རྣམ་པར་སྣང་མཛད་མངོན་པར་རྫོགས་པར་བྱང་ཆུབ་པའི་རྒྱུད་ཀྱི་ཚིག་འགྲེལ།
གཞོན་ནུ་དཔལ།
ད་ནི་སྙིང་རྗེ་ཆེན་པོ་འབྱུང་བའི་དཀྱིལ་འཁོར་དེར་ཞུགས་པ་རྣམས་ཀྱི་རྗེས་སུ་བསྔགས་པ་བཤད་དེ། དེ་ཡང་དེ་ནས་བཅོམ་ལྡན་འདས་ལ་གསང་བ་པའི་བདག་པོ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ་ཞེས་པ་ནས། བཅོམ་ལྡན་འདས་དེ་ཅིའི་སླད་དུ་ཞེ་ན། རིགས་ཀྱི་བུ་དང་རིགས་ཀྱི་བུ་མོ་དེ་དག་ཉིད་སངས་རྒྱས་བཅོམ་ལྡན་འདས་རྣམས་སུ་བལྟ་བར་བགྱི་བ་ལགས་སོ་ཞེས་པའི་བར་ཏེ། བཅོམ་ལྡན་འདས་རིགས་ཀྱི་བུའམ། རིགས་ཀྱི་བུ་མོ་གང་སྙིང་རྗེ་ཆེན་པོའི་སྙིང་པོ་འབྱུང་བའི་དཀྱིལ་འཁོར་གྱི་རྒྱལ་པོ་ཆེན་པོ་འདིའི་དམ་ཚིག་ལ་བཞུགས་པར་གྱུར་པ་དེའི་བསོད་ནམས་ཇི་ཙམ་ཞིག་མངོན་པར་འདུས་བགྱིས་པར་རིག་པར་བགྱི་ཞེས་པ་ནི་དཀྱིལ་འཁོར་བུ་ཞུགས་ཤིང་དམ་ཚིག་མནོས་པ་འབའ་ཞིག་ལ་མི་བྱའོ། དེ་བཞིན་གཤེགས་པའི་སྐུ་ལ་སོགས་པ་མཉམ་པ་ཉིད་མི་ཟད་པའི་རྡོ་རྗེའི་རྒྱན་དེ་དག་གིས་བྱིན་གྱིས་བརླབས་པར་གྱུར་པ་སྙིང་རྗེ་ཆེན་པོའི་དཀྱིལ་འཁོར་དང༌། ཡི་གེའི་འཁོར་ལོ་བསྐོར་བའི་དཀྱིལ་འཁོར་དང༌། གསང་བའི་དཀྱིལ་འཁོར་རྣམས་དེ་བཞིན་གཤེགས་པའི་སྐུ་གསུང་ཐུགས་ཀྱི་མཚན་མར་
གྱུར་པ་སྟེ། དེ་དག་ཉིད་ལ་དམ་ཚིག་གསུམ་ཞེས་བྱའོ། །དམ་ཚིག་ལ་ཞུགས་པ་ཞེས་པ་དེའི་རྒྱུ་དང་རང་བཞིན་དང་འབྲས་བུ་ལ་སྦྱོར་བར་ཤེས་པ་ཞེས་པ་སྟེ། དེ་དག་ཤེས་ཡང་རྒྱུ་ཤེས་པ་ནི་སྐུ་མི་ཟད་པ་ལ་སོགས་པའི་རྡོ་རྗེའི་རྒྱན་གྱི་རྒྱུ་བྱང་ཆུབ་ཀྱི་སྙིང་པོ་ཡིན་པར་ཤེས་པའོ། །རང་བཞིན་ཤེས་པ་ནི་སྐུ་ཟད་པ་ལ་སོགས་པ་ཉིད་ཤེས་པའོ། །འབྲས་བུ་ལ་སྦྱོར་བ་ནི་གསང་སྔགས་ཀྱི་སྤྱད་པ་རྣམས་ཀྱིས་བླ་ན་མེད་པའི་བྱང་ཆུབ་ཏུ་འགྱུར་པའམ། ཇི་ལྟར་བསམས་བ་འགྲུབ་པ་ལ་སོགས་པ་འཐོབ་པར་ཤེས་ནས་དེ་ལ་སྦྱོར་བ་སྟེ། དེ་ལྟ་བུར་ཞུགས་པར་གྱུར་པ་དེའི་བསོད་ནམས་ཇི་ཙམ་ཞིག་མངོན་པར་འདུས་བྱས་པ་ཞེས་ཞུས་པའོ། །སེམས་དང་པོ་བསྐྱེད་པ་ནས་ཉེ་བར་བཟུང་སྟེ། དེ་བཞིན་གཤེགས་པ་ལས་བྱུང་བའི་བསོད་ནམས་མངོན་པར་འདུས་བྱས་པ་ཇི་ཙམ་པ་རིགས་ཀྱི་བུའམ་རིགས་ཀྱི་བུ་མོ་དེ་དག་གི་བསོད་ནམས་མངོན་པར་འདུས་བྱས་པ་དེ་ཙམ་དུ་རིག་པར་བྱའོ་ཞེས་པ་ནི་ས་དང་པོའི་སེམས་བསྐྱེད་པ་ནས་ས་བཅུ་གཅིག་ཏུ་འགྱུར་བའི་བསོད་ནམས་མངོན་པར་འདུས་བྱས་པ་དང་མཉམ་མོ་ཞེས་པ་སྟེ། ཅིའི་ཕྱིར་ཞེ་ན། དམ་ཚིག་དེ་ལྟ་བུ་ལ་ཞུགས་པ་ནི་མོས་པས་སྤྱོད་པ་ནས་ཞུགས་ན་མཐའ་དེ་བཞིན་གཤེགས་པའི་བར་འགྱུར་བའི་ཕྱིར་རོ། །རིགས་ཀྱི་
བུ་དང་རིགས་ཀྱི་བུ་མོ་དེ་དག་ནི་དེ་བཞིན་གཤེགས་པའི་ཞལ་དང་ཐུགས་ལས་སྐྱེས་པའི་སྲས་ཡིན་པར་རིག་པར་བྱའོ་ཞེས་པ་ལ་ཞལ་ནས་སྐྱེས་པ་ནི་འཇུག་པའི་སྒོ་ནས་སྐྱེས་པ་སྟེ། ཞལ་ནི་མོས་པས་སྤྱོད་པའི་ས་ལ་སོགས་པ་སྟེ། དེ་དག་མོས་པས་སྤྱོད་པའི་ས་ལ་ཞུགས་པའི་ཕྱིར་རོ། །སྐྱེས་པ་ནི་དེ་བཞིན་གཤེགས་པར་འཇུག་པའོ། །ཐུགས་ལས་སྐྱེས་པའི་སྲས་ཞེས་པ་ནི་དེ་བཞིན་གཤེགས་པའི་སྤྱོད་པ་དང་མཐུན་པར་སྤྱོད་པའི་ཕྱིར་རོ། །རིགས་ཀྱི་བུའམ། རིགས་ཀྱི་བུ་མོ་དེ་དག་ཕྱོགས་གང་ན་གནས་པ་དེར་དེ་བཞིན་གཤེགས་པས་ཆེན་པོ་དགོངས་མི་དགོས་པར་འགྱུར་རོ་ཞེས་པ་ནི་དེ་དག་གང་ན་འཁོད་པ་སེམས་ཅན་གྱི་དོན་སྤྱད་པ་སྟེ། ས་ཕྱོགས་དེ་བཞིན་གཤེགས་པས་སེམས་ཅན་གྱི་དོན་སྤྱད་པ་ཆེན་པོ་མི་དགོས་སོ་ཞེས་པའོ། །མགྲིན་གཅིག་ཏུ་ཞེས་པ་ནི་དུས་གཅིག་ཏུ་སྨྲས་པ་དང༌། སྨྲ་བའི་ཚིག་གཅིག་པ་དང༌། སྨྲ་བར་བྱ་བའི་དོན་གཅིག་པ་དང༌། སྒྲ་གཅིག་ཏུ་འབྱིན་པའོ། །ད་ནི་དཀྱིལ་འཁོར་ལ་སོགས་པ་བསྲུང་བ་ལ་སོགས་པ་རྣམས་འཆད་དེ། སྔགས་དེ་རྣམས་ཀྱང་དེ་བཞིན་གཤེགས་པའི་གསུང་གི་འཁོར་ལོས་ཁམས་གསུམ་དུ་ཁྱབ་པའི་བྱིན་གྱི་རླབས་སུ་གྱུར་པ་སྟེ། དེ་ནས་ཡང་བཅོམ་ལྡན་འདས་རྣམ་པར་སྣང་མཛད་ཀྱིས་ཐམས་ཅད་ལྡན་པའི་འཁོར་དེ་དག་ལ་གཟིགས་ནས་ཞེས་པ་ནས་དུས་གསུམ་དུ་ཆགས་པ་མེད་པའི་སྟོབས་དང་ལྡན་པའི་གསང་སྔགས་ཀྱི་ཚིག་དག་ཡོད་དོ་ཞེས་བྱ་བའི་བར་ནི་ཁྱད་པར་དེ་ལྟ་བུ་དང་ལྡན་པའི་གསང་སྔགས་ཀྱི་ཚིག་ཡོད་ཀྱིས་བཤད་དོ་ཞེས་པའི་ཚིག་ཁོང་ནས་དབྱུང་བར་རིག་པར་བྱའོ། །མཐའ་ཡས་པར་འཇུག་པ་རྒྱ་ཆེན་པོ་ལས་འབྱུང་བ་ཞེས་པ་ནི་སེམས་ཅན་གྱི་ཁམས་ཐམས་ཅད་དུ་ཁྱབ་པར་འཇུག་པ་ཞེས་པའོ། །སྣ་ཚོགས་ཀྱི་གཟུགས་ཀྱི་ནོར་བུ་དང་འདྲ་བ་ཞེས་པ་ནི་ཡིད་བཞིན་གྱི་ནོར་བུ་དེ་གཟུགས་སྣ་ཚོགས་སུ་སྣང་ལ། སེམས་ཅན་གྱིས་ཅི་འདོད་པ་ཐོབ་པའི་བྱ་བ་སྣ་ཚོགས་བྱེད་དེ། དེ་བཞིན་དུ་རིག་པའི་རྒྱལ་མོ་འདི་ཡང་སེམས་ཅན་རྣམས་ཀྱི་དོན་དུ་གཟུགས་སྣ་ཚོགས་སྟོན་ཅིང་བྱ་བ་སྣ་ཚོགས་བྱེད་ཅེས་པའོ། །བསོད་ནམས་ཀྱི་ཚོགས་དཔག་ཏུ་མེད་པ་བསགས་པ་ཞེས་པ་ནི་དེ་བཞིན་
གཤེགས་པའི་གསུང་དེ་ཚད་མེད་པའི་བསོད་ནམས་ཀྱི་ཚོགས་བསགས་པ་ལས་བྱུང་བའི་ཕྱིར་རོ། །ཐོགས་པ་མེད་པའི་རྟོགས་པ་ལ་གནས་པ་ཞེས་པ་ནི་སེམས་ཅན་གྱི་ཁམས་ཐམས་ཅད་ཡེ་ཤེས་ཀྱི་སྒྲིབ་པ་མེད་པར་མཁྱེན་ཞེས་པ་སྟེ། དེ་བས་ན་དུས་གསུམ་དུ་ཆགས་པ་མེད་པའི་སྟོབས་དང་ལྡན་པའི་གསང་སྔགས་ཀྱི་ཚིག་ཅེས་གསུངས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ལྗགས་ཀྱི་དབང་པོ་འདོད་པ་ཐམས་ཅད་ཡོངས་སུ་རྫོགས་པར་ཞེས་པ་ནས། ཏིང་ངེ་འཛིན་ལ་སྙོམས་པར་ཞུགས་སོ་ཞེས་པའི་བར་གྱིས་རིག་པའི་རྒྱལ་མོ་དེ་ཡོངས་སུ་བསྒྲགས་པའི་ཕྱིར་ཏིང་ངེ་འཛིན་ལ་ཞུགས་པ་སྟེ། དེ་ལྟར་ཏིང་ངེ་འཛིན་དུ་ཞུགས་པ་ཡང༌། བཅོམ་ལྡན་འདས་ཏིང་ངེ་འཛིན་དེ་ལྟ་བུ་ཞིག་ལ་ཞུགས་ཀྱིས། ངོ་མཚར་བ་ཞིག་འབྱུང་ངོ་སྙམ་ནས་སེམས་ཅན་རྣམས་ལྟ་བ་དང་ཉན་པ་ལ་གཟུང་བར་བྱ་བའི་ཕྱིར་རོ། །ལྗགས་ཀྱི་དབང་པོ་འདོད་པ་ཐམས་ཅད་ཡོངས་སུ་རྫོགས་པ་རྣམ་པར་སྤྲུལ་པས་ཐམས་ཅད་དང་ལྡན་པའི་སངས་རྒྱས་ཀྱི་ཞིང་ཀུན་དུ་གཡོགས་ནས་ཞེས་པ་ནི་ཏིང་ངེ་འཛིན་དེར་འཇུག་པའི་ཕྱིར་དེ་བཞིན་གཤེགས་པས་བསྐལ་པ་དུ་མར་བདེན་པའི་ཚིག་བསགས་པ་ལས་བྱུང་བ་དེ་བཞིན་གཤེགས་པའི་སྐྱེས་བུ་ཆེན་པོའི་མཚན་ལྗགས་རྒྱ་ཆེ་བ་སྲབ་པ་ཁ་དོག་ཟངས་འདྲ་བ་དེས་ཁྱབ་པར་བྱས་ཞེས་པའོ། །རྒྱ་ཆེན་པོ་ཞེས་པ་ནི་ཏིང་ངེ་འཛིན་དེའི་ཁྱད་པར་ཏེ། ཁམས་གསུམ་ཐམས་ཅད་དུ་ཁྱབ་པར་བྱེད་པའི་ཕྱིར་རོ། །ཡོངས་སུ་དག་པ་ཞེས་པ་ཤེས་བྱ་དང་ཉེན་མོངས་པའི་སྒྲིབ་པ་མེད་པའོ། །ཆོས་ཀྱི་རྒྱལ་མཚན་ཞེས་པ་ནི་རྒྱལ་མཚན་ལྟར་གཞན་ལས་འཕགས་པའི་ཆོས་སྟོན་པར་བརྗོད་པའོ། །ཏོག་ཅེས་པ་ནི་ཏིང་ངེ་འཛིན་དེ་ཉིད་སྔགས་ཀྱི་ཚིག་སྟོན་པའི་མཚན་ཉིད་དོ། །རྩེ་མོ་ལ་ལྟ་བ་ཞེས་པ་ནི་ཁམས་གསུམ་ཐམས་ཅད་གཟིགས་པས་ན་རྩེ་མོ་ལྟར་མཐོ་བ་སྟེ། དེ་དག་ནི་ཏིང་ངེ་འཛིན་གྱི་ཁྱད་པར་རོ། །དེ་བཞིན་གཤེགས་པ་ཐམས་ཅད་ཀྱིས་ཆོས་ཀྱི་དབྱིངས་ཁྱབ་པ་ཞེས་པ་ནི་ཁམས་གསུམ་ཐམས་ཅད་ཁྱབ་པ་ཞེས་པའོ། །དེ་བས་ན་སེམས་ཅན་གྱི་ཁམས་མ་ལུས་པ་རྣམས་ཡོངས་སུ་བསྐྱབ་པ་ཞེས་བྱ་སྟེ། བཅོམ་ལྡན་འདས་དེ་ལྟ་བུའི་
སྒྲ་འབྱིན་པ་རིག་སྔགས་ཀྱི་རྒྱལ་མོ་གསུངས་སོ་ཞེས་སྦྱར་རོ། །སངས་རྒྱས་མཁས་པ་ཐམས་ཅད་ཀྱིས། །རིག་སྔགས་འདི་གསུངས་སོད་ལ་ནི། །ཞེས་པ་ནས། སྲིན་པོ་འཇིགས་པའི་གཟུགས་ཅན་ནི། །དེ་དག་ཐམས་ཅད་འཇིག་པར་འགྱུར། །ཞེས་པའི་བར་གྱིས་རིག་པའི་རྒྱལ་མོ་དེ་མཐུ་རྗེས་སུ་བསྔགས་པ་སྟེ། སེམས་ཅན་ཐམས་ཅད་བསྲུང་བ་དང༌། །བསྐྱབ་ཅིང་སྤ་བའི་ཕྱིར་གསུངས་ཏེ། །ཞེས་པ་ནི། བསྲུང་བ་ནི་གནོད་པ་ཆུང་ངུ་ལས་བསྲུང་བའོ། །སྤ་བ་ནི་གནོད་པ་འབྲིང་པོ་ལས་སྤ་བའོ། །བསྐྱབ་པ་ནི་གནོད་པ་ཆེན་པོ་ལས་སེམས་ཅན་རྣམས་སྐྱོབ་པར་བྱེད་པའོ། །གང་གི་སྙིང་ལ་སྲུང་གནས་པ། །དེ་དག་ལ་ནི་འཇིགས་པ་མེད། །ཅེས་པ་ནི་སེམས་ཅན་གང་རིག་པའི་རྒྱལ་མོ་འདི་སྙིང་ལ་དྲན་ན་དེ་ལ་འཇིགས་པ་མེད་དོ་ཞེས་པའོ། །དེ་ནས་ཡང་བཅོམ་ལྡན་འདས་ཀྱིས་ཆོས་ཀྱི་དབྱིངས་རྒྱ་ཆེན་པོར་བྱིན་གྱི་བརླབས་ནས་ཞེས་པ་ནས་དེ་བཞིན་གཤེགས་པའི་ལྗགས་ཀྱིའོ་ཞེས་པའི་བར་གྱིས་དཀྱིལ་འཁོར་དུ་དགོས་པའི་སྔགས་རྣམས་བཤད་པ་སྟེ། དེ་ནས་ཡང་བཅོམ་ལྡན་འདས་ཀྱིས་ཆོས་ཀྱི་དབྱིངས་རྒྱ་ཆེན་པོར་བྱིན་གྱིས་བརླབས་ནས་ཞེས་པ་ལ། ཆོས་ཀྱི་དབྱིངས་ལ་ཡང་རྣམ་པ་གཉིས་ཏེ། ཟབ་པ་དང་རྒྱ་ཆེ་བའོ། །དེ་ལ་ཟབ་པ་ནི་བྱང་ཆུབ་ཀྱི་སྙིང་པོའི་རང་བཞིན་ནོ། །རྒྱ་ཆེ་བ་ནི་སྐུ་ལ་སོགས་པ་མི་ཟད་པའི་རྡོ་རྗེའི་རྒྱན་གྱི་འཁོར་ལོ་སྟེ། སྐུ་ལ་སོགས་པ་མི་ཟད་པའི་འཁོར་ལོ་དེ་ཉིད་བྱིན་གྱིས་བརླབས་ནས་ཞེས་པའོ། །དེའི་ཚེ་ཆོས་ཀྱི་མཛོད་ཀྱི་སྙིང་པོ་ཅན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་པ་ནི་ཏིང་ངེ་འཛིན་དེའི་བྱེ་བྲག་སྟེ། ཆོས་ཀྱི་མཛོད་ཅེས་པ་ནི་དམ་ཚིག་གི་སྔགས་ལ་སོགས་པ་དེ་ལས་འབྱུང་བའི་ཕྱིར་རོ། །སྙིང་པོ་ཞེས་པ་ནི་འབྱུང་བའི་གནས་ཏེ་སྔགས་དེ་རྣམས་འབྱུང་བའི་གནས་དེ་ཡིན་ནོ་ཞེས་པའོ། །དམ་ཚིག་ལ་འཇུག་པའི་རིག་སྔགས་འབྱུང་ངོ་ཞེས་པ་ལ་དམ་ཚིག་ཅེས་པ་ནི་ཀུན་དུ་འགྲོ་བའམ། རྟོག་པ་སྟེ་དེ་ཡང་སྐུ་ལ་སོགས་པ་མི་ཟད་པའི་རྡོ་རྗེའི་རྒྱན་ཏེ་དེ་རྟོག་པ་ལ་འཇུག་པ་ནི་རིག་པ་འདི་ལྟ་སྟེ། འཇུག་པ་ཡང་མ་ཐོབ་པར་འཇུག་པ་དང༌། ཐོབ་ནས་ཞིག་སྟེ་འཇུག་པའོ། །དེ་ལ་མ་ཐོབ་པར་
འཇུག་པ་ནི་དཀྱིལ་འཁོར་མ་མཐོང་བ་དང་པོར་རིག་པ་འདི་བླངས་ཏེ་འཇུག་པའོ། །བྱང་ཆུབ་སེམས་དཔའ་ཀུན་དུ་བཟང་པོ་ལ་སོགས་པ་རྣམས་ཀྱང་རིག་པ་དེ་བརྗོད་པ་ཙམ་གྱིས་རང་བཞིན་གྱིས་དཀྱིལ་འཁོར་དེ་མཐོང་བར་འགྱུར་རོ། །ཐོབ་ནས་ཞིག་སྟེ་འཇུག་པ་ནི་དཀྱིལ་འཁོར་དུ་ཞུགས་ཟིན་པ་བར་གཞན་གྱིས་མཆོད་ནས་དམ་ཚིག་གི་སྔགས་འདོན་པའོ། །སྔགས་དེ་འདོན་པ་ཡང་དེ་བཞིན་གཤེགས་པའི་སྐུ་དང་གསུང་དང་ཐུགས་གསུམ་གྱི་འཁོར་ལོའི་ཡོན་ཏན་གསང་བ་དེ་ཐོས་པའོ། །དེ་ནས་དེ་མ་ཐག་ཏུ་སངས་རྒྱས་ཀྱི་ཞིང་ཐམས་ཅད་དང་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་དུ་དམ་ཚིག་ལ་འཇུག་པའི་རིག་སྔགས་ཀྱི་སྒྲ་ཞེས་པ་ལ། སངས་རྒྱས་ཀྱི་ཞིང་ཐམས་ཅད་ཅེས་པ་ནི་འདུལ་བའི་འགྲོ་བ་ཕལ་རྣམས་ལའོ། །བྱང་ཆུབ་སེམས་དཔའི་འཁོར་གྱི་དཀྱིལ་འཁོར་ཐམས་ཅད་དུ་ཞེས་པ་ནི་ཀུན་དུ་བཟང་པོ་ལ། སོགས་པའི་འཁོར་རྣམས་ལའོ། །གང་ཞིག་ཐོས་ནས་མཁས་པ་རྣམས་ཆོས་ཐམས་ཅད་ལས་འདའ་བར་མི་འགྱུར་ཞེས་པ་ལ་དམ་ཚིག་ནི་མཁས་པ་རྣམས་ཀྱིས་ཐོས་ནས་ལུང་གི་ཆོས་དང་རྟོགས་པའི་ཆོས་གཉིས་ལས་མི་འདའ་བ་སྟེ། ལུང་གི་ཆོས་ལས་མི་འདའ་བ་ནི་དམ་པའི་ཆོས་ཡོངས་སུ་མི་གཏོང་བ་ལ་སོགས་པའི་དམ་ཚིག་རྣམས་མི་འདྲལ་བའོ། །རྟོགས་པའི་ཆོས་ལས་མི་འདའ་བ་ནི་རང་བཞིན་གྱི་དཀྱིལ་འཁོར་དེ་ཡིད་ལ་བྱེད་པ་མི་གཏོང་བའོ། །ཆོས་ཀྱི་དབྱིངས་ཀུན་དུ་འབྱུང་བའི་གསང་སྔགས་ནི་འཇུག་པ་སྟེ་སློབ་མའམ། བདག་ཀྱང་རུང་སྟེ་སྟོང་པ་ཉིད་དུ་བསྒྱུར་པའོ། །རྡོ་རྗེ་སེམས་དཔའི་བྱིན་གྱིས་བརླབས་པའི་སྔགས་ནི་གནས་པ་སྟེ། ཡེ་ཤེས་ལྔའི་རང་བཞིན་ནམ། རྡོ་རྗེ་སེམས་དཔའ་ཉིད་ཀྱི་སྐུར་གནས་པའོ། །རྡོ་རྗེ་གོ་ཆའི་སྔགས་ནི་ལྡང་བ་སྟེ། སེམས་ཅན་ཐམས་ཅད་བདེ་པ་དང་ལྡན་པའི་བྱམས་པ་ཆེན་པོའི་གོ་ཆ་བགོས་པའོ། །དེ་བཞིན་གཤེགས་པའི་སྤྱན་གྱི་སྔགས་ནི་སློབ་མ་མིག་གཡོགས་བཀྲོལ་ཏེ་དཀྱིལ་འཁོར་བལྟར་གཞུག་པའོ། །བྱུག་སྤོས་ཀྱི་སྔགས་ནི་དེ་བཞིན་གཤེགས་པའི་ཚུལ་ཁྲིམས་རྣམ་པར་དག་པའི་ཡོན་ཏན་ལས་གྱུར་པའོ། །མེ་ཏོག་གི་སྔགས་ནི་བྱམས་པ་ཆེན་པོའི་ཡོན་ཏན་ལས་གྱུར་པའོ། །བདུག་སྤོས་
ཀྱི་སྔགས་ནི་ཆོས་ཀྱི་དབྱིངས་དང་རྗེས་སུ་མཐུན་པའི་ཡེ་ཤེས་ཀྱི་ཉོན་མོངས་པ་ལ་སོགས་པ་བསྲེགས་པའི་ཡོན་ཏན་ལས་གྱུར་པའོ། །མར་མེའི་སྔགས་ནི་དེ་བཞིན་གཤེགས་པའི་ཡེ་ཤེས་ཀྱི་འོད་འབར་བ་ནམ་མཁའ་བཞིན་དུ་རྒྱ་ཆེ་བར་སྣང་བ་ལས་གྱུར་པའོ། །མཆོད་ཡོན་གྱི་སྔགས་ནི་ཆོས་ཀྱི་དབྱིངས་རྣམ་པར་དག་པ་ནམ་མཁའ་དང་མཉམ་ཞིང་མི་མཉམ་པ་ལས་བྱུང་བའོ། །གཙུག་ཏོར་གྱི་སྔགས་ནི་དེ་བཞིན་གཤེགས་པའི་སྤྱི་གཙུག་བལྟར་མི་སྣང་བ་ནམ་མཁའ་ལྟར་མཐའ་མེད་པ་ལས་བྱུང་བའོ། །དེ་བཞིན་གཤེགས་པའི་གོ་ཆའི་སྔགས་ནི་དེ་བཞིན་ཉིད་ཐོབ་པར་བྱེད་པའི་ལམ་གྱི་ཡེ་ཤེས་འབར་བ་དེས་ཤེས་བྱ་དང་ཉོན་མོངས་པའི་སྒྲིབ་པ་དག་སྲེག་པར་བྱེད་པ་ལས་བྱུང་བའོ། །ཀུན་དུ་འབར་བའི་སྔགས་ནི་འོད་ཀྱི་དཀྱིལ་འཁོར་ཏེ། དེ་ཡང་ལམ་གྱི་ཤེས་རབ་འབར་བས་ཤེས་བྱ་དང༌། ཉོན་མོངས་པའི་སྒྲིབ་པ་སྲེག་པར་བྱེད་པ་ལས་བྱུང་བའོ། །དེ་བཞིན་གཤེགས་པའི་ལྗགས་ཀྱི་སྔགས་ནི་བདེན་པའི་ཚིག་གི་ཆོས་ལ་གནས་པ་ལས་བྱུང་བ་སྟེ། དེ་བཞིན་གཤེགས་པའི་སྤྱན་དང་གཙུག་ཏོར་ལ་སོགས་པའི་སྔགས་དེ་རྣམས་འོག་ནས་འབྱུང་བའི་ཕྱག་རྒྱ་དང་ལྡན་པར་བྱ་སྟེ། སློབ་དཔོན་ཉིད་དེ་བཞིན་གཤེགས་པའི་སྐུར་བསྒྱུར་ན་ཡང་སྔགས་དེ་རྣམས་ཀྱིས་བསྒྱུར་བར་བྱའོ། །ནམ་སྙིང་པོ་འབྲུ་གཅིག་པ་ལས་བསྒྱུར་ན་ནི་འདི་རྣམས་ཀྱང་མི་དགོས་སོ། །སློབ་མ་དབང་བསྐུར་བ་ན་ཡང་བུམ་པའི་ཆུས་བཀྲུས་པའི་འོག་ཏུ་སྔགས་དེ་རྣམས་ཕྱག་རྒྱ་དང་བཅས་པར་སྦྱར་རོ། །བཅོམ་ལྡན་འདས་ཇི་ལྟར་ན་དཀྱིལ་འཁོར་བྲི་བའི་ཚེ་ན་ནི་བགེགས་རྣམས་ཞི་བར་འགྱུར་བ་ལགས་ཞེས་པ་ནི་ཐོག་མ་དཀྱིལ་འཁོར་འདྲི་བ་སྟེ། སྦྱོར་བའི་ཚེ་དང་བྲིས་ནས་སློབ་མ་ལ་སོགས་པ་གཟུད་པའི་ལས་བྱེད་པའི་ཚེ་དང༌། སློབ་མ་ལ་སོགས་པ་བཙུད་ཟིན་པའི་ཚེ་བགེགས་བྱུང་ན་ཇི་ལྟར་བགྱི་ཞེས་ཞུས་པའོ། །གསང་སྔགས་སྒྲུབ་པའི་ཚེ་ན་ཡང༌། །ལོག་འདྲེན་རྣམས་ནི་མ་མཆིས་འགྱུར། །ཞེས་པ་ནི་དཀྱིལ་འཁོར་མ་བྲིས་ཀྱང་རུང་སྟེ། སྤྱིར་སྔགས་སྒྲུབ་པ་ལ་བགེགས་བྱུང་ན་ཇི་ལྟར་ཞི་བར་བགྱི་ཞེས་པའོ། །གསང་སྔགས་རྣམས་ཀྱང་ཇི་ལྟར་བསྒྲུབ། །ཅེས་པ་ནི་གསང་སྔགས་ཀྱི་སྒྲུབ་པ་བཟླས་པའི་ཡན་ལག་བཞི་ལ་
སོགས་པ་ཇི་ལྟར་བགྱི་ཞེས་པའོ། །དེ་ཡི་འབྲས་བུ་ཅི་འདྲར་འགྱུར། །ཞེས་པ་ནི་གསང་སྔགས་བསྒྲུབས་ན་དེའི་འབྲས་བུ་ཅི་འདྲ་བར་འགྱུར་ཞེས་པའོ། །བགེགས་ནི་རང་གི་སེམས་ལས་བྱུང༌། །ཞེས་པ་ནས། ཚངས་བའམ་འོན་ཏེ་བརྒྱ་བྱིན་ཡང༌། །དེ་ཡི་མོད་ལ་མྱུར་དུ་འཚིག །ཅེས་པའི་བར་གྱིས་བགེགས་ཞི་བར་བྱ་བ་བཤད་པ་སྟེ། དེ་ཡང་མཚན་མ་མེད་པ་དང་མཚན་མ་དང་བཅས་པའོ། །མཚན་མ་མེད་པ་ནི་བྱང་ཆུབ་ཀྱི་སེམས་བསྒོམ་པའོ། །མཚན་མ་དང་བཅས་པ་ནི་འཕགས་པ་མི་གཡོ་བའི་གཟུགས་སུ་བསྒྱུར་ཅིང་སྔགས་དང་ཕྱག་རྒྱ་དང་དཀྱིལ་འཁོར་དུ་ལྡན་པར་སྦྱར་བའོ། །སྔོན་ཆད་སེར་སྣ་བསྟན་པའི་ཕྱིར། །བགེགས་ནི་རང་གི་སེམས་ལས་བྱུང༌། །དེ་ཡི་རྒྱུ་ནི་གཞིག་པའི་ཕྱིར། །ཞེས་པ་ནས། བྱང་ཆུབ་སེམས་ཞེས་བཤད་པ་ཡིན། །ཞེས་པའི་བར་ནི་བགེགས་ནི་ཆོས་དང་ཟང་ཟིང་གཞན་ལ་མི་གཏོང་བར་འཇུངས་པ་ལས་བརྟེན་པའི་བག་ཆགས་རང་གི་སེམས་ལ་བསགས་པ་ལས་གྱུར་ཏེ་བགེགས་དེའི་རྒྱུ་ནི་སེར་སྣ་ཡིན་ནོ། །དེ་གཞིག་པའི་ཕྱིར་བྱང་ཆུབ་ཀྱི་སེམས་བསྒོམ་པ་ནི་བྱང་ཆུབ་ཀྱི་སྙིང་པོའི་རང་བཞིན་གོམས་པར་བྱ་བ་སྟེ། སྟོང་པ་ཉིད་གོམས་པར་བྱས་ན་སེར་སྣའི་དངོས་པོའམ། བགེགས་ཀྱི་དངོས་པོ་དག་དམིགས་སུ་མེད་པའི་སྒོ་ནས་ཞི་བར་འགྱུར་རོ། །གང་ཏུ་སེམས་དང་སེམས་བྱུང་བའི། །ཞེས་པ་ནས། སྤྲོས་པ་ཐམས་ཅད་འགག་འགྱུར་བ། །ཞེས་པའི་བར་ནི་བྱང་ཆུབ་ཀྱི་སེམས་དེ་ཉིད་ཀྱི་ཁྱད་པར་ཏེ། བྱང་ཆུབ་ཀྱི་སེམས་དེ་ནི་རྣམ་པར་རྟོག་པ་ལ་སོགས་པ་སྤོང་ཞིང་འགོག་པའི་རང་བཞིན་ནོ་ཞེས་པའོ། །སྔགས་པས་བྱང་ཆུབ་སེམས་དྲན་ཞིང༌། མི་གཡོ་བ་ནི་ཡིད་ལ་བཟླས། །དེ་ཡི་ཕྱག་རྒྱ་བཅིངས་ནས་ནི། །བགེགས་རྣམས་ཐམས་ཅད་འཇིག་པར་འགྱུར། །ཞེས་པ་ནི་བགེགས་བསལ་བའི་ཐབས་གཉིས་པ་སྟེ། སྔགས་བས་བྱང་ཆུབ་ཀྱི་སེམས་དྲན་པར་བྱས་ནས་འཕགས་པ་མི་གཡོ་བའི་སྔགས་ཡིད་ལ་བཟླས་པར་བྱ་སྟེ། དེའི་སྙིང་གར་རླུང་གི་དཀྱིལ་འཁོར་གྱི་ནང་ན་ཡི་གེ་ཧཾ་འདུག་པར་བསམས་ཏེ་ཡི་གེ་ཧཾ་གི་སྒྲས་ཆོས་ཐམས་ཅད་རྒྱུ་དང་འབྲས་བུ་མི་དམིགས་པ་ནི་བྱང་ཆུབ་ཀྱི་སེམས་དྲན་པའོ། །སྔགས་ཟློས་
པ་ནི་ཡིད་ལ་མི་གཡོ་བར་ཟློས་པ་སྟེ། དེ་ལྟར་སྔགས་དེ་ཕྱག་རྒྱ་དང་ལྡན་པར་བཟླས་ནས་བསྡིགས་ན་བགེགས་དེ་འབྱེར་པར་འགྱུར་རོ། །གསང་བའི་བདག་པོ་དེ་ལ་རླུང་བཅིང་པ་ཉོན་ཅིག་ཅེས་པ་ནས། སྔོན་གྱི་རྒྱལ་བ་རྣམས་ཀྱིས་བཤད། །ཅེས་པའི་བར་ནི་རླུང་བཅིང་བའི་ཆོ་ག་སྟེ། བདག་ཡི་གེ་ཨ་ལས་རྣམ་པར་སྣང་མཛད་དུ་བསྒྱུར་ནས་ཡིད་ལ་འཕགས་པ་མི་གཡོ་བའི་སྙིང་པོ་ཧཾ་བསམ་ཞིང་རླུང་གི་ཕྱོགས་སུ་དྲིའི་ཐིག་ལེ་བདུན་བྱ་བ་ནི་རླུང་གི་རྒྱལ་པོ་འཁོར་དང་བཅས་པ་སྟེ། འཁོར་དྲུག་གིས་མཐའ་བསྐོར་ནས་རྒྱལ་པོ་ཉིད་དབུས་སུ་གཞག་ལ་ཀུན་ཀྱང་རི་དགས་ལ་ཞོན་པ་ཁ་དོག་སྔོན་པོར་བསམས་ཏེ། དེའི་སྟེང་དུ་ཁམ་ཕོར་གྱིས་བཀབ་ལ། ཁམ་ཕོར་དེ་རི་རབ་ཏུ་བསམས་ཏེ་དེའི་སྟེང་དུ་ཡི་གེ་ཨཾ་བསམ་ཞིང་ཨཾ་ལས་དབང་ཆེན་གྱི་དཀྱིལ་འཁོར་གསེར་གྱི་ཁ་དོག་འདྲ་བ་ཤིན་ཏུ་ཁྲོ་བར་བསམ་མོ། །སེམས་དཔའ་ཆན་པོ་ཆུ་ཡི་ཡང༌། །ཞེས་པ་ནས། ཕྱོགས་ཀུན་ནས་ནི་ལངས་པའི་སྤྲིན། །དེ་མ་ཐག་ཏུ་འཇིག་པར་འགྱུར། །ཞེས་པའི་བར་གྱིས་ནི་ཆུའི་བགེགས་བསལ་བ་སྟེ། བདག་ཉིད་ཡི་གར་ལས་འཕགས་པ་མི་གཡོ་བ་མདོག་དམར་པོ་འབར་བར་བསམས་ལ་སྤྲིན་གྱི་གཟུགས་ལ་བྲིས་ཏེ་དེ་རལ་གྲིའི་ཕྱག་རྒྱས་གཏུབས་ན་འཇིག་པར་འགྱུར་རོ། །ཡང་ན་སྔགས་པ་མི་གཡེང་པས། །དེ་དག་ཕུར་བུས་གདབ་བྱས་ཏེ། །མཁས་པ་རྡོ་རྗེར་གྱུར་ནས་སུ། །ཐམས་ཅད་རྡོ་རྗེའི་ཕུར་བུས་གདབ། །ཡང་ན་བགེགས་རྣམས་ཐམས་ཅད་ནི། །ཞི་བར་བྱ་བ་ཡང་བཤད་དེ། །ཞེས་པ་ནི་ཆུའི་བགེགས་དེ་ཉིད་བསལ་བའི་ཕྱིར་གཞན་གསུངས་པ་སྟེ། བདག་ཉིད་ཕྱག་ན་རྡོ་རྗེར་བསྒྱུར་ལ། རྡོ་རྗེ་རྩེ་ལྔ་པའི་ཕྱག་རྒྱ་བཅིངས་ནས་ཕྱག་རྒྱའི་རྩེ་སྤྲིན་གྱི་གཟུགས་ལ། ཕུར་བུས་གདབ་པའི་ཐབས་སུ་བཙུགས་ན་ཞི་བར་འགྱུར་རོ། །ཡང་ན་བགེགས་སུ་གྱུར་པ་ཀུན་ཞི་བར་འགྱུར་བར་བྱ་བར་ཡང་བཤད་དོ། །སྔགས་པ་དཀྱིལ་འཁོར་དབུས་གནས་ནས། །ཞེས་པ་ནས། དོགས་པ་མེད་པར་འཆི་བར་འགྱུར། །ཞེས་པའི་བར་གྱིས་བགེགས་ཞི་བར་བྱེད་པའི་ཐབས་གཞན་གསུངས་པ་སྟེ། སྔགས་པ་འཕགས་པ་མི་གཡོ་བོའི་གཟུགས་སུ་བསྒྱུར་ནས་དེའི་སྔགས་བཟླས་པར་
བྱ་སྟེ། འཕགས་པ་མི་གཡོ་བར་བསྒྱུར་བའི་སྙིང་གར་རླུང་གི་དཀྱིལ་འཁོར་བསམས་ཏེ་དེ་ལ་སྔགས་གནས་པར་བསམ་ཞིང་སྔགས་པ་ཉིད་དཀྱིལ་འཁོར་ཆེན་པོའི་སྒོ་ཁྱུད་ཀྱི་ནང་དུ་འདུག་ལ་དེར་བགེགས་ཀྱི་གཟུགས་བྲིས་ཏེ། དེའི་སྤྱི་བོར་རྐང་པ་གཡོན་པས་བཙིར་ན་བགེགས་ཞི་བར་འགྱུར་རོ། །དེ་ཡི་གཟུགས་བརྙན་བྱས་ནས་སུ། །ཞེས་པ་ནས། དེ་ཡི་མོད་ལ་མྱུར་དུ་འཚིག །ཅེས་པའི་བར་གྱིས་ཀྱང་བགེགས་བསལ་བའི་ཐབས་གཞན་བཤད་པ་སྟེ། བགེགས་ཀྱི་གཟུགས་བྱས་ལ་དུག་དང་སྐེ་ཚེ་བསྲེས་པས་བསྐུས་ཏེ་མེ་ལ་བསྐམས་ན་བགེགས་ཞི་བར་འགྱུར་རོ། །དེ་ནས་བཅོམ་ལྡན་འདས་ལ་ཕྱག་ན་རྡོ་རྗེས་འདི་སྐད་ཅེས་གསོལ་ཏེ་ཞེས་པ་ནས། བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱིས་ཀྱང་རང་རང་གི་གནས་ལ་གནས་ནས་དོན་ཐམས་ཅད་པ་སྒྲུབ་པར་བགྱིའོ་ཞེས་པའི་བར་ནི་སྔར་བགེགས་བསལ་བ་བཤད་པའི་སྐབས་སུ་འཕགས་པ་མི་གཡོ་བ་རླུང་གི་ཁ་དོག་ཏུ་གནས་ཏེ་བསྐྲང་བ་དང༌། མེའི་ཁ་དོག་ཏུ་བསྒྱུར་ཏེ་བགེགས་བསྐྲད་པ་དང༌། ཁམ་ཕོར་ལ་དབང་ཆེན་གྱི་དཀྱིལ་འཁོར་བསམས་ནས་རླུང་བཅིང་བར་བཤད་པའི་དོན་ཕྱག་ན་རྡོ་རྗེས་མཇལ་བ་ནི་ཞི་བ་དང་རྒྱས་པའི་ལས་བྱ་བ་རྣམས་ལ། ལྷ་རྣམས་རང་རང་གི་དཀྱིལ་འཁོར་ལ་གནས་ནས་ཞི་བ་ལ་སོགས་པའི་ལས་རྣམས་བྱེད་པར་མཇལ་ཏེ། དེ་ཅིའི་སླད་དུ་ཞེ་ན། དམ་ཚིག་གི་ཚུལ་གྱིས་དེ་ལྟ་བུ་ཡིན་ཏེ་ལྷ་རྣམས་རང་རང་གི་དཀྱིལ་འཁོར་ལ་གནས་པར་སྦྱར་ན་གང་དུ་བསམས་པ་དེ་བྱིན་གྱིས་ཀྱང་རློབ་པ་ལས་གང་བྱ་བ་རྣམས་ཀྱང་དེ་བཞིན་གཤེགས་པས་ཇི་སྐད་གསུངས་པ་བཞིན་དུ་བྱེད་པར་འགྱུར་ཏེ། དེ་བས་ན་སྔགས་པ་རྣམས་ཀྱང་ལྷའི་ཁ་དོག་ཅི་འདྲ་བར་དེར་བསྒྱུར་ཏེ་ལས་རྣམས་བྱ་བར་མཇལ་ཏོ་ཞེས་པའོ། །བཅོམ་ལྡན་འདས་ཀྱིས་བཀའ་སྩལ་པ། གསང་བ་བའི་བདག་པོ་དེ་དེ་བཞིན་ཏེ། དེ་སྐད་སྨྲས་པ་དེ་དེ་བཞིན་ནོ་ཞེས་པ་ནི་ཕྱག་ན་རྡོ་རྗེས་མཇལ་བ་དེ་ཕྱིན་ཅི་མ་ལོག་པར་མཇལ་ཏོ་ཞེས་པའོ། །གང་གིས་ཁ་དོག་གང་གསུངས་པ། །དེ་ཉིད་དེ་ཡི་དཀྱིལ་འཁོར་ཏེ། ཞེས་པ་ནི་ལྷ་རྣམས་ཀྱི་ཁ་དོག་ཅི་འདྲ་བ་དེའི་དཀྱིལ་འཁོར་
ཡང་དེ་འདྲ་བར་བྱའོ་ཞེས་པ་སྟེ། ལྷའི་ཁ་དོག་སེར་པོ་ནི་དབང་ཆེན་གྱི་དཀྱིལ་འཁོར་ལ་སྦྱར་བར་བྱ་ཞིང༌། ལྷའི་ཁ་དོག་དཀར་པོ་ནི་ཆུའི་དཀྱིལ་འཁོར་ལ་སྦྱར་བར་བྱ། ལྷའི་ཁ་དོག་དམར་པོ་ནི་མེའི་དཀྱིལ་འཁོར་ལ་སྦྱར་བར་བྱ་ལ། ལྷའི་ཁ་དོག་སྔོན་པོ་དང་ནག་པོ་ནི་རླུང་གི་དཀྱིལ་འཁོར་ལ་སྦྱར་བར་བྱ་སྟེ། དེ་རྣམས་ནི་སོ་སོའི་དཀྱིལ་འཁོར་མཐའ་གཅིག་ཏུའོ། །དེ་ལས་མཆོད་པའི་ཡོ་བྱད་ལ་སོགས་པས་གཞན་དུ་བསྒྱུར་ན་རྒྱལ་བའི་ལྷ་ཡང་ཞི་བར་འགྱུར། ཞི་བ་ཡང་ཁྲོ་བོ་ལ་སོགས་པར་དགོས་པའི་དབང་གིས་བསྒྱུར་དུ་རུང་བར་ཤེས་པར་བྱའོ། །ལྷ་ལ་ལ་ནི་ཁ་དོག་ཐམས་ཅད་དང་ལྡན་པ་སྟེ། དཔེར་ན་འཕགས་མ་སྒྲོལ་མ་ལ་སོགས་པ་ཁ་དོག་ལྗང་གུ་ཡིན་པས་ཁ་དོག་ཐམས་ཅད་དང་ལྡན་པ་སྟེ། དཀྱིལ་འཁོར་ཀུན་དང་ལས་ཐམས་ཅད་བྱེད་པར་ཤེས་པར་བྱའོ། །དེ་བཞིན་དུ་དགོས་པའི་དབང་གིས་མཆོད་པའི་ཡོ་བྱད་ལ་སོགས་པས་བསྒྱུར་ན་རང་བཞིན་སོ་སོར་ངེས་པ་ལས་ཀྱང་ལས་ཐམས་ཅད་བྱེད་པར་ཤེས་པར་བྱའོ། །དེ་ལ་གསང་བ་པའི་བདག་པོ་མ་འོངས་པའི་དུས་ན་སེམས་ཅན་བློ་ཞན་པ་ཞེས་པ་ནས། ངེས་སེམས་ཅན་རྣམས་ལ་ཕན་པར་བཞེད་ནས་འདི་དག་ཐམས་ཅད་བཤད་དོ་ཞེས་བྱ་བར་ནི་མི་ཤེས་སོ་ཞེས་པའི་བར་གྱིས་ནི་ལྷ་རྣམས་ཀྱི་ཁ་དོག་གང་ཡིན་པ་དཀྱིལ་འཁོར་ཡང་དེ་ཡིན་པར་གསུངས་པ་ན། དབང་ཆེན་དང་མེའི་དཀྱིལ་འཁོར་ལ་སོགས་པ་ནི་འཇིག་རྟེན་པའི་རྒྱུད་ལ་ཡོད་ཀྱི་འཇིག་རྟེན་ལས་འདས་པའི་རྒྱུད་བྱ་བའི་རྒྱུད་དང་རྣལ་འབྱོར་གྱི་རྒྱུད་ཀུན་ལས་མི་འབྱུང་བས་ན་འདི་ནི་སངས་རྒྱས་ཀྱིས་གསུངས་པ་མ་ཡིན་ནོ་ཞེས་ཟེར་ཏེ། གང་འཇིག་རྟེན་གྱི་རྒྱུད་རྣམས་ཀྱང་སངས་རྒྱས་བཅོམ་ལྡན་འདས་ཐམས་ཅད་མཁྱེན་པས་སེམས་ཅན་རྣམས་སོ་སོའི་དད་པ་དང་རྗེས་སུ་མཐུན་པར་བཤད་དོ་ཞེས་མི་ཤེས་པའི་ཕྱིར་རོ་ཞེས་པ་སྟེ། དེ་ཅིའི་ཕྱིར་དེ་ལྟར་མི་ཤེས་ཤེ་ན། བློ་ཞན་ཅིང་དད་པ་ཆུང་བ་ལ་སོགས་པའི་ཉེས་པས་བསྐལ་པའི་ཕྱིར་རོ། །ཆོས་རྣམས་ཀྱི་ནི་ཆོས་ཀྱི་མཚན། །བླུན་པོ་དེས་ནི་དེ་མི་ཤེས། །ཆོས་རྣམས་ཀུན་གྱི་མཚན་ཉིད་ནི། །སྟོང་པ་ཉིད་དུ་ཡང་དག་གསུངས། །ཞེས་པ་ནི་དེ་དག་ནི་བདག་ཉིད་ཀྱང་མ་རུང་ལ་གཞན་ཡང་
ཕུང་བར་བྱེད་པ་ཡིན་ནོ་ཞེས་བྱ་བ་དང་སྦྱར་རོ། །སྔགས་པ་རྟག་ཏུ་དེར་གནས་ནས། །རབ་ཏུ་ངེས་པར་ལས་བྱའོ། །ཞེས་པ་ནི་སྔགས་པས་སྟོང་པ་ཉིད་ལ་གནས་ནས་ཞི་བ་ལ་སོགས་པའི་ལས་བྱའོ་ཞེས་པ་སྟེ། སྟོང་པ་ཉིད་ལ་གནས་ནས་ལས་བྱ་བ་ཡང་གཅིག་ནི་མཚན་མ་མེད་པའི་ཏིང་ངེ་འཛིན་ལ་གནས་ནས་དེ་ཉིད་ཀྱིས་གྲུབ་པ་ཐོབ་པར་འགྱུར་བའོ། །གཅིག་ནི་སྟོང་པ་ཉིད་ཀྱི་ཏིང་ངེ་འཛིན་མངོན་དུ་བྱས་ནས་དེ་ལས་ལངས་ཏེ་བཟླས་ལ་སོགས་པ་བྱས་ནས་གྲུབ་པ་ཐོབ་པའོ། །དེ་དག་ནི་བགེགས་ཞི་བར་བྱ་བའི་སྐབས་སོ།། །། ད་ནི་ཀུན་དུ་བཟང་པོ་ལ་སོགས་པ་བྱང་ཆུབ་སེམས་དཔའ་དེ་རྣམས་ཐོག་མ་མོས་པས་སྤྱོད་པའི་ས་ལ་ཞུགས་པའི་ཚེ་རང་རང་གིས་རྣམ་པར་གྲོལ་བའི་སྒོ་གསང་སྔགས་ཀྱི་ཚིག་བསྟན་པ་དེ་ཉིད་ལ་གོམས་པར་བྱས་པས་ས་བཅུ་དང་ས་བཅུ་གཅིག་ལ་སོགས་པ་ཡོངས་སུ་རྫོགས་པའི་རང་རང་གི་རྣམ་པར་ཐར་པའི་སྒོ་ཇི་ལྟར་རྟོགས་པའི་གསང་སྔགས་རྣམས་སྙིང་རྗེ་ཆེན་པོ་འབྱུང་བའི་དཀྱིལ་འཁོར་དུ་དགོད་པའི་ཕྱིར་སྨྲ་བར་འདོད་ནས་བཅོམ་ལྡན་འདས་ལ་གསོལ་བ་སྟེ། དེ་ནས་ཕྱག་ན་རྡོ་རྗེ་ལ་སོགས་པ་རྡོ་རྗེ་འཛིན་པ་དེ་དག་ཅེས་ལ་སོགས་པས་སོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་བྱང་ཆུབ་སེམས་དཔའ་དེ་དག་དང་རྡོ་རྗེ་འཛིན་དེ་དག་ལ་མི་ཉམས་པའི་ཆོས་ཉིད་དུ་བྱིན་གྱིས་བརླབས་ཞེས་པ་ནི་བྱང་ཆུབ་སེམས་དཔའ་དེ་རྣམས་མི་འགེང་བའམ། སྤོབས་པ་སྐྱེ་བར་བྱིན་གྱིས་བརླབས་ཞེས་པའོ། །སངས་རྒྱས་ཀྱི་རྒྱན་ཞེས་པ་ནི་བྱང་ཆུབ་སེམས་དཔའ་ཀུན་དུ་བཟང་པོ་ཏིང་ངེ་འཛིན་དུ་ཞུགས་ན་སྤུའི་ཁུང་བུ་རེ་རེ་ནས་སངས་རྒྱས་རེ་རེ་འབྱུང་སྟེ། དེ་ལྟར་ལུས་ལས་སངས་རྒྱས་གྲངས་མེད་པ་འབྱུང་བར་འགྱུར་བ་དེ་ཉིད་ལ་རྒྱན་ཞེས་བྱའོ། །དེ་བཞིན་དུ་ཏིང་ངེ་འཛིན་རྣམས་བྱང་ཆུབ་སེམས་དཔའ་སོ་སོའི་ཡོན་ཏན་དང་རྗེས་སུ་མཐུན་པར་ཤེས་པར་བྱ་སྟེ། དེ་བཞིན་དུ་གསང་སྔགས་རྣམས་ཀྱང་དེ་བཞིན་གཤེགས་པའི་ཡོན་ཏན་ལས་བྱུང་ཞིང་བྱང་ཆུབ་སེམས་དཔའ་དེ་རྣམས་ཀྱི་སོ་སོའི་རྣམ་པར་གྲོལ་བའི་སྒོ་སྟེ། དེ་དག་ཉིད་ཀྱི་ཚིག་ཏུ་བྱིན་གྱིས་བརླབས་པར་ཤེས་པར་བྱའོ། །དེ་ནས་ཡང་
བཅོམ་ལྡན་འདས་རྣམ་པར་སྣང་མཛད་ཀྱིས་ཐམས་ཅད་དང་ལྡན་པའི་འཁོར་འདུས་པ་ལ་གཟིགས་ནས་ཞེས་པ་ནས། རྣམ་རྟོག་རྣམ་པར་སྤངས་ཏེ་སྤྱད་པ་སྤྱོད་པར་གྱིས་ཞེས་པའི་བར་དུ་སྔར་ཡི་གེ་ཨ་རྣམ་པ་བཞི་བྱང་ཆུབ་དང་སྤྱོད་པ་དང་ཀུན་དུ་སངས་རྒྱས་པ་དང་མྱ་ངན་ལས་འདས་པའི་ཏིང་ངེ་འཛིན་གྱི་སྒོ་གསོད་པ་སྟེ། དེ་ཉིད་ཀྱི་དོན་བྱང་ཆུབ་དང་སྤྱོད་པ་དང་ཀུན་དུ་སངས་རྒྱས་པ་དང་མྱ་ངན་ལས་འདས་པའི་རང་བཞིན་ཡང་བསྟན་པ་སྟེ། དེ་བསྟན་པ་ཡང་འདུལ་བའི་འགྲོ་བ་རྣམས་ལ་ལ་ནི་ཡི་གེ་ཨ་ལ་སོགས་པའི་ཡི་གེ་འབྲུའི་སྒོ་ནས་གོམས་པར་བྱེད་ལ། ལ་ལ་ནི་དེའི་དོན་གྱི་སྒོ་ནས་གོམས་པར་བྱེད་དེ། དེ་བས་ན་དོན་འདི་བསྟན་པས་བྱང་ཆུབ་ལ་སོགས་པའི་རང་བཞི་ཁོང་དུ་ཆུད་པར་བྱ་བར་དོན་གྱི་སྒོ་ནས་བསྟན་ཏོ། །རེ་བ་ཐམས་ཅད་ཡོངས་སུ་རྫོགས་པར་བྱེད་པ་དུས་གསུམ་མཐའ་ཡས་པའི་སྒོ་ངེས་པའི་ཡེ་ཤེས་ཡོངས་སུ་རྫོགས་པར་བྱེད་པའི་ཆོས་ཀྱི་ཚིག་རྣམས་གསུངས་སོ་ཞེས་པ་ལ་རེ་བ་ཐམས་ཅད་ཡོངས་སུ་རྫོགས་པར་བྱེད་པ་དུས་གསུམ་མཐའ་ཡས་པའི་སྒོ་ངེས་པའི་ཡེ་ཤེས་ནི་དེ་བཞིན་ཉིད་ཀྱི་ཡེ་ཤེས་ལ་བྱ་སྟེ། རེ་བ་ཐམས་ཅད་ཡོངས་སུ་རྫོགས་པར་བྱེད་པ་ཞེས་པ་ནི་ཡེ་ཤེས་རྣམ་པར་མི་རྟོག་ཀྱང་སྨོན་ལམ་གྱི་ཤུགས་ཀྱིས་སྐུ་མི་ཟད་པའི་རྡོ་རྗེའི་རྒྱན་ལ་སོགས་པ་ཐམས་ཅད་དུ་ཁྱབ་པར་སེམས་ཅན་ཐམས་ཅད་ལ་རྗེས་སུ་མཐུན་པའི་དོན་བྱེད་དོ་ཞེས་པའོ། །དུས་གསུམ་མཐའ་ཡས་པའི་སྒོ་ངེས་པའི་ཡེ་ཤེས་ཡོངས་སུ་རྫོགས་པར་བྱེད་པ་ཞེས་པ་ནི་ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའ་ལ་སོགས་པའི་ཏིང་ངེ་འཛིན་རྣམ་པ་མང་པོའི་སྒོ་ནས་སྟོང་པ་ཉིད་དུ་འཇུག་ཅིང་ཡེ་ཤེས་ངེས་པར་བྱེད་པའོ། །ཡོངས་སུ་རྫོགས་པར་བྱེད་པའི་ཚིག་རྣམས་ཡོངས་སུ་ཞེས་པ་ནི་ཡེ་ཤེས་དེ་ཉིད་ཡོངས་སུ་རྫོགས་པར་བྱེད་པའི་ཚིག་སྟེ། དེ་ཡང༌། མཁའ་ལྟར་དྲི་མེད་ངོ་བོ་ཉིད་མེད་པ། །ཞེས་པ་ལ་སོགས་པའི་ཚིགས་སུ་བཅད་པ་རྣམས་ཏེ། དེ་རྣམས་ཀྱི་དོན་ཁོང་དུ་ཆུད་ན་ཡེ་ཤེས་དེ་ཡོངས་སུ་རྫོགས་པར་འགྱུར་པའི་ཕྱིར་རོ། །དེ་ལ། མཁའ་ལྟར་དྲི་མེད་ངོ་བོ་ཉིད་མེད་པ། །ཞེས་པ་ནི་བྱང་ཆུབ་ཀྱི་རང་བཞིན་ཏེ་ཇི་ལྟར་ནམ་མཁའ་ལ་རྡུལ་ལ་སོགས་པའི་སྒྲིབ་པའི་དྲི་མ་མེད་ཅིང་སྔོན་པོ་ལ་སོགས་པའི་ངོ་བོ་ཉིད་དུ་གཟུང་དུ་མེད་པ་དེ་བཞིན་དུ་བྱང་ཆུབ་ཀྱི་
རང་བཞིན་ལ་ཡང་ཉོན་མོངས་པ་ལ་སོགས་པའི་སྒྲིབ་པའི་དྲི་མ་མེད་ཅིང་དེའི་རྣམ་པ་ཡེ་ཤེས་ཀྱི་གཟུང་དུ་མེད་པའོ་ཞེས་པའོ། །རྣམ་མང་ཡེ་ཤེས་སྣ་ཚོགས་སྦྱིན་པར་བྱེད། །ཅེས་པ་ནི་སྤྱོད་པའི་རང་བཞིན་ཏེ། མངོན་པར་བྱང་ཆུབ་པ་ཉིད་ཀྱི་ཚེ་ན་སྔོན་གྱི་སྨོན་ལམ་གྱི་ཤུགས་ཀྱིས་མི་ཟད་པ་ལ་སོགས་པའི་རྡོ་རྗེའི་རྒྱན་རྣམས་སེམས་ཅན་རྣམ་པ་མང་པོ་ལ་ཇི་ལྟར་རྗེས་སུ་མཐུན་པར་ལུང་གི་ཆོས་དང་རྟོགས་པའི་ཆོས་དག་སྟོན་ཏེ། ཆོས་དེ་དག་བསྟན་ན་སེམས་ཅན་རྣམ་པ་སྣ་ཚོགས་པ་དེ་རྣམས་ཀྱིས་ཡེ་ཤེས་ཐོབ་པར་འགྱུར་པའི་ཕྱིར་རོ། །གཉིས་སུ་ན་རྒྱུའི་ཆོ་གའི་སྤྱོད་པ་ལ་ཡང་བྱ་སྟེ། རྣམ་པར་དག་པའི་ཆོས་དེ་ཉིད་ལ་འཇུག་པའི་ཚེ་ཀུན་རྫོབ་བ་དང་དོན་དམ་པའི་ཡེ་ཤེས་ཐོབ་པར་བྱེད་པའི་ཕྱིར་རོ། །ངོ་བོ་ཉིད་ཀྱིས་རྟག་ཏུ་སྟོང་པ་ཉིད། །ཅེས་པ་ནི་ཀུན་དུ་སངས་རྒྱས་པའི་རང་བཞིན་ལ་བྱ་སྟེ། ཕྱི་གཟུང་བར་བྱ་བའི་ཆོས་རྣམས་ཀྱང་རང་བཞིན་མེད་ན། འཛིན་པར་བྱེད་པའི་ཡེ་ཤེས་ཀྱང་མེད་དེ། དེ་ལྟར་གཟུང་བ་དང་འཛིན་པའི་ཆ་གཉིས་ཀ་སྤངས་པའི་རང་བཞིན་ཕྱིན་ཅི་མ་ལོག་པར་ཡོངས་སུ་གྲུབ་པའི་མཚན་ཉིད་ལ་བྱའོ། །རྐྱེན་ལ་རག་ལས་ཟབ་ཅིང་བལྟ་བར་དཀའ། །ཞེས་པ་ནི་མྱ་ངན་ལས་འདས་པའི་རང་བཞིན་ལ་བྱ་སྟེ། རྐྱེན་ལ་རག་ལས་ཞེས་པ་ནི་གཞན་གྱི་དབང་གི་མཚན་ཉིད་ཀྱི་ཡེ་ཤེས་མར་མེའི་རྒྱུན་དང་འདྲ་བ་སྐད་ཅིག་མའི་རྒྱུན་མི་འཆད་པར་རྟེན་ཅིང་འབྲེལ་པར་འབྱུང་བའི་རང་བཞིན་ཞེས་པའོ། །ཟབ་ཅིང་བལྟ་བར་དཀའ་ཞེས་པ་ནི་ཟབ་པ་ནི་གཟུང་བ་དང་འཛིན་པའི་ཆ་གཉིས་སྤངས་པ་སྟོང་པ་ཉིད་ཀྱི་རང་བཞིན་ནོ། །དེ་བས་ན་སྟོང་པ་ཉིད་ཀྱི་རང་བཞིན་དེ་ལ་སྔོན་པོ་ལ་སོགས་པའི་རྣམ་པ་མེད་པས་བལྟ་པར་དཀའ་ཞེས་པའོ། །ཁྱད་པར་འགྲོ་བ་རྣམས་ལ་རྟག་པ་རུ། །ཞེས་པ་ནས། དེ་ལས་གོ་འཕང་རྙེད་དཀའ་གཞན་མེད་དོ། །ཞེས་པའི་བར་ནི་བྱང་ཆུབ་ཀྱི་རང་བཞིན་རྣམ་པར་དག་པའི་ཆོས་ཉིད་དེ་ལ་འཇུག་ཅིང་གོམས་པར་བྱེད་པ་དེའི་འབྲས་བུ་ཐོབ་པའི་རིམ་པ་བཤད་པ་སྟེ། ཁྱད་པར་འགྲོ་བ་རྣམས་ལ་རྟག་པ་རུ། །རྣམ་པར་བསམས་པའི་འབྲས་བུ་མཆོག་སྦྱིན་བྱེད། །ཅེས་པ་ནི་རྣམ་པར་དག་པའི་ཆོས་ཉིད་དེ་ལ་ཉན་པ་དང་བསམས་པ་
དང་གོམས་པར་བྱས་ན་འཇིག་རྟེན་གྱི་རྒྱལ་པོ་དང་ལོངས་སྤྱོད་ལ་སོགས་པ་བདེ་བའི་མཆོག་ཐོབ་པར་འགྱུར་རོ་ཞེས་པའོ། །ཇི་ལྟར་ནམ་མཁའ་ཆགས་མེད་སྤྱོད་ཡུལ་ཅན། །འགྲོ་བ་ཀུན་གྱི་གནས་སུ་གྱུར་པ་ལྟར། །དེ་བཞིན་རྣམ་པར་དག་པའི་ཆོས་ཉིད་འདི། །སྲིད་གསུམ་མ་ལུས་འབྱོར་པ་འབྱུང་བར་བྱེད། །ཅེས་པ་ནི་རྣམ་པར་དག་པའི་ཆོས་ཉིད་དེ་ལ་མོས་པས་སྤྱོད་པའི་ས་ལ་གནས་ནས་གོམས་པར་བྱས་ན་ཁམས་གསུམ་གྱི་དབང་པོ་མངོན་པར་མཐོ་པའི་མཚན་ཉིད་ཐོབ་པར་འགྱུར་རོ་ཞེས་པ་སྟེ། རྣམ་པར་དག་པའི་ཆོས་རྣམ་པར་མི་རྟོག་ཀྱང་དེ་ལྟ་བུའི་འབྲས་བུ་འབྱུང་སྟེ་དག་པ་ནི་དཔེར་ན་ནམ་མཁའ་རྣམ་པར་མི་རྟོག་ཀྱང་འགྲོ་བ་ཐམས་ཅད་ཀྱི་གནས་བྱེད་པ་བཞིན་དུ་རྣམ་པར་དག་པའི་ཆོས་ཉིད་དེ་ཡང་རྣམ་པར་མི་རྟོག་བཞིན་དུ་ཁམས་གསུམ་གྱི་འབྱོར་པ་འབྱུང་བར་བྱེད་དེ། །དེ་བས་ན། ཇི་ལྟར་ནམ་མཁའ་ཆགས་མེད་སྤྱོད་ཡུལ་ཅན། །འགྲོ་བ་ཀུན་གྱི་གནས་སུ་འགྱུར་པ་ལྟར། །དེ་བཞིན་རྣམ་པར་དག་པའི་ཆོས་ཉིད་འདི། །སྲིད་གསུམ་མ་ལུས་འབྱོར་པ་འབྱུང་བར་བྱེད། །ཅེས་གསུངས་པ་ཡིན་ནོ། །མཆོག་སྐྱེས་མཁས་པ་གང་ཞིག་འདིར་སྤྱོད་ན། །རྒྱལ་བ་ཀུན་དང་སྤྱོད་ཡུལ་གཅིག་པར་འགྱུར། །ཞེས་པ་ནི་ས་རབ་ཏུ་དགའ་བ་ལ་གནས་པ་རྣམས་ཀྱིས་གོམས་པར་བྱས་ན་དེའི་འབྲས་བུ་སངས་རྒྱས་རྣམས་དང་སྤྱོད་ཡུལ་གཅིག་པར་འགྱུར་རོ། །རྒྱལ་བས་ཇི་སྐད་གསུངས་པའི་ཆོས་ཉིད་ནི། །ཤིན་ཏུ་རྣམ་དག་ཐམས་ཅད་སྣང་བྱེད་པ། །དེ་ལས་གོ་འཕང་རྙེད་དཀའ་གཞན་མེད་དོ། །ཞེས་པ་ནི་སངས་རྒྱས་ཐོབ་པ་ནི་འབྲས་བུ་སྟེ། སངས་རྒྱས་པ་ལ་རྙེད་པར་དཀའ་བ་གཞན་མེད་ཅིང༌། འཇིག་རྟེན་གྱི་ཁམས་ཐམས་ཅད་དུ་ཐམས་ཅད་མཁྱེན་པའི་ཡེ་ཤེས་ཀྱིས་ཁྱབ་པར་སྣང་བར་མཛད་པའི་ཕྱིར་རོ། །རྒྱལ་བས་ཇི་སྐད་གསུངས་པའི་ཆོས་ཉིད་ནི། །ཤིན་ཏུ་རྣམ་དག་ཅེས་པ་ནི་དེ་ལྟ་བུའི་ཆོས་ཉིད་རྣམ་པར་དག་པ་བཅོམ་ལྡན་འདས་རྣམ་པར་སྣང་མཛད་ཀྱིས་གསུངས་སོ་ཞེས་པ་ནི་སྡུད་པ་པོའི་ཚིག་གོ །ཡངས་པའི་ཆོས་ནི་ཟབ་ལ་འགྲིབ་མེད་ཅིང༌། །མཉམ་མེད་འཇིག་རྟེན་ཕན་བྱེད་དེ་ལ་ནི། །རྣམ་དག་རྣམ་པར་སྦྱངས་ཏེ་སྤྱད་པར་གྱིས། །ཞེས་པ་ལ་དེ་ལྟ་བུའི་རང་བཞིན་གྱི་ཆོས་དེ་
ལ་རྣམ་པར་རྟོག་པ་སྤངས་ཏེ་སྤྱད་པར་གྱིས་ཤིག་ཅེས་པའོ། །ཡངས་པའི་ཆོས་ནི་ཟབ་ལ་འགྲིབ་མེད་ཅིང༌། །ཞེས་པ་ནི་ཆོས་ཉིད་རྣམ་པར་དག་པ་དེ་རྒྱ་ཆེ་ཞིང་མི་འགྱུར་བར་ཡོངས་སུ་གྲུབ་པའི་མཚན་ཉིད་ཡིན་པས་འགྲིབ་བའམ། འགོག་པ་མེད་ཅེས་པ་སྟེ། ཆོས་ཉིད་དེའི་རང་བཞིན་སྤྱིར་བསྟན་པའོ། །གསང་བ་བའི་བདག་པོ་དེ་ལ་འདོད་པའི་ཁམས་ཀྱི་དབང་ཕྱུག་ལ་མྱོས་པར་བྱེད་པ་ཞེས་བྱ་བའི་རིག་སྔགས་ཡོད་དེ་ཞེས་པ་ནས། འདི་ལྟ་སྟེ་དཔེར་ན་གསང་སྔགས་ཀྱིས་ནི་མེའི་ཚ་བ་མེད་པར་བྱས་ནས་གྲང་བར་བྱེད་པར་འགྱུར་རོ། །རིགས་ཀྱི་བུ་དག་དཔེའི་ཚིག་འདི་རྣམས་ཀྱིས་གསང་སྔགས་ཀྱི་མཐུ་ལ་མངོན་པར་དད་པར་བྱའོ་ཞེས་པའི་བར་གྱིས་སྔགས་ཀྱི་རྒྱུ་དང་རང་བཞིན་དང་མཐུ་དང་འབྲས་བུ་རྣམས་བཤད་ལ། རྒྱུ་དང་རང་བཞིན་ནི་གོང་དུ་ཡི་གེ་ལ་སོགས་པའི་ནང་དུ་བཤད་དོ། །སྐབས་འདིར་ནི་སྔགས་ཀྱི་མཐུ་བསྟན་པར་བཤད་དེ། དེ་ཡང་སྒྲུབ་པ་པོ་ཡིད་གཉིས་དང་ཐེ་ཚོམ་ཅན་གང་དག་བསྒྲུབ་པ་ལ་ཐེ་ཚོམ་དུ་གྱུར་པ་དང༌། གྲུབ་པ་ཐོབ་བམ་མི་ཐོབ་སྙམ་དུ་ཐེ་ཚོམ་ཟ་བ་འོག་ནས་འབྱུང་བའི་སྔགས་ཀྱི་མཐུ་རྣམས་བསྟན་པས་བསལ་ཏེ། དེ་ལ་རབ་ནི་འདོད་པའི་ཁམས་ཀྱི་དབང་ཕྱུག་ཆེན་པོའི་རིག་སྔགས་ཀྱིས་ལྷའི་བུ་ཐམས་ཅད་སྤྱོད་པར་འགྱུར་བ་དང་གཟུགས་ཁམས་ཀྱི་དབང་ཕྱུག་ཆེན་པོ་ལ་ཡིད་མགྱོགས་ཞེས་བྱ་བའི་རིག་སྔགས་ལས་བྱུང་བའི་མཐུ་སྟེ་གཉིས་བཤད་དོ། །མིག་འཕྲུལ་མཁན་གྱི་སྔགས་ཀྱིས་སྤྱོད་པ་དང་ལྷ་མ་ཡིན་གྱི་སྔགས་ཀྱིས་སྒྱུ་མ་ལ་སོགས་པ་རྣམས་མཐུ་འབྲིང་དུ་བཤད་དོ། །དུག་དང་རིམས་ལ་སོགས་པ་མེད་པར་བྱེད་པ་དང་མ་མོ་རྣམས་ཀྱི་སྔགས་ཀྱིས་འཆི་བར་བྱེད་པ་དང༌། མེའི་ཚ་བ་མེད་པར་བྱས་ནས་གྲང་པོར་བྱེད་པ་རྣམས་མཐུ་ཐ་མར་བཤད་དོ། །གསང་བ་བའི་བདག་པོ་དེ་ལ་འདོད་པའི་ཁམས་ཀྱི་དབང་ཕྱུག་ལ་མྱོས་པར་བྱེད་པ་ཞེས་བྱ་བའི་རིག་སྔགས་ཡོད་དེ་ཞེས་པ་ནི་འདོད་པ་ནི་གཟུགས་དང་སྒྲ་དང་དྲི་དང་རོ་དང་རེག་བྱ་རྣམས་ལ་སྤྱོད་པའོ། །ཁམས་ཀྱི་དབང་ཕྱུག་ལ་ཞེས་པ་ནི་འདོད་པའི་ཁམས་ཀྱི་ལྷའི་གནས་རིམ་པ་དྲུག་གི་དབང་ཕྱུག་ལ་མོས་པར་བྱེད་པ་ཞེས་བྱ་བའི་རིག་སྔགས་ཡོད་དེ། ཁམས་དེར་སྐྱེས་པ་
རྣམས་རང་བཞིན་གྱི་རིག་སྔགས་དང་ལྡན་པས་རིག་སྔགས་དེ་བསམས་པའམ། བརྗོད་པ་ཙམ་གྱིས་འདོད་པ་ལྔའི་ལོངས་སྤྱོད་དང་ལྡན་པར་འགྱུར་རོ། །དེས་འདོད་པ་ན་སྤྱོད་པའི་ལྷའི་བུ་ཐམས་ཅད་མྱོས་པས་བརྒྱལ་བར་བྱེད་ཅིང་ཞེས་བྱ་བ་ལ་མྱོས་པ་ཞེས་པ་ནི་མི་དྲན་ཞིང་དབང་པོ་མི་གསལ་བར་གྱུར་པ་ནི་མ་ཡིན་གྱི་རིག་སྔགས་དེའི་མཐུས་ལྷའི་བུ་རྣམས་འདོད་པ་ལྔའི་ལོངས་སྤྱོད་ལ་ཆགས་ཤིང་ཞེན་པར་འགྱུར་ཏེ། འདོད་པའི་དབང་དུ་གྱུར་པས་ན་འདོད་པས་མྱོས་པ་ཞེས་བྱའོ། །མེ་ཏོག་མང་པོ་སྣ་ཚོགས་དང་ལྡན་པའི་ས་ཕྱོགས་ཉམས་དགའ་བ་རྣམས་ཀྱང་སྟོན་ཞེས་པ་ནི་དེ་ལ་མེ་ཏོག་སྣ་ཚོགས་ནི་ལྡུམ་ར་དང་མེ་ཏོག་གི་ཚལ་དང་ཡིད་དུ་འོང་བའི་སྐྱེད་མོས་ཚལ་དང༌། མེ་ཏོག་དང་ཚལ་དེ་དག་ཀྱང་དྲི་ཞིམ་ཞིང་ཁ་དོག་ཤིན་ཏུ་མཛེས་པས་བརྒྱན་པའོ། །ས་ཕྱོགས་ཉམས་དགའ་བའི་རབ་དང་རིན་པོ་ཆེ་སྣ་ཚོགས་ཀྱིས་བརྒྱན་པའི་ལྡིང་ཁང་ལ་སོགས་པ་སྟོན་པའོ། །ཡོངས་སུ་སྤྱད་པ་དང་ཉེ་བར་སྤྱད་པ་རྣམ་པ་ཐ་དད་པ་སྣ་ཚོགས་རྣམས་ཀྱང་མངོན་པར་སྤྲུལ་ནས་ཞེས་པ་ནི་འདོད་པ་རྣམ་པ་ལྔའི་ལོངས་སྤྱོད་དང་ཉེ་བར་སྤྱད་པ་སྟེ། བཟའ་བའི་ཁ་ཟས་དང་ལྷའི་གོས་རབ་ཏུ་བཟང་ཞིང་འཇམ་པ་ལ་སོགས་པ་རྣམས་སོ། །མངོན་པར་སྤྲུལ་པ་ནི་གནས་དེ་ན་ལྷའི་བུ་རྣམས་རང་རང་གི་རིག་སྔགས་ཀྱི་མཐུས་འདོད་པ་རྣམ་པ་ལྔའི་ལོངས་སྤྱོད་འབྱུང་བ་ལ་བྱའོ། །གཞན་འཕྲུལ་དབང་བྱེད་ཀྱི་ལྷ་རྣམས་ལ་ཡང་སྦྱིན་ལ་བདག་ཉིད་ཀྱང་ཡོངས་སུ་སྤྱོད་དོ་ཞེས་པ་དེ་ལ་གཞན་འཕྲུལ་དབང་བྱེད་ཅེས་པ་ནི་རང་གི་མཐུ་ལས་འདོད་པ་རྣམ་པ་ལྔའི་ལོངས་སྤྱོད་འབྱུང་བ་རྣམས་ལྷའི་བུ་མོ་རྣམས་ལའང་སྦྱིན་ལ་དེ་དག་ཀྱང་ཡོངས་སུ་སྤྱོད་དོ། །དེ་བཞིན་དུ་བྱང་ཆུབ་སེམས་དཔའ་ཡང་དེ་བཞིན་གཤེགས་པ་ལ་མཆོད་པ་ལ་སོགས་པ་ཡིད་བཞིན་དུ་སྤྱོད་ཀྱང་བདག་ཉིད་དེ་ལ་མ་ཆགས་པར་སྤྱོད་དོ། །འདི་ལྟ་སྟེ། ལྷའི་དབང་ཕྱུག་ཆེན་པོ་ལ་ཡིད་མགྱོགས་ཞེས་བྱ་བའི་རིག་སྔགས་ཡོད་དེ་ཞེས་བྱ་བ་ནི་རིག་སྔགས་དེ་བསམས་པ་ཙམ་གྱིས་སེམས་ཅན་གྱི་དོན་བྱ་བ་དང་ཇི་ལྟར་འདོད་པའི་གནས་དེ་དག་ཏུ་སྐད་ཅིག་ཡུད་ཙམ་གྱིས་ཕྱིན་པར་འགྱུར་བས་ན་ཡིད་མགྱོགས་ཞེས་བྱའོ། །དེས་སྟོང་གསུམ་གྱི་སྟོང་ཆེན་
པོའི་འཇིག་རྟེན་གྱི་ཁམས་སུ་སེམས་ཅན་གྱི་དགོས་པ་བྱེད་ཅིང་ཞེས་པ། དེ་ལ་སྟོང་གསུམ་གྱི་སྟོང་ཆེན་པོ་ནི་སྟེང་འོག་ཀུན་ལ་བྱ་བའམ། དེ་མ་ཡིན་པར་གཟུགས་ཀྱི་ཁམས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལ་བྱ་ལ། སྟོང་གསུམ་ནི་གཞུང་ལས་གྲགས་པའོ། །སེམས་ཅན་གྱི་དགོས་པ་ནི་གཟུགས་ཀྱི་སེམས་ཅན་རྣམས་ལ་རིག་སྔགས་དེའི་མཐུས་འོག་ནས་འབྱུང་བའི་ལོངས་སྤྱོད་ལ་སོགས་པས་སེམས་ཅན་རྣམས་ཀྱི་དོན་བྱེད་པའོ། །ཉེ་བར་སྤྱད་པ་དང་ཡོངས་སུ་སྤྱད་པ་ཐམས་ཅད་ཀྱང་མངོན་པར་སྤྲུལ་ནས་ཞེས་པ་ནི་དེ་ལ་ཁ་ཟས་ཁམ་གྱིས་ཟབ་དང་དྲིལ་སོགས་པ་ཁྱད་པར་དུ་མི་སྤྱོད་ལ། ལོངས་སྤྱོད་གཞན་ནི་ལྷག་མ་དང་འདྲའོ། །གནས་གཙང་མའི་རིགས་ཀྱི་ལྷའི་བུ་རྣམས་ལ་ཡང་སྦྱིན་ལ་བདག་ཉིད་ཀྱང་ཀུན་དུ་སྤྱོད་དོ་ཞེས་པ་གཟུགས་ཀྱི་ཁམས་དེ་ན་གཙང་མའི་རིགས་ཀྱི་ལྷ་རྣམས་ལ་ཡང་སྦྱིན་ལ། བདག་ཉིད་ཀྱང་རིག་སྔགས་ཀྱི་མཐུ་ལས་བྱུང་བའི་ལོངས་སྤྱོད་ལ་སྤྱོད་པའོ། །འདི་ཡན་ཆད་ནི་རིག་སྔགས་ཀྱི་མཐུ་རབ་ཏུ་བསྟན་པ་ཡིན་ནོ། །འདི་ལྟ་སྟེ་དཔེར་ན་མིག་འཕྲུལ་མཁན་ནི་གསང་སྔགས་རྣམས་ཀྱིས་ཀུན་དགའི་རབ་དང་མཚོ་དང་འབབ་ཆུ་དང་མི་ལ་སོགས་པ་རྣམ་པ་ཐ་དད་པ་སྣ་ཚོགས་སྟོན་ཏོ་ཞེས་པ་ནི་མིག་འཕྲུལ་གྱི་སྔགས་གྱི་མཐུ་བཤད་དེ་དེ་ཡང་གང་ཞེ་ན། མིག་འཕྲུལ་གྱི་སྔགས་མཁན་ནི་གསང་སྔགས་རྣམས་ཀྱིས་ཞེས་པ་ནི་དབང་པོ་ལ་སོགས་པའི་ལྷ་རྣམས་དང་ལྷ་མ་ཡིན་འཐབ་པའི་ཚེ་ན། སྔགས་ཀྱིས་གྲངས་མེད་པའི་ལྷའི་དབང་པོ་རྣམས་སུ་སྤྲུལ་ནས་ལྷ་མ་ཡིན་རྣམས་ཀྱི་མིག་བསླུ་བ་དང༌། གང་ལ་བརྒལ་པའི་གཏོལ་མེད་པར་མིག་འཕྲུལ་གྱི་མཐུས་བྱེད་པའོ། །མིག་འཕྲུལ་གྱི་སྔགས་ཀྱི་མཐུ་ལས་ཀུན་དགའི་རབ་བཟང་པོ་དང༌། མཚོ་དང་འབབ་ཆུ་དང་མི་ལ་སོགས་པ་སྔགས་ཀྱི་མཐུས་མངོན་པར་སྤྱོད་ཅིང་སྟོན་ཏོ། །འདི་ལྟ་སྟེ་དཔེར་ན་ལྷ་མ་ཡིན་རྣམས་ནི་གསང་སྔགས་ཀྱིས་སྐྱུ་མ་རྣམས་སྟོན་ཏོ་ཞེས་པ་ནི་ལྷ་མ་ཡིན་གྱི་སྔགས་ཀྱི་མཐུ་བཤད་དེ། དེ་ཡང་གང་ཞེ་ན། ལྷ་མ་ཡིན་དང་དབང་པོ་ལ་སོགས་པའི་ལྷ་རྣམས་འཐབ་པའི་ཚེ་ན་ལྷ་མ་ཡིན་གྱི་སྔགས་ཀྱི་མཐུས་ལྷ་མ་ཡིན་གྲངས་མེད་པར་སྤྲུལ་པ་དང༌། སྒྲ་གཅན་གྱི་གཟུགས་ལྷ་མ་ཡིན་
གྱི་གནས་ནས་རིའི་རྒྱལ་པོ་རི་རབ་ལས་འཕགས་པའི་ལུས་སུ་གྱུར་ནས་ལྷ་རྣམས་སྐྲག་པ་དང་མཐུས་བྱིན་གྱིས་བརླབས་པའི་སྒྱུ་མ་རྣམས་སྟོན་པའོ། །གོང་དུ་དབང་པོ་ལ་སོགས་པའི་མི་འཕྲུལ་གྱི་སྔགས་ཀྱི་མཐུ་བཤད་པ་དང༌། ལྷ་མ་ཡིན་གྱི་སྔགས་ཀྱི་མཐུ་བཤད་པ་གཉིས་ནི་མཐུ་འབྲིང་པོ་བཤད་པ་ཟིན་ནོ། །འདི་ལྟ་སྟེ་དཔེར་ན་གསང་སྔགས་དག་གིས་ནི་དུག་དང་རིམས་ལ་སོགས་པ་མེད་པར་འགྱུར་རོ་ཞེས་པ་ནི། མི་རྣམས་ཀྱི་སྔགས་ཀྱི་མཐུ་བཤད་དེ། དེ་ཡང་གང་ཞེ་ན། དེ་སྔགས་དེ་ཉིད་ཀྱི་མཐུས་དུག་ཐམས་ཅད་དང་རིམས་ལ་སོགས་པའི་ནད་ཐམས་ཅད་མེད་པར་བྱེད་པ་ལ་བྱའོ། །འདི་ལྟ་སྟེ་དཔེར་ན་མ་མོ་ཞེས་བྱ་བའི་ལྷ་མོ་རྣམས་ནི་གསང་སྔགས་ཀྱིས་སེམས་ཅན་རྣམས་ལ་ནད་འགོ་བ་གཏོང་ངོ་ཞེས་པ་ནི་མ་མོ་བདུན་པོ་རྣམས་ཀྱི་གསང་སྔགས་ཀྱི་མཐུ་བཤད་དེ། དེ་ཡང་གང་ཞེ་ན། དབང་པོ་ལ་སོགས་པའི་ལྷ་རྣམས་དང་ལྷ་མ་ཡིན་རྣམས་འཐབ་པའི་ཚེ་ལྷ་རྣམས་ཀྱི་ལྷ་མ་ཡིན་ཐོབ་པར་མ་གྱུར་ན་དང་པོ་དང་ཚངས་པ་ལ་སོགས་པ་སོ་སོ་ལས་མ་མོ་ཞེས་པའི་ལྷ་མོ་བདུན་སྤྲུལ་ཏེ། ལྷ་མོ་བདུན་པོ་དེ་རྣམས་ཀྱིས་མཚོན་གྱིས་བཏབ་པའི་ཁྲགས་ལམ་ལྷུང་བར་འཐུངས་པ་དང་གདོང་ལྷ་མ་ཡིན་རྣམས་ཞི་བར་འགྱུར་བ་ལ་ཡང་བྱ་ལ། བདུན་པོའི་གསང་སྔགས་དེས་གནོད་པའི་ལས་རྣམས་བྱེད་པའི་ཚེ་མ་མོ་རྣམས་ཀྱི་སྔགས་ཀྱི་ཚིག་བཞིན་བྱས་ན་སེམས་ཅན་འཆི་བར་བྱེད་པ་དང་ལྷ་དང་ལྷ་མ་ཡིན་དུ་འཐབ་པའི་ཚེ་འཇིག་རྟེན་ན་སེམས་ཅན་དགེ་བའི་སྤྱོད་པ་མང་ཞིང་བསོད་ནམས་ཆེ་ན་ལྷ་རྣམས་རྒྱལ་བར་འགྱུར་ལ། དགེ་བ་སྤྱོད་པ་ཉུང་ཞིང་མཐུ་ཆུང་ན་ལྷ་མ་ཡིན་རྣམས་རྒྱལ་བར་འགྱུར་ཏེ། དེ་ལ་ལྷ་རྣམས་རྒྱལ་བར་གྱུར་ན་གང་ཟླ་བ་དང་ཉི་མ་གཟས་ཟིན་པའི་དངོས་གྲུབ་རྣམས་ཀྱང་འཐོབ། ལྷ་མ་ཡིན་རྣམས་རྒྱལ་ན་སེམས་ཅན་གྱི་ཁམས་སུ་སྔགས་ཀྱི་མཐུས་སེམས་ཅན་རྣམས་འཆི་བར་བྱེད་པའི་རིམས་རྣམས་འབྱུང་བར་བྱེད་པའོ། །འདི་ལྟ་སྟེ་དཔེར་ན་གསང་སྔགས་ཀྱིས་ནི་མེའི་ཚ་བ་མེད་པར་བྱས་ནས་གྲང་བར་བྱེད་པར་འགྱུར་རོ་ཞེས་པ་ནི་སྔགས་ཀྱི་མཐུས་མེ་འབར་བའི་ནང་དུ་ཞུགས་ཀྱང་ཚིག་པ་དང་གདུང་བ་ལ་སོགས་པ་མད་ཅིང་ཆུའི་ནང་དུ་འགྲོ་བ་དང་འདྲ་སྟེ་གྲང་བར་འགྱུར་རོ། །རིགས་ཀྱི་བུ་དག་
དཔེའི་ཚིག་འདི་རྣམས་ཀྱིས་གསང་སྔགས་ཀྱི་མཐུ་ལ་མངོན་པར་དད་པར་བྱའོ་ཞེས་པ་ནི་གོང་དུ་མཐུ་རབ་འབྲིང་རྣམ་པ་གསུམ་བསྟན་པ་ལ་གང་མ་དད་པ་རྣམས་དད་པར་འགྱུར་པ་དང༌། །ཐེ་ཚོམ་དང་ཡིད་གཉིས་ཟ་བ་རྣམས་ཀྱི་ཐེ་ཚོམ་བསལ་ནས་གསང་སྔགས་ཀྱི་མཐུ་ལ་མངོན་པར་དད་པར་བྱའོ་ཞེས་བསྐུལ་བའོ། །གསང་སྔགས་ཀྱི་མཐུ་དེ་ཡང་གསང་སྔགས་རྣམས་ལས་བྱུང་བ་ཡང་མ་ཡིན་ཞེས་པ་ནས། རྟག་ཏུ་རྒྱུན་མི་འཆད་པར་གསང་སྔགས་ཀྱི་ཚུལ་གྱི་རྗེས་སུ་འཇུག་པར་བྱའོ་ཞེས་པའི་བར་གྱིས་སྔགས་ཀྱི་རང་བཞིན་བཤད་དེ། དེ་ཡང་གང་ཞེ་ན། གསང་སྔགས་ཀྱི་མཐུ་དེ་ཡང་གསང་སྔགས་རྣམས་ལས་བྱུང་བ་ཡང་མ་ཡིན་པ་ནི། གསང་སྔགས་ཀྱི་མཐུ་དེ་གསང་སྔགས་ཀྱི་ཡིག་འབྲུ་ལས་བྱུང་བ་ཡང་མ་ཡིན་ཏེ། གལ་ཏེ་གསང་སྔགས་ཀྱི་ཡིག་འབྲུ་ལ་ཡོད་ན་ནི་གསང་སྔགས་ཀྱི་གླེགས་བམ་ལ་སོགས་པ་རྐུན་པོས་ཀྱང་མི་ཐོབ། མེས་ཀྱང་ཚིག་པར་མི་འགྱུར་ཏེ་དེ་བས་ན་སྔགས་ཀྱི་ཡི་ག་འབྲུ་ལས་མཐུ་འབྱུང་བ་ཡང་མ་ཡིན་ནོ། །རྫས་ལ་འཇུག་པ་ཡང་མ་ཡིན་ཞེས་པ་ནི་རལ་གྲི་དང་འཁོར་ལོ་དང༌། རིལ་བུ་ལ་སོགས་པའི་རྫས་རྣམས་ལ་སྟེ། རྫས་དེ་རྣམས་ལ་གསང་སྔགས་ཀྱི་མཐུ་ཞུགས་ནས་གྲུབ་པར་འབྱུང་བ་ཡང་མ་ཡིན་ཞེས་པའོ། །སྦྱོར་བ་པོ་ལས་དམིགས་པ་ཡིན་ཞེས་པ་ནི་སྒྲུབ་པ་ལ་འཇུག་པའི་སྦྱོར་བ་དེ་ཉིད་ལས་གསང་སྔགས་ཀྱི་མཐུ་འབྱུང་པ་ཡང་མ་ཡིན་ཏེ། གལ་ཏེ་སྒྲུབ་པ་ལ་འཇུག་པ་ལས་བྱུང་བ་ཡིན་ན་ནི་གྲུབ་ཟིན་པ་ཡིན་པས་མི་དགོས་སོ་ཞེས་པའོ། །རིགས་ཀྱི་བུ་དག་འོན་ཀྱང་གསང་སྔགས་ཀྱི་བྱིན་གྱི་རླབས་ཀྱིས་ཆོས་ཉིད་འབྱུང་བ་ལས་འདའ་བར་ཡང་མི་འགྱུར་ཏེ། དུས་གསུམ་ལས་འདས་པའི་ཕྱིར་དང་རྟེན་ཅིང་འབྲེལ་བར་འབྱུང་བ་ཟབ་མོ་བསམ་གྱིས་མི་ཁྱབ་པ་ལས་མངོན་པར་གྲུབ་པའི་ཕྱིར་རོ་ཞེས་པ་ན་དེ་བཞིན་གཤེགས་པ་རྣམས་འཇིག་རྟེན་དུ་བྱུང་ཡང་རུང་མ་བྱུང་ཡང་རུང་སྟེ་གསང་སྔགས་ཀྱི་ཆོས་ཉིད་ནི་ཐམས་ཅད་དུ་གནས་པའོ་ཞེས་བཤད་དེ། རིགས་ཀྱི་བུ་དག་ཀྱང་གསང་སྔགས་ཀྱི་བྱིན་གྱི་རླབས་ཀྱིས་ཆོས་འབྱུང་བ་ལས་འདའ་བར་ཡང་མི་འགྱུར་ཏེ། དུས་གསུམ་ལས་འདས་པའི་ཕྱིར་ཞེས་པ་ནི་
དུས་གསུམ་སྟེ་སྔ་མ་འདས་པའི་དུས་ན་གྲུབ་པའི་རང་བཞིན་ཡིན་ན་ནི་མ་འོངས་པ་དང་ད་ལྟར་གྱི་དུས་ན་གྲུབ་པར་མི་འགྱུར་ལ། གལ་ཏེ་མ་འོངས་པའི་དུས་དང་ད་ལྟར་གྱི་དུས་ན་གྲུབ་པའི་རང་བཞིན་ཡོད་ན་ནི་སྔ་མ་འདས་པའི་དུས་ན་ཡང་གྲུབ་པར་མི་འགྱུར་ཏེ། དེ་བས་ན་སྔགས་གྲུབ་པའི་རང་བཞིན་ནི་དུས་གསུམ་གང་ལ་ཡང་གནས་པ་མ་ཡིན་པའི་ཕྱིར་དུས་གསུམ་ལས་འདས་པའོ། །རྟེན་ཅིང་འབྲེལ་བར་འབྱུང་བ་ཟབ་མོ་བསམ་གྱིས་མི་ཁྱབ་པ་ལས་མངོན་པར་གྲུབ་པའི་ཕྱིར་རོ་ཞེས་པ་ནི་དཔེར་ན་མེ་ཏོག་སྣ་ཚོགས་དང་འདྲ་སྟེ། ས་བོན་དང་མྱུ་གུ་དང་ལོ་མའི་ཚེ་ཁ་དོག་སྔོན་པོ་ལ་སོགས་པ་གཞན་ལ། མེ་ཏོག་དུ་གྱུར་པའི་ཚེ་ཁ་དོག་གཞན་དུ་གྱུར་པ་ལྟ་བུས་རྩྭ་རྩུབ་མོ་དང་སྔོན་པོ་ལ་སོགས་པ་ཟོས་ཀྱང་འོ་མ་འཇམ་ཞིང་དཀར་བའི་རང་བཞིན་དུ་གྱུར་པ་ལྟ་བུ་སྟེ། དེ་ལྟ་བས་ན་སྔགས་ཀྱི་དངོས་གྲུབ་ནི་གང་ལ་ཡང་མི་གནས་མོད་ཀྱི་ཟབ་མོ་བསམ་གྱིས་མི་ཁྱབ་པའི་ཆོས་ཉིད་དང་རྒྱུ་དང་རྐྱེན་གཅིག་ཏུ་ཚོགས་པ་སྔགས་ཀྱི་ཆོས་ཉིད་ཀྱིས་བྱིན་གྱི་རླབས་ལས་གྲུབ་པ་རབ་འབྲིང་རྣམ་པ་གསུམ་ལ་སོགས་པ་ཐོབ་པར་འགྱུར་རོ། །སྔགས་ཀྱིས་བྱིན་གྱིས་བརླབས་པའི་ཆོས་ཉིད་ལས་འབྱུང་བ་ལས་འདའ་བར་ཡང་མི་འགྱུར་ཏེ་ཞེས་བ་ནི་བྱིན་གྱིས་རློབ་པ་ཡང་མི་འགྱུར་བར་བཤད་དེ། དེ་ལ་བྱིན་གྱིས་བརླབས་ཞེས་པ་གང་གྲུབ་པ་ཉིད་ལ་ཆོས་ཉིད་ཀྱིས་བྱིན་གྱིས་རློབ་ཅིང་གྲུབ་པ་ཐོབ་པ་དེ་དག་བརྟན་ཞིང་མི་འགྱུར་པའོ། །རིགས་ཀྱི་བུ་དག་དེ་ལྟ་བས་ན་ཆོས་བསམ་གྱིས་མི་ཁྱབ་པའི་ངོ་བོ་ཉིད་དུ་རྟོགས་པར་བྱའོ་ཞེས་གསུངས་པ་ཡིན་ནོ། །དེ་ནས་ཡང་བཅོམ་ལྡན་འདས་དུས་གསུམ་དུ་ཆགས་པ་མེད་པའི་སྟོབས་ཀྱི་གཞི་བྱིན་གྱིས་རློབ་པ་ཞེས་པ་ནས། ཡང་དག་པར་རྫོགས་པའི་སངས་རྒྱས་ཀྱི་སྙིང་པོའི་ཚིག་གིས་མཚན་པ་རྣམ་པར་རིག་པའི་དབྱངས་ཀྱི་སྒྲ་གཅིག་ནས་གཅིག་ཏུ་མངོན་པར་གྲག་གོ་ཞེས་པའི་བར་གྱིས་བྱང་ཆུབ་ཀྱི་རང་བཞིན་ཡན་ལག་བཞི་དང་ལྡན་པའི་རྟེན་སྟོན་པའི་ཡི་གེ་ཨ་རྣམ་པ་བཞི་བཅོམ་ལྡན་འདས་ཀྱིས་གསུངས་ཏེ། ཨ་རྣམ་པ་བཞི་སྔར་ཡང་བཤད་ན། ཅིའི་ཕྱིར་འདིར་ཡང་བཟླས་ཏེ་གསུངས་ཤེ་ན། སྔར་བཤད་པ་ནི་དོན་དམ་པའི་ཏིང་ངེ་འཛིན་གྱི་སྒོར་
གྱུར་པའི་ཡིག་འབྲུ་རེ་རེ་པ་སྤྱིར་བཤད་པ་སྟེ། འདིར་ཡང་བཟླས་ཏེ་གསུངས་པ་ནི་གསང་སྔགས་སྒྲུབ་པས་དེའི་དོན་བསྒོམ་ཞིང་བཟླས་པར་བྱ་བའི་ཕྱིར་ཁྱད་པར་དུ་གསུངས་པ་ཡིན་ནོ། །དེ་ལ་དུས་གསུམ་དུ་ཆགས་པ་མེད་པའི་སྟོབས་ཀྱི་གཞི་བྱིན་གྱིས་རློབ་པ་དེ་བཞིན་གཤེགས་པའི་གནས་བསམ་གྱིས་མི་ཁྱབ་པའི་རྒྱན་རྣམ་པར་དག་པའི་སྙིང་པོ་ཅན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་པ་ནི་ཨ་རྣམ་པ་བཞི་པོ་དེ་གསུངས་པའི་ཕྱིར་བཅོམ་ལྡན་འདས་ཏིང་ངེ་འཛིན་དུ་ཞུགས་པ་སྟེ། དེ་རྣམས་ཀྱིས་ཀྱང་དོན་དམ་པ་དང་ཀུན་རྫོབ་ཀྱི་དོན་རྣམ་པ་གཉིས་སྟོན་ཏེ། དེ་ལ་དོན་དམ་པ་སྟོན་པ་ནི་ཡི་གེ་ཨ་དེའི་སྒོ་ནས་དེ་བཞིན་ཉིད་སྟོན་པའོ། །ཀུན་རྫོབ་ཏུ་སྟོན་པ་ནི་ཡི་གེ་ཨ་དེ་ལས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་འབྱུང་བར་བསྟན་པ་སྟེ། གང་གི་ཕྱིར་ཡི་གེ་བརྒྱ་བའི་ལེའུ་ཨ་འདི་རྣམས་ལས་ཀ་ལ་སོགས་པ་སུམ་ཅུ་རྩ་གཉིས་སྦྲོས་པར་བཤད་དེ་ཡི་གེ་སུམ་ཅུ་རྩ་གཉིས་པོ་དེ་རྣམས་ཀྱང་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་སུ་བལྟའོ་ཞེས་འབྱུང་བའི་ཕྱིར་རོ། །ཏིང་ངེ་འཛིན་འདི་ལས་དོན་རྣམ་པ་གཉིས་སུ་སྟོན་པའོ། །དེ་ལ་དུས་གསུམ་དུ་ཆགས་པ་མེད་པའི་སྟོབས་ཀྱི་གཞི་ཞེས་པ་ནི་དོན་དམ་པ་ནི་དེ་བཞིན་ཉིད་དེ་ཡི་གེ་ཨ་རྣམས་ཀྱི་རྟེན་དུ་བསྟན་པར་བྱ་བ་སྟེ། དུས་གསུམ་དུ་ཆགས་པ་མེད་པའི་སྟོབས་ཞེས་པ་ན་ད་བཞིན་ཉིད་ཀྱི་རང་བཞིན་མི་འགྱུར་བར་ཡོངས་སུ་གྲུབ་པའི་མཚན་ཉིད་ཡིན་པས་ནམ་མཁའ་དང་འདྲ་པ་སྟེ་དུས་གསུམ་དུ་ཐོགས་པ་མེད་པའི་མཐུ་དང་ལྡན་པ་ཞེས་པའོ། །གཞི་ཞེས་པ་ནི་དེ་བཞིན་ཉིད་ཀྱི་རང་བཞིན་ཏེ། ཡི་གེ་ཨའི་འབྲུར་བྱིན་གྱིས་རློབ་པ་སྟེ། འཁོར་བའི་མཐའ་ཇི་སྲིད་ཀྱི་བར་དུ་ཡི་གེ་ཨ་རྣམས་སུ་ལྷག་པར་གནས་ཞེས་པའི་དོན་ཏེ་དེ་ནི་དོན་དམ་པ་བསྟན་པའོ། །དེ་བཞིན་གཤེགས་པའི་གནས་བསམ་གྱིས་མི་ཁྱབ་པའི་རྒྱན་རྣམ་བར་དག་པ་ཞེས་པ་ནི་ཀུན་རྫོབ་ཏུ་ཡི་གེ་ཨ་ལས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་རྣམས་བྱུང་བར་བསྟན་པ་སྟེ། དེ་བཞིན་གཤེགས་པའི་གནས་བསམ་གྱིས་མི་ཁྱབ་པ་ཞེས་པ་ནི་དེ་བཞིན་གཤེགས་པའི་སྐུ་བསམ་གྱིས་མི་ཁྱབ་པ་སྟེ། དེ་བཞིན་གཤེགས་པའི་
སྐུ་ལས་རྫུ་འཕྲུལ་སྣ་ཚོགས་བསམ་གྱིས་མི་ཁྱབ་པ་འབྱུང་བའི་ཕྱིར་རོ། །རྒྱན་ཞེས་པ་ནི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་རྣམས་ཏེ་མཚན་དེ་རྣམས་ཏེ་དེ་ཨ་བཞི་པོ་འདི་ལས་བྱུང་བས་ན་རྒྱན་ཞེས་པ་ཨ་འདི་རྣམས་ཉིད་ལ་བྱའོ། །རྣམ་པར་དག་པ་ཞེས་པ་ནི་མཚན་སུམ་ཅུ་རྩ་གཉིས་པོ་དེ་རྣམས་ཡུལ་ན་གནས་པ་དང་གསལ་བ་ནང་ཀུན་དུ་རྫོགས་པས་ན་རྣམ་པར་དག་པ་ཞེས་བྱའོ། །སྙིང་པོ་ཅན་ཞེས་པ་ནི་འབྱུང་བའི་གནས་ཞེས་པའི་དོན་ཏེ། དེ་ལྟ་བུའི་དོན་དམ་པ་དང་ཀུན་རྫོབ་ཀྱི་དོན་སྟོན་ཅིང་འབྱུང་བའི་ཡི་གེ་ཨ་རྣམ་པ་བཞི་པོ་ཏིང་ངེ་འཛིན་འདི་ལས་བྱུང་བས་ན་ཏིང་ངེ་འཛིན་དེ་དུས་གསུམ་དུ་ཆགས་པ་མེད་པའི་སྟོབས་ཀྱི་གཞི་བྱིན་གྱིས་རློབ་པ་དེ་བཞིན་གཤེགས་པའི་གནས་བསམ་གྱིས་མི་ཁྱབ་པའི་རྒྱན་རྣམ་པར་དག་པའི་སྙིང་པོ་ཅན་ཞེས་བྱའོ། །ཆོས་ཀྱི་དབྱིངས་མ་ལུས་པ་ཇི་སྙེད་ཡོད་པ་རྣམ་པར་རིག་པར་བྱེད་པའི་སྒྲ་རྣམས་ལས་ཆོས་ཀྱི་དབྱིངས་ཀྱི་གནས་ཀྱི་སྟོབས། མི་མཉམ་པ་དང་མཉམ་པའི་སྟོབས། ཡང་དག་པར་རྫོགས་པའི་སངས་རྒྱས་ཀྱི་མོས་པ་ལས་བྱུང་བ་གནས་སྐབས་བཞི་དབྱངས་གཅིག་ལས་བྱུང་བས་ཆོས་ཀྱི་དབྱིངས་ཐམས་ཅད་ཁྱབ་པར་བྱས་ཏེ་ནམ་མཁའ་དང་མཉམ་པར་གྱུར་ནས་བྱུང་བ་ཞེས་པ་ལ། ཆོས་ཀྱི་དབྱིངས་མ་ལུས་པ་ཇི་སྙེད་ཡོད་པ་རྣམ་པར་རིག་པར་བྱེད་པའི་སྒྲ་ཞེས་པ་ནི་གནས་སྐབས་བཞི་དབྱངས་གཅིག་ལས་བྱུང་བ་ཞེས་པ་དང་འབྲེལ་ཏེ། ཨ་བཞི་པོ་འདི་མ་སྐྱེས་པའི་སྒྲ་འབྱུང་བ་ལས་རྣམ་པར་རིག་པས་ན་བུམ་པ་ལ་སོགས་པའི་ཆོས་རྣམས་ཀྱི་ཚིག་ཐམས་ཅད་ཀྱང་མ་སྐྱེས་པའི་ཚིག་ཏུ་འདུ་བར་འགྱུར་བའི་ཨ་བཞི་པོ་ཆོས་ཀྱི་དབྱིངས་ཀྱི་གནས་ཀྱི་སྟོབས་ཞེས་བྱ་བ་ལ་སོགས་པས་བྱེ་བྲག་ཏུ་གསུངས་ཏེ། ཨ་དེ་རྣམས་ཆོས་ཀྱི་དབྱིངས་ཀྱི་ཚིག་ཏུ་གྱུར་པས་ན་ཆོས་ཀྱི་དབྱིངས་ཀྱི་གནས་ཞེས་བྱའོ། །སྟོབས་ཞེས་པ་ནི་ཆོས་ཀྱི་དབྱིངས་ཀྱི་ཚིག་ལས་གཞན་དུ་མི་འགྱུར་བས་མཐུ་དང་ལྡན་པའི་ཕྱིར་རོ། །མི་མཉམ་པ་དང་མཉམ་པའི་སྟོབས་ཞེས་པ་ནི་དེ་དག་མཐུ་ཕུན་སུམ་ཚོགས་པར་བསྟན་པའོ། །ཡང་དག་པར་རྫོགས་པའི་སངས་རྒྱས་ཀྱི་མོས་པ་ལས་བྱུང་བ་ཞེས་པ་ནི་དེ་བཞིན་གཤེགས་པས་རྒྱུའི་ཚེ་ན་ཡང་དག་
པར་རྫོགས་པའི་སངས་རྒྱས་ཀྱི་ཡོན་ཏན་རྣམས་ལ་མོས་པ་ཇི་ལྟ་བ་བཞིན་དུ་མངོན་པར་བྱང་ཆུབ་པའི་ཚེ་ན་ཡོངས་སུ་རྫོགས་གྱུར་པ་དེ་ལས་ཡི་གེ་ཨ་བཞི་པོ་འདི་འབྱུང་བའི་ཕྱིར་རོ། །དབྱངས་གཅིག་ལས་བྱུང་བས་ཞེས་པ་ནི་བུམ་པ་ལ་སོགས་པའི་སོ་སོའི་ཚིག་རྣམས་མ་སྐྱེས་པའི་སྒྲ་གཅིག་པུ་ལས་བྱུང་བའི་ཕྱིར་རོ། །ཆོས་དབྱིངས་ཐམས་ཅད་ཁྱབ་པར་བྱས་ཏེ་ནམ་མཁའ་དང་མཉམ་པར་གྱུར་ནས་ཞེས་པ་ནི་མ་སྐྱེས་པའི་སྒྲས་ཆོས་ཀྱི་དབྱིངས་ཐམས་ཅད་ནམ་མཁས་ཁྱབ་པ་དང་འདྲ་བར་བྱས་ནས་ཞེས་པའམ། ཆོས་ཀྱི་དབྱིངས་ནམ་མཁའི་མཐའ་དང་མཉམ་པར་བྱས་ནས་ཞེས་པ་སྟེ། ཆོས་ཀྱི་དབྱིངས་ཞེས་པ་འདི་ཡང་འཇིག་རྟེན་གྱི་ཁམས་རྣམས་སུ་རིག་པར་བྱའོ། །ཡི་གེ་ཨ་ནི་བྱང་ཆུབ་ཀྱི་རང་བཞིན་ཏེ་རྣམ་པ་བཞི་ནི་བྱང་ཆུབ་དེ་ཡན་ལག་བཞི་དང་ལྡན་པ་སྟེ་བྱང་ཆུབ་དང༌། སྤྱོད་པ་དང༌། ཀུན་དུ་སངས་རྒྱས་པ་དང༌། མྱ་ངན་ལས་འདས་པ་རྣམས་སུ་རེག་པ་བཞིན་དུ་བལྟ་བར་བྱའོ། །དེ་དག་བྱུང་མ་ཐག་ཏུ་དེ་ནས་ཡང་ཆོས་ཀྱི་དབྱིངས་ཐམས་ཅད་ངེས་པར་སྒྲོགས་པའི་སྒོ་དག་ནས་ཡང་དག་པར་རྫོགས་པའི་སངས་རྒྱས་ཀྱི་སྙིང་པོའི་ཚིག་གིས་མཚན་པ་རྣམ་པར་རིག་པའི་དབྱངས་ཀྱི་སྒྲ་གཅིག་ནས་གཅིག་ཏུ་མངོན་པར་གྲག་གོ་ཞེས་པ་ནི་སྙིང་པོ་དེ་རྣམས་གསུངས་པ་དང་འཇིག་རྟེན་གྱི་ཆོས་རྣམས་ཀྱི་སྒྲ་ལས་དེ་བཞིན་གཤེགས་པའི་ཚིག་གིས་མཚན་པ་མ་བྱུང་མ་སྐྱེས་པའི་སྒྲ་སྒྲོགས་པ་བྱུང་ངོ༌། །བྱང་ཆུབ་སེམས་དཔས་དེ་ཐོས་ནས། །ཞེས་པ་ནས། ནང་གི་བདག་ཉིད་རྣམ་དག་པས། །རྟག་ཏུ་མངོན་པར་བརྩོན་པར་བྱ། །ཞེས་པའི་བར་གྱིས་དེ་ལྟར་མ་སྐྱེས་པའི་སྒྲ་འཇིག་རྟེན་གྱི་ཁམས་ཐམས་ཅད་དུ་ཁྱབ་པ་བྱང་ཆུབ་སེམས་དཔའ་རྣམས་ཀྱིས་ཐོས་ནས་ངོ་མཚར་དུ་གྱུར་ཏེ་དེའི་རྗེས་སུ་བསྔགས་པ་བཅོམ་ལྡན་འདས་ལ་སླར་གསོལ་པའོ། །དེ་ནས་ཡང་དག་པར་རྫོགས་པའི་སངས་རྒྱས་ཀྱི་སྙིང་པོ་རྣམས་སྒྲུབ་པ་འབྱུང་སྟེ་ཞེས་པ་ནས་ནམ་མཚན་མ་བྱུང་གི་བར་ཇི་སྲིད་དུ་འདུག་པར་བྱའོ་ཞེས་པའི་བར་གྱིས་སྒྲུབ་པའི་སྔོན་རོལ་དུ་བྱང་ཆུབ་ཀྱི་སེམས་བསྒོམ་པར་བྱ་བ་བཤད་དེ། དེ་ཡང་སྐྱེད་མོས་ཚལ་ལམ་གཙུག་ལག་ཁང་ལ་སོགས་པའི་གནས་མིང་སྨོས་
པའམ། དེ་ལས་གཞན་པའི་གནས་བདག་ཉིད་སེམས་གང་དུ་དགའ་བར་འདུག་སྟེ་བསྒོམ་མོ། །དེ་ལ་སྐྱེད་མོས་ཚལ་དང་ཕུག་ནི་ལུས་དབེན་པར་བྱ་བའི་གནས་སོ། །གཙུག་ལག་ཁང་ནི་སེམས་དབེན་ན་ལུས་མི་དབེན་ཀྱང་བླ་སྟེ་སེམས་དབན་པའི་གནས་སོ། །ཡིད་གང་དུ་དབེན་པ་དེར་ཞེས་པ་གནས་དེ་དག་ལས་གཞན་པ་ཡང་རུང་སྟེ། སེམས་གང་དུ་དབེན་པ་དེ་གཙོ་བས་དེར་འདུག་སྟེ། མཚན་མ་བྱུང་གི་བར་དེ་སྲིད་དུ་འདུག་པར་བྱའོ་ཞེས་འབྲེལ་ཏོ། །མཚན་མ་ཡང་སྐབས་འདིར་ནི་སྔགས་བཟླས་པ་ལས་ནད་མེད་པ་དང་བྲུ་བ་མི་ཚ་བ་ལ་སོགས་པ་བྱུང་བ་ལ་མི་བྱའི། བསམ་གཏན་ལ་སེམས་བརྟན་ཞིང་མི་འབྱུང་བར་གྱུར་པ་ལ་བྱའོ། །དེ་ནས་སྙིང་པོ་དེ་དག་ལས་གང་ཡང་རུང་བ་ཅིག་གཟུང་སྟེ་ཞེས་པ་ནས་ནམ་མཁའ་ལྟར་གཟོད་མ་ནས་ཞི་བ་སྟེ། དེ་ལ་སྒྲ་གནས་པར་བསམ་ཞིང་མཉམ་པར་གཞག་པས་བཟླས་བརྗོད་བྱའོ་ཞེས་པའི་བར་གྱིས་གོང་དུ་སྨོས་པའི་ཚུལ་གྱིས་བྱང་ཆུབ་ཀྱི་སེམས་གོམས་པར་བྱ་སྟེ། མཚན་མ་བྱུང་ནས་རང་གི་ལྷའི་གཟུགས་སུ་སྦྱར་བ་གོམས་པར་བྱ་བ་དང་དེའི་སྙིང་གར་མེ་ལོང་གི་དཀྱིལ་འཁོར་ལ་སངས་རྒྱས་ཀྱི་སྐུ་བསམ་པ་དང༌། སངས་རྒྱས་ཀྱི་སྐུའི་སྙིང་གར་ཡང་ཟླ་བའི་དཀྱིལ་འཁོར་དང་བཟླས་པའི་སྔགས་བསམས་ཏེ། དེའི་རིམ་པ་ཡང་འདིའོ། །ཨ་རྣམ་པ་བཞི་ལས་གང་ཡང་རུང་བ་ཅིག་སྙིང་གར་ཟླ་བའི་དཀྱིལ་འཁོར་ལ་བསམས་ལ། ཨ་དེའི་སྒྲ་ཆོས་ཐམས་ཅད་གཟོད་མ་ནས་མ་སྐྱེས་པའོ་ཞེས་པ་ལ་དམིགས་ཤིང་རང་གི་ཕུང་པོ་ལྔ་གཟོད་མ་ནས་མ་བྱུང་མ་སྐྱེས་པའི་སྦྱོར་བའམ། རྡུལ་ཕྲན་དུ་ཞིག་པ་ལ་སོགས་པའི་སྦྱོར་བས་སྟོང་པ་ཉིད་དུ་གཞིག་སྟེ། ཟླ་བའི་དཀྱིལ་འཁོར་ལ་ཨ་གནས་པ་ཙམ་འབའ་ཞིག་ཡོད་པར་བསམས་ཏེ། དེ་ནས་ཟླ་བའི་དཀྱིལ་འཁོར་དང་ཨ་ཉིད་ཀྱང་གོང་མའི་ཚུལ་གྱིས་དམིགས་སུ་མེད་པར་བ་ཤིག་སྟེ་ཇི་ཙམ་འདོད་ཀྱི་བར་དུ་སྟོང་པ་ཉིད་ཀྱི་ཏིང་ངེ་འཛིན་མངོན་དུ་བྱའོ། །དེ་ནས་སྙིང་རྗེའི་དབང་གིས་ཏིང་ངེ་འཛིན་དེ་ལས་ལངས་ཏེ་སྒྱུ་མ་ལྟ་བུར་མོས་པའི་ཚུལ་གྱིས་ཨ་དེ་སྙིང་གའི་ཕྱོགས་སུ་བསམས་ནས་དེ་ལས་འོད་སྒྲོ་ཞིང་བསྡུ་བའི་སྦྱོར་བས་རང་གི་ལྷའི་གཟུགས་སུ་བསྒྱུར་བར་བྱ་སྟེ། དེ་ཡང་ཐེ་
ཚོམ་མེད་པར་རང་གི་ལྷའི་གཟུགས་སུ་སྣང་བར་འགྱུར་གྱི་བར་དུའོ། །དེ་ལ་སྤྱིར་ལྷའི་གཟུགས་སུ་བསྒྱུར་བ་ལ་ཡང་རྣམ་པ་གསུམ་སྟེ། གཅིག་ནི་ཕྱག་རྒྱ་དང་སྔགས་སྦྱར་པས་ལྷའི་གཟུགས་དེ་བདག་གོ་སྙམ་པར་མོས་བཙམ་མོ། །གཉིས་པ་ནི་རྟག་ཏུ་གོམས་པའི་དབང་གིས་རང་གི་ལུས་ལྷའི་གཟུགས་སུ་ཐེ་ཚོམ་མེད་པར་གསལ་བར་སྣང་བའོ། །གསུམ་པ་ནི་སྦྱོར་བའི་མཐུས་རང་གི་ལུས་བརྗེས་ཏེ་ལྷའི་ལུས་སུ་གྱུར་པའོ། །དེ་ལ་སྐབས་འདིར་ནི་རྟག་ཏུ་གོམས་པའི་དབང་གིས་རང་གི་ལུས་ལྷའི་གཟུགས་སུ་གསལ་བར་སྣང་བ་ལ་བྱའོ། །དེ་ལྟར་རང་གི་ལུས་ལྷའི་གཟུགས་སུ་བསྒྱུར་ནས་དེའི་སྙིང་པོ་ཨ་ཅིག་བསམས་ཏེ། ཨ་དེ་ལས་བྱང་ཆུབ་ཀྱི་སེམས་ཀྱི་ཕྱག་རྒྱ་ཟླ་བའི་དཀྱིལ་འཁོར་མེ་ལོང་དང་འདྲ་བར་བསམས་ཏེ་དེ་ཡང་ཤིན་ཏུ་གསལ་བ་དྲི་མ་མེད་པར་བསམ་མོ། །དེའི་དབུས་སུ་ཡི་གེ་ཨ་ལས་བཅོམ་ལྡན་འདས་རྣམ་པར་སྣང་མཛད་ཀྱི་སྐུར་གྱུར་པར་བསམས་ཏེ། དེ་བས་ན། གཞི་གཉིས་པ་ནི་ཡང་དག་པར་རྫོགས་པའི་སངས་རྒྱས་མེ་ལོང་གི་དཀྱིལ་འཁོར་དེ་ཉིད་ཀྱི་ནང་ན་པདྨའི་རྒྱལ་པོ་ལ་བཞུགས་པ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་པ་ཞེས་པ་ལ་སོགས་པ་གསུངས་པ་ཡིན་ཏེ། ཕུག་གི་ནང་ན་བཞུགས་པ་ལྟ་བུ་ཞེས་བ་ནི་མེ་ལོང་གི་དཀྱིལ་འཁོར་གྱི་ནང་ན་བཞིན་གྱི་གཟུགས་བརྙན་སྣང་བ་ལྟར་དེ་བཞིན་ཉིད་ཀྱི་ནང་ན་ཉེ་བར་འདུག་པར་བསམས་ཏེ་ཞེས་པའོ། །དེ་ནས་དེ་བཞིན་གཤེགས་པའི་སྙིང་གར་ཟླ་བའི་དཀྱིལ་འཁོར་བསམས་ཏེ་དེའི་དབུས་སུ་བཟླས་པར་བྱ་བའི་སྔགས་བསམས་ནས་དེ་ཟློས་ཤིང་སྔོན་དུ་བསྙེན་པ་འབུམ་བྱ་སྟེ། དེ་བས་ན། དེ་ནས་སྔོན་དུ་བསྙེན་པ་ནི། །འབུམ་ཕྲག་གཅིག་ཏུ་བྱ་བར་བཤད། །ཅེས་གསུངས་པ་ཡིན་ནོ། །དེ་ནས་ཟླ་བའི་གཉིས་པ་ལ། །མེ་ཏོག་དྲིལ་སོགས་པ་དབུལ། །ཞེས་པ་ནི་སྔར་འབུམ་ཕྲག་གཅིག་གི་གྲངས་སུ་བཟླས་ལ། དེ་ནས་ཟླ་བ་གཉིས་ཀྱི་དང་པོ་སྔ་དྲོ་དང་ཕྱི་དྲོ་ལ་མེ་ལ་ཐུན་རེ་རེ། ཉི་མ་གུང་ལ་མེ་ལ་ཚེ་ཐུན་ཕྱེད་བཟླས་པའི་སྦྱོར་བས་དུས་ཆད་པ་སྟེ། སྔར་ཚིག་འབུམ་གྱི་གྲངས་སུ་ཟློས་པ་དང༌། ཟླ་བ་གཉིས་དུས་སུ་ཟློས་པ་ལས་ཟླ་བ་ཕྱི་མ་གཅིག་ལ་ནི་དྲི་དང་
མེ་ཏོག་ལ་སོགས་པའི་མཆོད་པ་མི་བྱ་བར་བཟླས་ཏེ་དང་པོ་སེམས་མ་གོམས་པ་ལ་ཕྱིའི་མཆོད་པ་ལ་སོགས་པས་སེམས་ཡེངས་སུ་དོགས་པའི་ཕྱིར་རོ། །ཟླ་བ་ཕྱི་མ་གཉིས་པ་ལ་ནི་གོམས་ཤིང་བརྟན་པར་གྱུར་པས་ཕྱིའི་མཆོད་པ་ལ་སོགས་པས་ཡེངས་བར་མི་འགྱུར་བའི་ཕྱིར་རོ། །སེམས་ཅན་རྣམས་ལ་རྣམ་མང་པོའི། །ཕན་པ་ཉེ་བར་སྒྲུབ་བྱེད་ཅིང༌། །ཞེས་པ་ནི། །ད་ནི་དཔའ་བོ་ཆེན་པོའི་སྙིང་པོ་འབྲུ་རྣམ་པ་ལྔ་རྣམས་སྒྲུབ་པ་དང་ས་རྣམས་བཤད་དེ། དེ་ལ་སྤྱིར་དེ་བཞིན་གཤེགས་པའི་རྒྱུ་དང་འབྲས་བུའི་ཡོན་ཏན་མོས་བས་སྤྱོད་པའི་ས་ནས་བརྩམས་ཏེ་ཀུན་དུ་སངས་རྒྱས་པར་གྱུར་གྱི་བར་དུ་ཅི་བསགས་པ་རྣམས་སྡུད་པའི་སྒོར་གྱུར་པ་ནི་ཕུང་པོའི་ལྷག་མ་དང་བཅས་པའི་མྱ་ངན་ལས་འདས་པ་དང༌། ཕུང་པོའི་ལྷག་མ་མེད་པའི་མྱ་ངན་ལས་འདས་པའོ། །དེ་ལ་ཕུང་པོའི་ལྷག་མ་མེད་པའི་མྱ་ངན་ལས་འདས་པ་ནི་དེ་བཞིན་ཉིད་སྟོང་པའི་མཚན་ཉིད་དུ་ཤེས་པ་ཕྲ་མོ་ཡང་སྦངས་པ་འོག་མིན་གྱི་གནས་སུ་མངོན་པར་བྱང་ཆུབ་པའོ། །ཕུང་པོའི་ལྷག་མ་དང་བཅས་པའི་མྱ་ངན་ལས་འདས་པ་ནི་ཀུན་དུ་སངས་རྒྱས་པའི་མཚན་ཉིད་ཆོས་རྣམས་སྒྱུ་མའི་རང་བཞིན་དུ་ཡང་མེད་བས་ཆོས་རྣམས་སྟོང་པའོ་སྙམ་པའོ་འདུ་ཤེས་ཙམ་གྱི་བག་ཆགས་ཕྲ་མོ་ལྷག་མ་ལུས་པར་འདོད་པའི་ཁམས་སུ་བྱང་ཆུབ་ཀྱི་ཤིང་དྲུང་དུ་མངོན་པར་བྱང་ཆུབ་ནས་བདུད་རྣམ་པ་བཞི་བཏུལ་བའོ། །དེ་ལ་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་སྙིང་པོ་ནི་ཨ་རྣམ་པ་བཞི་སྟེ། དེ་རྣམས་ཀྱི་སྒྲུབ་པ་ལ་སོགས་པ་ནི་བཤད་ཟིན་ཏོ། །འདིར་ནི་ཕུང་པོའི་ལྷག་མ་དང་བཅས་པའི་མྱ་ངན་ལས་འདས་པའི་སྙིང་པོ་བདུད་བཞི་འཇོམས་པའི་ཏིང་ངེ་འཛིན་གྱི་སྒོ་རྣམས་ཀྱི་སྒྲུབ་པ་དང་ལས་རྣམས་འཆད་དེ། དེ་ཡང༌། དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་ཐམས་ཅད་དང་ལྡན་པའི་འཁོར་དུས་པ་ལ་གཟིགས་ནས་གསང་བ་བའི་བདག་པོ་ཕྱག་ན་རྡོ་རྗེ་ལ་བཀའ་སྩལ་པ། ལག་ན་རྡོ་རྗེ་དེ་བཞིན་གཤེགས་པ་རྣམས་ཀྱི་ཐུགས་ལས་བྱུང་བ་ཞེས་བྱ་བ་ལ་སོགས་པས་སོ། །དེ་ལ་ཡི་གེ་ཨ་ལ་སོགས་པའི་ཏིང་ངེ་འཛིན་གྱི་སྒོ་ནས་བདུད་བཞི་བཅོམ་པ་དང་ཏིང་ངེ་འཛིན་དེ་རྣམས་ཉིད་དབང་ཆེན་
ལ་སོགས་པའི་དཀྱིལ་འཁོར་བཞིར་བྱིན་གྱིས་བརླབ་པའི་རིམ་པ་ཡང་འདི་ལྟ་སྟེ། ཡི་གེ་ཨ་ནི་ཆོས་ཐམས་ཅད་གཟོད་མ་ནས་མ་སྐྱེས་པར་རྟོགས་པའི་ཏིང་ངེ་འཛིན་གྱི་སྒོ་སྟོན་པ་སྟེ། དེའི་སྒོ་ནས་ཕུང་པོ་དང་ཁམས་དང་སྐྱེ་མཆེད་ལ་སོགས་པའི་ཆོས་རྣམས་མ་སྐྱེས་བར་རྟོགས་ཏེ་དམིགས་སུ་མེད་པས་ཕུང་པོའི་བདུད་བཅོམ་པའོ། །ཡི་གེ་བ་ནི་ཆོས་ཐམས་ཅད་ངག་གི་ལམ་དང་བྲལ་བར་སྟོན་པའི་ཏིང་ངེ་འཛིན་གྱི་སྒོ་སྟེ། ངག་གི་ལམ་ནི་རྣམ་པར་རྟོག་པ་མེད་པར་རྟོགས་ཏེ་རྟོག་པ་མེད་པས་ལྷའི་གུའི་བདུད་བཅོམ་པའོ། །དེ་ལྟར་ཕུང་པོ་ལ་སོགས་པའི་ཆོས་རྣམས་དང༌། དེ་ལ་དམིགས་པའི་རྣམ་པར་རྟོག་པ་མདན་དེ་དག་ལ་ཆགས་པར་འགྱུར་བ་འདོད་ཆགས་ལ་སོགས་པའི་ཉོན་མོངས་པ་རྣམ་པར་དག་པ་ཡི་གེ་རའི་སྒོ་ནས་མཚོན་ཏེ། །ཆོས་ཐམས་ཅད་རྡུལ་དང་བྲལ་བར་རྟོགས་སོ། །རྡུལ་ཞེས་བྱ་བ་ནི་ཉོན་མོངས་པ་ལ་བྱ་སྟེ་དེས་ཉོན་མོངས་པའི་བདུད་བཅོམ་པའོ། །ཡི་གེ་ཧ་ནི་ཆོས་ཐམས་ཅད་རྒྱུ་དང་བྲལ་བར་རྟོགས་པའི་ཏིང་ངེ་འཛིན་གྱི་སྒོ་སྟེ། ཉོན་མོངས་པ་ལས་ལས་དང་སྐྱེ་བ་འབྱུང་ལ། ཉོན་མོངས་པ་མེད་ན་ལས་དང་སྐྱེ་བ་ཡང་མི་འབྱུང༌། སྐྱེ་བ་མ་བྱུང་ན་འཆི་བར་ཡང་མི་འགྱུར་ཏེ་དེ་ལྟར་རྟོགས་པས་འཆི་བའི་བདུད་བཅོམ་པའོ། །དེ་ལྟར་ཆོས་རྣམས་གཟོད་མ་ནས་མ་སྐྱེས་པ་ལ་སོགས་པའི་ཚུལ་གྱིས་སྟོང་པ་ཉིད་ཀྱི་རང་བཞིན་དུ་རྟོགས་པའི་སྒོ་ནི་ཡི་གེ་ཁ་སྟེ་ཆོས་ཐམས་ཅད་ནམ་མཁའ་དང་འདྲའོ་ཞེས་བསྟན་པའོ། །དེ་ལྟར་ཏིང་ངེ་འཛིན་དེ་རྣམས་ལ་ཀུན་རྫོབ་ཏུ་ཡང་ཡི་གེ་ཨ་ལ་སོགས་པ་རེ་རེ་ལས་དབང་ཆེན་ལ་སོགས་པའི་དཀྱིལ་འཁོར་དུ་ཡང་སྦྱར་ཏེ། ཡི་གེ་ཨའི་སྒོ་ནས་ཞུགས་པའི་ཏིང་ངེ་འཛིན་གྱིས་ཕུང་པོའི་བདུད་བཅོམ་སྟེ། ཕུང་པོ་ནི་སྲ་ཞིང་ཁུར་ཁྱེར་ནུས་པའོ། །དེ་བཞིན་དུ་དེ་དང་རྗེས་སུ་མཐུན་པར་ཡི་གེ་ཨ་དེ་ལས་སའི་དཀྱིལ་འཁོར་དུ་གྱུར་ཏེ། ས་ཡང་སྲ་ཞིང་ཁུར་ཁྱེར་བཟོད་པའོ། །ཡི་གེ་བ་ལས་རྣམ་པར་རྟོག་པ་དང་བྲལ་བའི་ཏིང་ངེ་འཛིན་གྱི་སྒོར་གྱུར་ཏེ། དེ་ནི་རྟོག་པ་ལ་སོགས་པའི་དྲི་མ་དག་པར་བྱེད་པའོ། །དེ་བཞིན་དུ་ཡི་གེ་བ་ལས་ཆུའི་དཀྱིལ་འཁོར་དུ་གྱུར་པ་དེ་དང་རྗེས་སུ་མཐུན་པར་
དྲི་མ་དག་པར་བྱེད་པའོ། །ཡི་གེ་ར་ལ་ཆོས་ཐམས་ཅད་རྡུལ་དང་བྲལ་བའི་ཏིང་ངེ་འཛིན་དུ་གྱུར་ཏེ། དེ་ནི་འདོད་ཆགས་ལ་སོགས་པའི་ཉོན་མོངས་པ་སྲེག་པར་བྱེད་པའོ། །དེ་བཞིན་དུ་དེ་དང་རྗེས་སུ་མཐུན་པར་ཡི་གེ་ར་ལས་མེའི་དཀྱིལ་འཁོར་དུ་གྱུར་ཏེ། མེ་ནི་ཐམས་ཅད་སྲེག་ཅིང་མེད་པར་བྱེད་པའོ། །དེ་བཞིན་དུ་ཡི་གེ་ཧ་ལས་ཆོས་ཐམས་ཅད་རྒྱུ་དང་བྲལ་བའི་ཏིང་ངེ་འཛིན་གྱི་སྒོར་གྱུར་ཏེ། དེ་ནི་ཉོན་མོངས་པའི་རྒྱུ་ལས་བྱུང་བའི་ལས་ལ་སོགས་པ་འཐོར་བར་བྱེད་པའོ། །དེ་བཞིན་དུ་ཡི་གེ་ཧ་ལས་རླུང་གི་དཀྱིལ་འཁོར་དུ་གྱུར་པ་ཡང་དེ་དང་རྗེས་སུ་མཐུན་ཏེ། རླུང་ནི་ཐམས་ཅད་འཐོར་བའམ། འཇིག་པར་བྱེད་པའི་རང་བཞིན་ནོ། །ཡི་གེ་ཁ་ལས་ཆོས་ཐམས་ཅད་སྟོང་པ་ནམ་མཁའི་རང་བཞིན་དུ་རྟོགས་པའི་ཏིང་ངེ་འཛིན་གྱི་སྒོར་གྱུར་ཏེ། དེ་བཞིན་དུ་ཡི་གེ་ཁ་ལས་ནམ་མཁའི་དཀྱིལ་འཁོར་དུ་གྱུར་པ་ཡང་ནམ་མཁའི་རང་བཞིན་དུ་མཐུན་ཏེ་དེ་དག་ནི་སྤྱིའི་དོན་ཏོ། །དེ་བཞིན་གཤེགས་པ་རྣམས་ཀྱི་ཐུགས་ལས་བྱུང་བ་ཞེས་བྱ་བ་ནི་དེ་བཞིན་ཉིད་ཀྱི་ཡེ་ཤེས་ལས་བྱུང་བ་ཞེས་པ་སྟེ། ཨ་ལ་སོགས་པའི་སྟོང་པ་ཉིད་དེ་དག་ཉིད་ལ་བྱའོ། །ལས་དང་བྱ་བས་རྣམ་པར་རོལ་པ་ཞེས་བྱ་བ་ནི་གྲུབ་པ་རབ་ལ་སོགས་པ་དང༌། ཞི་བ་ལ་སོགས་པའི་ལས་རྣམས་བྱེད་པའོ། །སྤྱོད་པའི་རོལ་མོ་ཞེས་པ་ནི་རོལ་མོ་མཁན་དང་འདྲ་བ་སྟེ། རོལ་མོ་མཁན་ནི་གར་ལ་སོགས་པའི་རོལ་མོ་སྣ་ཚོགས་སྟོན་པ་དེ་བཞིན་དུ་སྙིང་པོ་འདི་རྣམས་ཀྱང་གྲུབ་པ་དང་ལས་སྣ་ཚོགས་སྟོན་པའི་ཕྱིར་རོ། །ཁམས་བཞི་ཡང་དག་པར་བསྡུ་བས་བསྡུས་པ་ཞེས་བ་ནི་སྙིང་པོ་འདི་རྣམས་ལས་ས་དང༌། ཆུ་དང༌། མེ་དང༌། རླུང་གི་ཁམས་ཀྱི་དཀྱིལ་འཁོར་རྣམས་བྱུང་བའི་ཕྱིར་རོ། །ནམ་མཁའ་ལྟར་ཀུན་དུ་ཁྱབ་བ་ཞེས་པ་ནི་འདི་ལྟར་ནམ་མཁའ་ཐམས་ཅད་དུ་ཁྱབ་པ་དེ་བཞིན་དུ་སྙིང་པོ་དེ་རྣམས་ཀྱིས་ཀྱང་ཐམས་ཅད་དུ་ཁྱབ་པ་སྟེ། དེ་དག་ནི་སྙིང་པོ་དེ་རྣམས་ཀྱི་རང་བཞིན་བསྟན་པའོ། །མཐོང་བ་དང་མ་མཐང་བའི་འབྲས་བུ་མང་བ་ཞེས་པ་ནི་མཐུ་བསྟན་པ་སྟེ། མཐོང་བ་ནི་རིག་འཛིན་ལ་སོགས་པར་དངོས་སུ་བསྒྱུར་བའོ། །མ་མཐོང་བ་ནི་སངས་རྒྱས་ལ་སོགས་པའི་འབྲས་བུ་ཉིད་
ནས་ཐོབ་པ་སྟེ་དེ་ལྟ་བུའི་འབྲས་བུ་མཆོག་སྦྱིན་པར་བྱེད་པ་ཞེས་པའོ། །ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་མངོན་སུམ་པ་ཞེས་པ་ནི་དེ་དག་གི་སྤྱོད་ཡུལ་དུ་གྱུར་པ་ཞེས་པ་སྟེ། ཉོན་ཐོས་རྣམས་ཀྱང་ཟད་པར་ས་དང་ཟད་པར་ཆུ་ལ་སོགས་པའི་ཏིང་ངེ་འཛིན་མངོན་དུ་བྱེད་དེ། དེ་ཡང་དཀྱིལ་འཁོར་འདི་དག་གི་རང་བཞིན་ཡིན་པའི་ཕྱིར་ལ། བྱང་ཆུབ་སེམས་དཔའ་ཡང་ས་གཞི་ཐམས་ཅད་རིན་པོ་ཆེ་ལ་སོགས་པས་བཀང་སྟེ། དེ་བཞིན་གཤེགས་པ་ལ་མཆོད་པ་བྱེད་པ་ལ་སོགས་པ་ཡང་དཀྱིལ་འཁོར་འདི་དག་རང་བཞིན་ཡིན་པའི་ཕྱིར་རོ། །གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱི་རེ་བ་ཐམས་ཅད་ཡོངས་སུ་རྫོགས་བར་བྱེད་པ་ཞེས་པ་ནི་བསྟན་པ་འདི་ལ་ཞུགས་པ་རྣམས་གྲུབ་པ་ལ་སོགས་པ་འཐོབ་པའི་སྒོ་ནས་རེ་བ་ཡོངས་སུ་རྫོགས་བར་བྱེད་པའི་ཕྱིར་རོ། །ལས་སྣ་ཚོགས་དང་ལྡན་པ་ནི་གདོན་དང་དུག་ལ་སོགས་པ་སེལ་བའི་ལས་སྣ་ཚོགས་དང་ལྡན་པའོ། །སེམས་ཅན་ཐམས་ཅད་ལ་ཕན་འདོགས་པ་ཞེས་པ་ནི་བསྟན་པ་འདིར་ཞུགས་པ་དང་མ་ཞུགས་པ་གཉིས་ཀའི་སེམས་ཅན་ལ་ཕན་འདོགས་པའོ། །ལག་ན་རྡོ་རྗེ་དེ་ལ་སྤྱོད་པའི་རོལ་མོ་ལས་དང་བྱ་བས་མངོན་པར་གྲུབ་པའི་འབྲས་བུ་ཕལ་ཆེ་བ་ལུས་ཅན་ཀུན་གྱི་མངོན་སུམ་པ་གང་ཞེ་ན་ཞེས་པ་ནི་གོང་དུ་སྨོས་པ་དེ་དག་ཉིད་དངོས་སུ་བསྟན་པའི་ཕྱིར་གང་ཞེ་ན་ཞེས་གསུངས་པའོ། །ཆོ་ག་ཤེས་པས་ཐོག་མར་ནི། །བདག་གི་དེ་ཉིད་རིམ་བཞིན་བྱ། །ཞེས་པ་ནས། འདི་བདག་ཉིད་ནི་རྒྱལ་མཆོག་ཏུ། །བསྒྱུར་ན་སྨོས་ཀྱང་ཅི་ཞིག་དགོས། །ཞེས་པའི་བར་གྱིས་སྔགས་པས་བདག་གི་དེ་ཁོ་ན་ཉིད་ལ་སྦྱར་བ་དང༌། དེའི་རྗེས་སུ་སྔགས་པ་འཆད་དེ། སྔགས་པས་བདག་གི་དེ་ཁོ་ན་ཉིད་ཀྱི་རྣལ་འབྱོར་སྔོན་དུ་བྱས་ནས་དེ་ནས་སྔགས་ཀྱི་ཡི་གེ་རྣམས་ལུས་ལ་སོ་སོའི་གནས་སུ་བཀོད་དེ་དབང་ཆེན་གྱི་དཀྱིལ་འཁོར་ལ་སོགས་པར་བསྒྱུར་ནས་དེ་དག་གི་སྒྲུབ་པ་དང་ལས་ལ་སོགས་པ་ལ་འཇུག་གོ །རིམ་པ་དེ་ལྟ་བུར་འཇུག་པ་ཡང་སྔོན་སངས་རྒྱས་བཅོམ་ལྡན་འདས་ཆོས་རྣམས་གདོད་མ་ནས་མ་སྐྱེས་པ་སྟོང་བའི་རང་བཞིན་དུ་མངོན་པར་བྱང་ཆུབ་
ནས་དེའི་འོག་ཏུ་སྔོན་གྱི་སྨོན་ལམ་གྱི་ཤུགས་ཀྱིས་སྐུ་མི་ཟད་པ་ལ་སོགས་པའི་རྒྱན་རྣམས་ཀུན་རྫོབ་ཀྱི་ཚུལ་དུ་འཇིག་རྟེན་ཐམས་ཅད་དུ་ཁྱབ་པར་སྟོན་ཏེ། དེ་བས་ན་སྔགས་པས་ཀྱང་ཐོག་མར་བདག་གི་དེ་ཁོ་ན་ཉིད་སྟོང་པར་དམིགས་པ་བྱས་ནས་ཕྱིས་ཡི་གེ་དགོང་པ་དང་བཟླས་པ་ལ་སོགས་པ་བྱའོ། །དེ་ལ། ཆོ་ག་ཤེས་པས་ཐོག་མར་ནི། །བདག་གི་དེ་ཉིད་རིམ་བཞིན་བྱ། །ཞེས་པ་ནས། འདི་ནི་སངས་རྒྱས་ཐམས་ཅད་ཀྱིས། །བདག་གི་དེ་ཉིད་ཡིན་པར་གསུངས། །ཞེས་པའི་བར་ནི་བདག་གི་དེ་ཁོ་ན་ཉིད་ཀྱི་རྣལ་འབྱོར་ཏེ། བདག་གི་དེ་ཁོ་ན་ཉིད་ཅེས་པ་ནི་སྔགས་མཁན་རང་གི་ལུས་ཀྱང་ཡི་གེ་ཨའི་སྒོ་ནས་གདོད་མ་ནས་མ་བྱུང་མ་སྐྱེས་པར་སྟོང་པར་བཤིག་སྟེ། དེ་ནས་ཨ་ལས་དབང་ཆེན་གྱི་དཀྱིལ་འཁོར་ཁ་དོག་ཤིན་ཏུ་སེར་ཞིང་ལྕི་བ་བསམས་ཏེ། དེའི་སྟེང་ན་སངས་རྒྱས་བཅོམ་ལྡན་འདས་བཞུགས་པ་དེ་ལྟ་བུར་བདག་ཉིད་ཀྱི་ལུས་ལ་བསམས་ཏེ། དེ་བས་ན། ཆོ་ག་ཤེས་པས་ཐོག་མར་ནི། །བདག་གི་དེ་ཉིད་ཇི་བཞིན་བྱ། །ཞེས་བྱ་བ་ལ་སོགས་པ་གསུངས་པ་ཡིན་ཏེ། བདག་གི་དེ་ཉིད་རིམ་བཞིན་བྱ། །ཞེས་པ་ནི་བྱང་ཆུབ་ཀྱི་སེམས་བསྒོམ་པ་བྱས་ཤིང་ལྷའི་གཟུགས་སུ་སྒྲུབ་པ་ལ་སོགས་པ་རིམ་པ་བཞིན་དུ་བྱའོ་ཞེས་པའོ། །སྔགས་པ་སྔ་མ་བཞིན་འདུག་ལ། །ཞེས་པ་ནི་གོང་དུ་དེ་བཞིན་གཤེགས་པའི་སྙིང་པོ་བཤད་པའི་རིམ་པ་བཞིན་དུ་འདུག་ནས་ཞེས་པའོ། །དེ་བཞིན་གཤེགས་པ་དྲན་བྱས་ཏེ། །ཞེས་པ་ནི་བཟླས་པ་ལ་སོགས་པའི་ལས་རྣམས་བྱ་བ་ན་དེ་བཞིན་གཤེགས་པ་མདུན་དུ་བསམས་ནས་བྱ་སྟེ། སྔགས་དང་པོ་ལ་སོགས་པ་དམིགས་པའི་ཡུལ་ཡིན་པའི་ཕྱིར་རོ། །གཉིས་སུ་ན་དེ་བཞིན་གཤེགས་པའི་དུམ་བུ་བསམས་ན་བགེགས་མེད་པའི་ཕྱིར་རོ། །བདག་ཉིད་ཨ་ཞེས་བྱ་བ་ནི། །ཀླད་ཀོར་དང་བཅས་རྒྱས་བྱས་ལ། །ཞེས་པ་ནི་བདག་ཉིད་ཡི་གེ་ཨ་ལས་སྟོང་བ་ཉིད་ཀྱི་རང་བཞིན་དུ་བསམས་ཏེ། ཀླད་ཀོར་གྱིས་ནི་འཛིན་པར་བྱེད་པའི་ཡེ་ཤེས་ཀྱང་སྟོང་པ་ཉིད་དུ་སྟོན་པ་སྟེ་གཟུང་བ་དང་འཛིན་པ་མེད་པར་སྟོང་པའི་རང་བཞིན་དུ་བསྒྱུར་པར་བྱའོ་ཞེས་པའོ། །ཐམས་ཅད་སེར་ཞིང་ཤིན་ཏུ་བཟང༌། །གྲུ་བཞི་རྡོ་རྗེས་མཚན་བྱས་ཏེ། །
ཞེས་པ་ནི་སྟོང་པའི་རང་བཞིན་དུ་གྱུར་པ་དེ་ལས་དབང་ཆེན་གྱི་དཀྱིལ་འཁོར་གྲུ་བཞི་པ་ཁ་དོག་ཤིན་ཏུ་སེར་བ་རྡོ་རྗེའི་མཚན་མས་མཚན་པ་བསམ་མོ་ཞེས་པའོ། །སྔགས་པས་དེར་གནས་རྫོགས་པ་ཡི། །སངས་རྒྱས་ཀུན་གྱི་གཙོ་བོ་བསམ། །ཞེས་པ་ནི་དཀྱིལ་འཁོར་དེའི་སྟེང་ན་བཅོམ་ལྡན་འདས་རྣམ་པར་སྣང་མཛད་ཀྱི་སྐུར་བསམས་ཏེ། དེ་ཡང་བདག་གི་ལུས་ཉིད་དེ་ལྟར་བསམ་པར་ཤེས་པར་བྱའོ། །ནམ་ཞིག་སྔགས་པ་བདག་གིས་ནི། །དེ་ཉིད་དོགས་པ་མེད་གྱུར་པ། །ཞེས་པ་ནི་བདག་གིས་དེ་ཁོ་ན་ཉིད་སྟོང་པར་དམིགས་པ་དང་ལྷའི་གཟུགས་སུ་གསལ་བར་སྣང་བ་ཐེ་ཚོམ་མེད་བར་གྱུར་ན་ཞེས་པ་སྟེ། སྟོང་པ་ཉིད་དུ་ཐེ་ཚོམ་མེད་པར་གྱུར་པ་ཡང་ཏིང་ངེ་འཛིན་དག་པ་དང༌། རྣམ་པ་དང་བྲལ་བ་དང་རྣམ་པར་རྟོག་པ་ཐམས་ཅད་སྤོང་བ་ཡང་དག་པ་ཉིད་དུ་ཐེ་ཚོམ་མེད་པའོ། །ལྷའི་གཟུགས་སུ་གསལ་བར་སྣང་བ་ཐེ་ཚོམ་པ་མེད་པ་ཡང་ཏིང་ངེ་འཛིན་དག་པ་དང་ལྷའི་གཟུགས་སུ་ཀུན་དུ་གསལ་བ་དང་རྣམ་པར་རྟོག་པ་སྤོང་བ་ན་ཡང་དག་པར་ཐེ་ཚོམ་མེད་པའོ། །ནམ་ཞིག་སྔགས་པ་རབ་ཏུ་མོས་པའི་སེམས་ཀྱིས་ཐེ་ཚོམ་མེད་པའོ། །ནམ་ཞིག་སྔགས་པ་རབ་ཏུ་མོས་པའི་སེམས་ཀྱིས་ཐེ་ཆོམ་མེད་པར་གྱུར་ན་འོག་ནས་འབྱུང་བའི་རྗེས་སུ་བསྔགས་པ་རྣམས་ཐོབ་སྟེ། དེའི་ཚེ་འཇིག་རྟེན་ཐམས་ཅད་ལ་ཕན་པ་བྱེད་པ་ཉིད་དུ་འགྱུར་ཞེས་པ་ནི་གྲུབ་པ་ལ་སོགས་པ་ཐོབ་པའི་སྒོ་ནས་སེམས་ཅན་རྣམས་ལ་ཕན་གདགས་ནུས་ཏེ། དེ་ནི་གཞན་གྱི་དོན་ཕུན་སུམ་ཚོགས་པའོ། །ངོ་མཚར་སྣ་ཚོགས་དག་དང་ལྡན། །མིག་འཕྲུལ་ཅན་གྱི་གནས་ལ་འདུག །ཅེས་པ་ནི་རིག་འཛིན་ལ་སོགས་པའི་གྲུབ་པ་ཐོབ་ནས་མིག་འཕྲུལ་མཁན་དང་འདྲ་བར་རྫུ་འཕྲུལ་ངོ་མཚར་སྣ་ཚོགས་པ་རྣམས་བྱེད་ནུས་པར་འགྱུར་ཞེས་པ་སྟེ་མཐུ་ཕུན་སུམ་ཚོགས་པའོ། །སྔགས་པ་ནམ་ཞིག་མཉམ་གཞག་ན། །སྲིད་པ་རབ་ཏུ་དོག་པ་ན། །ཐོག་མེད་དུས་ནས་མི་ཤེས་པས། །བསགས་པའི་ལས་དེ་ཀུན་ཟད་གྱུར། །ཞེས་པ་ནི་རྣལ་འབྱོར་དེ་ལྟ་བུ་ལ་མཉམ་པར་གཞག་ན་ཐོག་མ་མེད་པའི་དུས་ནས་མ་རིག་པའི་དབང་གིས་འཁོར་བ་དོག་པ་རྣམས་སུ་མི་དགེ་བ་དང་ཉོན་མོངས་པའི་ལས་བསགས་པ་དེ་དག་ཐམས་ཅད་བྱང་བར་འགྱུར་རོ་ཞེས་
པ་སྟེ། དེ་ནི་སྤོང་བ་ཕུན་སུམ་ཚོགས་པའོ། །བླ་ན་མེད་པའི་བྱང་ཆུབ་སེམས། །སེམས་དེ་ནམ་ཞིག་སྒོམ་བྱེད་པ། །དེ་ཚའང་སྔགས་པ་རྣལ་འབྱོར་པ། །ཆུ་ཡིས་པདྨ་ལྟ་བུར་ནི། །དགེ་དང་མི་དགེའི་འབྲས་འབྱུང་བའི། །ལས་ཀྱིས་རྟག་པར་མི་གོས་ན། །ཞེས་པ་ནི་བྱང་ཆུབ་ཀྱི་སེམས་དེ་སྟེང་པའི་མཚན་ཉིད་ཡིན་པས་དགེ་བ་དང་མི་དགེ་པའི་ལས་ཀྱི་འབྲས་བུས་མི་གོས་ཏེ་དགེ་བ་ལ་སོགས་པའི་འབྲས་བུས་དངོས་པོ་རྣམས་ཀྱི་གཉེན་པོ་ཡིན་པའི་ཕྱིར་རོ། །དེ་ལ་མི་དགེ་བའི་འབྲས་བུས་མི་གོས་པ་ནི་རགས་ན་དགེ་བའི་འབྲས་བུས་མི་གོས་ན་ཚུལ་ཁྲིམས་བསྲུངས་པ་ལ་སོགས་པའི་འབྲས་བུ་ཡང་མེད་དམ་ཞེ་ན། བྱང་ཆུབ་ཀྱི་སེམས་ནི་སྟོང་པའི་རང་བཞིན་ཡིན་པས་དགེ་བ་དག་དམིགས་སུ་མེད་པར་འགྱུར་མོད་ཀྱི། དེ་ལས་ལངས་ནས་ཕྱིས་རྣལ་འབྱོར་པ་བདག་ཉིད་འཚང་རྒྱ་བའི་རྒྱུར་གྱུར་པའི་ལུས་དང་ལོངས་སྤྱོད་ལ་སོགས་པ་དང་ལྡན་པར་ཤོག་ཤིག་ཅེས་སྨོན་ལམ་བཏབ་པས་དགེ་བའི་ལས་ཀྱི་འབྲས་བུའི་བག་ཆགས་སླར་བརྟ་བར་འགྱུར་རོ། །འདི་བདག་ཉིད་ནི་རྒྱལ་མཆོག་ཏུ། །བསྒྱུར་ན་སྨོས་ཀྱང་ཅི་ཞིག་དགོས། །ཞེས་པ་ནི་བྱང་ཆུབ་ཀྱི་སེམས་འབའ་ཞིག་བསྒོམས་པས་ཀྱང་དེ་ལྟར་འགྱུར་ན་བྱང་ཆུབ་ཀྱི་སེམས་བསྒོམས་པའི་རྣལ་འབྱོར་པ་དེ་བདག་ཉིད་སངས་རྒྱས་ཀྱི་སྐུར་བསྒྱུར་བ་ན་མི་དགེ་བ་ལ་སོགས་པའི་ལས་ཀྱིས་མི་གོས་པར་འགྱུར་བ་ལྟ་ཅི་སྨོས་ཞེས་པའོ། །དེ་ནས་བཅོམ་ལྡན་འདས་རྣམ་པར་སྣང་མཛད་བདུད་བཞི་ལས་རྒྱལ་བ་རྡོ་རྗེ་རྣམ་པར་རོལ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཞེས་པ་ནི་བཅོམ་ལྡན་འདས་ཏིང་ངེ་འཛིན་དེ་ལ་ཞུགས་ནས་བདུད་བཞི་ལས་རྒྱལ་བར་བྱེད་པ་དང༌། རྡོ་རྗེ་རྣམ་པར་རོལ་པའི་སྔགས་རྣམས་འབྱུང་བས་ན་ཏིང་ངེ་འཛིན་དེ་ལ་བདུད་བཞི་ལས་རྒྱལ་བ་རྡོ་རྗེ་རྣམ་པར་རོལ་པ་ཞེས་བྱའོ། །དེ་ལ་བདུད་བཞི་ལས་རྒྱལ་བ་ཞེས་བྱ་བ་ནི་སྤོང་བ་ཕུན་སུམ་ཚོགས་པའོ། །རྡོ་རྗེ་རྣམ་པར་རོལ་པ་ཞེས་པ་ནི་རྡོ་རྗེ་དང་འདྲ་བར་ཅིས་ཀྱང་མི་ཚུགས་པར་རྣམ་པར་སྤྲུལ་པ་སྟེ་མཐུ་ཕུན་སུམ་ཚོགས་པའོ། །དེ་བས་ན་རྡོ་རྗེ་ཡི་གེའི་ཚིག་ཅེས་བྱ་བ་ལ་སོགས་པ་གསུངས་ཏེ། རྡོ་རྗེ་ཡི་གེའི་ཚིག་འདི་རྣམས་གསུངས་སོ་ཞེས་སྦྲེལ་ཏེ། བདུད་བཞི་ལས་རྒྱལ་བར་བྱེད་པ་ཞེས་པ་ནི་སྔར་བཞིན་ནོ།
རྒྱུད་དྲུག་ལས་རྣམ་པར་གྲོལ་བར་བྱེད་པ་ཞེས་པ་ཡི་གེ་རྣམས་ཀྱི་སྒོ་ནས་སྟོང་པ་ཉིད་ཀྱི་ཏིང་ངེ་འཛིན་ལ་ཞུགས་ན་རྒྱུད་དྲུག་ལ་སོགས་པ་ཐམས་ཅད་དམིགས་སུ་མེད་པར་རྟོགས་པས་རྒྱུད་དྲུག་ལས་རྣམ་པར་གྲོལ་བར་བྱེད་པའོ། །གཉིས་སུ་ན་ཡི་གེ་དེ་རྣམས་གྱི་སྒོ་ནས་དབང་ཆེན་ལ་སོགས་པའི་དཀྱིལ་འཁོར་དུ་སྦྱར་ཞིང་རིག་འཛིན་ལ་སོགས་པའི་གྲུབ་པ་ཐོབ་ནས་རིམ་གྱིས་ས་གོང་མ་ལ་འཕར་བས་ན་རྒྱུད་དྲུག་ལས་རྣམ་པར་གྲོལ་བར་བྱེད་པའོ་ཞེས་པ་ནི་སྔགས་དེ་རྣམས་ཀྱིས་གཞན་གྱི་དོན་ཕུན་སུམ་ཚོགས་པ་བསྟན་པའོ། །ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་བྱེད་པ་ཞེས་པ་ནི་ཡེ་ཤེས་ཕུན་སུམ་ཚོགས་པ་སྟེ། གོང་མའི་རིམ་གྱིས་ཞུགས་ན་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་འགྱུར་བའི་ཕྱིར་རོ། །སྔགས་ཀྱི་ཡིག་འབྲུ་རྣམས་ལས་བདུད་བཞི་འཇོམས་པའི་ཏིང་ངེ་འཛིན་དང་དབང་ཆེན་ལ་སོགས་པའི་དཀྱིལ་འཁོར་དུ་བསྒྱུར་བའི་རིམ་པ་ནི་གོང་དུ་བཤད་ཟིན་ཏོ། །དེ་ནས་ཡང་གསང་བ་པའི་བདག་པོ་ཕྱག་ན་རྡོ་རྗེ་དང་རྡོ་རྗེ་འཛིན་དེ་དག་དང་ཞེས་པ་ནས། དེས་ནི་གསང་སྔགས་སྤྱོད་པ་ཡི། །ཐེག་ཆེན་བླ་ན་མེད་པ་ལས། །སེམས་ཅན་རྣམས་ནི་དགའ་བཞིན་དུ། །མཐོང་བའི་ཆོས་ལ་གནས་པར་འགྱུར། །ཞེས་པའི་བར་གྱིས་བཅོམ་ལྡན་འདས་ཀྱིས་སྔགས་གསུངས་པ་ན་ཕྱག་ན་རྡོ་རྗེ་ལ་སོགས་པའི་བྱང་ཆུབ་སེམས་དཔའ་དེ་རྣམས་ཀྱིས་སྔགས་དེ་རྣམས་ཀྱི་མཐུ་དང་ཡོན་ཏན་རྣམས་ཁོང་དུ་ཆུང་ནས་ངོ་མཚར་གྱུར་ཏེ་སྔགས་དེ་རྣམས་ཀྱི་རྗེས་སུ་བསྔགས་པ་རྟོགས་ནས་གནས་སོ་སོར་དགོད་པ་དང་ཆོ་ག་རྣམས་བཤད་པར་གསོལ་པ་སྟེ། བྱང་ཆུབ་སེམས་དཔའ་སྐྱོབ་རྣམས་དང༌། །སངས་རྒྱས་ཀུན་གྱི་ནོར་གྱི་དབྱིག །ཅེས་པ་ནི་སྙིང་པོ་འདི་རྣམས་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ནོར་གྱི་དབྱིག་གོ་ཞེས་པའོ། །འདིས་ནི་གང་དག་སངས་རྒྱས་དང༌། །བྱང་ཆུབ་སེམས་དཔའ་སྐྱོབ་རྣམས་དང༌། །རང་སངས་རྒྱས་དང་ཉན་ཐོས་པ། །མཁས་པ་དེ་དག་འཇིག་རྟེན་འདིར། །སངས་རྒྱས་ཡེ་ཤེས་བླ་མེད་པ། །དཔེ་མེད་ཡེ་ཤེས་ཐོབ་ནས་སུ། །རྫུ་འཕྲུལ་སྣ་ཚོགས་རྣམ་འཕྲུལ་བས། །ས་སྟེང་ཀུན་དུ་རྣམ་པར་སྤྱོད། །ཅེས་པ་ནི་སྙིང་པོ་འདི་རྣམས་ཀྱི་མཐུས་སངས་རྒྱས་དང་བྱང་ཆུབ་སེམས་དཔའ་རྣམས་
ཀྱང་རྫུ་འཕྲུལ་སྣ་ཚོགས་སྤྱོད། ཉན་ཐོས་དང་རང་སངས་རྒྱས་རྣམས་ཀྱང་ཏིང་ངེ་འཛིན་གྱིས་ནམ་མཁའ་སྟོང་པ་ལ་གནས་པར་བསམས་ཏེ་དེ་ལ་སྤྱོད་ལམ་བཞིས་གནས་པ་དང༌། སྨད་ནས་ཆུ་འབྱུང་ཞིང་སྟོད་ནས་མེ་འབར་བ་དང༌། རླུང་གི་དཀྱིལ་འཁོར་བསམས་ནས་རི་ལ་སོགས་པ་ཡང་འཇིག་པར་བྱེད་པ་ལ་སོགས་པའི་རྫུ་འཕྲུལ་སྣ་ཚོགས་སྤྱོད་དོ་ཞེས་པའོ། །སངས་རྒྱས་ཡེ་ཤེས་བླ་མེད་པ། །དཔེ་མེད་ཡེ་ཤེས་ཐོབ་ནས་སུ། །ཞེས་པ་ནི་དེ་ལྟར་རྫུ་འཕྲུལ་སྣ་ཚོགས་པ་སྤྱོད་ནས་ཀྱང་སྙིང་པོ་འདི་རྣམས་ཀྱི་མཐུས་རིམ་གྱིས་ཐམས་ཅད་མཁྱེན་པའི་ཡེ་ཤེས་ཐོབ་པར་འགྱུར་རོ་ཞེས་པའོ། །དེ་བས་འདི་དག་སོ་སོ་ཡི། །ཆོ་ག་རྒྱས་པ་དག་དང་ལས། །སྣ་ཚོགས་དགོད་པ་ཐམས་ཅད་ཀྱང༌། །བསྟན་པ་འདི་ལ་བཤད་དུ་གསོལ། །ཞེས་པ་ནི་སྔགས་དེ་རྣམས་ལས་དཔང་ཆེན་ལ་སོགས་པའི་དཀྱིལ་འཁོར་དུ་བསྒྱུར་བའི་ཆོ་ག་དང་སོ་སོར་དགོད་པ་དང་ལས་ཀྱི་སྤྱོད་པ་རྣམས་བསྟན་པ་འདིར་བཤད་དུ་གསོལ་ཞེས་པའོ། །དེས་ནི་གསང་སྔགས་སྤྱོད་པ་ཡི། །ཐེག་ཆེན་བླ་ན་མེད་པ་ལ། །སེམས་ཅན་རྣམས་ནི་དགའ་བཞིན་དུ། །མཐོང་བའི་ཆོས་ལ་གནས་པར་འགྱུར། །ཞེས་པ་ནི་དེ་དག་བཤད་པ་ཡང་སེམས་ཅན་རྣམས་མཐོང་བའི་ཆོས་ལ་མངོན་པར་མཐོ་བའི་བདེ་བ་ཐོབ་པར་བྱ་བའི་ཕྱིར་དེ་རྣམས་བཤད་དུ་གསོལ་བསྟེ་བཤད་པའི་དགོས་པ་བསྟན་པའོ། །ད་ནི་གོང་དུ་སྔགས་བཤད་པ་དེ་རྣམས་ཀྱི་སོ་སོའི་ལས་རྣམས་བཤད་དེ། ལས་དེ་རྣམས་ཀྱང་སྔགས་པ་བདག་ཉིད་ཡི་གེ་ཨ་ལས་སྔར་བཤད་པ་བཞིན་དུ་སྟོང་པ་ཉིད་དུ་བསམས་ཏེ་དེ་ནས་བདག་ཉིད་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་དབང་ཆེན་ལ་བཞུགས་པར་བསམ་ཞིང་ལུས་ཀྱི་ནང་དུ་ཡང་དབང་ཆེན་གྱི་དཀྱིལ་འཁོར་བསམས་ལ་དེར་ཡི་གེ་རྣམས་རིམ་པ་བཞིན་དུ་བསམས་ཏེ། དེ་བས་ན། དེའི་ཚེ་ས་གཞི་རྡོ་རྗེ་ཆེན་པོར་བྱིན་གྱིས་བརླབས་ཏེ་ཉིང་ཀྱི་སྐུ་ལས་བྱང་ཆུབ་ཀྱི་སྙིང་པོ་ཅན་ཉེ་བར་བསྟན་པར་བཤད་ནས་གསུངས་པ་ཞེས་བྱ་བ་ལ་སོགས་པ་གསུངས་པ་ཡིན་ཏེ་ས་གཞི་རྡོ་རྗེ་ཆེན་པོར་བྱིན་གྱིས་བརླབས་ཏེ་ཞེས་པ་ནི་སྐུ་དབང་ཆེན་གྱི་དཀྱིལ་འཁོར་དུ་བྱིན་གྱིས་བརླབས་ཏེ་ཞེས་པའོ། །ཉིད་ཀྱི་སྐུ་ལས་བྱང་ཆུབ་ཀྱི་སྙིང་པོ་ཅན་ཉེ་བར་
བསྟན་བ་ཞེས་པ་ནི་དེ་ལྟར་དབང་ཆེན་གྱི་དཀྱིལ་འཁོར་དུ་བསྒྱུར་བ་ལ་ཨ་ལ་སོགས་པའི་ཡི་གེ་རྣམས་དགོད་པར་བསྟན་པ་སྟེ་ཡི་གེ་དེ་རྣམས་ཉིད་མངོན་པར་བྱང་ཆུབ་པའི་ཏིང་ངེ་འཛིན་གྱི་སྒོ་ཡིན་པས་བྱང་ཆུབ་ཀྱི་སྙིང་པོ་ཅན་ཞེས་བྱ་སྟེ། དེ་ལྟར་བཅོམ་ལྡན་འདས་ཀྱིས་དབང་ཆེན་གྱི་དཀྱིལ་འཁོར་དུ་སྔར་བྱིན་གྱིས་བརླབས་ནས་ཕྱིས་ཡི་གེ་རྣམས་དགོད་པར་བསྟན་པ་ཡང་མ་འོངས་པའི་འགྲོ་བ་རྣམས་ཀྱིས་ཀྱང་ཚུལ་འདི་ལྟར་བྱའོ་ཞེས་བསྟན་པའོ། །ཨ་ནི་མཆོག་ཏུ་ཤེས་བྱ་བ། །དབང་ཆེན་དཀྱིལ་འཁོར་བསྟན་པ་སྟེ། །ཕྱི་རོལ་དང་ནི་ནང་དུ་ཡང༌། །རྡོ་རྗེའི་དཀྱིལ་འཁོར་ཤེས་པར་བྱ། །ཞེས་པ་ནི་གོང་དུ་བཤད་པའི་རིམ་པས་བདག་གི་ལུས་སངས་རྒྱས་ཀྱི་སྐུ་དབང་ཆེན་གྱི་དཀྱིལ་འཁོར་དང་བཅས་པར་བསམ་མོ་ཞེས་པའོ། །རྡོ་རྗེའི་དཀྱིལ་འཁོར་ཞེས་པ་ནི་དབང་ཆེན་ཀྱི་དཀྱིལ་འཁོར་ཏེ། རྡོ་རྗེའི་མཚན་མས་མཚན་པའོ། །དེར་འདུག་ནས་ནི་ཐམས་ཅད་བསམ། །ཞེས་པ་ནི་དེ་ལས་ཡི་གེ་ཨ་ལ་སོགས་པ་རྣམས་རིམ་པ་བཞིན་དུ་བསམ་མོ་ཞེས་པའོ། །རྣལ་འབྱོར་གནས་ཞེས་བཤད་པ་ཡིན། །ཞེས་པ་ནི་དབང་ཆེན་གྱི་དཀྱིལ་འཁོར་ལ་གནས་པའི་སྐུ་དེ་རྣལ་འབྱོར་གྱི་གནས་ཡིན་པས་རྣལ་འབྱོར་གནས་ཞེས་པའོ། །ཨ་ནི་སྲོག་གི་དམ་པ་སྟེ། །འགུགས་པར་བྱེད་པའི་མཆོག་ཏུ་བཤད། །ཅེས་པ་ནི་སྔགས་པ་དབང་ཆེན་གྱི་དཀྱིལ་འཁོར་ལ་གནས་ནས་ཡི་གེ་ཨ་དེ་ཁ་དོག་གསེར་བཙོ་མ་ལྟ་བུ་ནང་གི་དཀྱིལ་འཁོར་དབུགས་ཀྱི་རླུང་གིས་གྱེན་དུ་ཕུལ་བར་བསམས་ལ། བདག་གི་སྣའི་བུ་གནས་བྱུང་སྟེ་ཕ་རོལ་པོ་ནད་པའི་སྣའི་བུ་གར་ཞུགས་ནས་ཁོང་ཐམས་ཅད་དུ་ཁྱབ་པ་ནི་ཆུའི་ནང་དུ་རས་བཏིང་བའམ། །གཡག་རྔ་བཀྲམ་པ་དང་འདྲ་བར་བསམས་ཏེ་སླར་ཡིད་ཀྱིས་ཨ་དེ་དབུགས་དང་བཅས་པར་དྲང་བར་བསམས་ཏེ་རས་སམ་གཡག་རྔ་ཆུ་ནང་དུ་བཀྲམ་པའི་དཔུང་ནས་བཟུང་ནས་དྲངས་ན་ཞུམ་པར་འགྱུར་པ་དེ་ལྟར་བསམས་ནས་དེས་ནད་ཐམས་ཅད་ཨའི་རང་བཞིན་ལ་བསྡུས་ཏེ་སླར་ཡང་ནད་པའི་སྣ་ནས་འབྱུང་སྟེ། བདག་གི་ཁོང་དུ་ཞུགས་པར་བསམ་མོ། །དེ་བཞིན་དུ་ལན་མང་དུ་གོམས་པར་བྱས་ན་ཐམས་ཅད་འགུགས་པར་འགྱུར་རོ། །དེ་བཞིན་དུ་སེམས་དྲངས་ན་ཡང་ཨ་དེ་སྔ་མ་བཞིན་དུ་རླུང་དང་བཅས་པ་བདག་གི་ལུས་ལས་ཕ་རོལ་གྱི་ལུས་
ལ་འཇུག་པར་བསམས་ཏེ། ཁྱད་པར་དུ་བདག་གི་དབུགས་དང་ཕ་རོལ་གྱི་དབུགས་གཉིས་འདྲེས་ཏེ་གཅིག་ཏུ་གྱུར་པར་བསམས་ནས་ཨ་སྔ་མ་བཞིན་དུ་སླར་དྲངས་ན་དབང་དུ་འགྱུར་རོ། །དེ་བཞིན་དུ་ཨ་དས་བསྡུ་བར་བྱ་བའི་མིག་ལ་སོགས་པའི་དབང་པོའི་རྒྱུད་ལ་ཁྱབ་པར་བསམས་ཏེ་སླར་དྲངས་ན་རྐང་པས་འོང་བར་འགྱུར་རོ། །ཡང་སྔ་མ་བཞིན་དུ་བསམས་ཏེ་ཨ་དེས་བསྒྲུབ་པར་བྱ་བའི་ལུས་ཀྱི་ནང་ཐམས་ཅད་དུ་ཁྱབ་པར་བསམས་ཏེ་སླར་དྲངས་ན་གོང་བུ་འགུགས་པར་འགྱུར་རོ། །ནམ་ཞིག་ཀླད་ཀོར་གྱིས་སེལ་བར་འགྱུར། །ཞེས་པ་བསྡུ་བའོ། །སྔགས་པ་ནམ་ཞིག་ཟླ་གཅིག་ཏུ། །ཞེས་པ་ནས། ལྷ་དང་ལྷ་མིན་རྣམས་ཀྱིས་ཀྱང༌། །མི་བྱེད་ཤིན་ཏུ་བརྟག་པར་འགྱུར། །ཞེས་པའི་བར་གྱིས་བཟླས་པ་ལས་བྱུང་བའི་གྲུབ་པ་བཤད་དེ། བདག་གི་ལུས་སྔ་མ་བཞིན་དུ་བསྒྱུར་ནས་སྔ་དྲོ་མེལ་ཚེ་ཐུན་གཅིག །གུང་ལ་མེལ་ཚེ་ཐུན་ཕྱེད་དུ་བཟླས་པ་ཟླ་གཅིག་གི་བར་དུ་བྱས་ན་མ་རིག་པ་བསལ་བར་འགྱུར་ཞིང་ལྷ་དང་ལྷ་མ་ཡིན་ལ་སོགས་པས་ཀྱང་མི་ཚུགས་པར་འགྱུར་ཞེས་པའོ། །བདག་གི་རྙེད་པ་འགྲུབ་བྱའི་ཕྱིར། །རྒྱས་པའི་ལས་ནི་གང་ཅུང་ཟད། །དེ་ཀུན་རྟག་ཏུ་སྔགས་པ་ཡིས། །དཀྱིལ་འཁོར་གྱི་ནི་དབུས་སུ་བྱ། །ཞེས་པ་ནི་རྒྱས་པའི་ལས་དང་བདག་གི་ལོངས་སྤྱོད་བསྒྲུབ་པ་ལ་སོགས་པ་ཡང་དཀྱིལ་འཁོར་ལ་གནས་ཏེ། སྒྲུབ་པ་པོ་ཞེས་པའོ། །གསེར་གྱི་ཁ་དོག་འབར་དང་བཅས། །ཐོར་ཚུགས་དབུ་རྒྱན་འཆང་བ་ཡི། །རྫོགས་པའི་སངས་རྒྱས་ཏིང་འཛིན་བཞུགས། །དབང་ཆེན་གྱི་ནི་གཞི་ཞེས་བྱ། །ཞེས་པ་ནི་དབང་ཆེན་གྱི་དཀྱིལ་འཁོར་ལ་བཅོམ་ལྡན་འདས་ཀྱི་སྐུ་འདི་ལྟ་བུར་བཞུགས་པར་བསམ་ཞེས་པའོ། །རྡོ་རྗེ་པདྨ་རལ་གྲི་དང༌། །ཞེས་པ་ནས། དབང་ཆེན་དུ་ནི་བསྒོམས་ཏེ་བསྒྲུབ། །ཅེས་བྱ་བའི་བར་གྱིས་རྡོ་རྗེ་ལ་སོགས་པའི་རྫས་དེ་རྣམས་སྔགས་པ་དབང་ཆེན་གྱི་དཀྱིལ་འཁོར་ལ་གནས་ནས་རྒྱུད་གཞན་དག་ལས་འབྱུང་བའི་རིམ་གྱིས་བསྒྲུབ་པོ་ཞེས་པའོ། །མནན་བདག་ཀྱང་བཤད་པར་བྱ། །འདི་ནི་ཁྱེད་ཀྱིས་མཉམ་གཞག་ཉོན། །ཞེས་པ་ནས། དེ་ནི་མི་གཡོ་གནས་པར་འགྱུར། །ཞེས་པའི་བར་གྱིས་ཕ་རོལ་གྱི་རྒོལ་བ་ལ་སོགས་པ་མནན་
བར་བྱ་བ་སྟེ། སྔགས་བས་སྔ་མ་བཞིན་དུ་དབང་ཆེན་གྱི་དཀྱིལ་འཁོར་ལ་གནས་པར་བསམས་ནས་མནན་པར་བྱ་བའི་སྤྱི་བོར་རི་རབ་ཤིན་ཏུ་སེར་ཞིང་ལྕི་བ་རྩེ་མོ་བརྒྱད་པ་བསམས་ཏེ། དེའི་སྟེང་དུ་པདྨོ་བསམ་ཞིང་པདྨའི་སྟེང་དུ་རྡོ་རྗེ་རྒྱ་གྲམ་བསམས་ལ། སྟེང་དུ་ཨ་དེ་ལས་བཅོམ་ལྡན་འདས་ཀྱི་སྐུ་བསམས་ཏེ་མནན་པར་བྱ་བ་རྣམས་ཀྱི་སྤྱི་བོ་ནོན་པར་བསམས་ན་ཐམས་ཅད་མི་གཡོ་བར་འགྱུར་རོ་ཞེས་པའོ། །སྨན་ལ་ཡང་ནི་ལན་བརྒྱ་རུ། །ཞེས་པ་ནས། སྔོན་གྱི་ལས་ལས་བྱུང་བ་ཡི། །དེ་ཡི་ནད་རྣམས་འབྱང་བར་འགྱུར། །ཞེས་པའི་བར་ནི་བདག་སྔ་མ་བཞིན་དུ་བསམས་ཏེ་སྨན་ལ་ལན་བརྒྱ་བསྔགས་ནས་ནད་པ་ལ་བླུད་ན་ནད་འཚོ་བར་འགྱུར་རོ་ཞེས་པའོ། །དེ་ནས་གཞན་ཡང་ངེས་པ་ཡིས། །ཞེས་བྱ་བ་ནས། ཀླད་ཀྱི་འཁོར་དང་བཅས་བྱས་ན། །སེལ་བར་བྱེད་པའི་མཆོག་ཏུ་འགྱུར། །ཞེས་པའི་བར་གྱིས་པའི་སྒྲུབ་པ་རྣམས་བཤད་པ་སྟེ། ཡི་གེ་བ་བསམས་པ་ཡང་དབང་ཆེན་གྱི་དཀྱིལ་འཁོར་དུ་བསམས་པ་ནི་སྔ་མ་བཞིན་ཏེ། དེ་ལས་ཁྱད་པར་དུ་ན་ནང་གི་དབང་ཆེན་གྱི་དཀྱིལ་འཁོར་ལྟེ་བའི་ཐད་ཀར་བསམ་མོ། །གངས་དང་འོ་མ་དུང་འདྲ་བ། །ལྟེ་བའི་དབུས་ནས་བྱུང་བ་སྟེ། །པདྨ་དཀར་པོ་དམ་པ་ནི། །དེ་ཡི་དབུས་ན་རབ་ཏུ་གནས། །མགོ་ན་པོ་དམ་པ་རབ་ཏུ་ཞི། །ཞེས་པ་ནས། གདུང་བ་ཐམས་ཅད་ཞི་བྱེད་པ། །སྨུག་ཟིལ་འདུས་པའི་ནང་ན་གནས། །ཞེས་པའི་བར་གྱིས་བའི་ལས་གཅིག་བཤད་པ་སྟེ། བདག་ཉིད་དབང་ཆེན་གྱི་དཀྱིལ་འཁོར་དུ་གྱུར་ནས་ནང་གི་རྡོ་རྗེའི་དཀྱིལ་འཁོར་ལྟེ་བའི་ཐད་ཀར་བསམས་ཏེ་དེའི་སྟེང་དུ་པདྨ་དཀར་པོ་ཁ་བ་དང་འོ་མ་དང་དུང་འདྲ་བ་སྟེ་བའི་ནང་ནས་བྱུང་བ་འདུག་པར་བསམས་ཤིང་པདྨའི་སྟེང་དུ་ཡི་གེ་བ་སྟོན་གྱི་ཟླ་བའི་ཁ་དོག་འདྲ་བ་བསམས་ལ་བ་ལས་ཆུ་རྒྱུན་དགུ་འབྱུང་བས་སྒོར་བ་ཆུའི་དཀྱིལ་འཁོར་ཟླ་བའི་འོད་འདྲ་བ་དེའི་གཞིར་གྱུར་པ་ཡང་བསམས་ལ། ཡི་གེ་བདེ་ཡང་བུམ་པ་འདྲ་བ་སྨུག་པའི་ཟིལ་པ་དཀར་པོ་འདུས་པ་འདྲ་བའི་ནང་ན་འདུག་པ་བསམས་ཏེ། བདག་གི་ལུས་ཀྱི་ནང་ཐམས་ཅད་ཁྱབ་པར་བསམས་ན་གདུག་པ་དང་ཚ་བའི་རིམས་ལ་སོགས་པ་ཐམས་ཅད་འབྱང་བར་འགྱུར་རོ། །དེ་བཞིན་དུ་བདག་གི་ལུས་དབང་ཆེན་གྱི་དཀྱིལ་འཁོར་ལ་
འདུག་པར་བསམས་ལ་གཞན་གྱི་ལུས་ལ་ཡང་བདེ་དེ་བཞིན་དུ་བསམས་ན་གདུག་པ་དང་ཚ་བའི་རིམས་ལ་སོགས་པ་འབྱང་བར་འགྱུར་རོ། །འོ་མ་མུ་ཏིག་ཕྲེང་དཀར་དང༌། །ཞེས་པ་ནས། སྔགས་པས་ཡིད་ལ་བསམས་ན་ནི། །གདུང་བ་ཀུན་ལས་ཐར་བར་འགྱུར། །ཞེས་པའི་བར་གྱིས་པའི་ལས་གཞན་བཤད་དེ། ཡི་གེ་བ་དེ་སྔ་མ་བཞིན་དུ་བསམས་ནས་སྨུག་ཟིལ་མེད་པར་བདེ་ལས་ཆུ་རྒྱུན་དཀར་པོ་བྱུང་སྟེ། ཆུ་རྒྱུན་དེས་པ་དེ་ལ་བསྐོར་ནས་འཁྱིལ་བར་འདུག་པར་བསམས་ལ། དེ་བདག་གི་དབུགས་ཀྱིས་བསྐྱོད་ནས་རང་གི་ལུས་ཐམས་ཅད་དུ་ཁྱབ་པར་བསམས་ན་དེ་གདུང་བ་ལ་སོགས་པའི་ནད་རྣམས་ཞི་བར་འགྱུར་རོ། །དེ་བཞིན་དུ་ཕ་རོལ་ལ་བསམས་ན་ཡང་གདུང་བ་ལ་སོགས་པའི་ནད་རྣམས་དེ་ལྟ་བུར་ཞི་བར་འགྱུར་རོ། །མཉམ་པར་གཞག་པ་དངོས་འདི་རྣམས། །དཀྱིལ་འཁོར་འདིར་ནི་བསྒྲུབ་པར་བྱ། །ཞེས་པ་ནས། དཀྱིལ་འཁོར་དཔལ་དང་ལྡན་པ་འདི། །ཞི་བར་བྱེད་པར་བསམ་པ་འདི། །ཞེས་པའི་བར་གྱིས་བའི་དཀྱིལ་འཁོར་གྱི་རྣལ་འབྱོར་ལ་གནས་ནས་རྡོ་རྗེ་ལ་སོགས་པ་དང་རྫས་མིང་གིས་སྨོས་པ་དེ་རྣམས་བསྒྲུབས་ན་ཚེ་རིང་བ་ལ་སོགས་པའི་གྲུབ་བ་རྣམས་ཐོབ་པར་འགྱུར་ཏེ། རིམ་པ་བཞིན་དུ་སྦྱར་བར་བྱའོ། །ཀླད་ཀྱི་ཀོར་དང་བཅས་བྱས་ནས། །སེལ་བར་བྱེད་པའི་མཆོག་ཏུ་འགྱུར། །ཞེས་པ་ནི་ནད་པའི་ལུས་ལ་བ་དེ་ཀླད་ཀོར་དང་བཅས་པར་བསམས་ནབ་ནི་གཟུང་བའི་ཆོས་ཐམས་ཅད་སྟོང་བར་བྱེད་ལ། ཀླད་ཀོར་ནི་འཛིན་པ་ཐམས་ཅད་སྟོང་པར་སྟོན་པར་བྱེད་ལ། དེ་ལྟར་ལུས་དེ་གཟུང་བ་དང་འཛིན་པ་གཉིས་ཀ་དང་བྲལ་ཏེ་སྟོང་བས་ནད་ཀྱང་སྟོང་པའི་རང་བཞིན་དུ་འདུས་ནས་མེད་པར་འགྱུར་བའོ། །ར་ཞེས་བྱ་བ་ཡང་དག་མཆོག །ཅེས་པ་ནས། མེ་དང་ལྷན་ཅིག་འདི་སྤྱར་ན། །ཞེས་པའི་བར་གྱིས་རའི་སྒྲུབ་པ་དང་ལས་རྣམས་བཤད་དེ། ར་ཞེས་བྱ་བ་ཡང་དག་མཆོག །ཅེས་པ་ནི་ཆོས་ཐམས་ཅད་རྡུལ་དང་བྲལ་བའི་ཏིང་ངེ་འཛིན་སྟོང་པའི་རང་བཞིན་མཆོག་གི་དེ་བཞིན་ཉིད་དེ་རའི་ཡི་གེ་དེས་སྟོན་པས་ན་མཆོག་གི་དེ་བཞིན་ཉིད་ཅེས་བྱ་སྟེ་དོན་དམ་པའི་མཚན་ཉིད་དོ། །འོད་ཅན་རྣམས་ཀྱི་འོད་ཅེས་བྱ། །ཞེས་པ་ནི་འོད་ཅན་ནི་ཉི་མ་དང་ཟླ་བ་དང་སྐར་མ་ལ་སོགས་པ་སྟེ། འོད་ཅན་དེ་རྣམས་ཀྱི་ནང་ན་མེའི་འོད་
མཆོག་ཡིན་ལ། ཡི་གེ་ར་ནི་མེའི་ས་བོན་ཡིན་པས་འོད་ཅན་རྣམས་ཀྱི་མཆོག་ཅེས་བྱ་སྟེ་ཀུན་རྫོབ་ཀྱི་རང་བཞིན་བསྟན་པའོ། །དེས་ནི་ལས་རྣམས་གང་ཅུང་ཟད། །མཚམས་མེད་ལྔ་ལས་བྱུང་བ་ཡང༌། །རྣལ་འབྱོར་ཤིན་ཏུ་མཉམ་བཞག་ནས། །བསམས་ན་དེ་ཀུན་ཟད་པར་འགྱུར། །ཞེས་པའི་བར་གྱིས་ནི་དེ་བསྒོམས་པའི་འབྲས་བུ་བསྟན་པ་སྟེ། ཆོས་ཐམས་ཅད་རྡུལ་དང་བྲལ་བ་སྟོང་པ་ཉིད་ཀྱི་རང་བཞིན་དུ་བསྒོམས་ན་མི་དགེ་བ་བཅུ་ལ་སོགས་པའི་ལས་རྣམས་དང་མཚམས་མེད་པ་ལ་སོགས་པ་དམིགས་སུ་མེད་པས་དེ་དག་གི་འབྲས་བུ་ཟད་ཅིང་འབྱུང་བར་མི་འགྱུར་རོ། །ཡིད་འོང་ཐམས་ཅད་རབ་ཏུ་དམར། །གྲུ་གསུམ་པ་ཡི་ཚུལ་དུ་གནས། །ཞི་བ་འབར་བའི་ཕྲེང་བས་འཁྲིགས། །སུམ་མདོའི་རིས་མཚན་སྙིང་གར་གཞག །ཅེས་པ་ནི་མེའི་དཀྱིལ་འཁོར་གྱི་མཚན་ཉིད་དེ་སྙིང་གར་ནང་གི་རྡོ་རྗེའི་དཀྱིལ་འཁོར་གྱི་སྟེང་དུ་གྲུ་གསུམ་ཤིན་ཏུ་དམར་བ་འགྲེང་བུར་འདུག་བ་གྲུ་གསུམ་གྱི་མཚན་མས་བཏབ་པར་བསམ་མོ་ཞེས་པའོ། །རྣལ་འབྱོར་པ་ནི་དེར་འདུག་ནས། །ར་ནི་ཀླད་ཀོར་བཅས་པར་བསམ། ཞེས་པ་ནི་མེའི་དཀྱིལ་འཁོར་གྱི་མཚན་ཉིད་ཀྱི་དབུས་ན་ཡི་གེ་ར་ཁ་དོག་དམར་པོ་ཀླད་ཀོར་དང་བཅས་པ་འགྲེང་བུར་འདུག་པར་བསམ་ཞེས་པ་སྟེ། ཀླད་ཀོར་དང་བཅས་པ་ནི་ཀུན་དུ་སངས་རྒྱས་པའི་སྙིང་པོ་གཟུང་བ་དང་འཛིན་པ་གཉིས་དང་བྲལ་བར་སྟོན་པ་ཡིན་ལ། དེ་བཞིན་དུ་ཡི་གེ་བ་ཡང་ཀླད་ཀོར་མེད་ཀྱང་ཀུན་དུ་སངས་རྒྱས་པའི་སྙིང་པོ་ཡིན་པས་བའི་བུ་ག་ཉིད་ཀླད་ཀོར་ལྟ་བུར་འཛིན་པ་མེད་པར་སྟོན་པར་བལྟའོ། །མི་འཇིག་བས་ནི་ཅི་རིགས་པར། །དངོས་པོ་འདི་དག་དེར་བསྒྲུབ་པོ། །ཞེས་པ་ནས། མེ་དང་ལྷན་ཅིག་འདིར་སྦྱར་ན། །དེ་དག་ཐམས་ཅད་བྱེད་པར་འགྱུར། །ཞེས་པའི་བར་གྱིས་ཡི་གེ་རའི་སྒྲུབ་པ་དང་ལས་རྣམས་བཤད་དེ། སྔགས་བ་རའི་དཀྱིལ་འཁོར་ལ་གནས་ནས་སྒྲུབ་བ་མིང་གིས་སྨོས་པ་རྣམས་རྒྱུད་དང་རྟོག་པ་གཞན་ལས་བྱུང་བའི་ཆོ་གས་རྫས་ཀྱི་མཚན་མ་དང་བཅས་པའམ། མཚན་མ་མེད་པས་བསྒྲུབས་ན་ཉི་མ་ལ་སོགས་པ་གྲུབ་སྟེ་ཅི་བསྒོ་བ་ཉན་ཏོ། ཧ་ཞེས་བྱ་བ་དམ་པ་མཆོག །ཅེས་པ་ནས། རྒྱུ་ཀུན་དམིགས་སུ་མེད་སྒོ་ནས། །བདུད་ལས་རྣམ་པར་
རྒྱལ་བར་བྱེད། །ཅེས་པའི་བར་གྱིས་ཡི་གེ་ཧའི་སྒྲུབ་པ་དང་ཡོན་ཏན་དང་དཀྱིལ་འཁོར་ལ་སོགས་པ་བཤད་པ་སྟེ། ཧ་ཞེས་བྱ་བ་དམ་པ་མཆོག །ཅེས་པ་ནི་ཆོས་ཐམས་ཅད་རྒྱུ་དང་བྲལ་བར་སྟོན་པའི་རང་བཞིན་ཡིན་པས་དེ་ཁོ་ན་ཉིད་ཀྱི་མཆོག་ཅེས་པའོ། །རླུང་ནི་ཐམས་ཅད་ཡང་དག་འབྱུང༌། །ཞེས་པ་ནི་རླུང་གི་དཀྱིལ་འཁོར་ལས་འབྱུང་བའམ། དེ་ལས་རླུང་གི་དཀྱིལ་འཁོར་འབྱུང་བས་སོ། །རྒྱུ་དང་ལས་དང་འབྲས་བུ་དང༌། །གང་གིས་ས་བོན་རྣམས་སྐྱེ་བ། །འདི་ནི་ཀླད་ཀོར་བཅས་སྦྱར་ན། །དེ་དག་ཐམས་ཅད་འཇིག་པར་བྱེད། །ཅེས་པ་ནི་དེའི་རང་བཞིན་བསྒོམས་པའི་འབྲས་བུ་བསྟན་པ་སྟེ། ཧ་ཞེས་པ་ཀླད་ཀོར་དང་བཅས་པར་བསམས་པས་ཆོས་ཐམས་ཅད་རྒྱུ་དང་བྲལ་བའི་ཚུལ་གྱིས་གཟུང་བ་དང་འཛིན་པ་གཉིས་ཀ་དམིགས་སུ་མེད་དེ། །རྒྱུ་ཞེས་པ་ནི་མ་རིག་པ་ལ་སོགས་པའི་ཉོན་མོངས་པ་རྣམས་སོ། །ལས་ནི་ལུས་ངག་ཡིད་གསུམ་གྱི་སྒོ་ནས་དགེ་བ་དང་མི་དགེ་བ་ལ་སོགས་པ་རྣམས་སོ། །འབྲས་བུ་ནི་ལས་དེ་དག་གི་རྣམ་པར་སྨིན་པ་ངན་སོང་དང་བདེ་འགྲོ་ལ་སོགས་པའོ། །གང་གིས་ས་བོན་རྣམས་སྐྱེ་བ། །ཞེས་པ་ནི་རྒྱུ་དང་ལས་དེ་དག་གིས་སླར་ཡང་ཕུང་པོ་རྣམས་སྐྱེ་བ་སྟེ་དེ་དག་ཐམས་ཅད་དམིགས་སུ་མེད་པར་སྟོན་པས་ན་འཇིག་པར་བྱེད་དོ་ཞེས་བའོ། །དེ་ཡི་གཟུགས་ཀྱང་བཤད་པ་ནི། །ཁ་དོག་གནག་ལ་འོད་པོ་ཆེ། །མི་བཟད་འབར་བའི་ཕྲེང་བ་འཁྲིགས། །ཀུན་དུ་ཡང་ནི་རྣམ་པར་འཕྲོ། །ཞེས་པ་ནི་ཡི་གེ་ཧ་ཉིད་གཟུགས་བསྟན་པ་སྟེ། དེ་ཡང་རླུང་གི་དཀྱིལ་འཁོར་གྱི་སྟེང་ན་གནས་པར་བསམས་ཏེ་རླུང་གི་དཀྱིལ་འཁོར་ཡང༌། མཁས་པས་སྨིན་མའི་མཚམས་སུ་ནི། །དཀྱིལ་འཁོར་ལ་ནི་གནས་པར་བསམ། །ཞེས་པ་ནས། སྔགས་པས་དེར་གནས་བསམ་པར་བྱ། །ཞེས་པའི་བར་གྱིས་གསུངས་པ་ཡིན་ཏེ། གཡོ་བ་ནི་རླུང་གི་རང་བཞིན་གཡོ་བས་བསམ་མོ། །ཡི་གེ་རབ་ཏུ་མི་འགྱུར་བ། །སྔགས་པས་དེར་གནས་བསམ་པར་བྱ། །ཞེས་པ་ལ་ཡི་གེའི་རང་བཞིན་སྔར་བཤད་ཟིན་མོད་ཀྱི། ཡི་གེའི་སྒྲའི་རྗེས་ལ་མི་འགྱུར་བ་ཞེས་ཡང་བཟླས་ཏེ་གསུངས་པ་ནི་རབ་ཏུ་གོམས་པའི་མཐུས་ཡི་གེ་མི་འགྱུར་བར་བསམ་ཞེས་པའོ། །དཀྱིལ་འཁོར་དེ་ཡི་དབུས་སུ་ནི། །གང་གིས་མཐོང་བ་ཁོ་ན་ལ། །
ཞེས་པ་ནས། སྔགས་བས་མཉམ་པར་གཞག་པ་ཡིས། །དཀྱིལ་འཁོར་གནས་ན་དེ་ཀུན་བྱེད། །ཅེས་པའི་བར་གྱིས་ནི་སྔགས་པ་རླུང་གི་དཀྱིལ་འཁོར་ལ་གནས་ནས་མིང་གིས་སྨོས་པའི་དངོས་པོ་དེ་རྣམས་རྒྱུན་གཞན་ལས་བྱུང་བའི་ཆོ་ག་བཞིན་དུ་བསྒྲུབ་པར་བྱའོ་ཞེས་པ་སྟེ། ཡི་གེ་ཅི་ཡིན་ཡང་རུང་བཞི་ནི་རྩིས་མགོ་གཅིག་སྟེ། དབང་ཆེན་གྱི་དཀྱིལ་འཁོར་གྱི་དབུས་སུ་བསམ་ཞིང་བདག་ཉིད་ཀུན་དུ་སངས་རྒྱས་པའི་སྐུར་བསྒྱུར་བ་དང༌། ནང་གི་རྡོ་རྗེའི་དཀྱིལ་འཁོར་ལ་ཡི་གེ་བ་ལ་སོགས་པ་གང་བསམས་པའི་གནས་དེ་ཉིད་དུ་སྤོ་ཞིང་བསམ་པ་དང་ལས་སུ་བྱ་བ་རྣམས་མ་གཏོགས་པར་སྒྲུབ་པ་རྣམས་ལ་ཕྱག་རྒྱ་རྡོ་རྗེ་རྩེ་ལྔ་པ་བཅིངས་ཏེ། སྔོན་དུ་བསྙེན་པ་ཟླ་བ་གཅིག་ཏུ་དུས་གསུམ་དུ་བྱ་བ་དང༌། མཚན་མ་དང་བཅས་པ་དང༌། མཚན་མ་མེད་པ་གཉི་གས་སྒྲུབ་ཏུ་རུང་བ་ནི་ཀུན་ལ་སོ་སོར་སྦྱར་བར་བྱའོ། །འདིས་ནི་སྙིང་པོ་བྱང་ཆུབ་འདིར། །བྱང་ཆུབ་སེམས་དཔའ་གྲགས་ཆེན་རྣམས། །རྒྱུ་ཀུན་དམིགས་སུ་མེད་སྒོ་ནས། །བདུད་ལས་རྣམ་པར་རྒྱལ་བར་བྱེད། །ཅེས་པ་ནི་ཡི་གེའི་མཐུ་བསྟན་པ་སྟེ། བྱང་ཆུབ་སེམས་དཔའ་རྣམས་ཀྱང་ཡི་གེ་འདིའི་སྒོ་ནས་ཆོས་ཐམས་ཅད་རྒྱུ་དང་བྲལ་བར་རྟོགས་པས་བདུད་བཞི་རྣམ་པར་བཅོམ་སྟེ། མངོན་པར་བྱང་ཆུབ་པ་ཐོབ་པོ་ཞེས་པའོ། །རྒྱུ་མེད་པས་ན་འབྲས་བུའང་མེད། །ཅེས་པ་ནས། གོ་འཕང་དམ་པ་སྒྲུབ་པར་བྱེད། །ཅེས་པའི་བར་གྱིས་ཡི་གེ་ཁཾ་གི་རང་བཞིན་དང་སྒྲུབ་པ་བཤད་པ་སྟེ། ལས་ཀྱང་ཡོད་པ་མ་ཡིན་ཏེ། །དངོས་པོ་དེ་གསུམ་མེད་པས་ན། །སྟོང་པའི་ཡེ་ཤེས་འཐོབ་པར་འགྱུར། །ཞེས་པ་ནི་རྒྱུ་མ་རིག་པ་ལ་སོགས་པའི་ཉོན་མོངས་པ་དང་དགེ་བ་དང་མི་དགེ་བ་ལ་སོགས་པའི་ལས་དང༌། བདེ་འགྲོ་དང་ངན་འགྲོ་ལ་སོགས་པའི་འབྲས་བུ་རྣམས་ཡི་གེ་ཁཾ་གཟུང་བ་དང་འཛིན་པ་སྟོང་པར་སྟོན་པའི་སྒོ་ནས་དམིགས་སུ་མེད་ཅེས་པའོ། །རྫོགས་པའི་སངས་རྒྱས་མཐུ་ཆེན་གྱི། །དེའི་གཟུགས་ཡང་དག་བཤད་པ་ནི། །ཀླད་ཀོར་བཅས་དང་ལྡན་པ་སྟེ། །ཁཾ་ནི་སྟོང་པའི་མཆོག་ཅེས་བྱ། །ཞེས་བྱ་བ་ནི་ཡི་གེ་དེའི་རང་བཞིན་གསུངས་པ་སྟེ། ཡི་གེ་ཁཾ་དེ་གཟུང་བ་དང་འཛིན་པ་གཉིས་ཀ་དང་བྲལ་བར་སྟོན་པས་སྟོང་བའི་མཆོག་
ཅེས་བྱའོ། །རལ་གྲིའི་ཕག་རྒྱ་ལྡན་པ་ཡིས། །བསྒྲུབ་པར་བྱ་བ་ངེས་པར་བསྒྲུབ། །རལ་གྲི་ཞགས་པ་འཁོར་ལོ་དང༌། །ལྕགས་མདའ་དེ་བཞིན་ཐོབ་སྟེ། །རྫས་དེ་རྣམས་དང་ལྡན་ན་ནི། །གོ་འཕང་དམ་པ་སྒྲུབ་པར་བྱེད། །ཅེས་པ་ནི་སྔགས་པ་རྣམས་རྣལ་འབྱོར་གྱི་སྟན་ལ་གནས་ནས་སྤྱི་བོར་ཡི་གེ་ཁཾ་བསམས་ཏེ། ཐམས་ཅད་ནམ་མཁའི་རང་བཞིན་དུ་བསམས་ནས་ཡི་གེ་ཁཾ་འབའ་ཞིག་ཁ་དོག་ནམ་མཁའ་དང་འདྲ་བར་བསམས་ལ་རལ་གིའི་ཕྱག་རྒྱ་བཅིངས་ཏེ་སྔ་མ་བཞིན་དུ་བཟླས་ན་མིང་གིས་སྨོས་པ་རྣམས་འགྲུབ་བར་འགྱུར་རོ། །བདག་ཉིད་ཨ་ཞེས་བྱ་བའི་རང་གི་ངོ་བོར་བསྒྱུར་ནས་ཕྱི་དང་ནང་དུ་བཅས་པའི་དངོས་པོ་ཐམས་ཅད་ལ་མི་ལྟ་བར་གྱུར་ཅིང་ཞེས་པ་ནས། དེ་ལྟ་བུ་ལ་སོགས་པ་དག་ནི་ཡིད་ལས་བྱུང་བ་ཡིན་ནོ་ཞེས་པའི་བར་ནི་སྔགས་པས་རྣལ་འབྱོར་གྱི་སྟན་སྔ་མ་བཞིན་དུ་བསྒོམས་པ་ལས་ཁྱད་པར་དུ་འདོད་ཆགས་ལ་སོགས་པའི་ཉོན་མོངས་པ་རྣམས་ཀུན་ནས་མི་ལྡང་བར་ནུས་ཀྱི་བར་དུ་བདག་གི་དེ་ཁོ་ན་སྟོང་པར་བསྒོམ་པ་གོམས་པར་བྱས་ནས། ཨ་ལ་སོགས་པའི་སྙིང་པོ་རྣམས་སྒྲུབ་བ་དང་ལས་རྣམས་ཕྱི་རོལ་གྱི་རྫས་ལ་མི་ལྟོས་པར་སྒྲུབ་པ་བཤད་པ་སྟེ། བདག་ཉིད་ཨ་ཞེས་བྱ་བའི་རང་གི་ངོ་བོར་བསྒྱུར་ནས་ཕྱི་དང་ནང་དུ་བཅས་པ་དངོས་པོ་ཐམས་ཅད་ལ་མེ་ལྟ་བར་གྱུར་ཅིང་ཞེས་པ་ནི་ཨ་ལ་སོགས་པའི་རང་བཞིན་དུ་བསྒྱུར་ཏེ། ཕྱི་རོལ་གྱི་གཟུགས་ལ་སོགས་པའི་དངོས་པོ་རྣམས་དང༌། ནང་གི་གཟུགས་ཡོད་པའི་བློ་མི་སྐྱེ་ཞིང་དངོས་པོ་རྣམས་ལ་མ་ཆ་གས་པར་བྱས་ལ་ཨ་དེ་བསྒྲུབས་ན་དེའི་འབྲས་བུ་བོང་བ་དང་གསེར་དུ་ཡང་མི་འབྱེད་དེ། ཇི་ལྟར་རྡོ་བ་དང་བོང་པ་ལ་ཆགས་པ་མི་སྐྱེ་བ་དེ་བཞིན་དུ་གསེར་ལ་ཡང་ཆགས་པ་མི་སྐྱེ་སྟེ། འདོད་ཆགས་དང་ཞེ་སྡང་མངོན་དུ་མི་ལྡང་བ་དང་མི་དགེ་བ་བཅུའི་ལས་བྱས་པའི་སྡིག་པའི་འབྲས་བུའི་དབང་དུ་མི་འགྱུར་བ་སྟེ། དེ་བས་ན། དེ་ཚེ་དེ་ནི་དག་གྱུར་པ། །ཐུབ་པ་རྫོགས་པའི་སངས་རྒྱས་བཞིན། །དེས་ནི་ལས་རྣམས་ཐམས་ཅད་ནུས། །ཞེས་པ་ནི་གྲུབ་པ་རབ་འབྲིང་ལ་སོགས་པ་འགྲུབ་ཅིང་ཞི་བ་ལ་སོགས་པའི་ལས་རྣམས་ནུས་ཞེས་པའོ། །ཉེས་པ་ཐམས་ཅད་རྣམ་པར་སྤངས། །ཞེས་པ་ནི་ལས་དེ་དག་བྱེད་པ་ན་མ་ཚང་པའམ་འཁྲུལ་པ་ལ་སོགས་པའི་ཉེས་པ་མེད་པར་
བྱེད་ནུས་པར་འབྱུང་ཞེས་པའོ། །དེ་ནས་གཞན་སྔགས་རྣལ་འབྱོར་ལ། །ཞེས་པ་ནས། གང་གི་དེ་དག་འཐུང་བའམ། །ལག་པས་ཀྱང་ནི་རེག་ཀྱང་རུང༌། །དེ་ཀུན་ངེས་པར་བྱང་ཆུབ་ཏུ། །འགྱུར་ཏེ་འདི་ལ་དོགས་པ་མེད། །ཅེས་པའི་བར་གྱིས་བ་ཡིག་གི་རྣལ་འབྱོར་ཏེ། སྔགས་པ་རྣལ་འབྱོར་གྱི་སྟན་ལ་གནས་ནས་ཡི་གེ་བ་ལས་ཆུའི་དཀྱིལ་འཁོར་ལ་སོགས་པ་སྔ་མ་བཞིན་དུ་བསམས་ལ། ཁྱད་པར་དུ་ན་བ་ལས་ཆུའི་རྒྱུན་འབྱུང་བ་དང་ཆུའི་དཀྱིལ་འཁོར་གྱིས་བདག་གི་ལུས་སྤྱི་བོ་ནས་རྟིང་བའི་བར་དུ་རྒྱས་པར་གང་བར་བསམས་ཏེ། དེ་ལྟར་བརྟན་པར་ཡིད་ཆེས་པ་ན་ཆུ་དེ་དག་ཐམས་ཅད་བ་སྤུའི་བུ་གནས་ཕྱིར་བྱུང་སྟེ། བདག་གི་ལུས་ཀྱི་ཐོན་ཀོར་དང་ཁང་པ་ལ་སོགས་པ་ཀུན་དགའ་བར་བསམས་ལ་རིམ་གྱིས་གཙུག་ཁང་དང་ཡུལ་ལ་སོགས་པ་ཐམས་ཅད་དུ་གང་བར་བསམས་ན་ཆུ་དེ་ལ་སེམས་ཅན་སྐལ་བ་དང་ལྡན་པ་གང་གིས་འཐུངས་སམ། རེག་པ་ན་དེ་ལྟར་འཐུངས་པ་དང་རེག་པའི་སྤྱོད་ཡུལ་དུ་གྱུར་པ་དེ་ནི་སེམས་ཅན་ཕལ་བ་དེ་དང་མི་འདྲ་བར་སྐལ་བ་དང་ལྡན་པར་མངོན་པར་བྱང་ཆུབ་ཏུ་ངེས་པར་འགྱུར་རོ་ཞེས་པའོ། །ཡན་ལག་ཀུན་དུར་ཞེས་པ། །ཞེས་པ་ནས། བཏང་ནར་ཡིས་རྣམ་སྤྲུལ་པས།། སྔགས་པ་འདོད་པ་བཞིན་དུ་བྱེད། །ཅེས་པའི་བར་གྱིས་རའི་རྣལ་འབྱོར་ཏེ། ཡན་ལག་ཀུན་དུ་ར་ཞེས་པ། །འབར་བའི་ཕྲེང་བ་ཞི་བས་འཁྲིགས། །ཀུན་དུ་རྣམ་པར་འཕྲོ་བ་ནི། །ཤིན་ཏུ་རྣམ་པར་གཞག་པས་བསམ། །ཞེས་པ་ནི་སྔགས་པ་རྣལ་འབྱོར་གྱི་སྟན་ལ་སྔ་མ་བཞིན་དུ་གནས་ནས་སྙིང་གར་ཡི་གེར་མེའི་དཀྱིལ་འཁོར་ལ་གནས་པར་བསམས་ཏེ། འབར་བའི་འོད་འཕྲོས་པས་ལུས་ཀྱི་ནང་ཐམས་ཅད་ཁྱབ་པར་གང་བར་བསམས་ནས་དེ་ལྟར་བརྟན་པར་གྱུར་བ་དང་བ་སྤུའི་བུ་ག་ཐམས་ཅད་ནས་ཕྱིར་བྱུང་སྟེ་རིམ་གྱིས་གྲོང་ཁྱེར་དང་ཡུལ་ལ་སོགས་པ་ཐམས་ཅད་མེའི་འོད་འཕྲོ་བའི་སྣང་བས་གང་བར་བསམས་ཏེ། དེ་བས་ན། དེ་ཚེ་རྣལ་འབྱོར་བ་ཡི་ཕྱིར། །འབར་བ་ཀུན་དུ་སྣང་བྱེད་པ། །བཏང་ན་ཞེས་གསུངས་པ་ཡིན་ནོ། །ར་ཡི་རྣམ་པས། སྔགས་པ་འདོད་པ་བཞིན་དུ་བྱེད། །ཅེས་པ་ནི་རྣལ་འབྱོར་དེ་ལྟར་བྱས་ན་ར་ལས་མེ་བྱུང་བ་དེས་སྔགས་
པ་ཇི་ལྟར་འདོད་པ་བཞིན་དུ་བྱེད་པར་འགྱུར་རོ་ཞེས་པའོ། །ར་ཞེས་བྱ་བ་རོ་སྟོད་དུ། །བ་ཞེས་བྱ་བ་ལྟེ་བ་ཁུང༌། །འབར་བ་དང་ནི་ཆུ་འབབ་པ། །དེ་ཚེ་ཅིག་ཅར་སྟོན་པར་འགྱུར། །ཞེས་པ་ནི་ར་དང་ང་གཅིག་དུས་གཅིག་ཏུ་སྦྱར་བ་སྟེ། སྔགས་པ་སྔ་མ་བཞིན་དུ་རྣལ་འབྱོར་གྱི་སྟན་ལ་གནས་ནས་སྙིང་གར་ཡི་གེ་ར་མེའི་དཀྱིལ་འཁོར་ལ་གནས་པར་བསམས་ཏེ་ལྟེ་བའི་ཁུང་དུ་སྔ་མ་བཞིན་དུ་ཡི་གེ་བ་ཆུའི་དཀྱིལ་འཁོར་ལ་གནས་པར་བསམས་ན་དུས་གཅིག་ཏུ་ར་ལས་མེ་འབྱུང་བ་དང་བ་ལས་ཆུ་འབབ་པའི་ཆོ་འཕྲུལ་ཅན་དུ་འགྱུར་རོ། །དམྱལ་བ་གྲང་བའི་སྡུག་བསྔལ་རྣམས། །རས་ནི་ཤིན་ཏུ་ཞི་བར་བྱེད། །ཅེས་པ་ནིར་འབའ་ཞིག་སྔ་མ་བཞིན་དུ་མེའི་དཀྱིལ་འཁོར་ལ་གནས་ནས་བསྒྲིབས་ཏེ་བསྒྲུབས་ན་གྲུབ་པའི་མེ་དེ་སེམས་ཅན་དམྱལ་བའི་སྟེང་གི་བར་སྣང་ལ་གནས་ནས་ལུས་ལས་མེ་བྱུང་སྟེ་སེམས་ཅན་དམྱལ་པ་ཐམས་ཅད་ཁྱབ་པར་བྱས་གྲང་བས་སྒྲེབས་ཤིང་སྡུག་བསྔལ་བའི་སེམས་ཅན་དེ་རྣམས་མེ་དེས་ཞི་བར་ནུས་ཞེས་པའོ། །སྔགས་པ་སྔགས་ཀྱི་ཚུལ་གནས་པས། །བས་ཀྱང་ཚ་བ་ལ་སོགས་ཞི། །ཞེས་པ་ནི་སྔགས་པ་སྔ་མ་བཞིན་དུ་རྣལ་འབྱོར་གྱི་སྟན་ལ་གནས་ནས་ཡི་གེ་བ་སྔ་མ་བཞིན་དུ་ཆུའི་དཀྱིལ་འཁོར་ལ་གནས་པར་བསམས་ཏེ། བ་ལས་ཆུ་བྱུང་བ་ཡང་སྔ་མ་ལྟར་བསམས་ནས་བདུད་རྩིའི་ཆུ་དེས་ཚ་བས་གདུངས་པའི་སེམས་ཅན་དམྱལ་བ་དེ་དག་ཐམས་ཅད་བསིལ་བར་འགྱུར་ཏེ། ཞི་བར་བྱ་བའི་ཐབས་ནི་མེའི་རྣལ་འབྱོར་དང་མཐུན་ནོ། །ཧ་ཞེས་བྱ་བ་བ་དན་བཅས། །ར་ཞེས་བྱ་བའི་འོག་ཏུ་གཞག །སྡིག་དང་ལྡན་པའི་མི་རྣམས་ཀྱང༌། །དེ་ཡི་ལས་རྣམས་མྱུར་དུ་སྒྲུབ། །ཅེས་པ་ནི་མེ་དེ་ལས་ལ་སྦྱར་བ་ན་མེ་མི་འབར་ཞིང་ལས་སུ་རུང་བར་མ་གྱུར་ན་མེའི་དཀྱིལ་འཁོར་དེའི་འོག་ཏུ་ཡི་གེ་ཧ་རླུང་གི་དཀྱིལ་འཁོར་ལ་གནས་པ་བསམས་ཏེ་རླུང་ངེས་བསྐྱོད་པར་བསམས་ན་མེ་དེ་ལས་གང་ལ་སྦྱར་བ་དེ་ངེས་པར་བྱེད་དོ་ཞེས་པའོ། །སྡིག་དང་ལྡན་པའི་མི་རྣམས་ཀྱང༌། །ཞེས་པ་ནི་སྡིག་པ་དང་ལྡན་པའི་མིས་སྦྱར་ན་ཡང་འགྲུབ་ན་གཞན་ལྟ་སྨོས་ཀྱང་ཅི་དགོས་ཞེས་པ་སྟེ། ངེས་པར་ལས་བྱེད་པའི་ཆིག་བསྟན་པ་ཡིན་ལ། རྣལ་འབྱོར་པ་ནི་ཕྱི་དང་ནང་གི་དངོས་བོ་ལ་མི་བལྟ་ཞིང་ཀུན་ནས་ལྡང་བ་དང་བྲལ་བས་
བསྒོམ་པར་བྱ་བ་ཡིན་པ་སྡིག་པ་དང་ལྡན་པར་མི་སྤྱོད་དོ། །སྔགས་པ་དབང་ཆེན་ལ་འདུག་ནས། །ཆུ་ཡི་ལས་ནི་བརྩམ་པར་བྱ། །སེལ་བ་ལ་སོགས་ཐམས་ཅད་ཀྱང༌། །བྱེད་འགྱུར་འདི་ལ་ཐེ་ཚོམ་མེད། །ཅེས་པ་ནི་དབང་ཆེན་གྱི་དཀྱིལ་འཁོར་ལ་གནས་ནས་ཆུའི་ལས་བྱར་རུང་བར་བཤད་པ་སྟེ། སྔགས་པ་སྔ་མ་བཞིན་དུ་རྣལ་འབྱོར་གྱི་སྟན་ལ་གནས་ནས་ཡི་གེ་ཨ་དབང་ཆེན་གྱི་དཀྱིལ་འཁོར་ལ་སྔ་མ་བཞིན་དུ་བསམས་ཏེ། ཡི་གེ་བས་སྒྲུབ་པར་བྱེད་པའི་ལས་རྣམས་བྱེད་དོ་ཞེས་པའོ། །དེ་ལ་བ་ལས་ཆུས་ཐམས་ཅད་དུ་གང་བར་བྱ་བ་ནི་མ་གཏོགས་ཏེ། ཆུས་ཐམས་ཅད་དུ་གང་བར་བྱས་ན་དབང་ཆེན་གྱི་དཀྱིལ་འཁོར་དེ་ཉིད་ཆུའི་དཀྱིལ་འཁོར་དུ་གྱུར་པས་དབང་ཆེན་གྱི་དཀྱིལ་འཁོར་དུ་མི་འགྱུར་བའི་ཕྱིར་རོ། །སེལ་བ་ལ་སོགས་ཐམས་ཅད་ཀྱང༌། །བྱེད་འགྱུར་ཞེས་པ་ནི་ཡི་གེ་ཨ་དེ་ནད་པ་ལ་སོགས་པའི་སྤྱི་བོར་བསམས་ལ། དེའི་འོད་སེར་པོ་འཕྲོ་བ་ཞི་བའི་རང་བཞིན་གྱིས་སྤྱི་བོ་ནས་རྟིང་པའི་བར་དུ་མཐར་ཕྱིན་ང་ཁྱབ་པར་སོང་བས་བཀྲུས་པར་བསམས་ན་ནད་ཀྱང་དེ་བཞིན་དུ་འདག་པར་འགྱུར་ཞེས་པའོ། །དེ་བཞིན་དུ་ནམ་ཡི་གེ་བའི་སྦྱོར་བ་བྱེད་པ་ན། ཡང་ནད་པའི་སྤྱི་བོར་བ་དེའི་ཆུའི་དཀྱིལ་འཁོར་ལ་སོགས་པ་སྔ་མ་བཞིན་དུ་བསམས་ལ་བུམ་པ་ཁ་སྦུབ་པའི་ཁ་ནས་བདུད་རྩིའི་ཆུ་དཀར་པོ་བབ་པར་བསམས་ཏེ། ཆུ་དེས་སྤྱི་བོ་ནས་རྟིང་པའི་བར་དུ་མཐར་གྱིས་ཕྱི་ནང་དང་བཅས་པར་བཀྲུས་པར་བསམས་ན་ནད་ཐམས་ཅད་འབྱང་བར་འགྱུར་རོ། །སྦྱོར་བ་དེ་ནི་སྤྱིའི་ཆོ་ག་སྟེ། །གཞན་དག་ཏུ་ཡང་སྦྱར་པར་བྱའོ། །རླུང་ནི་ཀུན་དུ་འགྲོ་བར་གསུངས། །ཞེས་པ་ནས། ལྷ་ཡི་རྣ་བ་ཐོབ་པར་འགྱུར་རོ། །ཞེས་པའི་བར་གྱིས་ཡི་གེ་ཧ་དེ་དབང་ཆེན་ལ་སོགས་པའི་དཀྱིལ་འཁོར་ཀུན་གྱི་ལས་བྱེད་པར་བཤད་པ་སྟེ། དེ་ལ། རླུང་ནི་ཀུན་དུ་འགྲོ་བར་གསུངས། །ཞེས་པ་ནི་ཡི་གེ་ཧ་དེ་རླུང་གི་རང་བཞིན་ཏེ། དེ་ནི་དབང་ཆེན་ལ་སོགས་པའི་དཀྱིལ་འཁོར་ཀུན་དུ་གཏོགས་ཞེས་བྱ་སྟེ། དབང་ཆེན་གྱི་དཀྱིལ་འཁོར་དབྱིབས་གྲུ་བཞི་དང་ཆུའི་དཀྱིལ་འཁོར་ཟླུམ་པོ་ལ་སོགས་པའི་དབྱིབས་སོ་སོར་འབྱེད་པ་ཡང་རླུང་ཡིན་པའི་ཕྱིར་ཏེ། དེ་བས་ན། ཐམས་ཅད་འཇིག་པར་བྱེད་པའང་དེ། །རྣམ་པ་
སྣ་ཚོགས་ཐ་དད་པའི། །ལས་རྣམས་དབྱེ་བ་ལས་བྱུང་བ། །གཟུགས་ཀྱི་དཀྱིལ་འཁོར་དབུས་སུ་ནི། །ཞེས་བ་དང་འབྲེལ་ཏེ། རྣམ་པ་ཐ་དད་པ་ནི་དབང་ཆེན་ལ་སོགས་པའི་དཀྱིལ་འཁོར་ཁ་དོག་སེར་པོ་དང༌། དམར་པོ་དང༌། དཀར་པོ་ལ་སོགས་པའི་རྣམ་པ་ཐ་དད་པའོ། །སྣ་ཚོགས་ལས་རྣམས་ཞེས་པ་ནི་དཀྱིལ་འཁོར་དེ་རྣམས་ཀྱི་སོ་སོའི་ལས་སྣ་ཚོགས་པ་ཞེས་པའོ། །དབྱེ་བ་ལས་བྱུང་བ་ཞེས་པ་ནི་དབང་ཆེན་དང་ཆུའི་དཀྱིལ་འཁོར་ལ་སོགས་པ་སོ་སོ་བ་རྣམས་ཞེས་པའོ། །ཆོ་ག་འདི་ཡིས་རབ་ཏུ་བྱ། །ཞེས་པ་ནི་ཡི་གེ་ཧའི་ཆོ་གས་བྱ་ཞེས་པའོ། །གཟུགས་ཀྱི་དཀྱིལ་འཁོར་དབུས་སུ་ནི། །ཞེས་པ་སྔགས་པ་ལྷའི་གཟུགས་སུ་བསྒྱུར་ཏེ་དབང་ཆེན་གྱི་དཀྱིལ་འཁོར་རྣལ་འབྱོར་གྱི་སྟན་ལ་གནས་ཞེས་པ་སྟེ། མདོར་ན་ཡི་གེ་ཨ་དང་བ་ལ་སོགས་པ་སོ་སོའི་དཀྱིལ་འཁོར་དུ་ཡི་གེ་ཧ་བསམས་ཏེ་སྦྱོར་བ་བྱས་ན་ཨ་ལ་སོགས་པའི་ལས་རྣམས་བྱེད་པར་འགྱུར་རོ་ཞེས་པའོ། །ཡིད་ཡོངས་སུ་སྦྱོར་ཞིང་བཟླས་བརྗོད་བྱས་ན་ཡིད་རྣམ་པར་དག་པར་འགྱུར་རོ་ཞེས་པ་ཡིད་ནི་རྣམ་པ་དང་བཅས་པའི་སེམས་ཏེ་སྙིང་གར་མེ་ལོང་གི་དཀྱིལ་འཁོར་བསམས་ལ། དེའི་དབུས་ན་ཡི་གེ་ཧ་དེ་མེ་ལོང་གི་གཟུགས་བརྙན་བཞིན་དུ་བསམས་ཏེ་བཟླས་ན་ཕ་རོལ་གྱི་སེམས་ཤེས་པར་འགྱུར་རོ། །ལུས་ཡང་བར་གོམས་པར་བྱེད་ཅིང་འཆག་བཞིན་དུ་བཟླས་བརྗོད་བྱས་ན་རྫུ་འཕྲུལ་གྱི་རྐང་པ་འཐོབ་པར་འགྱུར་རོ་ཞེས་པ་ནི་སེམས་ལ་བདག་གིས་ས་ཤིང་བལ་ལྟ་བུར་ཡང་བའམ། །ནམ་མཁའ་ལ་འཕུར་ཏེ་འགྲོ་བ་སྙམ་དུ་སེམས་ཤིང་འཆག་པའི་ཚེ་ཡི་གེ་ཧ་བཟླས་ན་རྫུ་འཕྲུལ་གྱི་རྐང་པ་ཐོབ་ཅིང་ནམ་མཁའ་ལ་འགྲོ་བར་འགྱུར་རོ་ཞེས་པའོ། །ཙོག་པུར་འདུག་ལ་ཨ་ཞེས་བྱ་བ་རྣམ་པར་གཞག་སྟེ་ཟླ་བ་གཅིག་ཏུ་བཟླས་བརྗོད་བྱས་ན་ལྷའི་རྣ་བ་ཐོབ་པར་འགྱུར་རོ་ཞེས་པ་ནི་སྔགས་པ་ཙོག་པུར་བྱས་ཏེ་ཡི་གེ་ཨ་ཞེས་བྱ་བ་རྣ་བར་གཞག་ལ་ཟླ་བ་གཅིག་ཏུ་བཟླས་ན་ལྷའི་རྣ་བ་ཐོབ་པར་འགྱུར་རོ་ཞེས་པའོ། །གསང་བ་པའི་བདག་པོ་དངོས་གྲུབ་གྱི་གོ་འཕང་དེ་ལྟ་བུ་ལ་སོགས་པ་དག་ནི་ཡིད་ལས་བྱུང་བ་ཡིན་ནོ་ཞེས་པ་ནི་གོང་དུ་སྨོས་པའི་དངོས་གྲུབ་དེ་རྣམས་ཕྱི་རོལ་དང་ནང་དུ་མི་རྟོག་པར་གྱུར་པས་བསྒོམས་པའི་ཡིད་
ལས་བྱུང་ཞེས་པའོ། །གསང་བ་བའི་བདག་པོ་རྣམ་པར་བསམས་པ་ཙམ་ཁོ་ནས་དངོས་པོ་གཟུགས་ཅན་མ་ཡིན་པ་ཞེས་བྱ་བ་ནས། དེ་བས་ཀུན་མཁྱེན་དངོས་གྲུབ་དང༌། །གོ་འཕང་མཆོག་ཀྱང་བསྒྲུབ་པར་བྱ། །ཞེས་པའི་བར་གྱིས་སྤྱིར་སྔགས་ཀྱི་དངོས་གྲུབ་རྣམས་སེམས་ཀྱིས་བསམས་པ་དང༌། ཚིག་ཏུ་བརྗོད་པ་དང་དེ་བཞིན་གཤེགས་པའི་བྱིན་རླབས་ལས་བྱུང་བར་བསྟན་པ་སྟེ། དངོས་པོ་གཟུགས་ཅན་མ་ཡིན་པ་རྣམས་ཀྱི་འདུ་བྱེད་རྣམ་པ་ཐ་དད་པ་སྣ་ཚོགས་རྣམ་པར་བསམས་པ་ཙམ་ཁོ་ནས་འབྱུང་ངོ་ཞེས་སྦྲེལ་ཏེ། དངོས་པོ་གཟུགས་ཅན་མ་ཡིན་པ་ཞེས་པ་ནི་སེམས་དང་སེམས་ལས་བྱུང་བའི་ངོ་བོ་གཟུགས་མེད་པ་རྣམས་ལས་སོ། །མདོར་ན་ཕྱི་རོལ་གྱི་དངོས་པོ་རྣམས་མེད་པར་སེམས་ཀྱིས་བསམས་པ་ཙམ་ལས་དངོས་གྲུབ་རྣམ་པ་མང་པོ་སྣ་ཚོགས་པ་གཟུགས་དང་ལྡན་པ་རྣམས་འབྱུང་བར་འགྱུར་རོ་ཞེས་པའོ། །ལས་ཐམས་ཅད་པའི་ས་བོན་གྱི་བྱ་བ་ཚིག་ཏུ་བརྗོད་པ་ཙམ་ལས་འབྱུང་ཞེས་པ་ནི་ཧ་ལ་སོགས་པའི་ཡི་གེ་རྣམས་ཀྱི་སྒྲ་བརྗོད་པ་ཙམ་ལས་ཧ་ལ་སོགས་པའི་ཡི་གེ་འབྲུ་དབང་ཆེན་ལ་སོགས་པའི་དཀྱིལ་འཁོར་གྱིས་བོན་དུ་འགྱུར་བ་ཡང་རབ་དང་འབྲིང་ལ་སོགས་པའི་གྲུབ་པ་དང་ཞི་བ་ལ་སོགས་པའི་ལས་རྣམས་བྱེད་པར་འགྱུར་བ་འབྱུང་ངོ་ཞེས་པའོ། །གསང་བ་པའི་བདག་པོ་གཞན་ཡང་དེ་བཞིན་གཤེགས་པ་ནི་ཞེས་པ་ནས། །གཟུགས་བརྙན་ལྟ་བུར་བཞུགས་སོ་ཞེས་པའི་བར་གྱིས་ཐམས་ཅད་དུ་དེ་བཞིན་གཤེགས་པས་བྱིན་གྱིས་བརླབས་པར་བཤད་པ་སྟེ། དེ་བཞིན་གཤེགས་པ་དེ་བྱིན་གྱིས་རློབ་པ་ཡང་སྔོན་གྱི་སྨོན་ལམ་གྱི་ཤུགས་ཀྱིས་གདུལ་བའི་འགྲོ་བ་སོ་སོའི་ཇི་ལྟར་དད་པ་དང་རྗེས་སུ་མཐུན་པ་ཐམས་ཅད་ཀྱི་རེ་བ་ཡོངས་སུ་རྫོགས་པར་འགྱུར་བ་སེམས་ཅན་རེ་རེའི་མདུན་ན་ཡང་གཟུགས་བརྙན་ལྟ་བུར་བཞུགས་ཏེ་ཟླ་བ་ནམ་མཁའ་ལ་འདུག་ཀྱང་གཟུགས་བརྙན་མཚོ་དང་རྫིང་བུ་དང་ཆུ་སྣོད་ལ་སོགས་པ་ཐམས་ཅད་དུ་སྣང་བར་འགྱུར་བ་དང་འདྲའོ། །དེ་ལྟར་སེམས་ཀྱིས་བསམས་པ་ཙམ་དང་ཚིག་ཏུ་བརྗོད་པ་ཙམ་དང༌། དེ་བཞིན་གཤེགས་པའི་བྱིན་རླབས་ལས་གྲུབ་པ་རྣམ་པ་མང་པོ་སྣ་ཚོགས་པ་རྣམས་འབྱུང་བ་ལ་ལྟོས་ཞེས་པའོ། །དེ་བཞིན་གཤེགས་པ་
དེ་ནི་རྣམ་པར་མི་རྟོག་ཅེས་པ་ནས། ཆོས་དང་ཆོས་མ་ཡིན་པ་རྣམ་པར་སྤངས་ཀྱང་ཞེས་པའི་བར་ནི་དེ་བཞིན་གཤེགས་པ་དེ་ལྟར་སེམས་ཅན་ཐམས་ཅད་ཀྱི་མདུན་ན་གནས་ཀྱང་རྣམ་པར་རྟོག་པ་ལ་སོགས་པའི་དངོས་པོ་འདི་རྣམས་དང་བྲལ་ཞེས་པ་སྟེ། དེ་ལ་རྣམ་པར་མི་རྟོག་ཅེས་པ་ནི་དེ་བཞིན་གཤེགས་པ་དེ་ངས་སེམས་ཅན་འདི་རྣམས་ཀྱི་དོན་བྱའོ་སྙམ་པའི་རྣམ་པར་རྟོག་པ་དེ་མི་འཛིན་ཞེས་པའོ། །ཡིད་ཀྱི་སྤྱོད་ཡུལ་ལས་ཡང་དག་པར་འདས་པ་ཞེས་པ་ནི་ཡིད་ནི་རྣམ་པ་དང་བཅས་པའི་སེམས་དེ་ལས་འདས་པའོ། །བྱ་བ་དང་ལས་དང་ཞེས་པ་ནི་ལུས་ངག་ཡིད་གསུམ་གྱི་སྒོ་ནས་སྤྱོད་པའི་བྱ་བ་དང་ལས་རྣམས་དང་བྲལ་ལོ་ཞེས་པའོ། །ཆོས་དང་ཆོས་མ་ཡིན་པ་རྣམས་སྤངས་ཞེས་པ་ནི་ཆོས་ནི་དགེ་བ་བཅུའི་ལས་ཀྱི་ལམ་དང༌། ཆོས་མ་ཡིན་པ་ནི་མི་དགེ་བ་བཅུའི་ལས་ཀྱི་ལམ་སྟེ། དེ་དག་གི་དངོས་པོ་རྣམས་སྤངས་སོ་ཞེས་པའོ། །གསང་སྔགས་སྤྱོད་པ་ལས་བྱུང་པའི། །ཐམས་ཅད་མཁྱེན་པའི་གོ་འཕང་སྩོལ། །ཞེས་པ་ནི་དེ་ལྟར་དངོས་པོ་དེ་རྣམས་སྤངས་ཀྱང་མངོན་པར་ཤེས་པ་ལྔ་ལ་སོགས་པའི་དངོས་པོ་རྣམས་སྔགས་ཀྱི་སྤྱོད་པའི་སྒོ་ནས་ཐོབ་པར་བྱེད་དོ་ཞེས་པའོ། །དེ་བས་ཀུན་གྱིས་དངོས་གྲུབ་དང༌། །གོ་འཕང་མཆོག་ཀྱང་བསྒྲུབ་པར་བྱ། །ཞེས་པ་ནི་དེ་ལྟ་བས་ན་མངོན་པར་ཤེས་པ་ལྔ་དང་སངས་རྒྱས་བཅོམ་ལྡན་འདས་ཀྱི་གོ་འཕང་མཆོག་ཀྱང་བསྒྲུབ་པར་བྱའོ་ཞེས་པའོ། །དེ་ནས་དཔལ་ལྡན་རྡོ་རྗེ་འཛིན། །ཞེས་པ་ནས། སྔགས་པ་གསང་སྔགས་གནས་འདུག་པ། །ཡིད་ནི་དེ་ལྟར་ཤེས་ནས་སུ། །ཞེས་པའི་བར་གྱིས་སྔར་ཕྱི་དང་ནང་གི་བཟླས་པའི་ཡན་ལག་བཞི་དང༌། དཔའ་བོ་ཆེན་པོའི་སྙིང་པོ་ལྔའི་བཟླས་པའི་ཡན་ལག་གསུམ་སྔར་བཤད་པ་རྣམས་ཀྱང་དེ་བཞིན་གཤེགས་པའི་སྙིང་གར་ཟླ་བའི་དཀྱིལ་འཁོར་ལ་བཟླས་པར་བྱ་བའི་སྔགས་དགོད་པ་དང༌། དབང་ཆེན་ལ་སོགས་པའི་དཀྱིལ་འཁོར་རྣམས་ལ་བཟླས་པར་བྱ་བའི་སྔགས་རྣམས་བཀོད་དེ་བཟླས་པ་བྱའོ་ཞེས་མདོ་ཙམ་དུ་གསུངས་ལ། ཟླ་བའི་དཀྱིལ་འཁོར་དང་བཟླས་པའི་སྔགས་རྣམས་ཟློས་པ་ཉིད་ཀྱི་ཚེ་ན་གསལ་བར་སྣང་བར་བསམ་པའི་ཐབས་ཞིབ་ཏུ་མ་གསུངས་ཀྱང་དེ་དག་གསལ་བར་སྣང་བའི་ཡོངས་སུ་སྦྱང་
བའི་སྒོ་བཤད་པ་དང་ནང་གི་བཟླས་པའི་ཡན་ལག་བཞི་སྦྱོར་བ་ལ་བདག་གི་སྙིང་གར་དེ་བཞིན་གཤེགས་པའི་སྐུ་མེ་ལོང་གི་དཀྱིལ་འཁོར་གྱི་ནང་ན་བཞུགས་བར་བསམ་པ་ཡང་མདོ་ཙམ་དུ་གསུངས་ཀྱི་གསལ་བ་ཉིད་དུ་མ་བཤད་པས་དེ་ཡང་སྔགས་ཟློས་པའི་ཚེ་ན་སེམས་ལ་གསལ་བར་སྣང་བར་བྱ་བ་བཤད་པ་སྟེ། དེ་ལ། དེ་ནས་དཔལ་ལྡན་རྡོ་རྗེ་འཛིན། །ངོ་མཚར་གྱུར་ནས་མིག་བགྲད་དེ། །ཞེས་པ་ནི་གོང་དུ་དཔའ་བོ་ཆེན་པོའི་སྙིང་པོ་རྣམས་བཤད་པ་ཐོས་ཤིང་རྟོགས་ནས་ངོ་མཚར་དུ་གྱུར་པའོ། །དེ་ཚེ་རྡོ་རྗེ་འོད་ཟེར་ནི། །མེ་སྟག་འཕྲོ་བ་འདྲ་གསོར་ཞིང༌། །སངས་རྒྱས་ཞིང་ནི་འདི་ཐམས་ཅད། །ཀུན་དུ་སྣང་བར་བྱས་ནས་སུ། །ཞེས་པ་ནི་དེ་ལྟར་ངོ་མཚར་དུ་གྱུར་ཏེ་དགའ་བའི་ཤུགས་ཀྱིས་རྡོ་རྗེ་གསོར་ཞིང་རྡོ་རྗེའི་འོད་ཟེར་མེ་སྟག་འཕྲོ་བ་དང་འདྲ་བས་སངས་རྒྱས་ཀྱི་ཞིང་ཐམས་ཅད་ཁྱབ་སྟེ་སྣང་བར་གྱུར་པའོ། །གཉིས་སུ་ན་དེ་ལྟར་རྡོ་རྗེ་གསོར་བ་ཡང་མ་འོངས་པའི་འགྲོ་བ་རྣམས་སྔགས་ཀྱི་སྤྱོད་པ་ལ་དད་པ་བསྐྱེད་པ་སྟེ་སྔགས་ཀྱི་ཕྱག་རྒྱ་རྡོ་རྗེ་གསོར་བས་སངས་རྒྱས་ཀྱི་ཞིང་ཐམས་ཅད་འོད་ཀྱིས་ཁྱབ་པ་མཐོང་ན་དད་པ་སྐྱེ་བའི་ཕྱིར་རོ། །སྔགས་ཀྱི་འཇུག་པ་བཤད་ལགས་ན། །འཇུག་པ་དེ་ཡང་མ་རྟོགས་ན། །གསང་སྔགས་གང་ནས་འོང་བ་དང༌། །གང་དུ་འགྲོ་བ་གཙོ་ཁྱོད་ཀྱིས། །དེ་ཀུན་བདག་ལ་བཤད་དུ་གསོལ། །ཞེས་པ་ནི་སྔར་བཟླས་པའི་ཡན་ལག་བཞི་ལ་སོགས་པ་གསུངས་པ་ན་ཟླ་བའི་དཀྱིལ་འཁོར་ལ་སྔགས་དགོད་པར་བྱ་བ་བཤད་པ་རྣམས་ཟློས་པ་ཉིད་ཀྱི་ཚེ་བདག་གི་སྙིང་གནས་དེ་བཞིན་གཤེགས་པའི་སྙིང་གར་འགྲོ་བ་དང་དེ་བཞིན་གཤེགས་པའི་སྙིང་ག་ནས་དབུགས་སླར་སྡུད་པར་བསམ་ཞིང་བདག་གི་སྙིང་གར་དམིགས་པ་ན་གང་ནས་འོང་བའི་གནས་བདག་གིས་གསལ་བར་མ་དམིགས་ན་གནས་དེ་དང་དེ་དག་ཇི་ལྟར་དམིགས་པར་བགྱི་བ་བཤད་དུ་གསོལ་ཞེས་པའོ། །གོ་འཕང་དམ་པ་ཁྱོད་ལས་མེད། །ཁྱོད་ནི་ཇི་ལྟར་ཆུ་རྣམས་ཀྱི། །རྒྱ་མཚོ་བཞིན་དུ་ཆོས་ཀུན་གནས། །ཞེས་པ་ནི་བཅོམ་ལྡན་འདས་ལ་བསྟོད་པའི་ཚིག་སྟེ། ཆོས་ཀུན་གྱི་གནས་ཞེས་པ་ནི་ཁྱོད་ནི་
ལུང་གི་ཆོས་དང་རྟོགས་པའི་ཆོས་ཀྱི་གནས་སོ། །ཆུ་རྣམས་ཀྱི་རྒྱ་མཚོ་བཞིན་ཞེས་པ་ནི་དེའི་དཔེ་སྟེ། ཆུ་ཐམས་ཅད་ཀྱི་གནས་ཀྱང་རྒྱ་མཚོ་ཡིན་པ་དང་འདྲའོ་ཞེས་པའོ། །སེམས་དཔའ་ཆེན་པོ་དཀྱིལ་འཁོར་གྱི། །གནས་ནི་ཡིད་ཅེས་བཤད་པ་ཡིན། །ཞེས་པ་ནི་གོང་དུ་ཕྱག་ན་རྡོ་རྗེས་གསོལ་བའི་དོན་སྔགས་རྣམས་ཀྱི་གནས་དཀྱིལ་འཁོར་རྣམས་ཡིན་པར་གསུངས་པ་ཡང་ཡིད་ཡིན་པར་བཤད་དེ། །ཡིད་ཅེས་པ་ནི་རྣམ་པ་དང་བཅས་པའི་སེམས་ཏེ། ནམ་བདག་གི་སེམས་ཟླ་བའི་དཀྱིལ་འཁོར་ལ་སོགས་པའི་རྣམ་པར་སྣང་བར་གྱུར་བ་དེ་ཉིད་གནས་ཞེས་བཤད་དོ་ཞེས་པ་སྟེ། མདོར་ན་སྔགས་ཟློས་པར་བྱེད་པའི་ཚེ་རབ་ཏུ་གོམས་པའི་མཐུས་བདག་གི་སེམས་ཉིད་ཟླ་བའི་དཀྱིལ་འཁོར་ལ་སོགས་པའི་རྣམ་པར་གསལ་བར་སྣང་བར་བྱའོ། །དེ་བས་ན། སྙིང་ནི་གསང་སྔགས་གནས་ཡིན་པར། །ཤེས་ན་འབྲས་བུ་ཐོབ་པར་འགྱུར། །ཞེས་གསུངས་པ་ཡིན་ཏེ་བདག་གི་སེམས་ཉིད་སྔགས་རྣམས་ཀྱི་གནས་སུ་ཤེས་ན་ཏིང་ངེ་འཛིན་གྲུབ་ཅིང་སེམས་སྦྱངས་པའི་མཚན་མ་ཡིན་པས་དེ་ནས་ཇི་ལྟར་བསམས་པའི་གྲུབ་པ་ལ་སོགས་འཐོབ་པར་འགྱུར་རོ་ཞེས་པའོ། །དཀར་པོ་སེར་པོ་དམར་པོ་གང༌། །ཡིད་ཀྱིས་སེམས་པར་བྱེད་པ་སྟེ། །དེ་ལ་ཡོངས་སུ་སྤྱོད་པ་གང༌། །དེ་ནི་སེམས་ཀྱིས་བྱེད་པ་ཡིན། །ཞེས་པ་ནི། སེམས་དཔའ་ཆེན་པོ་དཀྱིལ་འཁོར་གྱི། །གནས་ནི་ཡིད་ཅེས་བཤད་པ་ཡིན། །ཞེས་པའི་འགྲེལ་པའི་ཚིག་སྟེ་ཡིད་ཇི་ལྟར་གནས་ཡིན་པ་དང་དཀྱིལ་འཁོར་ཡང་གང་རྣམས་ཡིན་པ་བསྟན་པ་སྟེ། དབང་ཆེན་དང་ཆུའི་དཀྱིལ་འཁོར་དཀར་པོ་དང་སེར་པོ་དང་དམར་པོ་ལ་སོགས་པ་རྣམས་ཡིད་ཀྱིས་བསམས་པ་སྟེ། དེ་རྣམས་བྱེ་བྲག་ཏུ་འབྱེད་ཅིང་ཡོངས་སུ་གཅོད་པར་བྱེད་པ་ནི་སེམས་ཡིན་ཏེ། སེམས་ཀྱིས་དཀྱིལ་འཁོར་དེ་རྣམས་གང་ཡང་རུང་བ་ཞིག་བསམས་ནས་གོམས་པའི་མཐུས་བདག་གི་སེམས་དཀྱིལ་འཁོར་གྱི་རྣམ་པ་ཉིད་དུ་གྱུར་ན་སེམས་དེ་ལ་གནས་ཞེས་བྱའོ། །སེམས་ནི་མགུ་ནས་ངེས་གྱུར་པ། །དེ་ནི་སྙིང་ཞེས་བཤད་པ་ཡིན། །ཞེས་པ་ནི། སྙིང་ནི་གསང་སྔགས་གནས་ཡིན་པར། །ཤེས་ན་འབྲས་བུ་ཐོབ་པར་འགྱུར།།
ཞེས་གོང་དུ་བཤད་པའི་འབྲེལ་བ་སྟེ་བདག་གི་སེམས་ཀྱི་དཀྱིལ་འཁོར་གྱི་རྣམ་པར་ཞེན་པར་འགྱུར་ཏེ། དེ་ལས་མི་འགྱུར་ཞིང་རྩེ་གཅིག་པར་འགྱུར་ན་ངེས་སེམས་ངེས་པར་མགུ་བ་ཡིན་ཏེ་དེ་ལྟ་བུའི་ཚུལ་དུ་སེམས་མགུ་བར་གྱུར་པ་དེ་ནི་སྔགས་རྣམས་ཀྱི་གནས་སྙིང་ཡིན་པར་ཤེས་པར་བྱའོ། །དེར་གནས་པ་ཡི་གསང་སྔགས་རྣམས། །འབྲས་བུ་རྒྱ་ཆེན་སྟེར་བར་འགྱུར། །ཞེས་པ་ནི་དེ་ལྟར་རང་གི་སེམས་ཉིད་ཟླ་བའི་དཀྱིལ་འཁོར་ལ་སོགས་པའི་རྣམ་པར་གྱུར་ཏེ་སྔགས་རྣམས་ཀྱང་དེ་ལ་གནས་པར་སྣང་ཞིང་སེམས་ཙམ་དུ་ཤེས་ན་སྔགས་དེ་རྣམས་འབྲས་བུ་རྒྱ་ཆེར་སྟེར་རོ་ཞེས་པའོ། །དེ་རུ་པདྨ་བསམ་པ་ནི། །འདབ་མ་བརྒྱད་པ་ཟེ་བར་བཅས། །ཞེས་པ་ནས། སྔགས་པ་གསང་སྔགས་གནས་འདུག་པས། །ཡིད་ནི་དེ་ལྟར་ཤེས་ནས་སུ། །ཞེས་པའི་བར་གྱིས་ནང་གི་བཟླས་པ་ཡན་ལག་བཞི་སྔར་བཤད་པ་ན་བདག་གི་ལུས་ལྷར་བསྒྱུར་བའི་སྙིང་ག་ན་དེ་བཞིན་གཤེགས་པའི་སྐུ་མེ་ལོང་གི་དཀྱིལ་འཁོར་གྱི་ནང་ན་གནས་པ་བསམ་པ་དེ་ཉིད་ཞིབ་ཏུ་བཤད་པ་སྟེ། དེ་རུ་པདྨ་བསམ་པ་ནི། །འདབ་མ་བརྒྱད་པ་ཟེ་བར་བཅས། །ཨ་ཞེས་བྱ་བ་འབར་ཕྲེང་འཁྲུགས། །བཟང་པོ་དེ་རུ་གནས་པ་ནི། །ཞེས་པ་རང་གི་སེམས་ཟླ་བའི་དཀྱིལ་འཁོར་གྱི་རྣམ་པར་གྱུར་པ་དེར་པདྨོ་དང་ཨ་བསམ་མོ་ཞེས་པའི་ཨ་དེ་ལས་བཅོམ་ལྡན་འདས་རྣམ་པར་སྣང་མཛད་ཀྱི་སྐུར་བསམ་པ་ནི། །ཞི་བ་ཀུན་དུ་རྣམ་པར་གཡོ། །ཞེས་པར་སྲོག་དང་བཅས་པ་འདྲ་བར་བསམ་མོ་ཞེས་པའོ། །གཙོ་བོ་སྣ་ཚོགས་གཟུགས་མདའ་བ། །ཞེས་པ་ནི་སྐུ་མི་ཟད་པའི་རྒྱན་ལ་སོགས་པ་རྣམས་དུ་མར་འབྱུང་བའི་རང་བཞིན་ཅན་ཞེས་པའོ། །སྣང་བ་ཀུན་དུ་སྟོན་པ་ནི། །ཞེས་པ་སེམས་ཅན་ཐམས་ཅད་ཀྱི་མདུན་ན་གནས་པར་སྟོན་པའོ། །མེ་ལོང་ཕུག་ན་གནས་པ་བཞིན། །ཞེས་པ་ནི་སྔར་བཤད་ཟིན་ཏོ། །ཆུ་ཡི་ཟླ་བའི་རྣམ་པ་བཞིན། །ཞེས་པ་ནི་དཔེ་སྟེ་ཟླ་བ་དེ་ཆུའི་ནང་ན་གཟུགས་འབྱུང་བར་བྱེད་པ་དང་འདྲའོ། །ཡིད་ནི་དེ་ལྟར་ཤེས་ནས་སུ། །ཞེས་པ་ནི་སྔགས་པས་རང་གི་ཡིད་དེ་བཞིན་གཤེགས་པའི་སྐུ་དེ་ལྟ་བུའི་རྣམ་པར་ཤེས་པར་བྱའོ་ཞེས་པའོ།།
དེ་ལྟར་དེ་བཞིན་གཤེགས་པའི་སྐུའི་བྱེ་བྲག་བཤད་པ་དེ་རྣམས་ཀྱང་རྣལ་འབྱོར་པས་ཚུལ་དེ་ལྟར་བསྒོམ་པར་བྱ་བ་བསྟན་པའི་ཞར་ལ་དེ་བཞིན་གཤེགས་པའི་སྐུ་གསུམ་ཆར་ལ་བསྟོད་པ་ཡང་བསྟན་ཏེ། ཨ་ཞེས་བྱ་བ་དེ་རུ་གནས། །ཞེས་པ་ནི་ཆོས་ཀྱི་སྐུའི་རང་བཞིན་དུ་བསྟན་ཞིང་བསྟོད་པའོ། །འབར་ཕྲེང་འཁྲུག་ཅེས་པ་ནས། གཙོ་བོ་སྣ་ཚོགས་གཟུགས་མངའ་བ། །ཞེས་པའི་བར་གྱིས་ལོངས་སྤྱོད་རྫོགས་པའི་སྐུའི་རང་བཞིན་དུ་བསྟོད་པའོ། །སྣང་བ་ཀུན་དུ་སྟོན་པ་ནི། །ཆུ་ཡི་ཟླ་བའི་རྣམ་པ་བཞིན། །ཞེས་པ་ནི་སྤྲུལ་པའི་སྐུའི་རང་བཞིན་དུ་བསྟོད་བའོ། །དེ་ནས་སྔགས་པས་སྟོད་དུ་ཡང༌། །ཞེས་པ་ནས། སངས་རྒྱས་ཡེ་ཤེས་མཆོག་གྱུར་པ། །ཞེས་པའི་བར་ནི་རྣལ་འབྱོར་གྱི་སྟན་ལ་གནས་པ་ལས་ཀླད་དུ་ཡང་ཡི་གེ་ཨཾ་ཤིན་ཏུ་དཀར་བ་བསམས་ལ་མིག་གི་ནང་དུ་ཡི་གེ་ར་བསམས་ཏེ། ཡི་གེ་དེའི་འོད་ཀྱིས་སྙིང་ག་ན་དེ་བཞིན་གཤེགས་པའི་སྐུ་བསམས་པ་དེ་སྣང་བར་བསམས་པ་དང༌། དེ་རྣམས་བསམས་ནས་ཀྱང་ཡི་གེ་རའི་གནས་མིག་གཉིས་སུ་ཡི་གེ་ལ་བསམས་ཏེ་ལའི་སྒྲའི་དེ་ཁོ་ན་ཉིད་ཆོས་ཐམས་ཅད་མཚན་ཉིད་མེད་པར་སྟོན་པ་ལ་དམིགས་ནས་ཐམས་ཅད་སྟོང་པའི་རང་བཞིན་དུ་བསམས་པ་དང་སླར་ཡང་ཨ་ལ་སོགས་པའི་ཡི་གེ་དག་བསམས་པ་ལས་དངོས་གྲུབ་ཏུ་འགྱུར་བ་དང་དེའི་རྗེས་སུ་བསྔགས་པ་རྣམས་འཆད་དེ། །ཡི་གེ་དེ་རྣམས་དེ་ལྟར་བསམས་པ་དང་དེ་སེམས་ཡོངས་སུ་སྦྱང་བ་དང༌། དེ་རྣམས་ཀྱིས་རྣལ་འབྱོར་པས་གྲུབ་པ་འཐོབ་པའི་ཕྱིར་རོ། །དེ་ལ་སེམས་ཅན་སུ་སྦྱོང་བའི་རིམ་པ་ཡང་ཐོག་མ་ཉིད་བདག་གི་ལུས་ཡི་གེ་ཨ་ལ་སོགས་པའི་སྒོ་ནས་མ་སྐྱེས་ཤིང་མ་བྱུང་བའི་སྟོང་པར་གཤིག་སྟེ། དེ་ནས་སླར་ཡང་ཡི་གེ་ཨ་བསམས་ཏེ་དེ་ལས་སྔར་བཤད་པའི་རིམ་པ་བཞིན་དུ་ཕྱི་དང་ནང་གི་དབང་ཆེན་གྱི་རྡོ་རྗེའི་དཀྱིལ་འཁོར་དང་བཅས་པའི་ལྷའི་གཟུགས་སུ་བདག་གི་ལུས་བསྒྱུར་ཏེ་ནང་གི་དཀྱིལ་འཁོར་གྱི་དབུས་ན་བཅོམ་ལྡན་འདས་རྣམ་པར་སྣང་མཛད་སྔར་བཤད་པའི་ཚུལ་བཞིན་དུ་བསམས་ལ། དེ་ནས་ཀླད་པའི་ནང་དུ་ཡི་གེ་ཨ་ཤིན་ཏུ་དཀར་བ་བསམ་ཞིང་མིག་གཉིས་སུ་བསམས་ཏེ་ར་དེ་
ཡང་ཆོས་ཀྱི་དབྱིངས་ཀྱི་ཡི་གེ་ཤིན་ཏུ་དཀར་བ་དེའི་འོད་ཀྱིས་སླར་སྙིང་ག་ན་བཅོམ་ལྡན་འདས་ཀྱི་སྐུ་མེ་ལོང་གི་ནང་ན་བཞུགས་པ་དང་འདྲ་བ་ལ་གསལ་བར་སྣང་བར་བྱའོ། །དེ་ནས་དེའི་འོད་ཀྱིས་སླར་ཡང་སྟོད་དུ་བསམས་ནས་ཡི་གེ་ཨ་དེ་ཤིན་ཏུ་གསལ་བར་སྣང་བར་བྱ་སྟེ། དེ་ལྟར་གསལ་བ་བརྟན་པར་གྱུར་པ་དང་སླར་ཡང་ཡི་གེ་རའི་གནས་མི་གཉིས་སུ་ཡི་གེ་ལ་ཀླ་དཀོར་དང་བཅས་པས་བསམས་ལ། དེའི་སྒྲའི་དེ་ཁོ་ན་ཉིད་ཆོས་ཐམས་ཅད་མཚན་ཉིད་དང་བྲལ་བ་ལ་དམིགས་པས་ཡི་གེ་ཨ་ལ་སོགས་པ་སྔར་བསམས་པ་ཐམས་ཅད་སྟོང་པར་བསམ་མོ། །དེ་ལྟར་སྟོང་པར་བསམས་པ་ཡང་བརྟན་པར་གྱུར་ནས་ཡང་དག་གི་སེམས་དབང་དུ་གྱུར་པར་བྱ་བའི་ཕྱིར་སྔ་མའི་རིམ་པ་བཞིན་དུ་རྣལ་འབྱོར་གྱི་སྟན་དང་བཅོམ་ལྡན་འདས་ཀྱི་སྐུ་སྙིང་གར་བསམས་པ་དང༌། ཀླད་པར་ཨ་བསམས་པ་རྣམས་སྔ་མའི་རིམ་པ་བཞིན་དུ་བྱའོ། །དེ་བཞིན་དུ་ཡང་དང་ཡང་དུ་ཡི་གེ་ལ་བསམས་ནས་སྟོང་བར་བྱ་བ་དང་སླར་བཅོམ་ལྡན་འདས་ཀྱི་གཟུགས་དང་ཨ་ལ་སོགས་པ་བསམས་པ་དང་སྟོད་པར་བྱ་བདག་སེམས་དབང་དུ་བྱ་བའི་ཕྱིར་ལན་མང་དུ་གོམས་པར་བྱ་སྟེ་དེ་བས་ན། དེ་ནས་སྔགས་པས་སྟོད་དུ་ཡང༌། །ཀླད་པའི་རྒྱས་ཀྱི་དབུས་སུ་ནི། །ཀླད་ཀོར་བཅས་པའི་མཚན་མ་ཅན། །ཨེ་ཞེས་བྱ་བ་དང་དེ་ཉིད་ཀྱི་བྱེ་བྲག །ཤེལ་དང་ཟླ་བ་གངས་འདྲ་བ། །དྲི་མེད་དག་པ་མཐོང་བ་ནི། །ཞི་བ་ཆོས་ཀྱི་རང་བཞིན་སྐུ། །ཐམས་ཅད་ཀྱི་ནི་གཞི་ཞེས་བྱ། །ཞེས་གསུངས་པ་ཡིན་ཏེ་བསམ་པའི་ཐབས་ནི་གོང་དུ་བཤད་ལ། ཡི་གེའི་དོན་ནི་ཨ་ཤེལ་དང་ཟླ་བ་ལྟ་བུར་དཀར་བ་ཀླད་ཀོར་དང་བཅས་པ་བསམས་ཏེ་དེ་ནི་ཆོས་ཀྱི་སྐུའི་རང་བཞིན་དུ་ཤེས་པར་བྱའོ། །དེ་བས་ན། ཐམས་ཅད་ཀྱི་ནི་གཞི་ཞེས་བྱ། །ཞེས་པ་སྟེ་ཆོས་ཀྱི་སྐུ་ནི་ཐམས་ཅད་ཀྱི་གཞི་སྟེ་ཆོས་ཀྱི་སྐུའི་དབང་གིས་ཐམས་ཅད་འབྱུང་བའི་ཕྱིར་རོ། །གཉིས་སུ་ན་ཨེ་དེ་ཐམས་ཅད་ཀྱི་སྙིང་པོ་ཡིན་པས་ཐམས་ཅད་ཀྱི་གཞི་ཞེས་བྱའོ། །དེ་ལས་གསང་སྔགས་དངོས་གྲུབ་ནི། །སྣ་ཚོགས་གཟུགས་ཅན་ཐོབ་པར་འགྱུར། །དེ་བཞིན་གཤེགས་པའི་གནས་མཐོང་ན། །མཐོ་རིས་དང་ནི་བྱད་གྲོལ་ཐོབ། །ཅེས་པ་ནི་དེ་ལྟར་སེམས་ཡོངས་སུ་སྦྱངས་ནས་ཨ་དེ་
ཀླད་པའི་ནང་དུ་བསམས་ཏེ་རིག་འཛིན་ལ་སོགས་པའི་གྲུབ་པ་ཐོབ་པར་འགྱུར་རོ་ཞེས་པའོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། དངོས་གྲུབ་སྒྲུབ་པའི་དེ་ཁོ་ན་ཉིད་རིམ་པར་ཕྱེ་བ་རྒྱས་པའོ།། །།ད་ནི་ལྷའི་རང་བཞིན་གྱི་ཏིང་ངེ་འཛིན་བཤད་དེ། དེ་ལ་ལྷའི་རང་བཞིན་ཡང་འོག་ནས་འབྱུང་བའི་ཚུལ་གྱིས་རྣམ་པ་དྲུག་ཏུ་རིག་པར་བྱ་སྟེ། རྣམ་པ་དྲུག་པ་དེ་དག་ཀྱང་གཟུགས་དང་ཕྱག་རྒྱལ་སོགས་པ་ཡིན་ལ། ལྷའི་རང་བཞིན་དེ་རྣམས་ནི་སྔར་བཤད་པའི་ཡན་ལག་རྣམ་པ་བཞི་ལ་སོགས་པས་བཤད་ཟིན་པ་དག་ཡིན་ཏེ། དེ་ཡང་ཕྱི་རོལ་དུ་དེ་བཞིན་གཤེགས་པའི་སྐུ་ལ་དམིགས་པ་དང༌། བདག་ཉིད་ལྷའི་གཟུགས་སུ་བསྒྱུར་བ་ནི་གཟུགས་ཀྱི་ལྷའི་རང་བཞིན་ནོ། །ཟླ་བའི་དཀྱིལ་འཁོར་ནི་བྱང་ཆུབ་ཀྱི་སེམས་ཀྱི་ཕྱག་རྒྱར་གྱུར་པའི་ལྷའི་རང་བཞིན་ནོ། །ཟླ་བའི་དཀྱིལ་འཁོར་ལ་ཡིག་འབྲུ་དགོད་པ་ནི་སྒྲའི་ལྷའི་རང་བཞིན་ནོ། །བདག་ལྷར་བསྒྱུར་བ་ནི་ཨུ་ཏ་པ་ལ་སོགས་པ་རྣམ་པར་གྲོལ་བའི་ཕྱག་རྒྱ་ནི་གཟུགས་དང་བཅས་པའི་ཕྱག་རྒྱའི་ལྷའི་རང་བཞིན་ནོ། །ཕྱག་རྒྱ་དེ་ཉིད་ལག་པའི་ཕྱག་རྒྱར་བསྒྱུར་ཏེ། ལྷའི་སྐུར་བྱིན་གྱིས་བརླབ་པ་དང་བསྲུང་བ་ལ་སོགས་པ་བྱ་བ་ནི་གཟུགས་དང་བཅས་པ་མ་ཡིན་པའི་ཕྱག་རྒྱའི་ལྷའི་རང་བཞིན་ནོ། །དྲུག་པ་ནི་ཡོངས་སུ་དག་པའི་ལྷའི་རང་བཞིན་མཚན་མ་མེད་པའི་ཏིང་ངེ་འཛིན་ལ་གནས་པ་སྟེ། ལྷའི་རང་བཞིན་དེ་སྔར་མ་བཤད་པས་སྐབས་འདིར་བཤད་པར་བྱ་བ་དང་ལྷའི་རང་བཞིན་ལྔ་པོ་ལྔར་བཤད་པ་རྣམས་ཀྱང་བཟླས་པའི་ཡན་ལག་ཙམ་དུ་ཤེས་ཀྱི། ལྷའི་རང་བཞིན་ཡིན་པར་མི་ཤེས་ཏེ་ཕྱག་རྒྱ་ལ་སོགས་པ་དེ་རྣམས་ཀྱང་ལྷའི་རང་བཞིན་ཡིན་པར་བསྟན་པའི་ཕྱིར། དེ་ནས་ཡང་བཅོམ་ལྡན་འདས་ལ་གསང་བ་པའི་བདག་པོ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ་ཞེས་པ་ལ་སོགས་པ་ནས། ལྷའི་གཟུགས་བྱིན་གྱིས་བརླབ་པ་བཤད་དུ་གསོལ་ཞེས་པའི་བར་ཏེ། འོག་ནས་འབྱུང་བའི་ལྷའི་གཟུགས་སུ་བྱིན་གྱིས་རློབ་པར་འགྱུར་བ་དེ་བཤད་དུ་གསོལ་ཞེས་པ་སྟེ། གཟུགས་ཞེས་པའི་ཚིག་ནི་ལྷའི་རང་བཞིན་ཞེས་པའི་དོན་ཏོ། །ལྷའི་རང་བཞིན་དེ་བཤད་པར་
གསོལ་པ་དེ་ལ་དགོས་པ་ཅི་ཞིག་ཡོད་ཅེ་ན། ལྷའི་གཟུགས་གང་གིས་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ལྷའི་གཟུགས་ལ་དམིགས་ནས་བདག་ཉིད་རང་གི་ལྷའི་གཟུགས་སུ་བསྒྱུར་བས་ཐེ་ཚོམ་མ་མཆིས་པར་དངོས་གྲུབ་འཐོབ་པར་འགྱུར་བ་ཞེས་གསུངས་ཏེ། དེ་ལ་ལྷའི་གཟུགས་ལ་དམིགས་ནས་ཞེས་པ་ནི་ཕྱི་རོལ་གྱི་དེ་བཞིན་གཤེགས་པའི་སྐུ་དང༌། དེ་ལ་ཟླ་བའི་དཀྱིལ་འཁོར་སྔགས་དང་བཅས་པའི་ལྷའི་རང་བཞི་ལ་དམིགས་ནས་ཞེས་པའོ། །བདག་ཉིད་རང་གི་ལྷའི་གཟུགས་སུ་བསྒྱུར་བས་ཞེས་པ་ནི་ཞི་བ་དང་རྒྱས་པ་དང༌། རབ་དང་འབྲིང་ལ་སོགས་པའི་གྲུབ་པ་དང་ལས་ལ་ལྷའི་གཟུགས་སུ་བསྒྱུར་བས་ཞེས་པའོ། །ཐེ་ཚོམ་མ་མཆིས་པར་དངོས་གྲུབ་འཐོབ་པར་འགྱུར་ཞེས་པ་ནི་ལྷའི་རང་བཞིན་དེ་རྣམས་བཤད་པས་ཤེས་པར་གྱུར་ན་ཐེ་ཚོམ་མེད་པས་ཇི་ལྟར་བསམས་པའི་དོན་འགྲུབ་པར་འགྱུར་བའི་ཕྱིར་ལྷའི་རང་བཞིན་དེ་རྣམས་བཤད་དུ་གསོལ་ཞེས་སྦྱར་རོ། །གསང་བ་པའི་བདག་པོ་དེ་ལ་ལྷའི་གཟུགས་ནི་རྣམ་པ་གསུམ་སྟེ། ཡི་གེ་དང༌། ཕྱག་རྒྱ་དང༌། གཟུགས་སོ་ཞེས་པ་ལ་ལྷའི་གཟུགས་རྣམ་པ་གསུམ་ནི་ལྷའི་རང་བཞིན་རྣམ་པ་གསུམ་ཞེས་པའོ། །ཡི་གེ་ཞེས་པ་རང་བཞིན་མི་འགྱུར་བ་ཞེས་པའི་ཚིག་སྟེ་དེ་ཡང་གང་ཞེ་ན། །དེ་ལ་ཡི་གེ་ལ་ཡང་རྣམ་པ་གཉིས་ཏེ། སྒྲ་དང་བྱང་ཆུབ་ཀྱི་སེམས་སོ་ཞེས་པའོ། །དེ་ལ་སྒྲ་ནི་སྔགས་ཀྱི་ཡིག་འབྲུ་སྟེ་སྒྲ་དེས་ཀུན་རྫོབ་དང་དོན་དམ་པའི་ལྷ་རྣམས་ཀྱི་རྣམ་པར་གྲོལ་བ་སྟོན་པ་ལས་རང་བཞིན་གཞན་དུ་མི་འགྱུར་བས་ན་མི་འགྱུར་བ་ཞེས་བྱ་སྟེ། འདི་ལྟར་དེ་བཞིན་གཤེགས་པ་རྣམས་བྱུང་ཡང་རུང་མ་བྱུང་ཡང་རུང་ཆོས་རྣམས་ཀྱི་ཆོས་ཉིད་དེ་ནི་ཡེ་ནས་གནས་པ་སྟེ། དེ་ཡང་འདི་ལྟར། གསང་སྔགས་རྣམས་ཀྱི་གསང་སྔགས་ཀྱི་ཆོས་ཉིད་དོ་ཞེས་ཇི་སྐད་དུ་གསུངས་པ་ལས་སོ། །བྱང་ཆུབ་ཀྱི་སེམས་ནི་ཟླ་བའི་དཀྱིལ་འཁོར་ལ་བྱ་སྟེ། དེ་བཞིན་ཉིད་ཀྱི་རང་བཞིན་བྱང་ཆུབ་ཀྱི་སེམས་ད་ཟླ་བའི་དཀྱིལ་འཁོར་དུ་བྱིན་གྱིས་བརླབས་པ་སྟེ། ཟླ་བའི་དཀྱིལ་འཁོར་དུ་བྱང་ཆུབ་ཀྱི་སེམས་ཀྱི་ཕྱག་རྒྱས་བཏབ་པའི་ཕྱིར་རོ། །བྱང་ཆུབ་
ཀྱི་སེམས་དེ་ལ་མི་འགྱུར་བ་ཞེས་བྱ་སྟེ། ཕྱིན་ཅི་མ་ལོག་པར་ཡོངས་སུ་གྲུབ་པས་སྟོང་པ་ཉིད་ཀྱི་རང་བཞིན་ལ་གཟུང་བ་དང་འཛིན་པ་ལ་སོགས་པའི་རྣམ་པ་མེད་པར་རྟོག་པ་ཅན་དུ་མི་འགྱུར་བའི་ཕྱིར་རོ། །ཕྱག་རྒྱའི་གཟུགས་ལ་ཡང་རྣམ་པ་གཉིས་ཏེ། གཟུགས་དང་བཅས་པ་དང༌། གཟུགས་དང་བཅས་པ་མ་ཡིན་པའོ་ཞེས་པ་ལ་གཟུགས་དང་བཅས་པ་ནི་ལྷ་རྣམས་ཀྱི་སོ་སོའི་རྣམ་པར་གྲོལ་བའི་ཕྱག་རྒྱ་པདྨོ་དང་ཨུཏྤལ་ལ་སོགས་པའོ། །གཟུགས་དང་བཅས་པ་མ་ཡིན་པ་ནི་པདྨོ་ལ་སོགས་པའི་ཕྱག་རྒྱ་དེ་དག་ཉིད་ལག་པའི་ཕྱག་རྒྱར་བསྒྱུར་པའོ། །ལྷའི་གཟུགས་ཀྱང་རྣམ་པ་གཉིས་ཏེ། ཡོངས་སུ་དག་པ་དང་ཞེས་པ་ལ་ལྷའི་གཟུགས་ནི་ལྷའི་རང་བཞིན་ཞེས་པ་སྟེ། དེ་ཡང་གང་ཞེ་ན། དེ་ལ་ཡོངས་སུ་དག་པའི་རྟོགས་པའི་ངོ་བོ་སྟེ་མཚན་མ་ཐམས་ཅད་བྲལ་བའོ་ཞེས་གསུངས་པའོ། །སྟོང་པ་ཉིད་ཀྱི་ཏིང་ངེ་འཛིན་ཁ་དོག་དང་དབྱིབས་ལ་སོགས་པའི་རྣམ་པའི་མཚན་མ་ཐམས་ཅད་སྤངས་པ་དེ་བཞིན་ཉིད་ཀྱི་ཡེ་ཤེས་ཀྱི་ལྷའི་རང་བཞིན་ཞེས་པའོ། །ཡོངས་སུ་མ་དག་པ་ནི་མཚན་མ་དང་བཅས་པའི་གཟུགས་དེ་ཁ་དོག་དང་དབྱིབས་སོ་ཞེས་པ་ནི། འཕགས་པ་འཇམ་དཔལ་དང༌། སྤྱན་རས་གཟིགས་ཀྱི་དབང་པོ་ལ་སོགས་པའི་ཆ་ལུགས་ཏེ་ཁ་དོག་དང་དབྱིབས་ལ་སོགས་པའི་མཚན་མ་ལ་དམིགས་པས་མ་དག་པ་ཞེས་བྱའི། དོན་གྱི་བྱ་བ་བྱེད་པའི་སྒོ་ནས་ཡོངས་སུ་མ་དག་པ་ནི་མ་ཡིན་ནོ། །དེ་ལ་ལྷའི་གཟུགས་རྣམ་པ་གཉིས་ཀྱིས་དགོས་པ་གཉིས་འགྲུབ་པར་འགྱུར་ཏེ་ཞེས་པ་ནི་ཡོངས་སུ་དག་པ་དང་ཡོངས་སུ་མ་དག་པའི་ལྷའི་གཟུགས་རྣམ་པ་དེ་གཉིས་ཀྱིས་དགོས་པ་རྣམ་པ་གཉིས་འགྲུབ་པར་འགྱུར་རོ་ཞེས་པའོ། །དེ་ཡང་གང་ཞེ་ན། མཚན་མ་དང་བཅས་པས་ནི་མཚན་མ་དང་བཅས་པའོ་ཞེས་གསུངས་ཏེ་ཁ་དོག་དང་དབྱིབས་དང་ལྡན་པའི་མཚན་མ་དང་ལྟའི་གཟུགས་སུ་བསྒྱུར་བའི་ཏིང་ངེ་འཛིན་གྱིས་རལ་གྲི་དང་རྡོ་རྗེ་ལ་སོགས་པའི་གྲུབ་པའི་རྫས་མཚན་མ་དང་བཅས་པ་འགྲུབ་ཅེས་པའོ། །མཚན་མ་མེད་པས་ནི་མཚན་མ་དང་བཅས་པའི་དངོས་གྲུབ་ཀྱང་འབྱུང་བར་འགྱུར་རོ་ཞེས་པ་ནི་སྟོང་པ་ཉིད་ཀྱི་ལྷའི་རང་བཞིན་
མཚན་མ་མེད་པའི་ཏིང་ངེ་འཛིན་གྱིས་ནི་རལ་གྲི་དང་རྡོ་རྗེ་ལ་སོགས་པའི་རྫས་ཀྱི་མཚན་མ་ལ་མི་ལྟོས་པའི་དངོས་གྲུབ་མངོན་པར་ཤེས་པ་ལྔ་དང་གཟུངས་དང་རྣམ་པར་ཐར་པ་ལ་སོགས་པ་རྣམས་འཐོབ་པོ་ཞེས་པའོ། །སྐབས་འདིར་མཚན་མ་མེད་བ་ཞེས་པ་ནི་སྒྲུབ་པའི་རྔ་ས་རལ་གྲི་ལ་སོགས་པའི་མཚན་མ་མེད་པ་ལ་བྱའི། མངོན་པར་ཤེས་པ་ལྔ་ལ་སོགས་པ་དམིགས་པ་དང་བཅས་པ་གྲུབ་པས་ན་མི་དམིགས་པའི་མཚན་མ་མེད་པ་ལ་ནི་མི་བྱའོ། །མཚན་མར་བཅས་པས་མཚན་བཅས་ཀྱི། །དངོས་གྲུབ་རྒྱལ་བ་དམ་པ་བཞེད། །ཅེས་བྱ་བ་ལ་སོགས་པས་ནི་ཡོངས་སུ་དག་པ་དང་ཡོངས་སུ་མ་དག་པའི་ཏིང་ངེ་འཛིན་ལས་མཚན་མ་དང་བཅས་པའི་གྲུབ་པ་དང་མཚན་མ་མེད་པའི་གྲུབ་པ་སོ་སོར་གྱུར་པ་ལས་ཀྱང་མཚན་མ་དང་བཅས་པའི་ལྷའི་རང་བཞིན་ལས་གྲུབ་བ་ཡང་མཚན་མ་དང་བཅས་པ་ཉིད་འབྱུང་གི །མཚན་མེད་པའི་གྲུབ་པ་མི་འབྱུང་བའི་ངེས་པ་བཤད་པ་ཡིན་ནོ། །རྒྱལ་བ་དམ་པ་བཞེད་ཅེས་པ་ནི་དེ་ལྟ་བུ་སྔོན་གྱི་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་དགོངས་པའམ་བཞེད་དོ་ཞེས་པའོ། །མཚན་མ་མེད་ལ་གནས་པ་ནི། །མཚན་མ་ཅན་ཡང་བསྒྲུབ་ཏུ་རུང༌། །ཞེས་པ་ནི་མཚན་མ་མེད་པའི་ལྷའི་ཏིང་ངེ་འཛིན་ལས་མངོན་པར་ཤེས་པ་ལྔ་ལ་སོགས་པ་རྫས་ལ་མི་ལྟོས་པ་མཚན་མ་མེད་པའི་གྲུབ་པ་འབའ་ཞིག་མ་ཡིན་གྱི། རལ་གྲི་ལ་སོགས་པའི་རྫས་ཀྱིས་མཚན་མ་དང་བཅས་པ་ཡང་འགྲུབ་པོ་ཞེས་པའོ། །དེ་བས་རྣམ་པ་ཐམས་ཅད་དུ། །མཚན་མ་མེད་པ་བསྟེན་པར་བྱ།། ཞེས་པ་ནི་མཚན་མ་མེད་པའི་ཏིང་ངེ་འཛིན་ལས་མཚན་མ་དང་བཅས་པ་དང་མཚན་མ་མེད་པ་གཉི་ག་འགྲུབ་པས་རྣམ་པ་ཐམས་ཅད་དུ་མཚན་མ་མེད་པ་དེ་བསྟེན་པར་བྱའོ་ཞེས་པའོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས་ལྷའི་ཏིང་ངེ་འཛིན་གཏན་ལ་དབབ་པ་རིམ་པར་ཕྱེ་བ་རྒྱས་པའོ།། །།དེ་ནས་ཡང་བཅོམ་ལྡན་འདས་ཀྱིས་གསང་བ་པའི་བདག་པོ་ཕྱག་ན་རྡོ་རྗེ་ལ་བཀའ་སྩལ་པ། གསང་བ་པའི་བདག་པོ་དེ་ལ་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་
ཆུབ་སེམས་དཔའི་སྤྱད་པ་སྤྱོད་པ་མཚན་མ་མེད་པའི་ཏིང་ངེ་འཛིན་སྒྲུབ་བར་འདོད་པས་འདི་ལྟར་བསམ་པར་བྱའོ་ཞེས་པ་ལ་སོགས་པ་ནི་གོང་དུ་ཡོངས་སུ་དག་པ་དང་ཡོངས་སུ་མ་དག་པའི་ལྷ་རྣམ་པ་གཉིས་ཀྱི་ཏིང་ངེ་འཛིན་བསྒོམ་པའི་ཡན་ལག་བཞི་ལ་སོགས་པའི་སྐབས་སྔ་མར་བཤད་ཅིང་བསྟན་དུ་ཟིན་ཀྱང་ཡོངས་སུ་དག་པའི་ལྷའི་རང་བཞིན་གྱི་ཏིང་ངེ་འཛིན་བསྒོམ་པའི་རིམ་པ་བ་བསྟན་པས་ད་འདིར་ནི་མཚན་མ་མེད་པའི་ཏིང་ངེ་འཛིན་དེ་བསྒོམས་ན་སྔར་ལུས་དང་སེམས་དང་ཡིད་གསུམ་གྱི་མཚན་མ་འབྱུང་བ་སོ་སོར་བཤིག་ནས་སུན་བྱུང་སྟེ་མཚན་མ་བྱུང་བ་མེད་པར་བྱེད་པའི་ཐབས་བསྟན་ཏེ། དེ་ལ་མཚན་མ་རྣམས་གང་ནས་བྱུང༌། །ཅི་བདག་གི་ལུས་སམ། བདག་གི་སེམས་སམ། བདག་གི་ཡིད་ལས་བྱུང་ཞེས་པ་ནི་མཚན་མ་རྣམས་གང་ལས་འབྱུང་ཞེས་དང་པོར་དྲིས་པའོ། །ལུས་སམ་ཞེས་པ་ནི་སེམས་དང་ཡིད་གཉིས་མ་གཏོགས་པར་འབྱུང་བ་ཆེན་པོའི་རང་བཞིན་གྱི་ལུས་དེ་ལས་སྔོན་པོ་དང་སེར་པོ་ལ་སོགས་པའི་མཚན་མ་འབྱུང་ངམ་ཞེས་བརྟགས་པའོ། །སེམས་སམ་ཞེས་པ་ནི་ཡིད་ཀྱི་རྣམ་པར་ཤེས་པ་དེ་ལས་མཚན་མ་འབྱུང་ངམ་ཞེས་བརྟགས་པའོ། །ཡིད་ལས་ཞེས་པ་ནི་སོ་དྲུག་གི་རྣམ་པར་ཤེས་པ་ལས་མཚན་མ་དེ་འབྱུང་ངམ་ཞེས་བརྟགས་པ་སྟེ། ཡིད་ཅེས་པ་ནི་རྣམ་པ་དང་བཅས་པའི་བསམ་པ་ལ་བྱ་སྟེ་གཟུགས་ལ་སོགས་པའི་རྣམ་པར་སྣང་བའི་སྒོ་དྲུག་གི་རྣམ་པར་ཤེས་བ་ཉིད་ལ་བྱའོ། །དེ་ལ་ཐོག་མར་ལུས་ལས་མཚན་མ་མི་འབྱུང་བར་བརྟག་པ་ནི། དེ་ལ་ལུས་ནི་ལས་ལས་སྐྱེས་པ་སྟེ་ཞེས་པ་ནས་གསང་བ་པའི་བདག་པོ་དེ་ལྟར་ལུས་ལ་ལུས་ཀྱི་རྗེས་སུ་སོང་བའི་དྲན་པ་ངོ་བོ་ཉིད་ཀྱིས་སྟོང་པར་བསྒོམ་པར་བྱའོ་ཞེས་པའི་བར་ཏེ་མདོར་ན་ལས་ལས་སྐྱེས་པའི་ལུས་དེ་ནི་རང་བཞིན་གྱིས་བེམས་པོ་སྟེ་རྩྭ་དང་ཤིང་དང་བོང་བ་ལྟ་བུའོ། །ཇི་ལྟར་རྩྭ་ཤིང་དང་བོང་བ་དང་དེ་སྔོན་པོ་དང་སེར་པོ་ལ་སོགས་པའི་མཚན་མ་བྱུང་བའི་བྱ་བ་མི་བྱེད་པ་བཞིན་དུ་ལུས་དེ་ཡང་མཚན་མ་རྣམས་འབྱུང་བའི་བྱ་བ་མི་བྱེད་དོ་ཞེས་པའོ། །དེ་ཉིད་ཀྱི་པ་ཡང་གསུངས་པ་ནི་ཕྱི་རོལ་གྱི་རྣམ་པ་ལྟ་བུ་ལ་བཟོས་བྱས་པའི་
གཟུགས་ལྟ་བུར་བརྟག་པར་བྱའོ་ཞེས་བྱ་བ་ལ་སོགས་པ་སྟེ། ཇི་ལྟར་བཟོ་བོས་རྡོ་དང་ས་ལ་སོགས་པ་ལས་ལྷ་དང་མིའི་རྣམ་པའི་གཟུགས་བྱས་པ་དེ་མི་འགའ་ཞིག་གིས་ཁྲོས་ཏེ་མེའམ། དུག་གམ། མཚོན་ནམ། ཆུ་འམ། རྡོ་རྗེས་བཤིག་གམ། བསྲེགས་སམ། བཅད་ཀྱང་མི་དགའ་བ་ཅུང་ཟད་ཀྱང་མེད་ལ། དེ་བཞིན་དུ་སྐྱེས་བུ་འགའ་ཞིག་གིས་བྱམས་པའི་སེམས་དང་བཅས་པས་བཟའ་བའམ་བཏུང་བ་ལ་སོགས་པའམ། གོས་དང་རྒྱན་ལ་སོགས་པ་ལྷ་དང་མིའི་ཡོ་བྱད་ཇི་སྐད་དུ་སྨོས་པ་རྣམས་ཀྱིས་མཆོད་ཀྱང་གཟུགས་དེ་ལ་དྲིན་དུ་གཟོ་བ་དང་བྱམས་པའི་སེམས་མི་སྐྱེ་བ་དེ་བཞིན་དུ། བདག་གི་ལུས་འདི་ཡང་རང་བཞིན་གྱིས་བེམས་པོ་སྟེ་མཚན་མ་ལ་སོགས་པ་སྐྱེད་པའི་བྱ་བ་བྱེད་པ་མ་ཡིན་ནོ་ཞེས་ལུས་དེ་ལྟར་བཤིག་ནས་མཚན་མ་མེད་པའི་ཏིང་ངེ་འཛིན་དུ་འཇུག་པར་བྱའོ་ཞེས་དགོངས་པའོ། །གསང་བའི་བདག་པོ་གཞན་ཡང་སེམས་ནི་ངོ་བོ་ཉིད་མེད་པ་ཞེས་པ་ནས་ངོ་བོ་ཉིད་ཀྱིས་མཚན་མ་དང་བྲལ་བའོ་སྙམ་དུ་བསམ་པར་བྱའོ་ཞེས་པའི་བར་གྱིས་སེམས་ལས་བྱུང་བའི་མཚན་མ་མི་འབྱུང་བར་བྱ་བའི་བསྒོམ་པའི་ཐབས་བསྟན་པ་སྟེ། སེམས་དེ་ནི་དོན་དམ་པར་གཟུང་བ་དང་འཛིན་པའི་རང་བཞིན་མེད་པ་སྔོན་པོ་དང་སེར་པོ་ལ་སོགས་པའི་མཚན་མ་ཐམས་ཅད་དང་བྲལ་བ་རང་བཞིན་གྱིས་སྟོང་པ་ཡིན་པའི་ཕྱིར་དུས་གསུམ་ལས་ཡང་དག་པར་འདས་པ་སྟེ། གང་དུས་གསུམ་མེད་ཅིང་རང་བཞིན་གྱིས་སྟོང་པ་དེ་ནི་དེ་བཞིན་ཉིད་ཀྱི་མཚན་ཉིད་རྣམ་པར་མི་རྟོག་པ་ཡིན་པས་མཚན་མ་འབྱུང་བ་མ་ཡིན་པར་རིག་པར་བྱས་ལ་མཚན་མ་མེད་པའི་ཏིང་ངེ་འཛིན་ལ་གནས་པར་བྱའོ་ཞེས་དགོངས་པའོ། །གསང་བ་པའི་བདག་པོ་གཞན་ཡང་བྱིས་པ་སོ་སོའི་སྐྱེ་བོ་རྣམས་ཡིད་མཚན་མ་དང་བཅས་པར་རྟོག་སྟེ་འདི་ནི་ཡང་དག་པ་མ་ཡིན་པའི་ཀུན་དུ་རྟོག་པའི་ཚིག་བླ་དགས་སོ། །ཡང་དག་པ་མ་ཡིན་པ་གང་ཡིན་པ་དེ་ནི་མ་སྐྱེས་པའོ་ཞེས་བྱ་བར་ནི་རབ་ཏུ་མི་ཤེས་སོ་ཞེས་པ་ནི་ཡིད་ལས་མཚན་མ་མི་འབྱུང་བར་བརྟག་པ་བསྟན་ཏེ། མིག་ལ་སོགས་པའི་སྒོ་དྲུག་གི་རྣམ་པར་ཤེས་པ་གཟུགས་ལ་སོགས་པའི་
རྣམ་པར་སྣང་བར་འབྱུང་བ་ནི་བྱིས་པ་རྣམས་ཀྱིས་འཁྲུལ་པར་རྟོག་པ་སྟེ། བྱིས་པ་དེ་རྣམས་ཀྱིས་ནི་འཁྲུལ་པ་ཡིན་པར་མི་ཤེས་པའོ། །ཡང་དག་པ་མ་ཡིན་པ་དེ་ནི་མ་སྐྱེས་པའོ་ཞེས་བྱ་བ་ནི་གོང་དུ་སྒོ་དྲུག་གི་རྣམ་པར་ཤེས་པ་དེ་ཡང་དག་པར་ཡོད་པ་མ་ཡིན་པས་ཡང་དོན་དམ་པར་མཚན་མ་འབྱུང་བའི་རྒྱུ་མ་ཡིན་ནོ་ཞེས་པའོ། །གསང་བ་བའི་བདག་པོ་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པས་དེ་ལྟར་བསམས་ན་མཚན་མ་མེད་པའི་ཏིང་ངེ་འཛིན་ཐོབ་པར་འགྱུར་རོ་ཞེས་པ་ནི་ཇི་ལྟར་ཡོངས་སུ་མ་དག་པའི་ལྷར་བདག་གི་ལུས་སུ་བསྒྱུར་བ་ན་ལྷ་དེའི་ཁ་དོག་དང་དབྱིབས་ཅི་འདྲ་བར་བསྒྱུར་བ་བཞིན་དུ་མཚན་མ་མེད་པའི་ལྷའི་རང་བཞིན་དུ་བསྒྱུར་པ་ན་ཡང་མཚན་མ་མེད་པའི་ཏིང་ངེ་འཛིན་དུ་ཞུགས་ན་ཡོངས་སུ་དག་པའི་ལྷའི་རང་བཞིན་དུ་བསྒྱུར་པ་ཡིན་ཏེ། མཚན་མ་མེད་པའི་ཏིང་ངེ་འཛིན་རབ་ཏུ་ཐོབ་པོ་ཞེས་པ་ནི་ཡོངས་སུ་དག་པའི་ལྷའི་རང་བཞིན་དུ་གནས་པར་འགྱུར་རོ་ཞེས་པའོ། །གསང་བ་པའི་བདག་པོ་ནམ་མཚན་མ་མེད་པའི་ཏིང་ངེ་འཛིན་ལ་གནས་པར་གྱུར་པ་དེའི་ཚེ་དེ་ལ་དེ་བཞིན་གཤེགས་པས་གསུངས་པའི་གསང་སྔགས་རྣམས་མངོན་དུ་ཕྱོགས་ཤིང་གཞོལ་བར་འགྱུར་རོ་ཞེས་པ་ནི་ནམ་ཡོངས་སུ་དག་པའི་ལྷའི་རང་བཞིན་དུ་གནས་ན་དེ་བཞིན་གཤེགས་པས་གསུངས་པའི་ཐབས་ཀྱི་ལྷ་རྣམས་འགྲུབ་པར་འགྱུར་རོ། །དེ་ལ་གཞོལ་བ་ཞེས་པ་ནི་ལྷ་དེ་རྣམས་སྔགས་པ་དེ་ལ་གཞོལ་ལོ་ཞེས་པའོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་བ་བྱིན་གྱིས་རློབ་པ་ལས། མཚན་མ་མེད་པའི་ཏིང་ངེ་འཛིན་རིམ་པར་ཕྱེ་བ་རྒྱས་པའོ།། །།གསང་བ་པའི་བདག་པོ་གཞན་ཡང་བཟླས་བརྗོད་གསང་བ་བཤད་པར་བྱའོ་ཞེས་པ་ལ་སོགས་པ་ནི་བཟླས་བརྗོད་ཀྱི་དེ་ཁོ་ན་ཉིད་ཀྱི་ལེའུ་བཤད་པ་སྟེ། བཟླས་པ་དེ་ཡང་ལྷའི་རྣལ་འབྱོར་རྣམ་པ་གཉིས་ལ་གནས་ནས་བཟླས་པ་ནི་གོང་དུ་ཡོངས་སུ་དག་པ་དང་ཡོངས་སུ་མ་དག་པའི་ལྷའི་རང་བཞིན་བཤད་པ་ལ་གནས་ནས་ཏེ། དེ་ཡང་ཡོངས་སུ་མ་དག་པའི་ལྷའི་རང་བཞིན་ལ་གནས་པའི་བཟླས་བརྗོད་ཡན་ལག་བཞིར་ལྡན་པ་ནི་སྔར་ཡང་
བཤད་ཟིན་མོད་ཀྱི། འདིར་བཤད་པ་ནི་མཚན་མ་མེད་པའི་བཟླས་བརྗོད་དང་འཇིག་རྟེན་དང་འཇིག་རྟེན་ལས་འདས་པའི་བྱེ་བྲག་དབྱེ་བའི་ཕྱིར་རོ། །དེ་གཅིག་པུས་གཅིག་གམ་ཞེས་པ་ནི་ཡོངས་སུ་དག་པའི་ལྷའི་རྣལ་འབྱོར་གཅིག་པུ་ལ་གནས་ནས་ཡིད་ཀྱིས་བཟླས་བརྗོད་གཅིག་པུ་བྱའོ་ཞེས་པའོ། །གཅིག་གིས་གཅིག་ཅེས་པ་ནི་ཡོངས་སུ་མ་དག་པའི་ལྷའི་རྣལ་འབྱོར་པས་ཀྱང་ཡིད་ཀྱིས་བཟླས་བརྗོད་བྱའོ་ཞེས་པའོ། །ཡང་ན་ཤུ་བ་བུར་རྣམ་གཉིས་པ། །ཞེས་པ་ནི་ཡོངས་སུ་དག་པ་དང་ཡོངས་སུ་མ་དག་པའི་ལྷའི་རྣལ་འབྱོར་པ་གཉི་གས་ཡང་ན་ཤུབ་བུའི་བཟླས་པ་བྱའོ་ཞེས་པ་སྟེ། དེ་བས་ན། རྣམ་གཉིས་པ། རྣལ་འབྱོར་མཆོག་གིས་བརྟག་པར་བྱ། །ཞེས་གསུངས་པ་ཡིན་ཏེ། ཡོངས་སུ་དག་པ་དང་ཡོངས་སུ་མ་དག་པའི་ལྷའི་རྣལ་འབྱོར་ལ་རྟག་ཏུ་བརྩོན་པར་བྱའོ། །སྔགས་པ་ཡན་ལག་ཉམས་སྦྱར་བར། །བཟླས་བརྗོད་གཞན་དུ་མི་བྱའོ། །ཞེས་པ་ནི་ཕྱི་ནང་གི་ཡན་ལག་བཞིའི་བཟླས་བརྗོད་དང་ནང་གི་དོན་དམ་པའི་བཟླས་པ་འདི་གཉིས་ལས་གཞན་པའི་བཟླས་པ་ཆོ་ག་ཉམས་པ་དང་ཡན་ལག་མ་ཚང་བ་དག་མི་བྱའོ་ཞེས་པའོ། །ཕྱི་དང་ནང་གི་སྦྱོར་བ་ཡིས། །ཡན་ལག་བཞི་པ་ངས་བཤད་པ། །ཞེས་པ་ནས། བཤུབས་ཏེ་བཟླས་བརྗོད་བྱེད་པའི་མཆོག །ཅེས་པའི་བར་གྱིས་ནི་གོང་དུ་དོན་དམ་པ་དང་ཀུན་རྫོབ་ཀྱི་རང་བཞིན་མདོར་བསྟན་པ་དེ་ལས་ཀུན་རྫོབ་ཀྱི་བཟླས་པ་ཕྱིའི་ཡན་ལག་གསུམ་དང་ནང་གི་ཡན་ལག་གཅིག་སྟེ་བཞིར་ངས་བཤད་པ་དེ་ནི་འཇིག་རྟེན་གྱི་བཟླས་པ་ནི་ཡིན་ལ། དེ་ཡང་དམིགས་པ་དང་བཅས་པའི་བཟླས་པའི་ནང་ན་མཆོག་གོ་ཞེས་པའོ། །སླར་སྡུད་པ་ཡི་ཚིག་གིས་ནོན། །ཞེས་པ་ནི་སྔ་མ་བཞིན་ནོ། །ལྷ་ཡི་རྗེས་སུ་སོང་བའི་ཡིད། །ཅེས་པ་ནི་འདི་ལ་སེམས་རྩེ་གཅིག་ཏུ་དམིགས་པར་བྱའོ་ཞེས་པའོ། །ཡིད་ཀྱི། འཇིག་རྟེན་འཇིག་རྟེན་འདས་ཞེས་བྱ། །ཞེས་པ་ནས། གཞན་དུ་བྱ་བ་མ་ཡིན་ནོ། །ཞེས་པའི་བར་གྱིས་ནི་གོང་དུ་བཤད་པའི་དོན་དམ་པའི་བཟླས་པ་དེ་ཞིབ་ཏུ་འགྲལ་པ་སྟེ། དེ་ལ། སླར་སྡུད་ལ་སོགས་རྣམ་པར་སྤངས། །ཞེས་པ་འཇིག་རྟེན་ལས་འདས་པའི་བཟླས་པ་དེ་ཡོངས་སུ་མ་
དག་པའི་ལྷའི་རང་བཞིན་ལ་དམིགས་པ་མ་ཡིན་པས་ཕྱི་རོལ་གྱི་བཟླས་པའི་ཡན་ལག་ལས་ནང་གི་ཡན་ལག་ཏུ་བསྡུ་བ་མེད་དོ་ཞེས་པའོ། །ལྷ་དང་གཅིག་ཏུ་བྱེད་པ་དང༌། །ཞེས་པ་ནི་ལྷའི་གཟུགས་དང་བདག་གི་གཟུགས་གཅིག་ཏུ་བྱེད་པའོ། །ཐ་དད་མ་ཡིན་འཛིན་པ་ཡི། །ཞེས་པ་ནི་ལྷ་དང་བདག་གཉིས་གཅིག་ཏུ་བྱ་བ་ཡང་གཟུགས་ཐ་དད་པ་གནས་གཅིག་ཏུ་འཇུག་པ་ཡང་སྲིད་པས་དེ་ལྟ་བུ་མ་ཡིན་གྱི། ལྷ་དང་བདག་གཉིས་ཐ་མི་དད་པར་བྱའོ་ཞེས་པའོ། །ལྷ་དང་བདག་གཉིས་ཐ་མི་དད་པ་ཡང་གཟུགས་ཀྱི་རང་བཞིན་དུ་ཐ་མི་དད་པ་སྲིད་པས་དེ་བསལ་བའི་ཕྱིར། ཡིད་ཀྱིས་རང་བཞིན་དབྱེར་མེད་བྱ། །ཞེས་གསུངས་པ་ཡིན་ཏེ། གཟུགས་ལ་སོགས་པ་གཅིག་ཏུ་བྱ་པ་ནི་མ་ཡིན་གྱི་ཡིད་གཉིས་པ་སྟོང་པ་ཉིད་ཀྱི་རང་བཞིན་དུ་དབྱེར་མེད་པར་བྱའོ་ཞེས་པའོ། །གཞན་དུ་བྱ་བ་མ་ཡིན་ནོ། །ཞེས་པ་ནི་འཇིག་རྟེན་ལས་འདས་པའི་བཟླས་པ་དེ་ཆུལ་འདི་འདྲ་བ་ལས་གཞན་དུ་མི་བྱའོ་ཞེས་པ་སྟེ། མདོར་ན་རང་གི་སྙིང་པོ་གང་ཡིན་པའི་སྒྲའི་དེ་ཁོ་ན་ཉིད་ལ་དམིགས་ནས་བདག་ཉིད་ཀྱི་གཟུགས་སྟོང་བ་ཉིད་དུ་བཤིག་སྟེ་བཤིག་ནས་ཀྱང་ཇི་ལྟར་བདག་གི་གཟུགས་སྟོང་པ་ཉིད་དུ་ཕྱི་ནང་གི་ཆོས་ཐམས་ཅད་ཀྱང་སྟོང་བའི་རང་བཞིན་དུ་གཅིག་པར་རྟོགས་པར་བྱ་སྟེ། དེ་ལྟར་ཆོས་ཐམས་ཅད་སྟོང་པའི་རང་བཞིན་དུ་དབྱེར་མེད་པས་བདག་དང་ལྷའི་རང་བཞིན་ཀྱང་སྟོང་པའི་མཚན་ཉིད་དུ་དབྱེར་མེད་པར་རྟོགས་པར་བྱས་ལ། སྟོང་པའི་ཏིང་ངེ་འཛིན་རྩེ་གཅིག་པ་ལ་གནས་ནས་ཡིད་པ་བཟླས་པར་བྱའོ་ཞེས་པའོ། །གསང་སྔགས་གྲངས་ནི་སུམ་འབུམ་དུ། །ཕལ་ཆེར་ངས་ནི་བཤད་པ་དག །ལུས་ཅན་སྡིག་དང་བྲལ་བ་ཡི། །སྔགས་པ་རྣམ་པར་དག་པ་ལ། །བཟླས་བརྗོད་གྲངས་འདི་བསྟན་པ་སྟེ། །གཞན་དུ་བྱ་བ་མ་ཡིན་ནོ། །ཞེས་པ་ནི་གྲངས་སུམ་འབུམ་གྱི་བསྙེན་པ་སྔོན་དུ་བྱས་ན་འགྲུབ་པོ་ཞེས་ངས་ཕལ་ཆེར་བཤད་པ་དེ་དག་ནི་སྔགས་པ་སྡིག་པ་དང་བྲལ་བ་ལ་སྟེ། སྡིག་པ་དང་བྲལ་བ་ལ་ཡང་ཚེ་རབས་སྔ་མཚུན་ཆད་དུ་བསོད་ནམས་དང་ཡེ་ཤེས་ཀྱི་ཚོགས་བསགས་བསགས་པའམ། །ཚེ་འདི་ལ་བྱང་ཆུབ་ཀྱི་སེམས་བསྒོམ་པའི་ཐབས་སྔར་བཤད་པའི་རིམ་
པ་བཞིན་དུ་བསྒོམས་ནས་མཚན་མ་བྱུང་བ་ལ་བྱའོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། འཇིག་རྟེན་དང་འཇིག་རྟེན་ལས་འདས་པའི་བཟླས་བརྗོད་ཀྱི་དེ་ཁོ་ན་ཉིད་རིམ་པར་ཕྱེ་བ་རྒྱས་པའོ།། །།རྣམ་པར་སྣང་མཛད་མངོན་པར་བྱང་ཆུབ་པའི་ལུས་དང་ངག་དང་ཡིད་ཀྱི་འཁོར་ལོ་དཀྱིལ་འཁོར་གསུམ་བྱིན་གྱིས་བརླབས་པ་ལས་ལུས་ཀྱི་འཁོར་ལོ་བྱིན་གྱིས་བརླབས་པ་སྙིང་རྗེ་ཆེན་པོའི་དཀྱིལ་འཁོར་དེ་བཤད་ནས། ད་ནི་ངག་གི་འཁོར་ལོ་བྱིན་གྱིས་བརླབས་པ་ཡི་གེ་འཁོར་ལོ་བསྐོར་བ་འདིར་བཤད་པར་བྱ་སྟེ། འདིར་ལུས་དང་ངག་དང་ཡིད་གསུམ་ཀའི་འཁོར་ལོ་འདུས་མོད་ཀྱི་བདག་གི་འཁོར་ལོ་བྱིན་གྱིས་བརླབས་པ་སྟེ། གཞན་ཡང་མེད་པ་ནི་མ་ཡིན་ནོ། །དེ་ལ་དང་པོ་དཀྱིལ་འཁོར་བྲི་བར་བརྩམ་པའི་ཚེ་དཀྱིལ་འཁོར་གྱི་སློབ་དཔོན་གྱིས་རང་གི་ཏིང་ངེ་འཛིན་གྱི་ཁྱད་པར་བཤད་པ་གང་ཡང་རུང་བ་ལ་དམིགས་ཏེ། བདག་དང་འཁོར་ཐམས་ཅད་བསྲུང་བའི་ཕྱིར་རིག་པ་འདི་ལན་གསུམ་མམ། བདུན་ནམ། ཉི་ཤུ་རྩ་གཅིག་བཟླས་པར་བྱ་བ་ཡིན་ལ། བཅོམ་ལྡན་འདས་ཀྱིས་རིག་པ་དེའི་དོན་རྣམ་པར་ཐར་པའི་ཏིང་ངེ་འཛིན་ལ་དམིགས་ནས་སྔགས་བཤད་པར་མཛད་པ་ནི་དེ་ནས་ཡང་བཅོམ་ལྡན་འདས་ཞེས་པ་ནས་རིག་སྔགས་ཀྱི་རྒྱལ་མོ་བྱུང་ངོ་ཞེས་པའི་བར་གྱིས་གསུངས་པ་ཡིན་ཏེ། དེ་ནས་ཡང་བཅོམ་ལྡན་འདས་རྣམ་པར་སྣང་མཛད་ཀྱིས་ཐམས་ཅད་དང་ལྡན་པའི་འཁོར་འདུས་པ་ལ་གཟིགས་ནས་ཞེས་པ་དེ་ལ་ཐམས་ཅད་དང་ལྡན་པ་ནི་འཁོར་དེ་དག་ཉིད་ཐམས་ཅད་དང་ལྡན་པ་ཞེས་པའི་དོན་ཏོ། །རྣམ་པ་གཅིག་ཏུ་ན་ཐམས་ཅད་སྲུང་བ་ཞེས་བ་སྟེ། བྱང་ཆུབ་སེམས་དཔའི་འཁོར་ཕྱག་ན་རྡོ་རྗེ་དེ་སེམས་ཅན་ཐམས་ཅད་སྲུང་ཞིང་སྐྱོང་བའི་ཕྱིར་རོ། །གཟིགས་པ་ནི་འཁོར་སེམས་བསྡུ་བར་བསྐུལ་བ་དང་སྣོད་དུ་གྱུར་པ་དང་མ་གྱུར་པ་བརྟག་པ་རྣམ་པ་གཉིས་ཀྱི་ཕྱིར་འཁོར་ལ་གཟིགས་པ་ནི་ཆོས་ཉིད་ཀྱིས་དེ་ལྟ་བུ་ཡིན་ཏེ། སྐབས་འདིའི་འཁོར་ལ་དེ་དག་མི་དགོས་ཀྱང་མ་འོངས་པ་ལ་བསྟན་པའོ། །བྱམས་པ་ཆེན་པོ་དང་སྙིང་རྗེ་ཆེན་
པོའི་སྦྱིན་གཉིས་ཀྱིས་ཀྱང་སེམས་ཅན་གྱི་ཁམས་ཐམས་ཅད་ལ་གཟིགས་ཏེ་ཞེས་པ་ནི་བཅོམ་ལྡན་འདས་མི་གནས་པའི་མྱ་ངན་ལས་འདས་པ་རྟོག་པ་ཐམས་ཅད་དང་གཏན་དུ་བྲལ་བས་གཟིགས་པའི་རྟོག་པ་མི་འབྱུང་མོད་ཀྱི། སྔོན་གྱི་སྨོན་ལམ་གྱི་ཤུགས་ཀྱིས་ཐུགས་རྗེ་ཆེན་པོའི་ཡུམ་དང་བྱམས་པ་ཆེན་པོའི་དབང་གིས་སེམས་ཅན་ཐམས་ཅད་ཀྱི་ཁམས་ལ་གཟིགས་པ་ནི་མ་གྲོལ་བ་གྲོལ་བ་དང༌། མ་སྨིན་པ་སྨིན་པར་བྱ་བའི་ཕྱིར་རིག་པ་བཤད་པར་བཞེད་པའོ། །བདུད་རྩི་འབྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་པ་ནི་འཆི་བར་འགྱུར་བ་མེད་པའི་བདུད་རྩི་སྟེ་དེ་ཡང༌། ཆོས་ཀྱི་སྐུ་སྟོང་པ་ཉིད་དོ། །དེ་ལ་དམིགས་ནས་ཏིང་ངེ་འཛིན་འབྱུང་བས་ན་བདུད་རྩི་འབྱུང་བ་ཞེས་བྱའོ། །ཡང་ན་བདུད་རྩི་དེ་ཉིད་ཏིང་ངེ་འཛིན་འདི་ལས་འབྱུང་བས་ན་བདུད་རྩི་འབྱུང་བ་སྟེ། བྱང་ཆུབ་ལས་ཆོས་ཀྱི་སྐུའི་ཡེ་ཤེས་འབྱུང་བའི་དོན་ཏེ། ཏིང་ངེ་འཛིན་དེ་ལ་སྙོམས་པར་ཞུགས་ནས་རིག་པ་གསུངས་པའོ། །བཅོམ་ལྡན་འདས་སྙོམས་པར་ཞུགས་མ་ཐག་ཏུ་ཡན་ལག་ཐམས་ཅད་ནས་དུས་གསུམ་དུ་མ་ཆགས་པའི་སྟོབས་ཅན་ཞེས་བྱ་བའི་རིག་སྔགས་ཀྱི་རྒྱལ་མོ་བྱུང་ངོ་ཞེས་པ་དེ་ལ་བཅོམ་ལྡན་འདས་ཀྱི་ཡན་ལག་ཐམས་ཅད་ནི་ལོངས་སྤྱོད་རྫོགས་པའི་སྐུ་དང་སྤྲུལ་པའི་སྐུ་དང་སྙིང་པོ་བྱང་ཆུབ་ཀྱི་སྐུའི་ཡན་ལག་ཐམས་ཅད་ནས་བྱུང་བ་སྟེ། སྟོང་པ་ཉིད་རྣམ་པར་མི་རྟོག་པའི་ཏིང་ངེ་འཛིན་ལ་གནས་པས་ཞལ་ནས་ཚིག་ཏུ་འབྱིན་པ་མི་རིགས་སོ་ཞེས་བྱ་བ་ཡན་ལག་ནས་བྱུང་ངོ་ཞེས་པའོ། །དེ་ལ་དུས་གསུམ་དུ་མ་ཆགས་པའི་སྟོབས་ཅན་ཞེས་པ་ནི་སྔར་འདས་པ་དང་མ་འོངས་པ་དང་ད་ལྟར་གྱི་དུས་ལ་མ་ཆགས་པ་ནི་སྟོང་པ་ཉིད་དེ་ཆོས་ཀྱི་དབྱིངས་ཡིན་ལ། དེ་ལ་དམིགས་པའི་སྐྱེ་བ་སྟོབས་དང་ལྡན་པ་ནི་དོན་དམ་པའོ། །རིག་པ་འདིའི་མཐུས་བདུད་དང་རྒོལ་བ་ཐམས་ཅད་ཀྱིས་བགེགས་བྱེད་པར་མི་ཚུགས་པ་ནི་ཀུན་རྫོབ་ཏུའོ། །རིག་པ་ནི་ཤེས་པའི་དོན་ཏེ། སྐབས་འདིར་བྱང་ཆུབ་པའི་ཤེས་རབ་ཉིད་ལ་བྱ་ལ། རྒྱལ་མོ་ནི་ཤེས་རབ་ཐམས་ཅད་ཀྱི་ནང་ན་བྱང་ཆུབ་པའི་ཤེས་རབ་མཆོག་ཡིན་པའི་ཕྱིར་རྒྱལ་མོ་ཞེས་བྱ་སྟེ། དེ་བས་ན་རིག་པ་འདི་ཡང་བྱང་ཆུབ་ཉིད་ཀྱི་
ཡེ་ཤེས་ཀྱི་རང་བཞིན་བྱིན་གྱིས་བརླབས་པའོ། །རིག་པ་དེའི་རང་བཞིན་དང་གཟུགས་བསྟན་པའི་ཕྱིར་རིགས་ཀྱི་བུ་རིག་སྔགས་ཀྱི་རྒྱལ་མོ་དེ་བཞིན་གཤེགས་པ་ཐམས་ཅད་ཀྱི་སྐུ་དང་གཉིས་སུ་མེད་པའི་སྤྱོད་ཡུལ་ཅན་དེ་ཞེས་གསུངས་པ་ཡིན་ཏེ། དེ་ལ་དེ་བཞིན་གཤེགས་པ་ཐམས་ཅད་ཀྱི་སྐུ་ནི་ཆོས་ཀྱི་སྐུ་སྟེ་དེ་དང་རིག་པ་འདི་ནི་སྤྱོད་ཡུལ་གཉིས་སུ་མེད་དེ། དེ་བཞིན་ཉིད་ལ་དམིགས་པར་འདྲ་བའི་ཕྱིར་རོ། །རིག་པ་འདིའི་མཐུ་ཆེན་པོ་བསྟན་པའི་ཕྱིར། འདི་ཡིས་བྱིན་བརླབས་ཞེས་པ་ནས། །ཆགས་མེད་ཐོབ་པར་འགྱུར་ཞེས་བྱ་བའི་བར་གྱིས་གསུངས་ཏེ། རིག་པ་འདིས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བྱིན་གྱིས་བརླབ་པས་ན་སངས་རྒྱས་དང་བྱང་ཆུབ་སེམས་དཔའ་དེ་དག་གིས་མི་གནས་པའི་མྱ་ངན་ལས་འདས་པའི་ཆོས་ཉིད་ཆགས་པ་མེད་པ་གང་དུ་སྡུག་བསྔལ་འགག་པར་འགྱུར་བ་ཐོབ་པར་འགྱུར་ཞེས་པའི་དོན་ཏོ། །དེ་ལ་སངས་རྒྱས་དང་ཞེས་པ་ནི་བླ་ན་མེད་པའི་སངས་རྒྱས་ལ་མི་བྱ་སྟེ། བྱང་ཆུབ་སེམས་དཔའ་ས་བཅུར་ཕྱིན་པ་དབང་བཅུ་ཐོབ་པའི་སངས་རྒྱས་དེ་ལ་བྱང་ཆུབ་སེམས་དཔའ་ནི་དེ་ལས་གཞན་པའི་འཕགས་པའི་ས་ལ་གནས་པ་རྣམས་ལ་བྱའོ། །ཆོས་ཉིད་ཆགས་མེད་ཅེས་པ་ནི་མི་གནས་པའི་མྱ་ངན་ལས་འདས་པའི་རང་བཞིན་ཏེ། ཉོན་མོངས་པ་དང་ཤེས་བྱའི་སྒྲིབ་པ་མེད་པས་ན་མ་ཆགས་པའོ་ཞེས་བྱའོ། །ཡང་ཅི་ལྟ་བུ་ཞེ་ན། གང་དུ་སྡུག་བསྔལ་འགག་འགྱུར་པའི། །ཞེས་པ་སྟེ། མྱ་ངན་ལས་འདས་པ་ཞེས་བྱ་བའི་ཆོས་དེ་ལ་ཕུང་པོའི་སྡུག་བསྔལ་རྣམས་མེད་ཅེས་པའི་དོན་ཏོ། །དེ་ནས་བཅོམ་ལྡན་འདས་ཀྱིས་ཡི་གེ་འཁོར་ལོའི་དཀྱིལ་འཁོར་སྤྱད་པ་འཁོར་རྣམས་ལ་བཤད་པར་བྱའོ་ཞེས་བཀའ་སྩལ་པ། དེ་ནས་བཅོམ་ལྡན་འདས་རྣམ་པར་སྣད་མཛད་ཅེས་པ་ནས། རིམ་པར་ཕྱེ་བ་རྒྱས་པ་ཉོན་ཅིག་ཅེས་པའི་བར་དུ་གསུངས་པ་ཡིན་ཏེ། དེ་ལ་དེ་བཞིན་གཤེགས་པ་ཐམས་ཅད་རྗེས་སུ་དགོངས་ནས་ཞེས་པ་ནི་སེམས་ཅན་གཞན་དང་མ་འོངས་པའི་སེམས་ཅན་རྣམས་ཅི་ཙམ་ན་ཡང་དང་པོར་དེ་བཞིན་གཤེགས་པ་རྗེས་སུ་དྲན་པར་གྱིས་ཤིག་ཅེས་
ལུང་བསྟན་པའོ། །བདག་ཉིད་དང་ཕྱག་ན་རྡོ་རྗེ་གཉི་ག་གཟོད་མ་ནས་མ་སྐྱེས་པ་ཉིད་དུ་བྱིན་གྱིས་བརླབས་ཏེ་ཞེས་པ་ནི་དཀྱིལ་འཁོར་གྱི་ཆོ་ག་བསྟན་པ་སྟེ། འཆད་པ་པོ་དང་ཉན་པ་པོ་གཉིས་ཏིང་ངེ་འཛིན་ལ་སྙོམས་པར་ཞུགས་ནས་འཆད་ཅིང་མཉན་པའི་ཚུལ་ཏེ་དེ་བས་ན་འཆད་པ་པོ་བཅོམ་ལྡན་འདས་དང་ཉན་པ་པོ་ཕྱག་ན་རྡོ་རྗེ་གཉི་ག་མ་སྐྱེས་པའི་ཆོས་སྟོང་པ་ཉིད་ཀྱི་ཏིང་ངེ་འཛིན་ལ་སྙོམས་པར་ཞུགས་པར་བསྟན་ཏེ། དེ་ཡང་ཏིང་ངེ་འཛིན་ལ་མ་ཞུགས་པའི་སྤྱོད་ཡུལ་མ་ཡིན་པའི་ཕྱིར་རོ། །དེ་བས་ན་དཀྱིལ་འཁོར་གྱི་སློབ་དཔོན་གྱིས་ཀྱང་དཀྱིལ་འཁོར་དང་པོར་བརྩམ་པའི་ཚེ་བདག་ཉིད་ཀྱང་བྱིན་གྱིས་བརླབས་གྲོགས་བྱེད་པ་ཡང་རྡོ་རྗེ་དམ་པ་སྦྱིན་པར་བྱིན་གྱིས་རློབས་ཤིག་ཅེས་པ་སྟེ། དེ་ཡང་རང་ངམ་སློབ་དཔོན་གྱིས་སྟོང་པ་ཉིད་དུ་བྱིན་གྱིས་བརླབ་པོ། །ཡི་གེ་འཁོར་ལོ་བསྐོར་བ་ཞེས་བྱ་བའི་དཀྱིལ་འཁོར་སྤྱད་པ་རིམ་པར་ཕྱེ་བ་རྒྱས་པ་ཞེས་བྱ་བ་དེ་ལ་ཡི་གེ་འཁོར་ལོ་བསྐོར་བ་ཞེས་པ་ནི་གཅིག་ཏུ་ན་ཡི་གེས་འཁོར་ལོ་བསྐོར་ཏེ་ཡི་གེ་ཨ་དབུས་སུ་གཞག་ལ་ཀ་ལ་སོགས་པས་མཐའ་བསྐོར་བའི་ཕྱིར་རོ། །གཉིས་སུ་ན་འཁོར་ལོའི་དཀྱིལ་འཁོར་དུ་ཡི་གེར་བསྒྱུར་བས་ན་ཡི་གེའི་འཁོར་ལོ་བསྐོར་བ་སྟེ། དཀྱིལ་འཁོར་དེར་གཟུགས་ཡི་གེའི་འབྲུར་བསྒྱུར་ཏེ་བཀོད་པའི་ཕྱིར་རོ། །སྤྱད་པ་ཞེས་པ་ནི་དཀྱིལ་འཁོར་གྱི་ལས་སུ་བྱ་བ་རྣམས་སོ། །རིམ་པར་ཕྱེ་བ་ཞེས་པ་དེ་ཉིད་ཀྱི་གཞུང་གི་ལེའུའོ། །རྒྱས་པ་ཞེས་པ་ནི་དཀྱིལ་འཁོར་དེར་སློབ་མའི་བསོད་ནམས་ཀྱི་ཚོགས་ཤིན་ཏུ་འཕེལ་བའོ། །དཀྱིལ་འཁོར་དེ་ཡང་ཇི་ལྟ་བུ་ཞེ་ན། རང་བཞིན་བསྟན་པའི་ཕྱིར་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ལ་སངས་རྒྱས་ཀྱི་མཛད་པས་སོ་སོར་ཉེ་བར་གནས་པ་ཞེས་གསུངས་ཏེ། དེ་ལ་སངས་རྒྱས་ཀྱི་མཛད་པ་ནི་ཚེ་འདི་དང་ཕ་རོལ་དུ་མངོན་པར་མཐོ་བ་དང་ངེས་པར་ལེགས་པའི་འབྲས་བུ་ཐོབ་པར་མཛད་པ་ཡིན་ལ། དེ་བཞིན་དུ་དཀྱིལ་འཁོར་འདིའི་སྒོ་ནས་སྔགས་སྤྱོད་པ་རྣམས་ཚེ་འདི་དང་ཕ་རོལ་དུ་འཇིག་རྟེན་དང་འཇིག་རྟེན་ལས་འདས་པའི་འབྲས་བུ་ཐོབ་པར་བྱེད་པའི་ཕྱིར་དཀྱིལ་འཁོར་འདི་ནི་སངས་རྒྱས་ཀྱི་མཛད་པས་ཉེ་བར་གནས་པ་ཡིན་ཏེ་དེ་
བཤད་ཀྱིས་ཉོན་ཅིག་ཅེས་པའི་དོན་ཏོ། །བཅོམ་ལྡན་འདས་ཀྱིས་ཡི་གེ་འཁོར་ལོ་བསྐོར་བའི་དཀྱིལ་འཁོར་སྤྱད་པ་བཤད་པར་གནང་བས་དེས་ཕྱག་ན་རྡོ་རྗེ་ཤིན་ཏུ་མགུ་ནས་བཅོམ་ལྡན་འདས་ལ་ཡོན་ཏན་གྱི་སྒོ་ནས་བསྟོད་པ་ཡང་བཅོམ་ལྡན་འདས་ལ་གུས་པ་བསྐྱེད་པའི་ཕྱིར་ཕྱག་འཚལ་ཏེ་རྡོ་རྗེ་པདྨའི་སྟན་དེ་ལས་རྡོ་རྗེ་འབབ་པའི་ཚུལ་དུ་བབས་ཞེས་གསུངས་ཏེ། རྡོ་རྗེའི་ཚུལ་དུ་བབས་པ་ནི་གཡེང་བ་དང་འདྲོག་པ་མེད་པར་བརྟན་པོར་བབས་པའོ། །གཅིག་ཏུ་ན་དཀྱིལ་འཁོར་འདིའི་ནང་ནས་བཅོམ་ལྡན་འདས་ཀྱི་རྒྱུ་དང་འབྲས་བུའི་ཡོན་ཏན་འབྱུང་བ་རྣམས་ཀྱི་སྒོ་ནས་བསྟོད་པའི་ཕྱིར། དེ་ནས་ཕྱག་ན་རྡོ་རྗེས་བཅོམ་ལྡན་འདས་ལ་མངོན་པར་བསྟོད་པ་ཞེས་སྦྱར་རོ། །བཅོམ་ལྡན་འདས་ཞེས་བྱ་བ་ལ་སོགས་པས་ཡོན་ཏན་རྣམ་པ་ལྔའི་སྒོ་ནས་བསྟོད་དེ། བྱང་ཆུབ་ཀྱི་སེམས་ཀྱི་སྒོ་ནས་བསྟོད་པ་དང༌། རྒྱུ་དང་འབྲས་བུའི་སྤྱོད་པའི་སྒོ་ནས་བསྟོད་པ་དང༌། དེ་བཞིན་གཤེགས་པའི་དེ་མ་ཐག་པའི་ལམ་གྱི་སྒོ་ནས་བསྟོད་པ་དང༌། ཀུན་དུ་སངས་རྒྱས་པའི་ཡོན་ཏན་གྱི་སྒོ་ནས་བསྟོད་པ་དང༌། མྱ་ངན་ལས་འདས་པའི་ཡོན་ཏན་གྱི་སྒོ་ནས་བསྟོད་པ་སྟེ། ཡོན་ཏན་གྱི་གོ་རིམས་ཀྱང་འདི་ལྟར་རིགས་མོད་ཀྱི། །ཚིགས་སུ་བཅད་པ་སྦྱར་བདེ་བའི་ཕྱིར་གོང་འོག་བསྣོར་ཏེ་གསུངས་སོ། །དེ་ལ། ཕྱག་འཚལ་བྱང་ཆུབ་སེམས་ཁྱོད་ལ། །ཞེས་པ་ནི་བྱང་ཆུབ་ཀྱི་སེམས་དངོས་ནི་བྱང་ཆུབ་སེམས་དཔའི་ས་དང་པོ་ཡན་ཆད་ལ་བྱ་མོད་ཀྱི། ས་དང་པོ་ལ་སོགས་པ་རྣམས་ས་དང་ཕ་རོལ་ཏུ་ཕྱིན་པའི་སྒོ་ནས་བསྟོད་ཟིན་པས་ན་དེ་ལ་མི་བྱ་བར་སྐབས་འདིར་ནི་བཏགས་པའི་བྱང་ཆུབ་མོས་པས་སྤྱོད་པའི་ས་ལ་བྱ་སྟེ། དེ་ཡང་དེ་བཞིན་གཤེགས་པའི་རྒྱུ་ཡིན་པས་རྒྱུ་དེ་ལ་འབྲས་བུ་དེ་བཞིན་གཤེགས་པའི་མིང་གིས་བཏགས་སོ། །ཕྱག་འཚལ་བྱང་ཆུབ་འབྱུང་ཁྱོད་ལ། །ཞེས་པ་ནི་དེ་བཞིན་གཤེགས་པའི་དེ་མ་ཐག་པའི་ལམ་གྱི་ཡོན་ཏན་གྱི་སྒོ་ནས་བསྟོད་པ་སྟེ། བྱང་ཆུབ་སེམས་དཔའི་ས་བཅུ་ལས་འདས་ནས་སྙིང་པོ་བྱང་ཆུབ་མ་ཐོབ་ཀྱི་བར་དུ་དེ་མ་ཐག་པའི་ལམ་སྟེ། དེ་ལས་བྱང་ཆུབ་འབྱུང་བས་ན་བྱང་ཆུབ་འབྱུང་བ་ཞེས་བྱའོ། །སྤྱོད་གཟུགས་ཞེས་པ་ལ་རྒྱུའི་སྤྱོད་པ་དང་འབྲས་བུའི་
སྤྱོད་པ་རྣམ་པ་གཉིས་ལས་འབྲས་བུའི་སྤྱོད་པ་ནི། ལུས་དང་ངག་དང་ཡིད་གསུམ་གྱི་འཁོར་ལོའི་སྤྱོད་པས་འཇིག་རྟེན་གསུམ་དུ་ཁྱབ་པར་སྟོན་པ་ཡིན་ལ། རྒྱུའི་སྤྱོད་པའི་གཟུགས་ནི་ས་དང་ཕ་རོལ་ཏུ་ཕྱིན་པ་རྣམས་སོ། །ཕྱག་འཚལ་ཐོག་མར་བྱེད་ཁྱོད་ལ། །ཞེས་པ་ནི་ཀུན་དུ་སངས་རྒྱས་པའི་ཡོན་ཏན་གྱི་སྒོ་ནས་བསྟོད་པ་སྟེ། ཆོས་རྣམས་ཐོག་མ་ནས་ཡང་དག་པར་གཟུང་བ་དང་འཛིན་པ་དང་བྲལ་བ་སྟོང་པ་ཉིད་ཡིན་པ་དེ་ལ་ཕྱག་འཚལ་བའོ། །སྟོང་པ་ཉིད་ལ་འདུད་ཕྱག་འཚལ། །ཞེས་པ་ནི་མྱ་ངན་ལས་འདས་པའི་རང་བཞིན་གྱི་སྒོ་ནས་བསྟོད་པ་སྟེ་ཐམས་ཅད་མ་བྱུང་མ་སྐྱེས་པའི་ངོ་བོ་ཉིད་མི་གནས་པའི་མྱ་ངན་ལས་འདས་པ་ལ་ཕྱག་འཚལ་ལོ་ཞེས་པའོ། །དེ་ནས་ཕྱག་ན་རྡོ་རྗེས་དཀྱིལ་འཁོར་དེ་བཤད་པར་གསོལ་བ་གདབ་པའི་ཕྱིར་བཅོམ་ལྡན་འདས་ལ་འདི་སྐད་ཅེས་གསོལ་ཏོ་ཞེས་པ་ནས་བཤད་དུ་གསོལ་ཞེས་པའི་བར་དུ་གསུངས་སོ། །དེ་ལ་གང་དག་དང་ལྡན་ན་བདག་ཅག་རྣམས་ཞེས་པ་ནི་བཅོམ་ལྡན་འདས་ཀྱིས་བཤད་པའི་དཀྱིལ་འཁོར་གྱི་ཚུལ་དེ་དག་དང་ངོ༌། །དེ་ལ་ཕྱག་ན་རྡོ་རྗེ་ནི་རྟོགས་པའི་ཆོས་དང་ལྡན་པས་ན་བཅོམ་ལྡན་འདས་བཤད་པའི་ལུང་གི་ཆོས་དེ་དེས་ཐོས་ནས་སེམས་ཅན་གྱི་དོན་བྱ་བ་དང་སྔགས་ཀྱི་ཚུལ་རྫོགས་པར་བྱའོ་ཞེས་པ་དེ་མི་རིགས་སོ། །དེ་ཅིའི་ཕྱིར་ཞེ་ན། རྟོགས་པའི་ཆོས་ཉིད་ལ་གནས་པས་ལུང་གི་ཆོས་མཉན་ནས་སེམས་ཅན་གྱི་དོན་བྱ་བ་ལ་སོགས་པ་མི་རིགས་པའི་ཕྱིར་རོ་ཞེ་ན། དེ་ནི་དེ་ལྟ་མ་ཡིན་ཏེ། གཅིག་ཏུ་ན་བཅོམ་ལྡན་འདས་ཀྱིས་ཆོས་བཤད་པ་གཅེས་ཤིང་བཙུན་པར་བསྟོད་པའི་ཕྱིར་ཏེ། བཅོམ་ལྡན་འདས་ཀྱིས་ཆོས་དེ་བཤད་པ་ན་ཕྱག་ན་རྡོ་རྗེ་ལྟ་བུ་རྟོགས་པ་དག་ལྡན་པས་ཀྱང་ཐོས་ནས་ཡོན་ཏན་གྱི་བྱེ་བྲག་ཐོབ་པར་འགྱུར་ན་གཞན་ལྟ་ཅི་སྨོས་སྙམ་དུ་འཇིག་རྟེན་གྱིས་ཤེས་པར་བྱ་བའི་ཕྱིར་རོ། །ཡང་གཅིག་ཏུ་ན་ཕྱག་ན་རྡོ་རྗེ་རྟོགས་པའི་ཆོས་དང་ལྡན་པ་ཡིན་མོད་ཀྱི་ལུང་གི་ཆོས་རྣམས་ཀྱང་བཅོམ་ལྡན་འདས་ལས་མཉན་ཏེ་སེམས་ཅན་གྱི་དོན་མཛད་པར་གྱུར་ན་ཡང་ཉེས་པ་མེད་དོ། །དེ་ནས་བཅོམ་ལྡན་འདས་མི་གནས་པའི་མྱ་ངན་ལས་འདས་པ་ལ་བཞུགས་པས་རྣམ་པར་རྟོག་ང་མི་མངའ་བའི་ཕྱིར་རོ། །
ཆོས་གསུངས་པའི་ཚིག་དེ་འབྱུང་བར་མི་རིགས་ལ། ཡང་ན་ནི་རྣམ་པར་མི་རྟོག་པའི་ཚིག་ཉམས་པར་འགྱུར་རོ་སྙམ་པ་དེ་འདྲ་བའི་ཀླན་ཀར་མི་འགྱུར་བའི་ཕྱིར། བཅོམ་ལྡན་འདས་ཀྱི་ལོངས་སྤྱོད་རྫོགས་པ་དང༌། སྤྲུལ་པའི་སྐུས་ཆོས་དང་བཤད་ལ་རྣམ་པར་མི་རྟོག་པའི་ཏིང་ངེ་འཛིན་ལས་ཀྱང་ཉམས་པ་མེད་པར་བསྟན་པའི་ཕྱིར། ང་ནི་འཇིག་རྟེན་དང་པོ་ཡི། །ཞེས་པ་ནས། ལས་ཀྱི་རྣམ་པར་སྨིན་པ་བཞིན་དུ་མཐོང་བར་འགྱུར་བ་དེ་ལྟ་བུའི་བྱིན་གྱིས་བརླབ་བ་མཛད་དོ་ཞེས་པའི་བར་དུ་གསུངས་པ་ཡིན་ཏེ། དེ་ལ་འཇིག་རྟེན་དང་པོ་ཡི། །ཞེས་པ་དང༌། ཆོས་བཤད་དོ་ཞེས་པས་ནི་མི་རྟོག་པའི་ངང་ལས་ཆོས་བཤད་པ་མི་འབྱུང་བ་མ་ཡིན་པར་བསྟན་ཏོ། །དེ་ལ་འཇིག་རྟེན་དང་པོ་ནི་རྣམ་པ་གཉིས་ཏེ། དག་པ་དང༌། མ་དག་པའོ། །དེ་ལ་དག་པ་ནི་ས་དང་པོ་ཡན་ཆད་ཀྱི་བྱང་ཆུབ་སེམས་དཔའ་རྣམས་ཏེ་དེ་རྣམས་སྔར་བྱུང་ནས་ཕྱིས་མངོན་པར་ཆོས་བཤད་པ་མི་འབྱུང་བ་མ་ཡིན་པར་བསྟན་ཏེ། དེ་རྣམས་དང་པོའི་འཇིག་རྟེན་སངས་རྒྱས་པ་ཡིན་པའི་ཕྱིར་འཇིག་རྟེན་དང་པོ་ཞེས་བྱའོ། །དེ་ལ་མ་དག་པའི་འཇིག་རྟེན་པ་ནི་བསྐལ་པ་ཆེན་པོ་ཞིག་པའི་འོག་ཏུ་དང་པོ་འཇིག་རྟེན་འཆགས་པའི་ཚེ་ཚངས་པ་དང་བརྒྱ་བྱིན་ལ་སོགས་པ་དང་པོ་ཉིད་དུ་འབྱུང་བས་ན་འཇིག་རྟེན་དང་པོ་ཞེས་བྱའོ། །དེ་དག་ལ་བཅོམ་ལྡན་འདས་ཀྱིས་ཆོས་རྣམ་པ་གསུམ་བཤད་པས་ན་དེ་དག་གིས་བཅོམ་ལྡན་འདས་ལ་འཇིག་རྟེན་གྱི་མགོན་བོ་ཞེས་བསྒྲགས་སོ། །དེ་ལ་ཆོས་བཤད་པ་རྣམ་པ་གསུམ་པོ་དེ་ཡང་གང་ཞེ་ན། མཉམ་པ་མེད་པའི་ཆོས་དང༌། གཟོད་མ་ནས་ཞི་བ་དང༌། བླ་ན་མེད་པའི་ཆོས་སོ། །དེ་རྣམས་ཀྱང་འཇུག་པ་དང༌། སྦྱོར་བ་དང༌། འབྲས་བུའི་བྱ་བྲག་ཏུ་བལྟ་སྟེ། དེ་ལ་མཉམ་པ་མེད་ཅེས་པ་ནི་བླ་ན་མེད་པར་འཇུག་པའི་ཆོས་དེ་དགེ་བ་བཅུ་དང་སྦྱིན་པ་ལ་སོགས་པའི་དགེ་བའི་ཆོས་རྣམས་སོ། །དེ་ཡང་འཇིག་རྟེན་པ་ཕྱི་རོལ་མུ་སྟེགས་ཀྱི་ཆོས་དང་མི་མཚུངས་པས་ན་མཉམ་པ་མེད་པའོ། །གཟོད་མ་ནས་ཞི་བ་ཞེས་པ་ནི་སངས་རྒྱས་པར་སྦྱོར་བའི་རིམ་པ་སྟེ། ཆོས་ཐམས་ཅད་རྒྱུ་དང་རྐྱེན་གྱིས་མི་བསྐྱེད་པའི་ཕྱིར་ན་གཟོད་མ་ནས་ཞེས་བའོ་ཞེས་བསྟན་ཏོ། །དེ་ལ་བླ་ན་མེད་པ་ཞེས་པ་ནི་འཇུག་པ་དང་སྦྱོར་བའི་འབྲས་བུ་སྟེ་མི་གནས་
པའི་མྱ་ངན་ལས་འདས་པའི་ས་བསྟན་པའོ། །དེ་ལྟར་ཆོས་བསྟན་ཅིང་འཆང་མོད་ཀྱི་རྣམ་པར་མི་རྟོག་པ་ལས་ཉམས་པ་མེད་པར་བསྟན་པའི་ཕྱིར། དེ་ལྟ་བུའི་བྱིན་གྱིས་བརློབ་པ་མཛད་དོ་ཞེས་གསུངས་ཏེ། དེ་ལ་དེ་ལྟ་བུའི་བྱིན་གྱིས་བརློབ་པ་ཞེས་པ་ནི་བྱང་ཆུབ་སེམས་དཔའ་ཀུན་དུ་བཟང་པོ་ལ་སོགས་པར་བསམ་པ་ཡོངས་སུ་དག་པ་རྣམས་ཇི་ལྟར་བཅོམ་ལྡན་འདས་ཀྱིས་བྱིན་གྱིས་བརླབས་པ་འོད་ལ་སོགས་པས་བསྐུལ་བ་དེ་ལྟ་བུས་བྱིན་གྱིས་བརླབས་ནས་སྙིང་པོ་བྱང་ཆུབ་ན་བཞུགས་པའི་སྐུ་མཐོང་བར་བསྟན་ཏོ། །དེ་དག་གིས་སྙིང་པོ་བྱང་ཆུབ་ཀྱི་སྐུ་མཐོང་བ་དེ་ཇི་ལྟ་བུར་མཐོང་ཞེ་ན། ནམ་མཁའ་བཞིན་དུ་སྤྲོས་པ་མེད་པ་ལ་སོགས་པར་ཏེ། ནམ་མཁའ་བཞིན་ཞེས་པ་ནི་རང་བཞིན་གྱིས་འོད་གསལ་ཞིང་དྲི་མ་མེད་པ་སྟོང་པ་ཉིད་ཀྱི་རང་བཞིན་ནོ། །སྤྲོས་པ་མེད་པ་ཞེས་པ་ནི་ནང་གི་ཡིད་ཀྱི་རྣམ་པར་ཤེས་པའི་རྣམ་པར་རྟོག་པ་ཐམས་ཅད་སྤངས་ཞེས་པའི་དོན་ཏོ། །སྤྱོད་པ་ལ་གཉིས་སུ་མེད་པའི་རྣལ་འབྱོར་ཞེས་པ་ནི་ལུས་དང་ངག་དང་ཡིད་གསུམ་གྱི་འཁོར་ལོས་སྤྱོད་པ་དང་སྙིང་པོ་བྱང་ཆུབ་ཀྱི་སྐུ་གཉིས་སུ་མེད་པར་སྦྱོར་བ་སྟེ། དེ་གཉིས་རང་བཞིན་དབྱེར་མེད་པའི་ཕྱིར་རོ། །ལས་ཀྱི་རྣམ་པར་སྨིན་པ་བཞིན། །ཞེས་པ་ནི་ལས་ཀྱི་རྣམ་པར་སྨིན་པ་དང་འདྲའོ་ཞེས་པ་སྟེ། རྣམ་པར་སྨིན་པ་ཉིད་མ་ཡིན་གྱི་དེ་དང་འདྲ་བར་བསྟན་པའོ། །དེ་ཅིའི་ཕྱིར་ཞེ་ན། སེམས་དད་པའི་སེམས་ཅན་ནི་ལས་ཀྱི་རྣམ་པར་སྨིན་པ་ལ་བརྟེན་ཏེ་དེ་ཉིད་ཟད་པར་འགྱུར་གྱི་བཅོམ་ལྡན་འདས་ནི་བསོད་ནམས་དང་ཡེ་ཤེས་ཀྱི་ཚོགས་ཆེན་པོའི་རྒྱུ་མཐུན་པའི་འབྲས་བུ་དེ་ཟད་པར་མི་འགྱུར་བ་སྟེ། སྙིང་པོ་བྱང་ཆུབ་ཀྱི་སྐུ་དེ་ནི་བསོད་ནམས་དང་ཡེ་ཤེས་ཀྱི་ཚོགས་ཆེན་པོའི་རྒྱུ་མཐུན་པའི་འབྲས་བུ་ཡིན་པས་རྣམ་པར་སྨིན་པ་ལྟ་བུ་ཞེས་བྱའོ། །དེའི་ཚེ་བཅོམ་ལྡན་འདས་ཀྱི་ཡན་ལག་དང༌། དེ་བཞིན་གཤེགས་པའི་སྐུ་ཐམས་ཅད་ནས་ཞེས་པ་ནས། སྙིང་པོ་འདི་ལ་བརྩོན་པར་བྱའོ་ཞེས་པའི་བར་གྱིས་ནི་ཡི་གེ་ཨ་ཡི་གེ་འཁོར་ལོ་བསྐོར་བའི་དཀྱིལ་འཁོར་གྱི་བདག་པོར་བཞག་ནས་ཨ་དེའི་ཡོན་ཏན་བརྗོད་པ་དང་བཅས་པར་གསུངས་པ་ཡིན་ཏེ། དེ་ལ་བཅོམ་ལྡན་འདས་ཀྱི་ཡན་ལག་དང་དེ་བཞིན་གཤེགས་པའི་སྐུ་ཐམས་ཅད་ནས་ཞེས་པ་
ནི་ཡི་གེ་ཨ་དེ་བཞིན་གཤེགས་པའི་ལུས་ཀྱི་འཁོར་ལོ་སྐུ་ཐམས་ཅད་ནས་བྱུང་ངོ་ཞེས་པའི་དོན་ཏོ། །འཇིག་རྟེན་པ་དང་འཇིག་རྟེན་ལས་འདས་པ་ཞེས་པ་ལ་སོགས་པ་དེ་དག་ནི་ཡི་གེ་ཨའི་མཐུ་ཆེན་པོ་བསྟན་པ་སྟེ། དེ་ལ་འཇིག་རྟེན་པ་ཞེས་པ་ནི་མུ་སྟེགས་ཀྱི་དྲང་སྲོང་ལ་སོགས་པ་དང་ཕྱོགས་གཅིག་སྟོང་པར་ལྟ་བ་རྣམས་སོ། །འཇིག་རྟེན་ལས་འདས་པ་ཞེས་པ་ནི་བྱང་ཆུབ་སེམས་དཔའ་རྣམས་ལ་བྱ་སྟེ། ཉན་ཐོས་དག་ནི་འོག་ནས་འབྱུང་བས་ན་འདིར་མ་གཏོགས་སོ། །ཉན་ཐོས་དང་རང་སངས་རྒྱས་དག་ཀྱང་རང་གི་རྣམ་པར་གྲོལ་བ་ཕྱོགས་གཅིག་གི་སྒོ་སྟོང་པ་ལ་གནས་པ་སྟེ། དེ་རྣམས་ཀྱང་སྔགས་སྒྲུབ་པའི་འཇུག་པ་དང༌། བསམ་གཏན་གྱི་སྒོར་འཇུག་པ་རྣམ་པ་གཉིས་ཏེ་དེ་གཉི་གའི་ཡང་སྲོག་དང་འདྲ་བའོ། །དེ་ཅིའི་ཕྱིར་ཞེ་ན། དེ་དག་ཐམས་ཅད་ཀྱང་དོན་དམ་པར་ཡང་ལ་ལ་ནི་ཕྱིན་ཅི་མ་ལོག་པར་ཡོངས་སུ་གྲུབ་པའི་སྟོང་པ། ལ་ལ་ནི་ཕྱོགས་ཙམ་སྟོང་པར་ལྟ་བ་སྟེ། སྤྱིར་ཐམས་ཅད་སྟོང་པའི་དོན་ལ་བརྟེན་པས་ན་ཡི་གེ་ཨའི་དོན་སྐྱེས་པའི་ཆོས་ཉིད་ནི་དེ་དག་ཐམས་ཅད་ཀྱི་སྲོག་ལྟ་བུའོ། །ཀུན་རྫོབ་ཏུ་ཡང་གང་ཡིག་འབྲུ་ལ་བརྟེན་པའི་ཆོས་ཐམས་ཅད་ཨ་ལས་འགྱུར་བས་ན་སྲོག་ལྟ་བུའོ། །དེ་ལ་བསམ་གཏན་ཞེས་པ་ནི་རྣལ་འབྱོར་ཏེ་སེམས་པའོ། །བསམ་གཏན་དུ་བྱ་བ་ཞེས་པ་ནི་བསམ་པ་དེའི་འབྲས་བུ་གང་ཡིན་པ་སྟེ་དེ་ནི་བསམ་གཏན་གྱི་སྒོ་ནས་འཇུག་པའོ། །དངོས་གྲུབ་སྒྲུབ་པ་ནི་རབ་དང་འབྲིང་དང་ཐ་མ་ལ་སོགས་པ་སྟེ་དེ་དག་སྒྲུབ་པའི་ཕྱིར་འཇུག་པ་དེ་ནི་སྔགས་སྒྲུབ་པའི་སྒོར་ཞུགས་པའོ། །ཡི་གེའི་འབྲུ་རྣམས་ཀྱང་ཀུན་རྫོབ་དང་དོན་དམ་པའི་སྒོ་ནས་སྲོག་ལ་སོགས་པར་འགྱུར་བ་སྟེ། དེ་ལ་ཡི་གེ་ཐམས་ཅད་ཀྱི་འཚོ་བར་གྱུར་པ་ཞེས་པ་ནི་བྱང་ཆུབ་ཀྱི་སྒོ་ནས་ཡི་གེ་རྣམས་ཨ་ལ་བརྟེན་པའི་ཕྱིར་འཚོ་བར་གྱུར་པ་སྟེ། ཨ་ཞེས་པའི་དོན་ནི་མ་སྐྱེས་པ་ཡིན་ལ། དེ་བཞིན་གཤེགས་པ་ཞེས་བྱ་བའི་དོན་ཀྱང་དགོས་པ་ཐམས་ཅད་དང་བྲལ་བ་སྟེ་མ་སྐྱེས་པའི་དོན་ཏོ། །དེ་བས་ན་ཡི་གེ་ཀ་བྱང་ཆུབ་ཀྱི་ས་བོན་གྱི་འཚོ་བ་ཡང་ཨ་ལ་རག་ལུས་པའི་ཕྱིར་སྲོག་ཅེས་བྱའོ། །དེ་བཞིན་དུ་ཡི་གེ་ལྷག་མ་རྣམས་ཀྱང་ཤེས་པར་
བྱའོ། །དེ་ལ་ཡི་གེ་ཐམས་ཅད་ཀྱི་སྲོག་ཏུ་གྱུར་པ་ཞེས་པ་ནི་སྤྱོད་པའི་སྒོ་ནས་ཡིག་འབྲུ་རྣམས་དེ་ལ་བརྟེན་བས་ན་དེའི་ཕྱིར་སྲོག་ཅེས་བྱའོ། །སྐྱབས་སུ་གྱུར་པ་ཞེས་པ་ནི་ཀུན་དུ་སངས་རྒྱས་པའི་སྒོ་ནས་ཡི་གེ་རྣམས་ཀྱི་རྟེན་ཡིན་པས་ན་སྐྱབས་སོ། །བྱུང་ངོ་ཞེས་པ་ནི་མྱ་ངན་འདས་པའི་སྒོ་ནས་ཡི་གེ་རྣམས་བྱུང་བའི་དོན་ཏོ། །རིགས་ཀྱི་བུ་དག་འདི་ནི་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པ་ཞེས་པ་ནི་སངས་རྒྱས་ཀྱི་སྐུའི་འཁོར་ལོ་ཐམས་ཅད་ཀྱིས་བྱིན་གྱིས་བརླབས་ཞེས་པའི་དོན་ཏོ། །བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ལ། སངས་རྒྱས་ཀྱི་མཛད་པས་སོ་སོར་ཉེ་བར་གནས་པ་ཡིན་ཏེ་ཞེས་པ་ནི་ཡི་གེ་ཨ་དེའི་མཐུ་ཆེན་པོ་བསྟན་པ་སྟེ་སངས་རྒྱས་འཇིག་རྟེན་དུ་འབྱུང་བའི་ཚེ་ཆོས་རྣམ་པ་གཉིས་བསྟན་པ་ནི་སངས་རྒྱས་ཀྱི་མཛད་པ་སྟེ། རྣམ་པ་གཉིས་ནི་བསམ་པ་དག་པ་རྣམས་ལ་རྟོགས་པའི་ཆོས་བསྟན་པ་དང་བསམ་པ་མ་དག་པ་རྣམས་ལ་ལུང་གི་ཆོས་བསྟན་པའོ། །དེ་བཞིན་དུ་ཡི་གེ་ཨ་ཡང་ཆོས་དེ་གཉི་ག་སྟོན་པའི་རྒྱུ་ཡིན་ཏེ། དེ་བས་ན་སངས་རྒྱས་ཀྱི་མཛད་པས་སོ་སོར་ཉེ་བར་གནས་པ་ཡིན་ནོ། །ཇི་ལྟར་ཞེ་ན། རྟོགས་པའི་ཆོས་རྣམས་ཀྱང་ཡི་གེ་ཨ་དེའི་དོན་མ་སྐྱེས་པ་ལས་བྱུང་ལ། ལུང་གི་ཆོས་རྣམས་ཀྱང་ཡི་གེའི་འབྲུའི་སྒོ་ནས་བཤད་པ་ཡིན་ཏེ། ཚིག་ཐམས་ཅད་ཡི་གེ་ཨ་ལས་མ་གྱུར་པ་མེད་པའི་ཕྱིར་རོ། །སངས་རྒྱས་ཀྱི་མཛད་པ་བྱེད་པར་ཇི་ལྟར་ཤེས་ཤེ་ན། ཆོས་ཐམས་ཅད་ནི་ཨ་ཞེས་བྱ་བའི་སྒོ་ནས་འཇུག་གོ་ཞེས་གསུངས་ཏེ། དེ་ཡང་ཇི་ལྟར་ཞེ་ན། ཡི་གེ་ཨ་ཞེས་བྱ་བས་རྒྱུ་བྱས་པ་ལས་རྟོགས་པའི་ཆོས་དང་ལུང་གི་ཆོས་ཐམས་ཅད་འབྱུང་བའི་ཕྱིར་རོ། །དེ་ལྟར་ཡི་གེ་ཨ་ཞེས་བྱ་བ་དེ་སངས་རྒྱས་ཀྱི་མཛད་པ་བྱེད་ཅིང་ཆོས་ཐམས་ཅད་འབྱུང་བའི་སྒོ་ཡིན་པ་དེ་ལྟ་བས་ན་སྔགས་ལ་སྤྱོད་པའི་བྱང་ཆུབ་སེམས་དཔའ་རྣམས་ཀྱི་ཡི་གེ་ཨ་དེ་དེ་བཞིན་གཤེགས་པར་བལྟ་བ་ལ་སོགས་པ་བྱ་སྟེ། དེ་ལ་དེ་བཞིན་གཤེགས་པ་རྣམས་མཐོང་བར་འདོད་བས་དེ་བཞིན་གཤེགས་པ་རྣམས་ཀྱི་སྙིང་པོ་འདི་ལ་བརྩོན་པར་བྱའོ་ཞེས་སྦྱར་ཏེ། ཡི་གེ་ཨ་ཞེས་བྱ་བའི་དོན་ནི་དེ་བཞིན་
གཤེགས་པའི་རང་བཞིན་ལས་གཞན་མ་ཡིན་པའི་ཕྱིར་སྙིང་པོ་བྱང་ཆུབ་ཉིད་ཀྱི་སྙིང་པོ་སྟེ་དེ་ནི་དོན་དམ་པའོ། །ཀུན་རྫོབ་ཏུ་ཡང་ཨ་ཞེས་བྱ་བའི་ཡི་གེའི་འབྲུ་དེ་བསྒོམས་ན་དེའི་མཐུས་དེ་བཞིན་གཤེགས་པ་གྲངས་མེད་པ་འཆར་བའི་ཕྱིར་རོ། །དེ་བཞིན་གཤེགས་པ་མཆོད་པར་འདོད་པས་ཀྱང་ཡི་གེ་འདི་བསྒོམ་པར་བྱ་ལ་མཆོད་པ་ཡང་སྒྲུབ་པའི་མཆོད་པ་དང༌། ཟད་ཟིང་གི་མཆོད་པ་རྣམ་པ་གཉིས་སུ་རིག་པར་བྱའོ། །དེ་ལ་སྒྲུབ་པའི་མཆོད་པ་ནི་ཡི་གེ་ཨ་དེ་ཉིད་ཀྱི་དོན་བསྒོམས་པར་འགྱུར་ལ། ཟང་ཟིང་གི་མཆོད་པ་ནི་ཡི་གེ་ཨ་དེ་བསྒོམས་པའི་མཐུ་ལས་ནམ་མཁའ་གང་བའི་མཆོད་པ་རྒྱ་ཆེན་པོ་འབྱུང་བའི་ཕྱིར་རོ། །བྱང་ཆུབ་ཀྱི་སེམས་མངོན་སུམ་དུ་བྱ་བར་འདོད་པ་ཞེས་པ་ནི་བྱང་ཆུབ་སེམས་དཔའི་ས་དང་པོ་ཡན་ཆད་ཀྱི་སེམས་ལ་བྱ་སྟེ། དེ་མངོན་དུ་བྱ་བར་འདོད་པས་ཡི་གེ་ཨའི་དོན་མངོན་པར་སྒྲུབ་པར་བྱོས་ཤིག་ཅེས་པའི་དོན་ཏོ། །དེ་ཅིའི་ཕྱིར་ཞེ་ན། བྱང་ཆུབ་ཀྱི་སེམས་ཀྱང་མ་སྐྱེས་པ་ཡིན་པས་ཡི་གེ་ཨའི་དོན་མ་སྐྱེས་པ་དང་མཚུངས་པའི་ཕྱིར་རོ། །བྱང་ཆུབ་སེམས་དཔའ་རྣམས་དང་འགྲོགས་པར་འདོད་པ་ཞེས་པ་ནི་དེ་ལྟར་འདོད་པས་ཡི་གེ་ཨའི་སྒོ་སྒོམས་ཤིག་ཅེས་འདོན་ཏེ། བྱང་ཆུབ་སེམས་དཔའ་རྣམས་ཀྱང་མ་སྐྱེས་པའི་དོན་ལ་དམིགས། ཡི་གེ་ཨ་ཡང་མ་སྐྱེས་པའི་དོན་ཡིན་པས་ན་སྤྱོད་ཡུལ་མཐུན་པས་ལྷན་ཅིག་ཏུ་སྐྱེ་བར་འགྱུར་རོ། །དེ་ཡན་ཆད་ནི་བསམ་གཏན་གྱི་སྒོ་ནས་བསྒོམ་པ་དང༌། ཨ་ཉིད་སྔགས་ཀྱི་སྒོ་སྒྲུབ་བ་ལ་ཞུགས་པ་གཉིས་ཀའི་ཐུན་མོང་གི་ཡོན་ཏན་བསྟན་པ་ཡིན་ལ་དངོས་གྲུབ་མངོན་པར་འདོད་པ་ཞེས་པ་ནི་སྔགས་ཀྱི་སྒོ་ནས་ཞུགས་པའི་གྲུབ་པ་རབ་འབྲིང་རྣམ་པ་གསུམ་མོ། །དེ་རྣམས་ནི་ཡན་ལག་གི་ཚིག་ཡིན་ལ། རྣམ་པ་ཐམས་ཅད་མཁྱེན་པ་ཉིད་ཐོབ་པར་འདོད་པས་འདི་སྒོམས་ཤིག་ཅེས་བྱ་བ་ནི་བསྡུས་པའི་དོན་ཡིན་ནོ། །དེ་ནས་དཀྱིལ་འཁོར་བྲི་བའི་ཆོ་ག་རྣམ་བོ་གསུམ་བསྟན་པའི་ཕྱིར། དེ་ནས་བཅོམ་ལྡན་འདས་རྣམ་པར་མཛད་ཀྱིས་སྙིང་རྗེ་ཆེན་པོའི་སྙིང་པོ་འབྱུང་བའི་དཀྱིལ་འཁོར་གྱི་རྒྱལ་པོ་འདིའི་ཆོ་ག་དགོད་པ་དང༌། ལྷའི་གནས་གཏན་ལ་དབབ་པ་དང་ཞེས་བྱ་བ་ལ་སོགས་པ་གསུངས་ཏེ། དེ་ལ་སྙིང་རྗེ་ཆེན་པོའི་སྙིང་པོ་འབྱུང་བ་ཞེས་པ་
ནི་ལུས་ཀྱི་འཁོར་ལོས་བྱིན་གྱིས་བརླབས་པའི་དཀྱིལ་འཁོར་འདི་དང༌། ངག་གི་དཀྱིལ་འཁོར་ལ་ཡང་མིང་དུ་གདགས་སོ། །དེ་ཅིའི་ཕྱིར་ཞེ་ན། དཀྱིལ་འཁོར་རྣམ་པ་གསུམ་ཀ་ཡང་སྙིང་རྗེ་ཆེན་པོའི་ནུས་པ་དང་རྒྱུས་དཀྱིལ་འཁོར་འབྱུང་བའི་ཕྱིར་དེ་སྐད་ཅེས་བྱའོ། །ལྷའི་གནས་གཏན་ལ་དབབ་པ་ཞེས་པ་ནི་དབུང་མཐའ་དང་མཆོག་དུ་བཀོད་པའི་ལྷ་བཞུགས་པའི་གནས་ངེས་པར་བྱའོ། །ཏིང་ངེ་འཛིན་རྣམ་པར་སྦྲུལ་པ་ཞེས་བྱ་བ་ནི་གང་ཏིང་ངེ་འཛིན་དུ་ཞུགས་ནས་སྲུང་བའི་རིག་པ་དང་སྔགས་ལ་སོགས་པའོ། །གསང་སྔགས་སྤྱོད་པ་ཞེས་པ་ནི་དཀྱིལ་འཁོར་དུ་འཇུག་པའི་ཚེ་ལས་སུ་སྤྱད་པ་རྣམས་སོ། །བསམ་པར་བྱ་བ་ནི་དཀྱིལ་འཁོར་དུ་འཇུག་པ་ན་སློབ་མས་བྱང་ཆུབ་སེམས་བསམ་པ་དང༌། སློབ་དཔོན་རང་གི་ཏིང་ངེ་འཛིན་དུ་གནས་པ་ལ་སོགས་པའི་བྱེ་བྲག་གསུངས་པའོ། །དེ་དག་སོ་སོའི་བཤད་པ་ནི་ཕྱིས་འཆད་པར་འགྱུར་རོ།། དེ་ལ་དཀྱིལ་འཁོར་གྱི་རྒྱལ་པོ་འདིའི་ཆོ་ག་དགོད་པ་ཞེས་དོན་བཤད་པའི་ཕྱིར། དེ་ལ་སློབ་དཔོན་གྱིས་ཐམས་ཅད་མཁྱེན་པ་ཉིད་ཀྱི་སྒོ་ཨ་ཞེས་བྱ་བ་ལ་གནས་ཏེ་ཞེས་པ་ནས། དེ་བཞིན་གཤེགས་པའི་གཟུགས་སྙིང་པོ་ཉིད་ཀྱི་རང་གི་ངོ་བོར་བྱིན་གྱིས་བརླབས་ལ་ཞེས་པའི་བར་དུ་གསུངས་ཏེ། དེ་ལ་དཀྱིལ་འཁོར་གྱི་ཐིག་བྲེ་བའི་ཚེ་དཀྱིལ་འཁོར་གྱི་སྣམ་བུ་རེ་རེ་ལ་ཡང་སློབ་དཔོན་ཀྱི་ཏིང་ངེ་འཛིན་རེ་རེ་གསུངས་ཏེ། ཕྱི་རོལ་གྱི་རིམ་པའི་དཀྱིལ་འཁོར་ལ་བྱང་ཆུབ་སེམས་དཔའ་འཇམ་དཔལ་ལ་སོགས་པ་ཕ་རོལ་ཏུ་ཕྱིན་པ་ལས་སྐྱེས་པ་རྣམས་བཞུགས་པས་ན་ཐིག་བྲི་བའི་སློབ་དཔོན་གྱི་ཏིང་ངེ་འཛིན་ཀྱང་ཐམས་ཅད་མཁྱེན་པའི་རྒྱུའི་གནས་ཀྱི་སྙིང་པོ་ཡི་གེ་ཨ་ལ་གནས་ཏེ་དཀྱིལ་འཁོར་གྱི་སྲད་བུ་བྲེས་ཤིག་ཅེས་གསུངས་པ་ཡིན་ནོ། །དེ་ལ་དང་པོ་ཐིག་བྲི་བའི་ཚེ་དང་པོར་ནམ་མཁའི་ཐིག་བྲི་བར་གསུངས་པ་ནི་སངས་རྒྱས་ཐམས་ཅད་ལ་ཕྱག་འཚལ་ནས་ཞེས་པ་ནས་བྱང་ཕྱོགས་སུ་ཁ་བལྟས་ནས་སྲད་དུ་བྲེས་ཏེ་ཞེས་པའི་བར་གྱིས་སོ། །དེ་ནས་སའི་དཀྱིལ་འཁོར་གྱི་ཐིག་བྲི་བའི་ཕྱིར། །ནུབ་ཕྱོགས་སུ་ཁ་བལྟས་ལ་བསྒྱུར་ཏེ་ཐིག་གདབ་པོ་ཞེས་གསུངས་པ་ཡིན་ནོ། །ལྷག་མ་རྣམས་འདིར་མ་གསུངས་པ་ནི་སྙིང་རྗེ་ཆེན་པོའི་དཀྱིལ་འཁོར་དུ་
ཐིག་བྲི་བ་ཞིབ་ཏུ་བཤད་ཟིན་པས་འདིར་ཡང་ལྷག་མ་རྣམས་དེ་དང་འདྲ་བར་ཤེས་པར་བྱའོ། །དེ་ནས་སྙིང་པོའི་དཀྱིལ་འཁོར་གྱི་ཐིག་བྲི་བའི་སློབ་དཔོན་གྱི་ཏིང་ངེ་འཛིན་བཤད་པའི་ཕྱིར། དེ་ནས་བདག་ཉིད་རྡོ་རྗེ་སེམས་དཔའ་ལག་ན་རྡོ་རྗེར་དེའི་ཕྱག་རྒྱའམ། ཡི་གེ་བ་ཞེས་བྱ་བས་བྱིན་གྱིས་བརླབས་ཏེ་ནང་དུ་ཞུགས་ལ་སྙིང་པོའི་དཀྱིལ་འཁོར་བྲི་བར་བྱའི་ཞེས་གསུངས་ཏེ། དེའི་སློབ་དཔོན་གྱི་ཏིང་ངེ་འཛིན་ནི་བྱང་ཆུབ་བའི་ས་བོན་ཡི་གེ་ཨས་བསྐྱེད་པའི་རྡོ་རྗེ་སེམས་དཔར་སློབ་དཔོན་བདག་ཉིད་བྱིན་གྱིས་བརླབ་པའོ། །རྡོ་རྗེ་སེམས་དཔའ་ལ་ཡང་ལས་ཀྱི་རྡོ་རྗེ་སེམས་དཔའ་ལ་སོགས་པ་བཞིན་དུ་འདྲེན་པ་ཡང་ཡོད་དེ། སྐབས་འདིར་ནི་གཞན་ལ་མི་བྱའི་རྡོ་རྗེ་སེམས་དཔའ་ཕྱག་ན་རྡོ་རྗེ་ལ་བྱའོ། །དེ་ནས་དཀྱིལ་འཁོར་བར་མའི་སྣམ་བུའི་ཐིག་བྲི་བའི་ཏིང་ངེ་འཛིན་བསྟན་པའི་ཕྱིར། །དེ་བཞིན་དུ་དཀྱིལ་འཁོར་གཉིས་པ་ལ་ཡང་ཞེས་པ་ནས། སྙིང་པོ་ཉིད་ཀྱི་རང་གི་ངོ་བོར་བྱིན་གྱིས་བརླབས་ལ་ཞེས་པའི་བར་དུ་གསུངས་ཏེ། དེ་ལ་དཀྱིལ་འཁོར་སྣམ་བུ་བར་མའི་ནང་ན་ལོངས་སྤྱོད་རྫོགས་པའི་སྐུ་དང་སྤྲུལ་བའི་སྐུ་གཉིས་བཞུགས་པས་དཀྱིལ་འཁོར་དེའི་ཐིག་བྲི་བའི་ཚེའང་སྐུ་དེ་གཉིས་ཀྱི་རྒྱུའི་ཏིང་ངེ་འཛིན་རྣམ་པ་བཞི་སློབ་དཔོན་བྱིན་གྱིས་བརླབས་ཏེ། སློབ་དཔོན་གྱིས་ཏིང་ངེ་འཛིན་དེ་རྣམས་དམིགས་ནས་བྱའོ་ཞེས་པའི་དོན་ཏོ། །དེ་ནས་གཟོད་མ་ནས་ཞི་བ་ནི་བྱང་ཆུབ་པའོ། །གཉིས་སུ་མེད་པའི་རྣལ་འབྱོར་གྱིས་གཟུགས་ནི་སྤྱོད་པའོ། །དེ་བཞིན་གཤེགས་པའི་གཟུགས་ནི་ཀུན་དུ་སངས་རྒྱས་པའོ། །སྙིང་པོ་ཉིད་ཀྱི་རང་གི་ངོ་བོ་ནི་མྱ་ངན་ལས་འདས་པའོ། །དེ་ནས་དེ་བཞིན་གཤེགས་པའི་གནས་པ་མངོན་དུ་བྱེད་ཅིང་ཞེས་པ་ནས། ལྷའི་གནས་བཤམ་པར་བྱའོ་ཞེས་པའི་བར་གྱིས་དེའི་རྒྱུད་ནས་བཤད་པ་གནས་གཏན་ལ་ཕབ་པ་ཡིན་ཏེ། ཕྱིས་ཀྱང་འཆད་དོ། །དེ་ལ་སྣམ་བུ་གཅིག་ལས་ཀྱང་གསུམ་དུ་བགོས་ཏེ། སུམ་ཆ་ལ་འཁོར་ས་བྱ་ཞིང་སུམ་གཉིས་ལ་ལྷའི་གཟུགས་བྱའོ་ཞེས་པའི་དོན་ཏོ། །དེ་བཞིན་གཤེགས་པའི་གནས་པ་མངོན་དུ་བྱེད་ཅིང་སྲད་དུ་བྲེས་ལ་ཞེས་པས་དེ་ལྟར་ལྷའི་གནས་དང་འཁོར་ས་དགོད་པ་གྱ་ཚོམ་དུ་མི་བྱ་བར་ཐིག་
བཏབ་སྟེ་བྱ་བས་དེ་ཉིད་ཀྱི་ཚེ་ན་ཡང་དེ་བཞིན་གཤེགས་པའི་སྤྱོད་པ་སྟོང་པ་ཉིད་ལ་དམིགས་པར་བྱའོ་ཞེས་པའི་དོན་ཏོ། །དེ་ནས་དཀྱིལ་འཁོར་གྱི་ཚོན་རྩི་རྣམས་བྱིན་གྱིས་བརླབ་པའི་ཆོ་ག་བསྟན་པའི་ཕྱིར། དེ་ནས་ཡང་བདག་ཉིད་བཅོམ་ལྡན་འདས་རྣམ་པར་སྣང་མཛད་དུ་དེའི་ཕྱག་རྒྱས་བྱིན་གྱིས་བརླབས་ལ་ཞེས་པ་ནས། བདུད་སྡེ་སྡང་བ་ཐམས་ཅད་ལ། །རྣམ་པ་ཀུན་དུ་བསྡིགས་པར་བྱེད། །ཅེས་པའི་བར་དུ་གསུངས་པ་ཡིན་ཏེ། དེ་ལ་བདག་ཉིད་བཅོམ་ལྡན་འདས་རྣམ་པར་སྣང་མཛད་དུ་དེའི་ཕྱག་རྒྱས་བྱིན་གྱིས་བརླབས་ལ་ཞེས་པ་ནི་ཚོན་རྣམས་བྱིན་གྱིས་རློབ་པའི་ཚེ་རྡོ་རྗེའི་ཕྱག་རྒྱས་སློབ་དཔོན་ཉིད་རྣམ་པར་སྣང་མཛད་ཀྱི་སྐུར་བྱིན་གྱིས་རློབས་ཤིག་ཅེས་པ་སྟེ། རྡོ་རྗེ་ནི་ཡེ་ཤེས་ཀྱི་མཚན་མ་ཡིན་པས་ན་ཡེ་ཤེས་ལྔས་བྱིན་གྱིས་བརླབས་པའི་དོན་ཏོ། །ཚོན་རྣམས་བྱིན་གྱིས་བརླབ་པ་ཡང་ཀུན་རྫོབ་དང་དོན་དམ་པ་རྣམ་པ་གཉིས་ཏེ། དེ་ལ་དོན་དམ་པར་བྱིན་གྱིས་བརླབ་པའི་ཕྱིར། ཆོས་ཀྱི་དབྱིངས་རྒྱ་ཆེན་པོར་བྱིན་གྱིས་བརླབས་ཏེ་ཞེས་གསུངས་པ་ཡིན་ཏེ། དེས་ནི་མཚོན་སྣ་ཚོགས་ཆོས་གྱི་དབྱིངས་རྒྱ་ཆེན་པོ་སྟོང་པ་ཉིད་དུ་བྱིན་གྱིས་བརླབ་བོ་ཞེས་བསྟན་ཏོ། །ཐོགས་མར་ཚོན་རྩི་དཀར་པོ་བླངས་ལ་ཞེས་པས་ནི་ཀུན་རྫོབ་ཀྱི་སྒོ་ནས་མཚོན་རེ་རེ་ཞིང་ཡང་ལྷ་རེ་རེས་བྱིན་གྱིས་བརླབ་པར་གསུངས་པ་ཡིན་ཏེ། དེ་ལ་ཚོན་དཀར་པོ་ནི་ཆོས་ཀྱི་དབྱིངས་ཀྱིས་བྱིན་གྱིས་བརླབ་པར་གསུངས་པ་ལ། ཆོས་ཀྱི་དབྱིངས་དེའི་རང་བཞིན་དང་མཐུ་བསྟན་པའི་ཕྱིར། འདི་ནི་ཆོས་དབྱིངས་དག་པ་སྟེ། སེམས་ཅན་ཁམས་ནི་རྣམ་སྤྱོང་བ། །འདི་ནི་བདག་ཉིད་དེ་བཞིན་གཤེགས། །ཉེས་པ་ཐམས་ཅད་རྣམ་པར་སྤངས། །ཞེས་གསུངས་པ་ཡིན་ནོ། །ཆོས་ཀྱི་དབྱིངས་ཀྱི་དོན་དེ་ལྟ་བུར་བསམས་ནས་དོན་དེ་ཡི་གེར་འབར་བ་ལ་སོགས་པའི་ཡོན་ཏན་བཤད་པ་དེ་ལྟ་བུས་བྱིན་གྱིས་བརླབ་པོ། །དེ་ནས་ཚོན་དམར་པོ་བྱིན་གྱིས་བརླབ་པའི་ཕྱིར། དེ་ནས་ཚོན་རྩི་གཉིས་པ་ནི། །ཞེས་བྱ་བ་ལ་སོགས་པ་གསུངས་ཏེ། ཡི་གེ་ཨའི་ས་བོན་གྱིས་བསྐྱེད་པའི་སངས་རྒྱས་ཐུབ་དཀས་བྱིན་གྱིས་བརླབ་པར་གསུངས་སོ། །དེ་ནས་ཚོན་སེར་པོ་ལ་ཡི་གེ་ཀའི་ས་བོན་གྱིས་བསྐྱེད་པའི། སངས་རྒྱས་གསེར་ཐུབ་ཀྱིས་བྱིན་གྱིས་བརླབ་
པའི་ཕྱིར། དེ་ནས་སྔགས་པས་ཚོན་གསུམ་པ། །ཞེས་པ་ལ་སོགས་པ་གསུངས་པ་ཡིན་ནོ། །ཚོན་ལྗང་གུ་ལ་སྙིང་པོ་བྱང་ཆུབ་ན་བཞུགས་པའི་སྐུས་ཕྱིན་གྱིས་བརླབ་པའི་ཕྱིར། དེ་ནས་མྲྒད་འདྲ་བ་ཡི། །ཞེས་པ་ལ་སོགས་པ་གསུངས་པ་ཡིན་ཏེ། ཚོན་ལྗང་གུའི་ཁ་དོག་ནི་ནོར་བུ་མྲྒད་ཀྱི་ཁ་དོག་ལྟ་བུའོ། །ཚོན་ནག་པོ་ཁམས་གསུམ་རྣམ་པར་རྒྱལ་བས་བྱིན་གྱིས་བརླབ་པའི་ཕྱིར། དེ་ནས་ཚོན་རྩི་ནག་པོ་སྟེ། ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་ལ་ཡི་གེ་ཧས་བསྐྱེད་པའི་ཁྲོ་བོའི་གཟུགས་དེ་ཡང་ཅི་འདྲ་ཞེ་ན། འབར་བའི་ཕྲེང་བ་རྣམ་པར་འཕྲོ། །དུས་མཐའི་མེ་ལྟར་མི་བཟད་པ། །ཞེས་པ་ལ་སོགས་པའོ། །དེ་ཡང་ཚོན་སྣ་ལྔ་རྣམས་ཡེ་ཤེས་ལྔའི་རང་བཞིན་དུ་བལྟ་སྟེ་དཀར་པོ་ནི་ཆོས་ཀྱི་དབྱིངས་ཀྱི་རང་བཞིན་ནོ། །དམར་པོ་ནི་སངས་རྒྱས་ཐུབ་དཀའི་རང་བཞིན་ཏེ་མེ་ལོང་ལྟ་བུའོ། །སེར་པོ་ནི་མཉམ་པ་ཉིད་ཀྱི་ཡེ་ཤེས་སོ། །ལྗང་གུ་ནི་སོ་སོར་ཀུན་དུ་རྟོག་པའི་ཡེ་ཤེས་སོ། །ནག་པོ་ནི་བྱ་བ་སྒྲུབ་པའི་ཡེ་ཤེས་སོ། །དེ་དག་གི་རིམ་པ་བཤད་པ་ནི་དང་པོར་ཆོས་ཀྱི་དབྱིངས་ཉིད་དུ་འཇུག་ལ། སྟོང་པ་འབའ་ཞིག་ཏུ་དམིགས་པར་ཡང་མི་རུང་སྟེ་སྙིང་རྗེ་ཆེན་པོའི་དབང་གིས་སེམས་ཅན་ལ་དམིགས་ཤིང་ཆགས་པ་བསྐྱེད་པའི་ཕྱིར་དེའི་འོག་ཏུ་ཚོན་དམར་པོ་དགྱེའོ། །སེམས་ཅན་གྱི་དོན་ལ་ཞུགས་པས་རྒྱས་པར་འགྱུར་ཏེ། དེ་བས་ན་དེའི་འོག་ཏུ་ཚོན་སེར་པོ་བྲིའོ། །རྒྱས་ཤིང་མཐུ་དང་ལྡན་པས་ན་ལས་ཐམས་ཅད་ནུས་པ་སྟེ། བདག་དང་གཞན་གྱི་དོན་ནུས་པས་དེའི་འོག་ཏུ་ཚོན་ལྗང་གུ་བྲིའོ། །འཇམ་པོས་འདུལ་བ་ལ་ཡང་འཇམ་པོར་སྟོན། མ་རུངས་པ་རྣམས་ལ་ཡང་ཁྲོ་བོར་སྟོན་ཏེ་ཐབས་གཞན་གྱིས་མཐུ་མ་རུངས་པ་རྣམས་ལ་ཐབས་གཞན་མེད་ན་མཐར་དྲག་ཤུལ་གྱིས་གདུལ་བའི་ཕྱིར། ཐ་མར་ནག་པོ་གཞག་སྟེ་ཁྲོ་བོ་ལ་སོགས་ཏིང་ངེ་འཛིན་རྣམ་པར་སྤྲུལ་པ་ཞེས་གོང་དུ་སྨོས་པ་དེ། དེ་ནས་བཅོམ་ལྡན་འདས་རྣམ་པར་སྣང་མཛད་དེའི་ཚེ་ཏིང་ངེ་འཛིན་དེ་ལས་བཞེངས་ནས་ཞེས་བྱ་བ་ལ་སོགས་པ་འདི་མན་ཆད་ཀྱིས་འཆད་དེ། ཏིང་ངེ་འཛིན་དེ་ལས་བཞེངས་ཞེས་པ་ནི་སྔར་ཏིང་ངེ་འཛིན་དུ་ཞུགས་པ་ལས་བཞེངས་ནས་རྒྱལ་བའི་ཏིང་ངེ་འཛིན་ལ་འཇུག་
པའོ། །མཐའ་ཡས་པས་རྣམ་པར་རྒྱལ་བ་ཞེས་པ་ནི་གྲངས་མེད་པའི་རྒོལ་བ་རྣམས་ཀྱིས་མི་ཚུགས་པས་ན་གྲངས་མེད་པ་ལས་རྒྱལ་བ་ཞེས་པའི་དོན་ཏོ། །ཐམས་ཅད་དུ་ཐོགས་པ་མེད་པའི་སྟོབས་ཞེས་བྱ་བའི་རིག་སྔགས་ཀྱི་རྒྱལ་མོ་དེ་བཞིན་གཤེགས་པ་ཐམས་ཅད་ཀྱི་ཡུལ་ལས་འབྱུང་བ་འདི་འབྱུང་ངོ་ཞེས་པ་དེ་ལ་ཐམས་ཅད་དུ་ཐོགས་པ་མེད་པའི་སྟོབས་ཞེས་པ་ནི་ཀུན་རྫོབ་དང་དོན་དམ་པར་ཏེ། ཉོན་མོངས་པ་དང་ལྷའི་བུའི་བདུད་ལ་སོགས་པས་མི་ཚུགས་ཞེས་པའི་དོན་ཏོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྦྲུལ་པ་བྱིན་གྱིས་རློབ་པ་ལས། ཡི་གེའི་འཁོར་ལོ་རིམ་པར་ཕྱེ་བ་རྒྱས་པའོ།། །།ད་ནི་ཕྱག་རྒྱའི་ལེའུ་བཤད་པར་བྱ་སྟེ། ཕྱག་རྒྱ་རྣམས་བཤད་པ་ཡང་སྤྱིར་འདུལ་བའི་འགྲོ་བ་ཟབ་ཅིང་རྒྱ་ཆེ་བ་རྣམས་མོས་པ་དང་དམིགས་པ་དེ་རྣམ་པ་གཉིས་སོ། །དེ་ལ་ཟབ་ཅིང་རྒྱ་ཆེ་བ་ལ་མོས་པའི་དོན་ཏོ། །འགྲོ་བ་ནི་སྔགས་ཀྱི་ཚིག་རྣམས་བཤད་པས་སྔགས་ཚིག་དེ་བདག་གི་སྒྲའི་དེ་ཁོན་ཉིད་ལ་དམིགས་ཤིང་བྱང་ཆུབ་ཀྱི་སེམས་ཀྱི་བསྒོམ་པ་སྔོན་དུ་འགྲོ་བའི་ལྷའི་གཟུགས་སུ་སྦྱོར་ཏེ་ལྷའི་གཟུགས་སྦྱོར་བ་དེ་ཡང་ཏིང་ངེ་འཛིན་དག་པ་དང༌། རྣམ་པར་རྟོག་པ་གཞན་སྤངས་པ་དང༌། ལྷའི་གཟུགས་སུ་སྣང་བ་རྫོགས་པར་སྦྱོར་རོ། །དམིགས་པ་ཅན་གྱིས་གདུལ་བའི་འགྲོ་བ་ནི་སྔགས་ཀྱི་སྒྲའི་དེ་ཁོ་ན་ཉིད་ལ་དམིགས་པ་ལ་སོགས་པ་དེ་དག་མི་ནུས་ཏེ་ཕྱག་རྒྱ་ཙམ་བཅིངས་ནས་ལྷའི་གཟུགས་སུ་སྦྱོར་བར་བྱེད་པས་ན་དམིགས་པ་ཅན་གྱིས་གདུལ་བའི་འགྲོ་བ་དེ་དག་གི་ཕྱིར་བཅོམ་ལྡན་འདས་ཀྱི་རྒྱུ་དང་འབྲས་བུའི་ཡོན་ཏན་རྣམས་ཕྱག་རྒྱའི་གཟུགས་སུ་བྱིན་གྱིས་བརློབ་བོ། །དེ་ལ་རལ་གྲི་དང་རྡོ་རྗེ་ལ་སོགས་པའི་ཕྱག་རྒྱ་ནི་ཡིད་ཀྱི་ཡོན་ཏན་ནོ། །དུང་གི་ཕྱག་རྒྱ་ལ་སོགས་པའི་ཕྱག་རྒྱ་ནི་གསུང་གི་ཡོན་ཏན་ནོ། །གཙུག་ཏོར་གྱི་ཕྱག་རྒྱ་ལ་སོགས་པའི་ཕྱག་རྒྱ་ནི་སྐུའི་ཡོན་ཏན་ནོ། །ཇི་ལྟར་རིགས་པར་སྦྱར་བར་བྱའོ། །ཕྱག་རྒྱའི་ལེའུ་བཤད་པ་དེ་ཡང༌། དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་འཁོར་འདུས་པ་ལ་གཟིགས་ནས། བྱང་ཆུབ་སེམས་དཔའ་གསང་བའི་བདག་པོ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་བའི་
བདག་པོ་དེ་བཞིན་གཤེགས་པ་རྣམས་ལ་དེ་བཞིན་གཤེགས་པ་རྒྱན་དུ་གྱུར་པ། ཆོས་ཀྱི་དབྱིངས་རྟོགས་པའི་མཚན་མར་གྱུར་པའི་ཕྱག་རྒྱ་རིམ་པར་ཕྱེ་བ་རྒྱས་པ་ཞེས་བྱ་བ་ལ་སོགས་པ་སྟེ། དེ་ལ་དེ་བཞིན་གཤེགས་པའི་རྒྱན་དུ་གྱུར་པ་ཞེས་པའི་གཙུག་ཏོར་དང༌། སྤྱན་གྱི་ཕྱག་རྒྱ་ལ་སོགས་པ་སྐུའི་རྒྱུན་དུ་གྱུར་པའི་ཕྱིར་རོ། །ཆོས་ཀྱི་དབྱིངས་རྟོགས་པའི་མཚན་མར་གྱུར་པ་ཞེས་པ་ནི་དེ་བཞིན་ཉིད་ཀྱི་ཡེ་ཤེས་ཏེ་དེ་རྟོགས་ཤིང་ཆུད་པར་བྱེད་པའི་མཚན་མར་རལ་གྲི་དང་རྡོ་རྗེ་ལ་སོགས་པའི་ཕྱག་རྒྱའོ། །གང་གིས་བརྒྱན་ན་བྱང་ཆུབ་སེམས་དཔའ་རྣམས་ཞེས་པ་ནས། དེ་རྣམས་ཀྱང་དེ་དག་གི་ངག་ཉན་པར་འགྱུར་ཞེས་པའི་བར་གྱིས་ནི་ཕྱག་རྒྱ་དེ་རྣམས་བསྟན་པའི་དགོས་པ་བཤད་པ་སྟེ། བྱང་ཆུབ་སེམས་དཔའ་གང་དག་ཕྱག་རྒྱ་དེ་རྣམས་དང་ལྡན་ན། དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཆེན་པོའི་མཚན་མས་བཏབ་པས་དེ་དག་ལ་ལྷ་དང་མི་དང་ལྷ་མ་ཡིན་ལ་སོགས་པ་རྣམས་ཀྱིས་བརྫི་བར་མི་འགྱུར་ཞིང་ལྷ་དང་ལྷ་མ་ཡིན་ལ་སོགས་པ་དེ་རྣམས་ཀྱང་བྱང་ཆུབ་སེམས་དཔའ་དེ་དག་གི་ངག་ཉན་པར་འགྱུར་རོ། །ཇི་ལྟར་འཇིག་རྟེན་ན་རྒྱལ་བའི་ཕྱག་རྒྱ་འཆང་བའི་སྐྱེས་བུ་དེ་ལ་འཇིག་རྟེན་པའི་མི་རྣམས་ཀྱང་བརྫི་བར་མི་བྱེད་ལ། འཇིག་རྟེན་པ་རྣམས་དེའི་ངག་ཀྱང་ཉན་པར་འགྱུར་བ་དང་འདྲ་སྟེ། མདོར་ན་ཕྱག་རྒྱ་འདི་རྣམས་བཤད་པས་གདུལ་བའི་འགྲོ་བ་རྣམས་ལ་མཐོང་བའི་ཆོས་དང༌། ཚེ་ཕྱི་མ་ལ་ཕན་པར་འགྱུར་བར་བསྟན་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་སྟོབས་ཐོགས་པ་མེད་པར་གནས་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་པ་ནི་འོག་ནས་བྱུང་བའི་ཕྱག་རྒྱ་དེ་དག་ཉིད་སྟོབས་ཐོགས་པ་མེད་པའི་གནས་ཞེས་བྱ་སྟེ། བཅོམ་ལྡན་འདས་ཏིང་ངེ་འཛིན་དེ་ལ་སྙོམས་པར་ཞུགས་ནས་ཕྱག་རྒྱ་དེ་དག་འཆད་པ་ན་ཏིང་ངེ་འཛིན་དེའི་མིང་སྟོབས་ཐོགས་པ་མེད་པའི་གནས་བྱིན་གྱིས་རློབ་པ་ཞེས་བྱ་བའོ། །དེ་ལ་ཐོགས་པ་མེད་པ་ཞེས་བྱ་བ་ནི་བཅོམ་ལྡན་འདས་ཀྱི་སྐུ་མི་ཟད་པ་ལ་སོགས་པའི་རྡོ་རྗེའི་རྒྱན་དེ་དག་ཅི་ལ་ཡང་ཐོགས་པ་མེད་པའོ། །སྟོབས་ཞེས་པ་ནི་དེ་ལྟར་ཐོགས་པ་མེད་པ་
ཉིད་སྟོབས་སུ་གྱུར་པའོ། །གནས་ཞེས་པ་ནི་བཅོམ་ལྡན་འདས་ཀྱི་སྐུ་ལ་བྱ་ལ། བྱིན་གྱིས་རློབ་པ་ཞེས་པ་ནི་བཅོམ་ལྡན་འདས་ཀྱི་སྐུ་མི་ཟད་པ་ལ་སོགས་པ་རྡོ་རྗེ་ཐོགས་པ་མེད་པའི་སྟོབས་སུ་གྱུར་པ་དེ་ཉིད་ཕྱག་རྒྱའི་ངོ་བོ་བྱིན་གྱིས་རློབ་པའོ། །བཅོམ་ལྡན་འདས་ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ་རིག་སྔགས་ཀྱི་རྒྱལ་མོ་ཐམས་ཅད་དུ་ཐོགས་པ་མེད་པའི་སྟོབས་ཅན། མི་མཉམ་པ་དང་མཉམ་པའི་སྟོབས་ཅན། དམ་ཚིག་ལ་འཇུག་པར་བྱེད་པ་སྟོབས་གསུམ་དང་ལྡན་པ་བྱུང་ངོ་ཞེས་པ་ལ་སོགས་པ་མེད་པའི་སྟོབས་ཅན་ཞེས་པ་ནི་གོང་མ་བཞིན་ནོ། །མི་མཉམ་པ་དང་མཉམ་པའི་སྟོབས་ཞེས་པ་ནི་ཐོགས་པ་མེད་པའི་སྟོབས་དེ་ཉིད་གང་དང་གང་མི་མཉམ་པའོ། །དམ་ཚིག་ལ་འཇུག་པར་བྱེད་པ་ཞེས་པ་ནི། དམ་ཚིག་གི་དོན་ནི་སྔར་བཤད་ཟིན་ལ། དམ་ཚིག་ལ་འཇུག་པ་ནི་སྐུ་མི་ཟད་པ་ལ་སོགས་པའི་རང་བཞིན་གྱི་དཀྱིལ་འཁོར་འོག་མའི་འགྲོ་བ་རྣམས་ཀྱི་ལྟ་བའི་སྤྱོད་ཡུལ་དུ་མི་འགྱུར་བས་དེའི་བྱིན་རླབས་སུ་གྱུར་པ་དམ་ཚིག་གི་ཕྱག་རྒྱ་དང་སྔགས་འདི་བཅིངས་ཤིང་བརྗོད་པ་ན་རང་བཞིན་དཀྱིལ་འཁོར་དེ་མཐོང་བ་དང་འདྲ་བས་ན་འཇུག་པ་ཞེས་བྱའོ། །གཉིས་སུ་ན་སྲུང་བའི་དམ་ཚིག་རྣམས་ལས་ཉམས་པས་དམ་ཚིག་གི་ཕྱག་རྒྱ་དང་སྔགས་འདི་བྱས་ན་དཀྱིལ་འཁོར་མཐོང་བ་དང་འདྲ་སྟེ། དེ་བྱས་པ་ཙམ་གྱིས་དམ་ཚིག་ལས་ཉམས་ངེས་སོ། །སླར་དམ་ཚིག་ཏུ་ཞུགས་པར་འགྱུར་བས་ན་དམ་ཚིག་ལ་འཇུག་པར་བྱེད་པ་ཞེས་བྱའོ། །གསུམ་དུ་ན་དཀྱིལ་འཁོར་དུ་འཇུག་པའི་ཚེ་དམ་ཚིག་གི་ཕྱག་རྒྱ་དང་སྔགས་འདི་བྱས་ཏེ་འཇུག་པས་ན་དམ་ཚིག་ལ་འཇུག་པ་ཞེས་བྱའོ། །གསང་བ་པའི་བདག་པོ་རིག་སྔགས་ཀྱི་རྒྱལ་མོ་འདི་ནི་དེ་བཞིན་གཤེགས་པ་ཐམས་ཅད་ཀྱིས་ཡང་དག་པར་སྟོན་པར་བྱེད་པ་ཞེས་པ་ནི་རིག་པ་ནི་བརྗོད་པས་སངས་རྒྱས་ཐམས་ཅད་ཀྱི་གནས་རང་བཞིན་གྱི་དཀྱིལ་འཁོར་མཐོང་བ་དང་འདྲ་བས་ན་སངས་རྒྱས་ཐམས་ཅད་ཀྱི་ཡང་དག་པར་སྟོན་པར་བྱེད་པ་ཞེས་བྱའོ། །གཉིས་སུ་ན་གཟུགས་བརྙན་གྱི་དཀྱིལ་འཁོར་བྲིས་པ་ཡང་རིག་པ་འདི་བརྗོད་ནས་སྟོན་པའམ་རིག་པ་འདི་བརྗོད་ནས་སངས་རྒྱས་ཐམས་ཅད་ཀྱི་དཀྱིལ་འཁོར་དེ་མཐོང་བར་འགྱུར་
བས་ན་སངས་རྒྱས་ཀྱི་ས་དང་ཡང་དག་པར་སྟོན་པར་བྱེད་པ་ཞེས་བྱའོ། །ཆོས་གསུམ་གྱི་ལམ་གྱི་མཚམས་ལས་མི་འདའ་བར་བྱེད་པ་ཞེས་པ་ལ་ཆོས་གསུམ་ནི་དེ་བཞིན་གཤེགས་པའི་སྐུ་དང་གསུང་དང་རྡོ་རྗེའི་ཡིད་མི་ཟད་པའི་རྒྱན་ནམ་སྐུ་གསུམ་སྟེ་དེའི་ལམ་ནི་དམ་ཚིག་སྲུང་བའི་བྱ་བ་ལ་སོགས་པ་སྟེ་ལམ་དེ་ལས་མི་འདའ་བའོ། །ས་དང་ཕ་རོལ་ཏུ་ཕྱིན་བ་ཡོངས་སུ་རྫོགས་པར་བྱེད་པ་ཡིན་ཏེ་ཞེས་པ་ནི་དམ་ཚིག་དེར་ཞུགས་ནས་བཅོམ་ལྡན་འདས་ལ་མཆོད་པ་ལ་སོགས་པ་སྦྱིན་པའི་ཕ་རོལ་ཏུ་ཕྱིན་པ་ལ་སོགས་རིམ་གྱིས་རྫོགས་པར་བྱེད་པ་དང༌། དེའི་མཐུས་ས་ལ་རིམ་གྱིས་འཕར་བར་འགྱུར་བས་ན་ས་དང་པོ་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་པའོ། །སངས་རྒྱས་ཀུན་གྱི་དམ་ཚིག་ནི། །ཕྱག་རྒྱ་འདི་ལ་རབ་ཏུ་གནས། །ཞེས་པ་ནི་དམ་ཚིག་གི་དོན་དམ་ཚིག་སྲུང་བ་ལས་མི་འདའ་བའམ། སྐུ་མི་ཟད་པ་ལ་སོགས་པ་རྟོག་པར་བྱེད་པའམ། སྐུ་དེ་དག་ཡོངས་སུ་ཐོབ་པར་བྱེད་པ་དེ་དག་ཕྱག་རྒྱ་འདིའི་སྒོ་ནས་མཚོན་ཅིང་རྟོག་པར་བྱེད་པས་ན། ཕྱག་རྒྱ་འདི་ལ་རབ་ཏུ་གནས། །ཞེས་བྱའོ། །རྒྱ་འདི་ཕྱག་རྒྱ་ཆེན་པོ་སྟེ། །ཆོས་དབྱིངས་རྣམ་པར་སྦྱོང་བའོ། །ཞེས་པ་ནི་ཆོས་ཀྱི་དབྱིངས་སྟོང་པ་ཉིད་ཕྱག་རྒྱ་འདིས་མཚོན་ཅིང་རྟོག་པར་འགྱུར་བས་ཆོས་ཀྱི་དབྱིངས་སྦྱོང་བ་ཞེས་བྱའོ། །ཕྱག་རྒྱ་དཔལ་དང་ལྡན་པ་ནི། །ཆོས་ཀྱི་འཁོར་ལོ་ཞེས་སུ་གྲགས། །འཇིག་རྟེན་མགོན་པོ་སྐྱོབ་རྣམས་ཀྱིས། །འཁོར་ལོ་རབ་ཏུ་འདིས་བསྐོར་རོ། །ཆོས་ཀྱི་དབྱིངས་སུ་བྱིན་བརླབས་ནས། །ཆོས་ཀྱི་འཁོར་ལོ་བསྐོར་བའི་ཕྱིར། །རྡོ་རྗེ་སེམས་དཔར་བྱིན་བརླབས་ཏེ། །དཔལ་དང་ལྡན་པ་ཞེས་པ་ནི། །རྡོ་རྗེ་སེམས་དཔའ་ཉིད་ལ་དཔལ་རྡོ་རྗེ་སེམས་དཔའ་དེ་ལུང་གི་ཆོས་དང་རྟོགས་པའི་ཆོས་རྣམས་ཀྱི་འཁོར་ལོ་བསྐོར་བ་ཡིན་ལ། ཕྱག་རྒྱ་རྡོ་རྗེ་སེམས་དཔར་བསྒྱུར་ན་བྱང་ཆུབ་སེམས་དཔའ་འཇིག་རྟེན་གྱི་མགོན་པོ་རྣམས་ཀྱང་ཆོས་ཀྱི་འཁོར་ལོ་བསྐོར་བར་བྱེད་དོ་ཞེས་པའོ། །སངས་རྒྱས་སྐྱོབ་པ་ཐམས་ཅད་ཀྱི། །ཕྱག་རྒྱ་ཆེན་པོ་རལ་གྲིའི་རྒྱ། །འདིས་ནི་ལྷན་ཅིག་སྐྱེས་པ་ཡི། །འཇིག་ཚོགས་ལྟ་བ་གཅོད་པར་བྱེད། །ཅེས་པ་ནི་རལ་
གྲིའི་ཕྱག་རྒྱ་ནི་ཆོས་དང་གང་ཟག་ལ་བདག་མེད་པར་རྟོག་པའི་ཡེ་ཤེས་ཀྱི་མཚན་མར་གྱུར་པ་སྟེ། ཡེ་ཤེས་འདིས་ནི་ལྷན་ཅིག་སྐྱེས་པའི་བདག་ཏུ་ལྟ་བ་རྣམས་གཅོད་དོ་ཞེས་པའོ། །ཕྱག་རྒྱ་དཔལ་དང་ལྡན་པ་འདི། །ཆོས་ཀྱི་དུང་ཞེས་རྣམ་པར་བསྒྲགས། །འདི་ནི་འཇིག་རྟེན་འདི་དག་ན། །སངས་རྒྱས་བྱང་ཆུབ་སེམས་དཔའ་རྣམས། །ཞི་བ་མྱ་ངན་འདས་འགྲོ་བ། །རྡུལ་དང་བྲལ་བའི་ཆོས་འཆད་དོ། །ཞེས་པ་ནི་དུང་གི་ཕྱག་རྒྱ་སྟེ་སངས་རྒྱས་ཀྱི་གསུང་གི་མཚན་མར་གྱུར་པ་སྟེ། སངས་རྒྱས་དང་བྱང་ཆུབ་སེམས་དཔའ་རྣམས་སངས་རྒྱས་ཀྱི་གསུང་འདིས་རྡུལ་དང་བྲལ་བའི་ཆོས་རྣམས་མྱ་ངན་ལས་འདས་པ་ཞི་བ་ཐོབ་པར་བྱེད་པ་འཆད་དོ་ཞེས་པའོ། །པདྨ་དམ་པ་དཔལ་ལྡན་འདི། །སངས་རྒྱས་སྐྱོབ་པ་ཐམས་ཅད་ཀྱི། །མི་ཤིགས་རྡོ་རྗེའི་གདན་ཡིན་ཏེ། །དེར་ནི་འདྲེན་པ་འཚང་རྒྱ་ཞིང༌། །རྒྱལ་བ་སྲས་བཅས་ཐམས་ཅད་ནི། །འདི་ལས་སྐྱེ་དང་བྱང་ཆུབ་འགྱུར། །ཞེས་པ་ནི་པདྨའི་ཕྱག་རྒྱ་དེ། སངས་རྒྱས་རྣམས་ཀྱི་གདན་ཡིན་ཏེ། །མགོན་པོ་སངས་རྒྱས་རྣམས་གང་དུ་བྱང་ཆུབ་པ་ན་ཡང་གདན་འདི་ལ་བཞུགས་ཏེ་བྱང་ཆུབ་ལ། སངས་རྒྱས་ཀྱི་སྲས་བྱང་ཆུབ་སེམས་དཔའ་རྣམས་ཀྱང་པདྨོ་འདི་ལས་སྐྱེས་ཞེས་པའོ། །ཕྱག་རྒྱ་ཆེན་པོ་རྡོ་རྗེའི་རྒྱ། །མི་ཤེས་གྲོང་ཁྱེར་འཇིག་པ་སྟེ། །སངས་རྒྱས་རྣམས་ཀྱི་ཡེ་ཤེས་འདི། །ཉིད་ཀྱིས་བྱིན་གྱིས་བརླབས་ཏེ་བསྟན། །ཞེས་པ་ནི་བཅོམ་ལྡན་འདས་ཀྱི་དེ་མ་ཐག་པའི་ལམ་གྱི་ཡེ་ཤེས་དེ་རྡོ་རྗེའི་ཕྱག་རྒྱར་བྱིན་གྱིས་བརླབས་པ་སྟེ། མི་ཤེས་པའི་གྲོང་ཁྱེར་འཇིག་པ་ནི་ཡེ་ཤེས་དེས་སེམས་ལས་བྱུང་བའི་འཁོར་དང་བཅས་པའི་མ་རིག་པ་རྣམས་འཇོམས་ཞེས་པའོ། །གཙུག་ཏོར་ཕྱག་རྒྱ་ཆེན་པོ་སྟེ། །གཙུག་ཏོར་ཞེས་ནི་བསྒྲགས་པ་ཡིན། །འདི་ནི་བཅིངས་པ་ཙམ་གྱིས་ཀྱང༌། །རྒྱལ་བ་མཆོག་ཏུ་འགྱུར་བ་ཡིན། །ཞེས་པ་ནི་བཅོམ་ལྡན་འདས་ཀྱི་སྐྱེས་བུ་ཆེན་པོའི་མཚན་གཙུག་ཏོར་དེ་ཕྱག་རྒྱར་བྱིན་གྱིས་བརླབས་པ་སྟེ། འདི་ནི་བཅིངས་པ་ཙམ་གྱིས་ཀྱང༌། །རྒྱལ་བ་མཆོག་ཏུ་འགྱུར་བ་ཡིན། །ཞེས་པ་ནི་ཕྱག་རྒྱ་ལ་ནི་མང་པོ་བསྡུས་པ་ལས་ལྷའི་གཟུགས་སུ་འགྱུར་ལ་གཅིག་པུས་ལྷའི་གཟུགས་སུ་གྱུར་པ་ནི་གཙུག་ཏོར་གྱི་ཕྱག་རྒྱ་སྟེ་འདི་གཅིག་པུས་
བཅིངས་པས་ཀྱང་སངས་རྒྱས་ཀྱི་སྐུར་བསྒྱུར་དུ་རུང་ཞེས་པའོ། །རྒྱལ་བ་དམ་པས་ཕྱག་རྒྱ་འདི། །མཛོད་སྤུ་ཞེས་ནི་རབ་ཏུ་བསྒྲགས། །འདི་ནི་བཅིངས་པ་ཙམ་གྱིས་སུ། །རྒྱལ་བ་མཆོག་ཏུ་འགྱུར་བ་ཡིན། །ཞེས་པ་བཅོམ་ལྡན་འདས་ཀྱི་སྐྱེས་བུ་ཆེན་པོའི་མཚན་སྨིན་མཚམས་ནས་མཛོད་སྤུ་ཞེས་བྱ་བ་སྤུའི་ཉག་མ་གཅིག་གིས་བརྐྱང་ན་ནི་ཁམས་གསུམ་ཐམས་ཅད་དུ་ཡང་ཁྱབ་པར་འགྱུར་ལ་བསྐྱིལ་ན་དེ་ཉིད་དུ་ཟད་པ་དེ་ཕྱག་རྒྱ་འདིར་བྱིན་གྱིས་བརླབས་པ་སྟེ། འདི་འབའ་ཞིག་བཅིངས་པས་ཀྱང་སངས་རྒྱས་ཀྱི་སྐུར་བསྒྱུར་དུ་རུང་ཞེས་པའོ། །ལྷུང་བཟེད་ཀྱི་ཕྱག་རྒྱ་ནི་ཚིགས་སུ་བཅད་པ་ཉིད་ཀྱིས་གསལ་བར་གསུངས་སོ། །སེམས་ཅན་ཀུན་ལ་མི་འཇིགས་པ། །དེ་ཡིས་རབ་ཏུ་སྦྱིན་པར་འགྱུར། །གང་གི་རྒྱ་ཆེན་དེ་བཅིངས་ན། །མི་འཇིགས་ཕྱག་རྒྱ་ཞེས་བསྒྲགས་སོ། །ཞེས་པ་ནི་མི་འཇིགས་པ་སྦྱིན་པའི་ཕྱག་རྒྱ་སྟེ། བདག་གམ་སེམས་ཅན་རྣམས་བགེགས་ལ་སོགས་པས་སྐྲག་ཅིང་འཇིགས་པར་གྱུར་ན་ཕྱག་རྒྱ་བཅིངས་ཏེ་བསྟན་པས་དེ་ལས་ཐར་བར་འགྱུར་ཞེས་པའོ། །འདི་ནི་དམ་པ་བྱིན་རྒྱ་ཞེས། །འཇིག་རྟེན་མགོན་པོ་རྣམས་ཀྱི་སྒྲ། །འདི་ནི་བཅིངས་པ་ཙམ་གྱིས་སུ། །རྒྱལ་མཆོག་དམ་པ་སྩོལ་བར་བྱེད། །ཅེས་པ་ནི་བཅོམ་ལྡན་འདས་ཀྱིས་སེམས་ཅན་རྣམས་ལ་མཆོག་སྦྱིན་པའི་ཕྱག་རྒྱ་སྟེ་ནམ་གྲུབ་པ་ལ་སོགས་པའི་མཆོག་འདོད་ན་མཆོག་སྦྱིན་པའི་ཕྱག་རྒྱ་འདི་བཅིངས་ནས་མནོད་དོ། །ཕྱག་རྒྱ་ཆེན་པོ་རྒྱ་ཆེན་འདིས། །སངས་རྒྱས་སྐྱོབ་པ་ཐམས་ཅད་ཀྱིས། །བདུད་ནི་རྣམ་པར་བསྡིགས་ཞེས་བྱ། །ཕུང་བྱེད་ཐམས་ཅད་འཇིགས་པར་བྱེད། །འདི་ནི་བཅིངས་པ་ཙམ་གྱིས་སུ། །བདུད་སྡེ་ཤིན་ཏུ་མི་བཟད་དང༌། །གེགས་དང་ལོག་འདྲེན་གཞན་དག་ཀྱང༌། །ཐེ་ཚོམ་མེད་པར་རབ་ཏུ་འབྱེར། །ཞེས་པ་ནི་གེགས་རྣམ་པར་བསྐྲད་པའི་ཕྱག་རྒྱ་སྟེ་བཅིངས་པ་ཙམ་གྱིས་གེགས་ལ་སོགས་པ་ཐམས་ཅད་རྣམ་པར་སྐྲག་ནས་སོ་སོར་འབྱེར་བར་འགྱུར་ཏེ། དེ་ལྟར་གེགས་རྣམས་སོ་སོར་བྱེར་ན་གེགས་མེད་པས་ཇི་ལྟར་བསམས་པའི་དོན་གྲུབ་པར་འགྱུར་བས་ན་རེ་བ་ཐམས་ཅད་ཡོངས་སུ་རྫོགས་པར་བྱེད་པའོ། །འདི་ནི་སངས་རྒྱས་མགོན་རྣམས་གྱི། །ཐུགས་རྗེ་ལས་བྱུང་སྤྱན་ཡིན་ཏེ།།
མིག་གི་སྟེང་དུ་མཁས་པས་བཞག །དེ་ལས་སངས་རྒྱས་སྤྱན་དུ་འགྱུར། །ཞེས་པ་སངས་རྒྱས་བཅོམ་ལྡན་འདས་ཀྱི་སྙིང་རྗེ་ཆེན་པོའི་དབང་གིས་ཤེས་རབ་ཀྱི་སྤྱན་སེམས་ཅན་ཐམས་ཅད་ལ་གཟིགས་པ་ནི་སྙིང་རྗེ་ལས་བྱུང་བའི་སྤྱན་ཞེས་བྱ་སྟེ། སྤྱན་དེ་ཕྱག་རྒྱ་འདིར་བྱིན་གྱིས་བརླབས་བས་ན་ཕྱག་རྒྱ་འདི་བཅིངས་ཏེ་མིག་ཏུ་གཞག་ན་བདག་སངས་རྒྱས་ཀྱི་སྐུར་བསྒྱུར་བའི་ཚེ་སངས་རྒྱས་ཀྱི་སྤྱན་དུ་འགྱུར་རོ། །འདི་ནི་ཞགས་པ་མཆོག་ཅེས་གྲགས། །སྡང་བ་ཐམས་ཅད་འཇིག་པར་བྱེད། །སྔགས་པས་འདི་བཅིངས་དེ་ཡི་ཚེ། །རྟག་ཏུ་སྡང་བ་བཅིངས་པར་འགྱུར། །ཞེས་པ་ནི་འཕགས་པའི་ལམ་གྱི་ཡན་ལག་བརྒྱད་ཀྱི་རང་བཞིན་གྱི་ཡེ་ཤེས་སེམས་ཅན་ཐམས་ཅད་འདོན་པར་བྱེད་པ་ཞགས་པའི་ཕྱག་རྒྱར་བྱིན་གྱིས་བརླབས་ཏེ། ཞགས་པའི་ཕྱག་རྒྱ་འདི་བཅིང་པས་བགེགས་ལ་སོགས་པའི་གནོད་པ་རྣམས་འཆིང་བའི་ལས་བྱེད་དོ་ཞེས་པའོ། །སངས་རྒྱས་སྐྱོབ་པ་ཐམས་ཅད་ཀྱི། །ལྕགས་ཀྱུ་ཞེས་ནི་འདི་བཤད་དེ། །བྱང་ཆུབ་སེམས་དཔའ་བདག་ཉིད་ཆེ། །ས་བཅུ་དག་ལ་གནས་པ་དང༌། །སྡང་བར་སེམས་པ་གཞན་དག་ཀྱང༌། །སངས་རྒྱས་རབ་ཏུ་འགུགས་པར་བྱེད། །ཅེས་པ་ནི་དེ་བཞིན་གཤེགས་པའི་རྒྱུ་དང་འབྲས་བུའི་སྤྱོད་པ་རྣམས་ལས་རྒྱུའི་ཚེ་ན་བསྡུ་བ་རྣམ་པ་བཞིས་སེམས་ཅན་རྣམས་སྡུད་ཅིང་འདྲེན་པ་དང༌། འབྲས་བུའི་ཚེ་སྐུ་མི་ཟད་པ་ལ་སོགས་པའི་རྡོ་རྗེའི་རྒྱན་གྱིས་སེམས་ཅན་རྣམས་སྡུད་ཅིང་འདྲེན་པའི་སྤྱོད་པ་དེ་དག་ཉིད་ལྕགས་ཀྱུས་ཕྱག་རྒྱར་བྱིན་གྱིས་བརླབས་པ་སྟེ། ལྕགས་ཀྱུས་ཀྱང་བགེགས་ལ་སོགས་པ་གནོད་པར་བྱེད་པ་རྣམས་དང་བྱང་ཆུབ་སེམས་དཔའ་ས་བཅུ་ལ་གནས་པ་ཡང་སྟེ་ཐམས་ཅད་འདྲེན་པར་བྱེད་དེ་བྱང་ཆུབ་སེམས་དཔའ་ས་བཅུ་ལ་གནས་པ་ཡང་འགུགས་ན་གཞན་ལྟ་སྨོས་ཀྱང་ཅི་དགོས་ཞེས་པའོ། །དེ་བཞིན་གཤེགས་པའི་ལྟེ་བའི་ཕྱག་རྒྱ་ལ་ཕྱག་རྒྱ་དེ་ཉིད་ལས་ཞེས་པ་ནི་ལྕགས་ཀྱུའི་ཕྱག་རྒྱལ་སྙེགས་ཏེ་ལྕགས་ཀྱུའི་ཕྱག་རྒྱ་ལས་སྲིན་ལག་གཉིས་བསྒྲེང་པར་ཤེས་པར་བྱའོ། །དེ་བཞིན་གཤེགས་པའི་རྡོ་རྗེའི་ཕྱག་རྒྱ་ནི་མངོན་པར་བྱང་ཆུབ་པ་དང་སྦྱར་རོ། །ལྕགས་ཀྱུའི་ཕྱག་རྒྱ་ནི་སྤྱོད་པ་དང་སྦྱར་རོ། །དེ་བཞིན་གཤེགས་པའི་ཐུགས་ཀྱི་ཕྱག་རྒྱ་དང་སྟོབས་བཅུའི་ཕྱག་
རྒྱ་ནི་ཀུན་དུ་སངས་རྒྱས་པ་དང་སྦྱར་རོ། །ཆོས་ཐམས་ཅད་མཉམ་པ་ཉིད་དུ་རྟོག་པར་བྱེད་པའི་ཕྱག་རྒྱ་ནི་མྱ་ངན་ལས་འདས་པ་དང་སྦྱར་རོ། །དེ་ལ་སྔགས་ཀྱང༌། ནམཿ་ས་མནྟ་བུདྡྷ་ནཱཾ། ཞེས་པ་ནཾ་ཀུན་དུ་སངས་རྒྱས་པ་དང་སྦྱར་རོ། །ནམཿས་མནྟ་བཛྲཱ་ཎཱཾ་ཞེས་པ་ནི་བྱང་ཆུབ་དང་སྦྱོར་རོ། །ནམཿསརྦ་ཏ་ཐཱ་ག་ཏེ་བྷྱཿ་ཞེས་པ་ནི་དེ་བཞིན་གཤེགས་པ་དང་སྦྱར་རོ། །དེ་ལ་སྔགས་དང་ཕྱག་རྒྱ་རྣམས་བསྟན་པ་ཡང་སྤྱིར་བསྟན་པ་དང་སོ་སོར་བསྟན་པ་དེ། དེ་ལ་སོ་སོར་བསྟན་པ་ཡང་རྣམ་པ་གཉིས་ཏེ་དངོས་སུ་བསྟན་པ་དང༌། གཞན་དུ་སྙེག་པའོ། །དེ་ལ་དངོས་སུ་བསྟན་པ་ནི་གོང་དུ་མིང་སྨོས་པ་རྣམས་སོ། །གཞན་དུ་སྙེག་པ་ནི་དེ་ལྟ་བུ་ལ་སོགས་པ་ཞེས་པ་སྟེ། རྒྱུད་གཞན་དུ་སྙེག་པའོ། །སྤྱིར་བསྟན་པ་ནི་གསང་བ་པའི་བདག་པོ་འོ་ན་ཀྱང་ཇི་ཙམ་དུ་ཡན་ལག་བསྐྱོད་པ་དེ་དག་ཀུན་ཕྱག་རྒྱ་རྒྱས་པར་རིག་པར་བྱའོ། །ཇི་ཙམ་དུ་ལྕེ་བསྐྱོད་པ་དེ་དག་ཀུན་ཀྱང་གསང་སྔགས་བསྟན་པ་རིག་པར་བྱའོ་ཞེས་པ་སྟེ། དེ་ཡང་ཇི་ལྟ་བུར་གནས་ནས་ཤེ་ན། །བྱང་ཆུབ་ཀྱི་སེམས་དང་ལྡན་པའི་ཡིད་ཀྱིས་དེ་བཞིན་གཤེགས་པའི་ས་ལ་གནས་ཏེ་དཀྱིལ་འཁོར་བྲི་བར་བྱའོ་ཞེས་པ་སྟེ། ནམ་སྔགས་པ་བྱང་ཆུབ་ཀྱི་སེམས་དང་ལྡན་པའི་ཡིད་དང༌། དེ་བཞིན་གཤེགས་པའི་ས་ལ་གནས་པར་གྱུར་ན་ཇི་ཙམ་དུ་ཡན་ལག་ལ་སོགས་པ་བསྐྱོད་པ་དེ་ཙམ་དུ་ཕྱག་རྒྱར་འགྱུར་ཇི་ཙམ་དུ་ལྕེ་བསྐྱོད་པ་དེ་ཙམ་དུ་སྔགས་སྤྱོད་པར་འགྱུར་རོ་ཞེས་པ་དང་སྦྱར་ཏེ། བྱང་ཆུབ་ཀྱི་སེམས་དང་ལྡན་པའི་ཡིད་ཅེས་པ་ནི་སྟོང་པ་ཉིད་ལ་དམིགས་པའི་སེམས་དང་ལྡན་པ་ཞེས་བྱའོ། །དེ་བཞིན་གཤེགས་པའི་ས་ལ་གནས་ཞེས་པ་ནི་ཀུན་རྫོབ་དང་དོན་དམ་པ་རམ་པ་གཉིས་ཏེ། །ཀུན་རྫོབ་ཏུ་དེ་བཞིན་གཤེགས་པའི་ས་ལ་གནས་པ་ནི་ལྷའི་གཟུགས་སུ་སྦྱར་བའོ། །དོན་དམ་པ་ནི་སྟོང་པ་ཉིད་ཀྱི་རང་བཞིན་གྱི་ལྷར་སྦྱར་བ་སྟེ། དེ་ལྟར་ཡང་བྱང་ཆུབ་ཀྱི་སེམས་དང་ལྡན་ཞིང་ཀུན་རྫོབ་དང་དོན་དམ་པའི་མཚན་ཉིད་ལྷའི་གཟུགས་སུ་སྦྱར་བ་མ་ཡིན་པར་སྔགས་དང་ཕྱག་རྒྱ་བྱ་བའམ། དཀྱིལ་འཁོར་བྲིས་ན་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་སྲུང་བར་མི་འགྱུར་རོ་ཞེས་དངོས་སུ་
གསུངས་སོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྦྲུལ་པ་བྱིན་གྱིས་རློབ་པ་ལས། ཕྱག་རྒྱའི་རིམ་པར་ཕྱེ་བ་རྒྱས་པའོ།། །།ད་ནི་སྔགས་ཀྱི་ལེའུ་བཤད་པ་ལ་སོགས་པས་སྔགས་ཀྱི་ཚིག་དང༌། ཡི་གེའི་འབྲུ་ལས་ཏིང་ངེ་འཛིན་གྱི་སྒོར་འགྱུར་བ་ལ་སོགས་པ་དང༌། ཡི་གེ་ཀ་ལ་སོགས་པ་སུམ་ཅུ་རྩ་གཉིས་རྣམས་ཨ་ལ་སོགས་པ་བཅུ་དྲུག་དང་ལྡན་པར་འགྱུར་བ་བསྟན་ཏེ། དེ་ལ་ཡི་གེ་ཀ་ལ་སོགས་པ་སུམ་ཅུ་རྩ་གཉིས་པོ་རྣམས་ནི་ཡི་གེ་ཨ་དང་མི་སྨྲ་སྟེ། དེ་ཐམས་ཅད་ཀྱང་ཨ་དང་ལྡན་པར་ཤེས་པར་བྱའོ། །དེ་ཡང་གསང་བ་པའི་བདག་པོ་ཐམས་ཅད་དུ་འཇུག་པའི་ཆོས་ཀྱི་སྒོ་ཆོས་ཀྱི་རྣམ་གྲངས་ཉོན་ཅིག་ཅེས་པ་ལ་སོགས་པ་སྟེ། ཐམས་ཅད་དུ་འཇུག་པའི་སྒོ་ཞེས་པ་ནི་ཨ་དང་ལྡན་པའི་ཡི་གེ་རྣམས་སྔགས་ལ་སྦྱར་བ་དང༌། ཏིང་ངེ་འཛིན་ལ་སོགས་པ་ཐམས་ཅད་དུ་ཁྱབ་པར་འཇུག་པའི་སྒོའོ་ཞེས་པའོ། །དེ་བས་ན་གསང་བའི་བདག་པོ་དེ་ལ་བྱང་ཆུབ་སེམས་དཔས་ཨ་ཞེས་བྱ་བ་ལ་གནས་ཏེ། དགོས་པ་ཐམས་ཅད་བསྒྲུབ་པར་བྱའོ་ཞེས་གསུངས་པ་ཡིན་ནོ། །དང་པོ་ཨ་དང་ས་དང་ང་སྟེ་གསུམ་སྨོས་པ་ནི་རིགས་གསུམ་སྨོས་པའོ། །དེ་དང་པོར་ཡི་གེ་ཨ་ཐ་མལ་བར་སྨོས་ནས་ཀ་ལ་སོགས་པ་སུམ་ཅུ་རྩ་གཉིས་པ་མ་སྨོས་པ་ནི་ཀ་ལ་སོགས་པ་རྣམ་པ་ཐམས་ཅད་ཀྱང་ཐ་མ་ལ་པའི་རང་བཞིན་དུ་ཤེས་པར་བྱ་སྟེ། དེ་དག་ཐམས་ཅད་བྱང་ཆུབ་ཀྱི་རང་བཞིན་དུ་བསྟན་པའོ། །ཡི་གེ་ཨ་འདྲེན་པ་ཐོག་མར་སྨོས་ནས་ཀ་ལ་སོགས་པ་ཐམས་ཅད་ཀྱང་རིང་པོར་སྨོས་པ་རྣམས་ནི་དེ་དག་ཐམས་ཅད་སྤྱོད་པའི་རང་བཞིན་དུ་ཤེས་པར་བྱའོ། །ཡི་གེ་ཨཾ་ཐོག་མར་སྨོས་ནས་ཀཾ་ཞེས་པ་ལ་སོགས་པ་སུམ་ཅུ་རྩ་གཉིས་སྨོས་པ་ཐམས་ཅད་ཀྱང་ཨཾ་དང་ལྡན་པས་ཀུན་དུ་སངས་རྒྱས་པའི་རང་བཞིན་དུ་ཤེས་པར་བྱའོ། །ཡི་གེ་ཨ་ཆོ་ག་གཉིས་དང་ལྡན་པ་ཐོག་མར་སྨོས་ན་ཀ་ལ་སོགས་པ་ཐམས་ཅད་ཨ་ཚེག་གཉིས་དང་ལྡན་པ་ནི་ཐམས་ཅད་ཀྱང་མྱ་ངན་ལས་འདས་པའི་རང་བཞིན་དུ་ཤེས་པར་བྱའོ། །ཀ་ལ་སོགས་པའི་ཡི་གེ་སུམ་ཅུ་རྩ་གཉིས་པོ་དེ་རྣམས་ཨི་ལ་སོགས་པ་དང་ལྡན་པ་ན་ཡང་ཏིང་ངེ་འཛིན་དེ་དག་ཉིད་ཀྱི་སྒོ་སྟོན་པའི་
རང་བཞིན་དུ་ཤེས་པར་བྱའོ། །དེ་ལ་རྀ་རཱྀ་དང་ལྀ་ལཱྀ་གཉིས་མ་སྨོས་པ་ནི་གོང་དུ་ཡི་གེ་ར་དང་ཨི་ལ་སོགས་པར་ལྡན་པ་རྀ་རཱྀ་ཞེས་པའི་ཁོངས་སུ་འདུས་ལ། ལ་དང་ཨི་ལ་སོགས་པར་ལྡན་པ་ལྀ་ལཱྀ་ཞེས་པ་དེའི་ཁོངས་སུ་འདུས་པར་ཤེས་པར་བྱའོ། །གསང་བ་པའི་བདག་པོ་དེ་ལྟར་ན་འདི་ནི་ཡི་གེའི་ཚུལ་ལ་མཁས་པའི་ཆོས་ཀྱི་རྣམ་གྲངས་ཏེ་ཞེས་པ་ནས་གསང་བ་པའི་བདག་པོ་ངས་ནི་སངས་རྒྱས་ཀྱི་ཞིང་རབ་འབྱམས་གང་དག་ན་དེ་བཞིན་གཤེགས་པ་རྣམས་ཐམས་ཅད་དུ་འདུག་པའི་ཆོས་ཀྱི་རྣམ་གྲངས་འདི་མི་འཆད་པ་མཐོང་ངོ་ཞེས་པའི་བར་ནི་བཤད་པའི་ཡི་གེ་རྣམས་ཀྱི་རྗེས་སུ་བསྔགས་པ་བཤད་པ་སྟེ། རང་བཞིན་ཕུན་སུམ་ཚོགས་པ་དང༌། ལུས་ཕུན་སུམ་ཚོགས་པ་དང༌། བྱིན་རླབས་ཕུན་སུམ་ཚོགས་པ་དང༌། མཐུ་ཕུན་སུམ་ཚོགས་པ་བསྟན་པའོ། །དེ་ལྷ་རང་བཞིན་ཕུན་སུམ་ཚོགས་པ་ནི་ཡི་གེའི་རང་བཞིན་རྣམས་སོ་སོར་བསྟན་པ་སྟེ་ཡི་གེའི་ཚུལ་ལ་མཁས་པའི་ཆོས་ཀྱི་རྣམ་གྲངས་ཏེ་ཞེས་པའི་ཚིག་གིས་སོ། །ལུས་ཕུན་སུམ་ཚོགས་པ་ནི་གསང་སྔགས་ཀྱི་ཚུལ་ལ་མཁས་པའི་ཆོ་ག་ཞེས་པའི་ཚིག་གོ །བྱིན་རླབས་ཕུན་སུམ་ཚོགས་པ་ནི་ནམ་ཡི་གེའི་སྔགས་རྣམས་ཀྱི་སྒྲར་བརྗོད་དམ། ཏིང་ངེ་འཛིན་བསྒོམ་པའམ། ལྷའི་གཟུགས་སུ་སྦྱོར་བས་ན་དེ་བཞིན་གཤེགས་པ་རྣམས་ཀྱིས་བྱིན་གྱིས་རློབ་པ་དང༌། དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་ཀྱིས་བྱིན་དུ་བརླབས་པ་ཞེས་པ་ལ་སོགས་པའི་ཚིག་གིས་སོ། །མཐུ་ཕུན་སུམ་ཚོགས་པ་ནི་འདས་པ་དང༌། ད་ལྟར་དང༌། མ་འོངས་པའི་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་བཤད་ཅེས་པ་ནས། ཆོས་ཀྱི་རྣམ་གྲངས་འདི་མི་ཆད་པ་མ་མཐོང་ངོ་ཞེས་པའི་བར་གྱི་ཚིག་གིས་སོ། །བྱིན་གྱི་རླབས་ཕུན་སུམ་ཚོགས་པ་ལ་ལས་རྣམ་པ་བཞི་སྟེ། སྔགས་རྣམས་སུ་སྦྱོར་བ་དང༌། ལྷའི་གཟུགས་སུ་སྦྱོར་བ་དང༌། ཏིང་ངེ་འཛིན་དུ་སྦྱོར་བ་དང་སྤྱོད་པའོ། །དེ་ལ་སྔགས་རྣམས་སུ་སྦྱོར་བ་ནི་ཡི་གེའི་འབྲུ་དེ་རྣམས་ལས་སྔགས་ཀྱི་ཚིག་གི་ཚུལ་དུ་སྦྱར་བ་སྟེ། གསང་སྔགས་ཀྱི་ཚུལ་ལ་མཁས་པའི་ཆོ་ག་ཞེས་པའི་ཚིག་སྔ་མ་ཉིད་ཀྱིས་སོ། །ལྷའི་གཟུགས་སུ་སྦྱོར་བ་ནི་ཡི་གེ་རྣམས་
གང་རུང་པ་ལས་ལྷའི་གཟུགས་སུ་སྦྱོར་བ་སྟེ། ལྷ་ཡོངས་སུ་གཟུང་བའི་ཆོ་ག་ཞེས་པའི་ཚིག་གིས་སོ། །ཏིང་ངེ་འཛིན་དུ་སྦྱོར་བ་ནི་ཡི་གེ་འབྲུ་དེ་རྣམས་ལ་སྟོང་པ་ཉིད་ཀྱི་རང་བཞིན་ཆོས་ཀྱི་སྐུར་སྦྱོར་བ་སྟེ། ཡང་དག་པར་རྫོགས་པའི་སངས་རྒྱས་ཀྱི་ཚུལ་ལ་མཁས་པ་ཞེས་པའི་ཚིག་གིས་སོ། །སྤྱོད་པ་ཞི་བ་དང་རྒྱས་པ་ལ་སོགས་པའི་ལས་དང་རབ་འབྲིང་ལ་སོགས་པའི་དངོས་གྲུབ་བསྒྲུབ་པའི་སྤྱོད་པ་སྟེ། བྱང་ཆུབ་སེམས་དཔའི་སྤྱད་པ་སྤྱོད་པའི་རོལ་མོ་སྟེ་ཞེས་པའི་ཚིག་གིས་སོ། །ཀ་དང་ཙ་དང་ཊ་དང་ཏ་དང་པ་རྣམས་ཐོག་མ་དང་ཐ་མ་དང་དབུས་དང་ལྡན་ཞིང་ཏིང་ངེ་འཛིན་གྱི་ཚོགས་འཇུག་པས་བྱང་ཆུབ་དང་སྤྱོད་པ་དང་ཡང་དག་པར་རྫོགས་པའི་སངས་རྒྱས་དང༌། མྱ་ངན་ལས་འདས་པ་དང་བཅས་པར་ཐོབ་པར་བྱེད་དོ་ཞེས་པ་ནི་ཡི་གེ་ཀ་ལ་སོགས་པ་སུམ་ཅུ་རྩ་གཉིས་པོ་དེ་རྣམས་དང༌། དང་པོའི་ཨ་ཨཱ་ཞེས་པ་གཉིས་དང༌། ཐ་མའི་ཨཾ་ཨ་ཞེས་པ་གཉིས་དང༌། དབུས་ཀྱི་ཨི་ལ་སོགས་པ་རྣམས་དང་ལྡན་པར་སྦྱར་ན་བྱང་ཆུབ་དང་སྤྱོད་པ་དང༌། ཀུན་དུ་སངས་རྒྱས་པ་དང༌། མྱ་ངན་ལས་འདས་པའི་སྒོ་སྟོན་པའི་རང་བཞིན་ཡིན་པས་དེ་རྣམས་དང་ལྡན་པར་ཏིང་ངེ་འཛིན་དུ་སྦྱར་ན་བྱང་ཆུབ་ལ་སོགས་པ་ཐོབ་པར་འགྱུར་རོ་ཞེས་པའོ། །དེ་བཞིན་དུ་དེ་བས་ན་གསང་སྔགས་ཀྱི་ཆོ་ག་དང་པོ་ལ་སོགས་པའི་ཐ་སྙད་དང་ལན་པར་གྱུར་པ་དེ་དག་ཉིད་ཐོག་མ་དང་ཐ་མ་དང༌། དབུས་དང་ལྷན་ཅིག་ཏུ་གྱུར་པར་ཤེས་པར་བྱ་སྟེ་ཞེས་པ་དང་པོ་ལ་སོགས་པའི་ཞེས་པ་ནི་ཐོག་མའི་ཨ་ཨཱ་དང༌། ཐ་མའི་ཨཾ་ཨ་དངཿ་དབུས་ཀྱི་ཨི་ལ་སོགས་པ་དང་ལྡན་བར་ཀ་ལ་སོགས་པ་རྣམས་བརྗོད་ན་བྱང་ཆུབ་ལ་སོགས་པ་འཐོབ་པ་འབའ་ཞིག་མ་ཡིན་གྱི་སྔགས་ཀྱི་ཚིག་རྣམས་སུ་ཡང་འགྱུར་རོ་ཞེས་པའོ། །གསང་སྔགས་ཀྱི་ཚིག་རེ་རེ་ལ་ཇི་ལྟར་འདོད་པར་སྦྱར་བར་བྱའོ། །བློ་ཡིས་རྣམ་པར་རྟོག་ན་ནི། །དེ་དག་བླ་མའི་གནས་མཆོག་སྟེར། །ཞེས་པ་ནི་མཁས་པ་ཇི་ལྟར་འདོད་པས་སྔགས་ཀྱི་གཙོ་བོར་དེའི་ཚིག་རེ་རེ་དང་སྦྱོར་ཅིག་དེ་དང་ངེས་པར་འཚང་རྒྱ་ཞིང་བླ་ན་མེད་པའི་གནས་མཆོག་སྦྱིན་པར་བྱེད་དོ་ཞེས་འདོན་ཏེ། གོང་དུ་སྨོས་པའི་ཚུལ་ལ་མཁས་པས་ཏིང་ངེ་འཛིན་གང་འདོད་པའམ།
རང་གི་ལྷ་གང་ཡིན་པར་སྦྱར་པ་ལ་སོགས་པ་ལ་ཡི་གེ་དེ་རྣམས་ལས་གང་ཡང་རུང་བ་ཇི་ལྟར་འདོད་བའི་འབྲུ་གཅིག་ལ་སྦྱར་ན་ཡང་ཇི་ལྟར་བསམ་པའི་དོན་འགྲུབ་པར་བྱེད་དོ་ཞེས་པའོ། །དེ་ལྟར་འདི་ནི་འཁོར་ལོ་གཅིག་སྟེ། འཁོར་ལོ་བཞིན་དུ་ཡོངས་སུ་འཁོར་བ་ནི་ཡི་གེའི་འཁོར་ལ་ཞེས་པ་ནི་ཡི་གེ་ཨ་གཅིག་པོ་ལས་ཀ་ལ་སོགས་པ་དུ་མའི་ཏིང་ངེ་འཛིན་གྱི་རང་བཞིན་འཁོར་ལོ་ལྟ་བུར་འཁོར་བའོ་ཞེས་པའོ། །སྔགས་པས་ཡི་གེའི་འཁོར་ལོ་སྟེ་ཤེས་ན་རྟག་ཏུ་ཇི་ལྟར་བཅོམ་ལྡན་འདས་རྣམ་པར་སྣང་མཛད་འཁོར་ལོ་བསྐོར་བ་བཞིན་དུ་རྣམ་པར་མངེས་པར་འགྱུར་རོ་ཞེས་པ་ནི་སྔགས་པས་གོང་དུ་སྨོས་པའི་ཡི་གེ་འཁོར་ལོ་དེ་ཤེས་ན་བཅོམ་ལྡན་འདས་རྣམ་པར་སྣང་མཛད་བཞིན་དུ་ལས་དང་སྤྱོད་པ་ཐམས་ཅད་སྤྱོད་ནུས་པར་འགྱུར་རོ་ཞེས་པ་སྟེ། མཛེས་པ་ཞེས་པ་ནི་སྤྱོད་པའི་ཚིག་ཏུ་ཤེས་པར་བྱའོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྦྲུལ་པ་བྱིན་གྱིས་རློབ་པ་ལས། ཐམས་ཅད་དུ་འཇུག་པའི་སྒོ་ཆོས་ཀྱི་ཡི་གེའི་ཚུལ་རིམ་པར་ཕྱེ་བ་རྒྱས་པའོ།། །།སངས་རྒྱས་བཅོམ་ལྡན་འདས་ཀྱི་སྐུ་མི་ཟད་པ་དང༌། གསུང་མི་ཟད་པ་དང༌། ཐུགས་མི་ཟད་པའི་རྡོ་རྗེའི་རྒྱན་དེ་རྣམས་དཀྱིལ་འཁོར་བྱིན་གྱིས་བརླབས་པ་ལ། སྐུ་མི་ཟད་པ་བྱིན་གྱིས་བརླབས་པའི་དཀྱིལ་འཁོར་སྙིང་རྗེ་ཆེན་པོའི་སྙིང་པོ་འབྱུང་བ་དང་གསུང་མི་ཟད་པའི་བྱིན་གྱི་རླབས་ཡི་གེ་འཁོར་ལོ་བསྐོར་བའི་དཀྱིལ་འཁོར་དག་ནི་གོང་དུ་བཤད་ཟིན་ཏོ། །ད་ནི་ཐུགས་མི་ཟད་བའི་སྐུའི་དཀྱིལ་འཁོར་ཆོས་ཀྱི་སྐུ་བྱིན་གྱི་རླབས་སུ་འགྱུར་བ་དེ་འཆང་ལ་དེའི་ཞར་ལ་སྔར་དཀྱིལ་འཁོར་གཉིས་པ་བཤད་པའི་ཆོ་གའི་དཀྱིལ་འཁོར་ཀྱི་མཚན་ཉིད་དང༌། སློབ་མའི་མཚན་ཉིད་ལ་སོགས་པ་དང༌། དཀྱིལ་འཁོར་གྱི་ཡོ་བྱད་དུ་བཅས་པ་སྔར་རྒྱས་པར་བཤད་ཅིང་མ་རྫོགས་པ་རྣམས་དང༌། སྦྱིན་སྲེག་གི་ཆོག་ལ་སོགས་པ་ཡང་འདི་ཉིད་དུ་རྒྱས་པར་འཆད་དོ། །དེ་ལ་ཆོས་ཀྱི་སྐུ་ནི་མཚན་མས་བསྟན་པ་ལས་འདས་ཏེ། དངོས་པོ་མེད་པས་བསྟན་དུ་མི་མངོན་ཡང་ཡོན་ཏན་དང་རྗེས་སུ་མཐུན་པ་ལས་བསྟན་པར་བྱ་སྟེ། ཆོས་ཀྱི་སྐུའི་ཡོན་ཏན་ནི་ཕྱིན་ཅི་མ་ལོག་པ་དང་མི་འགྱུར་བར་
ཡོངས་སུ་གྲུབ་པའི་རང་བཞིན་རྣམ་པར་རྟོག་པས་ཐམས་ཅད་སྤངས་པ་དང་ཉོན་མོངས་པ་ཐམས་ཅད་ལས་རྣམ་པར་གྲོལ་བ་དང༌། བྱ་བ་ཐམས་ཅད་བྱེད་ནུས་པའི་རང་བཞིན་ནོ། །དེ་དང་རྗེས་སུ་མཐུན་པའི་སྒོ་ནས་དེ་སྟོན་པ་ནས་དང་ཆུ་དང་མེ་དང་རླུང་རྣམས་ཀྱི་དཀྱིལ་འཁོར་དུ་བྱིན་གྱིས་བརླབས་བས་སྟོན་ཏེ། ས་ནི་བརྟན་ཞིང་མི་འགྱུར་བར་ཡོངས་སུ་གྲུབ་པའི་མཚན་ཉིད་རྡོ་རྗེ་དང་འདྲ་བས་དབང་ཆེན་རྡོ་རྗེའི་དཀྱིལ་འཁོར་དུ་བྱིན་གྱིས་བརླབས་ཏེ་བསྟན་ཏོ། །ཆུ་ནི་ཐམས་ཅད་འཁྲུ་བས་དག་པར་བྱེད་པའི་རང་བཞིན་ཡིན་པས་རྣམ་པར་རྟོག་པ་ཐམས་ཅད་སྤངས་པའི་རང་བཞིན་ནི་ཆུའི་དཀྱིལ་འཁོར་དུ་བྱིན་གྱིས་བརླབས་ནས་བསྟན་ཏོ། །མེའི་རང་བཞིན་སྲེག་པར་བྱེད་པ་དང་ཡི་གེར་ཆོས་ཐམས་ཅད་རྡུལ་དང་བྲལ་བར་སྟོན་པའི་ཕྱིར་ཉོན་མོངས་པ་ཐམས་ཅད་རྡུལ་དང་རྣམ་པར་གྲོལ་བའི་མཚན་ཉིད་ནི་མེའི་དཀྱིལ་འཁོར་དུ་བྱིན་གྱིས་བརླབས་ཏེ་བསྟན་ཏོ། །རླུང་ནི་ཀུན་དུ་འགྲོ་ཞིང་ཐམས་ཅད་བྱེད་པར་སྔར་བཤད་ཟིན་ཏེ། བྱ་བ་ཐམས་ཅད་བྱེད་ནུས་པའི་རང་བཞིན་ནི་རླུང་གི་དཀྱིལ་འཁོར་དུ་བྱིན་གྱིས་བརླབས་ཏེ་བསྟན་ཏོ། །དེ་ལྟར་ཆོས་ཀྱི་སྐུའི་བྱིན་རླབས་སུ་གྱུར་པ་གསང་བའི་དཀྱིལ་འཁོར་དེ་དང༌། དཀྱིལ་འཁོར་གསུམ་ཆར་གྱི་ཆོ་ག་རྫོགས་པར་བཤད་པའི་ཕྱིར། བཅོམ་ལྡན་འདས་ཏིང་ངེ་འཛིན་ལ་སྙོམས་པར་ཞུགས་ཏེ། དེ་ཡང་ཅི་ཞིག་བྱས་ནས་ཞུགས་ཤེ་ན། དེ་ནས་བཅོམ་ལྡན་འདས་ཀྱིས་དེ་བཞིན་གཤེགས་པའི་སྤྱན་གྱིས་ཐམས་ཅད་ལ་གཟིགས་ནས་ཞེས་བྱ་བ་གསུངས་ཏེ། དེ་བཞིན་གཤེགས་པའི་ཡེ་ཤེས་ཀྱིས་གཟིགས་ནས་ཞེས་པའི་དོན་ཏོ། །ཆོས་ཀྱི་དབྱིངས་ཀྱི་མཛོད་ཀྱི་མཐུ་རླབས་ཏེ་དེ་བཞིན་གཤེགས་པའི་མཉམ་པ་ཉིད་བཀོད་པའི་སྙིང་པོ་ཅན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་པ་ལ་ཆོས་ཀྱི་དབྱིངས་ནི་དེ་བཞིན་ཉིད་དེ། དེ་ལས་སྐུ་མི་ཟད་པ་ལ་སོགས་པའི་རྡོ་རྗེའི་རྒྱན་རྣམས་ཀྱིས་མཚན་ཉིད་འབྱུང་བ་དེ་བཞིན་གཤེགས་པའི་མཉམ་པ་ཉིད་བཀོད་པ་ཞེས་བྱ་སྟེ། དེ་དག་ཆོས་ཀྱི་དབྱིངས་དེ་ལས་འབྱུང་བས་ན། ཆོས་ཀྱི་དབྱིངས་དེ་ཉིད་མཛོད་ཅེས་བྱའོ། །མཐུ་རླབས་ནི་རྣམ་པར་འཕྲུལ་པ་སྟེ། དེ་ལས་བྱུང་བའི་དེ་བཞིན་གཤེགས་པ་རྣམས་རྣམ་པ་སྣ་ཚོགས་སུ་སྤྱོད་པ་ཞེས་
བྱའོ། །མཉམ་པ་ཉིད་ཅེས་པ་ནི་དེ་བཞིན་གཤེགས་པའི་སྐུ་འབྱུང་བ་དེ་དག་ཉིད་ཚོགས་དང་ཆོས་ཀྱི་སྐུ་དང༌། སེམས་ཅན་གྱི་དོན་བྱེད་བར་མཉམ་པ་ཉིད་ཀྱི་ཕྱིར་རོ། །བཀོད་བ་ཞེས་བྱ་བ་ནི་མང་པོའི་ཚིག་གོ །སྙིང་པོ་ཅན་ཞེས་བྱ་བ་ནི་འབྱུང་བ་ནི་འབྱུང་བའི་གནས་ཏིང་ངེ་འཛིན་དེ་ཉིད་ལ་བྱ་སྟེ། ཏིང་ངེ་འཛིན་དེར་ཞུགས་ན་དེ་ལྟ་བུ་དག་འབྱུང་བའི་ཕྱིར་རོ། །ཏིང་ངེ་འཛིན་དུ་ཞུགས་ནས་ཀྱང་ཇི་ལྟ་བུ་ཞིག་སྟོན་ཞེ་ན། ཆོས་ཀྱི་དབྱིངས་མི་ཟད་པ་བཀོད་པ་བསྟན་པ་དང༌། གསང་སྔགས་ཀྱི་སྤྱད་པ་མངོན་པར་བསྒྲུབ་པ་འདི་ཉིད་ཀྱི་སེམས་ཅན་གྱི་ཁམས་མ་ལུས་པ་གདོན་པར་ཐུགས་དམ་བཅས་པ་ཡོངས་སུ་རྫོགས་པར་བྱ་བའི་ཕྱིར་ཞེས་བྱ་བ་གསུངས་ཏེ། ཆོས་ཀྱི་དབྱིངས་ཞེས་པ་ནི་སྐབས་འདིར་སེམས་ཅན་གྱི་ཁམས་ལ་བྱ་སྟེ། དེ་ལས་མངོན་པར་འབྱུང་བ་བསྟན་པ་ཡང་ལས་དང་ཚེ་དང༌། རྣམ་པར་སྨིན་པའི་འབྲས་བུ་ཞེས་པ་ལ་སོགས་པ་འོག་ནས་འབྱུང་བའི་ཚིག་རྣམས་ཀྱིས་འཆད་དོ། །སྔགས་ཀྱི་སྤྱད་པ་མངོན་པར་བསྒྲུབ་པ་འདི་ཉིད་ཀྱི་སེམས་ཅན་གྱི་ཁམས་མ་ལུས་པ་གདོན་པར་ཐུགས་དམ་བཅས་པ་ཡོངས་སུ་རྫོགས་པར་བྱ་བའི་ཕྱིར་ཞེས་པ་ནི་སྙིང་རྗེ་ཆེན་པོ་འབྱུང་བའི་དཀྱིལ་འཁོར་དང༌། ཡི་གེ་འཁོར་ལོ་བསྐོར་བའི་དཀྱིལ་འཁོར་བསྟན་དུ་ཟིན་ཀྱང་གསང་བའི་དཀྱིལ་འཁོར་མ་བསྟན་ན་ཚིག་ལྔ་ལ་སོགས་པ་དང་ལྡན་པར་ཡང་མི་འགྱུར་ལ། དེའི་ཞར་ལ་སྔ་མའི་ཆོ་ག་ལྷག་མ་རྣམས་ཀྱང་རྫོགས་པར་བཤད་པར་བྱ་བ་མ་བསྟན་ན། སྔགས་པར་རྫོགས་བར་མི་འགྱུར་ཏེ་དེ་བས་ན་དེ་དག་ཐམས་ཅད་རྫོགས་པར་བསྟན་ན་སེམས་ཅན་གྱི་ཁམས་མ་ལུས་པ་གདོན་པར་ཐུགས་དམ་བཅས་པར་རྫོགས་པར་འགྱུར་རོ། །དེ་ནས་དེ་ཉིད་ཀྱི་ཚེ་སེམས་ཅན་གྱི་ཁམས་མ་ལུས་པ་ཞེས་བྱ་བ་འབྱུང་བར་བྱེད་པའི་སྒོའི་བུ་ག་ཐམས་ཅད་ནས་བསམ་པ་ཇི་ལྟ་བ་བཞིན་ལས་དང་ཚེ་དང་རྣམ་པར་སྨིན་པའི་འབྲས་བུ་ཟ་བ་དང༌། ཟར་འཇུག་པའི་གཟུགས་དང༌། ཁ་དོག་དང༌། དབྱིབས་དང༌། ང་རོ་དང༌། འགྲོ་བ་དང༌། སྤྱོད་པ་དང༌། ངེས་པའི་ཚིག་བརྗོད་པ་སེམས་ཅན་ཐམས་ཅད་སོ་སོ་སོ་སོར་ཡང་དག་པར་མགུ་བར་བྱེད་པ་དང༌། ཆོས་ཀྱི་དབྱིངས་ཀྱི་རྣམ་པར་བསྐྱེད་པའི་སྐུ་རྣམས་བྱུང་བར་
གྱུར་ཏོ་ཞེས་པ་ནི་དེ་ལྟར་བཅོམ་ལྡན་འདས་ཏིང་ངེ་འཛིན་ལ་སྙོམས་པར་ཞུགས་མ་ཐག་ཏུ་བཅོམ་ལྡན་འདས་ཀྱི་སྐུའི་བ་སྤུའི་བུ་ག་ཐམས་ཅད་ནས་དེ་བཞིན་གཤེགས་པའི་སྐུ་སེམས་ཅན་ཐམས་ཅད་དང་རྗེས་སུ་མཐུན་པ་ལས་དང་ཚེ་དང་རྣམ་པར་སྨིན་པའི་འབྲས་བུ་ཟ་བ་དང་ཟར་འཇུག་པ་ལ་སོགས་པ་སྨོན་པ་འབྱུང་ཞེས་པ་སྟེ། ལས་ཀྱི་རྣམ་པར་སྨིན་པ་དང༌། ཚེའི་འབྲས་བུ་ཟ་བར་སྟོན་པ་ནི་ལས་ལེགས་ཉེས་ཅི་སྤྱད་པའི་འབྲས་བུ་བདེ་བ་དང་སྡུག་བསྔལ་རྣམས་ལ་རང་རང་སྤྱོད་པར་སྣང་བའོ། །ཟར་འཇུག་པ་ནི་རྒྱལ་པོ་དང་སེམས་ཅན་དམྱལ་བའི་སྲུང་མ་ལ་སོགས་པ་ལྟ་བུའོ། །དེ་དག་གི་དབང་དུ་བྱས་ནས་གཞན་དག་པ་དེ་བ་དང་སྡུག་བསྔལ་ལ་སྤྱོད་དུ་འབབ་པའོ། །དེ་དག་ཉིད་ཀྱི་བྱེ་བྲག་གཟུགས་དང་ཁ་དོག་དང་ཞེས་བྱ་བ་ལ་སོགས་པས་གསུངས་ཏེ། སེམས་ཅན་རྣམས་ཀྱི་གཟུགས་དང༌། ཁ་དོག་དང་བསམ་པ་ལ་སོགས་བ་རྗེས་སུ་མཐུན་པར་ཆོས་འཆད་པའི་སྐུ་རྣམས་བྱུང་ངོ་ཞེས་སྦྱར་ཏེ། དེ་བས་ན་སེམས་ཅན་ཐམས་ཅད་སོ་སོ་སོ་སོར་ཡང་དག་པར་མགུ་བར་བྱེད་པ་ཞེས་གསུངས་པ་ཡིན་ནོ། །སེམས་ཅན་གྱི་ཁམས་མ་ལུས་པ་ངེས་པར་འབྱུང་བར་བྱེད་པའི་སྒོ་ཞེས་པ་ནི་དེ་བཞིན་གཤེགས་པའི་སྐུའི་བ་སྤུའི་ཁུང་བུ་དེ་སེམས་ཅན་གྱི་ཁམས་མ་ལུས་པ་ངེས་པར་འབྱུང་བར་བྱེད་པ་ལས་དང་ཚེ་དང་རྣམ་པར་སྨིན་པའི་འབྲས་བུ་ཟབ་དང་ཟར་འཇུག་པར་སྣང་བའི་སྐུ་རྣམས་འབྱུང་བའི་སྒོ་ཡིན་པའི་ཕྱིར་རོ། །བྱུང་ནས་ཀྱང་ནམ་མཁའ་དང་མཉམ་པའི་འཇིག་རྟེན་གྱི་ཁམས་རབ་འབྱམས་རྣམས་སུ་སྒྲ་དབྱངས་གཅིག་གིས་ཆོས་ཀྱི་དབྱིངས་ཁྱབ་པར་རྣམ་པར་རིག་པར་བྱེད་པ་དེ་བཞིན་གཤེགས་པ་འབྱུང་བར་འགྱུར་བའི་ཚིགས་སུ་བཅད་པ་འདི་སྒྲོགས་པར་གྱུར་ཏོ་ཞེས་པ་ནི་འོག་ནས་བྱུང་བའི་ཚིགས་སུ་བཅད་པ་དེ་སྒྲོགས་པ་སྟེ། དེ་ཡང་ཐམས་ཅད་ཚིག་ཏུ་སྒྲ་སྒྲོགས་པས་ན་སེམས་ཅན་གྱི་ཁམས་ཐམས་ཅད་དུ་ཐོས་ཤིང་རྟོགས་པར་བྱེད་པ་སྟེ། ཆོས་ཀྱི་དབྱིངས་ནི་འདིར་སེམས་ཅན་གྱི་ཁམས་སུ་ཤེས་པར་བྱའོ། །དེ་སྐད་དུ་བསྒྲགས་པའི་ཚིགས་སུ་བཅད་པ་དེ་ཆོས་ཀྱི་དབྱིངས་ལ་དམིགས་ནས་སྟོན་པའི་ཚིག་དེ་ཚིགས་སུ་བཅད་པ་བསྟན་པ་དེ་ལ་
རྟོགས་ཤིང་གོམས་པར་བྱས་ན་དེ་བཞིན་གཤེགས་པར་འགྱུར་བས་ན། དེ་བཞིན་གཤེགས་པ་འབྱུང་བར་འགྱུར་བའི་ཚིགས་སུ་བཅད་པ་ཞེས་བྱའོ། །གསུངས་པའི་ཚིགས་སུ་བཅད་པ་ནི། ཆོས་ཀྱི་མཚན་ཉིད་གང་ལས་ནི། །ཞེས་པ་ནས། ལམ་འདི་ཁྱེད་ཀྱིས་བསྒོམ་པར་གྱིས། །ཞེས་པའི་བར་འདི་དག་ཡིན། ཆོས་རྣམས་ཀྱི་མཚན་ཉིད་གང་ལས་འབྱུང་བ་ནི་སངས་རྒྱས་དང་ཉན་ཐོས་ལ་སོགས་པ་མིང་གིས་སྨོས་པ་རྣམས་ཏེ། མདོར་ན་ཆོས་རྣམས་ཀྱི་ཆོས་ཉིད་ཀྱི་མཚན་ཉིད་ཆོས་ཀྱི་དབྱིངས་དེ་བཞིན་ཉིད་ལས་སངས་རྒྱས་དང༌། ཉན་ཐོས་དང༌། བྱང་ཆུབ་སེམས་དཔའ་དང༌། ཀུན་དུ་སངས་རྒྱས་པ་དང༌། སེམས་ཅན་གྱི་འཇིག་རྟེན་དང༌། སྣོད་ཀྱི་འཇིག་རྟེན་དང༌། ཆོས་རྣམས་སྐྱེ་ཞིང་གནས་པ་དག་འབྱུང་སྟེ། ཇི་ལྟར་འབྱུང་བ་ཤེས་རབ་དང་ཐབས་སུ་ལྡན་པས་ལམ་འདི་ཁྱེད་ཀྱིས་རྟག་ཏུ་སྒོམ་པར་གྱིས་ཤིག་སྟེ། དེ་ཡང་རྫོགས་པའི་སངས་རྒྱས་ཀྱིས་བཤད་པ་ཡིན་ནོ་ཞེས་པའོ། །བརྟགས་པའི་རིམ་པ་ཞེས་པ་ནི་ཀུན་རྫོབ་ཏུ་ཞེས་པ་སྟེ། མདོར་ན་ཆོས་རྣམས་ཀྱི་ཆོས་ཀྱི་དབྱིངས་མཚན་ཉིད་ཅི་འདྲ་བ་དང༌། དེའི་དབང་གིས་དེ་བཞིན་གཤེགས་པའི་སྐུ་ལས་སྦྲུལ་པའི་སྐུ་ལ་སོགས་པ་འབྱུང་བ་དང༌། དེ་ལ་དམིགས་ནས་ཉན་ཐོས་དང་རང་སངས་རྒྱས་ལ་སོགས་པ་སངས་རྒྱས་ལ་ཐུག་པའི་བར་དུ་ཇི་ལྟར་འགྲུབ་པར་འགྱུར་བའི་ལམ་དེ་ཁྱེད་ཀྱིས་ཤེས་པར་གྱིས་ཤིག་ཅེས་པའོ། །དེ་ལྟར་བཅོམ་ལྡན་འདས་ཏིང་ངེ་འཛིན་དེར་ཞུགས་ནས་འཇིག་རྟེན་པ་དང༌། འཇིག་རྟེན་ལས་འདས་པའི་ཆོས་གཉིས་བསྟན་ཏེ། འཇིག་རྟེན་པ་ནི་ལས་དང༌། ཚེ་དང༌། རྣམ་པར་སྨིན་པའི་འབྲས་བུ་ཟ་བ་དང་ཟར་འཇུག་པ་ལ་སོགས་པའོ། །འཇིག་རྟེན་ལས་འདས་པ་ནི་ཚིགས་སུ་བཅད་པ་འདི་ཉིད་དོ། །དེ་ནས་དེ་བཞིན་གཤེགས་པའི་སྐུ་ཆོས་ཀྱི་དབྱིངས་ལས་བྱུང་བ་དེ་དག་གིས་ཆོས་ཀྱི་དབྱིངས་ཐམས་ཅད་རང་གི་སྐུ་རྣམ་པར་རིག་པར་བྱེད་པ་སྦྲུལ་པའི་སྤྲིན་གྱིས་ཡོངས་སུ་བཀང་ནས་བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་ཀྱི་དབང་ཙམ་གྱིས་བ་སྤུའི་བུ་ག་ཐམས་ཅད་ནས། སངས་རྒྱས་འབྱུང་བ་གཅིག་ནས་གཅིག་ཏུ་བརྒྱུད་པ་བྱིན་གྱི་རླབས་ཏེ། རང་རང་གི་
ཆོས་ཀྱི་དབྱིངས་ཀྱི་གནས་སུ་ཞུགས་པར་གྱུར་ཏོ་ཞེས་པ་ནི་གང་དུ་བཅོམ་ལྡན་འདས་ཀྱི་བ་སྦུའི་བུ་ག་ཐམས་ཅད་ནས་ཆོས་ཀྱི་དབྱིངས་ཀྱི་བསྐྱེད་པའི་བྱུང་བ་དེ་དག་བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་ཀྱི་དབང་ཙམ་གྱིས་སངས་རྒྱས་ཀྱི་སྐུ་མངོན་པར་བྱང་ཆུབ་པ་དང༌། ཆོས་ཀྱི་འཁོར་ལོ་བསྐོར་བ་ལ་སོགས་པ་སེམས་ཅན་གྱི་ཁམས་ཐམས་ཅད་དུ་རང་གི་སྐུ་རྣམ་པར་རིག་བྱེད་པ་སྤྲུལ་པ་མང་པོས་ཁྱབ་པར་བྱས་ནས་ཐུགས་གྱི་དབང་ཙམ་གྱིས་རང་རང་གི་ཆོས་ཀྱི་དབྱིངས་ཀྱི་གནས་སུ་ཞུགས་པར་བསྟན་ཏོ། །ཐུགས་ཀྱི་དབང་ཙམ་གྱིས་ཞེས་པ་ནི་བཅོམ་ལྡན་འདས་རྣམ་པར་སྣང་མཛད་ནི་སྒྲུབ་པ་པོ་ལྟ་བུར་བལྟ་ལ། སྤྲུལ་པའི་སྐུ་རྣམས་འབྱུང་བ་ནི་བསྒྲུབ་པའི་ལྷ་རྣམས་ལྟ་བུར་བལྟའོ། །ཆོས་ཀྱི་དབྱིངས་ཀྱི་བསྐྱེད་པའི་དེ་བཞིན་གཤེགས་པའི་སྐུ་ནི་ཆོས་ཀྱི་དབྱིངས་ཀྱི་བྱིན་གྱི་རླབས་ཀྱིས་བཅོམ་ལྡན་འདས་རྣམ་པར་སྣང་མཛད་ཀྱི་སྦྲུལ་པའི་སྐུ་རྣམས་འབྱུང་ངོ་ཞེས་པ་སྟེ། དེས་ཀྱང་ཆོས་ཀྱི་དབྱིངས་ཀྱི་བྱིན་རླབས་དང་སྒྲུབ་པ་པོ་སེམས་ཀྱི་དབང་ཙམ་གྱིས་རང་གི་ལྷའི་སྐུའི་གཟུགས་སུ་སྣང་བར་འགྱུར་རོ་ཞེས་མ་འོངས་པའི་གདུལ་བའི་འགྲོ་བ་རྣམས་ལ་བསྟན་པ་ཡིན་ནོ། །རང་རང་གི་ཆོས་ཀྱི་དབྱིངས་ཀྱི་གནས་སུ་ཞུགས་པར་གྱུར་ཏོ་ཞེས་པ་ནི་སླར་བ་སྦུའི་བུ་ག་དེ་རྣམས་སུ་ཞུགས་པ་ལ་མི་བྱའོ། གང་དུ་བྱུང་བའི་གནས་དེ་དག་ཉིད་དུ་ཆོས་ཀྱི་དབྱིངས་སྟོང་པ་ཉིད་ཀྱི་རང་བཞིན་དུ་མི་སྣང་བར་གྱུར་པ་ལ་བྱའོ། །དེ་ལྟར་བཅོམ་ལྡན་འདས་ཀྱི་རང་གི་སྐུ་ལས་བྱུང་བའི་དེ་བཞིན་གཤེགས་པའི་སྐུ་རྣམས་ཀྱིས་སེམས་ཅན་གྱི་ཁམས་ཐམས་ཅད་དུ་ཁྱབ་པར་བྱས་ཏེ། སླར་མི་སྣང་བར་གྱུར་པ་བསྟན་ནས། དེ་ཡང་བཅོམ་ལྡན་འདས་ཀྱི་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་བཀའ་སྩལ་པ་ཞེས་བྱ་བ་ལ་སོགས་པས་ཐུགས་མི་ཟད་པའི་རྡོ་རྗེའི་བྱིན་གྱི་རླབས་གསང་བའི་དཀྱིལ་འཁོར་དང༌། དཀྱིལ་འཁོར་གསུམ་གྱི་ཆོ་གའི་ལྷག་མ་རྣམས་བཤད་པར་གསུངས་པ་ཡིན། གསང་བ་ཞེས་པ་ནི་དཀྱིལ་འཁོར་འདིས་ཡིད་ཀྱི་རང་བཞིན་ཆོས་ཀྱི་སྐུ་བྱིན་གྱིས་བརླབས་པ་ཡིན་པའི་ཕྱིར། ཡིད་ཀྱི་རང་བཞིན་ཆོས་ཀྱི་སྐུ་དེ་དངོས་སུ་བསྟན་པའི་རང་བཞིན་ཡིན་ཏེ་ཕྲ་བས་ན་གསང་བ་ཞེས་བྱའོ། །གཉིས་སུ་ན་སྐུ་དང་གསུང་གི་རང་བཞིན་
ལང་ཕྱག་རྒྱའི་རང་བཞིན་དུ་བསྒྱུར་བས་སྐུ་དང་གསུང་དུ་མི་མངོན་པ་ལའང་བྱའོ། །ལྷ་རྣམས་ཀྱི་གནས་པ་ཞེས་པ་ནི་དབང་ཆེན་ལ་སོགས་པའི་དཀྱིལ་འཁོར་དེ་དག་ལྷ་རྣམས་བྱིན་གྱིས་རློབ་པའི་གནས་ཡིན་པའི་ཕྱིར་རོ། །ས་བོན་དང་བཅས་པས་མཚན་པ་ཞེས་པ་ནི་དབང་ཆེན་ལ་སོགས་པའི་དཀྱིལ་འཁོར་སོ་སོའི་ས་བོན་ཨ་དང་བ་ལ་སོགས་པས་མཚན་པ་ཞེས་པའོ། །དང་པོར་སྔགས་པས་དཀྱིལ་འཁོར་དེ། །རང་གི་ལུས་ལ་བགོ་བྱ་སྟེ། །ཞེས་པ་ནི་ཚོན་འགྱེད་པ་ལ་སོགས་པའི་སྔོན་རོལ་དུ་སྔགས་པ་སྔར་བཤད་པའི་རྣལ་འབྱོར་གྱི་སྟན་ལ་གནས་ནས། སྔ་མ་བཞིན་དུ་དབང་ཆེན་ལ་སོགས་པའི་དཀྱིལ་འཁོར་ལུས་ལ་རིམ་པ་བཞིན་དུ་གཞག་གོ་ཞེས་པ་སྟེ། དེ་བས་ན། རྐང་པ་རྣམས་ནི་ཆུ་སོ་ལ། །ཐུག་གི་བར་དུ་ས་ཡིག་བསམ། །དེ་ནས་འོག་ཏུ་སྙིང་གའི་བར། །སྔོམ་བརྩོན་ཅན་གྱིས་ཆུ་ཡིག་བསམ། །ཆུ་ཡི་ཡན་ཆད་མེ་ཡི་སྟེ། །མེ་ཡི་ཡན་ཆད་རླུང་ཡིན་ནོ། །ཞེས་གསུངས་ཏེ། ཆུ་ཡི་ཡན་ཆད་མེ་ཡི་སྟེ། །ཞེས་པས་སྙིང་ག་ཡན་ཆད་མེར་བསམ་པ་ནི་གསལ་ན། མེ་ཡི་ཡན་ཆད་རླུང་ཡིན་ནོ། །ཞེས་པ་ལ་གང་ཡན་རླུང་དུ་བསམ་པའི་མཚམས་གསལ་བར་མ་སྨོས་ཀྱང་སྙིང་པོ་ལས་སྨིན་མཚམས་སུ་ཡི་གེ་ཧཱུཾ་བསམ་པར་གསུངས་པས་ན་སྨིན་མཚམས་ཡན་ཆད་རླུང་གི་དཀྱིལ་འཁོར་དུ་བསམས་པར་ཤེས་པར་བྱའོ། །བསམས་ནས་དེ་ནས་མཁས་པ་ཡིས། །ས་ལ་གཟུགས་བརྙན་གཞག་པར་བྱའོ། །ཞེས་པ་ནི་སྔགས་པས་དེ་ལྟ་བུའི་ཏིང་ངེ་འཛིན་བྱས་ནས་ས་ལ་གཟུགས་བརྙན་གྱི་དཀྱིལ་འཁོར་བྲི་བར་བྱའོ་ཞེས་པའོ། །དེ་ནས་ཕྱག་ན་རྡོ་རྗེས་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་དང་གསུང་དང་ཐུགས་ཀྱི་ས་ལ་ཞུགས་ནས་ཞེས་པ་ནི་བཅོམ་ལྡན་འདས་ཀྱི་སྐུ་དང་གསུང་དང་ཐུགས་མི་ཟད་པའི་རྡོ་རྗེའི་རྒྱན་ལ་ཞུགས་ཞེས་པའོ། །ཆོས་མཉམ་པ་ཉིད་ལ་བལྟས་ཏེ་ཞེས་པ་ནི་དོན་དམ་པར་ཡང་ཆོས་ཐམས་ཅད་སྟོང་པ་ཉིད་ཀྱི་རང་བཞིན་དུ་མཉམ་ལ་ཀུན་རྫོབ་ཏུ་ཡང་དེ་བཞིན་གཤེགས་པའི་སྐུ་ལ་སོགས་པ་སེམས་ཅན་གྱི་ཁམས་ཇི་སྙེད་པ་དང་མཉམ་པ་ལ་བྱའོ། །མ་འོངས་པའི་སྐྱེ་བོ་རྣམས་ལ་བརྟགས་ནས་ཞེས་པ་ནི་མ་འོངས་པའི་འགྲོ་བ་རྣམས་གྱི་དོན་དུ་རིག་སྔགས་གྱི་
རྒྱལ་པོ་ཐེ་ཚོམ་ཐམས་ཅད་གཅོད་པར་བྱེད་པ་འདི་སྨྲས་སོ་ཞེས་པ་ནི་མ་འོངས་པའི་དུས་ན་སྔགས་པས་དཀྱིལ་འཁོར་བྲི་བའི་སྔོན་རོལ་དུ་སྔགས་ཀྱི་རྒྱལ་པོ་འདི་བསྙེན་པར་བྱས་ནས་དཀྱིལ་འཁོར་བྲི་བའི་ཕྱིར་དང༌། སྔགས་འདིའི་དོན་ལ་འཇུག་པ་དང་འདིས་བསྲུང་བར་བྱ་བའི་ཕྱིར་རོ། །གསང་བ་པའི་བདག་པོ་ཕྱག་ན་རྡོ་རྗེས་གསང་སྔགས་ཀྱི་རྒྱལ་པོ་འདི་སྨྲས་མ་ཐག་ཏུ་ཞེས་པ་ནས། འཇིག་རྟེན་ཁམས་ཀུན་ཞུགས་པ་ཡིས། །རྫོགས་སངས་རྒྱས་རྣམས་དབང་དུ་འགྱུར། །ཞེས་པའི་བར་ཕྱག་ན་རྡོ་རྗེས་གསང་སྔགས་ཀྱི་རྒྱལ་པོ་འདི་སྨྲས་པའི་རྗེས་སུ་བསྔགས་པ་གསུངས་པ་ཡིན་ནོ། །དེ་ནས་དཔལ་ལྡན་རྡོ་རྗེ་འཛིན། །ཞེས་པ་ནས། མཚན་ཉིད་འདི་དག་རྟོག་པར་འགྱུར། །ཞེས་པའི་བར་གྱིས་སྔར་བཅོམ་ལྡན་འདས་ཀྱིས། ཡིད་གཉིས་སོམ་ཉིད་དབྲལ་བ། །རྫོགས་སངས་རྒྱས་ཀྱིས་རབ་བཤད་པའི། །ལམ་འདི་ཁྱེད་ཀྱིས་བསྒོམ་པར་གྱིས། །ཞེས་གདམས་པ་ཉིད་ཀྱི་དོན་ཕྱག་ན་རྡོ་རྗེས་ཇི་ལྟར་རྟོགས་པ་བཞིན་དུ་བཅོམ་ལྡན་འདས་ལ་གསོལ་པ་སྟེ། རྟོག་པ་དེ་ཡང་བཅོམ་ལྡན་འདས་ཀྱིས་བྱིན་གྱིས་བརླབ་པའི་རྟོག་པ་བསྟན་པའི་ཕྱིར། དེ་ནས་དཔལ་ལྡན་རྡོ་རྗེ་འཛིན། །བསམ་པ་མཆོག་རབ་མགུ་གྱུར་པ། །ཞེས་པ་ལ་སོགས་པ་གསོལ་པ་ཡིན་ཏེ། བདག་གི་སངས་རྒྱས་བཅོམ་ལྡན་འདས་རྣམས་ཀྱི་དགོངས་པ་ཞེས་པ་ནི་ཕྱོགས་བཅུའི་སངས་རྒྱས་ཐམས་ཅད་ཀྱི་ཕྱག་གཡས་པ་བརྐྱང་སྟེ་སྤྱི་བོར་གཞག་སྟེ་བྱིན་གྱིས་བརླབས་པ་ཤེས་པ་ཡིན་ནོ་ཞེས་པའོ། །ཆོས་འདི་རྣམས་ནི་མཚན་ཉིད་མེད། །ཅེས་པ་ནི་ཕུང་པོ་དང་ཁམས་དང་སྐྱེ་མཆེད་ལ་སོགས་པའི་ཆོས་རྣམས་རང་བཞིན་གྱིས་སྟོང་པས་ན་མཚན་མ་དང་བྲལ་པའོ། །ངོ་བོ་ཉིད་མེད་ཅེས་པ་ནི་བདག་དང་བདག་གི་བའི་རང་བཞིན་དུ་ཡོད་པ་མ་ཡིན་ཏེ་ཞེས་པའོ། །གནས་མེད་པ་ནི་ཕ་རོལ་པོ་རྣམས་ཀྱི་ཆ་ཤས་ཅན་ལ་སོགས་པ་ཀུན་གྱིས་གནས་སུ་བརྟགས་པ་དེ་ཡོད་པ་མ་ཡིན་ཞེས་པའོ། །ལས་དང་ཚེ་ལས་རྣམ་གྲོལ་ཏེ། །ཞེས་པ་ནི་ཆོས་རྣམས་ཀྱི་རྒྱུ་དང་འབྲས་བུའི་རང་བཞིན་མེད་ཅེས་པ་སྟེ། དེ་ལྟར་རྒྱུ་དང་འབྲས་བུའི་རང་བཞིན་མེད་པས་མཚན་ཉིད་མེད་པ་ལ་སོགས་པའི་ཚིག་གོང་མ་རྣམས་དང་སྦྱར་རོ། །
རྫོགས་པའི་སངས་རྒྱས་འདྲ་བར་སྤྱོད། །ཅེས་པ་ནི་ཆོས་ཐམས་ཅད་གང་དུ་ཡང་དངོས་པོ་ཡོད་པ་མ་ཡིན་ཏེ། འདུ་ཤེས་ཙམ་དུ་ཟད་དོ་ཞེས་པའོ། །ཐུགས་རྗེ་མངའ་ནི་མཛད་པ་ཡིས། །མགོན་པོ་རྣམས་ཀྱི་ཐབས་ཀྱིས་ནི། །རྣམ་པར་བསྐུལ་ནས་ཆོས་རྣམས་ཀྱི། །མཚན་ཉིད་འདི་དག་རྟོགས་པར་འགྱུར། །ཞེས་པ་ནི་ཆོས་རྣམས་ཀྱི་མཚན་ཉིད་འདི་འདྲ་བ་དེ་བཅོམ་ལྡན་འདས་ཀྱི་ཐུགས་རྗེ་ཆེན་པོའི་ཐབས་ཀྱི་སྒོ་ནས་བྱིན་གྱིས་བརླབས་པས་བདག་གིས་རྟོགས་སོ་ཞེས་པའོ། །དེ་ནས་གསང་བ་པའི་བདག་པོ་ཕྱག་ན་རྡོ་རྗེས་ཆེད་དུ་བརྗོད་པའི་ཚིགས་སུ་བཅད་པ་དེ་སྨྲས་ནས་ཞེས་པ་ནས། སྔགས་པ་རྣམས་ཀྱིས་ནམ་ཞིག་ན། །ལས་དང་ཚེ་ལས་རྣམ་གྲོལ་འགྱུར། །ཞེས་པའི་བར་གྱིས་གསང་བ་པའི་དཀྱིལ་འཁོར་བྲི་བ་དང༌། དཀྱིལ་འཁོར་གསུམ་ཆར་གྱིས་ཆོ་གའི་ལྷག་མ་རྣམས་བྲིས་པ་སྟེ། སློབ་དཔོན་གྱི་ཏིང་ངེ་འཛིན་དང་དབང་བསྐུར་བའི་ཆོག་རྣམས་མ་གཏོགས་པར་དཀྱིལ་འཁོར་གསུམ་ཆར་ཆོག་གཞན་ཐམས་ཅད་མཐུན་པར་ཤེས་པར་བྱའོ། །སྙིང་རྗེ་ཆེན་པོའི་སྙིང་པོ་འབྱུང་བའི་དཀྱིལ་འཁོར་ཆེན་པོ་འདིའི་ཐེ་ཚོམ་བཅད་པའི་ཕྱིར་ཞེས་པ་ནི་དཀྱིལ་འཁོར་གསུམ་ཆར་ཡང་སྙིང་རྗེ་ཆེན་པོ་ལས་འབྱུང་བས་ན་གསང་བའི་དཀྱིལ་འཁོར་ལ་སྙིང་རྗེ་ཆེན་པོའི་སྙིང་པོ་ལས་འབྱུང་བ་ཞེས་བྱའོ། །ཐེ་ཚོམ་བཅད་པ་ནི་འོག་ནས་འབྱུང་བའི་དོན་རྣམས་བཤད་ན་ཆོ་ག་རྣམས་མ་རྫོགས་པས་མ་འོངས་པའི་འགྲོ་བ་རྣམས་ཐེ་ཚོམ་དུ་འགྱུར་ཏེ། དེ་བས་ན་དེ་དག་གི་ཐེ་ཚོམ་བཅད་པའི་ཕྱིར་ཞེས་བྱ་བ་ནི་མ་འོངས་པའི་སྐྱེ་བོ་རྣམས་ལ་བརྟགས་ནས་ཞེས་པ་ལ་སོགས་པས་དངོས་སུ་གསུངས་སོ། །དྲི་བ་འདི་རྣམས་ཀྱི་དོན་ནི་འོག་ནས་ལན་ཞིབ་ཏུ་འབྱུང་བས་ན་དེ་དང་སྦྱར་ཏེ་བྱའོ། །དེའི་འོག་ཏུ་བཅོམ་ལྡན་འདས་ཀྱིས་ཕྱག་ན་རྡོ་རྗེ་ལ་བཤད་པའི་སྐབས་ལ་བབས་པས། དེ་ནས་ཀུན་མཁྱེན་རྫོགས་སངས་རྒྱས། །ཞེས་པ་ལ་སོགས་གསུངས་པ་ཡིན་ནོ། །ཕྱག་ན་རྡོ་རྗེས་དྲིས་པ་རྣམས་ཀྱང་བཅོམ་ལྡན་འདས་ཀྱིས་སྤྱིར་རྣམ་པ་གསུམ་དུ་བསྡུ་བ་མཛད་ནས། སྙིང་རྗེ་ཆེན་པོའི་རྩ་ལས་བྱུང༌། །གསང་བའི་དཀྱིལ་འཁོར་རྣམས་དགོད་པས། །ལྷ་རྣམས་ཀྱི་ནི་གནས་ངེས་པ།།
ཐེག་པ་ཆེན་པོའི་གོ་འཕང་མཆོག །རྫོགས་སངས་རྒྱས་ཀྱི་རབ་གསང་བ། །དཔའ་བོ་ཆེར་བྱུང་ཁྱོད་ཀྱིས་གང༌། །ཡོངས་སུ་དྲིས་པ་དེ་ལེགས་སོ། །ལག་ན་རྡོ་རྗེ་སྟོབས་པོ་ཆེ། །མདོར་ནི་བསྡུས་ནས་བཤད་པར་བྱ། །ཞེས་གསུངས་པ་ཡིན་ཏེ་དེ་ལ། ལྷ་རྣམས་ཀྱི་ནི་གནས་ངེས་པ། །ཞེས་བྱ་བས་ནི་འཇིག་རྟེན་དང་འཇིག་རྟེན་ལས་འདས་པའི་ལྷའི་བྱེ་བྲག་དང་ལྷ་དེ་རྣམས་ཀྱི་ཁ་དོག་ལ་སོགས་པ་དྲིས་པ་དང༌། ལྷ་རྣམས་ཀྱི་གནས་དབང་ཆེན་ལ་སོགས་པའི་དཀྱིལ་འཁོར་དུ་བརྟག་པ་དེ་དག་མདོར་བསྡུས་ཏེ་གསུངས་པའོ། །ཐེག་པ་ཆེན་པོའི་གོ་འཕང་མཆོག །ཅེས་པ་ནི། སྔགས་པ་བྱང་ཆུབ་མཆོག་སེམས་དཔའ། །ཐམས་ཅད་མཁྱེན་པ་ཇི་ལྟར་འགྱུར། །ཇི་ལྟར་བདེན་པ་མཐོང་བར་འགྱུར། །ཞེས་དྲིས་པ་དེ་དག་བསྡུས་ཏེ་གསུངས་པ་ཡིན་ཏེ། གནས་དེ་དག་ནི་བྱང་ཆུབ་ཏུ་གཞོལ་བའི་གོ་འཕང་ཡིན་པས། ཐེག་པ་ཆེན་པོའི་གོ་འཕང་མཆོག ། ཅེས་བྱའོ། །གཞན་རྣམས་ཀྱང་ཐེག་པ་ཆེན་པོའི་གནས་ཡིན་མོད་ཀྱི། གཞན་ལས་འདི་ཉེ་ཞིང་གཙོ་བོ་ཡིན་པའི་ཕྱིར་རོ། །དེ་གཉིས་ལས་གཞན་པ་སློབ་དཔོན་གྱི་མཚན་ཉིད་དང་ཚོན་འགྱེད་པ་ལ་སོགས་པ་ཇི་སྲིད་དྲིས་པ་དེ་དག་ཐམས་ཅད་ནི་གསང་བའི་དཀྱིལ་འཁོར་རྣམས་དགོད་བཞེས་པའི་ནང་དུ་བསྡུས་པར་རིག་པར་བྱའོ། །དེ་ལ་སྐབས་འདིར་གསང་བའི་དཀྱིལ་འཁོར་ཞེས་པ་ནི་དཀྱིལ་འཁོར་གསུམ་ཆར་གྱི་ཆོ་ག་སྤྱིར་བྲིས་པའི་དོན་དེ་དག་ཉིད་དམ་ཚིག་ཅན་མ་ཡིན་པ་ལ་མི་བསྟན་པས་གསང་བ་ཞེས་བྱའོ། །གཞན་ནི་གོང་དུ་སྨོས་པ་བཞིན་ནོ། །ཆེར་འབྱུང་ཞེས་པ་ན་གོང་དུ་དྲིས་པ་དེ་དག་ཐམས་ཅད་བླ་ན་མེད་པའི་བྱང་ཆུབ་ཀྱི་རྒྱུ་ཤ་སྟག་ཡིན་པས་དྲིས་པའི་དོན་དེ་དག་ལ་ཆེན་པོ་འབྱུང་བའི་རྒྱུ་ཞེས་བྱའོ། །སྙིང་རྗེ་ཆེན་པོའི་རྩ་ལས་བྱུང༌། །ཞེས་པ་ནི་དཀྱིལ་འཁོར་དེ་དག་སྙིང་རྗེ་ཆེན་པོ་ལས་བྱུང་བས་དེའི་ཡོ་བྱད་དྲིས་པའི་དོན་དེ་དག་ཀྱང༌། སྙིང་རྗེ་ཆེན་པོའི་རྩ་ལས་བྱུང༌། །ཞེས་བྱའོ། །རྫོགས་སངས་རྒྱས་ཀྱི་རབ་གསང་བ། །ཞེས་པ་ནི་ཐེག་པ་ཆེན་པོའི་གོ་འཕང་མཆོག་ལ་སོགས་པ་དེ་དག་སྣོད་མ་ཡིན་པའི་སེམས་ཅན་རྣམས་ལ་མི་བཤད་པས་རབ་ཏུ་གསང་བ་ཞེས་བྱའོ། །དཀྱིལ་འཁོར་གྱི་ནི་སྔོན་རོལ་དུ། །ཞེས་པ་ནས། གོ་རིམས་བཞིན་
དུ་བཟླས་བརྗོད་བྱ། །ཞེས་པའི་བར་ནི་དཀྱིལ་འཁོར་བྲི་བའི་སྔོན་རོལ་སློབ་དཔོན་གྱིས་བདག་དང་སློབ་མ་སྲུང་བ་ལ་སོགས་པའི་ལས་བྱ་བའི་སྔགས་རྣམས་ལ་ཡུན་དུ་བསྙེན་པ་བྱས་ནས་སོ་སོའི་ལས་ལ་སྦྱར་རོ་ཞེས་གསང་བའི་རྒྱུད་ལ་སོགས་པ་ལས་བྱུང་སྟེ་དེའི་ཕྱིར་དཀྱིལ་འཁོར་བྲི་བའི་སྔོན་རོལ་དུ་རིག་པའི་རྒྱལ་པོའི་བཟླས་པ་བྱ་སྟེ། མཚན་མ་བྱུང་གི་བར་དུ་བཟླས་ན་དེ་དག་ཐམས་ཅད་བསྙེན་པ་བྱས་པར་འགྱུར་རོ། །འདིའི་མཚན་མ་ཡང་དཀྱིལ་འཁོར་གྱི་ལྷའི་རྣམ་པར་གནས་པ་ན་སྔགས་པའི་རྨི་ལམ་དུ་སངས་རྒྱས་དང་བྱང་ཆུབ་སེམས་དཔའ་རྣམས་དཀྱིལ་འཁོར་འདྲི་བའི་ལས་ལ་སོགས་མཐོང་ན་ཞེས་པ་དང་སྦྱར་རོ། །ཡན་ལག་བཅུ་གཉིས་ཚིག་བྱུང་བ། །ཞེས་པ་ནི་ཡི་གེ་འབྲུ་ཡན་ལག་བཅུ་གཉིས་སྔགས་ཀྱི་ཚིག་ཏུ་གྱུར་པ་ལ་ཡང་བྱ་བ་ལ་གཉིས་སུ་ན་ཡིག་འབྲུ་བཅུ་གཉིས་ལས་དོན་དམ་པའི་མཚན་ཉིད་རྟོགས་པར་འགྱུར་བ་ལ་ཡང་བྱ་སྟེ། ཡན་ལག་ཅེས་པ་ནི་ཡི་གེའི་འབྲུའོ། །པཱ་ད་ཞེས་པ་ནི་རྟོགས་པ་ལ་བྱའོ། །རིག་སྔགས་རྒྱལ་པོ་སྟོབས་པོ་ཆེ། །ཞེས་པ་ནི་དོན་དམ་པར་སྟོང་པ་ཉིད་ཀྱི་རང་བཞིན་སྟོན་པར་བྱེད་ལ། ཀུན་རྫོབ་ཏུ་ཡང་སྤྲུལ་པ་ལ་སོགས་པ་བྱེད་པས་ན་མཐུ་ཆེ་བའོ། །གོ་རིམས་བཞིན་དུ་བཟླས་བརྗོད་བྱ། །ཞེས་པ་ནི་རྩ་སྔགས་དང་སྙིང་པོ་དང་ཉེ་བའི་སྙིང་པོ་རིམ་པ་བཞིན་དུ་བཟླས་ཞེས་པའོ། །རང་གི་ཏིང་འཛིན་ལ་གནས་ཏེ། །ཞེས་པ་ནི་སློབ་དཔོན་རང་གི་ཏིང་ངེ་འཛིན་རིགས་གསུམ་གྱི་སྙིང་པོ་གནས་གསུམ་དུ་གཞག་པ་དང༌། དཔའ་བོ་ཆེན་པོའི་སྙིང་པོ་གནས་ལྔར་དགོད་པ་དང༌། ཡན་ལག་ཐམས་ཅད་དུ་ཡི་གེ་དགོད་པ་ཡང་རུང་བའི་ཏིང་ངེ་འཛིན་ལ་གནས་ནས་བཟླས་པར་བྱའོ་ཞེས་པའོ། །སོ་སོའི་ལས་རྣམས་འདོད་པ་ཡིས། །ཚུལ་ཞེས་པས་ནི་ཅི་རིགས་པར། །ཞེས་པ་ནི་དེ་ལྟ་བུའི་རིམ་པས་སྔོན་དུ་བསྙེན་པ་བྱས་ནས་བདག་དང་གནས་དང་སློབ་མ་སྲུང་བ་ལ་སོགས་པའི་སྔགས་རྣམས་ཇི་ལྟར་རིགས་པར་སྦྱོར་རོ་ཞེས་པ་སྟེ། རིག་པའི་རྒྱལ་པོ་འདི་སྔོན་དུ་བསྙེན་པ་བྱ་བ་ཡང་དཀྱིལ་འཁོར་གསུམ་ག་དང་འབྲེལ་པར་ཤེས་པར་བྱའོ། །གསང་སྔགས་ཕྱག་རྒྱ་རྟོགས་ཤེས་པའི། །ཞེས་པ་ནས།
རྗེས་སུ་གནང་ཞིང་དབང་ཡང་བསྐུར། །ཞེས་པའི་བར་གྱིས་སློབ་དཔོན་གྱི་མཚན་ཉིད་དང་བྱེ་བྲག་བཤད་པ་སྟེ། དེ་ཡང་སྤྱིའི་མཚན་ཉིད་དང་བྱེ་བྲག་བཤད་པའོ། །དེ་ལ་སྤྱིའི་མཚན་ཉིད་ནི་ཡིད་བྱང་ཆུབ་ཀྱི་སེམས་ལ་ཞུགས་པ་ཞེས་པ་དང༌། ཐེག་པ་གསུམ་གྱི་ཁྱད་པར་ཤེས་པ་ལ་སོགས་པས་སྔར་བཤད་ཟིན་ཏོ། །འདིར་ནི་ཟབ་ཅིང་རྒྱ་ཆེ་བ་ལ་མོས་པ་དང༌། དམིགས་པ་ཅན་གྱི་བྱེ་བྲག་བཤད་པ་སྟེ། །དེ་བས་ན། ཟབ་དང་མི་ཟབ་བྱེ་བྲག་ལས། །དེ་ཡི་མཚན་ཉིད་ཤེས་པར་བྱ། །ཞེས་བྱ་བ་ལ་སོགས་པ་གསུངས་སོ། །གསང་སྔགས་ཕྱག་རྒྱ་རྟོགས་ཤེས་པའི། །ཞེས་པ་ནི་སློབ་དཔོན་ཉིད་ཀྱི་སྤྱིའི་མཚན་ཉིད་དེ། ཕྱག་རྒྱ་དང་སྔགས་རྣམས་གཞུང་ལས་ཇི་སྐད་བཤད་པ་བཞིན་ཤེས་པར་བྱའོ། །ཟབ་མོ་རྒྱ་ཆེར་ཤེས་པར་བྱ། །ཞེས་པ་ནས། མཐོང་བའི་ཆོས་ནི་རྣམ་པར་སྤངས། །ཞེས་པའི་བར་ནི་ཟབ་ཅིང་རྒྱ་ཆེ་བ་ལ་མོས་པའི་སློབ་དཔོན་གྱི་བྱེ་བྲག་སྟེ། ཟབ་མོ་ནི་སྟོང་པ་ཉིད་དམིགས་སུ་མེད་པ་ལ་མོས་པས་དེའི་སེམས་ཀྱི་རྒྱུད་སུས་ཀྱང་རིག་པར་མི་ནུས་ཏེ་དཔག་པར་དཀའ་ཞེས་པའོ། །རྒྱ་ཆེ་བ་ནི་དོན་དམ་པར་ཆོས་ཐམས་ཅད་སྟོང་པ་ཉིད་ནམ་མཁའི་རང་བཞིན་ལྟ་བུར་རྟོགས་ལ་ཀུན་རྫོབ་ཏུ་ཡང་སྒྱུ་མ་དང་སྨིག་རྒྱུ་ལྟ་བུར་ཤེས་ནས་ཚོད་པ་ལ་སོགས་པ་རྒྱ་ཆེན་པོ་ལ་སྦྱོར་པའོ། །ལུས་ཅན་རྣམས་ནི་ཡིད་མི་རྟོན། །ཞེས་པ་ནི་ལུས་ཅན་རྣམས་དང་སྤྱོད་ལམ་མི་མཐུན་པས་གཅིག་ལ་གཅིག་ཡིད་མི་རྟོན་པའོ། །སངས་རྒྱས་རྣམས་ཀྱི་སྲས་མཆོག་སྟེ། །ཞེས་པ་ནི་སངས་རྒྱས་ཀྱི་སྤྱོད་པ་དང་རྗེས་སུ་མཐུན་པའི་ཕྱིར་ཏེ། །འཇིག་རྟེན་ན་ཡང་པའི་སྤྱོད་པ་དང་མི་འགལ་བར་སྤྱོད་པ་ནི་བེའུ་མཆོག་ཅེས་བྱའོ། །མཐོང་བའི་ཆོས་ནི་རྣམ་པར་སྤངས། །ཞེས་པ་ནི་འཇིག་རྟེན་ཀུན་རྫོབ་ཀྱི་ཆོས་རྣམས་ལ་མ་ཆགས་པ་ཞེས་པའོ། །གཉིས་པ་མཐོང་བའི་ཆོས་རྣམས་ཀྱིས། །ཞེས་པ་ནས། རྗེས་སུ་གནང་ཞིང་དབང་ཡང་བསྐུར། ཞེས་པའི་བར་སློབ་དཔོན་དམིགས་པ་ཅན་གྱི་བྱེ་བྲག་སྟེ། མཐོང་བའི་ཆོས་རྣམས་ཀྱིས། །མྱོས་པར་འགྱུར་བ་དམིགས་པ་ཅན། །ཞེས་པ་ནི་ཐོས་པ་དང་བསམ་པའི་ཤེས་རབ་ཀྱིས་སྔགས་ཀྱི་རྒྱུད་ལ་སོགས་པ་ཐོས་ཤིང་བསམ་པའི་ཤེས་རབ་ཀྱིས་སྟོང་པའི་རང་
བཞིན་དུ་མོས་སུ་ཟིན་ཀྱང་བསྒོམ་པའི་ཤེས་རབ་ཀྱིས་གོམས་པར་ནུས་པས་ཕྱི་རོལ་གྱི་སྤྱོད་པ་རྣམས་ལ་མོས་པར་འགྱུར་ཏེ། དེས་འཇིག་རྟེན་པའི་དཀྱིལ་འཁོར་ཚོན་ལ་སོགས་པས་བྲི་བར་བཅོམ་ལྡན་འདས་ཀྱིས་དབང་བསྐུར་ཞིང་ལུང་སྩལ་ཏོ་ཞེས་པའོ། །འཇིག་རྟེན་པའི་དཀྱིལ་འཁོར་ནི་ཚོན་ལ་སོགས་པས་བྲིས་ནས་འཇིག་རྟེན་པ་རྣམས་ཀྱི་ལྟ་བའི་སྤྱོད་ཡུལ་དུ་གྱུར་པས་འཇིག་རྟེན་པའི་དཀྱིལ་འཁོར་ཞེས་བྱའི་མུ་སྟེགས་པ་ལ་སོགས་པའི་དཀྱིལ་འཁོར་ལ་ནི་མི་བྱའོ། །དེ་བས་ན་སློབ་དཔོན་དམིགས་པ་ཅན་གྱིས་ཕྱི་རོལ་གྱི་ཚོན་ལ་སོགས་པས་དཀྱིལ་འཁོར་བྲི་བར་དབང་བསྐུར་གྱི། །སེམས་དབང་དུ་མ་གྱུར་པས་ཡིད་ཀྱི་དཀྱིལ་འཁོར་བྲི་བར་ནི་དབང་མི་བསྐུར་རོ། །ཟབ་ཅིང་རྒྱ་ཆེ་བ་ལ་མོས་པའི་སློབ་དཔོན་དེ་ནི་ཕྱིའི་དཀྱིལ་འཁོར་དང་ནང་གི་དཀྱིལ་འཁོར་གཉིས་ཀ་བྲི་བར་དང་བསྐུར་ཏེ། ཕྱི་རོལ་གྱི་སྤྱོད་པ་རྣམས་ལ་མ་ཆགས་ཤིང་སེམས་དབང་དུ་གྱུར་པས་ནང་གི་དཀྱིལ་འཁོར་བྲི་བར་དབང་བསྐུར་ཏེ། སློབ་མ་རྣམས་ཀྱི་ཡིད་དང་སྦྱར་བའི་ཕྱིར་ཕྱི་རོལ་གྱི་དཀྱིལ་འཁོར་ཡང་བྲི་བར་གསུངས་སོ། །དུས་དང་དུས་མིན་བྱེ་བྲག་ལས། །ཞེས་བྱ་བ་ནས། སློབ་མ་དེ་ནི་རྒྱལ་བའི་མཆོག །ཅེས་བྱ་བའི་བར་གྱིས་སློབ་མའི་བྱེ་བྲག་བཤད་དེ། དུས་དང་དུས་མིན་བྱེ་བྲག་ལས། །ཞེས་པ་ལས་སྤྱིར་སློབ་མ་རྣམ་པ་བཞི་ལས་སློབ་མ་ཁ་ཅིག་སྔགས་ཀྱི་རྒྱུད་ལ་སོགས་པ་ཐོས་ཤིང་ཤེས་ལ། བྱང་ཆུབ་ཀྱི་སེམས་ཀྱང་བསྒོམས་པ་ནི་དཀྱིལ་འཁོར་དུ་བཅུག་པ་ཉིད་ཀྱི་ཚེ་ན་སྒྲུབ་པར་དབང་བསྐུར་ལ་སློབ་དཔོན་དམིགས་པ་ཅན་གྱིས་མཚན་ཉིད་དང་ལྡན་ན་བྱང་ཆུབ་སེམས་དང་མི་ལྡན་ཡང་དེ་ཉིད་ཀྱི་ཚེ་ན་སློབ་དཔོན་དུ་དབང་བསྐུར་བར་བྱ་སྟེ། དེ་དག་ནི། གཅིག་ནི་དེ་ཡི་མོད་ལ་བསྒྲུབ། །ཅེས་པའོ། །གཞན་ནི་སྔགས་ཀྱི་རྒྱུད་ལ་སོགས་པ་ཐོས་ཤིང་ཤེས་ཀྱང་བྱང་ཆུབ་ཀྱི་སེམས་མ་བསྒོམས་ན་སྒྲུབ་པར་དབང་བསྐུར་དུ་མི་རུང་སྟེ། དཀྱིལ་འཁོར་དེར་བཅུག་ནས་བྱང་ཆུབ་ཀྱི་སེམས་བསྒོམ་པའི་ཐབས་བསྟན་ཏེ། བྱང་ཆུབ་ཀྱི་སེམས་གོམས་པར་གྱུར་པ་ནི་ཕྱིས་བསྒྲུབ་པར་བྱ་བ་ནི་དུས་གཉིས་པར་བསྒྲུབ་པའོ། །དེ་བཞིན་དུ་སློབ་དཔོན་དབང་བསྐུར་བ་དོན་དུ་གཉེར་ན་ཡང་སྔགས་ཀྱི་རྒྱུད་ལ་སོགས་པ་མི་ཤེས་ན་དེར་དབང་མི་བསྐུར་བར་སྔགས་
ཀྱི་རྒྱུད་ལ་སོགས་པ་རྫོགས་པར་སློབ་ཏུ་བཅུག་སྟེ་སློབ་དཔོན་གྱི་མཚན་ཉིད་དང་ལྡན་པ་ན་སློབ་དཔོན་དུ་དབང་བསྐུར་བ་ཡང་དུས་གཉིས་པར་བསྒྲུབ་པའོ། །དེ་ལ་ཁ་ཅིག་སྔ་ནས་ཀྱང་རྒྱུད་ལ་སོགས་པ་མི་ཤེས་ཤིང་བྱང་ཆུབ་ཀྱི་སེམས་ཀྱང་མ་བསྒོམས་ཕྱིས་ཀྱང་མི་སློབ་ལ་བསྒོམ་པར་མི་འགྱུར་བ་ནི་དཀྱིལ་འཁོར་དུ་གཟུང་བ་ཙམ་ལས་དུས་གཉིས་པར་ཡང་སློབ་དཔོན་དུ་སྒྲུབ་པར་དབང་མི་བསྐུར་བར་ནི་གཉིས་ཀར་མིན་ཞེས་པའོ། །མཚན་ཉིད་ཐམས་ཅད་རྫོགས་པ་ཡིས། །སློབ་མ་དེ་ནི་རྒྱལ་བའི་མཆོག །ཅེས་པ་ནི། རྒྱུད་ལ་སོགས་པ་ཡང་རྫོགས་པར་ཤེས། །བྱང་ཆུབ་སེམས་ཀྱང་ཚུལ་བཞིན་དུ་བསྒོམ་པ་ཞིག་གིས་བསོད་ནམས་སྤེལ་བའི་ཕྱིར་དཀྱིལ་འཁོར་དུ་ཞུགས་པ་དེ་ཡང་སློབ་མའི་གྲངས་སུ་ཡང་གཏོགས་ཏེ། དེ་ནི་དབང་ལ་སོགས་པ་བསྐུར་བས། །འདིར་དབང་ལ་སོགས་པ་གདོད་བསྐུར་མི་དགོས་ཏེ། དེ་ནི། མཚན་ཉིད་ཐམས་ཅད་རྫོགས་པ་ཡིས། །ཞེས་པའོ། །ས་ནི་དང་པོར་ཤེས་བྱ་བ། །ཞེས་པ་ནས། དེ་བས་རྟོག་པ་རྣམ་སྤངས་ནས། །ས་ཀུན་རྣམ་པར་སྦྱང་བར་བྱ། །ཞེས་པའི་བར་གྱིས་ས་སྦྱང་བ་བཤད་དེ། ཕྱི་ནང་གི་རྣམ་པ་གཉིས་ལས། །ཕྱིའི་ས་སྦྱང་བ་ནི་སྔར་བཤད་ཟིན་ཏོ། །འདིར་ནང་གི་ས་སྦྱང་བ་བཤད་དེ། །སེམས་ཀྱི་སར་ནི་བཤད་པ་ཡིན། །ཞེས་པ་ནི། སྤྱད་པ་སྔར་ནི་བསྟན་པ་སྟེ། །ཞེས་པ་ནི་སྔར་བྱང་ཆུབ་ཀྱི་སེམས་ནི་རང་གི་སེམས་ཡང་དག་པ་ཇི་ལྟ་བ་བཞིན་དུ་ཤེས་པ་ཞེས་ནང༌། རྣམ་པར་རམ། ཁ་དོག་ཏུའམ། དབྱིབས་སུ་འམ་ཞེས་པ་ནས་རྣམ་པ་ཐམས་ཅད་ཀྱི་བར་དུ་ཡོངས་སུ་བཙལ་ཀྱང་མི་དམིགས་པ་ཡིན་ཏེ་ཞེས་པ་ལ་སོགས་པའི་བར་དུ་བཤད་པ་དེའི་ཚུལ་དུ་ཏིང་ངེ་འཛིན་དག་པ་དང༌། རྣམ་པ་ཐམས་ཅད་སྤངས་པ་དང༌། །རྣམ་པར་རྟོག་པ་དང་བྲལ་བས་ན། །སེམས་ཀྱི་དྲི་མ་དག་པ་སྟེ། །དེ་ལྟར་དག་པར་བྱས་ནས་ཕྱི་རོལ་གྱི་དཀྱིལ་འཁོར་རམ། ནང་གི་དཀྱིལ་འཁོར་གང་ཡང་རུང་བ་བྲི་བར་བྱའོ་ཞེས་པའོ། །དེ་ཡིས་དེ་ནི་ཡོངས་སུ་སྤངས། །ཞེས་པ་ནི་སྔར་བྱང་ཆུབ་ཀྱི་སེམས་སྦྱང་བར་བཤད་པར་དེས་སེམས་ཀྱི་སྦྱང་བར་བྱའོ་ཞེས་པའོ། །ནམ་ཞི་ཉེ་པ་དང་བྲལ་ནས། །སེམས་ཀྱིས་ནི་མི་འཇིགས་པ། །ཞེས་པ་ནི་ཇི་ལྟར་ཕྱི་རོལ་གྱི་སའི་
ཉེས་པར་རུས་པ་དང་རྡོ་བ་ལ་སོགས་པ་མེད་པ་བཞིན་དུ་འདིར་ཡང་རྣམ་པར་རྟོག་པ་ལ་སོགས་པ་དང༌། འདོད་ཆགས་ལ་སོགས་པའི་ཉོན་མོངས་པ་རྣམས་དང་བྲལ་ན་བགེགས་ལ་སོགས་པ་ས་མི་འཇིགས་ཞེས་བྱའོ། །དེ་བས་ན། དེ་ཚེ་དེ་ནི་དག་པ་སྟེ། །ཉེས་པ་ཐམས་ཅད་རྣམ་པར་སྤངས། །མངོན་པར་བྱང་ཆུབ་མཐོང་བས་ན། །དེ་ལྟར་དེ་ནི་བསྟན་ཞེས་བྱ། །ཞེས་གསུངས་པ་ཡིན་ནོ། །དེ་ལས་གཞན་དུས་སྤྱོད་པ། །ཞེས་པ་ནས། བྱང་ཆུབ་སེམས་ཀྱིས་སྤྱང་བྱ། །ཞེས་པའི་བར་གྱིས་ཕྱི་རོལ་གྱི་ས་རྣམས་ས་སྦྱངས་པ་ན་ཡང་བྱང་ཆུབ་ཀྱི་སེམས་དང་མི་ལྡན་པར་རྟོག་པ་ལ་གནས་ཏེ། སྦྱངས་ན་མི་འདག་གོ །དེ་ལས་གཞན་དུ་ཞེས་པ་གང་གི་ནང་དུ་སྤྱང་བ་ལས་གཞན་པ་སྟེ་ཕྱིའི་ས་ལ་བྱའོ། །སྔགས་པ་རྟོག་པ་ལ་གནས་ནས་སུ། །ཞེས་པ་ནི་ཕུང་པོ་དང་ཁམས་དང་སྐྱེ་མཆེད་ལ་སོགས་པའི་དངོས་པོ་ཡོད་པར་རྟོག་སྟེ། སྦྱང་བར་བྱ་བའི་ས་དང༌། །རུས་པ་ལ་སོགས་པའི་ཉེས་པ་ཡང་དངོས་པོ་ཡོད་པར་རྟོག་ཅིང་ས་དེ་སྤྱོད་ན་དེ་བྱང་ཆུབ་ཀྱི་སེམས་དང་མི་ལྡན་པས་དེ་དག་པར་འགྱུར་བ་མ་ཡིན་ཞེས་པ་སྟེ། དེ་བས་རྟོག་པ་རྣམ་སྤངས་ནས། །ས་ཀུན་རྣམ་པར་སྦྱང་བར་བྱ། །ང་ཡིས་དཀྱིལ་འཁོར་རྣམས་ཀྱི་ནི། །ཆོ་ག་རྒྱས་པར་གང་བསྟན་པ། །དེ་དག་ཐོག་མར་བསྟན་པ་ནི། །ཞེས་བྱ་བ་གསུངས་པ་ཡིན་ཏེ། བྱང་ཆུབ་ཀྱི་སེམས་སྔོན་དུ་བསྒོམ་པ་ཡང་སློབ་དཔོན་གྱི་མཚན་ཉིད་མང་པ་ལས་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ལ་རྟག་ཏུ་མཁས་པ་ཐེག་པ་གསུམ་གྱི་ཁྱད་པར་ཤེས་པ་ཞེས་བྱ་བ་ལ་སོགས་པ་གསུངས་པའི་ཕྱིར། ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ལ་མཁས་པ་ནི་སྟོང་པ་ཉིད་ཀྱི་རང་བཞིན་ལ་མཁས་པར་མངོན་པར་སྔོན་དུ་བྱང་ཆུབ་ཀྱི་སེམས་བསྒོམ་པར་རིག་པར་བྱའོ། །ཐེག་པ་གསུམ་གྱི་ཁྱད་པར་ཤེས་པས་ཀྱང་སྟོང་པ་ཉིད་ལ་མཁས་པར་མངོན་ཏེ། གང་ཟག་དང་ཆོས་ལ་བདག་མེད་པའི་ཁྱད་པར་ལ་མཁས་པའི་ཕྱིར་རོ། །དཀྱིལ་འཁོར་གྱི་ལས་འདི་རྣམས་ཐམས་ཅད་ཀྱང་བྱ་བ་བྱས་པའི་སློབ་དཔོན་གྱི་མཚན་ཉིད་དེ་ལྟ་བུ་དང་ལྡན་པས་ས་སྦྱང་བར་བྱ་བས་ན་རྟོག་པ་འབའ་ཞིག་ལ་མི་གནས་གྱི།
བྱང་ཆུབ་ཀྱི་སེམས་དང་ལྡན་པས་འཇིག་རྟེན་པ་རྣམས་ཀྱི་སེམས་དང་སྦྱར་བའི་ཕྱིར། ཕྱི་རོལ་གྱི་ས་རྣམས་སྦྱང་བ་རྒྱ་ཆེར་བཤད་པའི་བཅོམ་ལྡན་འདས་གྱི་དགོངས་པ་དེ། རྨོངས་པ་རྣམས་ཀྱིས་མི་ཤེས་ཏེ། །གང་གིས་དེ་ལྟ་བུའི་རྟོག་པ་མ་སྤངས་པ་དེ་ནི་སངས་རྒྱས་དང་ཐམས་ཅད་མཁྱེན་པའི་རྒྱུར་མི་འགྱུར་རོ། །དེ་བས་ན། འཇིག་རྟེན་འདི་ན་སངས་རྒྱས་སྨིན། །ཞེས་བྱ་བ་ལ་སོགས་པ་གསུངས་ལ། སློབ་མ་རྣམས་ལ་ནན་ཏན་དུ། །བྱང་ཆུབ་སེམས་ཀྱི་སྦྱང་བ་སྟེ། །དེ་ཡང་སྨོན་པ་བྱང་ཆུབ་ཀྱི་སེམས་དང༌། འཇུག་པ་བྱང་ཆུབ་ཀྱི་སེམས་སྦྱང་བ་གཉིས་འཇུག་པ་བྱང་ཆུབ་ཀྱི་སེམས་སྔར་བསྒོམས་ན་དེ་སྦྱངས་པ་ཡིན་པས་ཕྱིས་དཀྱིལ་འཁོར་དུ་འཇུག་ཀར་སྨོན་པ་བྱང་ཆུབ་ཀྱི་སེམས་སྦྱིན་པར་བྱ་སྟེ། གཉིས་པོ་དེ་དག་ས་སྦྱང་བའོ། །དེ་སྟེ་སྔར་འཇུག་པའི་བྱང་ཆུབ་ཀྱི་སེམས་གོམས་པར་མ་བྱས་ན་དཀྱིལ་འཁོར་དུ་འཇུག་པའི་ཚེ་སྨོན་པ་བྱང་ཆུབ་ཀྱི་སེམས་སྦྱིན་ལ། ཕྱིས་འཇུག་པ་བྱང་ཆུབ་ཀྱི་སེམས་བསྒོམ་དུ་གཞུག་སྟེ་དེ་ནི་སློབ་མ་རྣམས་ཀྱི་བྱང་ཆུབ་ཀྱི་སེམས་ཀྱི་སྦྱོང་བའོ། །སྲུང་བ་མི་གཡོ་མགོན་པོ་འམ། །ཁམས་གསུམ་རྣམ་པར་རྒྱལ་བས་བྱ། །ཞེས་པ་ནི་སློབ་མ་རྣམས་ཀྱི་སྲུང་བ་གསུངས་པ་སྟེ། སློབ་མ་རྣམས་ཐོག་མ་ནང་དུ་འོང་བའི་ཚེ་སྲུང་བ་དང༌། ལྷག་པར་གནས་པའི་ཚེ་སྲུང་བ་ལ་སོགས་པ་ཐམས་ཅད་གཉིས་པོ་འདི་དག་གང་ཡང་རུང་བས་སྲུང་ངོ་ཞེས་སོ། །སློབ་མ་ནམ་ཞིག་དམིགས་པ་ཡིས། །ནམ་ཡང་གཡོས་པར་མི་འགྱུར་བ། །དེ་ཚེ་དྲི་མེད་ན་ནམ་མཁའ་བཞིན། །ཡང་དག་པར་ནི་དག་པར་འགྱུར། །ཞེས་པས་ནི་སློབ་མ་དག་པའི་མཚན་ཉིད་གསུངས་ཏེ། དེ་ཡང་ནམ་སློབ་མ་དེ་རྣལ་འབྱོར་ལ་གནས་པའི་ཚེ་ཏིང་ངེ་འཛིན་དག་པ་དང༌། རྣམ་པར་རྟོག་པ་སྤངས་པ་དང༌། །རྣམ་པ་དང་བྲལ་བ་སྟེ། དགེ་བ་དང་མི་དགེ་བ་གཉིས་ཀ་ལ་དམིགས་པས་མི་གཡོས་པ་དང་རྣལ་འབྱོར་ལས་ལངས་ནས་ཀྱང་མཆོད་པ་ལ་སོགས་པའི་དགེ་བ་ནི་སྤྱོད་ཀྱི་འདོད་ཆགས་ལ་སོགས་པའི་ཡུལ་གྱི་དམིགས་པས་མི་གཡོ་བར་འགྱུར་ན་དེ་དག་པའི་མཚན་ཉིད་དོ་ཞེས་པའོ། །དེ་ཚེ་དྲི་མེད་ནམ་མཁའ་བཞིན། །ཞེས་པ་ནི་ཇི་ལྟར་ནམ་མཁའ་གང་གིས་
ཀྱང་མ་བསྡུས་པས་རང་བཞིན་གྱིས་དང་བ་དང༌། གློ་བུར་གྱི་སྤྲིན་ལ་སོགས་པས་ཆོད་ན་ཡང་ནམ་མཁའ་དེ་རང་བཞིན་དག་པ་ལས་ཉམས་པར་མི་འགྱུར་བ་བཞིན་དུ། འདི་ཡང་ཏིང་ངེ་འཛིན་ལ་གནས་པའི་ཚེ་དགེ་བ་དང་མི་དགེ་བ་ལ་སོགས་པའི་དྲི་མ་གཉིས་མེད་པ་དང༌། ཏིང་ངེ་འཛིན་ལས་ལངས་པའི་ཚེ་མཆོད་པ་ལ་སོགས་པའི་སྤྱོད་པ་བྱེད་ཀྱང་སྒྱུ་མ་ལ་སོགས་པའི་རང་བཞིན་དུ་ཤེས་བཞིན་དུ་བྱེད་དེ། དངོས་པོ་ཡོད་པར་རྟོག་པའི་དྲི་མས་མི་གོས་པའི་ཕྱིར། །ས་བྱིན་བརླབ་པ་དང་པོ་ནི། །རྫོགས་སང་རྒྱས་ཀྱིས་བྱ་བར་བཤད། །གཉིས་པ་སེམས་ཀྱི་དབང་གིས་ཏེ། །འདིར་ནི་གཞན་གྱིས་མི་བྱའོ། །ཞེས་པ་ནི། སྔར་སྙིང་རྗེ་ཆེན་པོས་ས་ཡོངས་སུ་གཟུང་བའི་ཚེ་དཀྱིལ་འཁོར་གྱིས་སྦྱང་བ་དེར་སངས་རྒྱས་ལྔ་བསམ་པ་ལ་སོགས་པ་གསུངས་པ་དེ་ཉིད་འདིར་གླེང་ནས་རིམ་པ་བཞིན་དུ་བཤད་པ་སྟེ། དཀྱིལ་འཁོར་གྱི་ས་དེ་དང་པོར་སངས་རྒྱས་བཅོམ་ལྡན་འདས་རྣམས་དེར་བསམས་ནས་བྱིན་གྱིས་བརླབ། དེའི་འོག་ཏུ་སེམས་ཀྱིས་བདག་གི་བར་གཟུང༌། །དེའི་འོག་ཏུ་སྔགས་ཀྱིས་བསྲུང་བ་སྟེ། །དེ་གསུམ་གྱིས་ཡོངས་སུ་གཟུང་གི་དེ་ལས་གཞན་དུ་མ་ཡིན་ཞེས་པའོ། །སྲད་བུ་རྣམ་བཞི་བཤད་དེ། །ཞེས་པ་ནས། ལྔ་པ་ནམ་མཁའ་ལྟ་བུར་བཤད། །ཅེས་པའི་བར་ནི་སྔར་ཚོན་སྣ་ལྔའི་སྲད་བུ་ཞེས་སྤྱིར་བཤད་པ་དེ་ཚོན་སྣ་ལྔ་གང་ཡིན་པའི་མིང་མོས་ནས་གསལ་བར་བཤད་པའོ། །བར་སྣང་ལ་ནི་བཟུང་ནས་སུ། །དེར་ནི་དཀྱིལ་འཁོར་བརྟག་པར་བྱ། །ཞེས་པ་ནི་དཀྱིལ་འཁོར་སྔ་མ་ལ་ལྟེ་པའི་ཐད་ཀར་སྲད་བུ་གཟུང་ཞེས་སྤྱིར་གསུངས་ཀྱི། དེར་དཀྱིལ་འཁོར་བྲི་བར་མ་བཤད་པ་དེ་ཉིད་བར་སྣང་ལ་སྲང་བུ་གཟུང༌། བར་སྣང་དེར་དཀྱིལ་འཁོར་བྲིའོ་ཞེས་གསལ་བར་བཤད་པ་ཡིན་ནོ། །སྲང་བུ་དག་ནི་གཉིས་པ་ཡིས། །ས་ལ་དཀྱིལ་འཁོར་དགོད་པར་བྱ། །ཞེས་པ་ནི་སྔར་སྲད་བུ་གཉིས་པ་བླངས་ནས་ཁ་ཤར་ཕྱོགས་སུ་བལྟ་ཞེས་པ་ལ་སོགས་པ་སྤྱིར་སྨོས་ཀྱི། དཀྱིལ་འཁོར་ཉིད་གང་དུ་བྲི་བ་ཞིབ་ཏུ་བཤད་པ་དེ་ཉིད་གསལ་བར་གསུངས་པ་ཡིན་ཏེ། བར་སྣང་ལ་བྲིས་པའི་འོག་ཏུ་སྲང་བུ་གཉིས་པ་བླངས་པ་དེས་ས་ལ་དཀྱིལ་འཁོར་བྲིའོ་ཞེས་པའོ། །སངས་
རྒྱས་རྣམས་ནི་ཐམས་ཅད་དང༌། །དེའི་སྲས་བློ་ཅན་རྣམས་ཀྱི་གདན། །པདྨ་ཡིད་ལས་བྱུང་བའི་མཆོག །བཀྲ་ཤིས་འཇིག་རྟེན་རྣམས་ཀྱིས་བསྔགས། །ཞེས་པ་ནི་གདན་པདྨ་དཀར་པོས་བྱའོ་ཞེས་པ་སྟེ། ཡིད་ལས་བྱུང་བའི་མཆོག །ཅེས་པ་ནི་སྔར་བཟླས་པའི་ཡན་ལག་བཞི་བཤད་པའི་ཚེ་སྙིང་གར་པདྨ་དཀར་པོ་བསམ་པར་བཤད་ལ། འདིར་པདྨ་དཀར་པོ་ཞེས་བཤད་པས་ཡིད་ལས་བྱུང་བའི་པདྨ་སྨོས་པས་ནི་ཡིད་ཀྱིས་བསམ་པའི་པདྨ་དཀར་པོ་དེ་དང་འདྲ་བའི་གང་ན་བྱའོ། །རང་རྒྱལ་དང་ནི་དགྲ་བཅོམ་པ། །ཕྱོགས་གཅིག་ཤེས་པར་གང་གྲགས་པ། །དེ་དག་སྟན་ཤེས་བྱ་བ། །པདྨ་ལས་བྱུང་འདབ་མའོ། །ཞེས་པ་ནི་ཉན་ཐོས་དང་སངས་རྒྱས་ཡེ་ཤེས་ཕྱོགས་གཅིག་པ་དང་ལྡན་པ་རྣམས་ཀྱི་སྟན་པདྨ་དཀར་པོའི་འདབ་མ་གཅིག་སྟེང་དུ་བྱ་ཞེས་པའོ། །འཇིག་རྟེན་གྱི་ནི་ལྷ་རྣམས་གང༌། །ཞེས་པ་ནས། རྒྱལ་པོ་རྣམས་ཀྱིས་རབ་བསྔགས་པའོ། །ཞེས་པའི་བར་དུ་འཇིག་རྟེན་གྱི་ལྷ་ཚངས་པ་ལ་སོགས་པ་རྒྱལ་པོའི་གཟུགས་ཅན་དེ་དག་འདོད་ཆགས་དང་བཅས་པ་ཡིན་པས་སྟན་གྱི་པདྨ་དཀར་པོར་བཤད་པ་ཡིན་ནོ། །ཕལ་པ་རྣམས་ཀྱི་ཅི་རིགས་པར། །ས་ཡི་བྱེ་བྲག་དག་ལས་བསམ། །ཞེས་པ་ནི་འཇིག་རྟེན་པའི་འཁོར་ཕལ་བ་རྣམས་བླ་མའི་དྲུང་ན་བླ་མ་དང་འདྲ་བར་པདྨའི་སྟན་མི་རིགས་པས་དེ་ལས་དམའ་བའི་སྟན་རྣམས་གང་རིགས་བྱའོ་ཞེས་པ་སྟེ། ཉན་ཐོས་དང་རང་སངས་རྒྱས་དང་འཇིག་རྟེན་པའི་ལྷ་རྣམས་ཀྱི་སྟན་འདིར་བཤད་པ་ཡང་འདི་རྣམས་དཀྱིལ་འཁོར་འདིར་མ་སྨོས་པས་ཞར་ལ་བཤད་པར་ཤེས་པར་བྱའོ། །དཀྱིལ་འཁོར་བར་མ་ལ་གཤིན་རྗེ་ལ་སོགས་པ་འཇིག་རྟེན་གྱི་ལྷ་རྣམས་སྨོས་པ་ཡང་དེ་བཞིན་གཤེགས་པའི་སྐུ་ལས་སྤྲུལ་པ་ཤ་སྟག་ཡིན་པས་པདྨའི་གདན་ཉིད་དུ་རིགས་པར་བྱའི་འཇིག་རྟེན་པ་ཕལ་པ་རྣམས་ཀྱི་ནི་མ་ཡིན་ནོ། །མཆོད་པ་རྣམ་བཞིར་ཤེས་བྱ་སྟེ། །ཞེས་པ་ནས། དེ་ལས་གཞན་པ་འཇིག་རྟེན་པའི་ལྷ་རྣམས་ལ་ནི་གོ་རིམས་བཞིན་ཞེས་པའི་བར་གྱིས་མཆོད་པ་རྣམས་བཤད་པ་སྟེ། དེ་ལ་སྤྱིར་མཆོད་པ་རྣམས་པ་བཞི་སྟེ། །ཐལ་མོ་སྦྱར་བ་དང༌། བྱམས་པ་དང༌། སྙིང་རྗེ་དང་མེ་ཏོག་དང་བདུག་པ་ལ་སོགས་པ་དང་ཡིད་ཀྱི་མཆོད་པའོ། །དེ་ལ་སྔགས་པ་ཟབ་ཅིང་
རྒྱ་ཆེ་བ་ལ་མོས་པའི་མཆོད་པ་འདི་བཞི་ཆར་སྤྱོད་དེ་ཡིད་ཀྱི་མཆོད་པ་ཡང་བྱེད། ཕྱི་རོལ་གྱི་མཆོད་པ་ཡང་བྱེད་དོ། །དམིགས་པ་ཅན་གྱི་སྔགས་པས་ནི་ཕྱི་རོལ་གྱི་མཆོད་པ་རྣམས་བྱེད་ཀྱི། ཏིང་ངེ་འཛིན་ནི་མི་ཁུག་པས་ཡིད་ཀྱི་མཆོད་པ་མེད་དོ། །བྱམས་པ་དང་སྙིང་རྗེ་ནི་ནན་ཏན་གྱི་མཆོད་པ་སྟེ། ཕྱི་དང་ནང་གི་མཆོད་པ་གང་ཡང་རུང་བ་བྱས་ནས་སེམས་ཅན་རྣམས་ལ་བྱམས་པ་དང་སྙིང་རྗེ་བསྐྱེད་ནས་མཆོད་པ་དེ་དག་ཉིད་སེམས་ཅན་རྣམས་ལ་བསྔོ་བར་བྱེད་པའོ། །དེ་ལ་ཕྱི་རོལ་གྱི་མཆོད་པ་རྣམས་ནི་སྔར་བཤད་ཟིན་ཏོ། །ད་ནི་འདིར་ཡིད་ཀྱི་མཆོད་པ་བཤད་པར་བྱ་སྟེ། དེ་ལ། མེ་ཏོག་བདུག་སྤོས་འཇིག་རྟེན་པའི། །སོར་མོ་ལས་བྱུང་མེ་ཏོག་རྣམས། །ཞེས་པ་ལ་སོགས་པ་སྟེ། སོར་མོས་ལས་བྱུང་མེ་ཏོག་རྣམས། །ཞེས་པ་ནི་ཐལ་མོ་སྦྱར་བ་ལས་མེ་ཏོག་འབྱུང་བ་དེ་སྐྱོབ་པ་ཀུན་ལ་དབུལ་བར་བྱ་ཞེས་པའོ། །དེ་ཉིད་དགྲོལ་བའི་ཕྱིར། །ཡན་ལག་ཀུན་འབྱུང་ཕྱག་རྒྱ་ནི། །བཅིངས་ནས་བྱང་ཆུབ་སེམས་བསྒོམས་ཏེ། །ཞེས་བྱ་བ་གསུངས་ཏེ། ཡིད་ཀྱི་མཆོད་པ་བྱ་བ་ཡང་ཐོག་མར་བདག་གིས་ཕྱག་རྒྱའི་བཅིངས་པས་ཇི་ལྟར་བསམས་བཞིན་དུ་སངས་རྒྱས་དང་བྱང་ཆུབ་སེམས་དཔའ་རྣམས་ལ་མཆོད་པའི་སྤྲིན་འབྱུང་བར་ཤོག་ཤིག་ཅེས་སྨོན་ལམ་བཏབ་ནས་སྟོང་པ་ཉིད་ཀྱི་ཏིང་ངེ་འཛིན་ལ་གནས་ཏེ་བྱང་ཆུབ་ཀྱི་སེམས་དེ་མངོན་དུ་བྱའོ། །དེ་ལྟར་ཏིང་ངེ་འཛིན་ལ་གནས་པ་ཉིད་ན་ཡང་ཡིད་ལ་ནམ་མཁའ་མཛོད་ཀྱི་རིག་པ་བཟླས་ཏེ། དེ་ནས་ཕྱག་རྒྱ་དེ་ལས་མཆོད་པ་རྒྱ་ཆེན་པོ་འོག་ནས་སྨོས་པ་རྣམས་ཆར་བཞིན་དུ་འབབ་པར་བསམ་མོ། །དེ་ལྟར་བསམས་ན་ཆོས་ཀྱི་དབྱིངས་ཀྱི་བྱིན་རླབས་ཏིང་ངེ་འཛིན་གྱི་དབང་དང་སྔགས་ཀྱི་མཐུས་དེའི་ཚེ་སངས་རྒྱས་ཀྱི་སྤྱན་སྔར་ཆར་བཞིན་དུ་འབབ་པར་འགྱུར་ཏེ། དེ་བས། འདི་ནི་སྐྱོན་མེད་མེ་ཏོག་སྟེ། །ཞེས་པ་ལ་སོགས་པ་རྗེས་སུ་བསྔགས་པ་དང་བཅས་པ་གསུང་སོ། །ལྷ་རྣམས་ཕལ་བ་གཞན་ལ་ནི། །ཞེས་པ་ནས། ཇི་ལྟར་རིགས་པར་རྣམ་པར་བསམ། །ཞེས་པའི་བར་གྱིས་ནི་གཟུགས་བརྙན་གྱི་དཀྱིལ་འཁོར་ཚོན་གྱིས་བྲིས་པའི་ལྷ་རྣམས་ལ་ཕྱིའི་མཆོད་པ་མེ་ཏོག་ལ་སོགས་པ་དབུལ་བའི་རིམ་པ་བསྟན་པ་སྟེ། སོ་སོའི་སྔགས་ཀྱིས་བཏབ་ནས་ཐོག་
མར་བཅོམ་ལྡན་འདས་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པའི་རིགས་ལ་མཆོད་དེ། དེ་ནས་པདྨའི་རིགས་ལ་སོགས་པ་ལ་མཆོད་པ་བྱ་སྟེ། དེ་བས་ན། ཇི་ལྟར་རིགས་པར་རྣམ་པར་བསམ། །ཞེས་གསུངས་པ་ཡིན་ནོ། །མཐེ་བོ་སྲིན་ལག་སྦྱར་བ་ནི། །ཞེས་པ་ནས། དེ་ལས་གཞན་པ་འཇིག་རྟེན་པའི། །ལྷ་རྣམས་ལ་ནི་གོ་རིམས་བཞིན། །ཞེས་པའི་བར་གྱིས་མཆོད་པ་རྣམས་འབུལ་བའི་ཐབས་བསྟན་པ་སྟེ། མཐེ་བོ་སྲིན་ལག་སྦྱར་བ་ནི། །ཞེས་པ་ལ་སོགས་པས་མེ་ཏོག་དབུལ་བ་གསུངས་པ། འཇིག་རྟེན་པ་ཡི་ལྷ་རྣམས་ལ། །ལྟེ་བའི་ཐད་ཀ་ནས་ཤེས་བྱ། །ཞེས་པ་འཇིག་རྟེན་པའི་འདིར་གཟུགས་བརྙན་གྱི་དཀྱིལ་འཁོར་གྱི་ལྷ་རྣམས་ལ་བྱ་སྟེ། དེའི་ལྷ་རྣམས་ལ་ལྟེ་བའི་ཐད་ཀ་ནས་མེ་ཏོག་དབུལ་བར་བྱ་ལ། འཇིག་རྟེན་ལས་འདས་པའི་ཡིད་ཀྱི་དཀྱིལ་འཁོར་རྣམས་ལ་ནི་སྙིང་ག་ནས་དབུལ་བར་བཤད་པའོ། །བདུག་སྤོས་རྡོ་རྗེའི་ཁུ་ཚུར་རམ། །ཡང་ན་པདྨའི་ཕྲེང་བ་ཡིས། །བར་སྣང་ལ་ནི་བཟུང་ནས་སུ། །འཇིག་རྟེན་མགོན་སྐྱོབ་རྣམས་ལ་དབུལ། །ཞེས་པ་ནི་བདུག་སྤོས་གསོལ་བ་ན་རྡོ་རྗེ་ལྟ་བུའི་ཁུ་ཚུར་རམ། པདྨའི་ཕྱག་རྒྱ་བཅིངས་པ་སྟེ། །པོག་ཕོར་ནི་རྡོ་རྗེ་ཁུ་ཚུར་གྱིས་བཟུང་ལ་ཁམ་པོར་ནི་པདྨའི་ཕྱག་རྒྱས་བཟུང་སྟེ་ཡིད་ཀྱིས་དཀྱིལ་འཁོར་གྱི་ལྷ་རྣམས་ལ་བར་སྣང་ལ་བསྟོད་དེ་བཟུང་ནས་གསོལ་ཞེས་པའོ། །གཟུགས་བརྙན་གྱི་དཀྱིལ་འཁོར་གྱི་ལྷ་རྣམས་ལ་ནི་ལྟེ་བའི་ཐད་ཀ་ནས་རིམ་པ་བཞིན་དུ་གསོལ་ལོ་ཞེས་པ་སྟེ། དེ་བས་ན། དེ་ལས་གཞན་པ་འཇིག་རྟེན་པའི་ལྷ་རྣམས་ལ་ནི་གོ་རིམས་བཞིན་ཞེས་གསུངས་པ་ཡིན་ནོ། །ཕྱི་དང་ནང་གི་བྱེ་བྲག་གིས། །སྦྱིན་སྲེག་རྣམ་པ་གཉིས་ཤེས་བྱ། །ཞེས་པ་ནས། སྔགས་ཀྱི་ཤེས་པ་སྤངས་པ་སྟེ། །ཞེས་པའི་བར་གྱིས་ཕྱི་ནང་གི་སྦྱིན་སྲེག་གཉིས་བཤད་པ་སྟེ། དེ་ལ་ཕྱིའི་སྦྱིན་སྲེག་ནི་བསྲེག་པར་བྱས་པ་སྟེ། སྲེག་པའི་མེ་ལ་སོགས་པ་ཕྱིའི་དངོས་པོ་གཟུགས་ལ་སོགས་པ་ལ་ལྟོས་པའོ། །ནང་གི་སྦྱིན་སྲེག་ནི་དེ་རྣམས་སེམས་གཉིས་ཀྱིས་བྱས་ཏེ་ཕྱི་རོལ་གྱི་གཟུགས་ལ་སོགས་པ་ལ་ལྟོས་པ་མ་ཡིན་ཏེ། དེ་པས་ན། ལས་དང་ཚེ་ལས་རྣམ་པར་གྲོལ། །ཞེས་གསུངས་པ་ཡིན་ཏེ། ཕུང་པོ་དང་ཁམས་དང་སྐྱེ་མཆེད་ལ་སོགས་
པའི་ཆོས་རྣམས་འཇིག་པར་བྱེད་པའི་བྱང་ཆུབ་ཀྱི་སེམས་ཀྱིས་སྟོང་པར་བཤིག་སྟེ་ལས་དང་ཚེ་ལ་སོགས་པ་དམིགས་སུ་མེད་པར་སྤྲོས་བ་མེད་པའི་ཤེས་རབ་ཀྱིས་རྟོགས་ཏེ་ཡིད་ལ་ཕུང་པོ་ལ་སོགས་པ་དང་སེམས་དང་སེམས་ལས་བྱུང་བའི་རྒྱུ་དང་འབྲས་བུ་དག་དམིགས་སུ་མེད་པར་གྱུར་པ་དེ་ལ། ལས་དང་ཚེ་ལས་རྣམ་པར་གྲོལ། །ཞེས་པའོ། །དེ་ལ་སྲེག་པར་བྱེད་པ་ནི་སྤྲོས་པ་མེད་པའི་ཤེས་རབ་ཡིན་ལ་ལས་དང་ཚེ་ལ་སོགས་པ་ནི་བསྲེག་པར་བྱ་བ་ཡིན་ཞིང་སྲེག་པའི་མེ་ནི་རྣམ་པ་དང་བྲལ་བའི་ཡིད་ལ་བྱའོ། །སླར་ཡང་ས་བོན་འབྱུང་བ་སྟེ། །ཞེས་པ་ནི་ལས་དང་ཚེ་སྲེག་པའི་མཚན་ཉིད་སྟོང་པ་ཉིད་ཀྱི་ཏིང་ངེ་འཛིན་དེ་ལས་ལངས་ནས་སྙིང་རྗེའི་དབང་གིས་ལྷའི་གཟུགས་སུ་བྱ་བ་ལ་བྱ་སྟེ། བདག་གི་ལྷ་གང་ཡིན་པའི་སྔགས་ཀྱི་ས་བོན་ལས་ལྷར་བསྒྱུར་བའི་རིམ་པ་ཇི་སྐད་གསུངས་པའི་ཚུལ་གྱིས་བདག་ཉིད་ཀྱི་ལྷའི་གཟུགས་སུ་བསྒྱུར་བ་ལ་བྱ་སྟེ། དེ་ལ་དང་པོ་ཕུང་པོ་ལ་སོགས་པ་འཇིག་པའི་བྱང་ཆུབ་ཀྱི་སེམས་ནི་འཇུག་པའི་བྱང་ཆུབ་ཀྱི་སེམས་སོ། །ཇི་ལྟར་འཇིགས་ཤིང་རྟོག་པ་དེ་ཡང་སྤངས་ཏེ་སྤྲོས་པ་མེད་པའི་ཤེས་རབ་རྣམ་པར་མི་རྟོག་པ་ལས་དང་ཚེ་སྲེག་པར་བྱེད་པ་སོ་སོ་རང་གི་རིག་པའི་མཚན་ཉིད་ནི་གནས་པ་བྱང་ཆུབ་ཀྱི་སེམས་སོ། །སླར་རང་གི་ས་བོན་ལས་ལྷའི་གཟུགས་སུ་བསྒྱུར་བ་ནི་ལྡང་བའི་བྱང་ཆུབ་ཀྱི་སེམས་སོ། །ལས་དང་འདོད་པའི་སྦྱིན་སྲེག་བྱ། །ཞེས་པ་ནི་ཞི་བ་དང་རྒྱས་པ་ལ་སོགས་པའི་ལས་རྣམས་གྲུབ་པར་འདོད་པས་ཕྱི་དང་ནང་གི་བྱའོ་ཞེས་པ་སྟེ། མཚན་མར་བཅས་པས་མཚན་བཅས་ཀྱིས། །དངོས་གྲུབ་རྒྱལ་བ་དམ་པ་བཞེད། །མཚན་མ་མེད་པ་གནས་པས་ནི། །མཚན་མ་ཅན་ཡང་བསྒྲུབ་ཏུ་རུང༌། །ཞེས་བྱ་བ་དང་སྦྱར་ཏེ། ནང་གི་སྦྱིན་སྲེག་ཕྱི་རོལ་གྱི་གཟུགས་ལ་སོགས་པ་ལ་མི་ལྟོས་པའི་མཚན་མ་མེད་པ་དེས་ཀྱང་ཤིང་ལ་སོགས་པ་མཚན་མ་དང་བཅས་པ་རྣམས་འགྲུབ་པར་འགྱུར་རོ་ཞེས་པའོ། །ཕྱི་རོལ་གྱི་ནི་གསུམ་ལྡན་ཞིང༌། །ཞེས་པ་ནི་ཕྱི་རོལ་གྱི་སྦྱིན་སྲེག་བྱེད་པ་ན་གསུམ་དང་ལྡན་པར་བྱ་བ་ནི་ཞི་བ་དང་རྒྱས་པ་དང་མངོན་སྤྱོད་ཀྱི་ལས་གང་ཡང་རུང་བའི་ཁ་དོག་དང་ཚུལ་དུ་ལྡན་པར་བྱ་བ་དང་རྫས་རྣམས་ཀྱང་དེའི་ཁ་
དོག་དང་ལྡན་པར་བསམས་པ་དང༌། བདག་ཉིད་ཀྱང་དེའི་ཁ་དོག་དང་མཚུངས་པར་ལྡན་པའི་ལྷར་བསྒྱུར་བ་སྟེ། དེ་ལྟར་མེ་དང་རྫས་དང་བདག་གསུམ་པོ་ཞི་བ་ལ་སོགས་པའི་ལས་གང་ཡང་རུང་བའི་ཁ་དོག་དང་ཚུལ་དུ་ལྡན་པར་བྱ་བ་ནི་གསུམ་དང་ལྡན་པའོ། །གནས་གསུམ་དང་ཞེས་པ་ནི་ཞི་བ་དང་རྒྱས་པ་དང་མངོན་སྤྱོད་རྣམས་ཀྱི་དཀྱིལ་འཁོར་དབང་ཆེན་དང་ཆུ་དང་རླུང་གི་གནས་གསུམ་དང་ལྡན་པའོ། །གསུམ་ལ་གནས་ཞེས་པ་ནི་ཞི་བ་ལ་སོགས་པའི་མེ་ཐབ་ཟླུམ་པོ་དང་གྲུ་བཞི་དང་གྲུ་གསུམ་དག་བསྲེག་རྫས་ལ་སོགས་པའི་གནས་ཡིན་ནོ་ཞེས་པའོ། །ལས་གསུམ་ནི་ཞི་བ་དང་རྒྱས་པ་དང་མངོན་སྤྱོད་རྣམས་ཡིན་ལ། ལམ་གྲུབ་པ་ནི་དེ་དག་གི་འབྲས་བུ་གསུམ་གྲུབ་པའོ། །ཕྱི་དང་ནང་གང་ཡང་རུང་བའི་སྦྱིན་སྲེག་གི་ཆོ་ག་དེ་ལས་གཞན་དུ་བྱས་ན་དེ་དག་གིས་འབྲས་བུ་ཐོབ་པར་མི་འགྱུར་ཏེ། དེ་བས་ན། གང་དག་གཞན་དུ་བྱེད་པ་ནི། །ཞེས་པ་ལ་སོགས་པ་ནི་གཉི་གའི་སྤྱིར་གསུངས་པ་ཡིན་ནོ། །དེ་བཞིན་གཤེགས་པའི་གསང་སྔགས་དང༌། །ཞེས་པ་ནས། ལྷ་ཡི་ཚད་ཀྱང་གོ་རིམས་བཞིན། །དེ་ཙམ་དུ་ནི་ཤེས་པར་བྱ། །ཞེས་པའི་བར་གྱིས་ནི་སྔགས་ཀྱི་ལྷ་ལ་སོགས་པའི་ཁ་དོག་དང་དབྱིབས་དང་ཚད་རྣམས་བཤད་དེ། དེ་བཞིན་གཤེགས་པས་གསང་སྔགས་དང༌། །དེ་བཞིན་རྫོགས་སངས་རྒྱས་ཀྱིས་གསུངས། །དཀར་དང་སེར་དུ་ཤེས་པར་བྱ། །ཞེས་པ་ནི་དེ་བཞིན་གཤེགས་པའི་རིགས་ནི་ཆོས་ཐམས་ཅད་རྣམ་པར་དག་པའི་མཚན་ཉིད་ཞི་བའི་རང་བཞིན་ཡིན་པས་ན་ཁ་དོག་དཀར་པོར་རིག་པར་བྱའོ་ཞེས་པའོ། །དེ་བཞིན་རྫོགས་སངས་རྒྱས་ཀྱིས་གསུངས། །ཞེས་པ་ནི་ཤཱཀྱ་ཐུབ་པ་དང་འཕགས་པ་འཇམ་དཔལ་ལ་སོགས་པ་བྱང་ཆུབ་སེམས་དཔའ་ཀུན་དུ་སངས་རྒྱས་པ་དེ་དག་ནི་སེམས་ཅན་གྱི་དོན་ལ་སྤྱོད་པས་ན་ཚོགས་རྫོགས་པར་མཛད་དེ་རྒྱས་པའི་མཚན་ཉིད་ཡིན་པས་ཁ་དོག་སེར་པོར་རིག་པར་བྱའོ། །ཕྱག་ན་རྡོ་རྗེ་ཐམས་ཅད་པ། །ཞེས་པ་ནི་ཕྱག་ན་རྡོ་རྗེ་ཡང་བྱ་བ་གྲུབ་པའི་ཡེ་ཤེས་ཀྱི་རང་བཞིན་སེམས་ཅན་གྱི་དོན་དུ་སྤྱོད་པས་ཁ་དོག་ཐམས་ཅད་པར་རིག་པར་བྱའོ། །འཇིག་རྟེན་དབང་ཕྱུག་གསང་སྔགས་ནི། །ལས་ཀྱི་བྱེ་བྲག་དག་ལས་དཀར། །ཞེས་པ་ནི་སྤྱན་རས་གཟིགས་ཀྱི་
དབང་པོ་ནི་སོ་སོར་ཀུན་དུ་རྟོག་པའི་ཡེ་ཤེས་ཀྱི་རང་བཞིན་ཆོས་ཐམས་ཅད་འཁྲུལ་པར་བྱེད་པའི་བདག་ཉིད་པས་ཁ་དོག་དཀར་པོར་ཤེས་པར་བྱའོ། །ཀུན་དུ་གྲུ་བཞི་ལྷམ་པ་ལ། །གོ་རིམས་བཞིན་དུ་ཟླུམ་པོ་དང༌། །གྲུ་གསུམ་དང་ནི་ཟླ་གམ་འདྲ། །དབྱིབས་ནི་ལེགས་པར་བཤད་པ་ཡིན། །ཞེས་པ་ནི་ལྷ་དེ་རྣམས་ཀྱི་འཁོར་དབང་ཆེན་ལ་སོགས་པའི་དབྱིབས་བཤད་པ་སྟེ། རིམ་པ་བཞིན་དུ་ཤེས་པར་བྱའོ། །གཟུགས་ནི་གཉིས་སུ་ཤེས་བྱ་བ། །བུད་མེད་དང་ནི་སྐྱེས་པ་ཉིད། །ཅེས་པ་ནི་ལྷ་རྣམས་ཀྱི་གཟུགས་བཤད་པ་སྟེ། དེ་ལ་ལྷ་རྣམས་ཀྱང་རྣམ་པ་གསུམ་སྟེ་རྣམ་པར་སྨིན་པའི་གཟུགས་དང༌། གནས་ཡོངས་སུ་གྱུར་པ་དང༌། སྤྲུལ་པའོ། །དེ་ལ་རྣམ་པར་སྨིན་པའི་གཟུགས་ནི་རང་གི་ལས་དང་བསོད་ནམས་ལས་སྐྱེས་པའོ། །གནས་ཡོངས་སུ་གྱུར་པ་ནི་སྒྲུབ་པ་པོས་གྲུབ་པའི་གཟུགས་སོ། །སྤྲུལ་པ་ནི་ཏིང་ངེ་འཛིན་ལ་སོགས་པའི་དབང་གིས་གང་ཡང་རུང་བ་ཅིག་ཡིད་ལ་བསམས་པར་གྱུར་པ་སྟེ། དེ་དག་ལས་ལ་ལ་ནི་སྐྱེས་པར་སྣང༌། ལ་ལ་ནི་བུད་མེད་དུ་སྣང་པའོ། །ཡང་ན་ཀུན་དུ་ཐམས་ཅད་ཀྱི། །ཁ་དོག་དབྱིབས་དང་གཟུགས་རྣམས་ཏེ། །ཞེས་པ་ནི་ཡང་ན་གོང་དུ་ཁ་དོག་དཀར་པོ་ལ་སོགས་སྨོས་པ་དང༌། དབྱིབས་གྲུ་བཞི་ལ་སོགས་པ་སྨོས་པ་དང༌། གཟུགས་བུད་མེད་དང་སྐྱེས་པར་སྨོས་པ་དེ་དག་ངེས་པ་ནི་མ་ཡིན་ཏེ་དེ་དག་ཀུན་ཀྱང་ཁ་དོག་ཐམས་ཅད་དང་དབྱིབས་ཐམས་ཅད་དང༌། གཟུགས་ཐམས་ཅད་དུ་ཤེས་པར་བྱའོ། །དེ་ཅིའི་ཕྱིར་ཞེ་ན། བསམ་ཡས་ཡེ་ཤེས་ལས་བྱུང་བས། །དེ་བས་དེ་རྣམས་བསམ་ཡས་ཏེ། །ཞེས་གསུངས་ཏེ་དེ་ཐམས་ཅད་ཀྱང་དེ་བཞིན་ཉིད་ཀྱི་ཡེ་ཤེས་བསམ་དུ་མེད་པ་ལས་བྱུང་བ་ཤ་སྟག་ཡིན་པས་ཁ་དོག་དང་དབྱིབས་ལ་སོགས་པ་ཆད་པ་མེད་པས་བསམ་གྱིས་མི་ཁྱབ་པའོ། །དེ་ཡང་ཅིའི་ཕྱིར་ཞེ་ན། ཡེ་ཤེས་མཁྱེན་གྱིས་ཡེ་ཤེས་ནི། །སེམས་ཅན་དོན་ཕྱིར་ཐ་དད་འགྱུར། །ཞེས་པ་སྟེ། དེ་དག་གི་ཁ་དོག་དང་དབྱིབས་ལ་སོགས་པ་ཆད་པ་མེད་པ་ཡང་སེམས་ཅན་གྱི་དོན་སྣ་ཚོགས་ལ་མཁས་པའི་ཡེ་ཤེས་དེས་གདུལ་བའི་འགྲོ་བ་དང་རྗེས་སུ་མཐུན་པའི་གཟུགས་ལ་སོགས་པ་སྟོན་པའི་ཕྱིར་
རོ། །ཡིད་ཀྱི་རྒྱན་ནི་ཇི་ཙམ་པ། །སྟན་དང་ཕྱག་རྒྱ་དག་དང་ནི། །ལྷ་ཡི་ཚད་ཀྱང་གོ་རིམས་བཞིན། །དེ་ཙམ་དུ་ནི་ཤེས་པར་བྱ། །ཞེས་པ་ནི་ལྷ་ལ་སོགས་པའི་ཚང་བསམས་ཏེ། ནང་དུ་ཡིད་ལ་བསམ་པའམ། ཕྱི་རོལ་དུ་བྲི་བ་ལ་སོགས་པ་ཀུན་ཀྱང་ཡིད་ལ་ཇི་ཙམ་དུ་འདོད་པ་དེ་ཙམ་དུ་བསམ་པའམ་བྲི་བར་བྱ་ཞེས་པའོ། །ལྷ་ཡི་ཚད་ཀྱང་གོ་རིམས་བཞིན། །ཞེས་པ་ནི་དཀྱིལ་འཁོར་དུ་བྲི་བའི་ལྷ་རྣམས་ཀྱང་སྙིང་པོའི་དཀྱིལ་འཁོར་དུ་བྲི་བ་རྣམས་ནི་དཀྱིལ་འཁོར་གྱི་སའི་ཞེང་ཆེ་བས་ལྷའི་གཟུགས་ཀྱང་ཆེ་བར་བྱ་དེའི་གོ་རིམས་ཀྱིས་དེ་བཞིན་དུ་ཞེང་ཆུང་བ་རྣམས་སུ་རིམ་གྱིས་ཆུང་བར་བྱ་ཞེས་པའོ། །སངས་རྒྱས་གང་ནས་གང་བྱུང་བ། །ཕྱག་རྒྱ་རྣམས་ཀྱང་དེ་ནས་བྱུང༌། །ཞེས་བྱ་བ་ནི་ཕྱག་རྒྱ་གང་ནས་བྱུང་བའི་ཁུངས་བཤད་པ་སྟེ། སངས་རྒྱས་རྣམས་ཀྱི་ཆོས་ཀྱི་དབྱིངས་ལས་བྱུང་བའི་ཕྱག་རྒྱ་དེས་བདག་དང་སློབ་མ་ལ་སོགས་པའི་ལྷའི་ལུས་སུ་བྱིན་གྱིས་བརླབས་པ་དང་ཕྱག་རྒྱ་དེས་སློབ་མ་ལ་སོགས་པ་སྲུང་བ་སྟེ། དེ་བསྲུངས་ན་ཆོས་ཀྱི་དབྱིངས་ཀྱི་མཚན་མས་བཏབ་པས་ཅིས་ཀྱང་མི་ཚུགས་པར་འགྱུར་བ་ནི་འཇིག་རྟེན་ན་རྒྱལ་པོའི་རྒྱ་དང་ལྡན་པའི་སྐྱེས་བུ་ལ་སུས་ཀྱང་གཙོ་བར་མི་འགྱུར་བ་དང་འདྲའོ་ཞེས་སྔར་བཞིན་དུ་བཤད་དོ། །དེ་བས་མདོར་ན་ཆོས་ཀྱི་དབྱིངས། །མཚན་མ་ཕྱག་རྒྱ་ཡིན་པར་བཤད། །ཅེས་པ་ནི་མདོར་ན་ཕྱག་རྒྱ་རྣམས་ཆོས་ཀྱི་དབྱིངས་ཀྱི་མཚན་མ་ཡིན་པར་ཤེས་པར་བྱའོ་ཞེས་པའོ། །དབང་བསྐུར་གསུམ་དུ་ཤེས་བྱ་སྟེ། །ཞེས་པ་ནས། རྫོགས་པའི་སངས་རྒྱས་རྣམས་ཀྱིས་བསྒྲགས། །ཞེས་པའི་བར་གྱིས་ནི་དབང་བསྐུར་བ་རྣམ་པ་གསུམ་བཤད་དེ། །ཕྱག་རྒྱ་གང་ཞིག་དབང་བསྐུར་བ། །ལས་དང་བྱ་བ་སྤངས་པ་སྟེ། །ཞེས་པ་ནི་སྙིང་རྗེ་ཆེན་པོ་འབྱུང་བ་དང་ཡི་གེ་འཁོར་ལོ་བསྐོར་བའི་དཀྱིལ་འཁོར་དུ་ནམ་སློབ་དཔོན་དང་སློབ་མ་ཟབ་ཅིང་རྒྱ་ཆེ་བ་ལ་མོས་པ་དག་ཕྱག་རྒྱས་དབང་བསྐུར་བྱ་བར་བཤད་པ་སྟེ། དཀྱིལ་འཁོར་གཉིས་གང་ཡང་རུང་བའི་མདུན་དུ་དབང་བསྐུར་བའི་དཀྱིལ་འཁོར་དང་བུམ་པ་ལ་སོགས་པ་ལ་མི་ལྟོས་པར་ཀུན་དུ་བཟང་པོ་ལ་སོགས་པ་བྱང་ཆུབ་སེམས་དཔའི་ཕྱག་རྒྱ་དང་འོག་ནས་འབྱུང་བའི་ཕྱག་
རྒྱས་དབང་བསྐུར་བའོ། །ལས་དང་བྱ་བ་སྤངས་པ་སྟེ། །ཞེས་པ་ནི་དབང་བསྐུར་བའི་བུམ་པ་དང༌། དཀྱིལ་འཁོར་དང་དུང་དང་འཁོར་ལོ་ལ་སོགས་པའི་ཆོ་ག་རྣམས་དང་བྲལ་བ་ཞེས་པའོ། །གཉིས་པ་ལས་དང་བྱ་བ་ཡིས། །ཀུན་ནས་བསླངས་པར་ཡང་དག་བཤད། །ཅེས་པ་ནི་སྙིང་རྗེ་ཆེན་པོ་དང་འབྱུང་བ་དང་ཡི་གེ་འཁོར་ལོ་བསྐོར་བའི་དཀྱིལ་འཁོར་གྱི་མདུན་དུ་དབང་བསྐུར་བའི་དཀྱིལ་འཁོར་བྲིས་ནས་སྔར་ཇི་སྐད་བཤད་པའི་ཆོ་ག་བཞིན་དུ་དབང་བསྐུར་བར་གསུངས་པའོ། །གསུམ་པ་ཡིད་ཀྱིས་ཤེས་བྱ་སྟེ། །ཡུལ་དང་དུས་ཚོད་སྤངས་པའོ། །ཞེས་པ་ནི་གསང་བའི་དཀྱིལ་འཁོར་དུ་ཡིད་ཀྱིས་དབང་བསྐུར་བ་སྟེ་འོག་ནས་དངོས་སུ་འབྱུང་ངོ༌། །བླ་མ་ལེགས་པར་མགུ་བྱས་ནས། །ཕན་བྱེད་པས་གང་སྨྲས་པ་ཡི། །དབང་བསྐུར་འདི་ནི་མཆོག་ཡིན་པར། །རྫོགས་པའི་སངས་རྒྱས་རྣམས་ཀྱིས་བསྒྲགས། །ཞེས་པ་ནི་དཀྱིལ་འཁོར་གོང་མ་གཉིས་སུ་ཕྱག་རྒྱས་དབང་བསྐུར་ནས་རྗེས་སུ་གནང་བའི་ཚིག་སྨྲས་པ་ལ་བྱ་སྟེ། ཕྱག་རྒྱས་དབང་བསྐུར་བའི་འོག་ཏུ་སློབ་དཔོན་སློབ་མའི་རིམ་གྲོ་དང་ནན་ཏན་ལ་སོགས་པས་མགུ་ནས་ཁྱོད་ཀྱིས་དེང་ཕྱིན་ཚད་ཆོས་ཀྱི་འཁོར་ལོ་བསྐོར་ཅིག་ཅེས་པ་ལ་སོགས་པའི་ཚིག་ཏུ་ཤེས་པར་བྱའོ། །ཕྱག་རྒྱས་དབང་བསྐུར་བ་དང་པོ་དང་དབང་བསྐུར་བ་གཉིས་པ་ནི་སྙིང་རྗེ་ཆེན་པོ་འབྱུང་བ་དང་ཡི་གེ་འཁོར་ལོ་བསྐོར་བའི་དཀྱིལ་འཁོར་དུ་བྱའོ། །གསང་བའི་དཀྱིལ་འཁོར་དུ་ནི་ཡིད་ཀྱིས་དབང་བསྐུར་བ་དངོས་སུ་གསུངས་པས་གོང་མ་གཉིས་མི་བྱ་བར་ཤེས་པའོ། །འདི་རྣམས་ཀྱང་འདིར་ཚིག་ཙམ་བཤད་ཀྱིས་དོན་བསྡུས་པའི་དོན་ཉིད་དུ་གཏན་ལ་ཕབ་སྟེ་བཤད་ཟིན་ཏོ། །སངས་རྒྱས་རྣམས་ཀྱིས་མདོར་ན་ནི། །དམ་ཚིག་ཅན་རྣམས་སྔར་བཤད་དེ། །ཞེས་པ་ནས། དམ་ཚིག་ཅན་ཞེས་གཞན་མི་བྱ། །ཞེས་པའི་བར་གྱིས་ནི་དམ་ཚིག་ཅན་གྱི་རིམ་པའི་བཤད་པ་ཡིན་ཏེ། དེ་ལ་སྤྱིར་སློབ་མ་རྣམས་དཀྱིལ་འཁོར་དུ་འཇུག་པ་ཡང་ཁ་ཅིག་ནི་དམ་ཚིག་ཅན་དུ་འདོད་པའི་ཕྱིར་འཇུག་ལ་ཁ་ཅིག་ནི་སྒྲུབ་པར་བྱེད་པའི་ཕྱིར་འཇུག །ཁ་ཅིག་ནི་སློབ་དཔོན་དུ་འདོད་པའི་ཕྱིར་འཇུག་སྟེ། དེ་ལ་
དམ་ཚིག་ཅན་དུ་འདོད་པའི་ཕྱིར་འཇུག་པ་ནི། དཀྱིལ་འཁོར་འདི་གསུམ་ལས་གང་ཡང་རུང་བར་ཞུགས་ཏེ་དམ་ཚིག་ཅན་དུ་གྱུར་ན་དཀྱིལ་འཁོར་ལྷག་མ་གཉིས་ལ་མི་ལྟོས་ལ། སྒྲུབ་པ་དང་སློབ་དཔོན་དུ་འདོད་པ་ནི་དཀྱིལ་འཁོར་གསུམ་ཆར་ལ་ལྟོས་པར་ཤེས་པར་བྱའོ།། དཀྱིལ་འཁོར་འདི་ནི་མཐོང་བ་ལས། །དམ་ཚིག་ཤེས་པ་གཅིག་ཅེས་བྱ། །ཞེས་པ་ནི་དམ་ཚིག་གི་དོན་ནི་འདིར་ཚུལ་ལས་མི་འགལ་བའི་དོན་ཏེ་དཀྱིལ་འཁོར་གསུམ་ལས་གང་ཡང་རུང་བ་ཞིག་མཐོང་ན་དམ་ཚིག་ཅན་གཅིག་ཅེས་བྱ་སྟེ། དེས་སྔར་བྱང་ཆུབ་ཀྱི་སེམས་བསྒོམས་ན་ནི་དེ་ལ་ཕྱག་རྒྱ་དང་སྔགས་སྦྱིན་པར་བྱ་ལ། སྔར་བྱང་ཆུབ་ཀྱི་སེམས་མ་བསྒོམས་ན་དེ་ལ་ཕྱག་རྒྱ་དང་སྔགས་སྦྱིན་དུ་མི་རུང་སྟེ། དེ་བས་ན། དེ་ལ་ཕྱག་རྒྱ་མི་བསྟན་ཞིང༌། །སྔགས་ཀྱང་སྦྱིན་པར་མི་བྱའོ། །ཞེས་གསུངས་པ་ཡིན་ནོ། །དེ་ལྟར་དཀྱིལ་འཁོར་དེར་ཞུགས་ནས་ཕྱག་རྒྱ་དང་སྔགས་མི་སྦྱིན་པར་བྱང་ཆུབ་ཀྱི་སེམས་བསྒོམས་དུ་བཅུག་སྟེ་གོམས་པར་གྱུར་ན། བྱང་ཆུབ་སེམས་ཀྱི་བྱེ་བྲག་ལས། །སྔགས་དང་ཕྱག་རྒྱ་ཡོངས་སུ་གཟུང༌། །ཞེས་བྱ་བས་གདོད་ཕྱག་རྒྱ་དང་སྔགས་སྦྱིན་པར་གསུངས་སོ། །དཀྱིལ་འཁོར་མཐོང་ཞེས་བྱ་བ་འདི། །དམ་ཚིག་ཅན་གཉིས་ཤེས་པར་བྱ། །ཞེས་པ་ནི་དེ་ལྟར་བྱང་ཆུབ་ཀྱི་སེམས་གོམས་ནས་ཡང་དཀྱིལ་འཁོར་དུ་བཅུག་སྟེ་ཕྱག་རྒྱ་དང་སྔགས་བྱིན་པ་དེ་ནི་དམ་ཚིག་ཅན་གཉིས་པར་ཤེས་པར་བྱའོ། །དཀྱིལ་འཁོར་དང་ནི་ཕྱག་རྒྱ་མཐོང༌། །ལས་དང་བྱ་བ་ལ་ཡང་སྦྱར། །བླ་མས་ལུང་ནི་མ་བྱིན་པར། །དེ་ཡང་དམ་ཚིག་ཤེས་པར་བཤད། །ཅེས་པ་ནི་དཀྱིལ་འཁོར་ཀྱང་མཐོང་ལ། །རྒྱུད་དང་རྟོག་པ་ལ་སོགས་པ་ཉན་དུ་བཅུག་ཅིང་སློབ་དཔོན་དུ་ལུང་མ་བསྟན་པ་དེ་ནི་དམ་ཚིག་ཤེས་པ་གསུམ་པ་ཞེས་བྱའོ། །ཕྱག་རྒྱ་དཀྱིལ་འཁོར་བྲི་བ་རྣམས། །དེ་ཚེ་ཆོ་ག་བཞིན་དུ་བསྟན། །གསང་བའི་ཡེ་ཤེས་བྱུང་བ་ཡིས། །དབང་བསྐུར་མེད་པའི་སྔགས་པའང་ཡིན། །ཞེས་པ་ནི་སྙིང་རྗེ་ཆེན་པོ་འབྱུང་བའི་དཀྱིལ་འཁོར་དང༌། ཡི་གེ་འཁོར་ལོ་བསྐོར་བའི་དཀྱིལ་འཁོར་གཉིས་ཀ་དབང་བསྐུར་བའམ། གང་ཡང་རུང་བ་ཅིག་ཏུ་དབང་བསྐུར་ཏེ་ཕྱག་རྒྱ་དང་དཀྱིལ་འཁོར་བྲི་བ་དང་ཕྱག་རྒྱ་བཤད་པ་དེ་དག་
ཚོག་བཞིན་དུ་དེས་གཞན་ལ་ཡང་བསྟན་པར་གསུངས་པ་ལས་གསང་བའི་དཀྱིལ་འཁོར་འབའ་ཞིག་ཏུ་དབང་མ་བསྐུར་བ་དེ་ནི་དམ་ཚིག་ཤེས་པ་བཞིན་ཞེས་བྱའོ། །གསང་བའི་དཀྱིལ་འཁོར་དབུས་སུ་ནི། །སྔགས་པ་ཆོ་གས་དབང་བསྐུར་བ། །དམ་ཚིག་ཤེས་པ་ལྔར་ཤེས་བྱ། །དམ་ཚིག་ཅན་ཞེས་གཞན་མི་བྱ། །ཞེས་པ་ནི་དཀྱིལ་འཁོར་གོང་མ་གཉིས་སུ་ཡང་དབང་བསྐུར་ལ། །གསང་བའི་དཀྱིལ་འཁོར་དུ་དབང་བསྐུར་བ་དེ་ནི་དམ་ཚིག་གཤེགས་པ་ལྔ་ཞེས་བྱའོ། །དམ་ཚིག་ཅན་ཞེས་གཞན་མི་བྱ། །དེ་ལྟར་གོང་དུ་སྨོས་པ་ལས་གཞན་དུ་ཆོ་ག་ལས་འགལ་བར་བྱས་ན་དམ་ཚིག་ཅན་ཞེས་མི་བྱའོ་ཞེས་པའོ། །བརྟུལ་ཞུགས་བཟང་པོ་བྱང་ཆུབ་ཕྱིར། །ཞེས་པ་ནས། གནས་པ་དེ་ནི་བདེན་པ་མཐོང༌། །ཞེས་པའི་བར་གྱིས་གོང་དུ་ནི། །སྔགས་སྤྱད་པ་ལ་བརྩོན་པ་ཡི། །སྔགས་པ་བྱང་ཆུབ་སེམས་དཔའ་དང༌། །ཐམས་ཅད་མཁྱེན་པར་ཇི་ལྟར་འགྱུར། །ཇི་ལྟར་བདེན་པ་མཐོང་བར་འགྱུར། །ཞེས་པ་ནི་དྲིས་པ་དེ་དག་བཤད་པ་སྟེ། བརྟུལ་ཞུགས་བཟང་པོ་བྱང་ཆུབ་ཕྱིར། །གང་ཞིག་སེམས་ནི་བསྒོམ་པ་ན། །སྔགས་པའི་གནས་གསུམ་མི་དམིགས་པ། །དེ་ནི་བྱང་ཆུབ་སེམས་དཔའ་ཡིན། །ཞེས་པ་ནི་གང་ཞིག་བྱང་ཆུབ་ཀྱི་སེམས་རྟག་ཏུ་བསྒོམས་ཏེ། ལུས་དང་ངག་དང་ཡིད་ཀྱི་གནས་གསུམ་མམ། འདོད་པའི་ཁམས་དང་གཟུགས་ཀྱི་ཁམས་དང་གཟུགས་མེད་པའི་ཁམས་ཀྱི་གནས་གསུམ་དུ་འཇུག་པའི་བྱང་ཆུབ་ཀྱི་སེམས་ཀྱིས་བཤིག་སྟེ། དམིགས་སུ་མེད་པར་བྱེད་པ་དེ་ནི་བྱང་ཆུབ་སེམས་དཔའི་ཞེས་བྱའོ། །ཐབས་ཀྱི་སྙིང་སྟོབས་སྐྱེས་ནས་སུ། །སེམས་ཅན་དོན་ལ་སྦྱོར་བ་ནི། །དམིགས་སུ་མེད་པའི་སྤྱོད་པ་ཐོབ། །རྒྱལ་བའི་མཆོག་ཏུ་ཤེས་པར་བྱ། །ཞེས་པ་ནི་དམིགས་སུ་མེད་པའི་སྤྱོད་པ་ཐོབ་ནས་དེ་ལས་ལངས་ཏེ་ཆོས་རྣམས་སྒྱུ་མ་ལྟ་བུར་ཤེས་པ་བཞིན་དུ་ཐབས་ཀྱིས་སེམས་ཅན་གྱི་དོན་དུ་སྤྱོད་པ་དེ་ནི་ཐམས་ཅད་མཁྱེན་པ་ཞེས་བྱ་སྟེ། དམིགས་སུ་མེད་པའི་སྤྱོད་ཐོབ་བ། །ཞེས་པ་ནི་མོས་པས་སྤྱོད་པའི་ཚེ་ན་འཇུག་པའི་བྱང་ཆུབ་ཀྱི་སེམས་ཀྱི་ཆོས་རྣམས་བཤིག་ནས་གནས་པའི་བྱང་ཆུབ་ཀྱི་སེམས་ཀྱི་མཚན་ཉིད་སྟོང་པ་ཉིད་ལ་གནས་པ་ན་དོན་དམ་པར་ཡང་ཆོས་རྣམས་དམིགས་
སུ་མེད་ལ། ཀུན་རྫོབ་ཏུ་ཡང་ཆོས་རྣམས་འཁྲུལ་པའམ་སྒྱུ་མ་ལྟ་བུར་རྟོགས་པས་ན། དམིགས་སུ་མེད་པའི་སྤྱོད་པ་ཐོབ་པ། ཞེས་བྱའོ། །རྒྱལ་བའི་མཆོག་ཅེས་པ་ནི་དེ་ལྟར་ཀུན་རྫོབ་དང་དོན་དམ་པར་ཆོས་རྣམས་དམིགས་སུ་མེད་པར་རྟོགས་པ་དེ་ནི་བདུད་བཞི་དངོ་སུ་བཅོམ་ཡང་བདུད་བཞི་ལས་རྒྱལ་བའི་དང་ཚུལ་ཅན་ཡིན་པས་རྒྱལ་བའི་མཆོག་ཅེས་བྱའོ། །ཐོག་མ་ནས་ནི་ཞི་བའི་ཆོས་ངོ་བོ་ཉིད་མེད་པ་ལ། གང་གི་སེམས་ནི་རང་བཞིན་གྱིས། །གནས་པ་དེ་ནི་བདེན་པ་མཐོང༌། །ཞེས་པ་ནི་བདེན་པ་མཐོང་བ་བཤད་པ་སྟེ། དེ་ནས་ཆོས་རྣམས་ཐོག་མ་ནས་ཞི་ཞིང་གང་གི་ངོ་བོ་ཉིད་མེད་པར་རྟོགས་ཏེ་དེ་ཉིད་ལ་སེམས་རི་རབ་བཞིན་དུ་མི་གཡོ་བར་འགྱུར་ན་དེ་ནི་བདེན་པ་མཐོང་བ་ཞེས་བྱའོ། །དེ་དག་ཀྱང་མདོར་ན་ཐོག་མ་ནི་འཇུག་པའི་བྱང་ཆུབ་ཀྱི་སེམས་དང་ལྡན་པའོ། །བདེན་པ་མཐོང་བ་ཞེས་པ་ནི་གནས་པའི་བྱང་ཆུབ་ཀྱི་སེམས་བཤད་པའོ། །རྒྱལ་པའི་མཆོག་ཅེས་པ་ནི་ལྡང་བའི་བྱང་ཆུབ་ཀྱི་སེམས་བསྟན་པ་སྟེ་དེ་དག་ཀྱང་མོས་པས་སྤྱོད་བའི་ས་གཉིས་ལ་གནས་པའི་ཡོན་ཏན་དུ་ཤེས་པར་བྱའོ། །འདི་བདེན་འདི་ནི་ཡང་དག་པར། །ཞེས་པ་ནས། སངས་རྒྱས་ཉིད་དང་གང་གཞན་ནོ། །ཞེས་བའི་བར་གྱིས་གྲུབ་པའི་རིགས་རྣམས་བཤད་པ་སྟེ། འདི་བདེན་འདི་ནི་ཡང་དག་པ། །དེ་བཞིན་དུ་ནི་མི་སླུ་བ། །ཇི་ལྟར་སངས་རྒྱས་བདེན་གཟིགས་པ། །དེ་བཞིན་སྔོན་ནི་ངས་མ་མཐོང༌། །ཞེས་པ་ནི། འདི་ནི་བྱང་ཆུབ་སེམས་ཐོབ་པ། །ཞེས་པ་ནི་དེ་ཉིད་ཀྱི་རྗེས་སུ་བསྔགས་པའི་ཁྱད་པར་ཏེ། གང་ཡང་བྱང་ཆུབ་ཀྱི་སེམས་ཐོབ་པ་དེ་ནི་བདེན་ཞིང་ཡང་དག་པ་མི་སླུ་བ་སྟེ་ཇི་ལྟར་སྔོན་གྱི་སངས་རྒྱས་དང༌། ངས་ཀྱང་ཡང་དག་མིས་སླུ་བ་ཡིན་པར་མཐོང་ངོ་ཞེས་པའོ། །གང་གིས་བྱང་ཆུབ་ཀྱི་སེམས་ཐོབ་པ་ཡང་བསྒྲུབས་ནས། དེ་སྲིད་དུ་བྱང་ཆུབ་སེམས་དཔའ་ཀུན་དུ་བཟང་པོའམ། འཕགས་པ་འཇམ་དཔལ་ལམ། རྡོ་རྗེ་འཛིན་ཆེན་པོ་གང་ཡང་རུང་བ་ཅིག་འོངས་ཏེ་མགོ་ལ་ཉུག་གམ་ལེགས་སོ་ཞེས་ཟེར་གྱི་བར་དུ་བཟླས་བརྗོད་བྱའོ། །དེ་ནས་ཕྱག་བྱས་ཏེ་མཆོད་ཡོན་ཕུལ་ན་བྱང་ཆུབ་ཀྱི་སེམས་མི་བརྗེད་པའི་ཏིང་ངེ་འཛིན་ཐོབ་པར་འགྱུར་རོ་ཞེས་གོང་དུ་བཤད་པ་དེ་ལྟ་བུའི་གྲུབ་པ་ཐོབ་པ་ནི་བྱང་ཆུབ་ཀྱི་སེམས་
ཐོབ་པ་ཞེས་བྱ་སྟེ། དེ་ལྟ་བུ་གྲུབ་པ་ན་དེ་ཉིད་དངོས་གྲུབ་ཡིན་གྱིས། གཞན་ཅི་ཞིག་དགོས་ཏེ་བྱང་ཆུབ་ཀྱི་སེམས་དེ་གྲུབ་པ་གཞན་གྱི་རྒྱུ་ཡིན་པའི་ཕྱིར་རོ། །དེ་ལས་གཞན་དུའང་དངོས་གྲུབ་ནི། །རྣམ་པ་དག་ནི་ལྔར་འདོད་དེ། །ཞེས་པ་ནི་བྱང་ཆུབ་ཀྱི་སེམས་གྲུབ་པ་དེ་ལས་གཞན་པ་མིང་གིས་སྨོས་པ་ལྔ་པོ་ལ་བྱ་སྟེ། དེ་དག་ཀྱང་སྤྱོད་པའི་རྗེས་སུ་འཇུག་པ་ལ་སོགས་པ་རྣམས་སོ། །དེ་ལ་སྤྱོད་པའི་རྗེས་སུ་འཇུག་པ་ནི་མོས་པས་སྤྱོད་པའི་ས་ལས་འཕར་ཏེ་ཡེ་ཤེས་ཀྱིས་ལ་འཇུག་པའི་སྐབས་སུ་སྣང་བ་ཐོབ་པ་དང་སྣང་བ་མཆེད་པ་ཞེས་བྱ་བ་ལ་སོགས་པའི་ཏིང་ངེ་འཛིན་གྱི་ཁྱད་པར་གྲུབ་པའོ། །དེ་བཞིན་ས་ནི་གནོན་པ་དང༌། །ཞེས་པ་ནིས་རབ་ཏུ་དགའ་བ་ཐོབ་པ་ལས་གྲུབ་པའོ། །འཇིག་རྟེན་མངོན་ཤེས་ལྔར་འདོད་དང༌། །ཞེས་པ་ནི་འཇིག་རྟེན་གྱི་མངོན་པར་ཤེས་པ་ལྔ་གྲུབ་པའོ། །སངས་རྒྱས་ཉིད་དང་ཞེས་པ་ནི་སངས་རྒྱས་ཀྱི་གཟུགས་སུ་གྱུར་པའི་རིག་འཛིན་གྲུབ་པའོ། །གང་ཞན་ཞེས་པ་ནི་རིག་འཛིན་པ་ལ་རྣམས་གྲུབ་པ་སྟེ། དེ་ཉིད་ཀྱི་གཟུངས་ཀྱི་གྲུབ་པའོ། །གོང་མ་གསུམ་ནི་སེམས་ཀྱི་གྲུབ་པར་ཤེས་པར་བྱའོ། །རྒྱུད་ལས་རྒྱུད་དུ་གྱུར་པ་ཡི། །ཞེས་པ་ནས། ཡིད་ལས་ཡང་དག་འབྱུང་བ་ཐོབ། །ཅེས་པའི་བར་གྱིས་གྲུབ་པའི་དུས་བཤད་དེ། དེ་ལས་གྲུབ་པའི་དུས་ཀྱང་ཚེ་འདི་ལ་གྲུབ་པ་དང་ཚེ་ཕྱི་མ་ལ་གྲུབ་པ་རྣམ་པ་གཉིས་སོ། །རྒྱུད་ལས་རྒྱུད་དུ་གྱུར་པ་ཡི། །ལས་ནི་མི་སྲིད་པ་ཉམས་ཤིང༌། །རྣམ་སྨིན་རྣམ་པར་མ་སྨིན་ཏེ། །དངོས་གྲུབ་དག་གིས་དུས་སུ་འདོད། །ཅེས་པ་ནི་ཚེ་འདི་ལ་གྲུབ་པ་སྟེ། རྒྱུད་ལས་རྒྱུད་དུ་གྱུར་པའི་ལས་རྣམས་མ་ཟད་དེ་ཚེ་སྔ་མའི་རྒྱུད་གོ་དྲུག་ལ་སོགས་པ་ནས་ལས་བསགས་པ་ཚེ་འདིའི་རྒྱུད་ལ་མ་ཉམས་ཤིང་བདག་གི་ཕུང་པོ་གསོན་ན་ཞེས་པའོ། །རྣམ་སྨིན་རྣམ་པར་སྨིན་པ་དེ། །ཞེས་སྟོན་ལ་དེ་ལྟར་ཡང་གསོན་ལ་ཚེ་དང་བསོད་ནམས་ལ་སོགས་པའི་རྒྱུད་བསགས་པའི་འབྲས་བུ་ཡང་འདིར་སྨིན་པར་གྱུར་ཅིང་སྔ་མའི་ལས་རྣམས་མ་ཟད་པས་བདག་ཚེ་རིང་བའི་རྣམ་སྨིན་རྣམ་པར་སྨིན་པས་བདག་གི་བསོད་ནམས་ཀྱི་རྒྱུད་མཐུ་བརྟས་བར་གྱུར་ཏེ། སྒྲུབ་པའི་ཚེ་དེ་ལྟར་ཚེ་དང་བསོད་ནམས་གཉིས་བསྲུངས་ན་དེ་ཚེ་འདི་ཉིད་ལ་གྲུབ་པར་བཤད་དོ། །མདོར་ན་
གང་ཚེ་དུས་གཅིག་ཏུ། །ལས་དང་སྐྱེ་བ་འཕང་གྱུར་པ། །དེ་ཚེ་འང་སྔགས་པས་དངོས་གྲུབ་ནི། །ཡིད་ལས་ཡང་དག་འབྱུང་བ་ཐོབ། །ཅེས་པ་ནི་དངོས་གྲུབ་བསྒྲུབ་པ་ནི་ལས་དང་ཚེས་མ་བཏང་སྟེ། དུས་གཅིག་ཏུ་ལས་དང་ཚེ་ཟད་པར་གྱུར་ན་སྒྲུབ་པའི་འབྲས་བུ་སྔགས་པ་དེས་ཚེ་ཕྱི་མ་ལ་བསྒྲུབ་མི་དགོས་པར་རྡོ་རྗེ་ལ་སོགས་པའི་རིགས་སུ་སྐྱེ་པ་དང་རིག་འཛིན་ལ་སོགས་པའི་སྐྱེ་བ་ཐོབ་པར་འགྱུར་རོ་ཞེས་པའོ། །ཡིད་ལས་ཡང་དག་འབྱུང་བ་ཡིས། །ཞེས་པ་ནི་རྫས་ལ་སོགས་པས་བསྒྲུབ་མི་དགོས་པར་ཚེ་འཕོས་མ་ཐག་ཏུ་ཡིད་ཉིད་ཀྱིས་གྲུབ་པ་དེ་དག་ཐོབ་པར་འགྱུར་རོ། །གྲུབ་ནས་མཁའ་ལ་འགྲོ་བ་ནི། །ཞེས་པ་ནས། རྫོགས་སངས་རྒྱས་དང་ལྷན་ཅིག་དགའ། །ཞེས་པའི་བར་གྱིས་ནི་གྲུབ་པའི་འབྲས་བུ་རྣམས་དྲིས་པའི་ལན་བཤད་པ་སྟེ། གྲུབ་ནས་ནམ་མཁའ་ལ་འགྲོ་བ་ནི། ཇི་ལྟར་སྒྱུ་མ་འཇིགས་མེད་བཞིན། །སྔགས་ཀྱི་དྲ་བས་རྨོངས་བྱེད་པ། །ཇི་ལྟར་མིག་འཕྲུལ་ཆེན་པོ་བཞིན། །ཞེས་པ་ནི་ནམ་མཁའ་ལ་འགྲོ་བའི་གྲུབ་པ་བཤད་པ་སྟེ། ཇི་ལྟར་མིག་འཕྲུལ་གཞན་ནམ་མཁའ་ལ་འགྲོ་བ་དང་རྫུ་འཕྲུལ་སྣ་ཚོགས་བྱེད་བ་བཞིན་དུ་སྔགས་པ་དེ་ཡང་རིག་འཛིན་ལ་སོགས་པ་གྲུབ་ནས་ནམ་མཁའ་ལ་འགྲོ་བ་དང་སྔགས་ཀྱི་མཐུས་རྣམ་པ་སྣ་ཚོགས་པའི་སྤྲུལ་པ་ལ་སོགས་པར་སྟོན་པར་བྱེད་ཅེས་པའོ། །གང་ལ་ལུས་དང་ངག་མེད་པར། །དྲི་ཟའི་གྲོང་ཁྱེར་དེ་བཞིན་ཏེ། །དེ་བཞིན་མི་སྣང་འགྱུར་ཞེས་བྱ། །དེ་ནི་དེ་ན་གནས་པ་ཡིན། །ཞེས་པ་ནི་རིག་འཛིན་ལ་སོགས་པ་གྲུབ་ནས་མི་སྣང་བར་གྱུར་པའི་དཔེ་དྲི་ཟའི་གྲོང་ཁྱེར་ལས་བླངས་ནས་བཤད་པ་སྟེ། ཇི་ལྟར་དྲི་ཟའི་གྲོང་ཁྱེར་ལུས་ལ་སོགས་པ་དང་དངོས་སུ་མི་སྣང་ལ་གནས་པར་བྱེད་པ་དེ་བཞིན་དུ། སྔགས་པ་དེ་ཡང་གྲུབ་ནས་ལུས་ཀྱང་མི་སྣང་ལ་ཚིག་ཏུ་བརྗོད་པ་ཡང་མི་ཐོས་པར་ནམ་མཁའ་ལ་མི་སྣང་བར་གྱུར་ཅིང་བར་སྣང་ལ་གནས་པར་བྱེད་དོ་ཞེས་བཤད་དོ། །ཇི་ལྟར་ཉལ་བའི་རྨི་ལམ་ན། །སུམ་ཅུ་རྩ་གསུམ་གནས་སུ་ནི། །ལུས་ཀྱང་སྤངས་པ་མ་ཡིན་ལ། །དེ་ཉིད་ཀྱིས་ཀྱང་དེ་མ་སོང༌། །དེ་བཞིན་རྣལ་འབྱོར་གཉིད་ཀྱིས་ཀྱང༌། །སྔགས་པ་སྔགས་ལ་གནས་པ་དང༌། །བསོད་ནམས་བྱས་པའི་ལས་རྣམས་ཀྱིས། །འཇའ་དང་འདྲ་བའི་
ལུས་ཀྱང་ཐོབ། །ཅེས་པ་ནི་སྔགས་པ་རིག་འཛིན་ལ་སོགས་པ་གྲུབ་ནས་ལུས་འདི་ཡང་མི་འདོར་བར་ནམ་མཁའ་ལ་སོགས་པ་ལ་འགྲོ་བའི་དཔེ་རྨི་ལམ་ལས་བླངས་ནས་བཤད་པ་སྟེ། ཇི་ལྟར་སྐྱེས་བུ་ཉལ་བའི་རྨི་ལམ་ན་སུམ་ཅུ་རྩ་གསུམ་ལ་སོགས་པའི་གནས་མཐོང་བར་ཡང་འགྱུར་བ་དེ་བཞིན་དུ། །སྔགས་པ་དེ་ཡང་རྣལ་འབྱོར་གྱི་དབང་གིས་ལུས་འདི་ནི་མ་བོར་བར་ནམ་མཁའ་ལ་སོགས་པར་འགྲོ་བ་ཡང་རང་གིས་མཐོང་ངོ༌། །གཟུགས་རྣམ་པ་སྣ་ཚོགས་ཡང་སྟོན་ནུས་པར་འགྱུར་ཞེས་པའོ། །འཇའ་དང་འདྲ་བའི་ལུས་ཀྱང་ཐོབ། །ཅེས་པ་ནི་གཟུགས་སྣ་ཚོགས་སྟོན་པའོ། །ལུས་དང་ངག་ཡིད་ལས་བྱུང་བའི། །གསང་སྔགས་ཡིད་བཞིན་ནོར་བུ་འདྲ། །དེ་ལས་རྣམ་པར་བསམས་པའི་དོན། །མ་བརྟགས་པར་ཡང་འབྱུང་བར་འགྱུར། །ཞེས་པ་ནི་སྔགས་ཀྱི་གྲུབ་པའི་ཡིད་བཞིན་གྱི་ནོར་བུ་ལས་དཔེ་བླངས་ནས་བཤད་བ་སྟེ། ཇི་ལྟར་ཡིད་བཞིན་གྱི་ནོར་བུ་གང་བསམས་པའི་དོན་རྣམས་བརྟགས་མི་དགོས་པར་ལྷུན་གྱིས་གྲུབ་པ་ཉིད་དུ་འབྱོར་བར་གྱུར་པ་དེ་བཞིན་དུ་སྔགས་གྲུབ་པའི་འབྲས་བུ་ཡང་གང་འདོད་པ་རྣམས་བརྟགས་མི་དགོས་པར་ལྷུན་གྱིས་གྲུབ་པ་ཉིད་དུ་འབྱོར་པར་འགྱུར་ཞེས་པའོ། །ཇི་ལྟར་ནམ་མཁའ་ཕྱོགས་རྣམས་སུ། །འདུས་བྱས་སྤྱོད་ཡུལ་ཐམས་ཅད་ཀྱིས། །མི་གོས་དེ་བཞིན་སྔགས་པ་ཡང༌། །རྟོགས་པའི་སྤྱོད་ཡུལ་ཀུན་གྱིས་སོ། །ཞེས་པ་ནི་གྲུབ་པ་ཐོབ་པ་དེ་ཡང་ནི་གཟའ་དང་སྐར་མ་དང་ལྟས་ངན་ལ་སོགས་པས་མི་ཚུགས་པར་བཤད་པ་སྟེ། ཇི་ལྟར་ནམ་མཁའ་ལ་འདུས་བྱས་ལ་སོགས་པའི་དྲི་མས་མི་གོས་པ་དེ་བཞིན་དུ་གྲུབ་པའི་སྔགས་པ་དེ་ཡང་གཟའ་དང་སྐར་མ་ལ་སོགས་པ་བཟང་ངན་ལ་མི་ལྟོས་ཏེ། དེ་དག་གིས་ལྟས་ངན་ལ་སོགས་པས་མི་ཚུགས་པར་ཤེས་པའོ། །འདི་ཀུན་འདུ་ཤེས་ཙམ་དུ་ནི། །ནམ་ཞིག་དེ་ལྟར་བསྒོམས་གྱུར་ཅིང༌། །རྣམ་པར་བསྒོམས་ན་སྔགས་པ་དེ། །རྫོགས་སངས་རྒྱས་དང་ལྷན་ཅིག་དགའ། །ཞེས་པ་ནི་སྔགས་པ་གྲུབ་པ་ཐོབ་ནས་སངས་རྒྱས་དང་ལྷན་ཅིག་ཏུ་འགྲོགས་པ་ཐོབ་པར་བཤད་པ་དེ། འདི་ཀུན་འདུ་ཤེས་ཙམ་དུ་ནི། །ཞེས་པ་འདུས་བྱས་ལ་སོགས་པའི་
ཆོས་འདི་དག་ཐམས་ཅད་དངོས་སུ་སྤོང་བ་མ་ཡིན་གྱི། །འདུ་ཤེས་ཙམ་དུ་བྱང་ཆུབ་ཀྱི་སེམས་བསྒོམ་པའི་ཚེ་བསྒོམས་པས་ཀུན་དུ་སངས་རྒྱས་པ་དང་ལྷན་ཅིག་ཏུ་འགྲོགས་ཤིང་དེ་ལ་ཆོས་ཉན་པ་ལ་སོགས་པས་དགའ་བར་འགྱུར་ཞེས་པའོ། །སངས་རྒྱས་རྐང་གཉིས་གཙོ་བོ་ཡིས། །སྦྱིན་སྲེག་གཉིས་སུ་བཤད་པ་ནི། །ཕྱི་རོལ་གྱི་དང་ནང་གི་སྟེ། །དེ་ཡང་ཚིམ་པར་བྱ་དང་བཅས། །ཞེས་བ་ནི་སྦྱིན་སྲེག་ལས་མེ་དག་དང༌། ཞེས་སྔར་དྲིས་པ་ལ་རྣམ་པ་གཉིས་ནི་སྔར་བཤད་ཟིན་ལ། འདིར་ནི་སྦྱིན་སྲེག་རྣམ་པ་གཉིས་ཕྱི་མའི་མེ་དང་ནང་གི་མེ་རྣམ་པ་གཉིས་སུ་བཤད་དེ། དེ་ཡང་ཚིམ་པར་བྱ་བ་བཅས། །ཞེས་གསུངས་པ་དེ་ལ་ནང་གི་སེམས་ཀྱི་ཚིམ་པར་བྱ་བ་ནི་རང་གི་ས་བོན་ལས་སླར་ལྷའི་གཟུགས་སུ་བསྒྱུར་བར་སྔར་བཤད་དོ། །ཕྱི་རོལ་གྱི་མེ་ནི་མཉེས་པར་བྱ་བའི་བསྲེག་པའི་རྫས་ཀྱིས་ཚིམ་པར་བྱའོ། །ལྷ་རྣམས་ཀྱིས་ནི་སོ་སོ་ཡིས། །ཞེས་པ་ནས། ཡང་དག་རྫོགས་པའི་སངས་རྒྱས་ཀྱིས། །གསང་སྔགས་འབྲས་བུ་སྐལ་བ་ལྡན། །ཞེས་པའི་བར་གྱིས་ལྷ་རྣམས་ཀྱི་རང་བཞིན་དང་གྲུབ་ཚད་རྣམས་བཤད་པ་སྟེ། ལྷ་རྣམས་ཀྱང་ནི་སོ་སོ་ཡིས། །རང་བཞིན་ཡོངས་སུ་མཁྱེན་ནས་སུ། །ཞེས་པ་ནི་ལྷ་རྣམས་ཀྱི་རང་བཞིན་ཤེས་པར་བྱས་ན་དེ་དག་གི་གྲུབ་པའི་འབྲས་བུ་ཡང་ཤེས་པར་འགྱུར་ཞེས་པ་སྟེ། དེ་ལ་འཇིག་རྟེན་ལས་འདས་བའི་ལྷ་རྣམས་ཀྱི་རང་བཞིན་ནི་སྔར་བཤད་ཟིན་ཏོ། །འདིར་ནི་འཇིག་རྟེན་གྱི་ལྷ་རྣམས་ཀྱི་རང་བཞིན་བཤད་ནས་དེའི་མཐུས་འབྲས་བུའི་ཚད་ཤེས་པར་བྱ་སྟེ། དེ་བས་ན། འཇིག་རྟེན་པ་ཡི་སྔགས་རྣམས་ཀྱི། །ཚད་དག་ལེགས་པར་གསུངས་པ་ནི། །ཞེས་བྱ་བ་ལ་སོགས་པ་གསུངས་པ་ཡིན་ནོ། །དབང་ཕྱུག་ལ་སོགས་པའི་ལྷ་མཐུ་ཆེན་པོ་དེ་དག་གིས་སྨྲས་པའི་སྔགས་དང་ཕྱག་རྒྱ་རྣམས་ནི་འབྲས་བུ་འཕྲལ་དུ་སྟེར་པ་ནི་དེ་དག་གི་ཚད་བསྟན་པ་ཡིན་ནོ། །ཚད་ཅེས་པ་ནི་དེ་དག་གི་མཐུ་ལ་བྱའོ། །འོན་ཀྱང་སྐྱེ་དང་འཇིག་པ་ཡི། །ཆོས་ཅན་དེ་དག་བརྟན་པ་མེད། །ཅེས་པ་ནི་དེ་དག་གི་ཁྱད་པར་གསུངས་པ་སྟེ། འཇིག་རྟེན་པའི་ལྷ་རྣམས་འབྲས་བུ་ཚེ་འདི་ལ་འཕྲལ་དུ་སྟེར་མོད་ཀྱི། དེ་རྣམས་སྐྱེ་ཞིང་འཇིག་པའི་ཆོས་ཅན་ཡིན་པས་མི་རྟག་པའོ། །འཇིག་རྟེན་འདས་པའི་
སྔགས་རྣམས་ནི། །ཞེས་པ་ནས། གསང་སྔགས་ཚད་ནི་སྔོན་བཤད་པ། །ཞེས་པའི་བར་གྱིས་འཇིག་རྟེན་ལས་འདས་པའི་སྔགས་ཏེ། བྱང་ཆུབ་སེམས་དཔའ་དང་ཉན་ཐོས་དང་རང་སངས་རྒྱས་ལ་སོགས་པས་གསུངས་པས་སྔགས་རྣམས་ཐོག་མའི་བྱེད་པ་མེད་ཅིང་ལས་དང་སྐྱེ་བ་བཅད་པ་སྟེ། འདོད་ཆགས་དང་ཞེ་སྡང་དང་གཏི་མུག་གི་ཉེས་པ་གསུམ་དང་བྲལ་བས་སྐྱེ་ཞིང་འཇིག་པ་ལ་སོགས་པ་མེད་དེ་ཚད་རྣམས་སྔར་བཤད་ཟིན་ཏོ་ཞེས་པའོ། །དུས་གསུམ་ལས་ནི་ཤིན་ཏུ་འདས། །རྟེན་ཅིང་འབྲེལ་པ་ལས་བྱུང་བ། །མཐོང་དང་མ་མཐོང་འབྲས་བུ་ཅན། །དག་གི་ལུས་ལས་བྱུང་བའོ། །ཞེས་པ་ནི་དེ་ལྟ་བས་ན་འཇིག་རྟེན་ལས་འདས་པའི་སྔགས་རྣམས་འཇིག་རྟེན་པ་ལྟར་མཐོང་བའི་ཆོས་འབའ་ཞིག་ལ་འབྲས་བུ་འཕྲལ་དུ་སྟེར་བ་ཁོ་ན་མ་ཡིན་གྱི། མཐོང་བའི་ཆོས་དང་མ་མཐོང་བ་གཉི་ག་ལ་འབྲས་བུ་སྟེར་རོ་ཞེས་པ་སྟེ། མཐོང་བ་ནི་ལྷ་དང་མི་ལ་སོགས་པ་འགྲུབ་བའོ། །མ་མཐོང་བ་ནི་མྱ་ངན་ལས་འདས་པའོ། །འཇིག་རྟེན་ལས་འདས་པའི་འབྲས་བུའི་ཚད། །བསྐལ་བ་གཅིག་ཏུ་བཤད་པ་ཡིན། །ཞེས་གསུངས་པ་ནི་འཇིག་རྟེན་པའི་ལྷ་རྣམས་ཀྱི་གྲུབ་པའི་འབྲས་བུ་ཇི་སྲིད་ཐུབ་པ་གསུངས་པ་སྟེ། འཇིག་རྟེན་པའི་འབྲས་བུ་ནི་བསྐལ་བ་གཅིག་གི་བར་དུ་ཐུབ་ཅེས་པའོ། །ཡང་དག་རྫོགས་པའི་སངས་རྒྱས་ཀྱིས། །གསང་སྔགས་འབྲས་བུ་བསྐལ་བ་འདས། །ཞེས་པ་ནི་འཇིག་རྟེན་ལས་འདས་པའི་སྔགས་རྣམས་ཀྱི་འབྲས་བུ་བསྐལ་བ་ལས་འདས་པར་ཐུབ་ཅེས་པའོ། །སངས་རྒྱས་དྲང་སྲོང་ཆེན་པོ་དང༌། །རྒྱལ་སྲས་རྣམས་ཀྱི་ཏིང་འཛིན་ནི། །མཚན་མ་མེད་ཅིང་དག་པའོ། །འཇིག་རྟེན་པར་ནི་མཚན་མར་བཅས། །ཞེས་པ་ནི་སྔགས་པ་རྣམས་ཀྱི་ཏིང་ངེ་འཛིན་བཤད་པ་སྟེ། དེ་ལ་སྤྱིར་ཏིང་ངེ་འཛིན་ལ་ཡང་རྣམ་པ་གཉིས་ཏེ། དོན་དམ་པ་དང་ཀུན་རྫོབ་ཀྱིའོ། །དེ་ལ་དོན་དམ་པ་ནི་ཨ་ལ་སོགས་པ་ཡི་གེ་འབྲུ་རེའི་སྒོ་ནས་བསྟན་པའོ། །ཀུན་རྫོབ་ཀྱི་ནི་སྟོབས་དང་མི་འཇིགས་པ་ལ་སོགས་པའི་ཡོན་ཏན་གྱི་ཚིག་ཏུ་གྱུར་པ་དེ་དག་གི་སྔགས་ཀྱི་ཕྲེང་བའི་ཚིག་ལས་ཏིང་ངེ་འཛིན་གྱུར་པའི་ཡི་གེ་རྣམས་ཏེ་སྔར་བཤད་ཟིན་ཏོ། །འདིར་ནི་ཏིང་ངེ་འཛིན་གྱི་དོན་རྣམས་བཤད་བ་སྟེ། སངས་རྒྱས་དྲང་
སྲོང་ཆེན་པོ་ནི། །ལུས་དང་ངག་དང་ཡིད་གསུམ་ཐུབ་པའི་མཚན་ཉིད་ཅན་ཡིན་པས་དྲང་སྲོང་སྟེ། མི་གནས་པའི་མྱ་ངན་ལས་འདས་པ་ཀུན་དུ་སངས་རྒྱས་པ་ལ་སོགས་པ་ལ་བྱའོ། །རྒྱལ་སྲས་རྣམས་ནི་བྱང་ཆུབ་སེམས་དཔའ་ལ་སོགས་པའོ། །དེ་དག་གི་ཏིང་ངེ་འཛིན་གྱི་ཆོས་ཐམས་ཅད་གཟོད་མ་ནས་མ་སྐྱེས་པ་རྣམ་པར་མི་རྟོག་པའི་མཚན་ཉིད་ཅན་ཡིན་པས་མཚན་མ་མེད་པས་དག་པའོ། །འཇིག་རྟེན་པར་ནི་མཚན་མར་བཅས། །ཞེས་པ་ནི་ནམ་བྱང་ཆུབ་སེམས་དཔའ་ཏིང་ངེ་འཛིན་ལས་བཞེངས་ནས་སངས་རྒྱས་ཀྱི་ཞིང་རྣམ་པར་བརྒྱན་པ་ལ་སོགས་པ་རྣམ་པ་དང་བཅས་པའི་སྤྱོད་པ་དང༌། འཇུག་པ་དང་སངས་རྒྱས་ཤིང་མངོན་པར་བྱང་ཆུབ་ནས་སྔོན་གྱི་སྨོན་ལམ་གྱི་ཤུགས་ཀྱིས་སྐུ་མི་ཟད་པའི་འཁོར་ལོ་ལ་སོགས་པ་འབྱུང་བ་ཡ་མཚན་དང་བཅས་པའི་སྤྱོད་པ་སྟེ་དེ་དག་ལ་ཡང་འཇིག་རྟེན་པ་མཚན་མ་དང་བཅས་ཞེས་བྱའོ། །གཉིས་སུ་ན་མུ་སྟེགས་བྱེད་ཀྱི་འཇིག་རྟེན་པའི་ལྷ་རྣམས་ཀྱི་ཏིང་ངེ་འཛིན་ནི་དངོས་པོ་ཡོད་པར་ལྟ་བས་ན་མཚན་མ་དང་བཅས་ཞེས་བྱའོ། །རྣམ་པར་སྨིན་པ་འདི་ཉིད་ལ། །ལས་ཀྱི་འབྲས་བུ་སྨིན་གྱུར་པ། །ནམ་ཞིག་དངོས་གྲུབ་ཐོབ་པ་ན། །དེ་ཚེ་ལས་དང་ཟློག་པར་འགྱུར། །ཞེས་པ་ནི་སྔོན་གྱི་ལས་ཀྱི་རྣམ་པར་སྨིན་པའི་ཕུང་པོ་ལྔ་པོ་འདི་ལ་ལྷའི་གཟུགས་སུ་སྨིན་པར་འགྱུར་བའི་ལས་ཀྱི་འབྲས་བུ་སྨིན་པར་འགྱུར་ཏེ། ནམ་བདག་གི་ཏིང་ངེ་འཛིན་ལ་སོགས་གྲུབ་པ་ཐོབ་པ་ནི་དེའི་ཚེ་གྲུབ་པ་དེ་ལས་ཀྱི་རྣམ་པར་སྨིན་པས་དེ་ཟིལ་གྱིས་མནན་ནས་འབྲས་བུ་མི་སྨིན་པར་ལྡོག་པར་འགྱུར་རོ་ཞེས་པའོ། །སེམས་ནི་ངོ་བོ་ཉིད་མེད་པའི་ཕྱིར། །རྒྱུ་དང་འབྲས་བུ་རྣམས་སྤངས་ཤིང༌། །ལས་དང་ཚེ་ལས་རྣམ་པར་གྲོལ། །ནམ་མཁའ་ལྟ་བུར་གྱུར་པ་ཡིན། །ཞེས་པ་ནི་གྲུབ་པའི་མཐར་སངས་རྒྱས་སུ་འགྱུར་པར་བསྟན་ཏེ། སྒྲུབ་པ་པོས་བྱང་ཆུབ་ཀྱི་སེམས་དག་པར་བསྒོམ་པས་སེམས་ཀྱི་ངོ་བོ་ཉིད་མེད་པར་རྟོགས་ཏེ། ཆོས་ཀྱི་རྒྱུ་དང་འབྲས་བུ་དམིགས་སུ་མེད་པས་རྒྱུ་ལས་དང་འབྲས་བུ་ཆེ་སྟེ། ལས་དང་ཚེ་དག་ལས་ཀྱང་རྣམ་པར་གྲོལ་བར་འགྱུར་ཏེ། དེ་ལྟར་ལས་དང་ཚེ་ལས་རྣམ་པར་གྲོལ་ན་ནམ་མཁའ་ལྟ་བུར་གཟུང་བ་དང་འཛིན་པ་སྤངས་པ་དག་པའི་
མཚན་ཉིད་དུ་འགྱུར་རོ་ཞེས་པའོ། །གསང་བའི་བདག་པོ་ཞེས་པ་ནས། །སྙིང་རྗེ་ཆེན་པོའི་འབྱུང་བ་ཞེས་བྱ་བ་ཡོད་ཀྱི་དེ་བྲི་བའི་ཆོ་ག་ཉོན་ཅིག་ཅེས་པའི་བར་གྱིས་གསང་བའི་དཀྱིལ་འཁོར་གྱི་རང་བཞིན་དང་ཡོན་ཏན་བརྗོད་ནས་ཉོན་ཅིག་ཅེས་པ་སྟེ། དེ་ལ་ཕྱག་རྒྱའི་གཟུགས་སུ་དགོད་བའི་རིམ་པར་ཕྱེ་བ་ཞེས་པ་ནི་སྙིང་རྗེ་ཆེན་པོ་འབྱུང་བའི་དཀྱིལ་འཁོར་དང་ཡི་གེ་འཁོར་ལོ་བསྐོར་བའི་དཀྱིལ་འཁོར་དུ་ལུས་དང་ཚིག་གིས་གཟུགས་སུ་བཀོད་ཀྱི། འདིར་སེམས་ཀྱི་རང་བཞིན་དངོས་སུ་གཞག་ཏུ་མི་རུང་པས་ཕྱག་རྒྱའི་གཟུགས་སུ་བཀོད་པ་དེ། དེའི་རིམ་པར་ཕྱེ་བ་ནི་ཕྱག་རྒྱའི་གཟུགས་སུ་བཀོད་པའི་དཀྱིལ་འཁོར་ལ་བྱའོ། །ལྷ་རྣམས་གནས་པར་བྱིན་གྱིས་རློབ་པ་ཞེས་པ་ནི་དཀྱིལ་འཁོར་དེར་ལྷ་རྣམས་ཕྱག་རྒྱའི་གཟུགས་སུ་བཀོད་བས་བྱིན་གྱིས་རློབ་པར་གྱུར་པའོ། །ཏིང་ངེ་འཛིན་ལྔ་རྟོགས་པ་ཞེས་པ་ནི་དབང་ཆེན་ལ་སོགས་པའི་དཀྱིལ་འཁོར་ལྔ་པོ་དེ་དག་ཉིད་ཡེ་ཤེས་ཀྱི་བྱེ་བྲག་ཏུ་བྱིན་གྱིས་བརླབས་པ་སྟེ། དཀྱིལ་འཁོར་ལྔ་པོ་དེ་ལས་ཡེ་ཤེས་ཀྱི་ཏིང་ངེ་འཛིན་གྱི་ཁྱད་པར་ལྔ་རྟོགས་པར་འགྱུར་པའོ། །སྔོན་གྱི་སངས་རྒྱས་རྣམས་ཀྱི་མངོན་པར་རྫོགས་པར་སངས་རྒྱས་བ་ཞེས་པ་ནི་སངས་རྒྱས་ཐམས་ཅད་མཛད་པ་གཅིག་ཏུ་བསྟན་པ་ནི། སྔོན་གྱི་སངས་རྒྱས་རྣམས་ཀྱིས་ཀྱང་མཁྱེན་ནས་བཤད་ཀྱིས་དེ་ཉོན་ཅིག་ཅེས་སྦྱར་རོ། །བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་ཞེས་པ་ནས། ཕན་པ་དང་བདེ་བའི་ཕྱིར་ཞེས་པའི་བར་དུ་ནི་དཀྱིལ་འཁོར་དེ་བཤད་པ་ཡང་ཕྱག་ན་རྡོ་རྗེས་མི་མཁྱེན་པའི་ཕྱིར་བཤད་པ་ནི་མ་ཡིན་གྱི། མོས་པས་སྤྱོད་པའི་ས་ལ་གནས་པའི་བྱང་ཆུབ་སེམས་དཔའ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ལ་ཕན་པ་དང་བདེ་བའི་ཕྱིར་བཤད་དོ་ཞེས་པ་སྟེ། ཆོས་ཀྱི་དབྱིངས་རྟོགས་པ་སྤྱོད་ཡུལ་དུ་གྱུར་པ་ཞེས་པ་ནི་མོས་པས་སྤྱོད་པའི་ས་ལ་གནས་པ་རྣམས་ཀྱི་ཤེས་རབ་ཀྱི་ཡོན་ཏན་བཤད་པ་སྟེ། དེ་དག་ཤི་ཤེས་རབ་ནི་ནམ་མཁའ་དང་འདྲ་བའི་ཆོས་ཀྱི་དབྱིངས་དམིགས་པའི་སྤྱོད་ཡུལ་དུ་འགྱུར་ཞེས་པའོ། །ཆོས་ཀྱི་དབྱིངས་ནམ་མཁའ་དང་འདྲ་བ་དེ་དག་གི་སྤྱོད་ཡུལ་དུ་གྱུར་ན་སྔགས་ཀྱི་ཚུལ་བཤད་ཅི་དགོས་ཤེ་ན། དེ་དག་དེ་ལྟར་
སྟོང་བ་ཉིད་ཀྱི་སྤྱོད་ཡུལ་ཅན་དུ་གྱུར་ཀྱང་ཐབས་ཀྱིས་སེམས་ཅན་བསྒྲལ་བར་བྱེད་དོ། །དེ་བས་ན་སེམས་ཅན་གྱི་ཁམས་མ་ལུས་པ་བསྒྲལ་བ་ཡི་དམ་བཅས་པ་ཞེས་གསུངས་པ་ཡིན་ནོ། །དེ་ལྟར་ཐབས་དང་ཤེས་རབ་ཟུང་དུ་འབྲེལ་བའི་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ལ་ཕན་པ་དང་བདེ་བའི་ཕྱིར་དཀྱིལ་འཁོར་དེ་ཉོན་ཅིག་ཅེས་པའོ། །དེ་ལ་དོན་དང་ཞེས་པ་ནི་བྱང་ཆུབ་སེམས་དཔའ་རྣམས་ཀྱི་དོན་མྱ་ངན་ལས་འདས་པའམ། ངེས་པར་ལེགས་པའི་བདེ་བའི་ཕྱིར་རོ། །ཕན་པ་དང་བདེ་པའི་ཞེས་པ་ནི་ཚེ་འདི་དང་ཕྱི་མ་ལ་ཕན་པའི་ཕྱིར་རོ། །བདེ་བའི་ཕྱིར་ཞེས་པ་ནི་ཚེ་འདི་ལ་བྱ་བའི་ཕྱིར་ཞེས་པའོ། །གསང་བ་པའི་བདག་པོ་དང་པོར་ཡང་དག་པར་རྫོགས་པའི་སངས་རྒྱས་ཀྱི་དཀྱིལ་འཁོར་དགོད་པ་ཞེས་པ་ནི་དཀྱིལ་འཁོར་སྔ་མ་དག་དང་འདྲ་བར་དང་པོ་སྙིང་པོའི་དཀྱིལ་འཁོར་དུ་བཅོམ་ལྡན་འདས་རྣམ་པར་སྣང་མཛད་དགོད་པ་ཞེས་པ་སྟེ། བྲི་བའི་ཆོ་ག་ཉོན་ཅིག་ཅེས་འོག་ནས་འབྱུང་བ་དང་སྦྱར་རོ། །གསང་བ་ལས་ཀྱང་ཆེས་གསང་བ། །ཞེས་པ་ལ་གསང་བ་ནི་སེམས་ཀྱི་རང་བཞིན་ཕྲ་ཞིང་དམིགས་སུ་མེད་པས་ན་གསང་བའོ། །དེ་ལས་ཀྱང་ཆེས་གསང་བ་ནི་དམ་ཚིག་མེད་པའི་སེམས་ཅན་རྣམས་ལ་མི་བསྟན་པའི་ཕྱིར་རོ། །སྙིང་རྗེ་ཆེན་པོའི་སྙིང་པོ་འབྱུང་བ་ཞེས་པ་ནི་སྔར་བཞིན་ནོ། །གང་ལས་འཇིག་རྟེན་པ་དང་འཇིག་རྟེན་ལས་འདས་པའི་དཀྱིལ་འཁོར་གྲངས་མེད་པ་འབྱུང་བ་ཞེས་པ་ལ་འཇིག་རྟེན་པའི་དཀྱིལ་འཁོར་ནི་གཟུགས་བརྙན་གྱི་དཀྱིལ་འཁོར་ཏེ་ཚོན་གྱིས་བྲི་བ་རྣམས་སོ། །འཇིག་རྟེན་ལས་འདས་པ་ནི་རང་བཞིན་གྱི་དཀྱིལ་འཁོར་ཏེ་གཟུགས་བརྙན་གྱི་དཀྱིལ་འཁོར་རྣམས་ཀྱང་འདི་ལས་འཕྲོ་བ་དང་རང་བཞིན་གྱི་དཀྱིལ་འཁོར་ཡང་འདི་མཐོང་བ་ལས་ཤེས་པར་གྱུར་པས་ན་འཇིག་རྟེན་པ་དང་འཇིག་རྟེན་ལས་འདས་པའི་དཀྱིལ་འཁོར་འབྱུང་བ་ཞེས་བྱའོ། །ཡང་ན་འཇིག་རྟེན་པའི་ལྷ་རྣམས་ཀྱི་དཀྱིལ་འཁོར་དང་འཇིག་རྟེན་ལས་འདས་པའི་ལྷ་རྣམས་ཀྱི་དཀྱིལ་འཁོར་གྲངས་མེད་པ་རྣམས་ཀྱང་འདི་ལས་འབྱུང་བ་ཞེས་པ་སྟེ། དེ་བྲི་བའི་ཆོ་ག་ཉོན་ཅིག་ཅེས་པའོ། །ཀུན་དུ་གྲུབ་བཞི་ལྷ་མ་པ་ལ། །ཞེས་པ་ནས། དགོད་པ་རྣམས་ཀྱང་ངེས་པ་ཡིན། །འདི་
ལས་བྱུང་བར་ཤེས་པར་བྱ། །ཞེས་པའི་བར་གྱིས་བཅོམ་ལྡན་འདས་རྣམ་པར་སྣད་མཛད་བཞུགས་པའི་སྙིང་པོའི་དཀྱིལ་འཁོར་བྲི་བ་སྟེ། དཀྱིལ་འཁོར་གྱིས་བཅད་པ་དང༌། སྣམ་བུའི་རིམ་པ་དང༌། ཚོན་དགྱེ་བ་ལ་སོགས་བའི་ཆོ་ག་རྣམས་དཀྱིལ་འཁོར་གོང་མ་རྣམས་སུ་ཇི་སྐད་གསུངས་པ་བཞིན་ནོ། །ཀུན་དུ་གྲུ་བཞི་ལྷམ་པ་ནི་ཚད་མེད་པ་བཞི་དང་ལྡན་པར་སྟོན་པའོ། །སྒོ་གཅིག་པ་ནི་སྒོ་མང་པོ་ནས་ཆོས་ཀྱི་དབྱིངས་ཀྱི་སྒོ་གཅིག་ཏུ་འདུ་བར་བསྟན་པའོ། །སྟེགས་བུར་བཅས་པ་ནི་མཐའ་ཚོན་གྱིས་བྲིས་པའི་དབུས་ཚོན་སེར་པོས་བཀང་སྟེ་བཅོམ་ལྡན་འདས་བཞུགས་པའི་གཞིར་བཅས་ཞེས་པའོ། །རྡོ་རྗེ་རྣམས་ཀྱི་མཚན་པ་ནི་དེའི་ནང་ནུབ་ཕྱོགས་ཀྱི་ལོགས་སུ་རྡོ་རྗེ་རྩེ་ལྔ་པ་བྲི་བའོ། །དབུས་སུ་རྡོ་རྗེ་རྩེ་བརྒྱད་པ། །ཞེས་པ་ནི་རྒྱུའི་ཚེ་རྣམ་པར་གྲོལ་བའི་གཟུངས་ཡེ་ཤེས་བརྒྱ་དང་བཅས་པར་སྟོན་ཏོ། །རྣམ་པར་གྲོལ་བའི་སྒོར་གྱུར་པ་ཡེ་ཤེས་བརྒྱར་ཡང་ཡི་གེ་འཁོར་ལོ་བསྐོར་བའི་རིམ་པར་ཕྱེ་བ་ལས་ཡི་གེ་ཨ་ས་མགོ་བཙུགས་ནས་ཀའི་རིམ་ནས་ཡ་དང་ར་དང་བ་དང་ལ་ཡན་ཆད་ཀྱི་བར་དུ་ཡི་གེ་ཉི་ཤུ་རྩ་བཞི་སྨོས་པ་དང་དང་པོའི་ཡི་གེ་ཨ་དང་བཅས་པ་ཉི་ཤུ་རྩ་ལྔ་པའོ། །དེ་བཞིན་དུ་ཨཱ་དང་བཅས་པ་དེ་ཡང་ཉི་ཤུ་རྩ་ལྔ་ཨོཾ་དང་བཅས་པ་ཉི་ཤུ་རྩ་ལྔ། ཨཿ་དང་བཅས་པ་ཡང་ཉི་ཤུ་རྩ་ལྔ་སྟེ། དེ་ལྟར་རྣམ་པར་ཐར་པའི་སྒོ་བརྒྱ་ལས་ཡེ་ཤེས་བརྒྱར་སྦྱར་བའི་རང་བཞིན་རྡོ་རྗེ་རྩེ་བརྒྱད་པ་དེའི་དབུས་སུ་བྲིའོ་ཞེས་པའོ། །ཤ་དང་ཥ་དང་ས་དང་ཧ་རྣམས་ནི་ཆ་གཉིས་པའི་ནང་དུ་འདུས་པར་ཤེས་པར་བྱའོ། །དེའི་སྟེང་པདྨ་བྲི་བ་ནི། །ས་བོན་དང་བཅས་རྒྱས་པར་བྱས། །ཞེས་པ་ནི་རྡོ་རྗེ་དེའི་སྟེང་དུ་པདྨ་འདབ་མ་བཞི་བ་རང་གི་ས་བོན་དང་བཅས་པར་བྲིའོ། །དེ་སྟེང་དུ་ཡང་པདྨ་ཆེ། ཕྱག་རྒྱ་ཀླ་དཀོར་གྱིས་མཛེས་བྱས། །འདབ་མ་བརྒྱད་པ་ལེགས་པར་རྫོགས། །ཟེ་བར་བཅས་པ་ཤིན་ཏུ་བཟང༌། །ཞེས་པ་ནི་པདྨོ་དེའི་སྟེང་དུ་ཡང་པདྨ་ཆེན་པོ་འདབ་མ་བརྒྱད་པ་བྲིས་ཏེ། ཕྱག་རྒྱ་ཀླད་ཀོར་གྱིས་མཛེས་བྱས། །ཞེས་པ་ཀླད་ཀོར་ནི་སྟོང་པ་ཉིད་དུ་སྟོན་པའི་ཚིག་ཡིན་པས་ཡན་ལག་བཅུ་གཉིས་པའི་རིག་པའི་རྒྱལ་པོ་ལ་བྱ་སྟེ། ཡན་ལག་བཅུ་གཉིས་ཚིག་དགོད་པ། །ཞེས་པ་དང་སྦྱར་རོ། །ཕྱག་རྒྱ་ནི་
གསང་བའི་ཕྱག་རྒྱ་བརྒྱད་པ་སྟེ། དཀྱིལ་འཁོར་བརྒྱད་ཀྱི་འཁོར་རྣམས་ཀྱི། །ཞེས་པ་དང་སྦྱར་རོ། །པདྨ་སྟེང་མཆེ་བ་དང་འདབ་མ་བརྒྱད་ཀྱིས་བྱེ་བྲག་ཆེ་བས་འོག་དེ་བས་ཆུང་བར་བྱ་བར་མངོན་ཏེ་འདབ་མ་བཞི་བར་ཤེས་པར་བྱའོ། །གཉིས་སུ་རྒྱུའི་ཚེ་པདྨ་ཡིན་པས་ཆུང་བར་ཤེས་པར་བྱའོ། །པདྨ་ཆེན་པོ་འདབ་མ་བརྒྱད་པ་ནི་ཡེ་ཤེས་བརྒྱད་ཀྱི་རང་བཞིན་དུ་སྔར་བཤད་པ་བཞིན་ནོ། །འདབ་མ་རྣམས་ནི་ཐམས་ཅད་ལ། །ཡན་ལག་བཅུ་གཉིས་ཚིག་དགོད་པ། །ཞེས་པ་ནི་ཡན་ལག་བཅུ་གཉིས་པའི་རིག་པའི་རྒྱལ་མོའི་སྙིང་པོ་དང་ཉེ་བའི་སྙིང་པོར་བཅས་པའི་ཡི་གེ་ཟུང་བརྒྱད་པོ་རྣམས་འདབ་མ་བརྒྱད་ལ་བྲི་བར་བྱའོ། །དེ་རྣམས་དབུས་ན་མགོན་བཞུགས་པ། །རྫོགས་པའི་སངས་རྒྱས་རྐང་གཉིས་གཙོ། །དཀྱིལ་འཁོར་བརྒྱད་ཀྱི་འཁོར་རྣམས་ཀྱིས། །ཁོར་ཁོར་ཡུག་ཡོངས་བསྐོར་བ། །ཞེས་པ་ནི་པདྨའི་དབུས་ཀྱི་སྙིང་པོ་ལ་བཅོམ་ལྡན་འདས་བཞུགས་ཏེ། ཕྱག་རྒྱ་བརྒྱད་པོ་རྣམས་ཀྱང་བཅོམ་ལྡན་འདས་ཀྱི་ཁོར་ཁོར་ཡུག་ཏུ་རང་གི་དཀྱིལ་འཁོར་དང་ས་བོན་དུ་བཅས་པར་པདྨའི་སྙིང་པོ་དེ་ཉིད་ལ་བྲི་བར་བྱའོ། །སྙིང་རྗེ་ལས་བྱུང་དཀྱིལ་འཁོར་འདི། །མཆོག་ཏུ་ཤེས་པར་བྱ་བ་སྟེ། །ཞེས་པ་ནི། མཆོག་ནི་སྟོན་པའི་མཆོག་གོ །སྙིང་རྗེ་ལས་བྱུང་ཞེས་པ་ནི་སྔ་མ་བཞིན་ནོ། །ལུང་བཞིན་དཀྱིལ་འཁོར་རྣམས་དང་ནི། །ལས་དང་ལུས་དང་དངོས་གྲུབ་དང༌། །དགོད་པ་རྣམས་ཀྱང་ངེས་པ་ཡིས། །འདི་ལས་བྱུང་བར་ཤེས་པར་བྱ། །ཞེས་པ་ནི་ཞི་བ་དང་རྒྱས་པ་ལ་སོགས་པའི་ལས་རྣམས་ཀྱི་དཀྱིལ་འཁོར་ལུགས་གཟུགས་སུ་དགོངས་ལ། དཀྱིལ་འཁོར་གྱི་སྔགས་ཀྱི་ལུང་གཞན་དག་ལས་བཤད་པ་རྣམས་ཀྱང་དཀྱིལ་འཁོར་འདི་ལས་བྱུང་བར་ཤེས་པར་བྱ་སྟེ། དེ་ནི་བཅོམ་ལྡན་འདས་རྣམ་པར་སྣང་མཛད་ཀྱི་གནས་དབང་ཆེན་གྱི་དཀྱིལ་འཁོར་དུ་ཤེས་པར་བྱའོ། །གསང་བ་བའི་བདག་པོ་གཞན་ཡང་དེ་བཞིན་གཤེགས་པ་རྣམས་ཀྱི་དཀྱིལ་འཁོར་ནི་ཞེས་པ་ནས། དེ་ནི་ཕྱོགས་བཅུ་རྣམས་སུ་སོང༌། །ཞེས་པའི་བར་གྱིས་བཅོམ་ལྡན་འདས་ཀྱི་ཤར་ཕྱོགས་སུ་སྔར་འདས་པའི་དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་བྲི་སྟེ། ཟླ་བའི་དཀྱིལ་འཁོར་འདྲ་ཞིང་མདོག།
ཅེས་པ་ནི་བཅོམ་ལྡན་འདས་ཀྱི་གདན་པདྨའི་ཁ་དོག་ཟླ་བའི་དཀྱིལ་འཁོར་ལྟར་དཀར་པོ་ཞེས་པའོ། །དུང་ལྟ་བུ་ཡི་དབུས་ན་ནི། །ཞེས་པ་ཆུའི་དཀྱིལ་འཁོར་ཁ་དོག་དུང་དང་འདྲ་བར་ཤེས་པར་བྱའོ། །སངས་རྒྱས་ཀུན་གྱི་གྲུ་གསུམ་པ། །པདྨ་དཀར་པོའི་སྟེང་ན་གནས། །ཞེས་པ་ནི་ཆུའི་དཀྱིལ་འཁོར་གྱི་སྟེང་ན་ཕྱག་རྒྱ་གྲུ་གསུམ་པདྨ་དཀར་པོའི་སྟེང་གནས་པ་བྲིའོ་ཞེས་པའོ། །ཀླད་ཀོར་བཅས་པའི་མཚན་གྱིས་བཏབ། །ཅེས་པ་ནི་དེར་ཡི་གེ་ཨ་ཀླད་ཀོར་དང་བཅས་པར་གཞག་ཅེས་པའོ། །རྡོ་རྗེའི་མཚན་མས་མཚན་པ་སྟེ། །ཞེས་པ་ནི་དེར་རྡོ་རྗེ་རྩེ་ལྔ་པ་བྲིས་ཞེས་པའོ། །དཔྱད་མི་དགོས་པར་ཀུན་ནས་ནི། །འོད་ཟེར་དག་ནི་གཉིས་བྱ་བ། །གསང་སྔགས་མགོན་ལས་བྱུང་བས་སུ། །དེ་ནི་ཕྱོགས་བཅུ་རྣམས་སུ་སོང༌། །ཞེས་པ་ནི་ཕྱག་རྒྱ་གསུམ་པ་དེའི་གྲ་གཉིས་ནས་འོད་གཉིས་བྱུང་བར་བྲི་སྟེ། དེ་ཡང་ཆོས་ཀྱི་སྐུ་ལས་ལོངས་སྤྱོད་རྫོགས་པ་དང་སྤྲུལ་པའི་སྐུ་འབྱུང་བར་ཤེས་པར་བྱའོ། །གསང་བ་པའི་བདག་པོ་གཞན་ཡང༌། སྤྱན་རས་གཟིགས་དབང་དཀྱིལ་འཁོར་ནི། །ཞེས་པ་ནས། རིག་སྔགས་རྒྱལ་དང་བཅས་པར་ནི། །མཁས་པས་རྣམ་པར་དགོད་པར་བྱ། །ཞེས་པའི་བར་གྱིས་སྤྱན་རས་གཟིགས་ཀྱི་དབང་པོའི་དཀྱིལ་འཁོར་བཤད་པ་སྟེ། ཀུན་དུ་གྲུ་བཞི་ལྷམ་པ་ལ། །ཞེས་པ་དབང་ཆེན་གྱི་དཀྱིལ་འཁོར་དུ་བྲི་བའོ། །དབུས་སུ་དུང་འདྲ་གཞག་པར་བྱ། །ཞེས་པ་ནི་དེའི་དབུས་སུ་ཆུའི་དཀྱིལ་འཁོར་བྲི་བའོ། །དེ་ཡི་སྟེང་དུ་པདྨ་ནི། །ས་བོན་བཅས་བྱས་རྒྱས་པར་བྲི། །ཞེས་པ་ནི་ཆུའི་དཀྱིལ་འཁོར་དེའི་སྟེང་དུ་པདྨ་དཀར་པོ་ས་བོན་ཨ་དང་བཅས་པ་བྲིའོ། །དེ་ཡི་སྟེང་དུ་འང་རྡོ་རྗེ་ཆེ། །ཞེས་པ་ནི་པདྨོའི་སྟེང་དུ་རྡོ་རྗེ་རྩེ་ལྔ་པ་གཞག་ཅེས་པའོ། །རྡོ་རྗེ་ལས་ཀྱང་པདྨ་ཆེ། །ཐམས་ཅད་ས་བོན་རྣམས་ཀྱིས་མཚན། །རང་གི་ས་བོན་ལེགས་པར་སྦྱར། །ཞེས་པ་ནི་རྡོ་རྗེ་དེའི་སྟེང་དུ་ཆེན་པོ་འདབ་མ་བརྒྱད་པ་བྲི་སྟེ། རང་གི་ས་བོན་དང་བཅས་པ་བྲི་ཞེས་པའོ། །སྒྲོལ་མ་དང་ནི་ཁྲོ་གཉེར་ཅན། །ཞེས་པ་ནས། ཁྱད་པར་དུ་ནི་བྲི་བར་བྱ། །ཞེས་པའི་བར་གྱིས་སྒྲོལ་མ་ལ་སོགས་པའི་འཁོར་རྣམས་དཀྱིལ་འཁོར་དེར་ཕྱག་རྒྱའི་གཟུགས་སུ་བྲིས་ཞེས་
པའོ། །རྟ་མགྲིན་ཅན་གྱི་བྱ་བ་ནི། །ཞེས་པ་ནས། མཁས་པས་རྣམ་པར་དགོད་པར་བྱ། །ཞེས་པའི་བར་ནི་དཀྱིལ་འཁོར་དེའི་ནུབ་ཕྱོགས་ཀྱི་མཐའ་མར་རྟ་མགྲིན་ཅན་གྱི་དཀྱིལ་འཁོར་གྲུ་གསུམ་པ་བྲི་སྟེ། དཀྱིལ་འཁོར་མཆན་མ་བཟང་པོས་བཏབ། །ཅེས་པ་ནི་གྲུ་གསུམ་པ་དཀྱིལ་འཁོར་གྱི་མཚན་པ་ཞེས་པའོ། །ཉི་མ་འཆར་བའི་ཁ་དོག་འདྲ། །ཞེས་པ་དཀྱིལ་འཁོར་དེའི་ཁ་དོག་ཉི་མ་དང་འདྲ་བའོ། །རིག་སྔགས་རྒྱལ་དང་བཅས་པར་ནི། །མཁས་པས་རྣམ་པར་དགོད་པར་བྱ། །ཞེས་པ་ནི་དཀྱིལ་འཁོར་གྲུ་གསུམ་པོ་དེ་རིག་པའི་རྒྱལ་པོ་རྟ་མགྲིན་དང་བཅས་པར་བྲི་སྟེ། དེའི་ཕྱག་རྒྱའི་གཟུགས་སུ་བྲི་བར་ཤེས་པར་བྱའོ། །གསང་བ་པའི་བདག་པོ་གཞན་ཡང་ཁྱོད་ཀྱི་དཀྱིལ་འཁོར་མདོར་བཤད་པར་བྱའོ་ཞེས་པ་ནས། རྒྱལ་བའི་གཙོ་བོ་རྣམས་ཀྱིས་གསུངས། །ཞེས་པའི་བར་གྱིས་ཕྱག་ན་རྡོ་རྗེའི་དཀྱིལ་འཁོར་བཤད་པ་སྟེ། ཕྱག་ན་རྡོ་རྗེ་ནི་བྱ་བ་སྒྲུབ་པའི་རང་བཞིན་ལས་ཐམས་ཅད་པ་ཡིན་པས་དཀྱིལ་འཁོར་བཞི་ཆར་དང་ལྡན་པར་ཤེས་པར་བྱའོ། །ཀུན་དུ་གྲུ་བཞི་ལྷམ་པ་ལ། །རྡོ་རྗེའི་མཚན་མ་རྣམས་ཀྱིས་མཚན། །ཐམས་ཅད་སེར་པོ་ཡིད་དུ་འོང༌། །ཞེས་པ་ནི་དབང་ཆེན་གྱི་དཀྱིལ་འཁོར་དང་པོར་བྲི་བ་སྟེ་སྔ་མ་བཞིན་ནོ། །དབུས་ན་པདྨ་རབ་ཏུ་གནས། །དེ་ཡི་དབུས་སུ་བྱ་བ་ནི། །བུམ་པ་ཟླ་བའི་འོད་འདྲ་བ། །ཞེས་པ་ནི་དབང་ཆེན་གྱི་དཀྱིལ་འཁོར་གྱི་དབུས་སུ་པདྨ་བྲིས་ཏེ། པདྨའི་སྟེང་དུ་ཆུའི་དཀྱིལ་འཁོར་བྲིའོ། །བུམ་པ་ནི་ཆུའི་དཀྱིལ་འཁོར་དུ་ཤེས་པར་བྱའོ། །འདི་ནི་མཚན་མ་རྣམས་ཀྱིས་མཚན། །ཀླ་དཀོར་གྱིས་ཀྱང་རྣམ་པར་བརྒྱན། །ཞེས་པ་ནི་དཀྱིལ་འཁོར་དེ་རང་གི་ས་བོན་ཡི་གེ་བ་ཀླ་དཀོར་དང་བཅས་པའི་མཚན་མས་མཚན་པའོ། །དེའི་སྟེང་དུ་ཡང་རླུང་ཆེན་ནི། །དབྱར་གྱི་ཆར་སྤྲིན་འདྲ་བའི་མདོག །བ་དན་གཡོ་བ་སྔགས་པས་བྱ། །ཀླད་ཀོར་གྱིས་ཀྱང་རྣམ་པར་བརྒྱན། །ཞེས་པ་ནི་ཆུའི་དཀྱིལ་འཁོར་དེའི་སྟེང་དུ་རླུང་གི་དཀྱིལ་འཁོར་ཁ་དོག་སྨུག་ནག་དབྱར་གྱི་ཆར་སྤྲིན་དང་འདྲ་བ་གཡོ་བཞིན་པའི་བ་དན་དང་བཅས་པ་བྲི་སྟེ། ཀླད་ཀོར་གྱིས་ཀྱང་རྣམ་པར་བརྒྱན། །ཞེས་པ་ནི་རང་གི་ས་བོན་ཡི་གེ་ཀླད་ཀོར་དང་བཅས་པར་ཤེས་པར་
བྱའོ། །དེའི་སྟེང་དུ་ཡང་གྲུ་གསུམ་པ། །རབ་ཏུ་འཇིགས་པའི་གཟུགས་ཅན་ཏེ། །འཇིག་པར་བྱེད་པའི་མེ་འདྲ་བ། །སུམ་མདོའི་རིས་མཚན་མཚན་གྱིས་བཏབ། །ཅེས་པ་ནི་རླུང་གི་དཀྱིལ་འཁོར་དེའི་སྟེང་དུ་མེའི་དཀྱིལ་འཁོར་གྲུ་གསུམ་པ་འཇིག་པའི་བསྐལ་བའི་མེའི་ཁ་དོག་འདྲ་བ་འཇིགས་འཇིགས་ལྟར་འདུག་པ་ཞེས་པ་སྟེ། སུམ་མདོའི་རིགས་མཚན་མཚན་གྱིས་བཏབ་པ་ནི་དཀྱིལ་འཁོར་དེའི་མཚན་མ་གྲུ་གསུམ་པས་ཀྱང་བཏབ་པའོ། །འབར་ཕྲེང་འཁྲིགས་པ་འཇིགས་འཇིགས་ལྟར། །ཉི་མ་འཆར་བའི་གཟུགས་འདྲ་བའོ། །ཞེས་པ་ནི་འབར་པའི་ཕྲེང་བ་ཁ་དོག་ཉི་མ་འཆར་བ་དང་འདྲ་བ་འཇིགས་པས་འཁོར་བར་བྱ་ཞེས་པའོ། །དེ་ཡི་དབུས་སུ་པདྨ་ཆེ། །ཞེས་པ་ནི་མེའི་དཀྱིལ་འཁོར་དེའི་དབུས་པདྨ་ཁ་དོག་དུས་མཐའི་མེ་འོད་འདྲ་བ་དམར་པོ་གཉིས་འདྲི་ཞེས་པའོ། །པདྨའི་སྟེང་དུ་རྡོ་རྗེ་ནི། །འབར་བའི་ཕྲེང་བ་འཕྲོ་བ་ཅན། །ཞེས་པ་ནི་པདྨའི་སྟེང་དུ་རྡོ་རྗེ་ཁ་དོག་དམར་སྨུག་ཏུ་བྲི་སྟེ་འབར་བ་ནི་མེའི་ཁ་དོག་ཡིན་ལ། འཕྲོ་བ་ནི་རླུང་གི་ཤས་ཏེ། མེ་དང་རླུང་གཉི་གའི་ཤས་ཡོད་པས་རྡོ་རྗེ་དམར་སྨུག་ཏུ་བྲི་སྟེ་འབར་བ་ནི་རྡོ་རྗེ་མེའི་ཁ་དོག་ཡིན་ལ། ཧཱུ༵་ཞེས་བྱ་བའི་སྒྲ་དང་ལྡན། །དམ་པ་ས་བོན་རྣམས་ཀྱིས་མཚན། །ཞེས་པ་ནི་དེའི་སྟེང་དུ་ཕྱག་ན་རྡོ་རྗེའི་ས་བོན་གྱི་ཡི་གེ་ཧཱུཾ་གཞག་པར་བྱའོ། །དཔའ་བོ་ཁྱོད་ཀྱི་དཀྱིལ་འཁོར་འདི། །རྒྱལ་བའི་གཙོ་བོ་རྣམས་ཀྱིས་གསུངས། །ཞེས་པ་ནི་སྔོན་གྱི་རྒྱལ་བ་རྣམས་ཀྱིས་ཀྱང་གསུངས་ཞེས་པ་སྟེ། དཔའ་བོ་ཞེས་པ་ནི་ཕྱག་ན་རྡོ་རྗེ་ལ་བོད་པའོ།། མཱ་མ་ཀཱི་དང་ལུ་གུ་རྒྱུད། །ཅེས་པ་ནས། དེ་དག་ཇི་ལྟར་རིག་པར་བྱ། །ཞེས་པའི་བར་གྱི་མཱ་མ་ཀཱི་ལ་སོགས་པའི་འཁོར་རྣམས་ཀྱང་དབང་ཆེན་གྱི་དཀྱིལ་འཁོར་གྱི་ནང་དུ་བྲི་བར་བཤད་པ་སྟེ། ཕྱག་རྒྱའི་དཀྱིལ་འཁོར་བོན་དང༌། ཁ་དོག་ཁྱད་པར་གོ་རིམས་བཞིན། །དེ་དག་ཇི་ལྟར་རིག་པར་བྱ། །ཞེས་པ་ནི་སོ་སོའི་ཕྱག་རྒྱའི་དང་ས་བོན་རྣམས་སོ་སོའི་ཁ་དོག་ཅི་འདྲ་བ་ལས། དཀྱིལ་འཁོར་ཀྱང་དེ་བཞིན་དུ་ཤེས་པར་བྱ་སྟེ། །སྔར་བཤད་པའི་རིམ་པ་བཞིན་དུ་བྲི་ཞེས་པའོ། །དེ་ནས་གཞན་ཡང་རྡོ་རྗེ་འཛིན། །ཞེས་པ་ནས། རྣམ་པར་རྒྱལ་
དང་ལྡན་པའོ། །ཞེས་པའི་བར་གྱིས་ཕྱག་ན་རྡོ་རྗེའི་དཀྱིལ་འཁོར་གྱི་འོག་ལོགས་སུ་ནམ་མཁའ་དྲི་མ་མེད་པ་ལ་སོགས་པའི་རྡོ་རྗེ་འཛིན་མིང་གིས་སྨོས་པ་བཅུ་གཉིས་པོ་རྣམས་བྲིས་ཏེ་དེ་རྣམས་ཀྱི་དཀྱིལ་འཁོར་ཡང་དབང་ཆེན་ལ་སོགས་བཞི་པོ་བྲི་སྟེ། དེ་རྣམས་དཀྱིལ་འཁོར་བཤད་པ་ནི། །དཀར་པོ་སེར་པོ་དམར་པོ་དང༌། །ནག་པོ་ཡིན་པར་ཡང་དག་བསྒྲགས། །ཞེས་པ་རྡོ་རྗེ་འཛིན་བཅུ་གཉིས་པོ་རྣམས་ལ་དཀྱིལ་འཁོར་བཞི་པོ་འདི་ལན་གསུམ་དུ་བསྒྲེས་ཏེ་རིམ་པ་བཞིན་དུ་སྦྱར་རོ། །དེ་ནས་གཞན་ཡང་ཕྱག་རྒྱའི་གཟུགས། །རྩེ་གསུམ་པ་དང་རྩེ་གཅིག་དང༌། །གཞན་ཡང་གཉིས་དང་གཉིས་མ་ཡིན། །ཕྲེང་བ་ལྟ་བུའི་དེ་བཞིན་གཞན། །ཁ་དོག་བྱེ་བྲག་ལས་ཤེས་བྱ། །ཞེས་པ་དེ་རྣམས་ཀྱི་ཕྱག་མཚན་རྡོ་རྗེ་རྩེ་གསུམ་པ་ལ་ཡང་རྣམ་པ་གཉིས་ཏེ། ཕྱོགས་གཅིག་རྩེ་གསུམ་པ་དང༌། །ཕྱོགས་གཉིས་ཀ་རྩེ་གསུམ་པའོ། །དེ་བཞིན་དུ་རྩེ་གཅིག་པ་ཡང་ཤེས་པར་བྱ་སྟེ། དེ་བས་ན་ཁ་གཉིས་པ་ཡང་གཟུང་བའོ། །གཉིས་ཀ་མ་ཡིན་པ་ནི་རྡོ་རྗེ་ཐོ་ལུམ་དུ་ཤེས་པར་བྱའོ། །ཕྲེང་བ་ལྟ་བུའི་དེ་བཞིན་གཞན། །ཞེས་པ་ནི་རྡོ་རྗེ་ཕྲེང་བའི་ཕྱག་རྒྱ་སྟེ། ཕྱག་རྒྱ་དྲུག་པོ་དེ་དག་ལན་གཉིས་སུ་བསྒྲེས་པས་བཅུ་གཉིས་པོ་ལ་ཁྱ་བ་པའོ། །ཁ་དོག་བྱེ་བྲག་ལས་ཤེས་བྱ། །ཞེས་པ་ནི་ཕྱག་རྒྱ་དེ་རྣམས་ཀྱི་ཁ་དོག་དག་ཀྱང་རྡོ་རྗེ་འཛིན་པ་དེ་དག་ཉིད་ཀྱི་ཁ་དོག་ཇི་ལྟ་བ་བཞིན་དུའོ་ཞེས་པའོ། །འདི་རྣམས་ཀུན་ཀྱང་མཐུ་ཆེན་ཏེ། །རྣམ་པར་རྒྱལ་དང་ལྡན་པའོ། །ཞེས་པ་ནི་རྡོ་རྗེ་འཛིན་པ་དེ་དག་གི་རྗེས་སུ་བསྔགས་པ་སྟེ། གདུལ་དཀའ་བ་རྣམས་ལས་རྣམ་པར་རྒྱལ་བ་དང་ལྡན་ནོ་ཞེས་པའོ། །མི་གཡོ་མགོན་གྱི་དཀྱིལ་འཁོར་ནི། །ཞེས་པ་ནས། བློ་ལྡན་དེ་ཡིས་བྲི་བར་བྱ། །ཞེས་པའི་བར་གྱིས་འཕགས་པ་མི་གཡོ་བའི་དཀྱིལ་འཁོར་བཤད་པ་སྟེ། རླུང་དང་མེ་ཡི་ཡིན་པར་འདོང༌། །ཅེས་པ་ནི་རླུང་གི་དཀྱིལ་འཁོར་གྱི་སྟེང་དུ་མེའི་དཀྱིལ་འཁོར་བྲིས་ནས་དེའི་སྟེང་དུ་འཕགས་པ་མི་གཡོ་བའི་ཕྱག་རྒྱ་རལ་གྲི་འམ་ཞགས་པ་གང་ཡང་རུང་བ་ཅིག་རང་གི་ས་བོན་དང་བཅས་པར་བྲིའོ་ཞེས་པའོ། །འཇིག་རྟེན་གསུམ་ལས་རྣམ་རྒྱལ་གྱིའང༌། །བྱེ་བྲག་ཏུ་ནི་རླུང་གི་དབུས། །ཞེས་
པའང་ཞེས་པའི་ཚིག་གིས་འཕགས་པ་མི་གཡོ་བའི་དཀྱིལ་འཁོར་ལྟར་རླུང་གི་དཀྱིལ་འཁོར་གྱི་སྟེང་དུ་མེའི་དཀྱིལ་འཁོར་གྱི་བྲི་ཞེས་པའོ། །རླུང་གི་དབུས་ཞེས་པ་ནི་མེའི་དཀྱིལ་འཁོར་གྱི་སྟེང་དུ་རླུང་གི་དཀྱིལ་འཁོར་བྲིས་ཏེ། དེའི་དབུས་སུ་རྡོ་རྗེའི་ཕྱག་རྒྱ་རང་གི་མཚན་མ་དང་བཅས་པར་བྲི་ཞེས་པའོ། །གནས་གསུམ་དག་ལ་འདུག་པའོ། །ཞེས་པ་ནི་རླུང་གི་དཀྱིལ་འཁོར་གཉིས་དང་མེའི་དཀྱིལ་འཁོར་གཅིག་སྟེ་གསུམ་ལ་འདུག་ཅེས་པའོ། །གསང་བ་པའི་བདག་པོ་གཞན་ཡང་ཞེས་པ་ནས། མདོར་ནས་བོན་དང་ལྡན་པར་བྱ། ཞེས་པའི་པར་གྱིས་ནམ་མཁའི་སྤྱན་གྱི་དཀྱིལ་འཁོར་བཤད་པ་སྟེ། དབང་ཆེན་གྱི་དཀྱིལ་འཁོར་ནི་སྔ་མ་བཞིན་ནོ། །ལྷ་མོ་དེའི་ཁ་དོག་ཀྱང་སེར་པོར་བྱ་སྟེ། པདྨའི་སྟེང་དུ་བཞུགས་པའོ། །དེར་ཡང་གཙུག་ཏོར་གཞག་པ་ནི། །ཆ་གསུམ་ལ་ནི་གནས་པར་བྱ། །ཞེས་པ་ནི་དབང་ཆེན་གྱི་དཀྱིལ་འཁོར་གྱི་སྟེང་དུ་པདྨ་བྲི་སྟེ། པདྨའི་སྟེང་དུ་གཙུག་ཏོར་ཆ་གསུམ་དང་ལྡན་པ་བྲིའོ་ཞེས་པའོ། །དབུ་མའི་ཆ་ནི་བོར་ནས་ནི། །དེ་ཡང་སྤྱན་ནི་བྲི་བར་བྱ། །ཞེས་པ་ནི་གཙུག་ཏོར་གྱི་ཕྱག་རྒྱ་དེའི་སྨད་སུམ་གཉིས་བོར་ལ་སྟོད་ཀྱི་སུམ་ཆའི་ནང་དུ་སྤྱན་གྱི་ཕྱག་རྒྱ་བྲིའོ། །རང་གི་འོད་འབར་དབུས་ན་གནས། །ཞེས་པ་ནི་གཙུག་ཏོར་གྱི་ཕྱག་རྒྱ་དེ་འོད་འབར་བའི་དབུས་ན་གནས་པར་བྱའོ་ཞེས་པའོ། །མདོར་ནས་བོན་དང་ལྡན་པར་བྱ། །ཞེས་པ་ནི་ཡུམ་དེའི་ས་བོན་གྱི་ཡི་གེ་དང་བཅས་པར་བྱ་ཞེས་པའོ། །བྱང་ཆུབ་སེམས་དཔའ་ཐམས་ཅད་ཀྱིས། །ཞེས་པ་ནས། རེ་བ་ཐམས་ཅད་རྫོགས་བྱེད་པའོ། །ཞེས་པའི་བར་ནི་བྱང་ཆུབ་སེམས་དཔའ་རྣམས་ཀྱི་ཕྱག་རྒྱ་ཡིད་བཞིན་གྱི་ནོར་བུ་ནི་ཆུའི་དཀྱིལ་འཁོར་གྱི་སྟེང་དུ་བྲིས་ཞེས་པའོ། །དེ་ནས་ཤཱཀྱ་སེང་གེས་ཡང༌། །ཞེས་པ་ནས། གོ་རིམས་བཞིན་དུ་གཞག་པར་བྱ། །ཞེས་པའི་བར་ནི་དཀྱིལ་འཁོར་གྱི་སྣམ་བུ་གཉིས་པ་ལ་ཤཱཀྱ་ཐུབ་པ་དབང་ཆེན་གྱི་དཀྱིལ་འཁོར་ལ་བཞུགས་པ་བྲི་སྟེ་གཞན་ནི་སྔ་མ་བཞིན་ནོ། །དབང་ཆེན་གྱི་དཀྱིལ་འཁོར་གྱི་སྟེང་དུ་པདྨ་སེར་པོ་བཞག་སྟེ་པདྨའི་སྟེང་དུ་ལྷུང་བཟེད་དམ། ཆོས་གོས་སམ། འཁར་གསིལ་གསུམ་ལས་གང་ཡང་རུང་བ་གཞག་སྟེ། དེ་ཡང་
འབར་བ་དང་བཅས་པའི་རྡོ་རྗེས་མཚན་པར་བྱའོ་ཞེས་པའོ། །གཙུག་ཏོར་ལྔ་པོ་གང་བསྒྲགས་པ། །ཞེས་པ་ནས། ཁ་དོག་བྱེ་བྲག་ལས་ཤེས་བྱ། །ཞེས་བྱ་བའི་གཙུག་ཏོར་ལྔ་པོ་རྣམས་ཀྱི་ཕྱག་རྒྱ་བྲི་བར་བཤད་པ་སྟེ། དེ་དག་གི་དཀྱིལ་འཁོར་ནི་སོ་སོའི་ཁ་དོག་ཅི་འདྲ་བ་དང་སྦྱར་བར་བྱ་སྟེ། ཁ་དོག་ཀྱང་དཀྱིལ་འཁོར་སྔ་མར་བཤད་ཟིན་ཏོ། །མཛོད་སྤུའི་ཡིད་བཞིན་ནོར་བུ་བཞིན། །ཞེས་པ་ནི་མཛོད་སྤུའི་ཕྱག་རྒྱ་ཡིད་བཞིན་གྱི་ནོར་བུ་བྲི་ཞེས་པ་སྟེ། དཀྱིལ་འཁོར་ཡང་དེ་ཉིད་ཀྱི་ཁ་དོག་ཅི་འདྲ་བ་དང་སྦྱར་རོ། །སྤྱན་གྱི་ཡང་ནི་འདི་ཉོན་ཅིག །གཙུག་ཏོར་ཐམས་ཅད་སེར་པོ་སྟེ། །རྡོ་རྗེའི་མཚན་མས་མཚན་པར་བྱ། །ཞེས་པ་ནི་སངས་རྒྱས་སྤྱན་གྱི་ཕྱག་རྒྱ་གཙུག་ཏོར་སེར་པོ་བྲིས་ཏེ། རྡོ་རྗེའི་མཚན་མ་དང་བཅས་པ་བྲིའོ་ཞེས་པའོ། །དེའི་ཁ་དོག་སེར་པོ་ཡིན་པས་དབང་ཆེན་གྱི་དཀྱིལ་འཁོར་དུ་བྲི་བར་ཤེས་པར་བྱའོ། །གཞན་གྱིས་མི་ཐུབ་མ་ཡི་ནི། །ལག་པ་ངོ་མཚར་པདྨ་ཅན། །ཞེས་པ་ནི་ལྷ་མོ་གཞན་གྱིས་མི་ཐུབ་པའི་ཕྱག་རྒྱ་ལག་པ་ཁུ་ཚུར་བཅངས་པ་འདྲ་བ་པདྨའོ་ཐོགས་པར་བྲིའོ། །གཞན་གྱིས་མི་ཐུབ་ཅེས་བྱ་བའི། །ཁ་ཆེན་པདྨ་གནག་ལ་གནས། །ཞེས་པ་ནི་གཞན་གྱིས་མི་ཐུབ་པ་ཞེས་བྱ་བའི་རིག་པའི་རྒྱལ་མོའི་ཕྱག་རྒྱ་པདྨ་ནག་པོའི་སྟེང་ན་གནས་པ་བྲི་བར་བྱའོ། །གཙང་མར་གནས་པ་གང་གྲགས་པ། །ཞེས་པ་ནས། ཆོ་ག་རྒྱས་པར་བྲི་བར་བྱ། །ཞེས་པའི་བར་གྱིས་གནས་གཙང་མ་རྣམས་ཀྱི་ཕྱག་རྒྱ་བྲི་བར་བཤད་པ་སྟེ། སེམས་པའི་ལག་པ་ནི་ཐལ་མོ་འགྲམ་པ་ལ་བརྟེན་པ་སྟེ། དཀྱིལ་འཁོར་དུ་བྲི་བ་ན་འགྲམ་པ་མི་བྲི་བར་ཐལ་མོ་འབའ་ཞིག་གྱེན་དུ་ཤོར་དུ་འདུག་པ་བྲིའོ། །དགེ་བའི་ལག་ནི་མི་འཇིགས་པ་སྦྱིན་པའི་ལག་པ་བྲིའོ། །འཛུམ་པའི་ལག་པ་ནི་ཁ་འགྲམ་ནས་འདྲེན་པ་ལྟ་བུ་བྲིའོ། །ལག་ན་མེ་ཏོག་ནི་སྲིན་ལག་དང་མཐེ་བོང་གཉིས་སྤྲད་པ་བྲིའོ། །ནམ་མཁའི་ལག་པ་ནི་ལག་པ་བསྒྲེང་བར་བྲིའོ། །ས་ཡི་ལྷ་མོའི་བུམ་པ་སྟེ། །ཆུ་ཡི་དཀྱིལ་འཁོར་རྡོ་རྗེས་མཚན། །ཞེས་པ་ནི་ས་བདག་གི་ཕྱག་རྒྱ་བུམ་པ་ཆུས་གང་བ་རྡོ་རྗེས་བརྒྱན་པར་བྲི་ཞེས་པའོ། །གཉེར་པའི་ལག་པ་མེ་ཡི་སྟེ། །དྲང་སྲོང་རྣམས་དང་བཅས་པར་བྲི། །ཞེས་པ་ནི་ས་
འོད་སྲུངས་ཞེས་པ་ལ་སོགས་པའི་དྲང་སྲོང་མིང་གིས་སྨོས་པ་རྣམས་དང་ལྷན་ཅིག་ཏུ་བྲིས་པ་སྟེ། རིག་བྱེད་ལག་པ་ཞེས་པ་ནི་སྨྲང་འདོན་པའི་ལག་པ་ལྟར་མཐེ་བོ་སོར་མོའི་ཚིགས་སུ་འབོག་པ་ནི་དྲང་སྲོང་རྣམས་ཀྱི་ཕྱག་རྒྱའོ། །གཤིན་རྗེའི་བེ་ཅོན་བྲི་བ་ནི། །རླུང་གི་དཀྱིལ་འཁོར་ནང་ན་འདུག །ཅེས་པ་ནི་གཤིན་རྗེའི་བེ་ཅོན་རླུང་གི་དཀྱིལ་འཁོར་དུ་འདུག་པ་བྲི་ཞེས་པའོ། །འཆི་བདག་གི་ནི་དྲིལ་བུ་ཡིན། །ཞེས་པ་ནས། ཇི་ལྟར་རིགས་པར་བྲི་བར་བྱ། །ཞེས་པའི་བར་གྱིས་གཤིན་རྗེའི་འཁོར་འཆི་བདག་དང་དུས་མཚན་མོ་ལ་སོགས་པ་མིང་གི་སྨོས་པ་རྣམས་ཀྱི་ཕྱག་རྒྱ་རླུང་གི་དཀྱིལ་འཁོར་གྱི་ནང་དུ་ཐ་མ་བྱ་རོག་དང་བྱ་རྒོད་ལ་སོགས་པས་བསྐོར་བར་བྲིའོ། །བདེན་བྲལ་གྱི་ནི་རལ་གྲི་བྲི། །ཞེས་པ་ནས། ཆུ་ལྷ་ཡིན་པར་ཤེས་པར་བྱ། །ཞེས་པའི་བར་དུ་ཁྱ་བ་འཇུག་ལ་སོགས་པ་མིང་གིས་སྨོས་པ་རྣམས་ཀྱི་ཕྱག་རྒྱ་ཡང་ཇི་སྐད་སྨོས་པ་བཞིན་དུ་བྲི་བར་བཤད་དོ། །དེ་དག་ལ་སོགས་པའི་དཀྱིལ་འཁོར་དངོས་སུ་མ་སྨོས་པ་རྣམས་ཀྱང་སོ་སོའི་ཁ་དོག་དང་གཟུགས་ཀྱི་དཀྱིལ་འཁོར་ཡང་སྔར་བཤད་པ་དང་སྦྱར་བར་བྱའོ། །གཞན་ཡང་མཆོག་སྦྱིན་རྡོ་རྗེ་ཡི། །ཞེས་པ་ནས། ཨུཏྤལ་རྣམས་ཀྱི་ཁེབས་པར་བྱ། །ཞེས་པའི་བར་གྱིས་དཀྱིལ་འཁོར་གྱི་སྣམ་བུ་གསུམ་པ་ལ་འཕགས་པ་འཇམ་དཔལ་གྱི་དཀྱིལ་འཁོར་བྲི་བར་བཤད་པ་སྟེ། ཀུན་དུ་གྲུ་བཞི་ལྷམ་པ་ལ། །རྡོ་རྗེའི་མཚན་མས་མཚན་པ་སྟེ། །ཞེས་པ་ནི་དབང་ཆེན་གྱི་དཀྱིལ་འཁོར་དེ་སྔ་མ་བཞིན་ནོ། །དེ་ཡི་དབུས་སུ་བྱ་བ་ནི། །དཀྱིལ་འཁོར་མེ་ལས་བྱུང་བའོ། །ཞེས་པ་ནི་དབང་ཆེན་གྱི་དཀྱིལ་འཁོར་དེའི་དབུས་སུ་མེའི་དཀྱིལ་འཁོར་བྲིའོ། །དེའི་དབུས་ཕྱག་རྒྱ་བཞག་པ་ནི། །ཨུཏྤལ་ཞེས་བྱ་གཟུགས་བཟང་བ། །ཞེས་པ་ནི་མེའི་དཀྱིལ་འཁོར་གྱི་དབུས་སུ་ཕྱག་རྒྱ་ཨུཏྤལ་འཛིན་པ་ཨུཏྤལའི་ཁ་དོག་ཉིད་དུ་བྲིའོ། །འཇམ་དབྱངས་བློ་དང་ལྡན་པ་ཡིས། །རང་གི་སྔགས་ཀྱིས་གཟི་བསྐྱེད་པའོ། །ཞེས་པ་ནི་ཨུཏྤལ་དེའི་སྟེང་དུ་འཇམ་དབྱངས་ཉིད་ཀྱི་སྔགས་ཀྱི་ས་བོན་བཞག་སྟེ། གཟེངས་བསྟོད་པར་བྱ་ཞེས་པའོ། །དེ་ཡི་གནས་ནི་ཆོ་ག་བཞིན། །རང་གི་
ས་བོན་ཉིད་ཀྱིས་བཏབ། །ཅེས་པ་ནི་དབང་ཆེན་དང་མེའི་དཀྱིལ་འཁོར་ལ་སོ་སོའི་ས་བོན་ཨ་དང་ར་ཆོ་ག་བཞིན་དུ་གཞག་ཅེས་པའོ། །མཐའ་མ་ཁོ་ར་ཁོར་ཡུག་ཏུ། །ཨུཏྤལ་རྣམས་ཀྱིས་ཁེབས་པར་བྱ། །ཞེས་པ་ནི་དཀྱིལ་འཁོར་དེའི་མཐའ་ཨུཏྤ་ལས་བསྐོར་བར་བྱའོ། །དེ་ཡི་དབུས་སུ་བྲི་བ་ནི། །ཞེས་པ་ནས། ཨུཏྤ་ལ་ཁམ་བྱེ་བར་ཞེས་པའི་བར་དུ་དྲ་བ་ཅན་གྱི་འོད་ལ་སོགས་པའི་ཕྱག་རྒྱ་ཇི་སྐད་སྨོས་པ་བཞིན་དུ་བྲི་ཞེས་པའོ། །འཇམ་དབྱངས་བློ་དང་ལྡན་པ་ཡི། །མངག་གཞུག་མར་ནི་གང་གྲགས་པ། །ཞེས་པ་ནས། དེ་དག་ཐམས་ཅད་ཨུཏྤ་ལའི། །མཚན་མ་དག་གིས་མཚན་པར་བྱ། །ཞེས་པའི་བར་ནི་སྐྲ་ཅན་མ་ལ་སོགས་པའི་མངག་གཞུག་མ་རྣམས་ཀྱི་ཕྱག་རྒྱ་ཇི་སྐད་དུ་སྨོས་པ་རྣམས་ལ་ཨུཏྤ་ལའི་མཚན་མས་བཏབ་སྟེ་བྲིའོ། །ཇི་སྐད་གསུངས་པའི་ཕྱག་བརྙན་མ། །དེ་དག་ཕྱག་རྒྱ་ཁཌྒ་རི། །ཞེས་པ་ནི་འཕགས་པ་འཇམ་དཔལ་གྱི་ཕྱག་བརྙན་མ་སྔར་ཇི་སྐད་དུ་བཤད་པ་རྣམས་ཀྱི་ཕྱག་རྒྱ་ཁཌྒ་རི་ཞེས་བྱ་བ་གྲི་གུག་འདྲ་བ་རྣམས་བྲིའོ། །ལྷོ་ཡི་ཕྱོགས་སུ་ནན་ཏན་དུ། །སྒྲིབ་པ་རྣམས་སེལ་བརྩོན་འགྲུས་ཆེའི། །ཞེས་པ་ནས་དེ་དག་ཐམས་ཅད་ཀྱང་པདྨ་ལ་གནས་ཤིང་དཀྱིལ་འཁོར་གྱི་ནང་དུ་ཆུད་པར་བྱའོ་ཞེས་པའི་བར་ནི་སྒྲིབ་པ་ཐམས་ཅད་རྣམ་པར་སེལ་བ་འཁོར་དང་བཅས་པའི་ཕྱག་རྒྱ་ཇི་སྐད་དུ་སྨོས་པ་རྣམས་བྲི་བར་གསུངས་པ་སྟེ་ལག་པ་སྙིང་གར་གཞག་པ་ནི་ལག་པ་འབའ་ཞིག་གཞག་པ་འདྲ་བར་བྲི་བར་བྱའོ། །དེ་དག་ཐམས་ཅད་ཀྱང་པདྨ་ལ་གནས་ཤིང་དཀྱིལ་འཁོར་གྱི་ནང་དུ་ཆུད་པར་བྱའོ་ཞེས་པ་ནི་འཕགས་པ་འཇམ་དཔལ་དྲ་བ་ཅན་གྱི་འོད་མན་ཆད་དཀྱིལ་འཁོར་དངོས་སུམ་སྨོས་པ་ཐམས་ཅད་དཀྱིལ་འཁོར་གོང་མའི་ནང་དུ་པདྨོའི་སྟེང་དུ་བྲིའོ་ཞེས་པའོ། །བྱང་ཕྱོགས་སུ་སའི་སྙིང་པོའི་ཕྱག་རྒྱ་ནི། །ཞེས་པ་ནས། ཕྱག་རྒྱའི་གཟུགས་སུ་འདིར་བཤད་དོ། །ཞེས་པའི་བར་ནི་སའི་སྙིང་པོའི་དཀྱིལ་འཁོར་བཤད་པ་སྟེ། དབང་ཆེན་དཀྱིལ་འཁོར་ནང་གནས་པ། །ཞེས་པ་ནི་དབང་ཆེན་ནི་སྔ་མ་བཞིན་ལ། སྟན་ནི་སྔ་མ་བཞིན་དུ་གཞག །ཅེས་པ་ནི་དབང་ཆེན་གྱི་དཀྱིལ་འཁོར་དེའི་དབུས་སུ་སྟན་སྙིང་རྗེ་ཆེན་པོ་འབྱུང་བའི་དཀྱིལ་འཁོར་དུ་
བཤད་པ་བཞིན་དུ་བྲི་ཞེས་པའོ། །དེའི་སྟིང་པདྨ་ཆེན་པོ་སྟེ། ཁ་དོག་ཀུན་ལྡན་འབར་བར་བཅས། །ཞེས་པ་ནི་གདན་དེའི་སྟེང་དུ་པདྨ་འདབ་མ་བརྒྱད་པ་བྲི་སྟེ། ཁ་དོག་ཀུན་ལྡན་ནི་དཀར་པོ་སེར་པོ་དམར་པོ་སྔོན་པོ་དང༌། ཁ་དོག་དེ་རྣམས་ལས་གཞན་དུ་སྦྱར་བ་ལྗང་གུ་ལ་སོགས་པ་གསུམ་དང༌། བརྒྱད་དེ་པདྨ་འདབ་མ་བརྒྱད་པ་ཁ་དོག་སྣ་ཚོགས་རྣམས་སུ་བྱའོ། །དེའི་སྟེང་བ་དན་ཆེན་པོ་སྟེ། །རྩེ་ལ་རིན་ཆེན་ཆེན་པོ་གཞག །ཅེས་པ་ནི་པདྨའི་སྟེང་དུ་བ་དན་གྱི་རྩེ་ལ་རིན་པོ་ཆེ་གཞག་པ་བྲི་ཞེས་པའོ། །དེ་ཡི་གཟུགས་ཀྱི་མཆོག་ཡིན་ཏེ། །ཕྱག་རྒྱའི་གཟུགས་སུ་འདིར་བཤད་དོ། །ཞེས་པ་ནི་སའི་སྙིང་པོ་དེའི་གཟུགས་ཕྱག་རྒྱའི་གཟུགས་སུ་བཤད་པ་ཡིན་ཞེས་པའོ། །དེ་ཡི་འཁོར་ནི་གྲངས་མེད་པ། །གཙོ་བོ་ཡོན་ཏན་མཐའ་ཡས་ཏེ། །ཞེས་པ་ནས་ཕྱག་རྒྱ་ཐམས་ཅད་ཀྱང་དཀྱིལ་འཁོར་གྱི་ནང་དུ་ཆུད་པར་བྱའོ་ཞེས་པའི་བར་ནི་སའི་སྙིང་པོའི་འཁོར་མཐའ་ཡས་ཤིང༌། གྲངས་མེད་པ་རྣམས་ཀྱི་ཕྱག་རྒྱ་བྲི་བར་བཤད་པ་སྟེ། ས་འཛིན་གྱིས་ནི་རྡོ་རྗེ་ཁ་གཉིས་པ་རིན་པོ་ཆེའི་སྟེང་ནི་འདུག་པའོ་ཞེས་པ་ནི་རྡོ་རྗེའི་ཡ་ཐོག་མ་ཐོག་གཉིས་ཀ་རྩེ་མོ་ཅན་ཞེས་པ་སྟེ། དེ་ལྟར་རྡོ་རྗེ་དེ་བྱེ་བྲག་ཏུ་ཆེ་བས་ན་རྡོ་རྗེ་གོང་མ་གཉིས་བོ་ཕྱོགས་རེ་རེ་ན་རྩེ་གསུམ་པ་དང༌། རྩེ་གཅིག་པར་ཤེས་པར་བྱའོ། །ཕྱག་རྒྱ་ཐམས་ཅད་ཀྱང་དཀྱིལ་འཁོར་གྱི་ནང་དུ་ཆུད་པར་བྱའོ་ཞེས་པ་ནི་ཕྱག་རྒྱ་དེ་དག་ཐམས་ཅད་ཀྱང་དབང་ཆེན་གྱི་དཀྱིལ་འཁོར་གྱི་ནང་དུ་ཆུད་པར་བྱའོ་ཞེས་པའོ། །ནུབ་ཕྱོགས་སུ་ནམ་མཁའི་སྙིང་པོའི་ཕྱག་རྒྱ་ནི་ཞེས་པ་ནས་རིམ་པར་ཕྱེ་བ་རྒྱས་པའི་བར་ནི་ནུབ་ཕྱོགས་སུ་ནམ་མཁའི་སྙིང་བོ་འཁོར་དང་བཅས་པའི་ཕྱག་རྒྱ་ཇི་སྐད་སྨོས་པའི་རྣམ་པར་བྲི་བར་ཤེས་པའོ། །དེ་ལ་དཀྱིལ་འཁོར་འདིར་ལྷ་རྣམས་ཀྱི་ཁ་དོག་དང་དབྱིབས་གསལ་བར་མ་གསུངས་པ་རྣམས་ནི་དཀྱིལ་འཁོར་གོང་མ་གཉིས་སུ་བཤད་པའི་ཁ་དོག་དང་དབྱིངས་སུ་བལྟ་བར་བཤད་པར་བྱའོ། །དཀྱིལ་འཁོར་གོང་མ་དག་ཏུ་ཁ་དོག་ལ་སོགས་པ་ཞིབ་ཏུ་མ་བཤད་པ་ཡང་དཀྱིལ་འཁོར་འོག་མ་འདིར་ལྷ་སོ་སོའི་དཀྱིལ་འཁོར་ཇི་སྐད་བཤད་པ་ལས་དེ་རྣམས་ཀྱི་ཁ་
དོག་ཀྱང་དེ་བཞིན་དུ་ཤེས་པར་བྱའོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། གསང་བའི་དཀྱིལ་འཁོར་རིམ་པར་ཕྱེ་བ་རྒྱས་པའོ།། །།དེ་ནས་ཡང་བཅོམ་ལྡན་འདས་ཀྱིས་གསང་བའི་དཀྱིལ་འཁོར་དུ་འཇུག་པའི་ཆོ་ག་གསུངས་པ་ཞེས་པ་ནས། དམ་ཚིག་ཅེས་ནི་གཞན་མི་བྱ། །ཞེས་པའི་བར་གྱི་གསང་བའི་དཀྱིལ་འཁོར་དུ་བཅུག་ནས་དབང་བསྐུར་བའི་ཆོ་ག་བཤད་དེ། དཀྱིལ་འཁོར་དུ་འཇུག་པའི་རིམ་པ་ལྡ་དེ་ནུབ་མོ་ལྷག་པར་གནས་ཤིང་སྡོམ་པ་བཟུང་བ་ལ་སོགས་པ་དང༌། དཀྱིལ་འཁོར་དུ་འཇུག་པའི་ཚེ་བསྲུང་ཞིང་ཆུས་བསང་གཏོར་བྱ་བ་དང༌། བྱང་ཆུབ་ཏུ་སེམས་བསྐྱེད་པ་ལ་སོགས་པ་དཀྱིལ་འཁོར་སྔ་མར་བཤད་པ་སྦྱིན་ནོ། །ཁྱད་པར་དུ་ནི་དཀྱིལ་འཁོར་གྱི་སྒོ་ཁྱུད་ཀྱི་ནང་དུ་སློབ་མ་སྔ་མ་བཞིན་དུ་གཞག་སྟེ་སློབ་དཔོན་ཡང་སྔ་མ་བཞིན་དུ་རང་གི་ཏིང་ངེ་འཛིན་ལ་གནས་ནས་སློབ་མའི་སྙིང་གར་ཡི་གེ་ར་བསམས་ཏེ་ཡི་གེ་དེའི་སྒྲའི་དེ་ཁོ་ན་ཉིད་ཆོས་ཐམས་ཅད་རྡུལ་དང་བྲལ་བ་ལ་དམིགས་ནས་སློབ་མ་དེའི་ལུས་རྡུལ་ཕྲན་ལ་སོགས་པར་བཤིག་སྟེ་རྡུལ་ཕྲན་དེ་དག་ཀྱང་མི་དམིགས་པར་བྱས་པས་ཡི་གེ་རའི་སྒྲ་ལས་སློབ་མའི་ལུས་དོན་དམ་པར་སྟོང་པར་བྱའོ། །དེ་ལྟར་བསམས་ནས་ཡི་གེ་རའི་མེ་དེས་སློབ་མའི་ལུས་བསྲེགས་ཏེ་ཐལ་བར་གྱུར་པར་བསམ་མོ། །དེ་ལྟར་སྟོང་པར་གྱུར་པ་དང༌། དེའི་གནས་སུ་སླར་ཡང་ཡི་གེ་ཨ་བསམས་ཏེ། ཨ་ལས་བཅོམ་ལྡན་འདས་ཀྱི་སྐུར་གྱུར་བར་བསམ་མོ་ཞེས་པ་ནི་འདུས་པའི་དོན་ཏོ། །ཡན་ལག་གི་དོན་ཡང་བཤད་པར་བྱ་སྟེ། ཀུན་དུ་བསླབས་པའི་སྔགས་པ་ནི། །ཞེས་པ་སློབ་དཔོན་སྙིང་རྗེ་ཆེན་པོ་འབྱུང་བ་དང་ཡི་གེ་འཁོར་ལོ་བསྐོར་བའི་དཀྱིལ་འཁོར་གཉིས་པོ་བྲི་བ་དང་དབང་བསྐུར་བ་དང་བཟླས་པ་དང་བསྒྲུབ་པ་ལ་སོགས་པའི་ཆོ་ག་བསླབས་ཏེ་ལོ་བས་པར་གྱུར་པས་མཁས་པ་ཞེས་བྱའོ། །གསང་བའི་དཀྱིལ་འཁོར་ལ་མཁས་པས། །ཞེས་པ་ནི་དཀྱིལ་འཁོར་གོང་མ་གཉིས་ལས་མཁས་པ་འབའ་ཞིག་མ་ཡིན་གྱི། གསང་བའི་དཀྱིལ་འཁོར་ལ་ཡང་བྲི་བ་དང་དབང་བསྐུར་
པ་ལ་སོགས་པའི་ཆོ་ག་རྣམས་ལ་མཁས་པས་ཤེས་པ་སྟེ། མདོར་ན་དཀྱིལ་འཁོར་གོང་མ་གཉིས་སུ་དབང་བསྐུར་བའི་སློབ་དཔོན་གྱི་ལས་འདི་རྣམས་བྱའོ་ཞེས་པའོ། །དེ་ཚེ་སློབ་མའི་སྡིག་པ་ཀུན། །ཆོ་ག་བཞིན་དུ་བསྲེག་པར་བྱ། །ཞེས་པ་ནི་དང་པོ་གླེང་པའི་ཚིག་སྟེ་སྡིག་པ་ཀུན་ཞེས་པ་ནི་སེམས་ཀྱི་རྒྱུད་ལ་མི་དགེ་བའི་བག་ཆགས་བསགས་པའི་མི་འདོད་པའི་རྣམ་པར་སྨིན་པ་བརྟ་བར་བྱེད་པ་ལ་བྱ་སྟེ། སློབ་མའི་སྡིག་པ་དེ་འོག་ནས་འབྱུང་བའི་ཆོ་གས་བསྲེག་ཅེས་པའོ། །ཅི་ནས་སླར་ཡང་མི་སྐྱེ་བར། །དེ་ཡི་འཚོ་བའང་བསྲེག་པར་བྱ། །བསྲེག་ཏེ་ཐལ་བར་གྱུར་ནས་ཀྱང༌། །ཞེས་པ་ནི་གོང་དུ་སྡིག་པ་བསྲེག་པར་བྱ་ཞེས་སྨོས་པ་དེ་ཇི་ལྟར་བསྲེག་པ་གསལ་བར་གསུངས་པ་སྟེ། དེའི་འཚོ་བ་ཞེས་པ་སློབ་མ་དེའི་ཕུང་པོ་ལྔ་ལ་བྱའོ། །ཅི་ནས་སླར་ཡང་མི་སྐྱེ་བར། །ཞེས་པ་ནི་ཕུང་པོ་ལྔ་པོ་དེ་ལྟར་བསྲེགས་ཏེ་སྟོང་པར་བྱས་པ་དེ་ཉིད་ཀྱི་ཚེ་ན་སློབ་མ་དེའི་ཕུང་པོ་ལྔ་ཡོད་པའི་འདུ་ཤེས་མི་སྐྱེ་བར་བྱ་ཞེས་པའོ། །བསྲེགས་ཏེ་ཐལ་བར་གྱུར་ནས་ཀྱང༌། །ཞེས་པ་ནི་སྲེག་པ་ཡང་ལྷག་མ་དང་བཅས་པ་མ་ཡིན་གྱི་ཤིན་ཏུ་ཚིག་ནས་སྟོང་པ་ཉིད་དུ་གྱུར་པར་བྱའོ་ཞེས་པའོ། །དེ་ནི་སླར་ཡང་གསོ་བར་བྱ། །ཞེས་པ་ནི་དེ་ལྟར་སྟོང་པ་ཉིད་དུ་བརྟན་པར་གྱུར་ནས་འོག་ནས་འབྱུང་བའི་ཚིག་གིས་སློབ་མ་དེ་ལྟར་རྣམ་པར་སྣང་མཛད་ཀྱི་གཟུགས་སུ་སྦྱར་རོ་ཞེས་པའོ། །དེ་ལྟར་སློབ་མ་དེའི་འཚོ་བ་སྲེག་གོ་ཞེས་སྤྱིར་སྨོས་པ་ཙམ་དུ་ཟད་ཀྱི། གང་གིས་སྲེག་ཇི་ལྟར་སྲེག་སྙམ་པ་ལ། །ཡི་གེ་ཡིས་ནི་མི་འགྱུར་བསྲེག །ཅེས་བྱ་བ་གསུངས་ཏེ། ཡི་གེ་ཡིས་ནི་ཞེས་པ་ནི་ཡི་གེ་ར་དེས་སྔར་སྨོས་པ་བཞིན་དུ་སློབ་མའི་ཕུང་པོ་ལྔ་པོ་དེ་བསྲེག་གོ་ཞེས་པའོ། །ཨཀྵ་ར་ནི་མི་འགྱུར་བ་དེ། །ཕུང་པོ་ལྔ་པོ་སླར་མི་སྐྱེ་བར་སྟོང་པར་གྱུར་པ་ལས་གཞན་དུ་མི་འགྱུར་བར་ཏིང་ངེ་འཛིན་གྱིས་བརྟན་པར་བྱའོ་ཞེས་པའོ། །འཚོ་བས་སླར་ཡང་གསོ་བར་བྱ། །འཚོ་བས་ཐམས་ཅད་གསོས་ནས་ནི། །ཞེས་པ་ནི་ཚིག་སྔ་མ་ཉིད་འགྲེལ་པ་ཡིན་ཏེ། སློབ་མའི་འཚོ་བ་ཕུང་པོ་ལྔ་པོ་སྟོང་པར་གྱུར་པ་ལས་ཡི་གེ་ཨ་འཚོ་བར་གྱུར་པ་དེས་སླར་ཡང་སངས་རྒྱས་
ཀྱི་སྐུར་གོང་དུ་སྨོས་པའི་ཚུལ་དུ་འགྱུར་ཞེས་པའོ། །ཀུན་དུ་དག་པ་ནི་དཀར་པོ་ཡིན་ལ། དྲི་མ་མེད་པ་ནི་གསལ་བ་སྟེ། །སངས་རྒྱས་ཀྱི་སྐུ་དཀར་ཞིང་གསལ་བར་འགྱུར་ཞེས་པའོ། །ཡན་ལག་བཅུ་གཉིས་ཚིག་རྣམས་ཀྱི། །དེ་ཡི་སྣོད་ལ་དགོད་པར་བྱ། །ཞེས་པ་ནི་ཡན་ལག་བཅུ་གཉིས་ཀྱི་ཚིག་རྣམས་དེའི་གདན་པདྨ་ལ་དགོད་པར་བྱ་ཞེས་པའོ། །བྱང་ཆུབ་སེམས་དཔའ་སྐྱོབ་རྣམས་དང༌། །ཞེས་པ་ནས། འཇིག་རྟེན་རྣམས་ཀྱིས་བསྐུར་བ་ཡིན། །ཞེས་པའི་བར་ནི་སངས་རྒྱས་དང་བྱང་ཆུབ་སེམས་དཔའ་དང༌། ཉན་ཐོས་དང་རང་སངས་རྒྱས་དང་འཇིག་རྟེན་པ་རྣམས་ཀྱང་དམ་ཚིག་འདི་ལ་མོས་པ་དང་ལྡན་པར་རིགས་སོ་ཞེས་པའོ། །གསང་བའི་དཀྱིལ་འཁོར་དབུས་གནས་པའི། །དམ་ཚིག་འདི་ནི་སུས་རིག་པ། །རྒྱུད་རྣམས་ཀུན་དུ་ཞུགས་པ་དང༌། །དཀྱིལ་འཁོར་ཀུན་ལ་དབང་བ་ཡིན། །ཞེས་པ་ནི་གསང་བའི་དཀྱིལ་འཁོར་གྱི་དབུས་སུ་འདི་ལྟ་བུའི་ཏིང་ངེ་འཛིན་གྱི་ཚུལ་བསྟན་པའི་རྒྱུད་ཐམས་ཅད་ཀྱི་དཀྱིལ་འཁོར་དུ་ཞུགས་པ་དང་འདྲ་སྟེ། ཐམས་ཅད་ཀྱི་དམ་ཚིག་ཅན་དུ་འགྱུར་བ་དང༌། དཀྱིལ་འཁོར་ཐམས་ཅད་ཀྱང་བྲི་བ་ལ་དབང་ངོ་ཞེས་པའོ། །སྔགས་འཆང་དེ་ནི་ང་དང་འདྲ། །ཞེས་པ་ནི་གོང་དུ་སླར་གསོས་ནས་དཀར་ཞིང་གསལ་བར་བྱ་ཞེས་སྤྱིར་སྨོས་པ་ཙམ་དུ་ཟད་ལ། །ཚིག་འདིས་ནི་བཅོམ་ལྡན་འདས་རྣམ་པར་སྣང་མཛད་ཀྱི་གཟུགས་ཉིད་དུ་བྱ་ཞེས་པའོ། །དམ་ཚིག་ནི་གཞན་མི་བྱ། །ཞེས་པ་ནི་ཏིང་ངེ་འཛིན་དེ་ལྟ་བུར་མ་བྱས་ཏེ་ལོག་པར་གཞན་དུ་བྱས་ན་དམ་ཚིག་ཅན་དུ་མི་བྱ་ཞེས་པའོ། །དམ་ཚིག་ཅེས་པ་ནི་སྐབས་འདིར་སྟོང་པ་ཉིད་ཀྱི་ཏིང་ངེ་འཛིན་རྟོག་པ་ལ་བྱ་ལ། ཏིང་ངེ་འཛིན་དེ་ཡང་དང་པོ་བསྲེག་པ་ནི་འཇུག་པའི་སེམས་སོ། །བསྲེགས་ནས་སྟོང་བའི་རང་བཞིན་དུ་གནས་ཏེ་མི་འགྱུར་བ་ནི་གནས་པའི་སེམས་སོ། །དེ་ནས་གསོས་ཏེ་བཅོམ་ལྡན་འདས་ཀྱི་སྐུར་བསྒྱུར་བ་ནི་སྡང་བའི་སེམས་སུ་ཤེས་པར་བྱའོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་བ་བྱིན་གྱིས་རློབ་པ་ལས། གསང་བའི་དཀྱིལ་འཁོར་དུ་འཇུག་པའི་རིམ་པར་ཕྱེ་བ་རྒྱས་པའོ།། །།ད་ནི་གསང་བའི་ཕྱག་
རྒྱ་བརྒྱད་པོ་བཤད་པར་བྱ་སྟེ། ཕྱག་རྒྱ་འདི་རྣམས་ཀྱང་སྔགས་པ་ལྷའི་གཟུགས་སུ་བསྒྱུར་བ་དེ་བརྟན་པོར་བྱ་བའི་ཕྱིར་སྦྱར་ཏེ། ལྷའི་གཟུགས་སུ་བསྒྱུར་བ་ཡང་རྣམ་པ་གཉིས་ཏེ། དེ་བཞིན་གཤེགས་པའི་སྐུར་བསྒྱུར་བ་དང་བྱང་ཆུབ་སེམས་དཔའི་སྐུར་བསྒྱུར་བའོ། །བཅོམ་ལྡན་འདས་ཀྱི་སྐུར་བསྒྱུར་བའི་ཚེ་ན་ཡང་གསང་བའི་ཕྱག་རྒྱ་འོག་ནས་འབྱུང་བ་རྣམས་ཀྱི་གདན་དང་འོད་ལ་སོགས་པ་འོག་ནས་ཇི་ལྟར་འབྱུང་བའི་རིམ་པ་བཞིན་དུ་བྱའོ། །བྱང་ཆུབ་སེམས་དཔའ་ལ་སོགས་གཞན་གྱི་གཟུགས་སུ་བསྒྱུར་ན་ཡང་ཕྱག་རྒྱ་དེ་རྣམས་ཀྱིས་བྱིན་གྱིས་བརླབས་ན་བརྟན་པར་འགྱུར་རོ། །དེ་བཞིན་གཤེགས་པའི་སྐུར་བསྒྱུར་བ་ལ་ཕྱག་རྒྱ་འདི་རྣམས་ཀྱིས་བྱིན་གྱིས་བརླབས་ན་ཕྱག་རྒྱ་འདི་རྣམས་དེ་བཞིན་གཤེགས་པའི་ཕྱག་རྒྱ་ཡིན་པའི་ཕྱིར། དེ་བཞིན་གཤེགས་པ་ཉིད་ཀྱི་རང་བཞིན་དུ་འགྱུར་རོ། །དེ་ལ་ལྷའི་སྐུ་ཡོངས་སུ་རྫོགས་པར་བྱ་བ་ཡང་རྣམ་པ་གཉིས་ཏེ། གནས་རྫོགས་པར་བྱ་བ་དང་ལུས་རྫོགས་པར་བྱ་བའོ། །གནས་རྫོགས་པར་བྱ་བ་ནི་རྡོ་རྗེ་མི་ཤིགས་པའི་ཕྱག་རྒྱ་དང་པདྨའི་སྦུབས་ཀྱི་ཕྱག་རྒྱ་གཉིས་སོ། །ལྷག་མ་དྲུག་གིས་ནི་ལུས་རྫོགས་པར་བྱ་བའོ། །དེ་རྣམས་ནི་རྣམ་པ་གསུམ་དུ་དབྱེ་སྟེ། ལུས་དང་ངག་དང་ཡིད་རྫོགས་པར་བྱེད་པའོ། །དེ་ལ་ལུས་རྫོགས་པར་བྱེད་པ་ནི་ཡན་ལག་ཐམས་ཅད་འབྱུང་བའི་ཕྱག་རྒྱ་དང༌། གཟི་བརྗིད་འབྱུང་བའི་ཕྱག་རྒྱའོ། །གཟུངས་ཀྱི་ཕྱག་རྒྱ་དང་བཅོམ་ལྡན་འདས་ཀྱི་ཆོས་གནས་པའི་ཕྱག་རྒྱ་གཉིས་ནི་སེམས་རྫོགས་པར་བྱེད་པའོ། །སངས་རྒྱས་ཀྱི་གསུང་དབྱངས་བཀོད་པའི་རྒྱན་གྱི་ཕྱག་རྒྱ་ནི་ངག་རྫོགས་པར་བྱེད་པའི་ཕྱག་རྒྱའོ། །བཅོམ་ལྡན་འདས་ཀྱི་རྣལ་འབྱོར་འཛིན་པའི་ཕྱག་རྒྱ་ནི་ཏིང་ངེ་འཛིན་གྱི་རྣལ་འབྱོར་རྫོགས་པར་བྱེད་པའོ། །དེ་རྣམས་སྦྱར་བར་བྱ་བའི་རིམ་པ་ཡང་ཐོག་མར་རྡོ་རྗེ་མི་ཤིགས་པའི་ཕྱག་རྒྱས་བདག་གནས་པའི་གཞི་དང་དབང་ཆེན་གྱི་དཀྱིལ་འཁོར་རྡོ་རྗེའི་གདན་དུ་བྱིན་གྱིས་བརླབས་ཏེ། དེ་ནས་དམ་ཚིག་གི་ཕྱག་རྒྱ་བཅིངས་ནས་བདག་དང་གནས་སྲུང་བ་དང༌། མཆོད་པ་བྱ་བ་དང་རྡོ་རྗེ་
སེམས་དཔར་བྱིན་གྱིས་བརླབ་པ་ལ་སོགས་པ་ཇི་སྐད་གསུངས་པ་རྣམས་རིམ་པ་བཞིན་དུ་བྱས་ལ། དེ་ནས་དེའི་འོག་ཏུ་ཇི་སྐད་བཤད་པའི་རིམ་གྱིས་བདག་ཉིད་ལྷའི་སྐུར་བསྒྱུར་ཏེ། དང་པོར་པདྨའི་སྦུབས་ཀྱི་ཕྱག་རྒྱས་པདྨའི་གདན་བྱིན་གྱིས་བརླབས་ལ། ཡན་ལག་ཐམས་ཅད་འབྱུང་བའི་ཕྱག་རྒྱས་ལྷའི་སྐུར་བརྟན་པར་བྱིན་གྱིས་བརླབས་ནས། དེ་ནས་གཟི་བརྗིད་འབྱུང་བའི་ཕྱག་རྒྱས་འོད་ཀྱི་དཀྱིལ་འཁོར་བྱིན་གྱིས་བརླབས་ཏེ། དེ་ནས་གཟུངས་ཀྱི་ཕྱག་རྒྱས་ཆོས་མི་བརྗེད་པའི་དྲན་པ་བརྟན་པར་བྱིན་གྱིས་བརླབ་པོ། །དེ་ནས་སངས་རྒྱས་ཀྱི་གསུང་དབྱངས་བཀོད་པའི་རྒྱན་གྱིས་ཕྱག་རྒྱས་ངག་བྱིན་གྱིས་རླབས་ནས། དེ་ནས་ཆོས་གནས་པའི་ཕྱག་རྒྱས་དེ་བཞིན་ཉིད་ཀྱི་ཆོས་ཉིད་བརྟན་པར་བྱིན་གྱིས་བརླབས་ནས། དེའི་འོག་ཏུ་རྣལ་འབྱོར་འཛིན་པའི་ཕྱག་རྒྱས་ཏིང་ངེ་འཛིན་བརྟན་པར་བྱིན་གྱིས་བརླབ་པོ། །དེ་དག་ནི་བསྡུས་པའི་དོན་ཏོ། །ཡན་ལག་གི་དོན་ནི། དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ལ་གཟིགས་ནས་ཞེས་པ་ནི་སྔ་མ་བཞིན་ནོ། །བྱང་ཆུབ་སེམས་དཔའ་ཕྱག་ན་རྡོ་རྗེ་ལ་བཀའ་སྩལ་པ་ཞེས་ཕྱག་ན་རྡོ་རྗེས་མ་གསོལ་བར་བཅོམ་ལྡན་འདས་ཉིད་འཆད་པ་ནི་ཕྱག་རྒྱ་དེའི་ཆེ་བའི་བདག་ཉིད་བསྟན་པའི་ཕྱིར་ཏེ། དེ་རྣམས་སངས་རྒྱས་བཅོམ་ལྡན་འདས་ཀྱི་སྤྱོད་ཡུལ་ཡིན་གྱི། བྱང་ཆུབ་སེམས་དཔའ་ལ་སོགས་པ་གཞན་རྣམས་ཀྱི་སྤྱོད་ཡུལ་དུ་མ་གྱུར་པས་ཕྱག་ན་རྡོ་རྗེས་ཀྱང་དེ་བཤད་དུ་གསོལ་ཞེས་མ་གསོལ་ཏོ། །གསང་བའི་ཕྱག་རྒྱ་ཞེས་པ་ནི་དམ་ཚིག་མེད་པ་དང་དབང་མ་བསྐུར་བ་ལ་སོགས་པ་ཀུན་ལ་མི་བསྟན་པའི་ཕྱིར་རོ། །གསང་བ་དང་བཅས་པ་ཞེས་པ་ནི་རྡོ་རྗེ་གདན་དང་པདྨ་དང་འོད་ཀྱི་དཀྱིལ་འཁོར་ལ་སོགས་པ་ལྷ་རང་གི་གཟུགས་སུ་མི་བསྟན་ཕར་ལག་པའི་ཕྱག་རྒྱར་བསྟན་པའི་ཕྱིར་རོ། །ལྷའི་གནས་བྱིན་གྱིས་རློབ་པར་གྱུར་པ་ཞེས་པ་ལྷའི་གནས་ནི་རྡོ་རྗེ་གདན་དང་པདྨ་སྟེ། དེར་ལྷ་རྣམས་གནས་པར་འགྱུར་བས་ན་རྡོ་རྗེ་མི་ཤིགས་པའི་ཕྱག་རྒྱ་དང་པདྨའི་ཕྱག་རྒྱ་གཉིས་ལ་བྱའོ། །གཉིས་སུ་ན་ཕྱག་རྒྱ་བརྒྱད་ཆར་ལ་བྱ་སྟེ། ཕྱག་རྒྱ་དེ་
རྣམས་ཀྱིས་བྱིན་གྱིས་བརླབས་ན་རང་གི་ལུས་ལ་ལྷ་གནས་པར་འགྱུར་བའི་ཕྱིར་རོ། །རང་གི་གསང་སྔགས་ཀྱིས་མཚན་པ། །ཞེས་པ་ནི་ཕྱག་རྒྱ་དེ་དག་སོ་སོའི་སྔགས་སོགས་འོག་ནས་འབྱུང་བའི་མཚན་མ་རྣམས་གྱིས་བཏབ་སྟེ། ཕྱག་རྒྱ་དེ་བཅིང་བ་ན་སྔགས་ཀྱང་དེར་བསམ་མོ་ཞེས་པའི་དོན་ཏོ། །དཀྱིལ་འཁོར་དང་ལྡན་པར་ཞེས་པ་ནི་ཕྱག་རྒྱ་དེ་དག་སོ་སོའི་དབང་ཆེན་ལ་སོགས་པ་ཇི་ལྟར་འོག་ནས་འབྱུང་བ་དང་ལྡན་པ་ཞེས་པ་སྟེ། རང་རང་གི་དཀྱིལ་འཁོར་རྣམས་ཕྱག་རྒྱ་ཉིད་ཀྱི་ནང་དུ་བསམས་ལ། རྡོ་རྗེ་དང་པདྨའི་གདན་དང༌། འོད་ཀྱི་དཀྱིལ་འཁོར་ལ་སོགས་པ་ནི་སོ་སོའི་གནས་སུ་ཡང་ལྡན་པར་བསམ་མོ་ཞེས་པའི་དོན་ཏོ། །རང་གི་ལྷའི་ཚུལ་དུ་རྣལ་འབྱོར་དུ་བྱ་བ་ཞེས་པ་ནི་ཞི་བ་དང་རྒྱས་པ་དང་རབ་དང་འབྲིང་ལ་སོགས་པའི་བསྒྲུབ་པའི་བྱ་བ་རྣམས་ལ་རང་གི་ལྷ་ཉིད་ཀྱི་རྣལ་འབྱོར་དུ་བྱས་པ་ལ་ཕྱག་རྒྱ་འདི་རྣམས་དང་ལྡན་ཞེས་པའོ། །བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཆོ་ག་བདག་ཉིད་ལྷའི་གཟུགས་སུ་བསྒྱུར་བ་ལ་ཕྱག་རྒྱ་འདི་རྣམས་ཀྱི་ཇི་སྐད་བཤད་པའི་རིམ་པ་བཞིན་དུ་སོ་སོའི་བྱིན་གྱིས་བརླབས་ན་ལྷའི་གཟུགས་སུ་བསྟན་པར་འགྱུར་རོ་ཞེས་པའོ། །ཤེས་ནས་ཀྱང་རང་གི་ལྷའི་ཚུལ་དུ་གནས་ནས་དངོས་གྲུབ་ཐོབ་པར་འགྱུར་བ་ཞེས་པ་ནི་དེའི་སྐུར་བསྒྱུར་ཏེ་ཕྱག་རྒྱ་དེ་རྣམས་ཀྱིས་བྱིན་གྱིས་བརླབས་ནས་བརྟན་པར་བྱས་པ་ཙམ་གྱིས་ཆོ་ག་མ་ཡིན་གྱི། རང་གི་ལྷའི་བྱ་བ་ཞི་བ་དང་རྒྱས་པ་རབ་དང་འབྲིང་ལ་སོགས་པའི་གྲུབ་པ་དང་ལས་རྣམས་བསྒྲུབས་ན་འགྲུབ་པར་འགྱུར་རོ་ཞེས་པ་སྟེ། དེ་ལྟ་བུ་ཡོད་དེ་ཞེས་འབྲེལ་ཏོ། །རྡོ་རྗེ་མི་ཤིགས་པའི་ཕྱག་རྒྱ་དང༌། པདྨའི་སྦུབས་ཀྱི་ཕྱག་རྒྱ་དང༌། སངས་རྒྱས་ཀྱི་གསུང་དབྱངས་བཀོད་པའི་ཕྱག་རྒྱ་བཅིངས་པ་ན་ཕྱག་སྔ་མ་ལས་ཤེས་པ་ནི་དེ་དག་གསུམ་ཆར་ཡང་གཟི་བརྗིད་འབྱུང་བའི་ཕྱག་རྒྱ་ལ་སྙེག་པར་ཤེས་པར་བྱའོ། །དེ་བཞིན་དུ་གཟུངས་ཀྱི་ཕྱག་རྒྱ་ལ་སོགས་པ་ཕྱག་རྒྱ་གསུམ་པོ་ལ་ཕྱག་རྒྱ་སྔ་མ་ལས་ཤེས་པ་ནི་ཡན་ལག་ཐམས་ཅད་འབྱུང་བའི་ཕྱག་རྒྱ་ལས་ཤེས་པར་བྱའོ། །གཟུངས་ཀྱི་ཕྱག་རྒྱའི་དཀྱིལ་འཁོར་འཇའ་འདྲ་བ་མཚན་མ་ཐམས་ཅད་
དང་ལྡན་པ་རྡོ་རྗེ་བ་དན་ཕྱར་བ་ཞེས་པ་ལ་གཟུངས་ནི་རྡོ་རྗེའི་གདན་དང་པདྨ་དང་འོད་ཀྱི་དཀྱིལ་འཁོར་ལ་སོགས་པའི་དངོས་པོ་ཇི་ལྟར་བསམ་པ་རྣམས་མི་བརྗེད་པར་བྱས་ན་མཐུ་ཐམས་ཅད་དང་ལྡན་པར་དགོངས་པས་འཇའ་དང་འདྲ་བར་དཀྱིལ་འཁོར་བཞི་ཆར་གྱི་ཁ་དོག་དང་ལྡན་པའོ། །མཚན་མ་ཐམས་ཅད་དང་ལྡན་པ་ནི་དཀྱིལ་འཁོར་སོ་སོའི་མཚན་མ་རྡོ་རྗེ་དང་པདྨ་རྡོ་རྗེ་པདྨ་ལ་སོགས་པ་དང་ལྡན་པའོ། །རྡོ་རྗེ་བ་དང་ཕྱག་བ་ནི་དཀྱིལ་འཁོར་དེའི་དབྱི་བས་འཇའ་འདྲ་བས་རླུང་གི་དཀྱིལ་འཁོར་མཚན་མ་བ་དན་རབ་ཏུ་མི་གཡོ་བ་བྱ་བའི་ཕྱིར་རྡོ་རྗེ་དང་ལྡན་པའི་བ་དན་ནོ། །ཆོས་གནས་པའི་ཕྱག་རྒྱའི་ཀླད་ཀོར་གཉིས་ཞེས་པ་ནི་སྟོང་པ་དང་སྟོང་པའི་མཚན་མའོ། །དཀྱིལ་འཁོར་ནི་རྣལ་འབྱོར་འཛིན་པའི་ཕྱག་རྒྱའི་དཀྱིལ་འཁོར་རོ། །ནམ་མཁའ་སྟེ་ནམ་མཁའི་ཁ་དོག་ལས་ཁྱད་པར་དུ་སྔོ་བར་བྱ་བ་ནི་ཏིང་ངེ་འཛིན་གྱི་མཐུ་ཐམས་ཅད་དང་ལྡན་པའི་ཕྱིར་རླུང་གི་དཀྱིལ་འཁོར་གྱི་ཤས་ཆེ་བར་བྱ་བར་དགོངས་པའོ། །གསང་བ་པའི་བདག་པོ་འདི་དག་ནི་གསང་བའི་ཕྱག་རྒྱ་སྟེ། དེ་བཞིན་གཤེགས་པ་རྣམས་ཀྱིས་རབ་ཏུ་གསང་བ་ཡིན་པས་གཞན་སུ་ལ་ཡང་མ་སྦྱིན་ཅིག་ཅེས་སྦྱར་ཏེ། དབང་བསྐུར་བ་ལ་སོགས་པ་འོག་ནས་འབྱུང་བའི་ཡོན་ཏན་མིང་གིས་སྨོས་པ་རྣམས་མི་ལྡན་ཞིང་དམ་ཚིག་མེད་པ་སུ་ལ་ཡང་མི་སྦྱིན་གྱི་ཡོན་ཏན་དེ་རྣམས་ཀྱང་ལྡན་པ་ལ་ནི་སྦྱིན་ནོ་ཞེས་པའོ། །དབང་བསྐུར་བ་ཞེས་པ་ནི་གསང་བའི་དཀྱིལ་འཁོར་དུ་དབང་བསྐུར་བའོ། །ཆོ་རིགས་བཙུན་པ་ཞེས་པ་ནི་བྲམ་ཟེ་དང་རྒྱལ་རིགས་རྣམས་ལ་སྦྱིན་གྱི་ཉེ་བ་ལ་སོགས་པ་རིགས་ངན་པ་རྣམས་ལ་མི་སྦྱིན་ནོ་ཞེས་པའོ། །གཉིས་སུ་ན་རིགས་དང་ལྡན་ཞེས་པ་སྟེ། དེ་བཞིན་གཤེགས་པའི་རིགས་དང་པདྨའི་རིགས་ཀྱི་ལྷ་རྣམས་ལ་བརྟེན་ཅིང་དེ་ལ་གནས་པའོ། །གསུམ་དུ་ན་དེ་བཞིན་གཤེགས་པའི་རིགས་ལ་སོགས་པའི་སྔགས་པའི་སྤྱོད་པ་ལ་བརྩོན་ཞིང་འབད་པ་རྣམས་ལ་ཞེས་པའོ། །སྤྲོ་བ་ཅན་ཞེས་པ་ནི་སྔགས་ཀྱི་སྤྱོད་པ་ལ་བརྩོན་པ་ལ་བརྩོན་པ་ཞེས་པའོ། །ཡི་དམ་ལ་བརྟན་པ་ཞེས་པ་ནི་ཇི་ལྟར་བསམས་པའི་དོན་མ་གྲུབ་ཀྱི་བར་དུ་མི་གཏོང་བའོ། །བླ་མ་གུས་པ་ཞེས་པ་ནི་བླ་མ་ལ་དང་པའོ། །
བྱས་པ་གཟོ་བ་ཞེས་པ་ནི་བླ་མ་ལ་དད་ཅིང་གུས་པས་ཇི་ལྟར་བསྟན་པ་བཞིན་དུ་ཡང་དག་པར་སྦྱོར་ཞིང་ནན་ཏན་བྱེད་པའི་ཕྱིར་རོ། །གཙང་སྦྲ་ཆེ་བ་ཞེས་པ་ནི་ལུས་གཙང་ན་སེམས་འདུལ་བར་འགྱུར་བའི་ཕྱིར་རོ། །བདག་གི་ལུས་དང་སྲོག་ལ་ཡང་མི་ལྟ་བ་ཞེས་པ་ནི་ལས་དང་བསྒྲུབ་པ་ལ་སོགས་པའི་སྔགས་ཀྱི་སྤྱོད་པ་ལ་ལུས་དང་སྲོག་ཀྱང་མི་ཕོངས་ཏེ་དེ་ལྟ་བུ་ལ་ཕྱག་རྒྱ་དེ་རྣམས་སྦྱིན་ནོ་ཞེས་པའོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྦྲུལ་པ་བྱིན་གྱིས་རློབ་པ་ལས། གསང་བའི་ཕྱག་རྒྱ་བརྒྱད་རིམ་པར་ཕྱེ་བ་རྒྱས་པའོ།། །།ད་ནི་ནང་ཡིད་ཀྱི་དཀྱིལ་འཁོར་བྲི་བའི་སྐབས་འཆད་དེ། ཡིད་ཀྱི་དཀྱིལ་འཁོར་བྲི་བ་ཡང་སྤྱིར་དཀྱིལ་འཁོར་གཉིས་ཏེ། རང་བཞིན་གྱི་དཀྱིལ་འཁོར་དང༌། གཟུགས་བརྙན་གྱི་དཀྱིལ་འཁོར་རོ། །དེ་ལ་རང་བཞིན་གྱི་དཀྱིལ་འཁོར་ནི་རྒྱ་ཆེ་ཞིང་བསམ་གྱིས་མི་ཁྱབ་སྟེ། མདོར་བསྡུས་ཏེ་བསྟན་པ་ནི་ཡིད་ཀྱི་དཀྱིལ་འཁོར་དུ་ཤེས་པར་བྱའོ། །གཟུགས་བརྙན་གྱི་དཀྱིལ་འཁོར་ཡང་ཇི་སྐད་གསུངས་པ་བཞིན་དུ་རྫོགས་པར་དཀར་སྟེ། དེ་མདོར་བསྡུས་པ་བསྟན་པ་ནི་རྒྱུད་ཕྱི་མ་ལས་དཀྱིལ་འཁོར་བཤད་པའོ། །དེ་བས་ན་ཡིད་ཀྱི་དཀྱིལ་འཁོར་འདིའི་སྒོ་ནས་སེམས་ཀྱི་རང་བཞིན་གྱི་གསང་བའི་དཀྱིལ་འཁོར་ཇི་འདྲ་བའི་ཚུལ་ཤེས་པར་འགྱུར་ཏེ། འདི་ནི་འཇུག་པའི་སྒོ་ལྟ་བུར་བསྟན་ཏོ། །ཡིད་ཀྱི་དཀྱིལ་འཁོར་དེ་བྲི་བའི་ཐབས་བསྟན་པའི་ཕྱིར་བཅོམ་ལྡན་འདས་ཏིང་ངེ་འཛིན་དུ་བཞུགས་ནས་སངས་རྒྱས་ཀྱི་ཞིང་འདི་ལག་མཐིལ་བཞིན་དུ་མཉམ་པར་གནས་ཤིང༌། སྒོ་ཁྱུད་དང་རྟ་བབས་རིན་པོ་ཆེ་སྣ་ལྔས་རབ་ཏུ་རྣམ་པར་སྦྲས་པས་བརྒྱན་པར་བསྟན་པ་སྟེ། དེ་དག་ཐམས་ཅད་ཀྱང་དངོས་པོ་མེད་པ་ལས་སེམས་ཀྱི་དབང་ཙམ་གྱིས་ཇི་ལྟར་བསམས་པ་བཞིན་དུ་འབྱུང་བར་བསྟན་པའོ། །དེ་བས་ན་ཡིད་ཀྱི་དཀྱིལ་འཁོར་ལ་སོགས་པ་ཡིད་ཀྱིས་བསྐྱེད་པ་ཐམས་ཅད་རྣལ་འབྱོར་པས་སེམས་མཉམ་པར་གཞག་པ་ལས་བཀོད་པའི་མགོན་པོ་ཇི་ལྟ་བུར་གྱུར་ཅིག་ཅེས་བསམས་ནས་སྨོན་ལམ་བཏབ་ལ། ཏིང་ངེ་འཛིན་དུ་ཞུགས་ན་ཇི་ལྟར་སྨོན་པ་དེ་ལྟར་འགྱུར་བར་ཤེས་པར་བྱའོ། །དེ་ལྟར་ཡིད་ཀྱི་དཀྱིལ་འཁོར་
བྲི་བའི་ཐབས་བསྟན་པ་ཡང༌། དེ་ནས་བཅོམ་ལྡན་འདས་རྣམ་པར་སྣང་མཛད་ཆེན་པོས་དེའི་ཚེ་མ་འོངས་པའི་འགྲོ་བ་རྣམས་ལ་གཟིགས་ནས་ཐམས་ཅད་ཀྱི་རྗེས་སུ་འཇུག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ་ཞེས་བྱ་བ་ལ་སོགས་པ་ཡིན་ཏེ། བཅོམ་ལྡན་འདས་སྔོན་གྱི་སྨོན་ལམ་གྱི་ཤུགས་ཀྱིས་སེམས་ཅན་གྱི་དོན་མཛད་པ་ལ་སོགས་པ་ལྷུན་གྱིས་གྲུབ་པ་ཉིད་དུ་འབྱུང་བས་ཏིང་ངེ་འཛིན་དུ་འཇུག་མི་དགོས་མོད་ཀྱི། འོན་ཀྱང་དངོས་པོ་བསྟན་པར་བྱ་བའི་ཏིང་ངེ་འཛིན་དུ་ཞུགས་ན། བྱང་ཆུབ་སེམས་དཔའ་ཀུན་དུ་བཟང་པོ་ལ་སོགས་པ་འདུལ་བའི་འགྲོ་བ་རྣམས་ཀྱིས་བཅོམ་ལྡན་འདས་ཅིའི་ཕྱིར་ཏིང་ངེ་འཛིན་དུ་ཞུགས་པ་དང༌། ཞུགས་ནས་ཇི་ལྟར་སྟོན་པར་འགྱུར་བ་ལ་སོགས་པ་ཤེས་པར་འགྱུར་ཏེ། དེའི་ཕྱིར་བཅོམ་ལྡན་འདས་ཏིང་ངེ་འཛིན་དུ་འཇུག་གོ །ཐམས་ཅད་ཀྱི་རྗེས་སུ་འཇུག་པ་ཞེས་པ་ནི་བཅོམ་ལྡན་འདས་ཏིང་དེ་འཛིན་དེ་ལ་ཞུགས་ན་དོན་དམ་པར་ཆོས་ཀྱི་དབྱིངས་ཀྱིས་ཀུན་དུ་ཁྱབ་པར་རྟོག་པ་དང་ཀུན་རྫོབ་ཏུ་ཡང་སངས་རྒྱས་ཀྱི་ཞིང་འདི་ལག་མཐིལ་བཞིན་དུ་མཉམ་པར་གནས་པ་ལ་སོགས་པ་གནས་ཀྱི་ཁྱབ་པར་བསྟན་པ་རྣམས་ཁོང་དུ་ཆུད་པ་སྟེ། བཅོམ་ལྡན་འདས་ཏིང་ངེ་འཛིན་ལ་ཞུགས་ན་དོན་དམ་པ་དང་ཀུན་རྫོབ་རྟོགས་པ་དེ་དག་འབྱུང་བའི་ཕྱིར་ཏིང་ངེ་འཛིན་དེའི་མིང་ཐམས་ཅད་ཀྱི་རྗེས་སུ་འཇུག་པ་ཞེས་བྱའོ། །མ་འོངས་པའི་འགྲོ་བ་རྣམས་ལ་གཟིགས་ནས་ཞེས་པ་ནི་ཀུན་དུ་བཟང་པོ་དང་ཕྱག་ན་རྡོ་རྗེ་ལ་སོགས་པ་ཡོངས་སུ་དག་པའི་བྱང་ཆུབ་སེམས་དཔའ་རྣམས་ཀྱིས་ནི་དེ་དག་ཇི་ལྟ་བ་བཞིན་དུ་མཁྱེན་མོང༌། །མ་འོངས་པའི་འགྲོ་བ་རྣམས་ཀྱི་དོན་དུ་དངོས་པོ་ཡོད་པ་མ་ཡིན་པ་ལས་སེམས་ཀྱི་དབང་ཙམ་གྱིས་རྣམ་པ་སྣ་ཚོགས་འབྱུང་བར་བསྟན་པ་ཡིན་ནོ་ཞེས་པའོ། །བཅོམ་ལྡན་འདས་སྙོམས་པར་ཞུགས་མ་ཐག་ཏུ་དེ་ནས་འདི་ལྟར་སངས་རྒྱས་ཀྱི་ཞིང་འདི་ལག་མཐིལ་བཞིན་དུ་མཉམ་པར་གནས་ཤིང་ཞེས་པ་ནི་དཀྱིལ་འཁོར་བྲི་བ་ན་སྔར་ས་མཐོ་དམན་ལ་སོགས་པ་སྙོམས་ཤིང་སྦྱང་དགོས་ཏེ་དའི་ཚུལ་བསྟན་བའོ། །སངས་རྒྱས་ཀྱི་ཞིང་འདི་ཞེས་པ་ནི་མི་མཇེད་ཀྱི་སྟོང་གསུམ་གྱི་སྟོང་ཆེན་པོའི་ཁམས་སོ། །ལག་མཐིལ་
བཞིན་དུ་མཉམ་པར་གནས་ཤིང་ཞེས་པ་ནི་སངས་རྒྱས་ཀྱི་ཞིང་དེ་རི་དང་གཅོང་རོང་ལ་སོགས་པ་མེད་པར་མཉམ་པར་གྱུར་ཞེས་པ་ནི། ཚིག་དེས་མ་འོངས་པའི་དུས་ཀྱི་འགྲོ་བ་རྣམས་ནམ་དཀྱིལ་འཁོར་འདྲི་བ་ན་དཀྱིལ་འཁོར་གྱིས་དེ་ལག་མཐིལ་བཞིན་དུ་མཉམ་པར་སྦྱང་བར་བྱ་བ་བསྟན་པའོ། །སྒོ་ཁྱུད་དང་རྟ་བབས་རིན་པོ་ཆེ་སྣ་ལྔས་རབ་ཏུ་རྣམ་པར་སྦྲས་པས་བརྒྱན་པ་ཞེས་པ་ནས། སིལ་སྙན་གྱི་སྒྲ་ཡིད་དུ་འོང་ཞིང་སྙན་པ་རྣམ་པ་དུ་མ་གྲག་པ་ཞེས་པའི་བར་གྱིས་ནི་སངས་རྒྱས་ཀྱི་ཞིང་དེ་མཉམ་པར་གྱུར་ནས་ཀྱང་རྒྱན་དེ་དག་གིས་བརྒྱན་པར་བསྟན་པ་སྟེ། དེས་ནི་དཀྱིལ་འཁོར་གྱི་ས་དེ་དག་བསྙམས་ནས་རྟ་བབས་དང་སྒོ་ཁྱུད་དང་གདུགས་དང་བ་དན་ལ་སོགས་པས་བརྒྱན་པ་དང་རི་མོ་རྣམས་ཀྱིས་བརྒྱན་པར་བྱ་བའི་ཐབས་བསྟན་པའོ། །པདྨའི་ཚེའུ་ཆུ་དྲི་ཞིམ་པོ་ཡན་ལག་བརྒྱད་དང་ལྡན་པས་ཡོངས་སུ་གང་བ་སྨོས་པ་ནི་དཀྱིལ་འཁོར་གྱི་ཉེ་འཁོར་དུ་རྫིང་བུ་ལ་སོགས་པ་བྲི་བར་བྱའོ། །ཡན་ལག་བརྒྱད་ནི་བསིལ་བ་དང་དང་བ་དང་མངར་བ་ལ་སོགས་པའོ། །བྱང་ཆུབ་སེམས་དཔའ་མང་པོའི་བསོད་ནམས་ཀྱིས་བསགས་པའི་སྟན་དང་ཁང་པ་དང་གཞལ་མེད་ཁང་ཡིད་ལས་བྱུང་བ་དང་ལྡན་པར་གྱུར་ཏོ་ཞེས་པ་ནི་སངས་རྒྱས་ཀྱི་ཞིང་དེར་ཕ་རོལ་ཏུ་ཕྱིན་པ་ལས་བྱུང་བའི་བྱང་ཆུབ་སེམས་དཔའ་རྣམས་ཀྱི་སོ་སོའི་བསོད་ནམས་ཇི་ཙམ་ལས་སོ་སོའི་སྟན་དང་ཁང་པ་དང་ལྡིང་ཁང་ལ་སོགས་པ་དང་ལྡན་པ་ཞེས་པ་སྟེ། དེས་ཀྱང་དཀྱིལ་འཁོར་གྱིས་དེར་བྱང་ཆུབ་སེམས་དཔའ་ལ་སོགས་པ་ལྷ་སོ་སོའི་གནས་དང་བཅས་པར་བྱ་བ་བསྟན་ཏོ། །པདྨའི་རྒྱལ་པོ་ཆེན་པོ་ཞེས་པ་ནས་བསོད་ནམས་ཀྱི་རྣམ་པར་སྐྱེད་པ་དག་བྱུང་བར་གྱུར་ཏོ་ཞེས་པའི་བར་ནི་སངས་རྒྱས་ཀྱི་ཞིང་དེའི་དབུས་ན་པདྨའི་རྒྱལ་པོ་ཆེན་པོ་ལ་དེ་བཞིན་གཤེགས་པ་བཞུགས་ཏེ། དེ་བཞིན་གཤེགས་པའི་སྐུ་ལས་ཡེ་ཤེས་ཀྱི་སེམས་ཅན་ཆོས་ཀྱི་ཚིག་སྟོན་པ་ཤ་སྟག་བྱུང་ངོ་ཞེས་པ་སྟེ། དེ་ཡང་དཀྱིལ་འཁོར་གྱི་དབུས་སུ་བཅོམ་ལྡན་འདས་རྣམ་པར་སྣང་མཛད་བཞུགས་པ་ལ་དེ་བཞིན་གཤེགས་པའི་སྐུ་ལས་གྱུར་པའི་ལྷ་རྣམས་ཀྱིས་བསྐོར་ཏེ་བཞུགས་
པར་བྱ་བ་བསྟན་པའོ། །དེ་བཞིན་གཤེགས་པའི་མོས་པ་ལས་བྱུང་བའི་ཆོས་ཀྱི་དབྱིངས་རྟོགས་པའི་མཚན་མས་མཚན་པ་ཞེས་པ་ནི་པདྨའི་རྒྱལ་པོ་དེའི་བྱེ་བྲག་སྟེ། དེ་བཞིན་གཤེགས་པའི་མོས་པ་ལས་བྱུང་བ་ནི་སྔར་བཤད་པ་བཞིན་ནོ། །ཆོས་ཀྱི་དབྱིངས་རྟོགས་པ་ཞེས་པ་ནི་དེ་བཞིན་ཉིད་ཀྱི་ཡེ་ཤེས་དག་པ་ལ་བྱ་སྟེ། དེའི་མཚན་མས་མཚན་པ་ནི་ཡེ་ཤེས་དག་པ་དེའི་མཚན་མ་ཡིན་པས་དཀར་པོར་ཤེས་པར་བྱ་སྟེ། མདོར་ན་དེ་བཞིན་གཤེགས་པ་ཉིད་ཀྱི་ཡེ་ཤེས་དག་པ་པདྨའི་རྒྱལ་པོ་ཆེན་པོར་སྣང་བ་བྱིན་གྱིས་བརླབ་པོ་ཞེས་པའོ། །དེའི་དབུས་ན་དེ་བཞིན་གཤེགས་པའི་སྐུ་བཞུགས་པ་ནི་དེ་བཞིན་ཉིད་ཀྱི་ཡེ་ཤེས་ཆོས་ཀྱི་དབྱིངས་ཀྱི་མཚན་ཉིད་དེ་ལས་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་དབྱུང་བར་བསྟན་པའོ། །ཆོས་ཀྱི་དབྱིངས་ལ་གཞོལ་བ་ལ་ཞེས་པ་ནི་སྟོང་པ་ཉིད་ཀྱི་རང་བཞིན་དུ་གྱུར་པ་ཞེས་པའོ། །དེ་ལྟར་བཅོམ་ལྡན་འདས་སྟོང་པ་ཉིད་ཀྱི་རང་བཞིན་དུ་གྱུར་ཀྱང་ཕུང་པོ་ལྷག་མ་མེད་པའི་མྱ་ངན་ལས་འདས་པ་ལྟ་བུ་ནི་མ་ཡིན་གྱི། སྔོན་གྱི་སྨོན་ལམ་གྱི་ཤུགས་ཀྱིས་རྣམ་པར་མི་རྟོག་བཞིན་དུ་ཀུན་རྫོབ་ཀྱི་བྱ་བ་ཐམས་ཅད་འབྱུང་བར་བསྟན་པའི་ཕྱིར་སེམས་ཅན་གྱི་བསམ་པ་དང་མོས་པ་ཇི་ལྟ་བ་བཞིན་དུ་མགུ་པར་མཛད་པ་ཞེས་གསུངས་པ་ཡིན་ནོ། །ཅིས་ཀྱང་མི་ཚུགས་པའི་སྟོབས་དང་ལྡན་པ་སྟོབས་བཅུ་ལ་མོས་པ་ལས་བྱུང་བ་ཞེས་པ་ནི་བཅོམ་ལྡན་འདས་ཀྱི་སྐུ་ལས་བུང་བའི་སྐུ་དེ་རྣམས་ཀྱི་མཐུ་ནི་ཅི་ལས་མི་ཚུགས་པ་ཤ་སྟག་སྟེ། དེ་ཡང་བཅོམ་ལྡན་འདས་ཉིད་ཀྱི་སྐུ་ཚེ་ཀུན་དུ་སངས་རྒྱས་པའི་མཚན་ཉིད་ཀྱིས་སྟོབས་བཅུ་ལ་མོས་པ་བསྐྱེད་པས་འབྲས་བུ་སྟོབས་བཅུ་རྫོགས་པར་གྱུར་པ་ལས་བྱུང་བ་ཞེས་པའོ། །ཁ་དོག་དང་དབྱིབས་རྣམ་པ་དུ་མས་བདག་གི་སྐུ་བརྒྱན་པ་ཞེས་པ་ནི་སྐུ་མང་པོ་བྱུང་བ་དག་གི་ཁྱད་པར་ཏེ། དེ་དག་ཁ་དོག་དང་གཟུགས་སྣ་ཚོགས་དང་བཅས་པ་ཞེས་པའོ། །སྐུ་མང་པོ་དེ་རྣམས་ཀྱང་བཅོམ་ལྡན་འདས་ཉིད་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་བསྐལ་པ་གྲངས་མེད་པར་སྦྱིན་པའི་ཕ་རོལ་ཏུ་ཕྱིན་པ་ལ་སོགས་པའི་བསོད་ནམས་ཀྱི་ཚོགས་བསགས་པའི་རྒྱུ་ལས་བྱུང་བར་བསྟན་པའི་ཕྱིར། བསྐལ་བ་བྱེ་བ་ཁྲག་
ཁྲིག་བརྒྱ་སྟོང་དུ་མར་ཞེས་པ་ལ་སོགས་པ་གསུངས་པ་ཡིན་ནོ། །དེ་དག་བྱུང་ནས་ཐམས་ཅད་དང་ལྡན་པའི་འཇིག་རྟེན་གྱི་ཁམས་རྣམས་སུ་སྒྲ་མངོན་པར་གོ་བར་མཛད་ཅིང་ཆེད་དུ་གླེང་པ་འདི་གླེང་ངོ་ཞེས་པ་ནི་གོང་དུ་བཅོམ་ལྡན་འདས་ཀྱིས་སངས་རྒྱས་ཀྱི་ཞིང་ལག་མཐིལ་བཞིན་དུ་མཉམ་པ་ལ་སོགས་པར་དངོས་སུ་སྣང་བ་དེར་རྟོགས་པའི་ཆོས་རྣམས་བསྟན་པ་དེ་ཉིད་རྣམ་གྲངས་ཀྱིས་འོག་ནས་བྱུང་བའི་ཚིགས་སུ་བཅད་པ་རྣམས་ཀྱིས་བསྟན་པ་སྟེ། དེ་ཡང༌། ཨེ་མ་ཧོ་སངས་རྒྱས་ཐམས་ཅད་ཀྱི། །ཞེས་པ་ནས། གང་བརྙེས་རྙེད་པ་ཐོབ་པར་འགྱུར། །ཞེས་པའི་བར་གྱིས་སོ། །དེ་ལ་ཨེ་མ་ཧོ་ཞེས་པ་ནི་ངོ་མཚར་དུ་གྱུར་པའོ། །སངས་རྒྱས་ཐམས་ཅད་ཀྱི། ཤེས་རབ་ཐབས་ནི་བསམ་མི་ཁྱབ། །ཅེས་སྦྱར་ཏེ། ཤེས་རབ་ནི་ཆོས་ཐམས་ཅད་བདག་མེད་པར་རྟོག་པའི་རང་བཞིན་ཡིན་ལ། ཐབས་ནི་དེ་ལྟར་ཆོས་ཐམས་ཅད་སྟོང་པར་རྟོགས་ཀྱང་སེམས་ཅན་གྱི་དོན་དུ་དངོས་པོ་རྣམ་པ་སྣ་ཚོགས་ཡོད་པར་སྟོན་པ་སྟེ། དེ་དག་ངོ་མཚར་ཆེ་སྟེ་བསམ་གྱིས་མི་ཁྱབ་པའོ། །ཚིག་དེ་དག་ཉིད་དགྲོལ་བའི་ཕྱིར། །གནས་མེད་པ་ནི་རྟོགས་གྱུར་ནས། །གནས་དང་བཅས་པའི་ཆོས་ཀྱང་འཆད། །ཅེས་པ་ལ་སོགས་པ་གསུངས་ཏེ། ཤེས་རབ་ཀྱིས་ཆོས་ཐམས་ཅད་གཟུང་བ་དང་འཛིན་པའི་གནས་མེད་པ་སྟོང་པ་ཉིད་དུ་ཤེས་ནས་ཤེས་པའོ། །གནས་དང་བཅས་པའི་ཆོས་ཀྱང་འཆད། །ཅེས་པ་ནི་དེ་ལྟར་ཤེས་རབ་ཀྱིས་ཆོས་ཐམས་ཅད་དངོས་པོ་མེད་པར་རྟོགས་ཀྱང་ཐབས་ཀྱིས་སེམས་ཅན་རྣམས་ལ་ཕན་གདགས་པའི་ཕྱིར། གཟུང་བ་དང་འཛིན་པའི་གནས་ལ་སོགས་པའི་ཆོས་རྣམས་དངོས་པོ་ཡོད་པར་སྣང་བ་དངོས་སུ་སྟོན་ཞེས་པའོ། །གང་དག་གིས་ནི་ཆོས་རྣམས་ཀྱི། །ཆོས་ཀྱི་མཚན་ཉིད་རྙེད་པ་དང༌། །ཤེས་པ་ཞེས་པ་ནི་ཕུང་པོ་དང་ཁམས་དང་སྐྱེ་མཆེད་ལ་སོགས་པའི་ཆོས་རྣམས་ཀྱི་མཚན་ཉིད་གང་དག་གིས་མི་དམིགས་པར་ཤེས་པ་ཞེས་པའོ། །དེས་ནི་འདྲེན་ཀུན་གྱིས། །གང་བརྙེས་རྙེད་པ་ཐོབ་པར་འགྱུར། །ཞེས་པ་ནི་དེ་ལྟར་ཆོས་རྣམས་དམིགས་སུ་མེད་པར་གང་གིས་ཤེས་པ་དེས་འདྲེན་པ་སངས་རྒྱས་བཅོམ་ལྡན་འདས་ཀྱི་འབྲས་བུ་ཐོབ་པར་
འགྱུར་རོ་ཞེས་པ་སྟེ། མདོར་ན་ཆོས་རྣམས་སྟོང་པ་ཉིད་དུ་རྟོགས་པ་དེ་སངས་རྒྱས་སུ་འགྱུར་རོ་ཞེས་བསྟན་པ་ཡིན་ནོ། །དེ་དག་གི་ཆེད་དུ་གླེང་བདེ་ཁྱེད་དུ་གླེངས་ནས་དེ་དག་སླར་ཡང་དེ་བཞིན་གཤེགས་པའི་ཆོས་ཀྱི་སྐུ་བསམ་གྱིས་མི་ཁྱབ་པ་ལ་ཞུགས་སོ་ཞེས་པ་ནི་དེ་ལྟར་ཆོས་ཀྱི་དབྱིངས་སྟོང་པ་ཉིད་ཀྱི་རང་བཞིན་དུ་མི་སྣང་བར་གྱུར་པའོ། །དེ་ལྟར་གསང་བའི་དཀྱིལ་འཁོར་བྲི་བའི་ཐབས་བཅོམ་ལྡན་འདས་ཀྱིས་རང་བཞིན་གྱི་དཀྱིལ་འཁོར་སྔར་བསྟན་ནས། ད་ནི་གསང་བའི་དཀྱིལ་འཁོར་ཉིད་བྲི་བའི་ཐབས་བཤད་དེ་དེ་ཡང༌། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་བཀའ་སྩལ་པ། རིགས་ཀྱི་བུ་ནང་གི་དཀྱིལ་འཁོར་ཉོན་ཅིག་ཅེས་པ་ལ་སོགས་པས་སོ། །འདི་ཡང་སློབ་མ་ལྷག་པར་གནས་པ་དེ་ཉིད་ཀྱི་ནུབ་མོ་བྱ་བར་ཤེས་པར་བྱ་སྟེ། དེའི་རིམ་པ་ཡང་དེ་ལ་ཐོག་མར་སློབ་དཔོན་གྱིས་མཆོད་པའི་ཡོ་བྱད་འདི་དག་ལ་སོགས་པའི་དངོས་པོ་གཞུང་ལས་འབྱུང་བ་བཞིན་དུ་སྟ་གོན་བྱས་ནས་སློབ་མ་རྣམས་ཀྱང་བསགས་ཏེ་ཕྱི་རོལ་དུ་བཀོད་ལ། དེ་ནས་སློབ་དཔོན་དེ་དཀྱིལ་འཁོར་གྱི་ཁང་བའི་ནང་དུ་ཞུགས་ཏེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་བྱས་ནས་དམ་ཚིག་གི་ཕྱག་རྒྱ་བཅིངས་ཏེ་སྙིང་རྗེ་ཆེན་པོའི་དཀྱིལ་འཁོར་དུ་བསྟན་པ་བཞིན་དུ་མདུན་དུ་རང་བཞིན་གྱི་དཀྱིལ་འཁོར་སོ་སོའི་སྔགས་འབྲུ་རེའམ། །སྤྱིའི་སྙིང་པོས་དེར་བསམས་ཏེ། དེ་ནས་བདག་ཉིད་ཆོས་ཉིད་ཆོས་ཀྱི་དབྱིངས་ཀྱི་ཕྱག་རྒྱ་དང་སྔགས་ཀྱིས་བྱིན་གྱིས་བརླབས་པ་དང་ཆོས་ཀྱི་འཁོར་ལོ་བསྐོར་བའི་སྔགས་དང་ཕྱག་རྒྱས་རྡོ་རྗེ་སེམས་དཔར་བྱིན་གྱིས་བརླབས་པ་དང༌། རྡོ་རྗེ་གོ་ཆའི་ཕྱག་རྒྱ་དང་བསྲུང་བར་བྱ་སྟེ། དེ་ནས་ལས་ཀྱི་རྡོ་རྗེར་བསྒྱུར་ནས་ལྷ་རྣམས་ལ་དམ་ཚིག་གི་ཕྱག་རྒྱ་བསྟན་ཏེ་མཆོད་ཡོན་ཕུལ་ནས་དྲི་དང་མེ་ཏོག་ལ་སོགས་པའི་མཆོད་པ་རྣམས་ཀྱང་སོ་སོར་སྔགས་ཀྱིས་བཏབ་སྟེ་དབུལ་བ་དང་ཡིད་ཀྱི་མཆོད་པ་ཡང་བྱའོ། །དེ་ལྟར་ཕྱི་ནང་གི་མཆོད་པ་ལ་སོགས་པ་བྱས་ནས་སློབ་དཔོན་དེ་ཕྱིར་བྱུང་ལ་སློབ་མ་རྣམས་ལ་དྲི་དང་མེ་ཏོག་བྱིན་ཏེ་ལས་ཐམས་ཅད་པའི་སྔགས་ཀྱིས་བསྲུང་བ་དང༌། ལས་ཐམས་ཅད་
པའི་སྔགས་ཀྱིས་བཏབ་པའི་སྐུད་པ་དཔུང་པར་བཅིང་བ་དང་སོ་ཤིང་སྦྱིན་པ་རྣམས་བྱས་ནས། དེ་ནས་སྡིག་པ་བཤགས་པ་དང་ལུས་དབུལ་བ་དང་སྡོམ་པ་འཛིན་དུ་གཞུག་སྟེ། དེ་དག་ནི་ལྷག་པར་གནས་པའི་ཆོ་གའོ། །དཀྱིལ་འཁོར་དུ་གཞུག་པའི་ཆོ་ག་ཡང་སྒྲུབ་པའི་གྲོགས་པོ་གཞན་ཡོད་ན་ངེས་རིམ་པ་བཞིན་དུ་བྱ་ལ། མེད་ན་སློབ་དཔོན་ཉིད་ཀྱིས་དེ་ཉིད་དུ་སློབ་མ་དམ་ཚིག་གི་ཕྱག་རྒྱ་འཆིང་དུ་གཞུག་པ་དང་ཆོས་ཀྱི་དབྱིངས་ཀྱི་ཕྱག་རྒྱ་དང་སྔགས་ཀྱིས་བྱིན་གྱིས་བརླབ་པ་དང༌། ཆོས་ཀྱི་འཁོར་ལོ་ཕྱག་རྒྱ་དང་སྔགས་ཀྱིས་བྱིན་གྱིས་བརླབ་པ་དང༌། བྱང་ཆུབ་ཏུ་སེམས་བསྐྱེད་པ་ལ་སོགས་པ་རིམ་པ་བཞིན་དུ་བྱ་སྟེ། དེ་ནས་སློབ་དཔོན་དེ་ལྟར་མཆོད་པའི་གནས་སུ་ཞུགས་ཏེ། སེམས་མཉམ་པར་བཞག་ལ་སྙིང་གར་ཟླ་བའི་དཀྱིལ་འཁོར་གྱི་སྟེང་དུ་ཡི་གེར་ཁ་དོག་དཀར་པོ་ཡིད་ཙམ་རྩ་དམར་བ་བསམས་ཏེ། ཡི་གེ་དེའི་སྒྲའི་དེ་ཁོ་ན་ཉིད་ཆོས་ཐམས་ཅད་རྡུལ་དང་བྲལ་བ་བསྒོམ་པ་ནི་བདག་གི་ལུས་ཉིད་རྡུལ་ཕྲ་རབ་ལ་སོགས་པའི་རིམ་པས་བཤིག་སྟེ་རྡུལ་ཕྲན་དེ་ཡང་ཕྱོགས་ཆ་དང་བྲལ་བས་དམིགས་སུ་མེད་ལ། དེ་བཞིན་དུ་རྣམ་པར་ཤེས་པ་ལ་སོགས་པ་ཡང་དངོས་པོ་མེད་པར་བསྒོམས་ཏེ། ཟླ་བའི་དཀྱིལ་འཁོར་དང་ཡི་གེར་དང་སྟོང་པར་བསམ་ཞིང་ཐ་མ་སྒྲའི་དེ་ཁོ་ན་ཉིད་དེ་ཡང་དམིགས་སུ་མེད་པར་བསྒོམས་ཏེ་སྟོང་པ་ཉིད་ལ་ཇི་སྲིད་འདོད་པར་གནས་སོ། །དེའི་འོག་ཏུ་ཐོག་མར་རླུང་གི་དཀྱིལ་འཁོར་དང༌། དེ་ནས་ཆུའི་དཀྱིལ་འཁོར་དང༌། དེ་ནས་གསེར་གྱི་དཀྱིལ་འཁོར་བསམ་ཞིང་གསེར་གྱི་དཀྱིལ་འཁོར་དེའི་སྟེང་དུ་བདག་གི་ལུས་ལྟེ་བའི་འོག་མན་ཆད་ཀྱང་གསེར་གྱི་དཀྱིལ་འཁོར་གྲུ་བཞི་བར་བསམས་ཏེ་དེའི་སྟེང་དུ་པདྨོ་རྩ་བ་དང་བཅས་པ་སྙིང་གའི་བར་དུ་ཕྱིན་པར་བསམས་ལ། དེའི་དབུས་ན་བཅོམ་ལྡན་འདས་རྣམ་པར་སྣང་མཛད་བཞུགས་ཏེ། དེའི་ཤར་ཕྱོགས་ཀྱི་པདྨོའི་འདབ་མ་ལ་དེ་བཞིན་གཤེགས་པ་རིན་པོ་ཆེའི་ཏོག་གོ །ལྷོ་ཕྱོགས་ཀྱི་འདབ་མ་ལ་དེ་བཞིན་གཤེགས་པ་མེ་ཏོག་ཀུན་དུ་རྒྱས་པའི་རྒྱལ་པོའི་དབང་པོའོ། །བྱང་ཕྱོགས་
ཀྱི་འདབ་མ་ལ་དེ་བཞིན་གཤེགས་པ་རྔ་དབྱངས་ཅན་ནོ། །ནུབ་ཕྱོགས་ཀྱི་འདབ་མ་ལ་དེ་བཞིན་གཤེགས་པ་འོད་དཔག་ཏུ་མེད་པའོ། །ཤར་ལྷོའི་འདབ་མ་ལ་བྱང་ཆུབ་སེམས་དཔའ་ཀུན་དུ་བཟང་པོའོ། །བྱང་ཤར་གྱི་འདབ་མ་ལ་སྤྱན་རས་གཟིགས་ཀྱི་དབང་པོའོ། །ལྷོ་ནུབ་ཀྱི་འདབ་མ་ལ་འཇམ་དཔལ་གཞོན་ནུར་གྱུར་པའོ། །ནུབ་བྱང་གི་འདབ་མ་བྱང་ཆུབ་སེམས་དཔའ་བྱམས་པ་བསམས་ཏེ་བཅོམ་ལྡན་འདས་རྣམ་པར་སྣང་མཛད་ལ་སོགས་པ་དང་བྱང་ཆུབ་སེམས་དཔའ་དེ་རྣམས་ཀྱང་མེ་ཏོག་དོར་བ་ལ་བདེ་བའི་ཕྱིར་དེ་རྣམས་ཀུན་གྱི་སྐུ་བདག་གི་ཀླད་པའི་བར་དུ་ཕྱིན་པར་བསམ་ཞིང་པདྨོའི་གེ་སར་ཀུན་ལ་བྱང་ཆུབ་སེམས་དཔའ་རྣམས་ཀྱི་ཡུམ་རྣམས་དང་ས་བཅུ་དང་ཕ་རོལ་ཏུ་ཕྱི་པ་དྲུག་ཏིང་ངེ་འཛིན་རྣམས་ལྷ་མོའི་གཟུགས་སུ་བསམ་མོ། །པདྨོའི་རྩ་བ་ལ་བྱང་ཆུབ་སེམས་དཔའ་ཕྱག་ན་རྡོ་རྗེ་བསམ་ཞིང་དེའི་དྲུང་དང་གཡས་དང་གཡོན་དག་ཏུ་སྤྱན་རས་གཟིགས་ཀྱི་དབང་པོའི་འཁོར་རྣམས་དང་ཕྱག་ན་རྡོ་རྗེའི་རིག་པ་དང་ཁོར་བོ་རྣམས་དང་སྒོ་སྐྱོང་དང་ཁྲོ་གཉེར་ལ་སོགས་པ་རིམ་པ་བཞིན་དུ་བསམ་མོ། །དེའི་ཕྱི་རིམ་དུ་ལྷ་དང་ཀླུ་ལ་སོགས་པ་མང་པོ་རྣམས་བསམས་ཏེ་དེ་ལྟར་བརྟན་པར་བྱས་ནས་ཡིད་ཀྱི་མཆོད་པ་ཚུལ་བཞིན་དུ་བྱའོ། །དེ་ནས་དེ་དག་ཐམས་ཅད་ཟིན་པ་དང་སེ་གོལ་བརྡབ་པས་བརྡ་བྱས་ཏེ་སློབ་མ་རྣམས་མགོ་བོ་ལ་མེ་ཏོག་འདོར་དུ་གཞུག་གོ །མེ་ཏོག་དེ་དང་ཀྱང་ཡིད་ལ་བསམ་པའི་ལྷ་གང་གི་སྟེང་དུ་བབས་པ་སྟེ། སློབ་མ་དེ་ལ་སྦྱིན་པར་བྱ་སྟེ། དེ་དག་ནི་བསྡུས་པའི་དོན་ཏོ། །ཚིག་གི་དོན་ནི་གསང་བ་པའི་བདག་པོ་ལུས་ཀྱིས་གཞི་གང་ཡིན་པ་དེ་ཆོས་ཀྱི་དབྱིངས་ཀྱི་རང་བཞིན་གྱི་སྔགས་དང་ཕྱག་རྒྱའི་རང་བཞིན་གྱི་བྱིན་གྱི་རླབས་ཀྱིས་བྱིན་དུ་བརླབ་པར་བྱ་སྟེ། རང་བཞིན་གྱིས་རྣམ་པར་དག་པའི་ཕྱིར་རོ་ཞེས་པ་ནི་མཆོད་པ་ལ་སོགས་པ་སྔར་སྨོས་པ་རྣམས་རིམ་པ་བཞིན་དུ་བྱས་ནས་བདག་གི་ལུས་ཆོས་ཀྱི་དབྱིངས་ཀྱི་ཕྱག་རྒྱ་དང་སྔགས་ཀྱིས་བྱིན་གྱིས་བརླབས་ཏེ། སྟོང་པ་ཉིད་དུ་བྱོས་ཤིག་ཅེས་པའོ། །དེ་ནས་བདག་ལས་ཀྱི་རྡོ་རྗེ་སེམས་དཔར་བྱིན་གྱིས་བརླབས་ཏེ་ཞེས་པ་ནི་སྔ་མའི་རིམ་པ་བཞིན་དུ་ཆོས་ཀྱི་
འཁོར་ལོའི་ཕྱག་རྒྱས་བྱིན་གྱིས་བརླབས་ནས་ལས་ཀྱི་རྡོ་རྗེ་སེམས་དཔར་བསྒྱུར་ཏེ་མཆོད་པ་དང་སློབ་མའི་ཆོ་ག་བྱ་བ་ལ་སོགས་པ་ཐམས་ཅད་གོང་དུ་སྨོས་པའི་རིམ་པ་བཞིན་དུ་བྱའོ། །རྡུལ་ཐམས་ཅད་དང་བྲལ་བ་ཞེས་པ་ནི་དེ་ནས་སླར་བདག་ཉིད་ནང་དུ་ཞུགས་ནས་སྙིང་གར་ཡི་གེར་བསམས་ཏེ་ཆོས་ཐམས་ཅད་རྡུལ་དང་བྲལ་བར་བསྒོམ་པའི་རིམ་པ་ཡང་སྔ་མ་བཞིན་དུ་བྱའོ། །བདག་དང་སེམས་ཅན་དང་སྲོག་དང་འགྲོ་བ་དང་ཤེད་ཅན་དང་ཤེད་ལས་སྐྱེས་པ་དང༌། བྱེད་པ་པོ་ལ་སོགས་པའི་ཟུག་རྔུའི་སྐྱོན་དང་བྲལ་ལ་ཞེས་པ་ནི་མུ་སྟེགས་ཅན་གཞན་རྣམས་ཀྱིས་བདག་ལ་སོགས་པའི་དངོས་པོ་དེ་རྣམས་ཀྱང་དམིགས་སུ་མེད་པར་བསྒོམས་ཞེས་པ་སྟེ། དེ་དག་ནི་ཇི་ལྟར་རྡོ་ཤིང་ལ་སོགས་པའི་ཟུག་རྡུ་དང་ཉེས་པ་བསལ་བས་ཕྱི་རོལ་གྱི་སྦྱང་བ་བཞིན་དུ་ནང་གིས་སྦྱང་བ་ཡང་ཐབས་འདི་ལྟ་བུས་སྦྱོང་ངོ་ཞེས་བཤད་པའོ། །གྲུ་བཞི་ལ་སྒོ་བཞི་དང་ལྡན་པ་ནུབ་ཕྱོགས་ཀྱི་སྒོ་རྟག་ཏུ་ཕྱེ་བ་སྒོ་ཁྱུད་དང་སྟེགས་བུས་བརྒྱན་པ་ཞེས་པ་ནི་དེ་ལྟར་སྟོང་པ་ཉིད་ལ་སོགས་པའི་ཏིང་ངེ་འཛིན་བྱས་ལ་དེ་ནས་རླུང་དང་ཆུའི་དཀྱིལ་འཁོར་ལ་སོགས་པ་སྔ་མ་བཞིན་དུ་བསམས་ཏེ། དེའི་སྟེང་དུ་དབང་ཆེན་གྱི་དཀྱིལ་འཁོར་དེའི་སྟེང་དུ་བདག་གི་རྐེད་པ་མན་ཆད་གསེར་གྱི་དཀྱིལ་འཁོར་གྲུ་བཞི་པར་གྱུར་པར་བསམས་ཏེ། སྟེགས་བུ་ཞེས་པ་ནི་དབུས་ཀྱི་གཞིའི་གདན་དེ་ཉིད་ལ་བྱ་ལ་དེ་ཡང་གསེར་གྱི་ཁ་དོག་ཏུ་བསམ་མོ། །དབུས་ན་པདྨའི་རྒྱལ་པོ་ཆེན་པོ་ཡིད་ལས་བྱུང་བ་འདབ་མ་བརྒྱད་པ་སྡོང་བུ་དང་བཅས་པ་ཟེ་བརྒྱས་ཤིང་ཤིན་ཏུ་མཛེས་པར་བྱུང་བ་ཞེས་པ་ལ་ཡིད་ལས་བྱུང་བ་ཞེས་པ་ནི་པདྨོ་སྟེ་སྔར་བཤད་ཟིན་ཏོ། །ཤིན་ཏུ་མཛེས་པར་བྱུང་བ་ཞེས་པ་ནི་འདབ་མ་བརྒྱད་ལ་སངས་རྒྱས་བཞི་དང་བྱང་ཆུབ་སེམས་དཔའ་བཞི་རྣམས་ཀྱི་སྐུ་མདོག་ཅི་འདྲ་བ་དང་མཐུན་པར་ཁ་དོག་སྣ་ཚོགས་སུ་བྱ་སྟེ། རིན་པོ་ཆེའི་ཏོག་གི་ཁ་དོག་དཀར་པོ། །མེ་ཏོག་ཀུན་དུ་རྒྱས་པའི་རྒྱལ་པོའི་དབང་པོའི་ཁ་དོག་སེར་པོ། །རྔ་དབྱངས་ཅན་གྱི་ཁ་དོག་སྨུག་ནག །འོད་དཔག་ཏུ་མེད་པའི་ཁ་དོག་དམར་པོ། །དེ་
བཞིན་དུ་ཀུན་དུ་བཟང་པོ་ནི་སེར་པོ། །སྤྱན་རས་གཟིགས་ཀྱི་དབང་པོ་ནི་དཀར་པོ། །འཇམ་དཔལ་གཞོན་ནུར་གྱུར་ཕ་ནི་སེར་པོ། །བྱམས་པ་ནི་དམར་པོར་བྱའོ། །ཡང་ན་ཐམས་ཅད་ཀྱང་ཁོ་དག་ཐམས་ཅད་དོ་ཞེས་པ་དང་སྦྱར་ཏེ་ཆད་པ་མེད་པར་ཤེས་པར་བྱའོ། །དེའི་དབུས་ན་ཡང་དེ་བཞིན་གཤེགས་པ་སྐུ་དང་གསུང་དང་ཐུགས་འཇིག་རྟེན་ཐམས་ཅད་ལས་འདས་པ་ཞེས་པ་ནི་བཅོམ་ལྡན་འདས་རྣམ་པར་སྣང་མཛད་ཀྱི་སྐུ་པདྨའི་དབུས་སུ་བསམས་པ་དེ་མཆོག་ཏུ་བཟང་བ་འཇིག་རྟེན་ཐམས་ཅད་ལས་འདས་པ་ཞེས་བྱའོ། །སེམས་ཀྱི་ས་ལས་ཡང་དག་པར་འདས་པ་ཞེས་པ་ནི་སེམས་ཀྱི་ཡུལ་དུ་གྱུར་པའི་གཟུང་བ་དང་འཛིན་པའི་ཆ་སྤངས་ཞེས་པའོ། །སེམས་ཀྱི་རྗེས་སུ་ཐོབ་པ་ཞེས་པའི་སྟོང་པ་ཉིད་ཀྱི་མཚན་ཉིད་དེ་སོ་སོར་རང་གིས་རིག་པ་ཐོབ་པ་ཞེས་པའོ། །དེ་དག་གིས་ནི་རང་གི་དོན་དུ་ཕུན་སུམ་ཚོགས་པ་བསྟན་ཏོ། །འདོད་པའི་འབྲས་བུ་ཁྱད་པར་ཅན་སྩོལ་བ་ཞེས་པས་ནི་གཞན་གྱི་ཕུན་སུམ་ཚོགས་པ་བསྟན་ཏེ་སེམས་ཅན་རྣམས་ལ་མཐོ་རིས་དང་མྱ་ངན་ལས་འདས་པའི་འབྲས་བུ་རྣམས་སྦྱིན་ནོ་ཞེས་པའོ། །དེའི་ཤར་ཕྱོགས་སུ་ཞེས་པ་ནས་སྡོང་བུ་ནི་ཕྱག་ན་རྡོ་རྗེའོ་ཞེས་པའི་བར་ནི་སངས་རྒྱས་དང་བྱང་ཆུབ་སེམས་དཔའ་རྣམས་པདྨའི་འདབ་མ་དང་གེ་སར་དག་ལ་སྔར་སྨོས་པའི་རིམ་པ་བཞིན་དུ་བསམ་པར་བྱའོ། །ལྷག་མ་ནི་རྒྱ་མཚོ་ཆེན་པོའོ་ཞེས་པ་ནི་དཀྱིལ་འཁོར་དེའི་འོག་ཏུ་ཆུའི་དཀྱིལ་འཁོར་རྒྱ་མཚོ་བསམ་ཞེས་པའོ། །མར་མེ་མེ་ཏོག་བདུག་སྤོས་དང༌། །བཤོས་དང་བདུག་པ་ཡིད་ལས་བྱུང༌། །ལུས་ཅན་རྣམས་ཀྱི་དམ་ཚིག་ཕྱིར། །ཐམས་ཅད་སྔགས་པས་བསམ་པར་བྱ། །ཞེས་པ་ནི་དྲི་དང་མེ་ཏོག་ལ་སོགས་པ་དེ་དག་ཐམས་ཅད་སྔགས་པས་ཡིད་ཀྱིས་བསམ་ཞེས་པའོ། །ལུས་ཅན་རྣམས་ཀྱི་དམ་ཚིག་ཕྱིར། །ཞེས་པ་ནི་དཀྱིལ་འཁོར་ཏེ། སེམས་ཅན་རྣམས་དམ་ཚིག་ལ་གཞུག་པའི་ཕྱིར་གཟུགས་བརྙན་གྱི་དཀྱིལ་འཁོར་རྣམས་རྒྱས་པར་བྲི་མི་ནུས་ཤིང་ཟབ་ཅིང་རྒྱ་ཆེ་བ་ལ་མོས་པ་དཀྱིལ་འཁོར་འདི་བྱའོ་ཞེས་པའོ། །འོག་གིས་གཞི་ཐམས་ཅད་ལ། །ལྷ་ལ་སོགས་པ་གྲངས་མེད་པའང༌།།
བདག་ཉིད་ཆེན་པོའི་དཀྱིལ་འཁོར་འདིར། །སྔགས་པས་ནན་ཏན་བསྐྱེད་དེ་བྲི། །ཞེས་པ་ནི་བཅོམ་ལྡན་འདས་བདག་ཉིད་ཆེན་པོའི་དཀྱིལ་འཁོར་འདིར་དབུས་ཀྱི་སྟེགས་བུའི་འོག་གི་ཕྱི་རིམ་གྱིས་གཞི་ཐམས་ཅད་དུ་ལྷ་དང་ཀླུ་ལ་སོགས་པ་གྲངས་མེད་པ་ཞེས་པའོ། །རང་གི་ལས་ནི་བདག་ཉིད་ཀྱིས། །ར་ཞེས་བྱ་བས་རྣམ་སྦྱངས་ནས། །སྔགས་པ་རྣལ་འབྱོར་སྟན་ལ་འདུག །དེ་བཞིན་གཤེགས་པ་རྗེས་དྲན་ཞིང༌། །ཞེས་པ་ནི་རྣལ་འབྱོར་པ་དེ་རྣམས་ཀྱི་བྱ་བ་ཡང་བདག་ཉིད་ཡི་གེ་རེ་སྟོང་པ་ཉིད་དུ་སྦྱང་བ་ལ་སོགས་པ་གོང་དུ་སྨོས་པའི་ཚུལ་བཞིན་དུ་བྱས་ནས་གདོད་ལས་འདི་རྣམས་བྱ་ཞེས་པའོ། །སློབ་མ་རྣམས་ཀྱི་སྤྱི་བོར་ནི། །གླད་ཀོར་བཅས་པའི་ཨ་གཞག་སྟེ། །ཞེས་པ་ནི་སློབ་མ་དཀྱིལ་འཁོར་དུ་འཇུག་པའི་ཚེ་ཆོས་ཀྱི་དབྱིངས་སུ་བྱིན་གྱིས་བརླབ་པ་ལ་སོགས་པ་བྱས་ནས་དེ་དག་བརྟན་པར་བྱ་བའི་ཕྱིར། ཀུན་དུ་སངས་རྒྱས་པའི་སྙིང་པོ་ཨཾ་སྤྱི་བོར་བསམ་ཞེས་པའོ། །འཇིགས་པ་མེད་པའི་བདག་ལུས་ལ། །ཞེས་པ་ནས། ཡང་ན་དེ་ལ་རིག་སྔགས་སྦྱིན། །ཞེས་པའི་བར་ནི་བདག་གིས་ལུས་ལ་མེ་ཏོག་དོར་ནས་གང་ལ་བབ་པའི་རིག་པ་དེ་སློབ་མ་རྣམས་ལ་སྦྱིན་པའོ། །བརྟགས་ནས་དེ་ལ་བསྟན་པར་བྱ། །ཞེས་པ་ནི་དཀྱིལ་འཁོར་གྱི་ཚུལ་རྣམས་སློབ་མ་ལ་བསྟན་པའོ། །ལུས་ཅན་རྣམས་ཀྱི་དམ་ཚིག་ནི། །ཞེས་པ་ནི་དཀྱིལ་འཁོར་འདིའི་དམ་ཚིག་ཅན་དུ་བྱ་བའི་ཕྱིར་རོ་ཞེས་སྔར་བཤད་པ་བཞིན་ནོ། །འདི་ནི་དཀྱིལ་འཁོར་གཙོ་བོར་འདོད། །ཅེས་པ་ནི་སྟོང་པ་ཉིད་ཀྱི་ཏིང་ངེ་འཛིན་བསྒོམས་པ་ལས་བྱུང་ཞིང་ཕྱི་རོལ་གྱི་མཚན་མ་རྣམས་སུ་མི་གཏོགས་པས་གཙོ་བོ་ཞེས་བྱའོ། །གསང་བའི་དཀྱིལ་འཁོར་དུ་གཟུང་བ་ལ་འཇུག་པ་ལ་ཞེས་པ་ནི་ཐོག་མར་གོང་མའི་ནང་དུ་བཤད་ཟིན་ཏོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། གསང་བའི་དཀྱིལ་འཁོར་དུ་གཟུང་བ་ལ་འཇུག་པ་རིམ་པར་ཕྱེ་བ་རྒྱས་པའོ།། །།ད་ནི་རིག་སྔགས་ཀྱི་བརྟུལ་ཞུགས་རིམ་པར་ཕྱེ་བ་འཆད་དེ། རིག་པ་ཞེས་བྱ་བ་ནི་ཡང་དག་པའི་དོན་ཇི་ལྟ་བ་བཞིན་དུ་རིག་པས་ན་དེ་བཞིན་
ཉིད་ཀྱི་ཡེ་ཤེས་དང་དེ་ལས་བྱུང་བའི་སྔགས་དང་ཕྱག་རྒྱ་ལ་ཡང་བྱ་ལ། དེའི་དཀའ་ཐུབ་ནི་དེ་དང་རྗེས་སུ་མཐུན་པའི་སྤྱོད་པ་སྟེ་ཇི་ལྟར་བཅོམ་ལྡན་འདས་ཤཱཀྱ་ཐུབ་པ་དང་སྤྱོད་པ་སྐྲ་དང་ཁ་སྤུ་བྲེགས་པ་དང་ཆོས་གོས་བགོ་བ་ལ་སོགས་པ་དགེ་སློང་གི་གཟུགས་སུ་སྤྱོད་པ་དང༌། འཇིག་རྟེན་པ་རྣམས་ཀྱི་ཡང་ལྷ་ཆེན་པོ་ལ་སོགས་པ་ལ་དད་པའི་སྤྱོད་པ་དང་ཚུལ་འཇིག་རྟེན་ན་ཡོད་པ་ཇི་ལྟ་བ་བཞིན་དུ་རིག་པའི་བརྟུལ་ཞུགས་འདི་ཡང་བདག་ཉིད་ཀྱི་ལྷའི་གཟུགས་ཅི་འདྲ་བ་དང་རྗེས་སུ་མཐུན་པར་སྤྱོད་པ་དང༌། སྟོང་པ་ཉིད་ཀྱི་རང་བཞིན་གྱི་ཏིང་ངེ་འཛིན་དང་རྗེས་སུ་མཐུན་པར་སྤྱོད་པ་དང༌། ཏིང་ངེ་འཛིན་ལས་ལངས་ནས་ཀྱང་ཆོས་ཐམས་ཅད་སྒྱུ་མ་ལྟ་བུའི་རང་བཞིན་དུ་རྟོགས་པ་དང་རྗེས་སུ་མཐུན་པར་སྤྱོད་པ་དང༌། དེའི་སྔགས་ཟློས་པར་བྱེད་པ་རྣམས་ཏེ་ཡན་ལག་དེ་བཞིན་དང་ལྡན་པ་ནི་རིག་སྔགས་ཀྱི་བརྟུལ་ཞུགས་ཞེས་བྱའོ། །དེ་ལ་ཁ་ཅིག་ནི་བརྟུལ་ཞུགས་འདི་སྤྱོད་ཅིང་སྔོན་དུ་བསྙེན་པའི་གྲངས་སུམ་འབུམ་ལ་སོགས་པ་གཞུང་ལས་ཇི་སྐད་འབྱུང་བ་བཞིན་དུ་བྱས་ནས་སྒྲུབ་པ་ལ་འཇུག་པར་བྱའོ། །དེ་སྟེ་དེ་བས་ཀྱང་ལྷག་པར་བརྟན་པར་འདོད་པས་དབང་ཆེན་ལ་སོགས་པའི་དཀྱིལ་འཁོར་ལ་གནས་ཤིང་ཟླ་བ་དྲུག་ཏུ་རིག་པའི་བརྟུལ་ཞུགས་སྤྱོད་པར་ཤེས་པར་བྱ་སྟེ། དེ་བས་བརྟུལ་ཞུགས་འདི་ནི་དབང་ཆེན་ལ་སོགས་པ་ལ་གནས་པའི་བརྟུལ་ཞུགས་ཀྱི་རྒྱུ་ལྟ་བུར་བལྟ་བར་བྱ་ལ། རིག་པའི་བརྟུལ་ཞུགས་འདི་ལས་བྱུང་བའི་དབང་ཆེན་ལ་སོགས་པའི་དཀྱིལ་འཁོར་ལ་གནས་པའི་བརྟུལ་ཞུགས་ནི་བརྟུལ་ཞུགས་གོང་མ་འདི་ལས་བྱུང་བར་བལྟ་སྟེ། དེ་བས་ན་བརྟུལ་ཞུགས་འདིས་སྔར་སེམས་ཅན་ཡོངས་སུ་སྦྱངས་ནས་ཕྱིས་བརྟུལ་ཞུགས་འོག་མ་ལ་འཇུག་སྟེ། བརྟུལ་ཞུགས་འོག་མ་སྤྱོད་པ་ན་ཡང་ལྷའི་གཟུགས་སུ་གནས་པ་དང་སྟོང་པ་ཉིད་ཀྱི་ཏིང་ངེ་འཛིན་ལ་གནས་པ་དང༌། ཏིང་ངེ་འཛིན་ལས་ལངས་པའི་ཚེའང་ཆོས་ཐམས་ཅད་སྒྱུ་མ་ལྟ་བུར་རྟོགས་པའི་མ་ཆགས་པར་སྤྱོད་པ་དང་སྔགས་ཟློས་པར་བྱེད་པ་རྣམས་རིམ་པ་བཞིན་དུ་སྤྱད་པར་བྱ་བ་ལ། ལྷག་པ་ནི་དབང་ཆེན་ལ་སོགས་པའི་དཀྱིལ་འཁོར་ལ་གནས་ཤིང་དེའི་རང་
བཞིན་དུ་བྱ་བ་དང་དབང་ཆེན་ལ་སོགས་པ་སོ་སོའི་ཕྱག་རྒྱ་འཆིང་བའོ། །རིག་སྔགས་ཀྱི་བརྟུལ་ཞུགས་དེ་བྲིས་པ་ཡང༌། དེ་ནས་བཅོམ་ལྡན་འདས་རྣམ་པར་སྣང་མཛད་ལ་ཕྱག་ན་རྡོ་རྗེས་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱི་དོན་དུ་ཚིགས་སུ་བཅད་པའི་དབྱངས་ཀྱིས་བརྟུལ་ཞུགས་ཞུས་པ་ཞེས་པ་ལ་སོགས་པ་ཡིན་ཏེ། ཕྱག་ན་རྡོ་རྗེ་རིག་སྔགས་ཀྱི་བརྟུལ་ཞུགས་དྲིས་པ་ཡང་དབང་ཆེན་ལ་སོགས་པའི་དཀྱིལ་འཁོར་ལ་གནས་ཤིང་རིག་སྔགས་ཀྱི་བརྟུལ་ཞུགས་སྤྱོད་པ་དེ་གཙོ་བོར་དྲིས་པར་ཤེས་པར་བྱའོ། །ཚིགས་སུ་བཅད་པའི་དབྱངས་ཀྱིས་དྲིས་པ་ནི་དོན་གོ་དཀའ་ཞིང་ཞེས་པས་དོན་དང་ཚིག་འབྲུ་རྣམས་མི་མཉམ་པར་བྱ་བའི་ཕྱིར་རོ། །གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱི་དོན་དུ་ཞེས་པ་ནི་ཕྱག་ན་རྡོ་རྗེ་རང་ཉིད་དམིགས་མི་མཁྱེན་ནས་དྲི་བ་མ་ཡིན་གྱི། མ་འོངས་པའི་འགྲོ་བས་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ལ་ཕན་གདགས་པའི་ཕྱིར་ཡིན་ནོ་ཞེས་པའོ། །ཇི་ལྟར་བརྟུལ་ཞུགས་སྤྱད་པ་ལགས། །ཞེས་པ་ནས། རྒྱལ་བའི་གཙོ་བོ་དབང་དུ་བཞུགས། །ཞེས་པའི་བར་ནི་ཕྱག་ན་རྡོ་རྗེས་དྲིས་པའི་ཚིག་སྟེ། དེ་ལ། སངས་རྒྱས་རྣམས་ཀྱིས་སྔོན་བསྟན་པ། །ཞེས་པ་ལས་ཇི་ལྟར་སྔོན་གྱིས་བསྟན་ཟིན་ན་དྲི་ཅི་དགོས་ཤེ་ན། བདག་ཉིད་སྔོན་གྱི་སངས་རྒྱས་ཀྱིས་བཤད་པས་དེའི་དོན་འཚལ་མོད་ཀྱི་མ་འོངས་པའི་འགྲོ་བ་རྣམས་ཀྱི་དོན་དུ་བཅོམ་ལྡན་འདས་ཀྱིས་མངོན་སུམ་དུ་བསྟན་ཅིང་བཤད་ན་དེ་རྣམས་ཡིད་ཆེས་པར་འགྱུར་བ་དང་བཅོམ་ལྡན་འདས་ཉིད་དབང་དུ་བགྱིས་པའི་ཕྱིར་ཞེས་པ་སྟེ། དེ་བས་ན། མ་འོངས་འགྲོ་བའི་དོན་གྱི་ཕྱིར། །ཞེས་དང༌། རྒྱལ་བའི་གཙོ་བོ་དབང་དུ་བཞུགས། །ཞེས་གསུངས་པ་ཡིན་ནོ། །དྲས་པའི་ཚིག་གཞན་རྣམས་ནི། །འོག་ནས་ལན་ལྡོན་པ་དང་སྦྱར་རོ། །རིག་པའི་བརྟུལ་ཞུགས་ལས་བྱུང་བའི། །བརྟུལ་ཞུགས་སངས་རྒྱས་བཞིན་དུ་གནས། །ཞེས་པ་ལ། རིག་པའི་བརྟུལ་ཞུགས་ལས་བྱུང་བའི། །ཞེས་པ་ནི་སེམས་ཡོངས་སུ་སྤྱོད་པའི་མཚན་ཉིད་
ཡན་ལག་བཞི་དང་ལྡན་པའི་རིག་པའི་བརྟུལ་ཞུགས་དེ་ལས་བྱུང་བ་དབང་ཆེན་ལ་སོགས་པའི་དཀྱིལ་འཁོར་ལ་གནས་ཏེ་སྤྱོད་པ་དེ་བསྟེན་པར་བྱའོ་ཞེས་པ་དང་སྦྱར་རོ། །བརྟུལ་ཞུགས་སངས་རྒྱས་བཞིན་དུ་གནས། །ཞེས་པ་ནི་ཇི་ལྟར་སངས་རྒྱས་བཅོམ་ལྡན་འདས་ཀུན་དུ་སངས་རྒྱས་པ་དོན་དམ་པའི་ཏིང་ངེ་འཛིན་ལ་ཞུགས་པའི་ཕྱིར་ཡང་ཆོས་ཐམས་ཅད་སྟོང་པ་ཉིད་ཀྱི་མཚན་ཉིད་དུ་གཅིག་པར་ཐུགས་སུ་ཆུད་ལ་ཀུན་རྫོབ་ལ་སྤྱོད་པའི་ཚེ་ན་ཡང་ཆོས་རྣམས་སྒྱུ་མ་ལྟ་བུར་མཁྱེན་པས་ཇི་ལྟར་ཡང་མི་ཆགས་པར་སྤྱོད་པ་དེ་བཞིན་དུ་རིག་སྔགས་ཀྱི་བརྟུལ་ཞུགས་ལ་གནས་པ་དེ་ཡང་ཏིང་ངེ་འཛིན་ལ་གནས་པའི་ཚེ་ཆོས་ཐམས་ཅད་སྟོང་པ་ཉིད་ཀྱི་རང་བཞིན་ལ་གནས་པ་དང༌། ཏིང་ངེ་འཛིན་ལས་ལངས་ནས་སྤྱོད་པའི་ཚེ་ན་ཡང་ཆོས་རྣམས་སྒྱུ་མ་ལྟ་བུར་རྟོགས་ཤིང་གང་ལ་ཡང་མི་ཆགས་པར་སྦྱོང་བས་ན་ཀུན་དུ་སངས་རྒྱས་པ་དང་འདྲ་ཞེས་པའོ། །བདག་ཉིད་དེ་ཉིད་བསྐྱེད་ནས་ནི། །ཞེས་པ་ནས། དེའི་ཚེ་བརྟུལ་ཞུགས་སྤྱད་པ་ཡིན། །ཇི་ལྟར་བརྟུལ་ཞུགས་སྤྱོད་པ་ལགས། །བདག་གིས་དེ་ཉིད་བསྐྱེད་ནས་ནི། །ཞེས་པ་བདག་གི་དེ་ཁོ་ན་ཉིད་ཇི་སྐད་བཤད་པ་བཞིན་དུ་བྱས་ནས་ཤེས་བའོ། །རྟག་ཏུ་ཐེ་ཚོམ་མེད་པའི་ཡིད། །ཅེས་པ་ནི་དེ་ལྟར་བདག་གི་དེ་ཁོ་ན་ཉིད་བདག་གི་ལྷ་གང་ཡིན་པའི་གཟུགས་སུ་བསྒྱུར་བའི་ཏིང་ངེ་འཛིན་གྲུབ་པས་ལྷའི་རྣམ་པར་སྣང་བ་རྟོག་པ་བཞིན་མེད་པར་ལྷའི་གཟུགས་ཉིད་ཡིད་ལ་ཐེ་ཚོམ་མེད་པར་སྣད་ན། དེ་ཚེ་བརྟུལ་ཞུགས་སྤྱད་པ་ཡིས། །ཞེས་པ་དང་སྦྱར་རོ། །དེ་བས་ན། གང་ཚེ་རྟག་ཏུ་མཉམ་གཞག་པ། །ཞེས་གསུངས་པ་ཡིན་ཏེ་མདོར་ན་རྟག་ཏུ་སེམས་མཉམ་པ་གཞག་པར་བྱ་སྟེ། ལྷའི་གཟུགས་དེ་ཉིད་ལ་ཡིད་ལ་བརྟན་པོར་སྣང་བ་མ་བྱས་ན་སྔགས་དང་ཕྱག་རྒྱ་སྦྱར་བ་ཙམ་དང་ལྷ་གང་ཡིན་པ་དེ་བདག་གོ་སྙམ་དུ་བསམས་པ་ཙམ་གྱིས་རིག་པའི་བརྟུལ་ཞུགས་སུ་མི་ཆུད་ཅེས་པ་སྟེ། དེ་ནི་རིག་སྔགས་དང་མི་མཐུན་པའི་གཟུགས་སུ་སྤྱོད་པའོ། །བྱང་ཆུབ་སེམས་དང་ཆོས་རྣམས་དང༌། །ཞེས་པ་ནས། ཚུལ་ཁྲིམས་ལྡན་ཞེས་གཞན་མི་བྱ། །ཞེས་པའི་བར་ནི།
ཚུལ་ཁྲིམས་ལ་གནས་ཇི་ལྟ་བུ། །ཞེས་པའི་ལན་ཏེ་འཇུག་པའི་བྱང་ཆུབ་ཀྱི་སེམས་ཆོས་སུན་འབྱིན་པའི་མཚན་ཉིད་རྣམ་པར་རྟོག་པ་དང་བཅས་པའི་ཕུང་པོ་དང་ཁམས་དང་སྐྱེ་མཆེད་ལ་སོགས་པའི་རྣམ་པ་དང་དགེ་བ་བཅུའི་རང་བཞིན་གྱིས་བསླབ་པ་དང༌། འདུས་བྱས་ཀྱི་ལས་དང་འབྲས་བུ་རྣམས་སྟོང་པ་ཉིད་ཀྱི་མཚན་ཉིད་གཅིག་ཏུ་ལྡན་པར་རྟོགས་ན་ཚུལ་ཁྲིམས་དེ་ལས་དང་བྱ་བ་རྣམ་པར་སྤངས་པའི་ཟག་པ་མེད་པའི་ཚུལ་ཁྲིམས་སྟོང་པ་ཉིད་ཀྱི་མཚན་ཉིད་དེ། དེ་བས་ན། ཚུལ་ཁྲིམས་སངས་རྒྱས་བཞིན་ཞེས་བྱ། །ཞེས་གསུངས་པ་ཡིན་ཏེ། ཇི་ལྟར་སངས་རྒྱས་བཅོམ་ལྡན་འདས་ཆོས་ཐམས་ཅད་སྟོང་པ་ཉིད་ཀྱི་རང་བཞིན་དུ་མཚན་ཉིད་གཅིག་པར་ཐུགས་སུ་ཆུད་པ་བཞིན་དུ་ཞེས་པ་སྟེ། དེ་ནི་རིག་སྔགས་དང་རྗེས་སུ་མཐུན་པའི་སྟང་པ་ཉིད་ཀྱི་ཏིང་ངེ་འཛིན་གྱི་སྤྱོད་པའོ། །དེ་ཡང་སྔར་བཞིན་བདག་གི་ལྷའི་གཟུགས་སུ་བསྒྱུར་ནས་དེའི་འོག་ཏུ་རང་གི་སེམས་ཡོངས་སུ་སྤྱད་པའི་ཕྱིར་ལྷའི་གཟུགས་སུ་བསྒྱུར་བ་དེ་ལ་སོ་སོར་མི་གཞིག་པར་ཡིད་ལ་མི་བྱ་བའི་ཚུལ་གྱིས་སྟོང་པ་ཉིད་ཀྱི་ཏིང་ངེ་འཛིན་ལ་གནས་པར་བྱའོ། །ཆོས་རྣམས་ཀུན་ལ་དབང་ཐོབ་ཅིང༌། །ཞེས་པ་ནས། དེ་ནི་མྱུར་དུ་མ་ཆགས་སྤྱོད། །ཅེས་པའི་བར་ནི། གང་ན་ཇི་ལྟར་གནས་ཀྱང་རུང༌། །མ་ཆགས་པར་ནི་ཇི་ལྟར་སྤྱོད། །ཅེས་ཞུགས་པའི་ལན་ཏེ། ཆོས་རྣམས་ཀུན་ལ་དབང་ཐོབ་ཅིང༌། །ཞེས་པ་ནི་ཆོས་ཐམས་ཅད་སྟོང་པའི་རང་བཞིན་དུ་རྟོགས་ཏེ་འདོད་ཆགས་ལ་སོགས་པ་ཉོན་མོངས་པ་རྣམས་ཀྱི་དབང་དུ་མི་འགྲོའོ་ཞེས་པའོ། །སེམས་ཅན་དོན་རྟོགས་ཁོང་དུ་ཆུད། །གསེར་དང་བོང་རྡོ་མཉམ་གྱུར་ན། །དེ་ནི་མྱུར་དུ་མ་ཆགས་སྤྱོད། །ཅེས་པ་ནི་སྟོང་པ་ཡིད་ཀྱི་ཏིང་ངེ་འཛིན་ལས་ལངས་ནས་སེམས་ཅན་གྱི་དོན་དུ་སྦྱིན་པ་ལ་སོགས་པ་ཀུན་རྫོབ་ལ་སྤྱོད་པའི་ཕྱིར་འདུས་བྱས་ཀྱི་ཆོས་རྣམས་སྒྱུ་མ་ལྟ་བུར་རྟོག་ཅིང་དེ་རྣམས་ལ་ཆགས་པ་མི་འབྱུང་བ་ནི་ཇི་ལྟར་རྡོ་བ་དང་བོང་བ་ལ་སོགས་པའི་སེམས་མི་སྐྱེ་བ་བཞིན་དུ་གསེར་ལ་ཡང་ཆགས་པའི་སེམས་མི་སྐྱེ་བ་གང་ན་གནས་ཀྱང་མ་ཆགས་པར་སྤྱོད་པ་ཞེས་བྱ་སྟེ། དེ་ནི་ཀུན་རྫོབ་
ཏུ་ཡང་སྤྱོད་པ་ན་རིགས་སྔགས་དང་རྗེས་སུ་མཐུན་པའི་སྤྱོད་པའོ། །གསང་སྔགས་ཀྱི་གྲངས་དག་ལས་ཀྱང༌། །འབུམ་གྲངས་ཇི་སྙེད་བསྟན་གྱུར་པ། །བརྟུལ་ཞུགས་ཡོངས་སུ་རྫོགས་པར་འགྱུར། །ཞེས་པ་ནི། དུས་ནི་ཇི་སྲིད་ལོན་གྱུར་ན། །བརྟུལ་ཞུགས་ཡོངས་སུ་རྫོགས་པར་འགྱུར། །ཞེས་དྲིས་པའི་ལན་ཏེ། སྔགས་བཟླས་པའི་གྲངས་འབུམ་ལ་སོགས་པ་ཇི་སྙད་གཞུང་ལས་བསྟན་པ་དེ་སྲིད་ཀྱི་བར་དུ་གོང་དུ་བཤད་པའི་ཚུལ་བཞིན་དུ་བརྟུལ་ཞུགས་དེ་སྤྱད་ན་ཡོངས་སུ་རྫོགས་པར་འགྱུར་ཞེས་པ་སྟེ། དེ་ཡང་དབང་ཆེན་ལ་སོགས་པའི་དཀྱིལ་འཁོར་ལ་གནས་པའི་བརྟུལ་ཞུགས་ཀྱི་སྔོན་རོལ་དུ་སེམས་ཡོངས་སུ་སྦྱོང་བའི་མཚན་ཉིད་ཅན་ཡན་ལག་བཞི་དང་ལྡན་པའི་བརྟུལ་ཞུགས་དེ་ལ་བྱའོ། །དབང་ཆེན་གྱིས་ནི་དངོས་པོ་ཡིས། །ཞེས་པ་ནས། ཟླ་བ་གཞན་ལ་བཟླས་བརྗོད་བྱ། །ཞེས་པའི་བར་ནི། གནས་ནི་གང་དུ་བགྱི་བ་ལགས། །ཞེས་དྲིས་པའི་ལན་ཏེ། དབང་ཆེན་ལ་སོགས་པའི་དཀྱིལ་འཁོར་ལ་གནས་ནས་རིག་སྔགས་ཀྱི་བརྟུལ་ཞུགས་སྤྱད་པར་བཤད་པའི་ཕྱིར། དབང་ཆེན་གྱི་དངོས་པོ་ཡིས། །ཞེས་པ་ནས། སྔགས་པས་ཟླ་བ་གཅིག་ཏུ་བཟླས། །ཞེས་པའི་བར་དུ་གསུངས་ཏེ། དེ་ལ་དབང་ཆེན་གྱི་དཀྱིལ་འཁོར་ལ་གནས་ནས་བདག་ཉིད་རང་གི་ལྷའི་གཟུགས་སུ་བསྒྱུར་ཏེ། ཇི་ལྟར་སའི་རང་བཞིན་སྲ་ཞིང་མཁྲང་བ་ལྟར་བདག་གི་ལུས་ཀྱང་དེ་ལྟ་བུ་སེམས་ཀྱི་ཞར་ལ་བསྒོམ་ཞིང་བཟླས་པ་ཟླ་བ་གཅིག་ཏུ་གནས་པར་བྱ་བ་བཤད་དེ། །དབང་ཆེན་གྱི་ནི་དངོས་པོ་ཡིས། །དབང་ཆེན་དཀྱིལ་འཁོར་ལ་གནས་ཏེ། །ཞེས་པ་ནི་དབང་ཆེན་གྱི་སྙིང་པོ་ཆོས་ཐམས་ཅད་གཟོད་མ་ནས་མ་སྐྱེས་པར་སྟོན་པའི་ཨ་ཡིག་གི་སྒྲ་དེ་ཁོ་ན་ཉིད་བསྒོམས་ནས་ཡི་གེ་དེ་ཉིད་ལས་དབང་ཆེན་གྱི་དཀྱིལ་འཁོར་དུ་གྱུར་པར་སྔ་མ་བཞིན་དུ་བསམས་ཏེ། དེའི་སྟེང་དུ་བདག་རང་གིས་ལྷའི་ལུས་སུ་བསྒྱུར་ནས་རྡོ་རྗེའི་ཕྱག་རྒྱས་བཅིངས་ཏེ་དབང་ཆེན་གྱི་རང་བཞིན་ལྟ་བུར་སྲ་ཞིང་བརྟན་པར་བསྒོམ་པར་བྱ་ཞེས་པའོ། །རྡོ་རྗེ་ཅན་གྱི་རྒྱ་བཅིངས་ལ། །ཞེས་པ་ནི་སྲ་ཞིང་བརྟན་པར་རྗེས་སུ་མཐུན་པའི་ཕྱིར་རྡོ་རྗེའི་ཕྱག་
རྒྱ་བཅིངས་པའོ། །རྗེས་སུ་རྟག་པར་འོ་མ་བཏུང༌། །ཞེས་པ་ནི་ཟས་ཀྱང་རྗེས་སུ་མཐུན་པ་སྟེ་འོ་མ་འཐུངས་ན་ལུས་བརྟས་ཤིང་མཁྲང་པར་འགྱུར་པའི་ཕྱིར་རོ། །འཇིག་རྟེན་ན་ཡང་སེམས་དང་ཁ་ཟས་གཉིས་ཀྱིས་ལུས་འཛིན་པར་འགྱུར་བ་དེ་བཞིན་དུ་འདིར་ཡང་སྟེ། སེམས་ཀྱི་མཁྲང་བ་བསྒོམ་ཞིང་མཁྲང་པར་འགྱུར་བའི་ཁ་ཟས་ཟོས་ན་དབང་ཆེན་གྱི་ཏིང་ངེ་འཛིན་དང་མཐུན་པའི་ཕྱིར་རོ། །སྲོག་དང་རྩོལ་པར་བ་བསྡམས་ནས། །སྔགས་པས་ཟླ་བ་གཅིག་ཏུ་བ་ཟླས། །ཞེས་པ་ནི་སྔར་བཤད་པའི་ཚུལ་བཞིན་དུ་སྲོག་དང་རྩོལ་བ་བསྡམས་ནས་རང་གི་སྙིང་པོ་ཟླ་བ་གཅིག་ཏུ་བཟླས་སོ་ཞེས་པའོ། །དེ་ནས་ཟླ་བ་གཉིས་པ་ན། །ཞེས་པ་ནས། དེ་ཚེ་ཟས་སུ་ཆུ་བཏུང་ངོ༌། །ཞེས་པའི་བར་ནི་ཆུའི་དཀྱིལ་འཁོར་ལ་གནས་པར་བཤད་པ་སྟེ། ཆུའི་དཀྱིལ་འཁོར་གྱི་ས་བོན་གྱི་སྒྲའི་དེ་ཁོ་ན་ཉིད་བསྒོམས་པ་དང་ས་བོན་དེ་ལས་ཆུའི་དཀྱིལ་འཁོར་དུ་བསྒོམས་པས་གོ་རིམས་དམན་མ་བཞིན་དུ་བྱ་སྟེ། བདག་གི་ལུས་ཀྱང་ཆུའི་རང་བཞིན་ལྟར་སྔོ་བར་བསྒོམ་ཞིང་པདྨའི་ཕྱག་རྒྱ་བཅིངས་ལ་ཟླ་བ་གཅིག་ཏུ་བཟླས་ཏེ་པདྨའི་ཕྱག་རྒྱ་བཅིངས་པ་དང་ཟས་སུ་ཆུ་བཏུང་བ་ཡང་དེ་དང་རྗེས་སུ་མཐུན་པར་བྱ་བའི་ཕྱིར་རོ། །དེ་ནས་ཟླ་བ་གསུམ་པ་ལ། །ཞེས་པ་ནས། སྡིག་པ་ཐམས་ཅད་བསྲེག་པར་བྱ། །ཞེས་པའི་བར་ནི་མེའི་དཀྱིལ་འཁོར་ལ་གནས་པར་བཤད་པ་སྟེ། མ་བསླངས་པ་ཡི་ཟས་ཟ་ཞིང༌། །ཞེས་པ་ནི་མེ་དང་རྗེས་སུ་མཐུན་པར་བྱ་བའི་ཕྱིར་ཏེ། ཇི་ལྟར་མེ་ནི་སྐམ་གཤེར་དང་བཟང་ངན་ལ་སོགས་པ་ལ་མི་རྟོག་པར་སྲེག་པ་བཞིན་དུ་ཞིམ་པོ་ལ་སོགས་པའམ། འདོད་པའི་དངོས་པོ་རྣམས་ལ་མི་རྟོག་ཅིང་མ་བསླངས་པར་བཟའ་ཞེས་པའོ། །རལ་གྲིའི་ཕྱག་རྒྱ་དང་ལྡན་པས། །ཞེས་པ་ཡང་མེ་དང་རྗེས་སུ་མཐུན་པ་སྟེ། ཇི་ལྟར་མེ་ནི་ཐམས་ཅད་སྲེག་ཅིང་གཅོད་པ་དེ་བཞིན་དུ་རལ་གྲི་ཡང་དངོས་པོ་ཐམས་ཅད་གཅོད་ཅིང་མེད་པར་བྱེད་པའོ། །ལུས་དང་ངག་ཡིད་ལས་བྱུང་བའི། །སྡིག་པ་ཐམས་ཅད་བསྲེག་པར་བྱ། །ཞེས་པ་ནི་སྔགས་པ་དེ་ལྟ་བུའི་ཏིང་ངེ་འཛིན་ལ་གནས་ཤིང་བཟླས་ན་ལུས་དང་ངག་དང་ཡིད་གསུམ་གྱི་སྒོ་ནས་སྡིག་པ་བྱས་
པའི་ལས་ཀྱི་བག་ཆགས་སེམས་ལ་བསགས་པ་དེ་ལས་འབྱུང་བར་འགྱུར་ཞེས་པའོ། །བཞི་ལ་རླུང་དང་ལྡན་བྱས་ཏེ། །ཞེས་པ་ནས། མཉམ་པར་གཞག་སྟེ་གསང་སྔགས་བཟླས། །ཞེས་པའི་བར་ནི་ཟླ་བ་བཞི་པ་ལ་རླུང་གི་དཀྱིལ་འཁོར་ལ་གནས་པར་བཤད་པ་སྟེ། སྔར་བཤད་པ་བཞིན་རླུང་གི་དཀྱིལ་འཁོར་གྱི་ཏིང་ངེ་འཛིན་དུ་སྦྱར་ལ་ཁྱད་པར་དུ་བདག་གི་ལུས་རླུང་གི་རེག་པ་དང་ལྡན་པར་ཡིད་ལ་བསྒོམ་མོ། །ཟས་སུ་རྟག་ཏུ་རླུང་བཟའོ། །ཞེས་པ་ཁ་ཟས་ཀྱང་དེ་དང་རྗེས་སུ་མཐུན་པར་སྦྱར་བ་སྟེ། ནང་དུ་རྒྱུ་བའི་རླུང་ལྐོག་མར་འགོག་ཅིང་འགག་པར་བསམས་ན་བྲུ་བ་ཚ་བ་དང་སྐོམ་པ་མེད་པར་འགྱུར་ཏེ། དེ་ལ་རླུང་ཟ་བ་ཞེས་བྱའོ། །དེ་ནས་འཁོར་ལོའི་རྒྱ་བཅིངས་ལ། །ཞེས་པ་ནི་འཁོར་ལོ་ནི་འཁོར་ཞིང་གཡོ་བའི་མཚན་ཉིད་ཅན་ཡིན་པས་རླུང་དང་རྗེས་སུ་མཐུན་པར་བྱ་བའི་ཕྱིར་རོ། །མཉམ་པར་གཞག་སྟེ་གསང་སྔགས་བཟླས། །ཞེས་པ་ནི་སྲོག་དང་རྩོལ་བ་བསྡམས་པ་ལ་སོགས་པ་སྔར་བཤད་པའི་རིམ་པ་བཞིན་དུ་བཟླས་པའོ། །དབང་ཆེན་དང་ནི་ཆུ་དངོས་ལ། །ཞེས་པ་ནས། རྫོགས་པའི་སངས་རྒྱས་བཞིན་དུ་འགྱུར། །ཞེས་པའི་བར་ནི། དབང་ཆེན་གྱི་དཀྱིལ་འཁོར་དང་ཆུའི་དཀྱིལ་འཁོར་གཉིས་ལ་གནས་ནས་རིག་སྔགས་ཀྱི་བརྟུལ་ཞུགས་སྤྱོད་པ་སྟེ། དབང་ཆེན་དང་ནི་ཆུའི་དཀྱིལ་འཁོར་སོ་སོའི་སྙིང་པོ་ལས་སྔ་མ་བཞིན་དུ་བསམ་པ་སྟེ། རོ་སྨད་ནི་དབང་ཆེན་གྱི་རང་བཞིན་དུ་བསམ་ཞིང་རོ་སྟོད་ནི་ཆུའི་རང་བཞིན་དུ་བསམས་ནས་ཟས་སུ་ཡང་འོ་མ་དང་ཆུ་གཉིས་བཏུང་ཞིང་ཟླ་བ་གཅིག་ཏུ་བཟླས་པར་བྱའོ། །རྙེད་དང་མ་རྙེད་རྣམ་སྤངས་ཏེ། །ཞེས་པ་ནི་རྙེད་ན་ཡང་དགའ་བ་མེད། མ་རྙེད་ན་ཡང་མི་དགའ་བ་མེད་པའོ། །རླུང་དང་མེར་ནི་ལྡན་བྱས་ནས། །ཞེས་པ་ནས། ཟླ་བ་གཞན་ལ་བཟླས་བརྗོད་བྱ། །ཞེས་པའི་བར་དུ་རླུང་དང་མེ་གཉིས་གའི་དཀྱིལ་འཁོར་ལ་གནས་ནས་རིག་སྔགས་ཀྱི་བརྟུལ་ཞུགས་སྦྱོད་པ་སྟེ། རླུང་གི་དཀྱིལ་འཁོར་གྱི་སྟེང་དུ་རཾ་གྱི་ས་བོན་ལས་མེའི་དཀྱིལ་འཁོར་བསམས་ཏེ་བདག་གི་ལུས་རོ་སྟོད་མེ་འབར་བའི་རང་བཞིན་དུ་བསམ་ཞིང་རོ་སྨད་ཀྱང་སྔ་
མ་བཞིན་དུ་རླུང་གི་རང་བཞིན་དུ་བསམས་ཏེ་ཟས་སུ་ཡང་རླུང་གི་སྦྱོར་བ་ཡང་སྔར་སྨོས་པ་བཞིན་དུ་ཅུང་ཟད་བྱ་ལ་མེའི་ཟས་མ་བསླངས་པ་ཡང་ཅུང་ཟད་བྱ་སྟེ། ཟླ་བ་གཅིག་ཏུ་བཟླས་པ་བྱ། །ཞེས་པའོ། །དེ་དག་ཐམས་ཅད་ཀྱང་རང་གི་ལྷའི་གཟུགས་སུ་སྦྱོར་བ་ན་དཀྱིལ་འཁོར་སོ་སོའི་ཁ་དོག་ཅི་འདྲ་བ་བཞིན་དུ་ལྷའི་གཟུགས་ཀྱི་ཁ་དོག་ཀྱང་དེ་བཞིན་དུ་ཤེས་པར་བྱའོ། །དབང་ཆེན་གྱི་དཀྱིལ་འཁོར་གྱི་སྐབས་སུ་བཤད་པའི་རིམ་པ་བཞིན་དུ་ཟླ་གཅིག་ཏུ་སྲོག་དང་རྩོལ་བསྡམས་ཏེ་བཟླས་པར་ཡང་བཤད་པར་བྱའོ། །བརྒྱ་བྱིན་ཚངས་པ་ལ་སོགས་ལྷ། །ཞེས་པ་ནས། སྙིང་རྗེ་འཇིག་རྟེན་དབང་པོ་བཞིན། །ཞེས་པའི་བར་ནི། དེའི་མཐུ་ཅི་ལགས་འཚལ་བར་བགྱི། །ཞེས་ཞུས་པའི་ལན་ཏེ། མཐུ་བཤད་པ་ནི་བརྒྱ་བྱིན་དང་ཚངས་པ་ལ་སོགས་པའི་ལྷ་རྣམས་དང༌། ཤ་ཟ་དང་ལྟོ་འཕྱེ་ལ་སོགས་པ་རྣམས་ཀྱིས་རིག་སྔགས་ཀྱི་བརྟུལ་ཞུགས་དེ་ལྟ་བུ་དང་ལྡན་པའི་སྔགས་པ་མཐོང་ན་རྒྱང་རིང་པོ་ནས་ཕྱག་འཚལ་ཞིང་སྔགས་པ་དེ་ལ་སྲུང་བར་བྱེད་ལ་སྔགས་པ་དེས་ནི་ཅི་བསྒོམས་པ་རྣམས་ཀྱང་བྱེད་པར་འགྱུར་ཞིང་ལྷའི་སྨན་རྣམས་ཀྱང་སྔགས་པ་དེའི་དྲུང་ན་འཁོད་ཅིང་བཀའ་ཉན་ཏེ། སྨན་བཙལ་གྱིས་མི་རྙེད་པ་དག་ཀྱང་དེའི་དྲུང་ན་འདུག་པར་མཐོང་ངོ༌། །བགེགས་དང་མ་མོ་བདུན་ལ་སོགས་པ་འཇིགས་པར་བྱེད་པ་རྣམས་ཀྱང་རྒྱང་རིང་པོ་ནས་ཕྱག་འཚལ་བར་བྱེད་པ་དང་སྔགས་པའི་གནས་ཀྱང་མེ་འབར་བལྟར་སྣང་ལ། སངས་རྒྱས་བཅོམ་ལྡན་འདས་ལྟར་འཇིག་རྟེན་དང་འཇིག་རྟེན་ལས་འདས་པ་རྣམས་ལ་དབང་ཐོབ་པར་འགྱུར་བ་དང་མི་མཐུན་པར་བདུན་པ་ནི་ཕྱག་ན་རྡོ་རྗེ་ལྟ་བུ་དང་སྙིང་རྗེ་ཆེ་བ་ནི་སྤྱན་རས་གཟིགས་ཀྱི་དབང་པོ་ལྟ་བུར་འགྱུར་ཞེས་པའོ། །ཟླ་བ་དྲུག་རྣམས་བཟླས་གྱུར་ན། །འདོད་པའི་དངོས་གྲུབ་འབྲས་བུ་ཐོབ། །བདག་ཉིད་དང་ནི་གཞན་ལ་ཡང༌། །རྟག་པར་རྗེས་སུ་ཕན་པར་བྱེད། །ཅེས་པ་ནི། དུས་དང་ཡུལ་དང་བྱ་བ་ལས། །ཆོས་དང་ཆོས་མིན་རྣམ་སྤངས་པར། །དེ་ནི་ཇི་ལྟར་མྱུར་དུ་འགྱུར། །ཚད་ཀྱང་འདྲེན་པས་བཀའ་སྩོལ་
ཅིག །ཅེས་ཞུས་པའི་ལན་ཏེ། དབང་ཆེན་ལ་སོགས་པའི་དཀྱིལ་འཁོར་བསྒོམ་པའི་རིམ་པས་ཟླ་བ་དྲུག་ན་དུས་ལ་སོགས་པ་ལ་མི་ལྟོས་ཤིང་བདག་དང་གཞན་ལ་ཕན་པའི་གྲུབ་པ་ཐོབ་པར་འགྱུར་ཏེ་དེ་ལྟ་བུ་ཐོབ་པའི་ཚད་ཟླ་བ་དྲུག་གོ་ཞེས་པའོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། རིག་སྔགས་ཀྱི་བརྟུལ་ཞུགས་རིམ་པར་ཕྱེ་བ་རྒྱས་པའོ།། །།དེ་ནས་ཡང་བཅོམ་ལྡན་འདས་ཕྱག་ན་རྡོ་རྗེས་ཡང་གསང་སྔགས་རྣམས་དང་དཀྱིལ་འཁོར་རྣམས་ཀྱི་སྙིང་པོ་ཞུས་པ་ཞེས་པ་ལ་སོགས་པ་ནི་སློབ་དཔོན་གྱི་དེ་ཁོ་ན་ཉིད་བཤད་པ་སྟེ། སློབ་དཔོན་གྱི་དེ་ཁོ་ན་ཉིད་ཀྱང་རིག་སྔགས་རྣམས་དང་དཀྱིལ་འཁོར་གྱི་སྙིང་པོ་གང་ཡིན་པ་ལ་སོགས་པ་ཡང་དག་པ་ཉིད་ཤེས་ན་སློབ་དཔོན་དུ་འགྱུར་ཏེ། དེ་བས་ན། སྔགས་རྣམས་འབྱུང་བའི་གནས་སྙིང་པོ་དེ་སྔོན་དུ་བཤད་ནས་སློབ་དཔོན་གྱི་དེ་ཁོ་ན་ཉིད་བསྟན་ཏེ། དེ་བས་ན། གསང་སྔགས་ཀུན་གྱི་སྙིང་པོ་གང༌། །ཅི་ཞིག་འཚལ་ནས་སློབ་དཔོན་འགྱུར། །ཞེས་ཕྱག་ན་རྡོ་རྗེས་ཞུས་པ་ཡིན་ནོ། །དེ་ལ་གསང་སྔགས་ཀུན་གྱི་སྙིང་པོ་གང༌། །ཞེས་པ་ནི། ཨ་ནི་གསང་སྔགས་ཐམས་ཅད་ཀྱི། །སྙིང་པོ་ཡིན་པར་ཡང་དག་བཤད། །ཅེས་པ་དང་སྦྱར་རོ། །སློབ་དཔོན་ཞེས་པ་ནི། སྙིང་གར་སྙིང་པོ་གཞག་ནས་ནི། །ཡན་ལག་རྣམས་ལ་ཡན་ལག་འགོད། །ཅེས་པ་དང་སྦྱར་ཏེ། དེ་རྣམས་ཀྱང་བཀོད་པ་ཙམ་གྱིས་ཆོག་པ་མ་ཡིན་གྱི། དེ་དག་གི་སྐྲ་དེ་ཁོ་ན་ཉིད་ལ་སོགས་པ་ཤེས་ན་སློབ་དཔོན་ཞེས་བྱའོ། །ཡེ་ཤེས་གསང་བས་ཆེས་གསང་ཞིང༌། །ཞེས་པ་ནི་གསང་སྔགས་སྤྱད་པའི་ཚུལ་རང་བཞིན་གྱི་གསང་བའི་སྟེང་དུ་སྔགས་ཀྱི་སྙིང་པོ་ཡི་གེ་ཨ་ཞེས་པ་ཐམས་ཅད་གཟོད་མ་ནས་མ་སྐྱེས་པར་རྟོག་པའི་ཡེ་ཤེས་འབྱུང་བའི་སྒོ་སྟེ། ཤིན་ཏུ་ཟབ་པས་སྣོད་མ་ཡིན་ཞིང་དམ་ཚིག་མེད་པ་ལ་བསྟན་པར་བྱ་བ་མ་ཡིན་པའི་ཕྱིར་ན་གསང་བབས་ཆེས་གསང་བ་ཞེས་བྱའོ། །གསང་སྔགས་ཡེ་ཤེས་ཆེར་འབྱུང་བ། །ཞེས་པ་ནི་སྙིང་པོའི་སྒོ་ནས་ཆོས་ཐམས་ཅད་སྟོང་པ་ཉིད་དུ་རྟོགས་པར་འགྱུར་བས་དེ་ཉིད་ལ་ཡེ་ཤེས་
ཞེས་བྱ་ལ་ཡེ་ཤེས་དེ་ལས་བླ་ན་མེད་པའི་འབྲས་བུ་རྟོག་པ་ཆེན་པོ་འབྱུང་བས་ན་ཞེས་བྱའོ། །ཕ་རོལ་ཏུ་ཕྱིན་པ་ལ་སོགས་པའི་སྒོ་ནས་ཡེ་ཤེས་འབྱུང་བ་ཡང་འབྲས་བུ་ཆེན་པོ་འབྱུང་བ་ཡིན་མོད་ཀྱི། དེ་ལས་ཁྱད་པར་དུ། གསང་སྔགས་ཡེ་ཤེས་ཆེར་འབྱུང་བ། །ཞེས་གསུངས་པ་ཡིན་ནོ། །དེ་ལྟ་བུ་བྲིས་པ་ནི་ལེགས་སོ་ཚིག་དང་སྦྱར་རོ། །ཨ་ནི་གསང་སྔགས་ཐམས་ཅད་ཀྱི། །སྙིང་པོ་ཡིན་པར་ཡང་དག་བཤད། །འདི་ལས་བྱུང་བའི་གསང་སྔགས་ནི། །གྲངས་མེད་རྣམས་ཀྱང་འབྱུང་བར་འགྱུར། །ཞེས་པ་ནི། གསང་སྔགས་ཀུན་གྱི་སྙིང་པོ་གང༌། །ཞེས་ཞུས་པའི་ལན་ཏེ། དེ་ལ་ཡི་གེ་ཨ་ཞེས་པ་ནི། གསང་སྔགས་ཐམས་ཅད་ཀྱི་སྙིང་པོ་སྟེ། སྙིང་པོ་ཞེས་པ་ནི་འབྱུང་བའི་གནས་སོ། །དེ་བས་ན་ཀུན་རྫོབ་དང་དོན་དམ་པ་གཉིས་ཀ་འབྱུང་བའི་གནས་ཏེ། དེ་ལ་ཀ་ལ་སོགས་པའི་ཡིག་འབྲུ་ཐམས་ཅད་ཀྱང་ཨ་དང་མི་ལྡན་ན་མི་སྨྲ་སྟེ། དེ་བས་ན། ཡི་གེ་ཀ་ལ་སོགས་པ་ཐམས་ཅད་ཀྱང་ཨ་ལས་བྱུང་བར་ཤེས་པར་བྱ་བས་དེ་ནི་ཀུན་རྫོབ་ཏུ་འབྱུང་བའི་གནས་སོ། །དོན་དམ་པ་ནི་ཡི་གེ་ཨ་དེ་ལས་ཆོས་ཐམས་ཅད་གཟོད་མ་ནས་མ་བྱུང་ཞིང་མ་སྐྱེས་པར་རྟོག་པའི་ཡེ་ཤེས་འབྱུང་སྟེ། འདི་ནི་དོན་དམ་པའི་གནས་སོ། །འདི་ལས་འབྱུང་བའི་གསང་སྔགས་ནི། །གྲངས་མེད་རྣམས་ཀྱང་འབྱུང་བར་འགྱུར། །ཞེས་པ་ནི་འཇིག་རྟེན་དང་འཇིག་རྟེན་ལས་འདས་པའི་གསང་སྔགས་ཇི་ཙམ་གསུངས་པ་དེ་དག་ཐམས་ཅད་ནི་ཡིག་འབྲུའི་ངོ་བོ་སྟེ། ཡིག་འབྲུ་དེ་རྣམས་ཀྱང་ཨ་ལས་གྱུར་པས་གསང་སྔགས་གྲངས་མེད་པ་དེ་དག་ཐམས་ཅད་ཨ་དེ་ལས་བྱུང་ཞེས་པའོ། །དེ་ནི་ཀུན་རྫོབ་ཏུ་ཆོས་ཐམས་ཅད་འབྱུང་བའི་གནས་སུ་བསྟན་ཏོ། །སྤྲོས་པ་ཐམས་ཅད་ཞི་བ་ཡི། །ཡེ་ཤེས་མཐའ་དག་སྐྱེ་བར་འགྱུར། །ཞེས་པ་ནི་ཨའི་ཏིང་ངེ་འཛིན་གྱི་སྒོ་ནས་ཆོས་ཐམས་ཅད་གཟོད་མ་ནས་མ་བྱུང་བ་སྟོང་པ་ཉིད་ཀྱི་རང་བཞིན་དུ་རྟོགས་པས་གཟུང་བ་དང་འཛིན་པ་ལ་སོགས་པའི་རྣམ་པར་རྟོག་པའི་སྤྲོས་པ་དང་བྲལ་བའི་ཡེ་ཤེས་ཀྱང་ཨ་དེ་ལས་
བྱུང་ངོ་ཞེས་བསྟན་ཏེ། དེ་ནི་དོན་དམ་པར་འབྱུང་བའི་གནས་སུ་བསྟན་པའོ། །གསང་བ་པའི་བདག་པོ་ཞེས་པ་ནས། ལུས་ནི་སྣ་ཚོགས་ལས་བྱུང་བའོ། །ཞེས་པའི་བར་ནི་གོང་མའི་ཚིགས་སུ་བཅད་པས་མདོར་བསྟན་པ་དེ་ཉིད་འབྲལ་པ་སྟེ། དེ་ལ་སྤྱིར་རྣམ་པ་ལྔ་སྟེ། ཨ་དང་ཨཾ་དང་ཨཿ་དང་ཨི་དང་ཨུ་རྣམས་སོ། །དེ་དག་ནི་ཡི་གེ་ཐམས་ཅད་ཀྱི་སྤྱིའི་རང་བཞིན་ནོ། །ཨཾ་ཀླད་ཀོར་ནི་ང་དང་ཉ་དང་ན་དང་ཎ་དང་མ་རྣམས་ཀྱི་རང་བཞིན་ཏེ། དའི་ནང་དུ་ཀའི་འཁོར་རྣམས་འདུས། ཉའི་ནང་དུ་ཚའི་འཁོར་རྣམས་འདུས། ཎའི་ནང་དུ་ཌཱི་འཁོར་རྣམས་འདུས། ནའི་ནང་དུ་ཏའི་འཁོར་རྣམས་འདུས། མའི་ནང་དུ་པའི་འཁོར་རྣམས་འདུས་པར་བལྟའོ། །ཨ་དང་ཨིའི་ནང་དུ་ཡ་འདུས་པར་བལྟའོ། །ར་དང་ལ་ནི་རྀ་རཱྀ་དང་ལྀ་ལཱྀ་ནང་དུ་འདུས་ལ་ཤ་ཥ་ས་ཧ་རྣམས་ནི་ཡི་གེ་ཨཿ་ཞེས་པའི་ཚིག་གཉིས་པོའི་ནང་དུ་འདུས་ཏེ། ཨ་དེ་རྣམས་ལས་ཀ་ལ་སོགས་པའི་ཡན་ལག་ཐམས་ཅད་འབྱུང་བར་ཤེས་པར་བྱའོ། །རྫོགས་པའི་སངས་རྒྱས་རྐང་གཉིས་གཙོས། །ཨ་ནི་འཚོ་བ་ཡིན་པར་གསུངས། །ཞེས་པ་ནི་ཡི་གེ་ཨ་དེ་ཀུན་རྫོབ་དང་དོན་དམ་པ་གཉི་གར་ཐམས་ཅད་ཀྱི་སྲོག་སྟེ། ཀུན་རྫོབ་ཏུ་ཡང་གོང་དུ་བཤད་པའི་ཚུལ་གྱིས་ཨ་དེ་མེད་ན་ཀ་ལ་སོགས་པ་སྨྲར་མེད་པས་ཐམས་ཅད་ཀྱི་སྲོག་ཅེས་བྱ་ལ། དོན་དམ་པར་ནི་ཆོས་ཐམས་ཅད་གཟོད་མ་ནས་མ་སྐྱེས་པར་རྟོག་པའི་ཡེ་ཤེས་འབྱུང་བས་སྲོག་ཅེས་བྱའོ། །དེ་ལྟར་སྲོག་ཡིན་པར་ང་འབའ་ཞིག་གིས་བཤད་པ་མ་ཡིན་གྱི། སྔོན་གྱི་སངས་རྒྱས་རྣམས་ཀྱིས་ཀྱང་བཤད་པའོ། །དེ་བས་འདི་ཀུན་ཐམས་ཅད་དེ། །ཞེས་པ་ནི་དེ་ལྟར་ཨ་དེ་སྲོག་ཡིན་པས་ཀ་ལ་སོགས་པའི་དངོས་པོ་ཐམས་ཅད་འདི་ཡིན་ནོ་ཞེས་པའོ། །ཇི་ལྟར་ཡིན་ཞེ་ན། ཡན་ལག་ཀུན་ལ་རྣམ་པར་གནས། །ཞེས་གསུངས་ཏེ་ཨ་དེ་ཀ་ལ་སོགས་པའི་འབྲུ་རྣམས་ལ་གནས་ཞེས་པའོ། །ཡན་ལག་རྣམས་ཀྱང་ཅི་རིགས་པར། །རྟག་པར་ཀུན་དུ་རིག་པར་གྱིས། །ཞེས་པ་ནི་ཀ་ལ་སོགས་པའི་ཡན་ལག་རྣམས་ཀྱང་ཇི་ལྟར་རིགས་པར་སྔགས་ཀུན་ལ་རྟག་ཏུ་གནས་པར་ཤེས་
པར་བྱའོ། །ཡི་གེ་རྣམས་ཀྱིས་ཐམས་ཅད་ཁྱབ། །ཅེས་པ་ཡང་དེ་ཉིད་ཀྱི་སྣོད་དུ་གསུངས་པ་སྟེ། ཀ་ལ་སོགས་པའི་ཡི་གེ་རྣམས་ཀྱིས་སྔགས་ཀྱི་ཚིག་ཐམས་ཅད་དུ་ཁྱབ་ཅེས་པའོ། །ཡི་གེ་རྣམས་ཀྱང་དེ་ཡིས་ཁྱབ། །ཅེས་པ་ནི་ཨ་དེས་ཀ་ལ་སོགས་པའི་ཡི་གེ་རྣམས་ལ་ཁྱབ་ཅེས་པའོ། །ཡི་གེ་རྣམས་ལས་སྒྲ་འབྱུང་བ། །ཆ་དང་ཆ་ལས་བྱུང་བའོ། །ཞེས་པ་ནི་ཀ་ལ་སོགས་པའི་ཡི་གེའི་སྒྲ་རྣམས་ལས་ཆོས་ཐམས་ཅད་དགོས་པ་དང་བྲལ་བའོ་ཞེས་པ་ལ་སོགས་སྒྲའི་ཕྱོགས་གཅིག་པ་རྣམས་འབྱུང་ཞེས་པའོ། །དེ་བས་འདི་ཀུན་ཐམས་ཅད་དེ། །ལུས་ནི་སྣ་ཚོགས་ལས་བྱུང་བའོ། །ཞེས་པས་ནི་དེ་བས་ཨ་དེ་ནི་ཀ་ལ་སོགས་པའི་དངོས་པོ་ཐམས་ཅད་དེ། ཀ་ལ་སོགས་པའི་དངོས་པོ་དེ་རྣམས་ཀྱང་ལྷ་ཐམས་ཅད་ཀྱི་ས་བོན་ཡིན་པས་ལྷའི་གཟུགས་རྣམས་སྣ་ཚོགས་པའི་ཡི་གེ་དེ་རྣམས་ཇི་ལྟར་རིགས་པར་སྦྱར་བ་ལས་འབྱུང་ཞེས་པའོ། །དེ་ཡི་འགོད་པ་ཡང་དག་བསྟན། །ཞེས་པ་ནས། དེ་ནི་སློབ་དཔོན་ཡིན་པར་བཤད། །ཅེས་པའི་བར་གྱིས་ཡི་གེ་སུམ་ཅུ་རྩ་གཉིས་པོ་དེ་དག་ཐམས་ཅད་སློབ་དཔོན་གྱི་ལུས་ལ་འགོད་པ་བཤད་དེ། དེ་ཡི་འགོད་པ་ཡང་དག་བསྟན། །ཞེས་པ་ནི་ཡི་གེ་ཨ་དེ་སྙིང་གར་འགོད་པར་སྔར་བཤད་ཟིན་ཏོ་ཞེས་པའོ། །སྙིང་པོ་དག་ནི་དེ་བས་ཉོན། །ཞེས་པ་ནི་སྙིང་པོ་ཞེས་པའི་ཚིག་ཨ་འབའ་ཞིག་ལ་བྱ་བ་མ་ཡིན་གྱི། །སེམས་ནི་མགུ་ནས་ངེས་གྱུར་པ། །དེ་ནི་སྙིང་ཞེས་བཤད་པ་ཡིན། །དེར་གནས་པ་ཡི་གསང་སྔགས་རྣམས། །འབྲས་བུ་རྒྱ་ཆེར་སྟེར་བར་འགྱུར། །ཞེས་བཤད་པའི་ཚུལ་དུ་རིག་པར་བྱ་སྟེ། ཡི་གེ་འདི་རྣམས་ལུས་ལ་བཀོད་པ་ཙམ་གྱིས་ཆོག་པ་མ་ཡིན་གྱི་སོ་སོའི་སྒྲ་དེ་ཁོ་ན་ཉིད་སེམས་ཚིམ་ཞིང་མགུ་བའི་བར་དུ་བསྒོམ་པར་བྱ་བ་ཉོན་ཅིག་ཅེས་པའོ། །སྙིང་གར་སྙིང་པོ་བཞག་ནས་ནི། །ཡན་ལག་རྣམས་ལ་ཡན་ལག་དགོད། །ཅེས་པ་ནི། སྙིང་གར་ཡི་གེ་ཨ་བཀོད་ལ། །ཡན་ལག་རྣམས་སུ་ཀ་ལ་སོགས་པའི་ཡིག་འབྲུ་རྣམས། ཀ་ནི་ལྐོག་མར་ཤེས་པར་བྱ། །ཞེས་པ་ལ་སོགས་པ་འོག་ནས་འབྱུང་
བའི་རིམ་པ་བཞིན་དུ་དགོད་ཅེས་པའོ། །བློ་ལྡན་རྣལ་འབྱོར་སྟན་འདུག་སྟེ། །བདག་ལུས་རྫོགས་སངས་རྒྱས་ཀྱི་སྐུ། །བྱས་ནས་དེ་བཞིན་གཤེགས་པ་རྣམས། །དྲན་པར་བྱས་ཏེ་འདི་ཀུན་བྱ། །ཞེས་པ་ནི་སློབ་དཔོན་བདག་གི་ལུས་ཀུན་དུ་སངས་རྒྱས་པའི་སྐུར་བསྒྱུར་ཏེ། ཡི་གེ་འདི་ཐམས་ཅད་དགོད་པར་བྱའོ་ཞེས་པའོ། །བློ་ལྡན་རྣལ་འབྱོར་སྟན་འདུག་སྟེ། དེ་བཞིན་གཤེགས་པ་རྣམས་དྲན་པར་བྱས་ཏེ་ཞེས་པ་ནི་དེ་བཞིན་གཤེགས་པ་རྣམས་ལ་ཕྱག་བྱས་ལ་རྣལ་འབྱོར་གྱིས་སྐྱིལ་མོ་ཀྲུང་བཅས་ཏེ་ལུས་དང་སེམས་མཉམ་པར་གཞག་ནས་ད་ལྟ་སྨོས་པ་རྣམས་བྱ་ཞེས་པའོ། །གང་གི་ཡེ་ཤེས་རྒྱ་ཆེན་དེ། །ཆོ་ག་བཞིན་དུ་ཤེས་གྱུར་ན། །དེའི་ཚེ་སངས་རྒྱས་མཐུ་ཆེན་གྱིས། །དེ་ནི་སློབ་དཔོན་ཡིན་པར་བཤད། །ཅེས་པ་ནི་དེ་ལྟར་ཡི་གེ་རྣམས་བཀོད་ཅིང་དེ་རྣམས་ཀྱི་སྒྲའི་དེ་ཁོ་ན་ཉིད་སྟོང་པ་ཉིད་རྟོགས་པའི་ཡེ་ཤེས་རྒྱ་ཆེན་པོ་དེ་དག་ཆོ་ག་བཞིན་དུ་བྱས་ནས་ཤེས་པར་གྱུར་ན་ཀུན་དུ་སངས་རྒྱས་བ་རྣམས་ཀྱིས་སློབ་དཔོན་ནོ་ཞེས་གསུངས་སོ། །དེ་བས་དེ་ཉིད་དེ་བཞིན་གཤེགས། །ཞེས་པ་ནས། དཔལ་ལྡན་སྔགས་རྒྱལ་རྡོ་རྗེ་འཛིན། །ཞེས་པའི་བར་གྱིས་དེའི་རྗེས་སུ་བསྔགས་པ་བཤད་པ་སྟེ། དེ་ལ་སངས་རྒྱས་ལ་སོགས་པ་གྲུབ་པའི་རྒྱུ་ཡང་རྣམ་པ་གཉིས་ཏེ། བསོད་ནམས་དང་ཡེ་ཤེས་སོ། །དེ་ལ་སྦྱིན་པ་ལ་སོགས་པའི་བསེད་ནམས་ནི་བརྒྱུད་པའི་རྒྱུའོ། །ཡེ་ཤེས་ནི་དངོས་ཀྱི་རྒྱུ་སྟེ། དེ་ལ་འདིར་སྔགས་ཀྱི་ཡི་གེ་དེ་རྣམས་ཀྱི་སྒྲའི་དེ་ཁོ་ན་ཉིད་སྟོང་པ་ཉིད་རྟོགས་པར་བྱེད་པའི་ཡེ་ཤེས་མངོན་དུ་བྱས་པ་འདི་ནི་དངོས་ཀྱི་རྒྱུའོ། །དེ་བཞིན་གཤེགས་ཞེས་བྱ་བ་ལ་སོགས་པ་སྟོང་པ་ནི་སློབ་དཔོན་དེ་མོས་པའི་ས་ལ་གནས་པ་ཡིན་པས་དེ་བཞིན་གཤེགས་པ་མ་ཡིན་ཀྱང་དེ་བཞིན་གཤེགས་པ་ལ་སོགས་པར་འགྱུར་བའི་རྒྱུ་བྱེད་པས་ན་རྒྱུ་ལ་འབྲས་བུའི་མིང་གིས་བཏགས་པར་ཤེས་པར་བྱའོ། །དེ་བཞིན་དུ་ཆར་ཆུ་མོད་ཅིང་མྱུ་གུ་བཟང་ན་འབྲས་བུ་མ་གྲུབ་ཀྱང་ལོ་ལེགས་སོ་ཞེས་པ་ལ་སོགས་པ་འཇིག་རྟེན་ན་སྣང་ངོ༌། །རྗེས་སུ་བསྔགས་པ་ཡང་རྣམ་པ་བཞིའི་སྒོ་
ནས་ཏེ། འཇིག་རྟེན་ལས་འདས་པའི་ལྷ་རྣམས་ཏེ། འཇིག་རྟེན་གྱི་ལྷ་རྣམས་དང༌། འཇིག་རྟེན་ལས་འདས་པའི་མི་རྣམས་དང༌། འཇིག་རྟེན་གྱི་མི་རྣམས་སོ། །འཇིག་རྟེན་ལས་འདས་པའི་ལྷ་རྣམས་ནི། དེ་བས་དེ་ཉིད་དེ་བཞིན་གཤེགས། །དེ་ཉིད་རྫོགས་སངས་རྒྱས་ཞེས་བྱ། །ཞེས་པ་ལ་སོགས་པའོ། །འཇིག་རྟེན་གྱི་ལྷ་རྣམས་ནི། ཚངས་དང་ཁྱབ་འཇུག་དབང་ཕྱུག་ཆེ། །ཞེས་པ་ལ་སོགས་པའོ། །འཇིག་རྟེན་གྱི་མི་ནི། །བྲམ་ཟེ་དང་ནི་ཁྲུས་བྱེད་ཉིད། །ཚངས་པར་སྤྱོད་པ་ཞེས་ཀྱང་བྱ། །ཞེས་པའོ། །འཇིག་རྟེན་ལས་འདས་པའི་མི་ནི། །དགེ་སློང་དཔལ་ལྡན་ཟག་བ་ཟད། །ཅེས་པའོ། །གསང་བ་ཐམས་ཅད་འཛིན་པའོ། །ཞེས་པ་ནི་བདག་གི་ལུས་ལྷའི་གཟུགས་སུ་བསྒྱུར་པ་དང་ངག་གི་རང་བཞིན་གྱི་ཡི་གེ་རྣམས་བདག་གི་ལུས་ལ་ཚང་བ་དང་ཡི་གེ་དེ་རྣམས་ཀྱི་སྒྲ་དེ་ཁོ་ན་ཉིད་ལ་དམིགས་པའི་ཡེ་ཤེས་དང་ལྡན་པས་ལུས་དང་ངག་དང་ཡིད་གསུམ་གྱི་གསང་བ་ཐམས་ཅད་འཛིན་པའོ། །ཆོས་ཀུན་དབང་ཕྱུག་གཙོ་བོ་སྟེ། །ཞེས་པའི་ལུང་དང་རྟོགས་པའི་ཆོས་ཉིད་ག་ལ་དབང་དུ་གྱུར་པ་ཞེས་པའོ། །གང་ཞིག་བྱང་ཆུབ་སེམས་བརྟན་ཞིང༌། །སྒྲ་ཤེས་པ་ནི་ལྷུར་ལེན་གང༌། །ཞེས་པ་ནི་དེ་སངས་རྒྱས་དང་བྱང་ཆུབ་སེམས་དཔའ་ལ་སོགས་པར་འགྱུར་པ་ནི་ལུས་ལ་ཡི་གེ་བཀོད་པ་ཙམ་གྱིས་འགྱུར་བ་མ་ཡིན་གྱི། བྱང་ཆུབ་ཀྱི་སེམས་བརྟན་ཞིང་ཡི་གེ་རྣམས་ཀྱི་སྒྲའི་དེ་ཁོ་ན་ཉིད་ཀྱི་ཡེ་ཤེས་བསྒོམ་པ་ལ་བརྩོན་ན་ཇི་སྐད་སྨོས་པ་དེ་རྣམས་སུ་འགྱུར་ཞེས་པའོ། །དེ་ནི་སློབ་དཔོན་གྱི་ཏིང་ངེ་འཛིན་ཏེ་དང་པོའོ། །སྨིན་མཚམས་དབུས་སུ་ཡི་གེ་ཧཱུཾ། །ཞེས་པ་ནས། མཐའ་དག་ངས་ནི་རབ་ཏུ་ཁྱབ། །ཅེས་པའི་བར་ནི་སློབ་དཔོན་གྱི་ཏིང་ངེ་འཛིན་གཉིས་པ་སྟེ་རིགས་གསུམ་གྱི་སྟེང་དུ་དགོད་པའོ། །སྨིན་མཚམས་དབུས་སུ་ཡི་གེ་ཧཱུཾ། །ཞེས་པ་ནི་སྔ་མ་བཞིན་དུ་སློབ་དཔོན་བཅོམ་ལྡན་འདས་རྣམ་པར་སྣང་མཛད་ཀྱི་སྐུར་བསྒྱུར་ཏེ། སྨིན་མཚམས་སུ་ཕྱག་ན་རྡོ་རྗེའི་སྙིང་པོ་ཡི་གེ་ཧཱུཾ་རང་གིས་དཀྱིལ་འཁོར་ལ་གཞག་པར་བསམ་མོ། །བྲང་དུ་ཡི་གེ་ས་ཞེས་བྱ། །ཕྱག་ན་པདྨའི་གཞི་ཞེས་བྱ། །ཞེས་པ་ནི་
སྤྱན་རས་གཟིགས་ཀྱི་དབང་པོའི་སྙིང་པོ་སྟེ། ཟླ་བའི་དཀྱིལ་འཁོར་དང་བཅས་ཏེ་བྲང་མཁར་བསམ་ཞེས་པའོ། །ད་ནི་སྙིང་གའི་གནས་གཞག་པ། །ཞེས་པ་ནི་བཅོམ་ལྡན་འདས་ཉིད་ཀྱི་སྙིང་པོ་ཨ་དེ་རང་གི་སྙིང་གའི་དཀྱིལ་འཁོར་ལ་བསམ་ཞེས་པའོ། །ཀུན་གྱི་རྗེ་སྟེ་དབང་ཕྱུག་ཡིན། །རྒྱུ་དང་མི་རྒྱུ་སྣ་ཚོགས་པ། །མཐའ་དག་ངས་ནི་རབ་ཏུ་ཁྱབ། །ཅེས་པ་ནི་སྙིང་པོ་དེའི་ཡོན་ཏན་བསྔགས་པ་སྟེ། རྒྱུ་བ་ནི་མི་ལ་སོགས་པའི་སེམས་ཅན་ནོ། །མི་རྒྱུ་བ་ནི་ས་དང་ཤིང་ལ་སོགས་པ་སྟེ་དེ་དག་ཐམས་ཅད་ཁྱབ་ཅེས་པའོ། །ཨ་ཞེས་བྱ་བ་སྟོག་གི་མཆོག །ཅེས་པ་ནས། འཆི་འཕོ་མེད་པའི་གོ་འཕང་འཐོབ། །ཅེས་པའི་བར་ནི་སློབ་དཔོན་གྱི་ཏིང་ངེ་འཛིན་གསུམ་པ་སྟེ། དཔའ་བོ་ཆེན་པོའི་སྙིང་པོ་རྣམས་ལས་ཨའི་ཡི་གེ་སྲོག་གི་མཆོག་ཡིན་པས་བདག་གི་ཁོང་དུ་དབུགས་ཡས་མན་དུ་རྒྱུ་བ་དང་ལྷན་ཅིག་ཏུ་སྔར་བཤད་པ་བཞིན་དུ་བསམ་མོ། །བ་ཞེས་བྱ་བ་ཚིག་ཏུ་བཤད། །ཅེས་པ་ནི་ཡི་གེ་མ་ཚིག་གི་རང་བཞིན་ཡིན་པས་ཁར་བསམ་མོ་ཞེས་པའོ། །ར་ཞེས་བྱ་བ་མེ་ཞེས་བརྗོད། །ཅེས་པ་ནི་ཡི་གེ་ར་དེ་རང་གི་དཀྱིལ་འཁོར་དང་བཅས་པར་བསམ་མོ། །ཧཱུཾ་ཞེས་བྱ་བ་ཁྲོ་བོར་བཤད། །ཅེས་པ་ནི་སྨིན་མཚམས་སུ་ཡི་གེ་ཧཱུཾ་དཀྱིལ་འཁོར་དང་བཅས་པར་བསམ་མོ། །ཁ་ནི་ནམ་མཁའ་ཤེས་བར་བྱ། །ཀླད་ཀོར་སྟོང་པའི་མཆོག་ཅེས་བྱ། །ཞེས་པ་ནི་ཡི་གེ་ཁ་ཀླད་ཀོར་དང་བཅས་པ་ཀླད་པའི་སྟེང་དུ་བསམས་ཏེ། ཁ་ནི་ཆོས་ཐམས་ཅད་ནམ་མཁའ་ལྟ་བུའི་མཚན་ཉིད་དུ་སྟོན་པའོ། །ཀླད་ཀོར་ཡང་སྟོང་པའི་རང་བཞིན་ཞེས་པའོ། །གང་ཤེས་སློབ་དཔོན་ཞེས་བྱ་བ། །འདི་ནི་ཡང་དག་དམ་པ་ཡིན། །ཞེས་པ་ནི་གོང་དུ་སྨོས་པའི་ཡི་གེ་རྣམས་ཀྱི་སྒྲའི་དེ་ཁོ་ན་ཉིད་དང་དགོས་པ་རྣམས་གང་གིས་ཤེས་པ་དེ་ནི་སློབ་དཔོན་ཞེས་བྱའོ་ཞེས་པའོ། །དེ་བས་རྣམ་པ་ཐམས་ཅད་དུ། །རྫོགས་སངས་རྒྱས་བསྔགས་ཤེས་འདི་ལ། །རྟག་ཏུ་བརྩོན་པར་བྱས་ན་ནི། །འཆི་འཕོ་མེད་པའི་གོ་འཕང་འཐོབ། །ཅེས་པ་ནི་དེ་དག་ནི་རྗེས་སུ་བསྔགས་པ་སྟེ། སྙིང་པོ་དེ་རྣམས་འབའ་ཞིག་གིས་བཤད་པ་མ་ཡིན་གྱི། སྔོན་གྱི་སངས་
རྒྱས་རྣམས་ཀྱིས་ཀྱང་གསུངས་ཏེ། དེ་བས་ན་རྣམ་བ་ཐམས་ཅད་དུ་དེ་དག་གི་སྒྲའི་དེ་ཁོ་ན་ཉིད་སྟོང་པ་ལ་སོགས་པས་རྟག་ཏུ་ནན་ཏན་བྱས་ན་སངས་རྒྱས་ཀྱི་གོ་འཕང་འཐོབ་པོ་ཞེས་པའོ། །རྣམ་པར་སྣང་མཇད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། སློབ་དཔོན་གྱི་དེ་ཁོ་ན་ཉིད་ཞེས་པ་རིམ་པར་ཕྱེ་བ་རྒྱས་པའོ།། །།ཀ་ནི་ལྐོག་མར་ཤེས་པར་བྱ། །ཞེས་པ་ནས། ངེས་པ་ཐམས་ཅད་མཁྱེན་པ་བཞིན། །ཞེས་པའི་བར་དུ་ཡི་གེ་དགོད་པ་རིམ་པར་ཕྱེ་བ་གསུངས་པ་ནི་གོང་དུ། ཡན་ལག་རྣམས་ལ་ཡན་ལག་དགོད། །ཅེས་སྤྱིར་སྨོས་པ་དེ་ལ་ཀ་ལ་སོགས་པའི་ཡན་ལག་གང་རྣམས་ལུས་ཀྱི་ཡན་ལག་གང་དང་གང་དུ་དགོད་པའི་གནས་འཆད་པར་གསུངས་པ་སྟེ། ཡི་གེ་སུམ་ཅུ་རྩ་གཉིས་པོ་འདི་རྣམས་བཀོད་པ་ནི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་སུ་སྦྱར་རོ། །དེ་ལ་སློབ་དཔོན་གྱི་ཏིང་ངེ་འཛིན་དང་དེ་ནི་སྙིང་རྗེ་ཆེན་པོ་འབྱུང་བའི་དཀྱིལ་འཁོར་གྱི་དུས་སུ་སྦྱར་ཞིང༌། གཉིས་པ་ནི་ཡི་གེ་འཁོར་ལོ་བསྐོར་བའི་དཀྱིལ་འཁོར་གྱི་དུས་དང་སྦྱར་ལ། གསུམ་པ་ནི་གསང་བའི་དཀྱིལ་འཁོར་གྱི་ཚེ་ན་སྦྱར་བར་ཤེས་པར་བྱའོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། ཡི་གེ་དགོད་པ་རིམ་པར་ཕྱེ་བ་རྒྱས་པའོ།། །།དེ་ནས་གཞན་ཡང་བཅོམ་ལྡན་འདས་ལ་གསང་བ་པའི་བདག་པོ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ་ཞེས་པ་ལ་སོགས་པ་ནི་བྱང་ཆུབ་སེམས་དཔའི་བསླབ་པ་ཐབས་དང་ལྡན་པའི་དགེ་བ་བཅུའི་ལས་ཀྱི་ལམ་བཤད་པའོ། །དེ་ལ་གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱི་བསླབ་པ་ཐུན་མོང་མ་ཡིན་པ་དམ་ཚིག་གི་མཚན་ཉིད་ནི་སྔར་བཤད་ཟིན་ཏེ། འདིར་ནི་ཕ་རོལ་ཏུ་ཕྱིན་པ་ལ་སྤྱོད་པའི་བྱང་ཆུབ་སེམས་དཔའ་དང་སྔགས་ལ་སྤྱོད་པའི་བྱང་ཆུབ་སེམས་དཔའ་གཉིས་ཀའི་སྤྱིའི་བསླབ་པ་ཐ་པས་དང་ལྡན་པ་བཤད་པར་ཤེས་པར་བྱའོ། །དེ་ལ་བྱང་ཆུབ་སེམས་དཔའ་ཞེས་པ་དེ་བཞིན་
ཉིད་གྱི་བྱང་ཆུབ་དེ་ཁོང་དུ་ཆུད་པར་འདོད་པའི་བསམ་པ་དང་ལྡན་པ་ལ་ནི་བྱང་ཆུབ་སེམས་དཔའ་ཞས་བྱའོ། །སེམས་དཔའ་ཆེན་པོ་ནི་ཆོས་ཐམས་ཅད་སྒྱུ་མ་ལྟ་བུར་ཤེས་ཏེ། གང་ཡང་དངོས་པོ་ཡོད་པ་མ་ཡིན་གྱི། འོན་ཀྱང་ཀུན་རྫོབ་ཏུ་རྒྱུ་དང་འབྲས་བུ་ངེས་པའི་ཚུལ་གྱིས་ཀུན་རྫོབ་ཉིད་དུ་དོན་བྱེད་པ་སྒྱུ་མ་ལྟ་བུར་རྟོགས་ནས་སེམས་ཅན་ཡོངས་སུ་བསྒྲལ་བའི་ཕྱིར་ཐབས་དང་བཅས་པའི་བསླབ་པ་ལ་སློབ་པ་ནི་སེམས་དཔའ་ཆེན་པོ་ཞེས་བྱའོ། །སྐབས་འདིར་ཡང་བསླབ་པ་དེ་ལྟ་བུ་ལ་སོགས་པ་བཤད་པ་ལ་དགོངས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཁྱད་པར་དུ་སྨོས། བསླབ་པ་བཞི་ཞེས་པ་ནི་འོག་ནས་འབྱུང་བའི་དགེ་བ་བཅུའི་ཚུལ་ལ་འཇུག་པ་དང༌། མི་དགེ་བ་བཅུ་ལས་ལྡོག་པའི་མཚན་ཉིད་ལ་བྱའོ། །ཐབས་དང་ཤེས་རབ་ཀྱིས་ཡོངས་སུ་ཟིན་པ་ཞེས་པ་ནི་ཤེས་རབ་ནི་ཆོས་ཐམས་ཅད་གཟོད་མ་ནས་མ་སྐྱེས་པར་རྟོག་པའི་མཚན་ཉིད་ཡིན་ལ། ཐབས་ནི་ཆོས་ཐམས་ཅད་གཟོད་མ་ནས་མ་སྐྱེས་ཤིང་དངོས་པོ་མེད་པར་རྟོག་ཀྱང་སྒྱུ་མ་ལྟ་བུའི་ཚུལ་དུ་ཐབས་ཀྱི་སྒོ་ནས་ཀུན་རྫོབ་ཏུ་བསླབ་པ་འདི་ལྟ་བུ་དང་འཁོར་གསུམ་ཡོངས་སུ་དག་པའི་སྦྱིན་པ་ལ་སོགས་པ་ཀུན་ཏུ་སྤྱད་པ་ལ་བྱའོ། །ཡང་ན་ཐབས་དང་ཤེས་རབ་ཀྱིས་ཡོངས་སུ་ཟིན་པ་ཞེས་པ་ནི་མི་དགེ་བ་བཅུའི་དངོས་པོ་མི་སྤྱོད་བར་བྱ་བ་ལ་འཕགས་པ་ཉན་ཐོས་རྣམས་ལྟར་ཐབས་མེད་པ་མ་ཡིན་གྱི། ཤེས་རབ་གྱིས་དོན་ཆེན་པོ་མཐོང་ན་སེམས་ཅན་ལ་རྒྱུ་མེད་པར་བདག་ཉིད་སེམས་ཅན་ལ་སྦྱིན་པས་ངན་སོང་དུ་འགྱུར་བ་ལས་ཁས་བླངས་ཏེ་སྤྱོད་པར་མི་བྱ་བའི་དངོས་པོ་སྤྱོད་པ་ལ་ཡང་ཐབས་དང་ཤེས་རབ་ཀྱིས་ཡོངས་སུ་ཟིན་པའི་བསླབ་པ་ཞེས་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཐེ་ཚོམ་དང་ཡིད་གཉིས་མ་མཆིས་ཤིང་འཁོར་བ་ན་འཁོར་བའི་ཚེ་ཉམས་པར་མི་འགྱུར་བ་བཤད་དུ་གསོལ་ཞེས་པ་ལས་བྱང་ཆུབ་སེམས་དཔའ་སེམས་དཔའ་ཆེན་པོ་ནི་བཤད་ཟིན་ཏོ། །ཐེ་ཚོམ་དང་ཡིད་གཉིས་མ་མཆིས་པ་ནི་བཅོམ་ལྡན་འདས་ཀྱིས་ཇི་སྐད་དུ་བཤད་པའི་ལུང་མ་ཡིན་ནོ་སྙམ་པའི་ཡིད་གཉིས་མེད་པ་དང་ཡིན་ནམ་མ་
ཡིན་གཏོལ་མེད་པའི་ཐེ་ཚོམ་མི་སྐྱེ་བའི་བྱང་ཆུབ་སེམས་དཔའ་དེ་རྣམས་བསླབ་པ་དེ་དང་ལྡན་པས་འཁོར་ན་འཁོར་ཀྱང་ངན་སོང་ལ་སོགས་པར་ལྟུང་ཞིང་ཉོན་མོངས་པར་མི་འགྱུར་བ་དེ་བཤད་དུ་གསོལ་ཞེས་པའོ། །དེ་བཞིན་གཤེགས་པའི་སྤྱན་གྱིས་ཆོས་དབྱིངས་ཐམས་ཅད་ལ་གཟིགས་ནས་ཞེས་པ་ནི་དེ་བཞིན་གཤེགས་པའི་སྤྱན་ནི་སངས་རྒྱས་ཀྱི་ཡེ་ཤེས་ལ་བྱ་ལ། ཆོས་ཀྱི་དབྱིངས་ནི་སེམས་ཅན་གྱི་ཁམས་ལ་བྱ་སྟེ། སངས་རྒྱས་ཀྱི་ཡེ་ཤེས་དེས་སེམས་ཅན་གྱི་ཁམས་ཐམས་ཅད་དུ་སེམས་ཅན་འདི་རྣམས་ལས་གང་ནི་སྡུག་བསྔལ་ལ་སུ་ཞིག་བདེ་བ་དང་ལྡན་ཞེས་གཟིགས་པ་འམ། སེམས་ཅན་འདི་རྣམས་ལས་དགེ་བ་དང་ཉེས་པར་སྤྱོད་པའི་རྒྱུ་གང་དང་གང་གིས་བདེ་བ་དང་སྡུག་བསྔལ་འདི་ལྟ་བུར་འགྱུར་སྙམ་དུ་གཟིགས་པའོ། །བྱང་ཆུབ་སེམས་དཔའི་སྤྱད་པ་སྤྱོད་པའི་ཚུལ་ལ་མཁས་པ་བསྟན་པ་གང་ལ་གནས་ན་ཞེས་པ་ལ་བྱང་ཆུབ་སེམས་དཔའི་སྤྱད་པ་ནི་སྐབས་འདིར་ཐབས་དང་བཅས་པའི་བསླབ་པ་ལ་བྱ་ལ། ཚུལ་ནི་ཐོབ་པ་ལ་བྱ་བ་སྟེ་བསླབ་པ་འདིས་ཇི་ལྟར་འདོད་པའི་དོན་ཐོབ་པར་བྱེད་པའི་ཕྱིར་རོ། །མཁས་པ་ནི་ཐབས་དང་ཤེས་རབ་ཀྱིས་ཡོངས་སུ་ཟིན་པ། ཉན་ཐོས་ལྟར་མ་ཡིན་པ་གོང་དུ་བཤད་པའི་ཚུལ་ལྟ་བུར་བསླབ་པས་སོ། །གང་ལ་གནས་ན་བྱང་ཆུབ་སེམས་དཔའ་སེམས་དཔའ་སེམས་དཔའ་ཆེན་པོ་རྣམས་ཐེག་པ་ཆེན་པོ་རྟོག་པར་ཁོར་དུ་ཆུད་པར་འགྱུར་ཞེས་པ་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པའི་ཚུལ་ལ་མཁས་པའི་ཐབས་དང་ཤེས་རང་ཀྱིས་ཡོངས་སུ་ཟིན་པའི་བསླབ་པ་དེ་ལ་རབ་ཏུ་གནས་ན་དེ་བསླབ་པ་ལ་ཞུགས་པ་ཞེས་བྱ་སྟེ། དེ་ལ་བསླབ་པ་ལ་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཐེག་པ་ཆེན་པོ་ལ་རབ་ཏུ་ཞུགས་པར་འགྱུར་བ་དེ་ཉོན་ཅིག་ཅེས་པའོ། །གསང་བ་པའི་བདག་པོ་དེ་ལ་བྱང་ཆུབ་སེམས་དཔས་སྲོག་གཅོད་པ་དང་ཞེས་པ་ནས་ལོག་པར་ལྟ་བ་ལས་སླར་བཟློག་པར་བྱའོ་ཞེས་པའི་བར་གྱིས་མི་དགེ་བ་བཅུ་ལས་ལྡོག་པར་བྱ་བའི་མིང་རྣམས་སྨོས་པ་ཡིན་ལ། དེ་དག་གི་བཤད་པ་ནི་འོག་ནས་འཆད་པར་འགྱུར་རོ། །གསང་བ་པའི་བདག་པོས་
གང་ལ་བསླབ་ན་སངས་རྒྱས་དང་བྱང་ཆུབ་སེམས་དཔའ་རྣམས་དང་སྤྱོད་པ་མཚུངས་པར་བསླབ་པར་འགྱུར་ལ་བྱང་ཆུབ་སེམས་དཔའི་བསླབ་པ་ནི་འདི་དག་ཡིན་ནོ་ཞེས་པ་ནི་གོང་དུ་སྨོས་པའི་བསླབ་པ་དེ་རྣམས་ལ་བསླབ་ན་སངས་རྒྱས་དང་བྱང་ཆུབ་སེམས་དཔའི་སྤྱོད་པ་རྣམས་ལ་བསླབ་པ་ཡིན་པས་སངས་རྒྱས་དང་བྱང་ཆུབ་སེམས་དཔའི་གོ་འཕང་ཐོབ་སྟེ། དེ་བས་ན་བསླབ་པ་འདི་དག་ལ་བསླབ་ན་སངས་རྒྱས་དང་བྱང་ཆུབ་སེམས་དཔའ་རྣམས་ཀྱང་སྤྱད་པ་གཅིག་ལ་མཚུངས་པ་བསླབ་པར་ཤེས་པའོ། །དེ་ནས་ཡང་བཅོམ་ལྡན་འདས་ལ་གསང་བ་པའི་བདག་པོ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ་ཞེས་པ་ནས་ཐ་དད་དུ་བགྱི་བ་ནི་ཅི་ཞིག་མཆིས་ཞེས་པའི་བར་ནི་བྱང་ཆུབ་སེམས་དཔའ་རྣམས་དང་ཉན་ཐོས་དང་འཇིག་རྟེན་པ་ཐམས་ཅད་ལ་ཡང་བསླབ་པ་འདི་བཤད་ན་དེ་ལ་ཁྱད་པར་ཅི་མཆིས་ཞེས་ཕྱག་ན་རྡོ་རྗེས་ཞུས་པ་སྟེ། འཇིག་རྟེན་པ་མུ་སྟེགས་བྱེད་ཅེས་པ་ནི་འཇིག་རྟེན་པ་ཕལ་བས་མི་བྱ་བའི་བསླབ་པའི་དངོས་པོ་ལ་སོགས་པ་བསྟན་པ་འདི་ལ་འཇུག་པའི་སྒོ་བྱེད་པ་རྣམས་ལ་བྱའོ། །ཁྱད་པར་ནི་ཅི་ཞིག་མཆིས་ཞེས་པ་ནི་བསླབ་པ་དེའི་རང་བཞིན་གྱི་ཁྱད་པར་དྲིས་པས་སོ། །ཐ་དད་དུ་བགྱི་བ་ནི་ཅི་ཞིག་མཆིས་ཞེས་པ་ནི་རྒྱུ་དྲིས་པ་སྟེ་འོག་ནས་འཆད་པ་དང་སྦྱར་རོ། །གསང་བ་པའི་བདག་པོ་དེའི་ཕྱིར་རབ་ཏུ་རྣམ་པར་དབྱེ་བའི་ཚུལ་དང་ཚུལ་གཅིག་ཏུ་བསྟན་པའི་ཆོས་ཀྱི་རྣམ་གྲངས་བསྟན་གྱིས་ཉོན་ཅིག་ཅེས་པ་ནི་རབ་ཏུ་རྣམ་པར་དབྱེ་བ་ནི་འཇིག་རྟེན་པ་དང་ཉན་ཐོས་དང་བྱང་ཆུབ་སེམས་དཔའ་རྣམས་ཀྱི་བསམ་པའི་ཚུལ་ནི་བྱེ་བྲག་འོག་ནས་བསྟན་པའི་ཚུལ་གྱིས་ཐ་དད་དོ། །ཚུལ་གཅིག་པ་ནི་དགེ་བ་བཅུའི་རང་བཞིན་དུ་མཚུངས་བར་བསྟན་པའི་ཕྱིར་རོ། །གསང་བ་པའི་བདག་པོ་དེ་ལ་ངས་གང་ཉན་ཐོས་རྣམས་ལ་བསླབ་པ་བསྟན་པ་གང་ཡིན་པ་དེ་ནི་ཐབས་དང་ཤེས་རབ་ཏུ་མི་ལྡན་པ་བཀའ་སྒྲུབ་པར་བྱེད་པ་ཕྱོགས་གཅིག་ཤེས་པ་རྟོགས་པ་སྟེ། དེ་བས་ན་དེ་དག་དང་དགེ་བ་བཅུའི་ལས་ཀྱི་ལམ་དང་མཚུངས་པར་མི་འགྱུར་རོ་ཞེས་པ་ནི་འཕགས་པ་ཉན་ཐོས་རྣམས་སྟོན་པས་ཇི་སྐད་དུ་བསྟན་པའི་བཀའ་བཞིན་དུ་གྲུབ་པ་
ཡིན་གྱི། བྱང་ཆུབ་སེམས་དཔའ་ལྟར་རང་གི་ཤེས་རབ་ཀྱིས་ལུང་དང་རིགས་པར་སྦྱར་ཞིང་འཕྲལ་ལ་ཇི་ལྟར་རིག་པར་མི་བྱེད་ལ། ཐབས་དང་ཤེས་རབ་མེད་ཅིང་གང་ཟག་ལ་བདག་མེད་པར་རྟོགས་པའི་ཕྱོགས་གཅིག་པའི་ཤེས་པ་ལ་གནས་པས་མཚུངས་པར་མི་འགྱུར་རོ་ཞེས་པའོ། །འཇིག་རྟེན་པ་རྣམས་ནི་བདག་གི་དངོས་པོ་ལ་མངོན་པར་ཞེན་པ་དང་གཞན་གྱི་རྐྱེན་གྱིས་འཇུག་གོ་ཞེས་པ་ནི་འཇིག་རྟེན་པ་རྣམས་ནི་སྐྱེ་བ་དང་འཇིག་པ་དང་བདེ་བ་དང་སྡུག་བསྔལ་བ་དང་བསླབ་པའི་དངོས་པོ་ལ་སོགས་པ་ཐམས་ཅད་བདག་ཅེས་པའི་དངོས་པོ་དེས་བྱའོ་ཞེས་པ་དང་བདག་ཅེས་པ་དེ་གཞན་གྱི་རྐྱེན་གྱིས་བསླབ་པ་ལ་འཇུག་པ་སྟེ། བདག་གོ་སྙམ་པའི་དངོས་པོ་ལ་བརྟེན་པས་མཉམ་པར་མི་འགྱུར་རོ་ཞེས་པའོ། །ཐེག་པ་ཆེན་པོས་འགྲོ་བའི་བྱང་ཆུབ་སེམས་དཔའ་རྣམས་ནི་ཆོས་ཐམས་ཅད་ཀྱི་མཉམ་པ་ཉིད་ལ་འཇུག་པར་བྱ་བའི་ཕྱིར་ཞེས་པ་ནི་དོན་དམ་པར་ཆོས་ཐམས་ཅད་སྟོང་པ་ཉིད་ཀྱི་རང་བཞིན་ཉིད་དུ་མཉམ་པ་ཉིད་ལ་ཞུགས་ཤིང་ཀུན་རྫོབ་ཏུ་ཆོས་ཐམས་ཅད་སྒྱུ་མ་ལྟ་བུའི་རང་བཞིན་དུ་མཉམ་པ་ཉིད་ལ་ཞུགས་པའོ། །གཞན་གྱི་དྲིང་མི་འཇོག་ཅིང་ཞེས་པ་ནི་འཇིག་རྟེན་པ་བདག་ཏུ་རྟོག་པ་གཞན་གྱི་རྐྱེན་གྱིས་འཇུག་པ་ལྟ་བུ་མ་ཡིན་ཞེས་པའོ། །ཐབས་དང་ཤེས་རབ་ཀྱིས་ཡོངས་སུ་ཟིན་པ་ཞེས་པ་ནི་གོང་དུ་བཤད་ཟིན་ཏོ། །བདག་དང་གཞན་གཉི་གའི་དོན་བྱེད་པ་ལ་འཇུག་གོ་ཞེས་པ་ནི་ཐབས་དང་ཤེས་རབ་ཀྱིས་ཡོངས་སུ་ཟིན་པའི་བསླབ་པ་དེ་ལྟ་བུ་ལ་བདག་ཀྱང་སྤྱོད་ལ་གཞན་ཡང་བསྡུ་བ་རྣམ་པ་བཞིའི་སྒོ་ནས་བསྡུ་ཞིང་སྤྱོད་དུ་གཞུག་པ་ཞེས་པ་སྟེ། དེ་བས་ན་འཇིག་རྟེན་པ་དང་ཉན་ཐོས་དང་བྱང་ཆུབ་སེམས་དཔའ་རྣམས་ཀྱི་བསླབ་པ་དག་མཚུངས་པར་མི་འགྱུར་རོ་ཞེས་སྦྱར་རོ། །དེ་བས་ན་གསང་བ་པའི་བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོས་ཤེས་རབ་དང་ཐབས་ཀྱིས་ཡོངས་སུ་ཟིན་པར་ཆོས་ཐམས་ཅད་ལ་འཇུག་པའི་ཕྱིར་བརྩོན་པར་བྱའོ་ཞེས་པ་ནི་གོང་དུ་བཤད་པ་རྣམས་བསྡུས་པའི་ཚིག་སྟེ། འཇིག་རྟེན་པ་དང་ཉན་ཐོས་རྣམས་ཀྱི་བསླབ་པ་ཐབས་དང་ཤེས་རབ་མེད་པ་ལྟར་མ་ཡིན་པ་ཤེས་རབ་དང་ཐབས་སུ་ལྡན་པའི་
ཚུལ་ཇི་སྐད་བཤད་པ་དེ་ལྟ་བུས་ཆོས་ཐམས་ཅད་ལ་སྦྱར་བར་བྱའོ་ཞེས་པའོ། །དེ་ནས་བཅོམ་ལྡན་འདས་ཀྱིས་བྱམས་པ་ཆེན་པོ་དང་ཐུགས་རྗེ་ཆེན་པོའི་སྤྱན་གྱིས་སེམས་ཅན་གྱི་ཁམས་རྣམས་ལ་གཟིགས་ནས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་བཀའ་སྩལ་པ་ཞེས་པ་ནི་གོང་དུ་བྱང་ཆུབ་སེམས་དཔའི་བསླབ་པ་མིང་ཙམ་དུ་སྨོས་པ་རྣམས་རེ་རེ་ནས་ཞིབ་ཏུ་བཤད་པའི་ཕྱིར་བཀའ་སྩལ་པ་སྟེ། བྱམས་པ་ནི་སེམས་ཅན་ཐམས་ཅད་བདེ་བ་ལ་དགོད་པའི་མཚན་ཉིད་ཡིན་ལ་ཐུགས་རྗེ་ནི་སྡུག་བསྔལ་ལས་བྲལ་བའི་མཚན་ཉིད་དོ། །བྱམས་པ་དང་ཐུགས་རྗེ་དེ་དག་ཉིད་བཅོམ་ལྡན་འདས་ཀྱི་སྤྱན་དེ་བྱམས་པས་ནི་སེམས་ཅན་གྱི་ཁམས་རྣམས་ལས་སུ་ཞིག་བདེ་བ་ལ་གཞག་པར་འོས་པ་དང་ཐུགས་རྗེས་ནི་སུ་ཞིག་སྡུག་བསྔལ་དང་བྲལ་བར་འོས་པ་གཟིགས་པའི་ཕྱིར་རོ། །སྐབས་གཞན་དུ་གསང་བ་པའི་བདག་པོ་ཕྱག་ན་རྡོ་རྗེས་ཞེས་སྨོས་ལ། འདིར་བྱང་ཆུབ་སེམས་དཔའ་ཕྱག་ན་རྡོ་རྗེ་ཞེས་སྨོས་པ་ནི་བསླབ་པ་འདི་དག་བྱང་ཆུབ་སེམས་དཔའ་སྤྱིའི་ཡིན་པའི་ཕྱིར་རོ། །དེ་ལ་བྱང་ཆུབ་སེམས་དཔས་ཆེད་དུ་བསམས་ཏེ་སྲོག་གཅོད་པ་ལས་སླར་ལྡོག་པར་བྱའོ་ཞེས་པ་ནི་འདུལ་བ་ལ་སོགས་པའི་གཞུང་ལས་ཇི་སྐད་དུ་གྲགས་པ་རྣམ་པ་ལྔ་དང་ལྡན་པའི་མཚན་ཉིད་སྤང་བར་བྱ་སྟེ། དབྱུག་པ་ནི་སྤང་ཞིང་འཁོན་དུ་འཛིན་པ་སྤང་བར་བྱའོ། །དེས་བདག་ལ་ཇི་ལྟ་བ་བཞིན་དུ་གཞན་གྱི་སྲོག་ཀྱང་བསྲུང་བར་བྱའོ་ཞེས་པ་ནི་མཚོན་ཆ་འཆང་བ་དང་འཁོན་དུ་བཟུང་ནས་དགྲར་བྱེད་པ་ནི་སྲོག་གཅོད་པའི་ཡན་ལག་ཡིན་པས་དེ་དག་སྤང་བ་ནི་སྤོང་བའི་ཡན་ལག་ཡོངས་སུ་རྫོགས་པར་བྱ་བའི་ཕྱིར་རོ། །དེ་བཞིན་དུ་མ་བྱིན་པར་ལེན་པ་ལ་སོགས་པ་ལྷག་མ་རྣམས་ཀྱང་གཞུང་ལས་ཇི་སྐད་དུ་འབྱུང་བར་ཟད་དེ་སྐབས་སྐབས་ནས་སྤྱོད་པར་བྱ་བ་མ་ཡིན་པ་རྣམས་ལ་གནང་བ་ཡང་ཁྱིམ་པའི་ཕྱོགས་སུ་གཏོགས་པའི་བྱང་ཆུབ་སེམས་དཔའ་རྣམས་ལ་བྱའི་རབ་ཏུ་བྱུང་བ་ནི་འདུལ་བའི་གཞུང་དང་འགལ་བས་མ་ཡིན་ནོ་ཞེས་བྱང་ཆུབ་སེམས་དཔའི་ཚུལ་ཁྲིམས་ཀྱི་ལེའུ་ལས་འབྱུང་ངོ༌། །དེ་ནས་ཡང་བཅོམ་ལྡན་འདས་ལ་གསང་བ་པའི་བདག་པོ་ཕྱག་ན་རྡོ་རྗེས་
འདི་སྐད་ཅེས་གསོལ་ཏོ་ཞེས་པ་ནས། ཇི་ལྟར་ལྟུང་བར་མི་འགྱུར་བ་དེ་བཤད་དུ་གསོལ་ཞེས་པའི་བར་ནི་གོད་དུ་བཤད་པའི་དགེ་བ་བཅུའི་དངོས་པོ་རྣམས་རྩ་བ་ཉམས་པ་དང་མི་ཉམས་པར་འགྱུར་བའི་བྱེ་བྲག་དྲིས་པ་སྟེ། དེ་ལ་རབ་ཏུ་བྱུང་བ་རྣམས་ཀྱི་སྡོམ་པ་ནི་སོ་སོ་ཐར་པའི་སྐབས་སུ་བཤད་པས་འདིར་མི་གླེང་ལ། སྐབས་འདིར་ཁྱིམ་ན་གནས་པའི་བྱང་ཆུབ་སེམས་དཔའ་ལ་བྱ་བས་དེ་ཡང་རྣམ་པ་གཉིས་ཏེ། ཁྱིམ་ལྔའི་སྡོམ་པ་བླངས་པ་དང་སྡོམ་པ་མ་མནོས་པར་ཡི་དམ་དུ་བསྲུང་བའོ། །དེ་ལ་དགེ་བ་བཅུའི་ལས་ཀྱི་ལམ་འདི་རྣམས་ཀྱི་སྡོམ་པ་ཉམས་པ་དང་ཞེས་པ་ནི་ཁྲིམས་ལྔའི་སྡོམ་པ་མ་ནོས་པའི་བྱང་ཆུབ་སེམས་དཔའི་དགེ་བ་བཅུའི་ལས་ཀྱི་ལམ་རྣམས་ཀྱི་སྡོམ་པ་ཇི་ཙམ་གྱིས་མེད་པར་འགྱུར་བ་དེ་བཤད་དུ་གསོལ་ཞེས་པའོ། །ཤིན་ཏུ་རྩ་ནས་ཆད་པར་འགྱུར་བ་ཞེས་པ་ནི་ཁྲིམས་ལྔ་མ་མ་ནོས་པར་བདག་ཉིད་ཀྱིས་ཡི་དམ་དུ་བསྲུང་བ་ཇི་ཙམ་གྱིས་མེད་པར་འགྱུར་བ་དེ་བཤད་དུ་གསོལ་ཞེས་པའོ། །བཅོམ་ལྡན་འདས་བྱང་ཆུབ་སེམས་དཔའ་རྒྱལ་སྲིད་དབང་ཕྱུག་དང་ཁྱིམ་དང་ཆུང་མ་དང་བུ་དང་བུ་མོ་དང་ཉེ་དུ་དང་སྣག་གི་གཉེན་རྣམས་ཀྱིས་ཡོངས་སུ་བསྐོར་ཞིང་ལྷ་དང་མིའི་བདེ་བ་མྱོང་པར་བགྱིད་ཀྱང་ལྟུང་བར་མི་འགྱུར་བ་དེ་བཤད་དུ་གསོལ་ཞེས་པ་ནི་གོང་མའི་ཚིག་ཉིད་རྒྱུ་མཚན་གྱིས་བཀྲོལ་ཏེ་བྱང་ཆུབ་སེམས་དཔའ་ཁྱིམ་ན་གནས་པ་ལ་བྱེ་བྲག་ཏུ་ཞུས་པ་སྟེ། ཁྱིམ་ན་གནས་པའི་བྱང་ཆུབ་སེམས་དཔའ་བུ་སྨད་དང་འཁོར་གྱིས་བསྐོར་ཞིང་ལྷ་དང་མིའི་ལོངས་སྤྱོད་ལ་སྤྱོད་ཅིང་དབང་བྱེད་ཀྱང་དེ་རྣམས་ཀྱི་དབང་དུ་མི་འགྱུར་བས་ཐབས་མཁས་པས་དགེ་བ་བཅུའི་སྡོམ་པ་ལས་མི་ཉམས་ཞིང་ལྟུང་བར་མི་འགྱུར་བ་བཤད་དུ་གསོལ་ཞེས་ཞུས་པ་སྟེ། འོག་ནས་བཅོམ་ལྡན་འདས་ཀྱིས་སླར་གསུངས་བ་དང་སྦྱར་རོ། །དེ་ཡང་ཁྱིམ་ན་གནས་པའི་བྱང་ཆུབ་སེམས་དཔའ་རྣམས་ལ་བྱེ་བྲག་ཏུ་ཕྱེ་སྟེ་བཤད་པ་སྟེ། ཐབས་དང་ཐབས་མཚུངས་སྣ་ཚོགས་ཀྱིས། །རྒྱལ་སྲིད་ལ་ནི་དབང་བྱེད་དོ། །ཞེས་པ་ནས། བཟོའི་གནས་རྣམ་པ་སྣ་ཚོགས་སྟོན་ཅིང་ཞེས་པའི་བར་ནི་རབ་ཏུ་བྱུང་བ་ནི་ཚེ་འདི་ཉིད་ཀྱི་འབད་ཅིང་
རྩོལ་གྱི་ཁྱིམ་པའི་བྱང་ཆུབ་སེམས་དཔའ་ནི་དུས་དང་ཡུལ་ཆད་པ་མེད་དེ་ཚེ་འདི་འབའ་ཞིག་གི་མ་ཡིན་གྱི་ཚེ་རབས་དུ་མར་རྟོག་ཅིང་རྩོལ་བ་དང་ཐབས་སྣ་ཚོགས་པ་དུ་མའི་སྒོ་ནས་སངས་རྒྱས་ཀྱི་ཞིང་ལ་སོགས་པའི་ཡུལ་གང་དུ་སྐྱེས་ཀྱང་རུང་བར་རྩོལ་བའོ། །དེ་བས་ན། འདི་ལྟར་ཐབས་ཀྱིས་ཡོངས་སུ་ཟིན་པར་ཞེས་བྱ་བ་ལ་སོགས་པ་གསུངས་པ་ཡིན་ནོ། །རོལ་མོ་ལ་སོགས་པ་དང་བཟོ་རྣམ་པ་མང་པོ་སྟོན་པ་ཡང་སེམས་ཅན་སོ་སོ་དང་རྗེས་སུ་མཐུན་པར་སྦྱར་ནས་བསྡུ་བ་རྣམ་པ་བཞིའི་སྒོ་ནས་བསྡུས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་གདོན་པའི་ཕྱིར་རོ། །དེ་ལ་སྲོག་གཅོད་པ་དང་ཞེས་པ་ནས་ལོག་པར་ལྟ་བ་རབ་ཏུ་སྤངས་པ་ཡིན་ཏེ་ཞེས་པའི་བར་ནི་བྱང་ཆུབ་སེམས་དཔའི་ཁྲིམས་ལྔ་པོའི་དངོས་པོ་སྨོས་པའོ། །བསླབ་པའི་གཞི་དེ་ལྔ་བཟུང་ནས། །ཞེས་པ་ནས་ཐ་བས་ཤེས་རབ་ཀྱིས་ཡོངས་སུ་ཟིན་པར་སྤྱོད་ཅིང་ཞེས་པའི་བར་ནི་བསླབ་པ་དེ་རྣམས་ཀྱི་རྗེས་སུ་བསྔགས་པ་སྟེ། དེ་ལྟ་བུར་སློབ་པས་ལྟུང་བའི་རྩབ་པ་ཞི་ནི་སྲོག་གི་ཕྱིར་ཡང་ཉམས་པར་མི་བྱའོ་ཞེས་པ་དང་སྦྱར་རོ། །ཁྱིམ་པའི་བྱང་ཆུབ་སེམས་དཔའ་ཇི་སྐད་སྨོས་པའི་བསླབ་པ་འདི་ལྔ་ལ་དད་པས་བསླབས་ན་སྔོན་གྱི་དེ་བཞིན་གཤེགས་པའི་བསླབ་པ་བླ་ན་མེད་པ་དེ་བཞིན་གཤེགས་པས་བསྔགས་པའི་བསླབ་པ་དང་རྗེས་སུ་མཐུན་པར་བསླབས་པ་ཡིན་ཏེ། དེ་ཅིའི་ཕྱིར་ཞེ་ན། སྔོན་གྱི་དེ་བཞིན་གཤེགས་པས་ཀྱང་འདུས་མ་བྱས་པའི་ཚུལ་ཁྲིམས་ཀྱི་ཕུང་པོ་ལ་གནས་ནས་འདུས་བྱས་ཀྱི་ཚུལ་ཁྲིམས་ཐབས་དང་ཤེས་རབ་ཀྱིས་ཡོངས་སུ་ཟིན་པ་ལ་བསླབས་ནས་བླ་ན་མེད་པ་བརྙེས་ཏེ། དེ་བས་ན་འདི་ལྟར་བསླབ་པ་ནི་དེ་དག་གི་རྗེས་སུ་སློབ་པ་ཞེས་བྱའོ། །འདུས་མ་བྱས་པའི་ཚུལ་ཁྲིམས་ཀྱི་ཕུང་པོ་ལ་གནས་ནས་ཞེས་པ་ནི་ཆོས་ཐམས་ཅད་གདོད་མ་ནས་མ་བྱུང་ཞིང་མ་སྐྱེས་པ་སྟོང་པ་ཉིད་ཀྱི་རང་བཞིན་དུ་རྟོགས་པ་ལ་གནས་ནས་ཞེས་པའོ། །འདུས་བྱས་ཀྱི་ཚུལ་ཁྲིམས་ཞེས་པ་ནི་སྲོག་གཅོད་པ་ལས་སླར་ལྡོག་པར་ལ་སོགས་པ་མིང་གིས་སྨོས་པ་རྣམས་སོ། །ཐབས་དང་ཤེས་རབ་ཀྱིས་ཡོངས་སུ་ཟིན་པ་ཞེས་པ་ནི་སྔ་མ་བཞིན་ནོ།།
དེ་ལྟར་སློབ་མ་དེ་འོག་ནས་མིང་གིས་སྨོས་པའི་རྩ་བ་བཞི་པོ་འདི་སྲོག་གི་ཕྱིར་ཉམས་པར་མི་བྱ་སྟེ། བཞི་པོ་འདི་ཡང་སྔར་དམ་ཚིག་གི་སྐབས་སུ་བཤད་ཟིན་ཏོ། །དེ་ཅིའི་ཕྱིར་ཞེ་ན། འདི་དག་ནི་སླར་གསོར་མི་རུང་པའོ་ཞེས་པ་ནི། བཞི་པོ་འདི་དང་ལྡན་ན་བྱང་ཆུབ་སེམས་དཔའ་ཞེས་ཀྱང་མི་བྱ་སྟེ། སྔར་གསོར་མི་རུང་བའོ་ཞེས་པའོ། །བཞི་པོ་དེ་ཐབས་དང་ཤེས་རབ་ཏུ་མི་ལྡན་པ་རང་བཞིན་གྱིས་ཉོན་མོངས་པ་ཅན་ཏེ། སླར་གསོར་མི་རུང་ཞེས་པ་དང་སྦྱར་ཏེ། ཐབས་དང་ཤེས་རབ་ཏུ་མི་ལྡན་པ་ཞེས་པ་ནི་བཞི་པོ་དེ་འཇིག་པར་བྱེད་པའོ། །དེ་བས་ན། དེ་ཅིའི་ཕྱིར་ཞེ་ན། གང་དག་འདས་པའི་སངས་རྒྱས་དང༌། །དེ་བཞིན་གང་དག་མ་བྱོན་དང༌། །གང་ཡང་ད་ལྟའི་མགོན་པོ་རྣམས། །ཐབས་དང་ཤེས་རབ་ལྡན་པ་ལ། །བསླབས་ནས་བླ་མེད་བྱང་ཆུབ་ནི། །འདུས་མ་བྱས་པ་དེས་ཐོབ་པོ། །ཞེས་གསུངས་པ་ཡིན་ཏེ། དེ་བས་ན་བཞི་པོ་འདི་དང་ལྡན་ཞིང་ཐབས་དང་ཤེས་རབ་མེད་ན་བླ་ན་མེད་པའི་བྱང་ཆུབ་འདུས་མ་བྱས་པ་ཐོབ་པར་མི་འགྱུར་བས་སླར་གསོར་མི་རུང་བའོ་ཞེས་པའོ། །དེ་ལྟར་ཐབས་དང་ཤེས་རབ་ཏུ་མི་ལྡན་པས་སླར་གསོར་མི་རུང་ན་ཉན་ཐོས་རྣམས་ལ་ཐབས་དང་ཤེས་རབ་ཏུ་མི་ལྡན་པའི་བསླབ་པ་དེ་ལྟ་བུ་ཇི་ལྟར་བཤད་ཅེ་ན། ཐབས་དང་མི་ལྡན་ཡེ་ཤེས་དང༌། །བསླབ་པ་དག་ཀྱང་བཤད་པ་ནི། །དཔའ་བོ་ཆེན་པོའི་ཉན་ཐོས་རྣམས། །དེ་ལ་གཟུང་བའི་ཕྱིར་བཤད་དོ། །ཞེས་པ་སྟེ། ཉན་ཐོས་རྣམས་ལ་ངས་ཐབས་དང་ཤེས་རབ་ཏུ་མི་ལྡན་པའི་བསླབ་པ་བསྟན་པ་ཡང་ངེས་པའི་དོན་དུ་བསྟན་པ་མ་ཡིན་གྱི། དེ་དག་གི་སྣོད་དང་སྦྱར་ཞིང་དྲང་བའི་ཕྱིར་རོ་ཞེས་པའོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། བྱང་ཆུབ་སེམས་དཔའི་བསླབ་པ་ཐབས་དང་ལྡན་པ་རིམ་པར་ཕྱེ་བ་རྒྱས་པའོ།། །།བཅོམ་ལྡན་འདས་རྣམ་པར་སྣང་མཛད་ཀྱི་སྐུ་མི་ཟད་པ་ལ་སོགས་པའི་རྡོ་རྗེར་རྒྱན་གྱི་འཁོར་ལོ་འདིར་བྱིན་གྱིས་བརླབ་པ་ལས་སྔགས་བཟླས་པའི་སྐབས་ལ་ཐོག་མར་སྤྱིར་ཕྱི་དང་ནང་གི་བཟླས་པའི་ཡན་
ལག་བཞི་བསྟན་ཏོ། །དེའི་འོག་ཏུ་དེ་བཞིན་གཤེགས་པའི་སྙིང་པོ་བཞིའི་སྐབས་སུ་ནང་གི་བཟླས་པའི་ཡན་ལག་བཞི་བསྟན་ཏོ། །དེའི་འོག་ཏུ་དཔའ་བོ་ཆེན་པོའི་སྙིང་པོའི་སྐབས་སུ་ནང་གི་བཟླས་པའི་ཡན་ལག་གསུམ་བསྟན་ཏེ། དེ་རྣམས་ཀྱང་བཟླས་པའི་གྲངས་དང་དུས་ངེས་པའི་བསྙེན་པ་བྱ་བ་གསུངས་པ་ཡིན་ནོ། །ད་ནི་ཡི་གེ་བརྒྱ་པའི་སྐབས་འདིར་བཟླས་པའི་ཡན་ལག་གཅིག་དང་གྲངས་དང་དུས་མེད་པའི་བསྙེན་པ་མ་ཡིན་པར་ཀུན་དུ་སངས་རྒྱས་པའི་སྐུར་བསྒྲུབ་པ་གནས་ཡོངས་སུ་གྱུར་པའི་བར་དུ་བཟླས་པའི་མཚན་མ་འཆད་དོ།། དེ་བས་ན་བཟླས་པ་དེ་རྣམས་ཀྱང་རགས་པ་དང་ཕྲ་བའི་རིམ་པས་བཤད་པར་ཤེས་པར་བྱ་སྟེ། དང་པོ་ཉིད་དུ་ཕྱི་དང་ནང་གི་བཟླས་པའི་ཡན་ལག་བཞི་པའི་ཕྱི་དང་ནང་གཉི་ག་ལ་དམིགས་པས་རགས་སོ། །དེའི་འོག་ཏུ་ནང་གི་བཟླས་པའི་ཡན་ལག་བཞི་ནི་ཕྱི་རོལ་དུ་སངས་རྒྱས་ཀྱི་སྐུ་ལ་མི་དམིགས་པར་ནང་དུ་རང་གི་སྙིང་གར་དེ་བཞིན་གཤེགས་པའི་སྐུ་བསམས་ནས་ཟློས་པས་དེ་བས་ཕྲའོ། །དེའི་འོག་ཏུ་དཔའ་བོ་ཆེན་པོ་སྐབས་སུ་སྙིང་གར་དེ་བཞིན་གཤེགས་པའི་སྐུར་བསམས་པ་ཡང་གསལ་བཏབ་སྟེ། དབང་ཆེན་ལ་སོགས་པའི་དཀྱིལ་འཁོར་གང་ཡང་རུང་བ་བསམས་ནས་ཡན་ལག་གསུམ་དུ་བྱས་ཏེ་ཟློས་ཏེ་དེ་བས་ཀྱང་ཕྲའོ། །ཡི་གེ་བརྒྱ་པའི་སྐབས་འདིར་ནི་བདག་ཉིད་སྟོང་པ་ཉིད་ཀྱི་ཏིང་ངེ་འཛིན་ལ་གནས་ནས་སྙིང་པོའི་སྒྲ་ཙམ་ལ་དམིགས་ནས་ཡན་ལག་གཅིག་པུར་བྱས་ཏེ་ཟློས་པས་གོང་མ་ཀུན་པས་ཕྲ་བར་རིག་པར་བྱའོ། །ད་ལ་ཡི་གེ་བརྒྱ་པོ་ཀུན་ཀྱང་ཀུན་དུ་སངས་རྒྱས་པ་ཡིན་ཡང་ཡི་གེ་ཨཾ་དུ་བྱིན་གྱིས་བརླབ་པ་སྟེ། དེ་ཡང་ཡི་གེ་བརྒྱ་པ་འབྱུང་བའི་རིམ་པར་ཕྱེ་བ་དང༌། སྒྲའི་འབྲས་བུའི་སྦྱོར་བ་བསྟན་པའི་རིམ་པར་ཕྱེ་བ་དང༌། ཡི་གེ་བརྒྱ་པ་རྣམ་པར་དགོད་པ་སྒྲུབ་པའི་རིམ་པར་ཕྱེ་བ་དང༌། བདག་ཉིད་བསྒྲུབ་པ་རིམ་པར་ཕྱེ་བ་དང༌། རྫོགས་པར་བྱང་ཆུབ་པའི་ངོ་བོ་ཉིད་བསྟན་པའི་རིམ་པར་ཕྱེ་པ་སྟེ། རིམ་པར་ཕྱེ་བ་ལྔས་ཡི་གེ་བརྒྱ་པ་བཤད་པའི་ཡན་ལག་རྫོགས་པར་ཤེས་པར་བྱའོ། །དེ་ལ་འདིར་དེ་ནས་ཡང་བཅོམ་ལྡན་འདས་རྣམ་པར་སྣང་མཛད་
ཀྱིས་ཐབས་དང་ལྡན་པའི་འཁོར་འདུས་པ་ལ་གཟིགས་ཏེ་ཞེས་པ་ལ་སོགས་པས་དང་པོར་ཡི་གེ་བརྒྱ་པ་འབྱུང་བའི་རིམ་པར་ཕྱེ་བ་བཤད་དེ། དེ་ལ་ཡི་གེ་བརྒྱ་པོ་ནི་ཨཾ་ཞེས་པ་ཉིད་ཀྱི་ནང་དུ་འདུས་པར་ཤེས་པར་བྱ་སྟེ། འདིར་ཀླད་ཀོར་ནི་ང་དང་ཉ་དང་ཎ་དང་མ་རྣམས་ཀྱི་རང་བཞིན་ཏེ། ཀ་སྡེ་ནི་ངའི་རང་བཞིན་དུ་འདུས་སོ། །རྩའི་སྡེ་ནི་ཉའི་ནང་དུ་འདུས་སོ། །ཊའི་སྡེ་ནི་ཎའི་ནང་དུ་འདུས་སོ། །ཏའི་སྡེ་ནི་ནའི་ནང་དུ་འདུས་སོ། །པའི་སྡེ་ནི་མའི་ནང་དུ་འདུས་སོ། །དེ་ལྟར་ཡི་གེ་ཉི་ཤུ་དང་རྣམ་པར་ཤེས་པའི་རིམ་པར་ཕྱེ་བ་ལས་བཤད་པ་དང་སྦྱར་བས་ཨ་ཡང་ཨཾ་ལ་འདུས་ལ། རྀ་རཱྀ་དང་ལྀ་ལཱྀ་ནི་ར་དང་ལ་དངོས་སོ། །ཡ་ནི་ཨི་ཨཱིའི་ནང་དུ་འདུས་ལ་བ་ནི་ཨུ་ཨཱུའི་ནང་དུ་འདུས་ཏེ། དེ་ལྟར་ཡ་ར་ལ་ཝ་རྣམས་ནི་དེར་འདུས་སོ། །ཨཾ་ལ་སོགས་པ་གང་དང་ལྡན་པས་ཡི་གེ་ཉི་ཤུ་ལྔ་པོ་རྣམས་བྱང་ཆུབ་དང་སྤྱོད་པ་དང་ཀུན་དུ་སངས་རྒྱས་པ་དང་མྱ་ངན་ལས་འདས་པ་བཞི་པོ་ལ་ཡི་གེ་ཉི་ཤུ་རྩ་ལྔ་ལྔ་ལ་སྦྱར་ན་བརྒྱ་པར་འགྱུར་ཏེ། ཡི་གེ་དེ་རྣམས་གཅིག་ཏུ་བསྡུས་པ་ནི་ཨ་ཞེས་པ་སྟེ་ཨ་ནི་ཤེས་བྱ་དང་ཤེས་པ་གཉིས་ཀ་སྟོང་པའི་མཚན་ཉིད་ཡིན་ལ་ཀླད་ཀོར་ཡང་སྟོང་པའི་མཚན་ཉིད་དེ། ཨ་ཡི་གེ་ཨ་བཞི་ཆར་ཡང་དེའི་ནང་དུ་འདུས་པས་ཨཾ་དེ་ཉིད་བཅོམ་ལྡན་འདས་ཀུན་དུ་སངས་རྒྱས་པའི་རང་བཞིན་ཡི་གེ་བརྒྱ་པ་ཞེས་བྱའོ། །ང་དང་ཉ་དང་ཎ་དང་ན་དང་མ་རྣམས་དང་ཤ་དང་ཥ་དང་ས་དང་ཧ་དང་ཨ་དང་ཨཾ་དང་ཨཱཿརྣམྶ་ནི་ཏིང་ངེ་འཛིན་ཐམས་ཅད་ཀྱི་དབང་པོ་ཡིན་པས་འདིར་ཡི་གེར་མི་བགྲང་ངོ༌། །ཐམས་ཅད་དང་ལྡན་པའི་འཁོར་འདུས་པ་ལ་གཟིགས་ཏེ་ཞེས་པ་ནི་སྔར་བཤད་པ་བཞིན་ནོ། །བསྟན་པ་དོན་ཡོད་པར་གྲུབ་པར་བཞེངས་ནས་ཞེས་པ་ལ་བསྟན་པ་ཞེས་པ་ནི་གདུལ་བྱའི་འགྲོ་བ་རྣམས་ལ་བསླབ་པའི་ཕྱིར་བསྟན་པ་ཞེས་བྱས་ནས་མདོ་སྡེ་ལ་སོགས་པ་ཐམས་ཅད་ལ་ཡོད་མོད་ཀྱི་སྐབས་འདིར་ནི་སྔགས་ཀྱི་བསྟན་པ་ལ་བྱ་སྟེ། དེ་ཡང་བཟླས་པའི་གྲངས་དང་དུས་ངེས་པར་བསྟན་ནས་བསྒྲུབ་པར་བྱ་བར་གོང་དུ་བཤད་པ་རྣམས་ནི། གསང་སྔགས་གྲངས་ནི་སུམ་འབུམ་དུ། །ཕལ་ཆེར་ངས་ནི་བཤད་པ་དག །ལུས་ཅན་སྡིག་དང་བྲལ་
བ་ཡི། །སྔགས་པ་རྣམ་པར་དག་པ་ལ། །བཟླས་བརྗོད་གྲངས་འདི་བསྟན་པ་སྟེ། །གཞན་དུ་བྱ་བ་མ་ཡིན་ནོ། །ཞེས་འབྱུང་བས་སྔོན་དུ་གྲངས་དང་དུས་ངེས་པའི་བསྙེན་པ་བྱས་ཀྱང་རྒྱུ་མ་དག་པའི་སེམས་ཅན་རྣམས་ཀྱིས་མི་འགྲུབ་པ་ཡང་སྲིད་ད། དེ་དག་ནི་གདོན་མི་ཟ་བ་ཡིན་ལ། འདིར་ནི་གནས་ཡོངས་སུ་འགྱུར་བའི་མཚན་མ་འབྱུང་གི་བར་དུ་བཟླས་པར་གསུངས་པས་མཚན་མ་འབྱུང་བ་དེ་ཉིད་གྲུབ་པ་སྟེ། མཚན་མ་དེ་བྱུང་ནས་མི་འགྲུབ་པ་མི་སྲིད་པས་གདོན་མི་ཟ་བར་ཞེས་བྱ་སྟེ། བཅོམ་ལྡན་འདས་བསྟན་པ་དེ་གྲུབ་པར་བཞེངས་ནས་གསང་སྔགས་ཐམས་ཅད་ཀྱི་དབང་ཕྱུག་གསང་སྔགས་ཀྱི་མགོན་པོ་གཟི་བརྗིད་ཀྱི་རྒྱལ་པོ་གསུངས་སོ་ཞེས་སྦྱར་རོ། །གསང་སྔགས་ཐམས་ཅད་ཀྱི་དབང་ཕྱུག་གསང་སྔགས་ཀྱི་མགོན་པོ་གཟི་བརྗིད་ཀྱི་རྒྱལ་པོ་ཆེན་པོ་ཞེས་པ་ཡང་ཀུན་དུ་སངས་རྒྱས་པའི་རང་བཞིན་དུ་ཨཾ་ཞེས་པ་དེ་ཉིད་ལ་བྱེ་བྲག་ཏུ་བྱ་ལ། དེའི་རང་བཞིན་ཡང་རྣམ་པ་གསུམ་དུ་རིག་པར་བྱ་སྟེ། རྟོག་པའི་མཚན་ཉིད་དང་ལུང་གི་མཚན་ཉིད་དོན་དམ་པ་དང་ཀུན་རྫོབ་ཀྱི་མཚན་ཉིད་གཉིས་ཏེ། དེ་ལྟར་རྣམ་པ་གསུམ་མོ། །དེ་ལ་རྟོགས་པ་དོན་དམ་པའི་རང་བཞིན་ནི་ཡི་གེ་ཨ་ཞེས་པ་དང་དེ་ལ་སོགས་པའི་སྔགས་ཀྱི་ཡི་གེ་རྣམས་སོ། །དེ་ལ་གསང་སྔགས་ཐམས་ཅད་ཀྱི་དབང་ཕྱུག་ཅེས་པ་ལ་གསང་སྔགས་ཐམས་ཅད་ཅེས་པ་ནི་འཇམ་དཔལ་གཞོན་ནུར་གྱུར་པ་ལ་སོགས་པའི་ཏིང་ངེ་འཛིན་གྱི་རང་བཞིན་རྣམ་པར་ཐར་པའི་ཡེ་ཤེས་ཕྱོགས་གཅིག་པ་ཆོས་ཐམས་ཅད་ཞི་བ་དང་བྲལ་བའོ་ཞེས་པ་ལ་སོགས་པ་དང༌། ཀུན་རྫོབ་དེ་དག་ཉིད་ཀྱི་སྐུར་སྣང་བ་དང་ལུང་གི་ཆོས་སུ་ཡི་གེ་ཨཾ་ལ་སོགས་པ་ནི་སྔགས་ཐམས་ཅད་དོ། །དེ་དག་གི་དབང་ཕྱུག་གི་བཅོམ་ལྡན་འདས་ཀུན་དུ་སངས་རྒྱས་པའི་ཡི་གེ་བརྒྱ་པ་སྟེ། ཕྱོགས་གཅིག་པ་རྣམས་ཀྱང་དེར་ཀུན་དུ་འདུས་ལ། ཀུན་རྫོབ་ཏུ་ཡང་བཅོམ་ལྡན་འདས་ཀྱི་སྐུ་ལས་སྔགས་ཀྱི་གཟུགས་ཕལ་ཆེ་བ་འབྱུང་ཞིང་ལུང་གི་ཆོས་ཀྱང་ཨཾ་ལ་སོགས་པ་ནི་ཡི་གེ་ཐམས་ཅད་འབྱུང་བ་སྟེ། ཀུན་རྫོབ་དང་དོན་དམ་པ་ཀུན་དུ་ཡང་གསང་སྔགས་ཐམས་
ཅད་དེར་གཏོགས་ཤིང་དེའི་དབང་གིས་འགྱུར་བས་ན་ཨཾ་དེ་གསང་སྔགས་ཐམས་ཅད་ཀྱི་སྙིང་པོ་ཞེས་བྱའོ། །རྒྱལ་པོ་ཆེན་པོ་ཞེས་པ་ནི་ཀུན་རྫོབ་དང་དོན་དམ་པ་གཉིས་ཀར་ཡང་སྔགས་ཕལ་མོ་ཆེ་ལས་ཡོན་ཏན་ཐམས་ཅད་ཀྱིས་འཕགས་པའི་ཕྱིར་རོ། །གཟི་བརྗིད་ཅེས་པ་ནི་མཐུ་ཕུན་སུམ་ཚོགས་པ་བསྟན་པ་སྟེ། མཐུ་ཆེན་པོ་དང་ཞེས་པའོ། །གསང་སྔགས་ཀྱི་མགོན་པོ་ཞེས་པ་ནི་སྐྱབས་ཞེས་པའི་དོན་ཏེ་གོང་དུ་བཤད་པའི་ཚུལ་གྱིས་གསང་སྔགས་ཐམས་ཅད་དེ་ལས་བྱུང་ཞིང་དེར་འདུ་བའི་ཕྱིར་རོ། །དེ་ལྟ་བུའི་སྙིང་པོ་འཇམ་པའི་གསུང་གིས་ཕྱག་ན་རྡོ་རྗེ་ལ་བཀའ་སྩལ་པ་ཞེས་པ་དང་སྦྱར་ཏེ། ཕྱག་ན་རྡོ་རྗེ་ཡང་ཅི་འདྲ་བ་ཞིག་ཅེ་ན། དམ་ཚིག་གསུམ་ལ་གནས་པ་ལ། །ལམ་གསུམ་ཡོངས་སུ་རྫོགས་པར་བྱེད། །ཅེས་གསུངས་ཏེ། དམ་ཚིག་གསུམ་ཞེས་པ་ནི་བཅོམ་ལྡན་འདས་ཀྱི་སྐུ་དང་གསུང་དང་ཐུགས་མི་ཟད་པའི་རྡོ་རྗེའི་རྒྱན་ལ་བྱ་སྟེ། ཕྱག་ན་རྡོ་རྗེ་ལ་སོགས་པའི་བྱང་ཆུབ་སེམས་དཔའ་ས་བཅུ་ཡོངས་སུ་རྫོགས་པ་རྣམས་ཡེ་ཤེས་ཆེན་པོ་དང་ལྡན་པའི་དབང་བསྐུར་བ་ན་བཅོམ་ལྡན་འདས་ཀྱི་སྐུ་ལས་འོད་ཟེར་བཏང་བའི་བྱིན་གྱི་རླབས་ཀྱིས་སྐུ་མི་ཟད་པ་ལ་སོགས་པའི་རྡོ་རྗེའི་རྒྱན་གསུམ་པོ་དེ་དག་མཐོང་ཞིང་ཞུགས་པས་དམ་ཚིག་གསུམ་ལ་གནས་པ་ཞེས་པའོ། །ལམ་གསུམ་ཡོངས་སུ་རྫོགས་པར་བྱེད་པ་ཞེས་པ་ནི་དམ་ཚིག་གསུམ་ཐོབ་པར་བྱེད་པས་ལམ་སྟེ། དེ་ཕྱག་ན་རྡོ་རྗེས་རྫོགས་པར་བྱེད་པའོ། །གསང་སྔགས་མགོན་ནི་སྔ་མ་བཞིན་ནོ། །དེའི་ཚེ་ཡེ་ཤེས་དམ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཞེས་པ་ནི་བཅོམ་ལྡན་འདས་ཏིང་ངེ་འཛིན་དེ་ལ་ཞུགས་ནས་ཀུན་དུ་སངས་རྒྱས་པའི་ཡེ་ཤེས་དམ་པ་ཆོས་ཐམས་ཅད་གཟོད་མ་ནས་མ་བྱུང་མ་སྐྱེས་པར་མཁྱེན་པའི་རང་བཞིན་གྱི་ཡི་གེ་ཆད་པས་ཏིང་ངེ་འཛིན་གྱི་མིང་ཡང་ཡེ་ཤེས་དམ་པ་ཞེས་བྱའོ། །དེ་བས་ན་ཡེ་ཤེས་སྣ་ཚོགས་འབྱུང་བ་ཞེས་བྱ་བ་ལ་སོགས་པས་ཡི་གེ་ཨཾ་དེའི་ཁྱད་པར་གསུངས་པ་ཡིན་ཏེ། ཡེ་ཤེས་སྣ་ཚོགས་ནི་རྟོགས་པའི་ཆོས་དང་ལུང་གི་ཆོས་སྣ་ཚོགས་པ་ཀུན་རྫོབ་དང་དོན་
དམ་པའི་ཚུལ་གཉི་ག་མཁྱེན་པ་ལ་བྱ་སྟེ། ཡི་གེ་ཨཾ་ཞེས་པ་འདི་ལས་དེ་ལྟ་བུའི་ཡེ་ཤེས་དེ་འབྱུང་བ་ལ་བྱའོ། །འོད་ཟེར་བརྒྱ་འཕྲོ་བ་ཞེས་པ་ནི་དོན་དམ་པར་དེ་བཞིན་ཉིད་ཀྱི་ཡེ་ཤེས་རྒྱ་མཚོ་དང་འདྲ་བ་དེ་ལས་ཡེ་ཤེས་ཕྱོགས་གཅིག་པའི་སྔགས་གཞན་རྣམས་འབྱུང་བ་དང༌། ཀུན་རྫོབ་ཏུ་དེ་བཞིན་གཤེགས་པའི་སྐུ་ལས་སྔགས་ཀྱི་སྐུ་མང་པོ་འབྱུང་བས་ཁམས་གསུམ་དུ་ཁྱབ་པ་དང༌། ལུང་གི་ཆོས་སུ་ཡང་ཡི་གེ་ཨཾ་ལས་གོང་དུ་བཤད་པའི་ཚུལ་གྱིས་ཡི་གེ་བརྒྱ་རྣམས་འབྱུང་ཞིང་སྔགས་ཐམས་ཅད་ལ་ཁྱབ་པའི་ཕྱིར་རོ། །ལག་ན་རྡོ་རྗེ་འདི་གསང་སྔགས་ཐམས་ཅད་ཀྱི་མགོན་པོ་གཟི་བརྗིད་ཆེན་པོ་སྟེ་ཞེས་པ་ནི་གོང་དུ་བཤད་པའི་ཚུལ་བཞིན་ནོ། །འདི་ནི་བདག་ཉིད་རྫོགས་སངས་རྒྱས། །ཞེས་པ་ནི་ཡི་གེ་ཨཾ་ཞེས་པ་འདི་བཅོམ་ལྡན་འདས་ཀུན་དུ་སངས་རྒྱས་པའི་ཕུང་པོ་ལྷག་མ་དང་བཅས་པའི་མྱ་ངན་ལས་འདས་པའི་རང་བཞིན་ཉིད་ཡིན་ནོ་ཞེས་པའོ། །ཆོས་ཀུན་དབང་ཕྱུག་ཅེས་པ་ནི་ལུང་གི་ཆོས་དང་རྟོགས་པའི་ཆོས་ཀུན་མཁྱེན་པས་ཆོས་ཀུན་དབང་ཕྱུག་ཅེས་པའོ། །ཐུབ་པ་ཡིན་ཞེས་པ་ནི་ལུས་དང་ངག་དང་ཡིད་གསུམ་ཐུབ་པའི་མཚན་ཉིད་དེ་ཤཱཀྱ་ཐུབ་པ་ཉིད་ལ་བྱའོ། །མི་ཤེས་མུན་ནག་ཀུན་འཇོམས་པ། །ཉི་མ་ཤར་བ་བཞིན་དུ་སྣང༌། །ཞེས་པ་ནི་རྟོགས་པའི་ཆོས་དང་ལུང་གི་ཆོས་གཉིས་ཀ་ལ་སྒྲིབ་པ་སྤང་སྟེ་ཇི་ལྟར་མུན་པ་ན་འདུག་པའི་རྫས་རྣམས་དངོས་པོ་གང་ཡིན་མི་ཤེས་པ་ལས་ཉི་མ་ཤར་བ་ན་རྫས་དག་གསལ་བར་མཐོང་བ་བཞིན་དུ། ཐམས་ཅད་མཁྱེན་པའི་ཡེ་ཤེས་དེས་ཀྱང་མ་རིག་པའི་མུན་བ་བསལ་ཀྱང་ཀུན་རྫོབ་དང་དོན་དམ་པའི་དངོས་པོ་རྣམས་གསལ་བར་མཁྱེན་པ་སྟེ། དེས་ནི་སྤོང་བ་ཕུན་སུམ་ཚོགས་པ་བསྟན་ལ། །ཚིག་གོང་མས་ནི་ཡེ་ཤེས་ཕུན་སུམ་ཚོགས་པ་བསྟན་ཏོ། །ཐུབ་པ་ཆེན་པོ་བདག་ཉིད་ཀྱིས། །འདི་ལྟ་བུར་བྱིན་གྱིས་བརླབས་ཏེ། །ཞེས་པ་ནི་ཀུན་དུ་སངས་རྒྱས་པ་སྟོང་པ་ཉིད་ཀྱི་རང་བཞིན་དེ་ཉིད་ཤཱཀྱ་ཐུབ་པའི་སྐུར་བྱིན་གྱིས་བརླབས་ཏེ་ཤེས་པའོ། །དེ་ལྟར་བྱིན་གྱིས་བརླབས་ནས་ཀྱང་ཅི་ཞིག་མཛད་ཅེ་ན། སེམས་ཅན་རྣམས་ལ་ཕན་བཞེད་
ཕྱིར། །སྤྲུལ་པ་རྣམས་ནི་སྤྲུལ་པར་མཛད། །ཅེས་བྱ་བ་གསུངས་ཏེ། ཤཱཀྱ་ཐུབ་པའི་སྐུར་བྱིན་གྱིས་བརླབས་ནས། སེམས་ཅན་རྣམས་ཀྱི་དོན་དུ་རྣམ་པར་སྤྲུལ་པ་སྣ་ཚོགས་པ་རྣམ་པར་སྤྲུལ་ཞེས་པའོ། །རྣམ་པར་སྤྲུལ་པ་དེ་ཡང་དེ་སྙེད་ཅིག་སྤྲུལ་ཞེ་ན། འདི་ནི་སེམས་ཅན་རྣམས་དག་གིས། །སེམས་པ་འབྱུང་བ་ཇི་སྙེད་པ། །དེ་རྙེད་ཀྱི་ནི་སྤྲུལ་པ་ཡིས། །གོ་འཕང་དམ་པ་མཛད་པར་འགྱུར། །ཞེས་གསུངས་ཏེ། སེམས་ཀྱི་འཇུག་པ་ཇི་སྙེད་པ་དང་ཇི་ཙམ་འདོད་པ་དེ་སྙེད་ཀྱི་སྐུ་རྣམ་པར་སྤྲུལ་པར་བྱེད་ཅེས་པའོ། །དེ་ནི་སྟོང་པ་ཉིད་ལས་ལྡང་བར་བསྟན་པ་སྟེ། དེ་བས་ན་སྔར་དོན་དམ་པ་སྟོང་པ་ཉིད་ཀྱི་ཏིང་ངེ་འཛིན་ལ་གནས་ནས་ཕྱིས་ཀུན་རྫོབ་ཏུ་ཀུན་དུ་སངས་རྒྱས་པའི་སྐུར་བསྒྱུར་བ་ལ་སོགས་པའི་སྤྱོད་པ་རྣམས་བྱའོ་ཞེས་དགོངས་སོ། །དེ་བས་རྣམ་པ་ཐམས་ཅད་དུ། །རྫོགས་སངས་རྒྱས་ཀྱིས་ཐབས་འདོད་པས། །ནང་གི་བདག་ཉིད་རྣམ་དག་པས། །རྟག་ཏུ་མངོན་པར་བརྩོན་པར་བྱ། །ཞེས་པ་ནི་མཇུག་བསྡུ་བའི་ཚིག་སྟེ། ཀུན་དུ་སངས་རྒྱས་པའི་རང་བཞིན་དེ་ལྟ་བུ་ཡིན་པས་ན་གང་ཀུན་དུ་སངས་རྒྱས་པའི་སྐུ་ཐོབ་པར་འདོད་པས་ཀུན་དུ་སངས་རྒྱས་པའི་སྐུའི་ཡི་གེ་བརྒྱ་བའི་རང་བཞིན་དུ་བསྒོམ་པ་ལ་བརྩོན་པར་བྱའོ་ཞེས་པ་སྟེ། དེ་བས་རྣམ་པ་ཐམས་ཅད་དུ། །ཞེས་པ་ནི་ལུས་དང་ངག་དང་ཡིད་རྣམ་པ་ཐམས་ཅད་ཀྱི་སྒོ་ནས་ཞེས་པའོ། །རྟག་ཏུ་ནི་དུས་ཐམས་ཅད་དུའོ། །ནང་གི་བདག་ཉིད་རྣམ་དག་པས། །ཞེས་པ་ནི་སེམས་གཙོ་བོར་བཤད་པ་སྟེ། བདག་གི་ལུས་བཅོམ་ལྡན་འདས་ཀྱི་སྐུར་བསྒྱུར་བ་ཙམ་གྱིས་ཆོག་པ་མ་ཡིན་གྱི། ནང་སེམས་ཀྱི་ཏིང་ངེ་འཛིན་རྣམ་པར་དག་པས་ནན་ཏན་ལ་མངོན་པར་བརྩོན་པར་བྱའོ་ཞེས་པའོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། ཡི་གེ་བརྒྱ་འབྱུང་བ་བསྟན་པ་རིམ་པར་ཕྱེ་བ་རྒྱས་པའོ།། །།ཡི་གེ་བརྒྱ་པའི་རང་བཞིན་གསུམ་ལས་དོན་དམ་པ་དེ་བཞིན་ཉིད་ཀྱི་ཡེ་ཤེས་རྟོགས་པའི་རང་བཞིན་དང༌། ཀུན་རྫོབ་ཏུ་བཅོམ་ལྡན་འདས་ཀྱི་སྐུའི་རང་བཞིན་དག་ནི་ཡི་གེ་ཨཾ་གི་དོན་དུ་བལྟ་བར་བྱའོ། །
ཡི་གེ་ཨཾ་ནི་ཚིག་གི་རང་བཞིན་དུ་བལྟ་སྟེ། དེ་ལ་ཀུན་དུ་སངས་རྒྱས་པའི་རང་བཞིན་གྱི་ཡི་གེ་ཨཾ་འདི་ནི་བཅོམ་ལྡན་འདས་གསུང་གི་རྒྱན་སྣ་ཚོགས་སུ་འབྱུང་བ་སྡུད་པའི་སྒོར་འགྱུར་ཏེ། དེ་ཡང་འདིར་དོན་དང་དམ་ཚིག་གི་བྱེ་བྲག་གིས་རང་བཞིན་གསུམ་དུ་དབྱེ་མོད་ཀྱི། སངས་རྒྱས་ཀྱི་བྱ་བ་བྱེད་པའི་སྒོར་ནི་ཐ་མི་དད་དེ། དེ་དག་གི་བྱ་བའི་ལས་ཀྱང་གཟུགས་དང་སེམས་ཀྱིས་བྱེད་ལ། གཟུགས་ཀྱི་བྱ་བའི་ལས་ཀྱང་དག་དང་སེམས་ཀྱིས་བྱེད་ཅིང༌། སེམས་ཀྱི་བྱ་བའི་ལས་ཀྱང་ལུས་དང་ངག་གིས་བྱེད་དོ། །དེ་བས་ན་སྐབས་འདིར་ཡི་གེ་བརྒྱ་པའི་འབྲས་བུའི་སྦྱོར་བས་ཀུན་དུ་སངས་རྒྱས་པའི་གསུང་མི་ཟད་པ་དེ་སྟོན་ཏེ། དེ་ལས་ཀུན་དུ་སངས་རྒྱས་པའི་ཡི་གེའི་འབྲས་བུ་ནི་སེམས་ཅན་ཡོངས་སུ་སྨིན་པ་དང་མ་སྨིན་པ་རྣམས་ཡོངས་སུ་གྲོལ་བ་དང་སྨིན་པར་བྱེད་དེ། དེ་ཡང་དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་གསང་པ་པའི་བདག་པོ་ཕྱག་ན་རྡོ་རྗེ་ལ་བཀའ་སྩལ་པ་ཞེས་པ་ལ་སོགས་པའོ། །དེ་ལ་གསང་བ་པའི་བདག་པོ་སངས་རྒྱས་བཅོམ་ལྡན་འདས་རྣམས་གང་གི་ཚེ་ཞེས་པ་ནས་དམ་ཚིག་གསུམ་གྱི་ལམ་ལ་གནས་པར་གཟིགས་སོ་ཞེས་པའི་བར་ནི་ཀུན་དུ་བཟང་པོ་ལ་སོགས་པའི་བྱང་ཆུབ་སེམས་དཔའ་ས་བཅུ་ཡོངས་སུ་རྫོགས་པ་རྣམས་རང་རང་གི་མཐུ་དང་སྤྱོད་ཡུལ་གྱི་རྫུ་འཕྲུལ་སྣ་ཚོགས་དང་སངས་རྒྱས་ཀྱི་ཞིང་རྣམས་སྣ་ཚོགས་བརྒྱན་པའི་མཐུས་མགུ་ཞིང་འཁོད་པ་ལ་བཅོམ་ལྡན་འདས་མངོན་པར་བྱང་ཆུབ་པའི་སྐུའི་མཛོད་སྤུ་ལས་བཀོད་པའི་འོད་ཟེར་བྱུང་བས་བྱང་ཆུབ་སེམས་དཔའ་དེ་རྣམས་གྱི་གཙུག་ཏུ་ཕོག་སྟེ། འོད་ཟེར་དེའི་བྱིན་གྱི་རླབས་ཀྱིས་བྱང་ཆུབ་སེམས་དཔའ་དེ་རྣམས་ཡེ་ཤེས་ཆེན་པོ་མངོན་པར་ཤེས་པར་དབང་བསྐུར་བ་དང་ལྡན་པའི་ས་ཐོབ་པར་གྱུར་ཏེ། དེའི་ཚེ་བྱང་ཆུབ་སེམས་དཔའ་དེ་རྣམས་ཀྱིས་བཅོམ་ལྡན་འདས་ཀྱི་སྐུ་དང་གསུང་དང་ཐུགས་མི་ཟད་པ་རྡོ་རྗེའི་རྒྱན་དམ་ཚིག་གསུམ་གྱི་རང་བཞིན་རྟོགས་ཤིང་མངོན་དུ་འགྱུར་ཞེས་པའོ། །སངས་རྒྱས་བཅོམ་ལྡན་འདས་ཞེས་པ་ནི་ས་བཅུའི་གནས་ཡོངས་སུ་རྫོགས་ཤིང་དབང་བཅུའི་དབང་ཐོབ་པ་
ཆོས་རྣམས་སྒྱུ་མ་ལྟ་བུར་རྣམ་པ་ཐམས་ཅད་དུ་རྟོགས་པའི་བྱང་ཆུབ་སེམས་དཔའ་དེ་རྣམས་ཉིད་ལ་སངས་རྒྱས་ཞེས་བྱའོ། །ཡེ་ཤེས་ཆེན་པོ་ཞེས་པ་ནི་དེ་བཞིན་ཉིད་ཀྱི་ཡེ་ཤེས་ལ་བྱ་སྟེ་ཡེ་ཤེས་དེ་བྱང་ཆུབ་སེམས་དཔའ་དེ་རྣམས་ཀྱིས་མངོན་པར་ཤེས་པར་བྱ་བའི་ཕྱིར་འོད་ཟེར་གྱི་དབང་བསྐུར་བ་ལས་ཡེ་ཤེས་ཆེན་པོ་མངོན་པར་ཤེས་པར་དབང་བསྐུར་བ་ཞེས་བྱའོ། །ཡང་ན་ཡེ་ཤེས་ཆེན་པོ་ཡང་དེ་ཡིན་ལ། མངོན་པར་ཤེས་པ་ཡང་དེ་ཡིན་པས་ཡེ་ཤེས་ཆེན་པོ་མངོན་པར་ཤེས་པ་སྟེ། ཡེ་ཤེས་ཆེན་པོ་སྔ་མ་བཞིན་དུ་ཆོས་ཐམས་ཅད་སྟོང་པར་རྟོགས་པ་སྟེ་དོན་དམ་པའོ། །མངོན་པར་ཤེས་པ་དྲུག་ནི། མངོན་པར་ཤེས་པ་སྟེ་ཀུན་རྫོབ་ཀྱི་ཡེ་ཤེས་སོ། །དེ་ལྟར་དོན་དམ་པ་དང་ཀུན་རྫོབ་ཀྱི་ཡེ་ཤེས་དེ་བྱང་ཆུབ་སེམས་དཔའ་དེ་རྣམས་ཀྱིས་ཐོབ་པར་བྱ་བའི་ཕྱིར་དབང་བསྐུར་བ་ནི་ཡེ་ཤེས་ཆེན་པོ་མངོན་པར་ཤེས་པར་དབང་བསྐུར་བ་ཞེས་བྱ་སྟེ། དབང་བསྐུར་བ་དེ་དང་ལྡན་པ་ནི་དབང་བསྐུར་བ་དང་ལྡན་པའི་ས་ཐོབ་པར་གྱུར་པ་ཞེས་པ་ནི་སེམས་ཀྱི་ཁྱད་པར་ཉིད་ལ་བྱའོ། །དེའི་ཚེ་སངས་རྒྱས་བཅོམ་ལྡན་འདས་དེ་དག་ཅེས་པ་ནི་བྱང་ཆུབ་སེམས་དཔའ་དེ་དག་ཉིད་ལ་བྱའོ། །དམ་ཚིག་གསུམ་ཞེས་པ་ནི་བཅོམ་ལྡན་འདས་ཀྱི་སྐུ་དང་གསུང་དང་ཐུགས་མི་ཟད་པའི་རྡོ་རྗེའི་རྒྱན་གྱིས་ཁམས་གསུམ་ཐམས་ཅད་དུ་ཁྱབ་པ་ལ་བྱ་སྟེ། དམ་ཚིག་གི་དོན་ནི་སྐབས་འདིར་ཀུན་དུ་རྟོག་པའམ་ཐོབ་པ་ལ་བྱ་སྟེ། སྐུ་མི་ཟད་པའི་རྒྱན་ལ་སོགས་པ་ཁམས་གསུམ་དུ་ཁྱབ་པར་འབྱུང་བ་དེ་ནི་བྱང་ཆུབ་སེམས་དཔའ་དེ་རྣམས་ཀྱིས་དེའི་ཚེ་མཐོང་ཞིང་ཡེ་ཤེས་ཀྱིས་རྟོགས་པའི་ཕྱིར་རོ། །ལམ་ཞེས་པ་ནི་དམ་ཚིག་དེ་དག་རྟོགས་པའི་ཕྱིར་ཞུགས་པ་ལ་བྱའོ། །བདག་ཉིད་གནས་པར་གཟིགས་སོ་ཞེས་སྦྱར་ཏེ་བཅོམ་ལྡན་འདས་ཀྱི་སྤྱོད་ཡུལ་དམ་ཚིག་གསུམ་གྱི་རང་བཞིན་དེ་དག་བྱང་ཆུབ་སེམས་དཔའ་དེ་རྣམས་ཀྱི་ཡང་སྤྱོད་ཡུལ་དུ་གྱུར་ཏེ། མཐོང་ཞིང་རྟོགས་པར་བདག་ཉིད་ཀྱིས་གཟིགས་སོ་ཞེས་པའོ། །གསང་བ་པའི་བདག་པོ་དེའི་ཚེ་ཡང་བཅོམ་ལྡན་འདས་ཞེས་པ་ནས། སངས་རྒྱས་ཀྱི་མཛད་པ་ཉེ་བར་བསྟན་ཏོ་ཞེས་པའི་བར་ནི་ས་བཅུ་ལ་གནས་
པའི་བྱང་ཆུབ་སེམས་དཔའ་སངས་རྒྱས་ཀྱི་མཛད་པ་དམ་ཚིག་གསུམ་པོ་དེ་རྣམས་ལ་ཞུགས་པར་གྱུར་པ་དེའི་ཚེ་ན་སངས་རྒྱས་ཀྱི་གསུང་སྣ་ཚོགས་སྡུད་པའི་སྒོར་གྱུར་པ་ཡི་གེ་བརྒྱ་པའི་རང་བཞིན་བཅོམ་ལྡན་འདས་ཀུན་དུ་སངས་རྒྱས་པ་དེ་གཟུངས་ཀྱི་ཚུལ་དུ་གྱུར་ནས་སངས་རྒྱས་ཀྱི་མིང་ཅན་བྱང་ཆུབ་སེམས་དཔའ་དེ་རྣམས་ལ་སངས་རྒྱས་ཀྱི་མཛད་པ་ཉེ་བར་སྟོན་པ་སྟེ། བཅོམ་ལྡན་འདས་ཞེས་པ་ནི་ཀུན་དུ་སངས་རྒྱས་པ་ཉིད་ལ་བྱའོ། །ཡེ་ཤེས་ཆེན་པོ་མངོན་པར་ཤེས་པར་དབང་བསྐུར་བ་དང་ལྡན་པ་ཞེས་པ་ནི་ཀུན་དུ་སངས་རྒྱས་པ་དེ་ཉིད་ཀྱི་བྱེ་བྲག་སྟེ། ཡེ་ཤེས་ཆེན་པོ་ནི་སྔ་མ་བཞིན་ནོ། །མངོན་པར་ཤེས་པ་ཞེས་པ་ནི་ཡེ་ཤེས་ཆེན་པོ་དེ་མངོན་པར་རྟོགས་པ་ཞེས་པའོ། །དབང་བསྐུར་བ་དང་ལྡན་པ་ཞེས་པ་ནི་ཡེ་ཤེས་ཆེན་པོ་མངོན་པར་རྟོགས་པའི་ཆེད་དུ་དབང་བསྐུར་བ་དང་ལྡན་པ་ཞེས་པའོ། །གཟུངས་ཀྱི་ཚུལ་ཞེས་པ་ལ་དོན་གྱི་གཟུངས་དང་ཚིག་གི་གཟུངས་ཏེ་རྣམ་པར་མི་རྟོག་པ་ལ་འཇུག་པའི་དབང་དང་གཟུངས་ལ་སོགས་པའོ། །བཅོམ་ལྡན་འདས་ཀུན་དུ་སངས་རྒྱས་པ་ཡེ་ཤེས་ཆེན་པོ་མངོན་པར་ཤེས་པ་དབང་བསྐུར་བ་དང་ལྡན་པ་ཉིད་གཟུངས་གྱུར་ནས་སངས་རྒྱས་ཀྱི་མཛད་པ་སེམས་ཅན་ཡོངས་སུ་སྨིན་པ་དང་གྲོལ་བར་གྱུར་པའི་ཐབས་སྣ་ཚོགས་བྱང་ཆུབ་སེམས་དཔའ་དེ་རྣམས་ལ་སྟོན་ཏེ། དེ་བས་ན་སངས་རྒྱས་ཀྱི་མཛད་པ་ཉེ་བར་སྟོན་ཏོ་ཞེས་གསུངས་པ་ཡིན་ནོ། །དེ་ཉིད་ཀྱི་ཚེ། སངས་རྒྱས་རྒྱས་བཅོམ་ལྡན་འདས་ཞེས་པ་ནས། དམ་ཚིག་གསུམ་གྱི་ལམ་སྟོན་པར་ཉེ་བར་གནས་པར་འགྱུར་རོ་ཞེས་པ་ནི་དེ་ལྟར་བཅོམ་ལྡན་འདས་ཀུན་དུ་སངས་རྒྱས་དེ་བྱང་ཆུབ་སེམས་དཔའ་སངས་རྒྱས་ཞེས་བྱ་བ་དེ་རྣམས་ལ་སངས་རྒྱས་ཀྱི་མཛད་པ་སྟོན་པ་དང་བྱང་ཆུབ་སེམས་དཔའ་དེ་རྣམས་ཀྱང་རང་གི་དམ་ཚིག་གསུམ་གྱི་རང་བཞིན་ཇི་ལྟར་མཐོང་ཞིང་རྟོགས་པ་དེ་སངས་རྒྱས་ཀྱི་མཛད་པའི་ཚུལ་དེས་དམ་ཚིག་གསུམ་པོ་དེ་རྣམས་ཀྱི་ལམ་སྟོན་པ་ལ་ཞུགས་སོ་ཞེས་པ་སྟེ། དེ་ལ་དེ་ཉིད་ཀྱི་ཚེ་སངས་རྒྱས་བཅོམ་ལྡན་འདས་དེ་དག་ཅེས་པ་ནི་གོང་དུ་སྨོས་པའི་བྱང་ཆུབ་སེམས་དཔའ་དེ་དག་ཉིད་ལ་བྱའོ། །སེམས་ཅན་ཐམས་ཅད་ལ་ཞེས་པ་
ནི་ཡོངས་སུ་དག་པ་དང་མ་དག་པའི་སེམས་ཅན་ཇི་ལྟར་སྣོད་དུ་གྱུར་པ་རྣམས་ལའོ། །སངས་རྒྱས་ཀྱི་མཛད་པ་ཞེས་པ་ནི་སྔ་མ་བཞིན་ནོ། །དམ་ཚིག་གསུམ་གྱི་ལམ་ཞེས་པ་ནི་སྐུ་མི་ཟད་པའི་རྡོ་རྗེའི་རྒྱན་ལ་སོགས་པ་ཐོབ་པར་གྱུར་པའི་ལམ་མོ། །སྟོན་པར་ཉེ་བར་གནས་པར་འགྱུར་རོ་ཞེས་པ་ནི་བྱང་ཆུབ་སེམས་དཔའ་དེ་རྣམས་ཇི་ལྟར་སྣོད་དུ་གྱུར་པའི་སེམས་ཅན་རྣམས་ལ་དམ་ཚིག་གསུམ་ཐོབ་པར་བྱེད་པའི་ལམ་དེ་བསྟན་པས་སེམས་ཅན་དེ་རྣམས་ཀྱི་སྐུ་མི་ཟད་པ་ལ་སོགས་པའི་རྒྱན་དམ་ཚིག་གསུམ་གྱི་རང་བཞིན་དེ་ཐོབ་པར་འགྱུར་བའི་ཕྱིར་རོ། །གསང་བ་པའི་བདག་པོ་ངའི་གསུང་གི་འཁོར་ལོ་ཞེས་པ་ནས། བྱུང་བ་ཡིན་ནོ་ཞེས་བྱ་བར་རབ་ཏུ་མི་ཤེས་པ་ལ་ལྟོས་ཞེས་པའི་བར་ནི་དེ་བཞིན་གཤེགས་པའི་གསུང་གི་འཁོར་ལོ་སངས་རྒྱས་ཀྱི་དབྱངས་སྣ་ཚོགས་ལས་ཤཱཀྱ་ཐུབ་པའི་སྐུར་སྤྲུལ་ཏེ་འཇིག་རྟེན་གྱི་ཁམས་ཐམས་ཅད་དུ་ཁྱབ་པར་ཡོངས་སུ་སྨིན་པ་དང་མ་སྨིན་པའི་སེམས་ཅན་ཇི་ལྟར་སྣོད་དུ་གྱུར་པ་རྣམས་ལ་སངས་རྒྱས་ཀྱི་ཕྲིན་ལས་མཛད་པར་འགྱུར་བ་བཤད་པ་སྟེ། གསང་བ་པའི་བདག་པོ་ངའི་གསུང་གི་འཁོར་ལོ་ཞེས་པ་ནི་དེ་བཞིན་གཤེགས་པའི་སངས་རྒྱས་ཀྱི་གསུང་རྣམ་པ་སྣ་ཚོགས་སུ་འབྱུང་བ་སེམས་ཅན་རྣམས་ཀྱི་རྒྱུད་དུ་འགྲོ་བས་ན་འཁོར་ལོ་ཞེས་བྱ་སྟེ། དཀྱིལ་འཁོར་སྤྲུལ་པ་རྒྱ་ཆེན་པོ་ཞེས་པ་ནི་གསུང་གི་འཁོར་ལོ་དེ་ལས་ཤཱཀྱ་ཐུབ་པའི་སྦྲུལ་པ་དེ་དག་གིས་འཇིག་རྟེན་གྱི་ཁམས་ནམ་མཁའི་དབྱིངས་མ་ལུས་པ་དེ་སྙེང་དུ་ཁྱབ་པར་སངས་རྒྱས་གྱི་མཛད་པ་སྟོན་པས་ན་རྒྱ་ཆེན་པོ་ཞེས་བྱའོ། །འཇིག་རྟེན་གྱི་ཁམས་མཐའ་ཡས་པར་ཁྱབ་པར་ཞེས་པ་ནི་ཆོས་ཀྱི་དབྱིངས་སོ་སོར་རྣམ་པར་རིག་པར་བྱེད་པ་ཞེས་པ་དང་སྦྲེལ་ཏེ་སྤྲུལ་པའི་སྐུ་དེས་ཆོས་ཀྱི་དབྱིངས་ཀྱི་ཚིག་དང་དོན་རྣམས་འཇིག་རྟེན་གྱི་ཁམས་སུ་ཁྱབ་པར་སེམས་ཅན་ཐམས་ཅད་ལ་སྟོན་ལ། དེ་ཡང་རྣམ་པར་དག་པའི་སྒོ་ཤ་སྟག་སྟེ། རྣམ་པར་དག་པའི་སྒོ་ཞེས་པ་ནི་ཆོས་ཀྱི་དབྱིངས་རྣམ་པར་དག་པ་ལ་འཇུག་པའི་ཐབས་ཞེས་བྱའོ། །སེམས་ཅན་ཐམས་ཅད་རེ་བ་ཇི་ལྟ་བ་བཞིན་དུ་མགུ་བར་བྱེད་པ་ཆོས་ཀྱི་
དབྱིངས་སོ་སོར་རྣམ་པར་རིག་པར་བྱེད་པའི་སྒོ་ཞེས་པ་ནི་དེ་ལྟར་ཆོས་ཐམས་ཅད་སྟོན་པ་དེ་ཡང་སེམས་ཅན་སོ་སོའི་དད་པ་དང་རྗེས་སུ་མཐུན་པ་སྟེ། སངས་རྒྱས་ཀྱིས་འདུལ་བ་ལ་སངས་རྒྱས་ཀྱི་ཆོས་སྟོན། །དེ་བཞིན་དུ་ཉན་ཐོས་དང་རང་སངས་རྒྱས་དང་བརྒྱ་བྱིན་དང་ཚངས་པ་ལ་སོགས་པས་སོ་སོའི་དད་པ་དང་རྗེས་སུ་མཐུན་པའི་ཆོས་རྣམས་སྔོན་དུ་སྟོན་ཏེ། དེ་ཡང་ཆོས་ཀྱི་དབྱིངས་སུ་འཇུག་པའི་ཐབས་ཤ་སྟག་གོ །ད་ལྟ་འདི་ལྟར་བཅོམ་ལྡན་འདས་ཤཱཀྱ་ཐུབ་པ་འཇིག་རྟེན་གྱི་ཁམས་ནམ་མཁའི་ཁམས་གྱིས་ཀླས་པ་མ་ལུས་པར་ཞེས་པ་ནི་དེ་ལྟ་བུའི་ཆོས་སྟོན་པ་ཡང་ཤཱཀྱ་ཐུབ་པའི་སྐུ་གཅིག་གམ་གཉིས་ཤིག་གིས་མ་ཡིན་གྱི། ནམ་མཁའི་ཁམས་ཀྱིས་ཀླས་པ་ཇི་སྙེད་པ་དེ་སྙེད་ཀྱི་འཇིག་རྟེན་གྱི་ཁམས་མ་ལུས་པར་ཁྱབ་པའི་ཤཱཀྱ་ཐུབ་པའི་སྐུས་སེམས་ཅན་ཐམས་ཅད་ལ་ཇི་ལྟར་བསམས་པ་བཞིན་དུ་མགུ་བར་བྱེད་པའི་ཆོས་ཀྱི་དབྱིངས་རབ་ཏུ་སྟོན་ཞེས་པའོ། །དེ་བས་ན་སངས་རྒྱས་ཀྱི་བྱ་བ་བྱེད་པ་ལ་ཞུགས་ཞེས་གསུངས་པ་སྟེ། ཤཱཀྱ་ཐུབ་པའི་སྐུ་དེ་རྣམས་ཀྱིས་འཇིག་རྟེན་གྱི་ཁམས་དེ་སྙེད་དུ་དེ་ལྟར་སྣོད་དུ་གྱུར་པའི་སེམས་ཅན་མ་སྨིན་པ་ནི་ཡོངས་སུ་སྨིན་པར་བྱེད་པ་སྨིན་པ་རྣམས་གྲོལ་བར་བྱེད་པའི་སངས་རྒྱས་ཀྱི་བྱ་བ་ལ་རབ་ཏུ་ཞུགས་ཞེས་པའོ། །སངས་རྒྱས་ཀྱི་བྱ་བ་བྱེད་པ་ཤཱཀྱ་ཐུབ་པའི་སྐུ་དེ་རྣམས་སངས་རྒྱས་ཀྱི་གསུང་རྣམ་པར་བཀོད་པའི་རྒྱན་གྱི་སྙིང་པོ་ལས་བྱུང་བ་སྟེ། བཅོམ་ལྡན་འདས་ཀྱི་གསུང་གི་འཁོར་ལོས་སྤྲུལ་པའི་སངས་རྒྱས་ཀྱི་གཟུགས་ཡིན་པར་ནི་སེམས་ཅན་རྣམས་ཀྱིས་མི་ཤེས་ཀྱི། ཤཱཀྱའི་རིགས་ཀྱི་རྒྱལ་པོ་ཟས་གཙང་མའི་ལུས་ལས་འདི་ལྟར་གྱུར་ཏོ་ཞེས་ཟིན་ཏོ། །དེའི་ཕྱིར་གསང་བ་པའི་བདག་པོ་དེ་ལ་སེམས་ཅན་རྣམས་འདི་ནི་ཞེས་པ་ལ་སོགས་པ་གསུངས་པ་ཡིན་ནོ། །འོན་ཀྱང་བྱང་ཆུབ་སེམས་དཔའ་འཇིག་རྟེན་གྱི་ཁམས་མཐའ་ཡས་པ་རྒྱ་མཚོ་སྟེ་སྙེད་ཀྱི་སྒོར་ཞེས་པ་ལ་སོགས་པ་ནི་དེ་ལྟར་གསུང་གི་འཁོར་ལོ་ལས་སྦྲུལ་པའི་སྐུ་རྣམས་ཀྱིས་འཇིག་རྟེན་གྱི་ཁམས་ཐམས་ཅད་དུ་ཁྱབ་པར་སངས་རྒྱས་ཀྱི་བྱ་བ་བྱེད་པའི་ཤཱཀྱ་ཐུབ་པའི་སྐུ་རྣམས་བསྟན་ཀྱང་སེམས་ཅན་
རྣམས་ཀྱིས་སྤྲུལ་པ་དེ་དག་གི་འཁོར་ལོ་ལས་བྱུང་བར་མི་ཤེས་མོད་ཀྱི། །འོན་ཀྱང་བྱང་ཆུབ་སེམས་དཔའ་འཇིག་རྟེན་གྱི་ཁམས་མཐའ་ཡས་པ་རྒྱ་མཚོ་སྙེད་ཀྱི་སྒོར་ཞེས་པ་ལ་སོགས་པ་ལ་ཆོས་ཀྱི་དབྱིངས་མངོན་པར་རྫོགས་པར་བྱང་ཆུབ་པར་བྱ་བ་ལ་བརྩོན་པ་བྱང་ཆུབ་སེམས་དཔའ་ཀུན་དུ་བཟང་པོའི་སྤྱོད་པ་ལས་བྱུང་བ་འཇིག་རྟེན་གྱི་ཁམས་མཐའ་ཡས་པ་ནས་བྱུང་བའི་བྱང་ཆུབ་སེམས་དཔའ་རྣམས་འཇིག་རྟེན་གྱི་ཁམས་ཀྱི་རིགས་རྒྱ་མཚོ་མེ་ཏོག་གི་གཞིའི་སྙིང་པོའི་རྒྱན་ཅན་འདི་ངས་ཡོངས་སུ་བཟུང་བས་སངས་རྒྱས་ཀྱི་ཞིང་འདི་རྣམ་པ་སྣ་ཚོགས་ཀྱིས་བརྒྱན་པར་བྱེད་ཅིང་བྱང་ཆུབ་ཀྱི་སྙིང་པོ་མངོན་པར་སྒྲུབ་པ་དང་བྱང་ཆུབ་ཏུ་མངོན་པར་རྫོགས་པར་འཆང་རྒྱ་བ་ལ་སོགས་པ་ཡང་བྱང་ཆུབ་སེམས་དཔའ་དེ་རྣམས་ཀྱི་རང་བཞིན་མཐུ་འབའ་ཞིག་ཡིན་གྱི་དེའི་སངས་རྒྱས་ཀྱི་ཞིང་བརྒྱན་པར་བྱེད་པ་ལ་སོགས་པ་དེ་རྣམས་བྱེད་དོ་ཞེས་པ་སྟེ། དེ་ལྟ་བུར་མཛད་པ་ཡང་ཤཱཀྱ་ཐུབ་པའི་སྐུ་ཉིད་ཀྱིས་ཡིན་མོད་ཀྱི། གདུལ་བའི་འགྲོ་བ་བྱང་ཆུབ་སེམས་དཔའ་ཡོངས་སུ་དག་པ་དེ་དག་གིས་ནི་ཤཱཀྱ་ཐུབ་པའི་སྐུ་ཡང་ལོངས་སྤྱོད་རྫོགས་པའི་སྐུར་མཐོང་བར་འགྱུར་ཏེ། དེ་བས་ན་སྐབས་ཐ་མའི་འདི་ནི་ལོངས་སྤྱོད་རྫོགས་པའི་སྐུས་བྱང་ཆུབ་སེམས་དཔའ་དེ་རྣམས་ཀྱི་དོན་མཛད་པར་བསྟན་པར་ཤེས་པར་བྱ་སྟེ། དེ་དག་ནི་བསྡུས་པའི་དོན་ཏོ། །ཚིག་གི་དོན་ལ་འོན་ཀྱང་ཞེས་པ་ནི་དེ་བཞིན་གཤེགས་པའི་སྤྲུལ་པས་སེམས་ཅན་རྣམས་ལ་སངས་རྒྱས་ཀྱི་བྱ་བ་སྟོན་པའི་ཤཱཀྱ་ཐུབ་པའི་སྐུ་དེ་འཇིག་རྟེན་པ་རྣམས་ཀྱིས་དེ་བཞིན་གཤེགས་པའི་སྤྲུལ་པར་མི་ཤེས་མོད་ཀྱི། འོན་ཀྱང་ཤཱཀྱ་ཐུབ་པ་དེས་འོག་ནས་འབྱུང་བའི་དོན་དེ་རྣམས་ཀྱང་མཛད་དོ་ཞེས་པའི། །འཇིག་རྟེན་གྱི་ཁམས་མཐའ་ཡས་པ་རྒྱ་མཚོ་སྙེད་ཀྱི་སྒོ་ནི་བྱང་ཆུབ་སེམས་དཔའ་བཤད་པ་དེ་རྣམས་འབྱུང་བའི་གནས་ལ་བྱ་སྟེ། འཇིག་རྟེན་གྱི་ཁམས་མཐའ་ཡས་པ་དེ་དག་ཤེས་ཤིང་བརྟག་པར་དཀའ་བ་རྒྱ་མཚོ་དང་འདྲ་བའི་ཕྱིར་རྒྱ་མཚོ་ཞེས་བྱའོ། །སྒོ་ཞེས་པ་ནི་བྱང་ཆུབ་སེམས་དཔའ་དེ་རྣམས་འཇིག་རྟེན་གྱི་ཁམས་འདི་དག་ནས་འབྱུང་བའི་ཕྱིར་རོ། །
ཆོས་ཀྱི་དབྱིངས་མངོན་པར་རྫོགས་པར་བྱང་ཆུབ་པར་བྱ་བ་ལ་བརྩོན་པ་ལ་བྱང་ཆུབ་སེམས་དཔའ་ཀུན་དུ་བཟང་པོའི་སྤྱོད་པ་ལས་བྱུང་བ་ཞེས་པ་ནི་སངས་རྒྱས་ཀྱི་ཞིང་བརྒྱན་པ་ལ་སོགས་པ་བྱེད་པའི་བྱང་ཆུབ་སེམས་དཔའ་དེ་དག་གི་བྱེ་བྲག་སྟེ། ཆོས་ཀྱི་དབྱིངས་ནི་དེ་བཞིན་ཉིད་ཀྱི་ཡེ་ཤེས་ལ་བྱ་ལ། མངོན་པར་རྫོགས་པར་བྱང་ཆུབ་པར་བྱ་བ་ལ་བརྩོན་པ་ཞེས་པ་ནི་དེ་བཞིན་ཉིད་ཀྱི་ཡེ་ཤེས་ཆོས་ཀྱི་དབྱིངས་དེ་མངོན་པར་རྟོགས་པའི་ཕྱིར་བརྩོན་པ་ཞེས་པའོ། །བྱང་ཆུབ་སེམས་དཔའ་ཀུན་དུ་བཟང་པོའི་སྤྱོད་པ་ལས་བྱུང་བ་ཞེས་པ་ནི་བྱང་ཆུབ་སེམས་དཔའ་ཀུན་དུ་བཟང་པོའི་སྨོན་ལམ་ལས་སྐྱེས་པའོ། །འཇིག་རྟེན་གྱི་ཁམས་ཀྱི་རིགས་རྒྱ་མཚོའི་མེ་ཏོག་གི་གཞིའི་སྙིང་པོའི་རྒྱན་ཅན་འདི་ཞེས་པ་མི་མཇེད་ཀྱི་འཇིག་རྟེན་གྱི་ཁམས་ལ་བྱ་སྟེ། མེ་ཏོག་གི་གཞི་ཞེས་པ་ནི་འཇིག་རྟེན་གྱི་ཁམས་དེ་མེ་ཏོག་གྱིས་བརྒྱན་པའོ། །སྙིང་པོ་ཞེས་པ་ནི་འབྱུང་བའི་གནས་སོ། །རྒྱན་ཅན་ཞེས་པ་ནི་འཇིག་རྟེན་གྱི་ཁམས་མེ་ཏོག་གིས་བརྒྱན་པ་དེ་སེམས་ཅན་གང་དག་བསོད་ནམས་སྤྱད་པ་རྣམས་ཀྱི་རྒྱུད་ལ་བྱུང་བས་ན་བསོད་ནམས་ཀྱི་འབྲས་བུ་འཇིག་རྟེན་གྱི་ཁམས་དེ་ལྟ་བུར་སྐྱེ་བར་འགྱུར་ཏེ། སེམས་ཅན་དེ་དག་གིས་བརྒྱན་ཞེས་པའོ། །རིགས་རྒྱ་མཚོ་ཞེས་པ་ནི་སངས་རྒྱས་ཀྱི་ཞིང་དེ་ཡང་འཇིག་རྟེན་གྱི་ཁམས་ཀྱི་རྒྱུད་རྒྱ་མཚོའི་གྲངས་སྙེད་དང་ལྡན་པའི་སངས་རྒྱས་ཀྱི་ཞིང་ཞེས་པའོ། །ངས་ཡོངས་སུ་བཟུང་བས་ཞེས་པ་ནི་ལོངས་སྤྱོད་རྫོགས་པའི་སྐུའི་མ་ཐུས་སོ་ཞེས་པ་སྟེ། སངས་རྒྱས་ཀྱི་ཞིང་རྣམས་ནི་ཡོངས་སུ་སྦྱོང་ཞེས་པ་དང་སྦྱར་ཏེ། བསམ་པ་སྣ་ཚོགས་པ་རྣམ་པར་དག་པའི་སྒོ་རྣམས་ཀྱིས་ཞིང་རྣམས་ནི་ཡོངས་སུ་སྦྱོང་ཞེས་པ་ནི་བྱང་ཆུབ་སེམས་དཔའ་དེ་དག་གི་བསམ་པ་རྣམ་པར་དག་པ་སྣ་ཚོགས་པའི་སྒོ་ནས་སངས་རྒྱས་ཀྱི་ཞིང་ཡོངས་སུ་སྦྱོང་ངོ་ཞེས་པ་སྟེ། དེ་ཡང་བཅོམ་ལྡན་འདས་གྱི་མཐུས་སྦྱོང་བས་ཡོངས་སུ་བཟུང་བས་ཞེས་པ་དང་སྦྱར་རོ། །བྱང་ཆུབ་ཀྱི་སྙིང་པོ་ནི་མངོན་པར་བསྒྲུབ་ཅེས་པ་ནི་བྱང་ཆུབ་ཀྱི་སྙིང་པོ་འོག་མིན་གྱི་གནས་སུ་མངོན་པར་བྱང་ཆུབ་པའི་ས་དང་མིའི་གནས་སུ་བྱང་ཆུབ་ཆེན་པོར་མངོན་པར་
བྱང་ཆུབ་པའི་གནས་དག་ལ་བྱང་ཆུབ་ཀྱི་སྙིང་པོ་ཞེས་བྱ་སྟེ། དེ་དག་བྱང་ཆུབ་སེམས་དཔའི་འདི་རྣམས་ཀྱིས་ཡོངས་སུ་རྫོགས་པར་བྱེད་ཅེས་པའོ། །བྱང་ཆུབ་ཏུ་ནི་མངོན་པར་འཚང་རྒྱ་ཞེས་པ་ནི་ཉོན་མོངས་པའི་སྒྲིབ་པ་ཡོངས་སུ་བྱང་བའི་བྱང་ཆུབ་ནམ་མཁའི་མཚན་ཉིད་ལྟ་བུ་མངོན་པར་རྟོགས་པར་བྱེད་ཅེས་པའོ། །ཆོས་ཀྱི་འཁོར་ལོ་ནི་བསྐོར་ཞེས་པ་ནི་གཞུང་ལས་ཇི་སྐད་དུ་གྲགས་པའི་ཆོས་ཀྱི་འཁོར་ལོ་བསྐོར་བའོ། །སངས་རྒྱས་ཀྱི་མཛད་པ་ནི་བྱིན་གྱིས་རློབ་ཅིང་ཞེས་པ་ནི་སེམས་ཅན་ཡོངས་སུ་སྨིན་པ་དང་གྲོལ་བར་བྱེད་པའི་མཚན་ཉིད་ཅན་གྱི་སངས་རྒྱས་ཀྱི་མཛད་པ་བྱིན་གྱིས་རློབ་ཅེས་པའོ། །དེའི་གོང་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་འདོད་པས་ཞེས་པ་ནི་དེ་ལྟར་སངས་རྒྱས་ཀྱི་ཞིང་ཡོངས་སུ་སྦྱོང་བ་ལ་སོགས་པ་བྱས་ནས་ཀུན་དུ་སངས་རྒྱས་པའི་གོ་འཕང་དུ་འཕར་བར་བྱེད་པ་སྟེ། དེའི་ཚེ་ཆོས་ཐམས་ཅད་སྟོང་པ་ཉིད་དུ་རྟོགས་པའི་མཚན་ཉིད་དེ་བཞིན་ཉིད་ཀྱི་ཡེ་ཤེས་མངོན་པར་རྟོགས་ཏེ་དེ་ལྟར་མངོན་དུ་བྱེད་པ་ན་སེམས་ཚད་མེད་པ་ལ་སོགས་པ་འོག་ནས་འབྱུང་བའི་ཡོན་ཏན་རྣམས་ཐོབ་པར་འགྱུར་བ་སྟེ། དེ་ཡང༌། སེམས་ཅན་མེད་པའི་ཕྱིར་ཞེས་པ་ནས། ཚད་མེད་པ་བཞི་རབ་ཏུ་ཐོབ་པར་འགྱུར་རོ་ཞེས་པའི་བར་དུའོ། །དེ་ལ་སེམས་ཚད་མེད་པ་ནི་སེམས་ལ་རྣམ་པར་རྟོག་པ་ལ་སོགས་པ་རྣམ་པ་ཐམས་ཅད་དང་བྲལ་ཏེ་ཆོས་ཐམས་ཅད་སྟོང་པ་ཉིད་དུ་རྟོགས་པའི་སེམས་ནམ་མཁའི་རང་བཞིན་ལྟ་བུར་འགྱུར་ཏེ། ནམ་མཁའ་ནི་སྟོང་པའི་མཚན་ཉིད་ཅིས་ཀྱང་མ་གོས་ཤིང་ཐམས་ཅད་དུ་ཡང་མ་ཁྱབ་པ་མེད་པས་ཚད་གཟུང་དུ་མེད་པའོ། །དེ་བཞིན་དུ་སྟོང་པ་ཉིད་ཀྱི་རང་བཞིན་གྱི་སེམས་དེས་ཐམས་ཅད་དུ་ཁྱབ་པར་འགྱུར་བས་སེམས་ཚད་མེད་པའོ། །ལུས་ཚད་མེད་པ་ཞེས་པ་ནི་དེ་ལྟར་སེམས་ཚད་མེད་པ་ཐོབ་པས་དེ་དག་གི་ལུས་ཀྱང་སེམས་ཇི་སྙེད་པ་དེ་སྙེད་དུ་ལུས་ཀྱིས་ཁྱབ་པར་འགྱུར་ཏེ། དེ་བས་ན་ལུས་ཚད་མེད་པའོ། །ལུས་ཚད་མེད་པའི་ཕྱིར་ཡེ་ཤེས་ཚད་མེད་ཅེས་པ་ནི་དེ་ལྟར་ལུས་ཚད་མེད་པར་གྱུར་ན་ལུས་ཇི་སྙེད་པར་གྱུར་བ་དེ་དག་ཐམས་ཅད་ཡེ་ཤེས་བྱིན་གྱིས་བརླབས་པ་དང་བཅས་པར་
འགྱུར་ཏེ། ལུས་ཇི་སྙེད་པ་དེ་དག་གི་ཡེ་ཤེས་འབྱུང་བས་ན་ཡེ་ཤེས་ཚད་མེད་པ་ཞེས་བྱའོ། །ཡེ་ཤེས་ཚད་མེད་པའི་ཕྱིར་སེམས་ཅན་ཚད་མེད་ཅེས་པ་ནི་སྐུ་དང་ཡེ་ཤེས་དེ་དག་ཀྱང་སེམས་ཅན་ཇི་སྙེད་པ་དེ་སྙེད་དུ་འབྱུང་སྟེ། དེ་དག་ཚད་མེད་པས་སེམས་ཅན་ཚད་མེད་པའོ། །སེམས་ཅན་ཚད་མེད་པའི་ཕྱིར་ནམ་མཁའི་ཁམས་ཚད་མེད་པ་རབ་ཏུ་འཐོབ་པོ་ཞེས་པ་ནི་ནམ་མཁའི་ཁམས་ཇི་སྙེད་པ་སེམས་ཅན་གྱི་ཁམས་ཀྱང་དེ་སྙེད་དེ་སེམས་ཅན་གྱི་ཁམས་ཚད་མེད་པར་རྟོགས་ན་ནམ་མཁའི་ཁམས་ཀྱང་ཚད་མེད་པར་རྟོགས་པར་འགྱུར་བ་རབ་ཏུ་ཐོབ་པར་རིག་པར་བྱའོ། །གསང་བ་པའི་བདག་པོ་དེ་ལྟར་ན་སེམས་ཚད་མེད་པས་ཚད་མེད་པ་བཞི་ཐོབ་པར་འགྱུར་རོ་ཞེས་པ་ནི་ནམ་སེམས་ཅན་ཉིད་སྟོང་པ་ཉིད་ཀྱི་རང་བཞིན་ནམ་མཁའི་མཚན་ཉིད་ལྟ་བུར་གྱུར་པ་རབ་ཏུ་ཐོབ་ན་ལུས་དང་ཡེ་ཤེས་དང་སེམས་ཅན་དང་ནམ་མཁའི་ཁམས་ཀྱང་དེ་བཞིན་ཉིད་དུ་འགྱུར་པ་ཐོབ་པོ་ཞེས་པའོ། །ཐོབ་ནས་ཡང་དག་པར་རྫོགས་པའི་སངས་རྒྱས་སུ་འགྱུར་རོ་ཞེས་སྦྱར་ཏེ། དེ་ལྟར་དེ་བཞིན་ཉིད་ཀྱི་ཡེ་ཤེས་དང་སེམས་ཅན་དང་ནམ་མཁའི་ཁམས་ཀྱང་དེ་བཞིན་ཉིད་དུ་འགྱུར་བ་ཐོབ་བོ་ཞེས་པའོ། །ཐོབ་ནས་ཀྱང་ཡང་དག་པར་རྫོགས་པའི་སངས་རྒྱས་སུ་འགྱུར་རོ་ཞེས་སྦྱར་ཏེ། དེ་ལྟར་དེ་བཞིན་ཉིད་ཀྱི་ཡེ་ཤེས་མངོན་དུ་བྱས་ན་དེ་མ་ཐག་ཏུ་ཀུན་དུ་སངས་རྒྱས་པ་ཕུང་པོ་ལྷག་མ་དང་བཅས་པའི་མྱ་ངན་ལས་འདས་པའི་རང་བཞིན་གྱི་གོ་འཕང་ཐོབ་པར་འགྱུར་རོ་ཞེས་པའོ། །སྟོབས་བཅུའི་སྟོབས་དང་ལྡན་པ་བདུད་བཞི་ལས་རྒྱལ་བ་ཞེས་པ་ལ་སོགས་པ་ཞེས་པ་ནི་ཀུན་དུ་སངས་རྒྱས་པ་དེ་ཉིད་ཀྱི་བྱེ་བྲག་སྟེ་གཞུང་ལས་ཇི་སྐད་གྲགས་པའོ། །ཁྱུ་མཆོག་དང་སེང་གེའི་སྒྲ་སྒྲོགས་པ་ཞེས་པ་ནི་ཇི་ལྟར་སེང་གེའི་སྒྲས་བྱོལ་སོང་ཐམས་ཅད་ཟིལ་གྱིས་གནོན་པར་གྱུར་པ་དེ་བཞིན་དུ་བཅོམ་ལྡན་འདས་ཀུན་དུ་སངས་རྒྱས་པ་དེ་ཡང་འདུས་བྱས་ཐམས་ཅད་མི་རྟག་པ་དང་སྡུག་བསྔལ་བ་ལ་སོགས་པའི་ཆོས་ཀྱི་སྒྲ་སྒྲོགས་པས་རྟག་པ་དང་བདེ་བ་ལ་སོགས་པར་ལྟ་བའི་མུ་སྟེགས་པ་རྣམས་ཟིལ་གྱིས་གནོན་པར་འགྱུར་བ་དང༌། རྫོགས་སངས་རྒྱས་ཀྱིས་གསུངས་པ་
ཡི། །སྙིང་པོ་སྒོ་བརྒྱ་འདི་བསླབས་ནས། །གོ་འཕང་དམ་པ་འདི་དག་ཀུན། །དཔའ་བོ་དེ་དག་ཀུན་གྱིས་རྟོགས། །ཞེས་པ་ནི་གོང་དུ་སྨོས་པའི་ཡོན་ཏན་ཐམས་ཅད་བྱང་ཆུབ་སེམས་དཔའ་དཔའ་བོ་དེ་རྣམས་ཀྱིས་ཐོབ་ནས་ཀུན་དུ་སངས་རྒྱས་པའི་གོ་འཕང་དམ་པ་དེར་འཚང་རྒྱའོ། །དེ་ལྟར་ཀུན་དུ་སངས་རྒྱས་པའི་གོ་འཕང་དམ་པ་དེར་འཚང་རྒྱ་བ་ཡང་ཀུན་དུ་སངས་རྒྱས་པའི་སྙིང་པོ་ཡི་གེ་བརྒྱ་པ་དེ་བཟླས་ཤིང་བསྒོམ་པ་ཐོབ་པར་འགྱུར་ཞེས་པའོ། །ཡི་གེ་བརྒྱ་པའི་འབྲས་བུའི་སྦྱོར་བ་རྣམ་པ་གསུམ་གྱི་བྱེ་བྲག་བསྟན་པ་ཡང་རིམ་གྱིས་འཕར་བའི་ཚུལ་ཤེས་པར་བྱ་སྟེ། ས་བཅུ་གཅིག་པའི་བྱང་ཆུབ་སེམས་དཔའ་སངས་རྒྱས་ཞེས་བྱ་བ་དེ་དག་ས་བཅུ་གཅིག་པ་ལ་གནས་པ་ལས་བཅོམ་ལྡན་འདས་ཀྱི་འོད་ཀྱིས་བསྐུལ་ཏེ་དམ་ཚིག་གསུམ་གྱི་ལམ་ལ་ཞུགས་པ་ནས་ས་བཅུ་གཅིག་པ་དེ་ལས་འཕར་ཏེ། ཡེ་ཤེས་ཆེན་པོ་མངོན་པར་ཤེས་པར་དབང་བསྐུར་བ་དང་ལྡན་པའི་ས་ལ་གནས་པར་ཤེས་པར་བྱའོ། །དེ་ནས་ཀུན་དུ་སངས་རྒྱས་ཀྱི་གཟུགས་སུ་གྱུར་ཅིང་སངས་རྒྱས་ཀྱི་མཛད་པ་བསྟན་པ་དང༌། དེ་བཞིན་གཤེགས་པའི་སྤྲུལ་པའི་སྐུ་ཤཱཀྱ་ཐུབ་པས་སྤྱིར་སངས་རྒྱས་ཀྱི་མཛད་པ་སྟོན་པ་ན་བྱང་ཆུབ་སེམས་དཔའ་དེ་དག་ཀུན་དུ་བཟང་པོའི་ས་ལ་གནས་པར་ཤེས་པར་བྱའོ། །བྱང་ཆུབ་སེམས་དཔའ་ཀུན་དུ་བཟང་པོའི་སྤྱོད་པ་ལས་བྱུང་ཞིང་ལོངས་སྤྱོད་རྫོགས་པའི་སྐུས་བ་ཏང་སྟེ་སངས་རྒྱས་ཀྱི་ཞིང་སྤྱོད་པ་ན་ཀུན་དུ་སངས་རྒྱས་པའི་ས་མ་ཐོབ་ཀྱི་བར་དུ་ཀུན་དུ་བཟང་པོའི་ས་ལས་ནི་འཕར། ཀུན་དུ་སངས་རྒྱས་པའི་ས་ལ་ནི་འཇུག་པའི་སྟེགས་བུའི་ས་ལ་གནས་པར་ཤེས་པར་བྱའོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། འབྲས་བུའི་སྦྱོར་བ་བསྟན་པ་རིམ་པར་ཕྱེ་བ་རྒྱས་པའོ།། །།སྤྱིར་གདུལ་བའི་འགྲོ་བ་རྟོགས་པ་གཙོ་བོར་གྱུར་པ་ཡོངས་སུ་དག་པ་དང་ལུང་གི་ཆོས་ལ་གནས་པ་ཡོངས་སུ་མ་དག་པ་སྟེ་རྣམ་པ་གཉིས་སོ། །དེ་ལ་ཡི་གེ་བརྒྱ་པའི་འབྲས་བུ་སྦྱོར་བ་བསྟན་
པའི་རིམ་པར་ཕྱེ་བ་ནི་ཡོངས་སུ་དག་པའི་གདུལ་བའི་འགྲོ་བ་རྣམས་ཀྱི་དོན་མཛད་པ་བསྟན་པའོ། །རིམ་པར་ཕྱེ་བ་འདིར་ནི་ཡོངས་སུ་མ་དག་པའི་འགྲོ་བ་རྣམས་ཀྱི་དོན་མཛད་པ་བསྟན་པ་སྟེ། གང་གི་ཕྱིར་བཅོམ་ལྡན་འདས་ཀྱི་རྒྱུ་དང་འབྲས་བུའི་ཡོན་ཏན་རྣམས་ཀུན་དུ་སངས་རྒྱས་པའི་སྙིང་པོ་ཡི་གེ་བརྒྱ་པའི་མཚན་ཉིད་ཨཾ་ཞེས་པའི་གཟུགས་སུ་བྱིན་གྱིས་བརླབས་པའི་དེའི་འོག་ཏུ་འབྱུང་བའི་རིམ་པར་སྒྲུབ་པ་པོས་རང་གི་སྙིང་གར་བསམས་ཏེ་ཀུན་དུ་སངས་རྒྱས་པའི་སྐུར་བསྒྲུབ་པའི་ཕྱིར། །དེ་ནས་ཡང་བཅོམ་ལྡན་འདས་ལ་གསང་བ་པའི་བདག་པོ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ་ཞེས་པ་ལ་སོགས་པ་གསུངས་པ་ཡིན་ཏེ། དེ་ལ། སྔགས་རྣམས་ཀྱི་ནི་སྔགས་འབྱུང་བའི། །སྔགས་ཀྱི་མགོན་པོ་འདི་བཤད་པ། །ངོ་མཚར་ཆེའོ་བཅོམ་ལྡན་འདས། །ཞེས་པ་ནི་ཡི་གེ་བརྒྱ་པའི་རང་བཞིན་གོང་དུ་བཤད་པ་དེ་ཡོན་ཏན་དང་མཐུ་ཆེ་བས་ངོ་མཚར་ཆེའོ་ཞེས་པའོ། །སྔགས་ཀྱི་མགོན་པོ་ཞེས་པ་དང་སྔགས་འབྱུང་བ་ཞེས་པ་ཡང་སྙིང་པོ་དེ་ཉིད་ཀྱི་བྱེ་བྲག་སྟེ་སྔར་བཤད་པ་བཞིན་ནོ། །ཐུབ་པ་ཆེན་པོ་གནས་གང་དུ། །གང་གིས་ཇི་ལྟར་འཚལ་བར་བགྱི། །ཞེས་པ་ནི་ཡི་གེ་བརྒྱ་པ་རྣམ་པར་དགོད་པ་སྒྲུབ་པའི་རིམ་པར་ཕྱེ་བ་ཞེས་པ་སྟེ། གང་གིས་ཞེས་པ་ནི་སྒྲུབ་པ་པོ་ཅི་འདྲ་བས་འཚལ་བར་བགྱི་ཞེས་པ། གང་དག་ཐེག་ཆེན་དཀྱིལ་འཁོར་ནི། །སྙིང་རྗེ་འབྱུང་བར་དབང་བསྐུར་ཞིང༌། །ཞེས་པ་ལ་སོགས་པ་སྒྲུབ་པ་པོའི་མཚན་ཉིད་འོག་ནས་བཤད་པ་དང་སྦྱར་རོ། །ཇི་ལྟར་ཞེས་པ་ནི་སྙིང་པོ་དེ་ཅི་འདྲ་བར་རིག་པར་བགྱི་ཞེས་པ་སྟེ། གསེར་གྱི་ཁ་དོག་འབར་དང་བཅས། །ཞེས་པ་ལ་སོགས་པ་དང་སྦྱར་རོ། །ཐུབ་པ་ཆེན་པོ་གནས་གང་དུ། །ཞེས་པ་ནི་སྙིང་པོ་དེ་གནས་གང་དུ་དགོད་པར་བགྱི་ཞེས་པ་སྟེ། དེ་ཡི་གནས་ནི་སྙིང་ག་སྟེ། །ཞེས་པ་དང་སྦྱར་རོ། །དེ་ལས་སྔགས་རྣམས་འབྱུང་བ་ནི། །གང་གིས་ཇི་ལྟར་བདག་ལ་གསུངས། །ཞེས་པ་ནི་བདག་ཉིད་སྒྲུབ་པ་རིམ་པར་ཕྱེ་བ་བྲིས་པ་སྟེ། སྙིང་པོ་ཡི་གེ་བརྒྱ་པ་དེ་ལས་སྔགས་ཕལ་རྣམས་འབྱུང་ན་རྒྱུ་གང་དང་ཐབས་ཇི་ལྟ་བུས་འབྱུང་ཞེས་པ་སྟེ། འོད་ཟེར་སྐུ་ལས་
བྱུང་བ་རྣམས། །ཡན་ལག་གིས་ནི་ཡན་ལག་གནས། །ཞེས་པ་ལ་སོགས་པ་བདག་ཉིད་སྒྲུབ་པ་ལས་ཆད་པར་འགྱུར་བ་དང་སྦྱར་རོ། །མགོན་པོ་སྨྲ་བ་རྣམས་ཀྱི་མཆོག །འདི་ཀུན་བདག་ལ་བཤད་དུ་གསོལ། །ཞེས་པ་ནི་གོང་དུ་ཞུས་པ་དེ་རྣམས་བཀའ་སྩོལ་ཅིག་ཅེས་པའོ། །སྨྲ་བ་རྣམས་ཀྱི་མཆོག་ཅེས་པ་ནི་སྟོང་པའི་ཚིག་སྟེ་སྨྲ་བ་རྣམས་ཀྱི་ནང་ན་དམ་པ་ཞེས་པའོ། །དེ་སྐད་ཅེས་གསོལ་ནས་བཅོམ་ལྡན་འདས་ཞེས་པ་ལ་སོགས་པ་ནི་གོང་དུ་ཞུས་པ་དེ་རྣམས་སླར་འཆད་པ་སྟེ། ཆོས་ཀྱི་དབང་ཕྱུག་ཐུབ་པ་ཆེ། །ཞེས་པ་ནི་བཅོམ་ལྡན་འདས་ཀྱི་བྱེ་བྲག་སྟེ། ལུང་དང་རྟོགས་པའི་ཆོས་ལ་དབང་དུ་གྱུར་ཅིང་ལུས་དང་ངག་དང་ཡིད་གསུམ་ཐུབ་པའོ། །ཀུན་མཁྱེན་བཅོམ་ལྡན་སྣང་མཛད་ཀྱི། །དེ་ཚེ་འཇིག་རྟེན་ཁམས་ཀུན་དུ། །ཡོངས་སུ་ཁྱབ་པར་འགྱུར་བའི་ཚིག །འཇམ་དཔལ་གསུང་གིས་བཀའ་སྩལ་པ། ཞེས་པ་ནི་བཅོམ་ལྡན་འདས་རྣམ་པར་སྣང་མཛད་ཐམས་ཅད་མཁྱེན་པས་འཇིག་རྟེན་གྱི་ཁམས་མ་ལུས་པ་ཐམས་ཅད་ཁྱབ་པའི་ཚིག་ཏུ་གསུངས་སོ་ཞེས་པ་ཚིག་དེ་ཡང༌། སེམས་དཔའ་ཆེན་པོ་ལེགས་སོ་ལེགས་སོ་ཞེས་པ་ལ་སོགས་པའོ། །རབ་ཏུ་གསང་ཞེས་པ་ནི་སེམས་ལས་བྱུང་བའི་མཚན་ཉིད་ཤིན་ཏུ་ཕྲ་བ་ཞེས་པའོ། །ངོ་མཚར་ཆེན་པོ་ཞེས་པ་ནི་ཡིག་འབྲུ་སེམས་ཀྱིས་བསམས་པ་ལས་ཀུན་དུ་སངས་རྒྱས་པའི་སྐུ་ལ་སོགས་པར་འགྱུར་བས་ངོ་མཚར་ཆེ་ཞེས་པའོ། །སངས་རྒྱས་རྣམས་ཀྱི་གསང་བའི་མཆོག །ཅེས་པ་ནི་སྙིང་པོ་དེའི་དོན་དམ་པ་དང་ཀུན་རྫོབ་ཀྱི་རང་བཞིན་སེམས་ཅན་རྟོག་གེ་བ་རྣམས་ཀྱི་རྗེས་སུ་དཔག་པའི་སོགས་པའི་སྒོ་ནས་བརྟགས་པས་མི་རྟོགས་པས། སངས་རྒྱས་རྣམས་ཀྱི་གསང་བའི་མཆོག །ཅེས་བྱ་སྟེ། དེ་བས་ན། རྟོག་གེ་ཀུན་གྱིས་མི་ཤེས་པ། །ཞེས་གསུངས་སོ། །གང་དག་ཐེག་ཆེན་དཀྱིལ་འཁོར་ནི། །སྙིང་རྗེ་འབྱུང་བར་དབང་བསྐུར་ཞིང༌། །ཞེས་པ་ནས། བདག་ཉིད་ཆེན་པོ་ཤེས་པར་འགྱུར། །ཞེས་པའི་བར་གྱིས་གང་གིས་འཚལ་པར་གྱུར་པ་ཞུས་པའི་ལན་བཤད་པ་སྟེ། ཐེག་པ་ཆེན་པོའི་དཀྱིལ་འཁོར་སྙིང་རྗེ་ཆེན་པོ་འབྱུང་
བ་ཞེས་བྱ་བ་དེར་དབང་བསྐུར་ཞིང་ཞི་གནས་དང་ལྷག་མཐོང་དང་ལྡན་པའི་སྒྲུབ་པ་པོས་སྙིང་པོ་འདི་ཤེས་པར་འགྱུར་ཞེས་པ་ནི་སྤྱིའི་དོན་ཏོ། །ཡན་ལག་གི་དོན་ནི། གང་དག་ཐེག་ཆེན་དཀྱིལ་འཁོར་ནི། །སྙིང་རྗེ་འབྱུང་བར་དབང་བསྐུར་ཞིང༌། །ཞེས་པ་ནི་སྒྲུབ་པ་པོ་གང་ཇི་སྙེད་ཆེན་པོ་འབྱུང་བའི་དཀྱིལ་འཁོར་དུ་དབང་བསྐུར་བ་དེས་སྙིང་པོ་འདི་ཤེས་པར་འགྱུར་ཞེས་པ་སྟེ། ཐེག་པ་ཞེས་པ་ནི་འགྲོ་པའི་ཚིག་སྟེ། རང་བཞིན་གྱི་དཀྱིལ་འཁོར་སྐུ་ལ་སོགས་པ་མི་ཟད་པའི་མཚན་ཉིད་འདིར་འགྲོ་བའམ། གཟུགས་བརྙེན་གྱི་དཀྱིལ་འཁོར་འདིའི་སྒོ་ནས་འདིས་འགྲོ་བར་འགྱུར་བ་སྟེ། སྙིང་རྗེ་འབྱུང་བའི་དཀྱིལ་འཁོར་འདི་ལ་བྱའོ། །ཆེན་པོ་ཞེས་པའི་ཚིག་ནི་སྤྱིར་གསུངས་མོད་ཀྱི། འོན་ཀྱང་སྐབས་འདིར་ནི་ལུས་ཀྱི་དཀྱིལ་འཁོར་དང་ངག་གི་དཀྱིལ་འཁོར་གཉིས་ཀུན་རྫོབ་ཀྱི་མཚན་ཉིད་ཡིན་པས་ཆེན་པོ་ཞེས་མི་བྱའི། སེམས་ཀྱི་དཀྱིལ་འཁོར་དོན་དམ་པའི་རང་བཞིན་ཡིན་པས་དེ་ལ་ཆེན་པོ་ཞེས་བྱ་སྟེ། མདོར་ན་གསང་པའི་དཀྱིལ་འཁོར་དུ་དབང་བསྐུར་བ་ཞེས་པའོ། །གསང་བའི་དཀྱིལ་འཁོར་དེར་དབང་བསྐུར་ན་སྔར་བཤད་པའི་ཚུལ་གྱིས་དམ་ཚིག་ལྔ་ཆར་དང་ལྡན་ཞིང་དབང་གསུམ་ཆར་དང་ལྡན་པར་འགྱུར་ཏེ། དེ་ལྟར་དཀྱིལ་འཁོར་གསུམ་ཆར་ལ་རིམ་པ་བཞིན་དུ་བསླབས་པ་ཡོངས་སུ་རྫོགས་པའི་སྒྲུབ་པ་པོར་འགྱུར་བའི་ཕྱིར་རོ། །གང་དག་དྲང་ཞིང་མཉེན་པ་དང༌། །ཞེས་པ་ནི་སྒྲུབ་པ་པོ་དེ་གསང་བའི་དཀྱིལ་འཁོར་དུ་དབང་བསྐུར་བ་འབའ་ཞིག་གིས་ཆོག་པ་མ་ཡིན་གྱི། སྐབས་འདིར་ནི་སྒྲུབ་པ་པོ་གོང་མ་དག་ལྟར་བཟླས་པ་ལས་བྱུང་བའི་སྒྲུབ་པའི་སྤྱོད་ཡུལ་ཅན་ཏེ། དྲང་ཞིང་ཞེས་པ་ནི་སེམས་ལ་གཡོ་དང་གྱ་གྱུར་མེད་པ་ཞེས་པའོ། །མཉེན་པ་ཞེས་པ་ནི་ཁེངས་པ་དང་ཞེ་སྡང་མེད་པ་སྟེ། གང་དག་དྲང་ཞིང་མཉེན་པ་ནི་ཏིང་ངེ་འཛིན་དང་རྗེས་སུ་མཐུན་པས་ཞི་གནས་དང་ལྡན་པར་བསྟན་པའོ། །རྟག་ཏུ་སྙིང་རྗེ་གང་ཆེ་དང༌། །གང་དག་ནམ་ཡང་བྱང་ཆུབ་ལ། །དམིགས་པ་ཅན་དུ་མི་ལྟ་བ། །ཞེས་པ་ནི་ཤེས་རབ་མེད་པར་ཞི་གནས་འབའ་ཞིག་ཏུ་གྱུར་ན་དམིགས་པར་འགྱུར་ཏེ།
སྙིང་རྗེས་སེམས་ཅན་ཐམས་ཅད་སྡུག་བསྔལ་དང་བྲལ་བར་བྱེད་ཅིང་དེ་བཞིན་ཉིད་ཀྱི་ཡེ་ཤེས་རང་བཞིན་བྱང་ཆུབ་ཀྱི་སེམས་དེས་དངོས་པོ་དམིགས་པར་བལྟ་ཞིང་སྟོང་བ་ཉིད་རྟོགས་པའི་ལྷག་མཐོང་དང་ལྡན་པར་གསུངས་པ་ཡིན་ཏེ། དེ་ལྟར་ལྷག་མཐོང་དང་ཞི་གནས་དང་ལྡན་པ་དེ་དག་གི་སྙིང་པོ་བདག་ཉིད་ཆེན་པོ་འདི་ཤེས་པར་འགྱུར་རོ་ཞེས་པའོ། །འདྲེན་པ་གང་ན་བཞུགས་པ་ཡི། །ཞེས་པ་ནས། མཐུ་ཆེན་རྟག་ཏུ་གནས་པ་བཞུགས། །ཞེས་པའི་བར་ནི། མཐུ་ཆེན་པོ་གནས་གང་དུ། ཞེས་ཞུས་པའི་ལན་བཤད་པ་སྟེ། སྒྲུབ་པ་པོས་དང་པོར་སངས་རྒྱས་དང་བྱང་ཆུབ་སེམས་དཔའ་ཐམས་ཅད་མངོན་དུ་བསམས་ཏེ། ཕྱག་བྱས་ནས་དེ་དག་གི་སྤྱན་སྔར་སྡིག་པ་བཤགས་པ་ལ་སོགས་པ་དང༌། དམ་ཚིག་གི་ཕྱག་རྒྱ་བཅིངས་པ་ལ་སོགས་པ་བཞིན་དུ་བྱ་སྟེ། རང་གི་སྙིང་གར་པདྨ་དཀར་པོ་འདབ་མ་བརྒྱད་པ་བསམས་ལ། དེའི་སྟེང་དུ་རླུང་གི་དཀྱིལ་འཁོར་མེ་ལོང་ལྟ་བུར་གསལ་བར་བསམ་ཞིང་དེའི་དབུས་སུ་བཅོམ་ལྡན་འདས་ཡི་གེ་བརྒྱ་པ་ཨཾ་ཞེས་པ་བསམས་ཏེ། དེ་ཡང་མེ་ལོང་གི་ནང་ན་གཟུགས་བརྙན་སྣང་བ་བཞིན་དུ་དེ་ཉིད་དུ་ཞི་བར་བལྟ་སྟེ། དེ་ནི་གནས་པའི་བསྡུས་པའི་དོན་ཏོ། །ཚིག་གི་དོན་ལ། འདྲེན་པ་གང་ན་བཞུགས་པ་ཡི། །དེ་ཡི་གནས་ནི་སྙིང་ག་སྟེ། །ཞེས་པ་ནི་འདྲེན་པ་དེའི་གནས་ནི་སྒྲུབ་པ་པོའི་སྙིང་གར་བྱའོ་ཞེས་པའོ། །པདྨ་ཡིད་ལས་བྱུང་བ་ནི། འདབ་མ་བརྒྱད་པར་བ་མཛེས་ལ། །ཞེས་པ་ནི་འདྲེན་པ་དེའི་གནས་སྙིང་ག་ཞེས་བྱ་བ་དེ་ཡང་ཡིད་ཀྱིས་བསམ་པའི་པདྨ་འདབ་མ་བརྒྱད་པ་ཤིན་ཏུ་གསལ་ཞིང་དཀར་བ་སྙིང་གར་བསམས་ལ་དེའི་སྟེང་དུ་ཟླ་བའི་དཀྱིལ་འཁོར་བསམས་ཏེ། དེའི་དབུས་སུ་འདྲེན་པ་དེ་བསམ་ཞེས་པ་སྟེ་དེ་བས་ན། དཀྱིལ་འཁོར་ཟླ་བ་ལྟ་བུ་ནི། །ཞེས་གསུངས་པ་ཡིན་ནོ།། དྲི་མེད་མེ་ལོང་འདྲ་བ་ལ། །ཞེས་པ་ནི་ཟླ་བ་ཡང་དཀར་མོད་ཀྱི་དྲི་མ་རབ་རིབ་ཀྱིས་མི་སྣང་བས་དེ་ལས་གསལ་བར་བསམ་པར་བྱ་བའི་ཕྱིར། མེ་ལོང་ལྟར་ཤིན་ཏུ་དྲི་མ་མེད་ཅིང་གཟུགས་བརྙན་འཆར་བ་ལ་སྙིང་པོ་དེ་བསམ་ཞེས་པའོ། །མཐུ་ཆེན་རྟག་ཏུ་གནས་པ་བཞུགས།།
ཞེས་པ་ནི་མེ་ལོང་ལ་སྙིང་པོ་དེ་རྟག་པར་གནས་ཤིང་བཞུགས་པར་བྱའོ་ཞེས་པ་སྟེ། རྟག་པར་གནས་ཞེས་པ་ནི་དོན་དམ་པའི་རང་བཞིན་དང་ཀུན་རྫོབ་ཀྱི་སྐུའི་རང་བཞིན་ལ་བསྟོད་པ་སྟེ། དོན་དམ་པའི་རང་བཞིན་དེ་བཞིན་ཉིད་ཀྱི་ཡེ་ཤེས་དེ་མི་འགྱུར་པར་ཡོངས་སུ་གྲུབ་པའི་ཚུལ་གྱིས་རྟག་པར་གནས་པ་ཞེས་བྱ་ལ། ཀུན་རྫོབ་ཏུ་སྐུའི་རང་བཞིན་དུ་ཡང་བཅོམ་ལྡན་འདས་ཀྱི་སྐུ་མི་ཟད་པའི་རྒྱན་དེ་སྔོན་གྱི་ཤུགས་ཀྱིས་འཁོར་བའི་མཐའ་ཇི་སྲིད་པ་དེ་སྲིད་དུ་སེམས་ཅན་རྣམས་ཀྱི་དོན་གྱི་ཕྱིར་ཕྱིན་ཅི་མ་ལོག་པར་ཡོངས་སུ་གྲུབ་པའི་ཚུལ་གྱིས་རྟག་པར་བཞུགས་པའོ། །ཡང་ན་སྒྲུབ་པ་པོ་ཇི་སྲིད་ཏིང་ངེ་འཛིན་ལ་གནས་པ་དེ་སྲིད་དུ་སྙིང་པོ་དེ་ཡང་མི་གཡོ་བར་རྟག་པར་གནས་པར་བྱའོ། །དེ་ལས་གསང་སྔགས་མགོན་པོ་ནི། །ཞེས་དང༌། གསེར་གྱི་ཁ་དོག་འབར་བ་དང་བཅས། །སྡིག་དང་བྲལ་བའི་ཏིང་འཛིན་གནས། །ཉི་མ་བཞིན་དུ་བརྟག་པར་དཀའ། །ཞེས་པ་ནི་ཇི་ལྟར་འཚལ་བར་བགྱི་ཞེས་ཞུས་པའི་ལན་བཤད་པ་སྟེ། གསེར་གྱི་ཁ་དོག་འབར་དང་བཅས། །ཞེས་པ་ནི་སྙིང་པོའི་ཁ་དོག་གསེར་འདྲ་བ་ལ་འོད་འཕྲོ་བ་དང་བཅས་པ་ཞེས་པའོ། །སྡིག་དང་བྲལ་བ་ཞེས་པ་ནི། འབྲས་བུའི་རང་བཞིན་ལ་བསྟོད་བ་སྟེ། ཤེས་བྱ་དང་ཉོན་མོངས་པ་ལ་སོགས་པའི་སྡིག་པའི་རྟོག་པ་དང་བྲལ་ཞེས་པའོ། །ཏིང་འཛིན་གནས་ཞེས་པ་ནི་ཏིང་ངེ་འཛིན་གྱི་ཡེ་གེའི་འབྲུ་དབྱི་བ་མི་སྲིད་དེ། །དེ་བས་ན་སྒྲུབ་བའི་ཏིང་ངེ་འཛིན་དུ་འདུག་པ་ལ་སྙིང་པོ་དེ་གནས་ཞེས་བྱའོ། །ཉི་མ་བཞིན་དུ་བརྟག་པར་དཀའ། །ཞེས་པ་གཟི་བརྗིད་དང་ལྡན་པར་བསམ་པར་གསུངས་པ་སྟེ། ཇི་ལྟར་ཉི་མ་འོད་ཟེར་གྱིས་བསྐོར་བ་ལ་མིག་མི་ཆགས་ཤིང་བལྟ་བར་མི་བཟོད་པ་བཞིན་སྙིང་པོ་འདི་ཡང་རང་ལས་འཕྲོས་པའི་འོད་ཀྱིས་བསྐོར་ཞིང་བལྟ་དཀའ་བར་བསམ་ཞེས་པ་སྟེ། དོན་ནི་མདོར་ན་སྙིང་གར་མེ་ལོང་གི་དཀྱིལ་འཁོར་དེའི་དབུས་སུ་སྙིང་པོ་ཁ་དོག་གསེར་འདྲ་བ་དང་བཅས་ཏེ་འཕྲོས་པའི་འོད་ཀྱིས་སྒྲུབ་པ་པོའི་ལུས་ཁྱབ་པར་བསམ་ཞིང་འོད་འཕྲོ་བ་དེ་དག་ཉིད་འདུས་པ་ལས་རང་གི་ལུས་ཤིན་ཏུ་སངས་རྒྱས་བའི་སྐུར་གྱུར་པར་བསམས་ཏེ། དེ་ལྟར་གྱུར་པ་ན་
ཡང་ཟླ་བའི་དཀྱིལ་འཁོར་ལ་གནས་པའི་སྙིང་པོ་ཡང་སྔ་མ་བཞིན་དུ་སྙིང་ག་ན་གནས་པར་བསམ་ཞེས་པའོ། །དེ་བས་ན། དེ་ཡིས་འགྲོ་བ་འདི་དག་ཀུན། །ཕྱི་རོལ་དང་ནི་ནང་དུ་ཡང༌། །ཀུན་དུ་ཁྱབ་པར་བྱིན་གྱིས་བརླབས། །ཞེས་གསུངས་པ་ཡིན་ཏེ། འགྲོ་བ་འདི་དག་ཀུན་ཞེས་པ་ནི་སྒྲུབ་པ་པོའི་ཕུང་པོ་ལྔ་པོ་འདི་དག་ཀུན་སྙིང་པོ་འདིས་ཀུན་དུ་ཁྱབ་པར་བྱིན་གྱིས་བརླབས་ཞེས་པའོ། །དེ་ལ་ཕྱི་རོལ་གྱི་བྱིན་གྱིས་བརླབས་པ་ནི་ཕྱིའི་ལུས་ཀུན་དུ་སངས་རྒྱས་པའི་སྐུར་གྱུར་པའོ། །ནང་གི་བྱིན་གྱིས་བརླབས་པ་ནི་སྙིང་གར་ཟླ་བའི་དཀྱིལ་འཁོར་ལ་གནས་པའོ། །ཡང་ན་འགྲོ་བ་འདི་དག་ཀུན། །ཞེས་པ་ནི་འཕགས་པ་འཇམ་དཔལ་དང་སྤྱན་རས་གཟིགས་ཀྱི་དབང་པོ་ལ་སོགས་པ་སྔགས་ཀྱི་ལྷ་རྣམས་ལ་བྱ་སྟེ། དེ་དག་ཐབས་འདིས་ཀུན་དུ་ཁྱབ་པ་སྟེ། ཕྱིའི་གཟུགས་དེ་དག་གི་གཟུགས་སུ་བསྒྱུར་བ་དང༌། ནང་གི་ཡི་གེ་ཨ་ལ་སོགས་པ་ཟླ་བའི་དཀྱིལ་འཁོར་ལ་བསམ་པར་བྱ་བ་ཡང་སྙིང་པོ་འདིས་བྱིན་གྱིས་བརླབས་པ་ལས་བྱུང་བའི་ཕྱིར་རོ། །དེ་ལྟར་རང་གི་ལུས་ཀུན་དུ་སངས་རྒྱས་པའི་སྐུར་བསྒྱུར་བ་སྙིང་གར་ཟླ་བའི་དཀྱིལ་འཁོར་ལ་སྙིང་པོ་དང་བཅས་པ་བསམས་ཤིང་བསྒོམས་ན་ཀུན་དུ་སངས་རྒྱས་པའི་སྐུ་དང་ལྡན་པའི་རིག་པ་འཛིན་པར་འགྱུར་རོ། །དེ་ལྟར་ན་དེའི་ལུས་མཐོང་བ་དང་དེས་སྨྲས་པ་དང་བསམ་པའི་སེམས་ཅན་སྐལ་པ་དང་ལྡན་པ་རྣམས་ཇི་ལྟར་བསམ་པའི་དོན་རྣམས་འགྲུབ་པར་འགྱུར་རོ་ཞེས་འོག་ནས་འབྱུང་བ་དང་སྦྱར་རོ། །མེ་ལོང་ནང་དུ་ཤེས་པར་བྱོས། །ཞེས་པ་ནས། བདག་གི་ལས་ཀྱིས་འབྱུང་བར་འགྱུར། །ཞེས་པའི་བར་ནི་སྙིང་གར་ཟླ་བའི་དཀྱིལ་འཁོར་ཡང་མེ་ལོང་ཉིད་དུ་ཤེས་པར་བྱའོ་ཞེས་པ་ནས་ཡི་གེ་བསམ་པ་དེ་ལས་ཀུན་དུ་སངས་རྒྱས་པའི་སྐུར་བསྒྱུར་བར་བྱ་བའི་ཐབས་བསྟན་པ་སྟེ། མེ་ལོང་ཡིད་དུ་ཤེས་པར་བྱོས། །ཞེས་པ་ནི་སྙིང་གར་མེ་ལོང་བསམ་པ་དེ་ནི་མེ་ལོང་གི་དངོས་པོ་གཞན་མ་ཡིན་གྱི། རྣམ་པ་དང་བཅས་པའི་སེམས་ནི་ཡིད་ཅེས་བྱ་སྟེ། ཡིད་དེ་ཉིད་མེ་ལོང་གི་དཀྱིལ་འཁོར་གྱི་རྣམ་པར་འགྱུར་བར་ཤེས་པར་བྱོས་ཤིག་ཅེས་པའོ། །ཤེས་རབ་མིག་ཀྱང་དེ་
ཉིད་དེ། །ཞེས་པ་ནི་མེ་ལོང་གི་དཀྱིལ་འཁོར་དུ་གྱུར་པའི་སྐད་ཅིག་ཕྱི་མ་ལ་གསལ་བར་རྟོག་ཅིང་ཡོངས་སུ་དཔྱོད་པའི་ངང་ཚུལ་གྱིས་སེམས་འབྱུང་བ་ནི་ཤེས་རབ་ཅེས་བྱ་སྟེ། ཤེས་རབ་སྙིང་པོ་ལ་རྟོག་པས་ན་ཡིད་ཅེས་བྱའོ། །སྔགས་པ་ཤེས་རབ་མིག་གིས་སུ། །མེ་ལོང་ལ་ནི་རྣམ་བལྟས་ན། །དེ་ནི་རང་གཟུགས་རྫོགས་སངས་རྒྱས། །མཚན་ཉིད་རབ་ཏུ་ཞི་བར་མཐོང༌། །ཞེས་པ་ནི་སྐད་ཅིག་མ་ཕྱི་མའི་ཤེས་རབ་ཀྱི་སྙིང་པོ་དང་བཅས་པའི་ཟླ་བའི་དཀྱིལ་འཁོར་ལ་རྩེ་གཅིག་ཏུ་རྟོག་པའི་ཚེ་གོང་དུ་བཤད་པའི་ཚུལ་དུ་སྙིང་པོ་དེའི་འོད་འཕྲོས་ཏེ་འདུས་པ་ལས་རང་གི་གཟུགས་ཀུན་དུ་སངས་རྒྱས་པའི་སྐུའི་མཚན་ཉིད་དུ་གྱུར་པར་མཐོང་བ་ཞེས་པའོ། །དེ་བས་ན། དེའི་ཚེ་ལུས་ལ་ལུས་ཀྱི་གཟུགས། །ཞེས་གསུངས་ཏེ། བདག་གི་ལུས་ལ་བཅོམ་ལྡན་འདས་ཀྱི་སྐུའི་གཟུགས་སུ་བྱའོ་ཞེས་པ་སྟེ། དེ་ནི་ཕྱི་རོལ་གྱི་ལུས་སངས་རྒྱས་ཀྱི་སྐུར་སེམས་པའི་ཐབས་སོ། །ཡིད་ལས་ཡིད་ལས་བྱུང་བ་ནི། །ཞེས་པ་བདག་གི་ཡིད་ལས་བྱུང་བའི་མེ་ལོང་གི་དཀྱིལ་འཁོར་སྙིང་པོ་དང་བཅས་པ་བསམ་ཞེས་པ་སྟེ། དེ་ནི་ཕྱི་རོལ་གྱི་ལུས་སངས་རྒྱས་ཀྱི་སྐུར་བསྒྱུར་བའི་ཚེ་ནང་དུ་ཡང་སྙིང་པོ་དང་བཅས་པའི་ཟླ་བའི་དཀྱིལ་འཁོར་བསམ་ཞེས་པའོ། །དག་ཅིང་རྣམ་པར་མཛེས་པ་དག །བདག་གི་ལས་ཀྱིས་བྱང་བར་གྱུར། །ཞེས་པ་ནི་ཕྱི་དང་ནང་གཉིས་ཀ་དེ་ལྟར་བསྒོམས་ན་ཕྱིའི་ལུས་ཀུན་སངས་རྒྱས་པའི་སྐུ་རྣམ་པར་མཛེས་ཤིང་དག་པར་གྱུར་པ་དང་ནང་གི་ཡིད་ལ་ཡང་སྙིང་པོ་དང་བཅས་པའི་ཟླ་བའི་དཀྱིལ་འཁོར་གསལ་ཞིང་དག་པ་སྟེ། དག་པ་དེ་དག་ནི་བདག་གི་ལུས་སྐུར་བསམ་པ་དང་ནང་གི་སྙིང་པོ་བསམ་པའི་བདག་གི་ལས་བྱས་པ་ལས་བྱུང་ངོ་ཞེས་པའོ། །དག་པ་ཞེས་པ་ཡང་སྐབས་འདིར་ཡེ་ཤེས་ལ་སོགས་པ་དག་པའི་མཚན་ཉིད་ལ་མི་བྱའི། ཕྱི་དང་ནང་གི་གཟུགས་དེ་དག་གསལ་བའི་སྒོ་ནས་དག་པའོ། །རང་གི་ལས་ཞེས་པ་ཡང་ཚེ་རབས་སྔ་མའི་དགེ་བ་ལ་སོགས་པ་ལ་མི་བྱའི་ཕྱི་དང་ནང་གི་གཟུགས་འདི་དག་སྐྱེད་པའི་སྦྱོར་བའི་ལས་བྱའོ། །དེ་ནས་དེ་ཡི་འོད་ཟེར་ནི། །གང་གིས་སྔགས་པ་སངས་རྒྱས་ཀྱི། །
སྤྱོད་པ་ཐམས་ཅད་རབ་བྱེད་པ། །ཀུན་ནས་རྣམ་པར་སྣང་བར་འགྱུར། །ཞེས་པ་ནི་སྒྲུབ་པ་པོ་ཀུན་དུ་སངས་རྒྱས་པའི་སྐུར་གྱུར་པ་དེའི་ཚེ་དེ་ལས་འོད་ཟེར་འཕྲོ་ཞིང་བྱུང་བ་རྣམས་ཀྱི་མཐུས་སྔགས་དེ་ཀུན་དུ་སངས་རྒྱས་པའི་སྤྱོད་པ་ཐམས་ཅད་བྱེད་ནུས་པར་འགྱུར་རོ་ཞེས་པའོ། །ཡང་ན་སྙིང་པོ་དེ་ལས་འོད་ཟེར་འཕྲོ་ཞིང་འབྱུང་བ་ན་ཨ་ལས་ཡི་གེ་ཨའི་རིགས་རྣམས་འབྱུང་བ་དང་ཀླད་ཀོར་ལས་ཀ་ལ་སོགས་རྣམས་འབྱུང་ལ། དེ་རྣམས་ཀྱང་འཕགས་པ་འཇམ་དཔལ་ལ་སོགས་པ་སྔགས་ཀྱི་ལྷ་རྣམས་ཀྱི་སྙིང་པོ་སྟེ། དེ་དག་ཐམས་ཅད་ཀྱང་འོག་ནས་བདག་ཉིད་སྒྲུབ་པའི་རིམ་པར་ཕྱེ་བ་ལས་བྱུང་བའི་རིམ་པས་ཡིད་ལས་བྱུང་ཞིང་ཞེས་པ་ལ་སོགས་པ་ཀུན་དུ་སངས་རྒྱས་པའི་སྐུར་གྱུར་པའི་རྗེས་སུ་བསྔགས་པ་གསུངས་སོ། །དེ་བཞིན་བདག་ཉིད་དག་པ་ཡིས། །བལྟས་པའམ་ནི་སྨྲས་པས་ཀྱང༌། །ཡིད་ལ་བསམ་པའི་ལས་རྣམས་ནི། །ཐམས་ཅད་བྱེད་པར་འགྱུར་བ་ཉིད། །ཅེས་པ་ནི་ཀུན་དུ་སངས་རྒྱས་པའི་སྐུར་གྱུར་པའི་རིག་པ་འཛིན་པ་དེ་གང་གིས་མཐོང་བའི་སེམས་ཅན་དེའི་ཇི་ལྟར་བསམས་པའི་དོན་རྣམས་འགྲུབ་པར་འགྱུར་ཞེས་པ་སྟེ། དགོས་པ་ནི། ཐམས་ཅད་བྱེད་པར་འགྱུར་བ་ཉིད། །ཅེས་པ་དང་སྦྱར་རོ། །དེ་བཞིན་དུ་སུ་ཞིག་རིག་པ་འཛིན་པ་དེ་དང་ལྷན་ཅིག་ཏུ་སྨྲས་པ་ཡང་དོན་ཐམས་ཅད་འགྲུབ་པར་འགྱུར་ཞེས་པའོ། །དེ་བཞིན་དུ་རིག་པ་འཛིན་པ་དེས་སེམས་ཅན་དེ་འདི་ལྟར་གྱུར་ཅིག་ཅེས་བསམས་ན་ཡང་དེའི་དགོས་པ་ཀུན་དུ་བྱེད་པར་འགྱུར་ཞེས་པའོ། །རིག་པ་འཛིན་པ་དེ་མཐོང་བ་ལ་སོགས་པའི་སྤྱོད་ཡུལ་དུ་གྱུར་པའི་སེམས་ཅན་དེ་དག་ཀྱང་བསོད་ནམས་བསགས་ཤིང་སྐབས་དང་ལྡན་པར་ཤེས་པར་བྱ་སྟེ། སེམས་ཅན་དེ་དག་གི་དོན་བྱེད་པར་འགྱུར་གྱི། ཕལ་རྣམས་ཀྱིས་དེ་མཐོང་བ་ལ་སོགས་པའི་སྤྱོད་ཡུལ་དུ་མི་འགྱུར་རོ། །གསང་བ་པའི་བདག་པོ་གཞན་ཡང་ཞེས་པ་ནས། ཕན་ཚུན་བྱེད་པ་པོ་དང་ལས་སུ་རྣམ་པར་འཇོག་པ་ཡང་མི་བྱེད་དོ་ཞེས་པའི་བར་ནི་སངས་རྒྱས་ཀྱི་སྐུར་ང་རྒྱལ་བསྐྱེད་པའི་ཕྱིར་དེ་ཇི་ལྟར་འགྱུར་བའི་རྒྱུ་ཀུན་རྫོབ་ཏུ་རྐྱེན་དང་འདུ་ཞིང་
ཚོགས་ཏེ། འབྱུང་བའི་རྒྱུ་དང་འབྲས་བུ་ངེས་པའི་སྒོ་ནས་བསྟན་པ་སྟེ། འདི་ལྟར་ལུས་ལ་ལུས་ཀྱི་གཟུགས་བསྐྱེད་པར་བྱའོ་ཞེས་པ་ནི་གོང་དུ་གསུངས་པའི་ཚུལ་གྱིས་བདག་གི་ལས་ཀུན་དུ་སངས་རྒྱས་པའི་སྐུར་བསྐྱེད་པར་བྱའོ་ཞེས་པའོ། །ཡང་དག་པར་རྫོགས་པའི་སངས་རྒྱས་ལས་ལྷག་པ་ནི་གང་ཡང་མེད་དེ་ཞེས་པ་ནི་ཀུན་དུ་སངས་རྒྱས་པའི་སྐུ་ལ་ཤིན་ཏུ་བསྔགས་པའི་ཕྱིར་གསུང་པ་སྟེ། ཀུན་དུ་སངས་རྒྱས་པའི་སྐུ་ལས་ཁྱད་པར་དུ་འཕགས་པའི་གཞན་དག་གི་སྐུ་ཡང་མེད་པས་ན་ཀུན་དུ་སངས་རྒྱས་པའི་སྐུ་འདི་ཉིད་རང་གི་ལུས་ལ་བསྐྱེད་པར་བྱའོ་ཞེས་པའོ། །ཇི་ལྟར་བདག་གི་མིག་དང་རྣ་བ་ཞེས་བྱ་བ་ལ་སོགས་པས་ནི་ཀུན་དུ་སངས་རྒྱས་པའི་སྐུར་བསྐྱེད་པ་དེ་ཡང་དོན་དམ་པར་གཟུགས་ཀྱི་དངོས་པོ་མེད་མོད་ཀྱི། ཀུན་རྫོབ་རྒྱུ་དང་འབྲས་བུ་ངེས་པའི་ཆོས་ཉིད་མེད་པ་མ་ཡིན་ཏེ། དཔེར་ན་མིག་དང་རྣ་བ་ལ་སོགས་པའི་དངོས་པོ་ཆེན་པོ་བཞིའི་རང་བཞིན་དུ་གཏོགས་པ་དེ་དག །དོན་དམ་པར་མ་ཡིན་པར་སྟོང་པ་ཉིད་སངས་རྒྱས་བཅོམ་ལྡན་འདས་རྣམས་ཀྱི་མཁྱེན་མོད་ཀྱི། འོན་ཀྱང་རྒྱུ་དང་རྐྱེན་འདུས་པ་ལས་དེ་དག་འབྱུང་བར་སྣང་སྟེ། རྒྱུ་དང་རྐྱེན་མེད་ན་མ་ཡིན་ནོ་ཞེས་གསུངས་པ་ཡིན་ནོ། །དེ་དག་ཀྱང་ངོ་བོ་ཉིད་ཀྱིས་སྟོང་པ་ཞེས་པ་ནི་མིག་དང་རྣ་བ་ལ་སོགས་པ་འབྱུང་བ་ཆེན་པོ་བཞིར་གཏོགས་པའི་ཆོས་དེ་དག་གཟོད་མ་ནས་མ་བྱུང་ཞིང་མ་སྐྱེས་པའམ། རྡུལ་ཕྲན་ཕྱོགས་ཀྱི་ཆ་ལ་སོགས་པར་བཤིག་ན་དེ་དག་རང་བཞིན་ཡོད་པར་མི་འགྲུབ་ཅེས་པའོ། །མིང་ཙམ་གྱིས་བསྡུས་པ་ཞེས་པ་ནི་དངོས་པོ་སྟོང་བས་ན་མིང་དུ་གདགས་པ་ཙམ་མོ་ཞེས་པའོ། །དངོས་པོ་མེད་ན་མིང་དུ་གདགས་པ་ཡང་ཇི་ལྟར་ཡོད་ཅེ་ན། ནམ་མཁའ་དང་མཚུངས་ཤིང་འདྲ་བ་ཞེས་གསུངས་ཏེ། ནམ་མཁའ་ཡང་དངོས་པོ་མེད་མོད་ཀྱི། ནམ་མཁའ་ཞེས་མིང་དུ་བརྗོད་པ་དེ་བཞིན་དུ་འདི་དག་ཀྱང་དངོས་པོ་མེད་མོད་ཀྱི། མིག་དང་རྣ་བ་ཞེས་མིང་ཙམ་དུ་བརྗོད་དོ་ཞེས་པའོ། །གཟུང་དུ་མེད་པ་ཞེས་པ་ནི་དེ་ལྟར་དེ་དག་རང་བཞིན་གྱིས་སྟོང་པས་ན་གང་གི་ཡང་གཟུང་བའི་ཆ་མ་ཡིན་ནོ་ཞེས་པ་སྟེ། ཚིག་དེ་དག་གིས་ནི་མིག་ལ་སོགས་
པའི་དངོས་པོ་དེ་རྣམས་སྟོང་པའི་རང་བཞིན་ནམ་མཁའ་ལྟ་བུར་བསྟན་པའོ། །རྒྱུ་དང་ལས་ལས་བྱུང་བ་ཞེས་པའི་ཀུན་ནས་ཉོན་མོངས་པའི་ཕྱོགས་སུ་བསྟན་པ་སྟེ། །རྒྱུ་ནི་མ་རིག་པ་ལ་སོགས་པའི་ཉོན་མོངས་པའོ། །ལས་ནི་འཕྲལ་གྱི་དགེ་བ་ལ་སོགས་པ་ལུས་ངག་ཡིད་གསུམ་གྱི་སྤྱོད་པ་སྟེ། དེ་དག་དོན་དམ་པར་དངོས་པོ་མེད་ཀྱང་ཀུན་རྫོབ་དུ་རྒྱུ་དང་ལས་ལས་སྐྱེས་པར་སྣང་ངོ་ཞེས་པའོ། །གཟུགས་བརྙན་དང་འདྲ་བ་ཞེས་པ་ནི་ཀུན་རྫོབ་ཏུ་སྣང་བ་ཡང་གཟུགས་བརྙན་དེ་མ་བརྟགས་པའི་སྒོ་ནས་སྣང་བར་ཟད་ཀྱི། གཟུགས་བརྙན་དེ་རིགས་པ་དང་ལུང་གིས་བརྟགས་ན་བསྟན་མི་བཟོད་དེ་ཡོད་པར་མི་འགྲུབ་པ་བཞིན་ནོ་ཞེས་པའོ། །དེ་བཞིན་གཤེགས་པ་རྣམས་ཀྱིས་མངོན་པར་རྫོགས་པར་སངས་རྒྱས་སོ་ཞེས་པ་ནི་ཆོས་དེ་རྣམས་སྔོན་གྱི་དེ་བཞིན་གཤེགས་པ་རྣམས་ཀྱིས་ཀྱང་འདི་ལྟ་བུའི་ཚུལ་དུ་མངོན་པར་མཁྱེན་ཏོ་ཞེས་པའོ། །དེ་དག་ཀྱང་ཕན་ཚུན་རྟེན་ཅིང་འབྲེལ་པར་འབྱུང་བའི་རྒྱུན་མ་ཆད་པར་འབྲེལ་ཏེ། གང་རྟེན་ནས་སྐྱེས་པ་དེ་ནི་གཟུགས་བརྙན་དང་འདྲ་བར་འབྱུང་ངོ་ཞེས་པ་ལ་གལ་ཏེ་དེ་ལྟར་གཟུགས་བརྙན་དང་འདྲ་བ་ན་གཟུགས་བརྙན་ནི་གཟུགས་མེད་ན་མི་འབྱུང་བ་བཞིན་དུ་རྒྱུན་འཆད་དམ་ཞེ་ན། གཟུགས་བརྙན་བཞིན་འཆད་པ་མ་ཡིན་གྱི་ཉོན་མོངས་པ་སྔ་མའི་སྐད་ཅིག་གི་ཆ་ཤས་མེད་ཀྱང་ཉོན་མོངས་བསྐྱེད་པའི་ལས་དང་སྐྱེ་བ་དག་ཀྱང་འབྲས་བུ་སྐྱེད་པར་བྱེད་དེ། གཟུགས་མེད་ན་གཟུགས་བརྙན་མི་འབྱུང་བ་ལྟར་མ་ཡིན་གྱི། ཕན་ཚུན་རྟེན་ཅིང་འབྲེལ་བར་འབྱུང་བའི་རྒྱུན་མི་འཆད་པར་འབྱུང་ངོ་ཞེས་པའོ། །གང་རྟེན་ནས་སྐྱེས་པ་དེ་ནི་གཟུགས་བརྙན་དང་འདྲ་པར་འབྱུང་ངོ་ཞེས་པ་ནི་དེ་ལྟ་བུའི་རྐྱེན་ལས་བྱུང་བའི་ཆོས་དེ་རྣམས་བརྟག་མི་བཟོད་ཅིང་དོན་དམ་པར་ཡོད་པ་མ་ཡིན་པའི་དཔེར་གཟུགས་བརྙན་དང་འདྲ་ཞེས་པའོ། །དེ་ལྟ་བས་ན་ཕན་ཚུན་རྟེན་ཅིང་འབྲེལ་པར་འབྱུང་བའི་ཕྱིར་ལྷ་གང་ཡིན་པ་དེ་བདག་ཡིན། །བདག་གང་ཡིན་པ་དེ་ནི་ལྷ་ཡིན་ནོ་ཞེས་པ་ནི་དེ་ལྟར་དོན་དམ་པར་ཆོས་ཡོད་པ་མ་ཡིན་ཀྱང་ཀུན་རྫོབ་ཏུ་རྟེན་ཅིང་འབྲེལ་པར་
འབྱུང་བ་ལས་ཆོས་རྣམས་སྣང་བས་ན་བདག་གི་རྐྱེན་གྱིས་ལྷ་བསྐྱེད། །ལྷའི་རྐྱེན་གྱིས་བདག་བསྐྱེད་པ་ན་བདག་བསྐྱེད་དོ་ཞེས་བྱ་སྟེ། ལྷ་གང་ཡིན་པ་དེ་བདག་ཡིན་ཞེས་པ་ནི་ཡི་གེ་བརྒྱ་པའི་རང་བཞིན་ཨོཾ་ཞེས་པ་སྙིང་ག་ན་གནས་པ་དེ་བདག་གིས་བསམས་པ་ལས་འབྱུང་བའི་ཕྱིར་རོ་ཞེས་པའོ། །བདག་གི་ཡིན་པ་དེ་ནི་ལྷ་མ་ཡིན་ནོ་ཞེས་པ་ནི་སྙིང་པོ་དེས་བདག་ཀུན་དུ་སངས་རྒྱས་པ་བསྐྱེད་པའི་ཕྱིར་རོ་ཞེས་པའོ། །དེ་བཞིན་དུ་ལུས་ཀྱི་ལུས་གཟུགས་ནི་ལྷའི་སྐུར་བསྐྱེད་པར་བྱའོ་ཞེས་པ་ནི་དེ་ལྟར་ཕན་ཚན་རྒྱུ་དང་རྐྱེན་འདུས་ཤིང་ཚོགས་ཏེ་བྱུང་བས་བདག་གི་གཟུགས་ཀུན་དུ་སངས་རྒྱས་སྐུར་བསྐྱེད་པར་བྱའོ་ཞེས་པའོ། །གསང་བ་པའི་བདག་པོ་ཆོས་ལ་བརྟེན་ནས་རྟོགས་པ་འབྱུང༌། རྟོགས་པ་ལ་བརྟེན་ནས་ཀྱང་ཆོས་འབྱུང་བ་ལ་ལྟོས་ཞེས་པ་ནི་ལྷ་གང་ཡིན་པ་དེ་བདག་ཡིན་བདག་ཡིན་པ་དེ་ལྷ་ཡིན་ཞེས་པའི་ཚིག་དེ་ཉིད་གཞུང་གཞན་གྱིས་བསྟན་པ་སྟེ། ཆོས་ཞེས་པ་ནི་ཨཾ་ཞེས་པའི་ཡིག་འབྲུའོ། །རྟོགས་པ་འབྱུང་བ་ཞེས་པ་ནི་ཀུན་དུ་སངས་རྒྱས་པའི་སྐུ་དེ་ཡི་གེ་དེའི་རྐྱེན་གྱིས་ཀུན་དུ་སངས་རྒྱས་པར་འགྱུར། །ཀུན་དུ་སངས་རྒྱས་པར་འགྱུར་ནས་སླར་ཡང་སྙིང་གའི་ཡི་གེ་བསམ་པར་བྱ་བ་ནི་གཅིག་གི་རྐྱེན་གྱིས་གཅིག་འབྱུང་བ་སྟེ། དེ་ལྟར་ལྟོས་ཤིག་པའོ། །དེ་གཉིས་ཀྱང་རང་བཞིན་གྱིས་སྟོང་པའི་ཕྱིར། ཕན་ཚུན་བྱེད་པ་དང་ལས་སུ་རྣམ་པར་འཇོག་པར་ཡང་མི་བྱེད་དོ་ཞེས་པ་ནི་ཡི་གེ་དང་གཟུགས་དང་དེ་གཉིས་རང་བཞིན་གྱིས་སྟོང་པའི་ཕྱིར་ཡི་གེས་གཟུགས་བསྐྱེད་པའི་བྱ་བ་མི་བྱེད་ལ། གཟུགས་ཀྱིས་ཀྱང་ཡི་གེ་བསྐྱེད་པའི་བྱ་བ་མི་བྱེད་ཅེས་པའོ། །གསང་བའི་བདག་པོ་ཇི་ལྟར་ན་ཡིད་ལ་ཡིད་ལས་བྱུང་བའི་གཟུགས་བསྐྱེད་པར་བྱ་ཞེ་ན་ཞེས་པ་ལ་སོགས་པས་ནི་ཡིད་ལ་ཟླ་བའི་དཀྱིལ་འཁོར་ལ་གནས་པའི་སྔགས་ཀྱི་འབྲུ་བསྐྱེད་པ་དེ་བརྟན་པོར་བྱ་བའི་ཕྱིར་ཡིད་ལས་ཇི་ལྟར་འབྱུང་བའི་རྒྱུ་མཚན་བཤད་པ་སྟེ། གསང་བའི་བདག་པོ། །དཀར་པོའམ། སེར་པོའམ། དམར་པོ་ཡིད་ལ་བྱས་ན་ཡིད་དེའི་རྣམ་པ་ལ་ཞེན་པར་འགྱུར་ཏེ་ཞེས་པ་ནི་ཆུའི་དཀྱིལ་འཁོར་དང་དབང་ཆེན་གྱི་དཀྱིལ་འཁོར་དང་
མེའི་དཀྱིལ་འཁོར་བསམས་ན་ཡིད་ཀྱང་རྣམ་པ་རུ་འགྱུར་རོ་ཞེས་པའོ། །དེས་ན་དེ་ལྟ་བུས་དགོས་པ་ཡང་དེ་ལྟ་བུ་ཁོ་ན་མངོན་པར་སྒྲུབ་པར་བྱེད་དོ་ཞེས་པ་ནི་དབང་ཆེན་ལ་སོགས་པའི་དཀྱིལ་འཁོར་གྱི་རྣམ་པར་གྱུར་བའི་ཡིད་དེས་དབང་ཆེན་ལ་སོགས་པའི་བྱ་བ་བྱེད་པར་འགྱུར་རོ་ཞེས་པ་སྟེ། དེ་བས་ན། གསང་བ་པའི་བདག་པོ་འདི་ལྟ་སྟེ། ཡིད་ལ་དཀྱིལ་འཁོར་བསམས་ནས་སུ། །རིམས་ནད་ཅན་ཞིག་བྱ་བ་ན་ནི། །དེ་ཡི་མོད་ལ་སྐྱེ་བོ་ནི། །རིམས་ལས་ཐར་འགྱུར་དོགས་པ་མེད། །ཅེས་བྱ་བ་གསུངས་པ་ཡིན་ཏེ། ཆ་བའི་རིམས་ཀྱིས་བཏབ་པ་ལ་ནད་པའི་ཀླད་པའི་སྟེང་དུ་བུམ་པ་ཁ་སྦུབ་པར་ཆུའི་དཀྱིལ་འཁོར་ཇི་སྐད་དུ་བཤད་པ་བསམས་ལ། དེ་ལས་བདུད་རྩིའི་ཆུ་དཀར་པོ་བྱུང་བས་ནད་པའི་སྤྱི་བོ་ནས་མཐར་གྱིས་ཕྱི་དང་ནང་དང་བཅས་པར་རྟིང་པའི་བར་དུ་ཁྱབ་པར་བསམས་ཏེ། དེའི་ཚེ་ཆུས་བྱབ་ཅིང་དེའི་མོད་ལ་རིམས་ནད་ཐམས་ཅད་ཕྱིར་འབྱུང་བར་བསམ་པ་དེ་ལྟ་བུ་ལན་གཉིས་སམ། ལན་གསུམ་དུ་བྱས་ན་རིམས་ལས་ཐར་བར་འགྱུར་པ་ལ་དོགས་པ་མེད་དོ། །དེ་བཞིན་དུ་དབང་ཆེན་གྱི་དཀྱིལ་འཁོར་ལ་ཡང་སྦྱར་རོ། །གྲང་ཞིང་འདར་བའི་རིམས་ཀྱིས་བཏབ་པ་ལ་མེའི་དཀྱིལ་འཁོར་ཇི་སྐད་དུ་བཤད་པ་བསམས་ནས་དེའི་སྟེང་དུ་ནད་པ་བཞག་ལ་མེ་དེས་མས་ཡར་གྱེན་དུ་ལུས་ཀྱི་ཕྱི་ནང་ཁྱབ་པར་བསམས་ན་གྲང་བའི་རིམས་ལས་ཐར་བར་འགྱུར་རོ། །ཡིད་མེད་པར་ཡང་དཀྱིལ་འཁོར་ཡོད་པ་མ་ཡིན་ལ། དཀྱིལ་འཁོར་མེད་པར་ཡང་ཡིད་མོད་པ་མ་ཡིན་ནོ། །དེ་ཅིའི་ཕྱིར་ཞེ་ན། དཀྱིལ་འཁོར་དང་མཚན་ཉིད་གཅིག་བའི་ཕྱིར་རོ་ཞེས་པ་ནི་དབང་ཆེན་ལ་སོགས་པའི་དཀྱིལ་འཁོར་དེ་དག་དངོས་པོ་གཞན་དུ་ཡོད་པ་ལ་ཡིད་ཀྱིས་དེའི་རྣམ་པར་བསམ་པ་མ་ཡིན་གྱི། ཡིད་ཉིད་དཀྱིལ་འཁོར་དེ་དག་གི་རྣམ་པར་གྱུར་པས་མཚན་ཉིད་གཅིག་ཅིང་ཡིད་དང་དཀྱིལ་འཁོར་གཉིས་དབྱེར་མེད་པ་སྟེ། དེ་དག་གཉིས་ཀ་དོན་དམ་པར་ཡོད་པ་མ་ཡིན་པ་ལས་ཀུན་རྫོབ་ཏུ་རྣམ་པ་དང་བཅས་པའི་སེམས་ཀྱིས་བརྟགས་པ་ཙམ་ཡིན་པའི་ཕྱིར་ཏེ། དེ་བས་ན་དེ་ཉིད་དཔེས་བསྒྲུབ་པར་བྱ་བའི་ཕྱིར་གསང་
བ་པའི་བདག་པོ་འདི་ལྟ་སྟེ་ཞེས་བྱ་བ་ལ་སོགས་པས་སྒྱུ་མར་སྤྲུལ་པ་གསུངས་ཏེ། མདོར་ན་གང་ཡིད་ལ་ཟླ་བའི་དཀྱིལ་འཁོར་དང་སྙིང་པོ་བསྐྱེད་བ་དེ་ཡང་དོན་དམ་པར་རང་བཞིན་གྱིས་སྟོང་ཞིང་ཡོད་པ་མ་ཡིན་མོད་ཀྱི། འོན་ཀྱང་ཀུན་རྫོབ་ཏུ་རྒྱུ་དང་རྐྱེན་ངེས་པའི་དབང་གིས་དོན་གྱི་བྱ་བ་བྱེད་པས་ན་ཡིད་ལ་ཟླ་བའི་དཀྱིལ་འཁོར་སྙིང་པོ་དང་བཅས་པ་བསམ་པ་ལ་ནན་ཏན་དུ་བྱའོ་ཞེས་པའོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། ཡི་གེ་བརྒྱ་པ་རྣམ་པར་དགོས་པ་གྲུབ་པ་རིམ་པར་ཕྱེ་བ་རྒྱས་པའོ།། །།ད་ནི་བཅོམ་ལྡན་འདས་ཀུན་དུ་སངས་རྒྱས་པའི་རང་བཞིན་གྱི་ཡི་གེ་བརྒྱ་པ་ལས་འཕགས་པ་འཇམ་དཔལ་དང་སྤྱན་རས་གཟིགས་ཀྱི་དབང་པོ་ལ་སོགས་པའི་སྔགས་ཀྱི་སྐུ་དང་ཡིད་འབྲུ་རྣམས་འབྱུང་བར་བསྟན་པའི་ཕྱིར། དེ་ནས་ཡང་བཅོམ་ལྡན་འདས་ཀྱིས་གསང་བའི་བདག་པོ་ཕྱག་ན་རྡོ་རྗེ་ལ་བཀའ་སྩལ་པ་ཞེས་པ་ལ་སོགས་པ་གསུངས་ཏེ། དེ་ལ་གསང་བ་བའི་བདག་པོ་སྔགས་ཀྱི་མགོན་པོའི་སྐུ་དང་ལུས་སུ་དབྱེར་མེད་པ་ཉོན་ཅིག་ཅེས་པ་ནི་ཀུན་དུ་སངས་རྒྱས་པའི་སྐུ་ལས་སྔགས་ཀྱི་ལྷ་གཞན་རྣམས་འབྱུང་བའི་ལུས་དེ་དག་དབྱེར་མེད་པ་ཉོན་ཅིག་ཅེས་པའོ། །ཡིད་ལས་གྱུར་པ་ལས་བྱུང་ཞིང༌། །ཞེས་པ་ནི་སྐུ་དེ་རྣམས་ཀྱང་བཅོམ་ལྡན་འདས་ཀྱི་གསུང་མི་ཟད་པ་སྡུད་པའི་སྒོར་གུར་པ་ཨཾ་ཞེས་པ་ཟླ་བའི་དཀྱིལ་འཁོར་ལ་གནས་པ་སྙིང་གར་བསམས་པ་དེ་ནི་ཡིད་ལས་གྱུར་པ་ཞེས་བྱ་ལ། དེ་ལས་ཀུན་དུ་སངས་རྒྱས་པའི་སྐུའམ། སྔགས་ཀྱི་ལྷ་གཞན་རྣམས་ཀྱི་སྐུར་འབྱུང་བས་ན། ཡིད་ལས་གྱུར་པ་ལས་བྱུང་ཞིང༌། །ཞེས་པའོ། །ཡིད་ཀྱང་ཤིན་ཏུ་རྣམ་སྦྱངས་ན། །ཞེས་པ་ནི་སྐུ་དེ་དག་ཡིད་ལས་འབྱུང་བ་ཡང་བསམས་པ་ཙམ་གྱིས་ཆོག་པ་མ་ཡིན་གྱི། ཞི་གནས་དང་ལྷག་མཐོང་ཟུང་དུ་འབྲེལ་པར་སྦྱངས་པ་ལས་བྱུང་བའི་སྐུའོ་ཞེས་པའོ། །མགོན་པོ་དེ་ན་བཞུགས་པ་ལས། །འོད་ཟེར་སྐུ་ལས་བྱུང་བ་རྣམས། །ཞེས་པ་ནི་ཡིད་ཤིན་ཏུ་སྦྱངས་པ་དེ་ལ་ཞུགས་ཤིང་གནས་པའི་སྙིང་པོ་དེ་ལས་སྔགས་ཀྱི་ལྷ་རྣམས་ཀྱི་
སྙིང་པོ་འབྱུང་ལ། འོད་ཟེར་སྐུ་ལས་བྱུང་བ་རྣམས། །ཞེས་པ་ནི་སྙིང་པོ་དེ་ལས་ཀ་ལ་སོགས་པའི་ཡི་གེ་རྣམས་འབྱུང་ཞེས་པའོ། །ཡན་ལག་གི་ནི་ཡན་ལག་ནས། །རྟག་པར་ཀུན་དུ་རྣམ་པར་འཕྲོ། །ཞེས་པ་ལ་ཡན་ལག་ནི་ཨ་ཉིད་ལ་བྱ་ལ། ཡན་ལག་དེའི་ཡན་ལག་ནི་ཀླད་ཀོར་དང་ཨི་དང་ཨུ་ལ་སོགས་པ་སྟེ། དེ་རྣམས་ལས་སྔགས་རྣམས་འབྱུང་བས་ན། ཡན་ལག་གི་ནི་ཡན་ལག་ནས། རྟག་པར་ཞེས་གསུངས་པ་ཡིན་ཏེ། མདོར་ན་འཕགས་པ་འཇམ་དཔལ་ལམ་སྤྱན་རས་གཟིགས་ཀྱི་དབང་པོའི་སྐུར་བསྒྱུར་བ་ན་གཞན་ནི་རིམ་པ་སྔ་མ་བཞིན་ཏེ། ཡི་གེ་ཨའི་ཀླད་ཀོར་དེ་ལས་ཡི་གེ་མཾ་ལ་སོགས་པ་གང་ཡང་རུང་བ་འབྱུང་བར་བསམས་ཏེ་དེའི་འོད་འཕྲོས་ཤིང་འདུས་པ་ལས་འཇམ་དཔལ་ལ་སོགས་པའི་སྐུར་བསྒྱུར་རོ། །ཡང་ན་ཨའི་གནས་ཉིད་དུ་བསམས་ཏེ། སྔ་མ་བཞིན་དུ་སྐར་བསྒྱུར་བར་བྱའོ། །ཚུལ་འདི་དག་ནི་མ་ཤེས་པས། །རྨོངས་པ་རྣམས་ཀྱིས་ཡོངས་མི་ཤེས། །ཞེས་པ་ནི་ཀུན་དུ་སངས་རྒྱས་པའི་སྐུ་གཅིག་པུ་དེ་ལས་སྔགས་ཀྱི་སྐུ་རྣམ་པ་མང་པོ་དེ་དག་ཇི་ལྟར་འབྱུང་བར་འགྱུར་སྙམ་དུ་ཡིད་མི་ཆེས་ཤིང་མི་ཤེས་པ་ནི་འོག་ནས་འབྱུང་བའི་ཚུལ་འདི་མ་ཤེས་པ་ལས་ཡིན་ནོ་ཞེས་པ་སྟེ། ལུས་ཀྱི་བྱེ་བྲག་ཇི་སྙེད་པ། །བརྗོད་པ་ལས་ནི་མང་དུ་འགྱུར། །དེ་བཞིན་སྔགས་ཀྱི་མགོན་པོ་ཡི། །བྱེ་བྲག་དག་ཀྱང་གྲགས་མེད་གསུངས། །ཞེས་པ་ནི་སངས་རྒྱས་དང་བྱང་ཆུབ་སེམས་དཔའ་ལ་སོགས་པའི་ལུས་ཀྱི་བྱེ་བྲག་མད་པོ་དག་བརྗོད་པའི་རང་བཞིན་ཡི་གེའི་འབྲུ་ལས་རྣམ་པ་མང་དུ་འབྱུང་བ་བཞིན་དུ། སྔགས་ཀྱི་མགོན་པོ་ཀུན་དུ་སངས་རྒྱས་པ་ལས་སྔགས་ཀྱི་ལྷའི་བྱེ་བྲག་གྲངས་མེད་པ་འབྱུང་ངོ་ཞེས་པའོ། །ཀུན་དུ་སངས་རྒྱས་པའི་རང་བཞིན་དེ་རྣམ་པར་རྟོག་པ་ལས་ཤིན་ཏུ་འདས་ན་དེས་སྐུ་རྣམ་པ་མང་པོ་འདི་རྣམས་ཇི་ལྟར་སྐྱེད་པར་བྱེད་ཅེ་ན། ཇི་ལྟར་ཡིད་བཞིན་ནོར་བུ་ནི། །དཔལ་ལྡན་འདོད་པའི་དོན་སྒྲུབ་པ། །དེ་བཞིན་འཇིག་རྟེན་སྒྲོན་མ་ཡི། །སྐུ་ཡང་དོན་རྣམས་ཐམས་ཅད་སྒྲུབ། །ཅེས་བྱ་བ་གསུངས་ཏེ། ཇི་ལྟར་ཡིད་བཞིན་གྱི་ནོར་བུ་དེ་རྣམ་པར་མི་རྟོག་ཀྱང་
ཐམས་ཅད་ཀྱི་རེ་བ་ཡོངས་སུ་རྫོགས་པར་བྱེད་ལ། དོན་ཐམས་ཅད་སྒྲུབ་པ་དེ་བཞིན་དུ། སྔགས་ཀྱི་མགོན་པོ་འཇིག་རྟེན་གྱི་སྒྲོན་མ་དེ་ཡང་རྣམ་པར་མི་རྟོག་བཞིན་དུས་ངོན་གྱི་སྨོན་ལམ་གྱི་ཤུགས་ཀྱིས་སྐུ་ལ་སོགས་པ་རྣམ་པ་སྣ་ཚོགས་འབྱུང་ཞིང་དོན་ཐམས་ཅད་རབ་ཏུ་བྱེད་དོ་ཞེས་པའོ། །དེ་ཉིད་ཀྱང་ནམ་མཁའི་དཔེས་བསྟན་པའི་ཕྱིར། གསང་བ་པའི་བདག་པོ་ཆོས་ཀྱི་དབྱིངས་རྣམ་པར་མི་རྟོག་པ་ཇི་ལྟར་དགོས་པ་ཐམས་ཅད་མངོན་པར་སྒྲུབ་ཅེ་ན་ཞེས་པ་ལ་སོགས་པ་གསུངས་ཏེ། དེ་དག་གི་ནི་ཨཾ་ཞེས་པ་ནི་ཡི་གེ་བརྒྱ་པ་དེ་ལས་བཅོམ་ལྡན་འདས་ཀུན་དུ་སངས་རྒྱས་དང༌། སྔགས་ཀྱི་ལྷ་རྣམས་ཀྱི་སྐུར་བསྒྱུར་ནས་ཀྱང་ཡིད་ཟླ་བའི་དཀྱིལ་འཁོར་ལ་གནས་པར་བསམ་པའི་སྦྱོར་བ་བཤད་དོ། །འདིར་ནི་དེ་ལྟར་བདག་གི་ལུས་ཀུན་དུ་སངས་རྒྱས་པའི་སྐུ་ལ་སོགས་པར་ཡོངས་སུ་བསྒྱུར་ནས་ཀུན་དུ་སངས་རྒྱས་པ་དང་རྗེས་སུ་མཐུན་པའི་སེམས་ཀྱི་ཡོན་ཏན་བསྐྱེད་པའི་ཕྱིར་སེམས་ཡོངས་སུ་སྦྱང་བར་བྱ་བ་འཆད་དེ། དེ་ཡང༌། དེ་ནས་བཅོམ་ལྡན་འདས་ཀྱིས་སེམས་ཅན་གྱི་ཁམས་མ་ལུས་པ་རྣམ་པར་སྦྱོང་བའི་ཚིག་རྣམས་ཀྱིས་ཞེས་པ་ལ་སོགས་པ་གསུངས་པ་ལ་སེམས་ཅན་གྱི་ཁམས་མ་ལུས་པ་རྣམ་པར་སྦྱོང་བའི་ཚིག་ཅེས་པ་ནི་ཏིང་ངེ་འཛིན་སྒྲུབ་པའི་ཚིག་ཅེས་པ་ལ་སོགས་པ་འོག་ནས་འབྱུང་བའི་ཚིག་རྣམས་ལ་བྱ་སྟེ། ཚིག་དེ་དག་གིས་སེམས་ཅན་རྣམས་ཀྱི་ཉོན་མོངས་པའི་སྒྲིབ་པ་ལ་སོགས་པ་ནི་སེལ། ཡེ་ཤེས་ཁྱད་པར་ཅན་སྐྱེ་བར་བྱེད་པའི་སྒོ་ནས་རྣམ་པར་སྤྱོད་པའི་ཕྱིར་རོ། །སྒྲུབ་པའི་སེམས་ཡོངས་སུ་སྦྱང་བར་བྱ་བ་ཡང་འཇུག་པའི་སེམས་དང་གནས་པའི་སེམས་དང་ལྡན་པའི་སེམས་དང་ལྡན་པ་སྟེ། དེ་ལ་འཇུག་པའི་སེམས་ནི་ཏིང་ངེ་འཛིན་སྒྲུབ་པའི་ཚིག་ཅེས་པ་སྟེ། གང་གི་ཚེ་ན་ཐོག་མ་ནས། །ཅུང་ཟད་སྐྱེ་བའམ་འཇིག་མེད་པ། །དེ་ཚེ་རྣལ་འབྱོར་ཅན་དག་གི །སྟོང་པའི་ཡེ་ཤེས་ཇི་ལྟར་སྐྱེ། །ཞེས་པ་དང་སྦྱར་རོ། །བསམ་གྱིས་མི་ཁྱབ་པའི་ཚིག་ཅེས་པ་ནི་གནས་པའི་སེམས་འཆད་པ་སྟེ། གང་ཚེ་ཆོས་ཞེས་བྱ་བ་སྟེ། །ངོ་བོ་ཉིད་ཀྱིས་མི་
རྙེད་པ། །དེ་ཚེ་ནམ་མཁའ་འདྲ་བའི་སེམས། །བྱང་ཆུབ་འབྱུང་བ་སྐྱེ་བར་འགྱུར། །ཞེས་པ་དང་སྦྱར་རོ། །ཡོངས་སུ་གྱུར་པའི་སྒོ་ཡི་ཚིག །ཅེས་པ་ནི་ལྡང་བའི་སེམས་འཆད་པ་སྟེ། དེ་ཚེ་འཇིག་རྟེན་ཀུན་མཐུན་པའི། །སྙིང་རྗེ་དག་ཀྱང་སྐྱེ་བར་འགྱུར། །ཞེས་པ་དང་སྦྱར་རོ། །དེ་ལ་ཏིང་ངེ་འཛིན་གྲུབ་པའི་ཚིག་ཅེས་པ་ནི་ཚིག་དེས་ཆོས་ཐམས་ཅད་གཟོད་མ་ནས་མ་སྐྱེས་ཤིང་མི་འགག་པར་རྟོག་པའི་ཏིང་ངེ་འཛིན་འབྱུང་བར་སྟོན་པའི་ཕྱིར་རོ། །བསམ་གྱིས་མི་ཁྱབ་པའི་ཚིག་ཅེས་པ་ནི་ཚིག་དེས་ཆོས་ཐམས་ཅད་དམིགས་སུ་མེད་པ་ནམ་མཁའ་དང་འདྲ་བའི་སེམས་སྟོན་པའི་ཕྱིར་རོ། །ཡོངས་སུ་གྱུར་པའི་སྒོའི་ཚིག་ཅེས་པ་ནི་ཚིག་དེས་ཏིང་ངེ་འཛིན་ལས་ཡོངས་སུ་གྱུར་ཏེ། ལངས་ནས་སྙིང་རྗེའི་དབང་གིས་སེམས་ཅན་གྱི་དོན་བྱ་བ་ལ་སོགས་པ་སྟོན་པའི་ཕྱིར་རོ། །གང་གི་ཚེ་ན་ཐོག་མ་ནས། །ཅུང་ཟད་སྐྱེ་བའམ་འཇིག་མེད་པ། །དེ་ཚེ་རྣལ་འབྱོར་ཅན་དག་གི །སྟོང་པའི་ཡེ་ཤེས་ཇི་ལྟར་སྐྱེ། །ཞེས་པ་ནི་གང་གི་ཚེ་ཕུང་པོ་དང་ཁམས་ལ་སོགས་པའི་ཆོས་རྣམས་ཐོག་མ་ནས་མ་སྐྱེས་ཤིང་མ་བྱུང་བའི་ཕྱིར་འཆི་འཕོ་བ་ཡང་མེད་དེ། དེ་ལྟར་ཕྱི་གཟུང་བའི་ཆོས་མེད་ན་དེ་ལ་འཛིན་པར་བྱེད་པའི་རྣམ་པར་ཤེས་པ་ཡང་སྐྱེ་བའི་གནས་མེད་པས་མི་སྐྱེའོ། །དེ་ལྟར་གཟུང་བ་དང་འཛིན་པའི་ཆ་གཉིས་ཀ་མེད་དེ། སྟོང་པ་དེའི་ཚེ་ན་རྣལ་འབྱོར་ཅན་གྱི་སྟོང་པའི་ཡེ་ཤེས་ཀྱང་སྐྱེ་བར་མི་འགྱུར་རོ་ཞེས་པའོ། །གང་ཚེ་ཆོས་ཞེས་བྱ་བ་དེ། །ངོ་བོ་ཉིད་ཀྱིས་མ་རྙེད་པ། །དེ་ཚེ་ནམ་མཁའ་འདྲ་བའི་སེམས། །བྱང་ཆུབ་འབྱུང་བ་སྐྱེ་བར་འགྱུར། །ཞེས་པ་ནི་གོང་དུ་བཤད་པའི་རིམ་གྱིས་ཕྱིའི་ཆོས་རྣམས་དང་ནང་གི་རྣམ་པར་ཤེས་པ་གཉི་ག་མེད་པར་བཤིག་ན་ཕུང་པོ་ལ་སོགས་པའི་ཆོས་འདི་དག་ཐམས་ཅད་དམིགས་སུ་མེད་པར་རྟོག་པ་ལ་གནས་པའི་སེམས་ནི་ནམ་མཁའ་དང་འདྲ་བར་རྟོག་པ་ཐམས་ཅད་བྲལ་བར་འགྱུར་ཞེས་པའོ། །རྣམ་པར་མི་རྟོག་པའི་སེམས་དེ་ལས་དེ་བཞིན་ཉིད་ཀྱི་ཡེ་ཤེས་བྱང་ཆུབ་ཀྱི་མཚན་ཉིད་ཅན་འབྱུང་བས་ན་དེ་ལ་བྱང་ཆུབ་འབྱུང་བ་ཞེས་བྱའོ། །དེ་ཚེ་འཇིག་རྟེན་ཀུན་མཐུན་པའི།།
སྙིང་རྗེ་དག་ཀྱང་སྐྱེ་བར་འགྱུར། །ཞེས་པ་ནི་ཏིང་ངེ་འཛིན་དེ་ལས་ལངས་ནས་སྙིང་རྗེའི་དབང་གིས་སྦྱིན་པ་ལ་སོགས་པ་དང༌། སྤྱོད་པ་དང་ལྷའི་སྐུར་བསྒྱུར་བ་ལ་སོགས་པ་སེམས་ཅན་གྱི་དོན་བྱ་བ་དང་ལྡན་པའི་སེམས་བསྐྱེད་དོ་ཞེས་པའོ། །དེ་དག་གི་དོན་མདོར་བསྡུ་ན་དང་པོར་འཇུག་པའི་སེམས་རྟོག་པ་དང་བཅས་པའི་ཆོས་རྣམས་སྟོང་པའི་རང་བཞིན་དུ་བཤིག་སྟེ། དེ་ནས་སྟོང་པ་ཉིད་རྟོགས་པ་རྣམ་པར་མི་རྟོག་པའི་སེམས་ལ་ཇི་སྲིད་འདོད་པར་གནས་ནས་དེའི་འོག་ཏུ་སྙིང་རྗེའི་དབང་གིས་ལྷའི་གཟུགས་སུ་སྣང་བར་བྱས་ཏེ། སྦྱིན་པ་ལ་སོགས་པ་སེམས་ཅན་གྱི་དོན་རྣམས་ལ་བྱའོ་ཞེས་དགོངས་པའོ། །མིང་ཙམ་གྱི་ནི་ཚུལ་དུ་གནས། །ཞེས་པ་ནི་སྤྱོད་པ་དེ་དག་ཀྱང་དོན་དམ་པར་ཡོད་པ་མ་ཡིན་ཏེ། མིང་ཙམ་དུ་རྟོག་པའི་གནས་སོ་ཞེས་པའོ། །ད་ལྟར་ཐམས་ཅད་མིང་ཙམ་ཡིན། །སྔར་ཀུན་དུ་སངས་རྒྱས་པའི་སྐུར་བསྒྱུར་པ་ལ་ནན་ཏན་ཆེར་བྱ་བ་ཡང་ཇི་ལྟར་དགོས་ཤེ་ན། སངས་རྒྱས་མིང་དུ་འདིར་བརྗོད་དོ། །ཞེས་གསུངས་ཏེ། ཀུན་དུ་སངས་རྒྱས་པ་ཡང་འདིར་དོན་དམ་པར་ཡོད་པ་མ་ཡིན་གྱི། མིང་ཙམ་དུ་ཟད་དོ་ཞེས་པའོ། །དེ་ཚེ་སྟོང་དང་མི་སྟོང་ཞེས། །ཡང་དག་ཏུ་ན་མིང་དུ་འདོགས། །ཞེས་པ་ནི་དེའི་ཚེ་ནམ་མཁའ་ལ་སོགས་པ་སྟོང་པའོ་ཞེས་བྱ་བ་དང་བུམ་པ་ལ་སོགས་པ་ཆོས་རྣམས་ཀུན་རྫོབ་ཏུ་སྟོང་པ་མ་ཡིན་ནོ་ཞེས་པ་ཡང་མིང་ཙམ་དུ་བྱའོ་ཞེས་པའོ། །དེ་ལ་གཅིག་གཉིས་གསུམ་ལ་སོགས། །གྲངས་གྱི་དབྱེ་བའང་འབྱུང་བར་འགྱུར། །ཞེས་པ་ནི་ཡི་གེ་ཨ་ཞེས་པ་གཅིག་པུ་དེ་ལས་ཀྱང་མིང་ཅན་དུ་བྱ་བའི་སྒོ་ནས་ཨི་ལ་སོགས་པའི་ཡི་གེའི་དབྱེ་བ་མང་པོ་རྣམས་སུ་འགྱུར་རོ་ཞེས་པའོ། །དེ་ལྟར་དཔའ་བོ་སྟོང་པ་དེ། །རང་འབྱུང་རྣམས་ཀྱི་བྱིན་རླབས་ལས། །ཨ་ལ་སོགས་པ་རིམ་བཞིན་འཕེལ། །དེ་ལྟར་སྟོང་པ་ཉིད་ཀྱི་ངོ་བོ་ལས་ཨ་དང་ཨི་ལ་སོགས་པའི་ཡི་གེ་རྣམས་ཀྱི་བྱེ་བྲག་མང་པོར་འཕེལ་བར་འགྱུར་ཏེ། ཡིད་ལ་གནས་པའི་སྙིང་བོ་ལས་སོ་ཞེས་པའོ། །རང་འབྱུང་ཞེས་པ་ནི་བཅོམ་ལྡན་འདས་ཀུན་དུ་སངས་རྒྱས་པའི་རང་བཞིན་ལ་བྱ་སྟེ། སུས་ཀྱང་མ་སྐྱེས་པའི་ཕྱིར་རོ། །རྣམ་པར་སྣང་མཛད་
ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། བདག་ཉིད་སྒྲུབ་པ་རིམ་པར་ཕྱེ་བ་རྒྱས་པའོ།། །།རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་བ་བྱིན་གྱིས་རློབ་པ་ལས། ཡི་གེ་བརྒྱ་པའི་སྔགས་ཀྱི་ཆོ་ག་རིམ་པར་ཕྱེ་བའི་འགྲེལ་པ་མི་སྣང་ངོ༌། །དེ་ནི་དེ་བཞིན་གཤེགས་པའི་ཀུན་དུ་བྱང་ཆུབ་པའི་རང་བཞིན་བསྟན་པའི་ཕྱིར། ཇི་ལྟར་ནམ་མཁའ་ཕྱོགས་རྣམས་ན། །ཀུན་ལ་རྟག་པར་མི་གནས་པ། །དེ་བཞིན་ཆོས་རྣམས་ཐམས་ཅད་ལ། །གསང་སྔགས་མགོན་པོ་མི་གནས་སོ། །ཞེས་པ་ལ་སོགས་པ་གསུངས་ཏེ། ཇི་ལྟར་ནམ་མཁའ་ལྷོ་བྱང་དང་ཤར་ནུབ་ལ་སོགས་པའི་ཕྱོགས་ལ་མི་གནས་པ་བཞིན་དུ་དོན་དམ་པའི་མཚན་ཉིད་ཀྱི་སྔགས་ཀྱི་མགོན་པོ་དེ་ཡང་གཟུགས་ལ་སོགས་པའི་ཆོས་རྣམས་ལ་དམིགས་པར་བྱེད་པ་དང༌། དམིགས་པར་བྱ་བའི་སྒོ་ནས་མི་གནས་སོ་ཞེས་པའོ། །ཇི་ལྟར་དངོས་རྣམས་ནམ་མཁའ་ལ། །གནས་ཤིང་རྟག་ཏུ་རྣམ་སྣང་ཡང༌། །དེ་ནི་གནས་སུ་མི་འགྱུར་བ། །གསང་སྔགས་མགོན་པོའང་དེ་བཞིན་ནོ། །ཞེས་པ་ནི་ཇི་ལྟར་ནམ་མཁའ་ལ་གཟུགས་ཀྱི་དངོས་པོ་རྣམས་གནས་པར་སྣང་ཡང་དངོས་པོ་དེ་རྣམས་ལ་ནམ་མཁའ་གནས་པར་མི་འགྱུར་བ་བཞིན་དུ་དེ་བཞིན་གཤེགས་པ་ཡང་མངོན་པར་བྱང་ཆུབ་པའི་ཚེ་སྐུ་མི་ཟད་པའི་རྡོ་རྗེའི་རྒྱན་ལ་སོགས་པ་རྣམ་པ་སྣ་ཚོགས་པ་རྣམས་དེའི་དབང་གིས་བྱུང་བ་ཡང་བྱང་ཆུབ་ཀྱི་རང་བཞིན་དེ་ནི་སྐུ་མི་ཟད་པ་ལ་སོགས་པའི་རྡོ་རྗེའི་རྒྱན་དེ་རྣམས་ལ་དམིགས་པའི་སྒོ་ནས་མི་གནས་སོ་ཞེས་པའོ། །ནམ་མཁའ་དུས་གསུམ་ལ་སོགས་དང༌། །ཇི་ལྟར་བྲལ་བར་འདོད་པ་བཞིན། །དེ་ལྟར་གསང་སྔགས་མགོན་པོ་ཡང༌། །དུས་གསུམ་མེད་ཀྱང་རྣམ་པར་སྣང༌། །ཞེས་པ་ནི་ཇི་ལྟར་ནམ་མཁའ་དེ་རང་བཞིན་གཅིག་ལས་མི་འགྱུར་བས་ན་དུས་གསུམ་ལས་འདས་པ་བཞིན་དུ་དེ་བཞིན་ཉིད་ཀྱི་རང་བཞིན་སྔགས་ཀྱི་མགོན་པོ་དེ་ཡང་མི་འགྱུར་བར་ཡོངས་སུ་གྲུབ་པ་ཡིན་པའི་ཕྱིར། དུས་གསུམ་ལ་མི་གནས་པར་སྟོབས་དང་མི་འཇིགས་པ་ལ་སོགས་པའི་
ཡོན་ཏན་རྣམས་སྣང་ངོ་ཞེས་པའོ། །མིང་ཙམ་དུ་ནི་གདགས་པའི་གནས། །བྱེད་པ་པོ་ལ་སོགས་དང་བྲལ། །ནམ་མཁའ་ལ་ནི་ཐ་སྙད་དུ། །མཁས་པ་རྣམས་ནི་འདོགས་པར་བྱེད། །མིང་ཙམ་གཏོགས་པར་ཆུ་ཟད་ཀྱང༌། །ཡོད་པ་མ་ཡིན་ནམ་མཁའ་བཞིན། །དེ་བཞིན་གསང་སྔགས་དབང་ཕྱུག་ཀྱང༌། །ཐ་སྙད་ཙམ་དུ་སྣང་བར་ཟད། །ཅེས་པ་ནི་དེ་བཞིན་གཤེགས་པའི་གསུང་མི་ཟད་པའི་རྒྱན་ཡིག་འབྲུར་བྱིན་གྱིས་བརླབས་པའི་རང་བཞིན་དེ་དོན་དམ་པར་དངོས་པོ་ཡོད་པ་མ་ཡིན་པར་བསྟན་པ་སྟེ། ཇི་ལྟར་ནམ་མཁའ་མིང་དུ་གདགས་པ་ཙམ་དུ་གནས་ཀྱི། ནམ་མཁའ་དེ་ཉིད་མེད་པའི་རང་བཞིན་ནམ། གཞན་གྱི་ས་བྱས་པའི་དངོས་པོ་ཡོད་པ་མ་ཡིན་ཏེ། ནམ་མཁའ་ཞེས་བརྗོད་པ་ཙམ་དུ་ཟད་ཀྱི། །མིང་ལས་ལྷག་པར་ནམ་མཁའ་ཞེས་བྱ་བའི་དངོས་པོ་ཡོད་པ་མ་ཡིན་པ་དེ་བཞིན་དུ་སྔགས་ཀྱི་དབང་ཕྱུག་སྙིང་པོ་དེ་ཡང་ཀུན་རྫོབ་པ་ཙམ་ཡོངས་སུ་སྣང་བར་ཟད་ཀྱི་དངོས་པོར་མོད་པ་མ་ཡིན་ནོ་ཞེས་པའོ། །མེ་དང་ཆུ་དང་རླུང་མ་ཡིན། །ཞེས་པ་ལ་སོགས་པ་ནི་དེ་བཞིན་གཤེགས་པའི་བྱང་ཆུབ་ཀྱི་རང་བཞིན་དེ་ནི་མེ་དང་ཆུ་ལ་སོགས་པ་ཆེན་པོ་བཞི་དང༌། ཉི་མ་དང་ཟླ་བ་ལ་སོགས་པ་ཆེན་པོ་བཞི་ལ་གནས་པ་དང༌། ཉིན་མོ་དང་མཚན་མོ་ལ་སོགས་པའི་དུས་ལ་སོགས་པ་མིང་གིས་སྨོས་པ་རྣམས་ཀྱི་རང་བཞིན་མ་ཡིན་ཏེ། གང་ཐམས་ཅད་མཁྱེན་པའི་གོ་འཕང་ཐོབ་པར་འདོད་པ་དེས་ནི་ཇི་སྐད་དུ་སྨོས་པའི་དངོས་པོ་འདི་རྣམས་དང་བྲལ་བའི་བྱང་ཆུབ་ཀྱི་རང་བཞིན་དེ་ལ་ནན་ཏན་བྱའོ་ཞེས་པའོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། རྫོགས་པར་བྱང་ཆུབ་པའི་ངོ་བོ་ཉིད་བསྟན་པ་རིམ་པར་ཕྱེ་བ་རྒྱས་པའོ།། །།ད་ནི་དམ་ཚིག་གསུམ་བཤད་དེ། དེ་ཡང་རྣམ་པ་གཉིས་ཏེ། རྒྱུའི་དམ་ཚིག་གསུམ་དང་འབྲས་བུའི་དམ་ཚིག་གསུམ་མོ། །དེ་ལ་རྒྱུའི་དམ་ཚིག་གསུམ་ནི་འཇུག་པའི་སེམས་དང་ལྡན་པའི་སེམས་སོ། །འབྲས་བུའི་དམ་ཚིག་གསུམ་ནི་བཅོམ་ལྡན་འདས་ཀྱི་སྐུ་མི་ཟད་པ་ལ་སོགས་པ་རྣམ་པ་གསུམ་མོ། །དེ་
ལ་དམ་ཚིག་ཅེས་པའི་ཚིག་གི་དོན་ནི་ཀུན་དུ་འགྲོ་བ་ཞེས་བྱ་སྟེ། འཇུག་པ་དང་གནས་པ་དང་ལྡང་བའི་སེམས་འདིས་ཀུན་དུ་འགྲོ་ཞེས་པའི་དོན་ཏོ། །ཀུན་དུ་ཐོབ་པའམ་རྟོག་པར་བྱ་བ་ཞེས་ཀྱང་བྱ་སྟེ། སྐུ་མི་ཟད་པའི་དོ་རྗེའི་རྒྱན་ལ་སོགས་པ་དེ་དག་ནི་ཐོབ་པར་བྱ་བའམ། རྟོགས་པར་བྱ་བ་ཡིན་པས་དེ་དག་གཉིས་ལ་དམ་ཚིག་ཅེས་བྱའོ། །སྐབས་འདིར་ནི་རྒྱུའི་དམ་ཚིག་བཤད་དེ། དེ་ཡང༌། དེ་ནས་ཡང་བཅོམ་ལྡན་འདས་ལ་གསང་བ་པའི་བདག་པོ་ཕྱག་ན་རྡོ་རྗེས་འདི་སྐད་ཅེས་གསོལ་ཏོ་ཞེས་པ་ལ་སོགས་པས་གསུངས་པ་ཡིན་ཏེ། དེ་ལ་ཆོས་ཀྱི་ཁྱད་པར་རྣམ་པ་གསུམ་ཞེས་པ་ནི་འཇུག་པ་དང་ལྡང་བ་དང་གནས་པའི་སེམས་གསུམ་ཐ་དད་པས་ཆོས་ཀྱི་ཁྱད་པར་རྣམ་པ་གསུམ་ཞེས་བྱའོ། །ཆོས་ཀྱི་ཁྱད་པར་གང་ལས་སྒྲིབ་པ་མེད་པའི་ཚུལ་གྱིས་འབྱུང་བར་འགྱུར་བ་དེ་ནི་དམ་ཚིག་གསུམ་སྟེ་ཞེས་སྦྱར་ཏེ། འཇུག་པ་ལ་སོགས་པའི་སེམས་གསུམ་པོ་དེ་སྤྱད་པ་ལས་ཐོགས་པ་མེད་པར་སྐུ་མི་ཟད་པ་ལ་སོགས་པའི་རྡོ་རྗེའི་རྒྱན་དམ་ཚིག་གསུམ་གྱི་མཚན་ཉིད་དེ་འབྱུང་ངོ་ཞེས་པ་སྟེ། གོང་དུ་ཉོན་ལ་ཞེས་བྱ་བ་དང༌། ངས་བཤད་དོ་ཞེས་བྱ་བ་དང་འབྲེལ་ཏོ། །ཆོས་ཀྱི་ཁྱད་པར་དེ་ཡང་གང་ཞེ་ན་ཞེས་པ་ནི་འཇུག་པ་ལ་སོགས་པའི་སེམས་གསུམ་པོ་དེ་དག་སོ་སོར་བྱེ་བྲག་ཕྱེ་སྟེ་བཤད་པའི་ཕྱིར་གསུངས་པའོ། །དེ་ལ་འཇུག་པའི་སེམས་ནི་དང་པོའི་སེམས་ཏེ་ཞེས་པ་ནས། བྱང་ཆུབ་ཀྱི་མཚན་ཉིད་དོ་ཞེས་པའི་བར་གྱིས་ཏེ། རྣམ་པར་བསྒོམ་པའི་རང་བཞིན་ཞེས་པ་ནི་ཕུང་པོ་དང་ཁམས་ལ་སོགས་པའི་ཆོས་རྣམས་ཤེས་རབ་ཀྱིས་མ་ཤེས་པའོ་ཞེས་པའོ། །དེ་ལ་མ་བསྒོམས་པའི་རང་བཞིན་ཞེས་འདོན་ཏོ། །དེའི་རྗེས་ལས་བྱུང་བའི་ཤེས་རབ་ཅེས་པ་ནི་མ་བསྒོམས་པའི་རྗེས་ལ་ཆོས་ལ་བདག་མེད་པར་ཤེས་རབ་པོ། །དེས་ཀྱང་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་ནས་སེམས་བསྐྱེད་པ་ཞེས་སྦྱར་ཏེ། ཤེས་རབ་དེས་ཆོས་ཐམས་ཅད་ཕྱིན་ཅི་མ་ལོག་པར་ཤེས་པ་བསྐྱེད་དོ་ཞེས་པ་སྟེ། དེ་བས་ན། རྟོག་པའི་དྲ་བ་མ་ལུས་པ་དང་བྲལ་བའི་བྱང་ཆུབ་ཀྱི་མཚན་
ཉིད་ཅེས་སྦྱར་བར་བྱ་བ་སྟེ། ཕུང་པོ་དང་ཁམས་ལ་སོགས་པའི་ཆོས་ཀྱི་མཚན་ཉིད་ལ་ཡོད་ཅིང་ཆགས་པར་རྟོག་པ་ནི་གྲོལ་བའི་གེགས་སུ་འགྱུར་བའི་ཕྱིར། རྟོག་པ་དེ་ཉིད་དྲ་བ་ཞེས་བྱ་ལ། གང་རྟོག་པའི་དྲ་བ་མེད་པའི་སེམས་ནི་སྟོང་པ་ཉིད་དུ་རྟོགས་པའི་སེམས་ཏེ། བྱང་ཆུབ་ཀྱི་མཚན་ཉིད་དོ། །དེ་ནི་དང་པོའི་སེམས་ཤེས་པའི་ཚིག་གོང་མ་དང་འབྲེལ་ཏེ། འཇུག་པའི་སེམས་སོ། །གཉིས་པ་ནི་རྣམ་པར་མི་རྟོག་པ་སྟེ། རྫོགས་པའི་སངས་རྒྱས་ཀྱི་གོ་འཕང་ངོ་ཞེས་པ་ནི་གནས་པའི་སེམས་ཏེ། རྟོག་པའི་དྲ་བ་ཐམས་ཅད་མེད་པའི་བྱང་ཆུབ་ཀྱི་མཚན་ཉིད་ཀྱི་ཤེས་རབ་དེ་ཉིད་ཆོས་ཐམས་ཅད་སྟོང་པའི་རང་བཞིན་དུ་རྟོགས་ནས་རྣམ་པར་མི་རྟོག་པ་ཉིད་ལ་གནས་ཏེ། དེ་ཉིད་ལ་ཀུན་དུ་སངས་རྒྱས་པའི་གོ་འཕང་ཞེས་བྱའོ། །ཡང་དག་པ་ཇི་ལྟ་བ་བཞིན་མཐོང་ནས་ཀྱང་ཞེས་པ་ནས་དེ་ནི་དམ་ཚིག་གསུམ་མོ་ཞེས་པའི་བར་གྱིས་ལྡང་པའི་སེམས་བཤད་པ་སྟེ། ཡང་དག་པ་ཇི་ལྟ་བ་བཞིན་མཐོང་ནས་ཀྱང་ཞེས་པ་ནི་འཇུག་པ་དང་གནས་པའི་སེམས་ཀྱིས་དེ་བཞིན་ཉིད་ཕྱིན་ཅི་མ་ལོག་པར་རྟོགས་ནས་ཀྱང་ཞེས་པ་སྟེ། དེ་ལྟར་དེ་བཞིན་ཉིད་དུ་རྟོགས་ནས་ཀྱང་རྣམ་པར་མི་རྟོག་པ་དེ་ཉིད་ལ་མི་གནས་པར་སེམས་ཅན་གྱི་དོན་དུ་སྤྱོད་པ་སྟེ། དེ་བས་ན་སེམས་ཅན་གྱི་ཁམས་མ་ལུས་པ་ལ་བལྟས་ནས་ཞེས་པ་ལ་སོགས་པ་གསུངས་པ་ཡིན་ནོ། །སེམས་ཅན་གྱི་ཁམས་ལ་ལྟ་བ་དེ་ཡང་དམིགས་པ་དང་བཅས་པས་ཁེ་དང་བཀུར་སྟིའི་ཕྱིར་ལྟ་བ་ནི་མ་ཡིན་ཏེ། དེ་བས་ན་སྙིང་རྗེའི་དབང་དུ་གྱུར་པས་དམིགས་སུ་མེད་པ་ཉིད་དུ་བལྟ་སྟེ་ཞེས་གསུངས་པ་ཡིན་ནོ། །བྱང་ཆུབ་ཀྱི་སེམས་དེ་ཡང་གང་ཞེ་ན། སྤྲོས་པ་ཐམས་ཅད་དང་བྲལ་བ་མཚན་ཉིད་མེད་པའི་བྱང་ཆུབ་ལ་སེམས་ཅན་རྣམས་རབ་ཏུ་དགོད་པར་བྱའོ་ཞེས་གསུངས་པ་ཡིན་ཏེ། མངོན་པར་དེ་བཞིན་ཉིད་རྣམ་པར་མི་རྟོག་པ་ལ་གནས་ནས་ཀྱང་སྔོན་གྱི་སྨོན་ལམ་གྱི་ཤུགས་ཀྱིས་སྙིང་རྗེའི་དབང་དུ་གྱུར་ཅིང་དམིགས་པ་མེད་པ་ཉིད་དུ་སེམས་ཅན་ཐམས་ཅད་ཇི་ལྟར་བདག་གིས་རྟོགས་པའི་བྱང་ཆུབ་རྟོག་པ་དང་བྲལ་ཞིང་སྤྲོས་པ་ཐམས་ཅད་
དང་བྲལ་པ་མཚན་ཉིད་མེད་པ་དེ་ལ་དགོད་པར་བྱའོ་སྙམ་པའི་བྱང་ཆུབ་ཀྱི་སེམས་སྐྱེའོ་ཞེས་བྱའོ། །དེ་ནི་དམ་ཚིག་གསུམ་མོ་ཞེས་པ་ཇི་སྐད་དུ་སྨོས་པའི་འཇུག་པ་དང་གནས་པ་དང་ལྡན་པའི་སེམས་ཏེ། གསུམ་པོ་དེ་ནི་དམ་ཚིག་གསུམ་མོ་ཞེས་པའོ། །གསང་བ་པའི་བདག་པོ་གཞན་ཡང་དམ་ཚིག་གསུམ་གང་ཞེ་ན་ཞེས་པ་ལ་སོགས་པ་ལ་ནི་འཇུག་པ་ལ་སོགས་པའི་སེམས་དེ་དག་ཉིད་ཀྱི་རྣམ་གྲངས་བཤད་པ་སྟེ། དང་པོའི་སེམས་ནི་སངས་རྒྱས་ཏེ། །ཞེས་པ་ནི་དང་པོ་འཇུག་པའི་སེམས་ཀྱི་ཕུང་པོ་ལ་སོགས་པ་རྣམས་བདག་མེད་པར་རྟོགས་པས་ན་སངས་རྒྱས་ཞེས་བྱ་སྟེ། སངས་རྒྱས་ཀྱི་ཚིག་ནི་རྟོགས་པ་ཞེས་པ་དང་རྣམ་གྲངས་ཡིན་པའི་ཕྱིར་རོ། །གཉིས་པ་ཡང་ནི་ཆོས་ཞེས་བྱ། །ཞེས་པ་ནི་གནས་པའི་སེམས་ཏེ། དེ་བཞིན་ཉིད་ཀྱི་རང་བཞིན་གྱི་མཚན་ཉིད་འཛིན་པའི་ཕྱིར་ཆོས་ཞེས་བྱའོ། །དེ་དང་ལྷན་ཅིག་བྱུང་བའི་སེམས། །དགེ་འདུན་ཞེས་ནི་བཤད་པ་ཡིན། །ཞེས་པ་ནི་ཆོས་ཐམས་ཅད་སྟོང་པར་རྟོགས་པའི་ཚེ་ཉིད་ན་སྙིང་རྗེའི་དབང་གིས་ཕྱིར་མི་ལྡོག་པའི་བྱང་ཆུབ་སེམས་དཔའི་དགེ་འདུན་གྱི་མཚན་ཉིད་ལྷ་རྣམས་ཀྱི་སྐུར་བསྒྱུར་བ་ལ་བྱའོ། །དཔའ་བོ་དམ་ཚིག་དེ་གསུམ་ནི། །འདྲེན་པ་རྣམས་ཀྱིས་ཁྱོད་ལ་བཤད། །ཅེས་པ་ནི་ཇི་སྐད་བཤད་པའི་དམ་ཚིག་གསུམ་པོ་འདི་དང་ང་འབའ་ཞིག་གིས་དཔའ་བོ་ཁྱོད་ལ་བཤད་པ་མ་ཡིན་གྱི། སྔོན་གྱི་སངས་རྒྱས་བཅོམ་ལྡན་འདས་འདྲེན་པ་རྣམས་ཀྱིས་ཀྱང་བཤད་དོ་ཞེས་པ་སྟེ། སངས་རྒྱས་རྣམས་སྤྱོད་པ་གཅིག་ཏུ་བསྟན་པའོ། །དེ་ཚེ་སྣ་ཚོགས་ཚུལ་གྱི་སྒོས། །དཔའ་བོ་སེམས་ཅན་ཕན་འདོད་པས། །དམ་ཚིག་གསུམ་པོ་འདི་དག་ལ། །གནས་ནས་བྱང་ཆུབ་སྤྱད་པ་སྤྱོད། །ཅེས་པ་ནི་བྱང་ཆུབ་སེམས་དཔའ་བྱང་ཆུབ་ཀྱི་སྤྱད་པ་སྤྱོད་པ་རྣམས་དམ་ཚིག་གསུམ་པོ་འདི་ལ་གནས་ནས། འཇིག་རྟེན་པ་རྣམས་ཀྱི་ཚུལ་མང་པོ་དང་འཇིག་རྟེན་ལས་འདས་པ་ཉན་
ཐོས་དང་རང་སངས་རྒྱས་ལ་སོགས་པའི་ཚུལ་སྣ་ཚོགས་ཀྱི་སྒོ་ནས་སེམས་ཅན་གྱི་ཕྱིར་སྤྱོད་དོ་ཞེས་པའོ། །གསང་བ་པའི་བདག་པོ་གང་གི་ཚེ་སྐུ་གསུམ་ལ་མངའ་མཛད་པ་དེ་དག་རྫོགས་པར་སངས་རྒྱས་པར་གྱུར་པ་དེའི་ཚེ་ཞེས་པ་ལ་སོགས་པ་ནི་འབྲས་བུའི་དམ་ཚིག་གསུམ་བསྟན་པ་སྟེ། ནམ་ཀུན་དུ་སངས་རྒྱས་པར་གྱུར་པ་དེའི་ཚེ་སྤྲུལ་པའི་སྐུས་སངས་རྒྱས་ཡབ་ཟས་གཅང་མའི་སྲས་སུ་སྟོན་པ་ནས་མྱ་ངན་ལས་འདས་པའི་བར་དུ་སྟོན་ཏེ། དེ་ལ་སྐུ་གསུམ་ལ་མཛད་པ་ཞེས་པ་ནམ་འོག་མིན་གྱི་གནས་སུ་ཀུན་དུ་སངས་རྒྱས་པར་གྱུར་པ་དེ་ཉིད་ཀྱི་ཚེ་ན་ཆོས་ཐམས་ཅད་སྟོང་པ་ཉིད་དུ་རྟོགས་པ་དེ་བཞིན་ཉིད་ཀྱི་རང་བཞིན་དུ་གྱུར་པ་ནི་ཆོས་ཀྱི་སྐུ་ལ་མངའ་མཛད་པའོ། །དེའི་ཚེ་ལོངས་སྤྱོད་རྫོགས་པའི་སྐུར་སྣང་བས་ན་ལོངས་སྤྱོད་རྫོགས་པའི་སྐུ་ལ་མངའ་མཛད་པའོ། །དེ་ནས་སྤྲུལ་པའི་སྐུ་འཇིག་རྟེན་དུ་སྣང་བས་ན་སྤྲུལ་པའི་སྐུ་ལ་མངའ་མཛད་པའོ། །འདི་ལྟར་དང་པོར་སྤྲུལ་པའི་སྐུ་གཅིག་པུར་བྱིན་གྱིས་བརླབས་ནས་ཞེས་པ་ནི་ཡང་དག་པར་རྫོགས་པའི་སངས་རྒྱས་དེ་དག་བསྟན་པ་གཞག་པ་མཛད་དོ་ཞེས་སྤྲེལ་ཏེ། ཐོག་མར་འོག་མིན་གྱི་གནས་སུ་ཀུན་དུ་སངས་རྒྱས་ནས་སྤྲུལ་པའི་སྐུར་བྱིན་གྱིས་བརླབས་ཏེ་རྒྱལ་པོ་ཟས་གཙང་མའི་སྲས་སུ་སྟོན་པ་དང་གཞོན་ནུ་རོལ་པ་དང་རབ་ཏུ་འབྱུང་བ་དང་དཀའ་བ་སྤྱོད་པ་དང་བྱང་ཆུབ་ཀྱི་སྙིང་པོ་ཉེ་བར་འགྲོ་བ་ལ་སོགས་པས་བསྟན་པ་རྣམས་སྟོན་པར་བྱེད་དོ་ཞེས་བྱའོ། །གསང་བ་པའི་བདག་པོ་གཞན་ཡང་སྐུ་གཅིག་པོ་དེ་ཉིད་རྣམ་པ་གསུམ་དུ་འཇོག་པ་ནི་འདི་ལྟར་སངས་རྒྱས་དང་ཆོས་དང་དགེ་འདུན་ནོ་ཞེས་པ་ཡང་ཡང་དག་པར་རྫོགས་པའི་སངས་རྒྱས་དེ་དག་བསྟན་པ་གཞག་པ་མཛད་དོ་ཞེས་སྦྱར་ཏེ། སངས་རྒྱས་ཀྱི་སྤྲུལ་པའི་སྐུ་ཉིད་ལ་བྱའོ། །ཆོས་ནི་གསུང་མི་ཟད་པའི་སྒོ་ནས་གསུང་རབ་ཡན་ལག་བཅུ་གཉིས་འཆད་པའོ། །དགེ་འདུན་ནི་འཕགས་པའི་གང་ཟག་བརྒྱད་ཀྱི་དགེ་འདུན་ཏེ། སྤྲུལ་པའི་སྐུ་གཅིག་པུ་དེ་འདི་རྣམས་སུ་བྱིན་གྱིས་བརླབས་
ནས་ཀུན་དུ་སངས་རྒྱས་པའི་བསྟན་པ་སྟོན་པར་བྱེད་དོ་ཞེས་པའོ། །གསང་བ་པའི་བདག་པོ་གཞན་ཡང་དེ་ཉིད་ཐེག་པ་གསུམ་དུ་འཇོག་པས་སྟོན་ཏོ་ཞེས་པ་ནི་སྤྲུལ་པའི་སྐུ་དེ་ཉིད་གང་ཟག་ལ་བདག་མེད་པར་རྟོགས་པ་ལ་མོས་པའི་འགྲོ་བ་ཉན་ཐོས་རྣམས་ལ་ནི་ཉན་ཐོས་ཀྱི་ཐེག་པར་བརྟགས་ཤིང་འཆད་དོ། །ཆོས་རྣམས་རྟེན་ཅིང་འབྲེལ་བར་འབྱུང་བའི་ཚུལ་དུ་བཤིག་སྟེ་མི་རྟག་པར་མཐོང་ནས་གྲོལ་བར་བྱེད་པ་ལ་མོས་པའི་འགྲོ་བ་རྣམས་ལ་ནི་རང་སངས་རྒྱས་ཀྱི་ཐེག་པར་བརྟགས་ཤིང་འཆད་དོ། །ཆོས་དང་གང་ཟག་གཉིས་ཀ་བདག་མེད་པར་རྟོགས་པ་ལ་མོས་པའི་འགྲོ་བ་རྣམས་ལ་ཐེག་པ་ཆེན་པོར་བརྟགས་ཤིང་འཆད་དོ། །དེའི་ཚེ་སངས་རྒྱས་ཀྱི་བྱ་བ་མཐའ་དག་བྱས་ནས་ཡོངས་སུ་མྱ་ངན་ལས་འདའ་བ་སྟོན་ཅིང་སེམས་ཅན་རྣམས་ཡོངས་སུ་སྨིན་པར་མཛད་དོ་ཞེས་པ་ནི་མི་རྟག་པར་མཐོང་ནས་འཁོར་བ་ལས་ཟར་བའི་ཆེད་དུ་ནན་ཏན་བྱེད་པའི་སེམས་ཅན་སྨིན་པར་བྱ་བའི་ཕྱིར་མྱ་ངན་ལས་འདས་པ་སྟོན་ཏ། མྱ་ངན་ལས་འདས་པ་དེ་སེམས་ཅན་རྣམས་ཀྱིས་མཐོང་ནས་སངས་རྒྱས་བཅོམ་ལྡན་འདས་ལྷ་དང་མིའི་བདག་པོ་བསོད་ནམས་དང་ཡེ་ཤེས་ཀྱི་ཚོགས་བསགས་པ་ཡང་མི་རྟག་ན་གཞན་ལྟ་ཅི་སྨོས་སྙམ་ནས་འཕགས་པའི་ལམ་ནན་ཏན་བྱེད་ཅིང་སྨིན་པར་འགྱུར་རོ་ཞེས་པའོ། །འདི་དག་ནི་རྒྱུ་དང་འབྲས་བུའི་དམ་ཚིག་གསུམ་ཕ་རོལ་ཏུ་ཕྱིན་པ་ལ་སྤྱོད་པ་སྔགས་ལ་སྤྱོད་པའི་བྱང་ཆུབ་སེམས་དཔའ་གཉི་གའི་ཕྱིར་བསྟན་པ་སྟེ། རྒྱུའི་དམ་ཚིག་གསུམ་ནི་མོས་པས་སྤྱོད་པའི་ས་ནས་ཀུན་དུ་བཟང་པོའི་སའི་བར་དུ་སྟེ། དེའི་བར་དུ་འཇུག་པ་ལ་སོགས་པའི་སེམས་གསུམ་དང་ལྡན་པའི་ཕྱིར་རོ། །འབྲས་བུའི་དམ་ཚིག་གསུམ་ནི་སྔ་མ་བཞིན་ནོ། །དེ་ལྟར་སྔགས་ལ་སྤྱོད་པའི་བྱང་ཆུབ་སེམས་དཔའ་མོས་པས་སྤྱོད་པའི་ས་ལ་གནས་པ་རྣམས་ལས་གང་དམ་ཚིག་གསུམ་པོ་འདི་ཤེས་ཤིང་དེ་ལ་གནས་པ་དེའི་རྗེས་སུ་བསྔགས་པ་བཤད་པའི་ཕྱིར། །གསང་བ་པའི་བདག་པོ་ཞེས་པ་ནས། རྟོག་པ་ལས་བྱུང་
བའི་བགེགས་མེད་པ་ལ་ལྟོས་ཞེས་པའི་བར་དུ་གསུངས་པ་ཡིན་ཏེ། སྤྱིར་བགེགས་ལ་རྣམ་པ་གསུམ་སྟེ། རྣམ་པར་རྟོག་པ་ལས་བྱུང་བ་དང༌། ལས་ལས་བྱུང་བ་དང༌། གང་ཟག་མེད་པ་མ་སྤངས་པ་ལས་བྱུང་བ་སྟེ། ལས་ལས་བྱུང་བའི་བགེགས་ནི་ནད་མང་པ་ལ་སོགས་པ་དང༌། བག་མེད་པ་མ་སྤངས་པ་ལས་བྱུང་བའི་བགེགས་ནི་དུག་དང་མེས་ཚིག་དང་གཡང་ས་ལ་སོགས་པར་འགྲོ་བ་དང༌། དེ་དག་རྣམ་པར་རྟོག་པ་སྔོན་དུ་སོང་བ་ལས་གྱུར་བས་རྟོག་པ་ལས་བྱུང་བའི་བགེགས་ཞེས་བྱ་སྟེ། བགེགས་དེ་དག་མེད་པར་འགྱུར་རོ་ཞེས་པའོ། །མི་དད་པ་དང་ལེ་ལོ་ཅན་དང་འདུ་འཛི་ཅན་དང་སྔགས་ལ་ཡིད་མི་ཆེས་པ་དང་ཡོ་བྱད་མང་པོ་སོགས་པ་མ་གཏོགས་པར་ཞེས་པ་ནི་དམ་ཚིག་གསུམ་པོ་དེ་དག་དང་ལྡན་དུ་ཟིན་ཀྱང་བསྒྲུབ་པར་མི་འདོད་པ་དང༌། ལེ་ལོ་ལ་སོགས་པ་མིང་གིས་སྨོས་པ་འདི་རྣམས་དང་ལྡན་པ་ནི་བགེགས་མེད་པའི་ནང་དུ་མ་གཏོགས་ཏེ། སྒྲུབ་པར་མི་འདོད་པ་དང་ལེ་ལོ་ལ་སོགས་པ་དེ་ངག་ཉིད་བགེགས་ཡིན་པའི་ཕྱིར་རོ། །ཆང་བཏུང་བ་དང་ཁྲི་ལ་ཉལ་བ་གཉིས་ནི་མི་བྱའོ་ཞེས་པ་ནི་མྱོས་པའི་བ་ཏུང་བ་ནི་མ་རུངས་པར་གྱུར་པ་ཐམས་ཅད་པ་ཡིན་པའི་ཕྱིར་སྤང་ངོ༌། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། དམ་ཚིག་གསུམ་སྤྱད་པར་རིམ་པར་ཕྱེ་བ་རྒྱས་པའོ།། །།ཇི་ལྟར་དེ་བཞིན་གཤེགས་པ་ལགས། །ཞེས་བྱ་བ་ལ་སོགས་པའི་ཚིགས་སུ་བཅད་པ་རྣམས་ཀྱིས་བཅོམ་ལྡན་འདས་ལ་ཕྱག་ན་རྡོ་རྗེས་ཞུས་པ་ནི་སྔར་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་གསང་སྔགས་གསུངས་པ་ལ་འདི་ནི་དེ་བཞིན་གཤེགས་པ་རྣམས་ཀྱི་སྔགས་སོ། །འདི་ནི་བྱང་ཆུབ་སེམས་དཔའ་རྣམས་ཀྱི་སྔགས་སོ་ཞེས་པ་ལ་སོགས་པ་གསུངས་པ་དེ་ལ། དེ་བཞིན་གཤེགས་པ་དང་ཀུན་དུ་སངས་རྒྱས་པ་དང་བྱང་ཆུབ་སེམས་དཔའ་མཚན་གཉིད་བྱེ་བྲག་ཅི་མཆིས་གང་ལགས་པ་མ་འཚལ་ན་ཐེ་ཚོམ་དེ་དག་བསལ་བར་གསོལ་ཞེས་པའོ། །དེ་ཡང་ཕྱག་ན་རྡོ་རྗེ་ཉིད་ཀྱིས་མི་མཁྱེན་པ་ནི་མ་ཡིན་གྱི།
མ་འོངས་པའི་འགྲོ་བ་རྣམས་ཀྱི་ཐེ་ཚོམ་བསལ་བའི་ཕྱིར་རོ། །ཞུས་པའི་ཚིག་བཞི་པོ་དེ་ཡང༌། བྱང་ཆུབ་ནམ་མཁའི་མཚན་ཉིད་དེ། །ཞེས་པ་ལ་སོགས་པའི་ཚིགས་སུ་བཅད་པས་རིམ་པ་གཞན་དུ་བསྟན་ཏེ། བྱང་ཆུབ་སེམས་དཔའ་གྲགས་ཆེན་རྣམས། །ཐེ་ཚོམ་ཡིད་གཉིས་བསལ་ནས་སུ། །སྤྱད་པའི་རྒྱལ་པོ་བླ་མེད་པ། །ཐེག་པ་ལ་ནི་སྤྱོད་པར་འགྱུར། །ཞེས་པ་ནི་བྱང་ཆུབ་སེམས་དཔའ་གྲགས་པ་ཆེན་པོ་རྣམས་ཐེག་ཆེན་གྱི་སྔགས་ཀྱི་སྤྱད་པ་ལ་སྤྱོད་པ་ནི་ཐེ་ཚོམ་དང་ཡིད་གཉིས་སྤངས་ནས་ཐེག་པ་ཆེན་པོ་སྔགས་ཀྱི་སྤྱོད་པ་ལ་སྤྱོད་པའི་ཕྱིར་བདག་གི་ཐེ་ཚོམ་བསལ་དུ་གསོལ་ཞེས་པ་དང་སྦྱར་རོ། །སྤྱོད་པའི་རྒྱལ་པོ་བླ་མེད་པ། །ཞེས་པ་ནི་སྔགས་ཀྱི་སྤྱོད་པ་ཉིད་ལ་བྱའོ། །བྱང་ཆུབ་ནམ་མཁའི་མཚན་ཉིད་དེ། །ཀུན་དུ་རྟོག་པ་ཐམས་ཅད་སྤངས། །གང་ཞིག་དེ་རྟོགས་འདོད་པ་དེ། །བྱང་ཆུབ་སེམས་དཔའ་ཞེས་བྱའོ། །ཞེས་པ་ནི། ཇི་ལྟར་བྱང་ཆུབ་སེམས་དཔའ་ལགས། །ཞེས་ཞུས་པའི་ལན་ཏེ། དེས་ནི་འདི་སྐད་དུ་གསུངས་པ་ཡིན་ཏེ་ཆོས་ཐམས་ཅད་སྟོང་པ་ཉིད་དུ་རྟོགས་པའི་དེ་བཞིན་ཉིད་ཀྱི་ཡེ་ཤེས་གཟུང་བ་དང་འཛིན་པ་ལ་སོགས་པའི་རྟོག་པ་ཐམས་ཅད་སྤངས་པ་ནམ་མཁའ་ལྟ་བུ་ཉོན་མོངས་པ་དང་ཤེས་བྱའི་སྒྲིབ་པ་མེད་པ་དེ་ནི་བྱང་ཆུབ་སྟེ། དེ་ལྟ་བུའི་བྱང་ཆུབ་རྟོགས་པར་འདོད་པ་གང་ཡིན་པ་དེ་ནི་བྱང་ཆུབ་སེམས་དཔའ་ཞེས་བྱ་སྟེ། དེ་ཡང་ས་དང་པོ་ལ་གནས་པ་ནས། །ས་དགུ་པ་མན་ཆད་ཀྱི་བྱང་ཆུབ་སེམས་དཔའ་རྣམས་ལ་བྱའོ། །གང་གིས་ས་བཅུ་བསྒྲུབས་ནས་ནི། །ཞེས་པ་ནས། སངས་རྒྱས་ཞེས་ནི་བྱ་བ་ཡིན། །ཞེས་པའི་བར་ནི། ཇི་ལྟར་སངས་རྒྱས་ཞེས་ནི་བགྱི། །ཞེས་ཞུས་པའི་ལན་ཏེ་ས་དེ་ཡོངས་སུ་རྫོགས་པའི་བྱང་ཆུབ་སེམས་དཔའ་ཇི་སྐད་དུ་གྲགས་པའི་དབང་བཅུ་ལ་ཡང་དབང་དུ་གྱུར་པའི་ཏིང་ངེ་འཛིན་གནས་པ་དང་ལངས་པ་གཉིས་ཀའི་ཚེན་ཡང་སྙིང་པོ་ལ་སོགས་པའི་ཆོས་རྣམས་སྒྱུ་མ་ལྟ་བུར་རྟོགས་ཤིང་རྟེན་པ་རྣམས་ཀྱི་རྒྱུད་ཀུན་རྟོག་དང་དོན་དམ་པའི་མཚན་ཉིད་སྟོང་པ་ཉིད་དང་སྒྱུ་མ་ལྟ་བུར་ཤེས་པ་དེ་ནི་སངས་རྒྱས་ཤེས་པ་ཞེས་བྱ་སྟེ། བྱང་ཆུབ་སེམས་དཔའ་ཇི་སྐད་ཕལ་མོ་ཆེ་རྣམས་ཀྱིས་ཀྱང་ཆོས་རྣམས་སྟོང་པ་
ཉིད་དང་སྒྱུ་མ་ལྟ་བུར་རྟོགས་ཤིང་འཇིག་རྟེན་ཀུན་གྱི་རྒྱུད་ཀྱང་ཤེས་མོད་ཀྱི། མི་མཐུན་ཕྱོགས་ཐམས་ཅད་དུ་མ་སྤངས་པས་ཆོས་རྣམས་སྟོང་པ་ཉིད་དང་སྒྱུ་མར་རྟོགས་པའི་མཉམ་པར་གཞག་པ་ལངས་པའི་ཆོས་མི་མཐུན་པའི་ཕྱོགས་ཀྱིས་སྒྲིབ་པར་འགྱུར་ཏེ། དེ་བས་ནས་བཅུ་དང་དབང་བཅུས་རྫོགས་པར་སངས་རྒྱས་པ་ཞེས་ཁྱད་པར་དུ་གསུངས་པས་སངས་རྒྱས་པ་ཞེས་བྱ་བ་ནི་ལོག་པའི་གཉེན་པོ་ལ་སོགས་པ་སྤངས་ནས་ཕྱིན་ཅི་མ་ལོག་པར་ཁོང་དུ་ཆུད་པ་ལ་བྱའོ། །ཆོས་ནི་ནམ་མཁའི་མཚན་ཉིད་དེ། །གཉིས་སུ་མེད་ཅིང་མཚན་ཉིད་གཅིག །སྟོབས་བཅུས་རྫོགས་པར་སངས་རྒྱས་པ། །དེ་ནི་རྫོགས་སངས་རྒྱས་ཤེས་བྱ། །ཞེས་བྱ་བ་ནི། ཇི་ལྟར་རྒྱལ་བ་མཆོག་ཏུ་འགྱུར། །ཞེས་ཞུས་པའི་ལན་ཏེ། ས་བཅུའི་བྱང་ཆུབ་སེམས་དཔའ་སངས་རྒྱས་ཞེས་བྱ་བ་རྣམས་སྟོང་པར་རྟོགས་པ་ཡང་མཚན་ཉིད་སོ་སོ་བར་རྟོགས་པ་ཡིན་ལ། དེ་ལས་ལྷག་པར་མཚན་ཉིད་སོ་སོ་བར་སྟོང་པར་རྟོགས་པ་གང་ཡིན་པ་དེ་རྣམས་ལ་གཟུགས་ཀྱི་སྟོང་པ་ཉིད་གང་ཡིན་པ་དེ་ཚོར་བའི་སྟོང་པ་ཉིད་དེ། གཟུགས་ཀྱི་སྟོང་པ་ཉིད་དང་ཚོར་བའི་སྟོང་པ་ཉིད་ནི་གཉིས་སུ་མེད་ཅིང་གཉིས་སུ་བྱར་མེད་ཅེས་བྱ་བ་ལ་སོགས་པའི་ཚུལ་དུ་ཆོས་ཐམས་ཅད་ནམ་མཁའི་མཚན་ཉིད་ལྟར་གཉིས་སུ་མེད་ཅིང་མཚན་ཉིད་གཅིག་ཏུ་སྟོབས་བཅུས་ཡོངས་སུ་རྫོགས་ནས་ཀུན་རྟོག་པ་དེ་ནི་ཀུན་དུ་སངས་རྒྱས་པ་ཞེས་བྱ་སྟེ། དེ་ཡང་ཕུང་པོ་ལྷག་མ་དང་བཅས་པའི་མྱ་ངན་ལས་འདས་པ་ཀུན་དུ་བཟང་པོའི་ས་ལ་གནས་པའི་བྱང་ཆུབ་སེམས་དཔའ་ལ་བྱའོ། །རྒྱལ་བ་མཆོག་ཅེས་པ་ནི་བདུད་བཞི་ལས་རྒྱལ་བའི་ཕྱིར་རོ། །འདུ་ཤེས་ཙམ་ཡང་སངས་རྒྱས་པའི་ཕྱིར། །རང་གི་ངོ་བོར་བསྟན་དུ་མེད། །ཡེ་ཤེས་རང་རིག་བྱ་བ་ནི། །དེ་ནི་དེ་བཞིན་གཤེགས་པར་བཤད། །ཅེས་པ་ནི། །ཇི་ལྟར་དེ་བཞིན་གཤེགས་པ་ལགས། །ཞེས་ཞུས་པའི་ལན་ཏེ། ཀུན་དུ་སངས་རྒྱས་པའི་ཆོས་ཐམས་ཅད་སྟོང་པའི་མཚན་ཉིད་གཅིག་ཏུ་རྟོགས་པའི་འདུ་ཤེས་ཙམ་པོ་དེ་ཡང་སྤངས་ཏེ། རང་གིས་རིག་པའི་རང་བཞིན་དུ་བསྟན་དུ་མེད་པ་ལྷག་མ་མ་ལུས་པའི་མྱ་ངན་ལས་འདས་
པ་དེ་ནི་དེ་བཞིན་གཤེགས་པ་ཞེས་བྱའོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ལས། དེ་བཞིན་གཤེགས་པ་བསྟན་པ་རིམ་པ་ཕྱེ་བ་རྒྱས་པའོ།། །།ད་ནི་མེ་རྣམས་ཀྱི་རབས་བཤད་དེ། དེ་ཡང་བཅོམ་ལྡན་འདས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བྲམ་ཟེ་ལ་སོགས་པའི་མུ་སྟེགས་པ་རྣམས་ལོག་པ་ལ་ཕྱོགས་ཤིང་སེམས་ཅན་རྒྱུན་ཆགས་སུ་གསོད་པ་ལ་སོགས་པའི་སྡིག་པའི་ལས་སྤྱོད་པ་རྣམས་སེམས་ཅན་རྒྱུན་དུ་གསོད་པ་ལས་གྲངས་བསྙུང་པའི་ཕྱིར། ལྷ་ལ་གཏོར་མ་དབུལ་བའི་ཚེ་སེམས་ཅན་གསོད་པ་མ་གཏོགས་པར་དུས་གཞན་དུ་སེམས་ཅན་མི་གསོད་དོ་ཞེས་པ་ལ་སོགས་པ་མུ་སྟེགས་ཀྱི་གཞུང་ལས་དགེ་བའི་ཕྱོགས་སུ་འཆད་པ་དང་བྲམ་ཟེའི་རིག་བྱེད་ལས་མེ་བཤད་པ་རྣམས་ཀྱང་བཅོམ་ལྡན་འདས་ཉིད་ཀྱིས་བསྟན་པར་ཤེས་བར་བྱ་སྟེ། དེ་ལྟར་ཅིས་མངོན་ཞེ་ན། འཕགས་པ་འཇམ་དཔལ་གྱི་རྒྱུད་ལས་ཇི་སྐད་དུ་ལེགས་པར་སྨྲས་པ་ཅུང་ཟད་དུ་ཞིག་ཡོད་པ་རྣམས་ཀྱང་ངས་བསྟན་ཏོ་ཞེས་འབྱུང་བའི་ཕྱིར་རོ། །ལག་ན་རྡོ་རྗེ་གཞན་ཡང་དུས་གཅིག་གི་ཚེ་ན་ང་བྱང་ཆུབ་སེམས་དཔར་གྱུར་ཏེ། བྱང་ཆུབ་སེམས་དཔའི་སྤྱད་པ་སྤྱོད་ཅིང་ཚངས་པའི་འཇིག་རྟེན་ན་འདུག་པ་ན་ཚངས་པས་ང་ལ་ཀྱེའི་ཚངས་པ་ཆེན་པོ་མེ་ལ་རྣམ་པ་དུ་ཡོད་པར་ཤེས་པར་བྱ་ཞེས་དྲིས་པ་དང་ཞེས་བྱ་བ་ལ་སོགས་པ་གསུངས་ཏེ། བཅོམ་ལྡན་འདས་བྱང་ཆུབ་སེམས་དཔའི་སྤྱད་པ་སྤྱོད་པ་ནི་ཚངས་པའི་འཇིག་རྟེན་ན་ཚངས་པའི་གཅུགས་སུ་གྱུར་ཅིང་བཞུགས་ཏེ། དེ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལ་དབང་བའི་ཚངས་པའི་རྒྱལ་པོ་ལ་འདི་སྐད་ཅེས་དྲིས་སོ་ཞེས་པའོ། །ངས་དེ་ལ་འདི་སྐད་ཅེས་སྨྲས་སོ་ཞེས་པ་ནི་ཚངས་པ་དེ་ལངས་འོག་ནས་འབྱུང་པའི་ཚིག་རྣམས་སྨོས་སོ་ཞེས་པའོ། །དེ་ལ་མི་ང་རྒྱལ་ཅན་གང་ཡིན་པ་དེ་ནི་རང་བྱུང་བའོ་ཞེས་པ་ནི་བསྐལ་པ་དང་པོའི་ཚེ་འཇིག་རྟེན་ཐམས་ཅད་སུས་ཀྱང་མ་བྱས་པར་རང་བྱུང་ནས་ནམ་མཁའ་ལ་འགྲོ་ཞིང་དགའ་བའི་ཟས་ཟ་སྟེ་དེའི་ཚེ་ཡང་མེ་ཚངས་པའི་འཇིག་རྟེན་དུ་རང་བྱུང་སྟེ། ང་ནི་རང་བྱུང་སྟེ་
སུས་ཀྱང་མ་བྱས་སྙམ་པའི་ང་རྒྱལ་ཡོད་པས་ང་རྒྱལ་ཅན་རང་བྱུང་བ་ཞེས་བྱ་སྟེ། མེ་དེ་ལྟ་བུ་དང་པོར་བྱུང་ངོ་ཞེས་པའོ། །དེའི་འོག་ན་ཚངས་པའི་བུ་སྟེ། དེ་ལས་སྐྱེས་པ་ཡིན་ནོ། །འཇིག་རྟེན་པའི་མེ་པ་བ་ཀ །ཚངས་པའི་བུ་ནི་དང་པོ་ཡིན། །ཞེས་པ་ནི་རང་བྱུང་བའི་མེད་འོག་ཏུ་པ་བ་ཀ་ཞེས་བྱ་བ་འཇིག་རྟེན་པའི་བཙོ་ཞིང་སྲེག་པར་བྱེད་པའི་མེ་ཚངས་པ་ལས་བྱུང་སྟེ། དེ་ཡང་ཚངས་པའི་བུ་དེ་རྣམས་ཀྱི་ནང་ན་དང་པོའོ་ཞེས་པའོ། །དེའི་བུ་ཚངས་པའི་ཟས་ཞེས་པ་ནི་འཇིག་རྟེན་པའི་མེ་པ་བ་ཀ་ཞེས་བྱ་བ་དེའི་བུའོ། །དེའི་ཡང༌། བྷཱ་ར་ཏ་ཞེས་བྱ་བར་བཤད། །ཅེས་བྱ་བ་ནི་ཚངས་པའི་ཟས་དེའི་བུ་བྷཱ་ར་ཏ་ཞེས་བྱའོ། །དེའི་བུ་བཻ་ཤྭ་ན་ར་དང༌། །ཧ་བ་ན་དང་བསྲེག་བྱ་ལེན། །ཞེས་པ་ནི་བཻ་ཤྭ་ན་ར་དང༌། ཧ་བ་ན་དང་བསྲེག་བྱ་ལ་ན་ཞེས་བྱ་བའི་མེ་དེ་རྣམས་ནི་བྷཱ་ར་ཏ་ཞེས་བྱ་བ་དེའི་བུའོ། །ངོས་བསྲུངས་ཨ་ཐར་པ་ན་ཡི། །བུ་ཡིན་པར་ནི་རྒྱ་མཚོ་གྲགས། །ཞེས་པ་ནི་ངོས་བསྲུངས་ཞེས་བྱ་བའི་མེ་ནི་ཨ་ཐར་པ་ན་ཞེས་བྱའི་མེའི་བུ་སྟེ། དེ་ཡང་བུ་སྐ་ར་ཞེས་བྱ་བའི་རྒྱ་མཚོ་ན་གནས་པར་གྲགས་པའོ། །རླུང་ཞེས་བྱ་བའི་མེ་དེ་ནི། །མངལ་དུ་འཇུག་པའི་ཆོ་གར་བཤད། །ཅེས་པ་ནི་བྲམ་ཟེའི་ཆོ་ག་ལས་མངལ་དུ་འཇུག་པར་བྱ་བའི་ཚེ་སྦྱིན་སྲེག་བྱ་བའི་མེ་ནི་རླུང་ཞེས་བྱའོ། །དེ་ནས་མི་ཁྲུས་བྱ་པ་ལ། །དེ་བཞིན་པཱ་བ་མཱ་ན་ར་ཤེས། །ཞེས་པ་ནི་མངལ་དུ་ཞུགས་ནས་སྦྲུམ་པར་གྱུར་པ་ན་བུ་དེའི་ཆེད་དུ་ཁྲུས་བྱ་བའི་ཚེ་སྦྱིན་སྲེག་བྱ་བའི་མེ་ནི་པཱ་བ་མཱ་ན་ཞེས་བྱའོ། །བཀྲ་ཤིས་ཞེས་བྱ་མཚམས་ཀྱི་མཐར། །ཞེས་པ་ནི་བུ་བྱུང་བའི་ཚེ་སྦྱིན་སྲེག་བྱ་བའི་མེ་ནི་བཀྲ་ཤིས་ཞེས་བྱའོ། །བཙས་པའི་ལས་ལ་པྲ་གལ་ལ་བྷའོ། །ཞེས་པ་ནི་བུ་བཙས་ཟིན་པའི་འོག་ཏུ་སྦྱིན་སྲེག་བྱ་བའི་མེ་ནི་པྲ་གལ་ལ་བྷ་ཞེས་བྱའོ། །མིང་འདོགས་མེ་ནི་པཱ་རྠི་པ། །ཞེས་པ་ནི་བུའི་མིང་འདོགས་པའི་ཚེ་སྦྱིན་སྲེག་བྱ་བའི་མེ་ནི་པཱ་རྠི་བ་ཞེས་བྱའོ། །དེ་བཞིན་རྐན་དང་བ་པ་ལ་གཙང༌། །ཞེས་པ་ནི་བུ་རྐན་དབབ་པའི་ཚེ་སྦྱིན་སྲེག་བྱ་བའི་མེ་ནི་གཙང་མ་ཞེས་བྱའོ། །ཤད་བྷི་ཞེས་ཀྱང་གཙུག་ཕུད་ལ། །ཞེས་པ་ནི་གཙུག་ཕུད་འཇོག་པའི་ཚེ་སྦྱིན་སྲེག་བྱ་བའི་མེ་ནི་ཤང་བྷི་ཞེས་བྱའོ། །བརྟུལ་ཞུགས་སྦྱིན་ལ་ཀུན་འབྱུང་ངོ༌། །ཞེས་པ་ནི་བུ་ལོ་བརྒྱད་ལོན་ནས་
བག་མ་བླངས་ཀྱི་བར་དུ་བརྟུལ་ཞུགས་འཛིན་དུ་གཞུག་པའི་ཚེ་སྦྱིན་སྲེག་བྱ་བའི་མེ་ནི་ཀུན་དུ་འབྱུང་བ་ཞེས་བྱའོ། །ཉི་མ་ཞེས་བྱ་ཕྱུགས་སྦྱིན་ལའོ། །ཞེས་པ་ནི་བག་མ་ལེན་པའི་ཚེ་སྦྱིན་སྲེག་བྱ་བའི་མེ་ནི་ཉི་མ་ཞེས་བྱའོ། །བག་མ་ལེན་ལ་སྦྱོར་བྱེད་བཤད། །ཅེས་པ་ནི་བག་མ་ལེན་པའི་ཚེ་བསྐོར་ཟར་བྱེད་པའི་མེ་ནི་སྤྱོར་བྱེད་ཅེས་བྱའོ། །ཨགྣེ་ཡས་ནི་ཁྱིམ་ཁ་བསྲོ། །ཞེས་པ་ནི་ཁྱིམ་ཁ་བསྲོ་བའི་ཚེ་སྦྱིན་སྲེག་བྱ་བའི་མེ་ནི་ཨགྣེ་ཡ་ཞེས་བྱའོ། །ཉེ་བར་འབུལ་ལ་མེ་ཉིད་དོ། །ཞེས་པ་ནི་ཨ་བ་ནི་ཀ་ཞེས་བྱ་བའི་ཆོ་ག་ལ་སྦྱིན་སྲེག་བྱ་བའི་མེ་ནི་མེ་ཉིད་ཅེས་བྱའོ། །པ་བ་ཀ་ཞེས་བྱ་བའི་མེ། །སྣ་ཚོགས་ལྷ་ལ་སྦྱར་བར་བཤད། །ཅེས་པ་ནི་གཟའ་སྐར་ལ་སོགས་པའི་ལྷ་སྣ་ཚོགས་པ་ལ་སྦྱིན་སྲེག་བྱ་བའི་མེ་ནི་པ་བ་ཀ་ཞེས་བྱའོ། །ཁྱིམ་བདག་ལ་ནི་ཚངས་པའི་མེ། །ཞེས་པ་ནི་ཁྱིམ་བདག་གི་ཚོགས་ལ་སྦྱིན་སྲེག་བྱ་བའི་མེ་ནི་ཚངས་པའི་མེ་ཞེས་བྱའོ། །དེ་བཞིན་ཡོན་དབུལ་བ་ལ་ཞི། །ཞེས་པ་ནི་ཡོན་དབུལ་བའི་སྦྱིན་སྲེག་ཞེས་བྱའོ། །གཉིས་སུན་དཀྲི་ཎ་ཞེས་བྱ་བ་ནི་ལྷོ་ཕྱོགས་ལ་ཡང་བྱ་སྟེ། ཚངས་པའི་མེ་དང་ཞི་བའི་མེ་གཉིས་ནི་ལྷོ་ཕྱོགས་ལོགས་སུ་བཞག་ནས་རྟག་ཏུ་གསོ་བའི་མེ་ཞེས་པའོ། །དེ་བཞིན་ཕྱུགས་ནི་བཅིང་བ་ལ། །ཨ་བ་ནི་ཀ་ཞེས་བྱའི་མེ། །ཞེས་པ་ནི་ཕྱུགས་གསད་དེ་ལྷ་ལ་ཡོན་དབུལ་བའི་སྦྱིན་སྲེག་བྱ་བའི་མེ་ནི་ཨ་བ་ནི་ཀ་ཞེས་བྱའོ། །ལྟུང་བ་ལ་ནི་པི་བེ་ཙེ། །ཞེས་པ་ནི་མྱོས་པས་ལྟུང་བ་བྱུང་སྟེ། འགྱོད་ནས་མྱོས་པ་དེ་དག་པར་བྱ་བའི་སྤྱིན་སྲེག་བྱ་བའི་མེ་ནི་པི་བེ་རྩེ་ཞེས་བྱའོ། །བཙོས་སྦྱིན་ལ་ནི་ས་ཧ་ས། །ཞེས་པ་ནི་ཟས་བཅོས་པ་སྦྱིན་པའི་ཆོ་ག་ལ་སྦྱིན་སྲེག་བྱ་བའི་མེ་ནི་ས་ཧ་ས་ཞེས་བྱའོ། །དུས་ཀྱི་མཚམས་ལ་ཧ་བིར་ཤེས། །དུས་ཀྱི་མཚམས་ཞེས་བྱ་བའི་ཆོ་ག་ལ་སྦྱིན་སྲེག་བྱ་བའི་མེ་ནི་ཧ་བི་ཞེས་བྱའོ། །དེ་བཞིན་ཟླ་བ་གནས་ལ་གཏེར། །ཞེས་པ་ནི་ཟླ་བ་གནས་པ་ཞེས་བྱ་བའི་ཆོ་ག་ལ་སྦྱིན་སྲེག་བྱ་བའི་མེ་ནི་གཏེར་ཞེས་བྱའོ། །མྲི་ཊ་ཞེས་བྱ་བ་སྲེག་བླུགས་ལ། །ཞེས་པ་ནི་སྦྱིན་སྲེག་གི་སྔོན་རོལ་དུ་རྫས་རྣམས་ལས་གང་བའི་སྦྱིན་སྲེག་གསུམ་བྱ་བའི་མེ་ནི་མྲི་ཊ་ཅེས་བྱའོ། །ཞི་ལ་ད་རུ་ཎ་ར་འདོད་དོ། །ཞེས་པ་ནི་ཞི་བའི་སྦྱིན་སྲེག་ལ་ནི་མེ་དུ་ཎ་ཞེས་བྱ་བར་འདོད་དོ། །བྱས་མཐའི་མེ་ནི་གཤིན་རྗེའི། །ཞེས་པ་ནི་མེ་ཤི་བའི་ཚེ་སྦྱིན་སྲེག་བྱ་བའི་མེ་ནི་གཤིན་རྗེ་ཞེས་
བྱའོ། །དེ་བཞིན་རྒྱས་ལ་སྟོབས་སྦྱིན་པའོ། །ཞེས་པ་ནི་རྒྱས་པའི་སྦྱིན་སྲེག་གི་མེ་ནི་སྟོབས་སྦྱིན་པ་ཞེས་བྱའོ། །དྲག་ཤུལ་སྤྱད་པ་ཐམས་ཅད་ལ། །ཁྲོ་བོའི་མེ་ནི་རབ་ཏུ་བསྒྲགས། །ཞེས་པ་ནི་མངོན་སྤྱོད་ཀྱི་སྦྱིན་སྲེག་བྱ་བའི་མེ་ནི་ཁྲོ་བོ་ཞེས་བྱའོ། །འདོད་ལས་སྐྱེས་ཞེས་བྱ་བའི་མེ། །དེ་ནི་དབང་གི་དོན་དུ་བཤད། །ཅེས་པ་ནི་དབང་དུ་བྱ་བའི་སྦྱིན་སྲེག་ལ་འདོད་སྐྱེས་ཞེས་བྱ་བའི་མེ་དེ་བཤད་དོ་ཞེས་པའོ། །ནགས་ཚལ་སྲེག་ལ་ཕོ་ཉའི་མེ། །ཞེས་པ་ནི་གང་ནགས་སྲེག་པར་བྱེད་པའི་མེ་ནི་ཕོ་ཉ་ཞེས་བྱའོ། །ཁོང་པའི་མེ་ནི་ཛ་ཋ་ར། །ཞེས་པ་ནི་ཁོང་པ་ན་གནས་ནས་ཟས་ལ་སོགས་པ་འཇུ་བར་བྱེད་པའི་མེ་ནི་ཛ་ཋ་ར་ཞེས་བྱའོ། །བཟའ་བར་བྱ་བ་ཤ་ཟར་བཤད། །ཅེས་པ་ནི་བཟའ་བར་བྱེད་པའི་མེ་ནི་ཤ་ཟ་ཞེས་བྱའོ། །རྒོད་མའི་ཁ་ནི་རྒྱ་མཚོ་ནའོ། །ཞེས་པ་ནི་རྒྱ་མཚོ་ན་གནས་པའི་མེ་ནི་རྒོད་མའི་ཁ་ཞེས་བྱའོ། །ཟད་ཚེ་འཇིག་པ་ཞེས་བྱ་སྟེ། །དུས་མཐའི་མེར་ནི་ཡང་དག་བསྒྲགས། །ཞེས་པ་ནི་འཇིག་རྟེན་འཇིག་པའི་ཚེའི་མེ་ནི་འཇིག་པ་ཞེས་བྱ་སྟེ། དེ་ཡང་དུས་མཐའི་མེ་ཞེས་སོ། །འདི་ནི་མེ་རྣམས་མདོར་བསྡུས་ནས། །ངེས་པར་ཁྱོད་ལ་བཤད་པ་སྟེ། །རིག་བྱེད་ཐོས་པ་སྤྱོད་རྣམས་ཀྱི། །ཚངས་པའི་བུ་དག་བརྗོད་པ་ཡིན། །བཞི་བཅུ་རྩ་བཞི་འདི་དག་གི ། དེ་ཡི་ཚེ་ན་ངས་བསྟན་ཏོ། །ཞེས་པ་དེ་ལ་མེ་ང་རྒྱལ་ཅན་གང་ཡིན་པ་དེ་ནི་རང་བྱུང་བའོ་ཞེས་པ་ནས། ངོས་བསྲུངས་ཨ་ཐར་ན་བ་ཡི། །བུ་ཡིན་བར་ནི་རྒྱ་མཚོར་གྲགས། །ཞེས་པའི་བར་ནི་མེ་རྣམས་ཀྱི་སྐྱེས་པའི་རབས་བསྟན་པའོ། །རླུང་ཞེས་བྱ་བའི་མེ་དེ་ནི། །མངལ་དུ་འཇུག་པའི་ཆོ་གར་བཤད། །ཅེས་པ་ནས། འདོད་ལས་སྐྱེས་ཞེས་བྱ་བའི་མེ། །དེ་ནི་དབང་གི་དོན་དུ་བཤད། །ཅེས་པའི་བར་ནི་ལས་རྣམས་ཀྱི་རང་བཞིན་གྱི་མེ་བསྟན་པའོ། །ནགས་ཚལ་སྲེག་ལ་ཕོ་ཉའི་མེ། །ཞེས་པ་ནས། ཟད་ཚེ་འཇིག་པ་ཞེས་བྱ་སྟེ། །དུས་མཐའི་མེར་ནི་ཡང་དག་བསྒྲགས། །ཞེས་པའི་བར་ནི་མེ་རྣམས་ཀྱི་ངང་ཚུལ་ལས་རང་བཞིན་བསྟན་པ་སྟེ། དེ་རྣམས་བྲམ་ཟེ་ལ་སོགས་པ་འཇིག་རྟེན་པའི་གཞུང་ལས་གྲགས་ཤིང་འཇིག་རྟེན་པའི་ལས་བྱེད་པའོ། །གསང་བ་པའི་བདག་པོ་དེ་ལ། །མེ་རྣམས་རང་བཞིན་མི་ཤེས་པར། །གང་དག་སྦྱིན་སྲེག་བྱེད་པ་དེ། །སྦྱིན་སྲེག་མ་ཡིན་ལེགས་བྱས་
མིན། །ལས་ཀྱི་འབྲས་བུ་འང་ཡོད་མི་འགྱུར། །ཞེས་པ་ནི་མེ་རྣམས་ཀྱི་རང་བཞིན་མི་ཤེས་ན་ཆོ་ག་དང་འགལ་བས་སྦྱིན་སྲེག་བྱས་པར་མི་ཆུད་ལ། ལེགས་བྱས་མིན་ཞེས་པ་ནི་སྦྱིན་སྲེག་གི་ཆོ་ག་འཇག་མ་དགྲམ་པ་ལ་སོགས་པའི་ལེགས་བྱས་རྣམས་ཀྱང་ལེགས་བྱས་སུ་མི་ཆུད་དོ་ཞེས་པའོ། །ལས་ཀྱི་འབྲས་བུ་འང་ཡོད་མི་འགྱུར། །ཞེས་པ་ནི་གང་གི་ཕྱིར་སྦྱིན་སྲེག་བརྩམས་པའི་ལས་དེའི་འབྲས་བུར་མི་འགྱུར་རོ་ཞེས་པའོ། །ངས་བྱང་ཆུབ་མངོན་པར་རྫོགས་པར་སངས་རྒྱས་ནས་ནི་མེ་བཅུ་གཉིས་བསྟན་ཏེ་ཞེས་པ་ནི་བཅོམ་ལྡན་འདས་བྱང་ཆུབ་སེམས་པའི་སྤྱད་པ་སྤྱོད་པ་ན་བྲམ་ཟེའི་རིག་བྱེད་ལས་འབྱུང་བའི་མེ་གོང་དུ་སྨོས་པ་རྣམས་བསྟན་ལ། མངོན་པར་སངས་རྒྱས་ནས་ནི་འཇིག་རྟེན་ལས་འདས་པའི་སྦྱིན་སྲེག་ལ་སོགས་པ་བྱ་བའི་ཕྱིར་མེ་རྣམ་པ་བཅུ་གཉིས་པ་འདི་བསྟན་ཏོ་ཞེས་པའོ། །དེ་ཡང་གང་ཞེ་ན་ཞེས་པ་ནས། ཡེ་ཤེས་རྫོགས་བྱེད་ཡིན་ཞེས་བྱ། །ཞེས་པའི་བར་ནི་རྒྱས་པའི་སྦྱིན་སྲེག་གི་མེའི་མཚན་ཉིད་གསུངས་པ་སྟེ། ཡེ་ཤེས་མེ་ཞེས་པ་ནི་ཡེ་ཤེས་སེམས་དཔའ་ཡིན་པའི་ཕྱིར་རོ། །གཉིས་པ་འཛིན་བྱེད་ཅེས་བྱ་སྟེ། །ཞེས་པ་ནས། བགྲང་ཕྲེང་རིལ་བ་སྤྱི་བླུགས་ཐོགས། །ཞེས་པའི་བར་ནི་ཞི་བའི་སྦྱིན་སྲེག་གི་མེའི་མཚན་ཉིད་གསུངས་པའོ། །གསུམ་པ་རླུང་ཞེས་བྱ་བ་སྟེ། །མདོག་མེད་གནག་ལ་རྩུབ་པའོ། །ཞེས་པ་ནི་རླུང་ཞེས་པའི་མེ་དེ་མེ་ཐབ་ཏུ་མེ་སྤར་པའི་ཚེ་བོད་པའོ། །བཞི་པ་དམར་པོ་ཞེས་བྱ་སྟེ། །ནུབ་ཁའི་མཚམས་ཀྱི་དམར་ཐག་འདྲ། །ཞེས་པ་ནི་དབང་གི་སྦྱིན་སྲེག་གི་མེའོ། །ལྔ་པ་མྲི་ཊ་ཞེས་བྱ་བ། །སྦུན་ལ་ཁ་དོག་ཁམ་པ་སྟེ། །མགྲིན་པ་རིང་ཞིང་གཟི་བརྗིད་ཆེ། །ཀུན་ལ་ཕན་ནི་འདོགས་པར་བཤད། །ཅེས་པ་ནི་གང་བའི་སྦྱིན་སྲེག་བྱ་བའི་མེའོ། །དྲུག་པ་ཁྲོ་ནའོ་ཞེས་བྱ་སྟེ། །མིག་ཡོན་དུད་པའི་ཁ་དོག་འདྲ། །གྱེན་དུ་སྐྲ་བརྫེ་ས་སྒྲ་ཆེན་འབྱིན། །མཆེ་བ་བཞི་པ་སྟོབས་པོ་ཆེའོ། །ཞེས་པ་ནི་མངོན་སྤྱོད་ཀྱི་སྦྱིན་སྲེག་བྱ་བའི་མེའི་མཚན་ཉིད་གསུངས་པའོ། །བདུན་པ་ལྟ་བ་ཞེས་བྱ་སྟེ། །རྣོ་ལ་ཁ་དོག་ཀུན་དང་ལྡན། །ཞེས་པ་ནས། རྨུགས་བྱེད་ཅེས་པ་བཅུ་གཉིས་ཏེ། །སེམས་ཅན་ཐམས་ཅད་རྨུགས་བྱེད་པའོ། །ཞེས་པའི་བར་ནི་མེ་ལྷག་མ་རྣམས་ཀྱི་མཚན་ཉིད་ཉི་ཚེ་སྨོས་
པའོ། །གསང་བ་པའི་བདག་པོ་དེ་ལྟར། མེ་ཡི་གཟུགས་ནི་བྱིན་བརླབས་ཏེ། །ཞེས་པ་ལ་སོགས་པ་མེ་རྣམས་བཤད་པའི་ཞར་ལ་སྦྱིན་སྲེག་བཤད་པ་སྟེ། མེ་ཡི་གཟུགས་ནི་བྱིན་བརླབས་ཏེ། །ཞེས་པ་ནི་ཞི་བ་དང་རྒྱས་བ་གང་ཡང་རུང་པའི་མེས་ལས་བྱེད་པ་དང་རྫས་གཉིས་ཀའི་ཁ་དོག་བསྒྱུར་རོ་ཞེས་པ་སྟེ། དེ་བས་ན། བདག་རང་གི་ནི་གཟུགས་དང་ནི། །རྫས་ཀྱང་དེ་ཡི་ངོ་བོར་བྱ། །ཞེས་གསུངས་པ་ཡིན་ནོ། །འདི་ནི་ཕྱི་ཡི་སྦྱིན་སྲེག་སྟེ། །ཞེས་པ་ནི་དེ་ལྟར་བདག་དང་མེ་དང་རྫས་གསུམ་ཚར་དུ་ལྡན་པ་དེ་ནི་ཕྱི་རོལ་གྱི་སྦྱིན་སྲེག་གོ་ཞེས་པའོ། །ནང་གི་སྦྱིན་སྲེག་ཀྱང་གསང་བ་པའི་བདག་པོ་ནང་གི་ནི་རང་བཞིན་གཅིག་པ་སྟེ་ཞེས་པ་ནི་སྟོང་པ་ཉིད་ཀྱི་རང་བཞིན་དུ་གཅིག་པའོ་ཞེས་པ་སྟེ། གནས་དུ་ཞིག་གཅིག་ཏུ་བསྡུ་ཞེ་ན། གནས་གསུམ་གཅིག་ཏུ་བྱ་བའི་ཚུལ་གྱིས་གསུམ་དང་ལྡན་པ་ནི་ནང་གི་སྦྱིན་སྲེག་ཡིན་ནོ་ཞེས་གསུངས་ཏེ། བདག་དང་མེ་དང་རྫས་ཏེ་གསུམ་པོ་གཅིག་ཏུ་ལྡན་པའི་གནས་གསུམ་པོ་དེ། སྟོང་པ་ཉིད་ཀྱི་རང་བཞིན་གཅིག་ཏུ་བྱའོ་ཞེས་པ་སྟེ། དེ་ཡང་འོག་ནས་འགྲེལ་ཏོ། །གསང་བ་པའི་བདག་པོ་བྱམས་པ་ཆེན་པོ་དང་སྙིང་རྗེ་ཆེན་པོ་དང་ལྡན་པ་ནི་ཞི་བའོ་ཞེས་པ་ནི་ཞི་བའི་སྦྱིན་སྲེག་བྱ་བ་ལ་བྱམས་བ་དང་སྙིང་རྗེ་ལྷག་པར་བསྐྱེད་དོ་ཞེས་པའོ། །དགའ་བ་དང་ལྡན་པ་ནི་རྒྱས་པའོ་ཞེས་པ་ནི་རྒྱས་པའི་སྦྱིན་སྲེག་ལ་དགའ་བ་ལྷག་པར་བསྐྱེད་དོ་ཞེས་པའོ། །ཁྲོ་བོའི་མེས་ནི་ཞེས་པ་ནས། ཁྲོ་བ་ཐུལ་བས་བྱ་བའོ། །ཞེས་པའི་བར་ནི་མངོན་སྤྱོད་ཀྱི་སྦྱིན་སྲེག་གསུངས་པ་སྟེ། ཁྲོ་བར་བྱ་བ་ཡང་ལྡང་པ་དང་བཅས་པ་མ་ཡིན་ཏེ། དེ་བས་ན་ཁྲོ་བ་ཐུལ་བས་བྱ་བའོ། །ཞེས་གསུངས་པ་ཡིན་ནོ། །དབུས་སུ་རླུང་གི་མེ་གཞག་གོ །ཞེས་པ་ནི་དང་པོར་ཞུགས་ཐབ་ཏུ་མེ་སྦར་བའི་ཚེ་རླུང་གི་མེ་བོས་ནས་རླུང་གཡབ་ཀྱིས་མེ་སྦར་བར་བྱའོ་ཞེས་པའོ། །གསང་བ་པའི་བདག་པོ་དེ་ལྟར་ཇི་སྐད་བསྒྲགས་པའི་གནས་དེ་དང་དེ་དག་ཏུ་ཇི་ལྟར་རིགས་པ་དང་ཇི་ལྟར་ལྡན་པར་སྦྱིན་སྲེག་བྱའོ་ཞེས་པ་ནི་ཞི་བ་དང་རྒྱས་པ་ལ་སོགས་པའི་གནས་ཇི་སྐད་དུ་གསུངས་པ་དེ་དག་གར་རིགས་པར་ཞི་བ་ལ་སོགས་པའི་སྦྱིན་སྲེག་རྣམས་བྱའོ་ཞེས་པའོ། །དེ་ནས་ཡང་བཅོམ་ལྡན་འདས་ལ་ཕྱག་
ན་རྡོ་རྗེས་འདི་སྐད་ཅེས་གསོལ་ཏོ་ཞེས་པ་ནས། ཇི་ལྟར་བསམ་པ་བདག་ལ་གསུངས། །ཞེས་པའི་བར་ནི་གོང་དུ་སྦྱིན་སྲེག་མདོར་བསྟན་པ་དེ་ལ་མེ་ཐབ་ཇི་ལྟར་བྱ་བ་དང༌། མེ་བསང་བའི་ཕྱིར་ཆུས་གཏོར་བ་ནི་ཇི་ལྟར་གཏོར་བ་དང༌། མེ་ཐབ་ཀྱི་མཐར་འཇག་མ་ཇི་ལྟར་གདིང་བ་དང༌། མེ་ཐབ་ཏུ་མེ་ཇི་ལྟར་གཞག་པ་ཞུས་པའོ། །གསང་བ་པའི་བདག་པོ། །དེ་ལ་མེ་ཡི་ཐབ་ཁུང་ནི། །ཀུན་དུ་ཁྲུ་གང་ཙམ་གྱི་ཚད། །ཁ་ཁྱེར་སོར་བཞིའི་ཚད་དུ་བྱ། །རྡོ་རྗེའི་མཚན་མ་དག་གིས་མཚན། །ཞེས་པ་ནི། མེ་ཡི་ཐབ་ཁུང་ཇི་ལྟར་བགྱི། །ཞེས་ཞུས་པའི་ལན་ཏེ། མེ་ཐབ་ཁོར་ཁོར་ཡུག་ཏུ་ཁྲུ་གང་ཙམ་ལ་ཁ་ཁྱེར་ཡང་ཞེང་དང་དཔངས་སུ་སོར་བཞི་པར་བྱ་སྟེ། ཞབས་སུ་རྡོ་རྗེའི་མཚན་མས་མཚན་པར་བྱའོ། །ཐབ་ཁུང་གི་ནི་གཡས་ཕྱོགས་ནས། །ཀུ་ཤའི་རྩྭ་ནི་རློན་པ་དགྲམ། །རྩེ་མོ་དག་ཀྱང་རྩ་བས་དཀྲི། །རྩ་བ་དག་ཀྱང་རྩེ་མོས་དཀྲི། །ཞེས་པ་ནི། ཀུ་ཤའི་རྩྭ་ཡང་ཇི་ལྟར་དགྲམ། །ཞེས་ཞུས་པའི་ལན་ཏེ་གོ་བར་ཟད་དོ། །འདིར་ནི་བསང་གཏོར་གཡས་ཕྱོགས་ནས། །ཀུ་ཤ་བསྐོར་བ་བཞིན་དུ་བྱ། །ཞེས་པ་ནི། བསང་གཏོར་དག་ཀྱང་ཇི་ལྟར་བགྱི། །ཞེས་ཞུས་པའི་ལན་ཏེ། མེ་བསང་བའི་ཕྱིར་ཆུ་གཏོར་བ་ཡང་འཇག་མ་བསྐོར་པའི་ཚུལ་དུ་གཡས་ཕྱོགས་ནས་བསྐོར་ཞིང་གདབ་པོ་ཞེས་པའོ། །བྱུག་སྤོས་མེ་ཏོག་བདུག་སྤོས་དག །མྲྀ་ཊའི་མེ་ལ་དབུལ་བར་བྱ། །ཞེས་པ་ནས། མཁས་པས་དེ་ལ་དབུལ་བར་བྱ། །ཞེས་པའི་བར་ནི། ཇི་ལྟར་བསམ་པ་བདག་ལ་གསུངས། །ཞེས་ཞུས་པའི་ལན་ཏེ། མེ་ཐབ་དེར་ཐོག་མར་མེ་ཏོག་གཅིག་གཞག་སྟེ། མྲི་ཊའི་མེ་བོས་ལ་དྲི་དང་མེ་ཏོག་ལ་སོགས་པས་མཆོད་དེ། དེ་ནས་ཡང་ཆུས་བསངས་ལ་གང་བའི་སྦྱིན་སྲེག་ལན་གསུམ་མེ་དེ་ཉིད་ཀྱི་སྔགས་ཀྱིས་བཏབ་སྟེ་དབུལ་ལོ་ཞེས་པའོ། །དེ་ནས་ཞི་པའི་སྦྱིན་སྲེག་གམ། །ཡང་ན་རྒྱས་པའི་སྦྱིན་སྲེག་བྱ། །འཇིག་རྟེན་པ་ཡི་སྤྱིན་སྲེག་འདི། །ཕྱི་རོལ་པ་ཞེས་གསུངས་པ་ཡིན། །ཞེས་པ་ནི་ཇི་སྐད་བཤད་པའི་རིམ་པས་མེ་ཐབ་ཀྱི་ཆོ་ག་བྱ་བ་དང་མྲི་ཊའི་མེ་ལ་གང་བའི་སྦྱིན་སྲེག་བྱིན་ཏེ། མེ་དེ་རང་གི་གནས་སུ་གཞག་ལ། །དེ་ནས་ཞི་བའམ་རྒྱས་པའི་མེ་གང་ཡང་རུང་བ་སྤྱན་
དྲངས་ན་ཞི་བ་ལ་སོགས་པའི་སྦྱིན་སྲེག་གམ། ཇི་ལྟར་འདོད་པ་བྱའོ། །དེ་དག་ནི་མེ་ཐབ་དང་མེ་ལ་སོགས་པ་ཕྱི་རོལ་གྱི་དངོས་པོ་རྣམས་ལ་དམིགས་པས་འཇིག་རྟེན་གྱི་སྦྱིན་སྲེག་གསུངས་པ་ཡིན་ནོ། །གཞན་ཡང་ནང་གི་སྦྱིན་སྲེག་ནི། ཞེས་པ་ནས། དེ་ནི་ནང་གི་སྦྱིན་སྲེག་ཅེས། །དེས་པ་ཁྱོད་ལ་བསྟན་པ་ཡིན། །ཞེས་པའི་བར་ནི་ནང་གི་སྦྱིན་སྲེག་བཤད་པ་སྟེ། དེ་ཡང་བདག་ཉིད་ཀྱི་ཕུང་པོ་ལྔ་སྟོང་པ་ཉིད་དུ་བཤིག་ལ། ཕྱི་རོལ་གྱི་མེ་ཐབ་ལ་སོགས་པ་ཡུལ་གྱི་གཟུགས་རྣམས་ཀྱང་སྟོང་པར་བཤིག་སྟེ། དེ་བཞིན་དུ་སྒོ་དྲུག་གི་རྣམ་པར་ཤེས་པ་འཕྲོ་བ་རྣམས་ཀྱང་སོ་སོར་བཤིག་ནས་མི་འཕྲོ་བར་བཀག་ཅིང་དེ་ལྟར་འཇིག་ཅིང་འགོག་པར་བྱེད་པའི་བྱང་ཆུབ་ཀྱི་སེམས་དེ་ཡང་འཕྲོ་བ་མེད་པའི་ཤེས་རབ་ཀྱིས་བཀག་པ་རྣམ་པར་མི་རྟོག་པའི་ཏིང་ངེ་འཛིན་ལ་གནས་པ་ནི་ནང་གི་སྦྱིན་སྲེག་སྟེ། དེ་བས་ན། རླུང་གི་མེ་ཡང་འཕྲོ་བ་མེད་པའི་ཤེས་རབ་ཀྱིས་བཀག་སྟེ། ཡིད་ཀྱིས་མེ་ལ་སྦྱིན་སྲེག་བྱའོ་ཞེས་གསུངས་པ་ཡིན་ནོ། །རླུང་གི་མེ་བཀག་པ་ནི་སྲོག་དང་རྩོལ་བ་རབ་ཏུ་བསྡམས་ནས་ཞེས་པའོ། །ཡིད་ཀྱིས་མེ་ལ་སྦྱིན་སྲེག་བྱའོ། །ཞེས་པ་ནི་སེམས་མི་གཡོ་པར་བསྲེག་གོ་ཞེས་པའོ། །དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་འཁོར་འདུས་པ་ལ་བཀའ་སྩལ་པ། ཁྱེད་རྣམས་ཀྱིས་ཆོས་ཀྱི་རྣམ་གྲངས་འདི་ལ་བག་ཡོད་པར་གནས་པས་སྤྱད་པར་བྱའོ་ཞེས་པ་ནི་ཆོས་ཀྱི་རྣམ་གྲངས་འདི་ནི་སྣོད་དུ་མ་གྱུར་པའི་སེམས་ཅན་རྣམས་ལ་གྱ་ཚོམ་དུ་སྦྱིན་པར་མི་བྱ་བ་སྟེ། དེ་བས་ན། དེའི་སྲས་རྣམས་མ་གཏོགས་པར་དབང་པོ་མ་བརྟགས་པ་གཞན་སུ་ལ་ཡང་མ་སྦྱིན་ཅིག་ཅེས་གསུངས་པ་ཡིན་ནོ། །དའི་བུ་རྣམས་ཀྱི་མཚན་ཉིད་འོག་ནས་བཤད་པ་རྣམས་ལ་ནི་དབང་པོ་བརྟག་མི་དགོས་པར་སྦྱིན། དེ་ལས་གཞན་པ་རྣམས་ལ་ནི་ཆོས་ཀྱི་རྣམ་གྲངས་ཟབ་མོ་འདི་ཤེས་རབ་དང་ལྡན་ནམ་མི་ལྡན་པ་དང༌། དབང་པོ་རྣམས་འདོད་ཆགས་ལ་སོགས་པའི་ཡུལ་རྣམས་ལ་འཕྲོ་བ་ཡིན་ནམ་མ་ཡིན་པ་བརྟགས་ཏེ་ཤེས་པར་བྱས་ནས་དེ་ལྟ་བུ་ལ་སོགས་པའི་སྐྱོན་རྣམས་མེད་ཅིང་སྣོད་དུ་གྱུར་ན་གདོད་སྦྱིན་ཅིག་ཅེས་པ་སྟེ། དམན་པ་ལ་མོས་པ་ལ་ཟབ་ཅིང་རྒྱ་ཆེ་བའི་ཆོས་བཤད་པ་ནི་བྱང་ཆུབ་
སེམས་དཔའི་འཁྲུལ་པའོ་ཞེས་འབྱུང་བའི་ཕྱིར། དེ་ནས་དེའི་ཚེ་ཐམས་ཅད་ཀྱིས། དེ་བཞིན་གཤེགས་ལ་ཕྱག་འཚལ་ཏེ། ཞེས་པ་ནས། བསྟན་པ་འདི་ལ་བཤད་དུ་གསོལ། །ཞེས་པའི་བར་ནི་ཕྱག་ན་རྡོ་རྗེ་ལ་སོགས་པའི་འཁོར་དེ་རྣམས་ཀྱིས་རྣམ་པར་སྣང་མཛད་མངོན་པར་རྫོགས་པར་བྱང་ཆུབ་པ་རྣམ་པར་སྦྲུལ་པ་བྱིན་གྱིས་རློབ་པའི་ཆོས་ཀྱི་རྣམ་གྲངས་འདི་འཇིག་རྟེན་ན་མི་ཉམས་ཤིང་ཡུན་རིང་དུ་གནས་པར་བྱ་བའི་ཕྱིར་བྱིན་གྱིས་བརླབ་པའི་སྔགས་ཀྱིས་བྱིན་གྱིས་རློབ་པར་བཅོམ་ལྡན་འདས་ལ་གསོལ་བ་སྟེ། སྔགས་འདིས་བྱིན་གྱིས་བརླབས་ནས་ཆོས་ཀྱི་རྣམ་གྲངས་འདི་གསུངས་པར་གྱུར་པའི་ཕྱིར་རོ། །རྣམ་པར་སྣང་མཛད་ཆེན་པོ་མངོན་པར་རྫོགས་པར་བྱང་ཆུབ་པ་རྣམ་པར་སྤྲུལ་པ་བྱིན་གྱིས་རློབ་པ་ཤིན་ཏུ་རྒྱས་པ་ཆེན་པོའི་མདོ་སྡེའི་དབང་པོའི་རྒྱལ་པོ་ལས། གསང་སྔགས་ཀྱིས་གོ་ནས་བྱང་ཆུབ་སེམས་དཔའི་སྤྱད་པ་སྤྱོད་པའི་ཆོ་ག་ཇི་སྙེད་པ་རྫོགས་སོ།། །།རྣམ་པར་སྣང་མཛད་མངོན་པར་རྫོགས་པར་བྱང་ཆུབ་པ་རྣམ་པར་སྦྲུལ་པ་བྱིན་གྱིས་རློབ་པའི་རྒྱུད་ཆེན་པོ་སློབ་དཔོན་སངས་རྒྱས་གསང་བས་ཕྱིན་ཅི་མ་ལོག་པར་བཤད་པ་རྫོགས་སོ།། །།རྣམ་པར་སྣང་མཛད་མངོན་པར་རྫོགས་པར་བྱང་ཆུབ་པའི་རྒྱུད་ཀྱི་ཚིག་འགྲེལ་ཞེས་གྲགས་པ་འདི་ནི་དཔལ་སྔར་ཐང་གི་གཙུག་ལག་ཁང་དུ་བསྟན་བཅོས་བོད་ཀྱི་ཡུལ་དུ་འགྱུར་བ་ཇི་ལྟར་སྙེད་པ་བསྡུས་པའི་ཚེ། འགྲེལ་བ་འདིའི་དཔེ་ཕྱི་མོ་མ་དག་ཅིང་གོང་འོག་འཁྲུགས་ལ་བར་བར་ནས་ཅུང་ཟད་མ་ཚང་བ་ཞིག་ལ་བརྟེན་པས་བསྟན་འགྱུར་ཐམས་ཅད་དུ་མ་དག་པ་བརྒྱུད་པ་དང༌། སྐད་གསར་བཅད་ཀྱིས་གཏན་ལ་མ་ཕབ་པའི་འགྱུར་ཡང་མི་བདེ་བ་ཞིག་སྣང་བ་ལས། སྐད་གཉིས་སྨྲ་བའི་དབང་པོ་སྐ་བ་དཔལ་བརྩེགས་ཀྱིས་བསྒྱུར་བའི་རྒྱུད་ཀྱི་ཚིག་དང་བསྟུན་ཏེ། སྐད་གསར་བཅད་དང་མཐུན་པར་བཅོས་པ་འདི་ནི་ཡུལ་དབུས་ཀྱི་བནྡེ་གཞོན་ནུ་དཔལ་ཞེས་བགྱི་བས། དཔལ་རྩེ་ཐང་གཙུག་ལག་ཁང་དུ་ལྕགས་མོ་སྦྲུལ་གྱི་ལོ་ལ་བྲིས་པའོ།།