འཕགས་པ་འཇམ་དཔལ་གསང་བའི་རྒྱུད་ཀྱི་དཀྱིལ་འཁོར་གྱི་ཆོ་ག།
དོན་ཡོད་པ།
རྒྱ་གར་སྐད་དུ། ཨཱཪྻ་མཉྫུ་ཤྲཱི་གུ་ཧྱ་ཏནྟྲ་སྱ་མཎྜ་ལ་བི་དྷིཿ། བོད་སྐད་དུ། འཕགས་པ་འཇམ་དཔལ་གསང་བའི་རྒྱུད་ཀྱི་དཀྱིལ་འཁོར་གྱི་ཆོ་ག །འཇམ་པའི་དབྱངས་ལ་ཕྱག་འཚལ་ལོ། །འཕགས་པ་འཇམ་དཔལ་དབྱངས་ཀྱི་ནི། །ཁྲོ་བོ་ཡི་ནི་བསྙེན་པ་དག །སྔོན་དུ་བསྙེན་པ་བྱས་ནས་ནི། །དེ་ཡི་དཀྱིལ་འཁོར་བྲི་བར་བྱ། །དེ་ནས་འདི་ཡི་དཀྱིལ་འཁོར་ནི། །དངོས་གྲུབ་དམ་པ་སྦྱིན་མཛད་པ། །འཇིག་རྟེན་གསུམ་པོ་འཁྲུག་པར་མཛད། །ཡི་དགས་དམར་པོ་ཞེས་བྱ་ཡི། །ཚད་དུ་འདི་ནི་དཀྱིལ་འཁོར་འདི། །གནས་ནི་གང་དུ་འགྲུབ་འགྱུར་བ། །སྔགས་པས་
ཐོག་མ་ཉིད་དུ་ནི། །དེ་ཡི་གནས་ནི་བརྟག་པར་བྱ། །ཤིང་གཅིག་དང་ནི་དུར་ཁྲོད་དང༌། །ཁྱིམ་སྟོང་དང་ནི་བཞི་མདོ་དང༌། །མཆོད་རྟེན་འགྲམ་དང་ལྷ་ཁང་འགྲམ། །ཐིབས་པོ་ལམ་སྲང་གཉིས་པ་དང༌། །སྐྱེད་མོས་ཚལ་དང་རི་ཡི་རྩེ། །ཆུ་ཡི་འགྲམ་མམ་ནགས་ཚལ་དང༌། །ལྷ་ཆེན་གྱི་ནི་གནས་ཀྱང་རུང༌། །བ་ལང་ལྷས་སམ་ཡུལ་གྱིས། །ཁྱད་པར་དུ་ནི་ཡུལ་གཙང་སར། །ཡང་ནི་ཡིད་ནི་རབ་འཇུག་པ། །དེར་ནི་དཀྱིལ་འཁོར་རབ་ཏུ་བྱ། །ཤར་དང་བྱང་ནི་དམའ་བའམ། །ཁ་དོག་སྣུམ་པར་རབ་ཏུ་བཟང༌། །བ་ཚྭ་མེད་ཅིང་མ་གས་པ། །དང་པོར་མཁས་པས་བརྟག་པར་བྱ། །དག་པའི་གཟུགས་ནི་རབ་བཟུང་སྟེ། །དེ་ཉིད་གསུམ་བརྗོད་ས་ལ་ནི། །ལག་གིས་བརྡབ་པ་དག་ཏུ་བྱ། །རབ་འགྱུར་ལྷ་མོ་སྦྲན་པར་བྱ། །སྐྱོབ་བ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་གྱི། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །ཤཱཀྱ་སེང་གེ་སྐྱོབ་པ་ཡིས། །ཇི་ལྟར་བདུད་ཀྱི་ཚོགས་བཅོམ་པ། །དེ་བཞིན་བདག་གིས་བདུད་ལས་ནི། །རྒྱལ་བར་བྱས་ཏེ་དཀྱིལ་འཁོར་བྲི། །གསེར་གྱི་མདོག་དང་ལྡན་པ་ཡི། །ས་ཡི་ལྷ་མོ་ཇི་བཞིན་དུ། །ས་ལས་རབ་ཏུ་འཐོན་པ་ནི། །རྐང་བཀྲུ་མཆོད་ཡོན་མཉེས་པར་བྱས། །སྔོན་གྱི་དུས་ན་དེ་བཞིན་གཤེགས། །ཤཱཀྱ་སེང་གེས་ས་འདིར་ནི། །སྡེ་དང་བཅས་པའི་བདུད་བཏུལ་ནས། །ཆོས་རྣམས་མངོན་རྫོགས་སངས་རྒྱས་བཞིན། །དེ་ནས་རིག་འཛིན་ཅན་གྱིས་ནི། །སེམས་ཅན་དོན་དུ་དཀྱིལ་འཁོར་བྱེད། །ས་ཡི་ལྷ་མོས་དབང་མཛོད་ཅིག །བདུད་རྣམས་ཞི་བར་མཛད་དུ་གསོལ། །ས་བསླང་བའི་ཆོ་གའོ། །དེ་ནས་རིག་འཛིན་ནན་གྱིས་ནི། ས་ནི་ཡང་དག་སྦྱང་བར་བྱ། །ཁྲོ་བོ་ཡི་ནི་ང་རྒྱལ་གྱིས། །འབྱུང་བོའི་གཏོར་མ་བྱིན་ནས་ཀྱང༌། །ང་ནི་རྡོ་རྗེ་འདི་མིང་སྟེ། །སློབ་མ་དག་དང་སེམས་ཅན་གྱི། །དོན་དུ་དཀྱིལ་འཁོར་ཆེན་པོ་ནི། །ཡི་དགས་ཕལ་ཆེན་ཞེས་བྱ་བཞེངས། །གང་དག་ས་འདིར་གནས་པ་ཡི། །ལྷ་ཀླུ་གནོད་སྦྱིན་དྲི་ཟ་དང༌། །ནམ་མཁའ་ལྡིང་དང་ཤ་ཟའི་ཚོགས། །འབྱུང་པོ་མང་པོ་ཐམས་ཅད་ཀུན། །མཆོད་སྦྱིན་བདེན་པ་འདི་ལོང་ལ། །འདི་རུ་མ་གནས་གཞན་དུ་དེང༌། །ཁྲོ་བོ་འབར་བའི་བཀའ་བྱུང་གིས། །སྐད་ཅིག་གིས་ནི་མྱུར་དུ་དེང༌། །གང་དག་
བསམ་པ་དང་ལྡན་ཞེང༌། །ཁྲོ་བོ་ཆེན་པོའི་བཀའ་གཅོག་པ། །མྱུར་དུ་འགྲོ་བར་མི་སེམས་ནི། །སྤྱི་བོ་ཚལ་བ་བརྒྱར་འགས་སོ། །ཨོཾ་ཨ་ཀྲོ་ཏེ་ཀ་ཡ་མཱ་ནྟ་ཀ་ཧ་ན་མ་ཐ་བྷཉྫ་ཧཱུཾ་ཕཊ། བགེགས་ཀྱི་ཕྱོགས་ནས་བརྗོད་ནས་ཀྱང༌། །ཁྲོ་བོ་འབར་བའི་བཞིན་གྱིས་ནི། །རྐང་མཐིལ་ཧཱུཾ་ལས་རྡོ་རྗེ་མཆོག །འབར་བས་བགེགས་ནི་བསྐྲད་པར་བྱ། །ས་ལ་སྔགས་ཆུ་གཏོར་ནས་ཀྱང༌། །ས་ཡི་དབུས་སུ་ཁྲུ་གང་བརྐོ། །སོལ་བ་ལ་སོགས་རོ་དག་ནི། །བསལ་ནས་སྔགས་ཀྱི་ཆུ་ཡིས་གཏོར། །རིན་ཆེན་ལྔ་སྩོགས་གང་བ་ཡི། །བུམ་པའི་ནང་དུ་བཅུག་ནས་ཀྱང༌། །རང་གིས་ཀྱང་ནི་དགང་བར་བྱ། །དྲི་ཡི་ཆུ་ཡིས་གཏོར་བར་བྱ། །བ་ཡི་ལྔ་དང་ལྡན་པ་ཡི། །ལྕི་བས་ཀྱང་ནི་བྱུག་པར་བྱ། །དཀྱིལ་འཁོར་ཉིས་འགྱུར་ལྷག་ཙམ་དུ། ཀུན་དུ་སྦྱོ་རབ་བརྩམ་པར་བྱའོ། །ས་སྦྱང་བའོ། །དེ་ནས་མཁས་པས་སྟ་གོན་གྱི། །ལས་ནི་གཉིས་པ་རབ་ཏུ་བརྩམ། །ལྔ་ཡི་རྫས་ལ་སྦྱར་བ་ཡི། །དྲི་ཡི་ཆུས་ནི་དཀྱིལ་འཁོར་བྱ། །དེ་ནས་ཙནྡན་དམར་པོས་ཀྱང༌། །པདྨ་དག་གི་གཟུགས་སུ་བྱ། །ཡི་དགས་འཛིན་པའི་སྔགས་དག་གིས། །མེ་ཏོག་དམར་པོ་དབུ་ས་སྩོགས་བཞག །དེ་ནས་མཆོད་ཡོན་གཞག་པར་བྱ། །མེ་ཏོག་སྡུ་གུ་དྲི་ཞིམ་དང༌། །ཨ་ག་རུ་དང་སྦྱར་བ་ཡི། །གུ་གུལ་བདུག་པའང་དེ་བཞིན་ནོ། །མར་མེ་མར་གྱི་མར་མེ་མཆོག །དྲི་ཡི་དོན་དུ་ཙནད་མཆོག །ཙནད་ན་དཀར་པོ་དམར་པོ་ཡི། །གཏོར་མ་ཉ་དང་ཤ་ལ་སོགས། །སྦྱར་ཐུག་ལ་སོགས་དེ་བཞིན་ནོ། །མེ་ཏོག་ཆུར་བཅས་ཨརྐ་དང༌། །རས་ལ་སྩོགས་པ་ཐམས་ཅད་དོ། །དེ་ལྟར་དེ་ནི་ཚོགས་བསགས་ནས། །སློབ་དཔོན་གྱིས་ནི་ཁྲུས་བྱས་ནས། །སྨྱུང་བ་བྱས་ཏེ་མཉམ་གཞག་པས། །ཁྲོ་བོའི་བསྲུང་བས་བྱིན་གྱིས་བརླབ། །འདི་ལྟར་རྟོག་པ་ཞིབ་མོ་ལས། །གསུངས་པའི་རིམ་པས་ཁྲོ་བོ་ཉིད། །བསྐྱེད་དང་སྤྱན་དྲངས་ལ་སྩོགས་ཀྱིས། །ལྷ་དེ་འབད་དེ་མཉེས་པར་བྱ། །དེ་ནས་འབད་དེ་གསོལ་བ་གདབ། །དཀོན་མཆོག་གསུམ་དང་རིགས་གསུམ་གྱི། །མགོན་པོ་དེ་བཞིན་གཤེགས་དང་བཅས། །གང་དག་རིགས་ཀྱི་ཁྲོ་བོའི་ཚོགས། །མ་ལུས་བདག་ལ་དགོངས་སུ་གསོལ། །སློབ་མ་ལ་ནི་ཕན་པ་དང༌། །ཁྲོ་བོ་ཁྱོད་ལ་མཆོད་པའི་
ཕྱིར། །བདག་ནི་ནང་པར་དཀྱིལ་འཁོར་བགྱིད། །བྱིན་གྱིས་བརླབ་ཅིང་གནང་མཛད་ཅིང༌། །ཐུགས་རྗེས་རྗེས་སུ་གཟུང་དུ་གསོལ། །ཞེས་ལན་གསུམ་བརྗོད་དོ། །ལྷ་གནས་པའི་རིམ་པའོ། །གསེར་སོགས་རིན་ཆེན་ལས་བྱུང་བའི། །བུམ་པ་བཟང་པོ་མ་ཉམས་པའི། །ཁྲུས་ཀྱེས་གཙང་མར་བྱས་པ་ཡི། །དྲི་ཡི་ཆུས་ཀྱང་བྱུག་པར་བྱ། །མཚན་ཉིད་ལྡན་པའི་བུམ་པ་གཉིས། །པདྨའི་སྟེང་དུ་བེ་ཅོན་དང༌། །ལས་ཀྱི་རྒྱ་གྲམ་བྲི་བར་བྱ། །གཙང་མའི་གོས་ཀྱིས་མགུལ་བ་དཀྲི། །དང་པོ་འོད་གསལ་རྒྱུ་ལས་ནི། །ཁ་དོག་དཀར་པོ་བཾ་ལས་བྱུང༌། །ཇི་བཞིན་དབྱིབས་སུ་བསྐྱིད་ནས་སུ། །དེ་ཡི་ནང་དུ་པདྨ་བསམ། །པདྨའི་ལྟེ་བར་ཉི་མ་ལ། །ཧཱུཾ་ལས་བྱུང་བའི་ཁྲོ་བོ་བསྐྱེད། །ཁྲོ་བོ་གཉིས་པོ་དེ་དག་ནི། །རང་མཚན་ཁ་དོག་ལྡན་པར་བྱ། །སྤྱན་དྲངས་ནས་ནི་རབ་བཅུག་ནས། །མཆོད་ཡོན་ལ་སོགས་དེ་ལ་དབུལ། །སོ་སོའི་སྙིང་པོ་བརྒྱ་རྩ་བརྒྱད། །བཟླས་ནས་ཆུ་ཡི་རང་བཞིན་དུ། །ཁྲོ་བོ་གཉིས་ཀ་གྱུར་པར་བསམ། །རིན་ཆེན་སྨན་ལ་སྩོགས་པ་དང༌། །དཔག་བསམ་ཤིང་སྩོགས་ཁ་རྒྱན་བྱས། །བུམ་པ་གནས་པའི་ཆོ་གའོ། །སློབ་མ་གནས་པའི་ཆོ་ག་དག །གཞན་དུ་རྟོག་པ་ཞིབ་ལས་བཤད། །དེ་བས་འདིར་ནི་དེ་བཞིན་ནོ། །སྤྱི་ཡི་ལས་ཀྱིས་གནས་པར་བྱ། །འོན་ཀྱང་རང་གིས་ཆོ་ག་དག །ཅུང་ཟད་འདི་དག་སྦྱར་བར་བྱ། །སློབ་མ་སྨྱུང་བར་བྱས་ནས་ཀྱང༌། །ཁྲུས་ཀྱི་ཆོ་ག་ལེགས་བྱས་ཏེ། །ཁྲོ་བོས་བསྲུང་བ་བྱིན་བརླབས་ནས། །བླ་མ་ལ་ནི་གསོལ་བ་གདབ། །དཔའ་བོ་ཆེན་པོ་དེང་གསོན་ཅིག །བདག་ནི་འཁོར་བས་སྐྱོ་བ་དང༌། །སེམས་ཅན་ཀུན་ལ་ཕན་པའི་ཕྱིར། །གསུམ་ལ་སྐྱབས་སུ་འགྲོ་བ་གསོལ། །དཀྱིལ་འཁོར་ལྷ་ལ་དེ་བཞིན་ནོ། །ཁྱད་པར་དུ་ནི་སློབ་དཔོན་ལའོ། །བྱང་ཆུབ་སེམས་ཀྱང་བདག་ལ་གསོལ། །སྔགས་ཀྱི་སྤྱོད་དང་བརྟུལ་ཞུགས་གང༌། །ངེ་བཞིན་བདག་ནི་བསྒྲུབ་པར་འཚལ། །ཐར་ཆེན་གྲོང་དུ་འཇུག་པར་འཚལ། །བློ་ཆེན་གྱིས་ནི་བསྐྱབ་དུ་གསོལ། །སློབ་མའི་ཚིག་གསན་བླ་མ་བཟང༌། །བརྩེ་བས་བུ་ལ་མངོན་ཕྱོགས་ནས། །དང་བའི་བཞིན་གྱིས་འདི་སྐད་སྨྲ། །བུ་གཅིག་འདིར་ཤོག་ཐེག་ཆེན་གྱི། །ཁྱོད་ནི་ཚུལ་ཆེན་སྣོད་གྱུར་ཏེ། །རིག་པ་འཛིན་པ་སྤྱོད་བའི་ཚུལ། །ཁྱོད་ལ་ཡང་ནི་བཤད་པར་བྱ། །དུས་གསུམ་བྱོན་
པའི་སངས་རྒྱས་རྣམས། །སེམས་ཅན་ཕན་ཕྱིར་གང་བཞུགས་པ། །ཀུན་གྱིས་ཐབས་ཆེན་སྔགས་ཀྱི་ནི། །ཆོ་ག་མཁྱེན་ནས་ཐམས་ཅད་མཁྱེན། །དེ་བས་ཀུན་མཁྱེན་ཐོབ་བྱའི་ཕྱིར། །གསང་སྔགས་སྤྱོད་པ་མཉམ་མེད་པ། །བདུད་ཀྱི་ཚོགས་རྣམས་འདུལ་བྱེད་པ།། ཁྱོད་ཀྱིས་བློ་གྲོས་འདི་གྱིས་ཤིག །དེ་སྐད་སྤྲོ་བ་བསྐྱེད་ནས་སུ། །སློབ་མས་ཕྱག་འཚལ་ལ་སོགས་པ། །ཡན་ལག་བདུན་པའི་སྨོན་ལམ་བྱའོ། །དེ་ནས་སློབ་དཔོན་གྱིས་སྔོམ་པ་དཔོག་སྟེ། སངས་རྒྱས་ཆོས་དང་དགེ་འདུན་ལ། །ཁྱོད་ཀྱིས་སྐྱབས་སུ་འགྲོ་བར་གྱིས། །དཀྱིལ་འཁོར་ལྷ་དང་སློབ་དཔོན་དག །ཁྱོད་ཀྱིས་རྟག་ཏུ་གཟུང་བར་བྱ། །སེམས་ཅན་ཐམས་ཅད་སྒྲོལ་བྱེད་པའི། །བྱང་ཆུབ་སེམས་ནི་མཉམ་མེད་པ། །ཡང་དག་བརྟན་པོར་གཟུང་བར་བྱ། །རིག་པ་འཛིན་པའི་སྡོམ་པ་གཟུང༌། །སྲོག་ཆགས་གསོད་དང་མ་བྱིན་ལེན། འདོད་པ་བརྫུན་རྣམས་མི་བྱའོ། །ཉེས་པ་ཀུན་གྱི་རྩ་བ་ཡི། །ཆད་ནི་བཏུང་བ་སྤང་བར་བྱ། །ལུས་ཀྱི་ལས་ནི་རྣམ་གསུམ་དང༌། །ངག་གི་ཉེས་པ་རྣམས་བཞི་དང༌། །ཡིད་ཀྱི་རྣམ་གསུམ་བསྲུང་བར་བྱ། །སེམས་ཅན་འཚེ་བ་མ་ལུས་སྤང༌། །སེམས་ཅན་དོན་ལ་མངོན་དགའ་ཞིང༌། །ཐེག་པ་ཆེན་པོའི་ལམ་ལ་གནས། །དམ་པ་ཉེ་བར་མཉེས་པ་དང༌། །འདུལ་བའི་དོན་ནི་མ་ལུས་བྱ། །ལྷ་དང་ལྷ་མིན་གསང་བ་པ། །དེ་ལ་བརྙས་པར་མི་བྱའོ། །ཕྱག་རྒྱ་བཞོན་པ་མཚོན་ཆ་རྣམས། །འགོམ་པའམ་བརྫི་བར་མི་བྱའོ། །སྤྱོད་དང་བརྟུལ་ཞུགས་གསང་བ་གང༌། །གསང་བ་བརྟུལ་ཞུགས་བརྟན་པོར་གྱིས། །སློབ་མ་བརྟན་པོ་རབ་དང་བས། །ཇི་སྐད་གསུངས་པའི་སྡོམ་པ་ཀུན། །འཁོར་བས་སྐྱོ་བའི་ཡིད་བཞག་ནས། །ངེས་པར་ལེགས་པའི་དོན་དུ་གཟུང༌། །དཀོན་མཆོག་གསུམ་ལ་སྐྱབས་སུ་མཆི། །སྡིག་པ་མང་པོ་ཀུན་ནས་བཤགས། །དགེ་པ་ཀུན་ལ་ཡི་རང་ངོ༌། །སངས་རྒྱས་བྱང་ཆུབ་གཟུང་བར་གྱིས། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །མཉམ་མེད་བྱང་ཆུབ་སེམས་ནི་བསྐྱེད། །སེམས་ཅན་མ་ལུས་དོན་གྱི་ཕྱིར། །བདག་གིས་སྡོམ་པ་མ་ལུས་གཟུང༌། །སེམས་ཅན་མ་བསྒྲལ་དཔག་མེད་པ། །མྱ་ངན་
འདས་ལ་དགོད་པར་བྱ། །ལུས་ངག་ཡིད་ཀྱི་ཉེས་རྣམས་བསྡམས། །བག་མེད་ཆང་རྣམས་བཏུང་བ་ཡང༌། །ཐེག་པ་དམན་ལ་འདད་མི་བགྱི། །ལྷ་དང་ལྷ་མིན་གསང་བ་པ། །བླ་མ་བརྙས་པར་མི་བྱའོ། །ཕྱག་རྒྱ་བཞོན་པ་མཚོན་ཆ་དང༌། །མཚན་མ་ལ་སོགས་མི་འགོམ་མོ། །རིག་པ་འཛིན་པའི་སྡོམ་པ་ཀུན། །ཚུལ་ཆེན་སྔགས་པས་གསུངས་པ་ཀུན། །ཀུན་ནས་ཀུན་དུ་གཟུང་བར་བགྱི། །ལས་དང་བཀའ་སྩལ་མ་ལུས་བགྱི། །སྤྱི་གཙུག་ལ་སོགས་གནས་རྣམས་སུ། །ཁྲོ་བོའི་སྔགས་རྣམས་གཞག་པར་བྱ། །སོ་ཤིང་སྲུང་སྐུད་དེ་བཞིན་སྦྱིན། །ཀུ་ཤའི་སྟན་ལ་ཆོ་ག་བཞིན། །སློབ་མ་གནས་པའི་ཆོ་གའོ། །ཇི་ལྟར་རིམ་པར་དཀྱིལ་འཁོར་ལ། །མཆོད་ཡོན་ལ་སོགས་ཕུལ་ནས་ཀྱང༌། །ཡིད་ཀྱིས་ནམ་མཁར་བཞུགས་ནས་ནི། །ནད་པར་མཁས་པས་ཐིག་གསབ་བོ། །དཀར་པོ་དམར་པོ་སྔོན་པོ་ཡི། །ཁ་དོག་གསུམ་པའི་སྐུད་བ་ནི། །རས་བལ་ལ་སོགས་བཙོས་པས་བྱ། །སྟོང་པ་རྒྱུ་ལས་ཡི་གེ་གསུམ། །སོ་སོའི་ཆ་རུ་བསྐྱེད་ནས་ཀྱང༌། །སྐུ་གསུང་ཐུགས་དག་བསམ་པར་བྱ། །ནམ་མཁར་གནས་པའི་དེ་བཞིན་གཤེགས། །ཡེ་ཤེས་ཐིག་སྐུད་བཀུག་སྟེ་གཞུག །དྲི་ཡི་ཕྱོགས་ལ་སོགས་པས་མཆོད། །གཉིས་སུ་མེད་པའི་སྔགས་ཀྱིས་ནི། །ཐིག་སྐུད་སུམ་སྒྲིལ་མཛེས་པ་ཡིས། །མཁས་པས་ཐིག་བཏབ་ཕུན་སུམ་ཚོགས། །ཤར་གྱི་སྒོ་རུ་གནས་ནས་ཀྱང༌། །ཁྲོ་བོའི་སྐུར་ནི་རང་བྱས་ནས། །སྔགས་ཀྱི་ཡི་གེ་དགོད་པར་བྱ། །གཡོན་གྱི་ཁུ་ཚུར་ལྟེ་བར་བསྟེན། །ལས་ཀྱི་ཁྲོ་བོར་བསམས་ནས་སུ། །ཐོག་མར་ཤར་ནས་ནུབ་དུའོ། །དེ་འོག་ལྷོ་ནས་བྱང་དུ་སྟེ། །ནམ་མཁར་ཐིག་གཉིས་གདབ་པར་བྱ། །ཕྱོགས་བཅུ་ན་བཞུགས་དེ་བཞིན་གཤེགས། །འགྲོ་དོན་དུས་ལ་བབ་པར་བསྐུལ། །དེ་ནས་ཡང་ནི་དེ་བཞིན་ཏེ། །ཐིག་སྐུད་དེ་ནི་ཕྱོགས་མཚམས་ནས། །ཤར་ལྷོ་ཡི་ནི་མཚམས་ནས་ཀྱང༌། །ནུབ་ནས་བྱང་གི་མཚམས་དག་ཏུ། །ཐིག་གིས་རབ་ཏུ་ཚད་བྱས་ཏེ། །གྲུ་བཞི་པར་ནི་ཐིག་གདབ་བོ། །རིམ་པ་གཅིག་པ་མཛེས་པ་ལ། །སྒོ་བཞི་དག་གིས་མཛེས་པར་བྱ། །དཀྱིལ་འཁོར་དང་ནི་འཚམ་པ་ཡི། །དབུས་སུ་པདྨོ་བྲི་བར་བྱ། །པདྨོ་དང་ནི་ཕྱོགས་བཞིའི་སྒོ། །ཐེ་ཚོམ་མེད་པར་
མཉམ་པར་བྱ། །སྙིང་པོ་མཛེས་པའང་དེ་བཞིན་ཏེ། །ཐམས་ཅད་ཆོ་ག་བཞིན་དུ་གདག །ཆོ་ག་བཞིན་དུ་དཀྱིལ་འཁོར་དེ། །ཀུན་དུ་ཐིག་གིས་བཏབ་ནས་ཀྱང༌། །མཆོད་ཡོན་བཞེངས་ཏེ་རབ་ཏུ་གཤེགས། །ཡི་གེ་གསུམ་དང་མུཿ་ཡིས་འགྲོལ། །ཨོཾ་ཨཱཿ་ཧཱུཾ་མུཿ་དུར་ཁྲོད་རྫས་ཀྱི་ཐལ་བས་ནི། །ཕྱི་ནས་ཀུན་དུ་བྲི་བར་བྱ། །ཡི་དགས་ཕལ་ཆེན་གསང་མཆོག་ནི། །དཀྱིལ་འཁོར་མཁས་པས་ནུབ་མོ་བྲི། །ཁྲུ་གང་ལ་སོགས་རིམ་པ་ནས། །ཁྲུ་ནི་བརྒྱད་པའི་བར་དུ་སྟེ། །དེ་ལས་ལྷག་པ་ཡོང་མི་བྲི། །ལས་ཀྱི་རིམ་པ་སོ་སོར་བྲི། །དུར་ཁྲོད་ཐལ་བས་སྦྱར་བའི་ཚོན། །ཁ་དོག་གསུམ་ནི་བཅོས་པར་བྱས། །སྟོང་པ་ཉིད་ཀྱི་རྒྱུ་ལས་ཏེ། །ཁ་དོག་གསུམ་ནི་ཡི་གེས་བསྐྱེད། །ཡེ་ཤེས་ཚོན་དག་བཀུག་ནས་ཀྱང༌། །གཉིས་མེད་བྱས་ལ་མཆོད་ཡོན་དབུལ། །ཁྲོ་བོའི་ཡི་གེ་དག་བཟླས་ལ། །རིམ་པ་བཞིན་དུ་བྲི་བར་བྱ། །ཆོས་ཀྱི་དབྱིངས་ཀྱི་རང་བཞིན་གྱིས། །སེམས་ཅན་ཁམས་ནི་སྒྲོལ་བར་བྱེད། །དེ་བཞིན་གཤེགས་པ་ཐམས་ཅད་ཀྱིས། །གཤིན་རྗེ་གཤེད་ནི་མཆོག་གི་གནས། །དབང་ལྡན་ཕྱོགས་སུ་ཁ་དོག་གསུམ། །ཇི་བཞིན་ལེགས་པར་བྲིས་ནས་ཀྱང༌། །ཁྲོ་བོའི་སྔགས་ཀྱིས་བརྟག་པར་བྱ། །ཉེས་པ་ཀུན་ལས་རྣམ་གྲོལ་བའི། །ཚོན་གྱི་ལས་ནི་དེ་ནས་བརྩམ། །དབུས་སུ་ལེགས་པར་གཞག་ནས་ཀྱང༌། །ཁྲོ་བོས་ཀྱང་ནི་བྱིན་གྱིས་བརླབ། །དེ་ཉིད་གསུམ་གྱི་གསང་སྔགས་བཟླས། །དེ་བཞིན་ཐིག་ལས་གསུམ་བྲི་སྟེ། །དབུས་ཀྱི་པདྨོ་གསེར་གྱི་མདོག །འདབ་མ་དག་ནི་དམར་པོས་བརྒྱན། །སྙིང་པོ་ཟེ་བ་མཛེས་པ་དེ། །གསེར་གྱི་ཁ་དོག་བཞིན་དུ་བྱ། །ཐམས་ཅད་དུར་ཁྲོད་ཐལ་བས་བསྐོར། །སྒོ་དང་ཕྱོགས་མཚམས་ལ་སོགས་པ། །རིགས་ནི་དབྱེ་བས་ཕྱེ་བར་བྲི། །རྟ་བབས་མེ་ཡི་ཕྲེང་བའི་མཐར། །ཐམས་ཅད་རིགས་ཀྱི་ཁ་དོག་བྱ། །ལྷོ་ཕྱོགས་ཀྱི་ནི་སྒོ་ཕྱེ་ལ། །ལྷག་མ་རྣམས་ནི་བཅད་པར་བྲི། །གཞན་ཡང་ཡི་དགས་ལྷག་པ་ཡི། །པདྨོའི་ལྟེ་བར་བྲི་བར་བྱ། །དེ་བཞིན་ཕྱོགས་སྒོ་ནང་དག་དང༌། །ཕྱོགས་རྣམས་དེ་དག་ཐམས་ཅད་དུ། །ཡི་དགས་བཞི་དང་མགོ་མེད་དོ། །དུར་ཁྲོད་ཐལ་བས་སྤགས་ཏེ་བྲི། །བྱང་ཤར་ལ་
སོགས་གྲྭ་རྣམས་སུ། །མཁས་པས་ཅེ་ཅོན་ཕྱག་རྒྱ་བྲི། །གལ་ཏེ་བྲི་བར་མི་ནུས་ན། །ཡི་དགས་ཕལ་ཆེན་དབུས་དག་ཏུ། །པདྨ་ལྔ་བྲིས་གང་ཡིན་པའོ། །དེ་ཡི་སྟེང་དུ་ཡི་དགས་ནི། །ཡི་དགས་ཀྱི་ནི་སྔགས་མཆོག་གིས། །བསམ་པ་དག་ནི་བྱས་ཀྱང་རུང༌། །གྲྭ་ཡི་དབྱུག་པ་བཞི་པོ་ཡང༌། སྔགས་ཉིད་ཀྱིས་ནི་བསམ་པར་བྱ། །དེ་བཞིན་སྔགས་ཀྱིས་ཐམས་ཅད་བྱའོ། །གལ་ཏེ་དྲི་བར་ནུས་ཀྱང་ནི། །སྔགས་ཉིད་སྟེང་དུ་གཞག་པར་བྱ། །སྒོ་ཡི་ཡི་དགས་བཞི་པོ་ཡང༌། །སྔགས་ཀྱིས་བྱིན་གྱིས་བརླབ་པར་གསུངས། །དཀྱིལ་འཁོར་བྲི་བའི་ཆོ་གའོ། །དཀྱིལ་འཁོར་རྫོགས་པར་ཤེས་ནས་ནི། །རྣམ་རྒྱལ་ཁྲོ་བོའི་བུམ་པ་ནི། །ལྷོ་ཡི་སྒོ་ཡི་དབུས་སུ་གཞག །ལས་ཀྱི་བུམ་པ་བྱང་ཤར་ཏེ། །བགེགས་སྲུངས་ཞེས་ནི་བརྗོད་ལ་གཞག །མར་མེ་མར་གྱི་རྒྱུ་ལས་ཏེ། །སྙིང་པོ་འཇམ་པ་བརྒྱད་ཀྱིས་བསྐོང༌། །ལྷ་བ་ཤོས་དག་ཀྱང་དེ་ཡི་གྲངས། །བདུག་པ་མཆོག་དང་ཨ་ག་རུ། །དེ་ཡི་གྲངས་སུ་མཉམ་པར་གཞག །ཙནྡན་དཀར་དམར་དེ་བཞིན་བླང༌། །མཆོད་པའི་ཁྱད་པར་གཞན་ཡང་སྟེ། །ཐམས་ཅད་ཆོ་ག་བཞིན་དུ་གཞག །ཉ་དང་ཤ་དང་ཟན་དྲོན་ཚོགས། །ཁྱད་པར་གཏོར་མ་དག་ཀྱང་གཞག །ཡི་དགས་ཕལ་ཆེན་ཕྱི་རོལ་དུ། །ཆུ་དང་བཅས་པའི་མེ་ཏོག་གཞག། ཇི་ལྟར་ཆོ་ག་ཞིབ་མོ་བཞིན། །ཕུན་སུམ་ཚོགས་པའི་ཡོ་བྱད་གཞག །གནས་དང་གནས་སུ་དེ་བཞིན་བརྒྱན། །དེ་འོག་སློབ་དཔོན་བདག་ཉིད་ཀྱིས། །ཁྲུས་ཀྱི་ཆོ་ག་བྱས་ནས་ཀྱང༌། །རང་གི་སྙིང་པོ་སྔགས་ཀྱིས་ནི། །ཐམས་ཅད་ཡན་ལག་སྔགས་ཀྱིས་བྱ། །སྨྱུང་བས་བྱང་ཆུབ་སེམས་ལྡན་པས། །ཇི་ལྟར་རིམ་པས་བསྐྱེད་ནས་ཀྱང༌། །མཇུག་ཏུ་ཁྲོ་བོ་གཤིན་རྗེ་གཤེད། །སྔགས་བརྗོད་པས་ནི་སྤྱན་དྲངས་ནས། །རང་གི་སྙིང་པོ་ས་བཞུགས་སུ་གསོལ། །ཡི་དགས་ཀྱི་ནི་སྤྱི་བོར་ཡང༌། །མེ་ཏོག་དམར་པོ་བཞག་པར་བྱ། །བློ་ལྡན་གྱིས་ནི་ཁྲོ་བོ་ལའོ། །དེ་ནས་ཙནྡན་དམར་བོ་དབུལ། །ཙནྡན་གྱིས་ནི་གཏོར་བ་ཡི། །མེ་ཏོག་སྔགས་ཀྱིས་དབུལ་བར་བྱ། །དེ་ནས་གཙོ་བོའི་སྙིང་པོས་དབུལ། །འབྱུང་བའི་གཏོར་མ་ཁྲོ་བོ་ལ། །ཕུལ་ནས་ཡི་དགས་ཕལ་ཆེན་གྱི། །ཕྱི་རོལ་དུ་ནི་མཁས་པ་ཡིས། །སྨེ་གཏོར་རྣམས་ཀྱང་དབུལ་བར་བྱ། །དེ་ནས་གཙོ་བོའི་སྙིང་པོ་ཉིད། །
བརྒྱ་རྩ་བརྒྱད་དུ་བཟླས་པར་བྱ། །ཁྲོ་བོའི་གཙོ་ལ་ཕྱོགས་ནས་ནི། །དེ་ནས་ཡང་ནི་བདུག་པ་འབུལ། །ཆོ་གས་ཁྲུས་བྱས་སྨྱུང་བ་ཡི། །སློབ་མ་དག་གི་བསོད་ནམས་ཀྱང༌། །སྔགས་ཀུན་གྱིས་ནི་གཟི་བྱིན་བསྐྱེད། །ཁྲོ་བོ་ཡི་ནི་སྙིང་པོ་ཡི། །ལག་གཉིས་མེ་ཏོག་བྱིན་ནས་ནི། །གོས་ཀྱིས་གདོང་ནི་གཡོགས་པར་བྱ། །ཁྲོ་བོའི་སྔགས་ཀྱིས་སྒོ་དྲུང་གཞག །བླ་མ་རྡོ་རྗེ་འཆང་གིས་ཀྱང༌། །མཚོག་མ་སྤྱི་གཙུག་ལ་སོགས་ལ། །སྔགས་རྣམས་མ་ལུས་གཞག་པར་བྱ། །བསང་གཏོར་སྔོན་འགྲོ་དེ་བཞིན་ཏེ། །རིན་ཆེན་གསེར་སྩོགས་ཡོན་མཆོག་དག །འབད་པས་བླ་མ་ལ་ཕུལ་ནས། །འཇུག་པའི་སྔོན་དུ་གསོལ་བ་གདབ། །འདི་ནི་དངོས་གྲུབ་ཐོབ་པའི་རྒྱུ། །སངས་རྒྱས་ཀུན་གྱིས་རབ་སྦྲུལ་པའི། །བླ་མ་ལ་ནི་ཕྱག་འཚལ་ཏེ། །སེམས་ཅན་ཀུན་གྱི་དོན་གྱི་ཕྱིར། །བདག་ནི་དཀྱིལ་འཁོར་འཇུག་པར་འཚལ། །འཇམ་དཔལ་ཁྲོ་བོ་མི་བཟད་པ། །དེ་ཡི་དཀྱིལ་འཁོར་དམ་པ་མཆོག །ཡི་དགས་མང་པོ་ཞེས་བྱའི་ཕྱིར། །བདག་གིས་སློབ་མ་གཞུག་བར་བགྱི། །ཨོཾ་ཨཱཿ་ཧཱུཾ་ཞེས་པས་བསྐུལ་བར་བྱའོ། །དེ་ནས་སློབ་མ་བདག་ཉིད་དངོས་གྲུབ་ཀྱི་སྣོད་དུ་བྱ་བའི་ཕྱིར་ན་འདི་དག་བྱ་སྟེ། །བླ་ན་མེད་པའི་སངས་རྒྱས་དང༌། །ཆོས་དང་བྱང་ཆུབ་སེམས་དཔའི་ཚོགས། །འགྲོ་བ་མ་ལུས་པ་ཡི་སྐྱབས། །བདག་ནི་གསུམ་ལ་སྐྱབས་སུ་མཆི། །དེ་ནས་སྐྱབས་ནི་གསུམ་པོ་དང༌། །དཀྱིལ་ན་གཤིན་རྗེ་གཤེད་གཅིག་པུ། །དཔའ་བོ་ཁྲོ་བོ་མི་བཟད་པ། །དེ་དག་ཀུན་ལ་ཕྱག་འཚལ་ལོ། །དཀོན་མཆོག་གསུམ་དང་ཁྲོ་བོ་ནི། །རྟག་ཏུ་བདག་ནི་མཆོད་པར་བགྱིད། །བླ་མ་ལ་ཡང་དེ་བཞིན་དུ། །སྒོ་གསུམ་དང་བའི་སེམས་ཀྱིས་མཆོད། །དཀྱིལ་འཁོར་ལ་མེ་ཏོག་གཏོར་རོ། །ལུས་ཀྱི་ཉེས་པ་གསུམ་རྣམས་དང༌། །ངག་གི་བཞི་པོ་ཉེས་པ་སྤྱད། །ཡིད་ཀྱི་ཉེས་སྤྱད་གསུམ་པོ་སྟེ། །ལུས་ཀྱི་སྒྲིབ་པ་མ་ལུས་བཤགས། །སངས་རྒྱས་སྲས་བཅས་འཕགས་པ་ཡི། །ཐར་པར་བྱས་པའི་དགེ་བ་དང༌། །ཐམས་ཅད་ཐར་བར་གྱུར་པ་ཡི། །བདག་གཞན་དགེ་ལ་ཡི་རང་ངོ༌། །ས་བོན་མཆོག་ལས་རང་བྱུང་བའི། །ཐར་པར་གྱུར་པའི་དགེ་བའི་ཚོགས། །སེམས་ཅན་མྱ་ངན་འདས་པའོ།།
བྱང་ཆུབ་ཆེན་པོར་ཡོངས་སུ་བསྔོ། །ཕྱོགས་བཅུའི་ཞིང་རྣམས་དག་པར་ནི། །སེམས་ཅན་ཕན་ཕྱིར་གང་བཞུགས་རྣམས། །ཐབས་ཀྱིས་མྱ་ངན་འདའ་བཞེད་བ། །མྱ་ངན་མི་འདའ་བཞུགས་སུ་གསོལ། །མ་སྨིན་པ་རྣམས་སྨིན་པ་དང༌། །སྨིན་པ་གྲོལ་བར་བྱ་བའི་ཕྱིར། །དམ་ཆོས་བདུད་རྩི་འབྱུང་བ་ཡི།། གསུང་ནི་དུ་མར་བསྒྲག་པར་མཛོད། །དེ་ནས་སློབ་དཔོན་གྱིས་སྔར་གྱི་སྡོམ་པ་ཐམས་ཅད་བརྗོད་དེ་སྦྱིན་པར་བྱའོ། །སློབ་མས་ཁས་བླངས་པ་བརྗོད་པས། །སྡོམ་པ་མ་ལུས་གཟུང་བར་བྱ། །དེ་རིང་ཕན་ཆད་བུ་ཁྱོད་ནི། །དེ་བཞིན་གཤེགས་པའི་རིགས་སུ་ཞུགས། །ང་ཡི་ཡེ་ཤེས་ཆེན་པོ་སྦྱིན།། དེ་ཡིས་དངོས་གྲུབ་མཆོག་ཐོབ་འགྱུར། །གང་དག་དཀྱིལ་འཁོར་མ་ཞུགས་ལ། །གསང་བ་འདི་ནི་སྨྲ་བ་མིན། །བག་མེད་སེམས་ཀྱིས་སྨས་གྱུར་ན། །དངོས་གྲུབ་ཅུང་ཟབ་ཐོབ་མི་འགྱུར། །དེ་ནས་དམ་ཚིག་ཆུ་བླུད་དེ། །འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་འཐོབ། །འཐུང་ཅིག་རྡོ་རྗེའི་དམ་ཚིག་ཡིན། །དྲི་དང་མེ་ཏོག་ལྡན་པའི་ཆུས། །ལག་པ་གཡས་པས་བླུད་པར་བྱས། །ཨོཾ་ཨཱཿ་ཧཱུཾ། དུས་འདི་ཉིད་ནས་བུ་ཁྱོད་ཀྱི། །དེ་བཞིན་གཤེགས་པ་ང་ཡིན་གྱིས། །ང་ཡིས་ཇི་ལྟར་བཀའ་སྩལ་མཆོག །མཉན་དང་བསྒྲུབ་པ་དག་ཀྱང་གྱིས། །ཁྱོད་ནི་ནམ་ཡང་ལ་ང་ལ་ནི། །མ་དད་པ་ཡི་སེམས་རྣམས་སྤང༌། །སློབ་མ་མོས་པ་མེད་པ་ཡིས། །དངོས་གྲུབ་རིང་བར་རྒྱལ་བས་གསུངས། །ཇི་ལྟར་དངོས་གྲུབ་ཐོབ་མི་ཐོབ། །རྒྱུད་ལས་འབྱུང་བཞིན་ཕྲ་རྣམས་བརྟག །ལས་ཀྱི་བྱ་བ་རབ་འཇུག་པ། །རིམ་པ་འདི་ལས་ཤེས་པར་འགྱུར། །སློབ་མ་མཚན་ལྡན་ཉེས་སྐྱོན་མེད། །ཤིན་ཏུ་བཀྲུས་ཏེ་རྒྱན་གྱིས་བརྒྱན། །བ་ཡི་རྣམ་ལྔ་བླུད་ནས་ནི། །དེ་འོག་སྨྱུང་བར་གང་གནས་པ། །ཞིམ་པའི་དྲི་ཡིས་ལུས་ལ་བྱུག །གོས་དང་རྒྱན་གྱིས་བརྒྱན་པར་བྱས།། ཤར་གྱི་ཕྱོགས་སུ་ཁ་བལྟས་ལ། །ཀུ་ཤའི་སྟན་ལ་གཞག་པར་བྱ། །དེ་ཡི་ལག་གཉིས་སྙིམ་པའི་ནང༌། །ཙནྡན་གཏོར་མའི་མེ་ཏོག་སྦྱིན། །ཨ་གར་ནག་པོའི་དུ་བས་ཀྱང༌། །དེ་ནས་མྱུར་དུ་སྔགས་བརྗོད་དེ། །སྒྲུབ་པའི་ཆོ་ག་འདི་ཡིས་ནི། །སྣོད་ལ་དབབ་པའི་ལས་བྱའོ། །
ཨོཾ་ཨ་ཀྲོ་ཏེ་ཀ་ཡ་མཱནྟ་ཀ་ཧ་ན་མ་ཐ་བྷཉྫ་ཧཱུཾ་ཡ་མཱནྟ་ཀ་གྲྀ་ཧྞ་ཨ་བེ་ཤ་ཧཱུཾ་ཕཊ། སྣོད་ལ་བབས་གྱུར་དེ་ནས་ནི། །དགེ་དང་མི་དགེ་དྲི་བར་བྱ། །འབྱུང་བ་བྱུང་བ་བདེན་པར་སྨྲ། །སེམས་ཅན་ཆེན་པོ་འདི་གྱིས་ལ། །འདི་མིན་ཞེས་ནི་རྗོད་པར་བྱེད། །དེ་ནས་ཁྲོ་བོ་མཆོག་དེ་ལ། །མེ་ཏོག་ལྡན་པའི་ཨརྒྷ་དབུལ། །དེ་ནས་བདེ་གཤེགས་བསྟན་པ་ཡི། །དམ་ཚིག་ཀྱང་ནི་བསྟན་པར་བྱ། །སྣོད་ཀྱིས་ཐོས་ནས་དེ་ནས་སུ། །དེ་བཏང་ནས་ནི་ས་ལ་འགྱེལ། །རིག་པ་ཁྲོ་བོ་གཤིན་རྗེ་གཤེད། །གྲུབ་པ་དེ་ལས་བཞུད་པར་འགྱུར། །དེ་ལས་སློབ་མས་མེ་ཏོག་ནི། །གཤིན་རྗེ་གཤེད་ལ་གཏོར་བ་ནི། །རང་གི་སྙིང་པོས་མེ་ཏོག་ཉིད། །དཀྱིལ་འཁོར་ལ་ནི་གཏོར་བར་བྱ། །ཨོཾ་ཨཱཿ་ཧཱུཾ། ལྷོ་ཕྱོགས་སྒོ་ནས་དེ་བཞིན་ཏེ། །དེ་ནས་གདོང་རས་བསལ་ནས་ཀྱང༌། །དབྱུག་པའི་ཕྱག་རྒྱ་བསྟན་པར་བྱ། །དེ་ནས་དཀྱིལ་འཁོར་དེ་བཞིན་ཏེ། །དེ་བཞིན་གཤེགས་པས་དེ་རིང་ཉིད། །ཁྱོད་ནི་ནན་ཏན་མིག་ཕྱེ་སྟེ། །ང་ཡིས་ཇི་བཞིན་མིག་ཕྱེ་བས། །མི་བཟད་དཀྱིལ་འཁོར་མཐོང་བར་གྱིས། །ཨོཾ་ཨཱཿ་ཧཱུཾ། དེ་ནས་བེ་ཅོན་གྱི་ཕྱག་རྒྱ་བསྟན་པར་བྱ་སྟེ། དཀོན་མཆོག་གསུམ་གྱི་དམ་ཚིག་ནི། །མངོན་པར་བསྟན་པ་སྔར་བྱས་ནས། །ལག་པ་གཡས་པ་ཆོ་ག་བཞིན། །ལེགས་པར་རབ་ཏུ་བཅིང་བར་བྱ། །རིག་འཛིན་དག་གིས་རྟག་པར་ནི། །ལག་པའི་སོར་མོ་ཐམས་ཅད་ཀྱིས། །མཐེ་བོང་ལེགས་པར་སྤྲས་ནས་ནི། །རབ་ཏུ་བསྡམས་པ་བཟང་པ་བཅིང༌། །ཆོ་ག་ཤེས་པས་བེ་ཅོན་རྒྱ། །སྙིང་པོ་སྔགས་སམ་ལོགས་ཤིག་ཏུ། །སྔགས་པ་ཕྱག་རྒྱའི་སྔགས་གྱིས་བཅིང༌། །གཞན་དུ་ཡང་ནི་མ་ཡིན་ནོ། །ཨོཾ་ན་མོ་བུདྡྷ། དྷརྨྨཱ། སཾ་གྷ་བྷྱཿ། སརྦྦ་ཏ་ཐཱ་ག་ཏ་ཀྲོ་དྷ་བི་ཛ་ཡ། ཨ་གྣི་ཛྭ་ལི་ཏ་ཛི་ཧ་པྲ་ཏ་ཤྲཱི་རི་ཧཱུཾ་ཧཱུཾ་ཕཊ། དེ་ལྟར་བེ་ཅོན་ཕྱག་རྒྱ་དང་སྔགས་བསྟན་ནས་དཀྱིལ་འཁོར་ཡང་ཡི་དགས་ཕྲེང་བ་ལ་སོགས་པ་ཐམས་ཅད་བསྟན་པར་བྱའོ། །དེ་ནས་སློབ་དཔོན་བདག་ཉིད་ཀྱིས། །བསྟན་པའི་བེ་ཅོན་རྒྱ་བཅིངས་ནས། །ལྷོ་ཕྱོགས་སྒོ་ནས་སློབ་མ་ཡིས། །དྲི་སོགས་མཆོད་པ་མ་ལུས་དབུལ། །དེ་ནས་སྔགས་པ་དབང་བསྐུར་ལ། །ཆུ་དང་མེ་ཏོག་བཅས་པ་ཡི། །
སྙིང་པོ་གདབ་པའི་བུམ་པ་ཡིས། །ཁྲོ་བོས་དབང་བསྐུར་མཆོག་སྦྱིན་ནོ། །ཨོཾ་ཨ་ཀྲོ་ཏེ་ཀ་ཡ་མཱནྟ་ཀ་ཧ་ན་མ་ཐ་བ་ཉྫ་ཧཱུཾ་ཕཊ། དེ་ནས་ཁྲོ་བོའི་སྙིང་པོ་ཡིས། །ཆོ་ག་བཞིན་དུ་དབང་བསྐུར་ལ། །བདུག་པ་མེ་ཏོག་ཕྲེང་ལྡན་པར། །སྙིང་པོ་དེ་ལ་སྦྱིན་བར་བྱ། །ཨོཾ་ཨ་ཀྲོ་ཏེ་ཀ་ཡ་ལ་སོགས། །སྔགས་ཀྱི་དོན་ནི་བཅུ་བདུན་པ། །ཁྲོ་བོ་དེ་ཉིད་ཀྱིས་གསུངས་པ། །དེ་རིང་ཕན་ཆད་བུ་ཁྱོད་ཀྱིས། །ཁྲོ་བོ་དྲན་པར་བྱ་ཞིང་བཟླས། །གཞན་ཡང་སྔགས་ཀྱི་སྤྱོད་པའི་མཆོག་སྨྱུང་བར་བྱང་ཆུབ་སེམས་ལྡན་ལས། །སྐྱེ་བོ་མེད་བའི་ནགས་ཚལ་དུ། །རུ་རགྴ་ཡི་ཕྲེང་ཐོགས་ཤིང༌། །ལག་པ་དྲི་ཡིས་བྱུགས་ནས་ཀྱིང༌། །ཐེ་ཚོམ་མེད་པར་འགྲུབ་པར་འགྱུར། །འཇིག་རྟེན་ལྷ་ལ་ཕྱག་མི་འཚལ། །གླང་པོ་ལ་ཡང་ལམ་མི་བཟུར། །རྒྱལ་པོ་ལ་ཡང་ཕྱག་མི་བཙལ། །བགྲོད་དཀའ་བ་ནས་བགྲོད་པར་བྱེད། །ཁྲོ་བོ་འབའ་ཞིག་སེམས་བྱེད་ཅིང༌། །སྤྱོད་དང་བརྟུལ་ཞུགས་བརྟེན་པར་གྱིས། །ཞེས་བརྟུལ་ཞུགས་སྦྱིན་པར་བྱའོ། །དེ་ནས་སློབ་མ་དབང་ཐོབ་དེས། །གཤིན་རྗེ་གཤེད་ནི་ཁྲོ་བོ་ཡི། །ཚུལ་ལས་བདག་ནི་དོན་ཡོད་དེ། །ལྷ་ཁྱོད་ཀུན་ལ་བདེ་མཛད་བ། །ཁྲོ་བོ་ཁྱོད་ནི་བདག་གིས་མནོས། །མནོས་ཞེས་ཁྲོ་བོ་མེ་ཏོག་གཏོར། །དེ་ནས་སློབ་མས་ཕྱག་བྱས་ཏེ། །ཅི་ནུས་ཡོན་མཆོག་དབུལ་བར་བྱ། །སྔགས་པས་བྲ་མ་མཆོད་བྱས་ན། །དངོས་གྲུབ་འགྲུབ་འགྱུར་གཞན་དུ་མིན། །སློབ་མ་སྙིང་པོ་བྱིན་ནས་ནི། །ཕྲེང་བ་ཙནྡན་ལ་སོགས་པས། །མཆོད་ནས་དེ་ཡི་འོག་ཏུ་ནི། །ཕྱི་རོལ་དུ་ན་སྔར་བཞག་པའི། །དྲི་ཆུ་ལ་སོགས་བཀང་བའི་སྣོད། །དེ་ནས་མཆོད་བ་ཕུལ་ནས་ནི། །འཇམ་དབྱངས་ཁྲོ་བོ་མི་བཟད་པ། །མཐུ་རྩལ་དྲག་པོ་སླར་ཡང་གཏང༌། །དེ་བཏང་བ་ཡི་འོག་ཏུ་ནི། །དཀྱིལ་འཁོར་དུ་ཡང་མཆོད་ཡོན་དབུལ། །རྒྱ་ཆེར་ས་ཡི་དཀྱིལ་འཁོར་ནི། །དངོས་གྲུབ་མཚུངས་མེད་འདོད་པ་ཡི། །རིག་སྔགས་འཆང་གིས་དེ་ལྟར་ནི། །མཆོད་པ་དེ་ལྟར་ལེགས་པར་བྱ། །སྣོད་ནི་གསར་སོགས་རིན་ཆན་དུ། །ཚོན་རྩི་ལེགས་པར་བསྡུ་བར་བྱས། །གཙང་མའི་ཆུ་བོ་ལ་སྩོགས་པོར། །ཕྱི་ནས་ཀྱང་ནི་རྣམ་ལྔས་བྱུག །ཚུལ་ཆེན་རྒྱུད་ལས་གསུངས་པ་ཡི། །དཀྱིལ་འཁོར་འཇུག་པའི་ཆོ་ག་བྱས། །ཆུང་ཟད་དགེ་བ་གང་ཐོབ་འདིས། །འཇམ་དཔལ་ཁྲོ་
པོའི་གནས་ཐོབ་ཤོག །འཕགས་པ་འཇམ་དཔལ་གསང་བའི་རྒྱུད་ཀྱི་དཀྱིལ་འཁོར་གྱི་ཆོ་ག །སློབ་དཔོན་དོན་ཡོད་པའི་ཞབས་ཀྱིས་མཛད་པ་རྫོགས་སོ།།