ཡི་གེ་བརྒྱ་པའི་ཆོ་ག།
རྒྱ་གར་སྐད་དུ། ཤ་ཏཱཀྵ་ར་བི་དྷིཿ། བོད་སྐད་དུ། ཡི་གེ་བརྒྱ་པའི་ཆོ་ག །འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དང་པོར་སེམས་དཔའི་སྐྱིལ་མོ་ཀྲུང་དུ་འདུག་སྟེ། ས་ཕྱོགས་དེར་སངས་རྒྱས་དང་བྱང་ཆུབ་སེམས་དཔའ་ཐམས་ཅད་མདུན་གྱི་བར་སྣང་ལ་དམིགས་ཏེ། དེ་རྣམས་ལ་དང་པོར་མཆོད་པ་དང༌། གསུམ་ལ་སྐྱབས་སུ་འགྲོ་བ་དང༌། སྡིག་པ་བཤགས་པ་དང༌། བསོད་ནམས་ལ་རྗེས་སུ་ཡི་རང་བ་དང༌། བྱང་ཆུབ་ཏུ་སེམས་བསྐྱེད་པ་དང༌། ལམ་ལ་གནས་པ་ལ་སོགས་པ་བྱས་ནས། དེའི་འོག་ཏུ་བདག་དང་དངོས་པོ་ཐམས་ཅད་མི་སྣང་པར་བྱས་ཤིང་སྔགས་འདིས་སྟོང་པ་ཉིད་དུ་བསྒོམ་མོ། །ཨོཾ་སྭ་བྷཱ་ཝ་ཤུདྡྷཿ་སརྦ་དྷརྨཱཿ་སྭ་བྷཱ་ཝ་ཤུདྡྷོ྅ཧཾ། དེ་ནས་ཨོཾ་ཙིཏྟཾ་པྲ་ཏི་བྱ་དྷཾ་ཀཱ་རོ་མི། ཞེས་བྱ་བའི་སྔགས་འདིས་ཨ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་གྱི་གཟུགས་ཅན་བསྐྱེད་པར་བྱའོ། །དེ་ནས་ཨོཾ་བོ་དྷི་ཙིཏྟ་ཨུཏྤཱ་ད་ཡཱ་མི། ཞེས་བྱ་བའི་སྔགས་འདིས་དེ་ཉིད་སྤྲོ་བར་བྱའོ། །ཨོཾ་ཏིཥྛ་བཛྲ། ཞེས་བྱ་བས་ཧཱུཾ་ལས་བྱུང་བ་ནམ་མཁའི་ཁམས་ཐམས་ཅད་དང་མཉམ་པར་གནས་པའི་རྡོ་རྗེ་བསམས་ལ། དེ་ནས་རྡོ་རྗེའི་གཟུགས་དེ་ལས་སངས་རྒྱས་དང་བྱང་ཆུབ་སེམས་དཔའི་ཚོགས་འདུས་པ་དང༌། རྡོ་རྗེ་དང་ཟླ་བ་ཡོངས་སུ་གྱུར་པ་ལས་བཅོམ་ལྡན་འདས་རྡོ་རྗེ་སེམས་དཔའ་ཕྱག་གཉིས་པ། སྐུ་མདོག་དཀར་པོ་རྡོ་རྗེ་དང་དྲིལ་བུ་བསྣམས་པར་སྔགས་འདིས་བདག་ཉིད་བསམ་པར་བྱའོ། །སཏྭ་སརྦ་ཏ་ཐཱ་ག་ཏ་ཏ་ཐཱ་མ་ཧཾ། དེའི་འོག་ཏུ་ཧཱུཾ་ལས་བྱུང་བའི་འཁོར་ལོ་རྩིབས་བཅུ་དྲུག་པ་བསམས་ལ། དེའི་སྟེང་དུ་སྣ་ཚོགས་རྡོ་རྗེ། དེའི་ལྟེ་བར་དཔལ་རྡོ་རྗེ་སེམས་དཔའ་སྣ་ཚོགས་པདྨའི་སྟེང་དུ་བཞུགས་པར་བསམ་མོ། །ཤར་ཕྱོགས་སུ་མི་བསྐྱོད་པ། ལྷོར་རིན་ཆེན་འབྱུང་ལྡན། ནུབ་ཏུ་འོད་དཔག་ཏུ་མེད་པ། བྱང་དུ་དོན་ཡོད་གྲུབ་བའོ། །ཤར་ལྷོར་རྡོ་རྗེ་སེམས་མ། ཕྱག་གཉིས་པ་སྐུ་མདོག་ནག་པོ། ཕྱག་གཡོན་པ་དཀུར་བརྟེན་པ། ཕྱག་རྐེད་པར་འཇོག་པ། ཕྱག་གཡས་ན་རྡོ་རྗེ་བསྣམས་པའོ། །ལྷོ་ནུབ་ཏུ་རྡོ་རྗེ་རིན་ཆེན་མ་སྐུ་མདོག་སེར་བ་ཕྱག་གཉིས་པ་ཕྱག་གཡོན་པ་དཀུར་བརྟེན་པ། ཕྱག་གཡས་ན་རིན་པོ་ཆེ་བསྣམས་པའོ། །ནུབ་བྱང་དུ་རྡོ་རྗེ་ཆོས་མ་སྐུ་མདོག་དམར་བ། ཕྱག་གཉིས་
པ་ཕྱག་གཡོན་པ་དཀུར་བརྟེན་པ། ཕྱག་གཡས་ན་པདྨ་བསྣམས་པའོ། །བྱང་ཤར་དུ་རྡོ་རྗེ་ལས་མ་སྐུ་མདོག་ལྗང་གུ་ཕྱག་གཉིས་པ་ཕྱག་གཡོན་དཀུར་བརྟེན་པ། ཕྱག་གཡས་ན་སྣ་ཚོགས་རྡོ་རྗེ་བསྣམས་པའོ། །འཁོར་ལོའི་དབང་ལྡན་གྱི་ཕྱོགས་ནས་བརྩམས་ཏེ་བསྐོར་ཕྱོགས་སུ་རྡོ་རྗེ་སེམས་དཔའ་ལ་སོགས་པ་རྩིབས་བཅུ་དྲུག་ལ་བསམ་པར་བྱ་སྟེ། དེ་ལ་རྩིབས་ཀྱི་དབུས་སུ་ཐམས་ཅད་ཀྱང་སྣ་ཚོགས་པདྨའི་སྟེང་དུ་ཟླ་བའི་དཀྱིལ་འཁོར་ལ་བཞུགས་པར་བྱའོ། །དེ་ལ་དབང་ལྡན་གྱི་ཕྱོགས་སུ་རྡོ་རྗེ་སེམས་དཔའ་སྐུ་མདོག་ལྗང་གུ་གཡོན་པ་བསྙེམས་པས་དཀུར་བརྟེན་པ། ཕྱག་གཡས་ན་རང་གི་ཐུགས་ཀར་རྡོ་རྗེ་བསྙོད་པའི་ཚུལ་གྱིས་བསྣམས་པའོ། །རྡོ་རྗེ་རྒྱལ་པོ་སྐུ་མདོག་སེར་པོ་རྡོ་རྗེ་ལྕགས་ཀྱུས་འགུགས་པའི་ཚུལ་དུ་བཞུགས་པའོ། །རྡོ་རྗེ་ཆགས་པ་སྐུ་མདོག་ནག་པོ་ཕྱག་ན་མདའ་གཞུ་བསྣམས་པའོ། །རྡོ་རྗེ་ལེགས་པ་སྐུ་མདོག་མརྒད་ལྟ་བུ། ཕྱག་གཉིས་ཀྱིས་ལེགས་སོ་ཞེས་བྱ་བ་སྦྱིན་པར་བྱེད་པའོ། །རྡོ་རྗེ་རིན་ཆེན་སྐུ་མདོག་སེར་པོ་རང་གི་དབང་བསྐུར་བའི་གནས་སུ་ཕྱག་གཉིས་ཀྱིས་དབང་བསྐུར་བའི་ཕྲེང་བ་འཆིང་བའི་ཚུལ་གྱིས་བཞུགས་པའོ། །རྡོ་རྗེ་ཉི་མ་སྐུ་མདོག་དམར་པོ་ཕྱག་གཉིས་ཀྱིས་ཐུགས་ཀར་ཉི་མའི་དཀྱིལ་འཁོར་འཛིན་པའོ། །རྡོ་རྗེ་རྒྱལ་མཚན་སྐུ་མདོག་ནམ་མཁའ་ལྟར་སྔོ་བསངས་ཕྱག་གཉིས་ཀྱིས་ཡིད་བཞིན་གྱི་ནོར་བུའི་རྒྱལ་མཚན་འཛིན་པའོ། །རྡོ་རྗེ་བཞད་པ་སྐུ་མདོག་པདྨའི་རྩ་བ་ལྟར་དཀར་པོ་ཕྱག་གཉིས་ཀྱིས་སོའི་ཕྲེང་བ་གཉི་ག་དང་བཅས་པའི་རྡོ་རྗེ་གཉིས་བསྣམས་པའོ། །རྡོ་རྗེ་ཆོས་སྐུ་མདོག་དམར་སྐྱ་ཕྱག་གཡོན་པས་པདྨའི་སྡོང་བུ་འཛིན་ཅིང་ཕྱག་གཡས་པས་པདྨའི་འདབ་མ་འབྱེད་པའོ། །རྡོ་རྗེ་རྣོན་པོ་སྐུ་མདོག་གུར་ཀུམ་གྱི་མདོག་ཅན། ཕྱག་གཡོན་པས་ཐུགས་ཀར་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་བསྣམས་པ་ཕྱག་གཡས་ཀྱིས་རལ་གྲི་འཕྱར་བའོ། །རྡོ་རྗེ་རྒྱུ་གསེར་གྱི་མདོག་ཅན་ཆོས་ཀྱི་འཁོར་ལོའི་ཕྱག་རྒྱ་དང་ལྡན་པའོ། །རྡོ་རྗེ་སྨྲ་བ་སྐུ་མདོག་དམར་པོ་ཕྱག་གཡོན་པ་ན་དུང་བསྣམས་པ་ཕྱག་གཡས་པ་ལྕེའི་ཕྱག་རྒྱ་དང་ལྡན་པའོ། །རྡོ་རྗེ་ལས་སྐུ་མདོག་ལྗང་གུ་ཕྱག་གཉིས་རྡོ་རྗེ་རྩེ་གསུམ་བསྣམས་ནས་སྤྱི་བོར་འཇོག་ཅིང་གར་མཛད་པས་བཞུགས་པའོ། །རྡོ་རྗེ་སྲུང་བ་སྐུ་མདོག་
སེར་པོ་ཕྱག་གཉིས་ཀྱིས་རྡོ་རྗེ་གོ་ཆ་བསྣམས་པའོ། །རྡོ་རྗེ་གནོད་སྦྱིན་སྐུ་མདོག་ནག་པོ་ཕྱག་གཉིས་ཀྱིས་མཆེ་བ་གཉིས་རང་བཞིན་གྱིས་ཐད་ཀར་བསྣམས་ནས་གདུག་པ་ཐམས་ཅད་འཇིགས་པར་བྱེད་པས་བཞུགས་པའོ། །རྡོ་རྗེ་ཁུ་ཆུར་སྐུ་མདོག་དཀར་པོ་ཕྱག་གཉིས་ཀྱིས་རྡོ་རྗེ་བསྣམས་པ་དང་ལྡན་པར་བསམ་མོ། །དེ་ནས་རྡོ་རྗེ་སེམས་མའི་ཕྱག་རྒྱ་བཅིངས་ལ་ས་མ་ཡ་ཧོ། །ཧཾ་ཞེས་བྱ་བས་བདག་ཉིད་ལ་བལྟས་ལ། ས་མ་ཡ་སྟྭཾ། ཞེས་བྱ་བ་འདིས་མདུན་དུ་ཡེ་ཤེས་སེམས་དཔའ་ཟླ་བའི་དཀྱིལ་འཁོར་ལ་བཞུགས་པར་བསྒོམས་ལ། ས་མ་ཡ་སྟྭཾ་ཨ་ཧཾ། ཞེས་བྱ་བ་འདིས་སྙིང་གར་བཅུག་སྟེ། བདག་དང་མི་གཉིས་པའི་བདག་ཉིད་དུ་བསྒོམ་མོ། །དེ་ནས་ཡི་གེ་ཧཱུཾ་ལས་བྱུང་བ་རྡོ་རྗེ་འོད་དང་ལྡན་པའི་ཚུལ་ཅན་གྱི་ལྕེ་བསམ་མོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ལྔ་རྣམས་ཀྱི་བུམ་པའི་དབང་བསྐུར་བ་དང་ཅོད་པན་གྱི་དབང་དང༌། ཕྲེང་བའི་དབང་དང༌། རྡོ་རྗེའི་དབང་ལ་སོགས་པ་རྡོ་རྗེ་སེམས་མ་ལ་སོགས་པ་རྣམས་ཀྱིས་དབང་བསྐུར་བར་བསམ་མོ། །ཡི་གེ་བརྒྱ་བའི་ཆོ་ག་རྫོགས་སོ།།