རྣམ་པ་ཉི་ཤུས་བྱང་ཆུབ་པའི་རིམ་པས་བཅོམ་ལྡན་འདས་འཇམ་དཔལ་སྒྲུབ་པའི་ཐབས།
སོ་མ་ཤྲཱི།
རྒྱ་གར་སྐད་དུ། བིཾ་ཤ་ཏི་ཨཱ་ཀཱ་ར་བྷི་བོ་དྷི་ཀྲ་མ་ན་བྷ་ག་བཱ་ན་མཉྫུ་ཤྲཱི་སཱ་དྷ་ནཾ། བོད་སྐད་དུ། རྣམ་པ་ཉི་ཤུས་བྱང་ཆུབ་པའི་རིམ་པས་བཅོམ་ལྡན་འདས་འཇམ་དཔལ་སྒྲུབ་པའི་ཐབས། འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །དེ་དང་དེ་ཡིས་ཐེག་པ་ཡིས། །ཐབས་ཀྱིས་འགྲོ་བའི་དོན་བྱེད་པ། །ཐེག་པ་གཅིག་གིས་བདག་ཉིད་ཅན། །དཔལ་ལྡན་དེ་ལ་ཕྱག་འཚལ་འདུད། །ཤིན་ཏུ་དད་པའི་རོ་ཅིག་པ། །མི་གཡོ་དུས་ཀྱི་རྟོགས་བྱ་བ། །བདག་ཉིད་ཆེན་པོ་གང་ཡིན་པ། །སུ་ཞིག་
དེ་ལ་ཕྱག་འཚལ་འདུད། །དད་པའི་ཁྱད་པར་མ་རྟོགས་ཡང༌། །ཆགས་པའི་དབང་གིས་སེམས་ཅན་བཞིན། །འདོད་ཆགས་ལ་སོགས་ལ་གནས་ཀྱང༌། །གང་ཡིན་དེ་ལ་ཕྱག་འཚལ་ལོ། །དཀོན་མཆོག་གསུམ་གྱི་བདག་ཉིད་ཅན། །དཀོན་མཆོག་གསུམ་གྱི་དོན་བྱེད་མགོན། །ཀུན་དུ་དོན་བྱེད་ལྟོས་མེད་པར། །སྐྱོབ་བ་དེ་ལ་ཕྱག་འཚལ་ལོ། །དེ་ཡི་སྟོབས་ཀྱིས་ད་ལྟར་བདག །འཇམ་དཔལ་གཉིས་སུ་མེད་པ་ཡི། །རྣམ་པ་ཉི་ཤུས་མངོན་རྟོགས་པ། །སེམས་ཅན་དོན་དུ་བཤད་པར་བྱ། །དང་པོར་ལངས་ནས་རྣལ་འབྱོར་ནི། །རང་གི་ལྷ་ཡི་ང་རྒྱལ་ཅན། །རྣམ་དག་ཆོ་ག་བཞིན་བྱས་ནས། །མཆོད་པ་དམན་ན་བསྡུ་བར་བྱ། །ཨོཾ་བཛྲ་བི་ག་ཧཱུཾ། དྲི་མ་ཡང་ནི་བསལ་བར་བྱ། །ཨོཾ་ས་མནྟ་པ་རི་ཀྵ་གུ་ཧྱ་ཙ་ར་ཙ་ཏ་ཧཱུཾ། དེ་ཡི་རྗེས་ལ་སྐྱང་ནུལ་བྱ། །ཨོཾ་ནི་རྨ་ནི་ཤོ་དྷ་ཧཱུཾ། དྲིར་བཅས་ཆུ་ཡི་ཐིགས་པ་ཡིས། །སྐྱོབ་པ་ལ་ཡང་མཎྜལ་བྱ། །ཨོཾ་མ་ཧཱ་མཎྜལ་ཧཱུཾ། སྔར་ཉིད་ལངས་པའི་གནས་དག་ཏུ། །འཇམ་པའི་སྟན་ལ་གནས་པར་བྱ། །ཨོཾ་ཨ་མུ་ཀ་པདྨོ་བྷ་སུནྡྷ་ར་དྷ་རེ་མཎྜལ་ལ་ཧཱུཾ། སྙིང་གའི་ས་བོན་འོད་ཟེར་གྱིས། །སངས་རྒྱས་མཐོང་ནས་འདུད་པར་བྱཿ་།ཨོཾ་ས་བ་ཏ་ཐཱ་ག་ཏ་ཀཱ་ཡ་བཱ་ཀ་ཙིཏྟ་པྲ་ཎ་མེ་ན་བཛྲ་བནད་ནཾ་ཀ་རོ་མི། སྣ་ཚོགས་མཆོད་ཅིང་དེ་དག་ལ། །དང་པོར་ཕྱག་འཚལ་གཞན་ཡང་བྱ། །དེ་ནས་སྐལ་དང་ལྡན་པ་ནི། །སྤྲུལ་ཞིང་རྣམ་པར་མཆོད་པར་བྱ། །ཉེས་པ་བྱས་པའི་མཆོད་པ་ཡིས། །སྡིག་པ་བཤགས་པ་ལ་སོགས་བྱ། །བདག་གིས་བགྱིས་དང་བགྱིད་སྩལ་གང༌། །ཆུང་དུའམ་ནི་ཚད་མེད་པ། །གང་ཡང་རྗེས་སུ་ཡི་རང་བ། །དེ་དག་སྐྱོབ་པས་གཤེགས་པར་མཛོད། །བདག་གིས་འཇུག་པར་བྱ་བ་ཡིས། །དེ་དག་སེམས་ཅན་རང་ཉིད་ཀྱི། །ལས་ལ་འཇུག་པ་དེ་དག་གིས། །བྱས་པ་རྣམས་ལ་ལེགས་ཞེས་གསོལ། །སངས་རྒྱས་རྣམས་ལ་སྐྱབས་སུ་གསོལ། །དེ་བཞིན་ཆོས་ཀྱི་དཀོན་མཆོག་ལ། །སངས་རྒྱས་ཀྱི་གང་གདུལ་བ་བྱ། །བློ་ཆེན་མགོན་པོ་དེ་ལ་ཡང༌། །སྡུག་བསྔལ་རྒལ་བར་དཀའ་བ་ནི། །གཞན་གྱི་བདག་གིས་བཟོད་མི་ནུས། །དེ་ན་
དེ་ཉིད་སེལ་བར་བྱེད། །བདག་ནི་འཇིག་རྟེན་མགོན་པོར་ཤོག །སེམས་ཅན་བླ་མ་སངས་རྒྱས་དང༌། །བྱང་ཆུབ་སེམས་དཔའ་དེ་ཅི་བཞིན། །དེ་བཞིན་སློབ་མ་རྗེས་མཐུན་མ། །བདག་གིས་ལམ་ལ་འཇུག་པར་བྱ། །གང་ཡང་བདག་གི་དགེ་བའི་ཆ། །དྲི་མེད་གནས་པར་གྱུར་པ་ནི། །དེ་ཡིས་སེམས་ཅན་གྱི་དོན་དུ། །རྒྱུན་དུ་རྗེས་སུ་མཐུན་པར་ཤོག །ཨོཾ་མ་ཧཱ་སརྦ་པཱ་པཾ་ཀཱ་ཡ་བཱཀ་ཙིཏྟ་ས་མ་ན་སཏྦྷཱུ་ཏཾ་ར་ག་དྷི་ཤ་མཱུ་ཧ་ད་མ་ད་མ་ན་ཨ་བྷི་ཥི་ཏ་ཡཾཀྲིཏྟཾ་ཀ་ལེ་ཀཾ་ཧཱུཾ་་ཧཱུཾ་ཧཱུཾ་ཕཊ་ཕཊ་ཕཊ། སརྦ་པཱ་བཾ་སྥོ་ཊ་ཡ་མེ་སྭ་ཧཱ། ཨོཾ་སརྦ་ཐཱ་ག་ཏ་ཤ་ན་སྭཱ་ཧཱ། ཨོཾ་སརྦ་ཏ་ཐཱ་ག་ཏཱ་ནཱ་མཱཏྨ་བྷ་བཾ་ནི་ཪྻ་ཏ་ཡཱ་མི། སརྦ་ཏ་ཐཱ་ག་ཏ་པྲ་ཏི་གྲྀཧྞཱ་ན་སྭ་མི་མཾ་སྭཱ་ཧཱ། ཨོཾ་སརྦ་ཏ་ཐཱ་ག་ཏ་པུ་ཏྱེ་ཛྙཱ་ན་སཾ་བྷ་ར་ཨ་ནུ་མུ་ད་ཡེ་སྭཱ་ཧཱ། ཨོཾ་སརྦ་ཏ་ཐཱ་ག་ཏ་ས་མནྟ་བྷ་དྲ་མ་ཧཱ་བཛྲ་ས་མ་ཡཾ་མ་ཧཱ་བྷོ་དྷི་ཙི་ཏྟོ་ཏྤཱ་དཾ་ཨུཏྤཱ་ད་ཡཱ་མི་སྭཱ་ཧཱ། ཨོཾ་སརྦ་པཱ་པཾ་པྲ་ཏི་ཐི་ན་ཡ་མེ་ས་ཏྱེ་སརྦ་ས་ཏྭཱ་ནཱཾ། སརྦ་སིདྡྷྱ་སཾ་ས་ཏྱ་ན་ཏི་སརྦ་ཏ་ཐཱ་ག་ཏ་ཤྩ་ཨ་དེ་ཤ་ན་ཏི། ཨོཾ་སརྦ་ཤུདྡྷཿ་སརྦྦ་དྷརྨྨཱཿསྭ་བྷཱ་བ་ཤུདྡྷོ྅ཧཾ། སེམས་ཅན་འདི་དག་བདེ་བར་ཤོག །སྡུག་བསྔལ་ཀུན་ཡང་སེལ་བར་ཤོག །དེ་དག་བདེ་བས་བདག་ཉིད་ཚིམ། །འདི་དག་ཉོན་མོངས་བྲལ་བར་ཤོག །རང་བཞིན་མེད་དང་གཙང་ལ་སོགས། །མཚན་མ་མེད་དང་ཡིད་མི་འབྱུང༌། །འདི་དག་ཐམས་ཅད་དེ་ཡི་ཕྱིར། །བདག་གིས་གང་ལས་རྣམ་པར་འཁྲུལ། །ཨོཾ་ཤཱུ་ནྱ་ཏཱ་ཛྙཱ་ན་བ་ཛྲ་སྭ་བྷཱ་བ་ཨཱཏྨ་ཀོ྅ཧཾ། དེ་ནས་རྒྱལ་བའི་བཀའ་ལུང་གིས། །ཟླ་བ་གཉིས་སུ་མཐོང་བར་བྱ། །དེ་ཡང་བ་སྟན་ནས་གཅིག་འགྱུར་ཞིང༌། །དེ་ཡི་བདག་ཉིད་དུ་གྱུར་པ། །སངས་རྒྱས་ཐམས་ཅད་མཉམ་ཉིད་དུ། བློ་གྲོས་ཆེན་པོས་གཞུག་པར་བྱ། །ཨོཾ་བོ་དྷི་ཙིཏྟ་ཨུཏྤཱ་ད་ཡཱ་མི། །ཨོཾ་ཛྙཱ་ན་ར་སྨེ་བེ་སྲེ་ཛ་ཧཱུཾ། ཨོཾ་TIsHtHA་སྟ་བཛྲ་ཧཱུཾ། ཨོཾ་སྥ་ར་ཎ་བྫྲ། ཨོཾ་སཾ་ཧཱ་ར་ན་བཛྲ། ཨོཾ་ཛྙཱ་ན་བཛྲ། ཨོཾ་སརྦྦ་ཏ་ཐཱ་ག་ཏ་ཛྙཱ་ན་བཛྲ། ཨོཾ་བཛྲ་ཨཱཏྨ་ཀོ྅ཧཾ། ཨོཾ་ཡ་ཐཱ་སརྦ་ཏ་ཐཱ་ག་ཏ་ཏ་ཐཱ་ཨ་ཧཾ། དེ་ནས་གཞན་དོན་བྱེད་པའི་ཕྱིར། །སླར་ཡང་འདི་ལྟར་བསྒོམ་པར་བྱ། །ཁྲོ་བོའི་གཟུགས་ནི་འཆང་བ་ཡིས།
སྙིང་གར་པདྨ་ཉི་ཧཱུཾ་ལས། །ཁྲོ་བོ་བཅུ་ཡིས་བགེགས་ཀྱི་གཙོ། །ལུས་ངག་ཡིད་གསུམ་ཕུར་བུས་གདབ། །ཕྱི་རོལ་རྡོ་རྗེ་རབ་སོགས། །རྣམ་པར་སྤྲུལ་བ་བྱས་ནས་ནི། །ཧཱུཾ་ཡིག་གཉིས་ཀྱི་དབུས་གནས་པའི། །འོག་ཏུ་ཡཾ་བཾ་རཾ་དག་ལས། །རླུང་དང་ཆུ་དང་མེ་དག་ནི། །དཀྱིལ་འཁོར་དེ་ཉིད་རིམ་པས་བསྒོམ། །མཁའ་ལ་བྷྲཱུཾ་ཡིག་ལས་བྱུང་བའི། །རྟག་པའི་ཡན་ལག་ལས་སྐྱེས་པ། །བདུད་རྩིའི་རྒྱུན་གྱི་ཚོགས་ཀྱིས་ནི། །གང་བའི་སྣོད་ཀྱི་བདག་ཉིད་གྱུར། །ཧཱུཾ་གཉིས་དབུས་སུ་བཾ་ཡིག་ལས། །སྐུ་ཡི་རྡོ་རྗེའི་ཏིང་འཛིན་གྱིས། །བརྟན་ཞིང་སྲ་བར་གྱུར་པ་ཡི། །གསེར་གྱི་དཀྱིལ་འཁོར་ཉིད་དུ་གྱུར། །ངོས་གཉིས་རྣམ་པའི་ཧཱུཾ་ཡིག་དང༌། །སུཾ་ལས་སྐྱེས་པའི་ལྷུན་པོའི་སྟེང༌། །བྷྲཱུཾ་ལས་གྱུར་པ་དཔལ་དང་ལྡན། །གཞལ་ཡས་ཁང་བརྩེགས་བསྒོམ་པར་བྱ། །དེ་ཡི་དབུས་སུ་སྣ་ཚོགས་པའི། །ཆུ་སྐྱེས་སྟེང་དུ་སེང་གེའི་གདན། །དེར་ནི་དབྱངས་ཡིག་དང་པོ་ལས། །ཀུན་དའི་འོད་ལྡན་རྣམ་སྣང་མཛད། །བདུད་རྩིའི་དཀྱིལ་འཁོར་ལ་གནས་པའི། །ཞལ་བཞི་མཉམ་གཞག་ཕྱག་རྒྱ་ཅན། །དེ་ཡི་མདུན་དུ་མི་བསྐྱོད་པ། །རྡོ་རྗེ་དྲིལ་བུ་དང་ལྡན་པའི། །གླང་པོའི་སྟེང་དུ་ཟླ་བ་ལ། །ནམ་མཁའི་མདོག་ཅན་བསམ་པར་བྱ། །ལྷོ་རུ་རྡོ་རྗེ་ཉི་མ་ཡང༌། །རྟ་ཡི་སྟེང་དུ་ཟླ་བ་ལ། །རིན་ཆེན་དྲིལ་བུ་དང་ལྡན་པ། །གསེར་གྱི་མདོག་ནི་རྣམ་པར་བསམ། །ནུབ་ཏུ་པདྨ་གར་དབང་ཡང༌། །རྨ་བྱའི་སྟེང་གི་ཟླ་བ་ལ། །པདྨའི་དྲིལ་བུ་དང་བཅས་པ། །པདྨ་རཱ་གའི་མདོག་ཅན་བསམ། །བྱང་གི་ཕྱོགས་སུ་རྟ་མཆོག་ཀྱང༌། །མཁའ་ལྡིང་གསེར་འོད་ལ་གནས་པའི། །སྣ་ཚོགས་རྡོ་རྗེ་དྲིལ་བུ་མཛེས། །སྣ་ཚོགས་པ་ཡི་མདོག་ཅན་བསྒོམ། །དེ་དག་གི་ཡང་ཐུགས་ཀར་ནི། །དང་པོར་སངས་རྒྱས་བསྒོམ་བྱ་སྟེ། །དཔལ་ལྡན་ཞལ་ལྔ་ཕྱག་བརྒྱང་པ། །ཨཉྫ་ན་ཡི་སྐུ་མདོག་འཆང༌། །ངོ་མཚར་དྲག་པོ་སྒེག་པ་དང༌། །དགོད་དང་བཅས་པའི་ཞལ་མངའ་བ། །གཡས་གཡོན་རལ་གྲི་པུ་སྟི་དག །བདག་ཉིད་ཆེན་པོས་བཞི་བཞི་བསྣམས། །འཇིགས་སུ་རུང་བའི་གཟུགས་ཀྱིས་ནི། །སེམས་
ཅན་རྣམས་ནི་ཚིམ་པར་བྱེད། །རེ་རེའི་ཐུགས་ཀར་འཁོར་ལོ་ནི། །རྩིབས་བཅུ་གཉིས་ལ་དབྱངས་ཡིག་ལྡན། །ཕྱི་རོལ་ཀཱ་ལི་ནང་ན་ཡང༌། །ཨོཾ་སརྦ་དྷརྨཱའི་སྔགས་སུ་བཅས། །ཐམས་ཅད་ལ་ཡང་ཁྱད་མེད་པར། །དེ་སྟེང་ཤེས་རབ་འཁོར་ལོ་སྟེ། །ཕྱི་རོལ་ཨ་ཨཱ་སོགས་ཀྱིས་མཚན། །ནང་གི་མུ་ཁྱུད་ཨཱ་ལིར་ལྡན། །ཁྱད་པར་གཙོ་བོའི་འཁོར་ལོ་ནི། །རྩིབས་དྲུག་གསང་སྔགས་དྲུག་དང་ལྡན། །གཞན་དག་གི་ཡང་རང་རང་མཚན། །ཨོཾ་དང་ཡ་ཏེ་ན་མར་བཅས། །ན་མ་རྩིབས་གཅིག་ལ་བསྡོངས་ནས། །ལྷག་མ་ཡི་གེའི་གྲངས་བཞིན་བརྩིགས། །གཉིས་མེད་འཇམ་དཔལ་གཙོ་བོ་ནི། །ཡེ་ཤེས་སེམས་དཔའ་བསྒོམ་པར་བྱ། །རང་རིགས་ཕྱག་རྒྱ་ཅན་གཉིས་གཉིས། །ཨུཏྤལ་དང་པུ་སྟི་འཆང༌། །གཞན་དག་ལ་ཡང་ཁྱད་མེད་པར། །རལ་གྲི་གཡས་པ་ལ་མཚན་ནོ། །གཡོན་པས་རྡོ་རྗེ་རིན་ཆེན་དང༌། །ཆུ་སྐྱེས་སྣ་ཚོགས་རྡོར་དྲིལ་འཆང༌། །དེ་ཡང་གཉིས་པ་ལྔ་པ་དང༌། །དང་པོ་བཞི་པ་ཡེ་ཤེས་སྐུ། །ཀུན་ཀྱང་གཞོན་ནུའི་རྒྱན་དང་ལྡན། །ཀུནདའི་ཁ་དོག་གཟུགས་འཆང་བ། །རྡོ་རྗེ་སེམས་དཔའ་དཀར་པོ་སྟེ། །རྡོ་རྗེ་དང་ནི་དྲིལ་བུ་འཆང༌། །རྒྱལ་པོ་སེར་པོ་ལྕགས་ཀྱུ་འཆང༌། །ཆགས་པ་དམར་པོ་མདའ་གཞུ་ཅན། །ལེགས་པ་ལྗང་གུ་ལེགས་སྤྱིན་པ། །མི་བསྐྱོད་པ་ཡི་འཁོར་དུ་གནས། །རིན་ཆེན་དྲིལ་འཆང་རིན་ཆེན་སེར། །ཉི་མ་ཉི་བཞིན་གཡས་ཉི་འཛིན། །ལྗང་གུ་ཏོག་ནི་རྒྱལ་མཚན་འཛིན། །གཡོན་པ་གདན་ལ་གཉིས་ཀ་ཡང༌། །བཞད་པ་དཀར་པོ་སོ་ཕྲེང་འཛིན། །སྔ་མ་བཞིན་དུ་གཡོན་པ་ཡིས། །རིན་ཆེན་འབྱུང་བའི་འཁོར་དུ་གནས། །ཆོས་དམར་པདྨའི་སྡོང་བུ་འཛིན། །རྣོན་པོ་རལ་གྲི་པུ་སྟི་དཀར། །འཁོར་ལོ་སེར་པོ་འཁོར་ལོ་འཛིན། །སྨྲ་བ་ལྗང་གུ་ལྗགས་འཛིན་པ། །གཉིས་ཀ་གཡོན་པ་གདན་ལ་བརྟེན། །པདྨ་གར་གྱི་འཁོར་དུ་གནས། །ལས་ནི་ལྗང་གུ་རྒྱ་གྲམ་གྱིས། །བསྲུང་བ་སེར་པོ་གོ་ཆ་ཅན། །གནོད་སྤྱིན་ནག་པོ་མཆེ་བ་འཛིན། །ཁུ་ཚུར་སེར་པོ་ཁུ་ཚུར་འཛིན། །དོན་ཡོད་གྲུབ་པའི་འཁོར་དུ་གནས། །དེ་ལྟར་
འཁོར་ལོ་ཆེན་པོ་ནི། །བསམས་ནས་རིམ་བཞིན་མཆོད་པར་བྱ། །མཆོད་པའི་རིམ་པ་དཀྱིལ་འཁོར་གྱི། །ཆོ་ག་ཉིད་ལས་ཤེས་པར་བྱ། །སྙིང་པོ་དང་ནི་ཉེ་སྙིང་པོ། །རྒྱལ་བ་ཀུན་ཀྱང་མཉེས་པར་བྱ། །ལྷག་མ་ཀུན་གྱིས་བཟླས་པའི་སྔགས། །ཡི་གེ་གསུམ་པོ་ཤེས་པར་བྱ། །གཞན་དག་རྒྱལ་བའི་དཀྱིལ་འཁོར་བཅས། །རང་རང་གནས་སུ་བསམས་ནས་ནི། །དེ་ཡི་ང་རྒྱལ་དང་ལྡན་པས། །ཅི་རིགས་པ་ནི་སྤྱང་བར་བྱ། །རྣལ་འབྱོར་ལྡན་པའི་དུས་སུ་ཡང༌། །མཚན་བརྗོད་དང་ནི་བསྟོད་པ་ཡིས། །རྒྱལ་བ་འཁོར་བཅས་བསྟོད་ནས་ནི། །དུས་གསུམ་དུ་ཚེ་དོན་མཚན་བྱ། །རྣམ་པ་ཉི་ཤུས་བྱང་ཆུབ་པའི་སྒྲུབ་ཐབས། །དཔལ་ལྡན་སོ་མ་ཤྲཱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་མ་ཧཱ་ཛྙཱ་ན་དང༌། ལོ་ཙཱ་བ་གཞོན་ནུ་འོད་ཀྱིས་བསྒྱུར།།