མཚན་ཡང་དག་པར་བརྗོད་པའི་མི་རྟག་པ་འཁོར་བ་ལས་ཡིད་བྱུང་བ།
འཇམ་དཔལ་བཤེས་གཉེན།
འཕགས་པ་འཇམ་དཔལ་ལ་ཕྱག་འཚལ་ལོ། འཁོར་བ་ལས་ཡིད་བྱུང་བ་ནི་དེ་བཞིན་དུ་ནང་བཅུད་ཀྱི་སེམས་ཅན་དང༌། བདག་གི་གཟུགས་ཀྱི་ཕུང་པོ་ཡང་སྤྱི་བོ་ནས་རྐང་པའི་མཐིལ་ཡན་ཆད་དུ་བརྟགས་པས་མི་གཙང་བའི་ངོ་བོ་ཡིན་ཏེ། ཆུ་སེར་དང༌། བད་ཀན་དང༌། ཀླད་པ་དང༌། བཤད་གཅི་དང༌། རྣག་ཁྲག་དང༌། སྣབས་ལུད་དང༌། ཀེང་རུས་ལ་སོགས་པས་ཡོངས་སུ་གང་བ། དེ་ཡང་འགྱུར་བའི་ཆོས་ཅན། དེ་ཡང་ཡིད་བརྟན་དུ་མི་རུང་པ། སྡུག་བསྔལ་བ། མི་རྟག་པ་བདག་མེད་པ། སྟོང་པའོ། །དེ་ལྟ་བུར་ཤེས་པར་བྱས་ནས་གཟུང་འཛིན་གཉིས་ལས་ལོག་སྟེ། སེམས་ཀྱི་མཚན་ཉིད་ཀྱང་གཟུགས་མེད་པ། ཁ་དོག་མེད་པ་ངོ་བོ་མེད་པ། རྣམ་པ་མེད་པ་བལྟར་མེད་པ། གཟུང་དུ་མེད་པ་རྟོག་པ་
མེད་པ། སྤྲོས་པ་མེད་པ། ཀུན་ནས་ཉོན་མོངས་པ་མེད་པ། རང་རིག་པ་རང་གསལ་བ་ཙམ་དུ་ཡང་གྲུབ་པ་ཡིན་ཏེ། དེ་ལྟར་ན་འཁོར་བ་ན་འདོད་པའི་ཡོན་ཏན་ལྔ་ལ་ཆགས་པ་ནི་སླུ་པའི་ཆོས་ཅན་ཡིན་ནོ། །འཁོར་བ་ལས་ཡིད་བྱུང་བ་འདི་ཡང་རང་བཟོ་མ་ཡིན་ཏེ། ལུས་མེ་ལུས་ཏེ་ལུས་ཀྱི་མཆོག །ལུས་ཀྱི་མཐའ་ནི་རྟོགས་པ་པོ། །ཞེས་པ་དང༌། འཁོར་བའི་ཕ་རོལ་མཐར་སོན་པ། །བྱ་བ་བྱས་པ་སྐམ་སར་གནས། །ཞེས་པའི་བཀའ་རྒྱུད་ལ་བརྟེན་ནས་བྱས་སོ། །མཚན་ཡང་དག་པར་བརྗོད་པའི་མི་རྟག་པ་འཁོར་བ་ལས་ཡིད་བྱུང་བ། སློབ་དཔོན་འཇམ་དཔལ་བཤེས་གཉེན་གྱིས་མཛད་པ་རྫོགས་སོ།།