རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་ཀྱི་མན་ངག།
སྨྲྀ་ཏི་ཛྙཱ་ན་ཀཱི་རྟི།
རྒྱ་གར་སྐད་དུ། བཛྲ་བི་དཱ་ར་ཎ་ནཱ་མ་དྷཱ་ར་ཎི་ཨུ་པ་དེ་ཤ་།བོད་སྐད་དུ། རྡོ་རྗེ་རྣམ་པར་འཇོམས་པ་ཞེས་བྱ་བའི་གཟུངས་ཀྱི་མན་ངག །བཅོམ་ལྡན་འདས་རྡོ་རྗེ་རྣམ་པར་འཇོམས་པ་ལ་ཕྱག་འཚལ་ལོ། །འདིར་བླ་མ་དམ་པའི་མན་ངག་གིས་ལས་ཀྱི་ཚོགས་ཅུང་ཟད་དྲན་པ་རྣམས་དགོད་པར་བྱའོ། །དེ་ལ་ལས་ཀྱི་རྣམ་པར་དབྱེ་བ་ནི་མང་མོད་ཀྱང་འདིར་ནི་ཕྲིན་ལས་བཅོ་བརྒྱད་ལས་མ་གསུངས་ལ། དེ་དག་གི་དོན་ཀྱང་མ་གསུངས་བས་དེ་དག་གི་དོན་ཀྱང་བསྡུས་ན་གཉིས་ཉིད་དེ། ཕན་བཏགས་པས་རྗེས་སུ་གཟུང་བ་དང་ཚར་གཅད་པས་རྗེས་སུ་གཟུང་བའོ། །དེ་དག་ཀྱང་ཞི་བ་ལ་སོགས་འཕྲིན་ལས་བཞིས་འགྲུབ་པར་འགྱུར་ལ་ཕྲིན་ལས་ཀྱང་སྒྲུབ་པ་པོ་ཚད་དང་ལྡན་པས་ཡིན་གྱི་གཞན་དུ་ན་དོན་མེད་པར་འགྱུར་རོ། །ཐོག་མར་སྔགས་པ་སྙིང་རྗེ་ཆེན་པོས་བསྐུལ་བའི་བསྙེན་པ་ཡོངས་སུ་རྫོགས་པར་བྱས་ལ། དེའི་འོག་ཏུ་ལས་དང་མཐུན་བའི་འཁྲུལ་འཁོར་བྲི་བར་བྱའོ། །དེ་ཡང་ཞི་བའི་འཁྲུལ་འཁོར་ནི་དཀར་པོའི་ཕྱོགས་ཀྱི་ཚེས་གང་ཡང་རུང་བ་ལ་རས་སམ་ཤིང་ཤུན་ལ་སོགས་པ་གཞི་དཀར་པོ་ལས་པདྨ་རྒྱས་པ་ལྟ་བུའི་རྩིབས་བརྒྱད་པའི་འཁོར་ལོ་གུར་གུམ་ལ་སོགས་པའི་དྲིས་མཆོག་ཏུ་གཙང་སྤྲལ་གནས་བ་བྲིའོ། །དེའི་ལྟེ་བ་ལ་ན་མོ་རཏྣ་ཏྲ་ཡཱ་ཡ། ནམ་ཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ཆེ་གེ་མོ་ལ་རཀྵ་རཀྵ་ཞེས་སྤེལ་ལ་བྲིའོ། །རྩིབས་རྣམས་ལ་རིམ་པ་བཞིན་དུ་གནོད་པར་བྱེད་པ་རྣམས་ཏྲ་ཊ་ཡ་ཏྲ་ཊ་ཡ་ཏྲོ་ཊ་ཡ་ཆེ་གེ་མོ་རཀྵ་རཀྵ་ཞེས་བྲིའོ། །དེའི་མུ་ཁྱུད་ཕྱི་མ་ལ་ཡང་སྙིང་བྲི་བར་བྱ་སྟེ། སྔགས་དེ་ཐམས་ཅད་མགོ་ཕྱིར་བསྟན་པའོ། །དེ་ལྟར་བྲིས་པའི་འཁྲུལ་འཁོར་དེ་ལ་སྔགས་བས་འདི་ལྟར་ལས་ལ་སྦྱར་བར་བྱ་སྟེ། རང་ཉིད་ཡུད་ཙམ་གྱིས་ལྷར་བསམས་ལ་མདུན་གྱི་ནམ་མཁའ་ལ་བཅོམ་ལྡན་འདས་རྡོ་རྗེ་རྣམ་པར་
འཇོམས་པ་བསྐྱེད་ལ་གསོལ་བ་གདབ་པ་ནི། བཅོམ་ལྡན་འདས་ཐུགས་རྗེ་ཆེན་པོ་ཁྱོད་ནི་ཐམས་ཅད་ལ་ཕན་པ་དང་བདེ་བའི་ཕྱིར་ཞུགས་པ་ཡིན་ན་དེ་ཡང་ཆེ་གེ་མོ་འདིའི་གནོད་པ་འདི་དག་ཉེ་བར་ཞི་བར་བྱིན་གྱིས་བརླབ་ཏུ་གསོལ་ཞེས་ངག་དང་ཡིད་ཀྱིས་ལན་གསུམ་གསོལ་བ་གདབ་པར་བྱ་སྟེ། བར་གྱི་ཚིག་སྤྲོས་ལ་ཕྲིན་ལས་གཞན་ལ་ཡང་སྦྱར་བར་བྱའོ། །དེ་ལྟར་གསོལ་བ་བཏབ་པས་བདག་དང་བསྒྲུབ་བྱ་ལ་བྱིན་གྱིས་བརླབས་ནས་ཇི་ལྟར་འདོད་པ་གྲུབ་པར་སྨས་ཏེ་སླར་བཅོམ་ལྡན་འདས་འཁྲུལ་འཁོར་གྱི་ལྟེ་བ་ལ་བཞུགས་ཏེ་རྒྱུན་མི་འཆད་པར་བྱིན་གྱིས་རློབ་པར་མཛད་པར་བསམས་ལ་སྤེལ་བ་དང་བཅས་པའི་བཟླས་པ་བྱའོ། །ཟིན་པ་དང་མཆོད་དེ་བསྟོད་པ་ཡང་བྱས་ལ་ཐམས་ཅད་ཞུ་བ་དང་བཅོམ་ལྡན་འདས་ཀྱི་ཐུགས་པདྨ་རྒྱས་བ་ལྟ་བུའི་ཐུགས་ཀར་བསྒྲུབ་བྱ་ཆུད་པས་མཆོག་ཏུ་བདེ་ཞིང་གནས་པར་བསམས་ལ་དེ་བཞིན་ཉིད་ཀྱི་བློས་མེ་ཏོག་ལ་ཡང་སྙིང་པོ་ཅི་ནུས་པར་བཟླས་ལ་འཁོར་ལོ་ལ་གཏོར་བར་བྱའོ། །དེ་ནི་རབ་ཏུ་གནས་པ་ཞེས་བྱ་སྟེ། འཁོར་ལོ་དྲིལ་ནས་བསྒྲུབ་བྱ་ལ་བཏགས་ཏེ་དེ་ལ་འགོམ་པར་མི་བྱ་བ་ནི་དམ་ཚིག་གོ །སེམས་ཅན་ཐམས་ཅད་འཇིལ་བར་བྱེད་པ་དང་ཞི་བ་དང་སྲུང་བ་སྟེ། །ལས་གསུམ་དང་འབྲེལ་པའི་ཞི་བའི་འཁྲུལ་འཁོར་གྱི་རྣམ་པར་བྱེད་པ་རྫོགས་སོ།། །།ཇི་ལྟར་སྔར་བསྟན་པའི་ཚུལ་གྱིས་བར་གྱི་ཚིག་སྤོས་ལ་འདིར་ཡང་སྦྱར་ཏེ་རྒྱས་པའི་འཁྲུལ་འཁོར་ནི་གཞི་སེར་པོ་ཁ་རིན་པོ་ཆེའི་ཕུང་པོ་ལྟ་བུའི་དབྱིབས་ཅན་བྲིས་ལ་མིང་འདི་ཞེས་བྱ་བའི་ཆེ་གེ་མོ་རབ་ཏུ་གནས་པ་རྒྱས་པར་མཛོད་ཅིག་ཅེས་སྤེལ་བར་བྲི་ཞིང་མུ་ཁྱུད་ཕྱི་མ་ལ་ནི་ཡང་སྙིང་བྲིའོ། །དེ་ནས་གསོལ་བ་གདབ་པ་སྔར་བཞིན་ནོ། །དེ་ལ་འདིར་ཁྱད་པར་གྱི་མན་ངག་ནི་འདི་ཡིན་ཏེ། འདོད་པ་ཐམས་ཅད་རབ་ཏུ་སྦྱིན་པ་ཞེས་གསུངས་པའི་ཕྱིར་ན་ཡོ་བྱད་དོན་དུ་གཉེར་བར་ནོར་གྱི་བདག་པོ་ལ་བསྐུལ་བར་བྱའོ། །དེ་ཡང་འཁོར་གྱི་སྦྱོར་བ་སྤངས་ནས་ཡན་ལག་བརྒྱད་དང་ལྡན་པའི་ཆུ་ལ་སྤོས་ལ་སོགས་པའི་དྲི་ལ་སྩལ་ཏེ་དངོས་སུའམ་བསམས་པས་རྣལ་འབྱོར་པས་ཡུད་ཙམ་གྱིས་རྣམ་པར་འཇོམས་མཛད་དུ་བསམས་ལ་མདུན་གྱི་ནམ་མཁའ་ལ་དེ་བཞིན་གཤེགས་པ་བསམ་ཞིང་དེ་བས་དམའ་བར་ཇི་ལྟར་འདོད་པའི་ནོར་གྱི་ལྷ་
བསམས་ཏེ་བདག་ནི་དབུལ་ཏེ་དེ་བཞིན་གཤེགས་པ་མཆོད་པ་དང་དབུལ་པོ་རྣམས་ལ་ཕན་པའི་ནུས་པ་མེད་པ་ལ་ཇི་ལྟར་བྱ་སྙམ་དུ་འདུན་པ་དྲག་པོ་བྱས་ལ་ཡང་འདི་སྙམ་དུ་དཀོན་མཆོག་མཆོད་པ་ལ་སོགས་པའི་ཡོ་བྱད་ཀྱི་དོན་དུ་ཛམྦྷ་ལ་ཁྱོད་ལ་ནོར་གྱི་དངོས་གྲུབ་སློང་དགོས་བདག་ལ་མྱུར་དུ་ལོངས་སྤྱོད་རྒྱ་ཆེན་པོ་སྩལ་དུ་གསོལ་ཞེས་དངོས་སམ་ཡིད་ཀྱིས་བརྗོད་ལ་དེའི་ངང་ལས་ཡང་སྙིང་བརྒྱ་རྩ་བརྒྱད་བཟླས་པའི་ཆུ་ལག་པ་གཡས་པས་ཛམྦྷ་ལའི་སྤྱི་བོར་བླུགས་པར་བསམས་ཏེ་དེ་ལ་སྦྱིན་ནོ། །དེའི་ཚེ་ཛམྦྷ་ལས་སྔོན་བཅོམ་ལྡན་འདས་ཀྱི་སྤྱན་སྔར་ཇི་ལྟར་ཁས་བླངས་བ་དང་ད་ལྟར་ཡང་ཆུ་སྟེར་བའི་དུས་སུ་བཅོམ་ལྡན་འདས་དབང་པོའི་ཚུལ་དུ་བཞུགས་པ་དང་བདག་ནི་བཅོམ་ལྡན་འདས་རྣམ་པར་འཇོམས་པའི་སྐུ་ཡིན་ལ་དེ་ནི་སངས་རྒྱས་ཀུན་གྱི་གསང་བའི་བདག་ཉིད་ཀྱང་ཡིན་ཏེ། ལག་ན་རྡོ་རྗེའོ། །ལག་ན་རྡོ་རྗེ་ནི་གནོད་སྦྱིན་གྱི་སྡེ་དཔོན་ཡིན་ལ་ཛམྦྷ་ལ་ཡང་གནོད་སྦྱིན་ཡིན་པས་འབངས་སམ་འཁོར་ཛམྦྷ་ལ་ལ་བཀའ་སྩལ་པ་ནི་མི་ཚུལ་བས་ན་སྔགས་པའི་འདོད་པ་ཐམས་ཅད་ཛམྦྷ་ལས་རབ་ཏུ་སྦྱིན་པར་འགྱུར་ཏེ་འདི་ནི་ངེས་པའོ། །འཁྲུལ་འཁོར་རྒྱས་པ་འདི་ནི་གནས་དབེན་པར་མཆོད་ཅིང་གཞག་པར་བྱའོ། །འདིས་ནི་རྒྱས་པའི་།ལས་དང་འདོད་པ་ཐམས་ཅད་རབ་ཏུ་སྦྱིན་པ་དང་མ་གྲུབ་པ་རྣམས་གྲུབ་པར་བྱེད་པ་དང་གྲུབ་པ་རྣམས་ཆུད་མི་ཟ་བ་སྟེ། ཕྲིན་ལས་རྣམ་པ་བཞི་པོ་དེ་ནི་རྒྱས་པའི་འཁྲུལ་འཁོར་གྱི་ལས་སུ་རིག་པར་བྱའོ། །རྫོགས་སོ།། །།དབང་གི་འཁྲུལ་འཁོར་དམར་པོ་ཟླ་གམ་བྲིས་ལ། དབུས་སུ་ཧཱུཾ་ནག་པོ་བྲི་ཞིང་དེའི་གཡས་དང་གཡོན་དུ་ཧྲཱིཿ་དམར་པོ་རེ་རེ་བྲིས་ཏེ་མུ་ཁྱུད་ཟླུམ་པོས་བསྐོར་བ་ལ་ཡང་སྙིང་བྲིས་ལ་སྟེགས་བུ་ལ་གཞག་གོ །དེ་ནས་སྔགས་པས་གོས་དམར་པོ་བགོས་ལ་ནུབ་ཕྱོགས་སུ་ཁ་བལྟས་ཏེ་དེ་ནས་བརྩམས་ཏེ་ཆེ་གེ་མོ་དབང་དུ་བསྡུའོ་སྙམ་པའི་བློས་དང་པོ་གསོལ་བ་ལ་སོགས་པ་བྱས་དེའི་རྗེས་ལ་རང་གི་ལུས་འཁྲུལ་འཁོར་གྱི་ལྟེ་བའི་ཧཱུཾ་ལ་ཐིམ་ནས་དེ་ཡོངས་སུ་གྱུར་པས་རྣམ་པར་འཇོམས་མཛད་དུ་རང་ཉིད་བསམ་མོ། །ལས་ཉེ་བར་བསྒྲུབ་པ་ནི་གནས་པ་ཉིད་མྱུར་བས་ན་རང་གི་སྲིན་ལག་གཡས་པ་ལས་ཧྲཱིཿ་དམར་པོ་ཅིག་བྱུང་ནས་རང་གི་གཡས་ན་འདུག་པར་བསམས་ལ་གཡོན་པ་ལས་ཀྱང་དེ་བཞིན་
ཏེ་ཧྲཱིཿ་དེ་ལས་འོད་དམར་པོ་འཕྲོ་ཞིང་རང་འདོད་པའི་ལས་བྱས་ཏེ་སླར་ཡང་དེ་ཉིད་ལ་འདུས་པས་སྔགས་ཀྱང་རང་རང་གི་སྤེལ་བས་བཟླའོ། །དེའི་ཚེ་ན་ཡང་སྔར་གྱི་མདུན་གྱི་ནམ་མཁའི་བཅོམ་ལྡན་འདས་ནི་ཇི་སྲིད་འདོད་ཀྱི་བར་དུ་བྱིན་གྱིས་རློབ་ཅིང་བཞུགས་པར་བསམ་མོ། །འདོད་པའི་དོན་གྲུབ་ནས་ཧྲཱིཿ་ནི་རང་ལ་བསྡུས་ལ་རང་ཡང་ཞུ་ནས་ཇི་ལྟར་འདོད་པའི་ཚུལ་དུ་ནས་པར་བྱའོ། །འདིའི་འཁུལ་ནི་ཏིང་ངེ་འཛིན་ཉིད་ཀྱང་རུང་ངོ༌། །འདིས་ནི་འབྱུང་པོ་ཐམས་ཅད་འགུགས་པ་དང་གདོན་ཐམས་ཅད་ལས་ཐར་བར་བྱེད་པ་ལ་སོགས་པ་ཕྲིན་ལས་གཉིས་གཙོར་བྱེད་དོ། །དབང་གི་ཕྲིན་ལས་ཀྱི་རིམ་པ་རྫོགས་སོ།། །།བཅོམ་ལྡན་འདས་དཔལ་རྡོ་རྗེ་རྣམ་པར་འཇོམས་པ་གཏུམ་པོ་ལ་ཕྱག་འཚལ་ལོ། །མངོན་སྤྱོད་ལ་གཉིས་ཏེ། མི་དང་མི་མ་ཡིན་པའི་དབྱེ་བས་སོ། །འཁོར་ལོ་བྲིས་ལ་ལྟེ་བའི་གྲུ་གསུམ་ལ་བསྒྲུབ་བྱའི་མིང་དང་མཱ་ར་ཡ་སོད་རཾ་ནན་ཞེས་བྱ་བ་ལ་སོགས་པའི་སྤེལ་ཚིག་དང་བཅས་པ་བྲིའོ། །ཤར་གྱི་རྩིབས་ལ་སརྦ་ཤ་ཏྲཱུཾ་ནཱཾ་གྷ་ཊ་གྷ་ཊ་ཆེ་གེ་མོ་མཱ་ར་ཡ་རྦད་ཅེས་བྲིའོ། །གཡོན་དུ་བསྐོར་བའི་རྩིབས་ལ་སཾ་གྷ་ཊ་ཡ་ཆེ་གེ་མོ་མཱ་ར་ཡ་རྦད་ཅེས་སོ། །རྩིབས་གཅིག་ལ་ཨ་མུ་ཀཾ་མཱ་ར་ཡ་ཕཊ་ན་མཿ་ས་མནྟ་བཛྲཱ་ཎཱཾ་སརྦ་བ་ལེན་ཨ་བ་ར་ཛ་ཡེ་མ་ཧཱ་བ་ལེ་ཆེ་གེ་མོ་མ་ར་ཡ་རྦད་ཅེས་བྲི་ཞིང་མུ་ཁྱུད་ལ་ཡང་སྔགས་དེ་དག་ཉིད་དོ། །སྔགས་དེ་དག་ནི་མགོ་ནང་དུ་བསྟན་པས་སོ། །དེ་ནས་ཡང་གསོལ་བ་འདེབས་པ་ལ་སོགས་པ་སྔར་བཞིན་བྱ་སྟེ་བཅོམ་ལྡན་འདས་ནི་ཤིན་ཏུ་ཁྲོ་བར་བཞུགས་པ་ལ་གསོལ་བ་གདབ་པོ། །རང་ཉིད་རྣམ་པར་འཇོམས་མཛད་དུ་བསམས་པའི་ཞལ་ནས་སྔགས་བརྗོད་པས་སྔགས་ཀྱི་ཕྲེང་བ་འཕྲོས་ནས་གང་ལ་བྱ་བའི་ལུས་ལ་ཕོག་པས་དེ་ཡོངས་སུ་ཞུ་ནས་རྣམ་ཤེས་ཡིག་འབྲུ་གཅིག་ཏུ་གྱུར་བ་འཕེལ་བ་ནི་རླུང་གིས་བཏེག་སྟེ། ཡི་གེ་ཡཾ་གི་སྟེང་ན་ཧྲཱིཿ་སྔོ་ནག་ཏུ་གནས་པ་བཀུག་ནས་འཁོར་ལོའི་ལྟེ་བར་ཆུད་པར་བསམས་ལ་དེ་ཡང་འདར་ཞིང་འཕར་ལ་མི་བཟོད་བཞིན་དུ་གནས་པར་བསམ་མོ། །འཁོར་ལོའི་རྩིབས་ཀྱི་རྩེ་མོ་ལ་ཡང་གཟུགས་བརྙན་བྲི་བའམ་བསམ་པར་བྱའོ། །རབ་ཏུ་བསྒྲིམ་པར་བྱའི་གཞན་དུ་ན་རང་གི་སྲོག་ཀྱང་གཡོ་བར་འགྱུར་ན་དགྲ་བགེགས་ལྟ་ཅི་སྨོས། ཟིན་པ་དང་ལས་ཀྱི་མཐའ་བསྲེག་
པའམ་མནན་པ་གང་ཡང་རུང་བར་བྱའོ། །འདིར་ཡང་མན་ངག་ནི་འདི་ཡིན་ཏེ་རིག་སྔགས་གཅོད་པ་ཞེས་བྱའི་སྐབས་སུ་སྐུད་པ་སྔོན་པོ་ལ་སུམ་སྐུད་པ་སྔོན་པོ་ལ་སུམ་བསྒྲིལ་བྱས་ནས་བརྒྱ་རྩ་བརྒྱད་བཟླས་ཏེ་རྡོ་རྗེ་ལྟ་བུའི་མདུད་པའམ་ལྕགས་སྒྲོག་གམ་ཞགས་པ་ལྟ་བུའི་མདུད་པ་དོར་ཞིང་མདུད་པ་རེ་རེའི་ནང་དུ་ཕ་རོལ་གྱིས་རྦད་པའི་མི་མ་ཡིན་པ་དང༌། དེ་རྦོད་པར་བྱེད་པའི་དངོས་པོ་རྣམས་ཆུད་ཅིང་དེ་རབ་ཏུ་བསྡམས་ནས་སྔགས་བཟླས་པས་དེ་ལྟར་གྱུར་ཏེ་དེ་མགུལ་དུ་གདགས་སོ། །གང་གི་ཚེ་མི་དགོས་པ་དེའི་ཚེ་མདུད་པ་དགྲོལ་བར་བྱེའི་གཞན་དུ་ན་བསོད་ནམས་མ་ཡིན་པ་སོག་པར་འགྱུར་རོ། །དེ་བཞིན་དུ་རིག་སྔགས་ཐམས་ཅད་གནོན་པར་བྱེད་པ་ཞེས་བྱ་བ་དེ་ལ་ཡང་མན་ངག་གི་གནད་འདི་ལྟ་བུ་བརྩམ་པར་བྱའོ། །འཁྲུལ་འཁོར་གཞུང་ལྟར་བྲིས་ལ་འཁྲུལ་འཁོར་གྱི་ལྟེ་བར་བསྒྲུབ་བྱའི་གཟུགས་ལྕེ་ཤིན་ཏུ་ཆེ་བ་བྲིས་ལ་ལྕེ་ལ་རྩིབས་ཀྱི་སྔགས་རྣམས་དང་ཆེ་གེ་མོ་འདི་ཞེས་བྱ་བའི་ངག་རེངས་པར་གྱིས་ཤིག་རྩེས་སྦྲེལ་ཏེ་བྲིའོ། །དེ་ལ་སྒྲུབ་པ་བྱས་ལ་རི་རབ་ས་ནག་པོ་ལས་བྱས་པའི་སྟེང་དུ་རྣམ་པར་འཇོམས་མཛད་ཀྱི་སྔགས་ཤོག་བུ་ལ་སོགས་པ་ལ་བྲིས་ལ་རྩལ། །སྨད་དུ་བུག་པ་གྲུབ་གསུམ་བྲུས་ལ་དེའི་ནང་དུ་འཁྲུལ་འཁོར་བྲིས་ལ་དེ་བཅུག་ལ་མནན་པར་བྱའོ། །འདི་ནི་སྔགས་ཀྱི་ནུས་པའམ་བརྗོད་གཏོང་ཉེ་བར་ཞི་བར་བྱེད་པ་སྟེ་མངོན་སྤྱོད་ཀྱི་ཁྱད་པར་རོ། །ཡང་སེམས་ཅན་ཐམས་ཅད་སྐྲག་པར་བྱེད་པ་ཞེས་བྱ་བ་ལ་འཁྲུལ་འཁོར་སྤངས་ལ་རྟ་ནག་པོའི་རྔ་མ་ལ་བཤད་བའི་སྲིན་བུ་བརྒྱུས་ཏེ། ཕྲེང་བ་བྱས་ནས་གང་ལ་དམིགས་ཏེ་ཁྲོས་པས་སྔགས་བཟླས་ན་གྲོང་ཁྱར་ལ་སོགས་པ་འཇིགས་ཤིང་སྐྲག་པར་འགྱུར་ཏེ་སྔགས་ལས་སུ་རུང་ན་ལས་དེ་དག་ལ་ཐེ་ཚོམ་མི་ཟའོ། །མངོན་སྤྱོད་ཀྱི་འཁྲུལ་འཁོར་ནི་སྐྲག་པ་དང་རིག་སྔགས་གཅོད་པ་དང་རིག་སྔགས་གནོན་པ་དང་ལས་འཇོམས་པ་དང༌། རིག་སྔགས་ཀྱི་ལས་བྱེད་དུ་འཇུག་པ་དང་རེངས་པར་བྱེད་པ་སྟེ་ལས་དྲུག་བྱེད་པའོ། །དགྲའི་མངོན་སྤྱོད་ཀྱི་འཁྲུལ་འཁོར་རྣམ་པར་ཕྱེ་བའི་རིམ་པའོ། །རྫོགས་སོ།། །།ད་ནི་བགེགས་ཀྱི་མངོན་སྤྱོད་ཀྱི་འཁྲུལ་འཁོར་བརྩམ་པར་བྱ་སྟེ། རོ་རས་ལ་སོགས་པ་ལ་འཁྲུལ་འཁོར་གྲུ་གསུམ་སུམ་བརྩེགས་སུ་བྱས་ལ་གྲུབ་པ་རྣམས་ལ་
ཨོཾ་བྷིནྡ་ཆེ་གེ་མོ་ཚིནད་བྷིནྡ་ཆེ་གེ་མོ་བྷིནྡ་མ་ཧཱ་ཀཱི་ལའ་ཡ་ཆེ་གེ་མོ་མཱ་ར་ཡ་ཕཊ་བྲིའོ། །དབུས་སུ་བགེགས་ཀྱི་གཟུགས་དང་མཱ་ར་ཡ་ཞེས་སྤེལ་ལ་བྲིའོ། །ཡང་གསོལ་བ་གདབ་པ་ལ་སོགས་པ་བྱས་ལ་རང་ཉིད་ཆུའི་ཟླ་བ་ལྟ་བུའི་རྣམ་པར་འཇོམས་མཛད་དུ་སྐུ་ཆེ་བ་ལ་ཡན་ལག་རྒས་པར་བསྒོམ་མོ། །དེ་ནས་རབ་ཏུ་བསྒྲིམས་ནས་སྔགས་རིང་པོ་འབའ་ཞིག་བཟླས་པར་བྱ་སྟེ་སྔགས་ཀྱི་འོད་ཀྱིས་གང་ལ་བྱ་བའི་ལུས་ལ་ཕོག་པས་རབ་ཏུ་གཟིར་ཞིང་མི་བཟོད་པར་བསམ་སྟེ་དཔེར་ན་ལོ་ཐོག་ལ་སེར་བ་བབ་པ་ལྟ་བུར་དམིགས་ཤིང་ཁྲོས་པས་བཟླའོ། །ཟིན་པ་དང་ལས་ཀྱི་ཞབས་བསྲེག་པ་དང་མནན་པ་གང་འདོད་པ་བྱའོ། །འཁྲུལ་འཁོར་འདི་ནི་ཕལ་ཆེར་བགེགས་ལ་བྱེད་པར་བཤད་ཀྱི་འོན་ཀྱང་རྣལ་འབྱོར་ལས་སུ་རུང་བའི་སྔགས་པས་འཁྲུལ་འཁོར་གཅིག་གིས་ཀྱང་ལས་ཐམས་ཅད་ལ་སྦྱར་བར་ནུས་སོ། །འདིས་གདོན་རླག་པར་བྱེད་པ་དང༌། རྨུགས་པར་བྱེད་པའི་ལས་གཉིས་འགྲུབ་བོ། །དེ་ལྟར་ཕྲིན་ལས་བཅུ་བདུན། གཞན་གྱི་ལས་འཇིག་པ་ནི་སྡིག་པ་སྟེ་དེ་དག་པར་བྱེད་པ་ནི་བུམ་པ་ལ་སོགས་པའི་ཁྲུས་དང་འབྲེལ་པའི་ཕྱིར་འདིར་མ་སྨོས་སོ། །ཐམས་ཅད་ལ་ཡང་སྤེལ་ཚིག་ནི་སོ་སོའི་སྐབས་དང་སྦྱར་རོ། །རྡོ་རྗེ་རྣམ་པར་འཇོམས་པའི་མན་ངག་པཎྜི་ཏ་སྨྲྀ་ཏི་ཛྙཱ་ན་ཀཱི་རྟིས་མཛད་པ་རྫོགས་སོ།། །།པཎྜི་ཏ་ཆེན་པོ་དེ་ཉིད་ཀྱིས་བསྒྱུར་བའོ།།