགས་པ་གསུངས་ཏེ་ཁྲོ་བོའི་རྣལ་འབྱོར་དང་ལྡན་པས་རང་གི་སྣའི་རྩེ་མོ་ལ་གནས་པའི་ཧཱུཾ་ལས་བྱུང་བའི་རྡོ་རྗེ་ཕྲ་མོ་སྤྲོས་ལ་བསྒྲུབ་པར་བྱ་བ་བཀང་སྟེ་དེའི་ཡན་ལག་གི་ཚིགས་ཐམས་ཅད་དུ་སྣ་ཚོགས་རྡོ་རྗེ་རབ་ཏུ་འབར་བ་བསམས་ལ། དེ་འབར་བས་ལུས་བསྐམས་ནས་ཨོཾ་བཛྲ་ཌཱ་ཀི་ནི། ཞེས་བྱ་བ་ལ་སོགས་པའི་སྔགས་བསྐུལ་བའི་ཚིག་སྔོན་དུ་འགྲོ་བས། རྡོ་རྗེ་མཁའ་འགྲོ་རྣམས་ཀྱིས་ཁྲག་ཀུན་ནས་གཞིབས་པར་གྱུར་པར་བསམ་མོ། །རླུང་བཅིང་བར་བྱ་བའི་ཕྱིར་མཁས་པས་རླུང་གི་ཞེས་བྱ་བ་གསུངས་ཏེ། རླུང་གི་ཕྱོགས་སུ་དྲི་ནག་པོས་དཀྱིལ་འཁོར་གྲུ་བཞི་བྱས་པར་ཐིག་ལེ་བདུན་རེ་རེ་ཞིང་ཡི་གེ་ཡས་བསྐོར་བར་བྱས་ལ་དེའི་སྟེང་དུ་ཁམ་ཕོར་གྱིས་དགབ་ལ་དེ་ཡང་རི་རབ་རྩེ་མོ་བརྒྱས་བར་བསམས་ནས། དབུས་སུ་ལཾ་གྱིས་མཚན་པའི་དབང་ཆེན་གྱི་དཀྱིལ་འཁོར་རྡོ་རྗེ་ཆེན་པོས་མནན་པའི་ནང་དུ་རླུང་རྣམས་ངེས་པར་ཆུད་པར་བསམས་ལ་གསང་སྔགས་བརྗོད་དེ་འདི་བྱའོ། །ཆར་དབབ་པའི་ཕྱིར་པདྨ་འདབ་བརྒྱད་ཅེས་བྱ་བ་ལ་སོགས་པ་གསུངས་ཏེ། པདྨ་འདབ་མ་བརྒྱད་པ་བྲིས་ཏེ་དེའི་འདབ་མ་བརྒྱད་ལ་མཐའ་ཡས་དང་རིགས་ལྡན་དང༌། ནོར་རྒྱས་དང༌།
དུང་སྐྱོང་དང༌། འཇོག་པོ་དང༌། པདྨ་ཆེན་པོ་དང༌། ཀརྐོ་ཊ་དང༌། པདྨ་ཞེས་བྱ་བ་གཉིས་གཉིས་ཤིང་ནག་པོ་དང༌། དམར་པོ་དང༌། སར་པོ་དང༌། དཀར་པོའི་མདོག་ཅན། ཨོཾ་ཤ་ལ་ས་ཧ་ཁ་ཞེས་བྱ་བ་དང༌། རྐང་པ་ནས་བརྩམས་ཏེ་སྤྱི་བོའི་བར་དུ་ཀླུ་བརྒྱད་བྱིན་གྱིས་བརླབ་ཅིང་པདྨའི་ལྟེ་བ་ལ་མཇུག་མ་རྣམས་གནས་པར་བྱས་ལ་རང་གི་གནས་ནས་བཀུག་སྟེ་མཆོད་ནས་ཁྲོ་བའི་གཟུགས་འབར་བའི་ཕྲེང་བ་ཅན་དུ་བདག་ཉིད་དབུས་སུ་གནས་ལ་ཧཱུཾ་ནཱཾ་ཧཱུཾ་ཞེས་བརྗོད་ཅིང་རྟིང་པའི་མཐིལ་གྱིས་གཟིར་བར་གྱུར་པར་བསམས་ཤིང༌། ཀླུ་རྣམས་ཀྱང་ཆར་འབབས་པ་ལ་བརྩོན་པར་བསམ་མོ། །ཆར་བཅས་པའི་ཕྱིར་ཉི་མའི་མདོག་ལྟར་ཞེས་བྱ་བ་ལ་སོགས་པ་གསུངས་ཏེ། བདག་ཉིད་ཉི་མ་དམར་པོའི་མདོག་དང་འདྲ་བའི་འོད་ཅན་གྱི་ཁྲོ་བའི་གཟུགས་སུ་བསམས་ལ། རང་གི་ཁ་ནམ་མཁའི་ཚད་ཙམ་ལ་ཡི་གེ་ཧཱུཾ་གི་འབར་བར་གྱུར་པའི་ལྕེ་དང་ལྡན་པ་གདངས་ཏེ་ཆུས་ཡོངས་སུ་གང་བའི་སྤྲིན་བལྡགས་ལ་དབུགས་ཀྱིས་རྔུབས་ལ་དབུགས་ཕྱུང་བས་ཤིང་བལ་བཞིན་དུ་གཏོར་བར་བྱའོ། །ཡང་ན་རང་གི་ཕྱག་རྒྱའི་ཚོགས་ཁ་ནམ་མཁའི་ཚད་ཙམ་ལ་ལྕེ་འབར་བ་གདངས་ལ་ཆུས་ཡོངས་སུ་གང་བའི་སྤྲིན་བལྡགས་ཏེ་དབུགས་ཀྱིས་དྲངས་ལ་དབུགས་ཕྱུང་བས་ཤིང་བལ་བཞིན་དུ་གཏོར་བར་བྱའོ། །གལ་ཏེ་ཡང་རང་གི་ཕྱག་རྒྱའི་ཚོགས་ཀྱི་འབར་བ་བཏང་བས། སྤྲིན་བཅད་ཅིང་གཏུབས་ལ་ཧཱུཾ་ཞེས་བྱ་བས་བསྡིགས་པ་ལ་བརྩོན་པར་བྱའོ། །བགེགས་ཐམས་ཅད་རྣམ་པར་གཞིག་པའི་ཕྱིར་མེའི་དཀྱིལ་འཁོར་ཞེས་བྱ་བ་ལ་སོགས་པ་གསུངས་ཏེ། རྣམ་པར་སྣང་མཛད་ཀྱི་སྦྱོར་བ་དང་ལྡན་པས་རང་གི་དཔྲལ་བ་ལས་བྱུང་བའི་འཕགས་པ་མི་གཡོ་བ་མེའི་དཀྱིལ་འཁོར་ལ་གནས་པ་ཕྱག་དྲུག་པ་བསམས་ཏེ། དེ་ཉིད་ཁྲོ་བོ་གྲངས་མེད་པ་དང་བཅས་པས་བགེགས་ཐམས་ཅད་ཧཱུཾ་གི་སྒྲ་དང་རབ་ཏུ་འབར་བའི་རལ་གྲིས་ལ་སོགས་པ་འབེབས་པས་བགེགས་རྣམས་གཞིག་པར་བྱའོ། །མིའི་བགེགས་གཞོམ་པར་བྱ་བའི་ཕྱིར་རྐང་རྗེས་ས་དང་ཞེས་བྱ་བ་ལ་སོགས་པ་གསུངས་ཏེ། མིའི་རྐང་རྗེས་ཀྱི་ས་དང་མིའི་ཁྲག་གིས་བསྒྲུབ་པར་བྱ་བའི་གཟུགས་བརྙན་བྱས་ལ་མི་རུས་ཀྱི་ཕུར་བུ་
དག་ལ་འོད་ཟེར་ཅན་གྱི་སྔགས་ཉི་ཤུ་བཟླས་ལ་གཉིས་ཀྱིས་མིག་གཉིས་སུ་ཕུར་བུ་བཏབ་ལ་ཚོགས་ཀྱི་བདག་པོའི་ཁར་བཅུག་སྟེ། ཨོཾ་སུ་མྦྷ་བཛྲ་མུ་ས་ལ། ཞེས་བརྗོད་པ་སྔོན་དུ་འགྲོ་བས་རྡོ་རྗེ་གཏུན་ཤིང་གིས་རྒྱབ་ནས་བརྡུང་པར་བསམ་པར་བྱའོ། །མེ་མཆེད་པ་བཟློག་པར་བྱ་བའི་ཕྱིར་སྟང་ཟིལ་ཁ་དོག་ཅེས་བྱ་བ་ལ་སོགས་པ་གསུངས་ཏེ། རང་གི་ཡི་ཤེས་ཧཱུཾ་དང་སྤེལ་བ་ལས་བྱུང་བའི་ནམ་མཁའ་ལྡིང་མདོག་ནག་པོ་ལུས་ལ་ཀླུ་སྟོང་གིས་ཁྱབ་པར་བསམས་ལ། ཨོཾ་བཛྲ་ནཱ་ར་ཡཱ་ན་ཞེས་བྱ་བ་ལས་སོགས་པ་དང༌། བསྐུལ་བ་སྔོན་དུ་འགྲོ་བ་དེས་བརྒྱ་བྱིན་བསྐུལ་ལ་འདི་ལ་ཡང་སྤྲིན་གྱི་ཚོགས་ལས་ཆར་དབབ་པའི་ཕྱིར་བཀའ་བསྒོ་བར་བྱའོ། །བཀའ་ཐོས་ནས་ཆུའི་ཆར་འབེབས་པའི་སྤྲིན་རྣམས་ཀྱིས་མེ་གསོད་པ་ལ་བརྩོན་པར་བསམས་ལ་ནམ་མཁའ་ལྡིང་གིས་ཀྱང་གཤོག་པའི་ཆུ་དང༌། མཆུས་བརྐོས་པས་ཆུ་ཀླུང་གི་མཚམས་བྱེད་པར་བསམ་མོ། །རྡོ་རྗེ་ཐོག་ཐོག་བཟློག་པར་བྱ་བའི་ཕྱིར་ཞལ་རས་གསུམ་པ་ཞེས་བྱ་བ་ལ་སོགས་པ་གསུངས་ཏེ། དཔལ་རྡོ་རྗེ་སེམས་དཔའ་ཞལ་རས་གསུམ་པ་ཟླ་བའི་མདོག་ཅན་ཕྱག་བཞི་པ་འོད་དམར་པོ་སྣ་ཚོགས་འབར་བའི་འོད་དང་ལྡན་པ་བསྙེམས་མ་ལ་སོགས་ལྷ་མོ་བཞིས་ཡོངས་སུ་བསྐོར་བ་བདག་ཉིད་རྣམ་པར་བསམས་ལ་གཡས་པས་རྡོ་རྗེ་བསྟོད་དེ་འཇོག་པ། ལག་པ་གཡོན་པས་རྡོ་རྗེ་དྲིལ་བུ་བསྣམས་པའི་རྡོ་རྗེ་སེམས་དཔའ་ལ་སོགས་པ་ཕྱུང་ལ་སྤྲོས་ཏེ། ནམ་མཁའི་ཁམས་སུ་སྤྲིན་བཞིན་དུ་ཁྱབ་པར་བསམས་ནས་བསྒྲུབ་པར་བྱ་བའམ། ཨོཾ་མ་ཧཱ་སུ་ཁ་བཛྲ། ཞེས་བྱ་བ་ལ་སོགས་པས་རྣམ་པ་ཐམས་ཅད་ཀྱིས་བརྒྱན་པའི་རྡོ་རྗེ་ཅན་དུ་བྱིན་གྱིས་བརླབས་ལ་སངས་རྒྱས་རིན་པོ་ཆེས་དབང་བསྐུར་ནས་ཅོད་པན་དང་ཕྲེང་བའི་དབང་བསྐུར་བར་བྱའོ། །ད་ནི་རྣམ་པར་སྣང་མཛད་ཆེན་པོ་འགྲོ་བ་ཐམས་ཅད་ལ་གཟིགས་ནས་སྨིན་མ་མཛེས་པར་བསྐྱོད་ཅིང༌། འཛུམ་པ་ལ་སོགས་པ་དང་ལྡན་པར་མཛད་པ་དང་ཕྱག་ན་རྡོ་རྗེས་གཟིགས་པ་ལ་སོགས་པའི་རྒྱུ་ཞུས་ཤིང༌། བཅོམ་ལྡན་འདས་ཀྱིས་ཀྱང་བཀའ་སྩལ་པ་བསྟན་པར་བྱ་བའི་ཕྱིར། བསྒོམ་པའི་
ལམ་ལས་ཞེས་བྱ་བ་ལ་སོགས་པ་གསུངས་ཏེ་སེམས་ཅན་གྱི་དངོས་པོ་གང་ཡིན་པའི་དངོས་པོ་རྣམས་ནི་དངོས་པོ་མེད་ལ་སྐྱེ་བ་དང་འགག་པ་མཐའ་གཉིས་དང་བྲལ་བ་ཡིན་ཞིང་དེ་མེད་པས་དབུ་མ་ཡང་མེད་དོ། །དེ་བས་ན་ནམ་མཁའ་དང་འདྲ་བ་ཡིན་ན་བྱང་ཆུབ་ཇི་ལྟར་མངོན་སུམ་དུ་བྱ་བའི་ཐབས་དེ་བསྟན་པར་བྱ་བའི་ཕྱིར་ཕུང་པོ་ཞེས་བྱ་བ་ལ་སོགས་པ་གསུངས་ཏེ། ཐབས་དང་ཤེས་རབ་ཀྱི་བདག་ཉིད་ཅན་གྱི་ལྷའི་ཕུང་པོ་དང་གཅིག་ཏུ་གྱུར་པར་བསྒོམས་པས་སྒོམ་པ་ནི་བསྒོམ་པ་གོམས་པར་བྱེད་པའོ། །བྱང་ཆུབ་སེམས་ནི་གྲོགས་འགྱུར་པས། །ཞེས་བྱ་བ་ནི་བྱང་ཆུབ་ཀྱི་སེམས་སྒོམ་པ་སྔོན་དུ་འགྲོ་བས་སོ། །སྤྲུལ་པ་དང་ནི་བསྡུ་པ་ཡིས། །ཞེས་བྱ་བ་ནི་དེ་བཞིན་གཤེགས་པ་ཐམས་ཅད་མཆོད་པར་བྱ་བའི་ཕྱིར་སྤྲུལ་པ་སྤྲོ་བ་དང་བསྡུ་བ་དག་བྱེད་པ་སྟེ། དེ་ཡང་སེམས་ཙམ་ཡི་པས་དེ་ཉིད་ཀྱི་ལྷ་རྣམས་ཀྱི་སྐུ་དང་གསུངས་དང་བྱང་ཆུབ་ཀྱི་མཚན་ཉིད་ཅན་གྱི་སེམས་འཐོབ་པར་འགྱུར་ལ་དེ་ཡང་སྒྱུ་མ་དང་འདྲ་སྟེ་བྱང་ཆུབ་ཀྱང་དེ་དང་འདྲའོ། །སྒྱུ་མ་ལྟ་བུ་ལས་ཇི་ལྟར་ན་འབྲས་བུ་འབྱུང་བར་འགྱུར་ཞེན་དཔེར་ན་ཞེས་བྱ་བ་ལ་སོགས་པ་གསུངས་སོ། །ལྷག་མ་དང་བཅས་པའི་བྱང་ཆུབ་ནི་ཉན་ཐོས་ལ་སོགས་པ་སྟེ་ཕུང་པོ་ལ་སོགས་པ་མེད་པའི་ཕྱིར་རོ། །ལྷག་མ་མེད་པ་ཡང་སྒྲིབ་པའི་བག་ཆགས་དང་བྲལ་བས་བླ་ན་མེད་པའི་བྱང་ཆུབ་བོ། །འདི་ཉིད་བསྐྱེད་པར་བྱ་བའི་ཕྱིར་ཀུན་རྫོབ་ཏུ་ཏེ་ཁོ་ན་ཉིད་རྣམ་པ་བཅུ་གསུངས་སོ། །ཇི་སྐད་དུ་བཤད་པའི་ཆོ་ག་བྱས་ཀྱང་མ་གྲུབ་ན་ལྷ་རྣམས་ཚར་གཅང་པར་བྱ་བའི་དོན་དུ་ཇི་ལྟ་བ་བཞིན་དུ་ཕུར་བུས་གདབ་པར་བྱ་བའི་ཕྱིར། དེར་ལྕགས་ཀྱུས་ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་ལྕགས་ཀྱུས་བཀུག་ནས་རྡོ་རྗེ་ཞེས་པས་བཅིངས་ལ། རྡོ་རྗེ་ནག་མོས་སྡིགས་མཛུབ་བྱས་ལ་རྡོ་རྗེ་ཁུ་ཚུར་གྱིས་ཕུར་བུ་བཟུང་སྟེ། རྡོ་རྗེ་ཐོ་བས་ཕུར་བུའི་སྔགས་གདོན་བཞིན་རུ་གནས་ལྔར་ཕུར་བུས་གདབ་པར་བྱའོ། ལེའུ་བརྒྱད་པའི་བཤད་པའོ།། །།དབབ་པ་ལ་སོགས་པའི་ལས་བསྟན་པར་བྱ་བའི་ཕྱིར་དེ་ནས་བཅོམ་ལྡན་འདས་ཞེས་བྱ་བ་ལ་སོགས་
པ་གསུངས་ཏེ། རྣམ་པར་སྣང་མཛད་ལ་སོགས་པའི་རྣལ་འབྱོར་པས་དབབ་པའི་སྣོད་སྐུལ་བྱེད་མ་ལ་སོགས་པའི་གཟུགས་སུ་རྣམ་པར་བསམས་ལ། གནས་ཇི་ལྟ་བར་གྱུར་བའི་ཡི་གེ་གསུམ་གྱིས་བྱིན་གྱིས་བརླབས་ལ། རང་གི་ས་བོན་ལས་བྱུང་བའི་རླུང་དང་མེའི་དཀྱིལ་འཁོར་ལ་གནས་པ་རང་གི་རྡོ་རྗེ་འབར་བར་འགྱུར་བས་འབར་བཞིན་པར་བལྟས་ལ། རྡོ་རྗེ་བསྡམས་པ་དང་བཅས་པའི་དྲིལ་བུ་བསྐྱོད་ཅིང་གཟེངས་བསྟོད་པ་དང་བཅས་པར་གསང་སྔགས་བརྗོད་ན་འབར་བར་འགྱུར་རོ་ཞེས་གསུངས་སེ། །གནས་པར་བྱ་བའི་དོན་དུ་སྦྱོར་པ་བསྟན་པར་བྱ་བའི་ཕྱིར་དབང་ཆེན་དཀྱིལ་འཁོར་ཞེས་བྱ་བ་ལ་སོགས་པ་གསུངས་སོ། །དེ་ནི་འདི་སྐད་སྟོན་པར་འགྱུར་ཏེ། རས་ལ་སོགས་པ་ལ་དབང་ཆེན་གྱི་དཀྱིལ་འཁོར་ཕྱོགས་དང་མཚམས་རྣམས་སུ་ཨོཾ་གྱིས་མཚན་པར་གི་ཝང་གིས་བྲིས་ལ། དབུས་སུ་པདྨ་འདབ་མ་བརྒྱད་པ་ཨཱཿ་ས་མཚན་པ་བྲིས་ཏེ། ལྟེ་པ་ལ་གནས་པའི་ཡི་གེ་ཧཱུཾ་བཞི། མཐའ་མ་བསྒྲུབ་པར་བྱ་བའི་མིང་དང་ལྡན་པ་བྲིས་ལ། ད་ནས་དེར་དེའི་རྣམ་པར་ཤེས་པ་བཀུག་ནས་ཁམ་ཕོར་སེར་པོ་ཁ་སྦྱོར་གྱི་ནང་དུ་བཅུག་སྟེ་སྟེང་དུ་རྡོ་རྗེ་འཆང་བས་མནན་ལ་བསྐུལ་ཚིག་དང་བཅས་པར་ཧཱུཾ་བརྒྱ་རྩ་བརྒྱད་བཟླས་པའི་རྡོ་རྗེའི་སྐུད་པས་དཀྲིས་ལ་གཞག་པར་བྱའོ། །དབང་དུ་བྱ་བའི་ཕྱིར་སྔགས་ལ་མཁས་བ་ཞེས་བྱ་བ་ལ་སོགས་པ་གསུངས་ཏེ། འདོད་ཆགས་ཆེ་དང་ལྡན་པའི་གཟུགས། །ཞེས་བྱ་བ་ནི་རྡོ་རྗེའི་འདོད་ཆགས་ཏེ་དེའི་གཟུགས་ཅན་ལ་དེ་སྐད་ཅེས་བྱ་སྟེ། རྡོ་རྗེ་སེམས་དཔར་གྱུར་ནས་རྡོ་རྗེ་ཆགས་པར་གྱུར་པའོ། །དཔྱིད་ཅེས་བྱ་བ་ནི་མེ་ཏོག་དྲི་ཞིམ་པའི་ཕྲེང་བ་ལ་སོགས་པས་བརྒྱན་པའི་ཕྱིར་རོ། །འདོད་པ་དང་འདྲ་བ་ནི་མེ་ཏོག་གི་མདའ་དང་གཞུ་དང་ལྡན་པའི་ཕྱིར་རོ། །སྐུ་གསུམ་ལྡན་པ་མདའ་ཐོགས་ཤིང༌། །ཞེས་བྱ་བ་ནི་ལྟོང་དང་དབུས་དང་མདེའུ་ལ་ཨོཾ་ལ་སོགས་པ་གསུམ་བཀོད་པའི་མདས་བསྒྲུབ་པར་བྱ་བའི་བུད་མེད་ཀྱི་སྤྱི་བོར་ཆགས་པས་མནན་ལ་མར་སར་བཞིན་དུ་ཟགས་པར་གྱུར་པར་བསམས་
ཞིང༌། འཛག་པར་བྱ་བའི་ཕྱིར་པདྨའི་ནང་དུ་ཞུགས་པའམ་ཡང་ན་འདོད་ཆགས་ཅན་མི་འཛག་པར་འགྱུར་བ་སྟེ། འདོད་པ་ཞུ་བ་བཞིན་དུའོ། །པདྨ་ནི་པདྨའི་ལྟེ་བར་རོ། །དེ་ལྟར་ན་འདིའི་འཛག་པར་འགྱུར་བའོ། །བུ་མོ་ཟས་སྦྱིན་མ་དགུག་པར་བྱ་བའི་ཕྱིར་མི་ཐོད་ལས་བྱས་ཞེས་བྱ་བ་ལ་སོགས་པ་གསུངས་ཏེ། མི་ཐོད་ལས་བྱས་ཅང་ཏེའུ་ལ། །ཞེས་བྱ་བ་ནི་མི་ཐོད་ལས་བྱས་པའོ། །གཡོགས་ནས་ནི་ཞེས་བྱ་བ་ནི་ཁ་སྤྲེའུའི་པགས་པས་གཡོགས་པའོ། །བུད་མེད་ཁྲག་གིས་མཛེས་པར་བྱ། །ཞེས་བྱ་བ་ནི་བུད་མེད་ཀྱི་ཟླ་མཚན་གྱིས་ངོས་གཉི་ག་ལ་ཡང་པདྨ་བྲིས་པས་མཛེས་པའོ། །བྲིས་ཏེ་ཞེས་བ་ནི་བུད་མེད་ཀྱི་ཁྲག་ཉིད་ཀྱིས་པདྨའི་ལྟེ་བ་གཉིས་སུའོ། །མི་ཡི་སྐྲ་ཡིས་བཏགས་ནས་ནི། །ཞེས་བྱ་བ་ནི་དུར་ཁྲོད་ཀྱི་སྐྲ་བླངས་པས་རུས་པ་གཉིས་བཅིང་ཞེས་བྱ་བའི་དོན་ཏོ། །དཀྱིལ་འཁོར་བྲི་ཞེས་བྱ་བ་ནི་མཚན་མོ་ལམ་གྱི་བཞི་མདོར་རྐང་པ་གཡོན་པའི་མཐེ་བོས་དཀྱིལ་འཁོར་ཟུར་བཞི་པ་ལ་མཚམས་རྣམས་སུ་རྡོ་རྗེ་ལྕགས་ཀྱུ་བྲི་བར་བྱའོ་ཞེས་བྱ་བའི་བར་དུའོ། །བརྡུང་ཞེས་བྱ་བའི་བར་དུ་ནི་དེ་ལ་གནས་ནས་རྐང་པ་གཡོན་བའི་རྟིང་པས་འགུགས་ཤིང་མིང་བརྗོད་པ་སྔོན་དུ་འགྲོ་བས། ཁྲོཾ་ཧཱུཾ་ཞེས་བརྗོད་ཅིང་ཐིང་རིལ་གྱི་རྐང་བའི་རུས་པས་སྒྲ་དབྱུང་བའི་ཕྱིར་བརྡུངས་ན་བུ་མོ་ཟས་སྦྱིན་མ་འགུགས་པར་འགྱུར་རོ། །རྣལ་འབྱོར་པ་འཁོར་ལོ་རྫོགས་པར་གྱུར་པས་བལྟས་པ་དང༌། ཚིག་ཙམ་གྱིས་ཀྱང་མངོན་པར་དད་པའི་འབྲས་བུ་ཐམས་ཅད་རྫོགས་པར་འགྱུར་རོ་ཞེས་བསྟན་པར་བྱ་བའི་ཕྱིར་གང་ཡང་རུང་བ་ཞེས་བྱ་བ་ལ་སོགས་པ་གསུངས་སོ། །སྦྱིན་སྲེག་གི་ལས་བསྟན་པར་བྱ་བའི་ཕྱིར་སྦྱིན་སྲེག་ཅེས་བྱ་བ་ལ་སོགས་པ་གསུངས་ཏེ། དགེ་བ་ཡི་ནི་ལས་རྣམས་བྱེད། །ཅེས་བྱ་བ་ནི་ཞི་བ་དང་རྒྱས་པ་དང་དབང་དུ་བྱ་བ་ནི་གཡས་སུ་གཙུབས་པ་ལས་བྱུང་བའི་མེ་ལས་བྱའོ། །མངོན་སྤྱོད་ལ་ནི་དུར་ཁྲོད་ལས་བྱུང་བའི་མེ་ལས་བྱའོ། །ཐབ་ཁུང་ཞེས་བྱ་བ་ནི་ཟླུམ་པོ་དང་ཟུར་བཞི་དང་ཟླ་གམ་དང་ཟུར་གསུམ་པའི་ཐབ་ཁུང་གི་དབུས་སུ་གནས་པའི་དཀར་པོ་དང༌། སེར་པོ་དང༌།
དམར་པོ་དང༌། ནག་པོའི་པདྨ་ལ་གཞག་པའི་གཙུག་ཏོར་དང༌། རིན་པོ་ཆེ་དང༌། པདྨ་དང༌། འབང་བའི་རྡོ་རྗེ་དེ་ཉིད་ཀྱི་མདོག་ཅན་བྱའོ་ཞེས་བྱ་བའི་དོན་ཏོ། །ལས་ཀུན་བྱེད་པས་བཟླས་ནས་སུ། །ཞེས་བྱ་བ་ནི་ཧཱུཾ་གིས་མངོན་པར་བཟླས་པའོ། །ལག་གཡོན་རྡོ་རྗེ་ཞེས་བྱ་བ་ནི་ལག་པ་གཡོན་པ་རྡོ་རྗེ་རྩེ་གསུམ་པར་བྱས་པའོ། །ལས་ཀྱི་འོད་ཟེར་རྣམས་ཀྱིས་བརྒྱན། །ཅེས་བྱ་བ་ནི་ཞི་བ་ལ་སོགས་པའི་ལས་ཀྱི་མཆོག་གི་འོད་ཟེར་རྣམས་ཀྱིས་མཛེས་པར་འགྱུར་པའོ། །འབར་བའི་རྣམ་པར་བསྒྱུར་བར་བྱ། །ཞེས་བྱ་བ་ནི་འབར་པས་ལྷ་འབར་བའི་གཟུགས་ཀྱིས་དེ་བཞིན་ཉིད་ཀྱི་ཡེ་ཤེས་ངོ་བོ་ཉིད་དུ་འགྱུར་བར་བྱའོ།། ཨོཾ་ཞེས་པ་དང་སྭཱ་ཧཱའི་མཐའ། །ཞེས་བྱ་བ་ནི་ཞི་བ་དང་རྒྱས་པ་དང་དབང་རྣམས་ལ་ནི་གསང་སྔགས་གཞན་གྱིས་མི་ཐོས་པར་བརྗོད་པར་བྱའོ། །མངོན་སྤྱོད་ལ་ནི་ཧཱུཾ་དང་ཕཊ་བཅས་ཤིང་ཁྲོ་བོའི་ཚིག་གིས་ཐོག་མ་དང་ཐ་མར་དགང་བླུགས་དབུལ་བར་བྱའོ། །ཞལ་བཀང་ནས་ཞེས་གསུངས་པས་ལྷ་རྣམས་ཀྱི་ཞལ་གྱི་པདྨར་སྦྱིན་སྲེག་དབུལ་ལོ། །བཤང་གཅི་ལ་སོགས་པས་སྦྱིན་སྲེག་བྱས་པས་སྡིག་པར་འགྱུར་རོ་ཞེས་སོམ་ཉི་སྐྱེ་བར་མི་བྱ་སྟེ། གང་གི་ཕྱིར་འདི་དག་ཐམས་ཅད་རྣམ་པར་རྟོག་པ་ཙམ་ཡིན་གྱི་དོན་དམ་པར་ངོ་བོ་ཉིད་ཀྱིས་དག་པ་ཡིན་པའི་ཕྱིར་རོ། །དེ་བས་ན་དབང་པོ་གཉིས་ཀྱི་སྙོམས་པར་འཇུག་པས་ཀྱང༌། ལྷའི་ང་རྒྱལ་སྔོན་དུ་འགྲོ་བས་ཐབས་དང་ཤེས་རབ་རོ་གཅིག་པ་མངོན་གསུམ་དུ་བྱས་ན་ཟག་པ་མེད་པའི་ཡེ་ཤེས་སྐྱེད་པ་ཡིན་ནོ། །སྐུ་ལ་སོགས་པའི་དམ་ཚིག་བསྟན་པར་བྱ་བའི་ཕྱིར། ལས་ལས་བྱུང་བ་ཞེས་བྱ་བ་ལ་སོགས་པ་གསུངས་ཏེ། ལས་ལས་བྱུང་བ་རྣམས་བསྟན་པའི། །ཞེས་བྱ་བ་ནི་དགེ་བ་དང་མི་དགེ་བའི་ལས་རྣམས་ཀྱིས་སོ། །ཤ་དང་རྐང་ལ་སོགས་པ་རྣམས་ནི་རྣམ་པར་སྣང་མཛད་དང༌། མི་བསྐྱོད་པ་ལ་སོགས་པའི་ངོ་བོ་ཡིན་ཏེ་དེ་བས་ན་བསྟེན་པར་བྱའོ། །གང་ཡང་འདོད་ཆགས་དང་ཞེ་སྡང་ལ་སོགས་པའི་འདུ་བྱེད་རྣམས་འཕེལ་བའི་བཤང་གཅི་ལ་སོགས་པ་འཛག་པ་རྣམ་བ་ལྔ་ནི་ས་ལ་སོགས་པ་འབྱུང་བ་ཆེན་པོ་བཞིའི་ངོ་བོ་ཉིད་དོ། །བསྒོམ་པའི་བློ་གྲོས་རྫོགས་ཕ་ཡིས། །ཞེས་བྱ་བ་ནི་རྟོག་པ་དང་བྲལ་བར་གྱུར་པའོ། །ལེའུ་དགུ་བའི་བཤད་པའོ།། །།དེ་ནས་བཅོམ་ལྡན་འདས་ཞེས་བྱ་བ་
ལ་སོགས་པ་གསུངས་པ་ནི་སྒྲུབ་པ་ཆེན་པོ་བསྒྲུབ་པ་ལ་སོགས་པ་བསྟན་པ་ཡིན་ཏེ། ཏིང་ངེ་འཛིན་ཐམས་ཅད་ཐོབ་ཅིང་འཁོར་ལོ་ལ་སོགས་པའི་དངོས་གྲུབ་མཆོག་ལ་དམིགས་པའི་ཏིང་ངེ་འཛིན་གང་ཡིན་པ་དེ་ལ་དེ་སྐད་ཅེས་བྱའོ། །རྣམ་པར་སྣང་མཛད་ཏིང་འཛིན་གནས། །ཞེས་བྱ་བ་ནི་སྤྱན་དང་ལྡན་པའི་རྟོག་པའི་རྣལ་འབྱོར་དང་ལྡན་པས་སོ། །འཁོར་ལོ་བསྒྲུབ་པར་བྱ་ཞེས་བྱ་བས་ནི་འདི་སྐད་སྟོན་པར་འགྱུར་ཏེ། འཁོར་ལོ་བསྒྲུབ་པར་བྱ་བའི་ཕྱིར་སྟོན་དུ་བསྙེན་པ་བྱས་ལ། རང་གི་དཀྱིལ་འཁོར་གྱི་དབུས་སུ་རང་གི་མཚན་ཉིད་ཇི་ལྟ་བ་དང་ལྡན་པའི་འཁོར་ལོ་གཞག་སྟེ། འོད་ཟེར་འབར་བའི་ཕྲེང་བས་འཁྲིགས་པ་རྣམ་པར་སྣང་མཛད་ལ་སོགས་པ་སྐུ་གསུམ་རྡོ་རྗེ་ཅན་གྱི་གཟུགས་འབར་བའི་ཕྲེང་བས་འཁྲིགས་པའི་འོད་དང་ལྡན་པ་སྙོམས་པར་འཇུག་པ་ལས་བྱུང་ལ་འཁོར་ལོ་ནང་དུ་ཞུགས་པར་བསྒོམས་ཏེ། ཇི་སྲིད་དུ་ཞུགས་ནས་འབར་པར་གྱུར་པ་དེ་སྲིད་དུ་བསྒོམས་ལ། དེ་རང་གི་སྤྱན་གྱི་རིག་སྔགས་བཟླས་བརྗོད་བྱེད་བཞིན་དུ་བླང་བར་བྱའོ། །དེ་བཞིན་དུ་ཅི་རིགས་པར་མི་བསྐྱོད་པ་ལ་སོགས་པའི་སྒོམ་པས་རྡོ་རྗེ་ལ་སོགས་པ་བསྒྲུབ་པ་ཡང་ཉམས་སུ་བླང་བར་བྱའོ། །འདི་ཉིད་ཀྱི་སྐུ་གསུམ་དབྱེ་བའི་རང་གི་ངོ་བོ་བསྟན་པར་བྱ་བའི་ཕྱིར་རིམ་པ་བཞིན་དུ་ཞེས་བྱ་བ་ལ་སོགས་པ་གསུངས་སོ། །ལས་ཀྱི་ཕྱག་རྒྱ་ནི་ལྕགས་ཀྱུ་ལ་སོགས་པའམ་སྔར་བཤད་པའི་མཚན་མ་ཐམས་ཅད་ཀྱང་ཕྱོགས་གཅིག་བསྟན་པའི་ཉེ་བར་མཚོན་པས་བདག་པོའི་སྦྱོར་བ་དང་ལྡན་པས་འཁོར་ལོ་དང་འདྲ་བ་ལྕགས་ཀྱུ་ལ་སོགས་པ་གྲུབ་པར་བྱ་བའི་ཕྱིར་འདིར་སྐུ་ལ་སོགས་པ་ནང་དུ་གཞུག་པར་བྱའོ་ཞེས་བསྟན་པར་བྱ་བའི་ཕྱིར་རོ། །འདིས་ཞེས་བྱ་བ་ལ་སོགས་པ་སྤྱན་ལ་སོགས་པའི་གཟུགས་སུ་བསྟན་པར་བྱ་བའི་ཕྱིར་ས་ནི་ཞེས་བྱ་བ་ལ་སོགས་པ་གསུངས་སོ། །དེ་བཞིན་གཤེགས་པ་ཐམས་ཅད་མཉམ་པ་ཉིད་དུ་གནས་པའི་ཏིང་ངེ་འཛིན་གང་ཡིན་པ་དེ་ལ་དེ་སྐད་ཅེས་བྱའོ། །གསང་བ་འདུས་པར་དབང་བསྐུར་བ་ནི་དེ་བཞིན་གཤེགས་པ་ཐམས་ཅད་བུམ་པའི་ནང་དུ་ཞུགས་ནས་བདེ་བ་ཆེན་པོར་ཞུ་བར་གྱུར་པར་རྣམ་པར་བསམས་ལ་དེ་སྤྱན་ལ་སོགས་པས་ཐོགས་ཏེ། འཁོར་ལོ་ཆེན་པོ་དབང་བསྐུར་བ། །ཞེས་བྱ་བ་ལ་སོགས་པའི་ཚིགས་སུ་བཅད་པ་དང༌། གསང་སྔགས་
ཀྱི་བདག་ཉིད་ལ་སློབ་དཔོན་གྱིས་དབང་བསྐུར་བའི་ཕྱིར་རོ། །རྡོ་རྗེ་འཆང་ཐམས་ཅད་ཀྱི་དམ་ཚིག་སྟེ་རྒྱུ་དེ་ཉིད་ལ་དམིགས་པའི་རིང་ངེ་འཛིན་གང་ཡིན་བ་དེ་ལའང་དེ་སྐད་ཅེས་བྱའོ། །དེ་ཉིད་འཕགས་པ་སྟེ་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་བདག་པོ་རྡོ་རྗེ་འཆང་ཆེན་པོར་གྱུར་པས་སོ། །གང་དུ་ཡང་མི་གནས་སོ་ཞེས་བྱ་བ་ནི་དེ་རྣམས་བསྐྱེད་པ་ཉིད་དུ་མེད་པས་སོ། །སྟང་སྟབས་ནི་གཡས་བརྐྱང་བ་ལ་སོགས་པའོ། །འདུག་སྟངས་ནི་རྡོ་རྗེའི་སྐྱིལ་མོ་ཀྲུང་ལ་སོགས་པའོ། །ལས་ལ་སྦྱོར་བ་ནི་སྲུང་བ་དང་སྤྱན་དྲང་བ་ལ་སོགས་པའོ། །སླར་བསྡུ་བ་ནི་མཆོད་པ་དང་བསྟོད་པ་བྱ་བ་ལ་སོགས་པ་སྔོན་དུ་འགྲོ་བས་གཤེགས་སུ་གསོལ་བའོ། །གསང་བ་དང་གསང་ཆེན་ཉིད་ཡེ་ཤེས་ཡིན་ལ་དེ་ཉིད་ནི་རྣམ་པ་གསུམ་སྟེ། བླ་ན་མེད་པའི་འབྲས་བུ་བསྐྱེད་པས་ན་སྙིང་པོ་སྟེ་དེ་ཉིད་བསྟན་པར་བྱ་བའི་ཕྱིར། རྣལ་འབྱོར་ཅེས་བྱ་བ་ལ་སོགས་པ་གསུངས་ཏེ་རྣལ་འབྱོར་ནི་བྱིན་གྱིས་བརླབ་པ་ལ་སོགས་པའི་བདག་ཉིད་ཅན་རྣམ་པ་གསུམ་མོ།། དེ་བས་ན་གང་གིས་སྤྱོར་བ་དེ་ནི་ལྷག་པའི་རྣལ་འབྱོར་ཏེ་སྤྱན་ལ་སོགས་པའི་ལྷ་མོའི་ཁྱད་པར་རོ། །དེ་དག་ནི་སྙོམས་པར་འཇུག་པའི་བདག་ཉིད་ཅན་གྱི་རྣལ་འབྱོར་ནི་རྣལ་འབྱོར་ཆེན་པོའོ། །ཡང་ན་ལྷག་པའི་རྣལ་འབྱོར་དང་རྣལ་འབྱོར་ཆེན་པོ་འདིའི་ནང་དུ་ཆུད་པ་སྔོན་དུ་འགྲོ་བའི་དཀྱིལ་འཁོར་ལྷ་རྣམས་ཀྱི་ང་རྒྱལ་ཏེ་འདི་དག་ནི་གོ་རིམས་བཞིན་དུ་སེམས་ཅན་རྣམས་ལ་བཤད་པར་བྱའོ། །བཤད་པ་འདི་ནི་ལེགས་བྲིས་ལས། །བདག་གིས་དགེ་བ་གང་བསགས་པ། །དེས་ནི་རབ་ཞི་བཤེས་གཉེན་བཅས། །འཇིག་རྟེན་རྡོ་རྗེ་འཛིན་པར་ཤོག །རྒྱུད་ཀྱི་རྒྱལ་པོ་སྒྱུ་འཕྲུལ་དྲ་བའི་དཀའ་འགྲེལ་སློབ་དཔོན་རབ་ཏུ་ཞི་བའི་བཤེས་གཉེན་གྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་ཤྲདྡྷ་ཀ་ར་ཝ་རྨ་དང་ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།