ངན་སོང་ཐམས་ཅད་ཡོངས་སུ་སྦྱོང་བའི་དཀྱིལ་འཁོར་གྱི་སྒྲུབ་ཐབས་ཀྱི་འགྲེལ་པ།
ཀུན་དགའ་སྙིང་པོ།
རྒྱ་གར་སྐད་དུ། སརྦ་དུརྒ་ཏི་པ་རི་ཤོ་དྷ་ན་མཎྜ་ལ་སཱ་དྷ་ནོ་པི་ཀ་བྲྀཏྟི། བོད་སྐད་དུ། ངན་སོང་ཐམས་ཅད་ཡོངས་སུ་སྦྱོང་བའི་དཀྱིལ་འཁོར་གྱི་སྒྲུབ་ཐབས་ཀྱི་འགྲེལ་པ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངན་སོང་ཐམས་ཅད་ཡོངས་སུ་སྦྱོང་བའི་རྒྱལ་པོ་ལ་ཕྱག་འཚལ་ལོ། །དམིགས་མེད་དོན་དམ་རབ་ཞི་བ། །སྤྲོས་པ་མེད་པ་ཆོས་ཀྱི་སྐུ། །བྱིན་རླབས་རྫོགས་དང་སྤྲུལ་སྐུ་ལ། །བདག་ཉིད་གུས་པར་ཕྱག་འཚལ་ལོ། །རྡོ་རྗེ་རྩེ་མོའི་རྒྱུད་ཉིད་ལས། །ཡན་ལག་རྒྱུད་དུ་གྱུར་པ་ཡི། །རྡོ་རྗེ་གཙུག་ཏོར་རྒྱུད་རྒྱལ་གྱི། །སྒྲུབ་ཐབས་འགྲེལ་པ་བདག་གིས་བཤད། །དེ་ལ་རྡོ་རྗེ་གཙུག་ཏོར་གྱི་རྒྱུད་ལས་བཏུས་པའི་སྒྲུབ་ཐབས་གསུང་གི་དཀྱིལ་འཁོར་འདི་ལ་དང་པོར་དགོས་འགྲེལ་བརྗོད་པར་བྱ་སྟེ། དེ་ཡང་འགྲེལ་པ་དང༌། བརྗོད་བྱ་དང༌། དགོས་པ་དང༌། དགོས་པའི་དགོས་པ་རྣམས་ཀྱིས་གཏན་ལ་ཕབ་ནས། སྤྱོད་པས་ན་འགྲེལ་པ་སྒྲུབ་ཐབས་འདིའི་འགྲེལ་པ་བརྗོད་པར་བྱའོ། །དེ་ལ་དེའི་འགྲེལ་པ་དང་བརྗོད་བྱ་ཅི་སྟེ་བཤད་པར་མི་བྱ། དེ་སྨྱོན་པའི་ཚིག་བཞིན་དུ་མི་འབྲེལ་བ་དང་དོན་མེད་པར་བཤད་སྙམ་པའི་དོགས་པའི་རྟོག་པ་སྔོན་དུ་བཏང་བས་ཉམས་པར་མི་འགྱུར་རོ། །དེའི་ཕྱིར་ནི་འདིའི་འགྲེལ་པ་དང་བརྗོད་བྱ་གདོན་མི་ཟ་བར་བརྗོད་དོ། །དེ་ལ་བརྗོད་བྱ་ནི་གཉིས་སུ་མེད་པ་དང་དེ་ཁོ་ན་ཉིད་གཉིས་སུ་མེད་པ་དང་དེ་ཁོ་ན་ཉིད་སྦྱོང་བའི་དོན་གཉིས་བརྗོད་པ་ནི་ཚིག་དང་ཡི་གེ་སྟེ་སྒྲུབ་ཐབས་འདིའོ། །སྒྲུབ་ཐབས་འདིའི་དོན་ཕྱིན་ཅི་མ་ལོག་པར་བརྗོད་པའོ། །རྗོད་པ་དང་བརྗོད་པར་བྱ་བ་དེ་གཉིས་ཀྱི་མཚན་ཉིད་ཐབས་དང་ཐབས་ཀྱིས་འགྲེལ་
པས་ན་འགྲེལ་པའོ། །དགོས་པ་ནི་དཀྱིལ་འཁོར་འདིར་དབང་བསྐུར་བའོ། །དགོས་པའི་དགོས་པ་ནི་དེའི་འབྲས་བུར་གྱུར་པ་སྟེ་དགའ་ལྡན་ལ་སོགས་པའི་ལྷའི་ལུས་ཐོབ་པར་བྱས་སོ། །དེ་ལ་དང་པོ་སླད་ཀྱི་དོན་བཤད་པ་ཡང་དང་པོ་ཕྱག་འཚལ་བ་བསྟན་ཏེ་དེ་ཡང༌། ཁྱབ་བདག་ཤཱཀྱ་སེང་གེ་ལ། །དངོས་ཀུན་གྱིས་ནི་ཕྱག་འཚལ་ནས། །ཞེས་པ་དེ་ལ་ཡང་ཁྱབ་ཅེས་པ་ནི་ཤིན་ཏུ་རྣམ་པར་དག་པ་ཆོས་ཀྱི་དབྱིངས་ཀྱི་ངོ་བོ་དོན་དམ་པ་དེའོ། །དོན་དམ་པ་དེས་ཀུན་ལ་ཁྱབ་པའི་ཕྱིར་ན་ཁྱབ་ཅེས་བྱའོ། །བདག་ཅེས་བྱ་བ་ནི་དོན་དམ་པ་དེའི་བདག་ཉིད་དུ་གྱུར་པ་དེའོ། །དེ་ཡང་ཡིན་སྙམ་པ་ལ། རིགས་སུ་འཁྲུངས་པ་ཤཱཀྱ་ཐུབ་པ་དེའོ། །སེང་གེ་ནི་མི་འཇིགས་པ་བཞི་དང་ལྡན་པའོ། །དངོས་ཀུན་གྱིས་ནི་ཕྱག་འཚལ་ནས། །ཞེས་པ་ལ་དངོས་ཞེས་པ་ནི་ལུས་གསུམ་མོ། །ཀུན་ཞེས་པ་ནི་མ་ལུས་པའོ། །དེ་ལ་ལུས་ཀྱི་སྒོ་ནས་ཕྱག་བཙལ་བ་ནི་ཡན་ལག་སྨད་ལྔ་ས་ལ་བཙུགས་ནས་ཕྱག་བཙལ་བའོ། །ངག་གི་སྒོ་ནས་ཕྱག་བཙལ་བ་ནི་གསུམ་སྟེ་སྒྲ་དང་དབྱངས་དང་ཀུན་དུ་རྒྱུ་བའི་སྒོའོ། །དེ་ལ་སྒྲ་ཡང་ལྔ་སྟེ་ལྕེ་རྩ་ནས་ཀའི་ཚོགས་འབྱུང༌། ལྕེ་རྩེ་དང་སོ་ནས་ཚའི་ཚོགས་འབྱུང་བ་དང༌། ལྕེ་དང་རྐན་ལས་ཏའི་ཚོགས་འབྱུང་སྟེ། མཆུ་ལས་པའི་ཚོགས་འབྱུང་བའོ། །ཡ་ལ་སོགས་པ་ནི་གནས་ལྔ་པོ་ཅི་རིགས་སུ་སྦྱར་བའོ། །དབྱངས་ཀྱི་ཚོགས་ནི་ལྟེ་བ་ནས་མགྲིན་པའི་བར་ནས་འབྱུང་སྟེ་དེ་ཡང་ཨ་ཞེས་བྱ་བ་ལ་སོགས་པའོ། །དེ་ཡང་སྒྲའི་ཡི་གེ་ལ་དབྱངས་ཀྱིས་བརྒྱན་པས་ཚིག་གི་ཚོགས་འབྱུང་སྟེ། དེའི་ཚོགས་ཀྱིས་བསྟོད་པས་བསྟོད་པའོ། །ཀུན་དུ་རྒྱུ་བའི་སྒོ་ནི་ཧཱུཾ་ལ་བྱ་སྟེ་ཧཱུཾ་ནི་ལྟེ་བ་ནས་ལངས་ཏེ་རྒལ་ཚིགས་ཀྱི་ཁོང་བརྒྱུད་ནས་སྣའི་ཁུང་བུ་གཡས་གཡོན་དུ་འབྱུང་བའོ། །དེ་ཡང་སྲོག་དང་འདྲེས་ཏེ་འབྱུང༌། །སྲོག་ཅེས་པ་ནི་རླུང་ལ་བྱའོ། །རླུང་ནི་སྒོ་དགུ་ཀ་ནས་འབྱུང་བའོ། །ཧཱུཾ་ནི་རྩོལ་བའོ། །རྩོལ་བ་ནི་ངན་པའོ། །ཧཱུཾ་དེ་བྱང་ཆུབ་ཀྱི་སེམས་དྲན་པའི་རྒྱུར་ཆེ་བས་ན་དྲན་པའོ། །དྲན་པས་བྱང་ཆུབ་ཀྱི་སེམས་སྒྲུབ་པས་ན་རྩོལ་བའོ། །དེའི་གྲོགས་སུ་གྱུར་པ་ནི་བརྩོན་འགྲུས་སོ། །རྩེ་གཅིག་ཏུ་ཁྱབ་པས་ན་ཏིང་ངེ་འཛིན་ནོ། །བརྩོན་འགྲུས་
ལ་ཡང་རྩོལ་བ་ཞེས་བརྗོད་དོ། །དེ་ཡང་ལུང་ལས། སྲོག་དང་རྩོལ་བ་ཞེས་བྱ་བ། །སྲོག་ཅེས་བྱ་བ་རླུང་ལ་བྱ། །རྩོལ་བ་ཞེས་བྱ་དྲན་པའོ། །སྲོག་རྩོལ་གཉིས་ཀྱིས་བྱང་ཆུབ་བསྒྲུབ། །བྱང་ཆུབ་སྙིང་པོ་ཧཱུཾ་ཉིད་དོ། །ཞེས་སོ། །དེ་བས་ན་བྱང་ཆུབ་ཀྱི་སྙིང་པོ་ཧཱུཾ་དེས་བསྟོད་དབྱངས་ཀྱི་སྣ་འདྲེན་པས་སོ། །དེ་ཡང་ལུང་ལས། བསྟོད་པ་ཚིག་ཏུ་བརྗོད་པ་དང༌། །ཧཱུཾ་ནི་སྣ་གླུ་འདྲེན་པས་བླང༌། །ཞེས་སོ། །ཡིད་ཀྱིས་ཕྱག་བཙལ་བ་ནི་འོག་ནས་འབྱུང་བའི་ནང་སེམས་ཀྱི་དཀྱིལ་འཁོར་ལ་བརྟགས་པས་ཕྱག་བཙལ་བའོ། །དེ་ཡང་ལུང་ལས། དབང་པོ་དགག་དཀའ་གླང་པོ་མཆོག །ནུས་པ་སྟོབས་ཀྱི་ལྕགས་ཀྱུས་དགུག །ཐིག་སྡོང་སངས་རྒྱས་ཉིད་མྱུ་གུ་།ཟླ་བའི་འོད་ཟེར་ལྟར་འཕྲོ་བ། །རང་གི་སྙིང་གའི་དབུས་ན་གནས། །ཐུན་བཞི་པ་ཡི་རིམ་པ་ཡིས། །དེ་ལ་རབ་ཏུ་གནས་པ་ནི། །ཡིད་ཀྱི་སྒོ་ནས་ཕྱག་བཙལ་བའོ།། ཞེས་སོ། །དེས་ནི་ཕྱག་བཙལ་བ་བསྟན་ནས་ད་ནི་དམ་བཅའ་བ་བསྟན་ཏེ། རྩ་བའི་རྒྱུད་ལས་བཏུད་ནས་སུ། །ཞེས་པ་ལ་སོགས་པ་གསུངས་ཏེ་རྩ་བའི་རྒྱུད་ནི་རྡོ་རྗེ་གཙུག་ཏོར་གྱི་རྒྱུད་དོ། །དེ་ལས་དཀྱིལ་འཁོར་གསུམ་བསྟན་པའི་དང་པོ་ཤཱཀྱ་ཐུབ་པ་རྡོ་རྗེ་གཙུག་ཏོར་གྱི་དཀྱིལ་འཁོར་འདི་འབྱུང་བས་ན་དེ་ཡང་རྒྱུད་དེ་ལ་ཡང་རྩ་བའི་རྒྱུད་དང་རྒྱུད་ཕྱི་མ་གཉིས་ལས། རྩ་བའི་རྒྱུད་དུ་དཀྱིལ་འཁོར་འདི་གསུངས་སོ། །གསུངས་པ་དེ་སྒྲུབ་ཐབས་སུ་འདིར་ཀུན་དགའ་སྙིང་པོས་བཏུས་ནས་མཛད་དོ། །དེ་ཡང་འདིར་ཅིའི་ཆེད་དུ་མཛད་ཅེས་པ་དང༌། ངན་སོང་ཐམས་ཅད་སྦྱོང་མཛད་པའི། །ཞེས་པ་སྟེ་དེ་ཡང་རྒྱུ་སྦྱང་བ་དང་རྐྱེན་སྦྱང་བ་དང་འབྲས་བུ་སྦྱང་བའོ། །དེ་གང་གི་སྙམ་པ་ལ་ཁམས་གསུམ་གྱི་སེམས་ཅན་གྱིའོ། །དེ་ཡང་རྒྱུ་གང་རྐྱེན་གང་འབྲས་བུ་གང་སྙམ་ན་རྒྱུ་ཉོན་མོངས་པ་ལྔའོ། །རྐྱེན་སྲོག་གཅོད་པ་ལ་སོགས་པའོ། །འབྲས་བུ་ནི་ངན་སོང་གསུམ་མོ། །དེ་ཡང༌། ཚུལ་ལམ་ཐབས་ཅིས་སྦྱོང་ན་ནི། །དཀྱིལ་འཁོར་ཐབས་ནི་ཞེས་བྱ་སྟེ། །དཀྱིལ་འཁོར་ལ་ཡང་ནང་སེམས་ཀྱི་དཀྱིལ་འཁོར་དང༌། སྦྱོར་བ་གསུམ་དང༌། རྡུལ་ཚོན་གྱི་དཀྱིལ་འཁོར་དང༌། རང་བཞིན་གྱི་དཀྱིལ་འཁོར་རོ། །ནང་སེམས་ཀྱི་
དཀྱིལ་འཁོར་ལ་ཡང་བརྟག་བྱ་ནང་སེམས་ཀྱི་དཀྱིལ་འཁོར་དང་གཞན་དོན་ནང་སེམས་ཀྱི་དཀྱིལ་འཁོར་རོ། །ཐབས་ནི་ཞེས་བྱ་བ་ནི་དེ་རྣམས་ཀྱི་ཏིང་ངེ་འཛིན་བྱ་བའི་ཐབས་གང་དང་གང་གིས་གནས་སྐབས་ཤེས་པར་བྱའོ། །བཤད་བྱ་སྟེ་ཞེས་པ་ནི་དཀྱིལ་འཁོར་དེ་རྣམས་ཀྱི་རིམ་པ་བཤད་པར་བྱའོ། །ཅིའི་ཕྱིར་ཞེ་ན། སློབ་དཔོན་ཕན་པའི་དོན་ཕྱིར་རོ། །ཞེས་པ་སྟེ་མ་འོངས་པའི་སེམས་ཅན་འདིའི་སྒོ་ནས་དོན་བྱེད་པར་འདོད་པ་འདིའི་ཆེད་དུ་བརྩམས་སོ་ཞེས་དགོངས་སོ། །དེ་ནི་བརྩམས་པའི་དམིགས་སོ། །ད་ནི་རྒྱས་པར་བཤད་དེ། དེ་ཡང་བསྙེན་པ་དང་སྒྲུབ་པའི་རིམ་པ་གཉིས་སུ་ཤེས་པར་བྱའོ། །བསྙེན་པ་ལ་ཡང་སྔོན་དུ་འགྲོ་བ་དང་སྦྱོར་བ་དང་པོ་དང༌། དཀྱིལ་འཁོར་རྒྱལ་བ་མཆོག་དང༌། ལས་རྒྱལ་བ་མཆོག་གི་ཏིང་ངེ་འཛིན་ཏོ། །དེ་ལ་སྔོན་དུ་འགྲོ་བ་ལ་བདག་བསྲུང་བ་ལ་སོགས་པ་དང་ཚོགས་ཀྱི་ཡན་ལག་གཉིས་སོ། །སྲུང་བ་ལ་སོགས་པ་ལ་ཡང་བདག་དང་དཀྱིལ་འཁོར་བསྲུང་བའོ། །དེའི་དོན་རྣམས་ནི་སྐབས་དབྱེ་བར་བྱ་སྟེ་དེ་ཡང་དང་པོར་གནས་བསྟན་པ་ནི། ཡིད་དགའ་བ་ཡི་ཕྱོགས་སུ་ནི། །ཞེས་པའོ། །ཁྲུས་ལ་ཡང་རྣམ་པ་གཉིས་ཀྱིས་བསྟན་ཏེ། ཕྱིའི་ཁྲུས་ནི་ཆུ་ལ་སོགས་པའོ། །ནང་གི་ཁྲུས་ནི་བདག་མེད་པ་ལ་མོས་ནས་སུ་ཞེས་བྱའོ། །བདག་བསྲུང་བ་ནི་དང་པོར་བདག་མེ་ལྟར་འབར་བའི་གཟུགས་སུ་བསམས་ཏེ་ཧཱུཾ་ལས་མེ་ལྟར་འབར་བའི་གཟུགས་སུ་བསྐྱེད་དོ། །དེ་ཡང་སྐུ་མདོག་ནག་པོ། སྤྱན་གསུམ་པ་མེ་འབར་བའི་ནང་ན་བཞུགས་པ་སྐུ་སྟོད་གླང་པོ་ཆེའི་ཀོ་རློན་མནབས་པ། སྐུ་སྨད་སྟག་གི་པགས་པ་དཀྲིས་པ་ཞལ་གསུམ་པ་གཡས་དཀར་བ་གཡོན་དམར་བ་དབུས་སྐུ་དང་མཐུན་པ། ཕྱག་དྲུག་པ་ཕྱག་དང་པོ་གཉིས་ཀྱིས་ཁྲོ་བོ་ཐམས་ཅད་ཀྱི་ཕྱག་རྒྱ་བཅིངས་པ་ལ་བརྩོན་པ། བར་མ་གཉིས་ནི་མཆེ་བ་དང༌། རྡོ་རྗེ་རྒྱ་གྲམ་བསྣམས་པ། ཐ་མ་གཉིས་ཀྱིས་རིན་པོ་ཆེ་དང༌། ཁ་ཊྭཱཾ་རྩེ་གསུམ་བསྣམས་པའོ། །དེ་ལྟར་བདག་ཉིད་བསམས་ཏེ་མགྲིན་པ་བྱིན་གྱིས་བརླབས་པར་བྱ་བ་ནི། མགྲིན་པར་པདྨ་བསམ་པར་བྱ། །ཞེས་པ་ནས། སྔགས་བཟླས་པ་ལས་ནུས་པར་འགྱུར། །ཞེས་པའི་བར་གྱིས་སོ། །དེ་ནས་ལག་པ་བྱིན་གྱིས་བརླབ་
པ་ནི་ལག་པ་གཉིས་སུ་ཡི་གེ་ཨ་ཞེས་པ་ལ་སོགས་པའོ། །དེ་ཡང་གདན་དང་ས་བོན་དང་དེའི་རང་བཞིན་དང་ང་རྒྱལ་བྱ་བའོ། །དེ་ལྟར་ལག་པ་ལ་སོགས་པ་བྱིན་གྱིས་བརླབས་ནས་རྡོ་རྗེ་ཕྲེང་བའི་དབང་བླང་བར་བྱའོ། །དེའི་དོན་ཡང་མེ་ལྟར་འབར་བའི་སྔགས། ཨོཾ་བཛྲ་ཛྭ་ལ་ཨ་ན་ལཱརྐ་ཧཱུཾ། ཨ་བྷི་ཥིཉྩ་བྱ་བ་དང༌། ཕྱག་རྒྱ་ལས་འོད་འཕྲོས་པས་ཕྱོགས་བཅུའི་རྡོ་རྗེ་ཁྲོ་བོ་རྣམས་ཀྱིས་དབང་བསྐུར་བས་རྡོ་རྗེ་ཕྲེང་བ་སྟེ་རྩེ་ལྔར་གྱུར་ཏོ། །དེ་ནས་དཀྱིལ་འཁོར་བསྲུང་བའི་རིམ་པ་བསྟན་ཏེ། དེ་ཡང་དང་པོར་བགེགས་བསྐྲད་པ་དང༌། བསྣུན་པ་དང་བསྲེག་པར་བྱས་ནས་བཀའི་འཁོར་ལོས་བགེགས་བསྐྲད་དེ་དེའི་དོན་ཡང༌། རྡོ་རྗེ་འཇིགས་བྱེད་ནས་བརྩམས་ཏེ། །ཞེས་གསུངས་པས་མདོར་བསྟན་ཏེ་དེའི་དོན་ཡང་འདི་ལྟར་ཤེས་པར་བྱའོ། །རྡོ་རྗེ་འཇིགས་བྱེད་ཀྱི་སྔགས་དང་ཕྱག་རྒྱ་ལས་ཧཱུཾ་མཛད་འཇིགས་པར་བྱེད་པ་སྐུ་མདོག་ནམ་མཁའ་ལྟར་སྔོ་བསངས། ཞལ་གསུམ་ཕྱག་དྲུག་སྤྱན་གསུམ་གྱེན་དུ་བལྟ་བ། ཕྱག་གཉིས་ཀྱིས་རྡོ་རྗེ་དྲིལ་བུ་བཟུང་ནས་ཧཱུཾ་གི་ཕྱག་རྒྱ་བཅིངས་པའོ། །ཕྱག་བར་པ་གཉིས་ན་མདའ་གཞུ་ཕྱག་ཐ་མ་གཉིས་ན་རྡོ་རྗེ་ཕུར་བུ་བསྣམས་པའོ། །རྡོ་རྗེ་གནོད་སྦྱིན་འབྱུང་སྟེ། སྐུ་མདོག་ནག་པོ། ཞལ་གསུམ་ཕྱག་དྲུག་པ་སྤྱན་གསུམ་ནམ་མཁའ་ཁྱབ་པར་བལྟ་བ། ནམ་མཁའི་བགེགས་བཟློག་པ་ལ་བརྩོན་པ། ཕྱག་དང་པོ་གཉིས་རྡོ་རྗེ་མཆེ་བ་འཛིན་པ། བར་མ་གཉིས་ན་ཁ་ཊྭཱཾ་ག་དང་ཐོད་པ་འཛིན་པ། ཐ་མ་ཡིད་མཐུན་རྡོ་རྗེ་གཙུག་ཏོར་འཁོར་ལོས་སྒྱུར་བའི་སྔགས་དང་ཕྱག་རྒྱ་ལས་ཁྲོ་བོ་བགེགས་ལས་རྣམ་པར་རྒྱལ་བ་སྐུ་མདོག་དཀར་ནག་ཞལ་གསུམ་ཕྱག་དྲུག་པ་ཕྱག་དང་པོ་གཉིས་ཀྱིས་ཕྱག་རྒྱ་བཅིངས་པ། བར་མ་གཉིས་ན་འཁོར་ལོ་དང་དྲིལ་བུའོ། །རྡོ་རྗེ་ཞགས་པའི་སྔགས་དང་ཕྱག་རྒྱ་ལས་རྡོ་རྗེ་བཅིང་བའི་ཁྲོ་བོ་བྱུང་སྟེ། དེ་ནས་བརྩམས་ཏེ། མཚམས་བཞི་བཅིང་བར་བྱའོ། །རྡོ་རྗེ་བཅིང་བའི་ཁྲོ་བོ་བྱ་བ་ནི་ཁྲོ་བོ་གནོད་སྦྱིན་ནམ་མེ་ལྟར་འབར་བ་ལ་བྱའོ། །རྡོ་རྗེ་བ་དན་གྱི་སྔགས་དང༌། ཕྱག་རྒྱ་ལས་མི་གཡོ་མགོན་པོ་ནུབ་ཏུ་བསྐྱེད་དེ། སྐུ་མདོག་དམར་ནག །ཞལ་གསུམ་ཕྱག་དྲུག་པ་རྡོ་རྗེ་བ་དན་དང༌། ཐོད་དབྱུག་དང༌།
བེ་ཅོན་དང༌། རི་རབ་དང༌། ཕུར་བ་འཛིན་པའོ། །རྡོ་རྗེ་དུས་ཀྱི་སྔགས་དང་ཕྱག་རྒྱ་ལས་བདུད་རྩི་འཁྱིལ་པ། སྐུ་མདོག་ལྗང་གུ་ཞལ་གསུམ་ཕྱག་དྲུག་པ་ཕྱག་དང་པོ་རྡོ་རྗེ་མཆེ་བ། བར་མ་གཉིས་ན་རྒྱ་གྲམ་དང་ཁ་ཊྭཱཾ་ག་བསྣམས་པའོ། །རྡོ་རྗེ་རྩེ་མོའི་སྔགས་དང་ཕྱག་རྒྱ་ལས་ཁྲོ་བོ་གཤིན་རྗེ་གཤེད་བསྐྱེད་པར་བྱ་སྟེ་སྐུ་མདོག་ནག་པོ། ཞབས་བགྲད་པ། ཕྱག་གཉིས་ཀྱིས་རི་རབ་འདེགས་པས་ན། རྡོ་རྗེ་རི་བོའི་མཐར་ཐུག་པར། །མཁས་པ་ཡིས་ནི་བསམ་པར་བྱ། །ཞེས་སོ། །ར་བ་དྲ་བ་སྦྱོར་ནས་སུ། །ཞེས་པ་ནི་ཐུན་མོང་གསུངས་པའི་འཁོར་ལོ་སྟེ། རྡོ་རྗེ་ཧཱུཾ་མཛད་ཀྱི་སྔགས་དང་ཕྱག་རྒྱ་ལས་ར་བ་དང་དྲ་བ་དང་ས་གཞི་དང་གུར་བྱའོ། །རྡོ་རྗེ་བསྡམས་པ་དང༌། བཛྲ་བནྡྷ་ཞེས་བྱ་བས་གུར་གྱི་ནང་དྲ་བ་བྱའོ། །དེ་ནས་འོག་ཀྱང་བཅིང་བར་བྱ། །ཞེས་བྱ་བ་ནི་རྡོ་རྗེ་ཅན་གྱི་སྔགས་དང་ཕྱག་རྒྱ་ལས་ཁྲོ་བོ་སྟོབས་པོ་ཆེ་ཞེས་བྱ་བ་བསྐྱེད་དེ། སྐུ་མདོག་དག་པོའམ་དུད་ཀར་འདུག་པ་སྤྱན་གསུམ་པ་འོག་གི་བགེགས་ལ་གཟིགས་པ། ཕྱག་གཉིས་འོག་གི་བགེགས་བཟློག་པའི་ཕྱག་རྒྱ་འཆིང་བ། ཕྱག་གཉིས་ན་རི་རབ་འདེགས་ཐབས་སུ་འཕྱར་བའོ། །དེ་དག་གི་སྔགས་དང་ཕྱག་རྒྱ་ནི་རྡོ་རྗེ་ཆོ་ག་ཞིབ་མོ་ལས་ཤེས་པར་བྱའོ། །དེ་ཡང་རྡོ་རྗེ་སྲས་འདུ་སྲ་ལས། བདེ་བའི་སྟན་ལ་འདུག་ནས་སུ། །སྟོང་པ་ཉིད་ལས་ཁྲོ་བོར་བསྐྱེད། །ཁ་ལག་བྱིན་བརླབ་ཕྲེང་དབང་དང༌། །བསྐྲད་དང་བཀག་དང་ཐུན་མོང་གིས། །སྲུང་བ་དག་ནི་རབ་ཏུ་བྱ། །ཞེས་སོ། །ད་ནི་བསོད་ནམས་ཀྱི་ཚོགས་ཀྱི་ཡན་ལག་ལ་འཇུག་པར་བྱ་སྟེ། སེམས་ཅན་ཐམས་ཅད་ཕན་དོན་དུ། །ཞེས་པ་ལ་སོགས་པ་གསུངས་ཏེ་དེའི་དོན་ཡང་འདི་ལྟར་ཤེས་པར་བྱ་སྟེ། རྡོ་རྗེ་འཁོར་ལོའི་སྔགས་དང་ཕྱག་རྒྱ་ལས་དཀྱིལ་འཁོར་སྤྲུལ་པར་བྱ་སྟེ། དེ་ལས་དང་པོས་ནི་གཞལ་ཡས་ཁང་བསྐྱེད། གཉིས་པས་གདན་བསྐྱེད། གསུམ་པས་ལྷ་རྣམས་བསྐྱེད་པར་བྱའོ། །བཞི་པ་བརྒྱ་རྩ་བརྒྱད་བཟླས་པས་དཀྱིལ་འཁོར་དེར་བདག་ཉིད་ཞུགས་པར་འགྱུར་རོ། །དེ་ནས་ཕྱག་བཙལ་བར་བྱའོ། །དེ་ནས་མཆོད་པ་བྱིན་གྱིས་བརླབ། །དེ་ནས་མཆོད་དེ། མེ་ཏོག་བདུག་པ་མར་མེ་ལ། །ཞེས་པ་ལ་སོགས་པའོ། །དེ་
ནས་ཕྱག་རྒྱས་མཆོད་དེ། དེ་ནས་མེ་ཏོག་སྤོས་མེ་དང༌། །ཞེས་པ་ལ་སོགས་པའོ། །དེ་ནས་ལྷ་མོ་བརྒྱད་སྒེག་མོ་ཕྲེང་བ་ཞེས་པ་ལ་སོགས་པའོ། །དེ་ནས་ཕྱག་རྒྱ་དང་ཏིང་ངེ་འཛིན་གྱིས་མཆོད་དེ། མཆོད་པ་ཉི་ཤུའི་མཆོད་པས་མཆོད། ཅེས་པའོ། །དེ་ནས་སྡིག་པ་བཤགས་པ་ལ་སོགས་པ་བྱ་སྟེ་ཞེས་པ་དང་མཚམས་སྦྱར་བར་བྱའོ། །དེ་ཡང་དེ་ལྟར་རིམ་པར་ཤེས་པར་བྱ་སྟེ་སློབ་དཔོན་གྱིས་རྡོ་རྗེ་གཙུག་ཏོར་གྱི་རྒྱུད་ལ་ཇི་ལྟར་བཞུགས་པ་བཞིན་འདིར་ཡང་བཀོད་པའོ། །འདིར་ནི་ལས་ཀྱི་རིམ་པ་ལ་འཇུག་པས་དཀྲུགས་པ་ལས་རིམ་པར་ཤེས་པར་བྱའོ། །དེ་ཡང་རྟོག་པ་ཐམས་ཅད་བསྡུས་པའི་རྒྱུད་ཕྱི་མ་ལས་བྱམས་པས་ཞུས་པ། བཅོམ་ལྡན་འདས་མ་འོངས་པའི་སེམས་ཅན་རྣལ་འབྱོར་གྱི་དོན་ལ་བརྩོན་པ་རྣམས་ཀྱིས་སྔོན་དུ་འགྲོ་བའི་ཡན་ལག་གི་རིམ་པ་ཅི་ལྟར་ཤེས་པར་བགྱི་ཞེས་གསོལ་བ་དང༌། བཀའ་སྩལ་བ་རིགས་ཀྱི་བུ་རྣམས་འདི་ལྟར་ཤེས་པར་གྱིས་ཤིག །དཀྱིལ་འཁོར་སྤྲུལ་དང་ཕྱག་བཙལ་དང༌། །མཆོད་པ་བྱིན་གྱིས་བརླབ་པ་དང༌། །མཆོད་དང་སྡིག་བཤགས་ཡི་རང་དང༌། །དཀོན་མཆོག་གསུམ་ལ་སྐྱབས་འགྲོ་དང༌། །བསྐུལ་དང་གསོལ་བ་གདབ་པ་དང༌། །སེམས་བསྐྱེད་སྡོམ་གཟུང་བདག་དབུལ་དང༌། །དགེ་བསྔོ་རིམ་པར་ཤེས་པར་བྱའོ། །ཞེས་སོ། །དེ་ལ་སྡིག་པ་ཐམས་ཅད་བཤགས་པ། དབང་མེད་བདག་གིས་མི་དགེ་བགྱིས་པ་དང༌། །རྗེས་སུ་ཡི་རང་ཡང་ན་བགྱིད་སྩལ་གང༌། །དེ་དག་ཐམས་ཅད་བྱང་ཆུབ་མཆོག་གི་ནི། །སྤྱན་སྔར་ད་ལྟ་མ་ལུས་སོ་སོར་བཤགས། །རྗེས་སུ་ཡི་རང་བ། བདེར་གཤེགས་སྲས་ཀྱི་ཚོགས་གཉིས་ཟབ་པ་དང༌། །རྒྱ་ཆེན་འགྲོ་བ་མ་ལུས་པ་ཡི་དོན། །སྒྲུབ་པར་བྱེད་དང་དེ་ལས་གཞན་པ་ལ། །རྟག་ཏུ་བདག་ནི་རྗེས་སུ་ཡི་རང་ངོ༌། །སྐྱབས་སུ་འགྲོ་བ། ཐུགས་རྗེས་ཁྱབ་པའི་ཐུགས་དང་ལྡན་གྱུར་ཅིག །བློ་གྲོས་སྡིག་བྲལ་གཏི་མུག་ཚོགས་ཀུན་བཅོམ། །མ་ལུས་རིགས་ཀྱི་པདྨའི་ནང་བཞུགས་པ། བདེ་བར་གཤེགས་པ་རྣམས་ལ་སྐྱབས་སུ་མཆི། །བློ་མཆོག་རྣམས་ཀྱི་ཀུན་དགའ་ར་བ་སྟེ། །དམན་པས་འཇིགས་པ་རྣམས་ཀྱི་རྒྱལ་བྱེད་ཚལ། །
སྲིད་པའི་འབྱོར་པ་ཟིལ་གྱིས་གནོན་པའི་མཆོག །གསུང་མཆོག་ཆོས་ལ་བདག་ནི་སྐྱབས་སུ་མཆི། །འདོད་ཆགས་ལ་སོགས་སྤྲུལ་གྱི་དུག་བཅོམ་ཞིང༌། །བློ་གྲོས་རྣམ་རྒྱས་ཐུག་རྗེ་ཆེར་ལྡན་པ། །བརྟུལ་ཞུགས་བཟང་པོའི་ཚོགས་ལའང་སྐྱབས་མཆི་ཞིང༌། །སྲིད་དང་བྲལ་བ་རྣམས་ལ་བདག་ཕྱག་འཚལ། །ལམ་ནི་ཡང་དག་བསྒོམས་ནས་སུ། །ཞེས་པ་ནི་སེམས་ཅན་རྣམས་ནི་ཡོངས་སུ་སྨིན་པའམ། ཡང་ན་ཡོངས་སུ་བསྐྱབ་པར་བྱ་ཕྱིར་རམ། །རང་གི་སེམས་ནི་དག་པར་བྱ་བའི་ཕྱིར། །འདི་དག་ཐམས་ཅད་རྩྭ་སོགས་བཞིན་དུ་བཏང༌། །དེ་བཞིན་ཚུལ་ཁྲིམས་བཟོད་དང་བརྩོན་འགྲུས་དང༌། །བསམ་གཏན་ཤེས་རབ་བླ་ན་མེད་པ་ནི། །བདག་དང་གཞན་རྣམས་བླ་ན་མེད་པའི་ཕྱིར། །སྐད་ཅིག་རེ་རེ་ཞིང་ཡང་བསྒོམ་པར་བགྱི། །བྱང་ཆུབ་ཀྱི་སེམས་བཟུང་བ་ནི། །རྒྱུ་ཡི་རྗེས་ལ་བདག་པོའི་ཡུལ་བདག་ཉིད། །འབྲས་བུའི་སྟོབས་ཀྱིས་དགྲ་ལས་རྒྱལ་འགྱུར་ཞིང༌། །སྙིང་རྗེའི་རྩ་བ་ཟུག་ཅིང་ཡང་དག་རྟོགས། །མཉམ་མེད་བྱང་ཆུབ་ཡང་དག་གཟུང་བར་བགྱི། །གསོལ་བ་གདབ་པ་ནི། བདེ་བར་གཤེགས་པ་སྔགས་ལ་མཁས་པ་ཡི། །ཆོས་རྒྱལ་རྟག་ཏུ་ལྷུན་གྱིས་གྲུབ་པ་ནི། །འགྲོ་བ་འདི་ཡིས་ཐོབ་པར་བྱ་བའི་ཕྱིར། །ཁྱད་བདག་གནས་ལ་བདག་ནི་གནས་པར་བགྱི། །སྡོམ་པ་གཟུང་བ་ནི། ཇི་ལྟར་དུས་གསུམ་མགོན་པོ་རྣམས། །ཞེས་པ་ལ་སོགས་པའོ། །བདག་གི་ལུས་དབུལ་བ། དུས་འདི་ཉིད་ནས་བཟུང་ནས་ནི། །བྱང་ཆུབ་སྙིང་པོ་མཆིས་པར་དུ། །བདག་གི་ལུས་ངག་ཡིད་གསུམ་རྣམས། །རྣམ་པ་ཀུན་དུ་བཞེས་སུ་གསོལ། །ཐུགས་རྗེ་ཆེན་པོར་ལྡན་པ་ཡི། །མགོན་པོ་ཆེན་པོ་ཁྱེད་རྣམས་ཀྱིས། །དམ་ཚིག་དངོས་གྲུབ་བདག་ལ་སྩོལ། །དགེ་བའི་རྩ་བ་བསྔོ་བ་ཞེས་པ། བདག་གི་དགེ་བའི་རྩ་བ་འདི་དག་གིས། །འཇིག་རྟེན་དུ་ནི་མྱུར་དུ་སངས་རྒྱས་ཤོག །འགྲོ་ལ་ཕན་ཕྱིར་ཆོས་རྣམས་སྟོན་བགྱིད་ཅིང༌། །སེམས་ཅན་སྡུག་བསྔལ་མང་པོས་གཟིར་ལས་སྒྲོལ། །ཞེས་སོ། །དེ་ལྟར་བསོད་ནམས་ཀྱི་ཚོགས་སྔོན་དུ་འགྲོ་བའི་ཡན་ལག་བྱས་ནས་ད་ནི་སྦྱོར་བ་དང་པོའི་ཏིང་ངེ་འཛིན་བསྒོམ་པར་བྱ་སྟེ། དེ་ལ་ཡང་སྡིག་པ་དང་བྲལ་ཞིང་ཡེ་ཤེས་དབབ་པ་དང་
སྟོང་པ་ཉིད་དུ་བྱ་བ་དང་སྐུ་བསྐྱེད་པ་དང༌། ནང་སེམས་ཀྱི་དཀྱིལ་འཁོར་གྱི་རིམ་པ་བསྒོམ་པ་དང་སེམས་ཅན་གྱི་དོན་བྱ་བ་དང༌། དེ་ལ་ལྷ་ཀླུ་ལ་སོགས་པ་དད་པ་སྐྱེས་ནས་མཆོད་པ་དང༌། །སེམས་ཀྱི་དཀྱིལ་འཁོར་ལ་སྔགས་པས་མཆོད་བསྟོད་བྱ་བ་དང༌། དཀྱིལ་འཁོར་ལུས་ལ་བརྟག་པའོ། །དེའི་དོན་ཡང་དང་པོར་འདི་ལྟར་ཤེས་པར་བྱ་སྟེ། དང་པོར་ཆོས་ཐམས་ཅད་རྡུལ་དང་བྲལ་བར་བསམས་ལ། དེའི་རང་བཞིན་ལས་བདག་གི་སོར་མོའི་བྱེ་བྲག་རྣམས་ལ་ཟླ་བའི་དཀྱིལ་འཁོར་རེ་རེ་བསམས་ཏེ། དེའི་སྟེང་དུ་མཐེ་བོང་ལ་ཨོཾ། མཛུབ་མོ་ལ་ཧཱུཾ། གུང་མོ་ལ་ཏྲཱཾ། སྲིན་ལག་ལ་ཧྲཱིཿ། མཐེའུ་ཆུང་ལ་ཨཿ་བསམ་མོ། །གཡོན་པའི་སོར་མོ་རྣམས་ལ་ཡང་རིམ་པ་བཞིན་དུ། ལཾ་མཾ་བཾ་པཾ་ཏཾ་བསམ་པ་དང༌། དེ་འབྱུང་བའི་གཞི་གཡས་པ་དང༌། གཡོན་པའི་མཐིལ་དུ་ཉི་མ་དང་ཟླ་བ་བསམས་ལ་དེའི་སྟེང་དུ་ཧཱུཾ་དང་ཐ་བསམ་མོ། །དེ་ནི་སྟོང་པ་དང་ཡེ་ཤེས་ཀྱི་རང་བཞིན་ཏེ་དེའི་ཆ་ལས་གོང་གི་ཡི་གེ་རྣམས་བྱུང་བའོ། །དེ་ནས་ཐལ་མོ་སྦྱར་ནས་བཛྲ་ཨཉྫ་ལི་ཞེས་པས་ཡི་གེ་དེ་རྣམས་ཕན་ཚུན་དུ་ཕྲད་པར་བྱའོ། །བཛྲ་བནྡྷ་ཞེས་བརྗོད་པས་སོར་མོ་བསྣོལ་བས་ཡི་གེ་དེ་རྣམས་ཀྱི་འོད་ཟེར་རྣམས་འཁྲིག་པར་བསམ་མོ། །བཛྲ་བནྡྷ་ཏྲཊ། ཅེས་པས་དྲལ་བར་བསམས་ཏེ་ཡི་གེའི་འོད་དེ་རྣམས་ཀྱིས་སྡིག་པའི་ལས་དེ་རྣམས་སྲེག་པར་བསམ་མོ། །གསུམ་དུ་དྲལ་བས་ལུས་ངག་ཡིད་གསུམ་གྱི་སྡིག་པ་སྲེག་པར་བསམ་མོ། །དེ་ནས་ཡང་ཨོཾ་བཛྲ་ཨཱ་ཝེ་ཤ །ཞེས་པས་ཕྱག་རྒྱ་བཅིང་བར་བྱ་སྟེ། རྡོ་རྗེ་བསྡམས་པ་བཅིངས་ལ་མཐེ་བོང་གིས་སྲིན་ལག་གི་རྩ་བར་དྲལ་བས་མཐེ་བོང་དང་སྲིན་ལག་གི་ཡི་གེའི་འོད་ཀྱིས་ཧཱུཾ་དང་ཐ་བསྐུལ་བས་དེའི་འོད་ཀྱིས་ཡི་གེ་བཅུ་བསྐུལ། དེའི་འོད་ཀྱིས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་བསྐུལ་བས་མདུན་གྱི་ནམ་མཁའ་ལས་ཨ་བདག་གི་ལུས་ལ་དབབ་པར་བྱའོ། །དེ་ནས་འདིས་བརྟན་པར་བྱ་སྟེ། ཏིཥྛ་བཛྲ་དྲྀ་ཌྷོ་མེ་བྷ་ཝ་ཤཱ་ཤོ་ཏོ་མེ་བྷ་ཝ། ཧྲྀ་ད་ཡཾ་མེ་ཨ་དྷི་ཏིཥྛ། སརྦ་སིདྡྷིམྨེ་པྲ་ཡཙྪ་ཧཱུཾ་ཧ་ཧ་ཧ་ཧ་ཧོཿ། ཞེས་པས་རང་གི་སྙིང་གར་ཞུགས་པར་གྱུར་ཏོ། །དེ་ཡང་གྲོགས་པོ་ཉིད་དུ་གནས་པར་གྱུར་ཏོ། །དེ་ནས་བཛྲ་མུཥྛི་ཞེས་པ་དང༌། དམ་
ཚིག་གི་རྡོ་རྗེ་ཁུ་ཚུར་བཅིངས་ལ་འདི་སྐད་ཅེས་བརྗོད་པར་བྱའོ། །ཨོཾ་བཛྲ་མུཥྛི་བཾ། དེའི་རྗེས་ལ་ཨོཾ་སརྦ་ཨ་པ་ཡ་ཨཱ་ཀཪྵ་ཎི་སཾ་ཤོ་དྷ་ན་བཛྲ་ས་མ་ཡ་ཧཱུཾ་ཕཊ། ཅེས་བྱ་བ་དང༌། ངན་འགྲོ་དགུག་པར་བྱའོ། །རྡོ་རྗེ་ཕྱག་རྒྱ་གཉིས་ནང་དུ། །མཛུབ་མོ་གཉིས་ནི་བཅིངས་ནས་སུ། །ལེགས་པར་གྱེན་དུ་འཕངས་པ་ནི། །ལྟུང་བ་སློང་པའི་དམ་པའོ། །ཨོཾ་བཛྲ་པཱ་ཎི་སྥོ་ཊ་ཡ། སརྦ་ཨ་པ་ཡ། བནྡྷ་ནི། པྲ་མོཀྵ་ཡ། སརྦ་ཨ་པ་ཡ་གནྡྷེ་བྷྱཿ་སརྦ་སཏྭཱ་ནཱཾ་སརྦ་ཏ་ཐཱ་ག་ཏ་བཛྲ་ས་མ་ཡ་ཏྲཊ། ཅེས་བརྗོད་ཅིང་སྡིག་པ་དྲལ་བའི་ཕྱག་རྒྱ་བཅིངས་ལ་སྡིག་པ་ཐམས་ཅད་དྲལ་བར་བྱའོ། །རྡོ་རྗེ་བཅིངས་པ་བསྡམ་བྱས་ཏེ། །གུང་མོ་གཉིས་ཀ་སྦྱར་ནས་ནི། །ཐ་མ་བཞི་ཡི་རྩེ་མོ་སྦྱར། །སྡིག་པ་འཇོམས་པར་གྲགས་པ་ཡིན། །ཞེས་སོ། །ད་ནི་སྐུ་བསྐྱེད་པར་བྱ་སྟེ། དེ་ཡང་ཕྱིའི་ཡུལ་བལྟས་ན་སྣོད་ཀྱི་འཇིག་རྟེན་འདི་རྡུལ་ཕྲ་རབ་ལས་གྲུབ་པས་ན་ཕྱོགས་ཆ་དྲུག་གི་ཆས་གཞིག་ན་རྡུལ་ཕྲ་རབ་ཙམ་དུ་ཡང་མ་གྲུབ་པས་སྟོང་པ་ཆེན་པོའི་ངང་དུ་བསམས་ལ། དེ་ལ་ནང་འཛིན་པའི་སེམས་ལ་བརྟགས་ན་སེམས་ཅིར་ཡང་མ་གྲུབ་སྟེ་རང་བཞིན་གྱིས་འོད་གསལ་བའི་རང་བཞིན་ཡི་གེ་ཨའི་ངོ་བོར་བསྒོམ་མོ། །དེ་ནས་ཨ་དེ་ལས་སངས་རྒྱས་ཐམས་ཅད་ཀྱི་རང་བཞིན་འདིར་གཟུགས་བརྙན་གྱི་རྣམ་པའི་ཚུལ་གྱིས་ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ། རབ་ཏུ་ཞུགས་ཏེ་ཤེལ་དང་ཟླ་བ་ལྟ་བུའོ། །དེ་ཡང་ལུང་ལས། ཡང་དག་པ་ཡི་སྙིང་པོ་དག །ནམ་མཁའ་བཞིན་དུ་དྲི་མ་མེད། །གནས་ངན་ལེན་ནི་ཀུན་ལས་གྲོལ། །རྣམ་རྟོག་སེལ་བའི་མཆོག་ཡིན་ནོ། །ཞེས་སོ། །དེ་རྟོགས་པར་བྱ་བའི་སྙིང་པོ་ནི། ཨོཾ་ཙིཏྟ་པྲ་ཏི་བེ་དྷཾ་ཀ་རོ་མི། ཞེས་སོ། །དེ་ནས་རང་གི་གསང་སྔགས་ཟླ་བའི་དཀྱིལ་འཁོར་ལ་གནས་པ་བཀོད་ནས་སངས་རྒྱས་ཀྱི་ཡོན་ཏན་ཐམས་ཅད་སྐར་མའི་རྣམ་པ་ལྟ་བུའི་གཟུགས་བརྙན་ལ་སོགས་པའི་ཚུལ་གྱིས་ཡི་གེ་ཀ་ལ་སོགས་པ་རབ་ཏུ་ཞུགས་ཏེ་ཟླ་བའི་དཀྱིལ་འཁོར་གཉིས་པར་གྱུར་ཏེ། ཨོཾ་བོ་དྷི་ཙིཏྟ་ཨུཏྤཱ་ད་ཡཱ་མི། ཞེས་པའོ། །དེ་ཡང༌། ཉམ་ཐག་རྣམས་ལ་རྗེས་བརྩེ་བས། །སེམས་ཅན་ཡོངས་སུ་འཛིན་པ་ནི། །དགེ་བའི་ཆོས་
རྣམས་རྫོགས་པ་སྟེ། །ཉོན་མོངས་པ་ཐམས་ཅད་ངེས་འདུལ་བའོ། །ཟླ་བའི་དཀྱིལ་འཁོར་དབུས་སུ་ནི། །བྱང་ཆུབ་སེམས་ནི་གཉིས་པའོ། །ཞེས་གསུངས་སོ། །དེ་ནས་དེ་ལྟ་བུའི་ཟླ་བའི་དཀྱིལ་འཁོར་གྱི་སྟེང་གི་དབུས་སུ་ཧཱུཾ་དེའི་མཐའ་མ་ན་ཚུར་ཤོ་དྷ་ནེའི་སྔགས་སམ། མུ་ནེའི་སྔགས་ཀྱི་ཕྲེང་བ་དེ་རྣམས་ཀྱང་མར་མེའི་ཕྲེང་བ་བསྐོར་བ་ལྟར་གཡོ་བ་དང་ལྡན་པ་དང༌། འོད་དང་ཟེར་དུ་བཅས་པ་རྣམས་དང༌། རྣམ་པར་ཤེས་པ་མི་གནས་ན་ཡང་གནས་པ་བཞིན་དུ་བསྒོམ་མོ། །དེ་ལས་འོད་ཟེར་སྤྲོ་བ་དང་བསྡུ་བས་རྡོ་རྗེ་རྩེ་ལྔར་བསྒོམ་མོ། །ཨོཾ་ཏིཥྛ་བཛྲ་ཞེས་སོ། །དེ་ཡང་གསུངས་པ། བྱང་ཆུབ་བསྐལ་པ་གྲངས་མེད་གསུམ། །བསྡུས་པ་ཡི་ནི་ཆོས་ཉིད་དེ། །དམ་པའི་ཆོས་ནི་གྲངས་མེད་པའི། །སྤྱད་པ་སྤྱོད་པ་མཆོག་ཡིན་ནོ། །ས་དང་ས་མེད་ལེགས་རྟོགས་ཤིང༌། །ཟག་མེད་ཡེ་ཤེས་དག་པའོ། །ཟླ་བའི་དཀྱིལ་འཁོར་དབུས་སུ་ནི། །རྡོ་རྗེ་ཆོས་ཅན་གྱིས་བརྟགས་པ། །ཞེས་གསུངས་སོ། །དེ་ལས་འོད་ཟེར་སྤྲོ་བ་དང༌། བསྡུ་བའི་སྦྱོར་བས་ཡེ་ཤེས་ལྔ་ལ་སོགས་པ་སྤྲོས་པ་ཐམས་ཅད་དང་བྲལ་བའི་ཡེ་ཤེས་ཐམས་ཅད་དང་ལྷ་ཐམས་ཅད་ཀྱི་སྐུ་རྡོ་རྗེ་དབྱིངས་དང་གསུང་དང་ཐུགས་ཐམས་ཅད་ཀྱི་རྡོ་རྗེ་དབྱིངས་ཐམས་ཅད་སྙིང་གར་བསྡུས་ཏེ་གཅིག་ཏུ་བརྟན་པར་བྱ་བའོ། །ཨོཾ་བཛྲ་ཨ་ཧཾ། ཞེས་པས་བརྟན་པར་འགྱུར་རོ། །དེ་ཡང་གསུངས་པ། སངས་རྒྱས་ཀུན་གྱི་སྐུ་གང་ཡིན། །སྐྱོན་མེད་སྣང་བ་མེད་པ་སྟེ། །བཅོས་མེད་མ་སྐྱེས་དག་པ་དག །དངོས་མེད་ལ་སོགས་རྣམས་སྤངས་པ། །རྫས་མེད་ཆོས་ཀྱི་སྐུ་འདི་ནི། །མི་ཆོད་པ་དང་མི་ཤིགས་པའོ། །རྡོ་རྗེའི་བདག་ཉིད་ལེགས་འབྱུང་བ། །རྡོ་རྗེའི་སྐུ་ནི་བླ་མེད་པ། །ཞེས་སོ། །ཨོཾ་ཡ་ཐཱ་སརྦ་ཏ་ཐཱ་ག་ཏཱ་སྟ་ཐཱ་ཨ་ཧཾ། །ཞེས་པས་སྐུར་འགྱུར་རོ། །དེ་ཡང་སྐུ་མདོག་ལ་སོགས་པ་གསེར་བཙོ་མའི་ཁ་དོག་ཏུ་གནས་པ། ཕྱག་གཉིས་ཆོས་ཀྱི་འཁོར་ལོ་བསྐོར་བའི་ཐབས་མཛད་པ། རབ་ཏུ་བྱུང་བའི་ཆ་བྱད་ཅན་དུ་བསྐྱེད་དོ། །དེ་ཡང་གསུངས་པ། ལུས་དང་དེ་བཞིན་སྤྱོད་པ་དང༌། །སྦྱངས་དང་དེ་བཞིན་རྟོགས་པ་སྟེ། །མངོན་པར་བྱང་ཆུབ་རྣམ་པ་ལྔ། །སངས་རྒྱས་ཀུན་བདག་
བཟང་པོ་ཡི། །ཞེས་སོ། །དེ་ནས་བྱིན་གྱིས་བརླབ་པར་བྱ་སྟེ། །སྙིང་གར་རྡོ་རྗེ་དང་དཔྲལ་བར་རིན་པོ་ཆེ། །ལྐོག་མར་པདྨ་སྤྱི་བོར་རྒྱ་གྲམ་རྡོ་རྗེ་སེམས་མ་ལ་སོགས་པའི་ཕྱག་རྒྱ་བསམ་མོ། །རིན་པོ་ཆེ་མྱུ་གུའི་ཕྱག་རྒྱས་དབང་བསྐུར་བར་བྱའོ། །དེ་ལྟར་བདག་ཉིད་སྐུ་བསྐྱེད་ནས་ནང་སེམས་ཀྱི་དཀྱིལ་འཁོར་བསྒོམ་པར་བྱ་སྟེ། རྫོགས་པའི་སྦྱོར་བ་ལས་བྱུང་བའི། །ཞེས་པ་ལ་སོགས་པ་དང་མཚམས་སྦྱར་བར་བྱའོ། །རྫོགས་པའི་སྦྱོར་བ་ནི་སྐད་ཅིག་མས་སྐྱེས་པའོ། །དེ་ཡང་རྡོ་རྗེ་འཁོར་ལོའི་སྔགས་དང་ཕྱག་རྒྱས་སོ། །ཇི་སྙམ་པ་ལ་དཀྱིལ་འཁོར་ལྷ་ནི་ཐམས་ཅད་དག་སྟེ་ཉི་ཤུ་རྩ་གཅིག་གོ །གཙོ་བོ་གང་སྙམ་པ་ལ་ཤཱཀྱ་སེང་གེའོ། །གང་གི་རྣམ་པ་ཅན་ནི་བདག་ཤཱཀྱ་ཐུབ་པར་བསྒོམ་པ་དེའི་དངོས་པོ་ཅན་ནོ། །དེའི་སྙིང་གར་ཅི་བསྒོམ་ན། དེ་ནས་དེ་ཡི་དེ་མ་ཐག །གོ་རིམས་ཇི་བཞིན་བསྒོམ་པར་བྱ། །ཞེས་པ་ལ་སོགས་པ་དང་མཚམས་འབྲེལ་ཏོ། །ནང་སེམས་ཀྱི་དཀྱིལ་འཁོར་དང༌། ཚོགས་བསགས་པའི་དཀྱིལ་འཁོར་གཅིག་ཏུ་བྱ་བ་ནི་དེའི་དབུས་སུ་དཀྱིལ་འཁོར་ཡང་བྱ་བ་ནས། དཀྱིལ་འཁོར་གཅིག་ཏུ་བསྒོམ་པར་བྱ། །ཞེས་པའི་བར་རོ། །དེ་ལྟར་དཀྱིལ་འཁོར་རྣམ་པ་གཉིས་གཅིག་ཏུ་བྱས་ནས། ལྷ་དེ་དག་ཐམས་ཅད་ཀྱི་ཐུགས་ཀར་སྦྱོར་བའི་སྔགས་དགོད་པ་ནི། དེ་ནས་ཤཱཀྱ་ཐུབ་པ་ཡི། །ཞེས་བྱ་བ་ནས། སྔགས་ཀྱི་རྒྱལ་པོ་རྗེས་དྲན་ནས། །ཞེས་བྱ་བ་ལ་སོགས་པ་དང་འབྲེལ་ཏོ། །དེ་ལྟར་སྔགས་བཀོད་ནས་དེའི་འོད་ཀྱིས་ངན་སོང་གསུམ་པོ་ལ་སོགས་པ་སེམས་ཅན་ཐམས་ཅད་ལ་དབང་བསྐུར་བར་བྱ་སྟེ། དེ་ཡང་དང་པོར་འོད་ཟེར་སྤྲོ་བ་བསྟན་ཏེ། ཚུར་འདུས་ས་བོན་ལས་འོད་འཕྲོ། །ཞེས་པའོ། །འོད་དེས་ཁམས་གསུམ་གྱི་སེམས་ཅན་ཐམས་ཅད་སྣང་བར་བྱས་ཤིང་སྔགས་དང་ཕྱག་རྒྱས་སྡིག་པ་དག་པར་བྱ་བ་ནི། དེ་ནས་འོད་ཟེར་གྱིས་ཀུན་དུ། ཞེས་པ་ནས། འོད་ཟེར་གྱིས་ཀྱང་ཕོག་པར་བྱ། །ཞེས་པའི་བར་གྱིས་བསྟན་ཏོ། །སྔགས་དང་ཕྱག་རྒྱ་ནི་བྲབ་པའི་གནས་སྐབས་ལས་ཤེས་པར་བྱའོ། །དེ་ནས་དབང་བསྐུར་བ་ནི། །སེམས་ཅན་ཐམས་ཅད་བཀུག་ནས་སུ། །ཞེས་པའི་བར་གྱིས་བསྟན་ཏེ། དེའི་འོད་ཀྱང་འདི་ལྟར་ཤེས་
པར་བྱ་སྟེ། དང་པོར་འོད་ཟེར་སྙིང་ག་ནི་མེའི་སྔགས་ལས་འོད་འཕྲོས་སེམས་ཅན་ཐམས་ཅད་ལ་ཕོག་པར་བྱས་ཤིང་ཁྱད་པར་དུ་ཡང་ངན་སོང་གསུམ་ལ་ཕོག་པས་ངན་སོང་གསུམ་གྱི་སྡིག་པ་དང་སྡུག་བསྔལ་སྔགས་དང་འོད་ཀྱིས་དག་པར་བྱས་ཏེ་དེ་ཡང་སྔགས་ནི། ཨོཾ་སརྦ་པཱ་པཾ་ད་ཧ་ན་བཛྲ་ཧཱུཾ་ཕཊ། ཅེས་བྱ་བ་ནས། ཨོཾ་མ་ཐ་མ་ཐ་སརྦ་ཏིཪྻ་ཀ་ཏེ་ཧེ་ཏུཾ་ཧཱུཾ་ཕཊ། ཅེས་པའི་བར་གྱིས་སྲབ་ཅིང་དག་པར་བྱའོ། །དེ་ནས་བྱིན་གྱིས་བརླབ་པ་ནི། ཨོཾ་ཨ་དྷི་ཏིཥྛ་ཛྙཱ་ན་ས་མ་ཡེ་ཧཱུཾ་ཕཊ། ཅེས་པས་གནས་ཉི་ཤུ་ལ་སོགས་པར་བྱིན་གྱིས་བརླབ་པར་བྱའོ། །དེ་ནས་ནང་སེམས་ཀྱི་དཀྱིལ་འཁོར་དུ་སེམས་ཅན་ཐམས་ཅད་བཀུག་ནས་དཀྱིལ་འཁོར་དུ་བཅུག་སྟེ་ཆུ་ལ་སོགས་པ་དབུ་རྒྱན་དང༌། རྡོ་རྗེ་དང་དྲིལ་བུ་དང་བདག་པོ་དང་མིང་དང་ཕྱིར་མི་ལྡོག་པའི་དབང་ལ་སོགས་པ་བསྐུར་བར་བྱའོ། །དེ་ལྟར་དབང་བསྐུར་བ་ཙམ་གྱིས་ཀྱང་ཁམས་གསུམ་གྱི་སེམས་ཅན་ཐམས་ཅད་སངས་རྒྱས་ཀྱི་སྲས་བྱང་ཆུབ་སེམས་དཔའ་རྣམས་དང་མཉམ་པར་མཐོང་ནས། དེ་ནས་ལྷ་དང༌། ཀླུ་ལ་སོགས་པ་ངོ་མཚར་སྐྱེས་ནས་མཆོད་དེ་དེ་ཡང༌། དེ་ནས་ནམ་མཁའི་ཕྱོགས་སུ་ཡང༌། །ཞེས་པ་ལ་སོགས་པ་དང་མཚམས་སྦྱར་རོ། །དེ་ནས་ནམ་མཁའི་ཁམས་གང་བའི་ལྷ་དང༌། ཀླུ་དང༌། གནོད་སྦྱིན་དང༌། སྲིན་པོ་དང༌། འབྱུང་པོ་དང༌། ཡི་དགས་དང༌། ཤ་ཟ་ལ་སོགས་པ་དང༌། གཟུགས་ཁམས་ན་གནས་པའི་ལྷ་རྣམས་ཀྱིས་ཀྱང་མཆོད་པའི་རྣམ་པར་བསམས་པ་ནི་རྫས་ཀྱི་མཆོད་པ་དང་ཏིང་ངེ་འཛིན་གྱི་མཆོད་པ་དང་རེག་བྱའི་མཆོད་པ་བསམ་གྱིས་མི་ཁྱབ་པས་མཆོད་དེ་སངས་རྒྱས་ཀྱི་ཡོན་ཏན་ཐམས་ཅད་སྔགས་པར་བྱེད་དོ། །ཇི་སྙམ་པ་ལ། ཀྱེ་མ་སངས་རྒྱས་ཀྱེ་སངས་རྒྱས། །ཞེས་པ་ལ་སོགས་པའོ། །ཀྱེ་མ་སངས་རྒྱས་ནི་ངོམ་ཞིང་ངོ་མཚར་བའོ། །ཁྱེ་མ་སངས་རྒྱས་ནི་བོད་པར་བྱའོ། །ཅི་ལ་ངོ་མཚར་ན་སངས་རྒྱས་ཀྱི་མཛད་སྤྱོད་ཇི་སྙམ་པ་ལ། ངན་སོང་ཐམས་ཅད་སྦྱངས་ནས་སུ། །སེམས་ཅན་རྣམས་ནི་བྱང་ཆུབ་ཅེས་པ་ལའོ། །ཕྱི་མགོ་སླའོ། །དེ་ལྟར་ནང་སེམས་ཀྱི་དཀྱིལ་འཁོར་གྱིས་གཞན་གྱི་དོན་བྱས་པ་བསྟན་ནས་ད་ནི་བསྟོད་པ་བསྟན་ཏེ། ཆོས་ཀྱི་འཁོར་ལོ་བསྐོར་ནས་སུ། །
ཞེས་པ་ལ་སོགས་པས་བསྟན་ཏེ་གང་གིས་བསྟོད་ན། སྔགས་པ་རྡོ་རྗེ་དྲིལ་འཛིན་པ། །བསྟོད་པའི་རྒྱལ་པོ་ངེས་བསྟོད་ཏོ། །ཞེས་སོ། །ཕྱི་མ་དཀྱུས་སུ་གསལ་ལོ། །དཀྱིལ་འཁོར་ལུས་ལ་བརྟག་པར་བྱ། །ཞེས་པ་ནི་རྣལ་འབྱོར་ཆེན་པོ་ལ་བྱ་སྟེ། གནས་ཉི་ཤུ་རྩ་གཅིག་ནི་སྙིང་ག་དང་དཔྲལ་བ་དང་མགོ་བོ་དང་གཙུག་ཕུད་ལ་སོགས་པར་ལྷ་ཉི་ཤུ་རྩ་གཅིག་བསྒོམ་པའོ། །དེ་ནི་སྦྱོར་བ་དང་པོའི་ཏིང་ངེ་འཛིན་ཏོ། །ད་ནི་དཀྱིལ་འཁོར་རྒྱལ་མཆོག་གི་དོན་བཤད་པར་བྱ་སྟེ་དེ་ཡང་དང་པོར་སྟོང་པ་ཉིད་དུ་བྱ་བ། །གཞན་ཡང་ཁང་བསྐྱེད་པ་དང་གདན་བསྐྱེད་པའོ། །དེ་ལ་དང་པོར་སྟོང་པ་ཉིད་དུ་བྱ་བ་ནི། དེ་ནས་ཁམས་གསུམ་མ་ལུས་པ། །སྟོང་པ་ཉིད་དུ་བསྒོམ་བྱ་སྟེ། །ཞེས་པའོ། །རྟེན་བསྐྱེད་པ། རླུང་དང་ཆུ་གཉིས་སྟེང་དབུས་སུ། །ཞེས་པ་ལ་སོགས་པའོ། །གཞལ་ཡས་ཁང་བསྐྱེད་པ་ནི། །ས་བོན་བྷྲཱུཾ་ལས་བྱུང་བ་ཡི། །ཞེས་པ་ལ་སོགས་པའོ། །གདན་བསྐྱེད་པ་ནི། པདྨ་གནས་པ་སེངྒེའི་གདན། །ཞེས་པའོ། །དེའི་དོན་ཡང་འདི་ལྟར་ཤེས་པར་བྱ་སྟེ། དང་པོར་ཆོས་ཐམས་ཅད་གཅིག་དང་དུ་མའི་རང་བཞིན་དང་བྲལ་བར་བྱས་པས་སྟོང་པ་ཉིད་དུ་བྱའོ། །དེ་ནས་སྟོང་པ་ཉིད་དུ་ཡཾ་ལས་རླུང་གི་དཀྱིལ་འཁོར་ཁ་དོག་སྔོན་པོ་དབྱིབས་ཟླ་ཀམ་ལྟ་བུ་བ་དན་བཞིས་མཚན་པ་རྒྱ་ཁྱོན་དཔག་ཏུ་མེད་པ། དེའི་སྟེང་དུ་བཾ་ལས་ཆུའི་དཀྱིལ་འཁོར་ཟླུམ་པོ་བུམ་པས་མཚན་པ་དཀར་པོ་བསམ། དེ་གཉིས་ཀྱི་སྟེང་དུའམ་དབུས་སུ་ལཾ་ལས་གསེར་གྱི་ས་གཞི་བསྒོམ་པར་བྱ་སྟེ་ཁ་དོག་སེར་པོ་དབྱིབས་གྲུ་བཞི་རྡོ་རྗེ་རྒྱ་གྲམ་གྱིས་མཆན་པའོ། །དེའི་སྟེང་དུ་ས་བོན་སུཾ་ལས་རི་རབ་ཆེན་པོ་བསམ་པར་བྱ་སྟེ། རིན་པོ་ཆེ་སྣ་བཞི་ལས་གྲུབ་པ་ངོས་བཞི་གྲུ་བཞི་པ་དཔག་ཚད་བརྒྱད་ཁྲི་ཡོད་པ། ཤར་དཀར་བ་བྱང་ལྗང་གུ་ཤིན་ཏུ་ཡངས་པ་དབྱིབས་གྲུ་བཞི་པའོ། །དེའི་དབུས་སུ་ངན་སོང་ཐམས་ཅད་སྦྱོང་བའི་དཀྱིལ་འཁོར་བསྒོམ་པར་བྱ་སྟེ། ཡི་གེ་བྷྲཱུཾ་ལས་འཁོར་ལོ་རྩིབས་བརྒྱད་པ་དེ་སྤྲོ་བ་དང་བསྡུ་བ་ལས་གཞལ་ཡས་ཁང་བརྩེགས་མ་བསྒོམ་པར་བྱའོ། །དེ་ཡང་ཅི་ལྟ་བུ་བསྒོམ་པར་བྱ་སྙམ་པ་ལས། གྲུ་བཞི་པ་ལ་སྒོ་བཞི་པ། །ཞེས་པ་ལ་སོགས་པས་བསྟན་ཏེ། གྲུ་བཞི་པ་ནི་བྱམས་པ་དང་
སྙིང་རྗེ་དང་དགའ་བ་དང་བཏང་སྙོམས་བཞི་རྣམ་པར་དག་པའོ། །སྒོ་བཞི་པ་ནི་དྲན་པ་ཉེ་བར་གཞག་པ་བཞི་དང༌། ཡང་དག་པར་སྤོང་བ་བཞི་དང༌། རྫུ་འཕྲུལ་གྱི་རྐང་པ་བཞི་དང༌། དབང་པོ་ལྔ་རྣམ་པར་དག་པའོ། །ཏྭ་ར་ན་བཞིས་བཀླུབས་པ་དང༌། །ཞེས་པ་ནི་བསམ་གཏན་བཞི་རྣམ་པར་དག་པའོ། །ཐིག་སྐུད་བཞི་ཆོས་སོ་སོར་དབྱེ་བའི་ཤེས་རབ་རྣམ་པ་གསུམ་གྱི་ཡེ་ཤེས་བཞི་གཏན་ལ་འབེབས་པའི་རྟགས་སོ། །མུ་ཁྱུད་ནི་མུ་ཁྱུད་དོ། །ལྟེ་བ་ནི་དབུས་སུ། །བཅས་པ་ནི་རྩིབས་བརྒྱད་འཁོར་ལོའོ། །མཛེས་པ་ནི་ལེགས་པར་བྲིས་པའོ། །ཡང་ན་མཛེས་པ་ནི་དབུས་ཀྱི་ལྟེ་བ་ལ་སྣ་ཚོགས་པདྨ་བརྒྱད་ཀྱིས་མཛེས་པར་བྱས་པའོ། །གཞན་ཡང་སྒོའི་གློ་དང་སྒོའི་ཁྱམས་དད་མཚམས་དང་གྲྭ་རྣམས་སུ་རིན་པོ་ཆེས་མཚན་པའི་ཟླ་ཕྱེད་ཕུར་བུ་དང་རྡོ་རྗེས་བརྒྱན་པ་ནི་བྱང་ཆུབ་ཀྱི་སེམས་སྤྲོས་པ་མེད་པས་སེམས་ཅན་ཚིམ་ཞིང་ཡེ་ཤེས་ལྔ་རྟོགས་པར་བྱེད་པའི་རྟགས་སོ། །གཞན་ཡང་རྟ་བབས་ཀྱི་ཁའི་དར་འཕན་དྲིལ་བུ་དང་དོ་ཤལ་དང་ཕྲེང་བས་བརྒྱན་པ་ནི་གསུང་རབ་ཡན་ལག་བཅུ་གཉིས་རྣམ་པར་དག་པའོ། །དྲ་བ་དང་དྲ་བ་ཕྱེད་པ་ནི་བྱང་ཆུབ་ཀྱི་ཡན་ལག་བདུན་རྣམ་པར་དག་པའོ། །རྡོ་རྗེ་དང་རིན་པོ་ཆེ་དང་པདྨ་དང་རྒྱ་གྲམ་གྱིས་བརྒྱན་པ་ནི་འགྲོ་བ་མ་ལུས་པའི་བསམ་པ་ཡོངས་སུ་རྫོགས་པའི་ངོ་བོ་བས་ན་ཕྱག་རྒྱ་དེ་རྣམས་ཀྱིས་གཞལ་ཡས་ཁང་གི་མཚམས་དང་དབུས་ཀྱི་སྣ་ཚོགས་པདྨ་བརྒྱན་པའོ། །དེ་རྣམས་ཀྱི་སྤྱི་ཁྱབ་ཏུ་ཡང་བརྒྱན་ཞིང་སྤྲས་པའོ། །དེ་ལྟ་བུའི་གཞལ་ཡས་ཁང་གྲུ་བཞི་པ་ལ་འདོད་པའི་ཡོན་ཏན་ལྔ་དང༌། ཚུལ་ཁྲིམས་རྣམ་པར་དག་པའི་ཕ་གུ་དང༌། རྣམ་པར་ཐར་པ་བརྒྱད་རྣམ་པར་དག་པའི་ནང་གི་ཀ་བ་དང༌། འཕགས་པའི་ལམ་ཡན་ལག་བརྒྱད་དག་པའི་རྟ་བབས་ཀྱི་ཕྱོགས་བ་དན་ཀ་བ་བརྒྱད་དང༌། སེམས་ཅན་ཐམས་ཅད་ལ་སྙོམས་པར་ཆོས་ཀྱི་འཁོར་ལོ་བསྐོར་བའི་འཁོར་ལོ་དང༌། སྟོབས་བཅུ་དང་ལྡན་པའི་གྱད་ཚན་པོ་ཆེས་རྟ་བབས་རིམ་པ་གཉིས་པ་འདེགས་པ་ལ་སོགས་པའོ། །ནང་གི་རྩིབས་བརྒྱད་འཁོར་ལོ་ནི་རྟེན་ཅིང་འབྲེལ་པར་འབྱུང་བ་བཅུ་གཉིས་ཀྱི་ཚུལ་གྱིས་སྦྱང་བར་བྱའོ། །མཐའི་མུ་ཁྱུད་རྡོ་རྗེ་ཕྲེང་བས་བསྐོར་བ་ནི་ཐེག་པ་གཞན་ལས་ཁྱད་པར་དུ་གྱུར་པ་རྡོ་རྗེ་
ཐེག་པས་འགྲོ་བ་ཡོངས་སུ་སྨིན་པར་མཛད་པའི་ཚུལ་བསྟན་པའོ། །དེའི་དབུས་སུ་གདན་བསྐྱེད་པ་ནི་ཨ་སིཾ་ཨཱཿ། ཞེས་པས་སེང་གེའི་གདན་བསྐྱེད་དོ། །དེའི་སྟེང་དུ་སྣ་ཚོགས་པདྨ་ཧྲཱིཿ་ལས་བསྐྱེད་པ་དང༌། ཨ་ལས་ཟླ་བའི་དཀྱིལ་འཁོར་བསྐྱེད་པའོ། །དེ་ལྟར་རྡོ་རྗེ་གཙུག་ཏོར་ལ་སོགས་པའི་གནས་སུ་སྣ་ཚོགས་པདྨ་དང་ཟླ་བའི་དཀྱིལ་འཁོར་བསྐྱེད་དོ། །དེའི་ཕྱིར་ན། པདྨར་གནས་པ་སེང་གདན་དང༌། །དེ་ལ་གནས་པའི་ཟླ་དབུས་སུ། །ཞེས་སོ། །ད་ནི་གཙོ་བོའི་སྐུ་བསྐྱེད་པ་སྟོན་ཏེ། དབུས་སུ་ཐབས་དང་ཤེས་རབ་ཞུ་བྱས་ཏེ། །ཞེས་པ་ལ་སོགས་པས་བསྟན་ཏོ། །དེ་ཡང་སྒྲིབ་པ་ཀུན་སེལ་ཞེས་པ་ལ་སོགས་པའི་ཏིང་ངེ་འཛིན་དང་འབྲེལ་ཏོ། །སྒྲིབ་པ་ཀུན་སེལ་བའི་ཏིང་ངེ་འཛིན་ནི་ཅི་ལྟ་བུ་སྙམ་པ་ལ། ཐབས་དང་ཤེས་རབ་ཞུ་བྱས་ཏེ། །ཞེས་པ་ཇི་ལྟ་བུ་སྙམ་པ་ལ། ཨོཾ་མུ་ནེ་ཞེས་པ་ལ་སོགས་པ་དང་འབྲེལ་ཏོ། །དེའི་དོན་ཡང་འདི་ལྟར་ཤེས་པར་བྱ་སྟེ། ཟླ་བའི་དབུས་སུ་དང་པོར་ཧྲཱིཿ་དེའི་ཐ་མ་ན་ཚུར་ཨོཾ་མུ་ནེ་མུ་ནེ་མ་ཧཱ་མུ་ན་ཡེ་སྭཱ་ཧཱ། ཞེས་པས་སོ། །དེ་ནས་སྔགས་ཀྱི་རྒྱལ་པོ་དེས་ཤཱཀྱ་ཐུབ་པ་རྗེས་སུ་དྲན་ཏེ། དེ་ནས་འོད་ཟེར་འཕྲོས་པས། སེམས་ཅན་ཐམས་ཅད་ཀྱི་རྟོག་སྒྲིབ་སྦྱངས་ཏེ། སླར་འདུས་པའི་ཏིང་ངེ་འཛིན་དེས་པདྨ་འདབ་མ་བཅུ་དྲུག་ལ་བརྒྱད་གྱེན་དུ་བལྟས་པ། བརྒྱད་ཐུར་དུ་བལྟས་པའི་རང་བཞིན། དེ་དག་དེའི་དབུས་སུ་རྡོ་རྗེ་རྩེ་ལྔ་པ་གནས་པ་བསམ་པ་དེ་ལ་ནི་སྒྲིབ་པ་ཀུན་སེལ་གྱི་ཏིང་ངེ་འཛིན་ཏོ། །དེ་ལ་གནས་པ་ལ་སྙོམས་པར་ཞུགས་པ་ཞེས་བྱའོ། །ཐབས་དང་ཤེས་རབ་ཞུ་བྱ་སྟེ། །ཞེས་པ་ནི་པདྨ་ནི་ཐབས་ཞེས་བྱ་བ་ལ་རྡོ་རྗེ་ལ་ནི་ཤེས་རབ་ཅེས་བྱའོ། །དེ་ཡང་པདྨ་ནཾ་རིགས་ཀྱི་ཆ་འཛིན་པ་སྟེ་ཤཱཀྱ་ཐུབ་པ་ནི་པདྨའི་རིགས་སོ། །དེ་ཡང་ངན་སོང་སྦྱོང་བ་རྣམས་པར་སྣང་མཛད་ཀྱི་རྒྱུད་ལས། རྒྱབ་ཏུ་ཤཱཀྱའི་རིགས་དབང་པོ། །གཙོ་བོ་ཐུབ་པའི་གཟུགས་སུ་བྲི།། ཞེས་གསུངས་སོ། །དེའི་ཕྱིར་ན་རྒྱབ་ནི་གཙོ་བོའི་རྒྱབ་བོ། །དེའི་གནས་ནི་པདྨ་རིགས་ཀྱི་གནས་སོ། །དེའི་ཕྱིར་ན་པདྨའི་རིགས་སོ། །རྡོ་རྗེ་ནི་ཐུབ་པ་སྟེ་ཡང་དག་པའི་ཡེ་ཤེས་ཀྱི་རྟགས་སོ། །དེ་ལས་འོད་ཟེར་སྤྲོ་བ་དང་བསྡུ་བས་སེམས་ཅན་གྱི་དོན་བྱས་ཏེ། དེ་བཞིན་གཤེགས་
པའི་སྐུ་གསུང་ཐུགས་ཀྱི་བཅུད་བསྡུས་པས་ཐབས་དང་ཤེས་རབ་ཀྱི་རང་བཞིན་དུ་དང་པོར་འོད་དུ་ཞུ་བས་སེམས་ཅན་གྱི་དོན་གྱི་རྒྱུར་བྱུང་བའི་གོང་མའི་སྔགས་ཀྱིས་ཤཱཀྱ་ཐུབ་པའི་གཟུགས་སུ་སྤྲུལ་པར་བྱའོ། །དེ་ནས་སེམས་ཅན་ཐམས་ཅད་ཀྱི་ངོན་བྱེད་པའི་རྟགས་སུ། །། རྡོ་རྗེ་ཁུ་ཚུར་གཉིས་བཅིངས་ཏེ། །ཞེས་པ་ལ་སོགས་པའོ། །ཕྱི་མ་དཀྱུས་ལས་གསལ་ལོ། །དེ་ལྟར་སྐུ་བསྐྱེད་ནས་སྐུ་མདོག་དང་དེ་ནས་བྱིན་གྱིས་བརླབ་པ་དང་དབང་བསྐུར་བ་ཡང་གོང་ལྟར་བྱས་ཏེ་གནས་པར་བྱའོ། །དེ་ལྟར་རྩ་བའི་སྐུ་བསྐྱེད་ནས་ད་ནི་དཀྱིལ་འཁོར་གྱི་སྐུ་བསྐྱེད་པར་བྱ་སྟེ། དེ་ནས་སྙིང་གར་ཟླ་བ་ལ། །གནས་པའི་སྔགས་རྣམས་བརྗོད་ནས་སུ། །རྡོ་རྗེ་གཙུག་ཏོར་ནས་བརྩམས་ནས། །རྡོ་རྗེ་ལྕགས་ཀྱུའི་བར་དུ་བསྐྱེད། །ཅེས་པ་དེས་མདོར་བསྟན་ཏེ། དེའི་དོན་ཡང་འདིར་ཡང་མདོར་བསྟན་པས་རྒྱས་པར་བྱའོ། །ཤཱཀྱ་ཐུབ་པའི་སྙིང་གར་ཟླ་བའི་དཀྱིལ་འཁོར་ལ། བྷ་ག་བ་ཏིའི་སྐོར་སྔགས་དང་དབུས་སུ་ལྷ་གང་སྐྱེད་པར་བྱེད་པའི་སྔགས། ཨོཾ་བཛྲ་ཧཱུཾ་ཕཊ་དང༌། རཏྣོཏྟ་མ་ཧཱུཾ། ཞེས་པ་ལ་སོགས་པའི་སྔགས་བསམས་ལ། དེ་ནས་འོད་ཟེར་སྣ་ལྔ་སྙིང་ག་ནས་བྱུང་བས་སྔགས་ཀྱི་འོད་ཟེར་དེ་འཇིག་རྟེན་གྱི་ཁམས་ཀུན་དུ་འཕྲོས་པས་འགྲོ་བ་ཐམས་ཅད་ལ་ཕོག་པར་བྱ་སྟེ་སེམས་ཅན་གྱི་སྡུག་བསྔལ་ཞི་བར་བྱས་ནས། དེ་བཞིན་གཤེགས་པའི་བཅུད་བསྡུས་ནས་འོད་དེ་ཕྱིར་ལོག་ནས་སྙིང་གར་ཞུགས་པས་སྐད་ཅིག་མས་སྔགས་དང་འོད་ཟེར་གཉིས་འདུས་པས་རྡོ་རྗེ་གཙུག་ཏོར་གྱི་གཟུགས་རྫོགས་པར་བསྐྱེད་ནས་སྤྲོ་བར་བྱའོ། །དེ་ཡང་གང་དུ་སྤྲོ་ན་ནི་ཤར་ཕྱོགས་ཀྱི་འཁོར་ལོའི་རྩིབས་པདྨའི་སྟེང་ན་ཟླ་བའི་དཀྱིལ་འཁོར་གྱི་སྟེང་དུ་དགོད་པར་བྱ་སྟེ་བཀའ་ནོད་ཅིང་བཞུགས་པར་བྱའོ། །དེ་ལ་ཆོ་འཕྲུལ་ཆེན་པོ་བཞིས་བྱིན་གྱིས་བརླབ་པར་བྱ་སྟེ་སྙིང་གར་རྡོ་རྗེ། ཁར་པདྨ། དཔྲལ་བར་རིན་པོ་ཆེ། སྤྱི་བོར་རྒྱ་གྲམ་མོ། །དེ་ལ་ཡང་དབང་བསྐུར་བ་ཡིད་བཞིན་གྱི་ནོར་བུ་རིན་པོ་ཆེའི་རྒྱན་ནམ་ཁའ་ལས་བྱུང་བས་དབང་བསྐུར་ཏེ། བདག་གི་རྡོ་རྗེ་དང་དྲིལ་བུ་གཉིས་སྲི་ཞུའི་ཚུལ་གྱིས་ལག་པར་བྱིན་ལ། རྡོ་རྗེ་གཙུག་ཏོར་ཞེས་ལན་གསུམ་བརྗོད་དེ། མིང་གི་དབང་བསྐུར་ཕྲིན་ལས་གཞོལ་ལོ། །
སྐུ་མདོག་དང་འོད་ཟེར་དཀར་པོ་འབར་བའོ། །ཕྱག་རྒྱ་ནི་རྡོ་རྗེ་དང་ལྡན་པའི་ས་གནོན་གྱིས་བཞུགས་པའོ། །དེ་བཞིན་དུ་གཞན་རྣམས་ལ་ཡང་དང་པོ་ཐུགས་ཀའི་སྔགས་ཀྱི་ཕྲེང་བ་བཀོད་པ་དང༌། དེ་ལས་འོད་འཕྲོས་པ་དང་བསྡུ་བའི་སྦྱོར་བས་སྐུར་གྱུར་པ་དང་སེམས་ཅན་གྱི་དོན་བྱས་ནས་སླར་བྱོན་ཏེ་བཀའ་ནོད་པ་དང༌། དེ་ལ་ཆོ་འཕྲུལ་བཞིས་བྱིན་གྱིས་བརླབ་པ་དང༌། ནམ་མཁའ་ལས་བྱུང་བའི་རིན་པོ་ཆེས་དབང་བསྐུར་བ་དང༌། ཕྱག་མཚན་ལག་ཏུ་བྱིན་ཏེ་མིང་གི་དབང་བསྐུར་བར་བྱས་ལ་ཉིད་ཀྱི་ཕྲིན་ལས་ལ་བཞག་སྟེ་གནས་ཇི་ལྟ་བར་བཞུགས་པར་བྱའོ། །ས་བོན་དང་སྐུ་མདོག་ནི་དཀྱུས་སུ་གསལ་ལོ། །བསྐལ་བཟང་བཅུ་དྲུག་ཡང་དགོད་པར་བྱ་བའི་སོགས་དང་སྤྲོ་བ་དང༌། བསྡུ་བ་ནི་གོང་ལྟར་ཤེས་པར་བྱའོ། །མིང་གི་དབང་བསྐུར་མི་བྱའོ། །རིན་པོ་ཆེའི་དབང་བསྐུར་རོ། །དེ་ཡང་ཆད་ནི་དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་ཏོ།། ད་ནི་ལས་རྒྱལ་པོ་མཆོག་གི་ཏིང་ངེ་འཛིན་བསྟན་ཏེ་ལྷའི་ལས་དང་རྣལ་འབྱོར་པའི་ལས་རྒྱལ་པོ་མཆོག་སྟེ། དེ་ཡང་ལྷའི་ལས་རྒྱལ་བ་མཆོག་གི་དོན་སྟོན་ཏོ། །ཤཱཀྱ་སེང་གེར་ཕྱག་བཙལ་ནས། །ཞེས་པ་ལ་སོགས་པས་བསྟན་ཏེ་ཁམས་གསུམ་གྱི་སེམས་ཅན་ཐམས་ཅད་ཤཱཀྱ་སེང་གེ་ལ་སོགས་པ་དཀྱིལ་འཁོར་གྱི་ལྷ་རྣམས་ལ་ཕྱག་འཚལ་ནས་ངན་སོང་སྦྱོང་བའི་དཀྱིལ་འཁོར་འདིར་གཞུག་ཅིང་དབང་ནོས་པ་དང་དཀྱིལ་འཁོར་འདིའི་ལྷ་རྣམས་ཀྱིས་ངན་སོང་གསུམ་གྱི་སྡུག་བསྔལ་སྦྱང་བ་དང་སེམས་ཅན་ཐམས་ཅད་ཀྱང་ངན་སོང་ལས་འདྲེན་པར་མཛད་པའི་ཕྱིར་ན་ལས་ཀྱི་ཕྱག་རྒྱ་མཆོག་ཅེས་བྱའོ། །རྩ་བའི་ལྷ་ཉི་ཤུ་རྩ་གཅིག་དང༌། བསྐལ་པ་བཟང་པོའི་ལྷ་བཅུ་དྲུག་སྟེ་སུམ་ཅུ་རྩ་བདུན་པོ་ཀུན་གྱི་ཕྲིན་ལས་སུ་ངན་སོང་སྦྱོང་བ་ལས་གཞན་བི་མངའ་བའི་ཕྱིར་ན་སོ་སོ་རེ་རེ་ལ་དེ་དག་ལས་བཅོམ་ལྡན་འདས་དེས་ཀྱང་མ་གསུངས་སོ། །སོ་སོ་རེ་རེའི་སྒྲས་ནི་རྡོ་རྗེའི་དབྱིངས་ལ་སོགས་པའི་ལྷ་རྣམས་ལ་ནི་ལས་སོ་སོ་རེ་རེ་ཡོད་དོ་ཞེས་སྦྱར་བར་བྱའོ། །འདིར་ནི་ཅི་ཞིག་ཁོ་ནའོ་ཞེས་བྱའོ། །དེ་ནི་ལས་ཀྱི་རྒྱལ་མཆོག་ཅེས་བྱ་བའི་ཏིང་ངེ་འཛིན་ཏོ་ཞེས་བྱ་བ་ནི་ལྷའི་ལས་སོ་ཞེས་བྱ་བའི་ཐ་ཚིག་གོ །ད་ནི་རྣལ་འབྱོར་པའི་ལས་ལ་
རྗེས་སུ་སྦྱོར་བའི་ཏིང་ངེ་འཛིན་ཏོ། །དེ་ལ་ཡང་སྤྱན་དྲང་བ་དང་ཕྱག་རྒྱ་བཞིས་རྒྱས་གདབ་པ་དང་དབང་བསྐུར་ཞིང་བྱིན་གྱིས་བརླབ་པ་དང་མཆོད་པ་དང་བཟླས་པའོ། །དེ་ལ་དང་པོར་སྤྱན་དྲང་པ་བསྟན་ཏེ། སྔགས་དང་ཕྱག་རྒྱ་ལྡན་པ་ཡིས། །སྒོ་ནི་དབྱེ་བར་བྱ་བ་སྟེ། ཞེས་པ་ལ་སོགས་པ་དང་འབྲེལ་ཏོ། །སྒོ་དབྱེ་བའི་སྔགས་དང་ཕྱག་རྒྱལ་སོགས་པ་ནི་དཀྱུས་སུ་གསལ་ལོ། །ཤཱཀྱའི་རྒྱལ་པོ་བདག་སྦྱོར་རོ། །ཞེས་པ་ལ་སོགས་པ་ལ་ཤཱཀྱ་ནི་བདག་ཉིད་ཀྱི་རིགས་སུ་འཁྲུངས་པས་ནའོ། །རྒྱལ་པོ་ནི་གཙོ་བོར་གྱུར་ཞེས་བྱའོ། །བདག་སྦྱོར་བ་ཞེས་པ་ནི་བདག་རྣལ་འབྱོར་པ་ཤཱཀྱ་ཐུབ་པའི་ཏིང་ངེ་འཛིན་དང་ལྡན་པའོ། །དེའི་དོན་ཡང་འདི་ལྟར་ཤེས་པར་བྱ་སྟེ། དབུས་ཀྱི་གཙོ་བོ་ལས་མར་མེ་གཉིས་པ་ལྟར་བདག་བྱུང་ནས་དཀྱིལ་འཁོར་གྱི་ལྷ་རྣམས་ལ་དབང་ནོས་ཕྱག་བཙལ་ནས་གྲོགས་ལྟ་བུའི་ཚུལ་དུ་བསམས་ནས་ཤར་ཀྱི་སྒོ་དྲུང་དུ་གནས་ཏེ་སྤྱན་དྲང་བར་བྱའོ། །ལ་ལ་དག་བདག་སྦྱོར་བ་དང་པོ་དང་ལྡན་པ་དེས་བྱའོ་ཞེས་སྨྲའོ། །དེའི་དོན་ཡང་བདག་སྦྱོར་བ་པོ་དང་ལྡན་པ་དེས་ནམ་མཁའི་ཕྱོགས་སུ་གནས་ལ་སྟོང་པར་བྱ་བ་དང་གནས་བསྐྱེད་པ་དང་གཙོ་བོ་ལ་སོགས་པ་རྣམས་བསྐྱེད་པ་བྱས་ནས། དེ་ནས་ནམ་མཁའ་ལས་བསམས་ནས་སྒོ་དྲུང་དུ་གནས་ཏེ། ཡེ་ཤེས་སེམས་དཔའ་གྲོགས་སུ་བལྟས་ཏེ་སྤྱན་དྲང་བར་བྱའོ་ཞེས་གསུངས་སོ། །སྤྱན་དྲང་བ་ཡང་ཆོས་ཀྱི་སྐུ་ལས་བཞེངས་པ་དང་ལོངས་སྦྱོང་དང་རྡོ་རྗེ་རྒྱལ་པོའི་སྙིང་གའམ། གདན་མཚམས་ནས་སྤྱན་དྲང་བའོ། །ཛཿ་ཧཱུཾ་བཾ་ཧོཿ། ཞེས་པ་ནི་རྡོ་རྗེ་རྒྱལ་པོའི་སྔགས་སོ། །ལྕགས་ཀྱུ་ལ་སོགས་པའི་སྔགས་སོམ་ཉི་ཟ་བར་མི་བྱའོ། །ཕྱི་མ་ནི་དཀྱུས་སུ་གསལ་ལོ། །བགེགས་བསྐྲད་རྡོ་རྗེ་གནོད་སྦྱིན་གྱིས། །ཞེས་པ་ནི་ནམ་མཁའི་ཕྱོགས་སུ་བྱོན་པ་ལས་རྣལ་འབྱོར་པའི་རྣལ་པར་རྟོག་པའི་བློ་ལ་གནས་པའི་བགེགས་རྡོ་རྗེ་གནོད་སྦྱིན་གྱི་སྔགས་དང་ཕྱག་རྒྱས་བསྐྲད་དོ། །དེ་ནས་དྲི་ཆུའི་ཡོན་ཆབ་ཞབས་བསིལ་དབུལ་ལོ། །དེ་ནས་བསྟོད་པས་བསྟོད་དོ། །ཕྱག་རྒྱ་བཞིས་ནི་བཅིང་བར་བྱ། །ཞེས་པ་ནི་ཚུལ་རྣམ་པ་གཉིས་སུ་མེད་པར་བྱ་བ་ཕྱག་རྒྱ་བཞིས་རྒྱས་གདབ་བོ། །དེ་ལྟར་ཕྱག་རྒྱ་བཞིས་གཉིས་སུ་མེད་པར་བྱས་
ནས་ཕྱག་རྒྱ་བཞིས་རྒྱས་གདབ་པར་བྱ་སྟེ། དེ་ལ་ཡང་སྔགས་དང་ཕྱག་རྒྱ་གཉིས་སོ། །དེ་ནས་སྔགས་དང་ཕྱག་རྒྱ་ནི། །གོ་རིམས་བཞིན་དུ་བཤད་པར་བྱ། །ཞེས་པ་དང་མཚམས་སྦྱར་བར་བྱའོ། །སྔགས་ལ་ཡང་གཉིས་ཏེ། སྤྱིའི་སྔགས་དང་རྩ་བའི་སྔགས་སོ། །སྤྱིའི་སྔགས་ནི་ཨོཾ་ན་མོ་བྷ་ག་ཝ་ཏེ་སརྦ་དུརྒ་ཏི་པ་རི་ཤོདྷ་ན། ཞེས་པ་ལ་སོགས་པའོ། །རྩ་བའི་སྔགས་ནི་འོག་ནས་ཤེས་པར་བྱ་སྟེ། དཀྱུས་སུ་གསལ་བས་ཤེས་པར་བྱའོ། །ཤཱཀྱ་སེང་གེའི་ཕྱག་རྒྱ་ནི། །ཞེས་པ་ལ་སོགས་པས་བསྟན་ཏེ་དེ་ལ་ཡང་དམ་ཚིག་གི་ཕྱག་རྒྱ་དང༌། ཆོས་ཀྱི་ཕྱག་རྒྱ་དང། ལས་ཀྱི་ཕྱག་རྒྱ་དང༌། ཕྱག་རྒྱ་ཆེན་པོའོ། །རེ་རེ་ལ་ཡང་བསམ་པ་དང་བཅིང་བ་དང་བཟླས་པ་གསུམ་ཉིད་དུ་ཤེས་པར་བྱའོ། །དེ་ཡང་ལུས་ཀྱི་ལས་དང་ངག་དང་ཡིད་ཀྱིའོ། །དེ་རེ་རེ་ལ་ཡང་སྐུ་དང་གསུང་དང་ཐུགས་གསུམ་དུ་ཤེས་པར་བྱའོ་དེ་ཡང༌། སྐུ་གསུང་ཐུགས་ཀྱི་སྤྱོར་བ་ཡིས། །ཕྱག་རྒྱ་བཞི་ནི་བཅིང་བྱ་སྟེ། །ལུས་ངག་ཡིད་ཀྱི་ལས་རྣམས་ཀྱི། །དངོས་གྲུབ་ཐམས་ཅད་གྲུབ་ཅེས་པའོ། །ཞེས་གསུངས་སོ། །ལུས་ཀྱི་ལས་སུ་ནི། དབུས་སུ་ཏིང་འཛིན་མཆོག་གནས་པ། །ཞེས་པ་ལ་སོགས་པའོ། །ཡིད་ཀྱིའམ་བསམ་པར་བྱ་བ་དམ་ཚིག་གི་ཕྱག་རྒྱ་ནི། ལྷ་ནི་རེ་རེའི་ཐུགས་ཀ་ནས། །སེམས་དཔའི་རྡོ་རྗེ་བཀོད་ནས་སུ། །དམ་ཚིག་ཕྱག་རྒྱ་དེ་བསྒྱུར་རོ། །ཞེས་པའོ། །དག་གི་ལས་སུ་ནི། ཨོཾ་ཨཱཿ་སརྦ་བིཏ་སརྦ་ཨཱ་ཝ་ར་ཎཱ་བི་ཤོ་དྷ་ནེ་མུ་ནེ་ཧཱུཾ་ཕཊ། ཤཱཀྱ་ཐུབ་པའི་སྔགས་སོ་ཞེས་པ་ལ་སོགས་པའོ། །ཆོས་ཀྱི་ཕྱག་རྒྱ་ལ་ཡང་གསུམ་མོ། །ལྕེ་ལ་པདྨ་དང་ཟླ་བ་བསམ་པ་ནི་སྐུའོ། །རྡོ་རྗེ་བསམ་པ་ནི་ཐུགས་སོ། །ཡིག་འབྲུ་བསམ་པ་ནི་གསུང་ངོ༌། །ཆོས་ཀྱི་ཕྱག་རྒྱ་བསྒོམ་པ་ནི། །མགྲིན་པའི་པདྨ་ཟླ་དཀྱིལ་དུ། །གོང་དུ་ཕྱུང་བའི་སྔགས་བཀོད་པ། །ཆོས་ཀྱི་ཕྱག་རྒྱའི་ཆོ་གའོ། །ཞེས་པའོ། །ལས་ཀྱི་ཕྱག་རྒྱལ་ཡང་དེ་བཞིན་དུ་ཤེས་པར་བྱ་སྟེ། ལུས་ཀྱི་ལས་སུ་བཅིང་བ་ནི། །ལྷ་ཀུན་གྱི་ནི་ཐུགས་ཀ་རུ། །རྡོ་རྗེ་རྒྱ་གྲམ་བསྐྱེད་ནས་སུ། །ཞེས་བྱའོ། །ལུས་ཀྱི་ལས་ནི། ཆོས་ཀྱི་འཁོར་ལོར་ཅི་གསུངས་པ། །ཞེས་པའོ། །ཕྱི་མ་ནི་ངག་གིའམ་འོག་ནས་འབྱུང་བ་ལ་བཀར་མ་
བཏགས་པ་ལ་ཕྱག་རྒྱ་ཆེན་པོ་དེའི་ལས་ཀྱང་དེ་ལྟར་གསུམ་དུ་ཤེས་པར་བྱའོ། །བསམ་པ་དང་བཅིང་བ་དང་བཟླས་པའོ། །གོང་དུ་ཆུང་བ་ལས་གསུངས་པའི། །ཞེས་པ་ལ་སོགས་པའོ། །ཕྱི་མ་ནི་དཀྱུས་སུ་གསལ་ལོ། །དེ་ནས་བྱིན་གྱིས་བརླབ་པ་ནི་དེ་བཞིན་གཤེགས་པ་རྣམས་ལ་གནས་བཞི་རུ་སེམས་མ་བཞིས་བྱིན་གྱིས་བརླབ། སྒེག་མོ་ལ་སོགས་པ་རྣམས་ལ་རང་གི་རིགས་ཀྱི་ཕྱག་རྒྱས་བྱིན་གྱིས་བརླབ་བོ། །དབང་བསྐུར་བ་ནི་རིན་པོ་ཆེ་མྱུ་གུའི་ཕྱག་རྒྱས་དབང་བསྐུར་ཏེ། གཙོ་བོ་ལ་དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་ནས་ཐིམ་པས་དབུ་གཙུག་ཏོར་བལྟར་མི་མངོན་པར་གྱུར་ཏོ། །རྡོ་རྗེ་གཙུག་ཏོར་ལ་སོགས་པ་ནི་འཁོར་ལོས་སྒྱུར་བའི་རྒྱལ་པོའི་ཆ་བྱད་དུ་གནས་སོ། །དེ་ལྟར་དབང་བསྐུར་ནས་མཆོད་དེ། དེ་ནས་དེའི་མཆོད་པ་ཀུན་ལ་དྲིའི་ཆུས་གཏོར་བར་བྱའོ། །དེ་ནས་མཆོད་པའི་ཁྱད་པར་ནི་གོང་དུ་གསུངས་པ་བཞིན་དེ་དག་ལ། རྣམ་པ་སྣ་ཚོགས་མཆོད་པ་བྱ། །ཞེས་པ་ནི་གོང་དུ་གསུངས་པ་དེ་བཞིན་དུ་རྫས་ཀྱི་མཆོད་པ་ལྔ་དང༌། ཕྱག་རྒྱའི་མཆོད་པ་ལྔ་དང༌། ལཱ་སྱེ་ལ་སོགས་པ་བརྒྱད་དང་མཆོད་པ་ཉི་ཤུ་པས་མཆོད་དོ། །གཞན་ཡང་སྣ་ཚོགས་ཏེ། ཕྱག་རྒྱས་རོལ་མོ་བཅུ་པོ་རྣམས་ཀྱིས་ཀྱང་མཆོད་པར་བྱའོ། །སྒྲུབ་པའི་མཆོད་པ་བཅུ་དྲུག་གིས་ཀྱང་མཆོད་དོ། །མཆོད་པའི་རྗེས་ལ་མཉམ་མེད་མི་གཡོའི་བསྟོད་པ་བྱ་སྟེ་ཞེས་པ་ནི། མཉམ་མེད་མི་གཡོ་མཆོག་ཆོས་ཅན། །ཐུགས་རྗེའི་བདག་ཉིད་འགྲོ་སྡུག་སེལ། །ཡོན་ཏན་དངོས་གྲུབ་སྦྱིན་མཛད་པ། །འདིས་ནི་མཉམ་ཉིད་དམ་པ་བསྟོད། །ཡོན་ཏན་ཀུན་དུ་ཚད་མེད་དེ། །ནམ་མཁའ་དང་ཡང་བསྐྲུན་ཡོད་མིན། །དངོས་གྲུབ་མཉམ་མེད་དཔེ་བྲལ་བ། །འགྲོ་ལ་གནས་པར་སྩོལ་མཛད་བསྟོད། །རྟག་ཏུ་དྲི་མེད་ཐུགས་རྗེ་འབྱུང༌། །སྨོན་ལམ་གྲུབ་པ་འགག་མེད་ཉིད། །འགྲོ་བའི་དོན་ནི་མཐའ་ཡས་པ། །བདག་ཉིད་རྟག་ཏུ་སྣང་ལ་བསྟོད། །ཚད་བྲལ་ཡོངས་སུ་རྫོགས་པ་ཡི། །བདེ་གཤེགས་གོ་འཕང་དེར་བསྙེགས་ཀྱང༌། །ཐུགས་རྗེའི་སྤྱོད་པ་འགག་མི་འགྱུར། །བཟང་པོ་ཤིན་ཏུ་མཆོག་ལྡན་བསྟོད། །མཆོག་སྦྱིན་ནང་ན་མཆོག་
བརྙེས་པ། །ཀུན་གྲུབ་འགྲོ་ལ་མཆོག་སྩོལ་མཛད། །མགོན་པོ་ཀུན་དུ་སྒྲིབ་མེད་པ། །དངོས་གྲུབ་དམ་པ་སྩོལ་མཛད་པ། །བསྟོད་པའི་རྒྱལ་པོ་འདི་དག་གིས། །ལན་ཅིག་ཙམ་ཡང་བསྟོད་བྱས་ན། །སངས་རྒྱས་ཀུན་གྱིས་དབང་བསྐུར་ཞིང༌། །བདེ་གཤེགས་ཐམས་ཅད་འགྲུབ་པར་འགྱུར། །ཞེས་པའོ། །དེ་ནས་བཟླས་པ་ལ་འཇུག་པར་བྱ་སྟེ་བདག་དང་ལྷ་ཐམས་ཅད་ཐ་མི་དད་པར་གྲོགས་ལྟ་བུར་བསམས་ཏེ། གང་དང་གང་གི་བཟླས་པ་བྱེད་པ་དེའི་ཚེ་དེ་ཉིད་ཀྱི་རང་བཞིན་དུ་བསམས་ལ་གོང་གི་སྔགས་གང་ཡིན་པ་བཟླས་སོ། །དེ་ལྟ་བུར་བསྒོམ་པ་ནི་ཟླ་བ་དྲུག་གམ་ཟླ་བ་གཅིག་ཏུ་གནང་པའམ་མཚན་མ་འམ་གྲངས་རྫོགས་སུ་བསྙེན་པ་ཐུན་བཞིའི་རིམ་པ་བྱའོ།། །།དེ་ནས་གདོད་རྡུལ་ཚོན་བརྩམ་མོ། །སྔོན་དུ་བསྙེན་པ་བྱ་བའི་ཆོ་གའི་རིམ་པའི་དཀའ་འགྲེལ་རྫོགས་སོ།། །།