འཇམ་དཔལ་དཔའ་བོ་གཅིག་པའི་སྒྲུབ་ཐབས།
འཇམ་དཔལ་བཤེས་གཉེན།
འཇམ་དཔལ་དཔའ་བོ་གཅིག་པའི་སྒྲུབ་ཐབས་བཞུགས།། འཕགས་པ་འཇམ་དཔལ་ལ་ཕྱག་འཚལ་ལོ། །སྐྱེ་བ་མི་ལུས་ཐོབ་པ་རྣམས། །མི་ལུས་ཐོབ་པ་ཤིན་ཏུ་དཀའ། །དེ་བས་དམ་ཆོས་རྙེད་པར་དཀའ། །དེས་ན་སྒྲུབ་ལ་བརྩོན་པར་བྱ། །སང་ཙམ་འཆི་འམ་སུས་ཤེས་ན། །ད་ལྟ་ཉིད་དུ་བསྣུན་ཏེ་བྱ། །ཡིད་དགའ་བ་ཡི་གནས་དག་ཏུ། །བདེ་བའི་སྟན་ལ་འདུག་ནས་ནི། །
སྐད་ཅིག་ཙམ་གྱིས་ལྷ་རུ་དམིགས། །སྙིང་གའི་མུཾ་ལས་འོད་ཟེར་འཕྲོས། །བླ་མ་དང་ནི་ཡི་དམ་ལྷ། །མདུན་དུ་བསམ་པར་བྱས་པ་ལས། །དངོས་པོ་ཀུན་གྱིས་ཕྱག་བྱས་པས། །ཕྱི་དང་ནང་གི་མཆོད་པས་མཆོང༌། །སྡིག་པ་བཤགས་དང་རྗེས་ཡི་རང༌། །སྐྱབས་སུ་འགྲོ་དང་སེམས་བསྐྱེད་བྱ། །དགེ་བ་བསྔོ་དང་གཤེགས་སུ་གསོལ། །དེ་དག་ཡིད་ཀྱིས་བྱ་བར་བཤད། །དེ་ནས་ཚད་མེད་བཞི་བསྒོམས་ལ། །སྟོང་པ་ཉིད་ལ་གོམས་པར་བྱ། །ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱ་ཏྨ་ཀོ྅ཧཾ། སྟོང་ཉིད་བརྟན་པར་བྱ་བའོ། །དེ་ནས་མུཾ་དང་ཨུཏྤལ་ལས། །འཇམ་དཔལ་ཡེ་ཤེས་སེམས་དཔའ་བསམ། །སྐུ་མདོག་གསེར་མདོག་ལྡེམ་བག་ཅན། །རིན་པོ་ཆེ་ཡི་དབུ་རྒྱན་དང༌། །སྙན་ཆ་གདུ་བུ་དཔུང་རྒྱན་དང༌། །འོག་པག་དང་ནི་ཞབས་གདུབ་དང༌། །རིན་ཆེན་རྣམས་ཀྱིས་མཛེས་པར་བརྒྱན། །སེམས་དཔའི་སྐྱིལ་ཀྲུང་བཞིན་དུ་བཞུགས། །གཡས་ན་ཨུཏྤལ་སྔོན་པོ་བསྣམས། །གཡོན་ནི་ཆོས་འཆད་ཕྱག་རྒྱའོ། །སྤྱན་དྲངས་བཞུགས་སུ་གསོལ་བ་ལ། །ཕྱི་དང་ནང་གི་མཆོད་པ་བྱ། །གཉིས་སུ་མེད་པར་བདག་ལ་བསྟིམ། །མི་ཕྱེད་པ་རུ་རྒྱས་པར་བསྒོམ། །དེ་ནས་བཟླས་པ་བྱ་བ་ནི། །རང་འདྲའི་ཡེ་ཤེས་སེམས་དཔའ་བསམ། །དེ་ནས་ཏིང་འཛིན་སེམས་དཔའ་སྟེ། །པདྨའི་གདན་ལ་རབ་བཞུགས་པ། །ཡི་གེ་དྲུག་གིས་བསྐོར་བ་སྟེ། །ཨོཾ་ཝཱ་གཱི་ཤྭ་རི་མུཾ། །དམིགས་པ་གཏད་ལ་བཟླས་པ་བྱ། །སྐྱོ་ཞིང་གཏོང་བར་འདོད་པ་ན། །སྤྱན་དྲངས་གཤེགས་སུ་གསོལ་བ་དང༌། །བདག་ཉིད་ལྷ་ཡི་རྣལ་འབྱོར་བྱ། །རྣམ་པ་ཀུན་དང་དུས་ཀུན་དུ། །ལྷ་རུ་གསལ་བས་འགྲུབ་པར་འགྱུར། །རྫོགས་པའི་རིམ་པ་བསྒོམ་པར་བྱ། །དཀར་ནག་དམར་དང་སེར་དང་ལྗང༌། །གསལ་བ་དག་ཏུ་དམིགས་པ་ལས། །ཐུགས་ཀར་ཡི་གེ་ལྔ་བཀོད་དེ། །འོད་ཟེར་འཕྲོས་པས་དགུག་པར་བྱ། །ཕྱི་དང་ནང་གི་མཆོད་པས་མཆོད། །མཚན་གྱི་བསྟོད་པ་དག་བྱའོ། །ཡང་ན་མདུན་དུ་དམིགས་པར་བྱ། །བསྟོད་པ་རང་བཞིན་མེད་པར་བསམ། །བསྟོད་པ་ཟིན་ནས་གཤེགས་སུ་གསོལ། །དེ་ནས་མཚན་མེད་བསྒོམ་པ་ལ། །ཐ་མ་ནས་བསྡུ་དང་པོར་བསྡུ། །བདག་བསྡུ་ཡེ་ཤེས་སེམས་དཔའ་ལ། །ཡེ་ཤེས་སེམས་དཔའ་ཨ་ལ་བསྡུ། །དེ་ཡང་རང་བཞིན་དམིགས་མེད་དེ། །
དེ་ལ་བརྟན་པ་ཐོབ་པ་ནི། །ཆོས་སྐུ་སྐྱེ་མེད་ཐོབ་ཅེས་བྱ། །ཚིགས་བཅད་བཅུ་དྲུག་ལྡན་པ་འདི། །ཡེ་ཤེས་ཞལ་མཐོང་གཉིས་མེད་རྟོགས། །འཇམ་མགོན་སྒྲུབ་ཐབས་འདི་བརྩམས་ཏེ། །མཁས་རྣམས་གུས་པར་བླང་བར་བགྱི། །བདག་གིས་སྒྲུབ་ཐབས་འདི་བྱས་པས། །བདག་དང་སེམས་ཅན་ཐམས་ཅད་ཀྱི། །སྣོད་བཅུད་སྒྲིབ་པ་བྱང་ནས་སུ། །བླ་མེད་བྱང་ཆུབ་ཐོབ་པར་ཤོག །དཔའ་བོ་གཅིག་པའི་སྒྲུབ་ཐབས། །སློབ་དཔོན་འཇམ་དཔལ་བཤེས་གཉེན་གྱིས་མཛད་པ་རྫོགས་སོ། །རྒྱ་གར་གྱི་མཁན་པོ་སུ་བཛྲ་དང༌། བོད་ཀྱི་ལོ་ཙཱ་བ་ཆོས་ཀྱི་ཤེས་རབ་ཀྱིས་བསྒྱུར་བའོ།།