མཚན་ཡང་དག་པར་བརྗོད་པའི་རྗེས་སུ་དྲན་པ་དྲུག་བསྒོམ་པའི་མན་ངག།
འཇམ་དཔལ་བཤེས་གཉེན།
འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དབང་པོ་ཐ་མས་རྗེས་སུ་དྲན་པ་དྲུག་བསྒོམ་པ་ནི། སངས་རྒྱས་རྗེས་སུ་དྲན་པ་དང༌། ཆོས་རྗེས་སུ་དྲན་པ་དང༌། དགེ་འདུན་རྗེས་སུ་དྲན་པ་དང༌། གཏོང་བ་རྗེས་སུ་དྲན་པ་དང༌། ཚུལ་ཁྲིམས་རྗེས་སུ་དྲན་པ་དང༌། ལྷ་རྗེས་སུ་དྲན་པའོ། །དེ་ཡང་འདི་ལྟ་སྟེ། དེ་རྣམས་ཀྱི་ཡོན་ཏན་དྲན་པའི་སྒོ་ནས་གུས་པ་བསྐྱེད་ཅིང་བདག་གིས་ཀྱང་དེའི་སྒོ་ནས་འཇུག་པར་བྱའོ། །དེ་ཡང་སངས་རྒྱས་རྗེས་སུ་དྲན་པ་ནི་དེ་བཞིན་གཤེགས་པ་དགྲ་བཅོམ་པ་རིག་པ་དང་ཞབས་སུ་ལྡན་པ། འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ། ཡང་དག་པའི་སངས་རྒྱས་བཅོམ་ལྡན་འདས་སོ་ཞེས་བྱའོ། །དེ་ལྟ་བུའི་སྒོ་ནས་སངས་རྒྱས་ཀྱི་ཡོན་ཏན་རྟོགས་ཤིང་དྲན་པ་ཉིད་ནི་སངས་རྒྱས་རྗེས་སུ་དྲན་པའོ། །ཆོས་རྗེས་སུ་དྲན་པ་ནི་བཅོམ་ལྡན་འདས་ཀྱི་ཆོས་ནི་ལེགས་པར་གསུངས་པ་ཡང་དག་པར་མཐོང་བ། དུས་ཚོད་མཁྱེན་པ། འདི་མཐོང་བ་ལ་ཉེ་བར་གཏོད་པ། མཁས་པ་སོ་སོར་ཡང་དག་པར་རིག་པ། དོན་བཟང་པོ་ཚིག་འབྲུ་བཟང་པོ། །ཐོག་མར་དགེ་བ། བར་དུ་དགེ་བ། ཐ་མར་དགེ་བ། མ་འདྲེས་པ་ཡོངས་སུ་གསལ་བའོ། །དེ་ལྟ་བུ་ལ་དམིགས་ཤིང་ཡོན་ཏན་དྲན་པར་བྱའོ། །དགེ་འདུན་རྗེས་སུ་དྲན་པ་ནི་བཅོམ་ལྡན་འདས་ཀྱི་
ཉན་ཐོས་ཀྱི་དགེ་འདུན་ལེགས་པར་ཞུགས་པ། དྲང་པོར་ཞུགས། རིགས་པར་ཞུགས་པ། མཐུན་པར་ཞུགས་པ། ཀུན་དུ་སྦྱིན་པའི་འོས་སུ་གྱུར་པ། རབ་ཏུ་སྦྱིན་པའི་འོས་སུ་གྱུར་པ། སྦྱོར་བའི་འོས་སུ་གྱུར་པ། འཇིག་རྟེན་པའི་བསོད་ནམས་ཀྱི་ཞིང་བླ་ན་མེད་པའོ། །དེའི་ཡོན་ཏན་རྗེས་སུ་དྲན་པར་བྱའོ། །གཏོང་བ་རྗེས་སུ་དྲན་པ་ནི་ཀྱེ་མ་སྐྱེས་བུ་སེར་སྣའི་དྲི་མ་སྤངས་པའི་ནང་ནས་སེར་སྣ་དང་བྲལ་བའི་སེམས་ཀྱིས་ཆོས་སྦྱིན་འཁོར་མོར་བྱེད་པ། ལག་རྐྱོང་བ་རྣམས་གཏོང་བ་ལ་དགའ་བ། འདི་ནི་བདག་གིས་ལེགས་པར་རྙེད་པ་ཡིན་ནོ། །དེ་ལྟར་རྗེས་སུ་དྲན་པར་བྱའོ། །ཚུལ་ཁྲིམས་རྗེས་སུ་དྲན་པ་ནི་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ནི་ཚུལ་ཁྲིམས་མ་ཉམས་པ། སྐྱོན་མེད་པ་མ་འདྲེས་པ་མ་གོས་པ། རང་གཙང་ཡོད་པ། མཁས་པས་བསྔགས་པ། ཏིང་ངེ་འཛིན་ཤེས་པའོ་ཞེས་དེ་ལྟ་བུར་དྲན་པར་བྱའོ། །ལྷ་རྗེས་སུ་དྲན་པ་ནི་ལྷ་རྣམས་ནི་ཆེ་བའི་ཡོན་ཏན་དང་ལྡན་པ། ལྷར་སྐྱེ་བའི་རྒྱུར་གྱུར་པ། ཚུལ་ཁྲིམས་དང་ཏིང་ངེ་འཛིན་དང༌། ཤེས་རབ་དང༌། བདག་ཉིད་དང༌། ལྷའི་ཡོན་ཏན་མཚུངས་པར་བྱས་ནས་ལྷའི་ཡོན་ཏན་དང་སྦྱར་ནས་རྗེས་སུ་དྲན་པར་བྱའོ། །སློབ་དཔོན་འཇམ་དཔལ་བཤེས་གཉེན་གྱིས་མཛད་པའི་མཚན་ཡང་དག་པར་བརྗོད་པའི་རྗེས་སུ་དྲན་པ་དྲུག་བསྒོམ་པའི་མན་ངག་རྫོགས་སོ།།