ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོའི་སྒྲུབ་ཐབས།
དཱ་རི་ཀ་པ།
རྒྱ་གར་སྐད་དུ། པྲཛྙཱ་པཱ་ར་མི་ཏ་ཧྲྀ་ད་ཡ་སཱ་དྷ་ནཾ་ནཱ་མ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོའི་སྒྲུབ་ཐབས་ཞེས་བྱ་བ། བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཕྱག་འཚལ་ལོ། །གང་ཞིག་སྔོན་དུ་བྱས་གྱུར་པས། །རབ་ཞི་ཐམས་ཅད་མཁྱེན་མཛད་པའི། །རྒྱལ་བ་དེ་ལ་རབ་བཏུད་དེ། །སྒྲུབ་ཐབས་ཆོ་ག་དྲན་པར་བྱ། །དབེན་ཞིང་ཉམས་དགའི་ས་ཕྱོགས་སུ། །བདེ་བའི་སྟན་ལ་འདུག་ནས་ནི། །སྙིང་གར་པད་ཟླའི་ཉི་སྟེང་དུ། །མཾ་ལས་འོད་འཕྲོས་ཕྱོགས་བཅུ་ནས། །རྒྱལ་བ་སྲས་བཅས་སྤྱན་དྲངས་ཏེ། །ནམ་མཁའི་ཕྱོགས་སུ་གནས་པར་བསམ། །མཆོད་དང་ཉེས་པ་བཤགས་པར་བྱ། །རྗེས་སུ་ཡི་རང་གསོལ་བ་གདབ། །སྐྱབས་འགྲོ་སེམས་བསྐྱེད་བླང་བྱ་ཞིང༌། །བྱང་ཆུབ་ཆེན་པོར་བསྔོ་བར་བྱ། །བྱམས་དང་སྙིང་རྗེ་དགའ་བ་དང༌། །བཏང་སྙོམས་ཚངས་པའི་གནས་པ་བསྒོམ།། གསང་སྔགས་འདི་ནི་རབ་ཏུ་བཟླས། །ཨོཾ་སྭ་བྷཱ་ཝ་ཤུདྡྷཿསརྦ་དྷརྨྨཱཿསྭ་བྷཱ་ཝ་ཤུདྡྷོ྅ཧཾ། རྒྱུ་དང་མི་རྒྱུ་འདི་དག་ཀུན། །གཟོད་ནས་རང་བཞིན་སྟོང་པར་དྲན། །དེ་རྗེས་སྟོང་པའི་རང་བཞིན་ལས། །ཡཾ་རཾ་བཾ་ལཾ་འབྱུང་བ་བཞི། །སུཾ་ལས་རི་རབ་དེ་སྟེང་དུ། །བྷྲཱུཾ་ལས་མཛེས་པའི་གཞལ་ཡས་ཁང། །ཡངས་ཤིང་རྒྱན་ལྡན་བསམ་པར་བྱ། །དབུས་སུ་སེང་གེའི་ཁྲི་སྟེང་དུ། །པདྨ་ཉི་མ་ལ་གནས་པའི། །དམར་སེར་རྒྱལ་ཡུམ་སྐུ་མདོག་སེར། །ཞལ་གཅིག་ཕྱག་བཞི་སྐུ་ནི་རྒྱས། །གཡས་གཉིས་རྡོ་རྗེ་སྐྱབས་སྦྱིན་ཅན། །གཡོན་གཉིས་རྡོ་རྗེ་ཆོས་འཆད་མཛད། །ལོངས་སྤྱོད་
རྫོགས་པའི་རྒྱན་ལྡན་བསམ། །ཤར་དུ་སེང་གེ་ཟླ་སྟེང་དུ། །སཾ་ལས་རྒྱལ་བ་ཤཱཀྱ་ཐུབ། །བཙོ་མའི་མདོག་ཅན་སྤྲུལ་པའི་སྐུ། །གཙུག་ཏོར་ལྡན་པ་བསྐྱེད་པར་བྱ། །ནུབ་ཏུ་པདྨ་ཟླ་བ་ལ། །ཧྲཱིཿ་ལས་འཇིག་རྟེན་དབང་ཕྱུག་ནི། །ཤིན་ཏུ་དཀར་ཞིང་རྒྱན་མཛེས་པ། །སེམས་དཔའི་སྐྱིལ་ཀྲུང་བཞུགས་པར་བསམ། །ལྷོ་རུ་མཾ་ལས་ཤཱ་རིའི་བུ། །དཀའ་ཐུབ་ཆ་བྱད་སྐུ་མདོག་ནི། །དམར་སྐྱ་པུས་བཙུགས་ཐལ་མོ་སྦྱར། །ཤིན་ཏུ་མཛེས་པའི་སྐུ་ཉིད་བསམ། །བྱང་དུ་ཀུནད་ལས་བསྐྱེད་པ། །དམར་པོ་རྒྱལ་ལ་གུས་པའི་ཚུལ། །པདྨའི་སྟེང་དུ་བསྐྱེད་བྱས་ནས། །དེ་ལྟར་བསྐྱེད་པ་རྫོགས་པ་དང༌། །བདག་ཉིད་ཐུགས་ཀའི་མཾ་ལས་ནི། །འོད་འཕྲོས་ཡེ་ཤེས་བཀུག་བྱས་ཏེ། །མཆོད་དང་ཛཿ་ཧཱུཾ་བཾ་ཧོཿ་ཡིས། །སོ་སོར་དགུག་གཞུག་བྱས་ནས་ནི། །རྒྱལ་བས་དབང་བསྐུར་སོ་སོ་ལ། །རྣམ་སྣང་མི་བསྐྱོད་རིན་འབྱུང་དང༌། །མཐའ་ཡས་རྒྱལ་བ་ཉིད་ཀྱིས་མཚན། །ཡི་གེ་གསུམ་གྱིས་བྱིན་གྱིས་བརླབས། །ཡུམ་གྱི་ཐུགས་ཀར་རྒྱལ་བ་ཉིད། །བསྡུས་ཏེ་ཏིང་འཛིན་སྙོམས་ཞུགས་ནས། །དྲིས་དང་ལན་གདབ་སྟོང་པའི་དོན། །འཁོར་རྣམས་ཀུན་ལ་སྦྱིན་པར་བསམ། །འདི་ལྟར་ཆོས་ཀུན་རབ་ཞི་ལས། །སྤྲོས་པའི་འཁོར་ཀུན་ཡུམ་ལ་བསྡུ། །མཚན་བཅས་ཏིང་འཛིན་ཡི་གེ་ལ། །དམིགས་ཏེ་གསལ་ལ་མི་རྟོག་བྱ། །གཟོད་ནས་ཞི་བའི་ཆོས་ཀུན་ནི། །རྐྱེན་དབང་འཁྲུལ་བར་རབ་སྣད་ལ། །དེ་ཉིད་ཚེ་ན་ཞི་བ་ཉིད། །ཞི་ཚེ་སྒྱུ་མ་ལྟ་བུར་སྣང༌། །མཐའ་བཞིར་མི་རྟོག་བྲལ་བར་མིན། །བྱིང་རྒོད་མི་གནས་སེམས་ཉིད་ནི། །འོད་གསལ་ཅིར་ཡང་མི་སྒོམ་པ། །མཚམས་མེད་རྣལ་འབྱོར་ཕ་རོལ་ཕྱིན། །རྒྱལ་བས་ཞི་བར་རབ་གསུངས་དང༌། །གཅིག་དང་དུ་མ་བྲལ་སོགས་པས། །སྤྲོས་པ་བཀག་པས་མི་རྟོག་ཤེས། །རྣམ་པར་རྟོག་དང་ཡང་དག་རྟོག །གལ་ཏེ་སྐྱོ་ན་བཟླས་བྱ་སྟེ། །ཏདྱ་ཐཱ། ཨོཾ་ག་ཏེ་ག་ཏེ་པཱ་ར་ག་ཏེ་པཱ་ར་སཾ་ག་ཏེ་བོ་དྷི་སྭཱ་ཧཱ། མཾ་ལ་རབ་བསྐོར་འོད་ཟེར་ནི། །སྤྲོ་བསྡུས་དོན་བྱས་སྔགས་ཀྱི་འོད། །ལྟེ་བའི་ཁ་ཡི་བར་དུ་བསྐོར། །ཡེ་ཤེས་སེམས་དཔའ་མཆོད་ལ་གཤེགས། །སྟོང་པ་བཅོ་བརྒྱད་བརྗོད་བྱ་སྟེ། །དམ་ཚིག་སེམས་དཔའ་ཐམས་ཅད་དང༌། །གཞལ་ཡས་ཁང་ནི་མི་
དམིགས་བྱ། །རྒྱལ་བའི་བཀའ་དང་ནཱ་གཱ་རྫུ་ན་ཡི། །གསུངས་པ་ལ་བརྟེན་མོས་རྣམས་དོན་དང་ནི། །བདག་ཉིད་སྦྱང་ཕྱིར་ཆོ་ག་ཐབས་མཆོག་བྱས། །མཁས་རྣམས་བློ་ཡི་དྲི་མ་བཟོད་པར་མཛོད། །འདི་ལ་ངལ་བའི་དགེ་བའི་རྩ་བ་དེས། །འགྲོ་རྣམས་རབ་སྦྱངས་སྙིང་པོའི་དོན་ཤེས་ནས། །རྒྱལ་བའི་གོ་འཕང་རབ་ཏུ་ཐོབ་འགྱུར་ཏེ། །འགྲོ་རྣམས་ཞི་བའི་ལམ་ལ་འགོད་པར་ཤོག །ཤེས་རབ་ཀྱི་ཕ་རོལ་ཏུ་ཕྱིན་པའི་སྒྲུབ་ཐབས་སློབ་དཔོན་ཆེན་པོ་དཱ་རི་ཀ་པས་མཛད་པ་རྫོགས་སོ།།