འཇམ་དཔལ་གྱི་མཚན་ཡང་དག་པར་བརྗོད་པའི་བྱང་ཆུབ་ཆེན་པོའི་སྐུ་གདུང་གི་ཆོ་ག་ཞེས་བྱ་བ།
འཇམ་དཔལ་བཤེས་གཉེན།
རྒྱ་གར་སྐད་དུ། མཉྫུ་ཤྲཱི་ནཱ་མ་སངྒཱི་ཏི་བོ་དྷི་མ་ཧཱ་ཤ་རཱི་རཾ་བི་དྷི་ནཱ་མ། བོད་སྐད་དུ། འཇམ་དཔལ་གྱི་མཚན་ཡང་དག་པར་བརྗོད་པའི་བྱང་ཆུབ་ཆེན་པོའི་སྐུ་གདུང་གི་ཆོ་ག་ཞེས་བྱ་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང༌། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དད་པ་ཅན་གང་ཞིག་གིས་མཆོད་རྟེན་བྱེད་པར་འདོད་པས་ས་ཆོག་ཚུལ་དང་མཐུན་པར་བྱ། སྲོག་ཆགས་མེད་པའི་ས་ལེགས་པར་བླངས་ཏེ། རིན་པོ་ཆེའི་ཕྱེ་མ་ཡང་མང་དུ་བཏབ་ནས། དྲི་ཞིམ་པོའི་ཆུས་བྲན་ཏེ། བདག་ཉིད་སངས་རྒྱས་ཀྱི་ང་རྒྱལ་དང་ལྡན་པས་འཇིམ་པའི་གོང་བུ་དེ་འོད་ཀྱི་ཕུང་པོར་བྱས་ཏེ། འོད་ཕུང་དེ་ཉིད་དྷཱིཿ་སེར་པོ་ལས་དང་པོའི་སངས་རྒྱས་ཞལ་ལྔ་ཕྱག་བརྒྱད་པར་བསམས་ཏེ། ཡེ་ཤེས་སེམས་དཔའི་སྐུའི་ཕྲེང་བའི་སྔགས་ལ་རྡོ་རྗེ་བསྡུ་བ་དང་བཅས་པས་རིག་སྔགས་ཀྱིས་སངས་རྒྱས་འཁོར་དང་བཅས་པ་བསྡུས་ཏེ། བྱོན་པ་ཐམས་ཅད་དང་པོའི་སངས་རྒྱས་ཀྱི་ཞལ་ལྔ་པོ་དེ་ཉིད་དུ་ཐམས་ཅད་ཐིམ་པར་བྱས་ཏེ། དེ་ལ་ཐུགས་ཀ་ནས་སྤྲུལ་པའི་མཆོད་པས་ཡང་དག་པར་མཆོད་ལ། འོང་ཁ་དོག་ལྔའི་ཕུང་པོ་འཇའ་ཚོན་ལྟ་བུར་མོས་པ་བྱས་ལ། དེ་ལ་འབི་འབི་བྱ་ཞིང་སྐོལ་ཕོར་ཆོས་ཀྱི་འབྱུང་གནས་སུ་བསམས་ཏེ། དེ་བཞིན་གཤེགས་པ་ཐམས་ཅད་འགྲུབ་པར་བྱེད་པའི་ཡེ་ཤེས་སེམས་དཔའི་སྐུའི་ཕྲེང་བའི་སྔགས་འདི་ཟློས་ཤིང་གདབ་བོ། །ཨོཾ་ཨ་ཨཱཿ་སརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་ཧ་ར། ཨོཾ་ཧཱུཾ་ཧྲཱིཿ་བྷ་ག་ཝཱན་ཛྙཱ་ན་མཱུརྟྟི། ཝཱ་གཱི་ཤྭ་ར་མ་ཧཱ་ཝ་ཙ། སརྦ་དྷརྨཱ་ག་ག་ན། ཨ་མ་ལ་
སུ་པ་རི་ཤུདྡྷ་དྷརྨྨ་དྷཱ་ཏུ་ཛྙཱ་ན་གརྦྷ་ཨཱཿ་ཞེས་བཟླས་ཤིང་སྐོལ་ཕོར་ནས་གདོན་པ་དང༌། ཕྱི་གཞལ་ཡས་ཁང་དུ་རྫོགས་པ་ལ་ནང་དཀྱིལ་འཁོར་གྱི་འཁོར་ལོ་རིགས་ཐམས་ཅད་བསྡུས་པ་ལ་ལྷ་དྲུག་ཅུ་རྩ་གསུམ་གྲུབ་པར་བྱས་ལ་བཞུགས་པར་བསམས་ཏེ། སྙིང་གའི་འོད་ཟེར་གྱིས་དེ་དང་མཐུན་པའི་སངས་རྒྱས་སྤྱན་དྲངས་ཏེ་བཅུག་ལ་ཡང་དག་པར་མཆོད་དེ། ལྷག་པ་དང་མ་ཚང་བ་ཁ་བསྐང་པའི་ཕྱིར་ཡི་གེ་བརྒྱ་པ་གདོན་པར་བྱའོ། །སྔགས་འདིས་རབ་ཏུ་གནས་པར་བྱས་ཏེ། ཡེ་དྷརྨཱ་ཧེ་ཏུ་པྲ་བྷཱ་བ་ཧེ་ཏུནྟེ་ཥཱན་ཏཱ་ཐཱ་ག་ཏོ་ཧྱ་བ་ད་ཏ། ཏེ་ཥཱཉྩ་ཡོ་ནི་རོ་དྷ་ཨེ་པཾ་བཱ་དཱི་མ་ཧཱ་ཤྲ་མ་ཎཿ་།དེ་ཡང་བཀྲ་ཤིས་པར་བྱ་བའི་ཕྱིར་སྔགས་འདི་བརྗོད་པར་བྱ་སྟེ། ཨོཾ་རུ་རུ་སྥུ་རུ་ཛྭ་ལ་ཏིཥྛ་སརྦ་ཨརྠ་སིདྡྷ་ལོ་ཙ་ན་ཡེ་སྭཱ་ཧཱ་ཞེས་བཟླས་སོ། །སྔགས་འདིས་ས་དཀར་བྱུག་པར་བྱའོ། །ཨོཾ་ཨ་ར་ཛེ་བི་ར་ཛེ་སྭཱ་ཧཱ། ཞེས་བརྗོད་དོ་ཨོཾ་ཨཪྻ་ཡེ་སྭཱ་ཧཱ། ཞེས་པས་བྲེ་གཟུགས་སོ། །ཨོཾ་ཙཀྲ་བརྟ་ན་ཡེ་སྭཱ་ཧཱ། ཞེས་པས་འཁོར་ལོ་གཟུགས་སོ། །ཨོཾ་ཙཚ་ཏྲ་ནེ་ར་ཡ་སྭཱ་ཧཱ་ཞེས་པས་གདུགས་དབུལ་ལོ། །ཨོཾ་ཀུཾ་བི་ར་དྷྭ་ཛ་ཡེ་སྭཱ་ཧཱ་ཞེས་པས་རྒྱལ་མཚན་ནམ་ཏོག་གཞག་གོ །ཨོཾ་པཱ་ཏ་ཀ་ཏ་ཛ་ཡེ་སྭཱ་ཧཱ་ཞེས་པས་བ་དན་ཕྱར་རོ། །ཨོཾ་པ་ཊ་དཱ་མ་ཡེ་སྭཱ་ཧཱཿ་ཞེས་པས་དར་དབྱངས་གདགས་སོ། །ཨོཾ་པུཥྤ་མཱ་ལ་ཡེ་སྭཱ་ཧཱ་ཞེས་པས་མེ་ཏོག་གི་ཕྲེང་བ་གདགས་སོ། །དེ་ལྟར་རྫོགས་པར་བྱས་ནས་སླར་ཡང་མཆོད་པས་ཡང་དག་པར་མཆོད་དོ། །བཀྲ་ཤིས་བརྗོད་ལ་བརྟན་པར་བཞུགས་སུ་གསོལ་ལོ། །དད་ཅན་རྣམས་ལ་ཕན་པའི་ཕྱིར། །ཚ་ཚའི་ཆོ་ག་འདི་བྱས་པས། །དེ་ལས་བྱུང་བའི་དགེ་བ་དེས། །འགྲོ་བ་རྫོགས་པའི་སངས་རྒྱས་ཤོག །སློབ་དཔོན་འཇམ་དཔལ་བཤེས་གཉེན་གྱིས་མཛད་པ། མཚན་ཡང་དག་པར་བརྗོད་པའི་ཚ་ཚའི་ཆོ་ག་རྫོགས་སོ།།