ངན་སོང་ཐམས་ཅད་སྦྱོང་བའི་ཐབས།
སྐལ་བཟང་དགའ་བ།
རྒྱ་གར་སྐད་དུ། སརྦ་དུ་རྒ་ཏི་པ་རི་ཤོ་དྷ་ན་ཨུ་པཱ་ཡ་ནཱ་མ། བོད་སྐད་དུ། ངན་སོང་ཐམས་ཅད་སྦྱོང་བའི་ཐབས་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པ་རྫོགས་པའི་སངས་རྒྱས་ངན་སོང་ཐམས་ཅད་རྣམ་པར་སྦྱོང་བ་གཟི་བརྗིད་ཀྱི་རྒྱལ་པོ་ལ་ཕྱག་འཚལ་ལོ། །གང་ཞིག་དམ་ཚིག་ལ་བརྟན་པར་གནས་ཤིང་སློབ་དཔོན་ལས་ཚུལ་བཞིན་དབང་ཟོབ་པ། གསང་སྔགས་ཀྱི་རྒྱུད་དང་ཆོ་གའི་བྱེ་བྲག་ལ་མཁས་ཤིང་བདག་དང་གཞན་གྱི་དོན་བསྒྲུབ་པ་ལ་བརྩོན་པ་དེས་བྱམས་པ་དང༌། སྙིང་རྗེ་ཆན་པོའི་སེམས་ཀྱིས་སེམས་ཅན་
གང་དག་འཆི་བའི་དུས་བྱས་ཏེ། མི་དགེ་བའི་རྣམ་པར་སྨིན་པས་ངན་སོང་གསུམ་གྱི་སྡུག་བསྔལ་མྱོང་བར་གྱུར་པ་དང༌། །ཉམ་ངའི་གནས་ནས་འདོན་ཅིང༌། མཐོ་རིས་ཀྱི་བདེ་བ་ལ་དགོད་པའི་ཕྱིར་ངན་སོང་རྣམ་པར་སྦྱོང་བའི་བརྟག་པ་ལས་བྱུང་བའི་ཤི་བའི་ཆོ་ག་བྱ་བར་འོས་སོ། །དེ་ཡང་རྒྱུད་ལས། དེ་བཞིན་དཀྱིལ་འཁོར་བྲིས་ནས་ནི། །དེ་ལྟར་ཡང་ནི་གསུམ་པ་ལ། །བརྒྱ་རྩ་བརྒྱད་དུ་བསླས་ནས་ནི། །དབང་བསྐུར་བ་ནི་རབ་ཏུ་བརྟག །དེ་ནས་སྡིག་པ་ཀུན་སྦྱངས་ཏེ། །དམྱལ་བ་ལ་སོགས་སྡུག་བསྔལ་ལས། །དེ་ནི་མྱུར་དུ་རྣམ་པར་ཐར། །རིམ་གྱིས་བྱང་ཆུབ་ཐོབ་པར་འགྱུར། །ཞེས་འབྱུང་བས། ངན་སོང་རྣམ་པར་སྦྱོང་བ་ཞེས་བྱ་བའི་དཀྱིལ་འཁོར་གཞུང་ལས་སྨོས་པ་བཞིན་དུ་བྲིས་ནས་བུམ་པ་ལྔ་བཞག་པ་ལ་རིགས་ལྔ་སོ་སོའི་སྙིང་པོ་བུམ་པ་རེ་རེ་ལ་བརྒྱ་རྩ་བརྒྱད་བཟླས་ཏེ། ཤི་བའི་རོའམ་གཟུགས་བརྙན་ལ་ཚུལ་བཞིན་དུ་དབང་བསྐུར་ན་མྱུར་དུ་སྡུག་བསྔལ་ལས་གྲོལ་བར་འགྱུར་རོ། །ཐབས་གཞན་ཡང་རྒྱུད་ལས། དེ་ནས་རྣལ་འབྱོར་ཅན་གྱིས་ནི། །སྔགས་དང་ཕྱག་རྒྱས་དེ་དབང་བསྐུར། །ལྷ་ཡི་གཟུགས་སུ་བརྟགས་ནས་ཀྱང༌། །མཆོད་རྟེན་དབུས་སུ་གཞག་པར་བྱ།། རང་གི་ལྷའམ་ལྷ་གཞན་གྱི། །སྙིང་པོ་སྙིང་གར་བྲིས་ནས་ཀྱང༌། །ལྷ་འདྲ་བར་ཡང་སེམས་བསྐྱེད་དེ། །ཁྱིམ་གྱི་ནང་དུ་གཞག་པར་བྱའོ། །ཞེས་འབྱུང་བས། ཤི་བའི་རོའམ་གཟུགས་བརྙན་ནི་སྔགས་དང་ཕྱག་རྒྱས་ཚུལ་བཞིན་དུ་དབང་བསྐུར་ནས་ལྷ་ཡིན་ནོ་བར་སེམས་ཀྱིས་བརྟགས་ཏེ། ལམ་གྱི་བཞི་མདོར་མཆོད་རྟེན་ཆེན་པོ་བྱས་པའི་དབུས་སུ་བཞག་པའམ། དེ་ལྟར་མ་ནུས་ན་ནི་ཤི་བ་ཉིད་ཀྱི་ཡི་དམ་གྱི་ལྷའམ། ངན་སོང་རྣམ་པར་སྦྱོང་བ་དང༌། དེ་བཞིན་གཤེགས་པ་མི་འཁྲུགས་པ་ལ་སོགས་པ་ལྷ་གཞན་གྱི་སྙིང་པོ་རོའམ་གཟུགས་བརྙན་གྱི་སྙིང་གར་བྲིས་ལ། དེ་ལྷ་ཡིན་པར་སེམས་བསྐྱེད་དེ། དུར་རམ་མཆོད་པའི་ནང་དུ་བཅུག་ན་སྡིག་པ་རྣམས་བྱང་བར་འགྱུར་རོ། །ཐབས་གཞན་ཡང་རྒྱུད་ལས། དེ་ཡི་མིང་ནས་སྨོས་ནས་ནི། །གུ་ཀུམ་བཟང་པོས་སྔགས་བྲིས་ཏེ། རིམ་གྱིས་འབུམ་ནི་ཚང་ཙམ་དུ། མཆོད་རྟེན་ལས་
ནི་རབ་ཏུ་བྱ། །སྡིག་ཅན་སྡིག་ནི་ཟད་བྱའི་ཕྱིར། །བྱེ་བ་སྙེད་ནི་ཚང་བར་བྱ། །དེ་ནི་ངེས་པར་དམྱལ་བ་ལས། །འདི་བྱས་པས་ནི་གྲོལ་བར་འགྱུར། །ཡི་དགས་བྱོལ་སོང་སྡུག་བསྔལ་ལས། །གྲོལ་ཏེ་ལྷ་ཡི་གནས་སུ་སྐྱེ། །ཞེས་འབྱུང་བས། ཤི་བའི་མིང་དང་རིགས་ལྔའི་སྙིང་པོ་སྤེལ་ཞིང་གྲོ་ག་ལ་གུར་ཀུམ་གྱིས་བྲིས་ནས་མཆོད་རྟེན་གྱི་ནང་དུ་བཅུག་ཅིང༌། ཚ་ཚ་འབུམ་ཚང་བར་གཞུང་བཞིན་དུ་གདབ། སྡིག་པ་ཤིན་ཏུ་ཆེ་ན་མཆོད་རྟེན་བྱེ་བ་ཚང་བར་བཏབ་ན་ངན་སོང་གསུམ་ལས་གྲོལ་ཞིང་ལྷའི་གནས་སུ་སྐྱེ་བར་འགྱུར་རོ། །ཐབས་གཞན་ཡང་རྒྱུད་ལས། དེ་ཡི་མིང་ནས་བརྗོད་ནས་ནི། །ཇི་སྐད་གསུང་བའི་སྔགས་བཟླས་ཤིང༌། །འབུམ་ཕྲག་སྟོང་ངམ་ཡང་ན་ནི། །བརྒྱ་ཕྲག་སྟོང་དུ་ཚང་བ་དང༌། །བྱེ་བ་སྙེད་དུ་རབ་བཟླས་ན། །ལྷ་ཡི་གནས་སུ་ངེས་པར་སྐྱེ། །ཞེས་འབྱུང་བས། སྔགས་མཁན་ཉིད་ལྷའི་རྣལ་འབྱོར་དུ་བྱས་ལ། ཤི་བའི་མིང་དང་ལྷའི་སྙིང་པོ་རྣམས་སྤེལ་ཞིང་བཟླས་བརྗོད་གཞུང་བཞིན་དུ་འབུམ་ཕྲག་སྟོང་ངམ། བརྒྱ་ཕྲག་སྟོང་ངམ། བྱེ་བ་ཚད་པར་བཟླས་ན་ལྷའི་གནས་སུ་སྐྱེ་བར་འགྱུར་རོ། །ཐབས་གཞན་ཡང་རྒྱུད་ལས། དེ་ཡི་མིང་ནས་བརྗོད་ནས་ནི། མཁས་པས་འབུམ་ཕྲག་བརྒྱའམ་ནི། །ཡང་ན་བརྒྱ་ཕྲག་སྟོང་དུ་སྙེད། སྦྱིན་སྲེག་བྱས་པར་གྱུར་ན་ནི། །དམྱལ་བ་ཆེན་པོར་གྱུར་པ་ཡི། །སྡིག་པ་དེ་ལས་ཐར་བར་འགྱུར། །ཞེས་འབྱུང་བས། །ཤི་བའི་མིང་དང་སྙིང་པོ་རྣམས་སྤེལ་ཞིང་ཚུལ་བཞིན་དུ་སྦྱིན་སྲེག་གི་ལས་བྱས་ཏེ། གྲངས་འབུམ་ཕྲག་བརྒྱའམ་བརྒྱ་ཕྲག་སྟོང་ཚང་བར་བཟླས་ཤིང་སྦྱིན་སྲེག་བྱས་ན་ངན་སོང་ལས་ཐར་བར་འགྱུར་རོ། །ཡང་ན་གཞུང་ཉིད་ལས་སྨོས་པའི་མེའི་མདོག་དཀར་ཞིང་མེ་ལྕེ་གཡས་སུ་འཁྱིལ་བ་ལ་སོགས་པ་ལྟས་བཟང་པོ་རྣམས་བྱུང་བའི་བར་དུ་སྦྱིན་སྲེག་བྱའོ། །ཐབས་གཞན་ཡང་རྒྱུད་ལས། སྦྱིན་སྲེག་དཀྱིལ་འཁོར་དམ་པ་ནི། །སྦྱིན་སྲེག་རབ་ཏུ་བྱ་བ་ཡིན། །ཞེས་སྨོས་པས། སྦྱིན་སྲེག་གི་དཀྱིལ་འཁོར་བཞེངས་སུ་གསོལ་ཏེ། དབང་བསྐུར་ནས་མེ་ཐབ་ཏུ་སྦྱིན་སྲེག་བྱ་བ་དང༌། ཚ་ཚ་བཏབ་ནས་བཟླས་བརྗོད་ལ་སོགས་བྱ་དགོས་ཏེ། འདིར་གོང་གི་ཆོ་གའི་
ཐབས་རྣམ་པར་རྒྱུད་ཉིད་ལས་གསལ་བར་རབ་ཏུ་སྨོས་སོ། །དེ་ཡང་སྦྱིན་སྲེག་གི་དཀྱིལ་འཁོར་བྱེད་པར་འདོད་པས། དང་པོར་ཤི་བའི་རོའམ། གཟུགས་བརྙན་གྱི་སྙིང་གར་ཤི་བ་ཉིད་ཀྱི་མེ་ཏོག་གང་ལ་ཕོག་པའི་ཡི་དམ་གྱི་ལྷའམ། ལྷ་མེད་ན་ངན་སོང་རྣམ་པར་སྦྱོང་བ་ལ་སོགས་པ་ལྷ་གཞན་གང་ཡང་རུང་བའི་སྙིང་པོ་གྲོ་ག་ལ་གུར་ཀུམ་གྱིས་བྲིས་ཏེ་སྙིང་གར་གདགས། ལས་ཀྱི་སྒྲིབ་པ་རྣམ་པར་སྦྱོང་བའི་སྙིང་པོ་དེ་བཞིན་དུ་བྲིས་ནས་སྤྱི་བོར་གདགས་ཏེ། སྙིང་གར་བྲིས་པའི་སྙིང་པོ་གང་ཡིན་པ་དེ་ལྷ་དེ་ཉིད་དུ་རོ་དེ་གྱུར་པར་བསམ་ཞིང་བྱིན་གྱིས་བརླབས་ནས། གཙང་མའི་ནང་དུ་ཁྲིའམ་སྟེགས་བུའི་སྟེང་དུ་ཁ་ནུབ་ཏུ་བསྟན་ལ་གཞག་གོ །སྔགས་མཁན་ཤར་དུ་ཁ་བལྟས་ནས་བདུན་དུ་མཎྜལ་བྱས་ནས་ཞི་བ་དང་ལྡན་པའི་མཆོད་པ་རྣམས་དགྲམ་ཞིང༌། མཆོད་སྦྱིན་གྱི་གཏོར་མ་ཆ་གཉིས་ཚུལ་བཞིན་དུ་བཤམས། འབྱོར་ན་འཕན་གདུགས་ཅི་འབྱོར་ཀྱང་བྲེ། དེ་ནས་བདག་ཉིད་རང་གི་ལྷའི་རྣལ་འབྱོར་དུ་གཞུང་བཞིན་དུ་བྱས་ནས་བདེ་བར་གཤེགས་པ་སྲས་དང་བཅས་པ་སྤྱན་དྲངས་ཏེ། ཕྱག་བྱས་ལ་མཆོད་པ་དབུལ་ཞིང་ཐུགས་དམ་བསྐུལ་བ་དང༌། དམ་ཚིག་ཅན་རྣམས་ལ་གཏོར་མ་ཕུལ་ཏེ་ཕྲིན་ལས་བཅོལ་བ་དང་འགྲོ་བ་ལ་སྦྱིན་པ་རྒྱ་ཆེར་སྤེལ་བས་ལན་ཆགས་བྲལ་བར་བྱས་པ་ལ་སོགས་པ་གཞུང་གཞན་དང་མཐུན་པར་བྱས་ནས་བདེ་བར་གཤེགས་པ་དེ་དག་གིས་ཐུགས་ཀར་བཟླས་བྱའི་ཡི་གེ་ན་མོ་བྷ་ག་བ་ཏེ་བྱ་བའམ། ཨོཾ་སརྦ་དུརྒ་ཏི། ཞེས་བྱ་བ་གང་ཡང་རུང་བ་བཀོད་ལ། དེ་བཞིན་དུ་བདག་གི་སྙིང་གར་ཡང་བསམས་ཏེ། གཞུང་བཞིན་དུ་ཞི་བའི་མིང་དང་སྔགས་སྤེལ་ཞིང་ཞག་ཅི་ནུས་ཙམ་གྱིས་བཟླས་བརྗོད་བྱའོ། །ཆོག་ཤེས་པ་གཞན་ཡོད་ན་གནས་དེ་ཉིད་དམ་གཞན་ཉིད་དུ་ཞི་བའི་ཐབ་ཁུང་ཚུལ་བཞིན་དུ་བརྩིགས་ནས་ཕྱག་རྒྱ་བཞི་བཀོད་དེ། མཆོད་པ་དང་གཏོར་མ་དང་སྲེག་རྫས་ལ་སོགས་པ་གཞུང་བཞིན་དུ་བཤམས་ནས་མཆོད་པ་དང་གཏོར་མ་ཚུལ་བཞིན་དུ་དབུལ་ཞིང་བཏང་བ་དང༌། སྦྱིན་སྲེག་གི་ཆོ་ག་བྱས་པ་ལ་སོགས་པ་ཞག་ཅི་ནུས་ཀྱིས་བྱའོ། །གཞན་ཡང་སྒྲིབ་པ་སྦྱངས་ཤིང་ཚོགས་བསག་
པའི་ཕྱིར་མཆོད་རྟེན་གདབ་པ་དང་མདོ་སྡེ་ཟབ་མོ་བཀླག་པ་དང༌། སྦྱིན་པ་འབྱོར་ཚད་བཏང་བ་ལ་སོགས་པ་དགེ་བའི་ལས་རྒྱ་ཆེར་བྱ་བར་རིགས་སོ། །དེ་ལྟར་དགེ་བའི་ཕྱོགས་ཅི་ནུས་པ་བྱས་ནས། ས་ཕྱོགས་བརྟགས་པར་སའི་ཆོ་ག་གཞུང་བཞིན་དུ་བྱས་ལ་དཀྱིལ་འཁོར་ངོས་གཅིག་པོ་ལ་ཁྲུ་དྲུག་པ་གྲུབ་ཞི་དཔང་ཁྲུ་གང་བ་ཞིག་བྱས་པའི་དབུས་སུ། མེ་ཐབ་ཁོ་ར་ཁོར་ཡུག་ཏུ་ཁྲུ་དོ་པ་ཟླུམ་པོ་ཟབས་སུ་ཁྲུ་གང་པ། མུ་རན་འཕང་དང་ཞེང་སོར་བཞི་བཞི་པ་ཟླུམ་པོར་བསྐོར། ལྕི་བས་སྐྱང་ནུལ་ལེགས་པར་བྱ། ས་དཀར་པོས་བསྐུ་ཞིང་དྲིས་བྱུག །དེ་ནས་ཐིག་སྐུད་ལེགས་པ་ཅིག་གིས་ཚུལ་བཞིན་དུ་ཐིག་བཏབ་ནས། ཚོན་ཕྱེ་སྣ་ལྔས་བྲི་བ་ནི་མེ་ཐབ་ཀྱི་དབུས་སུ་འཁོར་ལོ་རྩིབས་བརྒྱད་པ་གཅིག་བྱ་བ་ནི་ཤར་དུ་རྡོ་རྗེ། ལྷོར་རིན་པོ་ཆེ། ནུབ་ཏུ་པདྨ། བྱང་དུ་སྣ་ཚོགས་རྡོ་རྗེ་རྣམས་ཚུལ་བཞིན་དུ་བཀོད་དོ། །མུ་རན་ལ་རྡོ་རྗེ་རྐྱང་པའི་ར་བ་རྩེ་ལྔ་པའམ། རྩེ་གསུམ་པས་བསྐོར་རོ། །དེའི་ཕྱི་རིམ་གྱི་འཁོར་ལོ་རྩིབས་བཅུ་དྲུག་ལ་ཤར་གྱི་འཁོར་ལོའི་རྩིབས་བཞི་ལ་རྡོ་རྗེ་དང་ལྕགས་ཀྱུ་དང་མདའ་དང་མགུ་བར་སྟོན་པ་རྣམས་དགོད་དོ། །ལྷོའི་རྩིབས་བཞི་ལ་ནོར་བུ་རིན་པོ་ཆེ་དང་ཉི་མའི་དཀྱིལ་འཁོར་དང་ཡིད་བཞིན་གྱི་ནོར་བུའི་རྒྱལ་མཚན་དང་སོའི་ཕྲེང་བ་རྣམས་དགོད་དོ། །ནུབ་ཀྱི་འཁོར་ལོའི་རྩིབས་བཞི་ལ་རྡོ་རྗེ་པདྨ་དང་རལ་གྲི་དང་འཁོར་ལོ་དང་དུང་རྣམས་དགོད་དོ། །བྱང་ཕྱོགས་ཀྱི་རྩིབས་བཞི་ལ་རྡོ་རྗེ་ཁ་བཞི་པ་དང་གོ་ཆ་དང་མཆེ་བ་དང་ཁུ་ཚུར་རྣམས་དགོད་དོ། །དེའི་ཕྱི་རིམ་གྱི་གྲུ་ཆད་ཀྱི་ཤར་ལྷོར་སྨིན་མ་འདེགས་པའི་ཚུལ་དང་བདུག་པ་དང༌། ལྷོ་ནུབ་ཏུ་རིན་པོ་ཆེའི་ཕྲེང་བ་དང་མེ་ཏོག་དང༌། ནུབ་བྱང་དུ་ཡིད་དུ་འོང་བའི་གླུ་དང་མར་མེ་དང༌། བྱང་ཤར་དུ་གར་བྱེད་པའི་མཚན་ཉིད་དང༌། བྱུག་པ་རྣམས་དགོད་དོ། །དེའི་ཕྱི་རིམ་སྣམ་བུ་ལ་ཕྱག་རྒྱ་བཞིས་གཏམས་པ་དགོད་དོ། །དེའི་ཕྱི་རིམ་གྱི་སྣམ་བུ་ལ་ཤར་དུ་རྡོ་རྗེ་གདེང་པོ་དང་ཟླ་བ། ཤར་ལྷོར་མེ་ཐབ། ལྷོར་བེ་ཅོན། ལྷོ་ནུབ་ཏུ་རལ་གྲི་།ནུབ་ཏུ་ཞགས་པ་དང༌། བུམ་པ་དང༌། ཉི་མ། ནུབ་བྱང་དུ་བ་དན། བྱང་དུ་དབྱུག་པ། བྱང་ཤར་དུ་མདུང་རྩེ་གསུམ་པ་རྣམས་དགོད་དོ། །དེའི་ཕྱི་
རིམ་གྱི་སྒོ་བཞིའི་ཤར་དུ་ལྕགས་ཀྱུ། ལྷོར་ཞགས་པ། ནུབ་ཏུ་ལྕགས་སྒྲོག་བྱང་དུ་དྲིལ་བུ་རྣམས་དགོད་དོ། །གཞན་ཡང་དཀྱིལ་འཁོར་གྱི་རྒྱན་ཐེམ་སྐས་བཞིའི་ཕྲེང་བ་དང་ལྡ་ལྡི་དང་དོ་ཤལ་དང་དྲིལ་བུ་དང་རྔ་མ་དང་སེང་གེ་དང་བ་ལང་ལ་སོགས་པས་བརྒྱན་པ་བྲིའོ། །དེ་ཡང་རྒྱུད་ལས་ཁྲུ་བཞི་པ་ཡི་ཚད་དུ་ནི། ཆོ་ག་བཞིན་དུ་ཁུང་བརྐོས་ལ། །རྡོ་རྗེས་མཐའ་མ་བསྐོར་བ་ཡི། །འཁོར་ལོ་དབུས་སུ་བྲི་བར་བྱ། །རིགས་ལྔ་ཡི་ནི་ཕྱག་རྒྱ་རྣམས། །ཇི་བཞིན་པ་ཡི་ཕྱོགས་སུ་བྲི། །ཇི་བཞིན་སེམས་དཔའ་རྣམས་དང་ནི། །འཇིག་རྟེན་གཙོ་ལ་སོགས་པ་བྲི། །ཞེས་སྨོས་སོ། །དེ་ལྟར་སྦྱིན་སྲེག་གི་དཀྱིལ་འཁོར་སྨོས་ནས་བུམ་པ་ཆུས་བཀང་བ། སྨན་དང་འབྲུ་དང་རིན་པོ་ཆེ་དང་མགུལ་ཆིངས་དང་བུམ་པའི་ཁ་རྒྱན་ལ་སོགས་པ་གཞུང་དང་མཐུན་པར་བྱས་པ་ལྔ་ཡན་ཆད་དགོད་པ་དང༌། ལྷ་བཤོས་སྣོད་གཙང་མས་བཀང་བ་བརྒྱད་དམ་བཅུ་དྲུག་སྙེད་ཀྱི་བཟའ་བ་དང༌། བཅའ་བ་དང་བཏུང་བ་སྣ་ཚོགས་པ་དང༌། མེ་ཏོག་དང་བདུག་པ་དང༌། བྱུག་པ་དང་མར་མེ་ལ་སོགས་པའི་མཆོད་པ་རྣམས་དང༌། མེ་ཏོག་གི་ཕྲེང་བ་དང་རྒྱལ་མཚན་དང༌། བླ་རེ་དང་གདུགས་དང་བ་དན་དང་འཕན་ལ་སོགས་པས་བརྒྱན་པ་དང༌། དཀྱིལ་འཁོར་གྱི་མེ་ཏོག་སིལ་མ་བཀྲམ་ཞིང་ཀུ་ཤས་བསྐོར་རོ། །མཆོད་ཡོན་གྱི་གཏོར་མ་རྒྱས་པར་ཆ་གཉིས་ཀྱང་བཤམ་མོ། །དེ་ཡང་རྒྱུད་ལས། ཆུ་སོགས་བུམ་པ་གང་བ་དང༌། །གཏོར་མས་སྣོད་རྣམས་བཀང་བ་དང༌། །བརྒྱད་སྙེད་ཙམ་དུ་གཞག་བྱ་སྙམ། །ཡང་ན་བཅུ་དྲུག་སྟེང་དུ་གཞག །བཟའ་བ་དང་ནི་བཅའ་བའི་བཤོས། །མེ་ཏོག་ཕྲེང་སོགས་དེ་བཞིན་ཏེ། །བླ་རེ་རྒྱལ་མཚན་དར་ལ་སོགས། །གདུགས་མཆོག་རྣམས་ནི་ལེགས་པར་བརྒྱན། །ཞེས་སྨོས་སོ། །གཞན་ཡང་སྦྱིན་སྲེག་གི་ཡོ་བྱད་མར་ཁུ་དང་འོ་མ་དང་ཏིལ་དང༌། ཉུངས་ཀར་དང་འབྲས་ཆན་དང༌། འབྲས་སོ་བ་དང༌། དཱུར་བ་དང༌། ཡམ་ཤིང་འོ་མ་ཅན་དང༌། དྲི་ཞིམ་པོ་ལས་བྱས་པའི་སོར་བརྒྱད་དམ། སོར་ཉི་ཤུ་བཞིའི་བར་དང༌། བུད་ཤིང་འོ་མ་ཅན་སྐམ་པོ་ཟླུམ་པོ་རྣམས་དང༌། ག་ཕུར་དང་གུར་
ཀུམ་ལ་སོགས་པ་དྲི་ཞིམ་པ་རྣམས་བསག་གོ །དེ་ཡང་རྒྱུད་ལས། ག་པུར་གུར་ཀུམ་ལ་སོགས་པ། མར་དང་འོ་མ་ཏིལ་བསྐོལ་ལ། །ཏིལ་དང་ཡུངས་ཀར་འབྲས་རྣམས་དང༌། །དྲི་ཡི་ཆུས་ནི་ལེགས་བཀང་སྟེ། །འབྲས་ཆན་ཡོས་དང་དཱུར་བ་དང༌། །སྤྲང་རྩི་ཤ་ཁར་མར་ལྡན་པ། །བརྒྱ་ཕྲག་དུ་མར་ཡོངས་བཟླས་པ། །ཡམ་ཤིང་ལ་ཡང་དེ་བཞིན་དུ། །ཞེས་སྨོས་སོ། །དེ་ལྟར་མཆོད་པའི་ཡོ་བྱད་རྣམས་བསགས་ཏེ། བདག་ཉིད་རང་གི་ལྷའི་རྣལ་འབྱོར་དུ་བྱས་ལ། དཀྱིལ་འཁོར་གྱི་ཡོ་བྱད་ཀུན་ལ་ལས་ཐམས་ཅད་པའམ། ངན་སོང་སྦྱོང་བའི་སྔགས་ཀྱིས་གདབ། སྲེག་རྫས་ཀུན་ལ་ཡང་ངན་སོང་སྦྱོང་བའི་སྔགས་ཀྱིས་གདབ། བརྒྱ་རྩ་བརྒྱ་ཕྲག་དུ་མར་བཟླས་སོ། །དེ་ནས་ལས་ཐམས་ཅད་པའམ། འཕགས་པ་མི་གཡོ་བའི་སྔགས་དང་ཕྱག་རྒྱས་བགེགས་བསྐྲད་ཅིང་མཚམས་བཅད་དོ། །རྡོ་རྗེ་རབ་དང་དྲ་བ་དང་ཕུར་བུ་ལ་སོགས་པའི་སྔགས་སམ་རྒྱུད་དང་ལྡན་པར་བྱའོ། །དེ་ནས་བདག་ཉིད་ཀྱི་སྙིང་གར་སྣ་ཚོགས་རྡོ་རྗེས་བསྡུས་པས་འཕགས་པ་སྤྱན་དྲངས་ཏེ། ཕྱག་རྒྱ་བཞིས་བཞུགས་སུ་གསོལ་ནས། ཡོན་ཆབ་ལ་སོགས་པའི་མཆོད་པ་རྣམས་ཚུལ་བཞིན་དུ་དབུལ་ལོ། །དེ་ཡང་རྒྱུད་ལས། ཆོ་ག་ཤེས་པར་བྲིས་ནས་ཀྱང༌། །ལྷ་རྣམས་མང་པོ་སྤྱན་དྲངས་ནས། །སྔགས་ཤེས་པས་ནི་སྔགས་ཕྱག་རྒྱས། །ཨརྒྷ་ཕུལ་བར་ཤེས་ནས་ཀྱང༌། །མདོར་ན་མཆོད་པ་བྱས་ནས་ནི། །ལྷ་ཡི་སྦྱོར་བར་རབ་གནས་ལ། །ཞེས་སྨོས་སོ། །དེ་ནས་གཏོར་མ་རྣམས་ཚུལ་བཞིན་དུ་བྱིན་གྱིས་བརླབས་ནས། དམ་ཚིག་ཅན་རྣམས་ལ་གཏོར་མ་ཕུལ་ཏེ། མིང་འདི་ཞེས་བྱ་བའི་སྒྲིབ་པ་སྦྱང་ཞིང༌། བདག་འགྲོ་བའི་དོན་བརྩམ་པའི་བསྟོང་གྲོགས་མཛད་དུ་གསོལ་ཞེས་བརྗོད་དོ། །འགྲོ་བ་སྤྱིར་གཏོར་མ་བསྔོས་ནས། མིང་འདི་ཞེས་བྱ་བའི་ལན་ཆགས་བྱང་ཞིང་བསོད་ནམས་ཀྱི་ཚོགས་སུ་གྱུར་ཅིག་ཅེས་བརྗོད་དེ་གཏང༌། སྔགས་མཁན་གཞན་མ་ཞིག་ཡོད་ན་བུམ་པ་ལྔ་ལ་རིགས་ལྔའི་སྙིང་པོ་དང་ཤི་བའི་མིང་སྤེལ་ཞིང་ཅུང་ཟད་བཟླས་ལ་དེ་ནས་ངན་སོང་སྦྱོང་བའི་སྔགས་ཅི་མང་དུ་བཟླས་བརྗོད་བྱ། གཞན་མེད་ན་བདག་ཉིད་ཀྱིས་བུམ་པ་གཅིག་
ལ་ངན་སོང་སྦྱོང་བའི་སྔགས་ཅི་ནུས་ཀྱིས་བཟླས་སོ། །དེ་ནས་བུད་ཤིང་ལ་ངན་སོང་སྦྱོང་བའི་སྔགས་ཀྱིས་བཏབ་ལ་བརྩིག །རོ་ལ་ངན་སོང་སྦྱོང་བའི་སྔགས་ཀྱིས་མང་དུ་བཏབ་སྟེ། བྱེ་མའམ་ཡུངས་ཀར་ལ་བཟླས་ཤིང་གཏོར་ནས་བུམ་པའི་ཆུས་ཚུལ་བཞིན་དུ་བཀྲུས་ཏེ་ག་པུར་དང་གུར་ཀུམ་ལ་སོགས་པའི་དྲི་རྣམས་ལ་ངན་སོང་སྦྱོང་བའི་སྔགས་ཀྱིས་བཏབ་སྟེ་རོ་ལ་བྱུག །གུར་ཀུམ་གྱིས་སྔགས་བཅོ་བརྒྱད་ཚུལ་བཞིན་དུ་བྲིས་ནས། དཔྲལ་བ་དང༌། མཛོད་སྤུ་དང༌། རྣ་བ་གཉིས་དང༌། གཙུག་ཕུད་དང༌། དཔུང་པ་གཉིས་དང༌། སྣ་དང༌། རྐེད་པ་དང༌། བུས་མོ་གཉིས་དང༌། བོལ་གཉིས་དང༌། ལོང་བུ་གཉིས་དང༌། མིག་གཉིས་དང༌། གསང་བའི་གནས་རྣམས་སུ་གདབ། དེ་བཞིན་ཡིད་ཀྱིས་ཀྱང་སྔགས་རྣམས་བཀོད་དེ། དེ་དག་གི་འོད་ཟེར་གྱིས་སྒྲིབ་པ་སྦྱངས་པར་བསམས། ངན་སོང་སྦྱོང་བའི་ཕྱག་རྒྱ་བཅིངས་ཤིང༌། སརྦ་བིད་བྱ་བའི་སྔགས་ཏེ། སྙིང་ག་དང༌། ལྐོག་མ་དང༌། སྤྱི་བོར་བཏགས་པས་ལུས་ངག་ཡིད་གསུམ་གྱི་བག་ཆགས་དག་པར་དམིགས་སོ། །དེ་ནས་རོ་ལ་ངན་སོང་སྦྱོང་བའི་སྔགས་ཀྱིས་བཏབ་པའི་གོས་ཀྱིས་གཡོགས་ནས། རྒྱན་རྣམས་ཀྱིས་ཀླུབས་ཏེ། མེ་ཏོག་གི་ཕྲེང་བ་གདགས་ཤིང༌། སྔགས་ཀྱིས་བཏབ་པའི་བདུག་པས་ཀྱང་བདུགས་ཏེ། ཐབ་ཀྱི་དབུས་སུ་སྟན་དང་བཅས་པར་བཞག་སྟེ། ནུབ་ཏུ་ཁ་བསྟན་ལ་བདག་ཉིད་ཤར་ཕྱོགས་སུ་ཁ་བལྟས་ཏེ་ལས་བྱའོ། །དེ་ཡང་རྒྱུད་ལས། རང་གི་སྔགས་ཀྱིས་བཏབ་པའི་ཤིང༌། །ཁུང་བུའི་ནང་དུ་གཞག་པར་བྱ། །རོ་ལ་སྔགས་ཀྱིས་བཏབ་ནས་ཀྱང༌། །ཆུ་མཆོག་གིས་ནི་བཀྲུས་ནས་ནི། །བཟླས་པའི་དྲི་ཡིས་བྱུག་པར་བྱ། །གོས་དང་རྒྱན་གྱིས་ཀླུབས་ནས་ཀྱང༌། །སྔགས་ཀྱིས་བཏབ་པའི་བདུག་པས་བདུག །མེ་ཏོག་ཕྲེང་ལ་སོགས་པས་མཆོད།། སྙིང་ག་ལྐོག་མ་སྤྱི་བོ་རུ། །སརྦ་བིད་ཀྱིས་བྱིན་གྱིས་བརླབ། །དེ་ལྟར་གཞན་དུ་མི་དགེ་སྔགས། །མཆོག་ཏུ་དགེ་བ་རྣམས་གཞག་གོ །དེ་ནས་ངན་སོང་སྦྱོང་བའི་ཕྱིར། །སྟན་དང་བཅས་ཏེ་དེ་དབུས་སུ། །གཞག་པ་ཉིད་དུ་བྱ་བ་ཡིན། །ཞེས་སྨོས་སོ། །དེ་ནས་རྡོ་རྗེ་ཆོས་ཀྱི་བཟླས་
བརྗོད་བྱས་པའི་ཆུས་ཐབ་ཀྱི་ཉེ་འཁོར་དང་ཡོ་བྱད་ཐམས་ཅད་བསངས་ནས། སྐུ་གཟུགས་ལ་སོགས་པ་མངོན་དུ་ཕྱོགས་པར་རྩྭ་ཀུ་ཤའི་ཁྲི་ལ་བཀྲ་ཤིས་ཀྱི་སྐྱིལ་མོ་ཀྲུང་དུ་འདུག་ནས། རང་གི་ལྷའི་རྣལ་འབྱོར་དུ་གསལ་བར་བྱས་ལ། རྒྱུན་བཞག་གི་མའམ། དཀའ་ཐུབ་ལ་དགའ་བའི་ཁྱིམ་ནས་བླངས་པའི་མེ་ལ། རྡོ་རྗེ་ཆོས་ཀྱི་བཟླས་བརྗོད་བྱས་པའི་མེ་བསངས་ཏེ་ཐབ་ཏུ་བཅུག་ལ། ལས་སྣ་ཚོགས་ཀྱི་སྙིང་པོ་བརྗོད་ཅིང་རླུང་ཡབ་ཀྱི་རླུང་གིས་མེ་སྦར་རོ། །དེ་ནས་རང་གི་སྙིང་གར་ཡི་གེ་ཧཱུཾ་གཞག་སྟེ། རྣལ་འབྱོར་གསལ་བར་བྱས་ནས་རྡོ་རྗེ་མེའི་དམ་ཚིག་གི་ཕྱག་རྒྱ་རྡོ་རྗེ་བཅིང་བ་དང་བསྡམས་པ་བྱས་ནས། དམ་ཚིག་གི་སྔགས། ཨོཾ་བཛྲ་ཨ་ན་ལ་མ་ཧཱ་བྷཱུ་ཏ་ཛྭཱ་ལ་ཡ། བྷསྨི་ཀུ་རུ་སརྦ་དུཥྚཱན་ཧཱུཾ་ཕཊ། ཅེས་བརྗོད་པས་རྡོ་རྗེ་མེ་མའི་གཟུགས་སུ་གྱུར་ཏེ། རིད་པ་རིང་ལ་གཟི་མདངས་ཆེན་པོ་གཡས་བགྲང་ཕྲེང༌། གཡོན་རིལ་བ་སྤྱི་བླུགས་ཐོགས་པ། ཐོར་ཚུགས་སེར་པོ་ཅན། མདོག་དཀར་ཞིང་སྣུམ་པ། མེ་ལྕེ་སྟོང་གིས་དཀྲིགས་ཤིང་འོད་འབར་བར་བསམས་ནས་མཆོད་ཡོན་སྔགས་ཀྱིས་བྱིན་ལ། ཞི་བ་དང་མཐུན་པའི་དགང་གཟར་གྱིས་མར་གྱི་དགང་བླུགས་གསུམ་སྦྱིན། དེ་ནས་ཡམ་ཤིང་གི་ཐོར་ཏོ་གཉིས་མར་ལ་བསྲེས་པ་བསྲེག་སྟེ་ཏིལ་མར་དང་སྤུས་པ་གུང་མོ་དང་སྲིན་ལག་དང་མཐེ་བོ་གསུམ་གྱིས་སམ། བླུགས་གཟར་གྱིས་སྲེག་བླུགས་གསུམ་སྦྱིན། དེ་ནས་མཆོད་ཡོན་གྱི་ཆུས་ཁ་ལག་བཀྲུས་ནས་བསང་གཏོར་བྱས་ཏེ། འདི་སྐད་བརྗོད་དོ། །དྲང་སྲོང་ཆེན་པོ་ཁྱོད་རང་གི་འབར་བ་ཉིད་དུ་བཞུགས་ཏེ། བདག་ཉིད་ཇི་ལྟར་འདོད་པའི་སྦྱིན་སྲེག་བྱེད་པའི་བར་དུ་གནས་པར་གྱིས་ཤིག་ཅེས་སྨྲས་ནས། མེ་ལྷའི་གཟུགས་དེ་ཉིད་མེའི་རང་བཞིན་འབར་བ་ཉིད་དུ་བསམ་མོ། །དེ་ཡང་རྒྱུད་ལས། དེ་ནས་བྱིན་ཟ་དགེ་བ་རབ་སྤར་ལ། །མེ་ལྕེ་སྟོང་གིས་དཀྲིགས་ཤིང་འབར་བའི་སྐུ། །ཟླ་དཀར་ཀུན་དའི་བཞིན་ལ་ཞི་བའི་ལུས། །མཐའ་ཡས་པ་ཡི་གཟུགས་ཀྱིས་མེ་བཀུག་ལ། །ཨརྒྷ་དབུལ་བར་བཏག་ནས་བདེ་བཞིན་དུ། །བློ་མཆོག་ལྡན་པའི་དབུས་སུ་གཟུགས་སོགས་བཞག །ཅེས་སྨོས་སོ། །དེ་ནས་སེམས་དཔའི་བཟླས་བརྗོད་བྱས་པའི་མཆོད་ཡོན་གྱི་སྣོད་གཡོན་རོལ་དུ་
གཞག །མཆོད་པའི་ཡོ་བྱད་གཞན་གཡས་རོལ་དུ་གཞག །དགང་གཟར་དང་བླུགས་གཟར་མདུན་དུ་བཞག་ནས། རང་གི་རྣལ་འབྱོར་གསལ་བར་བྱས་ཏེ། ལས་སྣ་ཚོགས་ཀྱི་སྙིང་པོ་བརྗོད་པས་མེ་འབར་བ་དེ་ཉིད་ཀྱི་ནང་དུ་རིན་པོ་ཆེའི་གཞལ་ཡས་ཁང་བཟང་པོ་ལྟེ་བ་དང་བཅས་པའི་འཁོར་ལོ་རྩིབས་བཅུ་དྲུག་པ་དང༌། གྲུ་ཆད་དང༌། ཁྱམས་དང༌། སྒོ་ཁྱུད་དང༌། རྟ་བབས་དང༌། ཐེམ་སྐས་དང༌། ཕྲེང་བ་ལ་སོགས་པས་བརྒྱན་པ། དབུས་སུ་སེང་གེ་དང་པདྨ་དང་ཟླ་བའི་གདན་ཆེན་པོ་དང་གྲུ་བཞི་དང་འཁོར་ལོའི་རྩིབས་དང༌། གྲུ་ཆད་དང་སྒོར་པདྨའི་གདན་དང༌། རིན་པོ་ཆེའི་ཁྲིའུ་ལ་སོགས་པས་བཀོད་ནས། བདག་གི་སྙིང་གར་སྣ་ཚོགས་རྡོ་རྗེ་བསམས་ལ། རྡོ་རྗེ་བསྡུ་བའི་སྙིང་པོ། ཨོཾ་བཛྲ་ས་མ་ཡཱ་ཛཿ། ཞེས་བརྗོད་ཅིང༌། རྡོ་རྗེ་ཁུ་ཚུར་གཉིས་བསྣོལ་ཏེ། དཔུང་མགོར་གཞག །མཛུབ་མོ་གཉིས་ལྕགས་ཀྱུ་ལྟར་བྱས་ཏེ། གུང་མོ་དང་མཐེ་བོང་གཉིས་སེ་གོལ་བརྡབས་པས། དེ་བཞིན་གཤེགས་པ་རྣམས་འཁོར་དང་བཅས་པ་རང་རང་གི་གནས་ནས་བསྐུལ་ཏེ། ཇི་ལྟར་མཆོད་པར་བསམས་པའི་གནས་ཁོར་ཁོར་ཡུག་ཏུ་བཞུགས་པར་བསམ་མོ། །དེ་ནས་ཤར་ཕྱོགས་ཀྱི་སྒོར་ལྕགས་ཀྱུའི་ལས་ཀྱི་ཕྱག་རྒྱ་བཅིངས་ཏེ། ཕྱག་རྒྱ་དེ་ཉིད་ཤར་ཕྱོགས་ཀྱི་སྒོར་ལྕགས་ཀྱུར་གྱུར་པར་བསམས་ལ། ཨོཾ་བཛྲ་ཨཾ་ཀུ་ཤ་ཛཿ། ཞེས་བརྗོད་ཅིང༌། ལྕགས་ཀྱུས་དགུག་པའི་ཚུལ་གྱིས་དེ་བཞིན་གཤེགས་པ་རྣམས་སོ་སོའི་སྒོ་དྲུང་དུ་བཞུགས་པར་བསམ་མོ། །ཕྱག་རྒྱ་དེ་ཉིད་བཀྲོལ་ནས་ལྷོ་ཕྱོགས་ཀྱི་སྒོར་ཞགས་པའི་ཕྱག་རྒྱས་བཅིངས་ཏེ། ཕྱག་རྒྱ་དེ་ཉིད་ལྷོ་ཕྱོགས་ཀྱི་སྒོར་ཞགས་པར་བསམས་ལ། ཨོཾ་བཛྲ་པཱ་ཤ་ཧཱུཾ། ཞེས་བརྗོད་ཅིང་ཞགས་པས་དྲངས་པའི་ཚུལ་གྱིས་དེ་བཞིན་གཤེགས་པ་རྣམས་སོ་སོའི་སྒོ་དྲུང་དུ་བཞུགས་པར་བསམ་མོ། །ཕྱག་རྒྱ་དེ་ཉིད་བཀྲོལ་ནས་ནུབ་ཀྱིས་གོར་ལྕགས་སྒྲོག་གི་ཕྱག་རྒྱ་བཅིངས་ཏེ། ཕྱག་རྒྱ་དེ་ཉིད་དང་ནུབ་ཕྱོགས་ཀྱི་སྒོར་ལྕགས་སྒྲོག་ཏུ་གྱུར་པས་བསམས་ལ། ཨོཾ་བཛྲ་སྥོ་ཊ་བཾ། ཞེས་བརྗོད་ཅིང་ལྕགས་སྒྲོག་བསྡམས་པའི་ཚུལ་གྱིས་བདག་ཉིད་ཇི་སྲིད་འདོད་པར་དེ་བཞིན་གཤེགས་པ་
རྣམས་བཞུགས་པར་བསམས་ཏེ། ཕྱག་རྒྱ་དེ་ཉིད་བཀྲོལ་ནས་བྱང་ཕྱོགས་ཀྱི་སྒོར་རྡོ་རྗེ་དབབ་པ་ལས་ཀྱི་ཕྱག་རྒྱ་བཅིངས་ཏེ། ཕྱག་རྒྱ་དེ་ཉིད་བྱང་ཕྱོགས་ཀྱི་སྒོར་དྲིལ་བུར་གྱུར་པར་བསམས་ལ། ཨོཾ་བཛྲ་ཨཱ་བེ་ཤ་ཧོཿ། ཞེས་བརྗོད་ཅིང་དྲིལ་བུ་བསྐྱོད་པའི་ཚུལ་གྱིས་དེ་བཞིན་གཤེགས་པ་རྣམས་མཉེས་པར་བསམས་ཏེ། ཕྱག་རྒྱ་དེ་ཉིད་དགྲོལ་ལོ། །དེ་དག་གི་སྐུ་མདོག་དང་ཕྱག་མཚན་དང་བཞུགས་ཚུལ་ལ་སོགས་པ་སོ་སོའི་ལྟ་བས་ཡུན་རིང་དུ་བལྟ་ཞིང་བསམ་མོ། །དེ་ནས་སོ་སོའི་དམ་ཚིག་ཕྱག་རྒྱ་རྡོ་རྗེ་བཅིངས་པ་ལས་བསྐྱེད་དེ། སོ་སོའི་སྔགས་ཀྱི་མཇུག་ཏུ། ས་མ་ཡ་སྟྭཾ། ཞེས་བརྗོད་པས། འཕགས་པ་རྣམས་དགྱེས་ཤིང་དམ་ཚིག་སྐོང་པར་བསམས་ཏེ། མཆོད་ཡོན་ཕུལ་ནས་བདེ་བར་གཤེགས་སོ་ཞེས་བརྗོད་ཅིང་མཆོད་པ་གཞན་རྣམས་ཀྱང་རིམ་བཞིན་དུ་དབུལ་ལོ། །དེ་ནས་སྲེག་རྫས་རྣམས་ལ་ལྷ་སོ་སོའི་སྙིང་པོ་དང༌། ངན་སོང་སྦྱོང་བའི་སྔགས་བཟླས་ཏེ། འོད་ཟེར་ཁ་དོག་དཀར་པོར་གྱུར་པར་བསམས་ནས་རྫས་རེ་རེ་ཞིང༌། ཨོཾ་བཻ་རོ་ཙ་ནཱ་ཡ་སྭཱ་ཧཱ། ཆེ་གེ་མོ་ཞེས་བྱ་བ་སརྦ་བིད་ཅེས་བྱ་བ་ལ་སོགས་པ་བརྗོད་ཅིང་རྫས་རྣམས་བསྲེག་གོ །བཟླས་པའི་མཐར་མིང་འདི་ཞེས་བྱ་བའི་ཉོན་མོངས་པའི་སྒྲིབ་པ་རྣམས་ཤཱནྟིཾ་ཀུ་རུ་ཞེས་བརྗོད་དོ། །དེ་བཞིན་དུ་དཀྱིལ་འཁོར་གྱི་ལྷ་རེ་རེ་ལ་ལན་བརྒྱ་རྩ་བརྒྱད་མན་ཆད་དུ་དབུལ་ལོ། །དེ་ནས་རྫས་དང་མེ་ཐབ་ལ་སོགས་པ་བསངས་ཏེ། ངན་སོང་སྦྱོང་བའི་ལྷ་ལ་སྲེག་རྫས་ཉི་ཤུ་རྩ་གཅིག་ཏུ་དབུལ་ལོ། །དེ་ལྟར་མཆོད་ཟིན་པ་དང༌། འཕགས་པ་རྣམས་ཚུལ་བཞིན་དུ་གཤེགས་སུ་གསོལ། དེ་ནས་མེ་ལྷ་ཡང་ཐབ་ཁུང་དུ་སྤྱན་དྲངས་ཤིང་བསམས་ལ། མཆོད་ཡོན་ལ་སོགས་པས་མཆོད་ཅིང༌། ཡོ་བྱད་ཀུན་ལས་ལན་གསུམ་དབུལ་ལོ། །དེ་ནས་ཡང་མེ་ལྷ་མེ་འབར་བ་ཉིད་དུ་གྱུར་པར་བསམ་མོ། །དེ་ཡང་རྒྱུད་ལས། ཇི་སྐད་གསུངས་པའི་ཡོན་ཏན་འདོད་པ་ཡིས། །དེ་བཞིན་གཤེགས་སོགས་དེ་ལྟར་སྤྱན་དྲངས་ལ། ཨརྒྷ་ལ་སོགས་བཏབ་སྟེ་དེ་བཞིན་དབུལ། །བདེ་གཤེགས་བསྡུས་པའི་མཆོད་པ་གང་ཡིན་བྱ། །དེ་ནས་བསྲེག་བྱ་བཀང་སྟེ་རིམ་གྱིས་ནི། །རྒྱལ་པོ་ལ་སོགས་བརྒྱ་རྩ་བརྒྱད་དུ་བཏགས། །དེ་ནས་
སྦྱོང་བའི་སྔགས་ཀྱིས་རྒྱལ་པོ་ལ། བསྲེག་བྱ་ཉི་ཤུ་རྩ་གཅིག་ཏུ་ནི་བརྟགས། དེ་ནས་སྤྱན་དྲངས་ཡོ་བྱད་ལན་གསུམ་དང༌། ཨརྒྷ་ལ་སོགས་པདྨ་དཀར་ཞལ་མཆོད། །ཅེས་སྨོས་སོ། །དེ་ནས་ཡང་མེ་ཐབ་དང་ཡོ་བྱད་རྣམས་བསངས་ལ། བདག་ཉིད་ཀྱི་སྙིང་གར་ཡི་གེ་ཧཱུཾ་བཞག་པ་ལས། བདག་ཉིད་ཁྲོ་བོ་ཕྱག་ན་རྡོ་རྗེར་ཡི་གེ་ཧཱུཾ་ཞེས་པས་གྱུར་ཏེ། བཞིན་དང་ཆ་ལུགས་ཁྲོ་བོའི་ཚུལ་ཅན་དུ་བསམས་ལ། མེ་ཐབ་ཏུ་ཡང་ཡི་གེ་ཧཱུཾ་ལས་རྡོ་རྗེ་སེམས་དཔར་གྱུར། རྡོ་རྗེ་སེམས་དཔའི་ཐུགས་ཀ་ནས། ཨོཾ་བཛྲ་སཏྭ་ཀྲོ་དྷ་ཨཱ་ན་ཝཱརྐ་མ་ཧཱ་བཛྲ་ཀྲོ་དྷ། དྲ་བ་དྲ་བ། བི་དྲ་བ་བི་དྲ་བ། སརྦཱ་པཱ་ཡ་ནཱ་ཤ་ཡ་ནཱ་ཤ་ཡ། ཧ་ར་ཧ་ར་པྲཱ་ཎཱ་ན་ཧཱུཾ་ཕཊ། ཅེས་བརྗོད་པས། ཁྲོ་བོ་ཐམས་གསུམ་རྣམ་པར་རྒྱལ་བར་གྱུར་ཏེ། སྐུ་མདོག་སྔོན་པོ་ཞལ་བགྲད་ཅིང་མཆེ་བ་གཙིགས་པ། ཕྱག་ན་རྡོ་རྗེ་དང་པདྨ་དང༌། རལ་གྲི་ལ་སོགས་པ་གྲངས་མེད་པའི་མཚོན་ཆ་བསྣམས་པ། སྤྲུལ་གྱིས་བརྒྱན་པ། སྟག་ལྤགས་ཀྱིས་སྨད་གཡོགས་པ་འཁོར་ཁྲོ་བོ་མང་པོས་བསྐོར་བ་རིགས་ལྔའི་དབུ་རྒྱན་གྱིས་བརྒྱན་པ། ཞབས་པདྨ་ལྟ་བུར་རོ་མནན་ཅིང༌། ཐབས་མཁས་པའི་ཐུགས་རྗེས་སྡིག་པ་སྦྱོང་བར་མཛད་པར་བསམ་མོ། །གྲུབ་ན་དེའི་སྐུ་གཟུགས་ཀྱང་མདུན་དུ་གཞག་གོ །དེ་ནས་ལག་པ་གཡོན་པས་ཁུ་ཚུར་བཅངས་ལ། མཛུབ་མོ་བསྒྲེངས་ཏེ་བྲང་ལ་སྦྱར་ཞིང་དཔུང་པ་དམ་དུ་བཅུམ་ལ། ལག་པ་གཡས་པས་སྦྱིན་སྲེག་བྱ་སྟེ། སྔགས་གོང་དུ་སྨོས་པ་དང༌། ཤི་པའི་མིང་སྤེལ་ཞིང་འབུམ་མམ། བྱེ་བ་མན་ཆད་བཟླས་པའི་སྦྱིན་སྲེག་བྱའོ། །བར་བར་དུ་མིང་འདི་ཞེས་བྱ་བའི་ཉོན་མོངས་པའམ་སྒྲིབ་པ་ཐམས་ཅད། ཨོཾ་སརྦ་པཱ་པཾ་ད་ཧ་ན་བཛྲ་ཡེ་སྭཱ་ཧཱ། ཞེས་བརྗོད་ཅིང་ཏིལ་བསྲེག་པར་བྱའོ། །དེ་ཡང་རྒྱུད་ལས། ཕྱག་ན་རྡོ་རྗེ་ཕྱག་ན་པད་ཞགས་བསྣམས། །འཇིག་རྟེན་གསུམ་ལས་རྣམ་པར་རྒྱལ་བའི་གཟུགས། །ཞབས་ཀྱི་པདྨས་སྡིག་མནན་ཅིང༌། །རྒྱན་རྣམས་ཀུན་གྱིས་རབ་རྫོགས་ལ། །རྫོགས་སངས་རྒྱས་ཀྱི་དབུ་རྒྱན་མཐོ། །བསམས་སམ་ཡང་ན་བྲིས་ཀྱང་རུང༌། །དེ་ཡི་སྙིང་བོ་དེ་བཞིན་དུ། །བརྒྱ་ཕྲག་
སྟོད་དམ་ཡང་ན་ནི། །བྱེ་བའི་ཚད་དུ་སྦྱིན་སྲེག་བྱ། །ཞེས་སྨོས་སོ། །དེ་ནས་ལྷ་གཤེགས་སུ་གསོལ་ཏེ། བདག་ཉིད་ལུས་བསྲུང་བ་བྱའོ། །དེ་ལྟར་བསྲེགས་ནས་ཐལ་བར་གྱུར་པ་དང༌། རྡོ་རྗེ་བསྡུ་བའི་སྔགས་ས་མ་ཧ་ར་ཎཱ་ཧཱུཾ། ཞེས་བརྗོད་ཅིང༌། རུས་པ་དང་ཐལ་བ་རྣམས་བསྡུས་ནས། སྣོད་གཙང་མར་བཅུག་སྟེ། མཆོད་རྟེན་གདབ་པའི་ཕྱོགས་སུ་གཞག་གོ །དེ་ནས་ག་པུར་ལ་སོགས་པའི་དྲི་ཆུ་དང༌། བའི་རྣམ་ལྔ་དང་རུས་པ་བསྲེས་ཏེ། ངན་སོང་སྦྱོང་བའི་སྔགས་བཞི་ལས་གང་ཡང་རུང་བའི་སྔགས་འབུམ་མན་ཆད་བཟླས་ལ་འཇིམ་པ་དང་བསྲེས་ལ་དཀྱིལ་འཁོར་གྱི་ལྷ་གང་ཡང་རུང་བའི་གཟུགས་སུ་གདབ་པའམ་ཡང་ན་མཆོད་རྟེན་དུ་བྱས་ཏེ། མཆོད་རྟེན་གཅིག་གདབ་པ་དང༌། གཉིས་གདབ་པ་དང༌། གསུམ་གདབ་པ་དང༌། བརྒྱ་རྩ་བརྒྱད་གདབ་པ་མན་ཆད་ཀྱི་བར་དུ་གཞུང་དང་མཐུན་པར་སྔགས་དང་ཕྱག་རྒྱས་ཚུལ་བཞིན་དུ་བཏབ་ནས། སྐུའམ་མཆོད་རྟེན་གྱི་སྤྱན་སྔར་ངན་སོང་སྦྱོང་བའི་སྔགས་འབུམ་ཕྲག་ཉིས་བརྒྱ་མན་ཆད་བཟླས་སོ། །དེ་ནས་མཆོད་རྟེན་འབར་བ་ལ་སོགས་མཚན་མ་བཟང་པོ་འབྱུང་བར་འགྱུར་རོ། །ཅི་སྟེ་མཚན་མ་དེ་དག་མ་མཐོང་ན། འབུམ་ཕྲག་བརྒྱ་སྟོང་མན་ཆད་བཟླས་ཤིང་ཇི་སྲིད་མཚན་མ་དགེ་བ་དག་མ་བྱུང་གི་བར་དུ། དེ་བཞིན་གཤེགས་པ་རྣམས་མཆོད་ཅིང༌། རྩེ་གཅིག་པའི་སེམས་ཀྱིས་མཉམ་པར་གཞག་སྟེ་བཟླས་བརྗོད་བྱ། དེ་ལྟར་བཟླས་པའི་མཐར་མཚན་གཅིག་ཏུ་བཟླས་ལ། རབ་ཏུ་བཟླས་ན། ཤི་བ་ངེས་པར་སྡིག་པ་ལས་གྲོལ་ཞིང་མཚན་མ་བཟང་པོ་རྣམས་འབྱུང་བར་འགྱུར་རོ། །དེ་ཡང་རྒྱུད་ལས། དེ་ནས་ཐལ་བར་གྱུར་པ་དང༌། །རྡོ་རྗེ་བསྡུ་བའི་སྔགས་ཀྱིས་ནི། །ཆོ་ག་བཞིན་དུ་བསྡུ་བར་བྱ། །ཐལ་བ་དེ་ཡང་རུས་པའི་རྡུལ། །སྔགས་ཀྱིས་བཏབ་པའི་དྲི་ཆུ་དང༌། །བ་སྐྱེས་འོ་མ་ལ་སོགས་ལྔས། །སྦྱོང་བའི་སྔགས་ཀྱིས་བློ་ལྡན་གྱིས། །འབུམ་དུ་བཟླས་པ་རྫོགས་ནས་ནི། །ག་བུར་དྲི་ཡིས་བསྒོས་པ་ཡིས། །འཇིམ་པ་དང་ནི་བསྲེས་ནས་ཀྱང༌། །གཟུགས་སུ་བྱའམ་ཡང་ན་ནི། །མཆོད་རྟེན་གྱི་ནི་ལྟར་བྱས་ལ། །གཅིག་གམ་གཉིས་སམ་གསུམ་མམ་ལྔ། །ཡང་ན་བརྒྱ་རྩ་བརྒྱད་དུ་བྱ། །སྔགས་
དང་ཕྱག་རྒྱས་བཏབ་ནས་ཀྱང༌། །འབུམ་ཕྲག་གཉིས་ཀྱི་བར་དུ་བཟླས། །དེ་ནས་མཆོད་རྟེན་འབར་གྱུར་ཏམ། །ཡང་ན་གཟུགས་ཀྱི་ཞལ་འཛུམ་མམ། །དྲི་དང་བདུག་པ་འོད་ཀྱང་རུང༌། །སྣང་ངམ་ཡང་ན་ངད་ལྡང་ངམ། །ལྷ་ལ་སོགས་པའི་རྣམ་པ་ནི། །སྣ་ཚོགས་བར་ནི་སྣང་གྱུར་ཏམ། །རྫུ་འཕྲུལ་རྣམ་པར་འཕྲུལ་བ་དང༌། །མེ་ཏོག་ལ་སོགས་འབར་བ་དང༌། །དུང་དང་རྔ་ལ་སོགས་པའི་སྒྲ། །དྲིལ་བུ་པི་ཝང་ལ་སོགས་རྣམས། །ཅི་སྟེ་མཚན་མ་དེ་དག་ནི། །སྡིག་ཅན་བློས་ནི་མི་མཐོང་ན། །འབུམ་གྱི་ཕྲག་ནི་བརྒྱད་སྟོང་ངམ། །ཇི་སྲིད་མཚན་མ་བྱུང་བར་དུ། །དེ་བཞིན་གཤེགས་རྣམས་མཆོད་ནས་ནི། །མཉམ་པར་གཞག་པས་བཟླས་པར་བྱ། །དེ་ཡི་མཐར་ནི་མཁས་པས་ཀྱང༌། མཚན་གཅིག་མི་ཉལ་ཐོག་མར་བཟླས། །དེ་ནས་དེ་ཡི་སྡིག་པ་ནི། །དག་པ་ཉིད་དུ་ངེས་པར་མཐོང༌། །ཞེས་སྨོས་སོ། །ཤི་བའི་བར་དུ་མེད་ན་ཆོ་ག་བྱ་བའི་ཐབས་ཀྱང༌། དེ་ཡང་རྒྱུད་ལས། ཡང་ན་མེད་པར་གྱུར་ན་ཡང༌། །བཟླས་ཤིང་བསྒོམ་པའི་ཚུལ་གྱིས་ནི། །མིང་ཙམ་ལེགས་པར་བྲིས་ནས་ནི། །མཆོད་རྟེན་ཕྲེང་བར་བྱ་བ་དང༌། །ཡང་ན་གཟུགས་སུ་བྱས་ཀྱང་རུང༌། །སྦྱིན་སྲེག་མངོན་པར་དབང་བསྐུར་རོ། །གདོན་མི་ཟ་བར་མཐོ་རིས་སྐྱེ། །ཞེས་འབྱུང་བས། རུས་པ་མེད་ན་ཡང་བདག་ཉིད་ལྷའི་རྣལ་འབྱོར་དུ་བསྒོམས་ཤིང་བཟླས་བརྗོད་བྱ་བ་དང༌། ཤི་བའི་མིང་བྲིས་པའམ། ཡང་ན་གཟུགས་བརྙན་གྱི་ནང་དུ་མིང་རྣམས་ཀྱིས་བསྔགས་ཏེ། ན་མཿ་ས་མནྟ་བུདྡྷཱ་ནཱ་ན། ཨི་ཙི་པ་ར་ཎ་མ་ནོ་མ། ཞེས་བྱ་བ་བྲིས་ནས་བཅུག་ལ། བུམ་པ་དང༌། སྔགས་དང༌། ཕྱག་རྒྱས་དབང་བསྐུར་བ་དང༌། སྦྱིན་སྲེག་གི་དཀྱིལ་འཁོར་བྱ་བ་དང༌། ཐལ་བ་ལས་མཆོད་རྟེན་མང་པོའམ། སྐུ་གཟུགས་གདབ་པ་ལ་སོགས་པ་གོང་དུ་སྨོས་པའི་ཆོ་ག་ལྟར་བྱས་ནས། སྒྲིབ་པ་རྣམས་ཟད་ནས་བདེ་འགྲོ་ལྷའི་འཇིག་རྟེན་དུ་སྐྱེ་བར་འགྱུར་རོ། །དེ་ལྟར་མཆོད་རྟེན་ནམ་སྐུ་བཏབ་པའི་ཚ་ཚད་རྣམས་ལམ་གྱི་བཞི་མདོར་མཆོད་རྟེན་ཆེན་པོ་བྱས་ཏེ། དེའི་ནང་དུ་བཅུག་ལ། མཆོད་པ་དག་གིས་མཆོད་ནས། འཕགས་པའི་དགེ་འདུན་ལ་མཆོད་བསྟོད་གསོལ།
ཡོན་ཡང་ཕུལ་ནས། དགེ་བའི་རྩ་བ་འདིས་ཆེ་གེ་མོ་བདེ་འགྲོ་མཐོ་རིས་ལྷའི་འཇིག་རྟེན་དུ་སྐྱེ་བར་གྱུར་ཅིག་ཅེས་བརྗོད་ལ། དེ་བཞིན་དུ་འགྱུར་བའམ། ཡང་ན་ཚ་ཚ་བཏབ་པ་རྣམས་རྒྱ་མཚོ་ཆེན་པོའམ་ཆུ་ཀླུང་དུ་དོར་ན་གང་དག་རྡུལ་དེས་རེག་པ་ཐམས་ཅད་མཐོ་རིས་ཐོབ་ཅིང་དགེ་བའི་རྩ་བ་འདིས་ཆེ་གེ་མོ་ངན་སོང་ལས་ཐར་བར་གྱུར་ཅིག་ཅེས་བརྗོད་ན་དེ་བཞིན་དུ་འགྱུར་རོ་ཞེས་གཞན་ལས་བཤད་དོ། །གོང་དུ་སྨོས་པ་བཞིན་ཆོ་ག་མ་ནུས་ན་ཐབས་གཞན་ཡང་རྒྱུད་ལས། ཐལ་བ་ཡུངས་ཀར་བྱེ་མ་སོགས། །རང་གི་མིང་སྨོས་སྔགས་བཏབ་ནས། བཟླས་པ་བྱས་ཏེ་སོང་ནས་ཀྱང། །རྒྱ་མཚོར་འབབ་པའི་ཀླུང་དུ་དོར། །ཞེས་འབྱུང་བས། ཐལ་བའམ་ཡུངས་ཀར་རམ། བྱེ་མའམ་དྲི་ལ་ཤི་བའི་མིང་དང༌། སརྦ་བིད་ལ་སོགས་པའི་ངན་སོང་སྦྱོང་བའི་སྔགས་སྤེལ་ནས་འབུམ་མན་ཆད་བཟླས་ཤིང་བཏབ་སྟེ་ཆུ་ཀླུང་ཆེན་པོར་དོར་ན་ངན་སོང་ལས་ཐར་བར་འགྱུར་རོ། །གོང་དུ་སྨོས་པ་ལྟ་བུའི་རོའི་ཆོ་ག་བྱས་པ་རྣམས་ཀྱི་ཡོན་ཏན་ཡང༌། རྒྱུད་ལས་དེ་ལྟར་ན་ནི་སྡིག་ཅན་ཡང༌། །ངན་སོང་ལས་ནི་ཐར་བར་འགྱུར། །དགེ་བའི་ཆོས་ནི་བསྐྱེད་པ་དང༌། །བྱང་ཆུབ་ས་བོན་བསྐྱེད་པའི་བདག །སངས་རྒྱས་འབྲས་བུ་རྒྱུད་ལྡན་པ། །སྦྱིན་བའི་ཕ་རོལ་ཕྱིན་པར་ལྡན། །ཚུལ་ཁྲིམས་རྒྱུ་དང་རབ་ལྡན་པ། །བཟོད་པ་བརྩོན་འགྲུས་མཉམ་གཞག་དང༌། །ཤེས་རབ་རྣམས་ཀྱི་རྒྱུ་བསྒོམས་པའི། །འཇིག་རྟེན་བསོད་ནམས་ལྡན་ཅི་སྨོས། །མྱུར་དུ་དེ་ནི་ངན་སོང་ནི། །བཅོམ་པར་འགྱུར་ཏེ་ཐེ་ཚོམ་མེད། །ཅེས་འབྱུང་ངོ༌། །དེ་ཡང་རྒྱུད་ལས། དགེ་བའི་རྩ་བ་མ་བསྐྱེད་ལས། །མེད་པར་ལྟ་བ་གང་ཡིན་དང༌། །བྱང་ཆུབ་ལམ་ལས་རྣམ་ལྡོག་པས། །བསྟན་ལ་ཞེ་སྡང་གནོད་བྱེད་ཅིང༌། །སྡིག་པའི་རང་བཞིན་མ་མཐོང་ལ། །ཕ་དང་མ་ལ་སྙིང་རིང་ཞིང༌། །བྱང་ཆུབ་སེམས་ལ་བརྟེན་པ་དང༌། །འདོད་ཆགས་བྲལ་བ་བསད་པ་རྣམས། །ཅི་སྟེ་ལྷ་རྣམས་མེད་གྱུར་ཏམ། །སངས་རྒྱས་དགེ་འདུན་ཆོས་དེ་བཞིན། །སྔགས་དང་ཕྱག་རྒྱའི་ཚོགས་ལ་སོགས། །ཤེས་རབ་ཐབས་རྣམས་མེད་ན་ནི། །སྡིག་ཅན་དེ་དག་མི་ཐར་ཞེས། །བདེ་གཤེགས་རྒྱལ་བ་ཉིད་ཀྱིས་གསུངས། །ཞེས་སྨོས་མོད་ཀྱི། དེ་ལྟ་བུའི་མི་དགེ་བའི་མཚམས་
མེད་པ་ལྔ་བྱེད་པའམ། དམ་པའི་ཆོས་སྤོང་བའམ། འཕགས་པ་ལ་སྐུར་པ་འདེབས་པ་ཡང་རུང་སྟེ། ལས་ཀྱི་སྒྲིབ་པ་རྣམས་ཟད་པར་འགྱུར་རོ་ཞེས་ལུང་གཞན་དག་ལས་འབྱུང་ངོ༌། །ངན་སོང་སྦྱོང་བའི་རྒྱལ་པོ་བརྟག་པ་ཡི། །ཤི་བའི་དོན་དུ་ཆོ་གར་གསུངས་པ་ལས། །འགྲོ་བའི་དོན་དུ་བདག་གིས་ཉུང་ཞིག་བསྡུས། །འདི་ཡིས་ཉམ་ཐག་སྡུག་བསྔལ་ཉུང་བར་ཤོག །ངན་སོང་ཐམས་ཅད་སྦྱོང་བའི་ཐབས་ཞེས་བྱ་བ་སྦྱིན་སྲེག་གི་དཀྱིལ་འཁོར་གྱི་ཆོ་ག །སློབ་དཔོན་སྐལ་བཟང་དགའ་བས་མཛད་པ་རྫོགས་སོ།། །།རྒྱ་གར་གྱི་མཁས་པ་ཆེན་པོ་བླ་མ་ནི་ན་ཤི་དང༌། ལོ་ཙཱ་བ་དགེ་སློང་གཡུང་དྲུང་འོད་ཀྱིས་བསྒྱུར་བའོ།།