དཔལ་རྡོ་རྗེ་སྙིང་པོའི་རྒྱན་གྱི་རྒྱུད་ཆེན་པོའི་དཀའ་འགྲེལ།
རབ་ཏུ་ཞི་བའི་བཤེས་གཉེན།
རྒྱ་གར་སྐད་དུ། ཤྲཱི་བཛྲ་མཎྜལཾ་ཀཱ་རེ་མ་ཧཱ་ཏ་ནྟྲ་པཉྩི་ཀཱ། བོད་སྐད་དུ། དཔལ་རྡོ་རྗེ་སྙིང་པོའི་རྒྱན་གྱི་རྒྱུད་ཆེན་པོའི་དཀའ་འགྲེལ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །མཐའ་ཡས་ཁམས་གསུམ་རབ་ཏུ་གཡེངས་ལ་བརྩེ་བ་དམ་པ་རྣམ་པར་དག་པའི་བློ། །འགྲོ་བའི་
ཉམ་ཐག་སེལ་ཅིང་རབ་ཏུ་འདོད་པའི་བདེ་བ་ལྡན་པར་སྒྲུབ་ལ་བརྩོན། །ཁྱབ་བདག་རྣམས་སངས་རྒྱས་ལ་རྟག་པར་རབ་ཏུ་ཕྱག་བགྱི་བདག་གི་བློ་གྲོས་འད་། མུན་པ་ལྟ་བུས་བརྩོན་པས་རྒྱུད་ཀྱི་དོན་ཆེན་སོ་སོར་དབྱེ་བར་ག་ལ་ནུས། །འོན་ཀྱང་སྤྱོད་ཡུལ་མ་ཡིན་ཡང༌། །རྣམ་པར་བརྩོན་པར་བྱེད་པ་ནི། སྐྱེ་བོས་བཞད་གད་ཆེད་དུ་དང༌། བརྩེ་བས་གཞན་གྱི་དོན་དུའོ། །རྡོ་རྗེ་སྙིང་པོའི་རྒྱན་ཞེས་བྱ་བའི་དོན་གྱི་མིང་ཅན་འདི་ནི་རྒྱུད་དོ། །འདི་ལྟར་རྡོ་རྗེ་སྙིང་པོ་ནི་བྱང་ཆུབ་ཀྱི་སྙིང་པོ་སྟེ་སངས་རྒྱས་ཐམས་ཅད་ཀྱི་གནས་སོ། །དེའི་རྒྱན་ནི་བླ་ན་མེད་པའི་ཁང་པ་བརྩེགས་པ་གང་ཡིན་པ་དེ་དེ་བཞིན་དུ་བརྗོད་པར་བྱའོ། །ཡང་ན་རྡོ་རྗེ་ནི་ཆོས་ཀྱི་སྐུའི་བདག་ཉིད་ཅན་ཏེ། དབྱེ་བར་བྱར་མེད་པ་ཉིད་ཀྱི་ཕྱིར་རོ། །སྙིང་པོ་ནི་ལོངས་སྤྱོད་རྫོགས་པའི་སྐུའི་རང་བཞིན་ཏེ་ཐམས་ཅད་ཀྱི་སྙིང་པོར་གྱུར་བ་ཉིད་ཀྱི་ཕྱིར་དང༌། སེམས་ཅན་གྱི་དོན་རྫོགས་པའི་སྙིང་རྗེའི་ཕྱིར་ཡང་ངོ༌། །སྣ་ཚོགས་པའི་སྤྲུལ་བ་ནི་རྒྱན་ཏེ་བཅོམ་ལྡན་འདས་རྣམ་པར་སྣང་མཛད་དོ། །ཡང་ན་རྡོ་རྗེ་ནི་དབྱེ་བར་བྱར་མེད་པ་སྟེ་ཁང་པ་བརྩེགས་པའོ། །དེའི་སྙིང་པོ་ནི་འཛིན་པའི་ཕྱིར་རྡོ་རྗེ་སྟེ་བྱང་ཆུབ་ཀྱི་གདན་ནོ། །དེ་ལྷག་པར་གནས་པར་རྒྱས་པར་བྱེད་པའི་ཕྱིར་རོ། །དེ་ཉིད་དཀྱིལ་འཁོར་དང་ཕྱག་རྒྱ་ལ་སོགས་པའི་ངོ་བོ་མ་ལུས་པ་སྟེ། དེའི་རྗོད་པར་བྱེད་པ་པོ་རྒྱུད་ལ་ཡང་དེའི་མིང་ཐོབ་པར་འགྱུར་ཏེ་སངས་རྒྱས་ཀྱི་སྤྱོད་པ་བཞིན་ནོ། །དེའི་ཕྱིར་ཡང་བཅོམ་ལྡན་འདས་དེ་འདིའི་མངོན་པར་རྗོད་པར་བྱེད་པར་གྱུར་པའོ་ཞེས་རྗོད་བྱེད་དང་བརྗོད་བྱའི་མཚན་ཉིད་ཀྱི་འབྲེལ་པའོ། །དགོས་པ་ཡང་དེ་སྐྱེ་བོའི་བྱེ་བྲག་ཏུ་རིག་པར་བྱས་པས་དེ་དང་དེ་ཐོས་ནས་ཐོས་པ་ལ་སོགས་པའི་རིམ་གྱིས་བླ་ན་མེད་པའི་བྱང་ཆུབ་ཀྱི་མཚན་ཉིད་མཐུན་པའི་འབྲས་བུའོ་ཞེས་རྟོགས་པར་བྱའོ། །འདིར་ཡང་ཡང་དག་པར་བསྡུ་བར་བྱ་བའི་དོན་དུ་ཕྱག་ན་རྡོ་རྗེས་ཇི་ལྟར་ཐོས་པ་བསྟན་པའི་ཕྱིར་ཐོག་མར་འདི་སྐད་བདག་གིས་ཞེས་བྱ་བ་ལ་སོགས་པ་གསུངས་པ། འདི་སྐད་ཅེས་བྱ་བ་ནི་རྒྱུད་ཀྱི་དོན་མཆོག་ཏུ་སྟོན་པའི་ཚིག་ཕྲད་དོ། །བདག་གིས་ཞེས་བྱ་བ་ནི་དངོས་ལ་སྟེ་གཞན་ལས་ཐོས་པ་དང་རྟོགས་པ་མ་ཡིན་པའོ། །དུས་གཅིག་ན་ཞེས་པ་འདིས་གཞན་གྱི་ཚེ་གཞན་ཐོས་ཞེས་ཐོས་པ་མང་པར་འདོན་པར་བྱེད་དོ། །དེ་ཡང་རྣ་བས་དེ་དང་དེའི་རྣམ་པ་ཐོས་ཤིང་སོ་སོར་རྟོགས་པའི་དོན་ནོ་
ཞེས་རིག་པར་བྱའོ། །གང་ལས་གང་དུ་ཐོས་ཞེས་གླེང་གཞི་ངེས་པར་བསྟན་པའི་ཕྱིར་གསུངས་པ་བཅོམ་ལྡན་འདས་ཞེས་བྱ་བ་ལ་སོགས་པའོ། །རྡོ་རྗེ་ལ་སོགས་པ་རྣམས་ཀྱིས་བྱིན་གྱིས་བརླབས་པ་དེ་དམ་ཚིག་གི་ཡེ་ཤེས་ཏེ་རྒྱུར་གྱུར་བའི་ཡེ་ཤེས་སོ། །ཇི་ལྟར་མེ་ལོང་འདི་ཡེ་ཤེས་རང་དངོས་དང་བརྒྱུད་པས་དེའི་གདུལ་བྱའི་དབྱེ་པ་ལས་ལྷའི་དཀྱིལ་འཁོར་དང་ཕྱག་རྒྱ་ལ་སོགས་པར་བྱས་པ་ནི་རྣམ་པ་སྣ་ཚོགས་པའི་ཁྱད་པར་རོ། །དེས་ཡང་དག་པར་ལྡན་པར་གྱུར་བ་ནི་རྗེས་སུ་སོན་པའོ། །གང་ལས་ཤེ་ན་གང་གི་ཕྱིར་མཉམ་པ་ཉིད་ཀྱི་ཡེ་ཤེས་ཀྱི་བྱིན་གྱིས་བརླབས་པས་རིན་པོ་ཆེའི་ཅོད་པན་གྱིས་ཁམས་གསུམ་གྱི་རྒྱལ་པོར་དབང་བསྐུར་པ་ཐོབ་པའོ། །དེ་བཞིན་དུ་ཡང་ཅིའི་ཕྱིར་ཞེ་ན་གསུངས་པ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་དམ་ཚིག་ཅེས་བྱ་བ་ལ་སོགས་པ་སྟེ། དེ་བཞིན་གཤེགས་པ་རྣམ་པ་ཐམས་ཅད་ཡང་དག་པར་འབྲེལ་བ་དེ་ལས་འགོད་པར་བྱ་བ་མ་ཡིན་པ་ཉིད་ཀྱི་ཕྱིར་རོ། །ཡེ་ཤེས་ནི་སོ་སོར་རྟོག་པའི་བདག་ཉིད་ཅན་ནོ། །དེའི་དོན་ནི་རྣལ་འབྱོར་ཆེན་པོའོ། །ཇི་སྙེད་ཡོད་པ་དེ་དང་ཇི་ལྟར་བརྗོད་པ་དེ་རྣམས་ཀྱི་དབང་ཕྱུག་སྟེ་མངའ་བདག་གོ །དོན་དམ་པའི་རྣལ་འབྱོར་དུ་བྱ་བ་ཉིད་དུ་བལྟ་བར་བྱའོ་ཞེས་དོན་དམ་པ་ངེས་པར་བསྟན་པར་གསུངས་པ། དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པའོ། །ཅིའི་ཕྱིར་གཞན་གྱི་དོན་ཁོ་ནར་མཛད་ཅེ་ན་གསུངས་པ། ཐུགས་རྗེ་ཆེན་པོ་ཞེས་པ་རྣམ་པར་སྣང་མཛད་ཆེན་པོ་ནི་དྲི་མི་མ་ལུས་བ་དང་བྲལ་བའི་ཕྱིར་རོ། །རྟག་པ་ནི་མི་གནས་པའི་མྱ་ངན་ལས་འདས་པའི་ཚུལ་ལས་སོ། །དུས་གསུམ་དུ་བཞུགས་པ་ནི་སྐད་ཅིག་རྟག་པ་ཉིད་ཀྱི་ཕྱིར་རོ། །པ་རོལ་གྱིས་ཀྱང་དབྱེ་བར་བྱ་བ་མ་ཡིན་པ་ཉིད་ཀྱི་ཕྱིར་སྐུ་དང་གསུང་དང་ཐུགས་རྡོ་རྗེའོ། །གདུལ་བར་བྱ་བའི་རྗེས་སུ་མཐུན་པར་དེ་བཞིན་ཉིད་དུ་གནས་པར་གྱུར་པ་དེ་བཞིན་གཤེགས་པ་སྟེ་དེ་བཞིན་དུ་ཡང་དེའི་རྒྱུ་ཅན་གྱི་ཕྱག་རྒྱ་ཆེན་པོ་ལ་སོགས་པ་བཞི་པོ་བསྟན་ཏོ། །དེ་བཞིན་དུ་སྟོན་པ་པོའི་ཡོན་ཏན་དུ་བརྗོད་པའི་གནས་ཕུན་སུམ་ཚོགས་པ་གང་ཡིན་པ་ངེས་པར་བསྟན་པ་གསུངས་པ་དེ་བཞིན་གཤེགས་པ་ཐམས་ཅད་ཀྱི་རྟེན་ཅིང་ཞེས་བྱ་བ་ལ་སོགས་པའོ། །འཁོར་ཕུན་སུམ་ཚོགས་པ་ཡང་སངས་རྒྱས་ཀྱི་ཞིང་ཞེས་བྱ་བ་ལ་སོགས་པས་སྟོན་པར་བྱེད་དོ། །ཡོངས་སུ་བསྐོར་ཅིང་ནི་མངའ་བདག་ཏུ་བྱས་པའོ། །མདུན་དུ་བདར་ཏེ་ནི་ཐོག་མར་གཞག་པའོ། །ཐོག་མ་དང་
བར་དང་ཐ་མ་ནི་ཐོས་པ་དང༌། བསམ་པ་དང༌། སྒོམ་པར་བྱེད་པའི་གནས་སྐབས་སོ། །དེ་རྣམས་སུ་དགེ་བ་ནི་ཕན་པ་ལ་གནས་པའོ། །དོན་བཟང་པོ་ནི་བྱང་ཆུབ་ཀྱི་ཐབས་ཀྱི་དོན་ཉིད་ཀྱི་ཕྱིར་རོ། །ཚིག་འབྲུ་བཟང་པོ་ནི་སྒྲའི་ཡོན་ཏན་ཕུན་སུམ་ཚོགས་པའོ། །མ་འདྲེས་པ་ནི་གང་ཟག་ལ་བདག་མེད་པར་སྟོན་པའི་ཕྱིར་རོ། །ཡོངས་སུ་རྫོགས་པ་ནི་བླ་ན་ཡོད་པ་དང་བླ་ན་མེད་པའི་འབྲས་བུ་ཐོབ་པ་པོ་ཉིད་ཀྱི་ཕྱིར་རོ། །ཆོས་ཐམས་ཅད་བདག་མེད་པ་གསལ་བར་བྱེད་པ་ཉིད་ཀྱི་ཕྱིར་ཡོངས་སུ་དག་པའོ། །ཐེ་ཚོམ་གྱི་ཉེས་པ་ཐམས་ཅད་སེལ་བའི་རྒྱུ་ཉིད་ཀྱི་ཕྱིར་ཡོངས་སུ་བྱང་བའོ། །ཆོས་ཐམས་ཅད་ཀྱི་ཚུལ་ནི་ཐེག་པ་ཐམས་ཅད་ཅེས་པའོ། །དེ་རྣམས་ཀྱི་ཐོབ་པར་བྱ་བ་རྣམ་པར་དག་པ་ནི། སྒྲིབ་པ་ཐམས་ཅད་རབ་ཏུ་བཅོམ་པའི་མཚན་ཉིད་དོ། །དེའི་སྒོ་ནི་ཐབས་ཏེ་སྟོན་པར་བྱེད་དོ་ནི་གསུང་བར་བྱེད་པའོ། །གང་གསུངས་བ་རྣམ་པ་སྣ་ཚོགས་པའི་ཁྱད་པར་ཡང་དག་པར་ལྡན་པར་གྱུར་བ་ཞེས་སོ། །དེ་ལ་ཆོས་ཀྱི་དབྱིངས་ཀྱི་དཀྱིལ་འཁོར་གྱི་སྒོ་ནས་ཁྱད་བར་གང་ཡིན་པ་གསུངས་པ། དེ་ནས་བཅོམ་ལྡན་འདས་ཞེས་པ་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ཞེས་པ་ལ་སོགས་པས་མེ་ལོང་ལྟ་བུ་ལ་སོགས་པའི་ཡེ་ཤེས་ལྔའི་རང་བཞིན་བསྟན་ཏོ། །ཇི་སྐད་ལྷའི་གཙོ་བོའི་སྒོ་དཔག་མེད་དོ། །སྤྲུལ་བའི་སྐུ་ནི་ཆོས་ཀྱི་རྡོ་རྗེ་མ་ཉེད་ལས་སོ། །ལས་མཉམ་པ་ཉིད་ཀྱི་སྐུ་ནི་གདོན་མི་ཟ་བའི་རྒྱལ་བ་རྒྱལ་བའི་གཙུག་ཏོར་ཉིད་ལས་སོ། །མི་ཤེས་ཅན་ནི་གཟི་བརྗིད་ཕུང་པོ་ཉིད་ལས་སོ། །ཆེན་པོ་ནི་རྣམ་པར་འཕྲོ་བ་ཉིད་ལས་སོ། །ཁྱབ་བདག་ནི་རྣམ་པར་རྒྱལ་བའི་གཙུག་ཏོར་ཉིད་ལས་སོ། །དེ་ལྟ་བུའི་ངོ་བོ་ཅི་ཞེ་ན་གསུངས་པ་རྣམ་པར་སྣད་མཛད་ཅེས་པ་སྟེ་རྣམ་པར་སྣང་པ་ཁོ་ན་རྣམ་པར་སྣང་མཛད་དེ། དྲི་མ་མེད་པ་ཉིད་ལས་གསལ་བར་བྱེད་དོ་ཞེས་པའི་དོན་ནོ། །བཅོམ་ལྡན་འདས་ནི་དབང་ཕྱུག་ཆེན་པོར་གནས་པ་ཉིད་ལས་སོ། །ནམ་མཁའི་ཁམས་ཐམས་ཅད་དུ་མཉམ་པར་གནས་པའི་སྐུ་ལ་སོགས་པའི་རྡོ་རྗེ་ནི་ཁྱབ་ཅིང་དབྱེ་བ་མེད་པའི་སྐུ་ཉིད་ཀྱི་ཕྱིར་རོ། །རྡོ་རྗེ་སེམས་དཔའ་དང་རིན་ཆེན་ལ་སོགས་པ་འཁོར་ལོས་སྒྱུར་པས་ཇི་ལྟར་རང་གི་དཀྱིལ་འཁོར་དུ་འདུས་བ་བསྐྱེད་པའི་རིམ་པ་དང་རང་བཞིན་གྱི་ལས་འདི་གཉིས་གསུངས་པ། དེ་བཞིན་གཤེགས་པ་ཐམས་ཅད་ཅས་པ་ལ་སོགས་པ་སྟེ་དེ་བཞིན་གཤེགས་པ་ཐམས་ཅད་ནི་དེ་བཞིན་གཤེགས་པ་ཐམས་ཅད་ཀྱི་འོད་ཟེར་རོ། །དེ་ཉིད་ཡང་དག་པར་འདུ་བར་
བྱེད་པ་ནི་རྒྱུ་སྟེ་རྡོ་རྗེ་སེམས་དཔའ་གང་ཡིན་པ་དེ་དེ་བཞིན་དུ་བརྗོད་དོ། །བཅོམ་ལྡན་འདས་རྣམ་པར་སྣང་མཛད་ཀྱིས་རང་གི་ཐུགས་ཀའི་རྡོ་རྗེ་ཕྱག་ཏུ་བཞག་ནས་དེ་ལ་དེ་བཞིན་གཤེགས་པ་ཐམས་ཅད་ཀྱི་འོད་ཟེར་འཕྲོ་བར་བྱེད་པའོ། །ཡང་དག་པར་བསྡུས་ནས་རབ་ཏུ་ཞུགས་པས་རྡོ་རྗེ་སེམས་དཔར་ཡོངས་སུ་གྱུར་པར་བྱེད་དོ། །དེ་ལས་ཕྱུང་ནས་རང་གི་གནས་སུ་ཀུན་དུ་གནས་སོ་ཞེས་པའི་ཇི་སྲིད་པར་ཏེ་དེའི་ངོ་བོ་ཕྱུང་ནས་སོ། །གང་རྡོ་རྗེའི་དབྱིབས་སམ་ཐམས་ཅད་ཁོང་དུ་ཆུད་པར་བྱེད་པ་སེམས་ཅན་ཐམས་ཅད་བྱང་ཆུབ་ཀྱི་སེམས་བསྐྱེད་བྱེད་པའམ་རྣམ་པར་སྣང་མཛད་ཐོབ་པར་བྱེད་པའོ། །དེའི་དོན་ནི་ཡེ་ཤེས་སེམས་དཔའ་སྟེ་འདིས་ཀྱང་རྟོགས་པར་བྱེད་པའི་ལས་ཀྱི་ཕྱིར་རང་ཡེ་ཤེས་སེམས་དཔའི་རང་བཞིན་ཉིད་དུ་བསྟན་ནོ། །ནམ་མཁའི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་མོ་ཡང་དག་པར་འདུ་བར་བྱེད་པའི་རྡོ་རྗེ་ནི་རྡོ་རྗེ་སེམས་དཔའ་ཇི་ལྟ་བ་བཞིན་དུ་བརྗོད་དོ། །བསྐྱེད་པར་བྱས་པ་དང་སྤྲོ་བར་བྱེད་པའི་རིམ་པ་དེ་ཉིད་ཀྱང་བྱིན་གྱིས་བརླབས་ཏེ་དེའི་ཡེ་ཤེས་ཀྱི་རང་བཞིན་གྱི་སྙིང་པོ་ནི་རྡོ་རྗེ་རིན་ཆེན་ནོ། །དེ་ཉིད་དེ་ལྟ་བུའི་རིམ་པས་རྫོགས་པའི་རྡོ་རྗེ་སེམས་དཔའ་རྣམ་པར་སྣང་མཛད་ཀྱི་ཐུགས་ཀ་ནས་ངེས་པར་བྱུང་སྟེ་སྤྲོས་ནས་རྡོ་རྗེ་རིན་ཆེན་གྱི་གཟུགས་ཀྱི་དུན་དུ་གནས་སོ་ཞེས་པ་བསྐྱེད་པའི་པའི་རིམ་པ་ཡེ་ཤེས་སེམས་དཔའི་རང་བཞིན་ཉིད་དུའང་བསྟན་ནོ་ཞེས་པའོ། །རྡོ་རྗེ་རིན་ཆེན་ཆེན་པོའི་མངོན་པར་དབང་བསྐུར་བའི་དམ་ཚིག་ནི་རྒྱུ་སྟེ། རྡོ་རྗེ་རིན་ཆེན་ཆེན་པོའི་དབང་བསྐུར་བའི་དམ་ཚིག་འདིས་ཀྱང་དེ་བཞིན་གཤེགས་པ་ཐམས་ཅད་མངོན་པར་དབང་བསྐུར་བའི་བདག་ཉིད་ཅན་གྱི་ལས་སུ་བསྟན་ཏོ། །དེ་བཞིན་གཤེགས་པའི་ཡེ་ཤེས་དེ་བཞིན་གཤེགས་པའི་ཕྱག་ན་གནས་པའི་རྡོ་རྗེ་དེའི་ཟེར་རྣམས་ཀྱིས་ཀྱང་ནམ་མཁར་ཐམས་ཅད་འཕྲོ་བར་བྱེད་པ་དེའི་མངོན་པར་བྱང་ཆུབ་པ་རྡོ་རྗེ་སེམས་དཔའ་གང་ཡིན་པ་དེ་དེ་བཞིན་དུ་གསུངས་སོ། །དེའི་ཕྱིར་མངོན་པར་བྱང་ཆུབ་པར་གྱུར་པ་ནི་མངོན་པར་བྱང་ཆུབ་པ་ཐོབ་པའི་རྡོ་རྗེ་ཆོས་སོ། །དེ་བཞིན་དུ་བསྐྱེད་པའི་རིམ་པར་བསྟན་ནོ། །དེ་བཞིན་གཤེགས་པ་ཐམས་ཅད་ཀྱི་ལུས་རྣམ་པར་དག་པ་ཁོ་ན་ལུས་རྣམ་པར་དག་པ་ཉིད་དེ་སྒྲིབ་པ་ཐམས་ཅད་དང་བྲལ་བའོ། །དེ་ཡིས་ནི་རྒྱུར་གྱུར་པ་ཡིས་སོ། །ཆོས་ཐམས་ཅད་རང་བཞིན་གྱིས་དག་པ་ནི། རྒྱུ་གང་གིས་ན་དེ་བཞིན་གཤེགས་པ་ཐམས་ཅད་ཀྱི་ལུས་རྣམ་པར་དག་པའི་ཆོས་དེའི་ཕྱིར་ཡང་ཆོས་ཐམས་ཅད་རང་བཞིན་གྱིས་དག་གོ་ཞེས་པ་ཇི་སྲིད་པའོ། །དེ་ཁོ་ན་རྡོ་རྗེ་སེམས་དཔའོ་
ནམ་མཁའ་ཐམས་ཅད་ལ་ཁྱབ་པ་པོ་གཟུགས་ཐམས་ཅད་ཀུན་དུ་སྟོན་པའི་ཡེ་ཤེས་ཀྱི་རང་བཞིན་ནོ། །དེའི་ཕྱིར་མ་ལུས་པ་ནི་འཇིག་རྟེན་གྱི་ཁམས་དང༌། ལུས་པ་མེད་པ་ནི་སེམས་ཅན་གྱི་ཁམས་སོ། །འདུལ་བའི་སྤྱོད་པ་མཆོག་དང་ལྡན་པ་ནི་རྡོ་རྗེ་ལས་ཏེ་འདིས་བསྐྱེད་པའི་རིམ་པ་བསྟན་ནོ། །དེ་བཞིན་གཤེགས་པ་ཐམས་ཅད་ཀྱི་བཀའ་ལུང་གདོན་མི་ཟ་བར་བྱེད་པ་དེ་རྣམས་སེམས་ཅན་ཐམས་ཅད་ལ་མཉམ་པ་ཉིད་དུ་བླ་ན་མེད་པའི་ལས་སྣ་ཚོགས་པ་གང་ཡིན་པ་དེ་དེ་བཞིན་དུ་བརྗོད་དོ། །རྒྱུ་གང་གིས་དེ་བཞིན་གཤེགས་པ་ཐམས་ཅད་ཀྱི་བཀའ་ལུང་གདོན་མི་ཟ་བར་བྱེད་པའི་རང་བཞིན་དེས་སེམས་ཅན་ཐམས་ཅད་ལ་མཉམ་པ་ཉེད་བླ་ན་མེད་པའི་ལས་སྣ་ཚོགས་པའི་དོན་ནོ། །རྡོ་རྗེ་སྙིང་པོར་བརྗོད་པའི་འཁོར་ལོ་འདི་གཉིས་ཇི་ལྟར་གཙོ་བོ་ཉིད་ཀྱི་ཁྱད་པར་གང་ཡིན་པ་གསུངས་པ་རྣམ་པར་སྣང་མཛད་ཅེས་བྱ་བ་ལ་སོགས་པ་སྟེ། གང་གི་ཕྱིར་མི་འགྱུར་བ་ཡིན་པ་དེའི་ཕྱིར་མི་བསྐྱོད་པའོ། །གང་གི་ཕྱིར་རབ་ཏུ་སྣང་བར་བྱེད་པ་དེའི་ཕྱིར་རིན་ཆེན་ཏོག་གོ །གང་གི་ཕྱིར་དགྲ་ལས་རྒྱལ་བའི་མགོན་པོ་ཡིན་པ་དེའི་ཕྱིར་འོད་དཔག་མེད་དེ་གཞན་དུ་དེ་ཡང་དཔག་ཏུ་མེད་པའི་འོད་དོ། །གང་གི་ཕྱིར་ལས་ཐམས་ཅད་བྱེད་བ་དེའི་ཕྱིར་དོན་ཡོད་དོ། །དབང་ཆེན་ལ་སོགས་པའི་དཀྱིལ་འཁོར་གྱི་སྒོ་ནས་གསུངས་བ་དེ་བཞིན་གཤེགས་པ་ཐམས་ཅད་ཀྱི་མེ་ལོང་ཞེས་བྱ་བ་ལ་སོགས་པ་སྟེ། མེ་ལོང་ཡེ་ཤེས་ཀྱི་བདག་ཉིད་ཅན་དབང་ཆེན་གྱི་དཀྱིལ་འཁོར་གྱི་རང་བཞིན་ཉིད་ཀྱི་ཕྱིར་དེ་བཞིན་གཤགས་པ་ཐམས་ཅད་ཀྱི་མེ་ལོང་ཡེ་ཤེས་ཀྱི་དཀྱིལ་འཁོར་རོ། །མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་མེ་ལྷའི་དཀྱིལ་འཁོར་གྱི་ངོ་བོ་ཉིད་ཀྱི་ཕྱིར། དེ་བཞིན་གཤེགས་པ་ཐམས་ཅད་ཀྱི་མཉམ་པ་ཉིད་ཀྱི་ཤེས་རབ་ལ་རབ་ཏུ་གནས་པའོ། །སོ་སོར་རྟོག་པའི་ཡེ་ཤེས་ཀྱི་རང་བཞིན་ཆུ་ལྷའི་དཀྱིལ་འཁོར་གྱི་བདག་ཉིད་ཅན་ཉིད་ཀྱི་ཕྱིར་དེ་བཞིན་གཤེགས་པ་ཐམས་ཅད་ཀྱི་སོ་སོར་རྟོག་པའི་ཡེ་ཤེས་ཀྱི་གནས་དང་གཉིས་སུ་མེད་པ་བརྙེས་པའོ། །བྱ་བ་རྗེས་སུ་སྒྲུབ་པའི་ཡེ་ཤེས་ཀྱི་རང་བཞིན་རླུང་ལྷའི་དཀྱིལ་འཁོར་གྱི་རང་བཞིན་གྱི་ཕྱིར་དེ་བཞིན་གཤེགས་པ་ཐམས་ཅད་ཀྱི་བྱ་བ་རྗེས་སུ་སྒྲུབ་པའི་ཡེ་ཤེས་ཡང་དག་པར་རྗེས་སུ་ཐོབ་པའོ། །གཙུག་ཏོར་གྱི་དཀྱིལ་འཁོར་གྱི་རང་བཞིན་ཉིད་ཀྱི་ཕྱིར་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་དབྱིངས་རྣམ་པར་དག་པའོ། །ཁྲོ་བའི་འཁོར་ལོའི་བདག་ཉིད་ཅན་ཉིད་ཀྱི་ཕྱིར་ཆོས་ཐམས་ཅད་མཉམ་པ་ཉིད་ཀྱི་ཡེ་ཤེས་ཀྱི་སྤྱོད་ཡུལ་ལོ། །བྱང་ཆུབ་སེམས་དཔའི་དཀྱིལ་འཁོར་གྱི་ངོ་བོ་ཉིད་ཀྱི་ཕྱིར། དེ་བཞིན་གཤེགས་པ་ཐམས་ཅད་ཀྱི་
གཉིས་སུ་མེད་པའི་མཉམ་པ་ཉིད་ལ་དམིགས་པའི་ཡེ་ཤེས་ཡོངས་སུ་དག་པ་མཐར་ཕྱིན་པའོ། །གཟུགས་ཀྱི་དཀྱིལ་འཁོར་གྱི་བདག་ཉིད་ཅན་གྱི་ཕྱིར་སྟོང་པ་ཉིད་དང་དེ་བཞིན་ཉིད་ནས་སངས་རྒྱས་ཐམས་ཅད་ཀྱི་ཡུལ་ཞེས་པ་ཇི་སྲིད་པའོ། །དེ་ལྟར་བཅོམ་ལྡན་འདས་ཐམས་ཅད་དུ་གཞན་གྱི་དོན་ཁོ་ནར་གནས་སོ་ཞེས་སྟོན་པས་གསུངས་པ། སངས་རྒྱས་ཐམས་ཅད་མཉམ་པ་ཉིད། །ཅེས་བྱ་བ་ལ་སོགས་པ་སྟེ་སངས་རྒྱས་རྣམས་ཀྱི་མཉམ་པ་ཉིད་སྟོང་པ་ཉིད་ལྷག་པར་གནས་པ་དམིགས་པ་མངོན་དུ་བྱས་ནས་སོ། །རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོ་ཉིད་ལ་བྱིན་གྱིས་བརླབས་ནས་ཞེས་པ་ནི་རང་གི་ཤེས་རབ་འཇམ་དཔལ་ཉིད་དུ་མངོན་པར་རྫོགས་ནས་སོ། །འདི་ཉིད་ཐབས་བདེ་བས་རྩ་བའི་རྒྱུད་ཀྱིས་བསྡུ་བར་བྱ་བ་ནི་ཤེས་རབ་ཀྱི་སྒོ་ནས་ཉེ་བར་བསྟན་པ་གསུངས་པ། དེ་ནས་ཡང་ཞེས་བྱ་བ་ལ་སོགས་པ་སྟེ། བཅོམ་ལྡན་འདས་ཞེས་པ་ནི་རྣམ་པར་སྣང་མཛད་དོ། །དེ་བཞིན་གཤེགས་པ་ཐམས་ཅད་ནི་སངས་རྒྱས་དང་རྡོ་རྗེ་འཛིན་པ་ལ་སོགས་པ་རྣམས་སོ། །དེ་རྣམས་ཀྱི་བསྡུ་བའི་སྙིང་པོ་བུདྡྷ་དང༌། བཛྲ་ས་མཱ་ཛའི་སྒྲ་དག་གིས་དེ་བཞིན་གཤེགས་པ་ལ་བསྡུས་ཤིང་བཅུག་པའོ། །རྒྱུད་རབ་འབྱམས་རྒྱ་མཚོའི་སྤྲིན་གྱི་སྒྲས་འཇིག་རྟེན་གྱི་ཁམས་ཤར་ལ་སོགས་པའི་ཕྱོགས་སུ་ཀུན་དུ་གནས་པའི་དབྱེ་བས་ལྷག་པའི་གྲངས་རབ་འབྱམས་སུ་བརྗོད་པའི་རིམ་པའི་མཐར་ཐུག་པ་ནི་རྒྱུད་གཉིས་པ་ཞེས་བྱ་བ་ལ་སོགས་པར་བལྟ་བར་བྱའོ། །ཡང་དག་པར་སྦྱོར་ནས་ནི་འདྲེས་པར་གྱུར་ནས་སོ། །རྡོ་རྗེའི་བློའི་ཡེ་ཤེས་ནི་བླ་ན་མེད་པའི་ཤེས་རབ་ཡེ་ཤེས་སོ། །ཡོངས་སུ་བསྐྱེད་དེ་ནི་མངོན་དུ་བྱ་སྟེའོ། །གནས་རྣམས་ཐམས་ཅད་དུ་ནི་དེ་བཞིན་གཤེགས་པ་ཐམས་ཅད་ཀྱི་ཐུགས་དང་ཐུགས་ཀ་རྣམས་སུའོ། །བཅོམ་ལྡན་འདས་རང་གི་ཤེས་རབ་དེའི་གཟུགས་ཀྱིས་བྱིན་གྱིས་བརླབས་པ་གང་ཡིན་པ་དེའི་ཕྱིར་དེ་ཉིད་དུ་ཀུན་དུ་གནས་པའོ། །འཁོར་ལོས་སྒྱུར་བ་ཆེན་པོའི་སྙིང་པོ་ཞེས་པ་ནི་གཙུག་ཏོར་གྱི་སྙིང་པོ་ཡི་གེ་གཅིག་པའོ། །ཤེས་རབ་ཀྱི་ཕ་རོལ་ཏུ་ཕྱིན་པ་བྱིན་གྱིས་རློབ་པ་པོ་ཉིད་ཡིན་ལ་དེ་གཙོ་བོའི་ང་རྒྱལ་གྱི་སྡུད་པ་པོ་ཉིད་འདིའི་ལུས་ཀྱི་ཐུགས་ཀའི་དཔལ་བེའུའི་རྣམ་པ་ནི་ཐུགས་དཔལ་གྱི་བེའུ་ལའོ། །བདེ་བ་ཐམས་ཅད་ཀུན་དུ་སྟོན་པར་བྱེད་པ་ནི་ཐམས་ཅད་བདེ་བ་ཀུན་དུ་སྟོན་པར་བྱེད་པའོ། །ཆགས་པས་ཆགས་པ་རབ་ཏུ་སྤང་བའི་ཕྱིར་དེ་ལ་སྤྱོད་པའི་དབང་དུ་བྱས་ནས་རྣམ་པར་སྣང་མཛད་
ཆེན་པོའི་དཀྱིལ་འཁོར་ངེས་པར་རྟོགས་པར་བྱ་བའི་དོན་དུ་གསུངས་པ་ཤིན་ཏུ་དགའ་བ་རྣམ་པར་དག་པ་ཞེས་པ་ལ་སོགས་པ་སྟེ། ཤིན་ཏུ་དགའ་བ་ནི་དབང་པོ་གཉིས་སྙོམས་པར་ཞུགས་པ་ལས་སྐྱེས་པའི་བདེ་བ་ལས་བྱུང་བའོ། །དེའི་རྣམ་པར་དག་པ་ནི་བག་ཆགས་བསལ་བའོ། །དེའི་གནས་ནི་རྟེན་ཏེ་བྱེད་པ་པོའི་ཞེས་པའོ། །རེ་ཞིག་གང་ཞེ་ན་གསུངས་པ་འདི་ལྟ་སྟེ་ཞེས་བྱ་བ་ལ་སོགས་པའོ། །འདི་ཞེས་པ་བྱང་ཆུབ་ཀྱི་བདག་ཉིད་ཅན་གྱི་སེམས་དཔའ་གང་ཡིན་པ་འདི་རྣམ་པར་སྣང་མཛད་ཆེན་པོའི་གནས་ཏེ་ཕྱག་རྒྱ་ཆེན་པོ་ལ་སོགས་པའི་ཚུལ་ལོ། །དེའི་ཤིན་ཏུ་དགའ་བ་རྣམ་པར་དག་པའི་གནས་སོ། །དེ་བཞིན་དུ་ལྟ་བ་རྣམ་པར་དག་པ་ནི་མི་བསྐྱོད་པ་དང་སེམས་མ་རྡོ་རྗེ་མ་དང༌། རྡོ་རྗེ་སེམས་དཔའ་ལ་སོགས་པ་རྣམས་ཀྱིའོ། །དགའ་བ་རྣམ་པར་དག་པ་ནི་སྒེག་མོའིའོ། །སྲེད་པ་རྣམ་པར་དག་པ་ནི་ཕྲེང་བ་མའིའོ། །འདོད་ཆགས་རྣམ་པར་དག་པ་ནི་གླུ་མའིའོ། །ཞེ་སྡང་རྣམ་པར་དག་པ་ནི་གར་མའིའོ། །གཏི་མུག་རྣམ་པར་དག་པ་ནི་བདུག་པ་མའིའོ། །བསྙེམས་པ་རྣམ་པར་དག་པ་ནི་མེ་ཏོག་མའིའོ། །མཚན་ཉིད་མེད་པ་རྣམ་པར་དག་པ་ནི་སྣང་བ་མའིའོ། །ཡིད་སིམ་པ་རྣམ་པར་དག་པ་མི་དྲི་མའིའོ། །སྣང་བ་རྣམ་པར་དག་པ་ནི་ལྕགས་ཀྱུའིའོ། །ལུས་རྣམ་པར་དག་པ་ནི་ཞགས་པའིའོ། །ངག་རྣམ་པར་དག་པ་ནི་ལྕགས་སྒྲོག་གིའོ། །ཡིད་རྣམ་པར་དག་པ་ནི་འབེབས་པའིའོ། །གཟུགས་ལ་སོགས་པ་རྣམ་པར་དག་པ་ཡང་གཟུགས་ལ་སོགས་པ་རྣམ་པར་སྦྱར་བར་རིག་པར་བྱའོ། །རིམ་པ་ནི་འཛིན་པའི་མཐར་ཐུག་པ་དེ་སྲིད་དུ་ཤིན་ཏུ་དགའ་བའི་དོན་ནི་བདག་ཏུ་ལྟ་བས་ན་ཞེན་པའོ། །དེ་ནས་བདག་ལ་དགའོ། །དེ་ནས་དོན་ལ་སྲེད་དོ། །དེ་བས་འཁོར་ལ་ཆགས་སོ། །དེ་ནས་བདག་ལ་སོགས་པ་དང་འགལ་བ་ལ་ཞེ་སྡང་ངོ༌། །འདི་དག་ཀུན་མི་ཤེས་པའི་ཕྱིར་རྨོངས་སོ། །དགའ་བ་དང་སྲིད་པ་དང་ཆགས་པ་རྣམས་ཀྱིས་བསྙེམས་སོ། །ཞེ་སྡང་ལས་མི་ཁོམ་མོ། །རབ་ཏུ་བྱུང་བ་རྣམས་ཀྱི་ལུས་ལས་སྐྱེས་པ་ལ་སོགས་པའི་སྡུག་བསྔལ་རྣམ་པར་དབེན་པའི་ཕྱིར་ཡིད་ཚིམ་པའོ། །དེ་ནས་ཡེ་ཤེས་ཀྱི་སྣང་བའོ། །དེ་ནས་ཁྱད་པར་དུ་འཕགས་པའི་ལུས་དང༌། ངག་དང༌། ཡིད་ཀྱི་བདག་ཉིད་ཅན་དཔག་ཏུ་མེད་པའི་ཡུལ་རྣམས་ཀྱིས། འདོད་ཆགས་དང་བྲལ་བ་ཡང་རབ་ཏུ་འཇོམས་པར་བྱེད་དོ་ཞེས་བས་གཟུགས་ལ་སོགས་པ་རྣམས་སོ། །འདི་ཉིད་སོ་སོར་རྟོགས་པར་བྱ་བའི་
ཕྱིར་གསུངས་པ། དེ་ཅིའི་ཕྱིར་ཞེས་བྱ་བ་ལ་སོགས་པ་རྣམས་སོ། །རྣམ་པ་ཅིས་ཤེན་གསུངས་པ། ཆོས་ཐམས་ཅད་རང་བཞིན་གྱིས་ཏེ་སྟོང་པ་ཉིད་ཀྱིས་ཞེས་པའོ། །གལ་ཏེ་དེ་ལྟར་ན་ཐམས་ཅད་དངོས་པོ་མེད་པར་ཐལ་བར་འགྱུར་རོ་ཞེས་གསུངས་པ། ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཞེས་པ་དོན་དམ་པར་དེ་ལྟ་བུ་ཡིན་ལ་ཀུན་རྫོབ་ཏུ་ནི་འགལ་བར་བརྗོད་པའོ། །དེའི་ཕྱིར་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཉིད་བྱང་ཆུབ་སེམས་དཔའི་གནས་སོ། །ཆོས་ཐམས་ཅད་རྣམ་པར་དག་པ་བསྡུས་པ་ནི་ཤིན་ཏུ་དགའ་བ་ལ་སོགས་པ་རྣམ་པར་དག་པ་ཐོབ་པའོ། །སྒྲིབ་པ་ཐམས་ཅད་དང་ཆོད་པ་ལ་སོགས་པ་དེ་རྣམས་ཉེ་བར་བསགས་ཀྱང་རྣམ་པར་སྣང་མཛད་ཆེན་པོས་བྱིན་གྱིས་བརླབས་པ་ལས་ཏེ། ཆོད་པ་ནི་འདོད་པའི་འདུན་པ་ལ་སོགས་པ་རྣམས་སོ། །སྙོམ་པའི་སྒྲིབ་པ་ནི་འདོད་ཆགས་ལ་སོགས་པ་རྣམས་སོ། །ཆོས་ཀྱི་སྒྲིབ་པ་ནི་ཤེས་བྱའི་སྒྲིབ་པ་རྣམས་སོ། །ལས་ཀྱི་སྒྲིབ་པ་ནི་མཚམས་མེད་པའི་མཚན་ཉིད་ཏེ་དེ་རྣམས་ཉེ་བར་བསགས་པའོ། །རིམ་པ་བཞིན་དུ་མི་བསྐྱོད་པ་ལ་སོགས་པས་བྱིན་གྱིས་བརླབས་པས་དམྱལ་བ་ལ་སོགས་པའི་ངན་སོང་དུ་ལྷུང་བར་མི་འགྱུར་རོ། །བྱས་པ་ཙམ་ན་ཡང་སྡུག་བསྔལ་དེ་ཟད་པར་འགྱུར་རོ། །འཆང་བ་ལ་སོགས་པ་ནི་རབ་ཏུ་འཇུག་པའོ། །ཆོས་ཐམས་ཅད་མཉམ་པ་ཉིད་རྡོ་རྗེ་ཏིང་ངེ་འཛིན་སོ་སོར་ཐོབ་པ་ནི་ཆོས་ཐམས་ཅད་སྟོང་པ་ཉིད་དབྱེར་མེད་པའི་ཏིང་ངེ་འཛིན་བརྙེས་པའོ། །ཆོས་ཐམས་ཅད་ཀྱི་དབང་ཕྱུག་ནི་རྣམ་པར་སྣང་མཛད་ཆེན་པོར་འགྱུར་རོ། །དགའ་བ་ལ་སོགས་པ་ནི་བླ་ན་མེད་པ་ཞི་བ་དེའིའོ། །རང་དང་གཞན་དང་གཉིས་ཀའི་དོན་ལ་དམིགས་པའི་དབྱེ་བས་རྣམ་པ་གསུངས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྐྱེ་བ་བཅུ་དྲུག་རྣམས་ཀྱི་ནི་རྡོ་རྗེ་སེམས་དཔའ་ལ་སོགས་པའི་ཏིང་ངེ་འཛིན་བཅུ་དྲུག་ཐོབ་པ་རྣམས་ཀྱིས་སོ།། །།ཞི་བ་ལ་སྤྱོད་པའི་སེམས་ཅན་འདུལ་བའི་དོན་དུ་རྣམ་པར་སྣང་མཛད་ཀྱི་དཀྱིལ་འཁོར་གྱི་དོན་བསྟན་པ་གསུངས་པ། དེ་ནས་བཅོམ་ལྡན་འདས་རྣམ་པར་སྣང་མཛད་ཞེས་པ་ལ་སོགས་པ་སྟེ། དེ་ནས་ཀྱི་སྒྲ་ནི་བར་མ་
ཆད་པའོ། །ཞི་བའི་ཆོས་ཉིད་ནི་དེ་བཞིན་ཉིད་དོ། །དེའི་མངོན་པར་བྱང་ཆུབ་པ་ནི་དེ་བཞིན་གཤེགས་པ་ཡེ་ཤེས་མཐའ་ཡས་པའོ། །དེའི་མངོན་པར་བསྒྲུབ་པ་ནི་ཐོབ་པར་བྱེད་པའོ། །དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ལོ། །རྡོ་རྗེ་མཉམ་པ་ཉིད་ནི་འཛིན་པའི་རྣམ་པ་སྟོང་པ་ཉིད་ངོ། །དེའི་མངོན་པར་བྱང་ཆུབ་པ་ནི་རྟོགས་པའོ། །དེ་ཁོ་ན་བྱང་ཆུབ་ཆེན་པོ་སྟེ་རྣམ་པར་སྣང་མཛད་ཉིད་དོ། །ཅི་ལྟར་ཞེ་ན་གསུངས་པ་རྡོ་རྗེ་བསྟན་པས་ཞེས་ཏེ་དེའི་འཛིན་པ་སྟོང་པ་ཉིད་དུ་ལྷག་པར་རྟོག་པ་བསྟན་པ་ཉིད་ཀྱིས་སོ། །དོན་མཉམ་པ་ཉིད་ནི་གཟུང་བའི་རྣམ་པ་སྟོང་པ་ཉིད་དོ། །དེའི་མངོན་པར་བྱང་ཆུབ་བ་དེ་ཁོ་ན་ཡང་བྱང་ཆུབ་ཆེན་པོ་ཞེས་ཏེ་སྔར་བཞིན་ནོ། །ཇི་ལྟར་ཞེ་ན་གསུངས་པ་དོན་གཅིག་པ་ཉིད་ཀྱི་ཞེས་པ་གཟུང་བྱ་སྟོང་པ་ཉིད་ལ་དམིགས་པའི་ཡེ་ཤེས་བསྟན་པ་ཉིད་ཀྱིས་སོ། །ཆོས་རྣམས་ནི་ལུང་དང་རྟོགས་པའི་མཚན་ཉིད་དོ། །དེ་མཉམ་པ་ཉིད་ནི་དེ་སྟོང་པ་ཉིད་དོ། །དེའི་མངོན་པར་བྱང་ཆུབ་པ་ཁོ་ན་བྱང་ཆུབ་ཆེན་པོ་ཞེས་པ་སྟེ། སྔར་བཞིན་ནོ། །ཅི་ལྟར་ཞེ་ན་གསུངས་པ། རང་བཞིན་རྣམ་པར་དག་པས་ཞེས་པ་ཆོས་རང་བཞིན་གྱིས་རྣམ་པར་དག་པ་ལ་དམིགས་པའི་ཡེ་ཤེས་བསྟན་པ་ཉིད་ཀྱིས་སོ་ཞེས་པ་ཇི་སྲིད་པའོ། །ཐམས་ཅད་མཉམ་པ་ཉིད་ནི་མིག་ལ་སོགས་པ་སྟོང་པ་ཉིད་དོ། །དེའི་མངོན་པར་བྱང་ཆུབ་པ་ཁོ་ན་བྱང་ཆུབ་ཆེན་པོའི་ཞེས་པ་སྔར་བཞིན་ནོ། །ཅི་ལྟར་ཞེ་ན་གསུངས་པ། ཐམས་ཅད་ཅེས་པ་ལ་སོགས་པ་སྟེ། མིག་ལ་སོགས་པའི་ཤེས་པ་རྣམ་པར་རྟོག་པ་སྟོང་པ་ཉིད་ལ་དམིགས་པའི་ཡེ་ཤེས་མཆོག་གིས་སོ་ཞེས་པའི་དོན་ཏོ། །དེ་བཞིན་གཤེགས་པའི་རིགས་པ་ལ་སོགས་པ་ཡང་རྡོ་རྗེ་ལ་སོགས་པ་ཡང་རྡོ་རྗེ་ལ་སོགས་པའི་སྒྲས་བརྗོད་པར་བྱའོ། །དེ་རྣམས་ཀྱི་མཉམ་པ་ཉིད་ཅེས་པ་ལ་སོགས་པ་ནི་སྔར་བཞིན་ནོ། །བྱང་ཆུབ་ཆེན་པོའི་རིམ་པ་བཞིན་དུ་མི་བསྐྱོད་པ་ལ་སོགས་པའི་གོ་འཕང་གི་རང་བཞིན་དུ་ཆུད་པར་བྱའོ། །ཆོས་བསྒྲུབ་པ་ནི་སྣང་མཛད་ལ་སོགས་པའི་གོ་འཕང་ཐོབ་པར་བྱེད་པའམ་མི་བསྐྱོད་པ་ལ་སོགས་པ་སེམས་ཅན་ཉེ་བར་འདྲེན་པ་པོའོ། །ཞེ་སྡང་སྤྱོད་པ་རྗེས་སུ་གཟུང་བར་བྱ་བ་རྡོ་རྗེ་ཧཱུཾ་མཛད་ཀྱི་དཀྱིལ་འཁོར་གྱི་དོན་བསྟན་པ་
གསུངས་པ། དེ་ནས་བཅོམ་ལྡན་འདས་གདུག་པ་ཐམས་ཅད་ཅེས་བྱ་བ་ལ་སོགས་པ་སྟེ། གདུག་པ་ཐམས་ཅད་ནི་ལྷ་ཆེན་པོ་ལ་སོགས་པ་རྣམས་སོ། །དེ་རྣམས་འདུལ་བར་བྱེད་པ་གང་གིས་ཤཱཀྱ་ཐུབ་པ་རྡོ་རྗེ་ཧཱུཾ་མཛད་ཀྱི་གཟུགས་ཅན་དུ་བྱས་པ་དེའོ། །ཆོས་ཐམས་ཅད་མཉམ་པ་ཉིད་འདོད་ཆགས་ལ་སྟོང་པ་ཉིད་ཀྱིས་སོ། །རྣམ་པར་རྒྱལ་བ་ནི་དེའི་བསམ་པ་ཉིད་ཀྱིས་འདོད་ཆགས་པ་རབ་ཏུ་བཅོམ་པའོ། །དེའི་ཡང་དག་པར་བསྡུས་པའོ། །གང་གིས་ཤེས་རབ་ཀྱི་ཕ་རོལ་ཏུ་ཕྱིན་པ་མངོན་པར་སྒྲུབ་པས་ཤེས་རབ་ཀྱི་ཕ་རོལ་ཏུ་ཕྱིན་པའི་ཚིག་གིས་དེ་དེ་བཞིན་དུ་གསུངས་པ་དེའོ། །འདོད་ཆགས་ནི་ཞེན་པའི་མཚན་ཉིད་དོ། །དེའི་སྤྲོས་པ་དོན་དམ་པ་ཉིད་དུ་ཉེ་བར་མི་དམིགས་པའོ། །ཅི་ལྟར་ཞེ་ན་གསུངས་པ། འདོད་ཆགས་སྤྲོས་པ་མེད་པ་ཉིད་དེ་འདོད་ཆགས་ཀྱི་རྒྱུ་ཁ་དོག་ལ་སོགས་པ་ཉེ་བར་དམིགས་པ་མེད་པ་ཉིད་ཀྱིས་སོ། །ཞེ་སྡང་ནི་ཀུན་དུ་འཇོམས་པའི་མཚན་ཉིད་དོ། །དེའི་སྤྲོས་པ་མེད་པ་ཁོ་ན་བཞིན་དུ། ཇི་ལྟར་ཞེ་སྡང་གི་སྤྲོས་པ་མེད་པ་ཉིད་ཀྱིས་ཤེ་ན་ཀུན་ནས་མནར་སེམས་པའི་གཞི་དགུ་ཉེ་བར་དམིགས་པ་མེད་པ་ཉིད་ཀྱིས་སོ། །གཏི་མུག་ནི་བདག་ཏུ་ལྟ་བ་ལ་སོགས་པའི་མཚན་ཉིད་དོ། །དེའི་སྤྲོས་པ་མེད་པ་སྔར་བཞིན་དུ་ཉེ་བར་དམིགས་པ་མེད་པའོ། །ཇི་ལྟར་ཞེ་ན། གསུངས་པ་གཏི་མུག་གི་སྤྲོས་པ་མེད་པ་ཉིད་ཀྱིས་ནི་བདག་ལ་སོགས་པ་ཡོངས་སུ་དག་པའི་ཞིང་རྣམས་ཉེ་བར་མི་དམིགས་པའོ། །ཆོས་ཐམས་ཅད་ནི་ཁམས་གསུམ་པའི་སེམས་དང་སེམས་ལས་བྱུང་བའོ། །དེ་རྣམས་ཀྱི་སྤྲོས་པ་དོན་དམ་པ་ཉིད་དུ་ཉེ་བར་དམིགས་པ་མེད་པའོ། །ཇི་ལྟར་ཆོས་ཐམས་ཅད་ཀྱི་སྤྲོས་པ་མེད་པ་ཉིད་ཅེ་ན་ཁམས་གསུམ་པའི་སེམས་དང་སེམས་ལས་བྱུང་བ་དེ་དག་ཏུ་ཡོངས་སུ་བརྟགས་པ་རྣམས་ཀྱི་དངོས་པོ་མེད་པ་ཉིད་ཀྱིས་སོ། །སྟོང་པ་ཉིད་ལ་སོགས་པའི་རང་བཞིན་ཅན་མཆོག་ཏུ་མཐར་ཐུག་པ་འབྱེད་པའི་ཤེས་རབ་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །འདིའི་སྤྲོས་པ་མེད་པ་ཉིད་ནི་དེ་ཁོ་ན་བཞིན་དུ་ཉེ་བར་དམིགས་པ་མེད་པའོ། །ཅི་ལྟར་ཞེ་ན་གསུངས་པ། ཤེས་རབ་ཀྱི་ཕ་རོལ་ཏུ་ཕྱིན་པ་སྤྲོས་པ་མེད་པ་ཉིད་ཀྱིས་ཏེ། རྣམ་པར་རྟོག་པ་དང་དེའི་དབྱེ་བ་
རྣམས་ཉེ་བར་དམིགས་པ་མེད་པ་ཉིད་ཀྱིས་སོ། །ཞེ་སྡང་གིས་དེ་སྤང་བ་ཉེ་བར་བསྟན་ནས་གཏི་མུག་ལ་སྤྱོད་པའི་སེམས་ཅན་འདུལ་བའི་དོན་དུ། དེ་ནས་བཅོམ་ལྡན་འདས་རང་བཞིན་དག་པ་ཞེས་པ་ལ་སོགས་པས་འཇིག་རྟེན་དབང་ཕྱུག་གི་དཀྱིལ་འཁོར་གྱི་དོན་བསྟན་པ་གསུངས་པ། རང་བཞིན་དག་པའི་ཆོས་མ་ལུས་པ་ཀུན་དུ་གཟིགས་པའི་ཕྱིར། རང་བཞིན་དག་པའི་ཆོས་ཐམས་ཅད་དོ། །ཆོས་ཐམས་ཅད་ནི་འདོད་ཆགས་ལ་སོགས་པའོ། །དེ་རྣམས་ཀུན་དུ་གཟིགས་པ་ཉིད་ནི་མངོན་སུམ་དུ་བྱེད་པའོ། །དེ་ལ་དབང་བྱེད་བས་ན་དབང་ཕྱུག་གོ །དེའི་ཡེ་ཤེས་ནི་དཀྱིལ་འཁོར་ལ་སོགས་པ་ངེས་པའོ། །དེ་ལ་གང་གིས་རྒྱས་གདབ་པར་བྱ་ཞིང་མངོན་པར་བྱ་བ་ཡིན་པས་དེ་དེ་བཞིན་དུ་གསུངས་ཏེ་དེ་སྐད་བྱ་བའིའོ། །འདོད་ཆགས་ཐམས་ཅད་ནི་སྔར་གསུངས་པ་དེ་རྣམས་ཀྱི་རྣམ་པར་དག་པ་སྟེ། མི་དགེ་བ་བཅུའི་ལས་ཀྱི་ལམ་རྣམ་པར་དབེན་པ་ཉིད་དོ། །དེ་ཞེ་སྡང་ཐམས་ཅད་རྣམ་པར་དག་པ་ཉིད་ཀྱིས་ཡང་དག་པར་འཇུག་པར་འགྱུར་ཏེ། རྒྱུད་ཉིད་དུ་འགྱུར་རོ། །ལུ་ཛྱེ་ཏེ་ཞེས་པ་ནི་འདིར་ཐོབ་པ་དང་སྐྱེ་བའོ། །ལྟ་བ་ཐམས་ཅད་ཀྱི་དྲི་མ་དེ་རྣམ་པར་དག་པ་སྟེ། དོན་དམ་པར་གདོད་མ་ནས་ཉེ་བར་དམིགས་པ་མེད་པ་ཉིད་ཀྱིས་སོ། །སྡིག་པ་ཐམས་ཅད་རྣམ་པར་དག་པ་ནི་མི་དགེ་བའི་སེམས་པ་ཉེ་བར་དམིགས་པ་མེད་པས་སོ། །ཆོས་ཐམས་ཅད་ནི་སེམས་དང་སེམས་ལས་བྱུང་བ་རྣམས་སོ། །དེ་རྣམས་ཀྱི་རྣམ་པར་དག་པ་ནི་འཛིན་པ་ཉེ་བར་དམིགས་པ་མེད་པའོ། །དེ་ནི་སེམས་ཅན་ཐམས་ཅད་རྣམ་པར་དག་པ་ཉིད་ཀྱི་ཡང་དག་པར་འཇུག་པར་འགྱུར་རོ། །ཐམས་ཅད་མཁྱེན་པའི་ཡེ་ཤེས་ནི་སྡུག་བསྔལ་དང་ཀུན་འབྱུང་བ་དང་འགོག་པ་དང་ལམ་དང༌། ཀུན་རྫོབ་དང༌། གཞན་གྱི་སེམས་དང༌། ཆོས་དང༌། རྗེས་སུ་དང༌། ཟད་པ་དང༌། མི་སྐྱེ་བཤེས་པ་རྣམས་སོ། །དེ་རྣམས་ཀྱི་ཡང་དག་པ་ནི་རྣམ་པར་རྟོག་པ་གཉིས་མེད་པའོ། །དེ་ནི་ཐམས་ཅད་མཁྱེན་པའི་ཡེ་ཤེས་རྣམ་པར་དག་པ་ཉིད་ཀྱིས་ཡང་དག་པར་འཇུག་པ་ནི་ཐོས་པ་དང་བསམ་པ་ལས་བྱུང་བའི་རྒྱུའི་གནས་སྐབས་ཡང་དག་པར་བསྡུས་པའི་སེམས་པའོ། །དེའི་རྣམ་
པར་དག་པ་ནི་ཉེ་བར་དམིགས་པ་མེད་པའོ། །དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཉིད་ཀྱིས། དེ་བཞིན་གཤེགས་པ་རྣམས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པ་དེ་ཡང་དག་པར་ཐོབ་པར་ཤེས་པར་བྱའོ། །འདོད་ཆགས་ལ་སོགས་པ་རྣམས་ཀྱིས་དེ་སྤྱོད་པ་ཉེ་བར་བསྟན་ནས་སེར་སྣའི་གཉེན་པོའི་དོན་ལ་ལྷག་པར་མོས་པ་རྣམས་ཡང་དག་པར་རྗེས་སུ་གཟུང་བའི་དོན་དུ་དེ་ནས་བཅོམ་ལྡན་འདས་ཞེས་བྱ་བ་ལ་སོགས་པས་རིན་པོ་ཆེའི་རིགས་ཀྱི་དཀྱིལ་འཁོར་གྱི་དོན་ཉེ་བར་བསྟན་པ་གསུངས་པ། ཉོན་མོངས་པ་ཅན་དང༌། ཉོན་མོངས་པ་ཅན་མ་ཡིན་པའི་མ་རིག་པ་དང་བྲལ་བ་ལས་ཁམས་གསུམ་པ་ཐམས་ཅད་ཀྱི་བདག་པོའོ། །དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བ་རིན་པོ་ཆེའི་ཅོད་པན་ཏེ། དེའི་འབྱུང་གནས་སོ། །གང་ལས་ཤེ་ན་ཡེ་ཤེས་ལས་སོ། །དེ་ཉིད་ཀྱི་སྙིང་པོ་གང་ཡིན་པ་དེ་ལ་དེ་སྐད་ཅེས་བྱའོ། །མངོན་པར་དབང་བསྐུར་བ་བྱིན་པ་ནི་དཀྱིལ་འཁོར་རྣམས་སུ་བཀོད་པའི་ལྷ་རྣམས་དང༌། སློབ་མ་རྣམས་ལ་ཡང་ཕྱག་རྒྱ་རྣམས་ཀྱིས་མངོན་པར་དབང་བསྐུར་བའོ། །དོན་ནི་གསེར་ལ་སོགས་པའོ། །ཆོས་ནི་མདོ་སྡེ་ལ་སོགས་པའོ། །དེའི་སྦྱིན་པ་ནི་ཉོན་མོངས་པ་མེད་པས་སྟོན་པར་བྱེད་པའོ། །ཟང་ཟིང་ནི་བཟའ་བ་ལ་སོགས་པའོ། །དེ་ལྟར་རྣམ་པར་སྦྱོང་བར་བྱེད་པའི་དོན་དུ་སྔགས་ཀྱི་ཚུལ་ངེས་པར་སྦྱར་བ་རྣམས་ཀྱིས་སྐུལ་སོགས་པ་གཅིག་པ་ཅན་དུ་བྱེད་པའི་མཚན་ཉིད་སྟོང་པ་ཉིད་རྗེས་སུ་དྲན་པའི་ཕྱག་རྒྱ་བསྒྲུབ་པར་བྱའོ་ཞེས་དེ་ནས་བཅོམ་ལྡན་འདས་ཞེས་བྱ་བ་ལ་སོགས་པས་རྡོ་རྗེ་ཁུ་ཚུར་གྱི་དཀྱིལ་འཁོར་གྱི་དོན་ཉེ་བར་གསལ་བར་བྱེད་པ་གསུངས་པ། དེ་བཞིན་དེ་བཞིན་ཉིད་བདེན་གང༌། །དེ་ནི་རྡོ་རྗེ་ཁུ་ཚུར་བརྗོད། །ཅེས་པ་འདི། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཕྱག་རྒྱ་ཉིད་དོ། །རབ་ཏུ་བརྙེས་པ་ནི་ལྷག་པར་རྟོགས་པ་དང་ལྡང་པའོ། །དེའི་གནས་སྐབས་གསལ་བར་བྱེད་པའི་དམ་ཚིག་གི་ཁུ་ཚུར་ནི་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་རོ། །དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་ཕྱག་རྒྱས་བྱིན་གྱིས་བརླབས་པ་ནི་བརྟན་པ་ཅན་དུ་བྱེད་པའོ། །དེ་ཉིད་རྡོ་རྗེ་སྟེ་དེ་སྐད་བྱ་བའོ། །དེ་བཞིན་གཤེགས་པ་ཐམས་
ཅད་ཀྱི་སྐུའི་ཕྱག་རྒྱ་ཡོངས་སུ་འཛིན་པ་ནི། ཕྱག་རྒྱ་ཆེན་པོ་འཆིང་བའོ། །གསུང་གི་ཕྱག་རྒྱ་ཡོངས་སུ་འཛིན་པ་ནི་ལྕེ་ལ་ཟླ་བ་བསྒོམ་པ་སྔོན་མ་ཅན་གྱི་སྔགས་བཟླའོ། །ཆོས་ཐམས་ཅད་སོ་སོར་ཐོབ་པ་ནི་སོ་སོ་ཡང་དག་པའི་རིག་པ་བཞི་བརྙེས་པའོ། །ཐུགས་ཀྱི་ཕྱག་རྒྱ་ཡོངས་སུ་འཛིན་པ་ནི་རང་གི་སྙིང་གར་ཟླ་བ་ལ་རྡོ་རྗེ་རྩེ་ལྔ་བ་བསྒོམས་པ་སྔོན་མ་ཅན་གྱི་དམ་ཚིག་གི་ཕྱག་རྒྱ་འཆིང་བའོ། །རྡོ་རྗེའི་ཕྱག་རྒྱ་ཡོངས་སུ་འཛིན་པ་ནི་རང་གི་སྙིང་གར་ཟླ་བ་ལ་སྣ་ཚོགས་རྡོ་རྗེ་སྔོན་དུ་འདྲེན་པས་ལས་ཀྱི་ཕྱག་རྒྱའི་འཆིང་བའོ། །ཤེས་རབ་ཀྱི་བློ་བསྒྲུབ་པར་བྱའོ་ཞེས་པས་དེ་ནས་བཅོམ་ལྡན་འདས་ཆོས་ཐམས་ཅད་སྤྲོས་པ་མེད་པ་ཞེས་བྱ་བ་ལ་སོགས་པ་སྟེ། དེའི་ཐབས་འཇམ་དཔལ་གྱི་དཀྱིལ་འཁོར་གྱི་དོན་ཉེ་བར་བསྟན་པ་གསུངས་པ། ཆོས་ཐམས་ཅད་དེའི་རྒྱུ་དང་འབྲས་བུ་དོན་དུ་གཉེར་བའི་བདག་ཉིད་ཅན་ནོ། །དེ་རྣམས་ཀྱིས་སྤྲོས་པ་ནི་འབྱུང་བའི་རྟོག་པ་ཡང་དག་པར་གཅོད་པའོ། །དེའི་རྗེས་སུ་མ་དམིགས་པས་ན་སྤྲོས་པ་མེད་པར་བྱེད་དོ་ཞེས་པས་སྤྲོས་པ་མེད་པའོ། །ཡི་གེའི་འཁོར་ལོ་ནི། ཨ་ར་བ་ཙ་ན་ལ་སོགས་པའོ། །ཡོངས་སུ་སྐོར་བར་བྱེད་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གང་ཡིན་པ་དེ་དེ་བཞིན་དུ་བརྗོད་པ་དེའོ། །ཆོས་ཐམས་ཅད་ནི་འབྲས་བུའི་ངོ་བོ་ཕུང་པོ་ལྔ་པོ་དེ་རྣམས་དོན་དམ་པར་སྟོང་པར་དངོས་པོ་མེད་པའི་རང་བཞིན་ནོ། །ཅི་ལྟར་ཞེ་ན་རང་བཞིན་མེད་པའི་ཚུལ་གྱིས་ཞེས་ཏེ་གང་གི་ཕྱིར་དེ་རྣམས་དོན་དམ་པ་ཉིད་དུ་རང་བཞིན་ཉེ་བར་དམིགས་པར་བྱ་བ་མེད་དོ། །དེ་ཉིད་ནི་མཚན་མ་མེད་པ་སྟེ། ཅིའི་ཕྱིར་ན། མཚན་མ་མེད་པས་ཉེ་བར་བཟུང་བ་སྟེ། གང་གི་ཕྱིར་དོན་དམ་པ་ཉིད་དུ་དེ་རྣམས་ཀྱི་མཚན་མ་སྟེ་རྒྱུའི་རང་བཞིན་ཉེ་བར་ཐོབ་པར་བྱར་མེད་དེ་དེའི་ཕྱིར་མཚན་མ་མེད་པའོ། །སླར་ཡང་ཁོ་ན་སྨོན་པ་མེད་པ་སྟེ་དོན་དུ་གཉེར་བ་མེད་པའོ། །ཅི་ལྟར་ཞེས་སྨོན་པ་མེད་པའི་ཚུལ་གྱིས་ཏེ་གང་གི་ཕྱིར། དེ་རྣམས་དོན་དམ་པར་དོན་དུ་གཉེར་བ་རྙེད་པར་མི་འགྱུར་རོ། །དེ་གསུང་པར་འགྱུར་བ་འབྲས་བུའི་ངོ་བོ་དེ་སྙེད་དང་བཞིན་གྱི་སྟོན་པས་འབྲས་བུ་མེད་པའི་ཕྱིར་དང་དེའི་རྒྱུ་ཡང་ཉེ་བར་མ་དམིགས་པའི་ཕྱིར་མཚན་མ་མེད་པ་དང་དེའི་སྨོན་པར་བྱ་བའི་ཡུལ་མེད་པའི་ཕྱིར་
སྨོན་པ་མེད་པའོ། །དེའི་ཕྱིར་ཡང་རང་བཞིན་གྱིས་འོད་གསལ་བའོ། །ཅི་ལྟར་ན་ཤེས་རབ་ཀྱི་ཕ་རོལ་ཏུ་ཕྱིན་པ་རྣམ་པར་དག་པ་ནི་དོན་དམ་པར་ན་དེ་དེ་བཞིན་ནོ། །ཀུན་རྫོབ་ཏུ་ནི་རྗེས་སུ་འཇུག་པ་ཁོ་ནའོ་ཞེས་སོ། །ཚིག་དེ་རྣམས་ཀྱིས་ཀྱང་རིམ་པ་ལས་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པ་དང༌། རང་བཞིན་གྱིས་འོད་གསལ་བའི་རྣམ་པར་ཐར་བའི་སྒོ་བསྟན་པ་དང་མེ་ལོང་ལ་སོགས་པའི་ཡེ་ཤེས་བཞིའོ་ཞེས་ཁོང་དུ་ཆུད་པར་བྱའོ། །དཀྱིལ་འཁོར་དུ་འཇུག་པ་མེད་ན་གྲུབ་པར་མི་འགྱུར་རོ་ཞེས་པས་དེ་ནས་བཅོམ་ལྡན་འདས་ཞེས་པ་ལ་སོགས་པས་གྲུབ་པའི་ཐབས་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའི་དཀྱིལ་འཁོར་གྱི་དོན་ཀུན་དུ་བསྟན་པ་གསུངས་པ། དེ་བཞིན་གཤེགས་པ་ཐམས་ཅད་ནི་སངས་རྒྱས་དང་བྱང་ཆུབ་སེམས་དཔའ་སྟེ། དེ་རྣམས་ཀྱང་འཁོར་ལོ་ནི་དཀྱིལ་འཁོར་རོ། །དེའི་ནང་དུ་གནས་པ་ནི་གང་དུ་ཐམས་ཅད་དེ་རྣམས་སུའོ་ཞེས་དེ་བཞིན་དུ་བརྗོད་པར་བྱའོ། །གང་གིས་འཁོར་ལོ་ཆེན་པོ་རབ་ཏུ་འཇུག་པ་དེ་འཁོར་ལོ་ཆེན་པོ་རྣམས་སུ་རབ་ཏུ་འཇུག་པའོ། །རབ་ཏུ་འཇུག་པ་ཡང་ཕྱི་དང་གསང་བའི་དབྱེ་བས་རྣམ་པ་གཉིས་ཏེ་ཕྱི་ནི་ཕྱག་རྒྱ་རྣམས་ཀྱིས་སོ། །གསང་བ་ནི་རབ་ཏུ་ཞུགས་པ་དང་འདི་ལ་དཀྱིལ་འཁོར་ལ་སོགས་པའི་དེ་ཁོ་ན་ཉིད་ཀུན་དུ་རྟོགས་པ་ལ་དེ་སྐད་ཅེས་བྱའོ། །རྡོ་རྗེ་མཉམ་པ་ཉིད་ནི་འཛིན་པའི་རྣམ་པ་དང་བྲལ་བ་ཉིད་དོ། །དེ་ལ་རབ་ཏུ་ཞུགས་པ་ནི་ལྷག་པར་རྟོགས་པའོ། །དེ་བཞིན་གཤེགས་པ་ཐམས་ཅད་ཀྱི་འཁོར་ལོ་ལ་རབ་ཏུ་ཞུགས་པའི་ཆེ་དུ་དེ་བཞིན་གཤེགས་པ་ལ་འཇུག་པའོ། །ཡང་དག་པར་འཇུག་པར་འགྱུར་རོ་ནི་སྐྱེ་བར་འགྱུར་རོ། །དོན་མཉམ་པ་ཉིད་འཇུག་པ་ནི་གཟུང་བྱའི་རྣམ་པ་སྟོང་པར་ལྷག་པར་རྟོགས་པ་སྟེ། དེ་ནི་བྱང་ཆུབ་སེམས་དཔའ་ཆེན་པོ་ཐམས་ཅད་ཀྱི་དོན་དུ་འཁོར་ལོ་ལ་རབ་ཏུ་ཞུགས་པའི་ཕྱིར། བྱང་ཆུབ་སེམས་དཔའ་ཆེན་པོ་ཉིད་ཀྱི་དོན་དུ་འགྱུར་རོ། །ཆོས་ནི་ཉན་ཐོས་པའི་ལུང་གི་ཆོས་ཏེ་སྟོང་པ་ཉིད་དུ་རྟོགས་པས་དམ་པའི་ཆོས་ཀྱི་འཁོར་ལོ་ལ་འཇུག་པའི་ཕྱིར་ཏེ་དམ་པའི་ཆོས་ཀྱི་འཁོར་ལོ་ནི་ལན་གསུམ་དང་རྣམ་པ་གཅིག་ཉིད་ཀྱི་མཚན་ཉིད་མངོན་དུ་ཕྱོགས་པར་
བྱེད་པའི་དོན་དུ་སྐྱེ་བར་འགྱུར་རོ། །ལས་ནི་མཆོད་པ་ལ་སོགས་པའི་བྱ་བའོ། །དེ་སྟོང་པ་ཉིད་དུ་རྟོགས་པས་འཇིག་རྟེན་པའི་དཀྱིལ་འཁོར་ཐམས་ཅད་ཀྱི་དོན་རབ་ཏུ་འཇུག་པའི་དོན་དུ་འགྱུར་རོ། །དེ་བཞིན་གཤེགས་པ་ཐམས་ཅད་མཆོད་པ་ཞེས་བྱ་བ་ལ་སོགས་པས་ཞུགས་པའི་འཁོར་ལོ་རྣམས་ཀྱིས་གྲུབ་པའི་ཐབས་མཆོད་པའི་དཀྱིལ་འཁོར་གྱི་དོན་བསྟན་པ་གསུངས་པ། དེ་ཞིན་གཤེགས་པ་ཐམས་ཅད་མཆོད་པ་ནི་བྱང་ཆུབ་ཏུ་སེམས་བསྐྱེད་པ་ལ་སོགས་པའི་མཚན་ཉིད་དོ། །དེ་དག་གི་ཆོ་ག་རྒྱས་པ་ནི་རྣམ་པ་སྣ་ཚོགས་པ་ཉིད་དོ། །དེའི་སྣོད་ནི་རྟེན་ནོ། །དེ་བཞིན་གཤེགས་པ་ཐམས་ཅད་ཀྱི་མཆོད་པ་ཉིད་དམ་པ་སྟེ་དེ་གང་ལ་དེ་དེ་བཞིན་དུ་གསུངས་པ་དེ་ལ་དེ་སྐད་ཅེས་བྱའོ། །སྨོན་པ་དང་འཇུག་པ་བྱང་ཆུབ་ཀྱི་རང་བཞིན་གྱི་སེམས་ནི་བྱང་ཆུབ་ཀྱི་སེམས་སོ། །དེ་བསྐྱེད་པ་ཉིད་དོ། །ངན་སོང་བ་ལ་སོགས་པའི་སྡུག་བསྔལ་དང་སྒྲིབ་པ་རྣམས་ཡོངས་སུ་སྐྱོབ་པའོ། །ཉན་ཐོས་དང་བྱང་ཆུབ་སེམས་དཔའ་དང༌། སངས་རྒྱས་ཀྱི་ཆོས་ནི་དམ་པའི་ཆོས་སོ། །དེ་ཐོས་པ་ལ་སོགས་པ་རྣམས་ཀྱིས་ཡོངས་སུ་བཟུང་བའོ། །ཤེས་རབ་ཀྱི་ཕ་རོལ་ཏུ་ཕྱིན་པ་བྲི་བ་ལ་སོགས་པ་ནི་གོ་སླའོ། །དེ་ནས་བཅོམ་ལྡན་ཞེས་པ་ལ་སོགས་པ་བགེགས་ཀྱི་གཉེན་པོའི་ཕྱོགས་ཏེ་རྡོ་རྗེ་གནོད་སྦྱིན་གྱི་དཀྱིལ་འཁོར་གྱི་དོན་བསྟན་པ་གསུངས་པ། གདུག་པ་རྣམ་པ་ཐམས་ཅད་འདུལ་བ་སྟེ་ཉེས་པར་སྤྱོད་པའོ་ཞེས་པས་སྒྲིབ་པའོ། །དེའི་མཐས་ཡོད་པ་ནི་ནུས་པ་སྟེ། སེམས་ཅན་ཐམས་ཅད་ཉེས་པར་སྤྱོད་པ་ལ་རབ་ཏུ་ཞེན་པ་དེ་རྣམས་འདུལ་བ་ནི་དེ་དག་ཡོངས་སུ་སྤོང་པའོ་།དེའི་དོན་གྱི་ཡེ་ཤེས་ནི་སེམས་ཅན་ཐམས་ཅད་འདུལ་བའི་ཡེ་ཤེས་ཏེ། ཁྲོ་བོའི་གཟུགས་ཀུན་དུ་སྟོན་པར་ནུས་པའོ། །དེ་ཉིད་སྙིང་པོ་སྟེ་དེ་སྐད་ཅེས་བྱ་བ་ཅན་ནོ། །སེམས་ཅན་ཐམས་ཅད་ནི་དགྲ་བོ་དང་མཛའ་བོ་ལ་སོགས་པ་རྣམས་སོ། །མཉམ་པ་ཉིད་ཀྱི་སྟེ་མཚུངས་པ་ཉིད་ཀྱི་ཁྲོ་བོ་ཡང་མཉམ་པ་ཉིད་དེ་ཐམས་ཅད་རིགས་པ་རྣམས་སུ་གོར་མ་ཆག་པར་འཇུག་པ་དང་ལྡོག་པའོ། །ནམ་གྱི་ཚེ་སོ་སོར་དུལ་བར་འགྱུར་ཞེ་ན་སེམས་ཅན་ཐམས་ཅད་འདུལ་བ་ཉིད་པས་
ཞེས་བྱ་བ་ལ་སོགས་པས་གསུངས་པ། ཇི་སྲིད་དུ་སེམས་ཅན་རྣམས་ཐམས་ཅད་དུལ་བར་གྱུར་བ་དེ་སྲིད་དུ་ཁྲོ་བོའི་སྐབས་སུ་དུལ་བ་ནི་ཁྲོ་བོའི་ཡང་འདུལ་བ་ཉིད་དུ་མི་འཇུག་པར་འགྱུར་རོ་ཞེས་བྱ་བའི་དོན་ཏོ། །དེའི་ཕྱིར་ཉེས་པའི་བདག་ཉིད་འདི་ཡང་སྔོན་དུ་བྱས་པའི་ཕྱིར་ཉེས་པ་མེད་པ་ཉིད་དུ་བསྟན་པ་གསུངས་པ། །སེམས་ཅན་ཐམས་ཅད་ཆོས་ཉིད་པས་ཏེ་དེ་ཁོ་ན་ནི་སེམས་ཅན་ཐམས་ཅད་ནི་སེམས་དང་སེམས་ལས་བྱུང་བའི་རང་བཞིན་ནོ། །ཆོས་ཉིད་ནི་སྟོང་པ་ཉིད་དེ་ཁྲོ་བ་ཡང་དེ་ཉིད་དོ། །དེའི་ཕྱིར་ཡང་ཁྲོ་བ་ཡང་རྡོ་རྗེའི་སྒྲས་བརྗོད་དོ། །ཅིའི་ཕྱིར་ཞེ་ན་གསུངས་པ། སེམས་ཅན་ཐམས་ཅད་འདུལ་བའི་བྱང་ཆུབ་པོ་ཞེས་པ་ནི་གང་གི་ཕྱིར་བྱང་ཆུབ་ཀྱི་མཚན་ཉིད་འདི་ཁོ་ན་སེམས་ཅན་ཐམས་ཅད་འདུལ་བ་ཡིན་ཏེ། དེའི་ཕྱིར་སེམས་ཅན་ཐམས་ཅད་མཉམ་པ་ཉིད་ལས་ཁྲོ་བ་མཉམ་པ་ཉིད་ནས་ཇི་སྲིད་དུ་རྡོ་རྗེ་ཉིད་དོ་ཞེས་སོ།། །།ད་ནི་དོན་ཡོད་རྒྱལ་པོ་ལ་སོགས་པ་ནས་རྡོ་རྗེ་ཁུ་ཚུར་གྱི་མཐར་ཐུག་པའི་དཀྱིལ་འཁོར་གྱི་དོན་བསྟན་པ་གསུངས་པ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པས་ཐམས་ཅད་མཉམ་པ་ཉིད་ནི་ཇི་ལྟར་གསུངས་པའི་དཀྱིལ་འཁོར་བཅུ་མཚུངས་པ་ཉིད་དོ། །དེ་ལས་དཀྱིལ་འཁོར་ཐམས་ཅད་ཀྱི་རང་བཞིན་ཡོངས་སུ་གྱུར་པར་ཀུན་དུ་གནས་པ་ནི་ཐམས་ཅད་མཉམ་པ་ཉིད་ལས་རབ་ཏུ་གནས་པའོ། །དཀྱིལ་འཁོར་ཐམས་ཅད་ནི་ཆོས་ཐམས་ཅད་མཉམ་པ་ཉིད་དོ། །དེ་ཁོ་ན་མཆོག་སྟེ་གང་དུ་དེ་བཞིན་དུ་གསུངས་པ་དེ་ལ་དེ་སྐད་ཅེས་བྱའོ། །ཐམས་ཅད་མཉམ་པ་ཉིད་ནི་དཀྱིལ་འཁོར་ཐམས་ཅད་མཚུངས་པ་ཉིད་དེ། དེས་ཤེས་རབ་ཀྱི་ཕ་རོལ་ཏུ་ཕྱིན་པ་མཉམ་པ་ཉིད་དེ། དོན་དམ་པར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་དཀྱིལ་འཁོར་ཐམས་ཅད་ལྟ་བུར་ལྷག་པར་སྒྲོ་བཏགས་ནས་དེ་བཞིན་ཁོ་ནར་བརྗོད་པར་འགྱུར་བའི་ཕྱིར་རོ། །དཀྱིལ་འཁོར་རྣམས་ཐམས་ཅད་ནི་རྟེན་དེ་མངོན་པར་བྱུང་བའི་མཚན་ཉིད་ནི་དོན་ཉིད་དོ། །གང་ཁོ་ན་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་པ་ཡང་དེ་ཁོ་ནའོ། །དེ་རྣམས་ཀྱི་ཆོས་ཉིད་ནི་བླ་ན་མེད་པའི་བྱང་ཆུབ་བསྐྱེད་པ་པོ་ཉིད་དེ་དེ་ཁོ་ནའོ། །དེ་ལ་ཡང་གང་དཀྱིལ་འཁོར་རྣམས་སུ་མངོན་པ་ལ་སོགས་
པའི་ལས་ཉིད་ཕུན་སུམ་ཚོགས་པར་འགྱུར་བ་དེ་ཁོ་ན་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ནོ་ཞེས་སོ། །འཇིག་རྟེན་པའི་ལྷ་ལ་ལྷག་པར་མོས་པ་རྣམས་བསྟན་པ་འདི་ལ་འཇུག་པར་བྱ་བའི་ཕྱིར། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པས་དབང་ཕྱུག་ཆེན་པོའི་དཀྱིལ་འཁོར་གྱི་དོན་བསྟན་པ་གསུངས་པ། དབང་ཕྱུག་དེ་བཞིན་གཤེགས་པ་ཐམས་ཅད་དུ་སྒོམ་པར་བྱེད་པས་བྱིན་གྱིས་རློབ་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ཡིན་པ་དེ་ལ་དེ་བཞིན་དུ་གསུངས་སོ། །དེ་བཞིན་གཤེགས་པ་ནི་ཆོས་ཀྱི་དབྱིངས་རྣམ་པར་དག་པའི་བདག་ཉིད་ཅན་རྣམ་པར་སྣང་མཛད་དོ། །དེའི་སྙིང་པོ་གང་ཡིན་པ་དེ་ལ་དེ་བཞིན་དུ་བརྗོད་པར་བྱའོ། །གང་ལས་ཤེ་ན་ཀུན་དུ་བཟང་པོ་ཞེས་བྱ་བ་ལ་སོགས་པ་སྟེ་གསུངས་པ། བྱང་ཆུབ་སེམས་དཔའ་ཆེན་པོ་ཀུན་དུ་བཟང་པོ་ནི་དེ་བཞིན་ཉིད་དང་ཡེ་ཤེས་ཀྱི་བདག་ཉིད་ཅན་ཆོས་ཀྱི་སྐུ་རྣམ་པར་སྣང་མཛད་ཆེན་པོའོ། །དེ་ཐམས་ཅད་ཀྱི་བདག་ཉིད་ཉིད་པས་ནི་སེམས་ཅན་ཐམས་ཅད་ཀྱི་རྗེས་སུ་འགྲོ་བ་ཉིད་ཀྱིས་སོ། །རྡོ་རྗེ་ནི་མི་བསྐྱོད་པ་སྟེ་དེའི་སྙིང་པོ་གང་ཡིན་པ་ནི་རྡོ་རྗེ་སྙིང་པོའོ། །ཅི་ལྟར་ཞེ་ན་རྡོ་རྗེ་སྙིང་པོའི་དབང་བསྐུར་བ་ཉིད་བས་ཏེ་མེ་ལོང་ཡེ་ཤེས་ཀྱི་བདག་ཉིད་ཅན་རྡོ་རྗེའི་ཕྱག་རྒྱས་མངོན་པར་དབང་བསྐུར་བ་སྟེ་དེ་ནི་དབང་ཕྱུག་ལ་སོགས་པའི་སེམས་ཅན་དང་ཐུན་མོང་པ་ཉིད་ཀྱིས་སོ། །རིན་པོ་ཆེ་ནི་རིན་ཆེན་འབྱུང་ལྡན་ནོ། །དེ་གང་རྣམས་ཀྱི་སྙིང་པོ་ཡིན་པ་ཞེས་པ་སྔོན་མ་བཞིན་ནོ། །ཅིའི་ཕྱིར་ཞེ་ན་རིན་ཆེན་སྙིང་པོས་དབང་བསྐུར་བ་ཉིད་ཀྱིས་ཏེ་མཉམ་པ་ཉིད་ཀྱི་བདག་ཉིད་ཅན་རིན་ཆེན་གྱི་མངོན་བར་དབང་བསྐུར་བ་སྟེ། དེ་ནི་དབང་ཕྱུག་ལ་སོགས་པའི་སེམས་ཅན་དང་ཐུན་མོང་བ་ཉིད་ཀྱིས་སོ། །ཆོས་ནི་འཇིག་རྟེན་དབང་ཕྱུག་གི་རྒྱལ་པོའོ། །ངག་ཐམས་ཅད་ལ་རབ་ཏུ་འཇུག་པ་ཉིད་པས་ནི་གང་གི་ཕྱིར་སོ་སོར་ཀུན་དུ་རྟོག་པའི་ཡེ་ཤེས་ནི་ངག་ཐམས་ཅད་ལ་རབ་ཏུ་འཇུག་པ་སྟེ་དེ་ཡང་སེམས་ཅན་ཐམས་ཅད་ཀྱི་རྗེས་སུ་ཞུགས་པའོ། །ལས་ནི་གདོན་མི་ཟ་བ་སྟེ། སེམས་ཅན་ཐམས་ཅད་ལ་ཀུན་དུ་གནས་སོ། །ནག་པོ་ཆེན་པོ་དང་དགའ་བྱེད་དབང་ཕྱུག་གི་དཀྱིལ་འཁོར་གྱི་དོན་བསྟན་པའི་ཕྱིར་དེ་ནས་བཅོམ་ལྡན་འདས་ཞེས་
བྱ་བ་ལ་སོགས་པ་གསུངས་པ། འདི་ལ་མཐའ་ཡོད་པ་མ་ཡིན་ནོ་ཞེས་པས་མཐའ་ལས་འདས་པའོ། །མུར་ཐུག་པ་དང་མཐར་ཕྱིན་པ་ནི་མུ་མེད་ཅིང་མཐར་ཕྱིན་པའོ། །དེས་གང་ལ་མུ་མེད་ཅིང་མཐར་ཕྱིན་པར་རིག་པར་བྱ་བ་དེ་བཅོམ་ལྡན་འདས་ནམ་མཁའི་དབྱིངས་ཐམས་ཅད་དུ་ཐམས་ཅད་ཀྱི་ཚེ་ཀུན་དུ་གནས་པའི་སྐུ་དང་གསུང་དང་ཐུགས་རྡོ་རྗེ་ཉིད་ཀྱི་ཕྱིར་རོ། །རིམ་པའི་མཐར་མཐའ་ལས་འདས་ཤིང་མུ་མེད་ལ་མཐར་ཕྱིན་པའི་ཚིག་རྣམས་ཀྱིས་དེ་བཞིན་གཤེགས་པ་ལ་སོགས་པའི་རིགས་གསུམ་གྱི་རང་བཞིན་གསལ་བར་བྱེད་དོ། །མུ་མེད་ཅིང་མཐར་ཕྱིན་པའི་ཆོས་འདིས་ཀྱང་ལས་ཀྱི་རིགས་ཤིན་ཏུ་སྤྱད་དོ་ཞེས་པའོ། །འདིའི་རྟོག་པ་ཞེས་པ་ནག་པོ་ཆེན་པོ་དང་དགའ་བྱེད་དབང་ཕྱུག་གི་བརྟག་པའོ། །ཡོངས་སུ་མཐར་ཐུག་པ་ནི་ཡོངས་སུ་རྫོགས་པ་སྟེ། དེ་བྱིན་གྱིས་བརླབ་པའི་དོན་དུའོ། །ཆོས་ཐམས་ཅད་ནི་རིགས་ཐམས་ཅད་ཀྱི་རང་བཞིན་ནོ། །དེའི་མཉམ་ཉིད་དོ། །ཡོངས་སུ་མཐར་ཐུག་པ་ནི་ནག་པོ་ཆེན་པོ་དང་དགའ་བྱེད་དབང་ཕྱུག་གི་སྤྲུལ་པ་སྟོན་པར་བྱེད་པའོ། །དེ་ཁོ་ན་ཚད་མས་གནོད་པ་ཉིད་ཀྱི་ཕྱིར་རྡོ་རྗེའོ། །ཇི་ལྟར་འབྱུང་པོ་མཐའ་མེད་པར་ཤེས་པར་བྱ་བར་རྟོགས་པས་ཤེས་རབ་ཀྱི་ཕ་རོལ་ཏུ་ཕྱིན་པ་མཐའ་ཡས་པ་ཉིད་ཀྱིས་དེ་བཞིན་གཤེགས་པ་མཐའ་ཡས་པ་ཉིད་དེ། ཐམས་ཅད་མཁྱེན་པས་གཞལ་དུ་མེད་པ་ཉིད་དོ། །དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་མུ་མེད་པ་དང༌། གཅིག་པ་དང་ཡོངས་སུ་མཐར་ཐུག་པ་ཉིད་ཀྱིས་དབང་ཕྱུག་དང་ཡོན་ཏན་བྱེད་པ་ཐམས་ཅད་མུ་མེད་པ་དང་གཅིག་པ་དང་མཐར་ཕྱིན་པ་དེ་ཉིད་དེ། ཡོངས་སུ་མཐར་ཐུག་པ་དང་ཤིན་ཏུ་མཐར་ཐུག་པ་དང་ཡོངས་སུ་ཟད་པ་མེད་དོ་ཞེས་བྱ་བའི་དོན་ཏོ། །དེ་ནི་ཞེས་པ་འཛིན་པ་ལ་སོགས་པ་ལ་འཇུག་པའིའོ། །མཐར་ཕྱིན་པའི་བྱང་ཆུབ་སེམས་དཔའི་སྤྱོད་པ་མཐར་ཕྱིན་པ་སྟེ་ཡོངས་སུ་རྫོགས་པ་ལ་གནས་པ་ཉིད་ཀྱི་ཕྱིར་རོ། །སྒྲིབ་པ་ཐམས་ཅད་ལས་རྣམ་པར་གྲོལ་ནས་ཞེས་པ་སྒྲིབ་པ་མ་ལུས་པ་ཡོངས་སུ་ཟད་པས་སོ། །བཅོམ་ལྡན་འདས་རྣམ་པར་སྣང་མཛད་ཅེས་བྱ་བ་ལ་སོགས་པས་མིང་པོ་གསུམ་གྱི་དཀྱིལ་འཁོར་གྱི་དོན་ཡོངས་སུ་བསྟན་པ་གསུངས་པ་དེ་བཞིན་གཤེགས་པ་ཐམས་ཅད་ཀྱི་
གསང་བའི་ཆོས་ཉིད་ནི་མིང་པོ་གསུམ་གྱི་ཆོས་རྣམས་སོ། །ཆོས་ཐམས་ཅད་མི་ཁོ་ན་སྟེ་མིང་པོའོ། །དེ་རྣམས་ཀྱི་སྤྲོས་པ་ནི་ཕྱག་རྒྱ་དང་དཀྱིལ་འཁོར་གྱི་རྣམ་པར་རྟོག་པའོ། །དེའི་སྤྲོས་པ་མེད་པ་ནི་གཉིས་སུ་མེད་པའི་ཡེ་ཤེས་ལྷག་པར་རྟོགས་པ་ཉིད་ཀྱིས་རྣམ་པར་རྟོག་པ་ཐམས་ཅད་བྲལ་བའི་ཕྱིར་རོ་ཞེས་པ་སྤྲོས་པ་མེད་པའོ། །བདེ་བ་ཆེན་པོའི་རྡོ་རྗེ་ནི་རྣམ་པར་སྣང་མཛད་ཆེན་པོ་སྟེ་དེ་ཁོ་ན་དོན་དམ་པའི་དམ་ཚིག་སྟེ་མིང་པོ་གསུམ་བསྐྱེད་པའི་དམ་ཚིག་རྒྱུར་གྱུར་པ་དེ་ལ་དེ་སྐད་ཅས་བྱའོ། །རྡོ་རྗེ་ནི་དེ་ཁོ་ན་མིང་པོ་གསུམ་པོ་དེ་རྣམས་ཀྱི་ཆོས་ཉིད་ནི་རྡོ་རྗེའི་ཆོས་ཉིད་འབྲས་བུ་ཐམས་ཅད་ཀྱི་ཐོག་མ་ཉིད་དོ། །མཉམ་པ་ཉིད་དུ་ཡོད་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སྟེ། །དེ་ལ་དེ་བཞིན་དུ་གསུངས་སོ། །འདོད་ཆགས་ཆེན་པོ་ནི་སྙིང་རྗེ་ཆེན་པོ་སྟེ། དེའི་མཆོག་ཏུ་གྲུབ་པ་ནི་མཆོག་ཉིད་དོ། །བྱང་ཆུབ་སེམས་དཔའ་ཆེན་པོ་རྣམས་ཀྱི་ཞེས་པ་ནི་བྱང་ཆུབ་ཆེན་པོའི་རང་བཞིན་གྱི་སེམས་དཔའ་རྣམས་ཀྱིའོ། །བདེ་བ་ཆེན་པོ་མཆོག་ཏུ་གྲུབ་པར་འཇུག་པར་འགྱུར་རོ་ནི་རྣམ་པར་སྣང་མཛད་ཆེན་པོ་ཉིད་དུ་སྐྱེ་བར་འགྱུར་རོ། །དེ་ཡང་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གྲུབ་པ་འདོད་ཆགས་རྣམ་པར་དག་པའི་བདག་ཉིད་ཅན་ཚངས་པས་སྤྲུལ་པའི་དོན་དུ་འཇུག་པར་འགྱུར་རོ། །དེ་ཡང་བདུད་ཆེན་པོ་ཐམས་ཅད་རབ་ཏུ་འཇོམས་པ་མཆོག་ཏུ་གྲུབ་པས་ཁྲོ་བ་རྣམ་པར་དག་པའི་རང་བཞིན་དབང་ཕྱུག་ཆེན་པོ་སྤྲུལ་པའི་ཕྱིར་འཇུག་པར་འགྱུར་རོ། །དེ་ཡང་འཇིག་རྟེན་གསུམ་པོ་མཐའ་དག་གི་དབང་ཕྱུག་སྟེ། བདག་པོ་མཆོག་ཏུ་གྲུབ་པས་གཏི་མུག་རྣམ་པར་དག་པ་ནི་རང་བཞིན་ཁྱབ་འཇུག་གི་ཕྱིར་འཇུག་པར་འགྱུར་རོ། །དེ་འང་རིམ་པ་ལས་མ་ལུས་ཤིང་ལུས་པ་མེད་པའི་སེམས་ཅན་གྱི་ཁམས་ཡོངས་སུ་སྐྱོབ་པ་སེམས་ཅན་ཐམས་ཅད་ལ་ཕན་པ་དང་བདེ་བའི་མཆོག་ཤིན་ཏུ་མཐར་ཐུག་པ་བདེ་བ་ཆེན་པོ་མཆོག་ཏུ་གྲུབ་པར་འཇུག་པར་འགྱུར་རོ། །དེ་རྒྱུ་ཅིའི་ཕྱིར་ཞེ་ན་ཞེས་བྱ་བ་ལ་སོགས་པས་སྲིང་མོའི་དཀྱིལ་འཁོར་གྱི་དོན་ཉེ་བར་བསྟན་པ་གསུངས་པ། གང་གི་ཕྱིར་མཁས་མཆོག་དེ་ལྟ་བུ་ཇི་སྲིད་འཁོར་བའི་གནས་སུ་གནས་པ་དེ་མི་གནས་པའི་མྱ་ངན་ལས་འདས་པས་གནས་པར་གྱུར་པ་དེ་སྲིད་དུ་
སེམས་ཅན་གྱི་དོན་མཉམ་མེད་དེ་ཕུལ་དུ་བྱུང་བ་མྱ་ངན་ལས་མི་འདའ་བར་བྱེད་པར་ནུས་སོ། །དེའི་ཕྱིར་སྲིང་མོ་སྤྲུལ་པ་རྣམས་ཀྱིས་ཀྱང་སེམས་ཅན་གྱི་ཁམས་ཡོངས་སུ་སྐྱོབ་པ་ལ་སོགས་པ་བྱེད་དོ། །དེ་ཁོ་ན་ཡོངས་སུ་གསལ་བར་བྱེད་པ་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བ་ལ་སོགས་པ་གསུངས་པ། ཤེས་རབ་ཀྱི་ཕ་རོལ་ཏུ་ཕྱིན་པ་ཁོ་ན་ཐབས་དང་ཡེ་ཤེས་ཏེ་དེའི་བྱིན་གྱི་རླབས་དེས་སྲིང་མོ་རྣམས་འགྲུབ་སྟེ་ལས་རྣམས་ཐམས་ཅད་རྣམ་དག་པ་ནི་སེམས་ཅན་ཐམས་ཅད་ཀྱི་ལས་ཡོངས་སུ་སྤྱོད་པའི་སྒོ་བ་ཡིས་སྲིད་བདག་པར་འགྱུར་རོ། །འཇིག་རྟེན་པའི་སྲིང་མོ་ལྟ་བུ་ཞེས་པ་ནི་མ་ཡིན་ནོ་ཞེས་སོ། །གལ་ཏེ་དེ་ལྟ་བུ་དངོས་ལས་འདོད་ཆགས་ལ་སོགས་པ་ཉིད་ཀྱིས་ཅི་ལྟར་སེམས་ཅན་འདུལ་བར་འགྱུར་ཞེ་ན་ཆགས་སོགས་ཞེས་པ་ལ་སོགས་པས་གསུངས་པ། དུལ་བར་བྱེད་པ་ཞེས་པ་འདུལ་བ་སྟེ་འདོད་ཆགས་ལ་སོགས་པས་འདུལ་བའི་འཇིག་རྟེན་ནི་གང་ལས་ཀུན་ནས་སྲིད་པར་ཏེ་འཁོར་བར་སྡིག་པ་བྱེད་པར་འགྱུར་བ་དེའི་ཕྱིར། དེ་རྣམས་རྣམ་པར་སྦྱང་བའི་དོན་དུ་སྲིད་མོའི་གཟུགས་ཀྱིས་འདུལ་བར་བྱེད་དོ། །རང་ཉིད་ནི་བདག་ཁོ་ན་སྟེ་མཁས་མཆོག་ཅེས་སྦྱར་བར་བྱའོ། །དེ་ལྟ་མོད་ཀྱི་བུད་མེད་སྤྲུལ་པས་ཀྱང་མཆོག་ཏུ་འདུག་པར་བྱེད་དོ་ཞེས། ཇི་ལྟར་པདྨ་ཞེས་བྱ་བ་ལ་སོགས་པ་གསུངས་པ། ཇི་ལྟར་ཤིན་ཏུ་དམར་པའི་པདྨ་ཚོན་གྱི་ཉེས་པས་གོས་པར་མི་འགྱུར་རོ། །དེ་བཞིན་དུ་འགྲོ་བ་ལ་ཕན་པ་རྣམས་བུད་མེད་ལ་སོགས་པ་སྤྲུལ་པས་དེ་ལ་ཕན་པ་རྣམས་འདུལ་བར་བྱེད་པ་གང་ཡིན་པ་ལ་སྲིད་པའི་བག་ཆགས་ཀྱི་སྐྱོན་གྱིས་གོས་པར་མི་འགྱུར་རོ་ཞེས་པའོ། །གང་གི་ཕྱིར་དེ་ལྟ་བུ་ཡིན་པ་དེའི་ཕྱིར་སྲིང་མོ་སྤྲུལ་པར་བྱད་དོ་ཞེས་དཀྱུས་ཀྱི་དོན་ཉེ་བར་བསྟན་པ་འདོད་ཆགས་ཆེན་པོ་ཞེས་པ་ལ་སོགས་པ་གསུངས་པ་ཚིག་བཞི་པོ་ཡང་སྲིད་མོ་བཞི་པོ་འདི་དག་གི་སྒོ་ནས་རིམ་པ་བཞིན་སྦྱར་བར་བྱའོ། །ཨོཾ་བོ་དྷི་ཙིཏྟ་བཛྲ་ཞེས་པ་ལ་སོགས་པ་སྟེ་ཤེས་རབ་ཀྱི་ཕ་རོལ་ཏུ་ཕྱིན་པའི་ཚིག་ཉི་ཤུ་རྩ་ལྔ་པོ་རྣམས་ཀྱི་རིམ་པས་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཆེན་པོའི་སེམས་སྐྱེད་པར་བྱེད་པ་དང༌། ཀུན་དུ་བཟང་པོའི་སྤྱོད་པ་རྫོགས་པར་བྱེད་པ་
དང༌། །སེམས་ཅན་ཐམས་ཅད་ཀྱི་དོན་དང་འཕོ་བ་དང་སྐྱེ་བའི་ས་དང༌། གཞོན་ནུ་རྩེ་བ་ཀུན་དུ་སྟོན་པ་དང༌། མངོན་པར་འབྱུང་བ་དང༌། བྱ་དཀའ་བ་སྤྱོད་པ་སྟོན་པ་དང༌། བྱང་ཆུབ་ཀྱི་སྙིང་པོར་གཤེགས་པ་དང༌། བདུད་ཐམས་ཅད་བཏུལ་བ་དང༌། བྱང་ཆུབ་ཆེན་པོར་མངོན་པར་རྫོགས་པར་སངས་རྒྱས་པ་དང༌། ཆོས་ཀྱི་འཁོར་ལོ་བསྐོར་བ་དང༌། མུ་སྟེགས་ཐམས་ཅད་ཚར་གཅོད་པ་དང༌། འཇིག་རྟེན་གསུམ་ལས་རྣམ་པར་རྒྱལ་བ་དང་ལྷ་ལས་བབས་པ་དང༌། འདུས་པ་ཆེན་པོས་བྱིན་གྱིས་བརླབས་པ་དང༌། གདུག་པ་ཐམས་ཅད་འདུལ་བ་དང༌། འདུལ་བ་ལ་སོ་སོར་འཇོག་པ་དང༌། ངན་འགྲོ་ཐམས་ཅད་གདོན་པ་དང༌། མདོ་སྡེ་ཐམས་ཅད་ཀྱི་མཐར་ཐུག་པར་གསུངས་པ་དང༌། རྟོག་པ་ཐམས་ཅད་བྱིན་གྱིས་བརླབས་པ་དང༌། དངོས་གྲུབ་ཐམས་ཅད་རབ་ཏུ་སྩོལ་བ་དང༌། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་སོ་སོར་ཐོབ་པ་རྣམ་པར་འབྱེད་པའི་སྒྲུབ་ཐབས་སོ་ཞེས་གསལ་བར་བྱེད་དོ། །ཤེས་རབ་ཀྱི་ཕ་རོལ་ཕྱིན་པའི་དཀྱིལ་འཁོར་ཡང་འདི་རྣམས་ཀྱི་ཉེ་བར་སྦྱོར་བའོ་ཞེས་རྟོགས་པའོ། །ལས་ཀྱི་སྒྲིབ་པ་དང་ལྡན་པ་ཡང་སྔགས་སྒྲུབ་པ་ལ་རང་གི་ཕྱག་རྒྱ་སྡིག་པ་དྲལ་བར་བྱེད་པའི་སྔགས་དང་རབ་ཏུ་སྦྱར་བར་བྱའོ། །སྡིག་པ་དྲལ་བའི་ཕྱག་རྒྱ་དང་སྔགས་སོ། །ཆོས་ཀྱི་དཀྱིལ་འཁོར་གྱི་དབང་དུ་བྱས་ནས་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་པ། འཁོར་ལོས་སྒྱུར་བ་ཆེན་པོ་བཞི་པོ་རྣམས་ཀྱི་ནི་མི་བསྐྱོད་པ་ལ་སོགས་པའི་རང་བཞིན་ཨ་ཡིག་ལ་སོགས་པ་བཞི་པོ་རྣམས་ཀྱིས་སོ། །སྙིང་པོ་གཉིས་པ་ནི་འདིར་གཙུག་ཏོར་རྒྱལ་པོའི་རང་བཞིན་ཏེ། དེ་ཡང་བཅོམ་ལྡན་འདས་རྣམ་པར་སྣང་མཛད་དང་ཐ་མི་དད་པར་བལྟ་བར་བྱའོ། །གདུགས་དཀར་པོ་ལ་སོགས་པ་ཡང་མི་བསྐྱོད་པ་ལ་སོགས་པའི་ངོ་བོའོ། །གདོད་མ་ནས་མ་སྐྱེས་པའི་ཕྱིར་རོ་ཞེས་པ་ནི་དེ་ཁོ་ན་ཉིད་དུ་ཡང་འདི་རྣམས་དེའི་སྐྱེད་པ་པོ་ལས་འདས་པར་ཁོང་དུ་ཆུད་པར་བྱའོ། །དགོས་པ་ནི་དེ་རྣམས་རྒྱུན་དུ་སྔགས་པས་ཇི་ལྟ་བ་བཞིན་མངོན་པར་རྫོགས་པར་བྱང་ཆུབ་པ་མི་བསྐྱོད་པ་ལ་སོགས་པའི་དེ་བཞིན་གཤེགས་པས་ཡོངས་སུ་བསྐོར་ཏེ། ལྷུན་པོའི་
ཁང་པ་བརྩེགས་པར་བྱོན་ནས་འདི་རྣམས་ཀྱི་སྙིང་པོའི་དོན་སྣང་བས་སོ་སོ་རང་རང་གི་ཐུགས་ཀ་ནས་ཕྱུང་ནས། མི་བསྐྱོད་པ་ལ་སོགས་པའི་དེ་བཞིན་གཤེགས་པའི་བདག་ཉིད་ཅན་རང་གི་ཐུགས་ཀའི་རྡོ་རྗེ་རྣམས་ལ་གཞག་པར་བྱའོ། །དེ་ནས་འོད་ཟེར་དེ་བཞིན་གཤེགས་པ་ལྔའི་ཕྲ་རབ་ཀྱི་བདག་ཉིད་ཕྱུང་སྟེ། སྤྲོ་ཞིང་བསྡུས་ནས་སླར་ཡང་ཐུགས་ཀར་དགུག་པ་ལ་སོགས་པ་ཐམས་ཅད་ཀྱིས་ཡོངས་སུ་གྱུར་པ་ཡང་ཕྱུང་སྟེ། ཕྱི་རོལ་དུ་ཇི་ལྟ་བ་རང་གི་ལྷའི་ཕྱག་རྒྱའི་གཟུགས་ཀྱིས་རང་གི་གནས་རྣམས་སུ་ངེས་པར་དགོད་པར་བྱའོ། །དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་ནི། ཆོས་ཀྱི་དབྱིངས་ཀྱི་དཀྱིལ་འཁོར་ཏེ་དེའི་བཀོད་པ་ནི་དེ་ཇི་ལྟ་བུ་བཞིན་དུ་གསུངས་པའི་སྙིང་པོའི་དོན་མངོན་དུ་བྱེད་པ་ལས་བྱིན་གྱིས་བརླབས་པའི་ཏིང་ངེ་འཛིན་གང་ཡིན་པ་དེ་ལ་དེ་སྐད་ཅེས་བརྗོད་དོ། །དེ་ལ་སྙོམས་པར་ཞུགས་པ་སྟེ་མངོན་དུ་མཛད་ནས་སོ། །དེ་བཞིན་གཤེགས་པ་ཐམས་ཅད་ཀྱི་དམ་ཚིག་ནི་དཀྱིལ་འཁོར་ཏེ་དེའི་འབྱུང་གནས་སོ། གང་གི་ཕྱིར་རྡོ་རྗེ་སྙིང་པོའི་སྤྱན་སྔར་གསུངས་པའི་སྙིང་པོ་ཡིན་པའི་ཕྱིར་ཏེ། དེ་བཞིན་དུ་བརྗོད་དོ། །དེ་ཉིད་ནི་ཕྱིན་གྱིས་རློབ་པའི་ཏིང་ངེ་འཛིན་གཉིས་སུ་མེད་པ། ཆོས་ཐམས་ཅད་མཚན་ཉིད་གཅིག་པ་ལ་སོགས་པ་དེ་ལྟ་བུ་ལ་དམིགས་པ་གང་ཡིན་པ་དེ་བཞིན་དུ་བརྗོད་པར་བྱའོ། །དེ་ལ་སྙོམས་པར་ཞུགས་པ་སྟེ་མངོན་སུམ་དུ་མཛད་ནས་སོ། །ཕྱི་རོལ་དཀྱིལ་འཁོར་ཞེས་པ་སྙིང་པོའི་དཀྱིལ་འཁོར་ལ་ལྟོས་ནས་སོ། །དེའི་འམ་ཞེས་པ་དབང་ཆེན་གྱི་ཕྱིའི་དཀྱིལ་འཁོར་ཉིད་ཀྱི་ཁོར་ཡུག་དེའིའོ། །བདུད་རྩི་འོད་ཅེས་པ་དཀར་པོའོ། །བསྐོར་བ་ཞེས་པ་ཟླུམ་པོར་བྱའོ། །དེ་ལྟར་གྱི་སྒྲས་བསྐོར་བར་བྱ་ཞེས་པ་གཞན་ལ་བསྒྲེ་བར་བྱའོ། །འཁོར་ལོ་ནི་དབང་ཆེན་གྱི་དཀྱིལ་འཁོར་ཏེ་དེ་འདྲབ་མཚུངས་པ་སྟེ་གྲུ་བཞི་བ་ཉིད་ལ་སོགས་པའི་ཚུལ་ནི་འཁོར་ལོ་འང་བར་རོ། །རྡོ་རྗེའི་ཐིག་གིས་ཡོངས་སུ་བསྐོར་བ་ནི་རྡོ་རྗེའི་ཕྲེང་བས་ཡོངས་སུ་བསྐོར་བའོ། །དེ་བཞིན་དུ་འཁོར་ལོ་རྣམ་པ་གཉིས་ཞེས་པ་ཟླུམ་པའི་དཀྱིལ་འཁོར་གཉིས་སོ། །ནང་གི་དཀྱིལ་འཁོར་ཞེས་པ་བདུན་པར་རིག་པར་བྱེད་དེ་དབང་ཆེན་གྱི་དཀྱིལ་འཁོར་
ལའོ་ཞེས་པའི་དོན་ནོ། །མཉམ་ཞེས་པ་གྲུ་བཞི་པ་ལ་སོགས་པས་མཚུངས་པའོ། །རྡོ་རྗེ་འཁོར་ལོས་རྣམ་པར་བརྒྱན། །ཞེས་པ་རྡོ་རྗེའི་ཐིག་གིས་ཡོངས་སུ་བསྐོར་བའི་སྙིང་པོའི་དཀྱིལ་འཁོར་གྱིས་སྤྲས་པའོ། །ཡང་ན་ནི་འཁོར་ལོ་འདྲ་བར་ཞེས་པ་ཟླུམ་པོའོ། །རྡོ་རྗེའི་ཐིག་གིས་ཡོངས་སུ་བསྐོར་བ་དེ་བཞིན་དུ་འཁོར་ལོའི་ཕྲེང་བས་ཡོངས་སུ་རྫོགས་པའོ། །དེ་ལྟར་འཁོར་ལོ་རྣམ་པ་གཉིས་པ་ཟླུམ་པའི་དཀྱིལ་འཁོར་གཉིས་སོ། །ནང་གི་དཀྱིལ་འཁོར་ཞེས་པ་སྔར་བརྗོད་པའི་གྲུ་བཞི་པའི་དཀྱིལ་འཁོར་རོ། །དེ་བཞིན་དུ་སྙིང་པོའི་འཁོར་ལོ་གཉིས་པ་ལ་ཆུ་ཞེས་དེ་ཇི་སྲིད་དུ་རྡོ་རྗེ་འཁོར་ལོས་རྣམ་པར་བརྒྱན་པ་སྟེ་སྙིང་པོའི་འཁོར་ལོས་སྤྲས་པའོ་ཞེས་པ་ནི་གཞན་ནོ། །གྲུ་གཅིག་པ་ཞེས་པ་ནི་གང་འདིའི་ནང་གི་དཀྱིལ་འཁོར་དུ་མངོན་པར་འདོད་པའི་དབང་ཆེན་ནོ། །ཟླུམ་པོ་ནི་དེ་ནས་ཆུའོ། །དེ་ནས་ཀྱང་གཞན་གྲུ་གསུམ་གྱི་རྣམ་པ་མེའོ། །དེ་ནས་ཆེས་ཕ་རོལ་དུ་ཟླ་བ་བྱེད་པ་དང་མཚུད་པའི་རླུང་ངོ༌། །དེ་ནས་ཆོས་ཕ་རོལ་དུ་ཡང་དཀྱིལ་འཁོར་གྲུ་གསུམ་གཅིག་པའོ། །ཕྱིའི་དཀྱིལ་འཁོར་གྱི་ཕྱེད་ཀྱིས་སྙིང་པོའི་འཁོར་ལོའོ། །དེའི་ཚེ་ཚད་ཀྱིས་གཞན་རིག་པར་བྱའོ། །པདྨ་ལོ་མ་བརྒྱད་པ་ལ་སངས་རྒྱས་ཐམས་ཅད་དེ་རྣམས་པར་སྣང་མཛད་ལ་སོགས་པ་གཞག་པར་བྱའོ། །དཀྱིལ་འཁོར་རྣམས་ཀྱི་དབུས་ཉིད་དུ་ནི་མི་བསྐྱོད་པ་ལ་སོགས་པ་དང་བདུན་པོ་རྣམས་ཀྱིའོ། །དམ་ཚིག་མཆོག་ནི་སེམས་མ་རྡོ་རྗེ་མ་ལ་སོགས་པའོ། །རིམ་གྱི་མཐར་ཞེས་པ་ཤར་ལ་སོགས་པའི་ཕྱོགས་སུ་གཡས་སྐོར་གྱིས་སོ། །སེམས་མ་རྡོ་རྗེ་མའི་མདུན་དུ་སེང་གེའི་གདན་གྱི་གནས་སུ་གང་ཞིག་རྩིབས་བརྒྱད་པ་དང་བཅུ་དྲུག་པ་ཅིག་འཁོར་ལོས་སྒྱུར་པའོ། །རྒྱལ་བའི་གཙུག་ཏོར་ལ་སོགས་པ་མེ་ལ་སོགས་པའི་ཕྱོགས་བྲལ་རྣམས་སུ་ཡོངས་སུ་བསྐོར་བའོ། །སངས་རྒྱས་ཐམས་ཅད་ནི་རྟག་པ་ལ་སོགས་པའི་དེ་བཞིན་གཤེགས་པ་དེ་རྣམས་ཀྱི་རིམ་པའི་མཐར་ཐུག་པར་གཙུག་ཏོར་ལྔ་པོ་རྣམས་སོ། །དཀྱིལ་འཁོར་ཀུན་དུ་ནི་རྟག་པའི་དཀྱིལ་འཁོར་དུའོ། །རིན་ཆེན་འབྱུང་བ་ལ་སོགས་པའི་དཀྱིལ་འཁོར་ནི་ལྗང་གུ་དང་དམར་པོ་དང༌། སྔོན་པོའི་ཁ་དོག་ཅན་དུ་རིམ་པས་
ཁོང་དུ་ཆུད་པར་བྱའོ། །དང་པོ་ནི་ཁ་དོག་ལྔ་པའོ། །ཆུ་ལ་སོགས་པ་ནི་གསེར་གྱི་རེ་ཁཱ་གཅིག་པ་བྲི། །འཁོར་ལོའི་དཀྱིལ་འཁོར་ཞེས་པ་ནི་ཆུའིའོ། །དེར་ནི་རྣམ་གཟིགས་ལ་སོགས་པ་བྲི་བར་བྱའོ། །དཀྱིལ་འཁོར་ཀུན་དུ་སྟེ་ཕྱོགས་བཞིའི་དཀྱིལ་འཁོར་དུའོ། །ཕྱིར་ནི་མེའི་དཀྱིལ་འཁོར་དུ་རིག་པར་བྱའོ། །འཁོར་ལོའི་གྲྭ་ནི་ལེགས་གནས་པར། །ཞེས་པ་ནི་སྙིང་པོའི་དཀྱིལ་འཁོར་གྱིའོ། །ཕྱི་ཡི་འཁོར་ལོའི་གྲྭ་རྣམས་སུ། །ཞེས་པ་ནི་དབང་ཆེན་གྱི་དཀྱིལ་འཁོར་གྱི་གྲྭ་རྣམས་སུའོ། །ཕྱི་ཡི་དཀྱིལ་འཁོར་གྲྭ་རྣམས་སུ། །ཞེས་པ་ནི་དེ་ཉིད་ཀྱི་སྒོའི་གྲྭ་རྣམས་སུ་མི་བསྐྱོད་པ་ལ་སོགས་པ་དང་ཐ་དད་པ་མེད་པ་ཉིད་ཀྱི་ས་ལ་སོགས་མིང་སྟེ་དེ་ཁོ་ན་ཉིད་ཀྱི་རྣམ་པར་བསྟན་པར་བལྟ་བར་བྱའོ། །རྣམ་པར་སྣང་མཛད་དང་ཐ་མི་དད་པ་ཉིད་ཀྱི་ཕྱིར་ཆོས་ཀྱི་དབྱིངས་སོ། །སྒོ་སྐྱོང་ནི་རྡོ་རྗེ་ལྕགས་ཀྱུ་ལ་སོགས་པ་རྣམས་སོ། །དཀྱིལ་འཁོར་གཉིས་པ་རུ་ཞེས་པ་ནི་མེ་ལྷའི་དཀྱིལ་འཁོར་ལ་ལྟོས་ནས་གཉིས་པ་སྟེ་རླུང་ལྷའི་དཀྱིལ་འཁོར་རོ། །དེར་ཤར་ལ་སོགས་པའི་ཕྱོགས་རྣམས་སུ་རིམ་པས་སངས་རྒྱས་ཀྱི་ཡུམ་ལ་སོགས་པ་བྲི་བར་བྱའོ། །དེ་ནས་བློ་ལྡན་དེས་འཐོན་ནས། །ཞེས་པ་ནི་དཀྱིལ་འཁོར་ལྔ་པ་རྣམས་སུ་ཁྲོ་བོ་གཞན་གྱིས་མི་ཐུབ་པ་ལ་སོགས་པའོ། །དེ་ནས་ཀྱང་འཐོན་ནས་དྲུག་པར་རང་སངས་རྒྱས་རྣམས་སོ། །དེ་ནས་ངེས་པར་འཐོན་ནས་བདུན་པར་རྒྱལ་བའི་ཉན་ཐོས་རྣམས་དང་ཚངས་པ་ལ་སོགས་པའི་འཇིག་རྟེན་པ་རྣམས་སོ། །ཕྱི་རོལ་གྱི་ཞེས་པ་སྒོའི་ཆ་ལ་ཤར་ལ་སོགས་པའི་ཕྱོགས་སུ་གཞན་གྱིས་མི་ཐུབ་པ་ཞེས་བྱ་བ་ལ་སོགས་པའི་ཕྱག་རྒྱའོ། །དེ་ལྟ་བུའི་གྲུ་བཞི་པ་ཞེས་བྱ་བ་ལ་སོགས་པ་རྣམས་ཀྱི་དང་པོ་དབང་ཆེན་གྱི་དཀྱིལ་འཁོར་མཆོག་ཏུ་འཛིན་པར་བྱེད་དོ། །འགྲོ་བ་ལྔ་ནི་ཁོར་ཡུག་གི་ནང་དུའོ། །རྒྱ་མཚོ་བདུན་པོ་ནི་འོག་ཏུ་བྲི་བར་བྱའོ། །རིམ་གྱིས་ཞེས་པ་ནི་ལུགས་མ་ལ་སོགས་པའི་གཟུགས་བརྙན་གྱིས་སོ། །བཀོད་ནས་ནི་ཀུན་དུ་བཞག་ནས་སོ། །ཉེ་བར་སྤྱོད་པ་ཐམས་ཅད་ཀྱི་ཚོགས་ཞེས་པ་ནི་མེ་ཏོག་གི་རབ་ཏུ་བྱེད་པ་དང༌། མར་མི་ལ་སོགས་པ་ཐམས་ཅད་རབ་ཏུ་སྤྱིན་པས་སོ། །
མཆོད་པ་བྱས་ནས་ཞེས་བྱ་བ་ནི་ནམ་མཁར་གནས་པ་རྣམས་ཀྱིས་གཅིག་པ་ཅན་དུ་བྱས་ནས་མཆོད་དེའོ། །དེ་ནས་རྒྱན་མཐའ་དག་ལ་སོགས་པ་རྣམས་ཀྱིས་རྣམ་པར་སྣང་མཛད་ཀྱི་རྣལ་འབྱོར་བསྟན་པ་གསུངས་པ་ཉེ་བར་བཞུགས་ཏེ་ཞེས་པ་ལ་སོགས་པ་སྟེ། ཉེ་བར་འཇུག་པ་ལ་སོགས་པའི་རྣལ་འབྱོར་གྱི་རིམ་པས་ཕྱག་རྒྱ་ཆེན་པོ་བཅིངས་ཏེ། ཡེ་ཤེས་སེམས་དཔའ་ཇི་ལྟ་བ་བཞིན་མདུན་དུ་དགུག་པ་ལ་སོགས་པ་བྱས་ནས་བྱིན་གྱིས་བརླབ་པའི་ཕྱིར་དེ་བཞིན་གཤེགས་པ་ཐམས་ཅད་ལེགས་སོ་ཞེས་བྱ་བའི་སྦྱོར་བས་བཀུག་སྟེ་དབང་བསྐུར་ནས་སྤྲོ་བ་དང་བསྡུ་བ་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ཆེན་པོ་དེ་བསྒོམ་པར་བྱའོ། །དེ་བཞིན་གཤེགས་པ་ཐམས་ཅད་ནི་རྣམ་པར་སྣང་མཛད་དེ་དེ་དག་དང་ཐ་མི་དང་པ་གཉིས་ཀྱི་ཕྱིར་རོ། །དེ་ཁོ་ན་རྡོ་རྗེ་སེམས་དཔའ་སྟེ་དབྱེར་མི་ཕྱེད་པའི་ཕྱིར་རོ། །ཀུན་དུ་བཀང་སྟེ་ཞེས་པ་སྤྲོས་ནས་དང་བསྡུས་ནས་སོ། །དེས་དེ་བཞིན་གཤེགས་པ་ཐམས་ཅད་རབ་ཏུ་འབབ་པས་ཏེ། ཡང་དག་པར་སྡུད་པའི་རང་བཞིན་གྱིས་རྡོ་རྗེ་སེམས་དཔའ་སླར་ཡང་རྡོ་རྗེ་ཧཱུཾ་མཛད་ཀྱི་ཕྱག་རྒྱ་ཆེན་པོ་རང་གི་ལུས་ལ་མངོན་པར་ཞུགས་ནས་ཏེ་དེ་བསྒོམས་ནས་དེའི་ང་རྒྱལ་དང་ལྡན་པས་ཧཱུཾ་ཡིག་བཞི་འདོན་ཅིང་དཀྱིལ་འཁོར་དུ་ཞུགས་ནས་ཕྲེང་བ་ཕུལ་བ་སྟེ་ལག་པ་གར་བསྐོར་བས་བླངས་ལ་ཧཱུཾ་ཡིག་བཞིས་དེ་ཉིད་རང་གི་སྤྱི་བོར་བཞག་ལ་གཡས་བརྐྱང་དང་གཡོན་པ་རྐང་དང་མཉམ་པ་དང་ས་གས་ཕྱོགས་བཞི་པོ་རྣམས་སུ་བགེགས་ཐམས་ཅད་ལ་ཕྱག་རྒྱས་བསྣུན་པར་བྱའོ། །རོལ་པ་དང་བཅས་དེ་བཞིན་གཤེགས་པ་ཐམས་ཅད་ལ་ཕྱག་བྱའོ། །དེ་ནས་སྒོ་སོ་སོར་གཡོན་བརྐྱང་གིས་གནས་ཤིང་ཡོངས་སུ་བསྐོར་ཏེ། ཁྲོ་བོའི་བལྟ་པས་ཀུན་དུ་བལྟས་བས་ཧཱུཾ་ཡིག་བཞི་ཡང་དག་པར་བཟླས་ཏེ་སྒོ་རྣམས་དབྱེ་བར་བྱའོ། །སླར་ཡང་རྣམ་པར་སྣང་མཛད་དུ་གྱུར་ནས། ཇི་ལྟར་མངོན་པར་འདུས་བྱས་པའི་བུམ་པ་ལ་ཨོཾ་ལ་སོགས་པ་དང་བཛྲ་ཨུཏ་ཀས་བརྒྱད་ལྷག་པའི་སྟོང་རྡོ་རྗེ་མེ་ཏོག་གི་ཕྲེང་བ་ནས་བཟུང་སྟེ་དམ་ཚིག་གི་ཕྱག་རྒྱས་རང་གི་སྔགས་ཀྱང་བརྒྱད་བརྒྱ་བཟླས་པར་བྱ་སྟེ། གཞན་ཡང་སོ་སོར་རང་གི་སྔགས་ཀྱིས་བརྒྱད་བརྒྱ་མངོན་པར་བཟླས་པར་བྱའོ། །གང་བའི་བུམ་
པ་སྒོར་གནས་པའི་བུམ་པ་ལ་ཡང་གཙོ་བོའི་སྔགས་ཀྱིས་བཟླས་ནས་ཇི་ལྟ་བ་བཞིན་དུ་གཞག་པར་བྱའོ། །དམ་ཚིག་གི་ཕྱག་རྒྱ་བཅིངས་པ་ཞེས་བྱ་བ་ལ་སོགས་པ་རྣམས་ཀྱིས་རྣམ་པར་སྣང་མཛད་ཀྱི་རྣལ་འབྱོར་ཆེན་པོས་བསྡུས་ཏེ། རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་བཅིངས་ནས། ལས་ཀྱི་ཕྱག་རྒྱ་དང༌། རང་གི་སྙིང་པོ་ཨཱཿ་ཡི་གེ་དང་ལྷན་ཅིག་ཏུ་འདོན་པར་ཤས་པའི་ནམ་མཁའ་ཐམས་ཅད་ཀུན་དུ་ཡང་དག་པར་འདུ་བའི་རྡོ་རྗེ་ཀུན་ནས་མངོན་དུ་བྱས་ཏེ་དེ་ལ་དེའི་ང་རྒྱལ་བསྐྱེད་ནས་དེ་ལ་ཡང་རྣམ་པར་སྣང་མཛད་བསམས་ནས་དེ་ལ་དེ་ལྟ་བུའི་ང་རྒྱལ་དང་ལྡན་པས་རྡོ་རྗེ་ལྕགས་ཀྱུ་ལ་སོགས་པ་རྣམས་ཀྱིས་ཞེས་པ་དགུག་པ་ལ་སོགས་པ་ཅན་དུ་བྱས་ནས་རང་གི་ཕྱག་རྒྱལ་སོགས་པ་དོན་དུ་གཉེར་བའི་བཀའ་ཐོབ་པས་མངོན་པར་དབང་བསྐུར་ཏེ་རྡོ་རྗེ་གཟུང་བ་ལ་སོགས་པ་བྱས་པས་སླར་ཡང་བདག་ལ་བྱིན་གྱིས་བརླབ་པ་ལ་སོགས་པ་བྱས་ནས་སྡུད་པར་བྱའོ། །དེ་ནས་མངོན་པར་བསྟོད་ལ་དགུག་པ་ལ་སོགས་པ་སྔོན་དུ་འགྲོ་བས་ཕྱག་རྒྱ་བཞིས་རྒྱས་བཏབ་སྟེ་སོ་སོ་རང་གི་ཏིང་ངེ་འཛིན་དུ་བྱས་ནས། ཨཱཿ་ཡིག་ལ་སོགས་པའི་སྙིང་པོ་སོ་སོ་རེ་རེ་ལ་ལྔ་བརྒྱ་དང་བཅས་པའི་བརྒྱ་བཟླ་བར་བྱའོ། །ཨོཾ་སརྦ་ཏ་ཐཱ་ག་ཏ་ཞེས་བྱ་བ་ལ་སོགས་པས་གསོལ་པ་བཏབ་པར་བྱའོ། །མངོན་པར་དབང་བསྐུར་ནས་རྡོ་རྗེའི་གར་དང་བཅས་པས་སྒེག་མོ་ལ་སོགས་པས་མཆོད་པར་བྱའོ། །ཕྱག་འཚལ་བའི་ཐལ་མོ་བཅིངས་ནས་ཞེས་པ་ནི་ཐལ་མོ་ཁ་སྦྱོར་དུ་བཅིངས་ནས་སོ། །ལག་པ་གཉིས་ཁ་སྦྱོར་དུ་བྱས་ཏེ་མིང་མེད་གཉིས་ནང་དུ་བཅུག་ནས་སྡིགས་མཛུབ་ཟུང་གུང་མོ་ཁབ་ལྟར་དུ་བྱས་པའི་ཚིགས་གསུམ་པ་ནས་གང་ཙམ་གྱིས་མ་རེག་པར་གཟུང་བར་བྱའོ། །མཐེ་པོ་དང་མཐེའུ་ཆུང་ཟུང་གཉིས་དེ་ལ་མངོན་པར་ཕྱོགས་པར་གཟུང་བར་བྱའོ། །ཕྱག་རྒྱ་འདིས་འབེབས་པའི་སྔགས་གང་ཡིན་པ་དང་རབ་ཏུ་སྦྱར་བར་བྱའོ། །འཇུག་པ་ལ་སོགས་པ་རྫོགས་ནས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་མངོན་པར་དབང་བསྐུར་བར་བྱའོ། །ཅི་ལྟར་ཞེ་ན་གསུངས་པ། གྲུ་བཞི་ཞེས་བྱ་བ་ལ་སོགས་པ་སྟེ། དེ་བཞིན་གཤེགས་པ་ཐམས་ཅད་ཉིད་རྡོ་རྗེ་སྟེ་དེ་རྣམས་ཀྱི་རྡོ་རྗེ་སློབ་དཔོན་ལ་དེའི་ཚིག་གོ །
རབ་ཏུ་གཞག་ནས་ཞེས་པ་ནི་དེ་བཞིན་གཤེགས་པ་ཐམས་ཅད་ཀྱི་མདུན་དུ་ན་ཆུའི་དབང་བསྐུར་བའི་དཀྱིལ་འཁོར་བྱས་ལ་སློབ་དཔོན་རང་གིས་བཛྲ་བིད་ཀྱི་སྙིང་པོ་དང་ཁུར་ལྷན་ཅིག་ཏུ་ཡང་དག་པར་བཟླས་ནས་དམ་ཚིག་གི་ཕྱག་རྒྱས་སློབ་མ་ལ་སྙིང་པོ་འདིས་དབང་བསྐུར་བར་བྱའོ། །བཛྲ་སཏྭ། བཛྲ་རཏྣ་བཛྲ་དྷརྨཱ། བཛྲ་ཀརྨ་ཨི་དཾ་ཆེ་གེ་མོ། །ཨ་དྷི་ཏིཥྛ་སརྦ་ཏ་ཐཱ་ག་ཏ་ཨཱ་ཙཱ་ཪྻ་སྭཱ་ཧཱ། འདིས་ལན་བརྒྱར་སྤྱི་བོ་དང་སྙིང་ག་ལ་སོགས་པར་བཞག་ལ་རིམ་པས་ཐམས་ཅད་བཟླས་པར་བྱའོ། །ཡང་ན་ནི་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་སློབ་དཔོན་ནི་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་སློབ་དཔོན་ནོ། །དེའི་གོ་འཕང་ནི་རྡོ་རྗེ་སེམས་དཔའི་རྣལ་འབྱོར་པའི་མགོ་བོར་རྡོ་རྗེ་འཆང་གི་སྐུ་གཟུགས་རབ་ཏུ་བཞག་ནས་ཨོཾ་མ་ཧཱ་སུ་ཁ་ཞེས་པ་ལ་སོགས་པ་སྙིང་པོ་ཡི་གེ་བཅུ་བདུན་པ་བརྒྱར་མངོན་པར་བཟླས་ནས་སོ་ཞེས་པ་འདིས་རབ་ཏུ་བཞག་ནས་ཞེས་བརྗོད་པར་འགྱུར་རོ་ཞེས་གསུངས་པས་སོ། །ཅོད་པན་ལྔའི་དབང་གིས་མངོན་པར་དབང་བསྐུར་ཏེ་ཞེས་པ་དེ་བསྟན་པ་གསུངས་པ། བྱིན་གྱིས་བརླབ་པར་བྱ་སྟེ། འདི་སྐད་བརྗོད་པ་ཡིན་ཏེ་ཇི་ལྟར་གསུངས་པའི་རིམ་པས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་སློབ་དཔོན་གྱི་གོ་འཕང་ལ་རབ་ཏུ་བཞག་ནས་སྔགས་འདི་སྐད་འདོན་ཅིང་རྡོ་རྗེ་ཆེན་པོས་སངས་རྒྱས་ལྔའི་ཅོད་པན་གྱིས་མངོན་པར་དབང་བསྐུར་བར་བྱའོ། །དེ་ཡང་སངས་རྒྱས་རིན་པོ་ཆེའི་ཅོད་པན་ཉིད་ཀྱིས་ཡོངས་སུ་གྱུར་པར་བྱས་ཏེ་དེ་བཞིན་གཤེགས་པ་རྣམས་ཀྱི་སངས་རྒྱས་ཀྱི་ཅོད་པན་དུ་སྦྱར་བར་བྱའོ། །རྡོ་རྗེ་སེམས་དཔའ་ལ་སོགས་པའི་འཁོར་ལོས་སྒྱུར་བ་རྣམས་ཀྱིས་ལེགས་པར་དབང་བསྐུར་བ་དེ་ལ་ནི་སྦྱར་བར་མི་བྱ་སྟེ། གང་གི་ཕྱིར་གང་ཞིག་འཁོར་ལོའི་དཀྱིལ་འཁོར་དུ་འཆད་པར་འགྱུར་བ་རྡོ་རྗེ་རིན་ཆེན་གྱི་མངོན་པར་དབང་བསྐུར་བར་བྱའོ། །འཆད་པར་འགྱུར་བ་ཞེས་པ་ལ་སོགས་པས་དེ་འགོག་པར་འགྱུར་ཏེ། རྡོ་རྗེ་ཆེན་པོའི་ཕྱག་རྒྱ་ཡང་དེ་བཞིན་གཤེགས་པ་རྣམས་ཁོ་ནའི་སྟེ། དེའི་ཕྱིར་སྐབས་འདིར་དེ་རྣམས་ཁོ་ནའི་དབང་དུ་བྱས་པའོ། །དེ་ནས་གཞན་ལ་རྡོ་རྗེ་ཕྲེང་བའི་དབང་བསྐུར་བ་དང༌། རྡོ་རྗེ་རིན་ཆེན་གྱི་དབང་བསྐུར་བ་སྦྱིན་པར་བྱའོ། །གང་ལ་སྤྱི་བོར་རྡོ་རྗེ་བཀོད་པ་སྔོན་དུ་འགྲོ་བས་
ཆུའི་དབང་བསྐུར་བ་ནི་རྡོ་རྗེའི་དབང་བསྐུར་བའོ་ཞེས་བརྗོད་པར་བྱའོ། །དེ་རྣམས་ལ་དེ་སྦྱར་བར་མི་བྱ་སྟེ་དཀྱིལ་འཁོར་གྲུ་བཞི་པ་བྱས་ནས་ཞེས་བྱ་བ་ལ་སོགས་པ་རྣམས་ཀྱིས་བཅོམ་ལྡན་འདས་ཀྱིས་བཤད་པའི་ཕྱིར་རོ། །ཡི་གེའི་ཕྱག་རྒྱ་བཀོད་ལ་རང་གི་ལྷའི་གཟུགས་སུ་རབ་ཏུ་སྦྱོར་བར་བྱའོ་ཞེས་པ་ནི་སྤྱི་བོ་ལ་སོགས་པའི་གནས་བརྒྱད་པོ་རྣམས་སུ་སྔགས་དང་དམ་ཚིག་གི་ཕྱག་རྒྱས་བཀོད་པ་རྣམས་ཀྱིས་བྱིན་གྱིས་བརླབ་པར་བྱའོ། །སྐུ་ལ་སོགས་པའི་ཕྱག་རྒྱ་རྣམས་ཆེས་མྱུར་དུ་སྒྲུབ་པའི་ཐབས་བསྟན་པའི་ཆེད་དུ། དེ་ལ་འདི་ནི་ཞེས་བྱ་བ་ལ་སོགས་པ་གསུངས་པ་རང་གི་ལུས་རྡོ་རྗེ་སེམས་དཔའ་སྟེ་དབྱེར་མི་ཕྱེད་པའི་ཡེ་ཤས་ཀྱི་གནས་ཏེ་རྒྱུའོ། །ཅི་ལྟར་ན་རང་བཞིན་གྱིས་དབྱེར་མི་ཕྱེད་པ་ཉིད་དེ་རང་བཞིན་རང་གི་ངོ་བོ་གདོད་མ་ནས་སྐྱེ་བ་མེད་པ་ཨའི་ཡི་གེའོ། །ཤེས་རབ་ཀྱིས་ཕུང་པོ་བཤིག་པར་བྱེད་པས་མཆོག་ཏུ་ཕྲ་མོ་རྣམས་ཕན་ཚུན་རྣམ་པར་འདྲེས་པ་མ་ཡིན་པ་ཉིད་ཀྱིས་སོ། །འདི་ཞེས་པ་མཐར་གནས་པར་སྦྱར་རོ། །ལྟ་བའི་ཐིབས་པོ་ཐམས་ཅད་ངེས་པར་འཇོམས་པ་ནི་འཇིག་ཚོགས་ལ་ལྟ་བ་ལ་སོགས་པ་རབ་ཏུ་བཅོམ་པ་གང་ཡིན་པའོ། །འཇུག་པར་འགྱུར་རོ་ཞེས་པས་སོ། །རིག་པ་ནི་ཟག་པ་མེད་པའི་ཡེ་ཤེས་ཏེ་དེ་ལ་རབ་ཏུ་འཇུག་པ་ནི་ལྷག་པར་རྟོགས་པ་སྟེ་དེའི་དོན་ནི་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པའི་རྣམ་པའི་ཤེས་རབ་བསྒོམ་བཞིན་པའོ། །མ་རིག་པ་ནི་གང་གི་ཚེ་དབྱེར་མི་ཕྱེད་པའི་ཡེ་ཤེས་ཡིན་པ་དེའི་ཚེ་རྡོ་རྗེ་གནས་སུ་འགྱུར་རོ། །དངོས་པོ་ལ་ལྷག་པར་དམིགས་པ་ནི་མ་རིག་པ་ཉིད་དོ། །མཐར་ཐུག་པ་མེད་པ་ནི་མཐའ་ནི་མཐར་ཐུག་པ་མེད་ཅིང་གྲངས་མེད་པའོ། །དེ་ཁོ་ན་རྡོ་རྗེའི་གནས་ཞེས་སོ། །སྔ་མ་བཞིན་དུ་དེ་ལྟར་གཞན་ལ་ཡང་ངོ༌། །རྡོ་རྗེའི་གནས་བསྡུས་པའི་དོན་ནོ། །མངོན་པར་འདུ་བྱེད་པ་མེད་པ་མཉམ་པ་ཉིད་ཀྱིས་ཏེ། འདུས་བྱས་སྟོང་པ་ཉིད་ཀྱིས་གདོད་མ་ནས་སྐྱེ་བ་མེད་པའི་རྣམ་པས་མཉམ་པ་ཉིད་ཀྱིས་སོ་ཞེས་པ་ཇི་སྲིད་པར་རོ། །འདོད་ཆགས་དང་བྲལ་བའི་མཐའ་མཉམ་པ་ཉིད་ཀྱིས་ཞེས་པ་ནི་རྒྱུ་ཉེ་བར་དམིགས་པ་མེད་པའི་རྣམ་པས་འདོད་ཆགས་དང་བྲལ་བའི་བག་ཆགས་དང་མཚུངས་པ་ཉིད་ཀྱིས་སོ། །འདོད་
ཆགས་ཀྱིས་འདོད་ཆགས་རབ་ཏུ་འཇོམས་པའི་དོན་དུའོ། །བྱམས་པ་མཐའ་མཉམ་པ་ཉིད་ཀྱིས་ཞེས་པ་ནི་ཞེ་སྡང་སྒྱུ་མ་ལྟ་བུ་ཉིད་ཀྱི་རྣམ་པས་བྱམས་པའི་མཐའ་མཚུངས་པ་ཉིད་ཀྱིས་སོ། །སྐྱོན་ཡང་དག་པར་གཅོད་པ་ནི་ཞེ་སྡང་རབ་ཏུ་འཇོམས་པའི་དོན་དུའོ། །ཤེས་རབ་ཀྱི་སྣང་བ་མཉམ་པ་ཉིད་ཀྱི་ཞེས་པས་གཏི་མུག་གི་མཐའི་རྡུལ་མེད་ཅིང་ཉེ་བར་བྲལ་བའི་རྣམ་པ་ཤེས་རབ་ཀྱི་རང་བཞིན་སྣང་བ་མཚུངས་པ་ཉིད་ཀྱིས་སོ། །མུན་པ་མེད་པ་ཡང་ཉེ་བར་ཐོབ་པ་དམིགས་པ་མེད་པས་ཤེས་རབ་ཀྱི་སྣང་བ་དེའི་དོན་དུ་སྐྱེ་བར་འགྱུར་རོ། །སེམས་ཅན་ཐམས་ཅད་གཅིག་ཏུ་མཉམ་པ་ཉིད་ཀྱིས་ཞེས་པ་ནི་རྒྱུ་དང་བྲལ་བ་ཉིད་དེ་འདིར་བྲལ་བ་ཉིད་ཀྱི་རྣམ་པས་སེམས་ཅན་རྣམས་ཐམས་ཅད་གཅིག་ཏུ་མཚུངས་པ་ཉིད་ཀྱིས་སོ། །སེམས་ཅན་རྣམས་ཀྱི་རང་བཞིན་དེ་ནི་རང་གི་ངོ་བོའོ། །དེ་རྟོགས་པ་ནི་ཁོང་དུ་ཆུད་པའི་དོན་དུའོ། །སེམས་ཅན་ཐམས་ཅད་སེམས་སུ་གཅིག། ཅེས་པས་ནི་སེམས་ཅན་ཐམས་ཅད་གདོད་མ་ནས་སྐྱེ་བ་མེད་པའི་རྣམ་པས་སེམས་ཉིད་དུ་གཅིག་པར་མཉམ་པའོ། །སེམས་ལ་འཇུག་པའི་དོན་ནི་རྣམ་པར་རིག་པ་ཙམ་དུ་རྟོགས་པའི་དོན་དུའོ། །རང་བཞིན་གྱིས་འོད་གསལ་བ་རྟོགས་པའི་དོན་ནི་རྣམ་པ་ཐམས་ཅད་ཉེ་བར་དམིགས་པ་མེད་པའི་ཡེ་ཤེས་ཀྱི་དོན་དུའོ། །སངས་རྒྱས་ཐམས་ཅད་སངས་རྒྱས་སུ་གཅིག་ཅེས་པ་ནི་སངས་རྒྱས་རྣམས་ཐམས་ཅད་འཇིགས་པ་དང་བྲལ་བའི་སྟོང་པ་རྡུལ་དང་བྲལ་བ་ཉེ་བར་རྟོགས་པའི་རྣམ་པས་སངས་རྒྱས་རྣམས་གཅིག་ཏུ་མཉམ་པ་ཉིད་དོ། །དེ་བཞིན་གཤེགས་པ་བཞུགས་པའི་དོན་ནི་སྟོན་པ་ཉིད་ཐོབ་པའི་དོན་དུའོ། །མཉམ་པ་ཉིད་ཀྱི་ཡེ་ཤེས་རྟོགས་པའི་དོན་ནི་ཐམས་ཅད་མཁྱེན་པའི་ཡེ་ཤེས་རྟོགས་པའི་དོན་དུའོ། །ཆོས་ཐམས་ཅད་ནི་འཇིག་རྟེན་དང་འཇིག་རྟེན་ལས་འདས་པ་སྟེ་དེ་རྣམས་བདེན་པ་ཉེ་བར་དམིགས་པ་མེད་ཅིང་སྟོང་པ་དབྱེ་བ་དང་བྲལ་བའི་རྣམ་པས་སངས་རྒྱས་ཀྱི་ཆོས་རྣམས་ཏེ་སྟོབས་དང་མི་འཇིགས་པ་ལ་སོགས་པ་རྣམས་མཉམ་པའོ། །ཐམས་ཅད་དུ་ཡེ་ཤེས་རྗེས་སུ་རྟོགས་པ་སྟེ་ཐོབ་པའི་ཆེད་དང༌། རྡོ་རྗེ་ལྟ་བུའི་ཏིང་ངེ་འཛིན་རྟོགས་པའི་དོན་ནི་རབ་ཏུ་མི་གནས་པའི་མྱ་ངན་ལས་འདས་པ་སོ་སོར་བརྙེས་པའི་དོན་དུའོ། །
བདུད་ཀྱི་ལས་ཐམས་ཅད་ནི་སངས་རྒྱས་ཀྱི་ལས་ཞེས་པ་ནི་བདུད་ཀྱི་ལས་རྣམས་རྒྱུ་བ་དང་བྲལ་བ་སྟོང་པ་རྡུལ་དང་བྲལ་བ་ལ་ངེས་པར་འབྱུང་བའི་རྣམ་པ་རྣམས་ཀྱིས་སངས་རྒྱས་ཐམས་ཅད་ཀྱི་ལས་རྣམས་ཀྱིས་ནི་སེམས་ཅན་དོན་གྱི་མཚན་ཉིད་ཀྱི་མཉམ་པ་ཉིད་དོ། །ལས་ཡང་དག་པར་འདའ་བར་འགྱུར་རོ་ཞེས་པ་ནི་ལས་སྤྱོད་པ་ཟད་པའི་དོན་དུའོ། །ངག་ཐམས་ཅད་ནི་སྐྱེ་བོ་ཚིག་ཏུ་བརྗོད་པ་སྟེ། དེ་བཞིན་གཤེགས་པའི་གསུང་སྟེ་སངས་རྒྱས་པ་ཅན་གྱི་དབྱངས་ཅན་མ་སྟེ་དེ་ནི་ངག་ཐམས་ཅད་དོ། །དབྱེ་བ་དང་བྲལ་བའི་རྣམ་པ་སངས་རྒྱས་ཀྱི་གསུང་དང་མཉམ་པའོ། །སྒྲ་ཇི་བཞིན་པ་ཐམས་ཅད་ནི་འདབ་ཆགས་ལ་སོགས་པ་མངོན་པར་རྗོད་པར་བྱེད་པའོ། །མངོན་པར་བརྗོད་པར་བྱ་བ་ལས་འདས་པའི་དེ་བཞིན་ཉིད། ཆོས་ཐམས་ཅད་ནི་གཟུགས་དང་ཚོར་བ་ལ་སོགས་པ་སྟེ་དེ་རྣམས་སྒྱུ་མ་ལྟ་བུ་ཉིད་ཀྱི་ཕྱིར་མ་སྐྱེས་པ་སྟེ་སྐྱེ་བ་མེད་པའོ། །འཆི་འཕོ་བ་མེད་པ་ལ་འཇུག་པའི་དོན་ནི་དེའི་ཐབས་ལྷག་མ་མེད་པ་མྱ་ངན་ལས་འདས་པ་ཐོབ་པའི་དོན་དུའོ། །ཉོན་མོངས་པ་ལས་འདས་པ་ལྷག་མ་མེད་པའི་མྱ་ངན་ལས་འདས་པ་ཐོབ་པའི་དོན་དུའོ། །ཆོས་ཐམས་ཅད་ནི་འཇིག་རྟེན་དང་འཇིག་རྟེན་ལས་འདས་པ་རྣམས་སོ། །དེ་རྣམས་ཀྱང་མཉམ་པ་ཉིད་ཀྱི་རྣམ་པས་སྟོབས་དང་མི་འཇིགས་པ་ལ་སོགས་པའི་སངས་རྒྱས་ཀྱི་ཆོས་རྣམས་ཀྱི་རང་བཞིན་ནོ། །འགོག་པ་མེད་པ་ལ་འཇུག་པ་ནི་མི་གནས་པའི་མྱ་ངན་ལས་འདས་པ་ཐོབ་པའོ། །ཆོས་ཐམས་ཅད་ནི་འགོག་པ་མེད་པའི་དོན་ནི་སེམས་ཅན་ཐམས་ཅད་ཀྱི་དོན་ཆད་པ་མེད་པའི་དོན་ནོ། །འདི་ལ་རྣམ་གནས་ཞེས་པ་འདིས་བྱིན་གྱིས་བརླབས་པའི་ས་བོན་རང་གི་སྙིང་གའི་མཚན་མ་ལ་གནས་ནས་ཇི་ལྟ་བ་བཞིན་དུ་རང་རྡོ་རྗེའི་གནས་སྒོམ་པར་བྱེད་པ་བསྟན་པར་གྱུར་པ་ལ་རྣམ་པར་གནས་པའི་ཡང་དག་པར་རྗེས་སུ་ཀུན་དུ་བསྟན་པ་བདག་གི་དེ་ཉིད་ཞེས་པ་ལ་སོགས་པ་གསུངས་པ། བྱང་ཆུབ་སེམས་དཔའི་ས་རྣམས་མྱུར་དུ་འགྲུབ་པར་འགྱུར་རོ་ཞེས་པ་ཇི་སྲིད་པའོ། །བདག་གི་དེ་ཉིད་དོ་ཞེས་པས་སེམས་གཉིས་ཉིད་དོ། །ད་ནི་ཡིད་ནི་རྩེ་གཅིག་པ་ཞེས་པ་ལ་སོགས་པ་སྟེ། སྐུའི་ཕྱག་རྒྱ་སྒོམ་པར་བྱེད་པ་བསྟན་པ་གསུངས་པ། སངས་རྒྱས་
ལུས་ཞེས་པས་དེ་བཞིན་གཤེགས་པ་ལྔའི་སྐུའི་ཕྱག་རྒྱའོ། །ཀུན་དུ་བཟང་པོ་ལ་སོགས་པའི་སྐུའི་ཕྱག་རྒྱ་ནི་ཟླ་བའི་དཀྱིལ་འཁོར་གྱི་དབུས་ན་གནས་པར་བསྒོམ་པར་བྱའོ། །བྱང་ཆུབ་ཀྱི་སེམས་ནི་ཀུན་དུ་བཟང་པོའོ་དེའི་མཆོག་ནི་དང་པོ་གང་ཡིན་པ་དེ་རྣམས་བྱང་ཆུབ་སེམས་ཀྱི་མཆོག་དེ་རྣམས་བསྒོམ་པ་ནི་བྱང་ཆུབ་སེམས་ཀྱི་མཆོག་བསྒོམ་པའོ། །གཙུག་ཏོར་གྱི་སྐུའི་ཕྱག་རྒྱ་ནི་འཁོར་ལོ་ལ་སོགས་པ་ལ་གནས་པར་བསྒོམ་པར་བྱའོ། །དེ་རྣམས་ཀྱང་གཙོ་བོ་རྣམས་ཀྱི་རྗེས་སུ་ཞུགས་པས་དཀྱིལ་འཁོར་པ་ཐམས་ཅད་བསྒོམ་པ་བལྟ་བར་བྱའོ། །རྣམ་པར་སྤྱོད་པ་ནི་སྒོའོ་ཞེས་པ་ལ་སོགས་པས་དག་གི་ཕྱག་རྒྱ་སྒོམ་པར་བྱེད་པར་བསྟན་པར་བྱའོ། །ཆོས་ཐམས་ཅད་ནི་དོན་གཟུགས་ལ་སོགས་པ་རྣམས་ཏེ་ཁོང་དུ་ཆུད་པའི་སྒོ་ནི་ཉེ་བར་ལེན་པའོ། །དེ་བཞིན་དུ་གཞན་ལ་ཡང་སྒོའི་དོན་བལྟ་བར་བྱའོ། །རྣམ་པར་འབྱེད་པའི་ཕྱིར་རྣམ་པར་སྤྱོད་པར་བྱེད་དོ་ཞེས་པ་འདི་བྱ་བ་ཉིད་བྱ་བའི་ངོ་བོར་གསལ་བར་བྱེད་དོ། །ཨ་ཡིག་ནི་ཆོས་ཐམས་ཅད་གདོད་མ་ནས་མ་སྐྱེས་པ་གསལ་བར་བྱེད་དོ། །དོན་དམ་པའི་བདེ་བ་དེ་བཞིན་ཉིད་དོ། །ཆོས་རྣམས་ཐམས་ཅད་ནི་ཕུང་པོ་ལྔའི་རང་བཞིན་རྣམ་པར་ཡོངས་སུ་ཤེས་པའོ། །ས་ཡིག་ནི་ཕུང་པོ་ལྔའི་ཁོང་དུ་ཆུད་པའི་སྒོའོ། །ན་ཡིག་ནི་རྣམ་པ་ཐམས་ཅད་གདོད་མ་ནས་འགྱུར་བ་མེད་པ་དབང་དུ་བྱེད་པ་ཉིད་ཀྱི་སྒོའོ། །ད་ཡིག་ནི་ཆོས་ཐམས་ཅད་འདུལ་པ་ལ་སོགས་པ་སྟོན་པར་བྱེད་པའི་སྒོའོ། །ཐོགས་པ་ནི་ཉན་ཐོས་དང་རང་བྱང་ཆུབ་སེམས་དཔའ་དེ་ལས་ཡང་དག་པར་འདས་པ་སངས་རྒྱས་ཀྱི་བྱང་ཆུབ་པོ། །ཀུན་ནས་ཉོན་མོངས་པ་ནི་འཁོར་བའི་ཆོས་རྣམས་སོ། །རྣམ་པར་བྱང་བ་ནི་མྱ་ངན་ལས་འདས་པའོ། །ཟག་པ་དང་བཅས་པ་དང་ཟག་པ་མེད་པ་ནི་ཡོན་ཏན་ནོ། །ཕུང་པོ་ལ་སོགས་པ་ནི་ཟག་པ་མེད་པའི་ལས་ཀྱི་བདེན་པས་འདུས་བྱས་པའི་རང་བཞིན་དེའི་བདེ་བ་ལ་ཕུང་པོ་ལ་སོགས་པ་དོན་དམ་པའི་བདེན་པ་ནི་དོན་དམ་པའི་རང་བཞིན་གྱི་སེམས་ལས་བྱུང་བའི་རང་གི་ངོ་བོ་ཉིད་དུ་བརྗོད་དེ། །ས་ཡིག་ནི་དེའི་སྒོའོ། །དེ་བཞིན་ཉིད་ཀྱི་རྗེས་སུ་འགྲོ་བ་ནི་གང་ཟག་ལ་བདག་མེད་པར་རྟོགས་པའོ། །ཆོས་
ཀྱི་དབྱིངས་ལ་འཇུག་པ་ནི་ཆོས་ཀྱི་བདག་མེད་པ་རྟོགས་པའོ། །དེ་ངེས་པར་སྟོན་པར་བྱེད་པ་ལ་ན་ཡིག་སྒོའོ། །ལས་ཀྱི་རྣམ་པར་སྨིན་པ་རྣམ་པར་བྲལ་བ་ནི་ལས་ཀྱི་འབྲས་བུ་ལས་འདས་པའོ། །དེ་གསལ་བར་བྱེད་པ་ལ་ཀ་ཡིག་སྒོའོ། །ཟབ་མོ་གཏིང་དཔག་དཀའ་བ་ཉིད་དེ་རིམ་པ་བཞིན་ཕྱི་རོལ་པ་དང༌། ཉན་ཐོས་ལ་སོགས་པ་རྣམས་ནམ་མཁའ་ལྟ་བུ་ཉིད་དང་ནམ་མཁའི་རང་བཞིན་ཉིད་དེ་གསལ་བར་བྱེད་པ་ལག་ཡིག་སྒོའོ། །ཛའི་བཤད་པ་ནི་གོ་སླའོ། །ཆོས་ཀྱི་དབྱིངས་ཀུན་དུ་མི་ཕྱེད་པ་དེ་བཞིན་ཉིད་དོ། །ཆོས་རྣམས་ཐམས་ཅད་ནི་གཞན་དང་མ་འདྲེས་པའོ། །རྡོ་རྗེ་ནི་གོ་སླའོ། །ཡོངས་སུ་རྫོགས་པ་ནི་དབྱེ་བ་བྱར་མེད་པའི་ཤེས་རབ་ལ་འཇུག་པར་བྱེད་པའོ། །དེ་སྟོན་པར་བྱེད་པ་ལ་དྷ་ཡིག་སྒོའོ། །ཞི་གནས་ནི་ཏིང་ངེ་འཛིན་ནོ། །ལྷག་མཐོང་ནི་ཤེས་རབ་བོ། །དེ་ཡོངས་སུ་རྫོགས་པ་རབ་ཏུ་གསལ་བར་བྱེད་པ་ལ་ཤ་ཡིག་སྒོའོ། །ནམ་མཁའ་དང་མཉམ་ཞིང་རང་བཞིན་གྱིས་འོད་གསལ་བ་ཉིད་ནི་གང་ཟག་ལ་བདག་མེད་པ་གསལ་བར་བྱེད་པ་ལ་ཁ་ཡིག་སྒོའོ། །འགྱུར་བ་མེད་པ་མ་སྐྱེས་པ་ཅན་མི་ཟད་པའི་ཡེ་ཤེས་ཆོས་ཐམས་ཅད་ཡོངས་སུ་དག་པའི་དོན་རབ་ཏུ་གསལ་བར་བྱེད་པ་ལ་ཀྵ་ཡིག་སྒོར་འགྱུར་རོ། །ཐམས་ཅད་མཁྱེན་པའི་ཡེ་ཤེས་ཐོགས་པ་མེད་པ་ནི་རྣམ་པར་རྟོག་པ་ཐམས་ཅད་དང་བྲལ་བ་སྟེ་དེ་སྟོན་པར་བྱེད་པ་ལ་ང་ཡིག་སྒོའོ། །སངས་རྒྱས་ཀྱི་ཞིང་ཡོངས་སུ་དག་པར་བྱ་བའི་དོན་དུ་གནས་དང་གནས་མ་ཡིན་པ་ལ་མཁས་པ་སྟོན་པར་བྱེད་པ་ལ་ཐ་ཡིག་སྒོའོ། །མཐར་ཕྱིན་པ་ནི་ཡོངས་སུ་རྫོགས་པའི་འགོག་པའོ་ཞེས་པ་ཇི་སྲིད་དུ་དེའི་མུར་ཐུག་པ་མེད་པ་ནི་ཆོས་རྣམས་ཀྱི་མུ་མེད་པའོ། །སྒྲིབ་པ་ཐམས་ཅད་རབ་ཏུ་སྤངས་པ་ནི་ཉོན་མོངས་པ་ཐམས་ཅད་འགོག་པའོ། །ཟད་པ་དང་མི་སྐྱེ་བའི་ཡེ་ཤེས་ནི་བྱང་ཆུབ་ཀྱི་མཚན་ཉིད་དོ། །ཌ་ཡིག་ནི་མཐར་ཕྱིན་ཅིང་མུར་ཐུག་པ་མེད་པ་སྒྲིབ་པ་དང་བྲལ་བའི་སྒོའོ། །དྲི་མའི་རྣམ་པ་ནི་དྲི་མ་དང་བྲལ་བ་ཅན་མ་ཡིན་པ་སྟེ། དེ་ཉེ་བར་མི་དམིགས་པ་སྟོན་པར་བྱེད་པ་ལ་ཛྷ་ཡིག་སྒོའོ། །འདོད་ཆགས་དང་བྲལ་བ་ལ་སོགས་
པར་རབ་ཏུ་སྟོན་པ་མ་ལུས་རྣམ་པར་འབྱེད་པར་བརྗོད་པར་བྱ་བ་ལ་ཀ་ཡིག་སྒོའོ། །ཨཾ་ཡིག་ནི་སེམས་རྣམ་པར་འབྱེད་པའི་དོན་ཏེ་འདུལ་བར་བྱ་བ་གང་ཡིན་པའི་ཞེ་སྡང་དང་གཏི་མུག་དག་དང་བག་ལ་ཉལ་རབ་ཏུ་སྤངས་པ། བྱང་ཆུབ་ཏུ་སེམས་བསྐྱེད་པ་ནི་སྨོན་པའི་མཚན་ཉིད་ཅན་རང་བཞིན་གྱིས་འོད་གསལ་བ་ཉིད་ཀྱང༌། སྒྲིབ་པ་ཐམས་ཅད་དང་བྲལ་བའི་ཡེ་ཤེས་ཀྱི་རང་བཞིན་རབ་ཏུ་གསལ་བའི་སྒོར་འགྱུར་རོ། །ངག་གི་སྤྲོས་པ་ཆོས་ཀྱི་དབྱིངས་རྣམ་པར་དག་པར་སྟོན་པར་བྱེད་པ་ལ་ངག་ཁོང་དུ་ཆུད་པའི་ངག་ཅན་པ་ཡིག་སྒོའོ། །ཚ་ཡིག་གི་བཤད་པ་ནི་གོ་སླའོ། །གཅིག་ཏུ་འདུས་པ་མ་དམིགས་པ་ནི་གཞན་གྱིས་ཡོངས་སུ་བརྟགས་པའི་ཆ་ཤས་གཟུགས་ལ་སོགས་པ་སྟོང་པ་ཉིད་དོ། །གཉིས་སུ་མེད་པ་ཉིད་ནི་གཟུང་བ་དང༌། འཛིན་པ་བྲལ་བ་ཉིད་དོ། །དེ་དག་གཉིས་ཀ་སྟོན་པ་ལ་གྷ་ཡིག་སྒོའོ། །ཅ་ཅོ་དང་བྲལ་བ་ཉིད་ནི་དྲིལ་བུའི་སྒྲ་རྗེས་སུ་འགྲོ་བའོ། །རྡོ་རྗེ་སེམས་དཔའ་འཛིན་པ་ནི་རྡོ་རྗེའི་ཕྱག་རྒྱ་འཛིན་པ་སྟེ། འདི་དག་གཉིས་ཀའི་ཁྱད་པར་གྱི་སྣོད་ལ་ཊ་ཡིག་སྒོའོ། །གསང་བའི་ཡེ་ཤེས་ནི་ཐམས་ཅད་མཁྱེན་པའི་ཡེ་ཤེས་སོ། །ལྷག་མ་གོ་བར་སླའོ། །འཚེ་བ་ནི་གཞན་གྱི་འཁོར་ལ་ཉེ་བར་འཚེ་བ་སྟེ་དེ་དང་བྲལ་བ་རབ་ཏུ་གསལ་བ་དང༌། ནམ་མཁའི་དངོས་གྲུབ་སོ་སོར་ཐོབ་པའི་དོན་དུ་ཌ་ཡིག་སྒོའོ། །གྲང་བ་ནི་ཁ་བ་ལ་སོགས་པ་ཕྲ་མོ་སྟེ། དེ་ཉེ་བར་མ་དམིགས་པ་སྟོན་པར་བྱེད་པ་ལ་ནི་ཁ་ཡིག་སྒོའོ། །རབ་ཏུ་འབྱམས་པ་མ་ཡིན་པར་འགོག་པ་དེ་རྣམ་པར་གཞག་པར་བྱེད་པ་ལ་ཉེ་བར་ཞི་བར་བརྗོད་པ་ཅན་གྱི་ཨུ་ཡིག་སྒོའོ། །ཚུལ་བཞིན་དུ་གཞག་པ་ནི་དེའི་ངག་ཅན་ལ་ངེས་པར་འབྱུང་བ་ལ་སོགས་པར་བྱེད་པ་ལ་སྒོའོ། །ཡ་ཡིག་ནི་དེ་ཁོ་ན་ཉིད་ནི་དེ་བཞིན་ཉིད་ཀྱི་ངག་ཅན་ཏེ་སྤྲོས་པ་སྤངས་པ་ནི་རྣམ་པར་རྟོག་པ་ཐམས་ཅད་དང་བྲལ་བ་སྟེ་དོན་དེ་རྣམ་པར་གཞག་པའི་རྒྱུར་ཏ་ཡིག་སྒོའོ། །ཨ་ཡིག་ནི་མ་སྐྱེས་པ་གསལ་བར་བྱེད་པ་སྟེ། རྣམ་པར་གྲོལ་བའི་མཚན་ཉིད་བརྗོད་པ་ལ་སྒོའོ། །ཧྲཱི་ཡིག་ནི་ཡོངས་སུ་གཟུང་པ་མེད་པའི་ངག་ཅན་ཏེ་
འཐབ་པ་དང་རྩོད་པ་སྤངས་པ་སྟོན་པ་ལ་སྒོའོ། །ཀ་སྡེ་ནི་ཀུན་ནས་ཉོན་མོངས་པ་མེད་པའི་ངག་ཅན་ཏེ་རྣམ་པར་དག་པ་མཚན་ཉིད་སྟོན་པར་བྱེད་པ་ལ་སྒོའོ། །རང་བཞིན་གྱིས་འོད་གསལ་བ་དེ་བཟུང་ནས་གནས་པ་གསལ་བར་བྱེད་པ་ཙ་སྟེ་ཡང་སྒོའོ། །ཊ་སྡེ་ནི་སྣང་བ་ཞེས་པ་སྟེ་རབ་ཏུ་གསལ་བ་སྟེ། རང་བཞིན་གྱིས་འོད་གསལ་བ་ཉིད་འབར་བར་བྱེད་དེ་འབར་བར་བྱེད་པ་ལ་སྒོའོ་ཞེས་རྟོགས་པར་བྱའོ། །ཡང་དག་པར་སྦྱོར་བ་དང་བྲལ་བ་ཡང་དག་པར་སྡུད་པར་བྱེད་པ་མངོན་པར་བརྗོད་པ་ལ་སྒོམ་པར་བྱེད་པའི་དོན་དུ་ཏ་སྡེ་སྒོའོ། །ཆོས་མ་འདྲེས་པར་རབ་ཏུ་འཇོག་པ་ལ་གཞི་མེད་པར་བརྗོད་པའི་བ་སྡེ་སྒོའོ། །མཐར་གནས་ཀྱི་སྡེ་པ་ནི་བྱང་ཆུབ་ཀྱི་དོན་དྲི་མ་མེད་པ་སྟོན་པར་བྱེད་པ་ལ་སྟེ། དྲི་མ་མེད་པ་གསལ་བར་བྱེད་པ་ལ་སྒོའོ། །ས་ལ་སོགས་པའི་སྡེ་པ་ནི་མྱ་ངན་ལས་འདས་པའི་གློ་བུར་བ་ངེས་པར་འདོར་བ་ལ་སོགས་པ་སྟོན་པ་ལ་སྒོའོ། །ཨོཾ་བཾ་ཞེས་པ་ལ་སོགས་པ་རྣམས་ཀྱིས་ཆོས་ཀྱི་ཡི་གེ་རྣམས་རྣམ་པར་རིག་པའི་སྒོའོ་ཞེས་པ་ལ་སོགས་པ་དེ་ཁོ་ན་ཉིད་རྟོགས་པ་སྟེ། གང་རྟག་ཏུ་འགྲོ་བར་བརྗོད་པའི་དབང་དུ་བྱེད་པའི་བསྡུ་བ་ནི་ཐམས་ཅད་མཁྱེན་པའི་ཡེ་ཤེས་རྣམ་པར་དག་པ་ཁོ་ན་རྣམ་པར་ཕྱེ་བའོ། །ཆོས་ཀྱི་སྐུ་རྣམ་པར་ངེས་པ་ནི་ཆོས་བརྗོད་པ་ཐབས་རྣམ་པར་འབྱེད་པའོ། །འདི་ནི་གཙོ་བོའི་དཀྱིལ་འཁོར་བ་དང་བཅས་པའི་ཐུན་མོང་གི་ཆོ་ག་ཆོས་ངག་གི་ཕྱག་རྒྱའོ། །དེའི་སྒོ་ནི་ཐབས་སོ། །དེ་རྣམ་པར་ངེས་པ་ནི་ཡེ་ཤེས་སོ། །སེམས་ཀྱི་ཕྱག་རྒྱ་བསྒོམ་པ་དེ་དག་བསྟན་པ་དེ་ལ་རིགས་ཐམས་ཅད་ཀྱི་ཞེས་བྱ་བ་ལ་སོགས་པ་གསུངས་པ། རྣལ་འབྱོར་གནས་ནི་དབང་པོ་གཉིས་ཀྱི་སྙོམས་པར་འཇུག་པ་ཡོངས་སུ་རྫོགས་པ་ཉིད་ཀྱང་སྐུའི་ཕྱག་རྒྱའི་སྒྲུབ་ཐབས་དང་ཐུན་མོང་པ་ཡང་ངོ༌། །སངས་རྒྱས་ཀུན་གྱི་ཕྱག་ནི་རྣམ་པར་སྣང་མཛད་ཀྱི་ཐུགས་ཀྱི་ཕྱག་རྒྱའོ། །ཤིན་ཏུ་འོད་གསལ་གྱི་དཀྱིལ་འཁོར་ལ་ནི་སྙིང་གར་ཉི་མའི་དཀྱིལ་འཁོར་དང་བཅས་པའོ། །རྡོ་རྗེའི་རྣལ་འབྱོར་གྱིས་ཞེས་པ་ནི་དེ་ལ་རྡོ་རྗེ་སྒོམ་པར་བྱེད་པས་མི་བསྐྱོད་པའི་རྣལ་འབྱོར་ཆེན་པོ་སྟེ། དེའི་རྣལ་འབྱོར་ཆེན་
པོ་དེ་ལྟ་བུ་ཁོ་ན་རྡོ་རྗེ་སྒོམ་པར་བྱེད་པ་རྣམས་སོ། །བསྒོམ་པར་བྱ་ཞེས་པ་ནི་ཉི་མའི་དཀྱིལ་འཁོར་ལ་གནས་པའི་རིན་ཆེན་ཀུན་མངོན་དུ་བྱའོ། །ཡོངས་སུ་བསྒོམས་ནས་ཞེས་བྱ་བ་ནི་ལྷག་པར་མོས་པའོ། །མཐོང་ཞེས་བྱ་བ་ནི་ཉི་མའི་དཀྱིལ་འཁོར་ལ་གནས་པའི་པདྨ་བསྒོམ་པའོ། །དག་པ་ཞེས་བྱ་བ་ནི་འོད་དཔག་མེད་དོ། །ཕྱག་རྒྱ་ཐམས་ཅད་ནི་སྣ་ཚོགས་རྡོ་རྗེའོ། །སྣ་ཚོགས་ལས་ཀྱི་སྦྱོར་བ་ཞེས་པ་ནི་སྙིང་གར་ཉི་མའི་དཀྱིལ་འཁོར་ལ་གནས་པའི་སྣ་ཚོགས་རྡོ་རྗེ་ལ་སྤྲུལ་པ་སྣ་ཚོགས་པ་སེམས་ཅན་མ་ལུས་པའི་དོན་ལ་ལྷག་པར་མོས་པའོ། །སྣ་ཚོགས་ལས་བྱེད་པ་ནི་དོན་ཡོད་པའི་དབང་ཕྱུག་གོ །རྡོ་རྗེ་རྣལ་འབྱོར་གྱིས་ཞེས་པ་ནི་ཟླ་བ་ལ་གནས་པའི་རྡོ་རྗེ་ལ་སོགས་པའི་མཚན་མ་བསྒོམ་པའོ། །རྡོ་རྗེའི་དམ་ཚིག་ཅེས་བྱ་བ་ནི་ཉི་མ་ལ་བརྗོད་དོ། །ནུས་པ་ངེས་པར་བསྟན་པ་གསུངས་པ། རྡོ་རྗེ་སེམས་དཔའ་སེམས་དཔའ་ཆེ། །ཞེས་བྱ་བ་ལ་སོགས་པའོ། །རྡོ་རྗེའི་རྣལ་འབྱོར་གྱིས་ཞེས་བྱ་བ་ནི་སྙིང་གར་ཟླ་བའི་དཀྱིལ་འཁོར་ལ་གནས་པའི་རྡོ་རྗེ་བསྒོམ་མོ། །དེ་ལྟར་རྒྱལ་པོ་ལ་སོགས་པ་རྣམས་ཀྱི་ཡང་ཇི་ལྟ་བ་བཞིན་དུ་རང་བཞིན་དུ་རང་གི་སྙིང་གར་ཟླ་བ་ལག་ནས་པའི་མཚན་མ་བསྒོམ་པར་བལྟ་བར་བྱའོ། །འདི་དག་ཀུན་གྱི་ཞེས་པ་ནི་སྐུ་ལ་སོགས་པའི་ཕྱག་རྒྱའི་སྒྲུབ་ཐབས་སོ། །རབ་སྦྱོར་གྱིས་ཞེས་པ་དང་རང་གི་སྐུའི་ཕྱག་རྒྱ་སྒྲུབ་པའི་དོན་ཅན་དུ་བྱས་པའི་རང་གི་ལྷའི་རྣལ་འབྱོར་ཇི་སྐད་གསུངས་པའི་གདན་ལ་གནས་ནས་ཡིག་རྩེ་གཅིག་ཏུ་གྱུར་པས་བསྒྲུབ་པར་བྱའོ་ཞེས་བྱ་བ་འདིས་སོ། །ཆོས་ཀྱི་ཡི་གེའི་ཚིག་གིས་ནི། །ཞེས་པ་དག་གི་ཕྱག་རྒྱའི་དངོས་གྲུབ་ནི་ལྕེའི་རྩེ་མོའི་འདབ་མ་ལ་རྡོ་རྗེ་མཛེས་པ་བསྒོམ་པ་སྔོན་དུ་འགྲོ་བ་ཅན་གྱི་སྙིང་གའི་ཟླ་བ་ལ་ཇི་ལྟ་བ་བཞིན་དུ་རང་གི་ཨོཾ་བཾ་ལ་སོགས་པའི་ཆོས་ཀྱི་ཡི་གེ་རྣམས་རྣམ་པར་བཀོད་ལ་རྣམ་པར་རིག་པའི་སྒོ་ཞེས་བྱ་བ་ལ་སོགས་པའི་དེ་ཁོ་ན་ཉིད་བསྒོམ་པར་བྱའོ་ཞེས་བྱ་བ་འདིས་སོ། །ཕྱག་རྒྱའི་ཡེ་ཤེས་ལེགས་སྦྱོར་བས། །ཞེས་བྱ་བ་ནི་སེམས་ཀྱི་ཕྱག་རྒྱ་བསྒོམ་པའི་དོན་ཅན་རང་གི་སྙིང་གའི་ཟླ་བ་ལ་ཇི་ལྟ་བ་
བཞིན་དུ་རང་གི་མཚན་མ་བསྒོམ་པར་བྱའོ་ཞེས་པ་འདིས་སོ། །འདི་རྣམས་ཀྱི་ཞེས་པ་སྐུ་ལ་སོགས་པ་རྣམས་ཀྱི་སྒྲུབ་ཐབས་ཀྱི་རབ་ཏུ་སྦྱོར་བ་བདུན་པོ་ཇི་ལྟ་བ་བཞིན་ནོ། །ཕྱག་རྒྱའི་འཁོར་ལོ་ཁྱད་པར་དུ། །ཞེས་པ་ནི། སྐུའི་ཕྱག་རྒྱའི་ཚོགས་སུ་ཤེས་པར་བྱའོ། །དེ་ཉིད་ཀྱི་རབ་ཏུ་སྦྱོར་བ་བསྟན་པ་གསུངས་པ། །ཡི་གེ་ཞེས་བྱ་བ་ལ་སོགས་པ་སྟེ། དེ་གསུང་པར་བྱེད་པ་སྐུ་ལ་སོགས་པའི་ཕྱག་རྒྱ་བསྒྲུབ་པར་བྱ་བའི་དོན་དུ་རང་གི་སྔགས་ཀྱི་ཡི་གེ་རྣམས་ཀྱིས་སྙིང་ག་ལ་སོགས་པ་རྣམས་སུ་ཡོངས་སུ་གང་བའི་སྐུའི་ཕྱག་རྒྱ་བྱས་ནས་ཕྱག་རྒྱ་ཐམས་ཅད་བསྒྲུབ་བར་བྱའོ་ཞེས་སོ། །ལས་ཀྱི་སྒྲུབ་ཐབས་ཉེ་བར་བསྟན་པ་གསུངས་པ། བསམ་གཏན་གྱིས་ཞེས་བྱ་བ་ལ་སོགས་པ་སྟེ། བསམ་གཏན་གྱིས་ནི་སྒོམ་པར་བྱེད་པ་རྣམས་ཀྱིས་སོ། །ཐིག་ལེ་གཅིག་ནི་ཡི་གེ་གཅིག་སྟེ་དབང་ཆེན་གྱི་ས་བོན་ནོ། །དེས་གྱུར་བ་སྟེ་ཡོངས་སུ་རྫོགས་པ་འདིའི་གོ་འཕང་ནི་དབང་ཆེན་གྱི་དཀྱིལ་འཁོར་རོ། །དེ་ཉིད་བསྟན་པ་གསུངས་པ། ས་ཞེས་པ་ལ་སོགས་པ་སྟེ། ས་ལ་རབ་གནས་ཀྱང་དཀྱིལ་འཁོར་གྲུབ་བཞི་པ་ལ་གནས་པའོ། །གོ་འཕང་ནི་གནས་ཏེ་དེ་ལ་གནས་པའོ། །དབང་པོ་གཉིས་ནི་མཉམ་སྦྱོར་བ་ནི་རང་དང་ལྷ་གཉིས་སྒོམ་པར་བྱེད་པས་དབང་ཕྱུག་ཀྱང་ནི་བསྒྲུབ་པར་བྱའོ། །དབང་ཆེན་གྱི་ལས་ནི་རྒྱས་པའི་མཚན་མའོ། །དང་པོའི་དཀྱིལ་འཁོར་ཚུལ་གྱིས་ནི། །ཞེས་པ་དབང་ཆེན་གྱི་དཀྱིལ་འཁོར་ཚུལ་གྱིས་རང་གི་ས་བོན་གང་ཡིན་པ་ཡོངས་སུ་རྫོགས་པའི་དཀྱིལ་འཁོར་རོ། །དབང་པོ་གཉིས་སྙོམས་པར་ཞུགས་པའི་ཡང་མཐའ་མར་རབ་ཏུ་བརྟག་སྟེ། འཁོར་ལོ་ལག་ཏུ་བསམ་པར་བྱའོ། །དང་པོ་ཞེས་པ་ནི་དབང་ཆེན་གྱི་དཀྱིལ་འཁོར་དང༌། པདྨ་དང་རིན་པོ་ཆེ་ལ་སོགས་པ་ཡང་ཇི་ལྟ་བ་བཞིན་སུམ་མདོ་རིས་ལ་སོགས་པ་རྣམས་སུ་རབ་ཏུ་གནས་པའོ། །ལས་ཀྱི་རྣལ་འབྱོར་གྱིས་ཞེས་པ་ནི་སྣ་ཚོགས་རྡོ་རྗེ་རྣམ་པར་གཞག་པས་སོ། །ལས་འདི་རྣམས་ཀྱང་དེ་ཉིད་བསྒོམས་པས་ཆེས་མྱུར་དུ་འགྲུབ་པར་འགྱུར་རོ། །ཕྱག་རྒྱ་ཡེ་ཤེས་
བསྟན་པའི་ཆེད་དུ་ཉེ་བར་བསྟན་པ་གསུངས་པ། བཅོམ་ལྡན་འདས་ཞེས་བྱ་བ་ལ་སོགས་པ་སྟེ། རྣམ་པར་གྲོལ་བ་ནི་སྒྲིབ་པ་ཐམས་ཅད་དང་བྲལ་བའོ། །དེ་ཁོ་ན་ཕྱག་རྒྱ་ཆེ་ཞེས་བ་ཐམས་ཅད་དུ་རྒྱས་བཏབ་ཅིང་བསྡུས་པ་རྟོགས་པར་བྱེད་པ་སྟེ། དེའི་རྒྱས་བཏབ་པ་ནི་མཆན་པའོ། །ཆོས་ཐམས་ཅད་ནི་འཕགས་པ་དང་སོ་སོའི་སྐྱེ་བོའི་རྒྱུད་ཀྱི་སེམས་དང་སེམས་ལས་བྱུང་བའི་རང་བཞིན་ནོ། །གང་གི་ཕྱིར་གཉིས་དང་གཉིས་སུ་མེད་པའི་གནས་སྐབས་ནི་ཡོངས་སུ་དག་པ་ནི་རྣམ་པར་གྲོལ་བའི་ལུས་སོ་ཞེས་པ་ཇི་སྲིད་པའོ། །མཐའ་དང་མཐའ་མེད་པ་ནི་ཆད་པ་དང་རྟག་པའི་རྣམ་པར་རྟོག་པའོ། །མཐའ་ལས་འདས་པ་ནི་མཐའ་མེད་པའོ། །དེའི་ཕྱག་རྒྱས་རྒྱས་བཏབ་པའོ། །གང་ལ་གང་གི་ཕྱིར་ཞེ་ན་དག་པ་དང་མ་དག་པའི་གནས་སྐབས་ཆད་པ་དང་རྟག་པ་ཡོངས་སུ་དག་པ་སྟེ། དོན་དམ་པར་དེ་དག་སྟོང་པའོ། །ཟད་པ་དང་འདོད་ཆགས་དང་བྲལ་བ་ནི་ཕུང་བོ་དང་ཉོན་མོངས་པ་འགག་པའོ། །དེའི་ཕྱག་རྒྱས་རྒྱས་བཏབ་པའོ། །གང་གི་ཕྱིར་ན་ཟད་པའི་སྒོ་ནི་སྐྱེ་བའི་གནས་སྐབས་སོ། །ཟད་པའི་མཐའ་ནི་གནས་པའོ། །ཟད་པའི་མུར་ཐུག་པ་ནི་མཐར་ཐུག་པའོ། །སྐུར་བ་འདེབས་པ་མེད་པ་ནི་སྨོད་པ་མེད་པའོ། གང་ཟག་དང་ཆོས་བརྟགས་བ་ཙམ་ཉིད་ཀྱིས་སྡེ་དེའི་ཕྱག་རྒྱས་རྒྱས་བཏབ་པའོ། །གང་གི་ཕྱིར་མཉམ་པ་ཉིད་ཀྱང་རྣམ་པར་དག་པ་ནི་དེ་དག་གཉིས་སྟོང་པ་ཉིད་ཀྱི་རང་བཞིན་ནོ། །ཆོས་ཐམས་ཅད་གང་ཡིན་པ་དེ་དོན་དམ་པ་ཉིད་དུ་ནམ་མཁའ་བཞིན་དུ་སྤྱན་ལྔའི་ལམ་ལས་ཡང་ངག་པར་འདས་པའི་ཕྱིར་ནམ་མཁའི་ཕྱག་རྒྱས་རྒྱས་བཏབ་པའོ། །སེམས་ཅན་ཐམས་ཅད་ནམ་མཁའི་ཁམས་ཉིད་ཀྱི་ཕྱིར་ཞེས་པ་ནི་དོན་དམ་པར་ན་སེམས་ཅན་ཐམས་ཅད་ནམ་མཁའི་ཁམས་ཀྱི་རང་བཞིན་ཡིན་པ་ཉིད་ཀྱི་ཕྱིར་རོ། །དབྱེར་མི་ཕྱེད་པའི་རང་བཞིན་གྱི་ཆོས་ཀྱི་དབང་དབྱིངས་སུ་ཡང་དག་པར་འདུ་བ་ནི་རྗེས་སུ་ཞུགས་པའོ། །དེ་ལ་དབྱེར་མེད་པའི་ཕྱག་རྒྱས་རྒྱས་བཏབ་པའོ། །བྱང་ཆུབ་ཀྱི་རང་བཞིན་གྱིས་སེམས་ནི་བྱང་ཆུབ་ཀྱི་སེམས་ཏེ་གཉིས་སུ་མེད་པའི་ཡེ་ཤེས་སོ། །དེའི་ཕྱག་རྒྱས་རྒྱས་བཏབ་པའོ། །གང་ལས་ཤེ་ན་བྱང་ཆུབ་ཀྱི་སེམས་དང་ཐ་
མི་དད་པ་ཉིད་ཀྱི་ཕྱིར་ཏེ། བྱང་ཆུབ་ཀྱི་སེམས་རྫོགས་པ་ཉིད་ཀྱི་གནས་སྐབས་སུ་ཡང་ཆོས་རྣམས་ཀྱིས་ལྷག་པར་ཀུན་དུ་འདྲེས་པའོ། །ཆོས་ཀྱི་དབྱིངས་འབྱེད་པ་མེད་པའི་མཚན་ཉིད་ཡིན་པའི་ཕྱིར་ཞེས་བ་ནི་རྫོགས་པའི་གནས་སྐབས་ན་དེ་བཞིན་ཉིད་ལ་ཁྱད་པར་མེད་པའི་ཕྱིར་རོ། །རང་བཞིན་མེད་པའི་ཕྱིར་ཞེས་བ་ནི་གནས་སྐབས་ཐམས་ཅད་དུ་གནས་སུ་ཞེས་པ་མངོན་པར་དགོངས་པའོ། །བདག་མེད་པའི་ཕྱག་རྒྱ་ནི་གང་ཟག་གི་བདག་མེད་པ་སྟེ་དེའི་རྒྱས་བཏབ་པའོ། །འཚེ་བ་མེད་པའི་ཕྱིར་ནི་གཞན་གྱིས་ཡོངས་སུ་བརྟགས་པའི་བདག་ཚད་མ་དང་བྲལ་བ་ཉིད་ཀྱི་ཕྱིར་རོ། །མི་རྟག་པ་ཞེས་བྱ་བ་ལ་སོགས་པའི་བཤད་པ་ནི་གོ་སླའོ། །སྔོན་གྱི་མཐའ་ནི་འཁོར་བའི་གནས་སྐབས་སོ། །ཕྱི་མའི་མཐའ་ནི་མྱ་ལས་འདས་པའི་གནས་སྐབས་དེ་དག་ནི་དེ་བཞིན་ཉིད་སྟོང་པ་ཉིད་དངོས་པོ་དང་དངོས་པོ་མེད་པའི་རྣམ་པར་རྟོག་པ་མེད་པའོ། །མཉམ་པར་མཚུངས་པ་ཉིད་ཀྱི་ཕྱིར། །ཞེས་པ་ལ་འདུས་བྱས་དང་འདུས་མ་བྱས་དག་དངོས་པོ་མེད་པའི་རང་བཞིན་ཡིན་པ་ཉིད་ཀྱི་ཕྱིར་རོ། །མཚན་མ་མེད་པའི་ཕྱག་རྒྱ་ནི་རྒྱུའི་རང་བཞིན་མེད་པ་སྟེ་དེའི་ཕྱག་རྒྱས་རྒྱས་བཏབ་པའོ། །གང་ལས་ཤེ་ན་སྤྲོས་པའི་དམིགས་པ་དང་བྲལ་བ་ཉིད་ཀྱི་ཕྱིར་རོ་སྟེ་རྒྱུར་རྣམ་པར་བརྟགས་པ་དང་བྲལ་བ་ཉིད་ཀྱི་ཕྱིར་རོ། །སྨོན་པ་མེད་པ་ཞེས་བྱ་བ་ལ་སོགས་པའི་བཤད་པ་ནི་གོ་སླའོ། །བདག་ལ་སོགས་པའི་དངོས་པོ་མེད་པའི་ཕུང་པོ་ལྔ་པོ་རྣམས་ཡོངས་སུ་འདུས་པ་སྟེ་ཚོགས་པ་ཅན་དུ་བྱེད་པ་དེའི་མཚན་ཉིད་ཀྱི་ཕྱིར་རོ། །བདག་མེད་པ་ལ་སོགས་པའི་བཤད་པ་ནི་གོ་སླའོ། །དྲི་མ་མེད་པ་ནི་རང་བཞིན་གྱིས་འོད་གསལ་བ་ཉིད་དེ། དེའི་ཕྱག་རྒྱས་རྒྱས་བཏབ་བའོ། །འཚོ་བ་རབ་ཏུ་མི་གནས་པ་ཉིད་ཀྱི་ཕྱིར་ཞེས་པ་ནི་དོན་དམ་པ་ཉིད་དུ་སྒྲིབ་པའི་བག་ཆགས་ཐམས་ཅད་དང་བྲལ་བ་ཉིད་ཀྱི་ཕྱིར་རོ། །འཁྲུག་པ་མེད་པ་ནི་རྣམ་པར་གཡོ་བ་མེད་པ་ཉིད་ཀྱི་ཕྱིར་རོ་སྟེ་དེའི་ཕྱག་རྒྱས་རྒྱས་བཏབ་པའོ། །བླ་ན་མད་པའི་མཐར་ཕྱིན་པའི་ཕྱིར་རོ་ཞེས་པ་ཤིན་ཏུ་མཐར་ཐུག་ཅིང་མཐས་ཀླས་པའི་ཆོས་ཉིད་ཀྱི་ཕྱིར་རོ། །ཇི་ལྟ་བ་བཞིན་ཞེས་པ་ནི་རྟག་ཏུ་ལྷག་པར་གནས་པའི་དེ་བཞིན་ཉིད་དེ་དེའི་ཕྱག་རྒྱས་རྒྱས་བཏབ་པའོ། །གང་ཟག་དང་ཆོས་རྣམས་ཀྱི་སྒྲོ་འདོགས་པ་
དང་སྐུར་པ་འདེབས་པ་མེད་པའོ། །གང་ལ་ཞེ་ན་འཇམ་པའི་དབང་དུ་བྱེད་པ་དང་དབང་དུ་བྱ་བ་མེད་པའི་ཕྱིར་རོ་སྟེ་ཚད་མའི་ཡང་རྣམ་པར་རྟོག་པ་དོན་དམ་པ་ཉིད་དུ་མེད་པའི་ཕྱིར་རོ། །རབ་ཏུ་འཇིགས་པ་ཞེས་པ་ལ་སོགས་པའི་བཤད་པ་ནི་གོ་སླའོ། །འགོག་པ་མེད་པ་ཉིད་ཀྱི་ཕྱིར་ནི་དོན་དམ་པ་ཉིད་དུ་ཆོས་རྣམས་ཀྱི་རང་གི་ངོ་བོ་མེད་པའི་ཕྱིར་རོ་ཞེས་དགོངས་སོ། །རྟོག་གེ་ཐམས་ཅད་ནི་རྣམ་པར་རྟོག་པ་ཐམས་ཅད་དོ། །མཚན་ཉིད་དེ་ནི་གཟུགས་ལ་སོགས་པའོ། །དེ་རྣམས་དོན་དམ་པ་ཉིད་དུ་མེད་པའི་ཕྱིར་མཚན་ཉིད་མེད་པའི་ཕྱག་རྒྱས་རྒྱས་བཏབ་པའོ། །གནས་ནི་ཀུན་གཞི་རྣམ་པར་ཤེས་པའི་རྒྱུན་ཆོས་ཐམས་ཅད་ཀྱི་བག་ཆགས་རྣམས་ཡང་དག་པར་བཅད་པའི་ཕྱིར་རོ། །རྗེས་སུ་སྦྱོར་བ་མེད་པ་ནི་ཉེས་པའི་ཚུལ་གྱིས་ཕྱིན་ཅི་ལོག་ཏུ་སྦྱོར་བ་མེད་པ་སྟེ་དེའི་ཕྱག་རྒྱས་རྒྱས་བཏབ་པའོ། །ཅིའི་ཕྱིར་ན་ཡོན་ཏན་གྱི་ཚུལ་རྣམས་ཀྱང་གཉེན་པོའི་ཕྱོགས་ཡིན་ལ་དེ་ཉེ་བར་དམིགས་པ་མེད་པའི་ཕྱིར་རོ། །ཐམས་ཅད་མངོན་པར་འདུས་མ་བྱས་པ་ཉིད་ཀྱི་ཕྱིར་རོ་སྟེ། དོན་དམ་པར་ལས་ཀྱི་རྣམ་པར་སྨིན་པ་རྣམས་མེད་པ་ཉིད་ཀྱི་ཕྱིར་རོ། །སྐྱེད་བ་དང་གནས་པ་སྟེ་དེ་དང་བྲལ་བ་ཉིད་ཀྱི་ཕྱིར་འདུས་མ་བྱས་པའི་ཕྱག་རྒྱས་རྒྱས་བཏབ་པའོ། །ཆོས་ཐམས་ཅད་མཉམ་པ་ཉིད་ནི་སྟོང་པ་ཉིད་དོ། །མཚན་ཉིད་གཅིག་པ་ནི་འདུས་བྱས་ཉིད་དོ། །དེ་ཡང་གཟུགས་ལ་སོགས་པ་རྣམས་ཀྱི་སྤྱིའོ། །ཕུང་པོ་ནི་ཕུང་པོའོ། །དེའི་ཕྱག་རྒྱས་རྒྱས་བཏབ་པའོ། །གང་ལས་ཤེ་ན་སྙིང་པོ་མེད་པ་ཉིད་ཀྱི་ཕྱིར་ཏེ། བདག་མེད་པ་ཉིད་ཀྱི་ཕྱིར་རོ་ཞེས་བ་ཇི་སྲིད་པའོ།། སངས་རྒྱས་ཀྱི་སྐུའི་མཉམ་པ་ཉིད་ནི་མཚུངས་པ་ཉིད་དོ། །དེ་སོ་སོར་རྙེད་པ་ནི་སོ་སོར་ཐོབ་པའི་ཕྱིར་ཏེ་ཉེ་བར་ཐོབ་ཅིང་རྗེས་སུ་ཐོབ་པའོ། །འཇིག་རྟེན་གྱི་ལམ་ནི་འཇིག་རྟེན་པའི་ལམ་སྟེ། དེ་ཁོ་ན་མཐའ་གཅིག་ཏུ་རྣམ་པར་དག་པའི་ཕྱིར་ནི་དོན་དམ་པར་ཕྱེད་པའི་ཕྱིར་རོ། །ཕྱག་རྒྱ་ཆན་པོ་ཞེས་བྱ་བ་ལ་སོགས་པའི་བཤད་པ་ནི་གོ་སླ་པའི་ཕྱིར་རྣམ་པར་བཤད་པར་མི་བྱའོ། །མུཿའི་ཡི་གེ་འདི་ལས་སྒྲུབ་པའི་དུས་སུ་རང་གི་སྙིང་གར་དགོད་པར་བྱའོ། །ཨའི་ཡི་གེ་ལ་སོགས་པ་རྣམས་ཀྱང་སྙིང་ག་དང་མཛོད་སྤུ་དང་རྣ་བ་དང༌། སྤྱི་བོ་དང་གཙུག་ཏོར་རྣམས་རིམ་པས་སྦྱར་བར་བྱའོ། །
གལ་ཏེ་ཡང་ན་ཧཱུཾ་ཡིག་ཉིད་སྙིང་གར་ཟླ་བའི་མཚན་མ་ལའོ། །ཡང་ན་ཁཾ་ཡི་ག་ཁོ་ན་སྤྱི་བོར་བསམ་པར་བྱའོ། །སྔར་བཞིན་དུ་སྐུའི་ཕྱག་རྒྱལ་རང་གི་སྔགས་ཀྱི་ཡི་གེ་རྣམས་ཀྱིས་ཀུན་དུ་བཀང་པ་ཇི་ལྟ་བ་བཞིན་དུ་རང་གི་ལས་བསྒྲུབ་པར་བྱ་བའི་དོན་ཅན་ལ་ཇི་ལྟར་གསུངས་པའི་དཀྱིལ་འཁོར་འབྱུང་བར་འགྱུར་བ་གང་ཡང་རུང་བ་ལ་མོས་པའི་ཕྱག་རྒྱས་རྒྱས་བཏབ་པོ་ཞེས་པ་གང་ཡང་རུང་པའི་ཚིག་གི་དོན་བསྒོམས་པས་ཇི་ལྟར་འདོད་པའི་ལས་རྣམས་སྐྱེ་བའི་ཕྱིར་རོ། །ཨ་ཡིག་ལ་སོགས་པ་ནི་ཕྱག་རྒྱ་ལྔའི་ཡེ་ཤེས་སུ་བསྡུས་པ་ཅན་གྱི་ས་བོན་མ་ཡིན་ནོ། །འདི་དག་སྡུད་པ་པོ་ནི་ཧཱུཾ་ཡིག་དང་ཁཾ་ཡིག་སྟེ་ཐམས་ཅད་བྱིན་གྱིས་རློབ་པའོ་ཞེས་པའི་དབང་དུ་བྱས་པའོ། །དེ་ནས་ད་ནི་ཞེས་བྱ་བ་ལ་སོགས་པས་རྣམས་པར་སྣང་མཛད་ཀྱི་སྐུའི་ཕྱག་རྒྱ་གསང་བའི་སྒྲུབ་ཐབས་སྟོན་པར་བྱེད་དོ། །པདྨ་འདབ་མ་བརྒྱད་པ་དང་ཟླ་བའི་དཀྱིལ་འཁོར་གྱི་དབུས་སུ་སོན་པར་ཁཾ་ཡིག་དཀར་པོ་ཉི་མའི་དཀྱིལ་འཁོར་རབ་ཏུ་གསལ་བ་དེའི་སྟེང་དུ་བར་བའི་ཕྲེང་བ་འཁྲུགས་པ་ནི་རྡོ་རྗེ་རྩེ་ལྔ་བར་ཉེ་བར་བསྟན་ནོ། །ཤེས་པར་བྱ་ཞེས་པ་ཉེ་བའི་མཐར་སྤྱོད་དོ། །དབང་པོ་གཉིས་ནི་སྙོམས་པར་འཇུག་པས་ཞེས་པ་ནི་ལྷ་དང་གཉིས་སུ་མེད་པ་ཅན་དུ་བསྒོམས་པས་ཕྱག་རྒྱ་སྟེ་རྡོ་རྗེའི་བདག་ཉིད་ཅན་གོ་འཕང་སྟེ་རྟེན་དུ་གྱུར་པར་མན་ངག་གང་ཡིན་པ་ལ་ཤེས་པར་བྱའོ། །འདིའི་སྙིང་པོ་ནི་དེའི་ཕྱག་རྒྱའི་གོ་འཕང་ངོ༌། །དེ་ཉིད་གནས་ཏེ་ཀུན་དུ་གནས་པའི་སེམས་གང་ཡིན་པ་དེའི་གནས་སོ། །ཡི་གེ་ཧཱུཾ་ཞེས་པས་ནི་ཧཱུཾ་ཡིག་དགོད་པའོ། །འབར་བ་ནི་ར་ཡིག་ལས་འབར་བར་བསྒོམས་ནས་འབར་བའི་མིག་ཅན་དུ་བྱས་པར་བསམ་པར་བྱའོ། །དཀར་པོ་ལ་སོགས་པ་ནི་འབར་བ་ནི་སྙིང་གའི་རྡོ་རྗེའི་སྙིང་པོ་ལས་དབང་པོ་ཐམས་ཅད་ངེས་པར་ཕྱུང་སྟེ་འཇིག་རྟེན་ཐམས་ཅད་དུ་སྤྲོས་ནས་བསྡུས་བཞིན་པས་འཁོར་ལོས་སྒྱུར་བ་ལྟ་བུ་ཞེས་པས་རྣམ་པར་སྣང་མཛད་བཞིན་ནོ། །དབང་པོ་ལྔས་ནི་ཡང་དག་དམིགས། །ཞེས་པ་ལྷའི་མིག་ལ་སོགས་པ་རྣམས་ཀྱིས་རང་གི་མིག་ལ་སོགས་པ་དང་གཅིག་པ་ཅན་དུ་བྱས་ནས་སོ། །ཇི་ལྟར་དབང་པོ་གཉིས་ཀྱི་རབ་ཏུ་སྦྱོར་བ་བརྗོད་པར་བྱ་བ་དེ་བཞིན་དུ་
ཉེ་བར་བསྟན་པ་བཀུག་ནས་ཞེས་བྱ་བ་ལ་སོགས་པ་གསུངས་པ། ཇི་སྙེད་བུད་མེད་ཞེས་པ་ནི་ལྷ་གང་ཇི་སྙེད་པ་དེ་དང་དེ་སྒྲུབ་པར་བྱེད་པའི་རྣམ་པར་སྣང་མཛད་ཀྱི་རྣལ་འབྱོར་ཅན་ཉིད་གཉིས་བུ་མེད་པ་ཅན་ཉིད་ཀྱིས་སླར་ཡང་འགྲོགས་པར་བསྒོམས་པས་ཇི་ལྟར་རང་གི་ལུས་ཀྱི་ཕྱག་རྒྱ་གསང་བའི་དངོས་གྲུབ་ཀུན་དུ་ཐོབ་བོ། །སེམས་ཀྱི་ཕྱག་རྒྱ་གསང་བའི་སྒྲུབ་པ་ཕྱེ་བ་གསང་པའི་ཞེས་བྱ་བ་ལ་སོགས་པ་གསུངས་པ་གསང་བ་ནི་ཕྱི་རོལ་ལ་སོགས་པ་གསང་བ་ཉིད་ཀྱི་ཕྱིར་རོ། །མཆོག་ནི་ཐམས་ཅད་ཀྱི་མཆོག་ཉིད་ཀྱི་ཕྱིར་རོ། །དགེས་པ་ནི་རྟོག་པ་ཐམས་ཅད་དང་བྲལ་བ་ཉིད་ཀྱི་ཕྱིར་རོ། །དེ་ལྟ་བུའི་ཆོ་ག་པས་མས་ནས་སོ། །ཆེན་པོ་ཞེས་པ་ཁྱབ་ཅན་ནོ། །ཞི་བའི་ཆོས་ཀྱི་རྗེས་སུ་མཐུན་མཆོག་ནི་ཉེ་བའི་ཐོབ་པ་མཉམ་པ་ཉིད་ཀྱི་ལུགས་དང་མཐུན་པ་དང་མཆོག་སྟེ་འདོད་པའོ། །རྡོ་རྗེ་སེམས་དཔའ་གང་ཡིན་པ་ཡང་འགྲུབ་པ་སྟེ་རབ་ཏུ་སྩོལ་བར་བྱེད་དོ། །དེའི་ཕྱིར་མཆོག་དེ་ཁོ་ན་བར་མིན་པ་ལའོ། །འབྲས་བུའི་ངོ་བོའི་དངོས་པོ་མེད་པ་ནི་སྟོང་པ་ཉིད་དོ། །རྒྱུའི་ཆོས་རྣམས་པར་རྟོག་པའི་མཚན་མ་མེད་པའོ། །དེའི་དོན་དུ་གཉེར་བ་དང་བྲལ་བའི་ཕྱིར་ཡང་སྨོན་པ་མེད་པའོ། །དེ་ཁོ་ན་ཡང་ཆོས་ཀུན་བདག་མེད་པ་ཉིད་དོ། །ཕ་རོལ་ཕྱིན་པ་ཐམས་ཅད་ཐོབ་པ་ཞེས་བྱ་བ་ནི་ཕ་རོལ་ཏུ་ཕྱིན་པའི་ནང་དུ་གཏོགས་པའོ། །རྡོ་རྗེ་སེམས་དཔའ་མཆོག་ཅེས་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །རྒྱན་རྣམས་ཀུན་ཞེས་པ་ནི་མདོར་བསྟན་ཏོ། །ཁ་དོག་ལྗང་གུ་ཞེས་པ་ནི་ལས་ཇི་ལྟར་གསེར་དུ་འཕོ་བ་ལས། །སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་དྲུག་རྒྱས་པར་བཤད་དོ། །དེ་དང་ལྷན་ཅིག་གནས་ཞེས་པ་ནི་ཕ་རོལ་ཏུ་ཕྱིན་པ་གང་ཡང་རུང་བ་སྔོན་དུ་བྱས་ནས་ཕྱི་རོལ་གྱི་བུད་མེད་དང་སྐྱེས་པ་སྦྱོར་བར་ལྷག་པར་མོས་པ་བསྒོམ་པར་བྱའོ། །རྡོ་རྗེ་འཛིན་མ་ཡང་ཞེས་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་ངོ༌། །དབང་པོ་གཉིས་ནི་སྙོམས་འཇུག་པས་ནི་སྐུ་དང་གསུང་དང་ཕྱག་རྒྱ་གསང་བ་བསྒྲུབ་པོ་ཞེས་བརྗོད་དོ། །རིམ་པ་གང་གིས་དེར་འགྱུར་ན་དེ་བསྟན་པའི་ཕྱིར་དྲན་པ་ཉེ་བར་གཞག་པ་ཞེས་པ་ལ་སོགས་པ་གསུངས་པ། སྐད་ཅིག་གིས་རྡོ་རྗེ་སེམས་
དཔའ་གཟུགས་བརྙན་ལྟ་བུ་ཀུན་ནས་མངོན་དུ་བྱ་སྟེ། རང་གི་སྔགས་འདོན་པ་སྔོན་དུ་འགྲོ་བས། དྲན་པ་ཉེ་བར་གཞག་པ་ལ་སོགས་པ་ནས་ཇི་སྲིད་པའི་བར་དུ་བསྒོམས་ནས་དམ་དུ་འཁྱུད་པར་བསྒོམ་པར་བྱ་སྟེ་ཚོགས་ཐམས་ཅད་ཉེ་བར་བསགས་པར་འགྱུར་རོ། །རྣམ་གྲོལ་གོས་ཀྱིས་བསྒྲིབས་ནས་སུ། །ཞེས་བྱ་བ་ནི་སྟོང་པ་ཉིད་དུ་བསྒོམས་ནས་སོ། །བྱང་ཆུབ་སེམས་ནི་ཞེས་བྱ་བ་ནི་ཟླ་བའི་དཀྱིལ་འཁོར་རོ། །རྡོ་རྗེ་ཡེ་ཤེས་ཞེས་བྱ་བ་ནི་དེའི་སྟེང་དུ་བརྡ་བསྒོམ་པའོ། །བརྩོན་འགྲུས་ཆེ་ཞེས་བྱ་བ་ནི་དེ་ལ་ང་རྒྱལ་བྱེད་པའོ། །དེ་བཞིན་གཤེགས་པ་ཐམས་ཅད་སྐུ་ལ་སོགས་པའི་རྡོ་རྗེ་དབྱིངས་ནི་རྣམ་པར་སྣང་མཛད་ཅན་ནོ། །སླར་ཡང་བདག་བརྟན་པ་ཞེས་པ་དེ་ལ་བརྟན་པའི་ང་རྒྱལ་བྱེད་པའོ། །དེའི་ཕྱིར་ལྷའི་ནང་དུ་གཏོགས་པའི་བུད་མེད་རྣམས་ཀྱི་དམ་ཚིག་ནི་སྔོན་གྱི་རིམ་པས་བསྒོམ་པའོ། །བྱེད་པ་བསྟན་པའི་ཕྱིར་དེའི་ཞེས་བྱ་པ་ལ་སོགས་པ་གསུངས་པ། དེའི་ནུ་མ་ལ་སོགས་པའི་ཆ་ཤས་རྣམས་རང་གི་ནུ་མ་ལ་སོགས་པ་རྣམས་ཀྱི་ནང་དུ་ཆུབ་པར་བྱའོ། །འདི་ཡིས་ཞེས་པ་ལ་སོགས་པ་རྣལ་འབྱོར་གྱི་བདག་ཉིད་དུ་གསུངས་པ་སྟོན་པར་བྱེད་དོ། །བཤགས་པ་ལ་སོགས་པའི་སྔོན་དུ་བྱས་ནས་སོ། །ཐོག་མ་ནི་སྔ་དྲོའོ། །གུང་ནི་ཉི་མ་གུང་ངོ༌། །མཚམས་ནི་ཐུན་མཚམས་སོ། །སངས་རྒྱས་ཐམས་ཅད་ཀྱི་ལྷ་ཐམས་ཅད་དོ། །རྣམ་པར་སྣང་མཛད་དང་མཐུན་པ་ཡེ་ཤེས་ཀྱི་སྐུ་ཉིད་བསྟན་པར་བྱ་བའི་དོན་དུ་འགྲོ་བ་སྤྲོ་བ་ཞེས་པ་ལ་སོགས་པ་རྡོ་རྗེ་སེམས་དཔའ་ལ་སོགས་པ་དེ་ཉིད་རྒྱས་པར་བཤད་པ་གསུངས་སོ། །དཀྱིལ་འཁོར་རྫོགས་པ་ལ་ཡོངས་སུ་མཉེས་པའི་ཕྱིར་འདི་འཇམ་དཔལ་གྱི་གླུ་ཡིས་བཅོམ་ལྡན་འདས་ལ་མངོན་པར་བསྟོད་པ། ཨོཾ་སརྦ་བུདྡྷ་པར་མེ་ཤྭ་ར་ཞེས་པ་ལ་སོགས་པའི་སྔགས་ལ་བུདྡྷྱ་བུདྡྷྱ་ཞེས་པ་ནི་སྐུལ་བར་བྱེད་པའོ། །ལ་ལ་ནི་ཞེས་པ་ནི་རོལ་པའི་གར་རོ། །ཧོཿ་ནི་དགེས་པའོ། །སུ་ཕག་ཞེས་པ་ནི་མེ་ལོང་ཡེ་ཤེས་ཀྱི་སྒོ་ནས་སོ། །སུ་ར་ཏ་ཞེས་པ་ནི་མཉམ་པ་ཉིད་ཀྱི་ཡེ་ཤེས་ཀྱི་སྒོ་ནས་སོ། །སུ་བྷ་བ་ཞེས་པ་ནི་སོ་སོར་རྟོག་པའི་ཡེ་ཤེས་ཀྱི་སྒོ་ནས་སོ། །མ་ཧཱ་མ་ཧཱ་ཞེས་པ་ནི་བྱ་བ་རྗེས་སུ་སྒྲུབ་པའི་ཡེ་ཤེས་ཀྱི་སྒོ་ནས་སོ། །སངས་
རྒྱས་ཀུན་ལ་ཕྱག་འཚལ་བསྟོད་པ་ནི་ཆོས་ཀྱི་དབྱིངས་ཀྱི་དཀྱིལ་འཁོར་གྱི་སྒོ་ནས་སོ། །གདོད་ནས་ཞི་ལ་ཕྱག་འཚལ་བསྟོད། །ཞེས་པ་ནི་རྡོ་རྗེ་སྙིང་པོར་བརྗོད་པའི་སྒོ་ནས་སོ། །རྡོ་རྗེ་ཀུན་ལ་ཕྱག་འཚལ་བསྟོད། །ཅེས་པ་ནི་དབང་ཆེན་གྱི་དཀྱིལ་འཁོར་གྱི་སྒོ་ནས་སོ། །བྱང་ཆུབ་སེམས་དཔའ་སྐྱོབ་པ་པོ། །ཞེས་པ་ནི་ཆུའི་དཀྱིལ་འཁོར་གྱི་སྒོ་ནས་སོ། །དེ་བཞིན་གཤེགས་པའི་རྡོ་རྗེ་ཆེ། །ཞེས་པ་ནི་མེའི་སྒོ་ནས་སོ། །སངས་རྒྱས་སངས་རྒྱས་ཞེས་པ་ནི་རླུང་གི་སྒོ་ནས་སོ། །མཐའ་ལས་འདས་པ་ཕྱག་འཚལ་བསྟོད། །ཅེས་པ་ནི་གཙུག་ཏོར་གྱི་དཀྱིལ་འཁོར་གྱི་སྒོ་ནས་སོ། །ཧཱུཾ་མཛད་ཅེས་པ་ནི་ཁྲོ་བོའི་དཀྱིལ་འཁོར་གྱི་སྒོ་ནས་སོ། །ཤིན་ཏུ་ཡོངས་སུ་མྱ་དན་ལས་འདས་ཞེས་པ་ནི་མི་གནས་པའི་མྱ་ངན་ལས་འདས་པའི་སྒོ་ནས་སོ། །འཇིག་རྟེན་དབང་ཕྱུག་མགོན་ཞེས་པ་ནི་བྱང་ཆུབ་སེམས་དཔའི་དཀྱིལ་འཁོར་གྱི་སྒོ་ནས་སོ། །རྣམ་པར་དག་པ་ཞེས་པ་ལ་སོགས་པ་ནི་གཟུངས་མའི་དཀྱིལ་འཁོར་གྱི་སྒོ་ནས་སོ་ཞེས་པའོ། །རྡོ་རྗེ་སྙིང་པོ་རྒྱན་ལས་ཆོས་ཀྱི་དབྱིངས་ཀྱི་རྣམ་པར་བཤད་པ། རྡོ་རྗེ་སྙིང་པོ་ཞེས་གྲགས་པའི་དཀྱིལ་འཁོར་ཉེ་བར་བསྟན་པའི་ཕྱིར་དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་པ། སྒོ་རྣམས་སུ་རྡོ་རྗེའི་གཟུགས་བརྙན་དང་དེ་རྣམས་ཀྱི་ཕྱག་རྒྱ་དང་ལྡན་པའོ། །དེ་བཞིན་གཤེགས་པ་ཞེས་པ་ནི་གཙུག་ཏོར་རྣམས་ཁོ་ནར་བསྟན་པ་ཤར་དུ་ཞེས་པ་ལ་སོགས་པ་གསུངས་པ། སངས་རྒྱས་གཟུགས་བརྙན་འཛིན་ཞེས་པ་ནི་རྣམ་པར་སྣང་མཛད་ལྟ་བུའི་ལོངས་སྤྱོད་རྫོགས་པ་ཅན་གྱི་སྐུ་འཆང་པའོ། །འཁོར་ལོ་གཉིས་པ་ལ་མི་བསྐྱོད་པ་ལ་སོགས་པ་རྣམས་ཤར་ལ་སོགས་པའི་ཕྱོགས་རྣམས་སུའོ། །དབང་ལྡན་ལ་སོགས་པའི་ཕྱོགས་བྲལ་རྣམས་སུ་རྡོ་རྗེ་སེམས་དཔའ་ལ་སོགས་པ་གཉིས་གཉིས་བྲི་བར་བྱའོ། །འཁོར་རྣམས་ཟླ་བའི་དཀྱིལ་འཁོར་ལ་སྟེ་དེ་དག་གསལ་བའི་དཀྱིལ་འཁོར་ལའོ། །རང་གི་ཕྱག་རྒྱ་འོད་ཟེར་འབར། །ཞེས་པ་ནི་ཇི་ལྟ་བ་བཞིན་དུ་རང་གི་རྡོ་རྗེ་ལ་སོགས་པ་འདོ་ཟེར་འབར་བའོ། །དེ་ཉིད་དུ་མེ་ལ་སོགས་པའི་ཟུར་རྣམས་སུ་རྡོ་རྗེ་སྒེག་མོ་ལ་སོགས་པ་རྣམས་སོ། །ཕྱིའི་ཟུར་རྣམས་སུ་བདུག་པ་མ་ལ་སོགས་པ་རྣམས་སོ། །སྒོའི་མཚམས་རྣམས་སུ་རྡོ་རྗེ་གཟུགས་ལ་སོགས་པ་རྣམས་སོ། །སྒོ་རྣམས་སུ་རྡོ་རྗེ་ལ་
ལྕགས་ཀྱུ་ལ་སོགས་པ་རྣམས་བྲི་བར་བྱའོ། །དཀྱིལ་འཁོར་གནས་རྣམས་སུ་ཞེས་པ་ནི་དཀྱིལ་འཁོར་གྱི་ཆ་རྣམས་སུའོ། །དེ་ནས་ཡང་ཕྱིའི་དཀྱིལ་འཁོར་དུ་འཇིག་རྟེན་སྐྱོང་བ་ལ་སོགས་པ་རྣམས་སོ། །དེ་ལྟར་དཀྱིལ་འཁོར་བྲིས་ནས་བསྡུ་བ་ལ་སོགས་པ་ནས་དབང་བསྲུང་བའི་མཐར་ཐུག་མངོན་པར་རྫོགས་པར་བྱ་སྟེ། ཇི་ལྟ་བ་བཞིན་དུ་མཆོད་ནས་སློབ་མ་རྣམས་གཞུག་པར་བྱའོ། །བྱང་ཆུབ་བསླབ་པ་རྗེས་སྤྱོད་པ། །ཞེས་པ་ནི་སྔོམ་པ་རྣམས་གཟུང་བའོ། །རྡོ་རྗེའི་དབང་བསྐུར་སྦྱོར་བ་ཞེས་པ་ནི་སྔར་བཤད་པའི་རྡོ་རྗེའི་དབང་བསྐུར་གྱི་རིམ་པས་སོ། །དེ་ཉིད་ལ་ཁྱད་པར་བསྟན་པའི་ཕྱིར། སེང་གེའི་ཁྲི་ཞེས་པ་ལ་སོགས་པ་གསུངས་པ། དེ་ནས་མིང་གི་དབང་བསྐུར་བ་བྱིན་ནས་རྡོ་རྗེ་རིན་ཆེན་གྱི་དབང་བསྐུར་བ་དང་ཆོས་ཀྱི་སྐུའི་དབང་བསྐུར་བ་དང༌། ལས་སྣ་ཚོགས་ཀྱི་མངོན་པར་དབང་བསྐུར་བས་སོ་སོར་དབང་བསྐུར་ལ་དར་དབྱངས་ཀྱི་དབང་བསྐུར་བར་བྱའོ། །སྤྱར་མི་བྱ་ཞེས་པ་ནི་དེ་ལ་ཞེན་པ་མི་བྱའོ།། དེ་དག་ལ་བསྔགས་པར་མི་བྱའོ། །སེམས་དཔའ་ཞེས་པ་ནི་རྡོ་རྗེ་སེམས་དཔའོ། །དེ་ལ་མངོན་པར་ཆགས་པར་བྱ་བའི་ཕྱིར་འདོད་པའོ། །ཆགས་པ་ལ་སོགས་པ་སྟོང་པ་ཉིད་དུ་བསྒོམས་པས། སྐྱེས་པ་ཉིད་ཀྱི་ཕྱིར་ཆགས་པ་ལ་སོགས་པ་འཁྲུངས་པའོ། །ཐལ་མོ་བརྟན་པར་བསྡམས་པ་ནི། །ཞེས་པ་ནི་མཉམ་པའི་ཐལ་མོའོ། །མེ་ཏོག་ཁ་འབུས་པའི་ཚུལ་ཞེས་པ་ནི་མེ་ཏོག་ཁ་འབུས་པའི་ཚུལ་དུའོ། །དེ་ནི་པདྨའི་ཐལ་མོའོ། །སོར་མོ་ཐམས་ཅད་རབ་ཏུ་བརྐྱང་བ་ནི་པདྨའི་ཕྱག་རྒྱ་སྟེ། པདྨའི་རིགས་རྣམས་ཀྱིའོ། །རྡོ་རྗེ་ཐལ་མོ་ནི་རྡོ་རྗེའི་རིགས་རྣམས་ཀྱིའོ། །དེའི་ཕྱིར་རྡོ་རྗེ་བསྡམས་པ་བཀྲོལ་ཏེ། ཐལ་མོ་བཀན་པའི་སོར་མོ་བཀུག་པའི་རྩེ་མོ་གཉིས་སུ་མེད་པ་ནི་དེ་བཞིན་གཤེགས་པའི་རིགས་རྣམས་ཀྱིའོ། །ཁུ་ཚུར་ནང་དུ་བྱ་བ་ནི་གཙུག་ཏོར་རྣམས་ཀྱི་སྡེ་འདི་རམས་དམ་ཚིག་གི་ཕྱག་རྒྱ་ཞིའོ། །དམ་ཚིག་ནི་ཞེས་པ་ནི་སོ་སོར་རེ་རེ་འཆད་པར་འགྱུར་པའི་ཕྱག་རྒྱ་བཅིངས་པར་བྱའི་གཞན་དུ་ཡང་མ་ཡིན་པར་ངེས་པའོ། །ལྷའི་རྣལ་འབྱོར་ལ་རྡོ་རྗེ་ཐལ་མོ་དང༌། རྡོ་རྗེ་བསྡམས་པ་དང༌། དེ་དྲལ་བ་དང༌། དབབ་པ་དང༌། དེ་བརྟན་པ་ན་དུ་བྱེད་པ་སྔོན་དུ་འགྲོ་བས་ཕྱག་རྒྱ་ཐམས་ཅད་འཆིང་བར་འདོད་པ་ཉིད་ཀྱི་ཕྱིར། ཀུན་གྱི་རྩེ་མོར་ལེགས་པར་བརྟག །ཅེས་པ་ནི་གུང་མོ་ཁབ་བཞིན་དུ་བྱས་ནས་སྡིག་མཛུབ་རྩེ་མོ་གཉིས་རྡོ་རྗེ་རྣམ་པར་བསྐུམ་
སྟེ། མཐེའུ་ཆུང་དང་མཐེ་བོ་རབ་ཏུ་བརྐྱང་བར་བྱའོ་ཞེས་པ་རྡོ་རྗེ་ཆེན་པོ་རྡོ་རྗེ་ཆེན་པོ་སངས་རྒྱས་ཐམས་ཅད་ཀྱིའོ། །མཛུབ་མོ་རབ་ཏུ་བརྐྱང་སྟེ་སྟེང་དུ་བསྒྲེང་བའི་རྣམ་པས་གུང་མོ་གཉིས་ཀྱི་གཞོགས་སུ་གཟུང་བའོ། །གུང་མོ་གཉིས་ནི་ཡོངས་སུ་བརྟག །ཅེས་པ་ནི་གུང་མོ་གཉིས་སྡིགས་མཛུབ་ཀྱི་རྩེ་མོ་བབ་བཞིན་དུ་བྱས་པའི་གཞོགས་སུ་རྡོ་རྗེ་ལྟར་གཟུང་བར་བྱའོ། །དེ་ཉིད་ཅེས་པ་གུང་མོ་གཉིས་དང་སྡིགས་མཛུབ་རྩེ་མོ་མཉམ་པར་བྱས་པའོ། །རྡོ་རྗེ་ཞེས་པ་སྡིགས་མཛུབ་རྡོ་རྗེའི་རྣམ་པ་ཉིད་དུའོ། །ཁུ་ཚུར་སྙིང་པོ་ནི་དེ་ཉིད་གཙུག་ཏོར་གྱི་རྣམ་པ་ནི་སྟེང་འགྲོ་ཡིའོ། །མཆོག་ནི་གུང་མོ་དང་སྲིན་ལ་གནང་དུ་བཅུག་པའི་གུང་མོ་ཁབ་བཞིན་དུ་བྱས་པར་བརྗོད་པར་བྱའོ། །ལྕགས་ཀྱུ་འདི་ཡི་སྦྱོར་བ་ཡིས། །ཞེས་པ་ནི་རྡོ་རྗེ་བསྡམས་པ་ཉིད་དོ། །གུང་མོ་རྡོ་རྗེ་རིན་ཆེན་རྩེ། །ཞེས་པ་ནི་གྲང་མོ་རྡོ་རྗེ་དང་རྩེ་མོ་དག་རིན་པོ་ཆེར་བྱས་པའོ། །རྩེ་མོའི་རྩེ་མོ་རྣམ་པར་འཇོམས། །ཞེས་པ་ནི་སྡིགས་མཛུབ་གཉིས་རབ་ཏུ་བརྐྱང་བའོ། །གནས་སུ་ངེས་པར་སྦྱར་ཞེས་པ་ནི་རྡོ་རྗེ་བསྡམས་པ་ཉིད་རྒྱལ་མཚན་ལྟར་གཟུང་བའོ། །བཞད་པའི་གནས་སུ་རབ་ཏུ་སྦྱར། །ཞེས་པ་ནི་དེ་ཉིད་དོ། །རལ་གྲི་ལྟ་བུར་ཞེས་པ་ནི་གུང་མོ་གཉིས་རལ་གྲི་ལྟར་བསྐུམ་པའོ། །འཁོར་ལོ་འདྲ་ཞེས་པ་ནི་འཁོར་ལོའི་རྣམ་པ་ཐམས་ཅད་དུ་འཁྱིལ་བར་བསྡམས་པ་བཀྲོལ་ནས་རབ་ཏུ་བརྐྱང་བར་བྱའོ། །ཁ་རུ་ཕྱེ་བ་ཞེས་པ་རྡོ་རྗེ་བསྡམས་པ་ཉིད་དོ། །གར་མཚུངས་ཞེས་པ་ནི་རྡོ་རྗེ་བསྡམས་པ་གར་གྱི་ཚུལ་གྱིས་སྤྱི་པོར་གཟུང་བའོ། །སྣ་ཚོགས་རྡོ་རྗེ་ཅན་ཞེས་པ་ནི་རྡོ་རྗེ་མདའ་འདི་ཉིད་ལས་ཀྱི་རྡོ་རྗེ་མའིའོ། །རྡོ་རྗེ་སེམས་དཔའ་ལ་སོགས་པ་རྣམས་ཀྱི་རྡོ་རྗེ་སེམས་དཔའ་དང་རྡོ་རྗེ་རིན་ཆེན་དང༌། རྡོ་རྗེ་ཆོས་དང༌། རྡོ་རྗེ་ལས་ཀྱི་ཕྱག་རྒྱ་ཁོ་ནར་བལྟ་བར་བྱའོ། །ཆོས་ཡོངས་སུ་སྡུད་པའི་སྦྱོར་བ་ཞེས་པ་ནི་གོ་ཆའི་ཚུལ་གྱིས་སོ། །མཆེ་བ་རྣམ་པར་གཙིགས་ཞེས་པ་ནི་མཐེའུ་ཆུང་དང་མཐེ་བོང་ཆེ་བ་ཟུར་གཉིས་སུ་བྱས་པའོ། །ཁུ་ཚུར་བཅིངས་པ་ཁུ་ཚུར་གྱིས། །ཞེས་པ་ནི་མཐེ་བོང་ནང་དུ་བཅུག་སྟེ་མཐེའུ་ཆུང་དང་མིང་མེད་ཀྱི་རྩ་བའི་བར་དུ་ཡང་དག་པར་སྦྱར་བ་སྔོན་དུ་བྱས་ནས་སྡིགས་མཛུབ་གཉིས་ཀྱི་མདུན་དག་གིས་མཐེ་བོང་གི་རྒྱབ་ཏུ་བཙིར་བར་བྱའོ། །འགྱེད་ཅིང་སྡུད་པར་ཡང་དག་གནས། །ཞེས་པ་ནི་ཁ་སྤྱོར་གྱི་ཐལ་མོ་ཉིད་དོ། །པདྨའི་ཐལ་མོ་ནི་པདྨ་ཁ་ཟླུམ་པ་ལྟར་ལེགས་པར་
འཇོག་པའོ། །སྟེང་དུ་ཡོངས་བརྐྱང་པ་ཞེས་པ་ནི་སྟེང་དུ་མེ་ལོང་ལྟ་བུར་གཟུང་བའོ། །རྡོ་རྗེ་འབེབས་པར་རྣམ་པར་བརྟག །ཅེས་པ་ནི་བཀྲོལ་བའོ། །རྣམ་པར་སྣང་མཛད་ལ་སོགས་པ་ནས་དྲིལ་བུའི་མཐར་ཐུག་པ་རྣམས་ཀྱི་ནི་ཕྱག་རྒྱའོ། །ཀུན་དུ་བཟང་པོ་ལ་སོགས་པ་རྣམས་ཀྱི་ནི་ཉེ་བའི་ཕྱག་རྒྱའོ། །རང་གིས་ཞེས་པ་ནི་རང་གི་ལྷ་གང་དང་གང་ཡིན་པ་དེ་དང་དེ་བདག་ཉིད་ཀྱིས་སོ། །རིན་པོ་ཆེ་ཡི་རྣམ་པ་བཅིངས། །ཞེས་པ་ནི་རིན་པོ་ཆེ་ལྟར་མཐེ་བོང་ལ་སྡིག་མཛུབ་ཀྱི་རྩེ་མོ་ལྟོ་སྦྱོར་བའོ། །དེ་ཉིད་ཅེས་པ་ནི་ཁ་སྦྱོར་གྱི་ཐལ་མོའོ། །རྩེ་མོའི་རྩེ་མོ་བསྐུམ་ཞེས་པ་ནི་སྡིགས་མཛུབ་རིན་པོ་ཆེའི་རྣམ་པར་བྱས་པ་ནི་སེམས་ལ་བྱམས་པ་བསྒོམ་བཞིན་པ་བྱམས་པའིའོ། །རབ་བཅུག་ནས་ཞེས་པ་ནི་ཁ་སྦྱོར་གྱི་ནང་དུ་སྡིགས་མཛུབ་པོ། །རལ་གྲིའི་རྣམ་པར་རབ་ཏུ་བརྟགས་པ་ནི་རལ་གྲིའི་ཚུལ་འཛིན་པའོ། །ཁ་སྦྱོར་གྱི་ཐལ་མོ་ཉིད་གར་ལས་རལ་གྲིའི་རབ་ཏུ་འཇོམས་པར་བྱེད་པའི་ཚུལ་ནི་རྣམ་སེལ་གྱིའོ། །གར་ནི་སྡུད་པའི་སྦྱོར་བ་ཡིས། །ཞེས་པ་ནི་པདྨའི་ཁུ་ཚུར་དག་གིས་གར་བྱས་ནས་ཀུན་དུ་སྡུད་པས་སོ། །དེ་ཉིད་ཅེས་པ་ནི་པདྨའི་ཕྱག་རྒྱ་ཨུཏྤལ་ལྟར་བརྟགས་པ་ནི་པདྨ་སྒྲོལ་བ་ཡི་སྟེ། པདྨའི་རིགས་རྣམས་ཀྱིས་སྒྲོལ་བ་གང་ཡིན་པའོ་ཞེས་པ་ནི་དོན་ཏོ། །པདྨའི་ཐལ་མོ་ཉིད་སྡིགས་མཛུབ་མཆེ་བའི་རྣམ་པར་བསྐུམ་སྟེ་མཐེ་བོང་ཉིད་ཁ་དང་འདྲ་བར་ཏེ་གྱེན་དུ་བསྐུམ་པར་བྱའོ། །འདི་ནི་རྟ་མགྲིན་གྱི་ཕྱག་རྒྱའོ། །རིན་ཆེན་ལྡན་ཞེས་པ་ནི་སྡིགས་མཛུབ་དང་མཐེ་བོང་རིན་པོ་ཆེར་བྱས་པའོ། །ཡིད་བཞིན་ནོར་བུ་འཛིན་པའི་ཚུལ། །ཞེས་པ་ནི་སྡིགས་མཛུབ་དང་མཐེ་བོང་དག་གིས་རིན་པོ་ཆེ་འཛིན་པའི་ཚུལ་ལོ། །སྔར་གསུངས་པའི་རྡོ་རྗེ་རིན་ཆེན་གྱི་ཕྱག་རྒྱ་གར་སྔོན་དུ་འགྲོ་བས་ཐུགས་ཀར་གནས་པ་ནི་ནམ་མཁའ་མཛོད་ཀྱིའོ། །རྡོ་རྗེ་ཆེན་པོ་ལེགས་པར་བརྐྱང༌། །ཞེས་པ་ནི་ལག་པ་གཉིས་ཕྱེ་བར་བྱས་ནས་དབུས་མ་གསུམ་པོ་རྡོ་རྗེར་བྱས་པའི་ནང་དུ་མཐེ་བོང་དང་མཐེའུ་ཆུང་བཅུག་ནས་ལྕགས་སྒྲོག་སྦྲེལ་བ་ལྟ་བུ་ནི་བློ་གྲོས་རྒྱ་མཚོའིའོ། །མཛུབ་མོ་གཉིས་པོ་སྦྱར་བར་བྱ། །ཞེས་པ་ནི་སྡིགས་མཛུབ་ཁབ་ལྟར་དུ་བྱས་པའོ། །རྡོ་རྗེ་སྙིང་པོ་རྣམས་ཀྱིས་ཞེས་པ་ནི་དེ་བཞིན་གཤེགས་པ་རྣམས་ཀྱིས་སོ། །ཤཀྟིའི་རྣམ་པ་ནི་ཞེས་པ་ནི་སྡིགས་མཛུབ་རྩེ་མོ་རྩ་བ་ནས་རྒྱས་པར་བྱ་བ་ནི་
ཨུཏྤལའི་ཕྱག་རྒྱ་སྟེ་འཇམ་པའི་དབྱངས་ཀྱིའོ། །སྙིང་པོའི་ཁུ་ཚུར་ལ་གུང་མོ་གཉིས་ཁབ་ལྟ་བུའི་སྟེང་གི་གཞོགས་སུ་སྡིགས་མཛུབ་གཉིས་བསྐྱེད་ནས་གཟུང་བར་བྱས་པ་ནི་མདུང་ངོ༌། །དེ་ཉིད་གཞོགས་ཕན་ཚུན་དུ་ལྟོ་སྦྱར་བ་ནི་མདུང་ཆེན་པོའོ། །ཕྱག་རྒྱ་གཉིས་པོ་འདི་དག་གཤིན་རྗེ་མཐར་བྱེད་ཀྱིའོ། །དེ་ཉིད་ཅེས་པ་ནི་སྡིགས་མཛུབ་གཉིས་པའོ། །རལ་གྲིའི་ཚུལ་ལས་ཞེས་པ་ཁབ་བཞིན་དུ་བྱས་པ་ལ་ཡང་དག་པར་སྦྱར་བ་རལ་གྲི་ལྟར་གཟུང་བར་བྱའོ། །སྙིང་པོའི་ཁུ་ཚུར་ལ་སྡིགས་མཛུབ་གཅིག་ཡང་དག་པར་བསྐུམ་པ་ནི་ཉེ་བའི་སྐྲ་ཅན་མའིའོ། །རྡོ་རྗེ་འཛིན་པ་ཆེན་པོའི་ཞེས་པ་ནི་ཕྱག་ན་རྡོ་རྗེའིའོ། །མཛུབ་མོ་མཐེ་བོང་བཅིངས་པ་ཞེས་པ་ནི་རྡོ་རྗེའི་ཕྱག་རྒྱ་གང་ཡིན་པ་སྡིགས་མཛུབ་དང་མཐེ་བོང་གཉིས་རྡོ་རྗེ་བསྡམས་པའི་ཚུལ་གྱིས་བཅིང་བར་བྱའོ། །རྡོ་རྗེ་བསྡམས་པ་ལ་སྡིགས་མཛུབ་དག་ཕན་ཚུན་ལྕགས་སྒྲོག་ལྟར་བཅིང་པ་བྱས་ནས་གུང་མོ་དག་ཁབ་བཞིན་དུ་བྱས་པ་ནི་རྡོ་རྗེ་ལྕགས་སྒྲོག་གིའོ། །རྩེ་མོ་ལྔ་པའི་རྡོ་རྗེ་ཆེ་ནི་རྡོ་རྗེ་གཟེགས་མའི་ཕྱག་རྒྱའོ། །རྡོ་རྗེ་བསྡམས་པ་ལ་སྡིགས་མཛུབ་ནི་རྡོ་རྗེ་རྩེ་མོའིའོ། །ལག་གཉིས་ལེགས་པར་བརྐྱང་བར་བྱ། །ཞེས་པ་ནི་ལག་པ་གཉིས་རབ་ཏུ་བརྐྱང་ལ་གཅིག་པ་ཅན་དུ་བྱས་ནས་སྡིགས་མཛུབ་དང་མཐེ་བོང་རིན་པོ་ཆེ་འཛིན་པའི་རྣམ་པར་བྱའོ། །པདྨའི་དབྱིངས་ཞེས་པ་ནི་པདྨ་བཞིན་དུ་ཁ་སྦྱོར་གྱི་ཐལ་མོ་བྱས་ནས་སོ། །སྡིགས་མཛུབ་ཀྱི་ཚིགས་པར་མ་བཅག་པའི་ལྟོ་ལ་མཐེ་བོང་གི་ལྟོ་དག་མིག་གི་ཚུལ་གྱིས་སྦྱར་བར་བྱའོ། །བྱིན་པ་གཡོན་པའི་སྟེང་དུ་གཡས་པའི་བྱིན་པ་བཀོད་པ་ནི་བཀྲ་ཤིས་ཀྱི་གདན་ནོ། །འདི་དག་དེ་བཞིན་གཤེགས་པ་རྣམས་ལས་གཞན་པའི་དམ་ཚིག་གི་ཕྱག་རྒྱ་སྟེ་ལུས་ཀྱི་སྒོ་ནས་སོ། །སེམས་ཀྱི་སྒོ་ནས་ནི་སྔོན་བཞིན་དུ་ཤེས་པར་བྱའོ། །ཕྱག་རྒྱ་ཆེན་པོ་ནི་དེ་རྣམས་ཀྱི་རྡོ་རྗེ་སྐྱིལ་ཀྲུང་ཉིད་དོ། །ལས་ཀྱི་ཕྱག་རྒྱ་ནི་རྡོ་རྗེ་ཁུ་ཚུར་ལས་བྱུང་བའི་བྱང་ཆུབ་མཆོག་ལ་སོགས་པའོ། །རྡོ་རྗེ་སེམས་དཔའ་ལ་སོགས་རྣམས་ཀྱི་ནི་བསྒྱིངས་བཅས་གསོར་གཉིས་ཀའི་ཞེས་པ་ལ་སོགས་པ་རྣམས་སོ། །སྒེག་མོ་ལ་སོགས་པ་རྣམས་དང་ལྕགས་ཀྱུ་ལ་སོགས་པ་བཞི་པོ་རྣམས་ཀྱི་རྡོ་རྗེ་སྙེམས་པའི་རབ་སྦྱོར་གྱི་བསམ་པ་གཡོས་པས་འདུད་པར་བྱ་ཞེས་བྱ་བ་ལ་སོགས་པའོ། །ལྷག་མ་རྣམས་ནི་གོ་
སླའོ། །དེ་ལྟར་རང་གི་ཕྱག་རྒྱ་ལ་སྙིང་གར་སྣ་ཚོགས་རྡོ་རྗེ་བསྒོམས་ནས་གར་སྔོན་དུ་འགྲོ་བས་བཅིང་ངོ༌། །ལས་ཀྱི་ཕྱག་རྒྱའི་རྣམ་པ་ནི་གདན་ཞེས་པ་རང་ལྷའི་གདན་ཇི་ལྟ་བ་ལའོ། །སངས་རྒྱས་ཀུན་གྱི་བདག་ཅེས་པ་ནི་ཇི་ལྟར་བདག་ཉིད་ལྷའི་ང་རྒྱལ་གྱི་ལྷ་རྣམ་པས་སོ། །བདག་ཅེས་པ་ནི་རང་ཉིད་ཀྱིས་འཆིང་བར་བྱའོ། །འཆིང་དུ་གཞུག་ཅེས་པ་གཞན་རྣམས་ཀྱིས་སོ། །མཐེའུ་ཆུང་མཐེ་བོང་ངེས་པར་བཅིང༌། །ཞེས་པ་ནི་མཐེའུ་ཆུང་མཐེ་བོས་མནན་པ་ཅན་ནོ། །འདི་ཉིད་ལག་པ་གཡས་པ་ལས་སྐྱེས་པ་ལས་དབང་པོའིའོ། །དེ་ཉིད་ཅེས་པ་ནི་སྡིགས་མཛུབ་དང་མཐེ་བོང་དག་གོ །སོར་མོ་གཉིས་ནི་བསྒྲེང་བ་ཞེས་པ་ནི་སྡིགས་མཛུབ་དང་གུང་མོ་གཉིས་ལས་སྐྱེས་པའོ། །སྡིགས་མཛུབ་དང་མཐེ་བོང་དག་གིས་མཆོད་ཕྱིར་ཐོགས་ཀྱི་ཚུལ་ནི་ཚངས་པའི་ཕྱག་རྒྱའོ། །དབང་ལྡན་གྱི་གསལ་ཤིང་གི་ཕྱག་རྒྱ་ཉིད་ནི་དྲག་པོའིའོ། །དེ་ཉིད་བར་མ་གསུམ་པ་ཊྚི་བའི་རྣམ་པ་རབ་ཏུ་བརྐྱང་བ་ནི་བགྲོད་དཀའ་མའིའོ། །སོར་མོ་ཐམས་ཅད་ཁར་སྣའི་རྣམ་པར་དབྱངས་པ་ནི་ཚོགས་བདག་གིའོ། །དཀྱིལ་འཁོར་གྱི་ཚུལ་དུ་བྱ་བའོ། །ཡང་ལག་པ་གཉིས་ཀྱིས་འོད་ཟེར་རབ་ཏུ་སྟོན་པར་བྱེད་པ་ནི་ཉི་མའིའོ། །འོད་ཀྱི་དཀྱིལ་འཁོར་གྱི་ཚུལ་ནི་ཐམས་ཅད་ཀྱིའོ། །གླུ་ལེན་པའི་ཚུལ་གྱིས་ཁར་ལག་པ་གཡོ་བར་བྱའོ། །གདེངས་ཀའི་ཚུལ་ཞེས་པ་མཐེ་བོང་གཉིས་ཕན་ཚུན་བཅིངས་ནས་སོར་མོ་ལྷག་མ་རྣམས་གདེངས་ཀའི་ཚུལ་གྱིས་བསྐུམ་པར་བྱའོ། །གར་ནི་སྡུད་པའི་སྦྱོར་བ་ཡིས། །ཞེས་པ་ལ་སོགས་པ་རྣམས་ཀྱི་རྡོ་རྗེའི་གར་སྔོན་དུ་འགྲོ་བས་ཇི་སྐད་གསུངས་པའི་ཕྱག་རྒྱ་རྣམས་བཅིངས་ནས་གཞག་གོ །དེ་དག་ཀྱང་དབྱངས་སྣ་ཚོགས་པར་བལྟ་བར་བྱའོ། །ལས་ཀྱི་སྦྱོར་བ་འབད་པ་ཡི། །ཞེས་བྱ་བ་ནི་བྱ་བའི་ལས་ལ་འབད་པ་རྣམས་ཀྱིའོ། །དེ་ཁོ་ན་ཉིད་ཀྱི་ལམ་ལ་སོ་སོར་འདྲེས་པའི་ས་དོར་ཡང་ཕྱག་རྒྱ་འགྲུབ་བ་པོ་ཞེས་བསྟན་པ་གསུངས་པ། ཕྱག་རྒྱ་དོར་ནས་ཞེས་པ་ལ་སོགས་པ་སྟེ་ད་ལ་འདི་ནི་རིམ་པ་སྟེ། ཇི་ལྟ་བ་བཞིན་དུ་རང་གི་ལྷ་རྫོགས་པའི་རིམ་པས་དེའི་གཟུགས་ཀྱི་བདག་ཉིད་དུ་བལྟ་སྟེ། ཛཿ་ཧཱུཾ་བཾ་ཧོཿ་ཞེས་འདོན་
ཅིང་བྱོན་པ་ཁོ་ན་ནང་དུ་བཀུག་ནས་སངས་རྒྱས་ཐམས་ཅད་མཆོད་པ་དང་སྒོ་རྣམས་གནས་ཇི་ལྟ་བ་བཞིན་དུའོ། །སྙིང་གར་འབར་བ་དང་བཅས་པའི་ཆུ་སྐྱེས་འདབ་མ་བརྒྱད་པ་དེ་ལ་གནས་པའི་ཟླ་བའི་དཀྱིལ་འཁོར་ལ་གནས་པའི་ཉི་མའི་འོད་ཟེར་གྱི་ཐིག་ལེ་དང་བཅས་པའི་ཀ་ལ་སོགས་པ་དེའི་སྟེང་དུ་འོད་ཟེར་ཆེན་པོ་འབར་བ་འཁྲུགས་པའི་རྡོ་རྗེ་རྩེ་ལྔ་པ་དེའི་དབུས་ཀྱི་རྩེ་མོར་དབྱངས་ཨོཾ་བསྐྱེད་དོ། །རྣམ་པར་རྟོག་མེད་ཅེས་བྱ་བ་ལ་སོགས་པ་ནི་ནང་དུ་ཨཱཿ་འམ་སྒྲ་བསྒོམས་ནས་མིག་ཀྱང་ར་ཡིག་ལས་འབར་བ་དང༌། སྣའི་རྩེ་མོར་ཡང་དེ་བཞིན་དུ་ཧཱུཾ་ཡིག་གོ །དེ་ནས་ཇི་སྐད་གསུངས་པའི་དབྱངས་ཨ་རང་གི་སྔགས་ཀྱི་ཡི་གེ་རང་འབར་བའི་ནང་དུ་ཀུན་དུ་འབར་བ་དབང་པོ་ཐམས་ཅད་ཀྱིས་རྟོགས་པར་བྱ་བ་མ་ཡིན་པ་སྣ་ཚོགས་རྣམ་པར་སྦྱོང་བ་བྱོན་ནས་རབ་ཏུ་ཞུགས་ཏེ་ནང་དང་ནང་མ་ཡིན་པར་མངོན་དུ་བྱས་པ་ཁོ་ན་དབྱངས་ཀྱི་དོན་ཏེ་ཇི་སྲིད་དུ། རྒོད་མ་ཁ་ཡི་མཐར་ཐུག་པ། །སེམས་ཀྱི་རིན་ཆེན་བསམ་པར་བྱའོ། །ཞེས་པ་ནི་ཕྱག་རྒྱ་དེ་རྣམས་ཤེས་པ་ནི་དེ་ཉིད་གསལ་བར་བྱེད་པའི་གནས་ལུས་དང་ངག་དང་ཡིད་ཀྱི་ཕྱག་རྒྱ་བཅིངས་པས་བསམས་ནས་བསྒོམ་པར་བྱའོ། །ཏིང་ངེ་འཛིན་གསུམ་ནི་ལུས་ལ་སོགས་པའི་ཕྱག་རྒྱའི་སྒྲུབ་ཐབས་སོ། །བརྟགས་པ་ནི་རྣམ་པར་གཞག་པ་ཡིན་ཏེ་སྔོན་དུ་བསྟན་པ་བཞིན་ནོ། །དོན་དམ་པར་ནི་ཕྱག་རྒྱ་དང་སྔགས་དང་ལྷ་རྣམས་གསུམ་པོ་དེ་ཁོ་ན་ཉིད་དུ་སྟོང་པ་ཉིད་ལ་སོགས་པར་རབ་ཏུ་གནས་སོ། །མཐའ་ཡས་པར་ཤེས་པ་ཉིད་ཀྱི་ཀུན་དུ་སེམས་པས་ཡང་དག་པར་སྦྱོར་བས་ཏེ་དེ་ཁོ་ན་རྣལ་འབྱོར་རོ། །དེས་ན་མཚན་ཉིད་གཅིག་པ་སྟེ་སྟོང་པ་ཉིད་དུ་རང་བཞིན་གཅིག་པར་རྣམ་པར་གཞག་གོ །ཕྱག་རྒྱ་ཐམས་ཅད་དངོས་པོ་དེ་ཉིད་དེ་དོན་དམ་པའི་རང་བཞིན་ནོ། །དངོས་པོ་མེད་པར་བཤད་པ་སྟེ་བརྗོད་པའོ། །སྒོམ་པར་བྱེད་པ་དངོས་པོ་མེད་པའི་རང་བཞིན་ནི་སྒོམ་པར་བྱེད་པ་དངོས་པོ་མེད་པའོ། །དེ་ནི་དོན་དམ་པར་དངོས་པོ་མེད་དོ། །གལ་ཏེ་དེ་ལྟ་བུ་འབྲས་བུ་ཅི་ལྟར་སྒྲུབ་ཅེ་ན་བསྒོམ་པ་ཉིད་ཀྱང་ཞེས་བྱ་བ་ལ་སོགས་པ་གསུངས་པ། བརྟགས་པའི་ཚུལ་གྱིས་ནི་དངོས་པོ་མེད་པ་མ་ཡིན་ནོ་ཞེས་པས་དངོས་པོའོ། །དེའི་ཕྱིར་ཡང་དངོས་པོ་མེད་པ་ལས་རྣམ་པར་གྲོལ་ཏེ། རྣལ་འབྱོར་ཡེ་ཤེས་མཆོག་ཏུ་བདེ། །ཞེས་པ་
མཆོག་ཏུ་བདེ་ཞེས་པ་གནས་པའོ། །སྐྱེས་པར་ཞེས་པ་ནི་བསྟན་པར་འགྱུར་བའོ། །དེའི་ཚེ་ཕྱག་དང་སྔགས་དང་ལྷ་རྣམས་སེམས་དང་ངག་དང་ལུས་ཀྱི་ཕྱག་རྒྱའི་ཚུལ་དུ་རྣམ་པར་གཞག་གོ །འོན་ཀྱང་ཕྱག་རྒྱ་དང་སྔགས་ཕན་ཚུན་ཉིད་དུ་མཐོང་བ་མ་ཡིན་པ་དེ་སྲིད་དུ་ལྷ་དང་གཉིས་སུ་མེད་པའི་རྣལ་འབྱོར་གྱི་རྒྱུ་ཉིད་ཀྱིས་རྣམ་པར་གནས་སོ། །བཅོམ་ལྡན་འདས་ཞེས་བྱ་བ་ལ་སོགས་པ་རྣམས་ཀྱིས་དེ་བཞིན་གཤེགས་པའི་རིགས་རྫོགས་པ་བསྟན་པ་སྟེ་དགའ་ལྡན་གྱི་སར་ཞུགས་ནས་ཞེས་པ་ནི་བྱང་ཆུབ་སེམས་དཔའི་གཟུགས་ཀྱིས་སོ། །དེ་ནས་རིམ་པས་རྡོ་རྗེ་གདན་དུ་མངོན་པར་རྫོགས་པར་སངས་རྒྱས་པ་ཇི་སྲིད་པར་དེ་ལྟ་བུ་ཡང་རྣམ་པར་སྣང་མཛད་ཀྱིས་འདུལ་བའི་སྐྱེ་བོ་གང་ཡིན་པ་གང་གིས་སླར་ཡང་འཇུག་པར་འགྱུར་ཞེས་རྫོགས་པར་བྱ་བའི་ཏིང་ངེ་འཛིན་དེ་ལས་བཞེངས་ནས་དབང་ཆེན་ལ་སོགས་པའི་དཀྱིལ་འཁོར་གྱི་དོན་དུ་རྡོ་རྗེ་སེམས་དཔའ་ལ་སོགས་པའི་སེམས་དཔའ་འབྱུང་བའི་མཛད་པའམ། འདིས་ཀྱང་འདི་དག་བསྟན་ནས་ཏེ་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་རྣམས་བཟླས་པས་ཚོགས་ཡོངས་སུ་རྫོགས་པས་དགའ་ལྡན་གྱི་སར་ཡོངས་སུ་གནས་པ་ལ་སོགས་པའི་རིམ་པས་ཇི་སྲིད་ཨོཾ་ཡ་ཐཱ་སརྦ་ཏཱ་ག་སྟ་ཐཱ་ཧཾ་ཞེས་པས་རང་མངོན་པར་རྫོགས་པར་བྱང་ཆུབ་པ་མངོན་དུ་བྱའོ་ཞེས་པའོ། །དེ་ནས་བཅོམ་ལྡན་འདས་ཞེས་པ་ལ་སོགས་པ་དབང་ཆེན་ལ་སོགས་པའི་དཀྱིལ་འཁོར་ཉེ་བར་སྟོན་པར་བྱེད་དོ། །སངས་རྒྱས་ཐམས་ཅད་ཅེས་བྱ་བ་ནི་མི་བསྐྱོད་པ་ལ་སོགས་པ་རྣམས་སོ། །དེ་དག་སོ་སོ་རེ་རེའི་གཞོགས་སུ་འཁོར་ལོས་སྒྱུར་བ་ལ་སོགས་པ་གཉིས་བྲི་བར་བྱའོ། །ཕྱིའི་གནས་སུ་ཞེས་པ་ནི་སངས་རྒྱས་ལ་ལྟོས་ནས་ཕྱི་རོལ་གྱི་ཆ་རྣམས་སུའོ། །སངས་རྒྱས་སྲས་པོ་ཞེས་པ་ནི་རྡོ་རྗེ་སྙིང་པོ་ལ་སོགས་པའོ། །གཞན་དུ་ནི་དཀྱིལ་འཁོར་གྱི་གླེང་གཞིའི་རྗེས་སུ་འབྲངས་ནས་རྡོ་རྗེ་སེམས་དཔའ་ལ་སོགས་པ་རྣམས་ཀྱང་དེ་བཞིན་གཤེགས་པ་གཉིས་གཉིས་ཀྱི་གཞོགས་དག་ཏུ་གཉིས་གཉིས་ཀྱིས་ཡོངས་སུ་བསྐོར་བར་རྣམ་པར་གཞག་གོ །ད་ནས་འཁོར་ལོས་སྒྱུར་བ་ལ་སོགས་པ་རྣམས་རེ་རེའོ། །སྣམ་བུ་བྱས་ནས་ཟུར་དུ་བདུག་པ་ལ་སོགས་པ་རྣམས་དང༌། སྒོའི་ཆ་རྣམས་
སུ་གཟུགས་ལ་སོགས་པ་རྣམས་དང་སྒོ་རྣམས་སུ་སྒོ་བ་དང་ནང་གི་ཟུར་རྣམས་སུ་སྒེག་མོ་ལ་སོགས་པ་རྣམས་སོ་ཞེས་སོ། །རླུང་གི་དཀྱིལ་འཁོར་རྣམས་སུ་རྗོད་པར་བྱེད་པའི་དཀྱིལ་འཁོར་ཐམས་ཅད་རྣམ་པ་སྣ་ཚོགས་པའི་ཁ་དོག་ཅན་གྱི་རེ་ཁཱའོ། །རྡུལ་ཚོན་ཡང་སྔགས་པས་ཡིད་ཀྱིས་རབ་ཏུ་བརྟག་པར་བྱས་ཏེ་རབ་ཏུ་དགྱེའོ། །བསྡུ་པའི་མཐར་ཐུག་པར་རྫོགས་པར་བྱས་ནས་ལས་ཀྱི་དངོས་གྲུབ་ཀྱི་དོན་དུ་བསྒོམ་པར་བྱའོ། །ཆུ་ལྷའི་དཀྱིལ་འཁོར་གྱི་དོན་དུ་ལྷ་རྣམས་བརྗོད་པར་བྱས་པ་ཉིད་ཀྱིས་ཆོ་ག་དེ་དང་དེ་ཁོ་ནས་མེ་ལྷའོ། །རྡོ་རྗེ་སྙིང་པོ་ལ་སོགས་པ་རྣམས་ལས་ཕྱི་རོལ་གྱི་སྣམ་བུ་ལ་ཁྲོ་བོ་དགོད་པར་བྱའོ། །རླུང་ལྷ་ལ་ནི་ཤར་ལ་སོགས་པའི་ཕྱོགས་རྣམས་སུ་རིམ་པས་ཁྲོ་བོ་ལ་སོགས་པ་རྣམས་སོ་ཞེས་པ་ནི་ཁྱད་པར་རོ། །དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་རྣམས་ཀྱིས་བཟླས་པའི་ཆོ་ག་སྟོན་པར་བྱེད་དོ། །མཆོད་པ་བྱས་ནས་ཞེས་པ་ནི་བསྡུ་བ་དང་དབང་བསྐུར་པའི་མཐར་ཐུག་པ་རྫོགས་ནས། སྒེག་མོ་ལ་སོགས་པ་རྣམས་ཀྱིས་ཡང་དག་པར་མཆོད་པར་བྱའོ། །ཀུན་ཞེས་པ་ནི་ཆོ་ག་སུམ་ཅུ་རྩ་གསུམ་མོ། །སངས་རྒྱས་ཀུན་གྱི་སྐུ་ཆེན་པོ་ནི་རང་གི་ལྷའི་གཟུགས་ཇི་ལྟ་བ་བཞིན་དུ་རང་གི་སྔགས་ཀྱི་ཡི་གེ་རྣམས་ཀྱིས་ཡང་དག་པར་ལྡན་ཏེ་ཀུན་ནས་གང་བར་བྱའོ། །འདོད་པར་སྟེར་བ་ནི། མངོན་པར་འདོད་པའི་དོན་གྱི་དམ་ཚིག་གོ །དེའི་ཕྱིར་སྒྲ་ལ་སོགས་པའི་བཟླས་པ་བྱའོ། །ཡི་གེའི་ཕྲེང་བར་རྣམ་པར་གནས་པ་ཅི་ཞེ་ན། ཟླ་བའི་དཀྱིལ་འཁོར་དབུས་ཞེས་བྱ་བ་གསུངས་པ། དུང་གི་སྒྲ་ནི་དེ་བཞིན་གཤེགས་པ་རྣམས་དང་དེའི་རིགས་ལའོ། །དྲིལ་བུའི་སྒྲ་ནི་འཇིག་རྟེན་དབང་ཕྱུག་དང་དེའི་རིགས་ལའོ། །རྡོ་རྗེ་ཧཱུཾ་མཛད་དང་དེའི་རིགས་ལ་སྤྲིན་ཏེ་སྤྲིན་གྱི་ཧཱུཾ་ཡིག་ཙ་ཊ་ཙ་ཊའི་སྒྲ་སྒྲོགས་པའོ། །ནམ་མཁའི་སྙིང་པོ་དང་དེའི་རིགས་རྣམས་ལ་རྔ་བོ་ཆེའི་སྒྲའོ། །པི་ཝང་ལ་སོགས་པའི་སྒྲ་ནི་ཐམས་ཅད་ཀྱི་སྤྱི་བོའོ། །རང་གི་སྙིང་གའི་མཚན་མར་རང་གི་སྔགས་ཀྱི་ཡི་གེ་བལྟས་ལ་རང་གི་དེ་ཁོ་ན་ཉིད་ལ་ལྷག་པར་མོས་ནས་ལག་གཉིས་ཡང་དག་པར་སྦྱོར་བས་སྒྲའི་བཟླས་པར་བྱའོ། །དེ་ནས་ལྕགས་ཀྱུ་ལ་སོགས་པ་རྣམས་ཀྱིས་དགུག་པ་ལ་
སོགས་པ་བྱའོ། །རང་གི་ཚུལ་ཞེས་པ་ནི་ཡིད་བདེ་བའི་ཚུལ་ལོ། །དེའི་ཞེས་པ་ནི་རང་གི་ལྷ་དེའིའོ། །ཡང་དག་སྦྱར་བྱ་ཞེས་པ་ནི་ཀུན་ནས་མི་ཕྱེད་པ་ཉིད་ཀྱིས་སོ། །ཕྱག་རྒྱ་སྔགས་ནི་ལེགས་པར་སྦྱར། །ཞེས་པ་ནི་རང་གི་ཕྱག་རྒྱ་དང༌། སྔགས་རྣམས་ཀྱིས་བྱིན་གྱིས་བརླབས་པའོ། །གཉིས་སུ་མེད་པའི་རྣལ་འབྱོར་པ་ལག་པར་རང་གི་མཚན་མ་དང༌། སྙིང་གར་ཟླ་བ་ལ་སོན་པའི་རང་གི་མཚན་མའི་ཕྱག་རྒྱ་བྱས་ནས་དེའི་འོད་ཟེར་རྣམས་ཀྱིས་ཀུན་དུ་འོད་གསལ་བ་གང་ཡིན་པ་ཀུན་ནས་ཀྱང་བ་སྤུའི་ཁུང་བུ་ཐམས་ཅད་ནས་བྱུང་བའི་འོད་ཟེར་རྣམས་ཀྱིས་ཁྱབ་པ་གང་ཡིན་པའི་བཟླས་པར་བྱའོ། །སླར་ཡང་བརྟན་པར་བྱིན་གྱིས་བརླབ་པ་དང༌། དབང་བསྐུར་བ་དང༌། ཏིང་ངེ་འཛིན་དང༌། མཆོད་པ་རྣམས་རྫོགས་ཏེ་རང་གི་གཟུགས་ལ་སྤྲོ་བ་དང་བསྡུ་བ་བྱས་ནས་སྙིང་ག་ལ་སོགས་པར་ཇི་སྲིད་དུ་བཟླས་པའི་སྒྲ་ཡང་མངོན་པར་མི་འཇུག་པ་ནི་རྣལ་འབྱོར་གྱི་བཟླས་པར་རྣམ་པར་བརྗོད་དོ། །དེ་ནས་སྙིང་གར་ཟླ་བའི་དཀྱིལ་འཁོར་གང་བ་ལ་རང་གི་སྔགས་ཀྱི་ཡི་གེའི་ཕྲེང་བ་མ་ཆད་པ་མུ་ཏིག་གི་ཕྲེང་བ་ལྟར་དཀར་བ་གློག་དང་མཚུངས་པར་གསལ་བའི་འོད་ཟེར་རྣམས་ཀྱིས་རང་གི་ལུས་ཀུན་ནས་གསལ་བར་བྱེད་པར་བསྒོམས་ནས་སྔགས་ཀྱི་ཡི་གེའི་བཟླས་པ་མངོན་པར་རྫོགས་པར་བྱའོ། །ཇི་ལྟ་ཇི་ལྟར་ཞེས་བྱ་བ་ལ་སོགས་པ་ནི་བདག་ཉིད་ཆེན་པོར་སྟོན་པར་བྱེད་དོ། །དེ་བཞིན་གཤེགས་པ་ཐམས་ཅད་ནི་རྣམ་པར་སྣང་མཛད་ལ་སོགས་པ་དང་དེའི་རང་བཞིན་ཉིད་ཀྱི་རིགས་རྣམས་ཀྱང་དེ་བཞིན་ཉིད་དུ་བརྗོད་པར་བྱའོ། །དེ་རྣམས་ཀྱི་བསྟོད་པ་རིན་པོ་ཆེ་ནི། དེ་བཞིན་གཤེགས་པ་ཐམས་ཅད་ཀྱི་བསྟོད་པ་རིན་པོ་ཆེའོ། །མི་གཡོ་ཞེས་པ་འདིས་ཆོས་ཀྱི་སྐུ་ངེས་པར་བསྟན་ནོ། །མཉམ་པ་ཉིད་ཁོ་ན་དེ་བཞིན་ཉིད་དོ། །དེ་ཁོ་ན་སྙིང་པོའི་ཆོས་ཏེ། གང་རྣམས་ཀྱིས་མཉམ་པར་ཡོད་པ་དེ་མཉམ་ཉིད་སྙིང་པོའི་ཆོས་ཅན་ཏེ། འདིས་ཀྱང་ལངས་སྤྱོད་རྫོགས་པའི་སྐུའོ། །འགྲོ་བའི་སྡུག་བསྔལ་སེལ་བར་མཛད། །ཅེས་པ་ལ་སོགས་པ་རྣམས་ཀྱིས་སྤྲུལ་པའི་སྐུའི་སྒོ་ནས། གཞན་གྱི་དོན་ཕུན་སུམ་ཚོགས་པའོ། །གསུམ་པ་དེ་རྣམས་ཀྱང་མཉམ་པ་མེད་པར་སྡུག་བསྔལ་སེལ་བ་སྟེ། ལྟ་བ་དང་ལྟ་བ་མ་ཡིན་པ་སྡུག་བསྔལ་སེལ་
པར་བྱེད་པའོ། །མཐའ་ཡས་ནི་མཐའ་མེད་པ་གང་ཡིན་པའོ། །ཀུན་ནས་དམ་པའི་ཡོན་ཏན་འཇིག་རྟེན་དང་འཇིག་རྟེན་ལས་འདས་པ་ཐམས་ཅད་དང་དངོས་གྲུབ་སྦྱིན་པའི་ཚུལ་གང་ཡིན་པ་དེ་རྣམས་ལ་དེ་བཞིན་དུ་གསུངས་ཏེ། དེ་ཡི་ཉམ་ཐག་སྡུག་བསྔལ་སེལ། །ཡོན་ཏན་དངོས་གྲུབ་སྦྱིན་པས་ཀྱང༌། །ཐུགས་རྗེའི་བདག་ཉིད་ཅན་ཞེས་གསུངས། །ཞེས་སོ། །གལ་ཏེ་ཡང་ཐུགས་རྗེའི་བདག་ཉིད་ཅན་ཡིན་པ་དེའི་ཕྱིར་དེ་རྣམས་ཀྱང་ཤིན་ཏུ་ཞེན་པར་འགྱུར་རོ་ཞེས་གསུངས་པ། དྲི་མེད་ཅེས་བྱ་བ་ལ་སོགས་པ་གསུངས་པ། དྲི་མེད་ནི་སྒྲིབ་པ་ཐམས་ཅད་སྤངས་པ་ཉིད་ཀྱི་ཕྱིར་རོ། །མི་གཡོ་ནི་གཞན་མུ་སྟེགས་ཅན་གྱིས་རབ་ཏུ་གཡོ་བར་མི་ནུས་པའི་ཕྱིར་རོ། །ཉན་ཐོས་དང་རང་སངས་རྒྱས་རྣམས་དང་བྱང་ཆུབ་སེམས་དཔའ་དང་ཐུན་མོང་མ་ཡིན་པའི་ཕྱིར། མཉམ་མེད་དམ་པའི་ཆོས་ཀྱི་མཆོག་ཡིན་ལ། །དེ་འདི་རྣམས་ལ་ཡོད་པ་དེ་རྣམས་ནི་མཉམ་མེད་དམ་པའི་ཆོས་མཆོག་ཅན་ཏེ་གང་གསུངས་པ་མཉམ་མེད་ཅེས་པའོ། །དེ་སྒྲུབ་པར་བྱེད་པ་གསུངས་པ། ནམ་མཁའ་ཞེས་པ་ལ་སོགས་པ་སྟེ། གང་གི་ཕྱིར་ནམ་མཁའ་སྟེ། ནམ་མཁའ་ལ་ཚད་ཀྱི་མཐར་ཐུག་པ་མེད་པས་དཔེས་བསྐྲུན་དུ་ཡོད་པ་མ་ཡིན་ནོ་སྟེ་གང་གི་ཕྱིར་འདི་ལ་མ་ཡིན་ནོ་ཞེས་པ་ངོ་བོའོ། །དཔེས་བསྐྲུན་དུ་མེད་པ་ཅིས་ཤེ་ན། ཡོན་ཏན་ཆ་ཞེས་པ་ལ་སོགས་པ་སྟེ་ཆུང་དུ་དང༌། འབྲིང་དང༌། ཆེན་པོའི་ཚད་ཀྱིས་དབྱེ་བ་ཡང་ཡོན་ཏན་ལ་ཡོད་པ་མ་ཡིན་ནོ། །ཅི་རྣམས་ཀྱི་ཞེ་ན་རྟག་ཏུ་ཞེས་བྱ་བ་ལ་སོགས་པ་གསུངས་པ་རྟག་ཏུ་སེམས་ཅན་གྱི་ཁམས་རྣམས་ལ། དངོས་གྲུབ་མཆོག་རྣམས་སྩོལ་བར་བྱེད་པའི་སངས་རྒྱས་དེ་རྣམས་ལའོ་ཞེས་དྲུག་པའི་དོན་ལ་བདུན་པའོ། །འདི་དག་ཉིད་གང་ལས་ཤེས་པ་གསུངས་པ་རྟག་ཏུ་ཞེས་པ་ལ་སོགས་པ་སྟེ། གང་གི་ཕྱིར་དེ་རྣམས་ཀྱི་ཐུགས་རྗེའི་ཤུགས་ལས་བྱུང་བ་ཉིད་ཀྱི་ཕྱིར། །རྟག་ཏུ་དྲི་མ་མེད་པ་སྟེ་ཉོན་མོངས་པ་མེད་པའོ།། སྨོན་ལམ་གྲུབ་པ་ནི་རབ་ཏུ་མི་གནས་པའི་མྱ་ངན་ལས་འདས་པའོ། །འགགས་པ་མེད་པའི་ཆོས་ཉིད་ནི་ཀུན་ནས་ཁྱབ་པར་རྟག་ཏུ་གནས་པའོ། །རྣམ་པར་སྣང་བར་བྱེད་དོ་ནི་འབར་བར་བྱེད་དོ། །ཐུགས་རྗེ་ཆེན་པོའི་བདག་ཉིད་ནི་སངས་རྒྱས་རྣམས་སོ། །འདི་དག་ཀྱང་གང་ལས་
ཤེ་ན་འགག་པར་ཡང་མི་འགྱུར་ཞེས་བྱ་བ་ལ་སོགས་པ་གསུངས་པ། གང་གི་ཕྱིར་དེ་ལྟ་ཡིན་པ་དེའི་ཕྱིར། ཐུགས་རྗེ་ཆེན་པོ་འགགས་པའི་ཆོས་ཅན་དུ་མི་འགྱུར་ཏེ་དེའི་ཕྱིར། དེ་ཡང་འགག་པ་མེད་པའི་ཆོས་ཉིད་དོ། །ཅི་དང་ཅི་ཞེ་ན་གསུངས་པ། ཚད་མེད་ཚད་དང་བྲལ་བ་ཞེས་བྱ་བ་ལ་སོགས་པ་སྟེ། ཚད་མེད་ནི་ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཀྱང་ཚད་དང་བྲལ་བ་རྣམས་ལའོ། །ཤིན་ཏུ་རྫོགས་པ་ནི་འབྲས་བུ་མཐར་ཐུག་པའོ། །བདེ་བར་གཤེགས་པའི་གོ་འཕང་ནི་ཡོངས་སུ་མྱ་ངན་ལས་འདས་པའི་གོ་འཕང་རྣམས་སུ་ཡང་བརྙེས་གྱུར་ཀྱང་སྟེ་མཐོང་བར་གྱུར་ཀྱང་ངོ༌། །དེའི་ཕྱིར་ཡང་ཨེ་མའོ་ཤིན་ཏུ་བཟང་པོའི་ཆོས་ཉིད་དོ། །དམ་ཚིག་གསུམ་ནི་སྐུ་གསུམ་གྱི་བདག་ཉིད་ཅན་ནོ། །དེའི་རྒྱུར་མཆོག་གི་དངོས་གྲུབ་སྩོལ་ཏེ་རབ་ཏུ་སྩོལ་བར་གྱུར་ཅིག །མཆོག་སྦྱིན་པ་ནི་དངོས་གྲུབ་རབ་མཆོག་སྦྱིན་པའོ། །མཆོག་སྦྱིན་རྣམས་ཀྱི་ནང་ན་གོ་འཕང་མཆོག་བརྙེས་པ་སྟེ་མཆོག་སྦྱིན་པ་རྣམས་ཀྱི་ནང་ན་གཙོ་བོར་གྱུར་པའོ། །མ་ལུས་པ་ནི་ལྷག་མ་མེད་པའོ། །དུས་གསུམ་མཁྱེན་པ་པོ་ནི་དུས་གསུམ་པ་ཅན་ནོ། །སྒྲིབ་པ་མེད་པ་ནི་སྒྲིབ་པ་ཐམས་ཅད་དང་བྲལ་བའོ། །འདི་ནི་ཞེས་བྱ་བ་ལ་སོགས་པ་རྣམས་ཀྱིས་བསྟོད་པའི་བདག་ཉིད་ཆེན་པོ་སྟོན་པར་བྱེད་དོ། །རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་ལྔའི་བཟླས་པ་རྣམས་དང་པོའི་རྣལ་འབྱོར་གྱི་རིམ་པས་ལྷའི་རྣལ་འབྱོར་བསྡུས་ནས་ད་ནི་དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་རིགས་བཞི་པོ་དེ་རྣམས་ཀྱི་ལྷའི་བཟླས་པ་རྣམས་ཀྱི་ངེས་པ་བསྟན་པ་གསུངས་པ། ཇི་ལྟར་བཤད་པའི་ཆོ་གས་ཞེས་བྱ་བ་ནི་གསུམ་ལ་སྐྱབས་སུ་འགྲོ་བ་སྔོན་མ་ཅན་གྱིས་སོ་སོར་ཐར་པའི་སྡོམ་པ་ཡང་དག་པར་གཟུང་བ་ནི་བསླབ་པའི་གནས་ཏེ་རང་གི་ནུས་པ་ཉིད་ཀྱིས་བཟུང་ནས་ཆོ་ག་སྔོན་མ་ཅན་གྱིས་ཇི་ལྟར་གསུངས་པའི་སྔགས་རྣམས་ཀྱིས་སྡིག་པ་བཤགས་པ་ལ་སོགས་པ་བྱའོ། །དངོས་གྲུབ་ཀྱི་གེགས་ཉེ་བར་འཇོམས་པ་ཉིད་ཀྱི་གཙོ་བོར་བཤགས་པ་ལ་སོགས་པ་རྣམས་ཀྱིས་སྔགས་ངེས་པར་བསྟན་གྱི་གསོལ་བ་འདེབས་པ་ལ་སོགས་པ་ནི་མ་ཡིན་ནོ། །ས་བཅུ་དབང་ཕྱུག་ཅེས་པ་ནི་ཟླ་བའི་
ཁ་དོག་ཅན་ཞེས་པ་ལ་སོགས་པ་རྣམས་ཀྱིས་ཡང་དག་པར་སྤེལ་བར་བྱ་སྟེ། བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པ་ཞེས་པའི་ཚིག་གིས་སོ། །དེ་ནས་ཇི་ལྟར་གསུངས་པའི་སེང་གེའི་གདན་གྱི་སྟེང་དུ་བདག་ཉིད་རྣམ་པར་སྣང་མཛད་དུ་བསམ་པར་བྱའོ། །ཨོཾ་བུདྷོ྅ཧཾ་ཞེས་པས་བྱིན་གྱིས་བརླབ་པར་བྱའོ། །ས་བཅུའི་དབང་ཕྱུག་དེའི་སེང་གེའི་གདན་དེ་བཞིན་དུ་རིགས་པ་མ་ཡིན་ནོ། །དེའི་ཕྱིར་ཨོཾ་སྭ་བྷཱ་པ་ཤུདྡྷོ་ཞེས་པ་ལ་སོགས་པ་རྣམས་ཀྱིས་སྣང་བ་མེད་པར་བྱས་ཏེ། སྙིང་གར་ཟླ་བ་ལ་གནས་པའི་རྡོ་རྗེ་བལྟའོ། །དེ་ལས་བསྐྱེད་པའི་རང་གི་མཚན་མར་ཀུན་དུ་བལྟའོ། །ཨོཾ་དྷརྨ་དྷཱ་ཏུ་སྭ་བྷཱ་བ་ཨཱཏྨ་ཀོ྅ཧཾ་ཞེས་པ་ནི་དེ་ང་རྒྱལ་བྱས་ནས། དེ་བཞིན་གཤེགས་བ་ཐམས་ཅད་ཀྱི་སྐུ་ལ་སོགས་པའི་རྡོ་རྗེ་དབྱིངས་ནང་དུ་ཆུད་པར་བྱའོ། །བྱིན་གྱིས་བརླབ་པར་བྱའོ། །ཞེས་པ་ནི་བསྒོམས་ནས་ཡེ་ཤེས་ཀྱི་སྐུའི་བདག་ཉིད་ཀྱི་ཕྱིར། ཆོས་ཀྱི་སྐུར་ཨོཾ་པྲ་བྷ་སྭ་རོ྅ཧཾ་ཞེས་པས་བྱིན་གྱིས་བརླབ་པོ། ཆོས་ཀྱི་དབྱིངས་རྒྱ་ཆེན་པོར་སྤྲོས་ནས་ཞེས་པ་ནི་ཇི་ལྟར་རང་གི་མཚན་མ་སྤྲོས་ནས། སེམས་ཅན་གྱི་དོན་མངོན་པར་རྫོགས་ནས་རང་ལ་ཉེ་བར་བསྡུ་བར་བྱའོ། །དེ་ལྟར་ཡེ་ཤེས་སེམས་དཔའ་མངོན་པར་རྫོགས་པ་བྱང་ཆུབ་པ་མངོན་དུ་བྱས་ནས་བུདྷོ྅ཧཾ་ཞེས་ང་རྒྱལ་བ་སྐྱེད་པར་བྱའོ། །དེ་ནས་མ་ཧཱ་ས་མ་ཡ་སཏྭཱ་ཧཾ་ཞེས་བྱ་བའི་ང་རྒྱལ་བྱས་ནས་རང་གི་དམ་ཚིག་གི་ཕྱག་རྒྱ་ཡང༌། ས་མ་ཡོ་ཧཾ་ཞེས་འདོན་པ་ཉིད་ཀྱིས་སོ། །ས་མ་ཡ་སཏྭ་ཨཱ་དྷི་ཏིཥཱ་མཾ་ཞེས་སྙིང་ག་དང༌། མཛོད་སྤུ་དང། མགྲིན་པ་དང༌། སྤྱི་བོར་བཞག་ལ་ཡང་རང་གི་སྙིང་གར་རང་གི་སྔགས་དང་ལྷན་ཅིག་ཏུ་དེ་ཉིད་གདོན་ནོ། །ཕྱག་རྒྱ་ཆན་པོ་བཅིངས་ནས་ཡེ་ཤེས་སེམས་དཔའ་མདུན་དུ་བཞག་ནས་བལྟ་བར་བྱའོ། །དེ་བསྐུལ་ནས་དེ་ཉིད་ཛཿ་ཧཱུཾ་བཾ་ཧོཿ་ཞེས་འདོན་ཅིང་རང་གི་ལུས་ལ་རབ་ཏུ་བསྒོམས་ནས་ཇི་ལྟ་བ་བཞིན་དུ་འོད་ཀྱི་དཀྱིལ་འཁོར་མངོན་པར་རྫོགས་པར་བྱས་ཏེ། ས་མ་ཡ་སྟྭཾ་ཨ་ཧཾ་ཞེས་དེར་བདག་ཉིད་བསྒོམས་ནས་བསྟན་པའི་རྡོ་རྗེའི་ལྟ་བས་ཡང་དག་པར་ཇི་ལྟ་བ་བཞིན་དུ་རང་བྱིན་གྱིས་རློབ་པའི་སྔགས་དང་ཕྱག་རྒྱས་སྙིང་གར་བྱིན་གྱིས་རློབ་པ་ཡང་བྱས་ནས་དམ་ཚིག་གི་ཕྱག་རྒྱས་ཛཿ་ཧཱུཾ་བཾ་ཧོཿ་
དང་སྔར་གྱི་རང་གི་སྔགས་ཀྱིས་སྤྱི་བོ་དང་མགྲིན་པ་ལ་སོགས་པ་རྣམས་སུ་བདག་ལ་བྱིན་གྱིས་བརླབ་པའི་ཆེད་དང་ཚུལ་ཇི་ལྟ་བ་སྙིང་པོ་དང་ཉེ་བའི་སྙིང་པོ་ལ་སོགས་པ་རྣམས་སུ་ཡང་ངོ༌། །ལེགས་སོ་ཞེས་པའི་སྦྱོར་བས་དེ་བཞིན་གཤེགས་པ་ཐམས་ཅད་ནང་དུ་བཅུག་སྟེ་དེ་དང་དེའི་ཡི་གེས་བརྟན་པ་ཅན་དུ་བྱས་ཏེ་མངོན་པར་དབང་བསྐུར་ནས་ཇི་ལྟ་བ་བཞིན་དུ་ཆོས་དང་ལས་ཀྱི་ཕྱག་རྒྱ་བཅིངས་པ་སྔོན་མ་ཅན་དུ་བྱས་པའི་ཏིང་ངེ་འཛིན་མཆོད་པ་དང་ཕྱག་འཚལ་པ་དང༌། དར་དབྱངས་སྦྱིན་པ་དང༌། སྤྱན་དྲང་གསང་བའི་མཆོད་པའི་མཐར་ཐུག་པ་མངོན་པར་རྫོགས་པར་བྱ་སྟེ། ཇི་ལྟར་བྱས་པ་ཉིད་ལ་སོགས་པའི་མཚན་མ་འཛིན་པ་ལ་སོགས་པ་ཅན་ནོ། །ཨོཾ་བཛྲ་ཨཱཏྨ་ཀོ྅ཧཾ་ཨོཾ་སྭ་བྷཱ་བ་ཤུདྡྷཧཧཾ་ཨོཾ་སརྦྦ་ས་མོ་ཉ་ཧཾ་ཞེས་རྡོ་རྗེའི་བདག་ཉིད་ཅན་དང་རང་བཞིན་གྱིས་དག་པ་དང༌། བདག་མེད་པར་མཉམ་པ་ཉིད་ཀྱིས་ཐམས་ཅད་མཉམ་པར་རྣམ་པར་བསམས་ནས་འགྲོ་བ་མ་ལུས་པའི་ཉེ་བར་འཚོ་བ་ཡང་རྣམ་པར་བསམས་ནས་བདག་ཉིད་སེམས་ཉེ་བར་འཕེལ་བའི་བཟླས་པ་བྱའོ། །དུས་ཇི་ལྟ་བ་བཞིན་དུ་ཞེས་པ་ནི་སྐབས་ཇི་ལྟ་བར་རོ། །ཐུན་མཚམས་བཞིའམ་གསུམ་དག་ལ་བརྩམ་པར་བྱ་སྟེ་ཡི་གེའི་རྗེས་སུ་སོན་པའི་ཡིད་ཀྱི་ཞེས་པ་ནི་སྙིང་གའི་མཚན་མའི་ཡི་གེ་ལ་སེམས་གནས་པར་གྱུར་པའོ། །དམན་པའི་དངོས་གྲུབ་ཀྱི་དབང་དུ་བྱས་ནས་ཉི་མ་རེ་རེ་རེ་ཞེས་བྱ་བ་ལ་སོགས་པ་གསུངས་པ་སྒྲུབ་པའི་དུས་སུ་ཐམས་ཅད་ཐུན་མོང་དུ་རྡོ་རྗེའི་གདན་ནོ། །གཞན་གྱི་ཚེ་སངས་རྒྱས་རྣམས་ཁོ་ནའོ། །དེ་བཞིན་གཤེགས་པའི་སྐུར་གསལ་བ་ཞེས་པ་ནི་རང་གི་ལྷའི་བྱིན་གྱིས་བརླབས་པའོ། །དངོས་གྲུབ་འབྲིང་པོའི་དབང་དུ་བྱས་ཏེ་གསུངས་པ་བྱ་བ་བཞིན་ཞེས་བྱ་བ་ལ་སོགས་པའོ། །སྒྲུབ་པ་ཆེན་པོ་ཞེས་པ་ནི་མཆོག་སྒྲུབ་པའོ། །དེ་བཞིན་གཤེགས་པའི་མཐོ་གང་གི་ཚད་ཀྱིས་དེ་བཞིན་གཤེགས་པའི་མཆོད་རྟེན་འབུམ་བྱའོ། །དེ་མ་འབྱོར་པ་ལ་ཇི་ལྟར་འབྱོར་བའི་ཚད་ཀྱིས་དྲིའི་མཆོད་རྟེན་རྣམས་སོ། །བཟླས་པ་ཡང་གཉིས་ཀ་ལ་སྟོང་ཕྲག་གོ །བྱེ་བ་བདུན་གྱི་ནང་མ་ཡིན་པ་སྟེ་སྟེང་དུ་ནི་མ་ཡིན་པར་རིག་པར་བྱའོ། །སྒྲུབ་པ་གཉིས་པ་ཡང་རྫས་སྔོན་མ་ཅན་གྱི་དཔེར་བརྗོད་པ་ཉིད་དོ། །དེ་ལ་ཡང་ལེགས་པར་བྱ་བའི་དབྱེ་
བས་དངོས་གྲུབ་གསུམ་དུ་རེག་པར་བྱའོ། །ཅི་སྟེ་འབུམ་ཕྲག་གསུམ་བཟླས་པས་རི་བོ་ལྷུང་བ་ལ་སོགས་པ་ཅན་གྱི་ལས་བྱེད་པར་གྲུབ་པར་མ་གྱུར་ཏོ། །ཡང་ན་གལ་ཏེ་འབུམ་ཕྲག་གསུམ་དུ་མི་བཟླས་པར་ཟླ་བ་རུ་མི་སྨྲ་བར་རང་སངས་རྒྱས་ཐམས་ཅད་ཀྱི་གཟུགས་སུ་བསྒོམ་པར་བྱའོ། །སངས་རྒྱས་ཐམས་ཅད་མཐོང་བ་ལ་སོགས་པར་འགྱུར་རོ། །སྒྲུབ་པ་པོ་ཐམས་ཅད་ཀྱི་ནན་ཏན་དུ་བྱའོ་ཞེས་པའི་བར་དུ་གསུངས་སོ། །གི་ཝཾ་ལ་སོགས་པའི་གྲུབ་པ་ནི་འཆད་པར་འགྱུར་བའི་ལྷུང་བཟེད་དང་ཆོས་གོས་ལ་སོགས་པ་ནས་གལ་ཏེ་སྒྲུབ་པ་ཞེས་པ་ཇི་སྲིད་པར་རོ། །ཀུན་ནས་གྲུབ་ཞི་པའི་རེའུ་མིག་ཅན་དུ་བྱས་ནས་ཀུན་ནས་ཇི་ལྟ་བ་བཞིན་དུ་བདུན་པ་བདུན་གྱི་རེའུ་མིག་ཅན་དུ་འགྱུར་ཏེ་དེ་དང་དེ་ལྟ་བུའི་རེ་ཁཱ་རྣམས་ཀྱིས་བཅད་པས་རེའུ་མིག་བཞི་བཅུ་ཞེད་གྱུར་འགྱུར་རོ། །ཕྲེང་ཟུང་ཞེས་པ་ནི་ཕྲེང་གཉིས་ལ་ཨ་ཡིག་ལ་སོགས་པ་བྲི་བར་བྱའོ། །ཕྲེང་གཉིས་པའི་མཐའ་མའི་རེའུ་མིག་ལ་རིམ་པས་མ་ནིང་གི་ཡི་གེ་གཉིས་གཉིས་ཀུན་དུ་རྟོགས་པར་བྱའོ། །ཕྲེང་གསུམ་པའི་ཐོག་མའི་རེའུ་མིག་ནས་བརྩམས་ནས་རྟེན་གྱི་རིམ་པས་ཀ་ལ་སོགས་པ་ཇི་སྲིད་པའོ། །ཕྲེང་གསུམ་པའི་ཐོག་མའི་རེའུ་མིག་དྲུག་པ་ནས་བརྩམས་ནས་ཡ་ར་ལ་ཝའོ། །བདུན་པའི་རེའུ་མིག་ནས་ཤ་ཥ་ས་ཧའོ། །སྟོད་པའི་རེའུ་མིག་ལ་ཀྵ་ཡིག་སྟེ་ཐམས་ཅད་ཀྱི་མཐར་རྡོ་རྗེ་རྩེ་ལྔ་པ་བྲི་བར་བྱའོ། །འདི་དག་ཀྱང་ཉེ་བར་མཚོན་པར་བྱེད་པ་སྟེ། གང་དུ་སྙིང་གར་རྡོ་རྗེ་མེད་པ་དེ་རུ་ནི་སྙིང་གའི་གནས་སུ་རང་གི་མཚན་མ་བཀོད་ནས་བཟླས་པའི་སྐུའོ་ཞེས་པའོ། །དེ་ཉིད་ཀྱི་ཕྱིར། འཁོར་ལོའི་དབུས་སུ་རབ་ཏུ་གནས། །ཞེས་པའི་ཚིག་གོ །གང་དུ་དངོས་གྲུབ་མེད་པ་དེར་རབ་ཏུ་སྦྱོར་བ་མྱུར་བས་དངོས་གྲུབ་མངོན་དུ་བྱའོ་ཞེས་ཆོས་ཀུན་དབང་དུ་འགྱུར་ཞེས་འབྱུང་ངོ༌། །མཆོག་ནི་ཨ་ལ་སོགས་པའི་དབྱངས་བཅུ་པོ་དང་གཙོ་བོ་ཉིད་དུ་ངེས་པར་བསྟན་ཏོ། །མ་ནིང་བཞི་པོ་སྤངས་པ་དེ་རྣམས་སྟོབས་བཅུར་བརྗོད་དོ། །ཡན་ལག་གཅིག་གཉིས་ཁྱད་པར་ནི་དབྱངས་གཅིག་གཉིས་ལ་གཅིག་གཉིས་སོ། །དབྱངས་ལས་སྐྱེས་པའི་སྔགས་ཀྱི་ཡི་གེར་ཡོངས་སུ་གྱུར་པའོ། །དབང་བསྐུར་བར་བྱད་པ་ནི་ཐིག་ལེ་ལ་སོགས་པར་ཡོངས་སུ་གྱུར་པའི་ཀ་ལ་སོགས་པར་ཡོངས་སུ་འགྱུར་བའོ། །ཡ་ར་ལ་ཝ་
ནི་རིམ་པས་རླུང་ལ་སོགས་པ་དང་མེ་ལ་སོགས་པར་ལུགས་ལས་བརྒལ་བའོ། །ཤ་ཥ་དང་ཡ་ལ་སོགས་པའི་སྡེ་པ་གཉིས་ནི་མི་མཉམ་པའོ། །ཀ་ལ་སོགས་པའི་སྡེ་པ་ལྔ་པོ་ནི་མཉམ་པའོ། །ཆོས་ཀུན་གྱི་སྔོམ་ཞེས་པ་ནི་ཆོས་རྣམས་ཐམས་ཅད་ཀྱིས་ཡང་དག་པར་བསྡོམས་ཤིང་བསྡུས་པའོ། །ཡང་དག་པར་སྦྱོར་བ་ནི་གང་ཞིག་ཡི་གེ་གཞན་གྱིས་ཀུན་དུ་སྦྱོར་བའོ། །སྦྱོར་བ་བྲལ་བ་ནི་གང་དུ་ཡི་གེ་གཞན་གསལ་བའོ། །བྱང་ཆུབ་ནི་ཨ་ཡིག་གོ །སྤྱོད་པ་ནི་ཨ་ཡིག་གོ །སངས་རྒྱས་ཀྱི་དོན་ནི་མ་ཡིག་གོ །མྱ་ངན་ལས་འདས་པའི་དོན་ནི་མ་ཡིག་གོ །དབྱངས་རྣམས་ཨ་ཡིག་ལ་སོགས་པའི་ཡི་གེ་རྣམས་ཀ་ལ་སོགས་པ་རྣམས་དང་གཅིག་ཏུ་བསྡུས་པར་གྱུར་པའོ། །བྱང་ཆུབ་གཟུགས་ནི་བྱང་ཆུབ་ཀྱི་རང་བཞིན་ནོ། །གཞན་ཞེས་པ་ནི་ཐིག་ལེ་རྣམས་སོ། །སངས་རྒྱས་ཐམས་ཅད་ཀྱི་བདག་ཉིད་ཅན་ཉིད་ཀྱི་ཕྱིར་སངས་རྒྱས་ཐམས་ཅད་ཀྱི་སྒྲས་བཅོམ་ལྡན་འདས་རྣམ་པར་སྣང་མཛད་དུ་མངོན་པར་འདོད་ལ་ང་ནི་དེའི་གསང་སྔགས་དེ་ཁོ་ན་བསྟན་པ་གསུངས་པ་ཐོག་མའི་དབྱངས་ཞེས་པ་ལ་སོགས་པ་སྟེ། དེ་ཡང་ཟླ་བའི་དཀྱིལ་འཁོར་དབུས་སུ་གནས་པའི་རྡོ་རྗེ་རྩེ་མོ་ལྔ་པ་གནས་པར་བསྒོམ་པར་བྱས་ནས་ཐམས་ཅད་དུ་འགྲོ་བ་ལ་སོགས་པ་ཐོབ་པར་འགྱུར་རོ། །དེ་ཉིད་ནི་བྱང་ཆུབ་ཀྱི་གཟུགས་སོ། །བྲལ་བ་ནི་ཐིག་ལེའོ། །གཉིས་པའི་དབྱངས་ཀྱིས་ཞེས་པ་ནི་ཨཱ་ཡིག་གིས་ཡང་དག་པར་སྦྱར་བའོ། །དེའི་གཟུགས་ཀྱིས་ཡོངས་སུ་གྱུར་པ་དེ་བསྟན་པ་ཤིན་ཏུ་རིང་པོ་ནས་དང་ཕ་རོལ་ཏུ་ཕྱིན་པར་བརྗོད་པར་བྱའོ་དྲོ་བ་ནི་ཚེག་དྲག་གོ །དེས་སྦྱར་བ་ནི་བྱང་ཆུབ་ཀྱི་གཟུགས་མྱ་ངན་ལས་འདས་པར་བརྗོད་པར་བྱའོ། །རང་གི་ལྷག་པའི་ཕྱག་རྒྱ་ནི་རང་གི་ལྷའི་ཕྱག་རྒྱའོ། །ཐོག་མར་སྤྱོད་པ་ནི་ཨ་ཡིག་གོ །གཉིས་པའི་སྨྲ་བ་པོ་ནི་ཝ་ཡིག་གོ །བཞི་བའི་དབྱངས་ནི་པའི་སྟེ་དེས་མནན་པའོ། །མེའི་མིང་ཅན་ནི་ར་ཡིག་གོ །རྒྱུ་དང་བྲལ་བར་གསལ་བར་བྱེད་པ་ནི་ཧ་ཡིག་གོ །དྲུག་པའི་དབྱངས་ནི་ཨུ་ཡིག་གོ །དེས་ཐ་དད་མ་ཡིན་པ་ནི་འདྲེས་པའོ། །སྟེང་དུ་ཡང་ཐིག་ལེ་དང་བཅས་པ་ནི་བཞི་པའོ། །ཆོས་རྣམས་ཐམས་ཅད་མཁའ་དང་མཚུངས་པ་ཉིད་དུ་གསལ་བར་བྱེད་པ་ནི་ཁཾ་ཡིག་སྟེ་ལྔ་པའོ། །འདི་ནི་བཅོམ་ལྡན་འདས་དཔའ་བོ་ཆེན་པོའོ། །གསང་སྔགས་སོ། །སྤྱོད་པ་ནི་མི་བསྐྱོད་པའོ། །
བྱང་ཆུབ་ནི་རྡོ་རྗེ་སེམས་པའོ། །ཆོས་ཀུན་གྱིས་དེ་བཞིན་ཉིད་གསལ་བར་བྱེད་པ་ནི་ཏ་ཡིག་གོ །མིའི་ས་བོན་ནི་ར་ཡིག་གོ །སྤྱོད་པ་ཡི་ནི་སྟེང་དུ་གནས། །ཞེས་པ་དེས་མནན་པའོ། །སྤྱོད་པ་ཡང་རྗེས་སུ་ང་རོལ་འདིར་བལྟ་བར་བྱ་སྟེ། སློབ་དཔོན་མན་ངག་ལས་ཞེས་བྱ། །ཞེས་པའི་གསུང་ལས་སོ། །ཆོས་རྣམས་ཀུན་གྱི་རྒྱུ་མེད་པ་ཉིད་གསལ་བར་བྱེད་པ་ནི་ཧ་ཡིག་གོ །མེའི་ས་བོན་ནི་ར་ཡིག་གོ །བཞི་པའི་དབྱངས་ནི་ཡི་ཡིག་གོ །དེ་ཡང་རྗེས་སུ་ང་རོའི་དབང་དུ་བྱས་པའོ། །དེ་ཉིད་ཅེས་པ་ཧ་ཡིག་གོ །དྲུག་པའི་དབྱངས་ཀྱིས་ཞེས་པ་ཨུ་ཡིག་གིས་སོ། །དེ་ཡང་རང་གི་རྗེས་སུ་ང་རོ་བཅས་པ་བལྟ་བར་བྱའོ། །སྡེ་ཚན་ལྔ་པའི་བཞི་པ་ནི་བྷ་ཡིག་གོ །སྡེ་པ་ལྔ་པའི་མཐའ་ཅན་མ་ཡིག་གོ །སྒྱུ་མའི་ཆོས་ལ་རབ་ཏུ་གནས་པ་ནི་སྒྱུ་མའི་རང་བཞིན་གསལ་བར་བྱེད་པའོ། །བརྒྱད་པའི་དབྱངས་དང་ཡང་དག་ལྡན་ནི་ཨེ་ཡིག་གི་དོན་ཏོ། །དེ་ཉིད་ཅེས་པ་ནི་མ་ཡིག་གོ །ཐིག་ལེ་དང་བཅས་པ་ནི་འཇམ་པའི་དབྱངས་ཀྱིའོ། །ལྔ་པའི་དབྱངས་ནི་ཨུ་ཡིག་གོ །དེས་ཡང་དག་པར་ལྡན་པ་ནི་འཇམ་དཔལ་གྱིའོ། །དེ་ཉིད་ནི་མི་ཡིག་སྟེ་སྤྱོད་པ་རྗེས་སུ་སོན་པ་ནི་རྣམས་སེལ་གྱིའོ། །སྡེ་ཚན་ལྔ་པའི་གསུམ་པ་ནི་བ་ཡིག་གོ །ཡི་གེ་གསུམ་ནི་གཤིན་རྗེ་མཐར་བྱེད་ཀྱི་སྔགས་སོ། །དེ་བསྟན་པའི་ཕྱིར་ཐོག་མར་ཞེས་བྱ་བ་ལ་སོགས་པ་གསུངས་པ། །དགུ་པའི་དབྱངས་ནི་ཨོ་ཡིག་གོ །སྐུ་སྒུམ་དུ་ནི་རྣམ་པར་བསྒོམ་ནི་ཧཱུཾ་ཡིག་གོ །དང་པོ་དང་བར་མ་ཐིག་ལེ་དང་ཚེག་དྲག་དང་བཅས་པར་བལྟ་བར་བྱའོ། །སྡེ་པ་ཐ་མའི་གསུམ་པ་ས་ཡིག་གོ །སྡེ་པ་དང་པོའི་གསུམ་པ་ག་ཡིག་གོ །དེ་ཉིད་ཀྱང་བཅོམ་ལྡན་འདས་ནམ་མཁའ་མཛོད་དང་ཁྲོ་བོ་ཆེན་པོ་སྟོབས་པོ་ཆེའིའོ། །སྒྱུ་དང་བྲལ་བ་ཉིད་དུ་གསལ་བར་བྱེད་པ་ནི་ཏ་ཡིག་གོ །དབྱངས་ལྔ་པ་ནི་ཨུ་ཡིག་གོ །རང་གི་རྗེས་སུ་ང་རོ་བཅས་པར་ཤེས་པར་བྱའོ། །དེས་ཡང་དག་པར་སྦྱར་བ་ནི་རྡོ་རྗེ་ཧཱུཾ་མཛད་ཀྱིའོ། །སྡེ་པ་བཞི་པའི་དང་པོ་ནི་ཏ་ཡིག་གོ །མེའི་རབ་ཏུ་གསལ་བར་བྱས་པ་ནི་ར་ཡིག་རྗེས་སུ་སོན་པར་རོ། །བཞི་པའི་དབྱངས་དང་ཡང་དག་ལྡན་པ་ནི་ཨི་ཡིག་གི་དོན་ཏོ། །དེ་ཉིད་འབའ་ཞིག་ཅེས་པ་ཏ་ཡིག་ནི་ལྷ་མོ་སྒྲོལ་མའིའོ། །བཞི་པའི་གཉིས་པ་ནི་ཐ་ཡིག་གོ །ཤེས་རབ་ཀྱི་ཕ་རོལ་ཏུ་ཕྱིན་མའིའོ། །ཐིག་ལེ་
སྟེ་རྗེས་སུ་ར་ངོའོ། །སྒྲ་ནི་རྗེས་སུ་སྣ་ལྡན་ནོ། །གཉིས་པའི་ཡི་གེ་གསུམ་པ་ནི་ཛ་ཡིག་གོ །བཞི་པའི་དབྱངས་ནི་པའི་ཡིག་གོ །འདི་འཇིག་རྟེན་གསུམ་ལས་རྣམ་པར་རྒྱལ་བ་དང༌། འཇིག་རྟེན་དབང་ཕྱུག་དེའིའོ། །སྙིང་པོ་ལ་ཚེག་དྲག་དང་བཅས་པ་ཉིད་དུ་ཁོང་དུ་ཆུད་པར་བྱའོ། །སྤྱོད་པའི་གར་མཁན་མིང་ཅན་ཞེས་པ་ནི་དང་པོར་གནས་པའི་ཨ་ཡིག་གོ །དགུ་པའི་དབྱངས་ནི་ཨོ་ཡིག་གོ །དབྱངས་ཆེན་ནི་ལ་ཡིག་གོ །སྡེ་ཚན་དང་པོའི་དང་པོ་ཅན་གྱི་ཡི་གེར་ངེས་པ་དང་པོ་ནི་ཀ་ཡིག་གོ །ཨོཾ་ཡིག་དང་བཅས་པ་ཡང་རང་གི་སྔགས་སུ་བལྟ་བར་བྱའོ། །སྡེ་ཚན་ལྔ་པའི་བཞི་པའི་ས་བོན་ནི་བྷ་ཡིག་གོ །སྒྱུ་མའི་ཆོས་ལ་རབ་ཏུ་གནས། ཞེས་པ་མ་ཡིག་གོ །རྒྱུ་ཉེ་བར་མི་དམིགས་པ་གསལ་བར་བྱེད་པ་ནི་ཧ་ཡིག་གོ །གནས་པའི་དབྱངས་ནི་ཨ་ཡིག་གོ །རང་གི་རྗེས་སུ་ང་རོ་ཡང་འདིར་ཀུན་དུ་ཁོང་དུ་ཆུད་པར་བྱའོ། །སྙིང་པོ་གཞན་ཉིད་ཀྱང་དགེ་བའི་རྡོ་རྗེ་སྒོམ་པར་བྱེད་པ་སྔོན་མ་ཅན་གྱི་རབ་ཏུ་སྦྱོར་བས་ཆོས་ཀྱི་ཕྱག་རྒྱའོ། །རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་རྣམས་དང་རྡོ་རྗེ་སེམས་དཔའ་ལ་སོགས་པ་བརྒྱད་པོ་རྣམས་དང་ལྕགས་ཀྱུ་ལ་སོགས་པ་བཞི་པོ་རྣམས་ཀྱིས་རྡོ་རྗེ་ཡེ་ཤེས་ཞེས་བྱ་བ་ལ་སོགས་པ་རྣམས་སོ།། ལ་ཡིག་གིས་སྦྱར་བ་ནི་རྡོ་རྗེ་བརྟན་པར་ཡིད་ལ་བསམ་བཞིན་པས་རེངས་པར་བྱེད་དོ། །རང་གི་ས་བོན་གནས་པ་ནི་ཡ་ཡིག་གནས་པའོ། །དེ་ཉིད་ཅེས་པ་ནི་ཧཾ་ཡིག་གོ །རྣམ་པར་སྣང་མཛད་མཐུན་གནས་ལས་བྱུང་ཞེས་པ་ནི་རྣམ་པར་སྣང་མཛད་དང་མཐུན་པའི་རྣལ་འབྱོར་ལ་གནས་པའོ། །རྒྱུ་ནི་ཧ་ཡིག་གོ །དྲུག་པའི་དབྱངས་ཀྱིས་ནི་ཨུ་ཡིག་གིས་ཡང་དག་པར་སྦྱར་བའོ། །ཐིག་ལེ་སྒྲ་དང་བཅས་པ་ར་ལ་གནས་པས་འགྲུབ་པར་བྱེད་དོ། །རླུང་གི་དཀྱིལ་འཁོར་དུ་དེའི་ས་བོན་གནས་པས་ཕྱེ་མར་བྱེད་དོ། །རྡོ་རྗེ་གནས་པའམ་འཁོར་ལོ་དབུས་སུ་གནས་པས་རེངས་པ་ལ་སོགས་པ་བྱའོ། །དབང་དུ་བྱེད་ཅེས་པ་ནི་འགྲུབ་པར་བྱེད་པའོ། །སྙིང་གར་ཞེས་པ་ནི་སྒྲུབ་པར་བྱེད་པའི་སྙིང་ག་ལའོ། །ཐོབ་ནས་ཞེས་པ་ནི་སྤྲོས་ནས་སོ། །བདག་ཉིད་བསྒོམས་ནས་ཞེས་པ། རྟོག་པའི་གཟུགས་སུ་གནས་བྱས་ནས། །ཞེས་པ་དང་སྤྲེལ་ལོ། །རླུང་གིས་ས་བོན་ཚོན་ཞེས་པ་ནི་
ལ་ཡིག་གིས་བསྐོར་བའོ། །སྤྱོད་པའི་སྟེང་དུ་འབར་བྱས་པ། །ཞེས་པ་ནི་ཡ་ཡིག་གི་མཐར་ཨཱ་ཡིག་གོ །རླུང་ལ་གནས་པ་མེ་ལ་གནས། །ཞེས་པ་ནི་རླུང་ལ་གནས་པ་དང་མེ་ལ་གནས་པའོ། །སྡེ་ཚན་དང་པོའི་དང་པོར་གནས་པ་ནི་ཀ་ཡིག་གོ །ས་ཡིག་གི་སྟེང་དུ་གནས་པས་ཀྵ་ཡིག་ཏུ་འགྱུར་རོ།། སྡེ་ཚན་ལྔ་པའི་ཐ་མ་མ་ཡིག་གོ །དབྱངས་དྲུག་པ་ཨུ་ཡིག་གོ །ཉི་མའི་དཀྱིལ་འཁོར་གྱི་དབུས་སུ་སོན་པའི་ར་ཡིག་ལ་གནས་པས་འབར་བར་བྱེད་དོ། །ཕྱག་རྒྱའི་བདག་ཉིད་ཐམས་ཅད་ཅེས་པ་ནི་རང་གི་ལྷའི་རྣལ་འབྱོར་ཇི་ལྟ་བ་བཞིན་པས། མི་ཡི་མདུན་དུ་གནས་ནས་ནི། །ཞེས་པ་མེའི་དཀྱིལ་འཁོར་གནས་པའོ། །རྒྱུ་བྱེད་པ་མཚུངས་པ་ནི་ཧཱུཾ་ཡིག་གོ །ངག་གི་འཁོར་ལོ་བསྒྲུབ་པའི་ཕྱིར་དཀྱིལ་འཁོར་ནི་གསུང་གི་འཁོར་ལོའི་དཀྱིལ་འཁོར་རོ། །ཆུའི་དཀྱིལ་འཁོར་བསམས་ནས་དེ་ལ་གནས་པའི་ཇི་ལྟར་གསུངས་པའི་པདྨའོ། །དེ་ལ་བདག་ཉིད་འཇམ་དཔལ་ལྷག་པར་གཡོ་བའི་འོད་ཟེར་ཆེན་པོར་བསྒོམས་ནས་རང་གི་སྙིང་གར་ཟླ་བ་ལ་པདྨ་དེའི་ཡང་སྟེང་དུ་དུང་བརྟག་པར་བྱའོ། །དེ་ནས་རྡོ་རྗེའི་རྩེ་བསྒོམ་པ་ལ་སོགས་པའི་རིམ་པས་ཇི་སྲིད་དུ་ཇི་སྐད་གསུངས་པའི་ཝ་ཡིག་ཇི་ལྟར་ངེས་པར་བསྟན་པའི་དུས་སུ་བསྒོམ་པར་བྱའོ། །དེ་ལྟར་བྱས་པ་ནི་སྔོན་དུ་རྙེད་པར་རོ། །པདྨས་མཚན་པའི་ཆུའི་དཀྱིལ་འཁོར་སྔོན་པོར་བྲིས་ནས་རྣམ་པར་སྣང་མཛད་ཀྱི་རྣལ་འབྱོར་དང་ལྡན་པས་དེ་ལ་སྐྱིལ་ཀྲུང་གིས་ཉེ་བར་འདུག་སྟེ། ཆོས་ཀྱི་དབྱིངས་ཐམས་ཅད་དུ་རང་གི་སྐུས་དེ་བཞིན་གཤེགས་པ་རྣམས་སྤྲོས་ནས་ཡང་དག་པར་བསྡུས་ཏེ་སྐུ་ལ་སོགས་པའི་ཕྱག་རྒྱ་རྣམས་རང་གི་སེམས་ལ་རབ་ཏུ་གཞུག་པར་བྱའོ། །རང་གི་ལུས་ཀྱི་དཀྱིལ་འཁོར་ལ། །ཞེས་པ་ནི་རང་གི་སྙིང་གར་ཟླ་བའི་དཀྱིལ་འཁོར་ལ་པདྨའི་གེ་སར་ཉིད་ཐིག་ལེ་སྟེ་དེ་རྣམས་ལས་ཝ་ཡིག་གི་ཕྲེང་བའོ། །མགྲིན་པར་བསྡུས་ནས་དབྱངས་ཉིད་དུ་འགྱུར་རོ། །དེ་ནས་མཆོག་ལ་གཞོལ་བ་རྩ་བའི་ཡི་གེ་ཉིད་ཐོབ་པོ། །དེ་ནས་རྡོ་རྗེའི་རང་བཞིན་གྱི་ལྕེའི་ཡི་གེ་འབར་བ་རྣམས་ཀྱིས་ཐམས་ཅད་དུ་གསལ་བར་བྱས་ནས་དོན་དམ་པའི་རྡོ་རྗེའི་གསུང་གི་དབྱངས་ཀྱིས་ནམ་མཁའ་ཀུན་ནས་གང་བར་བཟླས་པར་བྱ་སྟེ་དངོས་གྲུབ་ཀྱི་མཚན་མ་ཇི་སྲིད་པར་རོ། །ཡང་ན་དེ་ཁོ་ན་བཞིན་ཆུའི་དཀྱིལ་འཁོར་ལ་གནས་པའི་རྡོ་རྗེ་སེམས་དཔའི་
རྣལ་འབྱོར་ཅན་གྱི་ལྕེ་རྡོ་རྗེའི་རང་བཞིན་ཅན་དུ་བསམས་ནས་རང་གི་སྙིང་གར་ཟླ་བའི་དཀྱིལ་འཁོར་ལ་ཨ་ཡིག་བསམས་ཏེ། དེའི་སྡེ་པ་རྣམས་ཀྱང་ཨ་ཡིག་ལ་སོགས་པའི་མཐར་ཐུག་པ་ཉི་མའི་འོད་ཟེར་དང་མཚུངས་པ་དང་ཀ་ཡིག་ལ་སོགས་པའོ། །དེའི་འབར་བ་རྣམས་ཀྱི་རང་གི་དོན་དུ་སྤྲོས་པས་ལྕེའི་མཆོག་ཏུ་དྲ་བ་རྣམ་པར་བཀྲམ་པའི་རྡོ་རྗེ་འབར་བ་སྟོང་ཕྲག་སྐད་ཅིག་སྐད་ཅིག་ལ་འབྱུང་བར་བྱའོ། །དེ་རྣམས་ཀྱང་ཡི་གེར་གྱུར་ནས་འགྲོ་བ་ཀུན་དུ་སྣང་བར་བྱས་ཏེ་སླར་ཡང་བྱོན་ནས་གནས་སུ་རྒྱུན་བཞིན་དུ་རྗེས་སུ་འཇུག་པར་བསམ་པར་བྱའོ། །རང་གི་ལུས་ལ་ལྷ་རྣམས་ལུས་ཅན་གྱི་གཟུགས་བརྙན་ནོ། །སེམས་ཕྱག་རྒྱ་ལེགས་པར་བསམ་པ་བྱས་ནས་སྒྲ་རྣམས་མངོན་པར་མི་གསལ་བའི་ཆ་ཤས་ཀྱི་ཡི་གེ་དང༌། །དེ་ལས་གཞན་པའི་རང་བཞིན་ལྟེ་བར་སོང་བར་ལྷག་པར་མོས་པའི་རིམ་པ་ལས་གསང་སྔགས་དང་རིག་པ་རྣམས་སྙིང་གར་འཇུག་པར་བྱེད་པ་ཇི་སྲིད་པར་རོ་ཞེས་པར་རོ། །སྒོམ་པར་བྱེད་པར་བརྟན་པར་བྱས་ནས་སྔར་གསུངས་པ་ལྟར་ཆུའི་དཀྱིལ་འཁོར་ལ་གནས་ནས་རྡོ་རྗེ་ལྕགས་ཀྱུ་ལ་སོགས་པ་རྣམས་ཀྱིས་དགུག་པ་ལ་སོགས་པ་བྱས་ནས་བསྒྲུབ་པར་བྱའོ། །སངས་རྒྱས་ཀུན་ཉིད་ཅེས་པ་ནི་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་ཉིད་དོ། །ཡི་གེ་ཞེས་པ་ནི་ཨ་ཡིག་གོ །དེ་ཉིད་ཅེས་པའང་དེ་ཁོ་ནའོ། །དེ་ནས་བཅོམ་ལྡན་འདས་ཞེས་པ་ལ་སོགས་པ་རྣམས་ཀྱིས་གཙུག་ཏོར་རྣམས་དཀྱིལ་འཁོར་གསལ་བ་དང༌། སྔགས་ཀྱི་མཛོད་སྒྲུབ་ཐབས་ཀྱི་ལེའུ་གསལ་བར་བྱེད་དོ། །དེ་ལ་འཁོར་ལོས་སྒྱུར་བའི་སྒྲུབ་ཐབས་བསྟན་པ། དེ་ནས་ཞེས་བྱ་བ་ལ་སོགས་པ་གསུངས་པ། དེ་བཞིན་གཤེགས་པ་ཞེས་པ་རྣམ་པར་སྣང་མཛད་དུ་མཐུན་པར་བསྒྲུབས་ནས་དེའི་གཟུགས་སོ། །དེ་ཇི་ལྟར་བཅོམ་ལྡན་འདས་རྒྱན་དང་བཅས་པ་དར་ལའི་སྟོད་གཡོགས་དང་སྨད་གཡོགས་དང་རིན་པོ་ཆེ་ལྔའི་ཅོད་པན་དང༌། ཏིང་ངེ་འཛིན་ལ་གནས་པ་དེ་བཞིན་དུ་འདི་འང་སངས་རྒྱས་དེའི་གཟུགས་འཆང་བའི་ཕྱག་གི་ཞེས་གསུངས་སོ། །རིག་པའི་རྒྱལ་པོའི་གཟུགས་ཞེས་ཁྱད་པར་གཞན་བསྟན་པ་གསུངས་པ། འཁོར་ལོའི་ཕྲེང་བས་རྣམ་པར་བརྒྱན། །ཞེས་པ་འབར་བའི་ཕྲེང་བ་རབ་ཏུ་གསལ་
བར་འཆད་བ་འཆད་པར་འགྱུར་བའི་འབར་བ་དང་བཅས་པའི་འཁོར་ལོའི་ཕྲེང་བའོ། །མཐའ་རུ་རིན་ཆེན་བདུན་ཞེས་པ་ནི་བདུན་གྱི་དབུས་སུ་འཁོར་ལོ་རིན་པོ་ཆེའོ། །དེའི་གཡས་དང་གཡོན་མིན་དག་ཏུ་ཁྱིམ་བདག་དང་བློན་པོ་དང༌། གླང་པོ་དང༌། བཅོམ་ལྡན་འདས་དེ་བཞིན་དུ་རིམ་པས་བུད་མེད་དང་ཡིད་བཞིན་གྱི་ནོར་བུ་དང༌། མྱུར་འགྲོ་རིན་པོ་ཆེ་གཞན་རྣམས་ཀྱང་ངོ༌། །ཏིང་ངེ་འཛིན་དང༌། དྲན་པ་དང༌། ཤེས་རབ་དང༌། དགའ་བ་དང༌། བརྩོན་འགྲུས་དང༌། བཏང་སྙོམས་དང་ཤིན་ཏུ་སྦྱངས་པ་སྟེ་བྱང་ཆུབ་ཀྱི་ཡན་ལག་དང་རིམ་པས་དེ་བྱིན་གྱིས་བརླབ་པའི་དབང་དུ་བྱས་པའོ། །གཡས་པའི་གུང་མོ་གྱེན་དུ་བསྒྲེངས་པས་གཟུང་བའི་འཁོར་ལོར་ཀུན་དུ་རྟོགས་པར་བྱའོ། །དེ་གསུང་པར་འགྱུར་རོ་ཞེས་པའོ། །དཀྱིལ་འཁོར་གྲུ་བཞི་པའི་དབུས་སུ་ཇི་སྐད་དུ་གསུངས་པའི་འཁོར་ལོའི་ཕྲེང་བ་དེ་ལ་བསྡུས་པ་ལ་སོགས་པ་བྱས་ནས་ཕྱག་རྒྱ་ཆེན་པོ་སྒྲུབ་པའི་དོན་དུ་དེ་དང་གཉིས་སུ་མེད་པར་གྱུར་པས་གསེར་ལ་སོགས་པའི་འཁོར་ལོ་ལ་སོགས་པ་བསྒོམ་པར་བྱའོ་ཞེས་པའོ། །ཕྱག་རྒྱ་ཞེས་པ་ནི་འཁོར་ལོའི་ཕྱག་རྒྱའོ། །ཕྲ་མོ་ཞེས་པ་ནི་ཕྲ་མོ་ཉིད་དོ། །ཆེ་དང་ནི་ཆེན་པོ་ཉིད་དོ། །དབང་ཕྱུག་ནི་ཁྱབ་བདག་གོ །རང་དབང་ནི་དབང་ཕྱུག་ཏུ་གྱུར་པའོ། །འདོད་དགུར་སྤྱོད་པ་ནི་ཇི་ལྟར་འདོད་པ་བཞིན་སྤྱོད་པའོ། །ཨོཾ་སརྦ་ཏ་ཐཱ་ག་ཏོ་ཨུཥྞཱི་ཥ་ཞེས་བྱ་བ་ལ་སོགས་པ་རྣམས་རྩ་བའི་སྔགས་ཀྱིས་སྤྱི་བོ་ལ་སོགས་པ་ཕྱིན་གྱིས་རློབ་པའོ། །སྙིང་པོའི་སྙིང་པོ་དང་མཆོག་སྙིང་པོ་ཡང་ནུ་མའི་བར་དུ་ཡི་གེའི་གུང་མོ་དང་སྙིང་གའི་འཁོར་ལོའི་ལྟེ་བ་ལ་རབ་ཏུ་བཞག་ནས་བཟླས་པ་བསམ་པར་བྱའོ། །དེ་ནས་གཟི་བརྗིད་ཕུང་པོའི་སྒྲུབ་ཐབས་ཉེ་བར་བསྟན་པ་གསུངས་པ་ཉི་མའི་དཀྱིལ་འཁོར་ཞེས་བྱ་བ་ལ་སོགས་པ་སྟེ། གྲུབ་ཞི་པ་ལྗང་གུ་སྐར་མ་ལ་སོགས་པའི་རྣམ་པས་མཛེས་པ་སྟེ། ནམ་མཁའི་དཀྱིལ་འཁོར་ལ་མོས་པར་བྱའོ། །གཉིས་སུ་མེད་འབྱུང་ནི་གཉིས་སུ་སྐྱེ་བ་ཡོད་པ་མ་ཡིན་པའི་རྣམ་པས་བསམ་པར་བྱའོ། །འཁོར་ལོས་སྒྱུར་བ་མཆོག་ཏུ་འབར་ནི་དེ་དང་མཚུངས་པའོ། །འཁོར་ལོའི་དཀྱིལ་འཁོར་དབུས་སུ་གནས་པར་ཞེས་པ་ཉི་མའི་དཀྱིལ་འཁོར་གྱི་དབུས་སུ་གནས་པའི་འཁོར་ལོའི་ལྟེ་བ་ལ་གནས་པའོ། །འཆར་ཀ་ལྟ་བུ་ཞེས་པ་ནི་དམར་པོའོ། །ཕྱག་རྒྱ་
ཞེས་པ་ནི་གཙུག་ཏོར་གྱི་ཕྱག་རྒྱའོ། །དེ་ནམ་མཁའ་ལྟ་བུར་སྙིང་གར་བསྒོམ་པའོ། །རྩ་བའི་སྔགས་ལ་སོགས་པ་རྣལ་འབྱོར་དང་བྲལ་བ་ཡང་ཇི་ལྟ་བ་བཞིན་གྱི་རྣལ་འབྱོར་ནི་ཐམས་ཅད་དུ་སྔར་བཞིན་དུ་བལྟ་བར་བྱའོ། །བསམ་པར་བྱ་བ་ཐམས་ཅད་ཇི་ལྟ་བ་ཇི་བཞིན་པའི་རྣལ་འབྱོར་གཟི་བརྗིད་ཕུང་པོ་ལ་སོགས་པ་རྣམས་འཁོར་ལོས་སྒྱུར་བ་བཞིན་དུ་རྒྱན་ལ་སོགས་པ་དང་ལྡན་པར་ཀུན་དུ་རྟོགས་པར་བྱའོ། །ཀུན་ནས་སྣང་བའི་སྒྲུབ་ཐབས་བསྟན་པ་ཀུན་ནས་སྣང་བ་ཞེས་པ་ལ་སོགས་པ་གསང་སྔགས་ཡི་གེ་གསུམ་ཞེས་པ་ཡི་གེ་གསུམ་གཙུག་ཏོར་འཕགས་ཤིང་འོད་གསལ་བ་ཞེས་པ་ནི་གཙུག་ཏོར་གྱེན་དུ་བྱུང་ཞིང་འོད་གསལ་བའོ། །དེར་རང་བདག་ཉིད་དེ་ལྷའི་གཟུགས་ཀྱིས་སོ། །ཆོས་ཀྱི་འཁོར་ལོའི་ཕྱག་རྒྱ་ཆེ་ཞེས་བྱ་བ་ལ་སོགས་པ་ཆོས་ཀྱི་འཁོར་ལོའི་སྒྲུབ་ཐབས་གསུངས་པ། རྣམ་པ་བཅུ་གཉིས་ཉིད་གསལ་བར་གསུངས་པ། རྣམ་གསུམ་ཞེས་པ་ལ་སོགས་པ་སྟེ། འདི་ནི་སྡུག་བསྔལ་བདེན་པའོ་ཞེས་བྱ་བ་ལ་སོགས་པ་ཅན་ནི་རྣམ་གསུམ་མོ། །དེ་རྣམས་ཁོ་ན་ལན་གསུམ་དུ་བསྐོར་བས་ཡོངས་སུ་བསྐོར་བ་གསུམ་མོ། །ཐེག་པ་གསུམ་ནི་ཉན་ཐོས་ལ་སོགས་པའི་ཐེག་པའི་དབྱེ་བས་སོ། །ཆོས་ཀྱི་དབྱིངས་ཞེས་པ་ནི་ནམ་མཁའི་དབྱིངས་སོ། །དེ་ཁོ་ན་ཉིད་དུ་རྣམ་པར་གཞག་པ་ཅི་ཞིག་བསྒོམ་པར་བྱའོ་ཞེ་ན་གསུངས་པ། །རྟེན་ཅིང་ཞེས་པ་ལ་སོགས་པའོ། །ཆོས་ཀྱི་ཕྱག་རྒྱ་ཆེ་ཞེས་པ་ནི་ཆོས་ཀྱི་འཁོར་ལོའི་ཕྱག་རྒྱ་ཆེན་པོའོ། །དེ་ཉིད་སངས་རྒྱས་བྱང་ཆུབ་སྟེ་དེའི་རབ་ཏུ་སྒྲུབ་པར་བྱེད་པའོ། །ཉོན་མོངས་རྡོ་རྗེའི་སྒྲུབ་ཐབས་སྟོན་པར་བྱེ་དཔའི་ཕྱིར་པདྨ་རཱ་ག་མཚུངས་ཞེས་པ་ལ་སོགས་པ་གསུངས་པ་རྣལ་འབྱོར་སྦྱོར་བའི་མཆོག་ཅེས་པ་ལྷའི་རྣལ་འབྱོར་མཆོག་ཏུ་འཕགས་པ་རྡོ་རྗེའི་གཟུགས་བརྙན་འབར་བའི་རྡོ་རྗེས་ཉོན་མོངས་སྲེག་པར་བྱེད་པའོ། །དགྲ་ལས་རྒྱལ་བར་བྱེད་པ་ནི་སྡུག་བསྔལ་ལ་སོགས་པའི་བདེན་པའི་ཡེ་ཤེས་ཐོབ་པར་འབར་རོ། །དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་གྱི་སྒྲུབ་ཐབས་བསྟན་པ་དབང་ཆེན་དཀྱིལ་འཁོར་ཞེས་བྱ་བ་ལ་སོགས་པ་གསུངས་པ་དབང་ཆེན་གྱི་དཀྱིལ་འཁོར་དུ་རྡོ་རྗེ་ལ་གནས་པའི་སངས་རྒྱས་ཀྱི་གཟུགས་
ཅན་དེའི་རྒྱལ་གྱིས་བདུད་བཞི་ལས་རྒྱལ་བར་ལྷག་པར་མོས་ནས་སྡུག་བསྔལ་ལ་སོགས་པའི་བདེན་པ་བཞི་པོ་དེ་བཞིན་གཤེགས་པའི་ཁུ་ཚུར་གཉིས་ཀྱི་བདག་ཉིད་ཐམས་ཅད་བཟུང་ནས་གཉིས་སུ་མེད་ཅིང་སྐྱེ་བ་མེད་པའི་རྣམ་པ་བསྒོམ་པར་བྱ་ཞིང་བསྒྲུབ་པར་བྱའོ། །གཙུག་ཏོར་གྱེན་འཕགས་ཀྱི་སྒྲུབ་ཐབས་ཉེ་བར་བསྟན་པ། དངོས་པོ་ཐམས་ཅད་གྱེན་འཕགས་པ། །ཞེས་བྱ་བ་ལ་སོགས་པ་གསུངས་པ་དངོས་པོ་ཐམས་ཅད་གྱེན་དུ་འཕགས་པ་ཞེས་པ་ནི་ཆོས་ཐམས་ཅད་དོན་དམ་པར་བསྒོམས་པས་བསྐྱེད་པའོ། །དཀྱིལ་འཁོར་ཆེན་པོ་ནི་དབང་ཆེན་གྱི་དཀྱིལ་འཁོར་རོ།། དེ་ལ་གནས་པའི་རྡོ་རྗེའི་བདག་ཉིད་དེ། གང་གིས་ཐམས་ཅད་རྡོ་རྗེ་རྡོ་རྗེའི་བདག་ཉིད་དོ། །གདུགས་དཀར་པོའི་སྒྲུབ་ཐབས་བསྟན་པ་གདུགས་དཀར་ཞེས་བྱ་བ་ལ་སོགས་པ་གསུངས་པ་གདུགས་ཆེན་པོ་ཞེས་པ་ནི། གདུགས་ཆེན་པོད་ཀར་པོ་ཚད་པ་སྐྱོབ་པ་དེ་ཟླ་བའི་དཀྱིལ་འཁོར་གྱི་དབུས་སུ་གནས་པར་སྒོམ་པ་དེས་དངོས་གྲུབ་ཞེས་པ་དང་སྤྲེལ་ལོ། །ཅི་བསྒོམ་པར་བྱ་ཞེ་ན་གསུངས་པ། ཆུའི་ཞེས་པ་ལ་སོགས་པ་སྟེ། དེ་གསུང་བར་འགྱུར་བ་ཆུའི་དཀྱིལ་འཁོར་དུ་རེ་ཁཱ་བདུན་གྱིས་བསྐོར་བའི་དབུས་སུ་གནས་པའི་པུཎྜ་རཱི་ཀ་ལ་གནས་པར་བསྒོམ་པར་བྱའོ་ཞེས་སོ། །སྔགས་རྣམས་ནི་གསལ་བའི་དཀྱིལ་འཁོར་ལ་དགོད་པར་བསྟན་པ་སྔགས་ཀྱི་ཡི་གེ་ཞེས་བྱ་བ་ལ་སོགས་པ་གསུངས་སོ། །གཙུག་ཏོར་རྒྱལ་བའི་སྒྲུབ་ཐབས་ངེས་པར་བསྟན་པ་འབར་བའི་ཕྲེང་འཁྲུགས་ཞེས་བྱ་བ་ལ་སོགས་པ་གསུངས་པ། རང་ཉིད་གཙུག་ཏོར་རྒྱལ་པའི་རྣལ་འབྱོར་དང་ལྡན་པས་དེའི་ང་རྒྱལ་གྱིས་སྙིང་གའི་ཟླ་བའི་རལ་གྲི་ལ་གནས་པའི་སྔགས་ཀྱི་ཡི་གེ་ངེས་པར་བྱུང་བས་རྒྱལ་བའི་གཙུག་ཏོར་གྱི་གཟུགས་ཀྱིས་ཚོགས་ཀྱི་ནམ་མཁའི་མཐངས་རྣམས་བཀང་ལག་ཅིག་ཏུ་དམིགས་ནས་བསྒོམ་པར་བྱ་ཞིང་བསྒྲུབ་པར་བྱའོ། །ཀུན་དུ་གཙུག་ཏོར་གྱི་སྒྲུབ་ཐབས་ངེས་པར་བསྟན་པ་སངས་རྒྱས་ཀུན་དང་གཉིས་མེད་ཅེས་བྱ་བ་ལ་སོགས་པ་གསུངས་པ། དེ་དག་འཆད་པར་འགྱུར་རོ། །སེང་གེའི་ཁྲི་ལ་བཞུགས་པ་ཇི་ལྟར་རང་གི་དཀྱིལ་འཁོར་གྱི་རྣམ་པས་ལྷ་དང་གཉིས་སུ་མེད་པར་བསྒོམས་ཏེ་སྙིང་གར་རང་གི་སྔགས་འབར་བར་རྣམ་པར་
བཀོད་དེ་བསྒོམས་པས་ཀུན་གྱི་གཙུག་ཏོར་བསྒྲུབ་པར་བྱའོ་ཞེས་བྱའོ། །ཀུན་གྱི་གཙུག་ཏོར་གྱི་སྒྲུབ་པའི་མཐར་ཐུག་པ་འདིས་ནི་ཞེས་བ་ཀུན་གྱི་གཙུག་ཏོར་གྱི་སྒྲུབ་ཐབས་སོ། །ཡི་གེ་དྲུག་པའི་གཙུག་ཏོར་གྱི་སྒྲུབ་ཐབས་ཞེས་པ་ཇི་སྲིད་པའོ། །རྡོ་རྗེ་སྙིང་པོ་རྒྱན་དུ་གཙུག་ཏོར་རྣམས་ཐམས་ཅད་ཀྱི་སྒྲུབ་ཐབས་རྣམ་པར་འབྱེད་པའོ། །ད་ནི་དེ་ནས་བཅོམ་ལྡན་འདས་ཞེས་བྱ་བ་ལ་སོགས་པས་བྱང་ཆུབ་སེམས་དཔའ་རྣམས་ཀྱི་སྔགས་ལ་སོགས་པའི་ཆོ་ག་རྒྱས་པར་བསྟན་པ་དང༌། དཀྱིལ་འཁོར་གསལ་བར་བྱེད་པ་གསུངས་པ། བདག་ཉིད་བྱིན་གྱིས་བརླབས་པས་ནི་དེ་རྣམས་བཅུག་སྟེ་བཅོམ་ལྡན་འདས་རང་གི་ཡོན་ཏན་ཉིད་དུ་བྱིན་གྱིས་བརླབས་སོ་ཞེས་པའོ། །འཇམ་པའི་དབྱངས་ཀྱི་སྒྲུབ་ཐབས་ཉེ་བར་བསྟན་པ་ཤེས་རབ་ཡེ་ཤེས་ཞེས་བྱ་བ་ལ་སོགས་པ་གསུངས་པ་ཤེས་རབ་ཡེ་ཤེས་ཁོ་ན་རྡོ་རྗེ་ཆེན་པོ་སྟེ་རྡོ་རྗེ་རྩེ་ལྔ་པ་སྙིང་གར་ཟླ་བའི་དཀྱིལ་འཁོར་དུ་བསྒོམ་པར་བྱའོ། །མཐའ་ཀླས་པ་ལ་གནས་པ་ནི་འོད་གསལ་བའི་དཀྱིལ་འཁོར་རོ། །དབང་ཆེན་མེ་ལ་ཡང་དག་འབྱུང་བ་ནི་དབང་ཆེན་ལ་གནས་པའི་མེའི་དཀྱིལ་འཁོར་ལ་གནས་པའོ། །མངོན་ཤེས་དྲུག་པ་ཉིད་ཀྱིས་ཞལ་དྲུག་པའོ། །སྔགས་ཀྱི་ཡི་གེ་དྲུག་ཉིད་ཀྱིས་ཡི་གེ་དྲུག་པའོ།། རྗེས་སུ་དྲན་པ་དྲུག་གི་རྣལ་འབྱོར་གྱིས་ཕྱག་དྲུག་པ་སྟེ་གཉིས་ཀྱིས་བགྲང་ཕྲེང་དང་ཆུ་སྐྱེས་སྔོན་པོ་བསྣམས་པའོ། །གཉིས་ཀྱིས་རྡོ་རྗེ་དང་འཁོར་ལོ་བསྣམས་པ་གཉིས་ཀྱིས་སྟ་རེ་དང་ཐོད་པ་བསྣམས་པའོ། །ཡང་ན་ཞེས་བྱ་བ་ལ་སོགས་པ་འདི་ཁོ་ནའི་ཏིང་ངེ་འཛིན་ནི་གཞན་སྟོན་པར་བྱེད་དོ། །འདིས་ཞལ་གཅིག་པར་ཡང་རྗོད་པར་བྱེད་དོ། །བསམ་བྱ་ཞེས་པ་ནི་ཀུན་ནས་མངོན་དུ་བྱ་བའོ། །རྣམ་ཐར་གསུམ་གྱི་སྒོ་ལ་གནས། །ཞེས་པ་ནི་སྟོང་པ་ཉིད་ལ་སོགས་པའི་རྣམ་པར་ཐར་པའི་སྒོ་གསུམ་ནི་ཞལ་ལོ། །ཕ་རོལ་ཕྱིན་དྲུག་མཆོག་ཏུ་གསལ། །ཞེས་པ་ནི་རིམ་པ་ལས་ཨ་ལ་སོགས་པ་ཕ་རོལ་ཕྱིན་པའི་ཡི་གེའོ། །ཅི་ལྟར་བསྒོམ་པར་བྱ་ཞེས་ནི་ཤེས་རབ་ང་ཞེས་པ་ལ་སོགས་པ་དེ་འཆད་པར་བྱེད་དོ། །ཇི་ལྟར་དཀྱིལ་འཁོར་དུ་གདན་ལ་འདུག་ནས་ལྷའི་རྣལ་འབྱོར་བྱས་པ་དེའི་ང་རྒྱལ་ལམ་དེ་ཁོ་ན་ཉིད་མངོན་དུ་བྱེད་པ་སྔོན་དུ་འགྲོ་བས་ཇི་ལྟ་བ་བཞིན་དུ་བསྒོམ་པར་
བྱའོ་ཞེས་པའོ། །པདྨ་རཱ་ག་ཞེས་པ་ལ་སོགས་པ་རྣམས་ཀྱིས་འཇམ་དཔལ་སྟོན་པར་བྱེད་དོ། །འདི་ཡང་རལ་གྲི་འཛིན་བ་ཚངས་པར་སྤྱོད་པའི་རང་བཞིན་ནོ། །མུཿ་ཡིག་ཀྱང་འདིའི་སྔགས་སོ། །དང་པོར་ནི་ཤེས་རབ་ཀྱི་གཟུགས་སོ། །འཇིག་རྟེན་དབང་ཕྱུག་གི་སྒྲུབ་ཐབས་ཉེ་བར་བསྟན་པ་སྙིང་གར་ཞེས་པ་ལ་སོགས་པ་གསུངས་པ་སྙིང་གར་པདྨ་འདབ་བརྒྱད་ལ་གནས་པའི་ཟླ་བའི་དཀྱིལ་འཁོར་ལ་གནས་པའི་པདྨ་འཆང་བའོ་ཞེས་རྟོགས་པར་བྱས་པའོ། །ཕྱག་བཞི་ཞེས་པ་ནི་གཉིས་ཀྱིས་པདྨ་ཁ་འབྱེད་ཅིང་སྙེམས་པར་འཆང་བའོ། །གཉིས་ཀྱིས་པདྨའི་བགྲང་ཕྲེང་དང་རིལ་བ་སྤྱི་བླུགས་འཛིན་པའོ། །གཡོན་པ་དག་པདྨ་དང་རིལ་བ་སྤྱི་བླུགས་འཛིན་པའོ། །གཡས་པ་དག་དབྱུག་པ་དང་བགྲང་ཕྲེང་གི་སྲད་བུ་འཛིན་པའོ། །རི་དགས་ཨེ་ན་ཡའི་པགས་པ་འཕྱད་བ། ཆུད་ནི་དཀྱིལ་འཁོར་ཆེན་པོ་ལ། །ཞེས་བ་ཟླ་བའི་དཀྱིལ་འཁོར་ལའོ། །ཆོས་ཀྱི་དབྱིངས་ལས་ཡང་དག་བྱུང་སྟེ་སྟོང་པ་ཉིད་ལས་ངེས་པར་སྐྱེས་པའོ། །སྙིང་གར་ཡོངས་སུ་བསྒོམ་པར་བྱ། །ཞེས་པ་ནི་སྙིང་གར་ཟླ་བ་ལ་པདྨ་འབར་བའི་ཕྲེང་བ་འཁྲུགས་པ་ནི་འབར་བའི་ཕྲེང་བ་རབ་ཏུ་གསལ་བས་བསྐོར་བའོ། །འཇིག་རྟེན་གསུམ་རྒྱལ་བསྟན་པ་ཆོས་ཀྱི་དབྱིངས་ཞེས་པ་ལ་སོགས་པ་གསུངས་པ། སྣང་བའི་དངོས་པོ་ནི་རབ་ཏུ་གསལ་བའོ། །མི་སྣང་བའི་དངོས་པོ་ནི་མི་སྣང་བའོ། །དེ་བཞིན་དུ་འཇིག་རྟེན་གསུམ་ལས་རྣམ་པར་རྒྱལ་བའི་སྐུ་རྣམས་ཀྱིས་སྤྲོས་ནས་མདུན་དུ་ཡང་དག་པར་བསྡུས་ནས་ལེགས་སོ་ཞེས་པའི་སྦྱོར་བས་དགུག་པ་ལ་སོགས་པ་ཅན་དུ་བྱས་ལ་ཡང་དང་ཡང་དུ་བསྒོམ་པས་བསྒྲུབ་པར་བྱའོ།། རྡོ་རྗེ་ཧཱུཾ་མཛད་ཀྱི་སྒྲུབ་ཐབས་བསྟན་པ་ཐམས་ཅད་རྡོ་རྗེའི་རང་བཞིན་ཞེས་པ་ལ་སོགས་པ་གསུངས་པ། ཐམས་ཅད་དུ་རྡོ་རྗེ་འབར་བས་འཁྲུགས་པ་ཞེས་པ་ཇི་སྲིད་པར་རོ། །ནོར་བུ་ཡང་དག་འབྱུང་ཞེས་པ་ནི་འབར་བ་དང་བཅས་པའི་རིན་པོ་ཆེ་བརྒྱད་པ་དེའོ། །དེའི་ཞེས་པ་ནི་རིན་པོ་ཆེའི་དཀྱིལ་འཁོར་གྱིའོ། །དེ་འདྲ་ཞེས་པ་ནི་རིན་པོ་ཆེའི་དཀྱིལ་འཁོར་དང་མཚུངས་པའིའོ། །དེའི་དབུས་སུ་ཇི་ལྟར་ངེས་པར་བསྟན་པ་ནི་རྣམ་པ་བཞིན་གཡོན་པ་བསྙེམས་པ་དང་བཅས་པ་དང་གཡས་པས་ཐུགས་ཀར་འབར་བ་དང་བཅས་པའི་རྡོ་རྗེ་གསོར་བའོ། །རྡོ་རྗེ་ཧཱུཾ་མཛད་དུ་བདག་ཉིད་བསྒོམ་པར་
བྱའོ། །ཐུགས་སོན་པའི་ཞེས་པ་ལ་སོགས་རྣམས་ཀྱིས་འདོད་པའི་རྒྱལ་པོའི་སྒྲུབ་ཐབས་སྟོན་པར་བྱེད་དོ། །ཁྲག་མདོག་དམར་པོ་ཕྱག་བཞི་པ་སྟེ། གཉིས་ཀྱིས་གཞུ་དང་མདའ་འཛིན་པ་གཉིས་ཀྱིས་བསྙེམས་པ་དང་བཅས་པས་རྡོ་རྗེ་གསོར་བ་ལ་བརྩོན་པའོ། །བྱམས་པའི་སྒྲུབ་ཐབས་བསྟན་པ་དབང་ཆེན་ཞེས་པ་ལ་སོགས་པ་གསུངས་པ། །སྙིང་གར་ཟླ་བའི་གཟུགས་བརྙན་ཞེས་པ་ནི་སྙིང་གར་ཟླ་བའི་དཀྱིལ་འཁོར་འཛིན་པའོ། །རྡོ་རྗེ་འབར་བའི་ཕྲེང་བ་བཅས། །ཞེས་པ་ནི་ཟླ་བའི་དཀྱིལ་འཁོར་དེ་ཉིད་འབར་ཕྲེང་དང་བཅས་པའི་རྡོ་རྗེའོ། །ཅིག་ཅར་བྱས་ནས་ཞེས་པ་ནི་ཁྱབ་པའོ། །རང་བཞིན་ཞེས་པ་ནི་རང་གི་ལུས་ཀྱི་རྡོ་རྗེ་རྣམས་ཀྱིས་སེམས་ཅན་རྣམས་ལ་སྤྲོ་ཞིང་དབང་བསྐུར་རོ། །སེམས་ཅན་ཐམས་ཅད་བདག་ཉིད་དུ་གྱུར་པ་འདིའོ་ཞེས་པས་སེམས་ཅན་ཀུན་བདག་ཉིད་དོ། །མངོན་པར་དབང་བསྐུར་ཞེས་པ་དབང་བསྐུར་བ་རྫོགས་པར་བྱ་བའི་དོན་ཏོ། །ཡང་ན་ཞེས་པ་ལ་སོགས་པས་བསྒོམ་པ་གཞན་སྟོན་པར་བྱེད་དོ། །སེམས་ཅན་ཐམས་ཅད་ལ་བུ་གཅིག་པ་ལ་སོགས་པར་མོས་ནས་མི་འཕམ་པ་དང་གཉིས་སུ་མེད་པར་གྱུར་པ་དེ་ངའོ་ཞེས་པའི་ང་རྒྱལ་གྱིས་བསྒོམ་པར་བྱའོ། །ཐིམ་པ་ནི་ཡིད་ས་གཅིག་ཏུ་དམིགས་པ་ཉིད་དོ། །ལ་སོགས་པའི་སྒྲས་དམིགས་པ་ངག་གཞན་འཕོ་བའོ། །ཕྱོགས་ཀྱི་དབྱེ་བས་ཞེས་པ་ནི་ཕྱོགས་གཅིག་ཏུ་ལྷག་པར་མོས་ནས་ཞེས་བྱ་བ་ལ་སོགས་པ་རྣམས་ཀྱིས་སོ། །པདྨ་རཱ་ག་མཚུངས་པའི་འོད། །ཅེས་པ་ནི་དེའི་ཁ་དོག་གི་འོད་ཀྱི་དཀྱིལ་འཁོར་རོ། །དང་པོའི་རྣལ་འབྱོར་ཞེས་པ་ལ་སོགས་པ་རྣམས་ཀྱིས་འདིའི་སྔགས་ཀྱི་སྔོན་གྱི་ཏིང་ངེ་འཛིན་གྱི་རབ་ཏུ་སྦྱོར་བ་ཉིད་སྟོན་པར་བྱེད་དོ། །གཉིས་པ་ཡི་ནི་ཕྱི་མ་ཅན་དུ་བལྟ་བར་བྱའོ། །བྱམས་པའི་རྣལ་འབྱོར་གྱིས་ཞེས་པ་ནི་བྱམས་པའི་ཏིང་ངེ་འཛིན་གྱིས་སོ། །ནམ་མཁའི་སྙིང་པོའི་སྒྲུབ་ཐབས་བསྟན་པ་ནམ་མཁའི་ང་ཞེས་པ་ལ་སོགས་པ་གསུངས་པ་སྟེ་ཡང་དག་བསམ་ཞེས་པ་ནི་ལྷག་པར་མོས་ནས་སོ། །ཆོས་བདག་མེད་པ་བསྐྱེད་པ་ཞེས་པ་ནི་སྟོང་པ་ཉིད་ཀྱི་ཏིང་ངེ་འཛིན་མངོན་དུ་བྱས་ནས་སོ། །ནམ་མཁའི་འོད་ཟེར་རྣམས་ནི་བཻ་ཌཱུཪྻའི་འོད་ཟེར་
རྣམས་སོ། །ནམ་མཁའ་མཉམ་པ་ཞེས་པ་ནི་རང་བཞིན་གྱིས་སྟོང་པའོ། །བདག་གི་དེ་ཉིད་ཅེས་པ་ནི་ནམ་མཁའི་སྙིང་པོ་ཉིད་དོ། །ཅི་འདྲ་ཞིག་བསྒོམ་པར་བྱ་ཞེ་ན། རིན་ཆེན་དཀྱིལ་འཁོར་ཞེས་པ་ལ་སོགས་པ་གསུངས་པ་རིན་ཆེན་རྣལ་འབྱོར་གྱིས་ཞེས་པ་རིན་པོ་ཆེ་སྤྲོ་བ་དང་བསྡུ་བའི་རིམ་པས་སོ། །ཀུན་དུ་བཟང་པོའི་སྒྲུབ་ཐབས་བསྟན་པའི་ཕྱིར་སངས་རྒྱས་ཀུན་གྱི་རང་བཞིན་ཞེས་པ་ལ་སོགས་པ་གསུངས་པ། འོད་བཟང་པོ་ཞེས་པ་ནི་མཛེས་པའི་འོད་དོ། །མཚུངས་པར་བྱ་ཞེས་པ་ནི་རང་གི་ལུས་ཀྱི་ཕྲ་རབ་ཇི་སྙེད་སངས་རྒྱས་ཐམས་ཅད་ཀྱི་སྐུ་ཉིད་དུ་ཡོངས་སུ་གྱུར་པར་བྱའོ། །དཀྱིལ་འཁོར་འཁོར་ལོ་ནི་འཁོར་དང་བཅས་པའི་དཀྱིལ་འཁོར་གྱི་འཁོར་ལོའོ། །མཚུངས་བྱ་སྟེ་ཞེས་པ་ནི། རང་གི་བ་སྤུའི་ཁུང་བུའི་གྲངས་གང་ཡིན་པ་དེ་རྣམས་སུ་གནས་པས་མཉམ་པར་བྱའོ། །འདི་ཉིད་ཅེས་པ་ནི་རང་གི་མིང་ཉིད་དོ། །སྒྲིབ་པ་ཐམས་ཅད་རྣམ་པར་སེལ་བའི་སྒྲུབ་ཐབས་བསྟན་པ་ཟླ་བའི་དཀྱིལ་འཁོར་ཞེས་བྱ་བ་ལ་སོགས་པ་གསུངས་པ། སྔགས་ཀྱི་སྦྱོར་བ་ཞེས་པ་ནི་གསང་སྔགས་ཀྱི་དོན་སྒོམ་པར་བྱེད་པས་སོ། །ཐམས་ཅད་བསྒོམ་པར་སྦྱོར་བ་ཡིས། །ཞེས་པ་ལྷ་དང་བཅས་པའི་རང་གི་གཟུགས་མངོན་དུ་བྱེད་པ་ཡིས་སོ། །ཕྱག་རྒྱ་ཀུན་གྱིས་ཞེས་པ་ནི་སྐུ་ལ་སོགས་པའི་ཕྱག་རྒྱ་རྣམས་ཀྱིས་སོ། །ཐམས་ཅད་དུ་ཞེས་པ་རྣམ་པ་ཐམས་ཅད་ཀྱིས་སོ། །མཚུངས་བྱས་ནས་ཞེས་པ་ནི་གདོད་ནས་མ་སྐྱེས་པ་ལ་སོགས་པའི་རང་བཞིན་གྱི་བདག་དང་རང་གི་ལྷ་ཐ་མི་དད་པར་བྱས་ནས་སོ། །རྗེས་སུ་རྣལ་འབྱོར་གྱིས་ཞེས་པ་ནི་ལྷ་ནང་དུ་བཅུག་ནས་དེའི་ང་རྒྱལ་གྱིས་སོ། །མེའི་ཡོངས་སུ་བསྐོར་བ་ཞེས་པ་ནི་མེ་ལ་དབང་ཆེན་དུ་དེ་ཟླ་བ་ལ་གནས་པའོ། །སའི་སྙིང་པོའི་སྒྲུབ་ཐབས་བསྟན་པ་དབང་པོ་ཆེན་དང་ཞེས་པ་ལ་སོགས་པ་གསུངས་པ། རྡོ་རྗེ་ཡི་ནི་དབུས་ན་གནས། །ཞེས་པ་དབང་ཆེན་དང་རྡོ་རྗེ་དེ་ལ་པདྨ་གནས་པའོ། །རྡོ་རྗེའི་ཕྱག་རྒྱ་སྙིང་གར་གནས། །ཞེས་པ་ནི་ཐུགས་ཀར་ཟླ་བའི་དཀྱིལ་འཁོར་ལ་རྡོ་རྗེའི་ཕྱག་རྒྱ་དེའོ། །བློ་གྲོས་མི་ཟད་པའི་སྒྲུབ་ཐབས་ཉེ་བར་བསྟན་པའི་ཕྱིར་མི་ཟད་ཅེས་པ་ལ་
སོགས་པ་གསུངས་པ་འདིས་འདི་དག་སྟོན་པར་བྱེད་དོ། །དེ་བཞིན་གཤེགས་པ་ནི་ཟད་པ་མེད་པ་ནི་དབྱེར་མེད་པའི་ཤེས་རབ་ཀྱི་རང་བཞིན་འདིས་བཅོམ་ལྡན་འདས་སོ། །མེའི་དཀྱིལ་འཁོར་ནི་མེ་ལྷའི་དཀྱིལ་འཁོར་དེ་ལ་ཟླ་བ་ལ་གནས་པར་བསམ་པར་བྱའོ། །ནམ་མཁའ་མཛོད་ཀྱི་སྒྲུབ་ཐབས་བསྟན་པ་ཐམས་ཅད་གཏོང་བ་ཞེས་པ་ལ་སོགས་པ་གསུངས་པ། མེ་ལོང་ལྟ་བུར་བྱང་ཆུབ་སེམས། །ཞེས་པ་ནི་ཟླ་བའི་དཀྱིལ་འཁོར་རོ། །རྡོ་རྗེའི་རྣལ་འབྱོར་བདག་ཅེས་པ་ནི་ལྷ་དང་དབྱེར་མི་ཕྱེད་པའི་ང་རྒྱལ་ཅན་ནོ། །ནམ་མཁའ་ལ་རིན་ཆེན་འབྱུང་གནས་ཞེས་པ་སྟོང་པ་ཉིད་བསྒོམ་པ་སྔོན་དུ་འགྲོ་བས་རིན་པོ་ཆེའི་མཚན་མ་རྨད་དུ་བྱུང་བའོ། །ལག་ན་རིན་ཆེན་གྱི་སྒྲུབ་ཐབས་ཉེ་བར་བསྟན་པ་རིན་ཆེན་དཀྱིལ་འཁོར་ཞེས་པ་ལ་སོགས་པ་གསུངས་པ། རིན་ཆེན་དཀྱིལ་འཁོར་ལས་བྱུང་ཞེས་པ་རིན་པོ་ཆེའི་འོད་ཟེར་འབར་བ་ལས་རྫོགས་པ། རིན་པོ་ཆེའི་གཟི་བརྗིད་ཀྱི་མཆོག་རིན་པོ་ཆེའི་འོད་གསལ་བའི་དཀྱིལ་འཁོར་རོ། །རྡོ་རྗེའི་རྣལ་འབྱོར་གྱིས་ཞེས་པ་རང་ལྷ་དང་དབྱེར་མི་ཕྱེད་པའི་རབ་ཏུ་སྦྱོར་བས་སོ། །དབང་ཆེན་མེ་ལས་ཡང་དག་འབྱུང༌། །ཞེས་པ་དབང་ཆེན་གྱི་དཀྱིལ་འཁོར་ལ་གནས་པའི་མེའི་དཀྱིལ་འཁོར་ལ་རྣམ་པར་གནས་པའོ། །བློ་གྲོས་རྒྱ་མཚོའི་སྒྲུབ་ཐབས་ཉེ་བར་བསྟན་པ་ཆོས་དབྱིངས་ཞེས་པ་ལ་སོགས་པ་གསུངས་པ། ཆོས་དབྱིངས་མཉམ་པ་ཞེས་པ་དོན་དམ་པ་གཉིས་སུ་མེད་པའོ། །བདུད་རྩིའི་ཆུ་ཡིས་ཡོངས་བཀང་བ། །ཞེས་པ་ནི་ཀུན་རྫོབ་ཏུ་བདུད་རྩིའི་རང་བཞིན་གྱི་མཚོའོ། །དེར་པདྨ་གཅིག་རྣམ་པར་གནས་པའོ། །ཆུ་ལྷའི་ལུས་ཞེས་པ་ནི་ཆུ་ལྷའི་དཀྱིལ་འཁོར་རོ། །རྩེ་མོ་བརྒྱ་པ་བྱུང་ཞེས་པ་ནི་རྩེ་མོ་བརྒྱ་དང་ལྡན་པའོ། །རྡོ་རྗེ་སྙིང་པོའི་སྒྲུབ་ཐབས་བསྟན་པའི་ཕྱིར། དབང་ཆེན་དཀྱིལ་འཁོར་ཞེས་བྱ་བ་ལ་སོགས་པ་གསུངས་པ་གང་གང་ལ་སོགས་པར་སྦྲོན་གཏུག་ཅིང་མཐོ་བ་ཞེས་པ་ནི་སྤྲིན་བཞིན་དུ་མཐོ་བའོ། །སྙིང་གར་རྡོ་རྗེ་ཞེས་པ་ནི་སྙིང་གར་ཟླ་བ་ལ་རྡོ་རྗེ་དང་བཅས་པའོ། །དགུག་ཅེས་པ་ལ་སོགས་པས་གཉིས་སུ་མེད་པ་ཉིད་དུ་བསྟན་ཏོ་ཞེས་པའོ། །རྡོ་རྗེ་ང་ཞེས་པ་སྟེ་རྡོ་རྗེ་སྙིང་པོ་ངའོ། །བདག་
གི་རྣལ་འབྱོར་གྱིས་ཞེས་པ་ནི་དེ་དང་གཉིས་སུ་མེད་པའི་རྣལ་འབྱོར་གྱིས་སོ། །རྡོ་རྗེ་ཉིད་གྱུར་ཞེས་པ་ནི་རྡོ་རྗེ་སྙིང་པོའོ། །རྩེ་མོ་དྲུག་ཅེས་པ་ནི་གཉིས་ཀར་དུ་རྩེ་མོ་གསུམ་པ་ཅན་ནོ། །རིན་ཆེན་འབྱུང་གནས་ཀྱི་སྒྲུབ་ཐབས་བསྟན་པ་དབང་ཆེན་ལྷ་ཞེས་པ་ལ་སོགས་པ་གསུངས་པ། གནས་ཞེས་པ་ནི་པདྨའི་གནས་ལ་ནོར་བུ་དང་ཟླ་བའི་དཀྱིལ་འཁོར་གྱི་གདན་ལའོ། །མཁའ་འདྲའི་རྣམ་པ་ཞེས་པ་ནི་བཻ་ཌཱུཪྻའི་རྣམ་པར་རོ། །སྙིང་གར་གནས་ཞེས་པ་ནི་སྙིང་གར་ཟླ་བའི་དཀྱིལ་འཁོར་ལ་གནས་པའོ། །རིན་ཆེན་རྣལ་འབྱོར་གྱིས་ཞེས་པ་ནི་རིན་ཆེན་འབྱུང་གནས་དང་གཉིས་སུ་མེད་པའི་རྣལ་འབྱོར་གྱིས་སོ། །ཐམས་ཅད་རྣལ་འབྱོར་གྱིས་ཞེས་པ་ནི་རིན་པོ་ཆེ་ཐམས་ཅད་ཀྱི་ཆར་འབེབས་པའི་སྦྱོར་བས་སོ། །རྡོ་རྗེ་སྙིང་པོ་རྒྱན་དུ་བྱང་ཆུབ་སེམས་དཔའ་ཐམས་ཅད་ཀྱི་སྒྲུབ་ཐབས་རྣམ་པར་འབྱེད་པའོ། །ཁྲོ་བོ་དང་གཟུགས་ཐམས་ཅད་ཀྱི་ཕྱག་རྒྱ་དང་དཀྱིལ་འཁོར་ཉེ་བར་བསྟན་པ་དེ་ནས་བཅོམ་ལྡན་འདས་ཞེས་པ་ལ་སོགས་པ་གསུངས་པ་མེ་ལྷའི་དབུས་ནས་དབུས་སུ་ཞེས་པ་ནི་རླུང་གི་དཀྱིལ་འཁོར་གྱི་དབུས་སུ་མེ་ལྷ་ཁྲོ་བོ་ཐམས་ཅད་ཅེས་པ་གཡས་བརྐྱང་དང་གཡོན་བརྐྱང་གིས་ཀུན་ནས་གནས་པ་མདུང་དང་དབྱུག་པ་ལ་སོགས་པས་རབ་ཏུ་འཇོམས་པར་བྱེད་པའི་རང་བཞིན་ཅན་ནོ། །གང་འདིའི་དཀྱིལ་འཁོར་དུ་རྡོ་རྗེ་ཧཱུཾ་མཛད་ལ་སོགས་པ་རྣམས་ཉེ་བར་དགོད་པ་ཡི་གེ་གཅིག་ཅེས་པ་ལ་སོགས་པ་གསུངས་པ་ཧཱུཾ་ཡི་གེས་བཅོམ་ལྡན་འདས་རྡོ་རྗེ་ཧཱུཾ་མཛད་དགོད་དེ་དེའི་གཟུགས་ནི་འཆད་པར་འགྱུར་བ་ཉིད་ཀྱི་ཕྱིར་འདིར་མ་བསྟན་ཏོ། །དེ་ཉིད་ཅེས་པ་ནི་ཡི་གེ་གཅིག་པའོ། །དབྱངས་བདུན་པ་ནི་ཨེ་ཡིག་སྟེ་དེས་རྣམ་པར་རྒྱལ་བ་ནི་ཧེ་རུ་ཀའི་སྔགས་སོ། །དཔལ་ཧེ་རུ་ཀ་ཁོ་ན་རྡོ་རྗེ་ཆེན་པོ་དང་དབྱེར་མེད་པ་ཉིད་ཀྱི་ཕྱིར་རོ། །འཇིག་པའི་ཐལ་བ་མཆོག་ཏུ་འབར། །ཞེས་པ་ནི་ཟད་པའི་དུས་ཅན་གྱི་ཐལ་བའི་མདོག་གོ །སྔོན་པོ་འབར་བའི་རང་བཞིན་ཞེས་པ་ནི་འོད་ཟེར་སྔོན་པོའི་དཀྱིལ་འཁོར་རོ། །མེ་འབར་གསལ་བའི་དཀྱིལ་འཁོར་ཞེས་པ་ནི་དེ་ཉིད་རབ་ཏུ་གསལ་བའི་དཀྱིལ་འཁོར་འབར་བ་ཡང་དག་པར་ཚོགས་པའོ། །འཇིགས་པ་ཆེན་
པོའི་དུས་ཅན་གྱི། །ཆར་སྤྲིན་དང་ནི་འདྲ་བའི་འོད་ནི་སྐུ་ལའོ། །དེ་ཉིད་ལ་བ་སྤུའི་ཁུང་བུ་སོ་སོ་རྣམས་སུ་དམར་པོ་འབར་བ་འཁྱིལ་ཞིང་བྲེལ་བས་ཀུན་ནས་འབར་བའི་རྡོ་རྗེ་དང་ཐོད་པའི་ཅོད་པན་ཅན་རྒོད་མཁའི་མེ་བཞིན་རྣམ་པར་འཇིགས་པར་བྱེད་པའོ། །རང་འབར་སྣང་བར་གར་མཛད་པས། །ཞེས་པ་ནི་རབ་ཏུ་འབར་བའི་ལྟ་བས་རྣམ་པར་སྐྱོད་པར་བྱེད་པ་ཉིད་ཀྱིས་སོ། །ཅིག་ཅར་གྱུར་པས་ཞེས་པ་ནི་གར་གྱིས་མཉེས་པར་བྱས་པ་ཉིད་ཀྱིས་སོ། །དེ་ཉིད་བཅོམ་ལྡན་རྣལ་འབྱོར་ཏེ། །ཞེས་པ་ནི་རྣལ་འབྱོར་གྱི་དབང་ཕྱུག་ཆེན་པོའོ། །ཕྱག་དྲུག་རྣམས་ཀྱིས་ནི་གཡས་པ་དང་གཡས་མིན་རྣམས་མདུང་དང་དབྱུག་པ་དང༌། ཐོད་པ་དང་རྡོ་རྗེ་དང་དགྲ་སྟ་དང་ཧཱུཾ་མཛད་ཀྱི་སོར་མོའི་མཚན་མ་རྣམས་སུ་ཤེས་པར་བྱའོ། །སྙིང་པོ་དང་ཉེ་བའི་སྙིང་པོ་དང་རྩ་བའི་སྔགས་རྣམས་རིམ་པས། ཨོཾ་ཨཱཿ་ཧཱུཾ་ཞེས་བྱ་བ་ལ་སོགས་པ་རྣམས་སོ། །ཐུགས་རྗེའི་ཁྲོ་བོ་བློ་ལྡན་ནི་སངས་རྒྱས་དེ་རྣམས་ཀྱི་ངང་ཚུལ་གཞན་དོན་གྱི་མཚན་ཉིད་ཉེ་བར་སྤྱོད་པའོ་ཞེས་པའོ། །ཇི་སྲིད་དུ་ཁྲོ་བོའི་གཟེགས་མ་ནི་ཨུཏྤལ་སྔོན་པོའི་ཁ་དོག་གོ །དམར་པོ་འབར་བཅས་ནི་འོད་ཀྱི་དཀྱིལ་འཁོར་རོ། །སངས་རྒྱས་ཀྱི་ཅོད་པན་ཅན། རྡོ་རྗེ་དང་དབྱུག་པ་ལ་སོགས་པའི་མཚན་མ་ཅན་ནོ། །དེའི་ཁྲོ་གཉེར་བསྙེར་བ་ནི་སྨིན་མ་དམར་པོ་གཉིས་བསྙེར་བའོ། །སྐད་ཅིག་སྐད་ཅིག་ལ་འབྱིན་པར་བྱེད་པ་བསྒོམ་པར་བྱའོ། །རྡོ་རྗེ་སེམས་དཔའ་ཞེས་པ་དབྱེ་བར་བྱར་མེད་པའི་སེམས་དཔའོ། །ཆུའི་གནས་སུ་མེ་ལ་རྣམ་པར་གནས་པའི་གཡས་པ་དང་གཡས་མིན་ངག་གིས་པདྨ་དང་རྡོ་རྗེ་དང་ཧཱུཾ་མཛད་ཀྱི་སོར་མོའི་མཚན་མ་ཅན་གྱི་བཅོམ་ལྡན་འདས་རྟ་མགྲིན་ནོ། །ཐམས་ཅད་སློང་བ་ཞེས་པའི་སློང་བའི་དངོས་གྲུབ་པོ། །ཀུན་སྦྱོར་བདག་གི་རྣལ་འབྱོར་གྱིས། །ཞེས་པ་ནི་རྫོགས་པའི་སངས་རྒྱས་དང་གཅིག་པ་ཅན་དུ་བསྒོམས་པས་རླུང་གི་གནས་སུ་མེའི་དཀྱིལ་འཁོར་གྱི་དབུས་སུ་སོན་པའི་གཡས་པ་དང་གཡས་མིན་དག་གིས་རལ་གྲི་དང་ཞགས་པ་འཛིན་པའི་བཅོམ་ལྡན་འདས་མི་གཡོ་བའོ། །རྡོ་རྗེ་སྙིང་པོ་རྒྱན་དུ་ཁྲོ་བའི་དཀྱིལ་འཁོར་རྣམ་པར་འབྱེད་
པའོ། །གཟུངས་མའི་དཀྱིལ་འཁོར་གྱི་སྐབས་དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་པ་གཟུངས་མའི་དབང་ཕྱུག་རྒྱལ་པོ་ཞེས་པ་ནི་རྣམ་པར་སྣང་མཛད་དོ། །ཤེས་རབ་ཀྱི་ཕ་རོལ་ཏུ་ཕྱིན་པའི་དཀྱིལ་འཁོར་ཉེ་བར་བསྟན་པ་དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་རྡོ་རྗེ་ཉིད་རིན་པོ་ཆེ་སྟེ་དེ་རྣམས་ཀྱི་འདབ་མའི་ཕྱི་རྣམས་སུ་བརྒྱན་པའོ། །སྣ་ཚོགས་ལས་འདྲ་འབར་རྣམས་ལ། །ཞེས་པ་འདབ་མ་ཁ་དོག་སྣ་ཚོགས་པ་རྣམས་སུ་ཤེས་རབ་འོད་ཀྱིས་སོ། །ཤེས་རབ་ཀྱི་ཕ་རོལ་ཏུ་ཕྱིན་མ་ནི་སྒྲུབ་པར་བྱེད་པའི་ཐབས་ཉིད་ཀྱི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་རྣམས་ཏེ་ཨོཾ་བོ་དྷི་ཙིཏྟ་བཛྲ་ཞེས་བྱ་བ་ལ་སོགས་པའི་ཚིག་རྣམས་སོ། །ཕྱོགས་ཆའི་དབྱེ་བ་ནི་ཡི་གེ་དེ་དང་དེ་རྣམས་སེར་པོ་ལ་སོགས་པའི་ཁ་དོག་རྣམས་སུའོ། །ཤེས་རབ་འོད་ཀྱི་དཀྱིལ་འཁོར་གྱིས། །ཞེས་པ་ནི་རལ་གྲིའི་འོད་ཟེར་གྱི་འཁོར་ལོ་རྣམས་ཀྱིས་སོ། །དེ་དག་ཀུན་ཞེས་པ་ནི་གང་འོད་ཀྱིས་སྣང་བར་གྱུར་པ་དེ་ལ་བྱའོ། །ལྷའི་གཟུགས་དང་ཡང་དག་མཚུངས། །ཞེས་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་གཟུགས་ཉིད་ཀྱིས་ཡོངས་སུ་གྱུར་པ་ཉིད་དོ། །སྔགས་ཀྱི་དཀྱིལ་འཁོར་ཞེས་པ་ནི་ཨོཾ་བོ་དྷི་ཙིཏྟ་བཛྲ་ཞེས་པ་ལ་སོགས་པའོ། །ཀུན་དུ་ཞེས་བྱ་བ་ལ་སོགས་པ་རྣམས་ཀྱིས་འདིའི་ཁྱབ་པ་ཉིད་སྟོན་པར་བྱེད་དོ། །གྲོལ་བ་དེ་སྲིད་དུ་སྒྲིབ་པ་མེད་པའི་སེམས་ཅན་རྣམས་ལ་དེ་རྣམ་པར་གནས་སོ། །གང་གི་ཕྱིར་སྒྲིབ་པ་དང་བཅས་པ་རྣམས་ལ་ཇི་ལྟར་ཞེ་ན་གསུངས་པ་ཀུན་རྫོབ་དང་ཞེས་བྱ་བ་ལ་སོགས་པ་སྟེ་རབ་ཏུ་བརྟགས་ཞེས་པ་ནི་རྣམ་པར་གཞག་པའོ། །དེ་འཆད་པར་འགྱུར་བ་དག་པའི་རྟག་ཏུ་སེམས་ཅན་རང་བཞིན་མེད་པའམ། ཟག་པ་མེད་པ་ལ་སོགས་པའི་ཡོན་དང་ལྡན་པའོ། །སྒྲིབ་པ་དང་བཅས་པའི་རྒྱུད་རྣམས་ཀྱི་དབང་པོ་དང་གཤིན་རྗེ་ལ་སོགས་པས་བཅིངས་པ་ཉིད་ཀྱི་ཕྱིར་རིག་བྱར་རྣམ་པར་གཞག་གོ་ཞེས་པའོ། །དེ་ཉིད་ཀྱི་ནུས་པ་གསུངས་པ། །ཇི་ལྟར་བུང་ཤིང་ཞེས་པ་ལ་སོགས་པ་སྟེ། ཐམས་ཅད་དུ་སེམས་ཅན་རྣམས་ཐམས་ཅད་ལ་ཞེས་པ་ལ་སོགས་པ་རྣམས་ཀྱི་དཀྱུས་མའི་དོན་ཉེ་བར་སྡུད་པར་
བྱེད་དོ། །ཀུན་མཁྱེན་ཡེ་ཤེས་ཀྱིས་ཞེས་བྱ་བ་ཞེས་གསུངས་པའོ། །དེའི་དཔེ་རྣམས་ཀྱིས་ཡང་དག་པའི་དོན་གང་ཡིན་པ་གསུངས་པ་རྣལ་འབྱོར་ཡེ་ཤེས་ཞེས་བྱ་བ་ལ་སོགས་པ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམས་ཏེ་ཞེས་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཉིད་དོ། །བསམ་བྱ་ཞེས་པ་ནི་མངོན་དུ་ཕྱོགས་པར་བྱའོ། །འདིའི་ཡི་གེ་དེ་ཁོ་ན་ཉིད་ཅེས་པ་ནི་གསུངས་པའི་དོན་ཉེ་བར་སྡུད་པར་བྱེད་པའོ། །དེ་ཁོ་ན་ཡེ་གེ་བསྟན་པ་གསུངས་པ། བཞི་པ་ཞེས་པ་ལ་སོགས་པ་སྟེ་འདི་ནི་སྙིང་པོའོ། །སྔགས་ཀྱི་སྒྲས་སྙིང་པོ་དང་ཉེ་བའི་སྙིང་པོ་ལ་ཡང་བལྟ་བར་བྱའོ། །སངས་རྒྱས་སྤྲིན་གྱི་སྒྲུབ་ཐབས་ཉེ་བར་བསྟན་པའི་ཕྱིར་གཉིས་པ་ཞེས་པ་ལ་སོགས་པ་གསུངས་པ་རྣལ་འབྱོར་མ་རྣམས་ཀྱི་ཞེས་པ་ནི་གཟུངས་མ་རྣམས་ཀྱིའོ། །དབང་ཆེན་ཡི་གེའི་མཐར་ཐུག་པ། །ཞེས་པ་ནི་རང་གི་སྔགས་ཀྱི་ཡི་གེ་སེར་པོ་དང་ལྡན་པའི་འོད་ཀྱི་དཀྱིལ་འཁོར་གྱི་མཐར་ཐུག་པའོ། །སྤྱན་གྱི་ཕྱག་རྒྱ་ནི་མི་གསུངས་པའི་ཕྱག་རྒྱའོ། །གོས་དཀར་མོའི་སྒྲུབ་ཐབས་བསྟན་པ་ཆུའི་དཀྱིལ་འཁོར་ཞེས་པ་ལ་སོགས་པ་གསུངས་པ། སྔགས་ཀྱི་ཡི་གེའི་ཕྲེང་བ་ཆེ། །ཞེས་པ་ནི་རང་གི་སྔགས་ཀྱི་ཡི་གེས་བརྒྱན་ཞིང་འོད་གསལ་བར་རབ་ཏུ་འབྱུང་ཞིང་ཐིམ་པས་སོ། །པདྨའི་དཀྱིལ་འཁོར་ནི་ཆུའོ། །དེ་ལ་སྒྲུབ་པའི་ཐབས་ནི་ཟླ་བ་ལ་སོགས་པ་རྣམས་ཀྱིས་སོ། །འཕགས་མ་སྒྲོལ་མའི་སྒྲུབ་ཐབས་ངེས་པར་བསྟན་པ་སྔོ་བསངས་ཞེས་པ་ལ་སོགས་པ་གསུངས་པ། །སྔོ་བསངས་དཀར་མོ་ཞེས་པ་སྤྲི་ཡང་ཀུའི་ཁ་དོག་གོ །ཟླ་བའི་དཀྱིལ་འཁོར་དབུས་གནས་པ། །ཞེས་པ་པདྨ་དང་ཟླ་བའི་དཀྱིལ་འཁོར་ལ་གནས་པའོ། །རོལ་པ་ཡི་སྟེ་སྔགས་ཀྱི་ཡི་གེ་དེ་ཁོ་ན་མཆོད་བཞིན་པ་དེ་རྣམས་ཀྱིས་སོ། །ཆོས་ཀྱི་ཕྱག་རྒྱ་ཞེས་པ་སྔགས་སོ། །མཐའ་ཡས་མཆོག་ཅེས་པ་ཐོག་མ་དང་ཐ་མ་མེད་པའོ། །ཁྲོ་གཉེར་ཅན་གྱི་སྒྲུབ་ཐབས་ཉེ་བར་བསྟན་པ་དཀྱིལ་འཁོར་ཆེན་པོའི་དབུས་ཞེས་པ་ལ་སོགས་པ་གསུངས་པ་ཟླ་བའི་དཀྱིལ་འཁོར་དབུས་ཞེས་པ་ནི་པདྨ་ལ་གནས་པའི་ཟླ་བའི་དཀྱིལ་འཁོར་གྱི་དབུས་སོ། །ཕྱག་བཞི་ཞེས་
པ་ནི་བགྲང་ཕྲེང་དང་ཆུ་སྐྱེས་དང་མཆོག་སྦྱིན་དང་སྤྱི་བླུགས་འཛིན་པའོ། །སྔགས་ཀྱི་ཕྲེང་བས་རྣམ་པར་བརྒྱན། །ཞེས་པ་ནི་འོད་ཀྱི་དཀྱིལ་འཁོར་དུ་རང་གི་སྔགས་ཀྱི་ཕྲེང་བས་བརྒྱན་པའོ། །མཱ་མ་ཀཱིའི་སྒྲུབ་ཐབས་བསྟན་པ་ཉི་མའི་དཀྱིལ་འཁོར་དབུས་ཞེས་པ་ལ་སོགས་པ་གསུངས་པ་རྡོ་རྗེར་བཅས་ཞེས་པ་ནི་དབུས་སུ་གནས་པའི་རྡོ་རྗེའོ། །རྡོ་རྗེའི་ཕྲེང་བས་ཀུན་དུ་བསྐོར། །ཞེས་པ་རྡོ་རྗེའི་ཕྲེང་བ་བཅིངས་པའོ། །གཟི་བརྗིད་དཀྱིལ་འཁོར་བསྐོར་བའོ། །ཞེས་པ་ནི་འོད་ཟེར་དང་བཅས་བཞིན་པའོ། །ཕྱག་བཞི་ཞེས་པ་ནི་གཡོན་པ་དག་གིས་རྡོ་རྗེ་དང་སྤྱི་བླུགས་འཛིན་པ། གཡས་པ་དག་གིས་མཆོག་སྦྱིན་དང་བགྲང་ཕྲེང་འཛིན་པའོ། །སྔགས་ཀྱི་ཡི་གེ་ཕྲེང་བ་ཞེས་པ་རང་གི་སྔགས་ཀྱི་ཡི་གེའི་ཕྲེང་བས་བརྒྱན་པའི་སྔགས་ཀྱི་དཀྱིལ་འཁོར་རོ། །རྡོ་རྗེའི་དབུས་སུ་རབ་ཞུགས་ཞེས་པ་རྡོ་རྗེ་ལ་གནས་པའོ། །རྡོ་རྗེ་མེ་ཡི་ཕྲེང་བ་ཆེ། །ཞེས་པ་ལ་སོགས་པ་རྣམས་ཀྱི་ཏིང་ངེ་འཛིན་ནི་གཞན་སྟོན་པར་བྱེད་དོ། །རྡོ་རྗེ་མེ་ནི་རྡོ་རྗེ་འབར་བ་སྟེ་ཁོ་ན་ཕྲེང་བ་ཆེན་པོ་གང་ཡིན་པ་དེ་རྡོ་རྗེ་མེའི་ཕྲེང་བ་ཆེའོ། །རྡོ་རྗེ་འབར་བས་རྣམ་པར་བརྒྱན། །ཞེས་པ་ནི་འོད་ཟེར་གྱིས་བསྐོར་བའོ། །སྔགས་གཉིས་ལ་རིམ་པས་ཏིང་ངེ་འཛིན་གཉིས་ཀྱི་ཚད་དུའོ། །རྡོ་རྗེ་ལྕགས་སྒྲོག་གི་སྒྲུབ་ཐབས་ཉེ་བར་བསྟན་པའི་ཕྱིར་རླུང་གི་དཀྱིལ་འཁོར་ཞེས་པ་ལ་སོགས་པ་གསུངས་པ། དེས་ན་སྤྲོས་པ་ལས་སྐུ་ཞེས་པ་ནི་དབུས་སུ་རབ་ཏུ་གནས་པའོ། །ཕྱག་བཞི་ཞེས་པ་ནི་གཡོན་པ་བསྙེམས་པས་རྡོ་རྗེ་ལྕགས་སྒྲོག་འཛིན་པ་གཡས་པས་འབར་བ་དང་བཅས་པས་རྡོ་རྗེ་གསོར་བ་གཉིས་དག་གིས་ཀྱང་ཧཱུཾ་མཛད་ཀྱི་སོར་མོ་དང་མཆོག་སྦྱིན་པའོ། །རྡོ་རྗེ་བརྒྱན་ཞེས་པ་ནི་རྡོ་རྗེས་མཚན་པའི་རྒྱན་གྱིས་བརྒྱན་པའོ། །རྡོ་རྗེ་འབར་བ་འཁྲུག་ཅེས་པའི་འོད་ཀྱི་དཀྱིལ་འཁོར་དུའོ། །དེ་ཡི་ཐུགས་ཀར་རྡོ་རྗེ་ཚེ། །ཞེས་པའི་ཐུགས་ཀར་ཟླ་བ་ལ་གནས་པའི་རྡོ་རྗེ་རྩེ་ལྔ་པས་བརྒྱན་པའོ། །འཕགས་མ་སྐུལ་བྱེད་མའི་སྒྲུབ་ཐབས་བསྟན་པའི་ཕྱིར། ཟླ་བའི་དཀྱིལ་འཁོར་དབུས་གནས་པ། །ཞེས་པ་ལ་སོགས་པ་གསུངས་པ། པདྨ་དམར་པོར་རབ་ཏུ་གནས། །ཞེས་པ་ནི་ཟླ་བའི་དཀྱིལ་འཁོར་དུ་པདྨ་དེ་ལ་གནས་པའོ། །པདྨ་དང་བགྲང་ཕྲེང་གི་སྲད་བུ་དང་ལྷུང་བཟེད་དང་མཆོག་སྦྱིན་པའི་ཕྱག་རྣམས་ཀྱིས་
ཕྱག་བཞིའོ། །མང་པོའི་གཟུགས་ཞེས་པ་ནི་དཔའ་བའི་དབྱེ་བས་མཐའ་མེད་པ་དུ་མའི་གཟུགས་སོ། །སྙིང་གར་ཟླ་བའི་དཀྱིལ་འཁོར་དུ་རྡོ་རྗེ་དང་བཅས་པའོ། །སངས་རྒྱས་བྱེ་བ་ཕྲག་བདུན་གྱི་རང་བཞིན་ཡིན་པ་ཉིད་ཀྱི་ཕྱིར་སངས་རྒྱས་ཀུན་གྱི་བདག་ཉིད་སྐྱེས་སོ། །དེར་བདག་ཅེས་པ་ནི་སངས་རྒྱས་བྱེ་བ་ཕྲག་བདུན་གྱི་རང་བཞིན་ཡང་དག་པར་སྒོམ་པར་བྱེད་པ་དང་ལྡན་པའོ། །སྔགས་ཀྱི་ཡི་གེའི་ཕྲེང་བར་ལྡན། །ཞེས་པ་ནི་འོད་ཀྱི་དཀྱིལ་འཁོར་དུ་རང་གི་སྔགས་ཀྱི་ཡི་གེ་དང་ལྡན་པ་ཅན་ནོ། །ཡོངས་གང་བ་ཞེས་པ་སྤྲོས་ནས་སོ། །དེའི་ཞེས་པ་ནམ་མཁའི་ཁམས་སུའོ། །འོད་ཟེར་ཞེས་པ་ནི་འོད་ཟེར་རོ། །རྣལ་འབྱོར་ཡེ་ཤེས་ནི་སྒོམ་པར་བྱེད་པའི་རང་བཞིན་དེ་དང་དེས་ངེས་པར་སྤྲུལ་པའོ། །རྡོ་རྗེ་སྙིང་པོའི་རྒྱན་དུ་གཟུངས་མའི་དཀྱིལ་འཁོར་རྣམ་པར་འབྱེད་པའོ། །ད་ནི་བཅོམ་ལྡན་འདས་རྣམ་པར་སྣང་མཛད་ཀྱི་ཡོན་ཏན་ཐམས་ཅད་ཀྱི་བདག་ཉིད་ཅན་ཉེ་བར་བསྟན་པ་སྔགས་ཀྱི་དེ་ཉིད་ངེས་པར་བསྟན་པ་གསང་བ་ཞེས་བྱ་བ་ལ་སོགས་པ་གསུངས་པ། མེ་ལོང་ལ་སོགས་པའི་ཡེ་ཤེས་བཞི་པོའི་བདག་ཉིད་ཅན་ཉིད་ཀྱི་ཕྱིར། གསང་བ་ལ་སོགས་པའི་རང་བཞིན་བྱང་ཆུབ་ཀྱི་སེམས་ལ་རྟག་ཏུ་གནས་ཞེས་པ་མི་གནས་པའི་མྱ་ངན་ལས་འདས་པས་ཀུན་གནས་པའོ། །སངས་རྒྱས་ཀུན་གྱི་རྒྱུ་ཅན་ཉིད་ཀྱི་ཕྱིར་སངས་རྒྱས་ཀུན་གྱི་རང་བཞིན་ནོ། །དབྱེ་བ་བྱར་མེད་པ་ཉིད་ཀྱི་ཕྱིར་རྡོ་རྗེ་སེམས་དཔའོ། །རང་ཉིད་མངོན་པར་བྱང་ཆུབ་པའི་ཕྱིར་རང་འབྱུང་ངོ༌། །དོན་དམ་པ་གཅིག་པོ་ཉིད་ཀྱིས་ལྷག་པའི་ལྷའོ། །གདུལ་བྱ་སྣ་ཚོགས་པ་ཉིད་ཀྱི་ལྷ་གཞན་སྣ་ཚོགས་པའི་མཐར་ཐུག་པ་སྤྲུལ་པ་སངས་རྒྱས་ཀུན་གྱིས་ཏེ་ལྷ་རྣམས་ཐམས་ཅད་ཀྱིས་མཉམ་པར་སྦྱོར་བ་སྟེ་གསལ་བར་བྱེད་པའོ། །མཁའ་འགྲོ་མ་ནི་མཁའ་སྤྱོད་གྲུབ་པ་ཐམས་ཅད་དོ། །དེ་དང་དེ་རྣམས་ཀྱི་དྲ་བ་ནི་ཚོགས་སོ། །དེའི་རང་བཞིན་ནོ། །བདེ་བ་མཆོག་ཏུ་བྱ་བའི་ཕྱིར། །ཞེས་པས་སངས་རྒྱས་ཐམས་ཅད་མཉམ་པར་སྦྱོར་བ་མཁའ་འགྲོ་མའི་དྲ་བ་སྡོམ་མོ། །སེམས་ཅན་གྱི་དོན་གྱི་དབང་ཉིད་ཀྱི་ཕྱིར་དང༌། དོན་དམ་པར་ནི་འདོད་ཆགས་ལ་སོགས་པ་མེད་པའི་རང་བཞིན་ནོ། །བུད་མེད་ཀུན་ནི་ལྷ་ཐམས་ཅད་ཀྱི་ཕྱག་རྒྱ་ཆེན་པོའི་རང་བཞིན་ཁོ་ནའོ། །སྒྱུ་མ་ཞེས་བྱ་བ་ལ་སོགས་པ་ནི་སྒྱུ་མའི་
རང་བཞིན་དོན་དམ་པར་མེད་པ་ཅན་ནོ། །གལ་ཏེ་དེ་ལྟར་ན་དོན་དམ་པར་ཆེན་པོ་ནི་གང་ཕྱག་རྒྱ་ནི་ཅི་བརྟག་པར་བྱའོ་ཞེས་གསུངས་པ། ཐམས་ཅད་མཚུངས་པ་ཉིད་ཅེས་པ་ལ་སོགས་པའོ། །ཅིའི་ཕྱིར་ཁྱད་པར་དུ་འཕགས་ཤེ་ན་གསུངས་པ་ཅིའི་ཕྱིར་རང་བཞིན་གྱི་ནི་རང་བཞིན་གྱིས་མ་བྱས་པའོ། །གང་གིས་ན་ནུས་པ་ཡིས་ནིའོ། །རང་བཞིན་ཉིད་ཀྱིས་ཏེ་རང་བཞིན་ཁོ་ནས་དེ་འགྲུབ་བོ་ཞེས་སྤེལ་ལོ། །དེའི་ཕྱིར་ཡང་འདིས་བུད་མེད་དེ་ལྷ་རྣམས་བཀུར་བར་བྱ་བ་ཡིན་ནོ། །སྡུག་བསྔལ་གྱིས་སྤྱོད་པར་བྱེད་པ་དེ་མགུ་བར་བྱེད་དེ་ཞེས་པས་ངན་སྤྱོད་དོ། །ཐམས་ཅད་བུད་མེད་སྒྱུ་མས་འགྲུབ་སྟེ་ལྷའི་ཕྱག་རྒྱའི་གཟུགས་ཀྱིས་ཡོངས་སུ་གྱུར་པའོ། །རང་གི་ངོ་བོ་ཡོངས་སུ་བསྒྱུར་བ་ནི་བདག་མེད་པའི་ངོ་བོ་ཁྱད་པར་དུ་དམ་བཅས་པ་རྣམས་ཀྱིས་སོ། །སྣ་ཚོགས་ཞེས་པ་ནི་རང་བཞིན་དུ་མ་རྣམས་ཀྱིའོ། །དེ་བཞིན་ཐམས་ཅད་དུ་སྣ་ཚོགས་ཕྱག་རྒྱ་སྟེ་རྣམ་པ་སྣ་ཚོགས་པའི་ཕྱག་རྒྱའོ། །ཀུན་ལ་སྣ་ཚོགས་སྟོན་པ་ཡིས་ནི་རང་བཞིན་དུ་མ་བདེ་བའི་མཆོག་གིས་སོ། །སངས་རྒྱས་ཀུན་གྱི་རྣལ་འབྱོར་ཆེན་པོའི་བདག་ཉིད་ཅན་གྱི་དོན་དང་རྗེས་སུ་མཐུན་པ་དེ་སྲིད་དུ་བཅོམ་ལྡན་འདས་ཕྱག་རྒྱ་ལ་སོགས་པའི་གཟུགས་ཉིད་ཀུན་དུ་བསྟན་ཏེ་འཇིག་རྟེན་ལས་འདས་པ་དང་འཇིག་རྟེན་པ་ཐམས་ཅད་ཀྱི་ནང་དང་ཕྱི་རོལ་གྱི་དངོས་པོའི་རང་བཞིན་ཉིད་དུ་བསྟན་པའི་ཀུན་ལ་ཞེས་པ་ལ་སོགས་པ་གསུངས་པ་ཀུན་ལ་ནི་ཡུལ་ལའོ། །ཀུན་ནས་ནི་རང་རང་གི་ལྷའོ། །ཀུན་དུ་ནི་དངོས་པོའོ། །ཀུན་གྱི་རྣམ་པ་ནི་ཐམས་ཅད་ཀྱི་རྣམ་པས་སོ། །ཀུན་ཚེ་ནི་དུས་ཐམས་ཅད་ཀྱི་ཆེའོ། །རང་ཉིད་ནི་བདག་ཉིད་ཏེ་ལྷ་ཐམས་ཅད་དོ། །བརྟན་པ་ནི་རི་ལ་སོགས་པ་རྣམས་སོ། །གཡོ་བ་ནི་མི་ལ་སོགས་པ་རྣམས་སོ། །ཐམས་ཅད་དངོས་པོ་མ་ལུས་པའོ། །མདོར་བསྟན་པ་འདི་ཁོ་ནའི་རྒྱས་པར་བཤད་པ་གསུངས་པ་སེམས་དང་ཞེས་པ་ལ་སོགས་པ་ནས། ཀུན་དུ་དེ་བཞིན་མཐའ་ཡས་མཆོག །ཆོས་དབྱིངས་མཉམ་དང་མི་མཉམ་པ། །ཞེས་པ་ཇི་སྲིད་པར་རོ། །རྡོ་རྗེ་སྙིང་པོའི་རྒྱན་དུ་སྔགས་ཀྱི་དེ་ཉིད་རྣམ་པར་འབྱེད་པའོ། །ད་ནི་ཤེས་རབ་ཀྱི་སྒོ་རྩ་བའི་རྒྱུད་ཉེ་བར་བསྡུ་བ་དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་པ། བཅོམ་ལྡན་འདས་ཞེས་པ་རྣམ་པར་
སྣང་མཛད་ལ་གསོལ་བ་བཏབ་པ་དང་ལྡན་པའོ། །ཏིང་ངེ་འཛིན་ལ་སྙོམས་པར་ཞུགས་ནས་འཕགས་པ་འཇམ་དཔལ་ལ་ཐེག་པ་ཆེན་པོ་མངོན་པ་རྟོགས་པ་ཞེས་བྱ་བའི་དཀྱིལ་འཁོར་ཡོད་པ་ཉིད་གསལ་བར་བྱ་བའི་ཕྱིར་ཅང་མི་གསུང་བ་ནི་ཇི་ལྟར་གསུངས་པའི་རིམ་པས་རྣམ་སྣང་ཏིང་ངེ་འཛིན་མངོན་དུ་མཛད་ནས་ལྷའི་གནས་སུ་གདན་བསྐྱེད་དེ་སྲུང་བ་བྱས་ནས་བདག་ལ་དོན་འདི་དག་ལ་དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་ཅིང་ཇི་སྲིད་དུ་འཇམ་དཔལ་གྱིས་གསོལ་བ་བཏབ་པར་དགོངས་ནས་སླར་ཡང་དེ་བཞིན་གཤེགས་པ་ཐམས་ཅད་རྡོ་རྗེའི་རྣལ་འབྱོར་གྱི་དབང་ཕྱུག་ཉིད་དུ་བྱིན་གྱིས་བརླབ་པའི་ཕྱིར་དེ་བཞིན་གཤེགས་པ་ཐམས་ཅད་བསྡུ་བའི་དོན་དུ་འཇམ་དཔལ་ལ་བཀའ་སྩལ་ཏོ། །དེ་བསྡུས་པའི་དེ་བཞིན་གཤེགས་པ་ཐམས་ཅད་ཀྱི་ལྷན་ཅིག་ཏུ་ཡང་དག་པར་མཆོད་དེ། དེ་དག་རྫོགས་པའི་རྡོ་རྗེ་བློའི་ཡེ་ཤེས་དེ་བཞིན་གཤེགས་པ་ཐམས་ཅད་ཉིད་ཀྱི་བདག་ཉིད་དུ་བྱིན་གྱིས་བརླབ་པའི་ཕྱིར། དེ་བཞིན་གཤེགས་པ་ཐམས་ཅད་ཀྱིས་ལྷན་ཅིག་པའི་འཁོར་ལོས་སྒྱུར་བའི་ཐུགས་ཀར་བྱིན་གྱིས་བརླབས་ཏེ་ཐུགས་ཀའི་དཔལ་བེའུ་སྔགས་ཀྱིས་བསྐོར་བ་རྣམས་ལ་སྒོ་བཞི་པོ་སླར་ཡང་ཤིན་ཏུ་དགའ་བ་རྣམ་པར་དག་པའི་གནས་ཞེས་པ་ལ་སོགས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་གནས་རྣམས་ཀྱིས་རང་ཆོས་ཀྱི་དབྱིངས་རྣམ་པར་དག་པ་ཁོང་དུ་ཆུད་པར་བྱས་ནས་སླར་ཡང་རྣམ་པར་སྣང་མཛད་ཆེན་པོའི་དཀྱིལ་འཁོར་རྫོགས་ནས་སྡུད་པ་ལ་སོགས་པ་སྔོན་མ་ཅན་གྱི་ལྷ་རྣམས་རང་གི་ལས་ལ་ལེགས་པར་སྦྱར་བར་བྱའོ་ཞེས་པ་ནི་སྔོན་དུ་བྱ་བའི་རིམ་པའོ། །དེ་བཞིན་དུ་གཞན་དུ་ཡང་རྣལ་འབྱོར་ཇི་ལྟ་བ་བཞིན་དུ་བཤད་པའི་རིམ་པ་རྣམ་པར་རྟོགས་པར་བྱའོ། །རྡོ་རྗེ་རྣལ་འབྱོར་གྱི་དབང་ཕྱུག་ནི་རྣམ་པར་སྣང་མཛད་དེ་བཞིན་གཤེགས་པ་རྣམས་ཐམས་ཅད་ཀྱི་ཀུན་དུ་མཉམ་པ་ཉིད་དེ་ལ་ཏིང་ངེ་འཛིན་གང་གིས་དམིགས་པར་བྱ་བ་དེ་དེ་བཞིན་གཤེགས་པ་ཐམས་ཅད་ཀྱི་མཉམ་པ་ཉིད་ལ་དམིགས་པའོ། །དེ་ཉིད་དབྱེར་མི་ཕྱེད་པ་ཉིད་ཀྱིས་རྡོ་རྗེ་སྟེ་དེ་ལ་དེ་སྐད་ཅེས་བྱའོ། །དེ་བཞིན་གཤེགས་པ་ཐམས་ཅད་ཀྱི་ཐུགས་ཞེས་པ་རྣམ་པར་སྣང་མཛད་དབྱེར་མེད་པའི་
ཐུགས་ལའོ། །དེ་བཞིན་གཤེགས་པ་རྣམས་ཐམས་ཅད་ཀྱི་ཐེག་པ་ཆེན་པོ་ནི་ཆོས་ཀྱི་དབྱིངས་རྣམ་པར་དག་པའོ། །རྟོགས་པར་བྱའོ་ཞེས་བྱས་ནས་གང་གི་ཕྱིར་དེ་ཡང་དག་པར་རྟོགས་ཤིང་ཁོང་དུ་ཆུད་པ་གང་ཡིན་པ་དེ་ལ་དེ་བཞིན་དུ་དཀྱིལ་འཁོར་ཆེན་པོར་བརྗོད་དོ། །ཤེས་རབ་ཀྱི་ཕ་རོལ་ཏུ་ཕྱིན་པ་ནི་ཤིན་ཏུ་དགའ་བ་རྣམ་པར་དག་པའི་གནས་ཞེས་བྱ་བ་ལ་སོགས་པའི་གནས་རྣམས་སོ། །དེ་ཉིད་ཐབས་ཏེ་སྒོའོ། །གང་གི་དཀྱིལ་འཁོར་ཞེས་པ་ནི་ལུས་སོ། །དེ་བཞིན་གཤེགས་པ་ཐམས་ཅད་ཀྱི་འཁོར་ལོ་ཆོས་ཀྱི་དབྱིངས་རྣམ་པར་དག་པའོ། །དེ་བྱིན་གྱིས་རློབ་པར་བྱེད་པ་གང་ཡིན་པའི་ཏིང་ངེ་འཛིན་ནི་དེ་བཞིན་དུ་བརྗོད་པར་བྱའོ། །འོད་ཟེར་འབར་བས་འཁྲུགས་པའི་འོད། །ཅེས་པ་ནི་ཕྱི་རོལ་གྱི་ར་བ་ལ་འོད་ཟེར་འབར་བ་དང་ལྡན་པའོ། །རྡོ་རྗེ་སྙིང་པོས་ཡོངས་སུ་བསྐོར། །ཞེས་པ་ནི་སྣ་ཚོགས་རྡོ་རྗེའི་ཕྲེང་བས་ཡོངས་སུ་བསྐོར་བའོ། །རིན་ཆེན་ཡང་ཡིན་ལ་རྡོ་རྗེ་ཡང་ཡིན་བས་ན་རྡོ་རྗེ་རིན་ཆེན་ཏེ། དེ་རྣམས་ཀྱིས་སོ། །སྣ་ཚོགས་རྩེ་མོ་ནི་བ་དན་བཀྲ་བ་དེ་རྣམས་སོ། །དྲིལ་བཅས་ནི་བདག་ཉིད་བཅིངས་པ་གང་ཡིན་པ་དེ་ལ་དེ་བཞིན་དུ་བརྗོད་པར་བྱའོ། །རླུང་གིས་བསྐྱོད་པའི་མཚན་མ་ཡིན་པ་ཉིད་ཀྱིས་རྒྱལ་མཚན་ཉིད་རླུང་གིས་བསྐྱོད་པའོ། །དེ་རྣམས་གྱེན་དུ་བསྒྲེང་བ་གང་ཡིན་པ་དེ་ལ་རྒྱལ་མཚན་གྱེན་བསྒྲེང་རླུང་བསྐྱོད་པའོ། །དེ་ལ་ཡང་ནི་ཆུའི་དཀྱིལ་འཁོར་ལའོ། །དེའི་ཞེས་བྱ་བ་ནི་གྲུ་བཞི་པ་དེའིའོ། །འཁོར་ལོ་ཆེན་པོ་ཞེས་པ་ནི་དཀྱིལ་འཁོར་གྲུ་བཞི་པའོ། །ཆ་བརྒྱད་ཀྱིས་ཡོངས་སུ་བསྐོར་བ་ནི་དབུས་མའི་ཆ་ལ་བསྐོར་བ་གང་ཡིན་པ་དེ་ཆ་བརྒྱད་རྣམས་ཀྱིས་ཡོངས་སུ་བསྐོར་བའོ། །རྡོ་རྗེའི་ཐིག་གིས་ཡོངས་སུ་བསྐོར། །ཞེས་པ་ནི་རྡོ་རྗེ་ཕྲེང་བས་ཡོངས་སུ་བསྐོར་བའོ། །རྡོ་རྗེའི་དཀྱིལ་འཁོར་ཞེས་པ་ནི་བྱང་ཆུབ་ཀྱི་གདན་གྲུ་བཞི་པ་ལ་སེང་གེའི་གདན་ལའོ་ཞེས་པ་ཇི་སྲིད་པའོ། །རྡོ་རྗེ་ཆེན་པོ་རྩེ་མོ་ལྔ་པའོ། །རྡོ་རྗེ་པདྨ་ནི་དབྱེར་མི་ཕྱེད་པའི་པདྨ་སྟེ། དེ་ལ་རབ་ཏུ་བཞུགས་པ་གང་ཡིན་པ་ལ་རྡོ་རྗེ་ཆེ་ཞེས་བདེ་བཞིན་དུ་བརྗོད་དོ། །གསང་བ་ཆེན་པོ་ཞེས་པ་ནི་སྡེ་ཚན་དང་པོའི་གཉིས་པ་ཐིག་ལེ་དང་བཅས་པའོ། །ཟླ་བས་བརྒྱན་ཞེས་པ་ནི་སྟེང་དུ་
གནས་པའི་ཟླ་བའི་དཀྱིལ་འཁོར་རོ། །དེ་དག་ཐམས་ཅད་དུ་ཡང་དུང་ལ་སོགས་པ་དཀར་པོའོ། །རྡོ་རྗེ་ཕྲེང་བས་རྣམ་པར་སྤྲས། །ཞེས་པ་ནི་སྣ་ཚོགས་པ་འབར་བའི་འོད་ཀྱི་དཀྱིལ་འཁོར་དུ་རྡོ་རྗེའི་ཕྲེང་བས་རྣམ་པར་བརྒྱན་པའོ། །དཔྲལ་བའི་སྟེང་དང་མགྲིན་པར་ཡང་རིན་པོ་ཆེ་ཆེན་པོའི་ཕྲེང་བས་སྤྲས་པའོ། །སེམས་མ་རྡོ་རྗེ་མ་ལ་སོགས་པ་རྣམས་ངོས་བཞི་པོ་རྣམས་སུ་དགོད་པར་བྱའོ། །སྡེ་པ་གསལ་བྱེད་ནི་ཧ་སྟེ་རྒྱུ་ཞེས་པས་རྒྱུའི་དོན་བརྗོད་པར་བྱེད་དོ། །དྲུག་པའི་དབྱངས་ཀྱིས་ཞེས་པ་ཨུ་ཡིག་གིས་སོ། །ཐིག་ལེ་ནཱ་ད་རྣམ་པར་བརྒྱན་ནི་རྗེས་སུ་སྣ་ལྡན་དང་བཅས་པའོ། །རྟེན་ཅིང་འབྲེལ་འབྱུང་འཁོར་ལོ་ཡི། །ཞེས་པ་ནི་འདིར་རྟེན་ཅིང་འབྲེལ་པར་བྱའོ་ཞེས་པའོ། །ཡེ་ཤེས་འོད་ཟེར་ཞེས་པ་ནི་རིན་ཆེན་འབྱུང་ལྡན་ནོ། །འཇིག་རྟེན་དབང་ཕྱུག་གི་རྒྱལ་པོ་ནི་འོད་དཔག་མེད་དོ། །རྡོ་རྗེ་རྣམ་པར་གནོན་པ་ནི་དོན་ཡོད་གྲུབ་པའོ། །ཤཱཀྱ་ཐུབ་པ་ཞེས་པ་རྣམ་པར་སྣང་མཛད་དོ། །ཕྱོགས་ཐམས་ཅད་མཉམ་པ་ཉིད་དུ་དམིགས་ནས་ཞེས་པ་ཕྱོགས་རྣམས་ཀྱི་སྐབས་མ་ཡིན་པ་མེད་པ་ཉིད་དུ་བསྒོམ་པ་མངོན་དུ་བྱས་ནས་འཁོད་དོ་དེ་ཉེ་བར་བཞུགས་པའོ། །ཐུགས་ཀའི་རྡོ་རྗེ་ལས་ངེས་པར་བྱུང་ནས་ཞེས་པ་ལྷག་མའོ། །དེ་རྣམས་ཀྱང་སྔོན་པོ་དང་སེར་པོ་དང་ལྗང་གུ་རྣམས་ཏེ་གསེར་དང་ཆུ་སྐྱེས་དམར་པོ་དང༌། ཤེལ་དང་མརྒད་ཀྱི་འོད་ཅན་དུ་ཆུ་སྐྱེས་དང་ཟླ་བའི་དཀྱིལ་འཁོར་ལ་གནས་པར་རིག་པར་བྱའོ། །དེ་བཞིན་གཤེགས་པ་ཐམས་ཅད་ཀྱི་ཀུན་དུ་བཟང་པོ་བྱང་ཆུབ་ཆེན་པོའི་སེམས་དཔའ་ནི་རྡོ་རྗེ་སེམས་དཔའོ། །དེ་ཉིད་ནི་འགོད་པར་བྱ་བ་མ་ཡིན་པ་ཉིད་ཀྱི་དམ་ཚིག་སྟེ་དེའི་འབྱུང་བའོ། །གང་དུ་ན་སེམས་དཔའ་ཟླ་བའི་དཀྱིལ་འཁོར་ལའོ། །དེ་བྱིན་གྱིས་བརླབ་པར་བྱའོ། །གང་གིས་ནི་རྡོ་རྗེའོ། །དེ་ནི་སེམས་དཔར་བྱིན་གྱིས་རློབ་པའི་རྡོ་རྗེའོ། །དེ་ལ་དམིགས་པའི་ཏིང་ངེ་འཛིན་ལ་ཡང་དེ་བཞིན་དུ་བརྗོད་པར་བྱའོ། །དེ་སྐད་ཅེས་བྱ་བ་ལ་སྙོམས་པར་ཞུགས་ནས་ཏེ་མངོན་དུ་མཛད་ནས་སོ། །དཀྱིལ་འཁོར་ཞེས་བྱ་བ་ནི་ཟླ་བའི་དཀྱིལ་འཁོར་གྱི་བདག་ཉིད་ཅན་བྱང་ཆུབ་ཀྱི་སེམས་སོ། །ཡེ་ཤེས་རྣམ་དག་པ་ཞེས་པ་ནི་རྡོ་རྗེའི་བདག་ཉིད་ཅན་གཉིས་སུ་མེད་པའི་ཡེ་ཤེས་སོ། །རྡོ་རྗེ་སེམས་དཔའ་ཉིད་དུ་གྱུར།།
ཞེས་པ་ནི་རྡོ་རྗེ་སེམས་དཔའ་ཉིད་ཀྱིས་ཡོངས་སུ་གྱུར་པའོ། །བྱང་ཆུབ་སེམས་ཞེས་པ་སྟོང་པ་ཉིད་སོ་སོར་རྟོག་པ་ལ་སོགས་པ་རྣམས་སུ་ཟླ་བའི་དཀྱིལ་འཁོར་ཉིད་དོ། །རྟེན་བསྐྱེད་ནས་ནི་ཡོངས་སུ་རྫོགས་པ་ཉིད་དོ། །སངས་རྒྱས་ཡེ་ཤེས་ནི་དེ་ལ་རྡོ་རྗེ་སྒོམ་པར་བྱེད་པའོ། །བརྟེན་པ་ཉིད་ནི་དེའི་ང་རྒྱལ་བྱེད་པའོ། །སངས་རྒྱས་ཀྱི་ཡེ་ཤེས་ལས་ངེས་པར་སྐྱེས་པའི་སྐུ་ནི་སངས་རྒྱས་སྐུའོ། །དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ཞེས་པ་ནི་རྣམ་པར་སྣང་མཛད་ཀྱི་ཐུགས་ཀའོ། །རིག་པའི་མཆོག་ཅེས་པ་ནི་རྡོ་རྗེ་དབྱིངས་ཀྱི་དབང་ཕྱུག་མའོ། །རྣམ་པར་སྣང་མཛད་ཅེས་པ་ལ་སོགས་པ་རྣམས་ཀྱིས་ཇི་སྲིད་དུ་དཀྱིལ་འཁོར་ཐམས་ཅད་བྱིན་གྱིས་བརླབ་པར་བྱ་བའམ་གང་དེར་བྱིན་གྱིས་རློབ་པར་རབ་ཏུ་བསྟན་པའི་སྔགས་ཅན་ནོ། །ཡང་བྱིན་གྱིས་བརླབ་པའི་དོན་དུ་འདི་དག་ཐམས་ཅད་མངོན་དུ་བྱའོ། །དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ཞེས་པ་ནི་རྣམ་པར་སྣང་མཛད་དང་མཐུན་པའི་ཐུགས་ཀ་ལའོ། །དཀྱིལ་འཁོར་རྣམས་ཐམས་ཅད་དུ་ཞེས་པ་ནི་མི་བསྐྱོད་པ་ལ་སོགས་པའི་དཀྱིལ་འཁོར་གྱི་གཟུགས་ཀྱིས་ཏེ་བདུན་པ་ནི་གསུམ་པའི་དོན་ཉིད་ཀྱི་ཕྱིར་རོ། །རྡོ་རྗེ་རྣམས་ཀྱི་ནི་དེ་བཞིན་གཤེགས་པ་ཐམས་ཅད་རྣམས་ཀྱིས་མཉམ་པ་ཉིད་གང་ཡིན་པ་དེ་རབ་ཏུ་སྤྲོ་བ་སྟེ་རབ་ཏུ་གསལ་བར་བྱའོ། །གང་གིས་ནི་སྙིང་པོ་སྟེ་དེ་དེ་བཞིན་དུ་བརྗོད་དོ། །མཚམས་རྣམས་ཐམས་ཅད་དུ་ཞེས་པ་ནི་སྒོའི་མཚམས་རྣམས་སུའོ། །རྡོ་རྗེ་སྒེག་མོ་དང༌། བདུག་པ་དང་ལྕགས་ཀྱུ་ལ་སོགས་པ་རྣམས་རིམ་པས་རྡོ་རྗེ་སེམས་དཔའ་དང་རྒྱལ་པོ་ལ་སོགས་པ་དེའི་ཁ་དོག་གོ །གཟུགས་ལ་སོགས་པ་རྣམས་མི་བསྐྱོད་པ་ལ་སོགས་པའི་ཁ་དོག་གོ །རྡོ་རྗེ་དྲི་ལ་སོགས་པ་རྣམས། །ཞེས་པ་དགོས་པ་རྒྱས་པར་བཤད་པའོ། །རྡོ་རྗེ་བདུག་པ་དང་མེ་ཏོག་དང་མར་མེ་དང་དྲིའོ་ཞེས་པ་ཇི་སྲིད་པར་ཨོཾ་བཛྲ་གནྡྷེ་ཧཱུཾ་ཨོཾ་བཛྲ་ཤི་ཤཻ་རཻ་ཧོ་ཧོཿ་ཞེས་པའི་སྔགས་དག་ལེགས་པར་བཟློག་སྟེ་བལྟ་བར་བྱའོ། །རྡོ་རྗེ་ཕྲེང་བ་མ་དང་བདུག་པ་ལ་སོགས་པའི་རྣལ་འབྱོར་གྱིས་རྗོད་པར་བྱེད་པའི་ཕྱིར་རོ། །ལྷའི་ཕྱག་རྒྱས་མངོན་པར་རྒྱས་གདབ་པར་བྱ་བ་ནི་ཤིན་ཏུ་དགའ་བའི་རྡོ་རྗེ་སྙིང་པོ་སྟེ་རང་གི་ཕྱག་རྒྱ་
བཅིངས་ནས་གདོན་པར་བྱའོ། །དཀྱིལ་འཁོར་ཐམས་ཅད་དུ་ཞེས་པ་ནི་མི་བསྐྱོད་པ་ལ་སོགས་པའི་དཀྱིལ་འཁོར་རྣམས་སུའོ། །སྒོའི་ཕྲིན་ལས་ཞེས་པ་ནི་བསྡུ་བ་དང་བསྟོད་པར་བྱས་ནས་ཤར་ལ་སོགས་པའི་སྒོ་རྣམས་སུ་གནས་ནས་དགུག་པ་ལ་སོགས་པའི་ལས་འདི་རྣམས་བྱའོ། །བྱང་ཆུབ་སེམས་དཔའ་ཆེན་པོ་རྣམས་གཞག་པར་བྱའོ་ཞེས་པ་ནི་སྣམ་བུ་ལ་ཤར་ལ་སོགས་པའི་ཕྱོགས་ནས་བརྩམས་ཏེ་བྱམས་པ་དང་ཀུན་དུ་བཟང་པོ་དང༌། ཕྱག་ན་རྡོ་རྗེ་དང༌། རྡོ་རྗེ་སྙིང་པོ་དང༌། ནམ་མཁའི་སྙིང་པོ་དང༌། ལག་ན་རིན་ཆེན་དང༌། འཁོར་ལོ་ལ་སོགས་པ་ཇི་ལྟར་གསུངས་པ་དེ་ལ་སོགས་པ་རྣམས་ཀྱིས་དེ་དག་རབ་ཏུ་དབྱེ་བས་སོ། །རྡོ་རྗེ་སྙིང་པོའི་རྒྱན་དུ་རྣམ་པར་སྣང་མཛད་ཆེན་པོའི་དཀྱིལ་འཁོར་གྱི་རྣམ་པར་འབྱེད་པའོ། །རྣམ་པར་སྣང་མཛད་དང་མཐུན་པའི་དཀྱིལ་འཁོར་ངེས་པར་བསྟན་པ་དེ་ནས་རྣམ་པར་སྣང་མཛད་ཞེས་པ་ལ་སོགས་པ་གསུངས་པ། སུམ་ཅུ་རྩ་གཉིས་མཆོག་ཏུ་འབར། །ཞེས་པ་ནི་མཚན་སུམ་ཅུ་རྩ་གཉིས་འཆང་བའོ། །གཉིས་པའོ་ཞེས་པ་ནི་ཨེ་ཡིག་གོ །འཁོར་ལོ་ཅན་ཞེས་པ་ནི་གཙུག་ཏོར་འཁོར་ལོས་སྒྱུར་བའོ། །འཁོར་ལོ་ཞེས་པ་ནི་གྲུབ་བཞི་པའི་ནང་དུ་ཆུད་པའི་རེའུ་མིག་བརྒྱད་པ་ཅན་འབར་བ་དང་བཅས་པའོ། །པདྨའི་རྒྱལ་པོ་རབ་ཏུ་གནས་ནི་སངས་རྒྱས་ཞས་པ་ལྷག་མའོ། །དང་པོའི་དཀྱིལ་འཁོར་ཞེས་པ་ནི་ཆོས་ཀྱི་དབྱིངས་ཀྱི་དཀྱིལ་འཁོར་རོ། །རྡོ་རྗེ་ཧཱུཾ་མཛད་ཀྱི་དཀྱིལ་འཁོར་ཉེ་བར་བསྟན་པ་དེ་ནས་ཞེས་བྱ་བ་ལ་སོགས་པ་གསུངས་པ། འཁོར་ལོ་ཞེས་པ་ནི་རྣམ་པར་སྣང་མཛད་དང་མཐུན་པའི་དཀྱིལ་འཁོར་བཞིན་ནོ། །སངས་རྒྱས་ཕྲེང་བ་སོགས་པས་བརྒྱན། །ཞེས་པ་སངས་རྒྱས་ལྔའི་ཅོད་པན་ནོ། །དབྱུག་པ་དང་ནི་ཞགས་པར་བརྗོད། །ཅེས་པ་ནི་དེ་ཉིད་དོ། །ཁྲོ་བོའི་ཁུ་ཚུར་ཉིད་ཀྱི་ལག་པ་གཉིས་མཐེ་ཆུང་གཉིས་ཀྱིས་ཕན་ཚུན་ལྕགས་སྒྲོག་ཏུ་མདུད་པའོ། །སྡིགས་པར་མཛད་ཅེས་པ་བསྡིགས་པར་གྱིས་བརྟག་པ་སྣ་ཚོགས་པར་དགོངས་པའོ་ཞེས་སོ། །རྡོ་རྗེ་ཧཱུཾ་མཛད་ཅེས་པ་འདིར་འཇིག་རྟེན་གསུམ་ལས་རྣམ་པར་རྒྱལ་བ་གང་ཡིན་པ་དེའོ། །དེ་ལྟར་ཁྲོ་བོའི་དཀྱིལ་འཁོར་ཐམས་ཅད་རྣམ་པར་བཀོད་ནས་ཞེས་
པ་འདིས་ཧེ་རུ་ཀ་ལ་སོགས་པའི་དཀྱིལ་འཁོར་རྣམས་སུ་གཙོ་བོའི་ཕྱག་རྒྱ་ཆེན་པོའི་དབུས་སུ་གཞག་པར་བྱའོ། །དེ་ཁོ་ནའི་ཕྱག་རྒྱ་རྣམས་གཞོགས་ཐམས་ཅད་དུ་གཞག་པར་བྱའོ། །མཆོད་པ་དང་སྒོ་བ་ཡང་ངོ༌། །འཇིག་རྟེན་དབང་ཕྱུག་གི་དཀྱིལ་འཁོར་ངེས་པའོ། །བསྟན་པ་དེ་ནས་ཞེས་བྱ་བ་ལ་སོགས་པ་གསུངས་པ། དཀྱིལ་འཁོར་ཆེན་པོ་ཆུའི་དཀྱིལ་འཁོར་ཞེས་པ་ནི་ཟླ་བའི་དཀྱིལ་འཁོར་རོ། །ཕྱག་བཞི་ཞེས་པ་ནི་གཉིས་དག་གིས་བགྲང་ཕྲེང་དང་བཅས་པའི་མཆོག་སྦྱིན་དང་སྤྱི་བླུགས་ལག་ཏུའོ། །གཡོན་པས་བསྙེམས་པ་དང་བཅས་པའི་པདྨའི་སྡོང་བོ་དཀུར་འཛིན་པ་གཡས་པས་དེའི་འདབ་མ་ཁ་འབྱེད་པའོ། །ཤ་ཥའི་སྡེ་པའི་མཐའ་ཞེས་པ་ནི་ཧ་ཡིག་གོ །དབྱངས་ཀྱི་བཞི་པ་ཨི་ཡིག་སྟེ་དེས་སྤྱི་བོ་མནན་པའོ། །མེའི་ས་བོན་ར་ཡིག་གོ །ཐིག་ལེ་ནི་མཆོག་ཏུ་ཞེས་པ་རྗེས་སུ་སྣ་ལྡན་དང་བཅས་པའོ། །མདུན་དུ་པདྨའོ། །གཡས་སུ་བགྲང་ཕྲེང་ངོ༌། །རྒྱབ་ཏུ་དབྱུག་པའོ། །གཡོན་དུ་སྤྱི་བླུགས་སོ། །དེ་རྣམས་ཐམས་ཅད་ཀྱང་ཟླ་བ་ལ་གནས་པའོ། །མཆོད་པ་དང་སྒོ་བ་ནི་ཐམས་ཅད་དུ་སྔར་བཞིན་ནོ། །ནམ་མཁའ་མཛོད་དང་རིན་ཆེན་འབྱུང་གནས་དང་འཇིག་རྟེན་དབང་ཕྱུག་དང་འཇམ་དཔལ་དང་ངན་སོང་ཀུན་འདྲེན་དང་བློ་གྲོས་མི་ཟད་པ་དང༌། སའི་སྙིང་པོ་དང་སྒྲིབ་པ་ཐམས་ཅད་རྣམ་སེལ་དང་དྲ་བ་ཅན་གྱི་འོད་ཅེས་པའི་རིམ་པས་དགོད་པར་བྱའོ། །སྔར་གསུངས་དཀྱིལ་འཁོར་ཞེས་པ་ཆོས་ཀྱི་དབྱིངས་ཀྱི་དཀྱིལ་འཁོར་རོ། །དེའི་ཚོགས་ཞེས་པ་ནི་རང་གི་གཙོ་བོའི་རྣལ་འབྱོར་གྱིས་སྒོ་ཕྱེ་ནས་བསྡུ་བ་ལ་སོགས་པ་སྔོན་མ་ཅན་གྱི་ཕྱག་རྒྱ་བཞིའི་རྒྱས་བཏབ་སྟེ་དབང་བསྐུར་ཞིང་མཆོད་པའི་མཐར་ཐུག་པ་རྫོགས་ནས་ཞུགས་ཏེ་རང་དབང་བསྐུར་བ་ལ་སོགས་པ་ཅན་རྫོགས་ནས་སློབ་མ་བཅུག་སྟེ་འཇུག་པ་ལ་སོགས་པ་རྫོགས་པ་འདིས་ཉེ་བར་སྤྱོད་པ་ཐམས་ཅད་ཀྱིས་མཆོད་པར་བྱ་ཞེས་པ་ནི་ཉེ་བར་བསྡུ་བའི་དུས་སུའོ། །དེ་ལ་དང་པོ་ཉིད་དུ་ཞེས་པ་ལ་སོགས་པ་འཇུག་པ་ལ་སོགས་པ་འདུས་བྱས་པའི་དུས་ཁོ་ནར་རོ། །དེས་ཞེས་པ་ནི་སློབ་དཔོན་གྱིས་སོ། །སྐྱིལ་ཀྲུང་ཞེས་པ་ནི་རྡོ་རྗེ་སྐྱིལ་ཀྲུང་ངོ༌། །གར་སྡུད་པའི་སྦྱོར་
བས་ཞེས་པ་ནི་རྡོ་རྗེ་ཁུ་ཚུར་གྱིས་བཛྲ་སཏྭ་སུ་སཾ་གྲ་ཧཾ་ཞེས་པ་ལ་སོགས་པའི་གླུས་རྡོ་རྗེའི་གར་སྔོན་མ་ཅན་གྱིས་སོ། །རབ་བཀོད་ཕྱག་རྒྱ་ཐམས་ཅད་དུ། །ཞེས་པ་ནི་གང་གི་ལྷ་གང་ཡིན་པའི་ཉམས་དེ་དང་དེར་གནས་པས་འདི་རྣམས་ཀྱི་ཕྱག་རྒྱ་རབ་ཏུ་སྦྱར་བར་བྱའོ། །བདག་ཉིད་རྡོ་རྗེ་གར་བྱས་ཞེས་པ་འདིས་ཕྱོགས་གཞན་སྟོན་པར་བྱའོ། །ཇི་སྐད་དུ་གསུངས་པའི་ཉམས་ཀུན་དུ་གནས་པ་སྣ་ཚོགས་པའི་རྡོ་རྗེའི་གར་སྔོན་མ་ཅན་རང་གི་ལྷའི་ང་རྒྱལ་གྱིས་སོ། །ཕྱག་རྒྱ་བཅིངས་པ་ལའང་མཆོག་གི་དངོས་གྲུབ་ཏུ་འགྱུར་རོ་ཞེས་པ་ཇི་སྲིད་པར་རོ། །སྐྱིལ་ཀྲུང་རྡོ་རྗེའི་སྐྱིལ་ཀྲུང་ངོ༌། །དེའི་ཕྱེད་ཀྱིས་ཞེས་པ་ནི་རྡོ་རྗེ་སྐྱིལ་ཀྲུང་གི་ཕྱེད་སེམས་དཔའི་སྐྱིལ་ཀྲུང་ངོ༌། །སྡིག་པའི་རྒྱུ་ཅན་ཞེས་པ་ནི་སྡིག་པ་ཞི་བའོ། །ཆོས་ཐམས་ཅད་ཀྱི་རྗེས་སུ་འཇུག་པ་ཞེས་པ་ནི་དེ་དང་དེའི་དངོས་པོ་རྣམས་ཐམས་ཅད་ལ་རྗེས་སུ་ཞུགས་ནས་ཆོས་རྣམས་ལ་འཇུག་པའི་ངང་ཚུལ་ལོ།། རབ་ཏུ་འཇུག་པ་རྣམས་ཀྱི་དགའ་བ་མེད་པ་ཡང་དེ་རྣམས་ཀྱི་མདངས་དང་བྲལ་བ་ནི་ཞེས་པ་ནི་སྒྲིབ་པ་ཐམས་ཅད་རབ་ཏུ་བཅོམ་པ་རྣམས་ཀྱི་དབང་པོ་ཞི་བར་བལྟ་བར་བྱའོ། །རྡོ་རྗེ་རིན་ཆེན་གྱི་དཀྱིལ་འཁོར་བསྟན་པ་དེ་ནས་ཞེས་བྱ་བ་ལ་སོགས་པ་གསུངས་པ། རིན་ཆེན་སྙིང་པོའི་ཞེས་པ་ནི་ནམ་མཁའི་སྙིང་པོའིའོ། །རིན་ཆེན་པདྨའི་ཞེས་པ་ནི་འདབ་མ་སྣ་ཚོགས་པའོ། །རིན་ཆེན་ཕྲེང་བས་རྣམ་པར་མཛེས། །ཞེས་ཏེ་དབང་བསྐུར་ཀུན་གྱི་མཆོག་ཅེས་པ་ནི་ཆ་བརྒྱད་ཀྱི་རིན་པོ་ཆེའོ། །ཡིད་བཞིན་ནོར་བུ་དང་ཤེལ་ལ་སོགས་པ་རྣམས་སོ། །དཀྱིལ་འཁོར་ཀུན་གྱི་གྲྭ་རྣམས་ཀྱི། །གནས་རྣམས་སུ་ནི་གཞག་པར་བྱ། །ཞེས་པ་ནི་མཆོད་པ་དང་སྒོ་བ་རྣམས་སོ། །སྡེ་པ་བཞི་པའི་དང་པོ་ནི་ཏེ་ཡིག་གོ །མའི་ས་བོན་ནི་ར་ཡིག་གོ །དབྱངས་ཀྱི་གཉིས་པ་ཡིས་ཞེས་པ་ནི་ཨཱ་ཡིག་གིས་སོ། །དབང་བསྒྱུར་བ་ནི་ཞེས་པ་རྗེས་སུ་ང་རོའོ། །རྒྱབ་བསྐུམ་སྟེ་ཞེས་པ་ནི་མཉམ་པའི་ཐལ་མོར་བྱས་ནས་སོར་མོ་ཐམས་ཅད་ཀྱི་རྒྱབ་བསྐུམ་པར་བྱའོ། །རིན་ཆེན་རྣམ་པ་ལེགས་འབྱུང་བ། །ཞེས་པ་ནི་རིན་པོ་ཆེའི་རྣམ་པས་ཡོངས་སུ་གྱུར་པའོ། །རྡོ་རྗེ་ཁུ་ཚུར་གྱི་དཀྱིལ་འཁོར་བསྟན་པ་དེ་ནས་ཞེས་བྱ་བ་ལ་སོགས་པ་གསུངས་པ། རྡོ་རྗེ་ཕྲེང་བས་རྣམ་པར་བརྒྱན། །ཞེས་པ་ནི་ཕྱི་རོལ་དུ་སྣ་ཚོགས་
རྡོ་རྗེའི་ཕྲེང་བས་ཉེ་བར་བརྒྱན་པའོ། །ཞལ་བཞི་པ་ཡི་རྡོ་རྗེ་ཆེ། །ཞེས་པ་ནི་སྣ་ཚོགས་རྡོ་རྗེའོ། །འཁོར་ལོ་བཞིན་དུ་ཡོངས་སུ་བསྐོར། །ཞེས་པ་ནི་སྣ་ཚོགས་རྡོ་རྗེའི་ཕྲེང་བས་བསྐོར་བའོ། །དེའི་དབུས་སུ་ཞེས་པ་ནི་ཞལ་བཞི་པའི་རྡོ་རྗེ་ཆེན་པོའིའོ། །ཁ་དོག་སྣ་ཚོགས་མཆོག་ཏུ་འབར། །ཞེས་པ་ནི་རྣམ་པ་སྣ་ཚོགས་པའི་མཆོག་གོ །རྡོ་རྗེ་སྣ་ཚོགས་ཞེས་པ་ནི་རྡོ་རྗེ་ཁུ་ཚུར་རོ། །སྣ་ཚོགས་ཁ་དོག་ཅེས་པ་ནི་ཞལ་ལ་དཀར་པོའོ། །བྲང་ལ་དམར་པོའོ། །ལག་པ་ལ་ལྗང་གུའོ། །ལྟོ་བ་ལ་སེར་པོའོ། །ལྷག་མ་ནག་པོའོ། །གཟི་བརྗིད་ཆེ་ཞེས་པ་ནི་འབར་བའི་ཕྲེང་བའོ། །སངས་རྒྱས་ཕྲེང་བས་རྣམ་བར་མཛེས། །ཞེས་པ་ནི་རྡོ་རྗེ་སངས་རྒྱས་ལྔའི་ཅོད་པན་ཅན་ནོ། །མྱ་ངན་འདས་དོན་རབ་གསལ་བྱེད། །ཅེས་པའོ། །པ་ནི་ཨ་ཡིག་གོ །སྒེག་སོགས་རིག་མ་ཐམས་ཅད་ཀྱིས། །ཞེས་པ་ནི་མཆོད་པ་རྣམས་ཐམས་ཅད་ཀྱིས་སོ། །དེ་བཞིན་ཞེས་པ་ནི་རིན་པོ་ཆེའི་དཀྱིལ་འཁོར་ཇི་ལྟ་བ་བཞིན་དུ་དབང་བསྐུར་བ་ལ་སོགས་པའི་ཕྱག་རྒྱ་རྣམས་ཀྱིས། སྣ་ཚོགས་མཆོག་ཏུ་རྣམ་པར་བཀྲ། །ཞེས་པ་དང་ཡང་དག་པར་སྦྲེལ་ལོ། །རྡོ་རྗེའི་ཐིག་ལེས་ཡོངས་སུ་བསྐོར། །ཞེས་པ་ནི་སྣ་ཚོགས་ཐིག་ལེའི་ཕྲེང་བས་ཡོངས་སུ་བསྐོར་བའོ། །སྒེག་སོགས་རིག་མ་ཐམས་ཅད་ཀྱིས། །ཕྱག་རྒྱ་ཐམས་ཅད་ཀྱིས་ཞེས་པ་འདི་ཁོ་ནའི་རིམ་པས་ཉེ་བར་བསྟན་པ། དེ་ལ་དབང་བསྐུར་ཕྱག་རྒྱ་ཡིས། །ཞེས་བྱ་བ་ལ་སོགས་པ་གསུངས་སོ། །འཇམ་དཔལ་གྱི་དཀྱིལ་འཁོར་ཉེ་བར་སྟོན་པ་དེ་ནས་ཞེས་གསུངས་པ། ཤེས་རབ་ཡེ་ཤེས་འཁོར་ལོ་ཆེ། །ཞེས་པ་ནི་དེ་བཞིན་གཤེགས་པའི་བླ་ན་མེད་པའི་ཤེས་རབ་ཡེ་ཤེས་ཀྱི་རང་བཞིན་རྩིབས་བརྒྱད་པའི་འཁོར་ལོའོ། །སྔགས་ཀྱི་ཡི་གེས་རྣམ་པར་བརྒྱན། །ཞེས་པ་ནི་མུ་ཁྱུད་ལ་ཨ་ར་པ་ཙ་ན་ཞེས་པའི་ཡི་གེ་རྣམས་ཀྱིས་རྣམ་པར་མཛེས་པའོ། །རལ་གྲིར་བཅས་ཞེས་པ་ནི་ཕྱག་བཞི་པོ་རྣམས་སུའོ། །རལ་གྲིའི་ཕྲེང་བས་རྣམ་པར་མཛེས། །ཞེས་པ་ནི་འོད་ཀྱི་དཀྱིལ་འཁོར་དུའོ། །ཡི་གེ་ལྔ་ཡི་གསང་སྔགས་ཆེ་ནི་ཇི་སྐད་དུ་གསུངས་པ་རྣམས་སོ། །དེའི་གཞོགས་སུ་གནས་ཞེས་པ་ནི་འོད་ཀོར་ལ་ཡང་དག་པར་བཞུགས་པའོ། །རོལ་ཞེས་པ་ནི་འཁོར་ལོའི་ཕྱི་རོལ་ལོ། །ཤེས་རབ་ཀྱི་ཕ་རོལ་ཏུ་
ཕྱིན་པ་ནི་སྟོང་པ་ཉིད་ཆོས་ཐམས་ཅད་རང་བཞིན་མེད་པའི་རྣལ་འབྱོར་གྱིས་སོ་ཞེས་བྱ་བ་ལ་སོགས་པ་ཅན་ནོ། །དེ་པདྨའི་འདབ་མ་རྣམས་སུ་བྲི་བར་བྱའོ། །སྔོན་དུ་བཤད་པའི་ཆོ་ག་ཡིས། །ཞེས་པ་ནི་ཁུ་ཚུར་གྱི་དཀྱིལ་འཁོར་དུ་བཤད་པའི་ཆོ་གས་སོ། །མཆོད་པའི་ཆོ་ག་རྒྱས་པར་ཞེས་པ་ནི་སྒེག་མོ་ལ་སོགས་པ་རྣམས་དགོད་པའོ། །ངོས་བཞི་པོ་རྣམས་སུ་རལ་གྲིའི་ཕྱག་རྒྱ་བྲིའོ། །འཇུག་པའི་ཆོ་ག་རྒྱས་པ་དེ་ཁོ་ན་བཞིན་དུ་ཞེས་པ་ནི་ཆོས་ཀྱི་དཀྱིལ་འཁོར་ཇི་ལྟ་བ་བཞིན་དུའོ། །སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའི་གནས་ཀྱི་དཀྱིལ་འཁོར་སྟོན་པ་དེ་ནས་ཞེས་བྱ་བ་ལ་སོགས་པ་གསུངས་པ་ཆོས་ཀྱི་འཁོར་ལོ་ནི་རྩིབས་བཅུ་གཉིས་པའོ། །རྟེན་ཅིང་འབྲེལ་འབྱུང་ཕྲེང་བ་ཞེས་པ་ནི་མ་རིག་པའི་རྐྱེན་གྱིས་འདུ་བྱེད་དེ་ཞེས་པ་ཨ་ཡིག་སྟེ་དེ་མུ་ཁྱུད་ལ་བྲི་བར་བྱའོ། །ཕྱག་བཞི་ཞེས་པ་ནི་གཉིས་དག་གིས་འཁོར་ལོ་འཛིན་པའོ། །གཉིས་དག་གིས་རལ་གྲི་དང་ཞགས་པ་འཛིན་པའོ། །རང་གི་ཡི་གེའི་ཕྲེང་བ་རྣམས་ཀྱིས་ནི་ཧཱུཾ་ཡིག་གི་ཕྲེང་བའོ། །དེ་ཡང་གཡས་པ་དང་གཡས་མིན་གྱི་གཞོགས་སུ་འཁོར་ལོ་གཉིས་ཀྱིས་འོད་ཟེར་དང་ལྡན་ཞིང་རྣམ་པར་མཛེས་པའི་འོད་ཀྱིས་བསྐོར་བར་བལྟ་བར་བྱའོ། །དེ་ཡི་ཞེས་པ་བཅོམ་ལྡན་འདས་ཀྱིའོ། །འཁོར་ལོ་བཞིན་དུ་རབ་ཏུ་གནས། །ཞེས་པ་ནི་འཁོར་ལོའི་རྣམ་པར་ཡོངས་སུ་གྱུར་པའོ། །མཆོད་པ་ཞེས་པ་ནི་སྒེག་མོ་ལ་སོགས་པ་རྣམས་སོ། །འཁོར་ལོ་བསྐོར་བར་བྱ་ལ་སོགས། །ཞེས་པ་ནི་ཆོས་ཀྱི་དབྱིངས་ཀྱི་དཀྱིལ་འཁོར་གྱི་རྣལ་འབྱོར་གྱིས་བསྡུ་བ་ལ་སོགས་པ་སྔོན་མ་ཅན་གྱིས་ཞུགས་ནས་འཇུག་པ་ལ་སོགས་པ་རྫོགས་པར་བྱའོ། །ནམ་མཁའ་མཛོད་ཀྱི་དཀྱིལ་འཁོར་ཉེ་བར་སྟོན་པ་དེ་ནས་ཞེས་པ་ལ་སོགས་པ་གསུངས་པ། ཐོག་མའི་དཀྱིལ་འཁོར་ཚུལ་གྱིས་ནི། །ཞེས་པ་ཆོས་ཀྱི་དབྱིངས་ཀྱི་དཀྱིལ་འཁོར་གྱི་རིགས་པའོ། །དཀྱིལ་འཁོར་ཀུན་གྱི་ཞེས་པ་གྲུ་བཞི་པ་ལ་སོགས་པ་དང་ལྡན་པ་ཕྱིའི་དཀྱིལ་འཁོར་ལའོ། །སྣང་བ་ཆེ་ཞེས་པ་ནི་འོད་ཀྱི་ཕྲེང་བ་ཅན་ནོ། །མཁའ་བཞིན་ཤིན་ཏུ་འོད་གསལ་བ། །ཞེས་པ་ནི་བཻ་ཌཱུཪྻའི་ཁ་དོག་གོ །ཟླ་བའི་ཁ་དོག་གཟི་བརྗིད་ཆེ། །ཞེས་པ་ནི་འོད་ཀྱི་དཀྱིལ་འཁོར་དཀར་པོའོ། །སྣ་ཚོགས་
མཚོན་ཆ་འཆང་བ་ཞེས་པ་ནི་སྣ་ཚོགས་རྡོ་རྗེ་འཛིན་པའོ། །སངས་རྒྱས་ཕྲེང་བ་སོགས་པས་སྤྲས། །ཞེས་པ་ནི་སངས་རྒྱས་ལྔའི་ཅོད་པན་དང༌། དཔྲལ་བའི་སྟེང་དང་མགྲིན་པར་ཡང་རིན་པོ་ཆེའི་ཕྲེང་བ་གཞན་ནོ། །དབྱངས་ཀྱི་དགུ་པ་ཞེས་པ་ནི་ཨོཾ་ཡིག་སྟེ་མ་ནིང་བཞི་པོ་མེད་པ་ཉིད་ཀྱི་ཕྱིར་རོ། །ཐིག་ལེ་སྒྲ་ཡིས་རྣམ་པར་བརྒྱན། །ཞེས་པ་ནི་རྗེས་སུ་སྣ་ལྡན་དང་བཅས་པའོ། །དེ་ཡང་ཞེས་པ་ནི་གང་ཐོག་མ་སྟེ་དང་པོའི་སྡེ་པའི་གསུམ་པའོ། །རྗེས་སུ་སྣ་ལྡན་དང་བཅས་པ་བསྟན་ཏོ། །པདྨའི་རྒྱལ་པོའི་ཕྱི་རོལ་གྱི་འདབ་མ་ལ་ཕྲེང་བ་མཆོག་འཆང་བའོ། །རྡོ་རྗེ་རིན་ཆེན་གྱི་ཕྱག་རྒྱ་ལས་མཐེའུ་ཆུང་དང་མིང་མེད་ཁབ་བཞིན་དུ་བྱས་པ་འདི་ཏོག་གི་ཕྱག་རྒྱའོ། །རྡོ་རྗེ་གནོད་སྦྱིན་གྱི་དཀྱིལ་འཁོར་བསྟན་པ་དེ་ནས་ཞེས་བྱ་བ་ལ་སོགས་པ་གསུངས་པ། དཀྱིལ་འཁོར་སྔ་མའི་སྦྱོར་བ་ཡིས། །དཀྱིལ་འཁོར་ཐམས་ཅད་ཐིག་བཏབ་པོ། །ཞེས་པ་ནི་བཤད་མ་ཐག་པའོ། །ཁྲོ་བོའི་དཀྱིལ་འཁོར་ཞེས་པ་ནི་འབར་བ་དང་བཅས་པའོ། །དེར་ཡང་ཞེས་པ་ནི་ཁྲོ་བོའི་དཀྱིལ་འཁོར་གྲུ་བཞི་པར་རོ། །མེའི་རྡོ་རྗེ་མཆོག་ཅེས་པ་ནི་མེའི་དཀྱིལ་འཁོར་རོ། །ཤ་ཥ་སའི་སྡེ་པའི་མཐའ་ཅན་ནི་ཧ་ཡིག་གོ །དེ་ཡང་ཚེག་དྲག་དང་བཅས་པའོ། །ཁྲོ་བོའི་དཀྱིལ་འཁོར་གྱིས་བསྐོར་བ་ནི་གང་དུ་སྔགས་ཀྱི་ཡི་གེའི་ཕྲེང་བ་བྲི་བར་བྱེད་པ་དེ་ཁྲོ་བོའི་དཀྱིལ་འཁོར་གྱིས་བསྐོར་བའོ། །དོན་ཡོད་རྒྱལ་པོའི་དཀྱིལ་འཁོར་བསྟན་པ་དེ་ནས་ཞེས་བྱ་བ་ལ་སོགས་པ་གསུངས་པ་ལྕགས་ཀྱུའི་རྣམ་པ་ཞེས་པ་ནི་ཟུར་གསུམ་གྱི་རྣམ་པའོ། །ལྕགས་ཀྱུ་ལ་ནི་རབ་ཏུ་བཞུགས། །ཞེས་པ་ནི་འོད་ཟེར་དང་བཅས་པའི་ལྕགས་ཀྱུ་ལ་ཡང་དག་པར་བཞུགས་པ་གང་ཡིན་པའོ། །ཕྱག་བཞི་ཞེས་པ་ནི་གཉིས་གང་གིས་རྡོ་རྗེ་ཁུ་ཚུར་གྱི་ལྕགས་ཀྱུ་འཛིན་པའོ། །གཡོན་པ་བསྙེམས་པ་དང་བཅས་པ་གཡས་པས་མཆོག་སྦྱིན་དང་བཅས་པའོ། །རྡོ་རྗེ་ལྕགས་ཀྱུ་འཛིན་པར་བྱེད་པའི་ཁུ་ཚུར་ཆེན་པོ་གང་ཡིན་པ་དེ་བཞིན་དུ་བརྗོད་དོ། །འབར་བ་འཕྲོ་བས་རྣམ་པར་བརྒྱན། །ཞེས་པ་ནི་རབ་ཏུ་གཡོ་བའི་འོད་ཟེར་འཁྲུགས་པའོ། །སྔགས་ཀྱི་ཡི་གེ་ལེགས་པར་སྦྱར། །ཞེས་པ་ནི་འོད་ཀྱི་དཀྱིལ་འཁོར་དུ་སྔགས་ཀྱི་ཡི་གེ་དགོད་པའོ། །ལྕགས་ཀྱུའི་ཕྱག་རྒྱ་ནི་སྔར་བཤད་པའི་རྡོ་རྗེ་རྒྱལ་པོའི་ཕྱག་
རྒྱའོ། །དེའི་ཡང་དག་པར་སྦྱར་བ་ནི་དེ་བཅིངས་ནས་ཀུན་དུ་འདོན་པའོ། །རྡོ་རྗེ་རྒྱལ་པོའི་དཀྱིལ་འཁོར་ལ་ཡང་ཐམས་ཅད་སྔར་བཞིན་ལས་ཁྱད་པར་ནི་ཞགས་པ་ལྕགས་ཀྱུ་འཛིན་ཞེས་པ་ལ་སོགས་པ་སྟེ་ཕྱག་གཉིས་ཀྱིས་ཞགས་པ་འཛིན་པའོ། །གཉིས་ཀྱིས་ལྕགས་ཀྱུ་འཛིན་པའོ་ཞེས་ཇི་སྲིད་པའོ། སྡེ་ཚན་གཉིས་པའི་གསུམ་པ་ནི་ཛ་ཡིག་གོ །གཉིས་འགྱུར་ཉིད་དུ་རྣམ་པར་གནས། །ཞེས་པ་ནི་ཡང་དག་པར་སྦྱར་བ་བྱས་པའོ། མྱང་འདས་ཐིག་ལེ་ཞེས་པ་ནི་ཚེག་དྲག་གོ །རབ་ཏུ་བསྐོར་ཞེས་པ་ནི་འོད་ཀྱི་དཀྱིལ་འཁོར་དུ་གནས་པའོ། །སྒེག་མོ་ལ་སོགས་པ་ནི་སྔོན་བཞིན་ཡང་ངོ༌། །རྡོ་རྗེ་ཆགས་པའི་དཀྱིལ་འཁོར་ལ་ཡང་ཕྱག་བཞིན་ཞེས་པ་ནི་གཡོན་པས་གཞུ་འཛིན་གཡས་པས་མདའ་འཕེན་པའོ། །གཡོན་གཞན་གྱིས་བསྙེམས་པ་དང་བཅས་པ་གཡས་ཀྱིས་མཆོག་སྦྱིན་པའོ། །སྔགས་ཀྱི་ཕྲེང་བས་རྣམ་པར་བརྒྱན། །ཞེས་པ་ནི་འོད་ཀྱི་དཀྱིལ་འཁོར་དུ་ཧོ་ཡིག་གེ་ཕྲེང་བས་རྣམ་པར་མཛེས་པའོ། །མེ་ཏོག་མདས་ནི་ཡོངས་སུ་བསྐོར། །ཞེས་པ་ནི་ངོས་བཞི་པོ་རྣམས་སུ་མེ་ཏོག་གི་མངའ་རྣམས་ཀྱིས་ཡོངས་སུ་བསྐོར་བའོ། །སྒེག་མོ་ལ་སོགས་པ་དེ་དག་ཀྱང་བལྟ་བར་བྱའོ། །འཆད་པར་འགྱུར་བའི་རྡོ་རྗེ་ཁུ་ཚུར་གྱི་དཀྱིལ་འཁོར་གྱི་མཐར་ཐུག་པ་རྣམས་སུ་གང་མ་བརྗོད་པ་དེ་དང་དེ་དག་གི་རྒྱུད་ཀྱང་དབང་དུ་བྱས་པའོ། །རྡོ་རྗེ་ལེགས་པའི་དཀྱིལ་འཁོར་ལ་ཡང་ཧ་ཡིག་གི་སྔོན་མ། སེམས་ཅན་དོན་ནི་རབ་སྒྲུབ་བྱེད། །ཞེས་པ་ས་ཡིག་གོ །ཐིག་ལེ་གཉིས་ནི་ཚེག་དྲག་གོ །སངས་རྒྱས་ཐམས་ཅད་མཉམ་པར་སྤྱོད། །ཅེས་པ་ནི་སངས་རྒྱས་ཐམས་ཅད་བསྔགས་པར་བྱའོ། །རྡོ་རྗེ་གཟི་བརྗིད་ཀྱི་དཀྱིལ་འཁོར་དུ་ཡང༌། ཀུན་ན་སངས་རྒྱས་ཉིད་མཚུངས་པ། །ཞེས་པ་ནི་ཐམས་ཅད་དུ་སངས་རྒྱས་ཉིད་སྦྱིན་པའོ། །དབྱངས་ཀྱི་བཅུ་གཅིག་པ་ནི་ཨ་ཡིག་གོ །སྔགས་ཀྱི་ཕྲེང་བས་ཡོངས་སུ་བསྐོར། །ཞེས་པ་ནི་འོད་ཀོར་ལ་རང་གི་སྔགས་ཀྱི་ཡི་གེའི་ཕྲེང་བས་བསྐོར་བའོ། །ཕྱག་རྒྱའི་མཚན་མ་ཞེས་པ་ནི་ཕྱག་གཉིས་ཀྱིས་ཉི་མའི་དཀྱིལ་འཁོར་དང་རིན་པོ་ཆེའི་དཀྱིལ་འཁོར་འཛིན་པའོ། །ངོས་བཞི་པོ་རྣམས་སུ་ཡང་དེ་ཁོ་ནས་ཡོངས་སུ་བསྐོར་བའོ། །སངས་རྒྱས་ཐམས་ཅད་མཆོད་ནས་ཞེས་པ་ནི་བསྡུ་བ་ལ་སོགས་པ་སྔོན་མ་ཅན་ནི་ལྷག་མའོ། །རྡོ་རྗེ་རྒྱལ་མཚན་གྱི་དཀྱིལ་འཁོར་ལ་ཡང་རིན་ཆེན་ཏོག་གི་དཀྱིལ་འཁོར་ནི་རིན་པོ་ཆེའི་དཀྱིལ་འཁོར་རོ།།
ཕྱག་བཞི་ཞེས་པ་ནི་གཉིས་ཀྱིས་རྒྱལ་མཚན་འཆང་བའོ། །གཡོན་པས་བསྙེམས་པ་དང་བཅས་པ་གཡས་ཀྱིས་མཆོག་སྦྱིན་པའོ། །སྡེ་ཚན་བཞི་པའི་དང་པོ་ལ། །མེ་ཡི་གསལ་བ་ཅན་ནི་ཏྲ་ཡིག་གོ །དེ་ཡང་ཚེག་དྲག་དང་བཅས་པར་བལྟ་བར་བྱའོ། །རྡོ་རྗེ་བཞད་པའི་དཀྱིལ་འཁོར་ལ་ཡང་གཉིས་ཀྱིས་སོའི་ཕྲེང་བ་འཛིན་པ་གཡོན་གྱིས་བསྙེམས་པ་དང་བཅས་པ་གཡས་ཀྱིས་མཆོག་སྦྱིན་པའོ། །རྒྱུ་དོན་རབ་ཏུ་སྒྲུབ་བྱེད་པ། །ཞེས་པ་ནི་ཧ་ཡིག་གོ །དེ་ཡང་ཚེག་དྲག་དང་བཅས་པའོ། །རྡོ་རྗེ་སྨྲ་བའི་དཀྱིལ་འཁོར་ལ་ཡང་དངོས་གྲུབ་རབ་ཏུ་སྟེར་བ་པོ་ཉིད་ཀྱི་ཕྱིར་དངོས་གྲུབ་ཀྱི་དཀྱིལ་འཁོར་རོ། །རྡོ་རྗེའི་ཐིག་གིས་ཡོངས་སུ་བསྐོར་བ་ཉིད་ཀྱི་ཕྱིར་རྡོ་རྗེའི་དཀྱིལ་འཁོར་རོ། །མེ་ལ་ཡང་དག་འབྱུང་ཞེས་པ་ནི་མེའི་དཀྱིལ་འཁོར་ལ་གནས་པའོ། །དེ་ཉིད་གསལ་བར་གྲུ་གསུམ་ཞེས་བྱ་བ་ལ་སོགས་པ་གསུངས་པ་ཆོས་ཀྱི་དབྱིངས་ཀྱི་ཡི་གེ་ནི་ར་ཡིག་གོ །དེའི་སྔགས་ཉིད་ཀྱི་ཕྱིར་ཆོས་དབྱིངས་ཡི་གེ་སྟེ་བཅོམ་ལྡན་འདས་ཀྱང་ངོ༌། །ཐམས་ཅད་གཟི་བརྗིད་རང་བཞིན་ཞེས་པ་ནི་འོད་ཟེར་སྣ་ཚོགས་པའི་ཕྲེང་བའོ། །ཕྱག་བཞི་ཞེས་པ་ནི་གཉིས་ཀྱིས་ཀྱང་བསྙེམས་པ་དང་བཅས་པ་དང་མཆོག་སྦྱིན་པའོ། །གཉིས་པ་ཞེས་བྱ་བ་ལ་སོགས་པ་རྣམས་ཀྱིས་ཏིང་ངེ་འཛིན་གཞན་སྟོན་པར་བྱེད་དོ། །བརྗོད་བྱའི་དབྱེ་བ་ཞེས་པ་ནི་དོན་འབྱེད་པར་མངོན་པར་དགོངས་སོ་ཞེས་པ་ཇི་སྲིད་པའོ། །རྡོ་རྗེ་སྲུང་བའི་དཀྱིལ་འཁོར་ལ་ཡང་གོ་ཆ་ཞེས་པ་ནི་གོ་ཆའོ། །ཕྱག་བཞི་ཞེས་པ་ནི་གཉིས་ཀྱིས་གོ་ཆ་འཛིན་པའོ། །གཡོན་པས་མེ་ཏོག་དམར་པོ་འཛིན་པའོ། །གཡས་ཀྱིས་མཆོག་སྦྱིན་པའོ། །སྣ་ཚོགས་ཁ་དོག་སྣ་ཚོགས་ཏེ་སྔར་བརྗོད་པའི་རྡོ་རྗེ་ཁུ་ཚུར་བཞིན་ནོ། །གཟི་བརྗིད་ཆེ་ཞེས་པ་ནི་འོད་ཟེར་འབར་བ་དང་ལྡན་པའོ། །ཕྱག་རྒྱ་སྔགས་དང་ཡང་དག་ལྡན། །ཞེས་པ་ཕྱག་དང་ངོས་བཞི་པོ་རྣམས་སུའོ། །སྔགས་དང་ཡང་དག་པར་ལྡན་པ་ནི་འོད་ཀྱི་དཀྱིལ་འཁོར་ལའོ། །ཤ་ཥའི་སྡེ་མཐའ་ཅན་ཞེས་པ་ནི་ཧ་ཡིག་གོ །ནཱ་ད་ཡིས་ནི་སྟེང་དུ་བརྒྱན། །ཞེས་པ་ནི་རྗེས་སུ་སྣ་ལྡན་དང་བཅས་པའོ། །སྣ་ཚོགས་ཁ་དོག་གིས་བསྒོམས་པས། །ཞེས་པ་ནི་འོད་ཟེར་སྣ་ཚོགས་ཀྱིས་སོ། །སྔགས་ཀྱི་ཕྲེང་བས་ཡོངས་སུ་བསྐོར། །ཞེས་པ་ནི་འོད་ཀོར་ལའོ། །གློག་གི་ཕྲེང་བས་རྣམ་པར་བརྒྱན་ནི་དེ་དང་དེ་ཁོ་ནའོ། །རྡོ་རྗེ་ཁུ་ཚུར་གྱིས་དཀྱིལ་འཁོར་ལ་ཡང་རྡོ་རྗེ་པདྨ་ཞེས་པ་ནི་སྣ་ཚོགས་རྡོ་རྗེ་ལ་གནས་པའི་པདྨ་
ལའོ། །ཕྱག་བཞི་ཞེས་པ་ནི་གཉིས་ཀྱིས་ཁུ་ཚུར་གྱི་ཕྱག་རྒྱ་འཆིང་བའོ། །གཡས་པས་མཆོག་སྦྱིན་པའོ། །དེ་བཞིན་གཤེགས་པ་རྣམས་ཀུན་གྱི་ཁུ་ཚུར་ཞེས་པ་དེ་དག་ཁོ་ནའི་སྒྲུབ་པར་བྱེད་པ་སྐུ་དང་གསུང་དང་ཐུགས་ཞེས་པ་གསུངས་པ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་གཅིག་པ་ཅན་དུ་བྱེད་དོ་ཞེས་པའི་དོན་ནོ། །རྡོ་རྗེ་སེམས་དཔའ་ཞེས་པ་ནི་དབྱེ་བར་བྱར་མེད་པའི་སེམས་སོ། །མཉམ་ཉིད་མཆོག་ཅེས་པ་ཁོ་ན་བསྟན་པ་གསུངས་པ་གཉིས་ཉིད་མེད་ཅེས་པ་སྟེ་མཆོག་ནི་སེམས་དཔའི་མཆོག་ཉིད་ཀྱི་ཕྱིར་རོ། །གསང་བ་ནི་སྔགས་ཀྱི་སེམས་དཔའ་རྣམས་ཀྱིས་བསྲུང་བར་བྱ་བ་ཉིད་ཀྱི་ཕྱིར་རོ། །སྡུད་པ་ཞེས་པ་ནི་གཅིག་པ་ཅན་དུ་བྱེད་པའོ། །སྡེ་ཚན་ལྔ་པའི་གསུམ་པ་ནི་པ་ཡིག་གོ །དེ་ཡང་རྗེས་སུ་ང་རོ་དང་བཅས་པར་བལྟ་བར་བྱའོ། །རྡོ་རྗེ་སེམས་དཔའ་དང་རིན་ཆེན་དང་ཆོས་དང་ལས་རྣམས་རིམ་པས་རྣམ་པར་སྣང་མཛད་ཆེན་པོ་དང་ནམ་མཁའི་སྙིང་པོ་དང་འགྲོ་བ་འདུལ་བ་དང་རྡོ་རྗེ་ཁུ་ཚུར་གྱི་རང་བཞིན་ཡིན་པ་ཉིད་ཀྱི་ཕྱིར་དཀྱིལ་འཁོར་གསུངས་སོ་ཞེས་པས་འདིར་ནི་ཉེ་བར་བཀོད་དོ། །འདིར་ཕྱག་རྒྱ་དགོད་པ་ཉེ་བར་མ་བཀོད་པ་གང་ཡིན་པ་དེ་རྣམས་ཀྱང་ངོས་བཞི་པོ་རྣམས་སུ་རང་གི་མཚན་མའི་ཕྱག་རྒྱ་ཉིད་གཞག་པར་བྱའོ། །སྔར་གསུངས་པའི་རྡོ་རྗེ་ལ་སོགས་པ་རྣམས་ཀྱིས་ཀྱང་དེ་རྣམས་ཀྱི་ཕྱག་དང་ཁ་དོག་དང་ཏིང་ངེ་འཛིན་ལ་སོགས་པའི་དབྱེ་བས་ཁྱད་པར་ཡོད་པར་ཁོང་དུ་ཆུད་པར་བྱའོ། །ད་ནི་འཇིག་རྟེན་པའི་དཀྱིལ་འཁོར་ཉེ་བར་བསྟན་པ་དེ་ནས་ཞེས་པ་ལ་སོགས་པ་གསུངས་པ། དེ་ལ་དབང་ཕྱུག་ཆེན་པོའི་དཀྱིལ་འཁོར་ལ། སྒོ་ཁྱུད་ལ་སོགས་རྣམ་པར་སྤང༌། །ཞེས་པའི་སོགས་ཀྱི་སྒྲས་རྟ་བབས་ལ་སོགས་པ་དང་བྲལ་བའོ། །སྒོ་གཅིག་པར་རེ་ཁཱ་དཀར་པོའི་དཀྱིལ་འཁོར་ལའོ། །ཕྱག་བཞི་ཞེས་པ་ནི་གཉིས་ཀྱིས་མདུད་རྩེ་གསུམ་པ་དང་པཊྚིས་འཛིན་པའོ། །གཉིས་ཀྱིས་དུང་དང་པདྨ་འཛིན་པའོ། །ཆུའི་དཀྱིལ་འཁོར་དབུས་སུ་ཞེས་པ་ནི་གྲུ་བཞི་པའི་དཀྱིལ་འཁོར་ལ་ཆུའོ། །དེ་ལས་ཁྱུ་མཆོག་གོ །དེ་ལ་ཞོན་པའོ། །མདུད་རྩེ་གསུམ་པ་ལ་སོགས་པའི་ཕྱག་རྒྱ་རང་གི་ངོས་རྣམས་སུ་དགོད་པར་བྱའོ། །འདི་ཉིད་ལ་ཞེས་པ་དབང་ཕྱུག་ཆེན་པོའི་དཀྱིལ་འཁོར་དུ་དགའ་བྱེད་དབང་ཕྱུག་ཀྱང་གར་བྱེད་པ་གཞག་པར་བྱའོ། །ཕྱག་བཞི་ཞེས་པ་ཡང་དེ་ཁོ་ན་དང་སྦྲེལ་ལོ། །ལག་པ་སྟོང་གིས་ཞེས་པ་ནི་ནག་པོ་ཆེན་པོ་ཉིད་ཀྱིའོ།།
རྩེ་གསུམ་གྱི་ཕྱག་རྒྱ་ངོས་རྣམས་སུ་གཞག་པར་བྱའོ། །འདི་ཉིད་ཀྱི་ནི་ཆོ་ག་ཡིས། །ཞེས་པ་ནི་སྒོ་ཁྱུད་ལ་སོགས་པ་རྣམ་པར་སྤངས་པའི་རིགས་པས་སོ། །སྦྲང་རྩིར་བྱེད་པ་ལ་སོགས་པའི་མིང་པོ་གསུམ་ཞེས་པ་སྦྲང་རྩིར་བྱེད་པ་དང༌། རྒྱལ་བར་བྱེད་པ་དང་གྲུབ་པར་བྱེད་པ་རྣམས་ཏེ་དེ་རྣམས་རིམ་པས་འདོད་ཆགས་དང་ཞེ་སྡང་དང་གཏི་མུག་གི་བདག་ཉིད་ཅན་ཚངས་པ་དང་དྲག་པོ་དང་ཁྱབ་འཇུག་རྣམས་ཇི་སྲིད་པར་རོ། །གཞུའི་ཕྱག་རྒྱ་ཡོངས་སུ་འཛིན། །ཞེས་པ་ནི་ལག་པ་གཡོན་པ་ན་གཞུའོ། །མེ་ཏོག་མདའ་ནི་ཡོངས་སུ་འཕེན། །ཞེས་པ་གཡས་པས་མདའ་འཛིན་པའོ། །ངོས་བཞི་པོ་རྣམས་སུ་རང་གི་མདའི་ཕྱག་རྒྱས་ཡོངས་སུ་བསྐོར་བའོ། །འདོད་ཆགས་སྦྲང་རྩིར་བྱེད་པར་གསུངས། །ཞེ་སྡང་རྒྱལ་བར་བྱེད་པར་དྲན། །གཏི་མུག་གྲུབ་བྱེད་རབ་ཏུ་བརྗོད། །ཀུན་དུ་གསང་བའི་མིང་རྣམས་སོ། །ཞེས་པས་འདི་རྣམས་ཀྱི་མིང་རྣམས་ཀྱི་མཚན་མ་དེ་དག་འདོད་ཆགས་ལ་སོགས་པ་རྣམས་སུ་བསྒོས་པས་ཉེ་བར་མཚོན་པའོ། །དེ་ལྟར་ཞེས་པ་ནི་རྡོ་རྗེ་སྦྲང་རྩི་ལ་སོགས་པའི་དཀྱིལ་འཁོར་བཞིན་དུ་འདབ་མ་བཞི་པ་ཞེས་པ་ནི་པདྨ་འདབ་མ་བཞི་པ་ལའོ། །རྒྱལ་མ་དམར་པོ་གཞུ་དང་མདའ་དང་ལྡན་པའོ། །རྣམ་རྒྱལ་ནག་པོ་ཕུབ་དང་རལ་གྲི་འཛིན་པའོ། །མི་ཕམ་སེར་མོ་གཏེར་གྱི་ལག་པའོ། །གཞན་གྱིས་མི་ཐུབ་མ་དཀར་མོ་ཐོད་པ་དང་བཅས་པའི་གྲི་རིངས་འཛིན་པའོ། །གཞོགས་སུ་རང་གི་མཚན་མ་དེ་རྣམས་བྲི་བར་བྱའོ། །གོ་རིམས་ཇི་ལྟ་བ་བཞིན་དུ་སྔགས་རྣམས་གཞག་པར་བྱའོ་ཞེས་པ་ནི་རང་གི་སྔགས་འདི་དག་འདོན་ཅིང་དགོད་པར་བྱའོ། །འཇིག་རྟེན་པ་ལ་ཡང་ལག་པ་གཡོན་པའི་ཁུ་ཚུར་འདི་རྣམས་ཀྱི་ཕྱག་རྒྱ་སྟེ་དེ་ཁོ་ན་བཞིན་དུ་ལག་པའི་རྒྱབ་ཅེས་པ་ཨོཾ་གྱི་ཡི་གེ་དེ་ཉིད་དགོད་དོ། །རྡོ་རྗེ་ཕྲེང་བ་ཞེས་འབར་བའི་མཐར་ཐུག་པར་རྡོ་རྗེ་རྩེ་གསུམ་པའི་ཕྲེང་བའོ། །ཡང་དག་སྦྱོར་ལས་ཞེས་པ་དབང་དུ་བྱེད་པ་ལ་ཨོཾ་ཡིག་དམར་པོ་བསྒྲུབ་བྱའི་མིང་དང་སྤེལ་བ་བྲིའོ། །དེ་ལ་བསྒྲུབ་བྱ་ནང་དུ་བསྒོམས་ནས་འོད་ཟེར་དམར་བོའི་ཕྲེང་བ་ཅན་གྱི་སོར་མོ་དཔྱད་པར་བྱའོ། །རྣམ་པར་དབྱེ་བ་ཡང་ཞེས་པ་དགུག་པ་ལས་ཏེ་དེ་ཁོ་ན་བཞིན་དུ་བསམས་ནས་བསྒྲུབ་བྱ་དགུག་པའི་ཚུལ་གྱིས་དེ་ལ་མངོན་དུ་ཕྱོགས་པའི་སོར་མོའི་ལྕགས་ཀྱུ་རྣམ་པར་དབྱེ་བར་བྱའོ། །ཕྱག་རྒྱ་ཞེས་པ་རྨོངས་པ་ལས་ཏེ་ནག་པོར་བསམས་ནས་ཕྱག་རྒྱ་བྱའོ། །ཀུན་སྤྱོད་ཅེས་པ་ནག་པོ་
ཉིད་བསམས་ནས་བསྒྲུབ་བྱ་དེ་ཡི་གེ་ཉིད་ཀྱི་ནང་དུ་བཅུག་ནས་སོར་མོའི་མཛུབ་མོ་ལས་གཞན་ཀུན་དུ་དཔྱད་པར་བྱའོ། །བསྡུས་པ་ཞེས་པ་དེ་བཅིང་པ་ལས་ཏེ་དེ་བཞིན་ཁོ་ན་བསམས་ནས་བསྒྲུབ་བྱ་ནང་དུ་བཅུག་སྟེ་སོར་མོའི་རྩེ་མོས་བཙིར་བར་བྱའོ། །དེའི་སྟེང་དུ་ལྷའམ་ལྷ་མོ་བལྟའོ། །དེ་རྣམས་ཐམས་ཅད་དང་དེ་ཐམས་ཅད་དེའོ། །རྨོངས་པ་ལ་སོགས་ཞེས་པ་སོགས་ཀྱི་སྒྲས་བསྒྲད་པའོ། །རེངས་པ་སོགས་ཀྱིས་འདི་ལས་གཞན་པའི་ལས་ཀྱང་འདིའི་ནང་དུའོ། །གོ་རིམས་བཞིན་ཞེས་པ་ཇི་ལྟར་རྗེས་སུ་མཐུན་པར་རོ། །རྡོ་རྗེ་སྙིང་པོའི་རྒྱན་དུ་རྩ་བའི་རྒྱུད་ཀྱི་རྣམ་པར་འབྱེད་པའོ། །རྒྱུད་ཕྱི་མ་ཉེ་བར་མཆོག་ཏུ་འཕགས་བ་དེ་ནས་བཅོམ་ལྡན་འདས་ཞེས་པ་ལ་སོགས་པ་གསུངས་པ་བྱང་ཆུབ་སེམས་ཞེས་པ་ནས་བརྩམས་ནས། རྡོ་རྗེ་རྣལ་འབྱོར་དབང་ཕྱུག་མཆོག །ཅེས་པ་ཇི་སྲིད་རྣམ་པར་སྣང་མཛད་ཀྱི་སྒོ་ནས་སོ། །མི་བསྐྱོད་པ་དང་ཞེས་པ་ལ་སོགས་པ་ནས་ཐམས་ཅད་དེ་བཞིན་གཤེགས་ཞེས་པ་སྲིད་པར་མི་བསྐྱོད་པ་ལ་སོགས་པ་དེ་བཞིན་གཤེགས་པ་བཞིའི་སྒོ་ནས་སོ། །འཁོར་ལོས་སྒྱུར་བ་གཙུག་ཏོར་གྱི་སྒོ་ནས་སོ། །རྡོ་རྗེ་སེམས་དཔའ་ཞེས་པ་ནས་བརྩམས་ནས། རྡོ་རྗེ་མཚམས་སྦྱོར་ལེགས་པར་བསྒྲུབ། །ཅེས་པ་ཇི་སྲིད་པར་རྡོ་རྗེ་སེམས་དཔའ་ལ་སོགས་པ་སེམས་དཔའི་སྒོ་ནས་སོ། །ཕྱག་འཚལ་ཁྱོད་ཅེས་པ་དེ་བཞིན་གཤེགས་པ་ཐམས་ཅད་ལ་ཕྱག་བྱས་པའི་སྒོ་ནས་འདི་ལ་བསྟོད་པ་བལྟ་བར་བྱའོ། །ད་ནི་དེ་ནས་བཅོམ་ལྡན་འདས་ཞེས་པ་ལ་སོགས་པ་དྲན་པ་ཉེ་བར་གཞག་པ་ལ་སོགས་པ་ནས་དཔེ་བྱད་ཀྱི་མཐར་ཐུག་པའི་སྒྲུབ་ཐབས་ཉེ་བར་བསྡུ་བ་གསུངས་པ། སངས་རྒྱས་ཐམས་ཅད་ཀྱི་ཡུལ་རྣམས་ནི་དྲན་པ་ཉེ་བར་གཞག་པ་ལ་སོགས་པ་རྣམས་སོ། །དེ་རྣམས་ཀྱི་འཇུག་པ་ནི་གང་དུ་ཤེས་པ་སྟེ། །དེ་ནི་སངས་རྒྱས་ཐམས་ཅད་ཀྱི་ཡུལ་ལ་འཇུག་པའི་ཡེ་ཤེས་སོ། །དེ་ལྷ་དང་དབྱེར་མེད་པ་ཉིད་ཀྱི་ཕྱིར་རྡོ་རྗེའོ། །དེ་ལ་དམིགས་པའི་ཏིང་ངེ་འཛིན་ལ་ཡང་དེ་བཞིན་དུ་བརྗོད་པར་བྱའོ། །དེ་ཉིད་ཀྱང་གང་གི་མིང་ཡིན་པ་དེ་ལ་སྙོམས་པར་ཞུགས་པ་ཞེས་པ་མངོན་དུ་མཛད་པ་དང་ལྡན་པའོ། །འཇམ་དཔལ་གཞོན་ནུར་གྱུར་པ་ཞེས་པ་ནི་འཇམ་དཔལ་གཞོན་ནུར་གྱུར་པ་ཉིད་ཀྱིས་ཡོངས་སུ་གྱུར་པར་སྔར་བྱིན་གྱིས་བརླབས་པ་ལས་སོ། །དེ་བཞིན་གཤེགས་པ་ཐམས་ཅད་ཀྱི་ཤེས་རབ་ཡེ་ཤེས་ཞེས་པ་ནི་རྣམ་པར་སྣང་མཛད་ཀྱི་ཐུགས་སོ། །ཞུགས་པར་
གྱུར་ཏོ་ཞེས་བྱ་བ་ནི་ནང་དུ་ཐིམ་པ་སྟེ་མི་བསྐྱོད་པ་ལ་སོགས་པའི་ཐུགས་ལེགས་པར་བྱུང་ནས་ཞེས་པ་ལྷག་མའོ། །ཤེས་རབ་དང་ཡེ་ཤེས་རྣམ་པར་སྦྱངས་ཏེ་ཞེས་པ་ནི་དྲན་པ་ཉེ་བར་གཞག་པ་རྫོགས་པར་བྱ་སྟེའོ། །བྱང་ཆུབ་ཀྱི་སེམས་བསྐྱེད་ནས་ཞེས་པ་ལ་སོགས་པས་རྡོ་རྗེ་སེམས་དཔའ་ལ་སོགས་པའི་བྱང་ཆུབ་སེམས་དཔའ་བཅུ་དྲུག་གི་ཏིང་ངེ་འཛིན་ཡང་བསྐྱེད་ནས་ཞེས་པ་བསྟན་པའོ། །དེ་བཞིན་གཤེགས་པ་ཐམས་ཅད་ཀྱི་ཤེས་རབ་ཡེ་ཤེས་ནི་རྣམ་པར་སྣང་མཛད་ཀྱི་ཤེས་རབ་ཡེ་ཤེས་ཀྱིས་སོ། །ཡོངས་སུ་བསྐོར་བ་ཞེས་པ་ནི་ཡོངས་སུ་བསྐོར་བར་བསྐྱེད་ནས་སོ། །རྣམ་པར་ཅིས་ཤ་ན་གསུངས་པ། དེ་བཞིན་གཤེགས་པ་རྣམས་ཐམས་ཅད་ཀྱི་ཞེས་པ་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་ནི་མི་བསྐྱོད་པ་ལ་སོགས་པ་རྣམས་སོ། །ཉི་མའི་དཀྱིལ་འཁོར་ཡང་འདི་རྣམས་ཁོ་ནའོ། །ཤེས་རབ་ཀྱི་ཕ་རོལ་ཏུ་ཕྱིན་པ་མདོར་བསྟན་པ་ཆོས་ཀྱི་ཚིག་ཅེས་པ་ནི་དྲན་པ་ཉེ་བར་གཞག་པ་ལ་སོགས་པའི་ཚིག་གོ །འཇིག་རྟེན་དུ་ཡང་ཉེ་བར་ལེན་པ་མེད་དོ་ཞེས་པ་ནི་ཉེ་བར་ཐོབ་པ་མེད་པའོ། །ལུས་ལ་སོགས་པའི་ཆོས་མཉམ་པ་ཅན་ནི་སྟོང་པ་ཉིད་དོ། །གང་དེ་ཁོ་ན་གནས་ཏེ་གཞིའི་རང་བཞིན་ཡིན་པ་དེ་ཡང་ཉེ་བར་ཐོབ་པ་མེད་དོ། །རྣམ་པར་སྣང་མཛད་ཀྱི་རྣལ་འབྱོར་སྔོན་དུ་བྱས་ནས་ཞེས་པ་ནི་དེའི་སྙིང་པོ་རང་གི་སྙིང་གའི་རྡོ་རྗེ་ལ་བཀོད་ནས་དྲན་པ་ཉེ་བར་གཞག་པ་རྣམས་ཀུན་རྫོབ་དང་དོན་དམ་པ་ཇི་ལྟ་བ་བཞིན་དུ་སྒོམ་པར་བྱེད་པའི་སྐུའོ། །དེ་བཞིན་དུ་དཔེ་བྱད་རྣམས་ཀྱི་མཐར་ཐུག་པར་ཇི་སྲིད་པར་རོ། །མི་སྤོང་བའི་ཆེད་དུ་ནི་དོན་དམ་པར་ཆོས་ཐམས་ཅད་དངོས་པོ་མེད་པའི་ཕྱིར་རོ། །མི་སྤོང་བ་མ་ཡིན་པའི་ཆེད་དུ་སྟེ་མ་བྱུང་བ་ཡོངས་སུ་བརྟགས་པ་རིག་བཞིན་པ་ཉིད་ཀྱི་ཕྱིར་དོན་དམ་པར་གཉིས་སུ་མེད་པའོ། །དོན་དམ་པའི་སྒོ་ནས་དངོས་པོ་མཐར་ཐུག་པ་མེད་པའི་ཕྱིར་དང་ཀུན་རྫོབ་ཀྱི་སྒོ་ནས་ཇི་ལྟར་སྣང་བ་ཐེག་པ་ལས་སོ་སོར་འཇུག་པའོ། །སྤྲོས་པ་མེད་པ་ནི་དོན་དམ་པར་གཉིས་སུ་མེད་པའི་ཚུལ་ལོ། །ཆོས་ཐམས་ཅད་མཉམ་པ་ཉིད་ལ་གནས་པ་ནི་བཅོམ་ལྡན་འདས་རྣམ་པར་སྣང་མཛད་ཉིད་དོ། །སྟོབས་ཐམས་ཅད་ཅེས་པ་ནི་སྟོབས་བྱེད་པ་དང་བྲལ་བའོ། །ཅིས་ན་གདོད་མ་ནས་སྤྲོས་པ་མེད་པའོ། །ཅི་རུ་གཞན་ཉེ་བར་ལྷག་པའི་སྤྲོས་པ་མེད་པར་འགྱུར་ཞེན་གསུངས་པ། གདོད་མ་ནས་དག་པ་ཞེས་སོ། །ངག་སོ་སོར་ཡང་དག་པར་རིག་པ་ཞེས་པ་ནི་ངེས་པའི་ཚིག་སོ་སོར་ཡང་དག་པར་རིག་པའོ། །ཅིའི་ཕྱིར་
ཆོས་ཐམས་ཅད་གཅིག་ཏུ་རྗེས་སུ་དྲན་ཞེ་ན་གསུངས་པ། ཆོས་ཐམས་ཅད་དོན་དམ་པར་སྟོང་པ་ཉིད་ཅེས་པའོ། །མཚན་ཉིད་ནི་རང་བཞིན་མེད་པའི་བདག་ཉིད་ཅན་ནོ། །མཚན་ཉིད་མེད་པ་ནི་དེ་ལས་བཟློག་པའོ། །དེ་རྣམས་རྣམ་པར་འབྱེད་པ་ནི་སྣང་བ་མེད་པར་བྱེད་པའོ། །ངེས་མཉམ་པ་ཉིད་དེ་ཁོང་དུ་ཆུད་པའོ། །སྒོ་ནི་ཐབས་ཏེ་དེ་ཉིད་གང་གི་མིང་ཡིན་པ་དེ་ལ་དེ་བཞིན་དུ་བརྗོད་པར་བྱའོ། །བྱང་ཆུབ་ཀྱི་ཡན་ལག་བདུན་པོ་རྣམས་ཀྱི་མཉམ་པ་ཉིད་ནི་སྟོང་པ་ཉིད་དོ། །སྐྱེ་བ་མེད་པ་ཉིད་ཀྱང་མཚོན་པར་བྱ་བ་ནི་མངོན་དུ་བྱའོ། །བདག་གིས་སམ་ཞེས་བྱ་བ་དེ་ལ་དེ་བཞིན་དུ་གསུངས་སོ། །ལམ་ཟད་མི་ཤེས་པ་ནི་གང་དུ་ན་བྱང་ཆུབ་ཀྱི་སེམས་ལ་སྟེ་དེའི་འཇུག་པའོ། །ལེགས་པར་སོ་སོར་རིག་པ་ཞེས་པ་ནི་རྣམ་པ་ཐམས་ཅད་ཡོངས་སུ་ཤེས་པའོ། །དེའི་རང་བཞིན་ནི་ཐམས་ཅད་མཁྱེན་པའི་ཡེ་ཤེས་སུ་རིག་པར་འགྱུར་རོ། །མཚན་ཉིད་གཅིག་པ་ཞེས་པ་ནི་གཉིས་སུ་མེད་པའི་རང་བཞིན་ལས་སོ། །ཆོས་ཐམས་ཅད་ཅེས་པ་དང་རྒྱུ་དང་འབྲས་བུའི་ངོ་བོ་ལས་སོ། །དེ་ཉིད་ཀྱིས་ཞེས་པ་ནི་འཆད་པར་འགྱུར་བའི་སྔགས་ཀྱིས་སོ། །ལེགས་པར་སོ་སོར་རྟོག་པའི་ཕྱིར། །ཞེས་པ་ནི་ལེགས་པར་སོ་སོར་བྱེད་པའི་ཕྱིར་རོ། །ཆོས་ཐམས་ཅད་སྤྲོས་པ་མེད་པའི་མཚན་ཉིད་ནི་དོན་དམ་པའོ། །དེའི་ཕྱིར་ཡང་ཀུན་ནས་ཉོན་མོངས་པ་མེད་ཅིང་རྣམ་པར་བྱང་བ་མེད་ལ་བསམ་གཏན་མེད་ཅིང་བསམ་གཏན་མ་ཡིན་པའང་མེད་ལ་སྙོམས་པར་འཇུག་པ་མེད་ཅིང་སྙོམས་པར་འཇུག་པ་མ་ཡིན་པའང་མེད་པའོ། །མི་འཇིགས་པ་རྣམས་ཀྱིས་ནི་མཉམ་པ་ཉིད་དོ། །གང་ལས་གང་ཞིག་ན་ཆོས་ཐམས་ཅད་སྒྱུ་མའི་མཚན་ཉིད་དོ། །དེ་ལྟར་ན་ཡང་ཅིའི་ཕྱིར་ཞེ་ན་གསུངས་པ། ངའི་རྣམ་པ་ཞེས་པ་ལ་སོགས་པ་སྟེ་ངར་འཛིན་པ་དང༌། ང་ཡི་བར་འཛིན་པ་ནི་བདག་དང་བདག་གི་བར་མངོན་པར་ཞེན་བ་དག་དང་བྲལ་བ་ཉིད་ཀྱི་ཕྱིར་རོ། །རྣམ་པར་ཐར་པ་བརྒྱད་མཉམ་པ་ཉིད་ཅེས་པ་ནི་སྙོམས་པར་འཇུག་པ་བརྒྱད་སྟོང་པ་ཉིད་དོ། །རྣམ་པར་ཐར་པ་མཉམ་པ་ཉིད་ཅེས་པ་ནི་སྙོམས་པར་འཇུག་པ་དགུ་དང་གཉིས་སུ་མེད་པ་ཉིད་དོ། །ཐམས་ཅད་ཅེས་པ་ནི་སྦྱིན་པ་ལ་སོགས་པ་ཐབས་ཀྱི་མཐར་ཐུག་པའོ། །མི་མཉམ་པ་ལ་སོགས་པའི་མཐར་ཕྱིན་པ་ཉིད་ནི་རང་བཞིན་དུ་འགྱུར་རོ། །ཇི་ལྟར་ན་བརྟན་པར་རྗེས་སུ་རྟོགས་པའི་སྦྱོར་བས་བསྒོམ་པ་ཕྱི་རོལ་གྱིས་སོ། །ཡེ་ཤེས་ཀྱི་དོན་ཏོ་ཞེས་པ་ནི་ཡེ་ཤེས་
ཀྱི་རང་བཞིན་ནོ། །ཅིའང་མེད་པ་ཞེས་པ་ནི་དམིགས་པ་དང་བྲལ་བའོ། །ཉོན་མོངས་མེད་པ་ཞེས་པ་ནི་ཀུན་ནས་ཉོན་མོངས་པ་མེད་པའོ། །ཡི་གེ་མེད་པ་ཞེས་པ་ནི་སྒྲ་དང་ལྡན་པ་མ་ཡིན་པའོ། །དེའི་ཕྱིར་དོན་ཡོད་པ་སྟེ་སྤྱོད་པ་དང་བྲལ་བའོ། །གདོད་ནས་དག་པ་ནི་གློ་བུར་གྱི་དྲི་མ་དང་བྲལ་བ་ཉིད་ཀྱི་ཕྱིར་རོ། །དྲི་མ་དང་བྲལ་བ་དང་འོད་གསལ་བ་གཉིས་སུ་མེད་པ་དང་རྣམ་པར་རྟོག་པ་མེད་པའི་ཕྱིར་རོ། །དེའི་ཕྱིར་ཡང་མངོན་པར་བརྗོད་བྱ་མ་ཡིན་པ་སྟེ། བྱང་ཆུབ་སེམས་དཔའ་རྣམས་ཀྱིས་གང་འདི་ལ་རྣམ་པར་གནས་པ་དེ་རྣམ་པར་བཞག་པའོ། །གང་ལས་གང་གི་ཕྱིར་ན། དོན་དམ་པར་ན་གནས་པ་དང་བྲལ་བ་དེ་ཡང་ཅི་ལྟར་རྣམ་བར་མེད་པ་ཉིད་ཀྱི་ཕྱིར་སྟོང་པ་ཉིད་གཅིག་ཏུ་རྣམ་པར་གནས་པས་རྣམ་པར་གཞག་པ་གཅིག་གོ །དབང་ཐམས་ཅད་བ་ཡང་དོན་དམ་པར་རང་བཞིན་རྣམ་པར་དབེན་པའོ། །ཀུན་རྫོབ་ཏུ་དབང་ཕྱུག་ཐམས་ཅད་ལ་དབང་རྗེས་སུ་ཐོབ་པའོ། །གང་ལས་ན་ཆོས་ཐམས་ཅད་ལེགས་པར་སོ་སོར་རྟོགས་པ་ཉིད་ཀྱི་ཕྱིར་རོ། །ཐམས་ཅད་དུ་ཞེས་བྱ་བ་ནི་ཡུལ་དུའོ། །ཐམས་ཅད་མཉམ་པ་ཉིད་ཀྱིས་བྱ་བ་ནི་ཆོས་ཐམས་ཅད་མཚུངས་པ་ཉིད་ཀྱིས་སོ། །སྟོང་པ་ཉིད་ལས་ཡང་དག་པར་རྗེས་སུ་རྟོགས་པ་ཉིད་ཀྱི་ཕྱིར་ཏེ། དེའི་ཕྱིར་ཡང་ཤེས་རབ་ཡོངས་སུ་དག་པའོ། །ཅིའི་ཕྱིར་མཚན་མངོན་པར་འགྲུབ་པར་བལྟ་བར་བྱ་བ་མ་ཡིན་ཞེ་ན་གསུངས་པ། བྱང་ཆུབ་ནི་མཚན་ཉིད་མེད་པ་ཉིད་ཀྱི་ཕྱིར་ཞེས་པ་གང་ལས་བྱང་ཆུབ་ལ་མཚོན་པར་བྱ་བ་མེད་པའོ། །གང་ཞིག་ཆོས་ཐམས་ཅད་མཚན་ཉིད་མེད་པར་འགྱུར་ཞེན་གསུངས་པ་འདི་ལྟ་སྟེ། སྟོང་པ་ཉིད་ཀྱི་མཚན་ཉིད་དོ། །ཞེས་པའོ། །སྟོང་པ་ཉིད་དུ་མཉམ་པ་ཞེས་པ་ནི་དེའི་རང་བཞིན་ནོ། །གང་གིས་ན་དེ་ལྟར་དེ་བཞིན་གཤེགས་པ་ཐམས་ཅད་དང༌། བྱང་ཆུབ་དང་ཆོས་ཐམས་ཅད་ཀྱང་མཚན་ཉིད་གཅིག་པ་སྟེ། འདི་ལྟ་སྟེ། ནམ་མཁའི་མཚན་ཉིད་ཅན་ཞི་བའི་མཚན་ཉིད་ཅན་ནོ་ཞེས་པའོ། །ཚད་མེད་པའི་དཔེ་བྱད་མཉམ་པ་ཉིད་ལ་ལེགས་པར་རབ་ཏུ་གནས་པ་ནི་དོན་དམ་པར་དཔེ་བྱད་རྣམས་ཀྱི་དངོས་པོ་མེད་པའི་ཕྱིར་རོ། །ཀུན་རྫོབ་དང་དོན་དམ་པར་གསལ་བྱེད་མ་ཡིན་པ་མཉམ་པ་ཉིད་ལ་ལེགས་པར་རབ་ཏུ་གནས་པ་ནི་མངོན་པར་ཞེན་པ་མེད་པའོ། །མཚན་དང་དཔེ་བྱད་རྣམས་སྒྱུ་མའི་ཆོས་དང་ལྡན་པ་ལ་ལེགས་པར་རབ་ཏུ་གནས་པ་དུས་གསུམ་གྱི་དཔེ་བྱད་ཅེས་པ་ནི་འདས་པ་ལ་
སོགས་པའི་དུས་སོ། །དེའི་མཉམ་པ་ཉིད་ཁོ་ན་རྡོ་རྗེ་ལྟ་བུའི་ཆོས་མཉམ་པ་ཉིད་དོ། །དེ་ཐོབ་པ་ནི་སྟོང་པ་ཉིད་ཆོས་ཀྱི་དབྱིངས་ཐམས་ཅད་དང་དཔེ་བྱད་མཉམ་པ་ཉིད་རྗེས་སུ་ཐོབ་པའོ། །དེའི་ཕྱིར་ཡང་གཉིས་སུ་མེད་པ་ནི་དོན་ལ་ཡང་དག་པར་ཞུགས་པ་གཉིས་སུ་མེད་པའི་རང་བཞིན་དུ་སྐྱེས་པའོ། །དེ་བཞིན་གཤེགས་པ་ཐམས་ཅད་ནི་མི་བསྐྱོད་པ་ལ་སོགས་པ་རྣམས་སོ། །དེ་ལ་སེམས་དཔའ་ཆེན་པོའི་དོན་ཉེ་བར་སྟོན་པའི་ཕྱིར་ཡོངས་སུ་ཚིམ་པར་རྒྱུན་དུ་ལེགས་སོ་ཞེས་པ་འཆད་པར་འགྱུར་བ་བཞིས་རིགས་ཅན་བཞི་པོ་རྣམས་ཀྱི་དཀྱིལ་འཁོར་གྱི་སྒོ་ནས་སོ། །ཕྱག་བྱ་བ་བཞི་པོ་རྣམས་ནི་དེ་བཞིན་གཤེགས་པ་བཞིའི་དབྱེ་བས་ཁོང་དུ་ཆུད་པར་བྱའོ། །ཨེ་མ་ཧོ་ཞེས་པ་ནི་ཡང་དག་པར་རྗོད་པར་བྱེད་པ་ལ་ཡ་མཚན་པའོ། །རྡོ་རྗེ་རྣལ་འབྱོར་གྱི་དབང་ཕྱུག་ཆེན་པོ་ནི་རྣམ་པར་སྣང་མཛད་དོ། །དེ་བཞིན་གཤེགས་པ་ཐམས་ཅད་ནི་མི་བསྐྱོད་པ་ལ་སོགས་པ་རྣམས་སོ། །ཨ་ཧའི་རྣམ་པ་ལ་སོགས་པ་བཞི་པོ་རྣམས་ཀྱང་མི་བསྐྱོད་པ་ལ་སོགས་པ་བཞི་པོ་དེ་དང་དེའི་རང་བཞིན་ནོ། །འདི་ཉིད་ནི་ཕྱག་བྱ་བ་ཡང་དག་པར་བསྡུས་ཏེ་བསྟན་ནོ། །རིགས་ཐམས་ཅད་ཀྱི་འཁོར་ལོ་ཞེས་པ་ནི་དེ་བཞིན་གཤེགས་པ་ལ་སོགས་པའི་རིགས་སོ།། རྣམ་པར་སྣང་མཛད་ཆེན་པོའི་གསང་བའི་དཀྱིལ་འཁོར་ཉེ་བར་བསྟན་པ་གསུངས་པ། དེ་ནས་བཅོམ་ལྡན་འདས་ཞེས་པ་ལ་སོགས་པ་སྟེ། ཀུན་དུ་སྣ་ཚོགས་བྱ་བ་རྣམས། །ཞེས་པ་ནི་རྣམ་པར་སྣང་མཛད་ཆེན་པོའི་བྱ་བའམ་སྐུ་དེ་ནི་རྣམ་པར་དབེན་པའི་ས་ལས་བསྒྲུབ་པར་བྱའོ། །དངོས་གྲུབ་མཆོག་ཅེས་བ་ནི་འཁོར་ལོས་སྒྱུར་བའི་དངོས་གྲུབ་བོ། །རིའི་རྩེ་མོ་རྣམས་སུའམ་དུར་ཁྲོད་ལ་སོགས་པ་རྣམས་སུ་རྡོ་རྗེ་འཛིན་པ་དང་རྡོ་རྗེ་ཧཱུཾ་མཛད་དང་དེའི་བྱ་བ་རྣམས་སོ། །པདྨའི་སྐྱེད་མོས་ཚལ་ལ་སོགས་པ་རྣམས་སུ་ཕྱག་ན་པདྨོ་སྟེ་འཇིག་རྟེན་དབང་ཕྱུག་དང་དེའི་བྱ་བ་རྣམས་སོ། །རྒྱལ་པོའི་ཕོ་བྲང་ལ་སོགས་པ་རྣམས་སུ་ལག་ན་རིན་ཆེན་ཞེས་པ་ནམ་མཁའི་སྙིང་པོའི་བྱ་བ་དེའོ། །རྡོ་རྗེ་སྣ་ཚོགས་ཀྱི་བྱ་བ་དེ་ནི་རྟགས་གཅིག་ལ་སོགས་པ་རྣམས་སུའོ། །དཔལ་རྡོ་རྗེ་སེམས་དཔའ་ནི་ལྷའི་མཆོག་ཉིད་ཇི་སྐད་དུ་གསུངས་པ་རྣམས་སུའོ། །འདི་རྣམས་ཀྱི་ཐུན་མོང་གོ་གནས་
བསྟན་པའི་ཕྱིར་ནམ་མཁའ་ཞེས་པ་ལ་སོགས་པ་གསུངས་པ་ཕྱོགས་ཀུན་མཉམ་ཉིད་གནས་ཞེས་པ་ནི་ཕྱོགས་རྣམས་སྐབས་ཡིན་པ་དང་སྐབས་མ་ཡིན་པའི་རྣམ་རྟོག་ཡིད་ལ་མི་བྱ་བར་རོ། །ཤར་ཏེ་ཤར་གྱི་ཕྱོགས་སོ། །ལྷོ་ནི་ལྟོའི་ཕྱོགས་ཏེ། བཞི་པོ་རྣམས་སུ་དཀྱིལ་འཁོར་གྱི་ཐིག་བརྒྱད་པོའི་ཕྱི་རུ་ནི་ཕྱིའི་ཐིག་བཞི་ལ་ཀུན་ནས་གྲུ་བཞི་པའི་བྱེད་ཀྱི་དཀྱིལ་འཁོར་བརྒྱད་དོ། །ཁ་དོག་ལྔ་ཞེས་པ་ནི། སྔོན་པོ་དང༌། སེར་པོ་དང༌། དམར་པོ་དང༌། ལྗང་གུ་དང༌། དཀར་པོའི་བདག་ཉིད་ཅན་ནོ། །རྣམ་པར་སྣང་མཛད་ཆེན་པོའི་དཀྱིལ་འཁོར་དུ་དགོད་པ་བསྟན་བ་དབུས་ཀྱི་དཀྱིལ་འཁོར་དབུས་ཞེས་པ་ལ་སོགས་པ་གསུངས་པ་སངས་རྒྱས་གཟུགས་བརྙན་ཞེས་པ་ནི་རྣམ་པར་སྣང་མཛད་ཆེན་པོའོ། །སྒེག་པ་ཞེས་པ་ནི་རྡོ་རྗེ་རྒྱལ་པོ་ལ་སོགས་པ་རྣམས་སོ། །རིན་ཆེན་འབར་སོགས་པ་ཡང་དག་ལྡན། །ཞེས་པ་ནི་རྡོ་རྗེ་རིན་ཆེན་རྗེས་སུ་སོན་བའོ། །སྣ་ཚོགས་རྡོ་རྗེ་སོགས་རྣམས་ཀྱིས་ནི་རྡོ་རྗེ་ལ་སོགས་པ་རྣམས་སོ། །རྡོ་རྗེ་རྣལ་འབྱོར་ཅན་གྱི་དབང་ཕྱུག་གི་ཞེས་པ་ནི་རྣམ་པར་སྣང་མཛད་ཆེན་པོ་ཡིའོ། །གལ་ཏེ་ཡང་ཀུན་དུ་བཟང་པོ་ལ་སོགས་པ་རྣམས་ཞེས་གསུངས་པ་ནི་དེ་བཞིན་དུ་ཡང་བྱམས་པ་ལ་སོགས་པ་རྣམས་ཁོང་དུ་ཆུད་པར་བྱའོ། །དེ་བཞིན་ཞེས་པ་ནི་ཇི་ལྟར་ཆོས་ཀྱི་དབྱིངས་ཀྱི་དཀྱིལ་འཁོར་དུ་ཇི་ལྟ་བ་བཞིན་ནོ། །གཙོ་བོ་གཞན་གྱི་སྒྲུབ་པའི་དཀྱིལ་འཁོར་ཉིད་འདིར་བསྟན་པ། སྒྲུབ་པའི་ཐབས་ནི་བརྩམ་པར་བྱ། །ཞེས་པ་སྟེ་གསུངས་པ། ཀུན་དུ་སྣ་ཚོགས་སྐལ་བཟངས་ལ། །ཞེས་པ་ནི་གྲུ་བཞི་པའོ། །ཀུན་དུ་སྣ་ཚོགས་འཁོར་ལོ་ཅན་ནི་རྣམ་པར་སྣང་མཛད་ཆེན་པོའོ། །རིན་ཆེན་བདུན་པོ་ཉིད་མཆོད་པ་ཆེན་པོ་སྟེ་འཁོར་ལོས་སྒྱུར་བ་གང་གིས་ཡིན་པ་དེ་བཞིན་དུ་བརྗོད་པར་བྱའོ། །དེའི་ཡོངས་སུ་རྫོགས་པ་ནི་ཟླ་བ་བཞིན་ནོ། །དེ་ཉིད་ཀྱང་སངས་རྒྱས་རྡོ་རྗེ་འཛིན་པ་ལ་སོགས་པ་རྣམས་སོ། །རིན་ཆེན་གྱི་ཞེས་པ་ནམ་མཁའི་སྙིད་པོའིའོ། །སྣ་ཚོགས་ཞེས་པ་རྡོ་རྗེ་སྣ་ཚོགས་ཀྱིའོ། །ཡན་ལག་ཀུན་ཞེས་པ་ནི་སྤྱི་བོ་ལ་སོགས་པའི་གནས་བརྒྱད་དུའོ། །ཕྱག་རྒྱ་ཞེས་པ་ནི་རང་གི་དམ་ཚིག་གི་ཕྱག་རྒྱའོ། །རིན་པོ་ཆེའི་པདྨ་འདབ་མ་བརྒྱད་པ་ལ་རབ་ཏུ་བཞག་ནས་རྣམ་པར་རྒྱལ་བའི་བུམ་པའི་མཐར་ཐུག་པས་ཡང་དང་
ཡང་དུ་མངོན་བར་དབང་བསྐུར་ཏེ་ཐམས་ཅད་རྒྱལ་སྲིད་དུ་འགྱུར་རོ། །ལག་ལྡན་ལ་སོགས་པ་རྣམས་སུ་རབ་ཏུ་བཞག་ནས། དཔལ་གྱི་སྔགས་འདོན་པ་འདི་དག་གིས་ཀྱང་དབང་བསྐུར་བས་འདིར་ཡང་དེ་བཞིན་ནོ། །མཚོན་ཆ་ལ་སོགས་པ་ལ་རྣམ་པར་རྒྱལ་བའི་རྒྱུ་ཉིད་ཀྱི་ཕྱིར་རྣམ་པར་རྒྱལ་བ་སྟེ་ཨ་བ་རཱ་ཛི་ཏ་དཀར་པོ་དང༌། གི་རི་ཀརྞི་ཀ་གང་ཡང་རུང་བ་འདིས་དབང་བསྐུར་བ་ནི་རྒྱལ་བར་གྱུར་པ་ཞེས་གཞན་གྱིས་མི་ཐུབ་པ་སྟེ། དེ་ཉིད་དུ་གྲགས་པ་གང་ཡིན་པ་དེ་ལ་དེ་བཞིན་དུ་བརྗོད་པར་བྱའོ། །དེ་ཞེས་པ་ནི་འཁོར་ལོ་དང་བཅས་པའི་གཙོ་བོའི་ཕྱག་རྒྱ་དེ་ཞེས་པའོ། །དེ་རྣམས་ལ་ཞེས་པ་བུམ་པ་ལའོ། །འདིས་དེ་དག་བསྟན་པ་རང་གི་ལྷའི་འཁོར་ལོ་རྣམ་པར་རྒྱལ་བའི་བུམ་པ་ལའང་ཇི་ལྟ་བ་བཞིན་དུ་བསྒོམ་པར་བྱའོ་ཞེས་སོ། །མཆོག་གྱུར་པ་ཞེས་པ་ནི་གི་རི་ཀརྞི་ཀའོ། །ལྷག་གནས་ཀུན་གྱི་སྦྱོར་བ་ཡི། །ཞེས་པ་ནི་སྔར་གསུངས་པའི་མཆོད་པའི་སྔགས་ཀྱིས་སོ། །རྡོ་རྗེའི་དབང་བསྐུར་བ་ནི་རྣམ་པར་སྣང་མཛད་ཆེན་པོའི་རྣལ་འབྱོར་པ་ལ་སྟེ་སྔར་བཞིན་དུ་བཤད་པར་བྱའོ། །ཅིའི་དོན་དུ་རིན་པོ་ཆེ་ལ་སོགས་པ་རྟོག་བར་བྱེད་ཅེ་ན་གསུངས་པ། སངས་རྒྱས་བྱིན་རླབས་སྦྱོར་བ་ཡི། །ཞེས་གསུངས་པ། དེ་དག་རྟོག་པར་བྱེད་པ་ལ་སངས་རྒྱས་ཀྱིས་བྱིན་གྱིས་རློབ་པར་བྱེད་པར་འགྱུར་རོ་ཞེས་མངོན་པར་དགོངས་སོ། །རྡོ་རྗེ་སྙིང་པོའི་རྒྱན་གྱི་རྒྱུད་ཆེན་པོར་ཇི་ལྟར་རྙེད་པའི་རྒྱུད་ཕྱི་མའི་རྣམ་པར་འབྱེད་པའོ། །རྒྱུད་ཀྱི་རྒྱལ་པོ་སྙིང་པོའི་དོན་གྱི་ཕུང་པོ་རྒྱས་པ་མི་མངོན་ཞིང༌། །ཤིན་ཏུ་མི་རིགས་བློ་གྲོས་ཡོན་ཏན་རྒྱ་མཚོའི་སྤྱོད་ཡུལ་དུ་གྱུར་པ། །བདག་གིས་འདིར་ནི་རྣམ་པར་འགྲེལ་ཕྱེ་བཟུང་ཞིང་ཐོབ་པ་སྔགས་ལས་བྱུང༌། །སྐྱེ་བ་མེད་པ་རྒྱུད་མ་ཆེས་སྔོན་གྱུར་པ་ཁོ་ན་ཚད་མ་ཡིན། །དཀའ་འགྲེལ་འདི་ནི་སྦྱར་བ་ལས། །འདིར་ནི་དགེ་བ་ཉེར་བསགས་དེས། །འཇིག་རྟེན་མ་ལུས་འདི་དག་ཏུ། །རབ་ཞིའི་བཤེས་གཉེན་ལྡན་གྱུར་ཅིག །རྡོ་རྗེ་སྙིང་པོ་རྒྱན་གྱི་རྒྱུད་ཀྱི་དཀའ་འགྲེལ་སློབ་དཔོན་རབ་ཏུ་ཞི་བའི་བཤེས་གཉེན་གྱིས་མཛད་པ་རྫོགས་སོ།། །།བོད་ཀྱི་ལོ་ཙཱ་བ་ཤཱཀྱའི་དགེ་སློང་རིན་ཆེན་གྲུབ་ཀྱིས་རྒྱ་དཔེ་ལ་བལྟས་ནས་བསྒྱུར་བའོ།། །།