འཕགས་པ་འཇམ་དཔལ་གྱི་སྒྲུབ་ཐབས་ཞེས་བྱ་བ།
སྙན་གྲགས་དགེ་མ།
རྒྱ་གར་སྐད་དུ། ཨཱཪྻ་མཉྫུ་ཤྲའི་སཱ་དྷ་ནཱ་མ། བོད་སྐད་དུ། འཕགས་པ་འཇམ་དཔལ་གྱི་སྒྲུབ་ཐབས་ཞེས་བྱ་བ། འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །སྤྲོས་བྲལ་བདེ་བ་ཆེན་པོའི་དང༌། །རྟོག་པའི་རླབས་དང་བྲལ་བ་ལས། །སེམས་ཅན་དོན་དུ་གཟུགས་སྐུར་སྣང༌། །ཅིར་ཡང་སྣང་ལ་ཕྱག་འཚལ་ལོ། །ཐུགས་རྗེ་ཆེ་ཞིང་དོན་མཛད་པ། །འགྲོ་བ་ཀུན་ལ་ཁྱབ་པའི་མགོན། །དེ་ཡི་བསྒྲུབ་ལ་དགའ་བ་ལ། །གཙོ་བོ་དད་པས་བཤད་པར་བྱ། །དབང་ཐོབ་དམ་ཚིག་གནས་པ་དང༌། །གཏོང་ལ་དགའ་ཞིང་འཛིན་པ་མེད། །སྲོག་ཕྱིར་རྣལ་འབྱོར་དང་དུ་བྱེད། །གསོང་པོར་སྨྲ་ཞིང་རྩེ་དང་བྲལ། །འདུ་འཛི་སྤངས་ཤིང་གཅིག་པོ་དགའ། །ཟླ་བོ་མེད་ཅིང་དང་ལྡན་པས། །ཉམས་དགའ་བ་ཡི་གནས་དག་ཏུ། །བདེ་བའི་སྟན་ལ་གནས་པར་བྱ། །ལྷ་ཡི་ང་རྒྱལ་གནས་པ་ཡིས། །ས་གཞི་དྲ་བར་བར་བསླབ། ཨོཾ་བཛྲ་ཡཀྵ་ཧཱུཾ་ཕཊ་ཅེས་བརྗོད་པས། རྒྱང་གྲགས་གཅིག་ཙམ་བགེགས་ཚར་གཅད། །དེ་ནས་ཤིན་ཏུ་བརྩེར་ལྡན་པས། །སངས་རྒྱལ་ལ་སོགས་མདུན་བསམས་ལ། །ཕྱག་འཚལ་མཆོད་པས་སྡིག་པ་སྦྱང༌། །ཡི་རང་སྐྱབས་འགྲོ་སེམས་བསྐྱེད་བྱ། །དགེ་བ་བསྔོ་བ་བསྟོད་པ་གུས་པར་བྱ། །མཆོག་སྦྱིན་རྡོ་རྗེ་མཆོག་
ཁྱོད་འདུད། །ཡང་དག་མཐའ་གྱུར་ཁྱོད་ལ་འདུད། །སྟོང་ཉིད་ལས་བྱུང་ཁྱོད་ལ་འདུད། །སངས་རྒྱས་བྱང་ཆུབ་ཁྱོད་ལ་འདུད། །སངས་རྒྱས་ཆགས་པ་ཁྱོད་ལ་འདུད། །སངས་རྒྱས་འདོད་ལ་ཕྱག་འཚལ་འདུད། །སངས་རྒྱས་དགྱེས་པ་ཁྱོད་ལ་འདུད། །སངས་རྒྱས་རོལ་ལ་ཕྱག་འཚལ་འདུད། །སངས་རྒྱས་འཛུམ་པ་ཁྱོད་ལ་འདུད། །ནམ་མཁའ་ལས་བྱུང་ཁྱོད་ལ་འདུད། །སངས་རྒྱས་བཞད་པ་ཁྱོད་ལ་འདུད། །སངས་རྒྱས་གསུང་ཉིད་ཁྱོད་ལ་འདུད། །སངས་རྒྱས་ཐུགས་ལ་ཕྱག་འཚལ་འདུད། །མེད་པ་ལས་བྱུང་ཁྱོད་ལ་འདུད། །སངས་རྒྱས་འབྱུང་བ་ཁྱོད་ལ་འདུད། །ནམ་མཁའ་ལས་བྱུང་ཁྱོད་ལ་འདུད། །ཡེ་ཤེས་ལས་བྱུང་ཁྱོད་ལ་འདུད། །སྒྱུ་འཕྲུལ་དྲ་བ་ཁྱོད་ལ་འདུད། །སངས་རྒྱས་རོལ་སྟོན་ཁྱོད་ལ་འདུད། །ཐམས་ཅད་ཐམས་ཅད་ཁྱོད་ལ་འདུད། །ཡེ་ཤེས་སྐུ་ཉིད་ཁྱོད་ལ་འདུད། །སྡོམ་པ་དག་ནི་གཟུང་བར་བགྱི། །སངས་རྒྱས་བྱང་ཆུབ་སེམས་དཔའ་རྣམས། །ཇི་ཙམ་དུས་ནས་བཟུང་ནས་ནི། །མ་ལུས་བདག་ལ་དགོངས་སུ་གསོལ། །ནམ་ཞིག་བྱང་ཆུབ་སྙིང་པོ་ལ། །ཡོངས་སུ་གནས་པའི་བར་དག་ཏུ། །བདག་གིས་བྱང་ཆུབ་མཆོག་གི་སེམས། །མ་ལུས་པར་ནི་བསྐྱེད་པར་བགྱི། །དེ་ནས་སངས་རྒྱས་ལ་སོགས་རྣམས།། མ་ལུས་བདག་གི་ཐུགས་ལ་བསྡུ། །ཐིམ་ཞུ་ཡེ་ཤེས་མེ་འབར་བས། །ཉོན་མོངས་ཕུང་པོ་བསྲེག་པར་བསམ། །སླར་གསོས་ཡེ་ཤེས་ལུས་སུ་བྱས། །བྱང་ཆུབ་ལྔ་བདག་བསྒོམ་པ་ནི། །ཡོངས་དག་མེ་ལོང་གསལ་བ་དཀྱིལ་འཁོར་ལ། །ཡུལ་དངོས་རིགས་ཀུན་མ་ལུས་སོ་སོར་སྣང༌། །ཐམས་ཅད་ཡོངས་དག་མེ་ལོང་ཡེ་ཤེས་ལ། །འདྲིས་པར་དེ་ལ་ཡང་དག་བལྟ་བར་བྱ། །སེམས་ཅན་རྣམས་ལ་སྙིང་རྗེ་བསྐྱེད། །མགོན་སྐྱབས་དཔུང་གཉེན་དང་བྲལ་བས། །སྡུག་བསྔལ་འཁོར་བ་རྒྱ་མཚོར་བྱིང༌། །སེམས་ཅན་དོན་དུ་སྡུག་བསྔལ་བྲལ། །སྟོང་པ་མཉམ་པ་ཉིད་དུ་སྦྱར། །བདག་སྟོང་སེམས་ཅན་དེ་འདྲ་ཡང༌། །ཆོས་རྣམས་ཀུན་ཀྱང་རབ་ཏུ་ཤེས། །ཆོས་ལ་དམིགས་པའི་སྙིང་རྗེ་ཡང༌། །བདག་མེད་རང་བཞིན་རིགས་པ་ལས། །མཉམ་ཉིད་ཡེ་ཤེས་བསྐྱེད་པར་བྱ། །དེ་ནས་གསང་སྔགས་བརྗོད་པ་ནི། །ཨ་ཀཱ་རོ་མུ་ཁཾ་སརྦ་དྷ་རྨྨཱ་ཎཱཾ་ཨཱ་དྱ་ནུ་ཏྭ་ནྣ་ཏྭཏཱ། སྔགས་དོན་
སྟོང་པར་བསྒོམས་ནས་ནི། །ལྷན་ཅིག་གཉིས་མེད་ཆོས་རབ་གཟུང༌། །དེ་ཉིད་ཡུལ་དུ་བྱས་པ་ཡིས། །ཆོས་བདག་མེད་པར་བསྒོམ་པར་བྱ། །དམིགས་མེད་སྙིང་རྗེ་སོ་སོར་བརྟག །སྙིང་རྗེའི་རྗེས་འགྲོ་གཟུང་འཛིན་ཡོངས་དང་བྲལ། །ངོ་བོ་འོད་གསལ་ཡན་ལག་ཀུན་བྲལ་བ། །རང་བཞིན་ཡོངས་དག་ཆོས་ཉིད་རྒྱུ་མཐུན་པས། །དངོས་བྲལ་དོན་སྟོང་ངང་ལས་དེ་གནས་པས། །ཆོས་དབྱིངས་ཡེ་ཤེས་བསྒོམ་པའོ། །དེ་ལྟར་སེམས་ཅན་དོན་བྱེད་མ་བྲལ་བའི། །རྣལ་འབྱོར་སྔོན་གྱི་སྨོན་ལམ་དབང་ཐོབ་པས། །སེམས་ཅན་ཀུན་གྱི་དབང་བསྒྱུར་བས། །སེམས་ཀྱི་དོན་ནི་རབ་རྫོགས་ཕྱིར། །ཁམས་གསུམ་འབྱུང་གནས་ཁྱབ་པར་གྱིས། །དོན་དམ་ཀུན་རྫོབ་མྱ་ངན་འདས། །དེ་ཕྱིར་ནན་ཏན་ཡེ་ཤེས་བསྒོམ། །དེ་ནས་དངོས་པོ་གཟུགས་སུ་བྱུང༌། །སྤྲུལ་བའི་ཚུལ་གྱིས་ནམ་མཁའ་ལ། །ཨ་ལས་ཟླ་བའི་གཟུགས་བསམ་པ། །དེ་འོག་བད་དཀར་པདྨ་སྟེ། །སྣ་ཚོགས་འདབ་བརྒྱད་མཛེས་པའོ།། དེ་སྟེང་དྷཱིཿ་སེར་གུར་གུམ་མདོག །སྤྲོ་དང་བསྡུ་ལས་མཚན་མ་བསམ། །དེ་ལས་དྷཱིཿ་མཚན་འཕྲོ་འདུ་ལས། །སྐུ་གསེར་མདོག་ལས་ལྡེམ་བག་ཅན། །བདེ་གཤེགས་དབུ་རྒྱན་ཟུར་ཕུང་ལྡན། །རིན་ཆེན་རྣམ་བརྒྱན་གཞོན་ནུའི་ཚུལ། །ལོ་བརྒྱད་རྡོ་རྗེ་སྐྱིལ་ཀྲུང་བཞུགས། །ཕྱག་གཡས་རལ་གྲི་པུ་སྟེ་གཡོན། །བཞིན་མཛེས་འཇའ་ཚོན་ལྟ་བུར་བསྒོམ། །གསལ་བས་ཐ་མ་ལ་ཕུང་པོ་སྤོང༌། །ཐུགས་ཀར་ཟླ་སྟེང་དྷཱིཿ་དཀར་བསམ། །དེ་ལས་དང་པོའི་སངས་རྒྱས་ཏེ། །ཞལ་ལྔ་བྱིས་པའི་རྒྱན་གྱིས་བརྒྱན། །རིན་ཆེན་སྣ་ཚོགས་ན་བཟའ་ཅན། །ཟླ་དཀར་མདོག་ལས་སྐྱིལ་ཀྲུང་བཞུགས། །ཕྱག་གཡས་ཤེས་རབ་རལ་གྲི་བསྣམས། །གཡོན་བཞི་ཤེས་རབ་པོ་ཏི་བསྣམས། །གསལ་བ་དག་ཏུ་ཤེས་པར་བྱ། །དེ་ཡི་ཐུགས་ལ་ཤེས་རབ་འཁོར་ལོ་སྟེ། །གསལ་བར་ཡི་གེ་ཨ་ལས་བསྐྱེད། །ལྟེ་དབུས་རྩིབས་དྲུག་མུ་ཁྱུད་བཞི། །ལྟེ་བར་ཡི་གེ་ཨ་དཀར་བསམ། །རྩིབས་ལ་ཡི་གེ་སྔགས་དྲུག་དགོད། །ཨོཾ་བཛྲ་ཏཱི་ཀཥནྷ་ཡ་ཏེ་ན་མཿ་ཨོཾ་དྲུཿ་ཁཙྪེ་ངཱ་ཡ་ཏེ་ན་མཿ་ཨོཾ་པྲ་ཛྙཱ་ཛྙཱ་ན་མཱུ་རྟཱ་ཡ་ཏེ་ན་མཿ་ཨོཾ་ཛྙཱ་ན་ཀཱ་ཡཱ་ཡ་ཏེ་ན་མཿ་ཨོཾ་ཝཱ་གཱི་ཤྭ་རཱ་ཡ་ཏེ་ན་མཿ་ཨོཾ་ཨ་ར་པ་ཙ་ནཱ་ཡ་ཏེ་ན་མཿ་དམར་སྔོ་དཀར་དང་ལྗང་གུ་དང༌། །སེར་དང་དཀར་ཏེ་རིམ་བཞིན་བསམ། །འཁོར་ལོ་
རྩིབས་ཀྱི་རིམ་བཞིན་ནོ། །མུ་ཁྱུད་དང་པོ་དག་ལ་ནི། །ཨོཾ་སརྦ་དྷརྨྨཱ་བྷཱ་བ་སྭ་བྷཱ་བ་བི་ཤུདྡྷེ་བཛྲ། །ཨ་ཨཱ་ཨཾ་ཨཿ་མུ་ཁྱུད་གཉིས་པོ་དག་ལ་ནི། །ཨ་ཨཱ་ཨི་ཨཱི་ཨུ་ཨཱུ་ཨེ་ཨཻ་ཨོ་ཨཽ་ཨཾ་ཨཿ་མུ་ཁྱུད་གསུམ་པོ་དག་ནི། །ཡེ་ཤེས་སེམས་དཔའ་སྐུ་ཡི་སྔགས།། ཨ་ཨཱ་སརྦ་ཏ་ཐཱ་ག་ཏ་ཧྲྀ་ད་ཡ་ཧ་ར་ཧ་ར། ཨོཾ་ཧཱུཾ་ཧྲཱིཿ་བྷ་ག་ཝཱན་ཛྙཱ་ན་མཱུ་རྟི་པཱ་གཱི་ཤྭ་ར་མ་ཧཱ་བཱ་ཙ། སརྦ་དྷརྨྨ་ག་ག་ནཱ་མ་ལ་སུ་པ་རི་ཤུདྡྷ་དྷརྨྨ་དྷཱ་ཏུ་ཛྙཱ་ན་གརྦྷ་ཨཱཿ་ཕྱི་རོལ་མུ་ཁྱུད་ཐ་མ་ལ། །ཡི་གེ་ཀ་སོགས་ཧ་ཡི་མཐར། །ཐུབ་པའི་ཡི་གེ་རྣམ་བཀོད་པ། །འཁོར་ལོ་སྔགས་ཀྱི་རིམ་པའོ། །དེ་ནས་འཁོར་ལོའི་ལྟེ་དབུས་ཀྱི། །ཨ་དཀར་ཡོངས་སུ་གྱུར་པ་ལས། །བཅོམ་ལྡན་ཡེ་ཤེས་སེམས་དཔའ་བསྒོམ། །ཞལ་དྲུག་སྟོན་ཀའི་ཟླ་ལྟར་དཀར། །ཨིནྡྲ་ནཱི་ལའི་གཙུག་ཕུད་མཛས། །ཉི་མ་འཆར་ཀའི་འོད་ཀྱིས་མཛེས། །ཞི་བའི་ཚུལ་འཆད་རིན་ཆེན་བརྒྱན། །རྡོ་རྗེ་སྐྱིལ་ཀྲུང་བཞུགས་པ་སྟེ། །གཡས་གཡོན་ཨུཏྤལ་སྔོན་པོ་བསྣམས། །སྟེང་ན་ཤེས་རབ་པོ་ཏི་བསྣམས། །མཛེས་པ་གསལ་བར་དམིགས་པའོ། །ཡེ་ཤེ་སེམས་དཔའ་ཐུགས་ཀ་རུ། །ཟླ་མཆོག་གསལ་བར་བསམ་པར་བྱ། །དེ་ཡི་ཐུགས་མཆོག་ངོ་བོ་སྟེ། དེ་སྟེང་ཡི་གེ་རྣམས་ངོ་བོ། །ཨ་མཆོག་ཨ་དཀར་བསམ་པར་བྱ། །དུས་གསུམ་སངས་རྒྱས་དེ་ལས་བྱུང༌། སངས་རྒྱས་རྣམས་ཀྱི་གསུང་ཡིན་ནོ། །དེ་ལྟར་འཁོར་ལོ་དྲུག་བརྩེགས་ལ། །ཨོཾ་ཨཿ་ཧཱུཾ་གི་ཡི་གེ་མཆོག །ཛཿཧཱུཾ་བཾ་ཧོཿ་དང་ལྡན་པས། །སྤྱན་དྲང་མདུན་དུ་གསལ་བར་དམིགས། །མཆོག་པ་ལ་སོགས་དབྱུལ་བར་བྱ། །ཐམས་ཅད་དེ་ཉིད་གསུམ་ལྡན་པས། །ཨེ་ཧཱ་བི་ར་ཧཱུཾ་པུ་ཥྤེ་སྭཱ་ཧཱ། དྷཱུ་པེ་སྭ་ཧཱ། གནྡྷེ་སྭཱ་ཧཱ། ཨཱ་ལོ་ཀེ་སྭཱ་ཧཱ། ནཻ་བི་ད་ཡེ་སྭཱ་ཧཱ། བ་ལིཾ་ཁ་ཁ། ཁཱ་ཧི་ཁཱ་ཧི་སྭཱ་ཧཱ། སྥ་ར་ཎ་ཁཾ་སྭཱ་ཧཱ། ཡོན་ཆབ་མེ་ཏོག་བདུག་སྤོས་དང༌། དྲི་ཆབ་ལྷ་བཤོས་གཏོར་མ་དང༌། །སྒྲ་ལ་སོགས་པར་རིམ་བཞིན་དབུལ། །འདུད་ལ་སོགས་པས་བསྟོད་པར་བྱ། །ཛཿ་ཧཱུཾ་བ་ཧོཿ་ས་བསྟིམ་པའོ། །ཡང་ན་འོད་ཀྱིས་ལྷ་མོ་བཀུག་ལ་དབང་བསྐུར་བར་བྱ། །དེ་ནས་བཟླས་པ་བྱ་བ་སྟེ། །ཡི་གེ་སྦྲུལ་མཐའ་ལྡན་པས་ན། །ལྔ་པོ་ཡ་སྟེ་ན་མ་པོར། །ཡི་གེ་ཚེ་བཅད་སུམ་ཅུ་ལ། །མ་ཡེངས་གཏད་ལ་བཟླས་པ་གསལ། །
ངག་གི་དངོས་གྲུབ་དྲི་མ་བྲལ། །མཁའ་འགྲོ་རྣམས་ཀྱང་དེ་ལ་དགྱེས། །གྲངས་ནི་བརྒྱ་པ་དག་པར་བྱ། །ཤེས་རབ་འཁོར་ལོ་གོམས་པའོ། །དེ་ནས་མཚན་ནི་བརྗོད་པར་བྱ། །ཡི་གེ་ཨ་ལ་སེམས་གཏད་ལ། །ངག་གི་མཚན་ནི་གསལ་བརྗོད་པའོ། །དེ་ཡང་རང་བཞིན་མེད་ཤེས་བྱ། །ཤེས་ནས་རྟོག་པ་རྣམས་དང་བྲལ། །འཇིག་རྟེན་པ་ཡི་ལྷ་རྣམས་དང༌། །འཇིག་རྟེན་འདས་པའི་ལྷ་རྣམས་ཀུན། །མ་ལུས་ཐམས་ཅད་དགྱེས་ནས་སུ། །ཡོན་ཏན་ཐམས་ཅད་མཐོང་བར་འགྱུར། །དུས་གསུམ་དག་ཏུ་བརྗོད་པ་དང༌། །ཡང་ན་དུས་དྲུག་དག་ཏུ་བརྗོད། །ཡང་ན་དུས་ཀྱི་ངེས་མེད་བས། །ནུས་ཚད་དག་ཏུ་བརྗོད་པའོ། །མཚན་ནི་བརྗོད་པས་སྐྱོ་བ་ན། །ཤེས་རབ་འཁོར་ལོ་སྔགས་དྲུག་ལས། །སྔགས་དང་མཐུན་པའི་འོད་བྱུང་ནས། །ལུས་སྣང་ཐམས་ཅད་གསལ་བར་བྱས། །མི་ཤེས་རི་བོ་ཐམས་ཅད་བཅོམ། །ཕྱི་རོལ་དག་ཏུ་འཕྲོས་པ་ལས། །ནམ་མཁའི་ཁམས་ཀུན་ཁྱབ་པར་གནས། །སངས་རྒྱས་ཞིང་ཁམས་གསལ་གྱུར་ནས། །ཆོས་སྐུ་ཡེ་ཤེས་ཐོབ་པའི་དོན། །བྱས་ནས་སླར་ནི་བཟླས་པ་ལས། །སྙིང་གར་ཟླ་སྟེངས་ཨ་ལ་ཐིམ། །བརྟན་པས་ཡང་དང་ཡང་དུ་བསྒོམ། །དེ་ལྟར་སྤྱོད་པའི་སེམས་དཔའ་ཡིས། ཡེ་ཤེས་བསྒོམས་ན་སྤྲུལ་སྐུ་དང། །ཟླ་བའི་སྒོ་ནས་ལོངས་སྐུ་དང༌། །ཨ་ཡི་སྒོ་ནས་ཆོས་སྐུ་དང༌། །རིང་པོ་མི་ཐོགས་པར་འགྱུར་བ། །བརྟན་པས་ཡང་དང་ཡང་དུ་བསྒོམ། །དེ་ལྟར་སྤྱོད་པའི་སེམས་དཔའ་ཡིས། །འདུལ་བའི་དབང་གིས་སེམས་ཅན་ལ། །ཉེ་བར་བཟུང་བར་མངོན་སྣང་བའོ། །དེ་ནས་སྟོང་ཉིད་ལ་གནས་བྱ། །ཨ་ཉིད་ཐིག་ལེ་བྱང་ཆུབ་སྟེ། །བྱང་སེམས་ཐམས་ཅད་དེ་ལ་འདུས། །བདེ་བ་ཐམས་ཅད་དེར་གནས་ན། །འཇའ་ཚོན་ལྟ་བུའི་ཐིག་ལེ་སྟེ། །ཤེས་པ་བྱིང་རྒོད་མེད་པ་ཡིས། །གསལ་བ་འབད་པས་དད་པར་བྱ། །སེམས་ཉིད་དེ་རང་ཡིན་ཞེ་ན། །ཆོས་ཉིད་ངང་ལ་གནས་ཞེས་བྱ། །ཐིག་ལེ་ཇེ་ཕྲ་ཤེས་པ་ཕྲ། །རང་བཞིན་མེད་པས་གནས་པའོ། །སེམས་ཉིད་བཏང་སྙོམས་གསལ་བ་ལ། །གསལ་བ་མི་རྟོག་ཐོབ་པའོ། །དེ་ལ་བརྟེན་ནས་གསལ་བ་དེ། །སྣང་ལ་རང་བཞིན་མེད་པ་ཐོབ། །འབྲས་བུ་ཆོས་སུ་ཐོབ་པའོ། །དེ་ནས་སྐྱོ་བ་བྱུང་བ་ནི། །
ཨོཾ་ཨཱཿ་ཧཱུཾ་མུཿ་གཤེགས་སུ་གསོལ། །ཐམས་ཅད་བསྡུས་ནས་ལྷ་ཉིད་གནས། །ངག་ཏུ་བཟླས་པ་ནུས་ཚད་བཟླས། །ཞི་ལ་གནས་ཤིང་སྙིང་རྗེ་བསྐྱེད། །སེམས་ཅན་དོན་ལ་དགའ་སེམས་བསྐྱེད། །གཏོར་མ་རྟག་ཏུ་སྦྱིན་བར་བྱ། །སྟན་ལ་གཅིག་པུ་འདུག་ནས་སུ།། ལམ་ལྔ་ཉམས་སུ་མྱང་བར་བྱ། །ཚོགས་ལམ་བསྐྱེད་པའི་རིམ་པའོ། །སྦྱོར་ལམ་བཟླས་པར་བྱེད་པ་ན། །མཐོང་ལམ་མཚན་ཉིད་བརྗོད་པ་སྟེ། །བསྒོམ་ལམ་འཕྲོ་འདུ་དག་ལ་གནས། །མཐར་ཕྱིན་སྟོང་ཉིད་སེམས་དབའོ། །དགེ་མས་བརྩམས་པའི་སྒྲུབ་ཐབས་ལ། །འགལ་འཁྲུལ་མཆིས་ན་མཁས་བཟོད་མཛོད། །བརྩམས་པའི་དགེ་རྩ་ཡོད་སྲིད་ན། །སེམས་ཅན་མོས་དང་ཕྲད་པར་ཤོག །དགེ་བསྙེན་མ་སྙན་གྲགས་དགེ་མས་མཛད་པ། འཕགས་པ་འཇམ་དཔལ་གྱི་སྒྲུབ་པའི་ཐབས་རྫོགས་སོ།།