ངན་སོང་ཐམས་ཅད་ཡོངས་སུ་སྦྱོང་བའི་དཀྱིལ་འཁོར་གྱི་ཆོ་གའི་རིམ་པ།
སངས་རྒྱས་གསང་བ།
རྒྱ་གར་སྐད་དུ། སརྦ་དུརྒ་ཏི་པ་རི་ཤོ་དྷ་ནི་མཎྜ་ལ་བི་དྷི་ཀྲ་མ་ནཱ་མ། བོད་སྐད་དུ། ངན་སོང་ཐམས་ཅད་ཡོངས་སུ་སྦྱོང་བའི་དཀྱིལ་འཁོར་གྱི་ཆོ་གའི་རིམ་པ་ཞེས་བྱ་བ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངན་སོང་ཐམས་ཅད་ཡོངས་སུ་སྦྱོང་བའི་རྒྱལ་པོ་ལ་ཕྱག་འཚལ་ལོ། །སྔོན་དུ་བསྙེན་པ་བྱ་བ་དང༌། །དཀྱིལ་འཁོར་
དག་གི་ཆོ་ག་དང༌། །དབང་ཐོབ་དངོས་གྲུབ་སྒྲུབ་པ་ནི། །ངན་སོང་སྦྱོང་བའི་རྒྱུད་དག་ལས། །སངས་རྒྱས་མཚན་ཐོབ་བདག་གིས་བཤད། །ཐུན་མོང་ཁྱད་པར་གནས་ཉིད་དུ། །གདན་བདེ་བ་ལ་བདག་གནས་ནས། །ལག་པ་རྡོ་རྗེ་བྱིན་བརླབ་སྟེ། །རྡོ་རྗེའི་ལྕེ་དང་བདག་མེད་སེམས།། ཨོཾ་བཛྲ་ཧཱུཾ། ཨོཾ་བཛྲ་ཛི་ཧཱ། ཨོཾ་བཛྲ་ཙིཏྟ་ཨ། དེ་ནས་མེ་ལྟར་འབར་བ་བསྐྱེད། །དེ་ལ་བྱིན་གྱིས་བརླབ་པ་དང༌། །སྦྱི་ནས་དབང་ནི་བསྐུར་བར་བྱ། །ཆོ་ག་བསྒོ་བར་བྱ་བའོ། །ཨོཾ་གྲིཧྣ་བཛྲ་ས་མ་ཡ་ཧཱུཾ་བཾ། ཨོཾ་བཛྲ་ཛྭ་ལ་ཨ་ན་ལཱརྐ་ཧཱུཾ། ཨ་བྷི་ཥིཉྩ་མཱཾ། ཨོཾ་ཊུཾ། དེ་ནས་རྡོ་རྗེ་ཐོ་བ་དང། །ཁྲོ་བོ་རྡོ་རྗེ་མེ་དང་ནི། རྡོ་རྗེ་ལྕགས་སྒྲོག་ཕྱག་རྒྱ་སྔགས། །གློ་བུར་བགེགས་ནི་བསལ་བར་བྱ། །ཨོཾ་བཛྲ་ཛྭ་ལ་ཨ་ན་ལཱརྐ་ཧཱུཾ། ཨོཾ་བཛྲ་ཛྭ་ལ་ཨ་ན་ལ་ཧ་ན་ད་ཧ་པ་ཙ་མ་ཐ་བྷཉྫ་ར་ཎ་ཧཱུཾ་ཕཊ། ཨོཾ་བཛྲ་ནེ་ཏྲི་བནྡྷ་སརྦ་བིགྷྣན། རང་བཞིན་སྒེག་ནི་ཁྲོ་བརྒྱད་ཅིང༌། །རྡོ་རྗེའི་ཅན་གྱི་འོག་ཏུ་བཅིངས། །ཨོཾ་བཛྲ་དྲྀ་ཌྷོ་མེ་བྷ་བ་རཀྵ་སརྦཾ་སྭཱ་ཧཱ། རྡོ་རྗེ་འཇིགས་བྱེད་གནོད་སྦྱིན་གཉིས། །སྟེང་དུ་རྡོ་རྗེའི་གུར་དུ་བྱས། །ཨོཾ་ཧཱུ་ལུ་ཧཱུ་ལུ་ཧཱུཾ་ཕཊ། ཨོཾ་བཛྲ་ཡཀྵ་ཧཱུཾ། ཤར་དུ་རྡོ་རྗེ་གཙུག་ཏོར་དང༌། །རྡོ་རྗེ་ཞགས་པས་བཅིང་བར་བྱ། །ཨོཾ་ཧཱུཾ་དྲུཾ་བནྡྷ་ཧཾ་ཧཱུཾ། ཨོཾ་བཛྲ་པཱ་ཤ་ཧྲཱིཿ། །རྡོ་རྗེ་བ་དན་ནུབ་བཅིངས་ཏེ། །ཕྱག་རྒྱ་མཛུབ་མོ་མཐེ་ཆུང་བསྒྲེང༌། །ཨོཾ་བཛྲ་པ་ཏཾ་ཀེ་ནི་ཏྲཊ། རྡོ་རྗེ་དུས་མཚན་བྱང་བཅིངས་པ། །གནོད་སྦྱིན་ཕྱག་རྒྱ་ཁ་ལ་གཞག །ཧྲི་བཛྲ་ཀ་ལི་རུ་ཊ་མ་ཊ། རྡོ་རྗེ་རྩེ་མོས་ལྷོ་ཕྱོགས་བཅིངས། །རྡོ་རྗེ་ཁུ་ཚུར་རི་བོ་འདེགས། །ཨོཾ་བཛྲ་ཤི་ཁ་རུ་ཊ་མ་ཊ། ཁྲོ་བོ་གསུམ་གྱི་ར་བ་ནི། །རྡོ་རྗེ་ལས་ནི་རྒྱ་གྲམ་སྟེ། །རྡོ་རྗེ་ཧཱུཾ་མཛད་སྔོན་པོ་ལ། །རྡོ་རྗེ་ཁུ་ཚུར་བཅིང་བའོ། །ཨོཾ་བཛྲ་ཀརྨ་ཧཱུཾ། བཛྲ་བནྡྷ་བཾ། དང་པོར་མཆོད་པ་བཤམ་པར་བྱ། །དེ་ནས་གཉིས་པས་བསང་བ་དང༌། །གསུམ་པས་གཟི་བྱིན་བསྐྱེད་པ་དང༌། །བཞི་པས་ལྷ་རུ་བསྐྱེད་པ་དང༌། །ལྔ་པས་མང་པོར་སྤྲུལ་པ་དང༌། །དྲུག་པས་བྱིན་གྱིས་བརླབས་པའོ། །སྣ་ཚོགས་རྡོ་རྗེའི་ས་གཞི་ལ། །ཚོགས་བསགས་དམིགས་པའི་ཡུལ་ཅན་སྤྲུལ། །མཆོད་བཤམ་བདུན་པོ་བྱ་བ་དང༌། །སེམས་ནི་རབ་ཏུ་བསྐྱེད་པ་དང༌། །སྡོམ་པ་བཟུང་ནས་
ལུས་དབུལ་བྱ། །གཞན་གྱི་དོན་དུ་ཚོགས་བསགས་མཆོད། །ཨེ་མ་ཧོ་སངས་རྒྱས་ཨེ་སངས་རྒྱས། །ཨེ་མ་སངས་རྒྱས་མཛད་པ་ལགས། །གང་ཕྱིར་ངན་སང་བདག་ཅག་སྦྱངས། །བྱང་ཆུབ་སྤྱོད་པ་ཉིད་ལ་གཞག །བསྟོད་ནས་ལྷ་རྣམས་ཕྱག་བྱས་སོ། །ལག་པར་རིགས་ལྔ་ཡབ་ཡུམ་བཅུ། །མཉམ་པའི་ཐལ་མོ་སྦྱར་བར་བྱ། །ཨོཾ་ཧཱུཾ་ཏྲཱཾ་ཧྲཱིཿ་ཨཿ། སོར་མོ་ཐམས་ཅད་བསྣོལ་བ་ནི། །རྡོ་རྗེ་ཐལ་མོ་རབ་ཏུ་བྱ། །ཨོཾ་བཛྲ་ཨཉྫ་ལི། རྡོ་རྗེ་བསྡམས་པས་སྡིག་པ་ནི། །སྙིང་གར་ལན་གསུམ་དྲལ་བར་བྱ། །བཛྲ་བནྡྷ་ཏྲཊ། རྡོ་རྗེ་དབབ་པ་དམ་ཚིག་རྒྱས། །ཨ་ཞེས་བདག་ལ་དབབ་པར་བྱ། །བཛྲ་ཨཱ་བེ་ཤ་ཨཿ། དབབ་པར་བརྟན་པར་བྱ་བ་ནི། །གསང་སྔགས་འདི་ནི་བརྗོད་པར་བྱ། །ཊཀྐི་བཛྲ་ཧཱུཾ། དམ་ཚིག་རྡོ་རྗེ་ཁུ་ཚུར་བཅིངས། །དབབ་པ་ཐ་མི་དད་པར་བྱ། །ཨོཾ་བཛྲ་མུཥྚི་བཾ། སྙིང་གར་ཟླ་སྟེང་དཀྱིལ་འཁོར་བསྒོམ། །ནམ་མཁའི་དཀྱིལ་འཁོར་བདག་ལ་ཐིམ། །དཀྱིལ་འཁོར་གཅིག་གྱུར་རྩ་བ་དབུས། །ཤཱཀྱ་སེང་གེའི་ཐུགས་ཀའི་སྔགས། །འོད་ཟེར་ལྔ་འཕྲོས་ལས་ལྔ་མཛད། །བཀུག་ནས་དཀྱིལ་འཁོར་གཞུག་པ་དང༌། །དེ་ལ་དབང་ནི་སྐུར་བར་བྱེད། །སྒྲིབ་དག་སྲས་དགོངས་ལྷ་ལ་བསྟོད། །སངས་རྒྱས་འདྲ་བའི་སྟོན་པ་མེད། །ཆོས་དང་འདྲ་བའི་སྐྱོབ་པ་མེད། །དགེ་འདུན་འདྲ་བའི་ཞིང་མེད་པར། །གསང་སྔགས་འདྲ་བའི་འདྲེན་པ་མེད། །ཤཱཀྱ་སེང་གེ་རྩར་གནས་པའི། །རྡོ་རྗེ་རིན་ཆེན་པདྨ་ལ། །གཟི་བརྗིད་རྒྱལ་མཚན་རྣོན་པ་གདུགས། །སྒེག་མོ་ཕྲེང་བ་གླུ་གར་དང༌། །སྤོས་དང་མེ་ཏོག་མར་མེ་དྲི། །ལྕགས་ཀྱུ་ཞགས་པ་ལྕགས་སྒྲོག་སྡོམ། །རབ་དགའ་ས་བཅུའི་སེམས་དཔའ་ནི། །སྐལ་བཟངས་བཅུ་དྲུག་ཁྱམས་ན་གནས། །ཚངས་པ་དྲག་པོ་གནོད་སྦྱིན་ཀླུ། །མེ་དང་སྲིན་པོ་ཀླུ་དབང་བཅས། །ཉི་ཟླ་ས་བདག་ཚོགས་ལྡན་པ། །ངན་སོང་སྦྱོང་མཛད་ཁྱོད་ཕྱག་འཚལ། །མཆོད་ནས་རྡོ་རྗེ་དྲིལ་ལྡན་པས། །དཀྱིལ་འཁོར་གྱི་ནི་མདུན་ཉིད་བསྟོད། །རང་ལུས་དཀྱིལ་འཁོར་ཉིད་ཡིན་ཏེ། །ལུས་ལ་ལྷ་ཡི་དཀྱིལ་འཁོར་གནས། །ཨོཾ་སརྦ་བིད་ཨ་དྷིཥྛཱ་ན་ཛྙཱ་ན་ས་མ་ཡ་ཧཱུཾ། གཅིག་ཏུ་བསྡུས་པའི་དཀྱིལ་འཁོར་དེ། །ཐབས་ཀྱི་ངན་སོང་
སྦྱོང་བར་བཤད། །ཕྱག་རྒྱ་ཆེན་པོའི་ཆོ་ག་བདུན། །རིམ་པ་བཞིན་དུ་བསྐྱེད་པར་བྱ། །སྟོང་པ་ཉིད་ཀྱི་ངང་ལས་ནི། །རླུང་གི་དཀྱིལ་འཁོར་ཆུ་དང་ནི། །ས་གཞི་རྒྱ་མཚོ་རིན་ཆེན་རི། །བུམ་པ་འཁོར་ལོ་རྩིབས་བརྒྱད་པ། །གྲུ་བཞི་རྟ་བབས་རྒྱན་རྣམས་རྫོགས། །ཆོ་འཕྲུལ་བཞི་ལས་བྱུང་བའི་ཚུལ། །ཤཱཀྱའི་རྒྱལ་པོས་འཁོར་བ་སྒྲོལ། །ཨོཾ་སརྦ་པཱ་པཾ་ད་ཧ་ན་བཛྲ་ཧཱུཾ་ཕཊ། པདྨའི་བུང་བ་བཞིན་གྲོལ་མཛད། །རང་གི་སྔགས་སོགས་ཐུགས་ལ་འཁོར། །ཨོཾ་མུ་ནེ་མུ་ནེ་མ་ཧཱ་མུ་ན་ཡེ་སྭཱ་ཧཱ། ཐུགས་ཀའི་ཟླ་བ་ལྔ་དང་བཅས། །དེ་ནས་འཁོར་རྣམས་འབྱུང་བར་བྱེད། །རྡོ་རྗེའི་གཙུག་ཏོར་ས་གནོན་དཀར། །སྤྲོ་བསྡུ་སྙིང་གའི་སྔགས་ལས་བྱུང༌། །ཨོཾ་སརྦ་ཨ་པ་ཡ་བི་ཤོ་དྷ་ནེ་བཛྲ་ཧཱུཾ་ཕཊ། ཨོཾ་བཛྲ་ཧཱུཾ་ཕཊ། རིན་ཆེན་གཙུག་ཏོར་མཆོད་སྦྱིན་སྔོ། །སེམས་ཅན་མ་ལུས་དབང་བསྐུར་བྱེད། །ཨོཾ་རཏྣོཏྟ་མ་ཏྲཱཾ། ཨོཾ་སརྦ་ཀརྨ་ཨཱ་བ་ར་ཎཱ་ནི་བྷསྨི་ཀུ་རུ་ཧཱུཾ་ཕཊ། པདྨའི་གཙུག་ཏོར་མཉམ་གཞག་དམར། །སེམས་ཅན་ཀུན་ལ་མཛེས་སྟོན་མཛད། །ཨོཾ་པདྨོ་ཏྟ་མ་ཧྲཱིཿ། ཨོཾ་བྲུཾ་བི་ནཱ་ཤ་ཡ་ཨཱ་བ་ར་ཎཱ་ནི་ཧཱུཾ་ཕཊ། ལས་ཀྱི་གཙུག་ཏོར་མི་འཇིགས་སྦྱིན། །སྣ་ཚོགས་མདོག་ཅན་ཁོང་དུ་འབར། །ཨོཾ་བི་ཤྭཏྟ་མ་ཨཿ། ཨོཾ་དྲུཾ་བི་ཤོ་དྷ་ཡ་ཨཱ་བ་ར་ཎཱ་ནི་ཧཱུཾ་ཕཊ། གཙུག་ཏོར་གཟི་བརྗིད་དཀར་དམར་མདོག །ཉི་མ་ཕྱག་རྣམས་དཀུ་ལ་བརྟེན། །ཨོཾ་ཛྭ་ལ་ཛྭ་ལ་དྷ་ཀ་དྷ་ཀ་ཧ་ན་ཧ་ན་ཨཱ་བ་ར་ཎཱ་ནི་ཧཱུཾ་ཕཊ། གཙུག་ཏོར་རྒྱལ་མཚན་དམར་ཞིང་གནག །ཡིད་བཞིན་ནོར་བུ་རྒྱལ་མཚན་བསྣམས། །ཨོཾ་ཧཱུཾ་ཕཊ་སརྦ་ཨཱ་བ་ར་ཎ་ནི་སྥོ་ཊ་ཡཾ་ཧཱུཾ་ཕཊ། གཙུག་ཏོར་རྣོན་པོ་མཁའ་ལྟར་སྔོ། །གཡས་པ་རལ་གྲི་གླེགས་བམ་གཡོན། །ཨོཾ་ཧ་ར་ཧ་ར་སརྦ་ཨཱ་བ་ར་ཎ་ནི་ཧཱུཾ་ཕཊ། གཙུག་ཏོར་གདུགས་དཀར་ཕྱག་ན་གདུགས། །སྐུ་ཡི་མདོག་ནི་དཀར་ཞིང་འབར། །ཨོཾ་སྲུཾ་ས་ར་ས་ར་པྲ་ས་ར་པྲ་ས་ར་ཨ་བ་ར་ཎ་ནི་ཧཱུཾ་ཕཊ། དེ་ནས་དེ་དག་ཡོ་བྱད་བཤད། །བདུག་སྤོས་མ་དང་མེ་ཏོག་མ། །མར་མེ་མ་དང་དྲི་ཆབ་མ། །ཨོཾ་སརྦ་ཨ་པཱ་ཡ་བི་ཤོ་དྷ་ནི་དྷ་མ་དྷ་མ་དྷུ་པ་ཡ་རཾ་ཧཱུཾ་ཕཊ། ཨོཾ་སརྦ་དུརྒ་ཏི་བི་ཤོ་དྷ་ནི་པུཥྤ་བི་ལོ་ཀི་ནི་ཧཱུཾ་ཕཊ། ཨོཾ་སརྦ་ཨ་པཱ་ཡ་བི་ཤོ་དྷ་ནི་ཛྙཱ་ན་ཨཱ་ལོ་ཀ་ཀ་རི་ཧཱུཾ་ཕཊ། ཨོཾ་སརྦ་ཨ་པཱ་ཡ་
བི་ཤོ་དྷ་ནི་གནྡྷ་ཧཱུཾ་ཕཊ། ལྕགས་ཀྱུ་ཤར་ལ་ཞགས་པ་ལྷོ། །ལྕགས་སྒྲོག་ནུབ་སྟེ་དྲིལ་བུ་བྱང༌། །ཨོཾ་སརྦ་ན་ར་ཀ་ག་ཏི་ཨཱ་ཀཪྵ་ཎི་ཧཱུཾ་ཕཊ། ཨོཾ་སརྦ་ན་ར་ཀ་ཨུཏྟ་ར་ནི་ཧཱུཾ་ཕཊ། ཨོཾ་སརྦ་ཨ་པཱ་ཡ་བནྡྷ་མོ་ཙ་ནི་ཧཱུཾ་ཕཊ། ཨོཾ་སརྦ་ཨ་པ་ཡ་ག་ཏི་ག་ཧ་ནི་ཧཱུཾ་ཕཊ། ལྷ་མོ་བཞི་དང་བྱང་ཆུབ་སེམས། །བཀྲ་ཤིས་ལ་སོགས་རྒྱས་བསྡུས་སྦྱར། །ཨོཾ་སརྦ་སཾ་སྐཱ་ར་པ་རི་ཤུདྡྷ་དྷརྨ་ཏེ་ག་ག་ན་ས་མུངྒ་ཏེ་མ་ཧཱ་ནཱ་ཡ་པ་རི་བ་རེ་སྭཱ་ཧཱ། དེ་ནས་བྱིན་གྱིས་བརླབས་པ་ནི། །གཙོ་བོ་དང་ནི་འཁོར་ལ་བྱ། །ཨོཾ་བིཏ་སརྦ་ཨཱ་བ་ར་ཎི་ཧཱུཾ་ཕཊ། ཨོཾ་ཏྲ་ཊ་སརྦ་ཨ་བ་ར་ཎ་ནི་ཧཱུཾ་ཕཊ། ཨོཾ་བི་ཊ་བི་ཊ་པ་ཡ་ད་དུ་ན་ནི་ཧཱུཾ་ཕཊ། དེ་ནས་ངན་སོང་སྦྱང་བྱས་ནས། །ཨོཾ་ད་ཧ་ད་ཧ་སརྦ་ར་ན་ཀ་ག་ཏི་ཧེ་ཏུཾ་ཧཱུཾ་ཕཊ། ཨོཾ་པ་ཙ་པ་ཙ་སརྦ་ཏིཪྻ་ཀ་ག་ཏེ་ཧེ་ཏུཾ་ཧཱུཾ་ཕཊ། ཨོཾ་མ་ཐ་མ་ཐ་སརྦ་པྲེ་ཏ་ག་ཏེ་ཧེ་ཏུཾ་ཧཱུཾ་ཕཊ། བསྒོམ་པ་སྐུ་ཡི་ཕྱག་རྒྱ་ཆེ། །ཐུགས་ཀའི་རྡོ་རྗེ་ལས་ཀྱི་རྒྱ།། བཅིང་བ་དམ་ཚིག་ཕྱག་རྒྱ་སྟེ། །བཟླས་པ་མཆོག་གི་ཕྱག་རྒྱའོ། །ཨོཾ་ན་མོ་བྷ་ག་ཝ་ཏེ་སརྦ་དུརྒ་ཏི་པ་རི་ཤོ་དྷ་ནི་རཱ་ཛཱ་ཡ་ཏ་ཐཱ་ག་ཏཱ་ཡ། ཨརྷ་ཏེ། སམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་ཤོ་དྷ་ནེ་ཤོ་དྷ་ནེ། སརྦ་པཱ་པཾ་བི་ཤོ་དྷ་ནི་ཤུདྡྷེ་བི་ཤུདྡྷེ་སརྦ་ཀརྨ་ཨཱ་ཝ་ར་ཎ་བི་ཤུདྡྷ་ནེ་སྭཱ་ཧཱ། རྡོ་རྗེ་ཁུ་ཚུར་མཛུབ་མོ་བརྐྱང༌། །མཐེའུ་ཆུང་སྤྲེལ་ནས་སྒོ་དབྱེ་བྱ། །ཨོཾ་སརྦ་བིད་བཛྲོད་གྷ་ཏ་ཡེ་ཧཱུཾ། རྡོ་རྗེ་འཁོར་ལོ་ཕྱག་རྒྱ་ཡིས། །བཞུགས་པའི་རྟེན་ཡང་ཁྱད་པར་བྱ། །ཨོཾ་སརྦ་བིད་ཨོཾ་བཛྲ་ཙཀྲ་ཧཱུཾ། སེ་གོལ་བརྡབས་ནས་སངས་རྒྱས་རྣམས། །བྱོན་པར་འགྱུར་ཏེ་གཞན་ཅི་སྨོས། །ཨོཾ་སརྦ་བིཏ་ས་མ་ཡ་ཛཿ་ཛཿ་ཧཱུཾ་བཾ་ཧོཿ། བསྟོད་ནས་བགེགས་བསྐྲད་བསྲུང་བ་དང༌། །སྒོ་བཅད་གོ་བགོ་མཆོད་པ་ནི། །ལས་བརྒྱད་རབ་ཏུ་བྱ་བ་ཡིན། །དེ་ནས་བསྒོམ་པར་བྱ་བ་ཡང༌། །ཞི་གནས་དང་ནི་ལྷག་མཐོང་བསྒོམ། །དེ་ནས་ལྡང་བར་བྱ་བ་ནི། །ཐུན་བཞིར་བྱས་ཏེ་རབ་ཏུ་བྱ། །ཟླ་དྲུག་གམ་ནི་ལྷ་ཡི་གནས། །དེ་ནས་དཀྱིལ་འཁོར་བརྩམ་པར་བྱ། །དང་པོ་ས་ནི་བཙལ་བར་བྱ། །བྱིན་ཆེན་བཀྲ་ཤིས་མཚན་ལྡན་འཐད། །ས་གནང་བླང་དང་མི་གནང་ལ། །རིན་བཅལ་བདེན་པས་བསྒོ་བར་བྱ། །སྤྱི་དང་དམིགས་ཀྱིས་བླང་བར་བྱ། །ས་
ཡི་ལྷ་མོ་སྤྲན་པར་བྱ། །སྔོན་འབྱུང་དང་ནི་དེ་རྗེས་འཇུག །བརྟག་པ་ངན་དོར་བཟང་ལ་བླང༌། །ས་ཡི་པྲ་བརྟག་རོ་རྣམས་བསལ། །བྱིན་གྱིས་བརླབས་ཤིང་དབང་དུ་བྱ། །སྦྱང་བར་བྱ་ཞིང་གཏེར་སོགས་གཞུག །ས་བཞི་གཟུང་བར་བྱ་བ་ནི། །དངོས་གྲུབ་རང་གིས་གཟུང་བར་བྱ། །གཙུག་ཏོར་ལྷ་མོ་བཀྲ་ཤིས་སེམས། །སྒོ་བ་རྣམས་ལ་སྟ་གོན་ཞུས། །སྦྱིན་སྲེག་གཏོར་མ་ལ་སོགས་བཤམ། །སློབ་མ་ཕྱི་ནང་ཁྲུས་བྱས་ཏེ། །ཀུ་ཤས་གཙང་ཞིང་རྨི་སྟ་གོན། །སྲུང་སྐུད་བགེགས་བསྐྲད་དངོས་གྲུབ་ཆགས། །ཚེམ་ཤིང་ངག་དག་དངོས་གྲུབ་དག །རྣོན་པོ་བསྲུང་བ་བཞད་སོགས་པས། །བྱིན་རླབས་ཟབ་མོས་དབུགས་ཕྱུང་ཉལ། །གསེར་དངུལ་བུམ་པ་གས་ཆག་མེད། །ཚད་དང་མཚན་ལྡན་རྫས་ཀྱིས་དགང༌། །མགུལ་ཆིངས་ཁ་རྒྱན་གཟུངས་ཐག་བཅས། །ཕྱག་རྒྱས་མཚན་ནས་སྤྱན་དྲངས་བསྒྲུབ། །རྟོགས་རིག་ཚད་མེད་སྲད་བུའི་ཐིག །རས་བྲལ་གཙང་མ་བུ་མོས་བཀལ། །བསངས་ནས་བྱིན་བརླབས་སློབ་དཔོན་གྱིས། །ཡེ་ཤེས་དམ་ཚིག་ཐིག་རྣམས་གདབ། །རྒྱུད་ལས་བྱུང་བའི་ཚོན་རྣམས་ལ། །བྱིན་རླབས་སྒྲུབ་པ་སྨིན་པ་ཡིས། །ཐིག་གདབ་ནས་ནི་ཕྱག་རྒྱས་བཏེག །དམ་ཚིག་ལྡན་པས་ལེགས་པར་བྲིས། །དེ་ནས་དཀྱིལ་འཁོར་བཤད་པ་དེ། །འཁོར་ལོ་འདྲ་བའི་དཀྱིལ་འཁོར་ལ། །ཤིན་ཏུ་མཛེས་པའི་རྩིབས་བརྒྱད་ཅན། །ལྟེ་བར་བཅས་ཤིང་མུ་ཁྱུད་ལྡན། །ནང་གི་རིམ་པ་བྲིས་ནས་ནི། །ལྟེ་བའི་ནང་དུ་ཤཱཀྱ་ཡི། །བདག་པོ་ཐུབ་པ་གཞག་པར་བྱ། །ཕྱག་ན་རྡོ་རྗེ་སྟོབས་ཆེན་ནི། །དཔའ་བོ་དེ་ཡི་སྤྱན་སྔར་བྲིའོ། །རྒྱབ་ཏུ་འཁོར་ལོས་སྒྱུར་བ་བྲི། །གཡས་ཕྱོགས་རྒྱལ་བའི་གཙུག་ཏོར་ཅན། །གཡོན་དུ་རྣམ་པར་རྒྱལ་བ་བྲི། །གཟི་བརྗིད་ཕུང་པོ་མེ་ཡི་ཕྱོགས། །དབང་པོའི་ཕྱོགས་སུ་གདུགས་དཀར་པོ། །རྣམ་པར་འཐོར་བ་རླུང་གི་ཕྱོགས། །རྣམ་པར་འཇོམས་པ་བདེན་བྲལ་ཕྱོགས། །བྲིས་ནས་ཕྱི་རོལ་བྲི་བྱ་སྟེ། །གྲུ་བཞི་པ་ལ་སྒོ་བཞི་པ། །རྟ་བབས་དང་ནི་སེང་གེས་བརྒྱན། །དཔའ་བོ་ལྕགས་ཀྱུ་ཞགས་པ་དང༌། །ལྕགས་སྒྲོག་དྲིལ་བུ་ཅན་རྣམས་གཞག །གྲྭ་ཡི་ཕྱོགས་ནི་ཐམས་ཅད་དུ། །བདུག་པ་ལ་སོགས་
བྲི་བར་བྱ། །བུམ་པ་དང་ནི་ཕུར་པ་མདའ། །དར་སྣ་རལ་གྲི་མེ་ལོང་དག །གཟུངས་ཐག་རྒྱལ་མཚན་དཱུར་ཝའི་གདན། །ཀུ་ཤ་རྟ་བབས་མཆོད་པ་དང༌། །རས་ཡུག་སློབ་དཔོན་སློབ་མའི་ཆས། །དེ་དག་དཀྱིལ་འཁོར་དགོད་པར་བྱ། །ཏིང་འཛིན་ཆོ་འཕྲུལ་བསྒོམ་པ་ནི། །དྲང་ཞིང་སྡུག་པ་རབ་ཏུ་དག །ནམ་མཁའ་དང་ནི་མཚུང་མཉམ་པ། །གནས་ངན་ལེན་པ་ཀུན་ལས་གྲོལ། །རྣམ་པར་རྟོག་པ་སྤང་བའི་མཆོག །ཨོཾ་སྭ་བྷཱ་ཝ་ཤུདྡྷོ྅ཧཾ། བྱམས་དང་སྙིང་རྗེ་ལས་བྱུང་ཞིང༌། །སེམས་ཅན་ལ་ནི་ཕན་མཛད་པ། །ཉོན་མོངས་དྲི་མ། ཐམས་ཅད་དག །ཟླ་བ་ལྟ་བུར་མཐོང་བའོ། །ཨོཾ་པྲ་ཏི་ཙིཏྟ་བེ་དྷཾ་ཀ་རོ་མི། །སངས་རྒྱས་བྱང་ཆུབ་སྐྱོན་མེད་པ། །དགེ་བའི་ཆོས་རྣམས་ཀུན་རྫོགས་ཤིང༌། །ཉོན་མོངས་ཐམས་ཅད་རབ་ཏུ་གྲོལ། །སྙིང་པོ་དབུས་ན་ཟླ་ཆེན་པོ། །ཨོཾ་བོ་དྷི་ཙིཏྟ་ཨུཏྤཱ་ད་ཡཱ་མི། །ས་དང་ས་མིན་ཤིན་ཏུ་མཁྱེན། །ཡེ་ཤེས་དག་ལ་ཟག་པ་མེད། །ཟླ་བའི་དཀྱིལ་འཁོར་དབུས་སུ་ནི། །རྡོ་རྗེའི་གཟུགས་སུ་བལྟ་བར་བྱ། །ཨོཾ་ཙིཏྟ་བཛྲ། སངས་རྒྱས་ཀྱི་ནི་རང་བཞིན་སྐུ། །མི་ཆོད་མི་འཇིགས་མི་ཤིགས་པ། །རྡོ་རྗེའི་བདག་ཉིད་ལས་བྱུང་བའི། །རྡོ་རྗེའི་སྐུ་ནི་བླ་མེད་པའོ། །ཨོཾ་བཛྲ་ཨཱཏྨ་ཀོ྅ཧཾ། རྡོ་རྗེ་སེམས་དཔའ་ཏིང་འཛིན་ནམ། །སངས་རྒྱས་རྗེས་དྲན་དེ་བཞིན་ཏེ། །བྱང་ཆུབ་སེམས་དཔའི་ཡི་གེ་འདི། །ཕྱག་རྒྱ་ཆེན་པོ་རྫོགས་པ་ཡི། །ཨོཾ་ཡ་ཐཱ་བཛྲ་སཏྭ་ཏ་ཐཱ་ཨ་ཧཾ། སྐྱེ་མེད་མཚོན་པའི་ཨ་ལས་ནི། །ཡིག་འབྲུ་ལྔ་ཡི་འཕྲོ་འདུ་ཡིས། །ནམ་མཁའ་རླུང་དང་ཆུ་དཀྱིལ་འཁོར། །ས་གཞི་མེ་དཔུང་རིན་ཆེན་རི། །བྷྲཱུཾ་ལས་བསྐྱེད་པའི་གཞལ་ཡས་ཁང༌། །ཉི་ཟླ་པདྨའི་གདན་དང་བཅས། །མ་སྐྱེས་པ་ཡི་རང་བཞིན་ལས། །སྐྱེད་པའི་བྱང་ཆུབ་ཟླ་བའི་སྟེང༌། །བཾ་ཧཱུཾ་ཏྲཾ་བྲུཾ་རཾ་ཕཊ་ཧཾ་སྲུཾ། དུ་རུ་ཨ་གཾ །ཧཱུཾ་ཏྲཾ་ཧྲི་ཨ། ཧཱུཾ་ཧཱུཾ་ཏྲཾ་ཧྲི་ཧྲི་ཨ་ཨ། ཨི་ཨ་པ་ར་པ་ཡཾ། ཀུ་ཨིང་སོ་ཨ་པྲ། ཛཿཧཱུཾ་བཾ་ཧོཿ། ཐུགས་ཀྱི་ཡེ་ཤེས་འབར་བ་ལས། །སྐུ་ཡི་ཕྱག་རྒྱ་རྫོགས་པའོ། །འཁོར་ལོའི་ཕྱག་རྒྱ་བཅིང་བར་བྱ། །ཨོཾ་བྲིད་ཏ་བྲིད་ཏ་སརྦ་ཨཱ་བ་ར་ཎཱ་ནི་ཧཱུཾ་ཕཊ། པདྨའི་ཕྱག་རྒྱ་བཅིང་བར་བྱ། །ཨོཾ་ཏྲ་ཐ་ཏྲ་ཐ་སརྦ་ཨཱ་བ་ར་ཎཱ་ནི་ཧཱུཾ་
ཕཊ། རྡོ་རྗེ་རྩེ་ལྔའི་ཕྱག་རྒྱ་བཅས། །ཨོཾ་ཙིཚནྡ་ཙིཚནྡ་སརྦ་ཨཱ་བ་ར་ཎཱ་ནི་ཧཱུཾ་ཕཊ། རྡོ་རྗེ་འཛིན་མའི་ཕྱག་རྒྱ་དང༌། །སྔགས་འདིས་ལྷ་རྣམས་ཀུན་དབང་བསྐུར། །ཨོཾ་ཧཱུཾ་ཨོཾ་ཨོཾ་ཨོཾ་ཏྲཱཾ་ཨོཾ་ཧྲཱིཿ། ཨོཾ་ཧ། རང་བཞིན་དཀྱིལ་འཁོར་བསྒྲུབ་པར་བྱ། །མཛུབ་མོ་ལྕགས་ཀྱུ་བསྣོལ་ནས་ནི། །རྡོ་རྗེ་སེ་གོལ་བཀྲོལ་བར་བྱ། །ཨོཾ་བཛྲ་སཱ་དྷུ་པ་རི་པུ་རུ་བཛྲ་ས་མ་ཡ་ཛཿ། ལྕགས་ཀྱུ་ཞགས་པ་ལྕགས་སྒྲོག་དྲིལ། །དབྱངས་ཀྱིས་སྤྱན་ཡང་དྲང་བར་བྱ། །ཛཿ་ཧཱུཾ་བཾ་ཧོཿ། བྷ་ག་ཝཱན་ཨེ་ཧྱེ་ཧི། མ་ཧཱ་ཀཱ་རུ་ཎི་ཀ །དྲྀ་ཤྱ་ཧོ། ས་མ་ཡ་སྟྭཾ། དམ་ཚིག་ཕྱག་རྒྱས་འབྱུང་རྒྱུ་བྱ། །གཡས་པས་མཆོག་སྦྱིན་པར་བྱས་ལ། །གཡོན་པ་མི་འཇིགས་སྦྱིན་པ་ནི། །དེ་བཞིན་གཤེགས་པའི་ཕྱག་རྒྱའོ། །རྡོ་རྗེ་བཅིངས་ལ་གུང་གཉིས་མཉམ། །མཐེ་བོང་མཐེ་ཆུང་བརྐྱང་བ་ཕྱག །རྡོ་རྗེ་བཅིངས་པ་གུང་གཉིས་མཉམ། །ཚིགས་བཅག་སོར་མོ་གཞན་ཡང་འཁོར། །དེ་ཉིད་མཐེ་བོང་མཐེ་ཆུང་བཀུག །རྣམ་པར་འཇོམས་པའི་ཕྱག་རྒྱའོ། །དེ་ཉིད་འོད་ཟེར་འདྲ་བ་ནི། །གཟི་བརྗིད་ཕུང་པོའི་ཕྱག་རྒྱའོ། །དེ་ཉིད་སྤྱི་བོར་བསྐོར་བ་ཡི། །གདུགས་དཀར་པོ་ཡི་ཕྱག་རྒྱའོ། །ཁུ་ཚུར་མཛུབ་གཉིས་མཐེའུ་ཆུང་བསྣོལ། །མདུན་ནས་གྱེན་བསྐོར་འཁོར་ལོས་སྒྱུར། །གུང་བསྒྲེང་མཛུབ་མོ་རྩེ་སྦྱར་བཀུག །ལྷག་མ་འོད་འཕྲོ་གཙུག་ཏོར་རྒྱལ། །དེ་བཞིན་མཛུབ་གཉིས་རྡོ་རྗེར་བྱས། །ལྷག་མ་བསྡམས་པ་རྣམ་རྒྱལ་རྒྱ། །བསྡམས་པ་མདུན་བཞག་བདུག་པ་མ། །དེ་ཉིད་གྱེན་གཏོང་ཕྲེང་བ་མ། །མཐེ་བོང་བསྒྲེང་བསྐོར་མར་མེ་མ། །དེ་ཉིད་བྱུག་པ་ལྟར་བྱས་དྲི། །མཛུབ་མོ་གྱིས་བཀུག་ལྕགས་ཀྱུའོ། །རྩེ་མོ་གཉིས་སྤྲད་ཞགས་པ་ལ། །གཅིག་ལ་གཅིག་མདུད་ལྕགས་སྒྲོག་གོ །དེ་ཉིད་ལས་སྦྱིན་དྲིལ་བུ་གཉིས། །དཔྲལ་བར་ཐལ་སྦྱར་དེ་བཞིན་གཤེགས། །མགྲིན་པར་པདྨ་གསུང་གི་ཕྱག །ཐུགས་ཀའི་ཐལ་མོ་རྡོ་རྗེ་ཕྱག །རིགས་རྣམས་སྤྱིར་ཡང་ཕྱག་བྱའོ། །འདུས་མ་བྱས་དང་འདུས་བྱས་དང༌། །ཕྱི་ནང་རབ་ཏུ་གསང་བ་དང༌། །བསོད་ནམས་དགེ་དང་དག་པའི་དོན། །བདེ་བར་ཚིམ་པར་བྱ་བ་དང༌། །སྤྱི་དང་སོ་སོའི་མདོར་བསྡུས་མཆོད། །དགྱེས་པ་བསྐྱེད་དེ་ལྷ་རྣམས་ལ། །ཞལ་
ཕྱག་སྐུ་ལ་སོ་སོར་བསྟོད། །ཆོས་ཀྱི་ཕྱག་རྒྱ་ལས་བྱུང་བ། །ངན་སོང་སྦྱོང་བའི་བཟླས་པ་ནི། །སྤྱིའི་དང་སོ་སོ་གང་བྱེད་བཟླས། །ལས་ཀྱི་ཕྱག་རྒྱ་ལས་ལ་གཞུག །དངོས་གྲུབ་ཐམས་ཅད་གསོལ་བར་བྱ། །ཡོངས་སུ་བསྔོ་ཞིང་སྨོན་ལམ་གདབ། །དེ་ནས་དྲི་ཞིམ་དྲི་མ་སོགས། །རང་གི་ལུས་ནི་བསྲུངས་ནས་ཀྱང༌། །རྡོ་རྗེ་འཛིན་པས་ཞུགས་ནས་ནི། །དེ་ནས་སློབ་མ་གཞུག་པར་བྱ། །སངས་རྒྱས་ཀུན་གྱི་རང་བཞིན་སྐུ། །སློབ་དཔོན་ལ་ནི་བདག་ཕྱག་འཚལ། །བདེ་བར་གཤེགས་པའི་གྲོང་ཁྱེར་མཆོག །སྙིང་པོའི་དཀྱིལ་འཁོར་འདི་རུ་ནི། །སློབ་དཔོན་ཁྱོད་ཀྱིས་བདག་འཇུག་འཚལ། །སློབ་མས་རྒྱུན་བཤགས་བདུན་པ་བྱ། །བླ་མས་དེ་ལ་ལན་བྱིན་པ། །བདེ་བར་གཤེགས་པ་ཐམས་ཅད་ཀྱི། །གསང་བ་ཆེན་པོ་རིགས་དག་ལ། །གསང་བ་ཆེན་པོ་འཛིན་པ་ནི། །བདག་ཉིད་ཆེན་པོ་ཁྱོད་འདོད་དམ། །སློབ་མས་འཚལ་ཞེས་བརྗོད་པར་བྱ། །སློབ་མས་དབང་བསྐུར་གསོལ་བ་གདབ། །རྡོ་རྗེ་སློབ་དཔོན་བློ་གྲོས་ཆེ། །སངས་རྒྱས་རྣམས་ནི་བདག་ལ་དགོངས། །བདག་མིང་འདི་ཞེས་བགྱི་བས་ནི། །སློབ་དཔོན་དཔང་དུ་གནས་པ་ལ། །སངས་རྒྱས་རོལ་མོ་ལས་བྱུང་བའི། །མི་ལྡོག་འཁོར་ལོ་སྦྱོར་བར་ལྡན། །ཐར་པ་ཆེན་པོའི་གྲོང་ཁྱེར་མཆོག །གསང་བ་ཆེན་པོར་ཞུགས་ནས་ཀྱང༌། །སངས་རྒྱས་ཀུན་གྱིས་དབང་བསྐུར་ཏེ། །སྐལ་ལྡན་ཆེན་པོ་བདག་ལ་སྩོལ། །མཚན་རྣམས་ཀུན་གྱིས་རྒྱས་གདབ་པའི། །དཔེ་བྱད་རྣམས་དང་ཡང་དག་ལྡན།། སངས་རྒྱས་སྐུ་ནི་ཡིད་འོང་བའི། །སློབ་དཔོན་ཆེན་པོ་བདག་ལ་སྩོལ། །བླ་མས་དེ་ལ་དམ་ཚིག་སྩལ། །དཔལ་ལྡན་ངན་སོང་སྦྱོང་བ་ཡི། །རྒྱུད་བཞིན་གསུངས་པའི་དམ་ཚིག་རྣམས། །འདི་ནས་བཟུང་ནས་བྱང་ཆུབ་ཏུ། ཁྱོད་ཀྱིས་ཡང་དག་བསྲུང་བར་བྱ། །དེས་ཀྱང་ཇི་ལྟར་གནས་པ་ཡི། །སྡོམ་པ་བདག་གིས་བསྲུང་ཞེས་བརྗོད། །བླ་མས་ལྷ་ལ་གསོལ་བ་གདབ། །ཆེ་གེ་མོ་ཞེས་བྱ་བ་འདི། །བྱང་ཆུབ་སེམས་ནི་ཡོངས་འཛིན་ཅིང༌། །དམ་ཚིག་སྡོམ་དང་གསང་བ་ཡི། །དཀྱིལ་འཁོར་འདིར་ཡང་འཇུག་པར་འཚལ། །ཨོཾ་སརྦ་ཏ་ཐཱ་ག་ཏ་ཡོ་ག་བོ་དྷི་ཙིཏྟ་ཨུཏྤཱ་ད་ཡཱ་
མི་སུ་ར་ཏ་ས་མ་ཡ་སྟྭཾ། བཛྲ་པྲ་ཐ་ཡ་ཐ་སུ་ཁཾ། དེ་ནས་ལྷར་ནི་བསྐྱེད་བྱས་ལ། །མཆོད་པ་རྣམས་ཀྱིས་མཆོད་བྱས་ཏེ། །སྟོད་གཡོགས་དར་གྱིས་གདོང་གཡོགས་ནས། །བགེགས་བསྐྲད་བདུག་པ་བྱ་བ་ནི། །ཨོཾ་བཛྲ་རཀྵ་ཧཱུཾ། ལས་ཀྱི་བུམ་པ་ཆུས་གང་བས། །བཀྲུས་ཏེ་དབང་དུ་བྱ་བའོ། །དེ་ནས་ལག་པ་ནས་བཟུང་སྟེ། །སྒོ་བཞི་དག་ནས་འཇུག་པར་བྱ། །དེང་ཁྱོད་དེ་བཞིན་གཤེགས་རིགས་བཞུགས། །ངས་ནི་ཁྱོད་ལ་ཡེ་ཤེས་སྣང༌། །དེ་བཞིན་དངོས་གྲུབ་གྲུབ་བྱེད་དེ། །དེ་ལྟ་བུ་ནི་ཁྱོད་སྦྱིན་ཞུགས། །རྡོ་རྗེ་སེམས་དཔའ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་མཛད། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཨོཾ་བཛྲ་ཨུ་ད་ཀ་ཋ། དེང་ཁྱོད་ལྷ་ནི་ང་ཡིན་ཏེ། །དམ་ཚིག་བསྲུངས་ན་དངོས་གྲུབ་ཐོབ། །དམ་ཚིག་ཉམས་ན་སྲེག་པར་བྱེད། །ང་ལ་བརྙས་པར་མ་བྱེད་ཅིག །སློབ་དཔོན་ལ་ནི་བརྙས་པ་ན། །བདེ་བ་སྤངས་ནས་དམྱལ་བར་ལྟུང༌། །ཨོཾ་དི་ན་ཏེ་ན་ར་ཀ་ན། དེ་བཞིན་གཤེགས་པ་ཐམས་ཅད་ཀྱིས། །བྱིན་གྱིས་བརླབས་པ་རྒྱ་ཆེན་ཉིད། །བདག་ལ་རབ་ཏུ་ཞུ་བས་ན། །རྡོ་རྗེ་སེམས་དཔའ་བདག་ལ་ཕོབ། །སློབ་མ་དེ་ཞུས་བླ་མ་འདི། །རྡོ་རྗེ་དྲི་བསྒོས་སྙིང་གར་གཞག །འདི་ནི་རྡོ་རྗེ་དམ་ཚིག་སྟེ། །རྡོ་རྗེ་སེམས་དཔའ་ཡིན་པར་གྲགས། །ཡེ་ཤེས་རྡོ་རྗེ་བླ་མེད་འདིར། །དེ་རིང་ཉིད་དུ་འབབ་པར་ཤོག །ཨོཾ་བཛྲ་ཨཱ་བེ་ཤ་ཡ་ཨ་ཨ། རྡོ་རྗེ་འཆང་གི་སྙིང་གར་དབབ། །འབབ་པར་བྱེད་དེ་མ་བྱུང་སྦྱང༌། །ཡི་གེ་བརྒྱ་པས་བརྟན་པར་བྱ། །ལེགས་པར་དོར་ཅིག་སེམས་དཔའ་ཆེ། །ཐར་པ་ཆེན་པོའི་དཀྱིལ་འཁོར་དུ། །མེ་ཏོག་གང་ལ་ལྷུང་བ་དེ། །དེ་ཉིད་ཁྱོད་ཀྱི་རིགས་ཀྱི་ལྷ། །ཨོཾ་སརྦ་བིཏ་པྲ་ཏིཙྪ་ཧོ། །ཨོཾ་པྲ་ཏི་གྲིཧྣ་སྭ་མི་མཾ་སཏྭ་མ་ཧཱ་བ་ལ། དེ་ཡི་ཕྲེང་བ་མགོ་ལ་བཅིང༌། །རྡོ་རྗེ་སེམས་དཔའ་དེང་ཁྱོད་ཀྱི། །མིག་འབྱེད་པ་ལ་བརྩོན་པར་མཛད། །མིག་ནི་ཐམས་ཅད་འབྱེད་མཛད་དེ། །རྡོ་རྗེ་མིག་ནི་བླ་ན་མེད། །དེ་རིང་ཉིད་དུ་འབྱེད་པར་ཤོག །ཧེ་བཛྲ་པཱ་ཤྱ་ཕཊ། རྡོ་རྗེས་གདོང་གཡོགས་དགྲོལ་བར་བྱ། །དེ་ནས་སྒོ་བ་ནས་བརྩམས་ཏེ། །ཤཱཀྱ་སེང་
གེའི་དཀྱིལ་འཁོར་བསྟན། །དབབ་པར་བྱ་བ་གང་ཡིན་པ། །དེ་ནི་ཉེ་བར་བསྡུ་བར་བྱས། །དེ་ནས་དཀྱིལ་འཁོར་ཤར་ངོས་སུ། །མཎྜལ་པདྨ་འདབ་བརྒྱད་བྲི། །ཡི་དམ་ལྷ་བསམ་དབང་བསྐུར་བྱ། །ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་བུམ་དབང་བསྐུར། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ། དཔལ་ལྡན་རྡོ་རྗེ་ཐུགས་འཆང་བ། །རྡོ་རྗེ་མི་ཕྱེད་གསུམ་བསྒོམས་ནས། །དེང་བདག་བྱིན་གྱིས་བརླབས་ནས་ནི། །རྡོ་རྗེ་ཐུགས་སུ་མཛད་དུ་གསོལ།། ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་ཨ་བྷི་ཥིཉྩ་མཱཾ། ཞེ་སྡང་ཁམས་དག་བྱེད་པ་ཡི། །དཔལ་ལྡན་ཆུ་ཡི་དབང་བསྐུར་བས། །མེ་ལོང་ལྟ་བུའི་ཡེ་ཤེས་ཀྱིས། །ཕྱག་ན་རྡོ་རྗེའི་དབང་ཐོབ་ཤོག །ཨོཾ་སརྦ་ཏ་ཐཱ་ག་ཏ་བཛྲ་ཨ་བྷི་ཥིཉྩ་ཧཱུཾ། ཕལ་པའི་ས་ནི་གཞོམ་པ་དང༌། །ཡོན་ཏན་གཟི་བརྗིད་བསྐྱེད་པའི་ཕྱིར། །རྒྱལ་བ་གཙུག་ཏོར་རིན་ཆེན་གྱི། །ཅོད་པན་གྱི་ནི་དབང་བསྐུར་རོ། །ཨོཾ་སརྦ་ཏ་ཐཱ་ག་ཏ་མུ་ཀུ་ཊ་ཡ་ཨ་བྷི་ཥིཉྩ་ཧཱུཾ། དཔལ་ལྡན་རིན་ཆེན་ཅོད་པན་དབང༌། །རྡོ་རྗེ་མི་ཕྱེད་གསུམ་བསྒོམས་ནས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་རིན་ཆེན་མཛད་དུ་གསོལ། །ཨོཾ་སརྦ་ཏ་ཐཱ་ག་ཏ་རཏྣ་སྭ་བྷཱ་ཝ་ཨ་བྷི་ཥིཉྩ་མཱཾ། ང་རྒྱལ་ཁམས་རྣམས་དག་བྱེད་པའི། །ཅོད་པན་གྱི་ནི་དབང་བསྐུར་བས། །མཉམ་པ་ཉིད་ཀྱི་ཡེ་ཤེས་ཀྱི། །རྒྱལ་བའི་གཙུག་ཏོར་དབང་ཐོབ་ཤོག །རཏྣ་ཨ་བྷི་ཥིཉྩ་མཱཾ། སངས་རྒྱས་ཀུན་གྱི་རྡོ་རྗེའི་དབང༌། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་དུ་རབ་བསྒྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོང༌། །ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་མི་བཛྲ་སྭ་བྷ་ཝ་སྟྭཾ། ཆོས་ཀྱི་གསུང་རབ་དཔལ་དང་ལྡན། །རྡོ་རྗེ་མི་ཕྱེད་གསུམ་བསྒོམས་ནས། །དེང་བདག་བྱིན་གྱིས་བརླབས་ནས་སུ། །རྡོ་རྗེས་གསུང་དུ་དབང་བསྐུར་རོ། །ཨོཾ་སརྦ་ཏ་ཐཱ་ག་ཏ་ཝཱ་ཀ་བཛྲ་ཨ་བྷི་ཥིཉྩ་མཱཾ། འདོད་ཆགས་ཁམས་རྣམས་དག་བྱེད་པའི། །རྡོ་རྗེ་ཡིས་ནི་དབང་བསྐུར་བས། །སོ་སོར་རྟོག་པའི་ཡེ་ཤེས་ཀྱི། །འཁོར་ལོས་སྒྱུར་བའི་དབང་ཐོབ་ཤོག །བཛྲ་ཨ་བྷི་ཥིཉྩ་མཱཾ། འདི་དེ་སངས་རྒྱས་ཐམས་
ཅད་ཀྱི། །ཤེས་རབ་དབྱངས་ཀྱིས་རྗེས་འགྲོར་བཤད། །ཁྱོད་ཀྱིས་ཀྱང་ནི་རྟག་ཏུ་བཅང༌། །རྒྱལ་བ་རྒྱ་མཚོ་མཆོག་ཏུ་བཤད། །ཨོཾ་སརྦ་ཏ་ཐཱ་ག་ཏ་ཨ་དྷི་པ་ཏི་སྟྭཾ། ཨ་བྷི་ཥིཉྩ་མཱཾ་ཏིཥྛ་ས་མ་ཡ་སྟྭཾ། དཔལ་ལྡན་རྡོ་རྗེ་དྲིལ་བུ་འཆང༌། །རྡོ་རྗེ་མི་ཕྱེད་གསུམ་བསྒོམས་ནས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ལུས་ནི་མཛད་དུ་གསོལ། །ཨོཾ་སརྦ་ཏ་ཐཱ་ག་ཏ་ཨ་མོ་གྷ་བཛྲ་སྭ་བྷཱ་ཝ་ཨ་བྷི་ཥིཉྩ་ཧཱུཾ། ཕྲག་དོག་ཁམས་རྣམས་རྣམ་དག་ཅིང༌། །དྲིལ་བུ་ཡི་ནི་དབང་བསྐུར་བས། །བྱ་བ་ནན་ཏན་ཡེ་ཤེས་ཀྱི། །རྣམ་པར་རྒྱལ་བའི་སྐུ་ཐོབ་ཤོག །ཀརྨ་ཨ་བྷི་ཥིཉྩ་མཱཾ། སྲིད་པའི་བདེ་བ་ཤིན་ཏུ་ཆུང༌། །སྡུག་བསྔལ་ཆེན་པོ་བསལ་བའི་ཕྱིར། །ཤིན་ཏུ་བདེ་བ་དམ་པའི་ཐབས། །ཤཱཀྱ་སེང་གེ་རྟག་ཏུ་བསྐྱེད། །ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་མི་ཆེ་གེ་མོ་ཨ་བྷི་ཥི་ཀ་ཏ། གཏི་མུག་ཁམས་རྣམས་དག་པ་ཡི། །དཔལ་ལྡན་མིང་གི་དབང་བསྐུར་བ། །ཆོས་ཀྱི་དབྱིངས་ཀྱི་ཡེ་ཤེས་ཀྱི། །ཤཱཀྱ་སེང་གེའི་སྐུ་ཐོབ་ཤོག །བུདྡྷ་ཨ་བྷི་ཥིཉྩ་མཱཾ། འདི་ནི་སངས་རྒྱས་ཐམས་ཅད་ཀྱི། །ཕྱག་ན་རྡོ་རྗེའི་ལག་ལ་འདུག །ཁྱོད་ཀྱིས་ཀྱང་ནི་རྟག་ཏུ་བཅང༌། །ཕྱག་ན་རྡོ་རྗེའི་བརྟུལ་ཞུགས་བརྟན། །ཨོཾ་སརྦ་ཏ་ཐཱ་ག་ཏ་བཛྲ་ཙིཏྟ་སྭ་བྷཱ་ཝ་ས་མ་ཡ་ཨ་བྷི་ཥིཉྩ་ག་ཏ་ཡ་མི་ཧཱུཾ་ཧི་ཧི་ཧི་ཧི་ཧི་ཕཊ། སངས་རྒྱས་ཀུན་གྱི་མི་ཕྱེད་པ། །གསང་སྔགས་བླ་ན་མེད་པ་ཡི། །སྙིང་པོ་ཡིད་བཞིན་ནོར་བུ་འདི། །སྐྱོབས་པའི་སྔགས་ཀྱིས་དབང་བསྐུར་རོ། །ཨོཾ་སརྦ་ཏ་ཐཱ་ག་ཏ་མ་ལེ་ཨ་བྷི་ཥིཉྩ་མཱཾ། སློབ་དཔོན་དབང་བསྐུར་གསོལ་བ་གདབ། །བྱང་ཆུབ་རྡོ་རྗེ་སངས་རྒྱས་ལ། །ཇི་ལྟར་མཆོད་ཅིང་གསོལ་བ་ལྟར། །བདག་ཀྱང་གསུངས་པའི་དོན་གྱི་ཕྱིར། །ནམ་མཁའི་རྡོ་རྗེ་བདག་ལ་སྩོལ། །དེ་བཞིན་གཤེགས་པས་དབང་བསྐུར་བས། །འགྲོ་བ་བསྐྱེད་པའི་གཟི་བརྗིད་ཅན། །ཇི་ལྟར་ཡེ་ཤེས་འབྱུང་གནས་གཙོ། །སློབ་དཔོན་ཆེན་པོ་མི་ལྡོག་པའི། །དབང་བསྐུར་བ་ནི་བདག་ལ་སྩོལ། །སེམས་ཅན་ཀུན་གྱི་དོན་གྱི་ཕྱིར། །བདག་གི་རྟག་ཏུ་སློབ་དཔོན་འགྱུར། །སློབ་དཔོན་ཆེན་པོ་བདག་ལ་སྩོལ། །དེ་ནས་དམ་ཚིག་སྦྱིན་པར་བྱ། །སྲོག་གཅོད་རྐུ་དང་འཁྲིག་
པ་དང༌། །བརྫུན་དང་ཆང་ནི་སྤང་བར་བྱ། །མི་དགེ་བ་ནི་བཅུ་པོ་དག །ཁྱོད་ཀྱིས་ནམ་ཡང་མ་སྤྱད་ཅིག །ཐེག་པ་དམན་ལ་མོས་པ་དང༌། །སེམས་ཅན་འཁོར་བ་མ་སྤངས་ཤིག །མྱ་ངན་འདས་ལ་མ་ཆགས་ཤིག །ལྷ་དང་མི་ལ་བརྙས་མི་བྱ། །དེ་བཞིན་གཤེགས་པའི་ཕྱག་རྒྱ་རྣམས། །འགོང་པར་བྱ་བ་མ་ཡིན་ཏེ། །དམ་ཚིག་འདི་དག་ཉམས་པ་ན། །རྡོ་རྗེ་དམྱལ་བར་འཚེད་པར་བྱེད། །དེ་བས་དམ་ཚིག་བུས་སྲུངས་ཤིག །སློབ་མའི་ལུས་ལ་ལྷ་བཀོད་དེ། །སློབ་དཔོན་བྱེད་པའི་དབང་བསྐུར་བ། །ཁམས་གསུམ་ཀུན་གྱིས་ཕྱག་བྱས་པ།། གསང་བ་གསུམ་གྱི་གནས་ལས་བྱུང༌། །དབང་བསྐུར་བ་ནི་རྡོ་རྗེ་ཆེ། །སངས་རྒྱས་ཀུན་གྱི་དབང་བསྐུར་རོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཡ་པ་རི་ཏི་ཀ་ཨ་བྷི་ཥིཀྟ་ས་མ་ཡ་ཡ་ཤྲི་ཡེ་ཧཱུཾ། ཇི་ལྟར་མིག་མཁན་རྒྱལ་པོ་ཡིས། །འཇིག་རྟེན་ལིང་ཏོག་བསལ་བ་ལྟར། །བུ་ཁྱོད་ཀྱིས་ནི་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ཨོཾ་བཛྲ་ནི་ཏྲ་ཨ་པ་ཧ་ར་པ་ཊཾ་ལཾ་ཧྲཱིཿ། ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་འབྱུང༌། །ངོ་བོ་ཉིད་མེད་གནས་མེད་པ། །དེ་ལྟར་ཆོས་འདི་ཤེས་ནས་སུ། །སེམས་ཅན་དོན་ནི་མཉམ་མེད་བྱོས། །འོན་ཀྱང་སངས་རྒྱས་སྲས་སུ་སྐྱེ། །ཨཱ་དཪྴ་ཨ་བྷི་ཥིཉྩ་མཱཾ། ཐབས་དང་ཤེས་རབ་གཉིས་མེད་དེ། །བསྐལ་པའི་ཆོ་འཕྲུལ་ཅིར་ཡང་སྟོན། །བདུད་རིགས་ཐམས་ཅད་ཕམ་བྱེད་པའི། །ཡེ་ཤེས་ཀྱི་ནི་མདའ་འཕོངས་ཤིག །ཛྙཱན་ཀཱ་ཡ་ཨ་བྷི་ཥིཉྩ་མཱཾ། ཆོས་རྣམས་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ནམ་མཁའ་དང་ནི་མཉམ་སྦྱོར་བའི། །སྐུ་མཆོག་མཉམ་པ་ཉིད་དུ་གསལ། །ཝཱཀ་བཛྲ་ཨ་ཨ། རྡོ་རྗེ་སེམས་དཔའ་མེ་ལོང་བཞིན། །དག་ཅིང་གསལ་ལ་རྙོག་པ་མེད། །སངས་རྒྱས་ཀུན་བདག་རང་བཞིན་ཉིད། །བུ་ཁྱོད་ཀྱི་ནི་སྙིང་ལ་ཞུགས། ཨ་བཛྲ་སཏྭ་ཙིཏྟ་ཨ། འཇིག་རྟེན་ཀུན་ལ་ཐམས་ཅད་དུ། །སེམས་ཅན་རྣམས་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་བ་ཡི། །ཆོས་ཀྱི་འཁོར་ལོ་རབ་ཏུ་བསྐོར། །དེ་རིང་
ཕན་ཆད་འཇིག་རྟེན་དུ། །ཆོས་ཀྱི་དྲུང་ནི་བླ་མེད་པས། །སེམས་ཅན་མ་ལུས་བློ་རྣམས་ལ། །ཀུན་དུ་མ་ལུས་གང་བར་གྱིས། །སོམ་ཉི་ཡིད་གཉིས་མི་བྱ་ཞིང༌། །དོགས་པ་མེད་པའི་སེམས་ཀྱིས་སུ། །གསང་སྔགས་སྤྱོད་པའི་ཚུལ་གྱིས་ན། །འཇིག་རྟེན་འདི་ལ་རབ་སྒྲོགས་ཤིག །འདི་ནས་བརྩམས་ནས་བྱང་ཆུབ་བར། །སེམས་བསྐྱེད་ཙམ་གྱིས་དོན་རྫོགས་ཏེ། །གསེར་གྱི་གདུགས་འདིས་སེམས་ཅན་གྱི། །ཉོན་མོངས་གདུང་བ་མ་ལུས་སྐྱོབས། །དེ་ལྟར་བྱས་ན་སངས་རྒྱས་ཀྱང༌། །ཕན་འདོག་དྲིན་དུ་གཟོ་ཞེས་བྱ། །རྡོ་རྗེ་འཛིན་པ་དེ་ཀུན་ཡང༌།། ཀུན་དུ་བྱེད་ལ་སྲུང་བར་བྱེད། །དེ་ནས་ཐམས་ཅད་གཟེངས་བསྟོད་ལ། །ཨོཾ་འདི་དེ་ཁྱོད་ཀྱི་ལུང་བསྟན་ཡིན། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པ་ཀུན་དུ་བསྒྲུབ་པའི་ཕྱིར། །སྲིད་པའི་ངན་འགྲོ་རྣམས་ལས་བཏོན། །ཀྱེ་དེ་བཞིན་གཤེགས་པ་ཆེ་གེ་མོ། །ཞེས་བྱ་བ་སིདྡྷ་ས་མ་ཡ་སྟྭཾ། བྷུར་བྷུ་བ་སྭཿ། དེ་ནས་རྗེས་སུ་གནང་བ་སྦྱིན། །ཨོཾ་ངོ་བོ་ཉིད་ཀྱི་སེམས་ཅན་རྣམས། །ཇི་ལྟ་ཇི་ལྟར་འདུལ་འགྱུར་བ། །དེ་ལྟ་དེ་ལྟར་ཆགས་ལ་སོགས། །གཙང་མས་སེམས་ཅན་དོན་བྱའོ། །དེ་ནས་དབུགས་དབྱུང་བྱ་བ་ནི། །ཨོཾ་གསང་བའི་དཀྱིལ་འཁོར་དམ་པ་འདིར། །དེ་རིང་ཕན་ཆད་ཁྱོད་ཞུགས་ཀྱི། །སྡིག་པ་ཀུན་ལས་ངེས་གྲོལ་བའི། །ཁྱེད་རྣམས་དེར་ནི་ལེགས་པར་གནས། །བདེ་ཆེན་ཐོབ་པ་རྣམས་ལས་ནི། །སླར་ཁྱོད་འཆི་བ་ཡོད་མིན་ཏེ། །མི་ཚུགས་པ་དང་མི་སྨོད་པ། །ཅིས་ཀྱང་མི་འཇིགས་དགའ་བར་གྱིས། །སྲིད་པ་ཤིན་ཏུ་དག་པའི་ཕྱིར། །སྲིད་པའི་སྡུག་བསྔལ་ལས་ཁྱོད་འདས། །ཁྱེད་རྣམས་ཀུན་གྱིས་སངས་རྒྱས་ཉིད། །དེ་ཉིད་ཐེ་ཚོམ་མེད་པར་ཐོབ། །ཆོས་གོས་ནས་གཟུང་ལུང་བསྟན་པ། །ཨོཾ་ང་ཡིས་འདི་ལྟར་ལུང་བསྟན་པ། །དེ་བཞིན་གཤེགས་པ་ཐམས་ཅད་ཀྱང༌། །མགྲིན་གཅིག་རྫོགས་བྱང་ལུང་བསྟན་མཛད། །སངས་རྒྱས་རྡོ་རྗེ་འཛིན་བཅས་པ། །ཀུན་གྱིས་དེང་ཁྱོད་དབང་བསྐུར་བས། །ཁམས་གསུམ་ཀུན་གྱི་རྒྱལ་པོ་ཆེ། །རྒྱལ་བའི་བདག་པོར་སྟོན་པ་ནི། །དེ་ནི་བདུད་ལས་རྣམས་རྒྱལ་ཏེ། །གྲོང་ཁྱེར་མཆོག་ཏུ་རབ་ཏུ་ཞུགས། །ཁྱེད་རྣམས་ཀུན་གྱིས་སངས་རྒྱས་
ཉིད། །དེ་ཉིད་ཐེ་ཚོམ་མེད་པར་ཐོབ། །དེ་ནས་རྒྱལ་བའི་ཆོ་ག་ནི། །མདོར་བསྡུ་རྣམ་པར་བཤད་པར་བྱ། །སློབ་མ་ཡོངས་སུ་གཟུང་བ་ནི། །བྱང་ཆུབ་མཆོག་ཏུ་སེམས་བསྐྱེད་ནས། །སློབ་མའི་གདོང་པ་གཡོགས་པ་དང༌། དམ་ཚིག་ཅན་དུ་བྱིན་གྱིས་བརླབས། །དངོས་གྲུབ་ལས་ནི་གསོལ་བ་གདབ། །དམ་ཚིག་གནན་པར་བྱ་བ་ནི། །མེ་ཏོག་ལྷ་ལ་དོར་བར་བྱ། །རྡོ་རྗེའི་མིག་ནི་དབྱེ་བར་བྱ། །དེ་ནས་དཀྱིལ་འཁོར་ལྷར་ཞུགས་ཏེ། །ལྷ་རྣམས་ལ་ནི་མཆོད་པར་བྱ། །མཐོང་ནས་དཀྱིལ་འཁོར་འཇུག་པ་ལྔ། །ཤར་ལྷོ་ནུབ་བྱང་དབུས་ཉིད་དུ། །ཆོ་ག་རྣམ་གྲངས་བཅུ་བཞི་ནི། །རེ་རེ་དག་ལ་རྫོགས་པར་བྱ། །སྒོ་བཞི་དབུས་ནས་གསོལ་བ་གདབ། །བྱང་ཆུབ་དོན་ལ་ཡིད་ཆེས་འཇུག །འཇུག་པའི་སྐལ་ཡོད་སྒོ་ཕྱེ་ནས། །བྱང་ཆུབ་མཆོག་ཏུ་སེམས་བསྐྱེད་དེ། །སྣོད་དུ་རུང་ཕྱིར་ཕྱག་འཚལ་ནས། །སྐྱབས་འོག་ཚུད་ཕྱིར་གསོལ་བ་གདབ། །གནང་བས་སློབ་དཔོན་ལན་བྱིན་བྱ། །ཡི་གེ་བརྒྱ་པས་བྱིན་རླབས་བསྡུ། །སྒྲིབ་པ་སྦྱང་བའི་ཁྲུས་ཀྱང་བྱ། །དེ་ལ་དམ་ཚིག་དབོག་པ་དང༌། །མི་འདའ་བར་ཡང་དམ་བཅས་ལ། །མཆོད་པ་རྣམ་ལྔ་དབུལ་བར་བྱ། །ཡོངས་སུ་བསྔོ་ཞིང་སྨོན་ལམ་གདབ། །དགེ་བའི་རྩ་བ་བསྔོ་བའོ། །དཀྱིལ་འཁོར་གནས་ཀྱི་དོན་བཤད་ཅིང༌། །ཕྱག་རྒྱ་ལྷ་ཡི་དོན་བཤད་ནས། །རྒྱན་དང་ཆ་རྐྱེན་བཤད་པའང་བསྟན། །བུམ་པ་ལ་སོགས་ཇི་སྙེད་ཐོགས། །དབང་བཅུ་ཅི་དགར་བསྐུར་བར་བྱའོ། །སྤྱིར་སྦྱིན་བྱང་ཆུབ་དབུ་རྒྱན་དང༌། །ཀུན་ལ་དབང་བསྐུར་འཁོར་ལོ་བསྐོར། །ལས་ཀྱི་རྡོ་རྗེ་རྒྱ་གྲམ་དང༌། །སྒྲིབ་པ་འཁྲུ་བའི་བུམ་པ་དང༌། །མཛེས་པའི་མེ་ཏོག་ཕྲེང་བ་དང༌། །ཟིལ་གནོན་བཟོད་པའི་ཅོད་པན་དང༌། །འདའ་བར་དཀའ་བའི་ཕྱག་རྒྱ་དང༌། །ཐབས་དང་ཤེས་རབ་ཟུང་འབྲེལ་དང༌། །མི་འབྲལ་བ་ཡི་གཟུངས་སུ་ནི། །ཐུན་མོང་མིན་པའི་གསང་བ་དང༌། །རྡོ་རྗེ་མིང་གི་གསང་མཆོག་རྣམས། །དབང་རྣམས་ཀུན་ལ་མཆོག་གྱུར་པ། །དེ་རིང་ཁྱོད་ལ་བསྐུར་བར་བྱ། །ཨོཾ་ཨ་བྷི་ཥིཉྩ་ཨ། རིན་ཆེན་བདུན་པ་རྣམ་གྲངས་པ། །གང་གི་རྫས་སུ་དཔེར་མི་བཟོད། །གསེར་གྱི་
འཁོར་ལོ་དབང་བྱེད་དང༌། །གླང་པོ་རིན་ཆེན་སྟོབས་ཆན་དང༌། །རྟ་མཆོག་རིན་ཆེན་མགྱོགས་པ་དང༌། །ནོར་བུ་འོད་ལྡན་རེ་སྐོང་དང༌། །བཙུན་མོ་རིན་ཆེན་གཟུགས་ལྡན་དང༌། །བློན་པོ་རིན་ཆེན་བློ་གྲོས་དང༌། །དམག་དཔོན་རིན་ཆེན་རྫུ་འཕྲུལ་དང༌། །དེ་འདྲའི་རིན་ཆེན་རྣམ་གྲངས་དང༌། །བྱང་ཆུབ་ཡན་ལག་བདུན་ལྡན་དང༌། །འཁོར་ལོས་སྒྱུར་བའི་དབང་ཕྱུག་རྐྱེན། །འཇིག་རྟེན་འཇིག་རྟེན་ལས་འདས་པའི། །དེ་ཡང་ལོངས་སྤྱོད་རྐྱེན་དུ་ཤོག །ཨོཾ་ཨ་བྷི་ཥིཉྩ་ཨ། ཉེ་བའི་རིན་ཆེན་རལ་གྲི་དང༌། །བྱམས་དང་སྙིང་རྗེའི་པགས་པ་དང༌། །འདོད་ལྡན་སྐྱེད་མོས་ཚལ་དང་ནི། །ཞི་གནས་ལྷག་མཐོང་མངའ་གཞུ་དང༌། །གོས་མཆོག་ཡང་དག་སྐྱབས་ལྡན་དང༌། །ལྷམ་མཆོག་འགྲོ་ན་སྟབས་སྡུག་དང༌། །ཚངས་པའི་ཁབ་སྐུད་བཅས་པ་བདུན། །དེ་ཡི་རྫས་མཆོག་རྣམ་གྲངས་བདུན། །རིན་ཆེན་བདུན་དང་ཉེ་བར་གྲགས། །དེས་ཀྱང་ལོངས་སྤྱོད་རྐྱེན་དུ་ཤོག །ཨོཾ་ཨ་བྷི་ཥིཉྩ་ཨ། བཀྲ་ཤིས་རྫས་སུ་རྣམ་གྲགས་པ། །རྫས་རྣམས་ཀུན་ལ་བཀྲ་ཤིས་པའི། །མཐུ་སྟོབས་སྒྲུབ་རྫས་ཡུངས་ཀར་དང༌། །ཤིན་ཏུ་གཙང་བའི་རྩྭ་མཆོག་དང༌། །ཡོན་ཏན་སྡུད་པ་ལི་ཁྲི་དང༌། །བཅུད་ཀྱི་དམ་པ་གི་ཝཾ་དང༌། །དོན་རྣམ་གསལ་བའི་མེ་ལོང་དང༌། །ཆོས་སྒྲ་སྒྲོགས་པའི་དུང་མཆོག་དང༌། །གཟི་མདངས་བསྐྱེད་པའི་ཟས་མཆོག་དང༌། །འབྲས་བུ་སྨིན་པའི་བིལ་བ་དང༌། །བཀྲ་ཤིས་རྫས་ཀྱི་མཆོག་འགྱུར་བས། །དེ་ཡང་ལོངས་སྤྱོད་རྐྱེན་དུ་ཤོག །ཨོཾ་ཨ་བྷི་ཥིཉྩ་ཨ། བཀྲ་ཤིས་རྫས་སུ་རྣམས་གྲགས་པ། །མཚན་བཟང་ཀུན་ལས་བཀྲ་ཤིས་པས། །ཐུགས་ཀྱི་དོན་རྟོགས་དཔལ་བེའུ་དང༌། །གཞན་ལས་དབང་སྒྱུར་འཁོར་ལོ་དང༌། །བདུད་ལས་རྒྱལ་བའི་རྒྱལ་མཚན་དང༌། །སྐབས་དང་ལྡན་པའི་གདུགས་མཆོག་དང༌། །སྐྱོན་གྱིས་མ་གོས་པདྨ་དང༌། །སྒྲིབ་པ་སྦྱོང་བའི་བུམ་པ་དང༌། །རྒྱ་མཚོར་ཤུགས་ལྡན་དུང་མཆོག་དང༌། །ཐབས་ཀྱི་འཕྱོ་བའི་གསེར་ཉ་དང༌། །སངས་རྒྱས་མཚན་དུ་བཀྲ་ཤིས་པ། །དེ་ཡང་ལོངས་སྤྱོད་རྐྱེན་དུ་ཤོག །ཨོཾ་ཨ་བྷི་ཥིཉྩ་ཨ། དབང་པོ་ལྔ་ཡི་ལོངས་སྤྱོད་སྐྱོན། །འདོད་
པའི་ཡོན་ཏན་ལྔ་ཡི་མཆོག །སྡུ་གུ་མཛེས་པའི་གཟུགས་དང་ནི། །མཇམ་ཞིང་སྙན་པའི་སྒྲ་མཆོག་དང༌། །ལྡང་ཞིང་ཞིམ་པའི་དྲི་མཆོག་དང༌། །མངར་ཞིང་བཅུད་ལྡན་རོ་མཆོག་དང༌། །མཉམ་ཞིང་འཇམ་པའི་རེག་བྱ་དང༌། །འདོད་པའི་ཡོན་ཏན་ལྔ་རུ་གྲགས། །དེ་ཡང་ལོངས་སྤྱོད་རྐྱེན་དུ་ཤག །ཨོཾ་ཨ་བྷི་ཥིཉྩ་ཨ། མ་རིག་འབྱེད་པའི་གསེར་ཐུར་དང༌། །ཆོས་རྣམས་སྒྱུ་མའི་མེ་ལོང་ལྟར། །རྐང་པའི་འཁོར་ལོ་རྫུ་འཕྲུལ་ལྡན། །དུང་གིས་ཆོས་ཀྱི་སྒྲ་འབྱིན་ཤོག །ཨོཾ་ཨ་བྷི་ཥིཉྩ་ཨ། དེ་སོགས་གཞན་ཡང་ཅི་རིགས་བསྐུར། །ལྷོ་སྒོའི་ཆོ་ག་བྱ་བ་ནི། །སྟེགས་བུ་ཁྲུ་གང་རྣམས་ལྔས་བྱུགས། །ཙནྡན་དཀར་པོའི་མཎྜལ་ལ། །བུམ་པ་རྫས་བཅས་མེ་ཏོག་དགྲམ། །མཚོན་ཆ་གདུགས་དང་སྨྱུག་མ་དང༌། །བདག་ཉིད་ཤཱཀྱ་སེང་གེ་ཡི། །ཐུགས་ཀྱི་མདའ་ལྔ་འཕྲོས་པ་ཡིས། །ལས་དང་ཉོན་མོངས་ཕྱིར་བཟློག་པའི། །ཡུངས་ཀར་སྔགས་ཀྱིས་བརྡེག་པར་བྱ། །མིང་ངམ་རུས་བུ་རུས་ལ་བྲབས། །ཨོཾ་སརྦ་ཨ་པ་ཡ་ཨཱ་ཀཪྵ་ན་བི་ཤོ་དྷ་ན་བཛྲ་ས་མ་ཡ་ཧཱུཾ་ཕཊ། ཨོཾ་བཛྲ་པ་ཎི་བི་སྥོ་ཊ་ཡ་སརྦ་ཨ་པ་ཡ་བནྡྷ་ནི་པྲ་མོ་ཀྵ་ཡ་སརྦ་ཨ་པ་ཡ་ག་ཏི་བྷྱཿ་སརྦ་སཏྭ་སརྦ་ཏ་ཐཱ་ག་ཏ་བཛྲ་ས་མ་ཡ་ཏྲ་ཊ། ཨོཾ་སརྦ་བིད་ཨཱ་ཨཱ་བི་ཤ་།ཨོཾ་བིཏ་ཏྲ་ཊ་ཚིནད་ཨ། ས་ར་ཎ་ནེ་ཧཱུཾ་ཕཊ། ཨོཾ་ད་ཧ་ད་ཧ་སརྦ་ན་ར་ཀ་ག་ཏེ་ཧེ་ཏུཾ་ཧཱུཾ་ཕཊ། ཨོཾ་པ་ཙ་པ་ཙ་སརྦ་པྲེ་ཏ་ཀ་ག་ཏེ་ཧེ་ཏུཾ་ཧཱུཾ་ཕཊ། ཨོཾ་མ་ཐ་མ་ཐ་སརྦ་ཏིཪྻ་གྒ་ཏེ་ཧེ་ཏུཾ་ཧཱུཾ་ཕཊ། ལྷ་ཡི་སྔགས་ལ་བཏགས་ཏེ་བྱ། །རྩ་བའི་སྔགས་ལ་འདི་བཏགས་ནས། །དེ་ནས་ཁྲུས་ཀྱིས་བཀྲུ་བར་བྱ། །སརྦ་བིགྷྣཱ་ན། སརྦ་གྲ་ཧེ་སརྦ་ཛྭ་རེ། སརྦ་བྱ་དྷི། སརྦ་ཨུ་པ་དྲ་ཝེ། སརྦ་ཨ་ཀཱ་ལ་མྲི་ཏྱུ་པྲ་ཤ་མ་ན་ཡ། སརྦ་དུར་སྭ་བྣ་དུར་མི་ཏེ་བྱ་ཀུ་ལ་ཚེ། ཤཱནྟིཾ་ཀུ་རུ་སྭཱ་ཧཱ། ནུབ་ཕྱོགས་བདེ་གནས་ལམ་བསྟན་བྱ། །ལམ་ནི་བར་ཆད་བསལ་ཏེ་སྦྱང༌། །ཞག་ནི་ཉི་ཤུ་རྩ་གཅིག་གམ། །ཞག་བདུན་དཀྱིལ་འཁོར་གཞུག་པར་བྱ། །དེ་བཞིན་བཅུག་སྟེ་དབང་བསྐུར་ན། །ངན་སོང་ཐམས་ཅད་རྣམ་གྲོལ་ཏེ། །བདེ་འགྲོ་མཐོ་རིས་འཇིག་རྟེན་དང༌། །ས་རྣམས་གོང་མར་སྐྱེ་འགྱུར་ཏེ། །དངོས་གྲུབ་ཐམས་ཅད་འགྲུབ་པར་འགྱུར། །སངས་
རྒྱས་སུ་ཡང་ངེས་པར་འགྲུབ། །སྔར་བཞིན་ལས་རྣམས་ཐམས་ཅད་བྱེད། །ཐམས་ཅད་ཐོགས་པ་མེད་པར་འགྱུར། །བྱབས་པས་རིམས་ནད་གདོན་དུག་སོགས། །ཐམས་ཅད་ཀུན་ལས་ཐར་པར་འགྱུར། །ཧཱུཾ་བརྗོད་ཙམ་གྱིས་ལས་རྣམས་འགྲུབ། །ཆོ་ག་ཞིབ་མོ་གཞན་ཡང་འགྲུབ།། ལྷ་ཀླུ་གནོད་སྦྱིན་སྲིན་པོ་སོགས། །ངན་འགྲོའི་དབང་དུ་གྱུར་པ་ཡིས། །རོའམ་གཟུགས་བརྙན་མིང་སོགས་བྲི། །བཟླས་བརྗོད་སྦྱིན་སྲེག་དབང་བསྐུར་གྲོལ། །སྐུ་གཟུགས་བྲི་བའི་ཆོ་ག་ཡང༌། །འཇིག་རྟེན་གསུམ་ལས་རྣམ་རྒྱལ་བྲི། །ཡང་ན་དཀྱིལ་འཁོར་ཚུལ་བྲིས་ལ། །མེ་ཏོག་ལ་སོགས་མཆོད་པ་བྱ། །སྤྱན་སྔར་བསྙེན་པ་འབུམ་བྱས་ན། །ལས་རྣམས་ཐམས་ཅད་བྱེད་པར་འགྱུར། །རྡུལ་ཚོན་ཆུར་དོར་དབང་ཡོན་དབུལ། །ཡེ་ཤེས་གཤེགས་ལ་དམ་ཚིག་བསྡུ། །གཙུག་ཏོར་དགུ་པའི་ཆོ་ག་འདི། །སངས་རྒྱས་གསང་བས་ཕྱི་རབས་དོན། །ངན་སོང་སྦྱོང་བའི་རྒྱུད་ལས་མཛད། །འགྲོ་ཀུན་ངན་སོང་ལས་གྲོལ་ཤོག །སློབ་དཔོན་སངས་རྒྱས་གསང་བས་མཛད་པ་རྫོགས་སོ།། །།རྒྱ་གར་གྱི་མཁན་པོ་སངས་རྒྱས་གསང་བ་དང༌། མཉྫུ་ཤྲཱི་བ་རྨ་དང༌། བྲན་ཀ་མུ་ཏིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།