མི་འཁྲུགས་པའི་སྒྲུབ་ཐབས།
དཔའ་བོ་རྡོ་རྗེ།
༈ མི་འཁྲུགས་པའི་སྒྲུབས་ཐབས་བཞུགས།། མི་འཁྲུགས་པ་ལ་ཕྱག་འཚལ་ལོ། །མཚན་ཉིད་ལྡན་པའི་བུམ་པ་ལ། །བརྡེག་དང་བདུག་དང་མཚན་མ་དགོད། །ནང་དུ་བཅུད་རྣམས་བླུགས་ལ་ཡང༌། །མགུལ་ཆིངས་ཁ་རྒྱན་ལ་སོགས་བཅས། །མཎྜལ་མེ་ཏོག་བཅས་པའི་སྟེང༌། །བཞག་ལ་མཆོད་སོགས་རིམ་བཞིན་བཤམ། །བདག་དང་གནས་སོགས་བསྲུང་བྱས་ལ། །མཆོད་པ་བསངས་ཤིང་བྱིན་གྱིས་བརླབ། །བདག་ཉིད་ལྷག་པའི་ལྷར་བསམས་ནས། །རང་བཞིན་དག་པའི་སྔགས་བརྗོད་པས། །བུམ་པ་སྦྱངས་ཏེ་བཾ་ལས་བསྐྱེད། །རྒྱ་མཚོ་པདྨ་ཟླ་སྟེངས་སུ། །མི་འཁྲུགས་རྒྱལ་པོ་སྤྱན་དྲངས་ལ། །བགེགས་བསྐྲད་རྒྱས་བཏབ་མཆོད་ཡོན་སོགས། །ཕུལ་ཏེ་ཛཿ་ཧཱུཾ་བཾ་ཧོཿ་སཾ་དགུག །གདན་ལ་བཞུགས་གསོལ་མཆོད་བསྟོད་བྱ། །འཕྲོ་འདུ་ཚུལ་གྱིས་བཟླས་བརྗོད་བྱ། །བརྒྱ་སྟོང་ལ་སོགས་ཅི་ནུས་པར། །བྱས་ཏེ་མཆོད་བསྟོད་གཏོར་མ་གཏང༌། །དེ་ལྟར་ཐུང་དང་སྦྱོར་བ་ཡིས། །ཇི་སྲིད་འདོད་ཀྱི་བར་དུ་བྱ། །ཁྲུས་ཀྱི་དུས་སུ་བུམ་ནང་ལྷ། །མཆོད་བསྟོད་བྱས་ཏེ་མཁའ་ལ་བཞུགས། །དེ་ཡིས་དབང་བསྐུར་བསམས་ལ་བཀྲུ། །རང་ཉིད་ལྷ་ཡི་སྦྱོར་ལྡན་པས། །རྒྱུན་གཅོད་སྔགས་ལ་ཆེ་གེ་མོ། །སརྦ་པཱ་པཾ་ཞེས་སོགས་པའི། །བརྗོད་ཅིང་བུམ་པའི་ཆུ་རྒྱུན་གྱིས། །བཀྲུ་ཞིང་དེ་ནས་རྨ་བྱ་ཡི། །སྒྲོ་ཡིས་བྱབ་ཅིང་ཨ་པ་ན། །ཞེས་སོགས་བརྗོད་པས་མི་མཐུན་
ཕྱོགས། །བསལ་བར་བསམས་ལ་སློབ་མ་དེ། །མདུན་དུ་གནས་པས་མཎྜལ་བྱ། །བླ་མ་ལ་ཕུལ་བླ་མ་ཡིས། །སྲུང་སྐུད་སྲུང་འཁོར་གདགས་པ་དང༌། །ཏིང་འཛིན་སྔགས་དང་ཕྱག་རྒྱས་བསྲུང༌། །ལྷ་ལ་མཆོད་བསྟོད་བཟོད་པར་གསོལ། །གཏོར་མ་བྱིན་ལ་ཕྲིན་ལས་གཞོལ།། སྨོན་ལམ་བཏབ་ལ་གཤེགས་སུ་གསོལ། །ཨ་ཀཱ་རོ་ཡི་སྔགས་བརྗོད་ཅིང༌། །མཎྜལ་མཆོད་པ་མེ་ཏོག་བསྡུ། །འདི་ཡིས་ཡིད་བཞིན་ནོར་བུ་བཞིན། །མི་མཐུན་ཕྱོགས་སེལ་འདོད་པ་འགྲུབ། །སློབ་དཔོན་དཔའ་བོ་རྡོ་རྗེ་མཛད་པའོ། །རྫོགས་སོ། །